بعد فوات الأوان الجزء العاشر

من بدات حياتها الكئيبة اخا كتمشي للعيادة وعليها الطلب ورونديفو معاها بباك صاحبي وبزز باش كيشدوها الناس من كثرة المتابعين داخل الوطن وخارج الوطن وشهرتها العالية مابقاتش كتلقا الوقت فين تجلس تخدم شي فيلر ولا شي منخار لشي واحد الا فبعض الاحيان.. رجعات من افتتاح لافتتاح رغير الافتتاحات الراقية والمناسبات الضخمة والاعلانات لعلك ترضى ..السطوري كتحطو كتخسر عليه جوج دقايق وتحطو بالملاين وماشي اي اعلان وكتشرط فالاعلانات . اما المساحيق والبروذويات لغير معروفة مكتشوفش جيهتهم الا ادا كان منتج طبي وكتحاول ما امكن تحافظ على مصداقيتها وهادشي لي خلا روتور عندها بزاف وصحاب المشاريع كيعاودو يرجعو ليها ويعاودو يعلنو عندها لحاصول واخا بالفضيحة دارت منها الفلوس ورجعات عليها بالمنفعة . لاكن شكون خلاها تهنا فضماغها وترتاح فلباسها وتخرج وقتما بغات وتدخل وقتما بغات .

تهدنات الاوضاع شوية ونقصو المشاكيل ... البنت عندها كبرات شوية وعندها ست شهور ولشي شافها كيشوف ياسين .. الخالق الناطق وماريا تربطات معاهم فالدار ماصلاحش ليها كي دير تمشي ترجع لسبانيا من نهار جات فداك الصيف ودابا فصل الربيع والصيف على الابواب والبنية بدات تاكل وتجلس فلكرسي دالماكلة .. اما نورة فهي. اسعد وحدة فهاد الكون وشحال فرحات بطلاق ياسين وذكرى وحسات ان الدنيا نتاقمات ليها منها والادوار تبدلو ورجعات هي لي عندها كامل الحقوق وذكرى هي المتطفلة عليها . ونهار ومطال وهي تهضر عليها وتنبش وتقلب فين ما تيح ليها الفرصة . وليوم جالسين كيفطرو هي وماريا والسيدة لي معاهم فالدار فاطمة وبقاو مجمعين على نفس الموضوع

ماريا: (هزات حجبانها) دابا صاافي... ذكرى مشاات طلعااات

نورة: كيفاش زعما طلعات

ماريا: صاافي دابا ولات مشهوورة ... ماشفتيهاشي فاين كتمشي ومعامن كتيمشي وشحال كتخلص... مابقاتشي كتجلس فعيادة خلات فيها شي طبيبات وهي كتجي مااارا مرا

نورة: ماتشهرات والو داكشي كلشي كيمشي بين ليلة ونهار .. غير كتزيد تشوه فراسها وصافي حالتها

ماريا: قلبات عينيهافالسما)لااالااالا ماعندو مايمشي ليها... صاافي دابا وصلات ... بارح هضرت معاها قلت لها ياسين غدا فلعشية عيخرج خصو يجبرك فالدار.. قالت لي انا كنصور البرنامج عيدوز فالامببسي خمسة ديال التجميل (خرجات شلاقمها كما ديما) هي لي عتقدم البرنماج (بالايجاب ساهية)ااايواا... وصلاات ذكرى وصلات

نورة: انا ماعرفتشي شنيييي كتعمل عندو فالدر هادي خصهالي يفضحها..يوريها شغلها ... جالسة فالدار دراجل مطلقها وكتمثل على الناس

ماريا: هزات كتفها)هوا لي قالها جلس تما .

نورة: شتي كوم ما ياسين ماتوصلشي لهادشي كامل كراها مزال خدامة عند داك بنيوتة لي كان قابل عليها

ماريا: توصااال توصال ... (حطات صبعها على مخها) ذكية دكرى .. نتينا واخاصاحيبتا من الصغر ماعرفتيهاشي .. بلحق انا جلست معاها فالاول فاش جات عندنا نسبانيا عرفتا ذكية وتقيلة .. تقيلة بزااااف مافيهاشي الزربة

نورة: اواعدي هاد الفضايح كاملة لي عملات ومافيهاش الطيرة شني خلات لطيارات ما يعملو

ماريا: واخا هايداك تقيقلة... حتى التقال كيدوزو عليهم المشاكل (هزات حجبانها)كتعجبني دكرى كتعجابني وياسين عمل عقلو معاها مابقاشي تابع بنات .. بلحق خسراتها فاش طلقاتو فالحبس.. وانا وصيييتها ماسمعتشي

نورة كتسمع وتشوف بنص عين ماعرفاتش اشنو كتقصد بذكية وشنو كتقصد بكتعجبها وشنو لي فذكرى مافيهاش هي.. حتى هي زوينة وعندها حقها وذكرى اصلا ماشي طبيعية مية فالمية باينة دايرة تجميل واخا كتنكر لاكن ديك الفصالة والكمارة ماشي طبيييعية.. اما نورة عادية طبيعية بحال اي وحدة كتولد كيبقاو الاثار عليها وخصهاشوية تجميل ترجع حسن من قبل.. فاش كتبدا ماريا تهضر على ذكرى كتزيد تحقد وتكرهها وماعارفاش بلي ماريا كتبغي البنات المرزنات .. ومن ديك الحملة لي حملات نورة مع ياسين عرفاتها كتفرفر وجاتها عادية ماشي عجب حيت ياما جاوها كوارت مع البنات لي عرف ونورة مافيها حتى شي ميزة..بحالهابحال غيرها .. اما ذكرى حتى فالهضرة كتعطي استفادة وماريا كيعجبها تهضر وتجمع معاها وكتمشي عندها للدار وللعيادة والاتصال بيناتهم دائم .. ماشي صحابات لاكن مفاهمين

من شدة الغيرة ديال نورة من ذكرى وتعماو ليها لعينين ناضت سربات الخبر ديال السكنة لاحد الصفحات لي ضد ذكرى وخرجو الخبر بأنها طلقات ومزالة ساكنة مع طليقها .. كان مجرد اشاعة كاين لي تيقها كاين ليما تيقهاش لاكن كالعادة بدات الشوشرة عليها . اما نورة غير شافت الخبر تلاح ناضت عاجبها الحال مشات توجد الحالة وتبان لياسين لي خارج فلعشية .

فديك الاثناء كانت ذكرى يالاه سالات تصوير البرنامج الصباحي ديالها حتى بداو سكرينات كيوصلوها .. الجيش ديالها فالصفحات كيدافع عليها والناس لي كيعرفوها كيسيفطو ليها ولو مكانش الخبر بصح مكانتش غتنفاعل وتتفقص وبغيت طرطق..حيت فعلا تفقصات وبغات تموت ماعرفاتش شكون لي كيخرج بحال دوك الاسرار الشخصية لي ماكيعرفهم حتى واحد.. حطات احتمالات كثيرة لانها اصبحت عندها شعبية كبيرة فممكن لي واحد يسرب اخبارها واخا يكون كيضحك ليها فوجهها .جلسات فالطموبيل كتغلي وتيليفون كيصوني وكانت احد صديقاتها مونة كتسول على اخبارها واحوالها وهاد مونة حتى شخصية مشهورة مقدمة برامج سبق ليها ستاضفاتها وبقات العلاقة بيناتهم

مونة: حبيبتي .. صافا تو فا بيان .. عاد شفت الاشاعات عاوتاني لاحولة ولاقوة الا بالله .. دعيهم اذكرى باش يترباو

ذكرى: عييت مانبقا تابعة هاد تخربيق.. الناس معندهم مايدار وانا السبعة دصباح بدا التصوير دلحلقة عاد ساليت وعنرجع فحالي.. ماعنديشي الجهد لهادشي

مونة: ميكونش طليقك لي خرج هاد الاخبار

ذكرى: لالا لا.. لا ماشي هوا ماشي ديالو هادي

مونة: وا الله يهدي ماخلق.. بلا منشدك اكثر خليك تمشي ترتاحي احبيبة حتى نتشاوفو

ذكرى: اوك ان شاء الله اتوت الوغ

قطعات وبدات تسوط وتيليفون كيصوني ونفس الموضوع عاوتاني .. ماقدرات تجاوب حتى واحد ودارت سطوري كتبسم وتهضر مع الناس

ذكرى: مرحبا بيا فكازا شكون يعرض عليا .. انا حاليا مستقرة هنايا .. حيت عندي تصوير يومي لبرنامج جديد قريبا غيبدا على قناتكم ام بي سي نهاركم مبروك

قطعات وصورات الاداعة من برا وقلب حداها ومشات بحالها .. كان سطوري كافي باش يردو بيه متابعينيها على ديك الاشاعة .اما هي ماعندهاش الوقت فين تحك راسها وعندها مندجر كتمشي وتجي معاها مقادة ليها جميع المواعيد والاعمال وخففات على راسها شوية التركيز والتفكير وكان عندها النهار مليىء بالاعمال . رجعات للدار دوشات لحمها وبدلات ملابسها ومكياجها ورجعات مشات لحفل تخرج اطباء التجميل كانت ضيفة شرف فيه وشدات المقعد ديالها من الاوائل حتى هي والطلبة كيدوزو باللبسة فالمنصة ويتصورو والصحافة بالعرام حتى دازو جميع الطلبة عاد بداو الضيوف كينوضو يلقيو الكلمة وهي منهم ناضت فقمة الرقي والاناقة كانت ايقونة الجمال والاناقة والدوق الرفيع .. لقات كلمتها بكل فخر وابتسامة وتشجيع ومن وراها بدا التعارف والبيفي دلماكلة عامر والكل واحد اش كيدير والصحافة كيدورو من واحد لواحد حتى وصلو ليها وبداو معاها استجواب فالميدان ديالها وفجأة طرحو عليها سؤال مخزي بلعاتو بابتسامة

الصحافية: سمعنا بلي ساكنة مع الطليق ديالك شنو الرد ديالك على هادشي

ذكرى: بابتسامة ) مجرد كلام.. ان لم تسلم استسلم هههه والحياة تستمر ومن نجاح الى نجاح والدرج طويل والاستمرار للي نفسه طويل وصبرو كثير وشكرا ليكم ههه

فديك العشية كان ياسين وصل للدار تقول جاي من الحج كاع مباينة عليه حالة الحبس، طالع ليه الجلاس فالراس وغير وصل دوش وضرب وااحد مولاتي ساعة فاليد ٠ ودجينز من داكشي وحداء رياضي مضايرش وقميجة بيضاء مخططة بشيبي ياسلام والروايح كتعطعط ومقاد تحسينة كيشعل ويبرق مبوكص لي شافتو طيح كاو. خرج مع الباب ركب فواحد فولزفاكن صغيرة ومشا نيشان عند مو فرانا حدا الباب وهي كطل وتسناه غير شافتو رجعات اللور فرحانة قالتها ليهم .. خرجات نورة بسرعة لابسة واحد سورفيت مزيرة والصدر مبندر والشعر مطلوق كما كانت من قبل والمكياج والعطور تلقات ليه،هازة بنتها وهوا طالع مع الدروج يكفرنس سلم على مو وعنقاتو فرحانة بيه كتهضر العربية وسبليونية اما نورة ماداهاش فيها وهز بنتو تقول عطاتها ليه شي برانية .. ماشافش جيهتها حتى حشمات وجمعات الضحكة ونقصات من الفرحة ومشات جلسات حشمانة كتبسم بزز وتشوف فيف هاز لينا وفرحان بيها كيبوس ويهرها ويعضها وهي كضحك وماريا كدور بيه من هنا ومن هنا .. جلس على واحد للكرسي شاد لينا وعينو كدوز على نورة عادي كأنها اتات فديك الدار .. جلس شوية وتجمع شوية ومد البنت لماريا ناوي ينوض

ماريا: جلس تاكل شي حاجة عاد جيتي

ياسين: كيلعب مع لينا) ماشي لكازا (شاف الساعة) حتى نعاود نرجع

ماريا: ااممم. . ماشي دابا ؟

ياسين: اه .. سوارت ديالي عندك لفوق

ماريا: كلشي لفوق

شارت براسها طلع معاه ومدات لينا لنورة ومشات قدامو كتمشى مكدرة تقول كتريني لحديد ، طلعات لواحد لبيت لفرق ساداه بسوارت ودخلات حلات واحد المجر فيه شلا كونطاكات ديال طموبيلات وقالت هازة حواجبها

ماريا: ماشي عند ذكرى؟؟

ياسين: اه

ماريا: تصالحتو ولا باقي؟

ياسين: انا عنوري يماها الطلاق .

ماريا: تتتاأ بلااا مدابزوشي غير بشوية بشوية

ياسين: محلف) انا غنوري والديها شكون هوا ياسين

هز سوارت اقوى سيارة عندو ونزل نيشان خرجها من لكاراج ركب فيها حتى فعفع داك الحي بصوتها وشد الطريق لوتوروت كيطير تقول البوراق دايز فلوتوروت

كانت مزالة فداك ليفينمو والدنيا مزالة عامرة وكتهضر مع الناس وتتصور.. على الاقل مشاكلها واخا خرجو للعلن شهروها شهرة نقية مع ناس واصلين وفطبقة راقية ماشي تشوهات مع الوسخ وبقات فيه .. واخا هاكاك راه الشهرة عندها مستويات .. كاين المستوى الراقي لي فيه لغة لحوار مختلفة وخصك تكون مثقف وقاري وعندك الماني ونيفو باش الناس يبغيوك ويتقربو منك وكاين المستوى المنحط لي لاثقافة لا قراية لانيفو ومشهروين على الشوهة والكدوب والفضايح وميقدروش يبدلو المستوى حيت العقليات مختالفة .

مابيها ماعليها حتى صونا ليها تيليفون وشافتو كيصوني.. وياويلها الى مارداتش . بعدات على الصدع والناس وردات عليه بهدوء حاسة بيه غيكون وصل لكازا حيت عارفاه خارج فداك النهار

ذكرى: الو سلام عليكم

ياسين: علثكم السلام.. فين نتي انا فكازا

ذكرى: انا فواحد إيفينمو ديال تخرج الطلبة دتجميل دابا

ياسين: ارا لي لعنوان فالواتساب

ذكرى: اصلا سالينا جبرتيني كنسلم على الناس نمشي بحالي

ياسين: يالاه اجي عندي قدام هاد لوتيل.. اسمو حياتريجينسي

ذكرى: واخا انا ماجا

قطعات ورجعات كتسلم وتودع الناس ومشات بسرعة ركبات سيارتها غادية وكتنقص من لعكار .. اما اللباس كان انيق عبارة عن كومبين ابيض بلا يدين والعنق واسع مفضفض بحال الشال والسروال باط ايليفون من لتحت واسع ومحلول من الجناب وصندالة عالية كحلة والصاك صغير والمجوهرات خفاف والشعر مطلوق مصاوب وايفي والروايح كتحمق وداخلة كتقرقب وتقلب عليه حتى لقاتو جالس متكي وهاز رجل على رجل وشاد تيليفون فيدو .

وقفات عليه بابتسامة مسطنعة كدور عينيها وناض طلعها من لتحت للفوق وهز راسو وخنافرو فالسما كيشوف فيها ويسوط

ذكرى: السلام (جلسات )

ياسين: مابقيتيش كتسلم تحجبتي(رجع جلس)

ذكرى: على السلامة ديالك

ياسين: جلس كيحنزز فيها) جا معاك الطلاق... جبرتي داكشي لي خصك

دكرى: حتى وحدة مكيجي معاها الطلاق . المضاهر خداعة .. المرى اكثر حاجة كدمرها هوا الطلاق

ياسين: لا تبارك الله دمرك الدمار الشاامل حتى مابقاش عندك الوقت تشد الارض

ذكرى: تنهدات بتحمل) الحمد لله .. لي جات من عند الله مرحبا بيها

بقا ساكت كيشوف فيها وهي جالسة تحت الضغط مستحملة ديك الجلسة ومكتشوفش فيه ، بدات تشطح برجلها وهوا كيطلع ويهبط فيها وقال

ياسين: ياكما عندك شي شغل شفتك مزروبة خصك غيز فوقاش تنوض

ذكرى: هاد الساعة كندخل فيها للدار نرتاح .. عيانة ومن السبعة وانا فايقة

ياسين: تكا على ركابيه) قالو لي رجعتي كتقدم البرااميج ... وكتصور فالاداعات

ذكرى: الحمد لله .

ياسين: والعيادة شديتيها؟

ذكرى: لاء معايا الناس كيعاونوني لحمد لله

ياسين: مزيان ... مزياااان .

حرك راسو بالايجاب وهي على نفس الوضعية بقات كتسنا اش يقول لاكن ماقال والو وبادرات هي وقالت

ذكرى: سمعني اياسين.. انا جيت باش نتفاهمو ونحلو المشاكيل .. ادا عندك شي مشكل معايا نشوفو لحل علاااش نوصلو للصدع والمحاكيم والتهديد انا شني عملت لك ؟؟

ياسين: سمع مزياااان الشريفة ... هاد تقح٠٠ين ماعندي منعمل به .. انا عااارف شكون بلغ المخزن .. انا منرضعشي صبعي ولا عاد فتحت عيني فالدنيا.. هه واش كضن مغنعرفشي هادشي؟؟ زعما اول مرة يوقع لي ..(شار بصبعانو) عندك الزززهر مامشاتشي السلعة اما كمشات كامشا معاها خاك كتسمع.. (تكا اللور)حتى دابا باقي داك خاك غيخلص .. مامزروبش انا هانا معاكم حتى ترباو

صفارت وتخلعات وبلعات ريقها لاكن نكرات

ذكرى: شني كتقول؟؟

ياسين: شنييي كنقووول هه دابا تفهم شني كنقول (هز تيليفون كيصوني) زيد واحد لكيلو .. انا خصني يدوز وزحد عشر سنين فالحبس حتى يتربا مزيان

سمعات الحبس وكحزات عندو كترعد وتشير بصبعها بزز

ذكرى: قطع نهضر معاك .. قطع خليني نهضر معاك

ياسين: قطع هانا قطعت

ذكرى: عاصم ماعمل والو .. انا صردتو هوا مابلغ عليك ما والو انا بلغت عليك

ياسين: خالك حتى هوا معاك ياك

ذكرى: لالالالالا هوا مافراسوشي بلعكس عيط ليك ديك ليلة قالي كنصوني على ياسين مكيردشي بغا يقولك رود بالك. حيت شي واحيد بلغ عليك قالوم ها شكون ها شكون .. انا بواحدي عملت هادشي وانا بلغت عليك ..عاصم مكانشي فخبارو غنبلغ المخزن قلتو لو يجيب ليا لاخبار

ياسين: صغر عينو) طلعتي ماسهلااااااشي يا لعايلة .. هادي غير كنتي داياها ققرايتك ومكتخرج مكدرج . طلعتي للسما

ذكرى: شني خصك دابا نطفيو هاد النار

ياسين: نطفيو النار!!هه

ذكرى: انا ماشي هايداا..نتينا عنفتيني نتينا خرجتي اسوء مافيا .. خرجتي جهنم الكحلة .. انا ماشي هايدا بلحق نتينا تعديتي عليا (غرغرو عينيها) ضربتيني شحال من مرة .. تزوجتي عليا ودابا عندك العايلة .. شني عملت لك انا فاش كنتي نتينا كتعمل هادشي كاامل؟؟ كنت كنربع يدي ونسكت .. بلحق صافي عييت قتلتيني وجبرتيني نعمل هادشي باش نطلق هادا هوا الحل لي بقا لي

ياسين: قو٠تيها بهاد الحل كرهتيني فالسمية ديالك

ذكرى: بسياسة) ياك نتينا عدبتيني علاش مكمحاسبكشي؟؟ انا مغدرتك ما خنتك ما عملت لك واالو..نتينا عملتي فيا الشغل دالسفاح وكملتي عليا بداكشي الللي ذوزني عليا مم للحبس

بقات كتبوحط مالقات ماتقول ليه من غير تبان هي الضحية على الله تجيب نتيجة ، اما هوا محاملش يشوف جيهتها وكيسمع ومعارفش واش يتيق ولا لا .. من اخر فعلة لي دارت ليه كلا طرشة خلاتو يرد البال منها ماشي كما الاول كان مرتاح نفسيا وذهنيا عمرو نواها تغدرو ولا فكر فيها عندها واحد الكمارة يحلف عليها الواحد خبز ربي فطبقو واخا يشوفها كتتحول بحال الحية ميصدقش عينيه .. اما عينيها وشوفاتها ميمكنش.. نقطة الضعف اي انسان واخا يكون حجر يلين .. والزين راه حتى قوة عضمى ياما ناضو عليه حروبات وياما ربح حروبات وحقق انجازات .. لاكن الزين فيه وفيه . وهي زينها كيخلي الواحد يحشم منها ويلين بزز منو خصوصا عيونها ونضراتها وكيفاش كتحرك حجبانها .. داكشي لي وقع حتى مع ياسين .. عيا يقلب فعينيه مابغاش يتيق بيها لاكن فالاخير طرد دوك الافكار حيت فعلا ميمكنش يكدب تعابير وجهها ولا علاقة بداكشي لي كيملي عليه دماغو .. واش فعلا دارت هاكاك فلحضة غضب وتسرعات ولا راها لفعة تحت التبن وخصو يقطع ليها الراس ولا يحتطاط منها .. دورها فراسو وهي كتهضر وتعبر بعينيها حسات بيه متردد وحسات براسها فحرب معاه .. هي تجر وهوا يجر .. هي كتحاول توقعو ويتيق بيها وهوا كيتهرب ويقلب على قشة تأكد انها لفعة تحت التبن .. غلابتو فالاخير وخلاتو ينساحب من وسط افكارو وقال بنفور

ياسين: سمع مزياان ... اقسم بالله وتعاود تعمل معايا هاه ولا هاه جتى نجمع لك كلشي فنهار واحد سمعتي . مغنسالكشي ست شهور دلحبس بلحق غنعمل راسي نسيت ونهار تفكرني فيها وجد راسك

ذكرى: انا معنقربشي ليك صافي

ياسين: صغر عينيه) كيفاش منقربشي ليك شنو زعما؟

ذكرى: بنص عين) غنسا شي عملتي فيا ونتينا نسا هادشي.. اصلا حتى واحد ما مرتاح فهاد الدنيا .. مزيان الانسان يحاول ويبدا من جديد

ياسين: يبدا منين جدييد ؟! اجي يااجي ... اجي نوووضي اجي لهنا

ذكرى: دورات عينيها) كيعرفو الناس عيشوفوني

ياسين: وانووضي ااجي ااجي قلت لك اجي اجي

ناضت بحدر جلسات حداه مبعد لاكن دور يدو على خصرها جرها عندو مزيان زيرها وقال كيطلع ويهبط فيها

ياسين : مزيان لواحد يبدا صفحة جديدة ... من دابا نبداوها

ذكزى: تزيرات) ياسين الناس كيعرفوني غينتابه لينا ترجع لي الصمعة خايبة

ياسين: راك مرتي ولي بغا يشوف يشوف

ذكرى: طلقنا

ياسين: فذماغك.. انا جالس مع مرتي

خرجات عينيها خافت يشوفها شي واحد وقالت

ذكرى: طلق غيصورني شي واحيد مناقصينيشي فضايح

ياسن: وازيد نمشيو بحالنا يالاه ماعندنا منزيدو هنا

ناض جرها من يدها ومشا للاستقبال وقف وجبد بزطامو بغا يحجز تما لاكن رفضات ذكرى ورجعات اللور وقالت

ذكرى: انا عندي الاوتيل ديالي خليت فيه الحوايج ديالي شد شموبر غير ليلك

خلاها كتهضر وكمل شغلو حجز الغرفة وجمع البطم ردو لور وزاد بعجرفة

ياسين: يالاه (شار براسو)يالا زيدي

حشمات وبقات واقفة ماصلاحش ليها تهضر من بعد ما جرها من يدها ومشات طلعات فالاسانسور عاد قالت بانفعال

ذكرى: شني خصك؟؟ هاا؟ انا معنباتشي معاك غير تهنا

ياسين: لسقها مع المرايا) شعندك دابا كتتهز عليا شكاين؟؟

ذكرى: طلق مني مغنباتشي معاك

ياسين: وا ها حنا غنشوفو

تحل الباب وجرها من يدها وهي كتجر وكل مرة يدور عندها باغي يحسم الوضع

ياسين: هانا غنعملك شي فيلم هنايا وا تحرك قدامي

ذكرى: والله معنبات معاك هانتا غتشوف

جرها بزز كتفرطط والطالون فرجلها خايفة طيح وزيدها قذامو شدها من اللور كيدفعها حتى دخلها وسد الباب وقالت معصبة

ذكرى: الدمااغ ديالك موووسخ اقسم بالله الى الدماغ ديالك كااامل مسخ

ياسين: وا دخل غسلو شكتسنا(لاح السوارت وتيليفون فوق الطبلة

ذكرى: راحنا طلللقنا .. انا طلقت بالنية وبالقانون نتينا عااارفني مكنحملشي الفساد وكنكرهه

ياسين: زعما ما عملت والو فاش طلقتي

ذكرى: وجعات حمرا) ادا حصلتي عليا شي حاجة ولا عندك شي دليل ماترحمنيشي .. عملي الشوهة فالتلفازة وفين وما عجبك عملها وانا عارفة شني كنقول ونتينا راك عارف.. ماشي قليل ما دوزتي عليا ونتينا فالحبس زعما هادي تخفا عليك

ياسين:بجدية) واسمع العايلة وحل ودنيك... انا مطلقتكش وماعمري غنطلقك سمعتي... عجبك تفهمها هوا هاداك ماعجبكش نفهمها ليك شبان ليك

ذكرى: شني دابا خصك؟؟

ياسين: نتي كطيري مشيتي طلقتي حسابليك صافي .. دابا ضبر راسك حسبها كما عجبك انا كنعرف حاجة وحدة.. تزوجتك وكتعيش معايا ودخلت للحبس خليتك مرى ديالي وبقيتي مرى ديالي وخرجت عند المرى ديالي .. فهمها كما عجبك

ذكرى: بفقصة) ميمكنشي ... انا ونتينا مطلقييين مطلقييين

ياسين: ومااامشي قولها لهم انا ماشي شغلي... كاطلعليش لخرا لراس خاصني نرتاح سمعتي

ذكرى: صافي رتاح ... رتاح كما عجبك

ياسين: ومالك كتقفقف عليا غنبقا نتفرج فيك هايدا كتشطح تما .. صافي كلمة وحدة قلناها والسلام

ذكرى: صافي هانا

جلسات على واحد الكرسي متوثرة على اعصابها وحطات الصاك .. اما هوا حتى كان غيجلس وناض وقف وقال معبس

ياسين: ساليتي شغلك فهاد كازا؟

ذكرى: لاء باقي عندي تصوير

ياسين: وهادشي مغيساليش

ذكرى: كنصورو ثلاتة دلحلقات ولا جوج فالنهار كيتجمعو باش يبقاو يدوزو كل وحدة فالنهار ..المهم يوماين فسيمانة ديال التصوير صافي باقي لي غدا

قلب عينو كيسوط هز سوارت وتيليفون وخرج خلاها جالسة كدور عينيها وطلب الله مايقربش ليها .. مجرد فكرة انه يقرب ليها مكتقبلهاش وكطردها من راسها خصوصا انها فقرارة نفسها طليقتو ويستحيل طيح معاه فالفراش . كان عندها مبدأ وجسها غالي عليها وعاطياه واحد القيمة كبيرة وكيجيها الجنس خارج اطار الزواج عفن ومرض وميكروب كيروع ليها قلبها

ربعات يديها كتسناه حتى رجع جار باليزتو حطها فالجنب وصاك ورقي ودخل عليها

ياسين: مالك مكمشة؟

ذكرى: مامرتاحاشي انا مزيرة ماقدراشي نرتاح .

ياسين: خفتي ناكلك؟؟ واقيلا خفتي ناكلك

ذكرى: ماحاساشي براسي فالامان كخليتيني مشيت لاوتيل ديالي حسن لي هاد الجلسة هايدا ماعندها حتى معنى

ياسين: نعاودو داكشي قلنا عاوتاني كامل ولا شنو

ذكرى: صالراحة هي هادي .. خوفانة منك

مشا عندها للكرسي لي جالسة عليه تكا بيديه على جنابو ونزل كيشوف فيها مصغر عينو وهاز حاجبو

ياسين : زعما صعيييبة عليا نعمل ليك شي حاجة ؟! امم... مناش خايفة ؟؟ همم؟

ذكرى: رجعات اللور) ماعرفتكشي شني خصك؟ ميمكنشي ماتعمل لي والو انا حاسة بلي ناوي تعمل شي حاجة تنتاقم مني

ياسين: هه .. نتاقم منك ؟ انا كبغيت نتاقم منك كوراه نتقااامت منك شحال هادي وانا فالحبس

ذكرى: بحال بحال ... الطرق تختلف لاكن المراد واحد .. كل واحد شني كيفضل

ياسين: ياك

ذكرى: ايوا هادشي لي كتشوف.. شني غيحبسك زعما ؟؟ والو غير الله يستر من لي ماجي

ياسين. جرها من دقنها)اري شي بوسة

كان غيبوسها وهربات للجنب خرجات عينيها وتخلعات وبذا قلبها يضرب وتخطف فيها اللون وتخلعات .. عينيها وساعو وتبدلات بانت الخلعة فوجهها وقالت

ذكرى: شني خصك؟؟

ياسين: مالك تفعفعتي عمري بستك ولا شنو؟

ذكرى: قولي شني خصك .. اذا خصك شي حاجة مشي مع البنات راهم عطاهم الله ... موجودين .

ياسين: طلع ليه الدم) تعاود هاد الهضرة مرى اخرى ونوريك .. خليني مبررد حسان لك

ذكرى: وشني خصك؟؟ خليني نمشي عييت والله لعضيم عييت خصني نمشي نبدل عليا ونعمل بزاف دزحاجات من الصباح وانا واقفة

ياسين: ها الدوش ها الحوايج .. وجع اللور فتح الباليزة ولاح ليها تيشورط ديالو وفوطة ومشا حل الصاك لي جاب معاه كانت فيه قرعة دروج من داكشي وعلب مكسرات وفواكه مجففةحط كلشي على واحد الطبلة قدام واحد البالكو كبير كيطل على الحديقة والمسبح وبدا كيحيد حوايجو وهي جالسة متوثرة .. جبدات تيليفون بدات كتقلب فيه وتشوف اش واقع حتى بدل وبقا كيدور بشورط مجموع قصير فالاسود والصدر عريان .. غادي جاي بتقاشر قصار بيضين عمر واحد جوج كيسان وجلس على كنبي مقابل مع البالكو والهوا والليل

ياسين: ااجي لهنا

شافت فيه بنص عين وناضت هازة تيليفونها مشات جلسات كتسوط من مناخرها .. مد ليها كاسها شداتو وبقات كتشووف فيه وقالت

ذكرى: محاساشي بالامان .. عندي احساس خايب

تكا على جنبو جيتها كيشرب وقال

ياسين: قلت ليك غنسا شني وقع ماتفكرنيشي فيه والسلام .

ذكرى: باش غنتيق انا؟

ياسين: هاحنا جالسين (جر ليها يدها) قين الخاتم ديالك ؟

ذكرى: بخجل) زولتو .. فاش طلقنا

ياسين : زربانة (هز راسو شاف فيه ) علاش عملتي هاد الروينة كاااملة قولي علاش؟

ذكرى: تنهدات) ماشي قليل ما عملتي فيا

ياسين: غيو قول قول .. دابا صاافي مابقا ميتخبا

ذكرى : انا مكانشي يحسابني غضربني وتحبسني فالدار وتمرضني... الصرااحة .. وكملتيها مشيتي كتزوج بنورة وماقلتي لي والو

ياسين: شمن زواج؟؟(عقد حجبانو) ورقة بيضا سميتها زواج

ذكرى: نقولو غلطتي وندوزو العايلة ستيتوة ومن حقها تعتارف بيها.. بلحق نورة علاش مشيتي عندهم حتى لدار وتزوجتيها وماشي ماجي . . طلعت لك فالراس من العام اللول جيبتي المرى الثانية جبرتي السبة

ياسين: مخرج عينيه) شكتخووي ااااش كتخوري.. هاديك زايدة ناقصة مكنشوفشي وجهها ... هادشي كامل على العايلة والتحاليل والروينة لي كانت

ذكرى: وانا شني يقولو عليا العائلة ديالي؟؟ جاب عليها الثانية وهي مكملاتشي حتى العام

ياسين: يقولو لي بغاو المهم نتي عارفة شنو كاين .. ولا جبرتي السبة باش طلق

ذكرى: ماكنتشي غنطلق كماوقعشي هادشي.. مكنتشي اصلا غنتجنن ونعمل شي حاجة عمري فكرت فيها باش نطلق

ياسين: ومصورتي وااالو .. حمقتينا بسطوريات دز٠ لي كل ساعة طالعة تبكي وتشكي

ذكرى: علاش صردتي لي رموك؟؟ كنتي ناوي تقتلني

ياسين : لااالا(كيشعل كارو) غير درس وصافي اما بغيت نقتلك كوراك فشي خلا مجلية نتينا وديك طموبير

ذكرى : ومصرد لي واحد حمق ققلبي داري..بااقا دابا لخلعة فيا عمرها تزول

ياسين: وااا ذكرى براكة ماتجبد غنبدا نحسبهم لك حتى نتينا واذا بديت نتفكرهم لك غنصعر وغنسخط عليك...،(تكا وحل يدو) اجي

ذكرى: بعدات كتفها) فاين

ياسين: اجي عندي

ذكرى؛ خليني هنا مرتاحة ك ...

ماكملاهاش جرها عندو وعمقها وكيشوف فيها وعينيه دابلين كيبعد ليها الشعر على وجهها

ياسين: توحشتلك ازايني ..

ذكرى: كتتهرب) عييت اياسين.. كنحس براسي فيا الدوخة

ياسين: دوخي

زيرها وكان ناوي على شي ليلة لاكن حلفات مايقرب ليها ولا يقيس شعرة منها وبعدات وقالت بجدية

ذكرى: غنكرهك ونكره راسي ادا مسيتيني ، واخا عملتي فيا كاااع هاد الخصايل ماكرهتكشي بلحق ادا قتاحمتي لخصوصية ديالي واديتيني فجسمي والله اياسين منسمح لك ولا نسمح نراسي

ياسين: ناض جلس معصب) شكتخور عليا؟؟(جرها بقوة) وا مرااتي واش مكتفهمشي نحشيها ليك فراسك

دكرى: انا عندي مطلقين واي علاقة فساد كتغيلفني كتجيب لي تقياا غنكره الجنس وما يجي منو،، براكة غير شني عملتي ليا بزز مني مزال كنتفكرها حنحيس بالحكرة كنكره راسي

ياسين: بغضب) شنو غنعمل معاك دابا ؟؟؟ كيقولي واحد الراس نشدك نفرسك والله منعقل عليك

ذكرى: بعدات منقدرشي … ماشي بيدي داكشي ديال الله ماعندي منعمل.. هادشي لي عطاني الله

مد يدو بغا يجرها مفقوص لاكن لاحها فالهوا معصب وضرب ديك الطبلة وناض كيسب بوحدو وهي فبلاصتها جالسة متبعة ليه العين غير بالنص وفين ما يضور عندها كتشتت النضر بسرعة ، بقا كيدور بغا يموت ويتفركع معصب وشعل داك الكارو بعصية كيسوط وبقا كيدور وينفخ ورجع مخرج عينيه فيها حط صبعو على كتفها وقال بنضرات حادة خلعاتها

ياسين؟ وجد كرك غدا على الصباح مكاين خدمة ولا ق٠٠ي ، غنرجعو داك العقد لي شتتي سمعتي(هز يدو غا يضربها) غننن نعوج لمك الوجه

فين مايبغي يضربها كدور وجهها كترمش وتشوف بنص عين لاكن فكل مرة كتقول غينزل عليا كيرجع يشد يدو ويلوح ليها شعرها معصب ولا يهز شي قرعة دالماء ولا ويعوج الحركة فجهة اخرى ،كان فعلا معصب عاد حس بالطلاق وحس بالقالب ديالو ومابغاش يتسرط ليه . سكتات مقالت والو خوفا من شي طرشة ولا ضربة وبراكة عليها غير دوك الهدات لي كيهد عليها كافيينها . خلاها جالسة جالسة يحوايجها وخرج للبالكو جلس بوحدو على واحد الكرسي وحط القرعة دالروج فالارض بين رجليه وشد تيليفون وقال عاطيها بالضهر

ياسين : سيري تنعسي

ناضت حيدات صندالتها الطالون ومشات نعسات فحوايجها فوق الناموسية وكانت مرهقة ومتعبة عيات تقاوم لاكن داتها عينها ونعسات حتى صبح الحال وضرباتها الفيقة مخلوعة وهزات راسها لقاتو ناعس على الكنبة خاشي وجهه فالقنت ومعنق المخاد شي تحت رجليه شي تحت يديه وتقشيرة طايرة وتقشيرة باقا وهوا مقلوب على جنبو عاطيها بالضهر كيبان غير شعرو

غسلات وجهها وجمعات شعرها ولقات الحال مشا عليها على تصوير . رسلات ليهم رسالة اعتذار وتغذرات على لحضور وجلسات على جنب الكنبة شادة تسليفون حتى فاق وناض خاسر.. جلس كيشوف قدامو ماهضرش معاها وبقا شحال عاد ناض غسل وجهو ومسح شعرو وخرج كيقلب على تقشيرتو الثانية . لبس حوايجو وواحد مكيهضر مع لاخر ، كانت كتقلب على الجملة المناسبة لي تقوليه وكيفاش توصل ليه انها مابغاتش تتزوج وماقابلاش اصلا، كيفاش توصلها ليه بلا اضرار وفالوقت المناسب، لبس واحد تيشورد دلاكوسط ودجين ودار كاسكيطة على راسو وخرج هوا وياها كتقرقب. قدامو وشعرها كعكة اللور ودايرة نضاضر كوحل رقاق . نزلو وشار ليها براسو يفطرو ومشات جلسات هي وياه وكل واحد فين كيشوف،، برد وتهدن وشافتو رجع مزاجو عاد فتحات الموضوع وقالت

ذكرى؟ كتحرك القهوى: ضاهر لي خصنا نعطيو وقت لراسنا،، خصنا ناخدو وقتنا وعرفو شني كنعملو عاد نقررو

سكتات كتشوف فيه وتسنا ردة فعلو لاكن ماجاوبهاش، خلاها كتهضر وتدفن الرساىل وسط الحوار.

ذكرى؟ زواج ليلة تدبيرو عام كيف كيف كيقولو ،ً

سكتات حتى عيات وخلات حتى طلعو لسيارتو يالاه جا يركب السمطة وقالت كترمش وتقلب منين دوزها ليه

ذكرى: ياسين.. بلاتي شوية

هز حاجبو فيها: شكاين؟

ذكرى: فاين عنمشيو؟

ياسين: نمشيو نشوفو شنو نعملو نرجعو لعقد

ذكرى: لعقد خصو عااد الاوراق والشواهد وزيد وزيد انا عارفة شني كنقول.. ميمكنشي نرجعو فنهار واحد

ياسين : طلع ليه الدم) وازيد نجمعو لوراق والخرا نعاودو من لاول .. (ديمارا السيارة) المرض

ذكرى: فاين عنمشيو دابا؟

ياسين: طنجة

ذكرى: اواعدي وطموبير ديالي ولحوايج فلاوتيل وغدا عندي شغل

ياسين: من الاول مانقزيش لطلاق نتي عملتي هاد روينة

ذكرى: واخليني بعدا نرتاح خليني..خليني انا حاسة براسي مرييطة منعستشي وعنرض دابا منقدرشي نمشي نطنجة.

عاوتاني طلع ليه الدم بدا كيسب بوحدو ودور داك المقود بجنون وصلها لاوتيل ديالها نزلات وزاد مع الطريق ماهضرش معاها ، اما هي كانت مقتولة خصها غير توصل وترتاح لاكن عندها شغل اهم من هادشي كله، غير وصلات صونات لخوها علماتو بشنو كيتسناه من ياسين ووصاتو يجمع حوايجو وبدات تقلب ليه على خرجة لبرا فأسرع وقت ممكن .. ومع كانو عندها المعارف لعلك ترضى دغيا لقات ليه مشية لفرنسا وماعليها غير تحرك جيبها وكلشي يدوز هوا هاداك . وصاتو ووصات عليه عاد قدرات تنعس وترتاح باش من بعد تعرف شنو كدير وكيفاش تعامل مع ياسين لي بدا كيبان ليها بحال الى رام لجيهتها ومية فالمية كاين شي مشاعر عندو اتجاهها وهادي نقطة لصالحها وماشي لصالحها فكلتا الحالتين، اولا حيت اجا مافكها دابا وثانيا تقدر تديه وتجيبو والى عماه الحب غادي تشطحو بلا متخاف منو ولا ضرب ليه حساب

صونا ليها فيقها من النعاس ناضت مسخسة مافيها لي ينوض يتحرك لاكن ما فجهدها ما دير ، واخا تحججات ليه بالتعب ماعقلش عليها وناضت بزز منها لبسات واحد لكسيوة فوق الركبة بسميطات ونشفات شعرها بسوشوار دلوتيل واكتفت بمجوهرات براند خفيفة ومرطب شفته وكريم وجه ..كانو حواجبها عامرين لونهم بني غامق ومربعين ومسحوبين سحبة خفيفة وشفيراتها طوال مقلوبين باينين وعينها كتبان بحال الى مكحلة بالشفار واخا ممكحلاش..كانو عيونها رائعة ونضراتها اروع ومحلوليين من الاطراف ونضرتها مشرقة .. خلات شعرها طبيعي تلوا شوية فاش نشف على طبيعتو ونزلات عندو لقاتو جالس فسيارتو لابس سوميج بلو مارين ودجينز وداير نضاضر .. يحلف عليه الواحد ولد شي برجوازي ولا شي كاوري لاباس عليه حيت مكانش كتبان عليه صفة مغريبي كاع ولا بزناس واخا المضاهر خداعة وما خفي اعضم والبنات غاديين جايين حداه كيشوفو هاكاك كيبان نقي وكليميني ماعارفينش انه ورا داك البروفايل علامة الخطر بحد داثها. حتى ذكرى كان كيعجبها شكلا لاكن هي كتعرفو وقربات ليه ماعجباتهاش شخصيتو ومارتاحتش ليه خصوصا العنف.. اكثر حاجة كتكرهها واخا سخي ومعاه الحياة وفيه الضحك ويفوج عليها فاش كيبدا يهضر ويعبر كيبدا يبان خبز ربي فطبقو وغادي بلا عقل وكيتسرع . لاكن مع ذلك مافيهش التقة وما فيهش الامان ومن اللحضة لي كتلاقا بييه وهي رجل فالحبس وجل برا الحبس.

حلات الباب لقات جالس ومدلي يدو على برا شاعل كارو وروايحو تعطعط كتشم من الشارع ..تلفت شاف فيها من تحت النضاضر وقاال بصوت غليض خارج معاه الدخان

ياسين: رعمتي رجعتي كنعري طرافك

ذكرى: جيت عندك باش نفاجي على قلبي ماشي تزيد تكمل عليا..لي فيا كافيني.

ياسين: شعندك؟

ذكرى: ماعرفتشي مالي كنحيس بقلبي مزييير عليا وصدري مخنوق ..مامرتاحشي تقول عاملة شي حاجة .. الدموع كينزلو لي بواحدوم

ياسين: عندك شي مشكل ولا؟

ذكرى: واحد الصفحة ماعرفتشي شني عندها معايا…دابا وساعا منزلة شي حاجة عليا خصها تشوهلي السمعة ديالي وصافي

ياسين: شنو نزلو عليك ارا نشوف

مد يدو يشوف ومدات ليه تيليفون كتشكي وراتو الصفحة وقالت فيها البكية

ذكرى: انا حتى كنقول صافيييي رتاحيت نقابل الخيدمة ديالي كتخرج لي عاود شي حاجة من الجنب… تشو شني منزلين عليا كيهددو فيا زعما عندهم اسراري وعندهم اخباري والدلائل .. مافهمتشي شني بغاو مني

ياسين: صرد لي ديك الصفحة فلواتساب انا نتوالا لق٠٠ة يماه مول داك الصفحة صردها لي

ذكرى: شني عتعمل ؟؟ ماخصنيشي لفضييحة

ياسين: انا عنعرف ليه صردها لي ورجع لور …(دور راسو) والله يا باباه حتى يرجع يبوس رجلين

ذكرى:(شادة تيليفون) صردتالك

خدا الكونط ومكانش من العاكزين بغا يعرف مولاه شكون لاكن ماشي ديك الساعة حتى يسالي بعدا الجلسة مع ذكرى لي كانت الجلسة معاها يسلام واخا مبرزط مامهنيش باغي يعرف راسو من رجليه وماقدرش يتسنا . كان جالس هوا وياهافإحدى المطاعم البعيدة على عينين الشعب فيهاحديقة كبيرة والربيع والشجر والكراسا مم الخشب والبونج رطب والمخاد.. كان كيتغدا هواوياها وكل شوية يسول

ياسين: كينفخ)ماعنديشي مع هاد كازا ربي السلامة ... فوقاش غتسالي هاد تصوير

ذكرى: كتاكل) كصورت اليوم كمشيت بحالي لطنجة خليت الشغل على راسي تما

ياسين: تكا على ضهرو ) يالاه نسافرو شي موطع

ذكرى: فاين عنسافرو؟؟!!

ياسين: كيتمنضر)فاين ما عجبك

ذكرى: خصني نسالي التصوير بعدا ماعندي كيفاش نعمل

ياسين: وهاد التصوير يبقا دييما تابعنا مانعيشوش حنا حياتنا؟؟ شحاال كاااع كيعطيوك فهاد البرنامج نعطيه ليك وجلس بحالك

ذكرى: ماشي مسألة الفلوس ، البرنامج بالنسبة ليلي شي حاجة مهمة نزيدها فالمسار ديالي فهمتيني.. انا اصلا معمبقاشي دييما معاهم غدوز واحد الفترة يولفو عليا ناسو وصافي عنوقف انا بيدي كنعيا

ياسين: وهاد الفترةهادي شحال فيها

ذكرى: غير بتشهر ودوز وقيتة ديالوصافي . الحاجة فاش كتكون جديدة كلشي كينتابه ليها وغير كدوز الموجة ديالها صافي مكيبقاشي حتى واحيد يديها فيها

ياسين: تنهد) وا طلق راسك جمع الاوراق ديالك نردك انا ماعندشي الوقت نبقا غادي جاي هاد كازا

ذكرى: كدور عينيها) انا فالصراحة مرتاحة هايدا مةنفكرشي فالزواج اياسين دابا .. هايدا مرتااااحة

ياسين: صغر واحد العين) كيفاش مكتفكرشي فالزواج مافهمتش

ذكرى: مكنفكرشي فالزواج وصافي بغيت نرتاح شويشوش

ياسين: فاش كنتي مزوجة بيا كنتي هازاني على راسك ؟

ذكرى: بالهداوة) لاااء بلعكس ماشي هايداك ... غير دابا مرتاحة كتر وصافي.. بغيت ناخدي وقت ونفكر مزيان عاد نقرر

وقف عاز حاجبو: واش غنتسناك تفكر وتقرر ؟ هضرة جديدة هادي (قلب عليهاالطبلة)نوضي ت٠٠وي يالاه نوضي ماتخرجنيشي على عقلي نقلب عليك هاد ريسذورنطي

تخلعات وكلشي تلفت والماعن تقلبو فالارض .. رجعات لور مخبيةوجهها ماتوقعاتش ديك ردة الفعل.. اما هوا زاد قدامها وسيفتو تبدلات .. خافت من الشوهةودارتنضراتها ومشات خرجات خلاتو فلاكيس حط الفلوس معصب والموضفين تما كيهدنوه .. عطاوه قرعةدالماء حلهاوخرج بحالوكيشرب مشا ركب حداها وزدح الباب وقال معصب

ياسين: غتزيد كلمة وحدة مايبقا لابرنامج لا ز٠ي سمعتي... واقلبي عليا

سكتات مجاوباتوش خلاتو كيهضر وعلى سبة .. ماهضرات مانطقات بقات ساكتة وهوا كيدورويعاودو فشوارع كازا ويهضر عقلو محاضرش ومقطوع بيه الحبل.. بقاهاكاك كيدور وكل مرة يشعل كارو حتى برد وتفش وقال

ياسين: كنكون مزيان معاك حتى كترمي لي شي شعلة ومابغيشي نعمل فيك يدي ... بلحق نتي كااااتقلبي عليا

ذكرى: بهدوء) هادشي لي خلاني نقول هايدا ...نسيتي شني عملتي فيا نسيتي؟

ياسين: عملتي فياا عملتي فياعملتي فيا لي سمع عملتي فيا يقول عدبتك فحياتك .. (طلق من المقود)وااالو،،، شنو عملت فيك ؟؟ واااالو كندابزو كنتصالحو بحال كاع الناس

ذكرى: انا لي عارفةوحاسة .. اما نتينا مغتحسشي بيا ..نتينا غرضك الزواج وصافي .. ياك تزوجتي نورة وامشي عندها

ياسين: هز يدو ساخط) غنضرب دي٠ ديماك حتى تخرج من الطاقة .. نوري لك نورة .

ذكرى: خبات وجهها) مرى ديالك ولانسيتي

ياسين: ها المرا ديالي هاااااا(جرها بزز منها شلقمهاوجر ليها عنقهامن لور حتى هزات وجهها وضربها ليهابتشلقيمة اخرى وطموبيل غادية عاد رخاها

ياسين: ماعندي منعمل بهاديك النسمة دلحليب والصهد دنفاس عاطي منها

ذكرى: اينا صهد والعايلة عندها ست شهور!!

ياسين: واخاهاكاك ..والدة

ذكرى: والدة؟!! وشني زعما ؟

ياسين: بفور) ماعندي منعمل بيها ... تقابل بنتها ..العايلة لي بيناتنا صافي .

مازادش معاه الهضرة سكتات وحتى هوا ماعندو خاطر ليها طلعات ليه الدم بديك الهضرة لي قالت ليه فالمطعم، وصلها لاوتيل ديالها وزاد مع الطريق خلاها تقضي شغلها وشنو تابعها على خاطرها، ماعيط ماسول حتى للغد ليه صبحات فالتصوير مشغولة وغير كملات تصوريها صونا ليها فكرها فالرجوع لطنجة على اساس العقد، كرهات حياتها فاش جبد ليها العقد مرة اخرى لاكن كات خاصها تمشي لطنجة عندها بزاف مايدار حتى هي ، كانت عوالة تمشي فطموبيلتعا لاكن لقاتو كايتسناها تمشي معاه وخلات سيارتها فالباركين ختى ترجع ليها ، ركبات حداه وشد الطريق لطنجة كيطير وهي عينها فطموبيل كتشوف فيها بإعجاب وتتبسم

ذكرى: ياسين ..عزيزة عندك هاد طموبير

ياسين: لا عادي

ذكرى: ايوا خليها لي نتحرك بيها فطنجة حتى نرجع ديالي من كازا

ياسين: شار براسو) ديها

ذكرى : ونتينا ؟

ياسين: الحديد موجود غير هوا

قالها وتنهد كيشوف قدامو

ذكرى: صافي خليها لي نتحرك بيها

ياسين: قلت لك ديها

عجبها الحال ، وشكون بحالها تسوق سيارة كتسوى الملاين بلا عداد مكاينش ختها فطنجة ومن اقوى السيارات وافخمهم . وصلها للدار وكانت مزالة جالسة فدارو طبعا من نهار هددها تمشي ليها ما خرجات منها . حطها فالباب ووصاها تجمع الاوراق لي تحتاج للزواج ونزل هز سيارة اخرى من الباركينك دالعمارة كانت محطوطة تما وخلا ليها سوارت سيارتو ومشا زربان يقضي شغلو . وحتى هي كانت زربانة ومشغولة غير وصلات بدلات ومشات تيشان للعيادة فسيارتو لي واخا تبيع العيادة بالماطيريال ماتشريش ليها بحال ديك السيارة، وطبعا زادتها قيمة كبيرة لي شافها كيتصدم وكملات الباهية مشات بيها تلاقات مع اصدقائها اللي فالوسط الفني طرطقات ليهم العينين، شحال غناو وشحال حياو من حفل وشحال دارو من اشهار ومشهورين وماخلاو حتى شي عمل حتى من تمتيل داروه ومع ذلك حتى واحد ماقدر يوصل لديك الطموبيل واخا عياو يطلعو ويتعلقو فالسيارات الفخمة باش يبانو اكثر لاكن ماوصلوش ليها وجات ذكرى فرمشة عين صايكاها خلاتهم غير كيشوفو مافهمو والو ، عياو يفهمو ماقدرو يفهمو حتى حاجة ، كيفاش هي غير طبيبة وعندها غير عيادة جايبة ديك السيارة؟ واخا تكون ماشي غير مشهورة والفلوس داخلة صعيب تشري سيارة بديك القيمة وزيد مصاريفها حتى هما اليومية ، ماقدروش يعرفو منين كيجيوها الفلوس ولا شكون هادا لي وراها لاباس عليه حتى لديك الدرجة ، شكون هادا وشكون يكون لي باينة هوا مصدر ديك الاموال لي كتجيها وجاهم فضول يعرفو السر وراء داكشي اللي كيشوفو حيت ماشي العيادة ولا الشهرة لي غيدخلو ليها اموال طائلة وكل مرة كتخلعهم بحاجة جديدة ، كانو كيستنتجو بينم هي جلسة معاهم كتتعشا ولموسيقى والرواج ولابسة لبسة انيقة ولشمع مضوي الطبلة حتى صونا عليها وقلبات وجهها للجنب جاوباتو

ذكرى: وي ياسين

ياسين: فاين نتين؟

ذكرى: مع صوحابي كنتعشا

ياسين: صرد لي لوكاليزاسيو نجي نتعرف على هاد صوحابك يالاه

ذكرى: شنو!!

ياسين: فاين كتعشاو طلقني انا كندور بطموبير دغيا

ذكرى: انا نصرد لك الموقع

قالتها والغبينة على وجهها كدور عينيها وقطعات سيفطات ليه الموقع ورجعات جلسات طاح عليها الضيم .. كانو بيهم شي سبعة منهم ربعة دلبنات وثلاتة دراري،، واحد فيهم منتج وموزع ولاخر زوج مغنية جالسة معاهم والثالت شخصية مشهورة وصديق العديد من الفنانين وعندو اعمال خاصة ومولوع بالموضة ثلاتيني وكيبان لطيف . اما البنات كانت ذكرى ومأثرة مشهورة من المؤثرات الكلاص ودخلات حتى للتمثيل والتقديم والغنا بالجبهة ومساعدها زينها مع عمليات التجميل وصلات لشنو بغات اما الثالت مغنية معروفة ديما البوز تابعها و جالسة وجالس حداها راجلها وحداهم ختها وكلهم بعقلهم وجالسين جلسة بالعقل ضاحكين ناشطين مع بعضياتهم وشي كيكمي شي كيشرب. كل واحد اش كيدير وصيكان دلوكس والحوايج دلوكس والروايح. داوكس، عالمهم بوحدو عايمين بحرهم بوحدهم وذكرى وحدة منهم لا تقل عليهم شيئا وكيحتارموها ويقدروها ماشي بحال قبل كانت كتحس بالنقص وكتشوف الحكرة والشفقة فعينين لي من الطبقة الغنية ، دابا مكيقدر حتى واحد ينقص منها حيت بكل بصاطة مامحتاجا لحتى واحد ومكتلسقش والبوز خالقاه لراسها بلا بيهم والفلوس عندها ماكتسلف من حد وجامعها معاهم النشاط والتفواج وهما عارفين هادشي، عارفينها ماواقفاش عليهم واخا سبقوها فالشهرة والاضواء وكيحتارموها بز منهم حيت ماعندهم مايعطيوها ومناقصها والو باش يقدمو ليها هما وهي وياهم فكفة وحدة . شافت فالساعة كتبسم وقالت اجي نعلمهم قبل مايوقف علينا ياسين مايفهمو والو. وقالت

ذكرى: غيجي عندي شي واحيد دابا نعرفكم عليه

موراد: المولوع بالموضة) شي حبيب ههه

ذكرى: (تبسمات وغمضات ورمشات بتتاقل) كتا مزوجين ..هادا طليقي

المغنية: فدهشة) بصح!!(شافت فيها بعينيها ) رجعات المياه لمجاريها

ذكرى: تقريبا

(هزا عينيها) هاهوا جا

وقف عليهم وقفة ديال واحد معقول ومحتارم ومتبت حتى بقات ذكرى فير كتشوف فيه معجبة . سلم بيدو على الجميع ووصل حتى ليها هي وسلم عليها بحنكو وللكل كيرحب بيه ..جلس معاهم وبدات ذكرى تشير بيدها وتعرفو عليهم واحد واحد ، ومايخفا على هاد النوع التقدير والاحترام كيعطيوه غير لي عندو لفلوس، وياسين من طيارة باين مكحلها فلوس لا من ريحتو لي عاطية قلعو ماركتها وقيمتها غير بالشمة ولا الساعة لي داير تقبات ليهم العينين لدرجة شكو واش بصح بصح حقيقية لان ثمنها فايت لخمس ميات مليون معروفة غير عند الناس الاثرياء، اما باقي ملابسو كانت عادية جذا وبسيطة الا الحداء فرجلو كانت قيمتو كبيرة.هاد النقط هما لي حددو اشمن طبقة يحطوه فيها باش يعرفو نوع التعامل لي يعطيوه .اما هوا زايد ناقص عندو ماشاف لا قيمة لا غيرها وعندو كي الخماس كي الالماس زايد ناقص كاع الناس بحال بحال ، ليوم تلقاه جالس مع السخارة ديالو ونهار تلقاه جالس مع لألبة فشي يخت ولا شي عجب مامعروفاش كاع سميتو ولا شي دولة كيعرفوها غير هما، هادا هوا ياسين عمرو داخ بالمضاهر ولا دار ليهم اعتبار وحتى من داكشي لي كيشريه حبا فيه وشايطين عليه لفلوس وعزيز عليه يعيش السن ديالو ماشي بضرورة باش يبان ولا يفوح وعمرو قال انا عندي ولا انا شنو كنملك .جلس عادي ما دافع كبير ما فيه تكبر ما شانت بداكشي لي باين عليه ومن جلستو وشكلو واسلوبو كيبان طبيعي ماشي متصنع وفيه ديك الهزة ديال طنجاوة بعيدا على لهجتو لاكن صوتو وشكلو كيبان مهييب عليهم كاملين وطريقة هضرتو حرشة وقاصحة وصوتو صدمهم فاش هضر ماتوقعوش يكون فداك العمق من العرض تقول كيهضر فسبيكر ولا مغلضين ليه الصوت . رجعو كيبانو قذامو بحال المشاش فاش هضر معاهم شتااان بين صوتو وصوتهم بقاو غير معجبين فيه وقالت اخت الفنانة وراجلها حداها كي القرد كيفرنس

ايناس: بمدح)اول مرة نسمع شي واحد من الشمال كيهضر هاكا حنا كنعرفو زعما الهضرة كتكون رطيطبة

جات تكحلها عماتها بقات غير كيشوف فيها وقال حتى هوا كيضحك

ياسين: نشا الله تجلس معانا تعرف الرطوبية. هه

قلبوها ضحك وبغاو يشريو معاه المعرفة،،بحال ياسين لايمكن يفلتوه ومعرفة صحيحة ،لما لا يتسلفو منو ولا يديرو معاه مشروع واخا يدخلو معاه غير بالسمية ولسان لحلو او يزيدو يطلعو على ضهرو ، زيادة الخير خيرين وهاد النوع مكيشريش المعرفة مع من والا حيت معندو ما يصور منو اما بحال ياسين راه ميدوزوهش واخا ماعرفت اش يديرو وشاكين فيه يكون شي بزنس مان فداكشي حيت المكان لي جاي منو معروف باش عامر غير الفرق بينو وبين بزااف بحالو هوا الفلوس..ياسين باين كيلعب بيهم صحاح وشغلو كبير وواحد من الحيتان لكبار ماشي سمكة صغيرة بحال لي معمرين الشمال ..النوع دياسين قليل فين تصادفو ونادرا حيت مكيتخلطش مع البراني وماعندوش مع ناس الداخيل يصفة عامة ولا الداخل ينفسه وجالس فكازا بزز منو والنفس مقطوعة وعمرو تسارا المغرب ولا عرف اش فيه .كيعرف المخزن والبزناسة والشمال وفوت لبحر لهيه وقح٠اب طنجة ،وهاد المرة باينة عين جديدة دخلات على الخط وايناس بدا كيبان اعجابها بياسين وضهشرات فيه بلا متشعر بدات كتبين بعفوية حتى نتابهات ليها ذكرى لاكن مادارت حتى ردت فعل بقات كما هي جالسة تابتة بحال ديما والجلسة جلسااا نعام السي بعقلها والنخوة والهمة وكاسها فيدها على ركبتها كتبسم وتشوف وساكتة واكثر واحد كيلاحظ بزاف وينتابه لاخطاء لاخرين هوا هاداك قليل الحماس ولي ساكت وكيسمع ويشوف ،كيبان بيه العجب لي مكيبانش للخرين ،نفس الشي ء. وقع مع دكرى واخا كلشي جاه الوضع عادي لاكن هي قرات كل واحد فيهم وشافتهم كيلحسو الكابة لياسين واشتنتجات اسنتتاجها وعرفات الخطوات القادمة وقرات القصة وهما ماحاسينش..ها لي باغي يتعارف ها لي كيدير بلاصتو ها لي جالسة كتفرنس حدا راجلها عينيها كيبرقو وتطلق زينها .اما ياسين جاها عادي هوا نفس ياسين لي كتعرف ماتزاد عليه والو فديك الجلسة ..مرة مرة كتشوف فيه بنص فاش كيبدا يهضر وكتشوف فايناس كي كدير فيه وكتشوف فراجلها لي حداها مادا ماجاب ..ماسمعوش حسها حتى نطق المصمم كيفرنس وقال بانتباه

حسام:ذكرى سكتاااات…كنشوووفها فاش كتسكت كتبدا تتامل..فين وصلتي ادكرى هه

ياسين:شاف فيها بنص عين) شعندك؟؟

ذكرى: تنهدات)وااالو غير هنايا كيعجبني نسمع لهضرة ديالكم

ياسين: عيتي؟ نتحركو ؟

ذكرى: لاالا نزيدو شويىش

ايناس: باقي الحاال ..ذكرى مولفة تسهري زعما شنو جاك ليوم

دورات دكرى عينيها كتحك ودنها وسمعاتو قال بخفوت حداها وهوا كيشعل كارو

ياسين: كتسهري

ماجاوباتش بقات كما هي ساكتة ومافهماتش كيفاش ايناس حالة فمها فياسين وراجلها كي لحمار مادا ما جاب وفوق هادشي كتحاول تخلق حوار معاه ، كن كانت هي لي كتحاول تخلق حوار مع شي واحد وياسين حداها كن هرسها من عنقها ! وحتى بالضحك متقدرش ديرها وكتحاول تخلي الاحترام بيناتهم قدر الامكان باش يوقعش شي احراج لاكن وقع للاسف وهما نايضين يمشيو وحتى تبادل النوامر مع الاصدقاء وجا يسلم وقشع حسام سلم على ذكرى من وجهها وبقا حاط يدو على كتفها كيهضر معاها ، غير شافها تبدل لون وجهه ولون عينيه والنضرة تقلبات ولحسن الحظ دغيا مشات دكرى واخا منتابهاتش ومشا حتى هوا مغلغل حداها حتى خرجو لبرا وبغات تركب سيارتها ووقفها لاحها للجنب ولاح الباب تسدات وقال معصب بداك الصوت العميق

ياسين: سمعني وحل ودنيك مزيااان..نعاود نشوفك خارجة مع هادو ولا كتهضر مع شي واحد فيهم نقطع لك رجلين سالينا يالاه قو٠د فحالك دغيا

حل ليها الباب دغيا تمشي وقلب وجهه مابغاش يشوف فيها بقا كينفخ لاكن هي واجهاتو قائلة

دكرى: متعضرشي معايا هايدا ماعندكشي الحق تهضر معايا هايدا

هز يدو للجنب كان غيضربها: طلع فحالك ولا نهرس لباباك لكمارة ..رجعتي ق٠ية حتى نتي طلقتي باش ترجع تبوس هادا وهادا واخر يحط علك يدو وهادا يعنقك الق٠٠ ها؟؟ وا طلع حسن لك تحرك

دكرى: بحدر) نتيينا انسان ماشي دنقاش والهضرة انا معنضيعشي الوقت ديالي معاك

ضارت بغات تمشي لاكن شدها من وقبتها ردها لور ودورها حتى جا وججها فوجه وبانو ليها عينيه وساعو وتخلعات وبان تحديد الوجه ماضي وقال مزير على سنانو

ياسين: عندك الوقت لي ضيعو مع الز٠٠٠ل كماكنتيشي ق٠ ماتمشيش مع ز٠٠ خصك تربية بلحق خصو يتربا هاداك لي كطول يدو الاول

طلقها بعنف وضار جهة الباب راجع عند حسام ..جمعات راسها بسرعة تخلعات ومابغاتش تحشم معاهم ومشات كتجري شداتو من يدو بغات تجرو لاكن ماقدراتش وكانت ضعيفة كفاية واخا عيات تلسق فيه وتجر

شافت القضية حماضت وغتتحشم قدام معارفها ويفضحها بشي شوهة يبقاو مطلعينها عليها عاوتاني فسوشل ميديا وناضت كتجري تبعاتو حتى للباب دلوتيل ووقفاتو حابساه يدوز وهوا قدامها مكلضم هاز خنافرو كيزفر ويشوف فيها من لفوق..باقي صغير وطايش ونفسو عزيزة يقدر يكحلها فأي لحضة وعندو هانيا ، اما هي واخا صغر منو سنا لاكن ناضجة عليه وكضرب حساب للعواقب وماكبراتش فالفشوش وهزات مسؤوليتها راسها ومزال كتتحمل نتائج اغلاطها بوحدها وماعندها لي يتحمل مسؤليتها وهادشي خلاها تكبر فدماغها .

ذكرى : وقاااف سمعني سمعني..سمعنييي ياسين انا مناقصني فصايح هادا ادا دابزتي معاه غدا يصبح كيهضر فسطوريات ويشكي ويستعطف عباد الله ..صافي عفااك..صافي قلتي ااخر مرة نجلس معاهم صافي سمعتك ومنبقاشي نجلس معاهم …صافي عفاك

بقا واقف كيخنزر فيها بحال الثور كان نيت عوال يمشي يخليها فديك الطبلة وتراجع فاللخضة الاخيرة وقال مخرج عينيه فيها

ياسين :تحرك تق٠٠ للدار…حتى لتما عاد نتفاهمو

مشا عطاها بالضهر كيتهز معفر وشحال كتجي معاه التعفيرة وتخنزيرة فاش كيبدا يقلب فعينيه ، مشا معاها للطموبيل حتى ركبات ووقف قدام النافدة كيشير بجوج صبعان وراسو مايل جهة الطريق مصغر عينيه

ياسين.عتمشي نيييشان للدار كتسمع …يالاه تحرك قدامي

شافت فيه مخرجة عينيها ماعجبها الحال وقالت

ذكرى: انا ونتينا مطلقين فاااين عنمشي واش كتهضر دبصح؟؟ دابا انا عنمشي معاك تينا للدار شني كيحساب ليك يانا

ياسين.تحرك للدار ماتزيديشي تمرضني راه صبرت لك ،، عتزيد شي كلمة اااخرا تشوف الكمارة الثانية

عطاها بالضهر خلاها يابسة بغات تموت كمداتها وركب سيارتو وكانت صايكة نيت الطموبيل لبينتلي لي خلا ليها وهوا ووراها فسيارة كحلة كاط كاط كضوي تبعها حتى للدار ودخلات فيها البكية والغبينة وهوا موراها كتر منها ودنيه طالع منهم للدخان ،زدح الباب وراه وبدا ينكر ويغوت غير بوحدو كيقلب بتشاد معاها لاكن ماجاوباتوش ومشات للكوزينة كلشات على الكرسي والقرعة دلما حداها كتشرب وتسمع ودير راسها صمكة ، خلاتو كيسب من السمطة للتحت غادي جاي وكينغخ بحال الديك مابغاش يسكت فاللخر مشا للبيت جلس كيحيد سبرديلتو وتسرح فوق النموسية وهز تيليفون مشا كيشوف سطوريات لي حاطة وكيبركم بفمو ويسب ماحملش يشوف تصاورها لي كتحط

كان جالس مابيه ما عليه شاد داك تيليفون كيتسارا فيه حتى وصلو مسج وتهز مخرج عينيه وقف وبقا كيشوف ويقرا ل مكتوب وتبدل فسيفتو حك سنانو مع بعض ورجع لبس سبرديلتو مشا خرج وزدح الباب وهي فالمطبخ كطل براسها وجالسة كتهضر فتيليفون مع مها مافهمات والو وقالت

ذكرى : خرج كيزدح فالبيبان عاود ماعرفت شني عندو

لبنى: عندو يقرب لك عنننداك

ذكرى: لااء منختفشي

ذكرى : ساهية)شوووف دابا هادا قداش وعندو العجب العوجاب والفلوس من دابا عايش مفطططح لي بغاها يجبرها والوقت كله قدامو ،،ماخدام عند حد وعندو لي ماعند حتى واحيد…وفعوض ما يتبرع مع راسو حاضيني يانا وتابعني ينكد عليا الحياة ديالي وجايبني هنا للدار علاش الله واعلم

لبنى: دابا هوا غير شابر الضد وصاافي خليه حتى يمل وهوا عيقلب عفى جهة اخرى غير ستنى عليه وغيمشي راسو

هي كتهضر مع امها وتجمع ماخلاو حتى حديث ماهضرو عليه ، اما هوا فرانا قدام دارهم فين كاينة مو وحل الباب محلف وطلع نع الدروج لقاهم جالسين كيتجمعو فالسطح فوق للفوطويات ودرم عليهم مكشكش مشا عند نورة نيشان مسبق يدو طلع معاها بواحد الطرشة حتى تحل ليها الفم وتصدمات مافهمات والو ومو كتفك ، جرها من شعرها وكشاكشو خارجة كان غيعلقها وقال كيترعد عليها

ياسين: يابنت لق٠٠٠٠ علاش كتقلب؟؟ يابنت لق٠٠(هبط عليها كيسلخ فيها ) عملت فيك خير رجعتي داخلة معايا فالحياة ديااالي يا لق٠٠٠٠ هبط كينزل عليها وهي فالارض كتغوت ومو كتفك وترغب

ياسين: بقيتي ناقصاني غير نتينا دابا حساب لك منعرفكشي ..هاااي هاي هاي تفرعنتي كتعمل معايا شغل لق٠٠٠ (شاف فمو) قلت لك قاااحباااا دلخلا قلتيلي بنت النا ها بنت الناس

عطاها طحنة دلعصا واخا عيات مو ما تفك وتغوت باش مايفيقش البنت. للكن هوا ماطلقها حتى سلخها سلخة نيت ورجع اللور ويزفر

ياسين:عاااود دوورر بيا…عااارد قلب عليا وهرج شي كلمة وتشوف شعيرفع ليك…(كينفخ)

ماريا: شني عملت شنييي كاااين اياسييين شواقع فالدونيا

ياسين:رجع حمر كيغوت وكيشير بيدو) سول القحب٠٠٠شنيعملت …كا كان بعدا غيييير سوقها … هي حاشية راسها فطاااب٠ن ذكرى صحاااا عليها …سوقك مك الق٠٠٠ تسكن عندي ولالا هاااا. عند بالك مقوووودة نتيتا … نتينا يالاه جمع عيا لخرا ديالك كامل وقود عليا من هنا تحرررك

ماريا:ياسييين نعل الشيطان

ياسين:منشوفشي الكماااارة ديالها ولا عنعمل فيه ا يدي …خرج قود

ماريا:والعايلة مزال كترضع

قاطعها مكشكش:تقررررب لديك العايلة ولا توصل ليها نقطع د٠٠ديماك طراف وامشي قود عليا خرج ليا من داري مشي حسن ما نصعر على يماك ماباغيشي نشوف الكماااارة ديالك يالاه

يتبع...