محتوى القصة
دخلو للشقة كانت مساحتها ميتين متر فطبقة فيه جوج برطمات فقط بالمصعد كطل على الشارع مقابلة للماركات الصغيرة دالحوايج والمكياج وعامرة بالاطباء ومكتب المحامي مافيها حتى واحد ساكن .. كلها ماكتب وعيادات من لفوق حتى للتحت .. كانت مصلوحة من داكشي الرفيع واسعة تقول فيلا من لداخل بالبالكو كبير بحال الجردة. هي اصلا مساحتها مساحة فيلا فقلب عمارة اللي ماشافهاش من برا يقول فعلا فيلا بفصلاتها وطواليطاتها ومطبخها الفسيح العريض فيه شرفة واسعة بان ليها هاداك هوا لي غديرو غرفة العمل بحكم فيه لافابو وبلاكارات فالابيض والبوطاجي ابيض خصو الثلاجة تحط فيها الادوات والبياص والماطيريال .. كان المطبخ مربع وكبير والوسط بوطاجي اخر مربع كانت كتشوف فيه وتفكر تحيدة وفبلاصتو غيجي البياص دالخدمة ووالحيط لي حداها في بيت كبير ديال النعاس فيه بلاكار من زجاج وحتى هوا مفتوح على شرفة مشتركة جامعة بين المطبخ والبيت والصالونات الكبيرة شاد الواجهة كلها . لما لا تحل باب كبير من زجاج فداك الحيط الفاصل بينو وبين المطبخ .. الحقيقة الدار زوينة وكيتسناها مستقبل زاهر فداك الموقع وشهرة كبيرة .. خصها متهندسش بوحدها زمن الاحسن تجيب ليها مهندس يقادها على شكل عيادة ويدير ليها الديكور اللي يجي معاها والاضائة لي تناسبها .
قاطع تفكيرها باها وهوا كيتسارا وقال
سعيد: هنا البيت دلعواول يجيك مضخم.. وهادا البيت د دضياف
ذكرى: ههه هادي راه الكابيني ديالي ابا شني كتخور.. ماشي دسوكنة
عاصم: هادي كاااملة عيااادة؟؟؟ عمل نوصها عيادة نوصها سوكنة
كان كيضرب على راسو يسكن فيها هوا ومرتو
ياك خاوية خاوية علاش لا مايعمرهاش هوا ومرتو
ذكرى: اه كااملة صافي تافقنا انا وياسين غيبداو الاصلاح .. ممنوع السوكنة فهاد العمارة حيت ديال لخيدمة وصافي
عاصم: ايوا صااافي ... شغول شي واحيد فيك عمل لي بغيتي سكون ولا خدم .. ماعندو حتى واحيد الحق يقولك شنو تعمل
ذكرى: انا عنسكن انا وياسين فالدار ديالو علاش عنسكن بواحدي؟؟ هادي تافقنا عليها تكون كابيني
سعيد: بلحق كبيييرة بزااف هادي كلينيكا ماشي عيادة
ذكرى: وا المهم ... شفتوها ؟ خصني نرجع قالي ياسين دفع لفيزا نمشي نسبانيا
عاصم: هاا؟؟ فيواخ؟
ذكرى : غدا عنمشي ندفعا .. باسبوطي عندي خصني فيزا وصافي
سعيد: شني عتدفع ندفعو لك يانا دغيا
ذكرى : انا نعرف شني ندفع فالصباح عنمشي نلبنكة نخرج شي وراق وصافي عندفع لاكارط ديالي دالخيدمة وصافي ماشي شي حاجة عندي كلشي
سعيد: وشحال عتبقاو؟
ذكرى: ماعرفتشي .. على حسب
سعيد: ارالي نيمرة ديالو .. النسيب ديالي وماعنديشي تيمرةديالو (كيمسح يديه فسروالو) ارا ارا
ذكرى: طفا لي تيليفون نمشيو ندار نعطيها لك .خرجات كدور فعينيها سدات الباب فرحانة بالدار .. كاع داكشي لي غديرو فعشرين عام دارتو فسيمانة وهنات راسها .. المستقبل دابا عندها . ها هي طبيبة بخدمتها وبطموبيلة دلوكس ودار دلوكس وهي كلها ولات دلوكوس ..الحقيقة الفلوس كتبدل.. تأثيرها على الانسان وتفكيرو واسلوبو فالحياة قوي بزاف خصوصا لي كيعيش الزلط والفقر ةفجأة كتقلب حياتو من واحد مزير مقجوج مقاتل مع الوقت لواحد عندو الحديد وعندو الفلوس ومنفس ومرتاح ماديا.. كلشي كيتبدل وحتى النضرة للحياة والمجتمع كتتغير وكيبدا يبان ليه اي واحد تودد ليه طامع فيه .. كيتبرا فيه واحد النفور والكره والحقد اتجاه اي انسان كان متكبر عليه وماراضيش بيه او كان كيعاملو معاملة خايبة.. تماما كما واقع مع ذكرى .. صاحبتها فداء لي قلبات عليها قلبة وحدة وفجأة رجعات هضرات معاه وباركات ليها كان مسج ديالها محض سخرية لذكرى تشفات فيها وشفات غليلها منها وباقي شاطن بالها داك لمبنت ديال ولد المدير لي كان كيمسح بيهم الارض هي والمبتدئين بحالها وديما مجرجرهم على لخلاص وكيمن عليهم .. حالفة حتى دير عيادة ديال الاحلام مضايراش ختها فطنجة وتجر كاع الناس لي فداك لكلينيك وتشهر شي شهرة ديال بصح لي تخلي داك المبنت يبان قدامها بحال الدبانة هوا وكاع لي رفضوها نهار اللول تخدم معاهم وحكروها وكانو كيشوفوها قليلة خبرة وكيتعالاو عليها بليفوغماسيو ديالهم لي دايرين على برا. بلا البنات لي كتعرف لاباس عليهم وقراو معاها وحلو ليهم واليديهم العيادات من نهارهم . كان محيطها فيه غير بحال هاد الناس وديما كتشوف لفوق وكتحاك معاهم بزاف فمكانتش كترضا ونفسها فالسما الشيىء لي خلاها تخفي حقيقة وضيعتها الاجتماعية وترسم بروفايل على دوقها ليهم باش ماينقص منها حتى واحد ويقلل منها شي مخلوق ومع ذلك مكتسملش واخا بداك الصورة لي عاطية على راسها. كاع لي كتعرف وكتحاك معاهم مكيرحموش.. كيتنمرو بزاف ةيستهزأو بزاف ويضحكو على الناس وفيهن الطنز على الدرويش.. مكيرحموش نهائيا والى رحمو كيشفقو عليك وكتزيد تحس براسك اقل مستوى منهم اكثر ويديرو ليك ضحكة صفرا بلا ميمدو ليك حتى يد مساعدة او كلمة تجبر الخاطر.. عينيو لفوق ونيفهم فالسما والتواضع والكلمة الطيبة كاينة غير بين الدراوش.. اما الطبقة الفوقانية مامولفينش هادشي وحتى الدرويش ماعندو بلاصة بيناتهم ومكيعرفوش يتعاملو نفس المعاملة وذكرى عارفة هادشي مزيان مزيان ولو لا مكانتها الاجتماعية ولقب الطبيبة اللي شوية كيخليها تبان فيها الضو وعارفاه مكافيش وهي مجرد طبيبة فقط .. تخشات بيناتهم وكتحس بالضيق وسطهم مقادراش تساوا معاهم وماباغاش تعيش دىويشة ويعيش شي واحد حسن منها ويشوف فيها هي لتحت. حالفة حتى تشد بلاصة كبيرة وتهبط ليهم الزنافر كاملين هادوك اللي كتعرف عاد تبرد ومزال هادي غير البداية وبداية مهمة جدا فحياتها
صبحات الصباح على للنبوري فالبنكة خرجات اوراقها من البنكة وكتجمع اوراق الفيزا .. اما ياسين مشا لسبتة هوا وعبد الحق مشغولين وتيليفونو طافي ، بغات تعلمو بلي دفعات الفيزا لاكن التيليفون ماخدامش وحتى هي خلاتو ماداتهاش فيه وبدات توجد راسها للسفر وخوها وباها نافخين ليها الراس على ديك الطموبيل. تقول واش بغا يقيلوها ولا يبدلو الموضوع لشي جعة اخرى وهي طول الوقت دايرة راسها صمكة مكتسمعتش وتتهرب .
سعيد غادي جاي فالدار كيدور: طموبييير عااااادية.. كاع الناس عندهم طموبيرات ،،، مالكم ملهوفين هايدا تقول عمركم شفتو طموبير
عاصم: كيلبس سبرديلتو) دابا طموبير اخرا شني غتعمل بيها؟؟؟ تييها لي انا خصني طموبير
سعيد: مزال كيدور) شني فيها ادا تسخرت بيها ورجعت ياك انا باباك(ترقيق الحروف)
عاصم: انا عندي العاايلاا ستيتوااا .. خصني طموبير واش عنبقا ماشي ماجي بيها فطاكسييي؟؟
سعيد: كيدور ) متبغيتيشي تيهالي نتسخر بيها صافي ماعنبقاشي نقولك تيهالي
عاصم: مشا وقف عليها فلكوزينة كيرغب) تيني طموبير فياط سانسو(ترقيق الحروف) هايا عندك طموبير مضخمة تبارك الله
ذكرى : صاااافييي. صافيييي واخا خوودها
عاصم: فدهشة) قول والله
ذكرى: ايوا صافييي خليني نقضي شغلي
سعيد: تبعو) كيفاش ! تيتيلو طموبير فمرااا
ذكرى: صافي خليه
عاصم: شني عندك اباااا ٩تى نتينا باغي توحلها لي ولاا؟
سعيد: انا باباها معنديشي طموبير ونتينا تاخدا
عاصم : نتينا متبغيتيشي وانا عندي العايلة ستيتوة كتكرفص فطاكسي
وردة : كنتكااارفصوووو اساعيييد نتينا مكتمشي فااااين
سعيد: ضار ليها) ناينا دخووول سوق دراااسك انا كنتسااخر
عاصم: تسخر فميرسيديسا
سعيد: فاين عنجبرا وهي عتمشي عند الراجل ديالااا
تسلات خلاتهم مناكرين مشات لبسات حوايجها وعيطات لمها تلاقاها باش تشري شوية دلحوايج لي تحتاج للسفر
تقدات ما قل ودل ودايرة فراسها غتشري الدهاز كله من برا وغير الماركات دالفريع
على بيدمن يدخل من سبتة تلهات مع اغراضها وداز ليها الكونجي كامل فسير واجي وعاودات مشات حطات ليهم شهادة طبية بوجهها احمر بغاو ولا كرهو واخا مابقاتش كتبان ليها فديك الخدمة وكتشوف راسها قريبة للهدف ديالها وعندها كلشي مابقا والو وتحقق الحلم . وعلاش لا؟ وشنو فيها واخا ماعندهاش خبرة راهم قراو معاها كفس منها وفتحو العيادات كيتعلمو كيتدربو فعباد الله .. اما هي على الاقل ضربات شوية فداك لكلينيك الحقير وجمعات كليان خصها غير الشجاعة وكلشي يجي مع الوقت.
لسقها عاصم بالبكا والشكا على ديك الطموبيل لي كانت عندها وكتشوفو غادي جاي للميكانيك كيتسناها توجد وكيحلم بيها حتى هوا ومابغاتش تحطمو وضيع ليه امالو .. واخا هاكاك راه خوها سواء مزيان ولا خايب ومتقدرش دوز دمها ولحمها .. واخا يدابزو ويتقاتلو ويوقع لي وقع ..غير كدوز ديك ساعة الغضب كيبردو ويرجعو يتهدنو .. كتمنا ليه الخير والافضل وماكرهاتش تشوفو خدام وحار مايبقاش يطلب لاكن الغالب الله . كتقول سي نهار يدير عقلو وخوها الوحيد واخا يكون ولد لحرام مقطر كتحن تحن فيه وبنتو مقطرة ليها من عينيها . شافتو مضيوم وكيخمم ويتسنى ترد عليه وغادي جاي واقف على ديك الطموبيل وقالت نعطيها لو وحتى هوا راه كبر وكيشوفو ويتمنى واخا مكيدير حتى مجهود . عطاتو السوارت فرحاتو ومرتو كتر منو كانت غطير بالفرحة وعندها البيرمي حتى هي وباغا تسوق وجاتها ديك الطموبيل على قلبها بغات تسطى بالفرحة وكدور بيها وتمسحها وسعيد جالس برا على واحد الكرسي كيشوف فيهم بنص عين ويضرب الشقوفة على قلبو .
تكاتبات هي وعاصم وكملات فرحتو ورجعات الطموبيل فملكو وشكون قال غادي تكون عندو حتى هوا طموبيل .. باقا جديدة ونقية واخا ديال البنات المهم ماركة مزيانة يركب ويسوق حتى هوا. وصلهم رزقهم حتى هما وطلعو بطموبيل من زواج ذكرى والعقبة لحوايج اخرين علاش لا. مزال الخير لقدام وداك الزواج نفع ليهم كلهم ماشي غير ليها هي
وجدات كلشي والفيزا فيدها كاتسناه غير هوا يبان . فين غابر الله واعلم ومابغاتش تسول عليه لا راوية لا حتى واحد اخر . خلاتو حتى صونا ليها هوا وردت عليه من الصالون وهي ناشرة يديها ورجليها قشرو ليها ديك الحنة لي بدات كتبهات باش متمشيش بيها هاكاك
ذكرى: الو ياسين
ياسين: اا زايني ..فاين نتينا؟
ذكرى: انا فصالون كنعدل شي حاجة وصافي
ياسين: انا ماجي فالطريق.... وجدتي راسك؟
ذكرى: كلشي واجد .. فيزا خرجات كلشي هوا هاداك
ياسين: ايواصافي .. انا بليل عنكون تما
ذكرى: نتينا فالطريق؟
ياسين : فالطريق بلحق ماجي على البحر... جيبت باركو لي عندنا فسبتة كبير على هاداك ديال طنجة.. زايد عليه مزيان فالسفر
ذكرى: تبسمو عينيها)اااه .. مزيان.. ادا عتوصل بليل
ياسين: انا دابا فبليونش دغياا دغيا
ذكرى: واخا الله يجيبك على خير
ياسين: امين ازايني يالاه . حتى نوصل ونعيط لك
ذكرى: واخا ..بسلامة
قطعات وضحكات بوحدها فرحانة وعاجبها الحال، كملات شغلها ومشات بحالها زيرات باليزتها وصاكها هبطاتهم للطموبيل حطاتهم وطلعات جلسات معاهم فكاسكروط كيتجمعو ويسولو باغين يعرفو كولشي وباها حتى هوا كيضرب فالفرماج مكيعقل من كثرة ما خلعو داكشي لي كيسمع
مع المغرب صونا ليها .. كان كيحسابها غتمشي تبات ديك الليلة فالدار عندو ساعا قاليها اجي لمارينا ديريكت ومشات نيشان تعرض ليها سلم عليها وهز الشنطة طلعها للباطو وهي كتشوف فداك اليخت شحال زوين موديل جديد وكبير شوية مكتوبة عليه سمية دشهد .. طلعات كتقرا السمية وتسول
ذكرى: شكون شهد؟
ياسين: العايلة دخاي طارق ..سميناه على السمية ديالها
ذكرى ااه هه مزيون الباركو تبارك الله
مشات كتمنضر كان مبدل على اللول ومريح ومجموع الفورمة عندو بحال الحوتة ديال السفر نيت وكيجري . قلع بواحد الصوت ولكلاصون تقول باطو كبير غيقلع وبقا داخل شوية بشوية حتى بعد على الحاشية لي كيصيدو فيها الصيادة عاد جهد فالسرعة كيسوق جالس نص جلسة والاضواء شاعلين فداك الليل وغادي كيتبرد حتى وقفات عليهم لامارين كانت كتراقب الوضع ووقف ليهم وشار بيدو ليها تدخل ووبقات كطل وتسمعو كيهضر كيهضر معاهم شكات فيه هاز شي حاجة فداك الباطو .. تزاد معاها الزايد وفعلا كان هاز داك الباطو ومحمل ومجمل ومتقل . تخلعات وكانت غتموت بالخلعة فاش دخلو كيقلبو اماكن معينة فلاوه مزيان وهوا غادي جاي خاشي صبحانو فجيابو مبررد يحلف عليه الواحد ما هاز شي حاجة. وهوا فلحقيقة هاز السلعة كلها لي كان طلع على قبلها للبلاد ولقاهم كيوجدوها وشارجاوها وجا فطريقو هاد السفر حجة وزيارة نيت . نزلات لامارين مشات بحالها وكمل طريقو حتى بعدو شوية عاد خرجات عندو فيها الموت ويدها على قلبها ووجهها اصفر وهوا كيسوق ويشوف فيها
ذكرى : مالك ؟؟
ذكرى: شني كانو باغيين؟
ياسين :واالو ماعندك مناش تخاف غير مشي ترتاح
سدات فمها وسكتات وهوا شاد واحد المنضار كيشوف بيه كل شوية وشار بيدو ليها تهبط وتسد الباب عليها ومشات دارت داكشي لي قاليها حتى حسات باليخت وقف والحركة فالسطح وفتحات الباب بشوية كتسمع الاسبانية كتشاير وكطل بشوية مخلوعة شافت كروب كيحل المكيفات ديال اليخت وكيجبدو السماطي طوال قدهم قداش داكشي متقون ومزير داخل المكيفات وكيحطو فالكراطن بسرعة وخرجو داكشي نقلوه ليخت اخر كان واقف قريب ليه وغير نزلو مشاو سد ياسين دوك المكيفات وقلع مكمل طريقو كيطير وهي لتحت على اعصابها ماعارفة شنو كيطرا وشنو غيطرا وعنداك تنوض شي كيرة بين المافيات يصفييوها لبعضياتهم وليها حتى هي معاهم .
حرارت عليها السفرية ومابقاتش قادرة كاع تيق فيه .. بقات كتقفقف فداك البيت حتى صبح الحال وفتح عليها الباب لقاها جالسة مركنة بحال القردة وزرقا ورجعات موف فاش سمعات الباب كيتحل كمل عليها
ياسين: فدهشة: مانعستيشي؟؟
رمشات فيه وبدات تفتف بغات توقف وكتمتم: ع عع ادييك فقت دابا
ياسين: بعفوية) نا عاد نرتاح شوية .. راحنا وصلنا ن إيبيزا
مشا حداها عندها جرها وهي كتقففف بحال دجاجة كانيت ناقصهاغير لجنس ونسات مادارت البنج وزرب عليها دغيا دغيا لقات راسها ناعسة ورجليها لفوف وعقل مع التهريب ولاخر مع الجنس ماعرفات معامن تركز وسدات عينيها وسنانها كيتقرقبو دوزات ديك الكوية نيت بحال الكوية دالعافية ماعرفتها كي دازت ولا شنو كان كيقول ولا اش دار حتى لقات راسها مكمشة كترعد بحالا فيها البرد وهوا ناعس حداها معنقها مراهش فداك العالم. ضارت شافت فيه مرتااح مع ىاسو وبقات كتتأمل وتقول سعداااتو.. الله يعطيني من هاد لهنا غير شوية . مابقات كتبان لها لا إيبيزا لا غيرها ولات باغا غير ترجع بحالها .. ماعرفاتو واش سالا شغلو ولا مزال شي ميطة اخرى جايا فطريق .. ماعرفات ترد بالها ولا ترتاح وحتى التسوال متقدر تسوولو. نعسات بزز منها غير بالخلعة حتى للثلاتة عاد قفزات مفزوعة من بلاصتها جات جالسة وعينيها خارجين وهوا قدامها كيشوف فيها ورجل فالارض ورجل فوق نموسية يالاه بغا يجلس ولاوي عليه الفوطة
ياسين: شعندك؟؟ تخلعتي؟؟
ذكرى : كتفتف ) والو(ردات شعرها لور كتهدن) غيى حلمت واحد الحيلمة خايبة
عاود ليها واحد الكوية مع لحلة دعيينيها حتى هي ماعرفاتها كي دازت وشنو طرا فيها ماعقلات على راسها حتى دوشات بماء بارد فيقها وضح ليها الحلم من لحقيقة ورجع كيبان ليها غير لحبس قدام عينيها فقط .. اما حتى المستقبل مابقاتش كتفكر فيه وعاد عرفات راسها فين حطات رجليها ومعامن وشنو ما عطاها ميحيدش ليها الخلعة لي ركبات فيها. بغات تسطى وقلبها تزير وعيات تصبر وطلعات لفوق لسطح اليخت لقات راسها فمارينا د ايبيزا والدنيا مبدلة والجو مختالف لاكن ماعطاتش للصورة اهمية وبقات كاتمة الصبر وعلى وجهها الضيم. طلع لابس دجينز وتيشورط بيضا وهاز صاك صغير محزم بيه على صدرو فيه وراقو وكلشي ونضاضر الشمس وقال
ياسين: لبس عليك نمشيو نفطرو
نزلات ماعوداتش الهضرة وماقلباتش بزاف لبسات اول حاجة جات فطريقها بانت ليها وكانت سروال رطب كريمي واسع بحال الصاية طويل والطوب ديالو عبارة عن نفس توب كيجي مكروازي على الصدر بحال شي مايو لبساتو بلا سوتيان وكرشها باينة ودازت على صندالة وطلعات كتجري طالقة شعرها مشات نزلات حداه مشطونة وعينيها فقلب مخها مكيبان ليها منضر لا ديور بيضا وقهاوي مصافة بحال الملاح ديالهم وداكشي فحال الى راها فليونان والدنيا مع الصيف عامرة . جلسات معاه فواحد من دوك المقاهي كترمش دايرة رجل على رجل ويديها خدا فمها كتفكر وهوا متكي حداها شاد الائحة كيقرا
ذكرى: بسياسة) ياسيييين.. لبارح سمعت شي اصوات درجال كيهضرو سبانيولا والخلفات فوق راسي؟ شني واقع؟
رد عليها وعينيه فداك اللائحة) صحابي تلاقيت بيهم وصافي
هزات راسها تنفسات وعاودات شافت فيه هازة حاجبها وقالت
ذكرى: هاد صوحابك باقي عيجيو عندنا فنصاص الليل؟
هز عينيو شافها كيفاش كتشوف فيه وكيفاش سولات وبقا ساكت عاد قال
ياسين : لا مابقيناشي عنعاودو نتلاقاوهم
ذكرى: حيت انا الخلعة لي فيا عتغرق ليك البابور اياسين .. سمعتيني
دورات وجهها للجهة الاخرى وهوا مهبط راسو على اللائحة وهاز عينيه كيشوف فيها قالبة وجهها ومتوثرة مامرتاحاش. ماهضرش معاها وماهضراتش معاه حتى حطو ليهم الفطور وماقدراتش تاكل .. دوزات بواحد طوسط صغيور مع طريف دلفرماج وجوج حبات دلعنب وقلبات وجهها ساكتة هوا كل شوية كيشوف فيها بنص عين وشار بيدو للنادل وتلفت قال
ياسين: شنو تشربي؟
ذكرى: بالنفي) ماخصنيشي
تلفت للنادل طلب ويسكي وهي ساهية فجهة اخرى مكتهضرش معاه ومرة مرة تهز تيليفونها فيدها تشغل بيه حتى ناض وشد ليها فيدها نوضها يتمشاو وبقاو غادين كل واحد كيشوف فجهة لابسين النضاضر وهوا مرة مرة يهضر فتيليفون حتى لواحد اللحضة عنقها من كتفها وسط الزحام فالمدينة ودخل بيها لروليكس بغا ياخد ليها ساعة ورفضات بكل احترام
ذكرى: شكرا اياسين.. ماخصنيشي
ياسين: بخفوت) علاش ماخصكشي جاتك فيدك
ذكرى: ماخصنيشي غير خليني على خاطري
تلفت كيسوط ويشوف فداكشي ويخمم ودفع ديك الساعة للبائع قاليه جمعها لي وخلصها بلكارط وهزها فيدو وخرج معاها كيتمشاو ساكتين
زادو شوية ويدو على كتفها داز حدا لويفيتو وجرها دخلها تتقدا بزز منها واخا مابغاتش عاود ليها نفس البلان ديال الساعة فواحد الصاك وخرج هازهم وكل مرة يدخلها لمحل حتى عيات بغات ترجع بحالها وردها لليخت كان تما جو زوين والناس مصفيين فاليخوت ديالهم وجالسين طالقين الموسيقى ومستمتعين بالاجواء. دخلات سخفانة حيدات صندالة وجلسات على الفوطوي فلاطيراس مسرحة رجليها كترتاح وتسرح شعرها بيديها حتى بان ليها هاز قرعة ديال الروج مخرجها والكيسان فيدة وبدات كترمش وتشوف بنص عين ودور وجهها. كان وقت العشا ةطلق موسيقى اسبانية وخرج واحد الشواية ديال الضو قدها قداش حطها على الطبلة برا وحط حداها طبسيل طويل مستف فيه اللحم هبرة والكفتة والصوصيط والكبدة والشحمة تقول لعيد لكبير وزاد القطبان داللحم والدجاج و طبسيل ديال العطرية ولاعشاب والزيوت وواحد طبسيل طويل ديال شلاطة بالبوراطا لوسط مكركبة ةطبسيل اخر ديال الفرماج وكلشي مغلف بدا يرون وييصايب راسو وحداه كاس دروج عامر .كان عزيز الزرود والماكلة وماشي اي ماكلة..الماكلة ديال لفريع لبنينة وعندو مع تاويل وتستاف وكيقاد بشوية عليه وهي كتشوف فيه
ياسين: اجي تتعشا ماحدو سخون
ناضت للطبلة جلسات كتشوفو جالس كيسطر فداكشي ويشوي ومن الشواية للطبسيل والفرشيطة وتقطاع داكشي على حقو وطريقو ةنسمة الاعجاب طالعة وكملها وجملها سط، عليه واحد الخط ديال الروج فوق الستيك طايب وقطع وعطاها
ياسين: وقولي كي جاك
داقت ودارت الصواب معاه شكرات ليه طيابو لاكن بتعابير جدية. بقا كيشوووف فيها وماش جلس حداها عنقها بيدو وقال
ياسين: جينا تبدلو الجو ماشي نغضبو
ذكرى : بجدية) نتينا ما كتحيبسش بيا.. انا ماشي غضبانة ومكنغضبشي .. انا دابا مامرتاحاشي وباقا فيا الخلعة ومشطونة ..مكتحيسش بيا وبشنو كنحييس .. قلبي هااايدا كيفرفررر وبقا فيا الحال بزاااف حيت ماخفتيشي عليااا .. ماقلتيشي العايلة عتاخلاااع !! ماديتيهاشي فيا مررااااا
هي كتهضر وتعبر وهوا كيشوف فيها ويدوز يدو اللي معنقاها على خدها
ذكرى: انا خاصني نحييس معاك ببلأماان ..نحيس معايا رااجل يخاف علياااا ويبعد عليا الحاجة لي تخوفني نطممآاان وانا معاك .. كنت مرتااحاا .. دابا ماقدراشي نتيق فيك زعزعتي لي التيقاا!!
ياسين: صافي ميبقاشي يتعاود مرة اخرا
ذكرى: تنهدات) ادا عاوتي اااصلا غير خليني ليلهم صااااافي .. بان البرهاان . نغسل يدييي فمرراا ..لي مايخافشي عليا ويخاف على احساااسي منأمنشيي ليه صافيي
ياسين: انا غلطت بصح .. صافي غلطت واااخر مرة ..صافي؟
ذكرى : عنتيق فيك اياسين .. بلحق ماتكسرشي الثقة ديالي..انا عارفة راسي ادا مابقيتش كنتيق فمكاينة حتى قوة فالدنيا ترجع لي ديك الثقة .
ياسين: وصافي ...يالاه تعشا معايا خصني نشوفك مرتاحة وكتاكل وفرحانة باش انا نرتاح يالاه
نعلات الشيطان وكلات وبدلات الساعة بأخرى وبدات كطيب هي وياه ويجربو يشكلو وينوعو ، حتى هوا كان ضريف معاها لو يمكن مالقاش معامن يدير داك التعامل القاصح لي مولف بيه. الهدوء والجو زوين دوزو الليلة قصارين وزادت رشقات ليها فاش حط ديك القرعة دروج الوسط وبدا كيعمر ليه وليها حتى نتابه انها كتشرب وتعاود بلا ماتسكر وقال
ياسين: موالفة تشربي؟؟
شافت فيه مصدومة ولكاس فمها بدات كترمش وقالت بابتسامة
ذكرى : لااء.. علاش؟
ياسين: شربتي بزاف عجبك ؟
ذكرى: مكيسكرشي؟؟
ياسين:كيرخي وصافي هوا مكيسكرشي .. حيت مخمر مافيهشي لالكول بزاف(كيعمر ليها)
ذكرى: براكة عليا صافي حسيت براسي ترخيت
ياسين: صافي كمل هادا ةبراكة عليك
كملاتو وهي متكية وشادة مخدة عندها كيتجمعو والموسيقى مطلوقة ..بدات كتصور الاجواء لي قدامها وتلفت شاف فيها وقال
ياسين:عننداك شي مرة تنزل وجهك ولا تلبس فحال هايدا فلمنغرب
ذكرى :علاش شنو الفرق بين بيناتهم؟
ياسين: فأروبا مكيبنشي لي يديها فك .. والنغرب كلشي عيقم عليك(كيشرب)
ذكرى: هاا؟
ياسين: واش عتخرج هايدا عند لمكابيت الكرش عريانة والصدر هاايداك ..كلشي ملهوف كلشي سايح
ذكرى: ماشي فالاماكن العامة
ياسين : موهيم . على حسب... لباس التقحبين والتقهقيه راه ماعنديشي معاه
ذكرى: ههه كيفاش؟
ياسين: تكا على يدو اللور وشار بعينو لواحد اليخت لهييه ) بحال هاديك دابا لي كتشطح لهيييه .. نحلف عليها شي مروكية .. تشووو كيف عاملة (عاف) كي كتشطح وتكركر زعما الاغراء ... وهاداك حداها فرحااان .. باااقي مدوخ بتقحين دجوج فرنك بوبري(مسكين)
ذكرى: كاملين بيكم هايداك كيعجبكم داك النوع
ياسين : تنهد كيدور وجهه ) شعندوم ما يغريو كاملين كيف كيف .. مدرسة وحدة خرجاتهم
ذكرى: غير تشوف وكان هه
ياسين: مابقاااشي داكشي شي حااجة.. الواحد فاش يالاه كيبدا بوبري كيدوخ بداك تعواج وداك تق٠٠٠ بين وتقهقيه ..من بعد كيطلعو ليه فالكر صاافي .. بنات الاصل شي حااااجة .. اما لق٠٠بة دلخلا كدوخ غير هاداك مطرنااان بوبري متايقشي فراسو كتديها فيه وحدة زوينة كتعطيه شوية دتيقة صافي كيتلف
ذكرى: نسقصيك خاايلاه .. انا دااائما كنقول بيني وبين راسي علاش زعما الراجل كيمشي عند بحال هادو ويخلي مراتو .. ولا يخلي بنات الناس ويمشي عند هاديك
ياسين: وا هاديك كتعرف تغرييه ادا كان شي ملهووف فيه الجوع راه يخلي بنت الناس ويمشي عندها ..بلحق شنو عيديه عندها ؟؟ غيير داك تقححبين دلخنز ... ككان مخييخ منهم وعاش وسطهم يعدفهم ويطلعو ليه فالراس ويقلب على عايلة نقية للزواج.. ماشي هاديك راسها جامع هايدا ددتصاور مع شحال من واحيد
ذكرى: اييه .. (تكات على دقنها) علاش الراجل كيكون مزوج بنت الناس وكيفسد ؟
ياسين: غيي زييغة... لي عندو الفلوس مكيفسدشي بزاف كيطلعو ليه فالراس على بكري .. لي معندوشي هوا لي كيما قلت لك ملهوف كيدوخ بداك تقحبين... ولا السحور
ذكرى: بصااح؟؟ كيفاش؟
ياسين: كيتأمل ويدوز بالكاس) وااايلي وايلي شكيعملو للسييحر هه(دور راسو) مكايناشي شي ق٠بة دبصح مكتعملشي السيحر والتشعويد.. مكاايناشي .. تقحبين خااه بنو ديماه باباه دسيحر .. شدو شحال من واحيد بالسيحر
ذكرى: ماجاوبتينيشي .. علاش اصلا يخلي مراتو ويمشي يفسد
ياسين: كطلع ليه فالراس وصافي.. عشر سنين بعطاش نسنة غشرين سنة صافي كطلع ليه فالراس .. كيتوحش داكشي كيرجع يقلب عليه... ولا تعجبو شي وحدة يمشي يدوز معاها شي يامات صافي
ذكرى: شحال من واحيد مشا مارجعش
ياسين: مهم كان ناوي يرجع
ذكرى: هه كيفاش كان ناوي يرجع
ياسين: كان ناوي يرجع وداتو بالسيحر ... زعما جبر عندهااا ...ااا... شعاايكون عندهااا كاع باش صااافي يبقا معاها... راهم هاااايدا تا لهنا اراااا ما تبدل وحدة تنسي فاخراا ..بلحق مراتو راه مرااااتو ادا كانت مزياانة راه ميبدلهاشي بالوسخ .. يدوز لي عيدوز ويرجع بحالو
ذكرى: اهمم وادا هوز شي مرض
دور وجهه كيقلب على الما: الله يستر... الله يستر وصافي والله يعفو
ذكرى : ادا كانو عندو ولادو وعائلتو وهز المرض..ماشي كلشي عيمشي فالرجلين .. شني زعما يبقا معزول ميمكنشي .. ادا مشا هز المرض عيخرج على كولشي ميبقاشي عايش كيف كان
ياسين : يا ربي تسترنا ... لواحد يبعد من الزبل .. يخخ
ذكرى: قبل مايعمل يدو فشي وحدة خصو يفكر شنو جايه فالطريق
ياسين: الله يحفض
ذكرى: تكون مثلا غير شي وحدة بغات تنتاقم من شي واحيد مثلا تمشي تهوز الدم من شي واحيد مريض بسيدا وتديه تحطو لهاداك اخر تنتاقم منو.. فاين يبااان شي سحور.. الواحيد ميشركشي معاهم الطبلة والبلاصة حساان ليه
ياسين: الله يستر وصافي بدل بدل هادشي كيمرض
ذكرى: الله يستر.. المهم الواحيد يرد بالو ... شحال من واحد كيسكر ولا يكمي شي عجب صافي ماكيبقاش عاقل اش كيعمل
ياسين: لي كيكمي العجب ااصلا مكيعمل والو
ذكرى: شنو زعما؟
ياسين : البلية مكتلاقاشي مع الفساد
ذكرى: باستغراب) مافهمتشي؟؟
ياسين: لي مبلي مكيقدر يعمل وااالو .. هناه الله
ذكرى: مافهمتشي؟؟ اول مرة نسمعها
ياسين : كاع اللي كيشم ولي كيكمي لحشيش ولي مبلي كيضرب دروكا يوميا مكيباقشي يقدر يجمع راسو.. نتينا طبيبة ومعارفاشي هادشي؟؟
ذكرى: والله معارفاها!!!! فلتات لي يمكن..بلحق انا لي كنعرف لي مبلي كيكون كيفسد
ياسين: لااااالا هه غيير اشاعة وصافي.. لي مبلي ميقدرشي بوبري ينواض... واخا ينوض كينوض مرة فشحال ... كااان الله وباقي الله صافي(مسح يديه)
ذكرى: شني لعلاقة ديال هادي مع هادي؟
ياسين: دروكا بحالها بحال دوا الاعصاب... هي نيت وكيخرجو منها الدوا دالاعصاب كيرخييي ... وكيبقى منادم دااايما مرخيييي مرخي مرخي مرخي صافي كيرخاااو ليه ..واخا يبغي يجمع راسو فشي نعسة ميقدرشي... النعاس كيبغيو الواحد مزييير مجموع والاعصاب ديالو هاايدا (كمش يدو) مزيرييين باش يقدر يعمل داك المجهوود كاامل ... اما واحيد بوبري مراااخرخخ اش عيعمل... بالدرااع باش كيعمل داك الواحد .. واااحد وحصل فيه بفف..اوديي (سكت مطولا) النعاس كيبغي النفس طويلة .. والماكلة والرياضة باش لواحيد تكون عندو ديك الرغبة ... اما اخر مفرفر مكتكونشي عندو وكينوض لو بزز..... لحشيش عااد كتر كيمشي لداك البلاصة نيشان كيسخنها فالاول وكيزير عليها الواحيد كيبغي يعمل شي حاجة.. اما فاش كيرجع ادمان ديما ديما صافي كيسالي مع ديك البلاصة مولاها ميبقاشي يحس مراا... والغبرة والشم مع الوقت صافي مكيبقاشي الراجل يعمل والو .. كيعيش بحال المخصي عرفتي المخصي؟
ذكرى: بحذر) ولي كيبيعوها؟؟؟
ياسين: لي كيبيعها راه كيبيعها تجارة وصافي.. لي كيتسخرو ويفرقو هادوك لي كيتبلاو اما التجار لكبار عاارفين شكاين
ذكرى: ياسين نتينا كتكمي لحشيش؟
ياسين: شاف فيها) ماشي مبلي.. تخلعتي ولاههععه
ذكرى: غير سقصيستك
ياسين: هانا جالس معاك من لبارح شفتي شي حاجة؟ ماجايبوشي اصلا وعارف راسي مطااول هنا
ذكرى: هاايدااك !!
ياسين: يعمل اربعين سنة صافي .. تسالي الحيااة الجنسية
ذكرى: ياسين حتى لفين قريتي؟
ياسين: كيشعل كارو) لباكالوريا
ذكرى: دبصااح؟؟ نجحتي ؟
ياسين: لااء منجحتشي ومابغيتشي نقرا
ذكرى: علاش؟؟ كا كملتي ماعجباتكشي المدرسة؟
ياسين: انا قريت فمدرسة سبانيولية فتطوان ..شني كتقولو لهم بفرنساوية.. لاميسيو ياك... اقدم مدرسة تما خلصو عليا زبابل وماقريتشي
ذكرى: ههههه علاش؟
ياسين: كيسوط ) الطيش.. الطموبيرااات ..بنااات ... صافي خليتا ومشيت نسبانيا عند يما نفخت لها الراس ديالا كنت عنحمقها ورجعتني عند با توالاني شي ايام من بعد صااافي
ذكرى : شنو لي صافي؟
ياسين : عملت مشكل... دخلوني نلحبس
ذكرى: شني عملتي؟
ياسين: دافناا انا واحيد .. كنت بااقي صغير .. تحماو فيا خليتو حتى كان بواحدو ضربتو بالطموبير مشا.. هزوني داوني وجا با وجاو خوتي خلصو ليهم الدياا فكوني خرجت بزز .. لقباحة خاايبة مامزياناشي
ذكرى: وشنو السبب ديك الحرقة لي حدا عنقك
ياسين: حتااا هي بالسبة د الطّيش.. كنت حالفان واحد المسخوط مشيت عندو بالموطور عطيتو صبغة ددق وفاش ركبت على الموطور والموطور كبيير كنعس على صدري هايداك الركبة ديالو .. ركبت نمشي بحالي جا خاه هاز للماء لقاطع رماه عليا وانا الحاااامدو الله دورت وجههي داغيا(هز حاجبو) اما كا مشا لي الوجه ومكنتشي عامل كاسك .. بالخف عملت هايدا درقت بكتفي وكان الصيف مالابس والو جاتني تما.. براات من شي بلايص بلحق هديك جات فيها الدقة لكبيرة
ذكرى: هيييه وشني عملتي؟؟ تحرقتي؟؟
ياسين: خرج عينيه وطفا لكارو) بقيت كنقاااز ... سخفت طحت فالارض صااافي .. حتى جبرت راسي هايدا مجبد فكلنيكا وبا عند راسي واقف كيستناني نفيق باش يردني للغيبوبة
ذكرى: هههههه
ضحكات حتى شبعات وهوا جالس كيتأمل فالديكور
ذكرى : اهمم (حطات يدها على دقنها) شني عمل معاك؟
ياسين: شعندو مايعمل... با بوبري جيتو انا على الشرف... كبااار مسكين عاد جيتو يانا بالعافية شاعلة فيا ماقدرشي بوبري وخلاني مني نطارق
ذكرى: حلات عينيها) هييه!! طارق صعييب ياك
ياسين: هز حاجبو) قبيييح طارق .. واخا كنت كاانعمل حسابو كانو المشاكل تابعيني.. كنطير
ذكرى: ههههه ضحكتيني ...
ياسين: سبابي فهاد لخرية كاملة لبنات والصحاب.... هما سبب المشاكيل وانا مكنتشي قادر نعيش بلا بيهم
ذكرى: وماتبليتيشي بعدا؟
ياسين: تتأ.. البلية قوداامي كتكبر كبرت معاها ماكنتاشي جديييدة عليا.. كنقياال نقز فوسط منها فاش باااقي صغير
ذكرى: فيين ؟؟
ياسين: فالبلاد .. فالارض ديالنا كونت كنطلع فالصيف نتما عند عزيزة (جداتو) كانت عندي شي تمن سنين تسع سنين لتحت .. حليت عيني تما كندوز الصيف تما كنت مساالي معارفشي شني كاين فالدنيا.. كيجيب لي الله عزيزة هي اللي كاينة وصافي ...كيطلعوني عندها نحنقز ويمشيو هما يتساراو ويتبرعوو وانا فالجبل كااااكتشوي فيا الشمس وفرحاان والامين عند راسي كيربي فيا زعما .. اودييي متأ الطفولة المشموتة
ذكرى : كتموت بالضحك) هههه اواعدي كنموت هههه
ياسين. تنهد ) ايييوا شعاتعمل.
ذكرى: مكانوشي كيديواك معاهم ؟
ياسين: فااين عيديوني وانا فاين ما يديوني نتلف... (دور راسو) ويرجعو كي لحوماق كيتجاراو عند المخزن
ذكرى: كتعتارف براسك كطير ههه
ياسين: صغر عينو) فخبارك واحد الحاجة
ذكرى: شني؟؟
ياسين: بتمعن ) كننكككره الطيران ديالي ...
ذكرى: هههههههه اواعدييي
ياسين: اقسم بالله ... كنكره اي واااحيد كيطير ... الرزانة صعيييبة .. بعدا بعدا الواحيد ميعملشي الضحك فراسو ويندم عليه (حرك راسو) دابا كماكونتشي كطير منعاولكشي هادشي كامل
رجعات اللور كتموت بالضحك سالا معاها وهوا كيشوف قدامو والكاس فيدو لي شافو يقول السيد عميق.. كيشرب بشوية عليه ويتأمل مع راسو
ذكرى : تنفسات) انا نقولك واحد الحاجة.. فهاد الدنيا شي كيكمل شي هاداك لي تقيل ميقدرشي يضحك عاوتاني ادا مكانشي شي واحد فيه الضحك يضحكو
ياسين: انا فيا الزربة
ذكرى: هههه نتينا ماشي كطيير ههه ناينا نشييط ودمك خفيف... باااقي تكبر راسك يزيد يعمار وعتقال بزز منك
ياسين: من الخفة عنتقال.. بلحق العقلية كتبقا خفيفة
ذكرى: واخا هايداك عتقال..نتينا كتشوف الدنيا حساان من لي كيشوفها واحيد تقييقال ... وباااقي صغير ..باقي هاد الجهد يتقادا وهاد الطاقة تنقص... انا تقييلة عارفة راسي تقيلة بلحق مملة منضحكك ما نبكيك ههه
ياسين. هز حاجبو ) كا كنتي كطيري كرميت يماك فالطريق للقرش ... انا هايدا كتعجبني البنت.. مهدناااا تقيقلااا تسمااع .. متزربشي .. اما واحدة كتفرفرررر (دور وجهه ) تفوو.. تسابق فالهضرة .. هاهيا نايضة تشطح هاهيا كتجري هاهيا كتنقز ..فيها الدوودة وضاروري طيح شي حاجة ولا تهرسا . . كتزنزن بحال الدبانة
فشلات بالضحك وبقات غير كتشوف فيه وقالت
ذكرى: ياسييين ...
ياسين: دور راسو بتقالة: هااد ياسييييين كتجي موراها شي حاااجة
ذكرى: ههههه
ياسين: قول قوول شنو خصك
ذكرى: كنت عنقولك نمشيو نموناكو
ياسين: فاين جات هاد موناكو
ذكرى: اوااعدي ماعرفتيشي موناكو فاين جاات؟
ياسين: فاااين عنعرفا
ذكرى: مكتسافرشي نأروبا؟؟
ياسين: (هز يدو) انا حدي حد هلندا بلجيكا.. طاليان .. صاافي. نتينا لي كتعرف اوروبا حسن مني
ذكرى: موناكو جات ففرنسا
ياسين: دوى وجهه كيكمي)فىنسا حتى هي يمشيولا الناس
ذكرى: اوااعدي موناكووو!!! مدينة دالاثرياء قالاك
ياسين: كي وااالو .. فرنسا هي فرنسا.. متقدرشي تعيش فيها بلا لحشيش
ذكرى: هههه وا موناكو مزييونة قالاك .. انا كانت خاصني نشري الدهاز ديالي من تما ههه
ياسين: تمشي حتا لموناكو باش تشري الدهاز.. غيدهزوك بالرئيس ولاا؟
ذكرى: هههه فيهاكوولشي (كتبسم) فيها واحد الاوتيل مشهووور اياسيين مضخم
ياسين: ها لاوتيلات فسبانيا فاين تبان هاد موناكو ..
ذكرى: ويالاه نمشيو يالاه يالاه .. انا مكرهتشي نمشيلا
ياسين: مابقيتيشي خدااما وخصك ترجع نلخيدماا
ذكرى: رجعت عطيتوم شهادة طبية
ياسين: مناااقص كاع منها .. ماعندك ما تعمل بديك الخدمة تما
ذكرى: كتهضر بصااح!!!
ياسين: تلفت شاف فيها) كنهضر بصح
ذكرى: تخلعات) منقدرشي نجلس نتينا عارفني وعارف لخيدمة ديالي
ياسين: شحااال كيعطيوك فهاد الخدمة نعطيه لك وجلس بحالك تسنط لعضامك
ذكرى: تزاد معاها الزايد) لالا انا كنعشق لخيدمة ديالي ماشي على الفلوس.. منقدرشي نجلس فالدار نتسطا
ياسين: علاش تسطا؟؟ لجلسة فالدار كتسطي؟
رجعات صفرا: متقدرشي اياسين ماقلتي ليشي هايدا ماتفقناشي
ياسين: تكا على الجهة لاخرى: ماعندك مااا تعمل بيها .... نتينا ماشي ديال لخدمة ... جلس بحالك رتاح مع راسك .. كول وشرب ولبس وتسارا وتهنااا .. وربي لعيال قدام عينك
هوا كيهضر وهي فيها السخفة بدا قلبها كيضرب جاتها البكية وبدات كترمش
ذكرى: وهاد القراية لي ضربت وهاد المجهود كامل بمشي فالزيرو
ياسين: ببرودة) مايمشيشي فزيرو... قري بيه ولادك
ذكرى: شدات قلبها) كطحيك معايا ياك
ياسين: كيطفي لكارو) كنهضر معاك نيشان
بقات ساكتة كتشوف فيه مطولا وناضت من حداه مشات للبيت سدات عليها وجلسات كتبكي وتنين ماقادراش تصدق شنة سمعات واكيد مغاديش تقبل ومستحيل تقبل .
بكات حتى شبعات ومشات بلاصتها تغطات وتقلبات كتنخصص وتفكر حتى سمعات الباب تحل ودخل ردو وراه وتكا حداها عنقها وطل عليها لاكن غمضات عينيهابزربة
ياسين: نعستي
بعد الشعر على وجهه باسها وبدا كيفيق فيها لاكن هي طلعات الغطا على وجهها بعدات عليه.ماعجبوش الحال وحيد داك الغطا عليها وقال
ياسين: تنفختي زعما ... هضرنا معاك جوج كلمات لمصلاحتك تنفختي
ذكرى: بأدب) ياسين خليني نعس .. ماشي الساعة دالهضرة
ياسين: كيفاش ماشي الساعة دالهضرة؟ نتينا عتقولي اشمن ساعة نهضر فييها
غمضات عينيها قلبات وجهها ماجاوباتوش وصعر قلبها على ضهرها وضربها لحنكها حتى تخلعات
ياسين: كنهضر معاااك فاش نكون كنهضر معاك جاوبني
ذكرى: بصبر) ياسين .. نعل الشيطان وخليني نعيس دابا.. شني خصك؟؟
ياسين: خرج عينيه) كنهضاار معاك رد عليااا ... ولا عنقلب يماه هاد الباركوو كامل
ذكرى: شني بغيتي هاني كنسمع
ياسين:ماالك كتنففخخخ ... شنو كااين هاا؟؟ كلمة جوج تتنفخخخ ياك لاباس نتينا بوااحدك لي كاينة فالدنيا قلتلك مكايناشي لخدمة مكايناشي لخدمة ماالك منفخة
ذكرى: نعل الشايطان اياسين ... بدل الساعة باخرى
طلع معاها بطرشة: وماتقوليشي بدل الساعة عادي نن... كنهضااار معاك شوف فيااا... عنخرج من يمااك هاد النفخة
فشلات بالخلعة بقات غير كتشوف فيه والدموع دارو فررر من جناب عينيها ماقدراتش تهضر وكتشوف فعينيه لي كيشوفو فيها بحال النسر وشنايفها كيترعدو وقلبها غيسكت مكانتش متوقعة ديك المعاملة حيت اصلا مدارتش علاش وليينة فالتعامل ديالها مكتوصلش للواحد حتى يفقد صوابو . بقات كتشوف وساكتة وقطعات النفس فيها حتى ناض بالزعفة وشار بجوج صبعان من عينيه لعينيها وقال
ياسين: شوف فيا مزيااان
دغيا رمشات شافت فجهة اخرى وناضت جلستات حطات يدها على صدرها مخلوعة ماقدراتش تشوف فيه ، خرج وزدح الباب وخلاها فبلاصتها كتقيس حنكها وتنهج وبدات كتبكي وتسمع فالرديخ فوق راسها. كان دايز وكيدفع مشا جلس فين كان كان وشعل واحد الكارو ورجع اللور كيسوط ساكت وبشوف قدامو ساهي .. سرح يدو المتشنجة قدامو وطلع صبعانو وعاود جمعهم و بقا تما كيضربو البرد حتى تفش وبرد وهدا وتهدن ورجع لعقلو عاد ناص كيسوط دار يديه على جنابو وبقا كيشوف فبلاصة وحدة ويخمم وغادي جاي كيوقف هنا وهنا من بعد هبط للبيت حل الباب بشوية لقاها مغطية بحال الميت راسها مكيبانش وشوية من شعرها لي معري .. بقل كيشوف فيها شحال ومشا يالاه جلس وهبطات النموسية بيها قفزات من بلاصتها مفزوعة وعينيها خارجين شافت فيه ورجعات لور هازة يديها مدرقة بيهم على وجهها بحذر كتشوف فيه اش بغا يدير والخلعة فعينيها كتخلع . بقا فبلاصتو كيشوف فيها وقال بشوية
ياسين: شعندك؟؟ منعسشي؟
ذكرى: بلعات ريقها) لا نعيس
رجعات اللور وهوا كيشوف فيها ويدخل فالفراش وهي كتكحز وتهرب حتى لقات غير الخوى حداها وناضات بشوية وبحدر مشات لطواليط سدات عليها وجلسات تما مخلوعة شحال ما خرجاتش حتى سمعاتو قال
ياسين: واش عتبقاي مخشية تما ولا شنو؟؟
خرجات من طواليط خايفة لاكن مامبيناش ومكتشوفش جيهتو .. وجهها مغسول وحمر وغادية جهة الباب بغات تطلع لفوق حتى عيط ليها
ياسين: فاين ماشيا.. هابلاصتك
جمعات النفس بصبر طويل ومشات بزز منها حداه نعسات وبعدات جهد لي بقات ناعسة نصها على النموسية ونصها فالخوا من الخوف وانعدام الامان . الأمان لي كانت مأمنة ليه راسها مشا فمرة ورجعات كتحس براسها مع انسان غريب ومجهول وخطير عليها وصعيب تغمض عينيها وهي حداه.. ماتوقعش شنو ممكن يدير ليها ولا يقدر يدخل ليها شي بزناسة يتعداو عليها... كلشي اصبح ممكن .. الخطر كيحيط بيها من كل جهة وهي بعيدة على بلادها وارضها ومعارفة والو فبلادات الناس .
غمضات نص غمضة وودنيها محلولين وعقلها معاه خايفة على راسها والضلام حتى حسات بيه نعس وتلفتات لقاتو ناعس وناضت بشوية من حداه فداك الصباح والبرد كيضرب والدنيا خاوية وكاع لي كانو سهرانين فاليوخوت ديالهم ناعسين .. بقات كتسرح يديها وتتمتضر فداك الجو مهمومة وطلعات مع واحد الدروج للسطح الاعلى وقفات مكمشة بالبرد كيتتأمل ودماغها طايب كيفكر حتى بان ليها واحد لكاوري يكون خمسيني .. الستيل ديال شوكر دادي واشم رجلو وفديو سيكار مبكوص وواقف متكي على حديدة كيتأمل الشروق وللريح كيضرب فيه .. تبسم ليها وردات ليه التبسيمة بجمالة ودورات وجهها كدور تما وتخمم وكل شوية تشوف فداك الكاوري كتلقاه كيشوف فيها ويتبسم وترجع تقلب وجهها .. شوية دارت ليها طق فراسها وقالت اجي نتواصل معاه على الاقل نعرف شي واحد هنا يعتقني الى طرات ليا شي حاجة، تلفتات مبسمة شافت فيه وهز يدو شار ليها سلم عليها وبدا يهضر معاها من اليخت ديالو لديالها بالاسبانية
الراجل: صباح النور.
ذكرى : بالاسبانية) صباح الخير
الرجل: الشروق جو زوين
ذكرى: اممم .. بزاف
الرجل: مرحبا بيك ..نشربو قهوى بجوج؟
ذكرى: بتردد) اممم.. هه واخا
بدات كترمش ونزلات مع دوك الدروج هبطات لتحت طلاتعلى ياسين لقاتو تقلب على كرشو ناعس وردات الباب بشوية مشات هزات غطا خفيف لاحتو عليها وخرجات من اليخت مشات للخيت لي حداها لقاتو كيتسناها..
طلعات مبسمةومدات يدهاسلمات عليه وهوا كيرحب بيها ودخلات جلسات على الكنبة قدام الطبلة وهوا كيوجد القهوى قدامها .. حط لكيسان كيهضر معاها ويتودد وهزات كاس منهم كان سخون وريحة القهوى ياسلام .. شداتو فيديها وجلس جنبهاهز الكاس الثاني كيشرب
الرجل: اليكس
ذكرى: متشرفين. . ذكرى.. مغربية
اليكس: ااممم مترفشين .. جيتي بوحدك ولا معاك شي واحد؟
ذكرى: لا ماشي بوحدي.. انا والزوج ديالي
اليكس: ااه مزيان..خصني نعرض عليه حتى هوا لشي قهيوة
ذكرى: لالا.. لا من الاحسن لا. راجلي كيغير بزاف ... وبسبب الغيرة لبارح دابزنا (تنهدات) من الاحسن بلاش.
اليكس:انا متافق معاه.. عندو هاد الجمال وميغيرش ميمكنش
ذكرى: ههه(هبطات راسها) شكرا
اليكس: بتشكيك) مكيعنفكش؟
ذكرى: غرغرو عينيها) ضربني لبارح.. اول مرة
بقا اليكس ساكت ومصدوم كيسول علاش وهي كتمسح عينها
ذكرى: انا طبيبة ديال التجميل..وكنبغي خدمتي بزاف.. وهوا فرض عليا نجلس ومنخدمش
اليكس: بالنفي) ماشي من حقو ... وماخصكش تسكتي على العنف..بقدر ماسكتي كيزيد الانسان فالطغيان
ذكرى: بالايجاب) تماما ... (حطات الكاس ) شكرا على القهوى.. خصني نمشي
اليكس:(جبد الكارط) الكارط ديالي.. خليه عندك الى حتاجيتي مساعدة
ذكرى: شكر
خدات الكارط ونزلات داك اليخت رجعات بحالها طلات عليه لقاتو مزالفبلاصتو.
هزات مانطة صغيرة من البيت وطلعات لفوق تكات وتغطات وبقات ساهية فالسما حتى داها النعاس
ضرباتها الفيقة قبل منو والشمس ضربات فوجهها . ناضت فشلانة طوات الغطا ومشات للحمام غسلات وجهها وحكات سنانها ومشطات شعرها وشمعاتو كوتشوفال ولبسات كسوة بالخيوط من لكتاف حريرية ضهرها معري ومجموعة شوية كتبين الصدر ومشات كتقلب فالثلاجة صايبات الفطور لراسها مع كاس دلعصير وهزاتهم لاتيراس حطاتهم ويالاه غتجلس هزات رلسها لليخت لي حداهم لقات اليكس جالس كيشوف فيها ويتبسم .. كان وسيم ولحيتو مخلط فيها الابيض والاسود وطويل وعامر لابس قميجة بيضا واسعة .. تبسمات ليه وهي كتقاد سربيتة على فخدها وبدات كترمش وتشوف فيه مبسمة وكتقول مع راسها يعلم الله كي كان فشبابو بالزين.. باينة كيحمق وداك الزين المسرار كاع الحرف باينة والضحيكة حتى هي .. مرجل وكلاسيكي .. بدات كتفطر وتشوف فيه ويشوف فيها نسات الهم وخرجات من جو الحزن وحسات بانجداب غريب لأليكس ، عمرها حسات بداك الاحساس العجيب فحياتها حتى نتابها داك الشعور فجأة ودفات خاطرها فيه من النضرة لأولى وحتى هوا كان كيشوف فيها باعجاب وعيون كتتأسف للوضع ديالها . بقات هاك مرتاحة فداك الاحساس كتشوف فيه مرة مرة حتى هز واحد الوريدة باسها وشار بيها جيهتها ودورات وجهها كضحك حشماتورجعات عانقات يديها بجوج كتعبير عن الشكر .. شار بصبعو جيهتها وجمع قبضة يدو كأنه كيقول ليها نتي قوية مضعافيش وهي كتحرك راسها بالايجاب وتشرب الليمون حتى سمع الحس وهزات النضاضر لي حداها دارتهم باش مايشوفش الحزن فعينيهاوماتشوفش وجهه وتجي عينها فعينه
هبطات راسها كتفطر والنضاصر فعينيها حتى حسات بيه وقف عند راسها البرافان كتعطعط عنقهاوباسها فخدها ومسح على كتفها وهي متوثرة بدات كتفتف وترمش وتشوف فأليكس لي بدوره.. رمش ودور وجهه ..
ياسين: صباح الخير
مارداتش وناضت هزات طبسيل وكتشوف جهة اليكس لي كان كيشوف فيها بنص عين بأسى ومشات دخلات الكاس والطبسيل ماهزاتش عينها نهائيا ولا شافت فياسين.. اما هوا صبح مبدل .. هوا نفسو ياسين لي كان كيعاود ليها ويضحك معاها ... عاود ناض مشا جيهتها مزال ماوصلش بعدات هي مشات لجهة اخرى مهبطة راسها كتتهرب حتى تعرض ليها وهي خارجة للاتيراس وقفها وعنقها لاكن دورات وجهها بعدات شافت جهة اليكس بان ليها نايض مهبط راسو ودخل لداخل.. تنهدات بتعب هبطات لياسين يديه فشلانة وقالت
ذكرى: عفااك .. عفاك.(وقفات يديها ماقدراتش تقيس فيه) الله يخليك
ماقدراتش تهضر شافت راسها مستنزفة وماعندهاش الطاقة ليه بغاتغير يبعد منها
ياسين: نهضرو بشوية.. صافي..مانغوت منقول وااالو .. غير هضر لي بغيتي تقولو قولو انا معنغوتشي
ذكرى : سدات عينيها مطولا) خليني عليك عفاك ... خليني .. ماقدراشي نهضر
دخلات لداخل وهبطات للبيت سدات عليها وهبطات راسها على يدها سادة عينيها كتنفس بتعب مطولا حتى سمعاتو كيدق
ياسين: ذكرااا..فتح الباب
هزات راسها بارهاق ووزيرات ملامح وجهها بنفور وصبر وفتحات الباب دخل عندها شافها كطوي لحوايج
ياسين: جرها من يدها) يالاه نخرجو نتمشاو .. يالاه.
ذكرى: جرات يدها) خليني عليك.. الله يخليك ... خصني نرتاح كنحيس براسي مرييطة (شدات جبهتها) خليني
تركنات فواحد القنت شادة تيليفون مهمومة وعامرة كتفكر تعاود لمها .. واش تعاود ولا بلاش؟ تعاود ؟ لالا من الاحسن بلاش تخليها مها مهنية وماتمرضهاش .. ماعندها مادير ليها اصلا غير غتمرض من جيهتها وصافي.
بقات جالسة طالعة نازلة فتيليفون حتى قفزها صوت اليخت كيطلق داك الصوت دالاقلاع ووقفات حسات باليخت كيتحرك ومشات خرجات عندو لقاتو قدام المقود ما جالس ما واقف.. متكي ونضاضر فعينيه لابس شورط قصير والساعة فيدو كخلة بسمطة مزيرة كيشوف قدامو
ذكرى: فاين ماشيي؟
ياسين: قلتي خصك تمشي نموناكو
ذكرى: لا خصني نرجع طنجة
ياسين : دابا صافي تافقنا على موناكو .. ها طريق ديالا قدامنا نيشان
ذكرى: خلينا نرجعو احسن
ياسين: وصاافي دابا تحركنا .. ندوزو نبرسالونا قريبة .. وغدا نزيدو لموناكو
بقات غير كتشوف فيه وخرجات لاتيراس بسرعة لقات راسها كتبعد على الميناء واليكس واقف متبع ليهم العين، شافها خرجات وهز يدو ليها وجمع القبضة كيقويها بديك الحركة. تبسنات وهزات يدها حداها وبقات واقفة كتشوف فيه حتى بعدو على الميناء وتقلب اليخت كيمشي مع جنب ايبيزا حتى بعد وبدات كتبان ليهم من البعيد عبارة عن جزيرة صغيرة وعلى اليمين جزيرة اخرى بعيدة كتبان .. شار بيدو وقال
ياسين: هاا مايوركا
تلفتات كتشوف وتصور داك المنضر لي يمكن مغتعاودش تشوفو مرة اخرى وقررات ما امكن تعقل على ديك التسافيرة بزينها وخايبها ومسحاتو هوا من قدام عينيها عتابراتو مكاينش ومشات تستمتع مع راسها
. كان اليخت كيطير وياسين متكي كيشوف الطريق وحداه واحد القرعة كيدوز بيها والموسيقى مجهدة مطلوقة . مشات لواحد الثلاجة لقاتها عامرة مثلجات اشكال وانواع وديسير بانواعو الصغير ولكبير .
اش قالها راسها دير .. ناضت هزات كاس كببر خوات فيه الروج فالقاعة والثلج وبدات تجر فالمثللجات وتكور وتحط فوقو وستفات عليه حب الملوك والعنب ومشات لاتيراس حطاتو حداها وحيدات حوايجها بقات بالمايو وجلسات كدهن وتكات كتشمش والريح كيضرب واليخت كيطير وهي كدوز بداك المثلاجات وكتمنضر ومرة ومرة تهز المنضار تبدا تشوف بيه حتى ضلام الحال وتحرك البرد بدات تبان ليها برشلونا مضوية والجو ياسلام .
دخل اليخت بلاصاه وناض مقسوم كيتجبد فيه الجوع خز حجبانو بتعب وقال
ياسين: يالاه يالاه نعتقو الروح
هز قميجتو الزرقا ولبس سبرديلتو باليونسياكا البيضا وداز على بزطامو تحزم بيه على الخصر ونزل كيسلم على الناس لي تما ويهضر معاهم حتى بدلات حوايجها وخرجات لابسة كسوة خفيفة قصيرة فيها فتحة فالجنب وصاكها لوبفيتو فيدها مشافتش فيه .. كتلعب فشعرها ونزلات مابغاتش تشد فيه وحتى هوا كان مسخسخ كيشوف فيه فير بنص غين مافيه لي يهضر وباينة كيعرف البلايص تما .. تما مابقاش كيدور بزاف مشا نيشان لواحد المطعم كان مكتض بالزبناء وقوة الهضرة كتقب الودنين
المطعم كبييير شي لداخل شي على برا وستيل مستوحا من الطبيعة والخضورية مدلية من السقف والخشب كيلمع فالجناب والجلسة كي دايرة داكشي مريح والناس عايشة الحياة ، جو اخر مع الموسقى الغجرية والسرباية كيطيرو غاديين جايين والدنيا مكتضة تقول عرس. جلسات كتمنضر وتتبسم ويدها حدا خدها كتشوف ديك الاجواء لي كتنسيك فالموت الى كانت داخلاك .. انتعاش حقيقي .. وزادو نعشوها بواحد الحك ديال لكوكو قدو قداش عامر من الوسط بالماء ديالو مع مشروب كحولي والتلج ولاباس لاسقة فيه ومزوق بالورد احمر. شعار الوردة الحمرا لي كيتحط فالراس وورا الودن . اما ياسين تكا كيتفوه مشافش كاع فاللائحة .. غير وقف عليه النادل بدا كيضحك معاه ويهضر ويسولو على سي اسماء اخرين وهي كتسمع عارفاه كيسول على صحابو.
مع مشا النادل هز تيليفونو كيشوف فيه وحطو فودنو كيهضر مع مو بسبنيولية علمها بلي راه تما وبدا كيتعاود هوا وياها ومد تيليفون لذكرى وقال
ياسين:مامّا خصها تهضر معاك
شدات تيليفون تبسمات ردات ليها ومو كترحب بيها وتسولها على الاحوال وكي وصلو . كانت كتبان فيها ضريفة من خلال هضرتها وفروجية وتلقائية. دغيا توادعو ورداتو ليه تيليفونو شدو عندو وقال
ياسين: خصنا نشوفو مامّا ماجاتشي جينا حتى لهنا ومنشوفوهاشي
حركات راسها بالايجاب مشافتش فيه ورجع قال
ياسين: غدا نتغداو مجموعين .. عاد نشوفو هاد موناكو
مارداتش عليه وبقا كيخنزر فيها وقال
ياسين: كنهضر معااك واش عنبقا نهضار بوحدي؟؟
ذكرى: صافي .. عمل لي جاك مزيان
ياسين: وانا كنهضر معاك وناينا مدورة وجهك فاين كتشوف
تنهدات بقات ساكتة .. اما هوا ناض من بلاصتو وجلس حداها دار يدو وراها جرها عندو وقال فودنها
ياسين: ملي نهضر معاك شوف فيا ماتخلينيشي نتعصب عليك .. انا هاد موناكو ماشي ليها بزز ومافيا لي يمشي .. ماتزيدشي تمرضني وضيع لينا لخرجة
ذكرى. شافت فيه هازة ىاسها) الخرجة خسرتيها نتينا واش نسيتي شنو عملتي لي؟؟
ياسين: معنقها بزز ) شنو عملت لك عملت لك هايدا(طلع معاها بطرشة خفيفة) صااافي
ذكرى: نزل يدك .. ماتقيسنيشي
ياسين: وصاافي هادي دابا شي طاااارشة؟؟؟
ذكرى: بغضب) مطولشي عليا يدك
ياسين : يدي سبقتني وصافي .. وماشي شي طااااارشة متحكرشييي..واش قصحاتك؟
ذكرى: تقصحني ولا متقصحنيشي ماطولشي عليا يدك
ياسين: والله ماطرشة دبصح... نتينا كبرتيييها
ذكرى: كبرتهاا?? وصلنا للضرب؟؟ باقين فالاول دطريق
ياسين: وا لي سمع الضرب يقول عطيتك شي صبغة هيااا هاديك
ذكرى : كتبغي تبعد راسها) انا قولي علاااش ؟؟ انا شنووو .. ماهصرتشي ااصلا معاك .. اما كا جاوبتك يعلم الله شنو تعمل فيا
ياسين: جرها باس راسها) وصاافي المسامحة .. انا غلطت معاك .. يالاه . صافي؟
ذكرى: بسهووولة عندك؟؟ .. جيتي قالك راسك منخدمشي قلتي اجي نجلسها فالدار... وعاد الضرب
ياسين: وعلاااش تخدم فداك كلينيك يحكمو فينا فوقاش نمشي فوقاش نجيو
ذكرى: وانا كون جبرت كعملت لعيادة ديالي ونمشي الساعة لي يقولها لي راسي وندخل لي بغيت ونخرج لي بغيت ونخدم علاااا لكانة ديالي.. واش كيحسابك ساهلة ولا؟
ياسين: وا عمل لعيادة ديالك يالاه ... بقبتي على خاطرك؟
ذكرى: كضحك عليا؟؟ خصني مزال لخدمة ونجمع ليها الفلوس
ياسين: فاين خصك هاد لعيادة؟؟(كيقولها وماحاملش يذكرها) فااين؟
ذكرى: كترمش) راه الدار ديالي خاوية تصلاح للعيادة.. حسن لي ..نتلها فيها ونخدم عند راسي
ياسين : وصافي حتى نرجعو ويدير الله لخير... (هز يديه) ها حنا غنعملو لك لعيادة ونشوفو واش عيبقا لك الوقت لينا ولا غتلسق لي فهاد العيادة د الززز.... (دور وجهه) وا زيد غوبش عاود
بردات دوك جوج طرشات بالعيادة اخيرا واخا متاقتش فيه حتى تشوف راسها بالطابلية وجالسة فيها عاد تيق. اما هوا بان ليها متقلب كل نهار عندو كلمة حسب الوضع والمزاج .. ضرب ليها واحد التشلقيمة خفا زربا كيشوف فيها وهي كدور عينيها وحطات يدها على فمها
ياسين: طلق الضحكة ماتبقاشي هايدا مغوبشة
ذكرى: جاتها الضحكة) انا مغوبشة؟
ياسين: كتغوبش بزاااف... لبارح كنتي جالسة كتهضر وكضحك كنتي حلوة .. كتهضر وكتقطواط عليا رشقتييه لي
ذكرى: ولفتي تقطوييط دالبنات اياسين
ياسين: بقرف) هادوك كيتكلبنو بزااااف عليهم تقطويط .. القطوط نقيين .. هادوك ميجيشي معاهم تقطويط ازايني(شافها كضحك) ها نتينا كضحك مزيييونة
باسها فخدها وتكا كيتنهد معنقها .. حطو ليهم العشا وتحلات ليه الشهية .. هز الفرشيطة بدا بواحد السلطة كياكل ويتبنن بشوية عليه وكلشي قدامو متابعو والو مازربان ما والو . كان مبلي بالحوت كيموت على اصناف الفواكه البحرية والماكلة لبنينة مكيقصرش من جهدو .. مجرب كاع المؤكولات والاطباق العالمية وكيعرف ياكل .. كيخلط هادي مع هادي ةيزيد هادي على هادي ويجرب هادي مع هادي كيتبدل الطعم كيولي واحد اخر وهي كتشوف فيه كيفاش كيدير ويقاد عاد يديها لفمو وكدير بحالو
ذكرى: عرفتي اياسين عندك الطريقة باش كتاكل مزيييونة .. كتعرف كيفاش تاكل
عيبها. عرفتي اياااسين عنداككككك.. مكاين ازايني ا ميياموور ا لحبيب ديالي... (كمش وجهه) ايااااسيين .. هايداك قرعة
يتبع...
على مزيناتها قصة