محتوى القصة
_ماكاملاش حتى ساعتاين باش زار النوم عينيها، نعست على حرقة فقلبها كتاكل فيها ، شكون من غير الرايس و فعايلو ..ياما حصلاتو مع النسا و ياما شاركاتو مع ضرتها و خطبت ليه هيا بنفسها بكل فرح و سرور , لكن دوام الحال من المحال و القلب مالينا عليه شوار.. تنكر وتقول ماغارتش؟ ماشي ديالها.. ناعسة على جنبها ليسر و يديها محطوطة على صدرها كتنفس بصوت مسموع و فلحظة رن هاتفها مرة و جوج وثلاثة.. تململات من بلاصتها بحالا مبنجة مدات يديها بعيونها مغمضين بدون ماتشوف شاشة الهاتف جاوبت بصوت ثقيل باح ..
سعاد : آلووو
عادل : مدام سعاد ! ( سكت للحظة )
سعاد : ( فتحت عيونها كتأكد من رقمو ) آش عندك اعادل فالستة دالصباح ؟
عادل : كارثة امدام سعاد كارثة ! القهوة مشات ، رزقك كلاتو العافية ..
سعاد : ( ناضت طافجة قلبها غايسكت.. شدات على صدرها وغوتات ) اش كتقول؟؟ ؟ كفاش القهوة مشات ؟ كيييفااااااش
عادل : ( شاد فراسو ) العافية شبرت مع الفجر و ماعتقو غير النص فيها ...
_ترفعت لسابع سماء.. جلالة بيضة طلعات على عينيها ! كارثة طاحت فوق ذماغها ، التليفون فوذنها و الجيغون كيعاود ليها الواقعة.. كلمة لقطااتها وكلمة تسمعات بحال الطنين فوذنيها.. خارجة ب بيجامتها رامية عليها عباية و بانطوفتها خارجة طايرة بطموبيل متجهة للقهوة كتويل وتنذب.. الحال يالله كيصباح..
سعاد : آيماا الحبيييبة آش هاد الموصيييبة ( حطات راسها على الڤولون وهيا واقفة فسطوب كتكلاكصوني ) طلقوووونا الزمررر
_ماوصلت حتى نفسها ضياق ! قلبها كيضرب باغي يخرج من صدرها..الدنيا كتمشي وتجي بيها وهيا كتشوف تجمهر الناس و البومبيا و البوليس و بعض الصحافة الالكترونية مع طلوع الشمس..حطت يديها على حنكها وهي كدور عينيها على الارجاء.. فقط حطام ! كولشي كحل بالعافية و زاج مشتت حتى من الحيوط تريبو ! خواو بيها رجليها فلحظة ضعف.. غ عادل لي شد فيها كيهدنها.. وجابو لها الخدامة كرسي تگلس عليه..
_عادل : لاحول ولا قوة الا بالله ! كارثة ماكانت على البال
سعاد : ( نفسها تقطع مصدومة ) كي وقع ؟ كيييي وقع ؟
عادل : البومبيا قالو لفويت وقع فلاكويزين و غير الناس لي سمعو الطرطيق و علمو البومبيا ..
سعاد : ( بعصبية تجننت ) كفااااش فويييت ? حطاااك انت جيغووون كتاخد زبالة دالفلوس وتجي تكولي فويت ؟ خدمتتتكم هاااديك الشريف ( بلعات ريقها من خلقها لي شحف) منيييين نصلح هادشي ؟ منيييين نخرج هاد يماااهم ؟
عادل : قدر الله امدام سعاد ! و خدمتي راه ربي شاهد عليا ، وراه فيقت كونصيي ديالي معرفة من النعاس خدام فلاسورانس كنبحت ، ضروري كاين مساعدة ، مخلصين الضرائب و السيگورو وكولشي قانوني..
هو كيهضر وهي كتشوف فالقهوة ! كأن صاروخ طاح فوسطها ، كتحسب الخسائر غي بعيينيها ناضت من فوق الكرسي باغا تزيد دخل لكن البومبية منعوها حيت مزال كيطفيو داك اللهيب الخفيف..
سعاد : ( بحرقة ) لاسورانس فلوسهم يبخرو بيهم ! مسالية انا للطلوع و النزول فالمحاكم .. نبقا تابعة الضوسي مضيعة الوقت.. كتهضر على المغرب ولا شي دولة أخرى؟ لا ماخداو منك مايعطيوش.؟ المهم شوف خدمتك لي نيطتي منهم فيه البركة ! انا غادي نتصرف فالباقي..
عادل : ( تابعها لطومبيل ) مدام سعاد و البوليس ؟
سعاد : مالهم ؟
عادل : خاصنا نحررو محضر ضروري ..
سعاد : سير انت راك مسؤول على القهوة ! بيناتنا التيليفون..
_الله ينجيك من الجايات ! هادي المقولة لي كتنطبق على سعاد فهاد اللحظة، كتحس براسها كأنها فحلم.. هي والحياة والنحس ثالتهما.. ركبت سيارتها كتحاول ديماري و يديها كلها كترعد .. فمها كينطق بكلمات مامفهومينش ..سمعات صوت تليفونها.. هزات صاكها كتفتف عليه.. كانت شيماء..
شيماء : الوو سعاد … فيينك اختي.. راه شفت شي قوادة فالفايس واش بصح؟
سعاد : (رجعات راسها اللور عينيها طايحة عليهوم الضبابة) كارثة وطاحت فوق راسي..
شيماء : (بقلق) نجي عندك؟ راك بوحدك؟
سعاد : انا راجعة للدار ماقدرتش نبقا هنا حاسة براسي غانطيح..
شيماء : بشوية عليك.. حضري عقلك دبا لي طرا طرا..
_مسافة الطريق وكانت داخلة للدار كتجر رجليها.. لاحت الساروت والصاك حدا الباب وكلسات قبالة شيماء الدموع محصورين فعينيها..
سعاد: شفتي على مصيبة؟
شيماء: (قربات عندها عنقاتها) قدر الله.. قوي راسك.. اش غاديري؟
سعاد: (بعدات عليها كتماصي على عنقها .. النفس محقونة فيها) ماعرفتش ماعرفتش..
شيماء: (كطبطب على ظهرها) تكالماي..
سعاد: (جرات باكية دالگارو حشات واحد ف فمها شعلاتو ويديها كيترعدو..شافت فشيماء وهي مدمرة) ماعرفت فين كانلي هادشي. عرفتي شنو هي تحرقلي القهوة دبا؟
شيماء: بشوية بشوية عاودي قاديها..
سعاد: (ضغطات على عينيها بتعب) خاصني زبالة دالفلوس (ضربات فوق فخدها بعصب) خسرت فلوس كثيرة على الدار.. مؤخرا جبدت من الكونط دالقهوة باش كملت.. بقات شي بركة قليلة يالله تقد نخلص الخدامة وصحاب السلعة لي كيسالو.. (شافت فيها الدمعة واحلة فطرف عينيها ماباغاش تبكي) ومزال الإصلاح ديال الدار والفراش.. منين غانبدا هادشي وباش؟ مصاريف صحيحة اشيماء..
شيماء: شحال ديال الفلوس تقريبا؟
سعاد: (رجفات عينيها بضياع) مامحسوبينش .. ديكشي كثير.. (سفات من الكارو شادة فراسها) ضعت وغرقت راسي .. شنو غاندير دبا؟
شيماء: صافي تهدني.. خاصك تكالماي باش تعرفي تفكري.. بشوية عليك اسعاد.. لا بقيتي هكا دماغك ماغايتحملش.. رتاحي والا مانلقاو حل.. مكتوب الله واش تقتلي راسك؟ صافي لي طرا طرا.. الحمدالله فلتي بالدار والبقية عندها الحل.. دبا هانتي معايا واش انا مقصرة معاك فشي حاجة..؟
سعاد: (تنهدات بعمق وطفات گاروها) ماشي داكشي اشيماء كنفكر ل لي جاي.. وفراسك حتى الخدامة عاد مؤخرا كتاشفت بلي مامقادش ليهوم cnss…. يعني باش مايضيعوش كولشي غايخرج من جنبي..
شيماء: صافي اختي العواشر هادو ماتفقصيش راسك.. رتاحي شوية ..نوض نوجدليك الفطور .. كمارتك صفرا ياختي..
على طبلة الفطور مشكلة كالسة جواهر ببينوار حريري فالابيض.. شعرها فازگ طايح على كتفها.. بابتسامة عريضة كتكب اتاي ليها.. قبالتها الرايس شاعل گارو.. صدره عاري .. عاقد حجبانو كيشرب قهوته..
نوردين: امتى راجعة؟
جواهر: غالبا غدا .. المغرب مافيه مايدار فرمضان..
نوردين: نعول عليك فالبلان ديال داك خونا؟
جواهر: كون هاني غير نرجع نمشي عندو.. غالبا غايبغي.. يلقا ماحسن منا نبيعوليه السلعة؟
نوردين: (خدا نفس من سيجارته كيحك على راسو) كنفكر فشي بخوجي جديد..
جواهر: القضية عندك مزوهرة الرايس .. تزيد تغفل شوية يطيحو عليك خوتنا فالله..
نوردين: راه نزلو عليا بالضرائب .. عاد شي سيمانة جاتني اللجنة..
جواهر: بيريفيكاثيون (verification
نوردين: ييه.. (كيطفي الگارو)
جواهر: مدام جاتك الفكرة إذن المشروع فدماغك..
نوردين: أوطيل فأگادير.. شريت الأرض.. تابع الرخصة..
جواهر: بيرفيكطو.. وشنو درتي مع خوتنا ديال الدوا..
نوردين: باقيين كنبيعو ليهوم الزبل والتخت ديال الكيف.. داكشي من تحت لتحت..
جواهر: الدولة كتبيع القرد وتضحك على من شراه.. الحشيش عليه الحبس وزبلو مفيد للصحة..
نوردين: (جغم من قهوتو كيضحك) السياسة بير غريق.. (تسمع الصوني فالباب)
جواهر: حكيم وصل
ناضت كتمشا ببينوارها القصير.. فخادها عريانين وطرمتها كتململ خلاتو حاضيها ماللور ماباغيش يتشها على الصباح.. حتى تمات جاية هي وحكيم كيضحكو.. جر كرسي وگلس حداهوم..
حكيم: كتجي عند ديامانتيس كتنسا الخدمة اخاي..
نوردين: (شعل گارو وتكا على الكرسي كيضحك) كون هاني ماناسيكش.. دير معاه مع الربعة..
جواهر: شي سلعة جاية هادي؟
نوردين: هادي غادخل للمغرب..
جواهر: منين جاية؟
حكيم: (كيكب قهوة) من تركيا..
جواهر: (باستغراب) حشيش فتركيا؟
نوردين: (علا راسو كيضحك.. ساط الدخان دالگارو وشافيها) ذهب..
جواهر: (بصدمة) نوموديغاس؟ (ماتقولهاش؟)
حكيم: الخيفي مشا بعيد..
جواهر: لا هاد المرة خاصك ماشي غي مشروع باش تبيض الفلوس.. قودتيها.. (قربات عندو كضحك) صدق أخيفي؟
نوردين: (قرب عندها باسها من عنقها وبعد) اش حبات الخاطر؟
جواهر: (غمزاتو) لي حبات الخاطر..
نوردين: (طفا الكارو وجغم من قهوته) دخل السلعة نتي الأولى..
حكيم: (بمزاح) كدبانلي غايعيطلك تستف معاه الفلوس ..
جواهر: على قبل خيفي نجي ..الله اودي..
حكيم: (شاف فنوردين) واقيلة مافراسك واحد الخبار..
نوردين: (عقد حجبانو) اش تم؟
حكيم: القهوة ديال طريق الرباط تحرقات..
نوردين: (تكا على الكرسي مبتاسم) حتى هي كطير..
جواهر: شكون هادي تاني؟
حكيم: (غمزها) القهوة لي كان عاطي لسعاد…
جواهر: اووه لا بوڤري..
حكيم: ماكتابتش ليها الخاوا..
نوردين: (كيلعب بكاس القهوة لي فيديه ساهي) نشوفوها اش غادير دبا..
جواهر: (حطات يديها على فخدو) عمري شفتك شاد فخاطرك من جهة شي وحدة حتى لهاد الدرجة.. باش توصل تشفا فيها.. اذن كان خاصها تموت..
شافيها شحال ماقادرش ينفي هضرتها.. جغم من كأسه دالقهوة وناض طلع لبيت يبدل..
جواهر: (باستغراب) واش كان كيبغيها؟
حكيم: ديكشي ديالو معاها فشي شكل اختي ديالي..
جواهر: شفتو البارح كيف تغير.. غي دخلات تخربق..
حكيم: أودييي خاليني ساكت…
صوت مقدم الاخبار وهو كيعلن على ان غدا هو اول أيام رمضان من بعد مراقبة الهلال.. دخل الفرحة لكل دار.. الصغار والكبار متحمسين للصيام ويعيشو أجواء رمضان لي كتكون خاصة غي بيه.. بمجرد مكتسالي النشرة كتقلب الدار وكولها فين كيتجارا.. العيالات لكوزينة باش يوجدو الصحور .. الداراي كينقزو بالفرحة خارجين للزنقة كيغوتو.. صوت الغيطة كيتسمع فكل دار.. لكن عندها كان العكس.. جو كئيب.. قلب مكلوم.. دماغ هارب.. كالسة فوق من واحد الفوطوي كتكمي بشراهة.. سالات جوج باكيات ديال الكارو وكل مرة تعيط على وحدة أخرى.. غي ساهية وكتخمم.. ماعارفة حتى شكون كاين معاها فالدار.. مكتحس بالحركة ديال حتى شي حاجة.. بحال شي جثة هامدة خرجات منها الروح وتهنات..
أحلام: (دخلات عند شيماء لكوزينة كانت كتوجد الصحور) اختي خوفاتني .. واش نوغمال تبقا هكا نهار كولو؟
شيماء: راه ماساهلاش اختي.. تخايلي تعيشي داكشي لي عاشتو.. مصيية ورا ختها.. داكشي لي عاودتلك البارح راه غا الاختصار..
أحلام: بازلها والله..
شيماء: خليها تكالما دبا .. هادشي خاصو تفكير..
أحلام: (انا غانمشي نعس فيقيني نتصحر عنداك تنسايني)
شيماء: سيري انا أصلا غانبقا فايقة..
خرجات أحلام كتجر فرجليها شافت فالبلاصة لي كانت فيها سعاد مالقاتهاش.. عرفااتها دخلات لبيتها.. جمعات داك الطفاية لي عامرة كارو كباتها فالزبل .. وعطات لشيماء تغسلها ومشات نعسات..
طالقةً اغنية كناوية .. كالسة فالارض منها للرحبة.. البرودة طالعة مع عظامها وماحاساش.. باكية ديال الدوا شربات فيها النص.. الحل الوحيد باش طفا وتنعس حتى يصبح ويحن.. من الشوفة فعينيها تبان المعنى.. مضيومة والدمعة مغرغرة.. القلب طاب.. والخاطر تغير.. لي فيها كافيها.. العواشر كتزير لي فيه الحال.. ويزيدو حتى هموم الدنيا.. هلكوها لي مارحمو حالها ماعرفو مالها . ماعذرو ضعفها ماشافو من جهتها.. بوحدها فهاد الدنيا لا تالي لا والي.. بين يديها تصويرة ميمتها.. نزلو جوج دمعات على خدها وخيالها راح لبعيد.. لزمان كانت توسد حجر ميمتها وتبكي على حالها فاش يضياق قلبها..
واللسان ينطق مكلوم..
سعاد: حلي يدك الميمة ونعسيني على صدرك نبكي ونوح.. جرحي مفتوح ومالقيت لي يداويني.. نتي العالمة بحالي.. شحال من مرة كلتيلي بكي ابنتي.. بكي وعدي .. بكي ابنتي وعدي.. هدا حالك فالدنيا.. صبري وعدي حتى يحن ربي الحبيب.. اشمن حال يداويني دبا.. نبيع الرخيص والغالي.. هانتي تشوفي اش طرا فيا.. الزيارة ماشفعاتلي مارحموني وهالكين حالي.. العواشر وقلبي تزير.. الزمان واقف بيا فمكانو.. لي عاشرني يهجرني.. واش انا لي خايبة ولا الزمان غدار؟
غمضات عينيها كتعصر الدموع وشهقات خفاف كيخرجو من حلقها.. كتحاول تكتمهوم ولكن الرجا فالله لايكلف الله نفسا الا وسعها.. صوت ناداها من بعيد حلات عينيها.. كانت مها كالسة قبالتها.. قريبة ليها لدرجة حسات بلمساتها الحنينة فوق شعرها.. وصوتها خرج مبحوح..من حرقتها على بنتها..
السعدية: عينك مابغاو ينشفو من الدموع؟ ابنيتي والصبر ايلا لقيت شريه بالفلوس!
سعاد: (كتبكي بصوت مسموع وبحرقة) مالقيت راحة ايما.. شكيت على الحجر ماسمع ليا.. شكيت على البحر غرقني فيه.. شكيت على التراب خوا بيا.. شكون يفرجها عليا؟شكون يرحمني من غيرك يا العالي..مافرحت فحياتي.. ماسعداتني الأيام.. ماعشت لي بغيت.. ماتحققت لي حلامي.. مليت.. (كتحك على صدرها) كرهت حياتي.. الدنيا جرحاتني ولعبات بيا.. ضمراتتي.. كواتني شحال من كية..
السعدية: (كتفرك صبعانها بفقصة وحرقة) وتعذبيني معاك ابنيتي؟ راسك شاب فسن صغيرة ورفدتي هم الدنيا فوق ظهرك.. بكي الحبيبة بكي.. عدي وبكي..
سعاد: (دموع شلال والعرق هابط على جبهتها) مرضت.. مرضت.. مرضت فحياتي وركبني الهبال.. كل ليل نرغب دموعي ماينزلوش.. نبات نخمم.. بقيت بوحدي.. لا حباب لا علامن نحط راسي.. كاتمة همي فقلبي ونضحك للناس.. من كترة الهم القلب داب.. ماقديت على فراقك اميمتي والموت علينا حق..
حطات التصويرة من يديها وشدات فراسها كتبكي وتنوح .. فرغات قلبها حتى نشفو الدموع.. والنوم مازار عينيها.. شافت فبامية الدوا باقا فيها مافكراتش جوج مرات وشربات لي بقا منها.. كمية كبيرة كيشربوها لابغار يودعو الحياة وهي الموت مابغاتهاش وحتى النعاس مابغاهاش.. كتحس كولشي ضدها.. وماكاين علامن تحط الراس.. ناضت بتثاقل كتحس برجليها خاوين بحال العجينة.. حركتها ثقيلة بزاف بالمقارنة مع الاعصار لي عندها فدماغها.. كلسات على النموسية شادة فراسها بيد واليد لوخرا هازة التيليفون..
صبعانها خدامين وعقلها مرفوع.. حتى لقات راسها كتقلب على نمرتو لي محيدالها السمية.. دخل من هنا وتخرج من هنا.. طاحليها التيليفون جوج مرات وعاودات هزاتو.. قلبات مرة وجوج وتلاتة كدوز عليها ولكن باش تبرك حركتها ثقيلة.. بصعوبة باش قدرات دوز الخط.. صونا فودنيها جوج مرات وتشد الخط..
خارج من الديبو فنصاص الليل.. التبزتيز مايعرف لا عواشر لا يام الله العادية.. حرام فحرام.. حتى يعفو الله.. ركب فطموبيلتو وديمارا باغي يلحق الصحور.. من فطوره مع جواهر ماطاحت النعمة فحلقو.. حتى فلحظة زارت ذاكرته.. طيفها وخيالها لي كيستغلو لحظات الفراغ باش ينهشو فيه بحال الكلاب.. قلل السرعة حاط يديه تحت ذقنه والأخرى سايگ بيها.. تساءل على حالها..
كيف غاتكون دبا؟
صوت التيليفون قطع عليه سهوته.. ضرب يديه لجيبو .. جبدو كيشوف النمرة حتى عقد حجبانو.. كانت سميتها لي مضوية الشاشة.. شاف قدامو وبراكا على ليمن حبس اللوطو وجاوب.. مابغاش يتكلم.. حتى وصلو صوتها بنبرة خافتة.. مرتجفة.. هادئة.. خلاتو يستلغا ليها..
سعاد: عاقل نهار جيتي عندي فاش مات با؟
طفا الضو الطوموييل وتكا براسو اللور
سؤالها خلاه ينعزل لبرهة عن العالم ورجع لداك النهار كأنه عاد البارح.. نطق بخفوت..
نوردين: اش فكرك فيه؟
سعاد: (سكتات شحال حتى يسحابليه قطعات عاد وصل صوتها مخنوق) عنقتيني فيه خشيتيني فصدرك.. باقي عاقل فاش خبيتيني من كولشي؟ شوفاتك داك النهار حسسوني بالراحة.. كنت محتاجاهوم بحال دبا!
زير على الفولون بيديه.. صوتها كيشلل أفكارو.. كيفقد تركيزه.. مانطقش حتى عاود سمع صوتها من جديد..
سعاد: توحشت نضاربو ونتغاوتو.. توحشت نتخاصمو..(سكتات شوية كيتسمع غي صوت أنفاسها وهمسات) وتوحشتك!
هضرتها غي ماكاتزيد تفتح الجرح لي فقلبو من جيهتها.. فاش كيغلب الشوق والحنين الكرامة.. القلب كياخد راحتو فالهضرة.. مسح على وجهه بوجوم وتمتم بقلق..
نوردين: شربتي داك المصيبة عاود؟
سعاد: (تكات على النموسية وجمعات رجليها لعندها.. الدموع كيطيحو شلال من عينيها.. كانها لقات راحتها فالدموع هاد المرة خرج صوتها متقطع من بين شهقاتها المتتالية) برد قلبك فاش حرقتيها؟
غمض عينيه بضياع.. كيزيد يتأكد نهار على نهار أنها ماشي بحال لي دازوها.. كذوقو بلا ماتحطو فوق لسانها.. نطق باقتضاب..
نوردين: مزال..مارتاحيتش..
سعاد: (بخفوت) شنو خاصك؟
سها لبعيد.. نظرات عينيه مظلمة.. الدم مجمد فعروقه.. كيتفكر خيبته معاها.. نطق بصوت أجش..
نوردين: كنتي خاصاني نتي!
سعاد: (تنهدات بوجع) زواجنا وعلاقتنا كانو معذبيني الرايس..
نوردين: (بفضول نطق كيتسنا جوابها) ودبا رتاحيتي؟
سعاد: (علات عينيها للسقف صدرها كيطلع وينزل.. الحروف خرجات مبعثرة من حلقها) الفراق معذبني كثر..
نوردين: (كارز على لسانو بغيض) علاقتنا كانت صعيبة..
سعاد: ولكن كانت جامعانا بجوج..(زفرات انفاس سخونة.. غمضات عينيها وتكلمات) واش مكنجيش لبالك كيف كتزورني انت؟
مسح على شعره بحنق.. هو بلا شي ماحاملش هاد زخات الشوق لي كتمطر عليه مرات عديدة فنهارو..كتعذبو.. كتخليه ضايع.. تايه.. ماقادرش يتحكم فيها حتى كتغرقو.. ضرب راسو جوج مرات على الكرسي لي متكي عليه ونطق بصوت متحشرج..
نوردين: خيالك ماكرهتش نخنقو ..
سعاد: وماغاترتاحش.. ماغاتقدرش طوي الصفحة وتزيد القدام بلا بيا.. ماغاتقدرش تنساني الرايس..
سكت ماجاوبهاش.. شنو غايقول امام هاد الكم الهائل من المشاعر لي كيوصلوه على شكل ذبذبات فصوتها.. سكون الليل وهدوءه مع حروفها المبعثرة كان مخدر من نوع آخر بالنسبة ليه.. خلاه بلا هواه يغمض عينيه ويسها.. حتى سمع صوت بكاها .. كتنخصص بشوية..
نوردين: علاش كتبكي؟
سعاد: (كتنين) ضاقت بيا.. ومابغاش يجيني النعاس!
ماعرف مايدير.. امام نبرتها الباكية.. نطق بلا مايشعر..
نوردين: نجي؟
يالله نطقها تسمع صوت الاذان قريب ليه وليها.. كان الفقيه كيعلن على الإمساك عن الطعام وفهاد الحالة مابقالو فين يجي.. فقط شعللت نيران الشوق داخله.. عذباتو فهاد الليلة وخلاتو بلا ماكلة.. دوز على وجهه بتعب ونطق..
نوردين: ماتعاوديش تعيطي اسعاد..
سعاد: (داتها الرخوة دالنعاس.. نطقات بصوت متقطع) و..خ…
من بعدها طاح التيليفون من يديها مع رنة انقطاع الخط.. ديمارا اللوطو ومشا مكسيري.. حل زاج الطوموبيل دخليه شوية دالهوا عالله يرتاح ويبرد..هي نعست وهو النوم هجر عينيه!
فاقت شادة فراسها بالحريق لي عاطيها.. گلسات فوق الفراش كتعصر فعينيها من شدة الألم.. لاحت الغطا وناضت مع الوقفة شداتها الدوخة.. حسات بالدنيا كدور بيها.. حلات الباب وجرات للحمام على برا.. گلسات على ركابيها كتقيا وترد فمصارنها فطواليط.. حتى شداتها السخفة.. علات راسها كتكح عينيها خارجين.. حتى وقفات عليها شيماء..
شيماء: الله اختي مالك ؟
سعاد: (بصوت مرخي كتمسح فمها) مصارني رديتهوم..
شيماء: (شدات فيها نوضاتها لافابو تغسل) وماكليتي والو اصاحبتي.. حتى الصحور مامصحراش..
حنات على لافابو كتغسل وجهها شاداها السخفة.. ساللت تكات على الباب كتمسح بفوطة..
سعاد: لعب بيا الدوا..
شيماء: ضاعلك النهار دبا زيدي تاكلي شي حاجة قبل لاطيحي..
سعاد: (خرجات معاها كتجر رجليها) شحال الساعة؟
شيماء: العصر قربات..
سعاد: فين أحلام؟
شيماء: اليوم راه بدات السطاج لي كنت قوتلك..
سعاد: مزيان.. ندخل نبدل حالتي..
شيماء: سيري هانا نسخن ليك ماتاكلي ..
دخلات لبيتها وجهها صفر.. شافت فالارض باكية الدوا خاوية.. تزاد معاها الزايد فاش شافت الكمية لي شربات… مابقات عاقلة على والو.. لاحتها فالزبل ومشات لبسات بيجامة نقية.. وهزات تيليفونها تعيط لعادل.. مع حلاتو لقات الجوغنال دابيل فوجهها ونمرتو هي اخر مكالمة دوزاتها.. دارت يديها على فمها وشهقات..
سعاد: اويلي اش خورت عليه تاني؟؟
سهات كتفكر وتحاول ترجع الذاكرة وتحضر عقلها ولكن والو غي التشاش.. لاحت التيليفون وتكات على الناموسية بعياء.. ماكتراتش على راسها تزيد تفكر.. شنو ماكانت قاتليه بالنسبة ليها ماغايبدل والو..تنهدات ورجعاات هزات التيليفون باش تعيط لعادل حتى لقاتو كيصوني..
سعاد: (شدات الخط) وي عادل..
عادل: وجدت الشيكات امدام.. بالمبلغ لي قولتي.. باش نخلصو الخدامة وليفوغنيسوغ..
سعاد: ديال ليفوغنيسوغ جيبلي معاهوم لي فاكتير واجي عندي للدار نسنيهوم ليك.. عيانة شوية ماغانقدش نخرج..
عادل: وخ امدام الله يزيد فراحتك هانا جاي..
حطات التيليفون وناضت خرجات عند شيماء لقاتها وجدات ليها الماكلة .. گلسات كتشم فريحة الحريرة..
سعاد: الله اختي وشحال مشهية الحريرة.. طلعتي حادگة..
شيماء: (كلسات حداها) خاصني غا الراجل.. كل رمضان كنقول ندوزو فدار راجلي وهانتي كتشوفي بحالا طاليين عليا الخرا..
سعاد: هههه.. ضحكتيني الله يعطيك الخير..
شيماء: ايوا الحمدالله لي ضحكتي.. البارح كنت كنقول دبا تنتاحري.. دخلتي فاكتآب الساطة خلعتيني عليك..
سعاد: (بدات تاكل كتنهد) ايوا ياختي اش ندير.. ماشفتيش المصايب لي طايحة فوق راسي..
شيماء: دبا كولشي يتحل..
سعاد: ماعرفتش كيفاش غاتحل.. ولكن غاتقود عليا بالبيان..
شيماء: (ناضت) ماتفكريش بسلبية.. يكون خير.. نمشي نشوف حريرتي..
مشات وخلاتها تكمل ماكلتها.. كلات حتى شبعات وناضت جابت جميع أنواع الدوا دالراس لي كاين فالدار شرباتهوم.. ومشات تكات على ما جا عادل.. هاز فيديه شلا وراق وشلا ملفات.. مشاو كلسو فالصالون.. كتراجع معاه الحساب لي دار.. وسناتليه الشيكات ديال التعويض لگاع الخدامة.. من الفام دميناح حتى لشاف كويزينيي مانسات حتى حد..
سعاد: (حطات الستيلو كتنهد) شحال باقي فالكونط ؟ جبتي ليغولڤي؟
عادل: (بأسف) شي حاجة قليلة أ مدام..
سعاد: (بأسى) والقهوة مابقا فيها مايتعتق ياك؟
عادل: خاص فلوس صحيحة ديال بصح..
سعاد: (خدات نفس عميق ونطقات باستياء) اذن نساها وصافي..
عادل: قدر الله.. ربي يعوضك..
سعاد: (زفرات بضيق) غانحتاج الفلوس فأقرب وقت.. كنفكر نبيع الطوموبيل..نلقا ليها الشاري زعما؟
عادل: صعيييب.. حتى حد مايقدر يزعم على داك الحديدة امدام..
سعاد: وايلا طيحت لها التمن؟
عادل: شحال گاع جهدك طيحي؟
سعاد: نخليها ب 200 مليون؟؟
عادل: (فتح فمو بدهشة) غاتكركبيها بهاد المعنى!
سعاد: غي دفع.. شوفلي الشاري وبحلاوتك.. وشوفلي حتى شي وحدة عادية.. جهد داك 20 مليون باش نتحرك..
عادل: (جمع وراقو) صافي ا مدام حسبي شغلك تقضا.. خليتلك الراحة..
سعاد: بسلامة..
سرحات معاه مشا ودخلات عند شيماء لكوزينة..
شيماء: كاين شي جديد؟
سعاد: خلصنا الخدامة.. وجمعنا وطوينا.. غانبيع داك البرويطة باش نفك مشاكيلي..
شيماء: وشنو غاديري من بعد..؟
سعاد: (تكات على البوطاجي كتفكر) فنظرك انا عاد عندي القلالات نبدا من الزيرو؟
شيماء: (باستغراب) المعنى؟
سعاد: المعنى واضح اشيماء.. يدوز رمضان ويكون خير..
رمضان دغيا كيطير سعدات لي صامو بقوامو.. هاد الشهر كان بالنسبة ليها فرصة فين تگلس مع راسها.. تفكر فلي جاي.. شنو غادير وكيفاش غاتواجه الحياة..ولهات راسها حتى بتفراش الڤيلا والإصلاح باش نقصات الشوية التفكير فالذي مضى والبكاء على الاطلال..
خارجة ورا العصر من الدار لابسة غي پيجامة جديدة صيفية كانت شراتها للعيد.. ركبات فطوموبيلتها وكسيرات لدار نجاة.. فطريقها دوزات الخط لشيماء..
سعاد: فين أ فرطوطو ؟ العيد واقيلة سالا ماسخيتيش بكازا؟
شيماء: ختي شكون يسخا من موالين الدار؟ نتي صافا؟
سعاد: صافا.. لقيتيني غادية عند نجاة..
شيماء: تباتي عندها؟
سعاد: لا.. راه قاتلك غادير الختانة لربيبها وغانديها عند مولات الگاطو..
شيماء: هههه اويلي استغفرالله .. الولد قرب يتزوج وهوما عاد غايختنوه..
سعاد: ههه.. اختي قالك عاد عندو تلت سنين ونص.. (هبطات الزاج فاش جات طوموبيلا قبالتها) اححح التيتيز اختي..
شيماء: شكون ؟
سعاد: واحد مول البورش كيصيد فيا…
شيماء: ههه واسيري الله يعفو عليك.. قطعي تانتعايطو بالليل..
سعاد: سيري تلاحي..
حطات التيلي وضارت عندو ضحكات.. كتهضر فنفسها..
سعاد: الله ياربي علاش تعذبني هكا وتجيبلي الزين لقبالتي..
زاد هبط الزاج مول البورش وغمزها..
-شعاندك الزاين؟
سعاد: عندي الله أخاي.. تزعطت اش ندير؟
جابتليه الضحكة .. شد على فمو مرجع راسو اللور..
-شبار .. شبار ليمن نهضرو..
ماجاوباتوش.. ضحكات معاه كتشالي بشعرها ووقفات جنب الطريق كتسناه يهبط عندها.. تكات على الكرسي حاضياه .. اشمنك يا طولة اشمنك يا تجريدة.. الكتاف عراض.. وسنينات مستفين.. وقف عند الزاج ومد يدو سلم دوخها العطر لي داير.. ودغيا ضربات على ساعتو لي ساوية الملايين..
-شني اسمك الغزالة؟
سعاد: (رققات صوتها كتهضر معاه بالطانجاوية) اسمي سعاد.. ونتينا؟
-محاماد..
طلقاتها بضحكة كتقهقه ونطقات..
سعاد: لي طلاقيتو كيقولي محاماد..
محمد: (ضحك حتى تكمشو ليه عينيه زير على يديها كيشوفها خارجة غي ب بيجامة) فاين ماشا تساخار ولا؟
سعاد: وي غادية غي نتسخر..
محمد: نعملو قهوة؟
سعاد: (بابتسامة صفراء) قيد النمرة..
دغيا جبد التيلي قيدها صونا عليها حتى تاكد بلي كتصوني عاد مشا.. حركات اللوطو كضحك..
سعاد: قالك نعملو قهوة! فتخناك بكري.. قول بعدا نتعشاو بجوج.. نقصرو بجوج.. واش كاينة شي وحدة طفراتو بالجليس فالقهاوي.. اححح مي بوگوص ولد القحـ •ـبة.. علاش اسيدي ربي خلقتيني كنعشق الزين علاش..
زادت فالموسيقى كتشطح دغيا طلع ليها المورال بهاد الزلالة.. حسات براسها توحشات هاد الأجواء.. رجعات لمود الحياة..
وصلات عند نجاة ماطلعاتش لعندها تسناتها هي نزلات مگودة ربيبها وبنتها كيدابزو بجوج..
خشاتهوم اللور وطلعات قدامها..
سعاد: اوووف من الأولاد اوووف..
سعاد: (كضحك) عاوديها لكرك لي نايضة تحملي دبا..
نقزات بنتها ماللور..
-خالتو ماتخصريش الهضرة..حشومة..
سعاد: ههه ا سكتي يعطيك الجدام..
نجاة: (يديها فوق راسها) هلكوني لا هي لا هاد الكوعليط..
سعاد: (كتشوفيه من المراية .. شاد لعبة كيغني) اويلي الولد قراب يشد الميكرو ونتي عاد غاتختنيه..
نجاة: ايوا باه غفل عليه ومو راها مزوجة مع السي كر ها شكون غايديها فهاد الدري..
سعاد: خرا ماعرفت لاش كيولدوهوم منين غايطلقو..
نجاة: ايوا الحياة بنت الكـ •ـلب..
سعاد: ارجعتي خاصرة الشعيبية .. صافي عاشرتي البزنازة تهوشرتي..
نجاة: ههه غي سكتي وصافي..فين هاد مولات الحلوة..
سعاد: هاحنا وصلنا نزلي ونزلي داك المعيز ديالك..
نزلو كيضحكو.. دخلو عند مولات الحلوة كيختارو الشكالات.. هادي زينة هادي خايبة.. بغيت داللوز.. بغيت دكاوكاو.. حتى داخت سعاد معاها ومع ولادها لي كلها وفين كينقز.. خلاتها محاربة معاهوم وخرجات يضرب فيها الهوا.. حتى صونا تيليفونها و وقفات مسمرة فباب المحل.. شحال كتأكد من النمرة.. رمضان كولها وهي كتعيط كتلقاه طافي.. ودبا يالله شعل..خرجات لبرا مبعدة على نجاة.. وشدات الخط..قلبها كيضرب.. والارتباك خدا منها حقو..
سعاد: آلوو..
وقفات فباب البار.. واحلة بين انها تخطي خطوة للأمام ولا ترجع منين جات.. فالاخير تشجعات ودخلات مسلطة نظراتها على كاع الطبالي.. لابسة سروال جينز مقطع.. وبيل سميطات فالابيض مع صبادري بيضة.. ماكياج عادي.. شعرها مجموع كودشوڤال.. زيرات على الصاك لي هازة بين يديها بمجرد ماشافتو.. ابتسامة صفراء زينات وجهها فاش شيرليها بجوج صباع .. تقدمات عندو بخطوات واثقة.. داك الارتباك والتوتر لي كان فيها مابقا عندو معنى دبا.. ثواني وصلات عندو من بعد ماتخطات كاع السكايرية .. فكلسة vip مدات يديها باش تسلم عليه.. حط كاس دالشراب لي كان بين يديه و وقف كيطلع فيها ويهبط بنظرة متفحصة.. النظرة لي كيديرها أي ذكر ايلا وقفات حداه امرأة كتفيض بالانوثة.. مد يديه هو الاخر..ضحك حتى بانو سنانو فاش قاص ملمسها الناعم.. وهي الأخرى توسعات ابتسامتها وطلقات الحروف تخرج من حلقها.. ناعمة و رقيقة..
سعاد: السي حميد!
حميد: (طبطب على يديها وجرها باش تگلس حداه) تفضلي لالة سعاد..
گلسات قريبة ليه.. حطات صاكها فوق الفوطوي .. دارت رجل على رجل بينما هو تكا بيديه واخد راحته فتفحصها شبر بشبر.. نظراته كتزداد إعجاب فكل ثانية طلع فيها وهبط.. شير لسيرفور جا عندها طلبات موخيتو ألاباز دالفودكا وشعلات گارو..
حميد: (هز كاسو شرب منو ونطق بصوت رخيم) مدة ماشفناك! اش فكرك فينا؟ فاش لقيت ليزابيل ديالك شدني الفضول ..
سعاد: (تسنات حتى حط ليها السيرڤور لي وقف عند راسها الكاس باش دوز الشحفة دالگارو ونطقات) البلان باين السي حميد.. بغيت نرجع للخدمة معاك!
شرب من كاسو ورجع تكا على الفوطوي كيشوفيها بتمعن..
حميد: الطلاق من الرايس ماسلككش؟
كانت عارفة طلاقها من الرايس غاتلقاه فبزاف دالفام.. وموجدة راسها باش تسرط بحال هاد الهضرة.. خدات نفس عميق من سيجارتها وقالت ببرود..
سعاد: الحياة مافيهاش غي الرايس.. هداك صفحة وطويتها السي حميد.. دبا كاينة سعاد.. وسعاد راك شفتي خدمتها..
طول فيها الشوفة .. مأخود بنظرة الثقة لي مرسومة فعينيها.. ومدام جاتو نيشان قرر حتى هو يهضر بلا مراوغة.. حتى هو انسان كيشري الهضرة بالفلوس.. وماعندوش وقت لدي وجيب.. تقاد فجلسته.. هز كاسو شرب منو جوج مرات وشافيها.. عينيه كيغليو على كل إنش من جسدها.. حتى خلات يديه تمادا وحطها براحة على فخدها.. نطق بهدوء..
حميد: شنو لي غايخليني نخدمك معايا دبا!
سكتات ماجاوباتوش.. هضرته كانت عارفاها فين غاتوصل.. فضلات الصمت وانها تكمل گاروها فهدوء حتى يزيد يفرج على الجمل والحروف لي باقيين واحلين فحلقو.. طبطب على فخدها وكمل كلامه..
حميد: شحال هادي كنتي كدوزي بسمية الرايس وعلى وجهه.. وحتى حنا كنا دايرين ليك القيمة حيت محزمة بيه! ودبا؟
سرطات ريقها وطفات الگارو .. هزات كاسها شربات منو وخلاتو فيديها كدوز على جنابو بهدوء..
سعاد: ماللخر السي حميد!
حميد: كلامي واضح الالة سعاد.. عطيني نعطيك..
بعد عليها شوية شعل گارو وتكا من ثاني كيشوف فيها .. بحالا كيتنشوا بشوفتها.. كيتسناها تهضر.. حطات كاسها وابتسمت..نطقات ببرود دايرة حد لهاد الگلسة..
سعاد: غانمشي دبا.. بونصواغي..
حميد: (بعد رجليه مخليلها منين دوز) نمرتي غاتبقا شاعلة .. كنتسنا اتصالك الغزالة..
خرجات من تماك بعجالة.. كان خاصها غي فوقاش تشم الهوا د ربي.. ركبات فطوموبيلتها وديمارات نيشان للدار.. هضرته كدور فراسها وتلعب بحال الفار.. دخلات للدار مهدودة.. تجردات من ملابسها فالبيت ودخلات للحمام.. الما البارد هو الوحيد لي قادر يطفي نارها فهاد اللحظة .. وهي تحت الرشاشة… مغمضة عينيها كتستعرض شريط حياتها.. فين داتها الدنيا ومنين جابتها.. كلام حميد مزال كيتردد فوذنيها بحال الطنين.. كانت عارفة ماشي ساهل ترجع كيف كانت..
الفلوس .. القيمة.. المكانة.. كيتخادو بالريق الناشف.. حلات عينيها على ذكرى زارتها من الزمن القريب.. فاش شاف فعينيها بكل قسوة ونطق بكل ثقة..
"كوني متأكدة غير غاتخرجي من باب هاد الدار.. جناحك غايتهرسو"
باقا عاقلة كيفاش واجهاتو فديك اللحظة بتحدي وكبرياء كانت كتخفي بيهوم ارتباكها وعدم رضاها..
رجعات غمضات عينيها وهضرتو لي قاليها من بعد كتحفر فذاكرتها بعنف..
" غاتكتاشفي من بعد بلي انا عجنتك على يدي.. غاتهضري بلساني.. وغاتحركي كيما كنت باغيك انا.. داك الساعات غاتعرفي بلي تاحد ماكان دايرلك قيمة من غير الرايس.. ايلا كنتي حاسبة هاد الزواج حبس غاتزيدي تكتاشفي بلي فعلا كان حبس.. بلا هواك دخلتي ليه وغاتخرجي ونتي باقا فيه.. غاتحسي براسك مربوطة.. وداك التاج دالعناد وقصوحية الراس لي حاطاه على راسك.. غايطيح للارض ويتهرس.. "
هاد الهضرة لي خرجات من فم الرايس بثقة عالية وكبرياء.. فداك اللحظة ماعارتها حتى اهتمام.. ولكن دبا وهي كترجعها كذكرى قاتلة من ذكرياتها معاه.. أطبقت على أنفاسها بدون رحمة.. حسات براسها فعلا مقيدة.. كتعوم فمواج عاتية لوحدها.. يا تغراق.. يا تقلب على شي قشة وتوصل لبر الأمان..
طفات الرشاشة وهزات فوطة لواتها عليها.. خرجات بشعرها كيقطر على كتافها.. تقابلات مع الشرجم شعلات گارو ساهية ففراغ الوحدة القاتل.. ولثاني مرة كتفكر واش تزيد للقدام ولا ترجع خطوة للوراء.. حتى عاودات زارتها ذكرى من نفس داك الليلة..
فاش سولها واش الفراق مع الرايس غايريحك.. كان جوابها ديبلوماسي
"واش ايلا قلت اه غاتخليني نمشي؟" سؤالها لي كان خلاه يرد بحدة.. "فين غاتمشي؟ غاترجعي للتقحبين والطريق الكحلة" جوابها من بعد ذالك كان باستنفار.. خرجات فيه عينيها وقالت ساخطة
"قبل مانعرفك ماكنتش فداك الطريق باش نرجع ليها"
تبسمات بسخرية فاش رجعات بيها الذاكرة للحاضر.. الگارو سالا وحتى الجهد باش تزيد تفكر تسالا.. تنهدات بببرود.. لاحت داك البونتة ومشات هزات تيليفونها.. دوزات نمرة حميد.. دارت التيلي فوذنها كتصنت للرنات. حتى جا صوته مباشرة من بعدها..
حميد: لي كيعجبني فيك الالة سعاد هو انك ماكاتفكريش بزاف فالحاجة ايلا كانت باينة و واضحة..
سعاد: (ابتسمت بسخرية.. ونطقات بهدوء) امتى نبدا الخدمة!
حميد: من غدا.. هاد المرة تسناي اتصالي..
نزلات التيليفون من وذنيها فاش تقطع الخط.. لاحتو على الفراش ولاحت معاه حتى راسها المشوش .. وتفكيرها الزايد لي مابقا غايفيد فوالو دبا .. ومشات تبدل حوايجها..
_من داخل دار نجاة لي لابسة قفطان و محزمة بفواطة كتوجد الصواني ديال اتاي و البلاطوبات دالحلوة معاوناها الخدامة ، صالون فيه النسا من عائلة حكيم ونجاة و الدراري كيلعبو مجموعين فالسيجور.. ولد حكيم لابس قشابة بالبلغة و طربوش اخضر ماسايق خبار لشنو كيتسناه.. خرجات لبالكون مبعدة على الصداع وهزات تيليفونها تعيط..
نجاة : الو سعاد تعطلتوو !
سعاد : ( كتنهد) هاحنا فالطريق البنت مع شيماء، مصاب غير لقاك ختنتو داك البعلوك ماقادة على صداع البز
نجاة : اوا تحضرو ليه معايا اختي..
كتصوگ و بجنبها شيماء وجهها محشي فالتلفون ، لابيسن جلالب الحطرة مزوقين باالعقيق و سعاد طالقة السالف جايين ناشطين بالماسق حتى وصلو عند نجاة ، نزلو هازين صيكانهم و الروايح تابعاهم ، دخلو كيسلمو دارو الصواب و جلسو مع الناس مامسوقيش لا تظرتهم لا للكلامهم ، مع تقديم الضيافة .. تسمع صوت الرجال من الخارج و حكيم شاد فولدو مدخلو البيت لاخر و شيماء كطل حتى رجعت بخطفة
شيماء : الرايس اسعاد
سعاد : ( قلبت عيونها بعدم هتمام ) واش اندير ليه ؟ نوض نبوسو ؟
تقادات فالجلسة اكثر، طالقة زينها و سالفها و عينيها المكحلين بداو كايهربو للباب كل خطرة فنفس الوقت مثقلة راسها و باغا تمنع نفسها من انها تشغل بالها بيه..
دخل الحجام مع الباب و خداوه للبيت فين كاين الدراري .. نجاة كانت مشغولة و مفتونة و حكيم بالو مع ولدو لداخل اما الرايس دخل لداخل باش يشدو مع الحجام و يقادوليه .. تا داز وقت قصير و خرجو لبرا، صوت بكا الولد كان كايتسمع، نجاة دخلات مزروبة تشوف حاله و حكيم تا هو كان مشطون عليه، اما الرايس مشا مع السيد تا لتحت تفاهم معاه و مشا، غير مشا رجع فحالو لفوق، وصل للبيت فين طهرو الولد و هو يلمح سالفها من البعيد .. وقفتها و ديك الجلابة كانت تقريبا لاصقة عليها من اللور عابراها .. الصندالة عالية فرجيلاتها البويوضين ، بشوفتها حواجبه تعقدو و تشركو.. قلب الدورة ودخل للصالون فين كاينين الرجال.. بداو الطلبة يقراو القرآن والبقية قطعو الزي كيتصنتو وحتى فصالون العيالات نقصو صوتهوم احتراما للقرآن لي بدا يتقرا..تحط العشا من بعدها .. ضايفو الناس احسن ضيافة.. ديكشي متول ماخلاو للفام علاياش تهضر..
طول الوقت وهي فبلاصتها.. مجمعة مع شيماء.. حتى حسات براسها تقطعات .. استغلت الفرصة ديال الناس مزالين كياكلو الديسير وسلتات طلعات للسطح.. جبدات كارو من صاكها شعلاتو وبدات تكمي.. حتى صونا تيليفونها بنمرة حميد.. جاوبات ..
سعاد: وي حميد..
حميد: غدا انشاءالله .. كاينة واحد السخيرة.. ومولاها مزوب..
سعاد: فطنجة ولا على برا؟
حميد: غاتمشي لتطوان.. وكالعادة غاتهزيها من الديبو ديال الغابة..
سعاد: (خدات نفس من سيجارتها وساطتو للسما) وخ.. والطريق؟
حميد: (ضحك بصوت رخيم) مامشرياش الغزالة.. هاد المرة نتي وشطارتك..
سعاد: (حكات جبهتها بارتباك) صافي كون هاني..
يالله جات تقطع سمعات صوته..
حميد: فالليل عاملين قصارة فالفيلا ديالي.. شي صحابي جايين من كازا.. فرصة باش تعرف عليهوم حتى هوما صحاب الحرفة يقدرو يحتاجوك..
سعاد: (طفاات الكارو فوق السور) اوكي نجي..
قطعات الخط هاد المرة قبل مايزيد ينطق شي حرف.. وشعلات كارو اخر حيت واحد ماكافيش..
طلع للسطح كيقلب عليها بعينيه.. شافها منين دازت من حدا الصالون لي كالس فيه.. كان كيحسابليه مشات فحالها.. تبعها لبرا مابانتش ليه.. حتى حبس وليد صغير سولو عليها قالو طلعات من هنا.. ماتدرددش فانه يتبعها..وقف فباب السطح كيبانلو خيالها.. وشعلة دالكارو لي كان فيديها.. قرب منها بخطوات ثقال حتى وقف مباشرة من وراها..عينيه على خصلات شعرها الفحمية. .. رائحتها تسللات لجيوبه الانفية بعمق و سخاء تا تغلغلات داخل رئتيه بحال المسك .. كرز على فكه بضروسه، عض عليهم بعنف من المشاعر اللي كايحسهم باغيين يحكموه ليها!
الشوق!
مشتاق يشدها و يضمها و يزيير عليها، مشتاق يخشيها وسط من ضلوعه و يحس بكل حركة منها و كل آه تخرج من فمها، كل نفس كايطلع و ينزل بصدرها و يديها بغا يحسهم تا هو مزيرين عليه، بغا يحس بطراوة جسدها متضادة مع طراوة جسده.. بغا يخشيها فيه.. يشم ريحتها عن قرب..
غمض عينيه بعمق منتشي من إحساسه فهاد اللحضة، مجرد تخيل انها بين يديه مخشية، الفكرة خلاته يهز يده ناوي يشد فيها و لكن فلحضة، تحكمات فيه قوته ، جبروته و كبرياءه ورجع يديه لعندو.. حتى سمع صوتها لي انساب مع وذنيه برقة وخفوت..
سعاد: رجليك مابقالك عليهوم حكام الرايس! (ابتسمت بسخرية) تلقاك دبا ماكرهتيش تهرسهوم حيت طلعوك بلا هواك لعندي.. (طفات الكارو وضارت عندو تكات على الصور وكملات كلامها بهدوء) توحشتيني؟
مكانش قادر يشوف ملامحها مزيان.. ولكن وجهها استاعد بشاشتو.. توقف بيه الزمان لعدة ثواني كايجلدها بسياط نظراته المتفحصة. كل ماكايغيب مدة ويشوفها كيلقاها تزدت جاذبية وأنوثة.. جمالها مهلك لقلبه المجروح.. حتى من صوتها كانت باينة عليه مرتاح.. الشي لي استفزو و تكلم ببحة صوته الهادئة..
نوردين: ماكونتيش هكا اخر مرة عيطتي فيها؟ (خشا يديه فجيابو وتبسم باستفزاز) لي سمعك داك النهار كتهضري مايقولش هيا هادي ديال دبا!
تبسمات برقة .. طولات الشوفة فيه باغا تشبع من شوفته، كانت جوعانة لهاد كمية الرجولة لمهيمنة اللي مقابلة معاها .. كانت عطشانة و باغاه يرويها غير بنظرة و لكن فنفس الوقت فداخلها باغا تطرد هاد الاحاسيس فخطرة.. تبسمات بهداوة .. الفضول كان قاتلها من داخل..
سعاد: ماعقلت على والو.. شنو قوتلك..
تبسم هو بدوره وقربلها ببطئ تا وحل الريق فحلقها، مابقات كتفصل بيناتهوم سوى بضع سنتيميترات.. كانت قادرة تحس بحرارة جسده.. قرب بشفايفه حدا ودنيها حتى غمضات عينيها والسخونية سرات فكامل جسدها.. قربه أطبق على أنفاسها وشلل أطرافها .. حسات بسخونية أنفاسه على بشرتها.. وهمس بنبرة مبحوحة ..
نوردين: توحشتك!
علات فيه عينيها حتى طلاقات مع داك الكثلة من الظلام داخل جفونه.. حس بانتفاضة جسدها وكمل كلمته لي خلاها معلقة حتى ضنت انه قالهاليها.. نطق بتهكم..
نوردين: هادشي لي قولتي فاش عيطتي..
صرطات ريقها بالزز .. عضات شفتها السفلية امام نظراته المتبعينها و نطقات بخفوت..
سعاد: وشنو قلت اخور؟
صوتها الهادى ونبرتها الهامسة.. كانت وباقا كتعصف بقلبه دون رحمة! كتخليه يتذوق كؤوس من الانوثة وفناجين من الدمار!
هز يديه كيتلمس خصلة من خصلات شعرها الهابطين براحة على وجهها.. عينيها مابغاتش تنزلهوم من عليه.. مصرة تجيب أخرته.. عقد حواجبه وتمتم بصوت أجش..
نوردين: قلتي بزاف .. هادشي لي عقلت عليه.. (هبط بصبعان يديه كيتحسس خدها الساخن وكمل كلامه) شنو دبا عقلتي؟
سعاد: (باقا كتشوفيه بعينيها الامعين.. حطات يديها على صرده طمعا انها دير مسافة بينها وبينو لاكن غي مازادت بعثات القشعريرة لاطرافه.. نطقات ببرود..
سعاد: ماعاقلة على والو.. مي يمكن نكون بصح كنت موحشاك فداك اللحظة..
كأنه كان خاصو غير يسمع هاد الهضرة باش يزيد يتوضر.. حط صبعو على شفايفها كيضغط بهدوء.. باغيها تزيد تهضر.. تتخرج شنو عندها لداخل.. لعل كلمة منها تبردو.. طفي النار لي شاعلة لداخل.. تكلم بصوت خشن..
نور الدين: هي كيجيو شي وقات كتوحش الرايس؟
سعاد: (عضات شفتها السفلية بقوة وتمتمات) اممم..
نوردين: (جرها ليه حتى لصقات فيه بجسدها..وهمس حدا وجهها) اممم شنو؟
كمية الهواء لي كتحسها داخلة كانت مخلطة بانفاسه.. الحرارة زحفات على جلدها.. خرج صوتها بصعوبة من حلقها..كانها كتعتارف بشي ذنب دايراه..
سعاد: شي مرات كنتوحش تكون معايا.. انت بوحدك ماشي شي حد غيرك..
تلذذ بالجملة الأخيرة لي خرجات من حلقها حد الانتشاء.. داك السواد لي فعينيه ارتجف .. والضياع بدا يترسم على صفحة وجهه..كملات كلامها بهدوء..
سعاد: عارفاك حتى انت كتوحشني.. ولكن مزال هاز فقلبك من جيهتي.. وغاتبقا ديما هكا.. معذب ومعذبني معاك..
نوردين: (بحدة) شكون السباب فهادشي ؟ نتي لي طلعتي موسخة..
السم مجددا كيتقطر من فمو.. غمضات عينيها ببرود ونطقات..
سعاد: ماغدرتكش وانت عارف هادشي! (حلات عينيها وكملات بقوة) شحال من مرة خاصني نشرحلك؟ كنت نافراك داك الساعات.. كانت أمنيتي داك الساعات نطلق منك.. نعيش بعيدة عليك! علاقتنا كانت بحال الحبس.. وانت كنتي حاس بهادشي.. كان صعيب عليا نتقبلك.. مادوزتيش عليا قليل الرايس.. هلكتيني فصحتي.. وفنفسيتي وشحال من مرة جيتك فاص وقولتهالك.. انا ماكنتش معتارفة بداك الزواج.. داكشي طرا فاش كان قلبي بارد وكحل من جيهتك..
مع كل كلمة قالتها ملامحه كانو كيلينو شوية بشوية.. هادشي كولو عارفو.. ولكن رجولته كتوقف قدام عقله وقلبه.. ابدا واش يرضى لراسو يسمح لوحدة خانتو وغدرات بيه.. خدا نفس عميق ونطق..
نوردين: ودبا؟
حققات فعينيه بصعوبة وهمسات..
سعاد: مال لعندك وياريتو بقا كحل..
شي مرات حتى الاعتراف ولو بكلمات بسيطة ماكايقدرش يضمد الجراح.. وجرح الرايس عميق.. كيخليه يسهر الليالي .. يطير نعاسو ويتبعو فنهارو بحال شي كابوس.. بقا مدة ساهي فعينيها .. يديه كتمر على وجهها بدفئ.. حط جبهتو على جبهتها بحالا صعقو شي تيار كهربائي.. ذرات الحرارة لي فذاتها شوطوه.. زير على دراعها بقبضة يديه ونطق بصوت مبحوح..
نوردين: صعيب نساهالك ..
سعاد: (زفرات انفاس حارة حدا فمو) حيت انت ماباغيش تنسا.. وماقادرش تنساني.. وماقادرش تعتارف..
كلامها كيزيد يعذبو.. كتقيسلو الجرحة وتلعب فيها.. سكت ماجاوبهاش.. حتى لامسات أنفاسها الحارة رقبته.. وعاود وصلو صوتها كتحطم ما تبقى من ذرات الكتمان..
سعاد: ماقادرش تعتارف بلي أنا معششة ليك هنا (حطات يديها على قلبه وقربات منو حتى لامسات شفايفه.. تابعات بهمس) هادشي بديت كنحس بيه بزاف قبل مانتفارقو.. تخبيه على كولشي الا عليا الرايس!
حط يديه على يديها لي فوق قلبو.. نزلها لتحت وبقا شادها مزير عليها.. تطق بغيض..
نوردين: و ما كاتستاهليش تبقاي تما..
تراجع للوراء .. عطاها بالظهر ومشا .. تنهدات بعمق حاضية خيالو فين غادي.. حتى نزل عاد شعلات كارو اخر كتنشوا بيه.. بينها وبين راسها فرحانة بداك الاعصار لي مخلية عندو لداخل..!
الطريق كلها للديبو كان ونيسها هو الموسيقى وباكية الكارو , لابسة جلابة صيفية مگفضاها..الفخيضات بويض باينين ، مركزة فالطريق وكتحسب الكيلومترات ! ذرة خوف ماعندهاش ، اش تخسر اكثر من داكشي لي خسرت ؟ فايام الرايس جربت الخدمة و ذاقت الكرمومة الصحيحة و مستعدة تغامر بجميع وراقها فهاد التبزنيزة.. اهم شيء تعاود توقف على رجليها ، بعد مسافة وصلت للديبو! مانزلت ماتكلمت كولها عارف خدمتو ، تحل الكوفر و تحطت السلعة طبطات على الطوموبيل بجوج ضربات و اشارت للخدام براسها وركبات وعطاتو سينيال خارجة من الكاراج .... نفس المسافة قاطعاها مرة مرة ضرب كاروو وفوق ما تقرب لشي برااج كتسوط بتهيدة و تعض فشفايفها ما كترجع ليها النفس حتى كتشوف ايد الجدرامي كيعطيها إذن المرور.. باش تزيد..
سعاد : اياااه اخاي يزيد ليااا فعمرك نزييد علاش مانزيدش..
بعد ساعات تمت المهمة بنجاح ، السلعة وصلات للكليان.. فلوس حميد خداتهوم مع فلوس تدويرتها بوحديتها.. قلبات الدورة راجعة فحالها لطنجة، عاد تتفست فخاطرها بعدما وصلت اول حاجة دارتها هيا حطت الفلوس فالبانكة ...
سعاد : ( تلفون فوذنيها كتشوف فالمرايا ديال الطوموبيل ) آشيخة ! فينك ؟
شيماء : فالدار اصاحبتي فين نكون ؟ كنتسنا أحلام تخرج من السطاج نخرجو لموول..
سعاد : سمعي شمن مول ليلة عندنا جلسة مع حميد مع شي اصحابو بزنازة صحاح .. وجدي راسك تمشي معايا.. بوحدك ..
شيماء : ( بفرح ) اوا اختي آتينا !
سعاد : القلاوي ماشي نآتيك ، نوضي ضربي شي حطة و شوية ندوز عندك فالليل ضربي على راسك مي سيلتوبلي شيماء هادشي يبقا بيناتنا.. الناس مشخصين..
شيماء : مشاات اسعاد كوني هانية ! دبا نايضة اجي فين بعدا ؟ لا نمشيو نخرجو فالرايس ؟
سعاد : ( بطعم صدأ فمها ) يعاودها لكروو هداك ! طلق راسك .. هانا جايا..
وصلت لدارها داخلة من الباب حيدت صندلتها و جلست كتكمد فصبيعات رجليها ! اتجهت لبيتها نصلت الجلابة وفتحات البلاكار تشوف شنو تلبس.. كتختار غي بعينيها ونفس الوقت كتناسق الصاك و الصندالة ..
سعاد : (تنهدات بحيرة) ايوا ندوش و يكون خير..
دقائق قليلة وكانت خارجة من الدوش كتنشف شعرها .. هزات تيليفونها وطلقت موسيقى تمزك عليها..تمتمات بخفوت كضحك..
سعاد: يهزك الشوق لو قلبك تناساني.. (وقفات حدا المراية) هادي ليك السي نوردين..(كتنفض شعرها ودندن مع كلمات الاغنية المورال مقيم) يهزك الشوق لو قلبك تناساني
يجيبك الوقت وتلقاني على خبرك
مهما تناسيت ادري فيك تهواني
انته تحبني ولا تكذب على عمرك
رجعات للماريو كتجبد اللبسة لي وقع عليها الاختيار ورفعات صوتها مع مقطع الاغنية لي كتسمع..
سعاد: تعااااال.. أبي أعرف وش كثر مشتاق لي..ابيك كثر صبري كثر ما تطري علي.. تعااااال انا منتظر.. تعال يا بعد روحي وكل ناسي وهلي.. (وقفات كدور فبلاصتها بمرح وبدات دندن من جديد) ما فيه مثلك ولو غيرك تماناني.. تعال واسأل عيوني شنهي تعتبرك.. يا مالي الشوف وعيني ما تبي ثاني يا مصغر الناس فيها وانت يا كبرك..
،قاطع مرحها صوت الصوني فاش حبسات الاغنية هزاتو دغيا وجاوبات..
سعاد: وي حميد!
حميد: ندوز موراك ولا تجي راسك؟
سعاد: نو انا مزال ماواجداش.. وديجا غاتجي معاي صاحبتي ياك هانية؟
حميد: خودي راحتك الغزالة.. كنتسناوك..
سعاد: اوكي باي..
قطعات الخط وتلفتات للمراية كتشوف الكسوة كيغاتجي مع وجهها.. باغية طلع قرطاسة ، طامعة تفرض وجودها و تشد ضربات صحاح ، فخضم تفكيرها نشفت شعرها و بدات تلوي خصلاتو بالبابليز ..حطت ماكياج لامع ركزت على عيونها و هي كطلع ماسكااراا و تفتح فمها بتركيز بآخر للمسة رتبت شعرهاا وقادات وقفتها قدام المراية كتشوف فراسها بإعجاب..
سعاد : الزين يااا بنت السعدية كيتقطر.. أحح عليك وخلاص..
بطلتها الساحرة و خصلات شعرها المنسابين على ضهرها، طالونها اللي كاطقطق بيه و ابتسامتها المبينة على صف اللؤلؤ المرتب ففمها .. شادة فشيماء و متقدمات بجوج لداخل، الڤيلا ديال حميد خلات عينيها كايغليو عليها، باينة خاسر فيها شلا فلوس، الاثاث و كل ماتشهى الخاطر تلقاه عندو .. شيماء دور دور و وتنغزها.. مع الدخلة لصالون ضربو عينيهوم على اللوز وگرگاع.. ماشي الفواكه الجافة بطبيعة الحال.. هادو كل ما لذ وطاب من جنس أدم.. التيتيز.. الحطة والحروشية.. جمعو ريوگهوم لي سالو وتقدمو يسلمو على المجموعة بكل رقي ولباقة، كانو غير البزنازة الصحاح، الجلسة كتفوح منها ريحة الكاريزما والهيبة وكتشم فيها حتى الفلوس غير الشوفة فيهم طلع معاك التبوريشة ويطلع حتى المواال..
تبسمات بأنوثة ، جالسة جنب حميد على يمينه و هو شاد كاس وسط يده و عينيه عليها كايدورو و يمشطوها شبر بشبر.. الكذوب عالله حرام.. شكون مايعشقش الزين.. خصوصا لا كانت شي وحدة كتفيض بالانوثة بحال سعاد..
شيماء جلسات مقابلة معاها و شدات الستون مع واحد العظمة كان معاهوم.. من الدخلة ضربات عليهوم شيماء انهم ماشي براهش وخاصها تكون خاترة وكلاص..
باش تبدا شي حوار ولا تنسجم مع هاد الوسط، مكانتش مهمة صعيبة على سعاد، البسمة حاضرة و الشوفة قتالة، البزنازة عينيهم زايغة و الهضرة فالخدمة و العشبة حاضرة ناضرة.. يقدرو يهضرو حتى فالسياسة يحنتوك ومنهوم تعرف المغرب فيه غي ولاد القحاب .. انسجمت فالحديث معاهوم والكاس كيدور..حركاتها كانو كولهم انوثة و دلال، خطفات الانتباه و فنفس الوقت جلستها جنب حميد بالضبط خلاتهم يردو بالهم و مايتسرعوش بشي حركة حتى ايلا كانو بغاو لاكن الظاهر هي لي بغات وعينيها مانزاحوش على واحد مول الوشام.. وبما انها ضيفة حميد كان عليها تحتارم وجوده وتنعل شيطانها وتخليها الوقت.. وكولشي بوقتو حلو..
قاطع شرودها يد حميد لي تحطات على يديها ومدلها كاس عاد عمرو مع الگلاصون و نطق بنبرة صوته الرجولية عينيه على ملامحها مثبت و كاتبان الكاريزما دياله حاضرة، خلاتها طول فيه الشوفة
حميد: ماوقعاتليك تا مشكلة فالطريق؟
سعاد: (بهدوء عينيها فعينيه) لا كولشي هو هداك.. الفلوس دوزتهوم للبنكة كيف تافقنا.. حطيتهوم بسميتك..
حميد: (دور يده ورا ضهرها فحالا معانقها وطبطب) راك بنت الحرفة و تعلمتي القواعد منخافش عليك..
تبسمات بخفة كاترد خصلة من القصة ورا وذنيها و رجعات شافت فالجماعة اللي معاهم
طوال الجلسة كان موضوعهم الرئيسي فالهضرة، هو الخدمة، زادت تعرفات على ناس جداد ومن اقود الرجال لي كاينين فالسوق دبا..فات نص الليل و مشا الوقت، ناض كولشي جمع الوقفة يمشيو فحالهم
شافت فشيماء كايتغامزو و هي تسمع صوته نطق بهداوة
حميد: نتي بقاي مزال معايا اسعاد .. الليل مزال طويل و باقي نزيدو نجلسو و ندويو!
شافت فيه بابتسامة خفيفة كاتلعب فخصلات شعرها، مع الكويسات اللي ضربات كانو منغمينها وحتى هي ماغاراضها فنعاس دبا..طولات فيه الشوفة مرتاحة لتكملة السهرة معاه.. تحماق على التباتة والحروشية..
سعاد: تانا مزال مافيا لي يمشي دابا.. نكملو السهرة اونسونبل..
شيماء: (دورات عينيها عليهم، جلستهم باينة ماغاتكونش عادية، وقفات شادة فصاكها) انا غانمشي الوغ..
ناض داك اللي كانت شدات معاه الستون طول السهرة..
-زيدي نوصلك (شاف فساعة يده) الحال مشا، ماتمشيش بوحدك
حركاتليه راسها بالايجاب و شافت فسعاد غمزاتها
شيماء: واخا مرحبا، سعاد التليفون بيناتنا
الدنيا بدات كاتخوا شوية بشوية، تا بقاو الراس فالراس، شافت فيه وكادور سبابتها على الكاس .. بدوره كانو عينيه عليها، نطق بهداوة
حميد: مزال مستعجب، كيفاش قدرو يفرطو فوحدة فحالك (غمزها)
تبسمات بخفة كاتشوف فالمدى البعيد و تمتمات بجدية..
سعاد: هوما اللي خاسرين!
حرك راسه بالايجاب عينيه كايتجولو عليها بالكامل بدون ملل
حميد: هادي كوني متأكدة منها.. مرا حارة فحالك غي الحمق لي يضيعها من يدو..
تبسمات بخفة لكلامه، بدورها عجباتها الشوفة فيه، و عجباتها تا الهضرة معاه كانت منغمة و الگانة حاضرة .. كل مرة كايدويو فموضوع و هاد الخطرة بعدو شوية على الخدمة، تا تطلقات معاه و تا هو تطلق و خدا راحته، دوز يده مع خذها تا حس برطوبيته و نطق بنبرة جادة خافتة عينيه متبعين عينيها
حميد: نطلعو نرتاحو شوية الفوق ؟
تبسمات بخفة ..زگفات آخر قطرات المشروب اللي بقاو فكاسها، حطات الكاس فوق من الطبلة و شافت ناحيته و تمتمات بأنوثة و خفوت
سعاد: يلاه تانا حاسة براسي عيانة، خاصني نرتاح!
ناض حاوطها بيديه غاديين
حميد: نوغمال.. مع الطريق غاتكوني عييتي.. (دوز ورا ظهرها بهدوء) نريحوك أ لالة.. شحال عندنا من سعاد!
طالع معاها بنخوته وأناقته شاد فيديها متبسم لها برجولة ، خطوة بخطوة جنب بعض ، السالف كيلعب وراها و ريحتها كتفوح ، ناشطة فدماغها و حميد جاها على الكانة و الفلوس كتنطق الزيزون، دخلو البيت ديالو بينهم نظرات اعجاب و جمال عدى الكلام ! طلق من يديها وشارليها لكليسة زوينة جاية فقلب البيت.. مشا لخزانة فتحها.. كانت تلاجة صغيورة فيها قريعات الشراب الفاخر كاع ماكان محطوط فالسهرة.. شافيها ونطق..
حميد: باقي فيك مايشرب؟
سعاد: اممم.. شي حاجة خفيفة.. مابغيتش نثقل..
همهم ليها بفمو.. كبليها كاس.. سد الثلاجة.. وحل كوفر فور كان عندو فنفس الخزانة.. جبد منو تلاتة ديال الربطات.. الزرقة تنطح ختها.. سد الكوفر والخزانة وتمشا بخطوات ثقال لعندها.. مدلها الفلوس عاد كاسها دالشراب..
حميد: فلوس خدمتك اليوم..
عينيها تقلبو.. ايلا سولوها على شنو هو البليزير هاد الساعة؟غاتقولهوم هو هذا نعام السي.. حطات الفلوس حداها وشافت فيه.. كان باقي واقف كيخربق فواحد الباف قدامه.. وكيهضر فنفس الوقت..
حميد: فاش كنت عايش فالطاليان كانت كتعجبني واحد الاغنية.. (شافيها كيضحك) ايلا سولتيني دبا شنو توحشت فالطاليان غانقولك غي شي طاليانية تشطح معايا عليها..
سعاد: (بفضول كتشرب من كاسها) هي علماتك شي وحدة!
حميد: (طلق الاغنية وتم جاي لعندها) كتبقا حلاوة المغربيات بوحدها.. تقدري تشطحي معايا عليها..(مدلها يديه)
سعاد: (حطات الكاس وناضت كضحك شادة فيديه) طلعتي حمق.. (جرها عندو لصقات مع صدره) هه ماغانعرفش..
حميد: هي علماتني.. انا غانعلمك..
بدات كتمايل معاه.. إيقاع الاغنية كان زوين نغمها.. غمضات عينيها وهمسات..
سعاد: زوينة بزاف..
حميد: Come vorrei, come vorrei, amore mio
Come vorrei che tu mi amassi a modo mio
Che questa sera troppo triste, troppo uguale
Non fosse più
Senza di te
سعاد: (حلات عينيها مبتاسمة) شنو كتعني؟
حميد: شحال تمنيتك تبغيني كيف كنبغيك انا على طريقتي.. داك الليلة كانت حزينة ومملة عمرها غاترجع..بلا بيك.. (ابتسم كيلعب فشعرها) كاتهضر على الليلة اللولى من بعد ماتفارقو..
سعاد: كلماتها زوينين.. شحال عشتي فالطاليان؟
حميد: (يديه على خصرها كتحسو كلاص غي من حركاته) من صغري يالله دخلت للمغرب فاش مات الواليد.. تقريبا شي ربع سنين دبا..
سعاد: (باهتمام) مابقيتيش كتمشي؟
حميد: سي كنمشي.. المدام والدراري عندي تماك..
سعاد: (تبسمات) علاش حاسة بلي مرتك هي لي بلاتك بهاد الاغنية والشطحة عليها..
حميد: (قبل يديها بهداوة) تماما.. هي طاليانية وتزوجنا عن حب..
سعاد: اممم قصة كاع الرجال..
ابتسم لهضرتها فين غادا.. دوز يديه مع ظهرها وضحك بهدوء..
حميد: حنا الرجال هكا دايرين.. فاش كنخونوكوم ماكتعنيش ان حنا مكنبغيوكومش.. هادي حقيقة مانقدروش نفيوها.. وهدا مبدأ كنخونوه فاش مكنكونوش مع عيالاتنا..
سعاد: (شداتها الضحكة) علاش كتبقاو تفلسفو فاش كتكونو غالطين؟
حميد: (علا راسه بقهقهةً خفيفة ورجع شافيها) الفلسفة كتخفف شوية من لادوز دالكذوب.. وهكا تقدر تيقني ونتي فرحانة..
على نغمات اغنية مونيكا بيلوتشي كملو رقصهم وهي كضحك على هضرته.. بعد ماسالات الاغنية شدلها فيدها ومشاو كلسو.. مقابلين لبعض.. والحديث مابغاش يتسالا..
حميد : ( بغمزة ) اوا الزين ! ماقولتيش ليا كي جاوك لكنوكة ديال السوق!
سعاد : ( كتمذق فكاسها) الا قلتي كنوكة راه جاتهم لاصقة ، هداك مول الوشام ؟ طالياني ؟
حميد : ( تنغم ) اوا قرب لعندي !
_بغنج تهزت مقربة عندو ، حاضنها جنب و اصابعو كيتخللو شعرها هزو كيستنشق ريحتو ونزل بوجهه متلمس رقبتهاا
حميد : سعاااد آسعاااد ! ( بقبل دافئة ) فين خليناها ؟
سعاد : ( بدلع و غنج ) فمول الوشاام
حميد : ( فتح فمو مقرب كاسو لعندو ) هداك من الريف و كيقولو يماه طاليانية !
سعاد : ( بنظرات اغراء ) ماتزعمنيش عليه نضرب شي آفيغ مقاودة
حميد : ( بصوت مبحوح غمزها بعيونو ) تتفري هاد لافيغ لي قداامك ..
سعاد : (بضحكة انثوية ) انت ديالنا ! علاه براني
حميد : اوا القريب قايس ! بايس ! واكل ( هز ايديه لفوق ) هاد الساعة راني براااني ..
سعاد: (مدت ليه يديها شدها كيدوز عليها بحنان.. نطقات بخفوت) نقولك حاجة؟ (علات راسها فيه) مارتاحيتش لك فالاول!
حميد: (دوز بصبعو على خدها) نوغمال.. باش تعرف بنادم خاصك تخلوا معاه..
سعاد: (ضحكات بخفوت) مابقات معرفة داك الساعات! الشيطان فين نحبسوه؟
حميد: (تحنا باسها بشوية وطلع راسو.. بوسة بورشاتها) ايلا كان هاد الشيطان غايوسوس ليا على وحدة فحالك.. مرحباا بيه.. (هبط بيديه كيدوز على دراعها العريان) عاودي ليا على راسك شوية..(بمزاح) من غير زواجك مع الرايس بطبيعة الحال..
سعاد: (ضحكات) الصراحة تماك فين كاين الاكشن..
حميد: إيوا عاودي ا لالة ماشي مشكيل..
سعاد: (شافت فيه كضحك) عرفتي ايلا يغيتي ضيع السهرة مع شي بنت شا دير؟
حميد: اش؟
سعاد: هي فكرها فالاكس ديالها..
حميد: (ضحك بصوت عالي) هي الخيفي خلا البصمة ديالو؟
سعاد: أي وحدة فبلاصتي كانت غاتبقا عندها شي حاجة عليه.. (تنهدات) بصح كانت علاقة ماشي طبيعية..
حميد: (جغم من كاسو) بصح الرايس طبعو خاسر شوية.. كان أميغو ديالي واحد الوقت.. بارطي رجع كيجيني سيكوباط.. بيبا ليلك لي صبارتي معاه.. شحال؟
سعاد: عاماين..
حميد: (بمزاح) الله يجعلها من مغفرة الذنوب..
سعاد: (ضحكات) خلينا منو دبا.. السهرة زوينة علاش نخسروها..
حميد: (حط الكاس وحط يديه على خدودها كيتلمس) السهرة زينة بيك أ لالة سعاد..
سعاد: فعينيك…
حميد: عيني هاد الساعة مكيشوفو حد من غيرك !
سعاد: كلام كبير هدا..
حميد: طلعتيلي التنغيمة اش ندير؟
سعاد: انا طلعات فاش طلعنا لهنا!
ميل راسو وتحنا على شفايفها باسها بشوية حتى حس بارتجافها تحت منو.. دور يديه على خصرها وضمها ليه بقوة.. خلاها بلا هواها تلين.. تسيح.. وترحب بأحضانه عطشانة للمسات حنينة.. لقبلات دافئة.. لرعشة تسرا تحتها.. ولسعادة تنسيها لي فات..
كان مثل العطشان كيتروا من الشهد لي فشفايفها.. مذاق العسل مخلط مع النبيذ الفاخر.. عصف برجولته.. وخلاه يمتع أنوثها .. يرضي غريزتو وغريزتها.. اش خص راجل بحالو فليلة حمراء؟
أنثى كتجمع مابين الحسن والدلال..
واش خص لمرا فسهرة دافئة؟ راجل يعزف على أوثار أنوثها بدقة وإثقان.. ينسيها راسها واللذي مضى.. وتعيش اللحظة فقط! فقط اللحظة!
كانت علاقة متكاملة ، مليانة آهات.. حرارة لا تنطفي.. غاصو فبحر الملذات، اكلو من نفس التفاحة و ذاقو نفس المذاق حتى قنعو..و نامت فحضنو عارية الجسد حتى للصباح!
يتبع...
التعليقات
لا توجد تعليقات بعد، كن أول من يعلق.