بعد فوات الأوان الجزء الثالث

شهر داز داك الشهر عليه وعلر نفسيتو حتى هي ..رجع كيشوف البنات كيعيف .. حقد عليهم وفين ما دوز حداه شي وحدة كدور عينيها وتعوج وتشوف فيه كيخزر فيها ويقلب وجهه حتى بدا فاتح كيضحك وهما داخلين للشكولاطي

فاتح : تأزمتي اصاحبي ههه مزااالك مأثر

ياسين : بنفور) رجعت كنشوف البنت كنشم ريحة دالخنز متبغااتشي تمشي لي من نيفي...تفووو اصاحبي

فاتح: انا بيدي تخلعت كماكانشي شي مرض عندو الدوا يالاه؟؟

ياسين: درو وجهه هاز يدو) غااسكت متفكرينيشي ابااااا على موصيباااا.. بالدرااااع اخاي بففف

مشا جلس على الكنبة جبد كارو لاحو فمو ومدور وجهه .. وما مدش يدو يسلم حتى على البنت لي شافتهم جالسين ومشات تسلم عليهم. ماحملشي يشوف فيها واخا كيعرفها بقا قالب وجهه ساخط حتى صدرها فاتح وجلسو غير بجوج كيتسنطو لعضامهم ويتجمعو وحتى الموضوع دالمرض بكثرة ما تكهم منو مابقاش قادر يجبدو ويسمع عليه شي حاجة ، سكن دماغو بواحد الجوان وناض شد الطريق للبلاد عند لأمين يشوف اش واقع تما وينسا الموضوع شوية .. نزل من واحد لبي ايم كحلة قدام الدار لابس بروطكان بسيور دجلد والريح .. داير عليه فيست فوق تيشورط ودجين مشا كيدور السوارت دايز على الارض لي كانت هكتارات كتمتد على طول الطريق لي جا منها ... العشبة نابتة على الطريق والواحة خضرا كلها بالكيف كتنتج اطنان وديما خداميين ديما الكوري عامر... كانت عندهم بلاصة واسعة كبيرة بحال لكوري عامرة خناشي دالعشبة وقوة الميكات وطباسل دلقزدير فالابيض والدراري خدامين كيضربو فيها بالزراوط ويصفيو ولغبابر طالعة .

قرب من المنتوج لي كان عبارة عن غبرة محطوطة فالطباسل لي مغربلة بالضرب وعقد حواجبو كمش واحد القبصة دلغبرا حطها فيدو وشعل فيها العافية بالبريكة كيشوف المنتوج كي خارج .. الى بدات كتغلي بحال الى كتقلا فالزيت فراه المنتوج هوا هاداك .. والى كحالت وتحرقات ما غلات فراه فالصو الطلعات .

صدق المنتوج مزيان ووقف كيهضر مع الدراري ويكمش واحد القبصة فيدو ويعاودو جمعها مزيان حتى حس بيها تزيتات ولاحها فالطبسيل ومشا خرج كينفض يديه تلاقا مع الامين بواحد القشابة جبلية كيلوح رجل هنا ورجل لهيه بسبرديلة

ياسين: الشغل غادي مزيان ... طلعات مخييرة على داك العام

غير شافو الامين دار يديه وراه هز راسو وكان مبلوووز وااحد الجبلي مسالي راسو ماكيهمو حد بدا كيضحك وقال بالجبلية وصوتو مبحوح ضعيف

لأمين: ااامشيثي يا ودي يا روبيو هههخخخ ماعملثي عواول (اطفال) ما عملثي وااالو كا قدك مطااهر فديك طنجة من جدددر

ياسين: قلب وجهه) مشي يا لأمين خليني نوقرك ... ماضحكشي معايا فهاد الق٠٠٠ ..

داز الامين قدامو كيكركر: وراهم لق٠٠٠ي نييث ... حاول حاول عليهم باقي دحتاجهم

ماداهاش فيه ياسين خلاه ومشا تحت واحد الشجرة جلس وشعل واحد الجوان مقابل مع الكيف كيكمي ويتمنضر .. كانت دارهم تما معزولة على الدوار مكيشوف حد وماباغي يشوف حد واخا العائلة تما مشتتة لاكن ما طل على حتى واحد .. تركن تحت ديك الشجرة جالس على حجرة كيدور كيدي فعينيه ويجيب حتى طاحت ليه ذكرى فالراس..هاديك بعدا نقية وطبيبة جامعة راسها ديال الجلسة .. لاكن سرعان ما تفكر بلي نمرتها مشات مع داك تيليفون لي لاح وبدا ينفخ ويسوط .

دوزها بنثرة وناض طلق رجليه فديك الطبيعة والليل كيطيح وختمها فعشا مع الامين دبحو واحد العتروس وعلقوه مع الشجرة وسلخوه هوا وياه جلسو هما والخدامة لي عندهم قدام واحد الكانون على كيسان دتاي بالنعناع والقطبان دالشوا كيتجمعو وختموها لامين بواحد طجين نصب ليه وحطو فوق الفاخر حداهم طاب على خاطرو تعشاو بيه وكل واحد فين مشا ينعس..كان هوا ولأمين مكتلاقاوش ومكيتفهاموش..واحد بلدي ولاخر رومي غير كيسلكو مع بعضياتهم وصافي .

صبح ياسين قدام تفريشة تحت الشجرة والطبلة والفطور بلدي لامين كان حادك بحال المرى والدار عندو فيها كلشي تقول عندو المرى فالدار. بياسين وبلا بيه هوا مفطح تما فالجبل كيحط الطبلة شهوة منها بالزيتون والزين والعسل والزبدة والجبن والخبز ولقهوى وياكل ويتكا يدوز بجوان والحياة السعيدة .. الطموبيلات والديور والمدينة عندو غا اشاعة .. كيشوف راسو هوا لي عايش فخوتو كاملين والفلوس مدكسة على الجهد لاكن هوا كيعرف غير كرشو ودماغو .. كل مرة شنو دابح والزرود على الجهد وديما فيدو واحد الناي كطوط فيه بالجبلية ومرة مرة ينش بيه على الناموس.. رجع ديك الدار شهوة منها مصبوغة بالابيض وشيبي ولارض المحيطة بيها بحال الجنةبالغرس والورد والنقا والدروج فبلاصة الحدورة ولكرمة دلكرموس والعنب على جنابو الحياة الوردية..دوز معاه ياسين داك الصباح ومن بعد شد الطريق رجع بحالو لطنجة هاز معاه شي طريفات يدوز بيهم الوقت على بيدمن يكملو الشغل والسلعة اللي كتوجد غتصدر على برا لاروبا وباينة لخدمة جايا فالطريق.. غير يكمل لامين خدمتو غتبدا خدمة خوتو .

ديك اليوماين لي دوز عند الامين نفعاتو ورتاح فيها وكان عارف راسو الى بغا يرد صحتو يطلع غير سيمانة عند الامين للجبل يرجع بحال لغول .

وصل طنجة مشا للدار نيشان دوش وبدل ولبس حوايجو وتريح وخرج كيشعل نزل للباركينغ فلاكاف هز البينتلي طلع فيها وخرج كيشوف الساعة فيدو مشا لكلينيك الفرودس مباشرة

كانت خدامة ماسالياش والبافيط على نيفها والقفازات والطبلية حتى دخلات عندها ممرضة طلات عليها وقالت

الممرضة: دوكتوغ ذكرى.. شي واحد كيسقسي عليك

ذكرى : هزات راسها ) شكون؟

الممرضة : قالي اسمو ياسين

حلات عينيها وتلفات مابقاتش عرفات تكمل وناضت خرجات كتزرب يالاه غضرب الدورة لقاتو واقف كيسرح عينيه فلكلينيك ورجعات لور دغيا كترمش وتهدا حتى تهدنات وخممات وقالت

ذكرى : ماقلتي لوشي شنو كنعمل؟

الممرضة: لا

ذكرى: صافي .. مشي قولو راه فغرفة العمليات واحد ساعتاين عندهم عملية.. هي غتسالي تتصال بيك

مشات الممرضة وصلات ليه لخبار وذكرى كطل مخبية تمات راجعة عندها

الممرضة: قالي غيتسناك فطموبير برا

ذكرى : قولو واخا صافي

بقات حاضياه حتى خرج ورجعات كتجري كانت لابسة كولون وحداء رياضي وشعرها مجموع عشوائي مشات عند المريضة ديالها كملات ليها دغيا ونصلات القفازات من يدها لاحتهم بسرعة ناضت كتجري حطات طابلية وخرجات من باب من الجهة لاخرى تعرضات لطاكسي بسرعة مشات للدار ودخلات كتجري تشوف فالساعة ، ساعة وحدة خصها تسالي فيها كلشي ونص ساعة ترجع فيها يالاه تلحق مع الطريق عامرة. طلعات نيشات لاحت الصاك ودخلات كتنصل حوايجها دوشات وغسلات شعرها وخرجات فبينوار ابيض كتشوف الساعة وتزرب نشفات شعرها ولاحت الحوايج فوق نموسية وبدات تتعطر عاد لبسات وتقادات وبقا ليها المكياج مشات كتصاوبو فالطريق وهي لور فطاكسي حتى وصلات جات مع الوقت هوا هاداك ودخلات مع الباب لي خرجات منو لاكن مادخلاتش للكلينيك ضارت غير مع الجناب حتى للباب لكبير كتنفض شعرها للجنب وخرجات كتقلب جات معاه نيشان حتى هوا مانعرف فين كان وقف قدام الباب وتبسمات ليه وهي لابسة كسيوة موردة بسميطات بحال لاميرة مع شعرها المطلوق طبيعي حتى للخصر ولعوينات عسلية كيبريو وسنينات بيضين والنعومة وصويك صغيور فيدها كانت غتوقف لاكن شار ليهابراسو والنضاضر على عينيه باش طلع ومشات طلعات حداه مبسمة مدات يديها

ذكرى: تسنيتي بزاف ههه

ياسين: لا.. مشييت وعاودت رجعت

ذكرى: يالاه دخل عند طبيب يشوفك.. ندخلو؟

ياسين: لا ماخصنيش ... ماعنديشي لكانة

ذكرى: نتينا فالباب دابا غير دخل

ياسين: حتى لمرة اخرى... يالاه نمشيو نجلسو فشي موطااع.(مد ليها تيليفون لكحل وهوا سايق) عاود قيد لي النمرة ديالك

شدات تيليفون متفاجأة كاتوقعاتش تترسم بهاد السرعة هادي، قيدات ليه النمرة وتيقات راسها دارت بلاصتها لاكن تقلات وترزنات ، مشات معاه لمقهى من غير المقهى لي كيجلس فيها جلسو كيتجمعو والهضرة كدور غير على التجميل والفورغماسيو الوهمية لي دارت فدبي وكتبين ليه انها ماعندهاش وقت للتفلية ومركزة مع خدمتها و حياتها

ياسين: كترهق راسك بزااف

ذكرى : خدمتي كتعجبني ، كنرتاح فيها، (بنص عين) احمم.. ياسين،، دابا ثاني مرة كنخرجو وانا ماسنانساشي نخرج مع الرجال .. عاد نتينا خاها دصاحيبتي وضاح ليا شنو خصك بالضبط حيت ماجاتشي نبقاو كنخرجو هايدا .. اشمن علاقة جامعانا؟ (بتبسيمة ) انا راه عندي الشغل ديالي وعندي غييير نيشان

سرحات يديها كتبسم كتهضر وحشمانة .. شاف فيها بنص عين طلع وهبط وقال

ياسين : باش نعرفك انا عندك غيير نيشان.

ذكرى : ساقصي ختك تقولك .. سقصي الناس لي معايا فكلينيك ..جيران .. اي واحيد كيعرفني واش عمرو شافني فشي موطاع ولا مع شي واحيد .. هادشي علاش قلت لك شنو بايناتنا حيت يقدر شي واحيد كيعرفني يشوفني يقول عليا شي حاجة

ياسين : امم.. دابا نتينا خايفة على صمعة ديالك

ذكرى : ايوا شنو .. انا مكنبغيشي هاد الخرجات فحال هايدا وعاد عندك المرا ديالك من لفوق مانرضاهاشي نراسي

ياسين : شكون قالك عندي المرى،؟ لمرى طلقت لها شحاال هادي.

ذكرى : باهتمام) طلقتي؟؟ انا سمعت هضرا اااخرا!!

ياسين : هز حاجبو ) شنو سمعتي؟

ذكرى : سمعت مشات هربات مع شي واحيد؟!

ياسين: ببرودة ) بصح

الهضرة جات فضروف جد مناسبة ، قدر يركز معاها ويفكر فشنو كتفكر حتى هي وبدا يطلع ويهبط فيها كيفكر فالموضوع وهي لي شافها يقول البرائة شخصيا

ذكرى: سمح لي غادي ندخل شوية.. كيفاش زعما هربات؟؟ واش بصح بصح؟؟

ياسين: هربات كي كيهربو كاع الناس .. بنت السوق ماشي ديال لحلال وماشي ديال الدار.. مشات للبلاصة لي تليق عليها

ذكرى : كترمش) امم... ايوا ودابا شعنقولك اياسين(تنهدات) انا منقدرشي نبقا نخرج معاك هايداك... شي مرة يتقدم لي شي واحد نقوليه انا عندي غير نيشان كي قلتليك ونكدب عليه فاللخر يكتاشفني غير كدابة . انا كلشي الا الصمعة ديالي نتحرق عليها..حيت ماعندها حتى معنى اصلا نتلاقاو شنو الغرض والهدف (هزات كتافها) ندوزو الوقت؟؟ حتى الوقت لي يدوز مكاينشي

قرب تكا على ركابيه شاف فيها : من للخر دابا باش منبقاوشي كنرونو .. نتينا بعاااقلك وانا ماعنديشي لخاطر نطيبك وطيبني .. انا صااافي طلقت وخصني المرى دالمعقول ... كنتي معقولة مرحبا ماكنتيشي معقولة الله يعاون مانزيد معاك متزيد معايا

ذكرى: دوراتها كتشتت النضر فصمت تسمع وهزات كتفها وقالت

ذكرى : ايوا الله يجيبنا فالصواب، حتى انا خصني الراجل دالمعقوول ..ديال الدار (شافت بنص عين) ديال مراااتو

ياسين: وانا خصني المراا ديال رااجلهااا.. هاداك اللعب (حرك يدو) ديال السباحة حواجز غيجيب غييير المشاكيل... انا كنقولها ونعاودها .. المرا دياال راجلها

ذكرى : انا دراااسي ومكنعملشي هايدا وهايدا عسااك مزوجة

ياسين: حرك راسو: عملوووها وكانو بنات الناس مكيعرفوشي تيليفون .. من الجبل وتحلو ليهم العينين ونقزو سينكو

ذكرى: ايوا لحمد لله لي ماشي كلشي بحال بحال كاقدنا كاملين هازين المرض .. الحمد لله .. الواحيد حتى ويدا مخافشي الله يخاف على راسو من الامراض.. كاشفتي شحال دناس مراض ونسبة الامراض لخطيرة فاين واصلة مدقدرشي حتى تسلم بيدك .. حاشاك واحيد راه مرض فالجهاز ديالو ماجبرو مايعملو لو ناض فيه شي عجب صدق مستأصل كوولشي .

لاحتها ليه باش يخاف شوية يبعد من البنات لاكن مافراسهاش راه جابتها ليه فالمرمى نيشان كمدات ليه وقال باستفسار

ياسين: الله يسترنا

ذكرى : الله يستر كاين امراض كتكون في سبات معيييييق مكتبانشي حتى كتعشش مزيان مزيان مكيجبرو ما يعاجلو فيه

ياسين: كيشوف فيها مخلوع) الله يحفظ ... الله كيحفظ

ذكرى: دابا خاص اي واحيد بغا يتزوج خصو يعمل فحوصات باش يرتاااح ويعرف معامن كيتزوج

ياسين : عندك الحق .. هي نتينا غتعمل فحوصات ؟

ذكرى: انا اصلا عزبة مناين غيجيني هاد المرض الله يحفظ

ياسين : واخا هايداك عملووم.

ذكرى: علاش؟

ياسين : ادا عينك فالمعقول ... نعملوهم انا وياك فاين كاين المشكل

ذكرى : صافي نعملوهم من لخير .. لواحد يرتاح (شافت فيه بنص عين) نمشي انا وياك شنو قلتي

ياسين: صافي.. نعملو شي ساعة ونمشيو

خاف على راسو كتر منها .. من كثرة ما دوز العجب عارف ماشي العذرية لي كتحكم على الطهارة والشرف وعطا الله الطرق ومايدار ، واخا تيق خمسين فالمية من كلامها لاكن الحدث دالمرض مزال جديد مخليه يشك فراسو وفالعالم كله ، سكتو شوية وعرفاتو نوا المعقول ولاكن مزال متقدرش تيق ويقدر يتقلب فأي لحضة ولا يكون غير كيهضر مسايرها .. لاكن لاهم من هادشي انه صدق برائتها بنسبة كبيرة وهادا هوا كلشي

الايام غتبين ليها واش معقول ولا ماشي معقول . داز حوارهم ديك سويعة وناض ردها لطموبيلتها لي خلات فلكلينيك وجات تسلم عليه باليد لاكن جرها سلم عليها بالوجه عاد نزلات مشات كتزرب ركبات فالطموبيل شدات الطريق وشافتو وراها تابعها بديك البينتلي بقات مستغربة حتى قربات للدار وكان مزال تابعها عرفاتو بغا يعرف فين ساكنة ، يعني بصح ناوي المعقول وباغي يعرف كلشي عليها وبيمن غيتزوج واخا هاد التزويجة مكانتش على البال لاكن بحال ذكرى والصورة لي عاطية على راسها راه فرصة لا تعوض، قلال البنات فهاد الوقت لي تلقاها عايشة فالمدينة وبداك الزين والمكانة الاجتماعية ومتكونش ضاسرة وماعندها خوف من حتى حاجة وعايشة كي بغات ومنفاتحة على كلشي واكيد ومؤكد كيجيوها عروض مغرية لي يخليوها تتحرر كليا ودير لي عجبها . وياسين مطحححن فهادشي دا وجاب ومن الشوفة كيطيرها فالسما وواخا هاكاك كيقول ماعارف والو والبنات خطار تعيا تخضي فاللخر تلقا راسك وسط الغيس ونتا فرحان وخير دليل الزعرة لي عماتو حتى تحرر من القيود فاللخر كلا دقة عمرها طيح ليه على البال ولا كان متوقع تجيه من بنت بحال هاديك. لي شاف لحوايج ماركة واليدين والرجلين كيشعلو والخلخال دالذهب والبيوضة واللحم كيشعل والمهبل كيضوي يقول هنا نبات .. ساعا العتمة لي ورا القضبان ريحتها زفرة وقناتها خانزين. ولاكن غاااالية بتعليمة ودرس خلاه عمرو يتيق فالمضهر والروايح .. وكاع لي متقوبات ما فجد بابابهم ثقة واخا يكونو كيبولو هواي

قلب الطريق مباشرة فاش شافها دخلات بحالها وعرفها فين ساكنة ورجع بحالو للقهوى للكرسي لي كيجلس عليه ديما فواحد القنت وجبد تيليفون متكي بيديه على ركابيه كيصوني ويطفي الكارو رد بداك الصوت غليض مع بحة المالبورو

ياسين: الو معزوز... لاباس الحمد لله كي كي بقات يماك

معزوز: نجحاتلا العملية الله يكثر خيرك ويخلف عليك

ياسين: عندا شكون ماقبها؟

معزوز: جيبتها نعندي عند المرى تقابلها

ياسين: وادوز عندي لشكولاطي بغيتك دوز انا كنتسناك

معزوز: واخا هاني ماجي دابا

قطع وجلس كيشوف فتيليفون ومرة مرة يهضر معشي واحد حتى دخل معزوز كان قصير وغليض مكربز وكرشو مدلية وحناكو غلاض كتر من الأمين مشا سلم عليه وجلس معاه سولو ياسين على احوالو عاد دخل فالموضوع

ياسين: عتمشي لدريسية عسس على واحد البنت شوف شنو كتعمل

معزوز: بالايجاب) فاين فدريسية؟

ياسين: انا نصرد لك العنوان دابا فالولتساب .. لوكاليزيتها باش متلفشي فالتقلاب

كيهضر ويشوف فتيليفون متقل بالجوانات

ياسين: وصلاتك... فاش تشوفها صورها لي نقول لك واش هي ولاماشي هي

معزوز: ماعندكشي تصويرة؟؟

ياسين: ماعنديشي تصويرتها نتينا شوف لي خرجات مع باب داك الدار لي صردتلك وصورها تقول شنو كاين... عسس عليها مزيااااان سمعتي شنو كنقول؟

معزوز: بالنهار ولا بالليل؟

ياسين: غتعسس عليها بالنهار وبالليل فاين ما خطات ولا خلفات تبعها .. مزال عندك الموطور،

معزوز: اه باقي هوا فاين جيت

ياسين: مزيان.. مهم عينك عليها ومخصهاشي تشوفك عنداك

معزوز: كون هاني شعندا متشوف .. تهنا

ياسين: مهم نتينا رد البال وصافي ماخصهاشي تمنع ليك وصافي

معزوز: لاء غير تهنا صافي

جبد ياسين بزطامو البني حلو كانت فيه فلوس مستفة قليلة عطاه منها وقال

ياسين: باش تقضي حاجة دابا وصافي

معزوز: لاء صافي ماشي مشكل

روتين عند ذكرى كيتكرر وفنفس الوقت كانت حاطة فراسها بلي هي حاليا دخلات فعلاقة جدية مع ياسين واي غلط دارتو غادي يكلفها خسارة ، واخا مكانتش عارفة بلي تابعها وحاضيها لاكن كان عندها احساس وماشي بعيد يبغي يعرف عليها كلشي وكلشي تتوقعو منو هادشي الى كان بصح باغي يتزوج وكيهضر من نيتو ، حتى فالواقع ديالها مكانتش خلاطة وماشي من النوع لي كينقز من هادا لهادا فنفس الوقت.. غير كطيح على شي هوتة كتشد فيها حتى تسالي وتنتاقل لوحدة نضرا لضيق الوقت والخدمة لي شاغلاها.

جمعات وطوات ودارت احتياطها ورجعات من الخدمة للدار والى خرجات كتخرج مع البنات ساعة ولا ساعتاين وترجع بحالها حاضية جنابها ورادة بالها من الساعة لي تبعها فيها وجات عينها فيه نيشان وشاف فيها كأنه كيقول ليها راني عرفتك دابا وعيني عليك.

تكمشات وتركنات وحتى هيا كانو عندها جوج نوامر وجوج تيليفونات واحد دالخدمة والكليان واحد ديال تلفية والنشاط . حطات تيليفونها الثاني عطلة حتى تشوف اخرتها مع ياسين فين غتخرج

الشمس واخا تشوي فالشمال حتى تعيا مكتفوتش 37 ومع ذلك مكيقدوش على صهدها .

لويكاند الراحة ولاكن ذكرى نشيطة مكتجلسش فالدار ومولفة الحركة ومتولة لدرجة كبيرة ونقية مابحالها حد فالنقى ، شابهة فمها وواخا كبرات فحي شعبي ماخرجاتش مصوفجة ورباتها مها احسن تربية وكانت الصديقة الوحيدة ليها واكثر شخص قريب ليها ، كل سبت الصباح كتفيق بكري باش تكسب الوقت ومتعودة على لفياق الصباح بحكم العمل فكتنوض تبدا بحوايج الصابون هما اللولين كديرهم فالماكينة وتهز حوايجها وتمشي لحمام سبا فصالون قريب ليهم كتحمم وتنشف الشعر وتصبغ دفيراتها ولا دير ليهم جيل حسب الضروف وهاد المرة مادارت والو كانت يالاه مصاوبتهم باسبوع هما ورجليها وكانت متبعة حصص الليزر عندهم فلكلينيك فكتافات بشعرها نشفاتو ورجعات بحالها متعطلاتش لقات راسها جابت التسعود ونص نيشان ومشات نشرات حوايجها فوق واحد السلك حدا بيتها فالسطح وطرقاتو بالسوارت وخرجات تشوف ديك الطموبيل لي كل مرة مريضة ضاراها شي قنت باش تجي مع الغدا نيشان عند مها بحال العادة، داكشي اللي دارت لبسات واحد الدجين فضفاض مع حداء رياضي وتيشورط بيضا وهزات صاك صغير خفيف ودات الطموبيل للكراج خلاتها تما وشدات طاكسي لدار مها مباشرة لعمارة كبيرة نقية وجديدة صونات فالباب وضرباتها ريحة الطياب وتبسمات . فتحات ليها لبنى الباب استقبلاتها ببيجامة نقية متولة كانت مرى طويلة تبارك الله ورقيوقة وزوينة كتهضر ب A حتى من عيالات قاع الخابية ماباينش عليها كاع والدة ذكرى كتبان بحال ختها بحكم ذكرى مكانتش ضعيفة كتموت كانت صحيحة.

لبنى : جلس دخوول انا قلت مغتجيشي

ذكرى: لاااء قلت لك عنجي غير وصلت طموبيل نميكانيك

لبنى: شني عنداا خسرات ؟

ذكرى: ول نتينا عاارفة المشاكيل ددطموبير مكيساليوشي... (دورات عينيها) بواحدك؟؟

لبنى: اه بواحدي سمير فالشغل عندو بزاف دلخيدمة قالي مغنجيشي

ذكرى: مافتحتيشي مكتبة ليوم ؟

لبنى: مافتحتاشي قلت حتى نعشية ونفتح

ذكرى: كتتأمل فيها) رجعو لاك عاود دوك لخطوط دتخنزير بداو يضهرو

لبنى: بعفوية) اه اه كنت عنقولك تعاودم لي

ذكرى: خصو يدوب عااد تعاود،، غدا اجي عندي نعدلك وجهك

لبنى: ان شاء الله ... وجلس جلس رتاح انا نحط الغدا

ذكرى: ناضت تبعاتها) علاش اتحط هنا صافي نتغداو تما فلكوزينة الطبلة كبيرة

مشات معاها للمطبخ وحطو الغدا كانت لبنى موجدة الحوت انواع اشكال جلسو كيتغداو وذكرى كتعاود ليها على لكوارث لي كيوقعو فالدار

ذكرى: ماعرفتشي شني باغي يخدم مافهمتشي

لبنى: عايط لي قالي مامّا عطيني قلت لو ماعندي منعطيك العاطي الله

ذكرى: دابا هوا عندو تمنية وعشرين شني بااقي باغي يبقا جالس ميخدمشي؟؟؟ كل مرة يعطيه شي واحد ميقلبشي على راسو ؟؟

لبنى: باباك عيط نسمير قالو سلفلي .. قلت لو متسلفوشي مغيردلكشي ومشا سلفو

ذكرى: خرجات عينيها وشدات حنكها مصدومة ) اواااعدي ياانااا!!!! (بفشل) واااالو معندووووشي لكمااارة علاش يحشم... كيتبوهل كيبين الضرافة زعما؟؟ عوومري شوفت شي راجل عيط لراجلها دمراتو قالو سلفني....(تنهدات) عمو سمير غير حشم منو وصافي

لبنى: انا بيدي حشمت ... ماجبرت فاين نعمل وجهي والله لعضيم

ذكرى: شحال سلفلو؟؟ انا نعطيك ردهوم لو بلحق قولو ميقول والو صافي حيت لاقالها لبا غيولف غيرجع يسلف ويقول رااه ذكرى تردلو.. (باستغراب) انا مافهمتشي واش كيجيب لهم الله انا بنكة؟؟ واقيلا كيسمعو الطبيبة كيجيب لهم الله كنبيط لفلوس هه ... الطبيبة زعما غير غتتخرج غتجبر الفيلا والطموبير دتمانين مليون فالباب كتستناها.. مافخبارهمشي شحال من طبيب مقاتل مع الزمان ومجلي فسبيطارات دلحومة ماعندوشي حتى طموبيل .

لبنى: لااء صافي صافي هوا قالي سلفت لو غير هاد المرة وصافي.. مابغاشي يقولي شحال سلفلو وانا مازيرتشي عليه يقولي

تنهدات ذكرى ووقفات ليها النعمة بقات ساكتة حتى بدلو الموضوع وتنهدات قائلة

ذكرى: احمم.. مامّاا ... كنعرف واحيد واقيلا غيجي يخطبني

لبنى: ضحكو عينيها) دبصح!!! شكون؟

ذكرى: هزات حجبانها) بزناسسس

لبنى: فدهشة) بزناس!!! وعنداك يضحك عليك

ذكرى: لااء ماعندو مايضحك... هوا قالك ناوي المعقول

لبنى: بزناس بزناس ولا غييرر

ذكرى: ضخمات تعابير وجهها) بزناس بزنااااس امامّااا.. بَّزناسا لكبااار د طنجة ماشي قضيان حاجة

لبنى: بخوف) واعندو يكون شي ولد احرام

ذكرى : كنعرف ختو .. مربيين ماشي ولاد السوق

لبنى: احيااني كااين شي بزناس ماشي ولد السوق

ذكرى : لااالا ماشي مريييض بالبلية نتينا عاارفة بزناسا لكبار كيف كيكونو عاملين..الشقا والنقا ... اصلا باقي صغير ماواصلشي ثلاتين

لبنى: بحماس) وفوياخ قالك عيجي؟

ذكرى: فتيسير د الله (مسحات يديها) بعدا فاميلا ديالهم كنعرفها ناس فالمستوى ماشي مهيييمجييين داك الشغل دسوااق.. يماه فسبانيا وختاه حتى هي وختاه الثانية صاحيبتي قرات معايا عندا فرماسيان كيف عاااملة هنايا فطنجة وعاد تزوجت مسكينة بلحق ماتت مراتو دباها نهار الحينة وكاع داكشي لي وجدو عملو بيه كنازة.. قالك حتى يفوت شوية الوقت على الموت عاد تعاود تعمل عرس واحيد اخر

لبنى: تبارك الله .. عااندوم الفلوس

ذكرى: ماشي غير لفلوس اماما هي ديك القهوى دشكولاطي معروووفة ديالهم ... وعاد عندوك 2 الباركو (اليخت) واحيد هنا فطنجة وياخور فتيطوان والفيلا على بحر فتيطوان جلسنا فيها شحال من مرا غااالية.. وزييد وزييد (ضرباتها ليدها) ااه نسيت.. هادا لي ماجي يخطبني عندو البينتلي .. (دورات راسها) عرفتي شنو هي البينتلي واقيلا وحدة لي هنا فطنجة.

لبنى: مزياان.. مرحبااا بيه

ذكرى: اييوا... راه بزناس كبير اماما ماجبر فاين يعملهم ... اللهم فيا يانا يبيط (يبيض) على طهري وانا نستافد بعدا.. وباقي صغييير انا قارية عليه ماعندو ما يضحك عليا نطحك على عشرة بحالو

ذكرى: ماتخافشي عليا... انا عارفة شنو كنعمل(تيليفون كيصوني) هاهوا كيعيط (فتحات الخط وكبرات الصوت) الو ...

ياسين: الو ذكرى... فاين نتينا .. فالدار؟

ذكرى: انا عند مامّا .. فالدار ديالها

ياسين: مافهمتشي؟؟

ذكرى: مامّا وبا مفارقين مامّا ساكنة مع الراجل ديالا فجيراري

ياسين: نتينا دابا فجيراري؟

ذكرى: اه مع ماما تهضر معاها؟؟ ندوزا لك

ياسين: دوز لي يماك

مدات تيليفون لمها غمزاتها وشداتو لبنى ردت عليه قائلة

لبنى: سلام عليكم

ياسين: عليكم سلام..لاباس كلشي مزيان؟

لبنى: الحمد لله نتينا لاباس عائلة ديالك لاباس خوتك وخ اتك

ياسين : الحمد لله .. قالت لي ذكرى مع ماماها وبغيت نتأك

سمح لي

لبنى: مكاين حتى مشكل ..

ذكرى: بصوت خافت) قولو قالت لي ماجي تخطبها

لبنى: دنيا هانيااا عاد قالت عيجي يخطبني ولاهيلا.. عاد فتحت معايا الموضوع

ياسين: ان شاء الله .. وا تهلا فراسك بسلامة

لبنى: بسلامة الله يعاون (قطعات) اواعدي صوتو ديال اربعين سنة (عضلت شنايفها) كيتأكد من لهضرة لي قلتي لو

ذكرى: صغرات عينها) وباش عرفني فالدار ولا ماشي فالدار كيسول في انا تقول شي واحيد قالو راه خرجات من الدار، عامل عليا العسا ولد لحرام

لبنى. باينة ... انا خلعني ..كيفاش كيهضر

ذكرى: انا بقيت كنأكد ليه على المعقول ... ودابا كيختابرني .. مانعرف الاختبار لماجي كيفاش عيكون عامل

لبنى: وا رووود البال... اذا كنتي كتهضر مع شي واحيد

ذكرى: هييه لاصافي داكشي لبقا ههه .. باش يقول ليا تيارك الله على بنت الناس قهرتيني بالعفة

لبنى: انا نوصيك مطولشي معاه

ذكرى: معنطولشي انا كنت عنقولو يالاه نهار تنين نعملو تحاليل شبرت رونديفو باش يدوز قدامي

لبنى: تحاليل ديالاش؟

ذكرى: ديال الامراض الخبيثة تافقنا نعملوهم... هوا يرتاح وانا بيدي نرتاح كنت واقفة عليهم نييت ... (كتشعل صبعانها)هاااايدا هايدا هيييدا لبنات عليه تقول قارون

لبنى: صبعها على حنكنها) اواااعدي على تحاليل حماقتي؟!!! لالالا الزواج خصو يكون مبني على تيقة

ذكرى: اشمن تيقة فبزناسة اماما بعقلك حتى نتينا!! هوا بيدو خايف على راسو تقول مكيمشيشي مع لقحاب جا حتى ليلي يانا عاد السيد خاف على راسو واخا قلت لو انا فيييغج وعمري عملت هايدا وهايدا السيد منكري غير بوااحدو

لبنى: ولاكن توصل الدرجة للتحاليل بزااف

ذكرى: توصل فاين بغات ... حنا ماشيين حتى نشوفو هاد الزواج فاين عيصفي .. انا اصلا خصني نعرف بلي السيد سليييم ... كاشوفتي تيليفون عندو كيف كينقز هااايدا بالبنات كعملتي بناقص. وغير لقيحبة على ختها ادا ماكانوشي فيهم شي مرض فاين عيكون ومناين كيجيو هاد الامراض على هاد الحساب.. وهما السبب فانتقال العدوى(هزات يدها) خليني اماما من لخير.. يعمل التحاليل نقراهم بعيني مانغامرشي هايداك بالصحة ديالي ..يعجبو الحال ولا ميعجبوشي حقي.. كيف هوا سقصاني واش عزبة باغي العزبة يشالي ويعالي بيها حتى انا من حقي نعرفو واش صحيح ماعندو والو

عشية كانت زوينة بحاال كاع لعشيات لي كدوز مع مها من وراها رجعات بحالها كان عندها بزاف مايدار، اما حتى ياسين من بعد ما وضاحت الفكرة وبانت ليه الطريق معاها معاها عرف راسو غيتزوج بيها خلا ليها العسة ومابقاش كيعيط ليها ..تقول مل منها قبل حتى ميتزوج بيها ، ماعندوش داك الحماس لقوي ولكبير ليها وبالنسبة ليه هوا زوجة مناسبة ومثالية ليه كونها طبيبة وراقية ومربية ومؤدبة ولحدالساعة هي حسن من كاع ليعرف وبحال نوعها ماشي ديماتلاقا بيهم ، نتا وزهرك والزهر كيجي مرة فشحال .. المهم عندو هوا المرى تكون مزيانة وواعية وبعقلها ورزينها اما مرتو اللولة تزوجها عن حب وكانت صغيرة وجابها من الجبل كتفرفر ونص عقل عاش معاها الحرب وكانت سادجة وكتقول فاهمة وقافزو وبسهولة انجرفت حتى طاحت فالخطأ اللذي لايغتفر. هاد المرة ياسين نوا يتزوج بعقلو ماشي بقلبو واخا مكانش معول او ناوي قبل ميتعرف على ذكرى ويبدل فكرتو . عس عليها حتى عيا ومالقا والو والبنت عادية كتمشي تخدم وترجع والويكاند كتشوف مها وهي غادية حتى قطع لياس وتلاقا معاها اخر لقاء قبل لخطوبة ومشات عندو تلاقاها حتى بانت ليه نازلة من طاكسي ومشات بكامل اناقتها لابسة غوب بيضا طويلة بالصدايف من الصدر بلاكمام والشعر مجموع والحلاقات دالوردة فالابيض وصاك كحل سلمات عليه فمقهى فيها جردة جلسات

ياسين: ماقلتيليشي ماجيا فطاكسي فاين طموبيل ديالك؟

ذكرى: الطموبيل خسرات لي

ياسين: من داك النهار

ذكرى: مرضتني صافي خليتها حتى يجي الشاري نبيعها .. شحال قدني نصلح ونقابل عييت الطاكسي رحمة

ياسين: وعلاش ماعلمتينيشي نجي نهزك ؟

ذكرى: غير ماجاتشي فكلام وصافي

ياسين: تنهد) مابقاتشي غتنوض؟؟

ذكرى: خليتها فكراج قلت لو اذا جا الشاري عيط لي وصافي

ياسين: جبد تيليفون كيقلب فيه) علمتي باك على لخطوبة ولا مزال؟

ذكرى: ايوا حتى تقولي النهار حيت الخطوبةغنعملها عند حبيبو فالدار ديالو

ياسين: مزال كيشوف فتيليفون) علاش مالها داركم؟؟

ذكرى: ابا ومامّا مطلقين هي معتجيشي عندو ندار هي والراجل ديالها وهوا معيمشيشي عندها وانا خصني يحضرو بجوج والدار دحبيبو انسب مكان

ياسين: ربط اتصال) فاين اا آميكًو (صاديقي)

معزوز : فالقهوى جاليس وصافي قولي

ياسين: مشي جيب طموبير من لكراج عتجرب لعساس تما عندو سوارت دميرسيدس

ياسين: شكون هي فيهم؟

ياسين: هوا عيوريها لك غير مشي عندو وجيبها لي انا فأشقار عنصرد لك الموطع ديالي فالواتساب

جالسة وكتسمع ومتبتة حتى كمل وقالت: مايحتاجي اياسين انا بيدي خصني نرتاح شوية من الاعصاب د طريق... جبرت راحتي فالطاكسي

ياسين: كيشوف قدامو ) اامشي قالاك جبرت راحتي فالطاكسي.. نتينا لابسة هاديا وماجا فطاكسي مع واحيد ماعرفنا عينو قدامو ولا فضهرو

سكتات وتبسمات هزات كاسها دالعصير ورجهات لور تكات دايرة رجل على رجل شاداه فيدها ساكتة وهوا شاد تيليفون حتى نطقات وقالت

ذكرى: شنو ضهر لك نمشيو نعملو تحاليل غدا شبرت الموعد

ياسين: ماتبقاشي تعمل شي حاجة منك راسك حتى تشاورني

ذكرى: نتينا قلتي عنعملو التحاليل!!!

ياسين: بلحق مقلتشي شبر الموعد

ذكرى: جبدات تيليفون بالنفخة )صافي نعيط ليهم يمسحو الموعد

ياسين: قلب عينيه جيهتها) صااافي... قلت ليك غير المرة الماجيا ماتبقاشي دير لي فراااسك

حطات تيليفون فالجنب وربعات يديها ساكتة ماعاوداتش هضرات وحتى هوا ساكت حتى وصل معزوز وناض ياسين وقف

ياسين: انا جاي ..بقا موطعك

تبعات ليه العين وهوا خارج وعوجات وجهها كتردد

ذكرى: كمااارة ...

قلبات عينيها قدامها حتى رجع وجلس كيسوط وحط ليها سوارت الطموبيل فوق الطبلة وقال

ياسين: ها الطموبير... كتعرف تسوق لأطوماتيك؟

ذكرى : تبسمات) كنت سقت شي مرة الطموبير اطوماتيك دلكرا.. عنحاول

ياسين: واغير حاول بشوية باقا جديدة ... عاد خارجة من الدار

سكتات وبقات كتشوف فالسوارت بنص عين.. تكدب الى قالت ماعجبهاش الحال او مافرحاتش.. ماشي ديالها لاكن حسن بعدا من ديالها والمهم هوا تركب فيها وحتى هي عندها شي اعداء وشي محاسيد ماكرهاتش تحرقهم وطرطق ليهم المرارة .

جلسو شوية وجاو نايضين عاد تلفت وقاليها

ياسين: هضر مع باباك قولو الجمعة ان شاء الله عنجيو

ذكرى: شكون عيجي معاك؟

ياسين: عتجي مامَّا وراوية وخاي عبد الحق وطارق

ذكرى: خرجات عينيها) طارق داك خاك لكبير(دارت يدها على فمها) ومالو خلعك ؟

ذكرى : ديك المرة خدا عليا نضرةخايبة

ياسين: كيشالي بيدو) خدا عليك نضرة خايبة عيطبع ليك الفيزة ؟؟ هوا فراسو عنخطب وبداكشي لي وقع بينك وبينو عرف شكون وانا فكرتو

ذكرى: مقال والو؟؟

ياسين: واش كيخلعك طارق ولا مالك

ذكرى: لااااء غير قلت وصافي

ياسين: واقول لباك وليماك الجمعة عنجي

ذكرى: ان شاء الله

هزات صاكها مشات كتمشى بشوية عليها قدامو بالتقالة والتاويل حتى خرجو شار بالسوارت فيدو حتى شعلات قدامها واحد الوحشة كحلة كتشعل تشوفيها وجهك من شدة سوادها البراق وديك العلامة دمرسيديس لاسقة فالفم كتلمع وعالية كتخلع واخا تخدم حتى تعيا الى مادارتش كريدي الحياة تبقا تخلص فيها حتى تموت ماتحلمش بيها. اخا كانت عايشة الغنى فدماغها وماحساش بالزلط على الاقل فاش جاتها ديك الطموبيل حسات براسها وكأنها عادية تقول كانت كتسوقها من قبل وخشبعانة .

مد ليها سوارت مشات حلات الباب ويا سلام عليها وهي كطلع فيها، عاد اكتملات الصورة وجلسات كتشوف فيها ويدها على صدرها مضهشرة وياسين جالس حداها كيوريها تايق فيها غتسوق عادي ، حلات عينيها مركزة معاه فهمات مزيان شنو غدير وسلم عليها بوجهه نزل رجع اللور كيشوف فيها ويشوف الروايض كلشي باقي جديد . هزات راسها كطل قدامها وتشوف وبدات تتحرك بشوية مخرجة الطيارة للشارع وعينيها قدامها فيها الخلعة خلاتو وراهاكيشوف فيها حتى بعدات وقلب وجهه مشا لطموبيلتو، شدات الطريق فرحانة كتشوف حلم من احلامها خيال من خيالاتها تحقق وكتعيشو فالواقع وهي غادية بشوية وكدور بشوية كتحاول تطلق يدها وتولف عليهاوتشد العبار وكتبعد على الزحام واخا جاتهاساهلة مريحة تقول كتمشي بوحدها احسن بكثير من طموبيلتها ..مشات مع طريق خاوية كطلق يديهاوتولف وبقات كدور حتى حسات براسها بدات تندامج معاها وتحيد الخلعة عاد ضحكات وقالت مع راسها ..ايوا دابا عاااد نقول طبيبة وتجي معايا

دخلات الوحشة للحومة والجيران مخرجين عينيهم .. ها ذكرى خرجات طموبيل جديدة ها ذكرى بانو عليها الفلوس وخرجات جارتهم واحد شويرفة كتبارك ليها وذكرى واخداها على قد عقلها، حطاتها قدام باب دارهم فالدرب نقي كيشعل ونزلات بشوية عليها فرحانة بيها طلعات لدارهم لقات مقلوبة .. باها واحد المقربل واخا الفراش جديد كتبان حالتها .. طاحو كتافها ماقدراتش على ديك تمارة والمنضر وعيطات للمرى تجمع ديك الروينة ومشات هي جلسات حطات البيسي ديالها كتقرا حتى سمعات الباب تحل بالجهد وحلات عينيها وطلات من بلاصتها عليه شافتو هايج كيجري فالدار ويقلب بحال الحمق مافهمات وقالت

ذكرى : شني واااقع؟؟ مااالك ؟؟ شنو كاين

سعيد : الورقة ديالي لعيبت بيها فاااااين هياااا خاليتها هنايا . فاين مشات فاااين عملتوها

ذكرى: اشمن ورقة ماشفناشي الورقا

سعيد: شد راسو كينقز) الورقةحمراااااا هااااايدا بحال هادي فاين طاااارت عمرتها ونزلتها هنايااااا

سعيد لي شافو بديك الخفة والجهد وهوا غير هيكل عضمي مدعوق ووجهه داخل طايك بالكيف وسنانو شادين بلايصهم غا بلخلعة .. رقيوق ومتوسط الطول ضربة وحدة يلقا راسو فالبرزخ .. كان قليييول وصبعانو طوال رقاق وغامق لونهم بالبلية لاكن حاجة وحدة لي كانت زوينة فيه هي النقا،، كيدوش ديماوحوايجو نقيين ومرتبين كيلبس على قد جهدو واخا شي مرات كيلبس من السلك قوامج مكمشين لاكن على الاقل مكيعيفوش الواحد واخا شر البلية ما يهني.

بقا كيطير وينزل حتى لقا الورقة وخرج مشا خلاهاكتنفخ شدات راسهارجعات لقرايتها .

تنضفات الدار ووجدات ذكرى واحد التحلية وكان عندها مع الطياب كتموت على الطبخ والشهيوات والحلويات وكل ويكاند كدير شي تحلية وتخليها فالثلاجة ياكلو منها .ديك العشية صايبات كيك ريد فيلفيت وحطات حداها طرف تاكل منو وتعقل عليه حتى تم باها داخل عاوتاني مكمش سيفتو كيسول

سعيد: ديالمن ديك ميرسيدسا لي قدام الباب ماعرفتيشي شكون وقف في فم الباب؟

ذكرى: انا جيبتا كريتا من كراج دخاها دصاحيبتي راوية

سعيد: رخف كمارتو) نتينا جيبتيها؟؟ شحال خرجتيها؟؟؟(خرج عينيه)

ذكرى: المعلقة فمها) ماخلصتاشي خلاتها لي حيت طموبير ديالي عند ميكانيكو

بقا ساكت تلف وخرج هبط مشا للطموبيل كيدور بيهاويشوف فيها وطلع كيجري وينقز جوج بجوج دخل عليها زربان مطول يدو

سعيد: ارا ارا مفاتح عندي السخرة خصني نجيبها ارا دغيا غيسد الحانوت خليت عندو سخرة

ذكرى: شنييي؟؟؟ فاين عتيمشي؟؟ منقدرشي نتيها لك(نعطيها لك) انا نزلت الشيك بالثمن عاديك جيبتا باقا دوبلفي

سعيد: معنتعطلشي عنرجع دغيااا غير ارا مفاتح

ذكرى: تشووو انا نعيط نحمادي(ميكانيك) يعطيك طموبير ديالي لي عندو تسخر بيها

سعيد : هز يدو كيشالي)انا عاااد عنهود عند حمادي الحانوت عيسد بناقص

لاح يدو وراه خرج خلاها بوحدها فالدار تعشات وتكات كتراجع حتى داتها عينها قدام البيسي بالعيا ماحساتش ب باها فاش دخل للدار ولقاها ناعسة مشا كيتسلت ويقلب ليها فالصاك على سوارت ولقا الفلوس خدا منهم باش متعيقش بلي هزهم ليها وخرج مع الباب خلاها ناعسة حتى صبح الحال وناضت وجدات راسهاولبسات وتقادات وهزات صاك جديد خوات فيها اغراض الصاك لقديم ونزلات مع الدروج بسروال دجينز وتيشورط فرحانة غتمشي للخدمة بطموبيل جديدة ..يالاه حلات الباب فداك الصباح خرجات عينيها كانت غتشهق الشهقة الاخيرة وشدات فالحيط ويدهاعلى قلبها قريب تغيب وجلسات فالارض كضرب فخادها وتشوف فالطموبيل مضروبة من واحد العين مضغوطة لداخل وزاجها مهرس ومجرحة ..بدات كتغوت وتبكي حتى تجمعو عليها الجيران فداك الصباح ونزل سعيد حفيان كيسول اش واقع لقاها مضروبة وضرب فخادو حتى هوا

سعيد: شني وقاااع شكون ضربهاااا

ذكرى: شادة راسها كتبكي) اواااعدي شني وقاااع ليييي اوااعدي شنو عنعماااال ياربيييييي

سعيد: مخرج عينيه) شكوووون شكووون شكووون عمل فيها هاد الحالة شكون

الجار: لقا البلا والباس الحمد لله ماتجيشي غير فالصحة

ذكرى : كتمشي وتجي وتبكي) جاااتني فالصحة هادا هوا البلا والباس بعينووو. واش ماسمعتوشي الصوووت؟؟ ماسمعتوشي الحس يا النااااس؟؟ تشووو الضربة كيف عاملة كيفاش كتتضرب ومنسمعوشي الصووت؟؟

الجارة: ماسمعنا وااالو يا ذكرى شهادة لله

ذكرى: شدات حنكها) اواعدي فاين كان مخبااع لي هادشيييي... شكون ضربهااا وفيواااخ وكيفاش ماسمعناشي الصوت

سعيد: شكون عيكوون ضربهااا شكون ... انا بيدي ماسمعت والو نعييست باكري

ذكرى : كتقلب فتيليفون) عنعيط بوليسياااا .. ماعندي منعمل عنعيطلوم يشوفو شنو هادشي(كتمسح خدها)

سعيد: هبط لها يدها)بلاتي بلاتي نساقصيييو ونشوفو عاديك نعيطولوم

مشا زربان طالع ليه الدم كيقلب وغادي جاي مشغول تقول قاضي حاجة.. اما ذكرى هزاتتيليفون عيطات للبوليس حتى كملات هضرتهاوقطعات عاد رجع عندها كيشالي بيدو

سعيد: معامن هضرتي؟؟؟

ذكرى : بوليس ماجيين ... خصهوم يجيو اباااا شنو عنقول نمولاها معيتيقشي بيا

سعيد سمع البوليس وتلف بدا يتمتم ويدخل ويخرج فالهضرة

سعيد: بلاااش بلااااش ااجي اجي نقولك اجي

جرها بعدها على جيران وخفض صوتو

سعيد : شنو عيعملو لك البوليس علاش تاصلتي بيهم

ذكرى: كيفاش علاااش؟ اناقلت لك خصني نبلغ ضاروري واش هادشي جاك عادي ؟ تفيق تجبر طموبير هايدا ومتبلغشي.؟

تفقصات وبدات كتصوني عاوتاني على ياسين وخايفة ومتوثرة حتى رد عليها

ذكرى: غاديا كتبعد ) ياسين لابااس؟

ياسين: لاباس اذكرى شعندك معيطة لي فهاد الساعة (8:00)

ذكرى: سمحلي وصافي ماشي نخاطري راني رجعت لبارح ونزلت طموبير بغرط الباب ديال الدار ديالنا وهاد الصباح فيقت نمشي نخيدمة جبرتها مضروبة ماعرفتشي شكون ضربها؟

ياسين: كيفاش ماعرفتيشي؟ ضربة خايبة؟

ذكرى: مهم ضربة .. انا عيطت بوليسيا يجيو حيت معرفتشي شكون ضربها؟

ياسين: سخط) عاوتاني كتعمل لي فراسك علاش ميعطتيليشي قبل متعيط بوليس واش عتحمقني ولااااا؟؟؟؟

قطع عليها طاع ليه الويل خلاها كتفتف عاد نتابهات تزاد معاها الزايد بدات كتفتف وباها قاطع الحس كيشوف ينص عين فيها .. قبل ما يوصلو لبوليس وصل معزوز كيجري خلعها خدا منها سوارت دا الطموبيل عيط ليها ياسين مكشكش

ياسين: سمع ادا جاو البوليس قولهم طموبير ديالك لي تضربات ديتيها ميكانيك ومشي داابا نداك كراج دنيكاميك فيقو ينزل وصيه قوليه ادا سولوك بوليس قولهم عاد جبتيها وانا غنصرد ليك واحد يقولهم انا ضربت طموبيل بليل ويخلص ليك الاصلاح فهمتي؟؟

ذكرى: واخا

ياسين: وانا من بعد نتفاهم معاك على هاد روينة

قطع عليها ومطاكنتش من لعاكزين حتى هي وصات باها يبقا تما واقف فاش يوصلو البوليس ويعطيهم السمية ديال طموبيل ديالها ميجبدش حس الميرسيديس،، مشات كتجري للباركينك هزات طموبيلتها لي محطوطة تما داتها بعداتها ونزلات جبدات واحد العصا ضرباتها حتى هرسات ليها الزاجة وزادت مع الطريق كتصوني على لكراج لي كيصلح ليها يحل وحطاتها عندو مضروبة عاودات ليه القصة بأنها بيتاتها قدام الدار وصبحات مضروبة..

فهاد الاثناء وصلو البوليس على خاطرهم لقاو غير سعيد واقف والدنيا خاوية داك الصباح كلشي دخل بحالو.. بداو يسولوه وهوا وجهه صفر كيعاود غير لهضرة ديال ذكرى حتى رجعات حطاتها الطاكسي قدامهم

ذكرى:سلام.. انا عيطت ليكم لاباس اسيدي

البوليسي: فاين الطمويير؟ علاش ديتيها؟؟

ذكرى: جبرت واحد الورقة مور ما عيطت ليكم فيها نيمرة وعيطت لمولاها قالي صافي ديها نكراج انا نتكلف بالاصلاح وهاهوا ماجي دااابة قالي انا عنجي .. حيت تعطلتو ماتجيو قلت صافي ملي قالي عيصلحها قلت نديها ونمشي نلخيدمة

البوليسي: واخا عطيني لوراق

جبدات الاوراق من الصاك كتعطيه ووراتو التصاور فتيليفون ديال طموبيل فلكراج مضروبة وفديك الاثناء وقفات حداهم طاكسي نزل منها راجل اربعيني لقا السلام

الراجل: سلام عليكم... انا لي قيست طموبير لبارح غير سمح لي اختي راه كحزت على القيطة خرجات لي فالطريق... انا دابا نخلص الحق غير سمح لي

ذكرى : نقيدو كووسطا

البوليسي: لاكارط ناسيونال اسيدي

مد ليه لاكارط وتافقو فالاخير يعطيها شي بركة باش تصلح بلاكوسطة بلا والو وعطاها الفلوس قدام البوليس وحتا هما جاتهم من الجنة والناس مافيهم لي يتجرجر فداك الصباح وفكو لحريرة وقال سعيد الحمد لله خرجت منها ،، لاكن تصرفاتو حفضاتهم ذكرى وعرفاتو هوا لي دار شرع يدو وخلات حتى مشاو البوليس وطلعو بحالهم عاد فاقت ليه

بالفقصة الغدايد واجهات باها وهوا كينكر لاكن ماصدقاتوش، قحمها فمشكل وخرج منفخ ناكر كلشي وخلاها كطلع فيها وتهبط حتى صونا تيليفون وقفزات لقات ياسين كيصوني وبدات تنهد كتستاعد للمعركة

ذكرى: بسياسة) الووو ياسين

ياسين: شبر طاكسي مشي لاميزو دمرسيديس يعطيوك طموبير تحرك بيها حتى يصلحو لاخرا .. ها الموطع فاين تمشي صردتو لك وانا فاش عنرجع من سبتة عاااد نتفاهم معاك جبرتيني مشغول

ذكرى : تنهدات) واخا

مزادش معاه الهضرة ودغيا قطع ومشات دارت داكشي لي قالها . وصلات للدار دالمرسيديس حشمانة وكتسول وينعتو ليها حتى لقات راسها فكراج كبير قد السخط مستفين فيه الطموبيلات نقيين وقدامهم المضروبين وناس تما غير شكون وشكون ، بقات كتمشي من واحد لواحد حتى تلاقات بللي غيسلم ليهاالسيارة خلاوها تختار بين جوج كانو محطوطين تما وختارت وحدة عاطية للعين عالية ومجبدة الداخل ديالها فبيسطاش كامل مشعشع وسلمها السوارت وقبل ما تخرج بغات تعرف الميزانية دالاصلاح شحال طاحت ساعة هي لي كانت غطيح تما فاش سمعات ربعطاش لمليون !!! اييه ربعطااش باش غيصلحوها تما والبياس غالي وغير العين لي مشات ليها غيركبوها جديدة بغسيل الفندق. دارت راسها ماسمعاتش وخرجات من تما راكبة فالطموبيل لي عطاوها لاكن مافرحاناش ومزال كيتسناها حساب مضخم مع ياسين سد ليها الشهية والنفس مشات للخدمة طايح عليها الضيم وكتبكي على فعايل باها وفين وصلوها .. وكان ممكن يطلع لياسين الدم يدير بناقص من شي زواج بيها وكانت متوقعاها لاكن لحسن الحظ حدرات الراس سكتات وبقات غير واخا واخا حتى فاتت العجاجة . دخلات للكلينيك طالع ليها الدم تلاقات مع المدير زاد غسلها وصبنها هي ساكتة كتقول ليه غير عملت كسيدة عملت كسيدة لاكن هوا كان شانت وفرحان بلكلينيك عاجبو دور المدير تما ومبنت تقول غير بنت ولابسة حوايج دراري.. مشات كينفخ ويهدد خلات هي للغرفة ديالها لبسات طبليتها وجلسات بكات حتى شبعات عاد بدات دوز المواعيد ديالها فصمت

تسنات ياسين يصوني لاكن ماصوناش وحتى هي مافيها لي يهضر معاه ويتلاقا بيه وتسمع شي هضرة تقلل من احترامها . بقات كتقول ياربي غير يبقا غابر حتى ينسا ليوقع ولا على الاقل تخرج الطموبيل من لاميزون باش كيبقاش حاطها فراسو وينساها.

خدات الدرس وتعلمات وهاد المرى وقفاتها فالباركينك بعيدة على الحي وخلصات عليها العساس يحضيها وطلعات للدار سخفانة لاكن لقات قرعة دشراب فوق الطبلة والكيسان والطفيات ديال سبسي والشقوفة وفشلات جلسات على السداري مهبطة راسها شاداه وريحة الخنز فالدار ماقدراتش تجلس تما حتى دقيقة ،، بقات كتشوف فداكشي فاللخر هزات صاكها وطلعات لبيتها فالسطح زدحات الباب وسمحات فكلشي لتحت بالفقصة .

لاكن مع الاسف الشديد يالاه بغات ترتاح سمعات الدقان فالباب وناضت كتسول شكون طلع خوها عاصم لي كيدق وحلات لباب لقاتو ساخط كينكر ومعصب

ذكرى: شني كاين؟؟ با مكينشي .

عاصم: لهلا فاين يكون انا خصني نتينا .. عطيني واحد خمسين ددرهم

ذكرى: ماعنديشي

عاصم : دار فيها شوفة غدر) ماعندكشي خمسين ددرهم ؟؟؟ غتعمل معايا لحسابات دابا

ذكرى: ماعنديشي

عاصم: اياااه!!! واااخا

هز يدو للسما بالاعصاب ضرب الباب وزادها ركلة حتى تهرسات

هادا حال عاصم وسببه الفشوش الزايد ومن نهار حل عينيه ومو مفششاه وكان لي بغاها يلقاها ، كيتكسا اكثر ما كتكسا ذكرى بأضعاف مضاعفة واخا بيناتهم غير عماين لاكن عقلو طايش وعايش واكل شارب مكسي وياربي غير مايجيبش ليهم شي منتف ، كبر منفخ وزادها بالبلية اللي ماعندو ليها دراع ولا جيب ، احيانا كيجي السبب من الواليدين من تربيتهم وكيساهمو فإفساد الابناء ديالهم .. وهادشي لي كتشوفو ذكرى وكتحملهم مسؤولية الادمان والتربية وزادت كملات فاش كبرات وانطفخ الكيل رجعات كتقولها ليهم فالوجه مباشرة .. عيات ماتغطي عليه وعلى زبايلو تستر خوفا من باها يمشي يقتلو وتوقع شي كارثة ، ياما هرس باب الدار وجابت لمعلم صلحو غير باش ميشوفوش باها وياما ضرب تلفازة وعتقات الموقف وتسترات عليه وياما كوارث عدة وقعات ماوصلاتش لباها حتى رجع كيبان قدام باه بريىء ومكيدير والو .. وحتى هاد المرة سدات ودنيها وخلاتو كيسب ويخسر الهضرة زنزل معصب كيتوعد ذكرى يحلف ويردد

عاصم: رجعتي كتعمل معايا لحسابات... واااخااا.. هانتينا عتشوف .. عتشوف التعامل كيف عامل من ليوووووم

. من ليوووم مكينشيي الرحمة نهائيا.

مشا مغدد حيت عارفها خدامة وعندها الفلوس ومابغاتش تعطيه وهادا حالو.. طول عمره جالس فالدار عمرو جرب الخدمة حتى ولف لعكز ومكيفكرش اصلا يخدم وينضابط وكلشي كيجيه صعيب وميقدرش يفيق بكري، مولف السهير حتى للربعة ولفياق حتى لجوج ومرتاح فحياتو ماعندو مشكل ما عندو نفس ولف يسمع الهضرة ويدوزها حتى مابقاش كيتأثر ، يجبد من مو شوية ومن ختو شوية ومن مرتو شوية هي غادية هادي هي خدمتو معول على مرتو فين ما تجلس من لخدمة يتسناها ترجع باش تصرف وكأنه واجب عليها لدرجة تقبلات الوضع رجع كيبان ليها عادي تهز المسؤولية وكتقدرش تعول عليه..

فقصها وخلاها جالسة شادة راسها وسادة عينيها شحال وتكات فوق ديك النموسية ، المكان الوحيد لي كترتاح فيه وتسد عليها وتتمرح فوق ديك النموسية لس شرات ليها كوفرلي فلكرونة رطب وسط النقا.. المكان الوحيد لي نقي فديك الدار كلها ومتنفس كتسد عليها فيه. تكات فكندورة مخططة طلعات ليها حتى بان السليب وشدات تيليفون كتتمنضر فالانستغرام طالعة هابطة حتى طاحت فصاحبتها فِداء ناشرة تصاور جداد فاليونان بلبسة مشبكة فالابيض والصدر عريان متكية فيخت ابيض مصورة ودايرة رجل على رجل وطالقة شعرها الاشقر وحداه كتف راجلها شادة فيه .. حتى هي قرات ولاكن ماوصلاتش للمستوى لي وصلات ليه ذكرى ودغيا تصادفات مع رجلها جاي عطلة للمغرب عايش فألمانيا وحتى هوا تاجر فالبيضا عندو لي يتحرق مايتم .. فايتها بعشر سنين لاكن مواتين .. كتبان قدو بحكم الفورمة وتجبيدة وحتى هي عاطية للعين . بقات ذكرى غير كتشوف فالتصاور وتتنهد كتقول مع راسها غيير فِداء اللي صدقات ليها .. هاهي فاليونان هاهي فالمالديف .. كتسافر خمسة ستة دالمرات فالعام مكتملش وكل مرة فين مصورة .. مرة فلوي فيتون شارية الصاك مرة خارجة من ديور مقدية مرة فالطيارة فيرست كلاص.. مرة شادة فيد راجلها فشي بورش.. كتطلق عليهم غير تبسيمة خفيفة وتفقصهم بالتصاور وعايشة الحياة بالطول والعرض . تنهدات ذكرى ولاحت داك تيليفون جنب وربعات يديها كتردد

ذكرى : ياربي يكون هاد ياسين مطلوق ماشي شي واحد معقد نتزرف فيه ياربي ،، هاهي فداء تزوجات بيه ريفي ولي شافو يحلف عليه كاوري.. ها لوشامات ها الكيسان ها الخرجات على الاقل كيتبرع بلفلوس لي عندو وعارف يعيش ماشي دنوب على والو..

قهرها التخمام وكتشوف حالتها وكيفاش عايشة وماعندهاش الحق تخرج تسكن بوحدها او تاخد قرارات منها راسها.. باقا تحت السلطة دباها واخا قمار وسكايري لاكن متشبت بالعاددات والتقاليد وعندو اعراف.

و واخا جمعات الفلوس حتى عيات من نهار بدات الخدمة وبدات كتشد ديك سبعالاف درهم فالخلصة من الشهر للشهر ما غتكفيها فوالو وباش تفتح حتى هي عيادة وتجتاهد وتخدم خصها الفلوس وسبيلها الوحيد هوا تاخد كريدي من البنك . هادا حل خلاتو هوا اللخر حتر تسالي جميع حلول الارض عاد ترجع ليه وكهدف باغا تحققو ومتشبة بيه كتشوفو المنقد الوحيد هوا شي تزويجة بشي بزنس مان يكونو فيدو الفلوس مشتتة ومتلقاش حسن من ياسين ..،جامع كلشي زين وصغر وفلوس كحلة .. مكحلها فلوس بالمعقول غير مخبية شي تبيض شي مزال بلا لي كيتسال لشحال من واحد ومكيبينش مخليها سلاح للدفاع فأي هجوم فالمجال ديالو ، ياسين واخا بزناس فالعشبة مع خوتو لاكن يدو فالبيضا طويلة وعزيز عليه يتاجر فيها وفلوسها مضوبلة

غبر على ذكرى ماصونا ماسول كان مشغول ..وفالشغل كيحط تيليفون ويهز واحد العضم للتواصل معا لارقام المهمة فالخدمة باش هاكا الى وقع شي مشكل مع صحاب الحال ميتجرش فيها كاع لي عندو فتيليفوم.

قرب النهار المعلوم وياسين لا حس ولا خبر ومابقاتش عارفة واش تقول. لباها على الخطوبة ولا ماتقولش ،، اقل ما دارت عينات لمها قالتها ليها فقط وبدأت تتعاود هي وياها وقرروا يدرو الخطبة عند خالها عبد المالك احسن باش مها تحضر وباها يحضر بلا حساسيات وكل واحد يجلس مرتاح. كان اقتراح ذكرى من اول يوم لجوجل اسباب .. الأول حيت مها متبغيش تمشي لدار طليقها هي وراجلها والثاني باش الجيران حتى واحد مايشم شي ريحة ومابغات حتى واحد يعرفها اش كدير وشنو كتوجد فحياتها بحال ديما وهادي طبيعتها من الصغر . بقا ليها التحضيرات ماعرفتش واش بصح غيجي ولا لا باش تعرف واش توجد ولا لا وخلها تسبقها لباها ويكون فبالو

كان فهاد الأبناء ياسين راجل فسيارة اودي بيضا كوبي من اللور داخل مع الديوانة ديال سبتة ويالله خرج من الباطو وهادي رجلو فأرض الوطن ومن تما نيشان كمل طريقو طالق المقود والسيارة غادية وهوا بنضاضر الشمس كيقلب فتيليفون ركبو فالشارج حتى شعل وسبق بختو راوية هي اللولة لي كانت مشات لدار راجلها عايشة فيها حتى يحن الله ويكتاب عاد تعاود عرسها .

ياسين: الو راوية ...كيف نتيا

راوية: ياسين لااباس؟ كيف نتينا اش كتعاود

ياسين: الحمد لله مزيان... قولي اراوية بغيت نصقصيك

راوية: سقصي قولي

ياسين : كتعرف مزيان ديك صاحبتك ذكرى ؟؟

راوية: باستغراب) صاحيبتي ذكرى ؟؟ كنعرفاا اه شنو عندها.

ياسين: كتعرفها مزززيان مززيان؟

راوية: كنعرفها مزززيان قرأت معايا من الإعدادي

ياسين: وشنو كتعرف عليها؟؟ كيف عاملة؟ مزيانة؟

راوية: وا الصراحة د الله عمري شوفت عليها شي حاجة خايب

ياسين: اممم.. زعما ترانكيلو

راوية: الحاااقيقة ماشوفتشي شي حاجة خايبة.. قرأت معايا كانت كتقرا مزززيان ومكتفرفرشي .. حتى فاش دابا فاش كبرنا باقا هي هي .. علاش كتسقصي ؟؟ شوفتي شي حاجة مازياناشي؟ كتعرفها؟

ياسين: عنخطبها غدا خصني نعرف كيف عاملة .. ادا كنتي كتعرف شي حاجة قولها دابا

راوية: فدهشة) دبصاااح؟؟؟ خيييير ما تعمل ايوا الله !!! والله متجبر حسن منها الله يعمرها دار وتقيييقلة

ياسين : يااك

راوية: ووهضرتي معاها؟؟ هي قبلات؟؟

ياسين: علاش متقبلش مالها شكون

راوية: لااا زعما ماتوقعتش تقبل وصافي.. وماقالتي واااااو!!! ايواا هاا نتينا بقات ساكتة

ياسين : قبلات .. غدا غنمشيو نخطبو وجد راسك ادا بغيتي تمشي

راوية : انا عنعيط لها دابا نشوف علاش ماقلتهاشي ليا.. وهي كتهضر معايا كل نهار وقالت لي والو

ياسين: وصافي دابا .. انا قلت لها تسكت ماتقول لحتى واحد وصافي .. يالاه بسلامة

راوية : بصااح؟؟ ههه ايوا صافي .. ايوا صافي ماشي مشكل .. انا فرحتيني حيت عتزوج ذكرى والله.. ماخطرليشي فبالي غتكون هي للعروسة لي قلتي عتخطب

ياسين: هي دابا على الضمان ديالك؟؟

راوية: هههه لااالا عييير سيير انا نضمنها ههه انا كنقولك العايلة لأدااب والأخلاق والمعاملة .. ومزيييونة وحليييلوة

تسنات يصوني يأكد ليها ألموعد لاكن ملي ماصوناش حتى هي ماصوناتش لاكن فكرات وقالت تعلم خالها بعدا يكون فراسو بلي الخطبة عندو اما باها غيلبس غير سروالو ويزيد مع الطريق

داكشي اللي دارت .. علماتو وفرح ليها قداش لاكن فاش سمع السمية عرفو بحكم انه كوميسير فميخفاش عليه ياسين وتصدم صدمة عمرو ملي سمعها قالت ليه شكون بقا ساكت شحال حتى مشات هي ومها لبنى عندو للدار يجهزوها عاد جلسو فالصالون كيتناقشو وقال

عبد المالك: هاد تزويجة هادي من سعد باك .. يجبر الشوفة ارا ما يشقف.. بلحق نتينا غترمي راسك وصافي الرحموني راهم صعاااب .. صعاااب ماتقدرشي عليهم

ذكرى: نتينا كتعرفو ا حبيبو ؟؟

عبد المالك: كنعرف خاه الكبير طارق .. هوا مكنعرفوشي بلحق كنسمع به.. ايوا ميغركشي الذهب والطموبيرات والمشاريع راه ما مخفي اعضم.

ذكرى: انا منكدبشي علبك الحبيب خصني لي يهزني ويقوم بيا ويوفر لي كلشي.. انا ماشي شغلي شمو كيعمل غير يعمل لي المستقبل وصافي

عبد المالك : هز حجبانو بتحدير) نوصيييك عننداك تعمل العيال. ها ودني منك ... عمل لي غتعمل حتى ادا غلب عليك قولو الله يعاونك

لبنى : قولتهااا لااا... بلحق هي بغات قلت صافي خليها هي تعرف

عبد المالك : انا كسمعتي مني كععملتي بناقص وتشوف لك هايدا شي ولد الناس بحالك حسااان لك

ذكرى: بتردد) لاا. لا انا مرتاحة هايدا

عبد المالك: ايوا عنداك

ذكرى: غير رتاح عليا

عبد المالك: انا كن كانت عندي البنت منعطيهاشي بزناس

ذكرى: هه عااادي حتى هما مزيانين

يتبع...