مجدول الذهب الجزء الثالث

- نسمة [ تقدمات منها كتمايل بخطواتها ] :

انت لي تمنيتي تبدلي الحكاية ، وحنا لبينا .. وأنت دابا ماعليك غير تكمليها وتجمليها وتوفيها ..

- قوت [ مزال ماستوعبات ] :

أنا ماتمنيت وماتسنيت ، حدي ماعجبني الحال منين لقيت بلي الحكاية ناقصة ومكاملاش ، شكون انتوما هالعار ، واش انتوما خدام هاد الكتاب ولا كيفاش ؟

- نبتة [ تنهدات تنهيدة طويلة ] :

مجدول الذهب ، تكتب بيد موحا الوزير ، اليد ليمنية لمولاي السلطان .. كتبو حرف بحرف ، وݣمطو بجلد الحر ، ونبتو بذهب واد مجدول الذهب ..

- إيوا مسكين ، منين كان غادي مع واحد الݣافلة ، تعرضو ليهم الݣطاطعية .. وسرقوهم وداو ليه حتى الكتاب ، ايوا بقا كيتكركب من سوق لسوق ومن بلاد لبلاد ، أخرتها طاح فواحد المتمورة ..

- قطرة [ دارت بجلايلها مبسمة ] :

حتى لنهار لي الكتاب ، طاح فيد مرة حكيمة لبيبة ، سميتها مرجانة .. وباش تحميه وتحرسو ، زممات عليه ب ربعة ديال العقدات ، وهاد العقدات هوما حنا ..

- ولكن الكتاب ، تقطعو منو جوج ورقات الاخرات .. وهادشي لي خلا لالة مرجانة ، تزميمتها تكون ليها حكمة ..

- قوت [ بإستغراب ] :

أشمن حكمة هادي ، والى كانت زممات عليه ، وخلاتكم انتوما تحرسوه وتحميوه .. علاش لقيتو انا وبنتو ليا ..

- شعلة :

الكتاب ، تدفن فواحد المتمورة ، وديك المتمورة ، من بعد زمان رجعات مكتبة الحكمة فين لقيتي الكتاب ، وانت اول وحدة تلقاه من هادي سينين وسينين ..

- قوت [ هادشي جاها غريب ] :

وعلاش مالقيتوش كولو غبرة ؟ والى تدفن فالمطمورة اش جابو للمكتبة وفداك الحيط ؟

- قطرة :

الكتاب ، كيختار مول القلب الصافي ، يقراه ويكمل الحكايا ، وهادي هي تزمينة لي زممات لالة مرجانة ، التزميمة لي عطات ، هو الكتاب مايرجع يتحل غير على يدين وحدة ، حكيمة ولبيبة وقلبها صفى من الحليب ، ماشي وحدة لفعى دميمة ..

- نبتة :

وهاد الحكيمة هي لي اتبدل الحكاية ، وتكمل الصفحة لي تقطعات .. ونهار لي تكمل الحكايا كيما خاصها تكون ، الكتاب ايتبخر ، بحال الغيمة صافية ..

- قوت [ تنهدات تنهيدة طويلة] :

انا ماحكيمة مالبيبة ، انا وحدة دليلة ، عشقات وبغات راجل لي عمرو فكر فيها ولا ساومها .. واش وحدة بحالي اتقد تكمل الحكايا ، وحتى الى بغيت نكملها كيغاندير ، وانا قليلة العرف والحيلة ..

- نسمة [ ضحكات بصوت رنان ] :

وشوفليك هاد الهبيلة الغشيمة ، لي كتب الكتاب .. كان بملوكو ، كاع طاقتو ولات وسط الكتاب ، اما لالة مرجانة ، متكدبشاي ، ومدام الكتاب طاح فيدك وختارك ، فراه عرف اش ختار .. اما داك ولد المختار ماشي من سومك الالات البنات ..

- شعلة [ طلات عليها من ورا ظهرها حتى قفزاتها ] :

انت سومك عالي ، وعالي بزاف .. سومك يتوزن بذهب الحر .. وخلاتها مولاتها العاتق الى بارت على رزقها دارت ، وانت كلما تعطلتي شانك ايزيد يعلى ..

- قطرة [ غمضات عينيها] :

وانا اش كنشوفليك اقوت القلوب ، سما عالية مزينة بنجوم زينة ضاوية ، وݣمرة كتبري فسما الليل ..

- قوت مداتهاش فكلامهم ] :

والديا ، ايقلبو عليا ومايلقاونيش .. كيغاندير ليها يهديكم الله ..

- نبتة :

ماتخافيش الهبيلة ، من هاد الوقت لديك الوقت حد مغايحس بغيابك ، غير هو مخاصناش نضيعو الوقت ، ونخدمو الحيلة ، باش نكملو الحكاية وكل يقصد بلادو يازينت البنات ..

- قوت [ بقات ساكتة حسات براسها وحلات وماعندها فكاكة ] :

واخا دابا شنو المطلوب مني ؟

- جراتها قطرة من يدها ليمنية ونبتة من يدها ليسرية ، اما شعلة كانت وراها ونسمة قدامها كتنقز بحال شي بنية صغيرة ..

- قطرة : شنو قريتي فأول الكتاب .. ؟

- قوت [ مݣيدينها بحال شي معزة ] :

دابا لي قريت هو مولاي سليمان ، مزوج ولكن مراتو مكتولدش .. وهو تغرم بالخادم بدر السعود ، وحملات منو او ولدات ولد ، ولكن مراتو الياقوت ماعجبهاش الحال ، وحيت هي مشرارة .. هددات بدر السعود ، الى ماخوات قصر مجدول الذهب غاتصفيها لولدها ..

- وبد السعود ، هزات ولدها ومشات للقبيلة زناتة لي لاصقة على قبيلة مجدول الذهب ، وتزوجات بواحد التاجر ، وهو لي ربا مولاي الغالي .. ولي بقا فيا هو مولاي سليمان ، لي مسكين على فراش الموت ومزال ماعرفش بلي عندو ولد ..

- ولي زاد خلا عقلي بحال الى تضرب بمقص حافي ، هو الياقوت ، لي ساقت الخبار بلي ولد راجلها عايش .. ودابا سيفطات الخادم ديالها حريريش يتلݣاو ليه مع القطاطعية ، ويسدو عليه الݣافلة .. يقت/لوه ويغبروه .. وهنا حبست حيت الوراق تقطعو ، وماعرفتش اش وقع فالحكاية ..

- شعلة [ جات قدامها ] :

الحكاية انت اتبدليها ، ولسلطان سليمان أتوصليها .. وانت تكوني خيط الوصل بين مولاي الغالي وباه ..

- قوت [ وقفات كتشوفيهم وحدة بوحدة ] :

لالا انتوما حفا ليكم القرشال على مبان ليا .. كيفاش انوصلها للسلطان ، انا نكون قريبة من ديك خبيثة النفوس الياقوت ، بغيتوها تغبر ليا الاثر .. وشكون غايتيقني وبصفتي شكون ..

- انا هادشي لي كنعيشو ومزال مادخلش ليا للعقل ، وانتوما كتقولو ليا ندخل لعند السلطان لالا ، بغيت نرجع بحالي ..

- نسمة [ ضحكات ] :

قوتة قوتة وا لياقوتة ، م ماعندكش فكاكة وماتقديش ترحعي الى ماكملتي الحكاية ، هكا قالت لينا لالة مرجانة ، ماعندك حيلة من غير تكملي المكتوب ..

- قوت [ بانت ليها صخرة وݣلساتعليها كتستوعب ] :

واخا نزيد فهبالكم وفهاد الملاغة لي ماعندها ساس ولا راس ، كيغاندير ندخل لقلب قصر السلطان سليمان .. وكيغاندير نخليه يتيق بيا ، ونسلم من بطش الياقوت مراتو ..

- قطرة [ تكات قدامها موسدة يدها ] :

ساهلة ماهلة بحال هاد القطرة [ رشاتها بالما ، واخا مكان تم لا واد لا عوينة ، مابغاتش تجري معاها باش متبينش خوفها ] .. قبل لا دخلي للقصر مجدول الذهب ، خاص تكسبي قلب بدر السعود ، ودخلك لدارها وتكسيك بكساتها ، وتشربي من ماها .. وتاكلي من ݣمحها .. وتغسلي فماعونها ..

- نسمة :

وهكا غاتكسبي قلبها ، وتحكي ليك حكايتها واخا انت فخبارك الامة كلها ، ولكن باش متفضحي سرك وتبيني طينتك .. خاصك ديري راسك غشيمة .. ،وباش دخلي للدار الغالي ، خاصك ديري راسك بنت باب الله تقطع بيك الحبال ..

- قوت : والى عاق بيا مولاي الغالي

- نبتة :

انت غير تهناي ، مولاي الغالي مكايعمرش الخيمة ، كيخرج مع التجار لدواور .. انت منين تكسبي قلب بدر السعود ، اتعرضي عليها الفكاكة من ديك الحالة ، وهنا يجي الدور باش دخلي لقلب القصر ، وتعفطي بلحافك على الياقوت ، وتخبري السلطان بلي كاين ، وهنا مولاي الغالي وبدر السعود غاينجاو من بطش ديك المشرارة ..

- قوت [ طلق ليها لسان ونسات بلي لي ݣالسة معاهم ماشي إنسيات ولكن هوما من مالين المكان ] :

ايوا نقولو لالة بدر السعود ولقينا ليها الفكاكة كيفاش ندخلو لقلب دارها ، والياقوت .. عارفينها طير مع طيور ، والله حتى تغبرني ومايلقاو ليا مكان ..

- نبتة [ ضحكات بصوت عالي ، حتى طيور طارو وعلاو من الشجر ] :

واخا طير حتى تعيا ، ماتوصلش لينا .. واش نسيتي بلي حنا حارسينك ومعاك ، ومانخليو أدى يمسك ولا يضرك ، تهناي ونعسي على جنب الراحة ..

- شعلة [ شافت فنسمة ] :

كيغانخليوها تدخل للقصر السلطان من ورا ما تكسب قلب بدر السعود ..

- نسمة [ كانت ساهية فقوت ] :

قوت ، خبريلي ، اش كديري لشعرك كيف حرير دودة ، وكحوليتو بحال عينين البومة ..

- قوت [ على نيتها ] :

كندير الزيوت كنصايبهم بيدي ، هوما او وجهي كندير غير الطبيعي بيديا .. فينما حرفات ليا ، نخرج خلطة من جنب بلاما ندوي على الحنة وعشوبها ..

- نسمة [ شافت فشعلة تبسمات وغمزاتها ] :

والياقوت ، يحفا ليها العقل ومايدوز خط الزمان فوجها ، تموت وشعرها يولي كيف سالف هاينة ..

- شعلة [ ضحكات ] :

والله الى راك لبيبة اختي نسمة .. وهاحنا لقينا كيفاش قوت تدخل للقصر مجدول الذهب .. وتصاحب الياقوت .. ولكن خاصنا لقاو ليها شي سمية ، مخاص حد يعرف سميتها الحقيقية ..

- نبتة [ نقزات ونقز الأرنب لي بين يديها ] :

لقيتها ، [ شافت فيهم ] :

غانسميوها حليلو ، حليلو مولات 7 عشوب ..

- قبيلة مجدول الذهب ، قبيلة لي معروفة بناسها الكرماء أهل الحكمة والفهامة ، أهل الكليمة الزينة وشهامة .. ناسها مضيافين وعمرهم كانو مشرارين ، يفتحو ليك باب الخيمة واخا يعرفوك ماشي أهل الدوار ..

- ناس الدواور لاخرين معروفين بالماشية ، ولكن هوما معروفين بذهب الحر ، علاش لا والواد عندهم كنزو غالي ، كاسيهم وموكلهم ، من الذهب لي فيه .. تسمات بمجدول الذهب من زمان ، وسماها اول سلطان حكمها .. على الواد لي كان جاي من راس الكدية ، حتى للخرجة .. كان ضاير بحال شي مجدول ، وحيت هو كيعطي الشهد ولي هو الذهب ، سماوها مجدول الذهب ..

- فالخرجة وعلى بعد مسافة ، كانت لاصقة عليه واحد القبيلة ، قبيلة بن موسى .. مكانتش كبيرة بزاف بحال مجدول الذهب ، كانت معروفة بواحد السوق كيكون من الخميس الخميس .. واقفة فيه جامعة شعرها بزيف ، ولابسة قفطان فزرق توبو شوية بالي وخشين ... دايرة عليها حايك فالبيض ، عينيها كيدورو والخلعة مزال راكبها من ساسها لراسها ..

- تفكرات كلام نسمة ليها :

وياك تخلعي الى سمعتي لغايا حداك وماشتيش خيالي ، هاديك غير أنا ، غانكون معاك منين تحطي ݣدمك فسوق بن موسى ، ماتخافي مادهشي ، ماتبيني خوفك لعيان ونصدقو مفروطين قدام العادي والبادي ، ويقولو هادي غير حمقة وهبيلة .. بحال بالعمان الحمورية وقلة الريحة ..

- شعلة :

كساتك غاتبدل ، وكيف وصيناك .. عندك تزلقي فالكلام اقوت ، انت من هاد الوجيبة سميتك حليلو ، ديري لي عليك وكملي هاد الحكاية ، باش تهناي وحتى حنا نتهناو معاك ..

- نبتة [ هزهزات بكتافها ] :

راه حتى حنا عندنا شلا مايدار ، خلينا ديارنا وناسنا او ولادنا ..

- قوت [ بلعات ريقها بإستغراب] :

علاش انتوما عندكم الولاد ؟

- نبتة :

ومالنا ماعليناش الله ، غير انتوما لي عندكم الرجال والولاد ، وزوينة هادي ..

- نسمة [ ضحكات بغنج وبانت تبسيمة بهيجة على شفايفها ] :

من غيري انا ، مزال مادة يدي للحنة وكنتمنى [ طلقاتها بضحكة رنانة ] ..

- شعلة [ خنزرات فنسمة ] :

اهاديك عود الريح ، هنينا واش حنا فزواج دابا ، قوت سمعيني مزيان ، بدر السعود مرة زينة ، تشوفيها تعرفيها بلاما تحتاجي تسوال .. وباش تميزيها ، عندها الوشام فجبهتها وتحت فمها .. والباقي راه قريناه ليك بالحرف ..

- قوت [ هزات ليها براسها ] :

صافي غانقول ، بلي با مشا مع الݣافلة ، ومابقاش رجع لينا .. وجابو خبارو بلي مات ، ومي تزوجات وراجلها جرا عليا .. وانا بقيت من بلاد لبلاد حتى رجليا جابوني لهاد الدوار ..

- شعلة :

هكاك ، وحنا راه غير تعيطي لينا تلقاينا حداك ، انا من نار نخرج ليك ، ونبتة من شجيرة تطلع ليك ، أما قطرة راه من حفنة ميها طل عليك ، أما نسمة اتبقى ديما حاضياك ودور بيك ..

- تفكرات كلامهم ليها ، بقات ݣالسة .. حتى كاتبان ليها واحد السيدة دخلات لسوق ، كانت لابسة حايك فالكحل ، فرشات واحد اللحاف ، وحطات عليه شي منادل ديال الكتان .. بقات مقابلاها وحاضياها ، حتى باعت ، وقربات الشمس تغرب .. حسات بالبرد حداها .. وسمعات صوت تردد وقفزها :

بدر السعود قدامك .. عرفاتها بلي هي ، غير هي هزات قشها وخرجات من السوق وقوت تبعاتها ، بقات غادية وراها حتى بانت ليها .. حلات باب دارها ودخلات ..

- قوت بقات واقفة مدة ، وهي تمشى خطوات حتى كانت قدام باب بدر السعود ، هزات يدها وشدات فالحديدة ديال الباب ودقات بيها زوج دقات .. بقات مدة وهو يتحل الباب صادر صوت جرة مبين على قدوميتو .. كانت واقفة بدر السعود كتشوفيها بإستغراب ، بصوتها وقور وتقيل :

أش حب الخاطر أبنتي ؟

- قوت زݣات فيها الشوفة ، كانت مرأة كبيرة .. مامعطيش ليها السن ديالها ، دا منها الزمان وجاب ، ولكن كانت مزال محتافظة بلامح الزين والبهى ..

- قوت [ بلعات ريقها ] :

لالة ، الله يجازيك بيخير ، فيا الجوع والعطش هادي يوماين ماكليت ..

- بدر السعود بقات كتشوفيها :

علاش ابنتي أنت منين أول مرة نشوفك فهاد الدوار ؟

- قوت :

أه من من دوار ولاد بن عبيد .. با مشا مع الݣافلة ، ومابقاش رجع لينا .. وجابو خبارو بلي مات ، إيوا ناضت مي تزوجات وراجلها مابغاش معاها الزايد ، ناض وجرا عليا ، لا أم تحن عليا وتوقف فوجه راجلها ولا حنين ولا رحيم يعطف عليا ، مابقات عندي حمية .. إيوا انا شديت الرحال ، وبقيت من بلاد لبلاد حتى رجليا جابوني لهاد الدوار ..

- بقات واقفة بدر السعود كتشوفيها هزهزات براسها وزادت حلات الباب :

دخلي البنتي دخلي .. حدرات قوت راسها ودخلات ، المراح كان كولو غير بالسيما ، مفرشة حنبل فالحمر مع هيادر ... واحد الطبيبة صغيرة فالوسط ..

- بدر السعود : ݣلسي أبنتي مرحبا بضيف الله ..

- ݣلسات قوت ، وبدر السعود دخلات للداخل ، بقات قوت غير كتشوف فدار ، كانو فيها زوج بيوت .. واحد شاعل فيه الضو ، كيبان مفرشة فيه حنبل بحال لي فالمراح ولكن كان فالبيج .. مع مانطات ومخاد ، وعاد مانطات مطويين ومحطوطين فالقنت .. والبيت لاخر كان بحالو ، كانو معلقين فيها جلالب رجالية وسلهام ، وقدام العتبة محطوطة بلغة فالصفر ..

- قاطع تفكيرها بدر السعود ، ليجابت ݣلة ديال الما وغراف ديال الطين مداتو ليها تشرب ، خداتو من عندها قوت ، شربات منو .. ماه كان بارد وبنين عمرها شربات بحالو ، رجعات وفيديها الخبز وزلافة فيها الحسوة ..

- بدر السعود :

هادشي لي لقيتي عندي هاد الساعة ، ولدي خرج مع الݣافلة ، كان خاسو هاد العشية يكون هنا .. على مكايبان ليا مزال معطل شي يوماين كيف عوايدو ..

- قوت [ هزهزات براسها ] :

الله يعاونو .. بدات كتشرب فديك الحسوة وتاكل فداك الخبز حتى سلاتو .. حطات ديك الزلافة ونطقات :

الله يجازيك بالخير الالة ، أنوض نمشي ..

- بدر السعود [ حبساتها بكلامها ] :

ݣوليا ليا ، فين كتباتي ؟

- قوت [ جاوباتها بصوت رقيق ، غالبة عليه الحشمة ورزانة ] :

كل مرة فين ، مرة تحت شي شجرة ، ومرة حدا الواد .. مرة موسدة يدي ومرة موسدة شي حجرة ..

- بدر السعود :

أبنتي الوقت خايبة ، وتخافي غير شي نهار طيحي فيد شي حد قاطع بدو من يد الرحمان ، لا تقري الأمان فالغريب ، عرفتي مايجيك مليح ، باتي هاد الليلة هنا .. والغد يصبح ويفتح ..

- قوت [ بشكر وامتنان ] :

الله يجايك بيخير الالة ..

- بدر السعود : قولو ليا غير خالتي بدر السعود ، وانت أش سماك الله ؟

- قوت : سكيتي حليلو ، وكانو يقولو ليا حليلو مولات 7 عشوب ..

- بدر السعود [ ضحكات ] :

سميتك غريبة عجيبة ، بلاتي نجيب مناكول ونزيدك حسيوة ونجي تعاودي ليا سر هاد السمية الغريبة ..

- مشات بدر السعود ورجعات ومعاها حسوة زايدة وحقها هي ، ݣلسات وبدات قوت كتعاود ليها على سر سميتها ..

- سماتني مي حليلو ، على لي قالت ليا بلي نهار تزاديت كتر عليهم الخير وتيسير ، وربي فتحها فوجهم من كل جيه ، داكشي باش سماوني حليلو .. أما 7 عشوب ماسماوني بيها ناس القبيلة حتى كبرت .. كيشتي كانو يقولو شعري زين ، بحال سالف هاينة هههه .. كنت تهلى فيه بزيوت والعشوب ..

- ودوك زيوت ولاو يطلبوهوم مني ناس القبيلة ، ولا عليهم الإقبال ، وليت الى صايبتهم اليوم الغد كنبيع كولشي ، واخا راجل مي كان ياخود ليا كاع الفلوس ..

- بدر السعود [ بدات تفوه بنعاس ] :

عندك الذهب فيدك احليلو ، مزيان ابنتي الحرفة الى ماغناتك تعيشك .. انا ابنتي نوض نعطيك لحاف تغطاي ، داتني عيني وعييت ..

- دخلات للبيت لاخر وشابت ليها واحد اللحاف او واحد الخدية عطاتهم ليها ومشات تنعس ، قوت توسدات الخدية وعلات راسها لسما .. تنهدات تنهيدة طويلة ، كتخمم وتفكر نطقات بصوت شبه مسموع :

الزهر ماعنديش ، فاش قلت الميمون تسݣم وهاني لقيت خديمة ، كنطيح على كتاب ، وماشي أي كتاب .. مرجعني لأيام الزمان ، مايقبلوها لا عقال لا هبال ..

- ايوا بحال هادشي كيوقع اقطيب الغزران .. قوت تنفضات من بلاصتها ، خنزرات فنسمة لي كانت متكية قبالتها :

نسمة براكة من هاد البسالة .. كل مرة تطيحيلي الما فركابي ، الناس يدقو يحنحنو يهديك الله ..

- نسمة [ ضحكات بأنوثة ] :

ياربي تهديني ياربي ، سمحيلي ماتديش عليا ، والله ياقوت .. كون غير كنتي ختي ..

- قوت [ نفتات فعبونها ] :

دكرنا السمن والعسل ، هادشي لي كان ناقص ، نسمة اش بغيتي اختي عندي خليني نعس نفكر اش غاندير فصبحية ..

- نسمة [ هزهزات كتافها ] :

لا انعس هنا ، حداك انت غير نعسي وانا حارصاك .. ماتخافيش مكاين لي غايحس بيا من غيرك ..

- قوت مجاوبتهاش ، عطاتها بظهر ونعسات ..

- فاقت مع السروية ، هادي هي عادتها .. كتقلب على ميها حتى لقاتها يلاه توضات حتى وقفات عليها بدر ..

- قوت [ تفافات مزال ماتعودات ] :

صباحك مبروك خالتي بدر السعود ، نضت كنقلب على ميهة بغيت نتوضى نصلي ..

- بدر السعود [ عجبها الحال ] :

واخا ابنتي ، حتى انا نيت بغيت نصلي .. انا نرض الما يطيب .. رضات الما طاب ، توضاو بزوج وصلاو بزوج .. وجدات بدر السعود الفطور معاوناها قوت .. ݣلسو كيفطرو حتى نطقات بدر السعود :

ودابا ابنتي اش ناوية ديري ؟

- قوت [ تنهدات تنهيدة طويلة] :

الديار ديال الله أخالتي ، ماعندي مندير ، نكمل طريقي ، ربي مقسم ليا رزقي .. ولي جات من عندو مرحبا بيها ..

- بدر :

أش بانليك ابنتي ، تبقاي معايا ، ولدي الغالي مكايعمرش معايا بزاف .. حدو يجي يطل عليا يعمر بيت الخزين بالمونة ويشد الطريق .. وكنبقى بوحدي بلا ونيس ، اش بان ليك نحطو الراس على راس ..

- قوت [ هزات فيها عينيها الكحيلة ، ونطقات بصوتها الرخيم الحنين ] :

ومانتقلش عليك أخالتي ؟

- بدر السعود :

أشمن تقولية ابنتي ، فينما تحطات يد تحط 10 ، بالفرحات عليا .. حسبيني بحال ميمتك ، كنت كنتمنى تكون عندي بنت نخاوي بيها الغالي [ تنهدات ] ولكن ماكتابش ايوا أش قلتي ؟

- قوت [ هزهزات راسها ] :

واخا أخالتي ..

- بدر السعود :

انا انزل لسوق نتقدا شوية دالخضرة ، بيت الخزين قرب يخوا ، والغالي باين مطول هاد النوبة .. نخليكفدار ماتخافي شاي ..

- قوت :

غير تهناي أخالتي ، انقابل الدار ونشغل راسي بشغال انت غير سيري الله يعرضك السلامة ..

- خرجات بدر السعود وخلات قوت فدار ، نفضاتها وقداتها خوات الما وسيقاتها بشطابة ديال الشطب ، محنية وضرب فالما .. مع كملات مع دخلات بدر السعود ، زولات ليها ديك الخضيرة من يديها غسلاتها ودارتها فواحد الشبكة دالخشب تسقطر ..

- نصبات طاجين بدجاج وخلاتو كيطيب ..

- بدر السعود [ كانت فرحانة بقوت ، جابها ليها الله بحال الميمون ] :

الله يرضي عليك ابنتي .. ميمتك كانت عندها نقرة صافية وضيعاتها من يديها .. رضيتي الدار كتشعل ..

- قوت :

هانية أخالتي ، انت حليتيلي باب دارك عطيتيني من شرابك ووكليتيني من طعامك .. هادشي وقليل فحقك ..

- كملوها بالهضرة بالهدى وضحكة ، حطو الغدا تغداو .. او وراها تكاو يريحو .. بقاو على هاد الحال غير هي وياها الراس فراس .. ولاو يخرجو بزوج ويدخلو بزوج ..

- نسمة وقطرة وشعلة ونبتة ، كانو مرافقينها صباح والليل ، حاضيينها .. كانت غادية على الخطة لي كانو حاطينها ..

- دازت سيمانة على وجود قوت فرحبة بدر السعود ، كانو ݣالسين بليل ورا العشا متكيين .. حتى نطقات قوت :

خالتي بدر السعود قولي ليا ، واش انتوما من هاد الدوار زيادة وخلوق ؟

- بدر [ تنهدات تنهيدة طويلة] :

- لاواه ابنتي ، أنا من قبيلة مجدول الذهب ، واحد القبيلة غير حدانا هنا ..

- قوت : وشنو جابكم لهنا ..

- بدر السعود [ هزات راسها لسما وسهات ] :

ايه أبنتي فاش فكرتيني ، فواحد الحكاية دازت عليها كثر من 3 العقود هادي .. اييييه ابنتي .. [ 10 سنوات كتساوي عقد كامل يعني كتر من 3 عقود هي كثر من 30 سنة]

- قوت [ تقادات فالݣلسة ] :

سمحيلي اخالتي ، قلبت عليك الوجع ماقصدتش ..

- بدر السعود [ شافت فيها ] :

عمر ابنتي مانسيت باش تفكريني .. اييييه ابنتي أش داز على هاد الخلقة لي قدامك هادي شحال .. كنت ساكنة انا وبا ومي ...

- كنت ابنتي زينة بين بنات القبيلة ، شحال من مرة جاو فيا الخطاب وبا مكانش كيبغي يعطيني .. حتى لواحد المرة جا فيها با ، وݣاليا جمعي الوقفة اتخدمي فدار مولاي السلطان سليمان .. ماكنتش بغيت نخدم خادم عندهم ، سمعة مراتو الشينة كانت واصلة لݣاع القبيلة ..

- كانو يعاودو عليها ناس لقبيلة بلي مشرارة ، ربي ماعطاهاش الولاد ، وكاع الحر وسم كتخرجو فالخدم لي عندها .. ولكن با ماسمعش ليا ، وداني للعندهم خادم .. مانكدبش عليك ابنتي وراتني الويل الكحل ..

- فاش كايكون السلطان فالقصر ، كتدهن ليا وجهي بالحموم ، كانت كتغير مني ، وكتخاف لا سلطان يشوف فيا .. وداكشي لي خافت منو طاحت فيه ، واحد المرة السلطان ، أمر الوزيرة باش تديتي وتغسل ليا وتجيبني لبيتو ..

- انا تزاد معايا الزايد وماعجبني الحال .. ديك الليلة سوكو ليا وكحلو ليا وعطروني بزهر ، فاش شافني السلطان تبهر ، وأمر الوزيرة توجد ليا بيتي وداع السيط بلي السلطان باغيني لزواج ، وايديني نكون مراتو الثانية .. الياقوت بغات تبخ الدم بغات تحماق ، كانت كدير لي فجهدها باش طيرني وماقداتش ..

- ايوا تزوجت انا وسلطان ، وشكون كال بدر السعود تدي مولاي سليمان ، مانكدبش عليك كان حنين مول القلب الكبير ، حقاني يتوزن بذهب ، كان كيبغيني وكنت كنبغيه .. كنا فرحانين واخا سم الياقوت ..

- حتى لنهار ، لي كان غايب على القصر ، ولقيت راسي خارجة كنتوحم .. الياقوت ساقت الخبار ، تزاد معاها الزايد .. وهنا حبساتني فحفرة تحت القصر ..

- ربطاتني لا ماكلة لا شراب حتى كلت صافي غادي نموت وربي غايقبط روحي .. نزلات عندي وهدداتني ، الى حنيت الراس وهزيت راسي وخويت مجدول الذهب ، مغاتحاديني ماتأديني .. والى عاندت وقصحت الراس ، فالحفرة غايكون موتي انا وتربية لي فكرشي ..

- بكيت وشكيت لربي الحنين ، واخرها حنيت الراس ودرت بكلامها .. هزيت رحيلي فديك الليلة ، وشديت الطريق ، لا حنين لا رحيم .. كنت خايفة على لي فكرشي ، حتى من والديا ماسيقت ليهم خبار ..

- حتى وصلت لهاد الدوار ، كنت كنعس غير فالكدية ولا تحت النخل .. غير الناس لي كيروفو عليا ، حتى دخلني واحد تاجر لدارو كان كبير فالعمر موحا الله يرحمو ، سترني وخلاني عندو فدارو .. حتى ولدت ولدي الغالي ، والناس عند بالهم بلي مزوجين ..

- ولكن هو مسكين كان بحال با ، ولي مادرو عليا با دارو هو .. الغالي يحسابليه موحا هو باه ، وسلطان عمرو قلب عليا ولا عرف ليا الطريق .. وهادي هي حكايتي ابنتي ..

- قوت [ بقات فيها وقطعات ليها قلبها ] :

دازت عليك اخالتي ، الله ياخود الحق فلي كان حيلة والسباب . ..

- بدر السعود [ تنهدات تنهيدة طويلة] :

اللهم آمين ابنتي ، يلاه نعسي مشا الحال ..

- بدر السعود دخلات لبيت تنعس ، وقوت بقات تفكر وتحلل ، بقات فيها بدر السعود .. داز عليها العذاب وهادشي كولو من المشرارة ديال الياقوت ، ولات تخمم وترفد الهم ، كيفاش ادخل لغارها وتعامل معاها ، وهي خبيتة وفعلها دميم ..

- يلاه بغات تغمض عينيها تنعس ، وهي تسمع صوت الباب كيتحل .. تنفضات وتهزات من بلاصتها ، هزات القنديل .. ومات كتسلت ، بانت ليها هراوة ديال الخشب .. وقفات حدا الباب ، حتى تحل ..

- غير بان ليها الخيال طويل ، وهي تهز ديك الهراوة وهي تنزل عليها لراسو حتى سمعات غواتو وطاح قدامها .. فاقت بدر السعود كتسول اش واقع ..

- قوت : شفار شفار اخالتي .. هزات القنديل وقابلاتو مع وجهو .. بدر السعود تنفضات ضربات فخاضها وغوتات :

أويلي ولدي الغالي ، ولدي الغالي ..

- كطل عليه بعينيها الكحلين ، كدور فيهم بحال ديك البومة فالليل ..

- بدر السعود [ كتمس ليه فراسو وتقلب فيه ] :

الله يا حليلو الله ، واش هادشي يديروه الناس اش هاد البهلان هدا ، قالك لالة زينة وزادها نور الحمام ، زادها فخفت اليد وفالبهلان وقلت العقل ..

- قوت [ كتمسكن ] :

والله اخالتي بدر السعود مادرتها بالعاني ، سمعت حس الغاشي داخل لدار ، يحسابلي غير شي شفار ساق الخبار بلي دار فيها غير نسا ، وݣال أجي ندخل حسي مسي بلا خبار ، ويهز المونا ويزيد خلفة ، مالقيت راسي غير وانا هازة الهراوة ونزلت عليه بيها ، والله مايحسابلي بلي ولدك الغالي هذا ..

- جاها الجواب من صوتو البهي .. بدا يحل فعينيه باصرها بشوفة قتيمة :

ياك الالة ، مݣاليكش عقلك تشوفي شكون هدا ولا تفيقي مي هي تشوف شكون .. انت بلا شك شي ݣطاطعية مالفة بالهراوة .. [ شاف فمو وبدا كيتقاد فالݣلسة ] شكون هاد الخلقة لي دخلتيها لينا لقلب الدار .. منين طحتي عليها ، هبيلة وغشيمة ، [ رجع شاف فقوت ] :

لي شاف الكسدة يݣول هنا نبات ، يحيرو فيها الحكماء والعقال .. وهي دايرة بحال المعلم بزاݣلو .. يد تنقب ويد شادة الغربال ..

- قوت [ وقفات , كتخنزر فيه ، ماحملاتو ماقبلاتو ] :

شتي انت لسانك سليط .. خاصو يدار ݣديد ، وشوف وشوف واش يتملح وينشف ولا يبقا هكاك خامج ويخناز ... وانا مادرت عيب ، ولي شافني ناقصة عقل هداك شغلو ، انا لي عليا راني درتو [ هزات بكتافها ] ..

- بدر السعود [ كتشوف فهدا وترجع لهدا دوخوها ] :

ولاواه ، واش انتوما مزال صغار ، نعلو شيطان وحضرو ليمان ..

- قوت [ هزهزات بكتافها ] :

انا مادرت والو اخالتي ، هو لي كيوطى عليا بالكلام ، مغانبقاش كنشوف ونسمع ومانعطيه خو جوابو . ..

- الغالي [ كيخنزر فيها ] :

جوابك على نابك نيت ، ماكتسكتيش ومكتهديش ..

- قوت [ جاوباتو فالحين ] :

بسم الله علينا وكي شتينا تخلينا ، العمى والعمية وظفار الجنية وحدة تسوط او وحدة تلوط او وحدة تشد من البوط ..

- الغالي [بصرامة ] :

ألجمي داك اللسان ، وعقديه عقدة صحيحة ، لا شي نهار يعود عليك بفضيحة ..

- قوت :

انا حرة غرة ، ماعندي راجل لي يلجم ليا لساني ويسد ليا فمي .. وكيما وقرناك وسكتنا ، حتى انت دير خمسة على فمك وهنينا ..

- بدر [ بزعاف ] :

وصافي ، هذا لله .. الغالي دير عقلك اولدي ، دخل دخل لبيتك وانا نعاود ليك اللامة كلها ، مابقا والو لصباح يصبح ، يلاه نعسو شوية ، سيري ابنتي حليلو ترتاحي سيري .. ناض الغالي كيخنزر فيها دخل للبيتو ، تبعاتو ميمتو وحكاتلو حكاية قوت كلها ، طلباتو وهدات نفسو وخلاتو يرتاح ، طلات على ياقوت لقاتها تكات فبلاصتها ، عاد مشات قصدات بيتها ورجعات نعسات ..

________________

- فاقت الصباح وفطرات هي وبدر السعود ، هزات الحوايج ونزلات للواد باش تصبنهم .. ݣلسات كتصبن سمعات حس الغاشي ، دورات راسها كيبانو ليها 3 البنات جايات .. رماو عليها السلام وݣلسو حتى هوما كيصبنو .. تقدمات منها وحدة رامية عليها السلام ..

- قوت [ هزات فيها راسها ] :

وعليكم السلام ..

- [ كانت بنت زوينة ، ملامحها زعرين وعيونها خضرين ، خدودها بحال الرمان فحموريتو ] :

انا سميتي باهية ، اول مرة نشوفك هنا .. بنتمن انت ؟ وفين كتسكني ..

- نقزات لوخرا لي معاها :

وا باهية مالك فضولية ، خلي عليك البنت واش انت جيتي تصبني ، ولا تدوري وتسولي ..

- باهية [ شافت فيها ] :

وشنو فيها أيامنة ، ماشي عيب ولا حرام ..

- قوت [ تبسمات ليها ] :

مكاين باس انا حليلو ، جيت عند خالتي بدر السعود .. باهية عينيها بان فيهم واحد اللمعان غريب ، خدودها حموريتهم زادت طغات :

خالتي بدر السعود ام سي الغالي ؟

- قوت : ايه هي .. أنا بنت ختها

- باهية [ هزهزات راسها ] :

مرحبا بيك فرحبتنا .. انا باهية كيف ݣلت ليك بنت التاجر حمان مول الكتان ، وهادي يامنة ، وهادي نورية .. من بعد التعارف كملو الصابون جميع دغية تخالطات معاهم ، بكلامهم الزين ونقاوة قلبهم لي لمساتها من كلامهم .. اليدين خدامين ، وحتى اللسان ماسكتش من اللغى ..

- يامنة [ حبسات الصابون ] :

عرفتو يالبنات ، أنا ماكرهتش نكون شي عالمة همة وشان ، وبا يفتاخر بيا بين ناس القبيلة ، يمشي وهو راسو مرفوع بيا .. مني ندخل وسط شي جماعة يتسدو الفام ، يوقفو ويضربولي السلام .. مانصبن مانعجن مانطيب ، نعطيها غير للحكام بين العباد ، ولي تلف على الطريق انا نوريه فين يمشي وفين يجي ..

- نورية :

مالقيتي مطلبي اش غايزيدك هاد العلم هدا ، المرة أخرتها دارها وتولد ولادها وتدݣ وتادها ..

- يامنة :

العلم ، كيعلي المقام ، كايرض لي ماعندو قيمة همة وشان .. فهمتي دابا يالفهيمة ، يالي عينها غير فزواج ..

- نورية [ تنهدات تنهيدة طويلة] :

ايوا انا ماكرهت ندير داري وكانوني .. كل ليلة نحط راسي على فارس الأحلام ، جاي على عودو لابس البلغة والسلهام ..

- يامنة :

يالبهلة يالغشيمة ، الزواج تابعاه غير الندامة وحلان الفام ، كيشفتي طفروه ناس زمان ..

- نورية :

انا ماشغليش فناس الزمان ، الى هوما ندمو يخليوني حتى انا نجرب طعم الحسرة وندامة ..

- قوت كانت تسمع للغاهم ، وكتخمم وتفكر ، شنو كانت باغية هي فحياتها ، واش تخدم وتوصل ولا حتى تزوج بحال نورية ، عمرها سولات راسها هاد السؤال .. فيقاتها باهية من سهوتها :

وانت أحليلو ، بغيتي تكوني عالمة ولا تكوني حتى انت بحال نورية ، تزوجي ودݣي الوتاد ..

قوت [ تنهدات تنهيدة طويلة ، حطات لي فيدها وتوسدات الشجرة ] :

انا مخلية مكتوبي لمولايا ، هو لي عارف رجاية .. مخلية ليه نصيبي بين يديه ، ولي غايقدرو عليا مرحبا بيه .. كنعيش كل نهار بنهارو .. انا بحال ديك البرة الى ماشكات ماتخيط .. لي مقسمو مولانا غانعيشو ونشوفو فالحين ..

- باهية :

زعمة محاطة العين على حد ، بحال سي الغالي ؟

- قوت [ غوبشات ] :

الغالي ، لالا يا باهية كيبان ليا حفى ليك القرشال .. انا والغالي بحال زيت مع الما ، هو كيصد لجيه وانا لجيه ، وزايدون خالتي بدر السعود مرضعاني .. راه حنا خوت ݣولي ..

- باهية [ بانت الفرحة على عينيها وتنهدات براحة ] ..

- نورية :

ولابدة احليلو متكوني كتمناي شي راجل زين طويل وعريض بحال الدالية .. يسخن كتافك ويكون هو مكتابك تبغيه وتحطي عليه راسك ..

- قوت [ حلات زيفها وجمعات شعرها ورجعات غطاتو وعݣدات عݣدتو ] :

انتوما سولتوني وانا غانجاوب ، باش نفضيو هاد اللامة ونرجع بحالي قبل لا تغرب الشمس .. انا الغرام لي مايبان عليا ويخلي خدودي وردية ، ماعندي مندير بيه ، ولي ماينقص من عمري ويكون قدام الرباح عليا نبقى نبان فيه ديما شابة وبنية ، بناقص منو .. منزيدو شاي على هم الدنيا وغرايب الناس لي مخرجين فيا .. ايوا الحب الى كان حب خاص حملو يكون خفيف عليا ..وخاصني نبقى وردة مفتحة .. خاصني نبقى نقية ويتهلى فيا ماشي نهز الهم فقلبي .. وندير يدي على خدي ونبقى نخمم ونبكي كل عشية ..

- الحب لي بغيت انا غايبان ليكم صعيب ، بالحق مع الصبر ربي غاينعم عليا ..ومغانديرشاي بحال داك لي صام صام وفطر على بصلة .. ايوا انا نفسي عزيزة عليا ، بشوية عليا ، تا يجي داك لي بغاه ݣلبي وبغاه خاطري وراسي ݣالها ليا .. ايوا خليت ليكم الراحة ازينة السعود ، ملقانا الخميس الجاي ..

- ودعوها ، هزات حوايجها وتمات راجعة للخيمة .. حتى قفزاتها نسمة بكلامها والهوى لي بخات عليها فوجها :

هاي هاي هاي ، على لالة قوت .. لي يسمع كلامك مايقولشاي هادي هي المديليلة لي طاح حبها على حجرة صلاح ..

- قوت [ خنزرات فيها ] :

داك الكلام حفظاتو ليا نبتة ، لي كانت لاصقة فشجرة وملاتو عليا ، [ تنهدات ] والى جينا نشوفو عندها الصح فكلامها ، راها حسات بيا .. ومانطق اللساني ، غير بلي حاس بيه قلبي .. اما صلاح غير غلطة ، كنت هبيلة وغشيمة ..

- نسمة :

لالا راك نيت هبيلة ، لي خبطتي مولاي الغالي بديك الهراوة ، غير ربي جا من جيهتو اما كون صفيتيها ليه مسكين ..

- قوت :

ماتزيدي شاي فيه حتى انت انسمة ، فالاول ندمت وبقى فيا ، ولكن فاش سمعت داك اللسان السليط عندو ، عبرت عليه خليه مزيان فيه .. وانت ماتبقايش غير لاصقة ليا فجلايلي ، خواتاتك كاملات مكايبانو غير وقت شي زلة ، وانت لاصقة فيا كيف الݣرادة وصافي انسمة واه ..

- نسمة هزهزات راسها بزعفة وطارت ماسمات ..

- تمات راجعة ، دخلات للدار وبدات تنشر فدوك الحوايج فوق الحيط وفوق واحد الشجرة ، مع كملات دارت لقاتو ݣالس مقابلها بعينيها وكيحقق فيها بشك .. تكذب الى قالت دخل ليها لخاطرها ... ماحملاتو ماقبلاتو ، جاها قاصح وصعيب وجوابو على نابو ..

- الغالي [ ببحة رجولية ] :

ݣالت ليا مي بلي سميتك حليلو ..

- قوت [ ضايرة عاطياه بظهر ] :

أيه سميتي حليلو .. كيما قالت ليك خالتي بدر السعود ..

- الغالي [ بقا ساكت مراقبها ] :

باك شنو كانو كيݣولو ليه الله يرحمو .. ؟

- قوت حبسات ، بلعات ريقها وقلبها ضرب ، هدا كيسول باينة باش يعرف شنو تحس راسها ولا يسول عليها .. سمعات البرودة حدا ودنيها ، فعايلنسمة حافظاهم مزيان .. تسمع صوتها حدا ونديها :

واخا جريتي عليا ، مانخليكش ، قولي ليه سميتو جعفر العطار ..

- قوت [ ضارت عندو ] :

سميتو جعفر العطار ، كانت عندو واحد البهيمة كيݣيدها ، وكينزل كل مرة فقبيلة ، يبيع لي قسم الله ويرجع بحالو ، حتى نهار دا مول الأمانة امانتو ..

- الغالي [ هز براسو ] :

الله يرحمو ..

- دخلات بدر السعود للدار .. وبدخولها هرسات اسئلة الغالي .. عاد قوت رتاحت ، ولات طالبة السلة بلا دم ، باغية غير ايمتا تفك هاد الحريرة وتكمل ..

- دازت ديك العشية بيخير وعلى خير ، فليل .. طلبات قوت من بدر السعود تخليها تخرج غير جنب الشجرة تݣلس وتقابل مع النجوم .. سمحات ليها بشرط ماتبعد وماتعطل ..

- وداكشي لي كان ، هزات بلغتها وخرجات ، مشات نيشان للجهة ديك الشجرة الكبيرة وݣلسات مقابلة معاها .. كان الجو زوين وسما صافية .. تنهدات تنهيدة طويلة وهي كتفكر فحياتها ، واخا هاد القلبة لي تقلبات ، ولكن نفعات فحاجة وحدة .. بدات تعلمها حروب النسا ، تعلمها تدوي ودافع على حقها ، وتكون بشانها ومرشانها وماتحدر الراس ..

- واخا الجنيات خلعوها ، ولكن كل نهار كيزيد عليها هنا كتعلم منهم حاجة .. قاطع تفكيرها الريح البارد لي تحرك ، غمضات عينيها معصبة ونطقات قبل لا تحل :

نسمة واش انت اتولي كيظلي ، وراه البهلان هذا ..

- سمعات صوت قطرة :

قوت ،هادي انا قطرة حلي عينيك عندي ليك واحد الخبار خاصك تعرفيه اليوم قبل من غدا .. حلات قوت عينيها كانت قطرة واقفة قبالتها ، وشعلة ݣالسة من الجهة الثانية ، حسات بلحاف طاح على راسها هزاتو للجهة الشجرة كتبان ليها نبتة ݣالسة ومدلية رجليها ..

- قوت اش واقع ، شتكم تجمعو عليا شنو كاين ؟

- نبتة :

نسينا ماقلنا ليك بلي الى بغيتي تكملي الحكاية ضروري من شرط الشروط لي مشروط بالكتاب ..

- قوت : أشمن شرط ولا شريطة ؟

- قطرة :

ليلة سيدنا رمضان خاص الحكاية تكون كملات ، والى طلع عليك الفجر وانت مزال ماكمليتها ، غاتحبسي وسط كتابها ، وغاتبقاي سجينة فهاد الزمان ..

- قوت [ غوبشات ، بدات تحسب ، وقفات وضربات فخاضها ] :

اويلي ، اويلي ، وعلاش ماقلتوهاش ليا .. ولكن بلاتي ، فاش كنت فزماني راه قدفات سيدنا رمضان بشحال .. علاش هاد الشهر شنو هو ؟

- نسمة [ بانت وراها ، كتدوي وهي مقلقة منها ] :

واخا غوتي عليا انا نقوليك ، حنا يلالة دبا فنص فشعبان ..

- قوت [ تنفضات بدات تبكي وتجدب ] :

اويلي ، اويلي وعاد جاكم تقولوها ليا ، علاش ماخبرتونيش وعلمتوني من اول نهار ، ماكنتش نضيع ليام غير هكاك .. دابا شنو المعمول ؟

- قطرة :

شوفي ماتخافي ماوالو .. حنا عندنا ليك الحل ، خاصك تبداي بزيوتك تبيعي لبنات الدوار ، وتولي تنزلي لسوق باش هكا سيطك يديع ، وهكا تسيق الخبار الياقوت وتجيبك عندها للقلب الدار ..

- قوت :

وعلى هاد الحساب ، خاص نعاود خبيرتي للبدر السعود ، نهار لي تسيفط ليا ديك دميمة ديال الياقوت ، ماتقولش عليا بدر السعود خنتها ومشيت عندها برجلية ، ولكن خاص الغالي مايكونش فدار ، باش هكا نصيب راحتي ..

- شعلة :

قبل قولي لينا شنو اتحتاجي فهاد الزيوت ، باش هكا نحضروهم ليك .. وتلقاي كولشي كامل ومكمول .. ماعليك اتنزلي لسوق وتبيعي لناس دوار ..

- قوت [ بقات تفكر ] :

خاصني زيت بلدية ، تكون حرة لونها يكون خضر صافي ، مايكونش قاعها بيض البيوضة كتبين بلي راها مخلطة ولا قديمة .. ريحتها تضرب من جهة الشجرة ، وخاصني الحبة السوداء حرة ، وخاصني السانوج .. وعاد خاصني الحرمل ، وخصني زنجلان وزريعة الكتان وحب الرشاد ، وخاصني يالالياتي زريعة البصل هادو كاملين بغيتهم مطحونين ، زيدوني عليهم ورݣة النبݣ مطحونة [ أوراق السدر]

- شعلة : كوني هانية غدا يكونو عندك ..

- تسمع صوت خشين ناطق فعز الليل :

حليلو معامن داوية ؟

- ضارت قوت كيبان ليها الغالي جاي قبالتها وكيشوفيها بإستفهام :

معامن داوية ؟

- قوت :

مابقى حد يدوي مع نفسو ، يسولها واش مرتاحة واش عاجبها الحال ، ياكما خاصها شاي ؟

- الغالي [ خنزر فيها ] :

دخلي ، كاع الناس داخلين لديورهم من غيرك انت بحال ديك البوم .. زيدي ..

- قوت [ تخطاتو كتبغم ] :

تغوت عليا ، يكما والدني ولا كاتب عليا براس المغرف وزوينة هادي تاني .. دخلات للدار ، وتبعها هو ، حطات بدر السعود لي قسم الله بداو كيتعشاو حتى نطق الغالي :

مع الفجر انخرج أمي إن شاء الله غير هاد المرة راه مغانطولش ..

- بدر السعود: الله يعاونك اولدي ..

- قوت [ بصوت شبه مسموع ] :

على سلامتنا ..

- الغالي : ݣلتي شيحاجة ؟

- قوت [ هزات عينيها الهية فيه ] :

ݣلت ليك طريق السلامة ، الله يديك فنجا ويجيبك فنجا ويبعد عليك غراري عيشة او ولاد لحرام ..

- بدر السعود [ تنهدات تنهيدة طويلة] :

أمين أبنتي امين .. الغالي بقا كيشوفيها بشك ، كمل عشاتو ، وناض غسل يديه ودخل لبيتو يريح شوية ..

________________

- ليلتها دازت طويلة ، كتفكر فحريرتها واش غاتقد تكمل حكاية وترجع لدارهم سالمة غانمة ولا غاتبقى محبوسة فهاد الزمان .. وشكون هي ياقوت لي تتقوى وتتجبر ، باش فايتاها .. واش نسات بلي هي دابا ولات مرا كبيرة ، شرفات مابقا ليها جهد ولا حيلة ، وبلي هي باقي صغيرة وعقلها يوزن العقال .. ومعاها 4 المخلوقات دكيات ويفطنو بأي حيلة ..

- حسات بالغالي فاش ناض ، غير هو خرج مشا .. وهي ناضت ݣلسات بقات تخمم ، واول حاجة خاصها تعاود حكايتها للبدر السعود ..

- جمعات الوقفة وقصدات بيت بدر السعود ، ݣلسات حدا راسها وبدات تفيق فيها :

خالتي ، خالتي .. تفافات بدر السعود وفاقت مخلوعة :

اش واقع أبنتي ، واش أذن الفجر .. مع كملات كلامها بدا الفجر كيأذن ..

- قوت : خالتي بغيت ندوي معاك .. انا على برا كنتسناك ..

- خرجات سبقاتها خلاتها مافهمة والو ...

- خرجات عندها بدر السعود ، كتشوفيها مافاهمة والو .. ݣلسات حداها مدوزة يدها على ظهرها ، بصوت الحنين :

مالك ياهاد البنية ، عندك لمعة فعويناتك مخفية ، عاودي ليا ..

- قوت تنهدات تنهيدة طويلة ، ونطقات وهي مضيومة :

خالتي بدر السعود ، انا كذبت عليك ، أنا ماسميتيش حليلو أنا سميتي قوت القلوب ...

___________________

قالو الزهر يجي مرة في العمر، شي قال الزهر وهم و كلشي من العقل و انا حايرة بين القوال ماعرفت نتيق كلام العلماء و العقال ولا لي على الزهر ضربو الامثال و قالو زهر المتعوسة بظفارها تهبش عليه و سعد الصݣعة بيديها تدفنو ، كاين لي تزاد مو مزغرتة عليه ، و كاين لي نحس تزاد شكارة محرفو ، شي قال ما كاين لا نحس لا زهر كلشي بإذن الله مقدر ...

- بدات الشمس كطلع ، وقوت كتعاود للبدر ݣاع لي وقع ليه من الاول للخر ، مانسات كلمة وحدة من حكايتها ، بدر السعود بقات ساكتة وكتخمم .. تنهدات تنهيدة طويلة ، ونزلات دمعة سخونة شاقة طريقها من عينها لجوفها ..

- شحال هذا ، شحال هذا ماحسيت بشي حد دار شي حاجة عليا ، ماقطع بحور مجال بلدان ، باش ياخود ليا حقي وينصرني ، حتى من با لي تسنيتو يقلب عليا .. قلب قب جلابتو .. ونسا بدر السعود بنتو ..

- قوت : تيقتيني اخالتي ياك ؟

- بدر السعود [ شافت فيها جراتها وعنقاتها ] :

متيقاك ازينة البنات متيقاك ، منكذبكش ، بحال هاد الحكايات سمعناهم وشفنا منهم .. شلا مداز على هاد الراس أبنتي ، ولكن ابنتي نصحك نصيحة ، ياقوت مشرارة ، تبخ السم من جوفها .. قاطعة يدها من يد الرحمان .. خايفة ابنتي لا تأديك .. وزايدون ، ولدي الغالي معارفش الحكاية ..

- قوت :

هادشي باش اخالتي ، خاص تعاودي ليه الحكاية ، خاصو يعرف بلي باه هو مولاي السلطان سليمان .. مايبقاش مسكين مجلي ومقلوبين عليه القفاف ، أنا اخالتي من هاد النهار انبدا نبيع فزيت سالفي ، اما على الياقوت ، كاع لي كيكون مشرار ، كاتكون فيه شركة ديال الهبال .. انت غير هنيني من الغالي ، وعاودي ليه اللامة ، وانا خلي ليا الياقوت المجرابة ..

_________________

- واقفة قدام المرايا ، مرأة كبيرة ... شوفتها ماتسر لا عدو ولا حبيب ، نفسها كتطلع وتنزل .. حجبانها معقودين الف عقدة وعقدة ، ماتشوفيها لا لي موحمة ولا لي شادة فحبل ، كانت قصيرة بحال شي كرداسة معلقة فحبل ..

- وهي كتشوف وجها لي دبال ولا بحال شكوة لي كيتنخض بيها الحليب ، طالقة سالفها لي كتهز زغبو بين صباعها طايح حدا رجليها دليل ، كل نهار كيطيح غبار غبار عمر الوسادة وركان البيت .. تغددات وتعصبات مزيرة على صباع يديها بالفقصة باغية تبخ الدم [ بصوت مبحوح بحال الى مقطعين وصالو وعلى حر جهدها نطقات بالغوات ] :

دواحــــــــــــــة ..

- جات واحد الخادم ، لابسة قفطان توبو بالي ، دايرة زوج ضفرات عندها خالة تحت العين ، وزبيبة فنيفها .. وقفات قدامها وحدرات راسها ، الخلعة كانت راكباها من رجليها لساسها .. [ بصوت فيها رجفة وخلعة ] :

نعام الالة الياقوت ..

- الياقوت [ النار ݣادية فيها ، كتشوف راسها كتخايب وسيفتها كتخسر نهار على نهار ] :

الزيت لي جبتيلي مابقى يقضي والو ، حتى الغاسول مابقى فيه نفع .. شعري كولو طاح .. وجلدة بدات كتبان ، وجهي ولات سيفتو خشينة .. ياك ݣلت ليك شوفي ليا شي عطار مليح ..

- دواحة [ هزات فيها عينيها كاتفافة ] :

الالة ، راه ݣاع عطارة مجدول الذهب ضرتهم ، واحد بواحد .. وكاملين جربتي عشوبهم وغاسولهم ، ولا بغا ينفع ..

- قربات منها الياقوت ، وعينيها كلها شر وغدر ، هزات يدها وحطاتها على عنقها قاجاها ، كتهضر من تحت سنانها .. بحال شي لفعة كتبخ فسم :

طيري تنزلي ، بغيت شعري يرجع كيف كان سالف مخبل ، وجهي يضوي بحال الݣمرة وشمعة سمعتي ، ولا نغبر ليك الأثر ومايلقاو ليك تصريفة ..

- دواحة [ كتحرك غير فراسها ، ماقداتش دوي ولا تنفس .. ] ، طلقاتها علاين لا طاحت ومشات كتجري للكوزينة .. كانو زوج عيالات ، كبارات فالعمر ..

- دواحة [ كتبكي ] :

حسبي الله ونعم الوكيل ، الله ياخود فيها الحق .. ياربي ياربي تعجل بنهارها ويعنقها التراب ياربي .. هلكاتني هلكاتني أمي مرجانة ..

- مرجانة [ كانت هي طيابة ديال القصر ، مرة كبيرة غليضة وطويلة ، طبطبات على ظهرها كتواسي فيها ] :

وجهيها للواحد وحدو ، ياخود حقك وحق غيرك منها .. هداتنا وهلكاتنا ، ولا بغات توب وتغاضى وترجع لطريق مولاها ..

- دواحة [ كتمسح دموعها ] :

عمرها توب امي مرجانة ، منين غانلقى ليها انا هاد العشوب لي يرضو ليها سالفها ، وهي راه عمايلها الخبيثة هي لي خرجو فيها .. ومزال العاطي يعطي ، انا بغيت جلدها يطيح شوية بشوية ، على هادشي لي دايىة فيا ..

- مرجانة [ تنهدات ] :

أحيانا ابنتي ، ولوكان تعرفي شحال ظلمات من عباد ، يهون عليك راسك ... أخليها على الله ، مشات نوارة الدار الوردة المفتحة ... لي كون كانت ، مايكونش هدا حالنا ، ولكن اش عند الميت مايدير قدام غسالو .. خلاوها ماليها أش عند الموت ماتدي من ديور الخالية ..

- دواحة : خفت غير نشكي همي للسلطان ويخاصم عليها ، وتصدق دافناني وأنا حية ..

- مرجانة :

لاواه أبنتي ، صبري الفرج من عند ربي قريب .. سيري كملي شغالك أبنتي سيري ..

- مشات دواحة تكمل لي عليها ، ومرجانة رجعات للطيابها وعقلها غير مع بدر السعود ، المرة زينة لي مشات مارجعات ..

__________________

- بدر السعود :

ودابا كيدرتي لهاد الزيت ؟

- قوت [ كتكب الزيت لي صايبات فالقراعي ديال الزاج كتسدهم بجلدة ودور عليهم القنب ] :

كنسخن كاع العشوب قبل مايكونو مطحونين ، ايوا عاد نطحنهم ونزيد عليهم زيت زيتون ، تكون زينة وحرة .. ونديرهم فقرعة كبيرة ، وعاد نزيد عليه ورݣ النبݣ [ السدر] مطحون ، ونخض ديك القرعة ، بحال الى كنخض فشكوة .. نخليها فيها تطلق ، ايوا وعاد كنبدا ندهن بيها جدر شعري .. انا مرات كنبات بيها كاع ومرات كنديرها اسويعة ونص والى كنت انغسلها من ورا واحد سويعة كنزيد فيها قطيرة من القطران الرقيق .. وهدا مكان ..

- بدر السعود :

تبارك الله تبارك الله ..

- قوت [ كملات او وقفات ] :

ايوا نخليك أمي بدر السعود ، ندي هاد الزيت للسوق دعي معايا ..

- بدر السعود :

الله يعرضك السلامة ابنتي .. الله يجيب تيسير وفاشما حطيتي يديك عمرك تخيبي .. نزلات قوت لسوق ، حطات منديل كبير وحطات عليه دوك القراعي وبدات كتنادي :

ازيدو قربو ، زيت سالف هاينة هاهو هنا ، لي بغات تربي السالف وتخلي ولاد الدوار كل واحد فيهم تالف ، ازيدو قربو زيت سالف هاينة عند حليلو مولات 7 عشوب ..

- شوية بشوية بداو العيالات والبنات ، يوقفو على قوت .. كل وحدة كتدي قريعة ، غير كيبصرو شعرها الغزال لي خارج كيطل من الحايك .. كيزيدو يتيقو ، مدام شعرها زين فراه زيت غيكونو هو فضلها وراس مالها ..

- باعت كاع القريعات ، بقاو ليها واحد زوجات .. كانت عيات حيت مامالفاش ، هزاتهم وتمات راجعة بيهم حتى تصادفات مع باهية ..

- باهية [ شافتها تلقات ليها بتبسيمة ] :

مرحبا مرحبا بلالة حليلو ، فين كنتي أش خبارك ؟

- قوت :

يلاه كنت فسوق ، بعت شي زيوت دشعر ،، يولي عندك سالف هاينة يالالة الباهية .. وسبحان الله العظيم شاطو ليا زوج ديال القراعي ، تقول مكتابين ليك سبحان الله العظيم .

- الباهية [ نورو عينيها بحال شي شميسة ضاوية ] :

حافي ياختي حليلو ، واش ايطوال شعري ويولي بحال سالف هاينة يضرب حتى لخصري ؟

- قوت [ ضحكات ] :

يالهبيلة ، وهادي تحتاج لتسوال ، شوفي غير سالفي يعطيك الخبار رطوبيتو وكحوليتو .. ومتنسايش ، الى عطاك البرهان بغيتك تشيعي بيها فكل مكان ، وقولي ليهم هدا زيت حليلو مولات 7 عشوب..

- باهية :

كوني هانية [ سكتات ورجعات تكلمات ، بحال الى كانت خايفة تنطق بداك الكلام ] :

حليلو ، بغيت نسولك ومديرهاشاي مني قلت الصواب ..

- قوت :

لالا سولي ، عارفاك مولات الصواب ودار الكبيرة .. هادشي باين من عينيك وكلامك الحلو ، واخا عاد معرفتنا باقة جديدة ..

- باهية : ربي ياختي واش الغالي حاط عينو على شي وحدة من بنات القبيلة ؟

- قوت [ كدور فعينيها ، عرفاتها حبها طايح على كمشة مخبلة ] :

واشقونليك اباهية ، الغالي ديما غايب ، هامو غير عشا ليلتو وميمتو مسكين .. قلبو خاوي بحال السما الصافية ، الله يسهل عليه بشي بنت الناس ، تكون لبيبة وحكيمة وبنت دار كبيرة .. لسانها ينطق الشهد .. تكون مراتو وأم ولادو ياربي ..

- باهية [ تنهدات تنهيدة طويلة] :

امـــــيــن ياربـــي .. من فمك لباب السما ..

- قوت [ كتشوفيها وتبسم ] :

وعلى مبان ليا ، البنت راه كاينة .. خاص غير هو يهز عينو ويشوف البدرة المنورة فسما ليلو الكحيلة .. قلبك طايح فالعشق أ باهية ، باينة من عينيك ..

- باهية [ حشمات وتزنݣات ] :

حشمتيني احليلو ، نكذب عليك .. قلبو عشقو من سنين طويلة ... فكل ليلة نهز كفوفي لسما ندعي يكون مكتابي ، عينيا نعطيهم ليه ..

- قوت [ بتبسيمة عويناتها الكبار كيتسدو ] :

مايكون الخير القرة العين ، إن شاء الله منهز رحيلي حتى نجمع لمتكم ..

- باهية [ بملامح الاستفهام] :

علاش فين غادية أحليلو ؟

- قوت [ بلعات ريقها ] :

شتي شديت الجميع ونسيت راسي ، انتعطل على خالتي بدر السعود ، يلاه نتلاقاو من بعد .. مشات قوت زربانة ، كانت غاتعكل فالهضرة ..

- نسمة : ماكدبش الغالي لي قاليك بقاي لجمي لسانك ..

- قوت [ ماداتهاش فكلامها ] :

وانت ماتكمل هاد الحكاية ، حتى يدي مول الامانة أمانتو بسبابك .. مكتعرفيش تحكي ولا تعلمي بلي انت هنا ، رحميني يا نسمة رحميني ..

- نسمة [ ضحكات بدلال ] :

كيعجبني كلامك وحديثك ، عرفتي مكرهتشاي نمشي معاك لزمانك ، ونكون إنسية بحالك .. ولكن مابدي حيلة ..

- وصلات قوت للدار ، دخلات وبشرات بدر السعود بالبشارة ديال بيع كاع القراعي .. كان هذا هو حالها فكل نهار ، يوجدو ليها البنات الزيت وهي تنزل للسوق وتبيع ، كانت تسنى كل نهار يجي شي خبار .. فعلا داع صيتها بين كاع الناس ... وكولشي عندو لغا واحد على حليلو مولات 7 عشوب ..

- كانت ݣالسة ، حاطة يدها على خدها ، قلبها كيرفرف بالخلعة .. هزات راسها لسما كتمنى ربي ينصرها وترجع لدارهم سالمة غانمة ..

- بدر السعود :

مالك ابنتي ، شفتك هازمة من هم الدنيا قنطار .. كتفكري فليام جايا ؟

- قوت [ عنقات رجليها وحطات راسها على الحيط ] :

ماعرفناهم ليام لي كيجريو أمي بدر السعود ولا عمرنا لي كيجري ، خفت غير يساليو ليام ونبقى محبوسة هنا ..

- بدر السعود [ عنقاتها ] :

والله منكذب عليك ، ماكرهتش تبقاي معايا .. وناخدك مرة لولدي الغالي ..

- قوت [ شافت فيها ] :

احيانة أمي بدر السعود ، منصيبش .. هدا ماهو زماني ، عندي ناسي وهلي وحبابي .. ميمتي وختي وبا الحنين ، ورفيقة دربي .. منصيبش نبقى حاصلة هنا ..

- قاطعهك الدقان فالبال ، كان واحد الدق بجهالة بحال شي حد باغي يهرس الباب .. وقفو وقفة وحدة ..

- بدر السعود : بلاتي بشوار يالي واقف عند الباب ..

- قوت : اخلي امي بدر انا نحل الباب ، حيدات الزكروم وحلات الباب ... كانو 3 ديال الرجال ، باينة فيهم حراس .. سولها واحد فيهم بصوت خشين غضين :

أنت هي حليلو ؟

- قوت [ كتشوفيهم مافهمات والو ] :

أياه هي انا ، أش حب الخاطر أسيدي ؟

- لالة الياقوت سلطانة مجدول الذهب بغاتك ، زيدي معانا .. جروها من يديها وهي كتفركل ... شافت فبدر السعود كتأشر ليها بعينيها بمعنى غير تهناي ..

- بدر السعود ݣلسات للأرض ، كتبكي وتنوح .. بقات فيها قوت ، إحساس غريب ، وحدة مامن دمك مامن لحمك دير عليك لي مايدار .. توقف جنبك وتبغي تنصفك من بعد هاد السنين .. هزات كفوفها لله وبقات كتدعي معاها .. باش ربي ينصرها ويغلبها على كل شر ..

__________________

- شاعلة القنديل ، حاطة العشا وساهية كتشوف فيه .. تنهدات تنهيدة طويلة ، وهي عينيها منفوخين بالبكا .. تحل الباب ديال الدار ، ودخل كيعيط بسميتها ، كانت ساهية وغافلة على ولدها لي رجع من الݣافلة ... وقف حدا راسها باصرها بعيونو ، مافهم فحال مو والو .. مالفة تلݣا ليها بضحكو وتبسيمة والفرحة فعيونها ..

- ݣلس حداها ، عاد هزات راسها ونتابهات ليه :

الغالي ولدي ، جيتي على سلامتك ..

- الغالي [ بملامح إستغراب ، دور راسو على دار كلها كيشوف ورجع شاف فمو ] :

ياك لاباس أمي ، ياكما عيانة ولا بيك شي علة ؟ وفين مشات حليلو ؟

- بدر السعود [ تنهدات تنهيدة طويلة] :

ݣلس أولدي رتاح بعدا ، عندي معاك شلا كلام ..

________________

- قلبها ضرب ألف ضربة وضربة فاش حطت رجليها فمجدول الذهب .. إحساس غريب توطى رجلك فالأرض لي قريتي عليها ، كانت كتحاول تحس بلي البنات معاها .. وداكشي لي كانت تفكر فيه بان برهانو ، حسات بريح خفيفة ... وصوت رواق الشجر بحال الى كيغني ويهلل تهليلة ، عرفاتهم معاها وبجنبها ..

- كانو الناس والغاشي ، كيشوفو فيها ويسولو ، شكون هادي لي جايبين عوين القصر ، تحصرو عليها .. حيت عارفين واخا السلطان هو الحاكم ، ولكن طغوان مراتو هو لي كيتكلم ..

- القصر كان عالي ، هزات راسها فيه كيفما موصوف فالكتاب ، جوج حراس على برا أما الدخلة كانت واسعة وعريضة وبهية .. داليات العنب بحال شي الجوهر مزينين حيوط القصر ، أما الخصة لي ماها كيبان بحال السما الصافية ، غير قربات ليها تعلات ماها .. تبسمات وعرفات بلي مولا الفعلة ماهي غير قطرة ..

- الخدم جاو يجريو مراقبينها بعينيهم ، هزات عينيها فيهم كتشوف فيهم وتجول عينيها على باقي حيوط القصر ، طلعوها مع الدروج للفوقي .. كانت مفرشة زربية طويلة فالاحمر .. وقفو عند واحد الباب موقفينها ، شافت جهة واحد الفاز دالحديد شاعلة فيه العافية ، لي بدات تهبا تهبا وتطلع طلعة وحدة .. خرجات منها تبسيمة وهبطات راسها ..

- دخل واحد من دوك العوين لداك البيت من بعدما دق ... شوية رجع جار قوت بلا كلمة بلا زوج .. دخلها لداك البيت لي كان كبير ، كلو أثاث كيفتن ، ولكن كان كيديق فيه النفس ، كتحس براسك باغي غير ايمتا تخرج ..

- كانت ݣالسة مرة كبيرة ... كيبان ليها شعرها طويل وكحل ، ولكن كيبان بحال شعر البغلة ماشي شعر راسها الحر الغر .. جهة حناكها كانت صابغاه بالكحل ، بحال الى شي حد ضحك عليها وقاليها تصبغو بالحموم باش الضرق شيب راسها .. كانت كتخلع وشوفة فيها كترعب .. هزات يديها لي مزرزرين بالخواتم وأشرات لاعوين يخرجو .. هزات عينيها وشافت فقوت ، زمت فمها وغوبشت ..

- علاش لا وهي كتغير من كل وحدة صبية فتية تفتن بزين وحسن منها ، بصوتها باح المدب/وح :

حليلو ... حليلو مولات 7 عشوب ، صيتك داع فالقبايل كاملين ، زيتك ولا يتضربيه المثال ..

- قوت :

هذا من فضل الله الالة ، بركة توارتاتنا من جد الجد ..

- الياقوت :

سولت عليك ، وݣالو ليا ودنيا ، بلي انتي مقطوعة من شجرة ، وبلي ضايفاتك واحد السخية يسميوها ام الغالي ؟ ݣولي ليا أش كديري فهاد الزيوت ، واش كيعطيو البرهان .. واش يداويو القروعية وتونية ؟

- قوت [ كانت متحكمة فكلامها ، كتهضر بتاويل وتباتة ورزانة ] :

الحمد لله الالة ، لي خداتو من عندي كترحم ليا الوالدين ، ولي عينها فسالف هاينة ، ماعليها غير بزيت حليلو .. أما العشوب لي فيه هوما كثار ، وخاص يدارو بالمقدار .. وتاويل ، كل عشبة يالالة خاصها العبار والميزان .. ماتنقص ماتزيد ، والحاجة لي تخلي الشعر يكحال ويزيان .. الى تزادت على حدها كتولي مسمومة ، وتقد تدي مولاها لتلت الخالي الالة ..

- الياقوت :

غايتعكاك بيت احليلو ، وݣاع لي تحتاجيه ، بغيتك تصايبي ليا زيت تكفيني وتوفيني ، وبحلاوتك .. ولكن بشرط هنا غاتبقاي واكلة شاربة ناعسة ، حتى يتقضى مورادي ، ومابغيت حتى وحدة فدوار يتحط على زغبة راسها زيتك احليلو ..

- حليلو [ حدرات راسها ] :

تاج راسك الالة ، امري وأنا نفد ..

- الياقوت :

غايوريوك بيتك ، وعطيهم كاع القوام لي تحتاجي ، بغيتو غدا احليلو شنو ݣلت غدا .. [ هزات واحد الحديدة صغيرة خبات بيها الكرسي .. تحل الباب وجا واحد من العوين ] ..

- الياقوت : خودها لدواحة ، وݣوليها توجد ليها بيتها ، وتوجد ليها كاع لي بغات ..

- واخا الالة ، حدر راسو ودا معاه قوت ... وهي قلبها وصل عند كمها بالخوف والخلعة ..

- كان ݣالس ، مصدوم مسرح رجليه ماعارف باش تبلا .. كلام مو نزل عليه بحال البرق والرعد من السما ، عمرو كان ضانها ولا عالم عليها .. عمرها جاتو للبالو، كان من زمان يحساب بلي باه هو تاجر موحا .. هز عينيه فمو ونطق بكلام بارد :

وتاجر موحا ، لي كنت كنݣوليه با .. طلع أمي هادشي كولشي كذوب وبهتان .. علاش ماصرحتينيش هدا زمان ؟

- بدر السعود [ كتبكي ] :

الخوف اولدي الخوف ، الخوف من الياقوت المشرارة ، خفت عليك .. خفتك تقلب على باك وتصفيها ليك ، داكشي باش كتمت السر وسكت .. سامحني اولدي .. لي كاين عاودتو ليك بلا زيادة بلا نقصان ..

- الغالي :

دابا بغيتي تݣولي ليا ، بلي حليلو ماشي من هاد الزمان ، وبلي مبعوتة من زمان تاني باش ترجع ليك وليا الحق لي فقدناه هادي زمان .. مايمكنش هاد الحكاية دخل للراس ، مايمكنش نتيق بلي انا ولد سلطان مجدول الذهب ..

- بدر السعود :

لي عاودت ليك أولدي هو لي كاين ، ماحرفت فيه كلام .. وبحال هادشي لي وقع منو شلا حكايا بين الناس ، ديك البنت البهية التقية ، البلارة الصافية .. عطات راسها للعافية ، باش تنصر المظلوم وظالم لي ظلم وخدا خدية الطغيان ، يتجازى على افعالو السقيمة ..

- الغالي :

وحنا نخليوها دخل للغار اللفعة برجليها ، نتفرجو فيها مانعاونوها مانحديو منديو لا امي .. ماشي فعايل الغالي هادو ..

- بدر السعود [ بخوف ] :

علاش ناوي اولدي ، ماتخلعنيش عليك .. خليك اولدي ، حتى تعطينا قوت البرهان ، وديك الساع يحلها ربي .. مفاتح الخير بيدو ، ضعت فراسي ومابغيتش نضيع فيك حتى انت .. نحلفك بغلاوتي عندك انور عياني ..

- الغالي [ سكت كيفكر ] :

ماتخافيش أمي ، مغانديشر شيحاجة بلا شورتك ... ومغانعرض حياة ديك بنت الناس للعافية والجمر ..

_____________________

فوسط ساحة كبيرة ، كان ݣالس راجل كبير وطويل ... واخا شيب شعرو ، كيبان عليه الوقار والهيبة .. عينيه فيهم للمعة حزينة .. كانو ضايرين بيه شلا رجال ، كيهضرو فامور البلاد .. كان كيسمع لكل واحد فيهم ، حتى تم جاي واحد من العوان .. تحدر عند ودنيه ونطق بشي كلام ، خلاه يغوبش ويهز راسو فيه .. :

ماعرفتوش شكون هي ؟

- لا أسيدي ، جابتها لالة الياقوت وخصصات ليها بيت هادشي لي ݣالو ليا ..

- واخا سير .. رجع العوين ، وهو بقا كيفكر وقف وقطع المجمع ناطق بصوتو الجبار :

مجمعنا الجمعة الجايا .. تقدو تشوفو شغالكم ، هز سلهامو لاحو على كتافو وخرج ..

__________________

- دخلات دواحة ، معاها للبيت كانت غير ساكتة مادواتها ماكلماتها .. حدها قالت ليها :

هدا بيتك ، الى بغيتي شيحاجة عيطي عليا ، سميتي دواحة .. انسيفط ليك إسماعيل ، عطيه لي بغيتي هو يوصلو ليك حتى لبيتك ..

- قوت [ بإبتسامة ] :

دواحة ، سميتك زوينة بحالك ماشاء الله ..

- دواحة [ بانت البشاشة على وجها ] :

ربي يخليك ويهنيك .. سمحيليا ، مانقدش نكتر معاك اللغى الى ساقت الخبار لالة غير تنحي لي راسي على كسدتي ، وانا ربي لي عالم بيا وبحالي ..

- قوت :

واش سلطان القصر مكاينش ، كاينة غير لالة الياقوت .. ماعرفتس علاش مادخلاتش لخاطري وماحسيتش براحة وانا معاها فنفس البيت ..

- دواحة :

السلطان مولاي سليمان ، كاين .. غير هو كايعمر المجمع الكبير مع الوزير والقاضي ، قليل فين كيجي .. من نهار مسكين مشات ليه .. [ كانت غاتكمل كلامها ورجعات سكتات ] :

سمحيلي ، خاصني نمشي خليت ليك الراحة .. خرجات وخلاتها ، تفتل وتغزل غير بوحدها تخمم ، هاهي وأخيرا فقصر مولاي سليمان ..

- تدق الباب وتحل وكل منو راجل ماكبير ماصغير ، رقيق وقصير ، حنى راسو وݣال :

نعام الالة ، شنو هي السخرة لي بغيتيني نجيب ليك من السوق ..

- قوت [ ملات عليه ݣاع لي اتحتاج .. واخا كانو البنات يوجدوه ليها فالحين ، ولكن خافت لا يعيقو بيها ويشكو فأمرها ] .. كانت تعدد وتحسب .. حتى جاها صوت بلاها من وراها ..

- نسمة :

انا على مبان ليا ، غايتسد الكتاب وانت مزالك هنا .. عرفتي راهبقاو ليك 6 دالليالي ، انا ماشفت شاي من هادشي ..

- نبتة [ لي كانت ݣالسة على حافة السرجم ] :

ماحنا على فالك ، لاش كتخلعي فيها ماشي من عوايدك ، نسيت بلي انت هي ديك الفلفلة الحارة ، لي دور وتوزوز ..

- نسمة : انا ماقلت حتى عيب غير فكرتها ..

- قطرة :

ماتديهاش فيها اقوت .. الى بغيتي غادي على هاد الحال مرادك غايتقضى ، ولكن خاصك ضروري تشوفي السلطان وتكلمي معاه وتعاودي ليه ..

- قوت [ جاتها البكية ضارت بيها الدنيا ، الخوف ركبها من ساسها لراسها ولات خايفة لا كلام نسمة يكون بصح ، وتبقى محبوسة وهي مابيدها حيلة ] :

شنو المعمول ، غير ݣولو ليا .. كيغاندير نلقاه ، وانا عاد دخلت لقلب القصر .. كيغاندير نلقاه ، ونخبرو بلي مراتو بدر السعود مزالها حية وبلي عندو ولدو كيف نخلة ، سميتو الغالي .. وبلي الياقوت نراتو هي لي نفات مراتو .. وانا معارفة حتى حالو ..

- تسمع صوت من الباب ، صوت باينة عليه الصدمة والخلعة :

بدر السعود مزالها حية ؟

- ناظرها بعينيه ، كان كلو هيبة .. واخا الزمان دا فيه وجاب ، ولكن ملامح الجمال مزال باينين عليه :

وليتي دخلي الغاشي للقلب القصر بلا موجب شرع ، وبلاما تشاوري الياقوت ..

- الياقوت [ شافت فيه كتخنزر فيه ] :

مكنتسناش منك الكلام ، ومنتسناش منك تكولي شكون ندخل وشكون لا .. كيما هادي دارك فراها داري ، ماتنساش بلي انا السلطانة الياقوت ..

- سليمان :

وانا لي رضيتك سلطانة ، ماتخلينيش نعصا ربي فيك ، ونرضك منين جيتي نهار الأول .. صابر عليك غير على وجه العشرة ..

- الياقوت [ خرجات عينيها او وقفات ، كتشوفيه بعينيها لي كيقطر منهم السم الكحل ] :

ديرها ديرها اسليمان ، وتشوف مني لي عمرك شتيه .. سيدي ولالة حدق منو ، سيدي حسابو قديد ولالة كتقطع منو .. سير بدل الساعة ، عارفة الخرف ولا يأثر عليك .. خرجات من البيت وخلاتو .. حط يدو على جنب الكرسي مغمض عينيه كيتنهد ، كيحس بقلبو غايخرج من بلاصتو .. شحال بقاليه فهاد الدنيا لا ولاد لا وتاد لامن يحط عليها الراس ، الحنينة لي كانت تسمع لغاه وتفطنو وتحاجيه مشات ، مشات مابقات رجعات ولا لقى ليها طريق ..

___________________

- ݣالسة ساهية .. حاطة يدها على حنكها كتخمم وتسمع لكلامها حتى سلات ، مانطقات بحتى كلمة .. حدها تخمم ، هزات راسها فقوت .. وعينيها ساحو بدموع حارة دموع الغبينة والقهرة ، نطقات بصوت مغنغ تقيل :

احيانة ابنتي ، لوكان تعرفي شحال قاصى السلطان فغيابها مسكينة ، كنسمعو يبكي بليل وبنهار .. كون يعرف بلي عندو ولد من صلبو يطير بالفرحة ، مايسمح لي كان حيلة وسباب ..

- قوت :

انت سمعتي الحكاية اخالتي مرجانة ، انا بقاو ليا ست داليالي .. خاص نخبر السلطان بالحكاية كلها ، عاونيني الله يرحم ليك الوالدين ..

- مرجانة [ كتهزهز راسها ] :

صعيب الحال ابنتي .. السلطان قليل فين كيعمر القصر ، من نهار خوات بدر السعود هاد الدار مابقات كتحلى ليه فيها الݣلسة ، وعيني الياقوت فكل بلاصة ، خايفة غير تسيق الخبار وتفنيك كيف دارت للبدر السعود..

- قوت [ كتخمم ، تبسمات تبسيمة طويلة ] :

ماتخافيش عليا منها اخالتي .. قلبها خبيث ، وعينيها معمية .. واخرتها اتكون على يدها الحجلة الخفيفة من سعد الصياد ، وهي صيادة راسها ، أنا لي هامني دابا هو السلطان خاصني نشوفو وندوي معاه ونعاود ليه اللامة كلها ..

- مرجانة [ سكتات ، كتخمم ] :

شوفي أبنتي ، نهار الثلاث من كل شهر السلطان كيدير واحد الصدقة .. وكيتجمعو فيها العزين والوزير والقاضي ، وكيكون فيها حتى السلطان ... انا غاندخلك عندو حسي مسي ، بلاما يعيق بيك شيحد ، ولكن مخاصكش تعطلي عندو .. مانضمنش ليك الياقوت تدخل عليكم فالحين ، أنا غاندير جهدي ، ولي كيجري فالخير راه عمرو يخيب ..

- قوت :

الله يجازيك كل خير اخالتي مرجانة .. إن شاء الله ياربي ، فهاد الوقيتة انا غانتولى الياقوت ..

____________________

- النهار المبارك عليك ، واحد يغديك او واحد يعشيك ، والنهار الصݣع عليك واحد يدعيلك او واحد يشهد فيك .. عيبهم بالورد يغطوه وعيب الناس من تحت الأرض يجبدوه ، فالصغر خوخ ورمان وفالكبر شوك وضربان ..ايه خسارة المسمار فاللوح الراشي ... وخسارة المحبة فلي مايستاهلهاشي .. إيوا الرجلة عندها ميزان ، ومعدن بنادم مع الوقت يبان ..

- الأيام كانت غادية وتجري ، وحدات كاع قراعي الزيت للياقوت داتها دواحة حتى لعندها ، سلماتهم ليها أو وقفات كتسنا شنو غاتݣوليها ..

- الياقوت [ هزات القراعي شماتهم سكتات كتخمم حتى نطقات بضحكة غريبة عجيبة ] :

حليلو ، علاش ماكترتيش فيهم القطران ؟ ولا خفتي شعري يطوال ويولي ضر شعرك ؟

- قوت :

بالعما الالة ، راه القطران الى كثرنا منو كيولي مسموم .. وانا مابغيتش ليك الضر الالة .. انا لي مالفة نديرو فزيت درتو ماكترت مانقصت ..

- الياقوت [ بقات تشوفيها بشك ، هزات حداها واحد الكموسة تقيلة ، ولاحتها ليها .. هزاتها قوت واشرات دواحة باش تديها لبيتها ] ، رجعات للبيت وهي كترجف .. دخلات سدات عليها ولاحت الكموسة فوق نموسية بلاما تشوف شنو فيها ..

- أنا بغيت داك الشعر يطيح ليها بالكامل تولي مجدامة ..

- هزات قوت فنسمة عينيها :

زيدي على مابيا حتى نتيا .. انا مغاتكمل هاد الحكاية حتى يدي مول الأمانة أمانتو بالخلعة ..

- شعلة : غير رتاحي ، قلتها ليك مرة عليك الامان أبنت عبد الرحمان ، مابقى قدما فات ..

يتبع...