مجدول الذهب الجزء السابع

- خولة كانت متكية لور حاطة راسها على زاجة كتمنظر دايرة الكيت فودنيها كتموسق وساهبة وعينيها مرة مرة كيتلاصقو بنعاس ، أما قوت فكانت صافي نعسات تكمل نعاسها لي مانعساتوش فلوطيل لابسة سروال فضفاض فالبيض واسع بحال لي كانت لابسة خولة مع قميجة طويلة فالأحمر وشال فالبيض وفيها وريدات فالحمر الغربي الخفيف لي كان داخل من سرجم كان كيحرك ليها الݣصة ديال شعرها مخليها تنزل على عينيها .

- أما هاشم كان مركز مع السوݣان مخدم القرآن فطوموبيل ، مكايتلفتش جيهتو حتى وصلو لكازا

- كازا كان الجو فيها مختالف واخا كانت الشميسة ولكن كان الجو زوين مبرد الطريق كانت عامرة بزاف ، صوت طوموبيلات خلا لي فايق ينوض من النعاس ، هزات عينيها لفين وصلو شافت فيه وسولاتو :

فين وصلنا ؟

- هاشم [ عينيه على الطريق وزحامات ] : كازا

- قوت [ حطات يدها على كرشها ] : ناري فيا الجوع ياك غادي نوقفو فشي قهوة نفطرو ؟

- هاشم [ تعصب مع الزحام وكترت الكلاكصون ] : نحيدو أمن هاد الزحام ويحن الله

- كانت واحد طوموبيل قدامو فبلاصة ماتحرك القدام رجعات باللور قايسة ليه طوموبيل ، نزلات منها مرة تكون فالخمسينات معرية شعرها ودرعانها وسيݣانها معاها زوج بنات ، طلات عليه مغوبشة هازة يدها كتشير :

مكاتشوفش دير نظاظر ابنادم راه قستي ليا طوموبيل

- خولة [ غوبشات] : هادي مالنا هي لي قايسانا وكتنفخ من الفوق

- هاشم حل طوموبيل هاز حاجب ومنزل الثاني أصلا فايق خاسر مشاربش قهوتو ديال الصباح وزايدها بالزحام وهاد خيتنا منين خرجات ليه لي كتهز بوحدها ، بصوتو الرجولي طلعها ونزلها :

من نيتك داوية ولا باغية فين تلصقي أشريفة راه انت لي راجعة باللور وقايساني وخارجة فيا كدوخي على بنادم ولا مالك

- نزلات واقفة قدامو ونزلو معاها دوك زوج بنات وحدة فيهم واشمة فيديها لابسة ميني جيب فوق الركبة وديباردو كرشها كلها عريانة ، ولوخرا لابسة سروال فضفاض مع بودي ماعندوش ليدين معرية الكرش دايرة بيرسينغ

- بحالك كنعرفهم مزيان كيبغيو يتلصقو فاش كيشوفو عيالات لي راكبات الطوموبيل قسنا بالله حتى نلصق فيك مونتيف ونسيفطك فين تربا

- بدا تيليفونو كيسوني وكان ياسين باش يسولو فين هو حيت زحام مابقاش بان ليه ، هز التيليفون ولاوحو بلاما يجاوب طلعهم ونزلهم بحال الأشكال ديالها دازو عليه بزاف وعارف هاد النوعية مزيان

- هاشم [ تنيرڤا وشعلات ليه البولة] : راه الى مامشيتيش انا لي غانسيفطك فين ترباي الحاجة [ ورك على ملمة الحاجة] سيري صباح هذا خلينا هانيين

- نقزات وحدة فيهم طلعاتو ونزلاتو :

حيوان عروبي [ دفلات عليه ] .. تحل الباب اللوراني وخرجات خولة ، تحل باب لي حداه ونزلات قوت بجوج بيهم جاو قاصدينهم ..

- خولة [ عݣدات غوباشتها ] : عاودي عاودي أش ݣلتي حيوان أسمعي اديك أم سيسي برب الكعبة حتى نفش ليك دوك البز///..ل لي عاجبينك ياكما شتوه راجل بغيتو تحاماو عليه ، سمعي اديك رابعة ديال لحم اطلعي لطوموبيل وتشريه وترولي ولا غانزيد نعريك يلاه رول لي ماعندو بݣاج

- قوت [ موجهة كلامها للمرأة ] : سيري الحاجة تقاي وجه الله وتستري ، وستري معاك هاد السلعة الدليلة لي مطلعة معاك فطوموبيل لي كطيحي بيها الكليان لا غانصدقو هنا مرايشيين خلينا مطلعين معاكم النيڤو لاغانهبطوه دابا

- هاشم [ كيجر فقوت ] : زيدي صافي بلا شوهة

- قوت [ حيدات من يدو وبدات تقرب لدوك زوج بنات ] : حيد عليا نوري لهاد زوج كروڤيتات اللويات اش كنسوى ، قالو ليك عروبي وكدفلي من الفوق ، دفلي على راسك أعوجت المسنون ازرݣات الشلاقم حالتك وحالت يامك باينة لي جا يبول فيك وجهك زرݣ كيف الاستدعاء

- بدات ديك السيدة كتجر فبناتها وتخنزر فخولة وقوت :

على مستوى كيف داير [طلعاتهم لطوموبيل وسدات عليها محركة من تم ..

- خولة : رجعي نيت نوريكم المستوى كيداير يا أم مستوى ..

- طلعو لطوموبيل قوت كتقاد ففولارها وخولة كترعد بالأعصاب ، شافت فهاشم لي قارن حجبانو ونطقات :

سمحليا أخويا هاشم الى قات شي كلام ماهواش ولكن راه عصبوني بحال هاد الأشكال كيجهلوني والله

- هاشم [ بصرامة] : مكاين لاش تهبطو هداك النوع كنعرفو مزيان مكانت غادي مني باش تنقي سنانها

- قوت [ شافت فيه] : ماشتيها كيفاش كانت كتعاير ودفلات عليك راهم كيجهلو لي مايجهل لي مكايتحرك فيه والو راهم يحركوه

- هاشم [ ببرودة وصرامة ] : عندها فمها تݣول لي عجبها ، واش انا غادي ندير راسي فالميكروب راه باين نوعية ديالهم كيدايرة [ قاطعهم صوت التيليفون ]

- هاشم [ فتح الخط ] وي فؤاد وغير تعطلنا مع الزحام وصافي فينكم انتوما ؟ وي عرفتها صافي واخا هاحنا جايين ، قطع مع فؤاد وشد الطريق محيد من ديك البلاصة ، خلط عليهم لواحد القهوة بلاصة الطوموبيل ونزلو داخلين للقهوة لقاوهم شادين الطبالي

- ياسين : عرفتي شحال وانا كنسوني ليك أصاحبي !

- هاشم [ جر الكرسي ] : الزحام وماسمعتش التيليفون ، جا السرباي خدا من عندهم شنو بغاو ، هاشم دوموندا على الفطور وعلى قهوة كحلة كان خاصو ضروري يشربها ولا راسو غايتهرس عليه .

- خولة [ كتهمس للسناء فودنيها ] : عرفتي كنا غانوضوها مع شي خياتي فطريق [ بدات كتعاود ليها ]

- سناء [ بدهشة ] : داكشي باش تعطلتو وباش فاريتوها فالأخر

- خولة : بداو كيتعوجو علينا ومشاو بحالهم ، هاشم خاصم علينا مابغاناش نولو نتغانو معاهم ، ولكن راه ماحسيناش شي كمارات ياربي سلامة

- قوت : صافي فطرو وسدو هادشي لا يسمعونا ، جابو ليهم الفطور فطرو من بعد البنات مشاو الحمام قضاو غراضهم وغسلو وجهم باش يفيقو شوية ويحيدو العيا عليهم ، خرجو كل واحد ركب فطوموبيلتو وشدو الطريق .. الطريق ديال كازا كانت زوينة بطبيعة والخضورية ، لوزينات كولشي كان زوين جبدات قوت تيليفونها قربات من الزاجة القدامية ديال الطوموبيل وبدات كتصور

- هاشم شاف لعندها ورجع شاف قدامو رامي يديه من السرجم ، خدم الراديو وكانو مدوزين أغاني مغربية وبصدفة تلاقاو مع أغنية نعمان الحلو بلادي يا زين البلدان ، شافت فيه قوت وبعوفية ضحكات :

شوف سبحان الله أغنية جات فوقتها أتجي مع الڤيديو

- هاشم [ شافيها ورجع شاف قدامو ] : ودابا راه دويتي ، صوتك غايتسمع فتسجيل

- قوت : لا الفيديو الاول داز اندير دابا الثاني ، رجعات مركزة مع الطريق كتفيلمي عاجبها الحال ، عينو كانت مرة كتمشي ليها ومرة على الطريق

- سلات التصوير فاش صورات القنطرة ديال الرباط ، عاد رجعات تليفونها للساكها ، ورجعات خرجاتو فاش باز ليها المسرح والبرج صوراتهم كاملين .. صورات حسان فاش دازو حداه مافلتات حتى حاجة ..

- ضربو دويرة فالرباط كلها .. سناء حالة السرجم وكتمنضر

- ياسين [ شافيها ] :

وقيلة أول مرة تجي لرباط ؟

- سناء [ شافت فيه ] : أه أول مرة نطلع لهاد الجوايه حدنا اكادير صويرة حتى هي والجنوب

- توفيق : الجنوب زوين أبنتي وتبارك الله الناس ديالو ناس الجود والكرم فايت مشيت لكلميم والعيون داخلة وطانطان حتى هي

- سناء [ ضارت عندو ] : أه أعميالناس تما الله يعمر ليهم الدار ومضيافين ويكبرو بيك

- نعمة : المغرب كامل زين ابنتي بشمالو وجنوبو وشرقو وغربو كولشي فيه زين سعداتنا بيه الحمد لله

- خرجو من الرباط وكملو الطريق من لوتوروت الغربي كان داخل من السرجم .. قوت مرة تصور مرة تقابل الطريق من السرجم لي محلول والبرد كيضرب ليها فشعرها أما عبد الرحمان كان كالس حدا فؤاد وطريق كلها وهوما مجمعين ، مرة يشدو الهضرة على الطريق وعلى الخضورية مرة على الفلاحة كل مرة وعلاياش .

- الطريق كلها دازت مزيانة حتى دهلو للطنجة الدنيا زينة وفشكل ، قوت حلات السرجم على أخرو حاطة يديها بزوج كطل بحال شي بنية صغيرة فرحانة مقاداها فرحة

- أول مرة غادي تحط رجليها فشمال ولا تشوفو ، كانت مالفة كتشوفو غير فتلفازة وكتمنى غير ايمتا يجي نهار تمشي ليه وها الحلم ديالها تحقق ، ضربو دويرة شرفية فشوارع طنجة وشدو الطريق للمضيق

- خولة كتنغز قوت من اللور قربات ليها من جهة السرجم وهمسات ليها فودنيها :

ناري يا صاحبتي غانموت بجوع

- قوت [ جاوباتها بالهمس ] : غير صبري مابقاش بزاف نوصلو إن شاء الله وناكلو اشوية ديال صبر [ حلات ساكها وجبدات واحد بيمو عطاتو ليها ] هاكي عدي بهدا

- هاشم [ عينيه على الطريق قفزهم بصوتو ] :

ساعة ديال المݣانة وغادي نوصلو إن شاء الله

- خولة [ بنفس الهمس ] : ناري سمعنا شتي انت لي كتدوي بجهد

- قوت : وصافي مال الجوع عيب حتى انت ، رجعات خولة للكرسيها حالة داك بيمو كتاكل فيه اما قوت كانت هازة تيليفونها وكتصور بيه .. وصلو حدا واحد القهوة كان شكل ديالها واعر ، فيها بحال طريبشات ديال الشماليين صوراتها حتى هي وهي فرحانة كتضحك ، تصرفات وحركات لي ماخفاوش عليه جاتو بحال شي بنية صغيرة لأول مرة تشوف الدنيا

- ماعرف علاش فغفوة منو تفكر الإنسانة لي كان مرتابط بيها نهار كامو يسافرو كان زايد ناقص عندها كانت كتقولو :

الناس الى بغاو يسافرو كيخرجو برات المغرب وأنت غادي مسافر بيا للشمال ، هزهز براسو طارد هاد الذكرى لي جات على بالو

- وصلو لواحد البلاكة كبيرة مصايبة بسيما ومصبوغة بالبيض وزرق وكتوب فيها بالخط العريض " المضيق " دور راسو على غفلة جيهتها لقاها مشرعة فمها حتى لودنين كضحك وتصور شالها طايح على كتافها بلاما تحس

- شعرها كولو عريان كاعما حاسة بيه هازة تيليفونها وتصور وعينيها كيبريو بحال الى حطات رجليها فإيطاليا ولا شي بلاد أوروبية ، خطف عينيها وشاف قدامو حنحن وبصوت بارد ثقيل :

ݣادي زيفك ، دورات راسها عندو مصغرة عينيها بإستفهام :

نعام ؟ خولة شافت فيه بإستغراب ودهشة

- هاشم [ بلاما يشوفيها ] : ݣادي زيفك ، هزات بزربة يديها للراسها لقات شعرها كلو عريان ومطلوقو، حطات تيليفونها بزربة جامعة شعرها هزات فولارها وقداتو كيف كان من قبل .. هزات تيليفونها ورجعات كتصور هز التيليفون ديالو دور لياسين :

وي ياسين سول الواليد فين غانتلاݣاو مع السيد ، صافي واخا ... قطع مع ياسين وضار مع واحد الشانطي

- قوت ضارت عند خولة كتأشر ليها بيدها :

شوفي ديك القهوة bluesky هي لي قلت ليك شفتها فالفيسبوك نمشيو ليها فالعشية فاش نخرجو

- خولة : صافي واخا

- وصلو قدام واحد مول الديسير حبسو طوموبيل تماك ، هاشم قبل مايهبط شافيها :

خليكم هنا نجيبو سوارت الدار ونرجع ، ماجاوباتوش حدها هزهزات راسها ليه ، خير مشا وهي تنقز عليها خولة :

تي شفتي السيد قاليك قادي زيفك كيفاش البلان زعمة ؟

- قوت : وعادي ، راه شعري عريان راه السيد ضروري ايقولي غطي راسك كون كنت كنعري شعري مغايدويش معايا وراني بحال ختو راه ولينا عائلة

- خولة [ كدور فراسها ] :

أممم بحال ختو ولينا من العائلة ، شتك تحاليتي معاه منين مشيتو كليتو لحم الراس لبارح .. شفت تعليكة اللحم علكات علاقتكم

- قوت : سيري سيري انت راه هبيلة شوية ، ياك انت لي كتقولي ليا مادابزوش وسيد مزيان وديري راسك بلي مكاينش ومديريش راسك فيه دابا وليتي كتقولي ليا هاد الهضرة من نيتك أخولة

- خولة [ هزات حاجب ونزلات الثاني ] :.

اممم ايوا ماعرفت انا غير قلت وصافي ..

- هزات تيليفون ديالها كتشوف تصاور حتى مدو ليها يدين هازين كيسان ديال العصير ، هزات راسها لقاتو هو :

هاكي عطي لصاحبتك

- قوت : شكرا [ تبسمات ليه] ، ضارت عند خولة مدات ليها العصير

- خولة [ كتفرنس ] : ايوا الله يحيب لينا فيمن ندوزو ياختي هادشي فشكل ظلي تهضري فسيد وتقولي خايب ومامزيان .. انا بعدا لحد الساعة ماشفت منو غير الخير والإحسان

- قوت : ايوا راه الواحد مكتعرفيه حتى كتعاشريه باش غادي نعرفو انا راه داكشي لي وقع بيناتنا خلاني نقزل عليه هكاك هو لي وراني داك الوجه ..

- خولة [ شربات نص فالعصير حيتاش جاها بارد ] :

ايوا باش تعلني ماتبقايش تحكمي على الواحد غير هكاك ظلمنا وعدوانة .. الإنسان ماتحكمي عليه حتى تعرفيه وتعاشريه عاد تقولي واش خايب ولا مزيان

- قاطعهم الباب لي تحل طلع هاشم ديمارا الطوموبيل وكيدوي :

الدار قريبة للبحر مابعيداش نحطو حوايجنا نرتاحو ونخرجو نتغداو إن شاء الله

- قوت : واخا ، شد الطريق تابع طوموبيل ياسين وفؤاد االدار كانت قريبة بزاف للبلاصة لي كانو واقفين فيها .. بلاصاو طوموبيلاتهم ونزلو نازل معاهم السمسار حتى وراهم الدار ، خلصو توفيق ودور معاه مشا ..

- الدار كانت كبيرة بزاف فيها الفوق والتحت متيسعة بحال شكل ديال پتي ڤيلا .. دخلو البالز ديالهم وكل واحد فيهم ختار بيت .. واحد للخولة واحد للقوت واحد لنعمة وتوفيق او واحد للصفية وعبد الرحمان وعاد سناء وياسين وهاشم وفؤاد بيوتهم جاو حدا حدا ..

- كانو عيانين بزاف ستفو حوايجهم خداو دوش رتاحو شوية وعاد خرجو باش يتغداو

- جاو من الشانطي لي جاو فيه مع السمسار ، قطعو الشانطي ودخلو جيهت السويقة فين كاينين القهاوي ريحة الحوت وريحت الدجاج كتعطي .. دخلو لواحد القهوة تماك ودراري لي خدامين كيرحبو بيهم ..

- مرحبا بيكم تفضلو تفضل أأستاذ ، تفضلي أ أستاذة لي بغيتوه عانا شني خاصكم كاين دجاج الحوت لي حبات خاطرك الخاوة ديالي

- خولة [ غمزات قوت ] : شتي ليا توتوز كيداير اعباد الله تجي معاه غير شي انسبيكتور ولا شي محامي كيحمق اعباد الله ، كيبان ليا غادي تزهى فهاد العطلة باينة غادي ندي معايا شي عريس .

- قوت [ كدور فعينيها ] :

الصراحة دراري هنا على مزيناتهم وياختي شتي حرام واش كيهز فيك العين نهائيا ماشي بحال دياولنا

- حط ليهم السرباي الميني وفؤاد كيخنزر فخولة منين كلسو وهي عينيها كيدورو على دراري لي تما ماعجبوش الحال فمرة

- خولة : حتى نديرو غدا ونجيو ندورو هنا ومنها نيت نشوفو البال ، راه البال ديال هنا واعر هو وديال الفنيدق

- قوت : صافي واخا نكونو نيت رتاحينا نجيو بزوج بلاما نعدوبوهم معانا ويكونو معانا الرجال

- خولة [ كضحك ] : صافي واخا .. جاب ليهم السرباي شنو طلبو ، البنات خداو الحوت أما الباقي شي خدا دجاج وشي خدا الكفتة

- تغداو حتى عرݣوها وقوت دغمة ليها ودغامي للمشاش ، شاط على صفية دجاج هزاتو فرتاتو ليهم شبعات راسها وشبعاتهم هوما ..

- ناض عبد الرحمان خلص سابق توفيق وهاشم لي بالكشايف باش خلاوه اما نعمة وصفية خرجو كيدورو عند مالين الخضرة ويسولو على زيت البلدية لي تفاجئو انها رخيصة بزاف على أسفي ..

- المسمن كان زين والحرشة زينة صفية موجهة كلامها لنعمة :

غدا فصباح نجيو نتقداو نعمرو الثلاجة مكاين لاش نبقاو ناكلو بزاف فزنقة

- نعمة : عندك الصح حتى لغدا إن شاء الله

- كل واحد فهم كيتافق على بروكرام فشكل ضربو دويرة خفيفة ورجعو لدار مهدودين باغيين اينعسو باش يخرجو بليل يحضرو للمهرجان إتصالات المغرب ..

- فصيف ومعضم الناس لي كيشدو عطلة وكيبغيو يسافرو كتكون الوجهة ديالهم هي الشمال ، كاين لي كيقصد طنجة ولي كيقصد المضيق .. كاين لي كيكري فكاپو نيݣرو وكاين لي كيمشي لمارتيل .. معضم العائلات والناس كتكون هادي هي أحسن وجهة بنسبة ليهم .. قليل لي كيقصد أݣادير

- واقفة فبيتها كتكمل لباسها ختارت تخرج بكسوة طويلة بالبلو غوا فيها سميطة مع صنيديلة بسميطات فتيركواز وشال فنفس اللون .. كحلات عينيها مع ماسكارا وكتافات بݣلوس بارد رشات من العطر ديالها لانتيردي هزات ساكها دارت فيه بزطامها وتيليفونها وخرجات من البيت ..

- تلاقات مع خولة خارجة من بيتها بكل أناقة ، سروال فالكحل طويل مع شوميز فزرق ساتان تقول تافقو على نفس اللون هازة ساك صغير وصندالة بلا وطالقة شعرها ..

- كانو مجموعين فدار التحت ، هاشم لابس سروال دجين كحل مع صباط بلا وشوميز فلبلو سييل حال ليها الصدايف ريحتو كتعطي ..

- فؤاد مكانش أقل أناقة عليه ، أما سناء وياسين كانو على براو كيتسناوهم واقفين بزوج كيضحكو مقاربين بعضياتهم ..

- قوت [ نازلة مع دروج ] : صافي مشينا ، ضربات فيه ريحتها لي تشمات من بعيد .. هز فيها عينيه مصغرهم كيدقق فتفاصيلها كاملين ، حنحن ونزل راسو خارج من دار

- مخلي فؤاد متبع خولة وكيحقق فيها لي بدورها نخلاتو ، ماعبراتوش كاع واش كاين ولا مكاينش خارجة بكل تقولية ومشية أنثوية بارزة طولتها وجسمها الممشوق ، كل حاجة كانت عندها فبلاصة ..

- ماركبوش فطوموبيل مشاو على رجليهم مستغلين الفرصة باش يتمشاو ويتعرفو على كل بلاصة ، الدنيا كانت عامرة بزاف وصوت الموسيقى واصل عندهم ..

- قطعو الشانطي من جهة الطاكسيات لي كيديو للمارتيل نيشان للجهة الكورنيش ، خولة هي وقوت مشادين مرة يتصورو مرة يدورو عينيهم ويتمعنو فكل حاجة ..

- عينين البراني كانت عليهم ... مكاينش شي واحد لي مازݣلش الشوفة فيهم

- فؤاد ضاغط على شفايفو مبرد حرو فيهم :

دابا هادي لبسة لابساها ، عاجبها طولها وعاجبها شعرها ..

- هاشم [ مدخل يديه فجيابو ] : وانا مالي لاش كتعاود ليا زابور حياتك أصاحبي واش انت بعقلك

- أش بينك وبينها اخويا باش دخل فيها تلبس ولا ماتلبس أنت مالك ولا بقى فيك الحال حيت قمعاتك

- فؤاد [ خنزر فيه ] :

كيفا قمعاتني مافهمتش هاد البلان ، هاشم أخرتها انرجعو من هاد الشمال واحد مدݣج التاني

- هاشم [ ببرود ] :

وهو بصح ماكدبتيش باينة غانعطيك علاياش كدور حيت طلعتي ليا فصحتي بخاد تخربيق ديالك أصاحبي فاش عينيك من الأخر مافهمتش

- فؤاد [ وقف كيهز فيديه متوتر ] :

أصاحبي بغيت اندوي معاها ، نطلب السماحة من داكشي لي وقع ولي ݣلت ليها ماعطاتنيش فرصة ݣاع ... تصرفات معايا بحال الى مكتعرفنيش بحال شي حشرة ..

- هاشم : وحتى انا عورتيها بالهضرة لي خرجات منك

- فؤاد : ماݣلنا والو هادشي حنا عارفينو .. ولكن أبنادم راه كنت طايش وكنت معصب فديك الوقيتة فهمها راه بنادم خطاء ربي وكيغفر خلي بنادم ..

- هاشم [ بصرامة وجدية ] :

صبر ماعندك مادير راه داكشي لي درتي مكايدارش العيالات ماشي بحالنا حنا رجال .. ݣلبهم حساس تغلط فيها وتنزل من كرامتها راه صعيب تسمح ليك .. أنت حاول دير لي فجهدك ݣاع داك تنقاز ديالك مشا أصاحبي تبت شوية

- فؤاد [ دوز يدو على لحيتو تنهد تنهيدة طويلة ورجع شاف فيها ] :

لهلا يحاشم يدير الله خير .. السهرة بدات والليلة كان فيها فهد بن شمسي ممثل ومغني أغاني ݣناوية .. قوت جرات خولة لداخل مخليين سناء وياسين على برا شوية واقفين بعيد .. أما توفيق وعبد الرحمان ݣلسو فشي كراسة كيشوفو لي غادي ولي جاي

- قوت [ فرحانة ] :

ناري أصاحبتي وتمنيت شي نهار نحضر ليه عزيز عليا .. بحال الى علمو عليا عزازين عليا ݣناوة ..

- خولة : حتى أنا .. بلات نجبد تيليفوني ضروري نصور

- غير بدات الموسيقى وبدا كيغني كولشي ترفع معاه وكولشي كيغني .. حتى من قوت وخولة مابقاوش حاسين على ريوسهم نهائيا هو يغني وهوما كايجاوبوه مع الناس لي تم ..

- فؤاد وهاشم كانو واقفين مقابلين معاهم .. مرة مرة عينيهم كتمشي للجهة ديالهم .. البنات حلفو لا يتحركو ولا ملو حلفو بحلوفهم مايتململو حتى يسالي .. سناء عيات وتوسدات كتف ياسين كترتاح عليه ..

- أما قوت وخولة كانو بحال دوك الرباعة لي كتكون فسهرة من ورا المغني ، خاصو غير يدوي وهوما يجاوبو عليه محاسينش على ريوسهم .. متحركو من تم حتى سالى وكال للجمهور بسلامة ..

- تمو خارجين شافتهم سناء وتقادات فالوقفة :

على سلامة حلفتو متحركو من تم ..

- خولة طلعاتها ونزلاتها :

عرفتينا اختي مع تاݣناويت ياك اختي انت مع راجلك قرة عينك ، أش بغيتينا حنا نباتو كاع وزيدك هادي ..

- قوت : كون انا بلاصتك كون جريت راجلي كنتمشاو ديها فينا حنا راه ازوفريات [ شافت فخولة ] ياك هكا كيقولو زوفريات ؟

- خولة [ كضحك ] : لا زوافرية كتقال لرجال لي ساكنين بوحدهم مامزوجينش ... حنا بايرات كيقول علينا مادة يديها للحنة وكتمنى ..

- قوت [ شافت فسناء ] :

وسمعتي ستغلي الفرصة الهبيلة ماحدك مسافرة مع راجلك ... وانت الاصقة فجنابنا دابا يتقلق يقوليك هادي كاعما شبعاتها من ختها وصاحبتها ..

- ضارت سناء لقاتو وراها بشوية شافت فيهم مزادتش معاهم الكلمة ورجعات لعندو شاداه من يدو ..

- خولة [ شافت واحد كيبيع البيبوش ] :

تشهيت البيبوش ..

- قوت : نتعشاو بعدا ونبشبشو هو الأخير ..خلطو على توفيق وعبد الرحمان لي حداهم كانت كالسة نعمة وصفية كينقيو فزريعة ..

- صفية : ساليتو ؟

- قوت [ هزات ليها شوية من الزريعة وݣلسات حداها تستاراح ] :

اه سالا غدا جايبين موس ماهر ، منمشيوش نتعشاو ؟

- نعمة : شوفو فين بغيتو تعشاو ؟

- قوت : قبيلات فاش كنا جايين كاين واحد المطعم هنا كايدير الشاورما اش بان ليكم نمشيو نتعشاو فيه ؟

- توفيق : غير لي بان ليكم ؟ أش بان ليك أهاشم ؟

- كان واقف هو وفؤاد كيهضرو ؟ شاف فباه بإستفهام :

أش ݣلتي الواليد ؟

- توفيق : فين بغيتو تعشاو ؟

- هاشم [ هزهز بكتافو ] :

غاليبان ليكم ؟ تافقو جميع يمشيو للداك المحال ستقبلوهم الدراري لي خدامين تما .. دهلو شدو بلايصهم المونيي كان فيه شوارما عادية وبلا شوارما كانو العواصر والحلويات لي صلاد حتى هوما وكامت حتى بيتزا ..

- كل واحد فيهم شنو ختار ياكل .. قوت ختارت پلا ديال شوارما وخولة ختارت بيتزا ..

- خولة : ناكل من عندك وكولي من عندي

- قوت : صافي واخا ..

- جابو ليهم شنو طلبو تعشاو حتى كيسمعو شي دقايقية كيغنيو .. كيوقفو على العائلات فالقهاوي باش يدورو معاهم .. الماكلة كانت بنينة غير سلاو ناض هاشم هو الأول خلص

- عبد الرحمان [ كيضحك ] : سبقني خافني نغفلو ونخلص انا ..

- توفيق : مابيناتنا اسي عبد الرحمان ..

- قوت [ موجهة كلامها لباها ] :

بابا سبقونا انتوما الى كنتو بغيتو ترجعو للدار ولا بغيتو تمشاو انا وخولة غادي نمشيو ناكلو البيبوش ..

- عبد الرحمان : ياكما تجلاو ابنتي ؟

- قوت : لا ابابا ويلي المدينة راه أصغيرة والبلايص باينين ودنيا عامرة .. سبقونا انتوما حنا راه غير نساليو ونتمشاو شوية وغادي نجيو صافي ؟

- عبد الرحمان : واخا أبنتي ياكما خصاك شيحاجة ؟

- قوت [ بإبتسامة ] :.

لا ابابا عندي فلوسي الله يخلف عليك .. خلاوهم خارجين فالقهوة وعينين فؤاد متبعاهم

- نعمة [ موجهة كلامها للتوفيق صوتها باين فيه العيا ] :

الحاج وقيلة نمشيو للدار أنا عييت صافي

- صفية : حتى أنا رجليا مابقاوش هازيني

- توفيق [ شافيهم ] : أشنو ترجعو ؟

- ياسين [ شاف فسناء ] : تبغي ترجعي ولا نزلو للبحر نݣلسو ؟

- سناء [ تبسمات بفرحة وبراءة ] :

لا خلينا نزلو البحر .. شفت ݣليسات زوينين ومشعلين دوك الشميعات ..

- ياسين [ شاف فباه ] :

أسيرو انتوما الواليد حنا مزالين معطلين شوية ..

- فؤاد [حنحن بصوتو الرجولي ] :

غير سيرو انتوما أعمي ... مزالين حنا شوية على برا

- عبد الرحمان [ بلكنة غالب عليها حس الفكاهة ] :

الحاج بالعربية تاعرابت نخليو الشباب سهران .. وحنا الشرف نمشيو نرتاحو ..

- توفيق [ كيضحك ] :

وهادشي لي بان ليا .. سمعو العيط طلع راسو كانت نعمة كتعيط ليه من جهة لوخرا هي وصفية لي شادة ليها فدراعها متكلة عليها ..

- ياسين شد فيد سناء ومشاو جهة البحر ..

- هاشم [ كيشوف ففؤاد قاني عليه ] :

مزال بغيتي دور ولا عينك تبع شي حد ؟ انا راه رب الكعبة لا تبعت شي حد ..

- فؤاد : انا متابع حد بغيت غير نتمشى .. بغيتي تجي معايا مرحبا مابغيتي تبعهم ..

- هاشم جاتو الضحكة هزهز براسو وتبع فؤاد ..

_______________

- فجهة أخرى ݣالسين فكراسة ديال الميكة .. كيتسناو مرة قوت تحط راسها على خولة ويتصورو ومرة خولة تحط راسها عليها ويتصورو .. جاب ليهم واحد السيد كبير بلاطو فيه البيبوش والبلول ..

- قوت [ عينيها كيبريو بحال الى ماعرفت شنو شافت ] :

الله الحياة السعيدة .. بدات كتاكل وتبنن ، كان البيبوش بنين بزاف وعامر عشوب .. سلاتو وطلبات السيد يزيدها زلافة أخرى .. شربات البلول لي كان حار ولكن كان بنين كتشرب وخنونتها جايا بالحار ..

- خولة [ نيفها هابط بالما ] :

بنين ياختي وقيلة غانزيد البلول

- قوت : حتى أنا غانزيد البلول ... جاب ليها زلافة التانية ديال البيبوش .. كلاتو وعاد زادهم البلول هي وخولة ، ناضت قوت خلصات عطاهم كلينيكس مسحو يديهم ونيوفهم ..

- خولة : فين غادي نتمشاو دابا ؟

- قوت [ أشرات ليها للجهة القهوة ] :

مابقيناش مشما للقهوة bluesky ، كونما شربنا الما ديال البيبوش .. كون مشينا ليها نتقهواو ولكن نخليوها حتى للغدا إن شاء الله دابا يلاه انتمشاو ..

____________

- فجهة أخرى ݣااسة هي وياه فوق الكراسة قدامهم طبيلة حاطين عليها تيليفوناتهم او ساكها .. قدامها الشمع واحد الجو كان زوين بزاف البحر بليل ... حداهم العائلات وليكوبل ..

- سناء [ شافت فيه ] :

كانت الأمنية ديالي نجي للشمال .. شكون قال هاد الحلم غايتحقق ..

- ياسين [ تبسم ليها وشد ليها يدها ] :

انا جيت ليه مامرة مازوج مع مالين الدار ... ومرات مع هاشم وفؤاد ولكن هاد المرة المجية عندها طعم خاص حيت مراتي معايا ..

- تبسمات وخدودها توردو وتزينو بوشاح الحشمة ... حدرات راسها وترجمات أحاسيسها بتنهيدة نابعة من القلب [ شافت فيه ونطقات بصوت رقيق ] :

عرفتي أياسين .. كنت كنشوف بزاف ديال البنات فالفيسبوك وفالفيديوات ... كيعيشو الحب وكنقول سعداتهم كنت كنقول علاش حتى أنا ماعنديش شي واحد كيبغيني ويكون حنين عليا وكيخاف عليا ..

- ولكن من بعد كنرجع وكنقول لا انا مابغيتش هاد الحب نعيشو بلا زواج ... أي حاجة بغيت نعيشها حلالا طيبا .. والحمد لله ربي رزقني على الصبر ديالي .. بعدت على حوايج لي ربي ماباغيهمش ومراضيش عليهم .. والحمد لله رزقني ربي على صبري وعوضني بيك انت ..

- يكذب عليك الكاذب لي يقوليك العلاقات كيكونو زوينين ... اه كتحسي بيهم فديك الوقيتة زوينين ولكن منين كتجرب الحلال كيكون زوين كثر عندو طعم خاص فشكل ..

- كتخرج مع حلالك وانت مخايفش من داركم .. كتشد ليه فيديه تعنقو وانت حاس براسك مرتاح حيت مداير حتى ذنب حيت هذاك الإنسان حلالك ، تعطل معاه فزنقة مدخلوش انتوما كاع [ ضحكات ] مكاين لي غايتحاسب معاك ولا يقوليك فين مشيتي ولا فين جيتي ..

- [ شافت ليه فعينيه بكل حب وبإبتسامة ] ربي عوضني بيك صبرت ونلت الحمد لله ..

- ياسين [ هزهز براسو ] :

الحمد لله ... حتى انا صبرت ونلت وعوضني الله بأحسن عوض اللهم لك الحمد يارب .. اللهم أدمها نعمة يارب ويرزقنا الله يدرية الصالحة يارب ..

- سناء : اللهم آمين ..

________________

- غاديات كيتمشاو مستمتعين بالجو ديال الكورنيش .. قوت ضارت عند خولة ونطقات بداكشي لي كتخمم وتفكر فيه :

شفتي فؤاد كيفاش كان كيشوفيك منين نزلنا مع دروج بغا ياكلك بعينيه ..

- خولة [ هزهزات كتافها ] :

يشوف ولا يݣعد ... أرا ماعندو أنا بغيتو يطرطق ويحماق وينتف شعرو ويعيط بالعداو على داكشي لي دار معايا ..

- قوت [ كتضحك ] :

ولايني قلبك كحل .. وسيد كان باغي يطلب منك غير سماحة ندمتيه على النهار فاش تزاد ..

- خولة :

انا قلبي ماشي كحل ومكنشدش فخاطري وانت هادشي عارفاه مزيان ... بالعكس أنا مسالمة وقلبي صفى من الحليب ولكن هداك خينا جرحني فقلبي بزاف .. خليه يتعلم ويشرب من الكاس لي شربت منو .. باش هاد المرة يعرف أش كيخرج على فمو ... ويفكر فالكلمة حتى يوزنها ويخرجها ..

- قوت : بصح فهادي عندك الحق .. داكشي باش شتك كتحرقي ليه نوادر عقت بيك هههه

- خولة [ كضحك ] :

مكنديرهاش بالعاني والله ماعلى بالي بيه ولا حاسة بيه كاع واش كاين ... ولكن بيني وبينك عاجبني الحال خليه يتحك ويطرطق ..

- قوت [ أشرات ليها لواحد البلاصة خاوية مقابلة مع البحر ] :

أجي نݣلسو لهيه .. مشاو للجهة ديك البلاصة ݣلسو فيها عطاو بضهرهم للشارع ورجليهم للجهة البحر .. واحد الجو كان زوين بزاف ماكنتيش تسخى تمشي للدار .. الموسيقى خدامة ماعرفوش منين جاية واش من جهة شي قهوة .. الناس غاديين جايين. .

- السلام عليكم .. هزات قوت راسها فمصدر الصوت ، كانو زوج ديال الرجال يكونو فأواسط الثلاثينات .. واحد فيهم لابس سروال دجين كحل مع صباط وتيشورت فالخضر داكن .. ساعة رجالية فاليد وليد لوخرا تويشية فالكحل فيها نجمة ديال المغرب .. كان مقبول فشكل ديالو طويل مدايرش اللحية غير موسطاج ..

- والرجل لاخر كان أنيق شورط عند الركبة فالبيج ودجين مع شوميز ديالو نفس الشكل ولون ... سبرديلة باينة غالية فالثمن ، راض شعرو لور رطب مجهو محسن وريحة العطر لي دايرين كتعطي ..

خولة [ طلعاتهم ونزلاتهم ] :

وعليكم السلام ..

- مد مول الأخضر يدو للخولة ] :

سلام معاك محمد رضى وأنت الى ممكن تشرفيني بمعرفتك الى جات على خاطرك ..

- خولة [ مدات ليه يدها سلمات عليه بملامح باردة ] :

مشرفين اخويا انا حورية ..

- محمد رضى [ هزهز براسو بإبتسامة ] :

مشرفين .. لاخر مد يدو للقوت :

أنا إلياس وأنت ؟

- قوت [ طلعاتو ونزلاتو ] :

سميتي لبنى وغير سمحليا ولكن مكنسلمش على الرجال ..

- إلياس [ حس بالإحراج جمع يدو مدوزها على شعرو ] :

واخا ماعليش .. واخا نݣلسو شوية معاكم الى ممكن ..

- قوت : لا اخويا الله يجازيكم بيخير بغينا نبقاو بوحدنا ..

- محمد رضى [ موجه كلامو للخولة ] :

حورية واش صاحبتك دايرة بحال هكا صعيبة ؟

- خولة [ كدور فراسها كتقول معامن كيدوي نسات بلي بدلات سميتها ، شافت فيه وضحكات] :

لا ماشي هكاك ... غير كاينة معانا العائلة مابغيناش الصداع والمشاكل داكشي باش [ نغزات قوت باش تسكت ] ..

- قوت [ حركات ليها راسها وبهمس ] شنو مالك ؟ مالي قلت العيب ..

- إلياس [ موجه ليها كلامو ] :.

شوفي حنا راه تابعينكم من عند مول البيبوش ... وباينات ماشي بنات هنا .. وحتى حنا راه ماشي ولاد هنا حنى ولاد الرباط وجينا ندوزو العطلة هنا فشمال ..

- محمد رضى :

حنا كاريين فكاپو نيݣرو وهبطنا اليوم للمضيق ندورو شوية .. بصدفة شفناكم ماكرهناش الصراحة نتعرفو عليكم ..

- خولة [ بإبتسامة ] :

حتى حنا جينا عطلة وجينا مع العائلة ... هذا باش مابغيناش المشاكل ..

- قوت [ ببرودة ] :

راه سمعتيها اخويا شنو قالت ليك ... راه معانا العائلة مافينا لي يبقى فشد ليا نقطع ليك ..

- إلياس :

والله القسم مابغيناش ندوزو الوقت ، وانتوما اصلا باينة ماشي ديال تدواز الوقت ... بغينا غير نتعرفو وإن شاء الله يكون خير الإنسان راه كيدير السبب والكمال على الله .. ولالا أ أنسة ..

- محمد رضى [ جبد تيليفونو من جيبو ومدو للخولة] :

إلى هكاك هاكي قيدي ليا نمرتك نسوني عليك من بعد .. الى غانسببو ليكم شي إحراج ..

- خولة خدات من عندو التيليفون وقيدات ليه نمرتها ورجعات ليه التيليفون ..

- إلياس بدورو جبد تيليفونو ومدو للقوت :

ممكن تسجلي ليا نمرتك ولا حتى هي ممنوعة ؟ ..

- قوت غمضات عينيهم وحلاتهم .. مكتحملش شي واحد يبقى واقف ليها على راسها .. هزات عينيها فيه ونطقات بكل ادب :

راه قلت ليك بلي مايصلاحش ..

- إلياس : ومايكونش راسك قاصح الله يهديك .. راه مقصودنا شريف ماشي كنتفلاو واش باينة فينا ولاد الحرام راه حنا ولاد العائلة زعمة ..

- قوت :

ماقلناش ليكم ولاد الحرام حاشة .. ولكن الإنسان كيحتارم اراء الغير ... انا مكنتعارفش ومابغيتش نتعارف وهادي كتبقى حرية شخصية ولالا .. وانا كيبان ليا بلي مابقى لينا ݣلسة هنا [ شافت فخولة ] زيدي نمشيو ..

- رجعات رجليها للعلى الأرض او وقفات .. كتسنى ففخولة لي حتى هي وقفات ..

- إلياس [ بجدية] :

مدموزيل ... حنا بغينا غير نتعارفو عادي .. ݣلتي مكتسلميش ݣلنا هانية حتارمنا الرأي ديالك .. ݣلتي نمشيو بحالنا حيت العائلة وحتارمنا هادشي .. ولكن نمرة ديال التيليفون زدتي فيه شوية لا ؟ [ مد ليها التيليفون من جديد] عطيني غير نمرتك .. ماݣلت ليك خرجي معايا ولا دهلي معايا خليني غير ندوي معاك ..

- تحيد ليه التيليفون من يدو .. هو راسو بالخف عينيه تلاقاو مع ملامح شخص كيشوف فيه ببرود .. هز التيليفون وخشاه ليه فجيبو ، نطق بكل برود :

سمعتيها شنو ݣالت ليك واقيلة لا ؟

- قوت تخلطو فيها الالوان .. ماحملاتش تحط فبحال هاد الموقف قدام نسيبهم جاها حشومة وعيب ..

- إلياس طلعو وهبطو :

خويا وشكون انت ... [ شاف فقوت ] واش كتعرفيه ياكما خوك [ رجع شاف فهاشم وكيهضر بالهداوة ] خويا شوف قسما برب الكعبة الى غراضنا شريف .. حنا راه ولاد عائلة او ولاد الناس وعندنا خواتاتنا مابغيناش نتفلاو ..

- هاشم [ هاز حاجب ومنزل الثاني طلعو وهبطو , ببرود وصرامة ] :

كون اسي محمد كنتو ولاد العائلة او ولاد الناس ... مغاتوݣفوش على بنات الناس وتحركو .. واش ݣالت ليك مابغاتش سالينا دور 100 ..

- إلياس [ حلف مايتزعزع من تم ] :

أقسم لك يمينا حتى البنت عجباتني ... بغيت غير نمرتها ولا نمرة اي واحد عطيني أخويا نمرتك انت ندوي معاك .. نعرفكم غير منين وفين ندوي مع الدار ونجيو لعندكم ..

- فؤاد [ مغزف كيخنزر ففخولة ] :

حنى من بويا عمر كتعرفو وحنا من تم ..

- إلياس [ شافيه ورجع شاف فهاشم ] :

مكايهمش أخويا .. لي كيبغي المعقول يمشي للحد الدنيا اش ݣلتي اخويا عطيني نمرتك ..

- هاشم [ النقشة طلعات ليه ] :

استغفر الله العظيم .. راه ݣلت ليك دور 100 هنينا مݣادين على شوهة خلينا متاقيين فيك وجه الله ..

- إلياس [ نفاعل ماعجبوش الحال ] :

خويا راه بغيت زواج .. واش لي بغا الزواج كديرو معاه بحال هكا ..

- هاشم [ شدو من دراعو دفعو ] :

وسييير أصاحبي سير السيدة مزوجة سير .. واش كتقلب على خلا دار عشتك ..

- فؤاد [ باغي يشنق عليه يبرد فيه الحر ديال خولة ] :

غاتمشي ولا نخلي دار بوك واحد فجوج ..

- محمد رضى [ جر إلياس ] :

صافي صافي هاحنا غاديين صافي ..

- قوت [ بقات واقفة مصدومة جاتها الضحكة .. دور وجهو كيشوف فيها :

ضحكي طلقيها اش كتسناي ... هادشي لي بغيتي من دوران انت وياها الراس فراس ..

- قوت [ جمعات الضحكة ] :

وخويا شكون قاليك دخل ولا دوي معاه اصلا ... واش انا تربية ولا برهوشة عندي 12 عام كنتسنى لي غادي يحامي عليا .. راه حتى حاحة مابزز فهاد الزمان .. كنت قادة نجري عليه راسي غير بغيتي دخل ..

- ولاش ديك راها مزوجة ؟ وإلى كان السيد بصح غراضو شريف يلاه ... جريتي ليا على عريس راه حشومة هادشي لي درتي مايبغيه لا ربي لا عبدو والله أهاشم باش نجيك لصراحة زعمة ..

- هاشم [ طلعها ونزلها بعينيه ] :

ياك أبنتي .. ياكما نمشي نتبعو نعيط عليه يرجع تعطيه النمرة ..

- فؤاد [ غتانم الفرصة وجر خولة من دراعها لي كانت كتفرج فيهم مرة تشوف فهاشم مرة فقوت دوخوها ] :

انا ݣااسة تفتي عليا ... مكنخرج مكنݣلس فقهاوي .. ايشوفونا الناس .. ورعواني دالخلا واݣفة معاه ..

- خولة طلعاتو ونزلاتو ... حيدات دراعها من يدو ونطقات بكل برود ، مخلياه غايجهل بهضرتها :

وأنت أنت شكون ؟ اممم با خويا ولد عمي خطيبي راجل وضارب عليا الكاغط بزنطيط موغرف ... نوقف معامن بغيت وندوي معامن بغيت وماشي من حقك أصلا تدخل ... شتي لي كيديها فراسو راه كيعيش بيخير والله نصيحة من عندي ورخف فيك شوية النفس ..

- فؤاد [ بصوت تقيل معصب ] :

سمعي الشريفة .. بنت مدينتي وحاسبك من عائلة الحاج ، يعني معرفة وكنعرفك وهادشي غايخلي عينيا عليك ... ديري هاه ولا هاه نخلي دار عشتك سمعتيها ..

- خولة [ تبسمات ببرودة ] :

للهلا يخطيك عليا أخويا فؤاد .. هذا هو المضمون فيك هكا يكونو ولاد البلاد والله العظيم الى حسيت راسي عندي خويا ... الله يحفظك اخويا فؤاد ..

- خلاتو واقف غايطرطق وݣلسات دايرة رجل على رجل كتسنى فقوت باش يمشيو ..

- قوت [ واقفة بكل هدوء كتشوفليه فعينيه وراسمة إبتسامة زوينة على شفايفها ] :

لا حشومة نعدبوك ونخليك تمشي لعندو ... حتى أنت المضيق غير صغير غدا ولا بعدو تلاقينا معاه الوقت .. مالنا حنا انݣلسو هنا غير نهار مزال مطولين .. غير هاد المرة الله يرضي عليك أخويا هاشم أنا راه قادة ندافع على راسي ماتخافش عليا ختك قادة تعطي لبنادم علاش كيقلب ..

- وأنا كون بغيت نعطيه نمرتي نعطيها ليه قبل لا تجي .. غير باش تعرف بلي راه يُعول عليَّ .. [ شافت فخولة ] يلاه نمشيو .. شدات فخولة وتحركو من تم مخليين فؤاد وهاشم متبعينهم بالعين ..

- فبيت قوت ݣالسة هي وخولة .. حاطة قوت البيسي ديالها قدامهم ناويين يتفرجو ففيلم شافت قوت فخولة ونطقات :

مجاكش قصحتي الهضرة شوية مع فؤاد .. جاني بحال الى براكة عليه .

- خولة [ هزات بكتافها مامسوقاش ] :

باش يتعلم يدخل سوق راسو ... واش بيني وبينو شيحاجة لي يدوي ولا يدخل فيا ؟

- قوت [ تكات على المخدة بظهرها ] :

لا مابيناتكم والو .. واخا انا جاني السيد غار منين شاف داك خونا واقف عليك .. وانت من نيتك عاطية نمرتك لهادك شلاغم القايد غير قولي ليا ؟

- خولة [ بدات كضحك ] :

أودي غير تهناي .. راه كتبت ليه نمرتي وبتلفة بلاصة ندير 20 فالأخر درت 02 .. ايسوني غيطيح فنمرة غلط ولكن مزيان نيت طاح من عينيا غير هضر معاهم هاشم جر صاحبو .. ومشاو كيتسرسبو الرجلة ديال الكارطون ..

- قوت [ بدات كضحك ] :

ولاخر لي بدا كيقول لهاشم عطيني نمرتك واش أنت خوها .. راه غراضي شريف شتي كون عطيتو نمرتي قبل مايجي هاشم ... كوراه سونا ليا يبقى شاد معايا جماعة ويعرض عليا لشي قهوة وشوية بشوية يزعم .. كيدخلوك بالمعقول بالعاني باش البنت تسمع الزواج وطيح ..

- خولة [ حلات شعرها خلاتو مطلوق ] :

باينة فيهم من المخزن .. هداك مكرط وجهو كامل ولاخر داير داك الموستاج ، باغيين معامن يدوزو الوقت ماحدهم هنا ..

- قوت [ كتشوفيها بنص عين ] :

وبعدا كنتي غادي تعطيه نمرتك ... شايطة عليك باز لوجهك باش تجيني تاني تق لي ليا راه هداك بلوكيتو وراه أنبدل نمرة ، عرفتي نمرتك شحال بدلتيها من مرة ؟ وليتي بحال دوك البزنازة ..

- خولة : صافي حتى انت خدمي الفيلم براكة خلينا نتفرجو نوضو نعسو ..

- قوت : أجي خولة ... الى بغا السيد يطلب منك السماحة صافي ، لي غلب يعف ..

- خولة [ شافت فيها هازة حاجب ومنزلة الثاني ] :

هداك القلب عندك هشيش كثر من غريبة ديال كاوكاو ... فاش يقولها ليا مخي أنسمح ليه دابا اديري لينا الفيلم ولا نوض نعس ..

- قوت [ كليكات على پلاي ] :

صافي هاهو ياربي سلامة ..

_____________

- ݣالسين فالبالكو .. حاطين صينية ديال أتاي فؤاد مرجع راسو اللور وكيخمم فيقو من السهوة ديالو سؤال هاشم ليه :

نسولك وجيني نيشان [ شاف فيه محرك راسو بمعنى شنو ] مارضيتيش البال بلي زدتي فيه .. الى جينا ندويو بلوجيك راه ما من حقكش تدوي مع السيدة ولا تحاسبها معامن وݣفت ولا معامن دوات .. راه لي شافك غايݣول بلي كتغير عليها ..

- فؤاد [ ببرود ] :

وعلاش منݣولهاش انا فاش دويتي مع داك خونا ؟

- هاشم [ بجدية ] :

حيت انت عارف وانا عارف بلي انا وقوت مابيناتنا والو ... من الواجب ديالي واحد السيدة من العائلة غادي ندخل وندوي ... ماشي حيت عيني فيها ولا باغيها ، حيتاش انا هكا داير وانت عارف هادشي .. أي وحدة تحطات فداك الموقف وكنت كنعرفها غاندخل ..

- فؤاد [ تقاد فالݣلسة ] :

أنا هادشي عارفو ماتحتاجش توريه ليا ولا توريني راسك ... عارف مزيان كون كنتي كتحس بشيحاجة جيهتها هداك خونا مكانش غادي يمشي بحالو على رجليه .. كانو غايديوه فوݣ الكرسي .. عقلتي نهار داك خونا تبسل على نسرين فالقهوة فاش كنتو مخطوبين [ بدا كيضحك ] خبطة وحدة مع طبلة مابقاش ݣعد الراس ..

- هاشم [ تنهد ] :

وكون غير كانت تستاهل .. دابا بلاما تبقى تدريبلي عليا فالهضرة ، واش كتحس بشيحاجة من جهة السيدة ؟

- فؤاد [ تنهد تنهيدة طويلة كيشوف فسما .. حدر راسو ورجع هز عينيه فيه ] :

شوف بغيتي الصراحة ؟

- هاشم [ اشر ليه بيدو ] :

كون مابغيتش الصراحة ݣاعما نسولك ، دوي ..

- فؤاد ربع يديه فوق رحليه وشاف فهاشم بجدية :

شحال هذا كانت كتعجبني ... كنت كندوز عندها للبزار ملشي غير على وديت نشري شيحاجة ... كان كيعجبني نشوفها كل نهار ، كانت فيها شيحاجة لي سپيسيال مكاينة حتى وحدة .. يمكن ديك البراءة ديالها .. مافهمتش ..

- هاشم [ هز حاجبو ونزل الثاني بإستغراب ] :

وهادشي عمرك ݣلتيه ... ولا حتى حسيتي بسخون دخل ليك مع العظام .. ودابا داخلت عليك بوجه الله لي كيعجبو شي حد كيدير مادرتي ؟

- فؤاد [ تنهد مدوز يدو على راسو ] :

راه ݣلنا ليك أصاحبي غلطنا .. وراه بنادم كيغلط أو واش أنا ملاك ... ونزيدك كون كت شي ولد الحرام كون طيحتها فداك الوقت لي كنت زهواني ... ولكن لا انا كنت جار راسي لتيساع .. حيت كنت عارف راسي مزال مواجد باش نجمع راسي من العيالات ..

- هاشم : وباش كتعجبني كتعتارف ..

- فؤاد [ رجع بظهرو على الكرسي مربع يديه ] :

لي كيشطح مكايضرݣ وجهو ...

- هاشم [ كيضحك ] :

وكيبان ليا طحتي أبا فؤاد ... ݣاع لي دردݣاتو المعزة فراس الجبل غاتخلصو فدار الصياد ..

- فؤاد [ ضرب بيدو على كتفو] :

حنا بغيتاها تعطينا غير وقت ... نطلبو فيه غير السماحة ونرتاحو من هاد الناحية .. راسها قصح منو مكاين ومن هادشي لي كدير راه باينة هازة فݣلبها من جيهتي حيت ماشي هادي هي خولة لي كنت كنعرف ..

- هاشم [ كيخمم ] :

وعلى ماعودتي ليا راه كنتو تجمعو وضحكو ... راه غاتجيها قاصحة من غير الى كانت حتى هي فداك الوقت كتعجبها .. وتعاملتي معاها بحال هكاك راه غاتقصح من جيهتك ..

- فؤاد [ جمع غوباشتو كيخمم فكلام هاشم ] :

زعمة ؟ زعمة بصح تكون حتى هي فداك الوقت كنت كنعجبها ... وراه بصح كونما كانتش كاتحس بشيحاجة من جيهتي راه ݣاعما تبقى شادة فقلبها سينين هادي [ ضحك ] والله الى عندك الصح .. خرجات ليا هاد القضية من راسي ..

- هاشم [ بصرامة ] :

وماشي غير تسمع هادشي تبورض ... عطي البنت الوقت وفينما لقيتي الوقت طلب السماحة .. ماشي بضرورة اصاحبي خاصكم حتى تݣلسو الراس فراس عاد طلب السماحة .. تكون شي وجيبة قصدها نيشان ..

- فؤاد [ شافيها كيفكر ] :

عندك الصح .. داكشي لي غادي ندير مغانبقاش مربع يديا نتسنى فيها هي حتى تعطيني الأورضر ..

- هاشم : ودابا عجبتيني ... هز كاسو جغم منو ورجع كيشوف فالمنظر لي قدامو.

___________________

- واقفة نعمة هي وصفية فالكوزينة كيوجدو الفطور .. حطو كولشي على الطبلة ، نزلات قوت هي وخولة ݣلسو عاد لتاحقو بيهم لوخرين ... كل واحد كيرمشي صباح الخير للجميع ويجر الكرسي وكيݣلس ..

- توفيق : فين غادي تمشيو هاد الصباح ؟

- نعمة [ شافت فيه ] :

قلنا غير نفطرو ونمشي للبحر هادذي علاش تافقنا ..

- توفيق [ شاف فعبد الرحمان] :

الحاج أنا وأنت نمشيو للقهوة ... حتى لديك الساع ونخلطو عليهم واحد شوية ..

- صفية [ شافت فراجلها ] :

علاش الحاج مغاتنزلش للبحر ؟

- عبد الرحمان [ بنفي ] :

عارفاني مع ديك الشمس كيكنولي ... انا والحاج انتقهواو فواحد القهيوة كاينة هنا .. غير سيرو أنتوما بصحة وراحة ..

- قوت [ موجهة كلامها لسناء ] :

سناء ديك الزبدة لي حداك .. هزات سناء البواطة مداتها ليها .. منين ݣلسو وخولة متفادية تشوف جهة فؤاد لا هي لا قوت ... هي كان عندها سبب أما قوت فكانت كتصرف عادي ..

قوت [ همسات لخولة ] :

غير نرجعو من البحر تبرد الشمس ... غايكونو صحاب البال واحطو باش نمشيو نتقداو صافي ..

- خولة [ كضحك ] :

صافي كوني هانية ..

- صفية : الغدا ماعرفنا ناكلو برا ولا حتى نرجعو ونصايبوه ..

- نعمة : بلاش عليا من ماكلة الزنقة حتى نجيو ونطيبو الغدا ..

- قوت [ صرطات دغمتها ] :

أنا بعدا اناخود طورطية فزنقة .. الى اتاكلو انتوما فدار غير كولو ..

- صفية : وعلاش ابنتي ماطيبيها فدار هنا وكولي حتى تشبعي ؟

- قوت : من نيتك اماما ، راه حتى فأسفي كنصايبها فدار ... انا بغيت ناكلها ديال هنا ، تجي للشمال ومتاكليش طورطية والبيصارة ولانتشوبا [ شطون ] مستحيل

- ياسين [ هزهز براسو ] :

الصراحة عندها الصح ... البنة عي تاكل الماكلة ديال هنا الصراحة ..

- سناء : بصح حتى انا بغيت ..

- قوت [ شافت فصفية ] :

شفتي شنو قلت ليك [ كضحك ] ..

- فؤاد [ قرب من هاشم لي كان كيفطر وحاط التيليفون مخدم الكاميرات كيشوف الدراري لي خدامين عندو ... او واش الأمور غادية مزيان ] :

نݣوليك المفيد والصراحة ... أكبر قالب هو لي غاتديه الى ماديتيش هاد بنت الناس انا نݣوليك ..

- هاشم [ ودنيه معاه وعينيه مع تيليفون ] :

وأكبر ملخة غاتشدها الى ماعطيتينيش التيساع ... كنݣوليك دخل سوق راسك ، ودير خير فراسك وتزوج أنت ... أنا هاد الساعة خاطيني ..

- فؤاد [ بجدية ] :

شوف بلاما دير ليا فيها ضحية بجوجنا عارفين بلي مكنتيش كتبغي نسرين بلاما ضحك على راسك ..

- هاشم [ هز فيه راسو كيخنزر فيه ... بهسهسة رجولية هادئة ] :

فاش عينك افؤاد .. دويت معاك يمكن ؟

- فؤاد : كنݣوليك الصراحة ... وحق الرب الذي لا رب سواه ... مكتي كتبغي نسرين أنا نݣولك ..

- هاشم [ مورك على سنانو باش صوتو مايطلعش ] :

غير البارح كنتي بارك كتݣول حݣا غرت عليها فالقهوة ... ودابا كونما كتش كنبغيها غانغير عليها ؟

- فؤاد [ بصوت رجولي وتبات كيحاول يفهمو ] :

أسمع الغيرة راه كانت خطيبتك على دمتك .. كنتي مبهور بدوك الأيام ديال الخطوبة لولين ... داخلت عليك بوجه الله كون كنتي بصح كتموت عليها كنتي غاتصبر على داكشي لي دارت .. وبرب العزة لا صبرتي واخا تكون كيما بغيتي تكون ..

- واخا يكون قلبك عامر بالإيمان لأقصى درجة .. اواخا تعرفها كاع خانتك غير فتيليفون والله لا صبرتي بالله حتى دير فيها شي عاهة ... داك الضرب لي درتي ليها كون كنتي كتبغيها غايكون مضوبل .. والله حتى يخرجوها من دارك فوق المحمل بالله ..

- كان كيسمع ليه وساكت .. مغوبش بحال الى عقلو ماباغيش يتقبل ليه داكشي لي كيݣول صاحبو ..

- فؤاد : كون كنتي بصح كتبغيها والله ماتخليها تعتب فديك الخدمة .. أنت كنتي داير بوجه الحاج باها ، حيت كان وقف معاك فواحد النهار .. ومابغيتيش تخسر معاه ، وكنتي داير بداكشي لي رباوك عليه والديك وداكشي لي أمرك بيه الله ...

- كنتي كتعاملها مزيان وكتخليها فرحانة ومرتاحة ... وحتى هي راه ساهمات باش ماتبغيهاش .. حيت كون كانو تصرفاتها معاك مزيانين كون شرات محبتك ..

- وباش نعطيك الخلاصة ... والله المعبود كون كنتي كتموت عليها ... متݣد تنساها ولا تخطى لي دارت ليك ، كوراك ساد عليك فشي قنت وكتخمم .. وحيد عليها من هاد التخربيق ..

- هاشم [ شافيه بكل برود ] :

ساليتي ... وراه واخا تبرول حتى لصباح داكشي لي فراسك غير نساه ... وإلى كانت قراتك الواليدة شنو تݣول غير فوتني عليك وخرج رونضتي ... نهار نحط العين على شي وحدة .. مغانتسناك لا انت لا الواليدة ..

- هز تيليفونو شافيهم ݣايل :

بصحة وراحة فطوركم .. وطلع الفوق .. شافت نعمة ففؤاد بمعنى أمضرا ؟ هزهز ليها براسو بمعنى مكاين والو ..

_________________

- خولة [ مقابلة المرايا كدير فليكرو ديال الشمس ] :

أجي شكون حسن البوركيني الأخضر ولا الغوز ؟

- قوت [ لبسات البروكيني ديالها .. هزات ليكرو وݣلسات على الكرسي ] :

لا الغوز زوين حسن من الأخضر ... لبسيه هو حتى نهار نمشيو لكاپو نيݣرو ولبسي الأخضر ..

- خولة [ حطات ليكرو ديالها وهزات البوركيني كتلبس فيه ] :

شفتي فاش كنا كنفطرو .. فؤاد ماعرفت أش كان كيقول لهاشم .. بان ليا تنيرڤا فواحد الوقت ..

- قوت : والله ماعرفت أنا مارضيتش ليهم البال ݣاع ..

- خولة :

أصلا داك فؤاد يفقص لي مكايتفقص ... بقى غير صاحبو ..

- قوت [ جمعات شعرها ودارت البوني ديال البوركيني ] :

شغلهم هداك .. راهم صحاب مرة يدابزو مرة يتصالحو وحنا مالنا ..

- خولة [ خنزرات فيها ] :

كتقت//ليني بهاد البرود ديالك أختي ، الواحد مايدي منك لا حق لا باطل ياربي تعفو ..

- قوت [ ببرود ] :

علينا وعليك من هاد التبرݣيݣ والفضول .. [ كتشوف فرجليها ] أنلبس هاد الكلاكيطة .. رجليا شحال وانا نطلي ليهم فالماسكات والحنة غايكحالو بشمس ..

- خولة : حتى انت حتى ترجعي وأرا ماطلسي ودهني صافي انا ساليت مشينا ؟

- قوت [ هزات سكادو على ظهرها ] :

يلاه ..

- صفية كانت سابقة هي ونعمة غاديات مجمعات ... وراهم خولة وقوت دايرات نظارات ديال الشمس .. خولة كانت لابسة البوركيني فالغوز ... شعرها كانت دايرة ليه جوج ظفيرات مع نيڤية فالغوز .. وحتى هي كانت لابسة كلاكيطة وهازة سكادو ديالها فيه ليكغو مع الفوطة ..

- عاد سناء اللور مع ياسين .. حتى هي لابسة بوركيني فالزرق .. شعرها جامعاه زدايرة بيرية فزرق شادليها ياسين فيدها ..

- فؤاد [ غادي مع هاشم كيجر فرجليه ... تنهد تنهيدة طويلة وهو كيشوف فياسين وسناء ] :

الصراحة الواحد خاصو يدوز الكونجي مع مرتو .. [ هز فيه راسو مطلعو من رجليه ] ماشي لاصق فيه صاحبو لاصق ليه فكعلالتو ..

- هاشم [ لابس شورط مبين على رجليه الطوال .. وسوفيطمة مبينة درعانو لي كانو منحوتين بالحديد محيد السلسلة ديالو من عنقو .. داير نظارات ديال الشمس وهاز سكادو حتى هو ] :

شكون منعك أصاحبي بالي قبل لا يسالي .. الخير موجود الحمد لله اش مانعك ؟

- فؤاد [ حك على عنقو كيشوف قدامو وبضبط جهة خولة ] :

خاص معامن ؟ خاص غير الݣلب يحن أودا صديقي ..

- هاشم [ كيضحك بصوت رجولي ] :

شت الدرية دخلات ليك العقل ... وزربة خايبة هادي كيدرتي ليها !

- فؤاد [ شافيه ] :

بيني وبينك ... الدرية نقية ديال الظار ماشي ديال زيݣ زاݣ .. كبرات فعينيا نهار قمعاتني على ود القهوة ، واخا ماعجبنيش الحال ولكن فرحت فنفس الوقت ..

- هاشم [ قاطعين شانطي ] :

تاشوفلك هاد بنادم دابا ... وحتى تݣاد معاها الأمور وعاد بالي ، أنت مزال ماطلبتي حتى سماحة وباغي تزوج ..

- نزلو للبحر كانت الرملة سخونة ... جا عندهم الدري لي تم لي كيكري پاراصولات .. خداو 3 البراصولات .. و8 دبال الكراسة ... سناء ݣلسات مع ياسين بوحدهم ..

- وصفية ونعمة وقوت وخولة يوحدهم ... عاد هاشم وفؤاد بوحدهم .. البحر كان زوين ودنيا كانت عامرة بزااف .. كل واحد وشنو جايب معاه ..

- صفية حطات بواطة فوق الطبلة ... فيها حلويات لي كانت صايبات فالعيد .. حطو العواصر لي كانو جايبينهم فثلاجة متنقلة ..

- خولة [ هزات للتيليفون كتسناپي ... دورات التيليفون جهة قوت كتصور تصاور وفيديوات ] :

نهبطو نعومو ؟

- قوت : وبلاتي غير نسخنو بلاصتنا بعدا واحد الشوية ..

- كدور فعينيها وصوت الغنا جاي من الجهة لوخرا ... دورات راسها كيبانو ليها مجموعة ديال الدراري مخدمين الباف ... هازين شيشة الإلكترونية ..

- دايز مول بيني كيعيط " بيني بيني "

- قوت [ شافت فخولة ] :

ناخدو بيني ؟

- خولة : حتى نعومو ونرجعو وناخدوه ... ويلاه أصاحبتي أنبقاو ݣالسين .. ولكن شوفي أجي صوريني بعدا قبل لا يخسرو ليا الظفيرات بالما ونحيد نيڤية نمشيو لهيه ..

- هزات قوت تيليفونها وناضت هي وخولة ضارت عند ماماها :

ماما غانمشيو لهيه ونرجعو صافي ... تخطاو الباصولات لاخرين تحت أنظار فؤاد وهاشم ... أما ياسين شد فيد سناء ونوضها ومشاو للجهة أخرى يتمشاو فيها ..

- طولتها وفورمتها لي واخا كان البوركيني مستور ... كانت فورمتها كتبان كتخلي أي عين تشوفيها .. وملامحها الزوينة الكبيرة كتخلي شحال من راجل يدور يتبعها بعينيه .. خولة كانت مميزة بزاف كتخلي اثر فالواحد واخا متدويش معاه من الملامح لي كيبقى عاقل عليهم الواحد ..

- خدات قوت التيليفون دخولة وبدات كتصور فيها .. شبعاتها تصاور وبݣاع لي بوز .. وخولة بدورها صورات قوت حتى هي ..

- سلاو تصاور ورجعو للطبلة فين كانو ... حطات قوت نظاظرها وتيليفونها دارتهم فسكادو .. خولة حتى هي نفس الشي حيدات النيڤية ونظاراتها وتيليفون حطاتهم فسكادو ..

- قوت : مغاتعوموش أنتوما ؟

- نعمة [ كضحك ] :

أشبعو أنتوما عومان حنا حتى طلعو انتوما ياك أصفية ؟

- صفية : أبصحتكم وراحتكم .. عنداكم دخلو الداخل أودني منكم ... قوت أنا وصيتك خولة عارفاك زعيمية وتموتي دخلي لداخل ..

- خولة [ كضحك جرات قوت ] :

لا غير تهناي أخالتي .. مشاو كيجريو .. مع هوما تحركو وقف فؤاد شاف فهاشم ] :

بغيتي تعوم دوز .. بغيتي تݣلس بحال دوك العݣايز لي كيشوفو بعينيهم ݣلس .. أنا غادي نحضي رزقي أخويا هادشي مكايعجب ..

- هاشم [ بضحكة رجولية ] :

بصحتك أخويا .. وحضي الحمام لا يطير من يدك أمعلم ..

- الما كان صافي مكانوش فيه الماج بحال لاپيسين ... البحر لي كيعجب قوت بحكم مكتعرفش تعوم .. كان عاجبها الحال وخالقة السعادة هي وخولة .. مرة خولة تهزها على ظهرها وترميها .. ومرة قوت تهزها وترميهم .. الشميسة كانت كتضرب فيهم ناسيين الدنيا ومافيها ..

- كانو مستمتعين حتى حسو بداكشي تخبط حداهم ..

- سناء [ كضحك خالعاهم ] :

هاني جيت نيهاهاهاها ..

- خولة [ كتحرك فودنيها كتخرج منها الما ] :

ناري ياختي بحال الرعدة .. فين خليتي زوجك قرة عينك ؟

- سناء [ كانت كتعرف تعوم ] :

راهو لهيه .. هزوني البنات هزوني .. تشابكو قوت وخولة يديهم .. عنقاتهم سناء من عنقهم وحطات على يديهم رجليها هزوها ولاحوها فالما وهي ميتة بضحك .. كانت كتعوم بحال شي حوتة فالما ..

- قوت كانت واقفة وسط الما كتقاد فالبوني .. هزات عينيها فواحد زوج ونغزات خولة وسناء .. كانو ݣالسات على ركابيهم طالقين يديهم كيشوفو فين أشرات ليهم قوت ..

- خولة [ شافت فيهم ] :

قوت انت ماعندكش مع هاد الاشكال .. [ شافت فسناء ] وأنت مزوجة أختي .. هاد النقلة ديالي انا مكاين ما ولكن ..

- كان شاب باقي صغير فأواخر العشرينات ... داير ݣورميط فيدو وسلسلة فعنقو لابس الشورط .. بشرتو بيضة بحال الحليب .. لحية فالكحل وشعر فالكحل فيه شوية ديال الخويات ..

- خولة مازعزعاتش عينيها عليه حاضيها فؤاد من بعيد مشافتوش ... معارف راسو يعوم ولا يحضيها ولا يلبسها النظاظر تعصب ..

- خولة [ مبسمة وكدير راسها كتعوم مامسوقاش ] :

وحبيتو البنات والله حتى حبيتو ..

- سناء [ بإستغراب] :

أجي شوفيليك ديك مولات الشاپو لي واقفة لهيه بحال الى كتشير ليه لا ؟

- خولة [ ضارت بزربة فين كتشوف سناء ] :

فين هي ؟

- سناء [ كتأشر ليها بحجبانها ] :

وراهي أصاحبتي .. لابسة داك البوركيني لاصق ... بدات خولة كتحقق هي وقوت ... كانت واقفة واحد البنت بشرتها بحال لون الحليب ، ظفارها مصبوغين بالأحمر وداير طربوش كبير فيها واحد الپابيو من جنب ..

- مقادة وجها ومصايباه .. خولة كحلات بالعما فاش شافت داك الدري غادي لجهتها .. تحنى وهزها بين يديه ..

- خولة [ تفقصات ] :.

لا هالعار ماتقولوهاش حتى بضحك واش مراتو ؟

- قوت [ ميتة بضحك ] :

شربي الما ديال البحر .. راه كيحيد الفقايص والمحاين

- خولة [ مفكيسية عينيها عليهم ] :

وشوفليك هازها مالها زحافة .. شتيه كيفاش كيعوم بيها اويلي هادو بغاو يجلطوني ... حشومة اويلي اش هاد الشوهة وقدام الناس بلا حشمة بلا حيا كون غير جبنا ليهم بيت النعاس ݣاع لهنا ..

- سناء [ كتحقق فيهم ] :

وصراحة هدا ماتصرف ما والو ... كيقتل//وني انا هاد الأشكال مكايجيهم رومانسية غير قدام الناس بحال دابا هذا ، هازها ديك الهزها وكيعوم بيها اويلي شووووفو شوووفو ..

- كان خاشي وجهو فعنقها بحال الى كيبوسها ..

- خولة [ خرجات فيهم عينيها مصدومة ] :

أويلي واش هادو من نيتهم ؟ والله القسم الى العياقة هادي .. أختي الى كان بحال هاد الراجل لهلا يعطيه ليا ، السيد ماعندو غيرة على مرتو ݣالس يمطمط فيها قدام الناس بلا حشمة بلا حيا ..

- قوت [ مامسوقاش كتعوم عاجبها الحال ] :

هادو خاصهم القرش يخرج ليهم ... وتشوفي واش غايبقى شي تعناق ديك الساع .

- سناء [ كضحك ] :

ديك الساعات والله لا عقل عليها ... اتلقايه هو كيجري وهي ناسيها .. أختي نمشي عند راجلي هادشي مكايعجب ..

- خولة [ كضحك ] :

سيري أختي يلاه توصلي ... لينا الله .. ، طلعات سناء لعند ياسين وهوما بقاو وسط الما كيعومو ..

- قوت [ حسات براسها عيات ] :

أنا عييت فخبارك وجاني الجوع .. تشهيت اش طبسيل ديال اللوبيا والهريسة ..

- خولة : ناري ياختي حرام عليك ... علاش فكرتيني فيها ، شهيتيني والله حتى تشهيتها ديال هاد البحر نيت ..

- قوت [ وقفات عاطياها بظهر ] :

وزيدي ضربي حلوة خالتك صفية على قلبك ... طلعات سابقاها وخولة من وراها .. حاضيها فؤاد غير هي طلعات طلع حتى هو الكراسة كانو خاويين .. مكانش هاشم تم ..

- صفية [ مدات للقوت وخولة الفوطات ديالهم ] :

وشبعتو عومان مع راسكم ..

- قوت : الما زوين غير نزلو ..

- نعمة [ وقفات ، حطاتها نظاظرها ] :

صفية زيدي أختي جات النوبة ديالنا ... وقفات صفية وتبعاتها غاديين بزوج بشوية عليهم كيهضرو وهوما هازين على كساويهم الطوال ..

- ݣلسو البنات من بعدما نشفو راسهم .. حلات قوت البواطة دالحلوة هزات منها وعطات للخولة ، شافت جهة فؤاد كيبان ليها غير هو بوحدو :

خويا فؤاد بغيتي ؟

- فؤاد [ بإبتسامة ، مد يدو وهز من الحلوة وعينيها على خولة لي مكتشوفش فيه ] :

شكرا أختي ..

- قوت : بصحة وراحة ..

- خولة [ شافت مول بيني ] :

خويا عفاك .. جا لعندها خدات بيني لراسها وللقوت خلصاتو ومشا .. هزات قوت نظاظرها دارتهم ، هزات راسها وعينيها تفيكساو عليه وهو طالع .. لابس غير الشورط كولشي فيك كان مطراسي .. شعرو فازݣ مرجعو للور ..

- بلعات ريقها وحنحنات متنهدة تنهيدة طويلة ... عينيها متزعزعوش عليه مستغلة فرصة ديارة نظاظر فالكحل .. كانو كاع الأنظار ديال البنات لي تم كيشوفو فيه ..

- متميز بزاف بطولتو الواضحة وفورمتو المتميزة .. كتخلي أي بنت شافت فيه قلبها يضرب برهببة وخوف بحال الى غادوز شي إمتحان والأستاذ واقف عليك ..

- بقات متبعاه حتى هز الفوطة ديالو كيدوزها على كتافو وعلى صدرو وكرشو ... حتى نشف راسو ، هز تيشورت نقي فالبيض ولبسو ..

- خولة [ كتشوفيها بنص عين ] :

النظاظر لي دايرة راهم ماشي زاج فيمي أشريفة ... راه عينيك كيبانو بقا ليك اتاكليه عينيك ولاو بحال ديك الوردة لي عندها السنان ..

- قوت [ خنزرات فيها ورجعات شافت قدامها ] :

والله منجاوبك ..

______________

- سلاو التبحيرة ديالهم ... جمعو حوايجهم وطلعو لقاو توفيق وعبد الرحمان كيتسناوهم .. طلعو مجموعين ، واخدين معاهم شنو غايطيبو ، هوما مشاو لدار وقوت وخولة وسناء وياسين بقاو على برة مغطيين بالفوطات وݣالسين فالقهوة كيتسناو فطورطية ..

- غير تغداو وشدو الطريق للدار عيانين العظم الصحيح مابقاش عندهم كانت الخمسة ديال العشية ..

- دخلو لدار كيسمعو الما كانو البقية كيدوشو ..

- قوت : خولة نمشيو للبال هو الأول وعاد نرجعو ندوشو ونرتاحو يلاما نخرجو اليوم أصلا المهرجان اليوم جايبين غير داك سامي راي مكايعجبنيش ..

- خولة : صافي واخا ..

- غسلو رجليهم وحيدو البوركيني ... خولة لبسات اتيشورت وسروال كيطمة .. أما قوت لاحت عليها واحد العباية هزات واحد الساك كديرو على جنب ، علمات مها وخرجو بزوج فتجاه الجوطية ..

- غاديات فتجاه الجوطية وكيتسراو بعينيهم .. وقفو عند واحد عندو المحال كيبعي غير الشكالط وطورون ..

- قوت [ هزات واحد البكية ] :

خويا بشحال هذا ؟

- 13 درهم خود أختي مرحبا .. حطاتو وهزات راسها فيه مع إبتسامة :

واخا خويا نتسخرو ونرجعو .. جرات خولة تمو غاديين :

حنا عندنا طورون ب 30 درهم وخفيف .. شفتي على مزينو ب 13 درهم .. احتى نكونو راجعين غادي ندي معايا ساشية كبيرة عامرة ..

- خولة : ماشتيش ميلكا شحال ب 6 دراهم ... تبارك الله ياختي كولشي زوين ورخيص ... وصلو لبلاصة البال لقاو صحاب البال يلاه ايبداو يقادو بلايصهم ..

- قوت [ وقفات دايرة يدها على جنبها ] :

دابا شنو غادي نديرو نرجعو لدار ولا تبقاو ندورو ؟

- خولة [ أشرات ليها براسها ] :

أجي نشوفو دوك المحالات .. شتهم دايرين 50 درهم ، شدات فيها قوت وتوجهو لواحد المحال ، دخلو ليه كانو فيه سروال ديال الدجين والكساوي قوامج كان فيه كولشي ... حوايج 50 وحوايج 100 وحوايج 150 ..

- هزات خولة واحد الكسوة نازلة لتحت الركبة وقفاتها عليها شافت فقوت :

كيجات ؟

- قوت كتشوفيها مصغرة عينيها .. حركات راسها بنفي :

اللون مازوينش .. البيج مكايجيش معاك وصيف دابا خاصك شي لون يكون زوين شوفي ديك البيستاج ..

- رجعات خولة ديك الكسوة لي هزات وهزات الكسوة لي وراتها قوت ... نباها دري لي فالمحال :

الى بغيتي تقيسي راه كاين فين ..

- خولة : واخا خويا .. تبعات دري للبلاصة فين كيقيصو .. دخلات سدات عليها قيساتها وتعصبات .. بدات كتعيط على قوت حتى جات دخلات عندها طلعات ونزلاتها جاتها الضحكة :

وختي ديري ريجيم ونقصي من طولك ..

- خولة :

كتريݣلي دابا .. من الكمايم وصدر هي هاديك .. ولكن فورمتي معزولة وجات قصيرة ماشي طويلة كيف تخيلتها ..

- قوت : راه حيتاش انت تبارك الله طويلة .. وفورمتك عندك التحت خاصك دوك لي كيهبطو كلوش من تحت ، صافي خرجي شوفي غيرها ..

- حيدات ديك الكسوة ولبسات حوايجها ، خرجات لعند ياقوت حتى حاجة ماعجباتها اخر حاجة ستقرات عليها هي واحد السروال ديال الدجين ..

- قوت خدات واحد زوج قوامج واحدة فالغوز بارد .. او وحدة فتيركواز .. خلصوه وخرجو هازين ساشيات ديالهم .. دخلو مع واحد الزنقة كيدورو وهوما يدخلو لواحد البزار فيه ديكورات كثيرة مرايات كيسان غير داكشي العتيق الأرتيزانة .. صورة كبيرة ديال تشيكيڤارا، أقنعة ديال المسارح كان محال فيه كاع لي تبغي العين .. ولكن غير لي عندو عين فنية وكيعجبو هادشي ..

- ختارت قوت شي ديكورات زوينين واخا كانو غاليين شوية ولكن كانو فنين .. او واحد صنيديق ديال الاكسسوارات حتى هو خداتو .. أما خولة ماخداتش حيت ماعندهاش مع داكشي .. خرجات هي وياها من تما وكملو المسارية ديالهم .. حتى بدات الشمس كتمشي وكتبرد ، وقفو عند واحد السيدة عندها كروصة .

- خداو عصير ديال الحامض ... عاد توجهو للبلاصة البال دخلو ليها من واحد الزنيقة أخرى عاد خرجو ليها ، كانو صحاب السوتيامات وسليبات بوحدهم وعاد صحاب الحوايج وعاد لي حاطين بيجامات ..

- وقفو عند مول السوتيامات هو الأول كيعزلو .. خدات قوت 5 وعاد 5 ديال السليبات .. وخولة حتى هي بحالها ، خلصوه وتوجهو عند واحد كيبيع حوايج العصري ..

__________

- فدار عبد الرحمان هز راسو للساعة وشاف فصفية :

هادو تعطلو من 3 ونص 6 هادي ومزال مجاوش بزااف

- صفية : واش انت عارف الجوطية كيف كتكون بناس .. راه لي كيمشي ليها راه كيتعطل ..

- توفيق : الله يهديك الحاج .. راك عارف البنات شوف هادي قيس هادي بسيف مايتعطلو ..

- فؤاد [ بهمس ] :

ياكما يكونو خوتنا دالبارح تلݣاو ليهم ؟

- هاشم [ هزهز بكتافو ] :

الله وعلم .. بغيتي تمشي تقلب على رزقك سير اخويا ... انا فوت ليا دماغي باغي غير نرتاح ..

- فؤاد : زعمة زعمة مهامكش ؟

- هاشم [ ببرود ] :

ولاش غايهمني [ أشر ليه لجهة الباب ] راه الباب راه الطريق ..

- توفيق [ شاف لجهة فؤاد او ولدو ] :

هاشم سير أولدي الله يرضي عليك أنت وفؤاد شوفو البنات فين تعطلو ..

- فؤاد [ جاتو الضحكة هز يديه بإستسلام ] :

الحمد لله ماݣلت والو ..

- هاشم تزنزل مالقى مايقول .. نفس كيطلعها غير بزز عيان مسخسخ مافيه لي يخرج ..

- عبد الرحمان : الله يرضي عليك أولدي لايمشيو يتجلاو ولا يتلݣى ليهم شي حد ..

- هاشم [ ناض مادواش لبس كلاكيطة فرجليه وخرج تابعو فؤاد ] .. :

دريات صغار غايتلفو .. تخربيق ، واش هوما لي باغيات يمشيو لجوطية واش انا مربية نتبعهم نجيبهم ..

- فؤاد [ ببرودة ] :

وصاحبي انت مول لقلب الكبير .. دير الأجر ونساه الواحد هو لي يدير الخير ..

- هاشم [ خنزر فيه بنص عين ] :

فوتني عليك هاد الساعة الله يرحم جدك ... ودابا فين غانقلبو على هاد خياتي يلاه ..

________________

- واقفات كيعزلو فشي بيجامات .. حتى تدفعات قوت شوية متجي فوسط الحوايج .. ضورات راسها وهي تشوفيها وحدة ونطقات :

پاغضو .. ، شافت فيها خولة وطلعاتها من رجليها لراسها ، كانت لابسة شورط قصير ديال دجين بحال شكل ديال الكيلوط تماما .. يعني مغطي غير المؤخرة ديالها للدرجة للحمات دالمؤخرة باينين .. من الفوق مكانتش لابس سوتيمات بتاتا ..

- لابسة ديباردو مشدود بالخيوط من الظهر الكرش كلها عريانة واشمة جنب كرشها وساݣها .. دايرة بيرسينغ فحاجبها ونيفها. .

- معاها وحدة طالقة شعرها ولابسة ݣندورة منها للحمها مع الكيلوط .. قوت مازݣات فيها الشوفة دورات راسها ناطقة بهمس :

لا حول ولا قوة إلا بالله العلي العظيم ..

- كملات التقلاب قوت هزات واحد شوميز عجبها .. هزاتو فيديها هو واحد ديباردو ديال التحت ، حطاتهم حداها باش تقيس واحد تريكو ... كاتبان ليها لي دفعاتها هزاتو من حداها كتقلب فيه ..

- قوت [ شافت فيها ونطقات بهداوة ] :

ختي هداك ديباردو لي هزيتي راه ديالي ..

- [ شافت فيها كتندغ المسكة ] :

كيفاش ديالك مكتوب بسميتك مخلصاه ؟

- قوت [ كتحاول تبرد ] :

ختي راه مامحطوطش فتيساع ... راني حاطاه حدايا هو وهدا حطيتهم غير باش نقيس .. وانت جيتي وهزيتيه راه حشومة ..

- [ رضات عليها ] : حشومة لقيتيني خاشية يدي فجيبك مثلا .. زوينة هادي ، حتى تكوني مخلصاه ونتفاهمو ..

- خولة [ مكاتصبرش بحال قوت ] :

الأخت دفعتيها جبتيها على فمها ... سدينا كابينتا ماݣلنا والو ، ولكن هاد قلت الترابي لي كديري فيه راه نقزتي السطر ..

- وانت مالك دايراك محامية ديال الدفاع ، كترتو [ طلعاتها ونزلاتها ] ..

- خولة [ مغزفة ] :

برب الكعبة وماتحطي داك ديباردو حتى نتشامو الݣراصن ... حيت ساهل نشمو ݣرصونك راه هو نيت لي لابساه ..

- مول البال : نعلو شيطان أشباب ..

- خولة [ طلعاتها ونزلاتها ] :

الشيطان هو بنادم .. منين تشوف بحال هاد شكل قدامك كاين شي شيطان أخور

- نقزات لوخرا مولات الكندورة :

قليلة الترابي عروبية ..

- خولة [ صافي شعلات ] :

عاودي أش ݣلتي ؟ .. قوت كتحاول تكالميها مابغاتش الشوهة .. :

صافي خولة خليها تربح بيه ..

- خولة [ بغات تدوز ليها ماخلاتهاش قوت ... نقزات فوق الطبلة ديال السيد فوق الحوايج ولات كتبان بحال العلام بطولتها .. ] :

أنا عروبية ..

يتبع...