محتوى القصة
ملاك: (متكية فنموسيتها كتشوف فالبيت كاين رسومات معلقين فالحيط وكاين نونوسات اذا البيت كتنعس فيه بنت عمها مهمهاش واش خداتولها ولا لا واهم حاجة عجبتها مفرغوش الماريو وحلوه حيت خلاتو مسوووت وبخاطرها بغات تعطيهلها متنساش وقفت سهام معاها فمحنتها!!!!
دورت عينها فسقف فكولشي مبقاتش مسوقة لهاد لبيت هي باغية ترجع لدارها لبيتها لحقيقي لي بغاتو وحباتو من قلبها اما هدا برد خاطرها من جيهتو كانت كتبغيه كما كانت كتبغي هاد الدار..
هزت تيليفونها شعلاتو معرفتش اصلا علاش طفاااتو اورطيغا منين كيبغي يوصل ليها راه كيصوني على مها.. تشعل وصلها انه صونا عليها جوج مرات قلبها ضرب حتى جلست)
شنو يكون بغا؟!!
(بقات حاطة صبعها على نمرتو ولكن مقدرتش تصوني داكشي للي دار ضرها فنفسيتها خرجت من تماك وبقات كتسنى لابيل ديالو حيت اكيد غيطلعلو ميساج انها شعلت التيليفون، تدق لباب)
ويييييييييي!!!!!
زهرة: ملاك خرجي تكلمي لباباك
ملاك: (دارت صيلونص لتيليفونها ودارتو فجيبها وقفت خدات شهيق زفييير وخرجت من تماك لقات باها وعمها لقبيح وعمها ضريف كولشي كان فوسط الدار وجدها متكي فوق السداري شاد التسبيح فيدو) احم سلام
زهرة: (خرجت عينها فيها باش تسلم مشات ملاك سلمت على باها عمها ضريف للي من ديما كيظحك معاها عاد عمها لاخر للي جبد يدو بطريقة مستفزة باش متبوسهاش حيت موالفين هاكا كيسلمو على عمامهم)
ملاك: (عصبها بزاااااف مقدرتش متهضرش) علاه زعما جبدت يدك؟!! حسابك غنرغبك ونقولك ها العار نسلم عليك ولا غنموت؟!!!!! شنو هاد العقلية عندك اعمي!! حاقد بحال تقول سرقت ليك ورثك!!!
رشيد: واش الحمارة مديريش عقلك؟!!
ملاك: واش مشفتيش كفاش كيحݣر على بنتك شنو زعما كيجبد يدو هاكا مالي شنو دايرة ليه فملك الله باش يدير معايا هاكا!!!!!!
العم: (هز يدو باستسلام) هادي راه قربت تصوطنا اخويا عييت تربي فبناتك ولدو ولادهم وهادي خرجت ليك من الجنب
زهرة: ونتا علاه تجبد يدك هاك؟!!!
رشيد: دخلي فحالك ازهرة
زهرة: لا مدخلش حتى نفهو خوك مالو مع بنتي الا البراءة ديالها بانت وهي لي كلاتها مسيكينة هو لاش حاطها فراسو ومطججها من دارهم
العم: أنا؟!!!!!! (بقا كيحلف وقف باهم بصعوبة جاي جيهتهم ولاخر حتى بقا كيبكي وهنا كيشوفو فملاك لي سباب هادشي)
ملاك: بنادم غير مكيلقى ميقول كيقلبها بكا!!! عندك معايا شي حاجة قولها وفاااريها نيشان!! (جرتها مها لبيتها)
شفتي شفتي علاش مبغيتش نرجع؟!!!؟
زهرة: يا بنتي بسلامتك حتى نتي مع وصلتي مع زندتيها!!
ملاك: وشنو نسكت على حقي (كتغوت) والله منسكت والله منعاودش نسكت على حقي صااافي ينساو ديك ملاك للي كانت حانية الراس!!
زهرة: وفين عمرك حنيتيه
ملاك: اواااااا حتى دابا عمري نحنيييه... انا اصلا بغيت نمشي لفاس اللهم نقابل ختي خديجة راه قوا عليها داكشي ورغبتني نبقى معاها!!!
رشيد: وعلاه تجبد يدك اخويا؟! ياك قلت صافي لبنت خاصها ترجع لدار باها
العم: دابا اخويا انا هو للي خايب وهي لي مكتحتارمنيش شنو؟! ياك غير قدامك عندها كلمة بكلمة بلا داكشي لي دارتلي انا وباك داك نهار
الجد: حتى يانا دخلت عندي قبيلة كتظحك علية اولدي
رشيد: علاش غظحك عليك أبَّا؟!!
الجد: بنتك مبقاتش تحتارمنا وخاص تعاود ليها ترااابي (ضارو فرشيد وهو غير كيسمع) زوج لبنت !!
رشيد: علاش نزوجها مالي لاقيها حدا الجامع!!! وبنتي هادشي كتر عليها حتى نتوما حنو فيها شوية واش مكتراعيوش لهادشي لي دازت فيه
العم: علاه حنا شنو درنا ياك الفضيحة ودخلناها لدارنا
رشيد: داركم؟!! راه دارهم هادي حتى هي اخويا اش كتقول ؟؟ واشمن فضيحة؟!!!
العم: سول أي واحد كما بغا يكون من مور ديك الفضيحة شنو كيديرو
رشيد: وريني شنو كيديرو؟! حيت أنا عندي بناتي حسن من هاد الناس علامن نتا هااضر
العم: دابا غير مدخلش حاجة فحاجة اخويا حنا كنهضرو معاك بالعقل
رشيد: لا لا نعرف حيت شتك حاقد عليها كاين شي كلمة حسن من القانون!!!
العم: حنا مقلنا والو
رشيد: هاد الدار كما داركم راها دار بناتي لي بغا ولي كره وهوما ماشي ضياف هنا والا تفضحت هاد لبنت انا نهزها واخا معرفت شنو دييير
الجد: واش حنا قلنا العكس!!
رشيد: هادشي لي سمعت منكم قالك زوجو البنت!! ساخي انا ببنتي باش نعطيها لأي واحد!!! (تم ماشي للبيت ورجع ضاير شاف فخووه)
بنتي جات تسلم عليك ونتا لي مقبلتش من هاد نهار مبقى سلام بيناتكم!!! شفتها دير راسك مكتعرفهاش ماشي انا باغيها ترجع ونتا كتزيد تهججها تخوي من هنا!!!! (شاف باه) ياك باغيني نبقى (باه حرك راسو باه) وخليني نبقى انا وولادي..
(دخل لبيت معصب لقا ملاك شادة أنير كتلعب معاه غير شافتو حنات راسها بقا كيشوف فيها)
شنو قالك داك الكلب!!!
ملاك: (بهدوء) بابا الله يخليك مراد ماشي كلب
رشيد: كنهضر على ليهودي يا الحماارة!!!!
ملاك: ااه (كانت مها فالدوش كتوضى) نقول قدام ماما؟!
رشيد: هضري!!
ملاك: هو قالي بغا غير يتعرف علية وماشي غير انا حتى لبنات كاملين وقال نيتو زوينة
رشيد: زيد
ملاك: انا طردتو والمرة التانية معطيتوش اصلا وقت صافي مشيت فحالي من تماك معاودتش شفتو
رشيد: (خرجت زهرة مخنزرة معاجبها حاال وهو عارف علاش ولكن ميمكنش يعزل وهي عارفة!!...)
اورطيغا: (مقدرش يصبر ضروري خاص يشوفها.. تسنى شي كليان باش يجيو يعطييهم التوصيل ديالهم للي شراو لحوالة وخلاوهم فالكوري.. مع اخر كليان وصا الدري باش يقابل ليه المحال ونيشان لدار يوسف دق حلات ليه الغالية محسابلوش غتكون تماك)
الغالية: مسينا على الله!!
اورطيغا: (دخل كانو جالسين كيتعشااو) واحد السلام عليكم
غيثة: (عينيها خرجو بان فيها الخووووف خديجة كانت كتوكل سليمان لي مجلساه فكرسي دلبيبي يوسف شاد الفورشيط بقاو مصدومين)
اورطيغا: مهم بصحتكم انا باغي نهضر مع غيثة
الغالية: اش غتقول ݣاع!!!! غَلَطْ ووقع غتبقى تتبعها حياتها كاملة عليه
اورطيغا: (شاف فيوسف) واش هاد مك متتهدش!!!
الغالية: اسمع نتا!!!
يوسف: الوااالدة!!! مراد جلس تعشا معانا
اورطيغا: انا برا على متكملو (خرج مخلي الباب مردوود مشا السرجم كيكمي)
يوسف: السيد كنا غنكونو سباب فموت مو وهو جاي غير يهضر ومزال نتي تتقابحي معاه
الغالية: اوا خلاااااص علية راها بحال العودة صحة سلام كيتي انا للي غنموت معاكم غير بالفقصة
يوسف: لا حول ولا قوه الا بالله العلي العظيم غيثة متخافيش هو باغي يعرف غير شنو وقع وكفاش
غيثة: (اللقمة بقات فحلقها مقدرتش تزيد تاكل) انا ندخل للصالون (دخلت للصالون يوسف خرج عيط على اورطيغا وخلاهم بووحدهم هي جالسة فسداري بيناتهم طابلة وهو فسداري كيشوف فيها)
سمحلي (بقات كتبكي)
معمرني فكرت ولا نويت نضرك نتا وطاتي انا تنبغيييكم بزاف..
اورطيغا: غيثة (مسح على وجهو) عاوديلي من اللول متنساي حتى شي حاجة!!!
غيثة: (شافت فيه كتمسح دموعها) انا راه معرفتش فاللول شنو باغي حتى بقا تيهددني..
اورطيغا: واخا.. غيثة عاوديلي من اللول باش حتى انا نفهم..
غيثة: (مع مكانش يوسف حاولت تعاود ليه كولشي حتى الاعتداءات لي عقلت عليهم باش تحطو فالصورة حتى فين ضرباتو كولشي عاوداتو بلا فرانات حدها مرة مرة كتبكي وهو عاطيها الوقت) ...حسابلي مات حتى عرفت من حمزة مخبع
اورطيغا: علاش مجيتيش عندي من اللول اختي مكنتيش غتوصلي لا نتي لا غيرك لهادشي كااااااامل
غيثة: كان تيعرفني فين تنمشي وفين تنجي كان عارف كولشي علية براسي كنت حساااه بحال شي كاميرا فوق راسي، ونتا غير تنبغي نهضر معاك تيعرف كان تيديرلي شي حاجة قبيحة بزاااااف كنت تنخاف منو امراد
اورطيغا: وملاك كنتي عارفة شنو موجد ليها
غيثة: لا والله مكنت عارفة حتى داز الوقت عرفت من اخر نهار فاش شفتو كان فات الفوت ولكن مع الخوف نسيت مقلت والو لا ليها لا ليك، اصلا كنت تنتخيل راسي غير فالحبس كنت عايشة فالجحيييم
اورطيغا: (معرف واش تبقى فيه ولا شنو ولكن مينكرش انه اثرت فيه ومغيبغيش ليها هادشي..)
غيثة: مراد!! ملاك عاوناتني حيت هي زوينة بزاف وتتبغي الخير كانت خايفاك تقلق ولكن غامرت وتحكمت فيها الإنسانية عاود.. عفاك متخاصموش بسبابي
اورطيغا: شنو غديري نتي؟!
غيثة: ولدي دارو للي يحضيوه وانا مغنسمحش فيه هادشي لي عارفة هادشي دابا
اورطيغا: عطيني فين ساكن
غيثة: (حركت راسها بلا) منقدرش... عفاك امراد نسا هو هادشي لي باغي يوصل ليه تقلب عليه نتا حيت هو ماشي بوحدو معاه بزااااف...
اورطيغا: شكون معاه
غيثة: متنعرفهمش
اورطيغا: وباش تتجيبو أخبارو؟!!
غيثة: غنقولهالك غير بوحدك حمزة عارف كفاش يجند الهضرة من لي دايرين بيه واكترية ليلا
اورطيغا: دخلو بختو ؟! اممم شنوما كان اغيثة علميني..
(وقف وخرج من تماك مهضرش حتى مع لوخرين نيشان توجه للباب ومشا فحاالو خرجت عندهم كتمشى بشوية شادة فبلاصة الجرحة حست براحة نسبية منين هضرت مع اورطيغا..)
تصبحو على خير...
اورطيغا: (ركب فطموبيلتو ومشا لدار الليدو تماك كاين بوحدو وكيعرف فاش يفكر وفشنو يدير وحاط كلام مو بين عينيه مغيوليش يتهور ولكن مغتبقاااش فيه الشمتة ويهرب!!! تفكر ملاك لدابا معاتباتوش على انه سباب حتى واحد مقالو شي حاجة حتى ملاك فاش خبعت غيثة غتكون خافت عليه ولا علاش غتخبعها هو متأكد من حبها ليها غلطت منين خبعت عليه ولكن عندها أعذاار جبد تيليفونو صونا عليها وهو كيكمي جاوبت حتى كان غيقطع)
مكنتيش عوالة تجاوبي!!
ملاك: شنو باغي؟!
اورطيغا: نجي نشوفك!!
ملاك: مفخباركش انا فدارنا!!!
اورطيغا: (سكت كيصوط الدخان) كان خاصك تقوليلي غيثة عندك... واش متتفهميش نتي الوحيدة للي متنبغيهاش تخبع علية شي حاجة!!
ملاك: نقولك باش تقتلها!!!
اورطيغا: تنبان ليك قتال املاك؟!!
ملاك: مزال بين عيني الطرشة للي عطيتها وهي حاملة مخليها كتوجع!!
اورطيغا: وانا مبقيتش فيك منين عرفتها بغات تحرمني من عيني باش تنشوف طريق، لوكان كانت مك هاكا كنتي غتشوفيها!!!
ملاك: (دقت مها فلباب) غنقطع كيدقو علية!!
اورطيغا: خلي الخط مشعوول... (حطت التيليفون تحت لوسادة وناضت حلت لباب...)
زهرة: (دخلت جلست معاها فلبيت ملاك عرفت غيكون موضوع حساس هزت عباية صلاتها وهزت التيليفون لواتو مزيان ورداتو تحت المخدة) انا هضرت مع باباك وخديجة زادت حتى هي هضرت معاه باش تمشي تجلسي معاها هاد ليام
ملاك: هاكا حسن اماما ولكن غنبقى نبات فداري
زهرة: عاود!!
ملاك: نبقى معاها نهار كامل نقابلها ولكن نعاسي فداري حسن اصلا وفاء كاينة معايا ماشي بوحدي وهي تجلس مع راجلها فخاطرها يقادو امورهم
زهرة: علاه مخاصمين
ملاك: ماشي مخاصمين ولكن كانو راكي عارفة خديجة عاودت ليك
زهرة: اممم... (كتهضر بشوية) كيف داير بابا؟!
ملاك: كيف زبل واحد الكمارة مشييينها!!! صراحة مع تشوفيه تعرفيه منهم
زهرة: هههه وشنو قالك؟!
ملاك: ديك الهضرة للي قلت ليك قبيلة ماشي شي حااااجة مهمة
زهرة: اممم مهضرش علية
ملاك: حدو قالي مديريش بحال ماماك للي حسباتني ميت وانا ظريف وولد الناس وناوي غير الخير
زهرة: ههه اودي.. بحال ماشي هو لي بغا يقتلني! مهم جدك وعمك اخر مرة اخر مرة تعاودي تردي عليهم الهضرة يقولو للي بغاو نتي عليك الاحترام باك راه قام بالواجب معاهم
ملاك: علاش مترحلوش وتهنيونا؟!!!
زهرة: نهار جا جدك باش يرجعنا لهنا...
فلاش باك
الجد: (من بعد 5 سنين وولدو بعيد عليه كان كل مرة كيبغي يهضر معاه كيرفض حتى غير عماين مجاش عندو مقدرش على البعد ديالو مشا سقسا عليه فين كاين كان أب حمزة عارفو فين حيت هو لي كان كيوصل ليه الاخبار مشا عندو لقا رشيد خادم على راسو شاري شي أراضي عندو بنيتة صغيرة كان موافق يرجع رشيد للدار واكترية منين فقيه الدوار عاود ليه كفاش سلمت زهرة وقرات شنو خاصها تعرف فالدين سمح ليهم وقبل برجوعهم واخا هوما مطلبوش ولكن زهرة بغات ترجع على حساب بنتها باش تعيش فالمدينة وتقرا وعلى حساب رشيد باش يتجمع مع عائلتو اما هي فينما كانو هادو الجوج غتكون فرحانة وعارفة رشيد مغيدوزهاش!! ولكن دخل رشيد للجامع وحلفو عمرو يعاود يخوي الدار ويعزل عليه!! رشيد كان فرحان بعودة الاب ديالو ورجع هو ومرتو ونيت متبقاش مكرفسة بقا خدام بين هنا ولهيه باه فتح ليهم مشروع قهوة هو وخوه باش العائلة تبقى مجموعة وزهرة دخلت للدار ودارو ليها حفلة وعاودو سبوع لمريم ومن ديما كان كيأكد عليهم عمرهم يعزلو عليه وميخليوهش!!!)
عدنا
ملاك: ولكن داكشي راه فات ودازت عليه اعوام وسنين
زهرة: فااااات اه ولكن باك داك الحلوف فالجامع مقدرش عليه!! وزيد باه مكيقدرش يفرق باباك ابنتي...
ملاك: (خرجت مها وهي متأكدة اورطيغا مغيكون سمع والو حيت كانو كيهضرو بشوية وعاد الللوية لي دارت لتيليفونها... هزت التيليفون كان قطع لابيل قلبت امتى قطع كانت دقيقة من مور مخلاتو باين مكان كيسمع والو، مبغاتش ترجع تصوني عليه مدام هو معيط الا عرف الغلط ديالو وخاصو يعتاذر ويقنعها باعتذاارو مع شروووطها..)
~~~~~~~~~~~~~
اصبحنا واصبح الملك لله..
الغالية: (فاقت من نعاسها مشات تشوف الفطور واش وجد حتى كتشوف ام آدم داخلة معاها مفتاحة ومرات سعد.. استغربت من زيارتهم المفاجئة)
مرحبا مرحبا زارتنا الخير والبركة
ام آدم: شنو هادشي سمعت الالة الغالية!!
الغالية: (كظحك) شنو!!
مفتاحة: هادي تربيتك فغيثة كفاش حبلت ووولدت ومعامن!!؟؟ وبلا زواج؟؟!
الغالية: (مصدومة كتشوف فيهم)
ام آدم: وهي مخطوبة لولدي؟!!!! شنو هادشي؟!!
مفتاحة: عيييب عييب هادشي!!! هادي للي كنت تنقول عليها مربية وشريييفة!! (خرج اشرف وباه من الصالة فين جالسين كيتسناو لفطور منين سمعو الغوات) ديرو غير بوجه هاد الراجل لكريم لي مرغتو وجهو فتراااب
الغالية: (بخوف) نخرجو الجردة نهضرو
ام آدم: انا مبقالي كلام خليتو حالة ولدي حالة مصدوووم وهو لي مشا يخدم باش يجي يتفرغ لبنتكم للي طلبات ديااامو والڤيلا والمشرووع!!! انا تصدمت فيكم بزاااااف
اب غيثة: شنو واقع؟!
مفتاحة: لا حول ولا قوه الا بالله العلي العظيم هادي هي تربيتنا فيك الغالية باش تقابل بنتك وتربيها!!
الغالية: اشرف سير نتا وباك لخدمتكم
ام آدم: مهم انا جيت نفسخ هاد الخطوبة ولدي ممستاعدش يربي ولد ماشي ولدو!!
الغالية: (انفاجرت) هداك الالة راه ولدو وبالسيف عليه غيتحمل مسؤوليو منين جاية تفرݣعي هنا سمعي ولدك شنو عمل لبنتي لالة غيثة للي كان تيدروݣيها فقلب داااري وبغا يقتلني حتى انا!!! لااااا وداير فيها مربي وولد عائلة ولدك الالة قتاااااال وملحد وموووووسخ كلب والكلب بزاااف عليه وكان باغي يقتل شحال من واحد الله ياخد فيه الحق ولكن كوني هانية حق بنتي غيرجع ليها وولدك للي مخبي غير فدارو هنا غياخد جزاء ديالو ومرة أخرى منين يعيط ليك قولو حق بنتنا مغنسمحوووش فيه ونتبعوه فينما كااان شماااتة الحيوان
اب غيثة: اش هادشي تنسمع!!
الغالية: ونتي الالة مفتاحة عارفة سيدي عبد الكريم مريض منين تبغي تجي تقولي هاد الفضيحة اجي عندي بيني وبينك ماشي قدامو!!!! (مشات لعند راجلها وولدها) نطلعو لبيتنا ونشرح ليكم كولشي...
ناااااادية (بعصبية) نااااااديااااااااااااا وصلي مع ضياااف لباب الدار ومتبقاي دخلي حد حتى تعلميني!!!
أشرف: (مصدوم) فين غيثة!!!!
الغالية: (مفقوسة ومقهووورة من صحابات لي جاو فرشوها وشكها الوحيد أمينة تكون هي لي قالت ليهم هادشي حيت مكاينش شي واحد براني عارف من غيرها ولكن خاص يعرفو...) شنو بغيت غيثة
أشرف: (بعصبية) كفاش حاملة!!!
اب يوسف: (بصدمة) لالة مفتاحة قالت ولدت ݣاااع!!!
الغالية: سمعو نفهمكم (شافت فراجلها) بنتنا تكرفس عليها ادم وداكشي باش كانت هاربة!!
أشرف: كفاااش!!!!
اب يوسف: (شد بيدو فوق صدرو) بنتي!!!
أشرف: فين هي واش نيت ادم ادم ؟!
الغالية: اه ادم نييييت ادم لي دخلناه لدارنا وتقنا فيه
أشرف: (بحال مكيسمعش) ادم لي كان خاطبها؟!!!!
الغالية: تكرفس عليها بزاااف مسيكينة الله ياخد فيه الحق!! بداها كان كيدروݣيها ويضربها وكملها تكرفس عليها وكان تيهددها باش تقتل ݣاع
أشرف: (بعصبية) اشنو تتقولي!!!!
اب يوسف: (داخ معرف كفاش حتى يوقف شدووووه) فين بنتي؟!!!!
الغالية: عند خوها الحااااج عند خوها!! متخافش عليها راه مهلي فيها بزاف هو ومرتو
أشرف: واش هادشي كامل وحنا مسايقين خبار كفاش القتيلة وتكرفس ولادرووݣ!!!
الغالية: واش متتشوفش حالة الحاج كيف دايرة!!!
أشرف: وحالتي انا؟!!! بغيتي تقولي هاد الهضرة ومندير والو؟!!
الغالية: (مشاو دايينو لبيتو كيحسو بركابيه كيخواو سكتو بجوج كيحاولو معاه بالهضرة حتى رجع مشالو التنفس) عيط عيط دغيا على طبيب!!!
أشرف: علاش قالوها قدامو؟!
الغالية: حيت ظنييتهم حبيباتي وصحباتي
أشرف: (كيصوني على طبيب قالو باش يجي دغيا رجع عندو لقا الغالية كتحايد صدايف الشوميز ديال باه)
الغالية: (كتبكي) الحاج هي دابا راه بيخير وعلى خير ويوسف دايرها فعينيه متخافش عليها
أشرف: انا نصوني على يوسف
الغالية: الحااااج الحااااااج... شوف فية حل عينيييك (حل عينو مخرجهم كيحاول غير يتنفس) متخافش بنتنا راه بيخير وداكشي لي وقع ليها ظلم والله حتى ظلم نتا تتعرف بنتك... (عينيه بداو كيتقلبو) الحااااج الحاج..... اشررررررررررررف.....!!!!
مفتاحة: (معجبهاش الحال تطردها من دارها اول مرة تعامل بوقاحة معاها وعاد فضيحة بنتها)
وااااااا شوفلك البنت كيف طلعت!!!
ام آدم: انا بقا فية غير ولدي مسيكين تيعيط لية وباين مهمووووم
مفتاحة: يشوف غيرها بنات الناس عطاهم الله
ام آدم: علاش هو كان باغي زواج من قبل راه غير منين بغا غيثة قلت الحمد الله غير منين بغا زواج اما دابا غيكون كره زواج ومايجي من جيهتو
مفتاحة: خلاص علية كما ربي خلقها هي خلق غيرها ولكن هي كانت تتقولي الغالية داخلة خارجة معاه غير هو ميكونش هو!!
ام ادم: زعما يكون ولدو؟! ختي مفتاحة ولدي اصلا متيولدش
مفتاحة: ياااااااك!!!!
ام ادم: هو متيبغيش لولاد فمرة
مفتاحة: وعلاش كان باغي يتزوج غير باش يسخن فراشو؟!!
ام آدم: داكشي بزوج تافقو عليه قالي حتى هي مكانتش باغية هاكا فهماتو، حتى غدرااتو وهانتي قلتي غيكون هادشي كدوب وفاش جينا هنا الغالية أكدت بنتها شنو دايرة
مفتاحة: وهادشي لي خلاني مصدومة الله يغصبهم ولاد هاد الجيل ردو كولشي عادي
ام آدم: يا ربي غير ولدي ميديرهاش فبالو...
~~~~~~~~~~~~~
ملاك: (فصباح بقات فبيتها حيت باها ومها مبغاوهاش تخرج باش متصادفش مع لوخرين كانت مزيرة بزااف بغات تدخل طواليط)
زمر تفوووووو
(بقات كتجي وتمشي فبيتها للي فيه 3 متر)
ليهووود وميديروش فية هاد الحالة
(دخلت مها عندها وانفاجرت)
بزااااف بزااف هاد *** مزيرة غنطرطق وحتى صلاتي مصليتهاش!!!
زهرة: سيري دابا راه خرجو
ملاك: باش زايد ليهودي ديال باك على هادا للي هنا
زهرة: سير لمك ولا ن.. (خرجت ملاك كتجري لطواليط وهي جلست فوق النموسية معاجبها حااال فهاد اللحظة مكرهتش بنتها لوكان تزوجت بمراد كانت غتكون مهنية عليها كتر ماشي فدارهم ومغبووونة ومع حتى ملاك كتحشم وتسكت!! جابتها معاهم نيشان... جبدت من فواطتها الضوبل ديال سوارت ماريوها حطت ليها شي حويجات دخلت كتنݣر من طواليط)
ملاك: ماشي عيشة هادي ولينا فوسط دارنا محݣورين واش هاد جدي وعمي نساو بابا للي صلح الدار وحط فيها فلوس صحييييييحة باش رجعها هاكا راه ماشي غراضهم يبقى معاهم باش تبقى العائلة مجموعة راه غراضهم فدوك الاراضي
زهرة: اسكتي!!! جمعي شنو تحتاجي فدار ختك
ملاك: منمشييييش هنا باقية باش كل واحد يعرف حدو..
زهرة: راه نحلف عليك نييت تبقاي هنا
ملاك: حلفي!! (خافت مها تحلف وتبقى فهاد الخبس) والله والله لوكان ماشي خديجة ختي مسكينة محنة والله منمشي لشي قنت ونجلس ليهم مسماااار فحلقهم..
اورطيغا: (كينسا راسو فالخدمة بقا من واحد لواحد فلبيع وشرا وحيت عندو نسبة فالبيع كيحاول يبيع اكتر..
كان السوق عاااامر مسالا حتى العصر طلع للكاميو وريحتو غير غنم بقا كيحسب فلفلوس كيهز النسبة ديالو كيديرها فصاك الي ديما معلقو فكتفو بحال زماݣرية وعاد فلوس الحاج كيجمعهم فجوا كبير نزل من تماك ولكن ديما كيهز فلوس معاه معندو ثقة فحد
دخلو لݣيطون كانو ديجا طلبو طاجين هو ودراري للي معاه مع تحطت النعمة طارو بيها بكترة الجوع خلاو الطاجين مزال طالق الفواار وهو خاوي رجعو للكاميو طلعو لحوالة لي متباعوش بوحدهم وللي تباعو ومخداوهش حتى ليلة العيد دارهم الفوق يرجعوهم الكوري..
نزل هو دخل للدار للي فالكوري غسل حالتو بلما بارد لبس حوايجو تيشورت وسروال بارا مشا عند الحاج لجنان لي كان مع شي صحابو عطاه فلوسو لي ديما كيديرهم فصكادو دالجلد والكارني ديال شحال خرج وشنو تباع.... ومشا من تماك مهلوووووك ولكن خاص يرجع المحال باش يكمل شغلو هز تيليفونو صونا على مو كانت مشات للرياض حيت عندها جلسة ديال الترويض وجا شريف هو لي خداها)
شريف: نتي عارفة الحاج الالة زهرة ضروووري خاص التقاليد ديالنا يكونو حاضرين
أمينة: بلعكس اولدي هاد التقاليد هوما لي كيحليو العرس حتى حنا فݣرسيف والشرق عندنا تقاليد زيييييييينة
شريف: هي فعرس مراد تديرهم لينا
أمينة: ههه ان شاء الله اولدي ندوزو بعدا عرسك، نتا غير ݣولي شنو تبغي وانا نوجدو ليك
شريف: لهلا يخطيك الالة أمينة..
~~~~~~~~~
ملاك: (تسنات باها حتى رجع مبغاتش تمشي بلا متشوفو اكترية منين سمعت انه داافع عليها قدام باه وخوه يعني تاني مرة كيوقف فوجه باه المرة اللولة على مو ودابا عليها وهادشي فرحها وريحها.. دخل مشات باست ليه يدو وعنقااتو)
رشيد: (مستغرب من هاد لبنت كل مرة كتكون فمزااج)
ملاك: (شافت فيه) انا غنمشي عند خديجة نجلس معاها غير على متولي شوية ورجع فحالي وكان ماشي طلبت ورغبت والله منمشي
رشيد: (بشك) عند خديجة؟!
ملاك: (خرجت عينها) والله!!!
رشيد: هاحنا نشوفو.. صبري ناااكل ونوصلك
ملاك: انا نمشي صايݣة طموبيلتي اصلا مزال الحال وفاس غير قريبة
رشيد: متعاوديش طردي حمزة هو راه بحال خوك بغا غير يعاون وغير يوقفو عليك داك لحلالف قوليهالي
ملاك: (تبسمت) واخا!!! شي حاجة اخرى اكبيدة!!!
رشيد: بحالك بحال مك دغيا كتصرطووني بهضووركم!!!!
ملاك: ههه نتا لي هشيييش ودغيا كتكااال
رشيد: (تبسم خرج معاها برا) مقالكش نعطيك فلوس ولا شي حاجة
ملاك: هم!! قالي نعاونك وتعوضي فالخدمة مهم بقا كيخربق
رشيد: التعويض دفعناه ليك غتعوضي غتعوضي غير متعمريش راسك
ملاك: هاد الناس بحال كيعرفونا بزااف ابابا!!!
رشيد: ضرووري غيجمعو علينا المعلومات عاد غيجيو
ملاك: وعلاش زعما راه باين اصلا مغنعطيهش وقت
رشيد: هوما فالقاموس ديالهم معندهمش شي حاجة سميتها صافي نسا ولا يستسلمو ولا يخليو شي حاجة فالنص داكشي باش الواحد ميتأمنش ليهم
ملاك: مسااليين.. (رجعت باست يد باها وركبت فالطموبيل) انا مشيييت...
رشيد: ردي لبال لراسك..
يوسف: (واقف حدا شومبر باه فلكلينيك دغيا قلبو تضر ومتحملش الصدمة كتبان ليه غير يمشي يحيح على هاد مفتاحة وجماعتها غير موو للي ماانعاه)
وعلاش مسكتيهمش!!!!!!!
الغالية: مكذبو فوالو باش نسكتهم بنتي كانت حاملة وولدت
يوسف: ونسيتي واحد الكلمة تكرفس عليها تتعاودي هادشي بحال مشات بخاطرها؟!!!!!!
الغالية: مقلناشاااااي ولكن اولدي الناس ماشي غندورو عندهم واحد بواحد باش نفهموهم هادشي للي تيهم هو صحة باك من بعد عاد نحتاجو نفهمو العائلة
يوسف: وممحتاجينش هاد الساعة ولا من بعد حتى واحد ميتسنى منا نقولو ليه كفاش وامتى وعلاش!! للي محتاجينا هو الواليد غيثة وولدها نكونو معاهم
الغالية: واش ختك قد مسؤولية تربي شي واحد؟!
يوسف: الا هي قادرة وباغية علاش حنا منكونوش فصفها الولد ندخلوه معانا
الغالية: اش تتخربق وهي يبقى تابعها كلام الناس واش حسابلك انا قلبي حجرة ولكن انا تنفكر ليها هي وحتى داك الولد لي من صغرو غيتسمى عليه ولد لحرام حتى يكبر
يوسف: وحتى سليمان!!
الغالية: كاين فرق نتا طلعت راجل ودخلتيه بسميتك اما هو فين بااه؟؟
يوسف: انا باه انا نكون باه الله يجعلني ندخلو مع سليمان ومنحرموش من مو انا نسول الفقيه هو لي يفكلي هاد المنامة غير باش نلوحوه لا
الغالية: تديرو غير ما بغيتو!!!!
~~~~~~~~~~~~~~~
ملاك: (صايݣة فطريق وكتفكر غير فاورطيغا لدابا مصوناش من لبارح فالليل فاش قطع لدابا!!!)
هاد ايخان كيخليني غير كنفكر فيه علاش مصوناش!! انا اه منصونيش غضبانة وهو علاش؟!
ياك لبارح صونا اذا راه فهمني!!! علاش ميدووزش المهم.. (هزت تيليفونها صونات على وفاء)
وفاء: افين البنت!!
ملاك: انا جاية لفاس قوليلي راكي مع خالتي امينة
وفاء: لا انا فالدار علاش جاية عاود ياكما هاربة شنو درتي؟!
ملاك: زمرة عليك انا ماشية عند خديجة
وفاء: اوا لباس
ملاك: حسابلي راكي فدارهم بغيت غير نعرفو واش تماك
وفاء: لا صباح مع فطرت جيت هنا حيت خالتي أمينة رجعت للرياض عندها الترويض اليوم
ملاك: اممم اوا صافي الا كنت غنجي نبات فالدار غنعلمك...
ملاك: (مشات لدار خديجة لي كانت كتسناها باش تخلييلها سليمان وتمشي طل على اب يوسف شيخها حيت عزيز عندها بزااف.. وصلت لتماك) واش هاد البرهوش ناعس بعدا
خديجة: شوفي هو راه مكالمي بزااف الا حتى فاق حطييه غير فرولاكس ديالو وراني موجدة ليه ماكلتوو مبدلة ليه منقياه كولشي
ملاك: صافي غير سيري كوني هانية!! الا فاق غنصوتي عليك تقولي شنو نديرلو
خديجة: ملاك ختي زوينة لكبيييييدة ملوووووكة لوليد فآماااانتك
ملاك: مالي غنقتلو؟!
خديجة: لا هو انا عارفة لقتيلة مغتقتليهش غير هو وسعي خاطرك شوية معاه وصافي
ملاك: سيري سيري شحال كتزيدي فيه نتي عاود راني انا للي مربية أنير!!
خديجة: نعام!!
ملاك: فينها غيثة ؟!
خديجة: مشات حتى هي قبيلة راه ولدها فنفس المصحة فين كاين باها.. (لبست كسيوةة بانت ليها لكريشة رشت بارفان ديالها هزت سوارت فصاكهاا ومشات.. ملاك دخلت شافت سليمان ناعس خلات لباب محلول باش تسمعو مشات للكوزينة حلت التلاااجة جبدت حلوة لي خلات ليها خديجة وكبت العصير وبقات كتاكل وتفكيرها غير فيه)
واش هاد ززمر مغيصالحنيش!!! ياكما كيمارس علية الصمت العقابي!!! معامن جا والله حتى نمارس عليه الغيرة لعمياااا نخليه كيتركل!!! انا نوريه علاش قادة!!!
~~~~~~~~~~~~
غيثة: (كتبكي معنقها يوسف) انا سباب انا سبااااب
يوسف: هي حتى انا سباب حيت قبلت بداك الكلب فاش دخل بيناتنا
غيثة: نتا كنت ضدو!!
يوسف: ولكن خليتو داخل خارج معاك كيف بغا
غيثة: خويا يوسف اش جابك لية غير بلا متقولي انا مظلومة شوف شحال بيكم لي تآذيتو بسبابي
يوسف: خوي راسك اغيثة (طبيب خرج ولكن منع عليهم الزيارة حيت مزال فوضع حرج اما الغالية واقفة بوحدها باين فيها حزن كبييييييير وصلت خديجة عندهم مشا عندها يوسف جار غيثة لي مدرعها بيد)
جات ملاك؟!
خديجة: اه خليتها مع سليمان كيف بقا عمي؟! مدخلتوش عندو؟؟
يوسف: ممنوع.. (مبغاش يعاود ليها على لمطايفة لي ناضت مع اشرف على حساب غيثة شاف فمو) الوالدة
الغالية: همم
يوسف: (مشا عندها كيواسيها عكس اشرف للي لامها على لعيالات لي كانو صحاباتها وكانو هوما سباب مرض باه للي من ديما كيحاولو عليه باش ميسمع حتى حاجة تأثر فيه)
غيبرا ان شاء الله نتي غير ددعي معاه...
مفتاحة: (وصلهم لخبار الحاج مرض بزااف عاود كان كولشي غيمشي حيت هو عزيز عندهم جا عندها خوها باش تمشي معاه حيت أمينة كانت عيانة شوية بكترة الحركات للي دارت)
غير سير اخويا
بنسليمان: (باستغراب كبير) متمشيش؟!
مفتاحة: علاش ماشي صباح الغالية لي كنت حسباها بنتي طردتني من دارها
بنسليمان: وعلاش؟!
مفتاحة: هضرة جابت هضرة شي فضيحة مشيت نبهها عليها ورجعت انا الغالطة
بنسليمان: اشمن فضيحة؟!
مفتاحة: فضيحة بنتها للي ولدت حرامي
بنسليمان: صافي سكت علية نتي عارفة تنكره لي يهضر فهاد تخربيق!!!
مفتاحة: مسمعتنيش حتى شنو كنت بغيت نقول!!
بنسليمان: وانا مالي فهاد هضرة ديال نسا واش غتمشي تشوفي السيد ولا لا؟!
مفتاحة: غير سير حتى لغدا ونمشي مع أمينة
بنسليمان: (خرج من بيتها مشا هو وولدو سعد شفيق اما حتى شريف كان تماك...)
اورطيغا: (كيهضر فالتيليفون) بالصح!! ياكما على حساب مشكل غيثة....
اممم.. داك السيد ميستاهلش...
واخا هكاك اخااي يوسف كان خاصو يعرف اليوم ولا غدا كانت غدوز فودنو راه ماشي براني اللهم يعرف بكري...
انا مزال فالمحال من الفجر وانا تنخبط...
لا لا نجي نتا مزال تما؟!
صافي شي نص ساعة نكون تماك...
(قطع راس كيقولو غير يمشي لصفرو عندها ولكن مزاال.. كمل شي خدمة عندو تماك ومشا لتماك غيشوف السيد ومن تماك يمشي عند مو يشوف كيف بقات حيت دوزت نهار عيااانة..
طلع عندهم الطابق فين كاين تقريبا كولشي تماك بعد جا عندو يوسف عاود ليه لبلان بالظبط شنو وقع عرفو الزيارة ممنوعة عليهم حتى هوما لي ولادو ومرتو!! مشا فحالو حيت عيا حتى سمع)
الغالية: مراااااااد (ضار مستغرب حيت موالف منها غير بالشمكار وصلت عندو)
كنت قلت داك نهار نتاا قادر تحل دار وعندك خيرك وعارفة غيثة عزيزة عندك
(وقف كيسمع ليها) نتا شفت شنو داز عليها وحيت ولادي وكولشي كيعزك قلت نتا تستر بنتي
اورطيغا: (هز حواحبو مصدووم عمرو نوا ولا تسنى ولا توقع الغالية تقول هادشي للي كيسمع دابا) بغيتي نتزوج غيثة؟؟؟!!
الغالية: (خرجتها من فوق قلبها) هي تتبغيك ونتا عارف هادشي وبسباب هادشي خرجت على راسها وعلينا كاملين، انا عارفاك نتا عمرك درت ليها شي حاجة قبيحة ومن ديما كانت عزيزة عندك وهاد المشكل خلا باها كان غيموت خوتها دابزو شفت حالتنا
اورطيغا: (تصدم بقا غير كيسمع راه جامي جات فبالو الغالية تخطبو لبنتها) ماااامـ..... ما
الغالية: فكر مزيااان ونتسناك ترد علية (مشات قبل ميجاوبها اصلا زربت عليه حتى فاش كتهضر عينها حانياااهم مرضياش بقا غير متبعها تلفاتو بهاد الهضرة..)
اورطيغا: (بقا غير متبعها كلامها مزال كيتعاود فودنو.. دخل لطموبيلتو شعل ݣارو راد راسو اللور ماشي كيفكر فكلام الغالية ولكن واش لهاد الدرجة وصلت بيها كيعرفها مزيان نافخة وحاسبة فراسها وكتكرهو وباش توصل بيها تخطبو لبنتها تخطب واحد مكتحملوش كان دم سنانها راه القضية صعييييبة عندهم!!! ديمارا الطموبيل وكسيرا شاد طريق لصفرو عارف ملاك غدير المستحيل باش تخرج عندو واخا مبغاش ليها صداع ولكن ضروووري خاص يشوفها واخا يعرف يدخل عندها..)
~~~~~~~~~~
الغالية: (طلعت الفوق أغلبية غيمشي فحالو من لي جاو بغاو يطلو عليه وتمنع عليهم الزيارة جلست فكرسي مهمومة نقطة ضعفها راجلها.. شافت فبنتها كفاش تبدلت وعاد حالتها وهاد الخطوة للي دارت على قبلها، من ديما كانت كتحماق على اورطيغا واخا السؤال علاش كانت كتبغيه حيت كان كيجيها معيوب من جميع النواحي ولكن هو دار العكس ماشي هو لي كان شمكار الراجل لي ختارت لبنتها كان هو الشمكار ولي شمكرها معاه كانت كتقول مزلوط بين ليها العكس وعندها احساس قوي مكيكذبش وان بالصح عندو أملاك وداير علاش يرجع فهاد زمان، كانت كتقول خايب كحل جحموم باش نفع ادم لي زوين وديما لابس لكلاص خلا بنتها مجرمة باغية تقتل ناس عمرهم أذاوها عاد حملها ونكر..
لامت راسها بزاااف بنتها كانت كل ليلة كتبكي على اورطيغا لي حتاقراتو وكانت كترغبها انها مترتابطش بادم وهي كانت كتشوف هادشي غير مراهقة وعناااد... عيااات بزااف شوفة ولادها لي كيلوموها انها أم قاسحة وهي هادشي كامل كانت دايراه كنوع من حماية ولادها حست بخنقة وغصة كبيييييرة وهاد المرة ملقات حتى واحد فجنبها حتى ختها مقدرتش تعاود ليها....)
~~~~~~~~~~~~~~
ادم: (من بعد مقال لمو شنو كاين باش يورط غيثة وتخرج تهضر انها دارت شي حاجة ليه وتحسب عليها حيت عارفها مكتفكرش قبل متهضر عارفها مكلخة ونيت يعرف شنو قالت عليه باش يعرف شنو غيدير وجد وراقو حوايجو وخرج من الدار مع صحابو نيشان للمطار صونا على ليلا تماك)
انا غنمشي لفرنسا
ليلا: (كانت مع حمزة) واش فمرة!!!
ادم: لا غندير عملية وغرجع
ليلا: وعلاش معلمتنيش من قبل؟! وشنو داكشي للي مشيت قلت لماما على غيثة
ادم: بغيتك تكوني حداها باش نهضر معاها
ليلا: راه قلت ليك هادي للي منديرش
ادم: غدا نصوني عليك باش تعطيهالي.. (قطع وبقا كيتسنى موعد طيارتو..)
ليلا: بفففف واخيييرا غيمشي
حمزة: (باغي يوصل ليه قبل ميمشي) الا بغيتي نوصلك عند خوك !!
ليلا: لا
حمزة: حسن شوفيه حيت باينة غتبقاي مديرونجية كنعرف لي كيكون حنين بحالك غيبقى تأنيب الضمير كياكلو واخا نتي مدايرة والو!!! ولكن معليش ودعيييه كما قلتي هو دابا بوحدو واخا دايرين بيه دراري!!
ليلا: ( جاها كيفهمها) بالصح؟!
حمزة: ياله نوصلك سيري نتي للطموبيل انا جاي!!
ليلا: (خدات سوارت من عندو وباستو فحنكو وهو مشا يخلص واخا كان ممكن يعط غير على السرباي لطبلتو ويخلص.. مع خرجت هز تيليفونو)
حمزة: (صونا على يوسف) ادم ماشي لفرنسا...
عرفت منين عرفت..
مهم انا علمتك..
اه غنمشي باش نتأكد واخا هكاك خلي عينك على ولد ختك.. (قطع خلص ولحق على ليلا ونيشان للمطار كيتفكر انه غيشوفو واش يقدر يتحكم فراسو ولا لا ولكن باغي يعرف أهم معلووومة حاليا لي كيبحث عليها فين هي أميمة؟؟!!)
~~~~~~~~~~~~~
اورطيغا: (قبل ميوصل لصفرو صونا عليها مرة جوج مكتجاوبش... صيفط ليها ميساج)
جاوبي ولا غندخل على مك!!!
(صونات عليه جاوب قبل ميهضر)
ملاك: سمع اولا انا صونيت ماشي حيت خايفة منك باش تبقى تهددني ولا..
اورطيغا: خرجي عندي!!
ملاك: فين غنخرج؟!! ميمكنش نخلي الولد بوحدو
اورطيغا: جيبيه معاك مالها أول مرة تجيبيه؟!
ملاك: (سمعت صوت طريق، باستغراب) فين جاي نتا؟!
اورطيغا: تلقايني فبلاصة فين موالفين تنتلقاو
ملاك: واش نتا ماشي لصفرو؟! انا راه كاينة ففاس
اورطيغا: شنااهوا!!! (وقف فجنب طريق) كفاش كاينة فاس؟!
ملاك: جيت قبيلة عند خديجة
اورطيغا: (بقا ساكت مدة) شنو هاد **** ديالك نتي!!
ملاك: (قطعت عليه) اوا ياله!!! باش يصالحني مزال كيخصر الهضرة!! (رجع صونا عليها جاوبت) شنو!!!
اورطيغا: (صاااعر) غير نوصل لتحت الدار خرجي عندي
ملاك: لا... حتى تعلم تهضر معايا باحترام الله يخليك!!!
اورطيغا: انا جاي لجد مك نوريك الاحترام!!! (قطع ومشا مكسيري على ميلقى شي رومبوان باش يضرب الدورة يرجع لفاس...)
ملاك: (معجبهاش الحال طريقتو رجعت مستفزة باش يعتاذر ويحس بالغلط ديالو كيزيد يكفسها معاها!!
بقات كتراري بسليمان واخا اصلا مكيبكيش وماشي حيت كتبغي دراري صغار ولكن هدا مساااالم حتى بكيتو خفيفة حدو بكا شوية وجدات ليه مياكل عطاتو وهو يصقر خلاها تهزو بلا هواها وزايدها بحروف كيخرجهم من فمو مثلا كيغاغي ودادادا.... دازت نص ساعة صونا تيليفونها كان هو مجاوبتش كتبت ليه ميساج)
"يوسف وخديجة مخلين ولدهم منقدرش نخليه ونهبط عندك "
اورطيغا: (جنناتو.. حط طموبيلتو فشي بلاصة خاوية ومشا باش يطلع ملقاش لي يحل لباب حتى من العساس مكاينش صونا على دار يوسف جاوبت) حلي لباب
ملاك: شنو باغي امراد واش غتكمل شنو بديت داك نهار؟!
اورطيغا: غنبقاو نهضرو هنا؟!!
ملاك: انا شادة الولد
اورطيغا: حلي لباب
ملاك: واش غطلع ومكاين حتى واحد؟!! والا تعديت علية؟!!
اورطيغا: (كتزيد تعصبو) حلي لباب املاك!! (بقات شحااال كتفكر)
ملاك: سير امراد مغنحلش ليك نتا معصب وانا معصبة مغنوصلو حتى لشي حل (حطت لانتيرفون وجلست عارفاه غيزيد يتقلق ولكن خاصو يفهم هادشي للي دار معجبهاش وهي واحدة موقف منو خاص حتى يصلحو عاد يرجعو كيف كانو.. صونات على خديجة عرفت ان يوسف غيجي يوصلها هي وغيثة ويبقى مع مو لي بايتين تماك..
اما اورطيغا مرجعش صونا عليها وهادشي كيزيد يأزمها.. حست براسها مرضت نفسيا بهادشي حتى كتفرح وترتاح شوية كتخرج ليها شي حاجة من الجنب!!)
~~~~~~~~~~~~
خديجة: (طالعين هي وغيثة من لبلاصة فين كاين ولدها)
متخافيش راه طبيبة قالت ليك الامور ماشية مزيان وهانتي شفتي شحال من وحدة بحال الحالة ديال ولدك
غيثة: (بتنهيدة حزن) بقا فية هو وبابا مسيكييين لي بسبابي راه هنا (تسالاو دموعها وباين فيها لعيا والارهاب والقلق كولشي تجمع فيها)
خديجة: مكيناش شي حاجة سميتها بسبابك هدا مكتاب الله
غيثة: قاسحة اخديجة والله حتى قاسحة عرفتي شحال هادي مفرحت!!! ولا جلست غير مرتاحة شوية!!
خديجة: غيكون خير ان شاء الله احبيبتي.. مصوناش عليك حمزة؟!!
غيثة: (حركت راسها بلا) مبقاش تيهضر معايا بزاف (وصلو عند يوسف ومشاو دازو خداو عشاهم وصلو للدار طلعو يوسف بدل حوايجو ورجع للمصحة من بعد موصااهم على راسهم باش ميخرجوش والا بغاو شي حاجة يعيطو ليه غيكون فايق الليل كامل...)
اورطيغا: (شاف فيوسف للي مشا، كان جااالس فالطموبيل غير يهضر معاها رجع صونا عليها وجاوبت)
متنزليش دابا؟!
ملاك: (حسابها غضب ومشا) مزال لتحت؟!
اورطيغا: نزلي املاك
ملاك: (عجبها الحال يتسناها عاد زادت فرنست ولكن مباينتش) مراد خلي حتى لغدا
اورطيغا: دابا غير تنزلي ولا انا للي غنطلع!!
ملاك: كولشي عندك بالتهديد؟!
اورطيغا: (كيرطب بالسيف عليه) متنهددش.. نزلي املاك
ملاك: (عوجت فمها) مزيدش على خمسة دقايق مبغيتش نتعطل!!
اورطيغا: واااخ غير اجي!!
(قطعت دخلت لبيت لقات غيثة كتلبس حوايجها بشوية على الجرحة لي فكرشها لبست هي كيطمة واااسعة) مقلتيليش شنو غتسمي ولدك؟!!!
غيثة: محمد
ملاك: بالصح!!! زويييينة!!!
غيثة: علاش جاتك عجب!!
ملاك: حيت نتي كيليميني قلت غتسمي شي سمية ديال دااااك تخربيق ههه
غيثة: ههه يا ملاك تتعطيهالي فوجهي ههه.. لا بغيت نسميه محمد عزيزة عندي هاد سمية
ملاك: مزياان والله يشافيه ليك ويخليكم لبعضياااتكم..
غيثة: اميييين.. شوفي انا عارفة انا لي درت ليك المشاكل مع مراد وقف..
ملاك: نتي مدرتي واالو!! (دارت شالها) وحنا ممخاصمينش غير مناقشين وصافي.. انا مشيت (دارت بارفانها ودارت عمر خفيف علمت خديجة هزت ساروت الدار ونزلت لقاتو حدا لباب سدت لباب بشوية متقلة فلمشية.. زادت القدام وهو تااابعها مشات لحدا طموبيلتو ربعت يدها وبقات واقفة)
شنو امراد؟!
اورطيغا: تتشحفيني املاك باش تنزلي؟!
ملاك: (قلبت وجهها راسمى ملامح الجدية مع الغضب)
اورطيغا: (حل ليها لباب مطلعتش) طلعي نمشيو لشي بلاصة نهضرو
ملاك: حتى هنا نهضرو ولا ناوي تاخدني لشي خلا و تبقى تغوت وتضرب!! حيت بانلي نتا هاكا تتناقش
اورطيغا: هاكا ديما تنهضر معاك املاك؟؟!!
ملاك: (شافت فيه) منين خرج منك داكشي داك نهار يعني اصلا فيك غير مجاتش الوقت باش يخرج!!
اورطيغا: محطيتيش راسك فبلاصتي!!!
ملاك: حطيت.. داكشي باش نزلت دابا، أمّا مكنتش غنزل... سمع امراد كولشي نقبلو منك الا العنف ماشي انا لي تقبل على العنف
اورطيغا: والكذوب نقبلهم انا منك هانية؟؟!!!
ملاك: انا مكذبتش ونتا عارفني علاش خبيتها!!!
اورطيغا: دابا طلعي املاك نمشيو لشي قنت ونهضرو فخاطرنا
ملاك: (دارت راسها بحال كتفكر وهي ميتة باغا طلع معاه.. عاد طلعت سد لباب بشوية عارفها خاصها غير فين تغضب ومشا طلع ديمارا وتحرك من تماك)
فين غنمشيو؟!
اورطيغا: وليتي تتخافي مني املاك!!
ملاك: مكنخافش ولكن... تصدمت فيك
اورطيغا: تصدمتي فية ݣاع!! على اساس بقيت تنقتل فيكم وحدة بوحدة
ملاك: يعني الضرب عندك عادي!!
اورطيغا: متحكمتش فراسي وحدة تتقولها بفمها انا لي خديت مك لتماك باش تقتل شنو تتسناي مني ندير!!
ملاك: وانا؟!
اورطيغا: نتي ضربتك!!! امتى؟!
ملاك: راه اصلا مشكلة الا معقلتيش!!!
اورطيغا: واش داوية بنيتك امتى ضربتك ابنادم؟!
ملاك: تطنز!!!
اورطيغا: نتي لي طانزة علية هاد الساعة!!! (مجاوبتش) اخر وحدة نضربها هي نتي
ملاك: وداك دفيع؟!!؟؟
اورطيغا: علاش هداك تيتسمى ضرب؟!!! واش نتي متتقوليش داك بنادم الله يحسن عوانو!!!
ملاك: الا دوزت ليك دفيع حتى الضرب نقول لا مسكين مكانش واعي محسش على راسو سمع امراد انا تضربني ميفكوني معاك غا البوليس!!!
اورطيغا: ههه ياااك
ملاك: والله منعقل عليييك قلبي نشدو نزطم عليه ومنتافكش معاك الا لحمي وكرامتي عزاازين علية
اورطيغا: (بقا كيظحك وهي كتعصب) البوليس ݣاع املوووكة!!!
ملاك: جرب!!
اورطيغا: (وقف الطموبيل شافت كانت جريدة نزلت قبل ميهضر زادحة باب الطموبيل شد لسااانو غير بالسيف.. تبعها الجردة كان باقي فيها شوية دالناس جلست فكرسي لحق عليها وجلس كحزت من حداه)
علاش رجعتي من داركم!؟!
ملاك: على حساب خديجة
اورطيغا: متأكدة!!!
ملاك: واش جايين نهضرو فهادشي؟؟؟
اورطيغا: تي مال مك غير تتخرحي فعييينك!!
ملاك: هااااااا..... هاااا نتا هو نتا الا مغوتش وعرعرت متقدرش تهضر بشوية!!
اورطيغا: انا هاكا وعمري كنت مرسوم بحال شي نونوس اي واحد كفاش تيتنيرڤا!!! وداك نهار معجبنيش الحال تكوني وحدة من لي خبعو علية الا قستك ولا شي حاجة غير مااا.. مغتفهميييش!!!! حيت صافي فبالك انا ضربت والسلام!!!
ملاك: انا ديما كنفهمك ولكن نتا كنت قبيح بزااف معايا وهادشي كنشوفو فالقدام!!! تضرب وحدة حاملة!! وتدفعني وانا للي كنت خايفة عليك!!!
اورطيغا: ونتي مااالك فيها!!! زعما خايفة نهار تكوني حاملة نبقى نشبع فيك عصى
ملاك: انا ماشي غيثة لي نتضرب ونحط يدي علىى خدي ونبقى نتغبن ونبكي انا حقي منسمحش فيه واخا تطيح الروووح
اورطيغا: (تبسم وهو كيشوف فعينها) هي نخاف على *** معاك
ملاك: كنهضر بالصح!!!
اورطيغا: اليد لي تمد عليك تقطع قبل متقيييسك
ملاك: مشفتش
اورطيغا: انا مضربتكش امليكة غير متحمقينييش!! (شافها نايضة وهو يوقفها جلسها) عمر كانت نيتي نضربك هو صراحة شي مرات تتكون داااايزة فيك ولكن باش نضربك لا
ملاك: ضربتني وطيحت مني!!
اورطيغا: اوا وباش تحكمي
ملاك: معندي مااانحكم غير هي مغتعاودش حيت اسهل طريقة تكرهني وتعيفني فيك هو هادشي
اورطيغا: اممم.. (عارفها شي وحدة لي متقبلش لعصا راه خوات دار باها غير على هادشي ولكن هو معاقلش حتى واش ضربها كما كتقول مكان حاس بواالو بقا سكاات بيناتهم هي كتشوف اونفاص ليها وهو كيشوف فيها)
علاش رجعتي من داركم عاود عمك؟
ملاك: لا
اورطيغا: متخبيش علية
ملاك: هوما مزال مبغاو يفهمو وبابا دابز معاهم على قبلي وخديجة طلبت منهم ورغبتهم باش نونسها هاد ليامات صافي قالي سيري عند ختك هاد اليوماين
اورطيغا: متأكدة!!
ملاك: وعلاش غنكذب !!؟
اورطيغا: نهبط نهضر معاه باش نفضيو هاد المنامة
ملاك: مغنتزوجش باش نهرب من تماك هاديك دارنا ودار بابا بغاو ولا كرهو
اورطيغا: وأنا؟! انا باغي نتزوج باش نهرب من ***** كااامل لعندك... راه الا هربتي عندي مغتنقسيش من قيمتك وداك الكرامة لي تظلي تطبخيلي مخي بيها راه تتعني ان راحتك معايا هاكا انا تنفهمها
اورطيغا: ...واخ انا عارف شنو غندير حيت صراحة الهضرة ماشي معاك الهضرة مع رجال نيشان!!...
(بقاو ساكتين مدة مزال كيحسها مغيرة) علاش مجيتيش تقوليلي على غيثة!!
ملاك: نتا غير تفكر شحال من مرة كنت كنبغي نهضر عليها ونقولك شنو كاين ولكن نتا غير كتسمع سميتها كتصعر.. تفكر خاصك تفكر
اورطيغا: كان خاصك تقوليلي املاك
ملاك: شنو غنقولك امراد!!
اورطيغا: مثلا الكلب بسبابو حفرلك هو وديك ال**** باش دارو ليك داك القالب
ملاك: داكشي داز ومكنبغيش نهضر فيه
اورطيغا: مدازش حنا مزال فيها مشاكلك مع عمك وجدك باقي كولشي بسباب هادشي
ملاك: نتا لي درت لحشيش لباه؟!
اورطيغا: اه
ملاك: وعلاش؟!
اورطيغا: (عاود ليها فلاش ديال ليلا) منين دارو هكاك مبغاتش تصرطلي كفاش يتجمعو علية!!! واحد خونا فتا واحد الري مفكرتش جوج مرات درتو ليه وتسعت بعييييد
ملاك: (بغضب) تستاهل داك لعصا وكان حسابلي هكاك ݣاع منقااابلك ديك الليلة غزا فيك لقاك مع بنتو مالو غيتعرض ليك بالاحضان
اورطيغا: يااك!!! انا بعدا من ديك الليلة بديت كنستحلاك
ملاك: (عوجت فمها كان عندها شك دازت بيناتهم شي حاجة هو وليلا، ولكن مكانتش بغاتو يأكدها ليها واخا ماضي ولكن شعلها)
اورطيغا: سمعت داك ولد جيرانكم تيعاون غيثة
ملاك: بزااف اكترية منين عرف ادم كان متافق مع مرتو يعني حتى هو حفرلو وللي فهمت راه حاطين عليه
اورطيغا: منعاودش نشوفك تتهضري معاه
ملاك: حمزة راه بح(خنزر فيها وهي ملات من هاد السيرة) بففف مراد خالتي أمينة خايفة عليك من هادشي بغاتك تبعد باش تكون هي مرتاحة
اورطيغا: ونتي بانلك انا غنبعد
ملاك: لا... (تشاوفوو مدة) غير هو ضرب وقيس
اورطيغا: ههه مزيااااان دابا تتفهميني...
شافو الساعة كانت 1 دالليل هضرة جابت هضرة لي خلا ملاك ممرتاحاش هو البرد لي تحرك شوية اما محسوش بالوقت وهاد الجلسة كانت خاص ضروووري تكون..
اورطيغا: تاكلي شي حاجة قبل متدخلي؟!
ملاك: لا لا مافيهاش الجوع
اورطيغا: متأكدة عارفك جويعييينة
ملاك: مرااااد!!! انا اصلا مزال مقلقة منك يحسابلك دغيا غنسى داكشي للي درت فية بجوج كلمات!!
اورطيغا: حتى انا مغنساش !!
ملاك: وتفرݣع!!
اورطيغا: غترجعي لدارك ولا دار ختك؟!
ملاك: لا عند خديجة بحال والو بابا يصبح على صباح يجي ومبغيتش نضيعها معاه عاود
اورطيغا: تصالحتو مزيان؟!
ملاك: على داكشي لي دار اه وقالتلي ماما خالتي أمينة هضرت معاه من تماك وهو مرطب الجو
اورطيغا: الوالدة!! شنو قالت ليه؟!
ملاك: معرفتش.. (وقفت) ياله نمشيو بردت بزاف
اورطيغا: (وقف حتى هو عارفها غير مسألة وقت وترجع كيف كانت معاه ركبو وصلها قبل متنزل شد لباب بيدو مقرب بقات كتشوف فيه بوجه جامد) غتبقاي هاكا؟!
ملاك: انا معجبنيش الحال واخا انا معاك فشي حوايج ولكن انا شنو درت نيتي كانت غير الخير وعييت كنتجازا بالخايب امراد
اورطيغا: راه مشعرتش براسي املاك
ملاك: اوا حس بيا حتى انا!!! لي كنهرب من كولشي لعندو فأول مشكل وعصبية شنو دارلي
اورطيغا: صافي ضربتي كولشي فالزيرو وركزتي غير على هادي
ملاك: مقلتش نتا متسواش غير انا هاكا بقى فية الحال وهادشي راه عادي نورمال باش تعاتبني علاش انا هاكا خاصك دير شي حاجة باش منبقاش هاكا
اورطيغا: (بقا كيشوف فيها) تتغمقي علية بقرايتك؟؟؟
ملاك: (تبسمت) تصبح على خير
اورطيغا: صبري نوصل معاك (هبط وصلها حدا لباب مخلاتوش يدخل معاها حيت غتوقع شي حاجة واخا غير بوسة وهي غتستسلم اللهم من اللول متقبلش.. رجع للطموبيل صونا عليها حتى عرفها دخلت للدار عاد مشا لدارو من بعد تعب ديال نهار طويييييييل....)
حمزة: (كان غيتجنن منين عرف طيارتو مشات كان غيتواجه معاه يعرف غير فين أميمة لي عندو شك كبير عارفها فين كاينة وبحال والو عاونها تحرݣ مهم غير يقولو فين هي)
مقالش امتى يرجع؟!!
ليلا: شفت على تبرهيش اجي عندي ومنين جيت لقيتو مشا!!!!!
حمزة: ومقالكش امتى يرجع؟!
ليلا: لا مصاب ݣاع ميرجعش كولو غير صداع ومشاكل
حمزة: (براكة غير هاد الاعصاب للي بانو مخاصوش يبين كتر)
ليلا: غنبقى معاك هاد الليلة معصبة بزااااف ومبغيتش نبقى بوحدي
حمزة: (شاف فساعة يدو) خاص نمشي لبلاد باش نسالي شي شغل وغدا نجي بكري نشووفك
ليلا: مقلتيلي والو!!
حمزة: هانا قلتها ليك دابا خاص نمشي.. فين نوصلك؟!
ليلا: حمزة مالك؟!
حمزة: شي حاجة فالخدمة خاص نريݣلها قبل متكبر المشكل
ليلا: اااه صافي... واخا.... غدا متأكد نتلقاو؟!
حمزة: اه اه غير نسالي نجي عندك مهم انا غنصوني عليك نعلمك.. (بانت فيه معصب.. وصلها لدارهم وهو مشا لفين جالس كيلوم راسو لي تعطل كان ممكن على الاقل يعرف بلاصة أميمة...)
~~~~~~
اصبحنا واصبح الملك لله..
اب يوسف كانت الحالة مستقرة نسبيا دخلو شافوه ولكن ممنوع يهضرو معاه
يوسف: الوالدة سيري للدار نتي راك الليل كامل مرتاحيتيش
الغالية: (حركت راسها بلا) انا نزل نشوف ولد ختك
يوسف: (بقا كيشوف فيها الليل كامل منطقات حتى بشي كلمة غير ساهية حتى الماكلة ولا الما مبغاتش تشربو عارفها فاش كيكون باه مريض كتكون حالتها خايبة راه هو نقطة ضعفها!! جا أشرف جايب ليهم فطور)
أشرف: فين الوالدة
يوسف: هبطت لتحت تشوف ولد غيثة
أشرف: علاش غيهرب تبقى مع الواليد لي كانت سبابو
يوسف: سعداااتك اخويا محضرت على والو محرقت اعصابك وومرضتي فهادشي وزايدها منفخ ومعاجبك حال
أشرف: حيت نتوما تتخبيو
يوسف: على هادشي نيت الا عندك باش تعاون اما نتير والغوات راه كامل تنعرفو ليه.. انا نمشي لداري وبعد من الوالدة براكة داكشي لي فيها كافيها....
ملاك: (صوناو عليها من الخدمة باش يتصنتو ليها يعني قربت تدخل... لبست دغيا بالفرحة حوايجها وخرجت بلا فطور مشات لعندهم وهي خااايفة متوترة ولكن حاولت تبين العكس كما العادة صونات عليها بريڤي جاوبت) وي!!
حمزة: واش عيطو ليك فالخدمة؟!
ملاك: حمزة!! اه عيطولي ونتا؟! باش عرفت؟!
حمزة: لا حيت حاط لاديميسيون ديالي واخا مزال متسنات قالهالي باك
ملاك: وعلاش احمزة ضيع راسك ونتا باغي ديك الخدمة راه ماشي ذنبك لا نتا لا أنا
حمزة: صعييب املاك رجع لتماك ديك الدخلة داك نهار عمرها تنسالي
ملاك: دفع ميطاسيون حتى نتا لشي مدينة اخرى
حمزة: منخليش الوالدة بوحدها وحتى رزق الواليد انا نتكلف بيه ومباغيش نخوي صفرو
ملاك: ولكن نتا مكتبغيش داكشي
حمزة: معلييش، مهم راني هابط لفاس داير مع عمي رشيد باش يرجع معايا وغيجيب شي وراق من المحكمة غتحتاجيهم مهم نتي متضهشريش وخرجي عيينك
ملاك: واخ.. (قطعت وكملت الصوݣان معرفت واش تصوني على اورطيغا تقولهالو ولا لا محست حتى دوزت نمرتو كتصوني مجاوبش كملت الصوݣان صونا عليها باها كان مع مها كيأكد عليها عاااود باش متخافش.. وصلت لتماك حطت الطموبيل مبغاتش مشكلتها تناقش هنا فالبلاصة لي غتبدا خدمتها فيها باش تبقى صورتها نقية وميكون حتى شبهات عليها من قبل الزملاء فالخدمة ولكن..
دخلت سولت على سمية لي قالو ليها ومشات لبيرو فين نعتو ليها كتسنى... كتبت ميساج لاورطيغا وهي متوترة بزاااف داكشي رجع عندها بحال غير لبارح وقع ليها داك المشكل)
"مراد عيطولي فخدمتي وانا فيها دابا"
صيفطاتو معرفت متكتب فيه ماشي بحال الهضرة لي كيخرج من فمها شنو عندها فقلبها.. بقات شي 5 دقايق وهو يجي واحد وقفت
...: تفضلي مدام ملاك
ملاك: (بلا متحس تابعاااه) أنسة (عضت لسانها ندمت علاش صححت واش هي دابا فمدام ولا أنسة!!)
...: (شير ليها تجلس وجلس) باغدون كانو قالولي مزوجة
ملاك: (بنصف ابتسامة) ماشي مشكل عيطتولي قبيلة!!!
....: (كيقرا شي وراق) سمحيلي نصحح المعلومة حيت عندي هنا مكتوب مزوجة بالسيد حمزة ****...
ملاك: (باستغراب آش جاب قضيتها لخدمتها لشكون راجلها وسمييتو مداروش معاها هاكا حتى فنهارها اللول دالخدمة..) سمحلي ولكن معرفتش اش دخل هادشي فالخدمة!!
...: غير اجراءات شكلية باش نعرف على حساب الوليدات الا كاينين
ملاك: هه مزال معرفت شنو العلاقة!!! مهم واش غرجع نخدم؟!
....: ضرووري.. انا هنا تنعمر الإجراءات المالية باش تاخدي التعويض ديالك
ملاك: (تحلو عينها) شحال؟!!
....: 40000 درهم
ملاك: (نسات التساؤلات ديالها و دغيا فدماغها عرفت لمن تعطيها السمسار باش تسالي كريدي ديال الدار وتهنا)
.....: بالنسبة للخلصة ديالك مزال مرجعت... في حالة هاد شهر متخلصتيش غتجمع ليك راپيل على مترجعي للخدمة
ملاك: (تبسمت) وامتى رجع للخدمة؟!
....: غيبقاو معاك على اتصال وغيعلموك هاد الايام
ملاك: نتا فالادارة المالية علاش كتسول على زواج ديالي؟؟!
....: غير اجراءات شكلية وصافي
ملاك: اممم (سنا الشيك وعطاه ليها) دابا؟!! غتعطيهلي دابا؟؟!
....: راك نتي لي تضررتي أنسة ملاك وكاين ناس مبغاتش هاد الضرر يزيييد كتر
ملاك: شكون؟!
....: (دار الفكس فودنو) باغدون (بقا كيهضر وهي كدور عينها مد ليها الشيك تلفها بقات كتقرا وتعاود واخيييرا غتهنى من كريدي ديال الدار حتى الا تعطلت خلصتها ماشي مشكل المهم متزيدش تحاااشم ومتخلصش طريطات راه مراد خلص وحدة وبقاو ليها 3 و4 فطريق تبسمت حتى طلعو حنوكها سارحة بعقلها فهاد المدة خدات دار وطموبيل ودابا عندها زيرو كريدي مكاينش شي حاجة احسن من هادشي غيوقع ليها يمكن هدا هو التعويض لي صيفطو ليها الله ومتأكدة انها تستاهلو حيت مغلطتش وربي كبيييييير.. وقف على اساس تابعاه شي خدمة)
الإدارة غتاصل بيك هاد الايام باش ترجعي (عطاها ورقة) خاصك تجيبي معاك هاد لوريقات وحتى الانتقال ديالك من صفرو..
ملاك: اه... (شافت فالورقة ورجعت شافت فيه) شكرا (خرجت كان كيحسابلها غيهضرو على حساب المشكل ولكن هاكا احسن.. خرجت برا غطير بالفرحة ركبت طموبيلتها ونيشان عند السمسااار....) الله على راحة اللللللللللللللله.....
ملاك: (طلقت الموسيقى كتشطح برويسها عجبها الحال رزق وجا عندها حتى لبين يدها وهي مدايرة عليه!! وصلت للحومة مشات لمكتب السمسار مخرجة داك الشيك للي صوراااتو وعطاتوو ليه باش يعطيه لمول الدار دار معاها الإجراءات انها عطات فلوسها وداتها للمقاطعة ورجعت عندو بقا غير يجاوبها منين يقولها لمول الدار خرجت وقربت تنقز بالفرحة صونات على مها وخوتاتها قالتها ليهم.. صونا عليها مراد جاوبت ناسية حتى واش مقلقة منو) الووووو
اورطيغا: فينك؟!
ملاك: رجـــــــعــــــــــــت من الخدمة
اورطيغا: شنو دارو معاك؟
ملاك: خلصوني ههه
اورطيغا: مال مك واكلة شي حاجة كفاش خلصوووك؟!!! (مبغاش يقول ليها كفاش قضية داك الشيك)
ملاك: انا خلصت داري ونتا لااااا!! ههه
اورطيغا: واش واكلة شي حاجة من غير الخبز!!!
ملاك: اغييير الفرحة خلصت الكريدي للي بقالي فالدار
اورطيغا: اممم.. هي غتخلصي معايا دارنا
ملاك: ههه
اورطيغا: منين جاوك فلوس!!
ملاك: راه بالصح شديت التعويض ديالي والخلصة غتجمعلي حتى هي راپيل الا كانت شي لعااقة نعاونك
اورطيغا: ياااك... ماشي حطيتي فلوسك كاملين للي عندك؟!!
ملاك: ورتاحيييييييت امراااد كنت باغا نسالي هاد لكريدي راك شفت مسكين مول الدار غير صاااابر معايا (باها كيصوني عليها) مراد بابا كاين فاس وكيصوني علية
اورطيغا: أنا ندخل لفاس ونجي عندك
ملاك: انا مزال مقلقة منك
اورطيغا: حتى نجي نبوسك وتنساي
ملاك: اممم مسكييييين مهم انا نجاوبو.. بسلامة (علمات باها فين هي وبقات كتسناااه وبقات مستمتعة بديك الورقة للي كتقرا ان مبقاش عليها كريدي فرنست بفرحة كبيييييرة)
الحياااااااااااااة....
~~~~~~~~~~
حمزة: (كان كيعاود لرشيد كولشي حتى علاقتو مع ليلا على شنو ناوي.. اصلا من ديما موالف كيعاود ليه) وهرب من بين يدي الكلب
رشيد: وقلت هادشي فخدمتك
حمزة: ضروري اي حاجة كنعلم بيها الشاف ديالي هوما مراقين وانا مراقب ولكن الا مكان حتى شي جديد غيبداو يتراجعو حيت مكاين حتى شي دليل ضدو وحنان معارفاااهش فكمارتو
رشيد: موصيييبة هدا وعلاش هادشي كامل
حمزة: معرفتش كما قلت ليك راه ماشي غير انا وملاك راه بزاف للي تقاسو... (معاودش على مراد وليلا كفاش حتى تبدا هادشي وشنو أصل المشكل.. بانت ليهم طموبيل ملاك مشاو وقفو حداها خرجو وخرجت مفرنسة مشات عند باها عنقاتو)
ملاك: خلصت لكريدي
رشيد: هههه ها ربي نصرك علييهم
ملاك: وييييه تصدمت قلت غيتصنتو لي ويبداو علية بالاسئلة ولا شي حاجة هاكا!! حتى كنشووف الشيك وكيهضرو معايا غير على الإجراءات المالية
حمزة: ماشي هاد الشيك خاصك تاخديه من المحكمة!!!
ملاك: مسموووم هوما بغاو يسهلوها علية اش داني لشي محاااكم
حمزة: ههه بصحتك...
ملاك وباها مشاو يشوفو باين يوسف وكتعاود ليه فطريق على غيثة لي عرف بقصتها
رشيد: شفتي علاش مكنتش نتيق فالزنقة الدنيا خايبة ابنتي
ملاك: بالصح!! ولكن هدا راه كان خاطبها
رشيد: واخا خاطب ابنتي مخاصش نتيقو فأي واحد الخطوبة راه غير وعد بالزواج مكيعنيش ندخلو معاه ونخرجو ونتيييقو
ملاك: (عارفاه كيمعني عليها) بالصح
رشيد: هاد الوقت صعاابت ابنتي.. (وصلو المصحة دخلو كان أشرف تماك وعمامو رشيد حدو شافو تمنى ليه الشفاء حيت الزيارات خاص تكون قليلة سول ولدو عليه وتمو ماشيين خارجين حتى كيشوفو يوسف وغيثة داخلين تسالمو معاهم)
غيثة: شفتو بابا كيف بقا؟!
ملاك: مزيان الحمدلله هضر معانا ݣاع مسكين
غيثة: تمشي تشوفي محمد؟!
ملاك: بابا انا جاية (مشات مع غيثة شافو الولد وهي رجعت عند باها ولوخرا طلعت عند باها..)
رشيد: فين غتمشي دابا؟!
ملاك: نرجع عند خديجة (وصلها لتماك وهو خدا طموبيلتها مشا يتقدا شنو بغا.. طلعت لقات خديجة كتقاتل باش توجد غدا لباها يكون زوين شدت عليها الولد وخلاتها تكمل شغلها صونا عليها مراد)
هدا حسابلو دغيا سمحت ليه!!!
(مجاوبتش مشات حدا خديجة كتذوق من طياب ويتعاودو)
خديجة: الغالية من لبارح وهي ضاربة الطم اكترية فاش جاو العائلة
ملاك: مغيرضاوش يقولو شنو وقع لغيثة
خديجة: مستحيل تخرج من فمها ولكن على للي فهمت من خالتي امينة منين طردت مفتاحة راه ساهلة ضور حتى فعائلتها
ملاك: خاصها توقف مع بنتها صراحة
خديجة: ويييه على الله دير العقل
ملاك: والولد علامن غيتسجل؟!
خديجة: على للي فهمت غيدعيو ادم هادي اخر هضرة تافقو عليها...
حمزة: (تأكد ان ادم بالصح سافر وتطبع فالباسبور ديالو حيت ميمكنش يتيق فيه..
مشا للمصحة بقا كينتاضر شحااال منين مبانتش ليه هبط و دخل لفين ممكن يلقاها وتماك لقاها كطل من الزاج كتفرج فيه بلا ملل)
غيثة!!
غيثة: (ضارت لقاتو) حمزة؛! (تبسمت) صاڤا!!
حمزة: الحمدلله كيف بقيتي؟! (شاف فولدها) ووو كيف بقا هاد لولييييد
غيثة: محمد بغيت نسميه محمد ان شاء الله
حمزة: (تبسم معرفش علاش حس انها سمات على سمية ولدو للي مات وكان عاودلها عليه) الله يخليه لييك ويشافيه
غيثة: امييييين، شنو درت؟!
حمزة: (حرك راسو بلا) مزال معرفتش فين هي
غيثة: مثلا الا طلبت سماحة منك ترجع ليها؟؟
حمزة: هه غيثة وكان غير معاودتش ليك التفاصيل ديال التفاصيل فين غرجع الله يهديك انا كنتمنى غير منلقاهاش بوحدها باش منقتلهاش
غيثة: متخرجش على راسك احمزة هي غتشد غتشد
حمزة: مهم.. نتي كيف غادا؟!
غيثة: تنبرا ولكن معرفتش هو امتى يبرا عييت تنتسناااه تنحلم بيه كل ليلة مكرهتش يعطيوه لية قالولي مزال 20 يوم بزاااااف
حمزة: قريب قريييب ان شاء الله خاص...
أشرف: (جرها من شالها حتى تحايد) اجي نتي !!
حمزة: اسبحان الله اشريف شنو هاد الجرة داير ليها
أشرف: هادي راه ختي ابنادم!!!!
حمزة: وغير ختك تزول ليها حجابها من راسها قدام البراني!!!! بقات فختك!!
غيثة: (بقات واقفة كتشوف فحمزة هي غير ولفت الفولار ماشي دايرة الحجاب ولكن توشاااها بهاد الكلمة شافت فأشرف كترد فولارها) شنو بغيت مني اشرف!!!
أشرف: شنو!!! هادا الجديد ديالك مزال حتى مكملتي شوهتك وباغية تزيدي شوهة اخرى!!
حمزة: لا حول ولا قوه الا بالله العلي العظيم واش كولكم دايرين هاكا (كيقصد الغالية) !!!
غيثة: بعدني أشرف يوسف قالك بعدني
أشرف: تحركي زيدي قدامي!!
حمزة: خونا اجي نهضرو بالعقل شوية دابا راك غير كترݣع فهمناك مقسح من جهة ختك ومراضيش ولكن راه هي للي واكلاها من هادشي كااامل...
أشرف: (طلعو وهبطو مكره مراضيش) شكون نتا اصلا باش نهضر معاك!!!! (مشا من تماك مقصد يوسف يتفرݣع عليه..)
حمزة: متسوقيش ليه غير مراضيش ومفاهمش
غيثة: هادشي مبقاش تيهمني احمزة انا باغية غير ولدي وبابا يبراو اما لي بغا يتقلق والا ميفهمش شغلو هداك!!
حمزة: غيبرااو.. نوصلك للدار؟ راكي عاد خارجة من عملية وخاصك ترتاحي ونيت باش تكوني فصحتك مزيان منين يعطيوك ولدك
غيثة: (حركت راسها باه دارت باي باي لولدها وخرجت معاه كتقاد فشالها ركبت معاه دايرة الصمطة شدت فبلاصة الفتحة) مقدرتش نديرها
حمزة: زوليها ماشي مشكل
غيثة: والبوليس؟؟؟
حمزة: غير زوليها.. (حيدتها) شنو تبغي تاكلي؟!
غيثة: مقدراش والله وصلني غير لدار خويا
حمزة: كنتي تتقولي منين تولدي بغيتي تاكلي حاجة كنتي ديما كتشهياها (تبسمت) واخا معرفت شنو كيعجبكم فداك العجب
غيثة: هه السوشي زويييين
حمزة: حوت خضر وصافي!! (بقا موضوع فموضوع مشاو ريسطو جلسو طلبت لي بغات وهو خدا طاجين لحم بالبرقوق) خوك أشرف من ديما هاكا معاك
غيثة: (حركت راسها بلا) بلعكس هو كان هاااادئ مكااااالمي تيخليني ندير لي بغيت يوسف لي كان قاسح معايا ودابا لقيت العكس
حمزة: متحكريش بزااف راه حتى الصدمة كتلعب دور
غيثة: واش ضرووري كل واحد خاصني نفهمو!! حيت تنبقى انا الغالطة للي ضرني فقلبي هو بلاصتي فالدار غتبدل 180 درجة كفاش كانو تيعاملوني ويشوفوني انا عاذرااهم ولكن... (حط السرباي غداهم)
حمزة: فكري غير فاليوم غدا حتى واحد معارف شنو غيوقع فيه... (بغا يهز ياكل) معطانيش خاطري!!
غيثة: ههه جرب جرب مغتخسر والو..
حمزة: غنحس براسي كيليميني!!
غيثة: ههه بلعكس والله زوييين نعطيك من المقلي حسن باش ميجيكش السومو قاااسح
حمزة: خليني اغيثة الله يحفظك مع لي كنعرف طويجييين بعقلو
غيثة: ههه راه حتى انا تنبغي طواااجن
حمزة: اممم تيقتك..
ملاك: (جا باهم تغدا معاهم من بعد داز عندو حمزة باش يوصلو معاه لصفرو... بقات جالسة هازة كتاب من مكتبة يوسف كتقرا فيها حتى جلس حداها) حسابلي مشيت !!
يوسف: مزال! (زفر) كاين شي عائلة تما مبغيتش نتلقا معاهم
ملاك: على حساب غيثة ؟!!
يوسف: ماشي كولشي فخبارو لبلان ومبغيناش تزيد تعرف وعاد انا واشرف متنتفاهموش
ملاك: اممم.. معليش صبر هو مفاهمش مزيان حيت صراحة مكانش خاص يتخبع عليه باش حتى هو يكون معاكم من اللول عارف شنو واقع، راه غتجيه فشكل يتكب عليه كولشي دقة وحدة غير شوف شنو وقع فالتالي
يوسف: حتى انا تكب علية كوولشي وغضبت وصعرت ولكن مدرتش بحالو رديت اللومة لجهة أخرى!!
ملاك: كل واحد وعقلو ايوسف وكولها وكفاش كيفكر ميمكنش تكون ردة فعل ديالك بحال ديالو كل واحد وكفاش كيقراها فراسو
يوسف؛ ونتي شنو درتتتي مع اورطيغا
ملاك: والو.. كنهضرو..
يوسف: هو معذووور
ملاك: (حركت راسها باه مبغاتش تقول شنو وقع ديك الليلة) شفتك درتي الصحبة مع حمزة!!
يوسف: جوونتي داك السيد كنت فاهمو غلاط
ملاك: مكيحملووووش مراد
يوسف: ههه وراه هداك هو النورمال!! ياك كان خطييبك
ملاك: ماشي شي خطباااااااااا غير ظحك الجيران بين مواتنا وصافي بحال ديك القضية ديال خلي بنتك لولدي منين تكبر يعني ماشي شي حاجة راه موصلناش درنا خطوبة رسمية
يوسف: ولكن للي شفت هو كان جدي معاك بزااف
ملاك: غير طرا واحد الديكور مرضاااش وكان كيفش فية داكشي!! ومنين فهم راك شفتيه دابا على حقيقتو راه هدا هو حمزة للي كبر معانا.. قولي واش بالصح غدعيو ادم؟!
يوسف: حتى نشوف مع المحامية شنو خاص نديرو باش ميشدنا حتى من جهة الولد خاصو ضروري سمية ديال باه
ملاك: اممم داكشي لي كنت بغيت نقولك راه هو ماشي سااهل مديرو حتى شي حاجة حتى تسولو على راسكم مزيان
يوسف: (صونات مو قالتلو أشرف غيمشي ناض هو مشا لتماك وهي بقات جالسة حتى جاها نعاس وناضت تكات حدا غيثة..)
ملاك: (ناضت من نعاس مدوخة حيت نعست بزااف خرجت لقاتهم فوسط الدار مجمعين كاينة حتى وفاء جلست حداهم كتاكل حيت بقاو حاطين الݣووتي، صونا تليفونها كان اورطيغا ناضت تجاوب مبعدة)
وي!!
اورطيغا: شنو زعما نتي مصونيتش انا نتي متصونيش؟!
ملاك: كنت مع بابا
اورطيغا: باباك مشا فحالو مع 4 لصفرو
ملاك: (عوجت فمها) من موراها عييت ونعست
اورطيغا: هبطي عندي انا لتحت
ملاك: واخ.. (ناضت كتجري للبيت لبست حوايجها مشات لبيت خديجة قدات راسها رشت پارفانها)
انا خارجة...
(سدت لباب ونزلت بقات كتقلب عليه حتى كيجي عندها واحد مقصدها كانت خايفة من ردة فعل اورطيغا عرفاتو هدا للي جا مع جدها لدارها عطات بظهر ماشية فاتجاه المعاكس حتى خرج اورطيغا من طموبيلتو)
اورطيغا: ايييييييييييه (مكيعيطش باسمها)
ملاك: (ضارت اصلا عارفاه فين كان مشات زاربة ولاخر وقف ياله غيهضر زربات عليه ضارباه بكتفها ليدو.. ودغيا وصلت عند اورطيغا للي حاضي داك السيد)
ياله نمشيو
اورطيغا: تتعرفي هاد خينا!!
ملاك: لا شكون (لاخر تابعها منين شافها طلعت فالطموبيل رجع من طريقو... بغات تعصبو) واش مغنتحركوش من هنا خلااص؟!!
اورطيغا: (ضار عندها وباين التعب على وجهو) تقادي املاك هي هاديك مغتقاديش غنعرف كفاش نقاد جد اصل مك!!
ملاك: كفاش!!
اورطيغا: كيف سمعتي غلطنا اه تعاملي بحال هاكا نجمع مك شنووو تتعاملي بحال الا نتي مغلطتييش؟!
ملاك: حيت خفت عليك غتسميني غاالطة
اورطيغا: سالينا داك الموضوع خفتي علية وانا تعصبت عليك هضرنا فهادشي لباااارح غنبقاو بحال هكا نهار كامل غااايب مكلفتيش راسك تصوني تسولي شنو قاتل ليك باااك أنا!!!
ملاك: قلت زعما غتفهم غلاطك ساعة غلطت
اورطيغا: انا هاكا داااير نتفاهم معاك فحاجة وحدة منمسكش ولكن تبقاي معايا هاكا لا
ملاك: (بقات كتشوف فيه)
اورطيغا: (ديمارا الطموبيل صايݣ بقاو مدة ساكتين حتى نطق) غدا فالليل غنهبط انا والحاج نهضرو مع باك
ملاك: (صدمها) غدا!!
اورطيغا: بحالا مبقاش عاجبك الحال!!
ملاك: ماشي هاكا كيقولوها واش نتا معندكش شوية ديال الرومانسية!!!
يتبع...
التعليقات
لا توجد تعليقات بعد، كن أول من يعلق.