محتوى القصة
خديجة: (تبسمت من هادشي للي موجد ليها عاد فهمت إلحاحو عليها باش تجي واش كان دايرها مفاجئة من قبل منين قالها تبقى ولا غير رأيو؟؟! مهم هو للي كاين دابا)
تعشيت؟!! حيت جبت ليك لعشا ديالك!
يوسف: (تبسم) ولكن ماشي حشومة؟!!
خديجة: علاش حشومة!! راه ماما للي صيفطاتلك
يوسف: الله يخلف عليها.. (كانت بواطة فيها المدفونة مشا جاب فورشيط وذاق) اممم البنة حااضرة تبارك عليكم عندكم بنة فطيابكم خاصة بيكم..
خديجة: (تبسمت) وجبت الشباكية وكولشي ديال رمضان (كتوريه)
يوسف: (حط لبواطة ومشا عنقها) زواجي بيك كان أحسن حاجة درتها فحياتي... وعمري غندم عليك بلعكس كنت غنكون حمق الا زݣلتك..
خديجة: (بإستغراب ولكن تبسمت)
يوسف: (باسها فخدها، وشاف فيها) انا وجدت ليك شي حاجة تلبسيها لداخل.. (باستئذان) واخا تلبسيها؟!!
خديجة: اممم واخا.. (مشات دخلت لبيت اول حاجة دخلت للحمام طرفت راسها دغيا على حساب تمارة دهنت راسها بكريم ديالها وخرجت لبست داك لغوب للي جاب ليها قدات ميكاب خفييف رشت بارفان ديالها عيط ليها طلقت شعرها حنات ورداتو القدام نفضااتو مزياان عاد هزت راسها قداتلو لڤوليم لبست الخلخال حلت المجر ولسقت بيرسينغ فسرتها للي كتلسق بكولة ديال رموش.. شافت فلمرايا الغوب كانت ديال الجلد سميطات رقااق على كتاف ومضرق شوية من صدرها ومن الكرش ليهونش كانت شبيكة وباينة البيرسينغ منو..
خرجت عندو كان قاد لمسات الأخيرة فين شعل شمع شافها متبمسة جاية كتحلون فمشيتها طلعها وهبطها بإعجاب كبيير مد يدو شدت فيه باسها)
زوين هادشي
يوسف: ماشي بحالك.. (رجع باسها فعنقها) تنبغييك..
~~~~~~~~~~~~~~~
اورطيغا: شنو نتي زعما
ملاك: شنو؟!
اورطيغا: شنو بلان خونا للي معاك فالدار
ملاك: شكون فيهم؟!
اورطيغا: (هز حواجبو) اه كاين جوج!!
ملاك: اه ولاد عمي جاو مع باهم لفين ساكنين واش فنظرك غنطردهم؟!! شكون انا اصلا للي نهضر كما انا جالسة حتى هوما جالسين
اورطيغا: صلابة بعدا!!!
ملاك: مراد هوما اولا صغار علية وحنا كبرنا بحال لخووت كما نتا كتقول غيثة هاكا كبرنا وانا بيتي بوحدي يعني بابي سدان علية ومنين كنخرج راه كنبقى بدرتي وحوايجي واغلبية رجال بوحدهم وحنا لوحدنا يعني مكاينش اختلاط
اورطيغا: (مكتخليلوش منين يشدها) وعلاش مقلتيهاش
ملاك: فاش جيت من عندك لقيتهم فالدار كانو عاد وصلو
اورطيغا: اممم... اوا تيعجبك تلبسي سترينغ؟!
ملاك: (صدمها) دغيا كتنقز!!....
~~~~~~~~~~~~~
اصبحنا واصبح الملك لله..
اورطيغا: (فاق بكري كما العادة مقادرش ينوض منعسش بكري حيت أول مرة غيهضر مع ملاك وكيدخلها الموضوع فوق 21 بالسيف واخا عيات تهرب ليه ولكن حس بيها حتى هي حتى كتبغي تهضر فهادشي كتراااجع مهم بدات الامور كتطور ميمكنش يبقاو يهضرو بحال لخووت.. ناض بالسيف قضا روتينو صلا صلاتو خرج بكري مشا حتى لتماك ويفطر.. صونا عليها فاش وصلت 9 كان فطر وسالا)
التوووت
ملاك: صباح الخير
اورطيغا: صبااحو.. منشوفكش هاد نهار!!
ملاك: ماشي بزاف تجي لصفرو ونتا مضوبل الخدمة
اورطيغا: ومتجيش نتي أسميمو!!
ملاك: ههه مصالحليش بابا اصلا غيكون تماك اليوم هو وشي واحد غيسولو على الدار (مبغاتش تقول حتى حمزة)
اورطيغا: (عيطلو شي واحد) شوية ونزغرت ليك
ملاك: ها!!
اورطيغا: نصوني نصوني زعما...
ملاك: اممم
اورطيغا: كتعرفي قضية تزغريت
ملاك: (خرجت عينها وبغات تبدل الموضوع) ديال صلا وسلام
اورطيغا: ههه اه ديال الله يبارك فعمر سيدي.. انا شوية ونصوني..
غيثة: (الليل كامل منعستش اصلا مدخلتش بكري كانت معاه فشي قنت معقلاش بزاف ولكن حاسة بشنو كانت كدير معاه ولكن منين سولها على شكون ديڤيرجاك تصدمت معرفتش تجاوب كانت كتمنى هو يجاوب واش كان هو اللول ولا دوك الاسماء للي كيجيو فبالها ومنهم اسم اورطيغا؟!
وصلت 8 دصباح دخلت دوشت خرجت نشفت شعرها قدات وجهها بميكاب خفيف يخفي داك الشحوب والحبوب للي بداو كيطرطقو ليها، لبست حوايجها وخرجت ناوية تقطع علاقتها بيه فمرة وعطا الله فين تشري شنو بغات تخلص فلوس ومتبقاش معاه كتخلص بلحمها..
حتى تشوف شي حل لمشكلتها فاالقريب.. فطرت مع مها وخرجت شدت تاكسي لاتوليي نيشان بغات ترجع كيف كانت ولكن تدريجيا ميمكنش تجي وتقطع فمرة بغات تشغل وقتها ما أمكن عندها عزييمة انها تبري راسها براسها وعاد عندها أمل كبير فرمضان انها تبرا من ديما كانت كتسمع أي مدمن بغا يقطع داكشي للي مبلي بيه رمضان احسن خيااار...
تبسمت بأمل كبير غتكمل فمشروعها ومغتزيدش تخلي خوها ومها كيتعذبو معاها وعليها كتر من هاكا،
خاصها دير عقلها مع غتحل لباب دخل، خرج شريف تبسمت وسلمت عليه من الوجه حتى عنقاتو وكولها أمل كبيييير)
توحشتك بزااف
شريف: (متبسم شاد فظهرها) غبرتي الأميرة ديالنا
أسماء: (كانت موراه كتوصلو لباب بقات كتشوف فهاد التعنيقة متعحبة!!، عاد حيدت من حداه ورجعت حتى هي عنقتها بنفس الحرارة مستغربة كتشوف فشريف للي مولفها هاكا دايرة.. )
غيثة: باغدووون اسماء كنت تنغيب بزاف ولكن دابا صافي مبقالي فين نغيب بغيت ناخد ليكسبريونس دغيا باش نبدا حتى انا مشروعي ان شاء الله ياك غتوقفي معايا
أسماء: بيان سيييغ حبيبة
شريف: (عجباتو منين رجعاتلها الطاقة راه كانو كيعانيو معاها فصمت واخا بعيد ولكن ميبغيهاش ضيع وعقلو كيبقى معاها وعاد يوسف للي مدمر من جيهتها.. غيثة عندها مكانة فقلووبهم كبيرة)
هي صافي نويتي ؟!
غيثة: اه ان شاء الله
شريف: مزيان.. ياله فتيات نخلييكم من بعد نتلقاو
غيثة: باااااي (دخلت تخليهم يتوادعو على راحتهم كتشوفهم اليقين لبعضيااتهم صونا تيليفونها كان ادم رداتو لصاكها من بعد مدارت صيلونص باش تعرف تركز مزيان مع أسماء..)
~~~~~~~~~~~
خديجة: (دوزو صباح زويين من بعد ليلة رومانسية فطرو وكان نيت هو للي وجد لفطور وقادو)
شنو مور هاد الحلاوة راك غتولفني هاكا!!!
يوسف: هه بصحتك احبيبتي تستاهلي كل خير
خديجة: (تبسمت كتاكل) خاص ندي لخالتي الغالية داكشي للي جبت
يوسف: انا نوصلو ليها.. امم عرفتي مشهي داك معقلتش سميتو اه مسمن بالشحمة بغيتك تقاديلي منو (مباغيهاش تمشي لتماك)
خديجة: بغيتيه اليوم؟!
يوسف: لا على حساب رمضان ياك هاكا تتوجدو دوك تويشيات
خديجة: ههه مرحبا شنو اخر
يوسف: شوفي انا نوصلك لسوبر مارشي تقداي شنو بغيتي نغبر ساعة منتعطلش على مضوري على راحتك ونلحق عليك نكمل معاك
خديجة: امم واخ.. (هناها من المشية عند الغالية ناضو دوشو بجوج مكملين*******
لبسو حوايجهم وصلها لمرجان هو مشا للخدمة مغيديش لمو داكشي حيت عارف جوابها اصلا مباغيش يتحااك معاها ولحق عليها كيكملو السخرة...)
الغالية: (اتصلات بالياقوت دارو يتلقاو فقهوة لبست حوايجها وهي كتهضر مع ختها للي عاودت ليها كولشي وكتسمع نصيحتها انها متسمحش فحفيدها خاص دخلو باسم يوسف وفنفس الوقت مدخلش بين يوسف ومرتو تخليه هو يقولها ليها وهي تبعدها)
تمشي تموووت شكون سوق ليها وأصلا شكون بحالها الياقوت غير عتقتها من طلاق التاني..
مهم ختي من بعد ونصوني عليك...
ههه ضرووري نصورو ليك...
معلوم غنعاود نديرولو تحليل الأبوة واش هادشي فيه اللعب!!!
ياله بسلامة حبيبتي...
(قطعت صونات على غيثة الي أكدت عليها انها فلاتوليي ودارت معاها أبيل ڤيديو كتبان ليها بنتها رجعت ليها شوية الظحكة.. ولكن مزال متعرف واش بالصح غتقاد ولا لا.. فطريقها صونا عليها راجلها علمها فلعشية غيجيو هو وولدها...
وصلت لتماك لقات الياقوت كتسناها وحداها بوسيت..)
~~~~~~~~~~~~
حمزة: (كان رجع من الخدمة الحد الان مقادرش يقيس أميمة من غير الا جات من عندها المبادرة واخا معندو ݣانة حتى لحاجة الا وقفت عليه غيقوم بالواجب ديالو مع مرتو.. دخلت عليه كيبدل كتبانلو مهدنة بزااف بحال هزيت وحدة وحطيت وحدة)
أميمة كولشي مزيان!
أميمة: الحمد لله احمزة قولي واخا نمشيو لقبر ولدنا..
حمزة: واخا
أميمة: واش كنت كتزورو؟!
حمزة: ضروري نهار اه ونهار لا وكل جمعة
أميمة: (بقات كتشوف فيه ممتيقاش) داكشي للي سمعت بابا كيقول واش بالصح بغيتيه فالتالي
حمزة: والله حتى بغيتو.. أميمة عارف راسي غلطت معاك بزااف نتمنى تسمحيلي على داكشي للي فات
أميمة: مسامحاك اولد عمي حتى نتا سمحلي.. (تبسمت) حنا غنحطو لغدا متعطلش
حمزة: واخ.. (خرجت غير كيبغي يفكر فملاك كيشغل راسو باش ميفكرش فيها صافي خدا قرار ومغيرجعش فيه واخا يوقع لي يوقع واخا يعرف هي تجي عندو مغيتراجعش براكة غير بسباب عنادو عليها خسرها وخسر رووح وماشي أي روح خسر ولدو للي موحال واش شي نهار غيبرى من هاد تأنيب الضمير للي كيعيشو سوا فايق ولا ناعس...)
رمضااان
كان أول نهار فسيدنا رمضان وجا بالسبت، ملاك كانت فبيتها مقدرتش تنوض واكترية هي كتبغي تشرب بزااف راه زهرة فاطمة بناتها كاملين على لما..
فضلت تشد الطابليط وتجلس ملاهية تماك ولا تخرج برا وتلقا شقا وهي كيسالي معاها رمضان وصيام.. وصلت 12 نهار اورطيغا مصوناش ݣاع!!
ملاك: معرفتش مالو ماصوناش ياكما كيجيه صوتي سيكسي ولا كيبقى يتخيلني!! كولشي ممكن!! ههه
(نعلت الشيطان وناضت توضات باش تصلي هزت القران ديالها للي شراتو مؤخرا فالغوز مع لبيسة ديال صلا وتسبيح فنفس اللون وبدات كتقرا صونا تيليفونها خلاتو كيصوني مشافتش حتى شكون فقط قطعت الصوت.. كملت 4 أحزاب للي كدير فنهار عاد سدت القران بايسااه حطاتو على جنب وهزت تيليفونها لقات اورطيغا تبسمت ورجعت صونات عليه قطع ورجع هضر معاها)
سلاااام
اورطيغا: كتكووت
ملاك: فين غابر
اورطيغا: بين لغبابر.. مزال فذبيحة قربت نكمل غنمشي للدار نبدل باش نمشي للمحال
ملاك: يحسن عوااانك
اورطيغا: ويييه كتزيدني حتى القطعة ولفت الݣارو فصباح من مور ذبيحة
ملاك: بحرا تهنا من داك الدخان غيخرج على شنايفك.. احم على ريتك
اورطيغا: (تبسم) هنييينا البنت حتى لدابا عاد بديتي تهضري!!
ملاك: ههه بالصح بالصح خاصك تقطعو
اورطيغا: اممم
ملاك: مراااد والله حتى كنهضر معاك بالصح معندو باش ينفعك ولا يزييدك مكرهتش تزولو فمرة
اورطيغا: واخا ملاك (كيهرب من مو لقاها هي)
ملاك: فخبارك حنا فالدار حتى واحد مكيكمي ولا حتى فرجال خوتاتي
اورطيغا: اممم اولا رجال خوتاتك للي فبرا تيكميو بجوج وباك وعمك تيكميو السبسي
ملاك: (بثقة) لااااااا بابا مكيكميش
اورطيغا: اااه بالصح
ملاك: (مرضاتش) راه بالصح بابا مكيكميش معمرني شفتو كيكمي
اورطيغا: الله يهديك ابنتي راه كيكمي شقيفات مدرحين
ملاك: (بانفعال) بزاااف عليك انا بابا مكيكميش
اورطيغا: مال مك تتغوتي
ملاك: حيت بابا متيكميش انا للي عارفاه عرفتي شنو من بعد ونهضرو
اورطيغا: (قطعت عرفها تكون مرضاتش راه كضل تهضر على باها بحال شي بطل ولكن هو هضر عادي بانتلو هي للي مقطووعة ماشي هي...)
ملاك: (بقات فبلاصتها عارفة ماشي تصرف بعقلو ولكن باها ومها وخواتتها متقدرش شي واحد يهضر فيهم بالخايب واخا يكون خايبين هوما كيبقاو خط أحمر عريييض ممنوع شي حد كما كان يهضر فيهم ولا يمسخم..
وعاد يقولها باها كيكمي هي عمرها شافتو حتى كما ݣارو عادي!! يمكن يكون كيكمي ولكن ميقولهالهاش بغات ديما تشوفو كما موالفة.. تعصبت بزااف رجعت تغطات غير سمعت الدقان سقرت باش متنوضش تعاون رجع صونا مجاوبتش.. )
زهرة: ملاااك حلي..
ملاك: (ناضت من بلاصتها حلت لباب باينة معصبة) صباح الخير
زهرة: 2 دنهار هادي اصلا، صباح ابنتي فقتي ومخرجتيش!!! عاود رجعتي لعادتك ولقيتي نيت لبيت فين تخباي
ملاك: اماما راكي عارفاااني كيسالي معايا صيام كندوخ وقلبي كيوجعني وركابية كيفشلو
زهرة: سمعي نقولك لحريرة طابت ودابا اجي تعلمي طيبي شي حاجة تنفعي بيها
ملاك: (خرجت عينها) لا
زهرة: (هضرت بشوية) باغا تزوجي ونتي مفضية!!
ملاك: مغنتزوجش!!
زهرة: حطي حوايج صلا واجي قبل مدخل شي وحدة من مرات عمامك
ملاك: اماما!! (مشات خلاتها تأفأفت لبست بيجامتها ودارت شالها حيت ولد عمها كاين فالدار مشات للكوزينة لقات بصلات فوق البوطاجي)
قطعيلي غير البصلة وشلضيها
زهرة: يااااك والأميرة شنو غدير؟
ملاك: شوفي اصلا انا البصلة غنبقى نشريها من عند صحاب سناكات مقطعة ومصايبة
زهرة: باغا تجشميني مع أمينة!! راك شفتيها شحال حاارة نسااي داك تبهليل الخاوي راه ولدها هو للي راجل وعندو طياب زوين
ملاك: اوا هانتي قلتيها بجوجهم كيطيبو مزيان انا علاش نداحس معاهم فالكوزينة
زهرة: شلظي البصلة املاك
ملاك: علاش و الهاشوار؟!
زهرة: ياله غير طلقينا، راه مزال تابعك العجينة
ملاك: بناقص من شي زواج ݣاع (جات خارجة جرتها مها من قب بيجامتها زيدتها بالسيف عليها تقاد بطبوط معمر..)
زهرة: قالتلي أمينة بغا يشري فشي حي زوين..
ملاك: اه بغا يشري فنفس الحي للي كاينة فيه مو زوين داك الحي موقر مافيهش صدااع
زهرة: امم مزيان الله يسهل عليكم ابنتي
ملاك: (تبسمت) أمين.. ولكن قالي الفراش غنبقاو كل مرة نشريو حاجة
زهرة: ماشي مشكل ابنتي راه حتى حاجة مكتجي دقة وحدة حاجة بحاجة. حتى نتي تعاوني معاه
ملاك: انااا.. انا غيكون عندي كريدي ديال داري راه سمعتي بابا شي 3 ايام ونطلعو نقادو لوراق وداكشي صافي زويييت
زهرة: سمعي اديك زقيريمة هو مغيكونش وااقف عليك ولكن نتي مرة مرة دخلي شي حاجة هاديك راه دارك حتى نتي وتباركالله راكي بخلصتك ومتابعك والو ما فيها باس تقادي لبلاصة لي غتكوني عايشة فيها كما غتكون دارو راه دارك حتى نتي..
اورطيغا: (رجع للدار مهدود دوش لبس حوايجو صلا العصر جلس 5 دقايق كيرد النفس، وهبط للمحال وبدات الخدمة مزيرة واخا فرمضان كيجيب جوج دراري من الحومة يخدمو ياله كيجيبو التعادل مع الناس ومرة مرة كيزيدو الرابع..
بقات للمغرب ساعة بدات رجل كتقل شوية وهو حس بلعيا بزااف كما العادة خرج المحلبة للي موالف باش يجيب زلافة حريرة ومسمنة طلع حطهم فالدار جبد صوص مطيشة للي صيباتلو مو دارهم فطجين جبد الكفتة دارها كويرات فالطاجين زاد العطرية وخلاه فوق البوطة مشاعلش عليه ونزل للمحال يصيفط دراري حيت بعاد وهو بقا على متبقى نص ساعة يسد ويطلع..
رجع صونا على ملاك مكتجاوبش قال تكون مشغولة مع التوجاد ظالكوزينى صونات عليه مو كما العادة مبغاهاش تصيفطلو حتى شي حاجة من تماك..
نقا المحال سدو فمرة حيت مغيحلش من مور المغرب وطلع للدار مهدود يكمل توجاد لفطور..)
~~~~~~~~~~~~
غيثة: (جالسة شادة تيليفونها بدات الحالة كتجيها وهي كضور فعينها ميمكنش ترجعلو راه قررت تبعد خاص تصبر راه يوماين جلست بلاش تزيد تصبر حتى توالف كان عندها التحدي تصبر 20 يوم حيت هاكا قرات فكتاب ان أي واحد بغا يحايد شي بلية خايبة ويطردها من الجسم ديالو خاصو يوقف منها 20 يوم وغيبدا ينساها حتى يكرهها وميعاودش يقرب يديرها...)
الغالية: (جلست حدا غيثة) علاش مبقيتيش تتجاوبي ادم؟!!
غيثة: غير مناقشين اماما فشي حاجة ولكن غنتصالحو غير تنعلمو يحتارمني
الغالية: علاش قلل منك فشي حاجة!!
غيثة: اه شي حاجة من خدمتي مهم ماشي شي حاجة خايبة غير تنعلمو يبدا يحتارم انني غندير مشروع وغنكون بيزنس وومن سيدة اعمال (عارفة هنا مغظغطش عليها تهضر معاه)
الغالية: اه خاصو يحتارمك
غيثة: داكشي باش متديهاش فكلاموو نتي غير قولو الله يهديها وصافي
الغالية: اممم.. خاك مهضرش معاك؟!
غيثة: هضرنا أخر مرة.. ماما خاصك تقولهم يجيو يفطرو معانا ولكن نساي موضوع الياقوت
الغالية: عرفتي ابنتي داك الوليد منين شفتو لبارح فالقهوة غير يوسف منين كيحل عويناتو وظحيكتو كما كان صغير
غيثة: عفاك اماما مدخليش اصلا راه وليتو بجوج بعاد على بعضياتكم مبقيتوش كما كنتو فمرة؟!
الغالية: كولشي بسباب الشلحة
غيثة: عفاك اماما عيطي عليه هو وخديجة ميمكنش نبقاو مفرقين رمضان هدا ديما كيبغي جماعة ياك ديما تتقوليها نتي
الغالية: وكان غير يجي بوحدو.. صافي دابا نعيط ياك ابنتي مبقيتي تديري والو!!
غيثة: لا متتشوفيش حالتي كيف ولات
الغالية: الله يهديك على راسك وعلية ابنتي...
ملاك: (من بعد مبداو الفطور كتشوف للي هز بطبوطة يا مكيكملهاش يعض عضة وحدة ويحط الباقي مكيوليش يدور بيه ولا كيكمل شوية ولكن مكيزيدش الثانية!!!
كتعرف على هاد البطبوط فاش كتقادو مها ولا مرت عمها كيطيير ولا من اللول كيتفرق باش كولشي ياكل منو هزت وحدة عضت وبقات كتاكل وكدور عينها العجينة مافيهاش حس الملحة وجاية حلوة شوية ولعمارة مذاق العطرية غالب بزاف واكترية الخرقوم وسكينجبير والبصلة مزال خضرة شوية)
احم.. منين درت بطبوط صحي شفت حتى وحدة مكتاكل، باز كيعجبكم غير كنوور (رجال بوحدهم وعيالات بوحدهم)
سهام: اشمن صحي املاك خليهم يديهم عمك لدجاج ولقنون
زهرة: قل خيرا او اصمت هاكا خاصنا نديرو اسهام، البنت ياله كتعلم
سهام: قلنا غير كلمة الحق هه
ملاك: منعاودش نطيب
زهرة: (هزت كتاكل منها) انا بعدا عجبتني تبارك الله على بنتي دابا تزيد تطيب وتعلم وترجعو تشتاقو ذوقو غير من يديها
ملاك: (حركت راسها بلا) مغنعاودش نطيب!!!...
داز الليل كامل مبغاتش تجاوبو كان مخدمش غير صلا تراويح مشا للحومة قضا غراضو وبقا مع دراري.. رجع للدار وجد لعشا ديالو صونا مرة مجاوبتش وبقا متكي حتى داتو عينو بلعيا.. مفاق غير على صوت اذان الفجر! شداتو فقسة استغفر الله ناض توضا خرج للجامع كيحس براسو عطشان من دابا صلا صلاتو ورجع للدار جبد عليها بنعسة ساعة ونص ومشا لذبيحة مدوز نهار قااسح ومن زهرو كان نهار مشمش..
~~~~~~~~~~~~
خديجة: (قدات بلاطو ديال المعجنات مالحين و كتحاول يكون داكشي مقاد مزيان باش متسمعش كريتيك من عند الغالية.. جمعت الكوزينة مزيان عاد مشات طرفت راسها وبقات كتسنى يوسف يخرج من الخدمة للي جاتو على غفلة باش يمشيو لدارهم)
~~~~~~~~~~~~~~
ملاك: (كانت فسطح كتلعب مع أنير قرات ميساج ديالو وباينة كاتبو هو معصب)
*مال مك متتجاوبيش*
ملاك: امم من صباح مصوناش ومنين مصيفط ميساج مصيفطو مالي مكنجاوبش ونتا من لبارح مصونيت من غير 2 مرات!!!!.. (مجاوبتش مبغاتوش يقول على باها كيكمي وعاد شقوفة!! قرب يأذن صونا جاوبت منفخة)
اورطيغا: (معصب وزادتو هي) علاش نتي متتجاوبيش؟!!
ملاك: نتا عارف انا علاش معصبة!!
اورطيغا: علاش الخ** شنو قلت ݣاع باش منفخة وهازة خناافرك من لبارح!!!
ملاك: (خرجت عينها عمرو هضر معاها هاكا قطعت معجبهاش الحال يهضر معاها هاكا!! رجع صونا مبغاتش تجاوب باين معصب وغادي غير يخليهم يوصلو لمواضع خاايبة حيت هي مغتسكتلوش وعارفاه حتى هو صعييب!!!! )
ملاك: (كملت الفطور دورت عينها كيهضرو على بنات عمها للي غيجيو والدار غتعمر.. جات تسلت وهي تعيط ليها مها وعاد معندها ݣانة كلات بالزربة باش تمشي تحل المشكل مع اورطيغا مبغاتش يبقاو هاكا..) شنو اماما خاص نزرب نصلي ترااوح
زهرة: تراوح مزالها ربع ساعة غيقدك تغسلي فيها الماعن
ملاك: (خرجت عينها) غير زلافة وكاس ومعلقة للي كليت فيهم وشي لاخر كلينا فيه مجموعين علاش انا!!
زهرة: (بتهديد) نلقا الماعن كيشعلو كتفهمي!! ياله ياله بحرا تجيبيها مع ترااوح اه ملقاش كوكوط عامرةتحت البوطاجي وطبسيل نغطي طبسيل وفوسطهم تمرة.. اه طباسل الشباكية والزميتة مكنديرهمش فسطولة كنخويوهم ونغسلو طباسل... تفاهمناا ازين
ملاك: (عرفت مها حمرت فيها العين يعني غتغسلهم غتغسلهم اللهم تمشي تسالي دغيا.. مشات للكوزينة لقات جبل ديال الماعن بقات تنݣر وتسب وزادتها مدابزتها مع اورطيغا جات بغات تبدا وهي توقف عليها مها كتأمر وتوريها حتى حيدت الوسخ كامل ونقات الدنيا عاد بدات تغسل الكيسان هوما لوالة ومها كتوريها بقات واقفة عليها حتى غسلت الطنجرة ديال لحريرة حيت كانت متأكدة الا موقفتش عليها مكانتش غتغسلها وبحال والو تحطلهم زلايف وتعمرها باما بحجة كيرقدو... كملت وشافت فمها)
شي حاجة اخرى الالة!!!
زهرة: الله يرضي عليك ابنتي غدا ديري حسابك طيبي لينا شي شهيوة من دوك ليديدات لغزاليين
ملاك: هاد الساعة كنعرف غير تطياب الݣلب نطيبو ليكم؟!! (مشات كتنݣر ومها كظحك مشات لحمام مها توضأت عاد رجعت لبيتها بدلت لبيجامة للي عمرت ليها بلما لبست حوايج صلا وبدات كتصلي.. متنكرش عيات باش تركز فصلاتها وعقلها كان مع اورطيغا كتر عمرو هضر معاها هاكا!! وعاد خاص يتحايد هاد العناد شوية باش يزيدو يتفاهمو كتر..
كملت وجلست فوق زربيتها مربعة يدها هزت تيليفونها حتى هو مرجعش صونا ولا صيفط ليها شي ميساج جاتها فشكل يوماين كاملة مهضروش وكملها هاكا!!
غدا الاثنين غدا غتهبط لفاس هي وباها تشري الدار واش غتلقاه ويجي عندها!! ولكن باينة مغيجييش غير منين مسولش لحد الان دارت مود أڤيون وبقات مرخية فبيتها كتفكر غير كفاش يتصالحوو شدت التسبيح وبقات كتستغفر الله باش يصفا دماغها وتنقص هاد العصبية للي كتركب فيها فرمضان مع الجمييييع..)
~~~~~~~~~~~~~
أمينة: (شادين طريق لصفرو) مغتݣولش شنو طاااري
اورطيغا: والو.. ياك داك نهار وصاتك على كرعين اليوم طاح فية داكشي بزااايد قلت تاخديه ليييهم... (كمل الصوݣان زرب على مو مع فطرت مشا عندها لقاها فطرت هزها يمشيو بلا تسبييق.. كانو قربو يوصلو) صوني على صاحبتك علميها
أمينة: ونتا غدخل؟!
اورطيغا: دابا نتي صوني الوالدة راك عارفاني فاش تنكون معصب
أمينة: معصب على راسك!! واش نتا ماشي تشوف البنت ونتا هاكا عنداك دير شي حاجة للي تندم عليها... واش دابزتو؟!
اورطيغا: (مكيهضرش، صونات على زهرة علماتها انها جايبة ليها شوية الكرعين للي وصاتها عليهم وزهرة رحبت بيهم وقالت أمينة قنطت وجات تشووفها... وصلو القهوة كانت عااامرة خرجو هز دوك الكرعين للي جايب فݣلاصيير كبيرة ديال لحم..)
أمينة: عنداك تخرج جنونك فلبنت ݣولي غير شنو بينكم؟
اورطيغا: زيدي الوالدة زيدي..
أمينة: لوكان جبنا غير كرطونة سكر وهانا خاطبينها ههه (شافتو مكيظحكش)
السلامة يا ربي.. ها ودني وديرلها شي حاجة!!
اورطيغا: وا زيييدي...
ملاك: (مفهمتش مجية ديال أمينة والسؤال المهم والأهم شكون للي جايبها!!! والا كان هو غيكون صونا تفكرت انها دارت مود أفيوون مشات جرات لبيتها شعلاتو لقات جوج ديال بواط فوكال شداتو جات عندها زهرة دارت راسها كانت كتصلي مخرجة عينها عارفة من مور هاد المجية غيكون شاااعل عليها...)
زهرة: هانتي هنا اجي وجدي معايا شنو نحط
ملاك: ماما نتي هاد نهار عاد حرتي فالكوزينة
زهرة: (كظحك معاها) زعما راه غتكون عݣوزتك
ملاك: هه سيري اماما انا راه كنت كندعي ربي يسهلي فلبيعة وشرية ديال غدا
زهرة: الله يقبل احبيبتي ويسهل عليك.. (كتفتاخر بهادشي حيت منين وعاو بناتها مدخلة ليهم فكرة فوقما صعابت عليكم شي حاجة صلييو وربي غيجيب التيسير..)
ياله نوضي راه قالتلي قربت
ملاك: واش مراد للي جايبها؟!
زهرة: منعرف نسولوك نتي عليه!!!.. يمكن هو حيت قالتلي جا هزني وهو مكيفطرش معاهم جالس بوحدو
ملاك: اممم.. (ناضت تبعت مها حطو للي قسم الله عيالات عمامها خرجو مشاو لمدينة يتقداو شي حاجة على حساب فطور الغد للي غيكون ضياف وكانو غير هي ومها بجوج هزت أنير سمعت الدقان)
احم يمكن وصلت!! هاد المجية جاتني فشكل!! غير الله يحضر السلامة
زهرة: سيري حلي (مشات هازة أنير قبل متحل قرست حنوكها تبان مزنݣة شوية حلت لباب كتشوفو مخنزر وزهرة كتبسم)
ملاك: (مدت حنكها سلمت على أمينة وعينها عليه للي باينة طايرة ليه)
زيدي اخالتي أمينة مرحبا بيييك
(دخلت أمينة مدورة وجهها كتشوف فولدها) مراد!!
اورطيغا: علاش نتي طافية داك ال**** ؟؟
أمينة: (خرجت عينها فيه) مراااد!! (جات زهرة كترحب وهي دور دارت ابتسامة)
ملاك: (صدمها كتفكر غير واش جا على حسابها منين طفات التيليفون)
اورطيغا: تنهضر معاك البشار!!! علاش طافياه ومن لبارح ونتي منفخة شنو واقع فملك الله؟!
ملاك: (كتهضر بشوية) مراد واش حمق؟! دابا يجي بابا!! ولا ماما تسمع
اورطيغا: دابا نفريوها هاد تبرهيش معنديش معاها تشدي طريق معايا مرحبا متشديهاش غنخلي مك تشديها بلا هوااك
حمزة: (خارج من دارهم كيتفاجئ بيهم بجووج حنا راسو وزاد ماشي من طريقو)
اورطيغا: (مكشكش) هضري.. واش انا دايزة علية تمااارة تنسرق الوقت نهضر معاك تفاجيها علية وتتزيدي بهادشي ديالك!! تقطعي وتهضري فوقما بغيتي وانا اخر همك!!
ملاك: (غير كتشووف فيه باينة فيه كتر من معصب أنير كيمد يديه باغي يمشي عندو)
اورطيغا: اااخر مرة املاك تطفي علية التيليفون الاخر مرة.. (حنا هز لݣلاصيير مدخلها مبعدة من لباب متبعاه حطها فوسط الدار كانت زهرة وامينة جالسين فوسط الدار) سلام لالة زهرة لباس عليك؟!
زهرة: الحمد لله اولدي ونتا؟!
اورطيغا: الحمد لله براك الله وفيك... (شاف فمو) انا نتسناك برا على متكملي..
ملاك: (وصل حداها منين جا خارج مكيضويهاش) صبر مالك دخلتي فية هاكا طول وعرض
اورطيغا: (شاف فيها ورجع شاف من موراه دارو لوخرين راسهم مكيشوفوش واخا راه متبعينهم بطرف عينهم) شي نهار غندخل فمك ونوريك هاد صلاابة للي فيك
ملاك: راك نتا للي غلطت معايا، علاش مكتعتارفش بالغلط ديالك امراد؟!!!
اورطيغا: (مقرب ليها مخزز حاني راسو ليها) فاش؟!!! فاش غلطت؟!!!
ملاك: احم (شافت فيه) مراد هوما هنا
اورطيغا: (بقا كيشوف فيها تم ماشي وهي تلحق خرجت لبرا) سيري دخلي..
ملاك: لبارح نتا غلطتي ونتا عارف
اورطيغا: وهانا غلطت!!! شنو وقع ݣاع فملك الله للي يخليك تطفي التيليفون ومتجاوبنيش!!! (مقرب ليها حتى كلاها فالحيط) بالعقل املاك شنو هاد الغلط للي درت!!
ملاك: (شافتو شعل) احم مراد!!
اورطيغا: (عاد وعى رجع اللور زاد ماشي تبعاتو لطريق) سيري ولا غنعطب مك!!
ملاك: (خافت تخسرو) صبر غير نهضرو بعدا واش مكتعرفش ندتحاور
اورطيغا: (مخرج عينو) شوفي غير تمشي ولا احسن ملوية تجيك فالوجه
ملاك: (شدت فيديه كانو سخان عكسها للي باردين) انا مكنبغيش للي يهضر على بابا محسيتش براسي فاش درت هاكاك.. انا هاكا واخا يكون بابا غالط لا مكنقبلش كلمة صغيرة عليه
اورطيغا: (كيشوف فعينيها) انا مهضرتش فباباك جا موضوع عادي مفهمتش اصلا علاش كبرتي الموضوع
ملاك: لا مكنبغيش للي يهضر فيه
اورطيغا: (سكت كيشوف فيها)
حمزة: (كان فراس الدرب شايفهم وكفاش ملاك شدت فيد صاحبها قلب عينو كيدير جهدو باش ينسى واخا صعييب ولكن خاصو ينسى ويطوي صفحة ملاك)
اورطيغا: (حرك يدو وجمعات يدها) سيري دخلي دابا..
ملاك: (كتحلون عليه بعينيها وكتحرك حواجبها) صافي!!
اورطيغا: قلت هاد شهر زعما غنعل الشيطان ساعة تسلطتي علية نتي قلتي للشيطان متتعرف والو
ملاك: (بدلع) انا شيطانة!!
اورطيغا: (بقا كيشووووف فعينيها مدة والتعب باين عليه) دخلي املاك
ملاك: (تبسمت ومشات دخلت اما هو مشا نيشان لطموبيلتو.. سمعت أمينة كتهضر مع ولدها باش تخرج)
هانتي جالسة اخالتي
أمينة: نمشي ابنتي خاصو ينعس شوية حيت كيفيق صباح بكري وكيعيا بزاااف
زهرة: اااه الله يعاونو مسيكين
أمينة: الله يهنيكم.. ،(توادعت معاهم مع مشات ضارت زهرة عند ملاك مع مدت يدها تقرسها حيت بانت شنو سر هاد المجية طارت لبيتها سادة عليها مخبعة)
زهرة: حتى تخرجي لمك ونوريك هاد ضسااارة كون محشمتي وكان دخلتيه لبيتك..
اورطيغا: (كانو فطريق كيهضرو هو ومو موضوعهم ملاك) من مور رمضان ان شاء الله نجيو واخا ميخرجش ليها الميطاسيون
أمينة: صافي هي نوجدو راسنا؟!
اورطيغا: اش غتوجدي غير غنسبق خطوبة نتبتها حتى تجي لفاس عاد نعقد على مها ونجيبها نيشان مكاين لا عرس لا سطا حمص
أمينة: العرس غاااانديرو غييير تهنا
اورطيغا: عرسي نتي وياها الا بغيتو ومنين تكملو طلقيلي لبنت نكمل شغلي معاها
أمينة: الله يمسخك الجحموووم
اورطيغا: (تبسم بتعب وصلها للرياض وهو مشا للدار مقادرش يزيد يوقف ولا يهضر طلع للدار، وجد طاجين معرف كفاش ݣاع دارلو وحطو فوق نار مهييلة ريݣل التيليفون باش ميتصيدش حتى طلع ابيل ڤيديو منها جاوب)
وي ملاك
ملاك: (تبسمت) كبيييدة
اورطيغا: غير ديال شي صقلة!!
ملاك: حشومة عليك!!
اورطيغا: (تكا بلاصتو) زوينة ديك الكسوة للي كنتي لابسة قبيلة
ملاك: هاديك ديال صلا، عندي شي 5 كيعجبني كل مرة نصلي بلون كتفتحلي الشهية على صلا
اورطيغا: امم مزيان
ملاك: باغدوون مراد مكنتش عارفاك غتقلق هاكا وتجي ونتا عيان ولكن..
اورطيغا: غتبقى تجيك النفس علية هاكا بحال كدرتيلي مع باك!!
ملاك: أكيييييد، نتا راك أهم حاجة عندي منبغيش للي يقول فيك شي كلمة خايبة
اورطيغا: (غير كيشووف وعينيه كيتغمضو)
ملاك: ولكن الناس كيجيو يزورو بوكي فلوغ شكلاط حليوات نتا جايب كرعين ههه
اورطيغا: (تبسم) المرة جاية نجيب ليك مليجات اما حسن ضربي لحم ولا تشمي الورد
ملاك: ههه عندك بعد نظر
اورطيغا: (عيا بزاف) ملوكة نعول عليك تفيقيني
ملاك: واخا امتى؟!
اورطيغا: شي ساعة ونص صوني علية
ملاك: صافي واخا غير رتاح...
غيثة: (مقدرتش تنعس مزيان بقات ماشية جاية فبيتها هاد الايام كتشرب ماغنزيوم ماغنزيوم سيرو نعاس اي حاجة ممكن ترخيها وتنعسها باش ياله ياله كتنعس ومكتعذبش بزاف، واخا كتحس بدمها قرب يخرج منها بكترة مكيفوور الحكودة والاعصاب وقلة الشهية كتحس بالفشلة والدوخة.. هزت سيرو دنعاس عاود شربات منو ودخلت لفراشها مغطية وهي كترجف ماشي من البرد حيت البيت عندها دافي ولكن من الادمان هاملة وناسية انها فصباح رمضان وصاايمة!!)
ادم: (مفهمش ومتسرطاتش ليه هاد القلبة للي دايرة ليه غيثة اصلا كفاش قدرت تصمد هاد 4 أيام بلا لادروك!!! جا عندهم للدار مقتدرش يصبر مع احتيطاتو للي موالف كانت خديجة للي جالسة فالصالة لابسة لباس واسع مع شال حيت لبارح فطرو وباتو معاهم يوسف مشا للخدمة وهي بقات غيزيدو معاهم هاد نهار.. هبطت الغالية مع الدخلة ديالو كترحب بيه بابتسامة عرييضة)
ادم: لالة الغالية!!
الغالية: اهلا اهلا بولدي ادم لباس عليك؟!
ادم: لباس ونتي؟!
الغالية: الحمد لله اولدي مبروك عواشرك (تبسم) غتجيو عندنا ان شاء الله شي نهار اجيو تفطرو معانا مجموعين
ادم: شي نهار.. قوليلي واش غيثة صاڤا؟!!!!
الغالية: الحمد لله علاش!!! ياكما مخاصمين ؟!!
ادم: لا غير شحال مشفتها وقالتلي فرمضان تتعيى شوية
الغالية: هي رمضان تيجيها قاسح فصيام
ادم: اممم، واخا تعيطي ليها؟!!
الغالية: ناديااااااا.. نااادية!!! (شافت فخديجة) نوض نتي عيط على لالة غيثة
خديجة: (طلعت وهبطت فيها ورجعت كتشوف فالتيليفون ناعلة الشيطان متجاولهاش حسن)
الغالية: صبر اولدي انا جاية الا مقضيت شغلي لراسي معندك علامن تعول!! (مع طلعت، خديجة حتى هي مشات لبيتها بقات حدا السرجم كتهضر مع خوتاتها فأبيل ڤيديو مشروك كيتسناو ملاك تجاوبهم شنو دارت فشرا ديال الدار)
الغالية: غيثة غيثة!!!
(سمعتها كتجخر مبغاتش ضيع ليها نعاسها هبطت عتاذرت من ادم للي مشا مفاهمش هادشي خرج وبقا حدا الطموبيل)
خديجة: (متبعااه كتشوف فيه كترمش بالزربة وكتزيد تأكد واقف حدا طموبيلتو)
اويلي واش هدا كيكمي!!!
استغفر الله!! والله حتى كيكمي!! من الاول هاد ادم مرتاحيييتش ليه!!!! والله حتى كيكمي (ركب فطموبيلتو ومشا وهي بقات مصدومة)
فرمضاااان!!!!!
~~~~~~~~~~~~~
ملاك: (كانو عند لعدول مع السمسار للي عندو لوكالة يبيع حيت مول العمارة رجع لبرا كما قالهم كملو امورهم القانونية وسنات رجعت الملكية لملاك وعاود سنات على عقد ديال تخلص 1700 درهم مدة عماين ديال طريطا من للي بقالها فخلاص الدار فرحت ظحكت حتى غرغرو عينيها بدموع ممتيقاش هاد الحلم للي كان كيجيها مستحيل انها توصلو بهاد السهولة وكان من الأحلام لي شبه مستحيل حيت صعيب تجمع وتشري دار بلا مساعدة البنك للي كولها مشاكل وربا... ممستوعباش ان حلمها تحقق وهادشي كامل بفضل باها مها وخوتاتها و اورطييييييييييغا !!صيفطات ليه ميساج وهي مغرمة)
*كنموووت علييك*
ملاك: (شدت الوراق كتقرا ممتيقاش غير ديك الكلمة الي كتقرا فالورقة ديال المالكة من موراها سميتها خلاتها كتبكي بالفرحة جا عندها باها بنظرة فخر واعتزاز.. بصوت مخنوق)
والله ممتيقة
رشيد: الحمدلله على كل حال ابنتي
ملاك: الحمدلله.. غنديرلكم زردة وااااعرة
رشيد: فلوسك دابا زايدين فيك ديري بيهم الفينسيون
ملاك: اه اه بالصح (ظحكت بفرحة كبيرة وعنقت باها صونا تيليفونها كان اورطيغا قطعت الصوت بالفرحة مكرهتش تعاود لباها عليه لوكان كان اورطيغا حداها تعنقو، فرحانة بزااف بزاااف.. خرجو من تماك رجعو الدار ديالها كتشوف فيها وتخيل الفنسيون لي دير ليها كتشوف ديور للي حداها كيتفيناو دخلت لدار للي حداها وبقات كتسول لمعلمية تماك وباها كيقلب عليها حتى سمع صوتها لحق بيها خرجها كينݣر عليها وهي كتحلف بغات غير تشوف شحال غيتقام عليها وشنو رخييس!! خرجو وياه شادة سواارتها)
سمعت هاد الݣاراجات كراتهم شي بنك غيشركو الݣراجات بتلاتة
رشيد: مزيان
ملاك: خاص حتى انا نفيني
رشيد: جمعي شوية بعدا وفيني
ملاك: معرفت باش نبدا
رشيد: (شاف فالساعة) انا خاص نهبط ابنتي نجيب السلعة
ملاك: صافي انا نطلع لفاك واش غتعطل؟؟
رشيد: شوية ابنتي.. واش غتقراي ولا شنو؟!!
ملاك: نشوف شي مطابع نجيبهم الامتحانات كاينين فشهر 1 مبقالهم والو... وخاص نوجد ليهم
رشيد: ومنين تكملي؟!
ملاك: معرفت يمكن نمشي عند خديجة حتى دوز عندي
رشيد: صافي مزيان انا شي 2 سوايع ونكمل (باستلو يدو هو ركب فطموبيلتو وهي بقات كتسنى تاكسي حتى وقفت وحدة ركبت فيها)
ملاك: بن سودة عفاك!!
~~~~~~~~~~~~~
خديجة: (حاسة بشي حاجة غريبة فالغالية كتشوف فيها شي شوفات فشكل مع ابتسامات ديال الاستهزاء صونا يوسف للي كل ساعة كيتأكد واش الامور بيخير حيت متايقش فمو.. قطعت صونات على ملاك جاوبتها)
فينك البنت تسنيتك
ملاك: خديجة الا صونا بابا قولو انا معاك الله يسمحلي فهاد نهار
خديجة: هههه رامي عند مراد!! تي بعدي السيد راه رمضان هدا
ملاك: دخلي سوق راسك ماشي غير نتي تزوجتي وانا تحرميها علية!!
خديجة: ههه واخا غتجي عندي!! انا عند دارهم ديوسف
ملاك: اممم صافي، انا منتعطلش غير شي حاجة ونجي عندك.. (قطعت حست بتأنيب الضمير خفيف غاالب عليه الحب ميمكنش متشوفووش ولو غير دقيقة هبطت لفاس هبطت وشوووف امتى يصلاح يتشاوفو.. شافت فكونتور التاكسي حيت بن سودة حي بعيييد على السونطر)
احححح أقلبي.. عندك اخويا هاد الكونتور كيجري كتر من زماان..
يوسف: (كان عند شريف فالمحال ديالو للي كيتسنى لحم يجيه من عند اورطيغا..) مدخليش هادشي فراسي اصاحبي
شريف: وطلعت ق**** مقطرة!!! منين كانت باغية تخلي الولد علاش هاد الفلم كامل وقالتلك انا طيحتو
يوسف: خربقتي هاد اليوماين كنت مرتاح فحيااتي بيييس حتى بانت وزادتها الوالدة
شريف: اوا؟!
يوسف: اوا غندير بحال مسمعت والو شكون ظمنلي انا هداك ولدي وحتى ويصدق فالتحاليل مني انا، غير من زهري المق*** سبقت زلال اخر وجات فية انا الربحة.. علاش انا نسا منين جا تيقولي واش ڤري ديك فلانة معاك!!
بفففف صعييبة نتقبلها اخاي شريف وعاد هاد بنت الناس للي معايا هاد الموضوع عندها حساس!!
شريف: خديجة عزيزة عندك!!
يوسف: خديجة تنبغيها نيشان، انا وياها ماشي بحال بحال ولكن تنبغيها تنحس براسي بنادم معاهاا محتارمني ومقدراني بيناتنا داكشي زوييين ماشي بحال كيف كانت ديك السلݣوطة للي كنت تنبان ليها غير فالفلوس صحاح!!
شريف: اوا ومك ودابا خديجة مخليها معاها
يوسف: حلفت ليها توصلها شي حاجة احسن ميطاسيون نغبر كمارتي من هنا
شريف: الله يصااوب وصافي
يوسف: نمشي انا نكمل شي خدمة ومن بعد نخرجو انا وخديجة نفطرو فشي قنت...
~~~~~~~~~~~~~
ادم: (شرب الما وصونا على ختو مفقوس جاوبت معطلة) ليلى بغيتك فشي حاجة!!
ليلى: اممم شنو ادم
ادم: بغيتك تمشي دابا عند غيثة للدار.. بغيت نعرف علاش متتجاوبنيش!!
ليلى: ادم خرجني من داكشي للي تدير لديك البنت مابغيا عداوة حتى مع شي واحد
ادم: هادشي تنديرو ليك ولبابا
ليلى: ادم هادشي تديرو راسك حيت اورطيغا ممسروطش ليك نتا اما انا اورطيغا مأذاني بواالو وعاد مدخل غيثة للي شرحت ليك ألف مرة هي بحال ختو
ادم: انا عارف اش تندير.. دابا مغتشوفيليش غيثة!!
ليلى: بففف واخ واخ حتى نفيق مزيان راه صباح هدا وتيقتلني صياام
ادم: لااااا دابا غتمشي 5 ايام مشفتهاش ومتتجاوبنيش ميمكنش وحدة بحالها خاص كل ساعة تصوني علية
ليلى: واخا ادم واااااااخ... (قطعت هي عرفت ادم بلى غيثة ولكن مفهمتش علاش غيثة للي بغا يضيعها وهو عارفها بعيدة كل البعد على اورطيغا عارفة عقلو خبيييث وغيكون كيخطط لشي حاجة لي تخلي اورطيغا مقيوس بزاااف وميتوقعو منو والو وحتى واحد مغيعرفو هو مول لبلان.. ناضت لبست حوايجها مع الجو بارد شوية مجاهاش صيام صعيب بزااف خرجت برا شدت تاكسي نيشان لعند غيثة!!)
ملاك: (معارفاش بالظبط فين غتمشي مبغاتش تصوني عليه بغات ديرها مفاجئة!! نعتات ليه غير بلاصة الݣرنة وقفت كتشوف داك القنت كيخلع جبدت تيليفونها خايفاه يطير شداه بجوج يدين والمشكل الكبير مجاوبش..)
لا لااااا لا متقولهاش امراد!! جاوب عفااك
(رجعت كتصوني ماشية حدا واحد الطموبيل عالية شوية مخبعة من موراها ومن دراري للي كيدوزو حداها لدابا مشافت حتى بنت ولا مرا دايرين من داك القنت)
سعد: (مشا جهة طموبيلتو كيهضر فالتيليفون) غيخرجو 4 دالكاميونات (صغار) ديالي وديال شفيق و شريف التالية هي للي غتكون ديال الشمكار راني هضرت مع السي احمد وهو داير مع الشيفور انا مباينش فهاد لبلان هو غيوقف بالكاميو فواحد القنت...
لا لا غيبدل طريق..
اه تماك نتا بدل لحم بداك لحم للي عطيتك لبارح..
معندك مناش تخاف هو مشغول بهادشي ديال ذبيح..
صافي مزيان..
خلاصك وخلاص لوخرين عارف فين غتلقاه..
ملاك: (مطرطقة عينها وودنيها عرفاتو جاي ضارت مع الطموبيل باش ميشوفهاش طلت عليه برويسها كان رجل كبير شوية عندو كرش وصحييح جاب الله الطموبيل عالية مخبعة فيها شافت فيه بقرف)
ولد لحرااااام بغا يرزيني فالراجل قول هاد الحلوف هو للي كيشريهاليييه!!! يخخخ تفو بنادم رمضان ومحامدش الله اودي للي معندو زهر معندو حتى فخلا دار بوه..
ملاك: (بعدت من تماك ماشي حدا واحد الدار ديال القزدير ورجعت كتصوني عليه حتى جا واحد كيطلعها ويهبطها وباين خضيييييرة غير من عينيه ومن حالو ووجهو المشروط)
فييين ازوييينة!!!!
ملاك: (بخوف ولكن دفعت الجبهة هازة راسها)
شووف أناااا راه عشييرة اورطيغا.. نعاودلو هادشي غيقلبها...
(شافتو مشا.. رجعت كتويل خاايفة وصونات عليه ميمكنش وصلت هنا ومتشوفوش ولكن عاود خافت على راسها وبين عينها غير مها وباها وخوتاتها وعاد هاد لكلام لي سمعت خاص يعرفو.. رجعت صونات الا مجاوبش هاد المرة غتمشي باش باها يلقاها عند خديجة عاد واقفة على اعصابها وبغات ضروووري تقولو شنو سمعت)
ويلا جبدت ليه صداع ولا يمشي يضربو يقتلو!! وعاود الا وصل داكشي ويعيطولو البوليس!!! بفففففف موشيييكيلة يا سيدي ربي
(بيأس بغات تمشي تقلب على تاكسي حتى رجع صونا عليها جاوبت)
وي مرااد
اورطيغا: (غير بصدقة جلد تيليفونو يشوف الساعة حيت كيخليه صيلوونص لقا بزاف دليزابيل عندو منها تنكرا) واش واقعة شي حاجة!!
ملاك: اناا جيت نشووفك..
اورطيغا: فين؟!
ملاك: بنسودة
اورطيغا: (خرج عينو) واش بنيتك اش جابك هنا؟!!!! (خرج من تماك كيقلب بعينوو) فييينك؟!
ملاك: مالك كتغوت؟!
اورطيغا: واااا فينك!!! مبانلك تجي غير هنا !!! فييينك
ملاك: (مفهمتش مالو تعصب عليها راه دارت خطوة رومانسية راس كيقولها غير تقطع تمشي تقلب على تاكسي حتى زعزعها)
اورطيغا: وااااا بنادم فيينك؟!!!
ملاك: معرفتش انا.. حدا طموبيل (فتات عليه الماتركيل عرفو ديال سعد) وكان حسابلي دير هاكا ݣاع منجييش...
اورطيغا: (خارج بجنويتو كيقلب عليها مباغيهاش تجي لهاد القنت ݣاع، راه مو وعمرو خلاها توصل هنا عاد بقات هي فبنت صغيرة بوحدها!! بقا كيقلب فالطموبيلات بعينيه حتى كتبانلو حدا طموبيلة ديال سعد مشا مقصدها صيام والقطعة وعاد بنادم يبقى يحنزز فيها هنا!! وقف عليها خلعها كتشوف فيديه للي فيهم الدم بين جديد ويابس ولابس بوط الميكة وريحة ذبيحة فيه بحال كان فوسط شي كرشة..)
شنو تديري نتي هنا؟!
ملاك: (خربق ليها كولشي كانت رومانسية وجاية هي ومشاعرها الفياضة ساعة ندمها وغيرها غير كترمش فعينيها)
اورطيغا: هاد الكوان م**** هنا..
عمري جيتك ليه انا شي نهار باش تزعمي نتي وتجيليه؟؟!!!
(غير كتشوف) هضر معاك شي واحد؟؟!!
ملاك: صافي انا غرجع
اورطيغا: راه معاك تنهضر!
ملاك: شنو كتهضر نتا غير كتغوت ندمت اصلا علاش جيت نشووفك
اورطيغا: شوفيني فأي بلاصة بغيتي الا هنا!! بلاصة كولها رجال لوكان وكولاشارا وكان مكنتش انا هنا!!! والله يا مك ميزݣلك شي **** والله لا حن فيك شي كلب
ملاك: (طلع ليها الدم) صافي عفاك انا ماشية
اورطيغا: صبري نخرج معاك نشد ليك تاكسي.. (ضار صفر بفمو بلا ميدير صباعو)
5 دقايق ونجي
(سبقاتو وهو من موراه كيحاول ميتعصبش عليها)
لابسة ومقاادة فين بالسلامة!!! ومكملاها جاية لوسط لݣزارة!!!
ملاك: (ضارت عندو معصبة) سبحان الله ابنادم!! راه كنت كنشري دااار
اورطيغا: بالزعطااا الا كنتي تتشريها ولباس هاكا علاش؟!!!
ملاك: (ماشي من العاكزين وقفت وهزت صبعها وراسها فيه)
اولا انا لبسي كولو محتارم تانيا هاكا كنخرج قدام بابا ومكيقول واالو اذا لباسي هو هداك تالت...
(كتشوفو كياكل فشنايفو مخرج عينيه بحال شي هبيل كيوجد باش يسرفقك وهي تسكت وزادت من طريق كتقلب بعينها على تاكسي حمر.. معصبها بزاف منسيها ففرحتها فرومانسيتها وفكولشي... بقا فيها الحال بزاف شو هي فين نواتها وشو هو كفاش استقبلها!!!!)
ركبت فتاكسي حتى هو مزادش هضر معاها ومهازش فجيبو شي ريال، قالتلو العنوان عرفها ماشي عند دار واليدين يوسف.. بقا متبع التاكسي وكيشوف رويسها عارف هاد القنت خايب عامر غير بالݣزارة وبنادم قليل للي يفرق بين رمضان ولا الأيام العادية غتبانلو هوتة يا يݣريسيها يا يبقى واقف عليها حتى يدي النمرة ولا يتكيها فشي قنت!!
غير تفكير شي واحد يوقف عليها كتمرضو راه حافظهم وعارفهم!! رجع لتمارتو كيشوف فتيليفونو بقا مقطوووع وزادتو ملاك للي عارف تقليقتها خايبة وماشي حتى قريبة ليه باش يفهمها ويشرح ليها.. تفكر غير ميساجها ديال كنموت عليك اول مرة تقولهالو ويمكن من اشتياقها وفرحتها بشرا ديال الدار! عجبو الحال ولكن، لا الوقت ولا المكان سامحييين من ديما باغي يبعدها على بلاصة خدمتو..
دخل فسعد بلا ميحس واحد مشاف فلاخر رجع بلاصة ذبيحة من زهرو ماشي الصيف فين كدوز تمارة بالصهد والذبان وووالقطعة...
~~~~~~~~~~~~~~
ملاك: (كتسب راسها وتعاااود على نهار للي فكرت ديرلو مفاجئة وتمشي لعندو) نستاهل انا للي حمااارة أناااا للي كلبة ومدلووولة ومعنديش نفس ومكلخة تفووو تفووو تفووو...
(تفكرت شنو سمعت من عند داك الراجل خرجت عينها نسااات، الا مشا حتى كمل على اش كيبلاني لو غيمشي فيها ديجا عاودلها على نقااايم لي كيديرولو باش يضيعولو بلاصتو عند الحاج للي كيتيق فيه ويخرجوه من المحال..
كتبت ليه ميساج خايفة ميقراهش حيت التيليفون مكيبقاش حاضيه فصباح وغالبا كيدير صيلوونص مسحت لميساج وبقات كتصوني عليه ووالو مكيجاوبش وصلت لدار الغالية صونات على خديجة علمتها انها برا كتسناها، ورجعت كتحاول تصوني على اورطيغا...)
خديجة: (لبست فولارها ونزلت عندها مبغاتش ملاك تدخل للدار وحيت الجو زوين مبرد شوية ونغيم بقاو جالسين فالجردة تحت شابيطو)
واش مخاصمين؟!
ملاك: (حركت راسها بلا ودايرة التيليفون فودنيها) قولي ليوسف يصوني عليه الا جاوبو ولا يمشي عندو بغيتو فشي حاجة ضرورية
خديجة: وعلاش غيجاوب يوسف وميجاوبكش نتي؟؟!
هادي شنو كدير هنا عاود!
ملاك: (ضارت لقاتها ليلى طرطقت عينها) هاد الزبلة فينما ضرت لقاها!!!
خديجة: مقلتش ليك هداك ادم خطيب غيثة قبيلة جا يشوف غيثة واقلة مهبطتش عندو ومنين خرج وانا طليت من السرجم لقيتو كيكمي
ملاك: بنهار؟!
خديجة: وا غير قبيلة كنقولك!! غير قبل منجي بشي ساعة
ملاك: الا!!! متحمقينيش!!!
خديجة: أقسم بالله حتى انا تصدمت موحال ݣاع واش مسلم داك بنادم الا كما فرمضان راه مكيصلي مكيصوم!!
ملاك: وييييلي استغفر الله.. صوني صوني على يوسف بعدا (رجعت كتصوني على اورطيغا من بعد معلمات خديجة يوسف) موشكيييييلة الا مجاوبش!!! شنو قالك يوسف
خديجة: قلتلو يمشي عندو قالي راه بعيد بزااف ولكن يبقى يصوني عليه غير يوصل يمشي عندو
ملاك: (تكرهت حيت نسااات وبقات كتصوني والوقت كيمشي والا طبق داكشي مشا فيها مراد...)
غيثة: (كتحل عينها كدووخ كترت من سيرو دنعاس كتسمع غير مها كتعيط ليها..) اممم
الغالية: بزااف هاد نعاس ابنتي نوض شوية ووربتي هاد لوجيييه لغزال
غيثة: ماما راه قبل الفجر شربت سيرو دنعاس مقاداش نفيق والله هاد الايام متنعسش مزيان..
الغالية: حبيبتي شوفي ليلى راه جات ورجعي نعسي... غيثة!! (بانت ليها نعست بقات كتحركها)
غييثة!!!
غيثة: ماماااااا عفااااك!!!!
الغالية: حرت معاك والله حتى حرت.. (خرجت من بيتها وسدات لباب هبطت عند ليلى)
والو لبنت مدوخة بنعاس لبارح شربت شي سيرو دنعاس ومقدرتش تفيق
ليلى: معليش مرة أخرى ترتاح شوية
الغالية: جلس تفطر معانا ابنتي
ليلى: مرة أخرى الالة الغالية
الغالية: ضرووري نشوفووك احبيبة دابا نتاصل بماماك نتجمعو فهاد الايام المباركة
ليلى: ان شاء الله، سلمي على غيثة (توادعت معاها وخرجت شافت فالجردة بانت ليها ملاك تشاوفو بيناتهم خنزرت فيها وهي تصبعها ملاك..)
ديݣولاص ولكن..
~~~~~~~~~~~~~~~~
اورطيغا: (كمل اخر ذبيحة بداو فالحساب باش متسبااش فيه عاود شي صݣيطة بحال لبارح للي هو متأكد من واحد العدد ولقاه نااقص.. لي خلصها من جيبو بثمن للي كتجي من الفيرمة يغني غير شي حاجة... وحيت مكيرضاش وقف على كولشي وبداو كيتوزعو فالكاميونات ديال ولاد الحاج عاد فالكاميونات لكبار للي كيتفرق على الݣزارة لوخرين وشي اوطيلات وليرسطو تخلص فنهارو من عند سعد للي محاملش وهو كيعطيه هاد المبلغ كامل يعطيه للگزارة ومياخدوش اورطيغا..
خرج بعياء كبيير ومن زهرو غدا كاينة ذبيحة قليلة حيت اليوم كانت كمية كبيرة مشا يبدل حوايجو هز تيليفونو يعلم الدري للي معاه يفتح هو المحال حيت غيتعطل لقا تيليفون مطرطق بليزابيل ديال ملاك وشي وحدين ديال يوسف استغرب جاتو فكرة خايبة تكون وقعت ليها شي حاجة فطريق منين مشات حيت مولاش سول فيها كيف وصلت!!! صونا عليها)
ملاك: (كانت راكبة مع باها راجعين لصفرو طلع ليها لابيل ديالو كانت غترجع عندو لبن سودة وكان ماشي باها للي جا دغيا) عاد دابا!!!
رشيد: (نقص من صوت القران) شنو؟!
ملاك: ها!! غير تفكرت شي حاجة من الخدمة، بابا واخا توقف نهضر واحد المكالمة مهمة
رشيد: هضريها هنا!!
ملاك: همم!! غير مبغيتش نصدعك وصافي (كملها وقف القران فمرة باش تهضر دارت راسها كتصوني ودارتو فودنيها وهي على اعصابها كتفكر تكتب ليه ميساج حسن خاصها تعلمو حتى رجع صونا فودنيها)
احم دوزيام أبيل.. لابيل اللولة مدازتش
(جاوبت قبل ميهضر)
زينب انا دابا راجعة مع بابا لصفرو شوفي داك الضوسي للي كنتي شديتي قبيلة للي جيتي عندي ولقيتيني حداه
اورطيغا: (مفهمش) كفاش!!!
ادم: (فهم من عند ختو غيثة كتحارب الإدمان بسيرو ديال نعاس!! زاد حقد عليها)
يعني كان تيجيبك عندي غير لادروݣ!!!
هربي شحال ما بغيتي غتعياي وتجي تحت رجلي طلبيني... (ركب فطموبيلتو وشد طريق ل...)
~~~~~~~~~~~~~~
أميمة: (لبست جلابة وخرجت تجيب شي حاجة من الحانوت حيت بغات تقاد شهيوة هادي للي لقاتها حجة!!! لقات الجارة وهي تشد فحنكها وبقات ماشية بحال مصدوومة شافت فالجارة وهي دير وجه باااكي وحنات راسها مضرقاه بذرااعها زعما كتبكي وزربت فخطواتها... على مضربت الدورة وتمشات عااادية كتشوف فتيليفونها وتراقب واش شي واحد شايفها...)
الجارة: مسكييينة هاد لبنت معرفت مالها رجعت مع هاد الراجل قتل ليها ولدها زايدها بالضرب والصااحبة!!!
لا حول ولا قوه الا بالله العلي العظيم...
الله يخرجنا من دار العيب بلا عييب..
~~~~~~~~~~~~~
الياقوت: (كتصور ولدها للي كيظحك ويحرك يديداتو باش تهزو وهي كتظحك معاه صيفطات الڤيديو للغالية وكتبت ليها)
سليمان توحش الميمة دياالو..
الغالية: (كتفرج فالڤيديو وتبسم هزاتو وصيفطاتو ليوسف)
هاد شنو صيفطاتلي الياقوت
(طلعت ليها جوج شراطي فلزرق كتسنى ردة الفعل ديالو الا شافو ممكن قلبو يحن وتحرك فيه مشاعر الأبوة دابا المطلوب غير يقبل بولدو وشي لاخر ملحووق...)
~~~~~~~~~~~
أمينة: (جالسة فبيتها كتبنالي لعرس ولدها مع راسها بكترة الملل وتخطط صونات على زهرة)
واش بنتك حتى هي حالفة على العرس؟!!
زهرة: هههه متخلينيش نقرا قراني فخاطري أمينة؟!
أمينة: انا داك الولد عندي جداااام شهمني يا ختي شهمني!!! ݣالك نوووون واش يدير شي عرس
زهرة: وانا هاد لبنت قالتلو نعس انا نغطييك ههه
أمينة: أحااااي تلݣاو بجووج !!!
زهرة: شوفي يعقدو والله يزيدهم ربح
أمينة: منديرش العرس زعما!! لا لا واالو ضرووري راه غير هو للي عندي
زهرة: (تفكرت ملاك للي دات فلوس عرسها حيت عارفة مراد وحداني عند مو والعرس غيدار غيدار!!! قوست عينها فهاد المطيييورة للي عندها)
أمينة: ألو!!!
زهرة: هاني معا..
أمينة: فينها ملاك مكتسول مكتبان؟!
زهرة: اجي غدا تفطري معانا
أمينة: غدا الحاج عندو كونترول خلي يدوز غدا ونعلمك منين يصلاح
زهرة: اوا سيري خليني نكمل قراني نوض لشغلي نتي راه كولشي كتلقايه واجد
أمينة: ماااااتما حلاوة اختي زهرة... اوا سيري منشدكش...
يوسف: (طلعلو الڤيديو فيه شي بيبي مركزش فيه نيشان مسح الڤيديو كتب لمو)
متخلينيش نبلوكيك الوالدة
(صونا على اورطيغا كان مشغول صونا على خديجة)
حبيبة وجدي راسك غنجي قبل المغرب نمشيو لريسطو زوين ومن تماك لدارنا
خديجة: (على قلبها) واخا... (قطعت ومشات جمعت حوايجها فرحت واخيرا تمشي من هنا للي كتجيها الجلسة مع الغالية مزعجة وتقيييلة)
~~~~~~~~~~~~~~~
اورطيغا: مفهمت حتى وزة املاك
ملاك: (كتنقس صوتو) الكاميو التالي للي غتعمري فيه دوك ضواسا.. قلبيه ولا وصليه بيدك
رشيد: (شاف فيها باستغراب خدمتهم معندهمش هادشي)
ملاك: (شافت فباها) عرفتي واحد لبلان هاد نهار ابابا قالتلي عليه زينب صاحبتي.. شي واحد مشارك مع خوتو فشي خدمة
اورطيغا: (كيستغرب وهو كيسمع ليها) وا ملاك!!
ملاك: هانتي سمعي اصاحبتي غنكمل لبابا بعدا وفهمي (دارت يدها على المايك) بابا راني مقلت حتى لشي واحد على الدار للي شريت
رشيد: (حتى هو كيهضر بشوية) مزيان ابنتي، حسن!!
ملاك: (رجعت كتهضر عادي) دابا واحد مشارك مع خوتو فداكشي ديال الطوبية اوا واحد هو للي مكلف كيصاوب داكشي مع المعلمية وخوتو كيجيبو الكاميونات يهزو السلعة شي 4 دالكاميونات ولكن واحد فيهم يمكن لكبير داير لصغير شي قاالب فالكاميو ديالو دارلو شي حاجة وهو نيت موالف ديما كيديرولو هاد لخصايل
رشيد: (باستغراب) اوا!!!
اورطيغا: (طلعت معاه وهو مخرج عينو) واش فالكاميو ديالي غدار شي حاجة؟!!!
ملاك: ااااااه, على سلامة غير عتقي الا ملقيتي متعتقي
اورطيغا: (كشكش) واش سعد؟!!!
ملاك: مكنعرفش، خليني نكمل لبابا
اورطيغا: (مشا بالزربة شاف الكاميو ديالو غتخرج)
ملاك: شوفي عنداك تهوري وضربي ولدك اصاحبتي راه لويلات صغار مكيعرفوش
اورطيغا: غنذبح مو هاد نهار بيا ولا بييييييه!!! (قطع ومشا بالزربة وهي خاافت)
ملاك: (بانت فيها تخلعت) اوا ابابا وعاق بيهم كان غيمشي الحبس
رشيد: اممم الخوت ممعاهم شركة
ملاك: (حيدت التيليفون من ودنها ورجعت كتعاود تصوني عليه خافت عليه بزااف يتهور ولكن خاصو يعتق راسو...)
ملاك: (كتبت ميساج ليوسف)
يوسف سير عند اورطيغا راه ياله خرج من بنسودة ولا قولها لخوه الا كان تماك راه غيدير شي حاجة خايبة...
(صفطاتو مع قراه صونا عليها قطعت عليه وصيفطات ليه)
سمعت شي واحد بغا يبدل ليه فلكاميو ديال لحم ديالو بشي حاجة ماشي هي هاديك يمكن داك خوه لكبير، انا حدايا بابا مصالحش نجاوبك
يوسف: دابا؟!
ملاك: راني قلتها لاورطيغا شي 5 دقايق هادي
رشيد: معاكن كتهضري نتي؟!
ملاك: (صيفطات لميساج وجاوبت بهدوء) نعيمة كتشكى
رشيد: علاش؟!
ملاك: انا نكمل معاها ابابا (صيفطات لاورطيغا ميساج)
مراد عفاك مديرش شي حاجة للي تندم عليها فكر فمك وفية انا..
(صيفطاتو وشافت فباها كتهضر بحال الا بالصح)
راك عارف ابابا نعيمة منين كيوصل رمضان كتقنط وكتبغي تجي عندنا مسكينة مولفتش ݣاع تماك اكترية منين كيكونو لعواشر وعاد دابا منين ولدت
رشيد: معليها غير بصبر نهار اللول ابنتي قلتلها واش تقدي داكشي باش انا تنجي نسولكم وحدة وحدة ها شنو كاين وعاد شنو كيتسناكم
ملاك: داكشي علاش انا نبغيتش نمشي لبرا بغيت غيير شي واحد فمدينتي ولا ݣاع فاس
رشيد: مع تيسير الله ابنتي
ملاك: نيت انا نهضر معاها منين نوصلو للدار وتهضر معاها ماما..
(بقات حاضية التيليفون وصلو الحومة هو دخل القهوة باش يخرجو السلعة للي جاب، وهي ماشية فالدرب بشووووووووية وكتصوني على اورطيغا نسات فرحة الدار ووالو مجاوبهاش.. قبل متوصل حمزة خرج من دارهم وهي مزال دايرة التيليفون فودنيها)
حمزة: سلام.. (ردت عليه السلام وبقات واقفة حدا باب دارهم كتشوف فالتيليفون ضار عندها) شي مشكل؟؟
ملاك: لا لا... لا..
حمزة: حقا مبروك الدار واخيرا شريتيها..
ملاك: (تبسمت) وييييه
حمزة: شنو بقا اخر، الحج!!
ملاك: ههه ان شاء الله
حمزة: ان شاء الله.. بسلامة (مشا فطريقو ماشي للخدمة وهي رجعت كتصوني على يوسف للي مكيجاوبهاش)
حتى نتا!!!! بفففف عنداك توقعلو شي حاجة مكانش خاصني نقولهالو ولكن خفت يوقع ما كفس!!!
(كتفكر واش تصوني لمو ولا لا!! قلبت على نمرتها صونات بريڤي تعرف غير واش وصلتها شي تنقنيقة, جاوبت بألو ألو... من صوتها جاوبتها بنبرة عادية والهدووووء حداها قطعت، رجعت صونات على اورطيغا والو مكيجاوبش)
ايييييخاااااااان....
اورطيغا: (كان تابع الكاميو للي ماشية المحال ديالو... تيليفونو حداه غيطرطق بليزابيل من ملاك ويوسف وشريف وهو داير صيلوونص عينيييه ضببو واخيرا عرف صاحب دعوتو..
كلام ملاك ميمكنش يكون عفوي ولا جاي من العبث حيت عطاتو لي ديطاي للي معارفاهمش هي، اش غيعرفها ب4 دلكميونات هو عمرو عاود ليها هادشي..
بقا مبعد عليه حتى كيشوف الكاميو بدل طريقو على غير طريق للي موالف بيها بقا مرااقبو حتى وقف كسيرا باش يلحق وعينيه خارجين من بلاصتهم كيشوف دابا غيرتاكب جريمة يا قااتل يا مقتوول.. شاف صطافيط وقفت حتى هي خرجو رجال دغيا وبداو كينقلو لحم من صطافيط لكاميو ديالو وصل حداهم ريݣل التيليفون موجهو ليهم باش يصور كولشي ويبقى عندو دليل حتى شاف لڤيديو خدام عاد هبط هاز عصا تقييلة كيتسنى يشوف سعد)
كاين ماااانقضييو اولاد لق****!!!
....: (معرفوهش هو المقصود هوما غير تسخرو وصافي) شي حاجة خونا؟!!!
اورطيغا: (ياله غيبدا يعربط جاتو ضربة للقرفادة دوخاتو من اللور فلبلاصة بيناتلو الدنيا كحلة!!!)
(تلاح على وقفتو فوق الشانطي داايخ جا واحد بحرا كيقدر يحل عينيه متبع ليهم العين حتى زادو ضربة لرجلو.. اورطيغا كان معاافر باغي ينووض يضاارب يدافع على راسو والشيفور قرب حداه عىفو كيغوت عليهم كيقولهم هو مول شي للي غيوصلولو هادشي، دغيا ركب معاهم الشيفور فصطافيط انا كانو غيصفيوهالو ويلوحوه فهاداك لخلا،
زادو مخليينو مليوح تماك وهو كيشوف فسماا للي كيحس بكولشي كيدوور...
~~~~~~~~~~~
يوسف: (كان هو وشريف بجوج واكترية منين عاودت ملاك داكشي صونات عليه وشرحت ليه بالتفصيل شنو سمعت عرفو القضية حااامضة وأكتر) عارف طريق الكاميونات؟!
شريف: طريقهم باينة واكترية المحال ديالو زعما يكونو تما!!
يوسف: نقلبو ولكن نديكلاريو قبل !
شريف: لقاوه بعدا منعرف شنو غلقاو داير نتا عارف اورطيغا
يوسف: (حرك راسو باه ومشاو.. صونات عليه ملاك)
وي ملاك
ملاك: (بخوف) واش لقيتوه؟!!
يوسف: مزال واش تتعرفي سعد نصيفطلك ليك دابا تصويرتو شوفي واش هو (صيفطلها فلواتس) هو؟!!
ملاك: اه هاد الكلب نيت للي سمعتو قال هاكا
يوسف: (شاف فشريف حرك راسو باه يعني هو)
صافي املوكة باشما نعلمك
ملاك: صافي انا نتسناك اخويا...
زهرة: (جاو بنات عمها ضياف مع رجالهم واخا شادين طريق دخلو للكوزينة نيشان يعاونو الا ملاك العصر أذن ومازال مخرجات من بيتها العائلة كاملة مهضروش عارفينها معندهاش مع الكوزينة وعزيزة عندهم ولكن سهام حداها كتزنزن للي بنتها كتقرا فالسادس وكدخلها تعلمها شي حاجة بسيطة.. مشات عندها مها مكشكشة لبيتها لقاتها سادة عليها لباب)
ملااااك!!!
ملاك: (على اعصابها معارفة والو على اورطيغا وزادوها يوسف وشريف للي تخلعو وزادو كملولها الخلعة منين غبر ليه الآثار هو بطموبيلتو والكاميو ديالو، اما سعد منين سولوه عليه حيت كانو بجوج فبن سودة نكر ومسوقش من الاصل وكيتسنى يتفرش منين يصيفطلو اللجنة للي كتكون دايرة حملة شرسة وخصوصا فرمضان مكيتعاتقوش كتوصل حتى يسدو المحال لايااااام.. وعاد ماعليهم حتى دليل حيت مخاصش يجبدو سيرة ملاك فالموضوع باش ميتجبدش ليها صداع..
ناضت حلت لباب)
نعام!!
زهرة: (معجبهاش الحال دخلت وسدت لباب) كفاش نعام خرجي حدانا حتى نتي!! واش بغيتي تفقسيني فهاد رمضان واش قد..
ملاك: ممسالياش اماما لهادشي!!
زهرة: واش بعقلك بنات عمك من طريق لكوزينة!! بنت عمك صغيرة حتى هي مداحسة معانا ونتي للي كبيرة كتقولي ممسالياش!!!
ملاك: صافي انا نغسل ماعن لفطور غير خليني دابا
زهرة: غتحطي داك المشقوف وغتبعيني ديري لعشا ولا والله حتى نهرسو ونتهناو من هاد زبل
ملاك: ماما.. شوفي... مراد ملقاوهش وخفت عليه ومعنديش ݣانة لشي كوزينة ولا شي طياب ولا حتى لفطور
زهرة: كفاش ملقاوهش!!
ملاك: (عاودت ليها باختصار) ومزال ملقاوه لدابا خافو يكونو صفاوهالو
زهرة: الله أكبر!! اوا!!
ملاك: يوسف وخوه دمراد كيقلبو عليه ومشاو لبلاصة منين كدوز كاميو ديالو ملقاوهش زعما الا وقفت تماك وموصلتش المحال ديالو دابا مشاو الكوميساريات وصبيطارات حيت هادشي للي بقالهم خافو يكونو دوك العصابة دخوه قتلوه ولاحوه فشي قنت!!
زهرة: اويلي استغفر الله لهلا يديرهالو مسيكين.. وأمينة؟!
ملاك: موحال واش فخبارها شي حاجة!!! نااااري خايفة توقع ليه شي حاجة ووهو أصلا عصبي انا متأكدة غيكون ضارب معاهم ولكن هو بوحدو وهوما ٪💯 غيكون بزاف
زهرة: (بقات كتشوف فيها درعتها) ياله حدايا متبقايش هنا فاش يوصلولو غيصونيو عليك!! حتى يوسف فخبارو نتي مع مراد!!!
ملاك: (خرجت عينها) لا
زهرة: (ضربتها ضربة خفيفة لذراعها) الله يمسخك الحمارة واش نتي مكتحشميش!! واش معندكش الوجه للي كيمرݣ؟!
ملاك: واش انا فهادشي!! عطيوني نتسخر ولا سخريني لبارتيسري
زهرة: معندك فين تخرجي ولاد عمك كيتسخرو
ملاك: لا انا مشهية واحد لحلوة انا نمشي نجيبها.. (لبست عبايتها لوات شالها) عفاك اماما والله معندي ݣانة.. عفاك عفاك...
غيبقاو يسولو فية اللهم نتسخر...
أذن المغرب ملاك غتحمااق معرفتش داك صياام وداك نهار كيف داز كسرت صيام بتمرة وجغمة ديال لما ورجعت اللور بحجة فيها شي حريق وكولشي فهمها انها غتكون الدورة الشهرية وحتى هي جاتها هي هاديك باش يبعدوها شوية مكرهتش تمشي لفاس دابا ميمكنش ميلقاوهش هاد المدة كاملة!! تقريبا مع 12 فاش تلقاتو من موراها بساعة علماتو... صونات على يوسف
ملاك: (معصبة) واخا يكون إبرة غتلقاوه!!!
يوسف: حنا تنشوفو فصبيطارات حيت الكوميساريات قلبناهم وكاينين شي صحابنا وصيناهم
ملاك: بففف ظلام طاح وهو مبانش!! من 12 دنهار راه بزاف؟!!!!! حتى وتكون وقعاتلو شي حاجة ميقدرش يصبر هادشي كامل زيد ايوسف قلب
يوسف: (حس بخوفها لكبير عليه براسهم كيتمناو ميكونش شي أذى للي كبير حيت الاذى متأكدين منو كاين ولا علاش غبر!!! ولا فين غيكون هو وطموبيلتو والكاميو!! طلعلو أبيل ديال أمينة) واش الوالدة ديالو فخبارها!!
ملاك: لا
يوسف: انا نجاوبها.. (جاوبها ومقطعش على ملاك) سلام عليكم
أمينة: عليكم السلام اولدي مبروك عواشركم
يوسف: الله يبارك فيك الالة زهرة علينا وعليك باش تتمناي ان شاء الله وطول العمر
أمينة: فحياتك اولدي.. قولي ولدي مراد عندك!! انا وعمك الحاج من ݣبيل وحنا نصونيو مكيجاوبناش
يوسف: بالصح ياكما مزال خدام!!
أمينة: لا هو كيسد فالمغرب وسول عمك الدري قال مجاش هاد العشية كاملة وكان داير يجي يفطر معانا وتنوغشت عليه بزاف
يوسف: انا نمشي عندو للدار
أمينة: مبغيتش نعذبك اولدي!!
يوسف: لا لا مكاين حتى عذاب اصلا دايرين نتلقاو اليوم بالليل باشما نجاوبك يقدر سالا الخدمة وغلبو نعاس
أمينة؛ داكشي للي ݣلت انا شوية ونجي انا والحاج
يوسف: واخا لالة زهرة
أمينة: سلم على خديجة (قطعت وقلبها ممرتاحش ولدها مموالفش يغبر عليها، راه موالف ديما فالمغرب كيصوني عليها صونات على ملاك هي الوحيدة للي تقدر تعرف شنو بيه ولا واش عندو شي مشكلة!! جاوبتها) سلام بنتي لباس عليك
ملاك: (بخوف وبقلق كتحس بالدنيا كحلة) ملباس والو اخالتي انا مغنخبعش عليك مراد لدابا مزال ملقاوه خاصكم حتى نتوما تقلبو عليه
زهرة: (بقات مخرجة عينها) اويلي!!!
ملاك: خالتي الوقت للي تصدمي فيه زيدو قلبو عليه يوسف وشريف لعشية كاملة وهوما يقلبو عليه مخلاو حتى قنت ودابا بداو كيقلبو كوميساريات وصبيطارات
زهرة: (بغات تسخف) اويلي على أولدي!!
ملاك: خالتي ان شاء الله يكون خير انا ملقيت جهد نجي لتماك غير كملو فالتقلاب...
الغالية: (كانو جالسين حاطين القهوة وبقلاوة حسابلها خديجة غتخرج تمشي فحالها حيت كان فخبارها غيمشيو يفطرو بجوج هي وولدها ومن تماك لدارها صدق يوسف خرجت ليه شي خدمة كما قال مجاش حتى فلفطور وممشاتش..
كتشوف فيها شادة تيليفونها دايرة لكيت وكتهضر مع خوتاتها.. شافت فالساعة كانت دايرة مع الياقوت تجي عندها مع 9 دالليل وقرب الوقت باش تجي)
مغتسنايش راجلك فدارك؟!!
خديجة: (شافت فيه دغيا قطعت على خوااتتها ودغيا دارت كتسجل الهضرة فڤيديو على أساس كانت كتصور ليها ڤيديو فسناپ وكتبسم)
نعام اخالتي مسمعتكش!!
الغالية: خالتك!!! يوسف مجاش نوضي سيري لدار ولدي تسنايه ووجدي ليه عشاه
خديجة: ولكن هو غيجي هنا!!
الغالية: عندي شي ضياف ومبغيتكش تبقاي هنا
خديجة: احم واخ.. فهمت.. (شافت فلڤيديو بحال تحرجت وقطعت.. رجعت شافت فيها ببرود)
جايبة الصاحبة؟!!
الغالية: ماشي شغلك
خديجة: فين باغية توصلي؟!
الغالية: داكشي حتى يجي من بعد وغتفهميه بووحدك خليه ليك مفاجئة
خديجة: اه يعني كتحفريلي!!!
الغالية: اش عندي منحفر ليك شكون مسوق ليك راه نتي للي حفرتينا وطيحتي عزري بحال الوردة فيدك متستاهلييش وزايدها بمكتولديش
خديجة: (دارت راسها انها متألمااتش واخا كان العكس)
الغالية حضي بنتك بحال كما حاضيااني راه شافتهم لالة
(بركت على كلمة لالة)
لالة أمينة فسطح داارياض معريها وكيبوس فيها وباينة ماشي أول مرة حضي بنتك من داك ادم للي كظلي تراري بيه راه بعيني شفتو صباح كيكمي فوسط نهار الݣهار وحنا فرمضان، والله مكاين للي غيخرج على بنتك قدو هو وقدك نتي للي مضيعاها (وقفت) انا ماشية وماشي كنجي هنا حيت عاشقة فيك ولا فهاد الدار كنجي على وجه ولدك باش منزيدوش حتى انا براكة غير نتي للي مكحلة عليه عيشتو لا هو لا بنتك للي بيدك كتزيديها العافية بقاي حاضيااني معندك متربحي من غير صداع الراس ليك ولولادك
غيثة: (طلعت كتجري لبيتها وسدت عليها لباب بشوية شادة فقلبها للي كيضرب بالجهد) كولشي عااارف راه خرج علية وانا مزال مبغيتش نعييق!! ولكن...
الغالية: (مجوبتهاش ولكن خلاتها موسوسة ومقرووووووووووسة)
خديجة: (جمعات حوايجها حتى كتبغي تصيفط الفيديو ليوسف وكتراجع عارفااه دابا عقلو مع اورطيغا للي مزال مبان.. فضلت تشاور مريم شنو غدير...)
يوسف: (حماقة بالتقلاب.. عيطلو بوليسي معرفة علموهم ان الاسم للي عطاوه مفقود اورطيغا كاين فصبيطار ديال الحسن الثاني... تخلع)
حي؟؟ واش حي؟!
شريف: (تخلع من هاد الكلمة حس بمخ راسو فشل)
....: اه عاد فاق وعطانا نمرتك وطموبيلتو كاينة عندنا فالكوميساريا الكبيرة
يوسف: صافي الله يحفظك انا جاي.. (قطع) راه فصبيطار كنت حاس غتوقعلو شي حاجة وبربي داك شماتة دسعد مغدوزلو نوريييه الحݣرة كدايرة!!! كبخݣر على راجل قتلو زمان قبل الوقت وباقي يصفيها لييه!!! (شريف مقدرش يهضر فااشل حتى هوما غير كسرو صيام بهرنيس والما.. تم صايݣ بسرعة)
شريف: سمعو قال غير الطومبيل!!!
يوسف: حتى نوصلو ونفهمو...
أمينة: (خرجت كتقلب بلا عقل غوتت ندبت مراد هو العين لي كتشوف بيها وعليه صبرت لشحال من حاجة!!
سعد هو للي صايݣ بيهم هو والحاج.. كتبكي وتقول مبكااات)
الحاج: ياله نمشيو لبوليس نيشان
سعد: (براسو مفهم والو هو موجد ليه دقة فالمحال للي موصل لا هو لا الكاميو أول مرة منين بغا يدير معاه قاالب مصدقلووش كان عوال يضرب الثقة للي داير فيه الحاج وها هو كيزيد يوطد العلاقة منين كيشوف باه للي ميت بالخلعة حتى صفاار وبدا كيرجف)
أمينة: (صونات ملاك عليها) ابنتي (مبغاتش تذكر سميتها)
ملاك: (بخوف) خالتي راه يوسف لقا مراد دابا راهم كاين فصبيطار ديال CHU
أمينة: اويلي على سبيطار؟!!
ملاك: راه قالو لبوليسي راه هو مزيان سيرو لتمااك وعلميتي اخالتي شنو كاين
أمينة: واخا حبيبتي واخا... (كتمسح دموعها علماتهم شنو كاين ومشاو لتماك)
الحاج: شكون هادي؟!
أمينة: فرملية كنعرفها
الحاج: الله يسمعنا خبار الخير يا رب يا ربي يحفظلي ولدي
أمينة: اميييين الحاج امييين
سعد: (بحقد كيشوف فباه للي راكبين اللور ودايرة راسها على كتفو كتبكي وهو كيصبرها) صبر صبر صبر.....
ملاك: (خرجت لقات ضياف عيطت على مها) احم ماما اجي شوفي واش هي هاديك
سهام: شنو هي؟!
زهرة: انا جاية (دخلت لبيت ملاك) بنتي مكليتي والو واش فاطرة على تمرة؟!؟
ملاك: ماما البوليس لقاو اورطيغا فصبيطار
زهرة: ياك لباس!!!!
ملاك: معرفتش عاد غتمشي مو ويوسف كولشي باش يعرفو شنو وقعلو.. ماما عفاك ياله نمشيو نشوفووه
زهرة: فين غتمشي تشوفيه واش بعقلك؟!
ملاك: (بترجي حتى بغات تبكي) عفاك عفاااااااك اماما والله منقدر نبقى هاكا جالسة عفاك شوفي شي حل نمشيو نشوفوه ياك ولد صاحبتك واش معندك كبدة؟!!
زهرة: هه ابنتي..
ملاك: (بخوف) عفاك اماما... هانتي صبري نص ساعة وصوني عليها هي غتقولك شنو طاري ونتي قولي لبابا نمشيو نشوفوه وغيبغي راه صلة الرحم وزيارة المريض واجب علينا وحنا فسيدنا رمضان خاصنا نكترو من الحسنات ونقصو ذنووبنا عفاك عفااااك اماما.... ولا نمشي بوحدي!!! ونخليهالكم متوورخة هنا!!
اورطيغا: (دخل عندو يوسف ملهوف على شوفتو حيت كان بدا كيفقد الأمل!! كان مع البوليسي للي كيعلمو هزو الطموبيل ديالو بالديباناج داوها للكوميساريا ومن حسن حظو كانت مسدودة اما الكاميو لقاوها فخرجة ديال فاس خاوية من لحم....)
كولشي كاين فتيليفوني مفيلمي
....: مزيان سجلت كولشي
يوسف: اورطيغا صااڤا!!!
اورطيغا: (شاف فيوسف) مقلتهاش الوالدة!!!
يوسف: (كيشوف فيه لاويين عليه فاصمة ورجلو حتى هي ملوية بالفاصمة ومتكي فبياص موسخ ودمايات قديمة فيه) خاص نديوك لاكلينيك بعدا واش قلبوك هنا؟؟؟
اورطيغا: اه مزال بنت.. (بحرا كيقدر يحل عينيه) عطيني تيليفونك..
يوسف: (تبسم) منين مزال طناز ونقايمي راك لباس (عطاه التيليفون محايد ليه الكود)
لالة زهرة جاية هي والحاج
اورطيغا: علاش قلتهالها اصاحبي؟!! غتخلع على والو!!
(دار نمرة ديال الولد للي خدام معاه هضر معاه كان خدم غير بداكشي للي كان قديم سول واش جا سعد لتماك قالو لا!! ولكن جات لجنة فتشات وكانت الامور عادية حيت من ديما اورطيغا كينبه على النظافة..
قطع دخل شريف للي مشا وجد لومبيلونص للي يديوهم لاكلينيك هزوه باش يطمأنو عليه مزيان مشاو من تماك عالمين حتى لالة زهرة باش تلقاوه فلاكلينيك للي موالفين كيمشيو ليها، غير شاف لومبيلونص)
غركب معاكم... واش نتوما مراض هزوني فالعمارية حسن!!
يوسف: صافي خليه على خاطرو (مشا شريف يعلمهم ولكن دور معاهم..) شكون جابك هنا؟؟؟
اورطيغا: (راسو عاطيه لحريق لدرجة عينيه بحرا كيقدر يحلهم) معقلتش شكون مزيان... للي عقلت عطاني نمرتو مسكين كان بالكروسة والحمار بيهم جابني لهنا...
يوسف: وااايلي!!!
اورطيغا: ملاك للي عيطت ليك؟
يوسف: اه كانت غتحمااق هاد نهار!! علمها راه كانت تتسناك تهضر معاها
اورطيغا: (عطاه التيليفون شاف فريبيرطوار كان بيناتهم كتر من 30 أبيل هز حواجبو بجوج) بزااف
يوسف: شنو؟!!
اورطيغا: هاد الهضرة كاملة كنتو تتصنعو دوليبران
يوسف: ههه وا هضر معاها دابا راه عربطت علية حيت ملقيتكش دغيا..
اورطيغا: (دوز نمرتها جاوبت دغيا)
ملاك: واش شفتووه؟!!
اورطيغا: ملاك!!
ملاك: (جاتها لبكية) شنو وقعلك علاش مجاوبتيتيش شحال صونيت عليك.. واش نتا بيخير؟!!! واش نتا كل مرة مالخك واحد!!
اورطيغا: (بحرا تبسم) الحمدلله، معندك علاش تخلعي
ملاك: عندي... الا متخلعت عليك نتا علامن نتخلع!!! علاش مجاوبتنيش شنو درت وفين كنت؟!!
اورطيغا: (كيضرو راسو بزاف) من بعد املاك ونهضر معاك (ركب شريف وزادو) يجيبولي تيليفوني ونصوني عليك
ملاك: واش نتا بيخير؟!
اورطيغا: الحمدلله.. صافي خوي راسك انا مزيااان
ملاك: فين ماشي دابا؟! (كملو جموع وصلو لاكلينيك قطع وهبطو لقاو زهرة والحاج تماك عنقاتو كتبكي والحاج فمو لكح خايف علييه عنقو حتى هو اما سعد كاين بعيييد مدام اورطيغا لحق على الكاميو ديالو وضربوه منين وصل عليهم الا وصلاتو تنقنيييقة...)
يتبع...
التعليقات
لا توجد تعليقات بعد، كن أول من يعلق.