محتوى القصة
زهرة: (دارت ليها ملاك القوق فراسها وزادت أمينة للي صونات تبكي وتنوووح عليها يعني خاصها تمشي تواسيها وعاد هي براسها بقا فيها مراد بزااف..
صونات على رشيد علماتو بشنوو كاين قالها شي ساعة ويجي يدييها)
ها باك غيجي
ملاك: سمعتو ساعة بزاف!!
زهرة: هادشي الا بغا يديك معانا!!
ملاك: مدانيش غنمشي بطموبيلتي.. (مشات لبيتها قدات راسها متمشيش مبهدلة، لبست حوايجها وزادت مونطو ومشات كتقلب على أنير كان ناعس جبدت حويجات ديالو لبساتو بشوية وهو ناعس حتى دخلت مها)
انا كلبسو!!
زهرة: لا لا مسكين منديهش لتماك
ملاك: راه فلاكلينيك متخافيش عليه والا ممشاش بابا غيقولي جلسي قابليه
زهرة: يا لالة ويا لالة!! (لبست جلابتها دارت فولارها للي كيجي نازل حتى لتحت.. دخل رشيد جا يريكلامي على ملاك تجلس هي وأنير)
ملاك: بابا أنير مسكين شحال مخرج يفوج خليه مسيكين واش كيبقى جالس فالدار بحال لبنات واش بغيت ديرلو تربيتنا راه درب صغير خاصو يشوف ويلعب تهلى فيه شوية
رشيد: حنا ماماشيينش نتسراو ابنتي
ملاك: ندوزو ناكلو صلاد ياك قلتلكم غندير الحفلة
رشيد: ههه واخا زيدي.. (مشاو ركبو فطموبيلة باها عرفو اشمن مصحة وبقاو كيهضرو.. وهي باغا غير تشوفو.. وصلو خرجو كان يوسف تماك على برا وشريف اما سعد مشا فحالو لدابا مزال مقالولو راه عرفناك نتا مول هادشي..)
~~~~~~~~~~~
اورطيغا: (دار تحليلات وسكانير كان صبعو صغير ديال رجلو تشقق ليه لعظم وكانو خايفين من الرأس ساعة مكانتش شي حاجة خايبة من غير 3 دالغرزات للي دار فقرفادتو ولكن ضرووري غيبات باش الغد ليه يعادو يفحصوه.. دخل لاشومبر وجات مو معنقااه كتبكي وهوما معلقين ليه الصيروم)
صافي الوالدة متخافيش
زهرة: (كتبكي.. عاودلهم شريف شنو كاين دون ذكر سعد حيت غتجبد سمية نلاك، الحاج تزعزع مفهمتش شنو هاد العصابة للي عندو فخدمتو وشكون هدا للي كيحفر ليه الكاميرا شادة كولشي وهادشي غيوقف عليه بيدو...)
اورطيغا: (كان فيه نعاس تكا وغمض ىعينو حتى زعزعاتو مو فصدرو) شنو!!
أمينة: متغمضش عينيك خفت عليك!!
اورطيغا: (تبسم بتعب) متخافيش ازين مكاين وااالو فية غير نعاس.. (صونا تيليفونها خرجت كتهضر الحاج بقا كيهضر ويبحث معاه وكفاش حتى لحق الكاميو واش كان عارف
اورطيغا: كملت خدمتي وكنت هابط المحال
الحاج: متخافش اولدي حقك غنجيبو حتى لعندك
اورطيغا: (جاتو صعيبة يعرفو أن ولدو هو المجرم... حتى كتبانلو مو داخلة من موراها زهرة ورشيد وأحسن حاجة شافها هي ملاك للي كطل برويسها عليه وباين الخوف عليه فعينيها تبسم جا يعوج راسو يشوفها مزيان وهو يتوعت.. دخلو عندو كيطمئنو علييه وهي واقفة اونفاص معاه وانير كيمد يدو ليه)
عطيني أنيير..
ملاك: هم!! (عارفة غتكون شي لمسة منو حيت مكيحشمش مشات مداتو لأمينة لي جلست حداه وهي واقفة تماك) لباس عليك اخويا!!
اب ادم: (كانو جالسين فقهوة وحتى ولدهم معاهم للي مشغول فالتيليفون كيصيفط لغيثة للي مفهمش كفاش قلبت عليه وهي محتاجة ليه فأهم وقت فحياتها.. كيعاود ليهم سعد شنو دار فاورطيغا)
وشكون قالها ليه؟!
سعد: معرفتش ونعرفو نعفسو ومزال نقلب عليه بالريق الناااشف!!! موالف داك الشمكار ديما تيتزطم فهادشي ومنين انا درتها أول مرة فحياتي حصلت
اب ادم: عرفك نتا ؟!
ادم: (هز راسو عاد انتابه لشنو كيتقال ولمن) واش درتها لداك الشمكار؟!
سعد: امم هو، ولكن متشدتش فيها ومنين راه معطوب الا شي لاخر هربو ضربوه وزادو على للي فهمت الكاميو تسرقت لقاوها فالدخلة داو لحم للي فيها
ادم: ويلا قالو اسمك؟!
سعد: ماشي انا للي صيفطت داخلين فيها شي 5 وللي عارفني انا شخصيا ميهضرش واخا يحطولو السيف فعنقو 4 لوخرين معارفينيش انا
ادم: لوكان غير قتلوووه (ضارو شافو فيه!!) بحال هداك انا عندي موتو حسن من حياتو
سعد: لا لا لقتيييلة لا تجيه من بلاصة اخرى اه، ولكن انا لااااا
اب ادم: اوا عنداك يغرك الشيطان
سعد: الااااا صاحبي.. لقتيييلة!!! لا منقدرش..
ادم: عادي راه واخد ليكم رزقكم مثلا ديروه غير تخاصم وجات فيه ضربة بالغلط
اب ادم: ااااادم هادشي ما فيهاش الظحك (عارف ولدو مكيرحمش)
ادم: (ببرود) اممم
~~~~~~~~~~~~~~
اورطيغا: (مجاوبهاش من كلمة خوها حدو هز حواجبو بجوج فيها وهي قلبت وجهها، دخلو جوج فرمليات لابسين لبيسة موحدة فالبيج وفيهم علامة المصحة بالغوز مقادين مزيان وأنيقات وحدة قاست ليه جبهتو)
ملاك: (طرطقت عينها شافت فلبنت ورجعت شافت فاورطيغا)
...: لا لا الحمدلله راك غادي ي مزيان اسي مراد، هانتا خلعتينا عليك الفاميلة والوالدة
امينة: مبقاتش فيه سخانة ابنتي؟!
....: لا الحمدلله
ملاك: (شافت باها كيهضر مع الحاج سليماني واب يوسف، مها مطاردة مع أنير للي فرتت بوكي فلور كاين تماك..
محست غير قربت حداه مدت يدها تحت الكاشة غرست ظفارها واخا مقطعاهم ولكن ريوس صباعها كافيين حتى هو مدار حتى ردة فعل، مشافش فيها، حدو كيشوف اونفاص معاه جمع الابتسامة للي كان دايرها معاهم بعدت من حدااه كتخنزر فدوك لبنات للي كيقشبو ويظحكو معاهم ويطمنوهم على حالتو حيت كانو خايفين من أن يكون نزيف داخلي واخا هكاك شدوه يبات باش يزيدو يطمئنو كتر..)
اورطيغا: (ظار عندها شاف فيها بصوت هادئ) صاڤا!!
ملاك: (قربت شوية مربعة يدها وعينها على باها) تخلعت عليك بزاف..
اورطيغا: (تبسم رمش عينو بتقالة) بقاي بعيدة على صداع املاك كتقولي حتى حاجة
ملاك: شكون دار فيك هادشي!!!
اورطيغا: (ضار شاف فيوسف للي مشا جاب خديجة وغيثة بغاو يشوفوه مشات واقفة مبعدة شوية جا عندها أنير هزاتو شوية دخلو بنات سعد وشفيق كان عزيز عندهم.. كتحس بغيرة مرضية شعلت فيها النار واخا مكتبين واالو بغات كولشي يخرج وتجلس حدااه غير هي كتحاول تخلص من هاد الاحساس حيت عارفة هي الوحيدة للي غتعاني منو وغضيع علاقة زويييينة وكتعطي حجج لراسها انه كبر مع هاد لبنات وكانو قبل منها فحياتو ومنين ختار ختارها هي.....)
ملاك: (جات كتهضر معاها ختها وهي مكيناش فهاد العالم كتشوف غير فدوك لبنات مكاينة غير طويلة وللي مزعرة وطروووفة حتى ملاك صحيحة شوية ماشي ضعيييفة ولكن طولتها للي مبينها شوية صغييرة على عمرها، غوبشت وشافت فخديجة للي كتحاول تستفسر منها شنو واقع لاورطيغا حيت منين كانت عندها فالدار طلبت من يوسف يقلب عليه ولكن مقالتلها والو حسابها غير مدابزييين حتى فهمها من بعد)
ملاك: خدييييجة!!! (بهمس) فرعتيلي راسي واش مكتسكتيش؟!!
خديجة: حمارة!! بغيت غير نعرف شنو وقع للسيد!!
ملاك: والو معارفة واالو ولكن حُّووحْ فييه نيييت للي مدور عليه لبنات (مدات ليها أنير) بوبنات لاخر..
شديه انا نمشي طواليط
(مشات تحت عينيه للي مكيفرقوهاش... اما هو تحجج ينوض لتماك عوناتو مو ويوسف على ميوقف خديجة كتشوف مشات بهدوء جيهتهم)
يوسف: (شافو الضو مشعول تما) يمكن شي واحد لداخل!!
خديجة: لا لا كانت وحدة وخرجت غير بقا الضو مشعول
اورطيغا: (شاف فخديجة لي عوناتو)
صافي غير رخي مني اخاي يوسف
(حل لباب محلوش مزيان باش ميشوفو والو الا كانت باينة دخل بالزربة وسد لباب كيسمعها لداخل للي حبست البولة)
ملاك: راها عامرة!!
اورطيغا: مزير اختي بغيت ندخل !!
ملاك: (خرجت عينها مصدووووومة!!! ضارت طلقت دغيا لما بالزربة باش يدير الصوت وكملت ششرررر ديالها مسحت دغيا ووقفت هزت حوايجها كااعية من هاد الموقف ديما كيحطها فهاد المواقف المحرجة!!!
قدات حوايجها دغيا وبقات لداخل كتهضر بشوية)
مراد وااش حمق بالي باغي تجبدلي صداع!!! بابا والله ميخلي فيك شي عظم صحيح
اورطيغا: ملاك خرجي عندي ولا ندخل عندك
ملاك: (خرجت قبل ميتهور وجرت سدت لباب) انا دخلت هنا غي حيت.. (بانفعال) واش نتا مريض خاصك تحتارم شوية دالخصوصية ديالي!! هادشي مكيعجبنيش!!
اورطيغا: (قرب عندها كيعرج ديجا سد لباب..) ملاك (هز ذقنها بيدو كيهضر مهدن وبشوية وعينيه نايمين فعينيها) الوالدة الا سولاتك على شي حاجة نكري نتي متتعرفي والو حتى يوسف وشريف الا عاودو سولوك ديري راسك متتعرفي والو
ملاك: ولكن!!
اورطيغا: ملاك!!! مبغيتكش دخلي راسك فهاد الوسخ صافي للي عليك درتيه ووفيتي واخا!! (كتشوف فعينيه) نبوسك؟؟!
ملاك: (تبسمت حتى تغمضو عينيها بعدت بخطوة اللور)
اورطيغا: من مور رمضان مغنبقاش نسول غندير شراع يدي
ملاك: امم غير حلم.. ولكن بالصح خفت عليك وكنت كنه.. (دغيا خطفها عنقها بشوية خاشي وجهها فصدرو وحتى هي متنترتش شي 4 الثواني بعدت شوية هزت راسها) خرج باش نخرج ومتعاودش دير هاكا!!
اورطيغا: مزال باغي نبو*
ملاك: بففف مراااااد..
والو متفاكش معاها حتى دخل طواليط وهي على برا كتشوف فلمرايا وتبسم سمعت لما كيتخوا خرج كيعرج
اورطيغا: متعاونينيش نتمشا ؟!!
ملاك: (تبسمت) خرج امراد راك غتحبدلي صداع
اورطيغا: (وصل حداها قرس نيفها جارو لعندو وحنا بصعوبة باسها فحنكها مبعدة... شهق بطريقة مظحكة) مشيتي فيها غتحملي!!
ملاك: (غير مخرجة عينها الا ظحكت غيضسر وملامح وجهها ماشي جديين حيت شادة الظحكة بالسيف!! حل لباب كيتبسم وخرج من موراه دخلت خديجة وأنير دغيا لقاتها فبلاصتها كتفرنس)
خديجة: ما فيهاش باسك!! هاد التبسيمة بالظبط ديال البوسان
ملاك: هه ايخااان (قادات شالها وكتشوف حنوكها كيحمارو ديك الحنية وكفاش عوج راسو يبوسها عجباتها...
فخاطرها)
باس باس وكان غير باسني فشنايفي ياك غنتقلق غنتقلق! نتقلق على العامر بعدا!!!
(خرجو من تماك مشاو عند مها وباها ودعو لوخرين وخديجة بقات تماك ومشاو كترغبو ملاك يمشيو ياكلو صلاد فروي.. كلاوها وهي فرحانة كتفكر فيه عاد رجعو لصفرو)
~~~~~~~~~~~
اورطيغا: (جابتلو مو كيطمة بدلولو الحوايج وعطاوه يتعشا كيشوف الحاج خاايف عليه شي مرات كيبقى فيه واش يبنلو راه ولدو هو مول الفعلة ولكن باشمن دليل البوليس عندهم الڤيديو ولكن مكاين حتى شي حاجة كدين سعد..
هوما غيديرو خدمتهم ويجبدوهم حيت بقا التيليفون كيصور حتى تطفا من الشارج... أكد عليهم يمشيو يرتاحو خصوصا الحاج للي صحتو على قد الحال بقات معاه مو شريف ويوسف وخديجة اما غيثة جات مرفوعة غير بغات تزير مشات للدار تشرب سيرو دنعاس.. )
صافي الوالدة سيري ترتاحي
امينة: واه درك نمشي ونخليك وحدك!!
شريف: خالتي أمينة انا نبقى معاه غير سيري نتي
امينة: اوالله منفرقوو!!!
اورطيغا: صافي غير سيرو نتوما هي غتبقى تخضر علينا..
أمينة: (مشاو دراري وخديجة حيت هي غتبات معاه وجابت ماكلتهم باش يتسحرو علاما يعرف واش غدا غيصوم ولا لا..)
عوينة احبيبي ومصلاتش على نبي شكون هادو للي بغاو يسرقوك؟!!
اورطيغا: كولشي غيعرفوه البوليس
أمينة: الله يعطيهم لݣطع واحد واحد..
اورطيغا: شوفي شي نهار عيطي على عائلة ملاك زعما ملاك ومها يجيو يفطرو معانا، باها لا
أمينة: هههه الله يرضي عليك
اورطيغا: بالصح داوي
أمينة: ان شاء الله، مسيكينة جات تشوفك وشحال تخلعت عليك هاد نهار
اورطيغا: هاديك راه الحب تيتمشى على رجيلاتو...
الغد ليه خرج اورطيغا منين كانت صحتو مزيان ولكن الا حس بدوخة ولا سخف ضرووري يرجع..
داوه للدار وشريف للي غيتكلف بذبيحة اليوم وكانت خفييفة.. بقا هو فالدار مخلاتوش مو يمشي يهبط جا الحاج لدار السعادة باش يفطرو مجموعين حتى شريف جا عندهم..
خديجة: (قدات شي حاجة دالمملحات فالفطور صونات على يوسف)
شنو بان ليك نديو فطورنا نمشيو عند خالتي زهرة؟!
يوسف: بلا متعذبي راسك نشريو شي حاجة
خديجة: لا لا انا اصلا صاوبت كولشي بقالي غير نديرو فالفران ندريه معايا هاكا باش يتحط كولشي سخون
يوسف: فكرة زوينة احبيبة (الياقوت بانتلو فباب المكتب)
خديجة: صافي انا نعلمها نتا مغتعطلش!! على مقالتلي شريف والحاج كاينين تماك
يوسف: لا حبيبة نكمل شغلي ونشوف هاد بنادمة للي جات عندي؟!
خديجة: شكون واش ديك العزافة!!
يوسف: هه اه
الياقوت: (هزت حاجبها من ظحكتو باينة عائلتها ولا تنمرت عليها اصلا عمرها جربت هاد الاحساس حتى تلقاتو بخديجة وختها)
خديجة: ولكن علاش اصلا تهضر معاها ايوسف؟!
يوسف: صافي احبيبة خوي راسك انا نكمل خدمتي ونشوف مع السيد للي فلباب ميعاودش يدخل هاد زبل عندي
خديجة: واش هي كتسمعك؟!
يوسف: اه
خديجة: (بقات كتشوف واش هادي معندها نفس لهاد الدرجة!!) صافي خلي التيليفون الخط دايز
يوسف: (دوز نمرة الفيكس عيط على صاحبو علمو غيخرج والخدمة للي بقات عندو غيديها معاه.. وقف لبس مونطو ديالو دار الشال كولشي بالتاويل هز سوارتو والتيليفون فودنو خرج والياقوت غير متبعاه مقدرت تنطق حتى بشي حرف اصلا صدمها!!
زاد خارج كيهضر مع خديجة وصلو لطموبيلتو دار أبيل ڤيديو معاها عرفاتو مشا وبوحدو عاد قطعات وبقات كتكمل شغلها كان ممكن تقطع ولكن غتبقى منوغسة شنو وقع شنو قالو اللهم تبرد راسها وتحضر على كولشي براكة غير الخيانة للي دازت بيها من قبل..
انا هو معرفش كفاش غيتهنى من الياقوت كل مرة فين جاية الا على الولد واخا يكون ولدو مغيقبلش بيه مفهمش كفاش يبعدها على حياتو فمرة!! صافي هو نساها وطوا صفحتها حيت بالصح خديجة نساااتو فيها ومبقاش باغيها..
مشا البوليس باش يعرف فين وصلات قضية اورطيغا ميمكنش هاد الحݣرة كاملة فاش اذاااهم من ديما مراد بعيد عليهم ومعمرو دخل راسو فوسطهم من غير شريييف شاف الفيديو سعد ممذكورش مكاين حتى معطى انها متورط ولا متواطئ فهاد الجريمة وحتى الكاميو لقاو غير شفارة للي خداو داك لحم معندهم علاقة بالي ضربو أورطيغا....)
ملاك: (تفكيرها غير معاه هضرو شوية فصباح حيت كانت مو وهو كيحشمها شكرها حيت وقفت معاه بزاااف مغينساهاش ليها بعدا بينت ليه عدووه للي شحال هو يخمم فشكون للي كيدير ليه كل مرة بلان وخلا ضوسيه موسخ طالع هابط فالمحاكم.. رجع كيهضر فالدار للي شرات وضيعلها فرحتها بيها)
ولكن خاصنا الزردة ازين
أمينة: (دخلت مو لبيتو تشوف شنو خاصو) اشمن زردة؟!
اورطيغا: مقلتش ليك ملاك لبارح شرات دار
ملاك: (تبسمت فرحانة)
أمينة: اوا مبروووك عليها الااالي بنتي تبارك الله شرات دار ارالي نهضر معاها (باركت لملاك للي كتجاوبها فرحانة وحشمانة وعاد بانت فرحة أمينة بزاف كملت وعطات التيليفون لولدها ومشات تجاوب فتيليفونها للي كيصوني)
اورطيغا: غتشرينا غير صدااع دابا غتبدا علية جات برهوشة وشرات دار ونتا مشريتش
ملاك: اوا بالي ههه
اورطيغا: بالي محدو رخيييص، غير باش نعلمك ازين دويرة غتكون غير على قد الحال
ملاك: ومالي قلت ليك شريلي ڤيلا
اورطيغا: مكرهتهالكش..
ملاك: (تبسمت) غير برتوش كافي
اورطيغا: هههه تتجيبي راسك التهمة بهاد الهضور فااابور
ملاك: انا عارفة راسي.. وللي تيبغيني عارفني شنو كنسوا
اورطيغا: اممم، قولي مكرهتش نشووفك
ملاك: لبارح عرفتي درت ليهم الطيارة باش نجي معاهم ومن بعد موحال واش يخليوني اكترية بابا للي عيقت عليه راه قبل مكنتش كنهبط لفاس بزاف
اورطيغا: وديك ختك متعرضكمش لفطور!!
ملاك: ههه انا نشوف الويكاند الا صلاح نجي
اورطيغا: ومتباتيش!!
ملاك: هه كون هاني بابا ميخلينيش نبات يعني غير نفطر ونرجع للدار
اورطيغا: مزياااااانة
ملاك: راه يوسف بحال خويا وراجل ختي امراد صافي دخلها لراسك
اورطيغا: (مغينساش إعجاب يوسف فاللول لملاك وشحال عاودلو عليها) مقلت والو
ملاك: اممم الله يجعلني نتييق.. انا قربت للدار
اورطيغا: اجي تطيبي شي حاجة
ملاك: اه اليوم غندير ليهم بيتزا
اورطيغا: مساكن لا حول ولا قوه الا بالله العلي العظيم
ملاك: ههه صيفطلي المقادير والطريقة
اورطيغا: غنخرج لمك من التيليفون نوري لمك المقادير
ملاك: يااااه على محسووس.. راه عادي اصلا ماما كتقولي مراد كيعرف يطيب حسن منك
اورطيغا: هاااااا للي مبغيناش
ملاك: هههه
اورطيغا: تظحكي اوا ظحكي على طيابك الزين....
مع فرحانة دخلت مع مها للكوزينة بلا نݣيييير بلا دباز بلا واالو دارت يوتيوب كتفرج دخلو بنات عمها كيزيدو يوريوها قلبوها ظحك حيت ترباو مجموعين كانو مزيانين بيناتهم وحتى هوما كبرو على نفس المشكل ديال الضيق عاونوها دارت ميني بيتزات على ميقرب المغرب وتكملهم باش يتكالو سخاان مشات لبيتها توضات صلات وقرات القران استغفرت شوية وبقات فوق سجادتها كتسبح شوية..
كملت، ورجعت صونات على اورطيغا لقاتو فالمحال حيت وصلاتو الكموند من عند شريف مقدرش مينزلش يوقف على شغلو مبقات تقة.. خرج برا لقا يوسف جايب ليه طموبيلتو من عند البوليس..
اورطيغا: فين مرتك؟؟
يوسف: عاد لقيتني غنمشي نجيبها
اورطيغا: واش نتا أنمي مغتعرضش نسابك!! من ديما زعما تنعرف عليك مصواب!!
يوسف: ههه عندي واحد نسييب متيطلقش القهوة
اورطيغا: رزقو اشريف.. ولكن عيط غير على ختها تفطر معاكم ونردوها فالليل
يوسف: تبات معانا نيت علاش ردوها
اورطيغا: مالها ساايبة!! باها الا منعساتش بنتو حداه فدارو متيكونش هاني
يوسف: ههه وااخا، انا نمشي نجيب لمدام.. (مشا اورطيغا لطموبيلتو كان فيها فلوسو فالقجر للي كيتسد هزهم ورجع المحال مقدرش يبقى فالدار مكيدير والو هو كان مكلف غير بلاكيس ودراري قايمين بالخدمة..)
~~~~~~~~~~~
أميمة: (جاها أبيل من عندو دخلت لبيتها حمزة خدام ونجية فالكوزينة... كانت كتهضر بشوية)
مكنشوفهمش بجوج ݣاع!!...
مكيجبدهاش فالهضرة نتا شفتيهم فالعرس كيف كانو ودابا والو واحد مكيهضر مع لاخر...
شوف انا عارفاك كتعاوني ولكن حتى نتا باينة كتكرهها...
صافي واخ..
(قطعت وشافت فتصويرة حمزة لي فبيت نعاس قدما كانت كتبغيه كرهااتو وميمكنش داك الدل فاش كان معيشها غدوزهالو هاكاك)
~~~~~~~~~~~~
دازو أيام اورطيغا رجع لخدمتو ولكن ذبيحة مرجعش ليها حيت الحاج عفااه ومقبلش يرجع حيت غيجبها غير فراسو احتى هو بغا يرتاح شوية ويرد صحتو للي مهمة، البوليس لدابا مشدو حتى واحد واخا باينين فالڤيديو...
اورطيغا شحال متشاوفو هو وملاك للي مخلاهاش باها تمشي عند ختها بحجة تبقى معاهم وأصلا فرمضان كيمنع عليها تمشي عند خوتاتها كيبغيها ديما تكون معاهم فالفطور..
غيثة مزال هي هي ولكن صحتها تدهورات حيت بسباب السيرو قطعت الماكلة حدها الا شربت لما وكلات تمييرة مقابلة غير سيرو دنعاس وبيتها، ادم مولاش مشا عندها ولكن خلاتو غيحماااق...
كان عندو اخر حل هو صونا على الغالية يعرف أخبارها ويمكن دخل بحال كما مواالفة, حتى عرفهم فصبيطار غيثة سخفت ومناضتش وداوها لتماك
ادم: واش شي حاجة ݣغااڤ؟!
الغالية: (مخلوعة) مزال اولدي مخرجت طبيبة!!! صبر اولدي نعاودو نصونيو على يوسف راه متيجاوبش
اشرف: انا تنصوني
الغالية: (قطعت وهي كدعي خايفة على بنتها غير كيقطع اشرف كتجرب هي حظها وتصوني على يوسف المنظر كفاش بنتها كانت صفرة وجابوها هنا وكفاش طبيب دخلها وبانت فيه حالة ماشي عادية فشلتها..)
يوسف: (كان داير صيلوونص للتيليفون، دخلت خديجة دوش من بعد مكانو فجو حميمي.. خرجت هو دخل وهي مشات جبدت لفلو من الثلاجة باش ميبقاش بارد بزاف رجعت لبيت شافت تيليفونو شاعل الضو عيطاتلو خديجة باش يجااوب) الا الوالدة جاوبي احبيبة!!
خديجة: (عوجت فمها لدابا مقالتلوش راه تطردت من الدار حيت جا داكشي ديال مراد خلعهم وحتى هي بغات تخلع الڤيديو حتى تحتاج باش متسناش كتصورهم باش تشحنو) الووو
الغالية: فاين يوسف فاين ولدي؟!! تلفتيه على مو وخوتو!!
خديجة: (بهمس) خازناااه
الغالية: جاوبي يا الكلبة فين ولدي راه ختو كتموت
خديجة: تعضك.. بففف فينكم نتوما؟!!
الغالية: (كتغوت) فاااين ولدي؟!
خديجة: قولي فينكم يخرج من الدوش نجيو عندكم دابا (خرج يوسف ملقات غير دارت سبيكر) فينكم نجيو؟!
الغالية: (كتغوت) متجييش متجييينييش راه الا جيتي نتي ولا شفتك معاه نقتلك يااا الكلبة
يوسف: (هز حواجبو مصدووم)
خديجة: يوسف لبس حوايجك سير لصبيطار راه خداو غيثة لتماك (مدت ليه التيليفون ومقطعتش) بلا منمشي انا
يوسف: (شد التيليفون معصب) فينكم؟!
الغالية: حنا ف**** (قطعت عرفت غيتقلق ولكن ماشي مهم يجي بعدا كان اشرف معاها اما الاب مفخبارو واالو..)
~~~~~~~~~~~~
ملاك: (كانت كتمشط شعرها دايرة سبيكر وكتهضر معاه وتشوف فلمرايا) طوالي شعري
اورطيغا: حداش؟!
ملاك: نص ظهر
اورطيغا: وقوي؟!!!
ملاك: (كتبسم) وعلاش كتسول؟!!
اورطيغا: باش نعرف فالشدة واش صحيح ولا لا ماشي تبقاي تبكاي علية وتقولي شعري كيطيح شعري دغيا كيتقلع
ملاك: ههه مكتمرݣش (دخلت مها عندها ناسية مساداش لباب بالفرخة)
اورطيغا: داك نهار شعرك كان فازݣ مجموع مشتوش مزياان
ملاك: مراااااد!! ( هزت عينها فلمرايا كتبسم لقات مها وهي تجمعها منين شافت زهرة دايرة يديها على جنابها مخنزرة) ماما!!!
زهرة: (مخرجة عينها)
اورطيغا: مال مك؟!!
يوسف: (وصل لتماك كيستفسر شنو وقع! ) كفاش عاطياها غير لنعاس ومكتفطرش!! علاش فين تتكوني نتي ولا اشرف؟؟!
انا مفهمتكمش حق الرب مفهمت من اللول قلت خليها معايا
الغالية: انا قلت تيغلبها رمضان صدقت لحبيبة كتشرب فسيرويات نعاس
يوسف: (فهم انها كتداوي راسها براسها تسناو طبيبة خرجت كانت حالتها خايبة بقلة لماكلة وكترة السيرويات دنعاس ..)
درتو ليها تحاليل!!
طبيبة: تنتسناها تفيق ونيت يكمل السيروم باش نديرولها شي تحاليل وحتى ليكو على لمصيرنات والمعدة
يوسف: (حرك راسو بأه دخل ادم.. كيشوف فيه جاي مخلوع حتى هو وقف حداهم نفس لكلام قالتلو ليه الغالية.. حتى كيتفاجأ بالياقوت حتى هي داخلة ومن موراها ختها جارة بوسيط)
شنو تدير هاد خيتنا هنا!!
الغالية: (بقات كتشوف حيت كانت معاهم فلفيلا منين نادية الخدامة مبغاتش تفيقلها غيثة... ولكن مطلبتش منها تجي)
يوسف: (ركز الشوفة فلبوسيط تخطاتو ومشات كتعنق الغالية)
الياقوت: طاتي فين غيثة كيف بقات؟!!
يوسف: (مشا عندهم جرها من ذراعها) واش نتي متتحشميش!! صراحة شهمتيني بهاد الصنطيحة للي عندك
الياقوت: (نترت ذراعها) اولا انا جاية هنا عند طاتي الغالية تانيا الدنيا متدوورش عليك ايوسف مبغيتش تعتارف بولدك شغاالك هادووك
يوسف: تالتا سيري ت**** من هنا بلاصتك عمرها غتكون معانا ولا وسط منا
الياقوت: شنو هاد النيڤو رجع عندك؟!
يوسف: لكل مقام مقال ونتي نيڤوووك هاابط على هادشي بلا منجبد ليك داك الضوسي الموسخ ديالك الا نتي مفهمة هادي (للغالية) شي حاجة من داك الخيال الواسع للي عندك انا مغدووزش علية!!
الياقوت: تبدلتي بزااف ايووسف مقدرتش نتيق رجعت نتا هاكا !!! مزال تنعقل على داك الولد شحال بكييت عليه باش منطيحوش
يوسف: كنت بالقروون كان حسابلي غير انا مكنتش عارف راني كنت شاد غير النوبة مع الخوت!!
الياقوت: (شهقت مصدومة من كلامو)
الغالية: يوووووسف!!! صافي براكة علية من هاد لخصاام!! دابا وقت لالة غيثة
يوسف: لالة غيثة ساكنة معاك ونتي هاملاها من اللول قلت ليك تبقى معايا خديجة رادة ليها لبال بحال ختها صغيرة
الغالية: لا مزياان تبارك الله!!
الياقوت: بففف انا نرضع ولدي ونجي عندك اطاتي...
(خرجت كتعوج ويوسف على اعصابو بقا مبعد حتى خرجوها داايخة مشا عندها مقدرتش تكلم داوها باش يديرو ليها ليكو على متوݣض باش دير التحاليل ولا يخليوها حتى الغدا عرت على كرشها وهي كتشوف طبيبة كتأكد من شي حاجة)
...: غيثة نتي مزوجة؟!!!
غيثة: (كانت مدوخة هاد السؤال فافاااها وخلعها) علاش؟!!
ملاك: (قطعت عليه وضارت عند مها مخرجة عينها) مغتيقيش الا قلت ليك دخل غير على غفلة لدارهم من مور عرس خديجة فاش بت عندهم انا ووفاء ومشافش شعري حتى مزيان... أقسم بالله الا هربت منين شفتو وحتى هو خرج بالزربة!
زهرة: (بقات غير كتشوف فيها)
ملاك: والله يا ماما مكاينة شي حاجة من للي فبالك (جرتها مها من شعرها واقفة) والله اماما متفهمي غلاط
زهرة: سمعي املاك
ملاك: سمعيني اماما والله مكاينة شي حاجة هاني كنحلف ليك بالله نتي عارفاني والله مكنحلف هاكا بزااف الا كنت كاذبة!!
زهرة: (كتيق فبناتها ولكن عارفة ملاك طيااارة)
ملاك: عيطي ݣاع وسولي
زهرة: نعيط انا للراجل نسولو واش شفت شعر بنتي؟!!
ملاك: لا.. ماشي هكاك.. هانتي.. بففف غير سمعي ماما والله معمر مراد حتى قاس شعري ولا شي حاجة خايبة راه حتى كلامنا محتااارم
زهرة: هاااا ودني املاك!!! والله حتى نخلي مك تظفري الشيب حدايا
ملاك: علاش شنو درت؟!!
زهرة: سمعي مراد راه بحالو بحال اي واحد فرحان بزنطيطو غير يلقى الفجوة غيدير مبغى يكون باغي الحلال ولا لا نتي جمعي راسك
ملاك: هو معمرو دار معايا شي حاجة خايبة بلعكس محتارمني بزاااف
زهرة: وخليني محتارماكم بزووج املاك ونتي عارفة الا حلفت متردينيش ق*** ديالك على اخر يااامي
ملاك: (طلقت من شعرها وجلست مشطاتو وجمعاتو دغيا تحت نظراتها حتى صونا تيليفونها كانت خديجة جاب الله ماشي هو جاوبت وخديجة قالتلهم على غيثة)
مسيكييناااا
زهرة: لا حول ولا قوه الا بالله العلي العظيم
ملاك: اوا وشنو دراو وكيف بقات؟!
خديجة: مزال مجاوبني يوسف.. تخيلي العافية ديال مو قالتلو متجييبش مرتك مخلاتنيش نمشي عندهم
زهرة: وعلاه؟!
خديجة: معرفت ليها كتكرهني واحد الكره فشكل والله
زهرة: معليش ابنتي وسعي خااطرك على وجه راجلك ولكن عطيها التيقاار حتى نتي
خديجة: عطاياها ماشي غير التيقار.....
ملاك: (جاها ميساج قراتو مخبعة على مها ولكن باقي مكبر الصوت خدام)
اورطيغا: واش نجي نفك قولها راه راني بريييئ مديت منك حتى باش نبلل ريقي بقالي غير شعر
ملاك: (فرنست من ميساجو)
زهرة: اش داكشي نتي!!!! (جمعت الظحكة)
ملاك: حم وااا خديجة متديش على مو شوفي هو مزيان معاك براكة داكشي لاخر بينها وبين ولدها...
غيثة: (بقات كترغب طبيبة باش متقولش شي حاجة واخا طبيبة كتقولها راه ماشي شي حاجة مأكدة ومزال خاص دير الصونار باش عاد يبان واش بالصح كاين شي حاجة ولا ولا!!! ولا خاص تحاليل الدم باش يبان،
غيثة مبغاتش غير ديك الفكرة خلاتها مرعووبة وكما كنقولو للي فيه دغل كيكون محسووس)
دكتورة بابا مريض بالقلب الا عرف غيموووت...
دكتورة: هادشي راه تيبقى من اسراري مع مريضتي ولكن ضروري خاص ديري التحليلة ونشوف حالتك انا اصلا مأكدتش عليك كاين شي حمل!!
غيثة: عفاك عفاك، حتى نكون بوحدي راه كولشي برا وحتى خوتي..
(خافت بزااف بقات تماك وعقلها كيديها ويجيبها راه فأقل من شهر منعستش غير مع واحد للي كتعقل عليه هو ادم!! خرجوها من تماك تبسمت فوسط ألمها وأصلا كانت صفرا)
يوسف
يوسف: (مشا عندها وقفت عنقاتو وهي فاشلة) واش بيخير دابا؟! كفاش تتحسي براسك اختي؟!!
غيثة: خويا متخافش انا معندي والو غير قلة الماكلة ومحسيتش براسي حتى سخفت
يوسف: (شاف فيها كيهضر بشوية) ياله تمشي المركز اغيثة هادشي للي تديري غير ويزيد يضرك راه ماشي هاكا تتعالج الأمور
غيثة: (بخوف وكترجف) عفاك اخويا انا دابا مزيان عرفتي من شحال هادي مااا..!! عفااااك اخويا عفااااااك انا انا تتجيني فوبيا منين تتقول المركز راه نمووت تماك عفاك اخويا
يوسف: راه تنشوفك تضيعي قدامي اغيثة
غيثة: (عنقاتو وهي تشوف ادم جاي كيشوف فيها هدا هو للي كتهرب منو وقف حداها وكولشي تجمع) احم بغيت نمشي للدار
ادم: غيثة صافا (مجاوباتوش)
الغالية: (عنقات بنتها) واش باغية تقتليني بلا وقت ابنتي ديري عقلك راه غير نتي للي عندي
غيثة: دابا انا مبقاش تيجيني نعاس وقلت نبقى نشرب هاد السيرو ويمكن كترت منو
يوسف: غتمشي معايا
ادم: اه حسن سيري مع خوك وبدلي الجو شوية
الغالية: لا ولدي غتبقى حدايا انا نتبالا بيها غير خليها
اشرف: علاش تتشربي السيرو اغيثة بقاي فايقة حتى تنعسي فوقما جاااك
الغالية: اه ابنتي
ادم: (كيشوف فيها) غيثة اجي معايا (استغل انشغال يوسف والغالية للي كيقلبو شكون يديها )
علاش تتهربي مني
غيثة: بغيت نبرا ادم هادشي كيقتلني وتيقتل عائلتي علاش متتفهمنييش نتا غير كتآذيني نتا عمرك بغيتني من نهار خرجت معاك وانا اللور اللور وانا عمري درت معاك شي حاجة خايبة!!
ادم: (كيشوف فعينيها)
غيثة: انا بغيت نسى هادشي
ادم: احم، انا فاهمك احبيبة ولكن ماشي هكاك تنبراو، نتي غير تضري راسك انا عارف خاصك تبقاي تاخدي شي حاجة خفيفة مرة مرة حتى تبراي وتزوليه منك لراسك
غيثة: (مد يدو بقات كتشوف وترمش مدت يدها وكانت قريعة صغيرة قهوية دارتها فجيبها دالسروال دغيا)
ادم: شعلي تيليفونك احبيبة توحشتك
يوسف: (جا عندها) صافي غتمشي معايا سيمانة وترجعي للدار (حركت غيثة راسها باه وهي عقلها مشا سرح بعيييييييييد...)
الياقوت: (دخلت مشات عند الغالية كتشوف فيوسف بطرف عينها كان كيهضر فالتيليفون بعيد عليهم) شنو درتو اطاتي؟.
الغالية: علاش جبتي الولد هنا؟!!
الياقوت: صافي مبغاهش!! مغنزيدش نخبي ولدي !! هو كبير وعارف ميمكنش نبزز عليه اصلا الا مدارش الحل نتي عارفة شنو غندير
الغالية: هنا مغنكونش معاك!!
الياقوت: الولد خاصو كنية ديال باباه اطاتي القانون هو لي غيكون بيناتنا متاقش خلي القانون هو يقنعو!! انا وياك من سابع المستحيلات يتيقنا ولا حتى يسمع لينا براكة غير ديك الشلحة لاحسة ليه العقل ودماغ
الغالية: (غير كتشوف خرجت غيثة مسنودة على أشرف خوها مشاو عندها طبيبة عطات لأشرف شنو دوا للي تاخد اما الشي لاخر غيثة رغبتها تسكت عليه حتى تعرف هي شنو دير.. وبما أنها كبيرة العمر ممنحقهاش تخرج أسرار المريض..)
~~~~~~~~~~~~~
اصبحنا واصبح الملك لله..
اورطيغا: (كان تقدا لمو داكشي للي بغات حيت غتجي ختها من بعد شي يوماين وصلاتو الكموند مشاو يتعرض ليها رجع اكثر حذر حيت لدابا البوليس مشدو حتى واحد من دوك للي شاركو فالجريمة اللولة بحال تشقت الأرض وتسرطو فيها، اما ذبيحة مزال مكيمشي ليها حيت مزال كيعرج شوية كان باغي دوك الفلوس حيت موالف كيدخلهم فالحساب ولكن صحتو دابا أهم وعاد ولات عندو مرا تانية فحياتو خاص يدير بحسابها حتى هي..
طلع للدار مو كانت كتوجد الفطور ليه باش هي تمشي للرياض كان حداها فالكوزينة)
معندناش شي مشية لصفرو؟!
أمينة: ههه تقطعتي؟
اورطيغا: شوفينا شي لعبة راه باها حتى من ختها مخلاهاش تجي تفطر معاها
أمينة: علاه؟!
اورطيغا: عندو الصح واخا كنت بغيتها تجي ولكن مجاتش تبات عندهم باهم داير ليهم العز
أمينة: اوا هي الا نضتو عقدتو
اورطيغا: حقا ديك الدار غدا نمشيو نشوفوها واخا مبغاش يطيحلي منها ولد ل.. (سكت) ولد العائلة
أمينة: فين؟!
اورطيغا: قريبة من هنا غير هي جاية لداخل شوية
أمينة: هنيا عليك اوليدي
اورطيغا: مزال مشريت غدا نمشيو نشوفوها وديك الساعه يحن الله
أمينة: على مولانا حتى الحاج يعاونك
اورطيغا: ميعاوني منعاونو براكة غير نتي منين نخدم غنتخلص منو باش يعاوني لا!!
غيثة: (صبحت مزيانة حيت عيات تقمع راسها ولكن فالتالي شربت حبة كان عندها بزاف خباتهم مزيان وخرجت لقات خديجة فايقة غير هاد المرة مداخن موالو كنحس براسها عادية مكاين لا نشاط لا نشوة لا واالو) خديجة فين يوسف؟!!
خديجة: صباح الخير بعدا
غيثة: باغدون، صباح الخير
خديجة: كيف صحبتي ؟!
غيثة: مزيان الحمدلله بغيت نخرج نمشي لاتوليي
خديجة: وقلتيها لخوك؟!
غيثة: اه غنقولهالو دابا
خديجة: حقا فكرتيني (قربت حداها كنهضرو بجدية) ادم داك نهار شفتو كيكمي فصباح فرمضان نهار جا عندكم ومبغيتيش تخرجي عندو!
غيثة: مكيصومش؟!!!
خديجة: (حركت حواجبها زعما انا قلتلك ونتي وفهمك)
غيثة: (حركت راسها باه كتكمل الشكوك والمشكل رجع هو الفوبيا ديالها كتخاف منو)
عفاك متقوليهاش ليوسف....
~~~~~~~~~~~~
ملاك: (صدمها المدير منين قالها من مور رمضان غيرد عليها امتى تنتاقل كانت كتوقع كياخد هادشي وقت كبيييير اذا صافي قربت تخوي قلبها تزير اول وحدة جات فبالها هي مها مغتقدرش تسخا بيها ندمت علاش بدات هادشي ولكن حبها لمراد هو للي خلاها دير هاد الخطوة!! واش غيستاهل دير عليه هادشي؟!!! مشات لطموبيلتها بكات حتى شبعت مسخاتش بمها وباها والمشكل حتى أنير!!! صونا عليها مجاوبتش رجع صونا مسحت دموعها وجاوبت)
وي مراد
اورطيغا: مالكي؟!
ملاك: والو علاش؟!
اورطيغا: باين صوتك مخنخن ابنتي, قولي مالكي؟!
ملاك: مسخيتش لماما
اورطيغا: علاش فين ماشية!
ملاك: فاش غانجي لفاس
اورطيغا: واش قربتي؟! ولا خرجت لعييبة!!
ملاك: هاكا لمح المدير
اورطيغا: خاصك تفرحي بهادشي املوكة
ملاك: نفرح حيت غنخلي ماما وبابا؟!!
اورطيغا: شكون قالك غتخليهم غتجي غير لفاس صفرو راها غير فراس الدرب
ملاك: هاكا غتقول ولكن مغتخلينيش نهبط بزاف
اورطيغا: ملاك انا عمري غنمنعك على داركم هادي غير كوني هانية من جيهتها فوقما بغيتي غتمشي ليها وحتى هوما مرحب بيهم فأي وقت
ملاك: (قلبها تزير عليها) معرفت جاتني قاسحة؟؟
اورطيغا: ياكما لاعبة الوداد عندك؟!
ملاك: (جابلها الظحك حيت بالصح نهارها اللول)
اورطيغا: اذا الهرمونات هادوك احبيبي... داركم فوقما حبيتي غتشوفيهم!!
ملاك: (بقاو مجمعين هي واورطيغا فالتيليفون حتى خلاها ظحك وقلب ليها لمزاج ديمارات ومشات للدار اليوم مها عاود غتخليها طيب شي حاجة مشات صلات نعست ساعة ودخلت للكوزينة دارت 4 طواجن ديال صوص مطيشة بالكفتة غسلت لماعن للي طيبت فيهم حيت غيتبعها نݣير ومبقاتش بغات تخاصم مع مها من ببعد براكة غير كتحس بتأنيب الضمير حيت قربت تمشي وتخلينا!!! خرجت مكرهة)
انا غنسكن غير انا وياه علاش كيخليوني نطيب لفرقة!!!
(دخلت لبيتها جا عندها أنير ومع البرد تكمشو تحت مانطة دارت فالطابليط ديالها فلم كارتون حاطاه فوق الكوافوز معنقاه كيتفرجو حتى جبدت عليها بنعسة هي وياه دخلت مها لقاتها ناعسة عزت عليها تفيقها وهي معنقة خوها، ومشات تكمل توجاد لفطور..
صونات عليها أمينة وأكدت عليها تجي تفطر معاها محد ختها غتجي عندها)
زهرة: حتى نتشاور مع مول الدار اختي أمينة.. (قطعت صونات على مريم تشوف كيف راها حيت الوحم جاها صعيب فهاد رمضان ومخلاهاش راجلها تجي لعندهم وعاد لوليدات كيقراو!!)
~~~~~~~~~~~~~
اورطيغا: (عيطلو السمسار هضرو على شي حاجة)
صافي دوزها معاك..
لا لا متنظنش غتبغي تبدل شي حاجة فلفصاالة...
صافي قلت ليك شنو دير..
الله يحفظك اخاي عبدو..
(قطع وكمل الخدمة فالمحال حتى وقف عليه عمر تبسم وخرج سلم عليه بحرارة خرج لقا خالتو وبنتها سلم من بعيد مزال داير حاجز بينو وبين خت مو اما بنتها مكيشوفش حتى فيها، طلع معاهم للدار فرحت أمينة بزااف بقدوم ختها هبط حتى يلحق بيه عمر منين يرتاح.. وهو هبط يكمل خدمتو قرب المغرب صيفط دراري كما موالف من بعد مخلصهم حيت كيخلص بنهار عارف مصارف رمضان كداير كيفضل يخلصهم بنهار ومرة مرة كيعطيهم للي كان من لحم.. هبط عمر عندو باين فيه تسخسخ من مجيتو فتران للي مزال معروف تران ديال فاس ݣرسيف وجدة مزال ديال الفحم ماشي ديال الضو يعني كيزيد شي ساعة على تران العادي..)
عمر: ولد خالتي لباس عليك؟!!
اورطيغا: الحمدلله الغزال ونتا؟! (كينقي الدنيا منين مكيكونش شي كليان)
عمر: الحمدلله على كل حال.. مراد كنت بغيت نتشاور معاك فشي حاجة
اورطيغا: (وقف من مسيح الثلاجة) شو غير يأذن المغرب نرد مزاجي وانا معاك
عمر: ههه حتى هادي مزيااانة
اورطيغا: واش شي حاجة قبيحة؟
عمر: لا لا الحمدلله غير الخيير..
هاد المرة شكرو فماكلة ديال ملاك عجبها الحال حيت صاوباتوو بالنفس وكانت بغات ترضي مها، لدابا حتى واحد من العائلة معارف ملاك شرات الدار بغات حتى تفينيها وتقولها... هي عااادتها من اصحاب للي كيبغي كولشي ديالو يكون مستور مدام الحاجة مكتعلق حتى بشي حد اذا خصوصيتها تبقى ديالها براكة غير خوتاتها وواليديها وزادت حتى اورطيغا ومو ووفاء وحمزة...
علمها اورطيغا خالتو وولادها جاو هاد المرة رزنت راه بدات كتيق فيه واخا كتحاول تقتها فيه من ناحية لبنات متفوتش 60٪..
اورطيغا: انا غنهبط دابا الحومة مع عمر
ملاك: لدارك؟! حقا نتا أغلبية دالوقت جالس عند مك ومزال كاري؟!!
اورطيغا: ديك الدار تنخليها منين الدار تتكون عامرة
ملاك: (طلعت لسطح) ودابا غتجلس فيها؟! (دارت سبيكر كتجمع حوايجها للي صبنت وناشرااهم)
اورطيغا: راك شفتي الدار ازين ممفرشاش فيها غير داك بيت نعاس
ملاك: جديد مزال مشفتو !! (كدور للجهة الأخرى كتشوف خيال دغيا حيدت سبيكر) شكون!!
اورطيغا: (سكت)
زهرة: دابا غييير للي يلوح مك من هاد سطح اشمن دار علامن هاضرة
ملاك: (سمعاتو تفرݣع بالظحك قطعت عليه دغيا ودارت لبيل فمها)
مكتحنحنييش
زهرة: (مخنزرة فيها) زول علية داك لپيل
ملاك: هااانتي... دابا هو كان ساكن تحت دار وفاء وهو كان كيعاودلي والله مكاينة شي حاجة من للي فبالك
زهرة: ربي كيفظحك معايا غير بشوية
ملاك: والله مكاينة شي فضيحة اماما راه كنظلو نهضرو من صباح حتى الليل طبيعي غنعرف عليه كولشي
زهرة: الله يخرج عاقيبتك على خير نتي!!
ملاك: اميييين (مشات كتبحلس عليها وتقنعها ولكن منجاتش من القرسة) احححح ونتي شنو كديري هنا؟!
زهرة: كنت تنهضر مع صاحبتك وفاء شحال وهي تصوني كتلقاه مشغول
ملاك: بنت لحرام شي 4 ايام مهضرنا
زهرة: جاوبيها راه بغات غدا تجي عندنا
ملاك: وووو معندكش شي مشكل؟!!
زهرة: بعدا هي مسيكينة كتعاودلي داكشي للي مكتعاودوليش بنتي (خلاتها مع تأنيب الضمير ومشات هبطت لتحت..)
أورطيغا: (عرف مها غتشدها فضل بلا ميصوني ولكن جابتلو الظحك ديما كتشد معاه والمشكل عمرو دار معاها شي حاجة غير داييين التهمة باااطل.. وصلو للحومة هو وعمر مشاو القهوة هو بقا كيكمي وعمر كيخوي اتاي ويشرب)
شنو تما!!
عمر: ݣلت الا كتاب قبل ميرجعو الدار نخطب انا مزال جالس شوية عاد لحق
اورطيغا: خيير
عمر: هاد لبنت منعرفهاش يانا مليح وبغيت نسول عليها
اورطيغا: سول عليها مول الحانوت غيعطيك حتى اولويز فوقاش تتاخدو!!
عمر: ههه نتوما راكو تعرفوها؟!
اورطيغا: (باستغراب حط داك الݣارو طفااه) شكون؟!
عمر: وافا!!
اورطيغا: وفاء صاحبت ملاك؟!
عمر: واه هي الا كتاب هضرت معاها شوية ونويت معاها المعقول بناتلي حتى هي معقولة وبنت الناس صراحة رتاحيت معاها
اورطيغا: (غير كيشوف)
عمر: انا قربت نمشي عندي خدمة شهر ونولي رجع حيت الخدمة فشتا كتكون خفييفة وانا شحال مخديت كونجي ومن حقي ناخد شحال بغيت
اورطيغا: (هز حاجبو وهز دكة كيشرب) هضرتو بزوج؟!
عمر: واه هضرنا شوية زلكن مزال مجبدت معاها الهضرة رسمية
اورطيغا : ونتا متأكد!
عمر: واااه، انا صراحة عجباتني وبغيتها لزواج الا كتاب، هي انسانة واعية مثقفة قارية ماشي بريهيشة نحير فيها
اورطيغا: (جبد ݣارو كيكميه كفاش غيوصلو راه هادي للي بغا يتزوج بيها ديجا نعس معاها ونهار تلقاو تلقاو فبار كانو سكرانين بجوج...)
عمر: شنو امراد؟!
اورطيغا: احححم صلي الإستخارة
عمر: هههه صليت وبانلي الخير ولكن مبغيت نزيد حتى نسولكم نتوما تعرفوها خير
اورطيغا: نسولو ملاك.. ولكن زعما شنوما سولتنا علاقتها معاك نتا للي غتحْكَم عليها وتعرفها مزيان واش صالحة ليك واش غتفاهمو.. خاصك تزيد تعرفها كتر باش نتا تعرف فين تتحط رجلك
عمر: واش من ناحية مطلقة؟
اورطيغا: غير باش تكون عارف كولشي
عمر: واه عاوداتلي شوية واخا غلݣى بزاف دالمشاكل مع مّا وبّا من هاد الناحية
اورطيغا: ووووهي كبيرة عليك ب4 سنين ولا خمسة!!
عمر: راك تعرفها مليح؟!
اورطيغا: شي حاجة.. انا نسول ليك ملاك ولكن نتا خاصك تسول عليها لهيه فتازة
عمر: مراني نعرف حد لهيه.. وهي 8 سنين ولا كتر وهي عايشة هنا وݣالتلي ساكنة هنا مع ملاك
اورطيغا: ملاك ياله عام باش تتعرفها وسكنو بجوج شي 20 يوم مكملاش، يعني صاحبتها غتقولك عليها غير الخير..
ملاك: (كيهضرو فالتيليفون) هادشي كاااامل الحمارة ؟!!
وفاء: خلي حتى نوصل غدا ونعاود ليك ديطاي انا راه صدمني منين طلبلي النمرة وهضر معايا
ملاك: الفقيه للي نتسنااو براكتو دخل الجامع ببلغتو
وفاء: ااااح ايمااا والفقيه ومداير فيا
ملاك: هي فيها سويسرا
وفاء: هههه معندي غرااض بحال بحال الموهيم يكون غير رااجل
ملاك: ناري على فقسة غتزوجي قبل مني?؟
وفاء: بنت لحرام!!! ههه خليني غير نقطع
ملاك: وراه بالصح انا سبقتك اصاحبتي شدي النوبة شوية... ها باش خايبين صحابات!!
وفاء: ينعل حسك بحال ديتلك مراد
ملاك: متقدرييش احبيبة
وفاء: ههه غدا ونكملو دعي معايا اديك البرغوتة
ملاك: الله يجعل عرسي قبل عرسك
وفاء: ههه (قطعت عارفاها كتغير على مراد وعاد وكان عرفت صاحبتها ديجا كانت معاه وباينة حتى هو معاودلهاش حتى التالي عاد رجعو غير اصدقاء... جمعت التبسيمة تفكرت يقدر مراد يعاود هادشي لولد خالتو اكترية ملاك كتقول رجع عزييز عندو!!!)
~~~~~~~~~~~~~
يوسف: (خرجهم فطرو فريسطو فيه أنيماسيون ديال عيساوة باش يبدل الجو لخديجة للي طلب منها يمشيو لعند مو ومقبلتش وعطات تبرير وراتو ان الغالية طردتها نهار كان كيقلب على مراد متصدمش من مو ولكن حسن من مرتو حيت هادشي بزاااف...
وبغا يبدل الجو حتى لغيثة للي كتبانلو مزيان.. بلعكس نشطات وبان فيها انها بدلت الجو وبان حتى فوجها وماكلتها.. شوية تم داخل شريف واسماء جلسو معاهم كانو فجو زويين غيثة للحظة سهات وخممت وكان اورطيغا حبها وبغاها كما بغاتووو كانو غيكونو كوبلات زوينين واخا ماشي صحابات ولكن دراري صحاب اذا لبنات غيتصاحبو... سرحت بخيالها تبسمت وهي كتخيل فاورطيغا للي توحشاتو بزاااف ومكرهتش تشوفو تعنقو )
يوسف: غيثة!!!
غيثة: وي خوياا!!
يوسف: ياله كولي داك الطبسيل بغيتو يكمل كامل
غيثة: هههه الا عندك شي واحد اخر غير حطو
يوسف: نحطلك المحال كاامل غير بينيلي
غيثة: ههه.. اسماء بغيت نرجع لاتوليي
أسماء: (شرح ليها شريف انها كدوز من مرحلة اكتئاب وفقط) انا ندير معاك حاجة زوينة من مور الفطور نخصص ليك ساعة فلاتوليي وتكوين نيت رتاحي من صيام ولفطور...
غيثة: (رجعو من السهرة خدات حبة للي كتخليها مكالمية ولكن ماشي كتهججها ولا تخليها فرحانة كتكون عادية دخلت الدوش حتى بانلها كتقلب فلبلكار تماك لقات تيست جديد باقي فميكتو بقات كتفكر شحاال هزاتو خباتو وخرجت مشات لبيتها مزال مكتهضرش مع ادم وهو مكيقدرش يهضر معاها فتيليفونها...)
خديجة: (بقات ببيجامة خفيفة حيت لبيت دافي فرحانة الدورة الشهرية معطلة عليها ب3 أيام ولكن مهضرت مقالتها حتى لواحد وحتى يوسف باش ربي يسهل عليها ومتسبقش الفرح بليلة) يوسف غيثة كيف كتبان ليك
يوسف: المشكل تتبان طبيعية
خديجة: مشكل!! علاش مشكل؟!
يوسف: وحدة تتعاطا دغيا تبرا؟!! ميمكنش
خديجة: معرفتش!!
يوسف: مهم ها هي محضية هنا حتى ادم مغنخليهش يشوفها
خديجة: حقا بغيت نقولك واحد الحاجة!! (ترددت ولكن هادشي راه قضية حياة أو موت وحياة غيثة للي كضيع للي رجعت عزييييزة عندها) شفتو داك نهار... نهار كنتو كتقلبو على مراد كيكمي فصباح
يوسف: بنهار؟!
خديجة: اه وانا متأكدة حيت بقيت متبعاااه اصلا كيجيني داك بنادم فشكل!!
يوسف: (عقلو سرررح.. هضرة مراد كيشوفها منطقية ها هو بان مكيصومش يعني بحال والو يكون هو صاحب دعوتها!!!... هنا خاصو يتأكد مزياان)
~~~~~~~~~~~~~
زهرة: (رغبت رشيد ومبغاش على عراضة أمينة)
خليني نمشي نبدل الجو شوية شحال من عام وانا مكنخرج حتى فشي مناسبة ومعندي لمن نمشي
رشيد: رمضان هدا ازهرة!!
زهرة: عارفااه رمضان داكشي باش بغيت نمشي حتى انا نجمع شوية وغتكون عندها حتى بنتي خديجة نشوفها وندي معايا ملاك وأنير يبدلو الجو شوية
رشيد: هادي غير ملاك منوضة فيك الصعرة وزايدون عندها لعزارة فين باغية تمشي ديك البنت؟!!
زهرة: منين كنكونو تم ولدها متشوفووش تبارك الله مربي حسن من بزااف
رشيد: لا باااينة!!
زهرة: كفاش باينة نتا من نهار ݣرسيف ونتا كتقول عليه هاكا، ياك لباس؟!
رشيد: مهم يكون خير انا نمشي للقهوة
زهرة.: غدا الا كتاب غنمشيو
رشيد: كديري شراع يديك ازهرة؟!
زهرة: حاشا!! ولكن حتى نتا تبغيلي نبدل لحيوط شوية
رشيد: (حرك راسو بأه خرج من تماك ومشا يكمل شغلو...)
وفاء: (وصلت لصفرو شدت تاكسي من محطة نيشان لدار ملاك رجعت فيها الروح منين عمر هضر معاها كتحس براحة خطيييرة عمرها عرفتها مع شي واحد حتى راجلها اللول كيهضر معاها باحترام كبيير للي افتافداتو شحاال هادي عمرها تنسى نهار قرأ عليها بحال فيقها!!
سلمت على رشيد للي رحب بيها بحرارة اكترية منين شافها تحجبت وعاد هااادئة و ضريفة كان ديما ضد بناتو يديرو صحابات ورباهم ان لخوتات بيناتهم يكونو صحابات ولكن منين بقات ملاك بوحدها خلاها ديرهم..
كانت ماشية فالحومة كتفكر فهاد الحجاب براسها عمرها فكرت تديرو ونهار بغات ديرو دارتو عن قناااعة تااامة وعاد الأحسن صلاتها مبقاتش كتزݣلها حتى من الفجر رجعت مواضبة عليها وكتنوض ليه بكل فرح.. دقت باب الدار حلت ليها ملاك للي كتسناها عنقتها بحرارة)
توحشتك توحشتك توحشتك...
ملاك: الله يمسخك هادشي دايرو ليك غير لبغو والهرمونات عندك طاالعة
وفاء: على زمرة حسن عوان اورطيغا معاك نااشفة!!!
ملاك: دخلي دخلي.. (دخلتها للكوزينة فين مها كانت عاطياها دير شي شهيوة) شنو كتعرفي طيبي؟!
وفاء: هه كتستاغليني!
ملاك: اه طيبتي تاكلي مطيبتيش متاكليش
وفاء: هههه بلاك مراد بهاد الهضرة المخضرة ديالو.. شنو بغيتي وكان ؟!
ملاك: معرفتش شي حاجة معمرة داك نهار درت بيتزا جات زوينة ولكن ماشي بحال للي كندوق برا بغيتك تعجنيلي شي حاجة بحال ديال برا
وفاء: اممم حيت جيتيني راني ناشطة غنديروها بالعجين المورق كتجي زوينة
ملاك: ورقي للي بغيتي غير طلقينا قبل مدخل ماما....
(بقات معاها كتجييب ليها المقادير للي خاصها و كتخدم وتعاود شنو قالها عمر للي كيبحث عليها ويسولها على راسها)
مزيان وواليديك بغاو؟!
وفاء: بالفرحات عليهم امتى نتزوج ولكن انا خاايفة من واحد القضية للي جاتني فشكل!!
ملاك: شنو هي؟!
وفاء: هو فعمرو 32 عام
ملاك: هاي هاي على الفقيه صدق كيبغي لميمات
وفاء: (رشت عليها طحين) كلبة كنبان ليك شارفة!!!
ملاك: (هزت حواجبها كتقلب ليها السم)
مقارنة معاه اه
(شافتها بحال بدات تقلق) اغير كنظحك معاك ازمر العمر راه غير رقم!! قدامو راه كتبانو هوما هادوك
وفاء: هو مزال مقلت ليه شحال فعمري
ملاك: وا ختي اش غنقولك!! الصراحة راه شي حاجة لي ضرووورية فالبدية
وفاء: ههه شكون كيهضر
ملاك: اه انا للي كنهضر
وفاء: هو مسولنيش اصلا مسولنيش والطامة الكبرى والمشكل لكبير فعائلتو واش يقبلو بية كبيرة عليه ومطلقة!!
ملاك: ماااااا مكنظتش باقية هاد العقلية... هانتي شوفي خديجة تزوجت بسهووولة الناس مبقاتش ݣاع كتفكر هاكا الموهيم دابا هو التفاهم...
اورطيغا: (كان فالمحال وجالس معاه عمر، بن سودة مبقاش مشا ليها بأوامر من الحاج مع تعويض خفيف.. صباح كانت خاوية شوية الدعوة،
عمر رجع جبد ليه موضوع وفاء للي متحمس ليه وغير غيهضر معاها هاد المرة غيفاتح دارهم يديرو شي حاجة من مور رمضان قبل ميمشيو وعلى ميقاد وراقو يهبط يدير لاكط..
مراد مقدرش يهضر ولا يقول شي حاجة معارفش واش خاصو اصلا يقول شنو كيعرف على ليلى حيت بتحجبها ومنين دخلت سوق راسها بدلت شحال من حاجة خايف يظلمها وخاايف يظلم ولد خالتو للي شايفو عايش بنية نقية!! جاه أبيل من عند السمسار)
خاي عمر انا عندي شي لعبة خاص نقضيها مغنتعطلش الا قنطت ط..
عمر: لا لا بلعكس مزعفتش من هنا، غير سير خود راحتك
اورطيغا: (حط طابلية ديال الميكة ديالو دخل غسل يديه لبس جاكيط ديالو ومشا للحومة.. طلع فلموبل للي شرات فيه ملاك لقاه تماك حل لباب ودخل الدار كيشوفها السمسار تكلف ودوز عليها المرطوب كاملة من بعد مداز ليها لبلومبي ودارو سلوكة ديال الضو.. بقالها غير دخل المݣانة باسمها)
المعالمية كملو ديور للي هنا ؟!
السمسار: راهم ماشيين..
اورطيغا: مهم نتا شوف معاهم السلعة الا بقات تاخدها البنت هنا بالثمن ديالنا
السمسار: مرحبااا خاي اورطيغا شي حاجة اخرى!!
اورطيغا: العز.. (هبط من تماك ورجع طلع عند السمسار)
عطيني الوراق باش شرات لبنت
السمسار: راهم عندي فالدار
اورطيغا: صافي انا بالليل نشق عليك فقهوتنا المعلومة
السمسار: مشاااات
اورطيغا: (رجع دخل للدار صور ليها ڤيديو شنو تزاد للي كانت غير طوبية وياجور والرملة فالارض والخشب، هبط من تماك مشا لدارو خدا شي حاجة ورجع المحال للي فحال هاد الوقت كتكون عااامرة القضية..)
غيثة: (فاقت معطلة ناضت هزت من صاكها التست للي هزت لخديجة وخرجت مشات الدوش كتشم ريحة طياب عجباتها شافت فالساعة كانت 2 دنهار خديجة كطيب بكري وهي تعطلت بزاف فنعاس...
دخلت طواليط بقات مدة كتفكر نزلت سروالها وهزت طاسة دخلت يدها تحتها باش تعرض البو** كملت خرجتها وبقات كتشوف فيها، هزت الب** بديك اللعبة لي كتكون فيه حطاتو فالأرض ودارت قطيرات فديك الدويرة وبقات حاضية كتسناه يكمل بخوف كبير حاضياااه حتى كيبان طلع ليها الخط اللول بالاحمر بقات على اعصابها والخط التاني بدا كيبان ماشي واضح بحال اللول ولكن كاين وباين!!! دارت يدها على وجهها كتبكي عرفت راسها
حااملة!!!
بقات فديك الوضعية لدقااائق ممتيقاش هادشي!!
رجعت كل مشكل كدووز بيه كيجي من موراه مشكل كبير كينسيها فاللول!! ولكن دابا لحمل بلا زواج ومدمنة من الفوق راه فضيييحة وجريييمة وعاد لحرام للي غيبقى وصمة عار غيتبعها فحيااتها هي وعائلتها..
اول فكرة جاتها فبالها هو طيحو ميمكنش يبقى فأحشائها!!! فين غتجيبو هي اصلا مزال مدمنة الا بقات كتعاطا غادي دير فيه شي تشوه بكات حتى سخفت!! خديجة كدق عليها مقادراش تنوض ركابيها فشلو ودااخت )
خديجة: غيثة!!! غييثة!!!!
غيثة: (معرفت شنو دير؟ واش تقولها لخديجة ناضت مسحت وهزت سروالها غسلت وجهها وقلبها معصوووور خرجت شافت فخديجة)
نعام؟!
خديجة: مالكي؟! علاش كتبكي؟!
غيثة: واالو غير تنفكر نتفارق مع ادم!! الهضرة للي قلتيلي مبقيتش باغاه
خديجة: زيدي بعدا جلسي متفورصيش على راسك نتي أصلا مريضة فكري فراسك بعدا، هدا هو المهم هاد الساعة
غيثة: عفاك متقوليش ليوسف كنت تنبكي
خديجة: علاش نقولها؟!
غيثة: تيبقى مسيكين راد البال معايا بزاف حتى نتي.. عارفة مخليتكمش تهناو فهاد زواج ديما جايبة مشاكل
خديجة: واش نتي حمقة راحنا عائلة نتي ختي صغيرة بحالك بحال ملاك
غيثة: (جاتها لبكية منين تفكرت اورطيغا للي رجعو هو وملاك وباينة علاقتهم غتولي رسمية) واش غيتزوجو؟! ملاك واورطيغا؟!
خديجة: حبيبة غيثة منقدرش نقولك شي حاجة حيت مزال معرفت ولكن بانلي هاكا ماشية علاقتهم كنعرف ختي ملاك عندها غير نيشان نيشان
غيثة: (حركت راسها باه) تستاهل كل خير.. معليش نمشي نعس؟!! تنحس بالدوخة
خديجة: اه سيري ترتاحي يفوت العصر ونفيقك
غيثة: ميغسي خديجة... (رجعت لبيت سدت لباب وشافت فالتست كتبكي.. الخط وضاح مزيان طفات الضو ودخلت تحت الكاشة تبكي وتقول مبكات...)
اورطيغا: (فالليل كان فالحومة عرف غتجي حبيبة قلبو مع مها غدا)
اجي بكري شوية باش نشوفو دارك ونشوفو الزين الصافي والغاابر علية
ملاك: (تبسمت) اه بغيت حتى نشوفك وحتى ماما تشوف الدار وحتى خديجة بغات
اورطيغا: غتجيبي طموبيلتك؟
ملاك: يمكن بابا للي غيجيبنا
اورطيغا: اممم يعني بلا منبان انا فالصورة؟!!
ملاك: حتى لغدا ونقولك (وصلها ڤيديو فلواتس من عندو) صيفطتلي شي حاجة!!
اورطيغا: اه شوفيه وردي علية من بعد ونصوني عليك جايين عندي شي دراري
ملاك: واخ.. (قطعت شافت الفيديو وشهقت فرحانة الدار بانت مزيااان دمعو عينها بالفرحة)
زمر شحال كنبغيييك!!
(بقات كتعاود لڤيديو بزاف دلمرات)
ولكن منين جاب سوارت؟؟؟ هانية الا غيفينيلي الدار يدي حتى الساقطة ومولاتها
(بقات كظحك بحال شي حمقة مغرمة بهاد الشخص للي كيدير شي حوايج خطيييرة كيخليها كتزيد تبغيه نهار على نهار!! كتبت ليه ميساج)
مMerci kbida 😘
(صيفطاتو كتفرنس خرجت مشات كتقلب على مها لقاتها مع وفاء كيهضرو مشات جلست حداها كتوريها الدار)
زهرة: امتى دوزتي المرطوب؟!
ملاك: (خرجت عينها) لبارح
زهرة: سيري بعديني املاك نتي ولكدوب خووت
وفاء: ههه
ملاك: علاش كظحكي نتي؟!
زهرة: بغيتي تشدي فلبنت
ملاك: اوا نتي عارفة اماما شنو كاين براسي مكنت عارفة والو حتى جاني الفيديو
زهرة: اممم اوا غدا خلصيه
ملاك: يخلصو الله!! حتى واحد مقالو ديرها ولا ضربتو على يدو
زهرة: نوضي من حدايا ولا انا للي نوض قبل مطرطقيلي شي عرق
ملاك: مفهمتش علاش كيبقاو يتقلقو مني وانا مدايرة والو
وفاء: هههه
ملاك: تهجرييييه بقاي غير كظحكي نتي، بنتلك انا كلون!!!
يوسف: (كيشوف غيثة لابسة حوايجها) غيثة خارجة؟!
غيثة: (كتدير راسها طبيعية والابتسامة مكتفارقهاش وكتكملها كتمثل الطاقة)
اه بغيت نمشي للصالون ومن موراها دايرة مع اسماء فلاتوليي مسكينة خصصات لية ساعة من مور لفطور
يوسف: ما فيها باس!! تمشي معاك خديجة؟! حيت قبيلة قالتلي بغات تمشي للصالون
خديجة: اه منها نتوانسو
غيثة: (معرفت متقول من غير تبسمت ناض مشا للجامع هي جمعت الطبلة خديجة مشات صلات عاد دخلت للكوزينة تغسل لماعن.. دخل يوسف حطات ليه زلافة ديال لحريرة حيت كيشربها حتى كيرجع من صلا)
حقا غدا معروضين عند خالتي امينة وحتى ماما وملوكة غتجي
يوسف: ياااك!! وعلاش حنا مقبلوش عراضتتا؟!!
خديجة: غدا وسول ماما هه
يوسف: ههه لا لا منقدرش
خديجة: (جلست حداه) هانتا باش متقلقش ماما وخالتي امينة دارو صحبة زوينة وحدة حاطة الراس على لوخرا بحال تقول كانو عايشين بحال بحال من ناحية العائلة
يوسف: وعائلة ماماك؟!
خديجة: هي بابا هه
يوسف: (تبسم كيشرب الحريرة من اللول هي وملاك مكيهضروش على عائلة مهم ولكن للي فهم ان مها معندها عائلة ربما تكون هربت تزوجت رشيد ربما ميكونش عندها مهم مكيدخلش فالتفاصيل معاها حيت مكتهمزش بزاف المهم التربية راه باينة كفاش..
لبست خديجة حيت غيثة كتسناها فالصالة خرجو كاملين وصلهم للصالون وحيت عارفهم غيتعطلو مشا للقهوة يتلاقا مع دراري...)
غيثة: (دخلت خديجة دير لاصيغ وهي برا كيغسلو ليها شعرها كانت بغات تمشي تقلب على شي دوا للي يطيح هادشي للي فكرشها ولكن غتلقى صعووبة مع خديجة حيت 💯 غتوصلها ليوسف.. خاصها ترجع لدارهم تماك عندها الحرية كتر تخرج بوحدها.. خرجت خديجة حتى هي غسلت شعرها وقداتو بوكلي)
اش هاد الزااااز يا ناس غير خويا للي مزوج فهاد الدنيا
خديجة: ههه عويناتك احبيبة
غيثة: عرفتي شنو غنخليكم بوحدكم هاد الليلة غدا ورجع
خديجة: زعما؟!
غيثة: اه نمشي انا عند ماما، اصلا توحشاتني وبغاتني نبات معاها غدا فلعشية نرجع عندك
خديجة: نتي عارفة داري بحال داركم فوقما حبيتي تجي علمي غير خووك انك غنمشي...
مشات لدارهم حساب ليها غتلقى الحرية لقات كفس مها بقات حاضياها كتر من يوسف اما أشرف واقف ليها فالصالة وغير سمعت ادم بغا يجي يشوفها صعرت على مها حتى بغات تسخف ودخلت لبيتها سدت عليها خاصها تلقى حل وغدا صباح غتمشي تقلب!!...
~~~~~~~~~~~~
اصبحنا واصبح الملك لله..
ملاك: (كان الويكاند مخدماتش فاقت ناشطة حيت اليوم غتشوفو.. كملت روتينها من صلا لقراية القران للذكر.. وبقات كتقلب شنو تلبس حيت غتزول المونطو يعني خاص تكون لابسة مزيان من لتحت.. بقات شحال كتلبس وتحايد حتى ريان على لبسة واسعة طويلة فلبيج والماغو حتى جات علاماتها زهرة خاص يمشيو..
خرجت لقات فالطموبيل حتى حمزة جالس فالقدام قلب وجهو كيحاول متجيش العين فالعين بقات غير كضور عينها مصالح ليها لا تنݣر لا تهضر ركبت اللور هي ومها وأنير اما وفاء مشات بكري لفاس، عرفت حتى هوما بغاو يمشيو يشوفو الدار)
احم حقا بابا داك نهار راه دوزت ليها المرطوب... الدار!!
زهرة: (خافت كتر من بنتها من ردة فعلو حتى ضار ديك الدورة ديال الطوبيس)
كنت نسيت معلمتكش كانت قالتهالي وبقيت مع شغال حتى نسينا
حمزة: مزيان باش تجيك الفينسيون ساهلة من بعد
ملاك: داكشي نيت
رشيد: (بصرامة) هبطتي لفاس؟!
ملاك: لا (خرجت عينها) غير السمسار بقاو عندو سوارت وداك نهار هضر معايا على شي سيمة طاحت رخيسة عندو قلتلو تكلف حتى لراس شهر على منشد دارت ديالي ونمشي نخلصو اوا مسكين الله يخلف عليه قام بالواجب براك الله وفيه والله يجعلو فميزان حسناتو ياااا ربي أمين
حمزة: (تبسم من طريقة هضرتها ومنين كدعي مع الناس كيعرفها كتكذب)
أمين، مهم قضا الغراض هدا هو المهم (شاف فرشيد)
منين كيكونو هميزات بحال هاكا مخاصكش تفكر جوج مرات برافو عليها قالتلو تكلف!! ديما كنقولك اعمي راك والد ملاك بميات رااجل
رشيد: هي تبارك الله عليها فهادشي كطيييير مع طيور (معرفت واش شكرها ولا شنو!!)
غير مرة أخرى بنتي تبقاي تشاوري
ملاك: (تبسمت) واخا ابابا
رشيد: شحال حسب عليك؟!
ملاك: حتى نتلقاه ويقولي حيت دوز حتى داك ديال الضو وخاصني نمشي لريضال باش يطلقو المݣانة.. (نقذها حمزة هزت تيليفونها صيفطات ميساج لاورطيغا)
مراد بابا جاي معايا
اورطيغا: (دازت جوج دقائق عاد جاوب، كان بغا هو للي يوريها الدار ويشوف ديك الفرحة فعينيها هاكا كان عاجبو)
معليش انا نوصي السمسار
ملاك: (كتباتلو شنو قالت لباها) وسولني بشحال تقام داكشي؟!
اورطيغا: انا نهضر معاه متخافيش
ملاك: (فكرت شحاال)
بابا جايب معاه حتى حمزة..
(صيفطاتو وكتسناه يشعل.. ساعة مولاش صيفط ليها والميساج تقرا..)
غيثة: (مشات لشحال من طبيبة مكتبغيش دير ليها إجهاض حيت غير قانوني وعاد رمضان وكاين للي طردها كاين للي بغا يبلغ عليها البوليس حيت كتبقى ترغب وتزاوݣ..
خرجت من اخر عيادة كتبكي ميمكنش تخليه فكرشها ميمكنش تزيد فضيحة على فضيحة وهي معارفاش حتى شكون باه تقدير كبير لادم ولكن الوقت للي دارت معاه شي حاجة وعاااقلة كانت قريبة، ودابا منين قلبت كانت عندها 7 السيمانات جلست فكرسي فجريدة حايرة وتالفة وخايفة حتى الا هربت متقدرش تزطط راسها وتعتامد على راسها راه ولفت كولشي كيجي حتى لعندها بااارد!!
وعاد غيقلبو عليها وغيردوها وفبلاصة لفضيحة غتكون 3 دلفضيحات الهروب ولحمل والادمان... مزعمتش تمشي لفرماسيان حيت قالت غيبلغو بيها
بقات كتفكر تمشي لحل عربي يعني دير عشوب وأي حاجة ممكن تطيح الجنين.. صونا تيليفونها كانت مها)
وي ماما!!
انا كنت خرجت نجيب شي حويجات خاصني
ملقيتش اصلا داك المحال حال..
ماما عرفتي شنو تشهيت رفيسة
هههه معرفت شفتها لبارح فلفايس بزاف وبقيت تنفكر فيها..
صافي..
قوليلي شنو ناقص نجيبو انا عفاك غير ديريها اليوم..
واخ..
(قطعت صونات على خديجة باش تجي تفطر وقالت ليها حتى تشوف مع يوسف)
انا تشهيت رفيسة هاد نهار ياكما تكون صعيبة عليك الا كنتي حاملة؟!!!
خديجة: ههه من فمك لسما
غيثة: ديما تندعي معاكم اختي.. قوليلي شنو لعشوب للي صعاب عليك باش منجيبهمش ومنديروهمش
خديجة: راس الحانوت القرفة المساخن.. شوفي نتي غير ديريها كما بغيتي انا ناكل حاجة اخرى
غيثة: ولا نقول لنادية تطيب ليك ديالك بلا هادشي
خديجة: بلاش عليك اختي اصلا ممشهياهاش
غيثة: صافي على خاطرك نتي علمي يوسف وقوليلي شنو كاين
خديجة: صراحة أغيثة انا معروضة واش نسيتي لبارح قلت ليك معروضة عند خالتي امينة
غيثة: ااااااه نسييت صافي واخا من مور الفطور نقدر نجي عندكم
خديجة: مرحبا حبيبة..
وصلو لفاس علمت وفاء للي كانت طلعت لفاس بكري على حساب لفاك تلقاهم لتحت..
قلبها ضرب منين شافت طموبيلتو كاينة وزاد مجاوبش على لميساج..
خرجت من طموبيلة ديال باها كتقلب بعينيها عليه حتى كتشوفو واقف مع وفاء بعيد شوية مشات حدا باها
رشيد: جبتي سوارت؟!
ملاك: (كتفكر تقول لا) اه (كتقلب فصاكها ميمكنش باها فرحان معاها وجاي على قبلها وهي على قبل اورطيغا تصدرو!! ميمكنش!!
مدت ليه سوارت)
انا نصوني على السمسار يجي باش نشوف معاه شحال كيسالني!!
رشيد: خليني انا نهضر معاه
ملاك: واخ.. (مصوناتش عليه، جات وفاء تسالمت معاها وقلبت بعينها مبانش ليه) فينو؟!
وفاء: فالطموبيل ديالو قالك الا شافك كتهضري مع حمزة غيجي يريب على مك هاد الموبل نتي وطاسيلتك (شافت فيها) ههه ما على الرسول الا البلاغ
ملاك: التسليم الالة فقيهتي
وفاء: ههه (طلعو للموبل كانو قادو لاموزيك فدروج) تبارك الله غير داك نهار كانو كيحطو الطوبية عقلتي!!
ملاك: لحلاقم.. (وفاء غير كظحك وصلو الدوزيام ايطاج حل رشيد لباب ودخلو ريحة السيمة جديدة تبسمت فرحانة كتشوف بانو لبيوت الصالون الحمام الكوزينة)
مكرهتش نسد الصالون باش نكريه حتى هو
حمزة: بغيتي تكري بلبيوت
ملاك: قلت... (مبغاتش تكتر معاه الهضرة وتناقشو فشنو بغات دير، مشات كتشوف فالسرجم كانت اونفاص مع طموبيلتو حتى صونا تيليفونها عرفاتو هو وعرفاتو قشعها هزاتو وجاوبت)
الو!!
اورطيغا: شنو جاب داك ميخي معاكم؟!
ملاك: حتى انا معرفتش والله
اورطيغا: اممم (مقوس عينو فيها حتى كيبان حمزة حداها فالسرجم)
حمزة: (مشافهاش كتهضر فالتيليفون) خاصكي تسبقي بسراجم
ملاك: (دارت راسها ݣاع مسمعاتو والمشكل حتى لاخر سكت كيتسناها تجاوب خرجت من داك لبيت كخلية حمزة بلاكة)
الو ؟!!
اورطيغا: (كيحاول يتهدن اما الا صعر يجمع غير براهش الحومة حتى واحد ميخرج من داك الموبل على رجليه) علاش مزال تيهضر معاك!!
ملاك: معرفتش
اورطيغا: راه فيدك ابنتي ضوري فيه اخر مرة!! منعاودش لقاه تيهضر معاك املاك
ملاك: راه ضرت وبزاف هو كيتعامل غي حيت حنا ولاد الجيران وصافي..
زهرة: (فرحت بالدار ديال بنتها بزااف مشات عنقت بنتها خرجو من تماك بقاو لتحت) اوا حنا نمشيو دابا عند أمينة
ملاك: بابا نقدرو بلاتي نجيو عاود حيت خديجة بغات تشوف الدار
رشيد: واااخ.. (شاف فحمزة) نمشيو حنا
حمزة: نمشيو.. ختي ملاك مبروك عليك والله يسر أمرك
ملاك: امين.. شكرا (كان بافيي اورطيغا كتشوفو غير بطرف عينها.. ركبت ملاك ووفاء ومها اللور وصلوهم لدار خديجة للي كتسناهم هبطت سلمت على باها للي كان مزروب وطلعو معاها للدار.. هي مشات لبيت كتهضر فيه مع مراد)
واش مشيت المحال.!
اورطيغا: (معجبوش الحال يجي حمزة) عاد ماشي
ملاك: خليك انا نجي للحومة بابا رجع لصفرو
اورطيغا: بوحدك؟؟
ملاك: لا غتجي معايا ماما وخديجة ووفاء (سمعت صوت يوسف دخل للدار كيرحب بزهرة)
اورطيغا: واش دابا؟!!
ملاك: اه دابا باش من موراها غنمشيو لعندكم
اورطيغا: متعطليش املاك خاصني نمشي المحال
ملاك: اوك (قطعت عارفاه مقلق خرجت اقتراحات عليهم يمشيو للدار ناضو ركبو مع يوسف ومشاو كان اورطيغا حط الطومبيل حدا الموبل فين كاري وقفو تماك)
يوسف: اورطيغا هنا!! (ملاك خرجت عينها فيه وهو ظحك جا عندهم قاطع الشانطي هو وعمر للي لحق منين علماتو وفاء راه جاية الحومة وبلا عݣز حتى هو مشا)
زهرة: (عرفت هنا مابيهاش ختها تشوف الدار عاود دارتهم قنطرة باش تشوف حبيب القلب!!)
ملاك: (فرنست وهي كتشوفو كيدير صواب مع مها وهاز أنير مهضرش معاها حتى السلام مقالهاش ليها من غير بيناتهم شوفات طلعو للدار كيشوفوها.. مشات حداه)
شحال يتقامو سراجم
اورطيغا: تقريبا شي 400 درهم
ملاك: (خرجت عينها) الواحد؟!!
اورطيغا: (تبسم بقا ساكت شحال وضار عندنا) مبغيش نعاود نشوفو كيطوف بساحتك داك نهار قلتي مبقتاش تيقرب ليك ولا حتى كيقول السلام
ملاك: وراه بالصح مبقيتاش كنهضرو ݣاع راه هو جا مع بابا ماشي معايا انا
اورطيغا: (كيشوف فيها وشاد أنير)
ملاك: احم بغيت نقاد سراجم شحال يخصني؟!!
اورطيغا: (ديجا حاسبهم وهادشي داااايز عندو...) 1700 درهم لسراجم ب4 وعاد البالكو ديري باب دالحديد حسن حيت بالاليمينيوم غيتقام غالي
ملاك: صافي انا نعطيهالك بلاتي
اورطيغا: شنو هي؟!
ملاك: فلوس هه فلوس امراد
اورطيغا: خاصني ندير علاش نشد لفلوس
ملاك: هههه (شافت فمها دايزة كتخنزر وهي تجمع الظحكة)
احم ولبيبان دلبيوت؟!؟؟!!
اورطيغا: سيري حدا ماماك
ملاك: (قاستوو فذراعو ضار عندها كامل كيشوف فيها) هادشي للي كدير معايا زوين بزااف!! لهلا يخطييك عليا
اورطيغا: (هز حواجبو) كيف والو
ملاك: لا لا بلعكس صراحة مااا معرفت منقولك
اورطيغا: مور المغرب صرفيها بوسات
ملاك: ههه فرمضان
اورطيغا: نتسنااو مور العيد احبيبي؟!! (فرنست وخرجت من حداه، بدا كيقشب معاها يوسف للي غير بانلو مراد مخزز نقص من الظحك خرجو من تماك كيشوف ولد خالتو كفاش كيشوف فوفاء للي رجع لباسها طويييل ومحتشم.. خرجو كولهم ركب معاه عمر مشاو المحال تابعهم يوسف للي مشاو يتقداو باش يدخلو عند أمينة...)
~~~~~~~~~~~~
نعيمة: معرفت اختي شكون هادي للي راه طايح فيها.. حنا عيينا فيه يدي بنت عمتو شحال وهوما يرغبو ونيت خيرنا ميديه غيرنا ومبغاش
أمينة: اوا زواج هدا اختي معندك فين دخلي
نعيمة: ماشي على ندخل ولكن من شحال وحنا نݣولوها ولبنت دارت الغر عليه
أمينة: اوا متعاوديش حتى يانا كنت غنغلط بحالك وكنت لاسقاه فوحدة وهو مبغاش حتى حياني الله وشفت علاش مبغاش ونيهو دايرها كيف ختو صغيرة
نعيمة: اوا واش نديرو مع باه للي عطا الكلمة لختو
أمينة: يزوجلها صغير، ياك عمر ݣالكم انا باغي وحدة
نعيمة: معرفتها منين ولكن بانلي من هنا
أمينة: الا بغا يختار راسو نتي متزيديه غير دعوة الخير ولدك راه راجل وعارف واش يدير متشريش لعداوة معاه
نعيمة: هاحنا نشوفو هاد الحريرة.. (بقاو مكملين التوجاد خرجت بنتها من حداهم) ونتي ولدك ݣلب ولا نݣلبولو حنا!!
أمينة: (عرفت كتهضر على بنتها) ولدي نشاعالله من مور العيد غنخطبلو وحدة متختاريها ليه من بين لبنات غير هي
نعيمة: اممم مزيان الله يكمل بالخير، راكي تعرفيها؟!
أمينة: نݣولو.. وطلݣي يدك انعيمة باش نجلسو معاهم على خاطرنا...
وصلو مع يوسف للسعادة هي زربت هبطت مشات طلت على اورطيغا فالمحال كان خدام كتسناهم يجيو المحال تقريبا فيه رجال وعيالات كبار شوية، مشافهاش وصلو لوخرين شافت وفاء وعمر متليين بيناتهم مسافة ولكن كيهضرو وللي لاحظت عمر مكيشوفش فيها عكس وفاء للي منين هزت راسها محيداتوش حتى كانت غتعثر بدرجة!!!
ظحكتها عارفة الزعطة شحال كتبهدل اكترية منين كتكوني مع واحد عندو شخصية ومهيب!!
طلعو للدار غير هوما يوسف رجع لخدمتو وعمر دخل حدا اورطيغا لابس طابلية حتى هو كيعاونو وداير ليه اورطيغا 50 درهم فنهار واخا لاخر مبغاش ولكن اورطيغا عندو مبدأ خدمتي تخلص مكيناش شي حاجة غير هكاك ونيت لقاه معاون حيت كاين الرواج وخصوصا فلعواشر!!
ملاك: (من بعد مدخلت للدار تحت ترحيبات أمينة وحتى هوما دخلو فيدهم وجابو توب جلابة بشالها لأمينة وجابت ليها ديكور زوين عاد جابو الديسير تمر معمر لي صواري وداكشي ديال باتيسري استئذنت ملاك عيات مها تغمز وتعض فشنايفها والو قالت ليها ضروري تمشي تخلص السمسار حيت قالها شحال كيسال)
زهرة: خلي حتى يجي باك بلاتي
ملاك: والا مشا لا اماما انا متبقى على رقبتي حتى شي ريال
زهرة: (جات تبعها وهي تهرب لها وكانو نيت مقنتين خرجت ملاك اما وفاء وخديجة وياسمين كانو فالكوزينة..)
ملاك: (دازت من حدا المحال ماشية كتقلب على التجاري بنك قشعها ولكن كانت الخدمة فيدو مشات تيرات الفلوس الي قالها اورطيغا يخصو لسراجم ورجعت قبل مطلع فالمصعد لحقها بطابليتو)
مراد!!
اورطيغا: فين مشيتي نتي؟!
ملاك: (تبسمت رجعت واقفة حداه هازة راسها) مشيت جبت الفلوس على حساب سراجم (حلت صاكها جبدتهم وحسبتهم كانو 3000 درهم دارتهم فجيب طابليتو للي فصدرو)
بغيتك الا جات على خاطرك تقادلي حتى لباب والطفايات ديال الضو وشي بولات
اورطيغا: وشي زليجات وشوية دالݣبص
ملاك: هههه نتا غير قولي شحال يخص ونصيفط ليك ولكن سراجم بغيتهم يتقادو هوما لوالة الا كان ممكن (هزت حواجبها ببراءة مع ابتسامتها) ممكن!!
اورطيغا: (كدوخو بهاد الشوفة) سيري طلعي
ملاك: جبت ليك كادو خليتو ليك فبيتك
اورطيغا: انا مباغي منك والو، انا باغيك نتي
ملاك: ماشي شي حاجة غير شفتها عجباتني وبغيت نجيبهالك
اورطيغا: اممم
ملاك: باااي (بركت على زر المصعد) نتسنااك فلفطوور (تسد لباب وهوما كيشوفو فبعضياتهم هي كتبسم وهو غير كيشوف حتى تسد لباب)
هههه مك يا مك داكشي ديال ݣواظالوپي...
تحط الفطور كان كتير ومتنوع ولذييذ دراري حطو ليهم فلبيت حيت هاد المرة لعيالات للي مشاو للصالون حيت كتار وياخدو راحتهم..
نعيمة: ݣالتلي أمينة لبنت شرات الدار تبارك الله
زهرة: (تبسمت وحركت راسها باه شافت بفخر فملاك واخا كانت محلفة عليها)
نعيمة: الله يدخلها عليها بربح
زهرة: اللهم امين احبيبة
أمينة: فين شريتيها ابنتي؟!
ملاك: فالليدو.. دوك ديور للي كيتبناو جداد
أمينة: تماك فين كان الكاريان؟؟
ملاك: اه
أمينة: (حركت راسها باه) سكنت تماك انا وولدي شي 7 سنين ولا كتر
ملاك: فاش كنت كتقرا فلفاك كانو باقيين الكاريان اما دابا رجع حي آخر تبدل
أمينة: شحااااال من عام ممشيت لتماك لا انا لا مراد ضربنا على داك القنت
ملاك: (هزت حواجبها شافت فمها وطمرو كياكلو كتعاود ليهم على المعاناة للي دوزت تماك وعلى مراد للي كان كيسمح فقرايتو ويمشي يبيع الميكا ولا الملحة ويمشي للسوق يوصل مع الناس تقدية مهم كل مرة وفين.. جا عندهم مراد كيعيط على مو حتى قالتلو دخل حيت كانو ݣاع لبنات لابسين حجابهم)
اورطيغا: وغير اجي
أمينة: (خرجت عندو كانت ملاك قالتلو خلات شي حاجة فوق النموسية ومنين دخل لبيتو ملقى والو) واش الساعة؟؟!
اورطيغا: (معرفش شنو جابت) اه
أمينة: راني درتها فماريوك هادشي علاش معيطلي ومنوض صداع (مشا لبيتو هي رجعت الصالون، قلب جبد بواطة فلݣري مكتوب عليها curren تبسم وحلها عجباتو واخا تكون خايبة غتعجبو ولكن بالصح عجباتووو
هانا على سمييمو مبقاتش مخيطة البزطام!!
(دار الساعة فيدو عجباتو رد لبواطة لماريو ديالو ومشا هو وعمر للجامع..)
غيثة: (كتاكل فديك رفيسة ودارت فزلافة ديال البلول 3 معالق كبااار ديال راس الحانوت.. كتشوف فيها مها)
مالكي؟!
الغالية: مالك على هاد الحالة نتي؟!
.غيثة: هه جعت هاد نهار بزاف وكنت مشهياها هاد الايام تطلع لية غير هي فالتيكطوك والانستغرام
اشرف: هاد لي ليزابلكاسيون لاحظت اي حاجة تنبغيوها تلقاهم سبقوني تيحطو تصاور
مرتو: اه عندك الحق حتى انا تنلاحظها
غيثة: (عجبها الحال تبدل الموضوع) حيت تيكونو تيتصنتو علينا على للي فهمت.. (كملو الماكلة تجمعات الطابلة وبدا جوفها كيتروع طلعت بشوية باش متعيقش مع غبرت مشات كتجري لبيتها نيشان طواليط ردت كولشي وهي مباغيااش!!)
~~~~~~~~~~~~~~
أمينة: ياك املوكة كولهم شافو الدار وخالتك أمينة لا
ملاك: (تبسمت) الا بغيتي نمشيو دابا
أمينة: خلي يجي مراد من الجامع
نجية: وݣولو يجبد من عمر لكلام على المرا للي باغيها
وفاء: (طرطقت عينها وهزت كاس دلما كتشرب وكتشوف فمو كتبان صعييبة وخوفها موحال واش تقبل بيها!! ومن حقها حيت هي عارفة شنو دوزت وعارفة عمر كيف داير)
أمينة: انا نسولو نيت بلاتي
نجية: خاطري هااارب، الولد جاي صحة سلام شوية بغا جواج
أمينة: ههه ومال جواج كيخلع اختي نعيمة!! غير نتي فرختي شحال ما بغيتي ودابا الولد بغيتي توݣفيلو فسعدو؟!
نجية: ماشي هكاك!! غير منين ݣال متعرفوهاش!!
نعيمة: الله يهديك اختي نعيمة ديري النية ولدك راه كبير وعقلو تبارك الله يوزن بلد كما خلاوها المصراوة
ملاك: ههه (ظحكت على مصراوة وهي تقرسها مها ضارت لقات حتى وفاء كتخنزر فيها راه موضوع حساااس وهي كظحك) احم (هزت تمرة كتاكل)
أمينة: (بقات كتقنعها باش مينوضش شي خصام مع ولدها)
ياسمين: حتى انا داكشي للي ݣلت لماما خويا عمر عارف واش يدير وهو من حقو يختار للي حبت خاطرو
وفاء: (كتحسب فراسها العجوزة قبيحة واللوسة ضرييفة!!)
رجعو رجال من الجامع لبنات كانو جمعو الكوزينة والدار خلاوها كتشعل اما ملاك كترد غير للي يرجع لبلاكار ولا الثلاجة.. دخل مراد يشرب لقاها هي ووفاء كيتهامسو
اورطيغا: هاي هاي على الفسيسرة ديالي طالقة علينا حداݣتها (قرد كيشرب لما وهي متبعاه)
ملاك: (فرنست) انا للي جمعت كولشي
اورطيغا: الحمدلله (وقف رد الكاس فلڤابو) من هاد انا للي جمعت كولشي تقت فيك..
ملاك: هههه والله حتى عاونت
اورطيغا: اممم.. (ممعتابرينش وفاء للي ضايرة كتمسح الكيسان مخطمة ابليكاسيون صم بكم عمي)
شنو فيها نسلتو شي سليتة!!
ملاك: مك بغات تشوف الدار
اورطيغا: اشمن دار؟!
ملاك: (هزت حواجبها بتعالي) داري..
اورطيغا: اممم.. وبغات تمشي للحومة؟
ملاك: هي عارفاها تماك
اورطيغا: عنداك تقولي انا ساكن تماك
ملاك: لا لا انا عارفاك مخبع ديك السكنة
اورطيغا: (هز يدو وراها الساعة)
ملاك: بصحتك جاتك زويييينة
اورطيغا: عويناتك العمييرة.. (عيطلو عمر وهو كيشوف فملاك دار راسو مسمعوش) اجي نوريك بيتي
ملاك: ههه واش حمق ولا أثرت عليك الحريرة
اورطيغا: بجوج!
وفاء: (تحصرت فالكوزينة مقدرتش حتى تخرج حيت الا خرجت حتى ملاك خاص تخرج)
أمينة: مراااااد مراااد (دخلت للكوزينة لقاتو متكي على الثلاجة كيشوف فملاك) من ݣبيل وانا نعيط
اورطيغا: شنو الوالدة عااود!!!
أمينة: ياله نخرجو شوية ونمشي نشوف دوييرة ديال ملاك
اورطيغا: ما فيهاش الضو.. نديك فصباح حسن، الا بغيتو دابا تخرجو لشي قنت نديكم
ملاك: (عرفاتو مبغاهاش تمشي لتماك)
أمينة: صافي نهضر معاهم يلبسو ونخرجو
اورطيغا: تتموتي على الخروج
أمينة: سمييتو التفواااج..
اورطيغا: (خرجت وفاء من الكوزينة حيت شافتهم باغيينك يبقاو بوحدهم وجات تخرج ملاك تتبعها هو يزرب عليها دخل دافعها بصدرو وهي دغيا كترجع باللور باش ميحاديش فيها حل باب الثلاجة مكلالي بيه باش متهربس وهي كتبسم مخرجة عينها للي داخل للكوزينة غيبان ليه غير هو وهي لداخل مخبعة باب الثلاجة)
شنو نتي؟!
ملاك: ههه لبرد سدها
اورطيغا: (حط يدو على صدرو) هاكا تنحس بالليل خاصني دفا فهاد شتا
ملاك: اممم (هزت حواجبها الحركة للي كتعجبو اوطوماتيك كيتبسم) عمر شي قرعة ديال جاڤيل قديمة بالما سخون وعنقها
اورطيغا: مكفياش
ملاك: شري شوڤاج (كتعوج وتبسم)
اورطيغا: بغيت لحم
ملاك: طلع شي سݣيطة ههه
اورطيغا: بغيتك نتي
ملاك: رمضان هدا اعوذ بالله من الشيطان الرجيم استغفر مولاك لاحول ولاقوة الا بالله العلي العظيم
اورطيغا: (كيشوف فيها وعينيه قربو ياكلووها وحتى هي كتبسم وكتشوف فعينيه) شي نهار ناكل مك
ملاك: مراد خليني نمشي راه تقبنا الورقة مع ماما
اورطيغا: منين تقيب تقيب اجي نتقبوها فمرة
ملاك: ههه (دفعاتو بيدها فصدرو بعد شوية وخرجت من الكوزينة مخليها.. من بعد ملبسو بغاو يخرجو وشتا بدات كتطيح مجهدة مع الريح دارو بناقص)
زهرة: (صونا عليها رشيد باش يجي ولكن مخلاتوش يجي فهاد العاصفة... أمينة مشات للكوزينة دارت الغلاي باش يعمرو أتاي تبعتها زهرة وخديجة)
خديجة: ياله معايا للدار اماما
أمينة: هانتوما جالسين هنا ازهرة
زهرة: لا نمشيو اختي الدار عندك عامرة نمشي مع بنتي على ميجي رشيد
أمينة: الدار تهزك نتي اللولة ازهرة هانتي جالسة نتي وملوكة وخديجة نردو لعشا ونتجمعو عليه... (عيات ترغبها وفالتالي قنعتها يجلسو ملاك جالسة فالصالون كتشوف وفاء متوترة بوجود نعيمة وبنتها واكترية منين كتسمع انها متخوفة من هاد العروسة للي باغي ولدها)
غيثة: (من بعد مردت ݣاع للي كلاتو فالفطور هبطت للكوزينة عاود عمرت زلافة ودارت 4 معالق كبار ديال المساخن طلعت لبيتها سدت عليها وجلست بغات تشربها.
مقدرتش تزيد تشرب البلول غير كتحط معلقة فشنايفها كتروع مكتقدرش وكتزيد ترد كولشي.. بقات كتبكي بغات تطيحو دغيا طلعت فوق النموسية ديالها وبقات كتنقز.. عيات وحتى حاجة مكتحس بيها من غير شي حريق خفييف بحال ديال الدورة كدخل لطواليط مكتلقى والو... دخلت للفايس ݣروب ديال بنات كتقرا المشاكل حتى هي كتبت بوسط كتقلب على شي حل باش تطيح لبيبي حيت ميمكنش تكفل بيه ومعندهاش مسؤوليتو وكتبت انها تغتاصبات باش يتعاطفو معاها ويقولو شنو دير خبات سميتها وحطاتو... كتسنى الأجوبة الادمنة مزال مقبلت لانونص ديالها وبقات كتسنى... صونا عليها ادم تفكرت دوا واش تشرب ولا شنو دير جاوبااتو ممكن يعطيها هو شي حل)
وي ادم؟!
ادم: حبيبة توحشتك بغيت نشوفك
غيثة: انا لا متوحشتكش ومتنبغيكش ويمكن تنكرهك ومتنحملش نشوف وجهك
ادم: ههه شنو وقع معاك؟!
غيثة: تظحك ادم؟! واخا خسارة فيك هاد سمية بغيت غير نفهم واش نتا ملحد؟!
ادم: ملحد!! شنو تتعني هاد الكلمة؟!
غيثة: هي مكتامنش بالله متتصومش مجرم بدلتيلي حياتي وخرجت عليها الله ياخد فيك الحق
ادم: نتي تتصومي احبيبة وتتصلي؟!؟
غيثة: (غير كتصوم) اه
ادم: متنظنش تتصلي للي تيصلي متيلبسش دوك لحوايج متيخليش ظفارو طوال وكل نهار صباغة فشكل متيطلقش شعرو متيديرش مكياج وليباغفان!! هاكا تنعرف على المسلمين ونتي تديري هادو كاملين!! زائد تتعطاي تتنعسي معايا تتشربي يعني عايشة حياتك كما بغيتي
غيثة: (كتبكي حيت زمتها) ولكن تنآمن بالله متنكميش فوسط نهار رمضان
ادم: ههه وشنو الفرق علاش العبادة كاينة غير فشهر رمضان وغير فصباح بالظبط!!!
غيثة: (معرفت باش تجاوب
ادم: شوفي هي يا بيض يا كحل ياديري داكشي ديال الارهاب كامل يا تعيشي طبيعية باش غدخليلي نتا ملحد متديرش هاكا غير تتكوني تتخربقي ميمكنش تنصحي ولا تعايري بشي حاجة نتي متديريهاش!! هدا تيتسمى تناقض وونفاق ديني احبيبة
غيثة: تنكرهك ادم
ادم: شنو دابا متخرجيش عندي احبيبة!!! توحشتك ومتنبغيش نكون مع شي وحدة أخرى من غيرك!!
غيثة: (كتحس بالاستفزاز.. قطعت عليه حيت كيغلبها بالهضرة رجعت شافت داك المنشور مزال كتقلب تكاات والدوخة قاتلااها....)
اورطيغا: (موالف كيخرج ولكن هاد نهار مبغاش واخا يوسف بغا يخرج يتقهوا والو مبغاش عيطو على شريف هو للدار للي كيتسناهم فالقهوة وجلسو مجموعين.. مو كانت هي وختها وزهرة كيطيبو لعشا ولبنات فالصالون.. صيفط ليها ميساج)
اورطيغا: زين نسلتو للمحال
ملاك: (تبسمت) دابا ولا بلاتي
اورطيغا: ڤري؟!
ملاك: (ظحكت وكملت كتشوف فياسمين كفاش كتهضر باداب وكلامها كولو متول ومرزن عرفت انها جامعية ودابا كتخدم مع باها فالمحال للي كيبيعو كل ما هو مغربي تماك)
خديجة: كيقولو الطبيعة تماك زوينة
ياسمين: واه الدنيا تما زييينة وفريييجة
ملاك: (اورطيغا كيصوني قطعت وكتبت ليه) وي!!!
اورطيغا: اجي لبيتي نوريك واحد لوسادة شريتها
ملاك: ههه غنحرش عليك ماما الا مبعدتينيش
اورطيغا: (تبسم وبقا مجمع شاف فعمر كيكتب فلواتس عرفو طايح على زنافرو وعارف وفاء قااادة ولكن حتى عمر إنسان معقول وصاارم معندو فين ينصحو مجاش يقولو كانت معايا واخا ميتزوجهاش مغينساهالوش!! وعاد شكون هو باش يوقف فباب رزقها راه حتى هو فنفس موقفها... قلب عينو..
كملو جموع قبل ميطيب لعشا جا رشيد كانت هدنات شتا شوية، عياو يشدووهم والو مشاو لصفرو ولوخرين بقاو تعشاو يوسف وخديجة مشاو لدارهم اورطيغا دخل لبيتو سد لباب دوز نمرة ديال ملاك وهو كيرد الساعة لبواطة ديالها عندو سوايع زوينين ولكن هادي ديال ملاك زاايدة نغييزة فقلبو جاوبت)
مبقا لرمضان واالو
ملاك: ههه غير 11 اليوم
اورطيغا: وااايلي!! حسابلي شي سيمانة
ملاك: ههه.. (كتنغزها وفاء تسولو) مراد فخبارك بلان وفاء وعمر؟!
اورطيغا: اممم
ملاك: مقالش امتى يخطب؟
اورطيغا: شغلو هداك
ملاك: ومهضرتش معاه نتا؟!
اورطيغا: فاش غنهضر املاك نقول شي حاجة للي نخرج بيها على لبنت؟!
ملاك: (تحرجت حيدت سبيكر ووفاء سقلت) شنو غتقول؟!
اورطيغا: ملاك خطينا من هادشي انا لي تيهمني هو نتي وموضوعنا نهضرو فيه
ملاك: لا غير زعما الواحد كيدخل بخيط بيض باش ربي حتى هو كيفاجيها عليه
اورطيغا: وهادشي للي داير حتى أنا قلتلو وفاء إنسانة مزيانة قلبها بيض ظريفة قارية وصافي هادشي للي تنعرف، وعاد منين دارت حجابها مخلاتلي فين نهضر
ملاك: بالصح.. (شافت وفاء خرجت ومبغاتش تزيد تهضر فالموضوع باش متسمعش الي يخليها دابز معاه..)
يتبع...
التعليقات
لا توجد تعليقات بعد، كن أول من يعلق.