محتوى القصة
كلشي كان كمدحها بلاما يردو لبال انه هو لي ختارها بدات كضور بلاصتها بحال شي بنيتة صغيرة مخلياه كشوف فيها وكضحك هزات فيه راسها وتاهي راسمة ابتسامة على وجها رد عليها بغميزة مخلية الهضرة غير بيناتهم
مسعودة تبسمات ابتسامة عريضة وهي كضحك اشهادشي كلشي دار عقلو دقة وحدة وفنفس فرحانة بلعرسان لي جاو بناتها وحدة دوزات الفال لوخرا يوسف ضار عند وليد ونطق:صافي الضحك من علامات الرضى
وليد تبسم ابتسامة عريضة وهو تتسنى جوابها بعدما قصدها نيشان وصارحها مسعودة تنهدات ونطقات:بالفرحات عليا تكون مولاها ولد الناس بحالك بحال خوك والفرحة فرحتين
وليد:الله يكبر بيك امي مسعودة ويخليك لينا
مسعودة:وا من عندي انا الله يكمل كلشي بلخير شوف غير جوابها هي وزيد راه باقية صغيرة اولدي
وليد:عارف لي كاين امي مسعودة انا قصدتك نت باش نضمنها ليا قرايتها عليا حتى تكمل انا مستعد وقاد بيها وبكلشي
كانت تتشوف فيه مزال صغير وكيف كهضر دوزات فالزمان وعارفة من لي قاد بكلامو من لي داوي خاوي وهدا غير من عينيه قراتو تنهدات وهي مبتاسمة:اشغادي نقوليك لي فيها الخير الله يجيبها نساليو مع ختها وندوزو ليها هي ان شاءالله هي عارفة هادشي؟
وليد حرك راسو بلا:دويت غير مع الوليدة ومع امي مسعودة نتسناها حتى تسالي الامتحان وداك الساع يكون فراسها كلشي
مسعودة:هادشي لي بغيت نقوليك اوليدي حتى تسالي هاد الروينة باش متلاهاش ويكثرو عليها العرارم راك عارف مع التوجاد ديال ختها
وليد حرك راسو بآه:عارف كلشي وضارب الحساب امي مسعودة انا قصدتك باش نبين نيتي وتعرفو لي كاين وان شاءالله نتمناو غير الخير
فديك اللحظة ناض وطبع قبلة على راسها وهي تترضي عليه وتدعي معاه بلي مزيان الواحد يهز المسؤولية وهو صغير وهي بالفرحات عليها بنتها اخرى تزوج منهم عائلة الجود والمعدن الغالي
نهار على نهار وليام تتجري خصوصا انهم مشغولين وحمل العرس ككون ثقيل خاصة الا كان شي عرس لي هماوي كلشي كجري وكلشي معاون حتى وصل نهار الامتحان الوطني للبكالوريا لي بينو وبين العرس 12 يوم نزلات بشوية من الطوموبيل قدام الليسي لي غادي دوز فيها نزل يزيد وزينة وكذلك أم الغيث شدات فيها زينة من وجها
زينة:متخافيش ركزي مزيان وبشوية عليك قراي السؤال زوج دالمرات عاد جاوبي وان شاءالله كلشي غيدوز مزيان
من مور ما ختمات كلامها طبعات قبلة على راسها خلات سكينة تعنقها من ديما هي سندها واخا راه عروسة وتتجري على ود عرسها مكانتش ملاهية عليها ديما معاها لا هي لا خوها كانو رمز قوي للأخوة طاحو على بعضياتهم فالايام المرة وهاهما فنفس شي فالايام الحلوة بعدات عليها وهنا جات يزيد تبسم وهو كمسح على شعرها بشوية
يزيد:تايق فيك درتي مع كثر وهادي دايزة
كان كمعني على تجربة الديفيلي والتصاميم لأول مرة لي كانت تجربة كبيرة خلاتو فكرها فيها وعطاها بيها طاقة لي جاي طلاحت عليه معنقاه وهو كذلك مخليين زينة وام الغيث كشوفو فيهم مبسمين وهما كشجعوها ويدعموها بلي جهدها مغيمشيش هكاك وكل من زرع حصد والمستقبل قدامها طويل خاصها غير تنقز هاد العݣبة وغتنقزها وفنفس الوقت تتفكر كلام واحد آخر مجاش معاها لكن سندو كان كبير طول هاد المدة وكان سند جميل محسسها باهتمامو لها وقفتو معاها وبزاف
فليسي آخر كان وليد نيت مع رؤية وراضية لي جاو مع يوسف تقسمو وكلا مشى مع واحد كشيرو ليه بيديهم وهو داخل بعدما صونا الجرس وتاهو نفس الشي ضايرة بيه العائلة كساندوه ويشجعوه انه امتحان ودايز وحلمو مزال قدامو
داز شوية الوقت بالضبط فالمقبرة واقفة هو وياه قدام قبر الاب ديالها والسيد كقرا من مور ما كمل يزيد ضرب يديه فجيبو ومد ليه شي بركة زاد وخلاهم بشوية حلات قرعة الزهر وبدات تتخوي فيها جلسات بشوية وهي مضورة يديها جيهة الخاتم تبسمات بشوية ونطقات:تزوجت ابا ومن مور سيمانة غيكون العرس ان شاءالله تمنيتك تكون معايا فهاد الفرحة وتشاركها معايا وتشوفني معامن غنكمل حياتي ولكن(تنهدات)المكتااب الحمدلله على كل حال
تحنات بشوية وطبعات قبلة على الحجرة لي فيها سميتو وكأنها تتقبل راسو وهي تتهضر معاه مخلياه كشوف فيها وكتنهد تاهو الاب مكانتو عند البنت شي حاجة لي كبيرة وبزاااف من مور مدة وهي حاطة راسها على بيرو تتعاود ليه ومشاركاه ديك الفرحة فرحة العرس لي تمنى كل بنت يكون معاها باها ويشوفها غادية لدارها مع لي كتابت تكون ليه
ناضت بشوية بعدما طبعات قبلة كبيرة على قبرو تحنى حتى هو ودار نفس الشي صح مكاينش معاهم لكن بقى فقلوبهم ضور يديه عليها وزادو طلبات منو يجيو ومرفضش ليها وهما غاديين وقفات بقات كضور عينيها تتذكر فين قبرها مع تفكرات قصداتو وقفات بشوية وبدات تتكب عليه داك شوية ديال الزهر لي بقى تنهدات وعينيها على سميتها فالأخير كلشي تخلص على قد نيتو كانت تستاهل ما حسن لكن المكتاب ترحمات عليها نفسها رغم كلشي ربي لي كحاسب تاهي واحد النهار غادي تمو/ت وغتحتاج لي يترحم عليها
ضور يديه عليها تلفتات عندو وهنا نيشان طبع قبلة على راسها تتلخص بزاف عارف طينتها وعارف معدنها ولكن دابا زادت بينات ليه على انه ربح بنت الناس جوهرها نادر وبزاف كشوف فيها الصفاء وهي تتشوف فيه السند باها مشى وتاحد مغايجي بلاصتو ولكن الا مشى داك الذرع ديال الابوة على الاقل تلقى واحد الكتف لي تسند عليه وهاد الكتف كان هو عاد الشخص لي بغاه قلبها
هوليااااا تسمعات بصوت عالي من عند وليد ويوسف لي كان قدامهم لبيسي بعدما طلعو النتائج سكينة غوتات بالفرحة ودارت يديها على وجها تتبكي طايحة للأرض لحظة الاعلان عن نتائج الباكالوريا لي جتازوها بنجاح بزوج بيهم الزغاريت ديال كل من مليكة وام الغيث وفريدة سادت على الدار لي هي دار العرس ودابا تزادتها فرحة اخرى فرحة البكالوريا لي تتفرح الولاد والوالدين لي كعيشو تاهما داك الجو ديال السطريس قبل وبعد الامتحان يوسف كعنق فمسعودة وهي فرحانة تتبكي زينة شادة ختها تتبوس فيها وكبكيو بفرحة فرحة لي زوينة حيت العائلة كاملة كان بالها معاهم وبقاو فايقين معاهم حتال لزوج دليل باش طلعات النتيجة وكطمنوهم وكدعيو معاهم بلي ميكون غير الخير وفعلا ربي مخيبيهمش سكينة طلاحت على مسعودة تاهي فرحوها بزوج بيهم والفرحة فرحتين جو ديال البهجة ساد على الدار فداك الليل زايدها على الفرحة لكبيرة ديال العرس لي ما بقى حابسهم عليه والو دابا كانو كتسناو فقط الدراري يدوزو ويخرجو النتائج باش يعرسو مرتاحين معانقة هي وياه مفراسها ميتعاود عند بالها مزال كحسابوهم صحاب كهمس ليها فوذنيها وهي مبسمة
وليد:قلتها ليك قلت ليك غتفرحينا كاملين ودابا غنفرحو كاملين ان شاءالله
كلامو كان فيه رسالة لي هي مفهماتهاش ولكن غتعرفها من بعد بعدات عليه وعويناتها كبريو وهي كارزة على يديه كان داعم ومشجع لها طول هاد الفترة وعمرها تنسى هادشي طلقات منو فاش جراتها انيسة تتعنق فيها وتتبارك ليها فجيهة لوخرا كان معانق هو ورؤية تتبارك ليه بعدو على بعضهم وهما مزال مشادين وتتعبر ليه على فرحتها وتاهو فرحان بنجاحو وفرحان حيت فرح عائلتو وفرحان حيت فرحها حتى هي لي منهر عرفاتو دخل لبسمة على وجها وخفف عليها شوية من لي صاري فحياتها
الخدامة مخرجة العصير والحلوى فداك الليل كحتافلو جالسة حداه مدليها كاس العصير خداتو وهي مبسمة مع خدا حتى هو رجع ساند ظهرو على الفوطوي وهمس ليها:نوبتنا دابا وما بقى ما يحبسني عليك
تبسمات وهي منزلة راسها بلاما تشوفيه كانت فرحة العرس وحماسو طاغي على كلشي واكثرهم هما وعلاش لا وهو احتفالية حبهم لي بقات ليها ربعيام وغيكون انطلاقتهم فالحياة الزوجية
الــمــامــونـــيــــة مـــراكـــش🤍✨
اليوم المنتظر ليلة العمر وليلة الاحتفال بالعلاقة المتوجة بالزواج والحلال بعد انتظار وشوق اليوم لي سبقوه تحضيرات على قدم وساق باش يوصل لأن الفرحة ديالو ماليها مثيل فرحة العرسان فليلتهم لي غتبقى راسخة بكونها أنها أخيرا جات ووصلات وعائلاتهم والفرحة لي غيشوفو فيها ولادهم فهاد النهار لي كتمناه كل عائلة تشوف فيها بنتهم عروسة غادية لحضن شريك حياتها وكذلك فرحة عائلة العريس وهما كشوفو ولدهم ختار رفيقة دربو فالحلال لي مدام ختارو لواحد فراه ربي كيسر فيه وكلاقي القلوب المكتابة فالسما قبل الأرض
حلات عينيها بشوية وهي تتشوف انعكاسها فالمراية قلبها فرفر فرحة وبهجة وهي تتشوف راسها كيف طلعات عروس مغربية فأبهى حلة لعريسها وناسها لي جاو يشاركو معاها فرحتها كانت بقفطان الحناء الأخضر رمز الخصوبة ولي قيمتو عالية على مر تاريخ ثقافتنا التاج فوق راسها مخليها ملكة ليلتها اكسيسوارات ثقيلة زايداها نخوة على نخوة القفطان مشيطة انيقة جامعة فيها شعرها مبينة وجها اكثر هاد ماكياج ثقيل لهاد الليلة طاغي عليه ومبينو العكر لي كان فنفس لون الحجيرات باش منبت القفطان لكان هو اللون الوردي الداااكن والغامق وهدا هو طوندونس قفاطن الحناء حاليا كانو ضايرين بيها بزاف واقفين على جمالها وابرازها فهاد الليلة من مصففة الشعر للنݣافة تبسمات لمولات لميكاب وسيفطات ليها بوسة فالهوى من المراية مبينة على رضاها واعجابها بخدمتها واخا ماشي هي لي كانت باغية تجيب كان عينيها فواحد آخر مشهور فانستاغرام لكن طبعا الزوج الكريم غادي يرفض وهي كانت عارفة من بعد كلشي توقع انه يخلي راجل يماكي ليها فعرسها جات النݣافة معاونة هي ومصففة الشعر على الڤوال كلصقوه ليها
النݣافة:ياك التاج مكضركش؟
زينة:لا لا غير شوية الكوليي من جبهة السدادة كنحس بيه كنغزني
جات وحدة من طاقة النݣافة تاهي دارت يديها تتقاد ليها فالكوليي واقفين على راحتها باش دوز ليلتها وهي مرتاحة على اكمل وجه لتحت الصداع الدنيا عامرة ولوطيل لي حجزوه خصيصا لهاد الليلة كان كولو مقاد ومصاوب من البرزة حتى لبرا فين كحطو المعروضين الطوموبيلات وكان غير شكون وشكون لي حاضر الطبقة ديال موروكو كيفما مالين العرس تاهما همة وشان
تقريبا كلشي وصل الڤيدورا مطوقين الدنيا ولي دخل كدخل بلانڤيطاسيو كلشي مأمن ومضروب له حساب باش هاد الليلة دوز مثالية وزينة حيت الصبر على قلبها كان طويل وبزااف وهادشي لي مخليها بحلاوتها كان لي كدخل كوقف قدام واحد الكادر كبير فيه تصويرتهم بزوج وسمياتهم ككتبو ليهم فيها شي حاجة لي زوينة فيها لي غتبقى لهم ذكرى وكعبرو ليهم فيها على الفرحة لهم والسعادة فحياتهم
تبسمات وهما مزال كقادو ليها فاش سمعات عساوة قلبها بدا كضرب بالجهد اكيد وصل وجاب ليها معاه الدفوع وكلشي كتسنى بقى غير يطلع هو باش ينزلها ويبداو ليلة عمرها كانت شاداها الخلعة مع السطريس مع الفرحة كلشي بدات تتنش على وجها وكطلع النفس وتهبطها تتقوي راسها لأنها ليلتها هادي وفرحتها غتكمل اليوم واليوم انطلاقتها فالحياة الزوجية مع مالك قلبها وروحها
النݣافة:تبارك الله جيتي غزالة خاصنا نخرجو دابا باش يدخل مولاي السلطان يشوفك متخافيش وان شاءالله حنا معاك وكلشي ايدوز مزيان
زينة:شكرا ربي خليييك خدمتكم نقية تبارك الله عليكم تانتوما
خرجو كاملين وبقات معاها غير وحدة طاقم النݣافة عاوناتها ناضت بشوية ومشات تخبات وهي كضحك النظرة الاولى خلاوها ليه هو تتفكر كيفاش اتكون ردة فعلو وهو كشوفها عروسة ديالو لهاد الليلة وكذلك هي اتكون عندها ردة فعل وهي تتشوف عريسها بالكوستيم يا لالة جاي يديها يخطفها وهي ملكو السيدة لي بقات معاها قادات الطيليفون يسجل ويوثق هاد اللحظة فالبلاصة فين غيوقف عارفين هادشي مزيان وديما كديروه مع ݣاع لعريسات تسمع الدقان قلبها تهز وعضات على شفايفها وهي مبسمة هو سمعات السيدة تتهضر معاه وتتوريه يشوف فالحيط حتى تخرج ويضور وداكشي لي كان سدات وراها الباب مخلياهم بزوج داخل بكل اناقة ووسامة باين عريس من الطيارة مفرز بديك الطولة والتجريدة والكوستيم كحل جاي يدي مولات قلبو
يزيد:اتكايسي امدام
زينة وهي كضحك:يلاه ضوووور
يزيد وهو كشوف فالحيط:هانااا ضاير غا خرجي ما بقى صبر
داكشي لي كان طلات بشوية ليكون كغش لكن لقاتو ملفت فعلا خرجات بشوية من مخبئها شادة فطرف من تكشيطتها بيديها بزوج وتتمشى جيهتو بخطوات صغيرة عينيها على ضهرو وتتسنى ردة فعلو بكل شوق وحماس كان كسمع صوت الطالون لي لخلاه يعرف بلي راه مقابلة معاه مباشرة قبل متعطيه الإشارة تلفت متشوق ما عندو صبر وطلاقاو عينيهم فديك اللحظة وهما عرسان لبعضياتهم فديك الليلة لي ديالهم كانت مبسمة والڤوال على وجها شفايف مبين كلشي حتى من فرحتها لي فعينيها تتبري كانت ضاحكة وتتسنى ردة فعلو لكن فرمشة عين وسرعان ما ختافات ابتسامتها من على وجها نهائيا وهي تتشوف فيه والصدمة سرات معاها كاملة
كانت ضاحكة وتتسنى ردة فعلو لكن فرمشة عين وسرعان ما ختافات ابتسامتها من على وجها نهائيا وهي تتشوف فيه والصدمة سرات معاها كاملة وهي ممتيقاش شنو تتشوف الدهشة خلاتها تكذب عينيها لأنها أول مرة تشوف هاد اللقطة لخلاتها مبلوكية بلاصتها معرفات كيف تصرف
فور ما ضار ولمحوها عينيه نيشان سيفطو إشارة لقلبو صورتها قدامو وهي عروسة ديالو أخيرا من بعد طول إنتظار من بعد بزااف أو بالضبط من بعد عذاب خلاتو متمالكش نفسو خلات أحاسيسو نجارفات وفاضت وسط قلبو وفؤاذو لي متربعة عليه هي من أول نهار شافها فيها كان كقول هاد اللحظة عمرها توصل لكن وصلات من بعد صبر طويل ومشقة أنفس بزوج قاصاو فحرب حاربات حبهم وقفات بيناتهم ولكن فالأخير حبهم هو لي نتاصر وكل مكان واقف بيناتهم نزاح ومكاين حتى حاجة تعاود تفرقهم هادشي خلاه مقدرش يضبط راسو ولا يتحكم فمشاعرو مشاعر الفرحة لي خلات الدموع غلبوه فديك اللحظة وهو كشوفيها قدامو ديالو مبقى ليه بعاد عليها حيت داك البعاد ضرو بزاف ولكن دابا الحمدلله استنتج انها كانت هي مكتابو من الأول ولكن خاص ضروري يعيشو داكشي كامل باش الرابطة بينهم تقوى ويحسو بحلاوة هادشي لي كعيشوه دابا كان داير يديه على عينيه لي غمروهم الدموع دموع الفرحة والفرج وأهم حاجة دموع حبو ليها دموع فرحتو ليها ودموع ضعفو ليها هي فقط لأنها هي بوحدها لي غتشوف هاد اللقطة معرفش يعبر بالكلمات على فرحتو وكانت الدموع لي قادرة تبين ليها كلشي وهادشي لي صدمها كانت هي لي تتبكي وهو لي كسكتها معمرها تخايلات أنها غتشوف الدموع فعينيه واخا دموع الرجل للمرأة كعنيو المشاعر القوية والصادقة لها لأن الرجل ما يبكي إلا لكان وازنك ذهب وسميتك ناقشها على قلبو جاها واحد الشوك هو لي خلاها واقفة مصدومة متتيقاش لانها براسها معرفاتش كيف تلخص داكشي لي حسات بيه راجلها لي طول وتجريدة كبكي قدامها وعلى ودها هادشي مكنقصش من رجولتو بلعكس كبين لها انه عاشق هايم غارق فبحر حبها لكنها عمرها كانت تخيل مع حيد يديه من على عينيه لي كانو حمرين وهو كمسح دموعو وكشوف فيها مبسم هادشي لي خلاها تفيق من صدمتها لي تحولات لفرحة وفنفس الوقت تاهي حسات غادي يغلبوها الدموع وداكشي لي كان غرغرو عويناتها ونطقات سميتو بصوت باكي وهي غادية قاصداه مع وقفات قدامو شدات وجهو بين يديها ونطقات عينيها فعويناتو الدامعين
زينة:دموعك غاليين احبيبي
يزيد وهو كمسح عينو بالجنب ديال يديه وهو كشوف فيها مقادرش يحيد عليها العين نطق بصوتو الطاغية عليه ديك البحة لي عندو مزينة كلامو لي نطق بيه وكان وازن وغادي:كانت حرب صعيبة على ودك لكن تستاهلي
كلام كان من ذهب غالي كيفما هي غالية عندو كعبر ليها فيه على مكانتها عندو وغلاوتها كن مكانتش ديك الحرب كن مدارش بزاف على ودخل مكانش غادي يحس بطعم هادشي لي كعيشو ديما الحاجة الصعيبة كتكون زوينة فاش كتوصل لها مجاتوش بالساهل شي لمخليه دايرها فعينيه ومعاملها كيف الما القليل ودموعو طاحت فاش ولات ليه
عويناتهم على بعض ولأول مرة كانو عينيهم مغرغرين بزوج جامعين الفرحة الكبيرة لي كتلخص ف"وأخيرا من بعد ما داز قدام عينيهم فيلم علاقتهم من نهار طلاقاو بحلوو ومرو هاهما كعيشو اليوم ليلة العمر ديالهم احتفاء باجتماعهم وترابطهم مع بعض فالحلال إلى ما نهاية بزوج جرها عندو فديك اللحظة لصدرو ضامها وهي كذلك لو كانت شي حاجة لي أكثر من الفرحة فراه هي لكعيشو بزوج فديك اللحظة لقلب على لقلب حتى لنهار تقبض الروح كان كهمس لها بشوية وهو ضامها ليه تحت جناحو مكاين لي يحيدها ليه
يزيد:كنواعدك عمرك تندمي حيت قبلتي النهار الاول
كانت عارفة وشايفة قبل ما يتزوجو لي دار على ودها مخليها دابا عارفاه مداويش فالخوا وقف معاها فأشد حزة لقاتو سند وظهر حامي ليها عطاها طرف منو فاش كانت كتحتاضر رسم البسمة على وجها وهي فعز القهرة سهر معاها ليالي الضباب ونهار حلات عينيها ورجعات لوعيها لقاتو أول من كان جنبها كتفكرو هادشي وهما حاضنين بعض فليلتهم وفعلا كانت الليلة ليلتهم والفرح فرحهم آملين ان حياتهم تكون كلها أفراح وهي مزينة حبهم سمعو الدقان وهذا دليل على أنه جا الوقت فين يخرجو يحتافلو بتتويج علاقتهم للحلال بعدو على بعض شوية وهو شاد فيديها لي طلعها لشفايفو وطبع قبلة عليها تحت ابتسامتها وفرحتها ضورها على ذراعو وعينيه عليها ونطق:مشينا
حركات راسها بآه بابتسامة عريضة وهنا زادو بزوج فأول خطاوي حياتهم الزوجية لي بدايتها بهاد الليلة الزوينة ولي هما ملوكها
الانظار كلها عليهم وهما نازلين فأبهى حلة فليلتهم ليلة زفافهم وحفل حبهم الدقة دعيساوة مزينة دخولهم والنݣافات وراهم زايدين حلاوة الدخول بالصلاة على النبي كلشي واقف يستقبلهم وكلشي عينيه عليهم مشاركهم فرحتهم فليلتهم قلبها كضرب بالفرحة وهي نازلة يديها فيد حبيبها تتشوف فالناس او بالضبط عائلتها لي يلاه غادي يشوفوها وهي عروسة ختارو يشوفو اللوك حتى تنزل باش تكون المفاجئة اكثر مسعودة عينيها مغرغرين وهي تتشوف فبنتها لي طاحت وناضت هاهي اخيرا جاها العوض وغتولي كتمشى على الريش من بعد رحلة معاناة طويلة لي مخلياها تستاهل هادشي لي كتعيشو وبزاف خوتها واحد واحد الفرحة فاضت على قلوبهم وهما كشوفو الأخت لقريبة لهم كلهم عروس فليلتها كعيشو معاها فرحتها بعدما عاشت معاهم فرحتهم هما كاملين ودابا جات نوبتهم باش يشاركوها سعادتها كلشي الاحباب والاصحاب حاضرين من الشركة وكذلك المعارف وحتى من كيڤن ومراتو وصلاتهم الدعوة وحضرو باش يعيشو تجربة العرس المغربي بتقاليدو الوازنة والمتوارثة عبر أجيال مع نزلو ضارت بيهم الدقة دعيساوة والصلاة على النبي متواصلة تحطات الميدة لي غتكون أول حاجة غيحتافلو بيها بالعروس وهما مكرمينها هازينها فوق راسهم كلشي ضاير بيهم وكشطح
من مور تصاورها مع عريسها وهي فالميدة قبل ما تهز عضات على شفايفها بالخوف بعدما تهزات ولكن سرعان ما خوفها راح وهي تتشوف راسها الفوق فالعالي كلشي ضاير بيها الانظار عليها كديرو لها اشاراة بيديهم بلي جيتي فنة وهي باللباس الأخضر لباس الحناء رمز الجمال والخصوبة فأعراسنا العروس خاص تحني باش ربي يحن عليها تتسيفط قبلات لخواتاتها وهي فالميدة ولݣاع الناس لي ضايرين شي كصور وشي كشطح وشي كشالي ليها والدقة العيساوية خدامة عاطية طرب روحاني لديك الليلة روعة كانت جارة يزيد تتشطح هي وياه وضايرين بيه عائلتو وحبابو حتى هو كيفو كيف العروسة مولاي السلطان فليلتو اولهم واليديه فرحانين بيه هو كبيرهم كمل دينو لمح مليكة جرها من وسط الناس كشطح معاه طابع قبلة على راسها وهي كدعي معاه فرحانة له من كل قلبها لا هو لا عروستو وكلشي عايش أجمل اللحظات معاهم حيت كلشي دازت عليه بدون اسثناء البدية سخونة وكلشي محمس حيت كانو عايشين الشوق لهاذ النهار سكينة شادة السيلفي مقابلة مع ختها لي فالميدة تتصور معاها وتتوثق هاد اللحظات لي غيبقاو ذكرى ومن أجمل مداز فحياتهم جا وراها مشدود معاها فالسيلفي شي لخلاها تبسمات وكملو الشطيح وهما تتصورو بزوج همس ليها بشوية فوذنيها وسط الصخب:ساليتي معايا بالبلدي والحمر اعباد الله
سكينة مبسمة بكبرانية وهي عاجبها راسها يمدحها وهي بالقفطان المغربي التقليدي لي كعطي المرأة حلاوة ونخوة:ايوا باش تعرف راسك معااامن
وليد يديه على قلبو وهو مواصل الشطيح:عارف راسي معامن وطايح طيحة عمرني نوض منها
تلفتات عندو وهي كضحك وتقلب فعينيها بمعنى باش تعرف معامن من مور ضورة الميدة بلبسة الحناء نزلات عروستنا تحت الصلاة على النبي والدقة مزال خدامة شاد فيها بشوية بعدما ناضت وعينيه عليها وهما غاديين للبرزة لي كانت بدورها بالأخضر الملكي مجهزة بكل ما يخص طقس الحناء لي على وشك انهم يبداوه أهم ما فالعرس واول ما كتبدا بيه العروس وكيفما شاع حاليا ولات تتجمع مع العرس وككون الفرح فرح واحد وكاين لي مزال كسبقها قبل العرس بنهار وكلا وفاش الأهم هو الاحتفال الفرحة والحلال
ريحة الحنا والورد عطاو والعروسة مادة يديها ورجليها ليها الڤوال مزال على وجها كلشي نايض كصور ويشطح عايش مع عيساوة لي مزال محيين الحفل بعدما الناس ديال الميدة ضارو لطيافر الدفوع هازينهم كضورو بيهم برقصة متقونة وسينفونية تقليدية كان دفوع هماوي كامل مكمول من حوايج العروس ذهبها ماكياجها لوازمها حتال للشكلاط والورد ومرفقاتهم دفوع معلي شانها مخليها موزونة بالذهب وهي غادية لدار مولاها
الا كان شي حد منشط الدعوة من مور عيساوة فراه غير وليد لي مخلي كلشي مكرشخ بالضحك بشطيحو تصرفاتو وروحو المرحة يطلق من مو يشد فمليكة يطلقها يشد فأم الغيث حتى شوية بان ليه البلان فمسعودة شطح مع كلشي وضار على كلشي
جالسين فبرزتهم كشوفو ففرحة حبابهم بيهم النقاشة خدامة كتزين لزينة فيديداتها ورجليها بالحناء كهضرو بيناتهم وهو كحاول ميشوفش فالحنا شي خلاها تعيق بيه نطقات وهي ضاحكة:حياتك كاملة مكتحملهاش واليوم حصلتي فيها
يزيد لي كان هاز نشاشة وكنش عليها حيت الڤوال على وجها وعارفها اتكون صهضات:ياودي غير مين هاد النهار كلشي يهون على قبلك وقبلو
مع كمل كلامو غمزها راسم ابتسامة صغيرة على وجهو زايداه وسامة كثر ما هو زين مخليها تتشوف فيه عويناتها كبريو هازة يديها لي مزينين بالحنينة كيفما طيرات عقلو بزينها وهي عروسة وفرحتو بيها خلاتو بكى هي كذلك هبلها وهي تتشوفو بالكوستيم عريسها وطايح عليه السر تاهو من ديما أنيق وهماوي لكن فهاد الليل وهو عريس زينو فرفر قليبها وعاد دابا ثاني زاد على ما بيها باش انه شي حاجة لي دم سنانو مكحملهاش ويستحملها على ودها ويجلس ويتبت هادي اقل حاجة تبين لها قلبو ومافيه ليها عاد خلي مداز ومدار على ودها كملات ليها النقاشة يديها ورجليها وجات نوبة العازبات باش يديرو حنينة الفال بيما فيهم سكينة ورؤية وروعة عاد خلي بنات عائلتها وعائلتو سليمة بنات عمتو كلشي ايدوز فال العروس تستفو حداها وهما ناقشين صبيع كل وحدة هازة بلاكة فيها شنو كتقرب هي للعروس مصورين معاها ومخلينها تركب ليهم براسليات فاللون الاخضر تتوسطهم خميسة باللون الذهبي هدية منها ليهم على فرحتها لي شاركوها وفنفس الوقت سعد زوين بحال سعدها الحنا نشفات وجا وقت تحيادها ضارو بيها النݣافات كغسلوها ليها فطاص ذهبي بالما والزهر واوراق النعناع بشوية حطات رجليها المزينين بالحنينة فالأرض كان حداها وفور ما لمحها تحنى بشوية وهز ليها صندالتها وبدا كلبسها ليها كانت النݣافة مزال تتمسح ليها يديها وهي تتهضر لمسعودة فوذنيها حسات بيه وتلفتات مدهوشة هادشي مولفاه معاه لكن ماشي قدام الناس وهو مكانش عندو مشكل يبين حبو ليها قدامهم عادي تݣعد من مور مالبسها وسدها لها كانت تتشوف فيه ملاقية متقول تبسمات وهي تتنهد عينيها فقط لي كقولو ليه كلشي المصورين قدامهم كصورو من ݣاع الجوايه وكوثقو كلشي وهو كهز ليها الڤوال على وجها وزينها بارز مهبلو عليها قرب لها بشوية وهو طابع قبلة على راسها والتصاور كتلتاقطو لديك اللحظة قبلة الراس جامعة كل من الاحترام والتقدير وخصوصا فهاد الليلة مبسمة وهي تتشوف يديها فيديه غاديين يبدلو حابسة الضحكة متأكدة غير غادي يطلع غيرش الريحة على يديه على ود الحنا حكرات فهاد الموضوع حيت عارفاه شحال ككرها ودابا غير مستحمل كيفما قال كلشي يهون على قبلها وقبل هاد النهار
واقفين قدام العمارية مبسمين للكاميرة يديها فيديه ويدو لوخرا مضورها على خصرها وهي بالقفطان الابيض الرمز الاول للعروس المغربية لي كعلن على إنطلاقة العرس رسميا مبدلة تفاصيل صغيرة فالميكاب مشيطة جديدة والتاج فوق راسها مع خيط الريح التخليلة المكناسية العريقة زايدة إظافة على القفطان كانت حلوة تاكلها بداك الزين لي عطاها الله وسر العروسة لي طاح عليها تلفتات عندو بشوية منزلة راسها وهو طابع قبلة على جبهتها والمصور كلتاقط ديك اللقطة بكاميرتو تصاور وڤيديو جهزوها بحال الملكة وهي فالعمارية هودج التقاليد المغربية لي ميمكنش العروس متهزش فيها ليلة فرحها اعلان على علاوتها وغلاوتها وهي فوق الاكتاف تصورو كذلك وهي جالسة فيها ومن موراها نيشان تهزات تحت أنغام الاوركيسترا وصوت الفنان رشيد المريني بالأغنية الموروثة على العمارية ولي هي🤍ألف هنية وهنية العروسة فالعمارية🤍
كلشي ضاير بيها ومتبعها فينما ضارو بيها الناس لي هازينها وزايدين عليهم واجدين اخرين هازين ديكورات ضايفين لمسة إبداعية على ديك الضورة فالعمارية عريسها قدامها يديه على صدرو كحيي بلباقة كل من بارك ليه من بعيد ابتسامتو على وجهو وفرحتو فعينيه طاغية كتشير بيديها بشوية للحاضرين وهي مبتاسمة وابتسامتها زوينة كيفما هي كلها زوينة الدموع غلبوها فديك اللحظة بعدما كانت صغيرة وتتفرح بشوفة العروس ليوم هي عروسة والناس فرحانين ليها العروس والعمارية حلم طفولة كل بنت من صغرها تتقول واش شي نهار حتى أنا غنكون بلاصتها امتى غادي يجي داك النهار ومين كجي ككون احساسو فشكل ونت تتعيشيه على الارض الواقع مكانش هادشي فقط لخلا دموعها يغلبوها وانما حتى هادشي لي عايشة عمرها كانت تخايل عرسها غيكون اسطوري هكا وزوين وراقي نظرا للطبقة لي كانت عايشة فيها لكن ربي عندو رأي آخر هو لي كخلق المكاتيب والارزاق سعدها وزهرها ومكتابها وحلاوة العوض والفرج هما لي زادو خلاو دموعها يغمرو عيونها والحمدلله لا حاجة تضيع عند الله
تتمسح عينيها وهي تتشير لهم بيديها وتسيفط قبلات فالهوى لميمتها راضية لبنى سليمة حسنية لي حضرات صافية روعة كلشي ݣاع حبابها وصحابها كلشي ناشط وكلشي مفيجط وعلاش لا وهادشي باش معروف عرسنا غير بشتف هايتف وشطح وعيط لي يشطح معاك
من مور ضورة العمارية الهماوية وأنغام رشيد المريني نزلات عروستنا فور ما نزلات شد وجها بين يديه وهو كمسح لها عويناتها تزنيݣتها سادت على خدودها ويديها فيد عريسها متوجهين للجلسة ديالهم والأنظار عليهم غادي شاد فيها من يديها ومضور يديه على خصرها وعينيه فالأرض حاضي مع الطالون لي لابسة حيت عالي كل تفاصيلها راد معاها لبال فكلشي جلسات بشوية والمصور تابعها فينما مشاو كوثق كل دقيقة بيناتهم النݣافة تتقاد ليها فالقفطان قبل متجلس فارداه على البرزة كاملة باش يزيد العروس نخوة وهمة واقفين شادين فبعض والمصور كصور داك البوز من بعد عطاهم اشارة صافي وهما يجلسو وعينيهم على الحضور كلشي كشطح وكلشي ناشط جبد تيليفونو فديك اللحظة تبسمات للكاميرة وهما تتصورو بزوج بيهم سيلفي عامر حب جات فديك اللحظة سكينة وروعة يتصورو معاهم شادين معاهم السيلفي حتى هما وليد حاتي على مسعودة حالف حتى يشطحها الشعبي منوض فيه الهوايش
رؤية لي كانت تتشطح هي ويوسف وعينيه عليها مين بدا العرس وهو كشوف الزين لي تلفو حتى هو بالبلدي فديك اللحظة تلفت فاش جا عندو واحد الولد بغا يتصور معاه لي كان ودادي واكيد عرفو من مور آخر ماتش لي سطع فيه رجعات شوية باللور مخلياهم يتصورو لكن هو عندو رأي آخر شد فيها وهو كهضر مع الولد فور ما هز السيلفي جرها حداه وتصورو بتلاتة مع الولد لي شكرو بحرارة ومشى مخلي ديك التصويرة ذكرى باش نهار يسطع نجمو يلقاها يبارطاجيها ويفوح بيها على صحابو قلبها بغا يفرفر على هاد لجيست لي دار وحمقها شد فيها من يديها بزوج مكمل الشطيح وفنفس الوقت كهضر:لي بدا معايا من الاول غيعيش معايا كلشي
عضات على شفايفها ونزلات عويناتها حشمانة حيت فاهمة ملخص كلامو مزيان وتاهي هادشي لي باغية كيف كان معاها تكون معاه فديك اللحظة دخلو السرباية بالعواصر والحلويات مشكلين مضايفين الناس وكلشي مواصل الشطيح والرديح
بشوية كمسح لها بكلينيكس جنب شفايفها من لاكريم ديال الحليوة لي خدات بقى ليها واحد شوية فيديها مقداتش عليه تلفتات عندو موجهاها لفهمو:تكملها ايزيد؟
تلفت عندها هنا وهي تجمع ديها عندها تفكرات الحنا:آه حقا الحنا
بغات تمدها ليه فيديه لكن كان عندو رأي آخر شدها من معصمها وجه يديها لفمو وكلاها وهو كتحدى ما ككره وهنا تبين ليها بلي مكدويش فالخاوي الا كان على ود هاد الليلة يصبر لكلشي خلاها مبسمة حياها الله حتى شافتو كياكل من اليد المحنية وهي زهور الخدامة تتحني مكضورش بماكلتها لكن هي شكل والخدامة فشكل
يزيد وهو كمسح يديه:راه قلت على ودك ازين يحطو ليا الزاج نسرطو ماشي غا الحنا
دارت يديها على فمها وهي كضحك مميزة عندو فكلشي والله يدومها محبة راضية جاية يديها على كرشها تصور مع ختها وزايداها بالتيك توك معاها وهي هازة ليهم هبالهم بل وفرحانة حيت دفئ العائلة فبحال هاد المناسبات زوين ناقصهم غير المرحوم
الوقت غادي كدوز فليلة الفرح ومن بعد مدة وهما جالسين باللبسة البيضة هاهما نازلين ثاني بلبسة هماوية تسريحة جديدة وتفاصيل اخرى مبدلة فالميكاب مخليها مع كل لبسة زينها كبان فصيغة مختالفة كانت هاد المرة التكشيطة من الازرق الملكي ختارتها على ودو وبالنسبة له غير على لي لبسات ولي مزال غتلبس لأنه كان عزيز عندو هاد اللون وزاد وهو كشوف عليها على هاد الزين لي قدامو ديالو ملكو وميحيدها ليه حد تبسمات ابتسامة عريضة وهي خجلانة بعدما همس لها فوذنيها وهما نازلين بلي جات زوينة وهبلاتو من بداية لعرس وهو كتعنب ومن حقو كانت هاد المرة فنانة اخرى كتحيي لهم حفل زفافهم ولي هي الداودية الروح ديال الشعبي واقفين كتصورو باللبسة الجديدة عاطياه بالضهر وهو وراها مضور يديه على خصرها قدام البرزة والمصور داير خدمتو والنݣافة كذلك تقاد لها من هنا ولهيه فور ما سالاو التصاور بهاد اللبيسة قصدوهم كاملين الحباب ضارو بيهم وهما كشطحو شادة فمسعودة وتتشطح هي وياها بفرحة وهو كذلك شاد فميمتو على أنغام الداودية الشعبي ميمكنش تسمعو وتبقى جالس ومكاينش شي عرس مغربي بلا شعبي داخل مع العروق والتراث والثقافة🇲🇦❤️
فديك اللحظة وليد لمح لروعة حركات راسها بآه وهنا تلفت بقى حاضي زينة كتسناها تشوف فيه وداكشي لي كان مع جات عينو فعينيها فهماتو ضارت شافت فالمقصودة بانت ليها تتشطح هي وعبد الكريم وسليمة رجعات شافت فيه وهي تتشطح مع انيسة حركات راسها بآه وفنفس الوقت هزات كتافها زعما لي بانلك فديك اللحظة تلفت قاصدها نيشان وقف وراها قلبو كضرب مكانش عندو صبر هادشي لي غيدير من المفترض يدير حتى تلبس العروسة لاغوب ويبغيو يفرتكو الجقلة لكن مقدرش يصبر
ضرب يدو فجيبو جبد البواطة ونيشان مع فتحها نغزها فكتفها ضارت عندو وهي تتشطح وتما مباشرة نزل على ركبتو قدامها حال ليها خاتم دالزواج بطريقة الافلام التركية لي عارفها تتحماق عليهم داكشي باش ختار يطلب يديها هكاك وسط عرس خوه باش الفرحة تكون فرحتين
سكينة لي شعل معاها الضو وهي تتشوف فاللقطة لي دار الناس كلشي تتفرج لي كان كشطح وقف ولي جالس ناض كانت شي حاجة لي غير متوقعة ولكن زوينة مخلية شي تفاجأ شي جاتو واو وبدا كصور كان مبسم فوجها وماد ليها خاتم قلبو وهو نازل على ركابيه ويديها لي غتمد ليه وتعلن قبولها هي لي غتخليه واقف مبلوكية بلاصتها مدهوشة حيت آخر حاجة توقعها هي هادي بلعات ريقها شوية وهزات راسها تتشوف جنابها الناس كلشي تتفرج حتى من ختها العروس مبسمة وعريسها كذلك تقريبا كلشي مبسم الا هي لي مصدومة قلبها كضرب بالجهد وهي تتبلع ريقها وهو تتسنى جوابها فديك اللحظة وبدون سابق إنذار بدات تترجع باللور وهي مبعدة عليه خارجة من وسط ديك الدوارة لي ضايرين بالعرسان حتى فلحظة عطاتو بالضهر ومشات تتجري ومخلياه وراها بلاكة هكاك وسط انظار الناس والعائلة وݣاع الحاضرين
جو من الفرحة والبهجة تبدل فرمشة عين وتحول لجو مكهرب بردة فعلها الاوركسترا حبسو وساد الصقيل مخلي كلشي مكبوب على ديك اللحظة لي كان راسم شي ابتسامة على شفايفو راه تمسحات وتحولات لصدمة شي بدا كشوف فشي وكلشي ملفت متبعها فين غادية وهي هازة جلايلها تتجري مخلياه وراها مزال على ركبتو جالس الرد الوحيد لي جاه هو ظهرها لي عطاتو وخلاتو وراها زينة لي كانت ردة فعل ختها بحال الصفعة شافت فراجلها لي كانو عينيه على خوه وردة فعلو باردة معرفاتش فاش كفكر بلعات ريقها وبزز منها تفكرات لي داز مخلي لي وقع دابا يعطيهم صورة الهروب من العراس سلالة روعة وانيسة بداو كشوفو فبعضهم وفريدة كذلك اما واحد مسعودة مشى منها اللون ومعرفات فين دير وجها يوسف بدا كدوز يديه على ذقنو وهو عاض على شفايفو موقف محرج بكل ما تحمل الكلمة من معنى متبغيه لعدوك لا هما عارفين فين يديرو وجوههم قدام الناس لا هو باغي ينوض يجمع الوقفة الصدمة شللاتو خلاتو بلاكة بلاصة تبسم شوية وهو منزل راسو وسد لبواطة سارطها بأن الزربة ديالو هي لي دارت هكا ما مهد ليها ما حسسها بشي حاجة غير جا ونزل عليها ردة فعل طبيعية وهنا تعرف ان الواقع ماشي هو الافلام تنهد وهو مبسم معندو ما يدير حساباتو هاد المرة مخرجوش ليه كيف بغا معارفاش بلي عالم واليديها وواليديه لكن كيفاش يدير يشرح ليها وفات الفوت بلع ريقو شوية والناس تتفرجو تاشي حد من عائلتو مقدر يدير شي ردة فعل حيت الصفعة دالصدمة كانت عليهم كاملين وزيد وسط عرس ختها صعيبة بزاف مجا فين يجمع الوقفة حتى كلشي رجع تلفت وهما كسمعو صوت الطالون كانت جاية تتجري هازة جلايلها راجعة عندهم حد ما فهم حاجة لكن مع وقفات عليه وقبل ما يوقف هو جلسات القرفصاء مقابلة معاه تبسمات وهي تتلهت وعينيها فعينيه حلات البوشيط ديالها لي على ودها مشات تتجري مع حلاتها بلا حتى كلمة تحت أنظار كلشي جبدات واحد البواطة وكانت بواطة ديال الخاتم باينة من الطيارة حلاتها وضوراتها ليه وكان خاتم رجالي
سكينة:حتى انا على القرص ومناعساش على ودنيا
اللحظة لي كانت وشيكة فديك اللحظة ترخفات وكلشي فداخلو قال اووف وهما كشوفو ردة فعلها ماشي كيف كانو كحسابلهم بل هي لي طلعات مفاجأة وسط هادشي كامل كانت عارفة وعائلتها عند بالها معارفينش وعلاش لا المطيورة هاديك لكن كبقى شكون قالها ليها فديك اللحظة يوسف بدا كصفق وكيغوت(we we we)شي لخلا كلشي يدير نفس ردة الفعل ولحظة الصدمة والاحراج رجعو لحظة حماسية زوينة كاسيها معنى الفرحة فرحتين دار يديه على وجهو وهو كضحك وكحرك راسو بلا وهي كذلك وكلشي ضاير بيهم حيد يديه على وجهو ونطق:بغيت غا نعرف شكون قالها ليك
سكينة:ديرها غير زوينة حتى حاجة مكتخفى
انيسة قرصاتها بالضحك:شكووون قالها ليك عتارفي نعد/موه دابا خسر لينا المفاجأة
كلشي كان كتسنى جوابها يعرفو شكون سرب ليها المفاجأة طلعات حجبانها ونطقات:ايوا نتوما لي كتهضرو بالجهد وانا وذيناتي دارو خدمتهم غا بلاتي عليك اماما ساكتة وضاربة الطم مخليني انا زي الاطرش في الزفة ساعة الله يخلي لينا وذيناتي ويعطيهم العز والنصر ياربي
كلشي بدا كضحك والبرانيين فهمو بلي كانو دايرين ليها مفاجئة وعاقت بيهم وهما بدورهم ستنتجو هادشي حيت عارفين راسهم كدويو بالجهد واخا تكون شي حاجة لي بيناتهم وهادشي لي خلاها تسمعهم فرشو راسهم براسهم كانت لحظة طريفة كوميدية خلات كلشي كضحك وزادت طابع زوين على العرس يزيد وزينة شافو فبعضياتهم كضحكو
يزيد:تلاݣاو هاد البراهش
زينة:طاح الحك وصاب غطااااه
كان المعنى الحقيقي ديال حالهم تلاݣاو ديال بصح هو هبيل وقالها هي متعرفيش جبد الخاتم ورجع شافيها:دابا اشݣلنا نشرتيني وشروطتينييي قضيتي عليا فهاد اللحظة بالرب
سكينة:ديما كنقولك راك معارفش راسك معامن احنيني
ومع نطقات كلامها مدات ليه يديها وهي كضحك وكان جواب مباشر غير من اللحظة لي رجعات فيها وهي جايبة خاتم ليه مكملة بيه اللقطة بحد ذاتها كانت جواب بشوية دخل ليها الخاتم تحت التصفيق الكل والتصفار جبدات تاهي خاتمها وركباتو ليه وكانت اعلان لخطوبة رسمية وسط عرس واخا شي مكان عارف شي بلي راه عارف لكن كانت عندهم النية بزوج لديك اللحظة وهادي أهم حاجة هي النية تحنى بشوية طبع قبلة على يديها تتعني بزاف وشد فيها ووقفو بزوج نيشان جرها عندو وتعانقو تحت التصفيق الكل والفرحة لي تزادت على داك العرس ومكاين ما حسن من الحلال قالت تقمعت وسرطها عاذرها واخا هكاك لكن عندها رأي آخر بالصدفة كانت داخلة عند روعة وسمعاتو كخطط لأنه يتقدم ليها وبلي شرى الخاتم وكدا وعرفات من كلامو بلي راه كلشي عارف بخصوصهم ففكرات حتى هي دير لهم مفاجئة كيفما هما سكتو توريهم تاهي علاش مطوية لواحد واخا صغير الا لقى شريك الحياة المناسب يدير النية والكمال على الله ويبداو بزوج بيهم
مسعودة:احياني على ديك فليفلة وهاد الجيل
فريدة:جيل قيمش ما ساهلش ولكن مبروك علينا الله يجعل حياتنا ديما افراح ياربي
مسعودة:اللهم امين يااااربي
فديك اللحظة بعدو على بعضهم عينيهم كبريو وكقولو بزاف كلشي ضار بيهم ݣاع لي حاضرين دابا عرفو بلي غيعاودو يرجعو حيت عرس آخر جاي فالطريق وآرا ما ينشطو ويشطحو
يوسف عينيه عليها:الله يجيبنا فالصواب تاحنا
تبسمات وهي مزنݣة بلاما تشوفيه وقلبها كضرب مخلياه تضحك وهو كمسح على شعرو كتحمقو ديك التزنيݣة لي كتجيها فاش تتحشم فديك اللحظة روعة شافت فعادل وهي تتصفق ومبسمة بادلها النظرات وغمزها شي خلاها نزلات راسها حشمانة وهي مزنݣة تاهي قلبها مفرفر وتتسنى غير فوقاش تجمع بيه ويكونو لبعضهم كان كل واحد منهم مرتابط وعندو نفسو الاخر تخايل نفسو بلاصة العرسان وقال فنفسو امتى اتجي نوبتي انا ومن هواه قلبي ان شاءالله
زينة مشادة هي وسكينة تشطحو قربات عندها وهمسات لها:كنتي شوية اطلقيني على ولادي لي مزال ما ولدتش ابنت الحرام
سكينة وهي كضحك:غا رتاحي يزيد واكل عليك الجوانط متفرقو معاك غا المو/ت
روعة:عقباليا يااااااختي عقباليااا
بداو كضحكو وهما مشادين وكشطحو فالجيهة لوخرا كانت مسعودة شاد فيها وليد طابع قبلة على راسها وهي كدعي معاه فرحانة نضامات ليهم سكينة وهي تتعنق فميمتها على هاد الفرحة لي زادتها حتى هي فجو من الشطيح والبهجة زينة لي جرات لبنى صحيبتها عندها كشطحو بزوجات صحيبتها لي وقفات معاها فشلا بلانات وكانت معرفتهم زوينة وبزاف وعاشت معاها تاهي تفاصيل كثيرة بالإضافة لحسنية
حلات عينيها بشوية وهي تتشوف شنو بدلات لها السيدة فالماكياج هاد المرة كرزات لها على شفايفها كثر بعكر حمر جاي مع اللبسة لي كانت حمرة ومشيطة جديدة تبسمات راضية على اللوك وعلى راسها وزينها كانت معاها سكينة فين كتبدل وحتى روعة كقادو الماكياج تاهما كعاودو فيه جاو كتصورو معاها من مور ما كملات ليها النݣافة شبعو تصاور لي نيييت
زينة:حتى تسيفطيهم لي عنداك نت راه الداخل مفقود والخارج مولود من داك التيليفون
سكينة وهي تتصور:صافي كوني هانيا اصاحبتي
فديك اللحظة خرجو هما وخلاوها هي جالسة غينزلو دابا وقت العشى هزات تليفونها شادة السيلفي وتتصور عاجبها راسها تنهدات وهي مبسمة تتفكر شوف حال الدنيا لبارح المامونية جات ليه فقط خدامة وبالنسبة لها شي حاجة لي واو وفعلا ماشي واحد كدخل ليه معرووف هادشي واليوم هاهي معرسة فيه وعرسها غيبقى ذكرى زوينة فدماغها كعروسة تفكر حفلة حبها مع حبيب قلبها ومولاها تسمع الدقان اكيد هو ضارت بشوية وقالت ليه يدخل وداكشي لي كان مع فتح لباب خرجات عينيها وهي ضاحكة ووقفات جاي جيهتها وهي تتشوف حتى وقفو قبالة بعض حمقها بالبلدي وعمرها شافتو بيه عريس مغربي قح وهو بالجلابة المغربية الاصيلة ولايح عليه السلهام لي زادو هيبة ونخوة نطقات وهي عينيها عليه حمقها
زينة:كتافو عراض وديال السلهام تبارك الله ماشاء الله قايد صافي
يزيد:منبانش قدامك قايد مسلوب العقل بزينك
ضحكات وتعلات بشوية معاونها الطالون طابعة قبلة على خدو مخلياه حاط يديه عليه فلبلاصة فين باستو ونطق:دابا علاش تتقلبي راني صابر غا بزز
ضحكات بخجل فاهماه شنو كقصد راه صابر وغيصبر نيت مزال شدها من يديها وضورها وهو كشوف فيها بالحمر كيف جاها لون النخوة ولون الحلوة كيفما قال سلباتو ودات عقلو بكل تفاصيلها وهو كذلك كان بالكوستيم فشكل وبالتقليدي دابا شكل آخر خلاها هايمة فيه هماوي وزاد وخلاتها هي كتافو عراض وديال السلهام السلهام خاصو الكتاف والقالب وهادشي كان عندو هو طويل ومجردة تختارو من بين القياد نيت خلاتها هي كانو بزوج فيهم فأبهى ملوك ليلتهم وهادشي لا يعلى على تقاليدنا لي كتخلي العرسان فقمة الاناقة بملابسنا التقليدية الاصيلة سوى النسائية ولا الرجالية🇲🇦❤️
نازلين ثاني يديها فيديه بالصلاة على النبي والأنظار عليهم والكاميرا مرافقاهم فين ما مشاو هاد المرة كلشي كان جالس حيت العشى غادي يتحط وهذا ثاني موضوع بوحدو ميمكنش شي عرس مغربي الا بالطبخ المغربي التقليدية والاطباق الرفيعة لي واخا دخلات عليها بعض تغييرات القرن خاصة فالطريقة باش كتخدم لكن تتبقى البنة والقوام حاضر هو هو مكتبدلش كضورو على الطوابل كلمة مرحبا بيكم على لسانهم وهما كرحبو بالناس لي جاو يشاركهم فرحتهم والطبلة لي دازو منها ماليها يباركو لهم كان كلشي الاحباب والاصحاب المعارف رجال الاعمال من كل اختصاص وعاد خلي الناس دالشركة نيت لي تاهما تعرض منهم القراب للعائلة المالكة قصدو بزوج واحد الطبلة وبالضبط لي كان فيها كيڤن ومراتو فرحانين انهم عرضو عليهم وعاشو هاد التجربة الزوينة وسط عرس مغربية مية بالمية ناضت جولييت عنقاتها وهي تتبارك ليها تاني كانت لابسة قفطان جاي مع زينها وبشرتها البيضة وراجلها عنق يزيد كبارك ليه كان كلشي فرحان لهم حيت بالنسبة لهم مدير تزوج بسكرتيرتو السابقة وهادي حاجة زوينة لكن ما خفي أعظم ضارو على ݣاع الطوابل رحبو بيهم كيفما سرات العادة قبل الرجل تصورو حدا البرزة ومن بعد قصدو الطبلة الملكية لي مخصصة ليهم هما وعائلاتهم وكانت طويلة عكس طوابل الناس ضايرين جلسو هما مترأسينها والعائلة ضايرة ليهم من واليديهم حتى لعمة يزيد وبنات عم زينة
ضاحكين ناشطين بينهم علاما يتحط العشى لي بداو السرباية كمهدو ليه وليد لي كانو عينيه على سكينة تنهد ونزل عينيه للخاتم مبسم طيراتها منو خلعة لكن كانت حلاوة من مور ديك الصدمة طلعات مطيورة ومجبدة وهادشي لي كعجبو فيها قويفزة بغا يفاجئها صدقات هي لي مفاجآه هو وطريكتو كان عند بالو بلي لي كصرع لبرانكات ديما شاد فخوتو ساعة ربي لاقاه بما كثر منو طاح الحك وصاب غطاه
تحط العشى لي كان عبارة على البسطيلة بالحوت بقوامها واللحم مشوي الݣلاص والديسير المهم كلشي هماوي العرس وماكلتو وݣاع قوامو
مكانتش خايفة هاد المرة وهي مهزوزة حيت ولفات وهاد المرة غير على المرات لي فاتو حيت مهزوز معاها حتى عريسها وهي باللبسة الحمرا نيت وطقم ديال الجوهر غليض عاطي لمسة على اللبسة وهي لمسة زمان كلشي نايض كغني ويشطح مع المريني وكلمة مولاي السلطان على لسان كلشي وعلاش لا العريس راه مولاي السلطان نيت جات معاه ماشي غير بالسمية كانت كتضحك وهي شادة فجناب الميدة وتتشوف فيه جالس مربع ركابيه مقيلشين من الميدة حيت طويل والنݣافة تتقولو وقف وهو كدير بإشاراتو كيف غيدير يوقف يوقف يضرب السقف هو كضحك وكلشي كضحك عليه كضورو بيهم بسينفونية الشعبي لي عاطية رونق على ضورة العروسة ولعريس لي تتكون دائما فآخر اجواء العرس ممكونش بقى ليه بزاف قابلوهم مع بعضياتهم وهما عرسان ليلتهم كانت مزال كضحك عليه واخا هكاك ناض وقف قربوهم باحترافية الناس لي هازينهم وهنا مدات ليه راسها بشوية وهو محني طبعة قبلة على جبهتها مخلي المصور شادها وفنفس الوقت هي باش معروفة الضورة دلميدة دالعرسان كلشي على قبل ديك لبيسة لي غير دارت ليه النݣافة بلي راه خاصك توقف باش تبوسها وهو ينوض معاودهاش قولوها ليه من الاول يطير يفرفر لكان غير غيبوس بعد عليه وهو ضاير عند وليد لي كان كموت عليه بالضحك وكهضر معاه شادين فبعضياتهم وهو راجل لبلاصتو مدو ليه ولد انيسة شادو عندو وهما فوق الميدة وكلشي ضاير بيهم هي تتشير بيديها وتسيفط قبلات فالهوى للحاضرين وهو مبسم للكاميرة مخليها تلتاقط ليهم صور فرحهم صور ذكرياتهم على مر السنين لي غادي يعيشو بزوج
كلشي ضاير بيهم وهنا تزاد الريتم فالشطيح حيت العرسان لبسو هاد اللبسة مجلسوش بيها وانما باش يشطحو مع الحاضرين ويبردو تاهما هوايش فرحتهم وكانت هادي اللبسة الامازيغية اصلهم من تازة امازيغ الاطلس وختارت العروس شي حاجة تعطي لمسة كثر فعرسها ولي هي لباس اصلها واصل عائلتها وحتى عائلة العريس قدما كان رزين قدما ففرحو شطح وبين على فرحتو واخا حتى شطيح كان رزين وهماوي بحالو كشطح غير بكتافو بحركات موزونة مشادة هي وياه وكهزو بكتافهم على انغام امازيغية الفرحة فعينيهم بزوج وهما كتفكرو الايام الخوالي فلڤيلاج لي كانت نهايتها هاد الليلة نهاية بالزواج لي كان ميسر ومكتب ورسالة من عند الخالق هدا اكبر دليل باش يعرفو انهم من الاول كانو مكتابين لبعض غير ضروري من العترات باش يقوى الحب ويعرفو قيمة بعضياتهم دخلو واليديهم معاهم هو شاد فالحاج لي تاهو كشطح فرحان بولدو هاز راسو ومن جيهة اخرى زينة شادة فعݣوزتها وماماها كشطحو دقة وحدة فرحانين خوتهم ضايرين بيهم وحلاوة العائلة فالفرح لا مثيل لها يزيد قرم على عبد الكريم كشطح هو وياه مخليين زينة فرحانة كثر وهي تتشوف فيهم جرات تاهي جولييت تشطح معاهم وكيڤن شاد معاه الريتم وليد كوريه كيف يحرك كتافو وزايدة عليهم لالة سكينة لي مكاين غير الله يعطيك صحيحتك اما واحد رؤية ووليد علام آخر
حسنية معنقة زينة بالجهد:الله يسهل عليك ويفرحك يااااربيي فرحت ليكم من قلبي بزوجكم ولاد الناس
زينة:اللهم امين حتى نت الله يسر لك ويخلي ليك وليداتك
كانت هي وياها مشادين كشطحو وزايدة عليهم صافية لي حضرات هي وانور بتلاتة جامعهم سر كبير وبتلاتة وقفو على بعضياتهم فالحزة وربي لاقاهم خير المعرف اما فالجيهة لوخرا كان يزيد مزال شاد الريتم مع عبد الكريم والقلوب صافية وزايد عليهم حتى صاحبو انور لي دارو ليه الفال وبسبابهم طلاقى مع مكتابو لي طلب يديها وهو لايح وراه كل ما صرى ليها كلشي كان فرحان وكلشي صافي ومرتاح لايح وراه الماضي باش يعيش الحاضر
اضواء خافتة ولحن رومانسي عصري كتعزف بالكمان ومؤثرات اخرى عاطي واحد الجو بحال جو الاميرات والامراء لي لطالما عشنا معاهم هاد اللحظة فأفلام ديزني لحظة الفستان الابيض فالزفاف الضو لي ساطع بوحدو كان هو الضو لي مسلط عليهم وجاي نازل معاهم يديها فيد خوها الوحيد لي ناب على المرحوم فهاد اللحظة وهو نازل مع ختو وهي ففستانها الابيض بحال شي اميرة شعرها مطلوق تاج صغيور على راسها الفؤال نازل مع كتافها بوكي دفلوغ فيديها وهي نازلة تحت جناح خوها لي غادي يقدمها لعريسها كان جو رومانسي زايد نغزة مخالف تمام على الجو لي قبل طاغي عليه الشعبي والنشاط كان واقف حدا بياس مونطي دماغياج قدها قداش مزينة بأسمائهم وسايد عليها البياض لي كتمناوه فحياتهم
عينيه عليها وهو واقف بالكوستيم كحل ولبابيو ضايف رونق على وسامتو عينيه عليها وهي جاية منزلة راسها غالبينها دموعها لي كلشي متوقعهم فهاد اللحظة وهي غتقدم ليه من طرف خوها السند الاول فحياتها من مور باها لي غياخد بلاصتو وغيوصيه عليها كشوف لبنيتة لي حبها وهي مراهقة هاهي دابا جاية عندو شابة متكاملة فكل من الزين والاخلاق عروسة ليه ديالو ما يحيدها ليه حد وقفو قدامو وهي منزلة راسها مبسمة وفنفس الوقت غالبينها دموعها تعانقات هي وخوها عناق حار غرغرو فيه دموعها وخوها كذلك غير معافر لكن ضروري من هاد اللحظة بعد عليها وهو شاد وجها بين يديه وطبع قبلة على راسها مخليها مبسمة وهي تتمسح عويناتها كان منظر زوين اخوي وحلو تلفت عند يزيد تعانق هو وياه
يوسف:تهلا فيها عفاك راه اقرب وحدة لينا واخا راه عارف ولد الناس
يزيد بعد عليه وهما مزال مشادين:كون هاني راه فعينيا
عارفينو كيف داير لكن ضروري من الوصاية ولد الناس ولي دار على ولعل بزاف وشاريها بالغالي كلشي واقف وجاري مع ديك اللحظة الزوينة لي طعمها خاص واجوائها كذلك كان الظلام واضواء خافتة لي ساطعة عاطية رونق للمكان تحنى بشوية طبع قبلة على يديها وهي مبتاسمة اميرة فداك اللباس لي فرحانة بيه وبزاف ومن ديما كانت تتحلم تلبسو وهاهي لبساتو وهي عروس لحبيبها مولاها ومالك قلبها ضارو بزوج مقابلين مع لبياس مونطي والمصور كصور السرباي مكلف عطاهم الموس لكبير باش يقطعو الحلوى حلوة فرحهم لي كتمناو حياتهم الزوجية ومستقبلهم يكون بحال حلاوتها ومذاقها الريتم فالعزف تزاد وهي يديها فيديه على الموس نازلين بيه على الحلوى وسط تصفيق الجمهور والتصفار عطاو لموس للسرباي لي دغيا قاد ليهم طبيسلات باش يوكلو بعضياتهم وداكشي لي كان يزيد لي مع حط الطبسيل هز كلينيكس وهو كمسح ليها جنب شفايفها ومهتم بتفاصيلها الصغار وكرجع لها شعرها ورا ودنيها بشوية فديك اللحظة الاوركيسترا بدلات العزف بدخول فنان جديد لهاد اللحظة بالذات كلشي ضار جيهتو والعرسان جاو الوسط رقصة الحب لي كانت هي ديك اللحظة مرافقاها أغنية الحب لي عندها معاني كثيرة ولي هو🤍كل وعد🤍للفنان وائل جسار لي كان مبسم وسيفط تحية للعرسان جا خصيصا على ودهم تصادف انه كاين فالمغرب وتم الدعوة ديالو لإحياء آخر لحظات حلف زفافهم الاغنية بدات وهو يديه فيديها ويدو مضورها على خسرها وتتمايلو ناسجين رقصة قلبهم وعينيهم على بعض تتمعنو فكلمات الاغنية لي كانت تتعنيهم بزاف وخاصة هو
كل وعد وعدتوهو لك اوفيهولك متخافيش
كل حلم هيجي وقتو وبأوانو متقلقيش
مش هقصر يوم معاكي صدقيني
ادعميني انا بيكي بقوى متضعفيش
انت نفسك كنت حلم فيوم حلمتو
فضلت اعافر في الحياة لغاية ما وصلت🤍
حطات راسها على صدرو تتسمع دقات قلبو وهو مضور يديها على خصرها كلمات الاغنية كانو كعنيوه هو بالذات حيت بالنسبة ليه كانت حلم لي تعافر باش وصليه كانت امنية تمناها ومجاتوش بالساهل ونهار جات حس بحلاوتها لي زوينة وفنفس الوقت غيحطها فوق راسو ولي بغاتها تحضر مغتخصها حتى حاجة ولي بغاتها غير تفكر فيها اتحضر تالعندها فجو رومانسي عاشو ديك الرقصة لمدة دقائق حسو بلي كاينين فيها غير هما فقط على هاد الكون ونساو لي ضاير بيهم مفاقو غير على صوت تحية وائل ليهم من مور ما كمل شعل الضو وبعدو على بعض بشوية راجعين لواقعهم وعالمهم قصدهم وائل وسلم عليهم بزوج وهو كبارك ليهم تحت تصفيق الكل وبزاف منهم قصدوه يتصورو معاه من مور عرس الاسطوري جات نهايتو وجات لحظة الوداع وداع العروسة لعائلتها وهي فأول الخطاوي لدار راجلها
معانقة مع ميمتها وسط الدموع لي سادو على كلشي لحظة الفراق فراق الاهل وبداية رحلة جديدة ولي هي رحلة الحياة الزوجية مع رفيق الدرب مع مكتابها ومولاها دموع عائلتها عليها كان طاغي عليهم حزن اكثر لأنها كانت قريبة لهم كاملين كانت سند لهم ودارت بزاف على ودهم قاصات وعانات وتعوضات وعاشو معاها كلشي كيفما تاهي شاركاتهم بزاف وهي نفس الشي تتبكي عليهم على باها لي محضرش وعلى فراقهم عناق حار مع ميمتها وخواتاتها وخوها وهي تتودعهم للحياة الزوجية كتودع السند باش تمشي تحت جناح سند آخر كان منزل راسو تتنهد وهو كشوف داك الجو كيفما مشات ختو انيسة وودعوها بالبكى هاهي مراتو تتعيش نفس الشي غتعيش اميرة فدارو وغيديرها فعينيه لان اول حاجة كبغيها وفنفس الوقت امانة من عائلتها ليه السند لي غيعوضها على فرق باها ولي غيكون معاها فالصحة والمرض وهما كبنيو حياتهم بزوج لكن هدا المكتاب كبوس على راس مسعودة وهي تتوصي فيه وتدعي معاهم شي كعنق فشي وكتوادعو العرسان غيطلعو لوطيل لفوق وعائلاتهم غيمشيو للفيرما لي تما عندهم فمراكش من مور عرس اسطوري بكل ما تحمل الكلمه من معنى طاغي عليه الحب الفرحة دزواج كان ميسر ومختار من عند الله ومن بعد فراق الاهل والمعنى الحقيقي ديال دار لبنات خاوية وهادي هي سنة الحياة تفارق بالدموع وتفرتك المجمع وسالا العرس لي داز غزال وزوين
تحل سانسور بشوية مبسمة وعويناتها حمرين وهو هازها بين يديه اهم خطوة هي هادي قاصدين جناحهم وهي بين يديه وعينيهم على بعض تحل لباب ودخل برجلو اليمنى تقدم تالوسط الجناح لي كان كولو مزوق خصيصا ليلتهم وحطها بشوية بلاما يزيحو انظارهم على بعض شدها بشوية من كتافها وهو كشوف فعويناتها لي حمرين بالدموع نطق بصوتو الطاغية عليه البحة ديالو وهو كعني كل كلمة قالها وهي عارفة هادشي مزيان
يزيد:امانة عندي وعلى رقبتي عمرك الدمعة متنزل منك بسبابي عمرك تندمي حيت قبلتي النهار الاول
كانت عارفة هادشي مزيان حيت عاشت وشافت بلاما يحتاج تعانقو عناق دافي حاضنين بعض وهما اخيرا عايشين الخلوة ديالهم بوحدهم بلا زايد خلوة حبهم
بشوية كنزل ليها السنسلة وهي عينيها عليه من المراية تبسمات شوية شاداها الضحكة وهي تتسمعو تتنهد مغيديرو والو مزال عندها الوقت فين تجمع قوتها حيت دواو فهادشي عندهم طيارة شهر العسل غدا مع 12دالنهار يعني خاصهم يرتاحو واخا زربو فرحلة شهر العسل لكن خاصو يرجع لخدمتو وبغا يدوز هو وياها اطول مدة ممكنة الراس فالراس هز حوايجو وهو عينيه عليها غادي قاصد الدوش وكتنهد لكن ما عندو ميدير كشوف فيها عيانة بزاف غير داك التبدال فالعرس كعيي وهو راحتها عندو مهمة صابر يزيد يصبر باش نهار يجي الوقت تكون الحلاوة كيفما كان الزواج زوين بغاو حتى الدخلة تكون كذلك مرتاحين بزوج بوحدهم حيدات الكسوة ومسحات وجها من الماكياج وتسلتات من كلشي وهي مبسمة ولقيطات من عرسها كدوزو فذاكرتها اجمل ليلة فحياتها وعمرها تنساها ابدا وهاهي دابا تتعيش الوحدة والهدوء الراس فالراس مع حبيبها خرج هو من الدوش كنشف شعرو لابس حوايجو مزال شوية ديالا الاحتياطات عارفها تتحشم ولكن غتولف نهار تولف يتعرا عليها خخخ دخلات هي دوشات بالخف محيدة العيا والعرق ونيشان خرجات طلاحت حداه كان مغمض عينيه عند بالها ناعس داكشي باش تخشات فبلاصتها بشوية بلاما تهضر معاه حيت تاهو كان عيان لكن فور ما طفات الضو تلفت عندها بشوية كشوف فيها ومبسم ناعسة حداه مكحلمش غيولي يجمعهم فراش واحد حياة وحدة وغيوليو يديرو كلشي بزوج غيفيق بيها وينعس بيها اشبغى من الدنيا مزال نعسو بزوج كتسناو نهار جديد لي غيكونو فيه فبلاد اخرى وهما فأولى ايام حياتهم الزوجية وبدايتهم ولي هو شهر العسل
كديرو ليهم باي باي وهما داخلين كلشي حاضر باش يودعهم لحقو عليهم من الفيرمة للمطار مسعودة تدعي وفريدة كذلك كلشي كتمنى لهم سفر ميسر وكطلبو ربي يسهل عليهم فحياتهم وهما عاد عرسان جداد غاديين وسط المطار لابسة حوايج عصرين لكن لضربتي ليها على يديها ورجليها مفرزة عروسة وزيد السر مزال طايح عليها وهي غادية تتخطوي لحياة جديدة حياة الزوجية لي مختالفة كل الاختلاف على الحياة مع الاسرة لكن بالنسبة لها هي المسؤولية عادي لانها كانت هازاها قبل دابا يمكن غتكون مسؤولية أخف وزوينة حيت دابا حياة جديدة مع شريك الحياة غيأسسو كلشي بزوج عائلة احلام وطموحات غيكون مزينها الحب والغرام فليالي الأنس لي بالحلال هاد المرة
شاد فيها من يديها وهي كارزة عليه مغمضة عينيها فاش الطيارة تهزات لكن غير ستقرات فالسما ترخفات شافت فيه مبسمة كانو عينيه عليها هز يديه وباسها ونطق عينيه كبريو وهو كلمح فيها
يزيد:كنواعدك لي جاي زوين وبزاااف
زينة بنفس النظرة:غير نكون حداك هاديك هي الدنيا وما فيها
رجع طابع قبلة على يديها وهما كعطيو الغزل لبعض والوعود وهما طايرين فسما لأرض احلامهم لي ختارو يعيشو فيها العسل بداية زواجهم
بـــاريـــس فـــرنـــــســــا عـاصــمــة الأنـوار ومــديــنــة الــحــب🇨🇵🤍
حلات عينيها بشوية ورجعات سداتهم تكسلات بالجهد وهي مزال على حالها تطرطقو عظامها كاملين رجعات حلات عينيها وهي تتحك فيهم هزات طيليفونها وغير شافت الساعة خرجات عينيها 1:00 ديال الليل نعسات هاد الوقت ركبو مع 12:00 دالنهار ووصلو ل17:00 غير دخلو طاحو بزوج كاو عيانين بالسفر والعرس ناضت وهي مݣلوبة تلفتات جنبها ملقاتوش حداها فاق قبل منها تبسمات النعسة حداه شحال زوينة واخا مزال مدارو والو لكن غير داك القرب زوين ناضت نيشان للبالكو حلاتو وخرجات تطل بريد خفيف ضرب فوجها كان جو مغاير تماما على جو بلادنا تنهدات براحة وهي هازة عينيها فبرج إيڤل رمز فرنسا والاضواء ساطعة منو كامل عاطية جمالية للمدينة وواحد الهدوء خيالي بين شوارع باريس ورونق خاص هادشي لي مسميها مدينة الحب لان داك الهدوء نابع من الرومانسية واضوائها لي مخليها ملقبة بعاصمة الانوار وهادشي كامل غيعطي واحد المذاق وواحد لڤايب على شهر العسل ديالهم شهر الحب فمدينة الحب داكشي لي كان تتقراه فالقصص هاهي تتعيشو دابا رجعات دخلات قصدات الحمام غسلات وجها وخرجات كانت جالس شاعل التلفازة تتفرج التيليفون فيديه غير شافها تبسم ابتسامة عريضة وناض قاصدها شاد وجها بين يديه:رتاحيتييي
زينة يديها على صدرو:خمرنا ماشي غير نعسنا
يزيد:بالسيف من مور العرس نيشان لهنا فيك الجوع؟
زينة حركات راسها بآه وهي تتكسل:يمكن فات الحال منقدروش نزلو
يزيد:كلشي كبقى حال هنا وجدي راسك نخرجو منها نيت تشوفي المدينة فالليل شي حاجة غتعجبك بزااف
حركات راسها بآه وهنا تحنى شوية وطبع قبلة على خدها خلاها مبسمة ومزينݣة هاد ليام ديالهم وهادشي كولو لي جاي ليهم هما الراس فالراس غير توجد راسها الحلاوة جاية وحلاوة هي نيت مشات خلاتو وراها واقف خرج تاهو لبالكو وهادشي باش معروف المعمار الفرنسي كل بلاصة فيها بالكو كطل على المدينة وعلى شوارعها الهادئة هدوء منغم هاز راسو للسما واحد الفرحة كاسية قلبو وروحو ميوصفهاش هو دابا فمدينة لي قريبة لقلبو مع لي بغاها قلبو فبداية ايامهم الزوجية فرحان بزاف وكان كتسنى هاد الايام بشوق ولهفة وهاهي وصلات الحمدلله
جالسين فجو طاغي عليه كل مرادفات الحب كتعشاو وكهضرو فريسطو كان فالعالي ومنو للسما عينيها على برج إيڤل وتتشوف فدوك الضواو لي حسات بيهم اضواء الامل لي نورو حياتها دابا كن عرفات هذا هو العوض كن زادت صبرات كثر وكثر رجعات شافت فيه واخا الليل لكن كان كلشي حال وكانو الناس معاهم بحكم المدينة سياحية ومكتخواش كانت الدنيا سايدة عليها ليكوبل بحالهم غير هو لي كان غير مصاحب ولي مزوج بحالهم هما يلاه باديين الراس فالراس هو وياها وهما كهضرو فكلشي واهم حاجة حياتهم ولي جاي مستغلين الوقت لي عايشين فيه دابا بزوج بعاد على من كعرفهم عايشين عالمهم بوحدهم كضحكو وهما تتفكرو لبارح ذكريات العرس شي تفاصيل صغيرة المهم كهضرو فكلشي وشاركين اطراف الحديث لي ميسخاوش بيه بيناتهم وهما كانو كتسناو هاد اللحظات من شحال انهم يتعزلو ويعيشو حبهم بحرية يحسو بلي عايشين غير لبعضهم
يديه فيديها وهما غادين فداك الليل بين شوارع باريس مزال مواصلين لحديث وفينما عجباتها شي بلاصة كتوقف تصور فيها وهو غادي معاها فمتطلباتها ولي بغات بوكي ديال الورد حمر كان من نصيبها فديك الخريجة باسطين جناح علاقتهم بين ازقة باريس لي كل زقاق طاغية عليه الرومانسية كثر من لي قبلو بأضواء اللامبات والمعمار الفرنسي لي مخليك تعيش فالعصر الڤكتوري وهادشي لاش تسمات مدينة الحب وكانت مركز واختيار صحيح انهم يقضيو فيه شهرهم وحبهم يفيض احساس الفرحة كان عليهم بزوج وهما اخيرا غادين بزوج يديهم فيدين بعض ومكاين لي يقول لهم شحال فالساعة ما بقى بعاد بينهم ولا فراق وقفو دقايق وهو مضور يديه على خصرها كتأملو فالبرج تنهدات شي لخلاه تلفت عندها عينيه فعينيه وهو قريب لها بلا مقدمات قرب وخطف بوسة من شفايفها ورجع كشوف فالبرج مخليها تتبلع ريقها شوية مزال حاسة بشفايفها دافية حرك فيها شي حاجة وخلا دماغها كفكر فبلان وسهات وهي تضورو فدماغها من بعد مدة وهما خارجين خالقين جو لحبهم فداك الليل رجعو لوطيل دخلات هي لبيت وهو بقى برا شاد الطيلي مفيهش النعاس وهي كذلك غتبدل حوايجها وتخرج تجلس معاه كيفما طلب منها لحد الآن مقال ليها والو ومجبدش الموضوع تتفكر وتخمم صبر بزاف وتنهيداتو عليها كانو من القلب صبرو عليها لي خلاها تفكر ان المبادرة تكون من عندها دار بزاف على ودها وعلاش هاد المرة دير هي على ودو وتفرحو حشمانة وخايفة صح لكن الحلال هذا قدما هربات داك النهار غايجي غايجي داير ليها كيف الما لقليل وسهران على راحتها تاهي خاصها تفكر ليه والزواج راه نص نص عليا وعليك عضات على صبعها وهي تتفكر وقلبها كضرب بالجهد من داكشي لي غادي دير مرتاحة دابا والعرس لي كان شاغلاه تحيد معاه الراس فالراس وسط الحب والهدوء اذن...
جالس عينيه على التيليفون كشوف غير بالخف شي حاجة فالخدمة مباغي يطل على والو هاد الوقت ليه ولمراتو فديك اللحظة مع جا يطفي التيليفون جا على مسامعو لحن اغنية تطلقات تلفت وهنا شافها جاية قاصدها الطيلي فيديها مين مطلوقة ديك الموسيقى تبسمات وحطاتو وجات قاصداه تتبلع ريقها حشمانة لكن تتفورصي راسها باغية تشوف الفرحة فعينيه وقفات عليه وهما كشوفو فبعض فهم وطيرها فالسما غير من البينوار لي لايحة عليها واخا طويل وجاي على شكل كسوة لكن ثوبو ولونو باين لشنو كوحي قلبو فرفر فديك اللحظة وبانت فعينيه لانها ختاصرات عليه الطريق وقطعات الصبر لي تلاشى وقف وهما كشوفو فبعض وفديك اللحظة شدات فيه حاطة يديها على كتفو فهمها شنو بغات وتاهو مشى معاها فالخط وهدا هو الغرام غير بلعينين يفهمو بعضهم ضور يديه على خصرها وتأنسطالاو فوضعية الرقص الكلاسيكي تتفكرو بيه لبارح عرسهم ولحظة الكسوى البيضة بداو تتمايلو على الحان الاغنية الكلاسيكيه لي طلقات وكانت متعمدة طلقها لانها كانت عارفاه كحماق على كل ما يخص الزمن الجميل وكانت اغنية لماجدة الرومي نقلاتهم للعصر الڤيكتوري عصر الاحلام والاميرات وكل ما يوحي للحب عينيها كبريو فعينيه وقلبها لي كان كضرب ترخف وهي بين يديه وعايشين ديك الرقصة وضو ليل باريس والبرج باعثين بريق لحبهم اكثر
يسمعني حين يراقصني كلمات ليست كالكلمات
يأخدني من بين ذراعي يزرعني في أحلى العينات🤍
والمطر الاسود في عيني يتساقط زخات زخات
يحملني معه يحملني لمساء الورد🤍
كان داك الكلام لي كتقال تعبر على كلامها هي لي مقدراتش تقولو ليه كانت المبادرة منها لكن شنو غادي تقول تتفكر وهي فديك اللحظات لي بين يديه
عينيه عليها وفرحتو باينة هادشي لي خلاها تبلع ريقها شوية حيت عرفاتو بلي فهم لكن معندها جات بدات خاصها تكمل ميمكنش تخليه يفرح وترجع اللور فديك اللحظة وقفو مين حبسات الاغنية رسم ابتسامة عريضة ونزل بشوية طبع قبلة على عنقها خلاها تبورشات وترونات عليها الدعوة رجع عينيه فعينيها ونطق بهمس كتأكد:مرتاحة ياك؟
مجاوباتوش بقات غير تتشوف فيه البوسة لي حط على عنقها لي هو نقطة ضعف المرأة كانت شبه بداية تخليها تزعم جات معندها مدير وهي تتشوف فرحتو بخطوتها الاولى لداكشط طاغية فعينيه حلات البينوار وهي تتشوف فيه مع فتحاتو نزل لانه كان مشدود غير بالسينتا ديالو طاح من على كتافها كاشف على شنو لابسة لتحت ولي كان مبينها بصورة مخالفة على لي فيها هي كانت مثيرة بهاد المعنى واللون زادها اكثر اللون الاحمر لي وكأنه خرج فقط على ود هاد اللحظات لحظات الاحاسيس المخفية النابعة من الشهوة شهوة الروح والقلب نطقات بعدما بلعات ريقها وبصوت هامس عاطياه الطوع والاشارة على ود ليلة تسنات من شحال
زينة:مبقات حتى حاجة تحبسك انا كلي ليك دابا
جملة كانت كتلخص كلشي وهي كتعطيه نفسها على طبق من ذهب بالحلال لي لخصاتو بمعنى ديالو ومتحبسو حتى حاجة عليها جملة لي كانت اللهفة كبيرة على اللحظة لي من وراها لبارح منعاتو وليوم هي بنفسها جات لعندو لانها شافتو شحال صبر وشحال داير على ودها ودابا جات نوبتها رغم الخوف رغم الخجل لكن الخطوة الاولى كانت منها لانها هي براسها بغات تعيش ديك التجربة معاه ليلة الدخلة مع حبيب القلب حلم كل عروس تحس بيه بغلاوتها عند مالك قلبها وكذلك هو يحس بأنوثة ذمتو وهي بين يديه ولي هي الساس الاول ديال الزواج بعدما تشاركو الاحاسيس غيتشاركو حتى الاجسام واحاسيس من نوع آخر عينيه كانو عليها وهو كشوف فيها وحدة اخرى واخا هكاك قادر يميز الخجل بعينيها وكذلك الرجفة لي طاغية شوية عليها ولكن كتحاول تمالك نفسها لكن مغاديش تقدر ضروري من الخوف فديك الليلة واخا تكون هي لي جاية عندو البينوار لي طاح للارض خلا شنو كان تحت منو يبان شوميز قصيرة لاصقة عليها مبينة فورمتها ومفاتنها كذلك صدرها لي كان كبان شوية زايد عاطي إثارة عليها ولحمها الصافي كذلك بؤبؤ عينيه لي كان كتفحصها كاملة من شعر راسها حتى لرجليها بلاما يرمش لانه اول مرة تكون كاشفة على لحمها بهاد الحجم من ديما لبسها محتارم وعمرو شاف فيها الشوفة لي ناقصة ولا تخطى حدود عينيه فالشوف داكشي باش دابا تتبان ليه بحال الذهب قدامو حيت داكشي ليه هو فقط ديالو وبجملتها عطاتو الضو الاخضر باش يقطع الشريط الاحمر نحوها لأول مرة غيريح قلبو وغيطفي صبرو لي ساد عليه مدة وهو كتسنى هاد النهار قلبو لي فاضت احاسيسو كثر وكثر مخلياه غير بعينيه وبالشوفة فيها تعطيه اول اشارات الشهوة وهو كشوف جسم متكامل قدامو لا من زين ولا قوام وعاد انها مالكة قلبو وفالحلال حب من نوع آخر تفكر نفس الحاجة كانت قبل عطاتو نفسها لكن رفض وكبت احاسيسو لانها كانت حرام عليه وماشي فوعيها اما دابا غير دابا حلالو وديالو وبالفرحات عليه اضعاف انها تجي هي عندو فلعوض ما هو يحس براسو كقجر عليها وهي ممرتاحاش حتى تقبل وهي كتبزز على راسها وهادشي هو لي مباغيهش باغيها بين يديه بخاطرها المتعة يحسو بحلاوتها بزوج وهادشي لي حاس بيه غيعشوه بزوج عينيهم على بعض وفقط ردود الافعال هي لي غتكون جواب كل واحد للآخر بلاما يهضرو قرب عندها بشوية عينيهم على بعض بشوية كدوز يديه على خدها ونزلها لتحت ذقنها وهو كرفع لها راسها شوية لأنها قصر منو انفاسهم كضرب فبعض انفاس لي تتعطي تمهيد لي جاي تمهيد لقبلة لي غيتبعوها بزاف ولكن هي الاولى نسميوها قبلة بداية الآهات وممارسة الحب لأول مرة بشوية كهبط فراسو عندها محساتش حتى غمضات عينيها لي كفرشوها وكتعكس فيهم كل ما كتحس بيه ودابا حشمانة لكن فنفس الوقت باغية مستعدة وقادرة تعيش هاد التجربة جسمها تبورش وهي تتحس بشفايفو تحطو على شفايفها الدفئ لي ساد قبل يلتاحمو كان فشكل ولكن لي جا من وراه شي حاجة فشكل اكثر منو رعشة سرات مع ذاتها كاملة لكن مكانتش ديك الرعشة لي تتقفز بدات تتحس بيها كتزاد فور ما بدا بشوية كحرك شفايفو وهو كلتاهم شفاهها معرفاتش مدير لكن عجباتها شي لخلاها تبغي دير بحالو وداكشي لي كان ثواني قليلة حتى كانو بزوج داخلين فقبلة حنينة دافية غير هاد المرة كانت القبلة التالثة لي بيناتهم ولكن هادي مختالفة على لي فاتو كانت المرة الاولى ماشي فوعيها وهي لي طلاحت عليه وحبسها والمرة الثاني هو لي مكانش فوعيو ولكن هاد المرة بزوج فوعيهم بزوج باغيين وشادين فيدين بعض وهما كغسطو فبحر الحب لي امواجو هو الاحاسيس الساخنة ماحدك كتغوص فيهم ونت تتزيد فاللذة وأهم حاجة هاد المرة حلال وكلشي ولا متاح بالنسبة ليهم ضور يديه على خصرها جارها عندو كثر حتى تلاصقو اجسادهم وشوية هازها من الارض حتى تقادات معاه فالطول وهو حاكمها بين يديه من خصرها شي لخلاها بشوية تضور يديها على عنقو وهما مزال مواصلين فديك القبلة الحلوة بينهم وضو باريس ساطع زايد لمسة ساحرة على المكان
يتبع...
التعليقات
لا توجد تعليقات بعد، كن أول من يعلق.