محتوى القصة
ملاك: (صونا تيليفونها كانت خديجة جاوبت) ااااانعااام
خديجة: علاش مكتجاوبينييش
ملاك: مكنتش مسالية اخديجة معنديش غير مشاكيييلك فحيااتي باش نبقى مقابلة التيليفون
خديجة: حشوومة عليك كديريلي هاكا
ملاك: مدرت والو اختي ولكن نتي بزاااف كيحسابلك كولشي دااير عليك توݣضي شوية راك وحدة كبيرة ماشي مراهقة صغيييرة وعرفي شنو كيخرج مع داك الفم راه كندوزوها مرة وجوج ولكن الواحد منين كيطغى راه مكتبقى عندو حتى قيمة
خديجة : ياكي املاك يااك نتي للي تبدلتي علية من نهار عرفتيني مع يوسف
ملاك: ونااااااري على هاد يوسف وندمت علاش عرفتك بيه وصدقتي اختي من داك النوع للي الروح ديالها هو الراجل مع كيطلع معاها كتنسى واليديها
خديجة: هه والله املاك حتى نتي عندي أهم منو انا غير بغيت نفهمك حتى كنصدق غير مخربقاها
ملاك: واخا شنو بغيتي دابا حيت أنا راه حلفت مشاكيلك مندخلش فيهم
خديجة: خايفة
ملاك: بففف خديجة ديري ايمانك فالله شوية
خديجة: جا عندك يوسف؟! زعما تلاقيتو؟
ملاك: لا... مزال
خديجة: خفت نكون انا للي مكنولدش..
ملاك: ربي للي كيرزق كل واحد فينا وللي معندناش فيه الخير مكيعطيهش لينا سيري بهاد المبدأ وغترتااااااحي.. فين ماما
خديجة: منين جابو داك البجغوط وهي مقابلاه
ملاك: اشمن بجغوط؟
خديجة: ولد بابا
ملاك: اويلي علاش قبلات تربييه واش هادي حمقة ولا بغات تحمقني معاها
خديجة: ملاك غتسمعي مني نتي هاد المرة.. دخلي سوق راسك هاد المرة هي بغات تربيه وقااابلة براكة متجبدي مع بابا صدااع وتسماي بوحدك للي خايبة هي بغات راها مك وكبر منك وعارفة شنو كدير
ملاك: عارفة ***** للي عارفة علاش انا نجيب ولد ضرتي نربييه الولد للي كنعتابرو ثمن الخيانة نتي تقدريها على راااسك
خديجة: منقدرش.. ولكن ماما قلبها حنين وعاد الوليد مو ماتت وهي كتولدو خلاتوو عند ختها تكرفسو عليه وهو لحمة عرفتي شنو دايرين ليه بالضرب ولحمو كولو مقيح راه مشا بابا وحنيني يشكيو بيهم
ملاك: (بقات غير ساكتة حتى سمعت لبنت كتعيط عليها)
بلاتي ونصوني عليك اخديجة....
(قطعت مفقوسة... ناضت مشات لبيت شعلت الضو ولقات لوخرا كتبكي بقات كتقرب ليها بشوية)
صراحة عمرني طحت فهاد الموقف ومكنعرفش نتعامل مع شي واحد بغا ينتاحر
وفاء: (بشهيق وصوتها مبحوح من كترة متقيااات) ماشي سااهلة شنو داز علية
ملاك: انا معارفاش شنو داز عليك ولكن توصلي تقتلي أمانة عطاها ليك الله للي خاصكي تحافظي عليها منتافقش معاك فيها.. كولشي عندو حل واهم حاجة اختي وفاء خاص يكون إيمانك كبير بالله وغير غتيقي فللي كتب عليك الله، مشاكيلك غتبقى تحل شوية بشوية خاصنا شوية ديال صبر ماشي كولشي ساااهل فهاد الحياة
وفاء: (شافت فيها ورجعت دارت يدها على وجهها كتفكر داك المنظر كتبغي تمووت)
ملاك: (جلست فوق النموسية قريبة ليها) شوفي شنوما داز عليك خاايب الوقت راه كيدااوي مهم حاولي تكاي شوية بلاتي نجي عندك باش نتعشااو وتعاودي لية الا كنتي باغية تخوي قلبك باش ترتاحي
وفاء: (حركت راسها باه وتكاات عاود غطاتها ملاك وتمات ماشية) عفاك متمشييش وتخليني (سمعت الدقاان)
ملاك: لا.. انا غير برا غنتفرج فالتلفازة.. (خرجت من حداها مشات حدا لباب) شكون!!
اورطيغا: انا..
ملاك: (بقات واقفة واش تحل ولا لا.. حلت شافت فيه) شنو!!
اورطيغا: (كيهضر فالتيليفون) غنمشي نشوف الحاج... صافي واخا.. (قطع وشاف فيها حيد نظاظر) عنداك تخرجي
ملاك: راه قلتيهالي قبيلة، قلت ليك مغنخرجش
اورطيغا: (تكى على باب الدار بكتفو عين مسدودة وعين نايمة) نسيت كاسكيط ديالي
ملاك: (ضارت لقاتها فوق الطبلة مشات هزاتها جابتها ليه) واش باك مات؟!! (هز عينو شاف فيها) حيت ديك المرات قالو مات وقبيلات قالي يوسف فلاكلينيك
اورطيغا: (دار الكاسكيط فوق راسو ورجع نظاظر فعينييه) عنداك تخرجي.. (هبط مع درووج وهي بقات متبعااه نݣرت حيت مجاوبهاش وسدت لباب...)
يوسف: (دخل للدار لقا مو جات غير شافتو ضارت مخنززة تبسم معاها) مال الآلة الغاالية
ام يوسف: والو.... (ضارت مقابلة معاه) اولدي هاد التزويجة ديالك معاجبانييش وهاد الزربة ممتقبلاهاش غير قولي الا هي تتهددك ولا وقع بيناتكم شي حاجة قولهالي مغتخلينيش فدار غفلووون
يوسف: (هي جالسة وهو واقف حاط يدو على ظهر لفوتووي) نعلي الشيطان الوالدة انا بغيت نتزوج مبقيتش صغيير اشمن تهديد ولا شي حاجة مفهمتش علاش مبغيتيش تحتارمي قراري
ام يوسف؛ شحال ونتا تتعرفها
يوسف: ماشي بزاف ولكن مرتاح معاها وبغيتها
ام يوسف: اممم (بترجي) لا اولدي الله يرضي عليك دير بكلامي ودير بناقص
يوسف: بناقص؟ (جلس اونفاص معاااها) علاش بناقص وانا باغيها وعاد عاطي كلمتي ليها ولباباها واش لعب دراري صغار!!!
ام يوسف: انا نهضر معاهم الا نتا مبغيتش تبان فالصورة
يوسف: وعلاش تهضري سمعي الوالدة نتي عندي مهمة بزااف فحيااتي ومنقدرش ندير شي حاجة بلا بيك وشووورتك عندي من اولويات ديالي فكوولشي الا فهاد التزويييجة (جات تهضر قاطعها) من ديما تتقولي انا مول العقل وعارف شنو تندير وانا مزال تنأكد عليك عارف شنو تندير وعارف شنو باغي
ام يوسف: خليت لبناااات كاااااااملين!! وهاديك للي بانت ليك لا هي من سهمك ولا من مقااامك
يوسف: باش عرفتيها؟!! خديجة بنت مربية ورزيينة وانا عجباتني وبغيبيتها علاش متحتارميش هادشي
ام يوسف: اولدي مكملاش حتى عام باش كنتي تتقول على ياقووت هاكا وهادي لا علاقة بيها
يوسف: وهادشي للي مخليني مرتاح ليها حيت ماشي بحال ياقووت هادي للي غنأمنها على داري وتربيلي ولادي وانا مخاايفش، هادي للي غتحتارمك نتي والواليد للي تجي لداري وتلقاي مراااا ديال بالصح ماشي مونييكة خاص للي يشوفها يبقى عليها وااو ونتي وااعرة دابا ماشي موضوعنا انا منين قلت موضووع ياقوت تسد راه تسد وتطوى وتدفن...
ام يوسف: واخا نغمض عيني على المستوى ديالهم وشحال من حاجة!! ورااه هي كبييرة فالعمر واش تلحق الولاد ولا لا
يوسف: الوالدة من هنا داكشي ديالي انا وياها منبغيش شي حد يتدخل فيها ولا فولاد ولا حتى حاجة
ام يوسف: ومنين اسيدي هي زوينة وعفييفة ومرزنة وهادشي كامل فيها علاه متزوجتش شحاااال هادي هاد ديمانضة للي تظل تشكر فيها راها تطييير
يوسف: (فتحاتلو الموضووع) هي كانت ديجا مزوجة (خرجت عينها) عادي
ام يوسف: (معصبة وقفت) عادي (خبطت على فخاضها) اويييلي مناااين جاتها عادي منااااين؟! اويلي على مطلقة
يوسف: (غير كيشوف فيها)
الغالية: وشحال وهي مزوجة بالسلامة؟!
يوسف: شي مدة.. علاش تتسولي
ام يوسف: اوا وعلاش تطلقت؟!
يوسف: حيت متفاهموش
ام يوسف: الله يالا ربي من اللول حسيت بيها تلوات عليك بحال شي لفعة اويلي على اخر يامي نجيب وحدة مطلقة
يوسف: بففف الوالدة نعلي الشيطان
ام يوسف: (كنمشيو وتجي وتخبط) واخا نعلو، ولكن واش ترضاها على راسك تزوج وحدة ساابقك ليها وااحد وعلم الله شحال شابعة جنااابة!!!
يوسف: (بقا مصدووم فيها)
ام يوسف: واش كتولد ولا عاݣرة!!!
يوسف: (دار يدو بإشارة صاافي) منين وصلنا لهاد الهضرة راه مبقا كلاام (تم ضاير ماشي)
ام يوسف: يوووووووسف يوووووووسف (مشا وخلاها بصعرة) يووووووووووووسسسسففف....
يوسف: (بقا مصدوم فطموبيلتو وكاعي بالمزيان حيت كاين شي حدوود مخاصش يدوزهم مع مو وحتى هي بالمثل،
بقا فيه الحال بزااف علاش مشافتوش مرتاح وباغي هاد لبنت هو مباغيش يتعمق فحياتها للي دايزة وهي علاش كتعمق!!! علاش بغات تشوش ليه تفكيرو بشي حاجة تاافهة وحتى فالعصر الجاهلي مكانش هاد التفكير!!
ديمارا طموبيلتو وزاد دااايخ اخر حاجة يبغي يسمعها من مو على مرتو المستقبلية هي هادي واخا هو بعقلو ولكن ديك شابعة جنااابة خلاتو مشووووكي....
صونات عليه مابغاش يجاوبها تلف معرف فين يمشي حبس الطموبيل وبقا فيها غير كيفكر...)
~~~~~~~~~
رشيد: (رجع للدار فالليل مسخسخ حيت ظل عند الجدارمية للي فتحو تحقيق على ولدو للي تكرفسو والغد ليه غيديه تماك مع الشهادة الطبية للي عطاهم طبيب دخل نيشان لبيتو فين مرتو عتاكفت مع الولد لقاها عاطياه الرضاعة كتنعسو، بصوت خافت)
السلام عليكم
زهرة: (مشافتش فيه) عليكم السلام
رشيد: (سد لباب من موراه كيهضر بشوية) شحال وانا كنصوني عليك مجاوبتينيش
زهرة: الا كتصوني على ولدك راه ولا شوية
رشيد: (بعياء) مزال مبغيتي تسامحي ازهرة؟!
زهرة: صعيييب ارشيد داكشي للي درتي واعر مكيتنساش ومقااادة حتى نشوف فيك
رشيد: (بحزن حنا راسو وبقا متكي على الحيط)
زهرة: (بطرف عينها شافتو فديك الحالة) عطاك خاااطرك تغدرني وترجع عندي بحالا موااقع والو؟! عطاك خاطر تبات عند وحدة أخرى وانا تجي تنافقني وتكذب علية!!!
رشيد: (لا رد)
زهرة: (بقاو ساكتين شحال حطات لوليد فوق النموسية ناعس وبقات كطبطب بشوية عليه) شنو غتسميه؟!
رشيد: مااا.....ــمفكرتش..
زهرة: وشنو كتسنى؟! وديرلو ورااقو دخلو مع البنات راه كيبقى خووهم
رشيد: (كتزيد تقتلو بتعاملها) ان شاء الله
زهرة: وشريلو حويجات
رشيد: نخرجو انا وياك ونشريولو
زهرة: تمسا بخير (تكات حدا لبيبي للي عاطيااه اهتمام بدواه وحليبو وتبدالو، عطاتو بظهر وجرت لغطا مخلياه وااقف وكان غير غوتت ضربت هرست بلعكس عطاتو النخال وكملت تعاملها كأم ولكن كزوجة وقفات كوولشي للي كانت معوداه عليها....)
رشيد: (بقا شحااال وااقف حتى تحرك بشوية حل الماريو جبد فراش الارض ووسادتو فرش فالارض وجاب لغطا ونعس فالأرض...)
اورطيغا: (عرف الحاج رجع للدار مقادرش يصوݣ اصلا الطموبيل بقات حدا دار مو بقا مجمع مع دراري ديال الحومة تحت الدار.. صونا على شريف هو للي جا خدااه من تماااك ولاخر ألح عليه يعاودلو شنو وقع)
صافي هادشي شنو وقع
شريف: هاد لكسيدة كنتي حاضر فيها غير نتا لا بوليس لا كاميرات لا شهود!!
اورطيغا: (بكلل) شرييييف
شرييف: مرااااد
اورطيغا: (قلب وجهو كيحس بلعيااااا ولكن الشمتة غااالبة عليه ومتأكد 💯٪ 💯 غيكون هداك تماك، شريف كيهضر وهو باغي غير يتكالما) غير نشوفو وردني للدار
شريف: وعلاش!! هاد المرة غتبات معانا
اورطيغا: لا!! نتا عارف اشريف ضربت على لمباتة تماك من شحاااال هادي انا بغيت غير نشوفو وردني حتى الا مرديتنيش نتا غنشوف شي واحد اخر
شريف: ردك أنا اسيدي، مغتقولش شكون دار فيك هاد الحالة!! انا راه وليت خاايف عليك اخويا هاد المرة عينك تزݣلات المرة جاية؟!!!
اورطيغا: الا تتهضر على الحومة بلعكس تماك فين تلقى راحتي وبالظبط تماك للي تنكون بعييييد على المشاكل وما يجي منها
شريف: اوا وشكون
اورطيغا: كسيييدة مما قلت ليك ولكن معرفت واش للي ضرب وهرب كان قاصدها ولا لا!!
شرييف: هااااه عرفت غتكون شي حاجة
اورطيغا: منين نعرف كون هاني غنقولك كوولشي غير الله يرحم الوالدين الا ما طمر فرعتيلي *** بالتسوااال
شريف: معامن عندك الحساب وفيمن شااك؟!!
اورطيغا: الݣزارة دفاس كاملة ههه خوي رااسك اصاحبي مكاين واالو
(حطو الطموبيل فلباركينغ وتمشاو للرياض مع دخلو كيتساطح مع ليلى غير شافتو بقات مبلووكية مخرجة عينها لدرجة شريف بقا غير كيشوف فيها)
شنو غتبقاي مبندة تمااا
شريف: ليلى مالكي؟!
ليلى: (بخوف وندم شافت فيه) والو والو
شريف: (جر خووه للي دخل فيها بكتفو حتى ضاارت) مالك مع لبنت؟!
اورطيغا: (مجاوبش وحتى لاخر عارف خوه حال وأحوال ولكن باش يضرب زعرة ماشي من عادتو!!!! مشاو للصالون فين كانت العائلة دخل وتحولت للأنظار ليهم بقاو كيسولوه كيجاوب بكسيدة وجات عينو فأب ليلى) ولكن مولاها يتشد يتشد كولشي مصور وبااين، مهم (جلس حدا الحاج) الحاج كيف بقيت
الحاج: والبوليس شنو قالو ليك
اورطيغا: خليك مني دابا نتا للي كيف بقيت؟!! حاول على صحتك الحاج الوالدة راه حدها تحزن عليك 6 شهوور وتعاودها بتزويجة (بقا كيهضر معاه حتى ظحكو)
سعد: (غير كيخنزر من لبعد متصرطاتلوش حتى جا ربيب عاد ظحك باااه ورجع بحال الولد صغيير وهو اصلا بسبابو طااح بغا بتفرݣع شمكار خدا بلاصتو وخاايف من للي جااي يكون أسوأ...)
سعد: (بهمس بودن اب ليلى) شفتي شنو قلتلك
اب ليلى: (حرك راسو باه وديك الشمتة ديال بنتو تكون مع شمكار مابغاتش تصرط ليه)
اورطيغا: (حنا باس يدو وهضر بشوية)
انا غنمشي دابا الحاج, مريض وخاصني نتكى شوية باش نبرا دغيا ورجع للمحال غير يصبح الحال غرجع عندك نشوفك كيف بقيت براكة عليك من سهير وسير حتى نتا ترتاح شوية
(سايس معاه حتى بغالو بالخاطر خرج من تماك ومشا طل على مو واخا مقلق منها ولكن ميقدرش ميشوفهاش عيات كترغبو يبقى مابغاش رغباتو غير ياخد عشااه بقا كيتسناااها فوسط الرياض حتى جات من الكوزينة عطاتو لعشا ديالو عيات ترغبو يجلس وخاطرها وبالها مغيكونش مرتاح وهو بحال الحالة وبعيد عليها مابغاش حدها بززت عليه ياخد عشااه، ناض شريف وصلو للدار كان بغا يطلع معاه ومخلاهش خاصو يرجع الحاج
وكولها مشا فحاالو...)
اورطيغا: (تم طالع فدروج مزال ݣاع مرتاح على خاطرو صونا على يوسف للي غبر)
فيين.. اه كنت تماك.. لا رجعت.. انا غير فالدار.. صافي انا نتسنااك...
(وصل لدارو مشا للكوزينة حط داك لعشا تماك للي جاي متقل بيه ومشا لبيتو تكا على داك السداري كولشي كيضروو شرب دوا ديال الحريق وبقا متكي على ظهرو مغمض عينيه كتجي فبالو غير الشمتة ديال لبارح والهرمكة للي كلا فجناابو بقا شحاال متكي حتى سمع الدقان فلباب، ناض بتقالة مشا حل كان يوسف دخلو بزوج ساكتين)
انا جاي
(مشا للحمام شعل الضو كيشوف وجهو حدا فمو كاينة ضريبة وعاد الفاصمة للي فالحاجب وعينو زرقااا ومنفوخة ولكن بقات كتحل شوية ماشي بحال لبارح كيزيد يحقد مزيااان رجع عند يوسف للي لقاه حل لبالكون وواقف تماااك)
فييين
يوسف: هاانا
اورطيغا: (وقف حداه حاني كيطل) مشفتكش مع جماعة
يوسف: معندي خاطر نمشي، تناقشت مع الوالدة قالت شي كلام معجبنييش (زفر مكره حااااقد)
اورطيغا: مثلا!
يوسف: كلام ميتقاالش حتى بين صحاب حتى بيني وبين نفسي منقدرش نقولو!! والله مفهمت علاش تدير هاكا انا خديجة مزوج بيها سوا بغات ولا لا حيت مسألة زواج تتبقى ديالي انا وديك بنت الناس وتيبقى الاختيار ديالي فقط علاش هاد الحزازات الخاوية مفهمتش!!
اورطيغا: معليش مع الوقت تفهم
حقا مصوناتش عليك ختها
يوسف: ملاك!! لا علاش؟!
اورطيغا: (عاودلو تلخيص) واقلة خاص نطلع نشوف كيف بقات البنت
يوسف: مقالت لية والو اش دخلها هي فهاد المعماعة!!!
اورطيغا: ونخليو البنت تموت!!
يوسف: ماشي تموت ولكن شحال ما بعدت على المشاكل حسن
اورطيغا: اممم مهم اصلا كنت قلت ليهم غنجيب ليهم لعشا والوالدة صيفطات معايا شي حاجة
يوسف: نطلعو!!! (هز داكشي يوسف وتمو طالعين بزوج دقو وتسناو عاد فتحت ليهم ملاك مغلفة لابسة بينوار قدها فالطول ولاوية عليها شال نفس اللبسة.. بقات واقفة فلباب) ملاااك مقلتي لي والو
ملاك: غير مساليتش (شيرت بصبعها لبيت وفاء) من صباح وهي كتبكي بانلي موحال واش طول معانا لغدا خفت نغفل عليها دير شي حاجة
اورطيغا: (محس حتى ظحك) ربطيها
ملاك: (شقلبت عينها متبسمة وفتحت ليهم لباب)
هضر معاها نتا بعدا (ضارو بجوج) هو للي كيعرفها
(شافت فيوسف ولاخر مشا لبيتها) ونااااري على حصلة كنت هاربة من المشاكيل وطحت فمااا كفس صراحة الواحد منين كيشوف مشاكيل ديال الناس كيبانو ليه ديالو تافهيين
يوسف: ههه اشمن مشاكيل عندك الآلة ملاك
ملاك: ها!! راك عارف مع الخدمة وصافي
يوسف: ربي حطك هنا، بعدا هانتي عتقتيها اما وكان بقات بوحدها ميسيق ليها حتى واحد لخباار
ملاك: وراه هدا العزوا صااحبها هي..
يوسف: (خرج عينو فيها) ملاااااااك
ملاك: شنو سميتو راه مكتبغيش تحفظلي
يوسف: اورطيغا
ملاك: اورطيغا!!! (ميقت مخسرة وجهها) منين جات لباه اورطيغا على زعوريتو ولا بيااضو ولا (شافتو جاي مخرج وفاء معاه)
حم هانتي خرجتي؟! لبكى معندو فاش ينفعك توݣضي معانا ونساي الهم ينساااك...
اورطيغا: (مخسر كمارتو) واش متتجمعيش داك الفم عندك
ملاك: (عوجت فمها حيت معندها متقول، ومحسابهاش سمعها ضارت عند يوسف للي كيتبسم بقات كتشووف فيه)
يوسف: ختي صاڤا!!
وفاء: الحمد لله اخويا (جلس اورطيغا مباعد من وفاء للي غير دايخة، ويوسف للي باين مباغيش يجلس اما ملاك بقات غير وااقفة مفهمتش اش كدير مع هادو!! يوسف خطييييب ختها وفاء ياله يوماين باش عرفتها اورطيغا السيد للي مكتحملوش والمشكل انها بغات هاد جماعة فلداخل ديالها مابغاتش تبقى بوحدها ويرجعو عليها المواجيييع وهدا كان سبب كل واحد فهاد الربعة والدوافع تختلف)
اورطيغا: حقا راه جبت لعشا (شاف فملاك) الله يحفظك سيري حطييه
ملاك: ها!!
اورطيغا: الا بغيتي زعما، ماشي سيف علييك
(تمات ماشية للكوزينة هضر معاها مقاد اما مكانتش تحطو حلت الساشي كانت بواطة ديال الزاج كبيرة فيها لحم مزوق بالبرقوق ونص خبزة مغلفة بالأليمينيوم جبدتها وهي تلقاها بسطيلة ديال دجاج اللوز ماشي خبزة قلبت على كاسرونة كبيرة دارت داك لحم مخلط بالبرقوق ضيعت داك الديكور، والبسطيلة دارتها فلفران ديال الضو،)
مالي أنا خدامة عند بااهم حتى نتسخر عليهم هادشي مكنديروش حتى فدار با !!!
(جات بغات تخرج ولكن البنت مولات الدار راه كانت بين الحياة والموت متفهمهاش من الجانب الخايب تفهمها غير من الجانب الانساني!! رجعت بقات كتراد مع راسها حتى سخن داكشي حطات فطباسل وتمات مخرجة ناض يوسف الكوزينة يعاونها هز طبسيل لحم وهي فراشط، شاف فيها)
يوسف: صاڤا!!!
ملاك: (لوات شنايفها بمعرفت)
يوسف: تبغي نوصلك لوطيل؟! معندك مديري بهاد صدااع
ملاك: ونخليها بوحدها؟! صراحة عزت علية ومقدرتش
يوسف: بالصح ولكن!!! نتي فغنى على هادشي كامل
ملاك: معليييش (هزت كتفها) دير الخير تلقاه (تبسم معاها باينة حتى هو طايرة ليه، مشاو جلسو فالفتوي للي برا يوسف جر كرسي بقات وفاء كتعاود ان السيد للي معاه دار ليها قاالب وخلاها عشا لشي واحد عندو بيه الغرااض فشي شرااكة واخا كان كيسمع غواتها محنش فيها كلات لعصى وتغتاصباات بقات كتعاود لدراري كيسمعو ليها وهي كتبكي من غير ملاك كتاكل وتسمع حتى نطقت) لسقي فمو شي مونتييف حتى نتي
اورطيغا: (ضار شاف فيها كتمضغ بالزربة باش تهضر واخا مكتشوفش فيهم)
ملاك: (شافت فيها) ياك قلتي هو مدير اعمال وداكشي صيفطيلو غير برهوش ولا شي وحدة فلمطار يقنييو عليه مزيااان فزحام يلسقو ليه فجيبو شي طرف دلحشيش وخليه يتعذب، واخا ميتحبسش المهم يبقى طالع هابط ومربووط هادي تبردك شوية ولكن حتى نتي خاصك...
يوسف: (مبغاهاش دخل) ملاااااك
ملاك: انا غير قلت ولا ديري حل اخر نساايه وكملي حياتك وقطعي ورقتو ولكن هادي دير ليك العقل ازييين
وفاء: مبغيتش نعاود نطوف بساحتو لا هو لا غييرو نكمل قرايتي نمشي لألمانيا
يوسف: مهم ميغسي على لعشا اورطيغا مشينا!!!
اورطيغا: همم!!! اه.. اه.. (شاف فملاك شحااال) اه صافي اوافاا تااافقنا خلينا من هاد تبرهييش هاد المرة انا نكمل على ونلوح جدك من الطروازياام
وفاء: ههه ميغسي بزااف اورطيغا (مشاو دراري وبقاو لبنات شافت فملاك) شكرا بزاااف ملاك وسمحييلي على هادشي للي درت ليك
ملاك: انا صراحة ممتافقاش مع هادشي للي درتي ولكن عارفة الظغط كيولد الانفجار وميمكنش لا انا لا غيري نحكمو عليك حيت حتى واحد معايش حياة لاخر غير هو راه كولشي ليه الحل.. ودبا مثلا الا قتلتي راسك واش معندكش عائلة للي تخلي من موراااك متخافيش باش غيحسو!!
وفاء: (بتنهيدة) خايفة يكون صورني
ملاك: هو مدير وجايب شي حد للي معرفة صحيييحة فنظرك غيصورك ويلوحها حتى الا بغا يهدد غيهدد لاخر والا الله يستر مشا ودارها راه غيمشي فيها حتى هو مكنظنش مهم للي عليك هو تنساي عطي الوقت لراسك ونسااي...
دازت يوماين ملاك غير كتكمل من الخدمة كتمشي للدار مكتخليش وفاء للي كولها مغامرات وكتبقى تعاود لملاك للي كطلق ودنيها معاها عاجبها الحال تسمع خبيرات الناس وتشوف شنو داز عليهم وتاخد فكرة على شحال من حاجة مكانتش عارفاااها، اورطيغا مولاتش شافتو من ديك الليلة حيت كيجي عند وفاء فصباح قبل ميمشي لخدمتو وكتكون بوحدها وحتى يوسف مولاتش شافتو بيناتهم غير التيليفون مرة مرة كان جالس فداارو حتى الخدمة ممشاش ليها هضرة مو أثرت فييه بزاااف ماشي شك فزواجو ولا اقتناعاتو ولكن اخر حاجة توقعها منها جاتو قللات منو بزااف مكيجاوبهاش فالتيليفون وحتى فاش جات لدارو محلش ليها لباب حيت معصب ومباغبش يقول شي كلام ليها يندم عليه من بعد اللهم حتى يبرد شوية.. هضرتو بزااف كانت غير مع خديجة
مي حلو: اشنو ازهرة درتي؟!
زهرة: شنو غنقوولك منضيعش فرحة البنت نمشي بالولد ويبقاو يسولو من هنا ومن هنا غنخليه ليك على مرجع، نتي للي واش قادة بشي صداع الراس
مي حلو: الله يا ودي نديرو فعيني غير سيري وكوني هانية (دخلت عندهم سيهام)
سهام: حقا واش غادي تدي معانا ربيبك
زهرة: (كتكره هاد الكلمة) لا غيبقى معاها
سهام: حسن من شي تبرزييط تماك
زهرة: ما فيه مسكين بو تبرزييط ݣاع لوليدات صغار هكااك.. (سمعو صوت رشيد كيعيط ليها وكيهضر مع شي رااجل دارت شاال على راسها خارجة تشوف لمن كيقول مرحبا حتى لقات يوسف تبسمت ومشات جيهتهم) مرحبا ولدي نهار كبير هدا
يوسف: (حنا راسو بامتنان) براكة الله وفيك الالة سمحولي على هاد الدخلة كنت هنا فشي خدمة وقلت نجي ناخد الوراق باش ندفعهم للمحكمة
رشيد: ياله لبارح كملت كولشي بقا الباسبور، قالولي شي سيمانة ويخرج
يوسف: معليش هداك هو الوقت نيت باش نمشيو (خديجة كانت عارفة مجيتو كانت كطل غير من سرجم بيت مها وكتراري بالولد صغير للي ذبحو حولي عليه وسماوه كتشوف فالحب ديالها وكتفرنس) شتي ستي عمو شحال زوييين واخا راجل ختك غتبقى تقولو عمو يوسف هه
رشيد: دخل بعدا اولدي زهرة عمري للضيف ديالنا شي كاس اتاي
يوسف: لا لا خالتي بلا متعذبي رااسك
رشيد: (بصرامة) لغدا معانا ان شاء الله
يوسف: مرة أخرى ان شاء الله اسي رشيد مزروب شوية
رشيد: مكاين بو مزروب تغدا معانا اولدي وخود وريقاتك وسيير
(يوسف اصلا مكانش كيمشي للخدمة كولشي كيقادو غير من الدار، حنا راسو بأه دخل للصالون فين جلسو)
يوسف: سي رشيد مكناش هضرنا على التفاصيل كنت بغيت نجيب الواليد ونهضرو ولكن منين جيت جيت نهضرو حيت أنا بغيت نعقد على مرتي ان شاء الله ونسافرو ولكن العائلة مبرزطاني بغاو العرس
رشيد: شنو نقولك اولدي نتا طلبتي الحلال وشفتك معقول وولد الناس وحتى انا عطيتك بنتي للي دريويشة وصباارة دازت عليها فزواجها الاول ووقفت معاها حتى طلقت راجلها ورجعت معززة مكرمة لدار باها والحمد لله خرجت منها ساالمة ورجعتلي بصحبحتها، انا طلبي هو تهلالي فيها وحتى هي كذاالك غتهلى فيك وتكون بيناتكم المودة والرحمة باش زواجكم يسر فيه الله
يوسف: ان شاء الله اسي رشيد مغتلقاش معايا المشكل وغنديرها فعيني حتى انا قصدتكم والمقصود الله من تربيتك جيت طالب بنت من عندك (رشيد عجبو الحال حيت ݣاع ازواج بناتو نفس كلام يوسف كيتغناو بتربيتو وهادشي كيفرحوو...)
رشيد: الله يسهل عليكم اولدي غير هو العرس لبنت بغات غير ليلة بين العائلة وصافي
يوسف: شنو نقولك حتى أنا هكاك بغيت ولكن عائلتي ولا بد بغاو العرس وانا باغي نساافر هه حيرووني
رشيد: تفاهم اولدي مع داركم وللي درتووه انا نزيدكم غير الخير...
يوسف: (شرب كاس اتاي من بعد متفاهم مع باها للي عجبو الحال مدخل لا فصداق متشرط لا فسكنى لا الأمور المادية مهضرش عليها فقط طلب يتهلالو فبنتو ويقدرها،
خرج معاه للقهوة فين هضرو على بزاف دالامور ومختلف المواضيع، وهضر على خدمتو مع بااه والخدمة مع الدولة بقاو مجمعين شحاااال حتى عيطو ليهم باش يرجعو الغدا يتغداو مجموعين عاود دخلو لصالون مكاينش حس لعيالات غير هو رشيد خوه وباااه كملو لغدا للي دارو فيه دجاج محمر مع شلايض خبز وعصير بقا متوتر شحال)
سي رشيد واخا تسمحلي نهضر مع خديجة جوج دقايق بغيت نتشاور معاها فشي حاجة
رشيد: اهاااه.. اهاااه مرحباا ولدي (كيعيط) خديييجة (انا نوض نعيط ليها، ناض خارج لقا زهرة فلباب بحال شي عسكري) بغا يهضر مع لبنت
زهرة: ما فيها باس راه مكيدخلو مكيخرجوو ومبقى والو على زواجهم
رشيد: وفينها هي؟! خدييييجة
خديجة: هانا بابا (كانت غير فبيت لجلاس كتصنت ولكن لابسة بيجامة طويلة مع بينوارها من لحوايج للي كانو شراولها جايها على طايتها مصاوبة ميكاب خفيف ودايرة شالها)
رشيد: ها هو خطيبك بغا يهضر معاك
زهرة: صافي ها بيت لجلاس يهضرو فيه (مشا عيط ليوسف دخلوه لبيت لجلاس لقاها جالسة لابسة بيجامة من للي كان ختار ليها تبسم مع وجه مفيهش مكياج كانت زوينة وعاد لبارفان للي دايراه وللي دارتو حتى دخلت للبيت منين مشا باها،
تبسمت منين دخل وجلس فالسداري للي اونفاص معاها بصوت خافت حيت عارف مبقى حد فلباب واخا السرجم محلول كيطل على وسط الدار..)
توحشتك
خديجة: (تبسمت) حتى انا
يوسف: (بقا كيشوف فيها شحااال) خديجة بغيت نقولك شي حاجة مبغيتش تف (شافت فيه ببراءة) ولا صافي نسااي
(شد لسانو فأخر لحظة حيت حس بيه طلب مكيتطلبش وهو داخل بالنية فهاد زواج قرر هو يدير النية وربي فيكون كبير!!)
خديجة: لا غير هضر
يوسف: مكاين واالو.. غير جاتني فشكل صراحة ݣاع العلاقات للي درت فت فيهم الحدود الا مع البنت للي بغيتها لزواج
خديجة: ههه اوا هدا هو المعقول
يوسف: حتى بوسة!!
خديجة: ههه يووسف يسمعك بابا يلووحك من السرجم يدخلك من دوك لحديدات
يوسف: ههه فين هو انيير بغيت نشوفو
خديجة: بالصح!! ياله نعستو
يوسف: (شاف فيها بحب) عقبال منين تكوني تنعسي ولدنا ولا بنتنا
خديجة: (بابتسامة) ان شاء الله
يوسف: بوون، الا كتاب الجمعة غنديرو لاكط نقدر نجي غير انا من بعد ونمشيو عند العائلة غير هو انا بغيتك تكوني معايا من العدول نيشان عندي
خديجة: معرفتش ايووسف بابا مغيبغيش
يوسف: بغييتك اخدييجة تمشي معايا وراك غتكوني مراتي وحلالي
خديجة: حم غنكونو فمكناس راك عارف سبوع ختي
يوسف: نتبعك فينما كنتي اصلا حدها سيمانة وغتكوني فداري
خديجة: هه اوا صبر سيمانة مدات مجابت
يوسف: دات وجابت معايا احبيبة (حرك راسو بلا) مغنصبرش هه (خلاها غير كتشوف وهي عارفة غدير داكشي للي فبالها) انا غنمشي احبيبة باش منعيقش على باباك نهضرو فالتيليفون (حركت راسها باه خرج من لبيت سلم على مالين الدار وتم خارج للي كيتصادف مع حمزة فباب الدار واحد شاف فلاخر ولكن حمزة كان مخنزر ولاخر مفهمش ومسوقش... يوسف مشا وحمزة دخل لدارهم كيتساائل شكون هدا!!!!!!)
اورطيغا: (بدا خدمتو فالمحال ديالو دازت شي ساعة جا عندو الحاج ومعاه مو تبسم من زيارتهم خرج عندهم مرحب بيهم مفهمش سبب هاد الزيارة ولكن..) اهلااان اهلااان اهلااان نهار عليييظ هدا!! حمييييد ارا جوج كرااسا
مينا: لا ولدي الحاج باقي عياان (شافت فولدها) غنطلعو احبيبي للدار نرتاحو شوية كمل واجي تغدا معانا
اورطيغا: اهاااه، الحاج باقي عياان؟!
الحاج: الحمد لله اولدي الحمد كيف غادي مع العمل
اورطيغا: مزياان الحمد لله بلاتي غنمشي نجيب ليك دوك الشيكات ديال شهر وندووز على مصلحة الضرائب باش نقاد الإجراءات معاهم مغنتعطلش علييكم
الحاج: وجيبلي الروسيات كاملين
اورطيغا: ان شاء الله (مشاو وهو دخل رد الطابلية ديالو كيقطع شي طروفة ديال لحم واخا مكيقدرش يدير مجهود كبير مزال لحمو مقطع بكترة لعصا للي كلا وعاد يدو ليسرية ممعاوناهش بزااف)
عرق للي مزال خدام فيه هو ديال الشيكات والروسيااات...
( كمل شد تاكسي ومشا يكمل باش مكلفو الحاج.. ويطبق داكشي للي فكر فيه مزيااان)
~~~~~~~~~
ام يوسف: دخل اولدي دخل راني دايخة ومعارفة ما نعمل
شريف: ياك لباس الآلة الغالية !!!
(جات غيثة عندهم للي باينة عاد فاايقة لابسة بيجامة وشعرها كوب شوفال)
غيثة صاڨا!!!
غيثة: (سلمت عليه بلوجه) صاڤا الحمد لله ونتا!!
شريف: الحمد لله
الغالية: سير فطر وخليني نهضر مع شريييف
غيثة: باااي شرييف
الغالية: ولدي انا تنعرفك عزييز عندك يوسف ولكن راه رجع واحد اخر مبقاش ولدي المرزن للي تيفكر بعقلو ويتضرب بيه المثل
شريف: ياك لباس!!
الغالية: قالك على زواج ؟!
شريف: (بقا كيدور عينو) اه، ياك مشيتو معاه للخطوبة كاملين
الغالية: اييه خدانا معاه بالسيف وحنا معارفينش راسنا من رجلينا عندمن ماشيين وشكون هي حتى كيصدمني السيدة مطلقة ومدوزة مهضرناش على شكون هي وحالتها حتى حطنا قدام هادشي
شريف: ووووشنو المطلوب مني الآلة الغالية
الغالية: هضر معاه راه انا قاطع كلامي من داابا اعسااك منين يدخلها لدارو باينة خيرااتو هي ولا انا وهو بلا عقل ناض ختارها
شريف: احم مااااا للي تنعرفو الآلة الغالية يوسف غدا غيدير لاكط اشنو فاش نهضر معاه نقولو متزوجش مااا عرفتش ومفهمتش
الغالية: اويلي استغفر الله
شريف: لالة الغالية نتي عارفة يوسف تيفكر مزياان فالحاجة قبل ميديرها ماشي دري صغيير
الغالية: (كتبكي) الا هادي اولدي تلوات عليه متقوليش هدا هو ولدي مولاي يوسف لغزال!!!!!! ولدي مسحووووور مسحوور ماشي على هوااه ماشي هدا هو ولدي للي تنعرف
شريف: (معرف ميقول ومبغاش يدخل فهاد الامور) شوفي لالة الغالية مخاصكش تخليه بووحدو انا عارف يوسف عندو واحد المكانة خاصة عندك سوا كان غالط ولا مغالطش مخاصكش تخليه فهاد نهار بووحدو الدنيا هي هادي هو من بعد غيعرف كولشي واش هو ماشي فطريق صحيح او لا ولكن الا بقيتي تتعكسي معاه غيدير غير للي فباالو ونتي غتبعدييه علييك
الغالية: والمعمول؟!!!
شريف: مدام ختار ديك بنت الناس الا عارف انها مسلكاااه
الغالية؛ اويلي على مسلكااه اولدي شريييف الله يهديك حتى نتا انا بغيتك تهضر معاه ونتا تتقولي مسلكااه
شريف: لالة الغالية يوسف مشا هضر مع الناس لبارح ورسااا على حساب غدا أنا للي نقوولك متخليهش بووحدو (وقف حيت مبقالو ميقول ولا يدير) حتى مثلا اذا تصاب وكان غاالط يلقااك معااه (بابتسامة) نهارك مبروووك
(مشا وخلاها دايرة يدها على خدها متحسرة مصدومة ومفقوووسة....)
ملاك: (كملت الخدمة بكري ورجعت للدار لقات وفاء كتبريباري فشي حاجة، بدلت حوايجها وتقداات مزيان وخرجت هزت طموبيلتها نيشان شدت طريق المطار والفرحة مقداااها صونات على مها مجاوبتش صونات على خديجة)
خديجة؛ عرفتي شكون كان عندنا
ملاك: يوسف عارفة
خديجة؛ وباش عرفتي
ملاك: (كتقلي ليها السم بحواجبها) حيت تشاور معايا باش جا لتماك ههه (ظحكتها حيت جاتها بحال غاارت واكترية بقات سااكتة) هههه شي نهار غيتفرݣع فيك شي عرق سميتو يوسف هههه
خديجة: لا لا مقلت والو
ملاك: اممم مسكينااا.. فين ماما؟!!
خديجة؛ فبيتها
ملاك: كنصوني عليها مكتجاوبش وصليهالي بغيتها
خديجة: شنو بغيتيها
ملاك: وعطيهالي نقولها شي حاجة تفرح بعدا ونتي جالسة حداها بحال شي بومة كتقاقي بيوسف هههه ( رشقت ليها تشد فيها.. بقات مدة جاوبت مها وكتسمع صوت الولد صغير كيبكي خسرت وجهها حاقدة علييه)
ماما خرجي من هادااك صداع نقولك شي حاجة
زهرة: قوولي
ملاك: لا خرجي من داك صدااع انا مكنسمع واالو، انا نصوني ابيل ڤيديو عليك (صونات وهي تبان ليها مها عاكفة درة حياتي ومن موراها خديجة كتراري بالولد صغير خاشية وجهها تعرف شنو كاين!!) عرفتي فين ماشية انا
زهرة: فين؟!
ملاك: المطاااااااااار هه
زهرة: (بوجه عابس) وعلاش؟!
ملاك: صافي شريت كونطرا غنمشي لكندا عند فاطمة نعيش معاها على منقلب على شي خدمة صونيت عليك باش نتوادع معاك صافي مبقيتش قادة نعيش معاكم فديك الدار
رشيد: (طير التيليفون لمرتو وكشاكشو خارجين) والله يا مك حتى نتبعك فينما كنتي
زهرة: راها كظحك
رشيد: (بغا يخرجلو عقلو مخرج عينيه) داااابا تكوني فالدار ولا نجي لوالديك فينما كنتي دااابا (كيهضر ودفالو كيخر مكشكش)
خديجة: واش حمقة علاش غتمشي؟!
ملاك: (طارت الابتسامة) راه غير كنظحك انا غنتعرض لفاطمة راها جاية باش تحضر لسبوع نعيمة
زهرة: (بفرحة كبيرة، طيرتلو التيليفون) الله يا كبيدتي توحشتها وبغيت نطيرها من جناااابي صوݣي بشوية ابنتي
ملاك: متعرفوش تقولو هداك راه تم
رشيد: مزال كنسمعك الجحشة ولكن حتى ترجعي
زهرة: بعد من لبنت كانت مسكينة غير كتملغ معانا ونتا غير لاسق فيها
رشيد: الله يعميها ليها (قطعت عليهم شاف مرتو شنترت دخلت لبيت وتابعها كيهضر بشوية) راه خفت منين قالتها
زهرة: رخف على لبنت ولا بالصح غدييرها شي نهار تهز حوايجها وتزيد خلفة مترجعش من موراها...
ملاك: (بقات كتنݣر وفنفس الوقت بقا فيها الحال من باها للي تبدل عليها ورجع كيعاملها بقسوة ماشي بحال اللول وممتفهمش حتى علاش مقلقة منو وراد ليها الآونة كولها ليها هي مقدرتش تنافق وتناسا بحال خوتاتها هي للي عندها كتخرجو اكترية للناس للي قراب ابيها يعني محبة منها ومعزة كتبين الانسان للي عزيز عليها انها مقلقة منو أما للي معندها بيه غراض مكتسوقش...)
هو للي غالط ومزال كيغلط....
(شعلت الموسيقى مابغاش تحزن ولا تأثر، مدة ديال الوقت وصلت للمطار حطت الطموبيل فباركينغ للي كبيييير وعاامر شوية وبقات واقفة حداها حيت مزال شي ساعة على طيارة ختها وعاد الإجراءات.. كان الجو زوين الدنيا مغيمة واخا محرك البرد شوية عجبها الحال رجعت صونات عليها مها ابيل ڤيديو كيهضرو والدار مقربلة كيوجدو لضياااف واخا كانو مخملين كولشي الا بداو فالتوجاد دشهاوي ويقادو لبيت لفاطمة..)
زهرة: مزيان باش بحرا غدا تمشيو مجموعين
ملاك: فين؟!
زهرة: تمشي مع ختك العدول
ملاك: ماما انا مغنجيش مزال غدا خدامة وعندي اجتماع مووهيييم فصباح بكري مغنسالي حتى يساليو هوما
زهرة: لا غتجي (سدت باب بيتها عليها) وغتنساي داكشي
ملاك: (بقات ساكتة كترمش وتقلب فوجهها عاد شافت فيها) واش رجع؟!
زهرة: رجع لمرتو وولدو
ملاك: ومالي انا قلت ليك رجعلي انا!! انا غير سولت تحيه مندبة كحلة زحلة
زهرة: انا بغيتك ابنتي تقطعي لياااس منو وتنسااايه ربي غيجيبلك مكتااابك
ملاك: اماما انا مكنتسنى لا حمزة لا غييرو انا غير سولت! داك شماتة نسيتو وخرجتو من باالي شحااااال هادي والله معندي غراض بيئه نتي للي خوي راسك من هاد الناحية
زهرة: الله يرضي عليك احبيبتي هاكا نبغيك ابنتي نتوما من اللول ممكتابينش لبعضيااتكم
ملاك: مهم انا غنبقى مع فاطمة شوية ولكن منجييش
زهرة: غتجي هي غتجي الله يجعلك صباح بكري وسيري لخدمتك وأصلا ختك غدير العقد ففاس ونتلقاو تم ولا نمشيو مجموعين( دخلت خديجة وسدت لباب طلت عليها)
خديجة: متقلقيش ازين من بابا راه غير خاف عليك
ملاك: اممم
زهرة: (ما فهمتش ملاك علاش دارت لخديجة هاد القلبة مكتبغي لا تهضر معاها لا ظحك من نهار الخطبة وبنتها مكتبغيش تعمر حتى فالدار.. قطعو مع ملاك للي غتمشي)
شنو بينك وبين ملاك؟!
خديجة: اممم والو
زهرة: لاااااا قوليلي
خديجة: والله مكاين واالو غير هي بانتلي هاد الايام مقلقة ويمكن داك حمزة عندو يد فهادشي
زهرة: اممم اوا وشنو رد عليك يوسف
خديجة: (حتى هي مفاهماش) مجبدش حس مو ولا حتى شي واحد من فاميلتو حدو كيقولي يجي هو زعما يجي لصفرو يدينا وقلتلو بابا للي غيجيبنا لفاس، صافي قالي نتلقاو عند لعدول مذكر لا عائلتو لا والو مهم حنا نديرو حساب نقدرو نتغداو عندهم ولا من تنام لمكناس
زهرة: ومو؟؟
خديجة: واالو.. (بحزن) يمكن مبغاتنيش
زهرة: انا هاد زواج للي داخل هاكا معاجبنيش اخديجة غير داك نهار جات منفخة ودابا فالعقد متكونش!!!
خديجة: (زفرت) زهري عندي غير مع رجال ومعندي مع مواااتهم...
ملاك: (تأكدت من طموبيلتها واش مسوورتة مزيان عاد تحركت من حداها
قوست عينها كتأكد هوواا شايفاه بهاد الطموبيل متخفاش عليها راه حمرا كتبان من لبعيد قربت شوية من داك الاتجاه لقاتو هو نيييت للي كاين فطموبيلتو حتى هو قشعها بقا مدة حتى فاتت منين دارت راسها مشافتوش، تبسم وخرج من الطموبيل)
اورطيغا: اِيييييييه... اِييييييييه (مضاارتش) ملاااااك
ملاك: (اول مرة ينطق اسمها.. ضارت بقات كتسنى حتى جا كيتمشى مقاد ماشي كيعرج ولكن باين اثار فوجهو وفاصمة فحاجبو حيد نظاظرو)
اورطيغا: شنو تديري هنا!!
ملاك: المطار بسميتك؟!
اورطيغا: متتهديش اديك الوزغة متعرفيش تجاوبي مقاد بحال الناس
ملاك: (ميقت فيه)
اورطيغا: جاية تلقاي شي واحد
ملاك: اه.. ختي
اورطيغا: اممم مزياان (جاتها غريبة يهضر معاها لهييه كانت جامعاهم وفاء ولكن علاش يتبعها ويسولها) منين جاية؟
ملاك: كندا
اورطيغا: يوسف مجاش معاك
ملاك: لا... مقلتلو واالو اصلا تا..
اورطيغا: (شاف الدري زرب عليها) ياله بسلامة..
(تم ماشي بقات غير كتشوف بإستغراب راجع لطموبيلتو، مفهمت واالو رجعت فطريقها مفهماتوش علاش دار هاكا وعلاش اصلا هاضر معاها منين غيقمعها هاكا!!!، دخلت جلست فكرسي شافت فقهيوة تماك ناضت مشات طلبت عصير وجلست تشرب تبرد القمعة ديال باها وديال حتى هاد العزوا.. بقات جالسة كتخربق فتيليفونها حتى جلس قدامها هزت راسها فيه)
قلتيلي تتسناي ختك!!
ملاك: (بقات غير كتشوف فيه)
اورطيغا: هضري
ملاك: شنو؟!
اورطيغا: شنو للي شنو سولتك
ملاك: نجاوب بالسيف علية!!!
اورطيغا: (بقا كيشوووف فيها مقوس عينييه) انا ݣريستك؟!! (شافت فيه بإستغراب!! ربع يدو على الطابلة متكي كيشوف فيها حتى تبسم) معقلتيش؟!
ملاك: (مخسرة كمارتها حيت مفهمتش) شنو كتخربق
اورطيغا: (عض على شنافتو التحتية) داك الفم عندك!!!
ملاك: اييييوااا جمع رااسك
اورطيغا: (بقا كيشوف غير فشنايفها حتى حس بيها توترت)
ملاك: ماممممفهمتش شنو قلتي
اورطيغا: (حك حنكو شاف فيها) قلتي تشفرتي فبن سودة نهار حضرتي لشي عرس
ملاك: (طرطقت عينها) اااه تݣريسيت
اورطيغا: ههههه اه ااه ومزال مطرطقة عييينك!!! (حك تحت شنافتو) معقلتش خديت ليك شي ايفوون، ياك هو تيليفون طالب منك شرع مشخشخ من كل جهة
(وشير بعينو التيليفون للي هازة)
تبقاي تقرسي الحيط شوية الزقرامة
ملاك: (تصدمت بقات غير كتشوف فيه وخبعت تيليفونها)
اورطيغا: (تسع شوية وتقاد فالجلسة) بانتلك حالتي ديال واحد تيݣريسي!!!!
ملاك: حم (تصدمت).. حم غير داك نهار تضهشرت وصاافي ولكن اه حالتك باينة
اورطيغا: (زاد قرب منها حتى وصل ذراعو للعصير وقاسو يدها للي جمعتهم، يعني بقاو بيناتهم سنتيمترات قلال، وكلامو بصوت خافت وعينيه فعينيها معوج راسو شوية) باينة علية شفاار؟!!
ملاك: (بقات كتشوف فيه حتى حنات عينها) احم اه. زعما لا معرفتش!! (رجعت شافت فيه ولكن مبعدة متكية على الكرسي) غير حسابلي غتݣريسيني داكشي علاش وحتى نتا منطقتي بحتى كلمة خلعتيتي (تحطات فموقف بااااااايخ وتبسيمتو كتجيها مستفزة اكترية منين تحصلات كذبات)
اورطيغا: (رجع مبعظ متبسم) زربتي علية داك نهار مع السلام عليكم مع (رقق صوتو كيقلدها) هاك تيليفوني ومديرلي والو ههه اش غندير حدها غنطلب بيك تعاوني تشري (كيعيبها) ايفوون هه
ملاك: (جابلها الظحك) ههه
اورطيغا: (هز الكاس مناش كتشرب وشرب منو مقوس عينو فيها) فين خدامة؟!
ملاك: فف..(مستغربة منو) فالتجهييز
اورطيغا: (حرك راسو باه) ولافاك شنو تديري فيها؟!
ملاك: بغيت نكمل الإجازة المهنية (هزت كتفها ليمن) مكاين ميداار اللهم رجع نقرا نزيد نعمر وقتي
اورطيغا: علاش مال وقتك خاوي لهاد الدرجة؟!
ملاك: لا ماشي هكاك غير بغيت نكمل لقرايا وصاافي
اورطيغا: اممم
ملاك: (تبسمت شحال كانو كيكرهو بعضياتهم ودابا كيتعاودو شافت فيه شوفتو فشكل رجعت هزت كاس العصير حاضية منين شرب باش تشرب من الجهة الأخرى وهو حاضيها)
اورطيغا: واقلة كملات الخدمة عندك ففاس
ملاك: مزال معرفت حيت المدير قالي الاثنين نرجع عندو (شافت راسها كتبلبل بلا فران) علاش اصلا كنعاود ليك هادشي وشنو مجلسك معايا ياك مكتحملنيش
اورطيغا: (طرطق عينو) اناااا!!!
ملاك: اه.. نسيت هضوورك معايا !!
اورطيغا: (داير وجه ديال مستغرب حتى كيبان ليه صااحب دعوتو ملامحو تحولو لجدية متبع البلان للي قدامو ووواقف بترجي كيشرح للناس للي ضايرين بيه منهم جوج لابسين اللبسة ديال البوليس ولوخربن لا بقا قااني فيهم متبعهم شنو غيوقع حتى زادو دخلو لشي مكتب ضار لقاها طااارت من حداه تعجب شاف فكاس العصير كان خاوي، هز عينو كيقلب عليها حتى شافها معانقة مع شي وحدة طويلة عليها ورقييقة معاها راجل بنت وولد صغاار، بقا حاضييهم كفاش سلمت عليه غيكون راجل ختها وعاد عنقاات دوك لوليدات بقاو واقفين داخلة فختها بحال شي بنت صغيرة عاد تمشاو خارجين من تماك، حتى هو ناض بغا يخلص العصير لقاها مخلصاه تم خارج لقاهم مزال برا هي وختها داز من حداهم ببطئ من مور ظهرهم)
ملاك: وااالو اختي ارجاال مبقاااوش هههه
فاطمة: ويلي على مبقاوش هاد الزين كامل والطووولة
ملاك: دابا لاش كتعايري
فاطمة: هههه كنهضر على لسااانك،
اورطيغا: (تبسم من كلامهم ومشا بالزربة لطموبيلتو كيتسنى...)
فاطمة: قوليلي مزال ماما مكتهضرش مع بابا
ملاك: مزاااال
فاطمة: معجبنيش الحال نهائيا شنو دارلها وهضرت معاه فاش سقت لخباار محسيت براسي حتى غوت علييه
ملاك: حتى انا غوت علاش كيقولو غير أنا للي ممزياناش حتى نتي غوتي
فاطمة: هه ولكن من بعد طلبت منو سماحة حيت كيبقى بانا املاك براكة نتي وياه من لخصاام متخلهش يحقد عليك هوما راه غيتجمعو ويعاودو ويخضرو ونتي بوحدك غتبقاي فالعيب مع بابا
ملاك: هو للي قوليلو هاد الهضرة فوقما شافني يغوت وداك نهار ضربني ومدرت واالو كنا كنهضرو انا وخديجة، بقا فيا الحال بزاااف وهو مفهمنييش (شافو راجلها جا وهوما يسكتو كان كرا طموبيل باش يجي على حساب طموبيلة ديال ملاك مغتهزش داك البݣاج... فاطمة مشات مع ختها والوليدات مع باباهم تابعينهم فطريق لصفرو....)
اورطيغا: (ركب فطموبيلتو كيفكر فهادشي للي دار ولليرماأكد منو مظلم حتى واحد بلعكس عمرو كان مبرد هاكا وراد دقتو غير بالهداوة غير تفكر ملاك تبسم مفكر كلام يوسف
"عندها شي أفكار تخلي حياتك ساااهلة"..
مشا لخدمتو لبس طابلية ديالو وبقا خداام فسكات ولكن عقلو مهداش من التفكير حتى هضر بوحدو
"" اللهم هاكا ولا القضية يكون فيها الدم وباينة واحد ميهدا هاد يصفيها لااخر اللهم هاكا نرد دقتي...
. صونا على مو يعرف شنو كاين راه دازت كتر من 2 سواايع)
الوالدة
مينا: ااااولدي (طالقة ودنيها مع لوخرين) متجيش اليوم؟!!
اورطيغا: عندي شي خدمة.. ياك الامور هانية!!
مينا: (خرجت من حدااهم) لوكان تعرف واش طاري!!
اورطيغا: (تبسم هو اصلا هادشي علاش مصوني) شنو!!! (دخل لداخل مبعد على لكليان)
مينا: علاش ماشي شريف مبقاش بانلو فشي زواج ودار بناقص وجاو فاميلة ديال لبنت يترونجااو من قبيلة وهوما هنا نايضة نايضة
اورطيغا: هه نايضة نايضة!!
مينا: ويييه.. وشرييف نوووون واش بغا يرجع كيقولهم بنتكم للي منتزوجهااش واخا تنطابق سما مع الارض
اورطيغا: اممم
مينا: من اللول كنت عارفة هادشي محمااانش
اورطيغا: مكاتيب وصاافي
مينا: ونتا مناويش تجي تطل على الحاج وعلية!!
اورطيغا: نجي، نكمل شي خدمة ونجي شريف راه باقي تماك
مينا: كاين معاهم لداخل (شافت الغالية داخلة وعلات صوتها) اوا متعطلش الحاج راه كيهتر غير بيك باش تجي عندو
الغالية: (هازة خنافرها وكتشوف باحتقار فمينا مشات نيشان طلعات لبيت مفتاحة) هجيييج
مينا: (قطعت مع ولدها وتمات داخلة جالسة حدا الحاج للي كيحاول يصلح الا كاين ميتصلح..)
اورطيغا: (ماشي هاد الاخبار للي كيتسنى.. كمل خدمتو باش يمشي يشوف خوه شريف جاتو بيزاغ حيت خوه كان غيموت ويتزوج هاد لبنت..)
~~~~~~~~
من بعد العناق لكبير لفاطمة وولادها ولراجلها كولشي فرحان بالمجية ديالها حيت هي كتغبر بزااف ماشي بحال نعيمة للي كتهبط بزاف للمغرب بحكم خدمة راجلها عندو هنا ولهييه، بقات معنقة مها وجالسين على كاسكروط فيه كل مكيتشهى الواحد شي ساعة ودخلات حتى مريم وولادها وراجلها كانت فرحة كبييرة وشحال متجمعو هاكا ناضت خديجة وتمات داخلة بالوليد كولشي صقر وشي شاف فلاخر وملاك قندشت مربعة يدها نافخة حنوكها
باهم بقا غير كيشوف فوجههم
مريم: حم تبارك الله برا شوية اماما؟!!
زهرة: مزيان دابا الحمد لله
فاطمة: شنو ديك سمية؟!!
زهرة: أنيير
مريم: (شداتو من عند خديجة شافت فيه لعوينات زوورق وبييوض زعيعر) غزيييول تبارك الله
(دارو بيه دراري صغار للي كيبوس وللي كيسول ولدمن كيقولو خوونا بقاو شادينو ضارو بيه لبنات الا ملاك لي مقرباتوش خرجت من تماك نيشان طلعت لسطح..)
بقاو جالسين يهضرو على ترتيبات خديجة للي غدير لاكط وعلى سبوع ديال نعيمة للي مزال مقالو ليها والو على ختها فاطمة ناضت زهرة وتبعوها لبنات من غير خديجة حتى باهم تبعهم من بعد معيطو ليه..
فاطمة: بابا انا ولبنات فكرنا.. ماما حالتها خاايبة من مور داكشي للي وقع ونتا عارف من حقها تقلق
مريم: من حقها وبزاف نتا غلطتي معاها واخا كانت نيتك زوينة كما كتقول ولكن حنا مكنا بغينا لا ورث لا والو كنا بغيناكم غير تبقاو مجموعين
رشيد: ورزقكم ابنتي!!
مريم: رزقنا على الله أبابا مهم نتا بانا وهي منا وأنير كيبقى خونا ولكن نفسية ماما أهم دابا
رشيد: (شاف فزهرة للي مكضويهش) للي بغاتو نديرو الا لفراق
مريم: اعوذ بالله مقلنا حتى شي حاجة على لفراق حنا بغيناها غير تخرج شوية تبدل الجو
رشيد: فين بغات نديها نديها
زهرة: بغيت نبقى بوحدي
فاطمة: خاصها تبقى شوية بوحدها أبابا
زهرة: (وقفت وشافت فيه) باش دير واحد الحاجة فراسك انا غير علمتك مكنتسناش منك تقول اه ولا لا (تمات خارجة ولبنات بقاو مع باهم كيفهموه...)
خديجة: (دقت على مها للي كتنعس أنير حلها باها لباب) بابا راه عائلة ديال يوسف بغاو يجيو
رشيد: دابا؟!
خديجة: اه هادشي للي قالي عيطلي فالتيليفون قالي غيجيو باش يرصيو على حساب غدا.. (مشاو لبنات كيجمعو الدنيا ملاك جالسة فقنت فسطح تفكيرها بين هادشي واش خاصها تقبل امر الواقع كتشوف خوتها وحتى مها تقبلو داك الولد ولكن هي والو كارهاااه مقدرت لا تشوف فيه لا تسمع حسو حتى باش يعاملوه بحال خووهم معاجبهاش الحال!!!!
ومن جهة موضوع حمزة واخا سدات هاد الموضوع ولكن حاليا مابغاتش تعاود تشوفو حيت الجرح مزال مبراش وكتحس بكرامتها تهاااانت بزاااف معاه..
صونا عليها يوسف جاوبت كتسمع الهضرة والظحك)
وي يوسف
يوسف: راكي فالدار؟!!
ملاك: اه.. علاش؟!
يوسف: غنجيو بلاتي عندكم واليدية بغاو يتفاهمو مع واليدييك
ملاك: على العرس؟!
يوسف: اممم
ملاك: ونتا مباغيهش وحتى خديجة قالتلك مابغاتش
يوسف: مكرهتش، ولكن هوما عندهم كلام اخر مقدرتش نزيد نحكر فكولشي براكة غير...
ملاك: معليش خليهم يفرحو بيك ومنها ترد الغرامة ديالك ههه
يوسف: هههه نجمع فلوس الطيارة
ملاك: اودي فينما جا الخير ينفع...
يوسف: ياله من بعد ونتهاضرو عاود دخلي البيت ومتخرجيش
ملاك: هه لا لا كون هاني.. (قطعت هبطت من تماك لقاتهم كيطييرو كيوجدو يعطرو الدار اما كاسكرووط ديجا وااجد..
مشات حدا مها للكوزينة جاب الله كانو مقادين شهاوي على حساب وصول فاطمة بنتها لقاتها كتقاد أتاي اما كولشي باقي هو هداك) ماما
زهرة: ملاك حبيبة تقادي مع باك انا من اللول قلت ليك داكشي بيني وبينو وانا قااادة ندمو غير بالمهل ولكن نتي عليك بالاحتراام والوقاار
ملاك: ومالي شنو درت أنا
زهرة: راني شفت سلامك ناقص معاه وحتى الشوفة وتخنزيرة ولواااه ابنتي
ملاك: ونتي سمحتيلو
زهرة: أبنتي زواج هو هدا ماشي كولشي غتلقايه زوين هو غلط وغدر وانا كربي ولدو مع الوقت يقدر يجي نهار ونبدا نسا ونسامح متعرفي الوقت شنو جاايبة
ملاك: (بتنهيدة) بانلي نجلس بلا زواج هادشي غير كيعذب الواحد وصافي
زهرة: متقوليش هكاك ابنتي زواج راه سنة الحيااة
ملاك: (حركت راسها باه) واش غيتعشاو؟!
زهرة: معرفت ولكن كولشي موجود مرحبا بييهم.. غير منين جاو راه مزياان اما كانو خالعيني وكان مجاوش...
~~~~~~~~~~
كان جالس اورطيغا مع شريف ويوسف منين باه ومو قرروا يمشيو لصفرو ورغبو يوسف بغا، وحتى هوما غيمشيو معاه دارو غير يوصلو يدخل يوسف وهوما يمشيو يقضيو شي غراض.. غيثة غير شافت اورطيغا ماشي معاهم طارت بالفرحة عكس الغالية للي كحلت بالعمااا ولكن طمرت.. مشاو لصفرو ومع عارفين الدار نيشان قصدوها لقاو رشيد فلباب مستقبلهم دخلهم كان الصالون عامر وعرفهم بالي مكانوش عارفينهم.. دخلت ملاك لقاتهم جلسو تضهشرت من هاد جماعة محست برجليها حتى خرجووها دارت إشارة انها نسات شي حاجة..
اورطيغا: (بقا كيدور عينو عجباتو الدار وحتى فاش كانو داخلين برݣݣ مزياان مهليين فيها فاش شاف ملاك دارت ديك الخرجة جابتلو الظحك، نغز شريف وتمو خارجين وخارج يوسف معاهم لقاو ملاك فوسط الدار جالسة شاف فيها مقوس عينو)
يوسف: شنييولة شفتينا وسلتي
ملاك: ههه تضهشرت (شافت شريف وبدات ترقق فصووتها) واش خارجين؟!
يوسف: اجي بعدا نعرفك هدا شريف خو اورطيغا وصاحبنا
ملاك: (بابتسامة) مشرفين
شريف: ليلي الشرف أنسة ملاك
ملاك: (تبسمت قليل فين شي واحد كيهضر معاها بلباقة)
اورطيغا: باك تيعط ليك مسمعتييييهش!!
ملاك: ها!! بالصح (مشاات دخلات غيطليها علاش وقفت معاهم...)
شريف: (تموو خارجين حدا باب الدار) هادي خت خديجة
يوسف: اه هادي هي للي عاودت ليك عليها
اورطيغا: شنو عاودتيلو
يوسف: واش نتا عاد تعرف ملاك (حمزة تم جاي من الدرب) هدا ديما مطاايف هو وملاك
شريف؛ هه علاش
حمزة: (غير سمع اسم ملاك تقل فالمشية كيحنزز فيهم)
اورطيغا: صافي سير ايوسف رجع نتا لنسابك وغيز امورك منين تسالي قرس التيليفون.. (مشاو ويوسف تم راجع للدار لقا حمزة واقف حدا بابهم وكيشوف فلباب يوسف استغرب من هدا خينا وشك يكون هدا هو للي عاودت عليه خديجة اي خطيب ملاك السااابق...
دخللاخر فحالو وحتى يوسف دخل.. مشا رجع للصالون شاف فمو وهي تبسم ولكن متبسمش معاها مزال هاز فخاطري داك الكلام مخلاهش مرتاح.. نغزت راجلها للي جا يهضر ويعلمهم ان العرس من مور 10 ايام بما ان يوسف مزرووب وعاد باغي يخرج المغرب، زهرة جاتها قاسحة حيت 10 ايام باش توجد لبنتها جاتها قليلة حتى نطقت خديجة فاش شافت فمها تزيرت وخافت تحرجهم)
خديجة: انا مبغيتش العرس
الغالية: (فنفسها حيت راكي معرسة قبل)
رشيد: بنتي نتي نديرو ليك الليلة ديالك وسيري لدار راجلك هاكا فاللول تافقنا
اب يوسف: حنا ابنتي بغينا نفرحو بيكم واخا نتوما متافقين مديروش العرس ولكن حنا الأمنية ديالنا هو نديرو لولدي يوسف العرس (عائلة خديجة ملقاو ميقولو حيت مناويينش يديرو لخديجة العرس من غير ليلة وصافي تفاهمو غدا يديرو لاكط فصباح وعياو يشدوهم لعشا ومبغاوش خرجو فحالهم وبقاو فمداولة)
خديجة: (بفرحة) باينة غيديرو شي عرس مطرطق
فاطمة: مبروك عليك احبيبة غير هاد العائلة خاصك معاهم صبر
خديجة: علاش؟!
فاطمة: معرفتش جاتني مو مأرتتة وقاسحة شوية ولكن العريس غزاااال
خديجة: اه يا ختي كولشي فيه زويين (بقاو مجمعين كتعاود ليهم كفاش مهلي فيها من جميع النواحي..)
~~~~~~~~~~~
اصبحنا واصبح الملك لله..
ناضت ملاك بكري شدات طريق لفاس تكمل الاجتماع ديالها وتلاقا المدير ديالها تماك باش تعرف شنو غدير.. مشات للدار كانت وفاء ناعسة دخلت لبيتها هزت وراقها ونيشان للخدمة..
خديجة: (قلبها كان كيضرب اليوم غدير لاكط مع احسن انسان شافتو فحيااتها معمرها فرحت هاد الفرحة حتى عمر ومفرحتش معاه هاكا.. من بعد مفطروو ناضو كيلبسو حوايجهم خديجة مشات لكوافوورة بكري كانت دايرة معاها دارت لاصير لحمها كامل وقادات ميكاب خفيف لسقت ظفار رموش قدات شعر لبست جلابتها للي خيطت على حساب لعريسات لوات شال عليها رجعت للدار مع دخلت حيح عليها باها للي تعطلت مهضرتش براكة غير الفرحة للي فيها هزت صاكها اما حوايجهم كانو ديجا مجموعين باش من تماد يمشيو لمكناس..)
زهرة: (لبست جلابتها للي جاب ليها رشيد مخيطة من كولشي ديالها لبست الإسدال ودارت ذهبها للي ربحت فهاد الغضبة عاد لوات عليها كاب جابتو ليها فاطمة وخرجت لوسط الدار فين كولشي تماك كيساين رشيد مقدرش يهضر قدام نسابو باش ميتقمعش، سهام مكرهتش تمشي وحتى هي تعرضات ولكن خاص تقابل راجلها للي شاد القهوة وتقابل للي فالدار حتى السبت ويهبطو كاملين لسبوع فمكناس...)
فدار يوسف كانو تريتور كيقادو طوابل والغالية معاجبها حال ولكن قدام ولدها كدير ابتسامة عريضة وتمثل الفرحة هنا حست بخديجة ربحتها فالجولة اللولة مكانش خاصها تقولو ديك الهضرة كانت غتكلفها علاقتها بولدها.. هبط يوسف لابس كلاص بلا كرفاط بقا فيها الحال كتشوف ديك المطلقة متستاهلش عزري بحال ولدها تنهدت بحرقة ودخلت للكوزينة للي مستفين فيها لحلاوي وصواني اما الماكلة غتجي واجدة، بقات متكية على لبوطاجي دخلت غيثة لابسة قفطان ثليجة
غيثة: ماما مالكي؟!
الغالية: (بتنهيدة) والو ابنتي واالو، مشا خوك؟!
غيثة: اه قلب عليك ملقاكش ومشا هو وبابا وخويا وحتى شريف جا، علاش مبغيتيش تمشي معاه
الغالية: فيييين غنمشي ابنتي فيين واش كاينة شي أم ترضى تشوف ولدها كيسني على ورقة عذاابو وتبقى تتفرج من لبعيد (زفرت) خلي داك جمل راااااݣد حسن
غيثة: معرفتش!! تتبان خديجة ضرييفة وحتى عائلتها زويييينة
الغالية: اناااا لي عارفة دوك لعيالات ابنتي علاش قاداااات تلوات على الولد حتى تمكنت مطلقة اعباد الله ولدي شهوة منو يدي مطلقة!!!!
غيثة: (ملقات متقول سمعت الهضرة فبرا) واقلة جات العائلة
الغالية: (بفقسة) اليوم يديييو مايعاودو اليوووم الغالية بنت القاع والباااع غتبهدل فيك يا فاس كاااملة اليوم ݣنازتي اليووووم
غيثة: وصافي اماما جيتيني كبرتي الموضوع بزااف خويا يوسف متيبانش ليك شحال فر(ضارت خنزرت فيها) انا نمشي نشوف لي جا حشومة ميلقاوش للي يستقبلهم.. (خرجت وخلات الغالية غتاكل جناابها بقات كتقاد فراسها ودير الابتسامة باش تبين الفرحة شوية...)
~~~~~~~~~~~~
خديجة: (كانو وصلو لفاس راجل مريم وولادها مشاو لازرو باش يجيبو جداتهم عاد يلحقو بيهم لمكناس،
تحت لعدول بقاو لبنات ومهم طلع معاها غير باها وراجل ختها كيتسناو نوبتهم حانية راسها مهزاتووش اما يوسف كيعيى يبعد عينيييه من عليها ومكيفطن براسو حتى كيلقى عينيه عليها.. جات نوبتهم دخلو من بعد خطاب لعدول وصلو لصداق جبد يوسف اونڤولوب فيه 20000 درهم خديجة لمعو عينيها وهي حانيااهم يوسف حل صاكها للي محطوط فوق الطبلة ودار جوا دلفلوس تماك سولها على مؤخر صداق حركت راسها بلا وهنا يوسف تبسم)
يوسف: ان شاء الله اسي رشيد بنتك غتكون فعيني ميخصها حتى خير معايا
رشيد: ان شاء الله اولدي الله يرضى عليكم ويكمل بالخير وحتى هي تهلا فيك، (موجه الهضرة ليها) عليك ابنتي بالاحتراام نتوما دابا جمعكم زواج للي هو المودة والرحمة (بقا كيخطب عليهم وفنفسو مألم للي براسو مكملش بهضرتو وغدر زهرة للي رجع كيتمنى فهاد الحياة غير تسمحلو والا بغات تجي الموت تجي....)
خداو ريسي ديال لاكط على ميخرج الاصلي وخرجو برا حاضيها باغي غير يسلم عليها يعني أي حركة راه تزوج.. ولكن الاحترام للي عاطي لباها خلاه ميقدرش، خرجت برا متبسمة وطايرة بالفرحة فين عنقاتها مها وخوتاتها
يوسف: (تبعها حط يدو على ظهرها) مبروك علينا (مد حنكو سلم عليها وهي حشمانة وفنفس الوقت الابتسامة مابغاتش تحايد ليها)
خديجة: الله يبارك فيك (خوتاتها كيتناغزو ومهم كتخرج عينها فيهم)
باركت ليها الزهرة ولبنات
يوسف: واش ملاك مغتجيش عاود؟!!!
رشيد: (جا حداهم هاز تيليفونو) انا نصوني عليها نشوف واش كملت خدمتها
اب يوسف: البنية خدامة ففاس؟!
يوسف: لا فصفرو ولكن عندها فوغماسيون وهي خدامة فالتجهييز
اب يوسف: تبارك الله...
رشيد: الوو فينك؟!.. حنا غنمشيو ان شاء الله لدار سي عبد الله.. صافي واخا.. متعطليش ابنتي... ها هو يوسف يقولك العنوان.. (مدو ليوسف للي قالها العنوان وهي شادة فيه كيظحك وشاد راسو باش ميبينش اما هي عارفة دارهم)
مزال مكملت غير تكمل تجي من مورنا
اب يوسف: ان شاء الله..
يوسف: (كان بغا يطلب خديجة تركب معاه ولكن حشم.. كولها فين ركب
خديجة مع ركبات جبدت دوك لفلوس فرحانة متوقعتهااش منو يتهلا فيها هاكا وكولشي عجبو الحال، وصلو لطريق موزار فين كاينين غير لڤيلات وقفو حدا وحدة هبطو كيشوفو فيها)
خديجة: اوا هادي هي التزويييجة والا فالا
مريم: (ظحكتها) هههه
فاطمة: تي تبتي شوية اخديجة للي لداخل راه كيطيرو بنادم كفاش دااير تبتي ورزني راك فالاصل بنت الخير والحمد لله كبرنا فيييه (جمعت لوخرا الضحكة) متقلقيش انا كنقولك هاكا باش متبينيش هاد الفرحة ويخلعوك هاد المظاهر
يوسف: (وقف حداهم كيهضر ويرحب بيهم بصواابو المعتاد تمو داخلين حتى تعرضت ليهم غيثة لابسة البلدي هازة بلاطو فيه الحليب وتمر معمر والعيالات بقاو كيصليو على نبي يوسف شاف فمو للي كتصلي على نبي وتبسم هز زلافة ديال الطاوس زرقة فيها الحليب وزهر عطا لخديجة للي شربت جفيمة متبسمة وحتى هي نفس الشي عاد عنقت الغالية ولدها كتبكي كولشي ترجم التصرف انها دموع الفرح، عنقت خديجة عنااق كبير وهمست فودنيها)
""هاد التزويجة منبغيهاش حتى للعساس دالڤيلا ديالي""
خديجة: (بقات متبسمة)
عقبال تشوفي ولاد ولادنا اخالتي وتربيهم احسن تربية
(بقات متبسمة والغالية مقدرت دير حتى شي ردة فعل هي باغيا تقهرها صدقت هي المقهورة... سلمت على باقي العائلة كولشي جاتو زوييينة دخلو للصالون تحت ترحيبات ديال العائلة تفرقو رجال فالصالون ولعيالات فصالون شي كيعبر شي...)
~~~~~~~~~~~
ملاك: (كملت خدمتها مشات للدار تبدل حوايجها لقات وفاء خرجات لبست لبيسة كلاص وقدات الشال رشت بارفان ديالها للي شبابها حمزة ماشي حبا فيه ولكن عجبتها وغالبا ميمكنش تلوحها وضيع النعمة.. عاد تمات خارجة وصلت لباب التحتاني لقات اورطيغا غيحل لباب باش يطلع شافتو بقات واقفة)
اورطيغا: شنو تديري هنا
ملاك: ديجا قلت ليك انا وياك كااريين هنا بحالي بحالك
اورطيغا: (تبسم) غي حيت قلت غتكوني فدار يوسف
ملاك: وعلاش نتا ماشي تماك ياك صاحبك؟!
اورطيغا: صحاب اه ونكون تماك لا معندييش مع دوك جمووع الخااوية
ملاك: بلعكس الجلسة مع العائلة زوينة
اورطيغا: بالصح (تكا على لباب مكالي بيديه متخرجش) شنو زوين فيها؟!
ملاك: ههه كولشي
اورطيغا: تبغي نوصلك!! حيت معارفااش الدار
ملاك: (بثقة) عارفااها
اورطيغا: (هز حواجبو بجوج) اممم
ملاك؛ بسلامة (دارت إشارة بيدها زعما بعد من لباب ولكن مخلي يدو شادة من الفوق يعني خاصها دوز من تحت ذراعو)
واااحيد
اورطيغا: (لعب بلسانو فضرستو، حيد من لباب وطلع فدرووج وهي خرجت وتبسمت عاد مشات لطموبيلتها ياله غتحل لباب حتى وقف حداها...)
الا مكنتش غنوصلك ووصليني معاك...
ملاك: فين نوصلك؟!! (ضارت لقات طموبيتلو كاينة) تلفااتلك ولا شنو!!!
اورطيغا: لا غير ماشية ماشية قلت حتى انا نمشي نواسي يوسف مسكين
ملاك: علاش تواسيه شنو وقع؟!
اورطيغا: ماشي مسكين تزوج
ملاك: هه المؤمن مصااب شنو عندك مديرلو ندعيو معاهم وصاافي
اورطيغا: هههه سيري انا نصووݣ
ملاك: لا طموبيلتي انا نصوݣها ماشي داياك معايا وغتشرط من الفوق
اورطيغا: وانا متصوݣصش بية مراا
ملاك: مرا بزاف عليك للي مرااا
اورطيغا: غير ظااحك نتي راه برنسيسة انا نصوݣ بيك ونتي ريحي دوك ليديداات
ملاك: (ميقت فيه مموالفاش بهاد الهضوور) شنااهوا!!
اورطيغا: وصافي نمشيو دغيا باش لحقو وهاد الوقيتة تتكون الدنيا عامرة انا عارف درووبة دغيا نزربو (قنعها.. مشات للجهة الأخرى ركبت وهي توقف حداهم وفاء مشات جهتو) فيين
وفاء: نتوما للي فين؟!! واخا فيك نتي مبقيتش كنشووفك
ملاك: جيت ملقيتكش
وفاء: مشيت لافاك كنبريباري ليݣزام
اورطيغا: ياله بسلامة مزروبين شوية
وفاء: فين ماشيين
اورطيغا: وفااااا.. (حيدت وهو رجع اللور بالطموبيا ودغيا قلب لڤلون وزاد صونا تيليفونو جاوب داير مكبر الصوت) هضر ومتخصرش الهضرة
ملاك: (دورت وجهها السرجم زعما ممسوقاش، بقات كتسمعهم كيهضرو على الخدمة وغير ذبيحة وريوس كمل)
غير بشوية راك كتجري
اورطيغا: متخافيش
ملاك: لا نخاف على طموبيلتي وعلى راسي
اورطيغا: (بقا كيصوݣ بين دروبة) زادك المدير؟!
ملاك: اه
اورطيغا: غتبقاي ساكنة مع وفا
ملاك: داكشي فاش كنفكر
اورطيغا: (شاف فيها ورجع شاف فطريق دخل لطريق لكبيرة بقا زاارب كيتبسم فاش كيشوفها شادة فباب الطموبيل باينة مخلوعة وعاد كيزيد فالسرعة ولكن واالو مهضرتش غير مخرجة عينها، رجع دخل فدروبة وهو يوقف)
ملاك: وصلنا؟!
اورطيغا: على سلامة (خرجت كتأكد وحتى هو خرج) الطموبيل بانتلي مخنوقة شوية
ملاك: زعما
اورطيغا: اه من بعد نقادها ليك ونسرحها
ملاك: (هزت حاجبها فيه مكانش قاصد شي حاجة ولكن ردة فعلها خلاتو ينتابه حرك حواجبو بلا حولة...
مدت يدها عطاها الكونطاكط وبقات واقفة جبدت تيليفونها باش تصوني على باها)
اورطيغا: دخلي
ملاك: نتسنا بابا يجي
اورطيغا: ويينووو انا ندخلك
ملاك: ههه غير سير (شافت غيثة جات عنقااتو براسو غفلاتو منين طارت عليه معنقااه)
غيثة: عرفتي وكان مجيتيش كنت غنتقلق منك ووبزااف...
خرجلها باها لقا ملاك واقفة وبنتهم مع شي واحد، دخلت منين دارلها إشارة دخل بقات كتشوف كانت لفيلا غزاالة، وهو كان سابقها
رشيد: جلسي ورزني
ملاك: ومالي كنحشم بيكم (داخل اورطيغا وغيثة)
رشيد: (ضار عندها) وواش داك الفم ميتهناش الا مردش الهضرة شي نهار نهرسو لمك
ملاك: ونتا أبابا كتقولي هاكا بحال كندير ليكم لفضاايح
رشيد: (زاد دخل وهي زادت تفقسات بقات شي 5 الثواني واقفة مرضيااش، تبعاتو بالزربة هو مشا جيهة ديال رجال عاجبو الحال وداك الحديث وهي شافت لعيالات معرفت واش تسلم ولا تجلس حتى شافت فمها للي خرجت عينها فيها باش تسلم عارفاها غدير هبل تربح ومتسلمش، بقات كتسلم حتى جات الغالية لابسة فراشة ديال ثليجة وغير لاوية الشال ونص شعرها باين كترحب بابتسامة عريضة ميمكنش تخلي شي واحد يتشفا فيها ولا يدي خباارها)
الغالية: مرحباااا مرحباااا نهار كبير هدا لالة خديجة البلارة نورتنا الله يكمل كولشي بالخييير وتكون بزايدة ارزق على ولدي سيدي مولاي يوووسف
ملاك: (مشات تسلم عليها وخايفها تزبلها)
الغالية: (استغربت من وجودها واش يوسف للي عرضها حتى كتسمع زهرة كتقدمها ليلها انها بنتها مفهمتش كفاش كان ولدها مع هادي وتزوج ختها!!!)
نتي هي الصديقة ديال يوسف للي جيتي معاه لانيف ديال بنتي لالة غيثة والعرس للي فهرمومو؟!
ملاك: (بطرف عينها شافت فالصالون درجال كتشوف ميسمعهاش غير باها رمشت عينها بالزربة وشافت فيها مستغربة) باغدوون!!!
زهرة: (معجبهاش الحال ضارت شافت فبناتها اما خديجة دارت راسها مسمعت واالو راه راجلها دابا مكاين للي يحاسبها..)
الغالية: (كتزيد تأكد) لا لا نتيا باقية عاقلة عليك بالأمارة جيت سولتك قلتلك واش نتي من عائلة العروسة ولا العريس
ملاك: (تبسمت) تبارك الله عليك اخالتي عااقلة بقيت فباالك من داك نهار واخا انا معقلتش عليك صراحة مزياان، اممم نجلس؟!!!
الغالية: اه اه مرحبا بك ابنتي راه حتى هادي بحال دااركم مرحبا وألف مرحبا بالناس الشرفاااا
ملاك: (مع جلست حدا مها عينيها دمعو بالقرسة للي جمعتها معاها ففخضها شافت فخديجة) مبرووك عليك
خديجة: (بفرحة) عقباالك احبيبة نفرحو بيك حتى نتي
ملاك: امين.. (شافت ففاطمة للي لقاتها كدير فيها الشوفة ديال شنو هادشي؟!! شافت فمريم حتى هي معجبهاش الحال جبدت تيليفونها بقات كتخربق فيه تهرب من شوفااتهم حتى ناضو لطوابل فين كاين تريتور كيوجد جلسو وتحط الغدا للي كان فخم وكل طبق كينسي فلاخر.. كلاو مع اجواء موسيقى الطرب الأندلسي تفكرت اورطيغا وهاد الاغاني للي كيعجبووه مع ميلت راسها بلا متحس لصالون رجال لقاتو اونفاص معاها غمزها ودار حركة فوجهو انه كاين الملل تبسمت حتى ظحكت بقا كيحرك راسو مع الموسيقى للي شافو ميقولش كيتصنت لهاد الملحون..
مجاتش فين ترد راسها حتى لقات باها مطرطق عينو تبسمت معاه وقلبت وجهها، كملو الوليمة مجمعين مع للي كانو جالسين معاهم وقفو باش يمشيو وزهرة عرضااتهم كاملين لسبوع بنتها وأكدت على الغالية خصوصا باش تجي هي وبنتها وحتى يوسف واعدها باش يجيبهم خرجو وصلو الجردة)
يوسف: اممم خديجة بقاي معايا انا بلاتي ونوصلك لمكناس (كولشي صقر باها دار راسو مسمعش زاد مع رجال لبرا هي تبسمت وشافت فمها للي حركت ليها راسها باه عاد حركتلو راسها باه وهادشي فقس الغالية كفاش دافعة كبير على ولدها وهي غير مطلقة كفاش كتستاشر مع مها باش تبقى مع راجلها كفاش اصلا ولدها يرغبها تبقى معاه....)
الغالية: ولدي خليها تمشي مع عائلتها راه تابعهم سبوع ختها حشومة تخليها ومتحضرش ليها
زهرة: (بقات غير كتشوف شافت فخديجة ياله بغات تهضر)
يوسف: (دار يدو فظهر خديجة) انا نتسناك برا.. (مشافش فمو مفهمش واش بغات تحرجو ولا تصغرو معجبوش الحال وزادت داكشي للي بيناتهم، وفنفس الوقت مهضرش معاها باش حتى هي متحرجش)
زهرة: الله يخلف عليكم ومرحبا بييكم غدا ان شاء الله لمكناس (تبسمت وزادت مع طريق تابعينها بناتها ممخليينش ليها الوقت حتى تجاوب.. وصلو لبرا خلاو مهم بوحدها مع رشيد تركب معاه ربما تصفا الخواطر شوية!! مريم وفاطمة ركبو مع ملاك وراجل فاطمة خدا الولاد ومشا يقضي شي غراض عاد يتبعوهم..
ياله غديماري شافت اورطيغا خارج وكان معاه شي راجل كبير شاف فيها تبسمت وزادت مع طريق متبع ليه العين..)
فاطمة: وااهيااا ناري هادي كتاااار من الشمالية
مريم: حسن عواان خديجة بهاد لعݣووزة
ملاك: الله يهديكم راه حتى خديجة عارفة فين دااخلة وحتى هي مساهلااش
مريم: انا عارفاه مساهلاش ولكن هادي راه بزااف
ملاك: شتي يوسف ولد الناس مغيخليش شي واحد يحݣرها وعاد غيسكنها بوحدها مغيكونش بيناتهم بزاف ديال الاحتكاك
فاطمة: صراحة غزاااال راجلها.. ومصبرش عليها ههه
مريم: هه وراه باينة غير من هاد الزربة مشتيش العرس للي قالك من بعد 15 اليوم ومكره من الفوق هو مبغا عرس
فاطمة: بابا مغيدير ليها والو ؟!!
مريم: اوا راه دارلها فاللول عرس كدااير
مريم: وماما مغتصيفطهاش بلاش ضروري تشريلها حويجات ونديرولها ليلة الحناء ميمكنش تمشي هكاااك وحتى حنا نتعاونو بيناتنا
ملاك: انا معندي فين نعاون (شافت فمريم) ياله كنتكافا مع الطموبيل ووراقها المازوط ودابا الخدماا
فاطمة: ههه وباااز مكتقشرييش متعاونيش ختك؟!
ملاك: عاونتها فطلاقها
مريم: بالصح نتفارضو غير حنا، ملاك راها خسرات بزاف هاد الايام (بدلو الموضوع وشدو طريق لمكناس)
~~~~~~~~
رشيد: فين غتمشي ازهرة!!!
زهرة: ارض الله وااسعة
رشيد: نتي عارفة منقدش نخليك بووحدك راه الا مشيتي لشي قنت غنتبعك غنتبعك ماشي من بعد هاد العشرة غنسمح فيك وعاد نتي عارفة...
زهرة: سمحتي فية نهار تزوجتي ارشيد
رشيد: كنحلف ليك بالله الا ندمت وغلطت، مرة وحدة نهار زيدني با تزوجتها بالفاتحة ديك الليلة مرة وحدة فين شفتها
زهرة: (قلبت وجهها كتشوف فطريق.. عيا يرغب ويهضر وهي مكتجاوبش...)
~~~~~~~~~~
غيثة: (مشات جابت ليها لويزة وجلست حداها فالكوزيينة والمساعدات كيجمعو الدنيا) راه مرتو اماما شنو تتقولي
الغالية: (مفقووووسة) غتلوى علييه انا عارفااها باغية تشدو بلولاد
غيثة: ماما راه حتى خويا نفس الفكرة باغي يكونو عندو ولادو نتي دعي معاهم وصافي وكل واحد حر فحياتو يدير شنو بغا
الغالية: (تفكرت منين ردت عليها الهضرة عرفتها ماشي كما كانت كتبان عرفتها ماشي بهلوولة وعارفة شغاالها وقااادة، وهادشي زاد خلعها كتر)
انا عارفة شنو غنديير
غيثة: شنو غديري؟! (لا رد) ماما تكلمي لالة مفتاحة تتعيط عليك (ناضت الغالية ومشات عندهم مصطنعة الابتسامة وكما كانت عارفة غينتاقدو مرت يووسف وهي خاصها تبين أن ولدها عندو الحرية يختار للي بغا حيت مغترضاش قدام شي وحداات.....)
يتبع...
التعليقات
لا توجد تعليقات بعد، كن أول من يعلق.