العشق لمن يجرؤ الجزء العاشر

مقردة فطواليط .. بومادا فيديها كدهن تقبتها ماللور .. كتغزز سنانها وتسب وتحلف عليه .. دوزات ليلة فالجحيم .. تحتها كولو طاب .. جنونها طلعو وتقندشات .. سالات لاحت داك البوماضا وطلعات معاها قالب من القدام .. دخل كيوزوز .. تعوجات معاه حتى حساتو مشا عاد طلعات سروالها وخرجات كتجر فرجليها .. كتمشا كيف المختون .. خرجات للصالون لقاتها مزال كتسناها غي شافتها حبسات الضحكة ونطقات ..

شيماء: شوية دبا؟

سعااد: (كلسات جنب .. جرات كارو شعلاتو وراسمة 111فجبهتها) غي ضحكي القحبة .. تشفاي تشفاي ..

شيماء: (كتحاول ماتفركعش بالضحك حداها .. زيرات على شفايفها ونطقات بهدوء) ايوا كملي؟ هوا لي جابك لهنا؟

سعاد: (حكات على جبهتها كتغزز فسنانها) ولد القحبة .. خلاني منشورة بجوج خيارات حتى ودنات الضهر (تحركات من بلاصتها باش تجر الطفاية حتى تأوهات بوجع) اححح .. فرعني ولد الهاربة ..

شيماء: (مابقاتش قادة تصبر وهي طلقها بضحكة عالية حتى دمعو عينيها ) هههه .. لا لا بزاااف .. سمحيلي ولكن قلبتي عليها اصاحبتي .. هههه (غمضات عينيها كتنهج بالضحك) حمدي الله لي ماطلعش فيك شي موس ..

سعاد: (رجليها كيتهزو بغضب كتحلف عليه.. وتكمي بالجهالة) ولد الكلب الجاعر . برررررب ماتبقا فيه!

شيماء: عرف الدار؟

سعاد: اممم .. دخل معايا عاد مشا ..

شيماء: خليتيه يدخل ههه..

سعاد: كنت مرفوعة .. خاصني غي ندخل ندير الدوا ..

شيماء: واهانتي ماعندك ماتساليه .. دارها وجابلك الدوا ..

سعاد: (طقات الكارو) غي تسنااي .. دقتي نردها نردها ..

سمعو الصونيط فالدار حتى قفزات شيماء ..

شيماء: اهيا ناري ياكما هو؟

خنزرات فيها وناضت كتمشا كي البطريق .. حلات الباب .. شافت فيه وتنهدات ..

سعاد: دخلي اسميرة دخلي نعاودلك ماجرالي ..

دخل سمير كيتعوج فمشيتو كي القحاب .. تابعها وهي كتعرج حتى كلس من بعد ماسلم على شيماء ونطق بميوعة ..

سمير: اويلاي ياختي اش طرا لك .. صوتك ماعجبنيش فالتيليفون!!

سعاد: (تقادات فوق الكرسي غي بالمهل باش ماتعكرش .. شعلات كارو اخر وبدات تعاودليه الواقعة منين جرها من البار حتى جا موراها مع الظهر فكها وحيدليها الخيار من طرمتها وجرها رجعها لدارها .. عطاها الدوا ومشا خسر عليها جملة وحدة "داويه وتهلاي فيه نسالي وندوز ليه"

سميرة: (رد راسو اللور كيضحك) ههههه .. عندو صرف القحااب ولد المهتوكة ... اش غاديري دبا ..

سعاد: فرق داك كارطة شوف اش يطلعلك؟

سميرة: هي الاولى .. (شاف فشيماء) نوضي جيبيلي مجمر وشوية دالعود .. نقيم جوادي ..

ناضت شيماء شعلات المبيخرة وجابتهاليه لحداه .. من بعد ماضمس كارطة وشد الفلوس فالاول باش طلع .. فرقها على الطبلة وشعل عليها كارو كيقرا وتنشوا ..

سميرة: هاهوا ولد القحبة طالعليا هو الاول .. الدهماني عريض الكتاف!

سعاد: (ساطت الدخان فالسما .. وقالت بطنز) وكبالتو مهورة ...

سميرة: (شافيها كيضحك) هههه كيبرد الساكن ياك القحبة؟

سعاد: (ردات راسها اللور) اححح مقود ..

شيماء: (كتنهد)

سميرة: (رجع شاف فكارطة مركز معاها هاد المرة) طالعالك الميمة عيشة راضية عليك .. شايفالك فالحاجة الثقيلة .. يمكن دار ولا تبدال الحديد ..(ضرب بيديه على كارطة) هاهوا تاني طلعلي الدم .. والمينوط .. اختي هاد المسخوط مزال جايك معاه الغيار والغبينة .. خبيث ونيتو ماصافياش .. قالب وجهو عليك .. وكيخدملك ..

سعاد: (عقدات حجبانها) اش كيخدم؟؟

سميرة: (جمع كارطة كيضمسها وكارو ففمو) دبا تقولي سميرة قالت .. غايخدملك ولا غايكتبلك .. (شافيها) خدمتي شي حاجة مؤخرا؟

سعاد: خرقة!

سميرة: ايوا راه زدقات .. السيد قلب وجهو على القحاب .. وعن قريب غايرد عليك الراس .. (سكت شوية كيشوف فكارطة) اختي مزال عندك الحرام .. (خدا نفس من سيجارته قبل ماتطفا وقال وهو كيسوط الدخان) شكون هدى؟؟

سعاد: مكنعرفهاش!

سميرة: غاينوضلك صداع مقود بسبابها ..

سعاد: خلي حتى نشوفو شكون هاد الشايطة تاني .. دوزليا للقواد طلعليا اش عندو ..

سميرة: واختي كارطة هي لي كتهضر تسناي على خبيزتك حتى طيب هااء..

سعاد: وخ ضمس ضمس (شعلات كارو اخر)

سميرة: اممم .. الفرحة فحجرو هاد القواد .. قولتيلي مزوج ياك ..

سعاد: اه..

سميرة: وامرتو حاملة واقيلة .. ! غايدخلوك فلوس على طريق .. من عند الابيض الطويل ..

سعاد: اه رشيد ..

سميرة: طالعالك لالة مليكة التسليم الله بالضو .. شعليلها شميعات .. الباشا حمو شايفلك فركبة البحر .. ولا شدان الطريق ردي بالك ..

سعاد: (مطفي الكارو) هاد الساعة ماعندي فين نمشي!

سميرة: ايوا كارطة قالت ماشي انا .. مزالة اختي غاتزهري على شمع وعلى بيت الفراش .. (جمع كارطة كيعاود يضمسها) داك القواد.. خدميلو الشمع باش تردي دقتك .. غايفكك معاه غي العاشق الولهان ديالك ..

سعاد: (لحمها شوكات) كنمرض اسميرة .. الا شمع ميمون مانقدرش ..

سميرة: (خنزر فيها) وابقاي تفرجي فيه دقة مورا دقة القحبة...

سعاد: خدمتو جوج مرات كنت غانموت .. خدموليا انت ..

سميرة: نتي معطي ليك الشمع اختي .. براكة من التقحبين .. لا كانت تجي فيه الدقة صحيحة وتمرضي يوماين ماشكمانا ..

شيماء: عندو الحق ..

مييمون البواب .. كيقولو هو فتاح البيبان هو فتاح الرحابي بلا بيه ما كاين والو .. إلى ما فتح ليك ميمون رحبتك يبقاو جوادك كولهوم مكتفين..

ميمون فيه انواع كثيرة منها المسلم منها اليهودي منها المسيحي منها الي ما عندو ملة ...هو واحد من ملوك الارض السبعة ..(المذهب..مرة..الاحمر..برقان..شمهروش..زوبعة..وميمون) وهم خدام الملوك العلوية اي ديال السماوية..(روقيائيل..جبرائيل..سمسمائيل..ميكائيل..صرفيائيل..عنيائيل..كسفيائيل) كل واحد من هاد الملوك كيحكمو يوم من ايام الاسبوع وفلك فالسما.. وكيحكمو 49 قبيلة وكل قبيلة كتحكم على 49قبيلة وكل قبيلة ماكيعرف عددها الا الله .. من بين هاد القبائل كاينة قبيلة الميامين .. وهم من اكبر قبائل الجن واكثرهم قوة وعدد .. عندهوم ديانات مختلفة واكثر الميامين شهرة هو ميمون لباسه اسود وكيخدم نهار السبت .. وبخورو الجاوي الكحل.. ميمون كاين فيه بزاف ..ولي معروفين اكثر .. ميمون البواب ..كيجي بصفة واحد مبودر صحيح ..كاين ميمون العاشق .. كيبغي الزين والطرف كيسكن المرا ويرجع عاشق ليها ..كاين ميمون كحل الشوشة كاين ميمون كانكا صحراوي الاصل عزيز عليه الخلا والقفار ..ميمون ولد الكحلة ولد الزنجية عزيز عليه القبور والروضات .. كاين ميمون بوشاقور ..كحل بوغابة صفر العينين .. مقامه فالغرب ..كاين ميمون النكاح ..هدا جن يهودي ماشي رباني ..واعماله وافعاله شيطانية .. كاين ميامين افريقيا .. زوزو ماما ..فوفو دمبا.. الكوبايلي بالا.. ساندية..لاندو..بو جانكة.. مقامو فالمغرب مرشيش .. مولاي ابراهيم والقصر الكبير ..

وقفات فبيتها كتبخر الشمعة الكحلة لي بين يديها .. راسها عاطيها الحريق وداتها مبنجة .. ريحة الجاوي مالية المكان وهدوء غريب فالمكان .. شعلاتها من بعد ماتبخرات مزيان .. وحطاتها حداها .. استحضرت اسمه وصورته قبالة عينيها وبدات الطقوس .. سحر الشموع هو من اخطر انواع السحر معروف بدقته لي مكتنوضش وكيخدم بسرعة ونتيجته كتبان فوقت قصير بزاف وفساعات قليلة جدا ..

سعاد: (مخشعة) فينك البواب القاضي حاجتي .. فينك ا ميمون الكحل ليكتهدم القصور وتغوص وسط البحور .. فينك يا لي كتوسوس فالصدور ..ايلا كنتي فالارض خرج وايلا فالسما نزل ..توكلو وجيبوهلي دمو سايل نتشفا فيه ..ستفوليا الف منكوم على شمالو والف منكوم على يمينو .. (تمتمات غير مفهومة) غبني ودوقني المرار .. تبغيولي الشفاية؟ تبغيولي الدل؟ تبغيوه يتقاوا عليا (تمتمات غير مفهومة) نوردين ولد خديجة .. تكلفو بيه وردولي دقتي..

ارتعش جسدها بمجرد ماسالات هبطات دمعة حارة من عينيها .. راسها بدا يعطيها الحريق .. ذاتها كطيح عليها .. وعضامها بداو يترخاو .. خلات الشمعة شاعلة ومشات تكات .. جرات عليها الفراش وغابت كليا ..بقات غي الكسدة ديالها ..

الطموبيل واجدة و السلعة فوسطها مستفة مقادة، هو واقف بعيد فوسط داك الديبو شاعلين فيه ضواو خفاف بالزز باش كايبانولهم كمامر بعضهم .. حاضيهم من القنت و گارو شاعل بين صباعه .. حواجبه معقودين تا كملو كوولشي و شافو فيه

قرب عنده حكيم رامقه بنظرات جادة

حكيم: كولشي واجد .. رود البال فالطريق الرايس

ومأليه براسو بالايجاب، كمل داك الگارو بين يديه تا سفو بالكامل و لاومو فالارض، عفط عليه و الذخان خارج من فمه بكثرة .. حتى كمل و ضرب لحكيم على كتفه كايتمتم بهداوة

نور الدين: تهلا

طلع للطموبيل و ديمارا خارج من تما ، بسرعة عادية غادي فطريقه، شعل من الراديو اغنية دالراي و عاود شعل گارو آخر

غادي كايتنغم بيه و الشرقي داخل عليه بهداوة من الشرجم .. عينيه معسلين فالطريق الخاوية اللي سلكها .. الشجر فالجوانب هو اللي كاين و الطموبيلات مكايدوروش فجنابه هو بوحدو اللي شاد ديك الطريق .. مدة من الطريق حتى و فجأة قشع حاجة قبالته فرانا بسررعة تا تسمعات صوت تكحييطة الروايض عااالييية و موراها الصمت و صوت انفاسه العالية تسمعو موازاة مع صوت ديك الاغنية اللي مزالة مطلوقة

غزز سنانه بحددة و تبسم ابتسامة جانبية كايتمتم بنبرة متخللاها شراسة نظراته الماكرة

نور الدين: طحتو اولاد القحـ ـاب

جر الطابلو دالطموبيل و جبد سلاحه .. عمرو بالرصاص .. مع جوج مواس نقشات كايتطواو .. شاف لقبالته مباشرة و تبسم ابتسامة جانبية اول مبانوليه عدة رجال خارجين من ورا الشجر اللي فجناب الطريق

نزل من الطموبيل كايدور عينيه فالارض و فداك الحديد المشوك اللي كانو حاطينليه كحاجز فالطريق قشعو اما على شوووية كان غايدوز عليه و يتفشوليه الروايض

شمر بيدو على نيفو كايشوف فدوك الخمسة دالرجال اللي مقابلين معاه كولهم كمامرهم ديال الشر و مباينش انهم ناويين يخليوه يمشي صحيح هازين مواس كولهم بدون استثناء!

عوج عنقه يمين و شمال كايطرطقو .. خشا داك الفردي ورا ضهرو و طلق دوك المواس بدوره تا تفكو كايشوف فيهم بنظراته الشرسة و تا هوما قربو ناحيته

كرز على سنانه تا تمذق طعم الدم فاللثة ديال .. و اول واحد جا لجيهتو ناوي يعطيه بالموس ديالو زرب عليه الرايس و خشااهليه فكرشو بعنففف تا شهق و دفعو للأرض، طاح شاد على كرشه و الدم خارج من فمه و علا عينيه لدوك اللي معاه، مع علا راسو بانليه لاخر جاي عنده، الموس كان غايدوز مع عنقه نيشان و لكن ماليه و هو يدوزولو مع كتفه تا زاد زير سنانه بالوجع ديال الضربة .. شاثد داك اللي ضربو دوزلو الموس مع عنقه و داز للثالث تا هو ضربو كايزفر بعنف، عينيه مجغمين بالدم و العروق نافرة فرقبته بالغل و الغضب .. بقاو جوج رجال واقفين قبالته و هو كاينهج حاس بالدم سخون فيه

دوك الجوج تشاوفو بيناتهم و تغامزو باش يهجمو عليه دقة يحاصروه .. و يلااه بغاو يجيوه فدقة هو طاار على واحد فيهم خشالو المووس فعنقو مع غرسوليه عينيه زادو حماارو و خرجو و انفااسه تزيرو حاس بداك الشرخ اللي استولى على بطنه

كرز سنانه شاف فالراجل اللخر اللي بقا هو اللي خشا فيه الموس فكرشو، لاح داك اللي بقاليه فيدو و دار شاف فهداك اللي خشا فيه الموس .. شاف جيهت كرشو كان الموس مزال مغروس فيه .. حط عليه يدو كاترعدد تا عمراتليه قبضة يده بالدم و خرجها من فوسطو كايشهق .. غير خرجها داك اللي بقا تراجع جوج خلفات اللور .. يلاه غايزيد الخلفة الثالثة تعكل بداك الحاجز اللي كانو حاطينو ليه قبالت الطموبيل، تخبط بالجهد مع الارض حتى تغرسو فيه دوك الحداايد بقوووة تسمعات صرخة من اعمااقه من ديك الغفلة اللي تغفلها

نور الدين شافو طاح ديك الطيحة، تقدم عنده بخطوات مبعثرة و عينيه كايشوفو غير الكحوولة .. طاح عليه بالموس بين يدو و حطووليه عند عنقو كايتمتم بنبرة شيطانية

الرايس: شكوون .. سييفطكم!

صرط داك اللي تحته ريقه، قلبه كايترعد و نظرات الرايس كانو مبينينليه المصير اللي تابعه، بلا والو الطيحة اللي طاحها و داكشي اللي تغرز فكامل ضهره مخليه تقريبا مشلول عن الحركة، زيرر عينيه بقووة كاينهج و بغا يدفعو و هو يزيرر علييه نور الدين بقووة غارسلييه شوية من الموس فجلده

الرايس: دويييي

تنفس بقوة و خوف كايدور فعينيه و تمتم بخفوت

-غايقتلني

الرايس: (على غفلة خشاليه المووس فكتفه تا غوووت بالوجع) غادويي ولا انا النيت اللي غانقتلك!

شهق هداك كايحرك راسه بالنفي، عينيه مدمعين حتى قفز بجسده اول ماعاود تغرسليه المووس فوسط قلبه .. عينيه خرجو و رجليه بداو كايفركلو، المووت طاالعة معاه و بداك الحررر نطق بسمية و بحرووف متقطعة .. سمعها منه نور الدين و غير عرف مول هادشي عاود غرسليه الموس فنفس البلاصة فوق صدره تا مات فالبلاصة و ترخى جنبه كاينهج .. شد على كرشه اللي كاتنزف بغزاارة .. لونه ولا شااحب .. و النفس كايتقطع منه، العرق مجموع عند جبهته و عنقه .. ناض بالزز .. رجرليه كايخويو بيه، تمشى جيهت طموبيلتو .. ركب و حلقه ناشف عليه .. شد على كتفو اللي مضرون و كرشو حاسها شاعلة فيها العافية، ديمارا راجع ادراجه من ديك الطريق .. الضبابة بدا كايشوفها بين عينيه

غادي بسرعة مهولة .. و الحرااارة طالعة معاه .. صااطم على الكسيراتور بالحررر اللي فيه، ماحس بنفسه غير حابس جنب داك الموبل

علا عينيه فيه كاينهج .. و خرج من الطموبيل مخلي بابها محلول

شد على كرشه غادي كايتلاوح بين الحيوط .. تفاحة آدم باارزة فرقبته بقوة مامكنزز و مكايخطوي الخطوة تا كاتكون الروح غاطلعليه

كانت كالسة شادة الكارو بين يديها .. كتهضر فالتيليفون مع رشيد .. ساعة دالهضرة حتى زند عليها راسها ..بلا شي كتحس بذاتها مرخية من اخر مرة شعلات فيها الشمع .. ماخرجات مادرجات من الدار .. بحالا قفل وتسد عليها .. والغمة على قلبها .. هداك الشمع هلكها قبل ماتهلكو .. ساطت الدخان فالسما .. كتصنت لحديتو لي كيجيها غريق .. قبل ماتسمع الصونيط فالباب ..

رشيد: شكون جا عندك؟

سعاد: (كطفي الكارو) غاتكون غي شيماءهادي وقيتها باش تمشي للخدمة .. نخليك دبا من بعد نتعايطو ..

رشيد: تصباح على خير العمر ..

قطعات عليه الخط وناضت كتجر فرجليها .. بالحلة لي حلات شرعات فمها من شوفته .. طلعاته وهبطاتو عامر دمايات .. يديه كيقطرو والعرق كتصبب عليه .. جسدها ارتعش من داك المنظر .. مكتقدرش تشوف الدم .. كينوض فيها الساكن لي ماعمرها بغاتو ومن ديما كترفضو .. تراجعات خطوتين الى الوراء مبورشة .. كتمتم بخفوت ..

سعاد: دقتي خرجات فيك الرايس ..

كانت الدوخة شاداه وودنيه كيصفرو .. الشي لي خلاه مايسمعهاش اش قالت .. حدو شافيها بحدة .. نظراته كيف شي شيطان .. ونطق كارز على سنانو ..

نوردين: تحركي قدامي ..

سعاد: (باستغراب) فين؟

نوردين: (غوت من حر الضربة لي عندو فكرشو حتى قفزات بلاصتها وتكلمو الخيوط) قوتلك زيدي قدامي!! هزي سوارت الطوموبيل ..

شدات على قلبها .. لاول مرة كتخاف من نظراته .. نظرة واحد فيه حر الموت مستاعد يقتل عاد يبرد .. مشات هزات تيليفونها وسوارت طوموبيلتها وبزطام فيه وراقها .. ورجعات لعندو .. شد فيديها جرها معاه .. سدات الباب .. وهبطات تابعاه .. حتى وصلو لطوموبيلتها .. حلات الباب .. ركب وركبات قدامو كتشوفيه ..

نوردين: (جبد ورقة من جيبو عطاهاليها كينطق بوجع) سيري للدار لي بيتك فيها ولبارح ..وعيطي لهاد النمرة .. قولو الرايس بغاك!

بقات مدة كتشوفيه عقلها مرفوع حتى رجع نهض فيها شاد على كرشو لي كتنزف .. ديمارات اللوطو .. رجعات ماشاريار وشدات الطريق .. بينما هو مد يديه جبد بزطامها .. فتحو وجبد منو لاكارط ناسيونال ديالها .. قسمها على جوج .. حل السرجم ولاحها ..

سعاد: (بصدمة) اش درتي القواد؟ واش عرفتي شحال شحفت باش طلعت وراقي من جديد؟

نوردين: (جاوب ببرود) فيها جي بي إيس ..

سعاد: كتسطا عليا؟ لا كارط ناسيونال فيها جي بي إيس ..

نوردين: (رد راسو اللور شاداه الدوخة) سوكي .. وعيطي لنمرة لي قوتلك ونقصي عليا صوتك ازبي ..

سعاد: (ضحكات بتشفي) شكون هاد الكلب لي ضربك وماقتلكش؟

ماجاوبهاش عصر عينيه كيتوجع .. بينما هي جبدات تيليفونها .. دوزات النمرة لي عطاها .. تسناتو يجاوب ونطقات بببرود داخلة فالموضوع نيشان ..

سعاد: الرايس بغاك تلحق عليه للدار ديال الجبل.. لي كاينة فالخرجة دطنجة ..

ماوصلها منو حتى شي رد .. قطعليها التيليفون فوجهها .. عقدات حجبانها وشافت فيه باستغراب!

سعاد: قطعليا فوجهي ..!

نوردين: (بتعب واضح على ملامحه) طفي التيليفون وزيدي فالسرعة!

سعاد: (طفات التيلي ونقصات من السرعة) انا اخويا مزال باغا نعيش .. انت عزرايل عطا فيك العربون .. باغي تكدمني معاك؟

نوردين: (لا جهد باش يتلاج معاها .. نطق بصوت تعبان) من بعد ونتفاهمو على هاد التقحبين لي فيك!

سعاد: (وصلات لواحد الفيراج وزادت فالسرعة .. ضارت بالجهد حتى جا مزدوح حداها ورجع لبلاصتو .. ابتسمت بمكر ونطقات) ماتصورش شحال عاجبني الحال دبا! دقتي خرجات فيك الرايس!

نوردبن: (عض على شفايفو مغزف عليها) غانفدي فيك ثمن الدقة جوج ابنت الشيخ ..

سعاد: (بطنز كتشوف فالطريق) هادشي ايلا بقيتي بالحياة ..

ضهر شبح ابتسامة شاحبة على وجهو ..نخلها كيعصر يديه على كرشو .. الدم بدا يبرد فيه والحريق عاد ماجهاد .. ثمن نصف ساعة كانت وصلات لحدا الدار .. لمحات من بعيد سيارة جيب كحلة واقفة تماك .. صطالات حداها .. ونزلات كتشوف فداك جوج رجال لي جاو كيجريو لعندهوم .. واحد فيهوم لابس طابلية وداير نظاظر عرفاتو طبيب ولاخور كان طويل وعريض مخسر سيفتو باينة فيه معصب .. وقفات مربعة يديها كتفرج فيهوم حتى دخلو بيه لداخل .. رجعات لطوموبيلتها جبدات كارو .. شعلاتو كتكميه وتفرج فالكمرة لي مضوية المكان .. الريح كيضرب فوجهها .. كتسمع فيه كيتوجع لداخل .. يمكن كيخيطوليه بلا بنج .. ابتسمت برضى .. عينيها كيلمعو بفرح .. اكتاب ليه يتعذب فنفس الدار لي خلاها فيها .. وبطريقة ابشع من ديالها .. غمضات عينيها مع اخر نفس جبداتو من سيجارتها .. ساطت الدخان فالسما وتبعاتو بتنهيدة خارجة من القلب .. حلات عينيها تابعة الدخان فين غادي وصوت خافت كيرن فودانها كتسمعو غي هي ..

-طلبتيه بدمو وجبتولك ..

شعر راسها وقف .. ذاتها تنملات عليها ..لاحت الكارو وزطمات عليه بصندالتها .. حكاتو مزيان مع الارض .. كتحس بشي حاجة مثقلة على كتافها .. حريق خفيف فالوالدة ديالها الجهة اليسرى .. ورجليها حتى هوما .. وظهرها بحالا ضاربها الضو .. بقات شحال مكوانسية فبلاصتها.. تمتمات بخفوت

سعاد: طلق مني ..

.. دقائق كثيرة .. عاد طلقها .. شهقات بقوة .. حسات بذاتها ترخات .. مشات كتجر رجليها لطوموبيلتها .. حلات الكوفر جبدات منو تخوس .. كان فيه قنينة عطر ديال العود الملكي الخالص .. مخلطة بالزهر مصوباها على ذوقها .. رشات منها حتى دخلات ليها مع العظام وانتاعشات .. رجعاتها لبلاصتها فاش حسات براسها ارتاحت ..هزات داكشي لي غاتحتاج ودخلات لداخل راسها عاطيها الحريق ..

فبيت النعاس كان الرايس مجبد على الفراش .. عاقد حجبانه العروقات كتصبصب عليه .. الطبيب مزال كيلوي ليه الضمادة على كرشو من بعد ماقطبليه الجرح ديديه .. وحكيم فوق راسو كيهضر بغل ..

حكيم: قلب عليها ولد القحبة!

نوردين: (كيتأوه بوجع .. عروق جبهتو نافرين) حسابو معايا غادي وكيتقال البليدة!

حكيم: ارتاح انت .. حتى تبرد القضية ويكون خير ..نتأكدو بلي القرودة (المخزن) ماشموش الريحة ونبلانيو مزيان .. من هنا لتما بقا هنا..(سكت شوية كيحك على ذقنه ونطق) شكون هاديك لي على برا؟

نوردين: (تقاد فجلسته عاطي جنبو لطبيب يضربليه الشوكة ففخادو وقال بتعب) مرتي!

حكيم: ثقة ايلا بقات هنا؟

نوردين: هاديك خاصها تشوفني غي كنتعذب وغاتبقا بيخير ..

حكيم: (باستغراب) كطنز عليا اصاحبي؟

نوردين: (بجدية) غدا جيبلي شنو غانحتاج .. سير دبا رجع السلعة لبلاصتها ..

حكيم: (شاف فالطبيب) كريم اش تم؟

كريم: (كيحيد ليكون) بحال ديما .. غاطلعليه شوية السخانة .. ضربتلو جوج شوكات ونخليليه الدوا يشربو .. حتى نرجعو غدا ..

حكيم: (طبطب على كتف نوردين) الله يزيد فالراحة اخاي تهلا ..

دخلات كتمختر من بعد مامشاو ووصاها حكيم باش تسد الباب مزيان وماتحل لحتى واحد حتى يفيق الرايس .. طرقات بالسقطة ودخلات عندو لداخل .. تمشات بخطوات ثقال مربعة يديها .. كان ناعس فوق السرير غير بشورط .. الفاصمة ضايرة على يديه وكرشو .. حواجبو معقودين وجهه متشنج .. وملامحه شاحبة .. قربات منو بشوية كضحك بخفوت .. هزات يديها حطاتها على جبهته ورجعات هزاتها بزربة ..

سعاد: يا لطيف كيشوط!

رجعات هزات راسها فاش بدا كيتمتم ويهلوس غير بوحدو .. قطيرات العرق هابطة مع جبهتو.. تقادات فبلاصتها عاضة على شفايفها وقالت بتشفي ..

سعاد: هادي غا حرارة الدنيا العقبة لحرارة الاخرة .. ماكرهتش نبقا نتفرج فيك الليل كولو كتهبرت ولكن جيتيني راسي ضارني وجاني النعاس ..

قلبات الدورة .. خلاتو غارق فسخانتو .. مشات حلات البلاكار .. هزات منو جوج يزورا .. وخدية .. خرجات من البيت مشات فرشات فالصالون .. ونعسات في أمان الله ..

ضرباتها الفيقة فاش ضربات الشمس فعينيها ..لقات راسها مبورشة بالبرد ديال الصباح وهي لابسة بيجامة خفيفة .. ناضت كتكسل وماكتحس بحتى عظم صحيح .. زفرات بضيق من هاد الحالة ووقفات مخسرة .. غادية كتجر فرجليها .. مشات غسلات وجهها .. ورجعات هزات باكيتها دالكارو مع بريكي .. باش تقاد المجاج .. مشات حلات الباب وخرجات .. وردات البال للسقطة لي ماكايناش .. عرفاتو خرج ولكن مايمكنش يكون بعد .. حالتو يرثى لها .. خرجات كتقلب عليه بعينيها .. لاحت كارو فمها شعلاتو .. حتى لمحاتو واقف بعيد كيكمي حتى هو .. لابس عليه تريكو وسروال .. مشات قدامو حتى وقفات عليه .. طلعاتو وهبطاتو من اللور ونطقات بتهكم وهي كتسوط الدخان فالسما ..

سعاد: خاصك دير صدقة .. ثاني مرة كتنجا من دقتي!

نوردين: (ماشافش فيها نطق ببرود) خليها تجمع عليك ابنت الشيخ!

سعاد: (كتمنضر فالخلا لي قبالتها) جوادي صعاب ودقتهوم واعرة!

نوردين: (شافيها هاد المرة بملامح حادة وتعابير قاسية) نهار غانشد الدين ديماك .. وخ تجيبي الجنون ديال بانكوك مايفكوكش مني!

سعاد: (لاحت الكارو قدامو وربعات يديها) وخ تا هدا كلام!

نوؤدين: (مخسر سيفتو) اخر مرة تكمي داك الزبل حدايا..

سعاد: (بطنز) باغي دير فيها راجلي وداك الهيت ديالك؟ (بجدية) كضحك على راسك الرايس؟

قرب ناحيتها بانفعال .. شدها من دراعها مزير عليها وقال بغضب ..

نوردين: بغيتي ولا كرهتي انت مرت الرايس .. السمية لي ماخصهاش توسخ وعمرها غاتوسخ .. ماغاتجيش كلبة دالخلا ودير موراها مابغات..

سعاد: (ببرود جاوباتو) على اينا زواج كتهضر عليه؟ واينا سمية؟؟ ايلا كنتي انت عاطي قيمة لهاد الزواج انا عندي زايد ناقص .. (قربات لوجهو كتهضر من تحت سنانها) مافايقاش ليك ولا لسميتك! عطيتك فرصة طلقني ولكن انت لصقتي .. قادر تحمل العواقب؟

نوردين: (كيتحلف عليها) بررب المعبود اسوعااد وتبغي تلعبي بالعافية معايا .. روحك غانخرجها ..

سعاد: (ابتسمت باستهزاء) بلا مادرق الشمس بالغربال .. انت وانا عارفين مزيان شنو كيسوا كل واحد فينا .. غدا ولا بعدوغاتلقاني مع واحد اخر واللعب غايكبر داك الساعات .. يسحابلك غانتسوق ليك؟؟ راك غالط ومزال ماعارفش سعاد ..

نوردين: (زاد زير على دراعها حتى عطاتو الجرحة الحريق وقال بتحذير) غاتلعبي بالنار غاتحرقك.. وايلا باغا تجني على روحك ديريها..

هضرتو ماكانت كتحمل حتى ذرة من التفلية .. نبرة صوته كانت كتخلع ونظرة عينيه وهو كيشوفيها بحال شي شيطان خلات جزء من جسدها يرتاعش .. غمضات عينيها بغضب ونطقات بنفاذ صبر ..

سعاد: شنو خاصك مني بالضبط؟ الحساب لي كان بيناتنا صفيناه .. تزوجتي بيا باش تحبس الدم وسيلتيه من بعد! دقة خويا لي مات مغدور قدامي رجعتها وهانتا حدايا مامتيش! شنو باقي خاصك تاني؟

حلات فيه عينيها كترمقو بنظرات غاضبة .. عاصفة هوجاء كيحس بيها غاتعصف بيه ايلا زاد معاها غي شوية .. عض على شفايفو بقوة ونطق بفتور ..

نوردين: متأكدة حسابنا تصفا؟

سعاد: (بغيض) ايلا كنتي كتهضر على مك .. مادارتش فيا قليل! وايلا على توفيق .. مازدقش معايا راجل ويستاهل ماجرالو .. وايلا عليك انت؟ (سكتات كتراقب داك الغمامة السوداء لي غطات على عينيه وكملات بشجاعة) ماصرفتيش فيا الخير باش نردولك بالمثل .. نفكرك فشحال من مرة وصلتيني لموت؟ علاش؟؟ باش تنتاقم لخوك؟ شنو كان ذنبي انا؟؟

نوردين: (بحدة.. كيأكد على كل حرف خرج من فمو) ذنبك هو طحتي فطريقي وماقصرتيش من جهدك! عرفتي شنو هي توصلي الرايس للموت؟ (جرها لعندو مزير على دراعها .. صدره كيطلع ويهبط بعصب) الرجال الصحاح وماقدروش يديروها .. ولا حتى *مل عليه الضمير شي قواد ونوا .. كيسني على موته بيدو .. (ابتسم بخبث ونطق بصوت باح) تماما كيفما درتي نتي .. قطعتي ورقتك بيديك ابنت الشيخ! من يدي لعند عزرايل..

سعاد: (غمضات عينيها كتبعد وجهها من عليه ونطقات بنفاذ صبر) شنو باغي مني دبا؟؟ (رجعات حلاتهوم وكملات بملامح مكفهرة) ماكفاكش داكشي لي دزت منو وانا معاك؟ براكة غي داك الحلم لي كان عندي نقرا ونكون شي حاجة واو وسط هاد ولاد الق*حاب .. وجيتي انت (هزات صبعها الصغير حدا عينيه بغل) فثانية قد هكا هدمتيه .. انت! (ضربات بيديها على صدره) ودارنا.. شنو كنتي باغيني ندير؟ نتفرج عليك انت ومك وخوتك كتجففو بيا الارض؟؟ ولا نتسناكوم حتى دفنوني شي نهار حية وحد مايجيبلي الخبار؟ (سكتات مخرجة فيه عينيها ..نظراتها ضلامو .. وبانت فيهوم شوية ديال الحمورية كأنه جني وتلبسها ونطقات كارزة على سنانها) فحياتي ما كرهت شي حد قد ما كرهتك الرايس! يكفي أنني اختاريت نتلاح فالواد ولا يشدوني كلابك ويرجعوني ليك! مادرقكش الشمس بالغربال هادشي انت بديتيه وانت لي خاصك تساليه!

نوردين: (بنظرة لا تقل حدة على ديالها نطق بصوت شبيه بفحيح الافاعي) غايسالي نهار غانبغي انا ماشي نهار تبغي نتي! دقة بدقة .. غاتبداي طلبي الموت راسك .. داك الساعة عاد غانبرد!

تنترات منو منرفزة .. دوزات على شعرها بعصب .. ونطقات بفتور عكس النار لي شاعلة فيها لداخل..

سعاد: طلقني ودير لي بغيتي.. انا هاد الحرب قادة بيها .. عمري خفت من الموت .. وحدة لي كاينة .. المقود فخيولك سرجو .. (ضارت عندو حاقدة) غي سميتي ماتبقاش مربوطة بسميتك!

طلعها وهبطها وعطاها بالجنب .. لاح كارو فمو وشعلو .. كيخدم غير يد وحدة لوخرا المعطوبة خاشيها فجيبو .. ساط الدخان فالسما ونطق ببرود

نوردين: باش تقحبني مع كرك؟ الدار والطوموبيل منين جاوك؟؟ (شافيها عاقد حجبانو كيتسنا جوابها)

سعاد: (ضحكات باستفزاز) من نيتك؟؟ غانتسناك حتى طلقني باش نديرها؟؟ ماشي سعاد لي غاتبقا فيديل لشي واحد غي حيت هو لي تقبها! والدار والطوموبيل راك عارف كيفاش كتجيبهوم وحدة ماخدامة ما ردامة..

بركان وانفجر عليها .. لاح الكارو لي بين يديه بلا مايكملو وجرها من شعرها زدحها معاه .. حتى غوتات ..

نوردين: (التشاش خارج من فمو وعينيه حمارو وبانو فيهوم نقاطي دم) طحتي مع شي واحد ابنت الق*حبة؟؟ (عصرلها شعرها فقبضة يديه وغوت صاعر) الطوموبيل والدار من جااااوك؟؟؟ جاوبي بلا تق..حبين؟؟

سعاد: (كانت كتحس بشعرها كيتقطع من بلاصتو .. شهقات بقوة وغوتات جاهلة كتنتر منو) بعااااااد مني الزبللل .. بعااااااد ..

نوردين: (زاد زير عليها ... شدلها يدها مزير على صبعانها .. رفعاتو من قوة الاعصاب) دوي الق*حبة .. طايحة مع شي حد؟؟ دوييييييي

غفلها بطرشة حتى عواج حنكها وسال الدم من نيفها..

شافت فيه بعينين دامعين .. بنظرة كلها كره وغل .. وبملامح كتأكد هضرتو ..ماحس براسو غي مطرطق ليها جوج من صبعان يديها لي كان عاصر عليهوم بقوة .. حتى تكوانسات بلاصتها مع شهقة خرجات من أعماقها .. قطعات فيها النفس وفورات الدم فعروقها .. حريق رهيب سرا فذاتها .. جيش من النمل طلع كيدغدغ راسها حتى حسات بالدوخة شداتها وهو مزال مزير على صبعانها لاخرين .. لسانها تعقد بينما هو وجهو كولو كيترعد من فرط الاعصاب.. كأنه كان مرفوع ويالله وعا على راسو اش دار .. تكا بجبينو على جبينها المتعرق .. غمض عينيه وتمتم بصوت متقطع كيخرج مع انفاس حارة كضرب نيشان فوجهها... باغيها تنفي وخ غير تكذب عليه .. مزال مامستاعد يقتلها دبا ..

نوردين: درتيها؟

عصرات الدموع لي تكونو فعينيها .. يديها منملة عليها .. السخانة طالعة مع رجليها وعمودها الفقري نازلة منو قطيرات العرق جابتلها التبوريشة مع البرد الخفيف لي كيضرب تحت التيشورت .. حلات فمها بشهقة وجع ونطقات ببحة صوت خافتة..

سعاد: ل..لاء..

كلمة من جوج ديال الحروف كانت كافية باش طفي غضبو والنار لي شعلات فيه لداخل بمجرد التفكير انها وسخات اسمه .. وبحالو بحال اي رجل شرقي ماغايبغيش مرا تهينو فرجولته .. عارفها بدون مبادئ ولو تكون كذبات عليه وماقالتش الحقيقة لي رافض يتيقها .. الا انها برداتو وبينو وبين نفسو رتاح .. ابتسم برضى وبعد راسو كيشوفيها حادرة راسها مقصحة .. حط يديه تحت ذقنها علاليها راسها شافت فيه .. بعيون دامعة .. تكلم بفتور ..

نوردين: نهار تفكري ديريها ضربي حساب لعمرك! (طلق من يديها بشوية وكمل كلامو بهدوء) دخلي لداخل .. حاولي ماتحركيهاش هانا جاي ..

مانطقات ماتكلمات بالوجع .. كان خاصها غير امتا تغبر من حداه قبل ما ثور عليه .. مشات كتجر فرجليها وهو حاضيها ماللور .. غي ردخات باب الدار .. جبد تيليفونو من الجيب .. كان تيليفون غبي بالكاد شاد الريزو .. دوز نمرة حكيم ثواني وجاوبو ..

نوردين: دبا تبعت حدايا انت وكريم وقولو يدير بحساب الهرس!

حكيم: (صوت مخشخش .. تكلم بقلق) شكون تهرس؟

نوردين: (بنرفزة) بلا كترة التسوال اصاحبي .. طلق راسك دغيا ..

قطع عليه الخط وعلا راسو كيسوط انفاس حارة فالسما .. جنبو عاطيه الحريق من بلاصة الجرحة .. اعصابه خلاتهوم فايرين .. الوحيدة لي كتستنزف طاقته وكتاخد منو جهد جهيد باش يصبر معاها بلا مايقتلها من اول نظرة ..

**

قطعات الخط للمرة الالف وهي كتلقا رد المجيب الآلي بلي الهاتف خارج نطاق التغطية .. تأفأفات بملل وقلق فنفس الوقت .. كتشوف فالخدامات لي كيحطو الماكلة فالصالون .. لي كان عامر ضياف .. واليديها وخوتها جاو يطلو عليها بمجرد ماعرفو خبر حملها .. تنهدات بضيق .. يالله تمات راجعة تلاقات مع خديجة جاية بالركيلة كتكحز .. وزنها نقص بزاف .. تحت عينيها كحل .. الكلف ناض فوجهها .. بقوة الفقصة والتخمام والحزن ومن دقة لدقة ..وكل دقة كتهلك القلب اكثر من الي قبلها ..

خديجة: والو الحبيبة ماجاوبشي؟

فدوى: (بوجوم) والو اخالتي وتكول ..من البارح فالصباح ..

خديجة: (مداتليها تيليفونها) هاك .. دوزلي النمرا د عاماك ..

شدات من عندها التيليفون دوزاتو ليها .. غي تشد الخط تكلمات بقلق ..

خديجة: الحاج .. بنك فاينوا؟ خالا المرا ديالو مهاولا ..

المختار: (بهدوء وثبات) الولد خدام أ خديجة .. ماعانداشي لاش تشطن عليه ..

خديجة: (تنهدات بارتياح) ايوا خيار .. وا رود البال لدار .. تهالا ..

قطعات عليه وشافت ففدوى..كطمنها..

خديجة: لا خافشي راه بيخير ..

فدوى: باش عرفتيها اخالتي؟

خديجة: حياتي كاملة وانا مهولة عليه .. هو يغبر من قنت وانا نبكي فقنت .. ولكتيني عا نهضار مع الحاج ويجاوبني ها الجواب أنعارفو بيخير .. (نطقات بخفوت خايفة لايسمعها شي حد) أيلقي هايثا(هكا) فاش ايكون مخابي من المخزن .. نتينا لا ديرشي فبالك .. دبا دولف كيف ولفت انا .. (ابتسمت بشحوب) وا دخول الحبيية عند عائلتاك .. ولا فقاصشي راساك .. تفكار شني طرالاك فالكرش الاولى..

فدوى: (تنهدات بارتياح مبتاسمة.. شداتلها يدها باستها وقالت بهدوء) لهلا تعاودها عليا .. ويعطيك صحيحتك اخالتي كيف بردتي عليا .. (عاوناتها تكات عليها) يالله ندخلو .. الغدا تحط..

خديجة: (تسندات عليها معاونة بالعكاز.. ومع كل خطوة كتنهد وتفكر سباب بلاها.. وتحسبن فسرها ) الله ياخد الحق فالغدارة ..

تعاشات العشية .. وهو كالس فالصالون مع حكيم .. من بعد مامشا الطبيب لي جبرليها الهرس وبدليه الفاصمات .. وبقا هو مع صاحبو كيداكرو فامور الخدمة ..

حكيم: (كيبرم ليه جوان) غاتبقا هنا؟

نوردين: نيت باغي نرتاح ..

حكيم: المهم كيما قوتلك القرودة ساقلين والقضية مضموسة .. يعني بلا ماتحتاج تخبا ..

نوردين: انت ركز معاي على داك الكلب لي باغي يلعب..

حكيم: (عطاه الجوان) هانا مدوزي .. والسلعة نقية (طبطب على ركبتو كيضحك) مابغاش يتوب اخاي ديالي ..

نوردين: (خدا نفس من جوانو حتى تغلغليه مع الدماغ وابتسم بخبث) نتوبو ال*املبوه البليدة ..

حكيم: (ناض واقف) وا عليه .. المغرب فايتة .. المرا تكون سالات ؟

كان كيسول على الفام دميناج لي جابوها معاهوم من الصباح .. طيبات وخملات وجمعات الدار ..عيط بسميتها بشوية حتى تمات خارجة كتلبس فجلابتها.. وقالت بهدوء ..كتشير لبيت لي فيه سعاد..

-راها فاقت .. عطيتا كلات والدوا لي قال الطبيب .. والعشا راه فالكوزينة السي حكيم ..

حكيم: (تبسم للرايس) نخاليك الخاوا .. غدا نرجع ..

نوردين: (كيسوط الدخان فالسما) لا ماعيطتش ماتجيش ..

حكيم: (غمزو) هي كونجي!

نوردين: بحال داكشي..

سلم عليه وناض معاه للباب .. خرجو هو والفام دميناج.. سدها موراهوم وتم راجع كيكمي ما تبقى من الجوان لي كالماه شوية وقادليه المجاج .. وقف جنب واحد الطبلة .. شعل تيليفونو وتيليفونها .. حط ديالو كيسمع للكم الهائل دالميساجات لي وصلو..وفنفس الوقت دخل لتيليفونها لي تحل بلا كود .. علا حاجبو مستغرب.. وبفضول دخل كيقلب فالمكالمات والميساجات .. واتساب .. فايسبوك .. وكاع التطبيقات .. لاكن مالقا باش ينقي سنانو .. كولشي مسدود .. كولشي ممسوح .. والغريب أكثر أن كاع النماري مامسجلينش.. وهادي ميزة كتجمع البزنانزة والقحاب .. خرج من كولشي ودخل لتصاور .. عقد حجبانو كيطلع ويهبط فداك الفيديويات .. كانو كولهوم مصورين من ليلات الحنة والجواد لي كانت كتحضر ولي كانت كدير .. البخور.. المجامر .. الطبوقة.. الشمع .. اللدون .. بحالا هز تيليفون شوافة ماشي مرتو .. عض على سنانو بعصب .. لاحو فوق الفوطوي .. طفا الجوان لي تسالا .. وتم غادي عندها .. منين هرسها ماطاف بجيهتها ..

ناعسة فوق نموسيته .. يديها مطلوقة حداها ومبعداها عليها باش ماتحركش وتعكرها .. عينيها زليجة من الدموع لي مابغاوش يهبطو .. الدوا لي عطاها باش نعسات العشية كاملة باقي راخيها ..الحريق كتحس بيه غير على شكل نغيزات خفاف .. ولكن راسها ثقيل عليها بزاف وعاطيها الصداع لودنيها .. سمعات الباب تحلات عرفاتو غايكون هو.. مارمشات ما تحركات .. بحال شي جماد .. كتسمع لخطواتو جاي لعندها .. عطاتها ريحة الكارو والجوانات من بعيد .. هي لي خلاتها تغمض عينيها بلا خاطر .. حتى حلاتهوم فاش حسات بالجهة الاخرى من السرير هبطات ..

خدا وقتو الكافي فتفحصها من الخلف .. قبل مايهز يديه حطها على جبينها كيقيس حرارتها .. كانت طالعة شي شوية وهو رد فعل طبيعي للجسم ايلا ضررات فيه شي بلاصة .. هز يدو بشوية ونطق بخفوت عند راسها ..

نوردين: باقي فيك الحريق؟

سعاد: (ابتسمت بذبول ونطقات بتعب كتحلف عليه) غير بدا توجد للدقة لي جاياك من عندي الرايس!

ضهر شبح ابتسامة عابثة على وجهه .. رجع حط اليد لي مامريضاش عليها وقلبها لعندو بشوية حتى رجعات مقابلة معاه.. عينيها فعينيه .. بنظرات يغلفها البرود من برا وحارقة من داخل .. هز يديه من جديد حطها على حنكها ومكان الضربة لي بقات مدمغة فنيفها .. دوز عليها بصبعانو ببطئ ونطق بصوت متحشرج..

نوردين: ما كتهديش؟

سعاد: (ببرود) باغي طلع بيا التبويقة؟

سكت شحال كيشوفيها كيفاش مرخية ومهدودة .. للحظة تمنا كون تبقا ديما هكا .. هاديك الانثى الشرسة لي كتخرج فيه عينيها كتخليه يخرج على طوعه .. كتفكرو فالحايل والقديم .. وكيبين الوجه الثاني ديالو .. بزناز مخزز .. كيعرف غا العشبة والقتيل..

نوردين: (رد راسو اللور تكا على حرف النموسية كيشوفيها) شنو كونت باغا تولي كون ماخديتكش؟

سعاد: (هزات يديها لي صحيحة حطاتها على يدو حيداتهالو من وجهها ونطقات بفتور) قاضية .. ندخل بحالك يتعفنو فالحباسات!

نوردين: (جابتلو الضحك.. ابتسم بجنب.. ورجع كيلعب فشعرها بعناد..) بحالنا كاع مكيدخلو للحبس ابنت الشيخ! ماقراوهاش ليكم؟

سعاد: (بطنز) لا دلك الموديل قريتو فدارك..

نوردين: (دوز بصبعانه مع عنقها.. كيهبط بيديه حتى لدرعانها العريانين ويرجع يطلع) مايبقاش فيك الحال .. كاين لي قرا وماطفروش ورجع باغي غي الفلوس بأي طريقة..

سعاد: (قوسات فيه حجبانها ونطقات بخفوت) ماللخر الرايس!

نوردين: (بجدية) خدمي معايا .. منين باغا طيري فقنوت خرين..!

سعاد: (الدولار بان مرسوم فعينيها وهمساات) القضية شحال فيها دالفلوس؟

نوردين: (حيد يديه من عليها وجبد كارو من جيبو شعلو كيتنشوا بيه ونطق بجدية) اكثر من اي خدمة اخرى..

(شافيها بابتسامة لعوب) الدار فين تبان لي ساكنة فيها وطوموبيل اخر موديل.. ولي تشهات العين كتحضر فرمش العين ..

سعاد: (توسعو عينيها بذهول) الطوموبيل بحال هاديك ديالك البيضة؟

نوردين: (تكا على جنبو كيكمي ويبخ فالسما)سسس عجباتك؟

سعاد: مقودة..!

نوردين: نجيبلك بحالها .. هاديك لي عندك حرقيها ولا بيعيها مانعاودش نشوفها عندك..!

سعاد: (بهدوء) بغيت وراقي..

نوردين: غاتاخديهوم..

سعاد: شنو غانخدم بالضبط؟

نوردين: (مد يديه كيطفي فالارض) تلاقاي الكليان الجديد.. وتوصلي مرة مرة السخرة (خنزر فيها وقال بتحذير) والتقحبين مع الكليان نسايه .. توصلني خبارك الرجل ديالك تقطع..

سعاد: (تنهدات بملل) شي حاجة اخرى؟

نوردين: تا واحد ماغايعرفك مرتي .. وداك الخروج والدخول من غير الخدمة خاصو يكون بشواري (شافيها مخنزرة فيه ابتسم بمكر) هادي التالية بالسيف على الدين ديماك .. صوا خدمتي معايا صوا لا ..نلقاك فشي قنت وانا ماعارفش غاتلومي غي راسك ولي معاك..

سعاد: (بسخط ناوية تشعل) واش منيتك غاديرلي الحبس؟

نوردين: واش انا قولت ماتخرجيش؟

سعاد: واهيا هاديك .. اش معنيتها تخرجي بشواري؟ انا باغا نعيش حياتي كيبغيت انت ماعندك دخلة.. وفلوسي تحط غي نسالي الخدمة وبالدوبل..

نوردين: (طفا الكارو وزاوطو فالارض..ونطق ببرود) غاتعيشيها كيف بغيتي وانا حاضر .. (شافها غادوي لقفها قبل) عندك هاد الحل ولا غاتقودي قدامي للدوار .. بالسيف ولا بالخاطر وداك الساعات خرجي لا سميتك مرا..

سعاد: (غمضات عينيها كتكبح غضبها.. وماعندها جهد للغوات معاه) وخ الرايس كولها حسابو فراسو..

نوردين: داك الراس شحال مابقا غانهرسو ليماك.. غي حاولي تلعبي بشوالك معايا ونفرجك..

سعاد: (تكات على ظهرها مكتشوفش فيه) غانبقاو هنا؟

نوردين: هاد الساعة اه ... وغاتمشي نيشان لدارك الجديدة..

سعاد: (ببرود) العيد قرب بغيت نمشي نزور..

نوردين: (علا حاجبو) اينا عيد وشمن زيارة؟

سعاد: (تنهدات بنفاذ صبر) عيد الميلود .. وزيارة سيدي علي فمكناس..

نوردين: (ناض من حداها ساخط) ماكاين لا زيارة لا زبي .. كلسي الارض.. وايلا مشيرة نقادك..ساكناك ال*ملة نتي ماشي الجنون..

سعاد: (تكات على جنبها وطلقات حلاقمها) برررب حتى نمشي...

ماجاوبهاش .. حل الباب وخرج كيقاد فحوايجو..

سعاد: (رجعات تردخات على داك الفراش مقندشة كتمتم بحنق) دبا نشوفك اش غادير .. القوااااد... (شافت فصبعانها) اول دعوة فالزيارة هي فيك بربي الرايس حتى نحمقك .. ايلا مارجعتيش تزطم على تراب رجلي وتبوسو مانكونش انا سعاد بنت السعدية .. درتك فراسي عياقتك نحدها ليك القواد .. وباش كيحلفو القحاب .. بيا ولا بيك ..زغب طبوني نتفو عليك غا تسنا ..

ضرباتو الفيقة الصباح على نغيزات خفاف فالجرحة لي فجنبو.. تكسل بلاصتو بشوية وناض كيجر فرجليه نيشان للدوش .. غسل وجهو معدب مع يدو لي صبحات منملة .. مخسر سيفتو وماحاملش راسو .. خرج نيشان كيمسح وجهو بفوطة.. حل الباب تم غادي للصالون .. شاف فالساعة كانت قريبة الطناش دالنهار .. سمع التقرقيب فالكوزينة عرفها مولات الميناج جات كيفما وصا البارح حكيم .. دور راسو لجهة الطبلة بانليه الفطور محطوط تماك .. شي مغطي شي باين .. عقد حجبانو ومشا هز باكية الكارو .. شعلو واقف كيدور بلاصتو .. طالع هابط فتيليفونو.. كيقرا الميساجات لي وصلوه من عند فدوى وبزاف دالنماري ديال البواط فوكال .. رجع لاحو مخنزر .. صابح مقطوع والخاطر مكاينش .. حتى خرجات المرا كتمسح يديها من الكوزينة .. شاف فيها بنص عين صوته مبحبح يالله كيسرحو من النعاس ..

نوردين: فاقت؟

تقدمات عندو وقالت بهدوء ..

-ماعرفت السي نوردين .. انا جيت دخلت نيشان لكوزينة .. والبيت مسدود مابغيتش ندخل قلت بلا مانفيقها ..!

ماجاوبهاش .. طفا الكارو فالطفاية حداه .. وتم غادي لبيتها .. كمارتو مخسرة .. كارو واحد ماقداليه والو.. حل الباب بالجهد ودخل مدرم .. كانت ناعسة عاطياه بالظهر .. طرمتها خارجة .. الغطا مليوح الارض من الجهة لوخرا وهي ماكايناش فهاد العالم .. زاد قرب شوية ناوي يفيقها حتى خرجو عينيه فاش شاف المنظر لي سمرو بلاصتو .. عقد حجبانو بحدة ومشا وقف عند راسها كيتفحصها شبر شبر.. ملامح وجهه مظلمة .. وعينيه كيغليو فوق منها .. حتى ماحس براسو غير كيحركها من دراعها بالجهد وينادي باسمها بصوت عالي.. حتى ناضت طافجة كتشوفيه ..

سعاد: (دايخة بالنعاس) مالك الخرا.. صباحاتو الله ..

نوردين: (مافهم والو .. فيها.. شير بعينيه تحت منها وقال باستغراب) شنو هاد البركة دالدم لي تحت منك؟

طلات تحت منها .. عاد وعات على راسها غاطسة بالدم .. رجعات علات عينيها شافت فيه وقالت ببرود..

سعاد: الدم.. هادشي علاش مطفجني الزمر..

لاحت ماتبقى من الغطا عليها فااارض وناضت ساخطة ..وقفات وتمات غادية.. حتى رجع جرها من يديها تزدحات فيه .. مافاهم حتى حاجة .. كيفاش جرا منها هاد الدم كامل وهي ناعسة ومرتاحة بحالا ماواقع والو .. انسان طبيعي بحالها كان على الاقل غاتشدو الدوخة..

نوردين: هادشي عندك طبيعي؟

سعاد: (ببرود) ليغيكل نقولها ماتنزلش؟

نوردين: هاد الحوض لي خليتي فالفراش كولو من الريكلة؟

سعاد: (عنقشات فيه) حتى الدم غادخلي فيها كيفاش تجي؟؟

نوردين: (زاد جرها عندو صاعر) دوي از_بي بلا تق*حبين..

سعاد: (قربات لعندو حتى ضربو انفاسها السخان فوجهو.. وتحولو نظرات الغضب لي كانت دايرة فيه فجأة لضحكة خفيفة ونطقات بهمس) هو لي كيتحكم لي فيها .. تقدر تهبط .. ويقدر يحبسها لشهور .. ويقدر يجيبها حتى لجوج مرات فالشهر ..تقدر تجي خفيفة ويقدر يجريها لي.. هو وكانتو...

نوردين: (مستغرب) علامن داوية؟شكون هاد ال*لاوي؟ ..

سعاد: (زادت توسعات ابتسامتها اكثر .. دوزات بشفايفها على شفايفو وهمسات) عمو الزوين...!!

سعاد: (زادت توسعات ابتسامتها اكثر .. قربات من شفايفو وهمسات) عمو الزوين...

كتلعبلو على أعصابه بكل برود .. وكتستمتع بذالك ..زير على دراعها أكثر كيبرد حرو فيها..ونطق..

نوردين: شكون هاد عمو ال*لاوي عاود؟؟

سعاد: (خنزرات فيه) لا تسبوش.. قبل مايجي يقجك بالليل..وعارك على رجال الله داك الساعات..

تنترات منو ومشات هزات فوطة .. خرجات لبرا .. بقا واقف كيسمعها كدوي مع الفام دميناج من بعدها دخلات الحمام وردخات الباب..

نوردين: (شاف فالفراش وفالبركة لي خلاتها مرسومة تماك وتمتم) اش هاد الخراااا ؟؟

خرج موراها زادح الباب .. زادت قطعاتو.. مشا نيشان شعل كارو اخر وهز تيليفونو مدوز نمرة حكيم .. لي كيجاوبو فالبلاصة..

نوردين: جيبليا طبيبة واجي..

حكيم: علاش كريم كاين اصاحبي!

نوردبن: (مخنزر بحدة) لا بقا غي طارق تاهو يخور ليا فيها من تحت .. (رفع صوته بعصب) جيبليا طبيبة اصاحبي وبلا تفلسيف..

حكيم: (باستسلام) صافي شوية انا معاك..

قطع الخط معاه وكلس كيكمل الكارو ديالو .. الدخاخن مكجكجة فوق منو.. راسو كيدور .. بين عينيه غي داك المنظر لي شاف.. حتى ناض طافج فجأة فاش تفكر شي حاجة كان غافل عليها .. طفا داك الكارو وتم غادي لعندها .. حتى تمات خارجة كتمسح وجهها بفوطة .. لاوية عليها بينوار دالحمام ..

سعاد: (شافت ففام دميناج) هزي عافاك سوارت طوموبيلتي وجيبيلي واحد الميكة من الكوفر..

حركاتلها راسها بالايجاب وخرجات..بينما هي شافتو جاي قاصدها وقفات كطلع وتهبط فيه .. حتى وصل حداها جرها من شعرها مزير عليها صاعر..

سعاد: (كتنتر منو وتغوت) مالك الزمر واش جهلتي عاود؟

نوردين: (زاد زير على شعرها كيديها ويجيبها بحال الريشة وقال بعصب) كيفاش محيدة الوالدة وباقا كتنزل منك الدم؟؟

سعاد: (تنترات منو بقوة وغوتات فوجهو صاعرة) كدبت عليك.. كدبت عليكوم اتريكة القواويد...وقلت لخوك مايقول والو.. سر كان بيني وبينو .. كنت عوالة نقتلك ونتهنا منك ونمشي نعيش حياتي ونولد ولا نقود سوايع مع لي انا باغياه.. حرقك كرك تا على هادي؟

قرب منها الدم فاير فعروقه..ماشعر براسو غير وهو عاطيها جوج طرشات متابعين حتى بقاو يديه مرسومين فحناكها..ورجع جرها من شعرها بقوة غادي بيها البيت.. داز فالفام دميناج مدرم.. بقات واقفة مسمرة بلاصتها هازة ميكة دحوايجها.. يديها على فمها .. مصدومة كيفاش خلاتهوم ساقلين ..جات لقاتهوم حاميينها.. ما فيقها من صدمتها غير صوت باب البيت لي تردخ بالجهد وصوت غواتها لداخل..خلاها تجفل بلاصتها.. ماعارفة مادير..

لاحها فوق النموسية .. وبقا غادي جاي فوق راسها مرارته غاطرطق بالاعصاب..

نوردين: دايراني ضحكة ااابنت ال*حبة!

سعاد: (ناضت عينيها حومر بحال الجمر.. قربات عندو دافعة الجبهة مجننة عليه) ماباغاش منك التريكة القواااد.. كرشي وانا حرة فيها.. مكنحملكش كيفاش غانحمل ولادك..

زاد ليها مجنن.. شدها من عنقها خانقها..ونطق والتشاش خارج من فمو..

نوردين: وااش انا شايفاني حاامق عليك؟؟ بررب المعبود ابنت الشيخ ولي خالقني وخالقك .. يا حتى نربيك من اول وجديد.. وايلا كنتي عوجة نقااادك..

طلق منها تا جات مزدوحة على الحيط لي موراها وخرج يبدل الساعة بخرا داتو كولها كترعد عليه..

سعاد: (شادة فعنقها كتنفس بصعوبة وتماصي مكان الخنقة) تقادني ..لوطوروط دالداخلة انا اولد الكلبة.. (كلسات فوق النموسية كتنهد) يعطيك العذاب .. بغيتلك الشلل فعروق ز_بك باش كتقيم اولد ال*حبة..

نظرات الكره لي كيشوفهوم فعينيها ولي لا تقل حدة على ديالو .. كتخلي فكرة القتل ديالها تزيد تكون فالداخل ديالو اكثر واكثر.. لاكن ماشي بسهولة غايهنيها من هاد الحياة ويتهنا منها.. ومن صداعها .. عدد الناس لي قتل بدم بارد فحياتو كتر من عدد الناس لي تعرف عليهوم.. إنسان تربا من صغرو على الفلوس و القتل.. وتعلم جوج حوايج كيفاش يبزنز وكيفاش يقتل.. كبر على هاد الافعال لي رجعات كتجيه عادية .. تصفية الحسابات بطرق شنيعة هي اسهل حاجة كيعرف يدير.. معروف فالوسط الموسخ لي عايش فيه ان دقتو كترجع فالبلاصة ومكتعطلش.. هادشي لي مخلي كاع البزنانزة وولاد الدومين الصحاح يبعدو من ساحتو وتا حد مكيتجرأ يلعب معاه.. واش هو إنسان سيئ؟ هو انسان جبراتو الظروف والمواقف باش يعيش بطباع ماشي هي لي تولد عليها..علماتو كيفاش يقسا.. حتى تكونات فقلبه مدينة من الظلام.. شموع الحب فيها خامدة..حتى رجع قلبو عبارة عن حجارتين ..لا مكان للحب بينهما..

ساط دخان سيجارته العاشرة لبعيد .. كيغلي من الداخل ديالو..كتقدر تلعبلو على أعصابه فرمشة عين.. لسانها سليط وماضي.. انسانة معقدة وصعيب تفهم.. بزق فالارض بغل .. سنانو كيتكرزو مع بعض.. حتى وقف عليه حكيم مدرق الشمس بعينيه..

حكيم: برد اصاحبي..

نوردين: (مغزف) غي ديال القتيلة ..

حكيم: (قالب الموضوع) خونا قريب غايجي..

نوردين: (سف من الكارو حاقد) غانحوي ليه مو ولد القحبة..

اكتفى انه يحرك راسو وسكت.. حتى تمات خارجة الطبيبة كتقاد فحوايجها.. وقفاات حداهوم ونطقاات بهدوء..

ط: الحمدالله ماعاندا والو .. كدوقاع مرة مرة..

نوردين: (مخنزر) كيفاش ماعندها والو وهي صبحات فايضة ...

ط:(حنحنات بخفوت)داكشي راجع للهرمونات..عطيتا شي دالفيتامينات .. وخاليتلاك الورقة دالدوا دشربو..

ماجاوبهاش .. رجع عطاها بالظهر كيكمل كاروه بينما حكيم تكلف باش يوصل الطبيبة وخلاه بوحدو حتى يتكالما..

دقائق وهو واقف برا كيرد النفس.. عاد دخل هز تيليفونو وسوارت طوموبيلتو.. شاف فالفام دميناج لي مبعدة عليه كتحاول تفاداه.. ونطق عاقد حجبانه..

نوردين: ماتخليهاش تخرج لا فاقت.. اي حاجة عيطي لحكيم..

هزات راسها بوخ ومشات كطل عليه من السرجم من بعد ماخرج.. غي حرك الطوموبيل صاعر .. مشات كتجري لعندها .. حلات الباب ودخلات.. لقاتها مكورة فالفراش سايخة بحريق الراس.. كلسات جنبها كتحرك فيها بهدوء..

-اختي.. نوضي تفطري .. باش تشربي الدوا..

سعاد: (حلات عينيها بتثاقل وتمتمات) تقدري ضبريلي فالبخور؟

جاوباتها باستغراب..

-ماعندي منين نجيبو فهاد الخلا.. راه ماحداكوم حتى دار..

سعاد: (تقادات بلاصتها بتعب) تقدري تجيبيهلي معاك غدا؟

-دبا موحال نمشي.. السي نوردين وصاني نبقا معاك حتى يجي.. وايلا ماجاش؟

سعاد: (تنهدات بخفوت) وخ جيبيلي تيليفوني..

مشات جابتو ليها .. دوزات نمرة شيماء.. دوات معاها بزربة وقطعات .. رجعات مداتليها التيلي تحطو فوق الطبلة..وقالت..

سعاد: فاش تجي حلي ليها دخل..

شداتو من عندها متحسرة على حالها ونطقات بهدوء..

-نتي بنت رجال الله ياك؟

سعاد: (ردات راسها على النموسية مرخية..حركات راسها بالايجاب) اممم العواشر كيتزير عليا الحال..!

حطات تيليفون فوق الطبلة ورجعات لعندها..مونساها فالهضرة..

-الله يشوف من حالك اختي.. والله يهدي عليك السي نوردين..

سعاد: (مخيبة سيفتها) لقاني مسهوتة ومالقيت ليه جهد.. يدوزني حالي ونسالي ليه..

ابتسمت بهدوء مجاوباها..

-باينة فيك حارة ودقتك ماتبقاش عندك.. ولكن اختي راه كيبان قصح من الحجر.. ضربي وقيسي..

سعاد: (حطات يديها على راسها) اااه راسي زند عليا..

ناضت جابتليها الدوا وكاس دالما..

-هاكي حاولي تنعسي..

سعاد: (شداتو من عندها كتشربو) ماغانقدرش نعس دبا.. (تنهدات حاطة راسها مرخية) صعيب باش نعس..

كان مدد على النموسية صدره عريان .. دماغه سارح لبعيد .. كيشوفيها كتبدليه فالفاصمة عاقدة حجبانها بهدوء.. كان محتاج لهاد السكون ..

فدوى: (علات فيه عينيها لقاتو حاضيها..نطقات بعتاب) غاتبقا ديما تغيب وترجع مضروب هكا؟ علاش ماكننتيش كتجاوبني؟

نوردين: )ببرود) خاصك تولفي..

فدوى: (تحنات باستو مكان الجرحة من بعد ماسالات.. وكملات عتابها كتفشش) صعيب نولف هادشي.. قلبي كيبقا مقبوط عليا..

نوردين: (جرها لعندو باسها فمها وابتسم باسترخاء) قصحي داك القلب عندك..

فدوى: (بابتسامة هادئة) عليك انت ديما غايبقا رطب.. خاصك غي انت تحنن هاد الحجر عليا..(حطات يديها على قلبو)

نوردين: (هز يديها باسهوم ) عارفاني مانفوتكش!

فدوى: (باستو فعنقو معنقاه كتمخشش فيه بحال شي قطة) امممم توحشتك..

نوردين: (حط يديه على كرشها كيماصيها) العزري لباس عليه؟

فدوى: (كدوز صبعانها على لحيته) باش عرفتيه عزري؟

نوردين: (بصوت مبحوح) الرايس الصغير..

فدوى: (باستو فخدو عدة مرات وهمسات) لي جات منك مرحبا بيها.. (بعدات راسها شافت فيه) نوض خود دوش.. غانهبط لتحت نحط العشا مع البنات .. ماما وبابا غدا غايمشيو بحالهم .. غاتكلس معانا اليوم؟

نوردين: (ناض من بلاصتو كيتجبد) سيري .. شوية ونهبط..

ناضت خرجات ..بينما هو دخل للدوش كيلوي عليه ميكات باش مايقيصش الجراحي.. طلق الرشاشة .. نقصليها فالما وبدا يغسل .. عالله يخفافو عليه عظامو.. سالا ف عشر دقائق وتم خارج ببينوار دالحمام كينشف شعره من الما.. انتبه لتيليفونو كان الضو شاعل وطفا.. مشا طل عليه لقا اكثر من خمسة دليزابيل ديال حكيم.. عقد حواجبو وعاودليه الاتصال.. غي جاوب نطق بحدة..

نوردين: اش كاين؟

حكيم: (كيهضر مزروب) خليتي إعصار فالدار الرايس وخرجتي..

نوردين: شنو دارت؟؟

حكيم: عيطات الفام دميناج .. راها قالبة عليها الدنيا خاصك تمشي دبا..

قطع عليه الخط ومشا كيلبس حوايجو بسرعة.. كيغزز ضراسو ساخط.. الساعات القليلة لي نعم فيهوم بالهدوء جات هدماتها ليه ويعلم الله اش دايرة..

خرج من البيت رادخ موراه الباب .. نزل فالدروج كيجري .. طلاقاتو فدوى فباب الدار غادي يحلها ..هضرات باستغراب..

فدوى: نوردين فين غادي؟؟

نوردين: (شافيها مخنزر) خرجلي شي شغال ..

ماخلاهاش تنطق زدح الباب وخرج.. حرك الطوموبيل نيشان للدار لي خلاها فيها .. سايك بسرعة جنونية باغي يوصل يملخها عصا يبرد فيها الاعصاب لي ركبات فيه على الصباح.. وصل حدا الباب ..نزل من الطوموبيل صاعر.. حل الباب ودخل جنبو عاطيه الحريق من قوة التشنجات.. طلاقاتو الفام دميناج فالباب كتهضر بقلق..

-دكدكات كولشي فبيتها وفالصالون(شارت بعينيها للروينة لي خلات)

نوردين: (كيشوف فالدار لي قلباتها رأسا على عقب.. الزاج فالارض.. الطبلة مقلوبة.. المجورة شي محلول شي مهرس.. كولشي كباتو فالارض.. كاع الديكورات شخشخاتهوم.. شاف فالمرا وقال بحدة..)

نوردين: كانت باغا تخرج؟

حركات راسها بنفي..

-لا .. فالاول بدات غي تهرس معصبة .. ومن بعد جاتني بحالا كتقلب على شي حاجة.. ولكن الخروج مادكراتوش..

داز فيها ودخل عندها لبيت فين كان كيسمع صوت الخبيط والتهراس باقي.. حل الباب ساخط على الوضعية .. لقاها عاطياه بالظهر كتقلب فالمجورة بحال شي مجنونة.. كتلهت بصوت عالي.. ضرباتو ريحة البخور مجهدة فالبيت.. والدخاخن كانت مزالة طالعة من المجمر لي كون ماشافش فالارض كان غايزطم عليه.. عقد حجبانه ومشا عندها.. وقف عند راسها.. كيشوفيها كتقلب ويديها كيترعدو.. تحنا هزها من درعانها وغوت بحدة..

نوردين: وااش جهلتي ابنت ال*حبة؟؟؟

نظارتها كانو فشي شكل.. لون عينيها مخروض مايل للاحمر.. لون وجهها حتى هو مخطوف.. ماكانتش فسيفتها.. ملامحها مخربقين وحتى الشوفة فيها مخربقة.. الشي لي خلاه يعقد حجبانه ويرخي من قبضة يديه عليها.. حتى نطقات بصوت مبحوح بعيد كل البعد على صوتها..

سعاد: فوتني عليك أنوردين ولا غاندبحك..

تنترات منو بقوة ورجعات نزلات كتقلب فالمجورة بهستيرية.. شعرها طالع فالسما ..كتشهق.. والغريب فالامر ان صبعانها المهرسين كانت كتحركهوم بسلاسة وماحاساش بيهوم.. حتى توقفات فجأة وفيديها بواطة ديال الدوا.. دازت فيه ومشات هزات قرعة دالما .. لاحت حبة ففمها وشربات الاولى.. زادت التانية.. والتالتة.. يالله غادير الرابعة فمها حبسها عينيه خارجين فيها..

نوردين: شكاديري؟

دفعاتو بالجهد ..بالرغم من ضخامته وبنيته القوية قدرات تزعزعو من بلاصتو.. ولاحت الحبة الرابعة فمها.. شربات الما وتلاحت على الفراش.. جرات عليها الغطا .. وغمضات عينيها .. صدرها كيطلع ويهبط.. وصوت انفاسها مسموع حتى لعندو.. بقا شحال واقف مسمر بلاصتو.. حتى مشا هز داك الباكية ديال الدوا.. صورو وسيفطو لفدوى فواتساب.. كاتبليها"ديالاهش هادا"

شافها قرات الميساج بقا غادي جاي حاضيها كتكتب.. حتى وصلو ردها من بعد ثواني..

فدوى: هدا دوا ديال النعاس مجهد بزاف .. كيتعطا بوصفة طبية..

نوردين: علاش؟ دروكا!!

فدوى: تقريبا .. هدا هو الديفو لي فيه ايلا تشرب بزاف كيولي إدمان.. كيتعطا للناس لي فيهوم اكتآب ولا اضطرابات نفسية.. فين لقيتيه؟

نوردين: (تجاهل سؤالها) وايلا تشرب بزاف دالحبات؟

فدوى: ايلا كان بنادم مولفو مكيأثرش فيه.. نوردين فين مشيتي؟

طلعليها vu ولاح التيلي .. شافيها تهدنات .. سادة عينيها.. مشا وقف عند راسها .. كيتصنت لانفاسها المنتظمة.. عرفها نعسات.. خرج لبرا عند الفام دميناج كيشعل كارو..

نوردين: شكون جا عندها؟

جاوباتو بهدوء..

-صاحبتها .. عطاتها واحد الصاك ..كلساات معاها شوية ومشات..

دوز بيديه على شعره كيغزز سنانو.. رجع شافيها ونطق..

-تقدري تجمعي هادشي بوحدك؟

حركات راسها بالايجاب ومشات تبدا الجميع.. شاف فالساعة كانت قريبة العشرة دالليل.. خرج لبرا يكمل الكارو ديالو.. كيحس براسو كيزدح.. مزال ماتنساش عليه سيفتها كيف كانت.. بقا شحال على برا كيضرب فيه الهوا.. عاد دخل لداخل .. لقا المرا سالات مخرجة الزبل وداكشي لي جمعات على برا.. نطق بلا مايشوفيها..

-باتي هنا هاد الليلة..

جاوباتو بوخ وكمل طريق عندها لبيت.. دخل وسد الباب .. كانت باقا على نفس الوضعية.. غير الفراش طايح عليها هاد المرة.. حيد حوايجو كولهوم بقا غير بشورط.. شعل الشوفاج يدفا البيت شوية.. وتكا حداها كيتفحصها بهدوء.. جامدة.. هادئة.. لاكن وجهها بحالا زرق.. هز يديه حيدليها الشعر على وجهها.. بانو شفايفها شاحتين.. وتحت عينيها كحل.. الشوفة فيها مكتقدرش تكملها.. الشي لي خلاه يطفي الضو .. وبقا شاعل غير ضو الفيوز لي حداها خفيف.. غمض عينيه كيحس بعروق راسو كيزدحو.. ألم غريب بحال الشقيقة عمرو جاه.. ولكن فاش تفكر نهارو كيف داز معاها عطا أعذار لراسو.. استسلم النعاس بسرعة من قوة التعب.. غاص فبحر الاحلام..والكوابيس...

ساعة! جوج! تلاتة.. حتى صارو اربع ساعات.. عقارب الساعة كضرب بشوية .. كتكسر صمت الليل الرهيب.. تيك توك.. تيك توك.. رياح خفيفة .. تسللات من النافذة لعندو.. دازت فوق لحمو بشوية..حتى طلعات معاه التبوريشة.. حل عينيه بتثاقل ..جات نيشان فالسرجم.. السماء حالكة لا ضوء للقمر فيها.. رمش بعينيه عدة مرات.. كيحاول يوكض راسو..راسو مزال عاطيه الحريق..وثقيل.. تحرك بلاصتو ضار لعندها فإذا به تصدم من المنظر لي شافو ..!

كانت كالسة بعيد عليه فالارض.. ضامة رجليها ويديها لعندها.. كتشوف فالسقف بجمود .. ناض بسرعة وقف عليها.. كيتسناها تشوفيه.. ولكن مارمشات ماتململات.. تحنا لعندها شد فيديها ونطق باستغراب..

نوردين: مالك؟

حركات غير عينيها وشافت فيه.. ابتسمت بشحوب ونطقات بصوت مبحبح..شفايفها كيتلصقو مع بعض..

سعاد: طارلي النعاس.. ماخلاونيش نعس..

نوردين: (عقد حواجبو بحدة) شكون هادو؟

سعاد: (هزات يديها حطاتها على وجهو.. تحسسات لحيته بهدوء .. ابتسمت بدفئ وهمسات) انت ولد الميمة.. هي لي واقفة معاك.. غايجيك ولد غاتسميه يحيى.. وعندكوم موت قريبة فالعائلة ..

تجاهل هضرتها .. وتحنا هزها موجع من جنبو ودراعو.. حطها فوق النموسية وكلس مزير على يديه.. مكان الجرحة..

سعاد: (تخشات فالخدية ونطقات بصوت مغمغم بالبكا) بغيت نزور..

نوردين: (خنزر فيها وقال بحدة) ماعندك فين تمشي.. خاصك داواي نتي!

سعاد: (بصوت مرخي..شادة على راسها) الدوا ماغايديرلي والو.. الطبيب ماعندو مايديرلي.. مكنحملش الطبيب ..والدم.. ومكنحملكش انت وعائلتك..

نوردين: (ناض حل السرجم شعل كارو.. عارفها كدخل وتخرج فالهضرة وماواعياش) اممم.. زيدي!

سعاد: مرتك كتسحرلك..

نوردين: (بتهكم) اينا وحدة فيهوم..

سعاد: (ضارت لعندو كتهضر مرخية ولسانها ثقيل) انا عارفني وهي مكنتيش عارفها.. جابتك غير بالمجامر..

نوردين: (كمل الكارو على خاطرو..لاحو على برا .. سد السرجم ومشا تلاح حداها) كتعتارفي بلي راك سحارة!

سعاد: (حركات راسها بالايجاب) جوادي كيعاونوني فلي ضلمني.. وانت ومك وولد خالتك ضلمتوني...

نوردين: (شافيها بحدة ونطق بغضب) نعسي خلي الليلة دوز بسلام..

سعاد: (بداو دموعها يطيحو بغزارة وتزيرات.. شهقات بخفوت كتمتم بهمس) ماكرهتش!

بقا شحال كيشوفيها مافاهم والو.. وماعارف منين يشدها .. مرة ضحك .. مرة تبكي.. مرة ترخا وتهد.. مرة يرجعو فيها عشرة وتجعر.. تقلب على ضهرو وداير يديه على جبهته.. تمتم بسخط..

نوردين: مصيبة هادي!

ماجاوباتوش .. تقلبات على جنبها عطاتو بالظهر وسقلات.. بقاو شحال على نفس الوضعية.. حتى نعسات هي وهو طار النوم من عينيه.. بايت حاضيها شنو غادير.. ولكن ماتزعزعاتش من بلاصتها .. حتى صبح الحال.. وناض مع الستة دالصباح خرج..

دازت شي اربع ساعات تقريبا .. وتم راجع ومعاه حكيم وشاب باقي صغير..لابس فوقية.. حل الباب ودخل.. تصدم فاش لقاها فايقة كتفطر.. كان باين فيها العيا.. طلعها وهبطها شاف شنو لابسة .. تنهد فاش لقاها لابسة بيجامة بسروالها.. وهدا راجع للحمى الباردة لي فيها.. دخل ومعاه الدراري.. شاف فالفام دميناج لي كانت واقفة عند راسها كتمد ليها الدوا من بعد مافطرات ونطق بهدوء مراقب حركاتها..

نوردين: عاودي سخني داكشي... جاو صحابي غايفطرو معانا..

حركات راسها بالايجاب ودخلات للكوزينة بينما سعاد هزات راسها وماجات عينيها غير فعينين الراجل الغريب لي اول مرة تشوفو.. بقات حاضياهوم حتى كلسو وعينيها عليه مازعزعاتهومش..تقادات بلاصتها كتشوفيهوم.. هوما لي كيهضرو بيناتهوم مامسوقينش ليها من غير نوردين لي كانت عينو عليها كيراقبها فكل حركة وكل التفاتة.. حتى بدات تزير على يديها شوية بشوية فاش شافيها الشاب لي مع حكيم.. وبمجرد ماسلط نظراته عليها.. شهقات مزيرة.. دقات قلبها غاديين وكيتزادو.. النفس حسات بيها تحقنات فيها.. عقدات حجبانها.. وغوتات وهي كتحس براسها مكتفة.. وشي حاجة نازلة ليها على كتفها ..ماقادراش تنوض..

سعاد: طلقني!! قولهوم يحيدو من فوق كتافي.. اااااععععععععع! (شيرات عليه بموس كان فوق الطبلة كون ماحركش راسو كان غايجي فيه)

جا ينوض ليها نوردين لاكن الشاب جرو من يديه.. كيطمنو غير بعينيه..وغمزو باش يتكالما.. رجع طلع عينيه وشافيها كترعد.. باغا تنوض ولكن مكتفها.. من يديها وحتى رجليها.. غير بعينيه كان متحكم فيها كيقرا شي حاجة .. حتى بدات طلع معاه التبوريشة.. وكيحس بقلبو كيتقبط.. تزير حتى هو فاش بقات كتشوفيه ساقلة .. ابتسمت بشحوب ونطقات بمكر..

سعاد: ماغاتقدرش عليهوم.. غير فكني.. (غوتات فجأة) فكني ولا غاندمك...

ماداهاش فهضرتها .. بقا كيشوفيها حتى ماعرف كيفاش دارت .. طارت من بلاصتها وجات شانقة عليه.. كضرب وتغوت.. ماعرف باش تبلا.. حتى جرها نوردين وحكيم وهي كتنتر منهوم وتغوت.. وضارب معاهوم..

سعاد: ااااع بعااااااد مني بعااااااد.. طلااااق غانقتلو..طلاااق..

نوردين: (شادها بيديه بجوج .. حاكمها.. غوت على صاحبو) خراااج ا سماعيل.. خراااج..صافي..

جرو حكيم معاه خرجو لبرا كيماصي عنقو لي قجاتو منو.. بينما هي بقات كطيح وتنوض وتغوت .. شدها من خصرها مزيرها عندو..

نوردين: شتتت صافي رصاااي راه خرج..

سعاد: (كتبكي وتشهق) انننن... قولو يمشي.. مانشوفوش.. مايعاودش يجي معاك.. ااااه..

نوردين: (عنقها كيدوز على شعرها) صافي تهدني..

سعاد: (دموعها عمرو حوايجو) بغا يقتلني..

نوردين: (كينهج) ماغايقتلكش.. تكالماي..

سعاد: (كتنين بحال شي قطة) انننن... خنقني..!!

نوردين: ماغايعاودش يجي..

سعاد: (كتزير على حوايجو بضعف) غدا العيد..ب..بغيت نز..زور.. (كتعصر) اعععع..

نوردين: (باغي غير يبعدها شوية يشوف فوجهها مابغاتش طلق لصقات فيه..) شتتت .. غانديك تزوري!

غير سمعاتو اش قال.. طلقات منو ضاحكة.. كتشهق..

سعاد: بصح؟؟

نوردين: (كيشوف فعينيها الدامعين والحمورية لي فيهوم) امتا خاصك تمشي؟

سعاد: بعد غدا..

نوردين: (طلق منها كيمسح على وجهو) صافي غانديك..

ماعاوداتش شافت فيه.. مشات كتجري لبيت ..دازت فالمرا حداها.. ثواني وتمات خارجة بفوطة دالحمام وحوايجها.. كدوي بوحدها..

سعاد: ماخاصنيش نمشي موسخة..

خلاتهوم واقفين كيشوفو فيها بجوج .. ودخلات دوش.. بينما هو خرج لبرا لقا حكيم وصاحبهوم لاخور واقفين على برا.. غي شافو تنهد..

اسماعيل: مجهدين بزااف.. وكنضن لي ساكنينها ربانيين .. القرآن صعيب يخرجهم منها.. حيت غايجيهوم عادي.. كيتأقلمو معاه.. وفيها اكثر من واحد.. ماعرفتش بالضبط شكون لي سيفطاتو تحط على كتفي..

نوردين: (شعل كارو باش يبرد) غاتحمقني هي وجنونها..

حكيم: (طبطب على كتفو بالضحك) بدل شوية اصاحبي مولف ضارب مع الانس .. جرب الجنون..

نوردين: مشاااكيل..

حكيم: وا عليه .. نمشيو حنا ..

نوردين: بيناتنا التيلي..

جا شهر الميلود و تغير حالي و حتى واحد ماعرف مالي .. الشكوى العالي مريضة و عافوني صغيرة و لاموني .. ياك هدا حالي و هزيت كفوفي للعالي هو لي يداوي حالي ..عايشة عيشة مضيومة يا العالي و ربي مولانا ما عندي والي ما عندي تالي ليا الله و حدو الكريم العالي .. راه ما دايما ليك ما دايما ليا ..الدنيا فانية وماتبقا لا ليك ولا ليا..واشمن زهر واشمن عقوبة لاحتني ليام العوجة تسنيت أو مزال ما جاتني النوبة نضحك و ضحكتي محسوبة آش هاد الايام المزغوبة بغيت ربي ياخذ الحق فلي ضحك عليا و ماعرفش شنو بيا .. كنتسنى ربي يفاجيها عليا ما تعرف بحالي حتي تولي فمكاني نترجاك تفك حبالي ويالعالي..

شدو الطريق وهي كتردد هاد الكلمات بين شفايفها.. لابسة جلابة فالبلونكاسي مطروزة بالصم.. شال ابيض فوق راسها .. مغطية كاع الزغيبات .. مكتبان حتى شعرة..فرجليها بليغة فنفس اللون وحتى قطرة دالماكياج ما فوجهها..متكية براسها على الكرسي عاطية بوجهها للزاج.. حاضية الطريق باغا غير امتا توصل.. حتى نطق بهدوء كيطلعها ويهبطها..

نوردين: كون عطيناك قتلة دالعصا ماتلبسيش المستور بحال هكا..

سعاد: (بصوت غالب عليه التعب) غادية نزور الميمة .. كتبغي السترة..

شافيها ورجع شاف فالطريق مركز مع السوكان..عندو فضول أكثر يعرف علاياش كتهضر..نطق بهدوء..

نوردين: شكون هاد الميمة؟

سعاد: (حركات راسها غير بالمهل شافت فيه والهضرة عندها ثقيلة) لالة عيشة..

نوردين: لالة عيشة؟؟ اش تكون هادي!!

لالة عيشة ملكة بنت ملوك الجن كيختلف اسمها من دولة لدولة اخرى.. هي رهط من الجن .. كتميز بالقوة والعناد ..المشاكسة والتمرد..ولكن هي طيبة وكتحتارم لي كيحتارمها ..كتعدد اسماءها .. والجنية واحدة.. لالة عيشة مولات المرجة..لالة عيشة البحرية.. الدغوغية.. الحمدوشية.. ولكن الاغلبية كيفضلو يعيطولها بالميمة..حيت كتعامل مع صاحب الجسد كأنه ولدها ..وكتزرع فيه هاد الاحساس دالامومة..هي امرأة كبيرة فالسن .. وفية وصادقة.. ومرا معقولة.. كتوجهك ديما للمعقول .. الزواج .. الوليدات الخدمة المليحة.. عندها مقامات عديدة فالمغرب.. الجديدة..ازمور..دكالة..فسلا ..وفنواحي مكناس لي هو سيدي علي ..بخورها الجاوي والعود والخزامى والحرمل..كتحضر نهار الاتنين والخميس والجمعة .. وحالها كيكون فالجدبة العيساوية وجيلالة وحمادشة وكناوة ..كتبغي الطهارة ..التعطر ..التدين والنقا..

عطاتو الخاطر وشرحاتلو هادشي بطريقتها .. تصنت ليها مدوز الطريق بحديتها.. حتى عيات ومابقالها جهد تهضر بيه .. ترخات على الكرسي ونعسات.. زاد فالسرعة وكمل الطريق.. كيكمي كارو مور لاخور..

وصلو للمدينة للاسماعيلية جوايه العشرة دالصباح.. كانت مزالة ناعسة كأنها غايبة.. سول الناس فالطريق ..على ضريح سيدي علي.. ونظرا لشهرة الضريح فهاد الايام دالميلود لي سولو كينعت ليه..حتى وصلو ليه من بعد ماداز من 6ديال البراجات ديال الدرك الملكي.. وقفوه فاخر باراج.. الطوموبيل كانت كبيرة وعاطية للعين.. زير ليمن وهبط الزاج..

جدارمي: (كيشوف فسعاد ويشوف اللور فالطوموبيل) فين انشاءالله؟

نوردين: الموسم..

جدارمي: (تقاد فوقفتو وشيرليه بيديه) تفضل..

حرك ليه راسو ..طلع الزاج ورجع حرك الطوموبيل.. وكمل طريقه..حتى وصل لباركينغ السيارات.. سطاسيونا الطوموبيل.. حيد السمطة وقرب عندها كيفيقها.. كانت بحالا ميتة.. من فرط التعب.. حلات عينيها غير بشوية على حركة يديه فوق كتافها.. رمشات فيه شحال من مرة.. دورات عينيها فالارجاء.. كتحاول تذكر فين هي.. حتى بانلها الجو دالموسم.. عاد ملامحها استبشرت.. وتقادات بلاصتها كدوي بلهفة..

سعاد: وصلنااا...

حيدات السمطة ونزلات مصحصحة .. العيا مابقاش .. سدات الباب ومشات قدامه من بعد مانزل مباشرة من موراها تابعها كيدور راسو يمين شمال ..مستغرب من هاد الاجواء.. اول حاجة أثارت انتباهه هو الكوري ديال الكسيبة لي كاين على مساحة كبيرة فباب الموسم.. جديان وعتارس .. بقر وعجولة.. دجاح اببض واحمر.. كتشرا من تماك للناس لي جايين يدبحو.. ضارت عندو وهو مزال كيسكاني بعينيه الاجواء ونطقات بخفوت..

سعاد: خاصني الستة ديال العتارس نشريهوم.. وخاصني الحنة والشمع وما زهر..

يتبع...