سكرتيرة النمرود الجزء الثامن

فريدة جالسة مصدومة وبنتها انيسة حداها لي خرج كقلب مكعاودش يرجع يعني البنت غابرة تاحد مفهم علاش وشنو واقع لان كلشي كان عارف هاد الزواج على غير لعادة لانه مكانوش مبززين على العروسة وزيد العريس مزيان وميسور علاش اتهرب هنا بدا كشعل ديجانكتور على احتمالية تكون ماشي عزبة ولا دايرة شي فضيحة

كلشي تقلب وترون وتيباري وسط الرجال كسكتو فيه واولهم الحاج ابراهيم وهو كشاكشو خارجين صارع الدور

تيباري:شوهاتني بنت الحرام ليهودية شوهاتني قدام لي يسوا ولي ميسواش عليا بليمييين ونطيح فيها تندوز عليها من الودن تالودن اويلي ياويلييي آخر يامي تمرمدني برهوشة

الحاج ابراهيم براسو مصدوم ولكن داخل بخيط بيض وعقلانية:اسي تيباري لعن الشيطان وجلس الغوات مكجي من وراه غا الفضيحة معرفناش اشطاري لان البنت كانت بخاطرها وقابلة غا جلس وغنلقاو حل ولا زيد يلاه نخرج انا وياك نقلبو عليها

تيباري جلس ليهم فالارض وهو كندب ويتمرغ:علاياش غنقلب علايااش مشات الله يعرضها السلامة عمرها تعاود تدخل لداري عليا بليمين وباش كحلفو الشلاغمية تازاوا الحرار

غواتو كان واصل للعلام شي لخلا فريدة ومسعودة ينهارو ويتزاد على حالهم لانه عرفو المشكل اكبر والناس خرجو يقلبو وتاحد ما رجع يعطيهم غا شي خبار تبرد نفوسهم مليكة بوحدها لي كانت عارفة وجالسة وسطهم مقهوورة ومعالم بيها غير الله وهي تتشوف المنكر وقع وساكتة عليه ولكن ملقات جهد تحط لها الموس على عنقها تاهي

داز الوقت ولامن خبار يزيد مين خرج يقلب معاودش يرجع خرج بحالتو دالعرس مسكين بعدما كان خاص يكون بارز وفرحان مع مراتو بدات تتفرتك الجقلة الا المقربين لي بقاو مشاركين الحزن والصدمة والعرس تقلب لجنازة ودازت هاد الليلة كارتية بكل المقاييس

حاطة راسها على الحيط ومكمشة جبهتها زراقت وحالها معالم بيه غير الله يومين وهي فهاد الدار محبوسة بوحدها منهار هربها من الدار ديك الليلة وهي هنا معاودش طل عليها تتجي واحد المرة تتحل عليها تعطيها الماكلة ولبغات تمشي لطواليط وهي حاضياها وتترجعها لبيت شنو غيكون واقع فيهم وفيه هو كيفاش خلات الدوار وراها قلبها تتحرق وعاطياها غير للبكى حتى عينيها تنفخو فديك اللحظة سمعات لباب تفتح تلفتات كان عند بالها ديك السيدة ولكن غير شافتو قلبها تقبض عليها ووقفات نطقات بقهرة وترجي وحالها يبكي الدم:عفاك اعمي عبد اللطيف خليني نمشي للدار راهم غادي يكونو تخلعو عليا

عبد اللطيف كان هاز دفتار وستيلو وفيدو لاخرة سمطة جرها من دراعها ودفعها للارض رجعها جلسها وهي تتبكي لاح عليها داك الدفتار وستيلو ونزل عليها بالسمطة لدراعها حتى غوتات وهي تتشهق كملي عليها تكتب وهي قلبها تتقطع عاد فهمات لبلان وعاد فهمات بلي داروها طريق باش يضربو عائلتو مع كل مرة تتهز راسو طلبو حيت داك الكلام لي كقولها كتبي قاصح كيفاش ايكون حال يزيد الا قراه كنزل عليها بالسمطة حتى زرق لها لحمها بلا رحمة بلا شفقة حتى كملات وخدا لها ديك الورقة وهو كشوف فيها هادي هي باش غيخليوه يطج هو وطريكتو حيت متاقش يومين هو كقلب وجا حتى لفاس عرفوه غادي يلصقهم ويرونهم وكيفما تشكى ليه التيباري قالو بلي راه كتبعو ولاصقو داكشي باش فكر فحيلة ثانية طيرو لهم من الطريق زاد وخلاها سد عليها ثاني وهي تتبكي بحرقة وتتشهق كانت بحالا فحلم زوين وفاقت منو على كابوس كلشي سالا بانليها صافي مستحيل يعاود يشوف فيها بعد الرسالة وانها هربات منو بدات تتضرب فوجها وتنتف فراسها بهيستيرية وهي حاسة بلي تتقطع

هادشي كولو داز قدام عينيها بحال غير لبارح تتعاود ودموعها كطيحو بحرقة وام الغيث تتسمع وتاهي دموعها كطيحو مصدومة ومقهورة عليها مكانتش عارفة هادشي كولو واقع لها وهي مزال فهاد السن شافت لي ما يتشاف

زينة:مهربتش اماماتي هو لي بززو عليا خالو كان ضارب لحساب لكلشي كان خاصو غير يطبق ونجح فداكشي لي كان ناوي يدير من موراها بقيت تما شحال وهو من مو مشاف داكشي صدق نكر با بلي حد ما شافو فاش قاليه غنعطيك وغنكتب ليه وعاد با حس تاهو بحر الشمتة والشوهة لي كان الطمع عامي ليه عينيه عليها وخلاه ما يضربش لها حساب فينما مشى كدويو فينا الناس حتى صافي قررنا نخويو الڤيلاج

ام الغيث:ونت معاودش رجعتي بقيتي فديك الدار

زينة:جرى عليا خالو منها وبقيت تلتيام فالزنقة حتى حنات فيا واحد السيدة ودخلاتني لدارها وهي لي عطاتني عيطت لبا وجا عندي من تما جينا هنا لكازا وهما جاتنا خبارهم بلي عمرهم مشاو لڤيلاج و يزيد خوا لبلاد مدة طويلة تصوري حتى عمامي وخوالاتي حتى شي حد ما بقى بغا يهضر معانا ولا يسول فينا كحسابليهم انا مين دايرة شي فضيحة وداكشي باش هربت شفتي اماماتي علاش كنقولك مستحيل يكون مزال كحس بشي حاجة من جيهتي راه لي داز مكانش ساهل

ام الغيث فعلا مكانتش متوقعة هادشي لهاد الدرجة يكون وان كاينين ناس قاطعين كبغيو يآديو واحد من دمهم طلع المشكل اكبر مما كتصور مسحات دموعها وشدات فيها بحنان كانت عزيزة عليها ودابا غتزيدها لانها تعذبات فحياتها وقاصات وهي مزال صغيرة وجهدها ماشي ديال هاد التكرفيس

ام الغيث:انا مكنتش عارفة هادشي واصل لهاد الدرجة ولكن بغاك من نيتو ابنتي داكشي علاش متخليهش معذب حتى هو هضري معاه ريحيه وتحرري حتى نت من هاد الحمل لي هازة

زينة تتحرك راسها بلا:لا لا منقدرش اماماتي منقدرش هي لي عمرني ندير

ام الغيث:هما مفكروش فيك فاش دارو لي بغاو ونت هازة لهم الهم والدقة

زينة فهمات بلي كدق على تيباري لي عطاها بضهرو ومافكرش فيها وهي جالسة تتستر عليه:يدك منك واخا تكون مجدامة

ام الغيث:غنعاود نقولها واخا عاودتيلي القصة كاملة مزال كبغيك ومزال فقلبو لان حر الشمتة صعييب والفقصة هي لمخلياه هكاك متقمص شخصية ماشي ديالو ابنتيي نت تعرفي مغاديش نبزز عليك ولكن عقلي عليها نهار غادي يعرف غيرطاب داك الساع لانه واخا مسولكش علاش مشيتي نهار غتبغي تعاودي ليه غيسمع ليك

زعما يتيقها من مور ݣاع هاد السنين شدات فراسها لي غادي يطرطق عليها فاش تفكرات لي داز حسات بلي شوية تنفسات فاش عاودات لأم الغيث لي هي سندها وبئر اسرارها جراتها عندها عنقاتها بالجهد بقات فيها بزااف وهي كطبطب لها على ضهرها

ام الغيث:انا معااااك وديما معاااك وان شاءالله ربي راه كشوف والحق يبان يبان طال الزمان ولا قصار

زينة تنهدات وحطات راسها على ام الغيث معنقاها تاهي محتاجة سند لي يقويها ويعاونها تبني جناوح جداد وروح جديدة لي هدهم لها الزمان قبل الوقت

دازت هاد الليلة وجا نهار جديييد

كانت فلبيرو ديالو فالشركة كقاد شي حاجات فلبيسي ديالو وكشوف فالمݣانة عندو الطيارة من مور ساعتين غيمشي لهولندا يرتاح شوية فهاد الكونجي منها نيت يشوف عمتو حيت عايشة تما وهي لي مكلفة بليبوتيك ديال الشركة تما كمل وناض سد لبيرو ديالو ومجا فين يزيد حتى شاف لبيرو ديالها محلول غتكون غير الفام دميناج نساتو تقدم ليه ومع بغا يسد لباب بانليه الورد لي كان جاها حاطاه فواحد الڤاز حداها يلاه تفكرو داك النهار كان زربان قصدو ونيشان هزو وخرج سد وراه لباب وهو غادي كنتش فيه ويقطعو حتى وصل لبوبيل لي كاينة فالدروج لاحو فيها ببرود وزاد كمسح فيديه عادي بحالا مدار والو

فبلاصة اخرى

كانو عينيها خارجين والطيلي فيديها كترعدو وهي تتقرا داك الميساج لي وصلها من مجهول وزايدها بتصاورها يعني شدها بالجرم المشهود سعيدة حداها تتولول تاهي شداتها الرعدة

سعيدة:واش نت حمقة تتقلبي على الشووووهة واش نت اي واحد حتى تمشي لشوافة برجلييك ها اشغيوقع الا باك عرف والا وصلاتو هو نيييت شكون يبغي حرااكة المجامر حنا بغيناه يجي بالشعق حيت راني عارفة شكاين ومدوزتش القليل شفت بعيني داكشي مدايمش وخصوصا هو متاقي لي خلقو متشد فيه حاجة نبصم ليك عليها بالطابع لي مجا بخاطر ما يجي بمجامر وحتى الا جا مدايمش

سامية كانت كلها تترجف خايفة شكون ممكن يكون شي حد تبعها ولا شي حد كعرفها شافها تما اشداها وهي كانت غادية غير تسول مقدرات تقول والو فكرة انها تمشي وتوصل وتشوه مقدراتش ابدا تستحملها ورجعات تتقرا داك الميساج هدا باين كعرفها حيت جابد ليها اللاصق دحياتها

(غايجي فبالك شكون انا وكن ماشي كثر من أنك تخايلي هادشي يتعرف ويخرج للناس لي كشوفوك بشوفة اخرى ونت من ارقى العائلات فالمغرب سامية الوزاني لي قارية فرنسا وساكنة فأرقى حي فكازا وخدامة فالشركة دعمها مدير الموارد البشرية يا حسرة تكون من هاد النوع غيضحكو عليك مزيان 😉)

دارت يديها على فمها وجلسات تتخمم والخلعة طالعة معاها من طرمتها تخااااف ما تحشم ولات كي الكلبة حيت فعلا الموضوع متقدرش تخايلو الا عرف باها وعائلتو ودوك لي خدامين فالشركة لي لاعبة عليهم ست الكل وصحابها والمعارف غير الفكرة تخليها تلبد اما الواقع حاجة اخرى

داز الوقت حتى تعاشات العشية بالضبط فدار زينة كانت معانقة هي وختها راضية بحرارة توحشو بعضهم راجلها كسلم على مسعودة والتيباري جو زوين فالدار كفرح الوالدين فاش كشوفو بنتهم المزوجة جات تشوفهم وطمنهم بلي عايشة مزيان ومرتاحة فزواجها جلسو مجموعين وزينة وراضية فالكوزينة كتحتو ويحيدو الوحش من بعضهم

راضية تتستف المسمن والحلوى لي جابت:ايوا كدايرة الخدمة جلستو دابا

زينة تتنقي النعناع:حمدالله مزيانة هاحنا معديين عطاونا هاد السيمانة ديال راس العام

راضية:ايوا مزيان توحشتكم والله طلبتو يخليني نكمل سيمانة سبحان الله هانت تانت جالسة

زينة:تانا والله بقات بلاصتك وسطنا صح من قال دار لبنات خاوية

راضية:هاد التيو ازينة خاص يتبدل الا خرجنا نجيبو واحد جديد يركبو سعيد

زينة:صافي واخا راه فبالي غا مول لهري صابح ساد هاد اليومين

جلسات زينة فالسداري ديال الكوزينة تتنقي النعناع غادكرات لها التيو وهي تفكر نهار حصلها وقالها خاصك العصى محساتش حتى تبسمات واخا حشمات هاد الموقف نفسو دكرها بواحد البلان فكاهي كان وقع لها معاه قبل عمرها تنسااااه كان داك الساع يلاه فأيامهم الاولى مزال معتارفو لبعض كان داكشي غير بالافعال والتلميحات

🤍فــلاش بـاك تــازة 2019🤍

جالسة هي واختها سكينة سارحين واحد زوج بݣرات سكينة جالسة قدام زينة كظفر لها شعرها سمعو الحس بزوج وهما يتلفتو كان جاي وكهضر فالتيليفون زينة بقات تتشوف فيه بلاما تحس ونسات ختها لي كتمشط لها

سكينة:وصايبي ليا الخرية

زينة نغزاتها:سكتييي عطيك الويل

سكينة جمعات سوالفها وجلسات حداها وهما كشوفو فيه زينة يديها على خدها وساهية فيه مكتقدرش تحيد عينيها عليه فاش مككونش كشوف فيها

سكينة:شحال زويين

زينة وهي ساهلة:بزااااف عمرني شفت شي حد زويين بحااالو كن غير يبقى ديما هنا فالفيلاج

كانو كهضرو بالامازيغية وواخدين راحتهم بزوجات وهما كشوفو فيه وكتغزلو بوسامتو بنية عادية راهم غاصغارات فديك اللحظة سكينة ناضت مشات للدار وخلاتها غير هي تتشوف فيه مع كمل الابيل ديالو تلفت شوية نزلات راسها وعاود شافت فيه هنا تبسم ليها ولقى عليها التحية:كدايرة لبااس

زينة بخجل:الحمدلله ربي خليك

وضورات وجها فاش شافتو مبقاش عاطيها بالضهر بحال قبيلة كان كقلب فالتيليفون ومنزل راسو مرة مرة تترمي ليه شي شوفة حتى هز راسو دارو فجيبو وتما غادي بحالو ولكن قبل وقف ورجع شافيها:فكريني شنو سميتك؟

زينة وعينيها على الارض نطقات بصوت رقيق خجول:سميتي زينة

يزيد عينيه عليها:حتى نت زوينة ازينة

هنا هزات فيه راسها مخرجة عينيها ضحك لها وزاد مخليها وراه حشمانة ومصدومة مكانش كحسابليها كفهم الشلحة وهي واخدة راسها هي وختها لي اصلا صغيرة عادي الشوهة ديالها هي

رجعات لواقعها فاش دخلات عليهم مسعودة: سعدي سعدي ببناتي

راضية ضارت وعنقات ماماها توحشاتها بزاااف زينة تبسمات وهي مواصلة خدمتها تتنقي النعناع وتتبسم كان جو زوين سائد على الدار طلات على تيباري لقاتو كهضر مع سعيد راجل راضية ومعاهم يوسف تزادت واحد الروح خصوصا انها هي جالسة كونجي وحتى بالمجية ديال ختها

داز الوقت خرجو مجموعين تعشاو على برا على حساب راجل راضية ضحكو وفوجو ومن بعد رجعو وروح ديال جماعة العائلة طاغية عليهم تكاو فالصالة الخوت ومعاهم حتى راجل راضية لي كان اجتماعي وضحوكي جلسو على الضحك والتقشاب فداك الليل حتى بداو كنعسو بواحد بلواحد كانت مزال فايقة شادة الطيلي وتتشوف فالكونط ديال سامية زعما تكون شافت الميساج وتردعات شوية واخا كان فيه تهديد ولكن متقدرش تمشي ديكلاري السحور راه براسو جنحة داك الكونط حيداتو فور ما سيفطات ليها بيه هو والنمرة تتشوف فتصاورها زعما زوينة غير مطيحة الدل على راسها كل مرة فبلاد زعما عندها كلشي علاش دايرة هادشي كامل على راجل ماشي حتى مفحالهاش لي نقولو طامعة راه عطى الله الرجال بقات تتشوف حتى بانت ليها تصويرة مع روعة مطاݣياها دخلات لقات سادة الكونط دايراه بريف بقات تتشوف فتصويرة البروفيل ديالها وتتنهد وهي تتفكر فصداقتهم لي كانت زوينة رجعات تتقلب فكونط سامية فالناس لي متابعة بالصدفة كتبات فالبحث Yazid elwazani وهو يطلع ليها حسابو متسناتش بزاف حتى دخلات ليه لاحظات بلي حتى الحسابات على مواقع التواصل كبينو ليك اذا كان واحد ملعق ولا لا وهادشي نطابق عليه هو غير من تصاورو كلا مرة فجيهة بدات تتفلي فيهم وحدة بوحدة وغير من الستوري عرفاتو مشى لهولندا تتشوف فتصاورو وكل مرة تتسهى فوحدة وفيه هو بالضبط كل تصويرة فبلاصة ها فرنسا ها ايطاليا ها اسبانيا ها مريكان ها هولندا وهادشي عارفاه هي انه من عشاق السفر وزيد ربي عاطيه يسافر ويفوج مع راسو واصلا هما فالعطل كسافرو برا المغرب من غير الصيف كانو كدوزو شهر فالڤيلاج قبل ما تحرم عليهم مساكن يصدو لتما تنهدات وهي مزال تتشوف فتصاورو وتتبرݣݣ طلع لها وليد ودخلات لسطوري ديالو تاهو لقاتو فاسبانيا هو وروعة وأنيسة عايشين الحياة فرحانين خرجات من حياتهم بحالا عمرها كانت عضات على شفايفها شوية ورجعات لكونط يزيد بغات نشوف لمن داير ابوني واخا متابعينو قوة ولكن داير فولو غير لصفحات الرياضة صفحات ديال الدين ديال الثقافة وشي ناس أليبة تاهما قلال وشي بنات ديال العائلة عقلات عليهم وشي وحدات معدودات على رؤوس الاصابع كبانو سيدات اعمال يعني الواحد تعرفو خاتر غير من شنو كشوف وشنو تتفرج بقات هكاك مدوزة الوقت حتى داتها عينيها

داز الكونجي ايامو طايرين وعاديين كلها روتين وتزادتهم اضافة براضية بعدما جا راجلها جلس معاهم يومين ورجع لخدمتو وهي بقات معاهم ايام دوزوها بحالهم بحال ݣاع الناس كي ودعو العام لي غيخرج وكستعدو للعام لي داخل وكطلبو انه يكون حامل فطياتو السعادة وحاجات زوينة لي فبالو شي حاجة تحقق فيه ولي مريض يتشفى عما قريب ولي مسجون كطلب الفرج

كان النهار لي فيه الحفلة دالخدمة واقفة قدام المراية ووراها راضية تتقاد ليها الحزام ديال التكشيطة لي لابسة فالدعوة طالبين منهم يلبسو لباس تقليدي وحتى لبنى قالتها لها بلي الحفلة كدوز بحال شي عراسية كان دايرة مشيطة خفيفة فشعرها ومخليه مطلوق ميكاب خفيف ومركزة على عينيها لي تزادتهم جمالية بلميكاب ولونهم صندالة ديال الطالون وبوشيط دخلات أم الغيث جايبة لها الريحة رشاتها ليها وهي على فمها تبارك الله ماشاءالله

مسعودة تتشوف فبنتها بفرحة:تباركالله ماشاءالله على ابنيتي ويحفظها من العين

زينة طبعات قبلة على راسها ماماها ومشات عند باها فالصالة وقفات عليه:با كجييييتك

تيباري كشوف فيها شحال غزالة بنتو وطيبة قلبها زايداها زين على زين نطق وهو مبسم:زينة تبارك الله بحال سميتك

تقدمات عندو وطبعات قبلة على راسو وام الغيث تتشوف فيها هاد البنت آخرتها غتكون زوينة لانها بلي عاودات لها على شنو دار باها وشوف دابا كيف تتعامل معاه زعما

سكينة:حبيتك حبيتك أنا

زينة شداتها من خدودها:غير نشد بلاصتي معاهم مزيان وان شاءالله فينما كانت شي حفلة نديك معايا

سكينة:ان شاءالله ابب

دارت اللمسات الاخيرة لاحت عليها واحد العباية وخرجات هي وراضية وام الغيث غادين موصلينها عند لبنى لي غدوز عليها طلاقاو بيوسف كلعب الكورة مع الدراري زاد معاهم حتى هو

كان جالس فالقهوى ديالو كشوف فيها عينيه عليه هي فقط من دون الناس قطعات كلامو فمرة حاول ولكن والو ومزال غيحاول لان ميقدرش يبقى على هاد الحال إلا هي يصبر على اي واحد ساهي فيها وهي مقادة ومصايبة باينة غادية معروضة وجات غزاالة بقات متبعهم وكتنهد حتى غبرات

طلعات زينة بعدما لبنى سلمات عليهم وكاملين وعرفاتها على ختها راضية ودعوهم وهما كدعيو معاهم بالحماية وربي يحفضهم من العين

لبنى:غنشطح نشطح تنسخف باغى نشطح على كيتو نخرج السطريس ديال العام كامل

زينة:تانا كشدوني الهوايش صراحة

لبنى:جيتي فنة تبارك الله اصحيبتي الليلة نطرطقو العديان اولهم سامية

زينة:عويناتك الحب تانت بومبا هاديك غا خليها جايين نشطوها غنديرها بحالا مكايناش

الطريق كاملة وهما كهضرو وكوجدو الشطيح والرديح كان ظلام الحال والحفلة اتبدا مع تسعود كانت تتوجد راسها لانها حاسة شوية بالسطريس عارفة الموظفين كاملين ولكن الحفل اول مرة وزيد جايين بصفة اخرى ماشي الخدمة وصلو معطلين بنص ساعة بانو لها شي وحدين خارجين كتصورو قدام باب القاعة لي كانت راقية وكلشي البنات بالتقليدي والرجال بالكوستيمات الإجواء ديال عرس سطاسيونات لبنى الطوموبيل وخرجو بزوج فكامل اناقتهم لبنى كانت لابسة تكشيطة حمرا بمضمة صفرا وزينة بتكشيطة فالموطارد وتاهي مضمة صفرا واكسيسوارات خفاف كانو هما ولبنات كلهم حلوات بالفخامة المغربية❤️🇲🇦

وقفو معاهم وسلمو عليها وتصورو مجموعين ودخلو بزوجات هي ولبنى داخلين وكسلمو الموظفين كلشي مفركس حتى وصلو لقاعة كانو باديين شي كشطح وشي جالس وشي كتصور

لبنى:موسيو يزيد سنة سعيدة وان شاءالله نبقاو ديما مجموعين

زينة غير سمعات سميتو تلفتات كان واقف كصافح لبنى وابتسامة جانبية على وجهو وبكل ادب كهضر معاها بقات غير واقفة وتتشوف فديك اللحظة هز راسو فيها طلعها ونزلها هي بلاما تحس مدات ليه يديها بلا حتى كلمة ولكن مجات فين تحس براسها انه ممكن يخليها بلاكة كان صافحها حتى هو بلا حتى كلمة وعينيه عليها وقف عليه واحد وتشغل معاه هنا جراتها لبنى ومشاو ختارو طبلة وجلسو كان فيها منصور لي جاتو من الجنة والناس لانها جلسات حداه اخيرا غتكون قريبة ليه جلسو مجمعين مع الموظفين لي جالسين فالطبلة

منصور:جيتي غزالة تبارك الله

زينة ضارت عندو وتبسمات:ربي خليك

عادل وقف عليهم:سلام عليكم

نضم ليهم العنصر الفكاهي وجلس معاهم كان شد فكلشي يسالي من واحد يدوز لاخر حتى داز لزينة لي عرفات بلي روعة مقالت ليه والو مدام متبدلش فالتعامل ديالو معاها

الاوركسترا خدامة وجو زوين فآخر نهار من السنة تقول عرس وراقي لاكن القاعة ولا داكشي باش مجهز حتى من السرباية انيقين زينة لمحات عائلة الوزاني جالسين فطبلة بوحدهم الملكية زعما كانت طويلة ومترأسها الحاج ابراهيم فيها كلهم روعة انيسة وليد فريدة خوه سامية سعيدة عمتو لي ساكنة فهولندا نزلات لمغرب وولادها تنهدات تاهي تتعرفها لاشافتها مصيبة خوات راسها ميمكنش هي جاية تفوج وتجلس تخمم عام جديد دوزاتو جري وسطريس خصوصا فهاد الشهر اللخر لي قلب كلشي وداز بالكشايف تلفتات لمنصور لي مد ليها شكيليطة من داكشي لي محطوط فوق الطبلة كنقبو منو تبسمات ليه وخداتها ميمكنش تردها فوجهو وهي تتحس باهتمامو حلاتها وكلاتها وهي كضحك على واحد الكلمة قالها واحد الموظف جالس معاهم

عينيه عليها نيشان بحال شي سهم قبيلة ما طولش فيها الشوفة ولكن دابا مين مكتشوفش فيه فلاها مزيان وهي بالبلدي جايبة التمام لا فزين ولا قالب من بعيد منيش عليها ولكن ملامحو دغيا تبدلو وكرز على فكو وهو كشوف فيها كيف كضحك مع منصور لي كان كهضر معاها وكقرب لودنيها باش تسمعو كانت حركة عادية حيت الاوركسترا مجهدة ولكن بالنسبة ليه هو لا ولي زاد كثر هو فاش مد ليها شكلاطة وخداتها وهي تتضحك كان حاضيها لدرجة انه مسمعش السيد لي كهضر معاه

فديك اللحظة ناضو يشطحو فور ما دخل الداودي ونضم للأوركسترا لبنى تتجر فزينة بزز باش نوضاتها وكلشي تكب وسط القاعة وجلسو على الشطيح كانت واخا تتحشم تتشطح مزيان وغادية مع الايقاع ديال الشعبي لبنى كذلك وكاع البنات عادل خلاص شدو الحماس مخليهم كضحكو عليه وروعة من بعيد حاضياه وتتضحك وهي تتصفق شهاد الحمق بلاها سيدي ربي بيه فديك اللحظة كانت مونيا وصلات وكانت نشايطية نيشان دخلات وسطهم وبدات تتشطح مع عادل لي بالنسبة ليه عادي قدام روعة لانها اصلا السيدة كبيرة واربعينية فديك اللحظة مونيا لمحات زينة تسالمو على بعضهم وشدات فيها مونيا وبداو كشطحو بزوجات كلشي كشطح الا القليل لي غير واقف وكتفرج ومنهم يزيد عمو وباه

زينة فديك اللحظة كانت تتحرك بكتافها وتتصفق لمحات يزيد لي بدورو كان حاضيها ومراقب الفيلم والشطيح من الاول بدون سابق انذار خنزر فيها ودار ليها إشارة براسو مفهماتش بقات غير تتشوف فيه هنا وهو يلمح لها جيهة بلاصتها زعما سيري تجلسي طلعات حجبانها وهي مفاهمة والو وتتستوعب هنا جات واحد الموظفة عندها معاها شدات فيها وبداو كشطحو بزوجات بلاما تسوق ليه خلاتو كمسح على ذقنو وكحرك راسو بآه بحالا غير بلاتي داز الوقت فالشطيح والداودي منشط الجو كانت راجعة من الطواليط حتى طلاقات مع روعة لي جاية هازة جلايلها طلاقاو عينيهم وبقاو كشوفو فبعضهم هنا هنا روعة نزلات راسها ودازت من حداها بلا حتى كلمة زينة نزلات عينيها للارض دغيا لتاقطات الحلقة لي طاحت ليها تلفتات عندها ونطقات دغيا:روعة

روعة وقفات بلاصتها وتلفتات نص ضورة هنا زينة قربات لها ومدات ليها الحلقة ديالها تلفتات كاملة وخداتها من عندها تنهدات ونطقات وهي تتحاول متشوفش فيها ومتهزش فيها عينيها:شكرا

زينة:ماشي مشكل

زادت وخلاتها مع عطاتها بالضهر روعة هزات فيها عينيها وتنهدات محساتش كاع بلي طاحت ليها ووسط هاد العداوة كانت ممكن تاخدها ليها وتديها ولكن لا مزال كيفما هي عمرها مدات يديها على لي ماشي ديالها كيفما شحال هدا كانت مفحالهاش وكدخلها معاها لبيتها وعمر مشات ليها شي حاجة

غادية منزلة راسها وصوت الطالون عاطي رنة شادة فطرف من قفطانها وهنا مع هزات راسها بانليها جاي مكانش كشوف فيها حدها قربات دوز من حداه هبطات عينيها فديك اللحظة لي تساطحو شوية فالكتاف نطق:شدي الأرض حسن ليك

لاح عليها كلامو المحدود ولكن كان كعني بزاف وزاد خلاها واقفة فبلاصتها وتلفتات ممتيقاش هدا مالو واش الحبس فالشركة والحبس حتى هنا لي سمعو يقول بحالا نايضة بوحدها كي الشيخة وهي الناس النايض كثر من الجالس حركات راسها بلا وهي تتزفر وزادت

زينة قربات بشوية لعند الولد لي كان باغي يهضر معاها كان موظف معاهم:عفاك زينة واش واخا تدي لياسمين تيليفونها راه كاينة برا الله يحفضك

زينة خداتو من عندو:اه بيان سيغ ياك برا القاعة

حرك راسو بآه وزادت خرجات عطات للبنت تيليفونها كانت برا تتصور هي وصاحبتها ورجعات وهي غادية طلاقات بسامية جاية مطولاتش فيها الشوفة تفاديا لأي احتكاك ولكن مع دازت من حداها دخلاتها فيها بالجهد حتى خلاتها تفقد توازنها من مشداتش فلحيط وزادت ببرود

زينة ضارت مخنزرة ونطقات بانفعال: بشوية

سامية فهاد اللحظة ضارت عندها ونطقات:معايا؟

زينة:آه معاك نت مكتشوفيش راك ضربتيني

سامية فديك اللحظة شافت يزيد داخل قصداتو وقفات عليه زينة تاهي مشات وقفات عليهم شنو زعما غتخلعها بيه

سامية:قلت ليها مدرتهاش ليك بلعاني ولكن هي

جلسات تتهز وتحط والناس داخلة جاية

زينة:كن هضرتي بالاداب كانت غدوز مرور الكرام

سامية:راني هضرت بأدب داكشي باش مبغيتيش تحشمي وزيد مالني شنو درت فملك الله

زينة:راك كنت غطيحيني ومن المفروض عليك تعتاذري لانني ماشي كنسعى انا راني موظفة بحالي بحالك الاداب راه خاص يكون فينا ماشي غير كنهضرو وكنمتلو بلي كنتعاملو بيه

يزيد بنبرتو المعتادة معاها ممزوجة بنبرة آمرة:هضري بشوية

سامية مكرهاتش طلاح عليها ولكن قدام يزيد خاصها تبان هي لي كلاص سكتات وجلسات تتفرج خلاتها منها ليه يفرجها فيها

زينة شافت فيه:كنهضر بشوية كن كان العكس كانو ݣاع هاد الناس غيكونو كشوف فينا او لا

سامية:دابا شنو بغيتي مني عتاذرت منك علاش تتقلبي الا كان عندك شي مشكل معايا قوليه حيت بانليا ماشي مسألة انني دخلت فيك وصافي

زينة بهدوء:ماعندي معاك حتى مشكل وعمرو غيكون لانني جامعاني بيك غير الخدمة لكنمشي نصور فيها طرف ديال الخبز ماشي نجبد الصداعات ونهز فقلبي من جيهة الناس كن عتاذرتي بصح ݣعما نوصلو لهادشي دابا

سامية كانت تتشوف فيها كيف تتسرسبهم لها حيت شعلاتها وتتشوف فيه تاهو تتسناه يتدخل كان خاشي يديه فجيابو وكشوف فيها ببرود كيف مسرح لها اللسان عاود خاطبها بنفس النبرة:قلتها لك ديك المرة وغنعاودها عرفي كيفاش تهضري مع لي هاز السمية الشركة عرفي مقااامك اول حاجة عاد سمي راسك موظفة شقصتك نت بانتلي تزادت فيك واحد النغزة وخاص لي يحدها اشكتسواي حتى تستاهلي هاد الاعتذار ݣاع شكون نت

زينة حسات بكلامو بحال الموس فقلبها لانه ماشي من عوايدو يحتاقر المستوى وزيد لوخرا لي شعلاتها ورجعات اللور سرطاتها وبقات تابثة لانها قدام سامية لي كانت مبتاسمة شوية باستهزاء زينة نزلات راسها وعينيها للارض هنا سامية زادت تحلات لها هادشي لي تتعرف دير غير تنزل راسها فيها غير الفم يزيد براسو كان عاجبو الحال فاش كعطيها على ودنيها وتسكت وتنزل راسها

سكوتها مطولش بزاف فيساع هزات راسها وفيكسات عينيها فعينيه نيشان وتيرات فيه بواحد الهدوء مستفز

زينة:انا هي لي خليتها كطلع وتنزل فيك بحال العافية خمس سنين هادي

سامية عينيها خرجو حتى تحطو فوق حنوكها من بعد ما سمعاتها شقالت وفوجهو وكتعتارف ومفتاخرة بفعلتها هي شداتها الخلعة من ردة فعلو بلاصتها شافت فيه كان تابث والبرود بالنسبة ليه هو سيد الموقف اما هي عينيها كانو مزال فعينيه ومنزلاتهمش وكأنها تتقولو اجي حيدها ليا من فمي ولا كذبني الا قدرتي ياك هادشي لي وقع ديك كلمة اشساوية هي لي خلات العافية تشعل فيها وخصوصا منو هو وقدام سامية كانو كشوفو فبعضهم بنظرات الا كنت معارفش شنو تقال بيناتهم كنت اتقول زوج متشاوفوش شحال وكتمعنو فبعضهم ولكن بالنسبة لهم هما نظرات تحدي وهادشي ما حبسش هنا لأنها ستأنفات الحديث وكملات على القنبولة لي طلقات

زينة:أنا هنا موظفة كنستحق الاحترام بحالي بحال ݣاع هاد الناس لي هنا لأنني داخلة بديبلومي وبقرايتي ماشي غير هكاك وفالمشاكيل تانا عندي حق نهضر وندافع على راسي وفمشاكل لي تكون مهنية ماشي التخربيق والحمد لله ساوية وساوية بزااااف حيت مبايعاش كرامتي بالرخييص ومكنجيش بالساهل

حشاتها لهم بزوج فكلامها اللخر لكانت تتعني ليه فيه هو بلي مخداهاش وتتحشي لسامية لمدلولة لي حسات بالفقصة طلعات معاها من طرمتها والصدمة مخلياها مقادرة دير والو حيت مزال تتستوعب بلي راه تتعاير فيهم عاين باين وعطاتو هو القاصح وعينيها فعينيه ومسرح لها اللسان تتشوف فيه هو كيف غير ساكت وكشوف اشنو طرا ياك موالف كتي/ري فيها وهي مدايرة والو ودابا لي خرجات على فمها كلام محرم تتعتارف وتستهزأ بلي هي لي خلاتو ساكت

زينة لي مبغاتش تسكت ولا ترد لسانها لحلقها وكأن كاسها كان خاصو غير شوية ويفيض وكانت خاصاه غير الفرصة فين تخوي سمها وكلام مسموم لي نيت زادت كملات على لي بدات

زينة:يزيد الوزاني ولد وحدة من أرقى العائلات فالمغرب قراية وماستر على برا ومدير ديال شركة مرموقة فعالم الموضة والازياء خاصو يعرف يفرق بين المشاكل الشخصية والمهنية ويكون سوق لعيالات خاطيه

سامية بانفعال:زدتييي فيييه نتييي

يزيد قاطعها بهدوء بعدما ضار شافي فيها:سيري نت دخلي

سامية مفهمات والو وهي تتشوف فيه كانو عينيه عليها وببرود كشوف فيها ممعروفاش ردة فعلو ولكن علاش غيسيفطها بغات تشوف كيف ايكون ردو بغات تمرمد زينة هو يبدا وهي تكمل ويتحماو فيها بزووج بلعات ريقها وهي تتشوف عينيه عليها تتسناها تنفد شنو بغات لمحات زينة طلعات ونزلات فيها وزادت بلا حتى كلمة على هي تقدر تقوليه لا خلاتهم بزوج بيهم الراس فالراس وغيكون بينهم حساب على هضرة تقالت فايتة الحدود تلفت شافيها كانو عينيها مزال عليه وجه لها كلامو بنفس النبرة باش دوا مع سامية الهدوء كاسيها ولكن شنو جاي من وراه

يزيد:ساليتي؟

زينة يمكن عاد حسات بشنو قالت وطلعات معاها ولكن بالضبط ديك انا لي خليتها كطلع وتنزل فيك عاد حسات بحجمها وبزلة اللسان لي خرجات ولكن فوق طاقتها لا تلام بزاف عليها ديك اشكتسواي حرقاتها وبغات باش تحرقو مكلفش راسو حتى يسمع لها تاهي وهادي المرة الثانية لكديرها

بلعات ريقها ورجعات خطوة اللور فاش شافتو تقدم جيهتها بقات تترجع باللور حتى تكات على الحيط وتحاصرات وهي هازة راسها فيه مراقبة ردة فعلو لي للحد الآن مزال مبانت قلبها بدا كضرب بالجهد متأكدة شعلاتو متأكدة سكوتو ما هو إلا هدوء ما قبل العاصفة لي غتعصف فوجها دابا عينيه لي كانو عاديين معاقدش حجبانو ولكن كرمقوها بنظرة لي مصافيااش تتقول دابا غتجيني شي طرشة واخا عارفاه ميهزش يدو على امرأة ولكن لي خرجات مع فمها خطير وسلييط وكون غير كانت بصح خلاتو بخاطرها ميبقاش فيها لحال على لي غيدير فيها دابا مقدراتش على داك السكوت غطات وجها بيديها لثواني وهي كطلع النفس من بعد حيداتهم وشافت فيه تتحاول تشرح موقفها

زينة:سي يزيد انا ماقصدتش راه هادشي بزاف عليا شي حاجة مداخلاش فالخدمة مكاين لاش تحاسبني عليها وبحال هاد المشاكل حتى هما علاش انا من دون الناس

كانت تتحاول تبرد السوق وتستفسر علاش حيت فعلا بزاف هادشي زيادة على انه ككبر مشاكل لي بساط بحال هدا اي مع سامية علاش كتدخل فيما لا يعنيه بلعات ريقها وتزيرات على الحيط مكرهاتش دخل وسطو غير تهرب من هاد اللحظة وهي تتشوفو كطرطق عنقو يمين وشمال وهادي حركة لا تبشر بالخير زيادة على يديه لي بانولها عروقها برزو

بغات تهرب بغات تغوت على لي يعتقها ولا اي واحد يدوز من الصباح داخلين خارجين فين هما دابا يعتقوها فيكسى عينيه فيها بعد حركة العنق لي كانت وسيلة انه يهدن راسو باش ميدير حتى حركة ولا ردة فعل متهورة لانها شعلات فيه واحد العافية الا بغا يطفيها خاصو يخدم يديه لي مع هزها قفزات وبان فيها الخوف حطها على لحيط وزاد قرب لها حتى مبقات تتفصلو بينها وبينو والو نطق بنبرة اشبه فالفحيح ولكن الكلام لي خرج كبين مدى وزن داكشي لي نطق بيه ولي جاي من موراه رد فعل لي كابحو هو غير بزز حيت واخا فيقات داك البركان لي داخلو تربيتو وشخصيتو أكبر من انه يهز يدو على امرأة

يزيد:هبشتي على المدفون وحليتي على المنسي لݣاي دابا شنو غيجيك وقدي بيه راك يلاه شفت قد هكا ومزال ليك بزاااف(دار ليها بصباعو حركة شوية)

من بعد هز فيها صبعو بإنذار وهاد المرة كرز على فكو كثر شداتها السخفة فاش شافت حتى عنقو تزير يعني واصلة بيه كن مكان فطبعو كالم مكانش غيضبط راسو دابا كن قجها ميطلق منها حتى تخرج روحها كمل على كلامو وهو كارز على سنانو هاد المرة وصبعو فوجها لأن الكلام لي غيقول كعنييه وبزاااف

يزيد:غتخلصي على ديك الخمس سنين نهار بنهار و فعلتك الا منبكيك عليها الدم ونخليك تندمي على النهار لي عرفتي فيه هاد الوجه راني ماشي راجل جابتك ليا ليام نمشيك على العافية والزاج

هبط صبعو وهو مزال قريب لها وحرك راسو بلا وهاد المرة زاد فالدوص ديال التهديد فكلامو

يزيد:والله مغدوز ليك بالساهل ازينة

وورك على ديك زينة وهو كعني كلامو كامل وكتوعد لها بأقصى العقوبات وليزيد يؤكد لها أنه مداويش فالخوى انه قاص رجولتو وهو تتوعد لها وتتحلف عليها غتندم حيت عرفاتو والرجل الا رجولتو خط أحمر ولا قال راه كطبق بعد عليها وعينيه كنفتو الشرار اما هي كان اللون مشى منها بزز باش بقات واقفة وصامدة وهي تتسمع داك الكلام لي دب الرعب فيها وفقلبها وغير كيفاش كشوف فيها تعطيها الخبار هبشات ليه على المنسي خلاها هو وحكات ليه على الضبرة عيراتو بيها ساعة جاها الرد صاعق عطاها بالضهر وخاطبها ثاني بنفس النبرة وهو كبلع ريقو وكمسح على ذقنو ملبدها غير بزز

يزيد:حيدي من قدامي محدك مزال واقفة بصحتك

مع كمل كلامو معاوداتهاش معاه هزات جلايلها وطاااارت من بلاصتها خلاتو مع حس انها خوات السيكتور ضار وداك الجهد باش ضاير خشى يدو فالحيط لي برزو عروقها رعداتو وحكات ليه على الضبرة وعينيه فعينيها كتفتاخر بفعلتها صوتها وهي تتقول فيها مزال تتعاود فوذنو مهموش كلامها لاخر لي تاهو مطنطن قدما تغرزات فيه هاديك بالضبط مين شافها مع منصور وشافها كيف تجاهلات كلامو فاش قالها سيري تجلسي بغا يعطيها علاش ويسمعهم لها وجاتو هي هاديك مع بلان سامية ولكن الرد جاه ثقيل من بعد الرسالة لي خلاتو هو ميسولهاش علاش أول مطلاقاها هاهو خدا الجواب علاش هي محاولاتش تجبد الموضوع شي مرة ولا غير تلمح كان يسمع لها رغم حقدو وتبين ليه بلي غير شوية راها نادمة كان يقدر يسرطها رغم انها مارة باغي غير شي حاجه تخليه يطفي حقدو ويرتاح ولكن دابا غير مزادتو بتفاخرها وتعاليها بأنها كسرات قلبو وطعن/اتو ولكن حتى هو كلامو كان كعنيه دابا عاد غتبدا الحرب بالنسبة ليه

كانت جالسة وبزز كتسرط الماكلة كانو حطو العشى بالبساطل ديال الحوت والمقبلات داكشي بالطريطور ومتول على حقو وطريقو تتشوف فالفورشيط كيف تترعد فيديها وهي تتفكر كلامو وتهديدو عينيه كلشي كقولها بلي مزال مشافت والو وبلي لي جاي صعيب على لي شافت كان ساهل باقي شي حاجة صعب منو ندمات وعضات على لسانها بدا كبانليها انها فاش كانت كتنزل راسها احسن حل واخا تبقى تحرق فيها ولا هاد الحال

تدير الدغمة فمها وتتطول فيها فالمديغ وهي تتفكر وعقلها شارد وقلبها تسلل ليه الخوف مكرهاتش تنوض تمشي دابا وتهرب واخا تهرب الخدمة بعد غدا وغترجع ثاني لوكرو لي غيفرسها فين بنيابو

تحط اللحم مشوي لݣلاص والديسير زندوها وناضو ثاني للشطيح الا هي بقات غير جالسة وتتشوف مبسمة ولي طلبها تصورو تتصورو عياو فيها تنوض وهي والو بحجة انها عيات بغات غير فوقاش يسالي هادشي كانت تضور عينيها وتشوف رجع دخل قبيلة وكان تتصرف عادي ولكن عمرو عاود رجع شافيها ولا جات عينيها فعينيه تتشوفو كيفاش كهضر مع عائلتو وعاطيهم لخاطر كضحك مرة مرة وحتى مع الحاضرين تقول ماشي هو لي تتبدل معاها لكن كيف ديما تعذرو جات عينيها شحال من مرة فسامية لي بانت لها السم كخرج من عينيها وتتخنزر فيها وتحلف عليها بعينيها

تتصفق بشوية ومبسمة تتحاول متبينش بلي مبقات راشقة لعا ديما تتحاول تنسي ولكن ميمكنش لانها مع الناس لي عندها معاهم البلان عمرك تنسى ونت تتشوف المشكل ديالك تلفتات شافت منصور جا حداها هاز السيلفي وبغى يتصور هنا عتاذرات منو ووقفات

زينة:خليها مرة أخرى ان شاءالله حاسة براسي ماشي مزيان

منصور بابتسامة صغيرة:معرفتش علاش ديما كنحس براسي كنقجر عليك المهم انا بغيت غير نكون قريب ليك صديق ولا اي حاجة حيت وليتي عزيزة عندي وبنت ظريفة بزاف المهم الا كنت كنبرزطك سمحيليا

وزاد وخلاها واقفة دارت يديها على جبهتها وزادت لطواليط غتفرݣع كلا كلغط عليها من جيهة مجات فين تدخل حتى طلاقات بسامية ثاني خارجة فينما ضور طلقاها دارتها بحال شي حشرة دايزة متسوقاتش ليها مع فاتها شوية وهي تنطق سامية

سامية:غتندمي على لي خرجتي مع فمك كلمة بكلمة غير بلاتي راك مزال مكتعرفينيش

زينة وقفات بلاصتها عاطياها بالضهر ضحكات باستهزاء وتلفتات:اعلى ما فخيلك ركبييه وعيطي على لي يركب معاك كن كنا كنخافو من الدجاج منريشوهش

سامية بفقصة وهي تتفكر كيفاش استهزآت بيه ونعتاتها بالمدلولة نيشان:ولد عمي خسارة فيك وبزاااف عليك حتى تكوني مننا

زينة:حمدلله الفقر والسعادة وكرامتي هي راس مالي كيتك نت

سامية زادت فقصاتها كان كحسابلها ساهلة وساهل تمضغها هي تتشوف تتخاف منو ولكن معاها هي تتولي وحدة اخرى:وهانت غتشوفي والله ما تبقى فيك عقلي مزيان

زينة:الكلب لي كنبح مكعضش هاحنا غنشوفو

زادت وهي تتعتر فجلايلها وصوت الطالون كاسر الدنيا زينة وقفات قدام المراية حاطة يديها على الرخام حاسة براسها غطرطق حتى لبلاصة لي جات تفوج فيها صدقات هي لي منكدة فيها تتحس بواحد الضغط رهيب نازل عليها شدات فراسها وبدات تتطلع النفس وتنزلها خاصها تصبر الحرب مساهلاش فأي بلاصتها خاصها تقاتل ولكن وسط هادو خاصها جهد كبييير رجعات ثاني لقاعة جلسات كانت الاوركسترا حبسو وعائلة الوزاني كلهم طلعو بلاصة البرزة كانو محيدينها حيت ماشي عرس وكانت مقادة بحال المنصة وحداها واحد الطبلة كبييرة كلها عامرة كادوات مغلفين ومقادين يزيد وهو مضور يديه على عنق باه وحداه مو شاد فيها خواتاتو خوه عمو سعيدة تاهي طالعة مزاحمة سامية مهازاهاش الارض فديك اللحظة وعمتو المهم كلشي عائلة الوزاني كاملة والمصور كصور موتق اللحظات فريدة وهي واقفة مبسمة تنهدات وهي تتشوف راجلها ضايرين بيه خوتو وهي أخ واحد لي تكساب مبقات جامعاها بيه لا صلة ولا خبار حسات بعينيها غادي يدمعو ولكن تمالكات نفسها هاهي ضايرين بيها ولادها الحمدلله هادشي لي قالت فبالها وزيد ولدها الكبير مخليها دابا هازة راسها بين الناس خاصها تفرح يزيد شد لميكرو ويديه مزال على باه الحاج الوزاني لي تاهو دوز وقتو فالشركة وكلشي كشهد بيه وبطيبتو من بعد ما حبسو التصفاق بدا يزيد كهضر موجه كلامو لكلشي بنبرة هادئة جامعة كل من أدب الكلام والثقة فالنفس لي طاغية على شخصيتو والكاريزما لي عندو مخلية كلشي يعطيه انتباهو ويسمع ليه

يزيد:كيف كل عام كنتجمعو فهاد الأمسية السعيدة من بعد عام على قدو ديال الخدمة والجري باش نزيدو بالشركة القدام والحمدلله فينما كجي هاد الوقت كلقانا زدنا خطوة الفوق هاد لعام كان غير على لي قبلو لأول مرة فتاريخ الشركة غتكون الارباح زايدة بخمسة وسبعين فلمية على لعام لي قبل منو رقم خيالي وعمرو تسجل فالسوق وهادشي كولو بفضل الله وفضلكم

مع بنادم سمع سبعين فلمية شي شهق وشي خرجو عينيه وكلشي بدا كصفق بحرارة فرحانين بإنجازهم وبلي خدمتهم ممشاتش هكاك وفرحانين بالزيادة لي غتكون كل عام كزيدوهم فالصاليغ هادشي لمخليهم عاطيين الجهد بتفاني ودابا ملي دخلو بزاف غتكون شي زايدة معتبرة

يزيد وهو راسم ابتسامة على وجهو كتسناهم حتى يحبسو التصفيق والتصفار ويكمل كلامو

يزيد: كيفما سبق وقلت بفضل الله وبيكم وبأي واحد داز معانا الوزاني ليوم كاينة الكلام قليل فحق كل واحد كعطي جهدو فسبيل اننا نزيدو لقدام داكشي باش كنقولكم شكرا لأي كاين هنا ولا مقدرش يحضر معانا شكرا لكم القلب

ختم كلامو وهو حاط يديه على قلبو كحركة امتنان وشكر ليهم بكلامو كعلي لهم قيمتهم باش يعرفو راسهم مهمين ويعطيو كثر كلشي كصفق وكهتف وكانت حتى هي منهم تتصفق وتشوف فيه كيف كهضر وداك التواضع لي فيه هو أصلو واخا حسات الشكر مموجهش ليها لأنها هي يلاه جديدة ولكن المهم حتى هي راه معاهم

الحاج ابراهيم خدا الكلمة:داكشي لي كاين قالو لكم ولدي الشركة بتيسير الله وبيكم غادية الله يخلينا ديما مجموعين ويبعد عليها اي واحد نيتو خايبة الله يدخل علينا هاد العام الجديد بالخير والتيسير يارب وشكرا لكم

كلشي نطق آمين كصفق بحرارة وهما فرحانين زينة كانت تتشوف فيهم واحد بواحد فلحظة سهات وهي تتراجع ذاكرتها كان ممكن تكون منهم دابا ومعاه وماشي بعيد تكون ولدات اول مولود ليهم ويكونو فرحانين كانت غتكون حياتها أفضل من دابا بكثير عينيها غرغرو وناضت من تما مخلية كاع الموظفين

ناضو دارو الصف باش ياخدو الهدايا من هاد عائلة الوزاني ويتصورو معاهم خرجات مخلياهم اصلا معندها بلاصة وسطهم وميمكنش تصور معاهم وزيد يلاه جديدة حتى الكادو ديالها مغيكونش وهي مزال بادية مزال معاطياش اضافة للشركة

وقفات قدام الباب ديال القاعة تتمسح عينيها وهي تتنفس بالجهد الهدوء والصقيل والليل طاغي ظلامو تتنفس بالجهد وهي هازة راسها للسمى دخل العام الجديد وفات منتصف الليل بساعات تتمنى يكون هاد العام أحن واخف على الاعوام لي سبقوه وتطلب ربي يقويها ويعطيها الصبر اكثر حتى تقدي حاجتها سمعات الحس وراها فديك اللحظة شي حد نغزها فكتفها شوية تلفتات دغيا هنا هما يفيكسيو عينيهم فبعض وحتى وحدة منطقات بشي كلمة تشاوفو بزاف هاد الايام الاخيرة ولكن لقاءاتهم كانت باردة روعة ديك اللحظة مدات ليها شنو كانت هازة ونطقات بالزربة:الكادو ديالك حتى نت موظفة

زينة نزلات عينيها ليه وهي تاخدو بلاما تردد وترسمات ابتسامة على وجهو ورجعات شافت فيها كانو عينيهم كقولو بزاف ولكن توحدة مقادرة تهضر روعة فديك اللحظة نزلات راسها وزادت زينة لسانها تربط قبل ما تقول لها شكرا بهاد الجيست لي دارت فرحها بزاف نزلات عينيها للكادو كانت مكتوبة فيه سميتها حتى هي دايرين بحسابها رغم كلشي مقدراتش تمالك دموعها لي نزلو تخلطات عليها الفرحة على ود روعة احساس انها حسات براسها شوية مهمة فالشركة ودايرين بحسابها واخا مخداتوش من عندهم شخصيا ومتصوراتش معاهم المهم تاهي خدات

لداخل كانو دخلو الحلوى كبيرة بياس مونطي فيها شاعلين شموعها وكاتبين فيها الوزاني 2025 وليد لي تحمس وشعل الفلااام ودخلو معاه فالخط الموظفين وتبلبلات يزيد راجع اللور وتتفرج وحداه فريدة تاني تتشوف بعويناتها ومبسمة جو زوين مالياه الفرحة كتنبؤو بلي العام الداخل غيكون زوين بقاو شحال على الشطيح والغنى حتى بداو بشوية كمشيو الناس بعدها تتوادعو مع عائلة الوزاني شخصيا دوزو ليلة زوينة نشطو وفرحو فيها مع بعض وكوجدو طاقة جديدة لعام جديد داخل عليهم

متكية على الزاجة ديال الطوموبيل لبنى صايگة وكتكمع كلشي مهدود بالشطيح زينة تتشوف من الزاج السمى كانت شي ربعة دالصباح تتنهد وتطلب فنفسها هاد العام لي داخل يكون زوين وتيسر فيه داكشي لي بغات ولي هو عملية باها ويتشافى وفنفس الوقت تكون فيه شوية الفرحة لي تتحاول تدعي الخالق بلاما تفكر داكشي لي وقع فالحفلة لي كبين عكس داكشي لي باغية وبلي لي مخبي لها مساهلش ابدا ولكن ربي راه فوق من كلشي تمنات فقط انه هو أحن واحسن من الاعوام لي دازو وفنفس الوقت تتفكر فهاد الشهر الاخير لي داز كان مختالف وقلب حياتها بلي مكانتش متوقعاه غيعاود يتجبد بعدما تدفن ولكن الدنيا كلها مفاجآت

دازت هاد الليلة وجا نهار جديد من العام الجديد

نازلة من الدروج فكتفها شاكوش ناوية تخوي علاما تحس بالقضية بردات واخا هي ممسوق لها حد مع خطوات خطوة برا وقفو عليها كانو طوال لابسين تجاكيطات ودايرين نظاظر ديال الشمس نبيلة بلعات ريقها وصفارت دغيا نطق واحد منهم بنبرة صارمة:نت هي نبيلة

نبيلة تتفتف:اياه هي انا اسيدي شكون نتوما

الثاني:حنا لبوليس جاتنا خبار بلي كتمارسي طقوس السحر والشعوذة

نبيلة برد ليها الما فالركابي:هادي وثوبة احم بغيت نقول اشاف لا لا لا لهلا يطيح علينا باااطل والله مكاين هادشي انا عيد درويشة اشداني للمنكر

الاول:المهم هاحنا علمناك لكانت شي حاجة متلومي الا راسك دابا مجبناش الإذن بالتفتيش ولكن المرة جاية نغفلوك وندخلو لالقينا شي حاجة ما تلومي الا راسك

نبيلة:لا لا اسيدي مكاين والو غير نعس على جنب الراحة والله يعز الأمن

زادو وخلاوها تندب وتولول اشداها هادي والتوبة القضية طلعات بصح وزينة مكانتش تتكذب رجعات دخلات لدارها تخبات وسدات عليها

ام الغيث وزينة كانو تتبسمو وهما كشوفو فالڤيديو داكشي مصور من السطح واضح هو هداك

زينة: تبارك الله عليكم ادراري

ام الغيث مدات لكل واحد منهم جوا دوك لي مثلو دور البوليس وداك لي جابهم:هاكو الله يرضي عليكم غيزتو الشغل

واحد منهم:حنا فالدمة الوليدة فينما تخصك شي حاجة ولا شي بريكول حنا موجودين زيكو يصوني ويقطع علينا نحضرو فيساع

ام الغيث:الله يرضي عليكم الله يقوي من امثالكم كتجريو فالخير هكا يكونو الشباب

زيكو الولد لي ساكن حداهم:ختي زينة راك عارفة لي دوا معاك فالدرب مغيعجبو حال خوك زيكو موجود

زينة تبسمات:ربي خليك

ام الغيث:كيفما تافقنا ما شفتو ما سمعتو

بقاو عليها كوني هانيا وتفرقو كانو بعاد على الحومة فين طلاقاو وخلصوهم رجعو بزوجات تضحكو باقية ليهم واحد الحاجة هي اللخرة وفنفس الوقت تتعاود لها على الحفلة لبارح بدون ما ذكر داكشي لي وقع بينها وبينو

داز الوقت وتعاشات لعشية كانت جالسة فالكوزينة تتسنى الكوفيتير يدوب فالكاسرونة والشكلاط حتى هو قادات واحد زوج لاطات ديال الحلوى ريشبوند والصابلي هي وختها تتخمم فليلة لبارح وشنو وقع ولكن الحاجة لي فرحاتها بزاف هو لجيست ديال روعة دب السرور فقلبها وسط ديك الغمة وخلاها تفكر ان الصداقة مكتنساش ومكتهرسش وسط افكارها دخلات عليها راضية وجلسات حداها فوق داك السداري

زينة بحزن:مسخيتش بيك والله

راضية تنهدات طايح عليها الضيم غدا غتمشي وسيمانة دغيا طارت:غاسكتي راه دموعي فطرف عيني اختي ربي لي عالم بيا المهم

فهاد اللحظة راضية دارت يديها فصدرها وجبدات واحد الكموسة وسرحاتها قدامها كان مبلغ ديال الفلوس مداتو لزينة

راضية:شدي هاد ربعين ألف باش تعاوني جمعتها من هاد زوج خدامي لي شديت

زينة:خلي عندك فلوسك لدواير الزمان نت وراجلك يلاه باديين

راضية:راجلي قاد براسو وعايشين بلي قسم الله الحمدلله الحلوى كاسياني ومخلياني دايرة تحت مني راني عطيت لمي شي بركة شدي نت باش تعاوني الحمل ثقيل ويد وحدة مكتصفقش شديي زيديهم على فلوس العملية وانا قريبة نشد كوموند لواحد العرس وغنزيدك شدي راني كبر منك شدييييي متعصبينيش

زينة شداتهم بالكشايف وهما يتعانقو الاخوات سند ونعم السند فهاد الحياة مشات سكينة ويوسف يجيبو اللاطات من الفران وجلسو كزوقو فيهم وعمرو السطول وحطو منها مع وقت آتاي

دازت هاد الليلة وجا ثاني نهار فالعام جديد بالضبط فالخدمة

جاية طالعة فالدروج خاشية يديها فالمونطو ديالها تتشوف الموظفين كضحكو وداخلين بطاقة جديدة الا هي شاداها الخلعة من رجليها طلعات حمدات الله ملقاتوش مزال مجا مع دخلات البيرو ديالها وهي تعقد حجبانها فين هو الورد لي وصلها داك النهار لقات غير الڤاز عامر بالما عقداتهم وجلسات تتخبط اصلا ليوم فايقة ربي لي عالم بيها بانليها دايز وهي تسرط ريقها وناضت تجيب ليه قهوتو

زينة:كي بقى وليدك شوية اخالتي

حسنية:الحمدلله ابنتي شوية راه هو تقصح فيديه ولكن الحمدلله خرجات طريفة

خدات من عندها القهوى وداتها وهي فطريقها شافت سامية جالسة خدامة فبوسط عادي ماشي فلبيرو ديالها استغربات ولكن لكانت ديما غا خليها تهنى منها شوية متبقاش فينما ضور لفوق طلقاها

دخلات بشوية بعدما سمعات الإذن ديالو كان جالس فلبيرو عينيه على التيليفون حطات ليه القهوة ورجعات اللور وهي تتبلع ريقها شوية مبغاش تفكر شنو قال داك النهار مبغاش مدة وهي واقفة حتى بدات تتعيا لا هو قال لها سيري ولا قالها شنو دير حتى دارت المبادرة ونطقات بصوت رقيق:موسيو يزيد صافي نمشي

يزيد هنا هز فيها راسو ونطق باستنكار:مالك زربانة شعندك اي حاجة كديريها انا لي كنقولها لك ياك

حركات راسها بآه هنا هو يوقف وعطاها بالضهر قاصد الزاج وهو داير الطيلي فودنيه ونطق:ايوا تسناي

فديك اللحظة بدات تتغوت فبلاصتها بلاما تخرج الصوت وشادة فراسها وتتحركو بلا وكأنها تتخرج ݣاع ديك الطاقة السلبية فنفس الوقت دايرة يديها على شكل بونيا وكدير براسها غضربو زعما وهي عاضة على شفايفها بالفقصة المهم داكشي لي مغتقدرش ديرو قدامو دارتو ورا ضهرو

وهو كهضر فالتيليفون وكشوف فالانعكاس ديالها فالزاج لي هي مراداش ليه البال حيت مكتباش بزاف ولكن كان قادر يشوفها وهي كطرطا فبلاصتها وباغية ضربو وتتغوت بلا حس كمل الابيل وضار راجع لبيرو ديالو كانت ديجا تقادات فبلاصتها بعدما خرجات ديك الفقصة وواقفة مقادة هز فيها راسو ونطق:غتقادي ضوسي ديال الارشيف ديال العام كامل بles factures بكلشي ليه

زينة بشبه صدمة:بوحديي؟

عقد حجبانو وهو مفيكسي عينين فيها بلا حتى كلمة شي لخلاها تحرك راسها بلا وتطلب غا السلاك:آه صافي ماشي نقادو كون هاني

يزيد:من مور تلاتة السوايع يكون عندي نوريك هاد الزيادة فالهضرة والتبعكيك على الخدمة مالك لاش جايبينك صبحنا عالله

سكتات وسرطاتها بعيدا على انها كانت عارفة اسلوبو معاها لاحظات بلي اصلا جاي خاسر بالنعاس غير من صوتو وعينيه لي مزال مسدودين نزلات راسها وسكتات خلاتو حتى سالا حركات راسها بآه:سمحليا اموسيو كون هاني من مور تلاتة السوايع غيكون عندك

يزيد جلس بالجهد وهو مرون وفعلا كان مزال خاسر بالنعاس هز داك الكاس ديال القهوة نزل عليه دقة وحدة شربو كامل خلاها مخرجة فيه عينيها

يزيد باستفسار ولكاس مزال فيديه:شكتفرجي فيا نوض نبوس لك على راسك عفاك الالة خدمي لينا

زينة كان كبانليها غير داك الكاس غيسيفطو ليها للراس حركات راسها بآه معاوداتهاش معاه وطارت من بلاصتها خارجة ولكن مجات فين توصل للباب حتى كان مقرطسها بكلامو

يزيد:نقصي منك الطرطية دابا يطرطق فيك شي عرق

خرجات عينيها ومقدراتش ݣاع تلفت ليه حيت فهماتو شنو كقصد كيفاش عرفها وكيفاش عاااق عاد طلع معاها الزاااج شحال من مرة فاش كانت داخلة كتشوف راسها فيه بدات تندب وتولول وتزيد تولول على الضوصي لفيه خدمة العام كامل بغاه فتلاتة السوايع

بدات فيه وهي معندها ما دير كتجمع من هنا من ولهيه كلما غادية عند واحد هالمصور هصحاب الماركتينغ خاص كل واحد شارك فالديفيليات يعطيها النسخة الورقية من خدمتو وتجمعهم لسي المدير هي فضوصي واااحد كتزرب وهي مضغوطة والوقت كجريي

وصل لبوز ديال الغدا نزلات تغدات بالزربة هي ولبنى ورجعات طلعاات تتكمل تجري وتقول ما جريت ومتأكدة معندو ما يدير بيه غا بغا يجفف بيها حيت الارشيف ممكونش هكا كل ديفيلي ودفعة ككون الارشيف ديالها بوحدهاا وكتكلاصى ماشي كلشي فدقة وحدة

خارجة بشوية وهي مربعة يديها وجها ما عليه حتى شي تفسير حيت الشخص لي غادية عندو مقلقة منو تتقرب عندو وهو كشوف فيها وتتنهد حتى وقفات مقابلة معاه ونطقات:عبد الكريم هادي بلاصة الخدمة

عبد الكريم:عارف ازينة وعارف مخاصنيش نجي ولكن ربي لي عالم بيا مقادرش نصبر ونت مقاطعة معايا غير سمعيني وعمرك تعاودي تشوفيني هنا

زينة:لي درتي مساهلش اعبد الكريم مزال العافية شاعلة فيا من داك المنظر وانا كنشوف با كسعى الناس وهو عندو ولادو وعندو لي يصرف عليه

عبد الكريم:عارف غلطت وعارف مكانش خاصني نخبي تحطيت فموقف خايب خفت الا مبغيتش لا تيباري يمشي عند شي حد آخر ويزيدو يستغلو

زينة قاطعاتو بحرقة:كلشي تضرب ليا فالزيرو كان كحسابلي بلي كنجري ونجاري ساعة طلعت مقصرة

عبد الكريم فديك اللحظة شد ليها فيديها:متقوليش هكا نت مرضية ودايرة فوق جهدك وكثر الزمان لي صعيييب ازينة سمحيليا وبزاااف

زينة بشوية جرات يديها عندها وهي تتمسح على وجها:صافي اعبد الكريم سير عندي الخدمة نهضرو من بعد

عبد الكريم:تصالحنا يااااك

زينة:صافي قلت ليك من بعد ونهضرو

عبد الكريم:ديبلوكيني من الواتساب ونهضرو تما عفاك صافي؟

حركات راسها بآه وزادت دخلات وهي مضيومة فكرها فداك النهار لي كانت تتحاول تنساه وغير تتبين قدام باها بلي نساتو اما الكوية ديالو فقلبها قداااش دخلات لبيرو ديالها وهي تتخمم ليوم غتمشي لبنك تشد اول صالير لها بفلوس ختها مغاديش يبقى لها بزاف كلها تلت شهور ويتجمعو لها الفلوس وباها يدير العملية ويرتاح ويرتاحو كاملين تنهدات وناضت هزات داك الضوصي لي خرجها منها وقصدات يزيد

وقفات وهي شادة الضوصي كانت تتحس براسها كضرها عطات فيه الجهد بزاف وفظرف لي قصير مطلب غير انه مينتاقدوش حيت تعذبات فيه وتغطات حيت كان فوقت محدد خاصو يوجد وهو فيه ݣاع لي داز فالعام لي فات من ليزاغتيكل حتى لفاكتورة اللخرة والعامة ديال العام كامل

زينة:موسيو الضوصي واجد

يزيد فديك اللحظة كان كشوف من الزاج ويديه فجيابو تلفت عندها نص ضورة طلع ونزل فيه ونطق نيشان بالنبرة لي كآكتيڤي فمود الاستهزاء

يزيد:تحلات ليك ولاو كجيو عندك حتى لبلاصة الخدمة وتنزلي عندهم مخاصك حتى خير فالوقت لي خاصك تكوني فيه خدامة وتوقفي عاين باين والشدان فليدين الحشمة كتخدم عندك غا هنا

ضحك باستهزاء ورجع تلفت للزاج عاطيها بالضهر ومكمل بنفس نبرتو:طززز على تربية تيباري لي طلاحت للتوش من مور ما خوا الساحة وريح للأرض

كان كلامو بحال السم فودنيها تتحس بيه كنغز فقلبها بالجهد وموجة ديال الغضب طلعات معاها نتيجة الضغط لي جامعة وحاسة بيه وكحك عليه هو دابا باش ينفاجر وداكشي لي كان محساتش حتى شيرات بداك الضوصي شتتاتو وراقيه طارو خلاتو هو ضار بالزربة كشوف فيها نطقات بالجهد وهي كارزة على سنانها

زينة:عيقتيييييي ايزيييييييد

كانو يديها كترعدو وصدرها كطلع وينزل شدات فراسها وهي تتحس بديك الموجة ديال الغضب هي لي متحكمة فيها:صاااااافيييي انااااا عيييت غنطرطق معندكش الحق تحاااااسبنيييي على شي حاجة من غيييير الخدمة ومتجبدش باااااا علاااااش هادشيييي علااااش انا من دوووون الناااااس راني يلاه بااادية وغادي نطرطق معااااك نت حيااااتي ندير لي بغييييت ياااك الخدمة لي قلتيها ليا كنديرهاااا واخاا هكاك حتى شي حاجة مكتعجبك كنقول عااادي يلاه بادية عاااادي ولكن حيااااتي الشخصية بعييييدة عليييك وعلااااااش من دون هاد الخلق كااامل غير انا علاااش

كانت تتهضر وهي غطرطق كاع داكشي لي فقلبها خرجاتو وهو كشوف فيها فبلاصتو بهدوء بحال ماشي هو لي شعلها دابا كانت بحال شي كومة ديال القش ولاح فيه وقيدة وشعل هو هداك حالها حيدات يديها من على راسها وهي كلها تترعد وشفايفها كرجفو زادت كملات كلامها وهي على حالها

زينة:مبقييييتش قااادرة هناا وحبس صااافي كيفما كاينين نتوما كاينين بزاااف الرزاااق الله هنا وسالينا je démissionne(انا غادي نستقل)

لاحت عليه كلامها وهي كلها تترجف حطات يديها على صدرها حسات بحال شي حجرة كانت فقلبها وخرجاتها عطاتو بالضهر وزادت مخلياه وراها لم يحرك ساكنا مجات فين توصل لباب وتحل لبوانيي حتى وقفها بصوتو

يزيد:هاكي دي معاك شي حاجة قبل ما تمشي

بلعات ريقها وتلفتات شافت فيه جاي قاصدها بعدما جبد واحد الورقة من المجر عندو وقف مقابل معاها ومدها ليها خداتها من عندو وهي تتلهت بلاما تشوف فيه

يزيد:شكرا ليك على لي عطيتيه للشركة فهاد الشهر لي كنت معانا فيه

زينة مفهمات المعنى الحقيقي ديال كلامو غير مين قرات داكشي لي فالورقة خلاها تنهار والدنيا ضور بيها طلعات معاها السخونية والكربة والدوخة خلاوها تفقد التوازن ديالها وتكى على الحيط وهي تترعد والورقة فيديها عينيها يدمعو غير بالشمتة والفقصة لي حسات بيهم فديك اللحظة

كان كشوف فيها وفردة فعلها ضارت بيها الدنيا وطلعات معاها الصهدة دارت يديها على وجها غطاتو تتبين على أن حالتها منهارة وهو كشوف فيها ببرود حيدات يديها ورجعات تتقرا فالورقة وكأنها تتأكد وكذبات عينيها وتتقرا فداكشي لي صدمها وزعزعها مكتوب بالخط العريض

(في حالة ما حاول الموظف المذكور أعلاه ان يخالف أحد بنود عقد العمل واولهم الاستقالة قبل التاريخ المشروط به فسيكون عليه دفع غرامة مالية وتعويض للشركة قدرها 20000درهم وإن تم الرفض فسيتم اللجوء إلى المسطرة القانونية)

كانت مكتوبة بالخط العريض فالكونطرا ديالها بسميتها لي سينات النهار الاول لي كانت متأكدة ان هاد الشرط مكانش فيها كان فيها انه لبغات تستقل قبل من التاريخ لي متافقين معاها عليه خاصها تخدم معاهم شهر ولا مدة غير محددة بلا خلاص علاما يلقاو واحد يعوضها تتحرك راسها بلا وتقول ميمكنش عاقلة مزيان مكانش هادشي ولكن تتشوف فهاد الورقة التوقيع ديالها سميتها كلشي راسها زند عليها وحسات بواحد الشمتة خايبة

يزيد كان كشوف فيها وكشوف فحالها بغاها دوق من حر الشمتة واخا هادي مساوية والو قدام لي حس بيها هو مستحيل يخليها تمشي وهو مزال متحاسبش معاها نطق ببرود ولكن البرود المعتاد لي ممزوج بشيء من الاستهزاء:الا مزال شادة فهضرتك عندك زوج الاختيارات الفلوس ولا الحبس

عضات على شفايفها وهي تتشوف فالورقة لي كمشات بين يديها وهادشي كبين شحال تعصبات وحر الفقصة سرا مع عروقها وهادشي لي باغي هو وخلاه يزيد يكمل على كلامو بنفس النبرة

يزيد:يستاقل أقدم واحد فالشركة ومتستقليش نت باقي عليك الحال وباقي عندنا ليك شحال من حاجة حتى تكملي لي عليك على خاطرك

هزات فيه راسها عينيها مغرغرين والفقصة والشمتة واقفين لها فالحلق حسات براسها مربوطة ومكتفة وداكشي لي بغا هو كانو عينيه عليها ولكن فور ماشافت فيه وطلاقاو عينيهم بدل اسلوبو وخاطبها بنبرتو الآمرة مع حجبانو لي عقد

يزيد:جمعي الضوصي وغتعاودي تقاديه من الاول

وزاد عطاها بالضهر ببرود ومشى قصد الزاج خلاها فبلاصتها تتصارع حر الشمتة والصدمة والفقصة لي نزلو عليها دقة وحدة وهي تتشوف ديك الورقة لي كمشات باش تبرد داك الحر حتى غرسات ضفارها فوسط الرحى ديال يديها تعصبات فوق القياس وزادت كمشاتها وكأنها باغية تنسى شنو شافت واخا تخسرها راه عندو منها بزاف باش غيشدها ويكتفها كثر تقدمات وتحنات على ركابيها تتهز فدوك الوراق لي شتتات ويديها كترعدو وهو كشوف فيها من الزاج انعكاسها وهي محنية للارض كيفما شتتاتهم راه تتجمعهم دابا جمعات كلشي وخرجات بلا حتى كلمة حطاتو فلمكتب ديالها وزادت لطواليط كانت لبنى تتعيط لها ولكن متلفتاتش لها نهائيا خلاتها مستغربة سدات وراها لباب ديال الطواليط وتكات عليه تقابلات مع المراية وهي تتشوف فوجها وعينيها لي ذبالو وجها لي شحب بكثرة الهم والتخمام ودابا زاادها الفقصة تتحس بواحد الموجة ديال الغضب فقلبها خاصها تخرجها متسناتش بزاف حتى وصلات بيها بدات تتعض فدراعها بالفقصة وتتعض فحوايجها بسنانها تتبرد فيهم داك الحر وهي تتغوت فسرها بلا صوت بدات تتصرفق فوجها تنتف فشعرها وحوايجها وهي تتخرج داك العصاب حتى فشلات وتهدات كثر وهنا دارت يديها على وجها وبدات تتبكي بالصوت وتتشهق دارت يديها على قلبها لي غيطرطق تتحس براسها فاشلة ومهدودة وجهدها مشى وهادي البدية دالعام كتفها وعرف مزيان كيفاش يلعبها قتلها قبل ما تبدا وتقولها وتتوعد بلي مزال شنو مزال باقي راه عيات وتهدات مهد ليها الطريق النهار الاول وخلاها تحلم بلي حياتها غتقاد وهي معارفاش بلي كانت فبداية الكابوس كانت كتطرق على باب جهنم لي تحل عليها وكانت هي الحطب ديالو تتبكي ودموعها سخان كطيحو على خدودها تتبكي بحرقة لعل وعسى النار لي شاعلة فيها تطفى مين اتجيب ليه زوج دالمليون وهي براسها تتجري عليها تتحس براسها فحبس فقفص مسدود عمرها تخرج منو وهو جلادها دخل فالتخلويض وبدل وزور التوقيع ديالها غير باش يكتفها هنا تعرف مدى خطورة داكشي لي ناوي لها عليه

عندو كان مزال على حالو تلفت قاصد لبيرو ديالو جلس طرطق عنقو يمين وشمال وهو كفكر غيوريها ديك انا هي لي خليتها كطلع وتنزل فيك بحال العافية خمس سنين هادي بشحال غطلع عليها غتخلصها نهار بنهار وحرف بحرف كيفما جعراتو وشعلاتها فيه غيحرقها بديك العافية وغيوريها كيفاش تعلم تفاخر عليه وتعتارف بكل ثقة بفعلتها فآخر الحرب غيشوف فيها واش مزال غتقدر تهز فيه الراس الا بقى فيها شي جهد بعدا

فديك اللحظة تسمع الدقان وتحل لباب نيشان هز فيها راسو بشوفة فولادية ونطق:قلت لك دخلي؟

سامية فديك اللحظة تبلوكات بلاصتها من شوفتو بلعات ريقها ونطقات بصوت خافت:سمحليا

يزيد بنفس النبرة ورجع نزل عينيه لبيسي:سدي لباب وخرجي ممساليش

سرطاتها ونفدات كلامو خرجات وسدات وراها لباب وهي غطرطق بعدما وصلات لها مريم بلي صوت سكرتيرة كاسر الطاج ديالهم جات بغات تقلقل السوق وتعرف شكاين وطبق قول مها الا كان معصب كوني نت مزاجو ساعة لا هو لا مزاجو

شعلات الطيلي ديالها وهي تتزفر مشطونة وراكباها القفقافة من رجليها خافتو يكون عاق ولا سيفطو ليه شي حاجة باغية غير تقلقل السوق وتقيس النبض لبارح ثاني وصلها ميساج فيه ڤيديو دلبوليس كهضرو مع الشوافة لي مشات عندها القضية دخل فيها البوليس الا مشات حتى جبداتها مشات فيها بغات تعرف غا شكون هدا لي طاح عليها وفنفس الوقت متقدرش تمشي ديكلاري وتقول كهددوني لان براسها السحر راه جنحة تمشي عندهم برجليها مستحيل ندمات لاش دارت هاد الخطوة كانت من ديما تتسمع بلي كاين المحبة والقبول بين زوج بغات تجرب ساعة جاوها من موراها غير المشاكيل الا مشى حتى هادشي وصل لدارهم مشات فيها ولكن مين لحد الان مجاوش عندها البوليس هي شخصيا إذن راه هاديك مجبداتش سميتها هي ولي جاو عندها آخر مرة زفرات وهي شادة فراسها زند عليها وزادت لبيروها لي ولا وسط الموظفين عاديين لي حسات بيهم تتغامزو عليها وهدا بحد ذاتو واقف لها فالحلق

داز الوقت فجيهة اخرى بالضبط فالليسي جاية ساكها فكتفها وتتقاد فطابليتها داخلة مع الزوج يوسف مخالف معاها فالوقت حيت مكقراوش فنفس القسم مقاريش فالعشية هو ݣاع ضارت مع واحد الدورة وهي غادية شافت واحد خرج من الطوموبيل دار يديه فجيبو لوراني جبد منو تيليفونو لي كان كصوني وفنفس الوقت خرج حتى البزطام لي طاح بلاما يحس بيه سكينة فديك اللحظة مشات بالزربة هزاتو وتݣعدات مع وقفات تسناه يسالي المكالمة وحتى من صوتو كانت عرفات شكون واخا عاطيها بالضهر عضات على شفايفها زعما الصدف مكتعلمش ابدا يلاه بغات تحطو ليه على طوموبيلتو فين كاين سويݣلاص وهو يضور وكان ديك الساع قطع طلاقاو عيونهم غير غير شافتو حسات بشي حاجة داخلها تزعزعات مقدراتش تبقى صامدة بزاف وهي تمدو ليه وعينيها فالأرض ونطقات بصوت شبه خافت:طاح ليك فاش بغيتي تجبد التيليفون

وليد كان كشوف فيها كيف كبرات وزيانت بعدما تفارقو وهي بنت 13عام نزل عينيه ليديها لي كانت شادة فيها بزطامو وكأنه فاق من سهوتو وتنهد مد يديه وخداه من عندها ونطق بامتنان:شكرا بزااف

نزلات راسها بلا حتى كلمة وزادت كانو عينيها مغرغرين من بعد بضع خطوات وقفها بصوتو

وليد:علاش مشيتو شنو درنا ليكم

عرفاتو أنه كمعني على ختها علاش خلات خوه دمعتها طاحت سخونة على خدها وهو كفكرها فلي داز عليها ولي داز على ختها لي مكانش ساهل وعمرهم نساوه نطقات بصوت باكي بلاما ضور

سكينة:مكانش لخاطرنا

دارت يديها على فمها وزادت كاتمة دموعها وبكاها لي مقدراتش تحبسو وهي عينيها فعينيه وشركات معاه لكلام وليد فديك اللحظة تكى على الطوموبيل وهو تتنهد ملاقي ميقول من غير ان الدنيا لي كتفرق بين الناس غدارة وصعيبة

داز الوقت وطاح الظلام بالضبط فدار زينة

مسعودة تتعنق وتبوس فيها:الله يخلف عليك الله يعاون ويسر ليك وينقي طريقك من الشوك

زينة نطقات آمين من القلب وهي تتحسب الفلوس أول شهرية خدات واحد الإحساس فشكل وزوين حاسة بالحمل غيبدا يخف كانت حاطاها حدااها وتتقسم كل حاجة والنسبة كبيرة لي غتزيد فصندوقة العملية دايراها فالجوا وحاطاه جنبها كانت شوية فرحانة عكس كيف دوزات النهار كامل لانها لقات 7500 درهم 2500 درهم لقاتها زايدة مين سولات لبنى نفس الشي كلشي زايدين ليه وقالت لها بلي كل بدية دلعام كعطيوهم زيادة فالصالير فرحات حيت واخا يلاه شهر دارو بحسابها وعتابراتها حتى خلاص داكشي لي دارت مع فالديفيلي ولا التحاليل لي اصلا مخلصات فيهم والو وكان جا عندها المكلف بلاكيس وقالها راه دفعتهم ليك وغيرجعو لك فلوسهم مع الصالير عتابرات بلي يمكن دفعوهم لها حيت داكشي وقف فالخدمة سخفات حمدات الله رزيق جابو الله غتصرف بيه يمكن مين شافت الفلوس نسات داكشي دالصباح واخا ميتنساش

زينة:نهار السبت ان شاءالله نخرجو ونشري لك المونطو لي بغيتيي

سكينة ناضت عنقاتها وهي تتبوس فيها:الله يخليك ليا

زينة:خبي امي دوك الفلوس ديالك لعجباتك شي حاجة خوديها متقدايش بيهم انا غنتقدا وسيري للشركة قولي لهم غنسالي معاهم

مسعودة فديك الساعة هزات يديها للسما وهي تتسمع بنتها غتهنيها من الميناج كل صباح:سيري الله ينقي طريقك من الشوك سيري الله يفتح ليك بيبان الخير سيري انا بغيت الرضى والخير الا كانو فالسما ينزلو عليك والا كانو فالارض يطلعو ليك سيري كيف هازة همنا بغيت ربي فينما حطيتي يديك تيسر انا راضية عليا دنيا واخرة

سكينة هازة يديها ومع كل دعوة تتعطي مها لختها تتقول آمين زينة هزات يديها للسما ومن لقلب نطقات آمين لأن محتاجة هاد الدعاوي بزااف ناضت عند مها عنقاتها وهي محتاجة حضنها حابسة دموعها لان مبغاتش تشطنها ولكن محتاجة تخرج دموعها وهي فحضنها وتواسي حيت فعلا ضايقة بيها الدنيا

زينة باست يديها:الله يخليك ليا حتى نت درتي علينا لي ميدارش وتعذبتي خاصني نرجع لك واخا غير شوية

يتبع...