محتوى القصة
هادي هي الدنيا..بحال شي محطة ..شي غادي شي جاي ..وهادي هي الحياة كنا كتعطيك كلشي تقدر تاخد منك كلشي،،خص الانسان يكون على بال بتقلب الموازين فالحياة وديما ينتابه ومايتيقش فالدنيا،، خصو يكون مستعد للصدمات وقوي كفاية باش يتحمل الخسارة ومايتصدمش باش يقدر يزيد يكمل فهاد اللعبة ..والا فهوا الخاسر من هادشي كلو . ماشي ديما كنلقاو لي بغينا..وماشي ديما كنحققو لي حلمنا بيه..احيانا القدر كيلعب لعبتو ويقلب كلشي وخصك تبت وتقوي راسك باش تشد التوازن ديالك. والا فراه غتموت ونتا فالحياة ويطفا النور من عينيك وتكمل بقلب ميت ومشاعر جافة
بعد مرور سنوات على الذكرى اللي خلداتها ذكرى فذاكرة ياسين وكيتفكر داك اليوم المشؤم حتى رجع عندو تاريخ..داز الوقت ودارو احداث والانسان استمر لاكن واخا ينسا ومايتذكرش كيكون فات الفوت والي كدوز على الراس كتخلي فينا اثار وكيتحول لاسلوب فالعيش وكيرجع جزء من شخصيتنا.
فعمرو اليوم ربعين عام .. مشا الطيش مشا الشغف ومشا الحماس فدوك السنوات الاولى وكان طفا فيهم فمرة ..لاكن مع مرور السنين الانسان كيتبدل وكيتقال ويختر ومع التجارب فالحياة كتزيد للواحد خبرة وتعطيه درس .
ليوم هوا اب..اب فقط لعزية عندها طلاتش لسنة وهاديك هي الحب اللي مزال مخليه كيضحك . هي الصديقة وهي الحبيبة والباقي غير روايات واوراق خريفية كتطاير فالهوا، دخلات عندو للبيت كانت شقراء وعينيها زورق وشعرها حرير كتصبح عليه بحال ديما وتخشا حداه وهوا ناعس وتكمل نعاسها..لاكن هاد المرة لقاتو واقف قدام المرايا كيسد كمام القميجة ووشام كحل كيبان تحت منها ..لابس دجينز وقميجة. وطويل قدو وقامة ماخدا منو الزمان والو.باقي زين ووسامة يطيحو فيه مراهقات فالمدرسة لاكن شخصيتو تبدلات بزااف وكلشي باين فعينيه..نضرتو للحياة تبدلات وتعمقات وتقالت وملات من داكشي اللي كيبان قدامها.وقفات وراه شافتو عوال يخرج وقالت بالاسبانية
لينا: شهاد الوسامة لي شافك هاكا يقول عندك شي موعد غرامي
تلفت عندها ودار واحد ضحكة وشاف فيها معجب وقال
ياسين غنمشي نخطب
حلات عينيها:بصح !!!
داز حداها كيضحك ومشا جلس يلبس فرجليه لاكن مشات كتجري جلسات ليه على فخدو وقالت
لينا:بصح غتزوج؟
ياسين:كيتأمل فملامح وجهها)مايبقاش فيك الحال ؟
لينا:لااا بلعكس فنفرححح بزاااف
ياسين:تبسم) غير كنضحك معاك..هابط للمغرب عندي شي شغل تما ونرجع
لينا :حتى انا بغيت نمشي ديني معاك
ياسين: حتى تكون ماماك هابطة وتهبطك نتلاقاو تما
لينا: ماما كتمشي لدارهم وتجلس تما مكتساراشي
ياسين: عزيزة غتساريك انا نقولها لها
باس ليها راسها ونزل مع الدروج كانت مو تقدمات فالعمر لاكن هاد الكور مكيبانش عليهم الشرف ..باقا صحيحة تبارك الله ومربية البنت ومقابلاها وكتفضل تبقا معاها لينا على انها تمشي عند مها تعيش معاها بحكم واليديها مطلقين وكل واحد عايش بوحدو .
خلاها مع مو وخرج ركب سيارتو الفخمة وزاد مع الطريق في اتجاه المغرب
كان عندو بزنس كبير تما فطنجة عبارة عن معمل وشركة فنفس الوقت لصنع البياس ديال السيارات لاكن مع الوصول ديالو لقا المشاكل كيتسناوه .مشا جلس فواحد الفبيرو كبير وكان معاه المدير لي مكلف بالشغل تما جلس قدامو وبدا يحط ليه الضواسا الكحلة وحدة تابعة لاخرى حتى وصل لواحد الضوسي فالمحكمة وقال
المدير: هاد الدعوة مابغاتش قالك تنازل عليها وطالبة تعويضات من لفوق
ياسين:شد الضوسي كيشوف فيه) شكون هادي؟
المدير: هادي الشركة ديونكا لي كنتعاملو معاها..مات السي المرنيسي وبنتو دابا بلاصتو ناضت قالك غندعيكم وندير لكم الافلاس..كطير من المقلة
المدير من كثرة ما مخيخ منها جرجراتو فالمحاكيم رجع كيهضر عليها بقرف.
ياسين: ماهضرتوشي معاها باللاتي هي احسن تصبر شوية
المدير:قلتا ليها الضغط علينا والمرحوم عارف هادشي واخا كنتعطلو مندفعو ليه السلعة كيصبر
ياسين: لاح داك الضوسي)السلعة غتوصل من هنا خمسطاش ليوم من المانيا عيط ليها قوليها شنو كاين
المدير:قالت لك غضرب لينا الطر فالتلفازة
ياسين:سير عيط ليها تسكتنا واخر مرة يجمعنا معاهم شي شغل من هنا لفوق ..خليها دخل السلعة راسها
المدير: انا غنتاصل بيها دابا تسمع اش كتقول على ودنيك ..(شافها كتعيط)عمرها طويل بحال الكلب
المدير:الو السلام عليكم مدام مرنيسي
سمع ياسين صوتها من تيليفون كتهضر والمدير كيرطب حتى قطعات
المدير: ها اللي قلنا .. الخدمة مع العيالات هي هادي
ياسين:كيسوط) عيط ليها ربط معاها اجتماع نشوفو شي حل لهاد الروينة
المدير:كيصوني) مدام المرنيسي ..السي ياسين راه جا بغا يجلس يتكلم معاك .. نشوفو شي حل لهاد المشاكيل
مدام المرنيسي:مرحبا وعلى سلامة سيك ياسين عاد تفكرنا..هوا قاضي غرض وحنا واقفين بلا خدمة هادا هوا الاخلاص والتفاني
المدير:كلشي عندو الحل..(شار ليه ياسين بصبعو) لعشية نشاء الله غيكون اجتماع عندنا فالشركة
قاطعاتو:ومزال باغي مني نجي عندكم حتى لتما ؟ اسيدي قول لسيك ياسين يجي عندي لهنا هوا اللي داير المشاكيل كاملة يجي يشوف ليا شي حل راه الموضفين دياولي واقفين عن العمل
المدير: واخا امدام مرحبا (شار ليه ياسين بالايجاب) واخا مع الربعة ان شاء الله نكونو معاك
مدام لمرنيسي:ايوا دابا نشوفو
قطعات معصبة بقا المدير غير كيشوف وقال
المدير :يخخخ على مصيبة.. يالطيف
ياسين: تكا اللور) شكون هادي؟؟ شنو كتعرف عليها؟
المدير: بنتو دالمرنيسي قارية فلندن عندها الماستر فتجارة وكطير كن تشوفها كيفاش كتخرج دوك العينين تجبدهم ليها من بلايصهم. هادي يالاه عندها سبعة وعشرين عام وشنو دايرة ماخلات لباها مايقول..قالك حنا كنستاغلوه وكنضحكو عليه وجات تربينا
غير كتكثر الفلوس كيكثرو معاها المشاكيل..هادا حال الدنيا.
ضربات الربعة دلعشيا وكان فديك الشركة فالحي الصناعي داخل مع الباب استقبلوه فقاعة هوا ومعاه المدير فقاعة الاجتماعات كانت خاوية وشوية بشوية بداو يدخلو الموضفين ..ها المحاسب ها المحامي حتى عمرات الطاولة وشي كيهضر مع شي ويتسناو فيها دخل..تما جايا ورا الزاج وحلات الباب دخلات عليهم منفخة وراسها فالسما لاكن كانت اية فالجمال ، ايقونة الجمال من راسها لساسها والسوالف طوييلة مطلوقة كحلة والوجه مدور صغير ونيف مقاد والشفايف مشماشات ،اما لعيون كانت ساحرة والنضرة كتسلب العقول وفيها بريق ولمعان حي وبرائة تقول ماشي هي اللي كانت كتعطيهم فالقرطاس من التيليفون : كانت لابسة صباط عالي كحل من جلد ال حنش وصاية فلكرونة قصيرة مزيرة وفيست طويلة قد الصاية وصدايفها ذهبية ..نحيفة شوية لاكن كتصرخ بالانوثة صرخة وكتشهق بالدلال والدلع وكي المشية كي النضرات تقول انسانة زجاجية ..ناض المدير اللي جا مع ياسين بسرعة جر ليها الكرسي جلسات ومشافت فحتى واحد فيهم ..حطات الملف وهزات راسها قائلة تحت نضرات ياسين اللي ملي دخلات وهوا كيطلع ويهبط فيها
المدير:مدام المرنيسي ..مسيو ياسين
عاد هزات راسها شافت فيه وطلعاتو وهبطاتو وتبسمات بمجاملة
-مرحبا بك …نهار كبير هادا اللي شرفتينا وجيتي برجليك عندنا نتعرفو عليك
ياسين: ببرودة هادا واجب الاللة
لاحت شعرها وراها وقالت:شنو كتقول فهادشي اللي طاري بيناتنا
ياسين: كنقول باللي مكاين علاش نوصلو للمحاكم .. الى كانو شي تعويضات انا مستاعد ندفعهم
مدام المرنيسي:حركات راسها بالاجياب) اوك ..ممكن تتفضل معايا
ناضت من بلاصتها هزات الملف وناض حتى هوا بكل هدوء مشا وراها ..خرجات من لقاعة كل شوية تقوليه تفضل وباينة فيها معصبة واخا كتجامل لاكن يشفع ليها داك الزين كما دارت كيجي معاها ..المشية حمامة وهي كلها مختالفة على غيرها وكتحسها استثنائية فاسلوبها، هبطاتو للمعمل كانو فيه العمال هدامين ودخلاتو لواحد المستودع كبير ووقفاتو كتستعرض عليه
مدام:المرنيسي) شوف..ديبو خاوي..كنقضيو غير بداكشي اللي عندنا وهادشي تسبب لينا فمشاكل مع الكليان وعطلنا عليهم خدمتهم..هادشي راه كيخلي الكليان يفقد فينا الثقة السي ياسين وهاكا غتنهار الصمعة ديالنا …شوف ..(خرجاتو عند الموضفين)شوف الموضفين شحال قلال ..شحال من بوسط خاوي والخدمة مكايناش حيت السلعة ماجاتش وشحال من عامل جالس فدارو ماخدامش..عجبك هادشي ؟ عجبك هاد الحال لي حنا فيه بسببكم السي ياسين
ياسين سرح عينيه فالمعمل وقال) انا مستاعد نخلص ليك الضرر وكنعتاذر منك على هادشي وقع
مدام المرنيسي: الضرر ديالي كبيير بزاف وعندي مشاكل مع الشركات للي كنتعامل معاهم وكيتيقو فينا ، حنا دابا واقفين على السلعة
ياسين:غتوصل من هنا خمسطاش ليوم ولا اقل
مدام المرنيسي: ماشي اول تاريخ السي ياسين..كل مرة كتعطيوني تاريخ وهادشي زاد عند حدو بصراحة
ياسين: انا كنواعدك..خمسطاش ليوم او اقل غتكون عندك
مدام مرنيسي:نص شهر السي ياسين..نص شهر كامل راه خسارة لينا بزاف
ياسين:سرح عينيه فالمعمل مزيان)عندي واحد الاقتراح الى قبلتي
مدام مرنيسي: شنو هوا
ياسين: الى قبلتي تبيعي المعمل انا نشري منك
صدمها بقات واقفة غير كتشوف فيه وقبل متهضر تلفت شاف فيها وقال
ياسين: بالثمن اللي عجبك وبالخسارة ديالو وكاع المشاكيل اللي فيه..شنو قلتي؟
من الصدمة للبيرو نيشان دخلات دافعة باب الزاج لمكتبها الكبير ودخل وراها وهي كتقرقب بداك الصباط العالي .مشا جلسات فالمكتب دارت رجل على رجل وقالت بابتسامة
مدام المرنيسي:الى ناسبك الثمن وبغيتي تشري مرحبا
جلس قدامها كيشوف فداك البيرو ورجع طلع فيها و هبطها وقال
ياسين: ماجاش معاك معمل ديال صنع السيارات فلحقيقة
ربعات يديها فوق الطبلة وقالت :وشنو فنضرك يجي معايا؟
ياسين:شي حاجة بنوتية حسن..شي تصميم دلحوايج ولا شي حاجة فالتجميل
ضحكات وقلبات شعرها للجنب كتفكر حتى تحل عليهم الباب فجأة ودخل شاب طويل وعامر ملامح وجهه عربية .وسيم فوجهه لاكن نضراتو كانت غيورة ومع الدخلة قال بعجرفة
حسام: مكتجاوبيش فتيليفون
تلفت ياسين وراه شاف فيه وطلع وهبط فيه وناض وقف وقال
ياسين: نهضرو من بعد ونكملو على الاتفاق ديالنا
حسام: كيشوف فيهم) اشمن اتفاق؟ (شاف فيها)شنو واقع هنا غيتة؟
غيثة:والو غير كانو مشاكل فلخدمة مع السي ياسين وحليناهم دابا
حسام شاف فياسين بنضرات غيورة ومشا جهة غيثة وقف وعنقها من خصرها ،اما ياسين من عينيه محملوش شاف فيه بقرف وشار لغيثة باش يمشي وزاد بحالو مع الطريق
بقات هي وحسام فالبيرو وضارت عندو معصبة
غيتة :الشوهة كما ديما ..عاوتاني داخل عندي بلا اداب بلا صواب ومحشمني قدام الناس مالك على هاد الاسلوب مالك
حسام:ماشفتيش كيفاش كان كيشوف فيك؟؟ زايدون هاد السيد ماعندك ماديري بيه وبالخدمة لي تجمعك معاه ومايصلاحش ليك..نتي مزال معارفاش اش كيدير هاد السيد هادا ..وزايدون انا كنت. جاي عندك نشوفك وقالو لي شكون معاك هنا وهادشي لي خلاني نتعصب
غيثة: علاش شنو كاين ؟ اش كيدير؟ كن مكانش مزيان ميتعاملش معاه بابا ومايتعاملوش معاه بداف دناس لي كلشي دابا كيحاول يبني معاه علاقة
حسام :بغضب) نتي ماشب هي باباك..باباك كان راجا ونص وقد هاد المسؤولية…ونزيدك حاجة اخرى ، هاد السيد هادا ماشي رجل اعمال كما كتشوفي..عنداك يحساب ليك راه عندو شركة ومعامل صافي..هادا اكبر بارون بأروبا وتاجر مخذرات ،وماشي بوحدو ..الى غاب هوا كاينين خوتو والى غابو خوتو كاين هوا.. يعني محمية وخطار عليك نتي بي غير مرى ماعندك حتى سند ولا حماية
غيثة:بصدمة) كيفاش!!
حسام:كي كتسمعي،، هادشي كبير عليك اغيثة بزااف من الاحسن خليني نتكلف ..عمي كان كيتيق فيا وكيتسنا غير نرجع من امريكا ويعتامد عليا..خليني انا نتكلف بهادشي وخليك نتي مرتاحة ماشي ديالك هاد الشغل
غيثة: في حيرة) ولاكن بابا كان كيتعامل معاه!! واش كان عارفو؟
حسام: اللي كيعرفو ميمكنش ميعرفش اشنو ورا هاد الاعمال كلها، وباباك كان عارف..ولاكن لمصلحة الشركة كان كيتعامل معاه.. حيت مكاينش فالمغرب لي كيدخل السلعة بداك الثمن وضامنها توصل وحتى فديوانة كدخل غير بنص ثمن..هادا علاش باباك كان عندو الربح معاه واخا شي مرات كتعطل(غمزها) حيت بعد المرات كيخليها مسطوكية حتى يدخل معاها الشغل الصحيح عاد كيقلع الباطو ..فهمتي علاش بزاف دشركات كيفضلو يتعاملو معاه ! هادا مكيخسرش. وكلشي عندو ربح وكلشي ساكت حيت كلشي رابح معاه وفصفو..هاعلاش قلت ليك نتي مرى مغتقدريش على هادشي ..غير سمعتي وتخلعتي
غيثة.دارت يدها على قلبها)هادشي بصح كيخلع..هوا قتارح عليا نبيع ليه المعمل وانا وافقت
حسام :خرج عينيه)هاا!! اش غتبيعي؟
غيثة: شدات حلقها باختناق)انا مقادراش على هادشي وماكنتش عارفة الصراحة.. ومن كثرة الانتضار رفعت عليه دعوة فالمحكمة (شدات راسها)ناري شحال تكلخت
حسام: مخرج عينيه) لا برافو عليك…والله برااافو ماعندي مانتسالك
غيثة: نتااا فيين كنتي؟؟؟ فين كنتي فاش المعمل بقا خاوي بلا سلعة والعمال جالسين..شنو بغيتيني ندير (جلسات منهارة) هادشي بزااف عليا..غنبيع ليه هادشي ونمشي نرتاح عطا الله مندير
حسام: بلطف) حبيبة..سمعيني..ماعندنا منبيعو ولا نخليو..هاد الشركة راه فنا فيها عمي عمرو باش تكبر ماجاتش نخليوها بين ليلة ونهار غير حيت نتي ماقدرتيش عليها..متافق معاك ان الضومين صعيب والكابلاج خصو الرجال يوفقو عليه ولاكن هاشي هادا هوا الحل ..انا فجنبك ومعاك مستاعد نوقف هاد الشركة على رجليها من الاول
غيثة: بتعب)عندنا بزاف دلكريديات شحال قدنا..شوف هاد الملفات شحال من واحد كنتعاملو معاه كيطالب بتعويضات وشحال من واحد عطا فلوسو وما وصلاتوش السلعة فالوقت..حتى هادشي اللي كنتسناو دابا من هاد ياسين ماعندناش باش نخلصوه .. ات تقريبا شي مليار وست ميات مليون خصنا نحطوها فاش توصلنا السلعة وانا بلعاني بغيت نضغط عليه على الروطار باش يعطينا تعويضات على الاقل نصلحو بيها الوضع
حسام: سمعي احبيبة.. نتي خليك بعيدة على هاد المشاكل..اشنر كندير انا هنا الى ماكنتش غنعاونك…ماعليك غير تعطيني الوكالة على الشركة والمعمل وانا نتحمل هاد المسؤولية كلها غير تهناي
هي بنت رجل اعمال بحال بزاف درجال الاعمال اللي كيولدو غير واحد ويغربوه ويقريوه ويكبروه مامخصوص من حتى حاجة، هادو مكايكونوش عندهم عقد نفسية وهما اللي كتكون شخصيتهم قوية ومكيتأثروش بالمستوايات لاكن ماكبروش فالحروبات الشعبية ،هادي بالضبط عاشت بحال الاميرة مكتسناش اللي يعطيها الحنان ويدوخها بكلمة كنبغيك ونموت عليك وفنفس الوقت ماكتبغيش اللي يسلط عليها الاضواء او تشارك حياتها فالمواقع. عايشة البساطة فحياتها مكتنباهرش وتقول واو حيت دوزات كلشي..العز والدلال وبنت الخير والخمير ومفششة حيت وحيدة واليديها لاكن ماشي اجتماعية وكتخاف من البراني وماعندهاش مع المغامرات خصوصا فاش مشا الاب السند الوحيد رجعات كتخاف على راسها بزاف مكتقدر تيق فحتى واحد من غير ولد عمها اللي كتعرف ولي فنفس الوقت خطيبها وخطبها قبل وفاة باها باش هاكا يضمنو امانها وماتكونش وحيدة. هي حاليا كتعيش الوحدة والحزن وماقدراتش تتخطا موت باها . كانت نشيطة وحيوية لاكن فقدان الواليدين صعيب وكيكسر للخاطر ويكسر القلوب.
انفردت فبيتها بوحدها بعدما ضلام الليل وتفكرات دفئ الاسرة وجلسات حدا شرفة الغرفة على زربية فالارض كتشوف البوم الصور ومع كل صورة كتدرف دمعة ..بوحدها فديك الدار لكبيرة اللي بحال القصر غير هي والخدم والعساسة مكاين اللي يمسح على راسها ويواسيها من غير القمرة ونجوم الليل .
هادا حالها من نهار بقات بوحدها ، احساس صعيب وخوف وهبة كتتملك قلبها واخا كتدعي القوة لاكن فداخلها انسانة رهيفة قليلة معرفة ومزالة صغيرة على خبرة والتجارب..حياتها دارت بين الكليات والدراسة والسفر والرفاهية والاصدقاء .واخا كانت عايشة بعيد على واليديها لاكن كانت عايشة الطمئنينة وراحة البال وكتحس بالامان حيت باها كان رجل ونعم الرجال ..كلشي كيقدرو ويحتارمو ومكانتو كبيرة،،خلا ليها ثروة لاكن ماعطاتهاش اهمية والفرق اللث كتحس بيه حاليا هوا للفقدان و مشات الطمئنينة ومشات راحة البال وخصها دبر امورها بوحدها بدون تجربة وبدون خبرة ومزال كتخس براسها طفلة فالداخل ديالها معولة على باها ومحتاجة الحماية والامان ولا علاقة ليها بالبزنس والشغل لكبير.واسوء ما في الامر تلاقات مع بارون قدو قداش وخوفها منو ومن شنو ممكن يجي منو كبر بكثير من خوفها من الوحدة. لاكن وسط هاد المعانات اللي كتعيش كلها كانو ضايرين بيها العائلة المقربة والاصدقاء وفين ما كان شي مخلقو كيعرفها رجع يتودد ويتقرب منها حتى مابقاتش الدار ديالها كتخوا ومابقاتش كتلقا فرصة فين تجلس بوحدها..حتى من صاحبتها الانتيم من كثرة مكتجي عندها كلها نهار رجعات عايشة معاها فالدار تقول ساكنة فدارهم ..طبعا هه. فالابواب مفتووحة وشكون يقول ليهم لا ومابقا عندهم مناش يخافو ،وشحال خايبة تكون نتا اول مليالدير فالعائلة والباقي بسطاء وترقعو غلى ضهرك..تقري ولاد خوتك حتى هما وتعاون عائلتك وتوقفهم حتى يرجعو همة وشان وتتوسط ليهم وفالاخير يطمعو لك فبنتك ويطمعو فرزقها ويدورو بيها بحال لكلاب..بلا صحابك والشركاء ديالك اللي من نهار عرفوك خليتي وريثة باقا ماجايبة هبار فالدنيا ناضو كيقلبو عليها ويدورو بيها وكل واحد يجر من جهة باغي يستولي على شنو خليتي..ها اللي جايب ولدو يخطبها وها اللي باغي يدخل شريك معاها وها اللي داخلها بالنصب وزيد وزيد.لحاصول ربي كبير وديما كيسيفط ليك انسان متقي الله وسط دوك الدياب كلها ينبهك بدون مقابل وبدون طمع .وهاد الانسان كان هوا المحامي ديال باها وصديقو المقرب اللي فكل مرة كيزورها ويطل عليها كنبهها ويرشدها . وهادشي اللي خلاها هاد ست شهور بعد موت باها واقفة على رجليها شوية واخا راه سبق وتنصب عليها ودوزات اول عثرة فالدنيا وخسارة وراها غاديا مكملة
كيحسابلك ساهل تكوني لاباس عليك بنت رجل اعمال وعندك فيلا بحال القصر والفلوس فالبنك والاملاك،، زوينة يخلي ليك باك الورث وتكوني قارية فلندن وعندك عقلية نقية وعمرك جربتي الاشتياق والخصاص واللي بغيتينا تلقايها..يعجبك الحال تكوني وحيدة واليديك ومفششة ونتي هي الروح وهي العمر وتكبري بنفسية سليمة ماعندك عقد ما عمدك حتى ذكريات خايبة وتوصلي سبعة وعشرين ونتي بنفس سليمة ومرتاحة ماعرفاش اش طاري فالدنيا..شكون فينا كره يعيش هاد الحياة!! واش كيحسابك عزيزي الفقير هادشي اللي كتشوفو سطحي هوا كلشي! لا طبعا ماشي هادشي اللي كاين ولاكن كاين ما عمق وليوم غتعيش الدور ديال الانسان الغني لاكن وحييد ..وريث لاكن بدون سند بدون حماية..تقولي عطيني الفلوس وعطيني ديك الثروة ونوريك حنة يدي؟!! غنقوليك اجي نحيد ليك عقلية الفقير ونحيد ليك التحربين اللي دوزتي فيه وتاحراميات والشوق للمال والغنى ونحط ليك عقلية بابا غطيني اللي معارف والو من داكشي اللي عارف نتا ومامجرب حتى حاجة من شنو جربتي نتا وندفعك نحو الثراء ونخليك تجرب..لاكن غتجرب مع غيثة معنى الوحدة والفراغ والفقدان . حيت بالنسبة ليها المال مكيشريش السعادة واللي عايش فيه منذ نعومة اذافره مكيعطيعش قيمة ويمجد ليه..حيت بكل بساطة ماعارفش الاحتياج..لاكن نتا عارف عزيزي الفقير وعشتي فيه هادا علاش غتعطيه قيمة وتخاف عليه وتحميه بسنانك .هادي مجرد مقدمة ونبذة صغيرة باض تعرف باللي المال خطر على مولاه..مسح عليا داك العقلية التافهة لي عندك حيت مستحيل تتحكم فقوة المال الى ماخديتيش معاه حروبات وتجارب.. وخصك تعرف باللي هاد القوة كتجلب المشاكل والاخطار والى ماعرفتيش تتعامل معاها وتكون ذكي غادي تغرق وتسالي معاك..وديما فبالك باللي هي ضدك قبل متكون فصفك..وباللي عذابك قبل متكون سعادتك .. وباللي الى فكات ليك مشاكلك قادرة تغرق فما كفس منها..هادا هوا المال.. ماشي مجرد اسم او عملة فقط..بل هي قوة وقوة كبيرة وعضيمة وماشي ملك حتى واحد..ماشي ملكك واخا تكون خازن فمهازنك مال قارون. وانما نتا اللي ملكها ونتا اسيرها ونتا عبدها الى ماسيطرتيش عليها..وهي اكبر عدو ليك ..هي سعادتك وهي تعاستك..
وقفات بالسيارة قدام باب لفيلا الداخلي ..هي سيارة عادي لاكن اللي فيها كتعيش الخيال الوهمي بحال بزاف دناس كنشوفوهم كيشوفو الفوق بزاف وكيعيشو ادوار ماشي ديالهم ومكتناسبهمش نهائيا..نزلات بتعجرف هزات الصاك ودخلات للفيلا كتشرح عينيها ومع الدخلة طلعات وهبطات فالخدامة وقالت
مليكة: صباح الخير صابحين ناعسن ولا؟؟ مكاين فطور مكاين شغل
ربيعة:لا ختي مليكة فقنا بحري ها نتي كتشوفي الدنيا كي دايرة
مليكة:امم.مزيان غير مرة جايا عيطي ليا مدام مليكة..ماشي ختي..(زادت مع الطريق) اويلي رجع قد القب قد السطل
بقات ربيعة غير كتشوف فيها وكانت خدامة فالفيلا رجعات للمطبخ عند عويناتها وقالت كتنكر
ربيعة: بقات لينا حتى هادي فالحساب جايا تفهم علينا هنايا..ايوا صافي هادشي اللي بقا
مازال ماكملات هضرتها دخلاتهم للكوزينة ومشات حلات الثلاجة لقاتها خاوية وقالت
مليكة:ماعرفناكم كتجيو تخدمو وبا كتجيو تتقداو.. مال هاد الثلاجة خاوية
ربيعة:كتقلب عينيها) ايوا راه مدام غيثة مكانتش باش نتقداو عاد لبارح جات
مليكة: من ليوم ..اللي قلتها ليك ديريها .. واي حاجة تشاوري معايا انا ..فين غيثة مزالة مفاقتش؟
ربيعة:فاقت ومشات لاصال
ربيعة: وجدي ليا شي حاجة ناكلها ..نتسناها ختى
ربيعة: بهمس)كتشوف الثلاجة خاوية وقالت لك وجدي ليا مناكل ..تاكلي فيه السم العقروشة
بحال عادتها ديما فاش كتمشي للدار دغيثة كتبدا دور وتبركك وتقلب طالعة تازلة وتقلب فبيتها وتنبش والى لقات شي حاجة تهزها ديرها فالصاك علاش لا..واخا عارفة غيثة شاطة ماطة ماشي ساهلة ولا هبيلة والى حصلاتها تمسح بيها الفيلا من لداخل ومن برا مادوزهاش ليها..لاكن واخا هاكاك لاعبة عليها العشرة وعاطياها وجه مرت عمها الضريفة اللي كتبغي ليها غيير لخير وغتكون مرت ولدها وتحسبها بحال بنتها .كانت كتسارا فالفيلا حتى بانت ليها صاحبة غيثة نازلة بالبيجامة كتفشش بحال شي باطرونة كتبان فيها لاللة ومالي، لابصة بيجامة دفيكتورية ساكرت وبانطوفة وطالقة شعر وكتعيش الحياة اللي تمناتها ولقات راحتها تما وجلسات
مليكة:كطلع وتهبط فيها) واش نتي ماعندك دااار ماعندك طاسيلة ماعندك مك ما عندك باك !! غير كدوري فجناب البنت فين مكانت نلقاك وزدتيها رحلتي لهنا نتي كاع!! لقيتيها سايبة ولا؟
هدى :بنص عين) هي قالت ليا بقاي معايا ونسيني
مليكة:سير اختي جمعي حوايجك الله يعاونك الدار راه عندها ماليها ..
بينما هما كيتناكرو تمات داخلة هازة كلبها فيدها ولابسة سورفيت لاسقة وبانضة على راسها وشعرها الاسود مطلوق ضارب حتى للمؤخرة ويديها عامرين بالديامو ونضاضر ولاطاي حوتة منحوتة حلم كل بنت ومخدومة مزيان ومشدودة..شادة تيليفون كتهضر وتبسم بحال الى حشمانة ولا يمكن كتسمع شي كلام كيخجل مثلا او كتهضر مع شي واحد كتحتارمو وتحشم منو
غيثة:حسااام..براااكة عيقتي عليا..صافي انا دخلت للدار ..ههه اه لقيت طاطا مليكة هنايا …حتى نهضرو من بعد
قطعات وفتحات ليها مليكة يديها بالعناق الحار تقول مشافتهاش هادي عام وهي غير سيمانة خمسطاش ليوم مشات فيها لندن ترتب امورها وجات .
مليكة:لكبييدة..بنتي على سلامتك ..(عنقاتها)واخا عليك ماقلتيش نطل على طاطا مليكة نسول فيها ..صافي جمعتي باليزتك ومشيتي خلينا مشطونين عليك بغينا نحماقو
غيثة:واغير مشيت نقاد الامور ديالي تما راكي عارفاني جيت على غفلة خليت كلشي معلق
مليكة :وييلي حسام بغا يتسطا لينا ينعس بغيثة ويفيق بغيثة..(ضرباتها بكتفها كضحك)ايوا فوقاش نفرحو بيكم..هاد الخطوبة طولات بزااف اممم ههه
غيثة:تنهدات:ماشي وقتو اطاطا..انا مزال متخطيت موت بابا منقدرش نفرح من قلبي ونعيش اللحضة..فأي لحضة كنعيشها كنشوفو قدامي وهوا اللي بقا لي من بعد موت ماما الله يرحمها..كبرني وكبرت معاه هوا النور اللي منور ليا حياتي
مليكة:وحنا شنو كنديرو هنا؟؟ انا وحسام ومريم ..ها ختك مريم قلبها عليك مسكينة بغات تجي كاع تجلس معاك هنا وتخلينا غير باش ماقنطيش ولا تحسي براسك بوحدك
غيثة :بحزن) ماشي هاكاك اطاطا مليكة..الى غير على الوناسة راني ولفت بوحدي..عشت اغلبية الرقت بوحدي وولفت ..ولاكن واخا هاكاك كانو كتافي سخان وعندي سند وحنين..ماشي بحال دابا ..كنتمنى تفهميني..ماشي مسألة وناسة حيت هادشي ميغيرش احساسي نهائيا
مليكة: ايوا خلينا نزوجوكم نتي حسام ..راه الزوج فمرتبة الاب ..انا نقوليييك..انا تزوجت صغيييرة ماحسيتش كاع بحنان الابوة..ولاكن الزوج عرضني وهوا اللي عشت معاه الامان والحنان..تيقي بيا وشوفي من حال داك المسكين راه معلق وكيتسنا
غيثة/تنهدات) يكون خير اطاطا مليكة.حنا دابا مزال ماقادينا امورنا والشركة فيها مشاكيل وكنقلبو على حل..الوقت ماشي مناسب لشي مناسبة
مليكة:الله يهديك حتى نتي..خليه هوا راجل منو للرجال اش قربك لشي كابلاج ولا طموبيلات..خليه هوا يعوم بحرو راه كما داكشي رزقك وخايفة عليه حتى هوا راه رزق عمر وخايف عليه..شكون يخاف عليك كتر منو ومنا حتا حنا ..نعلي نعلي الشيطان الله يهديك..راك باقا صغيرة وغزالة كتشرفي بالهم قبل الوقت(طبطبات عليها) سيري ترتاحي غنمشي نجيب ليك واحد الكاس دلعصير بردي على قلبك
مشات كتفرفر وتزرب متحمسة تعيش دور مولات الدار وتمشي وتجي كيبغات..عطاتها الوقت شكون بحالها..لاكن حتى حاجة ماساهل ترصل ليها ..غير هي مشات غمزاتها مريم وقالت بحذر
مريم:عنداك تكتبي ليه شي حاجة انا نقولك..نتي بنت الفشوش كتشوفي غير داكشي الغوز..انا كيبان ليا بلان ااااخر ابب
غيثة:بتشكيك) شنو بان ليك؟ مثلا؟
مريم:هاد الفلفلة فيها حلاوة اللسان بزااف.. ماتيقيش
غيثة:انا اصلا كنفكر نبيع ونرتاح.. ماقادراش على هادشي الصراحة..واخا هاداك اللي بغا يشري مني ماشي حتى لهيه ولاكن غيعطيني الثمن اللي بغيت ..خاصني فير نتشاور مع المحامي
مريم:انا براسي مكنفهمش فهادشي ديالكم ..ولاكن اللي بان ليا هوا تبعي وجمعي رزقك..جمعي راسك انا نقولك..ماتزربيش فالزواج اغيثة بحالك راه كيقلبو عليهم بالريق الناشف..انا واخا نجيك مافحاليش وباغا نجلس معاك هنا ونعيش شوية ..ولاكن اختي ماشي بنت لحرام
غيثة:تيليفون كيصوني)بلاتي نشوف شكون..نمرة جديدة هادي
غيثة:الوو (بصوتها الناعم)
زعزعها صوتو فالتيليفون وزاد حمحم اكثر ومن النبرة عرفاتو حيت كان بالها معاه طول الوقت
ياسين:مدام غيثة..لاباس
غيثة:بارتباك) صافا الحمد لله السي ياسين
ياسين:فلعشية بغيت نشوفك ضاروري.
غيثة: شنو ؟؟ كاين شي مشكل؟
ياسين: لا مكاين حتى مشكل غير بغيت نشوفك على موضوع الخدمة وصافي..تجي عندي للشركة؟
غيثة: بتفكير)امم..واخا ..مع الربعة ان شاء الله
ياسين: بالي( واخا بالاسبانية) تهلالي فراسك
قطع وسدات تيليفون وقالت
غيثة:عيط لي هادا اللي قلت لك بغا يشري منك.بحال والو يكون بغا يتفاوض معايا..غنمشي نوجد راسي هوا الاول ندوز على المحامي نستاشر معاه عاد نمشي
مريم: نمشي معاك؟
غيثة: بغيتي تمشي معايا يالاه غير هوا هادا راه قالك بارون قد لخلا فأروبا انا غنمشي وخايفة
مريم:ههه شوقتيني نشوف هادو كي كيكون دايرين ههه..غيكون شي شارف عندو شي كرش وسنانو كبااار وكيخلع
غيثة:طالعة فالدروج وكضحك) وكيعض ههه فمو كتخرج منو العافية غير ردي بالك
مشات لبيتها كتجري طلقات داك الكلب ودخلات للدوش..اما مليكة تمات جايبة الكاس فيدها فيه العصير وكتقلب عليها ومريم واقفة كتشوف فيها بقرف
مريم:مشات دوش
مليكة:قلت ليها غنجيب ليك العصير!! مشات!!
مريم:اري نشربو انا نيت راني شحفت
مليكة:مداتو ليها)نتي اللولة احبيبة
عطاتر ليها ومشات وبقات مريم كتميق فيها وداتو لفمها يالاه غتشرب لاكن وقفات ودوراتها فراسها وبعدات الكاس بقات كتشوف فيه مطولا وشافت يمين يسار ومشات للجردة بدات تخوي فيه بشوية حتى تصفا ليها لون شوية خضر فقاع الكاس وهزاتو بقات كتشوف فيه مصدومة وتحقق..جبدات كلينيكس من جيبها مسحات قاعو كاكل ولواتو فالجيب ومشات رداتو للمطبخ وهي مرفوعة ومصدومة ..هي بنت الشعب وبنت الوقت واللي عاشتو فالاحياء الشعبية مع بحال النوع دمليكة خلاها مدوقش النعمة من يد شي واحد..تربات على الحسد والتابعة والغيرة والسم والسحور والتوكال وزيد وزيد حتى مابقات كتيق فحتى واحد. وسبحان الله ديما كتلقا ديك الزوينة بنت الفشوش المدللة عندها صاحبتها على قد الحال ومافحالهاش وكتكون صاحبتها الانتيم والاعز ماشي بحال باقي الصحاب. الاقدار كتجمع بين هاد الجوج وكتلقاهم فعلا جامعاهم صداقة قوية من الطفولة وكيبغيو بعضياتهم ..الى في بعض الاحيان اللي كتكون الغيرة والحسد بيناتهم على حسب الوضع
كان معمل كبير وكانت هي ورفيقتها كيقلبو منين يدوزو.
كانت فتاةً فاتنة الجمال، حضورها يسبق خطاها. شعرها الأسود الطويل ينساب بنعومة على كتفيها كليلٍ هادئٍ تلمع خيوطه تحت الضوء، كثيفٌ وحريريّ، يزيد ملامحها عمقًا وغموضًا. عيناها العسليتان واسعتان، تتدرجان بين الذهبي والبني، كأنهما تعكسان دفئًا صامتًا وذكاءً متّزنًا، ونظرتها تحمل مزيجًا من الرقة والثقة.
بشرتها صافية تشعّ نضارة، وملامح وجهها متناسقة: أنفٌ دقيق، شفاه مرسومة بابتسامة خفيفة لا تفارقها، تمنح من يراها شعورًا بالألفة. قوامها أنيق وحركاتها هادئة، وكل تفصيل فيها يوحي بجمالٍ طبيعي غير متكلف، جمالٍ يلفت الانتباه بهدوء ويظل عالقًا في الذاكرة،، كان جمال جسدها متناسقًا وهادئًا، يلفت النظر دون ابتذال. قوامها ممشوق، تتوازن فيه النعومة مع الرشاقة، وكأن كل تفصيل خُلق في مكانه بدقة. كتفاها منحدران بلطف، وعنقها طويل يزيد وقفتها أناقة، أما خصرها فمحدد بانسيابية تبرز أنوثتها دون مبالغة.
حركتها طبيعية وواثقة، وفي مشيتها خفة توحي بالنعومة والقوة في آنٍ واحد. جمال جسدها لا يكمن فقط في الشكل، بل في الطريقة التي تحمله بها؛ بهدوء، بثقة، وبحضورٍ يترك أثرًا رقيقًا في النفس
كانت فقة الاناقة والرقي في لباس اسود عبارة عن ميني قصيرة كلاسيكية وفيست كلاسيكي اسود وطوب من لتحت كامل مشبك كيبانو سوتيان هازين ليها صدرها تحت منو فالاسود مع ليبا موس كحلة وحداء عالي فاخر وحقيبة صغيورة مع قفازات جلدية فيد وخدة فيهم الحديد واصابعها خارجين كيبانو ..كان ذوقها وستيلها جريئ نوعا ما لاكن تناسق عجيب وجا معاها .شافتها السكريتيرة وهزات فيها العين من الاسفل لاعلى دايخة فداك الجمال وديك الشخصية اللي عمرها صادفات بحالها ووقفات كتبسم سولاتها
السكريتيرة:مرحبا امدام اشنو حب الخاطر
غيثة:مسيو ياسين هنا؟ عندي غونديفو معاه
سكريتيرة:اه اه مرحبا(شافت فالكتاب)مدام غيثة المرنيسي
غيثة:مدموزيل غيثة المرنيسي
سكريتيرة:مرحبا امدام تفضلي معايا
حلات ليها الباب دخلات كتمشا بحال الحمامة لقاتو جالس فالبيرو كيهضر فتيليفون ..تبسمات ووقفات كتمشى وتشوف المكتب اللي كان عندو جداو زجاجي كيطل على المعمل لتحت ومشات كتشوف وتلعب فشعرها بينما ياسين جالس شاد تيليفون كيهضر فلباس كلاسيكي هاد المرة عبارة عن سروال توب وحداء اسود وقميجة محلولة شوية من الصدر كيبان من خلالها خيال وشام فالجنب فواحد الجهة اللي من نفسها كيبان وشام اخر تحت الكم دالقميجة مخبي .
الحوار كامل بالاسبانية وهي مكتفهمش اش كيتقال حتى كمل المكالمة وحط تيليفون وناض كيتبسم جهتها
ياسين:مادموزيل غيثة..نهار كبير هادا
تلفتات كتبسم لقاتو وصل عندها وقبل ماتمد يدها قرب منها وسلم عليها بوجهو ..وعلاش لا وهي بحال الغزال عرضة للجميع..للوحوش والدئاب وحتى الصيادة.
تفاجآت من ردة فعله وقالت كتبسم وحناكها حومر
غيثة:ااا..هه سي ياسين
دغيا قلب وزاد شار بيدو لواحد الكنبة كبيرة وعريضة مريحة فالجلسة وقال
ياسين:مرحبا بيك..رتاحي
مشات كتمايل جلسات تكات على ضهرها بينما مشا هز واحد الملف بخفة ورجع جلس على نفس الكنبة لي جالسة عليها هي وقال
ياسين: ياسين هوا الكلمة..وها الوعد ديالي ..وها السلعة ديالك وفوقها تعويض على الضرر
حطهم ليها ورقة فوق ختها حتى حشمات من اخر تعامل دارتو معاه وكانت قبيحة وخرجات العيب وهي معارفاش معامن كتتعامل اصلا..بلعات ريقها باحراج وتحطات فورطة سوداء حيت مع الاسف ماعندهاش اصلا ثمن داك السلعة كلها واخا تنازل كاع على التعويض ..شدات فعنقها كتفكر وقبل ماتتكلم قال وهوا كيشوف فتفاصيلها
ياسين: والى فكرتي فالاقتراح ديالي داخر مرة انا واجد
كتهضر دوز يدها على شعرها وتتبسم ..شحال حلوة وهي ضريفة وكيوت ماشي بحال اخر مرة كانت كتاكل من لعينين
غيثة: فصراحة .امم.. مازال مافكرتش مزيان.. غنعطي فرصة للشركة ونشوف
ياسين :ماشي مشكل، اذا ها السلعة ديالك (عطاها الملف) غتجربها فالمعمل عندك
دارت يدها على فمها ساكتة كدور عينيها مالقات ماتقول..تقوليه ماعنديش باش نخلصها!! دارت راسها مانتابهاتش زعما وبقات ساكتة كتبسم ودور فدوك العينين بينما هز تيليفون قدامها وتاصل بالمدير
وكيشوف فتفاصيلها بتأمل
ياسين:السي الحسني… تكلف بالسلعة ديال مادموزيل المرنيسي توصلها للمعمل ليوم .. بغيتها ليوم تكون عندها .
هوا كيهضر وهي كتزيد تتوثر لاكن مكتبيش. قطع وشد دوك الاوراق مضا عليهم وعطاها ستيلو تستالم السلعة ديالها شداتو باليد اللي فيها قفاز ومضات على الاوراق واخا هاد العملية كدوز فاش كيدوزو الفلوس للحساب عاد كيستالم الزبون سلعته .هاد المرة اختالف الوضع على العادة .مضات ومدات ليه ستيلو وقالت بنعومة
غيثة:شكرا ليك..وسمح ليا الى خطأت معاك
ياسين:بابتسامة )كن ما الخطأ ماكناش غنتعارفو شخصيا
غيثة:نخليك دابا (ناضت)خصني نمشي
ياسين:تفضلي
شار بيدو ومشات قدامو وخرج معاها من البيرو غادي كيهضر معاها وهي كتشوف الجو عندو تما كي داير.. وصلها حتى للطموبيل فين كانت صاحبتها جالسة كتسناها لداخل وقف قدامها داير يدو فجيب
ياسين: الى مشا السي المرنيسي كاين انا ..ادا حتاجتي اي حاجة عيط لي ..مرحبا بك
غيثة:شكرا ليك بزااف السي ياسين
تبسمات ونزلات مع الطروطوار ركبات سيارتها الفاخرة الحمراء جنب صديقتها في حين مشا قدامها ركب الوحش اللي مكيدورش خوه فديك البلاد..السيارة الوحش لي خلات مريم غير كتشوف وقالت
مريم:هادا هوا اللي كيعض ومانعرف شنو؟؟
غيثة:كضحك)هادا هوا ياسين
مريم :اختي غير يجي يعضني محتاجة للعضان(حالة فمها)ويلي ياختي شهاد الزييين وشهاد الفورمة وشهاد (كتفتفت)اش هاد الخييير
غيثة:اوييلي راه كبير تكون عندو شي ربعين عام
مريم :هادا كبير!!!! هادا دابا جاك كبير!! شكلا اختي واش كبير غير قولي
غيثة:فعقلو زعما …نتي تبغي ترتابطي بواحد كبر منك بتلطاش لسنة
مريم:اختي نقبللللل قابلة ال كان بحال هادا قابلة اختي يقبل غير هوا ..واش الربعين ديال هاد البرجوازي هي الربعين ديال رجالنا حنا!! اويلي هادو مكيشرفوش
غيثة:وتقبلي ببارون ؟؟
مريم:تنهدات )اختي قابلة ماتبقايش تسوليني..نعيش غا نهار مع هادا حسن ليا من ميات عام مع واحد اخر حالتو..نقبل اختي ولابغات تجي الموت تجي
غيثة:مصدومة فيها)اويلي!!! انا بعدا لا… (حاللة فمها )هييه!! باروون اختي!! باروون!! لا اختي نخاف على راسي ومنقدرش .
مريم: ختي غيثة..ماتخلينيش نعيش الاوهام..مرة مرة جيبيني معاك وعاودي ليا عليه..انا بديت نطيح اختي والمشكلة مغيديهاش حتى فيا انا عارفة راسي
غيثة:ههه غير تهناي راه غيكون عاااايش شي قصة حب ياسلااااامممم(غمضات عينيها) منعرف هاد الحبيبة لكبيدة كي غتكون دايرة وكي داير دوقو
رجعات بحالها وكان ليها لقاء مع حسام عند المحامي..لقاتو كيتسناها وجلسات قدامو وهوا حال فيها فمو وكان كو وصلو لاتفاق انها دير ليه وكالة تسيير فقط واخا كانت باينة فيه مقابلش حيت كان باغي وكالة بيع وشراء وتسيير ويمثلها قانونيا فكلشي لاكن ماقدرش يدخل معاها فنقاش ..مضات معاه العقد وكانت كضن غيعجبو الحال ويفرح ..لاكن هبط راسو فاش جلس هوا وياها فالسيارة وقال
حسام :ماعرفتش واش مكتيقيش فيا..ولا خايفة مني..واخا انا خايف عليك من خيالي
غيثة:بسعادة)علاش؟؟ ههه كن متقتش فيك منمضيش معاك العقد وتسيير الشركة فبلاصتي
حسام :مهبط راسو)انا كان كيحسابني غتوكليني على املاكك كلها نحس براسي كتفيدك وقايم بيك..ماشي نسيير ليك المعمل والشركة وصافي
غيثة: انا قادرة نسير الشي لاخر..غير المعمل والشركة مكنفهمش فيهم صافي..ااه نسيت..هه راه السلعة وصلات وستلمتها لاكن باقي ماخلصتهاش..الصباح كنت مع مسيو ياسين واستلمتها
حسام:شاف فيها مخرج عينيه)كيفاش كنتي معاه الصباح وماقلتي ليا والو؟؟؟ ومشيتي بوحدك ولا جا عندك
غيثة:هزات كتفها بيرود)مشيت عندو ..عادي ..السيد مقال والو ..بلعكس مصواب
حسام:شد راسو)غتحمقني هادي ..شداك ليييه ..قلت ليك ماتقربيش منو
غيثة:هزات كتفها)اصلا مابقاليا ماندير معاه ..السلعة اللي بيناتنا راني خديتها ودابا منك ليه..غير هوا راني ماخلصتهاش..ياريت تمشي تفاهم معاه (غمزاتو)وريني شطارتك راه نتا مول الشي دابا يالاه تقدم
لاحت الهضرة ونزلات خلاتو حال عينيه مصدوم ومشات كضحك ركبات سيارتها وهوا مفقوص كيعيط ليها ويعاود فالاخير صونا ليها فايليفون وهوا موراها صايق فالطريق
حسام: اخر مرة تهضري معاه ولا تجاوبيه فتيليفون
غيثة بدلال)ايوا سير عندو علمو بلي استلمتي الشغل وقوليه يتواصل معاك شخصيا ههه بيزو (قطعات عليه)
لاح تيليفون معصب وقلب الطريق مباشرة للشركة ونار الغيرة شاعلة فيه ..تاصل بالمدير دشركة ياسين وطلب منو يشوف ياسين وربط ليه موعد فالغد ومع الوقت نيشان كان فالمعمل وكان ياسين كيتسناه باش من بعد يشد طيارة يسافر ..دخل عندو حسام بجدية هاز راسو ومد يدو سلم عليه وياسين حدا البيرو جالس نص جلسة ورجلو مهزوزة وقال
ياسين:مرحبا ..تفضل السي حسام
حسام:جيت غير نعرفك براسي..ونوضحو بعض الامور ..مناخدش من وقتك بزاف السي ياسين
ياسين:كيشوف فيه بعمق ويطلع ويهبط) اييه مرحبا
حسام: وراه الورقة) انا المسؤول على المعمل وعلى الصفقات .. وجيت بخصوص السلعة اللي خدينا من عندك بغيت نقوليك تعطينا مهلة عاد نخلصو ليك ثمنها..كما شفتي الروطار خلانا نخسرو بزاف وحنا وضعنا المادي شوية حرج ..لاكن الدين غنسددوه فأقرب وقت
ياسين :شاف فيه مطولا وهز حاجبو باستفزاز) ماشي مشكل..حتى حاجة ماتغلا عل مادموزيل غيثة
حسام:بغيض)مدام غيثة..خطيبتي السي ياسين
ياسين:وماتغلاش عليك حتى نتا السي حسام (هز راسو كيطلع فيه بابتسامة خفيفة)
حسام:اي عمل او غرض تاصل بيا حيت مدام غيثة غترتاح وتفرغ لحياتها الزوجية
مد ليه كارط فيزيت) خليت ليك الراحة السي ياسين
شد ياسين الكارط بين صباعو وحرك راسو حركة وحدة بالايجاب وهوا غير كيشوف فيه كيفاش كيهضر حتى خرج وهز داك الكارط قراه وضرب ليه تقطيعة ولاحو فالسلة لي حداه
لي شافها فرحانة وغطير بالفرحة فير حيت حسام غيخدم وهي لا غتمشي ترتاح، غادية فالطريق سايقة وفيدها كوب قهوى باردة مع الشكولاطة وطالقة الموسيقى وكتسارا شادة طريقها للملعب ديال تينيس وحداها مريم زايدة ليها فيه وكيضحكو ويغنيو
غيثة:بصوت مرتفع)انا مابغييييييش نخدم..مابغييييتش انا بغيت نعيش ونعيش ونعيش..تعييييض غيثة تعيييش
مريم:هههه مسطية
غيثة: نقصات فالموسيقى)اويلي اختي…كنت معدبة وكنعاني وكنبات نحسب ونفكر وحتى الخاطر مابقاش ليا و ومكنساليش حتى نتمتع بالحياة!!! فوقاش انا غنسافر وفوقاش غنلعب تينيس ونلعب الكولف ونمشي لاصال ونمشي للسباحة وندير ليوكا وندير لادونص والمساج والشوبينغ ونرسم و ونتسارا على العيايدات نشوف و جهي وندير ابر النضارة والتقسير و و و و. (حلات عينيها فالطريق)اويييلي انا كيفاش دوزت هاد ست شهور مادرت حتى وحدة فهادو!!! لالالالا ميمكننننش !! رجعت فحال الراجل حتى الاعصاب ركبوني
مريم:وشكون غيقابلك رزقك غتخلي داك حسام يدير مابغا
غيثة:علاش مالو حسام!!
مريم: غير قلت وصافي
غيثة: الى خسرت انا بحال الى خصر هوا ..ماشي لمصلاحتو الشركة تضرر هادشي اللي كنقول انا.. هوا الحلم ديالو تكون عندو شركة وهاهيا جاتو على طبق من ذهب
مريم: كن درتي مدير يتكلف حسن ليك
غيثة:واش حنا دابا فالمدير!! حتا يادوووب نخلصو كريدياتها ونوقفوها عاد نشوفو المدير (دخلات للنادي) وصلنااااااا(نزلات كتجبد ) اااااه شحال زوينة الحياة فاش كيكون راسك خاااوي..مكتهز الهم لحتى حاجة…انا فعز الشباب امريم فعزززز شباااابي هاد السن مكيتعوووضش …(بسعادة) هاد السن ديال المتعة والنشاط والحيوية براكة علينا من الحزن
مريم:مع الغيرة ديال حسام موحال توصلي تعيشي شي زفتة
غيثة:مشات كاع مامسوقة) خليني من حسام ولا غيرو يالاه نلعبو وعيشو اللحضة..
مشات هازة صاكها لابسة ميني قصيرة كحلة وتيشورط ديالها وكاسكيط على راسها وحداء رياضي وتابعاها مريم حتى هي بحالها مشا و كيستاعدو يبداو شي ماطش .
كان اثنائها حسام فالشركة كيعلمهم كيفاش يتعاملو معاه ريحتارموه وكان فعلا كيدير مجهود يوصلح الاوضاع حتى عيطات ليه مو وهوا فالبيرو مشطون بقات عليه بالهضرة
مليكة: ماتزييدش طول صافي..نديرو العقد بعدا هوا اللول مالو العقد صعيب؟ بغيتي حتى يجي شي واحد يطير بيها
حسام:هه شكون غيطير بيها الله يهديك وحنا شنو كنديرو هنايا
مليكة: البنت راه تالفة مازال ماشادة حتى طريق وتقلبات بيها الدنيا..الواد اللي جا يديها ..اجي بعدا ديك الفيرمة طليتي عليها ولا خليتيها للبراني يطحنها
حسام: مازال امي مزااال ..انا مضارب دابا فير مع هاد المشاكيل اللي غارقة فيهم الشركة
مليكة : اسيدي كن بعتوها وهنيتونا ودرتي شي حاجة من غير داك الكابلاج ..خير الله ..عمك ماخلاش غير ديك الشركة راه الفيرمة قدها قداش بخيرها وخميرها والاراضي والديور ..ماخلا ما دار فحياتو ..صافي ماجابتهاش الشركة تجيبها حاجة اخرى
حسام:واخا صافي انا غنفكر ونشوف..
قطع معاها وجلس كيشوف ويخمم شنو يدير ومن بعد ناض هز واحد الملف وزاد مع الطريق.
تحل الباب ودخلات جارة حقائبها والنضاضر على راسها يالله جايا من السفر ..طويلة والشعر كحل قصير وكسوة مقزبة والزين فالثلاتين ..ماتعطيهاش تمنية وثلاتين سنة.. هادي نورة يالاه وصلات ووراها مراهقة تبارك الله مشاء الله طويلة ومفورمية الفورمة ديال الكور ..زعرة والشعر طويل حرير والصدر واقف كيطل من ديباردور والمؤخرة بارزة مزيرة على الشورط كاورية تحلف عليها بدون لعيون زورق كبار والحجبان غلاض مقادين والحناك محمرين والشفايف مبطبطة ..مبرونزية بالشمس ومصايبة جيل فالدفار ومطولاهم بزاف والخواتم رقاق فالصبعان والسنسلة فالرجل واللودن عامرة بالطوانك من لفوق حتى لتحت ..كتبان عادية فداك الستيل لاكن فلحقيقة حتى حاجة ماجالوق..كلشي ديامون من راسها لساسها وريحتها كتشم من بعيد لبعيد..داخلة وكتكتب فتيليفون وعاقدة حجبانها وكتمضغ المسكة وقالت كتخلط العربية مع السبليونية
لينا: بابا مشا نهولادنا تشوو على هاد الزهر تفوو
نورة: ونتينا شني خصك بيه حاضياه فاين ماشي فاين ماجي
لينا:خزرات فيها) شعندك كتهضر معايا هايدا؟؟ انا اصلا ماجاا معاك غيير بزز كجبرت معامن نجي منجيشي معاك النكدية
نورة:وقفات مصدومة)نكدية!!! انا كتعيرني مابقيتيشي تحتارمني!! مانعرف شكون لي ولد ااخر انا ولا نتينا
لينا: هزات حاجبها) ولدتيني زعما كنت واقفة ليك فالباب قلت ولدني!!
زادت خلاتها واقفة وشدات راسها مفقوصة وجلسات على واحد الكنبة شدات تيليفون كتكتب مسج لياسين
نورة:اجي عند بنتك شوفلي شي حل معاها انا مابقيتيشي قادرة نربيها
ياسين: صبر معاها باقا صغيرة
نورة: عيت بالصبر ورجعت كتعايرني خرجات من يدي مابقا حتى واحيد يقدر عليها، غير عرفاتك مشيتي مابقيتيشي فالمغرب خرجات فيا السم كامل
ياسين:نتينا مكتعرفش تهضر معاها وهي مراهقة خصها الخاطر
لاحت داك تيليفون معصبة وشادة راسها عيات ولينا كتستنزف ليها طاقتها وكتمرضها ..مزال كاع ما كمداتها رجعات ليها ووقفات قدامها دايرة يدها على جنبها
لينا: غنبقاو فهاد الدار هايدا محبوسين علاش مامشيناشي للاوتيل؟
نورة: شافت فيها بتعب)عاد لحقنا وصلنا خصك نطيرو باش نتينا تخرج تسارا مع راسك منرتاحرشي
لينا:ماجيتشي نرتاح جيت نسارا
نورة:ماشبعتيشي مساريا فسبانيا .. بلحق عزيزاك(جداتك) ضسرااتك بزااف حتى رجعتي تقلل عليا الحيا..(طلعات فيها وهبطات)مشي لبس شي حاجة مستورة عنمشي عند باك سيدك..ماتمشيشي معايا بهاد العري هايدا با مكيعجبوشي الحال
شد ليا نقطع بين نورة وبنتها.. بحال بزاف دالامهات مع بناتهم كتلقا الحرب والنار شاعلة بيناتهم بلا سبة ..مع الاسف عقلية لينا اوروبية وكبرات مع جداتها وعماتها حتى هما نفس العقلية خلاوها دير مابغات واخا نهار ومطال تابعينها حاضيينها لاكن كانو فاتحين ليها المجال دير لي عجبها وتمشي حتى بلا سروال الى بغات. ودابا فهاد السن اللي كتعيش ماشي ساهل تسيطر عليها وصعيب التعامل معاها مقارنة ليها كفتاة مسلمة لاكن بثقافة اوروبية وفالمغرب مستحيل يتقبلوها ويتفهموها . كتبان كبر من سنها وفاخرة تبارك الله وولفات واحد الحياة ..ماشي بحال عائلة االام اسرة مغربية محافضة مكيتقبلوش يشوفو شي حوايج فحفيدتهم وكيلومو نورة .
مشات ديك العشية هي ولينا يشوفوهم ..استقبلاتهم زينب ام نورة بالاحضان والفرحة وكانت دايرة بحسابهم وكتسناهم بحال اي ام ولادها فالغربة عايشين كيحون داك النهار حافل وحتى العائلة كتكون مجموعة تما وكيتسناو يشوفو حتى هما ويعيشو اللحضة ويديو مايعاودو.لقات الدار عامرة بخوالاتها بحال ديما ..غير كيسيقو ليها لخبار جايا كل وحدة كدير السبة بشي حاجة وتمشي تضايف راسها وتجلس الوسط حتى هي.. وضاروري من العناق والبوسان والفرحة مكتعرفهمش علاش فرحانين اصلا. تلاقاو كيتسناو الكادوات وجلسات تفرق عليهم وهما الرجل على الوجل الشيكي والبخ على والو ولقاو نورة حتى هي كتبغي تبان كتم جايا وهازة فيدها للقريب والبعيد .اما لينا ماجايبة للدنيا خبار..يحشيو ليها الهضرة وهي حالة فمها بحال طاسيلة باها مكيفهمو المعنى حتى كيوصلهم السبان نيشان ، ومع عائلة نورة ماعندهمش البنت اللي تركب الدفار قد هاكاك وتتري الصدر لاكن بحال لينا مكيديوش عليها كيحسبوها كاورية ..علامن اصلا غيديو عليها وهي باها وطاسيلتو كتر منها علامهم بووحدوهم حتى هما .دوزو ديك العشية مع العائلة وكلشي قصر تما مابغاوش يمشيو وتجمعو على العشا كيتعشاو حتى لواحد اللحضة نفاردات بيها خالت مها غير هي وياها فواحد السرجم كيطلو وقالت كتشوف بنص عين
سعاد:هاديك هي الدار دالمرى اللي خدات باباك ليماك ..ماتت الله يرحمها
لينا:ماخداتوشي وكنعرفها!! كنعرف الدار ديالهم
سعاد:شكون قالك ماخداتوشي؟؟
لينا:بابا قالها لي..قالي زوج بيها قبل من ماما علاش كتألفو القصص من والو
سعاد: باباك قالها لك؟؟
لينا:اه وقالي كانت مزيانة عمرها جبدات العيب مع ماما ..ووراها لي شوفتها..(كتشالي بيدها)وااصلا مااتت مشات عند الله مسكينة تهنات
زادت وخلاتها واقفة مشات طلعات للسطح كتصوني فتيليفون حتى رد عليها ياسين وبدات تنكر وتسوط
لينا: ماعاجبنيشي الحال هنايا (بغات تبكي) مكنحملشي هاد الاجواء انا خصني نمشي نسارا بغيت نمشي مراااكش
ياسين: غتمشي لمراكش انا نهضر مع ماماك
لينا: عاوتاني ماما غتدي معاها خالاتها معانا؟؟؟ شني انا منتساراشي فخاطري؟؟ عزيزة فوقاش عتجي انا خصني عزيزة ولا سارة مكيعجبنيشي السفر مع ماما(شدات جبهتها) الغيلوف ياسين: معندكش معامن تسافر دابا غير بلاتي نهضر معاها تديك
لينا:بتأكيد) تشووو انا غنصرد لك لاوتيل لي خصني نمشي ليلو والمواطع اللي بغيت نتينا عملي الحجز تماك صافي
ياسين:بالي يالاه صرد لي هادشي نشوف
لينا: وخصني نمشي نصحرا واحد الموطاااع شني اسموو(كتتفكر) ماعقلتشي ..مهم نرجع نقلب عليه
ياسين: ستنا انا غنجي سيمانة الماجية نديك
لينا:بصااح!!
ياسين: نسالي الشغل هنايا ونجي
لينا:ايوا صافي انا غنستنا كاع حتى نمشي معاك ..ايوا دابا مزيااان ههه
ياسين: كضحك..باقي خصك شي حاجة؟
لينا: لاء صافي مخصني والو
ياسين: عنداك تخرج بوحدك ممنوع
لينا: اجي بعدا عاميتو راوية هنايا؟
ياسين: مصيفة فماربيا مزال معترجع
لينا:ايوا على زهر
ياسين: قلت لك ستنا حتى نجي
لينا: ايوا هضر مع ماما تديني لبلايا (البحر) معنبقاشي يانا جالسة هنايا محبوسة.. حتى ديك الدار خنقتني بالصهد مازويناشي
ياسين: صافي غنقطع شي واحد كيعيط
لينا: واخا بسلامة
كانت مجمعة مع عائلتها وعندهم عرس وباغا تعيش الاجواء حتى صونا ليها تيليفون وناضت من وسط المجمع خرجات لبرا كتهضر
نورة:الو
ياسين: العايلة خصها تمشي لبلايا ديها للدار دالبحر فتطوان تفوج مع راسها
نورة: عندنا العرس دابا و ..
ياسين:قاطعها) قلت لك دي العايلة تفوج ماعندها ما تجلس تعمل تما فالدار …(بغضب) الدار قد لخلا فقصر الرمال فتطوان غير مسدودة ونتي مجلسها وسط البشار حقا العرس
بقات غير ساكتة وكتسمع وكما العادةغتنوض دير داكشي اللي قالها بالحرف. كانت باغا تعيش اجواء توجاد عرس بنت خالتها لاكن خرجات ليها بنتها من الجنب ماعندها لا مع تجمعات عائلية رلا اعراس ولا صدع الراس..كيعجبها داكشي المغريبي لاكن شي حوايج كيجيوها فيهم الملل.
صبحات نورة شادة الطريق بلينا لقصر الرمال فتطوان.حي على شط البحر كامل فيلات مفتوحة والمنضر رائع وكانت وحدة من دوك الفيلات الكبار ديالهم ..الجو ولا اروع والبحر خاوي وصافي والعساسة فكل مكان والباب محلول على الرملة وعندهم باب اخر على الجهة لاخرى مدخل رئيسي..كانت الفيلا تجهزات وتوجدات وفيها افارقة كيديرو الميناج وينضفو ومفرشة من برا بالفوطويات كلها والجردة قدها قداش كتفتح النفس..عاد رضات لاللة لينا وعجبها الحال وضحكات وبدات النشاط ديالها مكاين غير السباعة وتجي تسكي صباح وعشية وتشماش على برا ..كيديو ليها لغدا للرملة فين مشمشة ويديو ليها كاسكروط لتما ووقت ما قالها ليها راسها تدخل ..حاضية البحر والدوش ولانترنت جالسة وتابعة المؤثرين كتجمع فالاماكن وتخبي باش غير يجي ياسين تستفهم ليه كاملين..فين ماطلع ليها شي واحد مصور شي بلاصة كتحفضها..ها المنطاد ها الصحرا على الجو البر باغا داكشي تقليدي تخاديسيونيل وباغا تعيش داكشي لي كتشوف بالضبط واخا ماخلات حتى بلاد مامشات ليها لاكن باقا كتشهق على الحاجة الى شافتها
دوزات ديك سيمانة كلها فالبحر حتى سمعاتو جاي وناضت كتجمع حوايجها فشنطتها فرحانة عارفة راسها غدير مابغات مكاينش اللي ينكر عليها..وحتى نورة عفا عليها الله بغاتو غير يديها تمشي ترجع لدارهم تعيش الاجواء ودوز العرس فراحتها بلا متفقصها لينا وتنكدها عليها .
جمعات حتى هي باليزتها ومشات ركبات طموبيلتها هي وبنتها. وشدات طريق طنجة نيشان للشقة اللي كطل على مارينا وقفات فالباب دالعمارة كتهبط مع لينا الشنطة حتى شافتو خارج من لعمارة لابس تيشورط كحل وشورط قصير وكلاكيطة وداير نضاضر والشعر كثير زعر اللور رطب وعندو واحد اليد كاملة موشومة برموز وكتابات حتى للمعصم تعرضات ليه لينا فرحانة عنقاتو وكتجبد ودير ترمة كتهز وتحط والصدر مقلز كلشي يالاه حيا فيها اللي شافو يحلف ما بنتو تقول صاحبتو بديك الفورمة والطولة سابقة عمرها بحال بزاف ديال الكور جيناتهم كيبانو فيهم على بكري.
اما نورة تقلبات وتبدلات رجعات وحدة اخرى غير كتسبلبل فعويناتها وطلق زينها وتتبسم وقالت
نورة: رتاحتي دابا؟ ايوا ها باباك
لينا: شافت فيه معنقاه ) على السلامة ديالك
ياسين: الله يسلمك (مسح على ضهرها) صافي هادشي اللي كاين(كيقصد الشنطة)
نورة:داكشي لي جمعات هوا هادا(شاف فيها) ايوا شنو متحضرشي للعرس د يسرى؟
لينا: حتى نشوف..ديك الساعة نرد عليك فتيليفون
ياسين: يالاه ..زيد (شار ليها براسو )
جر الشنطة حداه ولينا قدامو غادية كتكسول وتلعب بشعرها لقات اش بغات ..كتجبد التصاور وتعتر فيه كتوريه المهارات ديالها فالجيت سكي وتوريه تصاورها متحمسة وبدات تجبد ليه البلايص فالاسانسور اللي جامعة وكتوصف ليه وتعاود ليه زعما داكشي راه عاجبها وشي حاجة . عارفة باللي باها ماشي بحال مها ..مها كتعكز على السفر والحركة لاكن باها العكس تماما يقدر يكون جالس وينوض يسافر وماعندوش مع التأجيل كما دار دابا. غير وصلات عندو جلسات ساعتاين فالدار على بيدمن يشوف معاها داكشي اللي جامعة و يحجز فلأوتيل لي وراتو وناض لبس سبرديلتو وهبط الشنط للسيارتو الوحشة الفاخرة كانت سيارة بجوج ابواب كحلة بحال باطمان ..ركبات حداها ودارت السمطة وكانت كتسناه يطير فالسياقة لاكن دار لعكس ..بحال ديما فاش كتكون راكبة حداه كينقص السرعة شوية الا فبعض الاحيان للى تعصب فالطريق كيبدا يجري باش يتجاوز الاكتضاض
قوا الضغط على غيثة من كل جهة ..مرت عمها من جهة وحسام من جهة وبنت عمها من جهة حتى استسلمات ليهم ولقات راسها جالسة قدام المرايا فقفطان ابيض بسفيفة غليضة بيضا اللون فاللون نعام اسيدي مهدوم باليد على حقو وطريقو مخزاني متول من داكشي وبلغة فرجليها بيضا والشعر مطلوق اميرة واية فالجمال ..رشات جوج رشات دريحة وناضت كتقاد الحزام ومريم حداها لابسة كندورة كتعاونها
غيثة: اففف..مامرتاحاش..غير درت ليهم خاطرهم والله
مريم: وانتي اللي بغيتي ..بقاو عليك غير لعقد وصافي حتى قلتي ليهم واخا
غيثة:قلت زعما هاكاك حيت شفت حسام كيفاش كيخدم من نيتو وكيفاش كيتقاتل على قبلي..شفتي كيفاش رجع المعمل خدام دابا والخدمة بدات كتحياا وهوا كيتقاتل
مريم: كتزير ليها الحزام) انا لي نوصيك عليه ماتيقيش فمرت عمك.. ماتيقيش فيها ولا تاكلي شي حاجة حطوها ليك
غيثة: هه اوييلي كاع لهاد الدرجة ..ايوا بلاش من شي زواج
مريم:ماتيقيش وصافي..انا مابغيتش نضلم شي واحد ولاكن ماتيقيش ..بنادم ماتعرفي شنو تحت راسو.. الماكلة كولي اللي كتوجديه بيدك
غيثة:باستغراب) انا اصلا مكناكلش فالدار!! زعما اغلب الاوقات كنكون برا ودايت كندير ليه ماكلة بيدي ميعرفوش يوجدو ليا ماكلتي
مريم: المهم وصيتك وصافي..يالاه يالاه راهم لتحت كيتسناو والعدول جالسين من الجوج
نزلات ومليكة بالقفطان كتشالي معرضة ليها فرحاانة ومابغات تعرض على حتى واحد ولا تسيق لخبار لشي واحد حتى يتم داك الزواج على خير..دارتو حسي مسي غير هي وولدها وبنتها ورجالها كان هوا ضيف الشرف تما … هاز مناخرو وداير رجل على رجل لابس ليك الجلابة وكيهضر مع لعدول،، دارو بلاصة لغيثة جلسات وبحال اي بنت عندها عمها وعائلة والتعامل زوين ماعمرهم خلاوها بوحدها فأكيد غادي تحس بالامان بيناتهم ..علاش شنو عند الانسان من غير عائلتو .
كانو كيتسناوها غير هي تنزل ويبداو فالطقوس ووسط الضحك والسعادة كانت مريم كتشووف الطمع والنفاق فعينين مليكة وكيفاش كتبين التعامل الزوين والصواب وكيفاش مسيطرة على ولدها وكيسمع ليها وكتهضر معاه غير بلعينين . مابيدها مادير هي غير صديقة وكل مرة يحشيو ليها الهضرة باش تمشي بحالها. الحاصول كل واحد ونيتو فداك المجلس..والاهم من هادشي هوا العقد دالزواج تم وتهللو الزغارت والخدامات بداو يزغرتو واخا مكانوش حاملين داك الزواج وكل وحدة دور راسها للاخرى فجهة..بحال ديك العروسة النية الصغير اللي كطيح فسبعة دلوايسات وعكوزة حاارة عقروشة كلشي كيقول ليها يحسن عوانك والقادم اجمل.وخصوصا طبع مليكة ماشي شي وحدة قارية واخا اللباس وشيكي وتسوق الطموبيل لاكن ماشي مثقفة.. مجبدة مع الوقت وماضية على جوج جهات..حيت كن مكانتش ماضية ماتوصلش ولدها لداك المقام ودير ليه طريق فحياة المرحوم وتخليه يوافق عليه لبنتو ..حيت بكل بساطة هي اللي بدات تفيق راجلها وولدها باش يقربو منو اكثر ومايبقاش غير تعامل واحترام بيناتهم وتقدير وانما يشركو الدم كاع..وباقتراحاتها الشبه مستحيلة اللي ياما ضحك عليهم راجلها وكان خايف غير يتحشم مع خوه وصافي..اما حسام كان كيشوف من المستحيل يوصل لغيثة وديما كيحس بالنقص وكان كيتوقع يزوجها باها لشي واحد بحالهم فالمستوى ولا شي واحد قاري معاها ومن المستحيل تقبل عليه واخا يرضى باها ..لاكن كانت مكتابة ليه وهادا هوا اللي كيقولو عليه المكتاب..فاش كتحقق شي حاجة كانت كتبان مستحيلة .
زهات الوقت عند لينا فمراكش واخا الحرارة مفرطة لاكن عاجبها الحال ومستمتعة واكثر حاجة كيبغيوها الاجانب او الجالية اللي على برا هي الطابع التقليدي وعلى قبلو كيمشيو لدوك الاماكن ..من غير داكشي المؤلوف اللي مولفة تعيشو وطالع ليها فراسها كانت باغا اوتيل بطابع تقليدي على حديث. ودوك الالوان دمراكش والاكل المغربي طبعا .. كانو اوتيل كبير وفخم ومافيهش الناس بزاف مستوحى من لوحة فنية مغربية مراكشية وحت لباس العمال لباس بطابع مغربي وطرابش حمرا والاضاءة بفنانيس تقليدية.. كانت جالسة فالرولاكس البني الفاتح متكية على كرشها بالبيكيني اييض مزير وهي تبارك الله تقول عندها جسد افريقي مشدود وليمولي حتى هي ..بعدما عامت ودوزات وقت زوين عطات ضهرها لشميشة وجنبها ياسين جالس شعرو فازك وبادرو مطراسيين عامر والضهر مزدوج كل عضلة كتبان بوحدها وفخادو معضليين وشاد تيليفون فبيد والكارو باليد لاخرى والفوطة على كتافو ..جاه اتصال وناض كيتمشى بعد شوية كيهضر فتيليفون ومع طويل بحال ومكدر بحال شي ملاكم ويدو موشومة حتى لجهة صدرو كيبان كاوري ماشي عربي وكتبان لينا ماشي بنتو الشي اللي خلا واحد الجوج سواعدة جالسين على مقربة منهم كيتغامزو عليها وهي ناعسة وكيتفرجو فمؤخرتها وديك الفورمة حتى لواحد اللحضة ضار ياسين راجل وشاف واحد فيهم كيفاش كيضحك ويشوف فيها وينخز صاحبو بشهوة .. جمع داك تيليفون فيدو ومشا عندو بشوية عليه حتى وقف عليه وطبطب على حنكو من لور حتى تهز داك الساعودي وقف مفاهم والو ورجع اللور كيهضر انجليزي لاكن ياسين هضر معاه العربية وقال
ياسين: مخرج عينيه) عينيك نجبدهم دااابا لز٠٠ل بووك (مسح ليه على وجهه) يالاه نعس
رجع السعودي لور جلس مصدوم ومشا ياسين بلاصتو جلس وشد تيليفونو وكاروه وكل مرة يشوف فداك السعودي بنضرات ساحقة حتى ناض مشا تشكا منو وتمو جايين معاه المسؤولين يحلو المشكل وطبعا اوتيل فخم بحال هادا كيكون التعامل مع الزبناء جد راقي ومحترم ..تدخلو بالصواب لاكن ياسين ناض قصد داك السعودي اللي بالنسبة ليه خصو يتربى حيت زاد تشكا من لفوق ..كان غيضربو لولا تدخل المدير بيناتهم وزاد استفزاز السعودي اللي تكمل مع احدهم كيشرح قائلا بالانجليزي
السعودي: نايمة عريانة مابغاتش الناس تشوف فيها هه!
ضربو ياسين بداك تيليفون اللي فيدو وتدخلو فكوه كن شدو تما ميطلقوش ..تفزعات لينا ناضت وقفات كتشوف اش واقف وكتعيط بابا بابا في حين الامن دخل كيجري يفك حيت المشكل بغا يكبر وصوت ياسين كان كبر من حجم السعودي وهوا كيهضر بغضب غير صوتو كان غياكلو
ياسين: عرااااينة وتهز عينك فيها تقبها لد٠٠ د يماك …شغلك فيها وفالعرا ديالها!!؟؟ شغلك فشننو لابسة ؟؟كتعرفها؟ باها نتا؟ خاها؟؟ شعند لق٠٠ة يماك فيها اولد لق٠٠٠ هااا؟ تمشي عريانة ونتينا تنزل عينك فالارض حتى دوووز كتسمع … (كيشير بصبعو جهة الارض) تهبط راسك وهي تعمل لي بغات ..تنعس بلا سروال ماشي شغلك …شوف فالارض از٠٠ي عينيك ميمشيوشي عندها (بغضب) جالس تتشها تما الز٠٠ل وانا كنشوف
المدير: كيحاول يهدنو) صافي مكاين علاش تعصب راسك..قرب ليه كيهضر) هادو هاكا حالهم الصبر وصافي مع هاد القوم
ياسين: كيخزر فالساعودي) كلب
المدير جر ياسين كيهضر معاه والاخرون جرو السعودي حتى هما كيهدنو الوضع وحتى خاف على راسو مابغاش المشاكيل ماضنش غيرصل لهادشي كاع.. بعدو احد المسؤلين وقال كيحشم فيه
المسؤول: بنتو هاديك..راه عادي ميبغيكش تشوف فيها ..ماشي غير نتا اي واحد
السعودي:بلعربي)ونعم التربية.. يعني بنتو هه ياريت كن كانت صاحبتو احسن ..يخليها هاكا ويجي يحكي لي انا منشوفش!
المسؤول:واسير عندو قول ليه علاش خليتيها هاكاك علاش تخلي بنتك عريانة ..قوليه شنو يدير..الله يهديك نعل الشيطان .. هادو كيعيشو فاوروبا نتا ادرا باروبا ميتقبلش تقوليه علاش عريانة..يقولك علاش نتا كتشوف هي حرة تمشي عريانة نتا ماشي حر تدخل منطقة حريتها وهي ماوصلاتكش..فكر اصديقي فكر راه ..المهم ..ماطرا والو
هدنو الوضع ورجع ياسين لبلاصتو جلس وتكا على ضهرو ورجعات لينا جلسات كتسول شنو كاين وتخلعات وجهها صفار
لينا: شنوو وقع ؟؟ علاش ضربتيه؟ شنو كان كيقول؟
ياسين: والو غير كيخور هاداك .. ماتديهاشي فيه هاداك مكبوت مريض بالكبت عندو فمخو
لينا:شني زعما ؟ علاش
ياسين:بيرودة)هايداك…كاين بنادم مكبوت ..لكلاب عاطهم الله
يتبع...
واااااع علاش حيدتي البطلة قتلتيها القصة مبقاتش زوينة ☹️☹️☹️