محتوى القصة
ملاك: (وصلت لطموبيلتو حلت لباب وطلعت قاانية على شنايفو جلست سادة لباب وعقلها وقلبها منوضين حالة ضارت شافت فيه وعقلها ربح منين مد حنكو وبعدت وجهها) وااا مراااد!!
اورطيغا: (هز حاجبو) الصحرا وحميد زهير معاك
ملاك: وصافي هضرنا
اورطيغا: مهضرناش انا اصلا مقلت والو وتنبغي نبوس ونتباس
ملاك: (بقات غير كتشوف فيه)
اورطيغا: بلݣي عينك فية
ملاك: (جات بغات تحل لباب وشد يدها للي بقا مكوانسيها فبابها مقرب ضورت عينها وطلعت معاها الصهدة شافت الفووق) صافي صافي منخرجش
اورطيغا: (فنفس الحال بقا كيطل عليها من تحت راسها وهي مدورة وجهها كازة على شنايفها، تبسم بعد باش يخليها على راحتها رجع بلاصتو مقاد الجلسة مفرق رجليه كيشوف فيها) غنسافر
ملاك: (دغيا ضارت عندو) عاد كنت مساافر
اورطيغا: ماشي شي مساافرة غنمشي غير هنا
ملاك: فيين؟!
اورطيغا: جهة خنيفرة
ملاك: علاش؟!
اورطيغا: بغيت نبقى بوحدي
ملاك: علاش؟!
اورطيغا: حيت باغي نبقى بوحدي املاك اصلا كل عام تندير هاكا تتوصل واحد لوقيتة تنهز مسائل ديالي ونمشي
ملاك: (متقبلاتهاش بقات غير سااكتة)
اورطيغا: مالكي؟!
ملاك: معرفتش نتا عاد كنت مساافر شنو مزال باغي عارفة دزتي بوقت خايب ولكن (مقدرتش تقول وانا لمن تخليني!!)
اورطيغا: ماشي مسألة دوزت شي وقت ولا شي حاجة انا هاكا تيعجبني راه قلت ليك تتوصل واحد الوقيتة تنهز خيمتي وتنمشي لشي قنت نجلس شي يامات رتاح من الخدمة والبشار وترجع
ملاك: (حركت راسها باه باينة معاجبهاش الحال وهو مفهمش!!! شد يدها شافت فيه)
اورطيغا: شنو مقلقك؟! انا مولف تنمشي نبقى بوحدي
ملاك: (نترت يدها) منين باغي نبقى بوحدك علاش جيتي تقولها لي
اورطيغا: مال جد أمك راه غنمشي ولكن حتى حاجة مغتبدل معاك نتي (كتشوف فيه متايقاش، بقى كيفهمها هو عزيز عليه يمشي لشي طبيعة يحط لاطونط يجلس بوحدو يصيد كيصفي دماغو فيها مزيان وكيرجع ودابا غيجلس غير 3 أيام)
ملاك: (بقات غير كتشوف حتى فرحت باش تبقى تخرج عندو تبدل الجو حيت كتفرح بزااف وهي معاه وتزيد تعارف معاه كتر ها هو عاود غيسااافر!!!)
اورطيغا: واااا لبنت
ملاك: اوا انا كتقولي سفر لا ونتا غير هاز صاكك ومدرح
اورطيغا: (تبسم) تبغي تمشي معايا
ملاك: سير تزمر (شدلها فك فمها كيديه ويجيبو وهي كتنتر) صاافي صافي طلق
اورطيغا: سمعي مبغيتش نتقابل مع الوالدة دابا حيت معصب على داكشي للي دارت وفمي تيكون قبيييح منين تنتعصب
ملاك: حتى هي معذوورة امراد تنوض تهز خيمة وتطج؟!
اورطيغا: ملاك باغي نبقى بوحدي كما قلت ليك تنصفي عقلي راه ماشي غير هادشي راه حتى الخدمة عيااتني فعقلي كتر
ملاك: اممم!!! مهم انا خاص رجع
اورطيغا: صافي هاكا الناس تيتوادعو!!
ملاك: هاكا انا كنودع (خرجت من حداه وحتى هو هبط مفاهمش واش مساخياش بيه ولا شنو!!!)
اورطيغا: اجي اداك البخووشة
ملاك: ملاك الله يخليك
اورطيغا: لالة غزالتي ملاك.. (عوجت فمها، كانت لابسة غير سبرديلة مكانتش عوالة تلقاه مشا الكوفر جبد كرسي ديال الطموبيل تبسمت عاجبها الحال بقا كيدير بحال كيقلب عليها) واش مكتشوفنييش
اورطيغا: (حنا راسو) حسابلي مشيتي!!
ملاك: (دارت يدها على خصرها كطلع وتهبط فيه وهو كيظحك) بنادم!!!
اورطيغا: هزي ديك الكرطوونة (هزاتها كانت ديال الألعااب سد باب الطموبيل برجلو وتمشاو) شي نهار غتفرݣعي
ملاك: (ظحكها ولكن اكتفت بابتسامة) شكرا
اورطيغا: هادو لزريقة
ملاك: ههه وينووو شحال حنيين كيفكر لأنير (هز حاجبو فيها مكيعجبوش للي يقولو حنين، وصلو للطموبيل ديالها جبدت الساروت من صاكها حلت الكوفر دخلو هداكشي وسد لكوفر)
غتمشي دابا؟! ولا غتقدا
اورطيغا: شنو غنتقدا؟!
ملاك: لحم ودجاج وداكشي للي غتحتاج
اورطيغا: وشنو الهدف من هاد الخرجة الا تقديت هادشي
ملاك: معرفت على الاقل دي معاك غير شي خرووفة تماك شويها
اورطيغا: اهااه وندي معايا دوا لحمر والفاصمة كل مرة نقطع منها شوية ونداويها!! ههه فين غنحطها ابنتي وانا تماك تنصيد هنا فين كاينة الحلاوة
ملاك: (عوجت فمها) موووهيييم
اورطيغا: انا نوصل ونصوني عليك علميني بشنو تديري!!
ملاك: طريق سلامة فين غتمشي حقا!!!
اورطيغا: مزال معرفت بالظبط الألوو بيناتنا
ملاك: وبووحدك؟!
اورطيغا؛ (تبسم هاز حواجبو)
شوو طريق شنو جااايبة!!!
(عقدت حواجبها)
ياله دخلي لخدمتك الدعوة ناشفة عندك أبنت رشيد
(تمت ماشية دخلت وهو بقا متكي على طموبيلتها حتى وصلت للباب ضارت دارتلو باي باي تبسم معاها عاد دخلت وهو مشا لطموبيلتو ونيشان شد طريق خنيفرة...)
ملاك: (كانت مور باب منين شافت طموبيلتو مشات خرجت لطموبيلتها حلت الكوفر، شافت كرطونة اللعب للي جايب ليه عجبها الحال واخا مفهمتش ديك باربي واش ليه ولا ليها بقات غير كظحك، رجعت دخلت كملت خدمتها وهي تصوني عليها وفاء علماتها غترجع فلعشية واش خاصها شي حاجة!!)
خاص غير نتي ترجعي
وفاء: فلعشية هاني عندك ازين...
أمينة: (وصلو دازو لدار السعادة سولت العساس واش ولدها الفوق علمها انه خرج رجعت صونات عليه) فينك اولدي
اورطيغا: مسافر الوالدة
أمينة: واخا اولدي هانا وصلت لفاس
اورطيغا: على سلامتكم، شي 3 ايام ونجي لتم
أمينة: الله يجيبك على خير اولدي (رجعت للطموبيل موجهة الهضرة للحاج) مشا سافر (ركبت)
مفتاحة: اوا وخدمتو؟!
أمينة: سيريلها بلاصتو
الحاج: (حنحن وهوما يسكتو كل وحدة ضارت كتشوف فالقنت لاخر، وهو مهضرش حيت كان باغيه يخرج باش يصفي راسو اصلا هو للي علمو هاد القضية وكان كيشجعو عليها كما كان حتى هو فأيام الشباب ديالو وصلو للرياض مشاو يدخلو شريف هو للي كيخرج الحوايج ودخلهم أمينة طلعت لبيتها نيشان تابعها الحاج)
شوية دابا أمينة!!
أمينة: غيجيك الظحك الا قلت ليك دابا عاد رتاحيت من جيهة دارنا واخا مات بّا الله يرحمو ويغفر له
الحاج: علاش نظحك مكاينش حسن من الصلح مع العائلة ولكن مك ويمكن شي خووتك
أمينة: انا كيهمني غير مّا راك شفتي تفارقت معايا غير بدموع (تنهدت) اوا للي فات الله يسمحلها علييه
الحاج: معليييش نتي مولات القلب لكبير
أمينة: (تبسمت معاه حيت مزال وااقف معاها كما نهار اللول كبرو مبدل فيه واالو معاها) لهلا يخطيك علية ابنسليمان
الحاج: (حرك راسو باه كيحط حوايجو ناضت كتعاونو) حاولي متصونيش على مراد هاد 3 ايام غيبرد ويرجع كما كان
أمينة: منقدرش واخا نسمع غير صوتو...
~~~~~~~~~~~~~
ملاك: (كانت كملت خدمتها صيفطاتلو ميساج واش وصل صونا عليه) فين وصلت؟!
اورطيغا: عين اللوح
ملاك: زوين تما؟!
اورطيغا: حتى هنا موصلتيش؟!
ملاك: معقلتش كنت صغيرة واحد المرة مشينا لمنابع ام ربيع واحد نهار، نتا تماك غتمشي؟!
اورطيغا: دابا راها عامرة غنمشي نتكمش فشي قنت مبعد على البشري
ملاك: مزيان ولكن مكتخافش فالليل؟!
اورطيغا: لا، بلعكس هادشي تيربي فيك متخافش غنجيبك شي نهار معايا
ملاك: لاااا نخااف كتعجبني الطبيعة اه ولكن باش نبات فيها هاكا فلخلا!! لا منقدرش
اورطيغا: معايا غييير مغتخافيش بلعكس غيعجبك الحال (بقات سااكتة) داك دماااغ!!!!
ملاك: لا غير تفكرت شي حاجة
اورطيغا: اممم علية، ولكن بالصح تيكون جو غزاال غتنساي رااسك فيه..
ملاك: (بقات كتهضر معاه حتى وصلت للدار حطت الطموبيل كتشوف فلمرايا باها جاي) مراد بابا واقف كيتسناني
اورطيغا: صافي غير قطعي حتى انا نشوف اشمن طريق نشد حيت الطموبيل غنحطها بعيد شوية
ملاك: (قطعت ممعيقاش حيت باها واقف حدا لباب حلت لباب متبسمة معاه) بابا!! (باستو فيدو)
رشيد: (الله يرضي عليك) دابا مزيان فالصوݣان
ملاك: خصني غير نشد بيها شي طريق طويلة باش زعما نجرب
رشيد: كتمشي بيها لفاس
ملاك: لا طريق طول
رشيد: سيري لفاس ورجعي وعاودي سيري
ملاك: ههه وعلاش الخسران نمشي لشي مدينة فيها لبحر نعوم ونرجع (جا يعبس) وغير مثلا ابابا غير مثلا وأصلا منمشي حتى لشي قنت الا مكنتيش معايا
رشيد: اممم حتى لشي نهار
ملاك: (حركت راسها باه وللي فنفسها غير على الملامح للي فوجهها) حقا راه شريت كرسي لأنير باش يبقى يخرج معايا
رشيد: (مشات الكوفر تابعها حلاتو ووراتو كرطونة االلعاب عاجبو الحال شاف فالمونيكة هازها) حتى هادي (بقات كظحك حل الكرطونة ديالها كانت مونيكا بالدوبياس خرجت عينها اول مرة تعرف كاينة مونيكا غير بالدوبياس!!!!)
ملاك: (محشمة مكانتش قلبتها حيت كانت فالعلبة ديالها) تحم ولد لحرام بدلهالي يمكن ولا بالغلط كنت جبتها زعما لبنت عمي
رشيد: معليش (ردها دغيا للكرطونة) رديهالو.. الله يرضي عليك ابنتي
ملاك: امم هاد اللعب أنا للي شريتهملو ولكن الكرسي محسوب عليك (بابتسامة عريضة )
رشيد: ههه (هزو كيشوفو كان جديد) بشحال
ملاك: (نسات مقلبتش على الثمن ديالو) عطيني غير 500 درهم مخساراش فأنير نقيمو انا وياك صبر
رشيد: (كيظحك على هاد البنت للي عندو جلدة جبد من جيبو فلوس حسبهم وعطاهم ليها، وقف حداهم حمزة) اهلان اهلان
حمزة: (سلم عليه ومد يدو لملاك للي خلاتو بلاكة وهزت االكرطونة حطاتها فالكرسي باش تهز كولشي جمع يدو محرج)
كداير اعمي لباس عليك
رشيد: الحمد لله اولدي كداير مع السربيس
حمزة: هاحنا اعمي كنسلكو، ملاك لباس عليك
ملاك: الحمد لله، بابا انا مشيت
حمزة: نهز معاك شي حاجة اختي ملاك؟!
ملاك: (كتسبو فنفسها) لا شكرا (زربت كتمشي مخليااهم حتى سمعاتو كيعيط باسمها وزاارب غير وصل حداها طلقت غوتة على جهدها) شفااااااااااااار واااا عتقووو الرووووووح شفااااااااار....
ملاك: (خرجو الناس تماك وهي ببرود كملت طريقها متقلها داكشي لي هازة خرجت نجية كتسول)
نجية: شنو طاري؟!
ملاك: معرفت شي وحدة مشات كتغوت من الجهة لوخرا يمكن تݣريسات
نجية: الله يحد الباس هاد الزنقة من ديما كانت نقية وصلوها حتى الشفارة
ملاك: مزال يخرج منها العجب (كدق باب دارهم حلت ليها بنت عمها) بسلامة خالتي نجية (شافت حمزة جاي مخنزر دخلت للدار وسدت لباب كانو شي ضيااف مشات لبيت مها نيشان كان خاوي حطت داكشي مفاهماش هاد حمزة للي العام كامل حداه ومدارش عاد الحالة علاش دابا كيدير هاكا؟!! علاش باغي يخلق ليها المشاكل ميمكنش يكون هادشي حب!! واش غير حيتاش معطاتوش وقت وموصلهاش!!! شنو كان متوقع منها دير هو بمرتو وهي تكون العشييييقة **** ديالو!! دخلت مها لقاتها عاقدة حواجبها وجالسة)
زهرة: مالكي؟!
ملاك: هداك حمزة مبغاش يبعد مني
زهرة: ولد نجية؟!
ملاك: اه راه ديما واقف علية وكيبغي يهضرني بالزز طلعلي فراسي
زهرة: دارلك شي حاجة؟!
ملاك: (بزعفة) مدارش ولكن راه جهل واش هو بمرتو شنو باغي مني يانا؟!
زهرة: دابا نهضر مع مو
ملاك: هضري معاها اماما راه بزاااف على داك تبرهيش للي كيدير غيخلقلي غير المشاكيل
زهرة: مع باك؟!
ملاك: نتي عارفة بابا الا لقاه داير لي هكاك راه يقتلو وعاد غيشوهني مع الناس
زهرة: معامن؟!
ملاك: كفاش معامن راه كيتبعني فزنااقي تبعني حتى لفاس هو مزوج وكيجي يوقف علية اي واحد شافني شنو غيحسابلو انا !!
زهرة: (معطلتهاش هزت تيليفونها كتصوني) نجية اجي عندي الا كنتي مسالية (قطعت) واش دارلك شي حاجة خايبة
ملاك: اه دارلي غير يوقف علية راه دار، يبعدني ولا غنوصلو لشي شوهة خاايبة والله حتى نمشيلو بلاصة خدمتو!! (دخلت للحمام هازة بيجامتها، دخلت نجية كتسمع هضرتهم توضات وخرجت عندهم)
زهرة: نجية هضري مع ولدك يبعد ملاك
نجية: (باحراج شافت فملاك) علاش شنو دارلك ابنتي
ملاك: خالتي فهميه هو راه مزوج شنو بغا مني انا راه كيظل تابعني فالخدمة فالزنقة نتي عارفة بابا ولا عمي مغيتفاكوش معاه وعاد زعما كيبغيوه صافي انا ويااه مكتابيناش لبعضيااتنا يتهلا فمرتو وفبنتو ولا ولدو ويقيلني عليه انا
زهرة: نهار اللول قال هادشي ممسلكوش صافي يبعد من لبنت هضري انجية،
حيت صاحبتي وعزيزة علية هضرت معاك نتي اللولة منخليوش هادشي لرجال للي مكيعرفوش حتى يتفاهمو!!!
اورطيغا: (وصل لبحيرة أݣلمام كانو ناس قلال كما كيعجبو الحال حط لاطونط ديالو تحت ظليلة بين شجر قاد الكرسي حط حويجااتو فأمان حيت ماشي أول مرة يجي هنا وعارف ناس المنطقة موقرين الناس للي كيتريبييو، حط التيشورت للي لابس وهبط غطس فلما شي 5 دقايق وطلع جلس فوق الحجر كيرد النفس وكيشوووف بعييييد سااهي...)
~~~~~~~~~~~
خديجة: (حست باحراج كبيير كولشي كياكل بالفرشيطة والموس بقات غير كدور عينها فيها الجوع ولكن مغديرش دير فراسها الظحك كلات غير الخضرة مبعدة من ستيك دلحم شافت فيوسف للي مكلاش بزااف وغير سااهي همست ليه)
مالك؟!
يوسف: والو، متتاكليش؟!
خديجة: لا.. نتا لي مكليت واالو!! (مجازبش) يوووسف مالك
يوسف: والو اخديجة من بعد غير كملي فداك احبيبة...
الغالية: يوسف مالك احبيبي شنوو شد الشهية ديالك!!
يوسف: والو، غير كليت شي حاجة فالخدمة!! (شاف فغيثة للي كانت دايرة لكيت وكتاكل) غيثة!!! (حركتها مها هزت راسها وزولت لكيت)
تتشوفي من الاداب نكونو مجموعين ونتي عازلة راسك؟!
غيثة: لا غير كنت تنتصنت
يوسف: هادشي ديريه فبيتك ماشي وحنا مجموعين ولا حنا عندك زايدين ناقصين؟!
خديجة: (بغات تدخل تبرد السوق وخاافت من شي قمعة مغدخلش فشي حاجة للي ترجع عليها بالخايب كما كانت فزواجها اللول, واكترية كتشوفو معصب من جهة اختو ومغيكونش هدا هو السبب حيت غير قبيلة كان تعامل معاها فشكل ودابا فشكل)
الغالية: خااك عندو الحق ابنتي
غيثة: (كتأفأف حيدت الكيت من ودنيها) مزيان هاكا
يوسف: مزال خاصنا نهضرو على بزاف الحوايج (شافت فمها واش عاودااتلو) الا كملتو نمشيو؟!
خديجة: (فنفسها وااخيييرا تمشي للدار وتاكل شي حاجة على متعلم لهاد الموس والفرشيطة!! ناضو من تماك من بعد مكملو ركبو فطموبيلاتهم ونيشان للدار)
غيثة: انا غنخرج عند لبنات
يوسف: دخلي اغيثة بغيت نهضر معاك
غيثة: خويا نتا مزال هنا نمشي دغيا عند لبنت ونرجع
يوسف: واخ (تم خارج معاها مستغربة) انا نوصلك عندها
غيثة: (كمدتها ومشات معاه موصلها عند صاحبتها دخلت وهو بقا برا، صونات على ادم للي كان كيتسناها)
مصالحش يوسف لاسقني..
غنجيو بلاتي للرياض...
علاش مغتجيش؟؟
لا اورطيغا مكاينش.. اه متأكدة
سمعتها غير من عند خويا..
معرفتش.. للي تنعرف تيمشي للطبيعة يتريبي..
اممم.. صافي انا نتسناك..
راسي تيضرني بزااف...
صافي واخ..
(قطعت مشات سلمت على صاحبتها ودارت حجة جابت من عندها شي حاجة ورجعت عند خوها للي كيستفسرها على أحوالها...)
من بعد مخرجت نجية من عندهم مفقووسة عارفة ولدها باقي باغي ملاك ولكن ماشي لدرجة يتبعها ويخنقها ملاك بقات جالسة فلبيت مع مها
زهرة: بنتي غير هادشي للي كاين مدارلك حتى حاجة خايبة
ملاك: كتر من هاكا مكاينش راه تبعني لخدمتي لفاس وحتى فين سكنت دارلي الشوووهة!!
زهرة: ولد لحرام المفشش الي ولدو!! صافي ها مو غتهضر معاه شنو هادشي
ملاك: شريتو لأنير فين هو؟!
زهرة: سبحااااان الله (بفرحة بقات كتشوف الكرسي وهزت كرطونة ديال اللعب هزت ديك باربي) ليك
ملاك: اه عجباتني
زهرة: ههه هبييلة ومالقيتي غير هاد لباس
ملاك: ويييه
زهرة: (عنقتها بيد) هانتي درتي عقلك
ملاك: اوا عقبالك
زهرة: ههه اوا الله يمسخك (عجبها الحال) مزيان بعدا تخرجييه
ملاك: اوا غير على وجهك
زهرة: اممم على وجهي يانا (ضرباتها للقرفدة) ولا لقيتيه بعدا سبة
ملاك: (تبسمت كتلعب بحواجبها) بجوج
زهرة: والله يااا مك و...
ملاك: متحلفي علية منحلف عليك الا 30 قربنالها شنو بغيتي ندير نبقا حداك غير كنتنهد ونتغبن خليني نضبر على راسي الله يرحم بيها الواليدين
زهرة: وكتزيدي تخرجي عينيك يا الكلبة
ملاك: اوا زعما راني تربيتك معندي لا هاك لا هاد مكاين غير أغراس أغراس (نيشان)
زهرة: نوضي تعاونيني راه ختك وراجلها غيجيو
ملاك: شنو ندير انا
زهرة: نديرو شي شهيوة غيجيو غير لكاسكروط حيت غيتعشااو عند مينا باش يعزيو
ملاك: نعاونكم ولكن تعاوديلي بالنقطة والفاصلة على خالتي أمينة...
~~~~~~~~~~~~~
خديجة: (صونات على وفاء لقاها فاس وغتمشي لصفرو وعلماتها حتى هوما غيمشيو تسناهم ويديوها معاهم.. مشات للكوزينة فيها الجوع مكيناش الخدامة تمااك ومزعمتش تحل الثلاجة حيت كتحس براسها غير ضيفة بغات تخرج وهي تجيها الغالية للي حاضيااها)
الغالية: اش كنت تتعمل فكوزينتي
خديجة: والو كنت بغيت نشرب
الغالية: تشرب؟!! علاش مكاينش الما فبيتك؟!
خديجة: كنت باغية لما بارد
الغالية: خرج علية من كوزينتي
خديجة: (تصدمت بقات كتشوف)
الغالية: باغا تسحرلي يا المشعودة؟! قالك باغيا الما خرج ولا نجيبلك البوليس!!!
خديجة: (حتى بغات تهضر وخرجت حابسة البكية فيها متنتفها ݣاع وتشتف عليها فديك الكوزينة ماشي غير تهضر ولكن!! طلعت لبيتها معصبة مفقوسة حيت مردتش عليها بقات تماك كتاكل فراسها...)
اورطيغا: (شاف فتيليفونو كتجيه غريييبة ميساجاتها اتصلاتها قلاااال حتى حبيبة كنبغيك داك لكلام منعدم ولكن مرتاح معاها وإعجابو بيها كبير وللي حيرو انه كفاش صاابر ومخلي الامور ماشية دقة دقة اما هو كيبغي يحرق المراحل عاد يسول على سمية لبنت!!
صونا عليها مجاوبتش عاد رجعت هي صونات قطع وصونا عليها)
فين غابر الزين ديالي
ملاك: (تبسمت) كنت تنوجد مع ماما فلكوزينة
اورطيغا: اممم الحداݣة نعاماااس!! شنو تتصرعي
ملاك: ههه كنصعّر غير بناادم هاد الساعة
اورطيغا: هه هادي عارفها، بالصح شنو تتعرفي طيبي؟!
ملاك: الا قليت بيضة متقولها لحد
اورطيغا: الله يبشرك بالخير وشنو كنتي تديري مع مك؟!
ملاك: كنعاون وصافي نغسل ميعنات نقرب ليها شي حاجة بحال هاكا!! جاية خديجة ويوسف يجلسو معانا فلعشية
اورطيغا: اممم مزيان غير هو تبتي شوية
ملاك: علاش مالي كيفاش كتشوفني
اورطيغا: معرفت داك الظحك بزاف مع يوسف وتوشويش متيعجبنيش
ملاك: راه بحال خويا وراجل ختي وانا ويااه كنا اص..
اورطيغا: هاد الهضرة كوليها تبتي الله يرضي عليك
ملاك: بففف
اورطيغا: تفرݣعي متنقولش شي حاجة فسما للي باين باين
ملاك: واش نتا مكتيقش فية؟!
اورطيغا: ماشي مسألة ثقة ولكن تنبغي داكشي يكون غير لية متنبغيش نتشاارك فييه مع حتى شي واحد كما بغا يكوون
ملاك: حتى هضرة عادية؟!
اورطيغا: نتي عارفة شنو تنقصد
ملاك: انا ويوسف جامي تعدينا الحدود هو كيعتابرتي ختو وانا هكاك
اورطيغا: يوسف ختو هي غيثة وخوك نتي هو أنير هو راجل ختك نقطة ورجع لسطر
ملاك: عندك شي مشكل مع يوسف
اورطيغا: واش صايط لمك الريح فداك العقل الهضرة للي قلتها ليك تنعني بيها كوولشي ماشي غير يوسف انا مكافيكش باش تعاودي وتظحكي وݣاع داكشي لي باغية
ملاك: الا كانت غتطبق هاد الهضرة علية وعليك
اورطيغا: (هز حاجبو) معامن تتشوفيني معمر وقتي؟!
ملاك: معايا ولكن كاين شي حوايج حتى انا مكيعجبونيش
اورطيغا: مثلا!!
ملاك: اخر مرة نشوفك ماد هداك الحنك مع شي زبلة ومنين تشوف شي وحدة دير راسك عندك زهايمر ولا شي هبيل مضهصص مشغلييش مهم حدوودك متفوتش سلام لباس الله يعاون!! اه وغيثة راها خت يوسف..
ملاك: (مسمعات والو منو) اوا جااوب!!! اه ويوسف راه بحال خويا وواحد من العائلة غير باش تفهم ومتبقاش ماشي غلاط كنعاملو بحال محمد بحال حميد بحال عبد الهادي
اورطيغا: اممم
ملاك: (عصبها وهو ميجاوب مبرد وعاد ظحك فاش جبدت غيثة) شنو اممم انا من قبيلة وانا كنقولك ونفهمك !!!
اورطيغا: انا هضرت ونتي هضرتي المعنى ديالي وصل ليك مكاينش لاش نبقى نعاود هضرتي
ملاك: حتى انا مغنعاودش هضرتي امراد ميمكنش غنقاطع يوسف
اورطيغا: مقلتش ليك قاطعيه ولكن كولشي يكون عندو حدوود
ملاك: (تعصبت) انا حدودي كنعرفها مزياان مغتوريهاليش نتا
اورطيغا: (صاط من الݣارو ببرود) يعني داك كترة الظحك مغنعاودش نشوفو معاه
ملاك: (تجننت) علاش كتبغي تعقدها علاش منظحكش معاه؟؟؟ مفهمتش علاش حكمتي علية بالخايب هاكا من اللول كانت علاقتي معاه محترمة وهاكا غتبقى هو مشفت منو غير الخير
اورطيغا: (اوطوماتيك تفكر نهار عنقها فاش كانت كتبكي فاش جاو خدا سوارت من عندها ونهار قالو كنت حاط العين عليها)
ملاك: وهو رجع واحد من العائلة علاش بغيتني نعادييه وهو مداير لية واالو
اورطيغا: (غير كيكمي)
ملاك: (عصبها مكيجاوبش وهي تقطع) **** تفوو *****
(جلست فوق النموسية عاد كانو بيخيير منين جاب موضوع يوسف عاود!!! سمعت صوتهم جااو مخلاش ليها المورال للي تخرج ولكن مها صاوبت الݣوتي زويين وفيها الجوع!!
شافت فتيليفونها منين مرجعش صونا حتى هي مغتصونيش حيت مغالطااش ومغتحزرووش باش ميولفهااش خرجت من بيت مها مشات تسلم عليهم مدت يدها ليوسف للي فهم مكاينش سلام بالحنك جلسو مجمعين)
يوسف: ملاك صافا ؟!!
ملاك: الحمد لله اخويا ونتا لباس عليك كيف دوزتو الهاني مون
يوسف: خاصك تمشي لتماك
ملاك: ان شاء الله والله احسن حاجة درتو (بقاو مجمعين وخديجة مجمعة مع مها ومرت حنينها ووفاء غير كتصنت... شافت فتيليفونها كان وصل ميساج من عندو قلبها زدح خايفة تلقى شي حاجة للي تزيد تغيرها مقراتوش بقات كتاكل ويوسف كيعاود طرائف وقعو ليهم جا باباها للي سلم عليهم عطاوهم لي سوفونيغ للي جابو عجبهم الحال بزااف وفرحو انهم تفكرووهم عياو يشدوهم لعشا ولكن كان خاص يمشيو باش يمشيو يعزيو أمينة.. توادعو معاهم وهي طلعت لسطح ويدها على قلبها خاايفة من شي كلام للي ميعجبهاش مشات للقنت وشعلت تيليفونها دخلت للميساج ديالو كتقراه فنفسها....)
اورطيغا: ""منين تكمل علميني""
ملاك: واضفاك!! شنو هاد *** بففف مفهمتش شنو للي معجبوش فيوسف ياك صحاب ولا معرفت لمهم!!!
(بقات كتفكر شحاااال خاصها تعرف الخلاصة!!! صونات قطع ورجع صونا عليها جاوبت مكرهة)
وي!!
اورطيغا: (كان كيصيد فديك البحيرة) مشاو؟!
ملاك: (بعصبية) اه
اورطيغا: (بهدووء) ملاك, انا مقلتش ليك نتي ماشي محتارمة ولا قللت منك انا تنقول داكشي للي كان بيناتكم كنتو بزوج بيكم سليباطير ونتي مبيقيتيش ديال رااسك
ملاك: (منتابهتش لكلامو) راه كنا غير كنهضرو نتناقشو كيعاود لية صافي
اورطيغا: (شاد ليها الخاطر) هاديك!! دابا هو عندو مرتو يعاود ليها تعاود ليه يعاودوها راسهم نتي لا!! تعاملك غيكون معاه كما تتعاملي مع رجال خووتك لوخرين
ملاك: والا بغا يجي يعاودلي ولا يتشكالي نقولو بعدني!!
اورطيغا: علاش نتي نااقصة مشاكيل باش يجي يزيدك هو!! ونفتارو معندكش علاش يجي يخوي همو علييك!! بنادم كان ظاحك ناشط ويجي واحد يديرلو الغمة!!
ملاك: (كيهدئها شوية بشوية) ماشي هكاك ولكن مكيعجبنيش نتقلب على بنادم
اورطيغا: مقلتش تقلبي ولكن شي حدوود خاص يكونو باش متلقايش مشاكل لا معايا لا مع ختك
ملاك: معرفتش علاش كتحسسني بحال انا ويوسف بيناتنا شي حاجة اخرى معجبنيش هادشي امراد
اورطيغا: انا لوكان عرفت اصلا كانت بيناتكم شي حاجة كنت عمري نجي نهضر معاك واخا يكون غير اعجاب ديال دقيقة من جهتك نتي!!
(بقات ساكتة) ملاك (زفر) نتي تتعني لية بزااف وانا متنبغي نتشاركك مع حتى شي واحد!!
الظحك جموع يكون فحدود حيت رجع واحد منكم ولكن شي حاجة كتر من هاكا غترجع بالخااايب وانا قليييل فاش تنتحكم فراسي منبغيش نكون قبيح معاك ومعاه
ملاك: نتا متايقش فية
اورطيغا: آش جاب الثقة لهادشي واش انا تنشرق ونتي تتغربي صافي للي باين راه قلتو مكاين لاش نبقاو فنفس الديسك
ملاك: (بقات ساكتة حتى جات حجرة صغيرة حدا رجليها، هزت راسها كان حمزة فسطح كيديرلها إشارة تجي)
اورطيغا: ملاك!!
ملاك: كنسمعك
اورطيغا: شنو تديري دابا؟!
ملاك: كنهضر معاك ونتا؟
اورطيغا: تنصيد
ملاك: (غوبشت) شنو كتصيد؟!
اورطيغا: عرفتي شي حوتات لقيت هنا بشااااااخ
ملاك: (بعصبية) انا للي راجل ختي جالس علية متهضريش مضحكيش ونتا بوجهك مسنطح جاي كتقولي هاكا!!! (سمعاتو كيظحك.. عطات بظهر لحمزة كتكمل هضرتها)
وكظحك!!
اورطيغا: والله يا مك وتقطعي زطمة وحدة بالطموبيل نخرج فيك راه تنصيد الحوت ابنادم باش نااكل ههه
الغالية: (خداو كرطونة السكر ومشاو يعزيو واخا مغارضهاش تعزي بكترة مباغا تعاود ليها مفتاحة شنو داز فهاد تسافيرة المشؤومة...
العائلة كانت كولها مجموعة فيهم للي عزيزة عليهم أمينة وكاين للي جاي غير على وجه الحاج بقاو جالسين مجمعين حتى نطقت الغالية )
وتقبلووك داركم؟!!!
أمينة: (شافت فيها ديك الشوفة ديال بنيتك!!) بنادم راه كيصبر الغالية، هاحنا كنتقبلو للي يسوا وللي ميسواش جات عليهم ميتقبلوش بنتهم للي معرفت انا اش درت باش تسوليني نتي هاكا!!
الغالية: (بقات غير كدور عينها وشافت فمفتاكة للي حركت راسها كتقولها تسكت)
انا غير قلت حيت عارفاك معاديااهم
أمينة: ايييييوا للي شاف شي يقول الله يستر.. (تفكيرها كوولو فولدها وعارفة حالتو غتكون خاايبة وبووحدو!!!
ناضت من تمااك مافيها متجاوب وترااض ولكن معندهاش المورااال للي طااايح طلعت لسطح فهدووء دخلت لبيت الصابون مع شعلت الضو لقات غيثة صدرها عرياان وادم كيعبز فيها ويبوس فعنقها شهقت بصوت مسموع نادبة حنكها بطراف صبااعها)
ويلي على ولاد لحراام !!!!
غيثة: (عينيها مكمشيين منين تشعل الضو، غير كتشووف اما ادم بعد من غيثة مهبط ليها الديباردوور على صدرها وعاطي بظهر كيقاد راسو)
ادم: عفاك خرجي من هنا
أمينة: ياك اولد الحرام وكان غير معندكش ختك مقنت البنت وعاد كتزيد تهضر (بلا متشعر) هبط ت*** من هنا استغفر الله العظيم تخرجو الواحد على طوعو!!!
ادم: (ضار عندها مخنزر وشاف فغيثة للي واقفة بحال خشبة غير كتشووف ملامحها عادي بحال ماشي هي للي تشدت متلبسة واقفة بحال كتسنى الطوبيس.. شاف فأمينة)
عفاك متقول والو لشي وااحد
(شد فيد غيثة جارها يهبطو وقفت)
أمينة: عرفتي خوتها يسيقو لخبار!! ولا باها ولا عمامها ياكما حساابلك البنت ساايبة
(كتشوف فغيثة بإستغراب كبيييير مكاين حتى شي ملامح الخجل ولا الحشمة!!)
ادم: (مخرج عينيه) انا وياها مصاحبين!!
أمينة: خرج خرج قبل منبدا ندير شراع يدي فيك نتا اللول
ادم؛ (مبغاش يجبد معاها العيب طلق من غيثة وهبط محرج مدام مغوتتش ولا دارت شي ردة فعل مجهدة الا مبغاتش دير الشووهة)
تفو على مصوفجيين!!!
أمينة: (مشات لحدا غيثة ضرها خاطرها عمرها فكرت تلقاها فهاد الموقف وكانت كتمناها عروسة ولدها، وعاد محشمت مرمشت غير وااقفة، تصدمت من هاد الفضيحة وتصدمت فردة فعلها) شنو هادشي اغيثة؟!
غيثة: انا للي بغيت
أمينة: (زادت صدمتها) شنو بغيتي!! بغيتي يبقى يلعب فيك ابنتي لا لا نتي ماشي غيثة للي كنعرف
غيثة: (سالو دموعها بحال كتوݣض عاد شهقت شهقة مسمووعة ودارت يدها على وجهها كتبكي)
أمينة: واش بيك ابنتي فين باغية توصلي؟!!
غيثة: (غير كتبكي حتى جات أمينة كتعنقها) تنمووووت اطاتي أميينة تنحس براسي تنمووووت.....
أمينة: (بقات معنقاها كطبطب عليها بقات فيها مجااتها حتى ذرة شماتة بلعكس بقات فيها بزااااف من ديما عزييزة عليها حيت هي ماشي بحال مها كتحتارمها وتبغيها)
بنتي واخا تكوني معاه مخاصكش تخليه يقيس فيك
غيثة: (بصوت مخنوق بعدت كتمسح دموعها) متنبغيهش اطاتي متنبغييهش (بحرا كتنفس)
أمينة: واش كان شادك بالسيف عليك؟؟ غير قوليلي متخافيش
غيثة: (حركت راسها بلا كارهة راسها) معرفتش شنو وقع!!!
أمينة: وشنو ابنتي راك حيرتني فيك واش نتي هي غيثة لبنت لمأدبة والمحتارمة تخلي الواحد يقيسها هاكا؟!!
غيثة: (كتبكي) معرفت شنو وقع والله معرفت انا ادم غير صديق وصاافي علاش وصلنا لهاد مفهمتش!!
أمينة: (بقات كتشوف فيها) بنتي راه خاصك متبقايش تلقاايه والا عاود ضسر عليك خاصك تعلمي خوتك هوما يتكلفو بعدي من هادشي ابنتي
غيثة: يمكن انا للي درت شي حركة بيناتلو انني تنبغيه ولا معرف!!
أمينة: (شدالها الخاطر) علاه ابنتي للي كيبغي كيدير فحبيبو هاد الحالة شادك فظلام بديك الحالة والعائلة لتحت مجموعة لوكان باك ولا خوك ولا ماماك هوما شافوك هاكا!!! فين كنتي غتوصلي وكان راه واحد فالحبس واحد فالقبر الله يحفظ
غيثة: (رجعت غير كتبغي غير فكرة قاسها خلاها تخنقت!! براسها مفهمت والو وكفاش وصلو والمشاكل شكون لي شدهم! !!)
متقوليهاش لاورطيغا اطاتي عفاااك
أمينة: راه كما هو ولدي حتى نتي بحال بنتي والا حتى سمعها راه ميبغيش شي واحد يقيسك راكي بحال ختو ابنتي واخر حاجة يلغي هو شي واحد يضرك
غيثة: ختو!!
أمينة: بنتي رضي البال لراسك وفكري مزيان قبل مديري شي حاجة نتي بنت زوينة ومربية وبنت عائلة كبييرة ماشي ديالك ابنتي هادشي متخليش للي كان يضيع هادشي زوين للي فيك
غيثة: (رجعت عنقتها غير كتبكي وقلبها كيتقسم وحتى لوخرا بقات غير كطبطب عليها راسها داااخ بهادشي للي شافت!! نسات مواجعها ورجعت غيثة اكبر من دوك المشاكل!!
رجعت اللور ماسحة دموعها ونيفها)
فين اورطيغا بغيت نشوفو؟!
أمينة؛ مسافر ابنتي
غيثة: ياك رجعتو واش مشا يتريبي؟! بفف (ضربت فراسها بحال كتوݣض) حقا مشا يتريبي عقلي مبقاش تيخدم غير تنسى وتنتعصب
أمينة: (شدت ليها يدها) دابا يفوقتك ابنتي
غيثة: (تنهدت حركت راسها باه) عفاك اطاتي متقلقيش من هادشي للي شفتي عفاك ديري عمرك شفتيني هاكا عفاااك
أمينة: انا تقلقت عليك ابنتي ووجعني ݣلبي عليك
غيثة: معرفتش شنو وقع والله ولكن غنهضر مع ادم
أمينة: بعدي ابنتي من طريقو متهضري معاه ميهضر معاك باين مصافييش داك البرهوش
غيثة: (حركت راسها باه) حقا (كتجخر بنيفها وتسهق بكترة لبكى للي بكات) البراكة فراسك من جهة باباك اطاتي
أمينة: ممشا معاك باس ابنتي الله يرضيك ديري عقلك...
أصبحنا وأصبح الملك لله...
ملاك: (بقات غير كتشوف فهاد تسافيرة قلبت الورقة كتقرا) معرفتش صراحة واش يبغي بابا (باغا تمشي وبشدة)
زينب: (خدامة معاها) صراحة فكرة زوينة حاولي معاه املاك ومعانا حنا معندو فين يخاف عليك
ملاك: (بقات كتفكر اول مرة يديروها فالخدمة voyage organisé بيناتهم وللي بغا يجيب مرتو او تجيب راجلها كانت يوماين بين شفشاون والجبهة)
دابا نشوف
(كملت خدمتها شافت برا كانت مغيمة ولكن الزمت شافت فتيليفونها لدابا مزال مصوناش عليها يكون مفاقش!!! صونا عليها يوسف)
افيين
يوسف: فين نتي الآلة متتسولي موالو
ملاك: هه باسم الله عليك عاد تشاوفنا البارح!!
يوسف: لا لا بزااف هاد القلبة للي درتي شي حاجة تم!!
ملاك: مكاين والو والله غير مع الخدمة وصافي
يوسف: مزيان الآلة غير تكوني مرتاحة هدا هو المهم, بغيت نسولك نتي وغيثة متتهضروش هاد الايام
ملاك: لا قليييل مرة مرة سلام صاڤا!!
يوسف: اممم صافي (مسولت لا علاش لا واالو) شنو متجيش تزورينا شي نهار
ملاك: معرفت سمعت الدار كيقولو غيمشيو على حساب خالتي أمينة غدا لفاس
يوسف: بالصح خاص نضايفوهم فالدار
ملاك: اووو نسيب بغا يدير بلاصتو
يوسف: ههه بحال داكشي
ملاك: (طلعت ليها لابيل ديال اورطيغا) يوسف واحد شوية ونصوني عليك (قبل ميجاوب هي جاوبت على لابيل)
وي
اورطيغا: الريزو حمقني هاد صباح
ملاك: بالصح عليها مبغاش يشدلي صونيت قبيلة ومكيطلعلي والو (مصوناتش)
اورطيغا: معرفت مال هاد ***** على صباح
ملاك: (عوجت فمها كضور عينها)
اورطيغا: فالخدمة؟!
ملاك: اه، حم مراد بغيت نقولك شي حاجة ولكن الا تعصبت غنتقلق منك
اورطيغا: الله يسمعنا خبار الخير!!
ملاك: كاينة واحد voyage organisé فالخدمة سبت وحد مكرهتش نمشي ليها وفنفس الوقت خاايفة بابا ميبغيش
اورطيغا: مع الخدمة؟!
ملاك: اه عارفاك حتى نتا غتوقف فيها حسكة بحال شادين النوبة علية
اورطيغا: هه حسكة!! شوفي انا نفطر ونعاود نطلع لهاد الجبل نهضر معاك
ملاك: صافي واخا
اورطيغا: مكايناش شي كلمة زوينة!!
ملاك: هه بالصحة لفطور
اورطيغا: مّا يا مّا وشكون راني نتسنى!!
ملاك: هههه
اورطيغا: شوية ونصوني عليك.. (قطع وهبط يقاد مزاجو عاد يهضر!!!)
وفاء: (كانت على اعصاابها من داكشي للي عاشت وحسات بيه وهي فالقبور خلاها غير ساااهية!! لدابا ممتيقاش كفاش وحدة بقرايتها وثقافتها وصلت ليها الدنااااءة باش دير هاد تخربيق؟! وتبع هاد طريق كانت ممرتاحاش ولكن خايفة تمشي لدارهم يجي عندها طليقها للي مبغاش يتفك منها وعاد دارهم للي بغاوها ترجع معاه حيت رغب وطلب والا رجعت لفاس خافتو يوصل ليها وهاد الايام غير صااعر كيقلب عليها كانت دار ملاك هي الأمااان بالنسبة ليها ولكن باغيا تبقى بوحدها!! جات ملاك من الخدمة بكري تغدات معاهم)
شنو خلاك تجي بكري؟!
ملاك: عييت والله كملت شي خدمة وطلبت نجي بكري
أمينة: (دخل رشيد مشات للكوزينة باش تقاد ليه لغدا حيت كيدي للخدامة يتغدااو ويتغدا معاهم) رشيد مي حلو وسهام بغاو يمشيو يعزيو فأمينة
رشيد: الخدمة مزيرة الزهرة خلي حتى لخميس
زهرة: واخ
رشيد: فلعشية نخرجو لمارشي
زهرة: صافي واخا (عطاتو غداتو ومشا وهي رجعت تكمل غداتها مجمعين.. كملو كولها فين تلاحت يتكااو)
ملاك: (منين علمها اورطيغا تلقا شي صاحبو ومن بعد ويهضرو وهي كتفكر واش حتى هو غيوقف ليها فهاد تسافيرة جهة كتقول ماشي من حقو وجهة مباغياش تخسرو ولكن غيعصبها الا حتى هو وقف ليها!!! شافت فوفاء كتشوف فسقف)
وفاء مالكي؟!
وفاء: (طرطقت كتبكي وملاك كضور عينها مفهمتش مالها!! بقات فبلاصتها كتسناها توقف من لبكى)
عييت بزااف املااك
ملاك: مناش؟!
وفاء: ندمت ندمت ندمت علاش تزوجت هداك لحمار من اللول بسبابو انا فهاد الحالة
ملاك: واش على داكشي للي دارلك؟!
وفاء: وهو دار وانا (زفرت) درت
ملاك: مفهمتش واش هو داك نهار عطاك لصاحبو ودابا باغيك تخرجي عندو!! والله مفهمتش واش هاد *** ماشي راجل لهاد الدرجة
وفاء: لوكان كان رااجل ميوصلنيش فهادشي تفوو ندمت ندمت املاك
ملاك: معليش دابا كولشي يفووت
وفاء: مكرهتش نمشي لشي بلاصة بووحدي
ملاك: سيري اصاحبتي محد عندك الحرية تمشي سيري وفكري مزياان انا ماشي كنطردك ولكن بعدا حتى عندك الحرية ماشي بحالي سيري وصفاااي مع رايك
وفاء: (بقات سااكتة كتفكر هادشي خاصها ديرلو حد 8 سنين دالفساد ودايرة كأنها ماشي مسلمة جلستها مع عائلة ملاك بيناتلها بزااف دلحوايج!! بقاو متكيين حتى سمعت ملاك كتجخر تبسمت من هاد المخلوقة قدات ليها راسها للي كان عوج وبقات هي غير كتفكر وتخمم!!!)
اورطيغا: (كان تلقا مع واحد كل عام كيتلقاو فهاد القنت، ماشي صاحبو وماشي عشيرو غير كان بيناتهم السلام وهاد المرة جا عندو تعرف علييه وبقاو جالسين كيصيدو الحوت بجوج كملو ومشا لاخر لاطونط ديالو اورطيغا شعل العافية وبقا كيشوية داك الحوت صونا على ملاك مجاوبتش كانت علماتو خرجت بكري من الخدمة حيت عياات صونات مو جاوب)
الوالدة!!
أمينة: امتى تجي اولدي
اورطيغا: علاش الوالدة؟!
أمينة: حيت توحشتك اولدي بغيت نشوفك ونهضرو
اورطيغا: بعد غدا الا كتاب
أمينة: ان شاء الله اوليدي، صافي تلقاني فالدار
اورطيغا: ان شاء الله (دار الدكة) رتاحيتي شوية
أمينة: الحمد لله اولدي (هضرتو كانت ناقصة دارت بكلام الحاج تخليه على خاطرو قطعت ودوزت نمرة زهرة للي كتبقى تفش عليها هموومها وتعاود ليها حيت لقات راحتها معاها...)
~~~~~~~~~~~~
نجية: دير عقلك احمزة راه الا وصلوها لرشيد غتنوض رويينة وحنا مشفنا من دوك الناس غير الخير
حمزة: هي للي قالت ليك هاكا
نجية: اه هي وشكات على مها المرة جاية تشكا على باها
حمزة: لا لا مزيان نيت!! نساات كولشي غير قبل منعرفو ديك الموصيبة حاملة كانت مدوزة معايا الحب والغرام وتشد فلكادوياات
نجية: اسكت اسكت غتسمعك مرتك راه حراام هادشي للي كدير واش مرتك قرب شهرها ونتا مزال داير عقلك فملاك
حمزة: ندير حيت من اللول لوكان موقفتوش فيها وكان راها هي دابا للي حاملة. هي لي تكون مرتب
نجية: (كتندب حنوكها) أويييييلييي استغفر الله واش هبلت؟!
حمزة: دابا شنو بغات منعاودش نتعرض ليها واخ ولكن ونشوفها مع شي حد غنشوهها نقتلها ونقتل للي معاها
نجية: ونتا شغلك؟!!!
حمزة: اه شغلي نهار يقولي راسي بعد غنبعد دابا غنوريها كفاش تبقى تشكى على ديك بمادنة ديال مها للي معمرالها راسها انا نوريها الوجه لاخر
نجية: هاا ودني راه متلقى غير رشيد قدامك راه جبدلو عينيه ومتجبدلو بناتو
حمزة: داك السوق خرجي نتي منو
نجية: هاا ودني احمزة!! والا عاودو تشكاو ذنوبك على راسك
حمزة: صافي خرجي دابا خليني نعس تابعاني الخدمة بلاتي وقول لهاديك متعتبهاش باغي نعس!!!
~~~~~~~~~
ادم: (كيهضر فالتيليفون) تندير هاكا فيها حيت عارف هي للي غدير بزاف دلحوايج وانا تنشووف.....
هههه لي لقبر ولي الحبس...!!!
اورطيغا: (كمل غدااه جمع داكشي للي تماك، لبس بروطكان ديالو ومشا كيقلب على شي حانوت يشري خبز هز صكادوه للي فيه داكشي للي مهم وتمشا هاز عصا ماشي من طريق باينة باش يرجع وكان عارف حتى بلاصة الحانوت ودايرها حجة وزيارة..
بقا ماشي سااكت مدارش حتى موسيقى براكة غير دماغو خداام يحاجي ويفك.. وصل لدوار خدا نص دجاجة وخبزة وشي سقاطة ورجع ماشي بشوية وصلو ميساج من عند ملاك صونا عليها)
كنتي ناعسة
ملاك: (كانت فبلاصتها فسطح) اممم
اورطيغا: وايلي 8 دالليل هادي؟!
ملاك: لا فقت قبيلة غير جاو شي ضياف وبقيت معاهم وغير سلت دابا باش نهضر معاك
اورطيغا: شكون هاد ضياف عاود
ملاك: ههه من العائلة
اورطيغا: باباك ولا ماما
ملاك: بابا
اورطيغا: اممم شحال عندك ديال عمك وعماتك؟!
ملاك: كاين 3 دعمامي و2 عماماتي وجدي وجداتي ميتة وكاينة مرتو كنعيط ليها مي حلو
اورطيغا: مي حلو!! اممم مزيان نتوما شلوح
ملاك؛ هوما ههه انا كنفهم الشلحة وكنعرف شي كليمات ولكن الهضرة مطلوقة لا
اورطيغا: وماماك؟! واقلة ماشي شلحة
ملاك: باش عرفتها
اورطيغا؛ شحال هضرنا انا ياها باينة فيها غير من كلامها ماشي بحال باك
ملاك: بالصح (جا يهضر قبل ميجبد تريكة مها) امتى ترجع
اورطيغا: علاش؟؟
ملاك: (تبسمت) غير باش نجي لفاس نخلص هداك للي صاوبلي الطموبيل
اورطيغا: فين ودنك اجحا ها هي باش تقولي توحشتك تدوري دورة قد هاكا علاش عليك ابنتي!!!
ملاك: هههه
اورطيغا: شنو دابا توحشتيني
ملاك: لاااااااااا
اورطيغا: وطلقي معانا اللعب شوية
ملاك: شنو كدير دابا!!
اورطيغا: والو راجع من دوار جبت فيه شي حاجة نديره لعشا
ملاك: شنو غدير لعشا
اورطيغا: دجاج
ملاك: ݣزار معشي باللفت!!
اورطيغا: ههه الواحد يبدل مرة مرة
ملاك: هه وغتطيب دجاج بلا متكون ملحو وداير فيه الحامض
اورطيغا: هاد السيد للي كيبيعلي كيكون مقاد هادشي
ملاك: مزيان يعني داير بحساب الناس لي كتجي تخيم تماك
اورطيغا: اممم عرفتي اكتر حاجة مشهيها دابا هو نتي
ملاك: كفاش انا!!
اورطيغا: باغي نشوييك
ملاك: (بقات مخرجة عينها مكتهضرش) لحمي قاسح
اورطيغا: من داك الناحية متخافيش راني ݣزار وحافض لحم متنشوي حتى ترطبو مزيااان
ملاك: (بدات الامور كتخرج على السيطرة) ياااااه امراد صافي صافي
اورطيغا: ههه مال مك تنهضر على لحم وشوا (ديك شوا كيورك عليها) فين مشا عقلك
ملاك: اممم مهم انا نهبط
اورطيغا: متعطليش وطلعي نكملو هضرتنا
ملاك: فاش هه
اورطيغا: نقولك العطرية للي تندير
ملاك: ههه بلاش بلاش انا اصلا مكنطيبش لحمي عاااصي..
اورطيغا: وانا سناني ماضيين غير متهزيش الهم...
أصبحنا وأصبح الملك لله..
كانت كتفطر مع مها عندها جوج مواضيع مهمييين بزااف بغات تهضر معاها ديال سفر وديال الدار وللي باقية براسها كتفكر فيها حيت معندهاش شي مبلغ للي كبير!! ولكن مصالحش تهضر باقية العائلة وخاصها تختار الوقت باش متسمعش لا، واليوم لاربع وغدا كحد أقصى خاصها تسجل معاهم الا كانت غتسافر خرجت للخدمة لقات باها كيتغاوت مع للي كيجيب ليه القهوة كان جابلو شي وحدة مسوسة حتى باها ماشي الوقت المناسب ركبت فطموبيلتها حتى مراد مولاتش هضرت معاه فهادشي!!
مشات صاݣت لخدمتها دخلت لقات تقريبا كولشي من للي كتعرفو ماشي حتى من صاحبتها للي بولادها بغات تمشي تبدل الجو وهي ضرووري خاص تاخد الأوكي من عند واليديها صونات على مها لقاتها مشغولة مع الدار وشقا كتفكر كفاش غدير ليها صونا تيليفونها حتى كتلقاها أمينة!!! استغربت بزااف
ملاك: احم (جاوبت) الو
أمينة: اهلان اهلان بلغزاالة ديالي
ملاك: (تبسمت) سلام خالتي لباس عليك
أمينة: الحمد لله ابنتي ونتي لباس عليك كدايرة مع الخدمة
ملاك: الحمد لله اخالتي ونتي كيف بقا الخاطر؟!
أمينة: الحمد لله ابنتي هاحنا..
ملاك: (معرفت متقول) اوا الله يرحمو
أمينة: امين، مزال متجي لفاس؟!
ملاك: سلات الخدمة عندي تماك دابا رجعت لصفرو
أمينة: فيها خير اوا بنتي ان شاء الله نهار الخميس اجي مع ماماك وخوتاتك
ملاك: ان شاء الله ضرووري (جاتها فشكل تعرضها شخصيا)
أمينة: ان شاء الله ابنتي ياله بلا منطول عليك نخليك تخدمي
ملاك: ربي يخليك اخالتي بسلامة (قطعت، عاجبها الحال غتشوف بعدا مراد هدا الا رجع اما هو راه عقل لارووب شافت مصوناش عليها يكون مزال مفاق!! صونات قطع ورجع صونا عليها)
صباح الخير
اورطيغا: صباح النور
ملاك: صايݣ؟!
اورطيغا: راجع للدار قربت لفاس
ملاك: اهااه!! (سكتت جوج ثواني) مقلتيلي والو!!
اورطيغا: عرفتي واحد شتا هربت منها وأصلا واحد لبلان فالحومة خاص نطرقو
ملاك: مزيان، غير ميبقاش فيك الحال مرة أخرى الا درت شي حاجة ومعلمتكش
اورطيغا: راه كنت غنوصل ونصوني عليك
ملاك: مزيان، مهم عندي شي خدمة نكمل ونهضرو
اورطيغا: (قبل ميهضر قطعت عليه رجع صونا مجاوبتش اما هو عقلو مبرزط خاصو يرجع للحومة على حساب شي شغاال...)
ملاك: (عصبها كما هو كيبغي يعرف عليها كولشي حتى هي هكاك والكلام غيمشي عليهم بجووج!! ولبارح بقاو مجمعين لوقت معطل بزااف علاش مقالها والو رجع صونا مجاوبتش)
زينب: زين بقاو جوج بلايص ويوسف الا تسجل دابا غيدي معاه مرتو كما موالف زربي على راسك الا كنتي غتمشي
ملاك: بالصح!! (فكرت شحال جبدت من صاكها 200 درهم) سيري سجليني انا نمشي نجيب فلوس
زينب: قلتيها لباباك؟!
ملاك: مزال ولكن غنعرف كفاش غير سيري عطييهم (مشات خرجت لݣيشي تيرات فلوس ورجعت كملت ليهم الفلوس.. كملت خدمتها ورجعت للدار معصبة حتى هو مرجعش صونا وغيكون وصل لفاس!!
وصلت لدارهم كما العادة تغدات وبقات متكية حتى نعست فاقت لقات وفاء باغية تمشي حساتها فشكل ماشي كما موالفاها ولكن مبغاتش تحكر حتى وتبغي هي وتعاودلها، توادعات معاهم ومشات باش توصلها ملاك للمحطة غتمشي لفاس ومن تماك غتمشي لاݣار ولا الساتيام مزال مقررت، ومع كان مزال الحال مهضرش باها)
وفاء: والله مسخيت بيك عارفاك حتى نتي بغيتي تفوجي مكرهتش تمشي معايا ولكن
ملاك: معليش غطولي؟!
وفاء: شي سيمانة بغيت غير رتاح فراسي
ملاك: سيري رتاحي (تسالمو رجعت فحالها من حسن حظها فاش رجعت لقات باها برا القهوة واقف هو وخوه كيظحكو هبطت ومشات عندهم)
بابا!! عمي!!
(باستلو يدو عمها دخل) شوفي نقولك واحد الحاجة ومتقلقش ولكن قبل خاصك تقولي اه والا قلت لا والله غنكتائب ونمرض
رشيد: الله يسمعنا خبار الخير
ملاك: الخدمة دايرين رحلة وكولشي غيمشي (صونا تيليفونها شافتو كان هو قطعت الصوت) زينب كتصوني ديك السيدة للي خدامة معايا
رشيد: كملي
ملاك: مهم (تشجعت) بابا بغيت نمشي معاهم عفاك ابابا والله الا قنطت كولشي ماشي غير يوماين عفاك ابابا
رشيد: يوماين!! بزاف بزااف ابنتي
ملاك: عفاك ابابا مبزااف واالو (وقف حداهم حمزة) مهم نتا غير فكر وحتى ترجع ورد علية
رشيد: ابنتي راه متنقدش نخليك تسافري بوحدك
حمزة: فين بغيت تسافري (مجاوبتش)
رشيد: راه واخا مع الخدمة ولكن يوماين
حمزة: لا لا واش مكتسمعش اعمي شنو وااقع فالدنيا متييقش فالبراني حتى تسالي نتا وديهم يخيمو بوحدها!!!! تخاف اعمي ومكاينة ثقة
ملاك: (عصبها) ونتا ماالك باش دخل اش حشرك بيني وبين بابا
رشيد: (نهض فيها) ملاااك سيري للدار
ملاك: وااا ديها فراسك ماشي شغلك فينا تفوو على حيوان (تمات ماشي معصبة وصلت الدرب كتسمع خطوات جرا تيليفونها كيصوني قطعت الصوت)
حمزة: علاش كتهضري معايا هاكا!!
ملاك: (معصبة) نهضر كما بغيت بعد مني ابنادم واش مكتفهمش!!! غير خاشي راسك فية ودير فراسك النفس وقلب علية
حمزة: أواااقفلك فيها أوالله متعتبييه من هاد لباب
نجية: حمزاااااا
حمزة: (مشات ملاك مكرهة وهو تابعها ممسوقش لمو حتى دخلت وزدحت لباب عليه بكل جهدها)
انا نوريك باغية تسافري معاه!!! والله يا مك حتى نديرلك لعصا فروييضة نوريييك مزيااان شكون انا!!! (شاف باها جاي وهو يتم داخل لدارهم بالزربة..)
اورطيغا: (الصوت كان مشوش ولكن غواتها بعد مني ودير النفس وصوت دري غيكون غير هو قطع ورجع صونا عاود مكتجاوش!!! زاد تعصب كمل مع السمسار شي حاجة ومشا لطموبيلتو شد طريق لصفرو كيصوني مكتجاوبش!!! صونا على وفاء لقاها فطريق لفاس وأكداتلو ملاك خرجت وصلتها يعني كانت برا منين كانت كداابز!!!!)
~~~~~~~~~~~
رشيد: (دخل للدار) ملاك ملاااك (خرجت من الكوزينة فين كانت غتشكى لمها ومشات عندو لبيت نعاس فين سبقها مكرهة غتفرݣع.. كيغوت عليها) شنو داكشي..
ملاك: بابا قبل متهضر هو اش دخلو فينا انا وياك موضوع خاص بين أب وبنتو هو لاش كيفتي فرايو؟! شكون اصلا هو باش يجي يهضر معايا؟!
رشيد: واخا هكاك، هو بحال خوك
ملاك: ماشي خويا ومكنعرفوش ياك انا عندي غير خويا واحد هو أنير علاش يجي يهضر ويدخل فشي حاجة مسوقوش فيها
رشيد: (عزيز عندو حمزة راه كبر مع لبنات ولكن قنعاتو) واخا هكاك متغوتيش فالزنقة
ملاك: (بقات كتشوف مجننة واعصابها غيتفرݣعو) بابا عفااك خليني نمشي نساافر راه كولشي فالخدمة ماشي كل عام كنقولهم لا لا لا لدرجة شي وحدين كيحسابلهم معنديش الفلوس كيقولولي لبنات نخلصو عليك وانا اصلا والله حتى باغية نسافر بغيت نشوف البحر اعباد الله
رشيد: قولهم بابا كيخاف علية ماشي مكيبغينيش وماشي معندناش
ملاك: ومتخافش علية نموت بالقنط هنا؟؟؟ ابابا عفااك غير يوماين، سبت وحد صاافي
رشيد: (بقا كيشوف دخلت زهرة هازة أنير ناعس مكانتش عارفهم تماك)
اجي شوفي بنتك
ملاك: وعلاش ماشي بنتك نتا؟!! انا جيت كنهضر معاك حيت ميمكنش ندير شي حاجة بلا بيك
زهرة: شنو واقع؟ وهضرو بشوية الولد ناااعس
ملاك: اعععع (زادت تجننات اورطيغا غير كيصوني قطعت عليه) بابا بف!! (ضارت عند مها بقلة صبر) ماما كاينة رحلة ماشيين ليها فالخدمة لأقشور والجبهة
زهرة: خلي لبنت تمشي ارشيد
رشيد: (شاف فيها مخرج عينيه زعما مزال حتى مكملت الهضرة ومناقشوش هادشي)
ملاك: (براسها بقات غير كتشوف راه موجدة رغيييب وطلييب وهي دغيا قبلت!!)
زهرة: (كتشوف بنتها مزنݣة وباينة معصبة بزااف وعينيها خارجين)
ملاك: (محست حتى بقات كتبكي) بغيت نفوج غير شوية غنمووت بالقنط هنا (جلست ف ق النموسية)
هنا دموعها سلاو معاهم بجووج رشيد عارف بنتو مطيح الدمعة غير الا وصلت ليها العظم
زهرة: رشيد صافي ياك ماشية مع الخدمة وراك شفتيهم ناش معقولين صافي خليها تمشي ماشية حتى زينب؟! (حركت لوخرا راسها باه) ها السيدة براجلها وولادها غتكون معاها معندنا مناش نخافو ارشيد
رشيد: انا راه غير كنخاف عليها
زهرة: بنتك بعقلها معندك مناش تخاف للي دارو ربي هو للي يكون وان شاء الله تفوج شوية وترجع
ملاك: (دايرة يدها على وجهها)
رشيد: (بقا كيشوف فبنتو)
زهرة: سير رجع للقهوة من بعد ونهضرو (خرج ومشات حدا بنتها للي دغيا هزت راسها كتمسح دموعها) بلبكى ݣاع
ملاك: اوا على الله يبغي (تبدلو ملامحها كتمسح دموعها وحتى نبرة صوتها بحال ݣاع مكانتش كتبكي) خاصني نشري حوايج
زهرة: هاي هاي هاي على سليعفااانة كيف تيسفاات!! كنتي كتمثلي علينا؟!!!!!!
ملاك: ههه (هي بالصح بكات بالقهرة, ولكن كتبغي تهرب من جو دراما) مرة مرة الواحد يلعب على العاطفة ديالكم..
اورطيغا: (وقف فالدخلة ديال المدينة كان الحال بدا يظلام رجع كيصوني عليها)
زهرة: (تيليفون بنتها موقفش هزاتو كتلقى اسم زوبيدة استغربت جاوبت)
اورطيغا: (بعصبية) مال مك متتجاوبيش؟!!!
زهرة: الو؟!؟؟
اورطيغا: (سكت هدا ماشي صوتها يا مها يا مرت عمها!!) فين ملاك
زهرة: انا مها شكون نتا
اورطيغا: (بقا ساكت شحال معرف ميقول وعاد باديها بمال مك!! سمع الخط تقطع علاش مها لي جاوبت فين هي زاد صاايݣ مشوش عليها!!)
زهرة: (بقات كتسناها، خرجت من الحمام لاوية عليها فوطة) شكون هاد زوبيدة للي كظل تصوني عليها
ملاك: ها! غير واحد الزمرة (هزت تيليفونها خرجت عينها منين لقات مها يالخ جوباتو ومدة الاتصال 12 لثانية!! شافت فيها)
زهرة: شكون هدا؟!!
~~~~~~~~~~~~~
غيثة: (دازت 24 ساعة بدا راسها كيضرها وصحتها طااحت وفبالها غير ادم للي لبارح سالات معاه محست غير ديبلوكاتو وصونات عليه مجاوبش حطات التيليفون مكرهة رجعت كتبت ليه ميساج)
شنو سميت داكشي للي تتعطيني؟!!!
ادم: (قرا الميساج وحطو لبارح كان مندامج معاها كره ديك أمينة للي تدخلت من الاساس مكيحملهاش هي وولدها رجعت صونات جاوب) وي غيثة
غيثة: جاوبني
ادم: شنو بغيتي؟!
غيثة: راسي تيضرني
ادم: اجي عندي لقهوة****
غيثة: واخا (قطعت ناضت لبست حوايجها دارت ميكاب خرجت واخا مها عيات تعيط ليها تمشات لراس الشارع وشدت تاكسي ماشية عندو)
~~~~~~~~~~
ملاك: واحد السيد تعرفت عليه
زهرة: وشنو داك الأسلوب باش كيهضر معاك شكون هدا للي مخلياه يتعصب عليك هاكا ومزال مدرتو بالطاجين ميتحرق!!!
ملاك: (بلعت ريقها) علاش شنو قال؟!
زهرة: شكون هدا بعدا؟!
ملاك: ماما راني عاودت ليك عليه داك نهار يمكن معصب حيت مبغيتش نجاوبو هو بلعكس كيعاملني زوين وباحترام
زهرة: متقوليش هو للي باغيا تسافري معاه
ملاك: لا لا اماما والله ما هو اويلي نجلس يوماين معاه مالي حماقيت والله ما هو اقسم بالله مع الخدمة وهو بعيييد على خدمتي وعلى هاد المسافرة
زهرة: اوا!!
ملاك: اواااا هاحنا كنتعارفو بعدا هو اللول نهار يكتاب يجي لدارنا
زهرة: (بقات غير ساكتة سمعت كيعيطولها) مزال مكملنا، ومزال غنتفااهمو على هادشي (مع خرجت صونات عليه جاوبها)
اورطيغا: (بحذر) الو!!
ملاك: وي مراد
اورطيغا: خرجي عندي خرجي...
ملاك: فين غنخرج امراد!! مصالحش
اورطيغا: كفاش مصالحش!! فين مك بعدا؟!
ملاك: خرجت شنو قالت ليك فاش جاوبااتك!!
اورطيغا: والو نتي واش قالت ليك شي حاجة ياكما غوتت عليك؟!
ملاك: لا ولكن شنو قلتي؟!
اورطيغا: شنو واقع معاك هاد نهار؟! علاش مكنتيش تتجاوبي؟! عصبتي جد اصل مي!!
ملاك: بفف(جلست فوق النموسية) والو عصبتيني نتا قبيلة حنا تافقنا داك نه...
اورطيغا: داك الز*** شنو بغا منك؟!
ملاك: (تخلعت) شكون؟!
اورطيغا: راكي عارفة علامن داوي، شنو بغا؟!
ملاك: (مفهمتش منين جاب هادشي!!!) والو بغا يهضر مخليتوش شكون قالها ليك؟!!
اورطيغا؛ خرجي عندي
ملاك: مصالحش امراد راه غير شوية تناݣرت مع بابا وعاد انا مدوشة وماما كتسولني شكون هدا للي كيغوت فالتيليفون
اورطيغا: علاش مقراتش سمية؟!
ملاك: (خرجت عينها) كاتبة سمية مفهمتهاش، واش نتا هنا؟!
اورطيغا: شنو قالك داك "*** هضري ابنادم ولا غاندخل على مك فداك الدار
ملاك: والو امراد واالو، راني تبريت منو عند ماما ومو وحتى بابا قلتلو يقولو يبعدني
اورطيغا: كفاش قلتي لباك يبعدك علاش هو عارف تابعك وساكت!!!
ملاك: ماشي هكاك ولكن هو داير فيها خويا قدامو
اورطيغا: كفاش خوك قدامو ونتوما كنت مخطوبين
ملاك: (تزيرت) هو واخا تفارقنا بقينا عاديين جيران حيت أنا للي فرتكت ديك الخطوبة
اورطيغا: تخربيق !!
ملاك: (تزمتات) هو بقا معاهم عادي زعما محقدمش قدامهم فهمتي داكشي باش قلت لبابا انا ميبقاش يقولي حتى السلام !!! (غير كيسمع كيشوف فقهوة باها كان جالس هو وشي دراري كيبلاني فييه زطمة وحدة يكسيري يجمع ال*** كامل وحتى باها)
ملاك: واش بالصح جيت؟!
اورطيغا: اه منين سمعت داك **** تيهضر معاك جيت وعاد مك فاش جاوبت خفت يخاصمو عليك
ملاك: بغيت نسافر وبابا
اورطيغا: مخلاكش عاود
ملاك: بغا
اورطيغا: (هز حواجبو متفاجئ!!) ڤري؟!
ملاك: (كضور عينها كتسناه يهضر) اه
اورطيغا: (حاضي حمزة شاف باها خرج من تماك ووقفو كيهضر معاه)
ملاك: مراد!!
اورطيغا: انا حدا الدار باقي عااس الا صلاحلك تخرجي بغيت نشووفك
ملاك: صافي واخ...(قطعت مفهمتش واش بغاها تسافر ولا لا!! هي مسافرة مسافرة ولكن كتفضل ميكونش بينهم شي خصام باش تمشي بنفسية زويينة بقات كتفكر شافت فأنير ناااعس ناضت لبست حوايجها مرجعش صونا عارفة راسها مغتخرجش عندو راه مستحيل!! عيطت ليها مها مع مكانوش دراري من غير براهش جمعت شعرها للي فازݣ سفنجة وخرجت هازة تيليفونها)
شنو اماما
زهرة: اجي عاوني شوية العزري وقشريلي بطاطا، حقا غدا غنمشيو لفاس
ملاك: اه عيطاتلي خالتي أمينة عرضاتنني حتى انا
زهرة: وشتي صواب كداير ماشي بحال معزيتيهااش حشوومة ݣاع خوتاتك عزاوها نعيمة من لعيه عيطت
ملاك: واش هي للي قالتها ليك؟!
زهرة: (دخلت سهام سكتو هاكا موالفين، شافت فبنتها للي كتقشر بطاطا وكطير منها النص) ملاااك (خرجت عينها فيها)
ملاك: شنو اماما!!
سهام: ويلي استغفر الله شنو خليتينا نقلييو؟!!
ملاك: (عطاتها لموس) سمعت أنير كيبكي!!!
(هربت ليهم من تماك وسهام كتعاتب زهرة باش تزير مع بنتها تزيدها للكوزينة طيب ميمكنش فعمرها ومتعرفش تقشر حتى بطاطا وزهرة جاها كلام معقول حيت راااخية لملاك بزااف...)
~~~~~~~~~~~~~~
اورطيغا: (حتى كيبغي يهبط من الطموبيل يقصدو ويترااجع داير بزاف دالاعتبارات اولهم غيخلق لملاك المشاكل مع باها وعائلتها حيت غيتعرف علاش غيدابز معاه وعلم الله لاخر شنو غيبدا يخرج من فمو !! قادر يضارب معاه وميخاافش ولكن راه فوسط حوومتو وحدا باها للي كيعرفو ويصدقو فحوايج خايبة اهم حاجة منها هي غينوضو ليها مشاكل وعارف باها مزير معاها..
لثانية جا فبالو شنو هادشي كيوقع معاه واش بالصح راه تابع بنت جاي لمدينتها واخا مغيشوفهاش عاس حدا دارهم؟!! لهاد الدرجة اشمن سطاج وصلو مع ملاك؟!!
حرك راسو كينفض الافكار حمزة تحرك من تماك جا ماشي وهو يعيط ليه باين ملاك ولاخر حاني الراس كيسمع لرشيد)
رشيد: ولدي الله يرضي عليك نتا عزيز علية وكابر مع بناتي ولكن ملاك عندي بوحدها متعاودش دير بحال قبيلة
حمزة: عمي انا غير خفت عليها سفر بوحدها وبلا بيكم قاسحة للبنت واش مكتسمعش شنو واقع
رشيد: اييه ولكن هادشي نهضرو فيه انا ومها واخا ولدي
حمزة: عمي انا ملاك راه كبرت حدا عيني الا دخلت غي حيت بناتك راه فمقام خوتاتي للي معنديش وكنحس انا خوهم
رشيد: حنا كولنا عائلتك ولكن... متعاودهاش الله يرضي عليك نهار نبغيك دخل غنجي نقولهالك
حمزة: واخا عمي (مشا رشيد وهو بقا وااقف باين معجبوش الحال يعني هي للي غتكون عمرااتو مفهمتش ياك هو مزير معاهم علاش جا كيهضر معاه!! واش غيخليها تساافر!!! مشا فحاالو واورطيغا غير حاضي حتى جاه أبيل من عند ولد الحومة..)
ملاك: (دخلت عندها مها غوتت عليها على حساب تقشار بطاطا وأنها خاصها دير عقلها شوية فطياب ميمكنش تبقى هاكا على الأقل هاد لحوايج صغار تعرفهم صونا اورطيغا ومها مزال محيحة، وهي خاصها تجاوب ضروووري راه كاين فالحومة!!)
ماما ندخل لطواليط
زهرة: واش انا كنه.. (وقفت ملاك كدير حركة راه مزيرة ودخلت للحمام تابعاها مها كتنݣر) ݣاع خوتاتك كانو كيقراو ويتعلمو الا نتي
ملاك: بففف (جاوبت بهمس) ألو!!
اورطيغا: (بقا ساكت كيسمع مها كتغوت ولكن الكلمات مواضحينش) شنو واقع عاود؟!
ملاك: غير ماما واش نتا مزال حدا الدار؟!
اورطيغا: اه ولكن متخرجيش.. مشا لحال
ملاك: (عحبها الحال مها خبطت عليها الباب)
اورطيغا: شنو درتي؟!
ملاك: هه معرفتش نقشر بطاطا
اورطيغا: الا!! ميمكنش؟!
ملاك: (جات تحلف وهي تفكر راسها فطواليط) اه
اورطيغا: باينة هاربة فشي طواليط
ملاك: ههه بحال داكشي..
اورطيغا: (تبسم بلا نفس) حق الرب متنفهم فيك واالو
ملاك: صباح معجبنيش الحال تسافر ومتقولهاليش
اورطيغا: محيت مكنتش ناويها, كنت مزال باقي اليوم ولكن صونا علية الخدام وكان ضروري خاص نرجع
ملاك: ولو!!!
اورطيغا: اوا ونتي؟!
ملاك: شنو انا!! للي كنديرو كنقولو ليك كما وصيتني
اورطيغا: كما وصيتك ماشي حيت باغية
ملاك: اممم لا وحتى باغية
اورطيغا : (زفر معرفش شنو معصبو واش حمزة واش مجيانو هنا واخا عارف راسو مغيشوفهاش مهم يطمأن مفهمش!!)
مهم انا غرجع لفاس
ملاك: واخا
اورطيغا: واقلة ماماك مشات
ملاك: اه خرجت حيت بقات كتغوت وفاق أنير (حلت لباب) صافي انا نقطع
اورطيغا: متوصلينيش؟!
ملاك: ههه مكرهتش نكون معاك ݣاع
اورطيغا: اممم بالصح؟!
ملاك: (بقات مفرنسة) تسنا نطلع لسطح راه فأي لحظة غتهجم علية راه ضيعت ليها كيلو بطاطا
اورطيغا: ههه عالم نتي.. (ضرب الدورة فالرومبوان ورجع شاد طريق لفاس، شي 5 دقايق عاد هضرت) فين هادشي كامل
ملاك: غير لبست شالي وبينوار باش نطلع لسطح
اورطيغا: (بقا كيسمعها ويدورها فراسو) مزيااان.. مزيان متزوليش الفولار حتى فسطح امتى درتيه؟!
ملاك: من السادس تقريبا... ( بقات كتعاودلو قصة من خيالها كفاش بغات الفولار من صغر وكانت هي للي قررت ديرو.. بقاو مجمعين وهي كتسناه يرد عليها على سفر ومعاودتش جبدت الموضوع حتى يهضر هو فيه...)
اورطيغا: (وصل لدار مو معندو ݣانة يمشي للحومة مقطعش طلع للدار مع حل لباب لقا مو واقفة كتسناه مكانش عارفها جات كان داير لكيت) امتى جيتي؟!
(ملاك عضت شنافتها كضور عينها)
أمينة: غير قبيلة
اورطيغا: بوحدك؟!
أمينة: واه (حط سوارت بلاصتهم) نحط لعشا اولدي؟!
اورطيغا: ندوش نصلي ونجي.. (دخل لبيتو قبل ميسد لباب) ملاك من بعد ونصوني عليك
ملاك: مراد صافي طلقها متبقاش مقلق
اورطيغا: سيري هبطي من تماك حتى نصوني عليك وطلعي
ملاك: واخا ولكن طلقها
اورطيغا: (بعصبية) شنو جامع باش نطلق؟!
ملاك: (شافتو تعصب) صافي صافي ياله بسلامة حجاارك يشدووك ونتا غير معصب
اورطيغا: هبطي دابا نتي (قطعت حيد لكيت هز حوايجو دخل دوش خرج صلا المغرب ولعشا وخرج عند مو)
هانتي هنا؟!
أمينة: وفين بغيتني نمشي ولا مبقيتش حامل تشوفني
اورطيغا: مقلت والو غير سولتك
أمينة: تاامااال طاسييلتك غير ݣالب علية كمارتك علاه انا كرهت يكونو عندي والدين مݣادين مشفتنيش داخلة لتماك بحال شي يتيمة معندي حد
اورطيغا: (ببرود) عندك انا براكة عليك
أمينة: اوا ومّا مشتيش كدارت
اورطيغا: خطينا من داك التمثيل ديال جوج دريال
أمينة: (سكتت كتشوف فيه وهو شاد التيليكموند كيقلب على الكورة.. غتسكت حيت هاد الموضوع غير غيدابزهم) نحط لعشا
اورطيغا: اممم (دازت من حداه ناتفااه رجع راسو اللور كيقاد فشعرو تمت داخلة حاطة لعشا وجلسو كياكلو ساكتين حتى صونا تيليفونو شافها كطل وراها)
هاد ولد ختك فايت فيه كان لسقة
أمينة: عمر؟! على مزيناتو داك لوليد اولدي شحال فرح منين عرفك وحاامق يجي عندك
اورطيغا: (هز حاجبو فيها) راه راجل بحالي بحالو اش غيحمااق ولا يݣجدر
أمينة: ههه وا بغا يزيد يعرفك اولدي
اورطيغا: سبحان الله هاد المحنة دالغفلة معنديش معاها
أمينة: لا لا نعيمة ماشي كيفهم بعدا منين جلست وهي تطلب فسماحة وتبوس يدي وراسي وهكاك مّا اما لوخرين مسݣيين بمغرف وحدة
اورطيغا: اممم انا غنوض نعس غدا غنبدا الخدمة بكري ومغنسالي حتى الليل
أمينة: غدا غتجي عندي زهرة وبناتها (ضار شاف فيها بانتباه حرك راسو باه)
أمينة: عرضت لبنات وحدة بوحدة
اورطيغا: (كمش عينو فيها وهي كتبسم) لا حولة (وتم خارج داي معاه طبسيل لعشا للكوزينة عاد مشا الحمام هي ناضت تجمع داكشي خرج عندها)
اورطيغا: انا نصيفطلك الدري يتقدا ليك فصباح شنو تبغي
أمينة: الله يرضي عليك اولدي.. (هي دخلت لبيتها وهو دخل لبيتو نيشان مصوني على ملاك يهضر شوية باش ينعس بكري...)
اورطيغا: باش تتعمري وقتك فالليل
ملاك: اممم (كتفكر) بيك
اورطيغا: قبل منبداو نهضرو
ملاك: افلام مسلسلات عندي طابليط كنتفرج فيها
اورطيغا: شنو النوع للي تتبغي
ملاك: كل مرة وشنو
اورطيغا: عندك نتفلكس
ملاك: لأ (جاها ميساج فيه جيمايل والكود ديالو) ميغسي
اورطيغا: باش نبقاو نتفرجو بجووج
ملاك: هه اوكي متبع شي مسلسل؟!
اورطيغا: دابا تنتفرج فواحد "panshee" واخا طويل زوين غير هو الا بغيتي تفرجي خاصك تكوني بوحدك ودايرة لكيت وباك ميكونش فالدار
ملاك: (هزت حاجبها) علاش؟!
اورطيغا: (متبسم) فيه القرطاس والاكشن
ملاك: (ممتيقاهش) اممم (بقا كيصيفط ليها عناوين المسلسلات كملو جموع حتى جاها نعاس هبطت وحتى هو غينعس بكري دخلت وتكات فالسداري ضرها راسها علاش لدابا مجبدش ليها حس سفر واش زعما الأمر منتاهي عندو ومغتسافرش خافت تفارق معاه على حساب هادشي!!)
~~~~~~~~~~~
يوسف: (دخل للدار هو وخديجة هي طلعت تبدل حوايجها دايرين ليهم الخاطر يجلسو معاهم هاد الايام قبل ميسافرو لمراكش، قلب بعينيه) فين غيثة؟!
الغالية: (مشوشة عليها بزاف حيت مكتجاوبهاش.. جاوبت علدي) خرجت عند شي صاحبتها
يوسف: شكون؟! قبيلة مبغاتش تخرج معانا قالتلي مريضة!!!!
الغالية: راه جات صاحبتها حتى لهنا وخرجتها بالزز
يوسف: بالزز!! (دار التيليفون فودنو وجاوبت) فينك
غيثة: انا جاية اخويا
يوسف: فين كنتي
غيثة: راه قلت ليك انا قربت للدار (قطعت وشافت فادم) الا بغيتني نعاود نتلقاك متعاودش هداكشي
ادم: واش نسيتي راه نتي للي بقيتي تتبوسيني اللولة!!
غيثة: (سكتت حيت معاقلاش) واخا انا منعاودش
ادم: (لعب بصبعو فوجهها) ولكن عجبني الحال (باسها بوسة صغيرة فشنايفها) تتعجبيني اغيثة
غيثة: (بعدت راسها بشوية) خويا تيتسناني ادم
ادم؛ غدا شوفي كفاش نتلقاو
غيثة: واخا (كانت قريبة للدار خرجت من الطموبيل دايخة كتحاول توݣض عاد تمشات لدارهم متبعها ادم للي حتى دخلت عاد مشا دخلت للدار وهو يوقف عليها يوسف مخنزز ياله غيهضر بعصبية شافت فيه)
بفففف البوليس عاود شنو شنو بغيتي؟!!
غيثة: بففف البوليس عاود شنو شنو؟!!؟
يوسف: (مصدوم فيها عمرها هضرت معاه هاكا) كفاش؟!
غيثة: شنو بغيت ايوسف!!! عيانة باغا نعس علاش ديما واقف علية هاكا بابا ومتيديرش هاكا ها هي ماما متتقول والو علاش نتا بالظبط غير خااانقني فحيااتي!!!!!
يوسف: (بقا كيقرب ليها بغات تبعد وهو يشدها من عنقها الغالية ناضت كتجري وحتى خديجة يفااكو)
غيثة: طلق مني!!! طلق ايوووسف
يوسف: (بعصبية كيقربها يشمها واش شاربة كامية!! ريحتها عادي باغفان ديالها!! دفعها من عنقها مشات معنقاها مها)
الغالية: شنو هاد الاسلوب تدير مع ختك؟!! (مرضااتش كتشوف فخديجة وتشوف فيه) هاكا انا ربيتك تضرب ختك صغيرة وهي مدايرة والو
يوسف: فين كنتي؟!
غيثة: (كتبكي جهلت) ماشي شغلك نكون فينما بغيت شكون نتا للي تهضر معايا وتحاااسبني
يوسف: (مصدوم فيها هي للي عمرها حتى هزت العين فيه، غوت عليها)
فين كنتي؟!!!!!!
غيثة: ماشي شغلك (قالتها بشوية شادة عنقها) حماار (طلعت لبيتها والغالية شادة ولدها كتعاتبو دخلت لبيتها وسدت لباب بالساروت بقات كضرب فوجهها وراسها وغير كتبكي كتحس بألم كبييير فقلبها وراسها غير كيتقاال عليها صونات على ادم تفهم منو شنو واقع معاها واخا عارفة ولكن مبغاتش تعرف مجاوبهاش!!)
خديجة: (جرت يوسف للجردة بالهداوة لي بقا مصدوم فغيثة) يوسف نتوما بجوج معصبين حتى تبردو وهضرو دابا غير غتزيدو تضاربو
يوسف: اورطيغا عندو الحق خاص نحضيها مزيان
خديجة: علاش شنو قالك
يوسف: (مخرج عينيه) قالي ختك غضييع الا مرديتوش ليها لبال!!
تكون تتعاطا؟!!!!
خديجة: مسمعتكش!
يوسف: غدا منقدرش نسافر اخديجة!! منقدرش نمشي ونخليها هاكا
خديجة: ماشي مشكل سفر ملحووق نتا غير برد وفهمني شنو واقع؟! باش نفكرو مزيان
يوسف: متأكدة؟!!
خديجة: يوسف راه زواج هدا ماشي مزوجاك غير باش نسافر ونتسارا مشاكل ديالك هوما المشاكل ديالي!! ياله لبيتنا وتهدن شوية وفكر بلعقل واخا!!!
يوسف: (بامتنان هز يدها باسها جات مع الغالية خارجة كتقلب عليه وكحلت بلعمى دخلت مكضويييش كتر من للي كانت...)
~~~~~~~~~~~~~~
وفاء: (مشات لساتيام قطعت لأݣادير باغيا تبعد على كولشي وترتاااااح... صونات عليها بريڤي عرفاتو هو جاوبت)
شنو مزال باغي
.....: وفاء انا ندمت على شنو درت ليك داك نهار
وفاء: حتى انا ندمت علاش رجعت تقت فيك
....: عطيني غير فرصة أخرى انا فاس بغيت نشوفك
وفاء: غير نسا ديك الهبيلة لي كانت كل مرة كتيق فيك مااتت نهار عطيتيها لصااحبك اشمااتة ولكن الدنيا كدووور.. (قطعت.. تفكرت من مور متعتقت من الانتحار عينيها كانو كيشوفو غير ظلام ندمت علاش مشات تبعت داك طريق كانت بغات تآذيييه ولكن كانت كل ليلة هي للي كتخنق وتآذا وممرتاحاااش تمنات تكون فكت عليها داكشي باش يبعدها وتعيش حياتها مرتاحة شوية...)
أصبحنا وأصبح الملك لله...
يوسف: (منعسش بالفقسة على غيثة كان هاز ليها الهم غير على لباسها والتفتح الزائد!! دابا طورت وكلام اورطيغا مكيبشرش بالخير خلا خديجة ناعسة للي شحال وهي كتواسيه فالليل وسمحت فسفر للي واعدها بيه غير على قبلو لبس حوايجو خلا ليها ميساج حيت نعست معطلة معاه الفطور منين تفيق غيجيها للبيت..
لقا باه جالس فالجردة مشا جلس معاه شوية عاد خرج مشا لبنسودة فين غيلقى اورطيغا حيت عرف من شريف راه رجع لخدمتو بقا متسع مصيفط غير دري يكلمو خرج لابس بوط ميكا وطابلية عامرة بالدم، وحتى يديه للي كيمسحهم مشا حداه سلم غير محرك راسو باش ميوسخووش) الله يعاون
اورطيغا: اش تدير هنا؟!
يوسف: مراد قولي باش عرفت غيثة داك نهار فلبواط شكون شافها
اورطيغا : واش وقعت شي حاجة؟!
يوسف: داكشي للي قلت هو للي كاين
اورطيغا: (زفر) مقالهالي حد، هي داك نهار صونات علية مهم تتقول شي هضرة انا سايست معاها عرفتها فين كاينة مع قطعت صيفطت لأشرف خوك ميساج فين هي، وباينة مقالو ليك والو
يوسف: (حرك راسو باه معصب) مقالولي والو
اورطيغا: واا كنتي لهيه وعريس يمكن داكشي!!
يوسف: خصني نعرف معامن تتمشا هي عمرها كانت هاكا
اورطيغا: ماشي اليوم مسافر؟!!!
يوسف: أجلتها، (كانت باينة فيه مدمر)
اورطيغا: سير معاها دقة دقة نتا عارف غيثة تتجي غير بالخاطر والكلام زوين قربها منك وهي غتݣر ليك بكولشي الا تعصبتي غتدير منك اطونسيوو
يوسف: (زفر) ان شاء الله، باقي خدام؟!
اورطيغا: (بعياء) خوك من الفجر وهو هنا باقي شي حاجة قليلة ونهبط المحال بلاتي دوز عندي راه حتى مرتك غتكون عند مي
يوسف: ان شاء الله، انا نمشي دابا (توادع معاه ورجع الفيلا لقاهم كيفطرو مشا جلس كانو عاديين بحال مواقع والو وهادشي كينيرڤيه من لداخل ديالو مقدرش يفطر) فين غيثة؟!
الغالية: فبيتها، مال مرتك منزلتش تفطر؟!
يوسف: (مسح على وجهو بعياء، مشا للكوزينة وصاها تقاد فطور للي كتبغي غيثة هز بلاطو وطلع لبيتها كانت مظلمة ومزال ناعسة مشا حل السرجم حط لفطور فوق كوافوز جلس حداها كيتلمس على وجهها عاد كيلاحظها ضعاافت شوية..)
غيثة غيييييثة!!!!
غيثة: اممم
يوسف: نوضي تفطري
غيثة: (حلت عينها بشوية غير شافتو هو تفافاات) يووسف!!
(جلست مقادة وكانت جامعة شعرها سفنجة بانت طبعة صغيرة فعنقها تحت ودنييها شافها وحنا عينيييه داير عين ميكة)
شنو!!! يوسف (صوت كيرجف) انا والله لبارح مقصدت
يوسف: ششش شنو تبغي ليكخيب بعسيلة ولا شكلاط
غيثة: (شافتو مقاد ليها كولشي حتى بقات كتبكي هو قربها لعندو كيعنقها)
سمحلي على لبارح والله منعاود نغوت هكاك معرفت شنو وقع لي عفاك متقلقش منك نصبر لكوولشي الا تقلق مني نتا....
ملاك: (كانت خدمة قلييلة موالفة كيصوني عليها فهاد الوقت ويهضرو ولو غير 5 دقايق، حدو صيفط ليها صباح الخير واخا صونات مرجعش صونا كان ديجا فالليل قال ليها غيكون مشغول)
ولكن ميتشغلش علية!! واش عاد زمر كيبغيني ولا شنو؟!!
(كملت نهارها وهي كنحلم غير بهاد تسافيرة وخاصها تشري باش تعوم وشي لبيسة ولا جوج.... وصلت 2 عاد صونا)
الوو
اورطيغا: الفونووون صاڤا
ملاك: (تبسمت) الحمد لله ونت؟!
اورطيغا: وا تسخسسسخت!!! مزال نتي فالخدمة؟!
ملاك: مزالة
اورطيغا: والله مكرهتش شي بيرو وجوج ستيلوات ونرتاح مع قبي
ملاك: غتجيك مملة انا دابا بحال فشي حبس كنتسنى غير امتى يطلقونا بعدا نتا محلل رزقك هه
اورطيغا: (تبسم) فين غتشديها
ملاك: بلاتي معروضين عند مك
اورطيغا: مك اجدك؟! تبقاي تقولها طاتي أمينة غتزيد تحبك
ملاك: وعلاش تحبني هي؟
اورطيغا: حيت ولدها زاالق فييك، (بدل نبرة صوتو) تتنخنق املاك
ملاك: هههههه
اورطيغا: هه هانا على الشيخة ديالي
ملاك: ههه منقدرش نقولها طاتي
اورطيغا: تعلمي ازين (جا عندو واحد كيهضر معاه كمل وهو يسكت الطموبيل) ******
ملاك: (بعدت ودنها من هاد تخصار الهضرة) باسم الله عليك عاد كنت صحة سلام
اورطيغا: حتى كملت والحاج جايبلي بريكول بحال ق****
ملاك: وااااا مرااااد شور شوية
اورطيغا: بلاتي ونهضر معاك (قطع مكره وهبط من طموبيلتو مشا يشوف هاد الكموند!! اما هي وصلت 3 وهي تسلت لقات مريم جات عنقتها موحشاها بقاو مجمعين حطت ليها مها لغدا تغدات وبقاو مجمعين وصلت 6 دالعشية لبسو حوايجهم باش يمشيو لفاس ملاك كانت دوشت ولبست ديباردور بيض مع اونصومبل واسع شوية فلماغو جاي مريح لوات شال عليها بستيل تركي دارت عكر خفيف مع أيلينر ممعيقش رشت بارفان مرة وحدة حيت مبقالهاش)
ملاك: بففف خاصني نشري ريحة
مريم: هاي هاي على زوينات
ملاك: (تبسمت) هكدا كلبس ديما (لبست صندالة عالية) واش كملتو خاص نعلمو بابا
زهرة: قالي بابا تدينا نتي هو حتى يلحق بينا فالليل يمكن
ملاك: حسن، زعما هو دابا فخدمتو وحنا باش ناخدو راحتنا تماك
زهرة: (دخلت ملبسة أنير) والله يا مك نوصلو لتماك وتقوليلي عندي شي غراض خاص شي حاجة حتى نحك لمك لحروور مزيان تبارك الله وعلى من على واحد كيقولك مال مك من البدية
مريم: ههه شكون
زهرة: وتعرفي هادي كتعاود!!!
ملاك: بففف (خرجت من حداهم مشات لحدا لباب صونات عليه مجاوبش حتى جات مها ختها مرت عمها وبنتها ومرت حنينها مشاو للطموبيل ركبو جا عندهم رشيد كيظحك)
رشيد: اوا المسامحة بانلي غتمشيو جملة!!!
زهرة: هاد الكرسي دأنير رجعيه اللور ابنتي باش يكفيهم يجلسو (رجعو رشيد الكوفر هي جلست حدا بنتها وكولشي اللور مريم شادة أنير) حتى نعيط عليك هي راه دايرة بحساب لعشا
رشيد: ياك قلتو غير عشية
ملاك: بحال عشية بحال الليل اصلا خالتي أمينة كتحط لعشا بكري وانا نجييبهم
زهرة: ههه بسلامة (ديمارات طلقت ليهم الملحون) زوينين هاد الاغاني سنيييين متصنت عليهم
ملاك: شحال وليت كنحماق على هاد ستيل!! أذووووووب
زهرة: اممم (كتفرج فطريق صايݣة بشوية باش مدوخش مرت جدها وماشيين مجمعين وصلت لفاس اختاصرت طريق ومشات لدار زهرة)
عقلتي على الدار
ملاك: حيت باينة وصافي
(قلبها ضرب بقات واقفة دوزيام بوزيسيون على متقلب على بلاصة غير لقاتها مشات حطاتها ونزلو دازو من حدا المحال كان عامر ولكن مكاينش هو)
زهرة: بنتي شكون يهز السكر
ملاك: نتوما انا نمشي لشي باتيسري
مريم: ولايني مبقيتيش كتحشمي
ملاك: ونهز انا جوج كراطن؟؟! (بقاو مناقشين غير على لكراطن مشات باتيسري جابت ليصواري داكشي منوع مشات عند العساس)
قالك مراد الݣزار طلع لدارهم دوك جوج كراطن
(مدات ليه 10 دراهم مشا هزهم دخلهم للمصعد وطلعهم وهبط عاد طلعو هوما)
مريم: شنو قلتيلو؟!
ملاك: قلتلو تعاون معايا ودورت معاه عادي.. (قلبت تيليفونها كان ميساج من عندو انه يوصل للدار ويصوني عليها)
انا سبقتك للدار
اورطيغا: ااااح وتكون بالصح
ملاك: ههه رجوع الله كاينة انا وطاسيلتي
اورطيغا: سيري لدار الليدو
ملاك: تحمستي شوية
اورطيغا : مكرهتش ( ظحكت من ميساجاتو وصلو لعند أمينة سلمو عليها كيعزيوها مدت ليها الكرطونة)
أمينة: بلاش عليك احبيبتي.. عذبتي راسك
ملاك: ها (معرفت متقول) بالصحة والراحة (دخلو جلسو صونات عليها خديجة)
حنا وصلنا..
صافي واخا (قطعت)
جاية خديجة
مريم: توحشتها (بقاو مجمعين كانت الطبلة محطوطة مقومة داكشي من المملحات للحلويات اتاي قهوة عصير كول خير ربي حطاه بفرحة زبارتهم ليها، سمعو الساروت فلباب)
أمينة: غيكون ولدي جا (تسد لباب) مرااااد مرااد
اورطيغا: (حط سبرديلتو دارها فبلاكار لبس صندالة باقي حدا باب الدار) سلام عليكم...
اورطيغا: (كان ياله جاي من الݣرنة مشا حداهم للبيت بتيشورت كحل وسروال بارا داير كاسكيط، وريحة ذبيحة فيه دور عينو وملاك كتشوف فيه معجبة مغرمة متبسمة)
سلام عليكم
الكل: عليكم السلام
زهرة: لباس عليك اولدي؟!
اورطيغا: الحمد لله الآلة زهرة نتوما بيخير، (شاف فيها) ملاك صافا!!
ملاك: (صدمها محسابش ليها غيوجه الهضرة ليها) الحمد لله اخويا ونتا
اورطيغا: حمدالله، (تبسم زعما حيت بقا بعيد مصالحش يدخل) سمحولي ياله جاي من الخدمة
زهرة: دخل اولدي دير الݣوتي (أنير ماد يديه لييه) ههه عقل عليك
اورطيغا: راه ولينا صحاب (ملاك كتبيضهم بيض بيض.. خرج مشا لبيتو تابعاه مو)
سهام: خخخخخ ريحة مجهدة داخل بيها يا لطيييف!!!
ملاك: (ضارت مخنزرة فيها باغيا تاكلها جات تهضر)
زهرة: لا مزيان تبارك الله فعشهم وكنجلدوها فيهم لا لا مزيان اسهام
مريم: حشوومة امرت عمي
مرت الجد: من فمك لودن راجلك غير صبري
سهام: أويييييلي ونتوما ضرتو فية كاملين!!! (بدلو الهضرة منين جات أمينة للي مستاانسة بيهم تدق لباب دخلت خديجة وغيثة للي حشمانة من أمينة بزااف دخلو حتى هوما ملاك تفاجئت بحضور غيثة ولكن هنا غيبان واش حتارم هضرتها!!! شافتو فالممر دخل للدوش)
أمينة: ملاك كولي احبيبتي ياكما نجيبلك شي حاجة اخرى
ملاك: لا لا بلعكس اخالتي الخير موجود تبارك الله (هزت حلوى كلات منها ودوزت بأتاي شافت فغيثة كانت لابسة كسوة مبين صدرها وسيقانها طالقة شعرها دايرة ميكاب خفيف وباغفان عااطية حتى هي شافت فملاك وتبسمت)
صاڤا!! (تحصلت)
غيثة: الحمد لله متتسولي مواالو
ملاك: مع رجعت لصفرو بقيت مبرزطة مع الخدمة وصافي
غيثة: حتى انا غنبدا الخدمة السيمانة جاية ان شاء الله ولكن اجي نجلسو شوية
ملاك: ضرووري.. ان شاء الله (شافت فخديجة) كنتو غتسافرو اليوم؟!
خديجة: يوسف خرجت ليه شي خدمة وأجلناها
غيثة: (زادت حشمت من راسها سمعت باب تحل كان هو خارج من الدوش لابس حوايجو وريحة زوينة عاطية لاوي على عنقو فوطة شحال توحشاتو دخل لبيتو نيشان زاد قلبها ضرها)
ملاك: (وصلها ميساج من عندو قبل متقراه عارفة شنو فيه تبسمت وهي كتقراه) "اجي عندي"
(رجع كتب ليها)
"جيبيلي شي لعبة نحنجرها"
يتبع...
التعليقات
لا توجد تعليقات بعد، كن أول من يعلق.