محتوى القصة
قربت منها كتر تازدحت ركابيها مع الارض حطات يديها على دراعها تتحركها بشوية خلعتها و زادت و هي تتنطق هاد كلام مخربق شدات على وجهها بين يديها
سناء"" نوارة مالك اختي
نوارة"" مات .. مات
سناء"" ( بالغوات ) نوااارة فيقي اصحبتي
نوارة"( مدت ليها داك وراق تترعد ) نوح .. نوح ماشي هو
سناء""( شدت من عندها داك الوراق بقات تقرا معالم الصدمة بينت عليها هزات عينيها في نوارة لقاتها تتشوف فيها و تتسناها تكذب داكشي ) الصمت
نوارة"" ( بصوت مقهور) كذب عليا ياكي
سناء"" ( وقفت و شدات فيها) نوضي بعدا نوضي
نوارة"" ( بالعكس عاد زادت ريحت لارض تتجمع في تصاورها لي مشتتين فين الارض بصوت مخنووق ) كذب عليا .. عمرو هضرني.. عمرو بغاني.. عمرو دارني في بالو .. غا جيت في طريقو
سناء""( تحنات حابسة بكية شدتها من دراعها ) عفااك نوضي
نوارة""( شافت فيها تتحرك راسها و يديها تترعد ترعد بشكل غير طبيعي ) دابة هو غا عيط ليه و اعتارف هو غا قيد بيه .. و تزوجني باش يسترني ياكي .. تزوجني غير حيث كان تيسحب لييا انا معاه هو و بغيتو هو ياكي و
سناء""( زادت هزت يديها و عطاتها بطرشة تاسكتت فجاأة جرتها لعندها ) عفاااك تهدني اصحبتي ماشي هاكة ماشي هاكة
نوارة""( عاد فاقت و قدرو رموشها يتلاقاااو غمضت عينيها و عاود حلتهم شدات تصويرة قدامها كانت مغيبة ديك ساعة فوق سرير ) كذب عليا اسناء
سناء"" ( شدت وجها بين يديها ) نوارة الله يهديك ردي روح فيك اصحبتي عفاك
نوارة"" تيقولي ضريتيني .. تيقولي ماتزيديش تضريني .. هو ..هو من لول ضارني بالكذوب
جرت وجهها بين يديها هزات داك ضوسي و خرجات تبعاتها سناء تتشد فيها
سناء"" ريحي عفاك ايجي نصير و يوصلك
نوارة"" ( رمات عليها كاب و طبطبت عليها ) ماتخافيش عليا
خرجت من تما هازة ضوسي حياتها ضوسي لي دمر ليها حياتها نزلات في دوك درجات مرفوعة عينيها تيجريو بالدموع بطريقة فضيعة وقفت جنب تاوقف عليها طاكسي ركبت عطاتو العنوان و زاد و هي زايدة بتفكير اما عينيها ماحبسوش و قلبها تزير تزير عليها بزاااف ... وصلت نزلات من طاكسي ووقفت هزات عينيها في داك المبنى و يالاخص بالكو مددة عاد زادت تمات طالعة وصلت لباب مسحت دموعها و حلاتو و دخلت تتشم ريحة الكارو خارجة من البيت تمشات بخطوات بطيئة دفعات داك لباب و لقاتو جالس تيكمي و قدامو شي ضوسيات هز عينيه ليها مستفسر
نوح"" ( نطق بصوته الخشن عينيه مرخية حمرررررة )علاش ماقلتيش ليا نجي نجيبك
نوارة""( تتشوف و تحقق في ملامحو عينيه وجهو كتلتو كاملة ضارت عليها قربت بخطوات بطيىئة تتقرب و دموع تيزيدو ينزلو بحالا تيتسابقو معاها بحالا تيعاتبوه قبل لسانها وقفت مع اخر خطوة لديك طبلة لي قدامو جبدت ضوسي من تحت الكاب و خبطاتو على طبلة نطقت بجرح )
غا خرجت من عندها جلست في سيجور شادة على راسها تاسمعت باب تيتحل هزات عينها ليه بان ليها داخل و هي تبدا تبكي خلاتو تاني يتخلع قرب دغيا عندها
نصير"" مالكي اش عندك واش فيك شي حريق
سناء"" ( تتحرك راسها) لا لا ماتخافش
نصير""(قرب جلس جنبها باس على ثغرها ) و لاش دموع بنتي لاش
سناء"" اش داك ضوسي يانصير لي مخبي عندك
نصير""( عقد حواجبو باستفسار) شمن ضوسي
سناء""( بالغوات ) ضوسي تاع نوارة انصير اش تيدير عندك هنا
نصير""( عاد تفكرو سرط ريقو بزز ماعرفش اش يقول ليها ) سناء
سناء"" هاهي شافتو هاهي لقاتو و عرفت كولشي انصير كولشي عرفاات داك صاحبك كذب عليها في شي حاجة لي خلاتها تخرج لزنقة كون عرفت في الوقت كون رجع ليها حقها و كاع الكلام و النعت لي نعتو فيه يشدوه عندهم
نصير""( حط يديه على شعرها ) واخة تهدني بعدا عفااك موضوع طويل نشرحو ليك من بعد .. فين هي دابة ؟؟
سناء"" مشات مشات في حالها
نصير""( زفر بضيق تيدوز يديه على لحيتو ناض من جنبها تيدوز تلفون تيصوني لكن لا مجييب ) علاش ما عيطتيش ليا من لول
سناء "" اش نقولك عيطت ليها و تاهي ماتتجاوبش
نصير""( عاود ريح جنبها شد يديها ) اتصنتي ليا داكشي لي في محضر كله صحيح داك خونا ضحك عليهم بزوج بيهم ماشي غي هي و هو زاد بغلطو من ماصارحاش من لول ولكن حاجة وحدة لي عارف و متأكد منها بلي والله ماتزوجها شفقة تزوجها حيث بغاها مرتو هادشي لي نقدر نقول هاد ضوسي مشى ليا من بالي كان خلاه عندي من كان جابها لعندو للدار من شاف نفسيتها صعيبة مابغاش يزيد عليها داكشي لاش جابو لعندي
سناء"" هادشي ماشي ساهل عليها
نصير"" وماسهلش عليه تاهو اسناء هاد موضوع شحال كان خايف منو خايف يصارحها تمشي و تخليه تاهي ..
سناء""(نزلو دموعها يجريو ) و الله ماعرفت مانقول ماعرفت علامن يبقى فيا الحال واش عليه ولا عليها موقفهم صعيب بزااف
نصير"" ( عصر على جبينو و نطق ) غادي يتقصح من زوج جوايه و لكن هي ..هي كتر ...
بقى بعينه عليها وعلى ملامحها مدددة بدون حراك هكاك جامد مرافقه على ركابيه دخاخن شابكة جنبو .. تا التنفس ديالو ماتسمعش منو ..تم نااازل بشوووية بعينيه ولونها بدا تيتغير وصلت بيه لطبلة و بان جوا بالضبط و خارج منو نصف صورتها .. ماقدتش يديه تمد و لا يتأكد و لا يجي في بالو شي ضوسي من غير هاداك .. بقى بعينيه هكاك تاحس بيها قربت هز بعينيه بشوية لعينيها ديريكت .. ديك نضرة .. ديك شوفة .. ديك لمعة .. جاهد تاعيا باش مايشوفهاش فيها ..جاهد تاعيا باش يجبد معاها موضوع ..يشرح ليها .يبرر ليها بلي ماشي داكشي لي فهمتي راه بصح .. تحنات جبدت داك صور شتاتهم فوق طبلة تاطاحو تحت رجليه
نوارة"" ( بصوت مبحوح) شكون هاديك شكون انوح شكون وحدة ضحكتي عليها و كذبتي عليها غرقتي راسك على ودها دخلتي راسك في موشكيل على ودها .. تزوجتيها حيث على بالها بلي كااانت تتهضر معاك.. على بالها داك ميساجات منك .. داك انجداب منك ... داك احترام منك .. داك الحب لي حباتك صدقً ماشي عليك ..
مراقبها و القلب عالم بيه الله شي ضربات تيضربو قاصحين بجهد .. تيشوف روحو تتخرج من وسط ضلوعو بشوووية سرط ريقو بصعوووبة تا تفاحة ادم مشات و جات و هو رافع عينيه ليها ..ناض وقف عينيه رجعوووو حمرييين هاد خطوة جاتو تقيييلة تيحس بيهم بحال هاز الحجر رمى ديك الخطوات مقرب ليها و هي تبعد هازة يديها خلاتو يحبس
نوارة"" حبس حبس خليك تما الهضرة لي تقولها كلها باينة مابغيتش نخبي عليك و حاكة كنت نصارحك بكولشي كنتسنى الوقت و كدا و كدا ( دموعها بداو ينزلو ) كون صارحتيني غي قبل مانعقدو على الاقل.. ولا كون كاع ما بنتي في حياتي كاع ماتقلبش عليا كاااااع
نوح""( شدها من معصمها و جرها لعندو منزل براسو لعندها بعينين مزندين كتر من قلبو ) قلتي لي عندك
نوارة""( تدفعو بكل جهدها ) طلق مني انوح طلق
نوح""( زاد مزير عليها و زاد بملامحو عندها شاعلة و زايدة ) خليي ملتي نهضر
هزات يديها وبدات تتخبط فيه فين ماجات ..يد ..صدر.. عنق.. كتف .. بقات تضرب حتى حست بيه رخف عليها بشوية و طلقها هزات عينيها لعينيه
نوارة"" كنتي تقولي علاش كذبتي عليا ياك .. انا غي يامات قليلة وشدرتي ليا .. نتا شحال مخبي عليا انوح .. امم شحال شهر .. شهرين.. ست شهور.. لا تاهي لا انوح تاهي لا
نوح""( بقى غا تيشوف عارف راسو واخة يجلس يبرر و يشرح تايعييا مايستافد والو ) شنو المعمول انوارة تخليني نهضر تا انا و نقول لي عندي ؟؟
نوارة"" ماعندك ماتقول سالينا كولشي تفضح و بان .. وداك سترة لي سترتيني مابقيتش بغيتها وحتى ديك الهضرة لي قلت ليك صباح تنسحبها فهمتي تنسحبها.. مانبقاش معاك و يدي ماتشد فيك مزال ...
نوح""( غمض عينيه مع داك الكلام لاخر ديالها تيحس بخناجر تيدخلو ليه لقلبو و يخرجو طعنة ورا طعنة .. تيغزز في شواربو بجههد تا دم طوش ليه في وسط فمو حل عينيه لي زادت حمارت جبهتو بدات تجري بالعروقات نزلهم و عاود طلعهم فيها بصوت مقهور ) خبيت عليك اه كل مرة تنبغي نصارحك ماتنقدش .. قدرت نخبي هاد شهورة كاملة كيما قلتي .. ( نزل راسو و عاود طلعو فيها ) حيث خفت نخسرك .. خفت نخسر اليد لي تمدت ليا .. خفت نخسر الحنينة لي خلات راس يتحط عليها و ماتملش ..خفت نخسر لي نورت حياتي و حلاتها ( تبسم بقهرة ) يلا تانتي بغيتي تخوي عليا .. و بغيتي تانتي تمشي .. يلا حسيتي بقلبي كاذب عليك .. فا هادي مانقدتش نقول كتر سوى انكي غا تقتليني كتر ماقاتلاني الحياة
سكت تيتسنى ردود فعلها واخة كانت مبينة ليه لكن عمرو ظن اتكون بهاد القسوة ... نزل براسو و عاود شاف فيها غاينطق و صدقت مقاطعاه تاني
نوارة"" صافي انوح صافي .. بلاما تزيد تبرر ( عينيها تيتكبو بالدموع) حيث موضوع ماشي ساهل عليا و نعرفو بهاد طريقة صعيبة و صعيبة بزااف.. تمرمدت في زناقي .. و تضريت .. و تقصحت.. و انا واخدة عليك فكرة غااالطة و نتا ماعندك تا ذنب .. وزايدها تتقلب عليا .. تاصدقتي مزوج بيا بين ليلة و ضحاها علاش كاع كون خليتيها غي قضية غادي تحلها و صافي
نوح"" ( تيشوووف جامد و من هاد الهضرة قاصحة نطق بصوت نازل) نوارة
نوارة"" صافي هاد نوارة طفات بهادشي لي درتي ليها
خرجت دغيا من البيت تبعها بخطواتو لقاها دخلات لبيت تاني غايدخل تازدحت عليه الباب في وجهو و ضربت ليه ساروت حط يديه على كادر تترعد عليه ونطق
نوح""( بقهر ) ماتقصحيش قلبك يانوارة .. درت غلط من ماصراحتكش .. ماتخلصينيش ببعداك
بقى واقف مددة تيتسنى منها ردود لكن ..والو مابغيش هاد سدة في وجهو.. مابغيش ضهرها يعطيه بالوجه ..مابغيش داك نوار ديالها يطفيه .. نزل عينيه و قلبو تيضرب يضرب شي ضرباات مخربقيين عليه و ضروه .. ضروه لداخل .. حس براسو تاالف و الهضرة تخربقت ليه و راسو مخربق شي احاسيس فيه في ديك لحضة مامفهوماش .. ياما دوز من طعنات ياما قاسى مرار .. لكن هاد طعنة حاس بيها قاصحة بزاف عليه .. بقى في مكانو سامط و تلفونو تيصوني و يعاود . و يعاود و هو مغيب مدة اخرى زادها عاد تحرك و دار دخل لبيت مشى لتلفون جاوب ديك ساع
نوح"" رئيس ( نزل بعينيه لمحضر ) شوية نكون تم رئيس
قطع معاه و نزل قفازي هز صورها تيجمع فيها وحدة وحدة تالف .. و مدعوق .. جمعهم و ناض هز جاكيطتو و خرج من لبيت و دور عينيه لبيت تيشووف مدة عاد تحرك خرج في حالو ..
اما هي غا سمعت لباب تسد و هي تطيح الارض تبكي و تشهق حاسة براسها .. تقصحت .. و قصحت معاه .. و قصحتهم الوقت بزوج .. ولكن فكرة انها ضلماتو قهرتها كتر ..
صايك عينيه بركان فايض بدوك كترة العروق و حمورية لي وسطهم مزير على فلون و صدرو تيطلع و ينزل شواربو قريب يكملهم بالعضان و الكريز تطعن .. و تطعن. تاشبع .. حتى قال براك بسبتها هي بدات تداوي جروح شوية بشوية و عاود كوولشي تفلح من اول و جديد بسبتها هي تاني .. مقصحاه الوقت اه لكن هي .. هي ماقدرتش يتقبل تخليه و لا تعطي بضهرها .. الا هي ..
وصل المركز دخل لبيرو رئيس بعد ما طلب اذن دخل عطى التحية حرك راسو و قرب لعندو
رئيس"" العميد نوح اسمعت بلي تكلفتي نتا بنفسك بالقضية و بسفرية في محل نصير
نوح""( حرك راسو بايجاب ) ايه المدام ديالو عيانة مايقدتش يبعد
رئيس""( شابك يديه) عارف شحال تقدر تعطل تما
نوح"( نزل بعينيه محرك راسو ) على ود داكشي تكلفت في بلاصتو
رئيس"" غدا الصباح غاتشدو الطريق
نوح""( تحية ) في اي وقت
حرك ليه راسو و خرج من عندو مشى لبيروه تيجمع شي ضواسة و بين عينيه غا هي و تيفكر .. كيفاش تاوقت عاطياه بضهر تاهي مامساعداهش ..
شحال الوقت داز و شحال و هي تبكي و شحال هي شادة بيديها على قلبها .. اما داخل ديالو مريض مريض بكلامها لي خرجت ليه و ديك نضرة لي كان تيدير فيها و هي تتهضر .. اما من كان تيهضر و ديك لكنة حفرت ليها القلب .. و حسكاتو .. عارفة معاتبتها و كلامها قاصح ولكن قصحتها هي اكتر ..
ناضت من بلاصتها مسحت على دموعها و مشات خرجات من البيت و دخلات لبيت ديالهم لي جمعهم و دوزت فيه حلاوة و الحنية و العشق وكاع لحضات زوينة معاه .. ماوعياش برجليها لي مشات قدام بلاكار جبدات فاليز و بدات تجبد في حوايج و تحط وسطها تالفة و دايخة .. ولكن يديها عقلها فاش تيفكر الله اعلم ... خدات حوايجها و مشات بيها عينيها لبلاكار ديالو و عينيها بدات تنزل عشرة من العين ... قربت بيديها لريحتو لمحمقاها واخدة عقلها و هي ولفت تشمها من يكون داخل و لا خارج اما من تتكون في حضنه حاجة اخرى.. شداتها بين يديها تاقربتها لنيفها و بعداتها دغيا خبطتها مع الحيط تا تشخشخت و ريحتها ولات عاطية دخلات ليها مع قاع نيفها .. مسحت على دموعها و جرت فاليز بانو ليها تصاورها مجموعين ومحطوطين زادت بخطوات تقييلة و عينيها تدوز مع كل بلاصة في داك بيت واخر نضرة كانت لسرير لي جمعهم مرات و مرات ... غمضات عينيها بجهد مسحت على دموعها و خرجات حطات سوارت فوق طبلة و خرجات .. ايه صافي خدات قرارها انها تبعد عليه و تخوي عليه الدار و تخوي من حياتو ..
"""لم يكُن شيئاً عابراً في حيـاتي لأنساه بهذهِ السهولة، لم يكُن حلم عابر، هذا الشخص دمعت عيناي لأجلهُ، هذا الشخص سجدت أدعو لهُ، هذا الشخص أخذ مِن عُمري الكثير ومن حبي الكثير ومن حلمي الكثير ووجعي الكثير، هذا الشخص لم أُحبهُ بل عشقتهُ، كانَ وسيبقى صعب النسيان""""""
خارج من كوميسارية بخطواتو منزل بعينيه خاشي يديه في جيبيو .. مرفوع مدمر نفسيتو مهزوزة بالو معاها و مع الوقت لي مامقاداش كولشي جاه في دقة .. نازل من دروج وصل لباركينغ يفتح لباب تاسمع صوت جنبو
ابراهيم"" نوح
نوح""( دور راسو بشوية بنضرة مطولة بمعنى اش كاين ) الصمت
ابراهيم"" عفاك اولدي تقدر تعطيني وقيت
نوح"" ( دار عندو بكتلته و عينيه حمرييين مرخيييية بشكل فضييع لي مبينة غبينة بزااف ) الصمت
ابراهيم""( زاد قرب ) الله يرضي عليك وقيت صغير تسمع ليا ؟؟
نوح""( زاد بخطوة لعندو بنفس النضرة و على عينيه نيشان نطق ) وحدة لي نستاهل منها الرضى هي ميمتي لي غطات عليا وجهها .. اما نتا و الحياة كاع عطيتوني بالضهر .. لوقت لي كان عندي عاطيه لدمي حيث بوحدها لي تستاهلو ...
مع قال داك الكلام و زاد مخليه شاد على طوموبيل و عينيه تجري بالدموع حتى كسيرا بسرعة و زاد .. عينيه زادت في احمرارها تيضرب على فولون بجهد لا صوت لا كلمة .. حاس براسو غادي يتشتت بقوة مطارق لي في راسو اول مرة تيحس براسو تالف و معارفش اش يدير ولا اش يقول قصد الدار ربما تبغي تسمع منو ربما تخليه يبرر و يقول ليها راني مانويش نخبي عليه.. مانويش نجرحك ..مانويش نقصحك .. واخة كلامها قصحو بالمزيان ولكن ماقادش على بعادها ..
دوز الوقت و داك الطريق غا في تفكير و الكارو لي ولا بين شفايفو كتر من الكلام.. حبس طوموبيل باركينغ و بقى شحااال تيكمي يبخ و ينتر حتى عينيه زادت حمارت كتر ماهي حمرة حل باب و نزل سدها و تم طالع بدوك درجات خايف .. ماينكرش بلي طاحت لي بالو .. حل لباب و اول حاجة بقى تيتصنت واش حسها كاين .. ماسمع والو .. زاد قلبو بدا يضرب بجهد زاد بخطوة دفع لباب هز عينيه لبيت تيبان ليه محلول مشى بخطواتو حواجبو مگرونة و قلبو تيزيد يتعگد عليه .. حتى تاكد من احساسو و هو تيشوف مكانها و بلاصت حوايجها خاوية .. حس بقلبو مشى و جى بواحد الخبطة واعرة بقى تيدور في عينيه و تيقرب تا عفط على زاج تسمع داك صوت تهريسة تحت صباطو .. نزل بعينيه عاد رد بال عطره مهرس .. تحنى بشوية قفازي حط صباعو على العطر لي مكفح و طلعو لنيفو .. شم عليه مغمض عينيه و لي اول مرة جاااتو غرييبة .. و هو صوتها مسيطر عليه و هي تتقول ليه.. ( تتحمقني ريحتك ) .. فتح عينيه و بقى تيدور في عينيه بلاصة ..بلاصة.. تا تأكد انها فعلا خوات عليه الدار .. خوات الحيوط لي ضوات عليهم بنورها .. خوات الدار لي حتى دخلات ليها عاد ولات تحلى ليه .. خوات سريرها لي ماشدتش في يديه و لا حطت راسه عليه ماتنعسش .. نزل راسو و ناض بشوية سرط ريقو بشوووية تيدوز واحد الغصة واحلة ليه ماعرفهاش و ماعمرو جربها .. ولا حس بيها من قبل .. حتى لدابة فهم بلي كاع احاسيس جربهم معاها و عليها هي بالخصوص..
تمشى بخطواتو لسرير جهتها هي بضبط و ريح محني حاط مرافقو على ركابيه تيشووووف في نقطة .. حيث بصح تلفت بيه الوقت و عطاتو قتلة .. ماحيلتو لباه لي بان ...ولا نوارتو لي طفات فجاة...و الخدمة لي خاصو يصبح فيها .. مدة هو على حالو صورتها فقط لي بين عينيه محفورة لي وسط الجفون .. دور براسو و ناض بدل عليه و خرج تيبانو ليه سويرتاتها محطوطين فوق طبلة .. بقى تيشوف شحااال زفر بجهد و توجه الباب فتحو و خرج نزل لطوموبيلتو كسيرا و زاد ...
""التقينا وفرحنا معاً، ورسمنا طريق حياتنا سوياً، ولكننا نسينا تقلّبات الزمان وأنّ الفراق قد يصبح قدرنا، أصبحنا تائهين بعد أن جمعنا القدر، أصبح ألم الفراق يمزّق كياننا، يُشعرنا بحزن عميق أشدّ قسوة ممّا كنا نعتقد""
الرباط
المغرب تياذن و الظلام بدا يطيح .. وقف طاكسي قدام الدار نزلت عطاها شيفور فاليز حركت راسها و قربت بخطوات مدعوقة و خجلانة و كاع احاسيس تخلطت عليها .. قربت صونات في لباب منزلة براسها تا تحل لباب هزات راسها .. متبسمة
يوسف"" ( متبسم ) نوارة
نوارة"( زادت باست على يديه و عنقاتو ) خويااا
يوسف""( حاوطها بحنية و هز عينيه تيحقق برا ) بيخير
نوارة"( شافتو تيقلب بعينيه و هي تنطق ) جيت بوحدي اخويا
تبسم حرك راسو ودرعها لعندو هز فاليز و دخلو ماسولهاش .. دخلت لقات زهرة تتصلي و فاطمة في الكوزينة لي غير سمعت الحس و خرجات تتبسم قربت سلمت عليها بعناق
فاطمة"" يااختي الحبيبة على سلامتك
نوارة""( تبسمت ) الله يسلمك حبيبتي اش خبارك
حركت ليها راها و دخلت جلست و عينها على ميمتها و يوسف فاهم و مافاهم دخل ريح جنبها و جرها لعندو
يوسف"" مزيانة ؟؟
نوارة""( تبسمت ) بيخير اخويا الحمد لله
نزلت بعينيها لزهرة لي هازة بكفوفها تدعي .. غي شافتها كملت و قربت على ركابيها
زهرة""( درعتها بوجه مستفسر عارفها ماشي دخلتها و في هاد الوقت ) بنيتي اش خبارك
نوارة"" لاباس ماما و نتي لاباس كي بقى راسك شوية ليوم
زهرة"" لاباس احبيبتي لاباس
ناضت و شدت على يديها وقفتها و جلسو و دخلات فاطمة مدخلة الصينية حطتها فوق طبلة
نوارة"" فين اريج
يوسف"" لفوق تترسم
فاطمة"" ( جات جلست جنبها) بيخير كي خليتي كازا نوح لاباس
يوسف""( شاف فيها و هز حجبانو باش يلاما تحكر ) شوفي بنتك فين هي
فهمات قصدو و ناضت مخلياها تتفرك في يديها لاح يديه ورا ضهرها و نطق
يوسف"" هزي راسك ابنتي ولابد من غيار و خصام
نوارة"( حركت راسها بكيتها محبوسة في حلق قااجتها ) داكشي لي كاين اخويا
زهرة"" ( دوزت يديها على شعرها ) نوضي بدلي عليك واجي تشربي كويس
نوارة"" واخة اماما
ناضت بالخف حيث صافي تغلقت بالمرة هزات فاليز ديالها و طلعات مخلية يوسف و زهرة مستغربين باستفسار شافت ليه ونطقت
زهرة"" شنو ايكون وقع تا جات لدارهم اولدي
يوسف"" ( هز حواجبو نطق بثبات ) يعلم الله .. دارهم هادي و راجلها هداك .. ضروري من الغيار
قاطعو تلفون تيصوني قبالتو هزو و شاف نمرة باستغراب .. جاوب في الحين
يوسف"" السلام عليكم ( شاف في زهرة و كمل كلامو) مرحبا ..
دخلات لبيت دفعت داك فاليز و جلست على جنب السرير و هنا خلات دموعها ياخدو راحتهم و ماتبقاش حابساهم حيث خانقينها مامخلينها تطلع النفس عادي .. تحنات بمرافقها على ركابيها و حطات يديها على وجهها تاحست بيد حنينة تحطت على يديها .. هزات عينيها و بانت ليها فاطمة جلست جنبها و جرتها معنقاها ..
فاطمة "" بكي يلا ترتاحي
نوارة""( عنقاتها و بقات تبكي تبكي تابرداتو عاد هزات راسها ليها) ودخلة شحاال واعرة اختي واعرة
فاطمة""( باست على شعرها بحنية ) ششش ماداخلاش لدار غريبة احبيبتي داركم هادي
نوارة"" ( مسحت على دموعها) ماقديتش عييت نقولها في راسي ماقديتش
فاطمة""( تدوز يديها على شعرها) ازمة و تفوت ولو يكون غيار لي يخليك تجي لداركم .. راه مايسمحش فيك
نوارة"" انا صافي خديت قراري افاطمة
فاطمة"" مكاين تا قرار في لحضة غضب .. رتاحي دابة راني مانسولك و تاحد ما يدخل في قرارتك حيث حياتك نتي امم
نوارة"" من احسن البعاد ليا و ليه
فاطمة"" تنشوف البعاد للفترة لغير.. راه مايقدتش يخليك
_______
جالس في المقهى في وسط الحومة شاد الكارو في يد و تلفون في اليد منزل براسو تاحس بخيال قدامو هز راسو و ناض مد يديه و تسالم بسلام رجولي
يوسف"" اش خبارك ؟
نوح""( حرك راسو بايجاب و جلس بملامح طافية عينيه حمرة و زايدة نطق بخشونة) نتا مزيان ؟؟
يوسف"" ( طفى الكارو و ششاف فيه ) الحمد لله ( حرك راسو ) ياك لاباس واقع شي حاجة بيناتهم
نوح""( شعل كارو بخ منو و نطق ) وقع بلان و خوات عليا دارها
يوسف""( شابك صباعو ) مغاديش نسولك على سبب و لا شنو واقع بيناتكم .. راكم كبار و عارفين .. ختي متسرعة في قرارتها ماغاديش ننكر و دائما تتفضل الهروب على انها تواجه المشكيل ...
نوح""( نزل عينه و عاود شاف فيه بدوك عينين مدمرة ) خوات دارها و جات لدار وليديها ماعنديش الوقت لي نقدر نجي ليها و نهضر معاها .. عندي خدمة و الوقت مقودة معايا .. طلبو مني سفرية على 6 ديال صباح و نقد نتعطل .. داكشي لاش جيت عندك نتا نيشان و بلاما ندعقها بالوقت
يوسف""( حرك راسو ) فهمتك من احسن نيت ترتاح و تفكر مع راسها باش تقدر تواجه معاك و تحلو موشكيل
نوح""( حرك راسو نتر من فمو مطول ) مانحتاجش نوصيك عليها رد ليها لبال و تهلى... تهلى بين مارجعت
يوسف""( تبسم بجنب و حرك راسو ) ماتحتاجش .. في حفض و الصون في دارهم تا تجي و تفكو موشكيلكم نتوما..( هز حاجبو ) حتى يلا ما وصلتوش و الحل ديك ساعة نقدر نتدخل نتمنى ماتكونش ضلمتيها ..
نوح""( عض على شواربو نطق بهدوء عكس داخل ديالو تيگدي كديان ) مانضرهاش و عمرني نفكر فيها .. مانقدتش نضر راسي و دمي .. تهلى ليا فيها الله يحن عليك (هز واحد صاشي كان حاطو في جنبو و حطو ليه فوق طبلة) تقدر تعطيها معاك هاد امانة
بقات معاها بالكلام حتى تهدنات و رتاحت شوية .. ناضت بدلت عليها و نزلات لتحت لقات الجد جالس مشات جلست جنبو و حطات راسها على ركابيه كي مولفة ... و هاهي تعاودت نفس الجلسة ديال نهار اللول .. تعاودت نفس بكية .. لكن القلب و القدر متغير .. هز يديه تيدوزها على شعرها بحنييية فاطمة و زهرة غي تيشوفو فيها مولفة من تتقلق تتبان فيها نفسيا .. عيانة و محطمة .. لكن هاد مرة بانت فيها بزااف قلبها .. مضرار و مكرفس على الفراق الشخص لي مبين حبو و حبها بدرجات قوييين و هادشي لاحضوه و لاحضوه ...
محمد""( شد دراعها و نوضها ) اجي ابنيتي عندي
نوارة""( ناضت و باست على راسو و ريحت مخشية في حضنو ) لاباس عليك با
محمد"" لاباس ابنيتي الحمد لله نتي بيخير
نوارة"" ( مسحت على دموعها و نطقت ) لاباس الحمد لله
محمد""( طبطب عليها تيدوز يديه على شعرها) محنة ابنيتي و تدوز .. القدر دائما تيلعب لعبتو ماشي ديما نكونو مزيانن
زهرة"" كولشي يفوت رتاحي دابة و باركة من البكى
غي سمعات حس الباب و هي تمسح وجهها و تقادت في جلستها .. دخل يوسف مع الباب في يديه ديك صاشي غي لمحت ليها حلات عينيها بالصدمة عرفاها و عرفت منين جاية بداو دموع ينزلو بغزارة عرفاتو تبعها و تلاقاو بزوج قلبها ضيااق عليها ماعرفتش اش ضار بيناتهم و اش بصح كانت اخر مرة تشوفو و ماتوقعتش ايتبعها ديك ساعة ..حست بيوسف جاي اتجاها و بالفعل مد ليها داك صاشي ...
يوسف"" ( بهدوء) امانتك
نوارة"( بقات غا تتشوف تاسمعاتو حنحن و شدت من عندو ) الصمت
حاولو انهم يسكتو جلسو بيناتهم بحوارات و مافكروش يسولوها و لا يهضرو ف داك موضوع حالتها ماشي ديال الهضرة و حوارات .. تعشاو اما هي نفسيتها مزفتة و زيرو ماقدتش تاكل مزيان غا نقبت و ناضت جمعت فاطمة طبلة يوسف ناض طلع ينعس و الجد دخل تاهو بقات زهرة و فاطمة و نوارة جالسين
زهرة"" نوضي ابنتي ترتاحي نوضي راك عيانة ( شافتها حركت ليها راسها و ناضت و هي تنطق) هزي ابنتي داك صاشي
دورت عينيها و قلبها تاني بدا ينغز فيها هزاتها و شافت ليهم
نوارة"" تصبحو على خير
ضارت و خرجات من عندهم بهدوء و طلعات في حالها سدت لباب و مشات لسرير و حطات قبالتها داك صاشي طلعات يديها لنيفها .. ريحتو .. لي تعرفها بين مليون عطر و تميزها بالخف غمضات عينيها بجهد تتشم فيها حلات عينيها و نزلت بيها لداك صاشي غادية بيديها ليها قاطعها تلفون لي تيصوني جنبها دورت عينيها و بانت ليها صورتو مزينة الشاشة بقااات تتشوف ماتحركتش لكن عينيها كانو تيهضرو بزاااف .. تتحماق عليه ماتنكرش داك احساس لي تتحس من جيهتو فوق الحماق و العشق .. نزلت عينيها بعد ماقطع على خاطرو و راحت بيها تاني لصاشي حلاتها و تحل معاها جراح قلبها و دموع خلاص مسيقين خدودها .. مدت يديها بان ليها جوا قلباتو لقات فيه فلوس كتييرة ...و في داك جوا بالضبط مكتوبة فيه جملة خلات قلبها يبكي الدم ماشي غا الدموع
"" الروح خلاتني و جاتك يانوارة ""
بقات تقرا و تعاود كسرتها و طعنتها عارفة طعنة قلبو و لخصها ليها في ثلاثة كلمات .. قلبها تزير ..تزير بشكل قاصح عليها عرفت معناتها و عرفت احساسو و هو تيكتبها بيديه حطات يديها على وجهها و بقات تبكي تبكي تاغصتها وحلت ليها في الحلق رجعت .. نزلت بيديها لكرطونة لي تحت جبداتها حلاتها لقات فيها على اخر حاجة قالت ليه جيبها ليها معاه ( من تكون جاي جيب لي معاك حريشات ديال كوك)
ايه جابهم و مانساش مشات و خلاتو و مزال عقلو غاطس و غارق بلي تبغي و طلبها وصلها تالدارهم و تالمدينة اخرى .. اشمن عقااب هدا !!!
دخل مع الزنقة ديال دراهم تيقرب و قلبو تيزيد يتزير و يزيد على مابيه .. و بالفعل تأكد و زاد و هو مايقدر ينسى نفس طوموبيل و نفس الرقم وقف قدام دار و فتح الباب نزل و زدحو بجههد جبد سوارت حل لباب و تم داخل تيزيد يتأكد
شامة"" مافهمتش كيفاش عطاك قلبك تمشي و تخليها عرفتي اشمن حالة خليتيها
ابراهيم"" باغي ولدي باغيه يسامحني
دخل مع اخر كلمة وقف تيشوف واحد بواحد منانة .. شامة.. ابراهيم .. اخرهم سعاد لي غي شافتو و هي تبسم ناضت وقفت
شامة""( ناضت بصدمة ) نووح
نوح""( بقى تيشووف فيهم صدرو تيطلع و ينزل بطريقة قاصحة نطق ) ش مزال بغيتو عند هاد القلا....ي
ابراهيم ""(قرب عندو ) عفى وليدي سمع مني
نوح""( دور عينيه ليه بتخنزيرة تاقال باراك) سكت ديك لقب مالايقش بيك سكت ( شاف في شامة ) ياك الواليدة ياك ماعيتيش و مامليتيش بطعين فيا
شامة""( تتحرك راسها بنفي و دموع ماعرفاهتم منين جاو ) لا ولدي لا و الله ما قلت ليه حاجة
ابراهيم""( شد من دراعو ) عفاك ولدي راه
نوح""( نتر يديه بالغوات ) ماتقربش ليا ( هز يديه ) ماتقيسش ( شاف في شامة ) قسيتي ..طعنتي ..حرقتي ..ضربتي ..جرحتي .. مرمردتي.. ماخليتي ما درتي ولكن هادشي هرسني اشامة واخة نكون عدوك
شامة""(قربت تتشد عل يديه تبوس فيها ) لا وليدي لا والله مادرت حاجة
نوح""( بقهر) كون قلتي ليه مت و لا غرقت و تحرگت بلاما تحرگي هاد الگلب راك قويتي عليه قويتي
منانة"" اولدي الله يهديك مادارت والو ماعرفناش شكون اصلا عاود ليه
شامة"" والله اوليدي كون يسحب ليا مانحل ليه لباب
ابراهيم""( بصوت باكي ) نستاهل كاع لي تقولو انا ماشي اب و مانستاهلش هاد الكلمة و مانستاهلش تا كلمة الزوج حيث كبيرة عليا مخلي مرتي
نوح""( مقاطعو بعينيه حمرين و صبعو على شواربو بجههد ) شششش سكت اخر مرة تقول مرتي ماتجبدهاش و توسخها بديك كلمة .. باغي مسامحتي عرفتي شنووو( بقهر) اناا مساااامحك مسامحك من ݣلب ݣلبي مسامحك غي بعد مني و بعد من دمي ماتعاودتش تجي عندي و توقف قدامي ( هز يديه بزوج ) خليني و خليوني بوحدي باراك عليا كل واحد ينتف و يطعن من جيهة باراك عليا راني عييت عيييت
قلب دورة و تبعاتو زينة تتجري تتبكي
زينة"" عفاك خويا حبس فين غادي في هاد لحالة
نوح""( شاف فيها وطبطب عليها ) دخلي في حالك دخلي
خرج و كسيرا مخليهم تيشوفو شامة تتخبط على فخاضها تتبكي
زينة"( دخلات تتبكي بقهرة على حالتو) صافي رتاحيتو دابة حشومة عليكم حشووومة تسميو على راسكم عائلة من تزاد و نتوما تهرسو فيه واخة يكون عدوكم ماشي من دمكم ..
نزلو دموعها صقلت ماقدرت تهضر و لا تقول كلمة اما ابراهيم تيمسح على دموعو و دار تم خارج حبساتو منانة و قربت تالحدا رجليه
منانة""( حيدت فولارها تتلوحو عليه ) هالعاااار هالعااار بعد من داك راجل دير شي حاجة مزيانة في حياتك و بعد راك ماعرف اش دايز عليه وما قاسى هالعااااار ماتعاود ترجع
سعاد"" ( جالسة بكل هدوء ) زدتو فيه ضروري مايتقبلش في لول
زينة""( قربت ليها مكشكشة ) نتي ياكي باين نتي لي وصلتي ليه الهضرة
سعاد"" غا تتخربقو
قربت ليها بغات تلاح عليها دتها منانة و دخل سلمان في ديك لحضة جا تيزرب شدها من كرشها و جرها
سلمان" مالكم اش كاين ( شاف في داك الغريب مخنزر فيه) شكون نتا واش كدير مع للعيالات وسط الدار
شامة""( شادة من راسها ) و سير الله ياخد فيك الحق الله ياخد الحق رجع فحالك كمل حياتك
في حين نزل راسو دوز يديه على لحيتو تيمسح الدموع و تم غادي تاحس بيد تحطت على كتفو
سلمان""( قرب تا ولا يطل عليه و تحول ديك حطة على القبطة قوية تاتشد لحمو معاها) شكون نتا مربع ليا وسط الدار
زينة""( قربت شدااتو على يديه ) رخف رخف اخويا يديك انا نفهك
شداتو تاتفرق عليه بزز مخليه مزال منزل عينيه شاف فيهم و نطق
ابراهيم"" انا نمشي لا لقيتو تحننو قلبو عليا ديرو فيا خير كبيير
نطق كلامو مخليهم كل وشوفاتو عا لي مافهم والو هالي منكسر هالي محطم و كاين لي فرحان و خطتهم غادية هي هاديك لي هي سعاد و بدات تحلل مع راسها و من نضرة و حالة لي دخل بيها نوح فهمت بلي داخل بيناتهم صداع .. خرج و زينة عاودت كولشي لسلمان لي مع كملت شاف في سعاد مخنزر فيها
سلمان"" وصلت بيك تالهاد درجة نتي
سعاد"" ولهيلا زدتو فيه انا مادرت والو شوف منين وصلاتو
سلمان"""( قرب حتى رمى يديه شد شعرها وقربها ليه مزير عليها بكل جهدو كارز على سنانو ) القح***ة ماتتحشميش شنو باغة عندو
سعاد"" ( شادة على يده و تتنطق ) طلق مني طلق .. زعمة بقى فيك ونتا من تزاديتي و مك مشارباه المرار
منانة""( طرشتها و في نفس لوقت تتفك يديه من على شعرهاا حيث تتحس بيه اينصل) عفااك اولدي رخف رخف
سلمان""( عينيه ولاو حمرين ) عارفة ملتي ماتنبغيش داك الموضوع عارفاتي ماليا تا ذنب فيه ( شاف في شامة ) ماشي انا لي معدي على يتيم ( عاود قرب و شد فكها مزير عليه ) تزيدي تديري شي قل*** نفضح مك برب تانفضحك ماندير لط** مك حساب
زينة"( شداتو ) طلق اسلمان طلق عمرني شفت السم و الدل لي في هاد خيتي
بعداتو من حداها تا حسو بلخبطة من فوق سداري ضارو لقاو شامة طاحية على كفاها منانة تتخبط في فخاضها تبكي زينة تتجري و سلمان تحنى هز ليها راسها
زينة""( تتبكي ) ماما لا يااماما فيقي
سلمان""( قلبو تيضرب ضريب عينيه ايطيحو معاها تيقلب ليها نبض و رفعها بين يديه ) خرجي شوفي نبيل واش كاين سربي
مشات تتجري بانت ليها طوموبيل ديال الجار و مشات تتدق عليه و تغوت خرج طلباتو يوصلهم و دخلت عنده علماتو و خرج طلعها في طوموبيل مشات معاها هي سلمان و منانة و مشاو لاقرب كلينيك قريب منهم ...
——-
حبس بسيارتو قدام بلاصة لي مافيها نفاق ..مافيها شر .. مافيها عذاب .. وهي وسطها الحنينة لي غطات وجها عليه .. ماداق حنانها ..ماداق فرحتها .. نزل من طوموبيل و توجه بخطوات تقيلة داتو رجليه واخة الظلام و الحال مغيم ولكن حافض و عارف دارها فين جات .. تيقرب و تتزيد بخنقتو .. وقف قدام قبرها نيشاان .. جبد تلفون شعل الفلاش على اسميتها نيشان ..(المرحومة عائشة العطيات) بقى تيشووف مدة و يحقق في داك الاسم .. لفترة كأنه تيقول ليها كون ربطتي سميتي مع سميتك ديما كون مافرقتينيش و خليتي يديك في يدي.. نزل براسو و تحنى قفازي حط يديه على ترابها و خرج كلامو خرجها لاول مرة و هو واخة عارفها ماتجاوبوش.. و لكن نطقها .. خرجها بالكنة مقهورة
نوح"" طحت موقف محتاجك فيها امي تكوني معايا ( نزلت دمعة اه دمعة لي معمرو هبطها و هو مقصح قلبو تاطاحت على تراب ميمتو عض على شنوفتو بجهههد كاتم واحد غصة جاتو قااااصحة و صعيييبة ينزلها و كمل كلامو بالكنة زايدة قهرة ) حتى لقيت لي بحالك ( سكتت لتواني ) تاهي خوات بيا
شد طريقو راجع في حالو .. راجع بوحدو.. راجع بلا مرتو.. راجع بلا دمو.. كيما تيقول ليها جلس مع ميمتو تاحس براسو و بروحو خففت من الالم و زيار و نكسة لي كانت خانقاه و مشى ديريكت .. تلفونو طفاه باش ما يلقى تا مكالمة و لا شي حد ييرزطو ..
—-
داخل الكلينيك شامة ممدة فوق الفراش جنبها زينة و منانة
زينة"" ( باست يديها ) ماما شوية دابة
شامة""( طبطبت على يديها) ماتخافيش ابنتي
منانة""( بدموع) جا تاني يخربق لينا حياتنا
سلمان""( دخل مع باب بنضرة قاصحة ) خالتي سدي عليا داك موضوع
زينة"" ( قربت ليه ) شنو درتي اخويا خلصتي ؟
سلمان""( حرك راسو ) خليك هنا معاها تانرجع
حركت راسها و خرج مع الباب تيصوني في تلفون و تيلقاه طافي حدر راسو تاني تيصوني تادخل فشي حد غمض عينيه بجهد بتلفة لي شداتو تا مابقاو عندو عينين و لا العقل لي يفكر و لا يركز
سلمان"" سمحي ليا اختي يحن عليك ( نزل براسو و عاود طلعو بالخف تيحقق بعينيه حمممرة) الصمت
شيماء"" ( گارنة حاجبها بتساؤل) بيخير ؟؟
سلمان""( نزل بتلفون لجيبو و حرك راسو بايجاب و هو تيحقق بلباسها ) سمحي ليا يحفضك
شيماء"" ماشي موشكيل ( باستفسار) ياك لاباس شنو كدير هنا؟؟
سلمان"" غي الواليدة هنا ..عيانة شوية
شيماء"" مايكون باس عندها اشمن شومبر هي ؟
سلمان""( نعت ليها براسو ) غي هنا نيت
شيماء""(شافت فين نعت و شافت فيه) الله يجيب الشفاء ..
تبسمت و تخطاتو مخلياه حاضيها و دخلات نيت فين قالها بضبط حتى دخلات عاد مشى خرج في حالو و بالو مع نوح..
_——-
متكية و قبالتها سناء ابيل فيديو عينيها مورمين تتمسح على نيفها و دموعها
سناء"" باراك عليك الله يعطيك الستر طيبتي ليا قلبي و طيبتي عينيك
نوارة"(تشهق و تقول قليل ) عمرني كنت نتخيل غادي ندمر من ساعتي لولى وانا بعيدة عليه
سناء"" قصحتي معاه الكلام مسكين ونتي عارفة اش بيه
نوارة"" و انا مابقيتش فيك كاذب عليا و يومين وجهي في وجهو و تيزيد يكذب
سناء"" خايف يخسرك كي خاسر ميمتو .. مافهمتش كيفاش عطاك خاطرك تقصحي معاه ياختي
نوارة"" باراك عليا الخرا تانتي تنشكي عليك ولا تزيدي عليا
سناء"" نتي اول وحدة يخصك تحسي بيه .. مشيتي و ماخليتيه يبرر ليك
نوارة"" والله تانبلوكي مك بعدي مني
سناء"" غي بلوكي نتي ( بعتاب ) حيث ماشي واحد زوج نوض نهز حوايجي و نزيد اهاه و خدمتك لي بديتي مافكرتيش فيها .. متسرعة ديما اصحبتي
نوارة"" قلت ليهم ماغانجيش
سناء"" اهاه مزيان ديما خوي ساحة .. ديما
سكتت و بقات غاتتشوف زادو دموعها ينزلو عارفة هضرتها صحيحة مليون بالمية ماشي غا صحيحة .. هزات عينيها ليها و نطقت
نوارة"" نتي كي بقيتي
سناء"" قلبتي لطاسيلتي مخ .( بدات تبكي ) خلتيني بوحدي اصحبتي
نوارة""( غلباتها ضحكة وسط دموعها) يخليك بلخلى خاصك غا سبة.. معاك حبيبك اختي رتاحي مني شوية
سناء"" ( تتمسح على دموعها) معايا اه بلاصتو بووحدها ماشي هي بلاصتك اصحبتي ..
نوارة"" خليني نرتاح مع مخي شوية و
سناء"" ماتخليش شيطان يغلبك اصحبتي فكري بالعقل .. والله نوح درويش مايضركش و مايبغيش ليك المضرة و سبب باش خبى عليك باين مزيان
نوارة""( صقلت لتواني عاد نطقت ) سيري تنعسي خليني نغمض عيني شوية
سناء"" بسلامة فكري مزيان و ماضريهش الله يرضي عليك
متكي على صور الصغير ديال الكلينيك عينيه على نقطة وحدة تيكمي عقلو تيخمم و يفكر في هادشي هضرة سعاد باقة تضگ و تعاود فيه كره راسو بسبب معاملة مو للنوح و هو مصرف فيهم غا الخير.. هز عينيه و بان ليه الشخص تيتمايل سكرااان جايب الكاو تيدابز مع سكريتي باش يدخل بقى مراقب من بعد تا بانت ليه نازلة من دريجات تتجري حيد كارو من فمو تيبخ مصغر عينيه
شيماء""( شدت فيه ) صافي اخويا غا سير
سعيد""( شدها من دراعها ) طلقي نتي شي ميتين درهم لهنا .. قلتها ليك صبااح و م ماخلتيش لياا
شيماء""( كتشرش من هنا لهنا تتحاول تبعدو و بكية حابسة ليها في طرف جفون على هاد حالة مارضاااتش ) حشومة عليك حشومة والله هادشي لي تدير فيه
سعيد""( مزير عليها تيتمايل معاها) ماتتسمعيش اله الهضرة نتي ( دار شاف فيها و شدها بيديه بزوج من دراعها ) من نهضر سمعي ليا
حس بشدة من كفاه تاتجر من عليها مخليها حالة عينيها فيه
سلمان"" ( بتخنزيرة ) اش هاد رجلة ؟؟
سعيد"" نت قلت ليك انا نمشي نشوف غا بنتي و نمشي مالكم ماتتسمعوش ليا
سلمان""( شاف فيها و هي تنزل عينيها و دموع تينزلو تيجريو بالحكرة انها مارضياش على هاد حالة شاف فيه و نطق) ش بغيتي عندها
سعيد"" بغيت فلوسي
شيماء""( حطت يديها على يديه و شافت فيه بنضرة غرييبة) غي طلقو راه بابا ( شافتو رخف عليه ) بابا سير في حالك لدار غدا و نخلي ليك
سعيد""( شاف فيها تيهضر تا ريوگ تينزلو بحال معيوف ) طلعي لهنا ولا نشوه مك هنا
سلمان""( عض على فكو و شد من دراعو و تم جارو تابعدو مزيان لاح ليه 200 درهم في يديه و نطق ) سير الله يعفو عليك
شيماء"" ( تبعاتو تتجري) علاش عطيتيه علاش شوف حالتو كي دايرة
سلمان""(شاف فيها و نطق بصوت منخفض ) و حالتك نتي !!( قرب شوية نزل براسو عندها ) الله يجيب العفو مادريش في بالك
شيماء"" ( بحكرة )تسنى نجيب ليك الفلوس ديالك راه عندي غي ماتنبغيش نعطيه
سلمان""( حرك راسو بنفي بتقالة ) دخلي في حالك لخدمتك ..
شيماء"" لا لا و الله مابغيت دين عليا تسناني هنا
مخلاتوش يهضر ضارت داخلة لداخل تتبكي على الحكرة لي دار ليها و على الحالة لي جا بيها قدام كلينيك ماحملتش راسها دخلات لداخل خدات بزطامها و خرجات تتقلب بعينيها ساعة مالقاتوش بقات تدور بعينيها ساعة والو قلبت دورتها دخلات في حالها منزلة براسها حشمانة من حالتها ..
وقف طوموبيل في باركينغ و نزل دار يديه في جيابو تيتمشى بخطوات مهزومة وصل للدار فتح لباب و دخل و ماحملش يدخل و لا يرمي شي خطوة فيها .. مشى لبيت فتحو عيى يكابر عيى يشد في راسو ماقدش .. عينيه مشات لاي قنت تتعمرو بلاصة بلاصة مولف يدخل يلقاها ناعسة او يلقاها تساينو .. نزل راسو و مشى تلاح على كرشو بتقلو و بحوايجو و بسباطو في بلاصتها بضبط .. خاشي راسو في خدية .. يشم و يستنشق ريحتها .. قلبو تاني بدا يضرو و ينغزو .. عمرو دار في بالو غادي يوالف انسان تالهاد الحد.. عمرو دار في بالو قلبو يضرو هاد ضران .. اول مرة غا يحس و غا يتخلطو عليه هاد كترة احاسيس تيحس بالحلق ديالو فيه شي حاجة واحلة مابغاات تنزل ولا تهبط .. جر بيديه خدية تا زادت وغطات وجهو .. هكاك بقى ماملش ..و ماعياش .. مانعس ماشافو دقايق تيدوزو و ساعات تيدوزو و عينيه مارتاحت و ماشافت راحة .. البال .. القلب .. و العقل .. كولشي تيفكر في كل تفاصيل و اي حرف و اي كلمة تتخرج منها .. تعابير وجهها من تضحك ..تعبس .. تبكي .. تغير .. تفشش .. تبوحط.. كولشي جا في بالو خطوة خطوة من حطات رجليها في الدار تا خرجت ..
دازو سوايع كاملة تا صونا تلفون باش يعلموه باش يتوكلو على الله و يشدو الطريق .. ناض بشوية ريح بطرف تيعصر بين عينيه .. وقف بخطواتو و تا عفط عل داك زاج تحنى بكتلتو تيجمع فيه .. هو ماكرهش تاهو ترجع ليه و ترمم داك الهرس لي هرسات فيه داخل .. جمع داك زاج شد تصاورها تاهوما حطهم في بلاكار بين حوايجو .. حيد حوايجو و دخل للدوش خدا دوش خفيف و خرج لبس عليه حوايج جبد فاليز ديالو هز فيها لي يحتاج و خرج من لبيت تا سمع صونيت لباب عرف شكون .. فتح الباب و تم راجع كان نصير لي غا شافو عض على شواربو بجهد دخل و سد لباب وراه لقاه تيعصر قهوة و كارو في فمو
نصير"" كون خليتيني اصحبي نمشي بلاما تزيد عليه دعيق الوقت
نوح""( هز كاسو مدو ليه و دار كاس اخر يتعصر ) الصمت
نصير""( جلس بطرف على طبلة ) و ز** ي معاك داوي فك موشكيلتك بعدا
نوح""( شاف فيه هز كاسو رشف منو ) هنينا الق* ي .. خبارها تكون عندك باش ماكين علمني عليها
نصير""( حرك راسو بايجاب ) وداك خينا مشى في حالو ؟؟
نوح"" ماتيهمنيش
نصير""( عارف اش هامو واش لي ضراتو) الوقت مامقاداش اصحبي .. خلي ليها الوقت ترجع ان شاء الله يكون خير
نوح"" مشيتها عليا هرستني اصحبي هرستني
ناعسة في بيتها او نقولو تاهي مانعستش غا كانت دايرة براسها ناعسة عينيها حمارو و تنفخو بالبكى ناضت بفشلة من بلاصتها و خرجات الحمام دارت روتينها صباحي و رجعت لبست عليها صلات صلاتها و نزلت لتحت لقات فاطمة و زهرة و محمد تيفطرو
نوارة"" صباح الخير
الكل"""" صباح الخير
مشات جلست تتحك على عينيها لي تتحس بيهم تقااال عليها جلست على محمد شدات يديه باست عليها
محمد"" الله يرضي عليك ابنيتي كي صبحتي
نوارة" الحمد لله ابا لاباس
زهرة"" ( تتشوف فيها مطولة ) خودي تفطري ابنتي
حركت راسها و مدت يديها لكاس اتاي هزاتو حطاتو قدامها تترشف منو عينيها ساهين
فاطمة""( دفعت ليها طبسيل الرغايف) خودي قبل مايبرد
تبسمت ليها و قطعت منو طرف دارتو في فمها و جلست تديه من هنا لهنا غا تتلوك فيه ماحكروش معاها مخلينها على خاطرها تاكملو فطورهم تجمعت طبلة و ..دازت الوقت و داز و هي متكية في داك المرح لا هضرة لا كلام من غير يلا هضرو معاها ..
تسمعت الهضرة في الباب و هي تگعد جلست حتى بانت ليها زهرة داخلة مع الباب و وراها بديعة لي دخلت و هي تبان ليها صغرت عينيه بصدمة
بديعة "" نوارة هادي هنا
نوارة""( تبسمت بزز عليها غا من شوفاتها مبينة كولشي وقفت سلمت عليها) ايه هي هادي لاباس عليك شخبارك خالي و شيماء
بديعة ""( جلست جنبها ) كوولشي لاباس ازوينة نتي بيخير ..( شافت في زهرة ) ايوا ماقلتيش ليا غاتجي ..( عاودت شافت فيها ) شافتك غي مرت سي حمد جيتي مع الليل بشوانطك في تاكسي و قالتها ليا
فاطمة"" ( غاسمعتها و خرجت من كوزينة وقفت قبالتها ) شنو بغيتي نجيو ندقو عليك ولااا مافخبارناش وليتي مع مخابرات
بديعة"" هههه لواه لواه غا حيث جات في تاكسي و ليل و شانطة قلت شي باس ماكين
زهرة"" كولشي لاباس ( تدوز يديها على ضهرها بحنية ) توحشت ميمتها و جات تشوفها
بديعة "" ( تبسمت ) امم ايوا مافيها باس .. كون مشيتي نتي شفتيها راك باقة ماعمرك مشيتي لدار بنتك
نوارة"" ( شافت فيها نطقت ببرود) شي موشكيل .. ياكما جالسة على قلبك
بديعة """ لا حبيبتي داركم هادي هههه غي قلبي عليك و كان
زهرة""" عارفة عارفة قلبك علينا من قديم تتبغي لينا الخير
بديعة""( ناضت تتقاد كمام جلابتها ) نمشي لسوق نشري حوت .. والو شيماء قالت ليك بغاتو في لغدا نطيبو ليها
زادت بلاما تسنى شي رد منهم مشات مخلياهم تيشوفو فيها قربت فاطمة جلست جنبها
فاطمة"" مايبقاش فيك الحال
نوارة"" عادي قالت لي شافت
زهرة"" تنحشم و نحل عليها الباب واخة راه تدخل بلاما تدق
نوارة"" ماعليش ( تبسمت) و مالكم تتخمو ليا راه عادي
نطقت ديك عادي و ناضت تتبسم داخلها .. داخلها تيبكي قبل عينيها لي غي تضركو عليهم و بداو يسرسبو .. ماعرفتش تاني واش هضرة بديعة فهمتها كي دخلتها معاها بلي صافي لاحك و رجعتي لداركم بالليل .. طلعات لبيت و تكات مسندة بيديها تحت راسها ساهية و دموع تيتكبو غا بوحدهم ... سمعت تلفون تيصوني جنب راسها مدت يديها جابتو قدام عنيها .. تيبان ليها صورتو مزينة تاني بقات قدام عينيها يصوني و يعاود مامرة مازوج حتى عيا عاد حطاتو و عاود صونا تاقطع هزاتو و دخلات و بلوكات نمرة ديالو في مرة ...و لاحت داك تلفون و غمضت عينيها بقهرة بقات هاكاك .. تاداتها عينيها و صورتو معششة ليها وسط العقل
جهة اخرى و المدينة اخرى بضبط مدينة وجدة نزل من السيارة خاصة بالشرطة قدام للمبنى سكني خاص ... هز فاليز ديالو و جنبو عز الدين متوجهين للشقة ...
عزالدين"" اشاف بغيت نسولك لا تقلقش عليا ( شافو لمح ليه و كمل طريقو بلاما ينطق ) علاش ماخلتيش نصير يجي يعني فرصتو يطلع في گراد ورا هاد العملية
نوح""( شاف فيه مطلعو بتخنزيرة ) شي حاجة شخصية تبغي تعرفها واقيلة؟؟؟؟؟
عزالدين"" ( نزل بعينيه ) الا الشاف غا سولت وصافي
نوح"" تحرك قدامي
دخلو بالفعل هو وياه لشقة في طابق الاول دخل ريح و شد تلفون و عود اتصال لكن تأكد بالبلوك لي لاحت ليه زير بيديه على داك تلفون تا كان يطرطق وسط يديه .. عاود اتصال لكن لنصير لي جاوبو في الحين كان داخل في حالو للدار
نوح"" ياكما فيقتك
نصير"" ( سد لباب و دخل ) لا كنت خارج وصلتي على خير
نوح"" مزيان ( عصر بين عينيه ) شوف ليا سناء تهضر معاها تحيد داك البلوك
نصير""( باسف ) غا سمحلي اصحبي والله
نوح"" ( مقاطعو ) سير ترتاح ورد عليا
قطع عليه و مشى جبد فوطتو و توجه للحمام و بان ليه عزالدين خارج من الكوزينة
عزالدين "" تبغي شي حاجة راني خارج نجيب قهوة
نوح""( حتى فاتو و عاود شاف فيه ) جيب ليا نمرة جديدة معاك
دخل للحمام و عزالدين خرج في حالو خدا دوش يحيد العياء و دخل واحد البيت لبس عليه سد سراجم ضلمو و مشى تلاح فوق داك سرير ....
—-
مع دخل مع الباب كتسمعو تيهضر مع نوح و هي تخرج من البيت لقاتو قطع معاه قرب ليها باس على جبينها
نصير"" مزيانة
سناء"" ( حطت راسها عليه معنقاه ) بيخير بيخير احبيبي
نصير""( تيلعب بشعرها ) قولي لديك صحبتك تفك لبلوك
سناء""( هزات عينيها ليه) اواه بلوكاتو كاع
نصير"" ( حرك راسو ) غادي لديك الخدمة على ودي باش مانفرقكش و صدق معطل عليه الصلح .. ديري شي حاجة !!
سناء""( عوجت فمها ) و هي معكسة و بقى فيها الحال اه و لكن راه عورتها في هادي صراحة
نصير"" نسيتي راسك نتي .. طينة وحدة الله يحفض
سناء""( هزت كتافها ) صافي تبقى كل مرة تفكرني .. نتا لي تتهضر على زين فعايلك
نصير""( تبسم ) هاااك على القرطاس
سناء""( ميقت ليه و مشات من قدامو تتمختر بداك نص بيجامة لي لابسة ) هضرتي هضرت
نصير""( تيطلع و ينزل في جسمها لي بدا يتنفخ و يزيد بوزنو ) عفسي عفسي على الدين مو
سناء"" ( ضحكت و ضارت شافت فيه ) علامن
نصير""( قرب قفازي و حط يديها على قلبو ) تي دوك خطوات اش دايرن هنااا
سناء"" غي خطواتي صافي
نصير""( عض على شنوفتو بخبت ) شلى خطواي امولاي التهامي ( حس بيها كشرت على جبهتها و ضربت ليه على شفايفو حتى شد يديها باس عليها ) اش مشهي ولدي ؟
سناء"" ( تبسمت) ولدك مشهي طوجين تتعرف بعدا ليه ولا اً
نصير"" حگرة زينة هادي حاگرة حبيبك
سناء"" اوكي مون الشاف وريني
نصير""( قرب معوج براسه باس جنب شفايفها ) نوريك العمر نوريك
ذاز النهار المدعوق عندو نعس شوية و ناض لخدمتو ماعاودتش عيطت و حتى نمرة جديدة خلاها فين حطها ليه عز الدين .. و عندها هي نهار كامل و هي في الفراش تا من الغدا بزز نزلت لتحت في كملت و طلعات تا الوقيتة كسكروط عاد مشات اريج عيطت ليها نزلت لقاتهم كولهم لتحت يلا تجلس و دخلات شيماء مع الباب
شيماء "" السلام عليكم
الكل"" و عليكم السلام
شيماء "" ( قربت سلمت عليها) اش خبارك الزين بيخير
نوارة""( تبسمت ) لاباس الحب نتي مزيانة
زهرة"" جلسو بعدا تشربو كويس
شيماء"" ( جراات كرسي و جلست ) خويا يوسف سمح ليا بزاف على داك ليلة يعطيك ستر
يوسف"" ( شاف فيها )نتي ماعليك بوالو غا مبهدلك داك نص الراجل
زهرة"" ابنتي اش نقولك الله يجيب ليك ولد الناس يديك تفكي من هاد العيشة
نوارة"" علاش شنو وقع
فاطمة"" جات مسكينة مع زوج الليل تدق علينا جاو شي دراري عندها و قالو ليها سعيد جايب الكاو في راس الشارع
نوارة"" لا حول و لا قوة الا بالله
شيماء"" ( نزلت دمعة تتجري)و البارح لي جا لي الكلينيك ( شافت في نوارة ) كون ما لوسك كون دخل تالداخل
نوارة"( غا سمعت ديك لوسك قلبها تفز عليها ) مالو سلمان
شيماء"" علاه مافخباركش ( شافت فاطمة غمزتها و هي تكمل) عجوزتك شدها كريز و جابها لكلينك
نوارة""( عقدت حاجبها ) كيفاش بيخير دابة
شيماء"" لا لاباس لاباس .. تكون خرجات صباح ولا هاد العشية
يوسف"" ( بنرفزة ) يعاود يجي عندك علميني
زهرة"" الله يابنيتي ( شافت لنوارة ) خاصك تمشي تشوفي عجوزتك واقيلة
شيماء"" ( ناضت هزات صاكها ) تا نمشي و نشوف واش باقة و نرد عليكم يلا بسلامة
خرجات وخلات نوارة مزيرة على كاسها ماعرفاش اش دير حارت
فاطمة"" نوارة خاصك تشوفيها
نوارة"" ماشي ضروري
زهرة"" لواه ابنيتي لواه واخة الخصام راه ماديمش هادشي فترة و غادوز
يوسف""( هز كاسو و تم خارج و عاود ضار عندها ) ماباغيش نسولك ..و ماباغيش نبزز عليك ..و ماباغيش نضلمو تاهو غانقولك حاجة وحدة .. فكري مزيان قبل ماتصرعي .. و لي بغيتيها انا معاك
نوارة"( حركت راسها شافتو خرج و هي تشوف في زهرة ) ماما !!
زهرة"" اسمعي ابنيتي لي متأكدة منو هو داك السيد و دخلتو عليك بدلت فيك بزاف حوايج منها ضحكة رجعت ليك وجهك تغير رجعك لخدمتك مهلي فيك و ديما هاز همك و حنين فيك .. و الخصام ولابد منو كنتي مخربقة مع راسك و بغيتي ترتاحي داركم هادي .. شفتي شي حاجة حنا ماعلمينش عليها و ضراتك و شفتي راسك ماقاداش ترجعي معاه ( هزات يديها ) ديك ساعة ابنيتي ديري لي بغيتي
نوارة""( نزلت راسها و تمو دموع هوادين يتسابقو تاحست بيها جرتها فاطمة معنقها بيديها بزوج حاطة راسها على صدرها
فاطمة"" ولاش البكى اختي لاش من مابغاش تفرقي عليه
نوارة"" كنبغيه و لكن جرحني اصحبتي خبى عليا شي حوايج لي كنت ضالماه فيها
فاطمة"" ( باست على راسها ) و ماضلميش راسك و تزيدي ضلميه هو .. عطي لراسك وقت لي تقدري تقبلي هادشي لي قلتي واخة مبين فيك كولشي ولكن الوقت غا توريك مزيااان
ناضت من جنبهم طلعات لبيتها و لقات تلفوها تيصوني مكالمة من عند شيماء فتحات الخط و جلست على طرف السرير
شيماء"" و حبي صافا
نوارة" لاباس ازين وصلتي مزيان
شيماء"" بيخير احب عجوزتك مزال هنا طلع ليها لاطونسيو تاني ولقاو عندها السكر
نوارة""( عضت على شاربها بحسرة ) امم صافي واخة
شيماء"" صافي من تجي عيطي ليا نخرج عندك
قطعت معاها و خرجات من لبيت نزلت عند زهرة علماتها و قالت ليها تمشي تلبس عليها و تنزل داكشي لي دارت مشات لبست عليها جلابة دافية و نزلت لقات يوسف جالس تيساينهم خرجات زهرة من بعد ما لبست جلابتها و خرجو و عقلها مخربق و مزيرة خافت تشوفو تما او تلاقهم يبقاو يسولوها ..ديمارا و زاد متوجه لكلينيك تاسمعت تلفونها بمساجات تيوصلوها في دقة .... من عند سناء
سناء..."" نوارة فتحي داك البلوك اصحبتي اش هاد لعب براهش""
نوارة.."" ماتزيديش عليا تانتي يرحم باك مابغيتش نهضر معاه ماباغاش حسو ""
سناء.."" زدتي فيه والله زدتي فيه واخة ماعرفتش اش يكون دار ليك راه خبى عليك من صالحك نتي مابغاش يجرحك و خايف على نفسيتك ""
نوارة....""غادية لعند مو لكلينك دابة من بعد و نهضرو"""
سدت معاها و تكات براسها على زاج حاضية لي جاي و لي غادي تاوصل قدام الكلينيك و حبس في باركينغ نزلو و عيطت لشيماء هبطت عندهم و تمو داخلين
شيماء""( شدت فيها مخلية يوسف و زهرة وراهم وقربت تتهضر بشوية ) عجوزتك واكلة دق .. صحيبتي ماعرفتش سبب ولكن هاد كريز لي شداتها صعيبة على شوية ماكانت تمشي ليها صحتها جابوها لبارح نيت مع ليل
نوارة""( شاف فيها ) شكون معاها
شيماء"" معاها زينة لي بانت ليا
نوارة"" مكاينش نوح ياكي ؟؟
شيماء"" ( طبطبت ليها على دراعها و نطقت ) لا تيكون غا داك لوسك وزينة و ختها ديك المراة الكبيرة
حركت راسها غي وصلو لداخل تسناو يوسف و زهرة تاوصلو عليهم و تمو طالعين لطابق فوقاني سبقتهم شيماء بخطوة دقات زوج دقات خفاف حلات لباب و دخلات تتبسم
شيماء"" مدام شامة شي ناس بغاو يشوفوك ؟؟
جالسة في الصالون حدا السرجم حاضية شتاء تتنقط مغمضة عينيها تتشم على ريحة الثراب تاحست بيديه ضارت على كرشها و شفايفو على عنقها تيحرك بلحيتو على عنقها .. تبسمت و شدات على يديه تتعوج براسها على هرة لحيته
سناء"" ( ضارت عندو شافتو لابس عليه حوايج الخروج عبست) غادي تمشي دابة
نصير""( باس نيفها) ايه ( تيبعد شعرها على جبهتها) بديتي تقنطي ليا
سناء""( قربت تتشم في عنقو ختمتها ببوسة عليه ) ماتنسخاش بيك احبيبي
نصير"" ( تم مطلع بيديه مع مؤخرتها و غطس في عنقها بمصة ) كون تشوفي انا
سناء""( بعدت بوجهها تتضحك) تا مالك عقلك تيهرب بعيد
نصير""( تبسم ) نموت عليه داكشي حلاوة عندك
سناء""( حلات عينيها على جهدهم ) الصمت
نصير""( قهقه ببحتو خشنة و نطق) دابة شكون لي عقلو تيهرب انا و لا نتي
سناء"" ايوا شوف نتا علامن هضرتي
نصير"" صراحة ""( دور يديه بزوج على مؤخرتها و جرها تاتزدحت معاه نطق بخفوت ) هاعلامن هضرت فورمة عندك تتخردل
سناء"" و لا غلاضيت ( تتلعب في لحيتو) حيث مع حمالة ضروري من زيادة في الوزن
نصير""( تبسم) كولشي غا يزيد في وزن زعمة
سناء"" كيفاش
نصير""( قرص على حلمة ) هدا بدا يبان
سناء""( ضرباتو و ناضت ) انا لي دايرة فيك راسي
ناض وراها تيتبسم شد معصمها و جرها بشوية تاجات قدامو و نزل براسو تاستقر بشفايفو على شفايفها تيمص عليهم بفنية .. بعد شوية عليهم
نصير"" حلاوة معامن جات ( درعها خاشيها فيه و تم متوجه لبيت نعاس داها لسرير جلست و غطاها و) تريحي هنا انا جاي
بقات مراقباه بداك مشية و ختورية تتبسم كيف مهبولة تابان ليها جاي و هاز بلاطو بقات تتشوف مصغرة عينيها قرب حطو قدامها .. موجد ليها سباگيتي بصوص بيضاء و كاس العصير و معاها بعض فواكه الجافة تبسمت و عاودت شافت فيه
سناء"" يااالحبيب ديالي (شافت فيه) سمحلي عذبتك والله
نصير""( قرب باس على شفايفها و بعد تيلبس عليه جاكيط ) بصحتك العمر .. كولي و خلي داكشي تم تانرجع وياه تهزي شي حاجة ( شافها حركت راسها و نطق ) يلا حتاجيتي شي حاجة خلي ليا ميساج
خرج مخليها غاتموت في عشقو و تزيد جننها بهاد كترة حنانة و الحب لي تتشوف منو نهار على نهار موقف على موقف تيزيد يغرقها فيه...
داخل الغرفة شامة و جنبها زينة تتقاد ليها خدية تبسمت فور ماشافت شيماء عاد ردت لبال لنوارة لي دخلات هي لولى تبسمت بفرح عاد بالها نوح معاها تاتفاجأ بزهرة و يوسف معاها قربو سلمو عليها يوسف خرج بعد ما سلم عليها
نوارة""( محنية عندها حاطة يديها على كتفها) كي بقيتي خالتي
شامة""( حركت راسها و دموع بداو ينزلو ) الحمد لله ابنيتي الحمد لله
مشات شيماء و تبعتها زينة بقات معاهم زهرة لي جلست و عاطية مجال باش يهضرو
شامة"" فين نوح ابنتي
نوارة"( نزلت عينيها حركت راسها بنفي ) ماعرفتش اخالتي انا في دارنا
شامة"( شافت في زهرة و عاود شافت ليها ) شنو كاين ابنتي .. ياكما باه هو سبب
نوارة""( شافت فيها و طبطبت ليها على دراعها) خالتي رتاحي دابة من تولي لاباس و نهضرو
شامة""( عينيها ماحبسوش من الدموع ) وابنيتي راه ماعرفت فين زاد و ماعندنا ليه خبار تنعيطو ليه ماتيجاوبش من جا و لقى باه عندنا نفر منا و منو خرج خرجة واعرة ابنيتي (مسحت على عينيها ) عفى بنيتي طمنييني عليه الله يرضي عليك
نوارة""( نزلت عينيها كاتمة شهقاتها ) كان تيعيط ليا اخالتي غايكون بيخير
شامة""( شدت يديها باست عليها ) الله يرضي عليك قلبي تياكلني عليه خرج و هو غاضب عليا وليدي خرج و هو محطم ابنيتي
نوارة""( هنا ماقدرتش تحبس من دموعها خلاتهم و عطاتهم طريق باش ينزلو بغزارة ) الصمت
شامة""( بصوت مقجوج) تخاصمتو ابنتي ؟؟
نوارة" خالتي عفاك خلي ليا لوقت مافياش لي يهضر في موضوع
شامة"" ( شافت في زهرة و نطقت ) ياك لاباس اختي واقع شي حاجة
زهرة"" بحالي بحالك اختي جات لدارهم و مابغاتش تنطق خليناها على خاطرها تاوكان ترتاح و نعرفو اش كاين
شامة""( شافت فيها شدت على يديها و نطقت) مايضركش ابنتي عمرو يضرك و لا يفكر فيها .. انا لي تنضر و نكسر فيه كل مالقيت فرصة .. يصبر و يكمدها في قلبو .. هو ما يقدتش ابنتي .. عساك نتي نورتي ضلامو ..
ماقدتش تزيد تهضر فكت يديها و خرجت تتبكي مخلية شامة تتمسح دموعها قربت ليها زهرة وقفت جنبها و نطقت
زهرة"" مايكون باس اختي
شامة"" نهيها اختي ماتخليهش الله يعطيك الستر .. قولي ليها تخفف على داك القلب
زهرة"" يكون خير ( قربت سلمت عليها بعدت عليها نطقت بهدوء ) نخليو ليهم الوقت حيث هي ل تداوي .. هي تتكملو هو تيكملها و مايقدو على فراق
نطقت كلامها و خرجت من عندها .. مخلية شامة تبكي و تقول قليل .. تبكي دموع ندامة و لا قهرة لي شافت فيه و لا الحكرة لي معمرو نطقها خرجها هاد مرة و هو مقهور .. فهمت موشكيل اولو و اخره هو باه وزادت هي و فراقها لي مشات و خلاتو .. عرفاتو زاد تمرمد مرة اخرى لكن باسم الحب و العشق و الحنية لي كان محروم منها .. و عاود تحرم من كولشي تاني..
غير خرجت سدت لباب و زادت دموع ماقدرتش تحبسهم و لا قدرت.. ماشافت لا هنا لا هنا زادت نيشان لباركينغ مسحت على دموعها و طلعت لطوموبيل
يوسف""( لي حاضيها من كانت جاية لمح ليه من مرايا و نطق ) فين الواليدة
نوارة"" هاهي جايا
بقى مراقبها تا سمع الباب تحل و طلعات زهرة و كسيرا راجع في حالو
في حين زينة دخلت عند شامة لقاتها تتبكي قربت ليها باست راسها
زينة "" الله يعطيك صحيحتك باراك عليك
تحل لباب و دخل سلمان غي شافها في ديك حالة و قرب منها من جهة لاخرى باس على راسها
سلمان"" كي بقيتي الواليدة.. سمحي ليا على هضرتي معاك لبارح
شامة"" انا لي خاصني نطلب منكم سماحة كاملين .. بالخصوص داك الراجل لي خرج هو غاضب عليا ..
سلمان"" ( نزل عينيه ) تنعيط ليه ماتيجاوبش
شامة"" ( زادت بدموعها) و مرتو ماتتجاوبوش ...
زينة"" ماما بارك عليك يعطيك الستر غي تولي شوية و نمشيو عندها و نهضرو معاها
سلمان"" كولشي من ديك الق** ة اش نوعرت ولا اش دارت قلبت كولشي سفاه على علاه
شامة"" واخة نعرف نبوس رجليها و ترجعو ليا هي هي بيديها كولشي نوارة ..
سلمان"" انا نخرج نكمل وراق الخروج باش نتيسرو
خرج لبرا مشى الاستقبال تيقاد وراق الخروج و الخلاص جبد فلوس تيحطهم و تحطت 200 درهم قدامهم .. و تسمع صوت وراه
شيماء"" نقص 200 من دوك فلوس
سلمان""( دور عينيه مستغرب ) شنو زعمة ماتخليش عندك كريدي
شيماء""( تبسمت ) لا لا ماعرفت راسي نعيش من لغدا ولا لا تبقى تابعاني
سلمان""( تبسم و دار عندها بكتلتو ) مسامح من دابة
شيماء""( تبسمت ) شكرا و سمحلي على لي شفتي وعلى ( نزلت عينيها ) لي سمعتي
سلمان""( هز الوراق و نزل براسو لعندها منزل بصوتو ) مانقدروش نختارو الواليدين .. قد كانو خايبين معانا قد كانو مزيانن .. داكشي لي عطانا الله
شيماء"" ( حابسة دمعة حيث هضرتو صحيحة و واليدين عندها غا بسمية ) بصح ( شافت فيه ) شكرا
سلمان""( مد يديه منزل براسه بطريقة خلات خدودها يحمارو ) سلمان
شيماء""( مدت يديها بخجل حطتها وسط يديه و قلبها بدا يتخربق بلمستو ) شيماء
تبسم و طلق من رهوفية لي حس بيها تترعد حك على رقبته حتى كان ينطق و سكت حنحن تيقاد في حلقو تا شافها دارت ماشية و عاود شافت فيه و نطقت حشمااانة
شيماء"" كنعتاذر تا على طريقتي في هضرة معاك داك نهار على الحلوة
سلمان""( تبسم على خجلها و كيفاش عينيها ماتبتينش قرب بخطوة تالحداها و نزل لودينها و نطق جملتو و زاد ) ماتسرطاتش ليا بكترة حلاوتها
جالس فوق فوطوي ومعاه شي دراري الخدمة ناض من جنبهم و دخل لبيت سد عليه جلس بطرف السرير جبد تلفون من جيبو شعلو و بداو يوصلوه ميساجات و ابيل .. ماتسوقش و مشافش في تا حاجة .. دوز نمرة تاني لقاها مزال مبلوكية جبد كارط جديدة ركبها و حط تلفون قبالتو شعل سيجارتو يبخ و يعاود و عينيه حمرييييين. و هوما مراقبين داك تلفون و بضبط لصورتها هي و ياه اول صورة خداو عض على شاربو بجههد و عاود نزل تلفون و جلس يبخ تاني و يقول قليل
_______
وصلت الدار وطلعت نيشان لبيتها وسدت عليها تتحس بقلبها غادي يسكت تقهرت .. و تقهرت تالهاد درجة كولشي ملاحض عشقو ليها .. تالهاد درجة كولشي شايف فرحتو بيها.. سمهت تلفونها تيصوني و جاوبت في الحين كانت مكالمة فيديو من عند سناء
سناء""( مصغرة عينيها) معكسة و بكى عشرة للضس
نوارة"" صافي تانتي ماتزيديش عليا كولشي تيرضني غالطة كولشي
سناء"" حيث غالطة و بزااف موضوع باه و زدتي بفراقك عليه شحال ديال الجهد عندو داك سيد .. و نتي عارفة كولشي اصحبتي
نوارة"" دابة اتبقاي تلوميني غا انا
سناء"" فكي لبلوك و جاوبيه
نوارة"" لا مافاكش مافيا لي يهضر معاه .. نفكر مع راسي
سناء"" ماعندك ما تفكري كولشي باين و واضح ماقداش تعيشي بعيدة عليه
نوارة"" ولكن راه خبى عليا موضوع لي مضمر لي حياتي
سناء"" و بسببو هو رجعت فرحتك بسببو هو كولشي داير ليك الشان .. بسببو هو رجعت فرحتك .. مخبي عليك خايف يخسرك .. بغيتي شوية الوقت قوليها ليه على اقل ماشي هاكة تيتحلو مشاكل ماديريش غلط لي درتو انا .. انا نقطع و فكي داك بلوك خلي ليه كاع واخة غي ميساج على اقل و علميه .. بسلامة
قطعت عليهاا ديك ساعة مخلياها تتستوعب هاد لهضرة و هاد الكلام راسها مخربق عليها بصح تلفها و خرج ليها العقل توحشاتو و توحشاتو بزاااف برغم من انه غي نهارين باش غابت عليه تتحس بروحها تضرها .. هزات تلفون و دخلات لبلوك غا تفتحو و قاطعها اتصال من نمرة غريبة و جديدة .. بقات تتشوف طاح في بالها ممكن يكون هو .. لكن جات في بالها بنات الخدمة اكتر .. بقات مترددة و هي تتشوف فيها تاقطعت و عاودت تاني شاف حتى عيات و فتحات الخط
نوارة"" ( بصوت منخفض) الووو
:قل لماذا اخترتنى!
واخذتني بيديك من بين الانام!
ومشيت بي، ومشيت ثم تركتني.!
ان كنت ياملح المدامع تركتني!
فا اقل مايرث السكوت! من الكلام: هوا ان تؤشر من بعيد بسلام🍂
( ميسون- السويدان)
نوارة"" الو
محني بمرافقه على ركابيه حاط صباعو على نواضرو عينيه مغمضة و قلبو لي ماقاد يغمضو و لا يتحكم فيه .. توحشها .. توحش صوتها .. توحش ردودها بعد ديك الو سرط ريقو بصعووبة حل عينيه نطق بخشونة
نوح"" ماتقطعيش
نوارة""( حلات عينيها بجهد يديه بدات تترعد بشكل فضيييع و داكً صوت خلى رعشة تطلع ليها مع رجليها بدات تنفس بزربة ) الصمت
نوح""( تيسمع داك صوت نفس تيطلع و ينزل نطق بهدوء ) نوارة ماتقطعيش
نوارة"" علاش معيط ليا ياخ خليت لي
نوح"" ( مقاطعها) خليتي لملتي مرار تنسرط فيه بزز عليا
نوارة"" نووح عفاك ماتعاودش تعيط ليا و ماتعاودش تقولي تا كلمة
نوح"" لامتى ؟؟
نوارة"" ( دموعها تمو يجريو نطقت بقهرة على صوتو ) في مرة مابقيتش بغيتك و مابغيتش نسمع صوت
نوح""( نزل عينيه لي ولاو حمرييين) نخلي ليك الوقت ؟؟ واخة ماعنديش ؟؟ ديك كلمة مابغيتهاش نوارة
نوارة"" ( عضت على صبعها ) ماعندي ماندير ليك الله يعاونك
نوح"" ( بقهر)عندك ماديري و نتي لي تتعرفي مزيان انوارة بغيتي الوقت نخليه ليك شحال ما بغيتي .. عارف قودتها معاك واخة حياة دين مها مقوداها معاها بالمزيان .. ولكن نتي هرسيتنيً و ماخلتي ليا تافين نعكز .. الوقت نعطيه ليك .. غا نعطيه ليك حيث الوقت معاك عرفتو و معاك باغي نزيد ندوزو .. ديري في بالك انا باغيك و عمرني نضرك و لا نفكر فيها .. مانضرش اليد لي تمدت ليا ..
كان سباق باش يقطع ..اه ماباغيش و ماكرهش يهضر معاها ماكرهش يزيد يعبر و يزيد يعتارف بعشقو و بحبو ليها ... فكر و قال مع راسو نخلي ليها الوقت يلا كانت بصح باغية الوقت مانزيدتش نضعقها نجيبها في راسي و ماتجيش فيها .. متوحشها و متوحش صوتها ماساخيش كان محتاج يتكلم ليها و يعاود ليها حيث هي راحتو و هناه لكن ..لكن شي حاجة واحلة ليه في حلقو خانقاه و ماعرفش شنو هي ماعرفش يدوزها و يزيد ينطق شي كلام اخر .. شحال من حاجة جربها و غير ما زايد يجرب .. قهراتو و طعناتو بفراقها .. شد راسو بين يديه مخلي قلبو يضرب ..يضرب بشكل مخربق .. حك على وجهو بيديه و ناض خرج من البيت توجه لعند دراري جلس يكمل معاهم ديك الخدمة و هو العقل ديالو مغيب و مرفوع ....
مرور اسبوع
داز النهار على نهار ليلة على ليلة ساعة على ساعة لكن الاحاسيس هي هي القهرة و البعاد عدبهم و طعنهم بالمزيان .. هي ولفها داك اتصال في نفس الوقت و نفس الساعة يومين لكن ماقدراش تجاوبو من نهار لي جاوباتو و هي تتطعن و ترد لقلبها و .. هو.. زاد بطعناتو من يوم هداك تيعيط ليها غي باش يسمع غا صوتها لكن عمرها جاوبت —-
الوقيتة العصر جالسة جنب زهرة تتنقي معاها زنجلان و فاطمة جنبها تتفسخ الكاوكاو هزات عينيها لنوارة و نطقت ..
فاطمة"" مزال ماعيتيش نتي
نوارة"" مناش
زهرة"" هادشي ابنتي ماهواش مابقيتي تاكلي و لا تشربي نعاس تاهو تحت عينيك ولاو كحلين .. لاش مقصحة راسك من باغاه
نوارة"" ( هزت عينيها فيهم و عودت نزلتهم تتنقي ) الصمت
فاطمة"" خالتي والله يا شفت تاعييت و بحال هاد معكسة عمرني شفت
زهرة"" بغيت نعرف موضوع لي مخليك وصلتي لهاد لحالة كاملة
محمد""( خرج من البيت و جات على مسامعه توجه بعكازو و ضرب عليه ) اجي ابنتي لعندي لهنا اجي
نوارة""(ناضت بالفعل جنبو ) نعام ابا
محمد""( هز يديه و قاس على شعرها ) لبسي عليك من برد و يلا نخرجو شوية
نوارة"" با مابغيتش نخسر ليك و الله مافيا لي يمشي لشي قنت
فاطمة"" ( ناضت هزات داك الكاوكاو و زادت )شفتي لي قلت عكس عكس الله يستر
محمد"" يلا ابنتي انا نتسناك برا
زاد بخطواتو بقات متبعاه بعينيها شافت تاعيات و طلعات لبسات عليها سورفيت و رمات عليها مونطو و نزلات لقاتو تيساينها شدت ليه في يديه و بقاو غادين ماهضرش و ماتكلمش تاوصلو لجريدة فين تيجلس وريح في مكان بالضبط فين تلاقى نوح اول مرة
محمد""( خبط بعكازو على ديك بلاصة ) هنا كلمتو و هنا وقفتو ابنتي لوكان هاد بلاصة تشهد كون هضرتها
نوارة"" كيفاش ابا
محمد"" نوح هنا جا لعندي و انا راسي دايخ بيك و بشنو وقع ليك
نوارة""( نزلت عينيها تتفرك في يديها ) با هو
محمد"" خبى عليك ياكي ؟؟ ماقالش ليك بلي تاهو لعبة واحد ماتيسواش ؟؟ ماقالش ليك بلي كون مادارش ديك خطوة لعنة غاتبقى تابعاك حياتك كاملة ؟؟
نوارة"" با انا مابقاش فيا لداكشي لي بقى فيا هو خبى عليا و خلاني واخدة عليه نضرة خايبة و ضلمتو بزااف ( بصوت مقجوج) ضلمتو ابا دخلتو لحياتي غلط في غلط
محمد"" ماكاين تا غلط ابنتي ؟ اسمعيني اش نقولك و فكري ليا مزيان مع راسك ودي كلامي و جيبيه مزيان في دماغك
فلاش باك
محمد""( تيمسح على دموعو ) بنتي ماشي ديال هادشي اولدي عمرها كانت خبيتة
نوح""( شد على راسو باس عليه و نطق ) عارف عارف داكشي لاش دخلت لهاد لعقل من نهار لول كولشي باين في عينيها الواليد ..( دوز يديه على لحيتو ) كنت ناوي نجي نهضر معها حتى وقع لي وقع صدقت مالاقيهاش و ماعرفهاش فين هي
محمد"" و باقي باغيها ولدي ؟؟
نوح"" باغيها الواليد .. باغيها و نضرتي ليها عمرها تبدل غا تبقى ديما في عيني ديك نوارة لي شفت .. واخة مرة وحدة لي شفتها فيها عارفها شنو ساوية و عارف معدنها .. لهدا انا تنطلب يدها منك قبل ما نشوفها ولا نلقاها ..
محمد"" من عندي انا عاطيها ليك اولدي باين ولد الخير .. واخة هي صعيبة و معكسة اولدي و تنضن لا زادت شافتك غادي تزيد تصعاب
نوح"" مع المدة الواليد غا يتصلح كولشي .. المهم عندي هي نفسيتها هادشي ماشي ساهل عليها .. انا معاها خطوة خطوة تاترجع نوارة ل عرفت نهار لول ... بعدها نصارحها بالموضوع
العودة•••
محمد""( شد يديها بين يديه) عمرو ابنتي كان ناوي يضرك ولا ناوي يخبي عليك .. فكرة ديال انه يخسرك او تفهمي غلط هي لي خلاتو يخبي حيث باغيك بكلشي فيك و عليك خاف يخسرك ابنتي ..خاف يخسرك .. و للاسف هادشي لي كان نيت .. من اول فرصة تخليتي على اليد لي حماتك من هضرة و حماتك من الجروح لي كانو يفلحو فيك بفامهوم .. حماك من داركم لي لاحوك للزنقة و ماعقلوش عليك ابنيتي .. هو كان و غايكون ديما هو الضهر الحامي لي غطاك ابنيتي ..
هو يهضر و هي دموعها نازلين الشلاال ماحبسوش و ماعرفوش راحة .. ضلماتو .. وضلماتو.. و زايدة تضلم فيه .. ماقدراتش تجاوبو و لا قدرت تنطق كلمة حتى هو ماحكرش و ناض وقف مد يديه شدت عليه و هي مرفوعة غادية و عينيها مزالين تيكبو طريق كلها وهي تبكي حتى وصلت لدار طلعات نيشان بان ليها تلفونها تيصوني هزاتو و بانت ليها سناء غي بغات تجاوبها و قطعت جلست و نزلت عينيها لتلفون و في بالها يكون مصوني او مخلي ميساج لكن لا غا سناء لي .. مخلية ليها شلى ميساجات
بدات تقرى فيهم واحد واحد
•معكسة و قلبك حجر الله يستر في كل مرة يصوني و مزال باغي يبرر ليك من رغم عارفاه مادير تاحاجة
•عرفتي شنو ماباقاش نقولك تا حاجة حيث مادرتي تا اعتبار لا ليا لداركم لا ليه هو عومي في بحرك من يقبل بالبعاد كيف بعدتي ماتجيش تبكي عليا
•مهم انا نشد الطريق انا و نصير للدوار انمشي عند مي من نوصل نعيط ليك
نزلت عينيها وداك القلب تتحس بالخناجر تيدخلو و يخرجو اشمن قلب .. و اشمن قصوحية ..واشمن قهرة قهراتو .. و كلامها كلو لي جرحاتو بيه ماشي نطقاتو بدا يرجع ليها كلمة كلمة .. لكن ديك (تنسحب كلامي لي قلتو ليك صباح ) خلات حلقها يتقج .. شدت عليه و تتقول ياريث كون تقجيت ولا نطقتها .. تالهاد درجة قلبها قاصح ... تالهاد درجة ماقدرتش تحكم في لسانها ..
كحزت في بلاصتها و تكات مسندة بيديها على راسها و دموع نازلين و نازلين يجريو ..
——
بعد ديك ساعتين ديال الطريق وصلو واخيرا للدوار و بضبط قدام الباب الدار ميمتها و هي فرحانة غا تحل لباب تنزل تا حست. بيه شد عليها
نصير"" شوري يابنتي بقاي بلاصتك
حبست و نزل فتح ليها الباب و شد يدها نزلت بشوية وزادو متوجهين لباب دار .. تا بانت ليها ميمتها محنية على خضرة تتنقيها قدام الباب .. و ابتسامتها بدات تتلاشى شوية شوية .. دورت عينيها لنصير لي مزير عليها و عاودت شافت ليها واشمن شوفة و اشمن نضرة ... الوجه الدابل و صففر و داخل معاه الكحولية و الجسم ضعاااف تيبانو دوك كتاف طايحين ياما هزو و ياما تمرو ياما تعبو وياما حملو .. وقفت تتحس بيديه دارت عليها حيث بصح ركابيها خواو بديك كتلة صغيرة لي قدام عينيها ..
نصير"" ( تحنى لعند ودنيها ) بشوية عليك عمري
سناء"" ( شافت فيه موسعة عينيها ) مي انصير فين هي فين
سمعت صوتها و هي منادية بيها دورت عينيها بشوية لقاتها واقفة تتمسح على يديها متبسمة بقات تطلع و تنزل و زادت وضاحت ليها الرؤية قربت منها شوية شدت عليها يديها و تتفحص فيها بشكل قاهر حتى حست بيها جرتها لعندها حاضناها بداك الجسم مهلوك ..بداك الجسم متحمل السم لي فيه لداخل
مليكة""" و ابنيتي انا لاباس ابنتي لاباس ماتخافيش
طلعات عينيها ليها تتقيس على وجهها و تتبوس فيها مغمضة عينيها ماقدراتش تزيد تشوف فيها ديك شووفة قهرتها ..عاودت عنقتها بجههد تتبوس على كتفها و هي تتحسس داك العضام لي مبينن و حاسة بيهم تاهوما تيرشاو ...
سناء""( هزات عينيها ليها ) ميمتي واش عيانة تمشي لطبيب امم
مليكة""( تتحرك راسها ) اميمتي الحبيبة سكتي من البكى ( تبسمت و عاود جرتها لعندها ) غانولي لاباس اكبيدتي
سناء""( بصوت مقجوج ) و ماضاراك والو امي باش تتحسي
نصير""( قرب عندها شد على كتافها و جرها لعندو ) سناء
مليكة"" اتخلعي اتخلعي يابنيتي ( تبسمت و تحنات هزات داك بانيو الخضرة و عاودت شافت فيها ) دخلي بنيتي من برد راني وجدت ليك داك طويجين لي تعجبك
نطقت كلامها و تمت داخلة و مخلية عينيها تابعينها بدون رمش حست بيه دورها من خصرها تاحطت يديها بزوج على صدرو مقابلة معاه منزل براسو لعندها
نصير"" سناء عمري .. ( هز يديه تيمسح على خدودها بحنية نطق بخفوت) ششت عفااك ماتزيديش على مابيها
سناء"" ( هزات عينيها ليه) نصير مي تتمشي يانصير و مي تضيع مني .. شنو ندير حبيبي شنو ندير
نصير""( جرها لعندها حاط راسها على صدرها مخليها على خاطرها مابغاش يزيد يحبسها بقات تبكي مزيرة عليه حتى حسات براسها شوية هزت راسها لعندو ) تشدي في راسك ريحي معاها و حاولي ماتبينيش ليها
سناء"" ( حركت راسها ) ضعاافت بزاف راه خلعني منضرها بزاف
نصير"" الله يخفف عليها و يقويها عليه ( باس جبينها ) الله يرضي عليك
جرها و دخلها لداخل لقات مليكة مخرجة صينية
سناء"" مي غا ريحي رتاحي
مليكة"" ( تبسمت ليهم ) اسكتي من هضرة و زيدي تريحي
حطات ديك صينية ورجعت بخطوات تقيلة و باين فيها العياء عاونها جلست و هي عينيها حاضية داك باب كوزينة و عاودت بانت ليها مخرجة ليها مسيمنات لي تيعجبوها مع حطتهم و بداو دموع ينزلو تاني ماقدرتش تحبسهم ماقدرتش تكتمهم .. هزات عينيها ليها و بانت ليها تتقرب ليها داك طبسيل نزلت بعينيها ليديها .. هادوك ليدين لي عروقهم كاع بانو تيترعدو .. وجدو ليها هاد مسمن .. نزلت عينيها تتمسح على دموعها تابانت ليها مشات تاني و هنا قرب عندها نصير حط يديه على فخضها
نصير"" سناء الله يهديك تبتي راسك
سناء"" ماقدرتش ( حطت يديها على قرجوطتها) شي حاجة هنا قجتني انصير قجتني
يلا يهضر سمع خطواتها و حرك غي عينيه باش تحبس ماتزيدتش تبين خوفها ..
مليكة"" ( تبسمت و جلست جنبها ) مال بنيتي على هاد دموع .. شوري ليا على حفيدي و لا حفيدتي .. يخرج بكاي تاهو بحالك
يتبع...
التعليقات
لا توجد تعليقات بعد، كن أول من يعلق.