محتوى القصة
ليديا بقات ففراشها جاها الملل حتى داها النعاس ...
تونار رجع لقاها نعسات ودخل بدل حوايجو غير خرج من دريسينغ بانتليه كاتفيق .. كاتشوفو كايتحرك وواضح معندوش الخاطر ...
ليديا : تونااار ...( ماردش عليها ) تووونار ...( بالغوات ) تووونااار
تونار : ( ضار عندها بزعفة ) شنووو .. اش كاين ؟؟؟
ليديا خنزرات وناضت من الفراش ووقفات قدامو
ليديا : انا علاش كتززعف عليااا؟؟؟؟؟ عصبوووك هوما انا مالي ؟؟؟؟؟؟ اخر مرة تدوي معايا بحال هاكا .... مدايراش علاش تزعف عليا ... وحتى فاااش ندير علاش متزعفش ... ماتخلقش انا لي يزعف عليا ....
خلاتو ودخلات للدوش هو ماسمعهاش كاع كايشوف لتيليفون مبرزط .. ولااحو گلس على الفطوي شاد على راسو ....
خدمتو تصطوكات عليه ..وعندو ندوة غدا ... و جدو كايشوف كاضيع من يدو وزادت عليه هاد القضية ديال عائلة نور ... تحط امام امور كايكره انه يواجهها وطول حياتو عايش بعيد على الناس دابا مضطر يدخل فالجو العائلي على ود جدو يبقى فخاطرو .. كان كايعاندو ملي كان صحيح .. دابا ملي مريض .. مقادارش يرد عليه تالكلام ....
تاسمع الباب ديال الدوش تحلات خارجة مقلقة وطالع ليها الدم ... غسلات وجهها وخرجات دايزة من حداه ترجع لسريرها تاحساتو جبدها من يديها تلاحت عليه مابغاتش حتى تشوف فيه هو مزيرها كايشووف فيها ...
تونار : بحالا كنت كاتقولي قبيلة شي حاجة ؟؟!
ليديا : ( شافت عندو ) داباا تا عضرتي مابقتييش كتسمعها ؟
تونار : سمعت شي تزنزيين يمكن لا ؟ .....
ليديا تنفضات و ناضت عليه
ليديا : متعاااودش مزال تهضر معايا ... ماشي هوما يعصبوك و انا تخرج فيا ... انا مااااالي انا ؟؟؟؟؟ واصلا ماااشي من ( قاطعها )
تونار،: مابغيتيش تمشي تشري الحوايج ؟
ليديا،: شنوو ؟؟؟؟
تونار : ( علا حجبانو و رجع قاد الگلسة ) حسابتني بغيتي تمششي ...
ليديا،: بغييييييت
وتونار : وراك غضبانة زعما
ليديا : غضااابة اوا رااااضيني بحال الناس ....
تونار،: ( عوج معاها راسو ) على كون كنت بحال الناس غاتبغيني لاقيييس ...
ليديا : غاتخرجني ؟؟؟؟؟
تونار : (ناض وقف دار يدو فجياابو دايها على قد تقلها ) بغيت نخرجك ولكن مايمكنش .. معندك ماتلبسي
ليديا : غاانلبس لي كان غير خرجني .. بغيت تانا نجرب الشوووبينغ على براا كيداير ... عااافااااك ، لا ماشي عافاااك بززز عليك ....
تونار : بشررط ...
ليديا : ممم ؟؟
تونار،: غانبقى فطوموبيل ...
ليديا : صااافي نمشي بوحدي وريني غير كيفاش ندير
تونار : ( رجع حك شعرو بتردد ) كون غير خديتي اون لاين .. حسيمة صغييييرة ماعندك فين تمشي ... خلي تانرجعو لايطاليا ... هنا كاينين غير لي بوتيك صغاار ....
ليديا : مكيهمنيييش ( قربات عندو ) خليني نحس براسي انسانة طبيعية ولو لمرة وحدة فحياتي خليني نجرب شي حاجة كايديروها كاع الناس ....
تونار : ( طول فيها الشوفة و دوز يدو على شعرها ) واخا ....
ليديا : ( جا ماشي وشداتو ) صبر ... نقدر ندي معايا داك البنت ... تعاوني الى معرفتش شي حاجة ...
تونار : لي عحبك
نقزات عليه بفررحة عنقاتو مع قصيرة هزها باش توصل لعنقو ... وابتسم بعياء واخة مقادرش ، مي باغي يخلق ليها الجو ومايضلمهاش وسط امور ماعندهاش دنب فيهم ...
ليديا : نمووووت فلي نبغييييييه انا
تونار : لبسي حوايجك انا غانمشي نشوف جدي .. ماتعطليش ( حل لباب ورجع شاف عندها ) وراه كنعرف شنو كتعني جنتلمان غير تهناي ...
خلاها وخرج وهي بقات كتضحك متبعة اثرو ....
خرج عند جدو وليديا جبدات من الفاليز كسوة لي بانتليها ثوبها واقف مكتكمشش ، لبساتها .. هي كتبان عادية ولكن ليديا مقلقينها غير دوك الثنيااات البساط ديال الطي .. هي خصها كولشي مثالي ...
قادات شعرها ومكياجها وهزات صاكها كتلبس فنظاظرها مستعدة تنزل ...
اما نور عاد فاقت من النعاس ولا وجهها عامر كآبة وخيبات الأمل ... و زاد كمل عليها شعرها ، لابسة غير زيف حيت كدير لي ماسك .. يلاه هابطة لتحت وهي تشوف ماماها ونورة طالعين
نور : فين كنتو ؟
نورة : لتحت مع خالي ... اييه نعسي ليا نت مع راسك ونا نضرب تمارة ونخطط كينديرو نتهناو من داك اللفعة
نور : شفتي كون يقبل تونار يدخل معايا للبيت غير ليلة ويعطيني فرررصة وتشوفو واش منقلبوش عليها، واش هو عمرو عطاني فرصة كيف بغيتوه يبغيني ؟
حكيمة : هاداك غير ضربيه على حساب جدو .. عمرت الحاج مزيااااان ، قتليه حقا يدخل معاها قدام خويا وولد خويا باش مايضربوش بيها الطر فالعائلة .. واخا اشرف معارف تابيتك فين جا قتليه حنا عندنا قاعدة العائلة كدخل لبيت لعروس والعريس يباركو ....
نورة : ( ضربات على كتفها كضحك ) هايهاي طلعتي مسااااهلاش تانتي هههه ...
يلاه كايهضرو سمعو الباب تحلات فنهاية الكولوار هوما يكحلو بالعما كل وحدة فين بدات كتعوج عينيها، .. كانت ليديا خارجة من البيت شافتهم وهي تهبط النضيضرات على عينيها كاتشوف فيهم زعما ، وضحكات كتقرب عندهم بشووووية بغنجها المعتاد
ليديا : بوووون سواااغ، .. كتعني مسالخير الى مكنتوش كتفهمو الفرنسية ... متخافوش مكنعايركمش( غير كايعوجو فصيفتهم مادوهاش فيها وهي طلات على نور ) ضرررتي العزيييزة كيف بقى البال والخاطر شوية ؟ لقيتيني خارجة نفوج انا وراجلنا .... مكرهتكش تمشي معايا حتى نت تفوجي ولكن تونار كتعرفيه معندوش مع البراني .... ( نور مخنزرة فيها ونورة بغات تاكلها )
حكيمة : سيري بدلي ساعة باخرى حسن ليك
ليديا : اووووه كنت غانسى ( خشات يدها فالصاك وجبدات فاغاجو ومداتو لنور )
نور : شنو هدا ؟؟
ليديا : فاغااجو .... حيت قبيلة ( لحناتها ) جججدي المااامون ، قالينا بغى تونار يحمر ليك وجهك ... ونا نقول مع راسي هاد لون يجيك حسن ...اش باليك ؟ ولا نعطيك الغوز ! يطيح عليك شوية السر
نورة : يااااربي تصبرني يااربي
حكيمة : الله يطيييح عليك شي مووصيبة
ليديا: الله يحفظني ثقيييلة عليا ( كطلع وتهبط فحكيمة ) فيها شي 90 كيييلو هاكاك
نور : ( ضربات ليها داك الفارجو ) الموصيبة هي نت قاالااااك ماما
ليديا : واش انا قلت ماماك موصيبة ؟؟؟ ( شافت فحكيمة ) سمعتي بنتك كاتقول عليك موصيبة .. ونعم التربية
نورة : راه يا اما تهبطي ضرگي زلافتك ولا نعطيك نتفة حسسسسسن من هاديك لي خديتي ...
ليديا : ماسخيتش بالجماعة معاكم حلوة تباركالله ولكن غانتعطل على راجلنا انا و ختك ...باااااي .
تسناوني للعشا نفتح ليكم الشهية تاني ( عطاتهم بوسة فالهوا ونزلات )
نزلات ليديا لتحت كتقلب على نعيمة مخلية موراها العوافي شاعلة لفوق .... تاجات عندها نعيمة كتجري ... قالت ليها غاتخرج معاها ومشات بفررحة تلبس حوايجها
وليديا تمشاات لجردة يالاه غاتخرج وهي تساااطح مع امييير داخل... لي ريحتها ضرباتو لنيفو سكراتو وشاف عندها وهي طلعات عينيها فيه .
غير كاتشوفو كتفكر داك الفترة كاااملة وكتفكرو انه اول واحد خلا الاامل يفيق فالداخل ديالها وعطاها فرصة لحياة جديدة .... هو معارفاش ولكن هي كاتشوفو واحد من أسباب فرارها من المستعمرة .....
امير استغرب لدوك النظرات لي كاتشوف فيه بيهم، فنفس الوقت سحرها مخلاهش يقاوم ولا يبعد ...من لقريب كتبان فاتنة اكثر .. وجدابة لدرجة صعيب تبعد عينيك الى جاو فوقها
تاسمعو تنحنييحة مورااهم وضارت ليديا بزربة ... لقاتو تونار دااير داك الابتسامة ديال خزيت ...وهي تبعد كترد شعرها لور وتحاول تتبسم وامير تاهو ابتسم كايقرب عندو فنفس الوقت مقادش يشوف فعينيه ، الخضورية دالعنين الزوهرين صعيب تطيل فيه النظر الى مكنتيش مولف تشوفهم
امير : ( مد يدو ) انا أمير ولد أخ حكيمة .. ماسبقلناش تشرفنا ....
تونار فقط وما براسو وخلا ليه يدو ممدودة وخرج جارها من يديها وهي تابعاه وامير متبعهم بعينيه .... وكايقول ان غراااابة هاد البنت خيالية ... كأنها هاربة من عالم ديزني ... بنفس جمال البطلات ديالهم ورقتهم و إطلالتههم
اما تونار حل لباب ليديا ركبات وهي غير من زدحة لي دار لباب عرفاتو ماعجبوش الحال ... ركب ديمارا بدون كلام .. يلاه غايهبط الفران آمان شدات ليه يديه
ليديا : صبر تجي لبنت ...
حيد يدو وبقى كايتسنى بدون كلام وتاهي ماحكراتش اكتفت انها ضور لزاج وتتبسم وتعض فشفايفها كتستمتع ب شعور غيرتو لاول مرة .....ولفاتو تصرفاتو الباردين حتى بقات تقول مع عقلها " مكانش كايحسابتني كايحس !!" ... ساكتين تاجات نعيمة ركبات لور عاد انطلقو ...
وصلو قدام واحد الشارع كله بوتيكات ديال ملابس النساء و ليديا حالة فمها فروعة المكان المكتض بالناس عندها هي هادي هي الروعة ... وفرحانة لي غاتخرج تتجول من أرجل المارة والناس ... يلاه غاتشد لباب تمشي هو يجبدها اما نعيمة نزلات قدامها ...
ليديا : ( شافت عندو عينيها كايلمعو بالفرحة ) شنو ؟؟
تونار : علاش جيتي لهنا ؟؟
ليديا : هااء ؟ نشري لحوايج
تونار : باش
ليديا : مافهمتش
تونار : باش غاتشري داك الحوايج ؟؟؟؟؟
ليديا : ( كتحك فشعرها ) هااا ؟؟؟
تونار : ( مد ليها كارط ) شدي، ماشي كولشي غادوخيه يعطيك اش بغيتي فابور ....
ليديا : ( شافت ل داك الكارطة ) مافهمتش
تونار : عيطي لداك البنت ....
ليديا : واعطيني لفلوس راه كنعرف نحسب الدرهم قريتها فالعملات ...
تونار : ( ماد داك الكارط اصلا ) الى تواضعتي وشديتيهم ...
ليديا : هاء ؟ على هادي هي لفلوس ؟؟؟؟
تونار : ( شد على راسو) طلعي لطموبيل رجعي فحالك الله يرحم باك ...
ليديا بقات غير كترمش وشدات عليه داك الكارط فللخر رجعات لطموبيل
ليديا : دابا غير فهمني ... غير بشوية راه كنفهم ....
تونار : غادخلي لهاد لي بوتيك لي قدامي هنا .. تزيدي خلفة غانردك لدار ... وهاد الكارط لي فيدك راه بها غاتخلصي ... انا غانكتب ليك الكود وملي تاخدي اش بغيتي لبنت لي معاك توريك فين غاتخلصي .... لقيتي راسك ماعرفتيش هي غاتوريك ... هادي راه كاغط بونكيغ
ليديا : ااااه ... دابا هاد الكارط كتسحب الفلوس ديريكت من الكونط بونكيغ.. والى وريتهم الكود يدخلوه راسهم مغايسبحوش لي بغاو زعما ؟....
تونار،: على نتِ غاتخلي ليهم هوما شنو يسرقو ؟ مصاب غير يقدك شنو تما فداك الكونط وماتجييش عندي نكمل ليك إسپيس .
ليديا : على شحال هنا .... راه مغانشريش بزاف دالحوايج ... غير شي حاجة قليلة متخافش
تونار : ( كايكتب فواحد الورقة الكود ) منخافش ؟ انا منهار عرفتك خيالي وليت كنخاف منو ... ( عطاها ) شدي ها الكود ... ماتهزيش الهم للفلوس واش يقدو .. هزي الهم للطموبيل واش تقد تهز اش شريتي كامل ...
ليديا ضحكات ليه وخرجات من طموبيل شدات لباب عاد طلات عليه من السرجم
ليديا : متأكد مباغيش تنزل معايا
تونار كايجبد تيل و حرك ليها راسو ب لا ... وهي مشات متبعها بعينو تادخلات لواحد البوتيك وزاد بطموبيل حدا باب داك البوتيك ووقف وجبد تيل يشوف اخر اخبار البحث على اوشن فين وصل
ليديا غير دخلات لداك البوتيك بقات تشوف وتطلع وتهبط فالناس القلال لي تما كايضرو ... نساء مع بعضهم وبعض الرجال مع نسائهم ....
كيف دخلات كيف ثار انتباهها رائحة الناس لي كاينة كاتشوف بعينيها كايلمعو .. اما الرجال مع عيالاتهم وعناقهم كايطوالو يشوفو لعندها بلا مايثيرو انتباه عيالاتهم ... ونعيمة تابعها كل مرة تقوليها شوفي هادي شوفي هادي .... وهي متعتها مكايناش فالحوايج .. كاينة فأنها كتمشى بحرية وسط ناس غرباء وهادشي بنسبة ليها كان محرم كليا ومكانتش حتى كتحلم به....
حتى جات عندها وحدة مبتسمة وهضرتها باين عليها الريفية واخا هضرات بالعربية
- نساعدك فشي حاجة ؟
ليديا : سوارذ ثمازيخث ( كتهضري الريفية ؟)
- ( بالريفية ) ييييه كنهضر
ليديا : مكاينش شي باب اخرى هنا من غير هادي !!!
نعيمة علات عينيها و داك لبنت مافهمات والو
- اا .. مافهمتش قصدك !!!
نعيمة : ( بينها وبين ليديا ) هاء علااااش !!!
ليديا : زعما مكاينش شي باب نقدر نخرج منها لشارع من غير هادي !!!
- واش ضروري !!! كاينة وحدة ... ولكن علاش مال هادي
ليديا : وريها ليا وبلا اسئلة بزاف ...
داك البنت بقات غير كترمش ومشات قدامهم و نعيمة تابعها مافاهمة والو
نعيمة : فييين غاتمشي ؟؟؟؟ اويلي واش هربانة منو ...
مارداتش عليها حتى وراتهم الباب د منفذ الاغاثة .... كانت كتخرج لشارع اخر ... وخرجات غير شافت الشارع شحال عامر بالناس الضحكة وساااااااعت على فمها وعلات يديها
ليديا : ياااااااااي .... سوووووووپر ....
كان شارع طويل والفراشات فالارض كل واحد واش كايبيع ...وكاين لي فالطبالي ... وتعياااااط بجهد ديال الريباخا والريكلام ... وليديا شافت عند نعيمة
ليديا : واش كولشي هادشي بالفلووس !!!!
نعيمة : اااه .. ولكن قوليها لتونار بعدا
ليديا : فين غايشوفنا ... عقلي غير على طريق وغانرجعو من نفس الباب غير هنيييينا .. تبعيني وسكتي
تبعات داك الشارع كتمشى وتضحك وعاد انطابق المثل ديال " عمرها شافت الدنيا " كاتشوف مع موالين الخبز لي كايتباع على طبالي وكل مرة تسول نعيمة شنو هذا شنو هذا ونعيمة كتشرح كيف شي دليل سياحي ... تاشمات شي ريحة بنيفها بقات كتشمشم وضارت عند نعيمة
ليديا : هاد ريحة دشي حاجة كتعجبني !!!! ماشي الپوپ كورن !!!! " الفشار "
نعيمة : هوو ... راه كايتباع هنا بغيتيه ؟؟
ليديا : كايتبااااع،؟؟؟؟؟؟ حلفي وررريني فييين هو
تبعات نعيمة كيف شي غشيمة تا لعند مول الگلية وهي توسع عينيها ملي شافتها توحشاتها كانت ديما كطلبها من لبنى ... وققفات حداه كيف شي طفلة صغيييرة كتكتشف العالم
ليديا : بغييييت هادي ... عطيني منها
نعيمة : عطينا وحدة عفاك
داك الراجل عمر ليها ميكة وعطاها ... و شداتها كتاكل ...
نعيمة : عندك بعدا لفلوس راه انا مهزيتيش بزطامي
ليديا بقات كترمش و هي تتضحك ملي تفكرات لاكارط وخشات يديها فصاك مداتها ليه ونعيمة شدات على راسها
البائع : اش هذا ؟؟؟ واش بنتليك انا كنتخلص بالكارطة ؟ بانتليك مكتوبة على الكروسة الگوتشي ؟
نعيمة : ر راااه مكتعرررفش ... غير صبر .. شحال واش آبعا دورو ياك ( 2 دراهم )
ليديا : ورااااه هاديك فيها الفلوس مااالك ( مدات ليه الورقة ) ها الكووود ...
اابائع تحلو عينيه وشد عليها
البائع : اييييييه الله يخخخلف ... الكود ديالها هدا ياك
نعيمة : اااطططلق لهنا الشفرة بالعلاااالي راه مكتعرررفش .. اويلي علاش عطيتيه لكارط
تشادات نعيمة ومول الكلية و ليديا كتفرج فيهم ... فلخر خلاتهم وزادت مع واحد الدرب كتاكل فلكلية وتبلق بعويناتها كتسارا على الدرووبا ...
زادت تابعة داك الدرب كاتشوف فالديور كل واحد ساد بابو ... تاخرجات فشارع اخر يلاه بغات تقطع كانت غاتطحنها طموبيل كون ماهربات من الطريق وتقنتات فواحد القنيتة كاتشوف لداك الطريق عامرة طوموبيلات كيف غادير دوز ...لاول مرة فحياتها تحس بالضعف وتزيد تلعن الجحيم لي كانت منفية فيه لدرجة نهار خخرجات للعالم ماعرفات منين تبداه ...
رجليها بقاو كايزيدو بشوية تقطع الطريق وغير دوز شي طموبيل كترجع لور ... كاتشوف انها فعالم غرييييب عليها، هي ولفات تكون ملكة فعالمها و منافيها والكل كايهبط قدامها الراس .. ولكن هنا تاحد مكايعرفها شكون وكل واحد قاصد شغالو و فئة اخرى لي كاتشوف فيها كاين لي مستغرب وكاين لي معجب ....ولي داز حداها كايشوف فيها ولكن من خصال الرجال الريافا وساكنة منطقة الحسيمة معروف انهم مكيتبسلوش على لبنت فقط قلة قليييييييييلة اما الاغلبية كايشوفو وصافي نظرا للنفس لي عنهم مكيرضاوش .....
دارت بناقص انها تقطع داك الطريق وبقات تابعة غير الطريطوار لي كتمشى عليه وكل مرة تطلع راسها وتشوف وكتحس بسعااااادة رهيييييبة رغم شوية ديال القلق منهاد العالم ... ناسية تونار ونعيمة و ناسية الدار و ناسية اوشن و ناسية انها ليديا .. بغات غير تعانق حلمها لي كان مجرد هلوسات على سريرها دابا اصبح حقيقة .....
ماشية وكتاكل من الگلية لي دازت حداها كاتبقى تشوف فيها ليديا بلا حشمة كطلعهم وتهبطهم وتعيب بملامحها على لباسهم ... ولوخرين غير كايشوفو مال هادي وكاين لي كايقول "شوف كيف دااايرة" .. " ناري شحال زوينة " " واش هاربة هادي من شي روسوم "..
كملات الكلية ديالها وبدات تنفض فيديها بشووووية تنظفهم ... تالقات راسها فواحد الدرب وهدا ما معروف على الحسيمة من درب لدرب ... صغيرة ومجموعة كلها فالدروبة ... بقات ماشية داينها رجليها حتى كتلقى امامها واحد الكاراج كله بالزاااج والصور ديال كمال الاجسام والباب ديالو محلولة وكايتسمع من برا ( وان توو واان توو وان توو ) دخلات كطل براسها كيف شي فارة عليهم واحد كان هاز الاثقال شافها هوما يطيحو داك الاثقال كلهم لجنب حال فمو فيها وهي كاترمش معاه بمعنى " مال هذا " اما واحد كايجري فطاپي غولون طلق يدو وبقى كايجري فالهوا تاجا على فمو ... واحد كان غايضرب المدرب بركلة فالقفاز ديالو صدق عاطيها ليه لوجهو
وهي بقات غير كتبرقق بعينيها نوضات الفتنة فداك لاصال خلاتهم وخرجات .... كملات طريقها وخلات موراها لاصال مقلوووب .... كايعجبها غير تطل وتستكشف اش كاين .. غير شافتهم عرفاتو نادي ديال الريااضة ....
كملات طريقها كتطل على كل بلاصة " حلاق " " روض " " بوتيكات " " باتيسريات " تابدا الحال كايضلام وكتسمع المغرب كايأذن وكل الاضواء دالشارع شعلات ...
الحسيمة بالليل حكاية اخرى فالجمال والروعة الهدوء ..
مدينة السكون والأمان ... وليديا باقي ماشبعات من التجوال على الشوارع الضيقة و حتى الواسعة كلشي استكشفاتهم .. تابانت ليها بناية طالع منها الدخان من الفوق .. وبيبانها محلولين ماعرفاتش كاع شنو هي .. وتمات داخلة بان ليها صف ديال الرجال بالصيكان ديالهم كايقطعو الوراق عند واحد ... بقات كاتقول واش محطة قطار ولا آش !!.. غير كترمش معاهم وهوما كل واحد مشغول مع ورقتو ولي كايقطع ليهم عينيه يلاه مكافية معاهم ... لقصر قامتها تخطات وسطهم بلا مايرد ليها تاحد البال باغا غير طل وتشوف اش كاين ودخلات مافاهمة والو وقوة الهضرة والهاراج لداخل ... دفعات واحد لباب ودخلات .... يلاه مع الخطوة الثانية وهي تووقف مصدوووومة !!!!!!!!!!
عينيها توووسعوووو واقفة مامستوعباش اش كاتشوف ...وهوما للداخل باقي مزال مشافها تاحد ...
كان صالة كبيييرة بكراسي وكل واحد كالس حدا صاكو .. كاين لي دوش وكايلبس وكاين لي يلاه كاينصل ... وكاين لي كالس هاكداك عرياااان كايقلب على حوايجو ....ليديا بحب استكشافها لقات راسها وسط حمام ديال الرجال !!!!!! ....
واقفة مصدومة مافاهماش راسها فين هي .. ماعمرها عرفات انه كاين مكان ممكن يستحم الشخص فالخارج .. مجموعين بهاد الطريقة ومزال مافهمات ولش هدا حمام ولا اش كايديرو كلهم هنا عريانين هاكا ؟؟؟؟؟؟؟ ... واقفة بذهووول كاتشوف معاهم بلا حشمة بلا حيااا كتسااائل غير اش كايديرو هادو هنا هاكدا .... تاكتسمع الغوات ديال وااحد الراجل داخل من برا وواحد كايحضي صيكان شافها كايجري . ولي كايقطع اوراق سمح فيهم ودخل كايجري يشوف ملي قوات الهضرة .... لي عريان غطا لعورة ديالو كايشوفو فيها مصدومين اش دخل عليهم ممراة للحمام ... وهي غا واقفة وكاتشوف كيف شي هبيلة و عينيها كون كانت تهضر داك النظرة لي فيهم كون قالت "ماالكم اويلي "!؛
- واااشررييفة واااختي .. ولاخت واافييين دااااااخلة ... خرجي منهنا واش مسطية نت
مسمعاتوش كاع بقوة الصدمة .. تفيكسات فبلاصتها من شنو شافت تاوعات براسها لاراها وسط قوم دالرجال كلهم عريانين علم الله اش كايديرو وهي ضور خارجة كتججري والهضرة تابعاها وكاين لي شاداه الهيستيرية ديال الضحك من داك الصدمة لي كانت مرسومة عليها.... خرجات لبرا وبقات غادة فااشارع كتهضر غير مع راسها كيف شي هبيلة...
ليديا : لي كايبيع البوب كورن عرفتو ... لي كايديرو السبور عرفتهم ... لي كايبيع الحلوة عرفتو .... هادوووو اش كايبيعو اويلي ؟؟؟؟؟؟؟؟
كملات طريقها لي كانت كلها فضول واستكشاف لعالم جديد عليها ، عالم العلن ...
العالم لي كانت كتحلم بيه طول حياتها فوسط منفاها ،
كتتمشى مستكشفة كأنها أليس فبلاد العجائب ...
وكل مرة تعوج شفايفها بخيبة لهاد العالم لي كانت كضنو فشكل ، ساعة جاها عادي جدا ، ... لانها من النوع لي كتعشق الاشياء الخارقة للعادة ، الاشياء الكبيرة والمميزة ، العادي مكيستهويهاش ابدا.
للمرة الثانية كانت غاتدهسها طموبيل كون ماهرباتش مفزوعة من الكلاكسون .. ولسقات مع الحيط ديال الشارع ... الكلاكسون كان بحال شي فرقعة اصابع فيقتها من سهوتها ....عاد كاتشوف راسها الى ضلام عليها الحال .. وهي فعلا معارفاش فين كاينة ....
الكل قاصد شغالو و هي تايهة !! ... فضولها للعالم الخارجي خلاها تنسى ان عندها وجهة ....
ضارت موراها تتذكر طريق العودة لداك البوتيك حتى بانت ليها طموبيل جاية من داك الشارع والفار ديالها قوي خلاها تحط يديها على عينيها ، وفرانا قدامها نازل بجهالة ونعيمة نزلات موراه ... لي غير فقدات اثر ليديا رجعات كتجري عند تونار خبراتو ...
نزل بجهالة ومخلوع و عينيه حووومر جرها من دراعها كايغووت ويسب .. وهي بدون جواب غير كاتشوف فيه بحالا راها فشي سههوة مزال مفاقتش ...
تونار : الى باااقي عتتبتي لمك داك لباااب نحرررم حياااااتي تااغانقطع مك اناااا لي هصني لعقل داااير راسي فييك انا .... طططلعي ... طلللعي
طلعات مزادتش معاه ركبات وزاد طريق كلها غوات وسب وهي غير ساكتة كترمش بعينيها ...
تاحاجة من كلامو مكتأثر فيها ... ماراهاش فداك العالم ، ملي كايكون كايغوت عليها شي حد وهي ساكتة راه ماشي خايفة او راضية !! راه هي كتكون مكتسمعوش اصلا ... كتكون مشغولة مع راسها .. راسها لي اهم من عصبية اي واحد...
ساهية كتحاول تقارن سداجة احلامها .. وان هاد العالم البسيط جدا والعاااادي .. كان حلم أزلي بنسبة ليها !!!! كتسول راسها واش كاع احلامها نهار يتححقو غايكونو عااادين بحال هاكا !!!
واش كاع احلامنا لي كانحلمو بيهم باللون الوردي ..ونتخيلو ان حياتنا غاتزهر نهار يتحققو ... كالقاو راسنا نهار نحققوهم انهم جد عااااادييين ومايستاهلوش داك التشبت كامل،!!
شنو السبب ؟؟؟ واش أحلامها لي كانو عادين ... او ان الشغف لي كان عندها نهار كانت باقا كتحلم ... فقداتو
نهار تحقق الحلم !!! واش فعلا الشغف هو لي كايخلق الفرق ؟
او ان ولاو عندها احلام اخرين من غير العالم الخارجي ...لي كتفكر فيهم دابا
كحلم مثلا ( ضارت لعندو كاتشوف فيه وهو صايك معصب ) يكون عندها ولاد معاه !! حياة مستقلة بجانبو !!! كحلم ... تشوف وجهو مثلا !!! ....احلامها الجديدة خلاوها تنسى القديمة ويبرد الشغف ...
والسؤال تبادر لدهنها .... "ونهار يتحقق هاد الحلم تاني .... غايجيني عاااادي كيف ليوم !!!! نهار نشوف وجهو وجسدو .. غايبرد فيا الشغف؟ او غايزيد يشتعل !!! او غايكونو عندي احلام جديدة معاه ؟
واش فعلا بعد ما كانت احلامي متعلقة فقط بيا ... ولات دابا متعلقة بيه حتى هو !! احلامي ولا دابا حلضر فيهااا هو ؟ انا امتى تقسمت لنصفين يا عالم ؟؟
لحظة !! وانا علاش غانحلم ؟ نتشبت بحلم بعييييد ووننسى انني نعيش هاد اللحظة لي كانت حتى هي فالقديم مجرد حلم !! .... نبقى عايشة فقط كنحلم ونتسنى .. ومانعييش انا اللحظة ....؟؟"
تبسمااات ببلاهة غير مكترثة لامر عصبيتو ولا لحجم الفعلة لي دارت عاد دابا شوية .... وقربات عند دراعو عنقاتها وتكات راسها عليها وهو بقى غير كايشوف عين فطريق وعين فيها وباقي محافظ على تخنزيييرتو ...معارفها كاع اش باغا تصنع واش كاع كلامو مأثرش فيها ؟ معارفش الى هي ماسمعاتوش اصلا .... لا ووقت التعناق ؟ كأنها مدارت والو .....
وهي فقط وسدات دراعو ونعسات مبتسمة بعد ما طبعات قبلة على كتفو .... قبلة ك " شكرا " مثلا !!
بعد مسافة كانو وصلو لدار ... تونار مع التعنيقة لي دارت ليه مزادش لكلام ... غير نزلو طلعها ديريكت لفوق .. يلاه بغا يبدا يناقش لقاها غير ساهية بوحدها ، مشات ديريكت لفوطوي وكلسات كاتشوف فمنحى واحد ومرة تبتسم مرة تجمعها ... كتخلعو بشي لقطات ...
تابانت ليه طلعات راسها فيه
ليديا : فوقاش غانشوف وجهك ؟؟؟
تونار : مافهمتش ؟؟؟
ليديا : مزال مناوي تخيليني نشوفك ؟؟
تونار : ( بدون رد اكتفى فقط بنظرات الاستغراب عاد جاوب ) جيني من للخر
ليديا وقفات عندو وشاافت فيه
ليديا : ماتعطلش بزاف ....ماتخليش حتى تبرد داك الرغبة لي فيا ... ونهار نشوفو غايجيني عادي .... ماضيعش ليا المتعة وخليني نشوفو ماحدي كنحلم به ... حيت حتى الزنقة لي كنت كنحلم نخرج ليها ... وماخرجتش نهار كانت عندي الرغبة قوية .... خرجت تالمنبعد ... ماحسيت بوالو ... واش حيت الدنيا على برا مازويناش .. ولا ماشي كيف تخيلتها ... ولا حيت انا بردت .....
يلاه غايجاوبها وهي تتدق لباب وخلاها وزاد حل لقاها ايطو
ايطو : ولدي شفتكم طلعتو بزربة مالحقتش نهضر معاك .. راه العشا وجدناه وجدك راه لتحت بغاكم تعشاو معاه .. كنا كنتسناوكم غير نتوما تجيو
وما ليها براسو ودخل لاح الكاسكيط وبدا كايرد شعرو لقدام لي رقد بالكاسكيط ... وكلس كايتنهد وهي قربات عندو
ليديا : واش عندك المشكل ف انك تهبط نتا لتحت ، ولا ف انك خصك تتصرف على اساس راجلها ... ولا المشكل هو خصني نهبط حتى انا
تونار : ( شاف فيها ) علاش غاتنزلي نت ؟؟؟
ليديا طلقات قهههقهة ديالها المتمردة وشافت عندو
ليديا : كتحلم واقلة بالالوان ههه ... .
خلاتو ودخلات لدوش كضحك وهو غير مزاد زفر النفس عارف مغاتخليهش ينزل بوحدو ومحااااملش تنزل كاع واللقطة دشوفات دأمير مزال مانساها رغم انه مكيبينش شعور الغيرة لانه تعود يعيش بحال الآلة بدون احساس وكاع الاحساسيس لي دفنهم جات حياتهم وهادشي لي كايزيد يعصبو .... ت
نهد كايحاول يصنع شوية ديال الصبر لراسو ... لا من ناحيتها لا من حياة امر الواقع لي لقا راسو امامو ... ولا كيفاش غايتصرف وهو مكيحملش لبراني عاساك لاكانو من عائلة حكيمة لي مكيحملهااااش ...
استغل الوقت لي هي فدوش لبس سيغفيط يلاه كايعلي سلسلة لقاها خرجات ...
ليديا : نزلو دابا ؟؟
تونار : ليديا ... كوني كتسمعي لمرة وحدة فحياتك ... والله تااامعندي كراااام دالخاطر لي نهضر باركا غير شنو دوزتي عليا ليوم راني بحييييت .... واش نرغبك؟؟ عيااااان اليديا عياااااان
ليديا : ( قربات عندو وحطات يديها فوق الماسك ) ماخلاقش لي يعيي ليا انا راجي ، عيان رتاح معايا ...ماتخافش قادرة نعيييك ونريحك ونمرضك ونداويك .... ولكن راه نخليك تنزل يضوروك كيف بغاو ... ( كتقلدهم ) مرحبااا بيكم هدااا راججل بنتي ...هادا رااااجلي .. هادا راجل ختي .. ( شافت فيه ) لا ، نتا راه راااجلي انا .. وانا لي خصني نكون معاك، مكايهمنيش شكون يردوني ... لا بنت خالك لا بنت عمك .. لموهيم لا انا و لا هوما ماانقدرو نكرو حقيقة انا مراتك ... وانا عارفة راسي شنو كانسوى وشكون انا وشكون هوما .. والى هوما بهاد اللعلبة ظنو غايقهروني .... راه كايقهرو غير راسهم مظهرهم كتيجيب الشفقة
تونار ماقدش مزال يهضر رغم انو عندو بزااااف دالحروف خاص تتحط فوقها النقط ... ولكن خلاها وزاد وتاهي تبعاتو ....مابقاش عندو الطاقة لي يتناقش ولا يهضر وعارفها اعند من الاسمنت
طاولة الاكل كانت عاامرة وغير سمعو صوت الكعب ديال ليديا الكل هز عينو عاد لمحوهم نازلين فالدروج .. تونار لاشىء كايبان عليه اما ليديا فالابتسامة المستفزة لقلوب الحاسدييين مرسومة عريضة على وجهها ..... واشرف غير كايحك فيديه تحت طابلة ... وامير باقي غير كايشوفها كاينتابو احساس غريب ... كأن شخصتها الغريبة و هاد الاحساس لي حاسو من جيهتها ... سبق ليه وحسو من قبل
تونار بدون كلام منو جر الكرسي وجلس بعد مالقى نظرة على جدو لي مبتسم برضى ، لانه غير هبط الا وراه عارف بحالا دار انجاز وفرح لي راه كايتنازل على قبلو وهاد اللعبة ديال يهددو بحياتو وصحتو باش يفرض عليه شي أوامر كايديرها لصالحو ماشي لصالح نور، كايديرها باش يحاول يخليه يتعود على الناس والغرباء ويجلس وسطهم براحة ومايبقاش حبيس قوعقتو ...
رغم ان تونار بحالا كالس على الشوك ومامرتاحش وحتى اشرف و امير ماقدوش يهضرو معاه حيت ديجا سامعين على طبعو وانه منطوي على نفسو لاقصى درجة ... ولكن تاحد معارف حقيقتهم ان عائلتهم كلها تحرقات لان المامون محلف حكيمة على المصحف وتاهي ماقلتهاش حتى لبناتها لي عارفين ان فقط طرا مشكل فدارهم بسبب بوتاغاز لي أدى فحرق والدين تونار وتونار تاهو وملي كايسولو على العائلة كايقوليهم فدولة اخرى غالبا كايقول المانيا والبعض فايطاليا ... حكيمة بوحدها لي عارفة ان النسل كامل مات ...
اشرف ضحك و بغا يستفز شوية باش يكبر من الحصيصة لي غاتعطيه ختو ويدير خدمتو مزيان ... وخاطب الجد
اشرف : تبارك الله هادي هي حفيذة خوك لي قالت لينا حكيمة ....
ليديا طلعات عينيها بزربة و تا تونار شاف فجدو !!! .... ادن مكدبش الجد فهويتها !! و ليديا كتسائل واش هادا عاود لمرتو كولشي و لا قال ليهم راها كدبة وهوما معارفينش راها حقيقة ؟؟؟ ... اذن الكدبة لي كدبو باش يغطيو زواجهم هي وتونار ويبروو وجودها فالدار ماشي كدبة !!! راه حقيقة
المامون : ( بضحكة ) ايييه هي هادي .. ( شاف فيها ) الامانة ديال خووويا وولدو ...
اشرف : تباركالله ( ليديا غير معلية حاجبها فهاد المسرحية ) تاهي كانت فالخارج ...حيت قاتلينا حكيمة خوتك وفاميلتك كولها فطاليان
المامون : يييه تاهي تما ...
حكيمة : ههه تربات معانا مسكييينة .. اوا في سبيل الله درناها بحال بنتنا ... عشرين عام وهي غير معانا تاكل و تنعس عندنا ... ليااام ... ( تونار سنانو كايتحكو داخل فمو وهي كتحاول طيح بها زعما )
ليديا اخيرا نطقات بابتسااامتها و صوتها المجبد لي شعرة مكتهزوش و مكتأثرش فيه
ليديا : كتر خيييرك كولشي كتفكريه ... ولكن راه فعمري غير 18 عام آرااالة ينو ( جداتي )...
حكيمة ؛ ا .. اااه اه .. والعقل دالكبر ... نسيييت ( شربات كاسها )
ايطو كتحط على الطبلة و امير مصغر عينو فليديا وهاد الصوت لي مخافيييش عليه !!! هاد النبرة دالريفية لي تكلمات بها وهاد كمية الدلع لي فهضرتها مكاينش منها جوج ... كاينة غير وحدة وهي لي كايحاول يتذكرها فين سمعها ...وتونار عينيه عليه كيفاش كايشوف فيها... وعارف دوك النظرات ديال راه كايتذكر شي حاجة حيت هو عارفو سامع صوتها .... ونفسو تزيرات فيه وصدرو تنفخ و مزير على يديه تحت الطبلة باش متبانش عصبيتو قدام جدو .... تاسمع
نور : ( بضحكة كتستغل الموقف لصالحها ) حطي ادادا ايطو ل تونار ... دوق من هادو ( بحرج ) انا لي صاوبتهم
تونار فقط ووما براسو وليديا مبتسمة باستهزاء لحالتهم لي ماهزاتش فيها شعرة لانها تاااايقة فراسها و تايقة فيه ...
بدات كتحطو حداه بريوات ديال لحوت .. كان العشاء كله بحري ...
اشرف : ( مخاطب ليديا لي منلي هضرات زعزعو صوتها ومكرهاتش متسكتش كاع ) شنو سماااك الله
المامون : ( تدخل حيت باليه تونار غادي يشعل ) ليديا ....سميتها ليديا .
اشرف : تباركالله .... بحالها بحال سميتها ، كاتقراي اليديا
يلاه كتبغي تحاوب كايسبق المامون وتونار مزيرر على الكاس فيديه
المامون : اااه كاتقرا ... اييطو ( خصو ينسي لهضرة ) حطو لينا حتى الصوبا ... كدير ايطو شي صوبة ديال الحوت من داكشي
اشرف : ايييه تباركالله راني كندوق ... قولي ليا اليديا ونتي كاطيبي ؟
ليديا : (بابتسامة ) القلب ....
اشرف : هههه ( طلق ضحكة كاتشبه شخصيتو وتونار حط يدو على فخدها بمعنى تزيدي كلمة نطيرو ليك ) لا من ناحية القلب باليا كااااطيبيه ...
المامون ماعجبوش لكلام الاخير وحكيمة بدات تجبد مواضيع اخرى تغطي على تعناب دخوها لي زاد فيه حيت مابقاش داخل غير فاللعبة هو راه تعجب ديال بصح .. وليديا جوابها على نابها ولكن يد تونار ليتحطات عليها تحت الطبلة فهمات معاناها مافيها لي يزراق لحمها حيت عارفاه شارجاتو هاد نهار مزيان ومزال متفركع دبصح ...
اشرف : اوا نور نت مرتاحة ... كيف جاك الزواج ( نورة ضاحكة كتغمز ليه بمعنى براافو )
نور : ( كاتشوف فتونار وفيه وليظيا دايرة فيهم شوفة شفقة واستهزاء لحالهم) مرتااااحة بزااف ....
اشرف : وتهلى لينا اسي تونار فبنتنا ... راه خديتي لمليح.
ليديا حبسات الضحكة بطريقة مفروشة وعلات عينيها لي بحال عينين لحرباء
ليديا : اخر مرة سمعت هاد الجملة ... كان جدي باغ بگرة .....
كولشي خنزر من غيرها هي لي شربات من كاسها بهدوووء ... ونور جاااوبات
نور : اوا كية لي مايتباع مااا يتشرا ....
ليديا : وكية لي غير كايتكرا ....( غمزتها
نور : المكري بالعز ديالو وكيعطي خلاصو فالشهر
ليديا : ونهار يحتاجو دارهم غايتريييو عليه ...
المامون باليه الطرح سخن وكولشي عارف راسو كادب و لاخرين عارفينو كايكدب وكل واحد فيهم متيق كدبتو ... وتحنحن يفرتك الجو
المامون : تعشاو تعشاو باسم الله ...
نورة : اوا اليديا ... امتى نفرحو معاك تانتي ....
ليديا : حتى نفرحو بيك نت ... حشومة نتقدم قدام لكبيرة
نورة بقات كتحقد فيها عينيها منين مادازوها مكتقهرش وامير مزادش عااد فااطبلة وناض لبرا خرج بزربة كأنه مخنووق كولشي تبعو بعينو وليديا متبعاه تاهي ، عاد تفكرات راه هضرات وهو سامع صوتها وكتسول راسها ياكنا عرفزي،!! ... و اشرف بدا يضحك باش يخفف الجو وماينتابهش المامون للنوضة لي دار فجأة ، اما هو اخرج لبرا وبعد على الدار وكلس شاد على راسو ...
اشرف: ههه لا ان شاء الله نفرحو بك نت ونورة ...
تونار كان مخنزر فيييه و مزير على يدو هو يحس بالفيبرور فجيبو و بعد على طبلة عرفوه غايجاوب لان جبد تيل وبعد عيهم
تونار : اش كاين
- اجي دابا لعندي ، جابو ليا الرجال خبارات صحاح على داك السيد ...
تونار : لقيتو فين هو
- تماما
تونار : انا جاي
قرب لطبلة عندهم وخاطب جدو
تونار : بصحة .. عندي شي شغال ضرورين ...( غمز ليديا تبعو ) ....
المامون باقي يلاه غايهضر يشدو وهو زاد للباب وليديا ابتسمات وناضت تبعاتو
ليديا : فين ماشي ؟؟؟؟
تونار : ( بعصبية بين سنانو ) غاتكملي لعشا ديالك وغاطلعي لفوق قسما بالله وتهبطي مغاندوزها ليك ... يهضر معاك شي ***** من هادوك ضوري فيه .. مغانتعطلش
ليديا : واااغير قولي فين ماشي
مجاوبهاش ومشا لطموبيل وهي واقفة متبعاه بعينيها والجد كايحاول يشرح زعما لاشرف انهم ترباو مع بعض ومتقربين داكشي باش تبعاتو معارفش الى اشرف عارف كولشي ... مشا تونار بعد ماخلا نظرات التحدير لليديا من طموبيل ... غير غبرات عليها طموبيل ضارت تدخل حتى سمعات موراها
امير : لبنى ....
ليديا بقات واقفة فبلاصتها شحال وضارت عندو كان واقف ويدو مدلي منها كارو مشعول ضرب فيه النص
ليديا : سميتي ليديا
امير : سميتك لبنى ...( مخنزر فيها ) صوتك باقي لدابا كايدق فراسي ... حسابتك نسيت الششمتة !!!!!!
تونار وصل لكباريه ودخل بزربة طلع لفوق ديريكت لفين كاين البيرو ديال البركاك لي كايجيب ليه الخبارات كان البيرو كله مجهز بالشاشات دالكاميرات لي كايبينو اش لتحت ... غير شاف تونار داخل وقف يررحب ضاااحك .. وجلسو ورجالو واقفين عند راسو
تونار : ( شاف مع داك رجال لي وقفو عند راسو ) را ماهازش لا سلاح لا وااالو .. غير طلق اش عندك
- والواحد هو لي ياخد احتياطاتو دنيا والزمان ونتا كتقلب كتر من الزمان ..( لاح ليه الضوسي قدامو )
حلو تونار هو يلقاه ملف طبي كايوضح تشخيص لحالة سرطان متقدمة جدا و ميؤووس منها .... وشاف فيه بصدمة
تونار : نوووو
- لاسف ..... باليا الايام دارت خدمتها قبل منك ....
تونار : ( كمش داك الملف بين يديه مزير على سنانو ) باااقي حي ..( تلاح كمشو من حوااايجو ) بررربي وتقوووليا مااااات حتى تبعووو
دوك رجال بعدوه عليه وهو كايتنتر منهم و داك الراجل قاد حوايجو
- تههههدن ... تهدن شوووية ( هز يدو بمعنى طلقوه ) شررب ليك كاس دالما وتهدن ...متخاافش راه باقي حي ... ولكن حالتو ماشي دلاباس ... تيق بيا الى شفتييييه غايبرد فيك كولشي
تونار ملي سمعو حي عاد گلس كاينهج كانت غاتجيه اكبر فقصة الى مات بلا مااايحرق جثتوو بيديه ... وداك الراجل مكمل معلوماتو
- بحثنا فالنسل ديالو كامل .. بناتوو وحفيذاتو راهم كلهم مزوجات لعند بزنازا بحال شي رهينات .. ولادو دخلو للحبس شي حد بلغ عليهم هزوهم جملة وهاد اوشن هدا راه ديما مخرج راسو وولادو هاد المرة وحلو ديال بصح.. ولي سمعت مابغاش يخرجهم من الحبس وفهاد الازمة لخرا فين مكاين شي عدو عندهم راه مشا شهد ضدهم القضية عندهم كبييييرة راه القليلة شي ربعين عام لي غاتعطى ليهم راه مزال ماتحاكمو ... قاتلين الرواح ماشي غير لحشيش القضبة عندهم مروونة فتبييض الاموال والتزوير كولشي بيع بيهم خصهم غير يتهناو منهم راك عارف حال سوق الحشيش طلع عليا ليوم نطلع عليك غدا غييزو ليهم باش يخورو ليهم الكريق راه داك المسخوط د اوشن مكتسح ....ولكن لي عطاهم الضربة القاضية ومشا سيفط شي واحد يشهد فالمحكمة هو واحد بزناز كان غايتنساب معاهم وفللخر هربات العروسة ... جمعها ليهم هداك حب وتبن .... و بقى واحد حفيدو كايقولو هاجر لبرا منعرف فين صد تايقولو كان عندو شي معارف تاهوما بزنازا على برا راه غايكون معاهم ... هداك بضبط ماعندي عليه تامعلومة ...و المرا ديال اوشن راها فدار العجزة كايعاودو تخلخلات ... وعرايساتو هربو راه كل وحدة فين تجلات تطلقو ليهم شواري ووحدة راه داوها مع البعتة لي كاتمشي لتركيا ... داك شي لي على بالي وبالك راك عارف .... و وداك اوشن راه فداك المصحة سميتها فالوراق راه فالرباط كايموت بووحدو كي الكلب فاش نفعووووه الفلوس دابا هاداك ( تونار رجع كايشوف لسمية المصحة ) مهم راه هادشي لي كاتقوليك راه مافيهش التخرخيش خارج من لسان شي واحد كان خدام عندهم طاحو عليه الدراري سرسب ليهم كولشي ... تاحد مابقى يخاف منهم رااه تفرتك ليهم الشمل داك الحمية ديالهم لي كانت كتغلب السبع تفركتااات .... بقى غير داك حفيدو باقي كنقلب عليه راه هو نيت هرب وتاختو هربات .. هادوك طلعو ليهم من الجنب غير هو باقي حي وختو على ماسمعات هربات فشي كاميو لي تبلغ به راه ياما تاهي فالحبيبيس ولا تحرقات مع الحشيش ....مهم ضررررربهم الخلااا ديال بصصصصح .....
تونار : سميتو منير هذاك لي هرب لا ؟؟؟
- اييييه منير هو هاداك .... تبغيه تاهو ولا ؟
تونار :كووولشي بغيتهم
هز داك الوراق كايشوف فسمية المصحة ... و جبد تيليفونو تاتسمع صوت المسج وصل ل التيليفون ديال داك الراجل وردو لجيبو
تونار : ها فلوسك وصلات ... كمل على خدمتك نكمل لخلاص ....
خلاه وخرج ....
ورا الدار على واحد الكرسي جالسة ليديا وحداها أمير وليديا غير كاتشوف فواحد المنحى قدامها ....
امير : ( شاد على راسو ) مزال مامتييقش ... تامن سميتك كادبة فيها !!! ( شاف عندها ) اناااا شنو دنبي حتى تلعبي عليا هاكاك ؟؟؟؟
ليديا : ( ضارت عندو بزربة ) ونا شنووو دنبي !!! وشنو دنب لي ماتو عندنا ولي انتحرو ولي تقتلو ؟؟؟ تاواحد ماليه شي دنب ... ( رجعات كاتشوف قدامها )دنيا لي لعبات عليك ماشي انا ، ... كيفما انا الدنيا لاحتني فداك العائلة ... نتا الدنيا لاحتك ليا ....
امير : واش مأنبكش ضميرك ؟
ليديا : مالي اش درت ؟ عطيتك درس فالثقة !! راه من قبيلة ونا كنتسنى منك كلمة شكرا ومسمعتهاش !!
اميرا : ونزيدك شكرااا !!!!
ليديا : دابا خرخاش داير ليا عليه هاد الحالة
امير : واش حسابتك انا بقى فيا تيليفون !!!! راه الشمتة هاديك
ليديا : اوا بلاصة ماتلومني لوم راسك مالك على داك الكلاخ كامل شااري الحوت فالما ...
امير : ( كايشوف معاها وفوجهها لي ضارب فيه ضو الگمرة كأنها المراية منعاكسة ، مدة ساكت تا ابتسم ) غير شفتك اول مرة قلت هادي ماشي انسانة عادية ... اما تكوني هاربة من شي قصة خيالية واما نت هي نيت مولات الصوت لي كان متلفني على القبلة ... جمالك ماشي عاادي فيها شي حاجة مختلفة ...
ليديا : ( شافت فيه ولعبات بعينيها بغرور ) مابغيتش نقاطعك ولكن هاد الجمال لي ماشي عادي ولا ديال واحد آخر دابا ...
امير : وهااادشي لي زاااايد محيرني كايتقب فراسي .... وحدة بحالك مع واحد لي عارفين عليه محروق ؟؟؟؟ واش ابنت الناس متأكدة نت بشر بحالنا !!!
ليديا : بشر آه .. ولكن بحالكم لا ( بتسمات ليه ابتسامة استفزاز ورجعات كاتشوف قدامها ) لي قلتي عليه محروق نهار تشوفو كيف كنشوفو انا ... غاتنوض تشعل العافية فوجهك .....
امير : كتبغييييه !!
ليديا : ونبغييييك نتا مثلا ؟؟ لي وجهك وجه عادي بحال جميع الوجوه !! صوتك صوت عادي بحال جميع الاصوات !! و تصرفاتك عاديين و ومتاح للجميع يشوفوك ملداخل ومن برا .... ومكلخ ملفوق ( جمع فيها حجبانو ) لا لا آلغزال ... انا ماشي ديال العادي إما واحد مكاينش بحالو فالكون ... وإما بلاش ....
امير : فششكال ... بالله ايتا فشكل، عرفتي مابقاتش فيا الشمتة كتر مابقى فيا انني فقدتك ... كنتِ شي حاجة غرييبة فحياتي منقدرش نحدد شكون كنت بالنسبة ليا ... ولكن مور الشمتة .. عاد قدرت نحدد ... نت راك كنت هي التصرفيقة لي عطاتني الدنيا ....
ليديا : واخا انا عمرني عرفت الدنيا .... ولكن جيت ليها خصيصا باش نخليك تعرف الدنيا ..... ( وقفات ) تصبح على خير ..
امير : ( طلع يدو فيها الخاتم ) مغاتباركيش ليا .. خطبت
ليديا : مبروك ليك ... والتعازي ليها
امير : هه !! كاطيحي فمعناويتنا دابا ....
خلاتو جات ماشية تاسمعاتو
امير : حضي راسك من هاد الناس ( ضارت عندو ) ماعرفتش علاش باقي كنعاونك !! ولكن كنحس بيك واخا لفعة .. صادقة ، .. هاد الناس حضي منهم خصوصا عمي ... راهم كايضنو داخلة على الطمع
ليديا : عمك !!
امير : عمي اشرف ، خال نور .. معارفش انا اش طاري واش مزوج بيكم بجوج نيت ... ولكن حضي راسك منهم ومنو ....لاكنت كتبغي راجلك بصح .. مغتطيحيش فاالشبكة ... مهم حضي راسك وصافي
ليديا : مكضنش بلي هاد النصيحة خصك تقولها ليهم هوما !!
امير : ( حك فراسو ) واحد فالحالة ديالي عارفك اش كتسواي خصو يقولها ليهم هوما صراحة...ولكن ماعرفتش علاش حسيت براسي فصفك ... مكاينش لي يليق ليها واحد بحالو قدك نت ...
طلعاتو وهبطاتو ودخلات ...
يلاه داخلة لدار تتجه للدروج وهوما يبانو ليها مجموعين على المامون و الممرضة حاطة ليها بانيو وهو كايستفرغ .... و نورة مبعدة عيفانة و اشرف غير كايشوف من بعيد ونور وحكيمة كايشوفو معاه وايطو كتبكي لحالتو ....وهي تقرب ليه كايبان وجهو صفار والاستفراغ زاد كمل عليه .. مسحات ليه الممرضة فمو وايطو دات داك البانيو ...
الممرضة :الحاج كتحس براسك شوية نطلعك تنعس حسن !!!
المامون : ( عيان وفشلان ) لا .. ت .. تايجي تو .. تونار
الممرضة : راك عيان الحاج خليني نطلعك لفراشك حسن ....( كضور براسها لعندهم وتومي غير بعينيها بلي راه عيان )
ليديا واقفة فبلاصتها وحاسة بشي شعور غريب فلداخل ديالها وهي كاتشوفو فداك الحالة وكتحس بلي حالتو مكتبشرش بالخير وهي كتفكر فرد فعل تونار كيفاش غايكون !!! الامر ألمها لمجرد انه هو غايتألم ...
شوية بدا كايترعد بالبرد والتبوريشة و اشرف ااضطر انه يهزو وطلعو لفوق كايترعد والمررضة شافت عند ليديا
المررضة : لاقدرتي تعيطي لسي تونار عفاك ....
نور خنزرات علاش شافت عند ليديا وهي لا .. لان الممرضة ولفات تشوفو مع ليديا وماشي مع نور ..
نور : ( بتخنزير ) انا غااانعيط ليه ...
ليديا غير واقفة ماكترثاتش، بالها غير مع حالتو ... وطلعات فدروج تابعاهم و نور جبدات تيل تصوني ليه تادخل امير
امير : اش واقع !!
نور : والو .. غير عمي لحاج تزاد عليه شوية لحال
امير : وااايلي !!! ياك عاد داابا كان مزيااان !!! ....
نور : ماعرفناش شوووية هو يتبدل ( كتصوني ) نشوف تونار فين هو يجي يشوف جدو ...
تونار كان يلاه ركب فطوموبيل كالس فيها وشاد على داك الملف كايقرا فالسمية يلاه غايديماري يشد الطريق للرباط ... هو يصوني ليه تيل ... شاف رقم عرفو ديال نور لانها سبق واتصلات وهو كايحفض بسرعة فائقة ، غير شاف رقمها تفزع وجاوب بزربة حيت مدام غاتصوني الا شي حاجة واقعة
نور : الو .. تونار
تونار : اش كاين ؟؟؟؟
نور : اا .. ر را ... را عمي ل لحاج شوية تز
مزال مكملت كلامها قطع تيل وكسيرا دغيا للدار و هي بقات تشوف لتيل وامير مراقبها
امير : قطع عليك !!!
نور : ( كتحاول تتبسم ) لا ... هه .. غير يمكن الريزو
امير : نوورر ... واش بصح نت مزوجة بهاد السيد ؟ وكتهضري معاه هاكا كترعدي ؟؟؟
نور : ( خنزرات ووراتو الخاتم لي خداتو غير بوحدها ) وهدا شنووو هااا ؟؟؟ ر راه غير ماعرفتش كيفاش نقولها ليه وخفتو يتخلع ( داير فيها شوفة شك ) زايدون ملي يجي ينعس شوفو لبيت من غايدخل ...
خلاتو وطلعات فالدروج وهو متبعها بعينو .....
ليديا حتى وصلات قدام البيت دالمامون كانو دخلوه وشدوه موراهم .. حطات ييديها على لبواني .. فللخر طلقات كتهز فكتافها متصنعة عدم الاكتراث ، ومشات بجيهة البيت ديالها وكلسات تما كتلعب برجليها ... باغا تقتل فيها لداخل كل الاحاسيس ديال الشقفة تجاه شي حد ... موت ؟ عادي كلشي كايموت .. ماما وماتت .. دنيا كاملة غاتمووت ! انا شكون كااايجيني كاع يبقى فيا !!!
يلاه كتقول بحال هاكدا هوما كايتسربو لدماغها كاع الابتسامات لي دار فوجهها ... و " ايجي ينو " لي سمعات منو ولي عمر شي حد ماقالها ليها من قبل بهاد الحنية ....
شوية نفضات راسها ودخلات للدوش غسلات وجهها مدة كتخبط فيه بالما البارد مكتحملش بحال هاد الاحاسيس .... غير خرجات وهي تسمع فران قوي ومشات لسرجم كتجري دوزات الريدو بان ليها تونار لي جا .... وكلسات قالبة شفايفها مأزمة لحالتو ... الشخص لي كتبغيه مكتحملش تا تشوفو مقلق .... ليديا مكتبغيش بحب عادي ، ليديا حبها متملك لدرجة حقدات على مرض الحاج علاش بسبابو غايتأزم تونار وعلاش هاد المامون كاين فالدنيا اصلا الى كان غايقلق تونار ...
تونار طلع كايجري عندو للبيت حلها بجهالة لقاه ناعس فالسرير وهوما واقفين عند راسو وهو مبتسم واضح انه كان كايضحك معاهم واخا حالتو كاتبان عيانة بزاف ودايرين فوقو زوج مانطات وجبهتو متعرقة ، تونار غير شافو مبتسم عاد رجعات فيه الروح ...ومشا قرب عندو كايقلب فيه و يقيس فجبهتو واش راه بيخير وهو شد على يديه بيدو المتجعدة
المامون : ( بصوت عيان ) فين كنت اولدي فين تعطلتي خليتي العشا ومشيتي
تونار : غير شي شغال ... نتا بيخير ؟؟؟ اش وقع ليك عاد خليتك مزيان
الممرضة : غير رد حاشاك لي كلاه وجاتو تبوريشة دالبرد
تونار : تا سخانة طالعة ليك اجدي
المررضة : را عطيتو واحد الكينة غاتنزلها ليه
المامون : ( باس يدو فوق القفاز ) راني بيخير اياسكور ينو .... ( شاف عندهم ) عرفتو علاش كنعيط ليه آسكور ينو ؟؟؟ ( بابتسامة ) ملي كان صغيييير ... كان بيييض بزاف بحال النور ... ( تونار كايرمش بيعينيه وهوما كايسمعو ليه ونور ضاااحكة كتسمع ) وكان شعرو حريييري ووجهو تباركالله بحال داك الفرخ الصغير ديال الحجل واخا كبر ...( كايدوز يدو على الماسك ديالو ) وغطا عليا وجهو ... بااااقي بحال الحجل فعينيا
تونار : ( بعد وجهوو وهبطو كايحك بصبعو تحت دقنو مكيحملش هاد المواقف ورجع شاف فيه ) حاول تنعس شوية ترتاح ... الى شفتي راسك عياان بزاف نرجعك لكلينيك ( شاف عند الممرضة ) رجعي ليه السيروم حسن
المررضة : اه راه لقيتيني عيطت عليهم يجيبوه ... غانركبو ليه ومن الاحسن يبقى ففراشو .. ماحتى فلاكلينيك ماعندوهم مايديرو ليه ... الماكلة نقصاات ليه شوية تشدات ليه الشهية و السيروم غايعاونو
تونار : ( كايدوز يدو على جبهتو ) واشد شد شوية فراسك اجدي واش سخيتي بييينا ولا شنو
المامون : وشكووون يسخى بيكم اولدي .. تازيانت الدنيا وتونار تزوج ليا ... شكون يسخى ...( تنهد ) الاجل ماعارفو حد امتى مكتب ...
اشرف : الله يطووول لينا فعمرك آلحااااج .. نخليو ليك الرااااحة الله يجيب ليك الشيييفة .. حتاجيتوني ولا شي حاجة انا غير هنا ...
ماحاشاهاش ليه تونار و خرج ونورة تبعاتو .. وحكيمة كتقاد المانطة على رجلين المامون ونور كالسة تاهي كاتشوف فتونار لي مرادش ليها لبال كاع واش كاينة تما بالو غير مع جدو
المامون : سير اولدي حتى نتا ترتاح .. انا بييخيير الحمد الله بلا متخلع ..
تونار : ( كالس عند راسو ) وغاتولي حسن ( باس على يدو )
الممرضة : لاجاك النعاس آلحاج غير غمض عينيك الكينة راه غاترخيك شوية ماتخافش ... تنعس حسن
تونار تكاه على كتفو وكايدوز يدو على راسو والمامون واااضح عليه العياء رغم انه كايخبي وكايشوف مع نور كيف كاتشوف فتونار ويتنهد على حالها ...
حكيمة : ندير ليك اللويزة آلحاج ؟؟؟
المامون : مكاين لاش مقادش عليها
الممرضة : الكينة غاترخيه بلاش من اللويزة ...
المامون شاف فحكيمة وشاف فالكلسة لي دايرة نور كتسنى ... هو يتفكر انه واعد حكيمة يقنعو بلي هاد الليلة ديالهم بجوج .... و حاول يبتسم واخا معاجبوش هادشي ولكن غير باش نور متحشمش قدام عائلتها هو هادشي لي فبالو معارفش الى لاعبين عليه كاملين وشاف عند تونار
المامون : نوض اولدي ترتاح حتى نتا راني وليت لاباس
تونار : لا غير خليني معاك هنا ...
المامون : كون تسمع .... هاد ليلة انا بغييت تبات معايا ليديا ....فين هي مابانتليش،؟؟؟؟؟
الكل شاف فيه ونور طرطقات عينيها الا تونار لي فهم دغيا فاش راه كايفكر ..
نور : ك كيفاش ؟؟
حكيمة : اولي يالحاج !
المامون : رشقات ليا انا على داك البنت هي تقابلني هاد ليلة ( شاف عند الممرضة ) غاسيري تنعسي نت ابنتي عيطي عليها هي باغي نتجمع معاها هاد ليلة معارف حد شحال بقى ليا فالعمر ... ونت احكيمة نعسي مع نورة ....
تونار : ( تنهد ) حاول تنعس .. نععس اجدي نعس .... تالغدا وآرا ماتجمع معاها ...
المامون : لا والو بغيتها انا هاد ليلة ....
تونار : يهديك الله ... هاهي غاتجي تجمع معاها ونباتو معاك بجوج اسيدي
المامون : لا بغيتها بوحدها ملي كتكون معانا مكتهضرش هي معايا منعرف كتحشم منك .. خلينا بوحدنا شوية واش غاناكلها ...
تونار : ليديا كتحشم ؟؟؟؟...
المامون : سير آيطو عيطي ليا عليها .. صااافي قلت لي عندي .... تاهي ولات من العائلة اولا ؟؟؟ وانا بغيت نتجمع معاها هاد ليلة وهي تقابلني ... ونتا سير ترتاح ( كايومي ليه بعينيه جيهة نور وتونار فاهمو من الاول )
ايطو مشات وتونار شد على راسو وحكيمة ونور عااااد سرا معاهم البلان الى بغا يخلي تونار لنور ويبعد ليديا هاد الليلة .....
ايطو مشات للبيت دقات عليها وحلات وهي تقفز ليديا حسابتها تونار ...
ايطو : ( بنفخة ) الحاج بغاك ...
قالتها بنفخة ومشات خلاتها غير كترمش ... علاش غايبغيها !!؛ واش هدا كايودع نيت ؟؟
بقات واقفة شحال كتفكر فللخر اتجهات لغرفتو حلات لباب وهي تجي عينيها مبااااشرة فتونار ... عاد شافت عند الحاج لي ضحك
المامون : اجي اجي ابنتي .. دخلي
ليديا تقدمات وغير ساكتة مفاهمة والو ونور كاتشوف بشوفات شريرين وناضت بزربة تمشي توجد راسها وحكيمة تبعاتها ... نورة غيرر شافتهم خارجين مصااافين تبعاتهم تاهي دخلو لبيت نور لي غير كتنقز
نور : ناااااااري شحال مطور هاد الحاج تاهو ههههه
نورة :واش واااقع مالكم ؟؟؟؟
حكيمة : الحاج قالك ليديا تبات معاه هاد ليلة تقابلو
نورة : هاااااء ؟؟؟؟
نور : مافهمتيش ؟؟؟ واباااش تخوي لينا الطريييق انا ورااااجلي
نورة :وااايلي ( ضرباتها لكتفها ) ونا نقول مالك ناشطة ... ( شافت لشعرها ) واابوكلي داك الشعر يبان منفوخ تغطي العيب
حكيمة : انا كون تسمعي ليا خليك عزبة هداك مافيه ثقة .. يدخل معاه غير باش نقهرو لوخرااا تعرفك تانتي مساهلاش ولقاو باش نعايروها تاهي ...
نورة : راااجلي وحلااااالي ... ( ضارت لمرايا عضات على شفايفها ) اوووووف شحال ونا كنتسنى ...اخيييييرا غانكون معاه فبيت واااحد ...
ليديا تقدمات وكلسات فجنب السرير حدا تونار وكاتشوف مع المامون
ليديا : كيف بقيتي شوية ؟؟؟
المامون : الحمد الله .. فين كتغبري مكانشوفكش كاع ..
ليديا : ( شافت فتونار ورجعات شافت فيه ) غير هنا ..
المامون : راه هضرت مع تونار .. هاد الليلة بغيتك تباتي معايا ابنتي ... شلاااا ماعندي نقوليك ونوصيك ....
ليديا : هااا !!! ( شافت عند تونار كاتسولو غير بعينيها هو غير كايتنهد )
تونار : جدي ..داكشي لي كتفكر فيه راه مامخرجش ... والله ماامخرج بالله ....
المامون : عااااارف ... وعارف مكاين لي يفرقكم ... غير ديرلي الخاطر هاد ليلة لي هنا فاميلتها راه بقالهم غير غدا ويمشيو ..( باس يدو ) عااافاااا اوليدي
تونار خطف يدو دغيا ... حاس براسو حاط رجليه فوق القنابل اي حركة تفركع شي حاجة خايف على جدو بزاف ومضطر انه يقول غير وااخا
المامون : ياك ابنتي مافيها باس تباتتي مع هاد المريييض تقابليه ....
ليديا : اء !! م ... مافهمتش ؟!!
تونار : والى درت ليك خاطرك وخليتها ليك هاد ليلة غدا غاتطوي عليا الموضوع مم !!!! غدا مغاتجدبش ليا حس هادشي مزال .....
المامون : والله اولدي ماااااتخرج عليا فمي شي حاجة ديرلي الخاطر غير فهادي راني واعدتهم وهادي اللخرة
تونار : واخا ... هاهي غاتبات معاك .. ولكن راه غانشد عليكم لباب ... هادي نعاسها تقيييل والدار القضية مخلطة راك عارف ....
المامون : ( ضحك على لغيرة ديالو ) اودي زيد قفل آخور غير خليها ليا
تونار : ( حط ليه راسو على كتفو ) واحاول تنعس يلاه راه مغانمشي تانشوفك نعستي
المامون : والله بيا لادرتيها .. تقول جدك شرف مغايفهمش تخليني نعس وتهزها وتمشي ... نووووض سير دابا دير لخاطر لجدك .... ( شد فيد ليديا لي غير كتبرقرق بعينيها ) وليديا هاهي معايا مكاين لي يقرب ليها ( كايدفعو ) نووووض سيير وااانوض مايبقاش التقليد على جدك
تونار : ( تنهد ) واخا هاهو نااايض ....خليو معاكم الفرملية هنا ... ( ناض وجرها من يديها وقفها عندو) تسنى تبدل حوايجها وتجي
المامون : ( شدها من يدها لوخرا وليديا غيير كاتشوف ) لاا وااااااالو .. سير جيبهم ليها
تونار : وصااافي راه واعدتك والله حتى تبات معاك . غانهضر معاها وصافي
المامون،: آمنا بالله .....
جر ليديا وخرجو من الغرفة وليديا جات قدامو وقفات
ليديا : مااافهمت تاحاجة ؟؟؟؟؟؟؟ اش واقع ، واش بغاني نبات معاه باش نتا تمشي عند نور ؟؟؟
تونار : ( كايشوف معاها ودوز يدو على وجهها ) ها باش كتعجبيني ، كتختصري عليا الامور
ليديا :دابا انا نبات معاه ونتا غاتمشي عندها !!
تونار : واش منتيك !! ( جرها من يديها لعندو كايدوز يدو على وجهها ) دابا واش نرضي راسي ونديك معايا ونعصي جدي ... ولا نرضي جدي نخليك ليه ونعصي راسي ....( بابتسامة ) ديري حل يالاه معايا حتى نعس ورجعي عندو ....
ليديا : ( بنصف ابتسامة ) اشنو كايضور فراسك
تونار كايشوف معاها حاس برغبة قوية تجاهها ماعمرو حس بيها ملي كانت غير قدامو ، رغم ان الوقت ماشي مناسب يفكر حاليا فغريزتو الجنسية ولكن بمجرد ما عرف ان هاد الليلة غاتنعس بعيدة عليه جاتو رغبة بحال المغناطيس كاتجبدو لشفايفها .... بحالا كاتقوليه " في ثغرها يوجد السلام "
هاد ليلة لي رجع من نص الطريق ومامشاش عند اوشن ومضطر انه يبات فالدار ومايسافرش وجدو فهاد الحالة هاد اليلة بضبط كايفكر كيفاش غايدوزها وحتى من ليديا لي غاينسى معاها الواقع مغاتكونش !!! ...غمض على عينيه وهبط بشوية لشفايفها ويدو جراتها من خصرها لعندو ... وتاهي غمضات عينيها وغاصت معاه فقبلاتو ...
ونورة كانت خارجة من البيت غير شافتهم طرطقات عينيها ... ورجعات ضارت براسها كاتشوف فنور كتوجد راسها !! ... مدة كاتشوف فيهم بلا ماتهضر ... حتى كانت غادخل تقول لنور شوفي .. فللخر ضورات راسها وشدات لباب ومشات معصبة مراقبة غير من بعيد ....
ليديا بعدات عليه راسها كاتشوف فيه بقلق مطلعة حجبانها حيت غير من طريقة التقبيل هي كاتقراه
ليديا : واقعة شي حاجة مافخباريش !!
تونار اكتفى انه حرك راسو بالايجاب ومزال نشوة القبلة فعينيه
ليديا : وامتى تولي فخباري
تونار : ( كايرد شعرها ورا ودنيها مطالع وجهها ) حتى لغدا ...
ليديا : ( علات يدها شدات وجهو من فوق الماسك ) نجي معاك !!
تونار : مكرهتش ....
ليديا : ( تنهدات ) غاتمشي عندها ؟
تونار : واش فنظرك نت كنتيق نعس حدا شي واحد من غيرك !! ( قصد الماسك ديالو هي بوحدها لي كايتيق فيها انها مغاتحيدوش ليه بليل )
ليديا : ( دارت فيه ابتسامة ) باش تزيد تأكد بلي عمرك تلقى بحالي وعمرها تكون ....
تونار : ماعنديش فيها الشك
ليديا : وجدك ؟؟
تونار : ماواعدتو بوالو
ليديا : هااء !!! راك حلفتي ليه كاع ؟؟
تونار : حلفت اني غانخليك معاه ... ماهضرتش انا على شي حاجة اخرى !! ....
ليديا : مغايتقلقش
تونار : كنعرف نهدّيه ....
ليديا بقات غير ساكتة كترمش وهو هبط لفمها باسها بوسة خفيفة ...
تونار : مزال غانتفاهمو على الاعصاب لي ركبتي فيا هاد العشية ....سيري دابا عندو ... توقع شي حاجة علمييني فالبلاصة ...ردي معاه لبال واخا !
ليديا : مكنعرفش نعس حدا شي واحد .. غانعس بحوايجي !!! مستحيل يديني النعاس
تونار : من الاحسن ....
ليديا : ففففف ... عررفتي مابغيتش حتى نخسر خاطرو ... حسيت باغي يدير الخاطر لكولشي وصافي !! ....
تونار : ليديا كتفكر لشي وااحد !! لعجب
ليديا : كنفكر ليه حيت نتا كتفكر ليه .... وبغاه يبقى مرتاح باش نتا تبقى مرتاح ... ( قربات عندو كتر وعلات فيه راسها ) تيق بيا ... مكيهمنيش شي واحد من غيرك نتا .....
مجاوبهاش اكتفى فقط بنظرات حاملين كمية كبيرة من المشاعر خصوصا لصراحتها و النفاق لي عمرو كان فيها ، .... وهبط راسو حتا تحطات جبهتو على جبهتها و قال بصوت شبه طفولي فيه رغبة كبييييرة كأنه رجاء
تونار : يلااااه معايا .....
ضحكات وباستو ففمو
ليديا : سييير تنعس ... انا غانرجع عندو... نيت باغا نهضر معاه فبزاف دالحوايج ... باغا نعرف على أصلي كتر ومكاينش لي غاينفعني كتر منو ....
تونار : من الاحسن بلاش راه عيان ، حتى لغدا الى صبح مزيان وهضرو .. غير خليه ينعس يرتاح
ليديا : واخا .... ( بعدات ) يالاه تصبح على خير ...
ابتسمات ليه وضارت تمشي تالقاتو شدها من يديها كأنه مساخيش بحالا غاتمشي لشي بلاد بعبيييدة .... وضارت عندو كضحك
ليديا : راه بيناتنا غير زوج بيوت ...
تونار : شدي لباب بساروت .. مابغيتش نشدها انا باش لاوقعات ليه شي حاجة أجي عندي علميني ... ماتنعسيش الى ماشديتيهاش بساروت
بيدا : وشكون غايدخل !!!
تونار : مكاانتيق فحد ...
ليديا : تييق غي فيا ...
ابتسمات ليه ومشات وهو متبعها بعينيه فلخر حك فشعرو ومشا بعياء وعكز لبيتو ..
ليديا غير حلات لباب لقات الممرضة كاتغطيه
ليديا : ( بالهمس ) صافي نعس !!!
الممرضة : راه خدا الدوا بقى كايتعافر مع النعاس كايتسناك حتى غلبو .. ( بعدات وجات حداها )
الممرضة : غانهبط نجيب لما ... تشربي حتى نت
ليديا : بلاش .. كلمي ليا معاك غير لبنى
الممرضة : لبنى !!
ليديا : لبنت لي كتكون معايا
الممرضة : نعيمة سميتها لا
ليديا : ( بابتسامة ديال خزيت ) لبنى ...
ممرضة : ( باستغراب ) اااه .. واخا ...
مشات الممرضة وليديا طلات عليه بان ليها نعس ... وتقلبات لكانابي كتقيس فيه بيديها جاها مريح مابيهش دوز عليه هاد الليلة لي اصلا موحال يديها نعاس فيها .. وبقات كاتقادو تنعس فوقو حتى سمعات دقة خفيفة فلباب ودخلات نعيمة ..
نعيمة : بغييتيني ؟؟؟
ليديا : ( مشات عندها لباب كتهضر بالهمس باش مايفيقش ) جيبي ليا مانطة تكووون جديدة ماقاسها تاشي واحد ... ومخدة جديدة ويكونو رطبين ...
نعيمى : غاتباتي هنا !!
ليديا : آه ...
نعيمة : ماتقوليش ليا استسلمتي !!!
ليديا : مافهمتش !!
نعيمة : قبيلة الحاجة حكيمة قالت لينا نوجدو ليها تنعس فبيت بنتها لوخرا .. ملي سولوها علاش مغاتنعسش فبيتها سمعتها قالت ليهم غاتنعسي نت مع الحاج باش تونار غايبات مع نور .. سمعتها وقلت نت موحال تخليهم
ليديا : هه ! ومافيها باس الواحد يحلم شوية ولا ممنوع !!
معيمة : يعني ماغاتخليهمش ؟
ليديا : شفتي الغزالة واخا نبغي انا هو راه مغايبغيش وحاجة الدل غير بصحتها بيها .. نت حضييها لياااا مزيان .. لي طاحت عليها ودنيك هزيها ليا ...
نعيمة : الله اووودي .. واخا طيرتيها منا خلعة قبيلة قلت توضرتي موحال نلقاوك ..مهم انا نجيب ليكم خبارهم غير تهناي ...
ضحكات ومشات وليديا دخلات لبيت جالسة على الكانابي وكتلعب برجليها كتفكر .. حتى دخلات الممرضة كتقاد تاهي بلاصتها فين كتنعس ...
اما تونار خدا الدوش لي كايناسب الحالة ديالو بالمعقمات ديالو ... ولبس سيرفيت كحلة وكلس على البيرو شعرو باقي فااازك كايقطر ليه على وراق المصحة لي شادهم بين يديه .. كايقرا فداك لااسم ويعاود ... وحطهم مطلع راسو للفوق كايفكر كيف يدير يسافر غدا وجدو فهاد الحالة .. فنفس الوقت مقادرش يصبر امتى يشد اوشن بين يديه ويشوفو كتاكل فيه العافية .... واش يسبق الانتقام ولا يسبق جدو لي يقدر يغدرو فاي لحظة ويموت بلا مايشوفو ولا يودعو ولا يحضر ليه ... واش غايخلي اوشن للمرة التانية يحرمو من انه يودع جدو كيفما حرمو انه يودع عائلتو !!
فلداخل ديالو راه حاس وعارف ان جدو فاي لحظة يقدر يموت .. واخا مقادرش يعترف بهادشي فالداخل ديالو .... وبقى كالس على المكتب غير كايسوط طاوي يديه تحت راسو ....
نعيمة طلعات لفراش لليديا ... وقادات ليها بلاصتها ومشات ... وليديا دخلات ففراشها كتحاول تنعس ... كاتشوف عند الممرضة نعسات .. والدنيا ساااهطة وهي النعاس مابغاش يكحل عينيها .. فايقة كاتشوف فالسقف لي داخل ليه شوية ديال الضو من البالكون دالبيت .. مرة تفكر فتونار واش يكون نعس .. ومرة تفكر فشنوو شاغل بالو وشنو لي غايكون وقع .. مرة تفكر للمامون غدا ملي غايرد الخبار بلي تونار ماباتش مع نور كيف كايحسابت ليه .. تاطار عليها النعاس بمرة
اما نور فبيتها كتمشي وتجي متوترة لابسة بينوار طويل فالابيض حريري وتحتو شوميز ديال النعاس ومقادة راسها وضاربة تعكيرة وراشة احسن ماعندها فالبارفان كانت موجدة راسها وكتسناه يجي ، حتى جات بلاصتو نورة لي غفلات مها خلاتها تانعسات وجات عند نور تتأكد واش بصح بات معاها وتحيد الشك ساعة لقات شكها فمحلو ونور بوحدها ، ...
نور : ماايمكنش .. لا غايكون باقي مع جدو ..حلفي تاشفتيه دخل لبيتو ؟؟؟؟؟؟
نورة : هادشي لاماكانش غايكون نعس دابا ... كلس ليك هو وياها فالكولوار كايتباوسو حشمت تانشوف فيييهم ... ولد الحرام كنت حاگرااه ... صدق بواااااس مع راسو ....فلللخر مشا لبيتو ماخرجش كاع وهي راها مع الحاج شفت نعيمة طلعات ليها لفراش
نور : وعلاااااش ماقلتيهااش ليا
نورة : اش غانقوليك ؟ ماكنتش بغيت نضيع ليك المورال ونت كتوجدي راسك .. واصلا حتى كون قلتها ليك .. اش كنتي غاديري مثلا ؟
نور : ( كلسات معصبة وزفات بالتيليفون لي كان فيديها فالارض ) اووووووف ... اش غاندييير دابا غدا غاتصبح كتشفى فياا ونا لي كااانقاد راسي من قبيلة كي لحمااااارة
نورة : كاين حل واحد
نور : ( ضارت عندها ) شنوو هو
نورة : سيري نت عندو ... ياك راه بوحدو ؟
نور : ها !!!! ( مدة كترمش فلخر قلبات راسها ) لا لا ... اويلي اش غانقولليه ؟ .. لا ماميكنش .. نمشي ندق لباب وندخل لا لا لا ماشي لداك درجة نت عارفاني باقي مكنزعمش عليه ... انا حسابتني هو لي غايجي لعندي ياك قالي عمي الحاج غايجي عندك
نورة : واراك مغاتشديش ودخلي عندو ... نت غادخلي بالعز ديالك وبزز عليه ...
نور : مافهمتش ؟؟؟
نورة :انا غانمشي نفيق خالي ... ونوريك اش غانيدرو ...
ناضت بزربة تحل لباب و نعيمة هربات تخبات مور الحيط حيت كانت كتنسنط على لباب ... ونورة مشات باتجاه البيت لي ناعس فيه اشرف وامير ... اما نعيمة بقات كتولول ومشات كتجري لبيت المامون ...
ليديا مزال مبرققة عينيها فالسقف الليل طويل وهي كتحسب ليه فالدقايق امتى يسالي .... حتى شوية سمعات دقة فلباب خفيفة وناضت تحلها حيت دارت بوصاية تونار وشداتها بساروت ...وقربات هضرات بالهمس
ليديا : شكون !!
نعيمة : أنا ...انا غير حلي
ضارت ليديا بانوليها ناعسين .. وحلات لباب
ليديا : ( بالهمس ) اش واقع ؟؟
نعيمة : نااااري يالالة ... داااك نور راها غاتمشي عندو لبيت
ليديا : ( جمعات حجبانها ) كيفاش غاتمشي عندو لبيت ؟؟؟؟؟؟
بدات نعيمة كتعاود ليها وكل مرة ضور موراها تشوفهم واش فاقو ...
نعمية : والله حتى سمعت هادشي بودني .. وقالك داك خالهم لي غايحل المشكل
ليديا : ( كتفرك فيديها ) سيري حضيهم الى دخلات لبيت وحل ليها الباب ..اجي علمني بززربة ... سسسربي
مشات نعيييمة و ليديا دخلات لبيت كلسسات فبلاصتها كتلعب برجليها بتوتر وحالفة حتى تبيتها هاد ليلة فالجحيم لامشات تادخلات عندو ...
اما نعيمة بقات سامرة عليهم حتى بانليها اشرف ونورة دخلو للبيت عند نور ... شوية خرجو ضاااحكين ونورة مشات لبيتها ... ونور واشرف زادو لبيت تونار .... ونعيمة تابعاهم فضلام كاتجسس...
نور : دق نتا ... ( شادة على قلبها ) اوووووف خايفة كون غير رجعنا حسن ...
اشرف : تااابربي تابتاتي معاه ... والا انا ماااشي اشرف ... هادشي فسبيل الله عنداك يحسباتك على ود الفلوس ... غا نور وحدة لي عندنا ماخلاقش لي يبكيها لينا ...
دق لباب ونور شادة على قلبها ....
تونار كان واقف فالبالكون كايشوف بواحد المنظار صغير فااسما ... غير سمع دقة فالباب لاحو بزربة ومشا قال غير شي حاجة واقعة لجدو .. حل لباب بخلعة هو يبان ليه قدامو اشرف بضحكة كايبانو فيها ضراسو ونور مةوراه مخبية حشمانة كأن الحشمة كتواتيها،!!!! بقى غير كايطلع فيهم عينيه ويهبط مافاهم والو وكالعادة مكيبان والو على وجهو من غير البرود !!
اشرف : آمسلخييييير انسيبي( جاب نور قدامو ) واهانا جبتليك عروستك ههه راه غاكتحشم مسكينة لاديش عليها ...
تونار غير واقف كايشوف فيه جامع تخنزيرتو واشرف كايطل براسو على لبيت ودخل بلا حشمة بلا حيا وتونار بنفس وضعيتو مخنزر فنور لي مقداتش تعلي فيه عينيه
اشرف : تباااااركالله تباركالله .... هدا هو بيتك ابنت ختي ، تباااركالله ... الله يزيدكم من فضلو ...
ضار عندو تونار كايحك مور عنقو كايحاول يتحكم فأعصابو وااخا يديه حابسها غير بزز ماتجمعش معاه بشي كروشي يريب ليه سنانو ... و اشرف ضاحك باستفزاز وقرب عند نور شدها من كتافها
اشرف : يالاه تصبحو على خير تعطل الحال واقلة نخليكم ترتاحو ... وانتي ابنتي راه بلاصتك حدا راجلك دابا مجاتش تنعسي حدا مك..... ( شاف فتونار لي مضيق فيه عينيه قرب يخلطو ) وماتقلقش منها انسيبي راها حشووومية وصااافي .....
ضحك ليهم وخرج وشد لباب موراه وتونار واقف مزير على القبضة ديالو ... و نور بسبب الماسك ماقدرات تعرف لا واش مقلق ولا هادئ ..وقربات عندو بتوتر تبرر الموقف
نور :ر .. راه . راه ماعرفت مانقول ليه .. و
يلاه كاتهضر تاسمعاتو لتخ واحد الديكور كان على المكتب هو لي جاه على يدو تشخشخ مع كملها مع واحد الكرسي بركلة و نور تخطفاات شادة على قلبها وهو كايمشي ويجي كايرد فشعرو لور ، وهي قربات تهبط البولة فسروالها ماحسابتهاش غايدير بحال هاكا بغات غير تضور ترجع فحالها ندمات على الساعة لي جات فيها لعندو ...
تونار : ( ضار عندها مغزف هزها من حوايجها بيد وحدة وهي مغمضة على عينيها مزيرة عليهم ولات باغا تشق لاارض وتبلعها وهي كاتسمعو كايسب غير بتخصار لهضرة وهو مخرج فيها اعصاب النهار كاااامل طرطقوهم فيها ) شهاااد التخررررربيق دابا شهاااد ال****** ..... واااش مريييضة نت ف**** ولا ماااالك .... مااالقيتي مااااتجيبي ليا انا بقى ليا غير ال**** يدخلو لعندي ...
لتخها من يدو تاجات على السرير كايمشي ويجي وهي بدات كتبكي ماحسابتحاش غاتكون ردة فعلو بهاد العنف هي ماعرفاش ان فيها غايبرد جنونو هاد الليلة ...
نور : (كتحاول تهضر وسط الخوف والاحراج وهي كتشد بداك البينوار وداك الحالة ) اا انا .. انا غير
تونار : ( قرب لعندها تحنى شاد على ركابيه ) مافهمتش انا واش عندك عقل كاتفكري بيه ولا آش .... علاش قابلة على راسك هادشي !!!! واش انا تزوجت بيك ؟؟؟ واش أنا واعدتك بشي حاجة ؟ واش انا عمرني شفت فيك ؟؟؟؟؟
نور غير مهبطة راسها كتهز كولها وتنخصص وزراقت بالخلعة خايفة يهبط عليها بشي تصرفيقة هو قدامها كاينهج كيف شي ثور
تونار : الطرييقة لي كتفكرو بها مابغاتش تفهم ليا اانا !!!! واش عندك عااادي دخلي لبيت واحد مزوج مارااابطك بيه والو من غير ورقة مزوورة !! واش راااضية بهادشي على راسك !!!!
طرطقات بالبكا والتنخصيص وهو دوز يدو عى وطهو وقف و بعّد عليها كايبرد فراسو لان شفق على حالها واخا عصباتو ولكن الدل ماليه دوا وهي بقات تبكي بصوت مرتفع
نور : ا انا... غ غير .. خ خالي و وصافي لي .... ( شافت فيه معصبة و فنفس الوقت خيفانة ) حتى انا مراة مزوجة ... نتا تمارس زواجك ك كيف بغيتي وانا ؟ غير بالسمية !! ؟
تونار : واش انا منعتك ديري شي حاجة ؟؟ سييير اختي ديري نت عشرة دالرجال فنهااار عييييشي كيف بغيتي شكون ماااانعك ؟؟؟؟.... واش باغين تخرجوني على طوعي واش كاتشوفوني ساكت حيت جدي مريض صافي راه عااحبني هادشي !!! واش ماغااات****وش عليا ؟؟؟؟
نور : ( كتمسح دموعها ) ب بلا .. باا ماتسب .. ه هانا غانمشي .. ر راه غ غير خالي مابغيتش نتحشم ح حداه ...( شافت فيه ) و .... ودنووبي على رقبتكم
كايطلعها ويهبطها شنو لابسة ودار ضحكة ديال خزييييت
ناضت باتجاه لباب تحلها وشافها ماشية ثقييييلة و تنهد
تونار : رجعي لهنا دابا غير رجعي ... ملول ديري فيك هاد النفس ..
جرها من يديها تااغوتات ولاحها على السرير وهي طرطقات عينيها كاتشوفو قرب عندها ... بقات غير كترمش وهو حل المجر ديال الطابل دونوي ... وجبد الحبل لي وجدو يربط بيه ليديا فاش يكونو ناعسين مع بعضياتهم وهي غير شافت داك الحبل طرطقات عينيها مافهماش علاش جبدو !!! وآش غايدير ليها
ليديا واقفة فلباب مزيرة على لبواني وكارزة على سنانها وهي كتسمع فنعيمة كتعاود ليها ...
نعيمة : سيري عندهم من الاحسن ...
ليديا : ماشي نت لي غاتقولي ليا اش غانديرر... سيري تنعسي ..
شدات عليها لباب ونعيمة بقات غير كتبلق بعينيها ومشات .. اما ليديا كضور فلبيت بوحدها وهوما ناعسين ... فللخر حلات باب لبالكون بشووووية وشداتها باش مايدخلهمش الريح ويفيقو .... وخرجات كتطل كايبان ليها الضو مشعول فبيتو ... وبقات كترمش بعينيها وتفرك فيديها ...
شوية بان ليها الضو تطفى،!!!! نزل عليها العجب !!! .. وقلبها كايتلوا من لداخل بالفضول اش غايكون طاري تما بيناتهم .. وطلعات فوق الحديدة ديال البالكون معلية يديها و دروس ديال التواازن جا للوقت لي ينفعوها ... وتمشات بمرونة على داك الحديدة حتى نقزات لبالكون لاخور.. وتاني طلعات فوقو كتمشى تانقزات للبالكون ديال بيتهم عاد تهنات ... على قبل توصل لعندو القدر خلاها تتخطى منافي واسوار و مجاري الصرف الصحي .. مغاتحيرش دابا فجوج بالكونات ...
بانتليها لباب محلولة و الريدو دايز وغير ضو خفيف جاي من اباجور ديما تايخليوه مشعول .. بقات كتمشى على گدامها باش ماتصدرش شي صوت .. ودوزات الريدو كتطل غير براسها وهي تجمع الضحكة ملي شافت المنظر قدامها شدات على فمها باش متفضح ....
كانت نور مربوطة مع السرير وهو ناعس على الفوطوي بعيد عليها ... ناعس على ضهرو وطاوي يدي تحت راسو واضح يلاه كايديه النعاس .. غير من داك الربطة لي داير ليها وداك النعسة لي داير مرتاح عرفاتو راه ربطها باش متجيش بالليل تحاول تحيد ليه الماسك ... بقات كتضحك غير بوحدها وبعدات كتخرج الضحكة فالسر جاتها الهيستيرية .. كاع الاعصاب لي تعصباتهم ملي شافت المنظر برداااات وعرفات بقيمتها عندو شحال ساوية ... رغم انها تاهي دخلات لحياتو رغما عليه الى انها عمرها حسات معاه بالدل .... كاتشوف فنور بداك البينوار دالعرايسات وداك الحالة وتزيد تضحك .. بقات فالبالكون عااسة عليه حتى بان ليها صدرو كايطلع الزفس ويزفرها بانتظام عرفاتو راه نعس ... ماشي بحال فاش دايكون فايق الحركة ديال النفس فصدرو كتكون مبدلة بسبب التنهيدات ....
وشافت لعند نور بانتليها معلقة فداك السرير يديها مربوطين مع الحديد و فايقة راسها مايل للجنب على كتفها ، النعاس مكحلش عينيها وواضح شحال مكتأبة .... وهي تحل لباب دخلات كيف شي جنية من العدم تاقفزات نووور من بلاصتها بالخلعة و ليديا دارت صبعها على فمها وهضرات بالحس
ليظيا : شششششش .... ( شافتها مطرطقة عينيها بحالا شافت شي جنية وبصح باقا كتستوعب واش هادي بشر ولا من الجن ؟؟؟ لانها ماشي طبيعية ابدا ؟؟؟ وهي تزيد بخطوات لقدام وشدات موراها لباب دالبالكون كتهضر بالهمس ) ماحشوماش عليك تخلي لباب محلولة عند راسو مسكين يضربو البرد .... ( كتعلي عليه الغطا محنية عليه ) قلبك قااااسح يا ضرتي ... ( كاتشوف فيه ) سبحان الله دغيا نعس !! ملي كانكون ظعاه مكااينعس تالفجر .. باينة كاتجيبي النعاس للواحد دغيا ( علات راسها شافت فيها وعلات حاجبها ) مالك كاتشوفي فيا هاكاك ؟؟؟ عيب نجي نعس مع راااجلي ،؟؟؟ ..... راه بيتي هادا واقلة !!!
زادت كاضحك وكلسات على الكرسي دالمكتب ديالو دايرة رجل على رجل
ليديا : مرحبا بضرتي معانا .... واش ديما غاتجي تنورينا ولا غير ليوم ؟؟؟؟
نور : ( بالحس مغددة تحت سنانها ) الله ياااااخد فيك الحق
ليديا : اووه !!! حيت سمحت ليك دخلي لبيتي وتنعسي حدا راجلي ، بغيت نقول ( حابسة ) مربوطة حدا راجلي ههه ( قادات جلستها على الكرسي كتهضر غير بالحس باش مايفيقش ) واش حسابتك كون مابغيتش انا كنتي غادخلي لهاد لبيت ؟؟... حيت انا بغيت ، وحيت انا قبلت وعطيت ليك مجال ، عرفتي علاش ؟ حيت تايقة فيه ..وعارفة مغاتهزي فيه شعرة
نور : ( محقدة فيها عينيها ) حيت داير ليه الطلامييس عميتي ليه عينيه ... ديري لي ديري كتبقاي الطماعة لي داخلة بالغدر .. نتي مكتبغيهش وانا فضلت الدل على نخليه ليك ....اييييه الدل مهم نطلع بنتيجة ومتربحيش نت
ليديا : والموصيبة مغاطلعي غير بالدل ... حيت لدالى نتي ختارتي تكوني مدلولة وماتخليهش ليا ... انا ختاريت نكون بعزي ومنخليييهش ليييك ... انا عارفة ونت عارفة بلي لي طامع فهاد الفيلم راه هو نت و عائلتك .. هضرتكم كلها دازت على ودني خليني ساكتة حسن
نور : كنت ماشية فحاالي ... هو لي قالي غير رجعي ( بنظرة تحدي )
ليديا :هه !! باش ازيدي تعرفي قيمتك وديري فيك شوية دنفس
نور : باش نخليه ليك ؟؟
ليديا : هو من الااساس راه ليا .... الوقت لي كاضيعيه فهاد الدل كون درتي خيير فداك لي سيغن ( الهالات السوداء ) داويتيهم وتسنيتي شي عريس جديد .. مالك فاقدة فراسك الامل حتى لهاد الدرجة ؟؟
نور : ( نور قلبات راسها لجنب ) طلقي ليا يدي .. بغيت نمشي
ليديا وقفات كتقرب عندها
ليديا : لا لا لا مايمكنش .. فين غاتمشي فهاد ليل ؟؟ لا نتي ضييييفة عندنا ( نور ضارت كاتشوف فيها موسعة عينيها بالفقصة وليديا هبطات يديها كدوز صبعها على وجهها ونور كتبعد وجهها ) غاتباااتي معانا .... انا وراااجلي .. وعلى عينيك غاتشوفي هو ديالمن ..( شداتها من فكها ضورات راسها لعندها ونور كتنتر منها ) عااارفة بعدا علاش رااابطك ؟؟ ( غير كاتشوف فيها محقدة ) حيت مستحيل يتيق فيك .. حيت مكتعني ليه واااالو
نور : هه !!!! زعما نتي مكيربطكش .. ياك الحبل كان هنا
ليديا : كايربطني ... وديالي هاد الحبل ، غير هو الفرق بيني وبينك .... نت ربطك فاش بغا ينعس ... ونا كايربطني ملي كايبغينا نعسوووو ( غمزاتها بمعنى راك فاهمة )
نور : ( بحقد وكره ) ماتستااااهليهش
ليديا : نستاهلو ولا منستاهلوش مكاايهمش .. لي كايهم هو راه ديالي ... تقبليها بروح رياضية الغزالة ( كطلعها وتهبطها وطلقات قهقهتها المستهزأة بالحس ) وموووجدة راسك ههه . ياااااخسارة تونار ماعندوش مع الحوايج ... تايبغي الجسد كيف خلقو مولاه .... عندك هاد الجرأة ؟؟؟ .... نوو ؟... واحتى يكون عندك الجسد بعدا هههه
وقفات كتضحك و كاتفتح فصدايف الكسوة لي لابسة حتى حلاتها كاملة طاحت مع رجليها ونور كتراقب اش كادير هادي وبان جسدها المنحووووت غير بدو بياس وحيدات الليبا تاهي و لاحت صباطها ونور طرطقات عينيها
نور : اش كاديري نت ؟؟؟؟
ليديااا مجاوبتهاش وحيدات الفيليل من شعرها حتى تطلق كامل ونور كاتشوف معاها ومتنكرش ان جسدها خطيييييير الشيء لي كايخليها تزيد تشعل بنار الغيرة وتزيد تأكد ان لا مجال للمنافسة و البقاء للاقوى ... وكتزيد تتحرق وتشوى وتلعن فرااااسها لي جات لهاد لبيت ، وليديا قربات لكوافاوز هزات بارفانها رشااتو .. وتمشات بشوووووية بجهة تونار ونور كاضور فراسها لجنب لاخور مغددة كتحك رجليها على داك لفراااش .. وهي دخلات حداه فداك الكنابي وهو غير وصلاتو ريحتها لنييفو رغم انه ناعس دماغو استنشقها و جبدها عندو عنقها كيف موالف ، مواعييش بشنو اقع ... حسابتو راه ناعسين عادي !! ....
نور قلبات راسها لجنب مزيرة على عينيها وسنانها ... وليديا بالعاني كاتبوسو وتسمع ليها باش عمرها مزال تحلم تعاود تدخل عندو للبيت ...
تونار كمش ملامحو وخشا ليها راسها تحت دراعو كيف موالف فالنعاس ديالو ... وهي كل مرة تطل بعينيها تشوف فنور ....
نور غير قلبا راسها وعاضة على شفايفها ودموع كايسيلو من عينيها .. وليديا تنهدات و بعدات بشوية عليه وناضت هزات بينوارها معلق لبساتوو... واتجهات لعندها ونور مابغاتش تعلي فيها راسها وكلسات على السرير حداها
ليديا : وكتبكي ملفوق !! قابلة على راسك هاد المصير وكتبكي ؟؟؟
نور : ( تحت سنانها ) تفرررقي عليا
ليديا،: تفرقي نت علياا .. كون عطيتوني تيقار مغانجبدكمش ... واش كاينة شي مرة على وجه الكرة الارضية غاتقبل تشارك راجلها مع وحدة أخرى ؟؟؟؟؟
نور : ( شافت فيها ) قولي هادشي لراسك
ليديت : منييييين جاك نت راجلك ؟؟؟ ... هادشي راه مافيهش مزال نقاش ... تونار ديال ليديا ... وليديا ديال تونار غير دخليها لدماغك وجمعي راسك ... عندك الحياة كلها بين يديك .. حرة !!!! كتمشي فين بغيتي ... عندك ماماك .. عندك ختك .. عاااايشة بيخير !!!! وكتبكي ؟؟؟؟؟؟واش عارفة ان كاينين ناس فهاد دنيا معاك راه كايتزادو فبيت عمرهم كايخرجو منو ( نور علات فيها عينيها ) ماتايخرجوووش كاااع ... نهار كايخرجو على الباب كايكونو ماشين لمنفى اخور ... لمنفى راجل ماشي هوما ختاروه .. ويقدر يكون فعمرهم غير سطاش لعام وغاتمشي عند راطل فعمرو ستين عام يغتصبها بوحشية فليلتها لولة ويكمل عليها ولدو .... ماين لي كاتنتحر و كاين لي كتكمل الظدة السجنيية ديالها كتحارب حتى تمشي للقبر، .... ونت؟؟؟؟ .... عطاك الله كولشي سااهل الحياة لي كتمناها اي وحدة .... وحاطة راسك فهاد المواقف ؟!!!! مكاين تاشي حاجة اخرى فهاد الدنيا لكبيييرة لي شحال من وحدة كتحلم تخرج ليها تلهييييك وتخويه من دماغك ؟؟؟ راه مكاتجيبي ليا لا غيرة لا والو ... كانجيبي ليا هاد الساعة غير الشفقة ....
نور : ونت مالقيتيش فالدنيا لي يلهيك عليه ؟؟؟؟؟ زعما هو ختارك ماتلاحيتيش عليه يا الطمااعة؟؟؟
ليديا :انا ماشي هي نت .. ماتقارنيش راسك بيا واش نت تقدي عليا ؟ نت بحالي ؟؟؟... انا هي لي مستحيل يقاومها شي واحد كيفما بغا يكون.. الى قلت غانديه كانقد بيهااا وكانخليه هو يطلبني نديه مكنتلاحش عليه مدلولة .. ( كطلعها وتهبطها ) سمعي لنصيحتي راه كانعطيها غير مرة وحدة ومكنعاودهاش .... جمعي راسك وهادشي لي بقى فيك .... وعمري راسك بحوايج لي ينفعوك ... قراي لغة جديدة وتعلمي ثقافة جديدة و حسني من راسك كايبانليا دماغك خاوي كايسوط فيه الريح .... وخوي من راسك راجل مزوج حيت مغتقديش تنافسني .. نهار تشبهيني فوجهي و جمالي ... و 6 لغات لي كنهضر بيهم ...وعدد الكتب لي قريتهم ولخصتهم ... وعواصم جميع الدول و ثقافتهم وتاريخهم وقوانينهم وعملاتهم لي حافضاهم عن ظهر قلب ... كل نقطة فالدنيا سميتها كنعرفها .... نهار توصليني فهادشي ... نقدرو تنافسو .. اما دابا راااه لا مجال ... بقيتي فيا داكشي باش كنصحك ....كانشوفك غيؤ مگدمينك .... سيري خدمي على راسك حسن ماتبقاي متبعاهم راه غير غايخرجو عليك ... من الاحسن ماتعاوديش مزال ديري معايا شي لعب ولا دخلي معاهم فشي لعب حييت بوحدك لي غاتآداي .... وكولشي غايرجع عليك كنحدرك ... والنصيحة والتحذير مكنعاودهمش جوج دالمرات
نور : ( بنفخة رغم ان كلامها تغلغل فيها ) مامحتاطاش لنصيحتك
ليديا : مزال غاتوقفي عليها ( ناضت وقفات ) انا منك من بعد هاد الليلة .. يا نقتل راسي ... يا نحيي راسي من جديد ..... والاحتمال التاني لاكتتي بعقلك راه هو لي غاتختاري ...
خلاتها ورجعات لبلاصتها ومابغاتش تزيد عاد تفقصها رغم انها مخشية فيه كامة وزاد هو معنقها ولكن غير كتنهد وكاتشوف انها مايمكتش تغير من وحدة بحالها .... بل الشقفة وصااافي لي تقدر تحس من جيتها لهاد الضحك لي دايرة فراسها ...ونور مزيرة عل عينيها وقلبها كايتطحن من لداااخل بحالا الصخور كاتحكو ويتضاربو ويتسحقو فالداخل ديالها .....
يتبع...
التعليقات
لا توجد تعليقات بعد، كن أول من يعلق.