محتوى القصة
نور : ( حطات داك الوراق دالملكية على الطبلة ) جا المحامي وعطاني هاد الوراق قبيلة .... وقاليا بلي الحاج المامون الله يرحمو مسكين كتب ليا الدار وشركة والوزين فسميتي ... مهم ماما ونورة بقاو كايضغطو عليا تاوقعت بلا عقل .. ولكن ملي رجعت كنفكر .. ماعجبنيش الحال .. انا مكنستاهلش هادشي نتا لي حفيدو انا معنديش حق نورث هادشي وانا ماشي زوجة شرعية ( قربات الوراق لعندو ) الحاج الله يرحمو ايه ربانا ودار فينا خير كبير .. ولكن مجاتش ماعرفتش حسيت براسي مكنستحقش هااادشي ... حمد الله قرانا فاحسن المعاهد والمدارس وانا قادة نخدم بقرايتي و نوفر لقمة العيش ليا ولعائلتي ونشري داري بوحدي ... هادشدي كايخصك نتا ... مابقيتش بغيتو ومانقدش على هادشي كامل وهاد المسؤولية كاملة ...
تونار تنهد وهز داك الملف كايشوف فيه واضح انها وقعات بلا ماتقرا .... ورجع حطو وشاف لعندها
تونار : مقالش ليك شكون معاك فهادشي ؟
نور : ك .. كيفاش ؟
تونار : مكتوب ان عندك غير نصف الاملاك ...
ليديا غير كاتشوف ففيهم وهي رجعات هزات الوراق كتقرا وشاف فيها
نور : ماردتيش البااال .... النص ديالك ادن ؟
تونار : ( تنهد ماحاملش الوضع وشاف عند ليديا ورجع شاف فيها ) ديال ليديا ..
ليديا : شنوووو ؟؟؟؟؟
نور : اء ؟؟؟ ب .. بصح ؟؟؟، و ولكن واخا هاكاك صافي غير خود النص ديالي نتا انا مابغيت والو
ليديا : تانا مابغيت والووو !!! كون غير شاورنا انا ماخصنيييش ( رجعات لور دايرة رجل على رجل ) داكشي ديالكم نتوما انا اش دخلني
نور : صافي نكتبو ليك هادشي نتا لي اولى بيه
تونار : تاحاجة مغاتغير كولشي غايبقى كيف ماهو كيف وصا هو ... مابغيتش تاشي وصية ديالو تخالف .. وحتى شي رغبة ديالو ماتنفدش ..ولكن عندي شرط ....
ليديا : !!!
تونار : مادامها ليديا معاك فهادشي ونتوما شركاء... مابغيتش ماماك وختك يدخلو فهادشي ... والاهم يقلبو ليهم على سكنة جديدة ... املاكو كلها لي فالبنك راه دازت لعندهم وقادرين يشريو قصر ....
نور : اا .. مافهمتش ( قاطعها )
تونار : هضرتي راها واضحة ...
ليديا : تونار !! انا راه مابغيتش هادشي ( شافت عند نور ) غير ديه بصحة والراحة ... انااا لي كايهمني ها هو حداايا ... بصحتكم بداكشي لاخور، ...
يلاه غاتهضر نور وهوما يسمعو دقة فلباب دخلات ايطو واضح عليها الحزن ووجها باكي
ايطو : تونار ينو ؟؟ قاد اوليدي نهضرو شوية
ليديا بقات غير كاتشوف مال هادو هاد نهار .. وتونار ووما ليها تدخل تكلس وجلسات ..
ايطو : كيبقيتي اولدي شوية ؟ كليتي شي حاجة بعدا
تونار : ( كايشوف لعينيها ) مالكي ؟
ايطو : ( تنهدات بعمق ) اوا اولدي ... باش منطولش عليك .. المرحوم مات والله يرحمو ... انا غانمشي فحالي
تونار : وفين ؟
ايطو :ارض الله واسعة وعريضة ... نرجع لدوارنا ولا نشوف شي خدمة اخرى
تونار : علاش مالها خدمتك
نور : اويلي علاش تمشي ؟؟؟؟؟
اييطو : انا كان مخدمني المرحوم .. وملي مشا راه مابقى عندي مايدار هنا
نور : وحنااا ادادا ؟؟؟؟
ايطو : ( عنقااتها بغات تبكي ) على انا غانساكم ...غانبقى نزوركم، وراق الطاليان دارهم ليا الحاج الله يرحمو ونسول فيكم ... ولكن مابقات ليا بلاصة هنا اولاادي نمشي حسن ليا انا عيشة الدل مامولفاهاش ...
ليديا : ( مصغرة عينيها ) جرات عليييك !!!! ( نور شافت فيها )
ايطو : لا لا لا مجرا عليا حد .... غانمشي راسي
تونار : شنو قالت ليك ؟؟؟؟؟
نور : واش ماما ؟؟؟؟
ايطو : ياودي قلنا ليكم ماقاليا حد والو بغيت نمشي وصااافي الله يجعل الباركة ...
تونار : ( بقى كايشوف مدة وشاف عند نور ) نزلي عيطي لماماك ...
ناضت نور وايطو تدخلات
ايطو : اولديي يهديييك الله والله ماجراااات عليا .. غا انا مابقيتش مرتاحة ...
تونار مكايجوبهاش .. تاطلعات حكيمة ونورة وليديا عاد حلات ليها الكلسة ... وكلسات حكيمة منفخة
حكيمة : خلينا العزّايا لتحت وطلعنا لهنا ... ( كاتشوف معاهم ) ياك لاباس
تونار : ( كايشوف فيها ) احترمتي حتى موالين الدار بقى غير العزايا ؟؟؟؟
حكمية : محتاااارمة موالين الدار وراسي ... والحمد الله كون ماشافني المرحوم محتارمة كاع مايكتب لينا كولشي ( بقليان السم)
ايطو غير حالة فمها فيها كيف ولات تهضر معاه بعد مكانت مكتقدرش تحط عليه العين وليديا جاتها الضحكة
تونار : ممم ... مزيان الله يسخر ....
ايطو : الحاصول انا نوض نمشي .... تبقاو على خير مزال ندوز اولدي نسلم عليك فاش تكون ماشي
تونار : ( شدها ) كلسي ....( شاف عند حكيمة ) اش قلتي ليها نت !!
حكيمة : لهلا ينززززل علينا شي بااااطل ( شافت عند ايطو ) اش قللللت ليك ؟؟؟ قلت ليك غالحق .. الواحد يدخل سووق راسو ( كاتشوف فيهم ) كلها يبغي يرتاح فدااارو ... وكلها يعرررف مقاااامو ...
ايطو : الله يجازيك بالخير الحاااااجة ...كلها يعرف مقاامو ... وانا مقامي عارفاه الحمد الله ورااااضية بيه ...
تونار : ( قرب عندها لطلبة وهضر بحدة ) وسمعي اش غايجيك ملييييح .... غاتهزي قلوعك غاتخرجي عليا من هاد الدار .... وملي ترجعي لإيطاليا مانشوفش رجليك محطوووطين فداك فالدار تاهي .. بلاصة لي تجمعك بمراتي نريبها .... ( بين سنانو وعينيه نار فيها ) عنداك يحسابتك راني نسييييت ولا دوزت ليك خوك لي كنتي باغا دخليه عند مرتي ؟؟؟؟ ولا كاع داكشي لي درتييه من نهار جات .... لاسكت راني سكت على ود جدي لي كان مريض دابا اشريييفة غاتجمعي قلوووعك وكمااارتك مانشوووفهاش ...
حكيمة : ( وقفات ودارت يديها عللى خصرها ) شناااهواااا ؟؟؟؟؟؟؟ مزياااان تبااركالله .... اسمعني اولد الحاج داك تفرعين ديااالك غير سييير دفنو مع جدك حسن ليك ... داااار بنتي ونعيش فيها كيف بغبييييت ... نتا ومررررتك لي مانشوفكومش فيها
ليديا طلقات قهقتها لي ملات المكاان وكولشي شاف لعندها
ليديا : ههه سوووري .. سووري ههه ( كاتومي بيديها غاسكت ) متحكمتش فراسي هههه . كملي كملي قلتي نتا ومرتك مانشوفكمش فيها ههههه .. ايييه زيدي .....
نورة : ( مخنزرة فيها ) مقالتش ماما شي حاجة كضحك كنضن !!!!!
نور : ( بعدم رضى ) ماما .. ليديا راه عندها النص فداكشي لي عندي .. انا وياها النص بالنص ...
نورة شهقاات وحكيمة طرطقات عينيها فليديا لي كالسة كتشوف فيها بنظرات كلهم سم و شفاية.. فلول مكانتش باغا ولكن دابا ملي شافت الامر هاكا عجبها الحال ...
حكيمة : اش كاااتخربقي نتي ؟؟؟؟؟؟؟ وهاظي شدخلها
ليديا : اييييه الالة حكيييمة ... كيف كتسمعي ... بغيتي تبقاي معنديش مشكل لاكن بصفتك آش ممم !!!! ماعندك والو تما ... الدار بسمية بنتك .ولي بقا ضرررتي مولاتو و بنتك مزوجة براجلي .. يعني نص الدار بسمية نور وراجلي ونص لاخور بسميتي انا ورااااجلي تاني .. يعني داااارو ، وهو مابغاش يشووووفك فيها ! تكلسي مدلوولة !! ولا لابغيتي مرحبا بشرط ... ( شافت فايطو) ؟ كللللها يعععرف مقااااامو .... تخدمي تانتي وتكوني كالسة بصفتك دايرة شي حاجة فداك لدار ... كتعرفي طيبي ؟؟؟
حكيمة ركابيها خواو طاحت على فوطوي كتشوف
نور : ماما مغاتخدمش فالدار ... حنا مابغينا والو هادشي غنكتبو فسمية تونار والله يعاون ..
نورة : مااامتيقاش هادشي لي كنسمع ( شادة على فمها جاتها البكية)
تونار : ( لنور ) تاحاجة مغتبدل ومغنعاودش هضرتي .. لي كتبو ليك مكاين لي يحيدو ليك ... ونت ( شاف فيها ) راه خلا ليك حساباتو لي فالبنك تصرفي كيف بغيتي وقلبي فين تعيشي مغانخليكش فزنقة بلا متخافي .. ( شاف عند ايطو ) ونت خلا ليك دار دللفيرمة فين كنتي كالسة.. غاتعيشي معززة مكرمة بحالا باقي عايش مابغيت تتبدل حتى شي حاجة وغاتبقاي قريييبة لدار مكاينش لي غايطيب حسن منك ...
ايطو : ( شدات على قلبها وضحكات ) الله على الحااااج مسكييين الله( قربات عندو عنقتتو ) الله يحححفظك اولدي الله يحححفظك وينجيييك ، ( علات يديها لسما ) سيييير يالحاااج الله يرررررحمك ويوسع قبرك ياارب
حكيمة : انا مغاااانخرجش من ررزق بنتي
ليديا : ( طانزة دايرة رجل على رجل مستمتعة ) بقااااي .. نيت محتاجين شي وحدة تحاجي لينا وتضحكنا مرة مرة .....
نور : ماما صاااافي ...
نورة : لا لاااا انا مستحييييييل نبقى فدار وحدة مع هادي مستحييييل ....
خرجات تجري وحكيمة وقفات
حكية: اوا الله يااااااااخد الحق .. الله يااااخد الحق
خلاتهم ومشات
ليديا،: امييييييين ....
ابطو : ( مسحات دموعها ) فكرررر فيا مسكين
تونار : كلها عندو حقو .. ونت مدوزتيش قليل معانا ، مكاينش لي غايحيدك من بلاصتك ..... نوضي جمعي حوايجك ... غانمشيو غدا فصباح بكري....
ايطو : هي لولا اوليييدي ...
تونار: ( شاف فنور ) حتى نت غاتمشي معانا ..
نور : ( بقات غير كاترمش ) و واخا ..
ناضت هي وايطو خرجو وهو دار عند ليديا بانت ليه كاتشوف فيه مبتسمة وسولها بعينيه مالك
ليديا: والو .. غي توحشتك ..
تونار مد يدو نوضها وجبدها لعندو تاكلسات على رجليه .... وعنقها لعندو تنهد معمق ونطق بانكسار ...
تونار : بقيتي ليا غير نتي .....
***
عالمي وانت ....
للعالم أبواب ... ونت وحدك المفتاح ....
تحررت من قضبان الزنزانة ... عانقت كل الأدواح ...
تحررت روحي ... وتمشّت بين كل الأرواح ...
رغما عن كل المحاجز ، هربت خلسة كالأشباح ...
كانت أبواق السماء تناديني كل صباح ...
تنتظر لحظة حريتي، لحظة إطلاق السراح ...
وها أنا ذا تحررت ... ها هي تهب في وجهي الرياح ...
لكن رغما عن كل الملذّات قلبي معك فقط مرتاح ...
في عينيك عالم خاص و أنا به أسيرة مؤقتة السراح ...
رغبتي في العيش بعينيك سأكتبها على كل الألواح ..
اخبر بها والمارة و المشاة ، أصرخ بصوت صدّاح ...
اريد العالم لكن اريدك اكثر ...
اريدك فوق كل المعتقد و المعتبر ...
اريدك عالمي وكفى ...
كفى زحزحتي لن اتخلى، انا بعينيك اقف بثبات ...
اخبرك بكل اللغات ....
في عينيك اريد الحياة ....
وفيهما اريد الممات .....
و داخلهما بنيت عالمي بالآجور والأسمت ...
بنيت زنزانة وقضباناً و سكنت ....
اريدك انت ... اريد العالم .... عالمي وانت
الباب السادس من رواية توناروز عالمي وأنت
واقف بشموخو المعتاد وبنفس ديك الشخصية لي كتلفت انتباه كل من مر حولها ، مقاد مع التيليسكوب وقدامو واقفة أغلى نجمة عندو..
مبتاسمة كيف عادتها شهر دابا وهي وتونار واحد كيكمل لاخر وواحد كيلم الثاني
دابا نقدروا نقولو أنهم الوحيدين دبعضهم
تونار شاف فيها بنظراتو لي باقا كتخليها تلف وتخلا على اللاقيسة ديالها: شوفي لهيه ، ديك نجمة شحال لامعة ، وبارزة فالسما، بزاف دناس ختارعو خرافات انه النجمة الامعة كتحقق الأماني..
ليديا بضحكة: تا انا كان عندي هاد المعتقد ، كنت كنشوف فالسما ومنين كتبان ليا كنشوف بتحظي ونقول لها واخا متحققيش حلمي لي هو اني نخرج من ابواب المستعمرة ، انا قادرة نحققوا ...
تونار شاف فيها الشوفة دمن نيتك
رجع تونار عينيه كيبحث بيهم فالسما ويتأمل ، من ديما كان كيرتاح وهو كيحلل السماء و الكواكب ولكن هاد المرة غير ، حيت معاه الراحة شخصيا ..
رجع بنظروا لليديا لي مركزة معاه وقال: شوفي مزياان غتبان ليك نجمة فحال الى طاحت ، هاديك الملائكة كيرجموا بيهم الشياطين.
ليديا هزات حواجبها وشدات فيديه ، شافت فيه بنظرات كدل فقط على انها متيمة لا أقل ولا أكثر وقالت بصوت رقيق خلاه يغمض عينيه: نتا فحال ديك النجمات بجوج ، فلول شفتك وطلبت أنك تكون ديالي، وعينيك ميكونوش لغيري وبعنادك حققتي أمنيتي ، ومن بعد كنتي نتا نجمة الامعة فحياتي ، و الوحيدة لي قادرة ترجم غروري وكبريائي..
تونار هز حواجبو من فوق الماسك وبتاسم بجنب: و أخيرا عتارفتي بلي مغرورة..
ليديا طلقات من يديه وميلات عنقها بحركة طفولية: ومالك لاتغريت راه يجي معايا او لا..
تونار بضحكة ديال الله يستر: لا من حقك..
عوجات ليديا فمها ومشات وهو ضحك ورجع شاف فتيليسكوب..
بصح هو ماشي من النوع لي كضحكو اي حاجة ، ومكتفرحوش اي حاجة ولكن ليديا منين دق قلبو ليها وهو كيحس براسو فرحان بلى سبب أما الضحكة رجعات كتخرج ليه تلقائيا وهو بجنبها
*المقطع من كتابة دينك أختاه*
بعد شهر .....
على شرفة برج " moonlight " العالية بين الغيوم ....
الظلام خيم على السماء لي كايخليها تزيد تزيان والنجوم تتلألأ بحال حبات الياقوت على سجاد اسود ... منظر مغري لجميع الفلكين و المهووسين بقراءة السماء وحركة النجوم ....
كانت ليديا كاتشوف من التيليسكوب و تونار موراها كايعاونها فتقريب العدسات ... كانت كاتشوف بكل حماس و الفرحة غامراها ... شعرها كايتطاير مع الرياح القاسية ديال المرتفع ، وتونار اعتزل النظر لسماء و اكتفى بشعرها ... لي كان واخد من السماء سوادها وطولها و غموضها وريحتها ... انسيابو الحريري وحركاتو مع الرياح كايخليه يشوف الكون بين خصلاتها ...
اما ليديا مرة تشوف فالتيلبسكوب ومرة تعلي راسها تشوف بعينيها المجردة ...ثم نطقات
ليديا : واخا عينينا مفتوحين مكانشوفو من الشيء غير صفر فاصلة صفر صفر صفر واحد فالمية ....
تونار زاد للشرفة وشد بيديه فوق الحديدة كايتأمل ركن السماء ...
تونار : اكيد .... منهنا تعرفي ان ماشي كاع لي كاتشوفو عينينا صحيح ....
زادت ليديا قدامو وتكات على الشرفة بظهرها كاتشوف فيه ...
ليديا : قداش كاتعرف فالفلك !! ...
تونار : قد مكانعرفك ....
ليديا : هه !! زعما كاتعرفني كاملة !!!
تونار : وشكون قاليك انه الفلك عندو نهاية باش نعرفو انا كامل !!
ليديا : بروفيسور ... ومكتعرفوش كامل !!!
تونار : ( ضار عندها ) جميع الدراسات و جميع الابحاث وجميع النتائج وجميع ماكنعرف انا ... كلها غير ( عاود جملتها ) صفر فاصلة صفر صفر صفر واحد فالمية
ليديا : درستيه عاد حبيتيه !!!
تونار : شكون مكتشف نظرية الشمس مركز الكون !!
ليديا : نيكولاس كوبرينوكس
تونار : شحال من كوكب فالكون !!
ليديا : تقريبا كوكب لكل نجم خارج النظام الشمسي ... ولكن فبعد المرات كلقاو نجوم عندها كثر من كوكب ، بحال الشمس مثلا .. آخر الدراسات كاتقول انه كاين ما يقارب ربعالاف ووو .. و ( قاطعها )
تونار : ربعالاف و مية و ستة وعشرين ... وشحال من كوكب فالمجموعة ااشمسية
ليديا : تمنية ....
تونار : ( تبسم بجنب شفايفو )هه !! هانتي درستي الفلك .... كتبغيه؟؟
ليديا : لا ...
تونار : ادن ...
ليديا : ادن ماشي الدراسة وماشي البحث لي كايخليونا نحبو شي حاجة
تونار : شنو لي كايخلينا
ليديا : الشغف آبروفيييسور ...
تونار : ( ضربها لنيفها بصبعو ) تماما .... ( رجع كايشوف قدامو )
ليديا : كيفاش لقيتي راسك فعلم الفلك !!!
تونار : هو اول حاجة طرات فحياتي بلا منحس ...لقيت راسي مهووس بيها
ليديا : والثانية شنو !!
تونار : ( شاف عندها ) نتِ
ليديا بقات كاترمش فيه بحب كبير وقربات حطات يديها على وجهو ....
ليديا : درست كولشي ... وكنعرف كولشي ..ووصلت لكولشي ... بقى ليا غير وجهك .. بوحدو لي عجزت نشوفو .... واخا سااهل ، ساهل بزااف ( كدوز يديها على الماسك تاقربات لداك اللصقة ديالو ) حركة بسيطة مني غانحلو ... ( جمعات يديها وبعداتهم ) ولكن مكنقدرش .... عمرني خضعت لشي أمر ، او تزاد فالدنيا لي يخليني مانديرش شي حاجة باغاها ... علاش ماقدرتش نحيد ليك الماسك ونتا ناعس ... علاش كنتسناك حتى تبغي نتاا ، امتى وليت كنفكر لرغبات شي حد آخر ... لا لا ، السؤال هو امتى نتا مابقيتيش فحياتي مجرد شي حد ... امتى وليتي كتعني ليا قد هاكا ! امتى تحولتي من تحدي ورهان صبياني ... لرغبة و حب كنعيشو لاول مرة فحياتي ....
تونار : ( كايشوف فيها وباس كف يديها ) غادي تشوفيه
ليديا : من ديما كنطلب على موعد و مكتعطيهش ليا ...
تونار : نهار نقتنع انك مغاتخلعيش منو ....
ليديا تنهدات ورجعات كاتشوف قدامها لسما
ليديا : مزال مابغيتي تقبل بالعملية مم !!!!! ....
تونار : ( حك فراسو حتى ترون شعرو فوق الماسك ) هاد الموضوع مغاتمليش منو
ليديا : لا ( ضارت عندو ) وغير تعود تسمعو يوميا ... حتى تقتنع
تونار : و تعودي تسمعي نفس الجواب ...
خلاها ومشا داخل كايهضر
تونار : كاافي !!!
ليديا : ( تبسمات واجابت ) بلا سكااار ...
تونار : (ولا حافضها ) .... بالعسل ...
دخل يوجدها وهي بقات تما حتى بردات ودخلات لدار لاحت عليها الشال لي كان على كتافها لان الدار كليماتيزي ... وتبعاتو لكوزينة المفتوحة لي كلها فضييية كأنها فشي مركبة فضائية ... وكلسات حداه على احد الكراسي الطويييلة كايضور بيها
ليديا : امتى نرجعو ... ملي جينا من المغرب وحنا هنا ... وماعطيتني حتى جواب واش غانستقرو هنا ولا فايطاليا ولا فين
تونار : ( مد ليها فنجالها ) ماعمرني فكرت فالاستقرار ( شاف فيها ) ولكن باليا خصني نفكر فيه
ليديا : فين ما كاترتاح نعيشو
تونار :فين رتاحيتي نت ؟
ليديا : ( غمزة مشاكسة ) فعينيييك ...
تونار تبسم وضرب بفنجالو مع فنجالها على شكل النخب ... وهي كاتشوف فيه ، ماعرفاتش فوقاش غايولي حتى هو يبادلها الغزل ويقول كلام زوين ، فوقاش حتى هو يقدر يناديها بحبيبة و دوك الكلمات الرومانسية .. فوقاش يتعلم يعبر على شنو فقلبو تاهو ويهضر بلغة الاحاسيس . ديما غير عينيه لي كايهضرو وحتى الى قال شي حاجة كاتكون بسييطة زلكن مختزلة كولشي ...كاتسول راسها واش غايجي شي نهار يتعلم بتكلم بلغة للاحساسيس او خصها تتعود على طبعو وتفكيرو لي بحال الآلة .... هي لي ختارت العيش مع مخترع فلكي لا يؤمن الا بالحسابات والابحاث .... فلازم عليها التعايش ....
شربات من كاسها وخصرات ملامحها
ليديا : باقي مسوس ....
تونار : ( هز المعلقة لي دار بها العسل ) درت جوج .. نزيدك !!! ...
ليديا : اشمن عسل درتي ؟؟!
تونار : ( هزو ) هذا ..
شافتو وقلبات عينيها وناضت بعندو تاوقفات حداه وهزات داك المعلقة ومداتها لفمو وهو كايشوف معاها وضحك ضحكة خفيفة آسرة ... ومصها ليها وهي ديرها فالفنجال و خلطات بها وشربات ..وهو كايشوف معاها
ليديا : ( غمضات عينيها ) مممممم شحال حلووووة ...
تونار تبسم جانبيا وحط فنجالو وهزها لعندو حطها على الكونطوار و تلاح على شفايفها بقبل جاااامحة ....
هزها من فوق الكونطوار لبيت النعاس لي ملي جاو من المغرب ماخرجوش من هاد البلاصة ...
رغم ان ليديا كتكره السجون الا ان هاد البلاصة ملي فيها عينيه ماملاتش منها ولو يخيرها تعيش هنا مدى الحياة تقبل ... يلاه كايخرج فصباح بككري يتقضى و يرجع ... اما هي مغادراتش المكان ... تونار بغا يبقى بعيييد على اي حاجة تدكرو بجدو حتى يبرا جرحو .. كان غادي يبقى بوحدو لو مكانتش ليديا فحياتو ، كان الامر غاياخد منو شهوورر وسنين باش يخرج من ازمة موت جدو ، ولكن ملي هي فحياة قدر يتخطلها فاسابيع قلال ... رغم ان باقي الشحوب والذبول ظاهر على وجهو ... الا ان اهتمام ليديا بيه والحب لي كايقراه فعينيها كايخليه ينسى كولشي ...لان مشكلة تونار ماشي هي ماتو عائلتو ... مشكلتو هو كان من طفولتو عندو خوف انه يعيش بدون حب شي شخص ملي يمشي جدو ... مع ليديا قدر يلقى حب عائلة على قدها .. هوسها وحبها الغريب ليه كايخليه يطمئن .. رغم قساوة غشائو الخارجي ... رغم صلابتو وثباتو .. الان تونار من اكثر الاشخاص لي كايخافو يبقاو بوحدهم بدون شي شخص ... مشاعر الطفل الصغير المتوحد بقى مسيطرة عليه ... كايهربو من الجميع ، كايخافو يديرو علاقات ، مكيثيقوش بسهولة ، منطوين على ذاتهم ، فنفس كايتسناو شخص مناسب يقتحم حياتهم يبغيوه بكل وفاء وصدق واخلاص ... مكايعرفوش الخيانة ولا الغدر ...رغم انهم مكايعرفوش لرومانسية ولا للغزل ... الا ان حبهم قوي ووطيد .....
اما ليديا فهي كتحب بتملك ... بهوس .. بهيمنة .. ممكن تموت فسبيلو .. حبات نفسها بكل غرور و كتبغي اي حاجة متعلقة براسها ... عينيها شعرها نيفها فمها .. يديها رجليها عنقها كبدتها قلبها ، وحتى لي كااااين فقلبها ولي بغاه قلبها .... كتحبو بهوس انه شب حاجة ملكها .. شي حاجة كتنتمي ليها ... كأنه قطعة منها .. هي ، الأنا الغااالية والثمينة بنسبه ليها ...
من بعد الوصول للنشوة الجنسية على السرير وسط العلاقة لي كاتجمع بين هاد القطبين ...نعسات على صدرو وهي باقة معصوبة العينين على عادتها وهو كايمشط على خصلات شعرها وصدرو المشوه عاااري على السرير ...
تونار : غانرجعو غدا الايطاليا
ليديا : ( بهدوء وباقا النشوة فصوتها ) مممم اوكاي ....
تونار : مغاتعكسيش !!!
ليديا : علاش !!!! ياك غاتكون معايا تما
تونار :وعلى انا نقد نبعد عليك
ليديا : وفين المشكلة ... مدام غانكون معاك فينما بغيتي نمشيو نمشيو ... غانمشيو لدار لي كنا فيها ؟
تونار : ( باس على راسها وقال بطنز إن) اشنو .. مسموح نسكن مع ماي وايف فدارها !! ....ترحب بيا ولا لا ( هبط راسو لشفايفها ) مممم !!!
ليديا : ( حسات بشفايفو حداها وقربات ليهم كتر حتى تلامسو ) مممم عندي شروووطي ...
تونار : هه !!! كنت غانستغرب كون ماگلتيهاش
ليديا : غاتخلصني ... ( مع بوسات خفاف ) بريحتك.... ووجودك معايا ...
تونار : ( هزها وحطها فوق منو وباشرها فالتقبيل حتى داز لاذنها) نت بالضبط ... محكوم عليك تبقاي معايا ديما
ليديا : ( عنقاتو بيديها ) عاجبني حكامي ....
دخلو فقبلة طويييلة انتهت بنشوة أخرى .. عاد تطلق سراحهاا و دخل لدوش .. كالعادة خرج لقاها ناعسة ..
حيد العصابة من عينيها و غطاها ونعس خاشيها فحظنو ... تاصبح الصباح ....
دارو فطور فجو مرح وهادئ وهي تشغلات برواية وهو دخل لمختبرو ، هاكا كانت كتقضي الوقت فهاد اابرج ، مابينو هو ومابين عالم الروايات و بليل تخرج تشوف النجوم ، كانت فعلا فحياة اشبه بالخيال ...
تونار سلا خدمتو وحل لبيسي يدير نظرة اخيرة هو يبان ليه النظام كايتخترق من جديد ... وواضح هاد الاختراق الهدف منو هو لوكاليزاسيون " الموقع " ديالو هو ... الميزة لي فالانظمة تشغيل الحواسيب ديالو هي اشعارو بكل الاختراقات رغم سرية الاجهزة لي كايخترقو منها ، الى ان انظمة التشغيل ديالو متطورة بزاف ... كيف العادة بدا يحول المعلومات لحاسوب اخر وخلا ليهم غير البرد فداك النظام ... ولا كايتعامل مع هادشي ببرود لانه ولف هاد الاختراقات و عارف راسو ماعند حتى شي واحد مايدير ليه .. لانه من ناحية براءة اختراعاتو هو المخططات كاملة والتصاميم لي كايوجد والدراسات مكيحطهاش فالنظام مرتبة كايحطها مبعثرة ومكيحطهاش كاملة باش حتى الى تخترق شي نظام مايقدر تاواحد يسرق ليه شي حاجة لانه مغايفهم والو ... وديما الشيفرات المهمين كايحتفظ بهم فدماغو ... ورجع برونشا واحد كابل ريزو باش يقدر يعرف الجهاز لي كايقرصنو .. ومعلوماتو والمكان .. حتى ولا هو لي غايقرصن المقرصن ..
الامر غاياخد وقت طويل داكشي باش سد البيسي وهزو معاه حتى لليل عاد يلقاه واجد غالبا ...
خرج من المختبر باتجاه البالكون ....الحال كان صبح عندو بصح لتحت باقي شوية ديال الظلام .. وضار براسو لصالون يشوفها اش كادير .. غير بانتليه كاتقرا ربع يديه وبقى كايشوف فيها ، فوق ماهزات شي كتاب بهاد الطريقة كايولي مظهرها كايفتن .. طريقة باش كاتقلب الصفحات .. تركيزها ، ملامحها لي كايتبدلو مع القراءة .. مرة تتبسم مرة تحزن مرة تعلي حاجبها .. المنظر كايخله يبقى يتفرج فيها بلا ملل ...حتى سلات القراية وسدات الكتاب كضور بعينيها تقلب عليه فين هو ، عاد رجعات للعالمها كانت مرفوعة مع روايتها ، تابان ليها قدامها فالبالكون مربع يديه كايتفرج فيها وتبسمات بجنب شفايفها .. وهو قرب لعندها
تونار : فين ممكن نلقى اجمل منك مم !
حطات الكتاب ووقفات عندو شادة فسلسة السيغفيت لي لابس
ليديا : ديما تانگوليك مكاينش اجمل مني ، عرش الجمال بوحدي لي مربعة عليه
تونار : ( قبلة خفيفة ) جمعتي حوايجك
ليديا : مم قبيلة ...
تونار : مشييناا !!!!
ليديا فقط تبسمات بمعنى اه وهو مشا يهز الحوايج وهي متبعاه بعينيها عاضة على شفايفها شخصيتو و نبرة صوتو الخشنة و ريحتو والكاريزما والثقااالة كاتخليها تذوووب ....
هز لي فاليز ديالها واتجهو لباب الاسانسير لي غاينزلهم للاسفل فين كاين الكوبطير .. ركبو ووضعو لي كاسك ديالو و حزام الامان .... و انطلقو وهي عمرها شافت للتحت كيفاش كايبان البرج ... وبقات كاتحاول تشووف ولكن مكان كايبان والو لتحت ولا فجنابها رغم اابنايى الضخمة !! وشافت عندو باستغراب
ليديا : هاء ؟؟؟ فين البرج !!!
تونار : ( تبسم ) قلبي عليه
ليديا : ( كاتشووف عيات تقلب والو ) مكاينش ؟؟؟؟
تونار : ( عوج معاها راسو ) ياك لبارح فهمنا واحد الدرس سميتو ماشي كاع لي كاتشوفو عينينا صحيح ...
ليديا : ااه ... ولكن كنا فيه!!! كيفاش داك العجب كامل غايختفي !!! متقوليش كايهبط تحت الارض حيت هادشي مستحيل يتيقو المنطق ديااالي ....
تونار : وفنظرك !!
ليديا : معععرفتش ؟؟ تختفي شي حاجة بهاد السرعة الخيال هذاااا !! كون كان غير شي حاجة صغيرة غانقول هادي خدعة ايوز ايوز !! .. ولكن البرج علاش داوين راه شي حاجة كبيييييرة بزااف!!!!!! شي أباغاي كاتخفيه؟؟
تونار : ( غير كايضور راسو مبتسم على افكارها) هذا هو اقصى تفكيرك ...
ليديا : واااكيفاش بغيتيتي نفكر .. البرج قد السخط يلاه كنت فيه غير دابا ملي خرجت منو مابقاش كايبان ليا !!!! علاش مكايبانش من برا ؟؟؟؟؟ لاماجييك !!
تونار : هه !!! .. يطيح تحت الارض مااستوعبهاش منطقك ... و لاماجيك استوعبها ..
ليديا : وااقوليا عفاك
تونار : راه تما غير نت مكاتشوفيش مزياااان ...
ليديا : منيييتك !!!! لا واش باغي تسطييني ؟؟ لا يمكن باااغي تسطيني لاااا
تونار : سي ....
ليديا : دابا مغاتقولش ليا...
تونار : أووباااااا ... جا وقت نعيشك الربع من داكشي لي عيشتيني ( شافت عندها كايقلدها وكيومي بيدو حركة ل بلا بلا bla bla ) لا مغانجاوبكش .. حتى نبغي انا نجاوبك .. حتى ماتبغيش نت نجاوبك عاد انا نجاوبك .. مغانجاوبك حتى تموت ... رغبيييني ...
ليديا : توووونااار ...
تونار : ( ضربها براسو لي فيه الكاسك للكاسك ديالها ) جرربي شوووية ...
ليديا : واااگوووووليا بغيت نعرررف ...
تونار : شنو المقااابل
ليديا : فففف على استفزاز ... شنو بغيتي غير طلقني
تونار : ( نصل ليها بيد وحدة وعينيه على طريق قدامو الشال لي مربوط فعنقها عطاه ليها و وما ليها بعينو تجي تكلس على رجليه )
ليديا : ( طرطقات عينيها) حمااااقيتي لا ...
تونار : كانشوف قداامي غير اجججي ....
ليديا : مستحيييل .. واش باغينا نموووتو !!
تونار : نت لي غاااتصوكي هاد المرة ماشي انا ...
ليديا : مستحيييل هي مستحيل ( رجعات كاتربط داك الشال فعنقها )
تونار : مم .. مغاتعرفييش ادن كيفاش moonlight مكايبانش ليك
ليديا : ماااابغيتش .. اش غانستفد الى عرفت هاد moonlight علاش مكايبانش ليا الى كنت حتى غانولي فخبر كاان !!! لا لا مزال باغا نعيش
تونار : وليتي تخااافي من الموت !!! لعجب
ليديا : ملي زيانت حياتي آه ...
قالتها وضارت لزاج غضبانة وهو كايشوف مرة فيها مرة فطريق قدامو مبتسم ... وهي الفضووول كياااكل فيها و كطرطق فصبعانها وتلعب برجليها خصها تعررف .. كاع الافكار جاو لبالها شنو لي كايخلي البرج مكايبانش من برا .... عدوها فالحياة هي يجيها الفضول تجاه شي حاجة وماتعرفهاش عياااات بالصبر فلخر زفراات باستسلام ونترات داك الشال من عنقها وهو تبسم ابتسامة عريييضة وبدا يفسخ فالسمطة ....
عصبات عينيها بداك الشال وعلات كسوتها ... وهو مد يدو معاونها حتى كلسات عليه . وضورها لجنب حاطة راسها على كتفو باش يشوف لطريق وعاض على شفتو حتى شهقاااات مزيرة عليه بدييها
تونار : هه شششش ......
*فالدار
دخلات نور لدار من نهار طويل كانت كتقلب فيه على خدمة ... وهي تبان ليها ماماها مع الخدمات كتآمرهم اش يوجدو وكولشي كايتجارى وطلعات حاجبها باستغراب ودخلات
نور : اش واقع !!!
حكيمة : عندي عراااضة دصحاباتي و لبنات عماتي لي هنا ....وصحابات ختك ..
نور : وباشمن مناسبة ؟؟؟؟
حكيمة : بمناااسبة الحرية ... ملي كان تونار والمرحوم كان قاطع فينا الحس مكنقدو نعارضو على حبابنا ولا نشطو.. شحال هوما يمعنيو عليا ونا دايرة راسي مكنفهمش.... اوا ودابااا ( علات كمام عبايتها ) عاااد نرتاح ونفوح كيف بغيت كانو قتلوني بالفوحان ... داري ڤيلتي طموبيييلتي... واايجييو دابا يشوفو الفيييلا ديااالي لي وارثاها بنتي على المرحوم لي كتبهاليها حيت دارت الخير فحفيدو وتزوجاتو ستراااتو ...
نور : ماما منيييتك ؟؟؟؟؟؟؟ ( نفضات صاكها ) واش بااغين تحمقووني مزال مابغيتو تساليو عليا هادشي ؟؟؟ وشكون قاليك تونار مابقاش ؟؟؟ راه بااااقي ... و حتى مرااتو راها معايا هنا ..... ويقدو يجيو فاي لحظة ونت سمعتييييه اش قاااال .. واش كاتقلبي على المشاااكيل ؟؟؟؟ خلينا هانين اماما عافاك ... انا نقنعو تبقاي معايا هنا ولكن ماديريش بحاالل هاكااا ...وتنوضي صداع بزز
حكيمة : لهلااا يحيييه گالاك تقنعيه نكلس ... غانبقى بززوط على والديه ررزق بببنتي بصحتي وراحتي كيفما هو كالس مع مرتو انا كالسة مع بنتي ....ونت يالحماارة كون كنت تسمعي لماماك كون مشيتي كتبتيي ليا حقك ... نحرر فيهم العيشة
نور،: انا براسي ماباغاش وماقبلاهش هاد الحق بقى غير نكتبو ليك ؟؟؟ ماما هدا حق طفيدو وحنا ماشي حقنا ... ماخدمنا فيه ماعرقنا فيه ... وبالعربية تاعربات انا باغا نبببعد منهنا وماحملاش نبقى فهاد العائلة دزززفت .. باغا ننسااااه ونتقبل راه تزوج ...
حكيمة : تي سيري سيري يالكامبويا سيري تقولي ماولدتك من كرررشي ... ( شافت عند الخدامة ) ااجي نت.. ستفتو الحلوة ؟؟؟ راه قربو ناس يجيو
نور : ماماااا والله تااكتحبدي على راسك غير المشاكيل ونا عيييييت من مشاكيلكم .. انا لي غاانخيو ليكم هاد الدار ونمشي ....
هزات صاكها بالزعفة وطلعات و حكيمة بحالا ماسمعاتهاش مشغوولة كتوجد .. اما نورة فصاالون فرحانة يستغلو بعدا هاد الوقت لي مكاينينش هوما ويفوحو كيف بغاو ...
بقات ليديا كاتنهج على كتافو وهو مبسم ... وقالت فودنو كتنهج خرجها منها ....
ليديا : وهانا ... هانا درت اش بغيتي .. قول ليا
تونار :هه ... نوضي شربي غي لما غاتسخفي عليا ( مبسم وضاحك غير فلداخل ديالو عليها )
ناضت ليديا عليه وهو قاد حوايجو ... وهي حيدات العصابة و تقادات فبلاصتها رجليها باقين كايحرقوها وخدات قرعة دلما وقادات راسها نيطواياات الحالة وردات حزام الأمان و كتسنى الجواب لي خلصاتو بتماارة ....
ليديا : غير حسب ليها حسب ... مزال نردهاليك فساعة الخير ( رجعات كتشرب ) شحفتييني ...
تونار : شفتي الفضول اش كايدير
ليديا : يلاه كوليا علاش مكايباانش ... شي سيستييم !!
تونار : مراية ...
ليديا : نعااام !!!!
تونار : الواجهة ديالو مرااية ...
ليديا بقات كترمش بعينيها على هاد الشمتة لي مابغاتش تسرط ليها ... كتستوعب واش الجواب كان بهاد السهولة وهي خلصاتو غاالي ... وتونار كايشوف عندها وعند طريق جاتو الضحكة عليها و مابيناش على وجهو
تونار : مااعليش ماعليش ... تاتوقع ...
ليديا : ( كتستوعب وشافت عندو ) و ... وعلاش هااادشي كامل زعما !!! علاش تركّب فبنادم الفضول ؟؟؟ تخليه يشك فحوايجو
تونار : ماباغي يرصدني تاحد فين كاين
ليديا : ولكن راه لي داز حداه غايبان ليه !!!
تونار : الغابة لتحت متايدخل ليها حد.
ليديا بقات غير كترمش فللخر كلسات مربعة يديها تسرط الشمتة .... حتى وصلو لإيطاليا ...
تونار و ليديا نزلو بالكوبطير فواحد الساحة كانو تما جوج اخرين ... عرفاتهم ديالو غير من شكلهم الموحد ... وركبو فطموبيل يتجهو لدار و مناقشين ...
ليديا : انا راه مكنعرف فهادشي تاحاجة ... ملول قلتليك تحكّم نتا ...
تونار : غاتعلمي ... منها فرصة مغاتبقايش محبوسة فدار
ليديا : ايه بغيت نخرج ... ولكن كمسؤولية منقدرش
تونار : وامتى نت غتعلمي تحملي المسؤوليات !!!
ليديا : باشمن صفة ؟؟؟.. نتا لي حفيدو خصك تحكم فخدمتو انا مكنعرف فهادشي دالبزنس والتجارة تاحاجة
تونار : غانكون معاك حتى تعلمي .. حتى انا مكنفهمش بزاف فهاد الضومين ... ولكن لازم الخدمة ديالو تستمر .... منقدرش نضيع ليه شركة تعب عليها حتى كبرها ...
ليديا : ونور ؟؟
تونار : حتى هي معاك .. تعلمو .. وكملو على داكشي
لبديا : نوووو ...بغيتي تتحكم نتاا سير ... انا مكنعرفش وماتلوحش عليا مسؤوليات ماشي قدي ...
تونار : ( تنهد عارف راسها قاسح ) ونخليو داكشي يضيع !!!
ليديا : وانا مالي !!!!
تونار ضار شاف فيها داك الشوفة ديال " ياااك !! " وهي قلبات راسها لزاج عارف غير غايحفي الحجرة هادي راه مغاتخدمش ليه وبقى غير كايتنهد ويحك فجبهتو ... ماباغيش جهد جدو يمشي هباء ودوك العائلات لي خدامين تما يتشردو فنفس الوقت هو كايتخنق فضومين بحال هادا وكيكره شي حاجة سميتها سوق الاعمال والتجارة والتسيير... حيت كايحتاجو لبروفايل شعبي وكايعرف يهضر مع الناس وهو داكشي لي مكبعرفش ليه وقرر تترأس ليديا ونور وهو يبقى فليكوليس مراقبهم .... ولكن ليديا بان ليه راااسها قااسح و ماشي من نوع لي كتحمل شي مسؤولية و لا تخدم .... غرورها لا يسمح ،
غير وصلو لدار وهو يكمش عينو كايشوف طموبيلات غرباء !!!!!!! وليديا تاهي كاتشوف
ليديا : هنا شي حد !!!
تونار مجاوبهاش ونزل من الطموبيل شاف عند العساس و هو يجي عندو
العساس : على سلامتكم سينيور ... صاادق العزاء تجاه سينيور مامون رحمه الله
تونار : ( وما ليه براسو بمعنى شكرا ) ... هنا شي حد !!
عساس : سيارات بعض النساء جاو ... على مكنضن كاينة شي عراضة
تونار : شكون مولاها !!
عساس : السيدة حكيمة
ليديا مع نزلات من طموبيل مع سمعات الجملة الأخيرة مصغرة عينيها فالشمس والعساس عطاها تحية براسو و مشا وتونار عقد حجبااااانو وجبد تيليفونو وهي ماعرفاتو اش كايدير فيه... دقائق وردو لجيبو وداز لكوفر يهز الحوايج
ليديا : ياك هادي قلتي ليها مادخلش لدار !!!!! علاش كايقلبو تاني هادو ؟؟؟؟
تونار مكيجاوبهاش عرفاتو تعصب وهي تبسم لجنب شفايفها
ليديا : انا كون كنتي تتسمع ليا كون خليتيني نضاييييفها بطريقتي ... ( شافت لظفاارها متكية على طوموبيل ) نيت مع هاد الملل نشغل شوية الوقت ....
تونار هز الحوايج وداز حداها بتخنزيرة وهي تسكت دايرة يدها على فمها بمعنى ماقلت وااالو ، وتبعاتو كتحلون فمشيتها على عادتها ... حتى دخلو لدار وكايسمعو الهااراج لداخل طلعو ديريكت فدروج لبيت والخادمة شافتهم ووسعات عينيها ومشات كاتجري لصالة فين مجموعين العيلات باش تخبر حكيمة لي مشغولة مع ضيافها ماعطاتهاش وقت ... عيات الخادمة تغمز وحكيمة مافهماتش راسها ...
طبالي كانو مشكلين باصناف الطعام و العيلات مزوقين وعاطينها لضحك والنميمة .. وكلها كايفوح على لاخور ، عالم المظاهر ...
والخدامة فلباب كتغزز فضفارها كاتشير ليها و حكيمة ماداياهاش فيها ...
*الفوق
تونار مشا بهدوء جلس على الكنابي جابد التيل و ليديا تللاحت على سرير طالقة يديها من عياء الطريق وضارت شافت عندو
ليديا : اش كايضور فراسك غير گول ليا ...
تونار : ( شاف عندها ) عطي شوية راحة لداك دماغ عندك
ليديا : مرتاااااح .. فين عمرو مكانش مرتاح .. ( دارت يديها تحت راسها متحمسة ) وغير مكايزيد يرتاح فأجواء بحال هادو ....
تونار بدا كايقلب على رقم نور .....
نور نزلات لتحت بسييف بإصرار من ماماها ، هابطة بعگز وخايفة يجي تونار يلاه غادخل لصالة وهي تجي عندها الخدامة كااتجري
الخدامة : سينيووور جا
نور : ( وسعات عينيها وشدات على فمها ) اويييييييلي
الخدامة : من قبيلة ونا كنحاول نعلم لمادام ومعطاتنيش وقت ....
نور : فييين هو
الخدامة : طلعو ... طلعو لفوق
نور : مقال والو ؟؟؟؟
الخدامة : للاا طلعو ديريكت لفوق ...
يلاه غادخل عند حكيمة وهي تسمع تيليفونها كايصوني غير شافت نمرتو وهي تشد على قلبها .. و سرطات ريقها وجاوبات
نور .. ا. الو
تونار : طلعي ...
يلاه غاتجاوب كان قطع وشافت عند الخدامة بمعنى مشينا فيها .... وطلعات فدروج لعندو ... كان لباب مردودة ودخلات وليديا كانت كلسات حداه على تكاية دالكنابي رجل على رجل مبتسمة كاتشوف لظفارها ....
نور : اا .. ت.. تونار !! فوقاش جييتو ... ماحسيناش بيكم
تونار اشار ليها براسو تتقدم تجلس قدامو ....وهي مشات كلسات..
نور : شوف قبل ماتبدا تهضر .. انا ماباغاش هادشي .. ماما راك عارفها ...
تونار : انا اش قلت ليكم فالمغرب مم !!!
نور،: عرفت ... و .. ولكن . ( شافت عندوو ) صافي انا غانهضر مع ماما وغانمشيو
تونار : نت مغاتمشيش .. وصية جدي مغاتخلفش ...
نور : مانقدرش نعيش بعيدة عليهم ...
تونار : سيري عيطي عليها تطلع عندي
نور بقات كترمش فيه وناضت مشات وليديا طوال الحديث وهي كاتشوف غير فيه وهو طلع فيها راسو جا يهبطو ورجع طلعو فيها تاني ... مستغرب من هاد الشوفات لي كديرر فيه
تونار : !!!؟؟؟
ليديا : ( قربات جلسات على رجليه عنقاتو من عنقو ) وااالو ... غير كتجيني الغيرة ملي عينيك كايشوفو فشي حد من غيري ويميلو لعندو ....
تونار : دابا باليك هدا وقتو ؟
ليديا : انا غزلي بيك معندوش وقت .... فاي لحظة يقدر يجيني ( قربات لفمو طبعات قبلة خفيفة )
تونار : ( تبسم غير بجنب فمو ) نووضي عليا ملي كاتشوفيني مشغول عاد نت كتز*لي ...
يلاه غاتزيد تهضر وهوما يسمعو دقة فلباب ...
تونار : نوووضي حلي لباب .....
قربات ببوسة اخرى هو كايحسبهم ليها ... ومشات حلاتها بالكود لي عاطيها قبل مايسافرو ...وهي دفعها حكيمة وداخلة جااااعرة وموراها نورة و نور ... وليديا كطلعهم وتهبطهم وتونار داير رجل على رجل مربع يدو كايشوف فيهم ببرووود ..
حكيمة : ماااالنا اش وااااقع .. ناااشطة انا وحباباتي فالنص ديال بنتي فاااش آديناك ...جيتي منوض فينا الرعب يااااكما يحساااااابتك يااام جدك بااقااا كاينة ؟؟؟؟ راه دابا مغانراعي مغاااانحشم عيت مانهبط الراااااس ....
نورة : ماما عندها الحق ... كالسين مع ختي ومن حقنا نديرو اش بغينااا...( تونار غير مربع يدو ومعوج راسو كايشوف فيهم ببرود )
حكيمة : يااام داك الحكام ديالك ساالا ، هاد الدار انا وياك گالسين فيها بحال بحال .. انا مع بنتي ونتا مع مراااتك .. وندير لي بغيت نعرض على صحاباتي وحباباتي وعلامن مابغيت شكون تكون تجي تقطع فيااا عراااضتي و تخلع ليا فبنتي ؟؟؟؟؟ يااك لاباس يحسابتك باقي فيامك ولا شنوو ... راه مابقيتي كاتخلعني لا نتا لا غييييرك ... كالسة فرزق بنتي وعمر بيها فمك
تونار مدة هو ساكت غير كايشوف فيها ببرودو المعتاد وحيد الكاسكيط حطها رون فشعرو ورجع لور
تونار : ساليتي !!
حكيمة : سااااليت لي عندي قلتو
ليديا قربات كاتشوف معاهم ودازت لعند تونار كلسات على تكاية دايرة رجل على رجل طلعات فحكيمة وهبطاتها بداك العباءة لي لابسة ودهوبات مجلجلين
ليديا : ( باستهزاء ) غير بشووية عليك ماشحفتيش ؟ ياكما نعيطك شي كاس دالما ...
حكيمة : نت بالداااات دخلي سوق راسك شكون تكوني
ليديا : موولات الدار ( غمزاتها )
نورة : بزززعطة ...
تونار : ( تقلب فثانية وقال بحدة وصوت كايزعزع) گلسي ......
بغات ترد عليه ولكن خلعاتها نبرة صوتو وجلسات ونورة ونور واقفين .... جلسات قدامو وهو كايضور تيل ديالو فيديو مصغر فيها عينيه ... وهي عيات تسنى يهضر والو غير كايهز فيها ويحط
حكيمة : راه عندي مايدار وناس لتحت كااايتسناووني ....ونزيييدك .. دار بنتي مغااانخرجش منها ومزااااال ماااخلاق لي يجري عليا
تونار : نت تعرفي .....
حكيمة : ( كترمش فيه ) كيفاش ؟؟؟
تونار : ( لاح ليها تيليفون كان مشعول على بعض لي فيديو ) غاتكلسي .... غير هو غاتمشي على قوانين هاد الدار .....
حكيمة بقات كاتشوف فيه وتشوف لتيل وليديا كترمش تفهم اش واقع والبنات تاهوما .. وحكيمة هزات التيل كاتفرج وهي توسع عينيها وشدات على فمها ... كانو فيديواتها هي ، يديها بداو يرجفو وقلبها كااايضرب ... شوية بانو تافيديوات بنتها وعلات عينيها فنوورة لي مافاهماهاش اش كاتشوف تما .... ولات حمممممرة و تعصرات من دااااخل وتونار كايتفرج فيها بهدووووء
فواحد الكاراج عامر كراطن كان جالس منير وصاحبو .. والجلسة دمنير وااضح عليها التعب و الهم ...
- كاارتة يا صاحبي باقي ماسرطتي الموت دجدك ها البوس صدمنا بهادشي ..
منير : مافهمتش اش تاايخور هاداااا برربي مافهمت ... اشمن حرب !!! حرب على بنادم واحد !!!!
- راك سمعتيه ... لهاكرز ماقضاو منو تالعبة ... الفيدرالية تسلت منها كيف الشعرة من العجين .. راه دايير كيف دخان داك بنااادم ... دابا ملي عرفوه رجع لطاليان راه مغايفلتوهش دابا...
- انا ماااسوقيش فهادشي كامل .. ماباغيش ختي تدخل فهادشي
- وسبقهم اصاااحبي سبق .. مشيتي تالمغرب وماقضيتي تا **** .... نمشيو لعشية لتما !!
- داكشي لي بان لي ... غانمشيو نعصرو حدا الدار الى خرجات نهزوها ، لابد مغاتخرج
- والى كان داك خينا حابسها ؟ ولا خرجات معاه
منير : ( شد على راسو ) تخخربقت والله الى تخخخربقت .. واخا ماتستااااهل ديلمها تاحاجة ولكن ماااانقدررش .... نمووووت ونعرف اش كادير معاه واش وصلها ليه ... تلاقاو ياااصاححبي نمرووووودة تاهي ماساهلاش
- دابا غدا باغين يهجمو عليه فالفيلا ... تحرك نتا ليوم ... والى ماخرجاتش ، غدا شوف كيف دير تهربها
منير : دابا واش ضروري يقتلوه ؟؟؟؟
- وبغيتي يخليوه ... سيد قضى لينا على خدمتنا كااملة وبااقي خداام كولشي كايتعامل معاه غير هو ، البوس غايحماق زيعرف غير كيفاش هادا مسير هادشي كامل بووحدو .... زاد دابا عطاوه يخدم بالرخصة ديال الدولة كاميواتو كايدوزو فأمااااان مكاينش لي يهضر معاه و اابزناسا لقاو راحتهم معاه .... نبقاو حنا مربعين يدينا بلا خدمة وواحد داير ماعليه فالسوق ... بنادم واااحد يدير فينا هادشي كامل ؟ .... راه قبل ماتجي نتا والبوس كااايعاني منو كايحلم بليل ونهار امتى يشدو وغايفلتو داابا ؟ ..... راه لا مشا حتى هجمو على الفيلا راه الكلب للخر مغايبقاش حي .... هانتا كاع الى ماقدرتيش تنقد ختك ليوم ... نقدها غدا راه سمعتيه اش قال خصنا نكونو كاملين فالهجوم ....
منير : مفهمتش انا لهادا غايهز معاه 90 خلق باش يحااارب بناااادم واحد ....
- ونتا راك باقي معارفوش اش ساوي .. داك بنادم راه مشحفنا سنيييين وشحف معاه دول على قدهم .... 90 واحد وشووووف تشووووف عاد واش نشدوه الى مالقينا غير الريح بين يدينا .... ( تنهد وناض وقف ) مهم انا غانوووض نمشي .... تهلا ...
ربت على كتفو ومشا ومنير تكا تما على واحد الكارطونة وجبد جوان برمو وبدا يتكيف متكي على ظهرو وجبد تيل كيف العادة مشا ديريكت لصورة لبنت لي كايشوف فيها طيلة هاد المدة وينفت عليها دخانو وينسى فملامحها همو .. و دخل تاني يصوني على داك النمرة لي قيد عندو على أمل يلقاها شاعلة ، ولقاها تاني بااقااا طااافية .... منهار رجع لهنا وقرر يصوني عليها وهو كايلقاها طافية .... ولتخ داك تيليفون معصب .....
حكيمة يديها كايترعدو وتيل قرب يطيح من يديها ، سرطات ريقها مزياان و شافت عندو وهو كان داير رجل على رجل و رامقها بنظرات باااااردين .. وهي رجعات شافت مع بنتها نورة لي كاتسولها براسها اش واقع ... و ليديا ونور كايشوفو مفاهمينش ... ورجعات سرطات ريقها وعطاتو تيليفون وبقات ضور فعينيها وجهها ولا صغيييير وحنات راسها ... و تونار رد تيل لجيبو وقرب عندها لطبلة ...
تونار : ار يو اوكاي ؟
حكيمة غير كتسرط فريقها وبدات كاتشوف فيه وتتغبن تاتلاحت عليه كاتبوس فيديه و ليديا طرطقات عينيها و نور ونورة شهقو شادين على فمهم
حكيمة : الله يررررحم ليك جدك .. لمييييمة .. لمييييمة الله يررحمها اوولدي لاما ستتتترني ... لميييييييمة اوووووولدي .. نبوووس يدييك ( كاتبوس ليه هو خطفهم كايدفعها)
نور : ( مشات عندها كتهزها عليه ماحاملاش الوضع ) ماما اش واااقع ؟؟؟ شنو بيناااتكم !!! اش كاين فالتيليفون ؟؟
نورة : وريونا تاحنا ؟؟ ماما مالك ؟؟؟
ليديا غير بعدات وكلسات على سرير رجل على رجل متبعة هادشي كااتسنى تااايخرجو عاد يعاود ليها ...
حكيمة : ( كتنتر من نورة ) طططلقي مني .. ( كاتنهج بالخلغة ) شوووف اولدي رااااه والله مكندير شي حاااجة بصح زعماااا .. عااا كدوب وصااافي داكشي كنروج بيه الوقت الله يهدي الجميييع ...
تونار : ( ببرود ) عارف ..
حكيمة : نبوووووس يديييك وندير لي بغيتي مسح داكشي اوليدي عااافااااك ندير لي بغيتيي ...
تونار : ( قرب عندها مصغر فيها عينيه) عارفة هاظشي الى وصل ليد لبوليس ممم ؟
نور : اوييييلي شمن بوووليس !!!!
حكيمة : ( غاتسخف ليه ) لاا لااا اوليييييدي قققتلني وماديرهاش فيا ... لا اولدي راه شفاااية الناس نلوح عليها راسي من سطح
تونار : فين مشات زعامتك دابا ؟ وليت دابا "وليدي" ؟؟ همم !! شنو كنتي كاتگولي قبيلة ..... فكريني !
حكيمة : يييتقطع لساااااني ... يتقططططع لسااني لابقيييت هضضضرت يتقطع لساااااني
تونار : فعايلك كلهم عندي ... كنت عارف غايجي شي نهار بحال هدا لي غانحتاجهم ... عمرني دخلت فيك حياتكم هاديك مكيهمنيش .. ولكن ملي توصلي تمسيني انا راه مغانسكتش ..... ( رجع بلور ربع يدو )
حكيمة : وو . و واااغا قلة العقل .. و ونتا عارف الفلوووس كااايشدو العينين الطمع راه طاعون ( ضورات راسها عند نورة ) ودااااك المسخوووطة غير بلاتي عليها
تونار : ( مربع يدو ) ودابا شنو غااديري !!!
حكيمة : ( تنهدات بدون حيلة ) غانمشي فحالي
تونار : جريت عليك انا !!! ( حكيمة ضورات راسها ب"لا" ) مزيااان .... وهادوك لتحت اش غاديري ليهم
حكيمة : ( شافت عندو ) دوووزليا غير هادي ... غير يتعشاو غايمشيو
تونار : نعام ! ماسمعتش ( ليديا شدات ضحكتها كتشفى )
حكيمة : ( تنهدات كاتخرجها بزز عليها ) غانمشي نخرجهم دابا غير تهنى ...
تونار : جريت انا على ضيااافك ؟؟
حكيمة : ( ضورات تاني راسها بلا )
نورة :واش دابا تاواحد مغايفهمنا اش واقع ؟؟؟
حكيمة : غاندير هادشي كامل وعمرك مزال تشوف كمارتي انا وبنتي ولكن هااالعار ... هالعار لاما مسح داكشي
تونار : مغانمسحوش .. ولكن ماحدك دايرة عقلك غايبقى هادشي مخبي كيما تخبى هاد المدة كاملة ...
حكيمة : والله لااباااافي شفتي وجهي غير تهنى غانمشيو من الطاليان كاع
نور : ماما ؟؟؟؟؟؟؟
تونار : بغيتي تكلسي مع بنتك غاتمشاي على شروطي .... مغاتقديش عليهم ، براا .....
حكيمة ضارت شافت فيهم وشافت فليديا وهبطات و بناتها تبعوها .. هو يعيط تونار
تونار : نوور ...
نور ضارت عندو ورجعات ونورة وحكيمة نزلو ..
نور : نعام ؟؟
تونار : غايجي عندك المحامي وقعي ليه على وراق الطلاق ...
نور : ( بقات كترمش مدة فللخر تنهدات ) واخا .. ولكن ماما شنو دارت
تونار : تقدري تسوليها
نور : مااانقدرش نعيش بعيدة عليها
تونار : الى قبلات تتمشى على شروطي هاهي معاك ....
نور بقات غير كاتشوف فللخر تبعات ماماها تفهم اش واقع وليديا تبعاتها بعينيها تامشات وناضت شدات لباب ومشات عندو بشوية كتمختر هو كان جبد كارو وكايشوف لسرجم ويجبد منو وكلسات حداه حطات يديها على كتفو
ليديا : ودابا ... نقدر نعرف اش وااااقع .....
تونار: ( كايشوف من سرجم ) التخربييق ..
ليديا : ااه .... هاداك التخربيق بغيت نعرفو ...
تونار خشا يدو فجيب هز التيل ومدو ليها مختصر عليه الاومور حيت عارفها مغاتفاكش ، وهي بدات تفرج فدوك التسجيلات ومطرطقة عينيها شادة على فمها
ليديا : حكيكووو هادي !!!!! سحاارة ؟؟؟؟؟
تونار : ( ببرود كايكمي ويشوف من سرجم ) نوو
ليديا : وشنو ؟؟
تونار : نصاابة ...
ليديا : مافهمتش ؟؟؟ .. وهاد خيتي ( كاتشوف فنورة كتمارس فطوموبيل مع شي حد ) فين شتيها نتا حتى صورتيها ؟؟؟ وعلى قلة لبلايص مالقات غير طوموبيل !!! عطاتو رخيص كاع بحال هااكا ؟!!!
تونار : ( حيد ليها التيل ردو لجيبو ) شغلهم هاداك ....
ليديا : ايييه ... ولكن فهمني كيدرتي صورتيها
تونار : كاميرات ديالي راه مطلوقين فأي بلاصة ...
ليديا : ولكن كيفاش بلان داك حكيمة !!
تونار طفا الكارو فالطفاية وجرها من يديها لعندو عنقها لجنبو ..
تونار : كتستغل كونها وحدة عربية وهادو هنا فايطاليا عندهم واحد الاعتقاد ان الشعودة مواليها غير العرب خصوصا شمال افريقيا ... وهي استغلات الوضع وتتنصب على الناس وتقول ليهم كتفهم فداكشي وهي غير ضاحكة على الوقت كتدي فرزقهم
ليديا : واامسخوطة هادي لقات خدمة بلا راس المال
تونار : منها عدااد هنايا.. رجعوها حرفة ديالهم ... راس مالهم هي داك الجبهة .. وحيت عارفة راسها الى البوليس جابو خبارها غاتكمل لي بقى ليها فالحبس ... وبنتها راه الى تسرب داك الفيديو مشات سمعتها ..
ليديا : ونور بنتها لوخرا فخبارها هادشي ؟؟
تونار: منضنش.. هاديك تقيلة شوية وبعيدة على هاد الاومور
ليديا : ( كاتلعب ليه فالكول ) من ديما كايضور فبالي واحد السؤال بغيت ليه جواب مباشر .... نوور ... كاتجيني انسانة مزيااانة واخا مدلولة شوية .. من داك النوع الوديع كيف كايقولو .. وبنسبة ليك كزوجة يمكن احسن خياار .. كتسمع وتحني الراس تقتلها وماتقولش آح ... وبااينة طاايحة فيك مسسكيينة ....علاش زعما مافكرتيش تزوج بيها ... قبل مانجي انا طبعا حيت فوجودي مايمكنش تاتفكر فيها ... لكن قبل مانجي عمرها جات لبالك زعما همم ؟؟؟
تونار : ( هي كاتهضر هو كالعب شعرها فيديو وتبسم ملي سمع سؤالها وشنو كايضور فبالها وجاوبها ببساطة ) مكاتستهوينيش الحاجة العادية ....
ليديا : واشنو لي تايعجبك
تونار : ( هبط فيها عينيه وهي طبعات عينيها ) بحالك ....
ليديا :گول نتِ .. حيت بحالي مكاينش
تونار : هه !!! نوضي جيبي ليا لبيسي ....
ليديا : ( ضارت موراها بان ليها ) تقدر تنوض ليه مدامك حتى نتا عند رجلين بحالي ( وقفات ) بغيت نهبط لجر.....
قبل ماتكملها جرها من يديها تاطاحت عليه وجا نيفها على نيفو وهو معسل فيها عينيه وهي سرطات ريقها دوبها فثاانية وحدة بعينييه لي من ديما نقطة ظعفها
تونار : غاتجيبيه ليا ولا لا
ليديا : ( تجبدات الضحكة على فمها) كون داك حكيكو شافت طريقتك فالنصب ... كون اعتزلاتو ....
بعدات عليه ومشات جابتو ليه ..
ليديا : خوود ..
تونار : ( كايشعلو ) اجي كلسي حدايا
ليديا : نوو ... بغيت نهبط لجردة .. توحشت نشم الهوا
تونار : نو ، تاتخوا الدار ....( طلع فيها عينو واقفة ) وآآجي عندي ....
قربات عندو جلسها حداه وحطات راسها على كتفو ... وهو خدام و كايلعب فشعرها حتى طلعو ليهم الغدا .. تغدااو فهدووء ... وبقات حداه حتى نعسات على كتفو وهو كايشوف من زاج لتحت حكيمة خرجات دوك العيالات مافاهمين والو وكتعتدر منهم ... وشوية خرجات تاهي و نورة بليفاليز ديالهم ونور تابعاهم ... المنظر كايبان ليه ولكن مكيسمعش ليه اش كايقولو
نور : ماما !!!!! ... وااا شي حد يفهمني ... اشنو فداك الفيديويات وعلاش ضربتي نورة ؟؟؟؟
نورة : ( كان حنكها حمر و قالت بدون رضى وعينين منفوخين ) صااافي راااكي ضبببرتييينا ... ماشي سوووقك .. ونت ختاري واش تمشي معانا ولا تگلسي مع هادو هنا
نور : انا بغيت غيرر نعرف اش فهاد الفيديوات لي خلاكم ترغبو وتزاوكو ودغيا تمشيو ؟؟ ياك كنتو كتحلفو ماتخرجو منهنا ؟؟؟؟
حكيمة : ختك سمعتيها اش قالت .... تبعينا تباركالله ... تكلسي مع هاد ولاد الحراااام .... كلسي ،، منا مك مانتي بنتي لابقيتي هنا معاهم
نور : واش نتوما عارفيني غانبقى بلا بيكم .... غانهضر مع تونار نخلي ليه هادشي مابغيتوووش...
حكيمة : انا وختك غانمشيو لوطيل علما نلقاو شي دار ... لحقي علينا ...
خلاوها ومشاو ونور بقات تتنهد والفضول قاتلها شنو هادشي لي قدر يبتزهم بيه و فضلو يسمحو فكولشي على قبلو ... لقات غير تونار لي يجاوبها على هاد السؤال ... وطلعات دقات فلباب ... وهو شد لبيسي وهز راس ليديا بشوية حط تحتو مخدة ... ومشا لباب حلها ...
نور : ا.... ش شوف ، م ..( كتوتر ملي كتيكون قريب ليها ) م ماما و ختي مشاو ... و ، واش نقدر نعرف شنو فداك افيديو لي وريتي لماما حتى مشات بحال هاكا ؟؟؟
تونار : ( بكل وضوح ) لا
نور : من حقي نشوفو
تونار : وانا مامنحقيش نوريه ليك
نور : ( تنهدات باستسلام ) واش شي حاجة قبييحة ؟؟؟
تونار : ممكن ...
نور : عاافاك ... بغيت غير جواب واضح واش ختي وماما كايديرو شي حاجة خاايبة ؟؟؟؟ ...
تونار : مغانكونش كانعرفهم كتر منك
نور : ( قلبات راسها لجنب كتنهد عاضة على شفتها ورجعات شافت فيه ) ش شوف .. انا ، انا غانمشي معاهم مانقدرش نبقى بلا ماما وختي ... داكشي علاش بغيت .. ب ...( كتهضر كلها توتر ) بغيت نكتب ليك هادشي لي خلا ليا المرحوم حيت مغانقدش على المسؤولية .....
تونار : هضرنا فهاد الموضوع وقلت ليك وصية جدي ماتخلفش
نور : راااه منقدرش نقبل هادشي ومنقدرش نبقى هنا .. هادشي ماشي من حقي وانا ماشي مراااتك
تونار : بغيتي تسمحي فهادشي ... غاتبعيه ليا وغانعطيه فيك حقك فلوس ... اما باش تتخلاي هاكاك و تتعارض وصيتو لا ... ملي مابغيتيش حقك هاداك ولاكن غاتاخديه فلوس ... هاكا نكون حتى انا مرتاح من ناحية وصيتو ....
نور : اااه ماعنديش مششكل غيير حيد عليا هاد الحمل ....
تونار وما ليها بمعنى واخا ورجع شد لباب وهي هبطات ....
يلاه غايمشي عند ليديا يهزها لسرير وهي تبعث معاااه الروبوت كاتعلمو ان البوزيسيون ديال هادوك لي كايحاولو يخترقو الانظمة ديالو طلعات .... ومشا هز لبيسي لبيرو وحلو والروبوت مشات .... بدا كايشوف الاشارة بانتليه غير هنا فايطاليا وفنفس المدينة !!!!! ادن هاد الناس عارفينو فاطاليا ؟ وملي كانو كايحاولو يخترقو النظام ويبحثو على البوزيسيون ديالو كان هادشي ملي كان فالمغرب و ملي مشا للبرج ومارجعش لتما ... دغيا طيرها فعقلو بلي هاد الناس كايقلبو عليه ودابا حتى اختراق النظام لي كان كايوصلو راه حبس لانهم صافي غايكونو عرفوه رجع لاطاليا ..... فهم منهادشي دقتهم قريبة بزاف .... كانو كايقلبو عليه ملي كان بعيد ودابا صافي راه لقاوه ....
دخل لمعلوماتهم عاد عرفهم خلية من اسرائيل ، ادن هادو جاو لپيلارمو على قبلو هو !! وهو عاااارف ان هاد العصااابة زمان وهي كتقلب عليه ...ومنهار بان فالصحافة كان كايتسنى الضربة امتى تجي وموجد ليها .... عوج فمو باستهزاء على غبائهم ... لي سمعو غير خبر خروجو براءة و سمعو غير فين ساكن واسمو ... ومااااسمعوووش حكم القاضي اش قال ... ماسمعوش ان عندو حاليا الحماية من الدولة .....ولكن لابد يقاد ليهم الطريق مسرحة لعندو و فخ مقاد .. باش مايفلتوش منها ... ويضايفهم ويستقبلهم بشكل يليق بيهم ... طفا البيسي وهز ليديا للفراش وهي ناعسة ... ومشا لبس عليه وهز سوارتو وتيليفونو و نظاظرو وخرج .... كان الحال بدا كايضلااام ......
ليديا من بعد ساااعة عاد بدات كاتفيق وتتجبد ووتفوه ... وشافت مع جنابها مابانش ليها وبان ليها الجو ضلاااام ... وناضت خدات دوش وأنقات راسها على عادتها ... وشمن شغل عندها منغير رااااسها وجمالها .... لبسات بعض لاكسيسوارات .... واتجهات لباب تنزل لان قنطات من الگلسة فالبيت ... هابطة وكدوز يديها الرقاق على الشباك دالدروج حتى لاسفل والخادمات وقفو لتحت تحية ليها ملي شافوها نازلة.. وهي بدات تمسح صبعانها وشافت عندهم
ليديا : هاد لغبرة داخلة فالديكور ديال الدار !!!
الخادمة : يلااه مسحناها الالة صباح
ليدبا : ( وراتها صبعانها ) وهادشي شنو هو !!!! ......
الخادمة : غ . غ غبرة
ليديا : ملي نكون طالعة .. مانبغيش نلقاها مزال ..
تخطاتهم ومشات وهوما عاد رخاو النفس خصوصي دابا ملي عارفينها وحدة ملي مالكين هاد الدار ولاو ضاربين ليها الحساب كتر....
خرجات ليديا للجردة وجلسات مطلعة راسها لفوق كاتشوف فالنجوم لي بداو يبانو وجو الغروب المميز ...حتى كاتسمع شي خطوات وطلعات عينيها بانتليها نور خارجة جارة الفاليز وهازة ساكادو على ظهرها ... شافتها وطلعات حاجبها !!!!و نور شافت ليديا ....
عند منير ...
نزلو من واحد طموبيل هامر كحلة باتجاه واحد الكاراج مهجور تما فواحد البلاصة مضلمة .....تما فين غايتجمعو تاني مع البوس يهضرو على الهجوم ديال غدا حيت خصهم ينهيو الامر دغيا باش يرجعو فحالهم ... نازلين متجهين للباب داك الكاراج وهوما يشوفو واحد من المتشردين بلباس كولو ممزق كايشعل فالبريكة وكارو عاض عليه بسناانو و مابغاتش تشعل ليه كايطفيها ليه الريح وكاينفض فيها ويرجع يشعل مضاارب غير مع بريكة .. منير صغر عينو وصاحبو تاهو ... اما دراري لوخرين دخلو مشافوهش
منير : ( مصغر عينيه كايحاول يشزف شكون هو هداك ولكن مكايبان والو بضلااام ) شكون هاداك !!!
- ( مصغر عينو تاهو ) اااااه ... هادا ڤيسنتي ... راه هادي هي بلاصتو ... متخاافش راه كايعرفو البووص ...عطييه غير گارو ومايآديكش...
هاداك الراجل طلع فيهم راسو ولكن مكايشوفو والو فيه من غير خيالو .. حيت الضلااام ، وهو لابس واحد القبعة كبييرة و نازلة على عينيه وكاشكول غليض مخبي فيه نص وجهو ... وريحة خااايبة جاية من واحد المونطو مقطع لاابسو وصبااط ممهننكر ..... وجا بجيهتهم كايميل ضارب الكاو ومنير مصغر فيه عيينو وهو جاي مطيح راسو لتحت كايعتر فرجليه كل شوية كايقولو هاهو غاطيح ، .... جا دايز من حداهم وريحة خااايبة عطات منو حوايجو فيهم ريحة البركاصات .. هو ييتعكل كاان غايطييح وشدو منير مببعد راسو ومغمض عينييه عااااايف هاد ريحة و داك شخص بقى كايضرب على صدرو بمعنى شكرا ... ووحاول يوقف وكمل المشي ديالو و بعد من تما ، ومنير بقى مخسر سيفتو عيفااان داك الريحة و جرو صااحبو دخلو لكاراج وداك الشخص ضار براسو وعلا قبعتو على عينيه دار ضحكة مستهزأة ... ورجع مشا ....
وصلات طموبيل اخرى كحلة نزل منها البوص مقاااد الكوستيم ديالو شااف مع جنابو مكاين حد .... ودخل لكاراج ...
عند ليديا
جالسين هي ونور على الكرسي ، ونور جامعة رجليها والفاليز ديالها حداها وليديا رجل على رجل كالعادة بشموخ كاتشوف لسما ....
نور : ( حلات صاكها جبدات شي وراق حطاتهم على طبلة ) وقعت على طلاقي بتونار ... بقى خاص غير توقيعو ... ( ليديا هبطات عينيها على داك الوراق بدون جواب و نور تبسمات باستهزاء ) ربحتي ونا خسرت ....
ليديا : على كان غايكون العكس مثلا !!
نور : حتى من هادشي لي غايربطني بيك غانبعيو ليه ... وغانمشي فحالي نعاود حياتي بعيد عليكم باش نرتاح
ليديا : غاترتاحي نهار تبعديه من دماغك ... ماشي نهار تبعدي نت ...
نور : وباش تهناي مزيان ... راه معمر كانت بيناتنا شي حاجة
ليديا : اساسا مكنغيرش منك ....
نور : هه !! لهذا الدرجة حالي مثير للشفقة ؟
ليديا : الغيرة لي مكنغيرهاش منك ماشي نت السبب فيها ، السبب هو ثقتي فيه لي قوية .....
نور : نتمنى ماتجيش شي فرصة لي تجمعني بيك مزال ..( شافت فيها ) حيت فعلا كنكرهك ... وحتى نت متنكريش الامر
ليديا : انا مكنكرهك مكنبغيك .....( شافت فيها ) نتي مادخلاش لدماغي اصلا .....
نور : وااخا آديتني بزاف .. كنتِ درس عمرني نساه
ليديا : ماكاينش هدا لي تلاقاني و نساني .... و يحسن الشرف للخلايا الدماغية ديالك نكون فيهم أنا ....على الاقل شي حاجة زوينة تكون عندك فداك الراس
نور : هه !! ( ناضت وقفات وشدات فلافاليز ديالها وشافت مع الدار وتنهدات ) بصحتك .... قدرتي تخرجينا من حيوط كبرنا فيهم
ليديا : ماخرجت حتى واحد .... نتوما لي فضلتو تميشيو هادي اولا ، ثانيا عمرك تربي الكبدة على شي حاجة ماشي ديالك ... وعمرك تحاااربي على شي حاجة مكتحاربش تاهي على قبلك ... كنحاربو باش نشدو فاليد لي ممدودة لينا .. ماشي اايد لي مخشية فالجيب ... وتيقي بيا .. الحياة عاااادلة بزاااف وكتعطي لكل واحد حقو لي كايستحقو .. كون كان حقكم فهاد دار تستحقوه كنتو غاتربحوها .. ولكن الدار كايستحقها مولاها .. لذا بقا فيها مولاها ..
نور : هذا ماشي عدل ....مولاها ايه يستحقها ... ونت باشمن صفة جات فحقك !!
ليديا : مول هاد الدار عندو مولاتو ... ونا فيها بصفة بصفة مولات مولاها ....
نور : ( طلعاتها وهبطاتها وجرات فاليزتها ) مااامشرفاااش بيك
ليديا : ( بابتسامة ) ومالياش الشرف ....
مشات نور وليديا بقات فالجردة مبتسمة وفرحانة لانتصارتها المتوالية ....
حتى كتدخل سيارة ديال تونار ... نزل متجه لدار حتى شافها كالسة فالجردة واتجه عندها ، كانت مركزة كاتشوف فالنجوم ... تاجلس حداها وحط سوارتو على طبلة هو يشوف داك الوراق وهزهم عندو ..
ليديا : مشاات ... هزات حوايجها ومشات
تونار : ( كايجبد ستيلو من لافيست ديالو لداخل ) مزياان ....
ليديا : غانبقاو بجوج !!
تونار : وامتى كان بيناتنا التالت ( كايوقع على الورقة )
ليديا : مكانش ..( شافت عندو وعند الورقة لي وقعها ) ولكن كنفكر نجيبو ....
تونار : ( حط الورقة فوق الطبلة و رجع لور ربع يديه ورا راسو براحة ) نهار يبغي يجي هو .. مغايشاورناش ...
ليديا : بدلتي رأيك فالموضوع ديال الولاد.!!؟
تونار : ونت تخلي شي مايبدلش رأي ديالو !!
ليديا : بغيتو لاكان ولد يشبه ليك ... والى بنت تاااهي تشبه ليك ..
تونار : وعلاش لي ماتشبهكش !
ليديا : ( شافت فعينيه) باش تبقى ديما تقول ليا كاين منك غير وحدة فالعالم ...
تونار : ( تبسم خفيف جمعها دغيا ودار يديه تحت راسو كايشوف فالسما ) هاحنا دابا بقينا بجوج ... شنو مخططاتك لحياتنا ....
ليديا : ( تكات حتى هي ) ماعنديش مخططات .. انا الانسانة لي كاتعيش مع رغبتها بدون ماتربط راسها بشي التزامات ولا وعووود .... نقدر واحد صباح يعجبني نوجد ليك فطور للفراش ... وواحد صباح يعجبني نحافظ على ظفيراتي ونقول ملكة بحالي ماتستاهلش تدخل للكوزينة ... ( تونار مبسم ) يقدر واحد ليلة يعجبني تدخل وتلقى عشا بالشموع ... واحد الليلة غانقول انه ملكة بحالي هي لي خاص يدار ليها عشا بشموع وماشي هي لي ديرو .... قابل تعيش مع وحدة بحالي ؟؟؟؟
تونار : هه!! والى ماقبلتش مثلا ؟
ليديا : تفضل برا ... الدار راها داري ....
تونار : ( تنهيدة وصمت طويل ) شكون كان يقول ان مولات Slik dance لي خلات عقلي باقي معلق على داك الحبال .... تولي مولات الدار لي فيها انا ساكن ....
ليديا : مكتحسش ان الحياة كطنز علينا !! كتكون عااااارفة اش غايوقع وتخلينا نخططو ونحلمو و نطيرو غير بوحدنا !! كان يحسابتني غانهرب من دارنا باش نتحرر ونعيش بحرية ... مكانش يحسابتني ان الحياة كانت موجداك ليا نتا .. وتحررت باش نوصل عندك .... نضوي حيااااااتك المملة
تونار : مكيعجبني فيك غير تواضعك ...
ليديا : ومكيعجبني فيك غير عينيك ...
تونار : غير عينيا ؟؟...
ليديا : هوما لي كانشوف هاد الساع
جبدها لعندو عنقها تحت يدو وقال بلي خلا قلبها يتهز
تونار : تحاليل بساط يخرجو وغاندير العملية ...ونهنيك ونهني جدي فقبرو
ليديا تنفضات على كتفو وشافت فيه
ليديا : كضحك معايااا !!!!!!؛
تونار : موالف كنضحك ؟؟
ليديا : ( كترمش فيه ) ع .. عاود آش قلتي !!!!!
تونار : علاش هاد الاستغراب كامل ؟؟؟ على ماشي هادشي لي باغية نت ؟
ليديا : ( سرطات ريقها وضحكو عينيها بفرحة ) اقتتنعتي ؟؟؟؟؟
تونار : عن نفسي مامقتنعش ... ( تنهد ) ولكن لابد نحقق كاع الوصايا لي خلا ليا ...
ليديا : د .. دابا ..امتى ؟؟؟ امتى غادير العملية
تونار : حتى نساليو من تحاليل .... واحد الشهر هاكاك ..
ليديا : ( وسعات عينيها ) شهر ؟؟؟؟؟؟؟ دابا شهر، نقدر نشوووفك بلا ماسك صافي ؟؟؟؟
تونار جابتليه ضحكة وبانت على فمو مستهزأة دغيا جمعها وكايشوف فالسما بهدوء
ليديا : وجاوبني ، علاش كضحك !!
تونار : ( ضور عينيه عندها ) واش فرحانة حيت اقتنعت بالعملية ودرت هاد الخطوة .. ولا غير حيت غاتشوفي وجهي و ترضي فضولك ؟
ليديا : بحال بحاال
تونار : لا كاين فرق
ليديا بقات ساكتة مدة مصغرة عينيها ساهية فواحد المنحى ورجعات تقادات فجلستها
ليديا : عرفتي شنو ....ايييه بغيتك دير العملية ، باغا نشوف وجهك بلا ماسك .. فنفس الوقت متخوفة ... متخوفة اانني نحسك ماشي تونار ... حيت تونار لي كانعرف هو مول الماسك .. هو هاداك لي كايسد ليا عيني قبل ماينعس معايا .. هو نتا ... الى درتي العملية و بان قدامي وجه اخر ... كنخاف اانني مانولفوش ؟ انه نحس بتونار لي بغيت انا ماشي هو !!!! ماعرفتش علاش جايني هاد الخووف !!!!!
تونار : ( مدة كايشوف فيها ) هادشي بضبط لي مخليني مامقتنعش ... هو صعيب نتعايش مع وجه جديد عليا ... وجسد جديد عليا ...
ليديا : ( شافت عندو وهو هبط عينو لعندها ) ولكن نتا واعدتني غاتوريني وجهك وهو هاكا .... بغيت نشوفو قببل من العملية آتونار ... نتا واعدتني
تونار : ومغانخلفش بوعدي ....
ليديا : هاء !! نتا كاتقول شهر و غادير العملية فين غانشوفو انا !!!! ادن غانشوفو قبل هاد الشهر ؟؟؟
تونار : ( مصغر فيها عينو مدة ) كاتشوفي راسك قادة اليديا ؟؟ ... واخا عارفة انك لاتخلعتي منو غاتفقديني !! وغايضيييع هادشي كامل ؟؟
ليديا : انااا تايقة فراسي مية فالمية انه مغانتخلعش منك واخا يوقع لي يوقع وتكون كيف بغيتي تكوون .. وزايدون هانا تخلعت ؟؟؟ علاش غانفقدك ؟؟
تونار،: الامر عادي بنسبة ليك .. اما بنسبة ليا لااا .. يقدر يكلفني حياتي ... طول عمري وانا رافض الزواج غير باش مانشوف نظرة الغرابة والخوف فعينين لي غاتكون مراتي ... ومنبعد قدرت نتزوج بيك ... حيت نت الوحييييدة لي مالقيتش فيها نظرة الاستغراب ... والى بقيت حتى شفتها فيك ... ماتحلميش يتقابل وجهي مع وجهك مرة اخرى ....
ليديا : انا متأكدة من راسي ... وجهك مغااايخلعنيش ونتا اصلا مكتخلعنيييش .... واساااااسا مكتخلعش ...نتا فقط واحد الراجل مميز على لوخرين ...
تونار فقط دوز يدو على حنكها ورجع كاتنهد وحدة ورا الاخرى كأن النفس مقطوعة فيه ...
ليديا : ( بإصرار ) ادن غااانشوف وجهك غير فهاد الشهر قبل العملية ....؟؟؟
تونار : اجي ... اجي لعندي لهنا نفهمك
قربات عندو وعنقها تحتو وهي حطات راسها على صدرو كايلعب بشعرها ..
تونار : راه ماشي غير غاندير العملية غايبان ليك وجهي ....مغايركبوش ليا وجه ... انا فقط غانزرع النسيج والجلد مغايتمشى على الجسد ويغطيه حتى تفوت خمس سنين ولا ست سنين على حساب الاستجابة ... يعني باقي مطول معاك بهاد الماسك غير تهنااي ...
ليديا : هاء ؟؟؟؟؟؟ ست سنييين كاملة ؟؟؟؟؟؟
تونار : ويمكن كتر ... ويمكن قل ....
ليديا : حسابتني غير غادير العملية صافي غاتكون بريتي !!
تونار : والا .. مايمكنش ....
ليديا : دابا نتا ملامح وجهك مقسمين وكبرو مع العمر ديالك ... خاص فقط يتلبسو بالجلد ياك ؟؟؟؟
تونار : تماما ...
ليديا : دابا نتا لي كاتشوف وجهك .... واش واخا محروق كايبانو ملامحك ؟؟؟
تونار : المراية شفتها فحياتي كاملة شي خمسة دالمرات و لا ستة .. غير بالصدف ... مكنركزش فوجهي ... حيت انا براسي كنتفزع منو ....
ليديا كمشات ملامحها وسرطات ريقها .. واش فعلا الامر بهاد البشاعة ؟؟؟؟ واش بصح هي قادرة تشوفو بدون مايتغير والو من نظراتها ؟؟؟؟ رجعات زفرات النفس وتبسمات
ليديا : مهم نتا غاديرها .. ست سنين ولا عشر سنين مكيهمش ... مهم غاتبرا واحد نهار ...
تونار : يكون خيير ... ( دوز يدو على دراعها جاه بارد ) تحرك البرد .. يلاه ندخلو ...
ليديا : ( شافت للوراق لي وقع وشافت عندو بضحكة ) مانحتفلش بطلاااق رااجلي ههههه
تونار :على هو امتى كان مزوج بغيرك ...
ليديا : ( هبطات شفايفها ) فخبااارك غايجيني الملل هاكا ؟؟؟؟ مكاينش فيمن نتلهى !!! ماترجعش داك حكيكو مرة مرة طل علينا دير معانا صلة الرحم نشد فيها شوية ..
تونار غير تبسم بجنب فمو ضاحك عليها وناض جرها معاه كايضور فراسو على هاد المراة لي فنصيبو كيدايرة ... داخلين للدار
ليديا : هاديك لبنت لي قتليك فالمغرب قاد ليها وراقها تجي عندي لهنا ... قاديتيهم ؟
تونار : مابقاش ليهم بزاف
ليديا : ( بابتسامة ) ماانسيتيهاااش
تونار : مكنساش شي حاجة كتخصك
ضحكات وتخشات فجنبو وطلعو لبيتهم هو دخل لدوش وهي يلاه كلسات ليديا تديماكيي وجهها وتنظفو وهي تسمع دقة دالخادمة ودخلات
الخادمة : شنو تبغيو فالعشى الالة
ليديا : ( كاتشوف فالمرايا وكاتجاوبها ) سوپ شينواز ...
الخادمة : حاضر .
جات ماشية وهي توقفها ليديا
ليديا : بغيت الحاامض .. بزاااف دالحامض .. ( سرطات رييقها ) قطعيه هاكاك وجيليه ليا .....
الخادمة : حاضر ....
مشات الخادمة وهي نظفات وجهها ولبسات بيجامة حريرية حتى خرج تونار
ليديا : ( كاتفرش ايزار على سرير ) حبيبي طلبت لينا سوب شينواز... تشربها ؟ ( ماسمعاتش جوابو وضارت عندو لقاتو واقف كايشوف فيها ) مالك ؟؟
تونار : شنو قلتي !!! شكون انا ؟؟
ليديا جاتها الضحكة و قربات كتمشى عندو ببطئ ....
ليديا : علاش نتا ماشي حبيبي !!!!
تونار بقى غير كايرمش فيها ، الكلمة لي حياتو كاملة عمرو تخيل يسمعها وتبسم غير بطراف شفاهو على عادتو وهز بيسي ديالو وهي متبعاه بعينيها
ليديا : خدمة تاني !!!؛
تونار : ممم ....
خلاتو على خاطرو اصلا ولفات انه مكيتجاوبش معاها فمواضيع المشاعر ... وتخشات فسريرها هازة كتابها " فلسفة الوجود " كاتقرا فيه بضبط ف باب " السرمدية " وهو دار الكاسك وبدا كايتفرج فاابيسي مراقب شي حاجة فنفس الوقت كايسجل ويرسل .....
حتى دخلات لخادمة جارة الطاولة دالعشاء ومشات وليديا حطات فوق الطبلة قدامو وهو شد البيسي وبداو يتعشاو فهدوء .... ماكملاتش زلافتها ودغيا جرات عندها طبسيل دالحامض وبدات كتمصص فيه وتلذذ حتى تونار خسر سيفتو وكمش ملامحو !!!
تونار،: سسسسسس .. شكاديري !!!؛
ليديا : نممممممم ( كتاكل وتشم ) لذييييذ ..
تونار : الحااامض !!! ( مكمش ملامحو جمعات ليه ريقو ففمو )
ليديا : ممممم ... ( كتغزز فالحامضة )
يتبع...
التعليقات
لا توجد تعليقات بعد، كن أول من يعلق.