محتوى القصة
....عطاتها مو إيزار باش تغطى زهرة تسناتها تزول الخمار من على وجهها باش تشوفها بقات واقفة جااامدة اصلا مصدومة مخربقة خايفة تالفة... حتى فقدت مو الأمل حيت كتهضرها وزهرة مكتجاوبش سدت عليها لباب ومشات..
رشيد مشا لبيت خوه بقا متكي الليل كامل منعس لا هو لا زهرة لا مو للي خايفة يكون حمل هاد لبنت وجابها.. مع صبح صباح مشات عندو مو قبل باه مينوض من نعاس
رشيد: (عاود ليها كولشي) ....وهربنا هنا
الام: (بقات كتشوف فيه مصدومة من ولدها وهاد المغامرة للي معرفت واش دار الصح ولا قلب على المشاكل) دابا هي يهودية ؟!!
رشيد: مغتبقاش!! غنشوف با يديها للجامع باش تسلم ونقادو ليها لوراق وتبقى عايشة هنا
الام: ونتا باغي تزوجها؟!
رشيد: مكرهتش ندير فيها أجر باش مضييعش (مقدرش يقول أنه باغيها)
الام: ولكن نتا عارف باك اولدي من شحال هادي كان يقول الݣاورية هي للي مدخلش للدار
رشيد: ولكن هي بغات تسلم راه سمحت فعائلتها وواليديها باش تسلم
الام: خاص نقولوها لباك
رشيد: (بقاو كيتسناو حتى سمعوه ناض كيتحرك مشات تسخن ليه لما وتوجد لفطور مشا عندو رشيد متردد وللي معاونو خوتو مزال مرجعو من العطلة باسلو راسو وتسع كيقلب منين يبدا الهضرة كان باه باغي يصلي حتى كتبان ليه منقبة واقفة بعيد كطل)
الاب: شكوووون هادي؟!
رشيد: (ضار لقاها هربت لداخل ضار عندو) الواليد هادي واحد البنت انا عتقتها من الموت
الاب: كيف!!
رشيد: واليديها كانو بغاو يقتلوها غير حيت بغات تسلم وترجع مسلمة وانا هربتها منهم
الاب: (غير كيدور عينو كيحاول يستوعب شنو كيتقال ليه)
رشيد: لبنت معندها حد دابا وبغيت نديرو فيها هاد الاجر نديوها للجامع تسلم ونصايبو وريقاتها
الاب: ݣاورية؟؟
رشيد: اه
الاب: باغي تزوجها؟؟
رشيد: لا.. ماشي زعما لا غير ماشي دابا، حتى تولفنا وتبغي هي بعدا نعتقوها ونشوفو هادشي من بعد
الاب: خرجها علية من هنا وسير ديها فقرايتك ولا نصيفطك لبلاد ضرب لبالة والفيش!!!
رشيد: (كان عندو شك بين 51٪ يبغي و49٪ يرفض... بقا كيشوف فيه باه كان ماشي جيهتها ومو كتفرج من حدا باب الكوزينة كتويل فحنكها وأكيد هي مع ولدها ظالم او مظلوم ولكن قصة البنت بقات فيه..) الواليد بلاتي غير نشرح ليك!!
الاب: (واااقف مخنزر فيه شير بصبعو للأسفل) انا مدخلش لداري ݣاورية
رشيد: رااها بغات تسلم واش تبغي يلحقو بيها عائلتها يقتلوها وتبقى على رقبتنا
الاب: انا مكنعرفها مكتعرفني باش تبقى على رقبتي النصرانية هي لي متبقاش فداري
رشيد: (مبغاتش يزيد يقول يهودية) الواليد الله يحفظك غير سمعني
الاب: غتسكت ولا نتبالا بيك نتا اللول.. ااااااديك اجي هنا
رشيد: الواليد الله يحفظك غير سمعني راه غيقتلوها
الاب: بيناااتهم حنا مشغلناااش يقتلوها ولا يدفنوها حية ݣاع حنا مالنا
رشيد: انا باغي نتزوجها!!!
الاب: والله النصرانية هي للي متحطش يدك فيدها
(بغا يدخل عندها وهو يوقف ليه رشيد على لباب...)
حيد من قدامي
(زهرة فالقنت كتبكي خايفة راه كتفهم انها غير مرحب بيها والشارع كيتسناها وبحال والو واليديها لحقو بيها هي عارفة الا بقات بوحدها غيكملو شنو بداو راه هادو هوما قوانيييينهم)
رشيد: الواليد انا مغنسمحش فيها لبنت عطيتها عاهد الله مغنفرطش فيها
الاب: ها السخط ها رضى الا محايد من طريقي (شافو واقف ومتزعزعش حاني راسو جمع معاه بتصرفيقة بكل جهدو، ووالو متحركش)
رشيييييييييييد!!!
رشيد: (غصة فحلقو) مغنلوحهاش للزنقة فهم غير بعدا شنو عاشت وفين كانت عايشة
الاب: منفهمش ودابا هي تخرج من داااري ولا غتبعها نتا
رشيد: (بحرقة) مغنلوحهاش للزنقة الواليد
الاب: (بغضب كبييير) خرج علية من داري (جات الام كتبكي تبوسلو يدو ورجليه باش ميجريش على ولدها عاود جمع معاه بتصرفيقة اللولة التانية التالتة رشيد متزعزعش حاني راسو كيبكي ومهزش عينو فيه، ولكن مخلاهش يدخل عند زهرة، عيا يغوت عليه والو مكيردش)
خرج علية المسخوووط من هاد نهار ما نتا ولدي ما أنا بااااااك خررررررج....
رشيد: الواليد غير سمعني غندير للي بغيت نخرج من القرايا ونخدم معاك غير متجريش عليها نديروها بحال ختنا ومنسمحوش فيها
الاب: (الغضب عما عينيه كفاش رشيد للي عمرو هز فيه العين ومن ديما مرضي وكيسمع ليه وحنين فيه كيكسر كلمتو وفضل السخط على يخرج وحدة ونصرانية وعاد عرفها شي يوماين عليه!!!! بقا كيدفعو ويضربو فظهرو) نتا يهودي نتا كنت ظان فيك الخير وماالقيتوش فيك الله يسخط عليك دنيا وااااخرة
رشيد: (انفااجر) راه واليديها للي يهووود هوما للي بغاو يقتلوها غير حيت بغات تسلم فين غنخليها وفين غلوحها راه منفرطش فيها واخا نعرف اخر حاجة نديرها فحياااتي...
زهرة: (مشات عندو محايدة النقاب من على وجهها راداه على راسها)
عفاك اعمي مدابزش مع رشيد هو بغا يدير غير الخير فية مبغاش يدابز معاكم (عربيتها معكلة)
الاب: (دميه صماكو منين عرف عرف عائلتها يهود بقا غير مخرج عينيه!!)
يهودية؟!!! (بصعرة) وعاد مدخل يهودية عندي!!!!!! خررررررررج خرج علية ومترجع حتى دير عقلك ولا مترجعش ݣاااع
رشيد: (شد فيد زهرة بقات فيه مو للي بغات تسخف بلبكى وهي شادة فيه)
الا متقبلتيهاش أبَّا معندي فين نرجع
(جر زهرة ومو تابعاه كتجرو وباه حتى هو تاابعو ولكن كيدفعو)
مسخوووووط لعنة الله وعليك
مسخووووط لعنة الله وعليك
مسخووووووط لعنة الله وعليك (بغا يسخف) ...
(بقا كيسخط عليه وهوما خارجين ويهز لحجر ويضربهم رشيد سبق زهرة قدامو وهو كيبكي باش متقاسش ولحجر كيجي فظهرو ولا فرجليه ولا راسو اما مو حلفلها رشيد الا تبعاتو ولا عتبت باب الدار متلوم غير راسها وعارفااه قاااسح)
زهرة: (كتبكي) سمحلي سمحلي سمحلي بزاف ارشيد
رشيد: (كيمسح من على وجهو دموع) متقوليش هاكا نتي مدرتي واالو..
(بقا كيشوف فين غيمشي وفين غيجي مجابش حتى حوايجو ولا فلوسو خرج الله كريم.. شاف فصاحبو)
زهرة تسنايني هنا متحركيش..
مصطفى!!!! مصطفى!!!!! (مشا عند صاحبو)
شوف سير للدار هضر بينك وبين الوالدة تعطيك صاكي وقولها دير الأمانة ديالي فيها..
(مشا وبقى كيتسنااه فالظل راسو خدام شنو يدير وفين يمشي!! وفين يهربها؟!! وعاد حرقة خرج من دارهم مسخوط عمرها جات على بالو!!! دازت وقيتة جا مصطفى جايب ليه صاكو عطاتولو مو تخبية على باه للي دخل لبيتو سخفان ودارتلو فيه ݣاع لفليسات للي كان كيجمع منين كان صغير وكل مرة فين كان كيخدم وفين كان كيبيع الزيتون والتفاح واللوز... شد زهرة من يدها وماشيين على رجليهم للمحطة)
زهرة: فين غنمشيو؟!
رشيد: فين حتى واحد ميلحق بينا وتكوني مخبية ومأمنة
زهرة: سمحلي بزااااف ارشيد
رشيد: بلعكس هذا اجر ربي غيجازينا عليه متعمريش راسك فهادشي فكري فالحاجة زوينة حيت ربي قالها ديما خاص نكونو متفائلين (قلبو كان كيتحرق مئة مرة فالمرة)
زهرة: (بغات تعنقو وهو يبعد كيشير ليها بعينيه على الناس حركت راسها باه ومشاو للمحطة الطرقية..)
عدنا
مرت الجد: زهرة زهرة واااااااا زهرة!!!! (شافت فيها) رجووع الله ابنتي فين سرحتي!!
زهرة: ها... لا وااالو والو، غييير (شافت فشيخها بحرا كيقدر يحل عينيه ووجهو كولو حزن وألم) ...انا نمشي نشوف أنير واش نزلت ليه سخاانة
مرت الجد: سيري ابنتي انا نعطي لشييخك يتعشى ونجي نشوف لخويينز..
زهرة: (مشات لبيتها سدت عليها طلات عليه لقاتو نااعس قاست وجهو كانت حرارتو عادية و تكات حداه وعقلها غير مع ملاك واش قصتها كتعاود ولا شنو؟!!)
~~~~~~~~~~~~~~
ملاك: (بقات كتفرج فالتلفازة حتى سمعت الصاقطة كتحل دارت شالها دغيا وحتى هو تم داخل مدرم شافتو جايب ساشيات فلبيض فوسطهم أليمينيوم باينة العشا تبسمت معاه)
اورطيغا: (عاقد حواجبو) قلت لجد ملتك شعلي داك زبل ديال الألو!!
ملاك: (جمعت الابتسامة) مقدرتش
اورطيغا: شنو غتخلي مك غتحمااق راك خاصك تهضر معاها وانا فين نبغيك باش غنهضر معاك
ملاك: واش هضرت معاااك؟!
اورطيغا: (مشا للكوزينة بقا واقف معصب بزااف ومقادرش حتى يهضر!!! واكتر حاجة كيكرهها هو يكون مربووط!! فين خلا حمزة صباح فين رجع لقاه باقي!!! خلا دمو كيغلي سمع خطواتها ضار عندها)
ملاك: (بقلق) واش ماما هضرات معاك؟!
اورطيغا: اه، (نقص نبرة صوتو) هضري معاها هي بغات غير تعرفك واش بيخير.. براكة غير كاينة فصفك علاش تتهربي منها وتتهربي من أي واحد معاك!!! (عطاها التيليفون ديالو مدوز نمرتها هي كتحرك راسها بلا مع عطاهلها سمعت مها كتقول ألو بقات كتبكي)
ملاك: ماما....
زهرة: صافي احبيبتي متبكييش انا عارااافاك مربية وماشي ديال هادشي غير كتابت عليك وصافي
ملاك: (بحرة كتخرج ليها الهضرة) هوما لي هجمو علية
زهرة: راني حاضرة وشفت كولشي ابنتي ياك نتي بيخير؟!
ملاك: اه (مراد كيمسح دموعها بيدو) مراد مهلي فية
زهرة: (بقات فيها وهي كتسمعها كتشهق سمعت صوت رشيد) ملاك بلا متخافي من والو من بعد ونصوني عليك تبنتي (ياله كيحل لباب قطعت باش ميمشيش يجيبها عاد يعرف مراد معاها يزيد يكحل بلعمى)
ملاك: (قطعت وعطاتوو التيليفون) شكرا..
اورطيغا: (رد التيليفون لجيبو اللوراني وشد يديها) احسن حاجة فيك مقشاااشة
ملاك: انا!!!
اورطيغا: لوكان مكنتيش مقشاشة غتمشي لشي أوطيل تخباي تماك ساعة ربي دارلي الخير تخبيتي هنا ولقيتك دغيا
ملاك: هههه غير معنديش مع لوطيلات
اورطيغا: مزياااااااان حايديتهم علية
ملاك: لااااا من مور زواج هانية نمشيو نبدلو لحيوط شوية...
حمزة: (شك كبييييييير يكون اورطيغا كيطلع عندها لدارها وهي منين مبانتش لدابا اذا مخبعة تمااك، معرفش واش يقولها لرشيد ولا شنو يدير ناض من تماك ومشا لوطيل.. صونا تيليفونو بريڤي جاوب)
أميمة: (سكرانة) البراكة فرااسك
حمزة: (عرفها) أميمة؟!
أميمة: يااااه كتعرف صوتي حسابلي معمرك سوقتيلي باش تعقل على صوتي
حمزة: فينك نتي؟!
أميمة: هربااانة
حمزة: عرفتك هااربة, فين نتي؟!
أميمة: فبلاد بعييييييدة فوق سحااااب بعييييييييدة
حمزة: (فهمها انها مشات لبرا) حرݣتي؟؟ شفتي واخا دوز عوااام طيحي بين يدي طيييحي
أميمة: طحت ونضت طحت ونضت ومكان فيدك مديير شنو مثلا غدير غتلحقني بعمي؟!!!
حمزة: تعياااي تهربي الوقت غتجيبك هنا
أميمة: بغيتك غير تعرف بسبابك نتا مات عمي ماشي بسبابي أنا نتا للي قتلتيه وبغيت تلسقوها فية
حمزة: (حطت يدها على الجرح بقا غير كيغوت ويسب وهي قطعت تجنن حتى خبط التيليفون ديالو.. جلس مغمض عينيه كيحاااول ميخرجش على طوعو رجع راسو اللور فعام واحد مات باه وولدو كانت أوقات صعيبة والمشكل فموتهم بجوج كانو هو السبب الرئيسي هضرتها كتعاود فودنو وعينيه مغرغرين بدموع مع غمض عينيه سالو ومقدرش يتحكم فيهم...)
~~~~~~~~~~~~~
اورطيغا: (سخن لعشا وحطو بقاو كياكلو كولها كيفكر فمو)
غدا الوالدة غتخرج من طبيب
ملاك: بالصح!! مسكينة الله يشفيها درت معاها غلط كبير مكنتش كنزورها ياله مشيت شفتها مرة وحدة
اورطيغا: غتمشي للرياض
ملاك: علاش مبقيتوش غتمشيو لدار دالسعادة؟!
اورطيغا: مبغاتش (عرفاتو تقلق حيت عارفاه مكيبغيش الرياض وباغي هو للي يقابلها)
ملاك: بزاف عليك طريق تقابلني هنا وتقابلها لهيه بعدا السعادة كانت قريبة شوية هنا ماشي بحال رصيف.. (شاف فيها) تأ بقيت فية غتبقى خدام غير على المازوط
اورطيغا: (تبسم) ورينا شكرادتك!!
ملاك: (كيصدمها) كنكونو كنهضرو فحاجة حتى دغيا كتنقز لحاجة اخرى
اورطيغا: وصااافي ابنادم ورينا نبدلو الجو شوية
ملاك: كمل عشاااك ونوض سير تنعس بانلي راه بدا كيشد فيك نعاس
اورطيغا: وغنبقى انا ضااايع
ملاك: ههه مرااااد
اورطيغا: حايدي غير البينوار نشوف طايتك كدايرة
ملاك: (خرجت عينها فيه وقفت جاراااه وهو كيظحك بقات كدفعو حدا لباب هزت طبسيلو حطاتولو فيدو وسدت لباب) مزيان تبارك الله من هادي لنوضي شطحي
اورطيغا: (من مور لباب كيكمل ماكلتو) تتفهميني
ملاك: سير امراد فحاالك
اورطيغا: ومنعسش؟!
ملاك: سير لدارك
اورطيغا: ياك!! تطرديني فهاد شتا؟!!! البرد ومعنديش فين نمشي!!
ملاك: (مشات هزت 3 كواش حلت لباب حطاتهوملو كان متكي على الحيط كيااكل ويتبسم سدت لباب كان دار رجلو ومتسدش)
مراااد!!!
اورطيغا: قتلنا الناشف معاك!!
ملاك: (قوست عينها) كتر لا صوص
اورطيغا: ريقك كافي
ملاك: (تبسمت هازة حواجبها ودخلت سدت لباب كتكمل عشاها... اما هو حط الطبسيل فلكوزينة ومشا خرج من الدار مطرق عليها ونيشان لصبيطار عند مو يبات معاها هاد الليلة)
اصبحنا واصبح الملك لله..
خديجة: (فاقت بقات فبلاصتها شافت فيوسف للي ناعس كان مغوبش وتحت عينيه بدا كيكحال بقا فيها عارفاه غااارق مشاكل ولكن من جهة اخرى حتى هيا كتحس بلعيى وغاااارقة معاه فمشاكل ديالو!!!
نزلت دمعة يتيييمة من جنب عينها وشافت فسقف متنهدة من مور شهر العسل وهي فالحرب والمشاكل ودابا زاد كولشي تعقد زواجها لحد الان مفشلش ولكن كتحس بفجوة كبييييييرة بيناتهم، مبقاتش كتسمع لا كلام زوين لا لمسة منو لا نظرة والو حتى الحميمية توقفت من شحال هادي معرفت واش هرمونات الحمل للي حتى واحد مكيسولها واش نتي بيخير واش باغية شي حاجة شنو اخبارك مع الحمل حتى واحد مكيسولها ولا مهتم بحملها وهادشي كيزييد يأزمها نفسيا...
حطت يدها على كرشها حمل كانت كتسناه سنيييين ودابا خايفاااه يضيييع منها بكترة الاعصاب الخوف المشاكل وفنفس الوقت متقدرش متوقفش فصف غيثة راه حتى هي كانت صغيرة فاش فقدت العذرية مع راجلها اللول وكانت باغية للي يعاونها ويحميها ولقات ختها مريم ونعيمة اما غيثة ملقات حتى واحد فصفها، ناضت من بلاصتها حتى نعااس للي كان مصدر راحتها رجع عندها مرييييييض ناعسة ولكن عقلها خدام وكتحس باصغر حركة، دخلت طواليط قضات روتينها توضات ومشات تصلي... طولت بزاااف وهي كتدعي ربي يكون معاها كملت وهزت صلايتها كطويها لقات يوسف جالس كيشوف فيها)
صباح الخير
يوسف: صباح الخير.. خاص نمشي انا وشريف نشوفو ديالمن داكشي للي لقاوه محروق واش هو ولا شي حد اخر
خديجة: الا سولتو بزاف عاد غتخليو العين عليكم
يوسف: (وقف) مكنسولوش على هادشي نيشان
خديجة: (حركت راسها باه والبكية واقفة فحلقها وسؤال كيتعاود فراسها واش مغيسولنيش شنو مشهية وشنو باغية!!! مغيسولنيش كفاش ماشية مع الحمل مغيسولنيش باش كنحس!!!!
مشا طواليط حتى بوسة دصباح مبقاتش!!! مسحت دموع دغيا من خدها بدلت بيجامتها خرج يوسف مدوش هي خرجت من لبيت مشات عند غيثة لقات الغالية معاها)
الغالية: سير قاد نتي داك الفطور
خديجة: لا!!! عندك يدك نوضي قاديه راسك.. غيثة كيف صبحتي؟!!
الغالية: (بقات مخرجة عينها) من نهار بنتي فحياتنا وكولشي اللور اللور باينة نتي للي خرجتي على بنتي كونتي تتعمريها باش دارت هاد الفضيييحة!!!
خديجة: وعلاش متقوليش بنتك كانت عايشة وسط لقح** وتعلمت منهم ورجع كولشي كيجيها عادي!!!
غير خرج يوسف حداهم سكتو بجوووج اما غيثة جالسة حانية راسها معندهاش الجرأة تهضر خرجت خديجة والغالية كانت كتحلفها مها واش ادم هو للي دارلها هاكا...
يوسف: الوالدة عاوني خديجة فالكوزينة
دخلو بجوج الكوزينة كيوجدو الفطور فسكات حيت بيت فين كاينة غيثة اونفاص للكوزينة فطرو جا شريف عندهم للي عاودلو يوسف المشكل ولكن ماشي كولشي.. ناضو من تماك خرجو خديجة تبعات يوسف لحدا لباب
خديجة: يوووسف
يوسف: (جا عندها وشريف مشا للمصعد يتسناه) وي!!!
خديجة: غادي نخرج
يوسف: فين؟!
خديجة: غنمشي عند طبيبة ومن موراها عند خالتي أمينة حيت غتخرج اليوم وغنمشي نطل عليها
يوسف: بوحدك؟!
خديجة: نتا ممساليش
يوسف: اممم.. نجي بكري ونديك انا متمشيش بوحدك
خديجة: متأكد
يوسف: كفاش متأكد علاش موالف تنخليك بوحدك؟!
خديجة: اممم صافي واخ.. (مشا وسدت لباب ياله دايرة من الكولوار جاية عندها الغالية يكملو للي بداو صباح دخلت لبيتها وسدت لباب بالجهد مافيها للي يهضر ولا يضارب)
الغالية: مخلية الطبلة عااامرة!!!!! خرج قاد الدنيا والحالة!!! ياكما بحساب ليك خدامتك انا!!!!
غيثة: (للي فهمت من يوسف ممكن يكون ادم للي فالطموبيل وممكن لا واش تكون توهمت ولكن هي مبقاتش كادروݣا عااقلة مزيان كان هو وعاقلة فين ضرباتو.. تدق لباب بالجهد مشات الغالية تحل وكتنݣر ان خديجة مقايماش بالواجب ديالها لقاتها الياقوت وفيدها الكرسي للي فيه سليمان)
الياقوت: طاتي (سلمت عليها بالزربة) بغيتك تشدي اليوم سليمان عندنا جنازة فمدينة اخرى ومبغيتش ناخدو معايا ومكاينش للي يقابلو راكي عارفة مزال معارفين والو عليه
الغالية: وووو ولك..
الياقوت: عفاك اطاتي (رجعت باستها ومشات زااربة مخلية الغالية غير كتشوف رجعت شافت الولد ناعس فلكرسي وجايبة صاكو معاه دخلت الكرسي حطاتو فوق فوتوي ودابا كفاش تشرح ليوسف راه ماشي خطة منها راه مو للي جابتو وممتافقاش معاها وعاد هاد الموصيبة فين كاينين غتزاد موصيبة اخرى!!!!)
يوسف: (كيتسنى شريف فالطموبيل جالس على أعصابو جا عندو من بعد مدة) شنو!!
شريف: مزال معرفوش الجثة قالو تفحمت وعاد ملقاوش البصمات فمرة
يوسف: والكاميرات؟!
شريف: مبغيتش نقوي عليه فالتسوال ولكن قضية البصمات راه بالصح كما قالت غيثة
يوسف: هاكا قالتلي تيمسح كولشي ومتيخلي من موراه والو ولكن الا كان هو للي محروق غيلقاو بصماتو على الاقل فلڤولون فلباب ديالو!!
شريف: داكشي للي قلت بحال والو ميكونش واخا معرفت علاش حاس بالصح ماشي هو.. زيد يقدر يكون عيط على شي واحد ولا شووو شنووو دار!!
يوسف: غلطت غلطت غلطت.... من اللول وكان هضرت مكانتش غتوصل لهادشي
شريف: بالصح.. شنو دابا؟!
يوسف: معارفش لقنات لي تيكون فيهم
شريف: مرة كان عرضني فواحد الدار فعين شقف
يوسف: نمشيو نشوفوها!!!
~~~~~~~~~~~~~~
اورطيغا: (مشا معاها للرياض طلعوها كانت فكرسي متحرك حيت مزال متقدرش تمشى كانت فرملية تماك موجدين ليها كولشي هو غير مغووبش حطوها فالنموسية والحاج كيهضر معاه انه يبقى معاهم وميخافش على مو غير كيحرك راسو بأه حيت مو كتشوف فيه مشا جلس حداها)
مرتاحة؟!
أمينة: مرتاحة احبيبي غير رتاح حتى نتا
اورطيغا: (همس ليها) منين جيتي هنا غتجيب عائلتك تجي هنا حتى هوما
أمينة: جيبهم اولدي (شاف فيها ديك الشوفة ديال باااز كان باغي يهددها بيهم ساعة والو) اولدي نهار ملقاش راحتي غنقولهالك
اورطيغا: اممم.. غنمشي دابا نطل على ديك الوزغة
أمينة: جيبها نشوفها
اورطيغا: راكي عارفة شنو كاين وحسن ليها تبقى ملبداها بعيدة على كحل الراس
أمينة: الله يرضي عليك اولدي... عنداك مترجعش انا نتسناك
اورطيغا: ان شاء الله.. خاصك شي لعبة؟!
أمينة: (حركت راسها بلا، جاتها الفرملية كتقلبها وعلماتها الكيني غتبقى تجيها على حساب الترويض.. دخلت عندها مفتاحة وللي فالرياض سلمو عليها وشربو أتاي حداها ومع كان الحاج مكاين غير الله يشافيك احبيبتي وتوحشنااك والله يشافيك...)
خديجة: (سمعت صوت بيبي صغير مفهمت والو التيليفون مغيكونش هاكا!! خرجت من لبيت لقات الغالية هازة شي تربية كتراري بيها باش يسكت)
شكون هدا؟!
الغالية: (مكتحملهاش ومستصغراها ولكن تفافات وهي كتجاوبها)
حفيدي!!
خديجة: (بقات كتشوف فيها وعاد صاك لكبير باين ماشي غير زيارة ساعة ولا جوج... حست باستفزاز منها وكتحاول تعصبها ونجحت فهادشي)
هزيه وسيري لدارك
الغالية: دار ولدي هادي منسمحش ليك مرة أخرى تهضري معايا هاكا!!!
خديجة: (بعصبية) وداري حتى انا بغيتي ولا كرهتي!!! مغنبقاش كل مرة كنغيط بيها ودابا تحركي وسيري لدارك نتي وهاد حفيييدك
الغالية: واش هبلتي؟؟! (باقي كيغوت)
خديجة: (مخرجة عينها) غنوريك لهبال الا مخرجتيش من داري
الغالية: خلي يجي ولدي وغنشوفو شكون غيخرج فينا
خديجة: (بزقت عليها بلا دفال زعما قالت غير تفووو هه) الدل هو نتي بنتك ضاايعة ومزال كتزيدي تحفري حتى لولدك يضيييييع أأأأأأتفووو على أمهات دالجووطية للي بحااالك الله يقطعكم من هاد الدنيا
الغالية: (بقات مصدومة مخرجة عينها كان كلام وردة فعل قااااسحة وعاد الدفلة!!!
الولد كيغوت وهي ودنيها كيصوطووو خرجت غيثة)
غيثة: ماما!!! خديييجة!!!! شـــ.. (شافت الولد) واش ولد يوسف هدا ؟!! (مشات خديجة لبستها كتنݣر وزدحت لباب دبيتها)
الغالية: (مصدوومة ومشوكية)
غيثة: ماماااااااااااا !!!!!! واش حمقة جايباااه لهنا؟!!!!
الغالية: (بدموع نازلين على عينيها) عيطي على خوك يجي دابا
غيثة: شنو واقع؟؟!
الغالية: (شافت فكرش بنتها للي باينة... بحرقة) شحال عندك نتي من شهر؟!.
غيثة: (نقطة ضعفها للي يسولها هاكا كتزيد غير تحشم وتكره راسها)
الغالية: 5 شهور؟!
غيثة: (مقدرتش تشوف فيها ولكن راه جابتها لاسقة!!)
الغالية: (بقات غير كتبكي بحال عاد بدات كطلع معاااها قلبت فصاك الولد على لحليب تسكتو وهي كتشهق بلبكى قلبها ضرب بالضو منين تفكرت ان بنتها تقدر بالصح تكون قتلت آدم) واش جاوبك خوك شنو قالولو؟!!!
غيثة: ماما شكون جاب هدا هنا؟؟
الغالية: (بعصبية) مووووو... مو جابتو لاحتو فذراااعي ومشات تتجري شنو ندير انا لوحو!!!!!
خديجة: (كتحس براسها غتسخف أعصاب اعصاب اعصاب.. مقدرتش تحكم فهادشي للي عندها كولشي كيغلي فقلبها وفراسها خافت على راسها حيت كتشوف غير ضبابة جلست فوق نموسيتها فمها نشف دارت يدها فوق صدرها قلبها غيخرج من بلاصتو وبحرا كتقدر تنفس)
هو خلاني واحلة وخرج ومزال حتى ما رجع!!!!!!
(بحرا كتنفس باغا غير تطايف مع كولشي اي واحد غيبان قدامها غضااارب معاه ناضت لسراجم ظلمت الدنيا ودخلت ففراشها مزولة البينوار للي لابسة بعصبية لايحاه فالارض جرت لغطا على راسها وعينها مطرطقين كتفكر ووسواس لاعب فراسها يوسف واش عارف ولدو فالدار وبغا يحطها أمام أنر لواقع داكشي باش لدابا مزال مدخل للدار!!!!
هزت تليفونها حتى بغات تصوني عليه وهي تقطع دغيا صونات على مريم عاودت ليها كولشي...)
~~~~~~~~~~~
ملاك: (ناضت من بلاصتها خرجت من لبيت مشات للصالون كطل تشوفو واش كاين حلت السرجم شوية وبقات كطل طموبيلتو الحمرة مكيناش اذا مكاينش فالحومة مكرهتش تمشي تشوف مو ولكن خاافت تصادف مع باها، لباب تدق باستغراب اورطيغا عندو سواارت قالت ممكن رجع كيحتارم خصوصيتها)
شكون!!!
حمزة: انا حمزة!!
ملاك: (دارت يدها على فمها مخرجة عينها!!!)
حمزة: ملاك متخرجيش من الدار انا غرجع لصفرو مغنقول لعمي رشيد والو اصلا هو عارفك هنا غير كولشي داير عين ميكة
ملاك: باش عارفني الا مقلتيهالوش نتا؟!!
حمزة: حيت قالي حضي دارها راه غترجع ليها مهم انا غن..
ملاك: سييير فحاللك احمزة ومترجعش براكة غير المشاكل للي شفت معااك بعدني ها العااااار!!
حمزة: ملاك نتي بحال ختي داكشي للي فات صافي تمحااا
ملاك: محيني أنا كولي، انا ماشي ختك ونتا ماشي خويا احمزة صافي فهم هادشي وعطيني بالتيساع
حمزة: عائلة ماماك رجعت املاك وكولهم خايفين عليك متخرجيش انا غنقضي شي غرض عندي وغرجع
ملاك: (بقات غير كتخيل كفاش عائلة مها رجعت وهي شنو دخلها أصلا)
حمزة: انا مشيت الا وقعت شي حاجة عيطيلي مغنقول حتى لواحد بلاصتك
ملاك: (بقات غير وااقفة دابا فهمت علاش باها معاودش رجع يقلب لا هو لا مها ولكن شنو العلاقة بين رجوع عائلة مها وبينها هي!!! عرفاتو غيكون مشا وتمنات ميرجعش حيت هاد الوقت مباغيااش تخسر اورطيغا متقدرش تلقى شي واحد بحالو ولا تعيش مع حد اخر من غيرو...)
اورطيغا: (كان كيهضر مع الحاج فالرياض للي فأخر هضرتهم جبدلو موضوع الخدمة وانه خاصو يرجع للمحال ديالو ويرجع يشد الحساااب اما حتى ذبيحة مغيكلفوش فيها حاليا)
صافي الحاج غدا ندوز عندك ناخدو الحساب ديال هاد شهر والضريبة غنمشي ليها برجلي متهزش ليها الهم
الحاج: الله يرضي عليك اولدي دابا جيب العائلة راه كولشي واجد هنا
اورطيغا: انا نمشي ولكن الوالدة غنخليها فأمانتك نتا!! مبغيت حتى حاجة تعصبها ولا تخصها ماشي كنت غنخسرها ومقلت رجعت من الموت..
الحاج: كون هاني اولدي (عارفو كيهضر على المعاني للي كيعطيوها عائلتو!!)
اورطيغا: (خرج من تماك مشا جاب خالتو للي رجع متقبلها، اصلا اي واحد يدير المزيان مع مو بحال دارو معاه هو، جاب حتى جداتو للي مزال داير بيناتهم حيط اما لوخرين ممعتابرهمش عارفهم غير طماااعة!! وفاء وعمر مشاو لدارهم يجلسو هاد الايام للي بقاتلو فالمغرب بجووج وصلهم طلع عند مو ومشا خرج نييشان المحال ديالو يطل عليه كان مخلي جوج دراري ثقة تماك عرَّفهم راه قرب يرجع للمحال شاف الحساب وبقا شحال كيراجع داكشي للي مكانش حاضر فيه، عطا لكل واحد فيهم 500 درهم حيت شدو بلاصتو وخدمو معاه بالنية ودرهم ممهزوزاش ومع قريب العيد لكبير واعدهم غيجيب ليهم البون للي كيفرق الحاج باش ياخدو الأضحية.. خدا شي لحيمات من تماك طلع للدار هز شي حاجة باغيها ومشا للحومة داز للحانوت للي فيه عشيرو خدا شي لعيبات لملاك وبقا مجمع)
...: حقااا داك خونا للي سولت عليه لبارح بقا عاود فالقهوة شحاال
اورطيغا: (كيكمي) اوا!!
....: وطلع الموبل جديد (بقا غير كيشوف فيه وهو داير الݣارو ففمو) ورجع مشا فحالو بانلي ملقاش الكرا هنا
اورطيغا: اممم شحال جلس فالموبل
....: مكملاش ربع ساعة، بحال هاكا العشيير
اورطيغا: اممم ياله هو هدا انا مشيت... (خرج كيݣمݣم ومشا نيشان عندها...)
ملاك: (سمعت لباب تحل عرفاتو هو قدات شالها دغيا) مرااااد!!!
اورطيغا: (حط داكشي فلكوزينة ومشا عندها فاتح لباب متكي عليه وهي جالسة كتفرج فالتلفازة)
مزال مهداك الله تشعلي داك المشقووف؟!!
ملاك: (بقات ساكتة وهي كتشوف فيه)
اورطيغا: بلوكي داك الطاسيلة وخليلي باش انا نوصل لجدك
ملاك: ههه كيف بقات مك؟!
اورطيغا: (بزفرة) مك!! (دخل وسد لباب باش لبيت يبقى دافي) مخرجتيش؟!!
ملاك: (مبغاتش تخبع عليه راه فوسط حومتو وغيعرف غيعرف الا مكانش هو نيت شاف غيقولوهالو وأصلا مكانش لاش تخبع) جا قبيلة حمزة دق ومحليتش ليه
اورطيغا: (حرك راسو) زيد!!
ملاك: قالي بابا حطو هنا باش يعرفني فين انا
اورطيغا: قوا* ديال باك وصافي!!
ملاك: احم (يعني كان عارف وجاي شاعل) هو دار غير شنو قالو بابا
اورطيغا: اوا وشنو قلتيلو !!!
ملاك: قلتلو يمشي فحالو وماشي شغلو فية ودخلت فحالي وهو مشا (بقا كيشوف فيها شدت فيدو) متعمرش راسك بهادشي بابا غير كيخاف علية ومعندوش شي واحد كيتيق فيه من غير حمزة غي حيت كبرو وصافي
اورطيغا: كبرو على أساس معندوش باه!!!
ملاك: مراد متخليش هادشي يقلقك!!
اورطيغا: الا بغيتي منتقلقش نبات معاك فالدار!!!
ملاك: (لاحتلو يدو) اوا تفرݣع ݣاااع!!! ها 4 دلحيووط نطح راسك معاهم والخااامس هبط بوسو
اورطيغا: ههه ݣاع!! زيد أ إكس شمكار خرج شنو عندك فديك الدوارة!!!
ملاك: اوااااا شووف نتا شنو كتقول؟؟ قالك تبات!!!!
اورطيغا : اممم منين جيتيني الصراحة هاد المرة شنو حبت الغزالة ديالي لعشا
ملاك: كتسيف شي مرات!!
اورطيغا: عارفك حطيتي فراسك (دار صبعو فجبهتها) مخاصش نعاود نشوفك مرة أخرى معاه ولا حتى تتهضري معاه!!! منظمنش ليك راسي ازين هاد المرة حيت دوزت بزاف وبركت على راسي بزاااف وهاد المرة لا
ملاك: (معرفاتو تهديد ولا شنو) انا باغية امراد غير راحة البال داكشي للي خلاني هربت من كولشي
اورطيغا: (قرس حنكها) انا نمشي نقاد شي لعييبة حيت الا عولنا عليك بقينا خلاااا
ملاك: ههه (خرج من لبيت ساد لباب وبقات كتشوف اول مرة كتحس بتهديد خاايب منو اه هي مباغا تلاقا لا بحمزة لا ولو ولكن ميهددهاش!!...)
حمزة: (مشا عندهم للدار حيت رشيد مكانش فالقهوة مشا شاف الجد كيف بقا وبقا كيتشكالو من ملاك للي كلمة فمو غير الله يسخط عليها!!! دخل رشيد عيطلو وطلعو لسطح كيهضرو حتى خلطت عليهم زهرة شير ليها رشيد باض تنزل تخطاتو وشافت فحمزة)
زهرة: ولدي واش تبعوها لفاس؟!
حمزة: لا.. لا أخالتي للي سولني نهار اللول باقي غير هنا (عطا ورقة لرشيد) هنا فين ساكن وشكون هو وشكون عايلتو والعائلة ديالك دخلو للمغرب ومزال كاينين فصويرة
زهرة: وشنو بغاو منا؟!
حمزة: مااا معرفت
زهرة: هوما ماشي بهاد الكلاخ للي غيجرو معاهم بنتي وفهاد العمر
رشيد: هوما ازهرة مابيهمش يجروها ولايديوها هوما بغاو يتعرفو عليها وملاك غير طريق باش يتعرفو على لبنات كاملين وهضرة مور هضرة غيديرو لبنات عائلتهم ويبقى كونطاكط معاهم نتي عارفة دوك الناس كولشي عندهم بالمهل
زهرة: اوا؟!
رشيد: هوما للي عارفين شنو من مور هاد إوا ازهرة
زهرة: (بقات غير ساكتة دغيا كيقنعها حيت هضرتو معقولة!! شافت فحمزة عارفاه عارف فين ملاك وعارفااه ومتأكدة انه شاف اورطيغا كيشوفها وكيمشي عندها ولدابا مزال مقال لرشيد والو)
الله يرضي عليك اولدي سلم على مك
حمزة: مرحبا بسلامك اخالتي
زهرة: (نزلت حيت المفيد راه عرفاتو صونا تيليفونها كانت ملاك جاوبت دخلة لبيتها)
ابنتي!!!
ملاك: ماما... (شحال ترددت ونطقتها) انا فداري
زهرة: عارفة ابنتي حاولي متخرجيش ورتاحي
ملاك: واش بالصح هادوك كيقلبو علية؟! عائلتك؟؟
زهرة: متخافيش ابنتي من والو ولكن متهضري مع حتى واحد برااني متيقي فحتى واحد
ملاك: واش بابا مزال مقلق مني؟!
زهرة: (زفرت) هو غير خايف عليك ابنتي...
ملاك: (سمعت صوتو داخل لبيت وهي تقطع طفات التيليفون حاطاه فوق كوافوز ناضت من تماك مشات لصاكها هزت عكر عدرت شوية ومسحت من شنايفها باش ميجيش معيق يبقى غير لاطراس وللي بقا فصبعها دوزت بيه على حنكها يحمارو شوية خرجت من البيت ومشات عندو لقات روايح وطيااب تبسمت)
وييينو على لحداݣة
اورطيغا: (ضار مخنزر فيها) شنااااا هوا!!!
ملاك: ههه علاش كتقلق دغيا منين كنقولك حادݣ!!
اورطيغا: (ضار كيكمل جات وقفت حداه لقات الخضرة مصوطية باينة جايبها طايبة غير عاود شرملها ولابيغي ديال بطاطا هو قاد غير ستيك دلحم بالاعشاب المنسمة وكيقاد فطباسل)
معامن كنتي تتهضري؟!
ملاك: ماما قلتلها انا فين وقاللتلي عارفة قلتلها شكون قالهالك قالتلي نتا للي قلتيهالها!!!!
اورطيغا: (عطاها طبسيلها) منعاودش نشوفك مع داك **** ولا حتى تتردي عليه السلام باش هنا نسدوها!!!
ملاك: (بقات كتشوف فيه)
اورطيغا: بقاي مبلݣة عينك فية!!! (زاد قدامها وهي تابعااه.. دخلو للبيت، جلس وجلست مبعدة منو شوية حطت طبسيلها فوق الطابلة)
يا كولي!
ملاك: بقا فية الحال انا فين ونتا فين كتفكر!!!
اورطيغا: تفرݣعي!! ودابا غتاكلي ولا نوض نوكلو لمك بالسيف
ملاك: مالك عُنْفِي هاكا؟!
اورطيغا: حيت هادشي املاك مخاصش نبقى كل مرة نهلل بيها ونقولو ليك، للي باين راه باين وانا شحفت معاك وانا تنعاود نفس السيناريو حتى طلعلي ف***
ملاك: (خرجت عينها) وفين شفتني كنهضر معاه!! راه هو للي جا هضر معايا عاودت ليك كولشي ومخبيت عليك حتى حاجة!!
اورطيغا: مزيان حتى دابا مفاهمين!! (كمل ماكلتو)
ملاك: (بغات تغضب وتطلق فشوشها عليه ولكن جاها الجوع، بقات كتاكل وهو غير كيحشي فمو مكيهضرش ومموالفالوش) شنو معصبك؟!
اورطيغا: ها الوالدة رجعت لدارها مبغاتش ترجع معايا وهانا عاود بقيت بوحدي !!عاجبك هاد الحالة نبقاو هاكا الدار موقفتش صليح فيها بقا غير شي حاجة فالكوزينة وقربت تكمل!! شنو مانعنا منتجمعوش؟!!!
ملاك: ولكن انا عندي مشاكل مع الدار!!
اورطيغا: صافي خرجتي راك كبيرة ومغنديروش شي حاجة لي ماشي هي هاديك غير غنتزوجو باغي نستااقر ابنت الناس! انا للي كنت كاره جد أمها هاد الفكرة وكنت تنقول من ساابع المستحيلات نتزوج، ودابا معاك نتي باغيك وشاريك نتي شنو!!!
ملاك: صبر غير على منرجع للدار امراد هاكا غنزيد غير نكبرها مع بابا، هو راه معندوش مشكل فزواجنا (تبسم باستهزاء) والله!! معرفتش علاش نتا محسوس من جهة بابا امراد؟!
اورطيغا: حيت ماشي ترضع صبعي عارف شنو كاين!! مهم انا للي تيهمني هو نتي املاك باغي نتجمعو اليوم قبل غدا شوفي نتي شنو غتفينيها معايا!!
ملاك: حتى انا والله علاش انا كرهت!! ولكن غير صبر عفاااك
اورطيغا: لإمتى؟! (هزت حواجبها) عطيني وقت إمتى؟!
ملاك: ماشي بزااف والله
اورطيغا: (حرك راسو باه وكمل ماكلتو غير راض)
ملاك: (شافتو معاجبو حاال شدت فذراعو) طيابك بنين.. مرااااد انا متفرقتي معاك غير الموت غير شوية نتصالح مع بابا راه باه للي فرݣعتلو نيفو!! (هز حاجبو!!) عفاك اكبيييدة!!!
اورطيغا: (كيشوف كفاش كتشوف فيه تبسم هز شوية ديال لحم بفرشيطة وعطاها حلت فمها كتاكل متبسمة) عقبال لحم لاخر يدخل حتى هو (جمعت التبسيمة ووقفت لمضيغ) غير عولي ازين وديري عليها...
اورطيغا: (بقا مجمع مع ملاك شوية حس براسو غيبدا يطلع النيڤو ويسخن عليه راسو معاها اكترية منين لقاها كتبغي تفوج عليه غير باش يظحك وتطلقت معاه كيعاودو وجالسة حدااه ݣاع الاجواء تخليه يزيد يزعم وعاد لبيت دافي وجالسين فبيت نعاس!! جمع الوقفة ومشا كان عوال يمشي لدارهم فالسعادة ولكن بغا يبقى غير فالحومة هاكا كيحس براسو بالصح حاضيها وتحت عينييه اما هي جمعت دوك طباسل تصدمت بدوك الماعن للي خلا ليها فالكوزينة كان قدامها حل هو جمعت كولشي تحت الروبيني غطاتو بسربيتة طفات الضو سدت باب الكوزينة ومشات لطواليط عاد رجعت لبيتها.. شعلت تيليفونها بأمر منو صونا عليها وهنا دخل معاها فقلة الأدب واخا عيات تصدو ولكن قلبتها غير ظحك...)
~~~~~~~~~~
دازت أياام الوضع هو هو يوسف غيحمااق ادم غابر عائلتو مقلبوش عليه ومدام منوضوش البلبالة يعني البوليس مغيعطيش القضية شي أهمية وشك كبير يكون بالصح مماتش، زائد خديجة رجعت عصبية معاه وعاد ولدو للي جابتو الياقوت ومشات مو لدارها داياه معاها حيت حتى هو حسابلو هادشي من عمايل مو اما غيثة غير محبوسة فلبيت معارفة مادير حيت اصلا معندها مدير من غير ترضخ لخوها حتى يفك معاها هاد المشكل...
رشيد غير حاضي جنب دارو خايف يعادو يرجعو لزهرة ويبغيو يكملو شنو كانو بداو..
فلاش باك
زهرة: (شافت النقل حبس، قربت لرشيد) فين حنا
رشيد: هادي كتامة ولكن حنا مزال غنمشيو لواحد الدوار اخر
زهرة: باقيين نبعدو؟!
رشيد: اه غنمشيو بلاصة زوينة وميقدر حتى واحد يديك منها، كنعرف ناسها مزيااان وتماك كاين فقيه هو للي غيشهد على إسلامك
زهرة: (فوسط هاد الاحزان كاااملة كانت هادي الحاجة للي مفرحها خرجو من تماك مشاو للسوق خدا ليها شي حوايج من السوق كانو سواقيين ولكن مستورين هي غير كتشوف وقفها حدا الملابس الداخلية تختار قياسها واخا داكشي مزوينش خدات باش تقضي واخا لكاليتي ناااقصة عجبوها حيت جيست كبير وزويين منو، خلص رجعت اللور تابعااه انا هو مشا للجوطية درجال خدا شي حوايج باش يستر راسو وصافي شراو جوج صيكان دارو دوك لحوايج ورجعو لبلاصة نقل فين كيركبو الناس)
رشيد: زهرة هنا باش نبقاو بجوج خاص نتزوجو
زهرة: ولكن!!
رشيد: هو غير زواج قدام الناس واخا نعرف نديرو غير الفاتحة هادشي غير باش ندوزو واحد الوقت هنا على منشوفو شنو غنديرو وفين نمشيو
زهرة: ضروري؟!
رشيد: هاكا باش غنعيشو فوسطهم وباش نقدر نحميك ازهرة!!!
زهرة: (وصلو لهداك الدوار فين غيتخبعو وبقاو مدة كيتمشاااو حتى وصلو... بقات كتسناه منين دخل للجامع متعطلش حيت سالات صلاة العصر وخرجو جماعة بيهم.. دارلها إشارة بعينيه ووقفت تحت شجرة كتشوف رشيد كيهضر مع شي ناس وبحال كيحاول يقنعهم بطريقة باش كيحرك يديه!! بقات غير كتبكي على فين وصلت ولكن كما قال رشيد خاص تكون متفائلة هي ماشية فطريق مزيااانة من اللول عرفت مغتكونش سااهلة واخا رشيد كيسهل ليها كوولشي وداير كتر من جهدو باش تكون مرتاحة... بقاو شحاال باش عاد جاو عندها تضهشرت مخبعة من مور ظهر رشيد وطمئنها انه مكاين والو سولها واحد راجل كبير على وجهو الوقار لابس جلابة ولحيتو بيضة سولها..)
الفقيه: (بلكنة جبلية) بنتي لباس عليك؟!
زهرة؛ (شافت فرشيد ورجعت شافت فيه) لباس
الفقيه: (بابتسامة) الحمدلله الحمدلله.. هاد الايام غتكوني فضيافتي انا وعائلتي على تزوجي نتي وولدنا رشيد
زهرة: (شافت فرشيد مفهمتش شي كلمات عاود هضر معاها رشيد بالدارجة العامية حركت راسها باه... بدارجة معكلة جاوباتو)
شكرا بزاف اسيدي هادشي للي درتوه معايا فرحني بزاف.. انا بغيت نسلم ونتعلم الدين
الفقيه: (تأكدو انها ݣاورية.. وكولشي ظحك بفرحة اكترية الواحد منين كيسمع شي واحد باغي يسلم)د
عيط على مرتو للي جات خداتها وهزت صاكها تابعاها رشيد بقا واقف مع رجال كان شحال من مرة جا هنا مع صاحبو عبد الله (اب حمزة) حيت عائلتو من داك المنطقة وكان كيخدم فاش كان كيمشي لتماك حيت ميسورين وعندهم أراضي تماك.. حتى الناس عرفوه ودار معارف وبقا عزيز عندهم هضر مع السيد للي كان كيخدم عندو باش يخدمو خاصو يوفر السكنة والماكلة ليها وليه...
مشا لمور الدار كانت جات فوق التل كاين اراضي كتاااار واخا أواخر الصيف كاين خضورية كاين البقر شياااه... جلس مقرد كيشوف بين ليلة ونهار تقلبات حياتو سفاها على علاها تفكر باه ومو وخوتو قلبو كلااااه عاد لقرايا للي كان حلمو يكمل فيها باش يكون عندو مستقبل كبيييير عينيه تضببو مينساااش صوت بَّاه وهو كيصخط عليه ويعاودها اما الضرب ولغوات وكان قتلو وميقولوش هاكاك معندو حتى شي حاجة يتواصل بيها معاهم يهضر مع مو يهدنها ويطلب سماحة من باه بقا شحال كيفكر ويمسح عينيه حتى جابلو السيد للي غيخدم معاه لحمار للي غتهبطو لجنانات باش يبدا الخدمة جرو وهو كيجر فرجليه بكل خيبة أمل وحرقة كبيييرة فقلبو ومشا يبدا يخدم على مستقبلو ويأمن حياة لوحدة كان طلبها فقط هي اولي مسلمة...)
~~~~~~~~~~~~~~
عدنا
حمزة: (مشا للخدمة ديالو فين عيط ليه الشاف باش يتراجع على لاديميسيون للي صيفط مع صاحبو)
سي حسن انا خدمتي كانت هي حياتي ولكن دابا رجعت كنشوفها بحال شي جهنم الطريقة باش دخلت ليها وانا مييينط والواليد للي مات بسبابي وانا مداير والو غير حيت تفقس ومات خلاتني نكرهها ومنقدرش نزيد نعطي فيها
حسن: باك احمزة الله يرحمو وصلت ساعتو متقولش نتا سباب
حمزة: وساعتو كانت على يدي هي هي!!
حسن: فين وصلتي مع المحامي؟!
حمزة: انا للي واقف عليه دابا هو ديك الكلبة تشد عاد شي يامات صوناتلي قالتلي خوات المغرب
حسن: داكشي فاش شكينا!!
حمزة: خاصني نطلق بعدا نفك علية هاد المنامة متبقاش مربوطة بية وهي مصيرها تشد تشد
حسن: عاود فكر اولدي مضيعش الخدمة دياالك...
اورطيغا: (كان فالمحال ديالو جالس مجمع مع ملاك فالتيليفون كيعاود ليها ان مو بدات كتشافا شوية وكتجلس ولكن كتفها وذراعها باقين مقسحين وحتى فاش كتمشى ضروري خاص العكاز وشقيقة للي مكتحايدش ليها)
ملاك: مكرهتش نشوفها
اورطيغا: تبغي تخرجي؟!! نمشيو عندها هاد العشية!!!
ملاك: كتر من شهر وانا فالدار قنطت شوية واخا بقيت كنلقى راحتي فيها
اورطيغا: وا بنااادم ندوز عندك بلاتي ناخدك عندها؟!
ملاك: صافي واخ ولكن غنخرج نشري شي حوايج
اورطيغا: نقطع لمك الرجلين الا عتبتيييها
ملاك: (عوجت فمها) صااافي!! (قطعت معاه وبقات جالسة كتخمم فمشكلتها فين غتكون وصلت واش أميمة تشدت واش قالت الحقيقة وخدمتها!!! تفكرت فلوس للي كيسالها السمسار دابا شهرين مخلصااتش شحال قد مراد مغيهز عليها زاائد راه عندها الفلوس فلكونت ولكن بغات تخليهم حيت خاايفة من زمان شنو جاااايب ليها.. ناضت جمعت لبيت حلت السرجم باش تهوي لبيت مع حلاتو كيبان ليها واحد فالسرجم متكي على ذراعو كيكمي تشااوفو بيناتهم متنكرش انه بوووووݣووووووص دغيا دوزت الرييدو حيت مكانتش لابسة شالها رجعت اللور وكملت كتجمع رويينة تبسمت وهي كتخيل اورطيغا لوكان حصلها كان غيريشها)
اوا غير الشوفة اللولة راه بوݣوووص ياااه هادو هوما الجيران والا فالا....
صوناو عليها خوتاتها من غير خديجة للي مبقاتش كتبغي تهضر معاهم وقالو لوحم للي بيها بقاو مجمعين بعدا هوما كيهزو ليها المعنويات ويظحكو معاها
نعيمة: ملاك علاش مدفعيش الفيزا وتجي تبدل الجو عندي هاد الايام
مريم: ياك اختي حتى قربت نولد لا لا ملوكة نبغيها تكون معايا
ملاك: ميبغيوش يعطيوهالي وكما قالت مريم مجاتش نخليها حتى قربت تولد واخا مجالساش معاها ولكن بعدا قريبة ليها
نعيمة: علاش ميعطيوهالكش ياك صافي كمل داكشي!!
مريم: لا مزال خاص ضروري تبان ديك الويلة
نعيمة: الله يعطيها موصييبة
ملاك: (غير كتفكر داكشي صحتها كتبدا ترعد وكيضرها خاطرها) اممم مريم امتى لفكاكة اختي؟!
نعيمة: اوا منين متجيش نتي انا غنجي
مريم: مبقى واالو اختي ونيت اجي جلسي معايا تبدلي الجو
ملاك: (حركت راسها باه وفنفسها اورطيغا مطير عليها القنط والغبنة وكولشي بلعكس معيشها فوق سحاااب...)
ملاك: (عرفت من عند مريم مها حتى هي اليوم غتجي تشوف أمينة فالرياض واحتمال كبير باها غيكون حتى هو تماك ولأول مرة من شحال هادي غتزعم وغتمشي وغتشوف باها وغيعرف راه مراد معاها وهو للي كان مهلي فيها حاضيها ماشي حمزة للي مصيفطو، اليوم غتوقف فوجهو وغتقولو انها باغيا تزوج اورطيغا خاص غير موافقتو ومبغاتش لا عرس لا شطيح من غير صداقها ودهازها مغتنازلش عليهم.. مهم اليوم غتقولها وتوضحها اختيارها هو مراد ومكاينش من غيرو!!!
بقات كنتسناه طلت فالسرجم دبيت نعاس مكاينش داك الدري رجعت سداااتو جمعت لبيت مشات غسلت لماعن للي تماك سمعاتو دخل مسحت يدها ومشات عندو متبسمة كان لابس مقاااد حنا سلم عليها بالوجه المشكل حتى هي كتسلم عليه وتنݣر)
فاش قصر معاك سلام باليد؟؟؟؟!!!
اورطيغا: لبسي نتحركو
ملاك: (هي اصلا جايبة من دارهم جوج بيجامات فوقها مونطو خرجت عندو بقا كيشوف فيها عارفاه كيكره لي يخرج ببيجامة)
اوااااا راه كنت هاربة ماشي مسافرة نفوج
اورطيغا: قوليها نجيبلك شي حاجة تلبيسها
ملاك: بحال بحال نمشي نشري ونبدل تماك نيت
اورطيغا: (زفر بقا ساكت مبكره للي يخرج معاه ببيجامة!! خرجو من تماك حاضيها حيت عارف عينيها غير كيضورو ركبوو ومشاو كانت الوجهة برج فاس حيت فيه بزاف ديال المجالات دلحوايج دخلت كتقلب وحتى هو كيقلب ويجيب ليها تقيس خدات لبيسة بلا للي لابسة وخدا ليها جوج اخرين واكيد هو غيخلص واخا عيات تعاافر تخلص بتخنزيرة منو رجعت اللور خلاتو كيخلص ومشات بالزربة لflormar هضرت مع لبنت للي تماك حاضيها واش جاي وكتهضر بالزربة)
بشرتي دهنية جيبلي شي فوندوتان كونسيلر فاغاجو وقاديلي ميكاب اختي بالزربة ويكون خفيف (جلست اونفاص المرايا وجهها كان تعباااااان بدات لبنت كتقاد ليها ولوخرا كتجمع ليها بدات ليها وياله غتدير ليها ايلينر ووقف عليها كيعربط تماك ممسوق لحد هلل عليها مزيااان)
واااصافي امراد انا نايضة
اورطيغا: بنيتك تديري المكياااج فزناااقي!!!
ملاك: (شافت فلبنت مرضياش) جمعيلي اختي ݣاع داكشي للي نحتاج .. (مشات عندو)
صافي امراد حشمتيتي قدام لبنات
اورطيغا: غتحركي قدامي ولا نلسق لمك شي ملوية فداك الحنك
ملاك: نخلصها ونجي (مشات عندها لاكيس قالت ليها ثمن مكانش على لبال وهي بدات كتنقص من لمكياج خلات غير للي غتحتاج شافتو سبق مشات عند لبنت عاود)
قاديلي ايلينر خفيف دغيا قبل ميبان
(قدات ليها داكشي خفيف ميجيش معيق مع شافتو فانعكاس لمرايا جاي ناضت ومشات خرجت وهو كينݣر وهي تابعااه بقالها غير ماسكارا سااهل حالها كتفكر فين ديرها حيت مغيخليهاش ديرها فالطموبيل)
مراد مراااااااااد!!! وااااا مرااااد
اورطيغا: (ضار عندها) مال مك!!!
ملاك: (مخرجة عينيه) فية الجووووع !!!
من بعد مدومندات شنو تاكل استئذنت منو ودخلت طواليط تكمل الميكاب قدات شالها وخرجت عندو كان كيهضر فالتيليفون جلست تبسمت معاه وشافت فيه كتذبل فعينيها زعما شوفني انا راه زوينة غير كنت مكتائبة!!
اورطيغا: زعما الا تمكيجتي غتنسيني فديك الحالة فاش كنتي هاد ليام!!!
ملاك: (خرجت عينها قاريها فاش كتفكر) اشمن حاالة!!!!!
اورطيغا: هضري بشوية!!!!!
ملاك: (بشوية) أشمن حالة؟!
اورطيغا: علاش زعما نضتي تديري المكياج
ملاك: (مخرجة عينها) مدايراش!! غير شي حاجة خفيفة حيت كنت كتجري واش غيجي معايا ونيت نخبي بيه لعيا للي كان فية
اورطيغا : اممم مك يا مك قالك لعيا كابر انا تحت حجرة!!! (عوجت فمها وشقلبت عينها) متعاوديش تخرمزي فوجهك ازين انا عارفك تتبغي تقادي وتزيني ولكن متحتاجييش
ملاك: انا الا تقاديت تقاديت لراسي
اورطيغا: خلينا من داك لبلابلا الخاوية، نتي تتقااادي ليلي وهاد نهار تقاديتي لية حيت باغياني نبقا حال فمي فيك الا شنو هانا بقيت فاهي بيك شنو غندير مثلا نبقى غير تنشوف!!!
ملاك: مسكييييين تايق فراسك!!!!
اورطيغا: هاد المسكين ابنتي مزعووطة فيه نتي!! ومرة أخرى غنهرس لمك داك الوجه ونشووفك كتماكي فلحوانت
ملاك: اولا هاداك ماشي حانوت هد...
اورطيغا: ملااااااك!!!! هنينا ابنت الناس نتي ماشي ديال المكياج فلحوانت بغيتي طلي شي حاجة طليها فخربتك ومنين تكملي مسحيها المكياج عندو قواعدو الدار المناسبات بين نسا وعند راجلك للي هو انا ولكن تخرجي بيه ماااا غير تخربيقة وصااافي!!
ملاك: (حست بالاعصاب عاود مبقاتش كتحمل شي واحد ينصحها وهي فهاد الوضع هي محتارمة متحتاجش للي يفتي عليها معجبهاش الحال فمرة بقات غير ساكتة جات الماكلة تحطت هز كياكل وهي حست بغصة واقفة ففم معدتها مد ليها ومبغاتش)
اورطيغا: (هز حاجبو) يااا كولي!!!
ملاك: (قلبت وجهها عيا يهضرها مكتجاوبش حتى عصباتو ناض من تماك مشا خلص تبعاتو وخرجو ركبو فالطموبيل)
متعاودش تقولي هكاك أنا محتارمة وكنعرف راسي شنو كندير
اورطيغا: بغيتيني نشوفك غالطة ونولي حميدة بالݣرون!!!!
ملاك: (طرطقت كتبكي) انا مغالطاااااش مدرت حتى حاجة خاايبة انا غير... (معرفتش كفاش تشرح ليه بقات غير كتبكي حيت هاكا ولات كتعبر هاد الايام غير بلبكى وهو كيشوف فيها مفهمش هاد ردة الفعل للي دارت مموالفش كيشوفها كتبكي بزااف)
اورطيغا: يا صافي لاش لبكى دابا!!!! ملااااك (جرها ضامها لصدرو) دابا تتبكي على المكياج ولا حيت مكليتيش؟!!!! بغيت نفهم غير شنو خاصك!!!
ملاك: (بعدت منو) انا باغيا غير الحب وللي يفهمني
اورطيغا: (هاز حاجبو) الحب!! باغية ن**** زعما؟!!
ملاك: (بعدت منو ساكتة من لبكى كتمسح دموعها ضارت مخنزرة فيه وجانب منها كيقول ليها غير تقولو اه داكشي نيت لي خاصني، دغيا كيخربقها ويسكتها)
متعاودش تقولي هاكا ابنادم!!!
اورطيغا: مفهمتش انا فاش مقصر معاك الا على لغوات دقبيلة المرة جاية الالة مغنغوتش غندخل نيشان نخلي دار عشتك مزيانة هاكا!!!
ملاك: (غير كتخنزر فيه)
اورطيغا: شنو!! غنزوقها ليك!!! انا للي تنعرف عليك متديريش المكياج ودابا فاش نشوفك تديريه قدام البشري نسكت ونربع يدي!!! لا ابنت الناس انا ماشي هكاك ومغنكونش باش نتفاهمو عليها من دابا (معرفت متقول قلبت وجهها)
واش قنطانة؟! (تبدلت شوفتها من معصبة لشوفة ديال واحد طاحها فالنقطة وشافت فيه) توحشتي باباك وماماك؟!!!
ملاك: اه
اورطيغا: نديك عندهم دابا؟!!
ملاك: (حركت راسها بلا) صافي ياله نمشيو عند مك
اورطيغا: (شد يدها) شنو بغيتي نديرو غنديرو معاك تبغي غدا نمشيو إفران لشي قنت تبدلي الجو؟!
ملاك: (تبسمت) مكتخلينيش نتقلق منك!!!
اورطيغا: لا متنبغيكش تقلقي مهم فكري فين تبغي نمشيو نمشيو باش تسالي علية هاد تهرنيط ديالك (ديمارا تكات على ذرااعو متبسمة طلق موسيقى هادئة حتى وصلو للحومة بعدت من من حداه حط الطموبيل فباركينغ تمشااو شوية عاد وصلو للرياض)
ملاك: (وقفت حدا لباب) مراد مجبت والو فيدي؟!
اورطيغا: جايبااني انا كاينة شي حاجة اكتر!!!
ملاك: ههه خاص ندخل شي حاجة
اورطيغا : متفرعيليش *** املاك دخلي (دخلت وهو تابعها حشمت شد يدها طلعها نيشان لبيت مو كتجر يدها وظحك وهو شادها مزير عليها دق ودخل حيت لباب كان مردود يعني مكتبدلش حوايجها جمعت الظحكة ملاك)
ملاك: احم ماما!! (جرت يدها بالزربة)
أمينة: ههههه
زهرة: (وقفت واورطيغا حط يدو على قرفادتو مشات عندها ملاك عنقتها)
كنتي جاية ومعلمتينيش!!!
أمينة: بعدي لبنت ازهرة, اجي احبيبتي (مشاات ملاك سلمت عليها) لباس عليك ازين؟!
ملاك: الحمدلله كيف بقيتي اخالتي؟! (رجعت حدا مها للي توحشتها بزاااف)
أمينة: الحمدلله ابنتي، اجي احبيبي!!!
ملاك: (ضارت عند مها بلهفة كيهضرو ولوخرين كيهضرو..) ماما توحشتك
زهرة: جيتي هنا ومقلتيهاليش
ملاك: والله هادي أول مرة نخرج من الدار كنت عارفاك غتجي هنا داكشي باش جيت..
اورطيغا: (طالق ودنيه معاها وجار كرسي حدا مو للي كيهضرو ويسولها على صحيحتها)
تمشاي شوية؟!
أمينة: (بغاو يخليو الام وبنتها يهضرو فخاطرهم راهم عارفين شنو كاين وقبل كتجمع العائلة حيت عائلتها خرجو يضورو تماك فالمدينة) واخا اولدي (عاونها توقف حتى ملاك ناضت عاوناتو فيها لمس يدها من مور ظهر مهو بإبهامو تبسمت... عطاها عكاكز ديالها باش كتعاون تمشا وخرجو برا لبيت)
زهرة: باباك كان غير برا املاك وكان غير هضرتي معايا قبل متجي
ملاك: خاص يشوفو اماما باش يفهم انا باغية مراد ماشي حمزة للي مصيفطولي يحضيني!!
زهرة: اش هاد الهضرة نتي عاود!!!
ملاك: مراد بقا فيه الحال بزااف بابا ديما كيبين ليه انه باغي حمزة ومباغيهش هو وهادشي داير لية مشاكل معاه وانا مدايراها لا بيدي لا برجلي اما مباغاش نخسر مراد على ود حمزة
زهرة: اوا والمشكل الاخر!!!
ملاك: هاد الساعة انا هادي هي مشكلتي لي كتهمني!!
زهرة: جدك مرض بزاف ابنتي وباباك بقا فالنص بينك وبينو
ملاك: جدي الا مرض الله يشافيه!! انا مدرت والو اماما انا هربت من تماك باش نسا هاد المشاكل ولقيت راحتي مع مراد وكان شفتي كفاش كيعاملني وباغي نتزوجو اليوم قبل غدا أنا قلتلو لا حتى يبغي بابا ولكن هو عارف بابا ديما مقلل منو ومباغيهش بحال زعما الخطاب كيتقاتلو علية قدام باب الدار
زهرة: (كتشوف فيها) هي معوالاش ترجعي؟! حيت أنا كنهضر فجيه ونتي فجيه
ملاك: (حركت راسها بلا) عفاك اماما متبززيش علية نرجع لتماك!! عفاك اماما انا راه شفت العذاب تماااك
زهرة: ملاك راه خاصك ترجعي ابنتي؟!
ملاك: (بترجي) عفاك اماما إلا تماك انا كنتسنى غير يردوني للخدمة باش نخدم هنا ونتي كتقولي رجع!!
زهرة: (هي فصف بنتها بقات كتشوف فيها) قلت نلقاك ضعافيتي وحالتك!!
ملاك: (تبسمت) الحب اماما هدا للي مطيح علية السر ههه.. متخيليش شحال كنبغييييه مرضت وتهلا فية كل نهار يا كيجيبلي الماكلة ولا كيطيبها ويجيبها تخيلي جا فرشلي الدار من كولشي، خاصني غير نطلب ليه وعمرو دار معايا شي حاجة خايبة
زهرة: انا عارفااه ولد الناس الله يرضي عليه ولكن ابنتي شحال قدك تبقاي تماك بعيدة علينا؟!
ملاك: ماما انا غرجع منين غنبغي نتزوج، صافي انا بغيت نستاقر انا كنكبر اماما ماشي كنصغار ولقيت الراجل لي مرتاحة معاه بغيت ندير داري وولادي محدي مزال قاادة على المشاكيل...
يوسف: (مشا عند مو للي عيطاتلو على حساب سليمان ولدو للي مبغاش يسكت من لبكى وداتو لطبيب دخل عندهم لقا مو كتلبسو حويجاتو)
شنو عندو؟!
الغالية: وديناتو.. احح على لحبيب ديالي
يوسف: علاش مال ودنيه؟! هو مزال صغير على المرض
الغالية: تيمرضو بالودنين تيمرضو بكولشي راه عطاني دوا ولكن المشكل ماشي هنا ولدك خاصو يدير عملية
يوسف: عملية!!!
الغالية: الفتق ها طبيب خارج ويشرح ليك والولد مزال حتى ممطهر انا كنت تنطهركم نهار سبوع
يوسف: (بقا غير كيشوف شاف فولدو للي شاد اللهاية وناااعس كيخمم فحاجة وحدة حتى ويبغي يديه للدار عارف خديجة مغتبغيش اصلا رجعت عصبية وهو كتر،
جا طبيب شرح ليه المشكل للي عند ولدو عندو غير خصية وحدة للي باينة وفمكانها الطبيعي اما لوخرة طالعة الفوق وخاص عملية باش تهبط عاد من بعد ممكن يطهرووه اما الودنين ماشي شي حاجة للي ݣغاڤ عطاه دوا يتبعو ليه ويبرا وعطاه شي تحاليل يديرهم ليه على حساب من بعد ميبرا باش يديرو العملية.. مشا وخلاهم غير كيتشاوفو، قرا التحاليل)
الغالية: انا ولدي عييت ومبقاليش الجهد باش نبقى نصبر لبكى ديالو ونقابل براكة علية غير الاعصاب للي ركبت فية ختك
يوسف: اوا!!
الغالية: ديه لدارك وقابل ولدك باش يبقى عااقل عليك ويشبع منك راك شفتي مو لاحتو تزيد تلوحو حتى نتا!؟؟! بغيت ولدك يعيش فدار جدو وباه مزال فالحياة تيتسنى ولد ولا بنت جايين فطريق
يوسف: نتي للي قلبتي على هادشي كامل
الغالية: حضي ولدك ماشي نتا درتيها ودابا موحلها فية انا.. الياقوت كانت معولة غير انا زدت بينتها وصافي
يوسف: وشكون غيقابلولي انا؟!
الغالية: مرتك المصوونة باش تربيه تربية صااالحة راه غير داك نهار قاتلي اي واحد تربى عندي فداري خرج فاااسد خلينا نشوفو هي فاش تربيه كيف غيطلع
يوسف: (بقا غير كيشوف حتى لقا مو خارجة مقدرش يحبسها راه مشكلتو خاصو هو يكون قاد بيها اصلا الاجواء مكهربة مع مو بزااف ومغيرغبهاش باش تزيد تعاااونووو...
هزو مشا يخلص ركبو فالطموبيل اللور حيت جايبة ليه كرسيه وصاݣ بشوية لدارو وعارف المشكل الكبير للي غادي ينوض ولكن ميقدرش يسمح فيه....!
خديجة: (كانت حدا لباب لابسة حوايج لخروج وتابعاها غيثة كترغبها تمشي معاها)
مقلتيهاش ليوسف؟!!!!!
غيثة: حتى نتي مقلتيهالوش اختي خديجة عفاك غير نشم شوية دلهوا عفاااك متخلينيش بووحدي
خديجة: حلي السرجم وشميييه متجبديليش صداع اختي
غيثة: (كتبكي) عفاااك راه الا حليت السرجم ولا طلعت لسطح راس تيقولي غير لوح راسي ونتهنى ونهنييييكم
خديجة: (بقات فيها هي معندها ذنب تخرج فيها سمها) اغيثة راه يوسف مبغاكتش تخرجي حيت خايف عليك ماشي حيت حابسك
غيثة: انا غندير الفولار ولبس واسع ومنبانش عفاك اخديجة خليني نمشي معاك عفاااك
خديجة: صبري نشوف واش مراد تماك!! (صيفطات ميساج لملاك)
واش مراد كاين تماك؟!
(تسناتها تجاوب)
معرفت اغيثة والله
غيثة: غير نشوفو طاتي أمينة وغرجعو دغيا براسي راه تنحس بالذنب من جيهتها فداكشي للي درت فيها غير نشوفها راه بيخير
خديجة: (بحيرة) معرفت!!!!! انا بغيت نمشي لتماك باش نشوف ملاك وماما راك شفتي المشاكل للي كندوزو منها بغيت غير علامن نحط الرأس
غيثة: (معندها متقول براكة غير لاسقة فيها ولكن متقدرش تبقى فالدار ويجي يوسف يبقاو بوحدهم كتحس بخديجة هي المحامي والحامي ديالها)
خديجة: (جاها ميساج من عند ملاك قالت ليها راه خرج)
اجي نشوفو شنو تلبسي
(لبستها جلابة من عند خديجة واخا جاتها واااسعة باش يخبيو الحمل ولكن مع الطول ديالها جاتها هي هاديك بحال شكل مخزانية دارت شال قاداتولها خديجة ونظاظر كبار خرجو من الدار من بعد مسدوها ومشاو للشاريع شدو تاكسي عطاوه العنوان وزاد بيهم...)
~~~~~~~~~~~~
اورطيغا: (مشا للخدمة ديالو ولكن عقلو خدام مع ملاك راه سمعها قالت لمها حيت عرفتك هنا جيت يعني عارفة باها غيكون تماك وهي بغات تمشي لتماك وهو معاها عكس كيف كانت مكانتش كتبغي تبان معاه شنو بغات توصل لباها بشوفتها مع مراد!!!)
اش تتخطط هاد الموصيييبة عاود شي نهار تغرقني مع هاد نسيب!!!!!
(واش بغات تواجه باها انها باغيااه ولا شنو!!! واش خاصو يمشي لتماك وميخليهاش كتواجهو بوحدها!!)
يوسف: (وصل حتى لدارو مقدرش يطلع مزال كيهيئ راسو المواجهة مع خديجة!! وزاد فطريق خاصو حتى يحل مشاكيلو بعدا طل على ولدو كان نااعس هز تيليفونو دوز نمرة الياقوت جاوباتو وهي كظحك)
فيييينك؟!
الياقوت: توحشتي؟!
يوسف: علاش لحتي سليمان هاكا!!!
الياقوت: ملحتوش.. انا غير عطيتو لباباه لحنين لغزاال يقابلو شي يامات ميمكنش نهز الحمل بوحدي راه ولدنا بزوج احبيبي
يوسف: ولدك عارفة خاصو عملية
الياقوت: (عارفة) خليتو ليك سيمانة ايوسف ودغيا وصلتوه يدير عملية!!! ماشي شغلي ولدي عطيتو ليك صحيح فصيح هاكا غتردو لية منين غرجع ناخدو!!!
يوسف: فين كان عقلي من شحال هادي!!!
الياقوت: معايا فاش كنت تتفكر بعقلك وقلبك وحتى دابا احبيبي ديرو وجمعني معاك ومتهزش الهم ليه
يوسف: (طانز) وعاد نزيد نتزوجك؟!!
الياقوت: الحل بين يديك ونتا تعرف شنو غدير!! فين سليمان؟!
يوسف: (قطع معصب من بروديتها يعني غراضها باااين ميمكنش يبقى يدور بالدري فزناقي وهو عاد مريض!! دار الرومبوان ورجع لدارو كوميم خديجة حنينة وغتفهم الموقف للي تحط فيه!!!)
~~~~~~~~~~~
أمينة: (بقات غير كتصنت لدوك الجوج كيتوشوشو كلمة تسمعها و10 لا حتى جابو كاسكروط وهوما يسكتو)
زيدو تاكلو وبراكة من لملاغة
زهرة: الله يهديك ابنتي راه كيبقى جدك هداك
ملاك: (منفخة) انا مقلت والو!! (تمت داخلة خديجة وغيثة تسالمو بيناتهم.. حطت يدها على كرش خديجة) مزال معرفتي شنو عندك!!!
خديجة: (بحزن) مزال مبان لطبيبة مزيان قالتلي حتى نعاود رجع المرة جاية
ملاك: حاسة عندك شي بنيتة تماك
غيثة: (غير كتشوف صااقرة وفنفسها وانا شنو غيكون عندي؟! دورت عينها لقات أمينة كتشوف فيها تزيرت بزاف حشمت من راسها وهي تحني راسها)
ملاك: غيثة لباس عليك؟!
غيثة: (بغصة فحلقها) الحمدلله اختي ونتي؟!
ملاك: الحمدلله اخيتي (بقاو مجمعين كياكلو خديجة غمزت مها للي خرجو يهضرو تعاود ليها شنو وقع معاها وتخوي قلبها شوية ولا غطرطق)
أمينة: اجي حدايا اغيثة (ملاك متبعة بعينها.. مشات غيثة وخديجة عارفة شنو طاري بيناتهم)
كيف بقيتي؟!
غيثة: سمحيلي اطاتي بزااف (بدات كتبكي وتشهق) سمحيلي بزااااف
أمينة: صافي نساي داكشي، شنو درتي نتي؟!
غيثة: قتلتو!!!
ملاك: (خرجت عينها وهي كتاكل كيكة زعما راني مكنسمع والو ولكن فهاد الكلمة كولشي ضار عندها...)
يوسف: (دخل للدار كيوجد شنو يقول وكفاش يقنعها حيت كيشوف من حقها متقبلش وجميع الاحتمالات يديرهم ويقلب على مربية واخا هو يفضل يجيب مساعدة تعاونها فشقا وهي للي تربي ولدو حيت تايق بزااف فحنيتها وتربيتها!!، كان صقييير ملقى حتى واحد لا خديجة لا غيثة!!! قبيلة خرج من بعد متغاوتو ولكن مموالفهاش تخرج بلا متقولها ليه وعاد غيثة للي مانع عليها فمرة حتى طل من السرجم دخل لبيتهم لقا بيجامة ديال خديجة مطوية فوق النموسية حط ولدو للي ناعس فوقها وهز تيليفونو صونا على خديجة وراي كيقولو غير غضبت ومشات فحالها!!!)
خديجة: (لقاتو هو للي كيصوني عليعل) عيييت بزاف اماما
زهرة: جاوبي بعدا راجلك ابنتي
خديجة: ما فياااش رجعنا غير كندابزو مبقاش كيفهمني ولا كيديها فية اه عندو مشاكل كبااار ولكن فين كاينة انا من هادشي كامل!!
زهرة: جاوبي ابنتي بعدا
خديجة: (جاوبت) وي
يوسف: خديجة فينكم؟؟
خديجة: جينا عند خالتي زهرة وكاينة حتى ماما وملاك هنا جيت نشوفهم
يوسف: علاش مقلتيلي والو وفين غيثة؟!
خديجة: هادشي لي كيهمك غير غيثة؟!¡
يوسف: جااااوبي فين غيثة واش هي معاك؟!!
خديجة: اه معايا شي حاجة اخرى!!! (قطعت معصبة) شفتي بحال انا هي الخدامة ديالهم!! غير فين غيثة كلات غيثة راها عزيزة علية ولكن بففف..
زهرة: هو تايق فيك وحاط الراس عليك داكشي باش كيهضر معاك هاكا عطيه شوية دالوقت للي دايز عليه ماشي سااهل
خديجة: وانا؟!
زهرة: نتي كبري عقلك ابنتي
خديجة: هي انا الغالطة (رجع كيصوني قطعت شافو اورطيغا طالع فدروج) ياله ندخلو اماما
زهرة: (شافتها تفافات) مالكي؟!!
اورطيغا: (تبسم من بعيد) خديجة صاڤا!!!
خديجة: الحمدلله اخويا (تبعاتو وزهرة مفهمتش مالها تخطفت منين شافتو دخل)
غيثة: كان بغاني نكمل عليك ونقتلك بشي إبرة وا...
أمينة: (سمعت صوتو) صافي صافي (سكتتها مع الدخلة ديال مراد)
غيثة: (ضارت لقاتو وهي تصدم بانت ردة فعلها زادت خافت بزااف كتمسح دموعها)
اورطيغا: (كيدور عينو كولشي مصدوم ومو كتبتسم معاه بابتسامة بلهااااء يعني كاينة شي حاجة)
غيثة!!! عاودي شنو قلتي!!!
أمينة: هضرت عيالات اولدي جلس دير الݣوتي خلاتك وحناك دابا غيخلطو علينا
اورطيغا: (عارف عندها شي مشكل وشي واحد ظحك عليها حيت بينات ليه الغالية داك نهار شي واحد لعب عليها لكن ماشي هدا هو غراضو!!)
مزيان منين تجمعتو بجوج وحنا بوحدنا فهموني كفاش بلانكم؟!
ملاك: (مخاصش يعرف شنو عرفت هاد نهار حيت مغيخليهاش فيها) احم مراد بغيت نقولك شي حاجة
غيثة: (بخوف) شنو بغيتي تقوليلو؟!
ملاك: نتي شغلك!!! شي حاجة بيناتنا (تمت ماشية جيهتو كتشوف فيه) ياله!!
اورطيغا: ريحي نتي!! نعرف بعدا شنو كانو تيديرو بجوج حدا مرجان!! وكفاش بلانهم!!
ملاك: خاص نهضرو فداكشي ديالنا (مها كتخنزر فيها معجبهاش هاد الخفة للي فيها دابا)
اورطيغا: (موالفها رزينة واكترية قدام الناس وعاد مها!!! مخرج عينو فيها) من بعد املاك!!
ملاك: (ماالقات غير جراتو من ذرااعو وتم تابعها)
زهرة: ملااااك!!!!
اورطيغا: (وقفها برا شادها من ذراعها) مموالفكش هاكا!!!! مال جدك!!!
ملاك: ششو شنو نتا كنت باغي تقول لغيثة ياك قلتلي صافي غتجمع راسك؟! انا هادشي مكيعجبنيش وعاد قدامي!!!! علم الله بوحدك شنو كدير!!!
اورطيغا: (مخسر وجهو) شناااوااا!!!!!!
ملاك: كيف سمعت.. انا صافي بغيت نمشي فحالي، وصلني!!! ولا عجباتك الجلسة مع غيثة!!!!
اورطيغا: شنو تتخربقي نتي؟! مالك تسيفتي؟!!! انا فين تنهضر ونتي شنو تاادربلي!!!!
ملاك: (بإصرار) بغيت نمشي!! مهم انا مشيت الا نتا باغي تبقى هنا بقا!! (تمت ماشية مخرجة عينها مصدومة من كلام غيثة كفاش هي للي دارت هادشي لأمينة!! الا عرف غيدير شي جريمة فيها!!! شحالما تكون عزيزة عليه ولكن للي يقيسو فمو مغيعقلش عليه كما كان!!!!
تبعها فدرووج منيرڤي على تصرفها للي ممفهومش تصادف مع الحاج وباها طالعين فدرووج)
ملاك: (خرجت عينها بخوف) بابا!!!
الحاج: ولدي جيت؟! بنتي لباس عليك؟!
ملاك: (حنات راسها) الحمدلله اعمي ونتا؟! (هزت عينها فباها) بابا!!! (لقاتو مخنزر)
اورطيغا: (زادت كملاتلو التعصيبة وعاد وجود باها باين غيكون شي تصرف اخر من باها) الحمدلله..
رشيد: اجي معايا نتي
ملاك: ها.. واخا انا جاية (شافت فاورطيغا بلا متحس لقاتو كيشوف فيها مشات تبعات باها عرفت القضية زادت حماااضت واكترية منين شافتو خارج بيها لبرا الرياض!!!)
غيثة: (بقات ساكتة حتى عرفاتو مغيرجعش) عفاك اطاتي متقوليهاش لاورطيغا غيكرهني عفاااك
أمينة: ابنتي راه مغنقوليه واالو غير بردي شوية وفكري فمشكلتك للي عندك
غيثة: (انفاجرت كتبكي) عفاااك... انا.. انا حياتي مشااات ضااعت (بقات كتشهق) كنت فيييين ورجعت فين!! ضعت بزاااف اطاتي رجعت مكروووهة من كولشي عذبت خديجة فحيااتها وبمشاكيلي (خديجة كتبكي معاااها وزهرة كتفهم شنو واقع واخا رشيد قالها على شنو شاف وسمع داك نهار ولكن ماشي بالديطااي)
ضيعت خويا وضيعت كوولشي مبقالي لا مستقبل لا والو علاش نعيش !! تطبعت علية فاااسدة وعمرها تزووول مني واخا ندير للي ندير!!
أمينة: لا حول ولا قوه الا بالله العلي العظيم ابنتي انا مزال فكلمتي انا معاااك ومغنخليكش وربي كيغفر وبنادم كينسى نتي دابا فكري كفاش غدوزي هاد المحنة وتقربي من الله راه هو للي غيخرجك من هادشي كامل
زهرة: ونعمة بالله!!
خديجة: حتى انا مغنخليكش راك ختي صغيرة
زهرة: (فاهمة انها حاملة وعندها مشاكل مع للي حملها هادشي للي قال ليها رشيد ولكن هضرتها كتبين عندها مشاكل اكبر... ناضت تقلب على ملاك حتى شافت الحاج ومراد فوسط الرياض ومكيناش معاهم رجعت دخلت غتهبلها هاد لبنت واش مشات ولا دخلت طواليط ولا فين تكون عطات؟!!!)
~~~~~~~~~~
ملاك: (خرجو لبرا مبعدين شوية على لباب بغات تبوسلو يدو وهو يبعدها شافت فيه بحزن)
علاش حتى نتا ابابا كدير معايا هاكا!!!
رشيد: انا للي صدقت كندير معاك الخاايب!!! مزال مبغيتي تحشمي!!!! انا وحشمت فبلاصتك
ملاك: (بغصة وغضب تحسست منو) شنو درت؟!!! حيت تظلمت!!!!! خاصني نحشم حيت تظلمت!!!
رشيد: مهرسة لجدك نيفو وهاربة من داركم وعايشة بووحدك بلا رضايا وعاد لقاك معاه وتقولي مظلومة
ملاك: اه مظلومة انا مهرستلوش انا سديت لباب علية هاربة منهم وهو لي كان هاجم علية علاش متلومهمش هوما نيت للي حاݣرين على بنتك وكيسمعو لي الهضرة فوقما بنت ليهم هاداك عمي بغاني نتحبس فبيتي حيت قالك فاش كيشوفني كنحشمو جدي غير كيشوفني كيبزق علية
رشيد: (مخرج عينيه حيت زادت نبرة صوتها) هضري بشوية
ملاك: (دارت شهيق زفير) بابا انا ديك الدار مرجعلهاش
رشيد: دابا غترجعي معايا للدار
ملاك: لا.. (بنظرة ترجي) عفاك ابابا مديرهاش انا مبغيتش نرجع لتماك
رشيد: (معصب) غترجعي
ملاك: نرجع الا كنا غنسكنو بوحدنا مع داك القوم الجاهل مغنرجعش
رشيد: (قجها بيد) الجاهلين!!!! عمك وجدك هوما الجاهلين!!!
اورطيغا: (تم ماشي عندهم) اي اي اي ايييه.. (شدلو ذرااعو) نعل الشيطان اسي رشيييد.. كولشي تيتحل بالعقل!!!
اورطيغا: (معطاهش خاطرو تبقى بوحدها مع باها وفنفس الوقت مبغاش يدخل باش متأزمش الامور ولكن المشكل عارفها خايفة منو.. بقا كيشوف فعينيه رشيد بتحدي)
رشيد: زول يدك
اورطيغا: حتى تزولها نتا اللول!!!
ملاك: (هنا خافت كتر بين هاد الجوج شدت بيد باها) بابا عفاااك
رشيد: (شاف فاورطيغا للي حايد يدو) شنو بغيت واحد وبنتو كيهضرو نتا علاش كدخل؟؟!!!
اورطيغا: ملاك قريب تكون مرتي اسي رشيد!! ومشاكيلها هي مشاكيلي وانا وقفت غير باش نفهمك..
رشيد: شكون قالها ليك!! شكون قالك قريب تولي مرتك!!
ملاك: (جاتها لبكية ماشي هاكا كانت بغات تكون علاقتهم راه بجوجهم كتعتابرهم حبيب القلب وعاد باها) مراد انا نهضر مع بابا
اورطيغا: هضري
ملاك: بوحدنا عفاااك!!
رشيد: رجعنا فمسلسل مكسيكي قداامي الحماارة!!
ملاك: بابا علاش كتهضر هاكا راه بالصح مراد واحد منا
اورطيغا: سي رشيد (كيبانلو غير ينزل عليه بشي كروشي الوجه يخمجو) انا معرفتش شنو المشكل للي عندك معايا
رشيد: المشكل لي عندي هو بعد من طريق بنتي محد مدرتو والو نتا كتبقى غرييب عليها بغيت ولا كرهت
اورطيغا: اهاااه مقلتي عيب وداك خينا للي تيظل تابعها بحال خيالها شنو تيجيها؟!!
ملاك: (غصة فحلقها) مراااد!!!
اورطيغا: (كانو قراطس ماشي شوفات بيناتهم وهي فالوسط.. بعد من حدااااهم ودخل للرياض غيتفرݣع وغيتفرݣع غير فوجه رشيد)
رشيد: صافي هادشي للي بغيتي؟! مخلية كلب يهضر معايا هاكا ونتي كتنعميلو!!!!
ملاك: علاش كديرلو هاكا ابابا علاش حاݣرو من اللول ونتا محاملوش
رشيد: اليوم مغنخليكش من مورايا!!
ملاك: (كانت كتبكي) مغتمشيش
رشيد: غااااااتمشي!!!!!
ملاك: (بقات غير كتبكي وكتجمع قوتها وشجاعتها)
بابا عفاك انا باغية نتزوج بمراد ومنقدر ندير والو حتى تبغي نتا.. عفاك ابابا انا لقيت راحتي معاه وباغياااه غير هو ومبغيتكمش تخاصمو بغيتك ديرو بحال ولدك بحالو بحال رجال خوتاتي.. مراد ابابا ولد الناس وباغيني وشاريني وانا.. انا مغلقاش حسن منو...
رشيد: غترجعي معانا ولا (بتهديد) ابنتي عندنا كلام اخر
(حركت راسها بلا) راه الا شتيني مكنغوتش عليك ونضربك في حيت مزال تنحن فيك!!! داكشي كاااااامل للي طرا مسمعتي من فمي حتى حاجة ودابا بهاد الطيران للي فيك مزال زاايدة فيه!!!
ملاك: انا مكندير حتى حاجة خايبة انا باغية غير نرتاح من صداع والمشاكل بغيتني ابابا رجع معاك نرجع ولكن تكون دارنا بوحدنا مرجعش عند ناس حاسبني مشوهااهم
رشيد: (ظحك مفقوس) مك للي مك وعمرها شرطاتها علية
ملاك: حتى انا بنتك ابابا وماشي برانية انا من لحمك وطالباها وباغياا غير نرتاح لا انا لا نتا لا ماما لا أنييير
رشيد: (بتعصب وبدا كيجهل علبها) ربيت خوتاتك بربعة حتى دارو وليداتهم ومك تكرفست معايا وعمرها دارت هاد الحالة ونتي برهوشة دلخلا كتشرطي علية!!!
ملاك: اوا صافي خليني نتزوج باش ندير وليداتي ومنشرط عليك والو.. أبابا راه الا معطيتنيش كلمتك راه مغنقدر ندير والو
رشيد: كلمتي هي ترجعي لدار باك ولا غن...!!!
ملاك: (بقات كتشوف فيه بترجي وهي كدمع وتشهق!!)
رشيد: سيري طلعي للطموبيل نعيط لمك تجي نخويو من هنا
ملاك: (حنات راسها وحركت راسها بلا)
رشيد: (يعني فضلت مراد عليه وزاد جعر) بغيتي غير الزنقة هانتي فيها ابنتي ونساي دار باك ولكن مزال يجي نهار وتندمي على هاد تجرير للي باغيا!!! (دفعها من قدامو زاد خلاها تابعاه كترغبو غير دخل للرياض وقفت بعيد غتسناه وغتقنعو...)
اورطيغا: (قرب يزدح راسو مع الحيط بالاعصاب للي ركب فيه بقا فدروج حتى شاف غيثة خارجة هي وخديجة)
غيثة: يوسف غيقتلنا
خديجة: نقصي شوية من الخوف ونتي فمك فيه غير لقتيلة
غيثة: اش غنقص اختي والخوف قاتلني فماكلتي ونعاسي وحياتي راني قتاالة اخديجة قتاالة
خديجة: أااااااااسكتييييييي فمك غيجيبهالك شي نهار واش مباانلك الهضرة غير هاد نهار وهنا وكان سمعك مراد فين كنتي غتوصلي معاه
اورطيغا: (لقاوه فأخر الدرج سكتو صار عندها) بغيت غير نفهم شنو مخبيين!!! شكون قتلتي نتي؟!
غيثة: (خرجت عينها) طاتي راه مزال حية!!
اورطيغا: (كان كتر من معصب وكتزيد هادي تعصبو بدخول والخروج فالهضرة طلع جوج دروج حداها)
شكون للي قالك ديها لحدا مرجان باش يضربها؟؟؟؟؟!!!!!!
رشيد: (جالس مع الحاج معندو عقل مصوني على زهرة باش تنزل يمشيو فحالهم)
نعام الحاج!!!
الحاج: دابا الحمد الله لالة أمينة راه تتبرا بقالنا نكملو شنو بدينا وفين خليناها داك نهار
رشيد: (كان تالف جاتو قاسحة ملاك تخير مراد عليه وتكسر كلمتو وتزيد متبغيش تمشي معاه جاتو قهرة منها) مفهمتش!!!!
الحاج: زواج ولدنا مراد بلالة لبنات بنتك لالة ملاك
رشيد: ااااه.... خلي السيدة تبرا مزيان ووو مرحبا بيكم
الحاج: اش نقولك اسي رشيد انا الأمنية للي متمني هي نشوف مراد مستاقر فدارو قبل ميدي مول الأمانة أمانتو
رشيد: عزيز عندك؟!
الحاج: تيقطر من العين ولادي فكفة اسي رشيد وهو فكفة شهرين باش غاب علية من الخدمة ولادي دارو فية مابغاااو الحقيقة هو رجل أمييين نأمنو على كولشي وانا مرتاح
رشيد: (حرك راسو بأه) الله يخليه ليك
الحاج: أمييين يا رب عاش صغرو فمجتمع قبييح وتنحاول نعوضو ولكن منين كبر لقيتو هو عوضني فولادي
رشيد: (معندو ميجاوب ولا يقول هو براسو دابا معصب وتااالف.. تحط ليهم أتاي وتزادو شي رجال دالعائلة مجمعين فأمور اخرى وكيتسنى غير زهرة تجي باش يمشيو..)
~~~~~~~~~
غيثة: لا لا.... لا شنو تتقول؟!
اورطيغا: هضر اغيثة قول شنو عندك؟؟!
خديجة: نعلو الشيطان مراد!!! خويا هاد الهضرة منين جبتها!!
اورطيغا: (شدها من ذراعها) مغرخييييش منك هاد نهار حتى تخوي شنو عندك فداك الراس!!!!
غيثة: (دغيا قلبتها بكى) انا مدرت واالو والله مدرت واالو
اورطيغا: وشكون لي دااااار!!! مي كانت صحة سلام جاها ابيل من عندك كانت غتموت فيها!!!
خديجة: مرااد راه غيثة مرييضة وغير كتخلعها هاكا!!!
اورطيغا: (طلق منها) واخا أغيثة.. هضري دابا قولي غير شنو وقع شنو هاد الحاااجة للي مخبية نتي والوالدة!!! لا هي بغات تهضر لا نتي بغيتي تهضري شنو مخبييين؟!! الا ماشي نتي للي ديتيها لتماك وكان داكشي قدر, شنو مخبييين؟؟!!!
غيثة: انا مدرت والو!!!
اورطيغا: وا القلا** شكون للي دار؟!!
غيثة: (عياااات) ادم!! (بقات كتبكي محست غير قجها) ولكن راه قتلتو!!! والله حتى قتلتو!!!!
يتبع...
التعليقات
لا توجد تعليقات بعد، كن أول من يعلق.