محتوى القصة
اورطيغا: (هز بلاطو ديال اتاي للكوزينة كيعاون باش مو مدخلش عندهم... ونيت غيحطو لعشا ناضت حتى ملاك بلعاني كتحداݣ تتبعاه ببلاطة دلحلوى تلقاو فالكولوار)
تويييتة!!
ملاك: (بدلع) نعاونك؟!
اورطيغا: (حاني عندها بهمس) نبغيك تعاونيني اشحييمة غير فاش تنزلي سنسلة سروالي..
ملاك: (صدمها طرطقت عينها ندمها علاش سولاتو ولا تبعاتو ولكن عجبها الحال من جوابو فنفس الوقت كتموت عليه فاش كيخرج على طريق!!
مشات للكوزينة وهو مشا كيتبسم، دخلت لقات أمينة ونعيمة فالكوزينة باينة لوخرا كانت كتبكي وتشكي) احم.. اممم انا نشوف (خرجت دغيا حيت باينة موضوع خااص)
نعيمة: فضيحة فضيييحة فضييحة !!
أمينة: أحاااي على فضيحة؟! نعلي الشيطان اختي نعيمة واسهداي بالله!! لبنت مزويناتها مربية ولدك بغاها وبغاتو نتي علاش دايرة هاد لمناحة؟!
نعيمة: شفت الكاغيط دابا فلكتاب راه كبر منو ب4 سنييين ومجوجة ومطلقة غير ݣولي مالو على هاد الزربة الشييينة!!
أمينة: نعلي الشيطان اختي راه عندك بنتك الله يستر يوقع ليها هاكا تبغي عݣوزتها تهضر هاكا فيها
نعيمة: واش نݣول لحبابي؟!
أمينة: ݣولهم ولدي ختار وانا معاه فأي حاجة بغاها وزايدون علاش تمشي تبقاي تعاودي شي حاجة للي ديال ولدك ومرتو ݣولهم هو نعت وحنا درنا صوابنا ومتعرفي تلݣاي الخير فهاد البنت ومتلݣايهاش فوحدة صغيرة وعزبة
نعيمة: شفت باه غير صاااقر باينة حتى هو معاجبو حال
أمينة: وراه العروس لولدك لا ليك نتي لا ليه هو للي دايرين هاد الحالة يخخخ تغربتو وباقين نتوما هوما نتوما!!
اورطيغا: (دخل الكوزينة) الوالدة مزال لعشا؟!؟
أمينة: هانا احبيبي دابا غنحطو نعيمة جمعي الوݣفة
نعيمة: راه مها للي خاصها تنوض وهي دايرااالي فيها ضيفة هي للي خاصها تجي دير هادشي وتجري فشغل بنتها
أمينة: مها حتى هي كييفك مباغيااش هاد زواج حيت باغيينها ترجع لراجلها لقديم ولد خالتها، باغيين يهبلو عليها حيت عرفو واش ضيعو وهو حتى هو بخييرو ولباس عليه
نعيمة: ولدي بزاااف عليهم!
أمينة: هي الا كبرتي بيه وزدتي فقستيهم وبيني الفرحة وشرݣي فمك بالظحك ورحبي بعرووستك طرطقي لباباهم المرارة، واخا غاااا تناافقي هاد الوقت
نعيمة: (كتفكر فكلامها)
اورطيغا: (شاف خالتو مشات تبع ليها العين حتى كيسمعوها زغرتت)
هه لااااا ولا متحمقونيش غتجمعي علية نتي وداك نص بنادم غتخليوني بحال شي بوهاالي!!!
أمينة: ههه بوديينة هاكا كدار بيه
اورطيغا: انا دابا بودينة؟؟
أمينة: نتا حبيبي وكتاافي ولكيييدة ديالي (تبسم) هاااا مݣلت رجال كاملين مسݣيين بمغرف وحدة!! بودينات!!
تحط لعشا كلاو رجال تجمع كولشي وتحطت لاطاغط للي دمونداتها مع طبيسلات وتحط العصير فالكيسان جابت ملاك بلاطو للي جابو من عند النݣافة فيه كيسان حليب مع العسل الحر وفبواطة حمرا كيان جوج خواتم..
دخلو حتى لعيالات تحت صلا وسلام ووفاء فوسطهم مݣوداها نعيمة كتشقلب عينها الخالة للي غير عااابسة ومحاملة حتى حاجة لدرجة جغمة دلما مهبطتهاش مع حلقها وغير هازة راسها بتكبر.. جابو عمر للي غير كيتبسم وقفوه حدا وفاء وياسمين ختو كتصور، ملاك مدت ليها كاس دلحليب ليها ولعمر ضارت شافت فاورطيغا للي هاز حواجبو بملامح جامدة بحال كيقولوها ترجع اللور دارت راسها مفهمت والو وبحال مشافتوش عطاتهم تمر وعينها تشرب لحليب من مور وفاء راه رجع عادة وتقليد عندها بكترة مشربت الحليب من مور لعريسات ريوݣها ويديها كيرجفو على داك لحليب بحال شي موحمة!!
هزت نعيمة الخاتم كان سامل زوين ولكن جاها رخيس بزاف وحتى صداق معطاهاش بزاف قالت يمكن لقا فهاد البنت القناعة ورتاح معاها واخا مبغاتش تدخل ليها قضية مطلقة وكبيرة عليه واخا مباينش عليها العمر كبير!! تبسمت مع وفاء مداتو لولدها لبسها الخاتم دخلت أمينة مخلطة فزليفة الحنا دارت ليهم دويرة دويرة ليها ولعمر كانو اجواء بساااط ولكن بسعادة كبييييييرة!!!
جلسو وجلس حداها اول مرة يكون قريب ليها هاكا.. تقطعت لاطاغط تفرقت، ملاك كتاكل ومجمعة مع مها وأمينة اورطيغا غير حاضيها يمكن نسات وجودو حيت كتاكل وتظحك ومشافتش فيه غتحمقو راه هو للي خاصو يكون محور انتباهها ساعة والو كل مرة وشنو كتعطيه كتخليه غير كيفكر فيها... صونا رشيد علمهم راه لتحت باش يردهم
ملاك: عفاك عفاك عفاك اماما الله يحن عليك عفاااك
أمينة: خليها مع صاحبتها ولا تمشي معايا تبات
زهرة: فين غتمشي أمينة واش كتزيدي الݣاز العافية!!!
أمينة: ههه وعلاه انا شنو كندير ؟!
زهرة: ملاك نتي عارفة باباك
ملاك: غنبقى مع وفاء هنا راه مها غتبقى معاها خالتها للي غتمشي
زهرة: والا راجلها بغا يبقى معاها؟
ملاك: لا قالها ميبقاش عفاك اماما عفااك
أمينة: خلي البنت ازهرة
زهرة: (كتشوف فبنتها) نقولها لباك بعدا عاد نجاوبك
ملاك: غيبغي.. (حطت طبسيل الحلوى دورت عينها ورجعت اللور كتشوف فالطبلة) فين زلافة دالحنة!!!
أمينة: (شافت فين حطاتها مكيناش) كانت هنا!!! بيدي حطيتها هنا!!
رشيد: (بقا كلام مراد فودنو منين عيطلو فالتيليفون واخا عمرو عطاه نمرتو ولكن النمرة ساهلة المشكل هو منين قالو بغيت بنتك لزواج ويدير معاه وقيتة يهبط عندو يهضرو فهادشي وجه لوجه باش من بعد يجيب مو.. رشيد مجاوبو لا بلا لا باه اصلا متوقعهاش منو قالو واخا بسلامة بسلامة وقطعو...
مشا لفاس للحومة وبقا كيتسنى مرتو فالطموبيل باش تهبط وحاجة كدورلو فراسو واش بنتو غيكون فراسها هادشي!!!)
~~~~~~~~~~~
ملاك: (بقات كدور عينها وهي تهمس) ..خالتي أمينة خالة وفاء ومها هوما للي مكينينش نمشيو نقنتوهم يعطيونا زلافتنا
أمينة: تبعيني
زهرة: أفين غتبعك جلسي نتي، انا نمشي نفك هادشي (ناضو بهدوء وفاء وعمر كيتوشوشو ومرة مرة كتشارك معاهم نعيمة الهضرة كتعارف معاها... خرجت نعيمة شافت ام وفاء واقفة حدا باب الدار كتسالم مع ختها)
أمينة: بلاتي واحد دقيقة الله يخليك
الخالة: إييييييوا ختي نخليييك مزروبة مزرووبة..
أمينة: (بقات غير كتشوف منين معطاتهاش وقت اذا فراسها لعجيينة.. عيطت لولدها) مرااد مراااد
اورطيغا: (خرج عندها خبراتو فودنو شنو يدير باش حتى واحد ميبان فالصورة..
هبط بالزربة سابق الخالة لي كتعيط بشوية وهي كتهضر فالتيليفون ودارت مع بنتها للي غتجي تديها بالطموبيل..
مشا عند جماعة ديال دراري جبد ݣارو كيكمي وهو كيهضر معاهم شوية مشا متسع حاضي حتى غير بعينيه كيشوفهم ضايرين بيها منين هبطت وبقات حدا الشانطي..
وقفو عليها كيݣريسيو فيها ولكن بشرط وراهم شنو غيجيبو، وغادي غير يخلعوها، واحد فيهم بقا كيقلبها لقا فالقب ديالها ميكا صغيرة شمها كان داكشي للي بغاو واحد جمع معاها بطرشة ظحك اورطيغا بهاد الطرشة حيت هداك للي ضرب مبوق عاد رخاوها كتبكي مرعووودة!!
مبقاتش فيه مدام الواحد كيفكر يآذي الواحد هاكا يستاهل كتر من هاد الحݣرة!! مشايفش رشيد للي شاف لبلان كامل واكيد مفاهمش النية ديالو شاف غير شنو وقع قدام عينيه!!)
اورطيغا: الله يحفظكم.. عشاكم نص ساعة وينزل عندكم،، اه كاين شي ضياف نسمع شي بسالة مغيعجبنيش الحال
...: كون هاني اخاي اورطيغا!!!
اورطيغا: (شد من عندهم الميكا وطلع للدار مد لمو لميكا كانت زهرة لابسة باش تمشي)
خالتي تبغي نوصلك
زهرة: لا ولدي راه عمك لتحت
اورطيغا: اه.. راه هضرت معاه على داكشي ديالنا انا ولالة ملاك
زهرة: (تبسمت) يكون خير اولدي
اورطيغا: انوصل معاك.. ملاك غتبقى!!
زهرة: غتبقى هنا مع صاحبتها.. (وصل معاها لتحت رشيد غير كيشوف ويرد عليه صوابو ومشاو فحالهم..... )
اورطيغا: (هبط مع زهرة لتحت، كيحس برشيد انه ماشي ودود معاه عكس زهرة ولكن تقبلها عادي ماشي بالضرورة كولشي الناس تبغيه من اللول حتى يعرفوه عاد يحكمو.. مشاو وهو بقا تماك
صونا على يوسف يسول فيه مجاوبش قال غيكون ناعس مرتاح ميوليش يصدعو صونا على ملاك جاوبااتو)
فين البنت؟!
ملاك: حنا كنجمعو شوية الدار
اورطيغا: اجي جَمْعِي معايا انا، مكرهتش نشوفك دابا
ملاك: (تبسمت) مصالحش
اورطيغا: علاش؟!
ملاك: الدار عامرة واصلا ماما حلفاتلي ههه
اورطيغا: اممم قولي نسيبة حالفاها فية انا!!
ملاك: وحتى انا بغيت نشوفك ولكن حلفاتلي معندي مندير
اورطيغا: اوا!!
ملاك: منقدرش نتلقاك بوحدنا، دابا نتا منين تحلفلي على شي حاجة منديرهاش ونواعدك، متبغيش نخليك تضرب الضورة وندير عكس داكشي!!
اورطيغا: مالي غناكلك غير غنشوفك ابنادم!!
ملاك: (حسابها غتأثر فيه بهاد الهضرة) واخا هكاك امراد
اورطيغا: ديريها فين تجيييك (بقات كظحك) انا نطلع تلاحي منافعة بوالو..
(قطع معاها جبد ݣارو كماه ممكملوش، عاد طلع شاف لوخرين كينوضو يوجدو باش يمشيو)
الوالدة!!
أمينة: (جات عندو) راه جا عندي الدري خدا عشاه.. مزال كتبقى بولد فاطمة
اورطيغا: مرة مرة
أمينة: امم واش هاد الدار كتكرا بفراشها؟!
اورطيغا: اممم
أمينة: اوا مكاين لاش لبنات يبقاو هنا راه كولشي غيمشي ومنخليوهمش يباتو فالحومة
اورطيغا: ناخدو معانا ملاك للدار وفا تبقى هنا مع عمر
أمينة: حتى عمر غيمشي مع واليديه
اورطيغا: (بقا كيرمش ويشوف) كفاش مع والديه علاش مغيبقاش مع مرتو؟؟
أمينة: مزال... (عارفااه) ودخل سوق راسك
اورطيغا: كفاش مزال ولاش هاد الحالة وعقد!! هاد الزربة الخاوية!!! (جا ماشي عندو وجراتو من جاكيطتو)
أمينة: ونتا ماالك!!! دخل سوق راسك هاد العااار!!
اورطيغا: وعلاش عقد؟!
أمينة: (هزت يدها على راسها) ياااااا ربي على هاد جلااااخة!!! ونتا ماالك انا من الاول مبغيتش يضاسر معاك غير بمسبة هادشي!! (مشات وهو بقا واقف دازت من حداه ملاك)
اجي اديك الوزغة؟!
ملاك: (شقلبت عينها) ملااااك سميتي ملاك
اورطيغا: ملاك!! ملاك ولا (غمزها) ملييكة!!! (خرجت عينها) ادوي امليكة!!!
رشيد: (صايݣ بقا ساكت حتى نعس أنير فكرسيه من اللور) عيطلي ولد هاديك صاحبتك... داكشي باش معارفة معاها؟؟
زهرة: (باستغراب) كفاش؟!
رشيد: ولدها عيطلي!!
زهرة: مراد؟! وكفاش داكشي باش معارفة معاها؟!
رشيد: اييه مراد.. قالك بغا يجي يهضر معايا على لبنت
زهرة: (ملامح عدم الرضى باينة على وجهو) اوا مرحبا بييه!!
رشيد: كفاش مرحبا!!
زهرة: اه مرحبا بيه تبارك الله ولد الناس مأدب ومربي مرضي ميمتو وراجل ديال زمان
رشيد: أنا نعطي لبنتي هداك!!
زهرة: كفاش هداك!! واش حݣرتيه ولا شنو؟!!
رشيد: الالة محݣرت حد ولكن هداك هو للي ميتزوجش بنتي نخليها حدايا ومنعطيهالووش شحال وهي عاطية قيمة راسها وفالتالي!!
زهرة: (مبغاتش تعصب معاه) علاش؟! (شاف فيها) شنو للي شفت فيه قبيح باش متعطيهاش ليه؟!!!
رشيد: (بانفعال) هكاك وصافي، نربي نكبر وفالتالي نلوحها؟!
زهرة: علاش هو تولد وكبر فمحيبق؟! معندوش مو للي كبراتو وخدمت عليه ورباتو؟!
رشيد: زهرة!!!
زهرة: ياك كتقول النقاش هو كولشي فالحياة ونهار عرفتك عرفتك كتناااقش... اوا ناقشني!! فهمني علاش حاݣر هاد السيد ونتا مكتعرف عليه والو!! علاش حكمت عليه ونتا ممعاشرووش، ومتنساش كما كنقولو حنا المسلمين إن بعض الظن إثم!! ربي مكيبغيش هاد الحݣرة
رشيد: مكاين لا حݣرة لا والو ، انا شفتو مصالحش لبنتي داك نهار بغا يضرب خوالو ودفع خالتو وفالجنازة عاد!! وحتى مو مداهاش فيها وهاد نهار مصيفط شماكرية ݣريساو شي وحدة وضربوها قدام عيني
زهرة: ومفكيتهاش؟!!!
رشيد: كنهضر بالصح مكنظحكش
زهرة: من ديما كنتيقك الا فهادي ارشيد ولفتك رزيين وكتوزنها قبل متنطقها ولكن جيتي هنا وخربقتيها نتا عارف داك الولد مزيان كفاش كبر شتي نتا لوكان كنت فبلاصتو بعقايتك متوليش حتى ضور راسك لجهة خوالك بداكشي للي دارولو وهو مزال فكرش مو، وفلݣنازة راني كنت حاضرة هو مدفع ما ضرب ومو كيدير ليها بحال الريشة، وزعما عاودت ليك وشرحت ليك.. بااز بقات فقلبك لليوم باز والله حتى باز ولكن للي معندو زهر معندو حتى فخلا دار بوه عاد يكون عندو مع البراني
رشيد: (شاف فيها)
زهرة: وانا الا جا خطب بنتي غنعطيهاليه وعيني مغمضين ارشيد..
ملاك: (بقات مطرطقة عينها) شنو!!
اورطيغا: من ديما تنقول علاش متتجبديش كارت ناسيونال!!
ملاك: (غير مخرجة عينها)
اورطيغا: (جبد ورقة من جيبو مطوية على ربعة حلها كيقرا) إلى المالكة شقة 4 (شاف فيها) مليكة شراف (جمع الورقة دايرة فجيبو) ومتحشميش!!! (طانز) عام ونتي تتقوليلي سميتك ملاك
ملاك: (تصدمت بلعت ريقها شحال وهي مخبية سميتها على الناس.. منين كانت كتقرا فالاعدادي كولشي رجع كيقولها ملاك واخا الأساتذة كانو كيعيطو ليها باسم مليكة، وعاد فاش مشات للمحكمة تدعي باها يبدل سمية وجدها حلف عليها بالسخط ولا رضى كتر من 6 سنين وهوما يرغبوه واالو جاتو عيب بنت دخل باها للمحكمة واخا امور شكلية الا متقبلهاش وبقات هكاك قليييل فالقليل للي عارفها باسم مليكة وحيت حساسة فهاد النقطة ولفوها باسم ملاك!!!)
اورطيغا: شنو!!
ملاك: (جاتها لبكية ومزال مخرجة عينها حست براسها تحشمت بزاف قدامو)
اورطيغا: اشهاد الكذوب للي فيك.. واش فاايت فيك شي عرق يهودي؟!!!
أمينة: (جات خارجة من الصالة جات فوذنها هاد الجملة شافت ولدها شاد ملاك مقنتين... ملاك نفسها كان غير منتظم بحرا كتنفس شافت فأمينة للي خرجت عينها)
اداك الجحمووم؟!
اورطيغا: تنهضر معاها الوالدة!! (مابغاش يقول على سمية للي فنيتو غير يشد فيها شوية اما مكتهموش غير يقرصها على داك الكذوب)
ملاك: (عينيها عمرو دموع تمت ماشية خارجة وهو مفهم والو)
اورطيغا: اهياااا!!!
أمينة: اش هاد الهضرة يا الصُّوڤاجي؟!؟ (مشات عندو) مكنعايروش الناس بهادشي ماشي عاودات ليك تنوض تعايرها بيها!!
اورطيغا: شنو!!! (معقلش اصلا شنو قال ولكن للي فهم حتى هي فخبارها بلان سميتها لحقيقية شافها طلعت دروج) ملااااك ملاك
ملاك: (طلعت لسطح هي ماشي حشمانة من خلفية مها ولكن خافت تخسرو على قبل مها حيت هنا كتسالي حدود اي واحد كان معاها.. لحقها شدها من ذراعها، ضارت وعينيها حومر)
شنو؟!
اورطيغا: نتي للي شنو!! هاد الحالة كاملة على سمية تكون سميتك حتى الضاوية شنو العييب!!!
ملاك: (ضورت راسها مكتشوفش فيه ولبكية واحلة فحلقها صافي تفرشت من كولشي بانت صغييرة حيت خبات سميتها وهاد أهم حاجة تفرشت فيها)
اورطيغا: ملااااك (شد فيدها) ملوووكة واا مِّيييلِكَا ديالي (شافت فيه) واش احبيبي سمية هي للي غتخليني مباغيكش؟!! نتي راه الرية ديالي منسمحش فيك ولو بالمووت...
رشيد: وليتي شادة الضد معايا الزهرة!!!
زهرة: ماشي قضية شادة الضد ولكن كلامك ماشي منطقي ارشيد انا الولد مشايفة منو حتى شي عيب... نتا وريني العيب وانا نرجع اللور بحالك
رشيد: غيبان عيبو
الزهرة: راه ݣاع فينا عيووب علاش نتا ماشي من بعد عشرة طويييلة نضتي تزوجتي علية هدا ماشي عيب !!!
رشيد: هادشي للي شايفة فية, انا ديما خايب!؟؟
الزهرة: مقلتش ليك نتا خايب ولكن جني وجنوني للي يحكم بالخايب على الواحد وهو ممعاشرووش جلس معاه عطيه وقت وحكم.. واخا بانلي نتا محملتيهش من اللول غير باطل يعني السيد واخا يكون نازل من الجنة غتمشي تسول وعلاش نزل!!
رشيد: (بقا ساكت حيت حسابلو غتكون نفس ردة فعلها ومتبغيهش ساعة لقاه كتحامي عليه كتر من مو) اصلا بنتي مغنقبلش بيه...
زهرة: رشيد نعل الشيطان عقلتي نهار بغيتك وحسيت بيك إنسان مزيان شنو درت على قبلك؟!
رشيد: علاه انا هو هداك؟!
زهرة: تقدر تكونو بحال بحال يقدر نتا حسن يقدر هو حسن انا مفهمتش علاش اصلا كتقارن!! هو راه يتيم تيتم مسكين من صغرو وهو فكرش مو، وهزها وهو وليد صغير قرانو كانو كيمشيو يقراو وهو هاز معاها الحمل مخلا فين مشا خدم وشنو باع باش يعاونها واخا بدرهم فنهار حتى نهار تزوجت واحد ربي مسك عليه مقبلش يشد فرنك من عندو غير الا خدم عليه وباقي لدابا وهكاك خلا داك الحاج يفضلو من بين ولادو وحاطلو شغل فيدو متشوفووش هاكا وتقول مفشش هداك تمارة لي دازت عليه عمرني شفتها دازت على غيرو
رشيد: وشنو داير فحياتو هاد خينا؟!
الزهرة: كيشري دارو وخدام فالمحال بعرق كتافو
رشيد: كولشي كيبقى ديال راجل مو!!
الزهرة: دابا هادشي علاش حاݣرو؟؟؟
رشيد: زهرة نتي عارفة رجالات بناتي كاملين عمرني سولت شي وحدة على فلوس ولا شي حاجة ياك حتى خديجة فزواجها اللول عرفتو معندوش ومهضرتش حيت بنتك لسقت فيه ولكن ملاك مغنلوحهاش تكرفس وتخدم على واحد
زهرة: لا علاقة بين هاد الجوج ارشيد، مراد راااجل وسيييدهم ومقامو غيكون ان شاء الله من مقام راجل مريم ونعيمة وخديجة وفاطمة
رشيد: صافي نتي عطيتي لبنت
زهرة: ربي الا كان مكتبهم انا نزيدهم غير الخير ومزال اصلا نشوفو مع بنتك للي ماشي ساهلة ودار بيها، دعي دعوة الخير ونويها زوينة باش ربي يسهل لينا فبناتنا وحفادنا (وصلو) اجي هز أنير راه نعس وغطيه مزياان..
اورطيغا: (لمس على حنكها بظهر صباعو) متعاوديش تكذبي علية املاك كاين شي حوايج تيتخباو متنقولكش فتي علية تفاصيل حياتك كاملة ولكن شي حوايج تتكذبي فيهم ميحتاجوش!!!
ملاك: (دافعة الصنطيحة) مجابتهاش الوقت باش نقولها ليك
اورطيغا: (هز حواجبو) عام!! ملقيتيش ݣاع الوقت
ملاك: (بإحراج) بففف
اورطيغا: بغيت غير نفهم فين المشكل فهاد سنية شنو الفرق بين ملاك ومليكة ؟!!
ملاك: وصافي امراد
اورطيغا: دابا عاد فهمت تنشوف خوتاتك مكاين غير فاطمة خديجة نعيمة تنقول علاش زعما نتي بوحدك للي ملاك وما فيك حتى حاجة مبيناك ملاك
ملاك: ههه وصااافي
اورطيغا: بشرط (هزت حاجبها) قولي لمِّي طاتي أمينة
ملاك: ههه (شافتو مجبدش معاها الموضوع للي مهم على اصل مها)
اورطيغا: (تكا على حيط دروج) غير بالفن ابنت ازهرة طلعتك لسطح
ملاك: (بقات كتبسم باينة فيه كيبغيها راه صدق هو للي كيرغبها حيت كذبت عليه..)
انا ولفت من صغري كولشي كيعيط لية هاكا اصلا قليل للي عارف سميتي لحقيقية داكشي باش..
اورطيغا: من هادشي كاامل غوز ولا زرق؟!
ملاك: شكون؟! (هزت حواجبها عاد فهمت كيهضر على ****) واش بنيتك فين كنكونو كنهضرو ونتا فين؟؟
اورطيغا: حيت هادشي للي تيهمني اكبييدة سمية اش غندير بيها!!
ملاك: (عصبها) قوووقي ومع الضو كحلللللل باش يمشي اصورتي معاك!! (تمت هابطة وهو مكرشخ بالظحك حتى ظحكها ولكن مبينتش.. وصلت للدار كتشوف عمر وعائلتو خارجين دخلت حانية راسها حتى كتسمع اورطيغا كيهضر مع عمر)
اورطيغا: اش هاد لبلان نتا عندك؟!
عمر: هه مراااااد!!!
اورطيغا: فهمهالي نتا غير بالخشيبات
عمر: (عائلتو هبطت لتحت) غدا ونجي عندك المحال
اورطيغا: بلاش اخااي حشمتيينا ولا يكما خاصك شي معلومات خوك راه مدوز الاخضر واليابس (دازت ملاك مخنزرة فيه)
غير الله يحفظ ويستر على شي ألوان ولكن هانية يتطفى الضو كولشي يكونو ناضي كناضي
عمر: ههه (عاطي ملاك بظهر) غدا ان شاء الله وندوز عندك..
مشا عمر كان ممكن تكون خلوة بينو وبين وفاء ولكن باغي كولشي يكون بلعقل ماشي يزرب فكولشي راه اول مرة يجلسو حدا بعضياتهم هو هاد نهار.. ركبو فالطموبيل ومشاو للدار للي كاريين...
أمينة: ياله نمشيو ابنتي
ملاك: (مها نبهاتها متمشيش) معليش نبقى مع وفاء رغباتني ومنين مغيبقاش راجلها ماشي مشكل نونسها
أمينة: فينما رتاحيتي ابنتي.. (كتعيط) مرااااد
ملاك: يمكن هبط..
أمينة: حݣا ابنتي، من عند من شريتي دارك؟!
ملاك: من عند السمسار دايرلو مول الدار التوكيل ولكن حتى سول بابا وقلب ولقى كولشي قانوني عاد توكلنا على الله
أمينة: ووو مراد للي وراها ليك؟!
ملاك: (معرفتش علاش كتحكر على مراد) انا كنت ساكنة هنا مع وفاء وعرفنا بزاف دلحوايج حتى مراد.. مراد عارف (جاوبتها بديبلوماسية)
أمينة: (حركت راسها باه) اوا مزال موريتيهالي !!
ملاك: غدا ان شاء الله يجيبك مراد صباح نيت على مقالي السمسار غدا يركبو سراجم ولبيبان
أمينة: ان شاء الله ابنتي الله يسهل عليك (تم جاي مراد حداهم) حتى مراد راه لقى دويرة وان شاء الله تكون من نصييبكم
ملاك: (تبسمت وشافت فيه غمزها) ان شاء الله
اورطيغا: شنو مشينا؟!
أمينة: ياله اولدي راه عييت نيت
اورطيغا: (لملاك) سيري لبسي نتي شي حاجة شتا بدات تتنش برا
ملاك: انا غنبقى مع وفاء (قوس عينو فيها.. زربت سلمت على أمينة بالوجه تبسمت معاه ومشات دخلت لقات وفاء ومها مطايفين على هاد لعقيد وخرجت مابغاتش تكون متطفلة أمينة مشات تلبس وهو لقاتو حدا لباب كيتسنى خرجت عندو)
اورطيغا: مليكة!!
ملاك: (كيطفيها، تمت داخلة وهو يشدها كيظحك) طلق ازمر
اورطيغا: غنكركب مك من دروج
ملاك: والله وتعاود تقولها مرة أخرى حتى..
اورطيغا: متعاوديش تحلفي علية!!!
ملاك: وحتى نتا متبقاش تقولي هكاك ااخر مرة..
جات أمينة فكت بيناتهم زاعفة على مراد حيت مزال كيحساب ليها كيهضر على موضوع الديانة، هي دخلت غضبانة وهو هبط معتابر الأمر عادي، نورمال خاصو هو يتقلق حيت خبات سميتها راه اول مرة يطيح فموقف بحال هاكا ولكن مدام مقروسة من هاد الناحية ومعاجباهاش مكيهمش هو ولفها باسم ملاك وعاجبو وحتى اسم مليكة زوينة، ومكيهموش سمية بكتر مكتهمو هي... ودع دراري للي شكروه على لعشا ركبو هو ومو ومشاو..
أمينة: مشريتش نمرة؟!
اورطيغا: (دار راسو مسمعهاش وبقا مراقب طريق) باينة غتشتي مزيااان هاد الليلة..
أمينة: (شافت لباربريز) اممم.. ݣول من مور مخرجنا من الحومة مشريتش شي نمرة؟! وبعتي بالصح النمرة ديال الدار ديالنا؟!
اورطيغا: اش فكرك فهادشي؟!
أمينة: حيت موليناش هضرنا فدشي من مور مخرجنا من براكتنا.. واش بعتها ولا خليتها عندك استافدت؟
اورطيغا: حقا شنو بانلك فديك دويرة واخا صغيرة ولكن عجبتني وحتى الثمن ميسر
أمينة: ولكن صغيرة بزاف معجبننيش
اورطيغا: وشنو غندير انا بشي كبر جوج بيوت صالون كافي
امينة: هداك ماشي صالون هاديك غير جلسة سداري ونص..
اورطيغا: كافينا..
امينة: مكتفييش.. وعلاه نتوما بالسلامة ميجيوكم ضياف متولدو غتبقاو بجوج الراس فالراس صبر تلݣى وحدة ب3 دلبيوت وصابون على الاقل يهز 4 دسدادر ديك للي شفنا السيمانة الفايتة حسن وقريبة لية
اورطيغا: بزاف
أمينة: ماااابزافشااي.. نتا شحال عندك؟!
اورطيغا: داكشي للي عندي مكافيش من غير نبيع هاد البرويطة
أمينة: لا هادي كادو من عند الحاج علاش متسلفش من عندو وكل مرة عطيه
اورطيغا: مغنتسلفش من عندو ومغلوحش راسي للزيار الوالدة باش نشري دار نتي عارفة هادشي
أمينة: وميمكنش اولدي شاري شاري
اورطيغا: الا مطرباتكش هادي كاينة وحدة أخرى نمشيو نشوفوها ديال كليان عندي
أمينة: حدايا؟!
اورطيغا: الوالدة الطموبيل راه كاينة
أمينة: واش فالسعادة نيت؟!
اورطيغا: اه ولكن ماشي فنفس السيكتور بعيدة شوية
أمينة: علاش متشوفش للي تحت مني
اورطيغا: واش عارفة شحال ساوية الدار تماك؟!
أمينة: راه صاحب الحاج نشوفو معاه بعدا تماك نقية ومتبعدش على المحال ديالك وكل مرة طلع طل على مرتك
اورطيغا: (بقا ساكت كيفكر فكلامها) يكون خير (وصلو) شنو نتي غتمشي لݣرسيف !!
أمينة: وشتي خالتك شحال رغبت نمشيو نحضرو لداكشي للي غدير لولدها
اورطيغا: وانا لاش جامعاني؟!
أمينة: حيت غتمشي حتى خالتك زهرة وباينة غتمشي معاها ملوووكة
(حرك راسو بلا حولة بقات شادة فيه نساها موضوع النمرة وطلعو للدار...)
وفاء وملاك نعسو فبيت نعاس كانو عائلة عمر جابو كادويات خفاف بوكي ورد شكلاط ببيجامة بشالها تفصيلة جلابة وتفصيلة جوهرة وهادشي مهمش وفاء براكة غير الرجفة دالفرحة للي فيها غلبهم نعاس حيت عياو فالتوجاد...
اصبحنا واصبح الملك لله
خديجة: (فاقت قدات لفطور مشات تفيق يوسف والو مبغاش يفيق حالتو بحال مغيب خاافت بقات كطرشو فحنوكو بشوية وكيحل عينيه بحال داايخ)
يوووسف يوووووسف!؟!!
يوسف: اممم (كيحل عينو بصعووبة مقادرش) انا غنفيق
خديجة: شنو ضاارك؟!!
يوسف: (رجع غيب كانت غتكون بالخلعة هزت تيليفونو بانتلها نمرة ديال خوه هي اللولة صونات عليه قالتلو شنو واقع رجعت كتفيق شوية بشوية بقات كتبغي تنوضو وكتحاول تنوضو شي 10 دقايق جاو اشرف معاه طبيبة والغالية للي خافت بزااف خرجو برا كيتسنااو)
الغالية: شنو وقع مع ابني؟؟
خديجة: معرفتش فقت وجدت الفطور مشيت نفيقو واخا مموالفاهش يبقى ناعس حتى لهاد الوقت قلت حيت نعس لبارح معذب بلحريق فيدو وظهرو
الغالية: (حاطة يديها بجوج على قلبها) الحبيب ديالي!!
خديجة: لبارح مكانش خاصو يخرج من صبيطار دغيا، خاصنا نرجعوه دابا لتماك
الغالية: (تفكرت انها هي سباب بقات كتبكي وباين وجهها شااااحب)
خديجة: (لمست على ذراعها) خالتي متخافيش ان شاء الله يكون خير، خاصنا غير نردوه نديرو التحاليل فكولشي باش نرتاحو من جيهتو
الغالية: يا ربي يا ربي وقف مع ولدي
خديجة: اميين يا ربي (خرجت طبيبة قالت ليهم ضروري يرجع يدير سكانير على راسو زادو خافو كتر شدت فكرشها بلا متحس خايفة عليه والغالية كتبكي بشكل هستيري حاولو يوقفووه)
يوسف: (دايخ) خدييييجة نتي حاملة متعذبيش راسك
خديجة: (مع قد قد فالطول تقريبا تعاونت هي واشرف وحتى مو جات تعنقو ودفعها بشوية زاد ذبحها مكيشوفش فيها هبطو لتحت) خالتي عفاك سدي معاك لباب (سدات لباب تااالفة تابعااهم كتزرب ركبوه فالطموبيل ومشا صايݣ خوه بشوية خايفين علييه...)
اورطيغا: (فاق بكري مشا للݣرنة مزال مكيذبحش ولكن كيوقف على الكموند ديالو وكيتأكد من لحم للي خارج من تماك مطبوع عاد كيديه لدابا مبانوش دوك شلاهبية للي تعرضو ليه وحتى سعد ولد الحاج مبقى لا كيخنزر لا كيلوحلو هضرة وكيزيد يأكد عليه الشبهة وأصلا متيق ملاك!! وصل للمحال كانت مو كتسناه حيت بغاو يمشيو يشوفو دار ملاك، عيطلو شريف قالو على شنو وقع ليوسف وظطرو يأجلو شوفة ديال الدار هو ومو واخا كانو دايرين مع ملاك غادي غير يدوز. عليها حتى لمن بعد.) انا منين خرج معجبنيش الحال
أمينة: مسيكين عويينة ومصلاتش على نبي
اورطيغا: كولشي من ديك رخيسة
أمينة: بالحݣ!!!
اورطيغا: (عاودلها اصلا هو ومو مكيخبعوش بحال هاد تبرݣيݣات....)
~~~~~~~~~~~~
ملاك: (دايرة يدها فجنابها معاجبها حال) شكون عطاك الحق اشريف توري الملكية ديالي لشي واحد!!!! ماشي هاكا تافقنا!! (ربعت يدها) هاكا غتخليني غير منتيقش فيك!!!
السمسار: الله يهديك اختي راه موريتها لحد!!
ملاك: وريتها قالاك موريتهاش
السمسار: لمن؟!
ملاك: (مابغاتش تذكر سميتو) مهم وصلني لخبار تبقى تحافض على خصوصية ديال الناس الله يخليييك
السمسار: اختي مليييكة
ملاك: ملاك غير كاين غلط فالوراقة راني كنقادو
السمسار: اختي ملاك راه موريتها لحتى واحد الله يهديك
ملاك: راه لبارح شفتها فيد واحد السيد ونتا كتقولي موريتها لحد, كنكذب انا؟!
السمسار: واش لاورطيغا ؟!
ملاك: (خرجت عينها ودارت صبعها فوجهاه ليها)
انا قلت شي اورطيغا!! مهم انا نطلع نشوف الدار
(هربت طلعت كتفكر غير منين مراد يعرف شي لاخر للي مخبية على مها.. دخلت للدار كانو دارو سراجم زادت الدار كتبان عجبها الحال دارو بيبان جداد كان قالها مراد تزيد شي حاجة فالفلوس غتعطيهاليه بلاتي..
دابا خاصها تبدا فالفايونص وحايرة بين الأرضية واش دير لاموزيك ولا الجليج!! حيت غتخليها غير لكرايا خاصها تقلب على للي ميتكرفسش وفنفس الوقت رخيس والمتين.. بقات كتفكر اشمن صباغة دير شافت فوق الدوش دارو ليها سدة كبيرة تهز بزااف حمقتها دارها كنحس بسعادة فشكل وكبيييرة.. صونات على مها أبيل ڤيديو كتوريها الدار وبانت بووحدها
زهرة: قالتلي زهرة غتجي عندك
ملاك: مزال مجاو... (حتى صونات خديجة)
ماما صبري نجاوب خديجة.. (قطعت)
ياله كنت غنجي نشوفكم
خديجة: (كانت كتبكي) يوسف جبناه لصبيطار من صباح هو يسخف وينوض
ملاك: وايلي!! علاش مسكين؟! ياك لبارح كان مزيان؟
خديجة: ممزيانش والو.. معرفتش مالو عاد دخلو يديرو ليه سكانير خافو يكون كلاها فراسو
ملاك: (بقا فيها) انا نجي عندك صيفطيلي لوكاليزاسيون
خديجة: حتى خالتي امينة ومراد جايين
ملاك: بالصح!! (مراد كيصوني) صافي انا غنجي.. (قطعت جاوبها كان لتحت جا ياخدوها يمشيو مجموعين...)
...مشا اورطيغا ومو وملاك كانت الدنيا عامرة بالعائلة.. واساو خديجة وغيثة كانت كتبكي على خوها غير شافت اورطيغا جات عندو عنقااتو بالجهد حاطة راسها على صدرو ويديها مدوراهم على جنابو شاف فملاك للي شقلبت عينها مشات عند خديجة ختها اما هو كيبعد غيثة شوية بشوية
اورطيغا: شششت ان شاء الله ميكون والو غير الدوخة ديال لكسيدة تدير هاكا
غيثة: بسبابي خويا مبقاش تيفكر مزيان انا للي خليت خويا غير مشطون بسبابي دار الكسيدة
اورطيغا: هدا قضاء الله وقدره اختي غيثة متقوليش هاكا
(جات أمينة عنقاتها قلب بعينو على ملاك لقاها هي وختها بوحدهم مشا عندهم كانت خديجة كتعاود شنو وقع معاه فصباح..)
لبارح قالولو دير سكانير وهو مابغاش
خديجة: مسيكين مابغاش يخلعني (باستغراب كتشوف فالياقوت) شنو كدير هادي عاود هنا؟؟!
الياقوت: (مشات عند الغالية للي خلات جماعة ومشات عندها) طاتي فين يوسف؟!!
الغالية: (جرتها مبعدة) واش تنازلتي؟!
الياقوت: قلت للمحامي ديالي يتنازل على الدعوة اهم حاجة صحة يوسف دابا ولكن اطاتي!
الغالية: غير يصح ولدي غيدير واجب ديالو
الياقوت: ان شاء الله يكون خير (شافت فخديجة) متكونش غير تتكذب عليه؟!!
الغالية: لا مشاو لطبيبة!!
الياقوت: اوا غنسكتو؟! بلعاني ناضت تتحمل
الغالية: الياقوت راه ولدي لي لداخل واش انا دابا فهادشي!! ومتتشوفيش حالتها حتى هي!! (شافت خديجة عيط ليها طبيب مشات لجهة لبيرو) انا ماماه
خديجة: اجي اخالتي حتى نتي (شافت فطبيب) عفاك ادكتور راه حتى هي عالم بيها غير الله ومشوية على ولدها بزااف (سمح ليها دخل وهي سااكتة محستبلهاش خديجة غدير معاها هاكا!! شرح ليهم انه عندو ارتجاج ومن حسن الحظ موصلش لدماغ يعني ديك الدوخة وراسو للي كيضرو من هادشي، شي أيام ويرجع مزيان اهم حاجة يبعد على الستريس ويرتاح لأيام كتبلو شهادة طبية على حساب خدمتو)
تنعاود نقولها لك امدام خاصو الراحة ويتبع دوا ديالو ويبعد على المشاكل وصداع
خديجة: حنا الحمد لله ادكتور معندناش شي صداع بلعكس ربي غيرزقنا بوليد ولا بنيتة وكان فرحان بزااف
الغالية: (كتزيد تغرق فإحساسها بتأنيب ال ضمير وغير ساكتة.. خرجو من تماك)
خاص نجيو للدار باش نتهلا فيه
خديجة: اجي عندنا اخالتي راه بحال عندك بحال فدار ولدك
الغالية: (بقات غير ساكتة جات الياقوت وخديجة مشات كيسولوها شنو قالو على ميخليوهم يزورووه...)
وفاء: (مشاو عائلتها قادات راسها حيت عمر غيجي عندها ويخرجوو بجوج اما دارهم رجعو فحالهم لجرسيف بكري باش يشرحو للعائلة وياخدو بخاطرهم على ميوجدو شي حفلة.. تدق لباب دارت شالها ولكن ماشي مزير عليها لقاتو هو تبسمت تعلات سلمت بالوجه)
دخل.. مرحبااا انا دغيا نجيب صاكي ونمشيو
عمر: (دخل وسد لباب كيشوفها) نبقاو شوية ونخرجو
وفاء: ههه واخا (جلست وجا جلس حداها كيشوف فيها لمس على حنكها وغمضت عينها ورجعت حلتهم شافت فيه متبسمة)
عمر: زييينة بزاااف
وفاء: (بصوت خافت) عويناتك (كتشوف عينيه للي كوحل ورموشو حسن من دياولها)
عمر: (شد يدها وباسها... بقاو مجمعين حتى قلبوها بوسان ولكن حدو هنا على ميزيدو يتعرفو كتر...)
نخرجو حسن!!
وفاء: ههه واخا.. نجيب صاكي ونخرجو!!
~~~~~~~~~~~~~~~
اورطيغا: (خرج من عند يوسف عاطي لملاك إشارة يخرجو عارفها تقلقت.. لحقت عليه)
التوتووز
ملاك: انا خاص نمشي دابا غدا عندي الخدمة بزاف ومعرفتش خديجة واش نبقى معاها فنفس الوقت مبغيتهاش تبقى بوحدها مسكينة!!
اورطيغا: بقاي باتي وانا صباح نوصلك بكري
ملاك: الا كانت غتمشي لدار حماتها منبقاش
اورطيغا: بقاي معايا انا
ملاك: متحتاجش عندك غيثة غير كترما عليك
اورطيغا: هانتي قلتيها بفمك هي ماشي انا!!
ملوكة حبيبة راه غيثة كبرت معانا داكشي باش عندها هادشي عادي
ملاك: معاديش الا هي عندها عادي نورمال نتا مخاصش يكون عندك عادي الواحد كيعرف كفاش يرسم حدود غير نتا واش اصلا باغي ترسمهم ولا لا
اورطيغا: نرسم احبيبة غير خوي راسك..
ملاك: ها انا مع حمزة ميقدرش حتى يسلم علية (شافت ملامح وجهو كيتسيفو) اوا شتي!!
اورطيغا: المرة جاية نتي للي مغيبقاوش فيك عينين يشوفو
ملاك: (عوجت فمها صونا تيليفونها كان باها) صبر نجاوب بابا
اورطيغا: (حرك راسو بأه، مقالش ليها ديجا هضر معاه حتى يهبط يهضرو وجه لوجه معاه عاد يقولها)
ملاك: بالصح جيتو!!..
انا نصيفط ليك فالواتساب لوكاليزاسيون..
اه كولشي كاين..
صافي واخا..
(قطعت ورجعت حدا اورطيغا للي مربع يديه حاضيها)
بابا وماما جايين وحتى جدي (حرك راسو باه) بففف معرفتش شنو ندير وعاد انا جاية بطموبيلتي !!
اورطيغا: (لمس حنكها بظهر صباعو بحنية، بعدت وجهها مخرجة عينها) انا غنمشي دابا المحال حتى تقولي شنو غديري وعلميني
ملاك: صافي غتمشي؟!
اورطيغا: عندي شي خدمة خاص نزرب عليها مهم انا نزغرت عليك (تبسمت) قوليها الوالدة باش متقلبش علية
(تم ماشي مبغاش رشيد يشوفو هنا باش ميشكش ان بنتو كتعرفو غيبعد من ساحتها باش ميعكسش ليه...)
جاو عائلة ملاك كولشي كيطمئنو على يوسف وبطلب منو باش ميمشيش عند مو للي كتقولهم غيمشي عندو هضر مع طبيب باش يقولهم غيبات تماك.. وهنا خديجة أصرت هي للي تكون معاه... كان هادي شوية ولكن غير شاف الياقوت تعصب
الغالية: احم الياقوت اجي معايا (خرجو برا) بنتي صافي سيري عند ولدك
الياقوت: واش مزال مبغانيش نكون حداه ݣاع.. لهاد الدرجة!!!
الغالية: اه, حيت قالك جبدتيلو صداع مع الخدمة ونتي عارفة يوسف والخدمة ديالو
الياقوت: وهو مبغاش يدير معايا حل خاص يعتارف بولدو، وشوف شنو غدير معاه هاديك الا مبغاتش ولدو يعيش بعيد عليه
الغالية: الياقوت ماشي وقت هاد الكلام واش متتشوفيش ولدي ناعس فصبيطارات ونتي همك غير تخاصمي مع مرتو
الياقوت: باغدون طاتي انا غير... نتي عارفاني تتهمني صحة يوسف اولى
الغالية: صافي سيري دابا حتى نصوني عليك
الياقوت: واخا طاتي.. (سلمت عليها ومشات ولوخرا دخلت ماشيفينش ملاك للي مخبعة فالدورة دايرة التيليفون فودنها كتهضر مع اورطيغا وقاطعة الزي كتصنت عليهم)
اورطيغا: ملاك ملااااك!! (عارفها فالخط) وااااااا مليكة
ملاك: وااا زمر!!
اورطيغا: هه مال متتجاوبيش
ملاك: عرفتي شنو سمعت!!! واقلة الغالية وديك العزافة متافقين على يوسف باغيين يطيحوه فالشبكة ويضيعوها على ختي قالك ما قالك العزافة عندها ولد منو!!
اورطيغا: (غيفهمها من بعد) عنداك تقولي لختك شي حاجة
ملاك: (بقات كدور عينها) اويلي!! واش ڤري؟!!
اورطيغا: متهضريش تماك حتى تكوني بوحدك ونفهمك راه هادشي للي خلا يوسف فديك الحالة وعلى بونت كان غيودع
ملاك: الااا !!!!
اورطيغا: هنييينا حتى تكوني بووحدك
ملاك: انا غنبات مع خديجة مخلاهاش يوسف تبقى معاه غيبقى معاه شريف وخوه
اورطيغا: اممم مهم متجبديش الهضرة منين تكوني حدا ختك من بعد ونصوني عليك ولا انا غنجي عندكم باش نوصلكم للدار...
رجعت ملاك مفاهمة والو غير كتشوف فيوسف تفكرت نهار بغاتو قالت هادا هو ديال زواج راجل كامل مكمول زوين لباس عليه مثقف زعر ساعة عائلتو ماشي ديال المعاشرة وعاد مشاكل ديالو شافت فختها للي كتهضر مع زهرة وتشكا عليها بقات فيها محيلتها لحملها للي سنيين وهي كتحلم بهاد الحمل ولا لراجلها للي عندو ولد وهاكا وقع ليها مع راجلها اللول.. جا عندها باها خلعها من ضرب ظهرها بشوية باش تنتابه ليه...
بابا!!
رشيد: (بغا يجربها جرها مبعدين كيهضر بشوية) جا واحد السيد صديق ديالي كنت كنعرفو من شحال هادي بغاك لولدو
ملاك: (بقات كتشوف فباباها) فين خدام هاد ولدو؟!
رشيد: هههه (نفس اجوبتها منين كيجيبلها الخطاب) واش نتي عقلك غير فلفلوس؟!
ملاك: ههه وباش غنعيشو ابابا بالقموول ياكما باه لباس عليه؟؟! زعما عمي المستقبلي (ضربها لقرفادتها بشوية كيظحك)
معاك بالصح شكون هدا؟!
رشيد: متعرفيهش (فالاصل مكاين حتى واحد)
ملاك: (لوكان جاها شي واحد كانت مها غتقولها بحال ديما وتسبقها ليها ولكن مرة مرة كيبغي يجربها)
اوا الا بان ليك معقول ابابا مرحبا بيه يجي وراك عارف مكنشريوش الحوت فلما نشوفو بعدا ونحكمو هههه ونطلقو عليه شروطنا
رشيد: (بقا كيظحك وهي عنقت ذرااعو متكية راسها عليه)
انا ݣاع منسخا بيك تزوجي
ملاك: وشكون يسخى بيكم الكبييدة.. (أمينة كانت كتشوف وتبسم من علاقة ملاك مع واليديها يعني باينة بنت محبووبة عندهم بزااف وهي متأكدة ملاك بنت زوينة ونقية من لداخل ماشي خبييثة ووغيكون ولدها مرتاح وفرحانة معاها ومن دابا راه باينة فيه..)
الغالية: (شادة زهرة ) عفااكم الا متمشيو معانا للدار راحنا عائلة وحدة متجمعناشاي من العرس
زهرة: معليش احبيبة نمشيو شيخي عياان شوية وخاصو يمشي للدار ويرتاح
الغالية: اييه مسكين الله يكتر خيرو ويعشر خطوتكم جا وهو عيان
زهرة: يوسف راه واحد من ولادنا الله يقومو على خير ويخليه ليكم
الغالية: (تنهدت) اميييين امين الحبيبة (دخل الحاج سليمان وولادو، اب ادم ومفتاحة استئذنت ومشات تعطيهم صوابهم زهرة رجعت عند خديجة كتسائل فراسها واش هاد السيدة وهاد حلاوة لسانها هي للي كظل تشكى منها بنتها)
زهرة: خديجة بنتي حنا غنمشيو جدك مكيبغيش الصوݣان فالليل
خديجة: صافي واخا ملاك غتبات
زهرة: اه حتى لصباح بكري وتهبط لخدمتها...
من بعد مودعوهم وتمناو الشفاء ليوسف للي واخا دايخ عطاهم صوابهم وحتى الغالية وراجلها مقصروش معاهم...
ركبت زهرة اللور وشيخها القدام حدا راجلها كانت كتهضر فالتيليفون مع مرت شيخها حيت أنير غير كيقلب عليها حيت خلاتو ناعس حداها ومشاو لفاس ومنين فاق بقا كيبكي ويقلب عليها...
زهرة: (كتهضر معاه) صافي الحبيب ديالي انا جاية ونجيب لولدي دانون.. (قطعت وضار عندها شيخها)
اب رشيد: ولف بيك بزاف
زهرة: اوا راني مو ماشي بالضرورة الام غير للي ولدت.. راه جا لعندي وهو لحيمة
اب رشيد: هدا اجر ربي غيحسبو فميزان حسناتك ابنتي الله يقوي مثااالك
زهرة: (تبسمت وشافت فالسرجم كتفكر هي عارفة علاش باه كان مصر ولدو يتزوج ويولد اما حجة الولد كانت غير باش ميزيدش يذبحها كتر!! ...)
فلاش باك
بقاو كل نهار كيخرجو يتلقاو سالتين ويجلسون بسوايع واخا صحابو رجعو لعروبية هو بقا مخيم تماك على ودها وكانو احاسيس متبادلين ولكن مزعمش يدير شي حاجة معاها..
رشيد: داليا باقيلكم بزاف؟!
زهرة: لا.. خاص باش رجعو ل... نتا عارف
رشيد: داكشي للي شرحت ليك شنو بان ليك فيه
زهرة: (دارجة عندها معكلة) بان لي فيه موتي ارشيد واش عارف شنو هي تكون تولدت بديانة يهودية وتقلبها للإسلام!!؟
رشيد: وميمكنش تبقاي فشي حاجة ممقتانعاش بيها وانا عارفك كتخافي الله
زهرة: اه كنخاف وبزااف ولكن علاش واش الديانة اليهودية مكيناش فالكتاب السماوي التوراة!! علاش ربي خلق اليهوديين منين مبغاناش نكونو فيها وأصلا حنا هوما شعب الله المختار وديانتا قديمة حتى على الاسلام علاش هاكا؟؟! (تخربقت بزااف) حنا مزيانين.. (شاف فيها هاز حواجبو) انا انا مزيانة مكنآذي حتى واحد كنبغي الخير مكنبغيش لقتييلة كنبغي نشوف الناس كيظحكو كنبغي الحب انا مزيانة ارشيد
رشيد: داليا راحنا بجوجنا كنتعتابرو من الديانات الإبراهيمية ومنين جا الاسلام رجعت كتعتابر اليهودية من أهل الذمة
زهرة: كفاش؟!
رشيد: يعني اليهودية فوقت فاش بان الاسلام وبدا كينتاشر بين الناس رجعتو تحت الحماية ديال الاسلام اي واحد مسالم كنحدد مُسَاااالِمْ من نصارا اليهود مكياذيش الناس كيرجع من أهل الذمة يعني حرام على المسلم يقتلو ولا يآذيه واخا بكلمة!! ولكن اداليا وجودك فبلد الاحتلال ونتي كتشوفي شنو كيوقع !!!
زهرة: انا راه ضد شنو كيوقع!
رشيد: مني ضدو علاش غترجعي تماك؟!
زهرة: وفين غنمشي؟!!!
رشيد: بقاي معايا انا كنوريك الاسلام وان شاء الله غتقتانعي بيه بخااطرك وغتحبيه بقلبك حتى تبقاي راسك رجعتي مسلمة
زهرة: وباش غنعيش؟!
رشيد: انا غنتكلف بكولشي ديالك.. من كل قلبي مغنخلييكش كنواعدك
زهرة: (شافت فلبحر كاحزة عندو متكية راسها على كتفو بخوف كبيييييير) مغيخليونيش ارشيد....
رشيد& داليا(الزهرة)
وكل وحدة عندها الحرية تخيلهم كما بغات
رشيد: نهربو!! نديك تعيشي فبلاصة حتى واحد ميعرفك فيها وكولشي يجي حتى لعندك على متقغد الامور ونشوفو شنو نديرو
زهرة: (بقات كتشوف فيه قبل متعرفو كانت كتقرا على الاسلام حيت داكشي للي كتسمع وداك المجازر خلاها ناافرة داك المحيط فين عايشة، وفنفس الوقت مزاعماش بزااف عارفة العواقب صعييبة..)
ولكن ماما وبابا وخوتي!!!
رشيد: كيبقى الاختيار ديالك داليا
زهرة: ومباغاش رجع لهيهااات، مكنعيش مزيان مكناكلش فخاطري
رشيد: صعييبة على شي واحد زوين بحالك وعندو ضمير وقلب نقي يعيش مرتاح حدا مجازر كيمشيو فيها الابرياء تخيلي كيقتلو كبار صغار شياابن ولاد صغار ياله تزادو بلا التعذيب النفسي والجسدي للي عايشين تماك كل دقييقة
زهرة: (كيزيد عليها) ولكن غيقتلوني!!
رشيد: ميقدروش نتي هنا ماشي تماك
زهرة: شنو الفرق؟
رشيد: هنا كاين ناس عندهم ضمير الخطة باينة غتواجهي معاهم فبلاصة عاامة هوما مغيقبلوش غيكون عندك وقت توادعي معاهم وغنمشيو تحت انظار الناس منين كنقول الناس كنقول مسلمين غتجيهم النفس عليك حيت باغية تبدلي للخير
زهرة: مغيوليش عندي عائلة!!
رشيد: نكون عائلتك اداليا معمري نسمح فيك ولا نخليك ويمكن واليديك يحن قلبهم ويرجعو يتقبلووك
زهرة: (كتحرك راسها بلا وباين فيها الخوف) مغيتقبلونيش
رشيد: ان شاء الله يتقبلو..
زهرة: بقات لينا يوماين !!
رشيد: نتي متأكدة غيمشيو كاملين
زهرة: اه حيت عندنا شي تقاليد تماك ضروري كيحضر فيها كل يهودي يعني ضروري المشيان
رشيد؛ غدا غنتلقاو صباح غنقولك شنو غديري وفين وانا غنكون معاك متخافيش
زهرة: (تبسمت بخوف عارفة شنو غيديرو فيها وخوف فقدناهم فمرة زاد قاهرها كتر) واخا
رشيد: مقتانعة؟!
زهرة: كما قلت نتا يا بيض يا كحل، مبغيتش نطيح بين الجوج!! ولكن!!
رشيد: باش ترتاحي غنديك عند رجل دين هو فقيه ديال جامع غيشرح ليك كولشي..
زهرة: (حركت راسها باه وفقلبها خوف كبييييييييير....)
زهرة: (رجعت عند عائلتها من بعد متوادعت مع رشيد للي وصلها لحدا لوطيل.. دخلت لاشومبر مكتهضرش عينيها دامعين مسخاتش بيهم ولكن يا تختارهم وترجع لعيشتهم يا تختار تعيش مرتاحة وتولف غيابهم على ميتقبلو قرارها للي صعيب ومستحيل فعينهم!!
تفكرت رشيد هو عاجبها ولكن ماشي بسبابو غتهرب باش تكون معاه ولا حبو ليها للي خلاها تفضلو على عائلتها هي غتهرب باش تحرر من داكشي باش كتحس من داك العبء للي مخليها معايشاش فسلام!! رشيد كان غير النقطة للي أفااضت الكأس ومصح ضبابة للي كانت فاصل بينها وبين قرارها... دخلت مها محست غير مشات عنقتها وهي دفعها)
ماما!!!
...: (بالعبرية) عارفة شنو كيوقع منين كتبغي تمردي على دينك!!
زهرة: (تصدمت مخرجة عينها شافت فباها للي حنين بزااف معاها)
الاب: جوج حلول غترجعي معانا وغدخلي للجيش ولا تموتي
زهرة: الجيش؟!
الاب: اه، وصلتي العمر باش ديري التجنيد للي واجب علينا كاملين وحتى خوتك كاملين داروه
زهرة: لا لا انا مبغيتش نتا عارفني ابابا
اب زهرة: كنت كنعرف!!!
الام: باغية تهربي مع واحد يعيشك فالفقر وفالجهل وتخلاي على عيشتك ودينك
زهرة: مبغيتش نهرب مع شي واحد انا بغيت غير نبقى هنا ياك نتوما كترجعو ديما هنا غتلقاوني كنتسناكم مبغيتش رجع تماك
الاب: (ببرود) شنو ختاريتي؟!!
زهرة: (بحزن وقهر كبير وهي كتشوف فيهم ببراءة) تقدر تقتل بنتك ابابا؟
الاب: (ببرود) اخر مرة غنسول!!
زهرة: (كحزت عند مها بغات تعنقها باش تعطف عليها ودفعتها) ماما!! (كتبكي)
الام: شنو ختاريتي؟!
زهرة: (حنات راسها كتبكي ودايرة يديها على وجهها كتبكي بصوت مرتفع)
الام: جمعي حوايجك باش نرجعو خوتك غيكونو وصلو
زهرة: (شافت فيها عاد فهمت علاش خوتها مكينينش حركت راسها بلا وهي موحشااهم من دابا) نبقى هنا
الاب: (حل السرجم كانو فاوطيل كيطل على حافة لبحر) غنكون رحيم معاك لاخر مرة داليا، غادي تلاحي من هنا ولا راكي عارفة الطريقة التقليدية تمشي البحر دخلي ولكن متخرجيش
زهرة: (بهلع) شنو؟!!
الام: (شافت فراجلها) غنبانو حنا للي لحناها وغيهضر داك الكلب للي غااسل دماغها حيت غتكون متافقة معاه باش تهرب
الاب: غتكتب ورقة عاد غتلاح (شاف فبنتو) هاكا حسن!! مغنسمحش ليك ديري هاد الجريييمة!! الناس فالعالم كامل كيتمناو يكون بلاصتك ونتي ختاريتي طريق الخيانة للي معندهاش مغفرة عندي وحتى ونخليك حية غتبقاي يهودية والا والدتي ولاد ولادك غتبقاو يهوووود..
زهرة: غتقتلو بنتكم؟!
الام: نتي قتلتي راسك منين خنتي الدين والدولة...
عدنا
زهرة: (زعزعها صوت رشيد منين وصلو لصفرو حلت عينها مزيان بحال كانت فشي حلمة وفاقت منها!!
خرجت من الطموبيل مكتهضرش وصلها للدار وهو رجع للقهوة صونا تيليفونها كانت مريم كتشكي عليها معاناتها مع راجلها للي هاملها عاطفيا وهي كتسمع ليها وتخفف عليها...)
~~~~~~~~~~~~
خديجة: (وصلهم اورطيغا للدار حيت يوسف حلف عليها حتى تمشي ترتاح واخا مبغاتش ولكن أصر أنها تمشي وراحتها عندو مهمة من انها تبقى هنا)
ملاك ختي انا نطلع.. خويا مراد شكرا
اورطيغا: مدرت والو ومديريش فبالك راه بغل وعندو صحة لكسايد
خديجة: ههه
ملاك: ههه كانا الناس كيواسيو!!
خديجة: بسلامة.. (مشات طلعت وهوما بقاو فباركينغ العمارة لتحت بجوج)
ملاك: حتى انا خاص نطلع
اورطيغا: (مقرب مدرع كرسيها) بوسيني بعدا
ملاك: حمق لا!!
اورطيغا: لا
ملاك: مراااد قولي شنو داك الهضرة للي سمعت قبيلة من عند العزافة
اورطيغا: دابا واش انا فهمي ولا نشرح هم الناس
ملاك: (بجدية) مرااد قولي... واش بالصح يوسف عندو شي ولد مع ديك سيفووح!!
اورطيغا: هه تبوسني نقولك
ملاك: ههه وانا مالي ݣاع يا خبر بفلوس يا بكرة ببلاش نطلع انا عند ختي نفرݣع الرمانة تيليفون منها نعرف كولشي
اورطيغا: متتقدايش
ملاك: ونتا كتبغي دير الشونطاج
اورطيغا: شوفي يوسف كان مع هاد الخ*** من شحال هادي لبلان اوما فيه حملت منو وهو كان واكل عليها لخ** قالها نتزوجو نسترو ك*** هي معرفت شنو كانت كتبلاني قالتو لا نطيح وانا مزال صغيرة باغا نْعِيشْ ونْعَيَّشْ مهم تفارقو على هادشي هو تزوج وهي رجعت قالتلو سلام ها ولدك انا مطيحتوش
ملاك: هي عينها غير ضيعها على ختي
اورطيغا: اوا خونا فالله بقا فالنص ناضت بنت **** دعاتو وهو دار كسيدة بالفقسة
ملاك: اوا !!
اورطيغا: اوا حنا منتباسووش واش بغيتي نتعقد ليك ابنادم!!!
ملاك: (بقات كظحك وهي كتبعدو بيدها وهو هاجم عليها لكن بشوية ماشي بقوة) غير تبعد ولا نجمع عليك عباد الله
اورطيغا: (مبعد مقوس عينو فيها) غتندمي
ملاك: ههه دابا ولا غدا هه
اورطيغا: مبغيتيش!! انا غندير التعدد من دابا
ملاك: (هزت حاجبها) باش عمرك تحلم بية
اورطيغا: مغيارة!!
ملاك: ماشي قضية مغيارة ولكن معنديش مع الحاجة المشروكة!! يا ديالي كولو يا بلاش!! (خرجت من الطموبيل حتى هو خرج)
واش غترجع فتاكسي لاكلينيك على حساب طموبيلتك؟
اورطيغا: نمشي نجلس شوية مع دراري وعاد نرجع للدار!! مشيتي عند السمسار قاتيلو علاش عطاني الملكية!!
ملاك: انا!! لا
اورطيغا: شوف تشوف!!
ملاك: باغي يدخل بيناتنا ياااه على سوسة!!!
اورطيغا: هه متتقشريش
ملاك: (جات حداه وهو متكي على طموبيلتها مربع يدو) مغنقدرش نخبع على ختي هادشي امراد ميمكنش تبقى فدار غفلون
اورطيغا: ديري لي يريحك غير هو راعي شوية لوقيتة للي فيها هوما بجوج
ملاك: يوسف الا بقا مطول مهضرش خديجة غتسمع بهاد شي من مو ولا من ديك العزافة، هادشي مكيتخبعش
اورطيغا: (بملامح زعما براسو معارفش) مهم انا غنمشي !!
ملاك: غدا غنمشي لصفرو صباح بكري، غنمشي نيشان للخدمة (هزت حواجبها بجوج) عارضاك نفطرو بجوج
اورطيغا: معاش الساعة!
ملاك: السبعة ونص واخا عارفة غيكون ظلام ولكن باش نوفر الوقت ونفطرو على خاطرنا ويبقالي الوقت باش نمشي
اورطيغا: (حرك راسو باه) مشاات
ملاك: فقهوة ****
اورطيغا: (حنا راسو مقرب حنكو باش تبوسو، تبسمت وبعدت وجهها حتى قربها شادها من ذقنها جارها باسها فحنكها خاتمها بعضيضة خفيفة وبعد كانت مخسرة وجهها كتمسح حنكها بيدها)
ملاك: وااااا مراااااد!!!!
اورطيغا: سيري فحاالك ما فيدكش (سد الطموبيل مطلع الزاج مد ليها سوارت وهي مزال كتخنزر طلعت فالمصعد ممخلياهش يطلع معاها..)
ملاك: (من بعد ماطلعت عند ختها بقاو مجمعين كتعاود ليها شحال فرحانة بهاد الحمل وفرحتها كانت غتكمل وكان يوسف برا ورجعان ليه صحتو...
تلفت ملاك معرفت واش تقولها لها دابا ولا تخلي راجلها يحل المشكل ممكن مترضاش الا عرفتها من عندها وعاد الا عرفتها عارفة قبل منها، حيت عارفة عقلية خديجة حاارت ولكن خلات شوية دالوقت ليوسف هو يعرف يقولهالها بطريقتو...)
~~~~~~~~~~~~~~
اصبحنا واصبح الملك لله..
ملاك: (من بعد مفطرو بجوج فجو الظحك والنشاط وشوية ديال الرومانسية مخلاهاش تخلص توادعو ومشات لصفرو وهو مشا للݣرنة توحش ذبيحة ولكن مزال الحاج مانع عليه يقيس شي صݣيطة..
كمل شغلو للي تماك حيت خلال خدمة يتفاهم مع سماسرية كمل ومشا عند مو للرياض هزها ومشاو يشوفو الدار للي فنفس المجمع بينو وبين الموبل للي ساكنة فيه مو موبل كانت فالكاطريام طلعو ليها دخلو كانت عادية ممصلوحاش داكشي باش ناقص من ثمنها يعني فيها الخدمة صباغة والا بغا يعاود الجبص والكوزينة خاصها تعاود حيت موديل قديم بقا كيشوف)
اورطيغا: عجباتك؟!
أمينة: على مزيناتها وقريبة لية ولمحالك والحاج قالي غيهضر معاه يتاوا معاك
اورطيغا: اممم وصلتيهالو
أمينة: وعلاه منݣولهالوش!! مزال خاصها غير شوي دالخدمة
اورطيغا: شوية دالخدمة على الاقل خاص شي 7 كيلو هنا
أمينة: مدبرها حكيم دابا غير شوف معاه تكتابو وشي لاخر محلول
اورطيغا: (البالكو كان كبير على دار مو وجاي شوكة يعني جاي البالكو على جوج جيهات واحد الجردة ديال المجمع واحد على الشاريع.. رجع عند مو) اش غندير انا ب3 البيوت
أمينة: واحد لية واحد ليكم واحد ديروه بيت الجلاس وللي بات عندكم يلقى فين ينعس على متجيبونا شي خنفوس ولا خنفوسة
اورطيغا: علاش ازين نتي مزال مطولة معايا؟!
أمينة: ههه متفرقني معاك غا الموت
اورطيغا: (تبسم مشا شكر السمسار للي عطاه 30 درهم وهبطو من تماك) غنوصلك ونوصي الدري على المحال باش نهبط نطرق داك المسمار
امينة: هانتا اوليدي هضر معاه غير بشوية
اورطيغا: ومالي كنت غنضربو غنهضرو فداكشي باش يعطينا شي نهار نهبطو عندهم نجيبو ديالنا
أمينة: هه ان شاء الله اولدي..
اورطيغا: نتي فوقاش باغيا تمشي لݣرسيف؟
أمينة: الويكاند ولكن الا باها ݣال نمشيو انا عندي خطبتك حسن
اورطيغا: صافي.. ياله نوصلك
أمينة: لا غنمشي نتقدا شي حاجة غيجي بلاتي ولد خالتك هو ووفا يتعشاو وغنبقى فداري
اورطيغا: للي تقديتيه عيطي للدري هو يهز عليك
أمينة: لا لا غير شي حاجة خفيفة...
يوسف: (خرجوه من لاكلينيك لدارو من بعد مشراو دوا خوه عيا يرغبو يمشي معاهم للدار ووالو مبغاش اما الغالية كتهضر معاه مكيشوفش حتى فيها بحال مكيناش!!
دخلت معاه خديجة لبيت نعاس حيت منعسش مزيان ممرتاحش باغي يقولهالها قبل متعرف من عند مو ولا الياقوت.. وعاد فاش صونات عليه ملاك طمئنت عليه مقدرتش تصبر وقالتلو شنو سمعت..)
خديجة!!!!
خديجة: شنو احبيبي!! خاصك شي حاجة!!
يوسف: (بقا كيشوف فيها شحاال) دوا للي عطاتك طبيبة خديتيه!
خديجة: اه شي فيتامينات وصافي وحتى التحاليل درتهم خاص نردوهم ليها حتى تبرا ان شاء الله ونمشيو عندها
يوسف: عفاك حاولي متهمليش راسك احبيبة
خديجة: ضرووري... انا كنقاد ليك شي حاجة خفيفة!!
يوسف: امم خديجة لبارح جات الياقوت (شافها عوجت فمها) انا كنت تفارقت معاااها ولكن عمرني قلت ليك علاش
خديجة: مكيهمنيش والله ولكن راه باينة حيت كانت لسقة ميمكنش ديك لمرا شحال كتلسق كفاش كنت متقبلها!! بزاااف!!
يوسف: كانت حملت مني
خديجة؛ (بقات كتشوف فيه مخرجة عينها تصدمت فيه) بلا زواج؟!
يوسف: اه، كنت غلطت بزااف معاها غلطت وندمت بزااف
خديجة: اممم
يوسف: اجي جلسي.. (جات جلست كتصنت ليه) كنت بغيت نتزوجها باش داك الولد ولا البنت يكبر فوسطنا
خديجة: اوا؟؟
يوسف: هي كان عقلها عاامر بتخربيق منكذبش عليك عييت نقنعها نتزوجو نكملو مبغاتش وداك الكرش بحال كانت غتحرمها من بزاف دلحوايج كما قالت هي حيت كانت مزاال مشبعت زهو مهم قالتلي طيحااتو حتى من بعد كنعرف ماشي غير انا للي كنت فحياتها السيدة كانت كتمص مني فلوووس ومن غيري انا عندها سوكوور وكتقلب على راسها فجهة اخرى
خديجة: لا حولة ولا قوة الا بالله العلي العظيم. دارت ذنب فوق ذنب الواحد كيقتل ولدو وفيرو محروم منهم كنكره داك النوع
يوسف: حتى عرفت هاد الايام مطيحتش الولد وولداتو
خديجة: (تصدمت فيه ممستوعباش مزيان) مفهمتش
يوسف: (بحرا كيهضر خايف من ردة فعلها) الولد للي قالتلي طيحااتو كذبت علية مشات لدبي وولداتو تماك ورجعت بيه...
غيثة: (كانت فلاتوليي كتحاول ما أمكن تشغل راسها تبعد من الكينة مااا امكن واخا كتعذب ولكن رجع وقتها عامر فلاتوليي والدار وعاد أكبر هم للي هو الحمل... حست بألم فكرشها حطت يدها فوقها)
شنو هادشي!! ياكما!! يا ربي يكون كيطيح يااااا ربي!!!
(عاود رجع مشات طواليط بالت مسحت لقات دم شي 2 قطرات..)
يا ربي يكون كيطيح..
يا ربي مبغيتوش يتعذب ونتعذب معاه!!!!
(خرجت من تماك استئذنت من اسماء ومشات لطبيبة وبقات شادة النوبة والحريق كيمشي ويرجع وهي كتمناه يبقى ويشيل دم أكتر..
وصلت نوبتها قالتلها شنو كاين قلبتها)
...: معندك والو امدام غير خاصك شوية ديال الراحة وغنكتب ليك مثبتات الحمل واش تبغيهم على شكل قويلبات ديال القدام ولا كاين كينات!!!
غيثة: مغيطيحش؟!
...: لا لا ان شاء الله مغيوقعلو والو
غيثة: شحال عندي دابا؟!
...: 10 السيمانات..
غيثة: دكتورة واش المنشطات زعما لا درووݣ كيأثرو على لبيبي
...: أكيد الله يستر كيكونو تشوهات خايبين وممكن حتى الأعضاء الداخلية ديالهم تقاس
غيثة: (قلبها زير عليها داكشي باش بقات كتهرب منهم واخا مقابل كاين عذاب أليييم) انا كناخد لادروك واش ممكن نطيحو؟
....: علاش ابنتي ونتي مزال صغيرة حبسي عليك هداك السم
غيثة: (كتبكي) مقدرتش راه بسباب لادروݣ معرفتش حتى شكون باباه !!
....: لا حول ولا قوه الا بالله العلي العظيم.. بنتي نصحك تبعي طريق الله مديريش غلط فوق غلط خاصك تمشي لشي أخصائي تعالجي
غيثة: عفاك بغيت نطيحو نعيط للي بغيتي
...: لا بنتي منقدرش نقتل روح معندها حتى شي ذنب!
غيثة: لا ماشي نقتلو انا بغيت غير.. مبغيتش يتزاد ويتعذب معايا
...: منقدرش ابنتي ومنصحكش لا فالدين لا حتى على صحتك..
غيثة: (حركت راسها باه ناضت من تماك) عفاك ديري راسك بحال عمرك عرفتيني
...: الله معاك ابنتي...
غيثة: (خرجت وهي كتبكي بهستيرية عمرها فكرت تنتاحر حتى لدابا حيت غتزيد غير تمرض خوتها وواليديها وهوما معندهم ذنب حتى فحاجة راه كولشي كان عندها هي للي لاحت راسها فهادشي!!)
اورطيغا: (وصل لصفروو حط الطموبيل ديالو ضور عينو فباركينغ للي كتحط فيه ملاك طموبيلتها مكيناش عرفها مزال مخرجت من الخدمة، اصلا اليوم مهضروش بزاف هو مسالاش وهي كانت مشغولة فخدمتها..
كان لابس عادي سروال دجين ݣاط وجاكيط أرمي تمشا للقهوى جلس فطبلة جاه السرباي مابغاش يشرب قهوة كحلة حيت غيبغي يكمي طلب براد أتاي بالشيبة)
كاين سي رشيد؟!
...: اه كاين نعيط ليه!!
اورطيغا: لا صافي انا نصوني عليه.. (صونات مو قطع عليها حتى يكمل هاد البلان دار التيليفون صيلوونص ومصوناش.. حيت عارف السرباي غيوصل للمعلم ديالو راه شي واحد سول ولاخر غيشوف شكون..
غيتسناه يجي بوحدو.. تحطت الصينية هز عينو كان السرباي ومن موراه رشيد.. باحترام وقف ومد يدو)
السلام عليكم
رشيد: عليكم السلام.. جلس اولدي
اورطيغا: (جلس بارتياح واخا كان متوتر شوية و لكن ممبينش)
رشيد: كداير مع العمل ؟
اورطيغا: الحمدلله على كل حال من تماك لعندك
رشيد: المحال ديالك؟!
اورطيغا: (زربة خايبة شاف فيه حط الكاس للي فيدو ديال اتاي) لا ديال الحاج ولكن انا للي شادو هادي 12 العام
رشيد: كتخلصلو الكرا زعما!!
اورطيغا: لكرا وداير نسبة كتمشي ليه وفنفس الوقت صباح تنخدم فالݣرنة
رشيد: يعني ݣزار ولد الحرفة
اورطيغا: من صغر الحمدلله
رشيد: (شافو مقتانع بخدمتو) مزيان تبارك الله.. متديهاش مني قلة صواب علاش مفتحش محال ديالك؟!
اورطيغا: لا لا عادي ان شاء الله دايرو فبالي.. شكون للي غيكره يكون عندو مشروع ديالو بوحدو بلا شركة
رشيد: (هو مشارك مع خوتو) ان شاء الله..
اورطيغا: سي رشيد اناا وبنتك الا كتاب ان شاء الله تزوجنا مغنخليها مخصوصة من والو
رشيد: ان شاء الله.. عندك شي دويرة؟!
اورطيغا: تنقلب !!
رشيد: ساكن فالليدو؟؟
اورطيغا: لا فالسعادة
رشيد: (حس براسو سولو بزاف ولكن مزال داكشي بين عينو للي دار وباغي يعرف مستقبل) بنتي ملاك راه هي عويناتي مساخيش بيها وعارف سنة الحياة خاصها تمشي لدارها ودير وليداتها انا شرطي الوحيد هو بنتي تعيش مزيان تكون بعيدة على المشاكل وصداع
اورطيغا: كلمة رجال بنتك غتعيش مرتاحة وبعيد على صداع واخا كاين غير انا والوالدة للي مغتلقاش معاها المشكل وغديرها بحال بنتها..
اورطيغا: (قوا عليه بالأسئلة، محتاج ݣارو ضرووري فهاد اللحظة) شنو قلت اسي رشيد نجيو انا والوالدة!؟
رشيد: كتعرف بنتي؟
اورطيغا: اه
رشيد: (شاف فيه ديك الشوفة ديال لقتيلة)
اورطيغا: تنعرفها (بكل ثقة) عن طريق لالة زهرة وحتى الوالدة للي هضرتلي عليها وشكرتها بزاف قلت منين انا ناوي الحلال وتشاورت مع الوالدة ونعتاتلي بنتكم قلت مغلقاش حسن من تربية لالة زهرة
رشيد: (هو فهمها فاللول مصاحبين ولكن كفاش هدا ينوي المعقول؟؟ عاود هضرتو ورزانتو خربقات ݣاع داكشي للي كان متصور عليه)
ملاك: (حطت طموبيلتها مصعوقة منين شافت طموبيلة اورطيغا ميمكنش غير كتشبه ليها راها حافظة الماتركيل ديال طموبيلتو..
بقات غير كضور عينها كتقلب عليه رجعت صونات عليه والو مكيجاوبش شكت يكون هو ومو فدارهم زربت وتمت ماشية للداار كتصوني على مها مكتجاوبش!!!)
اورطيغا: (كب أتاي واخا معندو منين يدوز ليه وكب حتى لرشيد حاط حداه الكاس) باقي عندك شي حاجة اسي رشيد تعرفها
رشيد: لا.. لا غير كما قلت ليك ملاك هي بنتي صغيرة..
اورطيغا : من حقك تسول
رشيد: خليلي وقت نسول ونفكر
اورطيغا: اهاه مقلت عيب اسي رشيد من حقك
رشيد: الله يحفظك اولدي..
اورطيغا: (جغم كاس أتاي بحال كيشرب شي فودكا حط الكاس ووقف) هو هدا اسي رشيد نمرتي عندك من بعد يوماين غنصوني عليك
رشيد: يوماين!! يوماين قليلة هه
اورطيغا: (تبسم) 3 ايام مزيان؟!!
رشيد: مرحبا ولدي (وقف مد يدو سلم عليه جا يخلص مخلاهش حلف من الدقة اللولة توادعو واورطيغا مشا ركب فطموبيلتو كينݣر على هاد الستريس للي دارلو رشيد وعيشو فيه هاد ربع ساعة..
هز تيليفونو فيه 10 ليزابيل بين مو ملاك الحاج.. حضاه من لمرايا حاضيه ديمارا وتم ماشي من حيهم..)
اورطيغا: حضااي كتر من بنتوو!!!!
وفاء: (كان شرطو هو متبقاش فديك الحومة وميبقاش عندها علاقة بماضيها للي مسولش وحكم فضولو عليه تحت حكمة حبش تلقى حنش!! قرر يشوفو لكرا يكون قريب لخالتو يكري ليها على ميخرجو وراقيها وتكمل قرايتها فلفاك وحيت شحال وهو معاشر مع اورطيغا فالمحال كان خدا نمرة سمسار للي وصاه يشوفلو دار صغيروة تسكن فيها..
مشاو ليها كانت حتى هي فمجمع زوين مكالمي فيها 2 بيوت نعاس صالون صغير كوزينة حمام دوش عجبااتهم واهم حاجة قريبة لدار خالتو والناس حداها نقيين وحتى هي كتقلب على الكالم وراحة البال.. )
وفاء: زوينة بزاف غنجيب داك لفراش للي عندي نفرشو هنا كاافي فيها
عمر: لا هادي غتفرشيها فراش جديد على متصبغ
وفاء: راها نقية
عمر: لا ضروري تصبغ.. نيت على مرجعو من ݣرسيف نجيو ناخدو شنو خاصك
وفاء: وداك لفراش للي عندي؟
عمر: مول الدار للي كارية عندو بيعيه ليه ولا الا كانت شي وحدة طالبة محتاجة عطيه ليها صدقة فسبيل الله
وفاء: (فكرت فملاك للي باغية تفرش دارها باش تكريها للطلبة غينفعها هاد لفراش) صافي..
عمر: دابا غنتقداوو حويجات ليك انا عارف مجبت ليك والو
وفاء: (مقالتش لا نيشان مشاو يتقداو..)
~~~~~~~~~
ملاك: (بقات مصدومة منين عرفت من مها مراد كان كيخطب فيها من عند باها فالقهوة وبلا ميقولهالها!!! وعاد صدق قالهالو قبل بقات غير جالسة صااقرة)
زعما ميبغيش؟!
زهرة: الله وعلم ابنتي
ملاك: الا مشا قالو لا غنعاودو الجزء التاني ديالكم
زهرة: (خرجت عينها) عاودي قوليها وشوفي واش تعاودي تعتبي حتى داك لباب
ملاك: وشنو بغا يحرمني من حب قلبي ههه
زهرة: الله يمسخك غير ديري مزية وديري راسك عمرك عرفتي مراد
ملاك: شكون مراد ؟!!
زهرة: ههه للي مسمياه زوبيدة
ملاك: ههه نااااري نتي بزااف..
يوسف: (بقات غير كتشوف فيه) خديجة قولي شي حاجة!!!
خديجة: (كتحس بخنقة كبيرة بحال شي واحد قاجها من رقبتها غير كتشوف فيه!!)
يوسف: انا مكنتش عارفها باقية حاملة حتى فاش جات قالتلي ولدك ما ماولدك متيقتش راه اخر مرة عرفت كانت مع صاحبي فالخدمة صاحبي للي عرفتها عليه ودخل ليها فخدمة متيقتش (غير كتشوف)
عارف راسي غلطت بزاف احبيبة ومكنتش بغيت نحطك فهادشي ولكن مقدرتش نزيد نخبع عليك للي بغيتك تعرفيه انا فيديل معاك معمرني خنتك ولا فكرت حتى نخونك انا باغيك غير نتي
خديجة: (كتسمع غير زنننننننننن..... لبارح ملاك لمحت ليها انها شافت الياقوت معاها ولد صغير وبالظحك كتسولها واش الا كان ولد يوسف شنو ديري!! ساعة انفااعلت عليها، صدقت هي كانت بغات غير تقولها شنو كاين!!!)
يوسف: (جا يجلس وهو يدووخ بعدت طالقة من يدو)
خديجة عفاااك مديريش فية هاكا!!
خديجة: واش تأكدت هداك ولدك؟!
يوسف: مزال!!
خديجة: والا تأكدت!! شنو غدير؟!
يوسف: خديجة انا للي مهم عندي نتي !!
خديجة: (بقات كتبكي) معرفتش.. معرفتش علاش معنديش زهر ݣاع!!! حتى كنقول نفرح غير شوية ووو (طرطقت كتبكي.. زادت ألماتو بغا يوقف داخ كان غيطيح من النموسية غير زربت شدااتو ومع صحيحة دغيا عاوناتو يتكا فبلاصتو)
يوسف: خديجة!!
خديجة: (بصوت مخنوق) دابا رتاح طبيب قالك شرب دوا ورتاح
يوسف: (بترجي كيحس بالضعف وزادو هاد الوضع الصحي) خلينا غير نهضرو احبيبة
خديجة: (بجفاء) يوسف رتاح صحتك هي اللولة دابا..
يوسف: (قداتلو فراشو كيحاول يشدها كتنتر، عطاتو دوا قبل متجبد يدها شدها وباسها فراحة يدها)
تنبغيك... فكري من ناحية مبغيتش نخبع عليك راه حتى انا ممتقبلش هادشي وجاني فوق جهدي وطاقتي!!
دخل رشيد للدار ملاك دارت مفراسها والو تخليه يهضر مع مها للي غتجيب ليها لخبار..
صونا عليها مراد واخييرا!!! دخلت لبيتها سدت عليها لباب بكل براءة مخلية باها ومها يهضرو على خاطرهم!!
ملاك: (كتلحنها) هااالوووووو!!
اورطيغا: زين فين شداها !!
ملاك: فالدار (جلست فوق ناموسيتها مربعة رجليها) شفت قبيلة طموبيلتك حسابلي جبتي خالتي أمينة وجيتي!!
اورطيغا: كنت عند باك رشيد
ملاك: ههه خير وسلام!!
اورطيغا: خير ان شاء الله خيير... مقالك باباك والو؟!
ملاك: لا.. اممم شنو قلتو؟!!
اورطيغا: هضرة رجال.. شنو نتي غتمشي لݣرسيف؟!
ملاك: والله معرفت انا مكرهتش نمشي ولكن بابا معرفت شنو غيدير كلمتو هي اللولة راك عارف
اورطيغا: عارف العمييرة.. شفت قبيلة فصباح دار زوينة عجبات الوالدة
ملاك: بالصح وريهالي!!
اورطيغا: غتجي وغنوريهالك وختاري صباغة للي بغيتي
ملاك: ههه لا صافي كنتيق فذوق خالتي أمينة
اورطيغا: متجيش نشوفو؟!
ملاك: ههه لاءء
اورطيغا: ملاك مثلا باك الا عكس وبدا يترطا ويقول بنتي بغيتلها پيلووط!!
ملاك: هه لا بابا كيبغيلي غير الخير ميمكنش يعرف انني باغا ديك الحاجة ومرتاحة فيها ويحرمني منها.. وأصلا منقدرش نبعد عليك امراد راك وليتي مني
اورطيغا: (تبسم) النيكوتين نتي يا جدك
ملاك: ههه، واش بابا قسح معاك لهاد الدرجة؟!
اورطيغا: عادي بحال أي أب باغي لخير لبنتو.. مزال قالك غيجاوبني، دارلي بحال داك شكل ديال الشركة سير راه نمرتك عندنا حتى نجاوبوك
ملاك: هههه
اورطيغا: معليييش انا وتكون عندي قطيطة بحالك منرخيهاش
ملاك: (تبسمت مفرنسة) علاش مبقيتش فصفرو نشوفك!!
اورطيغا: حيت باك بقا حاضيني (سمعها كظحك) عنداك تبيني راكي كتعرفيني!!
ملاك: كولشي كيوصيني
اورطيغا: حيت الموصيبة من لبعد الواحد تيعرفك مزعووطة فية وواكلة جوااانط
ملاك: (ميقت) اممم الثقة امسكيين
اورطيغا: عادي عادي احبيبي مزال تزيدي تزعطي كتر..
خديجة: (كانت فبيت ضياف سادة عليها كتبكي بهستيرية هي الياقوت ومتقبلاتهاش عاد تقبل عندو ولد ومنها!!! عاد فهمت تهديد الغالية نهار قالت ليها هاد الظحك للي كظحكيه كولو غتهجريه وتبكيه دم وهاد الراحة للي نتي فيها غترجع جهنم تبغي غير تهربي منها..
حست بالغدر مكيهمش قبل ولا بعد ميعرفهت المهم هو دابا عندو ولد بقا فيها راسها بزااف كانت حاسة بحال ديما فرحتها مغتكملش ميمكنش زهرها يتبدل فدقة ضرووري من المفاجآت.. صونات على ملاك جاوبتها)
(بصوت مخنوق) علاش مقلتيليش على ولد يوسف؟!
ملاك: (بعدت من حدا مها للي كانت كتعاود ليها على باها) ماما انا جاية!!
زهرة: هضري هنا
ملاك: شي حاجة ديال قلة دالحيا، نهضر!! (زهرة بقات كظحك.. دخلت لبيتها) اخديجة!!
خديجة: علاش مقلتيلي والو؟؟
ملاك: لبارح بغيت نبدا معاك الهضرة ونتي تعصبتي
خديجة: واخا هكاك تقوليلي ماشي تخليني معارفة والو
ملاك: باش عرفتها؟!
خديجة: هو
ملاك: وراه مسكين بعدا عاود ليك مبغاش يزيد يخبع عليك
خديجة: باش غيفيدني انا هاد المسكين؟؟!
ملاك: شوفي راه من حقك تغضبي وتغوتي ولكن داكشي حدو يبقى عندكم
خديجة: علاش انا مزال نبقى معاه!!
ملاك: اوا صافي طلقي وخليه العزافة كادو لا هي لا لالاهم الغالية وها هوما ربحو شنو كانو ناويين من اللول ومخططين ليه ومتنسايش واحد الحاجة هو راه دار هادشي قبل حتى ميعرفك
خديجة: (كتبكي) مبقيتش كنحملو
ملاك: (بقات غير ساكتة تفكرت نهار باها جاب أنير كانت هي اول المؤيدين وكانت كتقنع مها باش تقبلو..)
واش هو قالك يجيبو يعيش معاكم؟!
خديجة: واش بنيتك املاك؟!
ملاك: وانا كنسول عاوديلي شنو قال!!
خديجة: صافي ما فية للي يهضر نشوف شنو ندير واش نجي ولا معرفت
ملاك: دار باك هادي اختي تجي ليها فوقما بغيتي غير واش يوسف يستاهل تعامليه هاكا وهو طايح فالفراش!!
خديجة: (هي براسها مقاداش تخليه ولكن الغضب عما عينيها...)
بلاتي ونهضر معاك املاك...
أميمة: (دخلت لطواليط كتهضر بشوية) راه مصالحش دابا حماتي مزال ممشات....
معرفت غتسافر غيبقى غير باه...
لا لا فهاد الايام غنزرب..
اه داك نهار شافني فالليل منين كنت جاية من عندك ولكن مشكش..
انا بعدا عمرني خنتو كنت غير كنهضر معاك اما هو وديك القزيپانة كانو عايشين الحياة...
صافي واخ..
ادم: (قطع معاها هادي بعدا غطرق ليه مسمار من جهة اورطيغا، هي عينها تنتاقم وجات سااهلة تعمر واحد قلبو وعينيه عامرين بالانتقام وتسهل عليها طريق...)
فلاش باك
ادم: فعرس يوسف وخديجة كان هااااادئ وكيركز على خطتو للي رسمها كان حاضي مزيااان اورطيغا للي كان شي مرات فحال خيال ملاك وكل مرة كيتلقاو فقنت وغيثة كانت خيالهم بجوج استغل انشغالهم ببعضيااتهم بقا غير حاضيهم حتى شاف طرف تالت تابع ملاك وعاد منين ضاربو هو واورطيغا تبعهم فهم كيدابزو على ملاك وقفت حداه وحدة كرشها كبيرة ومن عينيها كانو كيطلقو شرار هادي كانت جالسة مع الطرف الثالت للي دابز..
ادم: نتي مرات هدا؟!
أميمة: (شافت فيه معصب، طلعت الشوفة وهبطتها فيه) شكون نتا؟
ادم: (بهدوء مصطانع البراءة) انا باغي نخطب ملاك ومفهمت والو فهادشي وقت هنا تنتفرج وتنسنى شي واحد يشرحلي هاد الزوج علامن تيدابزو!!
أميمة: حتى نتا معمي على عينيك؟!! اش بغيتي هاد الطاسيلة راهم يهوود
ادم: يهود؟!
أميمة: اه مكتشوفش كفاش منوضة الفتنة بيناتهم؟! الله ياخد فيها الحق فيه نهار الق***
ادم: ولكن هي مبغات حتى واحد فهادو وقالتها ليهم
أميمة: هي راه كتحماق تجمع رجال عليها ياكما حسابلك عندها غير هاد الجوج انا للي جارتها وعارفة وزيد ها راجلي واخا عارفاه مزوج وقرب يجيه ولد مخليااه ضاير بيها بحال لحمار
ادم: اممم نهنيك من هادشي؟!
أميمة: (بقات كتشوف فيه كيبان انسان محترم وهاااااادئ)
علاش؟!
ادم: انا باغي لبنت متيهمنيش هادشي للي قلتي هليها ونتي باغية راجلك
أميمة: وكفاش؟!
ادم: انا غنكتب ليك نمرتي نتي غير حضيني فين غنحطها وهزيها باش منوضةش صدااع... انا غراضي ماشي خاايب في حيت بغيت لبنت ونتي يرجع ليك راجلك يبقى بوحدو ليك.. غنتفاهمو
أميمة: (شافت فحمزة للي كيقول لمراد ان ملاك ديالو ويبعدها.. رجعت شافت فادم)
صافي واخا...
بقات متبعاه دخل مكملش دقيقة خرج حطها فوق ڤاز كبير ودخل هي مشات خداتها فين خلاها ليها، فالايام اللولة مزعمتش تواصل معاه خافت من راجلها حتى مات ولدها عاد رجعت كتواصل معاه...
يتبع...
التعليقات
لا توجد تعليقات بعد، كن أول من يعلق.