العشق لمن يجرؤ الجزء 14

وصل بيهم العساس دالرايس للدوار، نعتاتليه سعاد الدار ، جالسة فالطموبيل فحالا جالسة على الشوك .. وذنيها مصمكين و عينيها مغرغرين بالدموع، حناكها نازلين بضفارها، القمشة اللي قمشاتهم خلات الاثر معلم زيادة على النفيخ و الزروقية د الدق اللي عطاها نور الدين و فوقما تطلع معاها الهضرة د مها و تفكر ان باها مات بلا ماتشوفو ولا تسامح معاه كاتعاود تهبط بضفارها على حناكها، نجاة شادة فيها كتبكي معاها بقات فيها و ماعرفات كي دير تهدنها و العساس دالرايس، عيا يصوني عليه فالطريق ولكن ماجاوبوش

وصلو اخيرا بعد طول الطريق، حلات الباب دالطموبيل و هو مزال مقاد الركنة ديالو نزلات منها قلبها طالع ففمها حاسة بعقلها غايخرج، دخلاتلداخل كتبكي بديك الحالة، شعرها طالع للسما غير بالبيجامة و البانطوفة، عينيها منفوخين و ذاتها مدمغة و الدموع محابسينش لدرجة النفس ولات كاطلعها بالزز بقوة ما البكية خنقاتها .. دخلات مع الباب على صوت البكا و النواح دالعيالات اللي جايين يعزيو فالنهار الثاني، ريحة الماكلة عاطية من السطح الطيابة جات كاتوجد العشا و كولشي مغبون على الشيخ

مع الدخلة ديالها كاتبكي و تشهق السوفل مابقالهاش بقوة الطريق كولها مدوزاها فهاد الحالة، علاو عينيهم جيهتها و اغلبيتهم تخلعو من الشوفة ديالها قدامهم سحابلهم غا جنية و بعتات عليهم

مرا من العزايات: باسم الله الرحمان الرحيم، باسم الله الراحمان الرحييم اواعدي يانا (شافت فالسعدية اللي شادة حق الله لابسة كولشي بيض و سخفانة فالوسط نسيمة جابتلها الما و السكر تشربو) السووعدية كا الجنون حضرو معانا؟

السعدية: (علات راسها سخفانة مع نسيمة اللي شادة فالكاس غير شافو سعاد زادو فالبكا ديالهم و هي تلاحت على يماها كاتبكي و تشهق) اطليبة ديالي اطلييبة و مشا و الحُرقة ديالك فقلبو

سعاد: (كاتبكي بحر جهدها قلبها غايسكت) بااا ماشفتووش با الحبييب.. فراسو راني عايشة؟؟

نسيمة: (كتبكي بدورها شادة راسها بيديها كانت ساقت الخبار لسعاد باقا عايشة قالتهالها مها عكس باقي الحضور) فخبارو اختي الحبيبة.. كان بغا يسامح معاك..

سعاد: شني وقاع كيفاش مات ياك كان بصحتو مزيانة؟

السعدية: (مزيرة عليها مساخياش تطلقها) غا الموتة دالله تا صباح مكاوفار فموطعو ابنتي .. غا فالفجر كنت نوضت و ساخانتلو الما فالكافاتيرا توضى و صلا و رجاع يغامط عاينو حتى للصباح كان دّا مول الامانة امانتو

طلقات من مها حاسة بالسخونة طالعة معاها رداتها كاترجف .. كولشي كايشوف فيها مخلوعين كايقولو فبالهم واش حقيقية ولا ميتة ولا شنو واقع و هي بديك الحرارة قطعات عليها العنق دالبيجامة ديالها تا تشرح، كاتنخصص و ضرب فراسها و تغوت ب "با الحبيب با الحبيب"

واخا يكونو بيناتهم مشاكل و واخا تكون كاتخاف منو و مرة مرة كايقصح معاها و لكن الاب لا مشى فحالا كاتكون غادي متكل على رجلك توصلك لشي بلاصة بالزربة حتى كاتخوي بيك فجأة و مكاتبقاش قادر تحركها، حسات بمغرس حامي كايدخل فوسط قلبها يكويه، الموت دالاب و لا الاب و لا واحد من الواليدين صعيب و حار و مايحس بالمزود غير اللي مخبوط بيه .. الواليدين نعمة كانربيو بيهم الجناح واخا يكونو عايشين بعاد عليك، يكفي غير راك عارفهم عايشين بخير و على خير، مجرد الشعور كايحسسها بالسكينة و الطمأنينة، دابا حسات فحالا تبترات و تقطعلها جنح من جنيحاتها .. السخانة و البرودة تجمعو فيها، كاتغوووت تا تزلزلو الحيوط معاها و كاضرب فراسها تا النسا ناضو لعندها مخلوعين، السعدية ونسيمة كاشدو فيها كايبكيو و هي كاتبكي حق البارح و اليوم دقة وحدة كاتفركلهم باغا تضرب و تغوت .. ولات زرقة فوجهها فحالا مقجوجة .. قربات عندها واحد الشريفة بغات تقرا عليها القرآن تهدنها، حطات يدها على شعرها و يلاه بدات تقرا طاارت عليها سعاد عضااتها يدها اللي كانت كاتلمسلها بيها شعرها و بدات كدفع و تقطع حوايجها من فوق لحمها .. بيجامتها شروطاتها تا بقات غير بالضوني .. بانت لحمها كاملة مزوقة و زرقة، بقوة داك الجهد و الغوات و رعفات من نيفها، حد ماقدر عليها اللي كايقربلها كادفعو .. تعودات بالكامل كاترجف و ناضت باغا تخبط راسها مع الحيط، تحاماو عليها النسا من جديد بالسيف حكموووها و هي كاتركل الدمايات كايشرشرو من نيفها .. السعدية طاحت سخفات بالخلعة على بنتها و نسيمة بدات كاتبكي و تعدد فبلااصتها .. النسا ولاو طالبين غير السلاكة، معارفين مايديرو، هزات واحد المرا سوارت ديالها كاتقرقبهم جنبها و هي بديك الحالة ولاو فيها عشرة، شوية بشوية بدات كاترخالهم حتى تهدات كليا و سخفات فاقدة وعيها!

فاش حلات عينيها كانت فبيتها.. الظلام طاح والكمرة علات.. عظامها مدكدكين.. راسها ثقيل بزاف.. لدرجة قدرة الاستيعاب رجعات عندها محدودة.. تململات من بلاصتها بالسيف.. حسات بيها نجاة لي كانت كالسة حداها.. طلات عليها لقاتها كتبكي فصمت.. ملامح وجهها متشنجين.. البكية كتخرجليها مع تنهيدة وأنين موجع..كيقطع فالقلب..

نجاة: (بحسرة) البركة فراسك أختي..

سعاد: (غمضات عينيها كتبكي بحرقة..صوتها خرج حار من حلقها) ما.. مشا معاك .. باس اختي..

نجاة: الموت علينا حق.. ربي بغاه.. هوما السابقين ونحن اللاحقين.. الله يصبركم..

سعاد: (تنهدات بالم) اميييين..

ناضت بتثاقل .. الدنيا كدور بيها.. كتسمع صوت القرآن جاي من تحت.. ماتقدرش تقولهوم حبسو .. الموت هادي وباها من حقو يتقرا عليه القرآن من بعد موته.. تمشات بخطوات تقال جهة الماريو.. حلاتو لقات بلاصة حوايجها باقا هي هي جنب نسيمة.. جبدات بيجامة طويلة على شكل عباية مفضفضة.. جبدات معاها شال لواتو على راسها.. لبسات داك بيجامة.. وخرجات من البيت.. هابطة لتحت .. نجاة تابعاها وحاضية معاها.. لا تمشي طيح فالدروج .. هي كتقرب وصوت القرآن كيجهاد فودنيها.. قلبها كيبكي الدم.. تجمع عليها كولشي فدقة.. داك ريحة كيكسو لي كيطيب كدخل لنيفها خانزة بحال ريحة الجيفة.. حتى قلبها طلع.. شدات على قلبها كتنهد حتى كتخرج السخانة من فمها.. دخلات مرة اخرى للصالون كتقلب على مها بين العيالات.. لمحاتها من بعيد كالسة فجنبها نسيمة ونجوى.. ختها الكبيرة لي طالعة فعاماين ماشافتهاش.. وصلات حداهوم.. غي شافتها السعدية دارتلها بلاصة كتشير ليها تكلس حداها .. مشات عنقاتها وكلسات..كيتباكاو.. حتى سمعات صوت ختها من موراها نطقات بصوت رخيم..

نجوى: و البركة فراسك أبنت ميمتي..

غمضات عينيها معنقة مها ماجاوباتهاش..

السعدية: (بعداتها من عليها كتمسحليها وجهها) شو كي ندبت وجاك! وشني هاد الضرابي الحبيبة؟

سعاد: (تنهدات بحرقة) غي بالفقصة أ يما..

السعدية: ماكانتشي عندي النيمرة باش نلغاطلاك الطليبة.. مارتاحيت تا جيت.. ماكتابلكشي دشوفو بالحق مشا راضي عنك..

سعاد: (دموعها هابطين بوجع) الحبيب با مسكين.. (عنقاتها كتبكي بصوت مسموع) هئ هئ .. مصاب كاشوفتو قبل مايمشي..

السعدية: (مزيرة عليها كيتباكاو وينوحو) اااه الحبيبة وكا كان عا خاك حاضر معانا تاهو يوقاف فالعزا دباااه..

سعاد: (بدون شعور مرفوعة) غا بكي عليه أيما تاهو.. مشا قبل منو.. الله يرحمو..

السعدية: (التبوريشة طلعات معاها.. بعدات منها شنايفها كيترعدو) كيفاش؟؟ مالو خاااك!

سعاد: (دارت يديها على عينيها كتبكي بحرقة) مشااا تاهو ايما.. ماات.. مات قتلو ولد المختار.. شحاال هادي..

صرخة مدوية تسمعات فالارجاء.. ناضو كاع النسا تجمعو عليهوم.. الكل مصدوم من الخبر.. جنازة اخرى فدار الشيخ.. صدمة اخرى للسعدية وبنياتها.. لطالما كان عندها امل انه يكون باقي حي.. وغايجي شي نهار يتطفا الغضب بين العائلات فالدوار ويدق عليها الباب.. خبر موته بهاد الطريقة جاها قاصح.. بحال هاد الاخبار ولفو يسمعوهوم فاي لحظة.. دواوير مكيحكمها حتى قانون.. كيحكمها لون الدم والثأر... كولشي كيتخاد باليد .. المخزن بيناتهوم غي اشاعة.. طاحت الارض كضرب فشواطها.. تكوا قلبها للمرة الثانية فظرف يومين.. سعاد غير شادة فراسها وكتبكي.. مها كتمرغ فالارض وضرب فراسها من حرقتها على ولدها.. ندمات علاش قالتهالها ولكن ماكانش غايكون شي وقت افضل من هدا.. كان خاصها تعرف.. تبكي وتبرد عليه احسن ماتبقا عايشة كل نهار على امل الملقى من جديد..!

كالسة جنب القبر ديال باها التراب فيديها فازك.. الدمع فعينيها حارق.. قلبها مضيوم والدنيا ضاقت بيها..

سعاد: (بصوت مكلوم) لا خويا لا با لا من يسال عليا.. با الحبيب والدنيا غدارة.. غدارة مادوم ليك مادوم ليا..

حسات بخيال وقف جنبها.. علات عينيها كانت مرا لابسة الالبيض.. وجهها ضاوي النور كيشع منو.. حطات يديها على كتفها ونطقات بهدوء..

م: دوام الحال من الموحال ابنتي..

سعاد: (كتزير على التراب بيديها) فراق حبابي جاني صعيب أميمتي.. بويا يابويا وعلى مكتابي..!

م: دبا تفاجا .. العين شحال مابكات والكبدة قد ماتشوات دبا القلب يتفاجا..

سعاد: (تنهدات بحرقة) وا كيف جرالي يا العالي؟؟ حطيت قلبي على لي ما يبغيني..

م: الزمان الغدار.. لي ديرو فجيبك يكويك بالجمر الحامي.. من بعد مايدفا غطاك ويتأمن (زيرات بيديها على كتفها) بنادم غدار ابنتي.. لا ديريش التقة فمن والا.. الايام الزينة جاياك.. والقرح غايدق بابك قبل.. نتي بنت الميمة.. والميمة مادوزش ولادها..

سعاد: (شهقات كتبكي بحرقة وضرب فقلبها) وا خااليني نبكي اميمتي.. نبكي على الدنيا الغدارة وناسها الرحالة..

م: بكي وبرد.. بكي..

حلات عينيها على هاد الحلم...كلسات فبلاصتها كتنفض..يديها كيترعدو ماعرفاتش كيفاش وصلات لهنا.. يمكن طاحت وجابوها شافت قدامها كانت ناعسة حداها نسيمة ونجاة.. صوت الصقيل.. عرفاتو وقت متأخر من الليل.. مسحات على وجهها بتعب عوالة غير يطلع الصباح تمشي تزور قبر باها.. طار النوم من عينيها.. تكات غير براسها على الحيط.. عينيها فالسقف.. كتشوف غي الظلام.. حتى قشعات تيليفونها شاعل الضو.. ناضت كتكحز هزاتو.. لقاتو قطع.. حلاتو ودخلات كانت نمرة الرايس.. بانولها بزاف دالميساجات مامقريينش.. ماعرفاتش حتى كيف جا تيليفونها لهنا.. ماكاينش من غير نجاة لي كتجمع موراها من ديما .. دخلات لميساجات لقاتو كاتب ليها.. "نزلي هانا لتحت"

رجعات جلسات كتنهد.. راسها كيدور عليها.. وقلبها مجروح..دار الصواب وجاي يعزي؟ ولا جا يتشفا!

شعل ضوء تيليفون مرة اخرى شافت فيه لقاتو هو.. بركات على رد ودارتو فودنيها.. وصلها صوت انفاسه المتحشرجة.. من بعدها نطق بخفوت بأمر.. وترجي فنفس الوقت..

نوردين: نزلي أ سعاد..!

نزلات التيليفون من ودنيها.. دموعها على خدها.. ناضت لبسات بنطوفتها.. لاحت شال على راسها وهبطات كتخلف فالدروج وترتاح.. حلات الباب وخرجات.. ضرب فيها هواء خفيف دخل لريتها انعشها.. لمحات طوموبيلتو من بعيد مور الزرب.. كتبان الشعلة دالكارو وخيالو واقف جنب الطوموبيل.. تمشات لعندو بخطوات ثقال.. غي وصلات قاد وقفته.. لاح الكارو طلعها وهبطها.. من رجليها حتى لراسها.. عقد حجبانه فاش شاف وجهها كولو مزوق.. نادبة حناكها ولاطراس باين.. تحت عينيها زرق.. وشفايفها شاحتين.. قبل ماينطق كانت سبقاتو.. صوتها خرج مبحوح وثقيل..

سعاد: جاي باش تشفا؟ دبا تقدر دير لي بغيتي.. لا ظهر نسند عليه لا كتف نتكا فوقو..

كان محاصرها بنظرته وسواد عيونه..قرب أكثر.. حط يديه على خدها.. كيتحسس أثر النذوب.. عاقد مابين حاجبيه ماعاحبو حال..

نوردين: شحال كيعجبك تأدي راسك..

بلعات ريقها.. كتحاول تبلل حلقها الناشف.. باقي على نفس التعبير.. كيجلدها بنظرات عيونه القاسية.. وتفاحة أدم كتمشي وتجي فحلقه.. كأن الحروف تبعترت داخله..

سعاد: (ببرود) نأدي راسي ومنخليش شي حد يأديني..

راسها اليابس.. البرود لي مغلفها.. نظرات العناد .. ماشي شي حاجة لي جديدة عليه.. دور يديه ماللور على راسها وقربها ليه.. حاطة وجهها على صدره.. راسها تحت ذقنه.. دوز بيديه على ظهرها وتكلم بصوت عميق..

نوردين: البركة فراسك!

همسات بصعوبة بين انفاسها.. كتبذل مجهود كبير فالنطق..

سعاد: ماغانقدرش نقولك مامشا معاك باس.. ايلا كان شي واحد كنتمنا ليه الشر فهاد الدنيا غايكون هو انت الرايس!

هبط وجهو حتى لجبهتها .. قرصاتها لحيته السوداء.. حط شفايفه على جبينها.. طبع قبلة هادئة حرق بيها بشرتها.. ونطق بصوت أجش..

نوردين: فاش ترتاحي.. صوني عليا نرجعك.. غانكون غي هنا..

بعدات منو متراجعة للوراء بجوج خطوات.. مسحات ماتبقى من دموعها.. عطاتو بالظهر وتمات غادية.. نطقات بزفير حار..

سعاد: ماغانرجعش الرايس!

ماجاوبهاش بقا حاضيها حتى قربات لباب دارهوم.. ركب فطوموبيلتو وديمارا حتى تحكو الروايض مع الحجر..تلفتات موراها لقات غي الغبرة طالعة.. حلات الباب ودخلات.. كانو جوج عيون مراقبينها.. من السرجم منين خرجات.. لاح الكارو من يدو وسد السرجم راجع ينعس جنب مرتو وولادو.. وخ العزو ودار عامرة عطاوهوم بيت بوحدهوم فين يباتو.. تكا بيديه تحت راسو.. شاف فنجوى ناعسة مرة مرة كتخرج داك التنخصيصة دالبكا.. تنهد عينيه على السقف.. كيتفكر لي مزالة شاغلة بالو وخ تزوجات.. عمرو ماينسا نهار جا يخطبها هي ورفض الشيخ.. قالو دي الكبيرة بعدا.. هي ماكانتش كتشبه لختها.. سلباتو بسالفها الطويل.. حروفها الزوينين وقدها الفاتن.. دا ختها وبقات هي فبالو.. حتى كتاب وجات تقرا عندهوم فاش سالات الثانوي.. تما ماقدرش يكبح راسو عليها.. حتى لعبات بيه السكرة داك الليلة ودار بيها!

تمتم بهمس كيدوز بيديه على لحيته..

-زادت زيانت بنت الحرام!

الصباح على طبلة الفطور كالسين مجموعين من بعد ماجاو من زيارة القبر.. سعاد ونجاة.. السعدية وخواتاتها.. نجوى ونسيمة..

السعدية: (حنات على سعاد كتهضر بتعب) شكون الحبيبة الطفلة لي جات معاك؟

سعاد: هادي نجاة أيما.. البنت لي كتعاوني فالدار..

السعدية: (بهمس) لاقيلاك الخدامة؟

سعاد: اممم..

السعدية: وشني دبا ابنتي.. مابغاشي يطلقاك؟

سعاد: (تنهدات) مابغاش أيما..

السعدية: نشو مع راجل اختك يوقف معاك فالطلاق؟

سعاد: (قلبها ضياق فاش سمعات سيرتو) لا ايما.. انا داك السيد مانشوفو مانراه..

السعدية: نموت ونعراف شني عنداك مع ختاك.. ماكدشوفشي فوجا من باراح.. كا الخوت كا الشرايكات؟

سعاد: صافي ايما قلب هاد الموضوع.. انا غانبقا معاكوم هنايا شي يامات.. ويقدر نطول.. مكنفكرش نرجع..

السعدية: (عنقاتها بألم) مرحبا بيك الحبيبة نهوزاك فوق راسي.. عمر عليا الدار.. اختك نسيمة قريب عورسا..

سعاد: فكرتيني ديك الخطرة ماسولتكش على الناس لي بغاوها..

السعدية: من بعد ونهضرو فهادشي.. ماشي وقتو دبا..

مرو الساعات والايام.. وهي غي ناعسة .. كتنوض تكلس معاهوم وقت قصير وترجع تنعس.. زادت لادوز ديال داك الدوا.. باغا تبقا غي ناعسة.. وماواعياش..

كانت كالسة فبيتها كالعادة.. مكدير والو.. غي كتشوف فالسقف وساهية.. حتى دخلات عليها نجاة..

نجاة: اختي.. يالله تعشاي.. كيتسناوك لتحت..

سعاد: (تحركات بتعب) غي سيري.. ماقاداش.. فاش تسالي جيبيلي دوايا..

حركات راسها بالايجاب وخرجات..سدات عليها الباب وخلاتها فراحتها.. ناضت من موراها فشلانة.. حلات خزانتها .. جبدات بيجامة وحدة اخرى .. باغا تبدل حوايجها.. قلعات داكشي لي كانت لابسة.. بقات غير بديباردور وشورط.. حتى سمعات الباب تحل.. ضارت بزربة طافجة لقات راجل ختها واقف كيطلعها ويهبطها بنظرات حقيرة..

الجنون طلعو كينقزو فوق راسها.. لاحت داك البيجامة من يديها واندفعت ناحيته ضرباتو فصدره حتى تزدح مع الباب وغوتات صاعرة..

سعاد: يا القوااااد لااااش داخل عليااااا؟؟

مكانش كيضن انها غادي ترياجي بهاد الطريقة العنيفة.. كان مولف كيدخل عليها البيت وكانت حتى ايلا بغات تسربكو كتسترو.. ماعرف باش تبلا حط يديه على فمها وكالاها للحيط..نطق بخفوت..

طارق: واش تسطيتي؟؟

غوتات تحت يديه صاعرة.. شدوها جنونها ودفعاتو بحررجهدها وغوتات بصوت عالي .. كأنها بركان وانفجر..

سعاد: وااااخراااااج علياااااا ال*اااااااامل... كولكوووووم ولااااد القحااااب.. كولكوم قواويد..

عصباتو بهضرتها.. ماشعر براسو غير عاطيها طرشة حتى عواجليها الوجه.. مد يديه فغفلة منها باغي يجرها من شعرها.. ساعة فطنات بيه وتلاحت عليه مهبطاليه وجهه.. مخرجة فيه الفقصة لي تراكمات داخلها طول هاد الايام.. ترفعات ومابقات عارفة شكادير.. عقلها غاب.. بدات ضرب فيه فين ماجات.. صعرات عليه..ولي جا قدامها كضربو.. هو واقف مصدوم كيطاكي على راسه.. كولشي طرا بزربة .. حتى تدفعات الباب وتمات داخلة نجوى.. وموراها نجاة ونسيمة.. جايين كيجريو يشوفو اش واقع..

نجوى: (دارت يديها على قلبها كتشوف فختها طايحة على راجلها بالضرب.. مشات ليها كتجري جرااها من شعرها ماللور كتغوت) يااااااا المووووسخة.. تابعاااه حتى لهناااا...

السعدية: (يالله وصلات كضرب رجل فرجل قلبها غايفلت.. شافت داك المنظر مافهمات والو.. مشات كتجري جرات نجوى حيداتليها يديها من شعرها وغوتات) اربي وشها المونكار؟؟

نجوى: (كتنهج .. الشال طاح على شعرها) هانتي كدشوف ايماااا.. البنت كدورلي براجلي.. ماخلات مادارت معاه فالمدينة وتابعاه حتى اهنا..

سعاد: (باغا تلاح عليها كتغوت صاعرة.. شادينها نجاة ونسيمة) ياااااا بنت القحبة.. نتي وراااجلك.. مهجم عليا فقلب دارنا.. ماحتارم با لي الربعين مزال ماقفلها.. ماحتارم نسيبتو لي كتبكي الدم لتحت..

نجوى: (اندفعت ناحيتها وسطهوم السعدية شادة على قلبها..نطقات بحنق) يا المووووسخة.. باغياهوم يتيقوك؟ (شافت فالسعدية) سمااااع ايماااا.. كونت دايما كدسولني لاش مدابزة تينا وختاك.. وهااااا علااااش؟؟ بنتاك كانت كدورلي بالراجل.. بنتاك موووسخة دحمد الله لي ستروها الدار دالمختار..

سعاد: (تبنجات بلاصتها مصدومة) ك..كيفاااااش؟ (جرات يماها) لا عانداك ايما ماتيقيهاش..هو لي كان كيجي لعندي وهو لي كان كيضسر عليا..

طارق: (نطق بغل.. وجهه مزنك) سمحيلي النسيبة.. مابغيناش نوصلو لهادشي ولاكن الحقيقة هي هادي.. الشيطان كيحضر والبنت عارفينها باقيا صغيرة.. مابغينا شوهة..

الدنيا ضارت بيها .. كترمش عينيها بثتاقل.. باطل كبير طاح عليها وكتشوفهوم كولهوم ضدها.. شافت موراها لقات عمامها بجوج واقفين مخنزرين فيها.. شافت فمها حانية راسها بانكسار.. زادت تقهرات وماعجبهاش الحال.. طلقات من البنات وتلاحت على معا كتهضر بحرقة..

سعاد: ماتيقيهومش ايما... هو لي كان كيبغي ينعس معايا..

ماجات تكمل هضرتها حتى كانت ضرباتها بطرشة لحنكها كترعد..

السعدية: أ سكووووت المصيبة.. طياحتلي بوجاي الارض.. (هبطو الدموع من عينيها كدوي بحرقة) هكاا رابيتاك أنا؟ هادشي لاش ماجيااا لجنازة دباااك... ماجية دعملي الشوهة فالدوار؟ ومعامن؟ مع الراجل دختاك؟؟

سعاد: (طلقات منها وغوتات بقهرة) واااامااادرت واالو كيكذب.. هو لي دخل عليا البيت وهو لي كان كيدور بيا شحال هادي.. وفاش واجهت بنتك ردتني انا الغالطة.. وراجلها الشريف العفيف..

السعدية: (زمجرت فوجهها بغضب) خروووووج عليااااا.. (دفعاتها) خرووووووج... ايلا ماجيا دشواهني خرووووووج... مانتي بنتي مانا يمااااك.. انا ماعانديشي الموسخاااات.. انا مارابيتشي الفاسدات..

بقات شحال مصدومةفردة فعل مها.. الصهدة طالعة معاها.. الغشاوة عمات عينيها.. شافت فطارق بغل.. غوتات جاعرة وطارت عليه ندباتليه وجهو كضرب فيه بحال شي حمقة.. جراو ليها شدوها عمامها.. نجوى كتغوت ونسيمة كتبكي.. السعدية كتقلب منين دوز ليها.. وهي دايرة بحال الحمقة وسطهوم.. فارقوها منو عمامها وتحاماو فيها بالضرب.. كل واحد منين كيغوت..

-مش دشوهنا؟؟ كا باك مات صافي طغيت؟ ايلا خااانا مات حنا كاينين.. وجه واحد منهوم كلامو للسعدية كيدوي بغل) تراحام عليها تاهي.. ماعاناشي المووسخات فالعائلة..

السعدية: (شهقات بعنف دمووعها سايلين.. مقصحة كبدتها عليها ماقدرات دير والو وهوما محامين عليها ضربة فيها وضربة فالحيط هي كتفكر غير الشوهة لي دارت ليها ..كتمتم بعدم تصديق) كدغدر ختااا الكبيرة.. باغا دشتت ليلا الشمل..

تسنات شي واحد فيهوم يفرق عليها.. شادة على قلبها رجليها كيترعدو.. كانت وخ كتشوفها كدافع على راسها الا انهم رجال غالبين عليها.. الدق القاسح لي مايصبرليه حتى واحد.. تراجعات جوج خطوات الى الوراء.. وخرجات من البيت كتجري كيف شي حمقة.. كدير طريقها وسط العيالات لي مجوقين برا..

نجاة: غايقتلوها.. اربي الحبيب.. غايقتلوها..

هزات تيليفونها بيديها كيترعدو.. دوزات نمرة الرايس.. الوحيد لي جا فبالها وغاينقدها من الموت المحتم هاد الليلة!

صاااافي حبسووووو...

نطقات بيها السعدية وهي كتفرقهوم من عليها وتغوت..

السعدية: بعدووووو.. مش طيحولي بطانة فداااري..

فرقاتهوم عليها كتنهج ووقفات قبالتهوم عاطياها بالظهر.. وهي طايحة فالارض كضرب فراسها وتبكي...

السعدية: (مخرجة فيهوم عينيها) تا واحد مايقيسا.. مش نعيط للراجل ديالا يجي يهوزا علينا..

نطق واحد من عمامها يديه كتنفض بالاعصاب..

-عايطلو..عايطلو يجي يقتلالاك هنا ويكمل عليها.. ما هواشي راجل ايلا خالاها حية..

سعاد: (حانية راسها فالارض كتبكي.. غي سمعات سميتو بدات كترعد.. مابغاتوش يجي.. تموت على يديهوم وماتموتش على يدو.. علات راسها وتمتمات بتعب) ماتعيطولوش..

نجوى: (كتشفا بغل) عايطولو يجي عايطولو..

بينما هوما واقفين كيتقاراو شنو غايديرو فيها.. وقفات طوموبيلتو حدا باب الشيخ حتى عواجو روايضها.. خرج مخلي الباب محلول.. دفع الباب الحديدي لي على برا ودخل صاعر.. مكيشوفش قدامه.. عينيه حومر.. وعرق فجبينه كيبان نافر..طلاقاتو نجاة لباب كترعد بالخلعة.. نطق بحدة كيعصر فقبضة يديه..

نوردين: فينهيا؟

نعتاتليه غي بيديها الفوق.. الصوت هرب من حلقها.. تراجعات للوراء مخلياه يدوز.. مثل ثور هائج .. داز من قدامها..فرمشة عين مابقاتش كتشوفو.. طلع كيضرب رجل فرجل.. هضرة نجاة كتعاود فودنيه بحال الصفير..

-راجل ختها مطيح عليها الباطل بلي كدور بيه وعمامها باغين يقتلوها..

وصل الفوق.. داز فداك العيالات لي مجموعين حدا البيت حتى هوما غي شافوه رجعو اللور كيتخبعو فجنابهوم خايفات.. دخل البيت كيقلب عليها بعينيه.. كان باغي يشوفها غير كتنفس عاد يدوي.. غزز سنانو بعصب فاش شافها طايحة فالارض كتبكي.. شعرها مشنتف كترعد.. مشا لعندها من بعد ما وقفو كولهوم مسمرين بلاصتهوم.. ماعرفوه منين جا ولا حتى منين جاب الجرأة باش يدخل لدارهوم.. تحنا عندها شدها من كتفها.. علا ليها راسها.. قبل ماتشوف فيه ضرباتها ريحته.. وملمس يديه الخشنة فوق دراعها حتى من قبضة يديه كتمزيها عن غيره.. ارتجف جسدها فاش عرفات راسها غي غاتعلي عينيها غاتقابل مع عينيه.. اشمن نوع من العذاب غايطبقو عليها هاد المرة؟ ماعارفاش.. لي عارفاه هو أنه قطاطعي وعمامها أرحم منو.. حلات عينيها كتعصر الدموع منهوم بحرقة.. شافت فيه بخوف.. تماما كيف ضناتو.. غاضب! ونيران الشر كتشع من تحت جفونه.. نطق بقسوة ومن خلف نظراته الثائرة..

نوردين: شنو طرا؟

نبرة صوته مكانتش ابدا كتشبه لنظرة عينيه.. مزيج من الغضب والطمأنينة فنفس الوقت.. سادت ثواني من الصمت كأنها الدهر بأكمله.. من طرفها هي لي ماكانتش عارفة نواياه.. واش جاي يكمل عليها ولا يسمع ليها.. بين الخوف والوجع كانو كيتغيرو تعابير وجهها.. حتى نطقات بخفوت .. بصوت بالكاد وصل غير ليه..

سعاد: غاتيقني!؟

ماجاوبهاش لاكن طمنها غير بعينيه..سحابة من الراحة دازت امامها خلاتها تنطق بدون خوف..

سعاد: راجل اختي شحال وهو حاط عليا العين قبل حتى مايتزوج بختي .. غرني الشيطان واحد المرة وماعاودتهاش.. واليوم دخل عليا البيت وفاش شوهتو ماتيقونيش..!

نجوى: (شافت فالكل مصدوم من وجود الرايس.. غززات سنانها واندفعت ناحيتهوم كتغوت) دي علينااااا الموووسخة ديااالك .. وخليو عليكوم راجلي فالتيقاااار.. كءاااابة باغاا تشتتلي الشمل ودفراق الراجل على ولادو..

طلق من سعاد راسو كيغلي.. ناض وقف كيقلب عليه بعينيه.. غير شافو.. بحال شي ثور شاف ثوب أحمر.. ماحس براسو حتى جرو من يديه حطها فوق ركبته قسمها ليه حتى غووت بمرارة.. صرخة خلات الكل يجفل من بلاصتو.. لاحو الارض وزطمليه على وجهه بسباطو كيتنفض بالاعصاب..

نوردين: حااااسبهاااا بلا راااااجل أولد القحبة؟؟؟ نسيتي مرت من هااادي الرب دمك (تكا عليه حتى عواج حنكو مع الارض وبغاو عينيه يخرجو) شهد على روحك الكلب.. موتك الليلة على يدي..!

كان بحال شي بحر وهاج عليهوم.. عطاوها الغواات.. شي كيضرب على قلبو شي فشواطو.. نجوى كتبغي تعلق فيه كيضربها غير بدراعو كيجيلها طايحة.. عمامها واقفين كيتنفضو بلاصتهوم خايفين على عمرهوم.. النسا كيتباكاو .. الجيران دخلو والدوار تهول.. الرايس غايب عن وعيه ضربة فيه وضربة فلي كيبغي يفرق عليه.. كان كيقلب على المضا ومالقاهش.. باغي يصفيهاليه.. حتى بنتليه قرعة دالزاج.. خلاه مليوح الارض ومشا هزها صاعر.. ضربها مع الحيط حتى تشتتات .. خلا نصها فيديه وتم غادي لجيهتو يخشيها فيه.. الغوات علا فالغرفة.. سعاد وقفات رجليها كيخواو بيها.. كتشم ريحة الدم جاية من بعيد.. كتشوف فختها كتندب حناكها وتغوت للناس يعتقو ليها راجلها.. كطلب فعمامها لي توخرو اللور خوفا من هاد القطاطعي لي جبدو باسو.. السعدية حانية الارض كضرب فوجهها ونسيمة مكوانسية.. مشهد خلا داتها تنمل عليها.. ومشات تلقاتليه قبل مايخشي فيه داك الزاحة يقطع صيته من هاد الدنيا..شداتليه فيديه كترعد.. نطقات بترجي..

سعاد: الله يعطيك ماتمنيتي.. خليه لولادو.. أنوردين..

نوردين: (مكنزز باغي يتلاح عليه.. كينطق بغضب.. صوته باح) حيدي من طريقي أسوعاااااد.. (كينهج) حاااايدي..

سعاد: (زيراتليه على دراعو وتعلقات فيه خاشية راسها فتجويف عنقو كتزفر انفاس حارة على بشرته .. كترغب وتزاوك) يالله نمشيو منهنا.. عااافاك.. (شهقات كتبكي بترجي دموعها بللو حوايجو) براااكة من الدم! ريحة الموت رجعات كتقهرني!

تعلقات فالطريكو لي لابس وشافت فعينيه.. كثلة من الدم متكومة داخلهوم.. نفس العيون لي شافتهوم نهار كان غايدبح رشيد..نفس النظرة.. ونفس الرهبة عاود حساتها دبا! سكاكين حادة كانو كيمزقوها من داخل..عاود نطقات بنفس نبرة الصوت المترجية..

سعاد: براكة عافاك!

غمض عينيه بعصب .. باقا كتحس بجسمه متصلب عند جسمها.. باقي غضبه ماطفاش.. رجع حل عينيه فيها بحال الجمر.. دارت يديها لي كيرجفو على وجهه.. وكملات بهمس كتمتص غضبه..

سعاد: ديني من هنا!

بصوت عميق .. خرج من بين شرارات الغضب المتكومة فجوفه.. كينطق بتوعد..

نوردين: خاصو يندم على النهار لي فكر يحط يدو على شي حاجة ماشي ديالو..

دلو باارد تكب عليها.. ألم حاد قصف قلبها.. حلو وحار بحال القهوة.. غمضات عينيها بعنف.. ورجعات حلاتهوم بصعوبة.. كتهرب من نظراته القاتلة..تكلمات بتعب..

سعاد: انت كدير اكتر من هكا..!

زير على داك الزاجة بين يديه حتى طرطقات وطوش الدم.. كيبرد حرو فيديه من بعد مانجحات فانها طفي غضبه ناحية راجل ختها.. وفالوقت لي كانت هي واقفة كتسايس معاه.. كانو عمامها خرجو طارق لبرا .. مغبرينو على عينين الرايس.. وتبعهوم كولهوم هاربين من النار لي باغا تحرقهوم!

لاح داك الزاجة من يديه.. ونطق بحدة..

نوردين: جوج دقايق نلقاك فالطوموبيل.. تعطلي داركوم نحرقها أ سعاااد.. !

خرج وخلاها واقفة فالوسط الدنيا كدور بيها.. شافت فنجاة لي كانت واقفة حدا الباب ونطقات بهدوء..

سعاد: نتي لي عيطتي ليه ياك؟

حركات راسها بشوية مزالة الخلعة شادة فيها..

نجاة: كانو غايقتلوك كون ماجاش..

تحنات الارض هزات ليها بيجامتها مداتهالها..

نجاة: يالله نمشيو بحالنا اختي..

سعاد: (كلسات فوق النموسية كتلبس بيجامتها عظامها مدكدكين) تخنقت هنا..

لبسات حوايجها عاوناتها نجاة.. وخرجات هازة غي تيليفونها كتزيد خلفة وترتاح..حتى وصلات لتحت لقاتهوم باقيين مجموعين من غير نجوى وراجلها ومها.. ماكملاتش فيهوم الشوفة وحتى هوما طلعوها وهبطوها باحتقار.. نزلات عينيها وخرجات..لقات الدنيا مقلوبة برا.. ناس الدوار كولهوم مجوقين .. قاتلهوم الفضول والتبركيك.. وصوت غوات الرايس جاي من بعيد.. شدات فيها نجاة وتمشاو جيهتو.. كان واقف معاه المختار كيأنبو.. ومعاه حتى عمامو وخوالو من كبار القبيلة.. وحكيم متكي على طوموبيلتو كيتسناه..

نوردين: (شافها جاية نطق بحدة) صافي أ با.. شوغلي وكنعرفو..

المختار: (طلع فيها وهبط مخنزر) شوغلاك هو طياح بسميتاك فالدوار؟

نوردين: (خلاه واقف وجرها معاه للطوموبيل مكيشوفش فوجهها) ركبي!

سعاد: (شافت فنجاة)

نوردين: (موجه كلامو لنجاة) نجاة غاتمشي مع حكيم..(شيرليها ناحيته) طلعي معاه..

مشات نجاة لعند حكيم.. بينما سعاد حلاات البلب وطلعات .. باغا غي تبعد من تماك..وحتى هو ماعطلهاش ركب حداها راجع ماشاريار.. كيشوف فباه مخنزر وعمامو لي ساقو الخبار..وجاو يشوفو اش واقع .. مارضاوش ولدهوم يتشوه فالدوار بسباب مراتو..ديمارا ساخط على الوضعية.. وهي حداه كتقاد السمطة مكتشوفش فيه.. جبد كارو لاحو فمو.. شعلو ونفس السطح ديال الطوموبيل شوية يخرج الدخان.. كيكمي ويبخ الدم.. ساد صمت غريب.. فقط انفاسه العنيفة لي كتسمع..مع حشرجات خفيفة خارجة من ثغرها.. كالسة ومامرتاحاش.. كارو مور كارو ماحبسش من الكماية.. حطات راسها على الزاج.. كتحس بعياء رهيب..كتفكر أحداث هاد الفترة الاخيرة وشنو داز عليها..دورات عينيها غير بشوية شافت فيه.. مركز فالطريق قبضة يديه كتزير شوية على المقود وترجع ترخف حتى كيبيضو مفاصله.. رابط يديه بشي حاجة بيضة ..حابس الدم لي كان هابط منها.. بغاات تسولو ولاكن ماقدراتش.. كان كأنه كالس على الشوك.. مزال كيغلي من داخل.. كان غايبرد كون سيل الدم وقتلو..ولكن ماخلاتوش..عض على لسانو من داخل كيطلع انفاس عنيفة من صدره.. رمش بعينيه فاش عرفها كتشوف فيه..ونطق بصوت متحشرج..

نوردين: شنو كان بينك وبين داك الكلب؟

ماكانتش كتنتاضر يسولها هاد السؤال.. جملة انسابت مع وذنيها بعنف..سكتات شحال كترتب الجواب فراسها.. وهو كيتسنا الجواب على احر من الجمر.. عارفها ماغاتكدبش عليه.. ولو على روحها..زاد فالسرعة ديال الطوموبيل كيسارع الرياح.. حتى وصلو صوتها .. من بعد مدة..

سعاد: كان كيعجبني قبل مايتزوج بختي.. وجا لدارنا يخطبها.. ماعجبنيش الحال ولكن دغيا تناسيتو من دماغي..ومن بعد عاد كنعرف بلي كان جاي يخطبني انا وبا الله يرحمو عطاه ختي حيت هي الكبيرة.. وفاش مشيت لمدينة وكلست عندهوم ..لعب بينا الشيطان..وطرا لي طرا..

نوردين: (سكت شحال وزفر نفس أجش من صدره..نطق بحنق) نعستي معاه؟

بقات كتشوف فيه بسهو.. سؤال بسيط جاتها الاجابة عليه صعيبة..غلطة من الماضي دارتها ففترة طيش وندمات عليها.. تلفتت ماعرفات واش تنكر او تقول الحقيقة.. البرودة طالعة معاها.. بلعات ريقها أكثر من مرة حتى لقات راسها كتجاوبو..

سعاد: راه قتلك لعب بينا الشيطان وندمت عليها..!

عينيه غامو بسحابة من السواد..بريق أسود لمحاتو من بلاصتها .. وخ مكيشوفش فيها.. هسيس أنفاسه العنيفة.. كانت كتوصل لودنيها ثقيلة..يديه زادو زيرو على الفولون.. اخيرا دور راسه وشافيها.. كيجلدها بنظراته القاسية.. هاد المرة مخلطة مع الكثير من الاحتقار.. غضب! قسوة! على شكل شحنات سالبة كيخرجو من عينيه ويقتاحمو صدرها بعنف لدرجة تراجعات تلقائيا للوراء.. حتى وصلها صوته ..بارد وقاسي فنفس الوقت..

نوردين: طلعتي رخيصة اكثر ملي كنت كنتصور!

غير قال هاد الجملة خلاها كذوب فبلاصتها مثل الشمعة فليل طويل.. من بعدها رجع شاف قدامو.. زاد فالسرعة ديال الطوموبيل.. قبضته على المقود ترخات.. فكه لي كان متشنج تطلق..من غير أنفاسه لي بقاو كيتسمعو فودنيها بعنف..

جملته أترات فيها لثواني فقط.. من بعدها كتمت انفاسها عندها.. ولفات بحال هاد الهضرة..خصوصا من عنده.. ماشي شي حاجة لي غريبة عليه.. باغي يحطم كبرياءها.. باغي بزيد يعفس عليها ويمزق روحها كتر ماهي مزقة..تقادات فجلستها كتحدق فالطريق لي قدامها والاشجار لي كتبان بسرعة وكتختافي بسباب السرعة المفرطة لي كان غادي بيها.. نطقات بهمس قاتل..بالكاد سمعه..

سعاد: رخيصة ومزال باغي تربط حياتك معايا الرايس..(شافت فيه وكملات باستهزاء) خايبة فحقك ياك؟

نوردين: (بصوت حاد.. وبنبرة باردة نطق) مزال غاتستعرفي بسمية الرايس...!

سكتات ماجاوباتوش.. نقاش عقيم بحالو بحال لي سبقو عارفة مزيان نهايته.. كيدور معاها فحلقات مفرغة بلا فايدة..

دوزو ما تبقى فالطريق فجو مكهرب .. والصمت سيد الموقف.. حتى حبس بالطوموبيل.. جنب العمارة.. عرفاتو ماغايطلعش معاها مدام مادخلش لكاراج.. مد يديه لاكودواغ.. حلو وهز سوارت الدار لاحهوم فحجرها.. هزاتهوم بهدوء.. حلات الباب وهبطات.. بقا حاضيها حتى طلعات .. عاد زفر وزاد.. غادي تالف بين الدروبة..كيناجي صمت الليل وهدوءه الرهيب..داخله نار كادية مابغاتش تبرد..

دخلات للدار كتجر رجليها..زدحاتها بعنف.. ومشات كلسات فواحد الفوطوي.. جرات خدية عنقاتها..كتسنا نجاة توصل.. فاتوهوم بزاف فالطريق.. دقائق من السكون عطات فرصة لهضرتو دور فدماغها.. كتزير على داك الخدية بين يديها.. ماحاملاهش.. وفنفس الوقت ماراضياش.. سهاات لفترة طويلة حتى سمعات الباب كتحل.. عرفاتها نجاة..دخلات وشعلات الضو عاد وعات على راسها انها كانت كالسة فالظلام..

نجاة: اويلي سمحيلي اختي ماعطيتكش الساروت بالتلفة..

سعاد: (متكية على الفوطوي) ماشي مشكل.. تعطلتو!

نجاة: (كلسات حداها) نتوما لي طرتو..(دوزات يديها على شعرها كتشوف وجهها مغير) مالك اختي؟ دابزتو؟

سعاد: (سهات شحاال فيها عاد دوات) اليوم اكتشفت واحد الحاجة!

نجاة: شنو؟؟

سعاد: قد ماجوعتي كلبك يتبعك..

نجاة: (تنهدات كتشوفيها وقالت باستسلام) ايلا كتشوفي طريقكوم مسدودة.. قنعيه بالفراق..

سعاد: (ببريق تحدي فعينيها) مابقيتش غانطلب منو الفراق..غانقتلو غي بالبارد.. درت فيه راسي يا نجاة ايلا مانردوش يهتهت بسمية سعاد.. راني ماشي قحبة..غانخرجو على طوعه.. عقله غانخردلو ليه..

نجاة: التسليييم اختي ماكاتهديش..

سعاد: (كتحلف عليه) داير راسو فيا يسحابليه انا هي داك السلوكية لي مزوج.. ايلا ماخليتوش دايع فالزناقي كي الهبيل.. تالف على دارو وولادو ودوارو.. راه ماولدات فيا السعدية غا الخرا حاشاك..

نجاة: (ابتسمت بهدوء) اش دارلك الزغبية حتى حلفتي فيه؟

سعاد: دارليه القوااد..

نجاة: هادي هي انا باللقمة لفمو وهو بالعود لعيني.. انا واحد ينوض القيامة على قبلي فالدار.. حتى كان غايقتل على مسبتي نبوسلو راسو ونقولو سيدي..

ماجات تكمل هضرتها حتى حسات بالخدية فوجهها من عند سعاد.. غوتات صاعرة..

سعاد: ماتجهلينيش انجااة.. شمن سيدي ولا زبي.. كنكرهو ونقولو سيدي؟

نجاة: (ناضت من حداها حابسة الضحكة) ومالو الكره؟ راه احسن من الحب.. المهم كتحسي بشي حاجة من جيهتو..

قالت جملتها وطارت من قدامها قبل ماتجي فيها شي دقة.. خلاتها كتمشي وتجي فوق داك الفوطوي جاعرة..

سعاد: غي بلاتي عليك.. كواريك غا نطيحهوم..! نوريك رخيصة بشحال غاطيح عليك غالية!

داز شحال دالوقت وتوالت الايام..نهار مكيشبه نهار..وكل دقيقة كدوز كتمنالو نهار كحل بحال قلبها.. كتمنا يضيق عليه صدره بحال كيف كان كيضيقو عليها..كتمنالو الخسارة والموت..كتمنا ترافقو فكوابيسه بحال شي هم وحزن ويأس..كتمنالو كل ماهو شر فهاد الدنيا.. حتى كتمل من الدعاء وكتسول راسها.. سؤال بريئ .. واش يقدر شي حد يوصل لهاد الدرجة دالكره اتجاه شي واحد.. الجواب هو أه.. فاش كتكون درجة الجرح عميقة.. والقلب والروح نزفو بشكل عنيف كيصعاب الصفح..! وكيصعاب النسيان!

من داك الليلة ماعاودات شافتو.. ولكن كان كيهضر معاها.. ماشي بغرض انه يسول فيها ولكن على الخدمة.. حديث عابر وبارد.. مدته مكتعداش دقيقة.. وحتى هي واخدة منو استراحة وحتى خلوفها داك الليلة تخلات عليه.. كانت فكرة عابرة فلحظة غضب.. لا الوقت ولا الخاطر عندها باش تلعب معاه.. انسانة مزاجية كل دقيقة فمود..الوضع كان عاجبها.. عاطيها التيقار.. صوته كاتسمعه مرة مرة.. الفلوس داخلة.. والخدمة شاغلاها.. حتى انها مشات بعيد فيها.. وحاطة فكرة قبالتها.. غدا ولا بعدو ايلا ماكانش الرايس؟

غاتكون سعاد!

هزات تيليفونها دخلات لمحادثة ديالهوم فواتساب.. كتباتليه..

سعاد: بغيت فلوس!

قرا الميساج فالحين وماجاوبهاش.. قفلات التيلي وحطاتو فوق الطبلة شافت فشيماء.. لي كتسناها على احر من الجمر..

شيماء: ماجاوبش؟؟؟

سعاد: تء.. ماغايجاوبش..

شيماء: ايوا وشنو غاندير؟

سعاد: (ببرود .. كتشعل كارو) شوية غايوصل الكود.. ماتخافيش اليوم نحلو هاد المشكيل.. راه لقيتي الفلوس مزال مادخلاتني..

شيماء: (تنهدات بضيق) بفف.. فكيني أسعاد راه الدنيا ضارت بيا...

سعاد: (بتأنيب) القحـ ـاب دجوج دريال هوما لي رجعو يحملو دبا! فين كان عقلك؟؟

شيماء: (دوزات يديها على وجهها بتعب) بلا ماتزيدي عليا اسعاد.. راه ماعرفتش كيفاش طرا.. والقو اد مكيجاوبنيش..

سعاد: (ساطت الدخان فالسما) بلاتي نطيحو هاد الكرش بعدا.. عادا نقلبو عليه.. (كتحلف) بربيي أشيماء ونلقاه .. نغززو بسناني ومانبردش.. عروق ز بو باش كيقيم نجبدهوم ليه..

شيماء: (شدات فيديها) خلينا منو دبا.. هاد الطبيب متأكدة غايديرلي كوغطاج؟

سعاد: (كطفي الكارو) اه.. دويت معاه.. خاصني غي الفلوس دبا.. تسناي هاد القو اد ديالي يسيفط..

ماجات تكمل هضرتها حتى كان وصلها ميساج.. طارت على التيلي دغيا حلاتو..لقات الكود ديال وافاكاش.. طلعاتليه vu وناضت..

سعاد: تكعدي نمشيو..الفلوس وصلو..

ناضت شيماء هازة صاكها.. اما سعاد هزات غي سوارت اللوطو كانت لابسة كيطمة.. حتى تحلات الباب وتمات داخلة نجاة.. الضحكة واصلة حتى لودنيها جارة موراها كروصة دالخضرة... طلعاتها وهبطاتها سعاد.. قوسات حجبانها وقالت باستغراب

سعاد: سنوهويت هادي كولها تقضية؟

نجاة: (كتحيد سباطها فالباب) اختي الزحام فكارفور..

سعاد: (بتشكيك) نجاة.. انا قحـ ـبة قدييييمة عليك.. عينك كيدورو فبلاصتهوم.. تلاقيتي بيه تاني؟

نجاة: (كدور فعينيها وتشوف فشيماء لي واقفة مهمومة.. تنهدات بخفوت ونطقات) تلاقيتو ماكاملاش ربع ساعة جا عندي لباب..

سعاد: (هزات صبعها كتحلف) شوفي هاه..يا يدير معاك الحل ياغانعيط للرايس ونقولو صاحبك ولا خدامك ولا شكايجيك كيدور بنجاة.. ونوريك خيطي زيطي بلا فلوس.. واتبعي الحب هو لي غايوكلك..

نجاة: (ابتسمت بدفئ حتى توردو خدودها) لا اختي سعاد.. السيد معقول.. وغايجي لدارنا..

سعاد: (ابتسمت برضى) ايوا دبا سمعتك.. كنت عارفة الصنارة عكلات من داك الليلة لي شديتو فيها الطريق بجوج.. كيتي انا جاية نسمع فالهضرة الناقصة.. (عوجات سيفتها) غاندي شيماء لطبيب نجي وعاوديلي اش طاري..

نجاة: (بقلق) مالك اختي شيماء مريضة؟

سعاد: (بالفقصة) ااه مريضة ومرضها ماعندو حتى دوا.. (جراتها من يديها) زيدي قدامي ينعل جد بو الحب لي عرفتو.. كون بقيتو فالقحـ ـوب احسن..مافيهش الغلط..

واقف فواحد من ديبويات ديالو على شكل كاراج.. جاي خارج المدينة.. واقف على شغلو بيديه كانت شحنة غاتخرج على برا.. الگارو بين يديه حاضي الخدامة.. حتى تم داخل حكيم.. باركة اللوطو ديالو ونزل عندو..

نوردين: (عاقد حجبانه) فاين هاد التعطيلة؟

حكيم: كان عندي شي شغال..

نوردين: (كيشوفيه بنص عين) شي بياسة جديدة عاود؟

حكيم: (كيشوف فالخدامة) لا هاد المرة المعقول أخاي ديالي..

نوردين: (ببرود) الله يسخر..

حكيم: الليحفضك.. (حط يديه على كتفو قالب الموضوع) الحاج عبدالله مابقاشي كيتعامل معانا؟

نوردين: (ضار عندو الدخان خارج من بين شفايفو.. زاد قوس حجبانه ونطق بحدة) كيفاش؟؟ و من عند من كيتقدا؟؟ شكون هاد ز بي لي قلبو عندو؟

حكيم: (حك على ذقنه ونطق بتردد) المرا ديالك أخاي!

نوردين: (الصدمة بانت على ملامحه) وااااش تسطات هادي!!! منين كتجيب السلعة؟

حكيم: من البلاد..

نوردين: (بعدم تصديق) والطريق؟؟

حكيم: كدووز بسميتك!

ماعرف يضحك ولا يتفقص.. سيفطها لعند كليان صحيح.. تعاملات معاه مرة وجوج وتلاتة داتو ليه.. لا ومشات بعيد رجعات كتجيب السلعة لراسها وكتبيعها فطنجة.. سكت شحال كيكمي ويبخ فالسما.. تمتم بسخط..

نوردين: هادي هي دخلناه من السمرة بغا يحو يلينا المرا..

حكيم: شنو اخاي نديرو معاها لازم؟

نوردين: (شافيه مخنزر.. ونطق بحدة) شمن لازم از بي.. راه مرتي هاديك..

حكيم: سماحلي اخاي ولاكن ضيعاتنا فكليان تقيل.. وتقدر تجر عندا شحال من واحد..

نوردين: (لاح الكارو فالارض وزطم عليه مغدد.. تمتم بحنق) ماكاتقاضاش.. خليها حتى نساليلها..دبا وقف معايا على هاد السخرة..

حكيم: انت غي سير هانا هنا..

نوردين: تسالي لحق عليا عند دراري..

حكيم: وا عليه..

تعاشات العشية.. ومن بعد نهار كولو دوزاتو مع شيماء عند الطبيب.. حددو موعد العملية الغد ليه بالليل.. عمليات بحال هادو كيكونو فسرية تامة.. حبسات طوموبيلتها امام مطعم ومقهى جاي على البحر..من الصباح ماداقو النعمة وبغاو ياكلو.. تمو داخلين مهمومات.. القهوة كانت عامرة .. التيتيز غي مشير وجو الزلالة زوين..

شيماء: (تنهدات كدور عينيها) القضية زاهية وحنا جايين محشرات..

سعاد: (مقندشة وماعندها خاطر) واييه ونهار نخرجو مقادات كيغبرو ولاد القحـ ـاب..

شيماء: (جرات كرسي ديال اول طبلة وقفو حداها) جلسي غي هنا..

حطات بزطامها وسوارت طوموبيلتها .. جبدات تيليفونها من جيب الكيطمة وملسات..

سعاد: (دوزات يديها مع خثلات شعرها كتنهد) اوووف عيينا اليوم.. كون كان ولد الحلال كون هبطلك غا بهاد التمخيطة..

شيماء: (جرات الموني) اختي ولاد الحرام كيلصقو..

ضحكات بصوت عالي شوية.. الشي لي خلاه يعلي راسه.. حتى جات عينه عليها.. كان كالس هو ومجموعة من الدراري صحابو..بقا مفيكسي الشوفة فيها.. داز بزاف دالوقت ماشافهاش.. او كان متعمد مايطلاقاش بيها..خدا وقته الكافي بتفحصها وهي عاطياه جنب.. شعرها الاسود لي هابط مع ضهرها على شكل موجات.. ولي باين انها مالقاتش الوقت لراسها تسرحو او تمشطو.. وجهها شاحب ولا نقطة ماكياج فيه.. لباس رياضي وكأنها كانت خارجة غي تمشا..حاضيها وهي كتهضر.. فكل حركة وكل التفاتة.. كتشوف فشيماء فقط وعينيها مكيدوروش.. الشي لي خلاه يستغرب ويعرف ان حالها مغير..وهو ساهي فيها.. نخسو واحد من صحتبو فغفلة على البقية لي عاطينها للتكحكيح ونطق بخفوت امام ودنيه..

-قورطاسة ياااك؟؟ حتى انا منين دخلات وانا عايني عليها الخاوا..

ماحسش براسو غير وهو مكاليه مع الكرسي كيعطيه فاللكمات.. هي وفين جات.. صعر عليه.. حتى أثار انتباه كاع لي كالسين فداك القهوة.. منهوم لي ناض كيغوت .. منهوم لي خرج بحالو هارب.. ومنهوم هي وشيماء لي غير شافوه وقفو مسمرين بلاصتهوم.. من خلال هضرتو وكشاكشو لي خارجين عرفات هاد الحرب عليها..

شيماء: (شدات فيديها) اويلي يالله نهربو..

سعاد: (كتشوف فالجوقة لي تجمعات عليهوم.. الدراري صحابهوم ناضو كيفرقو.. تمتمات بذعر) غايقتلو هاد المصعوور..!

شيماء: (بخوف) وااش نتي غمزك ولا غمزتيه ولا شاف فيك؟

سعاد: (يديها على قلبها) فين شفتو انا الزمر؟ بحالي بحالك دخلت كلست.. (هزات سوارت طوموبيلتها وتيليفون) يالله نهربو قبل مايدور ليا يشوهني قدام الشعب..وانا مادايرة لا بيدي لا برجلي..

هزات شيماء صاكها كتفتف.. وسعاد حاضية الحرب لي نايضة قدامها.. جا الجيرون والسرباية ودخلو سيكيريتي من برا.. حتى فرقوه عليه.. لاخور مغط فالارض والرايس باقي كيتهدد عليه باغي يرجع يضربو.. حتى هز عينيه على غفلة وشافها خارجة من الباب هي وشيماء غوت بصوت عالي طفجهوم..

نوردين: سوعاااااااأاااااااااد...

سعاد: (وقفات مسمرة فالباب كدور عينيها مع جنابها ..كولشي كيشوف فيها.. مدات ساروت طوموبيل لشيماء ودفعاتها تخرج كتهضر بزربة) هربي انت قبل مايشركنا بجوج.. سيري حتى نعيطليك..

من خوفها من الرايس شداتهوم من عندها ومشات ماضارتش موراها.. بينما سعاد دورات وجهها غي بشوية بانليها جاي لعندها صاعر.. بقات بلاصتها ماعرفات تهرب ماعرفات ترجع.. لونها رجع احمر مزنك والاعين كلها كانت عليها..وكولشي كيتوشوش عليها.. حتى حسات بقبضة يديه عند دراعها جرها معاه على مرأى الناس مخرجها لباركينغ.. سادة عينيها ماباغاش تحلهوم حتى تغبر من تماك..

نوردين: (جارها معاه كيبخ الدم بالاعصاب ويبزق فالارض بالفقصة) ولد القحبة.. !

وقفها فاش وصلها لقدام الطوموبيل كيقلب على السوارت فجيبو.. حلات عينيها وقبضة يديه مزال مزيرة على دراعها.. مع حلاتهوم مع شهقات بصدمة.. من موديل الطوموبيل لي سايك.. كانت اخر ماغنات المرسيديس.. القليلة شي 600 مليون باش مشرية.. شافت فيه وهو فعز الصعرة ديالو وتمتمات بعدم تصديق..

سعاد: نوردين؟ شنو كدير من غير التبزنيز فالحشيش؟

نزردين: (شافيها كيحل الطوموبيل مفقوص وكشاكشو خارجين) كنفكس القلاوي لولاد القحاب ونبيعهوم..طلعي تقودي..

دفعها طلعات فالطوموبيل وزدح الباب حتى مشات وجات..

سعاد: (بخفوت كدير الصمطة) يعطيك مصيبة ايلا شايطة عليك عطيهالي.. (كدور عينيها فالداخل) بشاااااخ ..الله ياربي والموت هادي..!

ساحت كي الزبدة من عشقها لهاد الحديدة حتى طفجها صوت الباب لي تردخ من جيهتو بعدها صوت المحرك لي نوض الشياط من بعد ماديمارا صاعر.. خارج من البراكينغ مكسل..مكيقشعش قدامو..وهي لاصقة فكرسيها ماعرفاتش علاش داير هاد ردة الفعل العنيفة.. شدات فحزام السلامة بجوج يدين وحاضية معاه الطريق والفيراجات.. وسط المدينة وغادي طاير.. مرة مرة كيسب ويشتم ويردخ لي جا حداه.. حتى صونا تيليفونو كان حكيم.. جاوبو هوط باغلوغ.. كيغوت..

نوردين: غانرجع للرب دمو نحويه..

حكيم: برد اصاحبي راه ماكانش عارفها مرتك..

نوردين: (كيضرب فالفولون بعصبية) وامااايتزللش عليهاااا ازبي .. مايتزللش..

حكيم: صافي وصلها واجي نتفاهمو بالعقل الخاوا.. ماوقاع والو.. واش كون كان عارف غايقدر يشوف حتى فيها والله يهديك اصاحبي..

ماجاوبوش قطع عليه وكركب التيليفون جا تحت الكوسان.. شافيها بنص عين لقاها كتشوفيه باستغراب..عاضة على شفايفها.. زاد فالسرعة وجبد كارو شعلو.. حل السطح ديال الطوموبيل شوية كيكمي ويبخ..

مدة طويلة وهي قالبة وجهها لعندو.. كتشوفيه بينما هو كيدور بين الدروبة والزنافي حتى شد طريق خارجة على المدينة.. كارو مورا كارو.. كيتسمعو صوت انفاسه فالطوموبيل بحالا كينهج.. لهيب انفاسه كون يوصل لعندها يحرقها.. عاقد ما بين حاجبيه.. مركز مع الطريق بنظرة قاسية.. مرة مرة يزير على المقود حتى يبيضو مفاصله..ومرة كيدوز على شعره بحنق.. بحالا كالس على الشوك.. تعصب فرمشة عين ودار ردة فعل عنيفة على سوء فهم بسيط كون دار عند صاحبو وقالو يهبط عينيه على مراتو كان غايفهم واكيد غاتكون احسن من الشوهة لي دار ليه وليها.. قدام صحابو والناس ..غزز سنانه بعصب... فاش كيتفكر انه تسرع.. وحتى باش يبرد الفقصة ديالو فيها.. كيلقاها مادارت والو..لباسها كان محترم.. ولا نقطة مكياج.. وحتى شعرها مامسرحش.. شافيها بنص عين لقاها حاطة راسها على الكرسي كتشوفيه.. ضوء خفيف فالطوموبيل كيبانو عينيها كيلمعو معاه..رجع شاف قدامو مخنزر.. وجهه المتشنج وملامحه الحرشة كانت قادرة تشوفهوم بوضوح..كان واصل لقمة غضبه واش هي السبب ولا غي جات فطريقه وبرد فقصته فصاحبو على ضهرها؟ سؤال تبادر لذهنها وسرعان مانطقات بيه بخفوت.. يديها تسللات بشوية وتحطات فوق من يدو...

سعاد: داير هاد الفضيحة كولها على قبلي؟

الصمت هو فقط لي صدر من عندو.. حركات يديها على يدو كتحسس اصابعه الخشنة وقالت بهمس..

سعاد: ماتقوليش كتغير عليا الرايس؟؟

شافيها مخنزر .. طلعها وهبطها ونطق بحدة.. كيزير بيديه على الفولون ..

نوردين: حتى نكون انا ال*امل لي نخلي السلاكط يتزللو ليا على مرتي وانا حاضر..!!

غمضات عينيها لوهلة وابتسمت بدون شعور.. جملة دغدغت حواسها.. رخاتها وحسساتها بالانتشاء.. زوين الاحساس فاش تلقاي لي يغير عليك.. يقراك من عينيك بلا مادوي.. يدافع عليك وقت الشدة.. الرايس كتكرهو بالحق راجل معاها فالمواقف الصعبة.. دوزات بيديها على طول يديه حتى لدراعه.. كتراقب تغير ملامحه ..وحركاته الا ارادية.. حتى قيمات عليه فهاد اللحظة..تحركو هرموناتها الانثوية.. ظلام الليل والهوا البارد زادو شعلوها..شافت قدامها كانت الطريق خالية.. تقريبا غي الغابة على جنابهوم.. بركات على البطونة زولات السمطة..وتململات من بلاصتها..دور وجهه جهتها ونطق بصوت اجش..

نوردين: شكاديري؟؟

سعاد: (حطات يديها خلف عنقه كتلعب بصبعانها بين شعره ورقبته وهمسات) خفف السرعة شوية..!

خففها فالحين ماشي حيت هي طلبات ولكن حيت مابقاش مركز مع الطريق وحركاتها على رقبته.. قوس حجبانه كيشوفيها بتدقيق.. كانت دايرة فيه شي شوفات م*مولين.. حرك الفولون على غفلة.. وقلب الاتجاه داخل بين الشجر لجهة الغابة.. عضات على شفايفها عاجبها الحال.. وحتى هو فهمها اش باغا.. غير حبس الطوموبيل.. ناضت من بلاصتها وتلاحت عليه طالعالو على حجره.. ورجليها مفرقين عليه..تحركات فةدقق منو عن قصد كتستفز لي مابين رجليه.. باستو فعنقو ومور ودنيه همسات..

سعاد: قيمت عليه.. جبدو!

ماشي الرايس لي يعكز على الحوا او يقول لا.. خشا وجهه بين صدرها ويديه ضارو على طرمتها كيعبر فيها بيديه.. باسها فعنقها فاش علاتو .. وطار عليها بعضة حتى شهقات .. تكلم بصوت اجش..

نوردين: نجبدووو أ سوسو..علاش مانجبدوش..!

خشا يديه تحت الكرسي برك على بوطونة رجعو اللور عاطيه مساحة أكبر فين يبقا هازها.. نوضها عليه كلسات عند ركابيه..عضات على شفايفها كتراقب حركاته بهدوء وهو كيحل السروال.. بشوية وبالمهل كأنه داير ليها عرض أز●باب..طلعات معاها الصهدة وبزازلها قيمو.. حيدات الطريكو لي كانت لابسة.. وموراه قلعات الس●وتيانات بزربة..وبقات حاضياه كيجبد فيه.. بحالا كيحل شي كادو .. دايرليها التشويق..

سعاد: (الشهوة باينة فعينيها..نطقات بنفاذ صبر) وا دغيااا..

نوردين: (تقاد فجلسته ودور يديه مورا شعرها جبدها حتى جا وجهها بين فخادو.. وخشاهليها فمها حتى تغرغر فحلقها.. غمض عينيه وعلا راسو منغاام) اممم.. كولييه قبل ماياكلك أكبيدة..

شداتو بجوج يديها معاونة بيهوم.. جاها هاد المرة لذيذ بحال شي مصاصة.. تفننات وهي كتلعب بيه بلسانها.. كدخلو وتخرجو بسرعة.. وتماصيه بيديها.. كتسمع صوت تأوهات خافتة خارجة من فمو .. حتى حسات بيه غايجيبو وخشاتو بين الشق دص●درها كتماصيه وعينيها عليه..

نوردين: (الريق مجموع ليه فحلقو بقوة الش●هوة لي وصل ليها..نطق بتلذذ) اااح علييك احححح...

غي جابو جرها من ذقنها وتحنا عندها كيبوس فشفايفها بشراهة.. ويلعب بلسانها..كينهجو بجوج بحالا مسابقين فشي عقبة..الحرارة طلعات معاهوم بجوج.. بحال شي جوج جيعانين لقاو طبق شهي كيفترسوه بشراهة..

نوردين: (طلق من شفايفها مخليها تنفس..حط يديه على ص●درها كيقرصها منهوم) مناين جايبة هاد الحلاوة؟ مناين..

سعاد: (جراتو من كول الطريكو لي لابس وقطعاتوليه حتى بان صدرو المزغب.. حطات يديها على كرشو عبزاتها كضحك) اححح .. على الكريشة..

ناضت كلسات على حجرو وعطاتو صدرها.. كتمحكك عليه كي الحرباية.. حتى هو ماكانش من العاجزين.. رضعو ليها حتى صعرات وبدات تغوت..طلق منها من بعد ماطبعها مصان وعضان فعنقها.. وشحطها فطرمتها..

نوردين: حيدي سروالك أ زايني..

جات توقف الطول دالطوموبيل ماطاوعهاش.. ضحك حتى بانو سنانو وجرها من دراعها لعندو باسها بوسة طويلة ونطق بهمس..

نوردين: نزلي..

حليها الباب نزلات.. نزل موراها شعطها لط●رمتها حتى ضارت عندو.. البرد سمقلها مع ع●ريانة من الفوق حتى تبورشات.. جرها عندو خشاها فيه.. كيهبطليها السروال مع الس●ليب كولشي فخطرة.. ويوزع قبلات ساخنة فعنقها فكتفها ودراعها..حتى مابقاش قادر يصبر على الحلاوة.. تحنا هزها بين يديه حطها على الكابو حتى طلعات معاها البرودة..

سعاد: سسسس.. ااححح..

نوردين: (فرق ليها رجليها عاض على شفايفه.. غير شاف التوتو علا العلام) الكوااا فوق الكابو غايعجبك أ مو ط*●ون مزغب..!

خشا وجهو ولسانو موراه كيلعب فأنوثها .. وهي كتهز وتحط فوق الكابو..خشا فيها جوج صبعان كيدير الطريق لبوعلام منين يدوز..

سعاد: (عينيها مقلوبين لفوق وفمها محلول كتشهق.. نطقات بنفس متقطع) ااااي.. خشيه خشيه دغيااا..

علا راسو كيشوفيها عرقانة وكتنهج.. وجهها رجع احمر ومزنكة كتعصر من حر النشوة .. خرج صبعانو فازكين .. لحسهوم بتلذذ.. طلع فوق الرويضة ومن بعدها تلاح فوق منها.. كيبوس فشفايفها بنهم.. وهي كتلوا تحت منو بحال الحية.. بقا معاها حتى ترخات وطلعو فغفلة منها.. خرجات نفس حار من صدرها وعينيها نامو.. مستحلياه تحت منها..

نوردين: (باسها فعنقها كيمشي ويجي فوق منها.. العرق هابط مع عموده الفقري.. نطق بانفاس متحشرجة منشوي) توحشتو...

نبرة صوته المبحوحة بورشاتها.. دورات يديها على عنقو كتلمس رقبته.. بينما هو كيطبع قبلات ساخنة على وجهها.. شفايفها.. ويديه كتلعب فصدرها.. زادت جراتو لعندها ولوات رجليها على ضهره.. ريحته معمرة جيوبها الانفية.. بلعات ريقها وقالت بخفوت) مننين توحشتيه علاش كتخونو؟

نوردين: (قبلها بدفئ كيديه ويجيبو تحتها بشوية..زادها قبلة اخرى كانه غير كيدوقها.. باسها تحت ودنيها ونطق بهمس خشن) حلاوتو بوحدها..

هضرته دغدغات اطرافها.. سرب من النمل طلع مع رجليها.. غمضات عينيها مستمتعة بقبلاته وترخات حاطة راسها على الكابو.. مرفوعة لعالم تاني.. قلبها وعقلها كيفيضو.. رغبة .. وشغف وجنون!

معاه وبالضبط فوق الفراش كتنسا راسها.. كيمتعها ويرضي غرورها كأنثى.. لمساتو على جسمها.. سواءا كانت هادئة او عنيفة كيستفزو غريزتها.. قبلاته الحنينة كتحسسها بالانتشاء.. كيعرف يلعب على وثرها الحساس.. كيشبعها.. ويشبع حتى هو..داك خيط الزغب لي هابط مع صدره حتى لصرته كيخلي معدتها تقلب ويزيد من رغبتها فيه اكثر.. اصابعه الخشنة فاش كذاعب صدرها كيخليوها تفقد صوابها معاه.. وطالب بالمزيد.. هداك المزيد لي كيقتلها ويخليها خاضعة ليه فالفراش عن رغبة واقتناع.. حاسة بأنوثها وسط داك الهالة من الرجولة لي كيحيطها بيها.. حتى كيخليها تآمن أن ما من رجل غايقدر يوصلها لنشوتها من غير الرايس! هداك الايمان الاعمق من الحب..!

وهي مستمتعة بداك التواصل المهلك بيناتهوم بداو قطرات المطر كيطيحو وكأن السماء غارت منهوم .. كالا بدرعانو مغطيها كولها وكانو قربو يجيبوه بجوج.. صوت تاوهاتهوم كتسارع صوت حفيف الاشجار.. بدا كيزرب قبل ماتجهاد الشتا.. حتى حطات يديها على صدره كتحسس حرارته ونطقات بلذة..

سعاد: غي بشوية مزال ماسخيت..

نوردين: (ظهر شبح ابتسامة على وجهه مع الظلام وتحنا باسها من فمها) غاتمرضي! الشتا كطيح..

سعاد: (عنقاتو جاراه لعندها طالبة المزيد) غانمرض ايلا ماكملناش..

نوردين: (كيبوس فعنقها ساد عينيه) كنتي مقطوعة؟

سعاد: (حركات غي راسها كتحاك بعنقها على لحيتو) اممم..

نوردين: (كيدوز على طرمتها بهدوء) كون سيفطتي غير ميساج فعوط خاصني الفلوس .. كنت غانجيك..

سعاد: (عضات على شفايفها كضحك فاش عضها فعنقها) حتى الفلوس قاضيين غرض الرايس! احح..

زاد فسرعته أكثر.. صعراتو بصوتها الهادئ والحنين.. ولمسة يديها الناعمة.. كتخلي عقله يغيب فين يبان شي حشيش ولا غبرة..زير عليها تحتو كيخبط حتى كيتكلم الكابو والطوموبيل كتزعزع بيهوم .. الشتا كتجهاد .. وداك الما هابط مع اجسادهوم بارد كيطفي النار لي شاعلة فيهوم بجوج..

بعد مدة من التلاحم الجسدي حطات راسها فوق من حجره داخل الطوموبيل.. مرجع الكراسة بجوج اللور.. الزاج مطلع طالق الصوفاج.. باقيين عريانين بجوج.. كيتصنتو لزفير انفاسهوم من بعد معركة خسرو فيها بجوج وربحات الشتا.. كارو بين يديه كيكمي ويسوط الفوق.. واليد لوخرا كتلعب فشعرها.. فلحظة تأمل كيراقبو قطيرات المطر لي كضرب فالزاج وفسطح الطوموبيل فصمت.. حتى نطق بصوت مبحوح الدخان خارج بين شفايفو..

نوردين: شيماء امتا تصالحتي معاها؟

سعاد: (عينيها على الشتا برا.. نطقات بخفوت) ماعمرنا دابزنا.. كولشي كان مخطط باش تجيبك عندي..!

نوردين: (ضحك بسخرية) ماكاتهديش..

علات عينيها شافت فيه.. اول ما لمحات خاتم فضي بجوهرة سوداء فيديه لي شاد بيها الكارو.. تغيرو ملامحها وهربات دغيا عينيها.. كتجمع قبضة يديها وطلقها بتوتر.. حس بانقباض جسدها فوق منو.. شافيها عاقد حجبانه وقال بحدة..

نوردين: مالك..؟

سعاد: عاد عرفتك فين كنتي غابر..

نوردين: (باستفزاز) سحورك مابقا قاضي والو أ بنت السعدية..

سعاد: (طلعات معاها السخانة .. شافت فيه عينيها تخربق فيهوم اللون .. ومع ذالك كتهرب من نظراته..) فيك فيس دالقحاب الله يعفو عليك..!

نوردين: (دوز بصبعانو لي فيهوم الكارو مع وجهها ونطق بخفوت) غرتي؟؟

سعاد: (ناضت من فوق منو كلسات بلاصتها كتقلب على حوايجها.. تكلمات بلا ماتشوفيه) ماغانقدرش نبقا نعس معاك وانت كل مرة فمن خاشيه..

نوردين: (كيكمل كاروه ببرود) نهار تقطعي وقوليهالي فوجهي هاد الهضرة..!

لبسات الفوقي دالكيطمة بلا سوتيان.. وكلسات بلاصتها كتحس بالنفس محقونة فيها.. وشي حاجة ثقيلة نازلة على كتفها.. قالت بضيق..

سعاد : ديني بحالي تزيرت..

لاح الكارو كيشوفيها كتماصي عنقها.. لبس سروالو وبقا بصدره عريان.. مستمتع بشوفتها هاكا.. حرك اللوطو وتم راجع ماشاريار.. بينما هي قلبات وجهها للجنب.. التبوريشة طالعة معاها.. كتفادا تشوفيه.. خاطرها تزير وقلبها ضياق.. جنونها نفروه حيت حساتو غلبهوم.. من الخاتم لي داير عرفاتو مشا خدم عند شي فقيه حصن راسو وفك ثقافو.. والمدة لي كان غابر عليها كان شابع فقنت اخر.. فكرة ديال انه كان كل نهار مع وحدة نفراتها لجوج اسباب.. الاول ماغاترضاش يحسبها شياطة بحالها بحالهوم والثاني داك التملك الجنسي لي كانت كتحس بيه اتجاهه توشاه ليها..!

من بعد نصف ساعة كان وقف بيها حدا باب دارها.. مد ليها السروال لبساتو.. عطاها جاكيطتو دارتها فوق منها.. عينيها مكتخليهاش تفلت جيهتو.. حتى جات تنزل جرها من يديها دورها لعندو حانية راسها..

نوردين: (باستغراب) مالك؟؟

سعاد: (بلعات ريقها.. كتحس بكتافها طايحين والشقيقة شاداها.. تكلمات بلا ماتشوف فيه) خليني نمشي أنوردين غانطيح!

نوردين: (ببرود) داكشي ولاد القحاب دالجنون ديالك عاود؟

سعاد: (كتبعد منو نافراه) خليني نمشي تزيرت بزاف!

طلق منها وبعد كيشوفيها.. غمضات عينيها حلات الباب بزربة ونزلات كتجري مكتشوفش موراها..بقا مراقبها حتى غبراات.. شعل كارو كينتشوا بيه.. عاجبو الحال للنتيجة لي وصل ليها.. ماشي الرايس لي دورو وحدة على صبعانها.. وماشي هو لي غاتحيدليه شي حاجة بالسيف عليه..!

دخلات للدار كضرب رجل فرجل.. الدموع سايلين من عينيها .. ضياق حالها وطاح عليها الضيم.. غي سدات الباب.. لاحت الساروت وكلسات فالارض.. شادة فراسها كتبكي وتشهق بعنف.. كانت نجاة كالسة فالصالون هي وشيماء لي مابغاتش تمشي حتى تجي.. غي سمعو حس الباب ومن بعد صوت البكا ناضو طايرات يشوفو اش بيها..

شيماء: (تحنات عندها ..شدات فيديها وقالت بخوف) شتتت.. سعاد حبيبة اش طرا؟؟ ياكما ضربك داك القواد؟

نجاة: (راجعة من الكوزينة كتجري من بعد ماجابت الما) هاكي اختي هاكي..اويلي مالك شنو دارلك المزغوب؟

سعاد: (شادة على صدرها كتشهق وتعصر غي بوحدها) ت.. تخنقت..

شيماء: (شافت فنجاة بقلق) عاونيني ندخلوها لبيت...

نجاة: اويلي حتا نشوفو مالها؟ راه كاتلك تخنقات..

شيماء: (خرجات فيها عينيها) عاونيني انجاة راه مافيها والو .. مطيحينها ماليها..

نجاة: (بفزع) التسليم الله..

عاوناتها حتى نوضوها بجوج بمشقة دخلوها لبيتها وهي كترجف.. جسدها كيتهز ويتحط غي بوحدو..

شيماء: (كتقادها ففراشها) سيري جيبي شوية دالزهر وشعلي العود.. سربي دغيااا..

مشات نجاة كتجري جابت داكشي لي خاصها.. عطاتها قرعة دالزهر ليديها ومشات هزات مبيخرة تشعل العود..

شيماء: (كدهنليها عنقها وجبهتها وتعطيها تشم الزهر فنيفها) صاف احبيبتي صاف.. ماكاين والو.. الرجوع الله.. قولي اعوذ بالله من الشيطان الرجيم.. حنا متايب الله..

نجاة: (قربات ليها المبيخرة لنيفها .. كتهضر مع شيماء) اختي نقرا عليها القرآن؟

شيماء: (كدلكليها يديها بالزهر.. خنزرات فيها) شتتت..ماغاتبغيش! خليها هاهي غاتهدن..!

داكشي لي كان.. أنينها بدا يخفاف..سكتات من البكا وبقات كتشوف فالسقف سايخة.. النفس كطلع وتهبط بصعوبة.. مرة مرة كتشهق بعياء..

شيماء: (حطات يديها على جبهتها) شوية أختي؟

يعاد: (لسانها ثقيل.. السخانة خارجة منو) ش.. شوية.. (شافت فنجاة) قربي ليا المبيخرة..

قرباتها تقريبا لنيفها.. استنشقت داك الريحة مطولا.. واخدة نفس عميق.. دخل مع صدرها حتى انتعشت وبدات تحس بلي داك الحجرة لي كانت مثقلة على صدرها بدات تمشي.. حلات عينيها وشافت فشيماء..

سعاد: كانو طالعين فيه.. شفتهوم بعيني!

شيماء: (باستغراب) شكون الرايس؟

سعاد: (حركات راسها بالايجاب) تحطوليا فوق كتفي ماقدرتش نكمل فيه الشوفة..!

شيماء: شنو زعما يكون دارلك شي حاجة؟

سعاد: خاصني ضروري شي شوافة...

شيماء: سميرة مزال فالبنيقة.. نشوفو رقية؟

سعاد: هي مكتبغيش ديبلاصا نمشيو عندها غدا قبل ماتمشي لطبيب؟

شيماء: يالله اختي..

سعاد: (شافت فنجاة لي شادة القنت فيدها مبيخرة كالسة كدور فعينيها..) جيبيلي الدوا!

نجاة: (شافت فشيماء كتسولها غي بعينيها واش تعطيه ليها.. ورجعات شافت فيها) بلا ماتشربيه انا نبقا معاك حتى تنعسي..

سعاد: (طلعات معاها الصهدة.. ماحسات براسها غير هازة الفيوز لي كان حداها وشيرات بيه للارض.. غوتات بصوت عالي طفجاتهوم) جيبولي الدوااااااا القلاوي !

شيماء: (كدور فعينيها.. غمزات نجاة) سيري جيبيه.. (شدات فيديها كتكالميها) صافي تهدني اكبيدة..

ردات راسها للور بعياء.. دماغها كيدور..مادوات ماتكلمات حتى مشات جابت ليها الدوا..مداتو ليها..لقات باقي غير ربعة الحبات شرباتهوم كولهوم ولاحت الباكية فالارض..!

سدو عليها الباب من بعد ماداها النعاس.. خرجو على برا كيتنهدو.. حتى صونا تيليفون نجاة فزعها.. وزادت تفزعات فاش شافت رقم الرايس..

نجاة: (الوان تخلطو فوجهها) اهيا ناري لاش كيعيطلي؟

شيماء: (كتفيبري بلاصتها) جاوبي جاوبي لايمشي يجي كورا تيليفونها طافي..

جاوبات بسرعة مع ألو مع خرج صوته من التيليفون صاعر..

نوردين: فييينهياااااا؟؟ علاااش مكتجاوبش؟

نجاة: (كتفتف فالهضرة) السي نوردين راه دخلات عيانة.. شربات الدوا ونعسات..

نوردين: (خفض صوته وقال بأمر) سدي باب البالكون.. والكوزينة.. وباتي حداها..

نجاة: وخ اسيدي..

قطع عليها قبل ماتكمل هضرتها.. شافت فشيماء كتبلع ريقها..

نجاة: اختي انا كيخلعني هاد السيد..

شيماء: (جراتها كلسو وشعلات كارو) كون تشوفي انا..فيه شي هيبة فشي شكل..عرفتي شحال من مرة كنت كنصادفو فشي بواط ولا شي مجمع.. شتي وخ يكون هو غي معروض.. كيبان هو مول الطبلة.. ولوخرين غي ضياف عندو.. لا فالكلسة ولا فالهضرة ولا داك التخنزيرة.. كيبان قاصح وجهو كيرد الصهد عليه.. تقدريش تزعزعي حداه..

نجاة: (قربات عندها كتهضر بشوية) عرفتي شنو كديرليه سعاد؟ غاتركب فيه السكر على صغرو..

شيماء: (كضحك) اشمن صغر.. السيد فايت الربعين وباقي يدك ويدردك..ولاد القحاب مكيشرفوش..

نجاة: (ناضت كتفوه) نوضي نوضي.. تنعسي حداها نتي ولا ندخول انا؟

شيماء: دخلي انت انا مزال غانكلس شوية..النعاس طاير ليا..

نجاة: (طبطبات على كتفها) وبراكة ماتفكريش بزاف... دبا ربي يفرجها من عندو..

شيماء: (تنهدات بعمق كطفي الكارو) مخلوعة وفنفس الوقت ماساخياش بيه..

نجاة: (بحسرة) الله يشوف من حالك... ربي يفاجيها..

شيماء: اميين.. تصبحي على خير اختي..

نجاة: تلقاي الخير..

**

الظهر أدنات والناس غاديين للجامع.. وقفات بطوموبيلتها حدا واحد الدار فحي شعبي.. نزلات هي وشيماء لابسين عبايات ودايرين الزيوفة على شعرهوم.. مع طوموبيل بورش مهيبة كيبانو بحال شي جوج شيخات سعوديات نازلين فكاريان.. دقو فباب الدار.. خرجات ليهوم مرا لابسة بيجامة وفواطة دايرة وشام فجبهتها وذقنها كتمسح يديها فمنديل صغير.. غي شافتهوم عقلاتهوم..

رقية: اهلااا.. عاش من شافكوم البنات..

شيماء: (كتسلم عليها) غي فالدنيا اخالتي رقية.. ندخلو؟

رفية: (سلمات على سعاد لي كانت كتبان عيانة ومهدودة..) مرحبااا دخلو..

دخلو معاها لداخل.. كلساتهوم فبيت صغير.. فيه طبيلة وحصيرة وجوج خديديات... مجمر طافي محطوط فالارض..تسابيح.. وكارطة..

رقية: (كلسات مربعة يديها) الله والنبي.. (هزات كارطة.. كتشوف فسعاد مهمومة وخاطرها مغير) مال زينة البنات؟مالها مضيومة؟

سعاد: (تنهدات بضيق) مخنوقة وحالي عالم بيه غي الله..

رقية: (كضمس كارطة وتشوفيها.. كتلحن الجمل بصوتها المبحوح) بويا يا بويا وشوف من حالي.. شارد عقلي يا بويا فالهم و الروح بين الموجة تلالي و تهمهم...فين الضحكة راها تجلات و فين الفرحة حسدوني عليها .. رفسوها الذياب الكوحل يابويا..و يا بويا ولين رماني و لين لاحني البحر نار الغم عايمة فالدم و فقلبي تكوي و تصادي.. ااااه يا مكواني يا بويااا...

سعاد: (دموعها كيقطرو فصمت.. تمتمات بحر) ياربي حن وعطف..

رقية: (حطات حداها كارطة بنصف ابتسامة باينة ليها سنة ديال الذهب كتبري) علامن باغا نشوفلك الغزالة؟

سعاد: على راسي وراجلي..

رقية: سميتو وسميت مو؟

سعاد: نوردين ولد خديجة..

رقية: قولي.. ها قلبي وها تخمامي وها باش يأتيني الله..

قالتها وعاوداتها تلاتة دالمرات..حطاتليها كارطة ومعاها ميتين درهم.. هزاتها رقية دارتها على قلبها وغمضات عينيها كتمتتم بكلمات مامفهومينش.. حتى شهقات مزيرة وبدات تفرق كارطة وتهضر..

رقية: الله يابنيتي والدنيا عطاتك وشاطاتك.. (شافت فيها بحسرة) مزالة تنزلي الدمعة الحارة.. ومزال تغيري على طريقو.. زهواني بو بنات.. ضايرة بيه البيضة مولات السالف كحل..طامعة فبيت الفرلش معاه.. شغانقولك (كتحقق فكارطة) هو قالب وجهو لجيهتك.. مايبدلك مايفرط فيك..كيقول بيا ولا بيها.. مني تخلاق.. (جمعات كارطة وقلبات التفريقة مرة مرة كتكرع.. ووجها كيتكمش) ابنتي راجلك كيخدملك.. سيري ضربي الفكد فحزامك..

شيماء: (نقزات) ثقفها؟

رفية: ايلا كانت خلاطة راه ربطها.. (شافت فسعاد) شاك فيك كتخونيه؟

سعاد: (بنرفزة) ماعرفت لمو..

رقية: (رجعات شافت فكارطة) كيقول هو كيخرج من هنا ونتي كتخرجي لعند الزلال من هنا.. حاضي وماحاضيش.. حالف على جلستك.. مايشرك معاك كلام ماياكل طعامك.. صعيييب اختي وقاسح.. كيقول نقتلها ومانبردش.. مزاال تمحني معاه هدا.. غاينوضلك معاه غيار قريب.. (عقدات حجبانها كتحقق فكارطة) ابنتي راه عندكوم الفراق!

يتبع...