محتوى القصة
تونار مابغاش يزيد يتجاوب معاها لان فاهم وعارف حالتها ، لا بل هو قاري و دارس هاد الحلات ...
لي الواحد كايكون عندو شي فالداخل ديالو لي هو براسو ماعندوش ليها تفسير ....
كمثال انه تشوف دخان طالع من وراء الجبال ... الدخان شفتيه ولكن شنو كايتحرق ماتقدرش تتحددو ...
هاد النفسية كتجي بعد التراكمات لي فلداخل ديالنا ... لي تقدر تفجرهم فقط شي حاجة بسيييطة كنوم مضطرب او شي كابوس او فقط اكلة تحترقات ... خلاها على خاطرها لان احسن علاج لهاد النفسية هو تقدم لراسك شنو بغات ، واخا صعيب تحدد شنو كتبغي النفس فهاد الحالة لان كايولي كولشي باسل ، مي فحالة ليديا هي عندها رغبة لي كاتحسها مناسبة باش تتخلص من هاد الغمامة الكحلة لي تحطات فوق راسها هاد صباح ....
فمكان آخر ....
تحط طاكسي بيض قدام بيبان مستعمرة أوشن المنسية ، .... خرج منها منير وجبد صاكادو ديالو من الكوفر لبسو فظهرو .... وعلا عينو مع المستعمرة .. وقلبو ضرو ودار غير ضحكة مستهزأة !!! كأن عمر كانت هنا الحياة ؟؟؟ وحقيقة، امتى كانت هنا الحياة ؟؟؟
ضحك ضحكة خارجة بقسوة ....خارجة بحرقة على حال المستعمرة لي تفناو فيها عمامو وباه وجدو .... على المستعمرة لي كانت مخلياهم يحكمو شمال افريقيا ....لي كبر فيها طغيانهم و ترعرع جبرتوهم ...ضحك على الدم لي تسفك هنا وعلى شحال من روح خرجات فالمحمل ....
من ديما منير كايحس بهادشي غااالط .. كايحس بيه مستنقع ، ولكن هو كولشي دايرو ضد فجدو لي دخلو لهاد العالم رغما عليه .. بغا يوريه النسخة لي دار منو ... بغا يوريه نتيجة الاصرار ديالو على منير يشد السلاح ..بغاه يحمل ذنبو طول حياتو ... وديما كايقول ... نهار نقتل ونهار ننصب ونهار نزني ونترمى فحضان الحرام دنوبي كلهم عليك .. لان هاد طريق دخليتيني ليها بزز ...
مكرهش يعاود يحي الحياة فهاد المستعمرة ويخرج عمامو و باه ويرجع كولشي كيكان ... ولكن مايقدر يدير والو الى مكانش اوشن ... لي ماعندو تاشي معلومة عليه اخر مرة سيفط ليه رسالة كايقوليه "بعد من الحرام وماتعدبنيش كتر راه بوحدك لي دنبك باقي تابعني " هنا عرفو غايكون بدا حياة جديدة .... لان كواشي باعو والفلوس ديالهم مشاو للخيريات .. ووهو مزاال مصر يكمل فهاد الطريق غير باش يزيد يعدبو .... خصوصا ملي لقاه دخل عمامو وباه للحبس ومابغاش يدّخل باش يخرجهم ...
عارف المستعمرة تباعت ... عارف النساء والرقبات تطلق سراحهم ... لي معارفش هو علاش جدو دار هاكا ؟ هو كاع معارفو راه كايصارع الموت بوحدو .... !!!
جبد تيليفون صونا طلب يجيبو ليه طموبيل لان جا من المطار غير فطرونسبور فضل انه يكري من الناظور .... وقرب للباب شد فداك الشباك دالبيبان وقلبو كايتقطع على المستعمرة كيف ولات ... الحرام دغيااا كايرشا سبحان الله !!!!!!! دغيا كايبان فيه الصدأ ....
زعزع داك البيبان مابغاوش يتحلو لان مشدودين بسلسلة والقفل وهو باااغي يدخل ..
فور ماجا للمغرب قبل مايقلب على ليديا بغا يجي لدارهم واخا غير يبوس حيوطها ويمشي رغم انو مزال فحيرة واش يبوسها ولا يلعنها !...
طلع فوق الشباك ديال البيبان ونقز نزل الارض كاينفض فحوايجو وبقى كايشوف فالساحة والجرادي لي كولشي ولا خاااالي بحالا سمحو فيه مية عام !!!!!!
كايتمشى وكايضور راسو بحسرة كبيييررررة مزير على سنانو وتايضرب الزطمة بجججهد فالارض على الحرقة لي فقلبو ... تاوصل لبيبان وتسلق فوق واحد القادوس طالع للبالكون ديال البيت ديالو .....
تلاح للبالكون تاولاو يديه مجروحين مسح دمهم غير فسروالو ونفضهم وبانليه الباب دزاج دالبالكون مشدودة حاول يدير يديه يشوف واش بيتو باقي مفرش مي الريدو ماخلاه يشوف والو ....
هو يضرب داك زاج ركلة وحدة شخشخو ... و دوز الريدو ودخل .... لقى بيتو تمامااااا كيف خلاه ... فقط الغبرة لي متراكمة عليه والشمس ملي دخلات البيت ولات فيه ضبااابة دالغبرة ، داخل كاينش بيدو على وجهو مصغر عينو .... كولشي كيف خلاه تاحاجة مامبدلة فراشو .. مكتبتو ... بيرو ديالو ... بلاكارو .. شبكة دكرة السلة .... العلاقة لي معلقين فيها السوارت ددطموبيلاتو لي كانو عندو ... غير الفيراري ، مرسيديس، لامبرجيني ...
رجليه فشولو عليه ملي تفكر الحياة لي دوز فهاد البيت وطاح كالس فالارض حاط راسو على الحيط عاض على شفتوو ... وجبد كااارو شعل وبدا يكمي ودموع فعينيه وكاينفت معاه مراااارة الاشياء لس كانت ليك ومابقاتش ....والغريب انه ولا ضااااحك .. كايمي ضاحك كانو كايتشفى فراسو القديم .. فمنير الطاغي لي كان كايضن جبروتو عمرو يسالي وطغيانو معندوش حد !! كايضحك على رااااسو ويتشفى فرااسو بمراااارة وحرقة ...
حتى قربو لاقليم الدريوش ... عاد تكلمات ليديا ..
ليديا : بغيت ليصونص ... متنساش تشريه
تونار : ( كايشوف لطريق وجاوبها ببرود وبساطة ) باغيا تحرقيها
ليديا : باغيا نمحي ليها الاثر ....
تونار : خصك تمحي ليها الاثر هنا ( ضرب ليها فدماغها ) اما على الارض ماعندها باش تنفعك
ليديا : ولكن الامر غايكون مسلي بنسبة ليا ...
تونار : متأكدة !!
ليديا : على يقين ..
تونار دار سينيال ودخل لبومبة .... خدا ليها ليصانص ، هو نهار شرا داك المستعمرة شراها خصيصا باش هي تخرج فيها غليلها .... وكان كايتمناها تحرقها ، عارف شحال غايكون زوين داك الشعور ، كايشبه للانتقام المدمر ...
دار ليصونص لور وفالكوفر ... ودخل لطموبيل ولاح عليها بريكة شداتها
تونار : يلاه تحرقي كاع لي يطير عليك النعاس
ديمارا طموبيل وهي ملامحها جامدين تاستوعبات جملتو مزيان عاد ضحكات ... ضحكة كلها مكر وعينيها كلهم شر ....
مسافة حتى وصلو لمستعمرة وباركا طموبيل و هي تنفسات مزيان ونزلات كاتشوف معاها ... وهو تكا على طموبيل مربع يديه
تونار : نعاونك ...
ليديا : حل ليا غير لباب ....
رما ليها السوارت ومشات تحل داك القفل لي بقات شحال شاداه بين يديها فللخر فتحات لباب وشافت موراها لعندو بمعنى اجي .. وهو مسايراها باغيها غير تششافى ...
شدات فدارعو وداخلة مبتسمة كأنها كاتسارى فشي جردة ...
ليديا : شفتي لهييييه !!! تما كانو عندنا الخيول ... ملي كنت كندير شي حاجة لداك اوشن ... كان كايربطني حداهم .... باش زعما يباتو كايرفسو فيا .... معارفش على الخيل الاصيل كايعرف المعدن الاصيل وكيستحيى يقرب ليه ... معارفش الى كانو فرحانين حيت وحدة بحالي دخلات عندهم وحسن ليهم الشرف ... ( تونار كايسمع ليها ولا كايعشق غرورها ) شتي فهاد المستعمرة قبل مايضربها الخلا .... كان كولشي عندو تمن غااااالي .. عرفتي صالون عندنا شحال كان ساوي ؟ عرفتي هاد الخصة شحال كانت ساوية .. عرفتي العيلات هنايا ثمنهم قداش ؟؟؟ عرفتي جدي شحال كان ساوي ؟ كوولشي كان عندو ثمن ... كولشي كان داير راسو ثمن غاااااالي بزاف .... الا أنا ... ( شاف عندها مستغرب حيت مستحيل ترخص راسها كايتسناها اش تقول ) عرفتي علاش معنديش ثمن غالي ؟... حيت انا عمرني مكنت للبيع ..
ابتسمات ليه وطلقات منو كاتمشى وهو تابعها ...
ليديا : تاواحد ... تا واحد فهاد الدار مكنت كنحس من جيهتو بشي حاجة ... إلا ماما ... مغانقولكش كنت كانبغيها .. ومغانقولش كنت كنكرها .. انا ماعرفتش راسي شنو كنت كنحس من جيهتها... شعور غريب ملي كنتفكر دمها فدمي ... غلاوة دمي من دمها ... ولكن كنت مقلقة منها بزاااف وباقية مقلقة .... مكنتش كنبغي الضعف ديالها ....ولا الدل لي كانت مستحملاه ... كون كانت الام كانختاروها ، مكنتش غانختارها ... كنت غانختار الام لي تشرب دمهم ... لي تملح ليهم العشا بالسم وتصبحهم كلهم ميتين وتهزني وتهرب ..... كنت كنفضل الام لي تحرق العالم على ود كرامتها ....داكشي علاش انا أم ديال راسي واب ديال راسي ..... انا كولشي ديال راسي ...
تونار : لنفترض دابا كتسمعك .... اش تقولي ليها
ليديا : في حاااالة ما دخلت للجنة وتلاقيتك .... ديري راسك ماعرفتنيش ، مابغيتش حتى فحياتي الاخرى تكوني عندي ام ضعيفة رضات بمصير يتباعو بناتها بأزهد الاثمان .....
تونار : ماتبغيش تمشي تحرري خواتاتك ؟؟
ليديا : لا .... هوما رضاو و راضيين .. كون كنت كانشوفهم تقاتلو ... يستاهلو يتحررو .... اما لي كايلبس فيديه مينوط ديال الدهب ويبدا يتباهى بيع قدام المسجونين بحالو بداك المينوط شحال ساوي .... يستاهل الحبس مدى الحياة ...
تونار : ونت كتحسي براسك حرة دابا ...
ليديا : كتعرف خيوط العنكبوت ! ملي كايشدو وسطهم شي فراشة ... وكتبدا تتحارب وتتفك ... وملي كتفك وطير كاتلقى باقي جناحها كايعكلوها فالسما ... حيت باقين الخيوط لاسقين فيها .... باقين لاسقين فيا جوج خيوط ....هاد المستعمرة .. و أوشن ....
زادت قدامو كاضور فالمستعمرة و هو موراها مسايرها لان سبق وتجول فهاد المستعمرة كيف بغا ... حتى ضارت عندو ...
ليديا : جيب ليا ليصونص
تونار : ودعيها مزال ... حيت مغاتشوفيش هاد المنظر مرة اخرى ...
ليديا : ودعتها نهار خرجت منها .... ودعتها نهار كانت بالروح مادابا هادي غير جثة
تونار : مغاطلعيش لبيتك ؟
ليديا : ( بقات شحال ساكتة وضورات راسها بلا ) لا
تونار : ماتشوفيهش لاخر مرة !!
ليديا : كانفضل نشوفو كايتحرق .... منظرو غايكون على الاقل حسن من اني نشوفو بااااااارد...حيت عمر بيتي مكان بارد مانستحملش نشوفو دابا بارد ... خليني نشوفو شااااعل مضوي كيف ملي كنت فيه ....
تونار حرك ليها راسو مطول فيها الشوفة وتنهد مشا للطموبيل وهي تجمعو ملامحها للجدية ... وعينيها بحالا بغاو يبكيو ... هادي غير بنت 18 عام .. ماشي هادشي لي هازاه كبير عليها بزااااف !!! لي قال العمر غير مجرد رقم ماعمرو كان كدااب !!
مشا لكوفر وهز ليصونص كايهز ويحط فالارض ... وهي جاتت عندو بزربة هربانة من مشاعر التردد والحزن ...
وهزات وحدة ومشات كتخويها وترش فكل بلاصة وهو ستفهم ليها كانو 6 ديال 5لتر ...
كضور بصمت وترش فكل البلايص ودورات الدار كلها بليصانص ورشات على الحيوط والبيبان ... وجردة تاهي .... كترش ومغزفة ومزيرة على سنانها وتونار متكي على طموبيلتو ومربع يديه كايشوف فيها غير من بعيد ...
اما مونير مكمش فوق سريرو بصباطو حتى داه النعاس ... جامع رجليه بوضعية جنين فكرش مو .. ومعنق مخدة والكاروات مزلعين حداه ...
ليديا سقااات ارض المستعرة كلها بالبنزين ...
تخلطات ريحة الدم وريحة ليصانص تاعطاو واحد الريحة غريييييبة كتشبه لريحة الجحيم ....
وخرجات بشوية عليها كتمشى وفقلبها كاين صراع وفعلقها كاين اليقين ... و متأكدة من قرارها فدماغها ..اما قلبها باغي يحن فهاد الحيوط لي كانو آخر حاجة بقات ليها من ماضيها ....
وصلات لباب لكبيرة وكومات دوك القراعي .... وجبدات البريكة وضارت عندو هو لي غير كايشوف فيها ...
ليديا : ( بضحكة جنون ) هاكا حررررق داركم يااااك هممم
تونار زير على عينو .. وقرب عندها جبدها من يديها بعدو شوية باش ملي تلوح اابريكة مايقيسها والو لان واضح داك القراعي غاينفاجرو ....
تونار : شععلي ....
ليديا : ( كتنهج شاعلة البريكة ) بغيت هنا تشعل عافية .. و عندنا تطفى عافية ....( بعينين لامعين ) هادي هدية لكاااااع ااارواح لي تزهقااات هنايا .....
لاحت دااك البريكة فوق داك القراعي غير انفجرو الارض تهزات بيهم وهو جرها بعدها .... والالسنة دالعاافية شعلووو بسرررعة بحاالا كانو عطشاااانييين ...بحالا ماشي غير البنزين لي شعلهم ... العافية براااسها كانت كتسنى غير امتى تشعل فهاد لارض وتمحي ليها الاثر وتنتقم لجميع الابرياء واارواح لي ماتت ولي تسجنات ولجميع الدمعات لي نزلات .... وليديا كاتشوف ولون العافية تصبغ فيعينيها وضااااحكة و بدات كتقرب وهو مراقبها بحذر غادي موراها بشوية عارفها متهورة ....تاوقفات قدام لباب لي كاتحررق و دارت صبعها بزربة تاخطفها توونار من اللور وبعدها شد ليها على صبعها لي حرقاتو وكضحك
تونار : ( شد على صبعها ) اش كديييييري مريضة ولا مالك
ليديا : ( كاتشوف فالعافية قدامها وسلتات منو يديها كاتشوف لصبعها حمرررر تحرق شوية ) بغييييت غير ذكرى ...غير وشام حلال من بلاصة كلها حرام .. ( خسرات ملامحها ) كتتتتحرق ...
تونار تنهد ومشا لطوموبيل وهي كتهضر
ليديا : شوووف قداش الحرقة وشحال كتحرق ....كييفاش كنتي صااابر نتا لي تحرقتي كااامل !!!!! ....
تونار كان حل لباب دطموبيل كايجبد من الپوش بومادا ... سمعها وكرز على داك البومادا بين يديه ... لانه اصلا غير كايشوف شي حد تحرق كايتعاود عليه المشهد ... ولتخ لباب دطموبيل واتجه عندها نتر يدها لعندو
تونار : نقصي شوية من الهضرة غايكون حسن
ليديا : ( عاطياه صبعها وكاتشوف مع الدار كاتحرق و الالسنة داللهيب طالعة مع الحيوط ) كولشي غاااايكون حسن دابا .. فففف اح بشوووية ...
دار ليها بوماضة وهي كاتشوف فالدار لي ولات كولها شااااعلة كتحرق وصوت ديال الحريق كايتسمع ... وجرها بعدو من الصهد وكايشوفو غير من بعيد
ليديا : عرفتي .... كنسمع صوت د اوشن كايستنجد لداااخل ( كضحك وتهضر ) كنسمع صوت عكازو .. وسلهامو ... وتاداك السنة دالنقرة لي كانت عندو .. فففف شحال كنت كنكرهها ... كانسمع كولشي كايستنجد ويتحرق .... كانسمع صوت الخيوط لي كنت نتعلق فيهم ... صوت لبنى .. صوت رالة .. صوت القاصر لي تزوجها بابا ... كنسمع تاصوت كاع الناس لي ماتو هنا ...
تونار : رتاحيتي شوية دابا!!!
ليديا : شوية ؟؟ هههه بزااااف ... البيرو داوشن غايكون تحرق كامل هعههه تخيل الكرسي ديالو غايولي رماد ؟؟؟؟؟ الديبو لي كان فيه الحشيش كوولشي غايولي رماد كولشي غايولي كحل...
تونار : ملي رتاحيتي .... يلاه نمشيو منهنا قبل مايعيط شي واحد للبوليس
ليديا : لا ... ياك الدار دارنا .. نديرو لي بغينا ...
تونار : كنضن هادشي مخالف فالقانون دالمغرب مافيا لي يجري بيك فالمحاكم .... ركبي ( حل لباب ددطموبيل )
ليديا : مزال ... بقات ليا امنية اخرى ... ملي عقلت على راسي ونا كنتمنى امتى نحرق المستعمرة و من رمادها نصنع كحل نكحل بيه عينيا ونتزين بيه ... بغيت نبين لاوشن ان المستعمرة لي بينيتها باش تدفن فيها جمالنا ... انا برمادها غانتزين ..... غااااناخد بزاف .. وغانبعيو .. غانكتب عليه كُحل من الجحيم .... وغانبيعو فابور ... عرفتي علاش !! باش مانخليش المستعمرة مزااال تخلي لبنات يدفعو ثمن جمالهم ...
المستعمرة لي غصبات شحال من انثى ... بغيت الجميع بتزين برمادها ...
جرها تونار من يديها بعدها من تما غادي بيها لطوموبيل وهي كتنتر مزال باغا تبقى ، وهو خايف يدوز شي حد ويتحطو فمشكل ، واخا المستعمرة كاينة فبلاصة بعيييدة على الناس و الطريق ماكايجي لتما غير لي باغي يجي ليها ....
دارها فطوموبيل بزز وشد عليها لباب و التفت للمستعمرة .. كانت كلها من الاسفل مشتعلة والعافية تمشات و ساحت بسرعة كبيرة .. و ضايرة بالدار كاملة ... يلاه غايركب هو يعلي عينيه للفوق بانليه شاب فالبالكون كايطل وواضح شحال مخلوع و كايقلب منين ينقز والدخان خانقو ....
جمع تونار ملامحو وزير على سنانو هادشي مكانش متوقعو شكون هاداك لي تما ... ومشا كايجري كايقرب لبيبان لمستعمرة وصهد العافية فوجهو ..
أما منير كان ناعس حتى تعمر ليه لبيت بالدخاان وناض مخنوق كايسعل ويكح وكايسمع صوت الاحتراق دالعشب لي فالجردة.. ومشا كايجري طل من البالكون هو يتصدم ، فهاد اللحظة مافكر لا فالمستعمرة لي كااضيع كلها لا فشكون شعل العافية ... كايفكر غير كيفاش ينجى .... مشا حل لباب بركالي هرسها وهبط كايجري لباب لتحت كايهرس الزاج ديالها مخلوع .. غير حلها بانليه حتاتما العافية ماعندو كاع منين يدوز ... ورجع طلع كايجري للبالكون يقلب منين يهرب ولا منين ينقز حتى شافو تونار ...
تونار كايقلب بعينيه كيف يدير يخرج داك الشخص فنفس الوقت كايتسائل شكون هاداك وااش جابوو لتما وشكون دخلو ..
منير غير شاف تونار رجع ليه شوية دالامل وبدا يهضر معاه بالغوات وبجججهد باش يسمعوو
منير : سلووم .. سلوووووم
تونار كايقلب مزير على سنانو وليديا ماعرفاتو فين مشا ومكايبان ليها والو لانو دارها فطوموبيل عيات تتعافر تخرج والو شادها عليها وكتعافر تقلب بعنيها غير فين مشا كايجري واش واقع.. و منير كاغوت ليه بسلوم وكايقول فين غايدير ليه هاد سلوم ؟؟؟ منير بالتلفة مابقى عارف اش يدير نزل عليه الغباء لدرجة لباب خلاها محلولة لتحت مهرسة ......
تونار فين مابغى يزطم كاينة العافية ... ضايرة كيف شي سلسلة على الدار وتالما لي غايطفي هادشي خاصو يكون دالااطفاء الان الحريق قوي وشد فالعشب بزاف وماشي وكااايقوااا ..... ومنير كايحك فيديييه و كايتسنى من تونار يدير شي حاجة لانو واضح باغي ينقدو ...وعندو امل غير فيه لان ماعندو تاشي حل آخر و بقوة التلفة والدهشة نسى كاع واش تاهو عندو تيليفون يصوني على الاطفاء ...
بانت لتونار شجرة (سيپريس ) طويييييييلة ... وبقى كايميز غير بعينيه وهي تبانليه راه الى مااالت غاتجي نيييشان على لبالكون .... خصو غير يعرف كيف يدير يدوز ليها لانها فالجردة لداخل والعافية ضااايرة .. وهو اصلا منظر هاد العافية هاكا والشخص لي كايستنجد لداخل كاااايخنقو .. بقااا كايرخف الصداااايف و حس بالتتفس تخنق فيه ... هاد المنضر كايحس براااسو كايعيشو للمرة التانية ... كايفكر دابا غير يخرج هاداك لسيد من تما ومايتولدش تونار آخر ...
علا عينيه للحيط لي ضاير بالمستعمرة هو يبعد ششوية ورجع انطلق كايجري حتى طلع فوقو كايتسلقو طاح للمرة الاولى وعاود الكرّة ومنير كايشوووف واخا كايبان ليه بعييييد ولكن كايبان ليه اش كايدير ... بقى كايعاود المحاولات وكايحس براسو تونار اخر لي تما وسط داك العافية و كايحس براسو نهار كان كايستنجد شي حد ملي مشا صاحبو لي عااونو وبقى بوحدو حتى تحرق ...
فالمرة السادسة نجح وتسلق داك الحيط وقف فوقو وكايشوف لداك شجرة لي تحتو غير العافية ... سرط ريقو مزيان كايحاول ينقز و منير حل فمو
منير : لاااا لااااااا لااااااا اش،كاااااادييير ( كايضور راسو ) لا لا لااااااا لااااا
نقز تووونار وجا فالشجرة نيشان شد فيها كاينهج ومنير حال فمو مابقاش خيفان على راسو كتر مخاف على هاد السيد لي كايبانليه باغي يعاونو ....
بدا كايحاول تونار يهبط برجليه ويديه مع السااق ديال داك الشجرة وحارص باش مايصولش العافية لي بدات كاتطلع معاها ... و منير حال عينيه كايشوفو اش كايحاول يدير ... شد بيد وطلع يد لفمو كايحاول يحل الساعة بسنانو حيت هي لي داير فيها الليزر لي مكيفارقوش لانه بقوة الاطهزة ولكوفرات ولابواب لي كايتعامل معاهم كلهم بالباسوورد وهو شخص سريع الحفض وسريع النسيان ، الليزر هو لي كايحل ليه داكشي الى نسى الكود ومكيفارقوش ، لليزر متطور كاثقب الحديد فما بالك الخشب ...
عمرو ظن غاينفعو هاد الليزر فانقاد شخص من الحريق .. فك الساعة وشدها بسنانو وعاد رجع شدها بيدو قالبها جيهة د الليزر ... وبدا كايحااول يحرق بيها الشجرة من تححت .. ووجهو فصهد العافية مكمش عليه ومغمض على عينييه .. و منير خايف تطلع معاه العافية الى طاااح راه غايجي وسطها مباااااشرة ..
اما ليديا فالسيارة قاتلها الفضوووول فين هو تونار وعلاش خلاها هنا ومشا بززربة وكان مخلوع ؟ شنو شااف .... لان ليديا مكايبانش ليها لبالكون لي فيه منير بسبب سقف الطموبيل
تونار الامر خداا منو ووقت بسبب قوة خشب الساااق القوي ... داك النجارة دالتقطيع كاتلاح كلها فعينييه ووجهو وهو مزير علييييهم خصو غير دغيا تقطع داك الشجججرة ......ومنير خاااايف عليه كتر .
بدات الشجرة كااتميل عاد منير فهم اش كايدير وبانليه غاطيح جيهتو .... و مشا هرب دخل لبيت وتونار غي بانتليه كاتميل بيه خلا داك الليزر تمااا فالشقة لي تقطعات بزااف خلاها تكمّل وصوت دالتقطيع مسموع مع صوت حريق الحشائش ... ووقف تاني نقققز للحيط تاكان غايطيح وشد بيديييه وقف كايننهج .. وبقا واقف تما كايتسناها تطيح وصدرو كولو كايطلع ويهبط ...
ربع ساااعة ووهو واقف كايتسنى والعافية بدات كتمكن وتقوا وتنتشر وشدات فالديبو كامل ودازت للدار لي خلا منير بابها محلولة .... ربع ساعة عاد طاااحت الشجرة ديريكت للبالكون لي هرسات فيه النص ... عاااد تونار تنفس و عهبط من الحيط نقز للارض .. ماشي كايفض يديه و على المونطو ديالو وكاينهج ومشا جيهة الطوموبيل ركب و انهالت عليه ليديا بالاسئلة واحد تلو الاخر ...وهو مكيسمع لوالو باقي كايحاول يرد غير فانفاسو و كسيرا بجهد يمشي قبل ماينزل داك الشخص ، مابغى يخلي حتى شي اثر ديالهم .. ومشاااا مكسيري فالطريق خصوصا ملي شاف طموبيل اخرى طالعة لتما ...حمد الله لي ماجاتش وهوما تما ...
منير كيف طاحت الشحرة خرج وحاول يتمشى عليها بحال شي جسر مائل .... تاقرب يوصل لاسسفل هو ينقزز للحيييط تماما كيف دار تونار ... عاد هو كانت عندو اسهل لان تونار القطن لي كان فالحسم ديالو كان مامعاونوش ...
ونزل كايجري يقلب عليه ولقا والو !!
كايشوف يمين و شمااال بدون فائدة كاينهج ويسول راسو فين مشاا هدا وشكون هو،؟؟؟؟
واش هو لي شعل العااافية ؟؟ ماايمكنش يشعل هادشي كامل بوجدو ؟؟؟؟؟منييير اخيرا تفكر التيليفون فجيبو وهو يضرب على راسو على الكلاخ لي نزل عليه ، قبح الله الخووف
وجبد تيليفون عيط على الاطفاء حتى بانت ليه الطوموبيل لي طلب وصلاتو وهو غير شاد على راسو كايشوف مع اسوار المشتعمرة لي طلعات معاهم العافية ... وكاييييتحسسر عليها و يسب على هاد الاطفاء لي تعطلو ...
وكلس مربع يدو على الطموبيل عاض على شفتو كايشوف بحسرة فألسنة اللهيب لي كتاكل فدارهم و السيد لي جاب ليه طموبيل تاهو كايشوف مفاهم والة كايسول ااش واقع ....
تفكر الشخص لي عاونو وفجأة جا لبالو مشهد الحرييييق دالمستعمرة لي حرق جدو و الطريقة باش كات كايعاون صااااحبو لي عمرو خرج ليه من بالو .. نفس داك التوتر والخلعة والزربة والتضحية نفس داكشي شافو كايتعاود وكايحاول يركز واش يحدد ملامحو ولكن بسبب اابعد مكاتش كايشوفو مزيان فوجهو لي عقل هو شخص طويييل وكان لابس غير الاسود ..... ورجع ضرب رجليه مع الارض
منير : فييييييين هااااد ل******* فييييييين ....واش تايمووووت بنادم عاد يعتقوووووو ؟؟؟
تونار وصل لطريق الرئيسي عاد بدا يهدا بالو شوية هو يبانليه كاميو دالاطفاء طالع لداك لبلاصة و ليديا كاتشوف بعينيها عارفاتهم بومبياا
ليديا : ماشييين لتما ؟؟ علاش نتاا مكتهضرش معايا شرح ليا اش واقع ، ظالك هاكا وفييييين كنتي ؟؟ ..... فيت مشيتي وخليتيني غانحمااااق
تونار : ( كاايحاول يقاد انفاسو باش يتكلم ) كان شي واحد لداخل
ليديا : شنوووو ؟؟؟؟؟
تونار : ماعرفتش منين دخل ... كان لداخل ...
ليديا : شكوون هدا ؟ ونتا شنو كنت كادير اش داكشي كنت كنسمع بحال شي حكااااان و رابت شي حاااجة ؟؟
تونار : درنا ليه طريق منين يخرج
ليديا : وشكووووون هذا منين دخل .. يااك لباب كنتي شادها ؟؟ شااافنا اذن ؟؟؟؟
تونار : ( بعصبية وزعفة ) واااش كاتسوليني انا بنتلييك عارف !! راه بحالي بحالك .... لي عارف هو داك السيد كان غايموت محروق تما وحتى واحد ماغايجيب خبارو
ليديا : ويمووووووت ... تلقاه هو لي عيييط دابا للبومبية تفووووو.. تعتق داك الدار نرجع نحرقها بالقنابل هاد المرة
تونار : بغيت غي نعرررف شكون هداك ..
ليديا : كيف كايبان وصفو لياااا ....ياكما منعندنا
توناار : مانعرف فين حققت فيه انا العافية ماكان كايبان لياا والو .... ( كايرد شعرو لور ويصوط ) ففففففف غاااليتبعك كنا غانقتلو روح ...
ليديا،: واش كاين لي كايدخل لدار مهجورة غير هاكاك !! هدا غايكون شي حد كان خدام تما ولا منعرف حيت الرجاال ديالنا كلهم فالحبس ....يكون منير ؟؟؟؟
تونار : ماعرفتش مااعرفتش آلييييديا
ليديا : ( كاتشوف لطريق ) داباااا فييين ماشي ..
ماجات تكملها تاكان شد فراان وشد لييمين دخل لجنب الطريق وووقف الطموبيل وهبط راسو على الفولون كاينهج وليديا بقات غير كاتشوف معاه ..
حس انو داتو سخناااات ، حس براسو فداك البلاصة وكولشي من الماضي فاق عليه ... علاا راسو للفوق و وعيينيه تصبغو بالدم .... وليديا واقلة فهمات اشنو واقع عندو لداخل .... وحطات يديها عليه
ليديا : توناار راه مكناش عارفين شي حد لداخل .... حنا راه ماغانقتلوش روووح .... ياك دابا هو بيخير وعيط لبيوميبا كاع مالك هاز الهم ؟
تونار : ( علا راسو لفوق كايسرط ريقو ) كان مشا داك السسيد آليديا كان مشا
ليديا : مشاااات عائلة كاملة ... مشات عائلة آتوونار .... بسبب داك الدار ومواليها راه مشات عائلة .. مشا نسل على قدو ماشي غير شخص واحد ... الى كان هاداك واحد منا وتحرق تما والله مايبقى فيا ....،هداك غايكون غير منير ولا شي واح. خدام تما ماعندك ماتگوليا ...
تونار : ( شد بيديه بجوج على راسو ) ماعرفتتش علاش تشتت هاكا فواحد اللحظة كايبانلي غير الضلام قدامي ....
ليديا : ( بعد صمت ) تفكرتي رااسك
تونار : ( تكا على الكوسان كايشوف للفوق ) كيفاش داك جدك كاينعس بليل غير گولي ليا ...
ليديا : الضمير راه نعمة .... وهو راه ماعندوش ...
تونار زير على سنانو هو كايتخيل المشهد د أوشن كايحرق فدارهم ...
قلبو تززيرر والتنفس ضياق عليه ، وسنانو كايتحكو مع بعضهم وديمارا طوموبييل راجع مارشاريااار و ليديا خلعها بهاد التغير لي دار فجأة !! وهاد السرعة لي طلعات فالكونتور ... تادخل لواحد مفترق الطرق وتبع واحد الطريق .... وهي كاترمش بيعينيها فين ماشي هادا !! وكاتسولوو فين ماشييين ومكيجابهاش فعينيه غير اوشن يشدووو بين يديه ويفدي فيييه كووولشي وليوم تطلع رحوو وتطوا صفحتو ... مغااايبقاش يتنسى مزال ... مقادش يزيد يأجل ... واوشن جنرة كتحرق فقلبو كل نهار ....
شدو طريق الرباط وليديا حتى قراتها فالپانو عاد فهمات فين ماشيين وعجبها الحال ، لا بل ضحكاااات بغااات تمشي وكانت خايفة مايديهاش او يغفلها ويمشي بوحدو .. قالت أخيييرا اللقااااء المنتظر ، اخيرا تشوفو طااايح اخيرااا غاااتشفى فيه وتوقفو على كاع كلامها نهار كانت تتعاند معاه وتقوليه بفقصتي غاااتموت ...وبسبااابي انا نتا غااتموت ....بقات توقف حداه ووتضحك وتقهرو بالشفاية .....
مدة ديال الطريق تادخلو الطريق السيار، .. ليديا فنص الطريق نعسات وهو شرارة الحقد فعينيه غير مكتزيد تبان كتر وسنانو بقاو مزييرين .. تاضلام الحال عاد دخل للرباط ...
ليديا غير حسات بالطموبيل وقفات ناضت بزربة مخطوفة ... وهي تلقى راسها قدام مبنى كبييير مكتوبة عليه مصحة ....
بدون شعور ضحكات اما تونار كايشوووف مكره و كايفكر كيف غايدير يتحكم فرراااسو ملي يشوفو لاول مرة ...ملي يتلاقا بالشخص لي قتل ليه النسل ديالو كااااامل !!!! كيفاش غايدير يصبر مايجبدش دماغو بين يديه ؟؟؟؟ ...مازفش بيه من سطح هاد المصحة يتشتت فالارض طرااف ... ؟؟؟ ماجبدش مصاارنو ويحرقهم .... كيفاش غايتحكم فعاافيتو المشعولة فللداخل ديالو !!! .... كيفاش غاادير !!!!
ليديا فرحانة حلات لباب وهو تبعها نزل وكايشوفوو مع داك المصحة ..
تونار تنفس الصعداء ودخل مهبط الكاسكيط شوية على عينيه وطلع الكاشكول ...وكيف العادة لي دازز حداه كايتبعو بعينيه ويشوف قيه ... وهي موراه حتى شافت الريسبيسيون " الاستقبال " لي قرات السمية ديالو لفوق وتقدمات وهو تاجه لسانسور
ليديا : ( بالانجليزية ) بغيت نسولك
الموظفة : ( بالفرنسية ) فرنسي عفاك
ليديا : شومبغ ديال ميمون شحال... كايعيطو ليه أوشن ماعرفتش بضبط كنتيتو ... ريفي ..
الموظفة : ماعرفتش امادموزيل علامن كاتسولي !!؛ خصني الاسم الكامل ، راه بزاف ديال ميمون هنايا ....
ليديا ضارت لجنب باليهاااا تونار ماشي ومشات كاتجري تبعاتو طلعات معاه فااسانسور ... تشد عليهم وهو واقف داير يدو فالجيااااب وعلى ملامحو الهدووووووء ...
ليديا : سولت عليه فالريسبسيون بصح مكنعرفش كنيتنا .. بدات كاااتعوج عليا تما قالك معارفاش هي خصها الكنية
تحل السانسور بدون مايجاوبها وهي غير تابعاه .. بقى كايقلب على الجناح داصحاب السرطان حتى لقاه .. وبقى كايحل كل شومبر ، وتاهي كتحل كايقلبو ، شحال هو كايأجل ودابا لي لقا راسو قريب مابقااش عندو غراام ديال الصبر خاصو غيرر يشدو دغيا .. باغي جواااب وواحد يسمعو منو قبل مايزهق روحو هو "علااش حرررقهم " ....وهو نفس سؤال لي كايضور فبالو حياتو كاااملة .. علاااااش .. علاش يحرمو من عائلتو ومن جسدو .... علاش هادشي وشنو ربح منو !!!
ليديا فالصف لي مقااابل معاه كااتحل تااهي ولي طلات عليهم كاتعتدر وتخرج ..
تابدا تيليفزون كايفيفري فجبيو لور ، وجبدو باش يطفيه لان ماشي وقتو ... هو يلقى رقم الدار .. جاوب بزربة لايكون الامر كايخص جدو لي نساه ليوم وتبع انتقامو ... جاوب وباقي كايحل فالشومبرات
تونار : مايندين ( اش كاين )
تونار بمجرد ماسمع الجواب ووقف مصدوووم ويديه ورجليه فشلو عليه وليديا تقلبات لعندو ... اما السيد لي فتح عليه الشومبر مصغر عينو فيه وكايسول راسو شكون هذا !!! حتى وسع عينيه بكل حججمهم وهو كايشووف لبنت لي جات عندو .... تونار طاح تيليفون من يديه وخرج كااايجري و لبديا هزاتو دارتو فودنيها
ايطو : ( بالبكا ) تووونار ... جري اولدي عفااااك جري راااه ماعرفنا مانديرو جدك راه كاااايخرج ليه روح .. جررري ياولدي جججري راه كايعيط غي عليييك ، جري تلحق عليه
ليديا دارت يديها على فمها واوشن شافها والتنفس تقطع فيه .. كايستنجد ويضررب بيديه فالبوطون لي يصوني على الممرضات يعتقوووه .. كان نحييييف وقرع ونقطة ددالدم مافيهش .. ليديا تبعات تونار كاتجري .. ولي جاو يشوفوه .. ماشافوهش ولكن هو شااافهم ..
الممرضات دخلو كايجريو دارو ليه الاكسيطين .. الصدمة ديال يشووف ليديا حية قداامو ماتحملهاش ..
ومكدباتش ليديا ملي قالت ... " بسبااابي غاتموت وبسبب فقصتي "
فمنزل المامون ...
ايطو عند راسو كاتبكي وكولشي واااقفين عند راسو وهي شادة فيديه
ايطو : لحااج . شد فراااسك الحاااج... غير شوية هاااهو دابا يييجي .. راه قبييييلة عيطتلو دابا غيكون قرب يوووصل شد فرااااسك شوية
المامون : ( صفاار بزاف وكايشوف غير فالسقف والهضرة بسيف كايخرجها ) ت ت تو نا ر
ايطو : غااااايجي الحاج غايجي .... وغاااتشوييينا يالحاج ( كاتبكي) ولمن بااغي تخليه لمن . لمن باااغي تخليييييه غااتخلينا كاع يتامى
المامون : ت .. و نااار
ايطو : عااودو عااااودو عييطو ليه شوفو فينووو .. شد فراااسك الحاااج شد فراسك هاهو قرب يجي
نور : كانصووووني مكايجاوبش يمكن فالطريق ... عمي الحاااج غيير صبببر ( كلسات حداه ) مساااخينش بيك اعمي غير قالوهاليا جيت كاانجري هادي غي انا اماا علم الله تونار كيغايكون .. صبر عافاااك ....
ايطو : اوييييلي واش باقين واقفين ! عييييطو لفقييييه يجي يقرا عليه شوية دالقرآن ... طلقو ااقرآن ياك عندكم تيليفونات .. ( كاتشوف فيه هو لي عينيه تقلبو للسقف ) نزيدك شوية دالما ها ؟؟؟ ...لاكتسمعني غمض غير عينيك ...( مدات يديها للممرضة ) عطيني داك الكااااس .... الله يااااالحاااج الله ( شداتو كان كاس فيه معلقة كتعمرها و نور كتحل شوية فمو وكايخويو ليه غير بالقطرات ) سررط ... حاول تسسرط ... ياااااربي ولساانو طاح وتونار موحال يخخلط عليه
حكيمة : ( بالحس ) هضضري بششوية راه كااايسمع
نورة : انا غانخرج نعيط على الفقيه ....
نور : فييييين تعطل تووونار فين ...( كاتشوف لساعة كانت طناش دليل ) عنداك غايكون دار شي كسيدة
المامون تحلو عينيه وحكيمة قرصاتها و نوضتها
حكيمة : رااااه كااايسمع .. لا الحاج متخافش دابا وهووووو جا ان شاء الله غييير صبر شوووية صبر ..
ممرضة كاتشوف فيه بيأس ....
نور : ( بالحس ) واش منهزوش لطبيب حسن
ممرضة : ( بالحس ) اش غايديرو ليه ؟ سيد راه كاايموت مسكين .... تلقى روح قابطة فيه غير يوصل عليه حفيدو ...
نور : ( شادة على قلبها ) الله ياااااربي الله مااااسخيناش بيه مسكييييين .. نااااااري اش غايطرا فتوونار
ايطو : ( شادة على يديه وكتبكي ) لمن غاااااتخلينا ياالحاج لمن ... ولمن غاااانشكي انا لمن ... لمن نخوي همي
المامون،: ( عينيه فالسقف ) ا .. ا ايطو
اييطو : هاانا هاانا معاك هنا
المامون : ت .. ت .. تهلا ي ... ف ف ت تونار
ايطو : يالحااج وكاتوصي على هادشي .... واش هادشي فيه الوصااااية ...
المامون،: ح حح حكي م ة
حكيمة،: ( كلسات حداه ) هااانا حداك الحاج
المامون : ت ت تهلااي .. ف فبنات تك .. و و ر رزقي .. ر رزقكوم
حكيمة : غير رتاح غير رتاح الحاج . وشد شوية فرااااسك ...
الماموز،: و .. و ول. ل لي د يا .. ت ته تهلاو .. ف فيها
ايطو : وغااااارتاح وماتقويش على راسك رتااااح الله يعطيك الستر ..
المامون،: ا اي طو .. د د .. د داك ل ... ل لب لبنت ر . راها . م مز مزيانة .... غ غير .. ت تتهل او .... ت ته تهلاو .. ف فبع بعضيا ياتكم
نور : صوت شي طمووبيل ؟؟ تونار هدا لا ..
مشات كتجري طلاات من سرجم لقاتو لمحامي ..
جا تاهو دخل عندو ... ومألم من جيهتو و المامون غير الضلام فعينيه كايسمع و كيحس ولكن روح قاااابطة غير شوية .. روح كتساين تونار ....كاتسنى الوصاية للخرة باش تموت مرتاحة
بقاو عند راسو تاجا الفقيه وبدا يقرا عليه القرآن هوما كلهم كايبكيو .. تامن حكيمة ونورة لي كانو طامعين غير فالفلوس ملي وصلات هاد اللحظة ماصبرووش .. ولفووه بزاف ومساخينش بيه ... اصلا لحظة الودااع كاتبكي الحجر، تا وصلات الطموبيل ديال تونار لي ماعرفش كيف دار وصلها اصللا .
تسمع الفران ديالها قوووووي ... ونزل كيجري و ليديا تابعاه .. الدرجة تايدير فيها ربعة ... تا دخل للببيييت بجنووون ... كايجرري لعندو تاطاح على ركابييه شد فيديه بهستيييرية
تونار : جدددي جددددي مالك ..جججدي ... ( كايطرش ليه وجهووو والفقيه كايحاول يشدو ) جججدي كاتسمعني .. تووكض معاياا ... جدددي
ناض كايجري كايحل فالسراجم
تونار : حلوو سرااجم واااش باغين تخخنقو السيد ولا مالكم خرجو عليا من هنااا حلو داك الباااااب خانقين عليه البييييت مجموعين هنا كاتنفسو عليه ... رخفو الاوكسيجين ييضووور ....
حل السراجم وكايحل فباب البالكون ورجع عندو وليديا غير واقفة فلباب كاتشوف مخلوعة عليه عينيها غير على تونار ولباقي كولشي كايبكي ...
تونار : ( مزير على يديه ) جدي ينو ... مااالك ؟؟؟ شوووف لعععندي ... جدي ..
المامون : ت..ت تونار .. ي . ينو
المحامي : ( بدا كاينوضهم ) واحد الدقيقة اشرفة عفاكم خليو السيد مع حفيدو ... تفضلو لبرااا الله يجااااازيكم بالخييير خليهم بوووحدهم تفضلو .. خليو غير سيد لي حامل كتاب الله ... تفضلو عفاكم راه غايبغي يهضر معاه ...
بدا كيدفع فيهم ... وتاهوما وافقو وخرجو لان من قبيلة هو كايطلب فيه واضح غاتكون بيناتهم وصية .. وليديا تاهي رجعات لوور ...
خرجو كلهم وشد المحامي لباب و بقى غير هو والفقيه معاهم ..
تونار : ( كاينهج كامل ) وااالا .. والا اجدي لا .. مزاال شوية( كايبوس فيدو غايحماق ) مزال اشوية اجججدي لاااا
المامون : ( كايشوف غير لفوق وكايقلب عليه بيديه ،) ف . ف في فينك (تونار حط ليه يدو فوق يديه ) ا آ سك ور .. ينو ( مزييير على عينيه ودموع تانزلو لي زماااااااااان مانزلو نهار عرف بمرضو ) ن ... ن .. نتا ه هو .. ل لي خ . خلاني . نعيش و .. ونصبر ع على ف فراق .. ع عائلتي .... ن .. نتا .. ب با . باش ن نكبرك .. و ... ونشوفك ( كايحبس الكلام مدة عاد كايكمل )ف فاحسن .. م . مراتب ... .. كا كانشوف .. ع ععمامك...و جداك ....وباك .... ك ك كلهم .. ك كاي تسناوني ... ج .. جدك ... خ .. خص و .. ي.. يمشي .. ا او ولدي ...
تونار طاح راسو عليه وكايتنخصص مقادش يهضر
المامون :.. ا الى .. ب بكي تي .. ع عل يا ...م مانسا منسامح كش .... ب .. ب بغي تك .. ت ت تعي ش ... ح . حي ياتك ... ك .. كنت .. ب باغي ... و .. وكنتمنى .... ن ن شوف .... ولادك ... و .. وم مكتابش، ( كاياخد نفس وتونار كايشهق كامل تحت يديه مطيح راسو ) و وو ول لكن .. الى بغي تي ...ت تفرح .. ج جدك ... هو . ك كون . مزيان .. و وع يش .. مزيان .....
تونار بعد.كاع و كلس فالارض شاد على راسو كايحس بروحو كاتسلب مع جدو
مامون : ب .. ب بغيتك .. ت تعرف .. و واحد .. ل لحاجة .... ب باش .. ن نموت . م مرتاح .... ج جبل .. ع على .. ظهري ً آولدي ... ا... أنا ... أنا .. ع عمني ... ع عمر ني . م ماكد كدبت عليك .... و ولاكن .. ك كدبت .. م مرة .. ووحدة . ب باش ن نحميك.... ل .. ل لي .. ق قق قتل . ع عائ عائلتك ... ر راه ...خ خويا ( المحامي طرطق عينيه والفقيه غير ساكت لانو عارف كولشي وصاحب المامون بزاف )
تونار غير عاض على شفتوو وكايتحرق .... واخا عتارف بهادشي كاااامل ولكن ومامسوقليهش كايلوم غير فراسو ويفكر فشي حاجة لي يشد بيها جد معاه مزال شي حاجة لي كاداوي الموت !!!!
المامون : و .. و وب باقي ... حي ... ه هو . و وع عائلتو .. ن .. نتا .. م ماكدب مكدبتيش ، ع عائلتك .. ح حرقه حرقهوم خ خويا، ... و .. ولكن .... ا انا ... س .. سا ساخط ع عليك ... اا الى ... م مش مشيتي .. ع عندو.. و ولا .. ق ق قربتي ل ليه و . و ضيع تي ح حيا تك... ( المحامي غير كايشوف فردة فعل تونار لي ضاهر بحالا عارف ) و ... و وتا .. م مراتك ... ر راه .. م منهم .. و ... و وب بحال .. ا الى ... خ خليتها ليك .. ا امانة .. و . وخ ليتك .. ل ليها ... أمانة .. ه هاديك . ح حفيدة .. خ خو خويا .. و .. ودمها ... م من دمك...ه .. هي ل لي .. ه هازة ب بحال ك كنيتك
تونار ناض لعندو وشد يديه بجوج وتيحاول ييهضر
تونار :ج جدي ... نسا عليا هادشي كامل دبا .. هادشي راه مكيهمنيش انا هاادشي راني عارفو .... غير ق قوليا ... قولي انتا باش كتحس ها،؟؟؟ مطلقش من راسك اجدي مااااطلقش
المامون : ا .. ا نا... ب بين ..يدين ... سيدي ربي ...
الفقيه : ونعم بالله .. حاول على راسك بششوي علييك
المامون : ا .. الى .. ا الى ق ق ربتي ... ل لعند ... د داك الن ناس.. ع عمر ج جدك م ميرتاح... ل لكنت .. ا انا .. ع عزيز ... ع عليك ... خ خ، خليني .. ن نرتاح .... ( كايسرط ريقو ) غ غ غانرتاح .. ن نهار .. ن نتا .. ت تعيش ... م مزيان . و وف فرحان .. ر راك . ماعشتي .. و والو اوليدي ....( شهق )
الفقيه :الله اكبر ... بششوية عليك الحاج نعطيوه لما ؟؟
تونار : (مخلوع ) ج جدي ... جججدي
المامون : ( مزير على بدو ) ت .. ت تهلا ... ت تن تهلا ف فراسك . و وف وفم مراتك .... و ف ن نور .. ت تا هي ... ر رد .. ل ليها .. ل لبال .... و . و ف ف ايطو ... ت تهلا ف ايطو ... م ماعندها .. حد ا اولدي من غير نا .... ا .. انا .. ا انا ر راضي.... راضي عليك .. د نيا و واخ ااخر .. س س سمحلي .. س سمحلي اولدي ا الى د در درت ل ليك ش شي حاجة .. س سمحلي . ن نهار .. ز زوجتك ...ب ن نور .. ج جدك .. ط طول ح حياتو .. هو ب باغي .. ل لل ليك ... غ غير . ل لخ ير ...
تونار طاح عند رجليه معنقهم كايبكي كيف شي طفل صغييير
تونار : نتا لي سمممحلي .. سمحلي ملي كنت نزعف عليك .. الى كنت مانسمعش كلامك .... الى شي نهار عدبتك فتربيتي .....ملي كنت نسافر ونخليك ... سمحلي الى مكلستش معااااك ... مشاااابعانش منك اجدي ..مستااخيش بييييك ...مزااال بغيييتك مزال ....ماشي تاتقدات حياتي تمشي نتاا ... مزال باغيك تشوف ولادي .. غايكونو عندي ولاد اجدي .. (نعس عليه معنقو بجوج يديييه ضامو لعندوو ... خايفو يمشي .... خااايفو يموت . باغي يشدو . تونار كايضن هاكا جدو مغيمشيش غايبقى فحظنو . معارفش الى جدو كايتسرب شوووية بشوية من بين يديييه وهو مزير عليه باغي يشششدو مايمشيش )
تونار : ماشي دابا ( بصوت البكاء ) م ماشي دابا اجدي كاااانرغبك خليييك مزال ... والله مااكبرت .... والله مقاد على دنيا بلا بيييك ....والله مانبقى نزعف عليك ولا ندير لي يقلقك ...
لمامون : ( شهق وطلع صبعو كايشهد فنفسو والمحامي قلب راسو كايمسح دموعو و هو كمل ااشهادة بكل تبات و حط يدو على راس تونار ) ا .. انا .... انا ر را راضي . ع عليك ...ع عيش .. م مطلع ... ر راسك... ل لفوق.. ن ن نتا ر ريفي .. و ولد . ريافا .. و وراجل ... و ولد .. ر الرجال ... ا ا.. ( شهق ) ا انا ..د ي ما . ( كايثقال لسانو ) ر، ررر ا ضي عليك ا اس سكور ... ييننن .. وو
تونار : غير شد فراااسك شد مزال .. شد واش سخيتي صافي .. شد فرااااسك مزال تولي بيخير مزال .. واخا نبقى نهزك اجدي غي فيدي .... نهزك فوق ضهري نحطك غير نشووووف فييييك ماتهضر موالو .. . غيرر خليييييك عندااااك تمشي عنداااااك ... (مزيير عليه )
الفقيه ( دار يدو على عينو وهبطهم ليه وشد ليه فمو لي بقى مفتوح )لا اله الا الله ...... ( باس على راسو )الله يرحمك آلحاج ....
تونار علا راسو بببزربة كايشوووف بجنووون ... اش كايقول هذا ... لقا جدو شد عينييييه وبقى غي كااايرمش بصدمة !!!!! لهاااد السهولة مشا ؟؟؟؟ بهاد السهوووولة تسربات رووحو ؟؟؟؟؟ رغم انه كان مزير عليه ؟ امتى مات ؟؟؟؟ عاد كان كايتكلم معاه ؟؟؟؟ علاش مشاا هاكا بزززربة ؟؟ عاد كان مزيااان !!!! عاد كان كاينزل لحردة ؟ مزال ماشي هاكا لا !!!! ماشي بهاد السرعة ؟؟؟؟؟ تونار ززعزعو شوية بيدو لقاه ولا حجججرة !!! ...
وبعد بززربة مخلووووع .... تلاح فالارض متكي على الحيط مصدووووم ... و المحامي قرب عند الحاج باس على راسو
المحامي : اللله يررررحمك الحاج ... الله يررحمك روح ( هبط عند تونار عنقو) الله يصصصصبرك اولدي والبركة فرااااسك ..
الفقيه : ( غطا المامون باايزار وهبط عندو ) فرح لييييه اولدي( كايبكي تاهو اما تونار جامد ) فررررح ليه مات مشهد و مع الفجر هاهو غايودن ...ماتعدبش مسكين وماعدب معاه تاوااااحد فرررح ليه مااات نقي و مات صحيح .. روحو خرجات بحاال الرييييييشة راه مسكين بحالا ناااااعس
تونار راسو تقااااااال مكيمسع والو بحالا كايهضرو معاه من شي بيييير غاااااارق وذنيه فيهم الصرييييررر وراسو تنفخ علييييه وقلبو تايضرب بجججهد و الباقي كولشي فيه جامد .... فهاد الحظة المواساة راها نوع من العداب، كانفضلو سكاااات . كانفضلو الصمت كاتفضلو فقط نستوعبوووو هادشي لي واقع !!!!
تاتحل الباب المحامي لقاهم كولهم فلباب ..
المحاي: ان الله وان اليه راجعون الباركة فراسكم والله يصصصصبركم ... الحاج توفى ...
ايطو غووووتاااااات بججججهد وطاحت سسسسخفاااات و ليديا دفعاتهم مشات كتجري عند تونار و حكيمة و نورة غير شدو على فمهم ونور بدات كتبكي شادة ايطو كاتصبر فييييها وتحاول تفيقها... والخادمات كاع حزنااانيين ...
ليديا شافت على السرير بان ليها مغطي كاااامل وشافت عند تونار لي جااااامد و الفقيه حداه كايواسيه وهبطات عندو كاتضرب فوجهو
ليديا : تووونار .. تونار كاتسمعني ... توووونار .. تونار وگض معياااا راسك ... عطيني معاااك داك الكاس دالما عفاااك ( تقالت النبرة ديالها بالخوف ) توووووناااااار
بعد 5 ساعات ...
كانت التامنة صباحا ...
الدار مطلوق فيها القرآن وعمرات بالنااااس وصالات عمرو بالعزايا.... اما المامون نقلوه للسبيطار على ود الغسل وعلى ود تنفيد وصية مهمة من الوصايا لي خلا و لي واقف عليها المحامي خصيصا جا على قلبها من ايطاليا ملي عيط عليه ....
ايطو غير كاضور وحازمة راسها كتهضر كي شي هبيلة وشفايفها بياضو و كدوز يديها على لحيوط
ايطو : ولمن خليتي هادشي الحاااااج لمن ..... ولمن خليتينا لمن .... الحاااج ينوووو ... احنيييين ينوووو .... ( دخلات وحدة سللمات عليها )
- اابركة فرااااسكم الله يعوووض المحبة دياللو بالصبر كاااان رااااجل وسيد الراجال تباركالله ... الله بغاه والله دااااه الله بصبرركم
ايطو : مشاااااا المااامون .. مشاا المامون آرااضية مشا . مشا الحنين .. مشا لي مكان ينسى تاحد ... مشا لي يدبح ليه و للناس ... مشااااا الماااااامون
- الله يصبركم قويو راسكم .. فين ولد ولدو .. مبانش ليا مع رجال برا نعزيوه
ايطو : و آش غايرگبك على حالتو .. اش رگبك ارااااضية على حالتو تونار ينو مسيكين ...
خلاتها ومشات كتهضر مكاتحس تابراسها اش كاتقول وحكيمة لابسة البيض و كالسة مع العزايات
ايطو : واالماااامون ... ولمن خليتي داك الولد امامون .... وقطعتي رااااسووو ومشيتي آلحاااج ... قطعتيينا كاملين ومشيتي .. فين لي يضحك لينا .. فين لي يضحكنا ... فين لي يحاجي لينا ..... فينك الماااامون فينك ...لحقتي عليهم آلعزيز ... لحقتي على عائلتك ... هوما عندهم عرس وحنا عندنا كنااااازة .. وشكون يصبر على فرااقك آلماااامون شكووون ..(خرجات لبرا ) شجيراتك لي غرستيهم ... كولشي بنيتيه كولشي درتيه نتا ولمن غااااتخلي هادشي وشكون غاايجمعنا من غيرك الحاج .. مشيتي ومشى معاااك كولشي .... ططفييتي قلوبنا ومشيتي ... العافية شاعلة فينا آلحااج .... كون ديتينا معاك وماتخليناش هاكا ... مشااات زين الضحكة مشاااا الحنين ... مشا العزييييز ....
داز واحد ااسيد عزاها
- ااباركة فراسك الحاجة
ايطو : مااامشا معاك باس ترزيينا فيه كااااملين اولدي كاملين
- حفيدو لداخل الحاجة ؟؟؟
ايطو : حسن غيير ماتشوفوش .. مافيه مايتشاف اولدي مكيهضر مكييتكلم ماهبط النعمة على فمو عاااا خلييييوه .....
- والله يصصصبركم الله يصبركم ويبدل محبتو بالصبر
تونار كان فبيتو جالس على واحد الفوطوي والباب دالبالكون محلولة وكايشوف فالشجر قدامو .... و ليديا كالسة حداه هازة واحد الكاس دالما كاتعافر معاه غير يشرب و لا يحل غير فمو ووالو بدون فائدة
ليديا : تووونار هاكا غي كاتزيد تعدبو فخبارك ياك ؟؟؟؟؟ .... شرب غير الما واش باااغي تموت حتا نتا راه من لبارح فصباااح مدقتي شي حاجة ... ديرلي خاااطري عاااافاك ..
بحالا كتهضر مع الحيط لا حياة لمن تنااااادي ...
ليديا : واش هاكا بغاك جدك هااا ؟؟؟؟ هاد نهار راه كان غايوصل غايوصل اتونار ... جدك تلقاه حاضر معاك دابا وكالس حداك .. يعجبو هاد الحالة لي داير فراسك ؟؟؟؟ وغييييير شوف غير ععندي ...
بدون جواب !! كيف الليلة لي كاملة وهي كتهضر بدون فائدة ..
فللخر ناضت متنهدة حطات داك الكاس دالما كانت لابسة عباية طويلة وشال فعنقها كديرو فوق راسها ملي كاتهبط وهي تسمع الباب تحلات و تأفافات لان صدعوهم وهو مكيبغيو يهضرو مع حد ساعة دخلات غير ايطو شافت لعندو عاطي بضهر وشافت عندها
ايطو : ( دخلات ) امضرا شوووية ؟؟؟ هضر ؟
ليديا : كاس دالما مابغاش يشررربو ... حرت والله.. راه ملبارح فصباح مدااق نعمة
ايطو : يااااااررربي ياااااربي شواني هاد الولد كتر من جدو ( قربات عندو كدوز يديها عليه ) تووونار ينوو .. اولدي رجوووووع الله ( مكيشوفش عندها كاايتسمع منو فقط صوت ريقو فاش كيسرطو ) واش باغي تقتل راسك ؟؟ شررب غاالما .. وجدك ربي بغاه وربي داه ونتا تموت ؟ نتا لي بقيتي لينا اولدي ونتا لي بقيتي بركة لهادشي لي خلا جدك ... لامشيتي نتا هادشي يتمحى .. واالا اولدي شد شوية فرااااسك ...
ليديا : والو واخا تبقاي تهضري تالصبااااح ...
ايطو : لا الاه الا الله محمد رسول الله ....
ليديا غمزاتهاا تقرب عندها و جات ايطو
ليديا : علاش داو المامون لسبيطار ومغسلوهش فبيتو!! ... ياك مات هنا فالدار مافهمتش ؟؟؟!
ايطو : بحالي بحالك الله واعلم مافهمنا واااالو ... عاتاجاو بلابينانص داوه ..
ليديا : دابا معاش غايدفنوه ! غايدوز من سبيطار لمقبرة ديريكت ولا كيفاش
ايطو : لاااا غايجيبوه هنا لدار عاد يخرج لدفينة ... راهم حطوو ( غلبات عليها البكية ) داك المحمل فالبااااب ( بدات كتبكي )
ليديا : ففففف .. ماعرفتش كاع تونار واش غايحضر ولا لا مابقيت فاهمة والو فيه انا تخخخخربقت صافي .. تقاضاو ليا والله .....نعيطلو على شي طبيب نفساني
ايطو : تخافي غير مايبغيش
ليديا،: انا مابقيتش عارفاه واش معايا و واش غير كايسمعني .... خلعاتني حالتو ديال بصح انا مامولفاش بيه هاكا راااااني مخلووووعة عمرني تخلعت هاكا
ايطو : خلي يجيبو لمرحوم للدار بعدا وقولي ليه راه غايدفنوه ونشوفو واش يسمع لينا ... دابا غير خليه على راحتو باقي مصدوم مسكين راه ماشي ساهلا الله يكون فالعوان ... عنداك تقولي حداه راه داوه لسبيطار عندااااك .... غايكمل على ما بيه كاتعرفيه معكس
ليديا : فففففف... حرت والله الى حرت معاه ...ماعمرني حضرت لهادشي كاع يدي كايترعدو ...
خلاتها ومشات تاني لعندو تحاول وايطو نزلات
ليديا : ( كدوز يديها على شعرو ) توونار ..... ماتبغيش تحضر للدفن ديال جدك هم ؟؟؟؟ .... وغير جاوبني علاش كتعدبني هاكا غي شوف غير لعندي
مابغيتيش تهضر جاوبني غير بعينيك نحس بيك راك معايا ..... راك خللللعتني ... حااالتك خلعانني فخبارك .. هانتا مجرب الفراق ومجرب شحال صعييييب وتبغيني نجرب فراقك انا ؟؟؟؟؟؟ تونار غير شوووف فيا عفاااك .... مابقيت عارفة شنو ندير ولا كيفاش نتصرف نتا عارفني فهاد اللحظات مكنعرفش كيفاش نتعامل قول شي حاجة غي متسكتش هاكا .... عفاااااك لاما غير شوووووف فيا بعداا ....
الدار عمرات على آخرها بالعزايا ، صغير وكبير والبعيد والقريب ، لانه كان عزيز على الجميع ...
والحليب و التمر كايتفرق و ايطو مرفوعة مكايناش فداك العالم كتهضر مع الناس ولكن راس مرفوع ... وحكيمة جالسة وسط العيلات هي ونورة .. اما نور كاتفرق عليهم تمر
- شكرا ابنيتي الله يخلف .. ( شافت معاها ) شكون مرات حفيدو نت ولا ختك مكنفرقش بيناتكم
نور : ( فوق الخاطر ) أنا اخالتي
- الله يابنتي الله وباقا عرووسة ...
نور تخطاتها وحكيمة غير كاتشوف وبدات كدوز التمر ...
اما ليديا بحّات مع تونار بالهضرة فاللخر دارت شالها غير مبعثر فوق شعرها ونزلات تشوف واش جابوه ولا مزال .... والعيلات لي فالدار كايشوفو عندها وهي كتقلب بعينيها تاشافتها نعيمة وجات
نعيمة : لالة بغيتي شي حاجة
ليديا : ( بتعفارها المعروف الهضرة فوق نيف ) جابو المرحوم !!!
نعيمة : مزال الالة ...
بدات ليديا كاضور عينيها على لعيلات وتعبر وهوما كايشوفو لعندها ووحدة قربات لعند حكيمة
- حكيمة شكون هاد البنت لي نزلات ماعرفتهاش ؟؟؟
حكيمة : ( ماعرفات ماتقول وعينيها دم على ليديا ) من فاميلة المرحوم الله يرحمو ...
ليديا الكلام وصل لودنيها لانها كانت غير قريبة وبدات ضور راسها باستهزاء تادخلو شي عيلات زايدة بيهم ايطو
ايطو : زيدو دخلو دخلو ها حكيمة هاهي
السيدة : ( شافت ليديا وسلمات عليها وليديا كاتمد غير وجهها ) لباركة فراااسكم ابنتي الله يعوض محبتو بالصبر .... ( ليديا غير كاتشوف فييها وهي ضارت عند ايطو ) وفين حفيد الحاج نعزيوه؟؟؟؟
ايطو : لا ر راه ... ( قاطعاتها )
ليديا : مقادش يهضر .. ( بابتسامة صفرة ) الله يعشر الخطوات ...
كاع العيلات كايشوفو كيفاش كاتهضر معفرة وداك المراة ماعجبهاش لحال كي هضرات معاها وضارت عند ايطو
- شكون هادي كاع ماعرفتها .. اش كاتجي لمرحوم ؟
ليديا : ( بكل ثقة فالنفس ) مرت حفيذو ...
( سيدة اخرى ) : هاويلي !! على شحال عندو من حفيذ ... حنا عارفين غا واحد مزوج ببنت حكيمة هاهي كاتسمع فيك .... ( نور غير منزلة راسها )
ليديا : دابا نتوما جايين تعزيو ولا تحسبو فالعيالات !!
دوك العيلات بقاو غير كايتمتمو بيناتهم وكايسولو فحكيمة وهي غير كاضور فراسها بمعنى خليو داك الجمل راگد .. ونور طلعات بحالها كاع حسات بالاهانة ..
ايطو : هااااويلي علاش قلتيها فالوسط هاكااا
ليديا : كنعرف لي جا يعزي كايعزي ويشد لباب هادو شتهم عجباتهم الگلسة !!! ....
ايطو : وراه كايتسناو دفييينة
ليديا : هوما لي غايحفرو القبر ... النفااق !!
ميقات فيهم ورجعات طلعات عند تونار ، اللهم بيتها ولا نظرات الفضوليين لي خلات موراها مع ضجة دالاسئلة على حكيمة ...
غير حلات لباب دلبيت وهي تبان ليها نور واقفة وغير كاتشوف فيه وهو عاطي بضهر كايشوف قدامو ...
ليديا تخطاتها وزادت للسرير جلسات
نور : كي بقى !!
ليديا : كاتشوفي فيه ...
نور : الله يخفف عليه ( جات ماشية وهي تسمع ليديا )
ليديا : نور سميتك ياك ...
نور : ( ضارت عندها ) مم ...
ليديا : واخا نتوما توام وكاتغالطو لكولشي .. يمكن انا بوحدي لي كاتجيوني مكاتشابهوش
نور : علاش زعما ..
ليديا : صراحة تمنيت كون كانت ختك بلاصتك ...كنت مغانسخاش بالحرب ، كايعجبني الخصم القوي .. ولكن للاسف نت ..الحرب معاك مملة !!
نور : ( سرطات ريقها ) اوا الله يكتر خيرك ...( جات ماشية وسمعاتها تاني ووقفات شادة فالبواني دالباب )
ليديا : عمرك تفقدي كرامتك على قبل شي حاجة نتي باغياها ، حيت داك الحاجة ملي غاتشوفك فقدتي كرامتك على قلبها حتى هي غاتحتقرك ... اما خوديها بالقوة اما خليها فبلاصتها الى لقيتي راسك داك الحاجة ماشي ديالك...
نور حلات لباب وخرجات وليديا ناضت عندو جلسات حداه كاتشوف قدامو ... مدة عاد نطقات
ليديا : بغيت نواسييك .... وماعرفتش كيفاش .. بغيت نخفف عليك ... وماعرفتش كيفاش .... عاد لقيت راسي الى كنعرف غير نعاندك ... مكنعرف ندير تاحاجة اخرى من غير نعاند .. يمكن حيت انا مامجرباش داكشي لي كتحس بيه دابا ، ماجربتش يمشي ليا شي حد لي كنعزو بزاف ... حيت انا عمرني عزيت شي واحد !!! مزال كنآمن انه حتى تاحد مكيعزني ....( بقات شحااال ساكتة تاجاتها الضحكة ) نهار قاليا جدك الله يرحمو ماما ماتت .. مانكدبش انني حسيت بشي حاجة ولكن ماحسيتش باحسساس انني فقدتها او مااتتت ... فقدانها مايمكنش نحسو لانها عمرني ملكتها اصلا .. وكلمة ماتت مغاتضرنيش ، انا الحياة فالمستعمرة بحد داتها كنعتبرها موت ... القبر كايجيني مشات تبدل الجو وصافي .... داكشي علاش مااعندي تاكلمة لي نقدر نقولها فبلاصتها ونواسيك ولا نحس بيك ... حاجة وحدة لي بغيتك تعرف ... هو انا الشخص الوحيد لي حسيت براسي ملكتو هو نتا ... الى كنت بصح كنعني ليك شي حاجة ماتخلينيش نفقدك ونجرب هادشي لي نتا عايشو .... انا راه وسط هاد الكنازة كاملة وهادشي كاملة راه هامني غير نتا ... لابسة الكحل وحزييينة ولكن مغانافقكش ونقول ليك على جدك ... ايه بقى فيا ولكن راه ماشي عليه ، انا راه مكنعرفوووشباش نحزن عليه ... انا لابسة الكحل عليك نتا ... جرحك تايجرحني .... انا الكنازة كنحسها عليك ... هادشي لي كانعرف ....هادشي دابا لي كاتحسو من جيهة جدك انا عارفة قااااسح بزاف وغايكون كايضر ... عفاك مابغيتش نعيشو ... انا بصح خاااايفة نجربو .. ماتخلينيش نعيشو عليك ....( شدات فيديه ) كنضن جدك كان تايق فيا ومرتاح من جيهتك ملي شافك معايا ... مابغيتش نخيبو ، بغيت نثبت ليه فعلا ان حفيدو معايا غايتبدل ... ماعرفتش علاش ولكن كنحس براسي باغا نقدم شي حاجة لداك السيد ... حيت كان كايبغيك من قلبو ... و لي يبغيك بحالا بغاني انا وكتر ...
جابو المامون للدار فلومبيلونص ونزلوه فاالصندوق كان مكفن واجد ... ايطو غير شافتو بدات تبكي وتغوت وتاحكيمة نزلو دمعات العشرة رغم الطمع ... ولكن المامون خلا انطباع ززين فقلوب الجميع لي تا مات عاد حسو بيه وتحسرو عليه .... كاع لي كايعرفو بدا كايبكي .. و كايسولو على تونار باش يخرجوه للمقبرة مابغاوش يمشيو بلا به ... ليديا غير سمعاتهم داخلين بيه نزلات لان خاصها تعرف علاش مشا لسبيطار ... وتوجهات عند المحامي ديريكت
ليديا : غايتدفن دابا
المحامي : ااه كنتسناو غير الظهر باش نصليو عليه ... كيبقى سي تونار ؟ مايقدش يمشي معانا
ليديا : علاش ماغسلتوهش هنا ؟ علاش مشا لسبيطار وخدا هاد الوقت كامل ؟؟؟؟
المحامي : امور شخصية امادام
ليديا : ممم .... بغيت نشوفو ، ماشفتوش ملي مات
المحامي : مايمكتش راه تكفن
ليديا : واخا فتحو ليا غير ملفوق بغيت نبوس غيرر راسو ...
المحامي : سمحيلي امادام راه مامكتش
ليديا : وعلاش !!!! شنو درتو ليه ؟ نتا معارفش تونار يقدر ينزل دابا يبغي يشوفو ...
المحامي : هادي من وصايا المرحوم وانا خصني غير ننفد
ليديا : حيدتو ليه الجلد مم !!!
المحامي : ( كايضور فعينيه كايطلب تسليم ) م ماعرفتش امادام
ليديا : ( تنهدات ) عارف الى مشا حتى عرف هادشي اش غايدير ؟؟؟ جلدكم يسلخو .....
المحامي : انا غير كانفد ..
ليديا :اوا طلب ماينزلش ....
خلاتو وطلعات للبيت حلاتو وهي تشوف بلاصة تونار فارغة وحلات عينيها ومشا كاتجري لدوش كاتقلب ولقاتو خاوي
ليديا : تونار ..... توونااار !!!؛ ...فين مشا هذا ؟؟؟؟؟ تووونارر
ليديا جا لبالها بيت المامون حيت تما فين دخلوه .. ومشات كاتجري حلات لباب داخلة وهي ترجع لخطوة لور واقفة وشادة فالبواني ديال لباب .... كان المامون فصندوق ديال الخشب ومحطوطة عليه السجاد الاخضر ديال الموتى .. و تونار مربع حداه وهاز قرآن كايقراه ..
الامر صدمها !!! بقات غير واقفة وكاتشوف ...كانت كضن غايثووور !!!!! هاد الهدوء وهاد الثبات صدمها ....معارفاش ان الله كاينزل القوة والصبر على القلوب ، كان كايقرا غير بشفايفو بهدوء تاااااام وعينين دااااابلين .... بقات فالباب ماتحركاتش ، تابان ليها سد المصحف وبقى كايشوف للصندوق وتحنا باس عليه ملفوق وحط راسو عليه معنقو بيديه .... ليديا بقات شحال كتعض فشفايفها فللخر ماقدراتش تبقى تشوف فيه هاكاك كايتقطع ومشات بعدات واقفة فكولوار ... اما تونار واصل لواحد الهدووووء غرييييب ...
نفسو داك الهدوء لي كايجيك فاش كاتبدى تفهم ان الموت سنة الحياة .. فاش كاتبدى تستوعب الامر .. داك الهدوء ديال لا حيلة لك امام القضاء ..
لا الصراخ يقدر يردو ليك ... ولا البكا ... ولا حتى حاجة ... كاتولي غير سااااكت .... ساكت وكاتشوف ...
وكاتسمع حواسك و باطنك لداخل كيفاش كايصرخ .. كيفاش كايبكي و يتحررق .. كاتشوف ان كولشي فيك كايبكي الا عينيك .. واحد اللحظة الدموع مكيبقاوش ينزلو .. كاتولي باغي غير تبقى بوحدك .. بحالا كاتكول للناس خليوني نتيق بعدا !!! خليوني نفكر فكيفاش غايزيدو اياامي و نعيشهم من بعدو !! خليوني نشوف شي طريقة لي نصبر بها قلبي !!! .....
الرجال لي طلعوه فاش دخل عليهم تونار خرج الجمييع خلاوه بوحدو معاه ، وملي نزلو قالو للمحامي تونار معاه .. صافي بدا كايزرب عليهم باش يهزوه للمسجد رغم ان الساعة باقا احداش ونص ... غير باش مايطلبش يشوفو ....
طلعو حلو عليه لباب لي كان غير مردود خلاتو ليديا ، ولقاوه معنق الصندوق وحاط راسو عليه كأنهم كايهضرو غير بالارواح ... كان منظر كايقطع فلقلب ، الانكسااار بابشع صووره .... بكاء بدون دمووع ... نجدة بدون صوت ... ذبووول تااام و برووود ساحق باين عليه .... والفقيه تحنى لعندو
الفقيه : الله يصبببرك اوليدي ويكون معااك ... نوض اويلدي خصنا نمشيو لجامع ....
تونار بدون اجابة فقط تنهد وشاف لصندوق مطول .. كايفكر واش عندو الجهد لي يعري عليه الصندوق ويشوفو وهو ميت !! عندو الجهد لي بقبل جبينو لاخر مرة !!! بمجرد ما سول راسو هاد ااسئلة لقا راسو ماقااادش وقلبو تزير عليه ... ورجع ناض وعينيه بانت عليهم واحد الحدّة ...وشمر بنيفو .. وهوما يدخلو المحمل وهزو الصندوق حطوه فيه ... وهو يهزو ودارو على كتافو هو وثلاثة درجال آخرين والمحامي عاد مسح العرق على جبينو ... زادو بيه وهو فالمقدمة هاز جدو فوق كتافو .. خارج بيه للروضة
وكايتفكر كل دكراياتو معاه ... مكايشوف والو قدامو مكايشوف لا الناس لي كاتواسيه منبعيد ولا شحال عامرة الدار .... ماشي وليدياا ملفوق كاطل عليه شحال منكسر ...
كايتفكر شحال تفشش على جدو ... شحال من مرة كان كايعصبو ورجع يصالحو ... فاش كان كايترجاه يتزوج ويشوف ولادو ... كايتفكر شحال طاح وناض بين يديه ... شحال كان كايفرح ليه فاش كاينجح و كان معاه فكل انجازات حياتو كل الجوائز لي كان كاياخد كايكون معاه كايصفق ليه ... ودابا هازو فوق كتافو وغايديه لواحد البلاصة لي ايكون فيها بوووحدو وغايبقى فيها بوووحدو .... غايخليه تما و يدير عليه التراب وغايجي .. و ايوز ايوز ... يموووث وني داي يسمان توناروز ... (ايوز ايوز .. مات لي سماني الامل )
كالس عند قبرو ... والفقيه حداه كايقرا ما تيسر ...وهو كايلعب بالتراب ديال قبرو بيديه وعينيه دااااابلين ... كأنه جثة وكتحركها الرياح ...
الفقيه : وليدي المغرب غايأدن علينا ... نوض اولدي نمشيو .... الله يرحمو ويوسع عليه ....
تونار تنهد وقرب راسو لتراب واستنشقووو بححححرقة كبيرة فقلبو ...وناض تمشى والفقيه موراه متأسف لحالتو ....
اما ليديا طيلة هاد تلات ايام وهي غير فبيتها لان الدار عامرة بالعزايا وهي مافيها لي يهضر مع شي حد كاتبقى غير مع تونار تخفف عليه .... لي ماسمعاتش هضرتو منهار مات جدو كايتصرف بااااارد وصافي فقط الى حط يدو على راسها ولا وما ليها بعينيه ....
بقات فالبالكون تاشافتو داخل عاد رتاحت ولات كل ما خرج لبرا كاتخلع ... ومكترتاح حتى كاتشوفو رجع ..
بقات تتسنى تاسمعاتو حل لبيت واتجهات عندو مبتسمة .... وقربات عنقاتو و باستو فخدو من فوق الماسك
ليديا : تعطلتي عليا ...
تونار جاوبها غير بعينيه عيااان ومشا كلس على الفوطوي معلي راسو للفوق ...
ليديا : نقوليهم يجيبو ليك شي حاجة تاكلها،؟؟؟؟
تونار اخييييرا تكلم حتى لقات راسها توحشات صوتو
تونار،: جمعي حوايجك ...
ليديا : ها !!!!! ( قربات عندو باستغراب وفرحة لي تكلم معاها ) نرجعو لايطاليا ؟؟؟؟
تونار،: همم ...
ليديا : ا .... صافي واخا ... لي رتاحيتي فيها انا معاك ...
ابتسمات ومشات كاتجمع حوايجها وهو مراقبها بعينيه .... تبدلات عليه بزاااااف منهار مات جدو ولات وحدة اخرى معاه فتصرفاتها ... كاتعاملو كيف شي بيضة خايفاها تتهرس .... الابتسامة مكتفارقش شفايفها ... ودابا كاتجمع حوايجها وملي كضور عندو وتجي عينيها فعينيه كاتبتسم ليه .... بلطافة كبيرة كاتعامل بها ... تاناض دخل للحمام .. وهي كملات جميع ديال حوايجها وحوايجو ... وهو شد فلافابو وكايشوف فالمراية وكايتذكر كلام المحامي هاد الصباح ....
المحامي : سي تونار ... دقيقة من وقتك عافاك ... حيت طيارتي باقيليها ساعة وضروري نهضر معاك ....
تونار : ( كان غايركب فسيارتو ورجع شد الباب وضار عندو )
المحامي : الامر كايخص جدك ...عندي وصية
تونار : ( غمض عينيه بثقافلة ورجع حلهم وهضر بصوت عياااان ) ماشي وقتها
المحامي : محلف باش نقراها فتلاتيام ديال موتو ....
تونار تنهد موكل امرو الله و ووما ليه يطلع لطوموبيل وركب معاه وزادو حتى للقبر حيت تما كانت الوجهة ديالو .. ولقاو الفقيه ديجا تما ... وكلسو على راس قبرو والمحامي جبد وراقو
المحامي : المرحوم قبل مايموت ... خلا ليا جوج وصايا مكتوبين ومهمين ... وانا ماعليا الا نفدهم لان هادي خدمتي .... نتمنى ماتقلقش مني سينيور تونار ولكن انا مضطر ننفد الاوامر و محلف على تنفيد الوصايا ... المرحوم قبل مايموت طلب منا نعطيوك ( قاطعو )
تونار : الجلد....
المحامي : اا ... ؟؟ .. ت .. تماما .. تماما سينيور ... و واش كنت عارف !!
تونار ميل فمو بابتسامة غريييبة .. كيفاش مايكونش عارف وهو كل ماكلس معاه كايقوليه ملي نموت غاتاخد جلدي ... وكان متأكد غادي يدير هاد الخطوة ... وعليها ديما كان كايقوليعه " الشاب الشايب "... لان كان كايواعدو باش جلدو يبقى ديما شااب وغايعيش كتر منو ... وشرط د تونار كان هو ممنوع يلبسو و جدو باقي فالحياة .. مايقدرش يرتاح وهو كاااايشوف جدو مشوه .. وكان طلب منو انه غايقبل بجلدو فقط الى توفى ... باش شي.حاجة منو تبقى عايشة معاه ... ولكن بقات ليه فلاستعدااد ... هو مامستعدش بتاتا لهاد الامر فالوقت الحالي .. مزال محتاج وقت ... شي حاجة لي صعيبة عليه .. الروبوت وصلات ليه خبار ان النسيج داروه فالفريكو وترسل لكلينيك لي فيه طبيب التجميل الخاص به فاطاليا .. عارف كولشي .... بل كان متوقع وعاارف ومتأكد جدو غادي يدير هاد التصرف ... وملي مات مابقى قادر يرفض ليه حتى طلب .... خاصو هو يقتنع ويزعم فقط .... اما فكرة يشوف فيديه ويلقى جلد جدو بحد داتها كاتخليه يرتاح ويطمأن ويقيس فيديه بحالا تايقيس فجدو ويبقى حي فيه ....
المحامي طمأن ملي شافو عارف كان مخلوع بزاف من ردة فعلو وخلا الامر حتى قرب يمشي عاد قالها ليه باش يهرب من الغضب ديالو ولكن دابا عاد رتاح ومسم العرق لي فجبينو ...
المحامي،: هادي هي وصيتو الاولى .. النسيج رسلناه لاطاليا .... وجدك كان مصر باش تدير العملية فاقرب وقت .. كان كايتمننى يشوفوك بعينيه محيد الماسك وجلدك طبيعي ولكن نتا كنتي رافض تماما يعطيك جلدو .... دابا ملي توفى نتمنى انك تقبل و تحقق ليه الامنية لي بغا .... ( تونار غير ساكت ) غانسيفطيلك المعلومات الاخرى فايمايل ... والوصية الثانية .... وصى على أملاكو لي فالبنك والاراضي لي فلايطالياا باش يمشيو لحساب الزوجة ديالو و بنتها نورة .... اما المنزل والوزين والشركة لي فاطاليا فهو كتبهم باسم السيدة نور .... وحتى السيدة ليديا ، بجوج بيهم شركاء .. وهنا فالمغرب الدار ديالكم والاراضي هو حطهم بإسمك نتا سيدي ... و وصا بحفر 3 آبار هنا فالمنطقة وواحد يمشي الماء ديالو للمسجد ... و صا بتخصيص محاصيل الاراضي ديالو هنا فالمغرب للناس لي مافحاملهمش ياكلو منها ويخدموها كيف بغاو ... وصا على تخصيص مبلغ شهري القيمة ديالو عشرالاف درهم للسيدة إيطو و كتب ليها المنزل لي كان فالمزرعة لي فاطاليا بالقرب من المنزل ديالكم اسيدي وطلب باش انها تبقى فالعمل ديااالها .... ( شد الملف ) وهادا مكان .... الله يرحمو ويسكنه فسيح الجنات ...
تونار غير ساكت كايشوف فالقبر ويتنهد .... تاوقف المحامي
المحامي : انا غانمشي دابا ... ( خلا ليه شي وراق ) هادو اوراق الملكية ديال الدار لي كتب لسيدة ليديا وسيدة نور لازمهم توقيع ... انا غاندي لسيدة نور وراقها ... وديال السيدة ليديا هاهي نخليها ليك ... ووصاني باش نخبرك انه غايكون فررحان ومرتاح الى نفدتو ليه الوصايا بدون جدال ....
خلاه ومشا ....
رحع تونار بذاكرتو وهو كايشوف فعينيه فالمرايا ... مابقاش عندو طاقة ولا حتى دموع ... حاس براسو ضعييييييف وتسلات طاقتو كاملة خصوصا ملي وصلو خبار ان اوشن حتى هو مااات .... وجدو لي مات كايوصي مايقربش ليهم حتى هادوك لي فالحبس... حاس براسو عمر ليه بزاااااف لدرجة مثقل عليه .. ولا باغي غير يحطو وينسى كولشي ولا يمشي لشي بلاصة بعييييييدة ويكلس ... ويحط راسو الثقيل .....
بدا كايفسخ فالماسك يعقم... وليديا كاتجمع الحوايج تادخلات عندها نعيمة بعد مادقات ..
نعيمة : لالة .... ايطو قالت لي نسولك واش تونار يبغي ياكل يطلعو ليه حيت ماتغداش قبيلة
ليديا : غير طلعي غانحاول معاه .... ( مشات ) اييييه ( ضارت عندها ) وراقك ماعرفتش تونار فين وصل فيهم .... ولكن ملي غايوجدو غاتلحقي عليا
نعيمة : ( طلات عليها شافتعا كاتجمع حوايجها ) غاتمشييييو ؟؟؟؟؟
ليديا : اممم .. ملي يوجدو غانسيفطليك تجي لعندي ...
نعيمة : ( بضحكة واسعة ) صااافي الالة كترررر خيرركم ...
مشات هابطة كاتجري فرحانة خاصها غير امتى تمشي تهاجر ... و ليديا جمعات حوايجها ووقفات تاني كاتجمع حوايجو هو .. كاتحيد من علاقات وتحط فلافاليز تاشافتو خرج من حمام وتمشى بخطى بطيئة لسرير ونعس داير يديه بجوج تحت راسو وغمض عينيه .. خلاتو عى خاطرو حتا طلعات نعيمة بلاطو وخرجات بزربة ملي هو تما .. حطات لي فاليز فجنب و طلات على لبلاطو شنو فيه .. ورجعات تمشات لعندو كلسات فالسرير حداه فالجنب تكات كاتشوف فيه شحال عيااان .... توحشات الجدال ديالو وعنادو معاها ... توحشات عصبيتو وحتى ابتسماتو لي واخا كانو قلال كانو كايبعثو ليها السلام لقلبها .. وبدات كدوز يديها على شعرو تتدلك فروة رأسو وهو استحلى داك التدليك الحنين ... وقربات براسها تاحطاتو فوق راسو مدة كاتلعب بشعرو ... عاد نطقات
ليديا : واش عرفتي شحال توحشتك ....
تونار فقط تنهد وحل عينيه فيها وهي ابتسمات ليه .... و تاهو تجبدو شفاهو بابتسامة عيااااااانة بااهتة و تقلب لجنب خشى راسو فصدرها وهي عنقاتو بيديها جبدات راسو التقيل لعندها .. حسات بيه مرتاااااح وتاهي حطات راسها عى راسو وخلاتو ... من خلال هاد الحركة هو قال ليها بزاااااف دالكلام لي هي عرفاتو و فهماتو .....
*فالاسفل ....
حكيمة : ( كالسة وشادة التسبيح ) واحطو لينا داك الكاس دالقهوة دغيا قبل مايجي شي حد تاني
ايطو: ( جايبة البلاطو ) تونار ماعرفتو غاياكل داكشي ولا يخليه تاني داك الولد كايقطع ليا فقلبي
حكيمة : اوااااا زااد فييييه ... كاع مشا لينا .. كلنا محروقين ومدرناش هاد الحالة..
ايطو،: لااااواااه احكيمة هو ماشي بحالنا .... الله يكون ليه فالعوان مانتحرقوش قدو ( تاتكب القهوة ) سمعت من نعيمة قالك غايرجعو لطاليان
حكيمة : وامصااااب .... عيينا هنا قتلونا غاضياف ... نمشي لداااااري نرتااااح ( حطات تسبيح ودارت رجل على رجل ) دابا عااااد غانتلهى مزياااااان لداك اللفعة لي لفوق ....
ايطو : لواه احكيمة السيد باقي خضر فقبرو غادي كايوصي
حكيمة : السيد مااااات ...مات وشبع موت .. العقبة للااحقين ...( ضحكات ) اغداااايدي اغدادي امتى ندخل لداري ونجري على داك اللفعة لي كان طاااامعة فيها ونتشفى ... المامون دابا كتب الدار بسمية بنتي المحامي جاب ليها وراق الملكية قبيلة سينااااتهم ...لا هو لا هي .. ماااايعتبوش باب داري
ايطو : ( كلسات ) اويلي راها دار جدو ؟؟؟؟؟ على هو يخليك بعدا
حكيمة : بزز عليه.. الدار فسمية بنتي .. اش كايسال .. ونزييييدك ماشي غيير الدار .. الدار والوزيييين والشركة ....(ضاحكة تالضراسها )
ايطو : ( حلات فمها ) احااااا !!!!! وماخلا لحفيدو والوو زعما ؟؟؟؟؟؟ مااااااايمكنش
حكيمة : وعلاش لي مايمكنش ؟؟؟؟ مال حفيدو مخصووووص ؟؟؟؟ هداك راه يشريني انا وياك الله يجيبك على خيرر
ايطو : وايه ولكن مجاتش تجري عليه من دار جدو
حكيمة : وووونجري عليه اش مشااالك ياكما خلاك المرحوووووم رقااص عليه !؟؟؟!
ايطو : ( بقات كتشوف فيها ) حكييييمة،؟؟؟؟
حكيمة : ييييه حكيمة ... سمعي اييطو من نهار لول يموت المش .. المرحوم مات والتراب فوق ظهرو فين غانمشيو كاملين ... بغيتي تعشي معايا واكلة شاااربة تباركالله ... بغيتي تبقاي دافعي على هداك لي عمرو حتاقاليا خااالتي سييري تبعيييه .... دابا مشا زمان وجا زمااااان ... انا باغة نرتاح وعييت من عيشة الدل والقهرة ماشي ربي مني سهل عليا تجي توقفي لي فعووودي .. خدمتك الكووزينة خدميها ولكن دخلي سوووق راسك آ ايطو الله يرحم باك
ايطو : ( حطات الكاس ) وصلنا لهاد الهضور احكيمة ؟
حكيمة : ايييييه باش الواحد يعرف راسو من رجليه
ايطو : دابا انا وليت غا خدامة فالكوزينة ؟؟؟ مابقيتش وحدة من موالين الدار كيف كان يقول المرحوم ؟ يشاورني فالطالعة والنازلة ( تعمرو عينيها بدموع ) حفيدو تربى على يدي .. هم ؟؟؟؟ وليت دابا هصني ندخل سوق راسي .... اوا الله يجااااازيك بالخير ... احكيمة ... الله يجازيك بالخييير لي نبهتيني لمقامي ..
حكيمة : ( دارت رجل على رجل) اوا الحاصول هو هدا .. الدار داري دابا ، ولي ماعجبو حال يخرجها ....
ايطو : ايييييه حتى هذا نضر ( حطات الكاس ووقفات ) الرزااااق الله اختي حكيمة ....
خلاتها ومشات وحكيمة طلعات كتافها وكلسات كاتكب القهوة حتى نزلات نورة
نورة : ماما فوقاش نرجعو فحالنا
حكيمة : خلي يمشي هو بعدا يطبگ علينا هو واللفعة ديالو سمعت قالك غايمشيو ... باش حنا هنا نبيعو لي يتباع فهاد دار نديرو فلوسنا فجيبنا قالك هاد دار تكتبات بسميتو هو ... غاتبرع فيها غير اللفعة خلينا نبعيو بعدا لي يتباع
نورة : ودابا غير طلقينا نمشيو فحالنا ( كلسات ضاحكة ) عرفتي كي نوصلو لدار غاندير حفلة ونجمع صحاباتي كاااملين .. الله، اخيرا غانوليو بحريتننااا فالدار .. ( شافت مع حكيمة وضحكات كضربها فكتفها ) وماما غااتولي تصغااررر وتلبس الدجييين تاهي وتحيد عليا هاد الزيييف وتولي تغالط مع الكاوريات ( حكيمة كضحك ) ياك الحاجة ههههه
حكمة : اوا ماااالها مك سهلتيها ...( ايطو كاتسمع وتضور راسها وخرجات كتبكي ) اجي فين المتعوسة دختك ملي سينات على داك الوراق وهي ما عاجبها حال
نورة : انا الى تسمعي مني اماما ... هاديك مافيها ثقة يجي يلعب بدماغها دغيا ... نقولوليها تكتبها ليك و ترفع وراق طلاق عليه باش مايبقى يسال فوالو ،و تكتب ليك الدار والوزين نبيعوهم ونديرو شي مشروع انا وياك ....
حكيمة : وفين هي بعدا المتعوسة تنزل نهضرو معاها ... لابقى ليها هادشي فيدها دغيا يلعب ليها بالعقل هو وداك اللفعة .. خير كبير هدا ماخصناش نكونو غافلين حتى يهزنا الما ..
الفوق ...
ليديا سمعات الدقان فالباب وشافت عند تونار مخشي فيها ماعرفاتو ناعس ولا غير مغمض عينيه مبغاتش تنوض تخسر نعستو وقالت هادي غير نعيمة ولا ايطو ...
ليديا : دخلييي .. .
تحلات لباب وهي تدخل نور غير شافتهم فداك الوضعية هبطات عينيها وبغات تمشي
ليديا : نوور !!
نور : ( مهبطة راسها ) نرجع منبعد .. سمحولي
ليديا : دخلي اجي
تونار غير سمعها بعد راسو غير كيتنهد ، بعد على ليديا وتكى على سريرو كايحاول ينعس .. وليديا ناضت
نور : ( كاتشوف لعندو ) ناعس بلا منصدعوه
ليديا : بغيتي شي حاجة،؟
نور : كنت بغيت نهضر معاكم ...
ليديا : سدي لباب ودخلي ...
شداتها نور ودخلات وليديا زادت للكليسة لي حدا البالكون وجلسات وجلسات حداها نور هازة شي وراق فيديها
.نور : ( بالحس ) كيبقا شوية ؟
ليديا : شوية ليوما ( كاتشوف لوراق ) شداكشي ...
نور : صراحة بغيت نهضر معاكم بجوج ... هو بالخصوص ...
ليديا : صبري ...
خلاتها ومشات لعندو ونور كتفادى تشوف لعندهم باقي كتحس بالغصة فقلبها ... وتكات حداه كاتهضر غير بالهمس بينها وبينو
ليديا : نور قالت بغات تهضر معاك ... باينة عندها شي حاجة مهمة مدامها جات ... قادر ولا تالمنبعد ؟ مم !!
تونار حل عينيه فالسقف وبدا كايحد فشعرو.... وهي بان ليها حل عينيه عرفاتو غاينوض ومشات رجعات لعندها تاناض بشوية عليه كايحك فشعرو ... وجا لعندهم جلس بعياااء ....
تونار : ( بثقاااالة ) ياك لاباس !!
يتبع...
التعليقات
لا توجد تعليقات بعد، كن أول من يعلق.