مجدول الذهب الجزء الثاني

- صلى صلاتو وتكا فبلاصتو ، هز تيليفون سونا ليها كيلقاه مشغول .. صغر عينيه دخليه الشك معامن اتكون كتدوي ، علاش ماسوناتش ليه فاش لقات ليزاپيل ديالو وحتى من ميساجو ليها لي سيفطو بلعاني باش يشوفها واش غاتجاوبو نخلاتو .. طلع ليه الدم وتعصب من هاد التصرفات ، قرر قرار واحد يدوي مع باها ويفك معاه هاد الحريرة ، كيحاول يخاف الله فيها .. ويتقي الله فيها ، ولكن هي مكتخليش بنادم يبقى على طوعو ..

_________________

- اما هي باتت الليل كولو وهي كتدوي معاه ، ليلة كلها وهي غاطسة فالحرام ومفرش ليه فبلاصة الورد الحرير والمرجان .. ماقطعات معاه الخط حتى وصل الفجر ، وهي فكرة وحدة فراسها غير ترجع تفك راسها من هاد التزويجة .. حسات قداش غلطات وتزوجات واحد ماشي من سهمها فكريا ..

- قلبها تغرم بعمر واخا يلاه تعرفات عليه ، ولكن حيت كان كيتقن فنون الاغواء وكيعرف يدوي ، خلاها تطيح فغرامو من اول نهار .. ناضت كتجر رجليها بدلات عليها ، وتبسيمة مزينة وجها .. جرات عليها الغطا وطفات عليها الضو ونعسات ..

- فشومبر لي حداها كان سهيلة شادة تيليفون وكضحك :

وماعندي مانسالك ، السيدة طاحت على عين قفاها ، [ضحكات بضحكة ميوعة ] شوف بغيتك تزيد تغرقها فيك بغيتك تخليها تلف على القبلة ... وماتنساش ليا تصيورات ، وصافي نص الفلوس راه خديتيه ، منين تنضي معايا الأمور يوصلك البقية انت غير تهنى ..

- جاها سؤال منو حيرو :

عمر : انا عارف راسي كنعرف ندوي مع الجنس اللطيف ، ولكن راه ماضنيتهاش طيح فنهارها ..

- سهيلة ضحكات ، ݣلسات على طرف الفوتوي راضة شعرها اللور :

هاديك لي طاحت من نهارها ، راه حتى طيبتها انا مزيان على عافية مهيلة ، واش يحسابك هادشي يلاه بديت نخطط ليه ، من نهار خطبها وانا كنحط فالعواد ونشعل العافية شوية بشوية ، كونما طيبتها انا مزيان والله ماطيح ليك فاليد ، راه 6 شهور وانا كنقنع فيها ونوسوس ليها .. المهم انت مكاين لاش تعرف هادشي ، كمل على خدمتك وراه مانخافش عليك يلاه خليت ليك الراحة ..

- قطعات معاه التيليفون وقفات غادية جهة نموسية وتلاحت عليها هي راشقة ليها وفرحانة ، علاش لا وهي موراضها قرب يتقضى .. غمضات عينيها ورجعات بيها داكرتها لنهار عرفات نسرين تخطبات لهاشم ..

فـــلاش بــاك ➡️➡️➡️

- سهيلة [بإنفعال وحرقة ] :

لالا واش من نيتك أنسرين ، واش هادو هوما مواصفات الراجل لي كنتي ظلي تعاودي لينا عليهم ؟

- نسرين [حاجة يدها على حنكها ] :

شنو أنقول اسهيلة ، بابا مانقدش نعارضو .. واش نقولو لا مابغيتش وسيد مافيه مايتعاب ؟

- سهيلة : فيه قالاك مافيه ، انت محامية ماشاء الله .. واخا حتى هو لاباس عليه ومعروف ودارهم لاباس عليهم ، ولكن والله لا خلاك تخدمي ..

- نسرين [ هزات فيها عينيها وغوبشات ] :

باش عرفتيها ، والله لا كانت ليه ، شحال وانا كنحلم نحل المكتب ديالي ، وفاش حققت هاد الحلم يجي راجل يقولي ماتخدميش ، من نيتك ..

- سهيلة [ كتزيد تقنع فيها ] :

هاد النوع كنعرفو مزيان ، كيبغي المراة تݣلس فدار .. مكايبغيش المرأة لي خدامة ومستقلة بداتها .. انت خاصك واحد يشارك معاك أحلامك .. ماشي واحد يدابز معاك غير على لباسك ، ويغبرك على عينين الناس ..

- نسرين [ غمضات عينيها وكلام سهيلة كيتردد فراسها ، فنفس الوقت كتهرب ونفس الوقت ماتقدش تراجع على كلمتها مع باها ] ..

________ دازت الخطوبة ديالها على خير مع هاشم ، كانت كتحاول تقبل أرائو .. من غير حاجة وحدة لي رفضات هي تكلس فدار ، ولقات بلي كلام سهيلة بصح ، كان ضد فكرة الخدمة .. ولكن كيفاش قبل وسكت ماعرفاتش ، كانت شاكة فباها لي دوا معاه .. فاش رجعو من شهر العسل هي وياه ورجعات لخدمتها .. جات عندها سهيلة للخدمتها ..

- سهيلة : ايوا أمضرا كيجاك العريس ؟

- نسرين : الصراحة أسهيلة بنسبة للخدمة عندك الصح ، فالاول مابغاش وقيلة بابا لي قنعو .. واخا الصراحة هو ظريف ولد الناس ومربي ولكن خايفة من لي جاي ..

- سهيلة [بصوت لحوح وشراني ] :

نسرين طوال الزمان لا قصار ، ايبغي يخرجك من خدمتك .. وايمنع عليك حتى السفر مع صحاباتك ، بحال هاد الرجال عندهم تفكير رجعي .. غير طحتي فخطية وغاتقولي سهيلة قالت ، انا قلبي عليك كنقولها حتى لنادية ، حسن عوانك واياك تحملي حتى الى بغيتي تفكي تفكي وانت حالك ساهل ..

- نسرين مجاوبتهاش كتخمم فهضرتها ، هزهات ليها براسها ونطقات بإبتسامة :

لهلا يخطيك عليا ، والله العظيم ماعرفت شنو كنت اندير يلا بيك ..

- سهيلة [وقفات] :

بلا جميل أزين ديالي ، راكي غالية على قلبي .. التيليفون بيناتنا ورضي بالك .. وماتسكتيش على حقك والى لقيتي راسك اطيحي هربي .. خرجات من عندها مخلياها غارقة فدوامة الحيرة ..

- من جهة الولاد كانت كتاخود مانع الحمل بلاما يعرف هو ، بداو نقاشات بينها وبينو .. ديما خدمتها كانت كتسبب مشكل بنسبة ليه ، الوقت لي كيبغي هو يݣلس معاها كتكون هي خدامة على شي ملف ، وهادشي هو محاملوش فالمرأة ..

- بدات كتلحق على كلام صاحبتها فاش ولات كتبغي تسافر مع صحاباتها وهو كيقولها المرأة خاص سكون معاها راجلها ، الى ماسفر هو معاها هي مكاتسافرش .. وهادشي بضبط لي بدا كيعصبها ، كتصبر راسها غير على قبل باها .. وعمر هادشي بيناتو لصحاباتها .. مكانتش كترضى تبين ليهم بلي عقليتها وعقليتو متناقضين ..

- فينما تلاقاو كضحك وتقول بلي كيموت عليها ومبرعها وفعلا ماكدباتش ، ولكن مسألة الخدمة وتحررها هوما لي كيسببو ليه المشكل .. نهار على نهار كتفكر فطلاق ولكن كانت كتسنى الوقت المناسب على الاقل يفوت عام على زواجها ، باش الناس مايحلوش فمهم عليها .. وهي من النوع لي مكترضاش كلمة تقال عليها ..

نــــهايـة الفلاش بـــاك 🔛

___________________

- السم ديال الإنسان يقدر يخرج عليك ، خصوصا الى كنتي غشيم وكنتي غير على سبة ، خاص غير الواحد يبداك .. كيبقى يحفر ليك وانت مجايب لدنيا خبار ، خبث الواحد يقد يصفيها ليك ويطيح فحفرة صعيب تخرج منها .. ياويلك من شي حد دارك فراسو ، كيبقى تابعك حتى ينول مورادو منك ..

- كانت غادية وسارحة فهبالها ، ناسية راجلها ناسية والديها ناسية بلي بهاد الفعلة ديالها اتخسر كاع لي ضايرين بيها ، عمر لحس ليها مخها .. صباحها دوزاتو معاه ماخلاو بلاصة فأݣادير مامشاو ليها ، باها من كلام نسيبو لي ماعجبوش ، عيا يسوني ليها ولكن مكانتش فهاد العالم ..

- طلع ليه الزعاف وماحجبوش الحال من فعايل بنتو ، هاشم تبرا منو .. وعطاه اخر انذار الى بنتو ماجمعاتش راسها دار القاضي تفرقهم ..

- وصل الليل وهي والو واش كتجاوب نهائيا ، وتصاورها هي وعمر وصلو لعند سهيلة لي كانت فرحانة وناشطة ..

- رجعات لشومبر ديالها حلات تيليفون لقات باها شحال وهو مسوني ليها ، عرفات بلي راه وصلها ليه سخونة .. ماكلفاتش راسها تجاوب نهائيا .. مكانتش باغية تخسر فرحتها ، كانت ناوية تزيد مزال أيام أخرى ، ولكن خدمتها كاتسناها شدات الطريق راجعة لأسفي وقلبها خلاتو مع عمر ، أول حاجة دارت فاش وصلات هي طرݣات مول تيليفونات .. خدات تيليفون جديد ونمرة جديدة ، تم تم ركباتها وسونات لعمر عطاتو نمرتها جديدة بحجة انو نمرة لوخرا ديال الخدمة ..

- ديمارات طوموبيلتها وشدات الطريق لدار ، دخلات مكان حتى واحد فدار عرفاتو ايكون فالمحال ، دخلات دزشات وبدلات حوايجها ، هزات ساكها وخرجات فتجاه خدمتها ..

___________________

- كانت ݣااسة خدامة على واحد الملف ، حتى تحل عليها الباب هزات راسها بان ليها باها .. داخل مغوبش ناضت وقفات يلاه اتسلم عليه نخلها وݣلس .. بصوتو الجبار الوقور :

أش هاد الفعايل ديال قلالات الترابي الالة ؟ راجلك جاي يتشكى من فعايلك واش هكا كيديرو بنات الناس ؟

- نسرين [ ببرود ] :

بابا ، أنا هكا دايرة هو خداني هكا ، ماخدانيش لابسة الخمار ولا ساكنة وسط الكوزينة ..

- الحاج [ضرب بيدو على البيرو حتى زعزعها ] :

ياريت كون كنتي بحال هاد النوع من البنات ، عند بالي ربيت وعرفت شنو مربي صدقتي لفعة كتلواي كل مرة بلون .. ، الالة اشريفة راكي مزوجة ماشي مزالك عزابية ، باش تبقاي دايعة ليا مع لي تسوى ولي ماتسواش ..

- نسرين : هداك زواج ، ماشيش حبس يخنقني ويسد عليا لا ماتسافريش الى ماكنتش أنا .. وزايدون هادوك صحاباتي ، مايمنعهم عليا حد ..

- الحاج [ تعصب ] :

تبارك الله على صحابات ، جامعة عليا تم غير ربات البيوت مربيات الاجيال ، وهي غير الكماية على ختها ، من ديما كنݣوليك ديك سهيلة مكايرتاحش ليها البال والخاطر وانت غير مزايدة فالهبال وطغيان ..

- نسرين [بقات ساكتة مدة وهي تقول ببرود ] :

بابا انت لي بززتي عليا هاد الزواج ، وانت لي عرضتيني على هاشم غير حيت معرفة ، عمرك سولتيني شنو بغيت .. عمرك قلتيلي الراجل لي بغيت نتزوج بيه كيف بغيتو وشنو كنتمنى فيه ، جيتي وحطيتيني قدام الأمر الواقع ، وأنا رضيت وتقبلت هاد الزواج .

- الحاج : جيت وسولتك واش رتاحيتي ليه ورا زواج ، ݣلتي ياه ابا ولد الناس مهلي فيا ، ولا ݣلتيها غير حيت مشبعك كادويات ؟

- نسرين [ حكات ورا عنقها بتوتر ونطقات] :

ماشي غير هكاك ، حيتاش حنين فيا وكايعاملني مزيان ، والى بغيت شيحاجة مكايقوليش لا .. حتى من طياب لي مكنعرف ليه قابل عليها وهو لي كيدخل للكوزينة ويطيب ، ولكن ابابا هادشي مكافيش ، المحبة الى مكانت مكاين والو ، 6 شهور دابا باش مزوجين ومزال مكنحسش بلي كنبغيه ابابا فهمني ..

- الحاج [ غوبش حس بيها كتخيط الدروبة باش توصل لشيحاجة ] :

عطيني المعنى ، لاياش باغية توصلي ؟

- نسرين [ حطات ستيلو من يدها وتنهدات تنهيدة طويلة ] :

انا وهاشم ، ماعمرنا نتفاهمو ، هو راغي وحدة تݣلس فدار ماتسافر غير وهو معاها ، باغي ولاد باغي بزاف دالحوايج انا مزال مكنفكر فيهم ، مزال كنطمح نكون محامية كبيرة ، مابغيتش الولاد يربطوني .. اللهم هاد زواج يدار ليه حل وكل واحد يشوف حياتو من الاحسن نطل [ قبل لا تكملها خبط الحاج يدو مع البيرو او وقف ] :

هاديك هي لي مدكريهاش على فمك ، ماعندناش بنات كيطلقو .. سمعتي ولاولا ، نهار ديري رايك وتفرقي مع داك ولد الناس ، نساي داري ونساي بلي انا باك ، ديك ساع كمارتك مابقيت نشوفها ..

- حل الباب بزعاف وخرج ، خلاها غير كتشوف وشادة على راسها معصبة ..

_____________________

- فواحد الدار ، كطل على البحر .. متكونة من بيت واحد وصالون كبير مفرش فراش بلدي أصيل ، الحيوط كلها بزليج مغربي حر والسقف كلو منقوش .. طبلة الوسط ، محطوط عليها تمر لوز الكركاع براد اتاي منعنع .. كيتسمع صوت الوتار ، موسيقى كتحرك روح كل مهموم .. كتخليك تغوت فديك المعزوفة ، كتحرك حال لي ماعندو حال ، أما لي الهم معمر قلبو كتخلي دموعو هابطة سيالة ..

- مقابل معاه كيحقق فصباعو ، رجل هازها فوق السداري ورجل مسرحها .. ساعة رجولية رجل كاين فالعام الأخير من الثلاثينات ، هاز كاس داتاي فيدو وكيتنغم بصوت عزف صاحبو .. مع سالة حط الوترة حداه ، هز كاسو وجغم أخر جغمة من أتاي ..

- فؤاد [ نطق بصوت رجولي تقيل فيه بحة ميزة صوتو ] :

الݣلب بردات جمرتو ولا مزال ؟ مكاتهز الوترة حتى كيكونو الاعصاب واصلين متصلهم معاك ..

- هاشم [ ناظرو بعينيه ، لي فيهم ألف معنى وإحساس ] :

الݣلب المشموت عمر نارو تهدى ولا تبرد ..

- فؤاد [ حط كاسو على الطبلة] :

قطع الضبرة تبرا ، كفيتي او وفيتي أصاحبي ، درتي بأصلك وبدينك .. مابقات معنى ..

- هاشم [ جبد عود الاراك من جيبو ودارو ففمو ] :

العين تجي فالعين أفؤاد ، ومن العين تعرف ولد الخيار من المشرار ، تعرف واش تزطم وتزيد تكمل ولا تحبس ، وتحيد عليك ديك الحدبة من ظهرك وتݣطعها من جدر ..

- فؤاد [ هزهز براسو ] :

حزم الحزام مزيان ، واياك يديك تسبقك ، حضر العقل والإيمان ..

- هاشم [ غمض عينيه وحلهم ] :

عمر يدي تهزات على مرا ، وعمرها تهز أفؤاد ، نعار لي تهز يدي على شي وحدة عرفني شميت ريحة الغدر وطعنة فظهر والخيانة .. ديك ساع هاد اليد [ هز يدو قبالت عينيه ] ماعليها لومة ..

- هز سوارت طوموبيلتو ، ربت على كتف صاحبو وخرج ..

- رجع بالليل للدارو ، حل الباب وصلاتو ريحتها .. دخل لصالون لقاها ݣالسة حاطة رجل على وكتسناه .. حط السوارت على الطبلة ونطق ببرود وعينيه عليها :

على سلامتك ..

- نسرين [ كتحرك فرجليها وصوت خلخالها كيتسمع] :

الله يسلمك وينجيك ، شفتك مشيتي لعند بابا وعمرتيه مزيان ، ماعندي مانتسالك ، ياك قلتي بلي مشاكل المرأة هي وراجلها مخاصش شي حد يعرفهم ولا شتك بدلتي كلامك ؟

- هاشم : ماخليتي فيها مفاهمة ابنت الناس ، منين نسوني على مرتي وتنخلني وسادة تيليفون فوجهي ، ومنين مرتي نسوني ليها وهي علم الله معامن شادة جماعة فراه مابقات مفاهمة .. وخاص الكبار يدخلو ..

- نسرين [ بنفس البرود ] :

ياك كتبتي ليا هاد السفر ايخليني نفكر مزيان ، وسمعني اهاشم [ حاولات ترطب كلامها ] 6 شهور داز على زواجنا ، حاولت نبغيك ، ولكن الحب مكايجيش بزز ولا بالحزارة .. أنا فهيث وانت فهيث ..

- انت باغي مرا شكل وأنا شكل ، انا عمر خدمتي مانخليها ولا نفرط فيها .. وحتى الولاد مكنفكر نحمل دابا ، مزال بغيت نحقق داتي ونولي محامية كبيرة ، وانت هادشي مكتفكرش فيه .. انت باغي وح[ قاطعها فاش ݣلس ونطق ببرود كيخلع ]

المفيد ابنت الحاج المفيد .. قصري طريق وجيني ݣود ..

- نسرين [ بصوتها الأنثوي ] :

من الأحسن هاد زواج يسالي ، وكل واحد يشد طريق ، نديرو طلاق إتفاقي ونتهناو ..

- هاشم [ بقا سلكت مدة شوية بدا كيضحك بصوت كيهدم جبال ] :

الطلاق ، غير جي وطلق .. [ وقف ] شوفي غادي نݣوليك جوج كلمات ، حمدي ربي متاقي فيك وجه الله ومدوز هاد تسافيرة لي مشيتي بجغمة الما ، داير بعدر راكي مزال جديدة فزواج وهاد الحياة لي بنسبة ليك غريبة ..

- الى غير على طلاق انا مامطلقش ، غانخلي ليك وقت تفشي فيه وترتاحي وتفكري مزيان ، ويرجع ليك عقلك لراسك .. دوك صحاب ديال جوج دريال لي غايخرجو عليك عطيهم تيساع ، هضرة وحدة تݣالت ..

- خلاها بغات تحماق ودخل الحمام ..

- نسرين بالغوات ] :

واش انت وبابا محاميين عليا ، واش نبقى معاك بزز ، اسيدي بغيت طلاقي واش نبقى مربوطة معاك بزز .. مشات كضرب برجليها للبيرو ديال خابطة الباب بزعاف ..

________________

- فدار العطار عبد الرحمان ، كانت الأجواء غير فرحانين بسناء .. التحضيرات بدات والأيام غير غادية وكتجري ، قوت سدات المحال الجديد وقررات الافتتاح مايكون حتى يفوت زواج ختها ، باش وقتها كولو يكون ليها ..

- كانو ݣالسات ب 3 خولة وسناء وقوت ..

- خولة [ بإعجاب ] :

حمقني الخاتم ، غزال شهوة منو ، الله يكمل عليك بالخير ياربي ..

- سناء [ عينيها كيبريو بالفرحة ] :

اللهم آمين ياربي ، والله يفرحكم ويفرح كل بنية مادة يديها للهنا ياربي .. عرفتو البنات ، فاش سونا ليا وقاليا نخرجو .. دنيا ضارت بيا ، ولكن كبر فعيني ، وشدة ماشدهاش فيدي ، وكيقولي واش متاكدة واش عجبك ، خرج ݣاع الموديلات لي عند خوه وراهم ليا ..

- زدت بغيتو كثر وكثر ، حتى عينو مكايهزهاش والله العظيم ..

- قوت [ طبطبات على يدها ] :

الله يفرحكم ويجمع بيناتكم بالخير ..

- سناء [ عنقاتها ودموعها ساحو ] :

الله يفرحك اختي ، ويعوضك على كل حاجة دازت عليك ياربي حبيبي ، ونشوفك فرحانة مع شي راجل لي يعرف قيمتك يكون هو سلطان وانت أميرتو ياربي ..

- قوت [ بعداتها كضحك ] :

انت مالك اعلى سبة ، خاصك غير تبكي ..

- سناء [ كضحك ] :

انا راه واخا مبلوزة مرة مرة ، ولكن كنبغيك ، انت هي عينيا باش كنشوف ماعنديش اختي من غيرك .. انت هي نصي تاني لهلا يحرمني منك ..

- خولة [ كضحك ] :

بقات ليك 15 يوم بالحساب ، نوصيك وصية ماتقتل ماتحيي ، عمرك تبيني بلي راه انت قل من شي واحد .. كيما بغا يكون نوعو ، عامليه بلاتي هي أحسن ، ولكن ماشي لدرجة الذل حاجة عاجباك مرحبا .. ماعجباك لا نتعامل بتربيتي ، ولكن ماتخلي حد ينقص مني ولا يقلل مني ، ولا يركب على راسي ..

- ديما انت حسن من أي واحد ، شانك عالي ومقامك عالي ، تفاهمنا ولالا ..

- سناء [ تبسمات وعنقاتها ] :

كوني هانية ، لهلا يخطيكم عليا ياربي ..

- الأيام كانت غادية كتجري بحال رويضة ، شي كدوز عندو تقيلة وحياتو ماشي حياة ، ماشي ديك العيشة لي تمناها ولي دخل ليها بنيتو الزوينة ..

- وشي عايش الغرام والمحرمات تحت الدف .. من اخر نقاش ليها وليه مابقاتش كاتعمر معاه كدخل كتسلم عليه عادي ودخل للبيرو ديالها .. مكانوش كيعمرو مع بعضياتهم ..

- تيليفونها العادي كانت كتحطو فاش كايكونو كياكلو بزوج ، أما تيليفون ديالها لي كدوي فيه مع عمر كانت مخلياه .. مكدوي فيه حتى كتكون بوحدها ولا فاش كتكون فالبيرو ..

- طلع ليه دم حالتهم ماهي حالة حتى ليمتا ايبقاو على هاد الحالة ، قرر يفوت عرس خوه ويكلس معاها على الطبلة ويتوصلو للحال ، لي طبعا مايكونش فيه الطلاق .

- دازت سيمانة ، وبقات سيمانة وحدة على ضريب الصداق ، فهاد الأيام كانت قوت كتحل المحال الأول مرة مرة ، وباقي الأوقات واقفة مع ختها وقفت راجل ، الحلوة كلها دازت على يديها حلفات ماياخدو والو من برا ، كولشي صايباتو هي وخولة بتاويل على حقو وطريقو ، كلما قرب نهارها كانت خلعتها كتزيد .. وفرحتها كتعلى وعلاش لا ، الانسان لي تمناتو بهاد الشخصية وبهاد الأخلاق هاهو ربي كتبو ليها وغادي تكمل معاه حياتها ..

_______________

- خرجات من الخدمة ركبات طوموبيلتها وتيليفون دايراه على ودنها فرحانة .. هاد الأيام لي دوزاتها مع عمر وزادت تعرفات عليه ، خلاها فرحانة خلاها تعرف بلي دارت خطأ منين قبلات تزوج بهاشم ، تعاملو معاها والمجية ديالو لعندها لأسفي مامرة مازوج ، خلاها تصارحو بلي مزوجة وباغية طلاق مقالتهاش ليه فالأول ولكن فاش شافتو غامر على قبلها وجا حتى لعندها وخلا خدمتو وݣلس فالأوطيل اباش يكون قريب منها .. قررات تعاود ليه كولشي ، عجبها لحال فاش قاليها :

أنا باغيك كيما انت ، وغير غادي طلقي انجيبك لداري ، مايمكنش ليا نسمح فيك انسرين ، واخا عرفتك فأيام قليلة ولكن ، قسما بالله حسيت معاك بشي حوايج عمري حسيتهم مع شي وحدة ..

- معاك حسيت برجولتي ، انت حسستيني برجولتي لي عمري حسيتها مع شي وحدة .. راه مايمكنش نسمح فيك مستحيل ، شوفي راه كنقسم ليك بالله اتكوني ديالي مكايهمني حتى حد ، وغانتسناك طلقي تدوز العدة اندير لازم ونجيبك لعندي ..

- انت ديالي ، دخليها لراسك ..

- كان هذا هو جوابو ، كلام لي خلاها تشد فقرار الطلاق بغا لي بغا وكره لي كره ..

__________________

- دخلات لدارها نيشان لبيت نعاسها ، بدلات عليها ولبسات سورڤيت سبور ، بدا تيليفونها الثاني كيسوني ، كانت كتمشط شعرها ، فتحات الخط ودارت مكبر الصوت :

ههههه عاد كنا كندويو نعل الشيطان ..

عمر : توحشتك اعباد الله ، واش مابقاش شي حد يوحش حبيبو مراتو .. [ ضحكات هزات تيليفونها وخرجات لصالون ] ..

- الله يعطيك عقل ، غادي تحمقني بكلامك ، حتى انا كنتوحشك [ تنهدات تنهيدة طويلة] إيمتا نكونو بزوج ..

- عمر : هادشي انت لي اديريه ابب القرار بيدك أنت ..

- نسرين : لا كون هاني ، راه عاودت ليك كولشي ماتخافش ، انفاري هادشي واش نسيتي بلي هادي راها خدمتي ، إن شاء الله انا اندوي مع بابا ونحاول نقنعو ، أما على هاشم مابقاش كيهمني يدير لي دار الاستدعاء غاتوصل ليه غاتوصل ليه .. [ رجعات ضحكات غافلة على الشخص لي خرج من البيت وهي غافلة عليه واقف كيسمع لكل كلمة قالتها كيسمع للفجور ديالها ، اخر حاجة كان كيتوقعها هي تخونو .. كلو كان كيترعد ، كيحس بنصو غايتشلل عليه بداك العصاب، نارو شعلات وشيطان لي كان كينعل فيه ، حظر .. أصعب حاجة ممكن الواحد يتعرض ليها الخيانة ] .. قطعات الاتصال من ورا ماكملات فغرامها ، وقفات غادة للجهة الكوزينة حتى كيبان ليها واقف كيشوف فيها ..

اللون تخطف من وجها ، دقات قلبها بحال الطبل .. رجعات خطوة لور و بلاما تحس وهي كلها كترعد طاح التيليفون من يدها ..

ها هاشم [ بلعات ريقها ] م مالف ك كتكون فالمحال !! جاها الرد من يدو لي نزلات على وجها حتى حسات بدم خرج من لحم سنانها .. ودنها تصمكات ليها ، مجات فين تستوعب ، حتى حسات بيدو على شعرها ، جرها حتى حسات بيه صافي غايݣلع ليها شعرها من جدر راسها .. كتغوت بألم وتهدد :

- هاشم هاشم والله مادرت شيحاجة هانت سمع .. مكانش نهائيا فهاد العالم ، جرها جرة وحدة وهي كتفركل تحت يديه بحال شي حوتة خرجات من الما ، كتحس بالعصب ديال راسها غادي يتݣطع ، اما هو نار الغدر شاعلة فيه ..

- عمرو قرب للحرام وهو عزري ، كانو عندو علاقات خفاف مكايفوتوش حدود الإحترام ، عمرو فسد كان غادي بمبدأ ، أي حاجة غاتكون مع حلالو .. شخصيتو هكا دايرة رزين ومتبت مايدير الحاجة حتى يعرف علاياش ايحط ساسها .. حتى نهار جاه الحاج ، لي كان معرفة ديما كيتقدا من عندو غرض عليه يتزوج ببنتو ، ماينكرش بلي كان غايرفضة، ولكن فاش شافها تسحر بيها وملكات قلبو .. كان ضد أنو مراتو تخدم ، ولكن نسرين خدات قلبو وعقلو ، قرر يمشي معاها بالهداوة حتى تقتانع بريو ..

- الكوليكسيو لي خرجات هي اول وحدة كتلبس منها ، كان خاصها غير تدوي ، حتى من الطياب كان هو يطيب مكانش عندو مشكيل انها مكتعرفش ، عماه الحب والغرام .. ولكن باش يصبر على هبالها ويصبر على غرورها ، وتغدرو تطعنو فظهرو فقلب دارو كتهضر مع راجل غيرو ، ماقدرش يتحمل الوعي غاب فهاد اللحظة .. عينيه تعماو مابقاش كيبصر قدامو .. ودنيه تصمكو على غواتها ..

- جرها راميها على حر جهد جهة النموسية حتى تخبطات على الكوافوز .. عينيه مكايبانوش ولاو بحال شي جغمة ديال دم .. صدرو كيطلع وينزل العصب ديال راسو كيخبط ، كيشوفيها بواحد الشر عمرها شافتو فحياتها .. حتى فخدمتها عمرها شافت بحال هاد النظرات ديال الشر لي كتشوف منو .. بلعات ريقها كتحس براسها كيوزوز وفمها كيضرها ..

- بعد مني خلينا ندوي بالعقل ، اش هاد تاهيماجيت لي انت فيها ، قسما بالله حتى غادي تندم ..

- هاشم [من تحت سنانو مغزز كيبرد فيها حر الشمتة ، حر التعامل لي كان يعاملها وفالاخر تخونو ، جاوبها بزوج كلمات ] :

تاهيماجيت هي لي غاتشوفيها دابا ..

- تعماو ليه عينيه مابقاش كيشوف قدامو .. كيضرب فيها وفينما جاتها الضربة ، عينيه معميين حتى رجع ليها وجها كولو زرݣ نيفها غادي بدم فمها نزل بدم .. مبرد فيها حر الكية كية كتخونو ، تخونو مع راجل مادخلاتش ليه لراسو ماتقبلهاش ، حس براسو حمار ، كيفاش كان كيعاملها دير ليه هكا ..

- كتهضر فتيليفون مع صاحبها بلا حشمة بلا حيا فقلب دارو ، وهو لي كان داير جهدو على ودها .. كيزيد يتعصب ويزيد يدݣ فيها ، فغفلة منو عضاتو من يدو دافعاه بجهد لي بقا ليها ، كتجر فرجليها كتجري حاتية على سوارت طوموبيلتها ، حلات الباب كتجري مع دروج ، حيط يديها وحيط يجيبها ... تبعها وجيران كيطلو .. بحكم الحي راقي مكانش كيكون فيه الصداع نهائيا ..

- غواتها خلا الكل يطل يعرف اشنو واقع ، مشات كتجري ترمات لطوموبيلتها ركبات فيها قاصدة الكوميسارية نيشان .. رجع لدار هز سوارتو وتيليفون يلاه ايسد الباب ، سمع سونيت فالواتساب .. ماداهاش فيه نزل وركب طوموبيلتو تابعها ، شوية سونا ليه التيليفون جاوب بلاما يشوف النمرة ، نطق بصوت بارد كولو كيترعد النار ݣادية فقلبو :

نعام !! سمع صوت راجل كينطق ببرود :

الى بغيتي تعرف مراتك معامن دوزات الويكاند ، شوف التصاور لي وصلوك فالواتساب .. ݣال هاد الجملة وقطع عليه ..

- حبس الطوموبيل ، ودخل للواتساب .. زاد شعل فاش شاف التصاور لي وصلوه كان بحال ثور هايج كان مسدود عليه وحليتي عليه ، مابقاش كيشوف قدامو نهائيا ..

- حط راسو على الڤولون كيحاول يفكر .. نطق بصوتو الرجولي لي كان بحال شي ألة ديال الحفير :

أستغفر الله العظيم وأتوب إليه ، يارب يارب يارب توجهني يارب يارب انا عبدك الضعيف تبتني يارب مابغيتش نعصاك .. تنهند تنهيدة طويلة ، واول حاجة دار وجاتو على بالو هي لي بدا فتنفيد ديالها ..

- شمتاتو طعناتو وغدراتو ، وحلف حتى يرضها ليها بضوبل يخليها تمنى الموت وماتلقاهاش .. رجع بطوموبيلتو وقصد دارهم .. وقف طوموبيل قدام باب دارهم نزل ودق .. حلات الخدامة الباب ، غير شافتو وخلات ليه الطريق يدخل ..

- كان الحاج باها ݣالس يلاه حاطين يتغداو هو ومراتو وخوها .. غير شافو تبسم ونطق :

ولدي هاشم ، مرحبا بيك دخل ..

- نطق هاشم ببرود ، بصوتو الرجولي الرخيم :

ماجيتش نضايف الحاج ، انت مول الخير .. جيت نوريك شيحاجة وغانقصد المخزن .. مابغيتش ندير شيحاجة قبل ماتشوفها ، باش متݣولش عليا ماقصدتكش ، واخا هادشي لي وقع خاصني نقصد القاضي ، ونسيفط بنت فين تربا ..

- الحاج [غوبش او وقف ] :

ياك لاباس اش كاين ؟

- أم نسرين : ولاواه أولدي ، ماشي غير حيت وقع بيناتكم هاد دباز تقصد المخزن ..

- يونس [خوها ] :

نسيبي اش كاين ؟

- هاشم [بنفس البرود ] :

نهار تزوجت بنتكم ، حيت انت الحاج شفتيها تستاهلني ونستاهلها ، ݣلتي ليا بفمك بلي بنتك واخا قارية او محامية او واصلة ، بلي تابتة ومرزنة .. مأصلة مكانش عليك تخرج كلام انت مامتيقنش منو ، وباش نحصل بنتك كتخوني مع رعاوين فقلب داري ، خاصها تربا ..

- وقف يونس وقفات مها ، شي كيشوف فشي ، الحاج لونو تخطف ، دقات قلبو مابقاوش منظمين ، بلع ريقو ونطق :

أش كتخرج على فمك أهاشم ؟

- جبد هاشم التيليفون بكل برود على عكس النار لي شاعلة فقلبو ... كان محضر الإيمان وشوية دالعقل لي بقا ليه .. باش مايمشيش على قبل وحدة ماتسواش للحبس ، مشا لجهة التصاور ومد ليه التيليفون هسهس بصوت بحال فحيح الأفعى :

تفرج ليا مع راسك ، شوفليا بنتك معامن دوزات الويكاند ..

- شد الحاج تيليفون ، فمو نشف عليهم كونما الكرسي لي وراه كان غادي يطيح .. غير يونس لي شد عندو تيليفون وعاونو يݣلس .. يد الحاج مشات للكاس الما ، هزو ويدو كترعد .. كيبلع فداك الما بحال حبات الحمص لي كيوحلو فالحلق ..

- يونس [ تصدم فشل بحال الى خواو عليه سطل دالما بارد ، اخر حاجة كان متوقعها هي ختو دير هاد الفعلة .. هز راسو فهاشم ، كلامو كيخرج مقطع ] :

شكون سيفط ليك هاد التصاور ؟

- هاشم [قرب منو ونطر ليه تيليفون مرجعو لجيبو ] :

مكايهمش شكون سيفطهم [ ورك على كلامو بصوتو لي بحال دݣة المهراز ] :

باش نجيك نيشان ، ختك خليت دار عشها ، وسبقاتني للكوميسارية باينة باش ديكلاري ، وماعديش ݣرام دالمشكيل ، غايشوفو هاد التصاور غايشوفوهم ، غاتشوه غاتشوه .. أقسم لك برب العالي والذي لا رب سواه .. تغاندمها على نهار فاش تزادت فيه ..

- عطاهم بظهر وخرج .. نطق الحاج ، بصوت كيخرج بزز سخفة شداها .. :

جري جري سيكل ختك .. لا ديكلاري ويشوها وتشوهنا ونتشوهو كاملين ، سوني ليها ولا شوف شنو دير ..

__________________

- كانت حالفة حتى دخلو يتݣلاصى فالحباسات ويدوز عمرو كامل تم ، حلات واحد المجر وجبدات شي شيكات ديالو ، هبطات المرايا كتشوف فوجها ، كلها كترعد .. كتردد بينها وبين راسها :

الى ماخليتك تدفن فالحبس وأنت حي مانتسماش نسرين ..

________________

- هز يونس السوارت وخرج كيجري ، ركب فطوموبيلتو مديماري وتيليفون فيدو .. كانت واقفة كتسنى تدخل عند لانسبيكتور باش ديكلاري بيه .. فم زرق عينيها زرقين .. هزات تيليفونها وحلات الخط ، يلاه اتبدا تبكي وتشكي وتنوح على خوها حتى سكتها بكلامو ..

- عند بالي عندي خت بحالها بحال الناس ، ساعة ربينا سلݣوطة ديال الخلا ، قسما برب الكعبة نشوفك انخلي دار عشتك ، فينك ؟

- نسرين [ كتبكي ] :

علاش كدوي معايا هكا ، كون تعرف شنو وقع ليا ، انا فالكوميسارية ..

- يونس [ مغزف عليها ] :

ݣاع لي دار لك تستاهليه ، شفنا تصاورك الموسخة ، با شاف تصاورك انت وداك الحيوان لي مصورة معاه ولي دوزتي معاه الويكاند .. برب وتجبدي هاشم حتى نتشوهو كاملين .. [ وقف عليها البوليسي وهي كتدوي مع خوها باش دخل عند الضابط ] ..

- يونس [ سمعو ] :

الى ديكلاريتي بيه ، تصاورك الحيوانة ايوريهم للبوليس ، اتشوهي لا انت لا حنا .. قسما بالله حتى الواليد يمشي فيها .. غادي تݣولي ليهم بلي تلݣاو ليك الشفارة ولا عرفتي خرجي انت من تم نيشان .. وخلينا نحلوها مع السيد بلاتي هي أحسن ..

- وحسن ليك الواليد مايشوفش كمارتك اسلݣوطة تفو .. قطع عليها الخط .. خلاها تبيض بيضة هنا وبيضة فطاس .. هزات عينيها فالبوليسي ونطقات :

سمحليا جاتني واحد الخبار خايبة ، هزات ساكها وخرجات كتجري ماعطاتو حتى تفسير ، ركبات فطوموبيلتها كتبكي .. ماعرفات شنو دير ، كتسول راسها شكون سيفط ليه تصاورها مع عمر .. شي حد قاريها فيها حسيفة مافهمات والو .. هزات تيليفونها دورات لعمر ، لقات نمرتو طافية ..

- نسرين : ياربي المعبود شنو غاندير .. ديمارات ورجعات لدار عندو .. ماتقدش تمشي لدارهم بأشمن وجه اتشوف والديها وهو شوها معاهم ، شدها من اليد لي كضرها ..

____________________

- حلات الباب ودخلات ، سداتو وراها .. مع هزات راسها كيبان ليها ݣالس مقابل معاها ، كيشوف فيها ببرود .. بؤبؤ عينيه مكايبانش .. مكتعرفو فاش كيفكر ، متكي بداتو العريضة الطويلة لي كلها هيبة .. داير رجل على رجل وكيشوف فيها ..

- بلعات ريقها ونطقات ] :

منين جاوك دوك التصاور ؟

- هاشم [كيعض باطن حنكوو، تبسم بطنز ] :

جاوني من نمرة صحايبك .. صدق ولد الناس ومابغانيش نبقى فدار غفلون ..

- نسرين [حرات الكرسي بتوتر وهزات عينيها فيك ، كان كيشوف فيها بواحد البرود كيخلع ، لأول مرة تبصر هاد النظرات منو ، رجعات شعرها ورا ودنيها ونطقات بصوت غالب عليه بحة الهدوء ] :

انا وياك من الأول ماكناش مفاهمين [ مع قالت هاد الجملة تبسم بإستهزاء ] انا مابغيتش راجل يربطني حداه .. حتى انا عندي حياة خاصة فيها خدمتي وصحاباتي ..

- هاشم [مقاطعها صوتو التقيل ] :

وصاحبك ؟

- نسرين :

هاشم قسما بالله انا وياه ماوقعات بيناتنا شيحاجة ، اه فعلا دوينا وتكلمنا كيفاش وقع ماعرفتش ، واصلا كنت جايا ناوية نقوليك نطلقو .. انا راه والله ماخنتك ..

- هاشم [ كيهزهز براسو ، محكم فداتو غير بزز ، كيبان ليه ينوض يطير على عنقها حتى تخرج روحها ، مكالمي راسو لأبعد حدود ] :

وحدة عمرها حطات جبهتها لأرض ، ماعرفاش لا ليها لا لي عليها ، معارفة فالدين ݣرام .. وا شريفة راه تهزي عينيك فراجل كتسماي خنتي .. كتريݣلي على الوعد ولا كيفاش .. رضاني رعواني .. ، تي سمعي ماتخلينيش النوض نقبرك وندوزها حبس ..

- ديك الهضرة ديال جوج كيلو ماعندي ماندير بيها ، اتحلي ودنيك معايا ولغاك مانسمعوش ، ماعدي مانخسر تصاورك نضرب بيهم طر .. يبقى فيا اباك لي ايهزوه كومة لسبيطار ونيشان للروضة ..

- نسرين [ يديها بردو عليها ، النفس بدات طلع ليها مقطعة ، حكات راسها ونطقات بصوت مرعود ] :

ماديرهاش أهاشم .. مادوزناش القليل ..

- ماقدش يتحكم فراسو ، بخطوة وحدة كان عند راسها ، حط يدو خانق عنقها مرجعها اللور ، حطات يديها على يدو باغية تبعدو عليها ، كتحس بروحها غادي تزهق ، داتو كلها سخونة بالاعصاب ، كيغزغز بسنانو مقنصها بنظراتو وعينيه لي بحال الفاخر فكحوليتو ] :

مابقيناش كنا مامفاهمين ، ولينا مادوزناش قليل ، الذهب كنتي تموتي عليه .. تفرحي بيه ، هاد الحيوط لي خاصهم يريبو عليك ، لي شهدو على كلامك وتصرفاتك وتحريميات ديالك .. نفكرك ابنت الحاج ولا نسيتي ..

- نفكرك شكون لي كنت نجي من عند الباب وتلاح عليا بحال قباطة الرواح .. دابا وليتي تݣولي ماكناش مفاهمين .. شنو لي مافياش أنا فيه هو أم .. علاش [ كيغوت بحال شي وحش ] علااااااااش علاش أنسرين علاش .. [ مكانش حاس على راسو شنو كيظير وهي كتفركل بين يديه دموعها نازلين وعينيها خارجين صافي كتحس براسها غاتودع .. بدات كتكح وعينيها نازلين بدموع ، طلقها طلقة وحدة مجيفها .. بدات تكح وكتاخود نسبة من الهوا تحاول ترجع بيها الوعي ديالها ..

- رجع لبلاصتو ، وݣلس بداتو العريضة الوازنة ونطق وهو كيشوف فيها :

الطلاق انا غاندفع ليه ماشي أنت ، حقك اتسمحي فيه تالي ومتلي ، غاتهزي رحيلك وتخوي رحبة أسفي ..

- كانت مزالها ماستوعبتش هادشي لي دار ليها .. زاد عليها بكلامو ، قلبها كيضرب وكتنهج :

من نيتك ، فين انخوي خدمتي هنا وعائلتي هنا ، فين غادي نمشي ..

- هاشم [ بنفس البرود ] :

التلت الخالي ، أشمن وجه مزال تكسابيه باش تشوفي باك ، ولا داركم .. جوج كلمات ݣلتهم ، مابقى عندي معاك فين نزيد تاقيت فيك وجه الله ، حضرت الإيمان ومابغيتش ن//قتل روح ، وروح عزيزة عند الله واخا انت رخستي روحك وقيمتك ..

- تنازلي على حقك وتخوي أسفي ، حد مغايشوف فضيحتك .. تعاندي وتكابري ، تصاورك توصل لعبدة كلها .. وانت تعرفي ..

- نسرين [ كتحاول تستعمر اخر وسيلة دالاقناع] :

هاشم لين قلبك وحننو .. انا ما [ ماخلاهاش تكمل ] .. نطق بقصوحية عاݣد غوباشتو كيخلع :

الݣلب لي يحن من جيهتك ، ند//*بحو بيديا وندفنو بد*مو ، الحوايج لي دخلتي بيهم لهاد الدار هوما لي تهزي ، ذهب السهري يبقى فدارو مايتهز فيه خاتم الأخر .. سربي باغي نبدل القفل ماعنديش الوقت .

- مكان عندها حتى حل اخر من غير تمتاتل للاوامرو اللهم هادشي ولا الشوهة والفضيحة مع الناس ، وتصدق خاسرة خدمتها وسمعتها .. دخلات للبيت لي كان بيت نعاسها .. جمعات حوايجها كاملين وذهبها هي ، اما ذهب لي كان يجيب ليها خلاتو كيف قاليها ..

- خرجات من البيت جارة البالز ديالها ، دورات راسها فصالون مكانش .. حدرات راسها وحلات باب دار وخرجات سادة الباب وراها ..

- غير سمعها مشات .. خرج من البيرو ديالو ، كيتنفس بصعوبة كيحس بقلبو مزير عليه وضاق عليه .. حل الباب وطلع نيشان للسطح كيحاول يتنفس ، ياخود الهوى ما امكن ، الدنيا كلها كدور بيه ، أصعب إحساس هو الخيانة .. تبغي واحد الإنسان من قلبك ، يكون هو اول واحد فحياتك تعطيه وقتك قلبك ، ديرو فعينيك .. حتى من صلاتك كنتي تصلي وتدعي معاه وتدعيليه بالهداية ، تدعي ربي يتبتو ويعمر قلبو بالإيمان ..

- ولكن داك الإنسان مكانش ݣاع فهاد العالم محاسش بيك واش عايش ولالا ، مكانش قادر يتحمل .. نزل لدار هز سوارت طوموبيل ودار مخلي تيليفونو فدار ، ديمارا ومشا للبلاصة لي كان كيرتاح فيها .. مكاينش من غير هاد البلاصة اطفي ليه نار ، مشا نيشان لبلاصة الطواليطات ، توضى .. كان قرب يأذن العصر .. من ورا ماتوضى دخل للجامع ..

- بدا الأذان كيأدن بواحد الصوت جميل ، غير سالا وهوما يبداو الصلاة وهو معاهم .. كان كيطول فالركوع .. ودموعو جايا ، لأول مرة ينزلو دموعو ، كان كيحاول يخوي ݣاع لي فقلبو .. سلاو الصلاة ، هز القرآن ومشا لواحد القنت كيقراه ..

- كيقرا ودمعتو هابطة ، قمة الشمتة لي مايحس بيها غير لي مجربها تكون داخل بنية زينة ، وتغدر وتطعن من الظهر ، نار وشمة لي صعيبة وحرقتها كتخلي فيك الأمارة ، حس بيد تحطات على كتفو .. هز عينيه ماسح دمعتو بباطن يدو .. نطق بصوت رجولي باح :

عمي أحمد ..

- كان راجل كبير فالعمر ، النور على وجهو .. لحيو بيضة لابسة واحد الفوقية ، مع واحد الطݣية .. شاد التسبيح ، مد رجلو وݣلس حداه .. بصوت وقور وحنين :

مال ولدي هاشم ، أش بكاك .. حالك ماعجبنيش هاد العشية ؟

- هاشم [ ماحس على راسو حتى عاود ليه ] :

كنت غادي نقتلها أعمي ..

- أحمد : أعوذ بالله أولدي ، أستغفر الله أستغفر مولاك .. الى دارت هي ذنب كبير عند الله ماديرش حتى انت بحالها ..

- ماتعصاش مولاك أولدي ، وأنت ماشاء الله مانحتاجش نوريك شنو دير راك عارف لي ليك ولي عليك .. عارف بلاصتك عندي قداش وشحال غالي .. شوف أي حاجة جات من عند الله سبحانه وتعالى فيها حكمة من عندو عز وجل ..

- مخاصناش نݣولو علاش ولا كيفاش ، أي حاجة من الخير أولدي ، ربي مابغاش ليك هاد السيدة تكمل معاها بينها ليك على حقيقتها ..

- هاشم [ شاف فيه بعينين مهرسين ] :

الغدر أعمي ، الغدر خايب ..

- أحمد : عرفت ماݣلتش ليك ماصعيبش ، ولكن ݣولي أما حسن تغدر بوحدك ولا تغد انت او ولادك ؟

- حمد الله مادرتيش معاها وليدات ، لي غايمشيو ضحية إستهتار مهم .. سمعني مزيان أولدي ، أصعب غدر هو الغدر ديال الصحة ، تغدر صحتك ويغدروك والديك ويمشيو ݣدام عينيك ..

- أما غدر العيالات ، حر ساعة يفوت ، زيد عمر قلبك بالإيمان ، ودوز وقتك مع والديك .. حيت ايجي وقت وتݣول ياريت كنت دوزت معاهم ݣاع وقتي ، واتولي تݣول بلي هادشي لي انت دزتي منو مايجي والو ݣدام والديك .. سمع مني ، ونوض جمع جمعة وحدة ..

- عطيها براتها وتفك منها صلي وحمد الله وشكرو على مبتلاه ، المؤمن مصاب أولدي وربي الى بغا شي عبد كيبتليه ..

- تنهد تنهيدة طويلة ، كلام الإمام أحمد ريحو ، ديما كلامو كيريحو وكيبعت ليه الطمأنينة للقلبو .. هز داك القرآن ورضو لبلاصتو .. خرج هو والإمام مع بعضياتهم ، الطريق كلها وهو كيوعي فيه وينصح فيه حتى تفارقو .. رجع بحالو لدار ، مشا نيشان للبيت النعاس ..

- جمع ݣاع الحوايج ديالو فالبالز .. هز تيليفون دوز واحد النمرة بقا مدة عاد تحل الخط :

- وي سي رشيد ، الحمد لله شوف [ شاف فساعتو ] نتلاقاو واحد شوية عندي فالمحال ، صافي وا عليه .. [ قطع معاه ، ورجع دوز نمرة أخرى ].

- سلام عبد اللطيف ، الأمور هانية .. ݣوليا ، داك السيد لي ݣلتي ليا كانت عاجباه الدار مزال باغيها ، شوف ݣوليه الى بغاها بفراشها ، ݣوليه بغيت نبيعها بفراشها ورض عليا الخبار .. يلاه الله يعاون ..

- دور عينيه على هاد الدار ، لي كرها .. فرشها وأتتها بدوقها ودابا مابقا عندو مايدير فيها مابقاش حامل الݣلسة ولا شوفة فيها .. وقف بحال الى تفكر شيحاجة .. رجع وهز تصاور لي كانو ديال عرسهم هزهم كاملين ، داهم للكوزينة حطهم فواحد الزلافة كبيرة ديال حديد ، هز البريكة وبدا كيشعل العافية صورة بصورة ، كلما حرق وحدة كيحس براحة فݣلبو .. حتى حرقهم كاملين ، رما ديك الزلافة كلها برمادها فزبل .. جر بالزو وهو يخرج ..

___________________

- فالڤيلا ، ݣالسة نعمة هي وتوفيق وياسين .. كانت ساهية وعينيها مدمعين .. :

بغيت نعرف غير شنو السبب ، شنو تكون دارت ليه .. شنو لي يخليه يبغي يبيع دارو بفراشها لي شاراها وفرشها بالعشق ، مايمكنش أعباد الله يكون غير سبب بسيط ، ولدي بيه شيحاجة ماهياش ..

- توفيق : خليه عليك ، كون بغا يݣول كون ݣال .. سمعتيه ݣاليك ماتفاهموش هو وياها وحرام الرزق بيناتهم ، انت عارفة ولدك مكايبغيش يعاود .. أنا لي كيهمني ، هو ولدي يكون مزيان ويكون عارف شنو كيدير .. [ شاف فياسين ] مݣاليك والو أنت خوك ؟

- ياسين [ هزهز براسو ] :

لا ، لي ݣال بلي شاف المحامي .. وخلاه هو يرفع الدعوة ديال الطلاق وهو لي يتكلف بكولشي .. ودار راه وقيلة كان عينو عليها شي واحد ، هداك يمكن لمن بغا يبيعها ليه ..

- نعمة [ كتحرك فراسها مقادلش تستوعب ] :

حسبي الله ونعم الوكيل فلي كان حيلة وسباب ، الله ياخود فيها الحق الى أدات ولدي والى حرݣات قلبو الله ياخود فيها الحق هادسي لي غانݣول ، كنا فرحانين .. ولد غايتزوج او ولد غايرج لدارهم مطلق ..

- توفيق [ بصرامة ] :

هادي سنة الحياة ، ماعندنا منديرو .. ماتبقايش تنوحي على الولد .. هاد الوقت محتاج والديه معاه ، مزيان نيت منين جا يوقف مع خوه ، هكا نيت ينسى همو شوية ، واياك دوري بيه ولا تسوليه .. خليه مرتاح وقفي معاك وكوني بجنبو ، أنا وصيتك أنعمة ..

- نعمة [ هزهزات براسها ] :

واخا واخا كون هاني ..

- الفرحة لي كانت عندهم كبيرة تهرسات على زوج .. واخا نعمة كانت نقسمة بين الفرحة والقرحة ، الفرحة حيت عمر نسرين مادخلات ليها للخاطر ولا رتاحت ليها ، والقرحة حيت مابغاتش هادشي لولدها ..

- يوماين دازت عليه ، من المحال للجامع للدار .. خلا المحامي هو يتكلف ليه بالطلاق ، مابغاش يشوف وجها نهائيا ... كان كيسوني ليه الحاج ومكانش كيجاوبو ، باغي ينسى ديك العائلة ، ويديرو راسو عمرو ماعرفهم ..

_______________

- فشومبر فالأوطيل ، ݣالسة دموعها نازلة .. شعرها مجموع بشكل عشوائي معصبة لواحد درجة كبيرة ، ماعرفات فين تمشي ولا فين تجي .. كتسوني ليه مامرة ماجوج والو مكايجاوبهاش نهائيا .. كتسوني لصحاباتها حتى وحدة فيهم مجاوباتها ..

- حتى من خوها ضار فيها وقطع عليها ، حلف الى وراتهم وجها يدفنوها وهي حية .. طلاقها لي اتخرج منو يديها خاويين وماعندها حتى حل ، من غير تحدر الراس ودير لي قاليها هاشم .. داخت دوخة وحدة ، حتى من المكتب مابقاتش كتمشي ليه النعمة مكتدوزش ليها ، كانت باغياه غير يجاوبها ويبرد نار الكية لي فقلبها ويطبطب عليها ولكن تيليفونو كان طافي ..

_________________

- كان ضروري مايوقف مع خوه فهاد النهار ، الدار بدات كتعمر بالحباب والعائلة .. الخلات والعمام ، كل واحد منين جا .. ياسين كان فرحان ونفس الوقت فرحتو مكاملاش بسباب طلاق خوه .. ولكن اللهم هكا وخوه يكون مرتاح ولا يبقى فالعذاب ، الدهاز كان مستفر فطيافر .. عائلة العريس والديه وخوه بوحدهم لي كانو غايمشي معاه اما باقي العائلة غاتسنى حتى تجي العروسة للدار .. ختهم ماقدراتش تحضر ، كانت دايرة معاهم كاميرا اول بأول .. شدو الطريق لدار العروسة ومعاهم فؤاد لي كان هو الوزير ديال ياسين ..

_________________

- فدار العروسة .. الدار محلولة ، الحباب وصحاب داخلين ، ريحة البخور وريحة الطياب مالية المكان .. صفية كتستقبل الضياف بالابتسامة وعبد الرحمن واقف على برا .. أنا سناء كانت الفوق ، لابسة تكشيطة بالبيج بارد مايل البيض ، مع التاج ومكياج هماوي .. الفرحة مخلطة ليها مع الخلعة ، اما دعاء كانت لابسة تكشيطة ديال تليجة مزوقة بصفر والخضر والاورونج جاتها كتحمق مع طولها ، واقفة غليهم قوت لي كانت لابسة عباية فالموف ديال الحرير وطالقة شعرها ، كانت كتحمقة وشعرها كيبري مبين على كحوليتو ..

- بداو كيسمعو الدقايقية وصوت الطوموبيلات ، عرفوهم جاو .. نزلات خولة وخلات قوت مع سناء ، ستقبلهم الحاج عبد الرحمان ، مدخلين الدهاز لدار .. الزغاريت معلية المكان ، دخلوهم لصالون فين غايكتبو العقد ، ݣلسو من بعدما ستقبلوهم بالحليب وتمر وزغاريت ..

- سناء [ مخلوعة ] :

ناري ياختي ، غانبول فحوايجي وحق الله العظيم ، قلبي غادي يخرج .. قبل لا تجاوبها قوت دخلات خولة :

- تبارك الله ماشاء الله ، تكبيرة ديال تحميرة الوجه .. خالتي صفية اتجي دابا باش نزلوك .. [ حطات يديها عليها وبدات كتقول ] أعوذ بالكلمات الله التامة من كل شيطان وهامة ومن كل عين لامة .. دخلات عليهم صفية كتشوف فبنتها فرحانة ومقاداها فرحة ..

- صلاة على النبي الحبيب ، ماشاء الله ماشاء الله .. يلاه ابنتي العدول راه وصل .. وقفات وهي كلها كترعد ، تمات نازلة والبنات وراها كيصليو على النبي ويعشقو عليه ، مها كتزغرت وجارات واقفات ملقيين ليها مع الدروج .. حتى دخلوها للصالون وݣلسوها حداه .. لابس كومبلي وداير عليه السلهام ..

- صفية [ بوشوشة ] :

جبتي قرعة ديال زهر لي قلت ليك ؟

- قوت [ خرجات عينيها ] :

ناري والله حتى نسيت ، انجيبها دابا دابا .. مشات كتجري ، زات الشال دالعباية لي كان على عنقها دارتو على راسها وضرباتها بجرية للحانوت .. خدات منو القرعة وتمات راجعة مشايفاش قدامها نهائيا حتى دخلات فيه ، طاح ليها الشال من فوق راسها .. هزات راسها فيه ، كان لابس سروالو كحل مع شوميز ديال دان فالقهوي محلولين زوج صدايف من جهة العنق .. ماشط شعرو مرجعو للور نطقات بصوتها الرزين :

سمحليا ..

- هاشم [ هز عينو فيها مرة وحدة وهبطهم ونطق ] :

مكاين باس .. رجع هز راسو فيها ، بحال الى شاف شيحاجة لفتات إنتباهو ، مكانش كيشوفيها كان كيشوف فعنقها لي متربعة فيه ، سلسلة مبرومة .. فيها علاقة دايرة دايرين بيها حجرات بحال شكل ديال الضفرة ، والوسط كان منقوش راس راجل موسطاجو طويل ولحيتو طويلة .. مافهماتش سبب نظراتو ، جات بغات تخطاه وهي توقف كتحقق فالسلسلة لي فعنقو .. كانت نسخة طبق الأصل من السلسلة لي فعنق الفرق الوحيد سلسلتها ذهبية وديالو فضية .. بلعات ريقها بتوتر ، هزات عينيها فيه كتبلع فريقها .. كتشوف فنظراتو لي كانو مفيكسيين فجهة وحدة عنقها ..

- جمع غوباشتو ، مافهم والو .. مايمكنش هادشي لي كيشوف ، مامستوعبش هادشي لي كتشوف فعينو ، هز عينيه فيها ونطق بصوت فين نبرة إتهام .. صوتو التقيل الرخيم الغارق لي زاد وترها :

أش كدير مجدول الذهب فعنقك ؟

- تزيرات وحلات ليها ماعرفاتش باش تبلات ... عمرها كانت ضناها ولا جات على بالها ، منين عرف بخبار السلسلة ، حتى واحد معارف لي وقع من غير خولة ، منين جاب الخبار .. بقات ساكتة ماجوباتوش ..

- هاشم [ تقابل معاها مزيان كيناظرها بنظرات كلها شك ] :

راه سولتك ، منين جاتك سلسلة مجدول الذهب ؟

- قوت [ وأخيرا عرف الصوت ليها طريق ] :

وعلاش اخويا كتسول ؟ وشكون انت لي توقفني هاد الوقفة بلا موجب شرع ؟

- هاشم [ بصرامة ، وبصوتو التقيل ] :

بصفتي الوارث لديك السلسلة لي فعنقك ..

- قوت [ دوزات لسانها على شفايفها لي نشفو ] :

كيفاش اش كتخربق ، واش كترون ، سمعني ماعرفتكش واش من أهل العريس ولا من معارف با .. ولكن راه خاصني نمشي .. [ جات تخطاه وقفها بكلامو ]

- كاينين جوج سلسلات ، ديال عائلة سهري ، وحدة هاهي [ أشر لعنقو ] او وحدة فعنقك .. ورث عائلة السهري أش كيدير فعنقك .. وحق الرب الذي لا رب سواه ، ياتدوي يايدخلو فيها الكبار ..

- قوت [ حسات بالما بارد تخوا عليها ، كيفاش الورث ديال عائلة سهري ، هزات فيه راسها كتحقق فيه .. بتلعثم] :

- واش واش أنت ولد عمي توفيق ؟

- هاشم : هو هذا

- قوت [ حسات بصهدة ، كيفاش السلسلة ورث لعائلة راجل ختها ، كتحس براسها فحلمة خايبة باغية تفيق منها بزربة ، حنحنات وبصوت بهي ] :

شوف هذا عرس ديال خوتنا .. خليه غير يفوت وندويو بالعقل ..

- هاشم :

مكاين بو عقل ، زݣي معايا الكلام ، ݣلتي عرس خوتنا [ صغر عينيه وتفكر كلام خوه على خت مراتو ] أنت بنت سي عبد الرحمان الكبيرة ؟

- قوت [ هزهزات براسها ] :

أه انا .. خلي غير يفوت العرس وندويو ..

- هاشم [ بنفس الصرامة ] :

ماعندي صبر لي نتسنى سيمانة كاملة ، تسني ختك على العقد نلقاك هنا ، مامني فكاكة بلاما تحاولي ..

- بقات كتشوف فيه ، حدرات راسها ودخلات لداخل كتعطر فجلايلها ، عقلها كان مرفوع ، مدات لمها الزهر او وقفات كتشهد على عقد ختها ، يديها كيضربو الرش وتبسيمة مزيانة وجها ، على عكس الخلعة لي راكباها .. كتفكر شنو غاتݣول ليه منين جاتها هاد السلسلة ، وهي لي وقع ليها هي براسها مازال لحد الساعة مامتيقاه .. داز عليه 3 سنين ومزال كتسول راسها واش كانت فحلم ولا علم ..

- مزال مادخلاتش ليها لراسها بلي سلسلة لي فعنقها ملك لعائلتو ، ولكن كيفاش .. من المستحيل تعطيها ليه مايمكنش تݣلعها من عنقها وتسلمها ليه ، حلفات لا فرطات فيها واخا يوقع لي يوقع ..

- سناو العرسان على العقد ، وتعلات الزغاريت .. قربات من مها وهمسات :

ماما نسيت الكادو ديال سناء فالمحال بالخف انمشي نجيبو ونرجع ..

- صفية : ويلي ابنتي دابا ؟

- قوت : دغية مغانتعطلش ، دارت الشال على راسها وخرجات .. لقاتو واقف عند الباب مزال كايساينها ماتحركش ..

- قوت [ بترجي بصوتها الأنثوي المهدن ] :

واش نقدو نبعدو على الدار ؟ [ بقا كيشوفيها نطق بحشرجة ] :

لفين ؟

- قوت :

كاين واحد المحال هنا ، تقد تبعني الله يخليك .. ماخلاتش ليه الوقت لي يدوي فيه سبقاتو .. دوز يدو على لحيتو بنفاد صبر وتبعها حادر راسو ..

- فاتو الدار بزوج زنقات ، وقفات قدام واحد المحال ، جبدات السوارت من جيب العباية .. حلات ودخلات ، شعلات الضو ، كان واقف كيشوف من الباب ، كان محال عامر بديكورات ديال الفخار ..

- قوت [ ضارت كتشوفيه ] :

مرحبا .. جرات الكرسي ومداتو ليه .. بقا مدة شدو وݣلس مبعد منها .. كان كيشوف فنقطة معينة مهزش راسو فيها .. :

مزال كنتسنى جوابك ابنت سي عبد الرحمان ..

- قوت [ نطقات عينيها عليه ] :

سميتي قوت القلوب .. هز عينيه فيها ناظرها بظراتو من راسها لرجليها ، ورجع مبعد عينيه عليها ..

- قوت [ حنحنات وجرات الكرسي وݣلسات ] :

بغيت غير نعرف ، كيفاش هاد السلسلة ورث عائلتك ، مزال مافهمتش كلامك .. وراه عطا الله السلسلات كايتشابهو ، راه السوق فيه أشكال وأنواع ..

- هاشم [ بنفس البرود ] :

جايباني لهنا باش تلوحي ليا هاد جوج كلمات ، السلسلة لي فعنقك كاين منها جوج وحدة من الذهب او وحدة من الفضة ، تدوري المغرب كامل ماتلݣاي بحالها .. ورث عائلة السهري هداك ، مغاتخفاش عليا سلسلة مولاي الغالي ..

- قوت [ ولات تحمار وتصفار ، بحال الى تكب عليها سطل ديال الما بارد فوق راسها ] :

م [ بلعات ريقها ونفس كيطلع بصعوبة ] منين كتعرف مولاي الغالي ؟

- هاشم [ كان مزال على نفس الوضعية ] :

جايباني لهنا باش تسولي ، كترتي الهضرة بزاف ، تدوي ونفضيو هاد المجمع ولا نسول سي عبد الرحمان حسن ؟

- قوت [ بصوتها لي فيه نبرة ترجي] :

ستهدى بالله ، وصلي على نبينا محمد ..

- هاشم [ رجع شافيها بعينيه المخبلة ، زݣا فيها الشوفة ورجع حدر راسو ] :

اللهم صل وسلم على سيدنا محمد وعلى اله وصحبه اجمعين ..

- قوت : أنا غانجاوبك ولكن بغيت نعرف منين كتعرف مولاي الغالي ؟

- شافيها بقنت عينيه ، بقا ساكت مدة حتى كانت قالت يا وقيلة ماسمعهاش ولا مابغاش يجاوب ، حتى فاجئها بالإجابة فشلها وصدمها :

السلطان مولاي الغالي هو جدي ، وهادشي راه معروف عند أهل أسفي القدام ومن زمان ..

- قوت [ بدات تبيض بيضة هنا وبيضة فالعش ] :

مافخباريش عمري عرفتها حتى قلتيها دابا ..

- هاشم [ بجدية ] :

غادوي انت ولا يدوي باك ؟

- قوت [ صافي جاتها الدوخة ، دقات قلبها كيضربو بحال البندير فنص الليل ، أش غاتقول ليه واش غايتيق بيها ، تنهدات تنهيدة طويلة ] :

عطيني لامان ، وحلف حتى تيق بيا .. ومتكذبني ، أنا ماشي سراقة ..

- هاشم [ ناظرها بعينيه ] :

حاشة تخرج كلمة سراقة من فمي ، و ماشي من طبعي نطعن فأعراض الناس وانا ماعندي لا حجة ولا برهان .. سلسلة مجدول الذهب ورث ديال عائلة السهري ، ورثوه أبا عن جد .. منها جوج وحدة فضية كيورثها الولد الكبير ..

- أو وحدة من الذهب الحر ، تعطات للمحبوبة مولاي العالي الله يرحمو .. ومايمكنش تكوني انت هي ولا تكون جداك ، حيت هي ماتت من زمان ..

- قوت [ غمضات عيونها الفحمية ، موركة عليهم ورجعات حلاتهم عاضة على شفايفها ] :

أنا هي ..

- هاشم [ عݣد غوباشتو ] :

اش كتخربقي ، تي واش كيبانو ليك عدي الودنين .. ولا دوخك عرس ختك وكترت الناس ..

- قوت :

هانت أنا غادي نعاود ليك كولشي من طاق طاق لسلامو عليكم ، غير عطيني الأمان ، وهاد الكلام لي انقوليك مايخرجش للبراني ..

- هاشم [ بقا مدة ساكت ونطق] :

عليك الامان دوي ..

- قوت [ زيرات على يديها ونطقات ] :

هادي واحد 3 سنين ...

قـــــبــل ثـــلاث ســـنــوات

- فواحد من البزارات .. واقفة كتدوي مع واحد الكليان ، غير سلات معاه مشا ، هزات عينيها كتبان ليها واقفة كتسناها عند الباب ، لابسة واحد الصايا طويلة مع تريكو نازل ولايحة عليها واحد الشال فيه الهدوب ..

- خولة : غاتبقاي واقفة تما نابتة تي دخلي .. ، تمات داخلة جرات الكرسي وݣلسات كترتاح ..

- قوت [ خزات عينيها فرحانة ] :

عرفتي فين كنت ههههه .. مشيت تسجلت فلاصال ..

- خولة [ بملامح جامدة ، كتخنزر فيها ] :

لاصال لي خدام فيه صلاح الدين ياك ؟

- قوت [ تبسمات ، وعينيها كلهم حب ] :

اه هو ، بغيت اختي نكون قريبة ليه ، كنبغيه ياختي كنبغيه .. بدات خولة كضرب ففخاضها وتندب ..

- اويلي اويلي على المدلولة اويلي ، واشفت اعباد الله فذل حتى شفت بحال الدل لي انت غارقة فيه عمري ذفت بحالو ، اعباد الله واحد مامسوقش ليك واش كاينة على وجه لأرض ، وانت داخلة لاصال تابعاه ..

- أش باغة تنقصي واش باغة تزيدي ، واش بغيتي ديري فراسك الضحك ، دابا يديرك ضحكة مع صحابو ويشد بيك الجميع دابا تشوفي وتقولي خولة قالت ..

- قوت [ دخل ليها كلام خولة من ودن وخرج ليها من ودن ] :

وصافي أصاحبتي ، راه انت جربتي كية الحب أتعدريني .. أنا بدلت لباسي على ودو ..

- خولة [ جمعات شعرها سفنجة معصبة ] :

الله ينعلو حب لي عشتو انا ، الحب لي كيجي من طرف واحد ماعندك ماديري بيه ، راه هادشي علاش كنقوليك جمعي راسك ، حيت دزت من هادشي وتعذبت ، تكوني كتبغي شي واحد وعند بالك بلي حتى هو كيبغيك وهو غير ساد بيك واحد الباب وكينسي بيك الماضي ، راه الفقصة .. ندفل على راسي ألف دفلة ومتبردش ليا نار الكية ..

- أنا اختي نصحتك وانت ديري لي يسلكك ، الوقت لي طوطحي تابعاه سيري قلبي اعلى خدمة وتلفي فيها الوقت ، الله يهديك ويرض بيك ..

- ماسمعاتش ليها قلبها كان مقفول وعينيها معميين ، كانت مواضية على لاصال ، كتمشي ومتبقى غير حاضياه هو .. البنات كيتعلمو وهي عينيها فيه .. نظراتها ليه ماتخفاش ، مكانش مسوق ليها نهائيا ، ولا حاس بيها واش كاينة على وجه الأرض .. كانت كترجع للدار كتافها هبطين كتجر فرجليها ، بحال شي هبيلة ..

- فدار عندهم كانت ݣالسة فبيتها وساهية ، حتى تحل عليها الباب وطلات مها ..

- صفية [ مغوبشة ماعجبهاش حال بنتها ] :

مغاتهبطيش تعشاي عاوتاني ؟

- قوت [ ݣالسة فوق نموسيتها معنقة مخدتها وكتخمم ] :

غير تعشاو اماما مابغيتوش أنا غير بصحتكم ..

- صفية [ وصلات بيها للعظم ] :

واش باغية تموتي شوفي حالتك كيف ولات ، وليتي بحال العود .. وزدتيها بداك لاصال ، أبنتي ابنتي يهديك الله أش هاد الحالة انت فيها .. خفت غير لا يكون مديور ليك شي سحور ..

- قوت : الله يهديك اماما أشمن سحور ، صافي راه ماعنديش الݣانة ديال الماكلة ..

- صفية [ بإستسلام ] :

ايوا اش غانقوليك الله يهديك ، الله يهديك ويرض بيك ياربي هادشي لي غادي نقول .. سدات الباب وخلاتها غارقة فأحلام اليقضة ..

- كانت ظل تخمم ، شنو غادي دير ، هزات تيليفونها وسونات على خولة ، بقات مدة عاد جاوبتها ..

خولة ، شوفي بغيتك تمشي معايا غدا نشري شيحوايج الله يستر عليك ..

- خولة : أشمن حوايج عاوتاني ، يلاه خديتيهم ؟

- قوت : وصافي حتى لغدا وتعرفي ، صباح عندك تعطلي عليا صافي ، بلاما ديري ليا العدر بالخدمة راكي ماخداماش ..

- خولة : واخا صافي ..

- طفات الڤيوز لي حدا راسها وتكات سارحة بخيالها وكتضحك مع راسها حتى داها النعاس ..

الصباح غير فاقت وفطرات جماعت الدار بالخف وسلات ، خلات باها خرج هزات الفلوس وهي تخرج ، مشات لعند خولة نيشان للدار دقات عليها لقاتها لابسة وكتسنى جراتها وخرجو بزوج ..

- خولة [ بشك ] :

أشمن حوايج غادي تشري ؟

- قزت [ بفرحة ] :

بغيت ناخود شي كادو لصلاح الدين ، اليوم عيد ميلادو ..

- خولة [ وقفات كتشوفيها بعدم تصديق ، بدات تضرب ففخاضها وتولول] :

اويلي ، اويلي واش ندب بشقف ولا ندب بشوك .. يا عباد الله اش هاد البنت بليتيني بيها ياربي ، أنا لي صحبة 10 سنين اعباد الله عمرك تفكرتيني بزيف هو الاخر ، وهو بو مشاحط قدهم قد الشحط غادية ليه بكادو ..

- ماهو راجلك ماهو خوك ولا باك ، يا هاد البنت ديري عقلك ..

- قوت [ رخات شفايفها ماعجبهاش الحال ] :

الى ماجبت ليك كادو راه كنعطيك حوايجي كلهم جداد مال حسك ، وصافي اصاحبتي حرام عليك ، راه قاليك الى بغيتي تخلي أثر عند الراجل خاصك تفاجئيه ..

- خولة [ هزات كفوفها لسما ] :

وياربي وثانية ياربي ، وكيما بغات تفاجئو يفاجئها بشي صدمة ، عمرها تنساها فحياتها وتفيقها من الݣلبة ودير فيها النفس ياربي ..

- زادت معاها لواحد المحال ، خدات ليه بواطة فيها واحد الساعة مع ݣورميط ديالو ، تمات جارة خولة معاها للاصال ، وهي عليها غير زبل زبل ، كتشوف فصاحبتها طيحات الدل ولا بغات تعيق وتفيق ..

- قربو لاصال .. دخلات قوت جارة خولة وراها بزز ، غادية نيشان للبيرو لي كيكون فيه ، كيبان ليها الباب محلول .. كتسمع صوت الضحك وهضرتو لي حبساتها او وقفاتها فشلاتها ..

- واش شتيها أصاحبي كيكادير فيك ، وباينة من طيارة طايحة على زنافرها ..

- صلاح :

داكشي لي بقى فالحساب ، كولشي قامو خليفة بقا ليه غير زبل فوݣ القطيفة ، تا واشتي التوت لي فصال ولالا ، مكنحملش المدلولات الدمدومات ، لي كيلوحو راسهم على رجال .. واخا تبقى تم لا شت فيها ، وتا شوفليا اسمية قوت تݣول هاربة من رمانة وبرطال .. تكرشخو بضحك وهي دموعها هابطة كتنخصص ..

- خولة [ ماوعاتش على راسها حتى دفعات الباب ودخلات عليهم ] ..

- كولشي دار كيشوف ، صوت شهقات قوت كيتسمعو وديك البواطة لي كانت هازة طاحت من يديها ..

- خولة [ طلعاتو ونزلاتو ] :

والله المعبود الى عندك الصح ، والله الى مدلولة لي طاح حبها على جلافاج بحالك ، مامعروف ساسك من راسك .. داير بحال سيفة التمساح ، عند بالك راه شان وهمة وانت داير بحال أفعى الأناكوندا .. [ جمعات دفلة حتى جمعاتها ولاحتها ليه على وجهو ] .. هزات ديك البواطة وجرات قوت من يديها مخرجاها من تم ..

___________________

- مقابلين مع البحر ودموع قوت نازلين ، كتنخصص على الشمتة ، وعلى الضحك لي دارت فراسها ..

- خولة [ كتسكت فيها ] :

وصافي أصاحبتي اويلي اش هاد الحالة دايرة فراسك .. صافي مشا لهلا يرضو ، لهلا يحييه حتى يدير فيك الضحك .. صافي دوينا معاك ، من الصباح وانا كنهضر وانت مكايناش فهاد العالم ..

- قوت [ بقات مدة وهي ساكتة ، مسحات دموعها وبلاما تشوف فخولة نطقات ] :.

خاصني نشوف شي خدمة ، مخاصنيش نبقى ݣالسة حاجة يدي على خدي ، قلت مايدار كتولد البالة أختي صافي قلبي طاب ، خاصني باش نشغل راسي ونسى حر الكرية وهادشي لي جرا ليا ..

- خولة [ وقفات ] :

من دابا رجلي على رجليك مانخليو بلاصة مانقلبو فيها يلاه زيدي قدامي .. ، مسحات قوت اخر دمعة من عينيها وناضت مع خولة .. كانت غير تابعاها ماخلاو بلاصة ماسولو فيها والو ، من محال المحال ومن بزار لبزار والو واش لقاو شيحاجة ..

- قوت [ وقفات كتحاول ترتاح ] :

أنا والله الى عييت ..

- خولة : غير زيدي مابقاش بزااف .. عرفتي شنو اجي نشوفو مكتبة الحكمة ..

- قزت : واش ديك لي حداها سناك سعيدة ؟

- خولة : اه هي يلاه نشوفو مرابانا .. ومنها نيت ناخدو شيحاجة ناكلوها ..

________________

- تما خارجين بزوج من عندو .. خولة فرحانة وقوت ماعجبهاش الحال ..

- خولة : مالك اصاحبتي ضحكي ، هانتي لقيتي خديمة شكون بحالك ..

- قوت [ هزهزات براسها ] :

الزهر ماعنديش والو ياختي ، واش شفتي البلاصة فين غادي نخدم ، كلها غاملة حالتها حالة ، علاش لي مايخدمنيش فالبلاصة لي فيها الرواج ، عاطيني السفلي لاكاب أخولة ..

- خولة : واش انت مزالة كتشرطي حمدي ربي وشكريه ، زيدي اختي لداركم أنا والله حتى عييت العظم الصحيح مابقاش عندي .. كملو طريقهم ، وكل وحدة مشات لدارها ..

- توالات الايام ، وقوت دايرة بحال شي جسد بلا روح ، كية صلاح مزال فقلبها ، كتخرج الصباح للمكتبة وفالعشية ترجع ، كتجمع مع عائلتها على الطبلة ، سولوها تجاوب مادواوش معاها مكدويش .. فكل عشية كطلع للسطح كانو دايرين واحد الݣليسة كتبقى ݣالسة ومقابلة النجوم ، سناء كتعيا تدوي فيها والو عقلها غايب ..

- دازت على خدمتها شهر ، كانت ݣالسة فالمكتب حاطة يدها على حنكها وكتخمم حتى نزل الحاج مول المكتبة وقف عليها ونطق :

قوت بنتي ، الله يرضي عليك بغيت ضربي واحد تخميلة للهاد الصف كولو ، كاع الكتوب القدام الراشيين لي كلاتهم دودة ايتلاحو ، انعوضهم إن شاء الله بكتوبة جداد الله يرضي على بنتي ..

- قوت [ وقفات وهزهزات براسها ] :

واخا الحاج .. طلع الحاج وهي بدات فتخمال ، كتحط صف بصف وتمسح الغبرة لي خنقاتها وليحة الغمولة ، هزات واحد السلوم وطلعات فوقو ، بدات تهبط فالكتوبة حتى تحطات يدها على كتاب كان الداخل ، بدات كتجر فيه من جرتو باينة فيه تقيل ، حتى خرجاتو .. غوبشات وعينيها كانت فيهم واحد اللمعة غريبة مبهورة بيه ، عينيها عمرها شافت بحالو .. كان من جلد فالقهوى ، ومحفور فيه إنحناءات مذهبة ، كان تقيل تقول مصنوع من الحديد ، عينيها عمرهم ماراو بحال هاد الكتاب ، لي شافو يقول واش مصنوع من الجلد الحر ومن الذهب الخالص ، دوراتو فيديها وهنا تفافات حسات بالبرودة طلعات معاها ، صباع يديها مشاو نيشان للحروف لي مكتوبين بذهبي ، بخط عربي كان مكتوب :

" مـــجــدول الـــذهــب "

- هبطات بشوية من على دربجات السلوم .. وداك الكتاب هازاه بين يديها بحال الى هازة كنز .. كدوز صباع يديها الرقاق على حناياه .. عجبها ولفت إنتباها ، نفضات عليه الغبرة ، ومشات للبلاصتها وݣلسات .. حلاتو واول صفحة كانت كتبان فيها واحد الرسمة ، عبارة على قصر وديور كثيرة ، والخضورية ضاير بيها واحد الواد .. داك الواد كيشبه للدوك الإنحنائات لي فالواجهة ديال الكتاب ، كيشبهو لشي مجدول فلويتو وفعݣاديه ..

- دورات الورقة الثانية .. وهنا كتاشفات بالي الكتاب لي بين يديها عبارة على رواية .. كانو كيعجبوها الروايات وخصوصا القدام ..

- قوت [ سدات الكتاب ، وهزات راسها كتفكر بينها وبين نفسها ] :

هاد الكتوبة غايتلاحو غايتلاحو ، علاش لي ماتديهش معاها غير غادي يضيع ، تديه تقراه ويبقى معاها .. بلاما تفكر هزات الكتاب ودارتو فساكها ، عاد ناضت تكمل شغالها .. مسالات حتى ولات كلها عرقانة وكتعطس من ريحة الغمولة .. هزات ساكها وطلعات للفوق ..

- قوت : الحاج انا كملت ، كاع الكتوبة خليتهم فجهة السرجم ..

- الحاج : الله يرضي عليك أبنتي ..

- قوت : خليت ليك الراحة ، .. خرجات كتجر فرجليها ، طرݣات مول الزريعة خدات من عندو زريعة الكخلة وزريعة الݣرعة .. وشدات الطريق للدار ..

- كان الجو دافي داك النهار ، تعشاو وطلعات هي وسناء للفوق السطح كينقيو الزريعة وشادين الحتيت ..

- سناء [ وقفات ] :

مسلسلي غايكون بدا ، مغاتنزليش ؟

- قوت [ هزهزات براسها ] :

لا ، جبت واحد الرواية من المكتبة انكلس نقراها ، حتى نساليها وننزل ..

- سناء : ورواية كيديرو فيها الناس يوماين ..

- قوت : عارفاني انا ، كنبغي نكمل الرواية فديك الليلة ، غير هبطي انت نسالي ونزل ..

- جمعات سناء الزبل لي دارت دزريعة ، خلات قوت ونزلات .. كملات قوت تنقية دزريعة جمعات روينة فواحد الميكة ، وحطاتها .. ساست يديها و تماطات للساكها حلاتو ، جابدة الكتاب منو ..

- دارت وسادة وراها حاطة عليها ظهرها ، السما صافية ونجيماتها باينين .. والݣمرة منورة ، سمات الله وحلات الكتاب .. بدات كتقرا اول ورقة ، وعقلها بدا يسرح مع الحكاية ..

- ورقة كتديها لورقة ، وحدث كيديها للخوه ، خلا عقلها يغيب على الواقع ، وتعيش مع الحكاية .. نطقات وهي ساهية مع الرواية :

وناري ، وشوفليك هاد مرات باه شحال سامة عقروشة ، الله ياربي بقا فيا سي الغالي .. [ كملات القراية وهي مرة تشهق مرة تعصب ] :

ودابا غير مابغاتوش يورت عرش السلطان باغية تصفيها ليه ، خاص هاد مو بدر السعود تعاودليه بلي باه هو سلطان مجدول الذهب ، وبلي هو الوريث ديالو ..

- بقات على داك الحال ، تحلل وتفصل غير بوحدها ، الوقت كيدوز وتݣول واش ملات ولا قالت نوض براكة عليا ، حتى قربات تتكمل الراوية .. هنا تفاجأت وفنفس الوقت تعصبات .. :

اويلي ، فينهوما الوراق الأخرين [ بقات كتحقق لقاتهم مقطعين ] :

وأنا دابا كيفاش غادي نعرف شنو وقع لمولاي الغالي ، ولسلطان سليمان .. ياربي متكونش فضات معاه مرات باه ياربي .. هاباش كيعصبوني الكتوبة القدام ، ضروري تلقاي شي ورقة فيهم مقطعة . .. حرام عليهم ، بحال هاد التحفة يقطعوها ..

- هزات تيليفونها ، ودخلات لݣوݣل تقلب ، مرابانا تلقاها محطوط فالأنترنت ، عيات تقلب والو .. كتكتب كتاب مجدول الذهب ، والو واش لقات حيدات كلمة كتاب وكتبات مجدول الذهب ..

- هنا ماخرجات ليها لا تصويرة لا والو ، خرج ليها مقال قديم على شي قبيلة كانت هدا زمان ، سميتها " مجدول الذهب " تسمات على الواد لي كان ضاير بيها ولي كان الشكل ديالو بحال شي مجدول ديال الحرير ، وكلمة الذهب جات .. حيت ناس ديك القبيلة ، كانو كيبيعو ويشريو فذهب ، لي كانو كيخرجوه من داك الواد ..

- هادو هوما المعلومات لي لقات ، ستغربات .. ولكن ماعطاتش للامر اهمية ، حيت مالقاتش شي حاجة لي جديدة حيت هادشي هو لي قراتو فالكتاب ، وهنا عرفات بلي عنوان الكتاب تسمى على القبيلة لي مدكورة فالحكاية ..

- جاها الإحباط منين مالقاتش الكمالة دالكتاب ، نطقات بلاما تحس لي كان متحكم فيها هو داك الشوق باش تكمل القراية ، تنهدات تنهيدة طويلة ونطقات بخيبت أمل :

كون غير كنت نݣد نبدل النهاية ، كون اكنت شي كاتبة ݣاعما يبقى راسي ضارني كيما هوكا .. حطات الكتاب فوق الطبلة ورجعات بظهرها كتشبح وتشوف فالسما ..

- تحرك برد خفيف بارد ، شوية زاد تجهد .. سدات عليها البوليرو باغية تنوض ، حست برجليها جمدو بلاصتهم منين عينيها ناظرو الكتاب ، لي تحل بشوية او وراقيه كيتحركو بزربة .. طالع منو غبرة بحال الرملة مذهبة .. بلعات ريقها وشفايفها نشفو .. الما جمد ليها فركابي ، فاش بانو ليها 4 العيالات واقفين قدامها ..

- وقفات بلاما تحس داخت ، شداتها الخلعة من ساسها لراسها ، دقات قلبها رتافعو ، كلها كترعد ، جاتها البكية ماعرفت باش تبلات ، يلاه حلات فمها باش تغوت حسات بدوخة وطاحت على وقفتها ..

_____________________

- حلات عينيها البهية بشوية ، كترمش برموشها التقال ، كتحاول تستوعب شنو وقع ليها ، هزات راسها بشوية كيبان ليها قدامها جنان ، خضوريتو روات من الما حتى شبعات ، تفتحات وتفرعات ..

- كتحاول تعرف فين هي ، آخر حاجة عقلات عليها ، هي الكتاب لي كانت كتقراه .. كانت حطاتو على الطبلة ، وتحرك الريح وتحل الكتاب بوحدو ، والعياىات لي بانو ليها قدام عينيها .. لي منلباسهم الغريب جاوها ماشي إنسيات ، جمعات الݣلسة وتقادات ..

- كان الليل ، كيفاش دابا النهار ياكما تكون نعسات ودابا كتحلم ، واش مزالة فوق سطح دارهم ولا راها فعلا فايقة وهادي ماشي منامة .. نتابهات بلي كانت ݣالسة فوق شجرة .. هي عمرها فحياتها طلعات لشي شجرة ولا كتعرف طلع ليها ، أش هادشي هي فيه اش كيوقع ليها ، ياكما الكتاب لي هزات مسحور ، والخدام ديالو لي نفاوها لشي تل الخالي ..

هزات راسها بزربة حتى طاح شالها وفاح شعرها على كتافها منين سمعات صوت انثوي رقيق :

- ماتخافي مادهشي ، عليك الأمان ابدر السوسان ، أقوت القلوب وانت بحال شي تقيوتة كتشافي العيان ..

- كتبان ليها بنت زينة لي يشوفها ويزݣي فيها الشوفة من منظرها غايتأكد بلي ماشي بشرية .. شعرها حمر جمرة ودنيها كانو شوية طوال .. بالخف دورات راسها للجهة لوخرا ، منين سمعات صوت ثاني كيقول :

- بلاما تلفي أنت ماشي فمنامة ، انت [ ضحكات بصوت طفولي] انت دابا كاينة فقبيلة مجدول الذهب ، حنا حنا غير سمعنا كلامك ولبينا عياطك ..

البنت الثانية لي كانت متكية جنب الواد زينها بحال زين اللولة من غير شعرها لي كان بيض وفوق راسها بحال تاج على شكل ݣرون حولي فزرق .. حسات بشيحاجة تحركات فوق راسها هزاتو بالخف ..

- كتبان ليها بنت ثالثة جميلة شعرها طويل ماقهوي مازعر خارجين ليها ݣرون كبش من راسها لابسة كولشي ذهبي وهازة أرنب وكتبسم معاها .. مجات فين تستوعب حتى سمعات تصفيرة حنينة دورات راسها جهة صوت كتبان ليها بنت بحالهم شعرها حمر لابسة كولشي بيض وݣرونها بيضين وجها بيض ومبسمة ليها ..

قوت [ بخوف] شش شكون انتوما ؟ وفين أنا ا ا نتوما لي شتكم قبل !! ما ماكنتش كنحلم ؟! هادي ماشي منامة .. انا فايقة مامضروباش بقرشال حافي [ حطات يدها على فمها كتستوعب ، جاتها البكية ، هزات عينيها فيهم ] ع علاش كلامي هكا أش واقع ليا ؟ [ بدات كتبكي]

- ضحكات لي كان شعرها بيض ] :

قوت قوت ، مكاين لاش تبكي ، عليك ألف امان وأمان ، مدامنا حنا معاك مايمسك أدى انا سميتي قطرة وتخلقت من الما ..

- [ نطقات لي كانت ݣالسة على شجرة ] :

وأنا سميتي نبتة بنت جبال وشجر وأي حاجة خلقها ربي فالخضر ..

- بلعات ريقها وشافت فثالثة هزات راسها كتأشر ليها ونطقات بتلعثم وتوتر :

و وأنت ؟

- نطقات لي شعرها كان كيف البركان :

وأنا سميتي شعلة ، بنت جمرة شاعلة .. وأي بلاصة تلقاي نارها ݣادية تلقايني ..

- نطقات الأخيرة بمرح وتنهيدة طويلة :

وأنا سميتي نسمة ، بنت الهوى وبنت الشمس وبنت السحاب ، ودايرة بحال النسمة حسن منهم كاملين [ضحكات ضحكة رنانة .. وقفات او تبعوها كاملات واقفات فصف واحد .. ونطقو بصوت واحد ] :

حنا هنا معاك ، باش يتقضى مورادك وغانبقاو معاك من أول الصفحة حتى لأخرها .. وكيما كنا حارسين الكتاب هادي سينين أنحرسوك .. وكيما جبناك لهاد زمان انبقاو معاك حتى نرضوك لزمانك ..

- قوت [ صافي داخت هادشي بزاف على عقلها ] :

اشمن مراد ياعباد الله ، اتخليوني نغزل بالفتيلة والقنديل ، انا كنت ماعليا مبيا كنقرا فالحكاية ، حتى كنلقاكم قدامي بحال قباض الرواح ، وكنلقى راسي فهاد الدنيا الغريبة ، وهاد اللكنة لي على شفايفي لي كنت نسمعها غير من حكايات زمان .. انا وقيلة ، الى ضو الݣمرة أتر عليا ..

- شعلة [ تبسمات ] :

لالا ازينت البنات ، مكتحلمي ، ومكاتخايلي ، والى عطيتينا ودنيك وسمعتي لينا ، غاتفهمينا .. انت غير رتاحي عليك لامان أبنت العطار عبد الرحمان ..

يتبع...