محتوى القصة
كتشوف فالمراية…
وجها بلا ابتسامة، عيون فيهوم شي ضوء خافت كيضيع.
كتهز راسها شوية وكتمسح على الخد ديالها بلا ما تحس، بحال اللي كيبغي يوقف دموعه بلا سبب.
كتفكر فالعُرس اللي ما دارش.، فالتاج اللي ماتلبسش .
كتفكر فاليوم اللي كان خاص يكون فرح، ولكن قلبها كان كيغرق فواحد الخوف اللي ما كانش عارفاه.
هي ما بغاتش العرس…
ولكن دابا، كتفهم باللي ماشي العرس اللي كان كيرعبها، بل الحياة اللي كانت غادي تبدأ من بعدو
القلب ديالها بدا كيدق بسرعة، بحال شي طائر محبوس فالصدر.
كتحس بالعرق فالإيدين ديالها، وبالرعشة كتدوز من الكتاف.
الخطوات وقفات قدام الباب ديال الغرفة.
كتسمع واحد النفس العميق، وشي حد كيغلق عينيه قبل ما يفتح الباب.
اليد ديالها كتشد على طرف الفستان، وكأنها باغية تسرحو به باش ما يبانش الخوف.
الباب تفتح.
وهو داخل.
كيطلّ عليها، كيتبسم .
، وكيتفقدها فهاد النظرة اللي فيها “أنا هوا الزوج ”.
كيبان عليه السرور والشوق ، ولكن فيه حتى شوية ديال الرتابة
كيقرب بخطوات باردة.
وهي ساكتة ، كتخاف من أي كلمة تخرج من فمها ..قرب وهمس بصوت خافت كيحاول يشد فيديها بلا ما يسولها واش بغات
حسام: مبروك علينا
هو كيقرب شوية أكثر وكيعاود يشد فيدها .
وهي كتجبد يدها شوية باش ما يبانش عليها الخوف، ولكن ما كتقدرش تحبسها.
اللمسة ديال يديه باردة…
وهي كتقلب فدماغها:
“واش هادشي هو اللي كنت باغاه؟”
“واش هادشي هو اللي غادي يكون حياتي؟”
هي كتحاول تبتسم، ولكن الابتسامة كتطلع ناقصة، بحال واحد رسم ما كملوش.
حسام : غادي تكوني اسعد مرى فهاد الدينا ..وغنعيشو انا ونتي لاخر العمر الحبيبة ديالي..متصوريش شحال تسنيت هاد اللحضة
هي كتسمع هاد الكلام بحال شي ضربة.
كتجيها رغبة كبيرة فالهروب.
ولكن الباب قدامها،و العائلة ورا الباب…
والحياة اللي كاتقلب عليها من بعد هاد اللحظة.
كيشدها من الكتف بشوية، وكيمشي بها نحو السرير و هي كتسير بلا شعور، بحال شي عروسة فحلم ما كاتفهموش.
فاش كيوصلو كيجلسها ويتكا عليها بشوية فجو حميمي :
“بغيتك تكوني معايا، نخلدو هاد الذكرى انا ونتي .”
هي كتسمع هاد الكلام، وكتحس باللي ما كاين حتى حب اتجاهه فقلبها وكأنها دركت حقيقة مشاعرها و غير كلام بلا روح.
حسام: باشر بتقبليها) خلي ليا روحك .. انا ونتي من ليوم واحد
جالسين على عشا مغريبي تحت انغام موسيقى الناي واضواء الفنانيس باللون الاحمر كيتدوقو ما لذ وطاب من الاطباق المغربية..قدامهم كسكسو ودجاج وبسطيلة الى اخره..تنوع من الاطباق والنادل واقف بالقفازات حداهم والمنديل كيستخر عليهم ..كان الجو حار وكانت لابسة كسوة بيضا قصيرة وشعرها مبلل للجنب وكتهز الشوكة وضحك باصابعها الرقيقة واضافرها الطويلة وبلهفة شادة تيليفون وكتوريه
لينا: هاادي بابا هادي (غمضات عينيها وعضات شنايفها) الحلم دياااالي غيتحقق
كان جالس قدامها كيتعشا معاها وتيليفونو مكيسكتش وفنفس الوقت عاطيها وقت
ياسين :قلت لك حتى توصل تمنطاش لعام
لينا :ويدها على قلبها) شريها لي ونحطها فالكراج منقربشي ليها
ياسين: كلمة قلتها لك ..مابقا لك والو
لينا: بتدمر) عنمووووت بالشوق عنمووت (شافت فتيليفون) اربييي شحال باقي خصني نصبر( بحزن) كتفتن هاد الملعوقة
ياسين: ماتبقاشي تشهق على الحاجة يكون عندك شوية دالصبر.. ماتجي فين توصل تمنطاش لعام حتى يخرج لجديد حساان منها
لينا :شري لي هادي نحيد الشوق ديالي منها هي اللولة
ياسين: شاد كاس اتاي) خليني نعقل على هاد الكاس .. غتعمل لي الصدع فراسي وانا جيت نرتاح
لينا:تقادات بسرعة فالجلسة) صافي صافي..هانا ..شني نعمل انا كنضعاف وكيتقادا لي الصبر اربي دغيا
ناضت كتأفأف وتسوط بغات تقرب من لابيسين اللي فالمطعم تصور المنضر ومع الدورة هز ياسين عينو والكاس ففمو شاف فيها وبقا يطلع ويهبط وقال
ياسين:سير بدل عليك سير
لينا: ضارت كتسائل) علاش؟؟ مامزياناشي هايدا
ياسين: شار بعينو) شوف موراك
ضارت وجرات الكسوة لقات طبعة ديال الدم قدها قداش حمرا وخرجات عينيها طاح منها النص وقالت
لينا:هيييه!!!! علاااش ربيييي شني عملت انا فالحياة ديالي حتى يرقع لي هايدا ماجبرات فوقاش تجي غير وانا مسافرة
ضارت كتبكي مشات كتنفخ معصبة وهوا متبع ليها العين ويتنهد ويحرك راسو يمين وشمال
فلتات من تحت انفاسه كتنفس وقالت كتنهج بحال الى كانت كتغرق
غيثة: حسام…
هز راسو شاف فيها كتشهق وجاو مع الصدع لتحت والصوت واصل حتى لعندهم بغات تنوض تشوف شنو كاين ومنها تهرب من داك القدر
غيثة: شنو واقع لتحت
حسام:تحكم فيها) والو بيناتهم
غيثة: بغيت نشوف شنو واقع
حسام:شدها)والو مكاين والو ..
خزرات فيها خزرة وحدة ونطقات بحدة
غيثة: حساام
تبلوكا ورخا منها ناضت كتقاد قفطانها وشعرها وحلات الباب والضوت عاد كيزيد يجهاد هبطات لتحت لقات جوج خوالاتها خواتات مها فصراع مع مليكة وبنتها اللي كانت قد غيثة فالعمر ..وغي شافو غيثة هابطة فالقفطان على هيئة عروس زادو تصدمو اكثر وقالت خالتها سميرة
سميرة: هادا المضمون فيك..هادا المضمون فيك اغيثة ماقلتي نعيط لخالاتي ماقلتي نعلمهم غلى الاقل!! صافي ولينا برانيين حتى نسمعو الخبار من البراني
مليكة: كتبرد السوق)مالها اش دارت.. كاع الناس كيسترو وكاع الناس كيتزوجو مكيقولوش..زايدون راكم كنتو عارفينها مخطوبة ليه
فتيحة:الخالة) ايااااه اختي ! حنا برانيين ؟؟ ماشي خوالاتها؟؟ شوفي امليكة حتا عااارفينك لاباش باغا توصلي ولاكن ماتوقعناش بهاد السرعة وبلا متعلمي حتى واحد فالعائلة
غيثة:مصدومة)طاطا سميرة!! طاطا فتيحة!
بعد المرات الانسان واخا يدكي كيتخدع خصوصا من طرف العائلة ..كيقول عائلتي وكيبغيو ليا الخير وانا منهم وهما مني وصعيب يتيق باللي كيتقال
غيثة من بين البنات اللي سمحو فيهم الخوال بعد موت الام ومكانوش كيسولو فيها بزاف عكس عمها وعائلة باها كانو عائلة وحدة و كانت هي وولد عمها كيقراو فجامعة وحدة على برا وديما القرب بيناتهم..كبراتهم كتحس بيهم قراب وكتحس بعمها فمرتبة باها وهما اللي كدفيو حياتها شوية ويطفيو ديك الوحدة اللي كتحس بيها بعد فقدان باها.. الصراع اللي ناض بين عائلة عمها وخوالاتها خلاوها تنحاز جهة عمها ضد خوالاتها ومشات فصفهم بكل هدوء وبدون وقاحة حتى نساحبو غضبانين و هرجو من الدار وخلاوهم يكملو اللي بداو .
قلبو ليهم الكانة وخلاوهم بلا خاطر وخصوصا غيثة مابقاتش بغات تهضر اكثر فالموضوع وبغات تبقا بوحدها الشي اللي خلا حسام يغضب ومشا عمد مو كيشكي وهي كتسايس معاه بحال العادة .
صبح الحال صبحات فالمطبخ باغا تصاوب مشروبها باش تبدا نهارها بحال العادة كما موالفة. لاكن الوضع تبدل ورجعات عندها الدار عامرة ورجع عندها اللي يقوليها شنو دير رشنر ماديرش..واولهم مليكة صبحات واقفة عليها كطبق العادة والقاعدة وتابعاها فالكوزينة من قنت لقنت
مليكة: وغتخرجي بلا خبار راجلك هادشي حرام مكاينش حتى فالدين!! …وحشومة عليك تخليه بلا خاطر لبارح بات بوحدو فالبيت لاخر بحال الزوفري ، دابا راكم مزوجين وراه عندو حق عليك
ضارت غيثة معصبة شافت فيها وقالت
غيثة: ماتزوجتش باش ناخد حق شي حد.. وحتى واحد ماليه حق عليا والزواج مغيبدل حتى حاجة
زادت طالع ليها الدم وخلاتها واقفة مصدومة فيها .. مال البنت صابحة طالعة ليها النقشة!! فين الاحترام وفين التقدير!! اوييلي واش هاكا كنعاملو لعكوزة؟؟
هبط مولاي السلطان هاز خنافرو،، السيد تقلب وتبدل حتى اسلوبو وحركاتو دخلهم الكبر وتسيف فوجهو . نازل بالبيجامة ومحلولة من السد والزغب كيطل والسنسلة دنقرة كتبان لقا مليكة جالسة مبرعة يديها كتحاك ومشا عندها هاز خنافرو وقال
حسام: باقا ماهبطات غيثة؟
مليكة:كدور راسها) باقا ماهبطات؟ اوييلي يا ويلي عل الراجل الس والدة ماعارفش يحكم مرتو وماعارفهاش واش دخلات ولا خرجات
حسام: مافهمتش اش كتقولي؟
مليكة:وقفات ليه) وا مرتك راه ناااصت وزيرات عليها مساسطها. وتمات غادية لابسة واحد لكولون نحشم انا نطل عليه تحتي ، وزادتها كملاتها وجملاتها قالت لييك اسيدي انا متزوجتش باش ناخد حق شي واحد.. هادشي غا حيت قلت ليها راجلك راه ليه حق عليك ودخلتها بالصواب والاداب..ساعا جاب ليا الله هادي ماديالش صواب واداب ديال العصاا باش تعاود تتربا
حسام: نفخ صدرو)مزيااان… دابا انا ماشي راجل(كيقلب على تيليفون) انا غنتفاهم معاها
مليكة: باك الى ساق الخبار لهادشي راه مغيعجبو حال .. عندك الزهر ناض الصباح مشا للفيرمة يشوف اش طاري تما
حسام: كيصوني) مكتجاوبش…فين مشات هادي على الصباح؟
مليكة: بالسيف مادير لكرون وهي شادة الفلوس فيدها..الفلوس راه كضسسر..وهب غا مرى ماعندها ماادييير بالفلوس، الفلوس خصهم يكونو عند الراجل وهوا يعطيها ليدها لابغا يعطيها.. هاد الترابي اللي رباها باها ماهماش ديالنا ..اويلي !! اش غيقولو علينا العائلة!! عروستنا سايبة !! هادشي مكاينش فالمغرب اوييلي!! (جراتو)خصك تشد الفلوس عندك كووولها..ماتخليهاش هي تصرف كيما بغات ..مانعرفوها اضنو دخلات اشنو خرجات لا شنو شرات!! منعرفوها اش كدير
حسام: معصب) ومكانجاوبنيش
مليكة: كن لقاتك سيدي ومولاي ماتقدرش حتى تفوت الباب..ماشي غير ماتجاوبكش!! مالك اش ناقصك ماتفرض راسك عليها!! هاا؟
نفخات ليه راسو بالهضرة وناض معصب طلع للفوق تلاقا مع ختو خارجة كتهضر فتيليفون وفير شافتو هبطاتو حتا داز وكملات طريقها مشات للبيت دغيثة كتسلت دخلات كدور فعينيها وسدات الباب عليها ووقفات كتنتاعش وتتنفس بسعادة.. بدات بالدريسينغ هوا الاول كتقلب وتعزل وتتخير وتهز وتقيس وعزلات على خاطرها الكسوة اللي بغات بصباطها وصاكها ودارت للمجر كتقلب لقات شلا دهوبات وديامون مستف فواحد الطبقة كل حاجة فبلاصتها وبدات تقيس وعينيها كيلمعو ويبرقو بدات تلبس وتجرب وقالت ماشي مشكل الى خديت شي حاجة اصلا ماغتبانش وسط هادشي كامل..هزات براسلي حطاتو فصدرها وناضت زادت مع الطريق
مشات دوز نهارها كما موالفة وماهزات تيليفون على حتى واحد، جالسة كدور من بلاصة لبلاصة هي ومريم والاخيرة كتقري فيهل وتعاود وكتحاول دير بلاصتها حتى هي وماكرهاتش تعتق من الفقر اللي عايشة فيه واخا مكضمر حتى سوء لغيثة لاكن كتشوف النعمة قدامها وبغات حتى هي حقها منها .راجعين للفيلا حتى لطناش دليل كيتناقشو
مريم: كن دوزتيني للدار حسن ..ديك مرت عمك كل مرة تحشي ليا هضرة
غيثة : علاش؟ مالكي معاها؟
مريم : والو ..راكي عارفة نتوما عائلة وانا برانية
غيثة :نتي بحال ختي (هزات كتفها)زايدون حتى هما جالسين معايا فداري ماعندهمش الحق يجريو عليك
مريم:ياختي علااا سلامتك مللي دويتي
غيثة:مافهمتش؟؟
مريم : كتجيني شي مرات نية بزااف
غيثة: انا نيشان امريم ماشي نية، كنبغي المعقول .. واخا شي مرات كنحشم ولاكن كنفهم..راني واخا كنت عايشة فموناكو راني كنعرف العقلية المغربية ..ماتنسايش عائلتي كلهم عقلية وحدة
مريم: واخا هاكاك تفهمي حتى تعياي ماتفهمي والو قد هاد المساخط
غيثة:بابتسامة)غير كيجيب الله هههه(شافت فيها هازة حاجبها) نتي اللي مزال ماعرفتيني مزيان (غمزاتها) وكنتمنى ماتعرفينيش
مريم:كضحك) اوكي اوك
كملو طريقهم للفيلا ومع الدخلة لقات حسام ومو وحتى ختو جالسين كيشوفو فالساعة ..تبسمات وقالت داخلة
غيثة:سهرانين حتى نتوما ؟؟
حسام :ناض معصب)اشش هاد الوقت؟؟؟ طناش هادي واش كاينة شي مرت الراجل كتبقا دور حتى لهاد الوقت؟ وعلاش مكتجاوبيش؟؟ فين بقيتي حتى لدابا ؟
غيثة:مصدومة فيه)حسام!!! مالك كتهضر معايا بهاد الاسلوب
مليكة :تدخلات كتجري) لواه لواه اوليدي بشوية (كتغمزو) بشوية على البنت راه عروسة جديدة وخزال ماعارفة والو ..صافي صافي سير سير .سير بدل الساعة بأخرى
غيثة: كطلع وتهبط فيه هوا كيخزر فيها) مافياش اللي يتناقش معاك دابا..غنمشي نرتاح
زادت خلفة وخلات مريم واقفة ضارت ليها مليكة هازة يديها بغضب وقال
مليكة:ماعندكش دااار؟؟؟ فين جايا اختي؟؟؟ نتي اللي غتخرجي عليها مكاينش قدك اللي غيخرج عليها
غيثة: من الدروج) مريم…يالاه
سدات عليها بيتها هي ومريم منفخة ولاحت الصاك ومشات كتجمع شعرها في اتجاه الحمام غادية وكتغني ومريم كتشووف فيها
مريم: عجبتيييني فيها…ليوم ماينعسوووووش ههه
ونيت مانعسوش..جلسو مصدومين وسط الدار ومليكة كتحاك وتحلف فيها في حين كان جو اااخر بالشيخات والشوا والنشاط فالفيرمة عند عمها وهوا ومدور بيه المقدم والباشا والقايد ورجال الكبار ديال المنطقة ..لابسين الجلالب ومكسلين على سواني اتاي والنشاط ..تكلم العربي اللي حدا العم عبد السلام وقال
العربي: من درووك نشري من عدك… تا غا توكل على الله
عبد السلام: واش كاين شي واحد بعقلو يسمح فهاد الخيير كامل ويبيعو
العربي:وعطا الله الفارم عند خوك تبارك الله الله يرحم القبر وماخلا
عبد السلام: مناويش نبيع السي العربي..عوال نوقف على شغلي ورزقي بيدي .. فين مزال نلقا بحال هاد الخير هادا وهاد الفييرمة هادي
هما كيتناقشو وناشطين وحسام فالبيت بوحدو جالس كيشطح برجلو ويخمم .. مامرتاحش للوضع وماعندوش الصبر نهائيا .. مابقاش كيشوف غير المعمل والشركة ..رجع كيشوف غيثة خصها تجلس وهوا يتصرف وهوا يكون الري والشوار فكلشي..خصو يتصرف فكل حاجة باش هاكا يحس بالعصمة وبأنه ماشي خدام عندها وتحت سيطرتها ..لاكن هادشي صعيب وخصو الوقت هوا ماقادرش يصبر عيا معاها بالخاطر وباللتي هي احسن من قبل مايتزوجو وكان عندو هدف واحد يخليه يسيطر هوا الزواج..ودابا تزوجو ومزال ماقادر يوصل لداك الاحساس دالسيطرة
جلس حتى عيا وناض مشا عندها للبيت حل الباب بالجهد دفعو لقا مريم متكية وبسرعة ناضت تاقادات فالجلسة
مريم:حسام!!
حسام: شنو كديري هنا؟؟ يالاه برا…داركم
مريم: حتى تقولها ليا غيثة
حسام: ههه!! الا زوينة هادي !!!
غيثة:خارجة من الدوش بالفوطة والبينوار)حسام!!
حسام: شنو هادشي اغيثة؟؟ شنو اللي واقع ؟
غيثة:كيفاش شنو لي واقع؟ انا ماواقع لي والو
حسام:شد راسو) مريم خرجي بغيت نبقا انا وياها
شافت مريم فغيثة اللي شارت ليها تخرج ومشات سدات الباب وراها فين حين تقرب منها بشوية وقال
حسام:شنو اللي تبدل اغيثة؟؟ علاش ولينا هاكا بين ليلة ونهار
غيثة:مشات جلسات تنشف شعرها) انا عاد تزوجت ..وكنحاول نستوعب فكرة الزواج ونتا كضغط عليا..بغيتي بين ليلة ونهار نتبدل!!
حسام: على الاقل تشاوري معايا…نعرفك فين كتمشي فين كتجي شنو كديري معاياش خرجتي
غيثة: شافت فيه) ميمكنش!! كيفاش غنعلمك بكل حركة وعلاش؟؟ هادشي ماشي طبيعي..تزوجنا نتشاركو الحياة ماشي تتحكم فيا
حسام:انا مكنتحكمش فيك اغيثة.. هادشي عادي اللي كنطلب منك واي مرى كطبقو مع راجلها
غيثة:وقفات) اي مرى…يعني المرى العادية…انا ماشي اي مرى احسام .
حسام: تنهد) ماشي هضرة هادي
غيثة: هادي هي الهضرة…وكتشوف انني اي مرأة؟؟ جاوبني!!! واش كتشووووف انني اي مرأة؟؟ واش انا هي مريم؟؟ واش انا هي ختك هدى… واش انا اي مرى احسااام؟؟؟ (ضحكات) طبعا لا …ولاكن نتا اي راجل…
ضربو الضو فاش قالت ليه جملتها لاخيرة ورجع حمر وقرب منها كيشوف فيها بغضب وقال
حسام: زدتي فيييه….شكووون نتي ؟؟ شكووون نتي كاااااع؟؟؟ وشنو كتحسبي راااسك؟؟
غيثة: هزات راسها) انا غيثة المرنيسي.. ونتا حسام المرنيسي…ولاكن عاد الكنية هادي عندها قييمة وعندها وزن بفضلي انااا ..انا وبابا..وكن ما حنا عمرررهل كانت غتكون واااازنة ..فهمتي.. داكشي علاش انا ماشي اي مرأة… ومنسمحش ليك تتحكم فيا وفقراراتي… وحتى واحد ما عندو الحق يتحكم فيا وبغيتك تفهم هااادشي ماحدنا فالبداية ..بغيت تستوعب هادشي وماتقارنيش بغيري..وماتقارنش زواجي بزواج غيري.. حيت لا انا لا زواجي لا حياتي كتشبه وحدة اخرى غيري…(بحدة) انا غيييثة المرنيسي احسام وماشي فصالحك تجي ضدي .
حسام:مصدوم فيها)هادشي جديد اغيثة!!! ماكنتيش هاكا شنو اللي تبدل؟؟ من لبارح ليوم شنو اللي تبدل
غيثة: انا هاكا من ديما… غير نتا بطريقتك جبدتي غيثة اللي كتشوف دابا..داكشي علاش غنقول خليك زوين وخليني زوينة … حيت الصدع وهاد تخراج دالعينين ماعندهم فاش يفيدونا
حسام: حرك راسو بالايجاب)واخا … على خاطرك… نخليك ترتاحي
شاف فيها بحقد وغل وهي كتبسم ورجع اللور حل الباب لقا مريم كتسنط جات لداخل وجمعات النوضة بالزربة..وقف كيشوف فيها حتى هي وزدح الباب مشا
توقعاتهم تضربات فالزيرو مع الاسف..كانت كتبان ليهم ساهلة لاكن كما كيقول المثل" العود لي تحكرو يعميك) هي نيت ديال غيثة وكيفاش غيديرو يرودوها بعقليتهم المزفتة .. مكانوش متوقعين منها نهائيا هاد الرد وكيفاش دابا غيتعاملو معاها!! ماعندهمش القدرة والقوة اللي عندها هي زيد على هادشي هي المسيطرة فهاد الساعة وميقدروش يديرو شي حاجة قدامها . نزلات الصباح بحال عادتها …هاد المرة كانت زايدة نغزة ضاربة شورط قصير ديال التوب وجيلي ديالو قصير محلول وتحتو طوب رهيف ابيض وحداء رياضي..طالقة شعرها الاسود كيلامس مؤخرتها وبين بزازلها بيرسين على شكل نقطة من الديامو ونضارات شمسة والصاك وغادية هازة خنافرها لقات مرت عمها جالسة ويدها على فمها كتشوف فيها ودور راسها … مالقات ماتقول ودورات وجهها للجهة لاخرى كتشطح برجليها في حين بقات غيثة كتمشي وتجي وتهضر فتيليفون حتى نزل حسام بالكوستيم طلعها وهبطها شاف داك الزين ودوك المفاتن كلهم باينين وحتى حاجة ماقاسها وزايدة خارجة هاكاك ماشي ديال وحدة مزوجة كاع ..حتى قدام مو مارضاش وكملات عليه فاش شافت فيه وضحكات عليه بسخرية وقلبات وجهها ..تقدم قدام غيثة هازة راسو حتى كملات مكالمتها وقال
حسا: تبارك الله على مرت الراجل
غيثة: خيدات نضاضر) نعام؟
حسام: خارجة هاكا ؟
غيثة: هضرنا لبارح .. نعاودو نفس الهضرة؟
حسام: نعاودوها مية مرات. الاللة
غيثة: واخا ..ايوا سمع ..
حسام:نتي اللي سمعي) انا ماشي ديوتي نخليك تخرجي بهاد الحالة ..هادا ماشي لباس هادا العهرررر بعينيه
غيثة: ايوا ماعندي مندير لك راك كنتي كتشوفو قبل منتزوجو وقبلت بيه
حسام:قبلتي بيه حيت غيتبدل
غيثة:بابتسامة) نتا اللي قلتي ماشي انا لي قلت. ههه
مشات خلاتو واقف خرجات بحالها حتى سمع السيارة غادية وبدا يعراق بوحدو.. اما مليكة ضربات فخادها كضحك بالفقصة وقالت
مليكة: اويلي ماحكمها حتى فاللباس بقا ليه غا يحكم المعمل والشركة (ندبات كضحك) اوييييلي على البرهوشة عرات لينا نيابها …وباغي قالك تعطيه الشركة والمعمل والفلوس وزيد وزيد…(ناضت ليه) والشراااوط غلبوك …الحوااااية غلبوووك ماقدرتيش تحكمها …طررر امالي طرر
حسام : بغضب) شنو بغيتيني نديير؟؟؟ هانتي كتشوفي بعينيك …بقا ليا غير نضربها ونحبسها فشي بيت
مليكة: يدها على جنبها) ومالها ؟؟ مالك ماتحبسها ملي مالقيتي ليها جهد…شكون كااع غيسول عليها هه!!! سررررها نيييت تحسبها ووريها الرجال علاش قادين
حسام:هادا هوا الحل عندك طفرناه بيه
مليكة: هاديك ماينفع معاها لا سياسة لا خاطر لا حلاوة اللسان… فطر بيها قبل ماتغدا بيك..ليوم ولا غدا طلع ليها فالراس وتسوسوك وتسوسنا حتى حنا معاك . شحااااال وحنا نراريو وفاللخر يالاه عطاتك نص وكالة ماتعرف مادير بيها ..وااالو.. وفوق هادشي الشركة مكحلاها كريديات ماعندك ماتدي منها حتى الفلوس مكاينييش ..
حسام: بتفكير) شنو بان لك ؟؟؟
مليكة: قربات منو ) اللي باليا عجل ليها اللي مأجل ليها .. وهانتا ورتي كلشي وورتنا حتى حنا معاك.. ولا شدها تحت السباط حتى تكتب لك كلشي بزز منها ..ماتخلي لخوالها وتريكتها ماينضيو وراها
حسام: بتفكير) صعييييب امي هادشي اللي كتقولي
مليكة :حتى حاجة ماصعيبة… زيد قرب نوريك الشغل
هاكا الايام رجعات عندهم.. تقلبات سفاها على علاها ورجع روتين ..كيشوفو وساكتين ومابقاوش كيهضرو كاع معاها خلاوها على خاطرها دير مابغات واخا كطلع وتهبط فيهم ماقادرينش يتدخلو ..السيدة كدخل حتى للطناش وشي مرات حتى للصباح مزالة عايشة العزوبية وكملاتها مشات سافرات بلا خبار حتى واحد لفرنسا تلاقا مع صحاباتها فموناكو ومودزة احسن صيف مكاين غير اللباس والماركات والدوران والكيسان ..عايشة الحياة والرفاهية واللي بغاتها تشريها ومكاين غير المايوهات الوازنة والبحورة الفي اي بي فين ما كان شي خانز فلوس مصيف تما .. شهر ماشافوها وماقادرينش يصدقو داكشي اللي كيعيشوه!!! اويلي على العروسة مشات والراجل خلاتو فالدار!!! حتى عمها عبد السلام ماقدرش يستوعب هادشي اللي كيسمع واللي كتوريه هدى بنتو حيت متبعة وحدة من صحاباتها اللي مسافرة معاهم وكل مرة تبوسطي شي صورة ولا فيديو باينة فيه غيثة وغتزيد تكمل على مليكة اللي غير كتشوف وضرب فخادها وتندب فدام الصالون وتسخر فالخدامات حمقاتهم كل مرة طيبو لينا هادي ديرو عادي بغينا هادي كتشها ومقابلاهم غير هما .
مليكة: اوييلي وحدي على المرى المزوجة اوييلي هادشي مكديروش حتى وحدة ديال راسها .. ها ختك مامزو نا مخطوبة ومكديرش هاد الفضيحة اللي دايرة بنت عمك .. شوووف شوف..شوف الصدورات معرية والبوزات نع البنات ويعلم الله واش غير بنات بيناتهم ولا معاهم الرجال
حسام:ناض ساخط) شنوو غنديييير شنو غندييير انا مرضت ومرضتيييني..شنو غندير ليها راه مشات مقالتهاش ماعرفتهاش كاااع اينا قرييينة كحلة مشات ليها
هدى :مشات لك لموناكو
مليكة :كن دات بعدا معاها غا ختك ملي بغات تسافر بوحدها مع البنات تدي معاها انا تك بعدا …منها معاها الونيس ترد ليها البال منها تفرج حتى هي شوية
هدى: وا هي مكتبغيش حتى تجلس معايا ماعرفت مالها.. مكتبغيش تجمع معايا
مليكة:سيري سيري تل نتي سمعتيني كنهضر عليك حساب لك بصح..سيري شوفي راسك بعدا حالتك متعرفي حتى تقادي هضرة كي الناس عاد تجلسي تجمعي معاها …هي كتهضر غير فالماركات والفلوس والسفر والقرايا مع اللي قدها بحالك نتي مادايرة حتى وحدة فهادو..كتسناوني انا نوريكم شنو ديرو… هي غاا بوحدها ..بووحدها ما رباتها مها ماقرصاتها ما قرصها باها ما كبرها رااسها مطيييورة ومجييبدة ..هادي كاع ماتكسابش الام ..نتوما ها مكم ها باكم ووااالو واش درتو الطايلة خصني انا نكودكم ديما ..من نهار ولدتكم وانا وراكم تابعاكم تى واحد فيكم ما يحمر الوجه. الله يخليها سلعة. تفوو
الحرب نايضة فالدار ولاللة العروسة كتسارا بحال عادتها من موناكو لايطاليا ومن ايطاليا لسبانيا ومن سبانيا عاد دخلات المغرب..يجيوكم اسماء الدول عادية فالنطق لاكن الاخت راه دوزات فيهم عطلة ولا فالافلام والاحلام..ما لايخطر على بال الدرويش. حياة اخرى وعالم اخر وهادشي اللي كيخليها تتعجب كيفاش هي غتخلي هاد الحياة كوولها وتتبع حياة مليكة وعائلتها!! لا يعقل تسمح فالنعيم اللي عايشة فيه وتمشي تعيش الجحيم ديالهم اللي كيجيهم هما عادي! واش الجلسة فأوتيل على البحر مع غروب الشمس بفستان مورد من ديور وعطور فاخرة وطبق السمك مع مقبلات ومشروبات ولا الذ منها تحت موسيقى هادية وجنب ناس راقية وتبادل الهدايا الثمينة هي الجلسة فوق الفوطوي اللي فالدار قدام التلفازة وتبقا حاضية الخدامات داخلين خارجين من لكوزينة ؟؟ واش اللي كيخط راسو ففندق فاخر قدام نافدة طويلة كطل على منضر البحر واليخوت الفاخرة وسبقا الفورميلة واحد بالسيارات الفخمة والناس الثرية هوا نفسو النعاس فبيت النعاس دمليكة اللي عندو سرجن واحد فعمارة كيطل على شارع كينفخ الراس بالصدع والطوبيس دايز والطاكسيات مدابزين. واش تفطر على كوكتيل من الليمون والكيوي مع العسل وممستخلص الفانيلا مع بان كيك بالكرز والفريز مع العسل والشكلاط قدام داك المنضر الجميل هوا تفطر فالطبلة قدام التلفازة ضايرين بيك الحيوط فالدار دمليكة وضرب الحرشة والى طارت تاكل كيكة مع القهوى!
فروقات شاسعة كبرات عليهم غيثة معارفاش نهائيا ديك الحياة اللي علشت مليكة وبغات تفرضها عليها والاخيرة معارفاش اصلا وماعندهاش فكرة على حياة غيثة اللي كبرات فيها وتربات فيها والمحيط اللي عاشت فيه وكيحساب ليها عادي تجيبها وتهبطها من واحد المستوى لواحد المستوى واقدر تعيش فيه!! كيجيب ليها الله ساهلة حيت هي كبرات فيها كتجيها عادية كتقول راه عادي حتى غيثة بحالنا بحالها وهوا فالحقيقة صعيب بزاف التأقلم مع بيئة مختالفة على البيئة ديالك..صعيب بزاف تشد وحدة بحال غيثة اللث حياتها كاااملة فلوس وسفر ومحيطها كلو عامر باللي بحالها والحرية عندها جزء من شخصيتها ..لايعقل تفرض عليها الحياة الزوجية اللي كيقبلوها عليها بنات الشعب بنات البسطاء والدراوش اللي مولفين عليها وعاشوها مع امهاتهم و عائلاتهم وصحابهم وكيقبلو عادي بحالهم بحال غيرهم اللي فالمحيط ديالهم.
من سابع المستحيلات وحدة بحال غيثة تقبل استشارة من الزوج وطبق القوانين الزوجية وترضي العكوزة والزوج والعائلة وهي ماتعلمات هاد القواعد وماعاشتش فيهم وكيجيها بالنسبة ليها عبودية وسجن ابدي.
لحاصول حتى واحد ميقدر يفهم الثاني وصعيب على الطبقات بجوج التفاهم وهادا علاش يفضل كل واحد يتزوج من الطبقة ديالو اللي حل فيها عينيه .
دخلات غيثة المغرب مباشرة لطنجة ومامشاتش للدار..علاش؟ حيت هي هاكاك..فضلات تمشي لاوتيل وماتلاقاش بحسام واخا هاديك دارها لاكن بدات تحس براسها مابقاتش عندها خصوصية..مابقاش عندها فين تحط اشيائها ولا فين تاخد راحتها وهي ولفات بوحدها كتبغي دور ومتشوف حتى واحد فجنابها .. فضلات الاوتيل ترتاح فيه من طريق السفر والسياقة لاكن شكون خلاها. رن هاتفها وهي يالاه خارجة من الدوش بالبينوار والفوطة وهزاتو لقات حسام كيصوني وسدات عينيها كتسوط مطولا وتفكر عاد هزاتو ردت
غيثة: حدك تما صوتك مايتهزش عليا والو بغيتي تهضر هضر بشويييية ..يالاه كنسمعك
حسام: بنفاد الصبر) رديتيني شماتة ياك؟؟ رديتيني قرد
غيثة: غير قدام مك اصلا ماشي شي حد براني
حسام: بصدمة) ياااك!!! انا قرد اغيثة؟؟
غيثة: قولتيها نتا ماشي انا …وزايدون اللي نطولوه نقصروه..لحيوط راع ليها اذان احسام وانا ماشي حمارة ..سمعت هضرة وضحات ليا بزاف ديال الامور كنت غافلة عليهم والحمد لله حنا مزال فالبداية..با ماتجيش تحاسبتي شنو كندير وشنو مكنديرش اللي اصلا ماعندكش الحق فيهم .. غنختاصر لك هاد الطريق ..انا ماشي ديال هاد الزواج ..منقدرش عليه غير الله يسهل عليك
حسام: بارتباك) شنو سمعتي ماقلتي ليا والو وهادشي كاامل فراسك وماجيتيش تقولي ليا؟؟ يقدر سمعتي شي حاجة فهمتيها غلط
غيثة: ماعنديش الطاقة نهضر فهاد الموضوع عييت بغيت نرتاح مابغيت حتى واحد يقلق راحتي
قطعات عليه خلاتو كيعيط ولاحت تيليفون وجلسات كتنفس وتسوط ساهية وكتخمم وجرات تيليفون لقات حسام كيعيط ليها قطعات عليه ودوزات لابيل كتصوني دايرة رجل على رجل
غيثة: بهدوء..السي ياسين؟ لاباس عليك ..بغيت نتلاقاك فشي موضوع الى كان ممكن …
ياسين: نتي تآمري الاللة غيثة
غيثة: هه..قلت زعما واش ممكن نتلاقاو
ياسين: مرحبا فأي وقت
غيثة:كتشوف فالساعة) نتلاقاو عندك فالشركة ؟
ياسين: علاش فالشركة؟ نتلاقاو فشي بلاصة اخرى حسن
غيثة: واخا الى كتعرف شي بلاصة كاالم مزيانة
ياسين: انا دابا غنصردلك الموطع
غيثة:اوكي
قطعات وناضت كتسوط وتبسم جاها الحماس تقول غتلعب شي مقابلة.. كانت طافية فاش دخلات للمغرب وغير اتصال واحد حياها بدل ليها المورال كامل ..تسنات يسيفط ليها الموقع لاكن ماسيفطو حتى للسبعة دلعشية وفاش دخلات تشوف المكان لقاتو مطعم كيطل على الجبال كبير فاخر وفهمات انه بغا يتلاقا معاها للعشا ، بدات كضحك ومشات رجعات الحوايج اللي كانت جابدة لداك اللقاء وجبدات حوايج اللي يليقو بالعشا وبداك اللقاء . وكملاتها حتى هي مامشات حتى لتسعود يالاه سالات ودخلات لداك المطعم كتقرقب بواحد الطالون قدو قداش العلو ولابسة كسوة طويلة لاسقة كاملة حتى للصندالة كلها مشبكة وشبكتها مجبدة عليها ومبطنة من لتحت غير من جهة المؤخرة بحال شي مينية من لتحت ومن واحد الجنب تحت الصدر والصدر فقط.. اما الكرش كتبان ومشدودة بخيوط رقاق فالكتاف وعريانة من الضهر وفيها فتحة من للتحت حتى للفخد وجاتها كتحمق.. الحق يتقال عندها الفصالة ديال داك اللباس..اشمنك ياسيقان والكتيفات والعنق مجبد ولحمها محمر وزادت جمعات شعرها لفوق فالاعلى كامل بحال شي تسريحة عالية مرخوفة وفيها شي زغيبات مدليين ولقصيصة منفوخة فالجنب طايحة وحلقات كبار ديال ديور وفيدها صويك قد نملة فضي.. دايرة مكياج سموكي خفيف وملمع شفاه بني وكتمشو وتتمايل بثقة فالنفس حتى بان ليها جالس على واحد الكنبي متكي على ركابيه لابس شوميزة فشيبي محلولة شوية على الصدر ودجينز زرق شاد تيليفون فيدو كيهضر والشعر اللور رطب زعر ..غير شافها جايا وقف كيودع المتكلم وماجا ت فين توصل عندو حتى قطع وتبسم كيشوف فيها وفتح يدو استقبلها وسلم عليها من الحناك ودار ليها بلاصة جلسات بكل ثقة فالنفس ودارت رجل على رجل وهوا قدامها كيشوف فيها ويتبسم
ياسين: مرحبااا …نهار كبير هادا
غيثة :كتحك ودنها،) شكرا.. كي داير …لاباس عليك
ياسين: اللي شافك ميكونش لاباس عليه؟
دوزات يدها على حلقها كتبسم وقالت
غيثة:حتى لاباس عليا ملي شفتك
ياسين: هه يااك.. كنتي تعيط لي ونتشاوفو ونوليو لاباس
غيثة:كتشوووف فيه) حتى دابا باقي الحاللل
ياسين: كل حاجة فوقتها مزيانة
غيثة: قلت ماعيطتيشي سول فالحساب اللي بيناتنا .. نعيط انا
ياسين: هز حاجبو)حنا بيناتنا شي حساب؟
غيث:كضحك) زعما لكريدي
ياسين: مازوبانش…بنتي لي زربانة
غيثة: انا جيت نبيع ليك (هزات حاجبها كتبسم)
ياسين: كيطلع فيها) وانا شاري
غيثة: تتنهدات) بصراحة السي ياسين انا منقدرش على هاد الضومين..صعيب عليا وجديد عليا خصو الرجال اللي يقدو بيه كما قلتي..من الاحسن نبيع ..غير هي واحد الحاجة..راه الشركة على ابواب الافلاس وانا مافجهديش نوضها وحتى حسام مكنضنش يقدر يحييها من جديد
ياسين:حط الكاس دالقهوى) ماشي مشكل ..باك كان راجل مزيان ..كان ناجح تبارك اللع ماعندي منقول..خسارة الشركة ديالو ضيع هايدا وتهدم
غيثة: بأسى) الساس الصحيح ديالها مشا مابقا ليها ساس..داكشي علاش من الاحسن نعتق ما تبقى منها قبل ما يفوت الفوت ..قولي عفاك شنو غدير معايا فالسلعة اللي خدينا من عندك بلا خلاص وشنو غنديرو فهادشي..انا مابغيتش نضيعك وفنفس الوقت مابغيتش نضيع (بأسى)هادشي مكتاب عليا ..كن لقيت فكتافي اللي يوقف معايا منوصلش لهادشي
عي كتهضر وهوا كيشوف فيها ويسمع تقول ملاك وكينطق.. الحزن فعينيها وبداو الدموع يتجمعو فعينيها حتى كانت واحد الدمعة غتهبط وحطات عليها كلينيكس وكملات
غيثة: غير الموت دبابا راه خسارة كبيرة ليا.. اما لخسارات لاخرى راه ربح قدام خسارتو
ياسين:تنهد) دابا اللي وقع وقع..هادا مكتاب الله.. شوفي شنو ماجي للقدام..ماترجعشي اللور ..
هوا كيهضر وهي كتسنط عجباتها اللهجة ديالو مع داك الصوت الضخم اللي عندو وحرف الراء اللي مكنطقش بيه وكخرج اللام فبلاصتو وهضرتو ملوية كتبقا غير كتشوف وتسمع فداك الخليط اللي جامع بين الشكل ديالو والهضرة ديالو وعاد فاش كتفكر راه بارون كتجيها فشكل كيفاش هادو بثلاتة يتجمعو فواحد ماشي سي حاجة اللي كتوقع دييما .
غيثة: فاقت بعد سهوة) قوليا دابا شنو غنديرو فهاد القضية
ياسين: ديري اللي عجبك..انا منقولكشي لا
غيثة: ولاكن انا مابغيتكش ضيع
ياسين:هه…انا مكنضيعشي
غيثة: ايوا صافي..خلي حتى نسيفط ليك الاوراق وكلشي..الى قبلتي وقع والى ماقبلتيش ماشي مشكل..متتبدل حتى حاجة
ياسين:حتى هادي هضرة.. ودابا خلينا من هادشي .. عرفني عليك كتر
غيثة: جاتها الضحكة) كتعرفني
ياسين: ماشي كتر
غيثة: قربات وجهها كضحك) وشنو غيتبدل الى عرفتي اكتر ؟!! اممم
بقا كيشوف فيها بلا ميشعر عض لسانو حتى سال ليه الدم وزم شفايفو كيتبسم بوحدو ويشوف فيها هزات واحد لكوكتيل فيه لاباي كتشرب و جالسة بهدوء وأناقة، بحال اللي مرتاحة مع راسها
ظهرها مستقيم شوية بلا تكلّف، كتافها طايحين بنعومة،
ورجليها مجموعين قدّامها بطريقة طبيعية.
حركاتها قليلة ولكن محسوبة.
راسها مايل شوية،
وعينيها كيشوفو بنظرة واثقة ودافئة،و
ابتسامة خفيفة كتجي وتْمشي بلا ما تحاول تبان.
اما هوا باين عليه الوقار ديال التجربة،
جالس قدّامها ولكن عينيه ما مفارقينهاش.
ما كيحدّقش بجرأة،
نظرتو هادئة، عميقة، فيها إعجاب صامت أكثر من رغبة.
كيشوف التفاصيل اللي ما كيشوفهمش أي واحد:
طريقة جلستها،
الهدوء ديالها،
كيفاش كتتحرّك بلا ما تحاول تبان. كيشوف الحيوية والشباب اللي فيها والشغف والحماس اللي فعيونها للحياة
شفايفو كيتشدّو بابتسامة خفيفة،
بحال واحد اكتشف جمال نادر وباغي يحتافظ به غير فالنظر.
كتبان عليه لحظة صمت،
ذاك الصمت اللي فيه احترام، تقدير، وربما شوية حنين.
ما كيقول والو،
ولكن نظرتو كتقول كلشي:
إعجاب، راحة، وإحساس بأنه جالس قدّام امرأة مختلفة
بدا حوار هادئ بيناتهم ..كيسمع ليها ويتحاور معاها على افكارها وشنو ناوية دير من بعد وهي بحال الى باغا رأيو فالموضوع وكتشوف انه لنسان ناجح فحياتو العملية وعندو تجربة وخبرة تقدر تستافد منو
غيثة: شي حاجة اللي نرتاح فيها ميكونش فيها مشاكل ومسؤولية كبيرة .. حيت الشركات الكبار بصراحة منقدرش عليهم واخا ارباحهم يعني كبيرة بزاف مسؤوليتهم اكبر
ياسين: بنضرة باسمة) عندك ديبلوم فالتجارة زوين..زيدي عليه شي ديبلوم فداكشي ديال التصميم وخرج المودل ديالك ودفعو للشركة تخرجو لك وطلقو فالسوق …حسن لك من حريق الراس دلمعامل والضرائب
غيثة: بادراك) بصح هه عندك الحق..ولاكن انا ماكرهتش زعما ندير ماركة بسميتي
ياسين : عمل لي عجبك ..داكشي ديالك
غيثة: هي واخا فكرة مابيهاش مي احسن ..ارباحها ماشي يعني كما كنعرف ولاكن كمسؤلية نقدر عليها
ياسين: مغطلقشي الماركة ديالك هنا فالمغرب
غيثة: كيفاش؟
ياسين: الى طلقتيها هنا مغتعطيهاشي قيمة مغتوصلشي للعالم..طلقها من طاليان ولا ميريكان تتسما ماركة ايطاليا مثلا ولا امريكية غتعطاها قيمة فهمتي
غيثة:تقادات فالجلسة) بلاتي ههه هادشي جديد عليا
ياسين: عاادي خصك غير اللي يوقف معاك وتوصل لشنو بغيتي
غيثة:حسن منك مغنلقاش (بابتسامة هادئة) انا كنشوفك قدوة ..ومثال للنجاح
ياسين: يااكُ ههه الله يكبر بك هههه
غيثة: كدبت؟ كنقول غير اللي كنحس بيه واللي كنشوفو
ياسين: شنو كتشوفي؟
غيثة: كنشوفك راجل ناجح..كيفكر بالعقل ..كيحسب خطواتها ..مكيزربش.. امم ذكي.. عندك بعد النضر وعندك افكار متنوعة فكاع المجالات ..اجي نتا برج الاسد؟
ياسين: كيضحك) اييه
غيثة: عرفتك .. (كتشرح بحركاتها)انسان قيادي.. مسيطر.. كيركز على الهدف بلا صدع بلا ميدير الحس.. عندك هيبة و حضور قوي صعيب شي واحد يلغي الحضور ديالك
ياسين: كل واحد كيشوف اللي فيه
غيثة: ههه ولاكن انا عارفة شنو كنقول (تنهدات كتشوف الساعة) خصني نمشي … وغدا ان شاء الله غنكلف الكونطابل يجمع الاوراق كلها
ياسين : وقف معاها) ان شاء الله .
غيثة: تصبح على خير السي ياسين
ياسين:وعلاش السي؟؟
غيثة: وعلاش لاللة ؟
ياسين:لاللة جات معا ك
غيثة: ايوا حتى نتا جات معاك السي ههه
هزات صاكها كضحك ومشات بينما هز سوارتو وتيليفونو مشا وراها فصمت وابتسامة خفيفة فعينيه حتى وصلات لسيارتها ووقفات حدا بابها وتلفتات عندو كترمش مالقات متقول والابتسامة مفتوحة فوجها البشوش ماتسخاش بها
غيثة: بمزحة) ماسخيتيش بيا!
ياسين:علمك الله
غيثة: حتى انا ماسخيتش بيك (غمزاتو ) بون وي
كانت غدور لاكن جرها من خصرها سلم عليها من واحد الحنك وضار للحنك لاخر يسلم لاكن باسها فقنت شفايفها ورجع اللور كيسوف فيها ويدو على الباب فتح ليها الباب طلعات كترمش دايخة تحت نضراتو وسد عليها الباب وهي مرتبكة كتبسم وتجمعها .. رجع اللور دار يديه فجيابو حتى ديمارات وشارت ليها باصابعها وحرك ليها راسو وزادت غادية وتالفة كتفكر والقلب كيضرب طلعات معاها الصهدة وعرقات بدات تهبط فالزاج وساهية حتى وصلات للدار ..هزات عينيها لقات راسها قدام الفيلا تفكرات مليكة وحسام وشافت فالخاتم اللي فصبعها وتفكرات الزواج والفيلم اللي عايشة ورجعات اللور مارشاريان كتردد
غيثة:شنو لي جابني لهنا؟؟ اويلي الله يستر ..صافي هرب ليا
رجعات لاوتيل والعقل بقا فالباب دريستو ..كل شوية توقف وترجع تتفكر ديك اللقطة وتعاود تكمل شنو كدير..وتعاود توقف كتذكرها حتى كتفوت وترجع تمسح جبهتها وتكمل ..خدات دوش ولبسات ملابس خفيفة ناعمة ومشات لبلاصتها دخلات كتقلب عليه فقوقل وتبحث فالانستاغرام باغا طلع سميتو حتى فجأة طلعو ليها شي تصاور فقوقل ديالو مع بنت زعرا اية فالجمال..مافهمات والو فالاول حيت كانت صورة وحدة ليه معاها نازلين من الباطو لاكن كتبان صورة قديمة دازو عليها سنين.. كان كيبان شاب وباقي صغير ..جاها الفضول تزيد تعرف اكثر وبدات تقلب لاكن كيطلعو ليها صور باسم ذكرى فقط ..عرفات من خلالهم انه كان معاها فشي علاقة شي وقت وكانت طبيبة مشهورة … بدات تحسب شحال كان فعمرها هي ماشاقتش لخبار لقات راسها كانت عندنا 13 سنة.. حلات عينيها مصدومة وفمها وقالت
غيثة:ميمكنش!!!! اوييلي لااا ههه..ميمكنش
رجعات لديك الصورة اللي منتاشرة وبعدات كتتذكر ويدها على فمها وقالت كضحك وتسخر من القدر
غيثة:وييلي ولاهيلا هوا!!! هوا هادا
عضات شنايفها فذهول كتشوف وضحك حيت كانت من بين البنات اللي تزعطو فيه فديك الوقت وكان لكراش ديالها فسن المراهقة ومتبعة الصفحات اللي كينشرو عليه وعلى ذكرى وتأسفات فاش رجع بيها الزمن اللور وفرحات ملي سمعاتها ماتت وخبارها دارو ضجة.. كانت مراهقة وعجبها الحال كانت كضن الى ماتت هاديك غتخوا الساحة ليها واللي بحالها وعقلها كيوهم ليها انه تخوا الساحة احسن ما تعمر ، لاكن دابا تأسفات اكثر تمنات كن بقات فالحياة يكون احسن . والاكثر دهشة ان الزمان دار ولقاها بالكراش ديال المراهقة..غريبة هاد الدنيا وهاد الصدف اللي كتصنع لينا!
صبحات كضحك بوحدها واخا هي ديما ضاحكة سبحان الله كاين اللي مكيجيش معاه الحزن ومكيعرفش ليه ..كاين اللي ملامح وجهه ماديالش الحزن نهائيا ومامخلوقش ليه..كتنجارف نحو السعادة واخا تكون غارقة فالمشاكل حتى للودنين ..عقلها واحساسها مبرمج على الحماس والضحك والفرحة وكن كانت شي وحدة اخرى بلاصتها عندها دوك المشاكل كلها ..ها الشركة فالحضيض والزواج اللي طبقات فيه وصية باها ومشاكلها مع العائلة والهم والغم متقدرش كاع تضحك ولا تطلع ليها الضحكة .لاكن غيثة العكس تماما واخا يكون فحياتها نور قليل من السعادة كتركز معاه وتنسا كلشي تقول ما عندها هموم فالدنيا..هادشي اللي مخلي تعابر وجهها بشوشة وصاحكة ومنعشة تضحك ليها فوجهها واخا تكون فعز البؤس وهادا اللي مخلي النور والبريق فعيونها الجميلة، بدات بالكونطابل كتعيط ليه وهي فطريقها لمطعم الفندق تفطر
غيثة: عادل..بغيتك تكلف ليا بالاوراق وكل ما يخص الشركة ..بغيتك تكلف بالبيع ديالها ..غنبيع كلشي ومابغيتش شي واحد يسيق الخبار . .. وهادشي الى خرج مغتلوم غير راسك حيت اللي غيشريها يدو طويلة وتقدر تهرسك اعادل …فهمتيني شنو كنقصد.. ياريت تسكت وماتخرجش هاد الهضرة اللي قلت ليك.. وياريت دير خدمتك فصمت يالاه مع السلامة
قطعات لاكن كتبقا هي غير ولية فنضر الرجال..وواخا هضرات ووصات ما عطا اكلامها حتى قيمة وناض تاصل فالحال بحسام وصلها ليه سخونة ..من موراها مباشرة تاصل بيها حسام وغير شافت الاتصال ديالو عرفات باللي لخبار وصلاتو كما كانت متوقعة .. لاكن كانت اذكى منهم وردت عليه بهدوء
غيثة:نعام؟
حسام: كتهربي مني؟؟ انا راجلك ولا عدوك
غيثة:بغيت نرتاح احسام
حسام: وشنو درنا لك حنا؟
غيثة: والو غير كنحس بالطاقة السلبية تما ..الشوفات والهضرة وبزاف دلحوايج انا ما متعوداش عليهم..داكشي علاش بغيت نرتاح بلا منشوف حتى واحد ولا يشوفني شي واحد
حسام :خلينا نتلاقاو ونهضرو ..اللي ماعجباتكش نبدلوها .. با راه كيسول عليك وتعصب فاش عرفك مشيتي سافرتي بلا شوارو
غيثة: الوحيد اللي من حقو يقول هاد الهضرة هوا بابا..والله يرحمو
حسام:وبا انا ماشي فمرتبة باك؟؟ هوا حاسبك بحال بنتو ونتي مكتحسيش بيه كاع
غيثة: من بعد نعيط ليك احسام ..
حسام: بلاتي مز
قطعات عليه وناضت من بعد الفطور مباشرة عند المحامي ديالها وكلاتو هوا فبيع الشركة والمعمل فأسرع وقت وقدمات ليه ملف ليدو ومشات بحالها خلات تيليفون غيتفركع بالاتصال ..كلهم كيصونيو عمها ومرت عمها وحسام وكلشي ..مابغات ترد على حتى واحد فيهم حتى صونات مريم هضرات معاها ومشات دازت عليها فالحي اللي ساكنة فيه وكملو طريقهم يتغداو بجوج. جلسو فمطعم كيطل على جبال طنجة كيتجمعو وكتعاود ليها على السفر وعلى اللقاء ديالها بياسين وقالت
غيثة: مزال مامتيقاش بلي هوا اللي كنت كنبغي فالمراهقة ههه
مريم: انا عااقلة عليه..كانو حطو صورة وحدة ديالو مع شي بنت وقالو من بعد ماتت
غيثة: اه راه مزال عاقلة على كلشي حيت كنت متبعة اخبارها غير باش نعرف عليه شي حاجة..فضول وصافي راكي عارفة المراهقة. الغبية.
مريم: مسكينة بقاات فينا
غيثة : انا تصدمت فاش قالو ماتت..ميمكنش
مريم :شفتي هاديك غير العين..اي وحدة دخلات لهادشي ديال الشهرة كتجيبها فراسها مسكينة وهي كانت ايقوووونة فوقتها
غيثة: ااه بصح الصراحة شحال تآنسبيريت منها كانت كتعجبني..ولاكن عمريي فكرت نتشهر ولا ندخل لهاد المجال ونهائيا ماعنديش هاد الفكرة نشر حياتي للناس وخصني نتقبل الانتقادات ديالهم ..الصراحة منقدرش
مريم : هانتي شفتي شنو وقع ليها بسبب العين..باقا عاقلة كانت عايشة فواحد البدخ مكانش شي واحد اخر فديك الوقت عايشو.. كانت كتحط شي تصاور كيخلعو بداكشي اللي كتعيش..اما دابا راه كلشي رجع كيصور ويلوح ماكتعرفي كيفاش رصلو لداكشي
غيثة: كتاكل الديسير) كلشي كيقلد وصافي مكاينش شي حاجة حقييقية ..كيبغيو يبانو اغنياء وكينساو يخدمو على راسهم باش يرجعو اغنياء..داكشي اللي كيعيشو ماشي دائم ..غير لحضات وصافي ومتعة قصيرة ..خص الانسان يتعلم كيفاش يوصل للغنا..ماشي يتعلم كيفاش يمثل انه غني..هادشي كيجيني تخربيق وقلة كرامة
مريم:بأسى) غير اجي ورجع غني..ماشي ساهلة كاع واللهم ديك اللحضة ولا والو
غيثة: ايوا اللي ماقدرش يوصل للغنا يتعلم كيفاش يجيب راجل غني ..هادا هوا الحل …ااه نسيت ماقلت لك ..عضات شنايفها)ياسين باسني هنا (حطات يدها على جنب فمها)
قالتها وكضحك فرحانة مع راسها ومريم كتشوف فيها فدهشة
مريم:اويلي خليتيه باسك؟؟؟
غيثة: لاااا !!! من نيتك. نخليه راه هوا ماعرفت كي دار ليا حتى لقيت شنايفو حدا فمي…(عضات شنايفها) وييلي حششمت
مريم: فرحااانة وكتقولي ليا حشمت !!
غيثة: بتوثر)الااا ههه فهميني زعما حشمت حيت باسني ..نتي مشفتيش كي دار راه مممم ماا فشكل ..بحال الى غيسلم عليا ..ولاكن باسني على غفلة
مريم: امم(كطلع فيها)وفاش باسك اشنو قالك
غيثة: والو لقت الباب محلول ورايا وطلعت وسد عليا ومشيت..فهمتي شي حاجة
مريم: هادشي فشكل عندك اختي…بان ليا غير باغي يستغلك وصافي
غيثة: يستغلني؟؟ شنو غيستغل فيا مثلا؟
مريم:ماانعرف..يقدر بغا يدوز بيك الوقت..ولا قال اجي ندي ليها الجمل بما حمل ..الطمع
غيثة:ولاكن هوا مامخصوصش زعما فين نبان انا قدامو..تبارك الله راه عندو بزنز كبير فأروبا ..غيطمع فشركة غاديا للفاييت برجليها؟ هوا اصلا غيشري مني واخا غارقة ..شنو اللي يخليه يشريها فنضرك واش كن كانت شي شركة اخرى ديال شي واحد اخر غيشريها وهي كتنهار؟؟ (كطرد الافكار السلبية) لالالا هوا كان كيقدر بابا وقالها ليا..يعني بغات يتعامل معايا بالجانب الانساني وصافي ماشي المادي
مريم: بسخرية) كتهضري عليه بحال الى كتهضري على شي رجل اعمال شريييف …ماشي مافيوزي قدو قد الخلا !! من نيتك هاداك دابا غيتعامل معاك بالجانب الانساني؟ ناقصاه الانسانية؟
غيثة: وشنو اللي يخليه يتعامل معايا هاكا زعما؟؟؟
مريم ما نعرف اختي..غير ردي بالك نتي راك معارفا والو غير غادية
سكتات غيثة مارداتش عليها وجلسات كدور فعينيها ..دوزات ديك العشية عادي حتى صونا ليها المحامي علمها باللي غياخدو الاوراق لياسين ووافقات ومشات تكمل شغلها مرتاحة كأنها حيدات عبئ تقيل عليها..شحال صعيب تكون غارق كريديات وكتحاول توقف واحد المشروع على رجليه من الاول ونتا ماعندكش اصلا الامكانيات ليه، هي مباركة مسعودة لقات اللي يشري المعمل بمشاكلو بلا ماتوصل للافلاس والمشاكل الكبار.اما كن بقات معولة على حسام يعاونها تما بقات .
صونا ليها المحامي من المكتب دياسين وهوا جالس معاه والملفات فيد ياسين كيشوف ديك الحالة اللي وصلات ليها الشركة وشحال ديال الدين عليها ..كيسمع فالمحاكي كيهضر حتى قطع وشاف فيه بدا يوقع على دوك الاوراق كاملين وحدة ورا وحدة وجبد دفتر الشيكات عمر فيه مبلغ اللي كانت طالبة غيثة فالاوراق ومدو للمحامي
المحامي:مبروك السي ياسين
ياسين: الله يبارك فيك.
صافحو وخدا الشيك خرج بحالو وناض ياسين جمع الضوسي ورسل وفد من الشركة عندو للشركة الجديدة ، غير وصلو لقاو غيثة يالاه نزلات من سيارتها طالعة كتقاد شعرها ووقفات سلمات عليهم وعلى المدير دياسين حتى هوا اللي كان معاهم وكان فشد ليا نقطع ليك هوا وياها لاكن هاد المرة جاي كيضحك مرتاح ولقاها حتى عي راشقة ليها والدنيا هاانية. ماشي بحال من قبل كان كيلاقيهم الرعد وكيرجع منفوخ ليه الراس بالمشاكيل.
وصلو لواحد القاعة كبيرة فيها بعض الموضفين الضاهر انهم كانو عاى علم بالاجتماع وكان معاهم حسام جالس ومقجوج..اخيرا شاف غيثة اللي من نهار تزوجها وهي غابرة .. جامع ليها بزاف دلحسابات بلا حساب الشركة اللي بغات تبيع . كان جالس حداه الكونطابل كيهضر معاه وقال بخفوت
الكونطابل:مادرتي والو لحد الساعة وهادو جايين باغيين ياخدو الشركة
حسام: عاد قلتيها لبارح كيفاش غنلقا حل انا اليوم..نشوفو بعدا هاد الاجتماع مع هادو ويحن الله .
دخلو عليهم وكانت معاهم غيثة والضحكة على وجهها مشات للكرسي اللي جالس فيه حسام على رأس الاجتماع وبقات كتشوف فيه باش ينوض حتى تحرج وناض حمر كحز للجنب وجلسات هي على الكرسي ديالها كتلقي الكلمة
غيثة:عارفين علاش جمعتكم ليوم؟
حسام:لا معارفينش الى سمحتي تعرفينا
غيثة: بنص عين) جمعتكم باش نخبركم باللي دابا هاد الشركة مابقاتش في الملك ديالنا.. ونتوما عندها مالك جديد واخا ماكنتش ساخيا بيها لاكن الضروف خلاتني ناخد هاد القرار..
حسام:وقف)كيفاش مالك جديد؟؟؟ ههه القرار خديتيه بوحدك؟
غيثة:وقفات) شنو بغيتي تقصد؟؟
حسام:انا اللي كنسيير الشركة هنا وانا من حقي نتاخد قرار
غيثة.خرجات عينيها)انا مولات الشركة وانا اللي كنقرر…اللي معجبوش الحال الباب وسع من كتافو..انا بعت الشركة والمعمل… حيت سيادتك ماقدرتي دير حتى حاجة وهادشي غادي وكيغرق فينا …سير شوف البلاطو فالباور واش فيه شي واحد خدام ؟ بلاطو على قدو واقف ونتا كتقول ليا القرار ما القرار..(شافت فالجميع)انا جيت نخبر الكل انني ماشي المالكة لشركة ستانيا وغنغادر هاد الشركة ليوم وغنخليكم مع وكيل المالك ديالها الجديد هوا يعرفكم ..اما انا الدور ديالي سالا هنا .الله يعاونكم
ضربات صاكها وملفاتها تحت باطها وزادت خلفة للبيرو دباها تجمع ما تبقا من الاغراض تما باش تمشي بحالها .لاكن حسام لحق عليها ودخل مدرم وجهه حمر وعينيه خارجين كيزدح فالبيبان ويغوت وهي بحال الصمة كتجمع فواحد الكارطونة مكتهضرش
حسام:معاااك كنهضر جاوبيني…باغا تحمقيني ؟؟ كتلعبي ليا على اعصابي؟….شوفي فيا فاش نكون كنهضر معاك
جرها من يدها حتى هزات راسها شافت فيه وقالت
غيثة: عييت…عيييت وانا اللي غارقة فالديون حتى لودنيا ماشي نتا..انا اللي كنبات نفكر ونقلب على الحل ماشي نتا..نتا مانفعتيني بوالو احليلو غير الهضرة الخاوية وشهر وزيادة مادرتي فيها حتى حاجة ترمم ولو شوية من الدمار اللي حنا فيه
حسام: بجنون)ولاكن تبيعي الحمل باللي فيه لاا اغيثة.. منسحمش ليك حيت هادي ماشي لعبة ..هادو سنوات عمي الله يرحمو مشاو هنا
غيثة :عمك فقبرو مهني مكيخممش فهاد الضياع..انا اللي هنا كنضيع وغارقة حتى شي نهار نلقا راسي فالحبس . بلا ماتقول ليا عمي وتستعطفني ..عمك عاش فيها بالعز .اما انا ماشاط ليا منها غير الهم
تحنات على كارطونتها كتجمع وهوا غياكل جنابو وضرب واحد السرجم بغضب حتى تخلعات
حسام:ومالقيتي لمن غير لداك لغباااار؟؟؟
غيثة:داك الغبار عطا فيها الثمن اللي ميعطيهش ليا واحد اخر..هاداك الغبار هوا اللي قبل عليها بخسارتها وماتاواش معايا فيها وماتحاسبش معايا على الدين اللي كيسالني وقبل بالثمن اللي طلب بلا مايزيد حتى كلمة..داك الغبار راه عتقني من الحباسات ..اما كن بقيت كنجر فيها ونطيح ونوض كن راني لا شركة لا معمل والكريديات من لفوق والحبس كيتسناني..داك الغبار دار فيا خير ماضيعنيش فيها وداها بالديون دايلها .
حسام: بغا يطرطق) زيدي مجدييييه..زيدي شكريه زيدي زيدي شنو اخر؟؟ هاا؟؟
غيثة:هزات كتفها) صافي هادشي اللي كاين.. انا خصني نشكرو على هاد الجميل..حيت كانت غتمشي فالسيزي وكانو غيحجزو ليا على املاكي كلها ..البنكة كتسالني الاموال الطائلة وماعنديش منين جنيب ليهم الفلوس..الملاير كتسال البنكة..اما دابا هوا يقدر يتفاوض معاهم وشوف حل ويبدا من جديد ..انا بعدا تهنيت والسلام .هزات كارطونتها
جمعات قشها وقالت من هنا دازو.بقا تابعها باغي يردها للدار لاكن نوضوها فالزنقة ماتفاكو حتى جمعات معاه بتسرفيقة خلاتو كيشوف فالارض ومشات طلعات طموبيلتها وزادت بحالها غادية وكتسوط ويدها كترعد اقول خارجة من معركة ،جاها اتصال من ياسين فوقت غير مناسب كمل عليها بدا قلبها يضرب وهزات تيليفون كتسوط وتنفس باش ترتاخ عاد ردت
غيثة: الو
ياسين :لاللغة غيثة..مبروك علينا
غيثة:الله يبارك فيك السي ياسين لقتيني عاد خرجت من الشركة خليت تما الناس ديالك
ياسين: ليوم خاصنا نتعشاو انا وياك .
غيثة: ههه ..ان شاء الله
ياسين: يالاه انا عارض عليك صافي
غيثة:اوك
قطعات وكملات طريقها مرة اخرى طالع ليها المورال وتبرجم عقلها على شنو تلبس عاوتاني وكيفاش تطلع وهمها هوا تمشي تبدا التوجاد من دابا وباش غتبدا والمتعة اللي راها كتعيش والشغف والحماس راه مكايناش قدها عايشاه..غادية وكتهضر بوحدها فرحانة عندها فحياتها اللي يخليها تنفض العكس وتجمع الوقفة بلا متحس بالعيا.
وصلات للاوتيل والقلب كيفرفر فرحاانة..كانت نيت كتفكر شنو غدير هاد العشية بلا متقنط حتى جاها مايدار على طبق من ذهب .
دخلات للغرفة كتلوح فالصباط وتحيد فالمجوهرات ونيشاان سلخات حوايجها بقات كنا ولداتها معا وتما غادية كتجري للحمام وتنقز دخلات فالبانيو من بعد ما عمراتو مزيان ولاحت تيليفون حداه وغطسات كلها وشط ديك الرغوة مابقاتش كتبان تقول ماتت . خرجها من تما صونيت التيليفون وخرجات شاهقة كتمس وجهها وتفتف عليه لقات مريم صاحبتها كتصوني وفتحات الخط كبرات الصوت ورجعات كتجبد وسط ديك الرغوة وتتدلع مع راسها
غيثة:انا ماتقوليييش ليا شي كلمة تعصبنيي انا ليوم فرحااااانة ..كركبت عليا ديك الشركة ومعروووضة مع مولاها شكون بحالي
مريم:اويلي حلفي بالله
غيثة: بلا منحلف لك دابا تشوفي كولشي على عينيك
مريم:غيثة واش مكتخافيش غلى راسك؟
غيثة: ماعندي مناش نخاف ابب
مريم: داك السيد. راه خطار عليك ونتي اصلا باقا صغيرة
غيثة:مالو هوا كبير؟؟؟ واش نتي شايفة اللي شايفة انا ولا لا!!! راك كتهضري على ياسين الزين
مريم:ولاكن فالسن راه كبير عليك
غيثة:هزات كتفها)اختي مكيهمنيش انا العدد ..كيهمني التعامل ..الشخصية اختي…
مريم: راكي مزوجة بحسام واش نسيتي ولا نفكرك
غيثة: زواجي بحسام غيير تنفيد لوصية بابا..اما انا مكنحس اتجاهو بحتى حاجة
مريم: ولاكن نتي كنتي راضية عليه
غيثة:اه قبل مايبان ياسين…ولاكن ميمكنش نرضى عليه وياسين محا ليه الوجود فحياتي…الغلط ديالو هوا ماقدرش يكبر فعيني وخلا ياسين يلغي ليه بلاصتو فمرة ..انا منقدرش نفضل حسام على ياسين دابا صافي
مريم:اوييلي واش تسطيتي!!! غير كتخربقي!! وزايدون السيد مابين ليك والو اصلا دغيا نتي قررتي
غيثة: ماشي ضاروري يبين ليا ولاكن انا صافي شفت ما حسن من حسام ..مكانش كيحسابني غيبان شي واحد يخلي حسام يبان لاشيء قدامو. واخا متكون بيني وبينو والو منبغيض نرتابط بواحد ماشي من المستوى ديالي وماشي شخصية كما اكتشفت دابا فياسين.يعني ماشي ضاروري تكون بيناتنا شي حاجة يكفي انني اكتاشفت معنى الراجل دبصح ..ومنقبلش بشي واحد لراسي قل منو حيت كنستاحق ما احسن
يالاه بدات مريم تهضر وهي تودعها غيثة فالبلاصة حيت اللي ماكيجيش مع كانتها وشنو كتبغي كتسد عليه بلا ميوش ليها المورال ويخسر ليها الكانة وهي بزز باش طاحت على هاد السعادة.. خلاتها كتصوني حتى قطعات على خاطرها وتمات نايضة كتلوي عليها فوطة وتسيفط ليها اودويو
غيثة سمحي ليا كبيدة مغنعضرش معاك دابا حيت الطاقة السلبية ديالك غتبهر ليا السعادة ديالي..الى حلقة قادمة ان شاء الله خليت ليك الراحة ههه
لاحت داك تيليفون وجلسات قدام المرايا نشفات شعرها وطلقات موسيقى كتغني معاها وبدات دور فالبابيليز وطلق فداك الشعر الطويل حتى طاحو كتافها وعيات عاد تلاحت على الرخامة كترتاح سخفانة
غيثة:ياربي كتافي طاحو كن مشيت لصالون حسن ليامن هاد العداب
نعسات شوية رتاحت فديك الوضعية مع ديك الرخامة باردة عاد ناضت شافت فالمرايا بدات تماكي وجهها وتقاد على خاطر خاطرها ..ضربات واحد طراساج للشنايف ناضي فالقهوي وعاوداتو فوقو كلوس شفاف لوسط بلا لون جاها من داكشي الرفيع ..وبلا مكياج تقيل اكتفت بسحبة طويلة بالايلاينر وجبدات شفارها مزيااان للاعلى حتى ترمشو عينيها ومشات حواجبها السوداء حتى تستفو ودارت بلاشر وناضت وقفات هزات واحد القرعة ديال الهايلايت سمر ومع هي سمرة بالشمس بحال شي برازيلية ولات زاد لمع ليها اللحم مزيان ودوزاتو على كتافها ويديها من بعد ما رطبات بالكريم وداتو وجابتو حدا صرها وعنقها ورجليها من لفوق للتحت حتى ندامج مع لحمها مابقاش كيبان عطاها لمعة طبيعية وزادت بخاخ بداش رش رش رش من اليدين والرجلين كتنعش الدات عاد جرات واحد لاتروسة فيها ملابس داخلية وناضت طلعات واحد سترينغ جبداتو مزيان حتى هرب وطلقاتو على اللحم حتى تسمع طرق وتحنات عطات بقزيبتها الكرزية كتقلب فالشنطة على شنو تلبس..هادا ولا هادا؟؟ هادي ولا هادي..تخشات لتحت مكوزة حتى طلعات بواحد الكسوة منمرة كتزلق فاليدين .. كسوة جاكوار ولاكن ماااشي اي نمر .. هادا الجاكوار دلوكس ..اللون بني فاتح مع بني غامق والاسود عطا واحد الدمج رهييب لداك التوب هزاتو قالت هاادا انسب لهاد العشا ولبساتو منو للحم نيشان.. وفيه واحد الفتحة فالصدر طويلة حتى للخصر ومجموع كامل وجا هابط من الاسف كلوش وااااسع ونااعم ..بقا الصدر كيلعب بوحدو والراس كيبان مكور وكيقفز راسو مع كل حركة وبيناتهم بيرسينغ وكملاتها بسنسلة طويلة مذهبة فيها ثلاتة الطبقات جات مدلية لوسط واصغرهم جات ضايرة على العنق.قلبات الشعر وبدات تسرح فيها يتدرج ودهانتو شوية بعطر خفيف ولبسات خاتم مذهب على شكل وردة فصبعها السبابة وباقي المجوهرات كانت خفيفة ..جلسات كتلبس فواحد الصندالة كحلة عالية كلها طالونها قدو قداش من القدام ومن اللور ومقمقة من الامام وقاعها حمر وناضت هزات الريحة بدات ترش وتعاود وتشوف يمين يسار واش داكشي هوا هاداك عاد تبسمات كضحك شافت الساعة لقاتها العشرة دليل .هزات صاكها الصغير ومشات كتقرقب وتتمايل وتلوح فشعرها خارجة
تحشم تقول عليها قنبولة حيت فين يباتو القنابل قدامها .. صاروخ دايز وعارفة راسها كطيح النسر ..طالقة زينها وغادية سايقة بشوية عليها والضو لداخل شاعل والموسيقى مطلوقة ومرة مرة تلعب فشعرها وتشوف فالمرايا وضرب تصيورات ..هزات تيليفون بعداتو ويدها على المقود كتصور بأريحية تقول شي واحد سايق بيها ولا السيارة غادية بوحدها، مكتشوفش كاع قدامها شي مرات وخدامة كترش الريحة ودهن اليدين..صونات ليها مريم ابيل فيديو وحطات تيليفون قدامها كتهضر معاها وتلعب فشعرها جالسة مرتاااحة ومريم كتبان فالكامرة بحال مرت شريك عاقدة دوك الحجبان وجالسة فواحد البيت وراها الزليج
غيثة: انا ذااهبة حبييي..كي جيتك
مريم: وييلي مالقيتي فير ديك اللبسة …ماجاتش مع دوك ليزاكسيسوار
غيثة:كضحك) ويييلي خصك شحااااال…(رمشات بتقالة) شحاااا ال خصك امريم باش تفهمي وتعرفي
مريم:اش غنعرف راه باااين ..الى عجبك نتي بصحتك
غيثة:وراني قلت ليييك خصك شحاااااال ..( كتحسب ليها بصبعها ودور راسها)خصك القسم اللول والثاني والتالت والرابع والسابع وطناش والعشرين وستين والمليون..عااااد توصلي لهاد السطاج احبيبتي مريم تفهميه ويعجبك
مريم:اوييلي شلا.. كن لبستي شي حاجة كلاص فالابيض يجيك حسن
غيثة:ماشي ديال هاد الخرجة ابب..اويلي لي تلف يلبس الابيض هه…اللي بغا يصرعها كيمشي يلبس الابيض..الله يهديك امريم ..سيري سيري دابا راني وصلت حتى لمن بعد نعيط ليك يالاه قصصص
قطعات كضحك وسطاسسيونات بين السيارات وجبدات البارفان تعطرات مزيان قادات صدرها ونزلات كتقرقب وتتعوج دخلات للريسطو كان ريسطو كبير فيه مويسقى ورقص وعشا وكلشي فأحد الفنادق .اغلبية الزبناء كبار ماشي بواط ديال البراهش وصدع الراس..كانت اومبيونص من نوع اخر .راقي وجامعة غير النخبة وفيها منصة طويلة كل مرة يطلع فنان يغني ..نزلات كتقرقب وتتمايل وتسرح عينيها وشحال كتموت فدوك البلايص..كتموت على السهير والشطيح والنشاط والجلسات الملاح ..غير من النسا اللي حاضرين مكاين غير وحدة تحنتك فالاخرى . يالاه غتهز عينيها تشوف فين يكون جالس حتى حسات بيد ضارت وراها عنقاتها من الخصر وتلفتات شافت فيه لقاتو ياسين بشحمه ولحمه..لاكن لاب سوميجة نص كم بلو مارين عنقها محلول مع سروال كحل وحداء رياضي كيمشي مع اللوك فيلو مارين والاسود .ريحتو قتالة كتحس فيها بالسلطة والعصمة والرجولة ..بوكوص بالمعقول ووجهه منور وابتسامتو بيضا ..عنقو عريض وكتافو واقفين عراض وصدرو مبندر ..بقات كتشوف فيه وفالتفاصيل بلمح البصر عاد عطاتو وجهها سلم عليها
غيثة:تسيفتي عليا
ياسين: منعرف شكون اللي كيتسيف على لاخر
ضحكات وحط يدو على خصرها داها لواحد الطاولة من بين الطاولات اللي جات بعيدة مضلمة ماعليهاش الاضواء بزاف مكيبانش مزيان شكون جالس تما..تقدمات وجلسات جامعة رجليها على اريكة حادرة مريحة وجلس. حداها كيشوف فيها ويضحك دار يدو ورا ضهرها
ياسين: مرحبا
غيثة: شكرا.. هه عرفتي شحاال ماخرجت بلايص بحال هادو فالمغرب
ياسين: نخرجوك الاللة شنو كنعملو هنا؟
لحضة صمت وابتسامات فالاول..كتكون الهضرة قليلة مكاينش موضوع محدد يتجبد ..كيكونو النضرات فالتفاصيل واستنشاق العطور المتبادلة حتى كتكتاشف العين اكثر التفاصيل وترتاح من النضر والاكتشاف عاد كيرجع العقل لبلاصتو يخلق حوارات .
كانت طول الوقت كتشوف فيدو الموشومة كتحاول تفهم شنو تما لاكن كانو خطوط ورموز مامفهوماش قالت مجرد فن وصافي.
ياسين: كيشعل كارو بعيد عليها)وصلك الشيك ديالك؟
غيثة:اه وديتو للبنك ..خصهم الوقت باش يحولو الفلوس لحسابي
ياسين: شنو كتفكر تعمل دابا؟
غيثة:عضات صبعها بفضول)انا اللي عندي الفضول نعرف شنو غتعمل نتا بالمعمل والشركة
ياسين:ساط الدخان بعيد) غنعشها وصافي خصها شوية دالوقت.
غيثة: تكات اللور على يدو)انا بعدا غندير داكشي اللي قلتي لي..شي ماركة فاسمي دالحوايج
ياسين:طلع فيها) تجي معاك..عندك الدوق مضخخم
غيثة:ههه عويناتك اللي مضخميين …(حركات راسها)اه والله ..عوينات عندك كيحمقوو
يتبع...
غا خورتيها فاش ماتت دكرى قصة ولات مملة هنا