محتوى القصة
تونار حط جدو فالفراش وغطاه وجلس حداه
الحاج : ولدي لاكانت عندك الخدمة مانشدكش معايا انا بيخير
تونار : ( رتب عليه) اشنو دابا كتجري عليا
الحاج : لا آياسكّور ينو نتا عارف بلي كنتوحشك ومكرهتكش ديما معايا .. غي راني عارفك شحال هاز فوق داك الظهر قلت لاتكون مشغول
تونار : تاحاجا مغاتشغلني عليك
الحاج : ( تنهد واستجمع قواه ) اا . م .. مجاش عندك المحامي
تونار : ( عرف علاش كايحوم ) لا ... علاش ? كاين شي مشكل
الحاج : لا اشمن مشكل غايكون .... غير سولتك ...
تونار : ( شاد يديه فيدو ودخل فالموضوع لي شاغلو ) جدي ... انا عارف هاد السؤال عاودتو ليك كتر من مية وخمسة وستين مرة .... ولكن ... غانعاودو للمرة مية وستة وستين ( الجد معلي حجبانو ديما كايستغرب فهاد التدقيق ديالو فالحساب وتونار كمل بجدية ) وكل مرة كايكون عندي أمل جديد يتبدل الجواب ديالك
الحاج : سوّل اولدي ... الله يسمعنا خير
تونار: ( عينيه فعينو ) مايكونش الماضي باقي حي !!
الحاج : ( سرط ريقو ) ا اش فكرك فهادشي دابا اولدي . هاد الموضوع سديناه زعما
تونار : ماعرفتش ( حيد كاسكيطتو وحك فشعرو ) شي حاجة عندي لداخل .. كاتقول ليا الماضي باقي حي ومماتش .. حتى يلا مكانش كامل حي شي حاجة مرتبطة بيه باقا حية ...
الحاج : ب ( كاتصبب بالعرق جبينو ) ... بحالاش اولدي
تونار : ممم ... ياك حتى هوما كون كان كانو حيين كانو غايكونو كايضّنو بلي انا وياك متنا .... وهاحنا حييّن ... زعما مايكونش تاهوما شي وحدين فيهم باقين حيين وحنا مافخبارناش .... !!
الحاج : ا لا لا اولدي انا بقيت حي حيت مكنتش فالدار ..... ونتا ر راه معجزة وصافي وكيف قلتي صاحبتك لي عتقك ...
تونار : اامم .. تماما يعني مدام عتقني .. غايكون حي ?
الحاج : اولدي راه قتليك غير هزيتك داك ليلة جاني الخبار بلي تاهوما ماتو ... لي زرع لينا ... راه زررع ليهم حتى هوما وكولشي مات وتن......
قاطعو تونار ملي وقف بعصبية كايمشي ويجي
تونار : باركا اجدي باركا ..... واش هاد السنين كاملة مابغيتيش تيقني ... ( كايضرب بصبعو لراسو بقوة ) شي حاجة هنا .. هنا كانتفكرها ... باقي كنتفكر الولد لي قاليا جدي باغي يحرقكم .... ااه كان فيا التوحد .. ومعاقلش على بزاف دالحوايج كايخصو طفولتي ونسيت النص فعائلتي بسبب داك الاضطراب ... عااقل .. عاقل على الصورة ديال داك الولد وهو كايقولها ليا .. ولكن هادي باقي عااقل عليها بحال الى البارح عاد ....
الحاج : ( خلعو ) تونار ينو .. اولدي راه كنتو صغار و ومكانش عارف يمكن آش وقع ويمكن سمع شي حاجة بالمقلوب ويمكن غير كايتهيأ ليك راه كنتي مريض اولدي فصغرك وديما كاتقول لينا شي حوايج مكاينيش كاتخليهم ( تونار كايزيد يعصبو هاكا ) ... را كنا بزانازا وكان هاد الحروب بيتاننا .. واحد آخور لي نصب لينا هادشي وقتليك ماعرفتوش شكون كون عرفتو كون سيفطتك ليه تجيبو ليا مقطع طراف طراف .. راه كنا خدامين فالخطر وعندنا العدو مكتحسبش منهم بزاااف ... ياك شفتي الارض بعينيك لي وريتك كيفاش ولات خالية كايرعاو فيها غير الكسيبة وداتها الدولة ..
تونار : (ضار عندو ) اش عرّفني آجدي راها نفس الارض ? وانا معاقل على وااالووو .....
الجد : واش مكاتيقش فيا اتونار ? انا نكدب عليك فحوايج بحال هادو ? بغيتي تشوف الارض لي كنا ساكتين فيها وريتها ليك ... وسولتي حتى الناس وقالوليك أرض البزنازا هايديك لي تحرقات ف 2000 .... ارضنا بجوج حنا وعائلة هاد صاحبك ...واش كون كان حي انا غانخليه بلا ماننتقم لدم ولادي ???? مكتيقش فيا ياك ??
تونار بقا يرمش وحس براسو تعصب حداه وهو كاتفادى دابا هادشي ... ورجع جلس وباس على راسو
تونار : كنتيق فيك اجدي .. وكنتيق فيك كتر من اي حاجة فهاد الدنيا واخا نتا لي علمتني مانتيق فحتى واحد تقت فيك نتا .... ( باس يديه بجوج ) نتمنى ماتخيبش تقتي شي نهار آجدي .... كنتمنى ...
المامون تزير قلبو بدا كايتفس بصعوبة
تونار : جدي !! جدي نتا بيخير ?? ( تخلع )
الجد : بيخير .... بيخير اولدي ... غ غير هاد الموضوع كاي( قاطعو )
تونار : صافي صاافي الغلطة ديالي اجدي .. مكانش عليا نجبد معاك هاد الموضوع فوقت بحال هدا ... سمح ليا الغلطة ديالي .. رتاح !! حاس برسك بيييخير ??
الجد : ماتبقاش اولدي تعاملني بحالا راني بيضة وغاتهرس ... راني بيييخير
تونار : ( هبط راسو على يديه ) نتا ماشي غي بيضة وغاتهرس .. نتا كنزي ... نتا عندي كولشي فهاد الدنيا.. الى مشيتي ليا الموت حسن ليا ...
الجد : ( كايدوز يدو على شعرو وتونار ناعس عليه ) بعيد الباس بعيد الباس باقي صغيييير وباقي الحياة قدامك بجدك ولا بلا بيه ... نسا اولدي هادشي ... كنرغبك نسا هادشي وشوف لمستقبلك سنين ونا كنرغبك .. عائلتنا ماتت الله يرحها هدا مكتاب الله .. عيش اولدي حياتك وبعّد على هادشي وماتفكرش فيه
تونار : صافي اجدي... كون هاني ....
علا راسو وبدا كايحك فيعنيه يبعد داك الغضب وتنهد معععمق يستعد قوتو ...ملي تفكر بلي كارتة اخرى كاتسناه فالبيت ....
تونار : نخليك ترتاح ونعس شوية .. ( شاف تحت لباب بانو ليه الرجلين ) غاتكون مراتك بغات دخل لبيتها ... انا غير هنا اجدي مغانمشي فين ( لبس كاسكيطتو و ابتسم ليه وجا ماشي)
الجد ( وقفو ) : اييه .... آسكوور ينو
تونار : ( ضار عندو ) مايندين ? (شنو )
الجد : ( بضحكة فرحانة ) شنو درنا فالعروسة !
تونار: ( دوز يدو على وجهو بعياء وضجر ) فففف مكتعيااااش مكككتهذش اجدي وااالو
الجد : نتا لي واش ماعيتيش اولدي ?
تونار : صافي اجدي ... عارف شغلي .. عطيني مزال الوقت ويكون خير ... ديها غي فصحتك دابا
حاول يتبسم وحل لباب وهي تبعد حكيمة على لباب كانت كتسنط وشحال كيكره فيهم هاد القاعيدة وتنهد ومشا وهي دخلات لبيتها والجد باقي متبع اثرو ومبسم بعينيه دامعين
الجد : الوقت هو لي ماعنديش اولدي .... ونا الى تبعتك عمرك غاتزوج ... غاندير شرع يديا ولي ليها ليها ....شحال قدك تعصب
تمشى تونار حتى للباب دجناحو وهو يوقف ... وضار جيهة الحيط القصير المطل على وسط الدار وشد فيه بيديه ... واش يكون فعلا جدو على حق ! ولكن هو صورة الولد الصغير لي قاليه ان جدي غايحرقكم باقيا فودنو ... يكون فعلا كاملين تحرقو ! ..
هاد الاسئلة كاتجول فدماغو بشك كبير لي كان نساه شوية وفيقاتو ليه ليديا بالتعويذة ... نساه نهار طلب من جدو انو يشوف الارض لي كانو ساكنين فيها واش فعلا خالية أو لي حرقهم استغلها ... اكيد هادشي لي كاين فالواقع .. اما المامون مكانش اقل ذكاء منو ... مشاو وداه لواحد الارض كانت خالية فملك الدولة وحتى هي كانت تحرقات ... ومشا خلص شي رجال تما يديرو راسهم دايزين باش يسولهم تونار ويقولو ليه كانت اررض المامون وعائلة اسراج الله يرحمهم ... وتحرقات حداه ارض بزناز اخر ... الامر قنعو بعض الشيء ... و معزة جدو عندو خلاتو نوعا ما يتيق فيه ... مكاملاش 3 ساعات ورجعو لان الجد ديما رافض تمام الرفض يگلس فالمغرب ... عارف ان لاجلسو بزاف غايبحث كتر .. شي لي مساعدش تونار فالبحث هو داكرتو لي كبرات مضطربة بسبب التوحد لي كان عندو ... معاقلش على بزاااف دالتفاصيل فصغرو ...عاقل فقط على ببغاء ... وصاحبو ... واخا هوما كايتفكرهم بصورة متقطعة فدماغو لدرجة اسمائهم نساهم .... معاقلش على عائلتو .. معارفش اسم جد صاحبو ... معارف والو ... لي عارف هو عائلة صاحبو كانت باغا تحرقهم.... منين رجعو للمغرب حاول يوضع الثقة فجدو ويتيق بيه هاد المرة .... لان عمرو ظن ان الجد ديالو تقدر توصل بيه يخلص ناس يكدبو عليه .. كون جاتو مع شخص آخر عمرو يتيق .. ولكن جدو كايتيق فيه .. بعد مرات مكنكونوش اغبياء غير الشخص لي كانتيقو فيه كاتكون عندنا ليه واحد المكانة كبيرة لي كاتخلينا نتيقو فيه بالعمى ....
رجع لحياتو وحاول يركز على خدمتو و مباراياتو لي كل مرة وفاش كايدير وغالبا كايكونو فالرياضيات ... وابحاثو بخصوص الادوية ... ولي حاز اخر مرة على جائزة بسبب اختراعو للدواء لأصحاب فقدان المناعة المكتسبة ... ولي كايتباع بالملاين للمستشفييات لكبار .. وكايخلي ديما عندو جرعات احتياطية من اجل المرضى الفقراء لي كتقدم مجانا ... رغم ان هاد الدواء كايتصنع منو قليييل فمختبرو ... لان المادة لي كايتصنع بيها خصها تكون كثييييرة يلاه تعطي واحد العصارة قليييييلة ...ورجع كايركز مع العلاج النفسي ديالو والجسدي مع الطاقم الطبي الخاص بيه لي فيهم جوج ديال الدكاترة لي رافقوه من الطفولة ديالو .. واحد عالج ليه التوحد وباقي كايعالجو نفسانيا وواحد خاص بالتجميل ....
ركز على حياتو وبعّد شوية على الشك يلاه بدا كاينعم بشوية ديال السلام .. ظهرات ليديا فحياتو بداك التعويدة لي قلبات كووولشي ....
نظارتو كاتمشي من اليمين لليسار وهو شارد الذهن ... كايحط قدامو اسوء الاحتمالات ... كايحاول يزيد يتحداها باش ماتهضرش ... وماتقولش ليه الى جدو كدب عليه ويفقد الثقة فاخر شخص تبقى ليه .... ولكن الشك كياكل فراسو ... خصو يعرف وينهي هاد المسألة فاقرب وقت ...
التفت لباب وتنهد معمق وحلها...
حل الباب وهو يشوفها جالسة على الفوطوي ... وشادة عندها واحد الكتاب كان رواية انجليزية للكاتبة " اجاثا كريستي" كانت رواية على الجريمة ...مركزة كاتقرا بعينيها ...
علا حاجبو ,آخر حاجة كان كايتوقعها منها هي تكون قارئة لروايات !! ... وعالم الجريمة من الفوق ... شد الباب وتقدم وهو يسمعها هضرات ومهبطة عينيها على لكتاب
ليديا : باش تكون عندك رواية بحال هادي ... ( طلعات فيه راسها ) غاتكون بوليسي اذن !!
تونار : ( تكا على جنب الحيط وربع يدو )ماعلموش ليك انه خاصك طلبي لاذن قبل ماتحطي يديك فوق شي حاجة ماشي ديالك !! ...
ليديا : ( كتقرا فالكتاب ) حتى نتا حطيتي يديك على شي حاجة ماشي ديالك .... لي هي أنا ( بللات صصبعها بريقها وقلبات الصفحة )
تونار تحنى عليها وحيد ليها داك الكتاب دارو ورا ظهرو وشاف فيها وهي كترمش فعينيه لي فاش كايكونو قراب كاتحس بحالا كاتشوف فضوء الشمس وقال بصوت هامس ونظرة ماكرة .....
تونار : وليتي ديالي دابا
ليديا بقات غير كاتشوف ماتنكرش ان هاد الجملة خلات بذنها يقشعر....لاولمرة فحياتها كاتسمع شي حد كايناديها بانها ملكو .... القرب ديالو وهاد الرائحة لي كاتفوح منو لي مخلطة برائحة السيجارة ورائحة الغرور ورائحة الرجولة... ثم جاوبت بنمرة واضح عليها الاضطراب ....
ليديا : م مفهمتش ...
تونار : ( وقف باش مايزيد يشعل الاجواء كثر ) فأرة تجاربي .... يعني ملكي
ليديا عاد فهمات الى راه كايهضر على الرهان لي بيناتهم تأففات بغضب على سذاجتها سافرات بعيظ .. وناضت تخطاتو عاطيا بالظهر وحكات عينيها حسات فيهم بوخز ملي طولات الشوفة فعينيه وضارت عندو بنظراتها الشريرة ...
ليديا : نتمنى ماتراجعش شي نهار وتقول العكس ... لان فأرة تجاربك كتفكر انها غاتبقى ديما تعطيك النتيجة العكسية لكاع تجاربك لي غاتحطهم عليها ... لو تجرب عليها فصل الشتاء واش غايطرطق فيه الرعاد ... هي غاتردو ليك ربيع وتحل فيه الورد ....
تونار : ( طلع معاها وهبط )مكنضنش انك بقوة هادشي كامل .... راك كاتقولي كلام كبير عليك
ليديا ضحكات وقربات عندو كاتشوف ففمو متفادية تطلع عينيها لعينيه ودوزات صبعها على وجهو من فوق الماسك
ليديا : كانعشق لي كايستاهن بيا ...
تونار دفعها عليه وتمشى حتى للمكتب ديالو وجلس على الحافة ظالبيرو وربّع يدو ...
تونار : ممم ... راك ضعيفة اساسا .... حتى من الزواج ماقديتيش عليه , ومغاتقديش عليه و(قاطعاتو بثقة كبيرة)
ليديا : موافقة ...
تونار تبسم جانبيا كان عارف خصها غير تحدي بسيط وتلبي ليه اش بغا .. اه فعلا ذكية ومراوغة وقوية .... ولكن باقا طفلة صبية عزيز عليها تلعب الرهانات ....
ليديا : ( ضربات شعرها للجنب ) ولكن عندي شرط
تونار : اهاه
ليديا قربات لعندو وشافت فيه بجدية
ليديا : بغيت نشوف وجهك ....ونعرف علاش كادير هاد الماسك ....
تونار سكت مدة وحيد الكاسكيط وخربق شعرو بيدو وهي تكمش ملامحها قضا عليها فهاد اللقطة مكرهاتش دغيا تحيد الماسك وتتلاح عليه .... شمر بنيفو ورجع شاف فيها....
تونار : ابنت الناس ماشي سمعتي الزواج مشا عقلك بعيد ... الزواج لي طلبت منك انا ... هو غاتوقعي على واحد الورقة ... منبعد غاتلعبي دور الزوجة الودودة قدام الدار .... حتى نشوف امتى غايسالي هاد الحبس لي غايجمعني معاك .. منغير هادشي ... ( ضور راسو بالنفي ) مكاينش شي حاجة اخرى ...
ليديا : هه !! ( قربات خطوة اخرى ودوات بصوت مغري ) نتمنى تبقى عند كلامك ..... غانفكرك بيه واحد النهار ... ( طلعاتو وهبطاتو بعينيها ) قنع راسك واش تصبر عاد قنعني ....
ابتسمات ليه وبعدات عطات ليه بالظهر وهو يتنهد كتغير ليه جميع المفاهيم فاش كاتكون قدامو كايضبط راسو بالسيف .... وهي ترجع تضور مرحماتوش حتى دقيقة
ليديا : الى ماشفتش وجهك ... مغانتزوجش
تونار : ( حل المجر جبد باكية دالكارو ) ماشي بخاطرك
ليديا : ياكما بشي ابرة تاني !!
تونار : ( شعل الكارو ودارو ففمو عوجو للجنب يهضر) بكااامل قواك العقلية ....
ليديا : كتحلم
تونار : ( نفخ الدخان ) غانشوفو شكون لي كايحلم فينا
ليديا : الى خليتني نوقع بزز عليا ... غير بلا متفرح بالانتصار
تونار : راه قلت ... غاتوقعي بخاطرك
ليديا : بلا منشوف وجهك ...
تونار: اساسا عمرك غاتشوفيه
ليديا : علاش !!!
تونار : كون جاوبتي نتي اصلا على سؤالي بسهولة كاع ماتكوني نتي هنا دابا ....وكتسنايني انا نجاوب ?
ليديا : ( بقات مدة كاتشوف فيه كايكمي عاد هضرات ) فخبارك مزال ماعارفش انا اش كاندير هنا ... وشنو بينك وبينيك
تونار : بيني وبينك ... سؤال وجواب ....
ليديا : اهاه ... والى حصلتي على الجواب ... غاايسالي هادشي لي بيني وبينك !
تونار : ( نفخ الدخان كايشوف فيها) على حساب الجواب شنو غايكون ....
ليديا : ( عوجات معاه راسها ) بغيت نفهم .. مدام قدرتي تسكتني ... وقادر تخليني نوقع على الورقة بكامل قواي العلقية وبخاطري .... مقادرش تخليني نهضر !!!
تونار كمل داك الكارو فالطفاية وناض لليفوطوي تلاح ليه معلي راسو للفوق كيتنهد وحدة ورا لوخرا بحالا هاز جبل على ظهرو ....
تونار : فخبارك ... كنتمناك تربحي الرهان ...
ليديا : ك كيفاش !! مانقوليكش شكون انا ?
تونار : ممم ... مكرهتش ... تبقاي مطولة فرهانك .... وعمرني نعرف شكون نت ....
ليديا : علاااش!!!!!
تونار: راه ديجا قتليك .... صعيب يكون جواب لكل سؤال
ليديا : مممم فهمت ... كدير ليا دابا هاكا باش انا نقوليك شكون انا بخاطري زعما ....
تونار : ( شاف فيها وتبسم جانبيا ) ممم آه ....
ليديا تبسيمتو لي دار ماعرفاتش علاش حركات فيها شي حاجة للداخل ... قربات بشوووية لعندو تاوقفات قدامو
ليديا : مناش خايف ! عندك شي علاقة بأصلي وشكن انا
تونار : يمكن تكون ... وكنتمنى ماتكونش
ليديا : علاش كتمناني نربح الرهان وماتعرفش شكون انا ...
تونار : ( عوج شفايفو ) ماعرفتش
ليديا : ( مدة كاتشوف فيه عاد نطقات ) فاش كنخافو من شي حاجة .... كنواجهوها ... ربما الجواب لي غاتسمعو غايكون اسهل من اننا نعيشو وسط عداب الاسئلة حياتنا كاملة .....
تونار : هه ! فاللول بحّيت معاك باش تقولي ليا شكون نتي مابغيتيش ... ولي مابغيتش انا نعرفك شكون .. بديتي تقنعيني باش نعرفك ... اشمن نووع دالبشر نت غير قولي ليا ?
ليديا بقات ترمش بعويناتها فيه كيف شي فارة .. فعلا !! هي اصلا مخصهاش تقوليه ... واش رغبتها هي مايعرفش شكون هي .. ولا رغبتها فقط تمشي ضد التيار !!! ... شافتو سااااهي فيها وباين عقلو سافر ... وهو يتكلم
تونار : اشنو كنتي غاديري ... لو لقيتي شخص لي قتل ليك عائلتك كاملة ....
ليديا ضحكات وهو ساهي فعينيها وضحتها ... هاد الضحكة كانت مختلفة ماشي بحال القهقهات الشريرة ديالها ... هادي كانت كيف شي ضحكة عصفورة مع صديقاتها .... ضحكة خفيييفة ونوعا ما عيااانة
ليديا : مغاتيقنيش لاقتليك غانشكرو حياتي كاملة ههههه
تونار : ( علا حاجبو ) حاقدة على عائلتك !
ليديا شافت لواحد الزاوية وهو قاد الجلسة ديالو ... داك الزاوية كاتشوف فيها اوشن بنظراتو ... اغتصاب العروس الصغيرة و انتحارها ....زواجها .... الكدمات لي فوجه خواتاتها ... ماماها وكرسيها المتحرك.. الارواح لي تزهقات فالمستعمرة ... ثم , نطقات شاااردة
ليديا : الى كانت شي حاجة اكبر من الحقد وأبلغ منو .... فأنا كنحسها من جيهتهم ....
تونار : ( مصغر عينو ) علاش !!! مكانوش كايعاملوك مزيان
ليديا : هه ! انا كون لقاو العافية يشعلوها فيا ... ولكن مكانوش وعمرهم قدو عليا ...
تونار : اذن ! مكانوش كايعاملو الناس مزيان !!! ضالمين مثلا !! قتاالة !! غدارين ?
ليديا غير تبسمات بلا متجاوب وتونار حس بلي عائلتها هي نفسها لي قتلات عائلتو غير ملي سمع انهم قباح ... وناض على لي فوطوي بلا مايدير صوت لي يكسر شرودها وتفيق حيت بانت ليه ساهية .. ومد يدو هز واحد الساعة قدييييمة بسلسلة طويلة ... وكلس على ركابيه قدامها وهي سااااهة وكتشوف شريط حياتها كولو قدام عينيها .... تابدات كتبان ليها داك الساعة كتمشي وتجي حداها بين عينيها وهو هازها من السلسة ديالها وهي البؤبؤ ديالها كاميشي يمين ويسار تابع ديك الساعة لي كتجرفها شوية بشوية للسهو .... وكيهضر بصوت هامس مايفيقهاش ...
تونار : اي .. بي .. سي .. دي.... كملي معايا
ليديا : ( متبعة بعينيها داك ساعة لي كتمشي يمين ويسار) او ... ايف ... جي...
تونار : وان ... تو ...ثري
ليديا: ( لسانها ثقال ومتبعة مع السلسة ) فور ... فااايف ... سيكس .. سيفن ...
هاد المراحل باش عقلها يتبرمج على انها تكمل على الجملة .....
تونار : آن دو .. طخوا كاط
ليديا : سانك... سيس... سات ...ويت
تونار : انا سميتي
ليديا : لييديا ...
تونار : ( كاسرط ريقو خيفان من اجوبتها) انا كنيتي
ليديا : كاع مكنعرفهاش ..
تونار : انا بنت
ليديا : الريف
تونار : الواليد ديالي سميتو
ليديا : سميتو حفيظ
تونار : خدمة الواليد ديالي هي
ليديا : هي الحشيش .. بنزناز
تونار الريق جف ففمو وعينيه حماارو .. ورجع كمّل ..
تونار : ح حشيش!! هوما بزانازا .. و....
ليديا : وصافي
تونار : ايوز ايوز يسضويت توناروز .. علمها ليا
ليديا : علمها ليا خويا
تونار : ( بدا كايرمش وعلا حاجبو ) خويا سميتو
ليديا : سميتو منير ...
تونار بقا غير كايشوف حتى الاسم معاقلش عليه ورجع كمل
تونار : خويا فعمرو ...
ليديا : مكنعرفش عمرو
تونار : ايوز ايوز .. علمها ليا خويا .. وخويا علمها ليه
ليديا : خويا علمها ليه ...ممم .. مكنعرفش شكون علمها ليه ... علمها ليا وانا صغيرة
تونار : كنكسن ف
ليديا : فالناظور
تونار : كنخدمو الحشيش فبلاد ...
ليديا : فبلاد الشاون .. وكتامة
تونار: لي مكلف بالخدمة كاملة هو
ليديا : هو جدي .. اوشن ...
تونار : اووشن !!!! م مايمكنش !!
علا حاجبو حيت عرفو هو لي كايسيفطو ليه قبيلتو الكاميوات .. وهوما لي لعبو عليه آخر مرة ... استغرب !! اش جاب تاهاادا ? .... يلاه شاف راسو راها قربات تفيق وهو يكمل
تونار : جدي جاب الاراضي ديال كتامة من ...
ليديا : من . ... م ماعرفتش
تونار : جدي الاراضي دكتامة جاوه من ...
ليديا : م .. م من ... ماعرفتش
تونار : ( كتنهد ) جدي حرق عائلة و ...
ليديا : م .. ماعرفتش ...
تونار ناض وزف بداك الساعة الارض حتى تهرسات وبدا كايضور ويرد فشعرو للور حيت شاف مغايصور منها والو حيت داك الوقت باقي متزادت ومستحيل يعاودو ليها بحال هادشي .... وليديا فاقت فور ماسمعات الضربة فالارض بقات غير كاترمش مافاهمة والو
ليديا : اش واقع !! ( كاتشوف فتونار واقف وهي عاد شافتو كالس ) هذا امتى وقف ....
ضار عندها وهزها مكمش على حوايجها وقفها وجيفها بيديه حاس براسو غايحماق
تونار : كييييفاش مااعرررفففتش .. كييييفاش .. علاااش معرررفتييييش خخخصك تعرفي
ليديا : ط طلقنني ... طلق اش كتقول ... ( كتقاتل تفلت)
يلاه غايهضر وهو يسمع دقة فالباب ولتخها على سرير غير كايمشي ويجي بالجنون ... وكايحاول يهدن فراسو ... ورجع جرها من يدها لاحها فداك البيت ودار صبعو فوق فمو
تونار : شششششش ... قطعي الحس ..
شد عليها الباب وتقدم كايتأفف للباب رغم ان مبلغهم انه مكيحملش لي يدق عليه الباب ... وليديا فداك البيت مفاهمة والو وقع ليها بحاالا توقف عليها زمان ثاانية .... حيت كانت فشكل وفرمشة عين ولات كاتشوف شكل اخر .. حيت الوقيتة لي كان منومها هي مشعراتش وممسوحة من ذاكرتها .. وقع ليها بحال شي فيدو مقطعة منو شي لقطة , توناار حل لباب بججهد وهي تخطف نور ... وهبطات عينيها
تونار : مايندين " شكاين "
نور : ع .. عمي .. عمي الحاج ... ر راه .. بغاك ..
تونار لتخ الباب فوجهها .ودخل جلس على السرير شاد على راسو وليديا حلات لباب وخرجات عندو
ليديا : نقدر نفهم اش واقع ! شي حاجة تمسحات من دماغي بحالا دازت عليا شي حاجة ماشفتهاش ! كنت جالس .. شوية وقفتي معصب .... م ماشفتكش امتى وقفتي وعلاش تعصبي واش وقع ... شي حاجة فلتات ليا !!!
تونار علا راسو للفوق وسمية اوشن كتزنزن فدماغو ... اذن هادي حفيذتو اش جابها للسيرك ... و وخوها اش عرفو فالتعويدة ! ... نفض راسو مزيان ... ورجع وقف بعد مانفض الغضب شوية وتحكم فاعصابو
تونار : قطعي الحس وبقاي هنا ... غانشوفهم اش بغاو ... رجعي قراي كتابك ومادريش الصوت ...
جا ماشي وهي تشدو من دراعو وضار عندها مخنزر
ليديا : حتى لإمتى غانبقاو هاكا !!! ...
فجناح الجد ...
متكي على سريرو وتسبيح فيدو وضاحك حتى لودنيه و الحاجة حكيمة حداه تاهي مبتسمة .... ونورة جالسة على الكرسي حداهم وهي تجي نور ..
نور : ( ملامحها حزانين ) عيطت ليه اعمي ....
الحاج : ومال إيجي ينو ( بنتي ) مقلقة ??? قاليك شي حاجة
نور : ل لا الو .. غير ... لتخ عليا لباب
الحاج : واش نتي كاتدي عليه ماعارفاهش كيف داير ... دابا ان شاء الله ملي تزوجو تعرفي ليه وتحفضي طباعو ونتي لي ترجعيه لطريق آيجي ينو ....
نور : ( ابتسمات بخجل وهبطات راسها ) ا ان شاء الله اعمي
الحاج : راه واخا يبان ليك هاكا راه حنيييين ... راه مزال يتعرف عليك كتر وتقربو من بعضياتكم ويلقاك واقفة معاه .... غاتشوفي فيه واحد الوليد صغييييرر ساكنو لداااخل ..
نور : ا انا ... انا اعمي م ماعنديش مشكل نصبر شحال مابغا ... مهم هو يكون بيخيير ومرتاح
الحاجة حكيمة : كون ماتجبدش معاه الموضوع دابا الحاج ... ا انا قتليك حتى تبرا .. ماشي تهضر معاه دابا ... حنا علمناك غير نتا .....
الحاج : واش هاد الخبار كايتعطل ...( بضحكة ) راه ملي قلتي ليا بنتي نور باغيا حفيدي ... هادي الدنيا ومافيها... وحتى هو غايفرح ... حيت انا حاااس بولدي داير بحال هاكا حيت فبالو بلي عمرو يقدر يأسس عائلة ولا يلقى بنت الناس ( شاف فنور وشد فيديها ) وهي غير حدانا وماشفناهاش
الحاجة حكيمة : واخا هاكا موحال يبغي الحاج راك عارفو
الحاج : عارف .. ولكن انا ماعنديش الوقت لي نتسناه ... انا عارف مصلاحتو كتر منو .. عييت نشاورو ونعلمو وراسو قاسح ... دابا غانحطو امام الامر الواقع
نور : ( وسعات عنيها كاتشوف فيهم ) كيفاش اعمي الحاج
الحاج : ( بضحكة ) انا عارف اش كندير غير تهناو .. بغيت غير نتهنى عليكم .... ونمشي مرتاح
يلاه غايجاوبوه هوما يسمعو دقة فالباب وحلها ... دخل كايشوف فيهم مجموعين مفاهم والو ... والحاج اشار بيدو لحكيمة وبناتها باش يخرجو ....
ناضو تاهوما خرجو وتونار متبع ليهم العين ... ورجع شاف فجدو
تونار : ياك لاباس !!
الجد : قررب... قرب آياسكّور ينو عند جدك ...
تونار باستغراب قرب عندو وكلس حداه
الجد : جدك فرحاااان آولدي ....
تونار : ( بابتسامة جانبية ) الله يسمعنا خير
الجد : قنعاتني الحاجة وبناتها ( شاف فيه ) باش نمشي للمغرب ..... وبغيتك تقطع لينا فاول طيارة ...
تونار : !!!!! ( طلع حاجبو ) ياك نتا سنين هادي حالف ماترجع .... اش واقع دابا ? وفرحان عاد !! هضر معايا نيشان بلا تلاوي ....
الجد : فرحااان حيت غانرجع للبلاد .... اولدي شحال بقا ليا انا فهاد الدنيا .. بغيت نمشي ونودع بلادي ... ونودع داري .... ونموت وسط ترابي
تونار : دابا نتا فرحان .. حيت مراتك قنعاااتك تموت وسط ترابك ! على اساس كنتي حيران فين غاتأُوغگانيزي الموت ديالك وكتقلب فين غتموت ... وهي جات وقاااتليك ها فين تموت .. وعجباتك الفكرة هادشي علاش راك فرحان !!!!
الجد : ( كايرمش ماعرفو كايطنز ولا داوي بصح ) اااه . اه اولدي ... ملي عرفت راسي غانموت وسط ترابي رتاحيت
تونار : اوووه !!! على اساس تما كايعادو بلي كاينظمو الموت من داكشي ... نقلبو ليك شي قاعة تاهي مثلا !!!
الجد : ( كايرمش ) دابا كضحك عليا
تونار : ( ربع يدو ) لا شوووف نتا شكون كايضحك على لاخور .. السيد ياقي حي يرزق كيقلب هو فين يمووت .....لا وفرحان حيت لقاو ليه فين ....آ شنو لا مشينا ومامتيش نقلبو تا على شي حد يقتلك تاهو باش تكمل فرحتك !!!!
الجد : آسكووور ينو ??? بحالا معصب وباغي تجيب السبة على جدك
تونار : علاش هادشي لي كاتقول نتا مكيعصبش ?? نوض انا نقطع ليك فالطيارة نديك فين تموت !! وندير خاطر للحاجة ديالك وبناتها ... لي ماعرفنيش شكون غايسبق فيكم .. كايقلبو ليك فين تمشي تموت مااابقيت فاهم والو ...
الجد : آوولدي ... انا عارف الاعمار بيد الله .....وماعرفنا شكون السابق... ولكن هاد الشوية دالعمر لي بقا لينا بغيت ندوزو فبلادي ....
تونار تنهد شد راسو بين يديه مدة عاد طلع راسو وعينيه حومر وشد فيدين جدو
تونار : جدي .... نتا عارف انني كنت اول واحد كنرغبك ترجع للبلاد ...وتمشي تزورها ... انا ماشي ضد تمشي نديك فوق كتااافي ... ولكن غير جيني للصراحة وقوليا علاش باغي تمشي ..و بلا كدوب راك عارف هادشي ماواكلش معايا .. غير اجيني للصراحة .....
المامون بقا كايشوف فيه كايعرفو فاش كايدير هاد الشوفة دايرة كيف الفرصة الاخيرة .. وعارف مغايتيقش الكدوب .. وهو يجمع نفسو
الجد : مغانقووولكش ( ربع يدو بعناد كيف شي دري صغير وضور راسو لجنب كايشوف للفوق )
تونار : ( باستغراب ) جدي !!!!
الجد كايطلع كتافو بعدم اكتراث
تونار : آلحاااج ... ( كايطل عليه براسو ) قوليا و نديك للبارك تلعب .. انشري ليك شوكولا ....
الجد : ( كايحرك كتافو ) مغاانقولش ....
تونار : ( كايطل عليه براسو تابعو فهبالو ) عفااك عفااك
الجد : مغااانقولش هي مغانقولش
تونار : ( تنهد ) داكشي لي كايضور فراسك آجدي ينو الى كان مغايعجبنيش نصحك تشد تسبيحك وتشد القبلة ... وتشد الارض ...
الجد : ( شاف فيه بزربة) لا نووض ضربني احسن
تونار : وااا عللى حساب اش كتفكر دير ....
الجد : واش عيب لا بغيت نوجد لولدي ساربرايز ...
تونار : ( كايشوف فيه ) سوبرايز اجدي ... سوبرايز ...
الجد : هااااديك
تونار : ( مصغر فيه عينو ) علاش شي عقل كايقولليا هادشي ليكايضور فراسك دابا مغايعجبنيش ....
الجد : يعجبك ولا مايعجبكش ... قرار جدك تحتارمو
تونار : مايخصش غير حياتي .... ونحتارمو ونهزو فوق راسي ....
الجد : دابا واش غاتنوض تقطع لياا ولا لا
تونار : لا ... حتى نعرف شنو سبب هاد المشية وهاد الحب لي نزل ليك على لبلاد فنهار
الجد : آوالله مغانقوليك كلمة ... حتى نمشيو ...
تونار : نمشيو ? حنا وصلنا كااع لنمشيو ... باااقين فيك نتا واش غاتمشي .. عاد نشوفو أنا ...
الجد : غاتنوض تقطع هي غاتنوض تقطع
تونار: ورااااه انا لي غانتقطع دابا لامخويتيش ليا داكشي لي كايضور فراسك ....
الجد : غانمشيو ... هي غانمشيو ... اشنو تخصر الخاطر لجدك لي قرب يموت ????
تونار: ودابا لقيتيها ليك سبة ?
الجد : دابا نتا حفيذي ولا العدو ديالي ....
تونار : اجدي ... حضر عقلك معايا .. ( كايضرب بصبعو فسعتو ) 20 دقيقة باش خليتك هنا صحة سلام ومشيت .... تعيط ليا.. اجي راه غانمشيو لمغرب باش نموت فيه ... شوية راه موجد ليك تما سوربرايز وتريكتك كانت مجموعة حداك ... وانا كنشوف شي حاجة كضور ليكم فالراس .... ياكما شي زواج هدا من بنت البلاد !!!
الجد : ( طيرهالو فالسما ) اشمن زواج ... الله يهديك .... كون تسمع ودير الخاطر لجدك لي ماباغي ليك غالخيرر
تونار : الخير لي دير فيا هو تديهاا فصحتك انا قاد برااسي .... وانا راه مكيمكنش نخلي شغالي ونمشي لمغرب اجدي .. ماشي وقت نسافر فيه دابا .. وعارفني مكنرتاحش تما
الجد : وغير نهار .... نهار لي طلبك عليه جدك رفضتييه
تونار : ( شد على راسو ) وشوووووف اش نزل عليك تاني اجدي ..
الجد : آخر مغايطلب منك جدك ... هو نمشيو مغرب وكلس معايا غير نهاار ....
تونار: راك كاتقول ليا المستحيل .. كيفاش نكلس معاك غير نهار .. واش عارفني غانفرقك ونخليك فدولة وانا فدولة ? شفتيني خليت كلشي وجيت عندك .. الى باغي تمشي للبلاد مغانحيدش ليك خليني تانسالي شغالي ونمشيو ....
الجد : واااااالو ... آش عرفني انا منهنا لغدا واش غانعيش ? والى تبعت شغالك مغايساليوش
تونار ( كايطلع راسو فاسما ) اللهم طووولك ياروح ....
الجد : باركا ماتسوط عليا... نمشي للمغرب هي نمشي ... وبجوج بينا ... عندك شغالك قضيهم ولحق عليا ......
هو كايهضر وتونار كايشوف فيهم داك شوفة ديال يااااربي تصبرني
الجد : ماطلبتش المستحيل ... بغيت نمشي لداري وموجد شي حاجة لحفيذي ...
تونار : وحفيذك غايقبل ليك كولشي الا شي حاجة كتخص حيااتو .. اطووونسيون .....( وقف ودار يدو فجيابو ) خليني تانفكر مزيان ونرد عليك ....
الجد : ماعندك ماتفكر مابغيتيش تقطع ....بنتي نور تقطع ليا ..... ونتا تلحق عليا بسيف عليك
تونار : ( بتحذير وغضب ) تمشي بلا خباري نوض العااافية فالداررر وعارفني نديرها
الجد : ماتدينيش للمغرب أنا لي غانوضها
تونار : ( دوز يدو مسح على وجهو ) واش اانا كايلاقيني الله غير مع المعكككسين .....
الجد : دابا اش درنا
تونار : ( مشا رجع كلس حداه وشد فيديه ) جدي .... آش كايضور فراسك مكيهمنيش .. نتا عارفني كتهمني صحتك كتر من أي حاجة فالدنيا ... ولكن غانطلب منك طلب وااحد ... ( بكل جدية ) ماتحطينيش فموقف لي نختار فيه بين حياتي وصحتك ....
الجد : ( بشوفة حنينة هز يدو دوزها على شعرو) حياتك اولدي دفنتيها ... وجدك باغي يحييها ليك ... لاكان خوفك على صحتي غايقدر يرجع يحيي ليك حياتك .. مغانترددش نبتزك بها ... انا ميت ميت ...مهم هو نتا تعيش ....
تونار غمض على عينيه مزير عليهم كايتحكم فعصابو مايقولش شي حاجة يندم عليها ... ورجع حلهم حوومر
تونار : انا هضرت وقلت أش عندي ... معزتي عندك هي لي غاتحكم دابا..( ناض وقف ) فوقاش باغي تمشي
الجد : ( بابتسامة) ثَيوْشّا ... "غدا"
تونار تنهد وبقا يفكر واش يقوليه على ليديا وبلي لقا البنت لي غايتزوج ...وفكر ان ليديا مافيهاش الثقة فاي لحظة تقدر تخرب كولشي بعنادها ...اذز حتى يقاد هويتها ووراقها ويتزوج عاد يواجهو ...ورجع سكت وشاف معاه وخرج بدون جواب و الجد ضحك بتبسيمة حنينة عارفو مغايدوزوش ... شد تونار فالحديددات ديال الدروج كايتنهد ويفكر كيفاش يدير فهاد الموصيبة تاني ... عارف ان جدو كايخطط لشي حاجة فنفس الوقت ماباغيش يقلقو او يخسر ليه الخاطر ... وعارفو مغايتفاكش .. ليديا هي الحل دهاد المشكل ... اللهم هي لي يقدر يتهنى منها فاي لحظة بلا مايعدبو ظميرو .. ولا يجيب ليه شي بنت من المغرب يكرفصها معاه ...اما ليديا كتبان ليه ديال التكرفيص ... وهو عارف اصلا لي غايجيب ليه غاتكون جاية غير طامعة فالورث لي غايكتب فسميتها .... اما هي شكون تقبل على واحد مشوه بحالو ... خصو يتزوج ليديا فارقب وقت ..
تاجه لجناحو لقاها كتمشي وتجي شافتو وقربات لعندو
ليديا : ( بملامح جدية ) مغاتخرجش على داك الباب حتى تقوليا هاد الطريق فين كاتخرج ...
تونار بدا كايشوف وتمشى لسيرو كلس وكايشوف فالحيط قدامو مشتت بصرو مدة عاد نطق
تونار : طريق كانت مسرحة،... واضحة .. ( شاف عندها ) بعندااك رديتيها متاهة ...( شاف فيها ) ودابا الى لقيتي الباب ... خرجي ... وخرجني حتى انا معاك
ليديا : ( مدة كتستوعب كلامو وجاوباتو عينيها فعينيه من بعيد ) الى انا بعنادي رجعات الطريق متاهة .. نتا بعنادك وضرتي السوارت ديال داك الباب لي ممكن نلقاها .....
تونار : اذن متعاوديش تسولني على طريق فين كتخرج ...
ليديا : غانبقاو ديما فيها ؟ مغانوصلو لوالو ؟ ....
تونار : ( وقف وتمشى لعندها ) لي بغا يوصل ... كيتمشى ، مكايباقاش واقف فبلاصتو ....
ليديا : فين غانمشي معاك ؟؟؟؟
تونار : للعدول ....
ليديا : ( العين فالعين وكلمة بكلمة) مغانتزوجش فمتاهة .. اظعف الايمان نشوف وجهك
تونار : على هاد الحساب غاتبقاي واقفة ... والطريق عمرها تسالي ( كايقرب عندها كتر) غانبقاو نضورو فنفس الحلقة ... ( ليديا متبعة عينيه لي كايقربو ليها) وعمرنا غانوصلو .....
ليديا : نشوف وجهك ولهلا يجعلني باش نوصل ....
تونار صغر فيها عينيه وحوارهم متسلسل كأنه مخطط ليه وحافظينو كايجاوبو بعضهم فنفس الثانية .. طوول حوارهم وهوما عينيهم فبعضهم بالهمس كايتجاوبو بحالا ولحد كايتحدى لاخر شكون يغلب فالهضرة وشكون يستسلم ......
تونار : الفضول بزاف مامزيانش ... ديما كايجي وراه ذنب
ليديا : حتى باش تخلي ناس تحس بالفضول من جهتك راك ساهمتي فداك الذنب
تونار : شنو مخليك باغا تشوفي وجهي
ليديا : هاد الشهر طوّل عليا وكنتسنى القمر يكتمل ....
تونار : قمرك مخسوف ....
ليديا : حيت انا شمسو ...
تونار : وحيت نتي كتشوفي راسك شمسو .. مستحيل يبان ونتي قريبة ليه ....
ليديا : و شنو دنب الشمس فظلام ليل ؟؟
تونار : شنو ذنب الليل حتى يردوه ظلام ؟
ليديا : خلي الشمس تضويه ؟؟؟ علاش كتبعدها !!!
تونار : ماحدها قدامو غايبقى ديما مكسوف ...
ليديا : الى تنازل شوية على كبريائو واكتمل .... الشمس غاتبعد من قدامو وتمشي لجنبو .. غاتبقى ديما فجنبو وماتخلاش عليه ...
تونار : الى اكتمل ... مستحيل مزال الشمس تشرق ...
ليديا : اش عرفك فضو الشمس ونتا ضلام ؟
تونار : الضو منو انا مصنوع ... اش دنبي الى كان ضاير بيا الظلام ....
ليديا : ( مدة كاتشوف فعينيه وقربات كتر ) الشمس الى طمنات كتضوي ... والى تقلقات كتحرق ... رحم نارها
تونار : حتى ترحم كسوفي ...
ليديا : بغات تشوفك مكتمل ...
تونار : ( قرب كتر وشاف فعينيها ) والى غربات ؟
ليديا : مستحيل ... ( دايبة فعينيه ) تحديت النجوم كاملين ودرت لي فجهدي نكون انا احسن نجم .. وانا المختلفة عليهم كاملين ... الى هوما كايضورو بيك بالليل ... انا كنطلع غير بالنهار .. ونهار نقرب ليك كايكون نهار مميز كايتسمى الخسوف .... انا احسن نجم بين كاع نجوم واجملهم .. انا لي مكاينش حتى نجم كايشبه ليا ....طمعت فالقمر ومكاينش لي يحيدو ليا .... غير ديرها فبالك
تونار بعد عليها رااجع بلووور كايشوف فيها
تونار : شنو هو الجمال بنسبة ليك
ليديا : هو داك الحاجة لي كتكون فينا باش تميزنا ومايكون كايشبه لينا حتى شي حد
تونار : وبلا بيه ....؟؟؟
ليديا : مانعيشش
تونار طووول الشوفة ومشا هز سوارتو وكاسكيطتو وتمشى تالباب وهضر
تونار : اذن بلا متحلمي بداك القمر يكتمل ...
حل الباب وخرج وهي بقات واقفة كترمش بقوة مكانت عاااايشة اللحظة ماحساتش كاع واش خرج ...
تونار مشا قطع لجدو وعائلتو فطيارة ... فإمكانو يرسلهم فطائرة خاصة ولكن مكيبغيش يبين نفودو ...
ودخل لطموبيل وصونا فتيل حتى جاوبو
سلطان : كنت غادي نتصل بيك ....
تونار : اش وصيتك عليه مزال ماوجد ؟
سلطان : لا اصاحبي عطيني مزال شوية دالوقت ...نقدرو نتلاقاو؟ محتاجك
تونار : بخصوص آش
سلطان : مستر اكس ... عندي شي معلومات جداد مهمين بزاااااف ... ضروري نتشاور معاك
تونار : فينك نتا
سلطان : فالبيرو
تونار،: انا جاي
قطع عليه تيل وصاگ حتى لخدمة سلطان.. لبس كاسكيطتو ونزل من طموبيل مهبطها على عينه ... ركب فالسانسور وهبط لاكاڤ لتحت فين كاينين البيرويات ديالهم ... غير دخل بانليه الرووووييينة وكولشي كايجري سلطان كان واقف مع العميد ... غير شافو داخل هضر فودن العميد
سلطان : هاهو لي هضرت ليك عليه غايعاونا بزاف نلقاوه .... راه عالم فلك ونابغة وذكي بزاف ...
العميد : شكون مكيعرفوش ( كايشوف معاه) مول الماسك لي معارف تاحد علاش مخبي وجهو ....واش متأكد منو ؟؟؟
سلطان : مية فالمية ..
دخل للعميد للبيرو وسلطان لوح لتونار وجا عندو
تونار : ( بغمزة متسائلة حرك راسو تجاههم ) اش واقع
سلطان : دخلونا معلومات قلبو لينا كولشي ...
تونار : ممم ... ضروري نعرفهم ؟؟؟ ولا مكاين لاش
سلطان : على انا علاش جبتك ... هضرت للعميد عليك وبلي يمكن نتيقو فيك ... غانديرو اجتماع وغاتكون حاضر معانا .... تسنا هنا نجيب الملف ...
مشا سلطان وتونار بقا كايحك فدقنو من فوق الماسك .. وقرب بخطوات بطيئة باتجاه مكتب العميد لي كانت الباب ديالو مردودة ... وبداو كايتسرب ليه صوت العميد وهو كايهضر فالتيليلون
العميد : مايمكنش ليا دابا ... فهمني راه الدورية مقلوبة سفاها على علاها فقضية مستر اكس ... آش عرفني .. واحد العميل جاب داك المخترع ... قال يقدر يعاونا ... داك الفللكي ... طونار مول الماسك ... لا لا اشمن مشكل غايدير حنا قضية مستر اكس بعيدة علينا ....آه آه داكشي مناش خايف ... باينة عليه دكي وباينة غايكون كايشاورو فالنازلة والطالعة وحتى فقضيتنا ... لا لا متخافش غاناحد احتياطاتي كولشي كايحتارممني هنا وتاهو واجب عليه يحني راسو فالمكتب ديالي ماشي ورشة اختراعاتو هادي .. الدورية كاملة رحبات بالفكرة ديال سلطان اننا ندخلوه للاجتماع .. منقدرش نعارضها غايشكو فيا ... انا غانشوف شنو تحت راسو ... مكنضنش غادير لينا شي مشكل ...
يلاه كايهضر هو يطلع عينيه وبانليه واقف قدامو ... تلف وحط تيليلون دغيا متوتر
العميد : ااء ... م مم ( خنزر ) من الادب تطرق الباب وتطلب الاذن
تونار : جوج دالمرات ... الي كان عندك مشكل فالسمع ماشي ذنبي ....
العميد : ( ربع يدو ) اذن نتا هو طونار
تونار : ( جا يجلس على لكرسي ورجع وقف كايشوف عندو ) تاهو نطلب الاذن ؟؟؟ ممكن !!!
العميد : جلس ..
تونار : ( جلس ) شكرا ... ( شاف لتيليفون ديالو) ياكما قاطعتك على شي حد مهم ....
لعميد : لا .. المهم عندنا دابا هو قضية مستر اكس
تونار : ممم قضية تهريب المخدرات فالحدود
لعميد : ( كايرمش فيه وترو) تماما ...
تونار : وعلاش لي عاطين اهمية لهدا بالضبط بوحدو ... بينما عندكم عملية تهريب مبلغ عنها نهار الاربع ومعاطينهاش هاد الاهمية تاهي ؟؟؟؟
العميد : ( جبهتو كتعرقق وضابط راسو تأكد بلي سلطان مكيخبي عليه والو ) هاديك قضية ساهلة ...نهار الاربع غانمشيو نشدوهم ... قضية مستر اكس لي صعيبة ومبهمة
تونار : ( حاني راسو كايضور ستيلو بين يديه على البيرو) بحال بحال ... بجوجهم قضية مخدرات ... وقضية مستر اكس ... كون استهنتي بيها كيف اسنتهني بالاخرى كانت غاتبان ليك تاهي ساهلة .... وممكن تكون غيرر قدامك وماشيفهاش ... تماما بحال القضية الاخرى ... مستهن بيها حيت عارف مولاها غير قريب ( طلع عينيه شاف فيه) منكم
العميد : مافهمتش !!
تونار : دابا تفهم ...
بقاو ساكتين مدة ونظرات رصاصيين كايتبادلوهم ... حتى دق الباب سلطان .. وكان موراه الايكيب كامل .. وقف العميد باش يتجه بيهم لطاولة الاجتماع لي قدامو ... غير هو زاد وتونار تبعو بعينو تامشا وجبد تيليفونو من جيبو خدم بخفة السكانير وحطو فوق التيليفون لي كان كايهضر فيه العميد ... حيت لابد ماخصو رقم التيليفون والمعلومات لي فيه .. وصعيب تحصل على رقم دتيليفون الشخصي دالعميد حتى لي معاه معندهمش وواضح انه هاتف مكيعطي رقمو لحتى شي حد ....
وناض تاهو معاهم لطاولة الدائرية وخلا تيليفونو يدير خدمتو ... وشد الكرسي ديالو ... ترحيب روتيني به ... ثم قللو الضو وناض سلطان كايشرح فالشاشة لي قدامو
سلطان : المعلومات وصلونا من هاد البلاد لي كتبان قدامكم ... المخدع الهاتفي رصدناه انه فليبيا(كايوريهم فشاشة و تونار مصغر عينو شكون هادا لي فليبيا ) الاتصال هانتوما نعاودو نسمعوه ( طلق التسجيل لي كان بالانجليزية والصوت بحال شي روبو عليه التعديل باش كايخفيو الصوت )
سلطان : آلو ..
- مكتب العميل سلطان ؟
سلطان : ياس ....
- عندي معلومات قوية بخصوص قضية مستر إكس
سلطان : نعاام ؟؟؟؟ عارف راسك اش كاتقول
- باش نزيد نطمنك .. انا غراضي تلقاوه ... ونعرفو حتى انا شكون وتكون عندي ليه زيارة مميزة ...
سلطان : شنو المعلومات لي عندك وشكون نتا
- مغانقدرش ... انا غير مجهول غانعاونك بزاف فالقضية .... مستر اكس غاتوصلكم ليه واحد البنت ... صورتها غانرسلها ليك برقم مجهول فتيليفونك الخاص .... الى لقيتو داك البنت هي لي غاتوصلكم لمستر اكس .... انا متأكد انها هي معاه حاليا ... بجوجهم
سلطان : وشكون هاد البنت وفين عرفتيها نتا
- البنت من المغرب ... منقدرش نزيد نعطيك معلومات كتر .... فين كنعرفها الامر كايخصني .... الى لقيتوها .. راكم غاتلقاوه ...
سلطان : انا بغيت مستر اكس .. لحد الان مزال ماستفدت تاشي حاجة منك
- على الاقل دابا غادي تقلب على شخص ملموس ... ماشي على الهواء ..... مستر اكس شخص بحال الهواء .. لا صوورة ولا صوت ولا رائحة ....يدوز من قدامك وماتعرفوش .... اما بفضلي غاتقلب على شخص بالصورة ديالو فسجييل الهويات المغربية .. وهي لي غاتوصلكم ليه ... نتمنى القبض عليها يكون فاقرب وقت .... "طييط طيييط طييط"
تقطع الاتصال وتونار جاااالس بهدوووء ودماغو خدام .. عرف الى داوين على ليديا ... ولكن باش عرفوها معاه ؟ وشكون هاد الناس وهو مكيعرف حتى شي حد من ليبيا وهاد الدولة جامعو بيها غير السيرك ..
سلطان : تونار .. اش باليك
تونار : كلامو معقول .... ممكن نشوف صورة البنت ...
سلطان بينها ليهم فشاشة كانت صورتها فالسيرك كتلعب فالحبال ...تونار شافها وكرز على سنانو ولكن على برااا كايبان الهدووووء .... تعصب من حاجة وحدة فهادشي كامل هي مايقدرش دابا يخدم ليها هوية مدام سلطان شاف صورتها دابا .... حمد الله لي كان مزال مجاب ليه الصورة .....الزهر كايوقف معاه دييييما .....دابا هصو يقلب على شي طريقة لي يدير ليها هوية وسط هادشي كامل .... وتحنحن كايهضر ببرود ....
تونار : مممم .... خاصكم تلقاوها فاقرب وقت
العميد : عندك شي حل
تونار : الهويات ...
سلطان : اتصلت بجميع المكاتب والادارات ... مكاينش حس صورتها فسجيل الهويات .... قلبنا فاكبر المحركات ... البنت بحالا مكيناش على الكرة الارضية
العميد :هادشي مغريبش ... بحالها بحالو ....
سلطان : تونار اش باليك ... فكرنا اننا نستعينو بالراي العام ونشرو صورتها على نطاق واسع ... مدامها راقصة فالسررك لابد متكون كتخرج ....
تونار : راها حتى هي جزء من الرأي العام و اقل شىء غاتكون كتفرج فتلفازة ... غاتخليها تحس انها مبحوث عليها .. وعمرها غاتخرج مزال غير لاكانت متنكرة ...
سيدرا : عندو الحق .... غاتاخد احتياطتها كتر ...
العميد : يلاه عطينا الحل ...جبناك باش تعطينا الحل وراك غاتخلص عليه
تونار : ( شاف عندو وهضر بحدة زعزو) فلوسك خليهم عندك .. جيت نأدي واجب الصداقة لا غير .... وانا ماشي مصباح علاء الدين نحضرها ليك ... بشر بحالي بحالك الفرق هو انا كنخدم عقلي ونتا لا .. (كايقول جملة كتخليه يتعصر من داخل ....و رجع شاف فسلطان ) ماعلينا ... كاينة طريقة وحدة لي تخليك تطلعها .. هي الطعم ...
سلطان :بحالاش ؟؟ عندك شي فكرة
تونار : فكرة لي غاتخليها تجي برجليها لعندك ...
سلطان : اهاه؟
تونار : مدامها كتعرف شخص بهاد السرية .. ومع ذالك كترقص فسيرك وكتحرك بين الدول من المغرب لليبيا وتدوز فالمطار ... الا وعندها هوية مزورة عايشة بها ....
سلطان : ااه حتى انا هادشي لي فكرت فيه .. ومدام مستر اكس كيتعامل بالديب ويب الا وهاكر كبير .... وغايكون تم تهكير السجييل ومسح هويتها وهزيتو ...
تونار : الحل ... هو غاتصاوب ليها هوية جديدة .. وغاتاخد معااير وجهها انطالاقا من للصورة لي عندك نسخ ليها صورة جديدة بالبروكرام التلقائي ... بإسم دشي سيدة اخرى يكون السجيل ديالها عامر جرائم ...( متبعين معاه )داك ساعة عاد يمكن ليكم تستاعنوا بالرأي العام ... انه لي شاف هاد السيدة يتصل لانها متهمة بجرائم مثلا السرقة او النصب والاحتيال .. هوما لي كايتفعالو معاهم الرائ العام حيت كايخافو تنصب عليهم تاهوما ويديرو لي فجهدهم باش يتم القبض عليها ......بشرط يكونو جرائم من المجتمع ... بحال النصب فالزواج الابيض ... هاد الجرائم كايتحرك فيها الرأي العام ...ثم السيدة غاتشوف ان صورتها تشهرااات .. ويمكن يرجموها بالحجر الى خرجات .....غاتغي تحد المشكل و تجي برجليها تقدم شكاية انهم منتحلين الشخصية ديالها وانها بريئة من كل هاد التهم ......
سلطان : غاتدخل للمخفر وهي عارفة راسها مبحوث عنها ؟
تونار : على نتا غاتقول ليها عارفك مع مستر اكس ؟؟؟؟ باش غاتعرف هي اصاحبي بلي راكم عارفينها .. هي غاتجي على ود تهم اخرى ... غاديرو ليها التمويه ....
سيدرا :وشنو مخليك متأكد غاتجي باش دير شكاية بهاد النوع
تونار : غاتشوف الاخبار .. وغاتعرف انه ماتقدرش تتن
مشى او تدوز فالمطارات بخاطرها .. وغاتجي تحل المشكل باش تكمل حياتها عادي .. اي واحد فبلاصتها غايديرها
سيدرا : ( كاتشوف معاهم) جاني كلامو منطقي
العميد : وعلاش غانصعبو علينا ... من لول نشرو صورتها بجرائمها ... مستحيييل ماتخرجش هاد البنت ... اكيد محاطين بها جيران ... اقارب ... ناس لي كتشوفهم فالسيرك
تونار : اهاه .. هاد السيرك لي مصورة فيها اشمن سيرك ؟
سلطان : الجندل .. فليبيا
تونار : سولتو ناسو واش شافوها ؟
سلطان : قالو آه .. ولكن معارفين عليها تاشي حاجة بانت فعرض واحد وغبرات بحال الى الارض تشقات وبلعاتها
تونار : ( شاف عند العميد ) اوا ممكن نعرف كيف غادير تلقاها بالبحث فسيرك دابا ؟
سلطان : كنضن تونار عندو الحق معندناش كيف نديرو نلقاوها الى مجاتش هي لعندنا .. لي صعب علينا الامر ان معندهاش هوية مسجلة اما كون قبضنا عليها فساعات قلال... مخصهاش تحس اننا عرفناها الى يديها فيد مستر اكس .. وتقدر تكون هي كاع ... خصها تجي وهي عارفانا كنقلبو عليها على ود حاجة اخرى ....
العميد : اذن نطلقو الاتهام دابا ؟؟؟؟
تونار : ( شاف عندو ) باغي تطلقو من الفدرالية هنا؟
العميد : ومنيين غانطلقوه فنظرك
تونار : جرائم النصب والسرقة ... امتى ولاو كاتكلفو بيهم ناس من الفدرالية ؟ باش تزيد تبين ليها ان جريتمها كبيرة داكشي باش نتوما لي مكلفين بيها ؟ حيت على مكنعرف راه جرائم السرقة والنصب كيتكلفو بيهم المخافر الصغار .... هنا القضايا الكبيييرة !!! ( شاف عنهم ) اولا انا غالط
احد العملاء : تماما .. غاتشك ان الامر مفبرك ... بالنسبة لوحدة دكية بحالها مدام قادرة خفي هويتها بهاد الشكل وتكون فيد مستر اكس ... قادرة تعرف ان جريمة النصب والاحتيال فقضايا الزواج الابيض ممكلفينش بيهم حنا ....حنا مكلفين بشيء لاخور لي مخبعاه ... ولي مامكلفيتش بيه المخافر الصغار غاتمشي فأماااان تقدم شكايتها ...
تونار : ( شاف فيه تاكمل الهضرة ورجع شاف فالعميد ) واش متأكد داك الشارات ديالك ؟؟؟ ( نظرة حادة) ولا غير شريتيهم ؟؟؟ مظنيتش عميد بهاد الغباء مكيفرقش بين الملفات المكتب ديالو وملفات المخافر الصغار ( العملاء طرطقو عينيهم كيفاش كايهضر معاه ولاخور ساكت ليه حيت عارف راسو اش داير)
العظيد : ( جبينو كايتعرق وضربات قلبو كتزاد كايحسو عارف عليه شي حاجة ) احترم رااااسك
سلطان : ( بغا يقلب الموضوع ويلطف الجو واخا عجبو فيه ) ادن نتمشاو على هاد الخطة ... تقدر تجيب نتيجة .... نتمنى نجحو ...( شاف فتونار،) اصلا اي حاجة دار فيها تونار يديه كتنجح ....
سيدرا : صراحة كان خصك تكون عميل ولا محقق ...
تونار : ولا عمييد كاع !! ( شاف فالعميد بنص ضحكة مستهزأة شدها معاه هاد نهار ورجع شاف فيهم ) حيت بانليا ... سهل بزاف تحصل على الشارات بدون تعب ....
العميد : ( بتخنير فيه ) سالا الاجتماااع .....
سلطان :ولكن باقي مااا
العميد: راه قلت سالا ....
سلطان خنزر وشد البيسي ديالو بزعفة .... والعملاء ناضو مشاو وتونار داز بالخفة للبيرو هز تيليفونو وضار عندو بانليه جالس فكرسيه وغارس راسو بين يديه ... ضحك ضحكة جانبية وخرج ....
ليبيا ...
سليم مشدود بسلاسل فواحد الگاراج وكولو دمايات وكدمات قدامين ووجداد... واضح انه مدة هو كاياكل فالعصا ... تاتحلو البيبان ودخل عيسى ...
سليم : ( طلع راسو معاه كايقطر بدمايات ) س سيدي ... لقد اعترفت لك بكل شيء ...اذن دعني وشأني ...
عيسى ضور عينيه شاف مع رجالو ...
عيسى : حرّروه ....
بداو كايفتحو ليه فالسلاسل ... وتلاح سليم على،رجليه كايبوسهم وكايشكر فيه .... حتى كايتفرگع رراسو بدمايات تيرا فيه من الفوق ... هو يلحو برجليه باقي كايترعد ويتركل ... حتى مات ...
عيسى : ( شاف مع رجالو) سليم .... عبرة لجميعكم .....
خلاهم وخرج كايرد سلاحو وهو يجي عندو واحد الراجل حاني راسو كان من الخدم القداااام ديال القصر ... وطلب منو يبيع ليه ولدو باش يعوض بلاصة سليم وشراه عليه بالفلوس بحال العبيد ...
- سيدي ... ابني ملكك الان ( شاف موراه كان واقف داك الشاب ) انه ذكي جدا .. ومتعلم ... و ايضا مطيع .... اعتبره ساعدك الايمن ( شاف فولدو ) انصت يا بني .. انت لان ابن عيسى ... اِرضيه واعصيني ...( شاف فعيسى) اطلب منه ما تشاء ... انه ابنك الآن ....
عيسى : لقد ترعرع في قصري .... انه ابن القصر .. لكن هناك شرط آخر
الشاب : كل شروطك ننفذها بالدم والروح سيدي
عيسى : ( مايقدش ينسى سليم ولي دوز معاه ماشي قليل) من اليوم فصاعدا .. سيصبح اسمك .. سليم ...
الشاب : كما تشاء
خلاهم ومشا دخل للقصر واتجه لجناح الست ماما لي ناعسة فالفراش كاتشوف غير فالسقف وتشللات بالكامل ..دخل وقطر ليها بعض القطرات ديال الماء ففمها وجلس فجنبها شد يديها
عيسى : كيف حالك اليوم؟؟؟؟
الست ماما : ( عوجات راسها بشوية معاه وهضرات ثقيييلة ) ب بخير ...
عيسى : افعل كل ما في وسعي لاستعادتك .... لم يتبقى امامنا الكثير من وقت ... كنت مضطرا لاخد تلك الخطوة الجريئة ...،
الست ماما : ( بصوت متقطع ) ل .. ل لما لم تخبرهم بإسمه ال الحقيقي .. س سيفلحون ف في القبض عليه بسرعة ...
عيسى : غرضي ليس القبض على القربان ... اذ تم القبض عليه سيتدمر كل شيء ... غرضي هو القبض على الفتاة ....
الست : س ستعترف لهم بمكانه ... وسيتم القبض عليه ولن نتمكن آن ذاك من ل لحصول .. ع على قطرات دمه اذ اعدموه او سجن ... سجن في مكان سري
عيسى : تلك الشمطاء ستعترف ؟؟؟؟ تلك التي تحملت صعقات الكهرباء وظلام الحفرة ؟ تلك الشيطانة لن تعترف لهم حتى لو تطابقت السماء على ارضها ... سيجلدونها ولن تعترف ... انها ماكرة ...
الست : و ومذا ستفعل اذ تم القبض عليها
عيسى : اذ لم تعترف سيطلقون سراحها .. لانه لا دليل يثبت كلامي وانها فعلا تعرفه ... عند اطلاق سراحها سأختطفها من جديد ... لازالت الخريطة توضح انهما لن يفترقا مستقبلا ... سيعود اليها لأخدها ... ولن اعيد نفس الخطأ الاول لو كلفني الامر باحتجازها في قنينة ماء .... الان انا بحاجة اليها .... بحاجة ان اعرف اي الدول هي موجودة ...
الست : و ولماذا اتصلت بالعميل الايطالي ... هل هي في إيطاليا ؟
عيسى: لست اعرف ... اتصلت به لانه العميل المكلف بقضية المدعو بالمستر اكس ... اذ تم القبض عليها سيتسرب الخبر عبر الصحافة وستتضح الدولة التي تم القبض عليها فيها ... ومن هناك يمكنني معرفة الدولة التي ينتمي اليها .....
الست : ما تقوله بعيد المدى .. و وانا لا وقت لدي
عيسى: حتى لو اخدوك لعالمهم .... سأفعل ما في وسعي لاستعادتك ... لن اعيش بدونك ..... ثقِ بي ... ساحل الامر ونعود لحياتنا السابقة وستستعدين حياتك وعافيتك
فمكتب سلطان
جالس سلطان فمكانو وقدامو تونار
سلطان : هضرتك معاه دخلات ليا الشك ...،كتعرف شي حاجة انا معارفهاش
تونار : مكنهضرش بلا دليل
سلطان : كتخلعني بعد المرات ...
تونار : ( شاف فيه مطول) تعلم ماتبقاش تيق فلي قراب ليك ..... جيتني شاب طموح .. وولد بلادي ... قلت مع راسي تستاهل هاد النصيحة ... تيق فالغريب وماتيقش فالقريب
سلطان : ( مدة كايستوعب ورجع ضحك) هي منتيقش فيك حتى نتا ...
تونار : من حقك ...
سلطان : هههه حااضر اسيدي هه اه نسيت بخصوص الهوية لي طلبتي ... عطيني مزال شوية دالوقت
تونار : عدرتك ... عندك قضايا بزاف فوق راسك ... مامزوربش بيها خليها منبعد ... زرب غير على ديال اابنت ... الى تعطلتي ليوم تكون واجدة
سلطان : راهم خدامين على استنساخ الملامح فصورة اصطانعية .... متخافش ... ولكن المشكل هو الهوية ماعنديش شكون لي نتيق فيها ونخليها عندو بلا متخرج فيد شي واحد يخدمها كيف بغا خصوصي ليكيب غاتكون عارفها مزورة غاينوضو يديرو بيها اي حاجة وانا عارف معانا جواسيس ..راك عارف غاتكون عندنا غير هوية وحدة الى مشات صعيب تاني نردوها ... لانها مكيناش فالسجيل ... ومكاينش ممن غيرك اتونار نأمن عليها تكون عندك ....
تونار : ( هبط راسو كايلعب باوراق واحد الكتاب ) لا ... حطيتني امام امانة صعيبة ... غير عفيني
سلطان : متردهاش فوجهي ...
تونار : واخا ... ملي مصر بحال هاكا ... ( شاف فيه ) نأمنها ...
سلطان : ( طول يدو ضرب على كتفو ) صاااحبي لي كنعرف ....
فمكتب سيدرا ...
حانية على المكتب كتخدم ...تاصونا تيليفونها غير شافت الرقم من المستشفى جاوبات بسرعة
سيدرا : آلوو ...
دكتورة : ضروووري تجي دابا وبزززربة
سيدرا : ( وقفات ) م ماما ... م مال ماما
دكتورة: تزاد عليها الحاااال ... خصها ضاروري تدخل للبلوك دااابااااا
سيدرا : ص صافي صااافي ( كتمشي وتجي كتقلب على تيليفون تهزو باش تخرج هو فودنيها ) صافي دخلوووها انا جاية ....
دكتورة : مااايمكنش ... حتى تخلصي راكي عارفة القانون
سيدرا : ( وقفات مصدومة دموع جامدين فعينيها ) شنوو ؟؟؟؟؟؟ ماما كتموووووت ونتي باقيا كطلبي لفلوووووس
دكتورة :الآلاف لي كايموتو كل نهار
سيدرا انفجرات بالبكا كتوسلها وطاحت للارض
سيدرا : م ماااعنديش المبلغ كااامل ... عفااااااك عفااااااك عتقي ليا ماماااا نبيييع ليك رااااسي وعتقييها
الدكتورة : القانون واضح ... كون جات عليا نديرها ليها ... ولكن الادارة مغاتوافقش ... وانا مافجهديش نديرها من جيبي ... هاحنا كنتسناوك ...
تطلق تيل و طاح من يديها كتبكي حاسة بقلة حيلة وماماها كتموت بين يديها ... ورجعات وقفات بزربة ومسحات دموعها وهزات صاكها وقفات مطووولة قدام الباب كتستعد ... تنهدات بعمق وخرجات متجهة بزربة لمكتب العميد ... دقات ودخلات بلا متسمع الادن
العميد غير شافها داخلة كتبكي فحالة لها يرثى .... ناض وقف جاي بجيهتها ...
العميد : سيدرا ؟؟؟
سيدرا : غاتعتق ليا ماما ياااك
العميد بزز على ملامحو تشقات الضحكة ... ودغيا جمعها حيت الوقت ماشي مناسب ...
العميد قرب بغا يطلع يدو يمسح دموعها وهي تبعد راسها
العميد : غاندير اي حاجة تسعدك ... مكنستحملش نشوف دموعك ....
سيدرا : بغيت غير ماما تعييييش( بالبكاء)
العميد : تعييييش .... ولكن ر ررراك عارفة انا ...(قاطعاتو)
سيدرا : ندير ليك اي حاجة بغيتي غير عتق ليا ماماااا كتترجاااك ....خصها دابا دخل للبلووك ...
العميد : واخا ... نهار لكبير هو لي تشافا ماماك ونديرو العرس وتولي ديااالي اسيدرا ... شفتي طنت قتليك تاحد مغايقد يعيشك سعيدة بحالي انا (قاطعاتو بهستيرية)
سيدرا : ماما كتموووووت سسسربي
العميد،: ندوزو لبنك هو لول ..ياك هي باقا فمستشفى ايسواريز ؟؟
سيدرا : ااه باقا سسررربي
هز لافيست ديالو دغيا وحل لباب خرجو سيدرا كتجري هو تابعها ... وتونار لي كان غير حدا الباب ... شمر بنيفو وهبط كاسكيط على عينيه وزاد كايضور فراسو ...
هبط لطوميل ...،ركب بلا مايديماري غير كالس فيها وكيشوف فالتيليفون للمعلومات لي كلها تنسخات عندو .... تفكر الحديث لي سمع بين سيدرا والعميد ... وهو عارف سلطان شحال باغيها ... غير من الحديث واضح انها باعت راسها ليه .... وواضح ان العميد مغايديرش شي حاجة فابور ....عارف انه آذى سلطان بزاف وهو دنبو انه تاق فيه.... مكرهش يدير شي حاجة ليه يكفر بها ذنبو .....
تونار،: اشنو سمية داك السبييطار ...( كايحك دقنو يتفكر ... ) اسوااريز ... ( طلع دليل الهواتف وجبد رقم المستشفى واتصل )
-مستشفى ايسواريز آلو
تونار : بغيت نسولك ( كايحك فىاراسو ماعرف لاكنيتها لا والو) سيدرا ... سيدرا واحد ااسيدة عشرينية زعرة راه الام ديالها مريضة عندكم
- ماعرفتش ؟ واش الانسة سيدرا لي تابعة للمكتب الفدرالي؟
تونار : تمااااماا .... الام ديالها غادخل للبلوك ياك ؟
- اه اسيدي ... كايتسناو توقيعها
تونار: مصاريف العملية انا لي غانخلصهم .. عطني رقم الحساب ....مابغيتش نتعرف شكون .. فاعل خير.....
عطاتو رقم الحساب وحول ليهم المبلغ لي طالبين ...
سيدرا والعميد وصلو للمستشفى .. داخلة سيدرا بهستيرية كتجري للشومبر ديال ماماها .. والعميد تابعها ووقف فالريسبسيون
العميد : لارا سنتياغو ... شحال كتطلب العملية ديالها،؟؟؟؟
البنت : الادارة هي لي تقدر تقول ليك ... ولكن راه العملية تخلصات ...
العميد : شنو؟؟؟؟؟؟ شكون خلصها !!!!!
البنت : فاعل خير .. شي واحد مجهول دار هاد الجميل ....
العميد : ( مسح على جبينو) اش هااااد الموصيبة ....
- نعام اسيدي،؟؟؟
ضار عندها شاف معاها
العميد : رقم الشومبر
-11 اسيدي
خلاها وطلع لقا سيدرا كاتبكي حدا الباب ومشا عنقها
سيدرا : دااوها .... دخلوووهااااا ( كتبكي)
العميد : ماتخافيش كولشي غايدوز مزيان وعلى خير .. انا حليت المشكل وخلصت المصاريف
سيدرا : ( بعدات منو ) تخرج ماما على خير و نخدم فيهم ليل ونهار نردهم ليك
العميد : نتي عارفاني ماسلفتش ليك ....
عرفات قصدو ومشات كلسات شدات على راسها ...
عند تونار ...
وصل بسيارة للدار ... حبسها وهو كايضور تيليفونو فيديو ويحاول يلقى فخ مناسب لي يطيح فيه العميد ... طيحة لي مافيهاش سبيل للنجاة ...فنفس الوقت فكر حتى فعائلتو وصحة جدو ... خصو يتزوج بليديا قبل مايمشي الجد يدير لي فراسو ... ومنبعد غايشوف كيفاش يخرجها من داك الجرائم لي غايتنسبو ليها ... وكيفاش يحل مشكلتها لان مايمكنش تبقى ديما مسجونة عندو واحد نهار غاتخرج .... وحتى هو مايمكنش يبقى حياتو كاملة عايش هاكا .... خدم عقلو ورسم خطططة مزيان فدماغو .. من الداخلة للخارجة ...
ونزل من الطموبيل طلع سبق البيت دجدو لقا مراتو كاتجمع ليهم الحوايج غايمشيو للمغرب ... مطولش فالبيت وتاجه لجناحو .. وهو ماشي فطريق ولا كايحس داك الجناح فيه شي حاجة خاااصة ... بجمال داك اللمسة الاخيرة لي كانزيدوها فوق شي حاجة ... شي حاجة بدلات ليه الجناح كليا .... شي حاجة سرية خاصة به غير هو تاحد معارفها ....
حل لباب هو يشوفها ناعسة على الكنابي والكتاب مطلوق فيديها .... واضح انها غفات وهي كتقرا ... قرب ليها بشوية وحيد الكتاب من يديها حطو على جنب ... وجلس بجانبها كايشوف فيها ...
تونار بعد خصلة من شعرها على عينيها رجعها للور ... وبقى كايشوف فيها وكايتكلم غير مع عقلو ...
تونار : كون جيتي فشي وقت آخر ... مع شخص آخور ... مع وضعية اخرى ... مكانش غايخليك الواحد ضيعي من يديه .... ولكن للاسف نتي فبلاصة غالطة مع شخص غالط ...
رجع ناض وقف ودار يديه فجيبو وضربها برجلو تفيق وهي تخطف وفاقت كترمش فيه ...
ليديا : مصررفة فيك شي عيب،؟
تونار : نوضي بغيت نهضر معاك ...
ليديا: ( ربعات يديها وعوجات راسها معاه) جلالة تووناار .. تواضع وبغا يهضر معايا ....
تونار : حتى نت تواضعي وجاوبيه ...
خلاها ومشا كلس على السرير مقابل معاها واخا بعاد
ليديا : اش بغيتي ؟؟؟؟ ...
تونار : تحلي ودنيك ...
ليديا : دماغي كامل محلول ... ودني خضرة فوق طعام
تونار : كاينة شي اومور خصك تععرفيها ...
ليديا : يا نعرف كولشي ... يا مانعرف تاحاجة تبقى تقطر عليا مكاين لاش ...
تونار : اش بغا تعرفي ؟ ....
ابتسمات شوية بشوية وناضت كتمخترر تاوصلات لعندو وهو نظرتو فيها جامدة ... وعلات رجلها حطاتها على سرير وهبطات براسها دوزات بيديها على وجهو من فوق الماسك وهو عينو فعينها ودوات بصوت مججبد و قمة فالانوثة
ليديا : بغيت نشوفك ....
تونار مدة كايشوف فعينيها ... وعينيه كايهبطو لشفايفها ... بدا كايقرب بلا هواه .. .بحال شي ميغناطيس كايجبدو .. تالواحد اللحظة لاحها فالارض وناض كاينهج عاطيها بظهر باش مايفضحوه عينيه ولاح الكاسكيط كايرد شعرو لور وهي طايحة فالارض وهضرات بكل جدية ونرجسية ...
ليديا : هادشي لي كادير فيه راك غير كتعدب بيه راسك ... انا مكنعياش ومكنستسلمش ... بغيييتك .. هي بغيتك ... ييتطمع عليا الكوون كاااامل .... مغانتخلاش ....
تونار : ( ضار عندها ) لي يسمعك ... يقول كتهضري على واحد سنين هادي ملي عرفتيه ... منين جبتي هاد بغيتك ؟؟
ليديا : (قادات كلستها فالارض متكية على السرير ) ليلة واحدة كانت كافية .... نتربط فعينيك ... ويبانو ليا كيف جي نجمة عاااالية .... خصني نوصل ليها بأي ثمن كلفني .... نقيسها بيدي .... ونشبع منها ....
قرب عندها تابقات كاتشوف غير سباطو ... وهبط عندها تحنى وجات عينيها فعينيه ... فهاد النظرة عينيها كايدمعو بسبب جادبية عينيه وهضر بصوت ثقييييل ورخم ... وبهمس خفيف
تونار : بغيتك بلغة لاقيس ... هي تحدي باش نحصل عليك ... ونهار نحصل عليك .. نهزك بحال شي ديبلوم نعلقو فللحيط نتباهى بيه ونرضي غروري ونقول حصلت عليه .... ومن ثم ... تشوفي ش تحدي اخور ليك تزيديه على انجازاتك .... بغيتك بلغة لاقيس هادي هي .. وتونار ماشي هو لي يكون مجرد اسم فلائحة الانجازات ديالك ايما يكون العنوان ... وايما يبقى التحدي لي خسرتي فيه ... خليك كتشوفي النجوم غير من البعيد .. نهار تقربي مغايعجبوكش ...
ليديا : عندي بلاصة فسماك ومن حقي نشوفك...
تونار : اشمن حق عندك عليا ؟
لبديا : بغيتك ... وليتي رغبتي ... ورغبتي كتنفد ...
تونار : باقي متزادش لي يردني رغبة ...
ليديا : بغيت نشوف وجهك ...
تونار : نهار لقاك تستاهلي تشوفيه ... غانعريه قدامك ...
ليديا : نموووووت .. نموت ونعرف علاش مخبيه
تونار : مدام فيك غير الفضول ... عمرك تحلمي تشوفيه ...
خلاها وتاجه للمكتب حل مجر جبد كارو وتكا عليه كايشعلو ... وليديا ناضت بشوية لعندو ...
ليديا : تونار .....
تونار كان كايشعل البريكة وتوقف على الحركة ... بحال شي فيديو توقف .. لاول مرة يسمع سميتو بحال هاكا وبهاد الصوت ... رجع تنهد وشعل الكارو .. جبد منو ونفت الدخان وشاف فيها بمعنى شنو
ليديا : دير لينا شي حل ... مستحيل نكملو هاكا ....غانقتلو بعضياتنا غير بالفقصة ....
تونار تنهد ومشا جلس على الفوطوي كايشوف فيها بكل جدية ... وهي تعصب من تأخر ديالو فالرد ..
ليديا : راه كنتسناك تجاوب ؟؟؟؟ كنحسك كتنتقم لكاع هادوك لي كنت نلعب على اعصابهم فجوابي ...
تونار : ها علاش قتليك انا مرايتك ...
ليديا : غانبقى هاكا طول حياتي ؟؟؟؟
تونار : لاقيس ... انا وياك ... مجامعنا والو وعمرها غاتكون .... ديري فبالك ان لي بيني وبينك هو سؤال وجواب .... تعطلتي فالجواب وتعكلات القضية ....
شفتي عنادك فين وصلنا ؟
ليديا : عنااادنا .... ماتنساش انك نتا لي رفضتي تطلبها مني بأدب وتعري وجهك ...
تونار : نتي لي بديتي .. بسبب قصوحية راسك .. طريق عندنا طولات ودخلنا فبيبان خرين انا وياك ... او بالاحرى ... ان لي دخلتك ...باش تعرفي نتيجة عنداك معايا بشحال كتصرف .... مكنتش كنضن غانتعاقب حتى انا معاك ... ( جبد من الكارو ونفخ دخانز وكمل الهضرو ) دابا حتى الى كاع تنازلتي ... وقلتي ليا نتي شكون ومنينن جايا وبنت من .... مغاتهنايش مني ....
يديا : وعلاش
تونار : حيت غاتولي مراتي ....
ليديا : هاه ؟؟ راه قتليك كتحلم ... نتزوجك بلا منشوف وجهك مستحيل
تونار : معنديش المستحيل فالقاموس ...( دوز لسانو على شفتو ومصهم ورجع هضر ) جدي مريض ... وباغي يدير لي فجهدو يزوجني .... حيت كيضن انني غاتبقى طول حياتي بوحدي مدام مزال ماكايناش هادي لي تقبل تتزوج بواحد مغايبينش ليها وجهو ..... بغيت نحقق امنيتو .. وتتزوجي بيا قدامو ...،تلعبي دورك باتقان ...،الزوجة الودودوة المطيعة ... وغاتببقاي محبوسة فالمنفى ديالي ... حتى لنهار تتنازلي وغايتطلق سراحك ونتهنى منك ومن وجودك واستعامرك لحياتي ...
ليديا : هادشي لي كاتقول فيه ... تقبل بيه شي وحدة اخرى من غيري ....ماشي ليديا ....
تونار : ليديا ... هه ... لاقيس كتناسبك كتر ...
ليديا : لا ومغير ليا الاسم من الفوق ... سارقني .. ونافيني ... و حابسني ... وباغيني نتزوج بك بزز ومبدل ليا سميتي وكتمشينى بهواك ... و انا ؟؟؟ ممنوع عليا حتى نتعجب بيك ؟
تونار : تعجبي بيا !!! ( جابت ليه الضحكة وخبلها ) تعجبي بواحد وجهو مخبع ؟؟؟؟ .... هاداك الغزالة راه مجرد فضول وحريق الراس ... ماشي اعجاب كيف كضني ..
ليديا : علاش كنحسك متايقش فراسك
تونار : انا واقعي .... ماشي بحالك عايشة كتغداي على غرورك وتخيلي راسك اجمل ما صنع الكووون ....
طفا الكارو فالطفاية وناض باتجاه البيت لي فيه اللوحات ديالو .... وبدا يجبد فالسطولة دالصباغة راشقة ليه يبدا شي لوحة .. تاحسها تبعاتو .. حيت مدة وهي واقفة كتستوعب
ليديا : اش قصدتي بهضرتك ؟؟؟؟ كيفاس كنتخيل راسي !!!
تونار كايعلي كمامو وعينيه على الصباغة مجاوبهاش
ليديا : خصك تعرف .. انه انا ماتخلقش مني جوج ....انا لي الواحد كنشووف فيه كايدووووب ... وتتا براسك شحال من مرة دبتي قدااامي وكبريائك العوج منعك تخضع ...انا لي مكاااينش لي مشافهاش وسبح الخااالق ... انا لي مكااااينش لي يرفض شوووفة مني ... ورفضك نتا ... راه حيت عندك نتا شي خلل ماشي انا ( تونار كايحك سنانو بلا مايبين ) علاش كنحسك غيران مني ؟؟؟؟؟؟ حيت انا حسن منك ؟؟؟؟؟؟ ... وكون كان العكس وكنتي حسن مني فالجمال ... كنتي غاتكون معري وجهك تفتخار بيه ...( جمع قبضة يدو وهي كتحاول ترد الاعتبار لكبريائها لي خدشو) اشنو دنبي لاكنت حسسسن منك ؟؟؟؟ واجمل منك ؟؟؟؟ اه انا مشايفاش وجهك .. ولكن تكون لي تكون مستحيل تكون بحااالي ... وغايجي نهار لي تطيح الراااس وتجي خاااااضع ليا ... وتعترف بلي انا اجمل ماشاف عيينك .... لي هوما دياولي ... آمول عينيا
قبل ماتكمل كلامها كان جرها مز شعرها حاكم راسها وسط قبضة يدو وهي كتنتتررر وكايخشيه ليها فالصباعة الكحلة كاامل كاؤغطسووو ويضربو فاللوحة مغززززف ... وعينيه حمااااررو بالاعصاب والاستفزاز ....
تونار : هاد وجهك الزوييييين لي فرعتيي ليااا مخيي بيييه .. هاا كيفااااش كانشوفووو اناااا ..
كايغمس ليها وجهها فالصباغة ويزيد يضربها بجهد مع طابلو تتلطخ فيه ....وهي كتحاول غير تفلت وتغوووت
تونار : هاكاااا كايبان لياااا ... هااكاااا ( مغزززف عليه ومجنز ) وجهك هذا الزويييين ؟؟؟ هااا كيييفاش داااايررررر ...
علا ليها راسها شداها من شعرها وكايوريها الطابلو ديال لطخات وجهها بالصباغة الكحلة ...
تونار : شوفي مزياااااان هاد الطابلو ... اانا معنديش دنب الى المرايا ناافقاتك وكدبات عليك ... هااااا وجهك كيفااش فعيينيااااا .... شفتيه ؟؟؟؟؟ راك واخا تبقاي العام كامل كتمشي وتجي حدايا بهاد الوجه لي كضنيه زوين .. مغايتحررركي فيا حتى شششعرة .... مااعجبتنيش ومكتعجبينيش وعمرك مغاااتعجبيني ....غاتبقاي تباني ليا وحدة حمقة كتشششكر فراسها وفوجهها المعفن ... حيت فمخها النقص .... الى كنتي نتي عاجبك هاد الوجه لي مافيه مايتشاف ... راه ماشي ضرووري يعجب الناس كااااملين ... كاين ماحسن منك وساكتين .... جمعي عليااا غررووورك وسيري قلبي علامن تمارسيه ماشي معايا هاااا وجهك فعيني كيف داير وبهضرتك غير مكتزيدي تعيفيني فييييه
ضربو ليها مع طابلو وخلاها وخرج معصصصب ... وهي طاحت على داك الطابلو والصباغة مزلعة ضايرة بيها وكالسة وسطها فااارض جااااااامدة مكتحركش....
الساعة الثانية صباحا ... امام احدى وكالات الاتصالات الخاصة بإحدى الشرائح ...
نزل من الطموبيل ديالو .. كان الشارع خاااااااوي ....علا عينيه للكاميرا لي كاتشوف للشارع ... جبد من جيبو تيليفون صور فيدو للمكان .... وقرب للباب .... شاف بعينو الى ماجاي حد ... وجبد من جيبو واحد البرنامج آلي .. حطو على القفل ديال الباب وبقا كايضور فواحد للقرص وسط داك الالة الصغيرة ... حتى تسمعات " طرااق "... وحيدها و فتح الباب دخل وهو كايصور تاني فيديو لاي مكان شاف فيه الكاميرا .. شعل البيل كايقلب حتالقا البيرو لي بغا ودخل جلس قدام البيسي .... شعلو ولقاه بالباسورد ... ماستغرقش منو الامر 10 دقايق كان حلو ...
تاجه لملف اتصالات ديال رقم العميد .... بسرعة وخفة ودقة فيديه وقمة التركيز .... غير طلعو ليه الاتصالات .. برونشا ال USB ديالو ودوز ليه داكشي كااااامل لي تما من نهار تطلق ليه الخط ... عاد طفاه .. ورجع للبسي آخور ... وحلو وقلب على التسجيلات الكاميرا ... جبد اللقطات لي دخل فيهم وصوروه... ودوز من تيليفونو لتما كاع الفيديوهات لي صور ...ودوز حتى فيدوهات للدقائق لي جااين باش ملي يخرج يطلع تاني غير نفس لفيدو فداك الدقائق لي غايستغرق خروجو من الوكالة .... ومسح هادوك لي صوروه داخل ... وشد كولشي وخرج دغيا قبل مايفوتو الدقائق لي غايدوز فيهم الفيديو ديال الرجعة .... وركب فسيارتو وزاد ....
هاد المرة تاجه للدار وقصد المكان لي نازلة فيه المروحية وقصد البرج ديالو ...
دخل مع بزوغ الفجر ... حل البيسيات ديالو و برونشا الكلي يو اس بي .. وبدا يسمع فالمكالمات والابتسامة الشيطانية كترسم شوية بشوية على شفايفو .....
المكالمات كلها مع العصابة عندو مسجلة.. وماشي غير هادش كايتاجرو حتى فالقاصرات ... وللاطفال ... ملف مزززند عندهم ...مفهمش كيفاش تصرفو بهاد الغباء وهضرو فرقم من الشرائح الوطنية ... ظنو ان مكاينش لي يععيق بالعميد واستاهنو بالامر ....
والعميد غير شراو ليه الشارات اما الحقيقي محبوس عندهم وجا كايخدم بالهوية ديالو ... سمع كولشي وفهم كولشي ... الضوسي مقاد ... مسح الاتصالات التافهة وخلا غير المهمة فداك اليو اس بي.... وناض قدام صبورتو .. وبدا كايخطط بالفوطخ ديالو واحد حمر ففمو شادو بين سنانو ...والكحل كاكتب بيه ...كايقاد ليه الضربة مزيان ...الضربة لي تغرقووو فمرة ....
مابقاش العميد غير متهم عادي بنسبة ليه .... ولا كايشوفو الحجر الثاني لي غايضرب بيه العصفور ...
سالا وخرج للصالون تلاح عليه كايشوف للفوق طالق يديه على جناب الكنابي ومعلي راسو للسقف..... وكايفكر فهادشي لي باغي يدير واش صحيح ولا غالط ... ولاهم من هادشي كامل ...باغي يشرح لراسو علاش قرر هاد اقرار فهاد الوقت بضبط ؟؟؟؟؟واش فعلا ولا كايشوف انه من حقو يعيش ؟؟؟
الافكار ديالو خدات منحى جديد ...
منحى عمرو كان يضن انه غايفكر فيه شي نهار ... جلس مع راسو وطرح سؤال ... انا علاش عايش مخبي ؟ ... انا علاش كايقلبو عليا ؟ .....
اسئلة لقا راسو عارف جوابها ... غير ماعمرو سبق ليه وطرحها على راسو،....
السن كايفوت وجدو ولا كايتسزى صباح لي يقولو ليه مات ... ماخطفش معاه ايام زوينة ... ماخرجش هو وياه ... مارسمش معاه دكريات ... ديما كان كايعاني معاه وهو عايش وراء الكواليس عمرو حقق ليه امنية يعيش بحال الناس ويبعد على الماضي .. ماحقق ليه حتى اقصى للاماني لي تمناهم ... ضيع بزاف من حياتو مخبي ورا تمثال الرجل الغامض ... رغم انه مداير حتى شي حاجة لي تخليه غامض بحال هاكا ...
مدة وهو كايفكر وحاول يقنع راسو انه هادشي دايرو على قبل راسو ماشي على قبل شي حد ...
وهز سوارتو وخرج يرجع للدار باش يودع جدو لي ماشي للمغرب ولي ولا كايدير ليه الخاطر كيف شي دري صغير . ...
مدة زمن كان وصل الدار .. ساعة كانت الثمينة ديال الصبح ... غير تلخدم لي كايضورو فالدار اما هوما كولشي للفوق فبيوتهم ...
تمشى بيجهة جناحو وهو مستعد تاني للحرب الكلامية لي كتكون معاها كل مرة .... حل الباب كايقلب عليها واش يلقاها فشي بلاصة مكمشة ناعسة ..،ولكن مبانتش ليه !!!!...
شد الباب ودخل كايقلب بعينيه وهي تبان ليه سيل ديال الصباغة سايح من داك البيت ... كمش ملامحو ومشا طل عليها .. هو يوسع عينيه .....
كانت فنننننفس الوضعية لي خلاها البارح ... بحالا غير رمش وصافي ماشي مشا وجا .... بنفس الجلسة .. ونفس النظرة .. ونفس الصباغة فوجهها ... وتاحاجة متبدلات كيف مشا وخلاها رجع لقاها ... كاتشوف قدامها فالحيط كيف شي جظاد .... خلعاتو !!! مستحيل تبقى هاكا بحال الصنم ليلة كاملة ؟؟؟؟ .. لهاد الدرجة الكلام علىى الجمال كايأثر فيها !!!
مشا بسرعة هبط على رجليه كايطلع ليها راسها تشوف عندو وعلات فيه عينيها كاتشوف دون ماترمش وبدا يضرب فوجهها طرشات خفاف
تونار : ليديا ؟؟؟؟ ليديا نتي بيخير !!!!
لبديا مكتجاوبوش غير حالة فيه عينيها ... خلعااتو حالتها وهزها للدوش حطها تحت الرشاش و هز الرشاش كاؤخوي عليها يغسل ليها وجهها من الصباغة وهي حالة عينيها بدون مترمش وجاااامدة ....
تونار : ( كايغسل ليها وجهها ) ليديا ... ليديا شوفي عندي ؟؟؟ ليديا واش نتي بيخير ؟؟؟؟؟؟ كتسميعني ؟؟؟
ليديا مكتردش عليه ومكتجاوبش بحال شي جماد ... لواها فالفوطة شعرها كولو فاااززك وشفرانها كايقطرو ... وكلسها على الكنابي كايضرب فوجهها
تونار : ليديا ... الى كتمسعيني ردي عليا .... ليييدياااا ....
مكتجاوبوش وناض بزربة تلف كاع ... اول مرة كيتحط فموقف بحال هدا .. حل المجر وجبد لابراي وقرب ليها عبر ليها طونسيون ودقات القلب بانليه كولشي مقاد ... بدا كايحيد شعرها على وجهها كايردو لور وشفايفها رجعو زراقو بالبرد ... حيت غسل ليها بالما بارد ...
تونار : ليدياااا ... ليديا قولي شي جاجة . .شوفي فيا !!!
لااا رد منها ... وباقيا كاتشوف فمنحى واحد وناض كايمشي ويجي ويسووط... عينييه حمااارررووو وندم على فعلتو دالبارح ... مكانش كايضن تقدر توصل كاع لهاد الحاااالة كاملة بسبب داك الكلام !! ندم لانه اكثر حاجة مكيبغيهاش هي يآدي شي واحد بحال هاكا .... ياك هي تايقة فراسها زوينة ومكاينش لي يزعزع تقتها فراسها ؟؟؟؟ مضنش كاااع وباقي متيقش ان ليديا القووووية لي كيف شي حصن ولات بحال هاكا !!! استتغررب ؟؟ .... حتى سمع صوتها ثقيييييييل وبحوح وهامس بالكاد كايقدر يتسمع ليه ....
ليديا : عمرني آديتك انا ... فشي حاجة .....
ضار براسو بززرزبة بانتليه كاتشوف فالحيط وهضرات .... ورجع قرب عندها كلس على ركبتو وضور وجهها لعندو
تونار : الحمد الله .... ليديا واش كتحسي براسك بيخير ؟؟؟؟؟ نعطيك تشربي ؟؟؟؟؟
ليديا قلبات عينيها مجاوبتاش ...،وهز فوطة نشف ليها شعرها وهي راااااخية راسها ... وهزها لسرير نعسها
تونار : نبدل ليك حوايجك ؟؟؟؟ غاتمرضي
مجاوباتوش ناعسة على ظهرها وكتشوف فالسقف ...
تنهد وقرب كلس حداها .... كايشوف مدة وعض فشفايفو ماعارفش اش يقول وكيفاش يتصرف فبحال هاد المواقف. ... استفزاتو حتى هضر معاها هاكاك مضنش غاتولي بحال هاكا ؟؟ وداكشي غايأثر فيها لهاد الدرجة ...
تونار : مضينتش لهاد الدرجة يأثر فيك الكلام على جمالك ؟؟؟؟
ليديا : ( مدة كتخليه حتى كايضن راها مغاتجاوبوش ... وهي كاتشوف فالسقف وهضرات ثقيييييييلة ) انا اجمل ماخلق الكون ...( شافت فيه ) ياك انا اجمل ماخلق الكون ؟؟؟؟؟
تونار طول فيها الشوفة ... لعينيها لي سارقين من القمر لونو ....ومن البحر عمقو .. ومن السما صفائها ... ومن النور لمعتو .... للخدودها ... لشفايفها ... لكولشي فيها !!! .... وحرك راسو بشوية بالايجاب بمعنى آه ...
ليديا: انا ... احسن مكاين فالكون ...ياك انا احسن مكاين فالكون ...
تونار رد عليها تاني غير براسو وهي تبسم شوووية بشوووووية بعينيها لي رجعات ليهم الغرور....خلاتو غير مستغرب !! وبلا مايحس ننطق غير بالهمس بدون ماتمسعو ....
تونار : وبضحكتك ....الكون حتى هو جاوب وقال آه .....
ناض تونار هبط لتتحت ... تلاقاتو ايطو كيف العادة ....
تونار،: صباح الخير ... بغيت فطور للبيت ...
ايطو : ؟ ها ؟؟ مغتتفطرش ليوم مع جدك ؟؟؟ حيت غايسافرو ووجدنا ليكم الفطور كاملين ...
تونار،: دابا وجدي ليا انا الفطور للبيت ... وملي يفيق نعاود معاه !! كاين شي مشكل ؟؟؟؟
ايطو : لا اولدي بصحة والراحة .....
خلاها وجا طالع فالدروج هو يشوف نور نازلة تخطاها وجا طالع تاسمعها
نور،: ا ت .. ت تونار .. ن نهضرو شوية،؟؟؟؟
تونلر : ( جاوبها طالع فدروج) مشغول ...
حزنو ملامحها ... وهو رجع للجناح لقاها مزال فنفس وضعتها تنهد وقرب عندها جلس ....
تونار : ( حيد كاسكيط وهبط شعرو على جبهتو حريري) ماقصدتش ... جيتي فالطريق وخويت فيك اعصابي ...
ليديا : ( شافت عندو) بغيت مرايا ......
بقا كايرمش ورجع ناض وقف وبعد تالبيرو ورجع وقف .... تنهيدة وراء اخرى ...
تونار : طلبي اي حاجة من غيرها ...
ليديا مجاوباتوش وتكات بشوية على السرير وباقة بااااااردة وجاااامدة ... وكاتشوف بنظرات ثقاال حتى الرمشة كادير فيها عام بحال شي جمرة وطفات ... بحال شي شمس غربات ... بحال شي شمعة تآكلات ....
ليديا : بغيتها هي ....
تونار كايشوف فيها ومايكدبش ان هاد الهدوء ديالها ... خلاه يحس باحساس غريب تملكو ... كايحس بقلبو فيه وخز لداخل ... ورجع قرب لعنها وجلس ...
تونار : ليديا ... كاينين بزاف دالحاجات فالحياة زوينين .... من غير المرايا !! تلفتي ليهم ..
ليديا : عارفة بلي كاين بزاف دالحجات زوينين ... كاينة .... أنا .... وانا .... وانا ( شافت فيه ) وانا ......و( مكملاتهاش وكملها هو )
تونار : و نتِ ...
ليديا : لا ..عينيك
سكتاتو .... ولا بالاحرى صعقاتو .... بقا كايرمش فيها .. وكاتعاود كلمتها فراسو الف مرة ....شي حاجة لداخل ضراتو ... هو بكلامو خلاها ليلة كاملة مصدومة وهي بكلمة .. زعزعاتو .... ردات ليه الدقة بكل اتقان ... وغير بطريقة اخرى .... لاكانت عي عمرها ضنات راسها خايبة و تصدمات ... هو عمرو ضن راسو زوين وتصدم !!
ليديا : الباب ...
تونار،: هم !!
ليديا : لباب كتدق .....
تونار توكض ... وناض للباب فتح غير نصها باش ماتشوفهاش ايطو على السرير .. هز عليها البلاطو وشد الباب هو يضور ولقاها مكيناش !!! كدير كيف شي جنية كاتخلعو ....
حط البلاطو وهي تبان ليه خارجة من داك البيت هازة داك الطابلو وحطاتو فوق البيرو ديالو .... وبقات كاتشوف فيه وتتبع بصبعها ....
تونار : ( مسح على جبهتو) انا نعيط ليهم يرميوها ...
ليديا ضارت عندو وهي شاداها فيديها كاتشوف فيها ...
ليديا : هاد اللوحة ...( علات عينيها فيه كدوخو بهاد النظرات) شحال تكون كتسوى فسوق الجمال !!!!
تونار : مافهمتش !!!
ليديا : هاد اللوحة ثررروة ...( كتمشى بشوية لعندو) ثروة كبيرة ..... حيت فيها وجهي .....( بيناتها قدامو ملطخة بالسواد) شووووف شحال زوينة ...( شاف فيها وشةفت فيه) ياك زوينة ؟؟؟؟
تونار غير مستغرب كايشوف !!!!!!
ليديا : صاوب ليها ايطار من الماس ... ووتحط فمتحف ... فجانب الاشياء الثمينة .. لا لا تحط بوووحدها .... مكاينش اثمن منها ..
تونار : ليديا ؟؟؟؟؟
بدون سابق انظار لاحت داك اللوحة الارررض وبدات كاترررعد كاملة وغوتات بجججهد وبححححرقة كبيرة فهضرتهة ....
ليديا : ماااااااعندكش الححححححق تحط تقييييمك على ووووجججججهي ..... شكووون نتا ؟؟؟؟؟ شكوووون قالييك اناا باغا نعجججججبك اصلااا ؟؟؟؟؟ .. انا اجمممل ماخخلق الكوووون وغانبقى اجمل ماخلق الكووووون ... مكااينش ماحسن مني فهااد الدنيا وبزز علييك تتقبلها وتعترف بيها .....
تلاح عليها دغيا شد ليها فمها ودخلها لداك البيت وشد الباب وهي كتنهج وتععض وتجنن وهو مخلييييها دير مابغات وتخرج غضبها كتغووووووت بجهد وتعععض فيه ... وتضررررب فالحيييط .. حتى طاحت لارض كترعد وصدرها كايطع وييييهبط ... تاهو هبط معاها وكايحاول يشدها من كتافها ويهدنها .... تابقات غير كتنهج ....
تونار : شششششش ... بشوووية عليك ...
ليديا بقات مدة طويييييلة ساااكتة كتشوف فواحد الحيط وتاهو كلس كاتسناها .....وواضح تفكراااات بزاف دالحوايج حتى لمعو عينيها مرة كتبسم مرة كتحزن ....
حسات شي حاجة سخونة هبطات على خدها ... تونار وسع عينيه !!! تلف وماعرف كيف يدير يتصرف ....
تونار : اا .. ليديا ؟؟؟؟ كتبكي،!!!!
ليديا شافت فيه فالزربة .. اش كايقول هدا ؟؟؟؟ هزات يديها بشوية وقاست فخدها الدمعة .. وبقات كاتشوف فيها فصبعها وكاتشوف فيها ...وشافت للفوق
ليديا : م منين قطر !!!!! منين قطر هادشي ...م .. ماشي دياااالي لا ... ماشي ديااالي .. منين جا ؟؟؟
تونار شااف فيها وحط يدو على قلبها
تونار :منهنا جا ...
بقات كتحبسها بزز وصدرها كايضيييق وموسعة عينيها ماتهبط تادمعة ... حتى حساتو جبدها وحظنها فحظنو وهي تنفجججررر ... بكاء السنين ..دموع الاعواااااام ... انسكبو فسيل وااااحد كايتدفق من اعماااقها .... وتونار . مكان غير النقطة لي كتفيض الكاس ......
أحيانا لا نكون بحاجة لطعنات
ولا نكون بحاجة لخيبات زائدة
ولا لكلام مرير
ولا حتى بحاجة لجدال أو نقاش
لا نكون بحاجة لشيء لننهار بالبكاء و نسقط على الأرض ككومة من الحطام
فقط نبش خفيف أو كلمة عادية جدا أو ربما جملة لتهز الكيان، يأتي سبب عنها ونجد انفسنا ننهار وشريط اليأس يمر على تلفاز اعيننا ليحرق ما بقي بداخلنا من سواد، تبا!!
حظنها فحظنو وخلاها تنخصص على خاطرها وهو غير كايحاول يستوعب هادشي !!! بحالا كيحلم ؟؟؟ .....
ليديا كتهضر بصوت مقطع بالبكاء وكلهات كتنخصص وتهتز .. نبرة صوتها تبدلات بالكامل .... بحات .. عياااات ... عيات من القوة .. عيات من الصلابة .. كتبقى انسان !!! .. نبرة الصووت حتى لي مايفهش لغتها يتأثر ليها .. الحرقة باش كتهضر بحالا الكلمات كاينزلو دم من فمها .... شريانها كايتمزق .... بحال الزمن وقف وخرجات ليديا من الايطار لي كانت فيه .. وتجردات من جسدها .. وخرجات روووح ساااابحة و كيف الريشة تحطات على كتف تونار .. كتقطر بدموع بحال الندى الصباكي ... الندى لي جا بعد ليلة ممطرة بالكامل ......
ليديا : مكنبكيييش ... مكنبكيش ... شي حاجة دخلات عيني انا مكنبكيش .... ماش دموووعي انا مكنبكيش .... ( كتنخصص ) حتى حاجة فالدنيا ماتقدر تبكيني ..... ليديا مكتبكيش .. ماشي ليديا لي كتهبط الدموع .. ليديا معندهاش الدموع .. انا مكنبكيييش ..... ( مدة كتنخصص باابكا ) قلت لماماا واحد نهار وانا صغيرة مفاهمة فهاد الدنيا والو .. سولتها علاش محبوسة انا ؟؟؟ علاش مكنخرجش بحال خويا ؟؟؟ ... قاتلياا حيت نت زوييييينة بزاف ... ولي زوين بزاف كايتخبى من عيون الناس .... كيف الشمس ورا الجبال .... وكيف الؤلؤ وسط المحار ... كيف الكنز تحت الارض .....
انا كنت كنضن محبوسة حيت كنت زويييينة ... حيت خافو من الناس يخطفوووني ... خافو من الناس يستغربو بلي كاينة وحدة بحالي فالدنيا .... ملي كبرت .... عرفت ااني كنت محبوسة ( بحرقة كتر) غير حيت انا بنت .... نهاار حزززنت .. لقيت راسي يواسيني ... نهار مرضت لقيت راسي يقااابلني .... نهار طحت لقيت راسي يووقفني .... وكطلبو مني مانبغيش راسي ؟؟؟؟؟ انا هي كوولشي ديال راسي ... جسدي وجهي يدي رجلي راسي شعري ...هوما لي مكايتخلاوش عليا .... تاحااجة مني ماتمس غير هاكاك الى مكانش لي يدفع ثمنها الغااالي ويقد بغلائها وغلاوتها..
حيت اناا ... اناااا لي كانلقاها الى وقعات ليا شي حاجة .. كنلقا غير انا ... غيرر رااااسي ... كنبغي غير راسي حيت مزال مكاينش فالدنيا .. لي عطاني اش عطيت لراسي ... لي بغاني كيف بغيت راسي . لي يحن عليا كيف كنحن على راسي ... لي يخاف عليا كيف كنخاف على رااااسي ... لي يحمني كيف كنحمي راسي ... لي يبغي ليا الخير كيف كنبغيه لراسي .... انا مطلبتش من دنيا شخص يدير ليا هادشي .. هي ماعطاتوليش وانا ماشكيتش .. وانا مكلستش فقنت البيت كنبكي ونطلب من الناس يحنو عليا .. انا لي شديت يدي فيدي ااخرى ووقفت ...انا لي واسيت راسي ... انا لي كنعطي لراسي الاهتمام ومكنطلبوش من الناس ......
كولشي حسبني جسد انا لي حسبت راسي كنز ... كولشي حسبني سلعة وانا لي حسبت راسي ثروة ... ( مدة ساكتة كتلتقط انفاسها وتنظف الصوت باش تكمل انسكابها اللين على كتفو ) علاش القوي هو لي كياكل الدق بزاف ؟؟؟؟ حيت مكيحسش ؟؟؟؟؟ كدووووب ... كدوووب ... القووووى اكثر واحد كايحس ....،القوي مكيبكيش باش يرتاح ...القوي كايزمها لداخل ويتعدب .. القوي مكيشفق عليه حتى حد ويقول باركا عليه ... القوي واخا مايآديش الناس هوما يآديوه ... كايحسبوه بحال داك الكاس لي الزاح ديالو مكتكسرش ... فاش كايكونو شادينو بين يديهم مكيردوش ليه البال باش مايطيح .. حيت عارفينو مكايتهرسش ... كايضربوه مع الحيط.. كيهملوه .. حيت كايقولو تاحجا ماتهرسو ... ونهار هداك الكاس كايتهرس ... كايولي فتااات صغيرة مستحيل تتجمع ولو بمعجزة ....
اش درت انا ؟؟؟؟ تزادييت فننفى بلا خاطري .. وكبرت فيه بلا خاطري .... حاولت مرارا وتكرارا نهرب بلا فايدة ....ماستسلمش وحاااربت ... ماستلمش لقدري لي استسلمو ليه كاع لي قبلي .... حاربت وعشت على انني نتحرر .... الامل كان بين عيني مضوي ليا بصيرتي ....ونهار هربت !!! .. لقيت راس فمنفى اخر بلاا خاطري من جديد .... تخشيت فححفرة تحت الارض ومكاينش لي تصبر ليها حتى دققيقة ... لظلامها ... لريحتها .. لضيقها ... كنت فقبر بلا موت .... ونهار خرجت منو ... ( كتنخصص بالبكا) كنتلاقا عينيك .. اول حاجة زوينة كنشوفها فالدنيا منبعد ماخرجت ليها ... ضارو بيا فكل بلاصة فدام الحفرة وضواو ضلامها ...مكنتش كنخطط نتحرر كتر ماكنت كنخطط نرجع نشوفوهم تاني ... تمنييييت نتسجن وسطهم ... حتى لقيت راسي مسجونة معاهم ... وتااااني بلا خاطري وبلا شواري ... لقيت راسي فمنفااك التالت فتابووت فضي وسط الغيوم .... خدشتي غروري وخرجتيني على ايطاري .. ( بعتاب كبير فكلامها المحروق ) انا آش درت ليك غير قول ليا ؟؟؟؟. واش دنبي عجبوني عينيك ( تونار مصدوم) هدا باش تجازيني ؟؟؟؟؟؟ .. اش دنبي فيكم كاملين . شنو دنبي فمنافيكم وسجونكم ... انا بجناحي علاش تحبسوني اشكون عطاكم الحق والله خلقني حرة ؟؟؟؟؟
انا عمرني شفت الدنيا .. انا عمرني شفت الناس .. انا عمرني شفت واش كاين ماحسن مني بصح ... ولكن لي متأكدة منو .. هو مستحيل يكون شي واحد بحالي .. لي دوز هادشي كامل وصبر ومابينش قطرة دمعة على خدوو .. اشنو درت باش ترميوني من منفى لاخر ؟؟؟؟ وعلى اشمن ذنب انا كنتسجن ونتعاقب .. فمنفايا الول تسجنت حيت تزاديت بنت .... وفالثاني تسجنت حيت سكت .. وفالثالث حيت بعينيك تعجبت .... امتى غانتحرر،؟؟؟؟؟ امتى ....
سكتات كتبكي وهو كيطبب على ظهرها ...حسها فشااات قلبها كاااااامل ... شوية بدات كتسكت عرف الى واقع ليها بحال السكران لي منين غايصحى غايندم على كولشي ومخصوش فهاد اللحظة يخليها تحس بندامة حيت باحت ليه ... بعدات على كتفووو كتجمع خصلات شعرها العالقة عليه ... وهي كترمش .. داك الرمشات ديال اش درت انا دابا !!!! ... ورجعات لور كتشوف هنا وهنا وتهرب من هاد النظرات الشفقانة لي كضن راه دايرهم فيها ....
ليديا : م .. مااتشوفش فيا هاكاك ....
تونار قرب ليها وطلع ليها راسها .... وبقى كايشوف فيها مدة
تونار : كنحشمو من الضعف ...،مكنحشموش من للقوة،... البكاء قوة .... والدليل .. هو ماشي اي حاجة تخليك تبكي بحال هاكا ...
خلاها وناض جاب كاس دالما وعطاها شربات نزلات عليه شحفااااانة وكاسيل مع جناب فمها .. ومسحات بديها ورجع جىس حداها مربعين فالارض وسط الصباغة مززلعة ...
هز ليها يديها .. وحطها فواحد البقعة ديال السوااااد .. وهزها لواحد الورقة مليوحة تما بيييييضة ...وهي متبعاه
تونار : هادي صفحة بييييضة .... اي حاجة تقدر توسخها !! كنخافو عليها ... وكنبداو ( كايحط ليها يديها فوق داك الورقة) نلطخوها بالسواد ...( كايدير ليها يديها فالصباغة ويحطها فالوحة ) فين مانشوفو بقات شي بلاصة بيضة ... كنلطخوها .....بحال هاكا .. (طلق يديها وهز داك الورقة ....) باش حتى حاجة ماتوسخها وماتزعمش عليها .... كنوليو كنشبهو لهاد الورقة ... ولي شافنا كايقول .... بلي هادا ظلام .. هادا سواد ... اي لون حطيتيه فوق هادشي مغايبانش ....الى هزينا ( حط يديها فصباغة زرقة ) هاد اللون .. وحطيناه هنا ( مبانش) مكيخليهش الكحل يبان على الورقة ومكيصور منو والو واخا يعيا يووووسخ به ... والى هزينا ( حط ليها فالحمر ) هدا ... مكيبانش واخا راه اقوى لوون تاهو مغايبانش .... حتى حاجة مكتبان فوق من الكحل .... فوقاش يقدر يبان اللون ... نهار يجي هدا ( هز واحد زيزوار ديال تقطاع الوراق مليوح حداه ) ويجرح هاد الورقة ( بدا كايكرط داك الكحولة ) كايجرحها حتى كايتحيد هاد السواد ويوصل الجرح للبياض لي تحتو ... لاعماااااااقنا ( بدات كتبان الورقة ) ... منين كنتجرحو ... داك الساعة ( هز يديها حطها فصباغة صفراء وحطها على البلاصة لي جرحها وبانت الورقة البيضة) حتى أضضضعف لون .. غايبان علينا ... وغايخلينا ننهارو .... ونبكيو . حيت قاس البياض ديالنا ... بدون جرح ... تاحجة ماتقيسنا ولكن الى تجرحنا ابسط حاجة تضرنا ....( كتشوف معاه متبعة) .... من بعد كنوضو من جرحنا و من ليلة ديال البكا ... وكنرجعو ( دار يديها فالملون الكحل وبدا كايلطخ فالورقة ) نلطخو بالسواد داك البلاصة لي تجرحات ... ( لطخ فوق اللون الاصفر لي باين) وكيبقى داك اللون لي قاس بياضنا لتحت مخبي فينا فأعماقنا ... وتجيب تاني الدنيا وللظروف زيزوار آخر ويجرحنا .. ونتقاسو بلون اخر ونرجعو تاني نخبيوه ... حتى كانتلنو بتراكماااات كبيييرة بالوان مختلفة تحت من داك السواد .... ونهار كتجري جرحة خفيييييفة !!! كايسيلو الاواااان كاملة ... كيبقى الانسان يتسائل منين جا هادشي !!! جرحة خفيفة بينات هادشي كامل !!!!!
ليديا : ( بصوت طفلة) و .. وغاتبقى هاد الورقة غير كترجح ....
تونار،: لااا ... تقدر تجي واحد اليد ..... خفييييييفة ( هز يدو السليمة وحيد منها القفاز وحطها فالما ) نقييية ... وتمسح هاد السواد بلطف بلا ماتجرح الورقة ( بدا كيحك الصباغة وكتسيح بالما وكتنقى الورقة) كايمسحها وينظفها كاااااااملة .... وكترجع الورقة لبيااااضها الاول .. ومكتخافش من الاوان يتساكبو عليها ويوسخو بياضها .. مكتباقاش محتاجة للسولداد يحميها ... حيت اليد لي كتنظفها كاتكون معاها ....( شاف فيها وهي كترمش بعينيها )
كلنا تزادينا ملائكة ... بصفحات بيضييين ... وغير الظروف لي حكمات علينا اشمن قناع نلبسوه .... وكايبقى داك الملاك متربص لداخل ... ومكيبانش غير قدام الشخص لي نجح انه يخرجو للبرا .....ويخرجو يتجرد من قناعو ... ويبان ليه .......
ليديا كاتشوف مع داك الورقة كيفاش كتبان مكمشة وبااهتة بقوة التجارب لي دار عليها وهزاتها وراتها ليه
ليديا : واخا تصلحات .. الاثار كيبقاو عليها .. شوف كيفاش كتبان ....باااهتة !!!!
تونار جبد بيديه كارطونة دلاوراق وبعثرهم قدااااامها .... وجاب داك الورقة وحطها فالوسط ...
تونار : فين المميزة !!!!! لي مكتشبه لتاوحدة فهادو
ليديا ابتسمات بشووووية بحالا فهماتو وهزاتها وراتها ليه ....
تونار : ياك ليديا لي مكاينش بحالها فالكون اولا ؟؟؟ .
ليديا : مممم .. ليديا ... ولكن ..
هزات داك الوراق كلهم لطخاتهم بالالوان وكمشاتهم فيديها وعضات فيهم بسنانها وهو متبعها ...وسخاتهم وحطاتهم فالارض عاااد حطات داك الورقة ...
ليديا : هاكا مزيان ..... ماتكونش غير المميزة .. تكون حتى الاجمل بينهم ...
تونار ناض وقف ومد ليها يدو
تونار : نوضي ... الفطور برد ...
علات عينيها شافت فيه مدة ... وشدات فيدو ناضت وخرجو لجناح ومشا كيكب القهوة
تونار : جابو ليا لفطور .. معنديش الگانة ليه .. اجي خوديه نتي ... ( مد ليها كاس دالقهوة )
ليديا : ( شداتو عليه ) ملي ماعندكش الكانة ... علاش نزلتي طلبتيه ليهم
تونار : ماطلبتوش !!
ليديا : ممم ....شكرا على الفطور
غمزاتو ومشات كلسات على السرير جغمات منو وهي تخسر سيفتها
ليديا : ععع معجباتنيش بحال هاكا .... بغيتها خفيفة ( بغرووورها المعتاد ) هبط قولهوم يعاودو يصايبوها ليا .... ( طلات على البلاطو ) وبغيت البيض مايكونش مصلوق بزاف ... والعسل تكون ثقيلة ....
تونار علا حاجبو
تونلر،: المسرحية سالات ؟؟
ليديا : ( دارت رجل على رجل ) بغيت قهوة خفيفة ..... ودابا .....
تونار جاتو الضحكة البنت كاتسيف كتر من الزمان ....
سمع دقة فالباب وشاف عندها
لبديا : صافي صصافي فهمنا ....
ناضت دخلات لدريسينغ وهو قرب للباب كلها وللابتسامة على فمو ..
ايطو : مينو ( ولدي ) جدك لتحت ... وكايتسناك للفطور ...
تونار : انا جاي ...
شد الباب وهي خرحات وضار عندها ...
تونار : مديريش شي صداع وخليك هادية .... مغاتبقايش محبوسة بزاف غير تهناي ..
حل الباب وبقا مدة واقف كايحك فشعرو ويفكر .... ورجع ضار عندها ....
تونار: تمشي للبحر ؟؟؟؟ .....
ليديا وسعات عينيها وبلاااشعور الضحكة وساااعت ففنها والدنيا تلونات قدامها
ليديا،: شنوووو ...
تونار،: والو ...
جا ماشي وهي طيرر كتججري لعندو وقفات قدامو الفرحة غامراها ..
ليديا : ححححلف والله حتى تديييييني ؟؟؟؟؟؟
تونار : ليديا مولات القهوة الخفيفة فين مشات ...
ليديا : مشات .. تبدل حواايجها حيت غااااتمشي للبحر ....
جات داخلة كتجري ورجعات وقفات و ضارت عندو كتحك مور عنقها وهبكات شفايفها
ليديا : ماعنديش حوايج !!!!!
تونااار جاتو الضحكة عليها و رجع شد الباب ومشا وهي بقات كتتنقققززز بالفرررحة طول حياتها وهي كتسمع علييه وعمرها وصلاتو ....
يتبع...
التعليقات
لا توجد تعليقات بعد، كن أول من يعلق.