محتوى القصة
نورة: جلساتوتنهدات) جاي
ذكرى: علا سلامتو هادي ثلاتة دسيمانات وحنا طالعين نازلين عليه ضيعت ثلاتة دلويكاندات عليه
قالتهاوقلبا عينيها العسلية للجنب كتلعب فشعرها .. زينها دافي كينبع منو الحنان والهدوء والراحة ماتسخاش بيها وهي كتهضر . كانت تقييلة ومرزنة كتركز مع شنو كيوقع قدامها عكس نورة ، نورة كانت نشيطة بزاف فيهاطاقة حماسية قوية وسريعة وكتبغي تلفتالانتباه سواء بالهضرة بالجهد او بالضحك
دخل اخيييرا وشرف المكان وحيد نضاضر على عينيه كيقلب ومعاه صاحبو فاتح.. شيرات ليه نورة بحماس بحماس وقصد مكانها هوا وصاحبو وقفو عليهم وسلم ياسين على نورة بالوجه اما ذكرى مدات يدها ليهم فقط وتبسمات ورجعات استقرت فمكانها ساكتة وكتشوف
ياسين: مزيان؟ كلشي مزيان؟
نورة: بحماس كضحك) هادي هي غنعيط ؟
جلس كيضحك : كنت حااطك فبالي
متنكرش انه جدبها ونال اعجابها حتى هي ومتكدبش على راسها،صاحبتها من حقها تشطن عليه . اما فاتح بادر بغا يهضر معاها ودارت راسها ماسمعاتوش حتى تكلم ياسين وقال
ياسين: صاحبتك ؟
نورة: صاحيبتي ذكرى
فاتح: مزييونة عندك السمية
ذكرة:شكرا
ياسين: نتوماصحابات راوية بجوج
نورة: اه ههه عزييزةعلينا راوية الله يعمرها دار
ذكرى: بابتسامةخفيفة)كي بقيتو رتاحيتو شوية مور الموت ديماك
ياسين: حرك راسو)الحمد لله .
ذكرى: تنهدات ) الله يبدل محبتها بالصبر
نورة: راوية مسكينة بقااات فينا صعيبة نهار العرس يتقلب
فاتح : المكتاب كيتصرف
ذكرى : كلشي يتعوض ماتجيشي غير فالصحة
ياسين : فشرود) كنتي داك النهار ... شمن مشكل كان عندك مع طارق؟
ذكرى: تبسمات ) ااه.. داك النهار ماكنتشي عارفة شني واقع دخلت على اساس الحينة دىعروسة وزغرت ليها(حطات يدها على صدرها) من لفرحة زغرت ليها وهادا هاد طارق عيط ليك قالي علاش تزغرت بقا فيه الحال ... عذرتوو من حقو انا غلطت بلحق سوء تفاهم مازدناشي كبرنا الموضوع كتار
ياسين: امم... كتوقع
نورة: بحماس) ايوا فين غبرتي فاين كنتي
ذكرى: انا خصني نمشي (نايضة) غنخليكم هاد الساعة
فاتح : وقف معاها) خليك مزال شوية باقي الحال
ذكرى: لاااالا خصني نمشي يالاه يالاه تابعني بزاف دشغل والله
نورة: صافي ماشي مشكل انا غنبقا مع ياسين
ذكرى: بغات دوز ) غير سمحو لي ساعة اخرى نشاء الله
فاتح: مزال لحال عاد تسعود هادي يالاه جلسنا
ذكرى:غدا الصباح خدامة خصني نفيق بكري
فاتح: واخا خدامة كاع خدامين جلس جلس
تبسمات كتقلب فين تجلس وقالت
ذكرى: غير حشمت منكم والله لعضيم غنجلس شويش ونمشي
جلسات دارت رجل على رجل كتنهد سكتات وياسين كيطلع فيهاويهبط فتفاصيلها
فاتح:كيشعل كارو) فاش خدامة ؟
ذكرى: فكلينيك الفردوس .. طبيبة د تجميل
طلع فيها ياسين وهبط وقال بصوت عليض والدخان خارج من فمو
دابا نتينا عاملة تجميل
شافت فيه وضحكات: لاااء مايحتاجش
قالتها وشافت قدامها كضحط
كورها ييدو فالهوا: نتينا هايدا طبيعية
فاتح: كترتو علينا ابنات ليوم متبقيناشي عارفين الطبيعي من لي ماشي طبيعي
نورة: ماشي كووولشي عاااود
ياسين: هز حاجبو) كتحيدو طبايع لاطراس وداكشي
ذكرى: ااه كنعملو لو تجميل ولا لايزر حسب لاطراس كيفاش عاملة
دور وجهه وراها عنقو : هادي تعرف تحيدها؟
كانت عندو طبعة طويلة نازلة مع عنقو بحال لحرقة شافتها من بلاصتها مربعة يديها
ذكرى: حرقة ؟
ياسين: قلب وجهه كيشوف فيها) بحال الماء لقاطع
ذكرى: ماشي مشكل نشوف؟
ميل راسو: اه شوف
ناضت مشات عندو وقفات خدا كتفو كتشوف فيها مزيان وهوا مهبط راسو مايل جنب ودوزات صبعها كضغط عليها ووقفات
ذكرى: ماتحتاجشي لعملية غير ليزر وصافي ماتبقاشي
ياسين: بملل) وا قااالوها لييي اناخصني شي حاجة تمسحها فنهار واحد مانبقاشي غادي جاي
ذكرى: ضاروري خصك الحصص راه كتقشر وتعاود وتعاود حتى مكتبقاشي ديك الطبقة كترجع موطعا وحدةجديدة
ياسين: يالاه ارالي نمرة غدا خدامة قلتي ياك (مد ليها تيليفون)
شداتها كتقيد : اه ان شاء الله
شد تيليفون صونا ليهاوحتى هي متجلساتش هزات صاكها كتبسم وتشوف فيهم
ذكرى : ايوا هادا الجهد غنخليكم دابا
بقات غير كتشوف فيها نورة بنص عين وطلع وتهبط .. اما ذكرى سلمات ومشات كضحك بوحدها جبدات تيليفون كتقلب على نمرتو قيداتها ومشات بحالها.
بقات نورة شحال جالسة مع ياسين وفاتح فالاخير ناض ياسين شار ليها براسو مشات معاه وهاد المرة كان جا فالموطور..موطور واشمن موطور كيخلع قدو قداش بزز باش ركبات بديك الكسوة كضحك عطاها الكاسك ولبس حتى هواالكاسك وطار بيها تقول كيطير فالسماحتى لباب العمارة ونزل بالموطور تحت لباركينك ديالطموبيلات.
دخلات ذكرى للدار وكانت خاوية غير هي ، شافت سبابطها فالباب والبلاكار لي كان جامعهم حدا الباب مكاينش وخرجو عينيها لاحت الصاك على سداري وطلعات نيشان للبيت لي فسطح كدق بالجهد وضرب حتى واحد ماحل ليها .. هزات كلامونيط بدات ضرب فالباب حتى هرساتو ودخلات كتقلب بعينيها فداك البيت لكبير مجهز بتلفازة وناموسية وحمام متقولش عليه بيت فالسطح ، لقات لبلاكار تما وبدات تخويه من صبابط وجراتو كدفع بالقوةوالغدايد رداتو للدار كتجمع صبابطها وتسوط ورداتو بلاصتو ومشات توجد راسها لبداية اسبوع عملية من جديد .
دوشات ولوات عليهاالفوطة على شعرها وخرجات لابسة بيجامة مزيرة مفزة جسمها المنحوت سمعات الزديح ومشات كطل لقات مرت خوها كتزدح وتخوي فيه وكانت مرت خوها مرى واشمن مرى قدهاا قداااش
ذكرى: شكتعماااال معامن تشاورتي تقيس ليا لحوايج ديالي
عايدة: علااء لي شراااه وهوا قالي مشي طلعو نلبيت
ذكرى: شراه علااء قبااال ماتجي نتينا وانابيدي شريت تلفازة لي عندكم فالبيت وهزها طلعها ماهضر معاه تا واحيييد
عايدة: ايوا ملي يجي خاك هضر معاه
بغات عايدة تهز البلاكار وناضت ذكرى كتجر وعايدة كتجري ودفعني ندفع فاللخر سمحات ليها ذكرى فيه وطلعات كتجري للبيت دفعات الباب بالجهد ومشات قلعات ديك تلفازة من لحيط جراتها بالفقصة نازلة بيهاوغير شافتهاعايدة ناضت ليها وناضو تشادو عاوتاني بحال ديما وعطيني نعطيك دقة فيا دقة فيكوتلفازة مشات تكركباتمعالدروج وتبعات ليها ذكرى حتى البلاكار وبقاو مشادين هاكاك حتى دخل علاء على غفلة سمع غواتهم .
كان متوسط الحجم عندو شوية دلكرشة وزوين فوجهه مشا كيجري فكهم وجا من جهة مرتو بغا يموت فاش شاف تلفازة فالارض وبدا يهز عليها يدو ويغوت
: علاء: مال د٠٠٠ ديماك عاملة علينا باربو هنايا ولا
ذكرى: ماتقربليشي للحوايج ديالي شنوجابها عندي
علاء : اناشريتو وانا قلتها مشي طلعو دابا شني خصك
عايدة: والله ماتبقا فيك يا لق٠٠٠٠ هااهيااا عقاال
ذكرى: لق٠٠٠هي نتينا لقطك من زناقي وانا بزااف علي
ماجات فين تكملهاحتى جمع معاها علاء بواحدطرشةمن لتحت لفوق
علاء: ياالاه زييد هضر
شدات حنكها ودخلات كتجري وتجمع شعرها فالفوطة بدات كتبكي حسات بالحكرة وماعندها لمن تشكي من غير واحد خالها مطلق حتى هوا وساكن بوحدو
: بدات كتبكي عليه وكان مشغول وفبلاصة ما يعيط لعلاء ناض عيط لسعيد عرق ليه فتيليفون حتى رجع سعيد للدار كيجري ريحة الشراب عاطية منو عامر ومشارجي طلع نيشان للسطح..سمعاتو صوتو وناضت كتجري تبعاتو فالدروج لقاتو كيزدح الباب وتخلعات ،، دخل هاجم على علاء ومرتو كيسب ويعررق ويهز ويلوح على برا
سعيد: خرج ق*** د عليا من داري... خرج دي ل٠٠٠بة ديالك عليا يالاه
عايدة: لق٠٠٠ة هي بنتك
عطاها سعيد طرشة مالقا علاء مايفك فيهم وذكرى كتشوف مقنتة مع واحد الحيط والصدع نايض وكلشي كيغوت وكلشي كيزدح وباها كيدفع فولدووفشراوطهم وبنتو صغيرة كتبكي .. الصدع ناض ديال بصح وعيطات ذكرى لخالها يفك ديك الحريرة جابتو كيجري طلع مع دروج كيطير تدخل كيفك ودفع علاء وقالبصوت غليض
عبد المالك : وعلااااش ضرب ختاااك على هاد بنت السوق هي لي عملت فيها يدها
عايدة كانت قبيحة ولسانها مبري منها كيعطيوها كلمة كتعطيهم عشرة مكتحشم مكترمش جرات بنتها وجراتو حتى هوا جمعو حوايجهم وخرجو من الدار
: بقا عبد المالك وسعيد وذكرى فالدار جالسين مور داك الصدع
عبد المالك: خليييه يعرف راسو معامن .. مجوج ليا السبتاوية الخانزة بنت السوق
سعيد: لسانو تقيل) اناااا لاا باقيييشي يوريني كمارتو يمشي معاها حتى لجهنم
عبد المالك : شار بيدو لذكرى) نوض مشي دنعس وديها فالخيدمة ديالك عمل الفلوس ومشي سكن بوااحدك حسان ليك
ناضت مشات خلاتهم بجوج وسعيد جيد سبسي كيعمر وعبد المالك كيشوف فيه محاملوش
عبد المالك: عمل عقلك اصااحبي ... شرفتي وباقي كدور ماقنعتيشي؟؟ مخلي العايلة عزبة بواحدا فالدار وكدخل سكران وتخرج سكران وتخلي الباب فتوح عليها ماخفتيشي
سعيد: بتحدي) فوياااخ خليت الباب مفتوح
عبد المالك : ضرب صبعو فالطبلة) خليتاااه مفتووح ليل كااامل حتى خرجت العايلةنلخيدمة جبراتو مفتوووح غير مردود .. وااعمل عاقلاااااك هانتينا دابا بقيتي كطير حتى عملتي لكسيدة وجبرو لك السبة جراااو عليك من لخدمة... بقااا عوال على ذكرى توكلك وتشربك والعايلة شالله قالت بسم الله ماهزات حتى راسها
سعيد: كافحت عليها حتى رجعت طبيبة وانا باباها ..
قاطعو بغضب: نتيناااا كافحتيييي نتيناااا؟؟ نتينا كنتي كتبرد الجنون ديالك فيهابالعصى عاد دابا جاك تقول باباها
: ربي عطاااك عايلة متبتة مكتجيبشي المشاكل بعقلها وكتقرا مزيااان ونتينا خصك تخرج عليها ... خرج عليك القمر ... كاقدك دابا عملتي ليها لعيادة تخدم وتزيد لقدام ماتبقاشي تراسة عند الزرهوني كيلوح لها جوج دلفرنك ويسمعها الهضرة .. حساب لك الطبيبة غير عتخرج غتجبر صنادق الدهب والفلوس كيتنساوها هه.... عمل عقلك اصاحبي خلي عليك العايلة تجمع شوية دلفلوس توقف فيهم على رجليها ونوض تخدم على راسك راه كبيير ... وخلي عليك هاد الويل راه خرج عليك
نفس الصدع نفس المشاكيل نفس الروتين من نهار حلات عينيها وهي كتشوف نفس المنضر ، الاب سكايري وقمار والولد يدور يدور ويجيب منتف والام لي كانت جامعاهم وصاينة البيت ومتولة وهازة الدار صبرات حتى عيات وشافت ولادها كبرو وطلقات مشات تزوجات راجل اخر وخلات ليه الجمل بما حمل وتفكات وشرات راحة بالها .
رجعات للروتين البسيط ديالها وخوات ليها الساحة تهنات وناضت طلعات لداك البيت لي فسطح بغات تهنا حتى من باها وهترانو فالدار ومشات جمعات البيت خملاتو تخميلة خفيفة وخرجات ماتبقى من اغراض مرت خوه لبرا وبدات كتستف حوايجها وترتب صبابطها وعطورها ومكياجها حتى سمعات باها كيعيط
سعيد: ذكرااااا اذكرااااا فاين تينا؟؟؟
ذكرى: هنايا ابا طلعت نسطح
طلع عندها كيمسح يديه فسروالو: شكتعمااال؟؟
ذكرى: صافي غنجلس هنايا موطع متيسااع على بيت نتاحيت
سعيد: انا ماشي (عطاها بالضهر ورجع) عند واحد لخمسين الف فرنك
ذكرى: مناين عنجيبا اللخر دشهار هادا
سعيد: عوشرين؟؟
ذكرى: تنهدات كتقلب فالصاك) هي لي عاندي
جبدات ميتين درهم عطاتو ليه مشا ودخلات سدات عليها كتقاتل مع ديك التلفازة على الله تخدم واخا فيها النص فالشاشة كيبان مشقوق المهم تونسها . حيدات عليها ديك البيجامة لقات راحتها ومشات تكات على نموسية شادة تيليفون كتهضر مع صاحبها
ذكرى: كيف نتينا عاد دخلتي؟
عبد النور: عاد وصلت وحشت نشوفاك
ذكرى: غدا ان شاء الله مور الربعة دلعشية
عبد النور: خرج هاد الليلة نتعشاو
ذكرى: عندي الشغل حتا لغداا
عبد النور: وا خرج خرج متعطلشي
ذكرى: واخا ههه
ماكان فيها اللي يخرج ولاكن الضروف كتحكم عليها تخرج، الريال مابقاش كيدرو وعبد النور كيصرف عليها واخا مزوج عارفاه مزوج كدوز معاه الوقت كما حتى هوا كيدوز الوقت .
نشفات شعرها بسوشوار قدام المرايا كدندن قدام المرايا خلاتو على طبيعتو مطلوق مقلوب جنب ولبسات سروال كحل واسع من لتحت. مزير من لفوق وقميجة ساتان واسعة داخلة فالسروال من لقدام ومرخية شوية على المؤخرة ، كان لباسها نوعا ما مستور قليل فين كتلبس شي حاجة معيقة بزاف وكتفضل تلبس المستور شوية كتحس بيه كلاص وانيق، رشات رويحة وهزات صاكها وعكرات بالاحمر المايل للبرتقالي ونزلات مع الدروج حسي مسي بشوية كطل مالقات حتى واحد وكملات طريقها مع جوايه العشا شدات طاكسي صغير نيشان للسونطر ونزلات كانت قدامها رانج روفر كحلة كتشعل ركبات كتبسم وسلمات عليه من الوجه .. كان راجل اربعيني وسيم بحال كاع شبان ورجال الشمال.. اللحية والبيوضا والصوت غليض مفركس كتبان عليه لاباس عليه
ذكرى: بضحكة خفيفة) على سلامتك عااد
عبد النور: عااد ولاهيلا... بقات بلاصتك
ذكرى: طولتي فهولاندا عاد طلقوك ههه
عبد النور: كان عندي الشغل
ذكرى: ومراتك جات معاك؟
عبد النور: وانا ماجي عندك كتقولي مرااتك
كان كيكره تقوليه مرتك ولا تفكرو فيها وهي مرة مرة كتعمد تقولها تفكرو فوضعيتو اللي مكيحملش .
دورات زجهها مبسمة مشاو لمطعم كبير وجلسو حطو ليهم العشا .. نقبات شوية ورجعات اللور
عبد النور: زييد كمل
ذكرى : مافياااشي الصراحة(حطات يدها على معدتها) ماعندي خاطر
عيد النور: قرب منها )نديرو ليك الخاطر شعندك
ذكرى: غير علاء عاوتاني بحال ديما .. دابزنا وهرس كلشي وخرج خلا ليا البيت مخرررب
ذكرى عمرها عطات راس الخيط لشي واحد او بينات ليه شنو هوا بالنسبة ليها،، وحتى واحد ماعارف وضعيتها المادية الحقيقية ، وعبد النور من نهار عرفها وتعرف عليها طبيبة زادت اكدات ليه انهم مامخصوصينش مامحتاجينش وماواقفة على حتى واحد باش تير الشفقة ديال شي واحد ، بل كتخلي بلاصتها راقية والمستوى عالي وكل مرة كتبغي تبين لعبد النور انه صديق واخا هوا كتعصبو هاد المسألة وكتبان ليه مرزنة وبعقلها ومتبتة وهضرتها تقيلة ولقب الطبيبة زاد تبت هادشي اكثر .. الشيء لي كيخليه يسعى لارضائها دائما ومكلاصيها مع الناس الراقية وماقادرش يشوفها على انها عاهرة او وحدة مساليا بحال اللي كيتلاقا بيهم ديما وكيقلبو يلسقو بأي طريقة..طريق ذكرى مختالفة على المعتاد فاش كيجلس معاها الواحد مكيحسش براسو جالس مع الرخص او يزعم عليها ويبدا يرمي يديه فالسما وتجي فين ما بغاات .
عبد النور: مزال مابغا يعمل عقلو
ذكرى: اييوا لفشوووش .. شغتعمل
عبد النور: وا كوول ماكليتي والو
ذكرى: والله متقادييت ماعنديشي لخااطر مااراا هاد النهار.. عملت لك خاطرك وصافي اما انا كنت غنعس (تيليفون كيصوني) بلاتي نشوف شكون... هادي صاحيبتي (ردت فتيليفون) االوو حسناء كيف نتينا ... لاباس ؟ شعندك مخلوعة ؟؟ ياك لاباس؟؟ غير قول قوول والله حتى تقول.. غير ماشي مشكل شحااال؟؟ شحال خصك؟ دابا دابا ؟؟ دوز عندي والله تدوز تاخدها دابا يالاه انا نصرد ليك لوكاليزاسيو.. بسلامة احبيبة
عبد النور: شنو واقع؟؟
ذكرى: على عجلة كتقلب فالصاك) صاحيبتي باباها عمل كسيدة هزوه كلينيكة وطلبو ليهم الشيك فيه عشرلاف درهم مسكينة بقات فياا ماجا عندي .. لاحولة ولا قوة الا بالله
بدات تقلب فالصاك وتسوط وقالت
ماجيبتشي لكارني دشيك مشكيييلة هادي (شارت بصبعها) عند شي عشرلاف درهم حتى لغدا الصباح ندوزها ليك
عبد النور: كاينة كاينة
جبد الكارني بزربة وهوا كيمضغ عمرو مدو ليها بكل ثقة شداتو كتنهد
ذكرى: شووف دابا المشاكيل فمن كتجي غير فالدرويش
عبد النور: واكوول نتينا غتسخف ماكليتي والو نقولو ينزلك شي حاجة اخرى
ذكرى: لاالا ماقاراشي طلعات لي الماكلة دريسطورات فالراس بلخصوص الماكلة دليل كتبيني فايقة
كملات جموعها حتى صونا تيليفونها وخلات صاكها حداه نايضة وقالت
ذكرى: انا ماجا نمشي نخرج عندها راها برا نعطيها الشيك ونرجع
مشات بشوية عليها كتقاد شعرها خرجات على برا وشافت وراها بنص عين بان ليها مزال جالس وخرجات ضربها الريح وخشات الشيك فصدرها ورجعات عندو مبسمة جلسات وتكات دايرة رجل على رجل
عطاها المليون وهوا ضاحك وراشقة ليه وسدات على الموضوع جلسات كتجمع هي وياه ويضحكو وكان عبد النور بااغي يتزوج بيها مللي شافها معقولة وماشي ديال الفراش وماشم منها والو وفوق هادشي زوينة والجلسة معاها حلوة فاتحها شحال من مرة فالزواج
عبد النور: ومالك المرى الثانية ديما كتكون اللولة فكلشي
ذكرى: حركات صبعها بلا) لااالااا انا ما نقولك طلق ما نقولك نتزوجو خلينا اصدقاء اعبد النور ههه
عبد النور: عاوتاااني الاصدقاء
ذكرى: ايوا المهم (شافت فجهة اخرى مبسمة ) عند وليدات والمرى مزيييونة تبارك الله علاش بغيتي تزيد
عبد النور: السؤال لي ماعندووشي الجواب... انا كنرتاح معاك اذكرى والله لعضيم رجعت فيا الروح فاش جلست معاك
ذكرى: نعل الشيطاان هههه(قلباتها ضحك) انا راه خصني نمشي تابعني الخدمة الصباح
عبد النور: نتيتا خاصك العيادة دياالك متخدمشي مع الناس نتينا ماشي ديال الخدمة مع الناس
ذكرى: وايييه ان شاااء الله .. راه ساهل من غدا نعمل العيادة بلحق عاد تخرجت فايناهيا ليكسبيريونس والخبرة هادشي كتستمدو من الخدمة مع الناس حتى تولي بوووفيسيونيل وعارف شنو كاين وكيفاش عاملة الخدمة فماطع اخرين و الاثمنة وتحتارف فالتعامل مع الناس عاااد كتجي ديك ساعات العيادة باش تقدر تسيرها بطريقة صحيحة ماتبقاشي غير كترون وصافي فهمتيني .. عاد تخرجت باقي الحال
عبد النور: دابا خليني من الخدمة نتينا تعرف... توكل على الله ويالاه نزوج بيك
ذكرى: ههه بسرعة ههههه انا خصني الوقت اعبد النور.. داكشي بالترتيب.. وقلت ليك ما نزعمش على الثانية
عبد النور: وافكر فيها مدخسر والو
ذكرى: وا نوض وصلني راني تعطلت يالاه ههه
هزات صاكها ناضت وناض وراها يوصلها وكله ثقة فيها كتبان ليه غير هي من دون البنات واكثر شي فاش طلبات الفلوس اول مرة وثاني مرة على اساس غير سلف وتحججات ليه بحوايج اخرين ورداتهم ليه صافي تشد شدة وحدة ورجع كيحشم يشد من عندها من بعد واخا كتعاود وتعاود كيعطيها بالفرحات عليه وكترجع ليه بالشيك بلعاني تردو زعما وكيرفض وحتى هي مكتعطلوش .. ماشي بحال اول مرة وثاني مرة حلفات حتى تردهم وبزز شدهم .. اما من بعد رجعات كدير غثر الواجب
خدام كيدك ويدكدك هاز ليها رجليها فالسما مكيرحمش ومكاين غير الطحن وهي مخرجة عينيها مكمداها كوحوح وتشوف فيه حتى كمل وناض نصل داك الواقي مشا للدوش طلق الماء عليه دغيا دغيا وهي جالسة فبلاصتها شادة تيليفون مضوية على انوثتها وكتشوف اش واقع وتتألم ، ناضت جمعات رجليها بزز قبل ميرجع يلقاها هاكاك مفرقة كطل ولبسات حوايجها دغيا حتى خرج لاوي عليه فوطة كحلة وكيمسح شعرو الاشقر مبوكص ديال بصح وشي شوفات عندو مضايرينيش وعاد الابتسامة الساخرة كيوضفها فكلشي ، بقات غير كتشوف فيه ومشات عندو عنقاتو وقالت
نورة: دابا شنو نوع العلاقة لي بيناتنا؟ نتينا عارف راسك اول واحيد
ياسين: هاحنا مع تيسير الله
لبس حوايجو وخرج كيقلب على سبرديلتو وتيليفون ما سكتش وهوا كان مشغول عاد تفرغ ليه كيهضر وبقا شادو فودنو كيهضر معاها غير بلعينين خرجات معاه وكتسناه يكمل لمكالمة باش تهضر لاكن ماكملش الهضرة وقف فسونطر ومد ليها شي بركة وقال مبعد تيليفون على ودنو
ياسين: دابا نعيط ليك دابا نعيط ليك..
تنهدات كتأفأف مالقات ماتقول وخرجات مشات بحالها كتشوف فالفلوس وتحسب في حين وصلات ذكرى لحومتها المتواضعة.. حومة نقية فدريسية والناس نقيين غير باها لي تالف ليه العقل ديما مسمع عندهم الجيران. حطاتها الطاكسي حدا الباب مع لحداش ونص ودخلات طالعة فالدروج للطبقة ديالهم لي فوق الحوانت وسمعات هضرة باها وطلات من الباب لقاتو جالس كيشرب مع جوج صحابو ويلعبو لكارطة بيناتهم ويكميو فجوانات .. حيدات صباطها وكملات طالعة للفوق وسدات عليها مزيان من لداخل ومن برا وكتبات مسج لخالها
ذكرى: وشووف دابا ماجي بسكايرية ندار كيشربو وانا بواحدي واش مخافش عليا؟؟ مخافش عليا من هاد الوحوش انا شي مرات كنشك واش با
سيفطاتو لخالها وفعلا كانت كتكفر من افعالو وتصرفاتو وكتعيش الرعب معاه واخا عمرها وقعات ليها شي حاجة لاكن باها كان منكدها عليها ديما . بغات غير تنزل تقلي شي جوج بيضات تاكلهم تسد بيهم الجوع والشهوة ديال ديك الماكلة لي تحطات قدامها فالريسطو لاكن والو متقدراتش تهبط حتى ندمات علاش ماجابتش معاها شي حاجة من زنقة كاع كن حسابها غتلقا لي تلقا.طرقات مزياان ولبسات بيجامتها ومشات بلاصتها نعسات حتى سمعات الدقان فالباب وفاقت طافجة
قربات من الباب مخلوعة شكوون؟
عبد المالك: فتااح اذكرى انا حبيبو عبمالييك
فتحات مخلوعة ويدها على صدرها:اوااعدي شحال تخلاااعت!!!
عبد المالك: جمع الحوايج ديالك يالاه معايا ندار
بقات كتشوف دورات فدماغها وجمعات لي يكفيها ونزلات معاه غادي كينكر فالدروج حتى خرج سعيد متفاجأ كيشوف فيهوم ويسول
سعيد: شنوواقع
رد عليه عبد المالك وهوا نازلمعالدروج متمر : ذكرى عتمشي معايا ندارحتى لغدا عااد ديك ساعات نهضرو،، مشي مشي كمل على لقصارة ديالك
هبطو وبقا سعيد المستهتر غير كيشوف ورجع لبلاصتو . اماذكرى ركبات مع خالها لي ساكن غير هوا وولدو وعندو ولد شديد التدين مكيبانش كاع وملتحي ودخلات عطاها عبد المالك بيتو باتت فيه
صبحات فلكلينيك اشيك وحدة فطبيبات المبتدآت .. ذكرى الجوهرة النويويرة كتنور عليهم داك لكلينيك وكن مكانش مولاه مبنت كن شافت ليه شي تخريجة ديرو فالجيب حتى هوا ،ساعا طلع مبنت واخا لباسو رجالي تصرفاتو مبنتة وباه مول شي على برا.. كان كلينيك غير صغيور بحال شي فيلا وهي كلينيك ماشي واو لاكن خدامين فيه جوج طبيبات اخرين مع ذكرى كل ما كيتعلق بالوجه الجلد وفنفس الوقت كيعاونو الطبيب فالعمليات.
لبسات طبليتها البيضاء وبدات الشغل وعلى بالها اتصال ياسين وتسناتو لاكن ما عيط حتى كانت هي خرجات ومشات مع صحاباتها سماح ونورة لواحد لغيسطو يبدلو الجو شوية وكانت مشهية شي كاس ديال الروج وتجمع مع البنات وضحك
ذكرى: تصاحيبتي مع خاها دراوية صافي ههه
نورة: فكرتييييني عطيني نيمرة ديالو عطيني ماعنديشي
ذكرى : اوااعدي الصاحب ديالك وماعندكشي نيمرة ديالو ههه
سماح: كتمازح
نورة: مسحتها بلغلاط عتيها لي
جبدات ذكرى تيليفون فيدها يالاه غتقلب على النمرة طلع ليها كيصوني وقطعات الحس شافت فنورة وشافت فتيليفونها وناضت
ذكرى: انا ماجا البنات
خلاتهم جالسين ومشات لواحد الشرفة كطل على الشارع ردت عليه
ردت كتشوف فواحد المرايا وتقلب فشعرها مبسمة بتلقائية
ذكرى: االوو ياسيين
هاديك ياسييين واخا كانت تلقائية خرجات من فمها بحال لعسل فيها شلا حنان وذفىء
ياسين: ها د ياسين عنداك داافية
ذكرى : ضحكت بنعومة) ههه كيف نتينا لاباس ؟
ياسين: الحمد الله .. شكتعاود كلشي مزيان
ذكرى: مزيان الحمد لله .. ماجيتيشي نلكلينيكا
ياسين : ماعليييش ... نتينا مساليا دابا نتلاقاك؟
سكتات مطولا عضات شنايفها فكرات فيها وقالت
ذكرى: جبرتيني فطريق ندار خاي كيتسناني فشي شغل
ياسين: امم... غتعطل؟
ذكرى : ماعرفتشي حيت كنعس بكري
ياسين: امم .. شحال هاد بكري؟
ذكرى : منقدرشي نزيد فوق تسعود ههه
ياسين: واصافي خلي حتى لغدا
ذكرى: غتجي نلكلينيك؟
ياسين: لا غتعيطي نتي فاش تسالي الشغل ديالك
ذكرى : ان شاء الله
ياسين: يالاه تهلا فراسك بسلامة
قطعات وبقات واقفة كتخمم ودورها فدماغها عرفاتو ناوي على علاقة معاها وشي علاقة عابرة تسالي فست شهور اييلا طولات، على قلة البنات والق٠٠٠ . وهوا عاطي للعين كي الوقفة كي الزين ولعينين والصوت حرش والفلوس من لفوق هه مغناطيس ويجر اي وحدة فطريقو غير بشوفة، زعما غيجي حتى ليها هي ويدير عقلو كاع هادا زهر عندها ، عرفاتو بغا يدوز بيها الوقت وياكل ليها الحلوى. ويحيد شهوتو منها ويقلب وجهه .. واخا ماكرهاتش والى تبعات شهوتها ٩تى هي واعجابها غادي تخرج خاسرة .. خاسرة خاسرة اللهم بالعز وتبقا حسن ملي عرف قبل منها، بلا متحشم راسها معاه وهي مكترضاش ونفسها حارة وخصوصا قدام الزين والفلوس. اذا شنو المعمول؟؟ هادا خصو يتشد شدة وحدة مايقنعهاش هي ست شهور ولا عام .. خصها شي ربطة معاه طويلة حتى تقول هي قنعت وشبعت
كانت غتعطي النمرة لنورة لاكن تراجعات وجلسات دايرة رجل على رجل كتشوف فتيليفون
نورة: شادة تيلفون) عطيني نيمرة دياسين الزاين
ذكرى : ماجبرتاشي نسيت ماقيدتا... تخلطات لي مع المكالمات
نورة: اوااعدي وعلاش ملسجلتيهاشي فاين غنجبروه عاوتاني (في حيرة) متأ.. كنت عوالة عليك الصوحبة والله
ذكرى : ايييوا شغنعمل نسييت .. كنت مشطونة
جلسات نورة دايرة رجل على رجل ومتكية على ركبتها كتخمم ويدها على خدها
نورة : كيفاش عاوتاني غنجبرو دابا يالاه
كتخمم وعندها احساس مغيعيطش ليها لاكن عندها امال كطفي بيه داك الاحساس،، عارفاه شكيسوا وعارفة غيكون كيعرف شحال من وحدو وشووف تشوف يقدر يكون طايح كاع فشي وحدة ولي وقع بينها وبينو مكانش كاع مخطط ليه وبغاتو يكون ليها والطامة الكبرى طاحت فيه عمية وحتى داك النعاس عاجبها وكتشوف هادي هي الوسيلة لي تخليها شاداه ، مكان فيها مايتعاب وكانت كاملة مكمولة شكلا .
جلسات معاهم ذكرى شوية وناضت مبسمة هزات صاكها
ذكرى : انا مشييت ... خصني نعس راكم عارفين
سماح: سعداتك اذكرى كتينعس مع تمنية انا منقدرشي
ذكرى: انا كتفيق بااااكري ههه
مشات بحالها ركبات فسيارتها ونيشان لدار خالها
ذكرى من نهار حلاتها عينها وبيرها غارق مزيان حتى واحد مكيعرف عليها شي حاجة وكتعطيهم غير اللي بغات ومسلكها فقط ، حتى فاش كانت كتقرى كانت ساترة راسها متقول ليهم لاحفضت لاوجدت لا والو وديما كتسمع وساكتة .. عمرها عاودات على حياتها وشنو عاشت وشنو كتعيش والمشاكل لي عندهم من غير الى سمعوهم الجيران مدابزين وطول الوقت كتشوف وتسكت وحضرات على الضروف لي دازت منها مها والمعانات لي عاشت مع راجل قمار مدمن مستهتر غير حال فمو وغادي مكدم والعجيب انه طاح مع مرى نقية بزاف ومتولة ومحافضة على جو البيت وصابرة ختى ضبرها الصبر وكبرو ولادها ورباو الكتاف وجات ذكرى شجعاتها على الطلاق ودخلات ليها الفكرة لراسها وقنعاتها انها قادة براسها ومابقا ليها علاش تهز هم شي واحد فيهم وكل واحد قادر يتحمل مسؤوليتو ويهز راسو كتر منها ، قتانعات الام وطلقات ومشات رجعات عند خوها عاشت معاها شي شهور فقط من بعد ضبر ليها فراجل عندو مشروع مطبعة مطلق ومعاود مكيولدش وتزوجات بيه ومشات بدات حياة اخرى تقول غير هي لي مزوجة ، راجل واشمن راجل.. قدها تقريبا وبدارو على حقها وطريقها وبرزقو ورجعات حتى هي تبدل وتنوع فجلالب والعصري وتخرج مع صحاباتها للقهوى تجلس والصلاة فالوقت وداخلة سوق راسها وزيانت وصحاحت تبدلات بزاف ورتاحت وومشات خدمات فمكتبة صغيرة فتحها راجلها جنب المطبعة وجالسة مقابلها هي بوحدها كدوز فيها نهار لابز يصدع ليها راسها ولا عكوزة تقابلها.. لقات لعكوز لعكوزة اصلا ميتين ولا تابع لا متبوع وعاد زيانت ليها الحياة وبدات تعيش كي ناس لي عايشة، اما ذكرى مللي طمنات على مها عاد تهنات وكانت هي المشكل الوحيد فحياتها وهازة ليها الهم وباغا تخدم وتكون شي حاجة غير باش يتفكو من ديك العيشة دلويل والمشاكل لي كل مرة نازلة على راسهم ، ها الراجل دار كسيدة .. ها الولد شدوه مهرب الشراب ها هوا عاوتاني محلفين فيه البزناسة هاهوا خارج ليهم بالكرش ها الراجل باع الطموبيل مشات فالقمر وهاهوا عاوتاني سرق ليها الذهب باعو ، ها هوا كيهرس ويديك فالاتات لي بزز باش قوماتو المرى وتولاتو وبلا الصدع والمشادات مع ولدو كل نهار وكيجري عليه سبعين الف مرة فالنهار و البنت الى هضرات يضربها والى جات من جيهة مها يشركها معاها وشحال من مرة جرا عليهم كاملين بالمرى والبنت والولد ومرتو للزنقة مشاو كلهم عند الخال عبد المالك جلسو سيمانة حتى عفا عليهم الله عاد رجعو بحالهم
كانت عكس صحاباتها تماما ومع ذلك سادة فمها ومكتبغيش الشوهة والفضيحة واخا هي قدها وقدود ومكتخافش لا من بنادم ولا مخزن .. لاكن كونها طبيبة خصها تحافظ على ديك الصورة لي عندها وعاطية انطباع نضيف وراقي عليها مع العلم جلاخة وعندها قابلية خطيرة لدرجة تقتل وهانية زايد ناقص وهادشي ابدا واش كيبان عليها ولا يقدر شي واحد يشك فيهاوفأفكار الاجرامية لي شحال من مرة فكرات تصفيها لباها ما مرة ما جوج فاش كان كيتعدا على مها لدرجة طحنات ليه الزاج حتى رجع غبرة وحطاتو ليه فالكاس دشراب وهزوه لسبيطار عتقوه وعاودات نفس الشيىء وطحنات ليه العصير تفاح مع كمية كبيرة ديال البذور تفاح القاتلة وتسمم وعاوتاني عتقوه وفلت منها شحال من مرة وردعات مها شحال من مرة وما وقفات ولا بردات حتى طلقات مها وخرجات من الدار عاد رجعات اللور خلاتو يدير لي بغا ومابقات حتى حاجة تمرضها وتفقصها ولي كانت هازة ليها الهم راه تفكات وعايشة حياتها
اما نورة وسماح عايشين حياتهم عادي جدا مكشوفين ماعندهم مايسترو. سماح كانت كان عندها مشروع بارا فاغماسي .. قرات مع ذكرى لاكن ماجابتش المعدل مزيان وتزوجات حتى هي بزناس كان لاباس عليه ماصدقش ليهم الزواج بجوج وطلقو وخرجات من ديك تطليقة بمشروع دايزو لكلام وربحات محل واخا ماشي ملك لاكن كان شاري الساروت بالملاين وكتخلص كراه ناقص لاكن كبير بزاف مساحتو كبيرة وعامر بالسلعة وكاع الماركات مدخلاهم وكانت عندها مرسيديس دارت بيها حادثة وحطاتها تصلح وغادية مقاتلة مع الوقت . اما نورة هي بنت الحومة ديال ذكرى صحاب من الصغر لاكن باها ميسور الحال عندو التجارة فلاتاث ماكتخدم مكتردم كيصرف عليها باها وهي لي بنت وسط ربعة دراري راخيين ليها كدير لي بغات ولي قاليها راسها ومفششة كتعيش الحرية .
صبح الحال مشات للكلينيك وكانت دايرة مع سماح دوب ليها الفيلر وتعاود ليها واحد اخر .
بالقفازات وطابلية جالسة على لكرسي شادة الابرة كضحك وشعرها مشدود بمقبط صغيور لور محلول ومدرج حتى للخصر وكتافها واقفين لابسة كسوة كحلة بالكول مثلت مجموعة عليها فوق الركبة غير شوية وسبادري معاها وتشكيلة ديال مجوهرات فان كليف فودنيها وعنقها ويدها
ذكرى: بقات واحدة صافييي
سماح: عملها لي هااايدة مقلووبة د روسية
ذكرى: قلبتهاليك اصاحيبتي جاتك مزييييونة(مركزة مع الابرة) .. غير تينا متبقاشي تمصهم لداخل ولا تضغط عليههم كيهرب لفووقي ياصاحيبتي كيهاجر ولا اذا بقيتي كتمصهم كيتدلااا ليك شنيفة لفوقانية
سماح: منعاودش صافي
ذكرى :صافي ساليت بالصحة
ناضت سماح شافت فالمرايا فرحانة عجبها الحال وقالت
سماح: يا ختيييي مضلوومة فهاد كلينيكة عراافتي شحاال مرة عملت فييلر مكيصدقشي هاالديااا.. كيخليو لي دقمي(فمي) مكتل تقول فيه حبوب نداخل... مضلومة يا صاحيبتي
ذكرى : كتحيد لقفازات) كنخدمو فالنهار علاين غشرة دالمرات رجع كيجيني ساااهل دابا.
سماح: (غمزاتها) تينا دابا عمل كليان من هاد كلينيكة وخرج مشي عمل العيادة ديالك كلشي يتبعك
ذكرى: ههه ان شاء الله نشاء الله
صونا تيليفون وطلات لقات ياسين وخلاتو هاكاك حتى جات خارجة راجعة بحالها عاد خسرات عليه مسج
ذكرى: سمح لي ماقدرتشي نرد عليك كان فيدي الشغل
ضحكات وقالت مع راسها : هادا بااااينة حطني فراسو
عاود صونا ليها وردات عليه بتبات هدوء
ذكرى: االو ياسيين
ياسين: بصوت غليض)نتي زعما لي عندك الشغل؟ امم؟
ذكرى: هههه ... فاش كنكون شابرة فيدي سورانك مكنقدرشي نهوز تيليفون
ياسين: خرج اجي لشكولاطي انا كنساينك يالاه
ذكرى: خصني نمشي للدااار بعدا
ياسين: سيري للدار واجي انا غنجلس نستناك
ذكرى: غنتعطل عليك شويييية
قطعات كضحك ومشات بحالها كتهضر مع خالها علماتو بللي غترجع للدار خصها حوايجها وخصها دوش وخصها شحال من حاجة وميصلاحش ليها ترجع عندو عاد كملات طريقها للدار لقاتها خاوية ومقلوبة سفاها على علاها . تخطاتها ومشات للسطح دخلات للبيت لقاتو متول كما خلاتو ودوشات على خاطرها وقادات الحالة ولبسات كسوة قهوية مزيرة طويلة حتى للكاحل وفيها فتحة فالجنب حتى للركبة ونص كم بالكول مثلت وسلسلة فان كليف مذهبة مضوبلة على جوج على عنقها مع حلاقاتها طوال وخاتم وكورميط وساعة يدوية خفيفة وهزات صاكها فيدها صغيور برتقالي مع صنيدلة خفيفة ديال زارا مسطحة بلا طالون فيها سميطات فالجنب بالبزيم وتعطرات مزيان حتى خرجات ريحتها من السرجم وحطات بلاشر مع مسكارا وطراساج للفم خفيف بني وكلوس كيكو وخرجات طالقة شعرها لي شنفات مدرج طبيعي عاطي لفوليم بلا بروشيغ قالباه للجنب نزلات ،ركبات طموبيلتها ومشات تلاقا بيه وتعطيه وقتو وقيمتو جهد لي يتيق راسو ويقول تزعطات وطاحت
وصلات للقهوى ودخلات بديك الفورمة كطيح الزرزو من فوق الصور ، القايس ميديوم والنحت والصدر مهزوز والمؤخرة بارزة لور شادة راسها والخصر رقيق وضيق الكرش مكدورش. لاكن ماشي كلشي طبيعي مية فالمية .. غير هي دايرة بحساب يبان طبيعي وخوات جناب كرشها من الدهون فلكلينيك فين خدامة وديقات الخصر مزيان حتى بانت المؤخرة وشدات عضلة المؤخرة للفوق تهزات وجاتها الفورمة هي هاديك متقونة كاع لي كيعرفوها كيحماقو على فورماتها وهي ناكرة انها دايرة شي حاجة ومابغات تعطي حتى لواحد اسرارها ومدوخاهم بلاصال لي كتمشي تريني فيه لدرجة الكوتش ديالهم تيق انها طلعاتها بالخدمة دالرياضة.
شافتو جالس مع رباعة ديال صحابو معاهم قشلة دالبنات فواحد الكوان مقربين الطبالي ومجموعين على الفوطويات والبنات وحدة تحنت لاخرى فاللباس والزين باينة عليهم مقزدرات مكيحشمو مكيعرفوه ، كيكميو وعاطيينها للضحك وتكركير . دارت راسها ماشافت والو واخا جات عينها فعينو رمقها داخلة لاكن مامشاتش عندهم عوجات الطريق كتشوف قدامها مشات لطبلة اخرى جلسات وناض طفا لكارو وهز سوارتو وتيليفونو كيخنزر بحال عادتو لا هوا لا لبزناسة كاملين .. تخطاهم والبنات كيشوفو فيه متبعين ليه العين حتى وصل عندها وبقات جالسة تبسمات ومدات يدها ليه سلمات عليه وجلس جنبها على الكرسي
ياسين: كيطلع فيها) متبغيتيشي تجلس معانا ؟
ذكرى : خليني هنا حسن مرتاحة .. ادا كنتي مشغول مع صوحابك مشي جلس معاهم ماشي مشكل
ضحك بلا ميهضر وهي كتشوف ليه فعينيه مباشرة وقالت ببسمة
ذكرى: قلتي لي اجي هانا جييت .. شني كاين ؟
صغر فيها عينيه : كيفاش شنو كاين؟؟
ذكرى: حيت ستانيييتك تجي للكلينيكة ماجيتيشي ؟!
دور راسو لجهة اخرى بالايجاب) غانجي غنجي... غير قلت نتلاقاو نشوفو شي حل اخر... من غير داك الليزر مكاينشي حل اخر؟
ذكرى: هادا هوا الحل الانسب... ولا خصك تشوف مع الطبيب يشوفها ويقولك واش تعمل العملية ولالا
ياسين: ونتيا ماشي طبيبة
ضحكات مدورة راسها: طبيبة ولاكن ماشي جراحة
ياسين: كيفاش زعما ماشي جراحة؟
ذكرى: انا ماشي تخصص جراحة... انا ديغماتو وتجميل بدون جراحة ، نعمل فيلر .. بوطوكس فول فاايس تكساس .. كلشي بالابر. بلخيوط مهم ماشي جراحة .. وحتى ازالة الدهون من الدقن وبزاف ديال حاجات داخل فيهم الشعر حتى هوا
شرحات ليه من نيتها واخا عارفاه مغيفهم والو من داكشي لي قالت مسايرها كيسمع وجايب داك الحوار غير سبب باش يتلاقاها وصافي
ياسين: امم فهامتك .. مزيان
ذكرى: ايوا تينا شنو كتعمل؟؟ شنو كتخدم زعما؟
ياسين: انا طبيب دالقلب
ذكرى: ههه جات معاك الصراحة
ياسين: ياك
ذكرى: فيها الضحكة وكتشتت النضر) ايوا عطيني شي دوا للقلب راه بدا كيضرني
ياسين: هز حاجبو) ايااه ... فوقاش بدا كيضرك
ذكرى : ملي شاف الطبيب ههه
دورات وجهها كضحك وجاتو على قلبو ضحك حتى هوا وطمع وقال
ياسين: الدوا موجوود
بدات كضحك وزيرات السمطة عاوتاني واخا رخاتها شوية باش متجيه معقدة كئيبة مملة وعاودات تبتات كتشوف فالقهوى باش تكسر الصمت
ذكرى : مزيييونة لقهوى تبارك الله ... المساحة ديال شي كلينيكة
ياسين: كيشعل كارو) دا لك عقلك لكلينيك
ذكرى : كنشوف شي بلاصة هايدا مزييونة ومبهجة وموقع مزييون كنتخيل كن كانت كلينيك كيفاش كانت عتكون
ياسين: فين كاين لكلينيك ديالكم؟
ذكرى: انا فكلينيك الفردوس فالخرجة حدا لكابو
ياسين: ااه .. مزيان...نتي ماشي ديال لخدمة عند الناس نتيا خصك تكوني مولات شي
ذكرى: قريب ان شاء الله غير نكتاسب الخبرة
ياسين: شار براسو) نمشيو نتعشاو فشي بلاصة حسن
ذكرى: مكنتعشاشي عاملة ريجيم
ياسين: نايض) يالاه يالاه نتعشاو قالك ريجيم
مد ليها يدو كتنهد شدات فيه نوضها ومشات قدامو خارجين وقصدات اتجاه سيارتها حتى تكلم
ياسين: خليها تما خليها نمشي فديالي
سكتاتها ومشات معاه شافت قدامها وااحد مولاتي طموبيل بينتلي باتور فالموف بجوج بيبان كتلمع وبدات تهضر غير مع راسها وتقول شووف دابا حاط قيمة خمسة دلعيادات ولا كتر غير فطموبيل وانا باغا غير برطمة واخا مكرية نحل فيها عيادتي وماقديتش .. زعما هاد البزناسة هادو لفلوس بااردة كتدخل بالقنطار حتى ماجبرو ما يعملو بيها وشكون هادا كاع لي قادر على طموبيل بحال هادي من غيرهم وكن ما هما فهاد الطنجة موحال يدور تما داك لحديد.
تنهدات ومشات ركبات حداه بالتاويل حسات براسها راكبة فمركبة فضائية الركبة فيها كتخلع هزات ليها القلب حتى بقات كتقول واش انا قد هادشي ولا لا .. واش بصح قادرة على هادشي لي راني ماشا فيه ولا كثرة الثقة فالنفس عامياني. واش بصح غنعرف ليه ولا غير كنكدب على راسي.. هادا مادام دخل هاد الوحشة لطنجة يعلم الله اش عندو وفين واصل وقد ما كثرات الفلوس كتكثر الخطورة وكيكثر حتى بنادم وكيثرو المشاكيل وحياة هادا يعلم الله شكون مجموع فيها وفين واصل بدماغو و جرأتو وزعماتو وزيد عليها مدوز الحبس من لفوق.
ركب حداها زاد فعفعها جا مع ديك الطموبيل وجات معاه الركبة وشافت فيه بنص عين تخلعات وقالت لالالالا هادا بزاااف .. بزاااف عليا كثير وغادي يمحي ليا تيقتي فراسي وشحال قدي نخبي ونستر قدام هاد المسخوط هادا كنشوف فيه كنتفعفع كنحس براسي والو ويعلم الله كي كنبان ليه وواش قدرت بعدا نوصل ليه الصورة لي بغيت عليا كما يجب ولا غلطت فشي حاجة .
كانت حدها شوكر دادي كترتاح معاهم حتى لقات راسها مع ياسين وماشي كما كانت متوقعة .. كانت كتبان ليها راوية ختو عادية نفس المستوى هي وياها واخا عندهم فيلا زوينة لاكن ماشي لدرجة نيفو لي شافت فياسين،، عمرها تخيلات توصل للبينتلي واخا عارفة البزناسة لكبار كيجيبو شي حديد كيخلع كيركبو فيه غير شي يامات وكيبيعو مكيطولش بزاف عندهم ومضروبين على بي ام والاودي والمرسيديس هادو هما لي كيطولو معاهم بزاف اما داكشي لوكس كيحيدو منو الشهوة و صافي كيبيعو ويدوزو شي يامات ويعاودو يجيبو لجديد وهي غادا.
تنفسات بعمق وسكتات قطعات لحس وتبتات كتفكر وتشوف قدامها ودايرة الاسقاط عليه حاضية معاه اش كيدير ..جوج تيليفونات فيدو كبار كينقزو حداه مكيسكتوش واحد رمادي فاتح محيد ليه الصوت فمرة والفيبرور حاطو حداه كيبان غير الضو كيشعل ولمكالمة دايزة ماطفاش وهوا مرة يشوف فيه مرة مايديهاش فيه والميساجات على الجهد ، والثاني كحل كيصوني حتى هوا ومهتم لامره كيشوف فيه كل شوية ومرة يرد مرة ميردش وهي غادا ، السيد مشارجي بزااف صعيب تشد بلاصتك فدماغو بلا متشطنو عليك شي حاجة اخرى او تلهيه..وغالبا داك تيليفون لي قاطع فيه الحس نمرتو ديال تفليا والبنات داكشي علاش ماكيرتاحش .. اما الثاني لي فيدو فغالبا للناس المهمة لي والخدمة والعائلة وفاش كيصوني كيشوف شكون وصوتو مسموع، بغات تعرف اشمن لائحة كلاصاها حتى هي باش تعرفو كيفاش كيشوف فيها وكيفاش واخدها وجبدات تيليفون صونات عليه فنمرتو ورادة بالها كتسنا اشمن تيليفون غيصوني فيهم .. لقات الخط المشغول وشكات..هوا مكيهضرش اصلا وتيليفون لكحل ساكت دابا لاكن داك الرمادي مكيرتاحش ، بغات تتأكد وخلاتو حتى تكتم الضو فيه وصونات مع بدا كيطوط فودنها على انه كيصوني شعل تيليفون رمادي عرفات شنو كاين .. ماداهاش فيه ماشافش جيهتو اصلل مولف بقوة تسرسير داكشي علاش زامتو ، قطعات وعرفات راسها مكلاصية حتى هي بحالها بحال غيرها ومدام داك تيليفون بالضبط لي مكيسكتش هوا لي صونا ونمرتو هي لي عطاها فراه هي نفس النمرة كيتعامل بيها مع هادي وهاديك ولخرى وكاع لي عندو فحياتو ماعاطيهمش اهمية وغالبا البنات حيت حتى هي بنت بحالهم ماخرجاتش من الجماعة ومكيردش كاع يمكن حسب ديك لامبالات لي شافت ،، حتا كيبغي يعيط هوا عاد كيهزو.
ايوا على هاد الحساب هااداك تيليفون لكحل ونمرتو هوا لي غيبين ليها واش هي مهمة ومكالامتها مهمين ورسائلها حتى هما او زايدة ناقصة، هاداك تيليفون هوا لي غيبين ليها واش نجحات ولا فشلات .. واش قدرات عليه ولا مزاال خصها مجهود .. واش وصلات ليه ولالا.. واخا يخبي حتى يعيا هاداك تيليفون هوا لي غيبين ليها شنو كاين وشنو خصها دير وفين خصها تزيد
هاد خيينا خصو بلان ، لخروج ودخول وهاد تخربيق راه يديرو مع اي وحدة وجدا ممل .. ومغتكونش هي الطبيبة الوحيدة فحياتو غالبا دوز بزااف وحتى هما غيكونو عندهم نفس الاهداف ويقدرو يكونو طاحو فيه ومصورو والو ، هادا خصو شي طريقة من غير المؤلوف . بقات كتخمم وتفكر وهوا غادي والموسيقى سبليونية
ذكرى : نمشيو شي موطع ميكونشي مؤلوف ولا فيه الصدع والزديح ماخصنيشي هاد الجو دابا صافي
ياسين : مافيك لي ينشط
ذكرى : لا ماشي وقتها انا كيخصني نرتاح وسط الاسبوع وكنعس بكري شوية .. حسن يكون موطع هادىء
سكت وكمل طريقو وهي عارفة طنجة قنت بقنت .. وقف قدام واحد لوتيل ونزلات معاه داخلو للمطعم انفاردو بعيد على الناس ..كانت فالمطمع فرقة اسبانية وراقصة منشطين الجو تقابلو مع المنصة فالضلام والشموع شاعلة وجلسو واخا داك الجو ديال الحيبان والناس الرمنسية لاكن حتى لي فيه جوع بغا غير ياكل ممكن يدوز بديك الرقصة الغجرية مافيها باس.
طلب لعشا وهي تراجعات ويدها على معدتها مبسمة مابغاتش تطلب ومافيها لي يرد المعروف ويقبل على شي طلبات مور داك العشا وهي فغنى عنهم وتصدق خاسرة معاه لا هي شاداه ولا هي مزيانة مع ختو .
ذكرى : انا منقدرشي على العشا صراحة فهاد الساعة... براكة عليا ديسير غييير خفيف بلا سكر
ياسين : تعشاااي ليوم وغدا كمل على ريجيم ديااك
ذكرى : حطات يدها على يدو) لالا والله ماخصني اياسين منقدرشي. .. مامسانساشيي(مامتعوداش)
تنهد وسكت وحطو ليها ديسير خفيف وتجنبات المشروب نهائيا واخا بدات كترعد على روج ماكرهاتش شي كاس لاكن ضسارة مغتسلكهاش وغتفتح ليه باب الزعامة وصعيب تردعو ، وحتى داك ديسير كلات منو معلقة ادات الواجب وتكات اللور جامعة راسها غير عينيها لي كيضحكو معاه ومبينة ليه انها مرتاحة
ذكرى : قولي فوياخ غتجي لكلينيك حيت انا غنسافر
ياسين: طيح عينيه كيشوف فيها ) غتسافري فاين غتسافر؟
ذكرى : عندي فوغماسيو فدبي
كتهضر وضحيكة مطلوقة والنعومة فتعابير وجهها بشوشة كتحاول متبينش ليه المعقول المفرط باش ميملش
ياسين: كتسافر على براا؟؟
ذكرى : اول فوغماسيو عندي ان شاء الله يقدر نمشي للسيمانة الماجية
ياسين: وشحال غتجلس تما؟
ذكرى : هزات كتفها) ماشي بزااف... سيمانة ونرجع
ياسين: مزيان.
كانت كتحاول تبين ليه ان خدمتها هي اللولة فحياتها مامركزاش على شيحاجة اخرى باش ميجرهاش لشي حوايج يدخلوها في حيرة كيفاش دير تفك راسها
ذكرى : (شافت الساعة) تسعود هادي... واقيلا خصنا نمشيو
ياسين: عييتي؟؟ ها لاوتيل ها حنا فيه ادا بغيتي ترتاحي
ذكرى : عندي با عيان كيضرب لابرة قبل مينعس انا كيخصني نعملها ليه.
ياسين: نتي ديما هايدا مشغولة مكترتاحشي؟
ذكرى: كنرتاااح... كنعمل ال،ياضة فلاصال .. كنخرج مع صحاباتي.. كنعمل بزاف دلحاجات مزيونين
ياسين: عندك صحاباتك وماشي صوحابك
ذكرى : عندييي صوحابي بلحق كنتلاقاهم هايدا فكلينيك وصافي .. صوحابي دالخدمة .. مكيكونيشي حتى هما مساليين كيعملو شغالهم فوقت الفراغ ،،، الخيدمة ديالنا صعيييبة ماشي ساهلة ومكيخصناشي نغيبو على لكلينيك
ياسين : بمزحة ) اجي نعمل انا وياك مشروع
هزات حاجبها تبسمات : ان شاء الله
هاد النقطة لي كانت كتحوم عليها وتتسناها تجي من عندو .. الى كان ياغي يطمعها ويتبتها بالفلوس فراه نجحات فاستدراجه
ياسين: شنو ضهر لك نعملو كلينيك؟
ذكرى : الله يسخر
ياسين: كنهضر معاك بصح
ذكرى : حتى انا كنهضر معاك بصح... (هزات كتفها) علاش ماتستتمرش فلكلينيكة ولا عيادة مشروع مربح بزااف.. بلا جراحات غير تجميل خارجي.. خرج شوية على المؤلوف
ياسين: تقابليه نتي؟
ذكرى : ندير مجهود ديالي ههه
خدات الامر على انه مزحة فقط واخا فقرارة نفسها عارفة كيتفلا حتى هوا وكتحاول تحول ديك تفلية لحقيقة وبينات ليه انها حتى هي كتمزح
ذكرى : انا تعاااطلت خليييت المفيييد ونسيت راسي
ياسين: الهضرة لي دوزنا ماشي مفيدة
ذكرى : كتهز الصاك) هضرنا وناقشنا وصافي كيبقاتعاويد.. مزيان الانسان يناقش ويتأمل تقدر توقع وتتطبق علاش لا.. انا دابا خصني نمشي اياسين .. ماسخييييتشي الصراحة الجلسة معاك مزيييونة (حطات يدها على فمها تفوهات) ههه بديت نتفوه شفتي ههه الساعة ديالي وصلات
وصلها حدا طموبيلتها ماطلب منها لا طلب لا والو وكانت كتحاول دير مافجهدها تبان بنت الناس وبنت العائلة المحافضة لي تخليه يحتارمها، بحال ياسين عندهم البنت المحترمة المحافضة هي لي مكتربش مكتخرج مع هادا وهادا ومربية ومأدبة ومكتعطيش قزيتها صافي والى كانت البنت فيها هاد المواصفات فراه بنت الناس وبنت الاصول والاصل والمفصل وشي حاجة عندها قيمة، بقوة ما كيعرفو البنات و كيلعبو فيهم كيف بغاو رجعو كيشوفو هاديك لي محافضة على راسها هي التاج وكيحتارموها مع ذالك ، نفس الشيء وقع مع ياسين ونجحات ذكرى فرسم الصورة المثالية ديال البنت المربية لمخلقة لي لازمة حدودها وكتخدم على راسها وماطا طامعة فحتى واحد وداخلة سوق راسها حتى الماكلة ماكلاتهاش ما غرضها لا فخروج ولا ماكلة ولا حتى حاجة حتى اسلوبها فالتواصل نضيف مافيهاش تحلوين وتقزقيز ..كتبان صافية ونضيفة وزوينة الجلسة معاها مريحة ماهي من لمعقدين ما هي من الضاسرين عكس لي كيعرف .. الزين والفورمة كاينة ولا تقحبين لاصيانات وتعواج والاسلوب زنقاوي باينين من طيارة ومكيخفيوش هادشي بل كيتعاندو شكون تاخد شرف اكبر باطرونة واعرة وكجيب ليهاا الله بداكشي راه غتصيد شي واحد ولايتزوج بيها. وهوا فلحقيقة كيتهافتو عليها على داك الشعاع لي طالقة وغرضهم واحد واخا يشري ليها ويتهلا فيها ويعطيها لي بغات لاكن كلشي بالمقابل وفين مكانت سعادتهم وضحكتهم راه كيحطو الفلوس وهما ناشطين ضاحكين .. لاكن يستحيل شيواحد فيهم يتزوج بيها ويديرها فالدار وهما سبحان الله الزواج عندهم هوا ام اللولاد .. قبل ميجيبهم كيقلب على تليق بيهم وتربيهم اما الزهو راه مكيخطاهمش كيبقاو غاديين كينوعو وكلشي تفلية ولعب فالاخير.
ذكرى : سلمات عليه) تهلا فراسك اياسين وعنداك تسنا مادوز نلعيادة
ياسين: دابا ندوز دابا ندوز
حرك ليها راسو بالايجاب وركبات مشات بحالها وركب حتى هوا ومشا يسهر مع صحابو والق٠٠ ضايرين بيهم كل وحدة باغا طيح واحد وكل وحدة بحال العودة ونقيات فالمضهر والروايح يا سلام شهوة منهم ، الزعرات على الجهد والكارو كيتشاير عاجبهم الحال والشراب والضحك .
كان ياسين كيعرف قشلة دالبنات بلا عدد حتى كينسا واش كيعرفهم ومعندوش شي وحدة محددة يبقا عاقل عليهم ، لاكن هما كيجيب ليهم الله راه قصر معشي وحدة فيهم وبات معاها صافي راه تصاحبو كما وقع لنورة مزالة كتسنى يحدد ليها نوع العلاقة ديالو معاها.
ديك الليلة كان مقصر وكانت معاه بنت كتفتن كلشي فيها كيجدب ، حلوة وكتحمق وزايدة بالمكياج والشعور زعرة ولاطاي واللباس والروايح رطبة بحال لكريمة عجباتو وشد معاها لحديث شوية وناض شد فيدها مشا هوا وياها للدار وطاحو فالفراش مكاين غير عطيه..لا هي لا هوا حتى واحد ماقصر وكانت مجهدااا لاصيانة ماخلات ليه ميقول ومكاينش عييت وحشومة لدرجة مابقاش مرتاح فالواقي ونصلو من شدة ماعجباتو وبردات ليه لغدايد ونقية بزاف زعم وضرب اللحم فاللحم حتى صبح الحال وضوات الشمس وتهلا فالزعرة مزياان وعقل عليها وعلى تمرتها وقيدها عندو بالسمية وعلمها باش يعقل ومشات بحالها ورجع نعس رتاح مزيان حتى للضهر وناض يدوش
مع النوضة حس براسو ماشي هوا هاداك .. دار يدو على حجرو فيه الحكة والبيضات كيضروه ومتقلين عليه وهبط راسو يشوف مالولقا لمعلم كيسل بالماء ولخناين والدم تابعو
تخلع ووقف ليه القلب فالركابي جاتو الصهدة ديال السخانة وضربو العروق فراسو مشا كيجري للدوش طلق الما سخون بدا كيغسل ويرش عليه حجرو عاطيه لألم ولحكة فالقضيب والسيلان وعاد لانتفاخ قال صافي مشا هادشي . تزاد معاه الزايد كان غيسكت ليه القلب رجع كيطلب الله ميكونش شي مرض خبيث يتفك من ديك الموصيية لي سلاطت عليه ..هادشي عمرو شافو ولا عرفو تخلع منو وهوا عمرو فحياتو تخلع بحال ديك الخلعة واخا ماخلا ما دوز .. ماخلوع بوليس البلاد ولا بوليس اوروبا ولا المافيات ولا لحباسات ولا لفرادا ولا جناوا قد ما خلعاتو الكارثة لي صابتو فالجهاز تناسلي ديالو.
هز تيليفون دغيا عيط لعبد لحق لي كان بمثابة الاب ديالو كيعاونو وواقف معاه فكلشي وهوا ركيزة لي كيتكا عليها ياسين وهوا السند الرسمي ديالو
ياسين : كيلبس حوايجو على عجلة) عبد الحق .. فاين تينا فاين؟
عبد الحق من صوت ياسين تخلع كان فالطموبيل سايق رد عليه مخلوع
عبد الحق: شعاااندك اياسين شعاااندك مالك شني واقع
ياسين: ماعرفتشي شنو واقع فقت جبرت الحجر ديالي منفوخ اصاحبي وروينة بالدم وكيعطيني الصدع
عبد الحق: عملتي شي حاجة ولا؟؟
ياسين: مهم ... لخبار فراسك
عبد الحق: مشي نطبيب داغياااا...داااابا مشي نطبيب ماتزيدشي تستنى ..الله يستر الله يستر ...مشي داغيا داغيا
جهلات فيه الحكة تقول فيه الدود بغا يموت وشعلات فيه العافية ما وصل للطييب حتى تقادا صبرو ، دوز و دار ودازت عليه فديك تدويزة بسبب الانبوب لي دخل ليه الطبيب من لقضيب بحال السلك كمدها ولقا عندو ميكروب وخصو ليه الصبر والدوا هادا الحل ديالو .. صبر على ديك الحالة ومشا طالع ليه الصهد وطلعات ليه السخانة وكلشي مجموع عليه ساخط وكمل عليه تيليفون لي كل شوية يشعل مكيسكتش شدو من وسط الطموبيل وهوا غادي كيطير وطموبيل وسط الشارع كتنقز قفز شحال من واحد قاطع وشبع فيه دعاوي ..هز داك تيليفون وهوا غادي وسط طنجة وشير بيه من السرجم ضربو مع الارض حتى تفركع بقا بنادم واقف غير متبع ليه العين ، بغا يموت وعرق وصل للفرماسيان حط ديك الورقة وساكت كيخزر فالبنات وحتى هما ساكتين كيقراو الورقة ويشوف فيه بنص عين دغيا سرباوه عطاوه الدواء وخرج زربان مشا للدار سبق بالدوا هوا الاول شرب لي كيتشرب وغسل بلي خصو يغسل ومشا مهلوك بالسخانة تجبد ماباغي يهضر مع حد ولايشوف كمارة شي حد
كمدها والدوا خدم فيه نوض فيه العافية فكرشو وشدو واحد الوجع حتى قال الموت هادي... ماقدر يطلع النفس ولا يهبط النفس زير على اعصابو ومشا للطواليط كيزحم ويتعصر وجنايو كيتقطعو من لداخل حتى بدا كيشوف الطروفة ديال الدم نازلين ملاسقين ولخيوط كيهيطو والبولة مكدوز حتى كيتعصر بالصوت والصورة ويخرجو ليه العروق .. دخلاتو الموت وقال صافي هادي وتوبة غير ينقز هاد المحنة ويخرج من داك العداب وعمرو مزال يطوف بجهة لقحاب .
ولاكن هايهاات، غير اجي وبرا ... عاد مزال جهاد عليه الحال فنصاص الليل منعسش وكرشو كتقطع بحال واكل السم وزاد طلعات ليه السخانة حتى نهشات ليه العضام مابقاش قادر يتكا وعضامو طايبين والدمايات كتفرفر والالم رهيب .. شاف الويل لكحل ومشا فنص ليل للكلينيك فحالة طارئة والضبابة على عينيه ماعندوش النضر فشي مخلوق. صابر ومتحمل ومكمدها لداخل وعينيه داخلين ومع ذلك كيحاول يوق مقاد .. ساقو ليه خوتو لخبار ومشا عبد الحق كيجري عندو يشوف مالو فلكلينيك لقاه مع الطبيب لداخل فالفحص وسوء الحظ الميكروب طلع ليه للكلاوي ووراه ليه الطبيب فالشاشة واضح عبارة عن بقع كبيرة منتشرة فلكلاوي وشي مناطق فالبطن والميكروب كيتحرك ويمشي من بلاصة لبلاصة كل مرة فين يشدو لحريق.
اضطر ينعس عندهم وكان اختيارو اما هما عطاوه حقن خصو يضربهم لاكن فضل يبقا تما يقابلوه ويبقا حداهم خوفا من شي تدهور ، خدا بيت تكا فيه شارب مسكن ووجهه صفر كينهج ويدو على جبهتو ساد عينيه وعبد الحق ساخط كيمشي ويجي حداه وينفخ بحال الجاموس
كان لي فيه كافيه بلا ميكمل عليه عبد الحق .دابا يا ربي يخرج منها سالم هادا هوا المهم ، عمرو عرف الالتهاب ولا الحكة ولا لميكروب حتى لهادي ، دقة عمرو ينساها والالم الفضيع لي عاش عمرو يتمحا ليه من البال،، رجع كيشرب الدوا ويتضوا بالدوا ويضرب ليباري وحدة صباح وحدة بليل والمسكنات باش مايحسش بالالم والسخانة كطحن ويعطيها فالدوايات اسبوع على قدو حتى كمل الابر ديالو وخفافت السخانة شوية مابقاتش مطيبة ليه عضامو والحريق مشا والبولة تسرحات مابقاتش كدوز بالدم عاد خرج مهلوك مدكدك داه عبد الحق للدار ومشا دوش ورتاح وجلس سخفان وراسو تقيل مع عبد الحق فالصالون
عبد الحق: على سلامة ديالك.. نقزتيها
ياسين: يخزر ساهي ) قلت صافي مشيييت
عبد الحق: المهم نقزيتها .. سيمانة دالمحنة خرجات طريفة... نوض جوج اصاحبي عطا الله البنات ددار،، ها نتينا دابا مرضتي ماجبرتي شكون يعطيك دشرب ،، خصك دزوج وتهنا فالراس ديالك خييير لك
ماهضر ياسين ما نطق ..مال على جنبو تكا ساد عينيه وهز رجلو كيتسنط لعضامو ..اماعبدالحق خلاه يرتاح ومشا يشوف شغلو وبقا ياسين فالدار شحال كيدور داكشي لي وقع ليه فراسو مامصدقش نجا منها..حسب داكشي لي عاش قال مع راسو صافي راني كنحط اعضائي . لاكن لحمد لله تفك وصفى الجهاز التناسلي ديالو وكمل على الدواء خمسطاش ليوم حتى برا مزيان ورجع وقف على رجليه وحل عينيه ومشا للدوش وقف بتقاشر بيضين وزن راسو فالميزات لقا راسو طيح ستة كيلو .. حرك راسو بالايجاب وقال مع راسو ماشي مشكل... غير رجع صحتو ورجع كي كان هاداك هوا الفضل اما الوزن لي خسر دابا يرجع .
خشا رجلو فسبرديلتو ونزل ركب سيارتو الموف الفخمة مشا رجع للكلينيك يتأكد من علاجو ، الخوف على راسو خلاه يدير شحال من تحليلة وفحص ورجع كيشك فجنابو ماتهنى حتى تأكد مزيان من تحاليل وعرف راسو برا مابقا عندو لا ميكروب لا والو عاد رجع يستأنف حياتو لاكن بطريقة اخرى .. الثقة نعادمات فمرة واخا تبان ليه البنت نابت فيها الورد مايتيقهاش.. كاع لي كتخرج تسهر وتشرب وماشي بنت مافيها تيقة وعدوى متنقلة .
يتبع...
التعليقات
لا توجد تعليقات بعد، كن أول من يعلق.