محتوى القصة
تركنات فالدار وتكمشات وكتسنا غير اتصال عاصم لي مكانش من العاكزين وكان واحد المسخوط منو مكاين عندو مع هادشي لي عطاتو ذكرى . مشا خداالفلوس من عند مو وزاد مع الطريق كرا طموبيل كطير على الله يلحق بيها ياسين وميفلتش ليه، مشا للدار عند مو لقا طموبيلتو تما وتكا بعيد عساس عليه متحركش من تما في حين كان ياسين كيدي ويجيب هوا ومو فقلب الدار لفوق
ماريا: مسكيناااا.حشوماااا خليني نمشي عندها نطلل عليها
ياسين: ماتهضر معاها ما تقرب ليها خليها دابا تفش
ماريا: لاااء (بأسى) ماتخليهاشي بواحدها مسكينة ماعملت والو .. بلعكس هي مزيانة ماكتعمل والو
ياسين: هي خاصها تقاد مع الطريق.. ادا مشيتي عندها غطلع فالسما
ماريا: ميلات راسهاكتشوف فيه) جاتهالغيرة مسكينة ... كتبغيك داكشي علاش عملت هايدا
ياسين: هز حاجبو) كتبغيني وباغا الطلاق
ماريا:حيت بقا فيها الحال مسكينة .. نمشي عندها نونسها .. حتى تهدن
ياسين: مشي عندها ... قولها طلاق معنطلقشي
ماريا: علاش مابغيتيشي طلقها؟؟
ياسين: هز حاجبو)كيفاش علاش؟؟علاش عنطلقها ؟
ماريا: بغات تكون حرة .. حقها تختار
ياسين: لا مغنطلقشي انا المرا ديالي .
ماريا: هي حرة وحقها تختار تعيش مع لي بغات
ياسين: كيفاش عاود حتى نتينا اماممٍّا واش عترون لي الدماغ ديالي ... معنطلقشي ذكرى هي معنطلقشي ذكرى تبغي ولامتبغيشي معنطلقاشي
ماريا: علاش كتعاقبها هايدا شني عملات لك
ياسين: وصاافي اماممّا ب،اكة عليا .. واش عنطلق لمرا ديالي و يجي يتزوج بيها واحد اخر
ماريا: شني فيها زعما؟
ياسين: كيفاش شني فيها؟؟ لااء فييها ... فيها بزاااف .. معنطلقشي هي مغنطلقشي صافي .. وامشي عندها ياك خصك تشوفها
ماريا: انا عنمشي (ناضت)
كانت فالدار مابيها ماعليها جالسة وكتفكر غير للخطوة الجاية وشنو خصها دير فيها .. كتشكي وتبكي على خالها فتيليفون وتعاود ليه وهوا كينصحها بحال ديما حاسبها بحال بنتو وحتى ياسين كيرتاح ليه ومرة مرة كيجلس هوا وياه فالقهوة وعندو معاه اكثر ما عندو مع نسيبو
عبد المالك: دابا نتينا خصك غير تعرف وصافي
ذكرى: انا خصني ندخلو للحبس.
عبد المالك: خليني نهضر معاه بالخاطر نقولو طلق لذكرى وبشوية بلا منوصلو لهادشي كامل
ذكرى: ها نتينا ها هوا .. ادا طلق لي مزيانة ليلي وليلو.. اما ادا مابغاشي غندخل باباه للحبس
عبد المالك: وا قطع قطع انا نعيطلو دابا ونجلسو ونهضرو ونشوفو شني نعملو
ذكرى: صافي شكرا احبيبو
قطعات وخرجات جات مع الزوهرة نيشان كتحل لباب لماريا .. دخلات ماريا كضحك وضراسها كيبانو بحال ديما وفعينيها واحد البرائة عجيبة . سلمات على ذكرى من وجهها وجلسات كضحك
ماريا: جيت نهضر معاك على ياسين
ذكرى: تنهدات) ماعندك متقولي .. كولشي بااين
ماريا: ااه دابا راه كلشي بااين ..(خرجات عينيها) دابا هوا عندو العايلة خاف يقولك راه عندي العايلة حيت مزال متأكد
ذكرى: هوا مشا تزوج وعمل العقد وعمل كولشي ومخبي زعما ! مكانشي قادر يعتارف بالبنت بلا ميتزوج بنورة
ماريا: ولاكن نورة راه غتفضاااح مسكيينة
ذكرى: مسكينة!
ماريا: ااه كون ماتزوجشي بيها كانت غتفضح قدام الناس والعائلة وديك العايلة دياسين عيبقاو قولو عليها بنت الزنقة بنت لحرام تكبر معقدة.. مافكرتيشي نتينا فالعايلة ستيتوة مسكينة معارفة والو عاد عتكبر
ذكرى: نورة تتحمل مسؤولية ديالها انا ماعندي منعمل ليها .. عاهي دابا شركات معايا الحياة ديالي كااملة يالاه
ماريا: ولاكن راه مشات معاه قبل ميتزوج بيك نسيتي
ذكرى: ماشي شغلي .. انا تزوجت الراجل عزري كبغيت الراجل بولادو كتزوجت شحاال هادي
ماريا: هزات يديها) ايوا دابا وقعداكشي صافي ..هوا مابغاشي يطلقك قالي قولها معنطلقهاش صافي
ذكرى: عيطلقني بزز منو
ماريا: صفرات عينيها) وعلاش بغيتي طلاق؟ صافي بقا معاه نتينا .. كولشي بعيد عليك مكيوصلك والو
ذكرى: لا انا مغنبقاشي معاه صافي قررت
ماريا: واا لي بغيتي.. هوا قالك مغيطلقش وانا قلتو طلقها .. قلت لو صافي طلقها خليها تعمل لي بغات فالحياة ديالا وهوا مابغاش.. عييت معاه
ذكرى: دابا ،يطلق بزز منو
ماريا: دوزات يدها على فمها) فوياخ عتفتح العيادة؟ خصني نعاود هادشي تشووف كيف رجع .. مابقاشي مزيان
ذكرى. تنهدات) هوت حابسني هنايا بحال الجرو ماخلانيشي حتى نخرج
ماريا: علاش حبسك ؟؟ قالك ماتخرجشي؟
ذكرى: قالي جلس فالدار ماتحركشي عمل لي الحبس هنايا ماريا: ادا بغيتي نهضر معاه يخليك تخرج نهضر معاه .. نشوفو
ذكرى: كيهددني ... انا رجعت كنخااف منو
ماريا: غير كيهضر .. مايعملك واالو غير كيهضر.. دابا نهضر معاها يخليك تخرج .. انا خصني نمشي(تنهدات) كتعرف شي موطع هنايا مزييون كيبيعو فيه لبيسات ديال لعواول صغار؟
على نيتها ماريا كتهضر لي فلقلب على اللسان وحتى ذكرى ملي جلسات معاها فسبانيا وعرفاتها فهمات عقليتها وكراكطيرها وميكات ودارت معاها الصواب حتى مشات بحالها .
جلسات ديك ليوماين على اعصابها كتسنا شي خبر حتى جاء الفرج وصونا ليها عاصم مع جوج دليل فيقهامن النعاس وناضت جلسات ردات عليه بلهفة
ذكرى: الو .. شني كاين خلعتيني
عاصم: انا قدام ياسين..شارجاو الطموبير و واقيلاوااقيلا عيمشي بيها شي موطاع
ذكرى: تحرك ولا مزال؟
عاصم: واقفين كيهضرو هوا وخاه وشي واحيد اخر..
ذكرى: متحركشي حتى يتحركو
عاصم: صافي
ذكرى: قولي الطريق لي عيشبر صافي
عاصم: صافي كون هاانيا
ذكرى: عندو يشوفك
عاصم: ببعيييد عليهم ماعندهم كيف يعملو يشوفوني
ذكرى: صافي .. وا رد بالك
قطعات ورجعات دخلات من بعد ماكانت كتهضر فالبالكون بخفوت وبقات غادية جايا حتى صونا ليها مرة اخرى ورجعات خرجات للبالكون
ذكرى: الو
عاصم: شبر الطريق نتيطوان
ذكرى: صافي .. ماشي بيها نسبتة باينة انا نوري باباه .. تبعو وعنداك يشوفك .. صرد ليا ماطريكيل الطموبير والنوع ديالا دغيا
عاصم: وماتخااافشي ههه يالاه
قطعات وعيطات لخالها بسرعة جاوبهاوقال
عبد المالك: الو حبيبو .. صافي داكشي لي قلت لك عليه راه ماشي بيه نتيطوان ..شبر الطريق
غبد المالك: عنداك تكون عيطتي بوليس
ذكرى: لاء قلتي لي نقولهالك
عبد المالك: صافي .. انا عنعرف شنو نعمل باش مايشكشي فيك ولا يحطك فراسو
ذكرى: انا خصني يحصل .. سمعتي احبيبو.. اناخصني هوا يحصل
عبد المالك: سكت عنداك يسمعك شي واحيد واش عارفة شني كتعمل ولا ماعارفاشي .. راه ادا عاق بيك والله مايجبرووك ..يحسابلك اللعب ولا
ذكرى: مهم نتينا دابا تعرف شني تعمل انا كنتستا.
عبد المالك: صافي قطع ومسح هادشي عنداك تخلي شي دليل فتيليفون يالاه
قطعات ورجعات للبيت تكات .. اما عبد المالك ناض لبس حوايجو مشا دار اللازم لاكن باقل الاضرار .. شاعت الخبار بأن شي سلعة خارجة من طنجة والخبار وصلات للبوليس لي فطريق ومشاو قطعو الطريق كيتسناو الطموبيل دوز .. هنا عبد المالك فكر باش يشد غير ياسين بلا ميجبد النحل بزاف الى تشدات التعبئة على قول للمخزن .
ضرب ليه اتصال لاكن تيليفون طافي ومع الاسف ياسين كيحط تيليفون والنمرة لي كيخدم بيها فدوك الاوقات مامعطية لحتى واحد من معارفو. عيا يصوني ويعاود وياسين غادي شاد الطريق ومعاه واحد اخر جالس حداه والطموبيل معبئة مزيان والسلعة دماليها خصها توصل فالامان. كان البرد والشتا خيط من السما والبوليس واقفين قاطعين الطريق وعندهم تعليمات بان التهريب دايز من ديك الطريق لاكن اسم المهرب وشكون ماعندهمش . الشتا كيطح خيط من السما وياسين فبحال هاد المواقف كيسخن وكيلبس خفيف. كان لابس تيشورط كحلة وسروال دجينز وبروطكان كحل مابيه ماعليه حتى لقا البوليس قدامو قاطعين الطريق مع الدروة وقفوه كيتمتم بنفمو ويهضر مع لي حداه ويسوط ووقف وهبط الزاج والضابط قدامو موقفو
الضابط : اوراق السيارة .. عندنا امر بتفتيش السبارة
ياسين: ببرودة: امر بتفتيش السيارة؟ علاش؟
الضابط: لوريقات الله يخليك
بداكيسوط ومد يدو كأنه غيجبد اوراق السيارة لاكن كسيرا وضرب المثلتات وزاد خلفة خلاهم تابعينو وبدات المطاردة. هوا غادي والبوليس وراه والصدع والغوات والماطر من كل جهة ولسوء الحظ قاس شرطي طيحو من فوق الموطور وكمل غادي بالطموبيل ماخايف ما مرعود ..واخدها بتحدي هوا حالف لاشدوه وهما تابعينو حالفين يشدوه وفآخر المطاف زهق بالطموبيل زاد مع طريق مهجورة عطا السيارة للي حداه يسوق ورجع جلس يرتاح مع راسو حتى لقا راسو فلعرايش .
فهاد الاثناء كانت ذكرى كتاكل جنابها بغات تموت .. بغاتو يتشد لاكن ماتشدش .. وكما كان الحال راه دابا روشيرشي وعرفوه وكملها وجملها ضرب شرطي كركبو من فوق الموطور واخرتو غادي يتشد طال الزمان ولاقصار
الفجر كيأدن والساروت كيدور فالباب . واخا كانت ناعسة لاكن نعسات على خبار مكفسة وبقات دايرة بالها وفاش تحل الباب سمعاتو وهزات راسها مخلوعة وناضت لبسات بينوارها الدافي لقاتو كيحيد سبرديلتو وقفزات مخلوعة
ذكرى: ياسين!
هز عينو شافيها : شعندك ؟؟ ياك لاباس؟
ذكرى: خلعتيتي سمعت تفتح
ياسين: مكاين والو مشي تنعس
داز حداها ضربها بكتفو العريض وداز نيشان لداك الحمام لي باين عاينباين وسط بيت النعاس دخل ورد ريدو كحل من لداخل عاى الزاج وطلق الماء . اما هي مشات لبلاصتها نعسات نص نعسة وودنها معاه حتى حسات بيه نعس حداها وضرباتها ريحة الشامبوان ومعجون الاسنان قوية سرح ليها مناخرها .. دارت راسها ناعسة لاكن شوي بدا كيقرب منها عنقها وهز راسو كيمشم .. تقلبات عطاتو بالضهر بعدات لاكن جرها عندو زيرها وباسها فعنقها
ذكرى: ماتقربليشي
ياسين: حقي .. تعطيه لي ولا ناخدو بيدي
ذكرى: ضارت عندو مخرجة عينيها) شنيي . وانا فاين حقي؟؟ ياك حقي نطلق ايوا يالاه عطيني حقي
ياسين: مافياا ليييي يهضر معاك ولانسمع ليك .. خلينا دابا نديرو شي واحد ونطيخو نعسو ماتبزطيش لي راسي
ذكرى: هاا؟؟ واش نتينا مريييض؟؟ ها؟
ماتجاوبهاش ونزل عليها بوسان هاك بالاك بزز منها وهي كدفع مابغاتش وماحملاتوش ما بغاتش دوز ليها وبدات كتعرق بغات تموت حلفات ما يدوزو فيها واخا تموت . لاكن القوة كانت عندو وحنتها .. ناض ربط ليها يديها وقلش ليها رجليها وفين ما تركلو يشحطها لقزيبتها .. عيا معاها فاللخر ناض شد ليها رجل هنا ورجل لهيه جبدهم وربطهم تحت النموسية مع الخشب وحيد تيشورط ودار فيها مابغا .. باش ولحس وخور حتى شبع وهي كتبكي دازت عليها اسوء ساعتاين فحياتها حتى كمل على خاطرو وطلقها وباسها كيضحك
وطاح حداها نعس .. طاح كاو لاكن هي ناضت مشات للصالون لي كيجلسو فيه وطاحت نعسات كتبكي حتى ضربات العشرة دصباح وفيقها صونيط الباب وناضت كتنخصص حلات الباب .. لقات البوليس واقفين كيسولو على ياسين وجاوها كيف نقطة الثلج على الحرقة بردو ليها قلبها وشارت براسها قائلة
ذكرى: كاين .. ناعس
البوليس: عيطي ليه
مشات عندو لقاتو غارق فالنعاس بقات كتحرك فيه حتى حل واحد العين هاز حاجبو كان غيسبها لاكن قطعات فيه النفس وقالت
ذكرى : البوليس كيسولو عليك قالو لي كلمو
هز راسو حل فيها عينيه مزيان: الله يرحم والديك.. وقلتي ليهم كاين
ذكرى: وشني عنقول لهم.. نوض تكلم
لاح لغطا كيسب وينعل لبس سورفيت كحلة ومشا جهة الباب دبيت النعاس لاكن رجع تلفت مشا عندها شدها من رقبتها قربها عندو وقال
ياسين: حل ودنيك مزيااان ... هاد الدار متخرجشي منها سمعتي... بغيتي تفتح العيادة فتحها بلحق هاد الدار متخرجشي منها .. وها ودني منك ... تعمل هايدا ولا هايدا وتعلب مور ضهري ماتلوم غير راسك(طلق منها عطاها بالضهر ورجع عنقها) وخليك عزيزة ماتخلينيشي نحقد عليك
داز على سبرديلتو وخرج وهي كطل تشوف اش واقع .. مشا بخاطرو بلا مايقولو ليه والو وسد الباب وراه جلسات اخيرا عرفاتهم قرقبو عليه ومشا فستين داهية وفرحات تقول عندها لعيد .. فرحات قد حقها فالدنيا وفرحتها ماتعطيها لحد فديك اللحضة واخا دوزها عليها الليلة الفايتة كمداتها بديك الجمعة لي جمعوه وتشقات طريق السعادة والمتعة قدامها اخيرا ... مشات كتجري دوشات ونشفات شعرها وركزات على الافتتاح ديالها اخيرا ..لقات البلاكار ديالو ديال حوايجو مطرطق بالفلوس لعلك ترضى.. واحد الدفة مستفة كلها من لفوق حتى للتحت مدكسين بالدرهم المغربي وبالاورو ماكرهاتش تسوط ليه فكولشي .. ميزاتها بعينها قالت مع راسها غتكون فالمجموع كله شي مليار وزيادة .. داك المنضر عمرها شافتو فحياتها وعمرها تشوفو غير عندو هوا واللي بحالو.. اكتفت وقالت ندير لافتتاح بعدا منعيقش باش مايندمهاش من وصرفات منهم على المأثرين ديال الطبقة الراقية وشوية دلفناني والتجهيزات دالافتتاح والمشروبات والبيفي الى اخرى جابت الصحافة ودارت حالة .. حالة واشمن حالة فداك الافتتاح دار بووم والبوز ديال بصح .. عيادة الاحلام والاطباء غير شكون وشكون وجايين عندها من المانيا والطاليان والسيدة خلاص .. كضرب على الشعا واشمنك يا لباس والديامو والرقي ولاكلاص والزين الزين الزين تشهرات شهرة ديال بصح اصبحت حديث الساعة واسبوع كامل والسوشل ميديا كيهضر عليها والتصاور كيتبارطاجاو وكولشي دايز على عينين ياسين .. متكي فالحبس فوق واحد النموسية بسورفيت وتقاشر بيضين وشاد تيليفون كيتفرج فيها ويتفرج فداك البوز وداك الافتتاح وكيقرا اش مكتوب عليها لاكن فكل مرة يصوني ليها مكتجاوبش.. صونا مرة وجوج لاكن والو .. ولي مطمنو من جهة داك الافتتاح هي مو وخواتاتو لي حتى هما كانو حاضرين وبانو فالتصاور معاها وهما لي كيوصلو ليه الاخبار باش قدر يعرف اشنو دار تما . اما هي فاش جلسات فالبيرو وهضرات مع الصحافة بانت ليه وحدا اخراا .. الهضرة بالعبار والثقافة واللقاء كامل وهي كتهضر بثقة وتبات ووعي كتبات عليها راسها عامر وبينها وبينو هوا سنوات ضوئية .. كل واحد فيهم باش عامر راسو وكيفاش كيفكر ويستحيل لي عرفهم بجوج يقول راه دوك الجوج شي نهار غيتزوجو او يتجمعو .
اسبوع كامل وهي كطلع ليه.. فين ما يحل تيليفون يلقاها قدامو واخا مكانش عندو مع المواقع رجع حتى هوا عندو حسابات وكيدخل يشوف ويتبع وبدا يستوعب شوية عالم الانترنت ويدخل ليه فالراس وبدا كيشوف الناس وقوة تأثير السوشل ميديا عليهم وكيفاش عايشين مع داك العالم الى اخره . شوية بشوية رجع كيدخل يوميا .. رجع ساكن فيه مابقاش كيخرج منو ونيت تونس بيه لقا فيه مايتشاف ومايتعرف وعطا الله الاخبار ومايتقال. اما هي رجعات كل يوم كتنزل حاجة جديدة كتتعلق بخدمتها وكل مرة لقاء مع جريدة مختالفة كتهضر على التقنيات لي عندها والجديد فالتجميل وكتوريهم العيادة كتهضر باحترافية وكتبين الخدمة وتبين النتائج وباينة عليها مركزة غير فداكشي ديالها وجميع تنزيلات ديالها وسطوريات لي كتحط وتبان فيهم عندهم علاقة بالعمل ديالها واخا كاين لي متبعها على المحتوى ديالها وكاينلي حال فمو غير فالجمال ديالها فشنو لابسة وشنو حاطة والاقبال عليها بكثرة كلشي باغي بحال البشرةديالها وبحال عينيها وبحال الدورة ودجهها وفمهاوكلشي عاجباه وباغي شي حاجة معينة ديرها ليه .
كان فديك العشية مابيه ماعليه .. غير طالع نازل كيتسنط لعضامو حاضيها حتى جا عندو الحارس علمو بلي شي محامي جا يشوفو وناض كيتهز خرج وتم غادي فالكروة وكلشي كيضرب ليه السلام . لقا محامي بالبذلة جالس كيتسناه وتقابل معاه كيشوف فيه بتساؤل بمعنى اش بغيتيني وشكوننتا
المحامي: مد ليه الورقة: انا المحامي ديال الزوجة ديالك السين ياسين..جيت نخبرك بلي الزوجة ديالك رافعة عليك دعوة ديال الطلاق
ياسين: بسخرية: اييه هه
جاتو الضحكة وضحك على المحامي ومن بعد هز حاجبو فيه وقال
ياسين: سمع شنو عنقول.. ضمس هاد القضية عليا بالثمن لي عجبك... والطلاق راه مكاينشي بلا مانجرو بعضنا
المحامي: السي ياسين. . المشكل ماشي هنا ..المشكل فالمدام ديالك راه تقد تكلف محامي اخر.. وتقدر تاخد الطلاق ديالها منك والقاضي غيطلقها واخا ترفض نتا .. الوضع ديالك مكيسمحش ليك تقرر فهاد الحالة والقانون معاها الى اصرت على الطلاق.. وهي حاليا كطلب الطلاق حبيا بلا متوصل تاخدو بزز
ياسين: شوف ليا شكون القاضي وخليني مني ليه
المحامي: القضية كبر من هادشي السي ياسين
ياسين: شنو لي مكبرها؟ نصغرو باباها غتغلبنا
المحامي: المرى ديالك راه عندها قوة كبيرة اكثر من المال.. عندها قوة الرأي العام وصعيب عليا ولا على القاضي يخرج على المسطرة القانونية وفيها خطر على المهن ديالنا .. المرى ديالك تقدر تحرك الرأي العام وعندها شهرة واسعة وهادالقوة راه دخلات ريوس كبار فالدولة لهاد الحبس وميمكنش شي قوة اخرى تغلب عليها... وحتى قاضي ميقبل على راسو الضجة والشوشرة وغيكثر القيل والقال ويخرجو المنابر الاعلامية يهضرو ويبداو يبحثو وهادشي ماصلاحش ليك حتى نتاا السي ياسين.. ومغتبقاش قضية طلاق وصافي .. غترجع قضية غش ومخدرات وطلاق والموضوع غيكبر بزاف وغيتجرو فيها بزاف دناس وواخا تبغي تسكت القضية بللفلوس متقدرش.
ياسين: كيتأمل فواحد النقطة) وشنو دابا؟
المحامي: حاوب معاها تنسا فكرة الطلاق.. هادا هوا الحل
ياسين: امم.. نشوفو .
جمع وطوا مع المحامي وكيبان مهدن لاكن صدرو من لداخل كيفور ويتحاك وحتى هي مكتردش على المكالمات ديالو كاع وفين ما تسمع شي صوت ماشي حتى لهيه كتقطع دغيا قبل مترد . بانت ليه مو فالبلان وجلس كيصوني عليها حتى ردات وقال طلع ليه القيح
الحوار بالاسبانية
ياسين: الو .. ممّا
ماريا: ياسين لاباس؟ خصك شي حاجة
ياسين: مشي عند ديك الدكتورة هضر معاها راه رفعات الدعوة دطلاق .. ولا مشي عندها دوزها ليا نغسل ليها ودنيها يحساب ليها راني فالحبس صافي غتعمل لي عجبها
ماريا دارت لي عليها واخا هي محاد عندها مع الإنسانية ومكتجي فصف حتى واحد .
وصلات للعيادة ولقات جوج ممرضات فالاستقبال واقفين والناس جالسين كيشربو قهوة والشاشة قدها قداش كدوز ربورطاج على المسيرة المهنية ديال ذكرى والسرفيس هاي كلاص وداكشي منضم وكلشي خدام والمواعد على الجهد .. جلسات كتسنا حتى رجعو عندها وداوها للبيرو عند ذكرى جلسات دارت رجل على رجل كتمنضر .. دخلات عندها ذكرى بالطابلية بيضا كتبسم والشعر مجموع لور وجهها كيبري مافيه حتى نقطة مكياج وريحتها كتعطعط سلمات عليها واستقبلاتها كتبسم وترحب بيها
ماريا: مشغولة بزااف عندك المواعيد بزاف ياك
ذكرى : ههه ماشي مشكل مرحبا بيك فأي وقت
ماريا: ادا مساليا دوب لي هاد لفيلر عمل لي بوقنينيط.. وهز لي لحواجب شويوش هايدا
ذكرى: ناضت ) اجي معايا .. كيف عاملةسارة لاباس عليها
ماريا: سارة مشات لسبانيا مسكينة
ذكرى: ايوا مزيان خليها تبدل الجو
دخلاتها من داك لبيرو لباب كبير بحال ديال مرجان كيتحل ويتسد بوحدو لغرفة قدها قداش بيضا كتلمع وريحة لالكول والدوا كتعطي فيها بياص كبير تكاتها عليه وبدات تحقن ليها وتجبد ليها حتى كملات ولاحت القفازات ورجعو للبيرو جلسو
ماريا: شحال نتسنا عليه
ذكرى: من دابا سيمانة يكون داب كامل
ماريا: دابا نتينا رجع عندك الشغل بزاف .. صاحيبتي عيات تصوني كيعطيوها المواعيد فشكل ماقدراتشي توصل لك مرررة ..بقات فيا
ذكرى: دابا تبارك الله المواعيد هايدا ..مكاينشي شي ساعة خاوية ونتينا عارفة ماشي غير من هنا من طنجة .. المغرب كامل كيعيط على رونديفو رانا دابا وساعة كيخرج لي شي شغل ولا شي حاجة كيخصني نعاود نقولهم يبدلو المواعيد .. منقدرشي نعيطها للوقت مضبوط.. كاجيبتيها معاك حسن دابا
ماريا: وا الحقيقة انا جيت على غفلة ..ياسين قالي مشي عندها قولا تجاوبني
ذكرى: بحسم) انا ماعندي منقولو صافي ، راه المحامي بيناتنا
ماريا: وراه حلفاان فيك .. قالي مشيييي قولها تتراجع على الطلاق ولا نحرق باباها ديك العيادة .. نتينا عارف ياسين مزنزن
ذكرى: ادا تزنزن راه المخزن يعملو عقلو...انا معنتراجعشي على القرار ديالي ومنقدرشي نرجع نعيش معاه .. كل ساعة شني كيقولو عقلو وبلا العنف .. يحمد الله مادعيتوشي على العنف ولا نعملو شي فضيحة المغرب كامل يجيب خبارو .. العايل باقي برهووش فعقلو
ماريا: بااقي صغير اذكرى داابا يعمل عقلو
ذكرى: راهم قدو هازين المسؤولية وعندهم العقل.. مابقاتشي بلعمر .. سبعة وعشرين سنة فعمرو دابا ماشي مراهق
ماريا: وسبعة وعشرين سنة زعما شي حااجة ... ماشي شي حااجة .. (تنهدات) ايوا المهم نتينا تعرف ... بيناتكم
ذكرى: ماتبقاشي تسمعلو خليه يقول لي بغا .. صافي ادا قالك شي حاجة قولو مابغاتشي وخليه
ماريا: انا خوفانة عندو يوقع شي خصومةكبيرة
ذكرى: ماتخافشي .. انا قاادة بيه غير تهنا
ماريا: انا عنمشي ونقولو مابغاتشي
تشبتات ذكرى بقرارها ومابقاش عندها حنى الوقت لي تفكر فيه ، مشغولة طول الوقت وبكثرة ما رجعات مشهورة وتصاحبات مع الفنانات وووسعات الريزو ديالها رجعات كل مرة فعراضة .. مرة فعشا مرة شي سهرة مرة فشي عرس مرة فشي برنامج وكل مقام ومقامو .. فاوقات الجد راه كتكون جادة ومعقولة وكتبان فالمنابر الاعلامية واعية ومثقفة وعندها متقول واخا كتحط قدام عمالقة المقدمين .. مرة فشي لقاء تلفزي فمصر مرة فشي ندوة صحفية ومرة فشي برنامج فاوروبا .. الحاصول السيدة خدامة ديال بصح وكتقلب على راصها فالقمة وكتبان فالريزوات الكبار وعروض الزواج لعلك ترضى .. والمعجبين عندها مالا نهاية لاكن النقطة السوداء فحياتها فحياتها هي ياسين ولي سولها شنو كيدير راجلك كتقوليه رجل اعمال فاروربا وكدوزها عليهم دغيا ودوز
تلهات فشغلها وخدمتها وكتسنا الطلاق وكتقلب على اللي يتوسط ليها حتى طاحت فواحد المسؤل توسطات ليها صاحبتها الفنانة معاه ووصلها طلاقها فاسبوع واحد بلا خبار ياسين ، طلقها القاضي وشدات ورقتها ونقزات بالفرحة وقالت حلات ليا الحياة وخرجات ديك الليلة بأرقى ما عندها مشات ركبات سيارتها الفاخرة وكانت الشتا خيط من السماء. شدات الطريق لكازا نيشان تلاقات مع صحابها فعشا مجموعين وسهرو كاملين مع الشناط ودازت عيشة دايزها الكلام من داكشي الرفيع وموراها شدات الطريق للاوتيل باتت ديك الليلة والصباح بكري شدات طريقها لطنجة راجعة وطالقة الموسيقة وكدندن مرتاحة فرحانة ماقاداها فرحة . كانت غادية مابيها ماعليها حتى فجأة لقات راسها حدا رموك قدو قداش كيخلع وهي لي مضوبلاه حيت سيارتها اسرع .. لاكن قبل مضوبلو زيرها ودفعها غير شوية حتى كانت غتخرج على الطريق ومالقات فين تكحز وبدات تنقص السرعة والرموك لاسق عليها ماخلاهاش تزيد وكيزيد يدفعها حتى قالت صافي الموت هادي موحال تفلت منها .. لاكن فجأة بعد عليها خلاها دوز وهي كتكلاصوني وتغوت ويالاه عطاها الطريق مع بغات ضوبل زاد فالسرعة وضرب ليها للطموبيل من واحد القنت عجنها وخلاها وزاد .. كملات الطريق كترعد وتبكي وتشوف فجنابها حتى للبياج ووقفات عند البوليس مخلوعة ونزلات كتشكي وتبكي وتعاود ليهم شنو وقع ليها فالطريق.. وجلسات كتسنا الرموك يوصل لاكن داك الرموك ماوصلش.. قيدو ليها المحضر ومشات باش تكمل اجرائاتها فطنجة لاكن قبل ماتوصل لطنجة بديك الحالة وصلها مسج من رقم مجهول مكتوب عليه"هادي غير قرصة اذن وا رد بالك"
قرصة اذن نييت .. كان داك المسج اكبر خلعة فين يبان اش وقع ليها فالطريق.. عرفات القضية مخطط ليها وماشي صدفة وحسات براسها فخطر .. حسات بخطواتها مراقبين والخطر يحيط بيها من كل جهة متقدرش تعرف فين تلقاه المرة الجايا وشنو يقدر يصيبها . اول من طاح ليها فبالها هوا ياسين .. ماتردداتش حتى دقيقة وغير وصلات للدار الجديدة لي كرات فسونطر فيل بأتاتها دخلات كترعد وطلعات نمرتو صونات ليه وخدمات تطبيق تسجيل المكالمات وبدات كتصوني وتشطح برجلها متوثرة حتى رد عليها
ذكرى: بهدوء ) الو .. ياسين ؟
ياسين: اييه ياسين شي حاجة ؟
ذكرى: ياسين ياك حنا تفارقنا بلا ادية .. واش اديتك؟؟ عملت ليك شي حاجة ؟
ياسين: دابا شنو خصك ؟؟ فاش كنت كنصوني ليك فاينكنتي؟
ذكرى: انا طوب ديالي هوا ماجاوبتكشي .. ولاكن نتينا كنتي عتقتلني انا كنت عنموت هاد النهار شني بغيتي عندي تلاقينا خوت نتفارقو خوت
ياسين: سير قلب على شكون كان عيصفيها ليك فجهة اخرى ضهر لي نتينا مكحلاها عديان حتى مابقيتيشي عارفة شكون بغا يقتل... انا ساليت معاك ابنت الناس الله يعاونك الطلاق ديالك خديتيه واسير قلب عليا
ذكرى: انا ماعنديشي العديان نتينا اللي صردتي لي رموك انا عاارفاك
ياسين: مافيا لي يهضر سيري تق٠٠ي (قطع)
قطع عليها وخلاها كتشوى بوحدها وركبها الخوف مابقاتش قادرة ترتاح ولا تشوف النعاس.. بمجرد انك تكون مهدد بالقتل فالنوم كيطير ووالنعمة مكتبقاش تنزل والوسواس كيركبك فكل واحد ومن كل جهة
هزات راسها ديك الساعة وصلات الطموبيل للاصلاح وحاضية جنابها وخايفة وخدات وحدة اخرى كما العادة على بيدمن تصلح سيارتها ومباشرة مشات للعيادة مخلوعة ودخلات صفرا بدات بدوك الكامرات هما اللولين تأكدات واش خدامين وزادت عرام ديال الكامرات ماخلات حتى قنت بدون كامرة والممرضات غير كيشوفو مافاهمين والو ، كامو معاها جوج اطباء اخرين كيسولو علاش هاد المراقبة كلها لاكن هي كانت كتقول للأمان فقط .. واخا شي آمان ماكاين وماداقتو وتلفات مابقاتش قادرة تخدم وحتى السفر ولات خايفة منو لا تمشي طيح فشي فخ ، الحاصول حياتها ترونات ديك اليوماين وماقدراتش تعيش وماعرفات شنو دير .. صبرات حتى عيات فاللخر صونات لياسين مرة اخرى مع العشرة دليل وهي جالسة فالدار كتشرب المهدئات وتعاود
ياسين: شكاين عاوتاني؟
ذكرى: خصني نهضر معاك حبيا بلا صدع
ياسين: حتى انا ماعندي مندير بالصدع
ذكرى: شني خصك دابا؟؟
ياسين: ماخصني واالو .. خصني نتي تعطيني التيساع
ذكرى: انا مكنسجلشي غير هضر ... خفتي زعما نسجلك
ياسين: هههه .. ماعندك ماتسجل عليا ... هاد الوقت لي كتفرعي لي فيه كري سيري قلبي شكون كان غيقتلك ولا شوفي اللي عاونوك فالطلاق يجبدوهم لك من تحت الارض
ذكرى: انا قلت لك نهضرو حبيا وصافي مابغيناشي نوصلو لهاد المواصل
ياسين: انا وصل عليا النعاس تصبح على خير
قطع عليها وخلاها كتموت وتبكي بالفقصة والخلعة وماكانتش باغا حتى واحد يعرف عليها شي حاجة وكانت محافضة على الصورة الراقية امام الكجتمع .. لاكن اللي وقع ليها وهدد حياتها اكبر من ديك الصورة .. بغات طرطق وهزات تيليفون طلقات سطوريات وعينيها مدمعين كتبكي بدات كتهضر وماراضياش تبان وكتشكي وتشرب الماء
ذكرى: مافكرت نهضر هايدا حتى صافي ضاقت بيا وتزييرت كنحس براسي عنموت ... هادشي خطييير بزااف بزاف اكثر من لي كتصورو .. انا ليوم راجعة من كازا الصباح مع السبعة وماجا فلوتوروت بحال كاع الناس حتى كنجبر راسي مداحسة جنب واحد الرموك .. كان قدامي وتقيل فالمشية وانا جيت نضوبل.. حقي نضوبل فديك الساعة لاكن هوا زاد جهد السرعة ودفعني للحافة كنت علااين تتقلب بيا طموبيل على شويييية . ماخلانيشي ندوزو ودخل فالطريق ديالي ودفعني وبقا كيدفع فيا حتى قلت صافي عنموت وبديك نقص السرعة باش نوقف..لاكن هوا بعد عطاني الطريق وقلت صافي الحمد الله .. جيت انا زدت فالسرعة نمشي لاكن قبل منهرب كحز عليا عاود وضرب لي الطموبيل من للوري حتى تعجنااات .. تعجنات وانا نزل ليكم فيديو ديالا كيفاش معجونة.. وفوق هادشي فاش وصلت عند البوليس وققفت وعاودت لهم هادشي كله وبقينا نتسناو الرموك هاداك يوصل لاكم ماجاشي. تخايلو فلوتوروت الرموك طار مابانشي
المهم انا كنت عنموت بالخلعة مزالة دابا فيا الخلعة كنترعد هاايداا .. ماعرفتشي شنو هادشي وشكوون وانا ماعنديشي الاعداء الحمد لله وانسانة مسااالمة وماعملتشي السوشل ميديا للدراما وانما للخيدمة وصافيي.. (تنفسات) ومنبغيشي الصدع والمشاكيل وانسانة مسالمة .. مساالمة وكنعرف غير الخيدمة ديالي وماعندي ماضي ماعندي حساب الحمد لله ومعقووولة .. شني بغلو عندي هاد الناس وعلاش؟ انا خصني نعرف علاش وانا مكنآدي حتى واحيد.. كنت عنموت اليوم ومابقيتشي قادرة نكون طبيعية رجعت خوفانة وموسوسة والهم فقلبي .. ادا كنتي نتا لي عملتي هادشي كتشوف سطوري ديالي انا كنقولك الله يرحم الواليدين خطيني عليك. خطيني عليك انا ماشي دلمشاكيل ومنزلة السلاح ماخصنيشي ندخل فشي عراك الله يرحم الواليدين خليني نعيش حياتي عادي كيف كاع الناس. (تنهدات) واخا مشيت عند البوليس ومشيت درت المحضر وباقا متبعة القضية حيت هادي محاولة قتل..علاش مانعرف. واخا هايداك باقين كيبحثو معايا وماجبرنا والو، ادا كنتي نتا لي عامل هادشي كتشوفني بعد مني وانا عنوقف البحث وصافي كل الله يسامح المهم نعيش عادي كي الناس.
قطعات سطوريات ولاحت صورة الطموبيل مضروبة ولاحت تسجيل الكامرة ديال السيارة اللي سجلات كلشي بالتفصيل كما شافتو عينيها وباين وواضح انا محاولة قتل او تهديد .. حيت كن بغاو يقتلوها كن دفعوها ورماوها هي وسيارتها للتوش وزادو . وانما هاداك كان بحال انذار او تخويف فضيع بطريقة بشعة .. داك التسجيل دالحادث صوت وصورة وكيفاش كانت كتغوت وتبكي وتصارع الحادث والرموك باين من الامام مزيرها كان مرعب ونتاشر بسرعة الضوء .. انتاشر انتشار فضيع وصل حتى للدول العربية وسطورياتها نتشارو ولي مكانش عارفها عرفها وضار ضجة كلشي ناض كيهضر عليه وعلى القانون حتى وصل للسلطات عاد ناضو تحركو بلهلايطريه ليهم وبداو الاتصالات كيجيوها من عائلتها والاقارب ديالها والمعارف ديالها وحتى ماريا وبناتها وكلشي تواصل معاها واصبح خديث الساعة ومتابعينها خايفين عليها وكلشي مطلع الهاشتاق "انقذو الدكتورة ذكرى"
شدات الارض مابقاتش كتمشي تخدم .. باها وخوها ومرتو ومها وراجل مها وخالها كلهم مشاو يجريو عندها للدار وكلشي مخلوع وكلهم متافقين على شخص واحد و هوا ياسين
لبنى الام: علاش ماقلتيشي لييهم هل شكوون؟؟ علاش ماقلتيشي ليهم راه عاد طلقتي وشاكة فالطليق ديالك باش يربيوه
عبد المالك: شني كتخور البنى حتى نتينا واش عتحرافلو يقتلها زعمها . والله ومشات جبدات الاسم ديالو حتى يصفيوها ليها تبات مل تصبح ومشي دعيهم ولا خليهم ماتجبرشي اصلا الدليل .. هادشي ادا جبرتي الجثة بعدا الله يستر .
ذكرى: منقدرشي اماما منقدرشي(شادة وجهها) انا متأكدة منو حيت الطريقة كيفاش كيهضر معايا عااجبو الحال ... مرتاح .. بلحق منقدرشي نذكر الاسم ديالو يقدر يعمل لي شي موصيبة ولا يدخلني للحبس انا عااارفة شني كنقول... سااهلة عندو يدخلني بشي عشر سنين هادي عندو بحال اللعب. انا منخصنيشي يكرهني ويحقد عليا . بلعكس انا خصني ينساني عليه ويخرجني من عقلو بالهداوة اما ادا شديت الضد صافييي عيقابلني غير انا
عاصم: ودبا شني عنعملو ؟؟ هانتينا عملتي الضجة وتحرك المخزن
ذكرى: انا عنعمل واحد الحاجة مزيانة فكرت فيها باش ميآدينيشي .. انا خصني نخوفو حتى هوا شويوش وصافي باش يتراجع ادا كان ناوي يعمل شب حاجة
عبد المالك: دابا ميمكنشي تبقا بواحدك خاك والمرا ديالو وباباك خليهم هنا حداك حتى نشوفو شني نعملو
ناضت للبيت جبدات ورقة وستيلو وكتبات فيها كل ما يتعلق بياسين وشنو دوز عليها والتهريب والعنف والتهديد وكلشي بالتفصيل حنى لاخر حلقة وذكرات فيه الاسم كامل وبصمات على الورقة وطواتها خلات غير الامضاء والبصمة باينين وهزات تيليفون طلقات سطوري والبكية غالبة عليها كتهضر وترعد
ذكرى: سلام عليكم .. انا بغيت نقول لكم ان احسن حاجة فحياتي صرات لي هي هاد الشهرة هادي .. بيها قدرت نوصل الصوت ديالي وكلشي يسمعني .. (هزات الورقة) هاد الورقة فيها كلشي ... فيها كوولشي وفيها الحلقة المفقودة لي انا ماعندي ضدها حتى دليل ولو اتاهمت شي واحيد فمعنديشي الدليل ضدو .. لاكن هاد الورقة فيها ادلة اخرى لي كتأكد كلش.هاد الورقة فيها كووولشي .. لاكن انا كتبتها وخليتها فمكان آمن في حالة ما وقعات لي شي حاجة او شفتوني ختفيت.. او سمعتو عليا شي خبر صادم .. فهاد الورقة غادي تجبرو فيها كلشي وغنخليها فاليد الامنة لي نهار توقع لي شي موصيبة الله يحفظ غادي تشوفوها منشورة من هاد الحساب.. ونهار تشوفو هاد الورقة تنشرات فهاد الحساب عرفو بلي انا مشيت ومنعاودشي نرجع. لاكن نتوما عتردو لي حقي.. نتوما معتسكتوشي ادا شفتو هاد الورقة .. نتوما عترجعو لي الحق ديالي والتأثر ديالي ومتخليوشي الروح ديالي تمشي محروقة هايداك..نتوما غتأرو لي
مابقا عند الرأي العام حتى موضوع يتبعوه من غير ذكرى لي سدات على المواضيع كلها وفين ما كان شي فنان منحوس صدر شي اغنية جديدة ودار ليها شي دخلة باش دير البوز جات ذكرى وضربات ليه البوز فالزيرو وحتى واحد ماداها فيه وقضيتها كانت من بين القضايا الحماسية لي كتخلي الانسان كما كان نوعو يتبع ويبغي يعرف الجديد..خصوصا انهل كانت باينة قصة حقيقية وداخلين فيها المخزن والتحريات وفيديو ديال الحادث اكبر دليل .. شد الموضوع ديالها انتباه المغرب العربي كله والوطن العربي وموضوعها كيتنشر فجميع الصفحات الكبرى بلا ملتخلص.. بل الكل رجع كيتواصل معاها لاهد خبر حصري جديد فالخفاء يسبق بالنشر ديالو هوا الاول حيت عارفين كلشي كيقلب على نتفة يعرفها وكلشي جاه الفضول وكلشي كيحلل ويناقش والفيديوهات عليها لعلك ترضى فين ما دخلتي تلقا الهضرة عليها . كل واحد اش كيقول لاكن المحللين العميقين لي متابعينهم كثار كلهم قالوان هاد البنت وراها قصة اخرى وقصة كبيرة بزاف ، بنت من هي اولا وشكون كان كيدعمها وشكون راجلها .. يا اما وقع بينها وبين زوجها مشكل حيت كما كيقولو زوجها رجل اعمال غني وهوا المساند ديالها وغيكون هوا لي سبب فهادشي.. يا اما عندو عداوة مع شي واحد وناضو هددوه بيها .. المهم وراه قصة كبيرة وفيلم نييت مزال ماتكشف خصوصا انها ماشي وحدة عادية .. وانما السيارة لي بانت مصورها غير هلديك قيمتها مية وخمسين مليون او اكثر بلا الحالة ديالها وحياتها لي باين عليها الفلوس وهي اصلا صغيرة وعاد بادية فالحياة وعاد فتحات العيادة ومامعروفاش كنيتها او شكون باها .. ولحد لان مابانتش عائلتها فالواجهة بشي قوة وبوحدها كدافع وتحاول تحمي راسها .. ختى زوجها مابانش وفين هوا من هادشي كله لي كيوقع ؟
شنو ورا هاد البنت هادي واشمن اسرار وشنو مزال غيكتاشفو من بعد .
كاع هاد الاسئلة لي دخلو للمتابعين فراسهم خلاو الضجة تزيد تكبر وكبرات نييت .. كبر الموضوع بزاف ومابغاش يسالي ولا يطفا وجلسات قابلاتو داك الاسبوع غير هوا طالعة نازلة وجالسة فالدار متبعة االاخبار وكتشوف الناس اش كيقولو والفنانين متضامنين معاها سوا كيعرفوها ولا مكيعرفوهاش.. فكرات فكلشي وتوقعات كلشي الااااا حاجة وحدة .. حاجة وحدة وضعات ليها النقطة على السطر وفجرات القنبولة
كانت ناعسة واحد الليلة مابيها ماعليها فبيتها بوحدها .. لاكن كيفاش حتى تفتح الباب فداك الضلام الدامس... ودخل للدار وسط الضلام وفيدو جهاز صغير كيضرب الضو هنا ولهيه.. طول يدو وطيح المكانة ديال الدار كلها فصمت ومشات حتى وصل لقلب بيتها فداك الضلام الدامس .. وحل عليها الباب بشوية ودخل بخطى ثابتة حتى وصل عندها وهي ناعسة وهز المخدة بشوية وحطها على وجهها حتى قفزات بدات كتفركل وتقمش وتنين ودخلاتها الموت وهي كتجابد معاه وتشير بيديها وكتحاول دفع المخدة على وجهها حتى جراتها وشهقات وغوتات غوتة وحدة خرج باها كيجري وخوها فداك الضلام كيضاربو وهي ماقدراش تهضر كتنفس بزز وتشد فصدرها وتقول شدوه .. كيفاش يشدوه وهما مكيشوفو والو وكيدخلو فالحيوط لولا الجهاز اللي فيه الضوء طاخ من يدو وشافوه ومشاو جيهتو نقزو عليه شدوه وكيغوتو باش تشعل وردة الضو لاكن الضواو طافيين .. الضو مقطوع وغوت عاصم باش تشعل المكانة لاكن خافت تقرب للباب ويكون شي واحد اخر يضربها بشي حاجة يطيحها وبداو يتفتو على تيليفونات ضواو بيهم ومشات ذكرى طلعات المكانة ويدها على صدرها كتشهق .. تشعلو الضواو وطاح فيديهم لابس كلشي كحل وهما متكيين عليه شادينو .. زادو حكموه ومشات وردة مع تقيلة كتر منهم وعامرة زادت زيرات معاهم بينما ذكرى كتفتف فتيليفون وتقفقف صونات للبوليس ولخالها وناضت الروينة .. روينة بالبوليس والسطافيط والطموبيلات وكاع الناس فاقت وكلشي ناض كيجري وهي هزات تيليفون فداك الليل كترعد بدات غير كتصور وتلوح وتبكي والبوليس كيمينطو فيه ويزيروه .ناضت قربالة وخبار تنسيك فخبار والصحافة كلشي تكجكج فداك الشارع فالبلاصة تقول عاسين عليها.. كلشي تجمع وصوروه خارج فيد الشرطة والحالة وذكرى خارجة مفزوعة مع خوها وباها لي كيبعدو على الصحافة.. لقات الميكرو قدامها وبدات كتهضر وتبكي يهستيرية
اما المسؤول لي طلقها كان يومو اسود نهار فكر يتدخل ويبين قوتو على ياسين. توالاه طارق ودخلو فالفصيحة من ابوابها الواسعة
نهار دير يدك فيدك المافيات كون اكيد انك غطيح واحد النهار تما .. مكيعرفوش الخير او المعروف من الباب الانساني .. بل كيعرفو الخير بالمقابل ومكاينش عندهم شي حاجة بالقول فقط وانما كلشي عندهم دقيق وبالحجة والدليل وحتى حاجة مكيدوزوها مرور الكرام . بحال هاد المسؤول الغبي لي واخا كيخشي نيفو فشي امور بعيدة عليه وكيجب ليه الله راه يدو طويلة وكيفهم. هوا فعلا كبير فالمحيط ديالو لاكن وسط المافيات مكيقدر يقفل والو لا هوا لا غيرو .. هاد النوع تعاملهم مختالف جدا وكيلعبو وسط الاخطار وكل خطواتهم مدروسة وديما عندهم كارط جوكر .. يستحيل يدوز بينك وبينهم شي تعامل وتفوت عادي بلا مايبقا عندهم اثار عليك وهادا هوا العادي عندهم . كما وقع لهاد المسؤول لي سبق ليه وكان بيض امواله عند طارق وكان بينهم وسيط لي خلاه يتواصل مع طارق لاكن عمرو عرف معامن تواصل وشكون هوا طارق واسمه الحقيقي بحكم مكيعشيش فالمغرب وبعيد على الشبهات وبعيد على كلشي .. هوا فقط تعامل مع اسم الشركة وكلشي تم فالخفاء وبالوسطاء لاكن بقاو ادلة قوية ضده فيد طارق هوا وبزاف منو .. ادلة كتبث انه بيض اموال طائلة ومن اين له هادا والادلة بالاوراق والتسجيلات الصوتية والفيديوهات بالصورة والصوت وكلشي بالتدقيق .. وباش طارق كزن خصو يطيح بحال هاد النوع فكان لابد يضحي بشي موضفين من لاجونص باش يبرأ راسو والشركة ديالو من بحال هاد العمليات وقام بالتبليغ على عملية تبييض مبلغ هائل ودفع الاوراق والادلة كلها للمحكمة وتشدو فيها الموضفين لي لبسو التهمة بيناتهم وعتارفو بديك العملية والتخلويضة غير بيناتهم وكلشي بالادلة وكلشي باش يوقعو هاد المسؤول لي من بعد ما حتى هوا بداو معاه التحقيق واخا عيا يتهرب وعيا يبعد ويطلق الفلوس لاكن مع الاسف مطاحش مع شي طرف ضعيف. وانما طاح مع طارق جرو جرة وحدة وغرقو تغريقة وحدة وكلشي كان مستور حتى بداو التهم كينزلو عليه شوية بشوية وفضايحو كيتجبدو وحدة ورا الثانية وخبارو كتسرب شوية بشوية ورجع حتى هوا كينافس ذكرى فالبوز وفضيحتو دارت بوووم والتحقيق مطول وكلشي كيهضر عليه والمحاميين لي ضدو كيصرحو للصحافة بالادلة وحتى واحد ماعرف علاقة هاد الفضيحة بهاد الفضيحة من غير ذكرى لي فاش طلعات ليها ديك الشوهة لغد ليه الصباح مور داكشي لي وقع ليها ليلة امس ومزال مفعفعة منو زاد كمل عليها اعتقال فلان فرتلان بتهمة تبييض الاموال الى اخره وتخلعات وتأكدات ان ياسين مكيلعبش معاها وانما جايها دقة دقة وبحال والو تبات فدارها وتصبح فالحبس حتى هي .. كلشي تفرج فالفضيحة وكان شهر ديال الفضايح التقيلة نيت لاكن كل ما عارفين الناس هوا ان الموضفين خلوضوها بيناتهم وصرفو المبالغ فالنواغ لاكن منين جات ديك الادلة والتسجيلات حتى واحد معارف .. الادلة كطيح فيد المحاميين لاكن من اين مصدرها حتى حد معارف.. ادلة قوية وحقيقية لاكن كيفاش حتى دازت على هاد المسؤول وكيفاش حتى تكشفات وتلقات هادشي لي صعيب الواحد يفهمو وكيفهمو غير شن. كتشوف عينهم فقط وشنو كيخرج من افواه المحاميين واخا عياو المحاميين ديال الطرف الاخر يبرأوه والو.. تعرضو على الخبرة وكانت ادلة سليمة وورقة جوكر قوية لعبها طارق ضد المسؤول ووقعو بيها فشباك يستحيل يخرج منهم مهما فعل. وهدا حال المافيات .. الى درتي يدك فيديهم وقلبتي وجهك غتلقا العجب العجاب لي نتا براسك معارفوش على راسك . المسؤول غلط وغلط بزاف . حكر ياسين وصغرو فهادي ولوا ليه يدو واستغل الحبس وتدخل وفرمشة عين نالت طلاقها . لاكن لسوء الحظ ماعرفش انه خشا نيفو مع نفس الطبقة لي داير يدو فيدها وعندهم زايد ناقص يعرف بلي تعامل معاهم معاملة خايبة وهما ديجا لباو ليه الطلب من قبل .. وماكيهمهومش واش عرفهم ولالا. لي كيهم هوا كما قلب استصغرهم واخا معرفهمش غادي يصغروه ويديرو ليه الابادة قدام المجتمع وكل حاجة كيخاف منها ويضرب حسابها هاديك هي لي غتكون عقابو واولهم الفضيحة
ها المسؤول مشا فالرجلين حتى هوا ، اما هاداك لي شدو عندها فالدار عندها فالدار صدق مختل عقليا واعتارف انه احد المعجبين ديالها وكيسيفط ليها مساجات فالخاص ومكتجاوبوش وحقد عليها !! هاد القصة صدقوها الناس ودارت ضجة اكثر من التهديد ورجع كلشي كيهضر عليها خصوصا ملي اتضح انه مختل عقليا وعندو الاوراق ديالو ومريض نفسي بالشواهد .. كلشي تصدم وكلشي تعجب ! حاجة جديدة فالسوشل ميديا!! طبيبة تجميل تتعرض لمحاولة القتل من احد معجبيها المختل عقليا!! عنوان وعناوين كثيرة دارت بوم وكملات الباهية ورجعات تراند عند المشاهير وصارت ذكرى اكثر شخصية مشعبية مشهورة مكاينش لي مكيعرفهاش دابا.. اما هي كاع هاد القصص مدخلوش ليها راسها نهائيا ورفضهم دماغها واحساسها ومتأكدة انها خطة مدروسة دخلو ليها الشكلي فالعكلي بالدلائل .. وفبلاصة ما يمشي المجرم للحبس مشا لمستشفى الامراض العقلية وما بقا لذكرى ماتقول ولا شكون تتاهم ولا الوجه لي يخرج يشكي مرة اخرى بالتهديد والا غتبان كدابة ومنافقة وكتضحك على الناس.. ياك المجرم تشد متلبس ومريض اصلا فمخو ومن الممتتبعين ديالها!! والغريب فالامر انها لقات رسائل فعلا فالحساب ديالها على الانستاغرام من شخص مجهول كيتفاعل مع جميع سطورياتها ومسيفط ليها كمية من الرسائل حتى فالاخير بدا يهددها لاكن هي مشافتش داكشي ومكتشوفش الرسائل اصلا نضرا لعددهم الهائل . وفاش تعرض حسابها للخبرة لقاو فعلا متابع ديالها وصفحتو قديمة محلولة من قديم الزمان ماشي جديدة وكيحط فيها شي تخربيق مامفهومش وعندو واحد العدد قليل من المتابعين وسبق ليه تراسل وعاود مع ناس كثيرة .. يعني حسابو عادي كأي حساب مكيبانش انه فو كونط او محلول على قبلها فقط.. جميع التفاصيل كتأكد ان الاقوال اللي دلا بيهم صادقة ومتطابقة مع الدلائل ومابقا لذكرى فين تزيد تهضر خصوصا فاش صحاب الحسانات مالين الصفحات نشرو بزاف ديال الاحداث اللي دازت غير بين الشرطة والمجرم والمحامين الى اخره .. ونشرو حتى الرسائل وبزاف دالاشياء حسب كل واحد واجتهادو فهاد البوز ومنين كيلقط الاخبار .. مابقا عندها ما تقول ورجعات من المتفرجين واخا خرجات بتصريح مع الصحافة من باب المحكمة وهي فقمة التعب والفشل والنضاضر على عينيها لاحت ليهم جوج كلمات معبرة ب " حسبي الله ونعم الوكيل " ومازادت وراها حتى حرف واخا تبعوها للسيارة كيجريو وخوها وباها كيبعدوهم وركبوها للور ومشاو بحالهم حتى هما مافاهمين والو وكل واحد كيلغي بلغاه وهي اللور شادة راسها كتنهد
ذكرى: دابا تشوفو واش صافي زال الخطر ولالا... هاد المرة محاولة القتل المرة الماجيا القتل نيشان
عاصم: وشني دابا عنعملو؟؟ المسخوط شبروه داواه للسبيطار لحومق يعني اللي كان مركب فيك الرعب صافي مشا
ذكرى: هادشي لي بغا ياسين .. انا متأكدة .. بغا يستفرد بيا ويعمل لي بغا ومنقدرشي انا نهضر .. كا صرد لي شي مجرم بعقلو كانت نقول شي واحيد صردو لي ومسح كلشي فيه .. بلحق هوا حفاااار لي من لتاحيت .. مناين جاب داك الحساب وشوف ولد السوق شني قالو راسو يعمل... وهوا عووومرو ما عرف الاسنتغرام شني هوا دابا رجع قلب كلشي للصالح ديالو الله يعطيه شي مصيبة
بان المستور وبقاو الناس كيحللو كيف بغاو .. اما هي عيات وتهدات بغات غير ترتاح وتنسا هاد الايام الكحلة .. لاكن شكون خلاها يالاه بدات تجمع حوايجها فباليزتها تسافر وتبعد وتنسا الهم حتى وصلها مسج مجهول كيقول " هادي دازت ..وجد راسك للعبة لأخيرة " طيحها داك المسج على ركابيها فالبيت ولاحت تيليفون .. بغات تحماق وبدات كتغوت وكانت بوحدها فالدار غير هي والزوهرة .. مشات كتجري عندها شدات فيها وذكرى شادة حلقها وصدرها وراسها وكتوريها المسج بحال المجنونة .. تماما كما كانت متوقعة وهاد اللعب الخايب مابغاش يسالي وهي مقادراش عليه .. وكل لعبة اخطر من لي قبل منها وهاد المرة يعلم الله شنو كيتسناها وماتقدرش حتى تخرج تهضر ... واخا بغات تخرج وتبين المسج لي عندها لاكن شنو الفايدة ... مدام هي عارفة شكون ومتقدراش تهضر فاذا علاش غتشكي وتبكي وكيفاش غتحمي راسها وتخلي المخزن يحميها وتخرج من هاد الورطة .. ندمات على النهار لي عرفات فيه ياسين .. كان كايبان طايش وواخا بزناس ماشي شي واحد لي فيه هاد الفعايل او تتوقعها منو .. كيبان باغي يعيش عزيز عليه الزهو والبنات ويدو متقوبة وصافي والبنات مكجكجين عليه يعني واخا تفارق معاه ولا توقوليه باي باي غيقلب عليها ويشوف غيرها مايصدعش راسو معاها .. وواخا شافت عليه التهريب فالباطو وفالحوايج ديالها قالت برهوش ومكيفكرش ومكيضربش حساب لبعواقب وكيطير .. كيزرب ويندم.. اما باش يخرج منو هاد لعجب هادا كله ويبدا يدريبلي فيها ويلعب معاها لعبة حقيرة ماتلقاش منها مخرج فهادي مكانتش متوقعاها...تمنات كن قتلها مرة وحدة احسن ما يبدا يقتل فيها كل مرة وتعيش نفس الاحساس فكل خطرة والرعب وقلة النوم وماعارفاش باش غتسالي.. والاسوء انها على علم بانها فخطر وجايها فالطريق واخا تعيا تحضي.. ماتعرف اشمن طريقة وكيفاش غتجيها عاوتاني.. بغات تسطا رجعات كترسم فدماغها ميات سيناريو باش تحطاط وبغا راسها ينفاجر .. بغات تحماق وماعارفاش اشمن نهار واشمن ساعة .. ياريت كن ماعرفاتش يكون اقل ضرر عليها بعدا.. اللهم جحيم الجهل ولا نعيم الوعي ..كن بقات جاهلة بشنو كيدور احسن ما توعا بيه وتجلس تفكر وتخمم وتتسناه وهي اصلا ماقدراش تحمي راسها يعني فيها فيها.. طرقو البيبان مزيان وقلبو الدار لا يكون فيها شي واحد مخبي .. وبينما هما كيقلبو فالدار لا يكون شي حد مخبي فشي قنت وحتى بيتها قلباتو وتحناو تحت النموسية كيقلبو لا يكون شي واحد مجبد تما ولا شي جثة حطوها ليها تسكت لباباها القلب وتكمل بالبوليس حتى فجأة جبدات زوهرة ميكة كحلة من تحت ناموسية .. شافتها ذكرى كتجبد داكشي وهربات لور مخلوعة .. اما الزوهرة بدات تحل فداك سكوتش وتعاود حتى تحلات وطلعات منها اكياس بيضا قياس كيلو دالغبرة .. بالخلعة بدات ذكرى كتفتف والزوهرة تخلعات هزوه بشوية كيجريو بيه للطواليط يالاه بداو يخويو فداكشي سمعات الدقان.. طاح منها النص وجاتها سكتة قلبية لا هي لا زوهرة .. لاحو كلشي فالمجرى خواو عليه الماء وساني كروة عاد حلو الباب لقاو عاصم كيتسنا
عاصم: شعندكم كفاعفعين ؟؟ عام باش تفتحو الباب
ذكرى: تنفسات الصعداء) دخل دخل دخل
دخلاتو وسدات الباب عاودات ليه اش طرا وبالخلعة ناضو خملو الدار كلها فلاوها قنت بقنت لا تكون شي حاجة مخبية فشي قنت .. اما كيفاش وصلات لتما و دخلات مابقاوش كاع كيفكرو فيها ورجع كلشي متوقع . وديك الغبرة باين شك ن مولاها وباين شكون حطها تما وشكون لي مسيفطو وكلشي باين عندهم .. ماعندهم فاش يشكو .. عيطات لخالها عاودات ليه كلشي ووحل معاها حتى هوا .. لاكن نصحها تعيط ليه وتسايس.. ماتعاداش معاه وترطب الجو شوية باش مايبقاش حاقد على الاقل تبرد ليه الشمتة ديال الطلاق لي ماشافت من وراه غير الويل لكحل.
مشات لبيتها سدات عليها وقالت يمكن هادي هي الضربة اللخرة لي نوا ليا وكان ناوي يسيفطني للحبس . يعني مزال البوليس غيجيو عنذها للدار .بقات كتفكر تحلل وصونات ليه جلسات شحال كتسنى حتى رد عليها منفخ
ياسين: شكاين فارعة لي كري من الصباح سرسرسرسررر
ذكرى: خصني نهضر معاك ضاروري
ياسين: عيان
ذكرى: شمو عملت لك ؟ ياك انا طلقت بحال كاع الناس ماشي غدرتك ولا هربت عليك بحال المرة الاولى .. هي لي هربات وماعملتيشي معاها هادشي وانا طلقت بحال كاع الناس شو شنو كتعمل فيا
ياسين: خصك نعمل معاك كما عملت معاها؟؟ ماتبقاشي تشوف وجهي ومنبقاشي نشوف وجهك ؟
ذكرى: بالحسنى ماشي بالعنف
ياسين: حتاا هي فاريتها معاها بالحسنى
ذكرى: صافي
ياسين: وا من دابا حتى نخرج نفاريوها غتمشي ترجعي للدار لي كنتي عايشة فيها معايا وتجلسي تما حتى نجي ..وحسب راسك ماطلقتيشي وانا كاين معاك وممنوه تخرج بليل ممنوع للباس ذق.اب وممنوع الصحاب يالاه سيري
ذكرى: شنييي؟؟ منقدرشي انا مطلقة شني عنمشي نعمل فالدار ديالك
ياسين: انا طلقتك؟؟ طلقتي راسك ... ادا مادايزشي داك الطلاق وا سيري تكمشي هانا خارج
ذكرى: شني عنقول للعائلة ديالي ؟!!! منقدرشي
ياسين: وماتبقاشي تعيط لي .. اخر مرة تصوني لي ولا غتفرج شعنعمل معاك
قطع خلاها واقفة مصمرة فبلاصتها ماعرفات مادير..خايفة ترجع لديك الدار وفنفس الوقت خايفة ماترجعش وتوقع ليها شي حاجة ..عيطات لخالها قالتها ليه وعاودات ليه على الحوار لي ضار بينهم وحتى هوا شاف حتى عيا وقاليها سيري ودي معاك خوك وباك حتى هما .. عاودات جلسات مع باها وخوها شرحات ليهم الوضع وناضو جمعو حوايجهم حتى هما وهزات قشها وجمعات كلشي وعيطات لمو علماتها مشات حلات ليها الباب ودخلات للدار مغبونة لقات نضرة تفكرات شحاال من ذكرى فديك الدار ..دوزات فيها الحلوة والمرة وكل قنت كيفكرها بحدث وغير دخلات حسات بطيف ياسين تما .. لما لا وهي دارو ريحتها من ريحتو حتى هي .. ديك الريحة حلات ليها ذكرايات فدماغها ماعرفات اش دير .. ماهضرات ما نطقات .. مشات مكسورة لبيت النعاس سرحات عينيها لقاتو خاوي وفراشو باقي كما خلاتو واخا دازو عليه شهور .. تقول رجعات بالزمن اللور ورجعات للماضي.. لاكن كما كان الحال ماتخفاش دابا وهي فدارو .. على الاقل غتنعس وتشبع نعاس اللي تحرمات منو ومغيسيفط ليها لا مجرمين لا ممنوعات لدارو وفوق هادشي معاها باها وخوها وفعلم مو وخواتاتو .. لحد الساعة هي فآمان بنسبة خمسين فالمية .. ماصونات ليه ماقالتها ليه وحتى هوا ماصونا ليها ماطاف بساحتها ومو كفيلة بأنها توصل ليه الخبار .. رتبات اغراضها ورجعات لمكان عيشها وكتوصي وتعاود فباها وخوها باش ميديروش شي زبلة تغرقها ولا يتسببو ليها فشي مشكل وييقا ديما على بال انهم فدار البراني ماشي فدارهم .. فمكاين لاش ديك الحرية فالتصرف واللي بغا يدير شي حاجة يمشي للذار لقديمة ..اما فهاد الدار فهما ضياق حتى يحن الله .
يتبع...
التعليقات
لا توجد تعليقات بعد، كن أول من يعلق.