محتوى القصة
- الفرحة وسعادة بشكل عام حنا لي كنبنيوها وحنا لي كنجيبوها لينا حنا لي بيدينا نخليو راسنا فرحانين وحنا لي ممكن نخليو حياتنا خايبة ونجلبو ليها التعاسة .. فينما حطيتي راسك غاتلقاه خاصك توقف كل نهار قدام المرايا وتقول انا كنستاهل نكون فرحان أنا ماتخلاقيتش لهاد الدنيا باش نعيش فالكآبة .. كانو المشاكل واجهيهم ومتخليش شيحاجة فهاد الدنيا تأثر عليك ..
- كانو شادين الطريق لكاپو نيݣرو خولة اللور مقابلة الطريق وكتفكر لي وقع البارح وهي ضاحكة وفرحانة .. واحد الفرحة غريبة كانت كتحس بيها
- قوت كانت ساهية وهو حداها سايݣ راحتها لي كانت حاسة بيها هي نفسها الراحة لي حاس بيها من داكشي لي وقع ليه مع نسرين مابقاش حس بهاد الطمأنينة
- شاف لجهتها ورجع مركز على طريق يمكن بسباب كلامها حس بديك الراحة ويمكن بسبب تصرفاتها لي بينو ليه بلي كلام الإمام لي قاليه فعلا بصح وبلي ماشي أي مرأة دارت تصرف خايب خانت أو غدرات راه ݣاع العيالات خايبات ، تنهد تنهيدة طويلة خلاتها تدور تشوفيه شافيها فنفس الوقت حرك ليها راسو بمعنى مالك ؟
- قوت [ ضحكات ] :
لا والو عير تنهدتي بحال الى كنتي هاز هموم الدنيا على قلبك وتعنيتي منهم ورتاحيتي
- هاشم [ عض على شفايفو وتبسم ] :
واش زمان لي مشيتي ليه رجعك كتحسي بالواحد وكتعرفي أش كيدور فبالو ؟
- قوت [ هزهزات راسها ] :
وقيلة بحال هكاك ولكن حاجة وحدة لي بقا فيا الحال عليها هوما دوك القوافي لي تعطاوني رجعت بلا بيهم
- هاشم : هي غير رمانة وصافي ؟
- قوت [ تقادات فالݣلسة ] :
والله العظيم إلى بحال هكاك عرفتي راه شي كلام كان كيطيح عليا كنتفكرو كنتعجب فراسي سبحان الله العظيم فخبارك أهاشم واحد الحاجة .
- هاشم [ تبسم لا إراديا فاش نطقات سميتو بواحد سلاسة وعفوية ] :
لا والله مافخباري ݣولي ليا أنت ؟
- قوت [ كتشرح من نيتها وتعاود مدايراش مسافات لي شافها كتدوي مايقولش هي لي كانت فشد ليا نقطع ليك معاه ] :
انت ومولاي الغالي كتشابهو بزاف سبحان الله العظيم لواحد الدرجة كبيرة
- هاشم [ عينيه مركزين مع طريق او ودنيه مركزيه معاها ] :
كيݣولوها ليا بلي كنشبه ليه فالملامح
- قوت [ بنفي ] :
لا ماشي غير فالملامح حتى فتصرفات حتى هو أول مرة شافني نوضناها مدابزة علاش معاودتش ليك ؟
- هاشم [ جاتو الضحكة كانت كتدوي بواحد العفوية واحد الراحة بحال شي بنت صغيرة لا ملامحها ولا كلامها يعطيوها سنها تحكم فضحكتو وشاغ فيها بملامح هادئة ] :
لا والله ماعودتي ليا علاش حنا كنا كندويو بحال الناس باش تعاودي ليا وداك نهار اختاصرتي مادويايش بتفصيل الممل
- قوت :
دابا خالتي بدر السعود كانت قاتلي بلي مولاي الغالي كيخرج للݣافلة وانا عند بالي راه كيوصل بنهار فاش نعسنا ، سمعت شي حد حل الباب عند بالي سراق هزيت واحد العمود ونزلت عليه لراس مسكين
- هاشم [ شافيها بإستغراب] :
انت نزلتي على جدي بعمود ؟
- قوت : وحق الله العظيم يحسابلي شفار الله يسمح ليا ويغفر ليا كون مات على يدي كون بقيت مفنية فداك الزمان فشي حبس تحت الأرض
- هاشم : وفاش كنشبه للجدي ثاني ؟
- قوت [ كتشوفيه كتفلي فيه بلاصة بلاصة ضار شافيها تبسم ورجع مركز على الطريق ] :
وهو الصراحة انت طويل عليه بزاف بحال شي نخلة
- هاشم [ ضار عندها بالعرض البطيء ] :
أنا نخلة ؟
- قوت [ كضحك بصوت أنوثي عفوي] :
وانت كتقول عليا معزة بقا فيك الحال على نخلة ، المهم كتشبه ليه فتصرفات حتى هو كان ضريف والى وقفتي عليه مايرضكش وتقيل ومرزن
- هاشم [ بان شبح إبتسامة على شفايفو ] :
باش عرفتيني ضريف أنا ؟
- قوت : لي يخلي طوموبيلتو لواحد الإنسان اباش يرتاح ويشد طريق بيخير وعلى خير ويتخلا على راحتو هو راه ضريف
- هاشم : مابيناتناش هادشي حنا عائلة الحمد لله .. يلاه هاحنا وصلنا بلاصاو طوموبيل نزلات خولة قبل منهم من ورا ماشدات كاع الخبار وسكانتهم مخلية جلسة الإستنطاق حتى لمن بعد ..
- مع حطات رجليها على الأرض وقف عليها فؤاد كيوشوش ليها هاشم جا يحيد الحزام بان ليه فؤاد كيدوي معاها جمع غوباشتو وبقا مكوانسي كيشوف فيهم .. هزات فيه قوت راسها قبل لا تخرج وشافت فين كيشوف حسات بيه ماعجبوش الحال بالخف ضارت عندو :
بلاما تغوبش ولا تقلق من صاحبك راه مدار حتى حاجة خايبة
- هاشم [ شافيها ببرود ] :
مكنحملش هاد الضسارة لاش يوݣف عليها ويدوي معاها الاحترام راه مزيان
- قوت : راه لبارح قاليها بلي باغيها لزواج واش مافخباركش ؟
- هاشم [ هز حجبانو بإستفهام وصدمة ] :
ايمتا مافخباري والو ؟
- قوت : يمكن لبارح بليل انا احتى دخلات عليا قاتلي راه طلبها لزواج راه ايقولها ليك يمكن احيت خرجنا بكري من الدار
- هزهز ليها راسو ، خدات السكادو ديالها وتوجهات للعند خولة وختها نزلو مع الدريجات .. كابو نيݣرو كانت عالم أخور زوينة فيها غير ليغيزيدونص وديور غزالين كيطلو على البحر من غير بحرها لي مكانش بحال المضيق .
- قوت [ ماعجبهاش الحال ] :
انا مغادياش نعوم عجبني بحال المضيق بحال لابيسين هدا فيه الماج بزاف
- سناء [ بحماس ] :
نركبو فپيدالو البنات
- خولة [ بنفس الحماس ] :
حتى انا بغيت نركب بيه شحال زوين ، وتزحلقي للبحر
- قوت [ كتشوفيهم بإستغراب] :
أشناهو أنا بعدا راه مراكباش أباش نديرها ليكم فالبال من دابا عارفين عندي فوبيا من البحر الداخل ومكنعرفش نعوم
- سناء :
أصاحبتي ماتعوميش انت اركبي معانا وبيدالي برجليك صافي وأنا وخولة نعومو كوني زعيمة شوية وجربي شيحاجة عمرك جربتيها فحياتك
- مداتهاش فيهم نزلات سبقاتهم جا عندهم الدري لي مكلف بالبراصولات خداو بلايصهم قوت قررات ماتعومش بقات ݣالسة حدا نعمة وصفية أما خولة وسناء دخلو يعومو ..
- نعمة [ قربات من قوت ] :
قوت بنتي بغيت ندوي معاك الى جات على خاطرك
- قوت [ زولاتها نظاظرها ديال الشمس من الأدب وظارتهم فوق راسها عاطية الاهتمام للنعمة] :
نعام أخالتي قولي ليا
- نعمة [ بإبتسامة ] :
ماكنتش بغيت ندوي معاك فهادشي ولكن والله بالي مهاني وخاطري ماعطاتنيش قلت نقولها ليك خايفة ابنتي لا يهربو ليا بيك [ ضحكات ]
- قوت [ تبسمات ] :
كنسمعك أخالتي
- نعمة :
انا دويت مع ماماك وقلت ليها بلي بغيتك لولدي هاشم مكرهتكش ليه أنت لي غاتجي معاه [ تنهدات مطبطبة على يديها ] مافرحتش ليه فزواجو لول مادرتش داكشي لي خاصو يدار مع ولدي الكبير هاديك السيدة عمري بغيتها ولا رتاحيت ليها حتى من العادات والتقاليد لي كنديرو ماخلاتني نديرهم ، علم الله اش وقع بينها وبين ولدي حتى كان كيف الوردة ورضاتو بحال شوك يلاه يلاه وليت نشوفو مرتاح وضاحك
- ماكرهتكش ليه انت هي لي اتجي معاه أبنتي والله ماتلقاي بحالو ولا يلقى بحالك كتشابهو وجايين مع بعضياتكم
- قوت [ بإبتسامة هادئة ] :
خالتي نعمة انت غالية وعزيزة وعارفة راسي عزيزة عليك ولي تقالت عليك خفافت عليا ، هاشم راه هو كون كان باغي راه ايݣولها هو يلاه خرج من واحد تجربة خاصو وقت باش يعرف شنو باغي .. داكشس باش خلينا حباب ونساب حسن الى كنا مكتابين انا وهاشم راه انكونو مزاوجين فسما واخا منبغيوش حنا أيجعل ربي سبب وغانكونو بزوج ايكون مكتابي وانا مكتابو كولشي بيد الله مكتوب ومقدر .. وإلى مامكتابين راه واخا ماعرفتش شنو نديرو ولا ديرو مغانكونوش مكتابين خلي كولشي بيد الله سبحانه
- قاطعوهم سناء وخولة لي تنشرو حداهم سخفانين
- خولة [ هزات راسها جهة فؤاد كان كالس هو وهاشم وياسين فطبلة وحدة كان كيهددها ابصباعو باش تبت الأرض شافت فقوت ]
كون غير عمتي حتى أنت عرفتي البحر شحال زوين واخا فيه الماج
- قوت [ رضات نظاظرها ] :
لا غير بصحة وراحة ..
- فجهة أخرى فطبلة الرجال هاشم شاف فياسين ونغزو بيدو :
فخبارك سيهم فؤاد ناوي يضرب الكحل فالبيض
ياسين : وايلي شكون هاد المسكينة ؟
- هاشم [ أشر للجهة خولة ] :
حبو القديم صاحبت مراتك
- ياسين [ بإستغراب وصدمة ] :
وايلي تا كيفاش حبو القديم شي كارطة محروقة ماشميتش دخانها هادي كيفاش بلانك أسي الوزير عاهدي بالوزير ديال العريس كيحط عينو على الوزيرة دالعروسة انت حطيتي عينيك على صاحبت الوزيرة
- فؤاد : درتوني حلقة شادين فيا مابقا بنادم يتزوج ويدير الحلال انت لي حلال عليك حنا لا ..
ياسين [ كيضحك ] :
أحسن مادرتي على سلامتك العݣوبة لشي ناس نفرحو بيهم بلازم
- فؤاد : شتي هاد الناس الى بقاو على هاد الحال هزهم الما وضربهم الضو غفلت طارت عينك عرفتي شحال ديال العينين حاضيين داك الرزيق واهلي
- هاشم [ كيشوف ببرود فياسين ] :
حتى انت حرشاتك الواليدة قرصاتك وقراتك مزيان أمعلم .
- ياسين [ بجدية ] :
بلاما تݣولها الواليدة ݣلتها مع راسي نهار مشيت نخطب سناء قبل كاع ماطلق تمنيتها ليك اخويا وربي شاهد ومنكدبوش على ريوسنا .. البنت تبارك الله عاطية العين وعينين الرجال عليها الفرصة كتجي غير مرة وحدة
- هاشم [ بجدية ] :
واش ندق باب وحدة وانا مزال عد طلقت الواحد على الأقل دوز اديك عام ولا 6 شهور يبرا داك الجرح
- فؤاد [ عصبو ] :
أشمن جرح ولا خرا تخليني أصاحبي نبقى داوي بزاف انت من الاول باين عربون زواج بلاما ضحك على راسك .. كاملنا عارفين زواجك كيداز هداك زواج لي والديك مكانوش راضيين عليه ناسك وحبابك كامل مكان راضي عليه حد
- ياسين [ بجدية وتبات ] :
عندو الصح حتى واحد مكان راضي باك راه غير دار ليك الخاطر ومشا معاك ختك ماحضراتش ليك ݣاع .. مك براسها مدارتش معاك لازم مشينا بحال ضياف
- فؤاد : عييت معاه علاش هو كيسمع بحال الى كانو ساحرين ليه مافهمتش انا أش كان واقع ليه واش كان مصبرو عليها مـكانش كايبغيها وصابر
- هاشم [ كيسمع ليهم حتى قال فؤاد كلامو الأخر ] :
بغيتها ݣلاك براكة من الهضرة
- فؤاد: نسولك وجاوب بصراحة ونحلفك بالعزيز متكذب
- هاشم : سول
- فؤاد : نسيتيها ؟ مزال كتفكر فيها !
- هاشم [ ببرود ] :
الكذوب على الله حرام مابقاتش كتجي على بالي ولا كنتفكرها ولا حاس بيها واش كاينة على كوكب الأرض
- ياسين : ونوض من الݣلبة مكاين لا حب لا لفت برب العالي كون كنتي كتبغيها دبصح لا نسيتيها ولا كنتي مسرح رجليك هنا وكتفرنس ومرتاح نوض جمع الوقفة وشوفليك بنت الناس تزوج دير ولادك راه عندك 37 مابقا ليك والو ل 40 بقا حتى تولي بحال داك العتروس لي حداك
- فؤاد [ كيضحك ] :
لا سمحليا أنا فتو بدراجات انا مابقى والو ونتزوج كيتو هو يبقى يقرق بعينيه حتى يطيرو ليه بقوت القلوب يبغيها بريق ناشف مايلݣاها بقا دافع ليا كبير
- أقسم لك يمينا وكندوي معاك بنيتي مكاين لي غايداوي داك جرح لي فقلبك ݣد قوت وانا عارف أش كنݣول
- ياسين [ بإبتسامة ] :
خطفتيها ليا من فمي .. درية ظريفة الله يعمر ليها دار أدارهم يعطيوك الخبار أسمعة ديالهم تريحك شوف اباها كيفاش كيدير معاها وعلى معاودات ليا سناء حطها على جرح يبرا هي لي قريبة لباها مرضية .. بالي أخويا ربي خدا منك شيحاجة ولكن راه عوضك بماحسن منها انت الى كنتي معمي ومكتشوفش العوض لي حداك وانت حر ..
- هاشم سكت مجاوبهمش عينيه كانو مقابلينها من تحت النظاظر مركز مع أدق تفاصيل ديالها .. سناء ناضت من حداهم وأشرات لياسين يجي عندها .. خلاهم وتوجه جيهتها [ بإبتسامة وكلام عذب ] :
أش بغات روح الروح ؟
- سناء [ جاتها الضحكة حركات عيونها بأنوثة وحطات صبعها دوزاتو على كتفو بلاما يشوفها شي حد ] :
ياسينو حبيبي بغيت نركب فبيدالو مع البنات الى جات على خاطرك
- ياسين [ دقات قلبو رتافعو الصهدة طلعات معاه وزادتو الصهدة ديال الشمس ] :
هاد ياسين واخا ݣاعما مايبغي بزز منو يبغي وانا شحال عندي منك .. واخا سيري ومن بعد نركبو انا وياك بزوج
- سناء [ كتشوف فيه بنظرات كلها حب ] :
الله يخليك ليا ومايحرمنيش منك ، عطاتو بظهر ومشات بقا واقف فبلاصتو ساهي فيها بلا هواه ولا كيحس براسو ماشي هو دات قلبو ودات كولشي فيه .. تنهد تنهيدة طويلة وتوجه راجع عندهم شاف فؤاد فهاشم :
شتي باش ݣلت ليك الحلال زين ولا كيفرنس بلا هواه أنت كنا كنشوفوك امعبس
- هاشم [ وقف ] :
انمشي نعوم انا بلاصتي زرعو فيها الحبق ..
- قوت كتشوف فالبيدالو لي قدامها دايرة يدها على خصرها قلبها كيضرب شافت فداك دري لي داير واحد جيلي :
خويا ياكما ايتقلب بينا ؟
- لا أختي مغايتقلبش بيكم انتوما غير شدو توازن الى ناضت وحدة تانية ترومبلاصيها ماتخافيش
- قوت [ قلبها غايسكت ] :
ناري كون غير عفيتوني
- خولة : وصافي ماتزيديش فيه أصاحبتي يلاه زيدي .. حرك دري البيدالو ركبات خولة وقوت ركبات من ديك الجهة أما سناء ݣلسات اللور
- وراهم كيفاش يديرو الى بغاو يخرجو بيه وكيفاش يمشيو للجهات وعندهم نص ساعة بدات قوت كتبيدالي وخولة حتى هي .. ثوت قلبها باغي يخرج من بلاصتو
- كتشوف فالما قريب ليها كلما زادو دخلو قلبها صافي ايخرج من بلاصتو خصوصا فاش بدا كيتحرك كينزل ويطلع البكية شداتها
- سناء طلعات فداك السلوم مع طلعات مع بدا كينزل ويطلع وهي تنقز للما .. بداو يدخلو لداخل وقوت صافي ولات صفرة بحال الى داهنة وجها بالخرقوم صوتها كلو كيترعد :
انا بغيت نرجع براكة هالعار
- خولة : اويلي من نيتك نعلي شيطان أصاحبتي هانتي حبسي انا انتسالطا مع سناء متحركيش
- قوت [ بدات كتغوت عليها ] :
واش انت مريضة ماسمعتيش قال خاص نشدو توازن واش بغيتيه يتݣلب بيا خولة ماديريش معايا هاد الفعايل الله يرحم بيها الوالدين
- سناء قربات ليهم كتعوم :
مالها ؟ قوت ترخاي أصاحبتي واخا كاع طيحي عادي راه كاعما غارق
- قوت [ صافي دموعها بداو نازلين خصوصا الما كيضرب ليها مع جلايلها ] :
مابغيتش نترخا مابغيتش بغيت نرجع بحالي الله يرحم بيها الوالدين بغيت نرجع بحالي [ كتبكي بدموع فمها بياض وجها ولا صفر كتحس براسها اتسخف ولا قلبها غايخرج ] خرجوني ورجعو انتوما صافي بغيت نرجع
- سناء تماطات للبيدالو باش تطلع غير كيتحرك بحال الى ايتقلب كتغوت قوت لربي لي خلقها وتبكي
- خولة : صافي صافي احنا انرجعو صافي
- قوت [ كتردد زوج كلمات ] :
الله يرحم والديكم الله يرحم والديكم .. بداو راجعين وهي كلما بعدو على البحر الداخل قلبها كيرتاح حتى وصلو نزلات منو قلبها غايسكت مخلية البنات وراها ماتلفتاتش جيهتهم رجليها غاديين بيها كتقلب فين خلات دارهم ..
- كدوز على الناس كل واحد مستمتع وهي شادة على قلبها ودموعها نازلين .. سمعات سميتها وهزات راسها كيبان ليها واقف قبالتها عاقد غوباشتو بإستغراب جا عندها وعلامات الإستفهام وشك على وجهو :
مالك أش كاين ؟
- قوت [ بحال الى قاليها زيدي بكي يدات تنخصص ] :
كنت غانموت قلت ليهم منركبش معاكم قاتها ليهم بززو عليا ماسم ماسمعونيش انا كنخاف من البحر هادشي باش كنعوم اعلى برا و وهوما ما داوهاش فيا
- هاشم [ حط يدو على كتفها وهربها دغية ] :
بلات انا جاي .. خلاها واقفة ومشا لواحد المحال صغير ا منو الما ورجع عطاها الما من بعدما فتحو شداتو عندو يديها كيترعدو .. تنهدات تنهيدة طويلة
- هاشم [ بإطمئنان ] :
شوية دابا ؟
- قوت هزهزات ليه راسها بأه
- هاشم : دابا أش وقع ؟
- قوت [ كتمسح فدموعها خرجات منها تنهيدة طويلة من جوفها هزات فيه عينيها لي عمرين بدموع ] :
انا عندي فوبيا من البحر مكندخلش الداخل حتى العومان مكنعرفش كنعوم اعلى برا هوما بغاو يركبو فبيدالو انا مابغيتش ولكن هوما قالو ليا ايلاه [ عاودات ليه كولشي ]
- هاشم [ هزهز براسو ماعجبوش الحال ] :
صافي رتاحي دابا واخر مرة تخلي شي حد يفرض عليك شيحاجة انت خايفة منها ومابغياهاش دوينا على هادشي داك نهار نسيتي ؟
- قوت : مانسيتش انا امابغيتش نخسر ليهم الخاطر
- هاشم [ بهدوء وصوت حنين كيخليك تحسي براحة] :
وانت هانية خاطرك يخسر شفتي الحالة لي وصلتي ليها درتي ݣنازة غير بوحدك ومالك عليها ؟
- قوت [ هزهزات راسها ] :
بصح عندك الصح اخر مرة نعاود
- هاشم : لا غير عاودي نيت مابغيتيش الحاجة ماديريهاش سالينا
- قوت [ تبسمات ] : واخا ..
- رجعات فيها الروح فاش ݣلسات مدة عاد جاو البنات مادواتش معاهم قررو يتحركو ويشدو الطريق للفنيدق يتغداو فيه ..
- خولة [ عنقات قوت ] :
وصافي ماتبقايش مقلقة منا أصاحبتي حنا أبغيناك تجربي شيحاجة عمرك جربتيها كون كنا عارفين ايوقع هكا والله مانركبوك
- سناء [ عنقاتها من الجهة لوخرا ] :
سمحيلينا أختي حنا قلنا جينا هنا نجربو شيحاجة جديدة تبقى ذكرى
- قوت [ بطيبة خاطر] :
المسامحة ماوقع والو تبغيو لاݣلاص ؟
- خولة : انا بغيت
- سناء : حتى انا ... خدات ليهم لي ݣلاص خدات لمها وللنعمة
- عبد الرحمان : وأنا ؟
- قوت : بابا نعل شيطان والسكر ؟ لا مكاين حلاوة غير نسى ..
- توفيق [ كيضحك ] :
عبرات عليك الحاج الحلاوة خليها للشباب وحتى شباب ولاو قاطعينها أما حنا نشوفو بعينينا ونسكتو .. ركبو طوموبيلاتهم وتوجهو للفنيدق ..
- وصلو للفنيدق واحد المنظر كان غزال واحد الجزيرة كتبان بعيدة على ماسمعات قوت بلي هي سبتة بلاصاو طوموبيلات وتوجهو للأول قهوة شافوها عامرة ، دخلو شدو بلايصهم
- كل واحد وشنو ختار الأغلبية ختارو الحوت ومقبلات ديال شطون ولا ديال الكروڤيت سلاو الغدا وتوجهو للبال ديال الفنيدق
- رجال مشاو ݣلسو فالقهوة اما العيالات ماخلاو محال كولشي خداوه وتقداوه شومبوانات باندوشات لي ماسك دشعر كاع الحوايج لي غاليين عندهم خداوهم رخاص .. حملو الساشيات ومسلاو حتى غربات الشمس عاد سلاو
- تمو راجعين عيانين رجليهم مهازينهمش ..
- توفيق : وبقى ليكم الفنيدق كامل كون هزيتوه
- نعمة : دابا غير زيد الحاج عيينا الرجلين لي يوقفو مزال مابقاوش ..
- طلعو لطوموبيل وشدو الطريق الحال ظلام واحد الجو زوين والغربي بارد حاطة يدها على خدها وكتخمم حتى تغمضو عينيها بنعاس وصلو للمضيق فيقاتها خولة طلعات نيشان للبيتها دخلات للحمام دوشات عليها وخرجات لبيتها تلاحت على نموسية حتى دخلات عليها خولة ونظراتها كلهم خبث :
أجي انت لهنا أش داك تفاهم انت وهاشم وليتو سمن على عسل
- قوت : عادي أصاحبتي واش أنبقاو شد ليا نقطع ليك صافي حنا كبار وبعقلنا تشهيت دجاج مشوي اعييت اما نخرج نجيبو
- خولة : قولي لسناء تقولها لياسين
- قوت : اويلي من نيتك مكاين لي غادي يتسخر المهم خليني نغمض عفاك واحد شوية عييت
- خولة [ ناضت ] :
نعسي نعسي .. خرجات وخلاتها طفات عليها الضو وضارت للجهة للخرى مستسلمة للنعاس
________________
- كتحس بشي واحد كيفيقها ماقداتش تحل عينيها بحال الى مانعساتش هادي عامين بالكشايف باش فاقت عينيها كيتعسلو بوحدهم ..
- خولة [ كتحرك فيها ] :
راه الموت هادي وبزاف على النعاس أصاحبتي واه نعلي شيطان فيقي تاكلي هادشي ماحدو سخون ، قوت بدات تحل عينيها الشعا ديال الضو عماها صوتها تقيل :
أش واقع حرام عليك أصاحبتي خليني نعس
- خولة : ونوضي تعشاي راه هاشم وفؤاد جابو العشا الدجاج مشوي
- قوت [ حلات عينيها على تيساع تقادات فللݣلسة خاطفة ليها ساشي من يديها ] :
حلفي شكون قالها ليهم ؟
- خولة [ ݣلسات دايرة رجل على رجل ] :
هههه انا طبعا وقفني فالكونتوار شد من عندي نمرتي ولحتها ليه قلت ليه واش مكاينش توصيل هنا راه قوت تشهات دجاج مشوي ومالقاتش لي يتسخر ليها .. قاليا انجيبو العشا انت ارتاحي شفتو خرج مع هاشم وجابو العشا فيديهم
- قوت [ كتاكل فدجاج وتبنن خرجت نفس طويل من نيفها دليل على الراحة ] :
والله الى الراحة عاد رجعات فيا الروح كان فيا الهيمري ديال الجوع .. كلات حتى شبعات وحطات ساشي حداها ورجعات تخشات تحت الكوڤرلي
- خولة : أترجعي تنعسي ؟
- قوت [ هزهزات راسها بتتاقل ] :
ااه صافي مقاداش والله حالة عينيا ابزز ربي طفي معاك الضو صافي ماقديتش نحل عيني ، ناضت خولة طفات عليها الضو وخرجات سادة الباب من وراها ..
- فجهة أخرى سالى صلاتو وتجدويد القرآن جمع صلايتو حطها فوق الكرسي وتوجه للبالكو بقا واقف مدة كيشوف لجهة البالكو ديالها كيبان ليه الظلام بقا واقف واحد مدة مبان ليه حتى واحد ستغرب ، عقد غوباشتو ودخل هز تيليفونو كتبان ليه الساعة 10 هز راسو كيسول راسو مزال الحال تكون نعسات ؟ حط التيليفون حل بابو بيتو وخرج متوجه للجهة بيتها وقف مقرب ودنيه من الباب وكيسمع واش جاي شي صوت ولالا
- جمع غوباشتو وهو كيسمع أنين خفيف جاي من بيتها حط يدو على الباب ودق والو دقة ثانية وثالثة ولا من مجيب ماعرفش واش يحل الباب ويدخل يشوف مالها ولا شنو يدير كان فصراع وحيرة ، مالقى مايدير بلاما يحس حط يدو على البوانيي ديال الباب ودخل ..
- شعل الضو وبقا عاطيها بظهر ضار بشوية كيشوف ابنص عين لا تكون ملابساش حوايجها ولا شيحاجة كتبان ليه لابسة .. حدر راسو وتوجه لعندها كيبان ليه محطوط سطل حدا نموسية فيه الرضان غير قرب لحدا راسها حلات عينيها بتتاقل
- هاشم [ بقلق ] : مالك ياك لاباس ؟
- قوت [ صوتها تقيل مرخي مقاداش تدوي] :
الدوخة ورضان وتبوريشة فيا او واحد الوجعة كتشدني فكرشي مصارني كنحس بيهم غايتقطعو ، ب بغيت نعيط لخولة ولا شي واحد ماقديتش [ غمضات عينيها كتألم ] أممممم ناري ياربييييييي
- هاشم [ حط راسو على راسها لقاه سخون ] :
سخانة طالعة ليك بلات انعيط على خولة انا راجع .. خرج هاشم مخليها شادة على كرشها ولية دالوجع كتعصر ليها فكرشها .. مدة قصيرة تمات جايا خولة لعندها مخلوعة :
مالك ياك لاباس أش واقع ؟
- قوت [ سخفانة وكتحس براسها ولات عرقانة كتشدها الوجع مكطلقها حتى كتسخف ] :
الكرش قتلاتني السخفة ودوخة ماجبت السطل من طواليط أبزز اللية ولادياغي
- خولة : وراه بسيف أصاحبتي بسيف اويلي كليتي الحوت فالغدا والحوت ديال القهاوي كيكون فيه زيت بزاف ولاݣلاص وعاد جيتي كليتي الدجاج ونعستي تم تم وراه خالوطة جالوطة درتي فديك الكرش
- قوت : صافي اخولة صافي راه والله مقادة ندوي شوفي ماديري ليا
- خولة جات خارجة تلاقات بهاشم فوجها :
انا انمشي نشوف الى كاين شي زعتر نديرو ليها
- هاشم : لا بلاش مايحتاجش انا انخرج نجيب ليها دوا ماعندها مادير بدوك العشوب ماتعرفي يكونو مصارنها طايبين نصدقو واحلين
- خولة : واخا صافي .. مشا هاشم او وقف عليها فؤاد :
كيف بقات ؟
- خولة : مريضة سخانة والوجع ديال الكرش دارها ليها تخلاط كلات الحوت فالغدا وغير تعشات نعسات
- فؤاد : وحتى داكشي لي وقع ليها فالبحر داخت راه غايأتر عليها
- خولة : ناري بلاما دير ليا تأنيب الضمير عفاك كنتفكرها كندم علاش بززنا عليها تركب معانا
- فؤاد : سيري حداها بلاما يفيقو والديها دابا يتخلعو عليها فهاد الليل
- خولة رجعات للعند قوت حيدات داك التقيا وغسلات السطل رجعات للعندها غطاتها مزيان حيت كانت فيها الرعدة كلها كترعد ..
- بقات كالسة حداها حتى سمعات الدقان فالباب طارت حلات لقاتو هاشم هاز فيدو ساشية ديال الدوا
- هاشم : هدا عطيه ليها دابا وݣلسي واحد 5 دقايق عطيها هاد الساشية وعاد عطيها هادا لاخر راه مكتوب شحال من مرة فنهار وراه كلهم قبل الماكلة الى مدازهاش الحال ݣوليها ليا
- خولة : صافي واخا شكرا بزاف ، رجعات عند قوت عطاتها الدوا كيفما وراها هو جاتها الوجعة ناضت لطواليط رجعات وهي شادة على كرشها رجليها فاشلين عليها
- تكات فبلاصتها كملات ليها خولة الدوا وغطاتها وبثات حدا راسها .. بقات مدة طلات عليها كتسمع نفسها منتاظم عرفاتها نعسات غطاتها وناضت من حداها خلات ليها الما وكولشي حداها وخرجات لقات هاشم واقف على برا
- أمضرا كيف بقات ؟
- خولة : راه عطيتها الدوا الحمد لله راها نعسات وسخانة هيطات ليها بعدا
- هاشم : ايوا الحمد لله يلاه تصبحي على خير .. عطاها بظهر ومشا لبيتو بقات واقفة وكتبسم بوحدها حدرات راشها وتوجهات لبيتها ..
_______________
- تحل عليها الباب باللهفة ودخلات صفية وملامح وجها مخلوعة .. كانت ناعسة ومغطية وجها صفر ݣلسات حداها دوزات يدها على راسها او وجها حلات قوت عينيها بشوية سخفانة :
ماما
- صفية : كيصبحتي أبنتي كيف بقيتي شوية ؟ علاش مافيقتونيش كون درت ليك الزعتر
- خولة : راه هاشم جاب ليها الدوا مسكين لبارح .. دخلات نعمة حتى هي كطمن عليها وباها
- قوت [ سخفانة كتحس بمصارنا كيتقطعو بجوع ] :
ماما جاني جوع كنحس بمعدتي لصقات ..
- نعمة : ديري ليها غير جبن فالخبز مع كاس ديال أتاي بزعتر
- صفية [ وقفات ] :
هادشي لي غادي ندير ليها خاصها تشرب دواها هو الأول بعدا
- خولة : انا غادي نشربو ليها .. مشات صفية توجد ليها فطورها ونعمة بقات ݣالسة دخلات عليها سناء مخلوعة عليها :
كيبقيتي شوية باش كتحسي [ ݣلسات حداها كتمس ليها فراسها ] وجهك صفر أختي علاش مافيقتونيش ؟
- خولة : لبارح كان كولشي ناعس مابغيتش نصدعكم فداك الليل وانتوما طحتو ناعسين بالعيا
- سناء [ كتحسس وجه ختها وراسها ] :
شوية دابا واش مزال بحال لبارح ؟
- قوت [ مقاداش تدوي بغات غير تاكل وتنعس ] :
شوية كنحس بالفشلة
- سناء [ وقفات ] :
انجيب ليك نمسح ليك وجهك .. مشات للبيتها ورجعات فيديها لانجيت الفازݣ مسحات ليها وجها او فمها رشات ليها شوية ريحة اباش تفيق شوية
- قوت [ مغمضة عينيها ] :
راسي غايتهرس
- نعمة : جمعي ليها أخولة راسها بزيف حياتي
- خولة عطات ليها الدوا هو الأول وݣعدات ليها الوسايد واحد الشوية وعكفات ليها راسها باش يتجمع بزيف حياتي فالبيض ..
- شوية دخلات صفية هازة بلاطو فيه الخبز مع الجبن وبراد ديال أتاي بزعتر ، ݣلسات حداها كتوكلها بيديها كلات غير شوية وبعدات راسها :
صافي أماما عييت شبعت
- صفية : وكملي ابنتي أهاد نص
- قوت [ حركات راسها بنفي ] :
براكة والله مقادة بغيت غير نعس صافي
- نعمة : الكرش راه كتسخف وكتعيي وكتهلك دابا شربات الدوا .. خليوها ترتاح تنعس باش يݣر فيها دوا وفالغدا ديري ليها ابطاطا مفورة مع مليحة والكامون وروز باش تجمع ليها كرشها
- صفية : هادشي لي غاندير ، خرجات صفية ونعمة من عندها بقات غير سناء وخولة
- قوت [ بلسان تقيل ] :
سناء حلي عليا البالكو وديري رواق يدخل ليا البرد ... وخدمي ليا سورة البقرة حدا راسي عفاك أختي
- سناء [ وقفات طارت ] : واخا دابا أختي .. حلات البالكو وطلقات الرواق .. هزات تيليفون قوت ودارت سورة البقرة وحطاتها حدا راسها ..
- خولة : بلات نقاد ليك المخاد ، قدات ليها المقاد وتقادات هي متكية ناعسة على جنبها ليمن .. عاطية وجها للجهة البالكون كيضرب فيها الغربي
- سناء : بغيتي شيحاجة ؟
- قوت [ حركةت راسها بلا وبصوت منخافظ ] :
غير سيرو رتاحو صافي انا انعس .. خرجات خولة وسناء من عندها خلات ليها قرعة الما وكولشي حداها .
- خرج من بيتو لابس تيشورت فالݣري مع سروال ديال كيطمة فنفس اللون وسبرديلة من شعرو باين عاد مدوش .. وصل عند بيتها كان غير مرضوض ماشي مسدود وصل ليه صوت القرآن .. حل الباب كتبان ليه ناعسة قرب ليها غير بلا حس كيطل عليها .
- حلات عينيها بشوية وشافت فيه غالبها النعاس
- هاشم [ بإطمئنان ] :
شوية دابا ؟
- قوت [ هزهزات راسها كدوي ابشوية] :
شوية شكرا ربي يخليك
- هاشم : الله يشافيك ويعافيك ياكما محتاجة شيحاجة ؟
- قوت [ بنفي ] : لا بغيت غانعس صافي
- هاشم : بشفاء إن شاء الله خليت ليك الراحة .. خرج من عندها وهي ساهية حتى تغمضو عينيها بنعاس ..
___________
- فنهار جابت ليها صفية الماكلة ديالها كلات غير شوية ورجعات نعسات فالعشية رجعات عندها خولة عطاتها دواها وخدات زلافة ديال الحسوة شعلات ليها خولة تلفازة بقات مقابلة معاها وكتفرج كتنسي فالمرض .
- كانت بقات ليهم 4 يام فالمضيق باش يطلعو لطنجة يدوزو فيها ديك يوماين ويديرو دورة وحدة فباقي النواحي ويرجعو للأسفي .. الأيام الأخيرة فالمضيق كانت سناء كتخرج هي وياسين وصفية مرة مرة الى خرجات مع نعمة أما خولة كانت كتݣلس مع قوت واخا مكتبغيش تخليها ولكن كتبغي تݣلس معاها
- ولات كتنوض واخا كتشدها الفشلة ودوخة ولكن مابقاتش بحال الأول .. كان اخر نهار ليهم فالمضيق ݣالسة فبيتها كتجمع فحوايجها حتى دخل علبها عبد الرحمان
- بنتي كيبقيتي ياك قادة تشدي الطريق بعدا ؟
- قوت [ بإبتسامة ] :
لا الحمد لله ابابا دابا مزيان اللهم لك الحمد واخا مزال فيا شوية ديال السخفة ولكن ماشي بحال الأول
- عبد الرحمان [ تنهد تنهيدة طويلة باغي يݣول شيحاجة ومقادش ]
- قوت : بابا ياك لاباس بغيتي تقوليا شيحاجة ؟
عبد الرحمان [ طبطب على يدها ] :
والله أبنتي ماكرهت نشوفك حتى أنت فدارك بوليداتك والله ماكرهت ليك شي ولد الناس يبغيك ويديرك فعينيه
- قوت : هي صافي سخيتي بيا ولا شنو
- عبد الرحمان : كاين شي واحد كيسخى بولادو ابنتي حتى واحد مكايسخى بطرف من كبدتو ولكن حتى انا بغيت نشوفك فدورتك بحال ختك .. مع شي واحد لي يستاهلك
- قوت [ حسات بلي كاينة شي حاجة ] :
بابا واش جايب ليا شي عريس غير جيني لطريق شنو كاين ؟
- عبد الرحمان [ ضحك ] :
والله أبنتي ماكرهت ليك هاشم الله يعمر ليه الدار وزاد كبر فعينيا كثر فاش جاب ليك الدوا ومسكين كيسول عليك هاد الأيام فاش كنتي مريضة ، بحال هاد الرجال أبنتي قلال لي يرض ليك البال ويهتم ليك شوف غير شنو دار دابا لي أنت أخت مرات خوه خلي يكون بيناتكم شي رابط قوي
- قوت [ تنهدات تنهيدة طويلة وشدات على يد باها ] :
بابا الزواج عمرو مكان بزز راه بالخاطر هو أه متافقة معاك هاشم ولد الناس .. ظريف والله يعمر ليه الدار وتبغيه اي وحدة وتمناه يكون شريك حياتها ، ولكن راه هو عاد خرج من تجربة ديال الطلاق أنت وماما وخالتي نعمة باغييني ليه ولكن واش هو باغي ؟ النوع ديال هاشم ابابا راه الى بغا شيحاجة راه غايمشي ليها نيشان مغايتسناش شي واحد يقولها ليه ..
بابا حتى حاجة مابزز أنت علمتينا هادشي من نهار عقلنا على راسنا وأنا راه قلتها لماما هاشم راه مغانتزوجش بيه زواج ديال العائلة من الأحسن بلاش يمشي يوقع اشي سوء تفاهم تأثر بيه ختي اللهم التيساع أحسن نبقاو حباب ، عارفة بلي باغيين مصلاحتي ولكن خليوني على راحتي حيت ماشي غير انا لي مابغياش راه حتى هو مباغيش ..
- عبد الرحمان : بنتي أحسني الظن بالله شنو كنا ݣلنا ؟ علاش كتفكري بلي راه ايوقع شي سوء تفاهم ياك ݣلنا بلي ديما نتمناو الخير
- قوت [ تبسمات ] :
بصح عندك الصح خاص الإنسان يتمنى الخير ولكن ابابا من الأحسن العائلة تبقى فتيساع وسيد اصلا ماباغيش وأنتوما كتخططو وتفصلو بوحديتكم
- عبد الرحمان : أنا عارف هادشي ابنتي وحتى دابا انا ناشي ݣلت ليك نزوجوكم بزز انا اخويت عليك ݣلبي وݣلت ليك ماكرهتش ليك شي ولد الناس بحالو
- قوت : إن شاء الله ابابا ربي كبير وهدا لي غانتزوج بيه غايجيبو الله إن شاء الله وشتي هاشم براسو الى كان مكتاب ليا راه نديه هو والى مامكتاب راه مامكتاب راه كولشي مكاتيب وأرزاق عند الله سبحانه
- عبد الرحمان : انا غير خفت الى جاب الله متعرفي الرزق وتقدم ليك هاشم ولا شيحاجة ماتبغيش ولا شيحاجة ؟
- قوت [ كضحك ] :
داكشي ديال الله سبحانه الى كان بحالك أبابا والله ومانرفضو أكون هاني ولكن يكون بحالك حيت انا باغية إنسان بحالك يعاملني كيف كتعاملني أنت وكيف كتعامل أنت ماما
- عبد الرحمان [ عنقها ] :
الله يرضي عليك أبنتي ويسهل عليك ويسر أمرك يارب .. يلاه كملي باش نمشيو ..
- قوت : واخا
- خلاها وخرج رجعات كتطوي الحوايج وعقلها كيفكر كيضرب ويخمم وقفات فللحظة وتفكارت اللحظات لي جمعاتها معاه نهار كاپور نيݣرو وفاش جاب ليها السقاطة ونهار جرها فالبال فاش مابغاش ليها الإحراج مع مول البال ..
- نهار تدخل فاش وقفو عليهم دوك الزوج ونهار ضرب صلاح وشرا ليها الحلاوة فاش جاتها السخفة فاش مرضات وهو لي خرج وجاب ليها دوا ، تفكرات فاش خولة قالت ليها بلي بقا واقف كيتسنى تݣوليه كيف بقات .. وفاش دخل طمأن عليها
- تفكرات نهار كلاو لحم الراس فجامع الفنا وخدا ليها عصير الحامض وسولها واش مزال بغيتي شيحاجة ولا خصاك شي حاجة مكانش شي واحد لي بخيل واخا هي مكتعني ليه والو وهوما غير نساب فقط .. كان كيعاملها مزيان
- ومعاملتو مع والديها كيفاش خلا طوموبيلتو لباها ومها باش يمشيو مرتاحين وهو شد طوموبيلت باها .. وفأي حاجة مكايخليش باها ولا باه يحطو يديهم إلى جات تفكر أتلقى بلي فيه بزاف ديال الحوايج زوينين وبلي أي وحدة تمناه يكون راجلها ..
- واخا الحاجة لي ماعجباتهاش هي قضية أنو ضد الخدمة .. راس كيقوليها بلي هو ضد المرأة المزوجة تخدم وتحتك برجال تفكرات فاش قاليها " الى مراتي قنطات تݣد تحل شي محال تحت الدار بعيدة على رجال خدمتها تكون غير مع العيالات هادي في حالة قنطات .. أما أنا مراتي ݣاد بيها نبغيها تݣلس معززة مكرمة "
- يعني هو كان ضد المرأة المزوجة تخدم أما الى كانت ديال راسها ماعندو إشكال فهادشي
- قوت [ غمضات عينيها وحلاتهم دغية بحال الى بهاد الحركة كتحاول تحيد عليها هاد الأفكار بدات تدوي مع راسها وتجاوب راسها ] :
قوت نعلي شيطان يلاه كتقولي لباك انا وهاشم مغانتزوجوش دابا وليتي تفكري فإجابياتو وسلبياتو بحال الى سيد عرض عليك الزواج نعلي شيطان اويلي على الضحك النايض ..
- رجعات كتجمع فحوايجها بزربة فالباليزة جمعات كولشي لبسات علبها عباية فالموڤ لايحة عليها شالها لي مغطي نص شعرها .. دارت نظاراتها ديال الشمس هزات ساكها وتيليفون رشات ريحتها وخشاتها فساك وجرات باليزتها ..
- غادية فالكولوار سمعات شي حد طالع مع دروج وهي توقف عند بالها خولة حتى بان ليها هو .. لابس سروال ديال دجين فالكحل مع شوميز فالقهوي ماشط شعرو اللور وداير نظارات فالكحل ديال الشمس ..
- قوت : صباح الخير
- هاشم [ طلعها ونزلها من تحت عينيه ضاربة فيه ريحتها ] :
صباح الخير كيبقيتي شوية ؟
قوت : الحمد لله واش كولشي كاين لتحت ؟
- هاشم : وي كولشي نزل خلي ديك الباليزة انا غانهبطها غير سيري انت
- قوت : لالا بلاما تعذب راسك انا نازلة نازلة
- هاشم [ طلع حاجب ونزل الثاني ببرود وصوت رجولي تقيل فيه نوع من الصرامة والأمر] :
دويت معاك يمكن ؟
- قوت [ تبسمات بلطف ] :
واخا شكرا .. خلات الباليزة باغية دوز واخا كاينة بلاصة منين دوز ولكن حسات ليها ضيقة جاتها الرعدة ورجفة والحمورية طغات على وجها دغية دغية كانت حاسة بيه حاضيها من تحت النظاظر كون صابت تنقز دوك الدروج وتهرب
- هاشم [ حاضي وجها كيفاش ولا حمر وكتمشي خطوة وتوخر الأخرى جاتو الضحكة ، هز يدو دوزها على راسو حاضيها كيفاش مابغاتش دوز حداه ولاصقة فالحيط ] :
ياكما بغيتي شي كومبريسور [ ألة الحفر] باش تحفري الأرض ودوزي منها شي طريق حيت شتك قربتي دخلي فالحيط ؟
- قوت [ بلعات ريقها ] :
ههه اويلي شكون انا لا والله ماهكاك ݣاع
- هاشم [ تقاد فالوقفة وملامح الإستغراب على وجهو] :
واش كنخلعك ولا لهاد درجة محاملانيش مافهمتش ؟
- قوت [ توترات بدات ترمش بعينيها محيدة نظاظرها كتشوفيه بصدمة ] :
ناري أنا والله القسم وربي المعبود وربي كبير وشاهد عليا ماهكاك بالله العظيم .. بالعكس والله حتى عزيز عليا أعوذ بالله متقولش هكاك
- هاشم : ومالك ؟
- قوت [ بدات كضحك ببلاهة وإستغباء ] :
أزعمة بغيت نخلي ليك الطريق فين دوز
- هاشم [ حك لحيتو وهو على نفس الملامح ] :
ݣوردو أنا [ ݣوردو = إنسان من الحجم الكبير ]
- قوت : لا حاشا اعوذ بالله أخويا هاشم تقول هكا انا ماقصدتش غير انت تبارك الله مع طويل وعامر خليت ليك فين دوز هدا مكان المهم انا هبطت ..
- هبطات مع دروج كتجري ورجليها فاشلين عليها وصلات التحت او وقفات كتستراح حاطة يدها على قلبها كتلهت بظات تعاتب راسها بالهمس لا يسمعها :
قوت واش انت هبيلة اويلي وحدي تقول عندك 16 عام أش هاد الهبال اش غايقول مع راسو دابا .. هادي هي تباتة ورزانة والهضرة بتاويل وتعرفي كيفاش تصرفي الهبال هذا ..
- حدرات راسها وخرجات توجهات نيشان للطوموبيل طلعات وسدات عليها
- خولة [ بإستغراب] :
مالك أنت ؟
- قوت [ ضارت عندها ] :
علاش مالي ؟
- خولة [ كتحقق فيها ] :
ماعرفتش جيتيني فشكل وصافي كتحسي براسك مزيانة ؟
- قوت [ هزهزات براسها ] :
الحمد لله ..
_______________
- فطوموبيل ديال ياسين مدورة وجها لجهة ازاجة وتوفيق مقابلها حط يدو على يدها حتى ضارت عندو :
مالك شفت حالك هاد الصباح مكايعجب ؟
- نعمة [ بلعات ريقها وعينيها غرغرو بدموع ] :
كنت متأملة بلي هاد السفر غايجمع بين القلوب ويحنن قلب ولدي ويحل عينيه ونجمع بينو وبين قوت .. ولكن ݣاع لي فكرت فيه تضرب ليا فزيرو لا هو باغي لا هي باغية وأصلا كيفاش غاتبغي وهو ماباغيش
- توفيق : خلي ولدك يضبر راسو ويدير لي يرتاح فيه كل واحد عندو حياتو وكيفاش كيشوفها ومخطط ليها ..
- نعمة [ مسحات دمعة من عينيها ] :
عارفة هادشي انا غير بغيت ولدي يكون فرحان مابغيت والو من هاد الدنيا شفت البنت ظريفة وعجباتني رتاحيت ليها انا كنت بغيتو ايخطبها ويتعرفو ففترة الخطوبة ماشي بغيتهم يتزوجو من الأول كنت ابغيت نفرح بيه مع لي بغاها ليا قلبي .. خفت عليه دور بيه شي وحدة تعءيو كيف عذباتو لولة واخا معارفاش أش وقع ولكن انا عارفة ولدي مايوصل لطلاق الى مكان تضر
- توفيق : لي عند الله مشافها حد مزال تفرحي بيه انت غير خرجي سوقو وخليه على راحتو ومايكون الخير دعي معاه فصلاتك هادشي لي تقدي ديري ..
- نعمة هزهزات بالإيجاب راسها .. تحل الباب ودخل ياسين وسناء هز راسو فمو وغوبش :
الواليدة مالك ياك لاباس ؟
- نعمة [ بإبتسامة ] :
والو أولدي
- ياسين : متأكدة ؟
- نعمة : والله مكاينة شيحاجة أولدي الله يرضي عليك
- سناء : عمي أجي حدا ياسين وانا خليني حدا خالتي
- توفيق [ شد يد مرتو ] :
لا أبنتي كل واحد يݣلس حدا رزقو .. جاتها الضحكة كضحك وضارت دايرة السمكة حشمانة .
- الطريق كلها وهي حاطة يدها على زاجة السرجم وساهية فطريق اما خولة اللور شادة تيليفون كتقرا فالميساجات لي دازو بينها وبين فؤاد .. هزات الكيت من ساكها وطلقات الموسيقى فودنيها .
- هاشم ضار عندها ورجع كيشوف فطريق رجع شاف فيها وبتساؤل :
قوت شوية ياكما ضاراك شيحاجة؟
- قوت [ شافت فيه ] : لا أنا مزيانة الحمد لله مكاين والو
- هاشم هزهز راسو يد سايݣ بيها ويد مخرجها من السرجم .. كانو مريزيرڤيين قبل فأوطيل فطنجة وضلو مع الغدا قادو شوانطهم وخرجو يتغداو فالأوطيل
- قوت خدات غير شلاظة خفيفة باش ماتقلش على المعدة ديالها كتحس براسها فاشلة متكرهاتش تمشي غير البحر وتقابل معاه
___________
- دوزو النص النهار غير فالأوطيل حتى العشية عاد خرجو يدورو أغلب الوقت ساكتة على غير العادة ديالها كتخمم وتفكر كتحس بشيحاجة ماهياش واقعة ليها كيدورو بطوموبيل متوجهين للبلايص لي زوينة فطنجة ومعروفة وهي مكايناش فهاد العالم
- توجهو نيشان للقهوة ديال الحافة يتقهواو فيها مأجلين البلايص الأخرى للغد .. دخلو شدو بلايصهم ݣلسات مقابلة مع البحر وكتنهد بحال الى كاين جبل فقلبها هزاه شيحاجة بحال الى خانقاها معارفاش شنو هي ..
- كان حاضيها وراض ليها البال جاتو شيحاجة فيها مبدلة ماشي هي مامالفاش ليها متأكد بلي ماشي المرض لي داير ليها بحال هكا عارف بلي ماشي شي وحدة لي كعرفها مدة لي هي طويلة ، ولكن داكشي لي شافو منها فهاد المدة متأكد بلي بيها شيحاجة وهادشي مكانش ملاحظو غير هو
- كانت حتى خولة ملاحظة هادشي كتسولها كتجاوبها على قد السؤال وترجع تسهى منين ركبو هاد الصباح وهي ماشي على برجها لوخرين خالقينها وكيهضرو وهي غير ساكتة وساهية فاللحظة وقفات
- خولة [ بإستغراب] :
فين غادية ؟
- قوت [ هزهزات راسها ] :
انا غير غانتمشى هنا شوية ونرجع .. خلات العينين متبعينها ومشات للجهة كانت خاوية او وقفات مقابلة مع البحر وأشعة الشمس كتاخود نفس طويل وتخرجو بحال الى شي حد ضاغط ليها على صدرها
- قوت : أستغفر الله العظيم يارب يارب يارب تبتني يارب تبين ليا طريق ياربي اش هادشي واقع ليا ياربي
- خولة [ وقفات عليها ] :
مالك أصاحبتي منين خرجنا من المضيق وانت ماهياش متقوليش ليا ماماليش راه كنعرفك واش كتخبي عليا ؟
- قوت [ شافت فيها ] :
أنا براسي معارفاش مالي أخولة كنت هانية كنت بيخير وعلى خير تخربقت وتلفت وضارت بيا وحق الله العظيم
- خولة [ بخوف ] : ياك لاباس خلعتيني ؟
- قوت [ كتشرح ليها بإنفعال ] :
كنت هانية جا بابا دوا ليا على هاشم كيما دارت ماما فاش خرج من عندي بديت نفكر فكلامو وليت كنحلل وناقش فتعامل هاشم بحال الى حلو ليا عينيا على شيحاجة كنت مكنشوفهاش أخولة وهادشي مامزيانش .. وليت نفكر فإنسان يمكن كاعما جايو هادشي على بالو كنت هانية مهنية حتى دخلوه ليا العقلي راه الحماق هذا وحق الله
- خولة [ بهدوء] :
قوت جاوبيني بصراحة ..
قوت : قولي
خولة : واش هاشم ولا كيعجبك ؟
- قوت : [ شافت فخولة بعدم تصديق ] من نيتك اخولة كيفاش كيعجبني اشنو بيناتنا باش غادي يعجبني ؟
- خولة : إيوا باش كنفسري هاشي لي واقع ليك دابا ؟
- قوت : [ دوزات يدها على راسها كتقاد فولارتها ] هادشي سبابو هو ماما وبابا مكاينش من غيرهم حلو ليا عينيا على شي حوايج انا مكنتش كنشوفهم نهائيا أخولة راه خاص تفهميني .. هادشي لي كنحس بيه خايب
- خولة : علاش خايب وشنو فيها الى عجبك هاشم واش عيب ؟
- قوت : [ بإنفعال ] ماشي عيب ولكن مايمكنش ليا نعاود تجربة دزت منها وعانيت منها واش نسيتي .. نسيتي صلاح لي كنت كنبغيه وهو ݣاعما حاس بيا مزال كون شفت فعينين هاشم الإعجاب ولا بين ليا نسرطها بجغمة الما هانية
- ولكن باش نتعجب بإنسان مكايحس من جيهتي بحتى حاجة لا سمحيليا
- خولة : وباش عرفتيه محاسش بشيحاجة يلاه ؟
- قوت : [ كضحك ] من نيتك واش شفتيه كيبين ليا شيحاجة واش انت هبيلة ؟
- خولة : [ هزهزات راسها بنرفزة ] راه انت لي عورة واخاصك نظاظر علاش فنظرك جاب ليك دوا فداك الليل وهو مالو سوقو خوك باك عمك أش كيجيك ؟
- علاش داك نهار داك من البال عاتقك من داك الموقف لي تحطيتي فيه قدام مول البال نسيتي .. اهاه ودجاج المشوي لي جاب وهو وفؤاد كان ممكن يجيبو العشا عادي مايتسوقش ليك كاع .. راه كتعجبيه غير هو محاسش على راسو وصافي
- قوت : ماتبقايش تزرعي فراسي شيحاجة مكايناش أخولة وتزيدي حتى أنت على والديا الله يرحم بيها الوالدين .. ماتعلقونيش بشيحاجة موحال واش غاتكون
- هاشم مغاندخلوش لراسي ومغانفكرشي فيه هاد تبرزيط وضجيج لي فبالي غايتحيد والله يرحم الوالدين حتى واحد مابقا يجبدو ليا خليوني هانية فحياتي حتى واحد مايبزز عليا شيحاجة مغاتكونش .. نهار لي غاتكون اتجي بوحدها مغاتكونوش انتوما السبب فيها دابا زيدي نرجعو بلاما نعيقو ..
- رجعو لبلايصهم تحت أنظارو لي كان مراقبها من بعيد كان كيبان على وجها توتر وبلي معصبة ومامرتاحاش ، ناضو من القهوة ضاربين دويرة فالمدينة ورجعو للأوطيل كل واحد دخل للشومبر ديالو متافقين باش فالعشا يتعشاو فلوطيل نيت ..
- بالليل كولشي نزل يتعشى حتى ليها هي مانزلاتش
- صفية :(بإستغراب) سناء فين ختك واش مغاتنزلش ؟
- سناء : والله ماعرفت بلات نسوني عليها ، هزات تيليفون سونات عليها ] ألو واش مغاتهبطيش تعشاي ؟ وايلي وعلاش واخا [ قطعات وشافت فمها ] مابغاتش تعشا قالت ليك مافيهاش
- كان واقف خاشي يديه فجيابو وكيسمع الحوار ديالهم جاتو عجب متنزلش تعشا منين خرجو من دار فالمضيق وهي مبدلة فالقهوة ومبدلة
- فؤاد [ كان حاضيه ] : ياكما ݣلتي للبنت شيحاجة فطريق قلقتيها ؟
- هاشم [ شافيه مخنزر ] : من نيتك اش بيني وبينها حتى غادي نقلقها شغلها هداك مابغاتش تنزل تعشا الماكلة راه ماشي بزز
- فؤاد هزهز براسو وسكت .
________
- ݣالسة فبيتها لابسة لبسة ديال الصلاة حاطة سجادة ديالها وهازة القرآن بين يديها وكتقرا مدة وهي على نفس الوضعية حتى كملات حسات براسها رتاحت حطات القرآن وهزات يديها كتدعي :
يارب يارب اللهم إني ستودعتك نفسي يارب توريني طريق الصحيح يارب تحيد هاد الإحساس لي كنحس بيه من قلبي يارب راه مكنحس براحة يارب ، يارب ماتعلقنيش بشي إنسان مكتشوفش فيه الخير ليا ياربي ماتعلقش قلبي بإنسان أيعذبني من بعد يارب بعدني من أي حاجة فيها الشر ليا
- يارب لي فيها الخير حطها فطريقي ولي فيها الشر بعدها مني يارب ، يارب راني ماقاداش نعاني ولا نتعذب ربي وفقني لي فيه الخير ليا يارب .. دعات وتضرعات وبكات حتى رتاح قلبها تنهدات تنهيدة طويلة وقفات وجمعات الصلاية ديالها ..
- وقفها صوت الدقان حطات الصلاية وتوجهات للباب حلاتو بلعات ريقها وهي كتشوفو واقف هاز بلاطو فيدو فيه الماكلة ، طلعها وهبطها ونطق بهدوء :
اتكوني عيانة ݣلت نطلع ليك الماكلة الى ماݣديتيش تنزلي
- قوت : (بقات كتشوفيه وفالبلاطو لي فيدو مدة حتى ݣال موحال واش غاتدوي دوزات لسانها على فمها وتنهدات) هاشم واخا نسولك ؟
- هاشم : (بنفس الهدوء) مرحبا ولكن شدي بعدا هاد البلاطو .
- شدات البلاطو عندو حطاتو فجنب الطبلة ورجعات شافت فيه بلعات ريقها وخرجت نفس طويل من نيفها غمضات عينيها وعاودات حلاتهم مقابلة عينيها مع عينيه الفحمية :
علاش كدير معايا بحال هكا ؟
- هاشم :(صغر عينيه بحيرة ) كيفاش زعمة شنو كندير مافهمتش؟
- قوت : مرضت جبتي ليا الدوا داك نهار جبتي ليا السقاطة وشكالط كان ممكن انا نرجع ونجيبهم .. نهار كنت كنبكي جبتي ليا قرعة ديال الما وخففتي عليا ودابا خليتيهم التحت وجبتي ليا العشا علاش ؟
- هاشم 🙁 حك على حاجبو) عادي علاش فيها شيحاجة حنا عائلة وحدة دابا ولالا ؟
- قوت : اه بصح عائلة وحدة ماقلتي حتى عيب ولكن كاينة خولة كان ممكن هي طلع ليا العشا ولالا ؟ كاينة ختي سناء حتى هي
- هاشم : واش هادشي كيديرونجيك ؟ واش كنبرزطك ؟
- قوت : مابغيتش شي واحد يدير شيحاجة على قبلي غير حيت تقالت ليه
- هاشم : ( دور لسانو وسط فمو مصغر عينيه كيفكر ) مافهمتش كيفاش تݣالت ليه وضحي كلامك الله يرضي عليك
- قوت [ دوزات يدها على وجها ] : شوف هاشم انا صريحة ولي فقلبي على لساني مكنعرفش نخبي وكنتوتر فاش كنكون مخبية شيحاجة الى ماخرجتهاش مكنرتاحش
- هاشم 🙁 بكل هدوء ) دوي كنسمعك
- قوت : انت ماملزومش دير هادشي حيت شي واحد مبزز عليك ولا مدخلني ليك لراسك راه فخباري خالتي نعمة بلي بغاتك تزوج بيا انا هادشي ماعجبنيش ومتمرتاحاش فيه
- هاشم 🙁 غوبش) شكون ݣالها ليك وشكون دوا معاك فهادشي ؟
- قوت : خالتي نعمة دوات معايا فهادشي وقالت ليا بلي ماكرهاتنيش نكون عروستها وأنا جاوبتها بلي من سابع المستحيلات نكون انا وأنت بزوج انا مايمكنش نكون مع واحد الإنسان هو ماباغينيش
- هاشم [ حك على حاجبو وحنحن بصوت رجولي ] :
دابا انت عند بالك أنا هادشي كنديرو حيت مأتر فيا شي واحد حيت انا برهوش مزال مراهق لي ݣاليا شيحاجة كندير بيها ياك الالة ؟
- قوت : الى مكانش حتى واحد مأثر عليك علاش كدير معايا هكا ؟ علاش هاد الإهتمام كامل نقولو نهار وقفتي علينا انا وخولة انت وفؤاد بلي هانية من الواجب ديالك ولكن الباقي علاش أهاشم علاش علاش كدير هادشي
- هاشم : عادي ..
- قوت : (قاطعاتو) متقولش ليا لا عادي مكايناش شيحاجة عادية الله يرضي عليك سير فكر وخمم وسول راسك علاش انا كندير هكا مع قوت ، الله يرحم بيها الوالدين مابغيتش عقلي يتشوش مابغيتش نمرض بشيحاجة مكايناش ومغاتكونش بغيت نبقى هانية ومرتاحة فبالي الله يعطيك الستر
- تراجعات للور سادة الباب مخلياه واقف وساهي فالفراغ ..
______________
- صراع داخلي ولا عايشو مابقاتش حالية ليه ديك السفرية ماكرهش يبقى بوحدو ماعجبوش الحال نهائيا لهادشي لي كيدير فيه هو برلسو مافاهمش بقا غير هي تفهم .. داز عندهم النهار الثاني عادي ديك الحلاوة لي كانت فالاول فسفرية مابقاتش
- ناس فرحانين ناشطين ببعضياتهم سناء وياسين عايشين الحياة وعايشين دورهم كزوجين جداد كيشوفو الدنيا زوينة ومبهجة اما فؤاد طاب عليه إيمتا يرجعو باش يطلب خولة لزواج وقوت لي بغات ترجع غير باش تركز فخدمتها .
- نهار رجوعهم من طنجة ركبات حداه بحال شي ديكور مكتهضر مكتكلم حتى ديك كثرة الهضرة لي كانت مع خولة ومكتكونش مسوقة ليه مابقاتش ولا اي كلمة كتخرجها كتخرجها بتاويلها
- ديمارا طوموبيل وشدو الطريق داير نظاراتو ديال الشمس مشافش جيهتها نهائيا غاديين ذادين طريق حتى وقفو فستوب منزل الزاجة ومخرج يدو من السرجم ، دور راسو بشوية بشوية ورجع شاف قدامو شوية رجع راسو كيشوف فطوموبيل لي حداه .
- كانت هي ولكن مختالفة الشعر لي كان عريان مغطي بفولار العصري والعنق العريان كان مستبدل بجلابة دايرة يدها على الڤولون وكتشوف قدامها دورات راسها بشوية وحبسات كتشوفيه مصدومة .. مارضاتش البال للطوموبيل لي راكب كتشوف فالبنت لي ݣالسة حداه
- بلعات ريقها كتحس بقلبها كيضرب هو مطولش فيها الشوفة غير شعر ضو الخضر زطم زطمة وحدة بقات مصدومة والكلاكصون وراها تحركات من تم او وقفات فواحد الدور كتحاول تسترجع شتات راسها تنهدات تنهيدة طويلة وتبسمات كتدوي مع راسها :
أش يحسابليك أنسرين ايبقى يبكي عليك حياتو كاملة درتي ذنب راه كتاخدي فالعقوبة ديالك .. يستاهل كل خير [ نزلات دمعة سخونة بالخف مسحاتها دارت نظاظرها وديمارات شادة الطريق للخدمتها ]
__________
- تنهد تنهيدة طويلة بإرتياح كان محتاج يشوفها باش يعرف واش تجاوز هادشي ولالا .. الناس فيهم أنواع النوع الأول الى وقع ليه شي مشكيل تخان أو تغدر كيݣلس مدة سينين ولي وقع ليه كيحفر فيه كيبقى يعاني ويقدر توصل بيه عند أطباء نفسيين وكاين ناس لي كيݣلسو شهورة عاد كيبداو يتعالجو من لي وقع ليهم .. وكاين ناس عندهم مبدأ فالحياة يوقع لي يوقع كيعطيو لريوسهم مهلة قصيرة يحزنو فيها ومن بعد كتكنل عندهم الحياة
- بكل بساطة الحياة ماوقفاش على شي واحد الباب محلول لي بغا يمشي راه غايمشي بلا رجوع الى خان ولا غدر راه مخانش داك الإنسان خان راسو هو الأول وغدر راسو حيت داك الإنسان ايكمل حياتو وربي أيجي نهار ويعوضو اما الغدار كيبقى عايش فتأنيب الضمير حياتو كلها وعمر شيحاجة مكتصلح فيه
- أما لي قلبو عامر بالإيمان وتايق فراسو مزيان وعارف راسو مزيان شنو ساوي وعارف بلي مخاسر والو وبلي لي ضيعو هو لي خسرو كيبقى مرتاح البال ومرتاح الضمير الحياة عامرة تجارب وعامرة ناس اشكال أنواع لي كيبقى يصارع ولي ضارب الدنيا بركة وكل تجربة كيتعلم منها وهاشم كان من هاد النوع لي متصالح مع راسو مرتاح وزاد تأكد وزاد رتاح فاش شافها ومتحرك فقلبو والو قلبو لي مات وجمد وتدفن من جهتها .
- إذا كان الأمس ضاع فبين يديك اليوم ! وإذا كان اليوم سوف يجمع أوراقه ويرحل فلديك الغد لا تحزن على الأمس فهو لن يعود ! ولا تأسف على اليوم فهو راحل واحلم بشمس مضيئه في غد جميل .. إذا أغلقت الشتاء أبواب بيتك وحاصرتك تلال الجليد من كل مكان فإنتظر قدوم الربيع وافتح نوافذك لنسمات الهواء النقي ! وأنظر بعيداً فسوف ترى أسراب الطيور وقد عادت تغني وسوف ترى الشمس وهي تلقي خيوطها الذهبيه فوق أغصان الشجر لتصنع لك عمراً جديداً وحلماً جديداً وقلباً جديداً.
- سيمانة من ورا رجعوهم للأسفي الحياة رجعات للروتينها وكل واحد رجع للخدمتو قوت لي فتحات المحال ديالها وعكات سوارت المحال القديم للخولة باش تقابلو .. الأيام غادية روتينية كيما كانت قبل
- فالمحال عند هاشم ݣالس هو وفؤاد لي كيشوفيه بإستغراب :
علاش ماتخليش حتى لرمضان إن شاء الله وسير للعمرة علاش دابا بضبط نسيتي الحفلة لي دايرين على قبل الذهيبية ؟
- هاشم : (ببرود) مانسيتش الحفلة حتى لشهر 9 حنى فالأخر ديال شهر 7 مزال شهر كامل العمرة راه اندوز غير 20 يوم وغادي نرجع مغانطولش بزاف إن شاء الله
- فؤاد : دابا مغاتمشيش معايا هضر فخولة ؟
- هاشم : (بإبتسامة مطبطب على كتفو) الله يجعل كولشي مبارك ومسعود ياك غاتمشي تدوي فيها ماشي خطوبة كبيرة ولا عرس
- فؤاد : واخا هكاك أصاحبي
- هاشم : فؤاد دوينا صافي نضيت الأمور مع الوكالة الله يهديك بلاما نبقاو ندويو بزاف
- فؤاد : الهروب عمرو كان حل أصاحبي راك عشرت عنري منين كنا صغار ݣد هك حافظك وعارفك مزيان الى كنتي باغي البنت قصد الدار وانت كتخوى وتدريبلي
- هاشم : ( عقد غوباشتو) واش غير حيت بغيت نمشي للعمرة درتي فيها راس وليدين والله يهديك افؤاد عيقتي عليا لا اشمن حب اش كتخربق واش انت لي غاتوريني
- غادي بغيت نرتاح فداك المقام فهمتي خاصني نبدا صفحة جديدة مع راسي حاس براسي باغي نغسل داتي من اي حتجة خايبة مسمومة
- فؤاد : غانعاودو من زيرو ؟
- هاشم : (تقاد فالݣلسة ) الݣلب باش يبدا يدق لشي وحدة خاصو يتغسل مزيان وروح خاصها تطهر من خبث البشر وهادشي مغايكون غير فداك المقام بغيت محتاج نكون تم محتاج نبدا صفحة جديدة من داك المقام
- بغيت نرجع من تم وانا صافي بحال شحال هذا باش نعرف ندخل شي وحدة لحياتي مابغيتش نعدب معايا شي بنت الناس كيما بغات تكون فهمتي داكشي لي كتفكر فيه لا انت لا غيرك مكاين منو والو غير خوي بالك
- فؤاد : ( تنهد بإستسلام ) واش غانݣولك أخويا الله يريح بالك وقلبك ادير فبالك الى كنا كندويو معاك غير حيت باغيين ليك الخير هادشي لي كاين
- هاشم : ( هزهز براسو ) هادشي عارفو ماتحتاج تݣولو
- فالعشا وفالڤيلا ديال توفيق مجموعين كيتعشاو حتى نطق توفيق :
والله اولدي الى ماكرهت حتى أنا ندير العمرة توحشت داك المقام
- هاشم : وكون علمتيني الواليد نمشيو بزوج
- توفيق : مرة اخرى إن شاء الله نمشيو انا وماماك ، اش درتي فالبارطما لي كنتي دويتي عليها ؟
- هاشم : مزال ماقررت مزال كنبالاني مع راسي حتى نرجع إن شاء الله ونشوف واش نزعم عليها ولالا
- نعمة : ( كتشوفيهم بزوج) على اشمن بارطما كدويو ؟
- توفيق : هاشم بغا يشوف شي بارطما يشريها
- نعمة : وعلاش مال دارهم ؟
- هاشم : ( هز فيها راسو ) الواليدة مغانبقاوش ندويو فهادشي بزاف نهار الاول كنت ساكن بوحدي رجعت لدار حيت بعت داري ودابا بغيت نرجع نستقر بوحدي مافيها عيب
- توفيق : مافيها عيب أولدي الله يسخر ليك
- نعمة : مافيها عيب أولدي غير ولفناك وصافي اتخلي علينا القنط
- هاشم : الله يهديك الواليدة واش أنا غادي غدا مزال خاصها تفينا وتصلح وتفرش مزال الحال
- توفيق : إيمتا غادي ؟
- هاشم : نهار الخميس إن شاء الله
- توفيق : اللهم يسر ..
___________
- صباحها كان متوتر كلها كترعد كتشوف راسها فالمرايا كيفاش جاها القفطان على فورمتها وشعرها
- قوت : ( كتشوف فيها ومبسمة ) ياختي ياختي على الزين ديالي فنة فنة طاح عليك السر هادشي اليوم للتعارف اما نهار العرس كيغاتكوني
- خولة [ ضارت عندها ] : ناري أصاحبتي الخلعة فيا كولي كنترعد والله العظيم كيفاش غاتكون مو وختو
- قوت : إن شاء الله مغايكون غير الخير عرفتي والله حتى فرحانة الحمد لله ربي كبير شفتي باش تعرفي بلي السيد معقول وتبدل سيمانة باش جينا هاهو جاي لدار
- خولة : ( كضحك ) وشنو خايف على رزقو لا يهرب ليه بيه شي حد علاش انا قليلة ولا هههه ..
- قوت : واش دويتو على العرس ايمتا وضريب الصداق ؟
- خولة : قلنا إن شاء الله فراس العام شهر 12 إلى بغا الله
- عنقاتها بكل محبة علاش لا وهي ختها الثانية لي ماولداتهاش ليها مها ... شافت فيها وعينيها مغرغرين :
أحسن كادو غايكون ليك ، والله ياختي الى فرحتيني الحمد لله لي غانتهنى من جيهتك ، نرجع إن شاء الله من السفر انا لي غانتكلف ليك بكولشي أنت غير خرجي هاد السوق .
- خولة [ غرغرو عينيها بدموع ] :
عارفاك ديريها وتفوتيها لهيه لهلا يخطيك عليا ياربي والله يفرحني بيك عرفتي والله القسم فوسط هادشي كامل ربي رزقني بيك بعد المرات كنقول كون والديا ولدو غيري مغاتكونش ختي بحالك ولا خويا بحالك والله
- قوت: ( كضحك) ودابا فرحيليا ورتاحي ليا ونوري ليا
- تحل عليهم الباب وطلات عليهم سناء :
الناس راه جاو نزلو خلاص وانتوما ݣالسين تحتو خالتي حورية كانت غاطلع ليكم..
خولة : اويلي إيمتا جاو؟
- سناء : شي 5 دقايق دابا انتوما مع الهضرة ماسمعتو حد دق ماسمعتو هضرة
- قوت : صافي دابا جايين ، سبقاتهم سناء باش تعاون حورية ام خولة عاد نزلات قوت هي وخولة ، فصالون ݣالسة أم فؤاد مرة كبيرة لابسة جلاية منخوية غليضة ودايرة نظاظر ديال الشوف كتبان منورة ومحبوبة .. وݣالسة اخت فؤاد وزوج وليداتها طويلة ولابسة جلابة منبتة بالحجر مع سباط عالي وفولار ديال الحرير .. ݣالسة معاهم صفية
- ݣالس الأب ديال خولة حداه توفيق لي جا مع فؤاد حداه عبد الرحمان وفؤاد ، وقفات خولة وقوت وقفات صفية بإبتسامة :
هاعروستنا جات .. دخلات خولة والعينين عليها خصوصا فؤاد لي بغا ياكلها بعينيه مازولش عينيه عليها سلمات عليهم كاملين وهو تخطاتو وݣلسات .. جات سناء وحورية ݣلسو حتى هوما :
- بديعة (أم فؤاد ) : ماشاء الله تبارك الله الالة حورية بنتك غزالة ماشاء الله
- حورية : ربي يخليك اختي بديعة الله يكبر بيك
- توفيق : وسيادنا بلاما نطولو فالكلام وندخلو فالموضوع نيشان سي محمد اليوم انا جيت مع ولدي فؤاد فمقام باه طالبين راغبين فيد بنتنا خولة الى جات على خاطركم وكنتو موافقين وقابلين علينا
- ناضت بنت خت فؤاد وجات عند خولة نيشان كانت بنية فعمرها 5 سنين زوينة لابسة كسيوة فالغوز وسبيبيط فنفس اللون :
انت هي مرات طونطو فواد ؟
- كولشي جاتو الضحكة
- محمد : ومابقات هضرة من ورا هاد الهضرة هادي .. مانلقاوش ماحسن من ولدي فؤاد ولكن نشولو البنية هي الأول (شاف فخولة) أش ݣلتي أبنتي ؟
- خولة [ حشمات هزات بنت خت فؤاد هزاتها مخبية وراها ونطقات ] لي درتيه ابابا مرحبا بيه
- لمياء (أخت فؤاد ) : إيوا وقيلة نزغرتو العيالات
- زغرتات سناء تابعاها صفية وحورية ولمياء
- محمد : الله يجعل كولشي مبارك ومسعود والله يكمل عليهم ويتاويهم للخير
- الكل : اللهم آمين ياربي ..
- مشاو ناس فؤاد وبقات غير سناء وقوو وصفية مع خولة وحورية سناء كتسنى فياسين باش يجي يديها .. ݣالسين ومجمعين فالصالة كيشوفو فداكشي لي جابو للخولة فتعارف ..
- خولة : (كنشوف فالݣورميط لي جاب ليها فؤاد ديال الذهب الابيض كلو منبت بالحجر هو وسلسلة ديالو وخاتمو ) ماما أش بان ليك فيهم ؟
- حورية : واشغانقوليك أبنتي كيبانو ناس الله يعمر ليهم دار شفتي ختو غير كضحك وفرحانة وشعبية مو حتى هي كدخل للخاطر والله أعلم عاوتاني راه شحال من ناس كيبانو مزيانين فالأول ومن بعد كيتسيفو ولالا أختي صفية ؟
- صفية : بصح أختي عندك الصح كيبانو زعمة مزيانين والله أعلم ياربي يبقاو فصباغتهم وكون كانو خايبين ولا مشرارين راه الحاج غايقولها
- سناء : ختو أصلا مساكناش فأسفي ياك ساكنة فمراكش اذا راه بعيدة فين وفين إلى شافتها مو راه معاها جوج ديال الخدامات او وحدة كتبات معاها مقابلاها راه سمعتي ختو أش قالت
- صفية : اه قالت ليك بلي وحدة كتجي دير الميناج وتسخر وكتمشي ولوخرا كتبقى معاها فدار تبات معاها حاسباها بحال الى ختها ماشي خدامة وتبارك الله مخاصها خير على ماقالينا الحاج راه دارها كبيرة تبارك الله خولة راه اتبقى فتيقار بدارها بوحدها
- قوت : إن شاء الله مايكون الخير يزينو النوايا
- بدا تيليفون سناء كيسوني هزات تيليفونها طلعات ليها نمرة ياسين وهي توقف :
ياسين كيسوني ليا خاصني نمشي .. سلمات على حورية وعلى وعلى خولة باركات ليها ومشات مخلية صفية وقوت
- صفية : ويلاه نوضو يلاه نوصلو
- خولة : خليكم قوت باتي معايا
- قوت : ( وقفات ) ݣاعما دكري حس المباتة هاد الأيام ݣاع خاص نخدم على تصاميم لي غانشارك بيهم مانصيبش ..
- خرجات صفية وقوت غاديين فطريق كيتمشاو على رجليهم صفية تنهدات تنهيدة طويلة :
العقبة ليك أبنتي نفرح بيك إن شاء الله كيما فرحت بختك
- قوت : ( عنقاتها من كتافها ) إن شاء الله
- صفية : بنت عمك عندها العرس فشهر 2 سونا عمك على باك قالها ليه زعمة باش يعلمو على تيساع
- قوت : شكون فيهم حبيبة ولا نادية ؟
- صفية : حبيبة باغي ياخودها شي سعودي تعرفات عليه يمكن فداك الفيسبوك
- قوت : ( ضحكات ) هاي هاي هاي كوراه الارض نغاتهزهاش هي كانت مكترضاش تدوي بلا والو دابا خلاص راه غير مالقاتش نمرتي وتفرجي ليا فالفشور
- صفية : ودابا تفرجي فمها تلقاي ماكرهاتش تحطها فجورنال وتشيق الخبار لوكلشي سبحان الله العظيم لي فيه شي قاعيدة فيه عمرها ماتبدل منو
- قوت : الله يسهل عليها ويسهل على الجميع واخا انا بيني وبينك أماما موحال نمشي قسما بالله العظيم عارفاني مع هاد الناس كون أكانت شي عائلة لي يتجمعو على الضحك والفرحة والقلب صافي هوما لا ..
- صفية : شتيني غير انا باغية نمشي خرج ليهم باك من الجنب ماراضيينش بيه يكون عطار واخا الحمد لله مخاصنا خير ولكن هوما واقفة ليهم فالحلق ..
- عمك عبد الصادق راه حل المݣازة الثانية ديال الثواب وعمك حسن كبر سوبير مارشي شر المحال لي حداه وشاركهم بزوج
- قوت : (هزهزات كتافها) كل واحد الله يرزقو لي عندو الله يزيدو ولي ماعندو الله يعطيه انا ݣاعما كيهموني كنصيلو غير الرحم وصافي أما العائلة لي فيها كترة الفياشة وبخ الخاوي ويتلاقاو فالمناسبات على الفشور مكاين لاش
- صفية : ( تنهدات) خالك هشام لي شحال هادي ماهود للمغرب توحشتو والله العظيم
- قوت : (تفتحات أساريرها) حتى أنا توحشتو يصاوب الله إن شاء الله ، وصلو للدار دخلات صفية للكوزينة نيشان وقوو طلعات للبيتها توضات وصلات جابت الطبيلة ديالها والمعدات ديال الرسم ونزلات راسها ماݣعداتوش حتى حسات بالعيا
- عوجات راسها كتريح فكتافها تنهدات تنهيدة طويلة وتفكيرها سارح بيها للبعيد تبسمات بلاما تحس فاش تفكرات اللقطة ديال البال نهار لقات دوك السماطي وكيفاش هزاتهم فوجهم وكتسول بشحال ضحات على راسها وعلى نيتها الزايدة
- جاوها للقطات من التسافيرة صورتو دازت من بالها باللمح البصر غمضات عينيها وحلاتهم كتحاول تطرد دوك الأفكار ودوك الذكريات .. رجعات حنات راسها على الوراق وتصورو ليها ملامح وجهو فالورقة
- هزات راسها كتحاول ما أمكن تطرد صورتو من راسها ، تفكرات عينيه الكبار لونهم القهوي الغامق رموشو لي كانو طوال وكحلين داكنين شعرو ولحيتو لي كيتخللها الشيب يديه لي مكتاسحهم شعر رطب طولتو ومشيتو كان عبارة عن كتلة مكتملة الرجولة
- قوت : ( حركات راسها بنفي ) أعوذ بالله من الشيطان الرجيم هذا هو البهلان .. قاطع تفكيرها صوت تيليفونها هزاتو كانت خولة مسونية ليها أپيل فتحات الخط ناكقة ويدها فيها قلم الرصاص باش تعاود ترسم :
مالك أش نسيتي تاني ؟
- خولة : ( فصوتها حماس ) واجبت ليك واحد تبرݣيݣة مزال بميكتها حلفت منعس حتى نقولها ليك
- قوت : الله يسمعنا خبار الخير
- خولة : عقلتي على نادية لي كانت خدامة فالتجاري ؟
- قوت : لي كانت عندها ديك كليو الݣرونة كنت كتقولي ليا هي صغيورة وطوموبيلتها صغر منها
- خولة : ايااه هاديك نهار شديت المحال وحليتو الغد ليه الالة جات لعندي دفعات فواحد البراصلي السيدة باغية تشري المعرفة شدات نمرتي لقيتها مسيفطة ليا ميساج بقينا كنهضرو
- جبدنا الهضرة على صحابات وݣلسات صحابات مافيهم خير غير تزوج تبدل عليك وتقلب عليك وجها هضرة تجبد هضرة وهي تجبد ليا طليقة هاشم كانت صاحبتها انا بغيت نجبد منها الهضرة عارفاني
- قوت : عارفاك فضولية وتموتي على الخبارات كملي
- خولة : السيدة يلالة غدراتو وخانتو حصلها كتدوي مع الصاحب فتيليفون فقلب دارو تخايلي معايا
- قوت : ( حبسات من الرسم ) من نيتك كوراه الكذوب تلقايها مكتحملهاش وحطات عليها الباطل
- خولة : فيقي وعيقي أشمن الباطل أصلا انا راه فايتة شايفة هادي لي كان مزوج بيها شعر زعر والحالة مكتنفسش وعاجبها راسها ونزيدك أزين علاش واحد ايبيع دارو بفراشها بكولشي ليها يلاه
- كون كان طلاق عادي مغايسمحش فدارو
- قوت : وشكون قاليك راه باع دارو يلاه ؟
- خولة : قالتها ليا هي وأصلا هو منين طلق وهو مع دارهم ودارو لي فالقدس باعها بفراشها ودار هو وياها طلاق إتفاقي سمحات فحقوقها كاملين وخوات أسفي .. حتى والديها تبراو منها على داكشي لي دارت
- قوت (تنهدات) : اودي بين زوج مكايعلم بيهم الله بوحدو أما الناس راه فيهم أكثرت الهضرة
- خولة : (بعصبية) قوت ماتعصبينيش راه كنقوليك لي كاين السيدة خانتو راه نادية كانت صاحبتها الروح بروح ونزيدك نهار تعرفات على هاد خونا تعرفات عليه فأكادير كانت هي ونادية وشي صاحبتهم أسمها سهيلة وتعرفات عليه تم وݣلس معاهم خرجات معاه وتصورات معاه ونهار حصلها صاحبها سيفط ليه تصاورها
- واش غير جات هي ودارت معاه طلاق إتفاقي ومحامية كون كان شيحاجة حقوقها كامل غادي تديهم وزادت خوات أسفي وحق الله الى أكبر حمارة دابا هاشم يخونوه الناس هادي والله مكاتحشم
- قوت : ونعلي شيطان راكي مخطوبة زعمة ابنادمة
- خولة : مالي كذبت وغير لي عورة وخاصها نظاظر لي مايعجبها تبارك الله مامخصوص من والو دابا تشوفي من غدا يتزوج ويجيب لالاها خاصو اينيش على شي وحدة تقول أه ديك ساع
- قوت : وسيري بحالك اختي خليني نكمل شغالي هالعار
- خولة : يلاه هاهي مشات .. قطعات معاها التيليفون وحطاتو حداها حطات يدها على حنكها كتفكر فالكلام لي قالت ليها خولة تفكرات كلامو نهار كلاو لحم الراس دورات هضرتو فراسها كان كيبان مضرور وشيحاجة بيه .. إذا فعلا الكلام لي قالت خولة بصح شحال من حاجة ذكر ومعنى بيها ومكانتش فاهماها ودابا عاد فهمات علاش قالها .
________________
- دازو باقي الايام غير فتوجاد ديال الكوليكسيو الجديدة وتصاميم الجداد لي وجدات قوت للحفلة سونات على خولة باش يتلاقاو خاصها تاخود حوايج جداد باش تحضر للحفلة ..
- خولة وفؤاد كانو مرة مرة كيتلاقاو على قبل كيتقداو ويختارو لدهاز باش يوجدو كولشي على تيساع
- فؤاد : هادشي ماشي معقول اللازم ودرتو علاش زعمة مانخرجوش بزوج شنو فيها
- خولة : ( شافت فيه هازة حاجب ومنزلة الثاني ) شوف أكبيدة ديالي راه ماشي أجيتي لدار صافي أنبقى خارجة داخلة معاك نسى حيدها من بالك كنخرجو على ود الدهاز نعار لي سميتي تكتب حدا سميتك عند العدول وبالفور يا شيفور هضرة أخرى دابا انبقاو واقفين ولا انتحركو ؟
- فؤاد : ( هزهز براسو ) قيدي عندك هادشي كامل غايخرج منك تالي ومتلي
- خولة : فكرتيني دزتي شفتي بيت النعاس فين وصل ؟
- فؤاد : (ديمارا طوموبيل) دزنا مابقاش ليه بزاف مافهمتش أنا مال بيت النعاس لي كان جديد وزوين ياك الترية فالبيت لاش باغية بولات لاصقين فنموسية ؟
- خولة : انا عندي ستيل فبيت نعاسي بغيتو تشهيتو بغيت نموسية يكون ضايرين بيها البولات انت داير ليا نموسية كحلة واش انا عروسة ندخل على الكحل افؤاد نعل شيطان ..
- فؤاد : ( تنهد ) الله ينعلو ويخزيه
- خولة : وقف كاع هنا كاين محال غزال ديال البيجامات وبلاما تنزل معايا أخليك مايصلاحش تشوف شنو غانختار .
- فؤاد: علاش زعمة ؟
- خولة : ( كتفك فسمطة ) هكاك وصافي .. نزلات وخلاتو فطوموبيل ..
يتبع...
التعليقات
لا توجد تعليقات بعد، كن أول من يعلق.