سكرتيرة النمرود الجزء 13

زينة ربي لي عالم الجهد باش انها تبقى تجاحد معاها وهي يلاه دافنة باها مكاينش معرفاتش هاد النوع كيف كفكر ومفهماتش واخا من ديك العائلة الراقية مشبهاتش لهم تنهدات جمعات شوية النفس وعطاتها جواب كلامها

زينة:الشياطة هي لي لايحة قيمتها بين الرجلين على ود لي معلابالوش بيها

سامية دايرة بحال العافية كتزيد تزند بالكلام لي كتعطيها كتجي عندها مفقوصة وكتزيد عليها:جنيتي على راسك ودقيتيي على باب العافية غندمك وغنوريييك تهدديني بتصاوريي لهاد الدرجة فاقصاااك حتى تولي غير تابعاني حاضية فين غادي وفين جاية وكتصوري فيا

زينة هنا عاد فهمات وطلعات معاها وعرفات بلي عاقت بيها هي لي صوراتها بقات تابثة ونطقات

زينة:آخر يامي تفقصني مدلولة فيقي احبيبة راك لعبتي فالتيران الغلط ونت لي غتندمي الا مخطيتيش ساحتي كلشي عندي بالدليل كظلي النهار كولو النيڤو النيڤو هااانت هبطتي لواحد المستوى تحت الصفر الفلوس والعز ومزال جاااهلة وعند بالك الا مجا بخاطر يجي بالمجامر راك غير تتحلمي ازين

سامية كارزة على سنانها:بزااااف عليك وعمرك تحلمي توصلييينيي ولا توصلي عائلتييي كنت وغتبقاي خديديمة وجفاف سوا فالشركة سوا فأيام زمان عشتي شوية الاوهام داك الوقت ورجعتي لواقع ديالك لي هو هدا ونت لي مؤلفة بالمجامر وساكنة حدا ماليهم داكشي باش يزيد مسكين كانو تعماو ليه العينين

زينة تتشوف فيها كيف كدخل وتخرج فالهضرة وغطرطق دغيا كتلعب عليها حيت كتقيسها بشي حاجة لي فيها هي الدل طبعا:رااك غالطة وغير مݣدمة الله يشوف من حالك مجات بسحور ولا مجامر جات غير بالنفس والعز والقيمة لي ناقصااك عندك الفلوس ولكن معندكش كرامة وهدا هو الفرق بيني وبينك

ختمات كلامها بغمزة وزادتها كلام آخر غتزيد تشعل فيها العافية كثر ماهي شاعلة:ايوا بعدا انا واخا كنت خديديمة عشت الحب والغرام مع ولد عمك غير لمكتاب لي تصرف اما كن راني دايرة معاه لولاد دابا كيتك نت عمرك كولو كتجري على شوفة وحدة منو وملقيتيهااش داكشي باش مشيتي تجري جيهة الشرك لي معندو ما يقدي غير غيزيد يطليك فالدل كثر ما راك مطلية شبانلك دابا نضرب لختي اكبر طرر فالمملكة وبالدليل لي عندي قدام هاد امة لا الاه الا الله ومزال شي وحدين من الشركة باقين كاينين يتفرجو تاهما وتخايلي يعرفو لي دايرة عليهم الهمة والشان والبريستيج تصدق فاللخر كتشد السربيس على مجمر ديال قعقلة والفاسوخ فدريبة مكتخرجش

سامية صدرها بدا كطلع وينزل وهي تتفكر انها تمشي تشوها وتوصل لموظفين فالشركة وتوصل ليه هو بالذاااات نطقات وهي ضاغطة على سنانها كثر من الاول وهي غطرطق

سامية:غادي ندمك والله مغادي دوز لك بالساهل

زينة:حياتك كاملة ونت غير كتنبحي آخر انذار هو هدا بعدي مني راه لي فيا كافيني حانية الراس آه باش نجيب طرف دالخبز ولكن غتزيدي تهبشي على ساحتي اقسم بالله مغادي تقدي عليا لبديها باش نسكت تانا ما مشى معاك

لاحت عليها كلامها وهي كطلع وتنزل فيها وزادت خلاتها كلها تتغزل وهي متبعاها دابا عاد زادت تأكدات بلي راه مساهلااااش حانية الراس غير مع يزيد لي حاكمهم كاملين اكدات لها بلي راه ماشي دمغة ساهلة لي تمضغها بالساهل بلعات ريقها وهي تتفكر فأنها شادة عليها التصاور واخا تبغي دير فيها شكون يتيقها يزيد كعرف هاد النواحي خافتو يجي يسول ويلقى الدار دالشوافة نييت زادت لطوموبيلتها كلا مرة تتقصدها كترجع وهي مشعلة فيها العافية وكتزيد تبين لها بلي اللعب معاها صعيب والحرب لي دخلو فيها دابا حامية سدات عليها وهنا ديمارات وزادت فمها كترعد بالعصاب غوتاااااات وهي صايݣة لعلى وعسى تخرج داك العصاب باش تتحس غطرطق غتفرݣع تكبو عليها الفقايص من ݣاع الجوايه هاهي شدات عليها تصاور يمكن يطيحو بصورتها لي شحال وهي تتبني فيها بالغرور والتكبر للأرض خاصها طيرها خاصها تغبرها من قدامها الا بغات ترتاح دابا مبقاتش مسألة يزيد وصافي ولات حتى صورتها بين يديها خايفة لتمشي تسيفطهم ليه الا هو

داز هاد النهار بحال الكابوس بالنسبة لعائلة زينة وجا نهار جديد كان النهار ديال الصدقة لي طلعو فيه الخيمة بدوك الفلوس لي جاو لزينة من طرف صحابها عبد الكريم وقف وقفة ديال الصح معاهم هو لكتسخر ومعاه ويوسف وشي دراري ولاد الحومة تطوعو يعاونو

الطريطور قام بالواجب كيفما موصيينو لي مسيفطينو ودازت على اكمل وجه وسط حزنهم على الفراق وكلمة الله يصبركم من عند الناس والعزاية كرددو وراها امين حيت فعلا محتاجين ربي يعطيهم الصبر دوزو كلشي باشما عطى الله وجا النهار ديال الزيارة

الفقيه كقرا ما تيسر من القرآن الكريم وهما واقفين مقابلين مع قبرو الدموع فعينيهم كاملين ومزال الجرح جديد وعمرو يبرا لان لي مشى طرف منهم وجزء منهم سكينة لي كانت حاطة راسها على صدر ختها زينة وواقفين تتبكي فصمت وهي تتشوف باها حبيبها مشى وهي فسن صغير كانت باغية تفرحو بالباك ديالها كانت باغياه يدعي معاها ليلة الامتحان بالتيسير وتصبح على دعاويه مشى وخلا لها حول راضية لي حاطة راسها على كتف مها مسعودة وتاهي حزنها فايت العمق بكيلومترات كانت باغياه كيفما حضر لعرسها وزواجها يحضر حتى لولادتها ويشوف حفادو ولكن مكتابش يوسف تاهو واقف وصااامد باش ميطيحش الدموع ومخبي حزنو كان باغي يحقق الحلم لي لطالما حلم بيه ويفرح بيه واليديه هو انه يولي لعاب ديال الكورة ويكونو معاه واليديه بدعاويهم ولكن مكتابش مسعودة تاهي واقفة وتتشوف لي دوزات معاه النص فعمرها وولدات معاه ولادها سبقها لتحت التراب كيفما كان حالو كبقى بات ولادها ولي مدمرها اكثر انه مشى مثقل وفعنقو تقليد الضحية ديالو بنتهم وولد الناس زينة لي يمكن اكثر واحد وسطهم لي حزنو مضوبل بأضعاف واخا كلهم باها ولكن هي لااا كانت علاقتهم بيه فشكل كانت مواعداه اديرلو العملية وطاحت وناضت وصبرات على الدل على الاهانة ماشي غير فالشركة حتى عند لي ضربات عندهم الجفاف وفاللخر موصلاتش لداكشي لي بغات حسات بلي جهدها كولو ضاع ومكانتش قد الكلمة كانت باغية تشوف رد صحتو واخا مغاديش يرجع كيف كان ولكن على الاقل يبرا فقصتها هي كملات عليه واخا مدارت والو ولكن بسباب مشكلتها وداكشي لي وقع كانت هاديك هي طيحتو ولا واحد فيهم كان باغيه يكون معاه فحاجة وكانت عندو قصة معاه ولكن مشى ومشى معاه كلشي مبقاوش غادي يشوفوه ومبقاوش غادي يتجمعو بييه هزو يديهم فاش بدا الفقيه كدير الدعاء وهما كرددو آمين حتى كمل ودعاو ليه بالرحمة والمغفرة زينة مدات لفقيه شي بركة وراضية بدات تتكب ليه الزهر على قبرو لي يلاه غادي يتبنى ويضورو عليه الزليج ويقادوه فديك اللحظة لحق عليهم عبد الكريم لي كانت عندو شي حاجة هي لي عطلاتو بقاو شحال تما حدا قبرو وكأنهم مزال كستوعبو انهم الا بغاو يطلاقاوه خاصهم يجيو لمقبرة ويشوفو التراب فبلاصتو هو شي حاجة صعيب ويعجز اللسان على وصفها جا الوقت فين خاصهم يمشيو تحناو كاملين على قبرو واحد واحد كبوسوه زينة جات نوبتها جلسات على ركابيها وحطات راسها على القبر وغمضات عينيها وكأنها تتخايل بلي حطات على راسها على صدرو دموعها نشفو وقلبها لي كان كبكي نطقات بصوت خافت وكأنها كدوي معاه

زينة:كيف غندير من وراك يا لي كنتي ساند ظهري والحيط لي محمية بيه ومسخن كتافي تهرست ابااا وبيك باش كنت كنقوي راسي مشيتي وربنا كاملين بعدما كنت نت هو الساس العزيز

كان واخا عاجز ومقعد ولكن على الاقل كان معاهم سندهم والساس ديال الدار مسخنين بيه كتافهم تݣعدات بشوية وهي كدوز يديها على التراب روحها لي كتبكي وكيانها اما عينيها نشفو عبد الكريم كان كشوف فيها وفحالها بقات فيه بزاف كيف بقاو فيه حتى هما وبقى فيه حتى تيباري لي كان بمثابة الاب ديالو هي بالذات بقات فيه لانه عندو من جيهتها احاسيس باغي يكون معاها يوقف معاها فهاد الحزة ويخفف عليها المهم يكون جنبها

فنفس الوقت فبلاصة اخرى حلات لباب ودخلات وهي هازة ولدها كمال حطاتو بشوية وسدات وراها لباب وهي شاداها الدوخة

انيسة:كمال اجي اماما جلس غادي طيح

متسوقش لها ومشى كلعب وهي جلسات شادة راسها الوحم جاها صعيييب هاد المرة كثر من ولادتها لأولى لدرجة انها نفرات راجلها وجات تجلس فدار خوها هي وولدها حتى ضار واليديها ما رتاحتش فيها رجعات شوية اللور وتسرحات فالفوطوي شعلات تيليفونها لقات عرام ديال ليزابيل هملاتو ومبقات داتها فيه لا شكون صونا ولا شكون سيفط كيفما هملات حتى خدمتها ولكن تحاجة ما لخاطرها لقات راجلها مصوني حتى قال براكة ومسيفط لها شلا ميساجات تجاهلاتو ومشات دخلات لكونڤيرساسيو بينها وبين ختها غير قرات داك الميساج لي مسيفطة لها وهي تخرج عينيها

روعة:تيباري بابات زينة مات وماما ويزيد مشاو لعندهم للدار عزاوهم

فديك اللحظة صونات لها روعة مين شافتها دخلات قرات ميساجها دخلات فصلب الموضوع نيشان بعدما سولو فبعضياتهم

انيسة:كيفاش قضيتهم وعلاش مشاو عندهم بابا حتى هو مشى؟

روعة:معرفتش اختي شي حاجة تما واش رجع معاها الله واعلم ماما حتى هي مفهمت فيها والو بابا راه مكاينش فكازا اصاحبتي ياك مشى مع سي العمراني لفيرما

انيسة تنهدات:ايوا الله يرحمو نت نت مشفتيهاش؟

روعة تنهدات:لا ولكن منكدبش عليك كنفكر نعيط لها مين شفت يزيد براسو مشى حتال عندها

انيسة:لي بانلك الموت هادي انا لا شفتها فالشركة غادي نعزيها عادي الا كانو هما خبيثين حنا ماشي بحالهم اجي مين غضبري فنمرتها

روعة هنا تسرط لها اللسان حيت عادل هو لي غتاخدها من عندو وحد معارف بسيرتو معاها بدات تتمتم وهي تنقد الموقف دغيا:احم غادي ناخدها من عند سامية ولا نطلبها ضبر ليا عليها

بقاو كهضرو شحال من بعد قطعاتها معاها بقات متكية وهي حاسة بالترويعة وولدها كجري من قنت لقنت كبقشش حتى جاب ليها واحد الصندوقة لقاها مرمية قريبة لشوميني

انيسة تݣعدات:فين لقيتيهاا؟؟؟

كمال نعت لها فين جلسات وحطاتها فوق ركابيها مع حلاتها نيشان وهي تخرج عينيها شوية كانت فيها تصويرة وخاتم هزاتو بين يديها وهنا عرفاتو ديالمن نفسو خاتم دالزواج لي جاب خوها لزينة ولي خلاتو ليه نهار مشات مزال محتافظ بييه نزلات راسها لتصويرة هزاتها وهي تتشوف فيها كانو عينيه زينة ومن ديما كانو هما نقطة ضعفو بقات تتشوف فيها وكيف محتافظ بيها خوها بلاما تعرف انه حرق بزاف وكان محتافظ بكلشي ذكرياتو معاها وهاديك ما رضش ليها البال ضوراتها وهنا شافت الكتبة لي غير قراتها حطات يديها على قلبها لي ضرها بثقل داك الكلام لي مكتوب ولي كعبر فيه خوها شحال مضرور

"لم يكن شيئا مهما بالنسبة لك يا زينة لكنه كان قلبي"

كانت جملة محمود درويش لي تاهو تخدل وقصة خوها كانت بحالو تماما بزوجهم غذروهم النسى وما اخيب كيد وغذر حواء عينيها غرغرو وحطات التصويرة على صدرها وهي هازة راسها ودموعها كنزلو بقى فيها خوها بزااف ميستاهلش هدا اكبر دليل على انه عمرو نساها ملي مزال مخبي تصاورها وهادشي مكتوب عليها من مور ما تفارقو وزيد خدمها فالشركة غير هكاك خوها مزال عاشق والحقد مدا من حبو والو واخا كبين لهم بلي نساها وضرب على العيالات لانها كاينة غير هي نطقات بصوت خافت وسط دموعها:الله يعوضك بلي تستاهلك الحبيب ديالي

خوها مرضي ونعم الاخ الاخلاق والتربية عمرو خسر لهم علاش وقع ليه هادشي كن كان شي مقطر كانت غتشد معاه الطريق ومتغدروش مزال عاقلة على كيف كان داير لها كيف الما لقليل قبل كاع ميعتارفو كانت تتشوف كيف كبقى يشوف فيها وكيف حاضيها وشي مواقف بساط خلاوها تقلع هي الاولى من وسط خوتها بلي خوها مزعوطة وزيد كانت تتشوف بلي حتى هي تتبغيه وصغيرة على لفعايل لي دارت حبسات لهم عقلهم وروناااتهم

تصدمو كاملين وخوها اكثرهم مبقات حلات ليه حتى وحدة فريدة شحال من مرة جبدات ليه موضوع الزواج ولي خلقها خلق غيرها ولكن والو كان كحسابلهم تعقد من العيالات ولكن دابا عرفات هي علاااش حيت صاحبة دعوتو مزال فقلبو هي بوحدها واخا ݣاع لي دارت وهنا تعرف ان رابطة الحب الحقيقي قوية بزااف

داز الوقت بالضبط فالدار زينة معانقة هي وام الغيث لي يلاه وصلات من فرنسا مقدراتش تجي لان اقرب طيارة كانت من بعد يومين على موت تيباري وهي لي جات فيها تتبكي حتى هي وتاهما كبكيو معاها تاهي بقى بيها وتاهي كانت غير غترجع من فرنسا غتعطيها شي بركة تعاونها فالعملية ولكن مكتاب وتصرف ربي قبض روحو وخلاه يرتاح جلسو مجموعين وكانو شي جيران حتى هما معاهم جالسين بحكم انه معندهمش معارف مع ناس كتار ولا شي حد من لعائلة لي بعيد تعطل وغايجي من بعد صافي دازت ديك اليومين ديال العزو وخففات الدنيا عندهم من غير الجيران لقراب لي كانو جايين يطلو عليهم ناضت راضية وزينة يقادو اتاي ومسعودة بقات تتعاود لأم الغيث على نهار ربي قبض روح المرحوم

راضية تتشوف فختها كيف مضيومة بحالها ومن داكشي لي عرفات مؤخرا درات بلي ختها كانت هازة بزاف وعمرها تشكات ولا قالت ليها نيشان نطقات وهي تتشوف فيها

راضية:متأكدة مليون فلمية انك شايفة العذاب فديك الخدمة لأن من نهار دخلتي لها وصحتك اللور اللور

زينة تلفتات عند ختها وهي تتشوف فيها سؤال واحد خلاه ينغمش داخلها وتقيس لها الوثر الحساس فعلا شايفة الويل فديك الخدمة ولي كان مصبرها هو باها حركات راسها بآه ونطقات

زينة:با لي كان مصبرني على الدل ودابا مشى الله يرحمو غنبدا نقلب فجيهة اخرى والبركة لي شاطت ليا غادي نخلص بيها العقد لي غادي نفسخ معاهم

راضية قربات عندها وشداتها من وجها:علاش معمرك قلتي لي شي حاجة علاش ديما تترضي لقلبك عاوديلي كيف وقع؟

تنهدات وبدات تتعاود لها على من اول نهار خدمات وكيفاش ربطها ودار لها الاصفاد وكلشي فسبيل الانتقام ديالو شهر وسيمانة شافت فيهم لي ميتشاف راضية غير تتسمع ومصدومة هادشي كولو وقع وهي معارفة والو ولي صدمها كثر باها لي طلاقا بيه وبغا يعاود لييه

زينة تتمسح عينيها:صراحة تعامل مع با مزيان ولكن كنت خايفة يقوليه شي حاجة ساعة هاهو ربي قبض روحو بلاما يلاقيه بيه اما انا مستحيل يسمع مني شي كلمة كنت خايفة من الشوهة لبا وهو حي معساك دابا مين مات منبغيش صمعتو تقاس وهو مشى عند الله

راضية تنهدات:ملقيت منقولك اختي با ودفناااه وديك الصفحة خاصها تطوى ممكتابش داك الزواج واخا كنا فرحانين بيه لكن معرفناش ربي لاش حيدو كنا معاونين على قبل با وعمليتو ودابا لي مشى بقات لينا ميمتنا وخوتنا ندمرو عليهم ونوصلوهم لفين بغاااو ويكونو حسن مننا

زينة حركات راسها بآه داكشي لي كاين باها مشى ودابا بقات ليها ميمتها ترد ليها شوية من لي دارت على ودهم وخوتها لي بغات يكونو حسن منها باها مشى عند الله وهدا ما كتب سيدي ربي وراضية بمكتوبو يمكن كان احسن ليه باش يرتااح من مرضو كان عزيز والله عز منو واخا صعيب تقبلها صعيب فراقو غير كتحاول تقنع راسها حيت ميمكنش ضارب مع المكتوب وقضاء الله

هزات راضية الصينية وزادت خلاتها وراها فالكوزينة القرار لي فكرات فيه غادي طبقو الفلوس لي كانت كتجمع لعملية باها بقات مخبياهم هما باش غادي تفسخ العقد وغتخرج من الشركة لي كانت جحيم لها وصابرة لعذابها غير على ود تيباري لي راه دفنوه دابا غتقلب فجيهة اخرى طبعا قبل ما تستقل ولكن قرار انها تخرج قرار نهائي خرجات للصالة جلسات معاهم وام الغيث تاهي حزنات صبراتهم وواساتهم وداكشي لي كاين خاصها تقوي راسها باشما عطى الله باش تكون لخوتها وماماها كيفما كانت لباها لي مشى غدير ما فجهدها باش توصلهم وتشوفهم حسن منها حيت تاهما باغين يقراو ويوصلو

دازت هاد الليلة وجا نهار جدييد بالضبط قدام الليسي كانت خارج منها بعدما مشى دفع لهم شهادة طبية تبريرا للغياب لهم هو وختو سكينة خرج وبانوليه واحد زوج دراري كقراو معاه واقفين

مشى سلم عليهم

الولد:هانيا اعشيري هادي هي الدنيا وكلنا غنروحووو

يوسف تنهد وحرك راسو بآه:داكشي لي كاين الخاوة

كشوف فالسمى وقلبو عامر ربي لي عالم بيه فقد باه وهو مزال صغير وهزو فوق كتافو وهما غادين بيه يتدفن شي حاجة لي فوق صعيبة بالنسبة ليه

دوك الزوج لي كقراو معاه واحد منهم جبد جوان شعلو ونتر نتيرة كتنغم بيها ساط الدخان ونطق وهو هاز راسو مرفوع:الله الحياااة التيتيز ميلااانو كومو ايسطاس

مد لعشيرو تاهو نتر نتيرة وهما مرفوعييين للحياة الوردية ختارو طريق البلية باش يحلمو بداكشي لي مقدروش يديروه فالواقع يوسف لي ضار كشوف فيهم شنو كديرو وكيف كظلو يتشكاو البلاد معطاتناش ودابا نتيرة خلاتهم يبردو ويجلسو كحلمو واحد منهم لمح يوسف كشوف فيه حيد الجوان من فمو بعدما ساط الدخان ومدو ليه

الولد:شد اعشيري الشوف ما يبرد جوووف عيش الحياة ونسى الوااااقع واي حاجة مرونة لميموااار

الولد الثاني ضور يديه على عنق يوسف:نت مع مهموووم نتيرة وحدة وغتهرب من مورووكو وغادي تنسى العالاام غتحل عينيك غتطلقى غا جاكلين وجوزفين ضايرين بيك

ضحكو بزوووج وهما كزيدو فيه وكزينو ليه البلية وهو كشوف فداك الجوان لي مادين ليه وكشوف فيهم حتى هما كيف مرفوعين وكحلمو فالسما السابعة بالغربة والشهبات وينساو واقعهم حتى هو باغي ينسى وباغي شي حاجة تخرجو من هادشي لي كعيش مباغيش الغربة والطاليان والتيتيز باغي ينسى موت باه لي ذبحا/تهم وجاتهم صعيبة هو وعائلتو بغى ينسى هاد الحلم لي خيم عليهم كاملين باغي ينسى عذاب ختو لي بنت وخدامة عليه وكطيح وكتنوض عليهم وهو لي ولد مقادر يدير والو باغي ينسى المشكل لي معقدهم فحياتهم باغي ينسى باه لي مشى متقل بتقليد وذنب كبير باغي ينسى بزااف فديك اللحظة بلاما يفكر خدا من عندو الجوان وهما كشجعو فيه لديك الطريق لي مافيها رجعة قادو بين صباعو وضار شافيهم

يوسف:غا يخليني نسى موت بااا؟

ضحكو عليهم بزوجهم لانه نقي وممولفش بهادشي ومعارف والو عليه ضار عندو داك لي كان مضور يدو على عنقو ونطق

الولد:وا غاتنسى مك وباك وطريكتك كاملة مغتبقاش عاااقل حتى على نت ولد من نتر نتر ومولاها ربيي

يوسف فديك اللحظة جات فبالو ختو زينة وديما تتوصيه يبعد على ديك الطريق ورفقاء السوء ولكن حتى هو تقهر وعيا باغي ينسى وباغي يخرج من داك العالام لي عامر بؤس وهم بلاما يفكر انه الا تبلى غيزيد ختو ودارهم عذاب على عذاب آخر لان ديك الطريق ديال الخسران نيشان تما غادي بالجوان لفمو وهادشي كلو تحت عينين لي كانو مراقبينو هو ودوك الزوج من بعيد وكشوفوه شنو غادي يدير فديك اللحظة

يوسف كشوف فداك الجوان نترة وحدة وغادي ينسى العالام غادي ينسى شنو مكتب عليه الله وشنو جابت ليهم الاقدار كشوف فيديه كترعد وصباعو كذلك داك لي معنقو كزعم فيه ولاخر كذلك عايش واحد الصراع داخلي بين وصية مو وخواتاتو يرد لبال وبين العذاب لي عايش فداخلو وباغيه يخف عليه بلع وفديك اللحظة حيد لداك خونا يديه لي مضور على عنقو ودفعو بعدما لاح الجوان للأرض

يوسف:انا ماشي ديال هادشييييي

صدرو كطلع وينزل وهو كشوف فالجوان لي على شوية كان غادي يتهور ويضرب تربيتو كلها فالزيرو دوك الزوج مين شافو الجوان فالارض جعرو تحنى واحد فيهم هزو وهو كعاير ولاخر دفع يوسف بالجهد:وسير الله ينعل الروح دمك يا لكعكاااع

الولد 2 بعدما قلب الجوان واش باقي مزيان جاليه حتى هو ودفعو:الكعكااع لي ولدك مالك كترعد بحال المريييوة

يوسف فديك اللحظة فاش سمع خونا عاير ليه باه لي يلاه دفن جهل هز يديه حتال للسما ونزل بواحد الكروشي طيحو للارض جا لاخر تاهو ضرب يوسف ولكن فيساع شد راسو ونزل عليه حتى هو واخا كان مزال صغير كان شاد صحتو غير بديك لونطرينمو لكدير بلا لاصال فديك اللحظة دوك الزوج ناضو بزوج بيهم غيطاولوه زوج على واحد وحتى هو مضعقوهمش كرز على يديه بزوج وتما قاصدهم فديك اللحظة وهو يدخل واحد وسط منهم نزل على واحد منهم بتصرفيقة ونزل على لاخر برجليه غير للكرش طوعو

وليد:يلاه لي نسميييه رااجل يقرب الا ما نتكي دينمو بحال الحولي راني ماشي راجل يا الرعاوييين كتحاماو كي ضباااع مكاين المريييوااات قدكم يلاه زيد نت نسميك راجل

معرفوه مين خرج يوسف براسو تصدم وهو كشوف فيه كيف تدخل ودافع عليه ولاح كلشي لي بينهم وراه دوك الزوج عينيهم خارجين على يوسف ومع اصلا مبوقين معندهم جهد وبانلهم وليد جا فخمسة الدقايق لبدهم ومع طويل ومݣلظم خاصهم المضى معاه رجعو باللور ونطق واحد منهم محلف على يوسف:عقل عليا الكعكاااع

وليد:بيناتنا ليااام سير حيد منك خصايل الضباع واجي داك الساع نتحاسبو اما هدا راجل عليك

مشاو كجريو مخلين يوسف كطلع وتنزل فيه ديك المعيورة لي عايرو ليه باه وهو يلاه دافن وليد لي كان مخنزر فيهم مع غبرو طلق ملامحو وتلفت عند يوسف لي غير شافو تنهد ومسح على شعرو بعدما نزل راسو ونطق:الله يحفضك اخاي وليد

وليد فديك اللحظة شد وجه يوسف بين يديه وهز ليه راسو حتى تفيكساو عينيهم وهو ينطق

وليد:عمرك تنزل راااسك كيفما مرضختيش ليهم وللوسخ عرف راك بلي راك مساهلش تحني راسك نت راااجل

قالها وهو كطبطب ليه على ظهرو عجبو وهو كشوف فيه كيف محناش الراس ومتبعش ديك الطريق لي كتبدا فالاول زوينة وفلخر كتكحااال

وليد:البركة فراسك من جيهة الوليد هدا هو المكتاب دابا خاص تكون راجل فظهر خواتاتك وتوصل فين كان باك باغيك توصل وهو حي

يوسف تنهد:ما مشى معاك باس اخاي ان شاءالله ربي يكون معايا باش نكون معاهم حتى انا ونرد لمي وخواتاتي غير شوية من لي دارو معايا

كان كشوف فيه كيف كهضر هضرة واحد بعقلو والحزن طاغي على عينيه فديك اللحظة وليد بلاما يفكر جرو من قرفااادتو وتما غادي هو وياه جارو ويوسف مفااهم والو ووليد منطق بحتى كلمة حتى دخلو لاصااال لي كان مزال خاوي الافتتاح ديالو غادي يكون فالويكاند وغادي يتحل نيشان يوسف غير كشوف ووليد تحنى وهز واحد الليݣات ديال البوكس قصد يوسف وشد فيه ركبهم ليه ودفعو جيهة الصاك ديال البوكس الكبير لي لاصق مع الصقف ونازل

يوسف:خرج داكشي لي كتحس بيه

يوسف غير كشوف فيه وحشمان ومقادر يقول حتى كلمة وهو كشوف دوك الليݣات لي ركب ليه ساويين الثمن عمرو يحلم يلبسهم وداك لاصال خلاص وليد خرج فيه عينيه ونطق:يلاه بدا دويت معاك خرج داكشي لي فقلبك

وداكشي لي كان بدا يوسف كضرب بشوية بعدما يوسف جا من ورا الصاك وتبتو ليه كضرب بشوية ومع مرور الوقت ضربة ضربة حتى زاااد فالريتيم وبدا كضرب بالجهد حتى وصل لݣاع جهدو كحطو فدوك الكروشيات لي ككروشي بيهم الصاك وكأنهم كخرج داكشي فقلبو وداكشي لي هاز ووليد مخليه على رااحتو حتى وقف بوحدو وهو كلهت وكوولوو عرقان وليد قصدو وشدو من وجهو ونطق

وليد:غتبدااا كل نهار تجي ابتداء من غدا الوقت لي عندك خاوي نبغي نلقاك هنا تفاهمنا؟؟

يوسف كان كشوف فيه وهو كدير معاه الجميل رغم ݣاع لي وقع بيناتهم تفكر كيف كان عزيز عندو وهو صغير قبل خمس سنين هادي كان كلعب معاه كورة وكشجعو حيت من ديما كان كحلم يولي لاعب ديال الكورة فشي فرقة وحلمو الكبير هو المنتخب حلم كل الشباب الهاويين لكرة القدم ودابا كتقوليه اجي تريني فبلاصة لي عمرو يحلم يجي ليها حيت بكل بساطة الطبقة ديالو متسمحش ليه

متسناش بزاف يوسف حتى كان طلاح على وليد بتعنيقة كبين فيها على الامتنااان والشكر ديالو لييه وهو فهال الازمة بالنسبة ليه هادشي شي حاجة كبيرة الرياضة شوية تقدر تخليه يخفف على نفسو وزيادة على انها فبلاصة راقية وزوينة لي بحال هاديك بعد عليه وشدو وليد من كتافو

وليد:تستاهل خليك ديما هكا جبل متزعزعك حتى حاجة

مع نطق كلامو مد ليه يدو وهنا يوسف صافحو وهما كارزين على بعض وهدا دليل على التحالف لي طرا دابا بيناتهم

وليد:هانا كنعاود نأكد عليك غدا نشوفك هناا

حرك راسو يوسف بآه وهنا عاود عنقو وهو فرحان عمرو ينسى ليه هادشي وهو كدوز من واحد الوقت عصيب عطاه طريق لي يخفف بيها على راسو مشى وخلا يوسف كشوف فيه متبعو غير بالصدفة كان غادي يبلاصي الطوموبيل وهو يلمحو بقى حاضيه وكشوف فهادوك كزيدو حتى قال صافي مشى معاهم فالطريق وطلع راجل واخا لي واقع هداك غير دري صغير معندو حتى ذنب واخا لي داز صعيب عليهم كاملين وكان كشوف خوه مناش كدوز واخا خوى لبلاد فديك الفترة وبعد عليهم كانو عارفين مناش كدوز تنهد ودار يديه فجيابو وهو كفكر او بالضبط كتفكر ايام زمان معاه هو وختو وفاش كانو مجموعين

داز الوقت بالضبط فالشركة كان واقف كهضر فالتيليفون وداير يديه فجيبو كشوف من الزاج كمل الابيل ورجع لبيرو ديالو جلس وعينيه على البيسي فلحظة هز الطيلي ديال البيرو مع دارو فوذنيه وهو يتفكر انها مكايناش نسى ومشات ليه من بالو بلي راه مغيبة زفر على حالو وخبط الطيلي وهو كفكر فلحظة شاف فالطيلي ديالو وبدا كفكر كيف غتكون دابا وكيف بقاو يلاه غادي يهزو وهو يجمع يديه بعدما ضربات ليه كلمة شياطة فوذنيه الكلمة لي مزال مكوية فقلبو بحال العافية وتتحرق فيه واخا مشى عزاها ودار معاها اللازم ولكن هاديك متنساتش ليه حيت مكدخلش شي فشي تفكر واخا الكلمة كاوية قلبو علاش خرج فيها فاش شافها هي وداك خونا معانقة هي وياه علاش حاقد وداير هاد البلبالة ولكن كتبقى اكثر حاجة مسترطاتش ليه نهار خرج فيها فالمامونية كان اعتراف مباشر ولي عض على لسانو وراه فاش طلعات معاه معرفش ولكن راه مكضبطش راسو حتى كبدا دمو يفور وكسخنو عليه وذنيه داك الساع مكعقل حتى صافي ككون برد ولي عطى الله عطاه مسح على ذقنو وهو كارز فكو ديك الكلمة مغاديش دوز لها بالساهل لانها تحطات على قلبو صعيبة وهو من طبعو كرد الدقة ولكن ماشي دابااا راعى بزاف ولكن رجع عليه داكشي غير برجولتو لي تزعزعات وتضربات زوج دالمرات المرة الاولى بفعلتها والمرة الثانية بالكلمة لي خرجات على فمها وهي تتعتارف بشنو دارت فيه هنا سرط الريق وهو كدوز يديه على شعيرات ذقنو بشوية وهو كفكر غير طاح فبالو جاية نهار تنين غترجع وهو يطرطق بشوية عنقو يمين وشمال وهو كتراسي فبالو لي جاي عاد دابا سرات معاه بلي زوج مرات عتارفات بلي دارت فيه وهدا بحد ذاتو كبين انه مزال فيها الجهد ولي دار والو قدامها كنسى ولكن حتى كبقى بوحدو عاد تتفكر وكضور فدماغو كان تحلف ليها ومدارش بيها حيت وقعو شلا حوايج كان حتى لبد معاها ولكن لسانها لي دارها لها دابا

تسمع الدقان بشوية فاق من تفكيرو وعطى الإذن بالدخول كانت سامية لي غير شافتو تبسمات كانت هازة فيديها واحد الضوصي دخلات وحطاتو له فوق البيرو مجات فين تخرج حتى وقفها

يزيد عينيك على البيسي:كيف كجيك الغوز؟

سامية تلفتات عندو عقدات حجبانها شوية ونطقات بابتسامة بلاما تفهم:زويين لون ديال البنات

يزيد مزال عينيه على البيسي:يجي مزيان مع لبيض ياك؟

سامية واخا مفهماتش علاش كسول ولكن المهم تدي وتجيب معاه فالكلام ضارت كاملة ونطقات:ميلونج زوين وهادئ علاش؟؟

يزيد فديك اللحظة هز راسو ونطق:هما الالوان لي غيكونو فالكوليكسيو الجاية لي خدامين عليها دابا شبانلك غادي يلقاو اقبال نت بنت وغتعرفي ذوق البنات

سامية تبسمات ابتسامة عريضة وهي تتسمع هاد الهضرة:اه بطبيعة الحال غادي يعجبوهم الوان انثوية وفنفس الوقت مين يتخلطو غيعطيو واحد الميلونج هادئ وكلاص

يزيد حرك راسو بآه وتبسم هنا عطاها إشارة صافي تقدر تمشي وداكشي لي كان خرجات وابتسامة عريضة على وجها وهي فرحانة سدات لباب وراها شافت جنابها ملقات حد وهي تبدا تنقز بلاصتها غطير عرفتي شنو هي يقولها شي حاجة على الكوليكسيو لي مكعرفها حد حتال نهار الديفيلي وياخد رأيها شي حاجة بالنسبة لها واو حطات يديها على قلبها لي فرفر شافت فلبيرو ديال زينة لي مسدود وهي تبسم بشر وزااادت

داز الوقت وظلام الحااال بالضبط فالدار ديال زينة واقفة فالسطح وهي تتشوف فالليل ونجومو شادة الطيلي فوذنيها وقلبها كضرب كانت كتاصل بعمها الوحيد تعلمو بلي خوه فارق الحياة عيات تعيط ليه من نهار مات باها ومكجاوبش

قلبها تهز فاش سمعات الخط تطلق وسمعات صوتو دغيا نطقات قبل ما يقطع

زينة:الو عمي احمد كيف داير لباااس عليك

احمد:الو سلام عليكم شكون معايا

زينة بلعات ريقها مقدراتش تقوليه شكون هي:كداير اعمي انا سكينة بنت خوك تيباري

احمد:ممم هادو نتوما حݣلني كنقول شكون هاد النمرة مصدعاني يومين هادي اشكاين

زينة تنهدات كانت عارفة هدا جوابو من داكشي لي وقع واخا سنين هادي متشاوفو كانت عارفة بلي مغينساش حسات بالغصة وهي غتنطق ليه بالكلام لي خاصو يعرف وكتمنى ان قلبو يلين

زينة:عميي المسامحة راه بااا ما/اات

لاحت ليه كلامها وهي على أمل انه يلين قلبو سكت وماهي إلا دقايق حتى جاها الرد لي كان معاكس لتوقعااااتهاا

احمد:نبصم عليها مشى غير بفقصة ديك العدوة ديال ختك فعلتها مزال بلاكة على ضهورنا لهاد النهار مرمدتنا وشوهتنا فالتراب الله يلݣيها ليها دفنتوه الله يرحمو لي كان بينا وبينكم صافي تسالا عمر شي حد فيكم باقي يضور بساحتي الله يݣطعكم خزيييت

قطع لها فوجها خلاها واقفة بلاكة فبلاصتها وتتشوف فالطيلي لي حيدات من ودنيها كانت متوقعة هاد الرد خمسين فلمية دعى فيها وهي ماليها والو وقالها لي بينا وبينكم سالا على اساس فاش كان خوه طايح باغي غير لي يسول فيه طلو عليه تنهدات وضارت نزلات بلاما طيح حتى دمعة لانهم اصلا نشفو قلبها لي كبكي وزيد شافت ما اكثر من هاد الموقف لي بالنسبة لها عادي دابا نزلات لتحت كانو مجموعين زايد عليهم راجل راضية لي تاهو فالجنازة وام الغيث

سعيد:مي مسعودة راك عارفة لي كاين اي حاجة انا موجووود راك بحال الوليدة والدراري بحال خوتي

مسعودة:عارفة لي كاين اوليديي درتي لي عليك ووقفتي معانا الله يسهل عليك دنيا وآخرة

ام الغيث:حنا دابا راه عائلة وراكم حتى نتوما عارفين باب داري ديما مفتوووح فوجهوكم

راضية حطات راسها على كتفها:الله يخليك لينا اماماتي

زينة جلسات وسط منهم تاهي وساهية تتسمع كلام ام الغيث بلي هدا مكتاب والموت علينا حق عارفة هادشي وراضية بقضاء الله ولكن صعييب النسيان

ام الغيث:تيباري مشى الله يرحمو ودابا ابنياتي بقيتو لميمتكم لي خاص تعوضوها على ما داز وخوتكم لي محتاجينكم تكونو سند ليهم وهما يلاه باديين

كان كلامها موجه لراضية وزينة لي كسمعو ليه بكل تأني فعلا كانو معاونين على عملية باهم لي مكتابتش ودابا غيتعاونو باش يقريو خوتهم لي باغين يوصلو بزوج بيهم

ام الغيث:ان شاءالله تقراي ابنيتي و توصلي لݣاع لي بغيتي نت وخوك وتفرحو ميمتكم وخواتاتكم لي مداروش لقليل على ودكم وحتى باكم بي راه واخا مشى عند الله غيكون راضي عليكم

كانت موجهة كلامها لسكينة لي تاني تتسمع ليه بتأني وهي كتواسيهم وتشجعهم يقراو قرايتهم ويكونو لبعضياتهم وفعلا باغية تقرا وتوصل تفرح ميمتها وخواتاتها وحتى باها لي واخا مشى كيفما قالت ام الغيث غايدي عليها رحمة الوالدين جراتها زينة عندها حطات لها راسها على صدرها وهي تتلعب لها فشعرها بشوية وهمسات لها فوذنيها

زينة:الله يجعل زهرك وسعدك حسن من ديالي

فديك اللحظة سكينة مع سمعات كلام ختها عنقاتها وتخشات فيها وهي عاضة على شفايفها تتبقى فيها ختها بزاف وكلهم عارفين علاش اكثر وحدة تعذبات فيهم فحياتها ومزال تتقاصي زينة تاعي تنهدات وهي كتلعب فشعر ختها لي تمنات لها تكون حياتها ومستقبلها حسن من ديالها بزااااف زهرها ولي دازت منو متبغيه لحد واخا يكون عدوها

دازت هاد الليلة وجا نهار جديد بالضبط بالڤيلا ديال الوزاني كانو جالسين فلاتيراس قدام لابسين زهور تتسخر كانو كتغداو

الحاج ابراهيم تنهد وهو كسمع الخبار:الله يرحمو ويغفر ليه لي داز ماشي ساهل ولكن كلا واحد منو لي خلقو

فريدة:داكشي لواحد لكان خبيث حاربو بالخير باش ربي يعلي شاانك

روعة:انا بغيت غير نعرف هي فاش هربات كيف داره طلاقات بواليديها باها قبلها واخا كان صعيب

فريدة:اللحم الا خناز كهزوه غير ماليه ابنتي داكشي فات مكاين لاش نحفرو فيه درنا واجب الله يجعلو فميزان الحسنات وصافي منهم لي خلقهم

وغمزاتها باش صافي متجبدش ثاني هاد السيرة قلبو الموضوع لي كان على الافتتاح ديال لاصال دوليد لي من دابا شوية غادي يمشيو ليه وهو كذلك كلا مرة يصوني يقولهم جيو راه صحابي وصلو وشحال ديال دلفيتنيس جايين عندو وصل لوقت وناضو بعدما داز عندهم يزيد ومشاو مجموعين وانيسة لي طلاقاوها تما باش يكونو مع ولدهم فداك النهار واول سلسلة ديال المشاريع ديالو ليه لي مستقلة تماما على باش معروفة العائلة ديالهم

دازو شي ايامات عاديين وطايرين تقطعات الرجل دالعزايا فدار زينة فقط الجيران لقراب الا طلاقاو بشي جيران فالحومة راه كسولوهم على حالهم وكبقاو صافي بردات الخبار دموت التيباري بين ناس وبقاو عائلتو بوحدها لي حاسين بدقة فراقو

وصل النهار لي خاص زينة ترجع فين للشركة دخلات بشوية لبيرو ديالها وهي تتشوف فجنابها وتنهدات مين دخلات اي واحد معزاهاش كعزيها ولي ديجا كان كسولها على حالها وكيف بقات هي ومالين الدار

تتشوف فلبيرو ديالها ومين دخلات للشركة حسات بلي غتبقى مفكرة داكشي لي كانت دايرة على ود باها وباي غتخدم مزيان وبفلوس الصالير غادي ديرلو العملية وغتبقى ديما مفكرة بلي مقدراتش ديرها وجهدها كولو مشى وباها متشافاش واخا قدر الله هداك ولكن صعيب عليها تخطى تنهدات وهي حاسة بقلبها مقبوط عمرها شافت النهار الزين فهاد الشركة منهار دخلات بدات فكرة انها تخوي تتعزز فدماغها واخا لي غادي يسمعها خرجات من شركة الوزاني غيندب طرمتو ولكن هي مقادراش عاشت فيها الويل وشافت فيها لي متشاف صحتها مشات غير بالسطريس فيها اول حاجة دارتها بعدما شعلات بيسيها هي صاوبات سيڤي لها دغيا وزادت فيه لكسبيغيونص عند الوزاني هادشي غيخليها تقبل ديال لانها تجربة واعرة من عند شركة بحال هادي غتعلي قيمتها وتولي مطلوبة ياك دوزو عليها الويل متخرجش تاهي الله كريم تستافد منهم قاداتو وامبريماتو وخلاتو عندها

وناضت تجيب ليه قهوتو حيت يلاه وصل وداز داباا بلاما يشوف جيهتها دخلاتها عليه بلاما يهضر معاها ولكن عينيه عليها تفحصوها دغيا بان فيها الضيم ووجها مسكوف وهادشي عادي الموت مساهلاش شافت فيه قبل ماتخرج ونطقات:موسيو خاص شي حاجة؟

دار إشارة بيديه زعما صافي غير سيري وداكشي لي كان خرجات بهدوء بلا حتى كلمة داكشي باغية متجمعها بيه كلام منساتش نهار موت باها هي مضيومة وهو جالس كقولها سبتي حيت باك ما/ت وكفلح لها على الضربة جلسات فبيروها وهي تتفكر كيفاش تفاتحو بالموضوع وزيد اصلا معندو مين يشدها فلوس التعويض راه عندها داز الوقت وهي خدامة حتى وصل للبوز ديال الغدا نزلات تغدات هي لبنى وعادل لي جا فآخر لحظة طل عليهم ومشى عندو الخدمة ومخداش لبوز نزل غير شرى شي حاجة وطلع

لبنى بصدمة:اويلي على معزاااتكش ولاش مشات معانا مريضة هاد الزبلة

زينة لي عاودات لبنى بلي سامية واخا جات معاهم معزاتهاش:اودي العفوووو

لبنى:الله يعطيها غير الدل باها عندو العقار لي يتحرق ما يتم باش تمشي توقف ليه على خدمتو وتكون قايدة على خير حيت معندوش الولد جالسة لهنا طاليها الدل من راسها حتال رجليها

زينة:فاش كطلاقى الجهل والدل وقلة العقل كعطيونا بحال هاد خيتي

بقاو شحال جالسين كتغداو زينة لي شافها يجي يعزيها حتى وصل لوقت وطلعات لبيرو ديالها خدامة على واحد الضوصي حتى حسات بشي حد وقف عليها هزات راسها غير شافتو تبسمات كان منصور لي جاي يعزيها

منصور مد ليها يدو صافحها:البركة فراسك والله يبدل محبتو بالصبر سمحيليا بزاف مقدرتش نجي فاش وصلاتني لخبار مكنتش فكازا

زينة:اللهم امين ياربي شكرا ليك بزاف لا لا بلعكس مكاين حتى مشكل سوا لبارح ولا اليوم المهم لواحد دار الصواب

منصور عينيه عليه وهو كشوف كمية من الادب والصواب تتمشى على رجليها وفنفس الوقت كشوف الحزن لي طاغي على وجها:ايلا حتاجيتي اي حاجة انا كاين متحشميش بحال خوك

زينة نزلات راسها وهي مبسمة:شكرا ربي خليك

منصور فديك اللحظة لمح السيڤي ديالها محطوط فوق الطبلة مد يديه وهزو كقرا فيه شمر ايكسبيغيونص عندها ولمح حتى تاريخ الميلاد ديالها مزال صغيرة:هدا السيڤي ديالك هو باش دفعتي النهار الاول؟

زينة:لا لا هداك يلاه صايبتو حيت يمكن غادي نمشي من الشركة

منصور شافيها مخرج عينيه بلاما يحس ونطق: علاش ميمكنش احم زعما نت مزال جديدة وشنو السبب؟

فديك اللحظة كان دايز داير الطيلي فوذنيه لمحهم بزوج طلع ونزل فيهم بانوليه مجمعين فديك اللحظة لاح لمنصور الهضرة غير بالفن حشاها لهم بزوج من

يزيد:سي منصور مين تسالي المحادثة نت والانسة دوز عندي لبيرو نديرو تاحنا شي محادثة على ود داك الضوصي ديال الشناوا ندوزو بيها الوقت

ومع لاح لهم الكلام داك لكان كصوني ليه جاوب وزاد خلاهم وراه هي تتبلع ريقها ومنصور تزنݣ حيت قرمعو قدام درية لي عاجباه ومايقدرش يجاوب وزيد متوقعش يشوفو ويكلاشيه حيت شحال من مرة كشوفو واقف مع شي حد مكقول والو موظفين بيناتهم فإطار الخدمة سرطها وتبسم لزينة مستأذن منها

منصور:نخليك دابا من بعد ونشوفو قضيتك نت لي باغية تخلينا فرمشة عين

تبسمات له وزاد بحالو خلاها تتزفر على حال داك المدير لي مكفلت حتى حاجة من مور هاد الدخلة تتستغرب كيفاش كانت صابرة وزادت اصرار انها خاصها تخويي جلسات وهي تتزفر وخدامة على واحد الضوصي خاصها تديه له وتشوفو ثاني الا فيه شوية الإنسانية يسكت وميقولها والو حيت راه غطرطق

داز الوقت كملات الخدمة ديال الضوصي وهي مرفوعة تنهدات هزاتو ومشات قاصداه تديه له دخلات بعدما سمعات الإذن ديالو منزلة راسها حتى مداتو ليه رمقها بنظرة باردة وحلو كتفحصو بعينيه

مدازش بزاف حتى هز فيها راسو بنبرة النبرة ديالو القديمة:ياك قلت لك هادي ديها لكونطابل شغندير بيها انا

زينة قربات وشافت فالورقة لي كانت فاكتورة وخشاتها وسط الضوصي نطقات بصوت خافت: سمحلي مرضيتش لها البال انا غادي نديها له دابا

مدات يديها وخداتها من عندو كان خطأ بسيط وغيتصلح ولكن هو ناوي يلصقها عليه حيت باغي غير مين يدوز لها طبعا على موقف قبيلة مع منصور مخلية خدمتها وتتجمع

يزيد:الحتيت وتضياع الوقت كتكوني موݣضة عشرة الزيرو والخدمة خاصنا نبقاو نعاودو ليك شنو ديري بحال الحمار

كلمة الحمار نزلات عليها بحال السم وهي تتشوف فيه مدير على قدو واشكقول وشكخرج مع فمو كتافات بالسكوت وهي غير تتشوف فيه سد الضوسي ولاحو باهمال ودارلها حركة بيديه زعما سيري سيري بحال وداكشي لي كان ضارت قاصدة لباب وهي غطرطق كطلع وتنزل فيها ديك الكلمة كشبها بحيوان على غلط بسيط وهو عارفها كدوز من أزمة كبيرة ونفسيتها على سبة كتشوفيه حجرة محطوطة وبدا كبانليها ديك الحنية والتعامل الزوين مع الناس غير نفاق مدات يديها لبوانيي وهي تترعد بالفقصة حرقها بداك التشبيه وبقات ساكتة خاصها تهضر خاصها تجاوبو وميهمش من بعد وداكشي لي كان تلفتات عندو ونطقات بعدما حلات لباب غتخرج حيت كن كانت مزال حداه متقدش تهضر تا بعدات عاد بغات تجاوبو

زينة:الحمير تعرف بعضها وعلى اشكالها تقع

حسات بواحد الراحة رهيبة فور ما خرجاتها بلاما تفكر فلعواقب وانها قالت لمول شي نت هو الحمار ولكن المهم رضاتها ليه كانو عينيه على البيسي طاح كلامها على المسامع ديالو وهو يهز فيها راسو وببرود وفلبلاصة عطاها خو جوابها وحالف كلا واحد فيهم الكرة والكلاش ما يبقى عندو

يزيد:الحمار الكلب البغل اي حاجة خاصك ترودها على الشوك وتمشيها على الحفى عاد تشد معاك الطريق ويتلجم ليها اللسان تولي غير حانية الراس وتابعاك وهانا كنشوف واحد قدامي معرفتو اينا فصيلة ولا نوع تابع لكن ماشي مشكل نرودو وندريسييه على يدي حتى يشد الطريق بزز وبلا بالخاطر وهادشي معطي ليااا انا مزيااان

مع كمل كلامو ختمها لها بغمزة خلاها تترعد فبلاصتها وتزاد على مابيها خرجات بعدما قلبات عليها هي كانت سامعة غير كلمة بقات تهبش حتى سمع لها جريدة توعد لها فيها بالقديم والجديد

مشات لبيرو وجلسات بالجهد وهي دارت يديها على وجها وغوتات بلا صوت غطرطق متسناتش بزاف حتى نهارت بالبكى بعدما تكات على لبيرو مخلياه وراها عاقدهم ولا تتعاطى معاها بحال راهم فالسوق المشكل مافيها والو كتبدا طرطا كتصعرو واخا مكبينش كلوح لها شي كلمة كتبقى طلع وتنزل فيها وتزيد تجري تغبن فالتيساع بلاما تشوف وراها وهدا هو العيالات غا الزيادة على والو

داز الوقت وكان داخل عندو منصور وكهضرو وعينيه عليه كتفكر قبيلة كيف كان مجمع معاها ومخاصو حتى خييير

يزيد:الكوليكسيو الجاية غادي تكون مختالفة لاول شبانلك فالزرق الملكي مع الابيض

منصور دار يدو على ذقنو وهو كتخايل المزيج:مزيااان لون غامق ديال الشتى

يزيد:داكشي الكوليكسيو كاملة غتكون ملعوبة على هاد زوج الوان

منصور:ومغاديش يكون تشابه فليزاغتيكل

يزيد:لا لا كيف قلت لك شي حاجة جديدة ما سبق لحد دارها كثرة الالوان مبقاتش نافعة

منصور:نت تعرف اسي يزيد مصلحة الشركة حسن منا والزرق كيفما قلت لك شي حاجة زويينة وراقية

يزيد:داكشي لي بغينا حتى حنا وحتى التصاميم غادي يخرجو للعلن هاد المرة الغموض مبقاش مسلك

منصور بقى غير كشوف وبدا تاهو كتناقش معاه ويزيد بحجة انه داكشي مبقاش مسلك وخاصهم يتقربو من الكليان ويعرف عليهم شلا حوايج

منصور: فكرة مزيانة اسي يزيد ان شاءالله فالاجتماع ناقشو مزيان هادشي احم امتى غيخرجو التصاميم

يزيد عينيه على لبيسي: قريب قريب ان شاءالله

منصور حرك راسو بآه وسهى وهو كضور فبالو شي حاجة حتى فيقو من سهوتو على الضوصي لي عطاه يخدم وناض مستأدن بعدما حمد الله انه مقاليه والو على قبيلة ماشي كخاف منو ولكن حتى لاخر عندو الهيبة وفارض شخصيتو مخلي كلشي محتارمو وضارب له حساب

دازت هاد النهار وجا نهار جديد بالضبط نيت فالشركة كانت واقفة قدام لباب ديال لبيرو ديالو ناوية تفتح معاه الموضوع بعدما الليل كولو وهي تتفكر فيه بلاما تعلم شي حد من عائلتها دخلات بعدما سمعات الإذن ديالو كانو عينيه على لبيسي تقدمات بخطوات صغيرة وهي شاداها الرعدة من رجليها ولكن تتحاول تبقى تابثة وقفات قدامو ونطقات بصوتها الرقيق

زينة:موسيو يزيد بغيت نهضر معاك عفاك

يزيد هز فيها راسو بعدم مبالاة ورجع شاف فلبيسي ونطق بنبرة جافة:شكاين؟

زينة:لا لا ماشي داكشي شي حاجة تتعلق بالخدمة والمسار ديالي فيها

هز فيها راسو ورجع شوية اللور كشوف فيها وكلمة مساري لي سمعها يقول ضاربة معاهم السنين

يزيد:شناهي هاد الحاجة اللالة

زينة بلعات ريقها وهي واقفة قدامو عينيه لي كوتروها ميمكنش نزلات راسها بعدما طلعات النفس ونطقات:موسيو انا جيت بغيت نعلم بلي غادي نحط لاديميسيون ديالي ومستاعدة نخلص التعويض

مع كملات كلامها هزات فيه راسها دغيا تشوف ردة فعلو لي كان كاسيها البرود كيف ديما ومتعرفش شتحت راسو حتى يتي/ري فيك نطق بنفس البرود لي كاسي تقاسيم وجهو

يزيد:وعلاش باغية تمشي لقيتي ما حسن؟

مكانش قصدو انه بالمعنى ديال علاش غتخلينا وانما غير باش يقلقلها طبعا

زينة:انا كنت كنقلب على خدمة على ود العملية ديال با الله يرحمو ودابا مين مشى عند الله بغيت نتبع ونتفرغ لداكشي لي كعجبني من ديما

يزيد وهو مطلع حاجب:الحلوى؟

زينة حركات راسها بآه وهي تتفرك فيديها مع بعض واخا معندوش مين يشدها شروط العقد غطبقهم ولي هو التعويض غتخلصو

رجع شاف فلبيسي بلاما يتسوق ونطق وهو مطلعها عليها عاين باين:داكشي لي يصلاح لك اصلا المرا بلاصتها الكوزينة الموظفات مشروع فاشل للزواج

تنهدات وهي تتسرط فيها بلاما تجاوب طبعا عارفاه غير شاد فيها لانه كدوي بعقلية متخلفة مكتربطو بيها حتى صلة اصلا ياودي غير تفك من هاد الشركة ويقول لي بغا يقول بلعات ريقها ورجعات نطقات ثاني

زينة:الكونطرا فيها زوج دلمليون وانا عندي مليون ونص النص لي بقى هو قيمة الصالير ديالي غادي نخدم هاد الشهر بلا خلاص وهكا غادي نكون كملت الشرط ومنها نيت فهاد الوقت تقلبو على بديل مناسب على خاطركم من الاول انا مكنتش مناسبة لهاد البوسط اصلا

عرفها كدق على كلام سامية النهار الاول لي قالت ليه داك البوسط ماشي ديال اي وحدة وجالسة تتفصل وتخيط بوحدها رجع شافيها وفيكسى عينيه فعينيها وهي تتشوف ردة فعلو وتطلب فخاطرها ميخرجش لها شي بلان حيت صافي معندو ميقول الشرط لي كان هاهو قادة بيه داك الساعة حتى معطلهاش

يزيد:الشركة مواقفة على حتى حد البديل غنلقاوه قبل ما يكمل الشهر غا قلبي على مين تجيبي الفلوس لي بقاو وسيري الله يعاونك

ومع نطق كلامو ضار لبيسي ككمل خدمتو بلاما يتسوق لها مخليها هي حاسة بواحد الراحة وبواحد الحمل تزاد عانات منو يامات كثيرة بهاد السهولة مكانتش صعيبة كيفما كانت تتوقع وهدا اكبر دليل على انه مساوية والو قبلها النهار الاول غير باش ينكد عليها حياتها هز فيها راسو وكمل على كلامو

يزيد:قادي الإستقالة ليوم نفسخو العقد وعلمي لاغيسيبسيو يطلعو السيڤيات المدفوعين

خرجات فيه عينيها بهاد السرعة وفرمشة عين اصلا كيفما دخلات النهار الاول بالزربة غتخرج حتى دابا بالزربة داك الحمل لي باغية تفك منو خلاها مسولات كيفاش ولا علاش حركات راسها بآه ونطقات:موسيو واش نقدر نمشي لدار بالزربة نجيب الفلوس ونرجع مغاديش نتعطل

دار إشارة بيديه زعما صافي سيري بلاما يتسوق خلاها خارجة غطير بالفرحة وبدات تتحس بالراحة كطلع معاها تتمنى هاد السيڤيات لي غادي يطلعو ليه يلقى منهم شي وحدة مناسبة وصافي تهنى فمرة غتحاول ضبر على 5000درهم واخا غير تسلفها تبكي على مها مين غتردها لمولاها المهم غتفك من عذاب وجحيم عانات فيه مشات طايرة هزات صاكها وخرجات قاصدة الدار تجيب الفلوس وهي محمسة وطافية دماغها بلاما تفكر علاش بهاد السهولة ولكن لجواب باين جات بالزربة وغتمشب بالزربة خرجات تحت عينين سامية لي مشات عند مريم تقلقل السوق علاش خارجة وهازة صاكها السيبة تما ملقات عندها تا جواب ورجعات لبوسط ديالها وهي مزال فرحانة بلبلان لي وقع بلي ستاشر معاها وخدا رأيها

داز الوقت ورجعات زينة بحالها لخدمة جايبة لفلوس قادات الإستقالة ومشات عندو بعدما لقاتو حتى هو مناسيش باغي يكركبها موجد لها وثيقة فسخ العقد بلا حتى كلمة جلسات وهي منزلة عينيها مباغياش تشوفيه حطات الجوا لي فيه الفلوس وهزات الستيلو لي عطاها مد ليها ورقة فسخ العقد معاهم وورقة اخرى متعلقة بإجراءات انها صافي رسميا مغتبقاش معاهم تتشوف فدوك الوراق وهي حاسة بقلبها غادي يتزاح عليه واحد الحمل كبير عانات من السطريس والحݣرة ودابا غادي ترتاح فرمشة عين تيسر داكشي بسباب صبرها بقات لها ايام معدودة فالشركة علاما يلقاو البديل ومن تما غادي طوي الصفحة فنفس الوقت هو كان كقرا فلاديميسيون ديالها قرات غير بعينيها السطور الاولى من وثيقة فسخ العقد وسينات دغيا بلاما تقرا الثانية لي اصلا ماشي شي حاجة غير باش يسحبو لها لاكيص وداكشي la CNSS كانت

السرعة باش سنات كفيلة تخليه يعرف بلي باغية غير تفك وفعلا هادشي لكان فبالها وهي تتسيني باغية ترتاح حيت لي شافتو معاهم ميتشافش حط لاديميسيون ديالها وشاف فيها راسم ابتسامة صغيرة

يزيد:الطريق لي جابتك النهار الاول غادي تديك بحالا معمرك كنتي

زينة شافت فيه كيف كهضر وهو مبسم والاستهزاء طاغي على محياه دابا تقدر تجاوبو لانه رسميا ولا مديرها غير بالسمية من جيهة الاحترام صافي ولكن إلا تخطى حدودو غيسمع جوابو

زينة:فيها خير والرزاق الله كيفما تقبلت هنا نتقبل فجيهة اخرى لانني بديبلومي ومكتاسبة تجربة هنا لي غتزيد من قيمتي فسوق الشغل

هضرات وحشات ليه بلي ستافدت منكم بسمية الشركة لي غادي نعمر فالسيڤي ومع هما عندهم المنافسة بزاف غادي يتخاطفو عليها

يزيد:بنتيلي سنيتي دغيا ساخية بينا لهاد الدرجة ضربي شي طليلة بعدا وشوفي واش ناقصة ومين تكوني خارجة ديك هاد الفلوس لكونطابل وسدي وراك الباب

مع كمل كلامو رجع كشوف فلبيسي وهي زفرات وهزات الوراق كتلقي نظرة اخيرة وكتأكد بلي كلشي هو هداك واخا كان خاص تقرا فالاول وثيقة فسخ العقد كانت هي هاديك دازت للورقة الثانية تتقرا فيها وهو هنا هز عينيه من البيسي وفيكساهم عليها وداكشي لي كان متوقع مع قرات مضمون الورقة الثانية الصدمة صفعاتها صفعة قوية وفرمشة عين طلعات مع وجها واحد الصفورية ديال الموت قلبها بدا كضرب بالجهد وطاح بين رجليها شفايفها بداو كترعدو وحتى يديها وهي تتقرا علاياش سينات وقف ودار يديه فجيابو وهو مبسم تمشى بخطوات ثقيلة حتى وقف وراها تحنى حتال عندها شوية ونطق بهمس شبيه بفحيح الافعى وفيه لمسة من مكر الثعلب

يزيد:ودابا شكون هو الشياطة دبصح

قلبها تهز بكلامو وهي تتشوف بلي لعبها مزيان ولقى كيف يرد لها دقة لسانها بالضوبل ويندمها على ديك الكلمة وقف قدامها وهو مبسم وكشوف فحالها هزات فيه راسها وعينيها حمرين ونطقات وهي مكسورة بعدما قطع لها جناحها من الجذر بهاد الفعلة لي دار ونطقات مقهور ومنهار وهي كتستنكر هادشي لي كدار فحقها

زينة: يزيد حرااام عليييك

كلامها كان كعني حالة الضعف لي هي فيها فديك اللحظة وهي تتشوف فيه كتلة من القساوة والغلظة واش لهاد الدرجة قطع يدو من الرحمة وتجرد من اخلاقو لهااااد الدرجة باغي يدمرها واخا لي دار راه ماشي قليل شنو باقي ليه مزال عضات على لسانها وندمات علاش خرجات ديك كلمة"الشياطة"لي كانت كفيلة تخليه ثاني يجعر عليه وهاهي خلصاتها غالية رضها ليها وبالضوبل

يزيد بنفس النبرة وزاد عليه جعرة من الاستهزاء:النهار الاول قلت لك غندمك رخفت عليك ولكن نت بغيتي طيري حطيتي راسك من راسي درت شرع يدي اذن هادشي نتيجة افعالك ومزال ندييير بزاف حتى نهرس لك داك الراس

نزلات عينيها وهي تتقرا فداكشي وعلاش خلاها تسيني او هي لي دارتها لراسها زربات قالت غتفك حتى لقات راسها غرقااااات مزيااان سينات على محضر على قدو فيه جناية السرقة من كونط الشركة مبلغ قيمتو 30000درهم وحتى شركة متقبلها مستقبلا يعني عمرها تحلم تخدم فشي جيهة اخرى زيادة على الحبس الا مشى حتى دفعو وزيد المستقبل المهني ديالها غادي يدمر تتشوف التوقيع ديالها لي سينات فيه على الدمااار وعلى اعترافها فعلا بلي دارت هادشي قلبها بدا كضرب بالجهد وشداتها السخفة وطلعات معاها السخونية وعينيها غرغرو بالفقصة وقفات وكمشات ديك الورقة وهي معصبة غطرطق بدات تتهضر وعينيها فعينيه ودايرة يديها على وذنيها وتتحرك راسها بلا وهي منفاعلة

زينة:ميمكنش ميمكنش انا ماشي شفارة وعمرنييي سرقت هئ هئ نت معندكش دليييل متقدرش دير هادشيي

يزيد بنفس البرود هز عينيه للسقف:كلشي مسجل والحيوط سماعين وبيديك جبتي الفلوس كاعتذار على فعلتك

نعت لها فالجوا ديالها لي فيه فلوس عرقها وباش تفسخ العقد وجالس كلصق لها المونتيفات وبلي دوك الفلوس تشدات جايباهم ليه زعما رضات داكشي لي سرقات هزات راسها وهي تتقلب فالسقف وصدرها كطلع وينزل مكاين والو مكاينة حتى كاميرة وهنا هو فهمها

يزيد:مشى ايام الكاميرة مفروشة تشوفي فيها وتشوف فيك واخا ميكونش دليل نشريوه مالو غادي يغلبنا

حيدات يديها على ودنيها وهي منهارة وتتشوف فيه شيطان نمرووود بصفة بنادم فديك اللحظة لهاد الدرجة كقولها نحط عليك الفلوس ونسيفطك اشدايرة فملك الله ݣاع وفنفس الوقت لي قا/تلها هو البرود باش كهضر بعدما شعل فيها العافية ورعدهااااا زاد كمل على كلامو وكمل عليها حتى هي والنبرة ديال صوتو باش كهضو متعمدة يستفزها بيها ويلعب لها بأعصابها

يزيد:وبهذه الجنحة يكون الطرد رسميا من سوق الشغل ومن مزاولة أي عملا مهما كان شفتي المعنى الحقيقي ديال الشياطة هو لي كنطابق عليك دابا حيت مكقبل بيها حد من غير مولاها ودابا نت الشياطة ديالنا واخا مزايدانا مناقصنا نهار يكمل داكشي لي دخلتي عليه النهار الاول عاد ديك الساعة غادي طلاحي ونت تحت الصفر وقل بزااااف من الشياطة

كلامو كان ذ/بحة لقلبها بكل ما تحمل الكلمة من معنى رضها ليها وعرف كيف يرجعها فشلها فديك اللحظة وهي تتشوف حياتها كلها كضيع وقادر انه يخرج عليها وعلى الكاريير ديالها وكلشي بلاما يحير فيها ولا يفكر بلي راه هازة عائلتها ولكن لسانها لي دارها لها فهاد اللحظة تحنى وهز داك المحضر وهو كوريه لها زعما بالاضافة لافعالو معاها زادها شاد عليها حاجة فيها الامضاء ديالها ممكن يغرقها بيها بشي مونتيف خايب وكيفما قال واخا متكون دايرة والو الفلوس يشريو كلشي حتى الظلم هز لاديميسيو ديالها وقطعها قدامها هي ووثيقة فسخ العقد ولاحهم عليها وهي غير تتشوف مسح نبرة الاستهزاء من صوتو وحولها لنبرتو الغليظة مع حجبانو المعقودين

يزيد:انا لي كنقول شنو يدار وشنو ميدارش نت تحت يدي وكيفما دخلتك انا النهار الاول مغادي تخوي من هنا حتى نهار نبغي انا نهار نشوفك راسك محني فوقما وقفتي قدامي وهاد العينين للارض عاد داك الساع غتخرجي حيت غنكون قطعت آخر عرق دالجهد عندك لي غيخليك حتى الشوفة هي اللخرة متقدريش تهزيها فالناس

فور ما كمل كلامو جاه الرد من عندها الغصة دالفقصة وفحلقها وكارزة على سماعها:ندمت على النهار لي عرفت فيه

يزيد:وانا كون كانت الندامة تنفع وتخفف حر الدقة وساوية مال الدنيا نحط عليها لي ورايا ولي قدامي ونعيش لي بقى من عمري كنتوسد ضص الزنقة غير تخليني نسرط بلي راني عطيت قيمة لك ولأمثالك

فديك اللحظة كان اعتراف مباشر لبعضهم وخرجو على طيم الخدمة والمشكل لي مقربلينها عليه ودخلو فالاحاسيس الشخصية كان من واحد الناحية عندهم الصح انهم يندمو علاش عرفو بعضياتهم لان كن عمرهم طلاقاو هي عمرها تغرب على الڤيلاج ديالهم وتعيش ببلاكة صمعة خايبة تبعاتها ومزال تابعاهااا اما هو مكانش غادي يحقد ويكره العيالات وعمرو كان غيتضر فقلبو ويعيش سنين فالحقد وفألم الغذر وكسول راسو علاش يستاهل هادشي كان المشكل كولو ضاير على الحقيقة لي معارفش هو وهي مقادراش تقولها حفاظا على حرمة الميت لي هو باها لي فحياتو وكانت محافظة ليه على صورتو معساك دابا لي مات هز دوك الفلوس ديالها ورماهم عليها حتى تشتت منهم شي حاجة نزلات عينيها لهم وهي تتشوف رزقها وعرقها لي جرات عليه وطيحات صحتها وشافت الويل مرمي فالارض الله ونعم الوكيل

لانه هو بوكو حبة وكلشي عندو بالساهل معارفش هي بلي قطعات لحمها على ودهم فلوس عملية باها لي متكتابتش دار نزلات على ركابيها وجمعاتهم بلا حتى شي كلمة اما هو مشى عطاها بالضهر كشوف من الزاج مخليها بعدما قط/عها فيها ثاني

زينة:حسبي الله ونعم الوكيل

كانت جملة كفيلة تلتاجأ لها جمعات فيها كلشي لي كتحس بيه لي ظلمها لي كان حيلة وسباب فهادشي كاملة خرجات وخلاتو وراها سمع الكلمة شنو قالت لي بالنسبة ليه هي بخبثها وفعايلها غير غترجع عليها ديك الدعوة دابا عاد غادي يرجع معاها كيف كان لانها هي لي هبشات عليه تحمل داكشي لي غيجيها مزال عندو الجهد لها

جلسات فوق الكرسي ديالها وهي تتشوف فدوك الفلوس حتى قالت غترتاح ورجعات لنقطة الصفر ندمات على النهار دفعات لهم وسينات على كونطرا دارت لها الاصفاد ودابا مين بغاه تخرج لقات بلي الحبس كتسناها يمكن الحبس غيكون ارحم من حبسو هو من مكان ايمانها قوي كون نهات حياتها شحال هدا يكفي حرقة باها زادها حتى هو هزات عينيها للسمى اشارة للخالق لي كشوف حيت راه عيااات شحال هدا دابا راه مكملة غير بقدرتووو هي براسها معارفاش هاد الجهد باش مكملة مين جاها

داز الوقت ووصلات ساعة الخروج كلشي تكب خارج من الشركة كانت فالݣاراج غادية قاصدة طوموبيلتها صوت الطالون كاسر دنيا لمحاتو فين قالها نتسناك عندي لك شي خبار ومشات قصداتو تحنات بعدما نزل الزاج ونطقات

سامية:ارليا ما عندك شمن خبار

منصور شافيها ونطق نيشان:معولة تمشي بحالها وقالتها ليا بفمها

سامية خرجات عينيها من ثقل لخبار لي سمعات كيفاش تمشي بهاد السهولة: كيفاش واش داوي على زينة؟؟؟؟

منصور:آه يلاه غتقولي السبب وهو يجي سي يزيد مكنتش كنحساب خاصنا نزربو الضربة ديالي انااا خاصني نطبقها سوا هنا سوا حتى خرجات غيكون احسن ليا شوفي نت

سامية وهي تتفكر ونطقات بابتسامة:الا كان على هاد الحساب وبهاد الزربة كنت كنقلب على باش نكركبها ساعة مين غتكركب بوحدها ضروري منسيفطها بشي سوڤونير نكرموها مسكينة

منصور:داكشي علاش تافقنا غادي نطبقو نوبتك نت وجدي راسك

سامية:شنو بغيتيني ندييير؟؟؟

منصور:سي يزيد قاليا اللون ديال الكوليكسيو وبلي التصاميم غادي يخرجو للعلن انا خاصني دوك التصاميم قبل ما يخرجو

سامية عقدات حجبانها:كيف غندير لها انا وزيد مين جبتي هاد الخبار فين عمر الكوليكسيو خرجات ولا شفناها حتال نهار الديفيلي

منصور:هادشي لي قال بفمو وقالي حتى الالوااان من من عائلتو وكدخلي عندهم تالدار شوفي كيف ديري الا بغيتي صاحبة دعوتك عمر تجبد سيرتها على اللسان

سامية فعلا هادشي لي باغية ولكن قضية التصاميم كيف غادي دير لها وقضية الالوان بلاتي:حتى انا قاليا الالوان وسولني على اللون الغووز مع الابيض نت شمن لون قالييك

منصور عقد حجبانو شوية:قاليا الأزرق الملكي مع البيض يمكن كاينين هاد الالوان بزوج والقاسم المشترك هو الابيض

سامية:انا مكهمنيش هادشي لي كهمني هو ديك خيتي تغبر وتحيد من طريقي

منصور ديمارا وشافيها:حلي عينيك وودنيك التصاميم خاصيني ماشي مهم علاش ولكن إلا بغيتي زينة بااااح

سامية تبسمات وتبسم حتى هو طلاقاو كلا واحد عندو مصلحة عند لاخر والهدف ديالهم يزيد وزينة زاد هو وخلاها هي غطير فاش سمعات بلي غتمشي بحالها مكهمش السبب لاش باغية تمشي ولكن المهم غطير وقبل مغادي طير غتخليها تدي معاها واحد الذكرى تبقى فوقما تفكرهم تشدها السخفة وهما فوقما يبقى يتفكرها شي حد فالشركة يقول خليهااا سلعة زادت مبسمة بشر طلعات فطوموبيلتها وهي راشقة لها وزادت لدار عمها تشوفهم وفنفس الوقت طلاقى بيه حتى هو تما مقاداهاش الشركة

داز الوقت وطاح الظلام كانت جاية من السويقة ومهمومة وعقلها مرفوووع دخلات مع الحومة وهي تشوف فالقهوى ديال عبد الكريم وقفات بلاما تحس وهي ساهية فالكرسي لي كان كجلس فيه باها سهات وفلحظة تخايلاتو بلي جالس فعلا وكاين وفرمشة عين فاقت من سهوتها عضات على شفايفها وزادت منزلة راسها حابسة دموعها دخلات لدار كانت مسعودة تتصلي وراضية فالكوزينة

سكينة كانت تتحفض فالصالة هزات راسها فاش لمحاتها ونطقات:تيليفونك من الصباح وهو كصوني

حركات راسها بآه وهي تتحيد جلابتها ومع جلسات صونى كانت تيليفون غير عظم عطاه لها راجل ختها تعدي بيه بعدما دارت فيه نمرتها عقدات حجبانها كانت نمرة غريبة وفديك اللحظة عاود صونات نفس النمرة متردداتش دغيا جاوبات

زينة:الو سلام عليكم؟؟؟

الشخص:وعليكم السلام مادموزيل زينة آيت الحاج؟

زينة:اياه هي هادي شكون معاياا؟

الشخص:متشرفين مادموزيل المهم انا كنتاصل بيك فيما يخص عرض الازياء حنا فرع شركة Zara دالمغرب ديجا كنا شفنا المرور ديالك مباشرة فالديفيلي ديال شركة الوزاني وصراحة كنت واااو حنا نهار السبت عندنا الديفيلي الخاص بينا ومكرهناكش تكوني معااانا وهادشي غادي يزيد فالظهور ديالك فهاد العالم

زينة وهي تتسمع كلامو زرب عليها وهو معارفش هي ماشي عارضة غير سدو بيها التقبة داك النهار وفنفس الوقت تتفكر كلام يزيد نت مزايدانا مناقصنا تتعاود فودنيها خونا مع سكت من الهضرة

نطقات:كاين غير هنا فكازا؟؟؟

يتبع...