محتوى القصة
العائلة للي فالعروبية والمدن المجاورة تجمعت وكولشي سمع بقصة ملاك وجدها يعني مشات عليها وتبصمت انها ضربت جدها وهرست ليه نيفو حتى مريم جات تبقى مع مها فهاد المحنة وهمهم غير ملاك واش بيخير
زهرة: هي تيليفونها طافي ورشيد مكيجاوبش علم الله شنو واقع ليهم بجوج عنداك غير يلقاها ويضربها
مريم: شوفي انا هضرت مع بابا قبيلة قالي مغيدير ليها والو حدو غيردها للدار راكي عارفة بابا إلَّا ملاك تبات برا الدار
زهرة: اوا ها الليل ليل ابنتي فين غيكونو؟!
مريم: غير زيدي صبري اماما (شدت فكرشها جاها حريق خفييف)
زهرة: متهنيتيش حتى نتي فهاد لحمالة
مريم: عادي انا بقات فية غير ديك لكعبية ݣاع المناتف ديال الدنيا والدين كيلسقو فيها وكان غير كانت كديرهم نقولو تستاهل هي للي قلبت عليهم.. مسيكينة معندها زهر
زهرة: اوا الله يجعل زهرها مع الله
مريم: ماما واش هضرت هي ومراد؟!
زهرة: علاه ماشي لقاهم عمك معناقين فدروج وكان غياكلو ردها من موراها وقالو ماشي شغلك
مريم: عمي؟!
زهرة: لا مراد خرج فيه عينيه وقالو دخل سوق رااسك وبعدها
مريم: ههه تلقاو مقزدر مع مقزدرة
زهرة: حتى هاد عمك خرج منو لعجاااايب مرتو لي كنت نقول عليها لفعة ومدارتش هاد لغرااايب...
مريم: ويييه تقول ماشي سهام للي كنعرفو..
~~~~~~~~~~~~
حمزة: (جالس فالقهوة تفكيرو بين لا ديميسيون ديالو وبين يشد خدمة باه بين جوج هريات لي عندو والمعصرة دالزيتون والبلاد حيت كولشي وارثو باه من جدو واكيد غيبقالو هو.. حتى سمع شي واحد كيسول على رشيد ضار عندو جاوبو)
مشا يقضي شي غراض بغيتو فشي حاجة اخاي!!
....: نتا كتعرفو؟!
حمزة: اه راه عمي هداك
....: كنت بغيت نسول على فين ساكن؟!
حمزة: نتا من العائلة ديالو ؟!!
....: لا من ديال مرتو (معارفش شنو سميتها جديدة قالولو ونسا حيت غير مسخر وهوما كيراقبو من بعيد)
حمزة: (هنا كان موصيه رشيد للي سول على مرتو راه غيكون من هادوك للي جايين من إس*****) اه مرحبا غير هوما دابا مسافرين ولكن عمي رشيد شوية ويجي من عندو بنتو لي ياله تزوجت
....: صغيرة؟!
حمزة: لا صغيرة مرتي انا...
اورطيغا: (دخلو بالزربة لقاو غيثة مغيبة ويوسف متكي حداها كيشوف فيها بحال ممتيقش شنو قالت وشنو دارت وهادشي كامل للي عايشاه وللي وقع والمجرم للي كانت معاه وحياتهم لي تقلبت سفاها على علاها عقل فهاد اللحظة كيقول وكان غير تموووت ولا هادشي للي جاي وكان غير خليتها تلاح من داك السرجم وغيتسد كولشي وقلبو مساخيش بيها وعقل كيقول يقتلها هو نيت عصى!!
استغرب مراد من صدمة يوسف حنا كيطرش غيثة فوججها عاد فاق يوسف)
مالك مكوانسي اصاحبي شنو وقع!!!
يوسف: (بدهشة) كانت بغات تلوح راسها وعتقتها دغيا
اورطيغا: (تصدم كفاش تلوح راسها شنو واقع اصلا توصل بيها الدرجة الانتحار!!) كحز نهزها (بغا يوقف وحس بدوهةوخطييرة لدرجة الشوفة رجعت مضببة عاوناتو خديجة وقفااتو وبقات حداه كتشوفو بحال كيحرك راسو باش يشوف مزيان جا حداه رشيد غير كيتفرج كتر عليه هادشي هاد نهار شاف اورطيغا مع هزها بانت مشقفة من راسها وكاين الدم فوق الارض فوسط الدم خااتم يعني جات على الخاتم)
خديجة: ويلي الدم!!!
اورطيغا: غتكون تشقفت لبس نديوها ايوسف لصبيطار راه طيحة خايبة
يوسف: (حرك راسو بلا) ديها غير لبيت لهيه انا نعيط على واحد الفرملي جاري (مباغيهاش تمشي لشي مؤسسة حتى يعرف شنو واقع)
اورطيغا: (استغرب من ردة فعل يوسف راه غيثة هي عينيه شنو هاد اابرووود؟!!!
ولكن معارفش شنو المشكل للي دايرة مخلية خوها مخيخخ من جيهتها، وهو براسو بقات فيه مغينساش انه هي لي جابت مو فالوقت المناسب لصبيطار واخا معارفش لبلان للي وقع وكفاش مشات عندها ولكن هي للي عتقتها...
داها لبيت لاخر خديجة جابت درة ديالها دارتها على راس غيثة على حساب الدم لي ماشي كتيير وكتقلب بين رجليها واش كاين دم خايفة من شي إجهاض)
رشيد: (مشا عند يوسف كيهضرو بشوية) حضر عقلك اولدي ومتنساش ولدها هنا بلا متخرج ليك شي كلمة باش متزيدش تشعل المشكل على الاقل فهم منها وميكونش هو حاضر
يوسف: سمحلنا اعمي على هادشي للي حضرت فيه
رشيد: حنا راه عائلة اولدي
اورطيغا: (تنكرى بزاف من رشيد بلا والو هو مقرووس من جيهتو تمو جايين جيهتو ساكتين وهو كيشوف فغيثة)
خديجة: (تبعت باها بعينيها) بابا!!
رشيد: انا مشيت ابنتي (غيثة كانت ماشي مغيبة 💯 حطاتلها راسها بشوية وخرجت تابعاه ويوسف كيهضر مع الفرملي باش يطلع عندو للدار ساكن فنفس الموبل اورطيغا فالكولوار طالق ودنيه واخا صوتهم ممسموعش بزاف ولكن كولشي جاه مخربق يوسف مبرد من ختو لهاد الدرجة!!! رشيد اش كيدير هنا فهاد الوقت!!....)
الا جات ختك قوليها لي ابنتي
خديجة: كون هاني ابابا..
اورطيغا: (بنص عين متبع رشيد للي مشا فحالو واحد مكيهضر مع لاخر، مفهمش اصلا اش جابو فهاد الوقت حيت عارف قليل فالقليل فين كيجي عند بنتو وعاد باين حتى هو ماشي هو هداك!! جات خديجة دايزة حداه بلا عقل)
خديجة ياكما واقعة شي حاجة عندكم فالدار؟! فصفرو!!
خديجة: ها!! لا لا لا... غير تلفت مع غيثة وصافي
اورطيغا: كفاش بغات تلوح راسها؟! عاد صباح كانت عادية معانا فصبيطار!
خديجة: على للي فهمت لقاها يوسف رجعت لداك السم وتخاصمو مخاصمة كبييرة، وراك عارف الحرب للي نايضة على هادشي
اورطيغا: رجعت!!!! (مصالحش يسول ويزيد يستفسر منها)
الله يهديها معرفت فين باغية توصل بهادشي!!!
(شاف فيوسف للي جالس على الكرسي وداير يديه على راسو وحاني للأرض بحال واقعة شي موصييبة رجع شاف فخديجة لي دغيا سهات)
حاولي نتي على راسك راك حاملة ومتغرقيش فمشاكل الناس بزااف!! هنا راه كل واحد كبير وعارف شنو تيدير
خديجة: (بقات غير كتشوف فيه عز عليها شو هو كفاش فكر فيها ولكن الا مشات قالت ليه شنو كاين عاد غتنوض الحرب ديال بالصح هو مغيسمحش فحق مو وممكن يتهور وعاد كاين صاحبو يوسف فالنص!! رجعت للبيت شافت فغيثة وهاد المرة عصبتها راه هي سباب هادشي كامل لوكان غير هضرت مكانوش غيوصلو لبزااااف دلحوايج..
وعاد ختها للي مزال مجات عندها يعني علم الله فين كاينة وعاطية الراس!!!
تلفت بزاف حست بكرشها تزيرت عليها بحال صريرة مشات لبيتها سدت لباب ودخلت لطواليط..)
اورطيغا: خاي يوسف جا الوقت باش تدي غيثة المصحة
يوسف: سي طروطاااار دابا
اورطيغا: كفاش طروطار مزال الوقت واخا تكون تتدروݣا كل دقيقة وااخا حالتها ماشي شي وحدة لي مبلية ݣاااااع راه كفس منها عطيهم شهرين تيدوااو
يوسف: (حرك راسو بلا مخرج عينيه)
اورطيغا: واش واقع ما كفس!!
يوسف: (حرك راسو باه)
اورطيغا: (مفهمش بالظبط شنو كفس ولكن للي فهم غيثة مغتعطيهش راس الخيط دابا هز تيليفونو شاف فميساج عمر كيسولو الا مكانش غيجي تبقى مو معاها هاد الليلة)
خاي يوسف انا غنمشي باش نحضي الوالدة باشما نتا علمني
يوسف: (كان باغيه يوقف ومقدرش مزال دايخ واخا الطيحة مجاتش فراسو ولكن كاين ارتدادات) سلم على لالة أمينة
اورطيغا: يووووصل... وشووو غير بالعقل هضر معاها... بيناتنا الألووووو..
وصل اورطيغا لصبيطار وعقلو خدام كفاش بلان غيثة ووجود رشيد تماك!! وكفاش قالو يوسف كاين ما اكفس!!!
لقا العائلة مزال كولهم للي جاو من ݣرسيف دخل حدا مو للي كتشيرلو يقرب قرب ودنو لفمها كتهضر بشوية
أمينة: عطي الساروت لعمر يديهم للدار راه معندهم فين يجلسو اولدي
اورطيغا: (ميقدرش يرفض ليها راه مها هاديك خرج برا عيط على عمر قالهالو حيت هو براسو كاري دار صغيرة بزاف مغتهزش هادشي.. وفوسط الهضرة لمح ليه بيتو ينعس فيه هو ومرتو الا بغا حيت فيه وراق خدمتو وشحال من حاجة مهمة عطاه الساروت هوما مشاو وهو بقا مع مو مقدرش يشد لسانو)
الوالدة علاش مشيتو نتي وغيثة حدا مرجان؟!
أمينة: (للي عاقلة عليه هو منين بغات تهرب من التاكسي ضربها) معقلت على والو اولدي
اورطيغا: صافي غير متعييش راسك حتى تعقلي على خاطرك (دخلت فرملية دݣت ليها شي إبرة فالسيروم مجمعة مع اورطيغا لي كيسول على حالة مو خرجت وهي عالمااه مو غتنعس فأي لحظة خلاها مرتاحة وتكا هو فالفوتوي طويل للي حداها بعدا هاكا كيبقى مرتاح وهي حداه وبكترة لعيا حتى هو نعس..)
~~~~~~~~~~~~~~
يوسف: (كان عندها الفرملي وخديجة معاها فلبيت كيغرز ليها فين تجرحت وهو برا صونا على مو ميمكنش هادشي يبقى مستور كتر من هاكا)
وي الوالدة!!!
(بحرا كتهضر بالاعصاب للي طيحوها)
الغالية: (مريضة على شنو شافت) اولدي
يوسف: مالكي؟!
الغالية: (بتنهيدة) غير نزلة البرد
يوسف: عرفت شي حاجة خايبة بزاف وخاص لقاو ليها حل.. على غيثة تنهضر!!
الغالية: ياكما وصلوك حتى نتا الفيديوهات؟!!
يوسف: كفس!! عرفت راها حاملة!!! وعاد كاين ما اكتر!!
الغالية: حاملة!!! (بقات كتبكي وهو غير كيتصنت)
نطيحووه اولدي قبل ميكبر داكشي!!
يوسف: وللي دارها يفلت؟!
الغالية: وشكون هدا؟!!
يوسف: شكون من غيرو ادم الكلب للي لسقتيه ليها صحة
الغالية: لڤيديوهات لي جاوني اولدي متتكونش تتهضر مع ادم ديك لحمارة غطست لينا راسنا فتراب هوما سميااات ها زهير ها مراد... يا ربي وكان مت ومشفتش هادشي ومعرفتهاش خرجت لطرييييق....
ومعااامن مع ولد الݣرسيفية!!
الغالية: ... ومع ولد الݣرسيفية!!!
يوسف: (خسر كمارتو) يا ريت وكان كان معاه كان غيكون راجل وميسمحش فيها وميذلهاش ولكن كولشي منك نتي مكاينش لي خرج عليها قدك.. (قطع كلامها كيجيه غير تخربيق)
يوسف: (بقا غير كيخمم ويفكر ناض شرب دواه خاصو يكون بصحتو وبكل طاقتو فهاد الكارثة!!)
خديجة: (بقات حدا غيثة منين خرج الفرملي وهزت شعر لي حايد ليها فلبلاصة للي غرزت فيها)
غيثة واش بالصح قتلتيه؟!!!
غيثة: (حركت راسها باه) غيكون مات كان علية نديرها من شحال هادي ولكن تعطلت بزاف
خديجة: وتخرجي على راسك؟!
غيثة: خرجت من شحال هادي منين كنت بحال شي پوپوية فيدو
خديجة: واخا هكاك اختي كان عليك غير تهضري
غيثة: (زفرت بخوف كبيير، تم داخل يوسف تزعزعت خايف ) خويا واش قلتيها لاورطيغا انا طاتي أمينة والله مكنت بغيت نآذيها بلعكس عاود ليها كولشي
يوسف: (مخسؤ كمارتو) عاودي من اللول فين درتي هاد الفضيحة
غيثة: (بلعت ريقها) ..هو جا خداني من حدا صبيطار ولكن حتى بعد شحااااال باش ميتشدش فالكاميرات أغلبية كان كيهزني من قدام بلايص ما فيهمش الكاميرات باش ميبانش فالصورة، وتم غادي بينا لشي خلا عطاني إبرة باش نديرها لطاتي أمينة باش تشلل فمرة
يوسف: وعلاش!!؟؟
غيثة: هو غراضو فاورطيغا باغي ينتاقم منو تيقول هو سباب باش باباه بقا فالمغرب وحيت نعس مع ختو
يوسف: (تخربق فراسو) كفاش!!!
غيثة: خويا راه كان تيهددني ديما الا هضرت ولا قلت شي حاجة غيصفيها ليكم واحد واحد وانا خفت بزااااف راه مكيآمنش حتى بالله
يوسف: (بلغوات) كان عليك تجي!!!!!! تهضري الكلبة!!!! (حتى كيبغي يهد عليها يضربها وكتوقفو خديجة شاف فيها)
شنو غندير داابا!!
خديجة: نشوفوه واش باقي حي!!
يوسف: (بقا مدة وشاف فغيثة للي كتبكي) فين كنتو؟!
غيثة: معرفتش الخلا مور صبيطار
يوسف: نوضي زيدي معايا نشوفو (عاونتها خديجة تنوض حيت رجليها ممعاونينهاش وراسها عاطيها لحريق كولشي كيضرها، لبستها خديجة بينوار ودارت ليها الشال)
وكان سترتي راسك من شحال هادي مكنتيش غتوصلي لهادشي الكلبة!!
غيثة: (غير حانية راسها يوسف مخلاش خديجة تمشي معاهم مشاو بجووج طريق كاملة كينݣر ومرة مرة كيلكمها فذراعها وهي لا حركة وصلو لصبيطار وفاتوه كما نعتات ليه حتى كيشوفو الجدارمية دايرين براج حيت خارج المدار الحضري وقفوهم باش يرجعو من تماك مفهمو والو وعلاش اصلا ديك لبلاصة عامرة)
يوسف: (شاف دراري دايزين) خويا نسولك الله يحفظك شنو واقع تماك؟!
....: شي واحد تقتل تماك وحرقوه فوسط الطموبيل...
غيثة: (راجعين من ديك طريق مصدومين يوسف زايد فالسرعة محاااسش حركت راسها بلا) انا محرقتش الطموبيل!!!
يوسف: (بعصبية كيغوت) وشكون للي حرقها اناااااا !!!
غيثة: (بصوت كيرجف) والله ما انا اخويا والله ما انا ملقيتش باش نحرقو!!
(ضار ضاربها فوجهها بلكمة سكتت مكتبكيش غير مصدووومة!!! حتى الحريق للي فيها لغاتو كتفكر لدرجة شكاو فراسها تكون هي بالصح للي حرقت ومبقاتش عااقلة!!)
يوسف: (كيفكر كفاش غيهربها من لبلاد صونا على مو لقاها فطريق لعندو للدار) رجعي للدار جيبي باسبور غيثة
غيثة: (بلعت ريقها حيت كانت واحد نهار باغيا تسافر تهرب حصلها ادم وخداه ليها ونيت كان غيسافرو وكان طاوعاتو)
..راه عندو!!
يوسف: عندمن؟؟
غيثة: (بصوت شبه مسموع) كان عند ادم!!
يوسف: (زاد جعر غير كيسب وهي مطرفة للباب شافها تماك سدو اوتوماتيك قبل متلوح راسها قطع على مو وصلو للدار.. طلعو غير وصلو وحلت خديجة لباب طارت عليها الغالية كضربها حتى دفعتها غيثة بكل قوتها)
غيثة: (بالغواات وكل عصبية) ياك هدا هو للي كنتي كدفعيني ليييه وكنت كنقول لا لا لا ونتي لااااااااا هو ولد عائلة لباس عليه ولد القاع والباع
يوسف: مزال كتزيدي تخرجي عييينك!!!!!
غيثة: فيها ااه حيت شحال من مرة رغبتها تبعدني غير تبعدني قلتلها انا متنبغييييهش انا مبغيتش نكون معاه وهي كل مرة تتعيارني وتسب فاورطيغا
الغالية: (غير كتشوف فبنتها) هو هو مول هاد الكرش!!
يوسف: شكون؟
الغالية: هداك الملقط
يوسف: عاااااود!!! خليتي المشكل للي قدها قداش وتتقلبي شكون باه بنتك راه قاااتلة واحد واش تتفهمي قاااتلة داك الكلب
الغالية: (حركت راسها بلا شافت فغيثة) قتلتيه؟!
غيثة: (مخرجة عينها كتهضر وكشاكشها هارجين) اااااااااه والا لقيتو حي عاود مرة أخرى غنقتلو والا زدتي دافعتي عليه غنق..
يوسف: (تم ماشي عندها خديجة هربت غيثة للبيت قبل متكمل الجملة، سدو عليهم وهو رجع عند مو جاااعر)
واش متتفكريش بعقلك انا تنقلب كفاش نهربها ونتي غير تتخربقي!!! واش متتشوفيش بنتك ضااااعت!!!
داز داك الليل صعييييييييب على كوولشي هو ومو فالصالة غير كيتشاوفو ويقلبو على شي حل هو باغي غير يهربها هدا هو همو مستحيل يصيفط ولا يسمح ختو صغيرة تمشي للحبس..
اما مو نفخاتلو راسو بلبكى خايفة من الشوهة والعائلة وفنفس الوقت مباغياش بنتها تزيد ضيييع وكتفكر كفاش تصرف فموضوع الحمل حيت عارفة يوسف غيتصرف فمروضوع القائلة للي نعطاتهاش أهمية بحال متاااقتش ومخداتش الأمر بجدية، اما خديجة محستش براسها نعست، وغيثة للي غير مطرطقة عينها رتاحت منين كولشي عرف الحقييقة وخايفة من للي جاي ولكن سؤال فراسها شكون للي حرقو فوسط طموبيلتو وهي محرقاتوش!!!!!....
~~~~~~~~~~~~
أصبحنا وأصبح الملك لله..
هزو أمينة فلومبيلونص داوها لمصحة خاصة فين كيتعالجو العائلة، مشا معاها اورطيغا ولوخرين لحقو عليهم دخلو لشومبر خرج مراد حيت غيعاودو يفحصوها كولها..
زهرة: (قلبها كلاها على بنتتها كانت قالت تفوت شي سوايع وتعيط ليهم، ولكن دابا داز الليل كامل ومزال مشعلت تيليفونها مخرجتش من بيتها بقوة العائلة كاملة كتهضر على بنتها وعلاش دارت هكاك وللي كيقول ممربياش حتى راجلها رشيد جاها تبدل فاش رجع من فاس غير كيخمم مهضرتش معاه ومجبدوش الهضرة حدو سولاتو عليها قالها مكيناش فدارها ومكيناش عند ختها...
شكت تكون مشات عند ومراد صونات عليه مجاوبش دازت شي دقيقة رجع صونا سولاتو على مو قالها شنو دارو حتى...)
اورطيغا: ملاك مزال معطاوها تيليفونها؟!
زهرة: (هنا عرفت مكيناش معاه ولا كيتلفوها) عطاوه ليها
اورطيغا: حيت مزال مشعلاتوو
زهرة: غير باقا مصدوومة شوية
اورطيغا: هضرت معاها ومزال مبغات دير عقلها!!!
زهرة: مع الوقت اولدي.. الا لقيت وقت ندوز عندكم ياك فاش كنت نتا فرمضان ؟!
اورطيغا: اه تماك...
(قطعت معاه مفهمش علاش مصوناتش عليها وعلاش طافياااه والا بالصح معارفش بهروبها علاش هو باغي يكون معاها فمحنتها وهي كتصدو راه هو للي خاصو يقلب عليها ويتقلق ماشي هي!! هاكا كتخليه غير كيزيد يفكر يهبط عندها ولكن محاملش يوصل لتماك ويشوف حمزة وباها!!! )
حمزة: (بقا فالقهوة صباح كاااامل حتى جا عندو رشيد ووقف) انا مشيت نشوف
رشيد: الله يرضي عليك اولدي
حمزة: امين اعمي.. (ركب فطموبيلتو ومشا يقلب على ملاك من بعيد ومبينش انه تابعها مهم يعرفو غير فين كاينة... اما للي سول حمزة عارفينو غيرجع ورشيد غيرااقبو...)
حمزة: (حس بانه خاص يرد الجميل للي دارتو فيه ملاك بسباب تعاطفها مع باه للي بغات تدخل تعاونو وتدارت بيها وصلت لهاد الحالة وعاد فاش شاف عائلة ديال مها كيقلبو عليها مفهمو والو ومنين قال انها متزوجة بان متفاجئ بحال عارف انها متزوجاتش، هوما مغيخطفوهاش ولكن علاش جاو يقلبو عليها سؤال مفهموهش مكيناش السيبة فلبلاد باش يديوها صحة ولكن علاش اصلا يقلبو عليها وعاد ملاك ماشي شي وحدة للي مكلخة للي غتبعهم فملتهم وتسمح فدينها غير للي منوغش رشيد ان بنتو نفسيتها خايبة وثقتها فنفسها تهزاات من مور شنو وقع ليها وخاف عليها، وحمزة الا راقب حدا دارها غير باش يعرفها فين كاينة بلا شوشرة بلا والو حيت فأي وقيتة ممكن يمشيو ليها يعرفو غير بلاصتها، بعدا قبل ميوصلو ليها لوخرين!!
رتاح من جهة مو للي بغات تمشي عند عائلتها تجلس ترتاح فلبلاد داكشي باش غيكون بالو هاني وإجراءات طلاق بدا فيهم الا مبانتش هاد المدة غيكون طلاق غيابي...
وصل لفاس نيشان الحومة معرفش اورطيغا واش مزال كاري فديك الدار للي اونفاص مع الدار دملاك اول حاجة دارها مشا عند السمسار قلب واش كاينة دار فنفس الموبل فين ساكنة..)
~~~~~~~~~~~~~
ملاك: (فاقت وراسها ضارها بكترة البرد للي ضاير فلبيت وعاد نعست وهي مكمشة بالبرد حلت عينها بصعووبة ونيفها مخنووق)
يعطيك موصيبة اعمي!!!
(فاقت كترعد لوات عليها كاشة مشات طواليط بغات توضى الما جااامد واخا هكاك توضات كتحس بالمرض مشات صلاة كتدعي الله يفرج عليها، شربت لما قلبت على شنو كانت شرات هزت مادلين مقدرتش تكملها حطتها، عظامها مفصلين عليها رجعت تكات وكتفكر فشنو دير عقلها كيقولها تمشي عند مراد عقل كيقول تمشي عند خديجة عقل كيقول سافري لشي بلاصة ولكن مباغياش تبعد كتر شعلت تيليفونها جاوها قوة الميساجات من مها خوتاتها كولهم باها حمزة اورطيغا وفاء بغات تصيفط غير لمها بالغلط دارت نمرة اورطيغا كتبت ميساج بالزربة قبل ميبداو يتاصلو)
*ماما انا بيخير بلا متقلبو علية*
(صيفطات ممنتابهاش لسمية غير مشا طفات تيليفونها قبل ميصونيو عارفة باها غيكون مقلق منها بزاااف راه باه هداك عاذراااه ولكن حتى هو خاصو يفهمها راه تفضل الموت دابا ومترجعش لديك الدار للي ولات كتجيها كتر من الحبس!!! رجعت راسها تحت دوك لكواش كتحاول دفي راسها باش تنعس...)
يوسف: (دق فلبيت خديجة ضربتها الفيقة شافت فغيثة للي جالسة مقنتة بعيد كانت غطات خديجة فالليل وجالسة كتخمم) حلو لباب!!
غيثة: (بتعب كبييير) عفاك اخديجة متحليش
خديجة: (عاد توݣضت) اجي نعسي بعدا..
غيثة: عفاك غير متحليش مبقيتش قادرة نحط عيني فعينو
خديجة: غير اجي، (جات غيثة تكمشت دخلت ففراشها خديجة ناضت لبست بينوارها لوات شالها حلت لباب جا يدخل وهي تزرب سدت لباب ودوزت الساروت وحيت يوسف مكيقدرش يخدم معاها العنف بعد كيشوف فيها)
لبنت مرعودة الليل كامل منعستش فهموها شوية اه غلطت ولكن شنو غدير غتمحي داكشي للي دارت بݣومة!!
الغالية: (بأمر) حل علية داك لباب!!
خديجة: لا!!! (شافت فيوسف) هي غلطت وبزااف وكان خاصها تهضر من شحال هادي ولكن داك الكلب للي ربا فيها داك الخوف هو لي خاصو يتحاسب ماشي هي براكة غير داك الاحساس فاش كانت عايشة وداك الخوف راه كان كيهددها بيكم
يوسف: خديجة حلي لباب
خديجة: مغنحلوش ايوسف
الغالية: هادي ضريبة باش تخلي البراني يدخل فشغاالنا
خديجة: اولا نتي فداري مغتحكميش فية شنو ندير وشنو منديرش!!! وتانيا الغلط ديالك حتى نتي للي كنتي كتبززي عليها وتلوحيها لادم شحال من مرة كانت كتجي عندي خاايفة مباغاهش ونتي عليها بالسبان والمعيور وماشية من مور المظاهر تالتا بغيتي ولا كرهتي انا من هاد العائلة
يوسف: خديييجة!!!! حلي لباب!!!
خديجة: (بقات كتشوف فيه) منقدرش انا واعدتها ومتنساش راها حاملة
الغالية: (كتزيد تفقس) لا لا هادشي بزااف حل ايوسف هاد زبل هادي راها غير تتشفى فينا وعاجبها الحال
يوسف: الوالدة!!!!!!
الغالية: واش متتشوفهاش كفاش تتقول حاملة وهي تتشفى فية!!
خديجة: (مشات لبيتها تابعها يوسف) شنو بغيت؟؟؟ تدخل عندها!!
يوسف انا راه فاهماك الا دخلت غادي غير ضربها كما خايفة عليها هي خايفة عليك حتى نتا!! باش نضيعو الوقت فهادشي نفكرو فالحل حسن
يوسف: بغيت نعرف واش قتلاتو!!
خديجة: نفتارضو اه شكون غيشك فيها!! هي كتعاود كتقولها انها مسحت بصماتها وهو براسو مكيخليش من موراها الدليل وانه كيهزها من بلايص مافيهمش كاميرات باش غيعرفو راه غيثة!!!
يوسف: وفاش قالت هي غير ضرباتو وهربت ماشي حرقااتو!! يعني كاين للي تبعهم وعندو حسيفة وهو كمل شنو بدات راه هادي بحد ذااتها مشكلة
خديجة: اوا تهنييينا دابا نفكرو شنو غنديرو معاها.. (كتقرب منو) غيثة غلطت ولكن لحم منين كيخناز كيهزووه مالييه منسمحوش فيها ايوسف لبارح منين بغات تقتل راسها باش حسيت!!!! الا سمحتي فيها حتى نتا واش مغتعاودهاش دابا راه احسن حل كيجينا هو تنتاحر!!! وا متبقاش فيك ختك؟؟!؟؟ انا غير ملاك هربت من الدار مخلية عقلي حااابس
يوسف: هربت!!!
اورطيغا: (كيقرا ويعاود لميساج كاين تحليل واحد أنها هربت من دارهم تلفااتو بزاااف، كان كيفطر مو ويوكلها حط التيليفون كمل كيعطيها تاكل)
أمينة: فين ملاك؟!
اورطيغا: (بحال قرات شنو فراسو مشافش فيها) فدارهم
أمينة: واش لباس عليها؟!
اورطيغا: نتمناااو... (كيعطيها بالمعلقة)
أمينة: مجاتش عندي... نبرا نمشيو نخطبوها
اورطيغا: براي غير نتي ونديرو للي بغيتي..
أمينة: ياكما تقلقت حيت ممشيناش
اورطيغا : للي مهم عندي دابا هو نتي تبراي شي لاخر كولشي ملحوق من بعد..
(شبعت مسح ليها فمها بعدا بلاطو لفطور وخرج بالزربة صونا عليها تيليفونها مزال طافي كتخليه مرعووود عليها، عاود صونا على مها قبل متقول الو)
...واش ملاك هربت؟!
زهرة: جات لعندك؟!
اورطيغا: لا، لقيت ميساج مصيفطاه بكري جا بالغلط حسابلها مصيفطاه ليك نتي تتقول هي بيخير غير متقلبوش عليها
زهرة: ولدي واش هي معاك؟!
اورطيغا: مكينااااش!!!! علاش شنو وقع عاود؟!!
زهرة: شي صداع مع عمها وجدها
اورطيغا: غير صداع وهربت؟!!
زهرة: الا جات عندك تقولهالي اولدي؟!!
اورطيغا: (معجبوش الحال تهرب وللي زاد معجبوش كتر هو متجيش عندو!!!!)
ان شاء الله
(تفكر رشيد للي كان لبارح ماشي هو هداك يعني كان كيقلب عليها عند ختها وكان كيوشوش باش هو ميسمعش)
زهرة: الا جات عندك اولدي عفاك قولهالي راني مشوية عليها
اورطيغا: غير متخبيش علية شنو وقع؟
زهرة: تناقشت مع عمها وجدها خافت من باها وهربت (بترجي) واش هي عندكم؟؟؟؟
اورطيغا: والله مكاينة، اصلا وكان مجاش الميساج غلط مكنت غنعرف والو مهم انا نشوووف
زهرة: مالقاوهاش فدارها
اورطيغا: غير تبان اخالتي زهرة غنعلمك.. (قطع معاها فبالو الا كتبغيه غتجي عندو والا مكتبغيهش ومكتحسش بالامان معاه مغتقلبش تهرب من كولشي لعندو!!!!)
دخلو عند غيثة للي مكمشة فبلاصتها مشات خديجة جلست حداها باش حتى واحد مينقز يضربها وخصوصا مها اما يوسف خديجة من قبيلة هي ترغبو وتحلفو بالله..
يوسف: عاوديلي من اللول كفاش بلاك بلادروݣ!! (غيثة عاودت كولشي بغا الغالية تصنت وتسمع اما مها لدابا مزال ممتيقة ان ادم دار هادشي كامل مزال صورتو نقية فراسها ولكن!!! ..بقات غير كتبكي على هاد خيبة أمل للي فيها)
وعلاش عطيتيه الباسبور
غيثة: كنت بالصح بغيت نهرب
يوسف: وغتهربي معاه؟!
غيثة: ديك الوقت كان تيعمرلي راسي عليكم وكفاش تتعاملوني خايب اكترية نتا وماما وكان تيبن لي شي حوايج قباااح وحتى فاش غنهرب كنت ناوية نوصل بعيد ونهرب منو حتى هو
يوسف: حمااارة ومكلخة!!!
غيثة: (بقات غير حانية راسها خرجت من كتبكي وهو بقا واقف واخا يصيفطها عند العائلة ووصلت شي حاجة البوليس غيجبدووها فينما كانت بقى حل واحد يكريلها فشي مدينة بعيدة ولكن للي منوغشو هو للي حرق الطموبيل!!!! خايف يتبعها ولا شنو يدير!!!
تبع مو مهموهش دموعها حيت معتابرها من الاسباب الرئيسيه أمرها تصوني على ام ادم تسول عليها باش تعرف واش هوما وصلتهم شي اخبار على ولدها )
الغالية: (داكشي للي دارت كملت لابيل معاها وشافت فولدها داايخة)
تتهضر عادي
يوسف: يعني مزال موصلهم والو (رجع عند غيثة بالزربة)
الطموبيل للي ركبتو فيها ديالو؟!
غيثة: (كتفكر) ...لا.. هو عندو بورش وهاديك لبارح كليو فلكحل
يوسف: اول مرة يجي بيها!!!
غيثة: مممـ....معقلتش انا للي تنعرف بورش هي لي ديالو...
يوسف: (غير كيبغي يهد عليها كتعرض خديجة خرجاتو لبرا صونا تيليفونها كان مراد)
خديجة: اهلان مراد لباس عليك
اورطيغا: خديجة ملاك مجاتش عندك
خديجة: لا مجاتش
اورطيغا: (كيأكد) خديجة واش كاينة ملاك عندكم؟!
خديجة: والله مكاينة راك شفتي لبارح (قال واخ وقطع شافت فيوسف)
حتى هو كيقلب!!!!
الغالية: ياكما هو مول الفعلة اولدي راه ديما كانت تتقول كنت مع مراد وداك نهار جبناها من دارهم
يوسف: سكتي الوالدة!!
الغالية: واش هاد الشمكار ولدتو ونسيتو باش تتدافع عليه كتر من ختك
خديجة: (باستهزاء) هداك الشمكار كان ديما كيعاملها بحال ختو
يوسف: خديجة!!
خديجة: راه قرب يكون راجل ختي وبحال خويا، وبزاااف مسكين هو فهمو وباش مك تفكر فختك وشنو نديرو راه القضية فيها ولد فكرشها وواحد ميت محروق
الغالية: سمع نتي الامور العائلية ديالنا مدخليش شبوقاااتها
خديجة: دخليها فراسك انا رجعت وحدة من هاد العائلة بغيتي ولا كرهتي
يوسف: (مكاينش معاهم فلمطايفة ديالهم مشا من حداهم عارف كل وحدة مغتسكتش للثانية تلف لمن يعيط وشنو يدير!!! صوناا على ادم تيليفونو طافي!! صونا على شريف)
فين
شريف: حنا مجموعين فلاكلينيك
يوسف: شي جديد؟!
شريف: شي يوماين وتخرج لالة زهرة
يوسف: امم.. شريف تتعرف فين تيسكن ادم؟!
شريف: اه علاش؟!
يوسف: بغيتك طوف تماك تشوف واش كاين تماك هو ولا غيرو مهم جيبلي شي خبار حتى تجي ونقولك
شريف: صافي مشااات....
يوسف: (تلف بزااف واحد الخوف واحد الغضب مخليه مربووط باغي يقتل ختو عصا وفنفس الوقت بقات فيه بزااف مزال ديما كيشوفها صغيرة مقدرش يحقد عليها واخا دير للي دير!!..)
بقا راسو كيدوور غتحمقو هاد لبنت بغا يفهم غير واش هي باغاه ولا لا!! كولشي مجموع عند مو للي شوية بدات كتقدر تحرك راسها وتهضر شوية رجع صونا عليها طافياااه صونا على صاحبو تماك...
...الصااط قني على الموبل جديد واش غتنزل وحدة فيها متر ودايرة فولار...
غير تقشعها زغرت علية..
اه هاديك..
لــــعــــز....
(قطع معاه رجع التيليفون لجيبو ورجع حدا مو عرف خالتو بقاتلها شي سيمانة وترجع فحالها هي وعمر للي عيطولو فخدمتو.. بقاو مجمعين صونات ابيل ڤيديو زهرة على أمينة بقاو كيهضرو وهو طالق ودنيه معاهم حتى رجعوها أبيل عادية)
أمينة: (كانت كتسمع فالتيليفون حتى بقات كظحك) عليها الجنية غبرت علية...
وريني..
لا لا غير وريني..
صافي حتى نكون بوحدي ورجع نصوني عليك... (وصلتها تصويرة بقات كظحك وجمعت تيليفونها هو راسو ضرو واش بنتها غابرة وهوما كانو كيظحكو!!! واش رجعت للدار ولا شنو!!)
زهرة: (هربت من داك جماعة للي كولشي كيتاهم بنتها على شنو دارت فالجد!! وهي باش ترد على كل واحد بوحدو وتفهمو فضلت تحايد من حداهم بقات فبيتها واخا بنتها لدابا معرفتها فين زادت وفين بايتة مرتاحة من جيهتها حيت عارفة ملاك بعقلها وغتكون بغات ترتاح من هاد المشاكل كاااملة للي اغلبيتهم مظلومة بزاااااف فيهم..)
~~~~~~~~~~~~~~~
شريف: (مشا لعند يوسف خرج هو عندو) مكاينش تلاقيت بختو قالتلي مشا لفرنسا عيطولو لشي خدمة
يوسف: الخدمة!!
شريف: واش واقع شي مشكل؟!
يوسف: (بقا غير كيشوف الجثة ديالو غتكون نشات التشريح وغبكونو عرفو شكون هو نورمال الخبار غتكون وصلات لعائلتو)
شريف: يووسف!!
يوسف: واش متأكد مشا؟! كنت بغيت نفاااريها معاه على حساب غيثة
شريف: علاش؟!
يوسف: مبقاتش بغاتو
شريف: اااه اوا صافي تلقاو خوت يتفارقو خوت
يوسف: الا وصلاتك شي خبار ضروووووري قولي...
أمينة: (كانت غتبات معاها خالتو ودعها مشا وصل عمر وعائلة مو للدار غير وفاء للي تايق فيها ومخليها تماك اما هو رجع عند مو مكيمشي من حداها حتى كتنعس دخل عندها خالتو كتهضر مع راجلها وهي كتهضر مع أمينة قطعت وهي كتبسم... شافت فيه)
حبيبي!!
اورطيغا: شنو قالت ليك
أمينة: شكون؟!
اورطيغا: زهرة!!
أمينة: زهرة لمك كتلعب معاك الكورة!! (هز حاجبو بحال معندو صبر) غير هضرة وصافي
اورطيغا: شنو صيفطات ليك باش بقيتو تظحكو!!!!
أمينة: هههه (هزت تليفونها وراتو تصويرة جدها للي مهرس من نيفو خرج عينو) عروستي مجهدة!!
اورطيغا: ألاَّااااا!!!!!
أمينة: ههه ݣول الصراحة فين هي؟!!
اورطيغا: (كيشوف فالتصويرة كيزومي هز حواجبو متفاجئ هو حسابلو غير نقاش ماشي توصل لهادشي!!) معرفتش
أمينة: واش طرا بيناتكم شي حاجة؟!
اورطيغا: دابا ديها فراسك بغيتك تبرااي.. (رجع شاف فالتصويرة) ضرباتو؟!
أمينة: ههه غير نوات وربي جاب التيسير
اورطيغا: (حرك راسو بلا حولة تبسم حيت مو رجعات ليها الظحكة والطنز عليه وهادشي للي كان باغي) اوا!!
أمينة: اوا راك عارفها فين كاينة علية انا!!
اورطيغا: قلت معارفش!!!
أمينة: (حركت راسها باه وهي متأكدة هو عارفها فين كاينة.. غمضت عينها بقا معاها شوية ومن تماك مشا لدارو فالليدو عيا كيطل من بالكووه مكاينش حس شي واحد كيدور فدارها دخل دوش بما سخوون من بعد صلا وبقا جالس تحرك الريح حيت نسا السرجم رجع طل على دارها والو.. سد سرجم ديالو ساهلة يصيفط دراري يخلعوها يتأكد ولكن بلاش!! تكا فسداري حيت نموسيتو مزال مركبها!! مبغاش يجيه تفكيرو غير فيها يعني داك نهار شافها ڤري ماشي غير تخيل!! نعاس طار ناض لبس قبيتو ودار كاسكيطتو قلب فسواارت لقا غير ساروت الموبل خرج مكره، لحسن الحظ كولشي ساد حيت كانت الوحدة دالليل حل لباب طلع الدوزيام بقا كيدق والو دار سوارت كاملين للي عندو كيجرب يحل لباب ندم علاش رد الساروت للسمسار للي خداتولو)
ملاك: (تخلعت قلبها غيسكت ناضت هزت الكرسي ومشات من مور لباب فداك ظلام كتسمع شي واحد باغي يدخل عليها كتقول غيمشي غيمشي والو الشفار مصر يدخل حتى نطقت بالخوف)
اداااك ولد لحرام غتمشي ولا نعيطلك البوليس!!!!!
ملاك: اداك ولد لحرام غتمشي ولا نعيطلك البوليس....
اورطيغا: (هز حواجبو بعدا عرفها هنا رجع دق) حل الموصيييبة الباب ولا نفرعو على أصل جد مك!!!
ملاك: (كانت حاطة ودنها على لباب.. تخلعت منين سمعت صوتو) مراد؟!!!!!
اورطيغا: (بقلة صبر) حلي املاك (حطت الكرسي هزت الساروت من جيبها وحلات لباب بانلها واقف اظلام وشاعل لبيل دخل شاعل الضو وساد الباب برجلو وعينو عليها كانت بحرا كتقد تحل عينها)
شنو هادشي ديالك نتي؟!!!!
ملاك: (بعدت شوية وحادرة عينها)
اورطيغا: (رجع طرق لباب بالساروت وتكا بظهرو على لباب كيشوف فيها)
علاش مجيتيش عندي منين هاربة؟!
ملاك: فين غنزيدك حتى نتا امراد!!
اورطيغا: (مخيخ منها) زيدي!! زيييييييدي اصل مي زيدي شكيت عليك الالة قلت ليك متزيديتيييش ولكن نتي!!!
ملاك: مبغيتش نزيدك مشاكيلي امراد هادشي راه بزااف مبقيتش عارفة شنو كيوقع مشكل من مور مشكل مكنجي نفهم شي حاجة حتى كلقى ما اكفس
اورطيغا: جي عندي!!! بلا متخبري علية هاد الخبيير من اللول قلت ليك اجي عندي
ملاك: (تنهدت عياات بالهضرة ومتشرح لهدا ولهدا قرب عندها هزت راسها)
اورطيغا: من امتى ونتي هنا؟!
ملاك: لبارح فلعشية
اورطيغا: شفتيني شفتك لبارح وهربتي!!
ملاك: (خرجت عينها) لاااااا!!!
اورطيغا: (بقا كيشوف فيها شحااال وبجدية تكلم معاها) تتهربي مني املاك!!!
ملاك: لا
اورطيغا: (معجبوووش الحال جا دااير باغي يمشي شداتو من ذرااعو ضار عندها)
حتى تعرفي راسك واش باغيااني ديك الساعة نهضرو
ملاك: (بقهرة) حتى نتا!!!!
اورطيغا: (شد يدها لقاها سخوووووونة اوتوماتيك دار يدو فجبهتها وحنكها كانت حرارتها طااالعة)
شي نهار غتحمقيني ابنت رشيييد!!!!
غيثة: (دخلت خديجة جايبة ليها حقها من لعشا مخبع.. شدت من عندها وكتهضر بشوية)
خديجة بغيت نهرب!!
خديجة: (بهمس) فين باغية تمشي؟!!
غيثة: معرفتش غير نخرج من هنا مبقيتش قادرة نزيد نجلس هنا
خديجة: معندك فين تمشي خوك غيعاونك!!
غيثة: مبقيتش قاادة اخديجة
خديجة: صبري دابا مراكيش بووحدك فكري حتى لي فكرشك كفاش غديري وعاد البوليس الا عرفو!!
غيثة: وشكون غيقبل بيه شفتي يوسف وماما!!! اما لاخر مصاب غير يكون مات
خديجة: كتخربقي!!! حاجة نوصيك بيها حني راسك وصبري راه غيبردو مغيلوحووكش وعاد المشكل دادم لا لا معندك مديري فالزنقة
غيثة: (بخوف) واش غندخل الحبس؟!
خديجة: داكشي باش كنقولك حني راسك وصبري باش خوك يعاونك راه يوسف مغيخلكش واخا يضربك راه مغيفرطش فيك
غيثة: (بحزن سكتت مداتلها خديجة ديك الماكلة فعز هاد الأزمة والموصيبات فيها الجوع... سدت خديجة عليها لباب وخرجت كان حتى اشرف للي قالولو شنو كاين..)
~~~~~~~~~~~~
اورطيغا: كليتي شي حاجة؟!
ملاك: (حركت راسها باه) بردت بزاف ومقدرتش نزل لفراش
اورطيغا: بغيت مك تعواجي من عندي
ملاك: حشووومة عليك!! (مد يدو شدت فيدو زير عليها جارها لبيت نعاس بغات تجر يدها ضار عندها)
فين غادي بية؟!
اورطيغا: ( زاد جارها سابقها وهي بحال شي بنت صغيرة تابعاه) اودي غير زيدي راني كلب الا طمعت فيك هاد الساعة
ملاك: وعلاش؟!
اورطيغا: (ضار عندها) نطمع؟!
ملاك: (تبسمت قلبت وجهها دخلو لبيت نعاس شاف فراشها فين مفرشة وكواغط شبس طونيكات كرطون بيتزا فالأرض)
اورطيغا: (ضار عنده) جيعانة!!
ملاك: واش عرفتني علاش جيت هنا؟!
اورطيغا: واش جيعانة؟!
ملاك: (حركت راسها بلا) بغيت غير نتكى...
اورطيغا: (شاف فلفراش تعلق وبدا يجبد شوية بشوية وهي فالقنت كتشوف معجبة مغرمة وجودو دابا معاها نساها كولشي واش غلطت منين ممشاتش عندو هو اللول!!!)
غنجبد ليك دابا غير شنو تحتاجي
ملاك: (حركت راسها باه شدتها الرجفة)
اورطيغا: باك ومك كولشي تيقلب عليك غنعلم بعدا مك راكي بيخير
ملاك: متقولهاش انا هنا
اورطيغا: (كمل شغلو هبط بصعوبة ناموسية ديال بلاصة للي كانت كتنعس عليها عند وفاء جبد ليها فراش قادولها فالقنت جبد لوسادة زاد بغا يجبد لفراش وضروري كان خاص لعويين)
اجي
ملاك: (مشات عندو) غتبقى!!
اورطيغا: خفتي مني؟!!
ملاك: لا غييير.. مبغيتش نعذبك
اورطيغا: (حايد لفراش من فوق النموسية) بغيتيني نمشي املاك؟؟!
ملاك: (حركت راسها بلا دارلها إشارة دخل لفراش دخلت تكات بقا كيغطي فيها زادها التالتة والرابعة)
اورطيغا: باقي فيك البرد؟!
ملاك: اه
اورطيغا: نعنقك غتسخني (تبسمت) انا راه كاره جد مك ولكن قلبي مساعفنييش
ملاك: (عارفاه مقلق ولكن هاكا راه غير كيخليها كتموت عليه)
اورطيغا: (حنا مقرد داير يديه على خديتها مقرب منها)
غادي نخرج نمشي نجيب ليك دوا وشي حاجة تخشي وجهك فيها غنسد عليك، متخافيش مكاينش لي يقرب ليك هنا
(حركت راسها باه لبس جاكيطتو خرج وهي بقات غير كتبسم مشا ركب فطموبيلتو يقلب على فرماسيان للي يكون خدام الليل خدا ليها شي حاجة ديال سخانة ورواح داز خدا ليها عشا وشي تقااوت و5 لتر ما، الدنيا كانت خاااوية داكشي باش جاتو مزياانة طلع عندها مع حل لباب هو وجاه البرد فدارها دخل عندها لبيت لقاها مزال كتقفقف عرف شداتها سخانة لبااردة قاد ليها دوليبران عطاها شربت ووزادت دخلت تحت الكاشة مغطية حتى راسها همها غير تسخن هو مشا كيقلب على طباسل حيت جايب حتى عشااه لقاهم غسلهم نشفهم وحط فطبااسل جبد وسادة حطها فالارض وبقا كيتسناها على ميقضي فيها دوا شوية باش يبزز عليها تاكل...)
ملاك!!! ملااااك!!! وااااا مليييييكة!!!! (عرات على وجهها مغوبشة) هه كولي شوية باش نعطيك دوا لاخر (حركت راسها بلا) متنسولكش ازين (جبد الوسادة من على راسها خاطفها حتى تعوج راسها، جلست عاقدة حواجبها حطها اوفقي على ظهرها تكات كتقاد فشالها حط ليها الطبسيل وهو هاز طبسيلو حداها كياكل، شاف فيها)
كووولي محدو سخوون..
ملاك: (بقات كتشوف فيه) ياك نتا معصب مني علاش كتعاملني هاكا!! وعلاش كتقلب علية؟!!
اورطيغا: هنا الفرق ازين بين معصب وبين تنبغيك (شافت فيه مصدومة) بحالا تزعزعتي مكنتيش عارفاها الأخت!!
ملاك: (حنات راسها للطبسيل متبسمة)
اورطيغا: ماشي وقت المحاسبة دابا المهم هو نتي!!
(ناضت بعدت الطبسل وقفت على ركابيها وعنقااتو يد بقا شاد بيها الطبسيل ويد دارها من مور ظهرها)
تتزياني منين تتمرضي
ملاك: (بعدت متبسمة وشافت فيه) حتى انا كنبغيك..
اورطيغا: (متبسم وعينيه نايمين فوجهها) عارف.. (بعدت وحط الطبسيل حدا طبسيلها وناض من الكرسي جلس فوق ناموسيتها شاد يديها بجوج)
داكشي للي داز عليك قبيح ولكن مبغيتوش يمرضك ويبدلك بغيتك تبقاي ملوكة للي تنعرف شويطينة ديال نهار اللول (حركت راسها باه)
المحاسبة غنتحاسب معاك ولكن من بعد غير دابا تتهمني صحتك كتر من علاش وكفاش وفين؟؟
ملاك: (باستو فحنكو)
اورطيغا: بقاي تترطاي حتى نصدق ح*** مك
ملاك: مرااااااااد!!! (معرفتش علاش عقل كيقولها غير تبوسو والسلام حست بالسخانة طلعت معاها وجات غير عليه.. بعدت هز الطبسيل حطو فوق رجليها وبقا كيوكلها بيدو وحتى هو بقا كياكل)
كيف بقات خالتي امينة
اورطيغا: قربت تخرج
ملاك: للرياض ولا لدارها؟!
اورطيغا: لا لدارها تماك مترتاحش باش نبقى مقابلها على خاطرها..
(بقاو كيهضرو ويقلبها ظحك مرة مرة حتى نسَّاها خلاها تاكل مزياان عطاها دوا التاني ناضت لطواليط غسلت يدها وفمها وهي فرحانة بوجودو عارفة دايرة الغلط بوجودو معاها فالدار وفهاد الوقت ولكن شحال وهي كتصدو وتصد غيرو وفالتالي باش تجازات خرجت من دار حمزة بشوهة عالمية غتبقى متوورخة عليها حياتها كاملة... اما هاد الوقت بغات تعيش شوية على الاقل غير هاد سويعات ترتاح فيهم مع حبيب القلب!!.. كملت كيمسح يدها بيدو للي أصلا متوسخاتش دخلت فلفراش وهو رجع جلس فلوسادة وبقا قريب ليها)
مكيناش شي بلاصة حداك
ملاك: ههه اووهووو
اورطيغا: سمييموو.. غنمشي دابا!! (بحال كيتسناها تقولو بقا وعينيه نايمين فيها مناويش على شي حاجة خايبة ولكن توحشها، حتى حركت راسها باه) بلا متحلفي مغنجلسش
ملاك: ههه
اورطيغا: عنداك غدا لقاك زدتي لشي قنت عااود!! هاد المرة بربي حتى نفݣس مك !!!!
ملاك: (غير كتبسم عطاها دوا ناض مغطيها مزيان قاارس حنكها وقاش جبهتنا كانت مزال شوية دالحرارة)
شكرا
اورطيغا : زيديها فراسك!! غنمشي نميل شوية غدا نصبح عندك
ملاك: (حركت راسها باه) مطفيش الضو.. هز ساروت من دياولها بيه سد عليها لباب غامزها ومشا خرج ندوز الصاقطة ونيشان لدارو واحد مساخي بلاخر...)
اصبحنا واصبح الملك لله..
زهرة: (فاقت لقات ميساج من عند اورطيغا علمها ان ملاك بيخير ومتخافش عليها بقات غير صااقرة حتى خرج رشيد من الحمام)
رشيد حتى لامتى غنبقاو فهاد العيشة!!!
رشيد: (براسو مكره) عقلتي على نهار اللول للي دخلنا فيه هنا ازهرة!!
زهرة: ولكن دابا راه ولادنا كبرو ونفرو هاد الدار والنوبة فملاك وماعرفت واش حتى أنير غيوصلو هاد الصهد للي وصلها هي!!!
رشيد: منقدرش ازهرة نعزل نتي عارفة مزيان وغير داك لحلوف للي حلفنا انا وياك فالقران وفالجامع مخلي يدي مربوطين
زهرة: (بندم) داكشي لي مخليلي حتى انا يدي مربوطة ولكن راه بنتي للي كظيع فهادشي هي راه محلفاااتش
رشيد: مكانش خاصها تخرج وبلا متزيدي معاها من امتى عندنا بنات عزبات يباتو فزناافي
زهرة: ياك بفمك كتقول الواحد كيوصل لمرحلة الظغط كيولد الانفجار وهكا وقع مع بنتك شوف شحال من موصيبة وقعات ليها
رشيد: انا مكنتش غنخلي حتى واحد يقيسها وها هوما دابا كيقلبو عليها شنو غندير!!
زهرة: بنتي بعقلها مغتمشيش معاهم مفهمتش اصلا غبائهم غير اجي ودي معاك بنت عمرها 30 عام!!!!
رشيد: بنتك هاد الساعة مكتفكرش بعقلها وهادشي مناش راني خاااايف ازهرة!!! (خرج من لبيت خلاها غير كتشوووف)
فلاش باك
زهرة: (كانت ساهلة يقتلووها فالشومبر عارفة عندهم هادشي بحال شريب الما ولكن هوما بغاو يعذبوها هي وتختار موتها برجليها وكان اخر قرار هو دخل البحر ومتخرجش منو البلاصة للي عندها فوبيا منها)
....عفااااكم سمحو لية!!!
اب زهرة: غترجعي معانا؟!
زهرة: (شافت فيه كتحاول تستعطفو بنظراتها راه هو كان صديقها كتر من مها حركت راسها بلا حيت تايقة فشنو ختارت)
اب زهرة: (بغضب كبييير شاف فالساعة قرب يظلام الحال) بقات ليك ساعة غتفكري فيها مزيااان ولا مصييرك غيكون بحال للي قبلك..
رشيد: (واخا كطلع لوطيل كيبقى شحاال مراقبها فالقهوة للي اونفاص ياله غينوض باش يمشي يشري سفنج يدوزو مع أتاي كيشوفهم خارجين هي ومهاو وبها، بقا ملبدها تماك حاضيهم حتى هبطو لبحر تبعهم كيشوف زهرة كتبكي بقا مبعد، شي حاجة ماشي هي هاديك والبلاصة للي مشاو ليها بعيدة على الناس للي كيعومو الحال كيظلام وهوما مزال كيتمشاااو فالرملة هو ماشي جهة الحافة باش ميباانش ليهم حتى شافهم وقفو بقا كيطل كيشوف زهرة كتبغي تبوس ليهم يدهم وهوما كيدفعوها باها قال ليها شي حاجة وتمو راجعين اللور مها فرشت فوطة وجلسو وهي بقات كتشوف فيهم شحال عاد ضارت شافت فلبحر الهائج وبقات كدخل شوية بشوية حتى فزݣت حد ركبتها خرج هو كيجري)
رشيد: هيييييييييييييه.... شنو كديري!!! (دارتلو إشارة لعنقها وبقات كتزيد تدخل لبحر بخطوات صغيييييييرة كتسنى العفو منهم ولا ربي يرحمها ضربتها موجة طاحت ورجعت ناضت زايدة دااخلة لداخل اما هو بقا كيغوت كيطلب النجدة باش الناس يجيو وقفو حداه واليديها)
باغيين تقتلوا بنتكم!!!!
(غير كيخنزروو فيه مكيهضروووش فلحظة مها تبسمت بطريقة مرييبة بحال كتهددو خلعووه بدوك الشوفات بعد من حداهم وهي شافت فوق الحااافة انا كيعيط باسم زهرة ويعيط للناس حيت خاف يكونو دايرين بيه دخل بالزربة عند زهرة للي كتسناه كيجرها من يدها باش تخرج)
اب زهرة: (شاف الناس جاية هز عينو الفوق وهز يدو بإشارة stop )
زهرة: منقدرش نخرج
رشيد: متخافيش غنمشيو من هنا فمرة
زهرة: غيتبعوني.. هوما عارفين أنك معايا فينما مشينا غيتبعونا
رشيد: متخافيش غير خرجي مغنسمحش فيك (شد فيدها جرها بالسيف خرجها من تماك شي ناس تمو جايين) طيحي سخفي طيحي سخفي..
زهرة: (سمعت كلامو سخفت هزها بصعووبة حيت براسو فاااشل شاف واليديها بعدو بحال مدارو والو ومولاوش ضارو جييهتهم، جاو ناس هو غراضو الوقاية تهزهم باش يوصلوهم لصبيطار واخا غيحط فيها 300 درهم ثمن خطية ديال اي واحد كتجي تهزو لومبيلونص من لبحر.. مشاو وهو غير كيفكر ويخمم فين غيخبعها وفين غيمشييو واش يرجع بيها لصفرو ولا فين!!!!)
من بعد اسعافات أولية كانت بيخير بقاو غير كيتشاوفو حيت غيجيو عندهم يخرجووهم وأصلا خاصو يمشي يجمع حوايجو باش يجيبهم من لبيت فين كاري ويجيب لفلوس وميمكنش يخليها بوحدها ولبلاصة فين كاري شعبية بقا شحاال كيشوف ويدور عينو خرج من المستعجلات كيسول على قسم الولادة وصل لتماك من حسن حظو كانت الزيارة مفتوحة بقا متبع لعيالات والناس لي كتزور بانت مرا كبيرة مشا عندها رغبها تعطيه شي بيجامة مستوورة لمرتو للي دارت كسيدة وتقطعو حوايجها وهوما ماشي من هاد المدينة ومصالحش يخرج يشري ليها شي حاجة ويخليها بوحدها عرض عليها يعطيها فلوس وحتى هي مرفضتش عطاتو بيجامة وشال خداهم ولكن فابور شكرهها ومشا بجرا عطاهم لزهرة بدلت حوايجها جاوها مخنششين وهدا هو المطلوب وحتى الشال معبطاه على عينها مخلية غير باش تشوف ودايرااه على فمها خرجو من تماك بالزربة مشات معاه لفين كاري جمع حوايجو فصاك دغيا وهز فلوسو وخرجو شدو تاكسي للمحطة الطرقية خايفين بجوج بيهم..
عدنا
~~~~~~~~~~~~~
اورطيغا: (فاق على ريڤيي قضى روتينو الصباحي مشا محلبة خدا فطور بلدي ديال جوج دالناس حل باب الموبل وكتبان ليه طموبيلة دحمزة وقفت وهو كيسد باب الموبل عرف رشيد عاود مصيفطو يقلب على بنتو وهادشي كيزيد يعصبو ويخليه حاااااقد على رشيد واش من مور هادشي كامل مزال دايرة فجنبو!!!!
بقا متبعو حتى شافو هو نيت زدح لباب بقا حدا لباب بحرا كيظبط أعصاابو عاد طلع درووج وصل الطبقة ديالها حل لباب ورجع سدو مكيسمعش حسها شك تكون خرجت ولا هربت عاود!! مشا للبيت حل لباب لقاها مزال متكية ناااعسة حالة فمها بقا كينݣر على هاد الحالة للي دايرة ليه مشا للكوزينة ما فيها واالو رجع للبيت بقا كيقلب هز كرطونة فيها الالات داها للكوزينة ستفها فوق البوطاجي رجع جاب الكرطونة التانية فيها داكشي لي بغا ستفهم وغسل لماعن نشفهم بكلنكس وحط الفطور فيهم خاص يضبر على بوطة باش تبقى تطيب واخا هو ضد تسكن بوحدها ولكن حاليا احسن حل على متخرج مو والا بغات تسكن معاها غيعجبو الحال ومتبقاش بوحدها.. على ميديرو شي حل!!
خرجت عندو كطل عليه وبحرا كتحل عينها ضار عندها)
كتكووووت صباحووو
ملاك: (مكمشة) صباح الخير
اورطيغا: غسلي وجهك انا جاي
ملاك: (تبسمت مشات للحمام بزااف عليها هاد الحب كولو نعست احسن نعييسة ودابا على صباح رجعتلها الحالة باغيا غير تبووسو!!!)
باينة قاستي للي مكتعلمش!!!! ملااااك تبتي ورزني فاللول كيكون هادشي زوين وحلو وفالتالي يتقلب علية!!!!
(شافت وجهها فلمريا)
كيف زبل!!
رجعت للبيت لقاتو حط فوق الطابلة الفطور جلست اونفاص معاه هزت كاس ديال الرايب ومعلقة كتاكل
ملاك: كيف صبحات خالتي امينة؟!
اورطيغا: عيطت قبيلة كانت باقا ناعسة
ملاك: (حشمانة من هاد اللطاافة والاهتمام) وخدمتك؟
اورطيغا: شحاااال مشقيت عليها!!! (حط ليها الملوية قدامها) رجعتي سكوليطة
ملاك: (تبسمت هزت كتاكل) لول لبارح بابا جا هنا مسكين مقدرتش نحل ليه لباب عارفاه غيردني تماك وانا مبقيتش باغا رجع تماك بعدا حاليا منقدرش..
اورطيغا: وعوالة تسكني هنا؟!
ملاك: جالسة فداري مبغيت لا نخرج لا والو بغيت غير نرتاح
اورطيغا: مطولة؟؟
ملاك: دابا اه
اورطيغا: اواااا اجي نديرو شي فشي ونتزوجو نبعدو علينا البشري!!!
ملاك: (شافت فيه حبست الماكلة شاف فيها هز حواجبو زعما شنو!!)
وبابا؟!
اورطيغا: باباك مزال عينو فداك الز****
ملاك: واش على حمزة؟! (كمل ماكلتوو حاني عينيه محتارم فاش كدوووز...) شوف بابا عمرو نوا انا وحمزة نتزوجو من مور داكشي للي وقع، اه هو غير عزيز عليه وصافي وبابا مقتانع بيك والله
اورطيغا: سدي الله يحفظك هاد الديسك، شنو قلتي فداكشي!!
ملاك: ضروري خاص يكون بابا امراد منقدر ندير والو من مور ظهرو
اورطيغا: اممم.. (حط جبن حداها) كولي ابابا كوولي
ملاك: هه (بقات كتكمل ماكلتها وهو كيشوف فداك الاثاث جاه أبيل من عند خالتو جاوب كانت كتسناه الفطور قالها مشغول رغبها تبقى مع مو حيت مشغول شوية.. قطع ورجع صونا على شي واحد باش يجي)
غيجي هنا؟!
اورطيغا: اه، دخلي للبيت لاخر نقادو القنت
(بقات غير كتشوف مشا عندها شدها من كتافها منوضها هز الرايب وملويتها للي باقية فطبسل وداها للبيت لاخر )
متبانيش انا نجي نشق عليك..
(تبسمت سد لباب رجع عندها جايب ليها كرسي ومانطة عطاها التيليفون ديالو)
تفرجي فشي فلم على منكمل..
يوسف: (رجع من الكوميساريا مهدوووود مكاين حتى شي خبار على ادم فقط كيهضرو على القضية انه مجهوول وحتى شريف قلب ووالو حيت عاودلو شنو كاين حيت عندو معااارف والتشريح مزال مخرج حيت لقاو شي عظام محروقين فالطموبيل وللي كراها زادو فلوس ومعطا حتى شي بيان ولا معطيات عليه حتى الشيك مشدوش من عندو منين دور معاه مزيان...)
يقدر بالصح ميكونش هو!!!!
(مقالوش ان غيثة حاملة)
شريف: (تلف) هادشي كامل طلع منو!!!
يوسف: انا بغيت غير نفهم هو بغا اورطيغا غيثة علاش!!!! بغا رجال يمشي عندو وكان راه عاود ليه ترااابي
شريف: غيثة مجاتو فوالو!!! وحتى قضية أن اورطيغا يدير الحشيش لباه فالمطار ميمكنش ميديرهاش هو تيقصد بنادم وعلاش اصلا يديرهالو اش بينو وبينهم!!!!
يوسف: شريف مخاصش اورطيغا يعرف هادشي!! واكترية على مو!!! هو غيثة عزيزة عليه ولكن مغيزݣلهاش وانا غنحط فالوسط ومغنسمحش فختي!!!!
شريف: واش نتا حمق تتوصيني!!! فين غيثة!!
يوسف: ساد عليها فالدار
شريف: ولادروݣ؟
يوسف: مبانلييش باقي تدير شي حاجة الدار مخرجتش منها شحال ومحضية دابا 24 ساعة متنخليوهاش بوحدها فمرة
شريف: اوا وشنو غديرو؟!
يوسف: هاحنا ملبدينها حتى يجيك نتا ولا انا شي خبار باش نعرفوا شنو نديرو فهاد الحريرة
شريف: تهربها؟!
يوسف: باسبور ديالها بقا عند الكلب ولكن مغنخليهاش واخا يبقى فية عرق واحد غيثة شحال ما غلطت منقدرش نسمح فيها واخا نعرف نبنيلها بيت تحت الارض
شريف: انا معاك فأي بلان ومغنسمحوش فيها
يوسف: (زفر حرك راسو بأه) الياقوت عاود قالت غتخرج الولد لبرا وبالعربية وتاعرابت قالت راه باين باش غتصرف عليه وانا مقدرتش غير تنتخيلها دمي تيفوور مكرهتش نديه لييها وعاد خديجة لداابا مزال مفرحت معاها بحملها تنحس براسي ظاالمها معايا بكترة هاد المشاكل ولقيتها مرا ونص ومعايا.. كترو المشاكل بزااااف اشريف..
ملاك: (جالسة فلبيت كتسمع الهضرة شي واحد جابو اورطيغا وكتسمع غير زديح وحتى من الشينيور خدام، تبسمت الفرحة للي كيدخل مراد لقلبها مكيدخلها حتى واحد زادت فرنست منين قالها على زواج يعني محاسبتو للي كيتوعدها غتكون تجباد ودنين هضرة وشوية دالعصبية وصافي، ولدابا اصلا مكيسولهاش حتى علاش وكفاش حدو كيقولها بغيتك ترجعي كيف كنتي ويحاول يظحكها غير باش يخلي مو ميمشيش ليها باش يبقى معاها راه محبة كبييييييرة لجيهتها!!
ملاك: شكون قال العزي يطيح فية طيحة لعما فالظلمة هههه
( حلت تيليفونو راس كيقولها تقلبلو ميساجات واتساب ولكن منعت راسها مباغاش ضيع فرحتها ولا تعلم تنبش مشات كتقلب فيوتيوب فين كيتفرج بزاف كانو اغاني حسني الغيوان الملحون... هادشي علاش كيتصنت بزااف ميلونج غريييب، جاه ميساج من عند مها كاتب ليها خالتي زهرة قلبها ضرب قرات غير من الفوق بلا مدخل ليه)
"واش هي بيخير اولدي قولها بغيت غير نهضر معاها وقولها متخافش"
مع اخر حرف نزلو دموعها شلال حتى بقات كتشهق وباقي طرف ملوي فمها ممضوغش خافت تصوني على مها تأثر فيها وترجعها لديك الدار للي مبقاش ليها الطااااقة فين تعاود تحط رجلها تماك!!
وخافت الا بقات سادة عليهم يغضبو عليها راه واليديها ميمكنش تهرب منهم حياتها كاااااااملة!!!!
~~~~~~~~~~~~~
خديجة: (عاودت ليها غيثة من اللول وبالتفصيل كانو غير بجوج اما الغالية كدخل تنݣر تغوت حتى كتهد تضربها ويخرجها أشرف من لبيت حيت كتبغي تسخف...)
كان عليك تعاودي لينا اغيثة لوكان قلتيهالي غير أنا كنت غنعرف كفاش نوصلها لخوك
غيثة: راه كان تيهددني اختي
خديجة: واخا هكاك راه كان باغيك تقتلي رووح وعاد نكر ولدو ولا بنتو وباغي يقتل مك ويقتلك حتى نتي بداك السم للي عطاك
غيثة: وشنو غندير دابا اخديجة؟!
خديجة: غنصبرو نشوفو يوسف شنو غيدير ونتي متبقايش ديري شي حاجة منك لراسك حتى يقولهالك خووك دابا خاصك تكسبييييه
غيثة: فنظرك مزال يوسف غيشوف فية
خديجة: نتي طاوعييه هو غيبغييلك غير الخير صبري تعلمي تصبري انا فاش طحت لقيت غير خوتاتي معايا وحتى نتي هكاك يوسف شحال ما لامك وغضب عليك مغيدووووزكش قد هاك وحتى ماماك الا تقلقت منك ولا شي حاجة حطي راسك فبلاصتها راه صعييبة عليها اغيثة وصعيبة على كوولشي...
ملاك: (تيليفونها خلاتو فلبيت فين خدام اورطيغا ولكن فالاصل مكانتش غتشعلو غيأثرو فيها عائلتها وتصدق راجعة، دارت Twilight الفلم للي مكتملش منو بقات كتفرج واخا عقلها ماشي معاها ولكن كتحاول تركز على الفلم كتر باغيا تخوي راسها من المشاكل شوية وقفت حدا لباب كتصنت كتسمع غير زدح طاق رجعت جلست بداو ركابيها كيضرووها بكترة المفاصل للي ضرووها فاش باتت فوق السيمة.. دازت شي ساعة اخرى دق عليها عاد حل ضارت كتشووف)
شنو كديرو؟!
اورطيغا: فيك شي جوع؟!
ملاك: (بعياء) بغيت غير نتكى
اورطيغا: زيدي صبري شوية شنو نصيفطلك تاكلي؟!
ملاك: مفياش الجوع امراد
اورطيغا: دجاج ولا شي حاجة خفيفة تقصيها؟!
ملاك: (تبسمت) للي جبتيلي، واش مصونيتش على خالتي أمينة؟!
اورطيغا: صونيت راه مزياانة نطرق معاك هاد لبلان ونخرج، عنداك تحلي شي سرجم ولا تخرجي!!
ملاك: واش على بابا؟!
اورطيغا: (بانفعال) على الز**** للي مصيفطو داك باك!!!
(سد لباب خلاها كضور عينها اذا حمزة لتحت حاضي واش هي كاينة هنا خافت غير يشوف مراد طالع هابط ويمشي يوصلها لباها وتزيد تغرق...)
~~~~~~~~~~~~~~~~
رشيد: (حاضيهم من لبعيد عارف هادوك للي جاو سولو ولكن اش غيبغيو بملاك ومتأكد هداك غير كيسول غير قو** ديالهم جاتو غباء منهم يجيو فهاد الوقت باش ياخدو بنت عندها 30 عام من بلادها ولكن ها هو حاضي على ميفهم صونا على حمزة للي كان فقهوة جالس اونفاص مع الموبل ديال دار ملاك)
كاينة تماك؟!
حمزة: لدابا مزال مبان والو غنزيد يوماين هنا وكنتسنى صحابي يقولولي على طموبيلتها
رشيد: شنوما كان علمني
حمزة: كون هاني اعمي ياكما رجع هداك
رشيد: اه.. (قطع رجع لخدمتو كيشغل راسو مبقاش كيحمل يرجع لدارهم هاد الساعة واكترية باه زاد عليه الحال تحت عينيه زرااق وعاطيه راسو لحريق ومع كبر مقدرش للألم)
داز الوقت وهي رجعت كتفرج حتى حل عليها لباب وهو كيغني...
اورطيغا:
*★*لُوكَانْ أنا شَاوْرُونِي فالزين يݣولو لݣْلِيبِي يختار*★*
*★*لوكان ݣليبي اختار الشلحة هي للي كواتو بالنار*★*
ملاك: (تبسمت مفرنسة مد يدو وقفت مدورها على نفسها)
اورطيغا: صحصحي ازمر ونتي بحال شي شروييطة
ملاك: ههه فية واحد لعياااا
اورطيغا: اجي معايا اشليحتي
ملاك: مشا صاحبك؟!
اورطيغا: ومالي غنخرجك وهو هنا؟! (بقات شادة فيدو داها لبيت وهي تخرج عينها متبسمة كان قاد ليها لبيت مفرش النموسية بكوافوزها وزربيتها وبلاكار فالجنب فين دير حوايجها، وداير فوتوي كبير وطبيلة تماك حتى الريدو دارو ليها وطالق شوفاج مركب التلفازة خدامة جرها للكوزينة مستف ليها لماعن الفران والثلاجة، وناموسية دارها فالصالون على ميردها لبيت صغير على حسابو باش الا بات مرة مرة معارفش الوقت شنو جايبة!!! والأثاث للي بقا دارو فالصالون عنقااتو معارفة متقول)
اورطيغا: (متبسم حتى هو معنقها) لوكان حسابلي هادشي غيفيض منك لوكان شحال هرستي لداك التفتاف جدك نيفو
ملاك: (بعدت شافت فيه) باش عرفتها
اورطيغا: وعلاش غتخبيها علية!!
ملاك: (خرجت عينها) مخبعتش!!! انا مهرستلوش هو جاي هاجم وانا سديت علية لباب هاربة منو هو وعمي
اورطيغا: هانية احبيبة للي متقاكش يعاودها لمو
ملاك: واش ڤري تهرس؟!
اورطيغا: مشغلناش حنا فداك تخربيق لغدا فالكوزينة فالفران غديريه يسخن غتغداي تشربي دواك وتكاي على منرجع عندك فلعشية
ملاك: (حركت راسها باه) ونتا؟!
اورطيغا: انا جوعي ماشي دالكرش
ملاك: صافي سير عند مك
اورطيغا: هه شعلي المرضية تيليفونك وهضري مع مك
ملاك: (تنوات فديك المرضية) مبغيتش نشعلو
اورطيغا: غتشعليه!!! باش انا غنهضر معاك؟!! صافي قولهم انا بيخير شي يوماين ونرجع
ملاك: (حركت راسها بلا) مرجعش
اورطيغا: من بعد ونهضرو فهادشي المهم هو هضري معاهم شحال قدك تبقاي هااربة كولي ونعسي مغنتعطلش عليك
ملاك: (حركت راسها باه حنا يبوسها فشنايفها وبعدت راسها) اييييه!!!
اورطيغا: تسالات لبرومو ولا!!!
ملاك: هههه (دفعاتو) سير راك غتعطل على مك
اورطيغا: تطرديني يااك!!! (قرس حنكها هز جاكيطتو بقا كيوصيها وخرج كتسمعو كيدوز فالساقطة دخلت متبسمة البيت دفااا والحب واخيرا غتنعس مرتاحة شوية ومشعلتش تليفونها مقادراش تواجههم حدها سخنت الماكلة كلات شوية شربت دوا وجبدت عليها بنعسة...)
اورطيغا: (هبط نيش على حمزة بعينو مزال تماك ولكن مكانش كيشوف فيه باغيه يشوفو هابط من عندها ولكن مباغيش يشوفو باش ميعلمش رشيد ويدخل بخيط كحل.. مشا عند صاحبو عاود وصااه عليها ركب فطموبيلتو ومشا عند مو.. فطريقو صونا على يوسف)
فين الولد!!!...
انا غادي عندها كيف بقات غيثة؟!..
صافي بان عندي انا غير تما...
المحال شكون بقا شافو غير شريف لي تيمشي يشق عليه...
صافي واخ..
(قطع صونا على ملاك مزال طافيااه، صونا على زهرة جاوبت دغيا سمع غوات أنير)
مال زريقة؟!! (تبدل ليه لمزاج من شوفة ملاك فرح نوعا ما واخا كاين مشاكل ولكن عارفها فين وشنو كدير)
زهرة: درنا ليه الجلبة ديال عام ونص
اورطيغا: لباس عليه..
زهرة: فين ملاك اولدي؟!
اورطيغا: هي بيخير غير بغات تصفي لمزاج ووو خايفة منكم شوية واخا مقالت والو ولكن باينة
زهرة: قولها تهضر معايا
اورطيغا: انا نرجع عندها بلاتي ونقولهالها
زهرة: واش راها فدارها؟! على الاقل تمشي غير عند ختها خديجة
اورطيغا: معندها مدير تماك بك.. (دغيا صححها) براسهم غارقين مشاكل مع بنتهم
زهرة: (عاودلها رشيد) لا حول ولا قوه الا بالله العلي العظيم.. كيف بقات أمينة؟!
اورطيغا: الحمدلله شي يوماين وتخرج حتى الترويض غتجي الفرملية للدار ديرولها
زهرة: غير تهدن الدنيا نجي نطل عليها واش ملاك فدارها اولدي ؟!
اورطيغا: هي راه بيخير ما فيا للي يجبد معاها شي صداع وهي دغيا تتفرݣع
زهرة: ههه قولها تهضر معايا وفين راها متخرجش انا عارفاك اولدي غتحضيها
اورطيغا: (بلا ميحس) فعيني..
زهرة: (دارت راسها مسمعتش) حتى نولي نعيط ليك اولدي نمشي نقابل أنير...
أميمة: (مخرجينها سخفانة من عند طبيب من بعد مبقات كدخل وتخرج فالهضرة وضرب راسها فالحيط وهزت فاژ بغات تنزل بيه على راسها غير طبيب للي زولو ليها وهي طيح سخفاانة بقاو كيفيقووها وبنت خالتها كتبكي عليها عطاها طبيب ورقة باش أميمة خاصها تمشي لشي مصحة نفسية تنعس فيها)
(كتشقلب عينها) خرج علية.... وعلى حياااتي....
بنت الخالة: دكتور واش صافي حمااقت؟!
طبيب: متنقولوش على المريض حماق هي غير مصدومة وخاصها تعالج
بنت الخالة: ولكن فالزنقة راه كدير شي حوايج ماشي طبيعية على الاقل وكان خرجت ليها شي ورقة تثبت انها ماشي طبيعية
طبيب: لا مزال حصاااات وان شاء الله تعالج دابا خوديها ترتاح وعطيها دوا واخا تبززيه عليها
بنت الخالة: (حركت راسها باه حنات عند أميمة للي بدات كتفيق عطاوها تشرب خرجت بحال شي وحدة مصدومة غير هبطت مع دروج) مبغاش ولد لحرام يعطيك الورقة
أميمة: واش خاص نقتلو باش يتيق
بنت الخالة: قلتلك مغتعطاش ليك دغيا نزيدو نصبرو قالك حصاات كل مرة ديري ما كتر
أميمة: (حكت فجبهتها) كليتها فراسي
بنت الخالة: ههه يا ختي حتى نتي التمثيل عاطياه عشرة لزيرو
أميمة: وغير باش نجيب حقي
بنت الخالة: انا نسولك واحد خينا على الورقة كفاش تخرج ليك دغيا باش متبقايش غير مخبعة...
~~~~~~~~~~~~
الغالية: (مقدرتش تستحمل سولت مفتاحة فين كاينة أمينة ومشات المصحة من حظها لقاتو على برا كيكمي مشات عندو مكضويش شافها عرفها مقصداااه) خرجتي على بنتي
اورطيغا: (هز حاجبو وبقا كيكمي)
الغالية: من اللول يا الشمكار يا المݣرد محملتكش
اورطيغا: زعما متتبغيني حتى شوية الغالية؟!!
الغالية: (كيزيد يعصبها) شتي نتا بلاصتك.. بلاصتك فالحبس وكان ماشي الحاج عطف عليك متكونش عندك الثقة والجرأة تهضر معايا هاكا!!!
اورطيغا: سمعي ازين داكشي للي عندي معندش جد أمك غير مافيناش البلابلا ونديرو وااااازززَّع لرزقنا ونصرحو بيه!!!
خلينا موقريينك الغالية واخا اغلى حاجة فيك هي هاد السنسلة (دارت يدها على عنقها خايفة يݣرسيها عاود... تبسم بمكر) موقرينك ماشي على شيييبك ولا كبرك ولكن على وجه ولادك بنتك سيري قلبي على مولااا دعوتها (لاح لݣاارو بعيد واخا راس كيقولو يلوحو عليها.. عطاها بظهر خلاها كتغلي كتر من للي جات وطلع عند مو...)
ملاك: (فاقت شبعانة نعاس وحست براسها مزيااااانة واخا عظامها ضارينها شوية ولكن حسن بزااااف من قبل حتى من الماكلة رجعت كتاكل وكتبقى فكرشها، بقات كتشوف فالتلفازة تبسمت وتفكيرها كولها فاورطيغا كتشوووف وجد ليها كولشي ووفر ليها حتى باش متقنطش ومتبردش.. واخا مافيهش الهضرة وكنبغيك وداك لكلام الرومانسي ولكن أفعالووو بزاااف هزت تليفونها حتى كتبغي تشعلو وتصوني على مها وكترااجع مزال باغية تبقى معاه..
ناضت مشات طواليط لقات حتى باپي جينيك وصابونة دايراها ليها تماك)
هاد زمر غيحلهااااالي معاه حتى نصدق انا للي مغتاصباااه...
(قضات روتينها توضات وخرجت صلات عاد جمعت الطبسيل فين كلات وداتو للكوزينة رجعت للبيت دغيا حيت تماك كاين دفا عكس الدار للي بااااردة)
وكان غير كمل خيرو وفينااالي الدار!!!
(تحشات فكاشتها وبقات كتقلب على شي فلم وهي تفكر حمزة للي قال ليها راه تحت الدار)
منين عارفني بابا هنا علاش مجاش عندي؟!! زعما يكون غير شااك!!
(بقات كتخمم وكتحاول متخمم فوالو حيت الهدف من هرووبها هو متفكرش فمرة بغات غير تصفي دماااغها وصااافي...)
~~~~~~~~~~~~
أمينة: (كانو حاولو يوقفوها وقفت ولكن مقدرتش تمشا حدها جلست شوية ورجعت تكات بقا اورطيغا شاد ليها يدها وداير ليها خاطرها باش الدم يتطلق فيها وتمشى شوية)
ولدي الحاج بغاني نمشي معاه للرياض
اورطيغا: لا
أمينة: حتى تماك راه داركم احبيبي
اورطيغا: الوالدة.... (رجع تهدن) انا من اللول قلتلو راك غادا تمشي لدارك علاش تقلب دابا ؟!!!
أمينة: ولدي نديرلو خاطرو شوية
اورطيغا: واش هادشي فيه الخاطر راك مرييضة وخاص نقابلك
أمينة: غتكون معايا فرملية اولدي وحتى هو راه مريض نخاف توقع ليه شي حاجة وانا بعيدة عليه
اورطيغا: يجي يجلس معانا
أمينة: نتا عارف الحاج مكيقدرش يبعد على الرياض وحتى نتا اولدي غتكون مع ميمتك مكاينش للي يهضر معاك
اورطيغا: (بقا كيشوف فيها هو كيكون عذابو كتر من راحتو فالرياض وفنفس الوقت مقادرش يقلقها ولا يتعصب عليها وأكترية منين هي فهاد الحالة وعاد شوية كان غيودعها بقات كترغبو حدو باس يدها وسكت...)
زهرة: (مشات لبيت شيخها مدخلة ليه لعشا كانت مي حلو كتصلي حطاتو وبقات كتشوف فيه)
عمي تاكل دابا ولا تسنى مي حلو!!!
الجد: (بصوت باح وباين المرض فيه والضعف) بلاتي ابنتي...
زهرة: (بكلمة بنتي رجعت بها الذاكرة اللور)
فلاش باك
راكبين فلكار ماشين لفاس بجوج ساكتين كل واحد فين كيفكر حتى قاستو بذراعها وخلات النقاب على وجهها لي شرالها وهو مدور الشال باين غير غير العينين حتى نيفو قاجو كيتنفس بصعووبة وعاد الصهد حيت كانو فأواخر شهر 8
زهرة: فين غنمشيو ارشيد؟!
رشيد: غنمشيو لدارنا... (بحال تخلعت) متخافيش
زهرة: والا تبعونا؟!!
رشيد: (حرك راسو بلا) متخافيش.. ياك نتي باغية تسلمي؟!!
زهرة: اه... انا خايفة عليك نتا
رشيد: الموت مكتخلعنيش للي مهم عندي هو نتي تكوني فأمان، وحنا ماشين لبلاصة مغيفرطووش فينا
زهرة: (حركت راسها باه وبقات كتشوف فطريق قلبها ضارها بزااااف من جهة واليديها للي دغيا بغاو يفرطو فيها.. دازت ساعات مهضروش غير كيشوفو بعينيهم وصلو لفاس معطلين بزااف سمعت رشيد قال للشيفور يحطهم هنا نزلو هي غير تابعاه كانت ديجا جات لفاس ولكن سياحة ومن اوطيل لاوطيل، الدنيا كانت خاوية شوية)
رشيد: غنتمشاو لجهة التاكسيات كاينين الفوق شوية معليش تمشاي؟!
زهرة: (حركت راسها باه)
رشيد: فيك الجوع؟! (حركت راسها بلا كانت فحالة نفسية خايبة زائد الرعب والخوف تبعااتو حتى شدت فذرااعو دازو على حانوت دخل شرا ليها قرعة ديال لماء عصير ومادلين عطاهلها مبغاتش تاكل بزز عليها شداتو وزادو تمشااو وصلو بلاصة التاكسيات وبقاو كيتسناو وحدة تعمر)
زهرة كولي
زهرة: والا لحقو بينا؟!
رشيد: غنكونو فوسط عائلتي معندك مناش تخافي مكيناش السيبة فلبلاد
زهرة: (بزز عليها تاكل، كلات شوية عطاتو حتى هو كلا عمرت التاكسي.. كتشوف مصيرها غاااامض ولكن تايقة بزاف فرشيد للي عرفاتو غير أيام قليلة فكرت أن الله صيفطو ليها باش تلقى طريقها للي شحال وهي كتقلب عليها، نصف ساعة كانت فصفرو دخلو الحومة وهي غير كدور عينها دق لباب وتسناو شحال حلت وحدة لباب دخل دغيا مدخل معاه زهرة ورجع سد باب دارهم)
أم رشيد: رشيد!!! (شافت فلبنت المنقبة) شكون هادي اولدي؟!
رشيد: مِّي هاد لبنت فأمانتي ديري ليها فين تنعس دابا وغدا ونعاود ليكم كولشي (جات تهضر معاه) مغتفهمكش امِّي (باش ميزيدوش عليها) غدا ونفهمكم كولشي... عفاك مترديهاش فوجهي راه معندها فين تمشي..
دخلاتها لبيتو تنعس فيه وهو مشا لبيت خوه للي مكاينش...
يتبع...
التعليقات
لا توجد تعليقات بعد، كن أول من يعلق.