قصة روبي فيريدجو الجزء الأول

الجحيم والنعيم طرفان لا يتأرجحان إلا على شفتي ابتسامة واحدة منها... بعيدة هي عن دور الضحية حتى يكاد يشهد لها أنها الشيطانة الماكرة. تنظر داخل عينيها فيصيبك الذهول، إن أقبلت الرقة على هيئة بريق، فستتجلى حتما في براءة وبياض عينيها.

تخرج يدها من جيبها فتتساءل: أتلوح؟ أم تستعد لتطلق رصاصة في منتصف جبهة غريمها؟! هي لا تبكي قبل أن تتخذ القرار الصحيح، ولا تضحك قبل أن تحسم الانتصار الساحق. كن ما شئت، لكن إياك أن تلعب معها لعبة، ستجني فيها ما تبقى من ويلات الأجمعين!

* * *

هو ذلك الرجل القادم من البعد الثالث، شخصيته عدالة الميزان: تارة تتأرجح كفته لهدوء موريشيوس، وتارة تتأرجح لعدائية السلفادور. رزين كالسلاطين، دبلوماسي ويتفنن في قلب الموازين، حكيم وعقلاني لا يؤمن إلا بالبراهين. تناقضاته كالهجين، ونوعا ما شبيه بالرقم العشرين. يخيل إليك أحيانا أنه خبير في القتل والتكفين، ولكن في الحقيقة يميل أكثر للحماية والتحصين. مبهم ومحير: أهو من أهل الملائكة أم الشياطين؟

في الغيرة يناقض جموده ويثور كالبراكين، يتخلى عن كرسيه بين العقلاء وينتقل إلى صف المجانين. أما في الخيانة، فيتحول من العاشق والمعشوق إلى السجان والسجين... أنفاسه ميثان وأفعاله طاعون، يتحول إلى شيطان الميدان ولا يعترف بعدالة القانون أو الميزان.

« 𝐑𝐔𝐁𝐘 𝐕𝐈𝐑𝐈𝐃𝐉𝐎 »

سناء الصنهاجي

⚠️لا يـنصح تـتـبعـهـا مـن طـرف الـجمـهـور الـناشـئ⚠️

✦

- بلسانه يقول :

أراك يا إمرأة تبحثين عن الثلوج ، أرى هنا أمامي نهرا من جليد يصعد ، وأرى أمواج بحرك في إشتباك تصرخ ..

فلروحي طعم ملحمة على قمم إشتعالك تنشد ، متعدد متقلب كالريح ... قبلك في هواك أنا لا أعترف بالحب ، انا كل من عاشوا ... وانا كل من لم يولدوا .

_________________________

- #الدار_البيضاء

- فوحدة من المصحات المشهورة والراقية فالمدينة ، فالبيرو ديال المدير ، واقف بكل هيبة ... رجل فستينات من عمرو ، شعر رمادي وعينين زرقين ، عاقد غوباشتو وباينة من ملامح وجهو بلي معصب :

- دابا أنت بغيتي تخرج عليا أنا جاي للبيرو ديالي كتهددني ، واش عارف معامن كدوي اشريف ولا نفكرك ..

- اونفاص معاه واقف رجل فنفس السن ، على وجهو ضحكة ساخرة ومستفزة :

- لا لا حاشا اسي فؤاد ، أنا مكنهددكش انا غير كنݣوليك شنو غادي يكون من هنا للقدام ... مايمكنش تكون انت رابح وانا خاسر ، براكة كليتي حقك ، ولي كلا حقو يغمض عينيه ..

- فؤاد (خبط البيرو بيدو ) :

30 عام ، وانا كنبني هاد الكلينيك طوبة طوبة ، صنعت السمعة ديالو بيدي ، فيه أحسن الأطباء ... وأحسن الممرضين ، وأحسن تعامل ... وسمعة ديالو سابقاه ، تجي انت بتحريميات ديالك وتنوعير ديالك دمر كاع لي بنيتو والله لا كانت ليك اسي رضوان ..

- قاطع الهضرة ديالهم الباب لي تحل ، طل منو شاب فثلاثين من عمرو ، لابس شوميز فالكحل مع تيشورت من التحت ، سنسلة طويلة نازلة من عنقو ، الجسد ديالو نحيل بالإضافة لعينيه صغار الكحلين لي زادوه جادبية وكاريزما كان هو او واحد البنت ، كتشبه لفؤاد ، نطق بحدة وهو كيشوف ففؤاد :

- الواليد ياك لاباس ؟ صوتك كيتسمع من لاخر ديال الكولوار ..

- (حتى هي سولات نفس السؤال وعلامة الإستفهام على وجها ) :

بابا شنو كاين ؟

- فؤاد ( كيخنزر ) :

والو أبنتي مكاين والو ، مزال مامشيتيش ، غادي تعطلي على خدمتك ، حتى لدار ونهضرو ..

- (كتشوف فسيد لي مع باها ) :

ولكن أبابا .. (قاطعها) :

دنيا صافي أبنتي دويت معاك ، حتى لدار ونهضرو ... ماعجبهاش الحال حدرات راسها .. ضربات فخوها وخرجات ..

البشير ( ضحك مستمتع بالعصبية لي باينة على المنافس ديالو ) :

وجد راسك مزياااااان أسي فؤاد ( لبس النظارات الكحلين ديالو وتم خارج حتى وصل لعندو ) :

أحسن مادرتي ادكتور كريم ، هو تخصص القلب وشرايين ، حيت غادي تنفع باك فالأيام جايا ( ضحك وخرج مامسوقش للعافية لي خلى وراه ..) .

- كريم :

الواليد شنو واقع ؟ شنو كاين شرح ليا ؟؟!!!

- فؤاد (مشا للكرسي ديالو وݣلس شاد على راسو ) :

هذا رضوان لي كان باغي يدخل شريك معايا فلاكلينيك ، منين قلبت وراه لقيت بلي مخلوض كبير ، الكلينيك ديالو فيه حوايج مشبوهة ، وكيتجراو فيه عمليات غير قانونية ، وكيتعامل غير مع ناس الهاي كلاص ، انت عارف شنو باغي نقصد ..

- كريم (مغوبش ) :

وي هادشي فهمناه ، لي مافهمتش شنو بغا منك ، حيت كايبان ليا من وجهك بلي ماعجبكش الحال ؟

- فؤاد :

كيهددني ، بلي غادي يدمرني ويدمر السمعة ديال لكلينيك ، وكيفما كنت فسابع سما أينزلني لسابع أرض ..

- كريم (تبسم بإستهزاء ) :

غير أجي وهدد ، الله يهديك واحد بحال هذا يخلعك ..

- فؤاد :

انا لي كنعرفو شنو كيسوا ، هداك راه الخنز براسو ، خبيييت اولدي ، والى دار شيحاجة فراسو كيوصل ليها ..

- كريم :

حتى منكونش انا كاين (غمزو) خاصني نمشي دابا ..

- فؤاد (شاف فيه) :

لفين ؟

- كريم (دار نظاظر الشمس ونطق ) :

(مجاوبوش على سؤالو حيت باه عارف مزيان بلي مكايبغيش شي حد يبقى يسولو فين غادي ) ، نتلاقاو من بعد ... تمشى حتى لباب وشاف فيه ) خوي بالك من تخربيق تفاهمنا .. أشر ليه باه براسو ، رض الباب من وراه .. غادي فتجاه لاسانسور ، هبطو لاكاڤ .. جبد السوارت وفتح طوموبيل فالݣرونة من نوع رونج ، مشا لباب اللوراني ، زول ديك شوميز لي كان لابس فالكحل لبس وحدة فزرق ، على الكمايم ديالها .. سلسلة دخلها فتيشورت ، حيد النظاظر ديال الشمس ودار نظارات بستيل أخور ، سد الباب وطلع لبلاصتو ، قبل مايديماري هز البكية ديال الݣارو لي كانت محطوطة ، هز منها واحد شعلو ، ديمارا طوموبيلتو وشد الطريق ..

#سطات

- فثاني أكبر حي شعبي بمدينة سطات (ضلاص ) ... ݣالس على الكرسي ، لابس شوميز فالݣري ... فوق منها واحد دجاكيط فالقهوي ، خاتم دنقرة فصبعو الصغير ، واحد التسبيح فعنقو ، لحيتو كيتخللها الشيب ، واحد العود ديال الأراك دايرو فمو كيحك بيه سنانو ، رجل مسرحها ورجل جامعها ، حاط حداه عكازو .. حتى وقفات عليه ..

- سي عباس لاباس عليك ، واحد لالة سعاد لاباس عليها ؟؟ شفتها ݣاعما بانت لبارح ، فالختانة ديال بنت مول دجاج ..

- عباس (ضور وجهو مخسر سيفتو ، كيسمعهم ليها ) :

يلاطيف يلاطيف ، واش تي مكدخليش سوق راسك ... واش ماعندك مايدار ، اطالقة ديك عوراجة ديال بنتك فدار ، وانت سايرة دوحي بحال دواحة الخيام ، وتي سيري فحالك وقيلي عليك مرتي ، وسيري شوفي ليك شي شغل وماحدكم حاضييني وربي عاطيني ، وسيري لخيمتكم قبل لا نسا راكي مرا ..

- (خافت منو حدرات راسها ومشات كتعاير) .. دور راسو بان ليه جاي كيفرنس ، هاز المقدية ..

- عباس :

وكون أبتي ، ماعرفناك مشيتي تقداها ولا مشيتي تݣلعها ... كانݣوليهم سخرت دريس لاروب ولكن ختك مكترضاش ..

- دريس :

الله يخليها ليا ، هي لي عارفة بقيمتي ، وانت اشاد داك العكاز ومقنت وكتنݣور ... وخاصك تكون فرحان أصحايبي ..

- عباس :

سير سير دي ليهم السخرة واجي راني بغيتك ..

- أدريس :

دابا ابا عباس نكون هنا ..

- عباس : تودوسويت ..

- أدريس (كيݣروز) :

تودوسويت ابا عباس .. مشا دريس وصل السخرة حل واحد الباب ، ودخل ... الدار كانت كبيرة فيها 3 ديال البيوت كبار ... البني قديم باين من زليج ، البيوت عندهم جوج ديال البيبان مصبوغين بالبيج ، المراح مفرش بسدادر ... الطبلة وتلفازة فوقها مع نيميرك ، الڤيزان فكل قنت ... وتصويرة عباس كان باقي صغير شوية ، قدام واحد لوزين مع صحابو مبسم ..

- دريس (كيعيط ) :

سعاد واا سعاد .. خرجات من الكوزينة ، لابسة قفطان فالبلو مارين ، شعرها جامعاه بشال ودايرة نصاص ديال دهب فودنيها ، لون بشرتها بيض وشعرها كيبان من تحت الفولار عسلي بخصلات دهبية وباين صابغاه ..

- سعاد (كتغوت عليه ) :

اويلي ياخويا واخا تكون مشيتي لبحيرة تجيبها من تم ، أمالك على هاد التعطيلة ..

- دريس :

وااا هداو عليا ، ماشي لي خلاه راجلك تكمليه تي ، ولا طلعوش ليا فوق راسي ..

- سعاد :

صافي صافي ماݣلت والو اخويا سير سير ، حجارك يشدوك أهيا ناري .. خلاها ورجع عند عباس ، جر الكرسي وݣلس حداه ..

- دريس :

ماذا هناك أبا عباس ، شنو كاين ؟

- عباس (كيحك فالحيتو وكيفكر ) :

السعودي ..

- دريس (غوبش) :

تا واش ماباغيش تنسا أصاحبي ، واش باغي تجبد عليك نحل تاني ، وغير رجلك تفكرك ..

- عباس (غوبش وهز عكازو كيخبط على رجلو ) :

بربي لا دوزتها ليه على هادشي ليدار أدريس ، ودابا تشوف ..

- أدريس : دابا شنو بغيتي مني انا بضبط ؟

- عباس : أنا انݣوليك ..

- فمحال خاص ببيع الازياء التنكرية ، ݣالسة ورا المكتب ديالها كتقيد فسلعة الجديدة لي دخلات ، لاباسها كان عادي جدا ، سروال دجين وتريكو خاشياه فسروال ، وسبرديلة ... شعرها كضرب فيه الشمس لي داخلة من سرجم ، مبينة لونو العسلي، نازلة بعينيها كتقيد حتى دخل مول المحال ..

- الحاج عبد الكبير :

سندس ، أمضرا ابنتي فين وصلتي ؟

- سندس (هزات راسها فيه او وقفات بإبتسامة طفولية ) :

قربت نسالي الحاج ، غير كون هاني ... مايجي فين يأذن الظهر حتى نكون ساليت وسلعة تستفات ..

- الحاج (بإبتسامة رضى ) :

الله يرضي عليك ... وسربي يديك شوية باش ترجعي لداركم بكري ..

- سندس (بنفس الابتسامة ) :

ويااااه ، خاص نوصل قبل لا توصل ختي ..

- الحاج (كيحاول يتفكر ) :

منين ݣلتي ليا جايا ختك ، حيت نسيت ؟؟

- سندس (حكات راسها بستيلو ) :

الطاليان الحاج ، دابا راه 3 سنين ماشفناهاش ، توحشناها بزاااف داكشي باش خاص ندخل لدار بكري ..

- الحاج :

إيوا على سلامتها ، الغربة راه صعيبة أبنتي ، واش ختك مزوجة ولا خدامة ؟

- سندس (مزال حاطة على وجها نفس الإبتسامة ، بينها وبين راسها مكرهاتش ، تعطيه واحد جوج كلمات يدخل سوق جواه ولكن ماتصيبش ) :

لا الحاج مامزوجاش ، خدامة فسياحة تم فطاليان ..

- الحاج :

إيوا مزيان ، إلى جات دوزيها للمحال تشوفو ، يلاه انا مشيت ..

- سندس (حيدات ديك الضحكة من وجها ، ورجعات ݣلسات) :

تفوو شحال فيه ديال تبرݣيݣ الله يستر ، العفو لله .. (هزات يديها شافت فساعتها ، وبدات كتزرب ... ستفات السلعة وقدات امورها ، هزات سكادو ديالها وتيليفونها ، وقفات كتسنى حتى بانت ليها مريم البنت لي كتناوب معاها جايا ، ماخلاتهاش توصل عندها مشات هي تلاقات ليها ، عطاتها الساروت ... شيرات لطاكسي تم تم وشدات الطريق لدار ..) ..

_____________________________

- فالكوزينة واقفة كتوجد ، وبنتها حداها ... كانت كتدي ليها غير فلون دالعينين ، ملامح وجها زوينين وكتميز بخالة فوق حاجبها ...

- ماما ..

- سعاد (مركزة مع لي فيديها ) : أممممم

- سمعت با كيهضر مع خالي دريس ، وݣاليه بلي حط الدار للبيع وغانرحلو من هنا ..

- هزات سعاد راسها فبنتها :

ياكما ݣلتي هادشي لجداك ، راه كنعرفك لسانك فيه ميترو خاصو سودانية ..

- سكتات كتدور فعينيها ..

- سعاد (بصوت عالي) :

عاشورا راه سولتك جاوبيني ..

- عاشورا ( عقدات غوباشتها ) :

متبقايش تعيطيليا بهاد السمية ، سميتي صفاء ماشي عاشورا أعباد الله واش باغيين تحمقوني ..

- سعاد ( كتقلي ليها السم ) :

واخا جداك ابنيتي دارت لي فراسها ، ومشات قيداتك بديك السمية ، انبقاو نعيطو ليك بسمية لي بغا باك عاشورا ، سالينا الكلام ولغا ورضان الهضرة ودابا ݣولي ليا واش فخبار جداك ..

- جاها الجواب من المراح :

- راني سمعتك أش سايرة تݣولي ، وعطيو لبنتي بتيساع وجهكم هداك ولا مسلفينو بغيتو تعقدو ليا بنتي بديك السمية ، أراجلك هبيل وانت تابعاه تشالي ، واييه واييييه فخباري ايبيع الدار ، وانيت طلعات ليا هاد المدينة فراسي ، نمشيو انفوجو شوية ونبدلو العتبة ..

- سعاد (خرجات عندها هازة الموس فيديها ) :

واش ݣاليك فين انرحلو ؟

- وااايه ݣاليا أنرحلو لجديدة ، كاينة واحد دار تما شافها ليه واحد صاحبو ، اللهم جديدة بعدا فروجية والبحر كاين ماشي بحال ..

- سعاد (واخا هكاك ماعجبهاش الحال ) :

مي معزوزة انا والله مابغيت نرحل ، نكدب عليك وهنا دوزنا فيه مدة طويلة ، وكاينين حبابنا وجيرانا .. لا سماحة ليه مابغاش يهديه الله ..

- معزوزة (هزات يدها لي عامرة دبالج وخواتم دنقرة وأشرات ليها بصبعها ) :

ݣولي مابغاش يهديهم الله ، كاملين ماشي غير هو ..

- سعاد (تنهدات ) :

هو الكبير مول العقل زعمة ، فبلاصة مايدير ليهم العقل ... كيزعم فيهم ، أش ربحنا بنتو هاهي 4 شهور وهي فالحبس ، ومرتاح بحال الى ماخصو خير ..

- قاطعهم الباب لي تحل ، دخلات بعجاجتها ..

- سندس (باللهفة) :

متݣولوش ليا جات ؟

- معزوزة ( بحنان ) :

لا ابنتي مزال ، جابك الله بحال الميمون ... أجي مسدي ليا رجليا راه ضروني هوما وراسي ، مك لسانها فيه ميترو بحال لبوية الله يستر ، مكتصيبش تسكت ..

- سندس (كضحك شافت فسعاد لي سلمات أمرها لله ورجعات للكوزينة ) :

واخا أمي ، انا أنشرب ونجي .. دخلات الكوزينة تابعة سعاد ..

- سندس (غمزات ختها بمعنى شنو كاين ) :

عاشورا (صفاء) :

با حاط الدار للبيع شي شهر دابا ، وراه وقيلة لقا شاري وانرحلو ..

- سندس (خرجات عينيها ) :

اويلي ، ماما واش بصح هادشي ؟

- سعاد (معصبة) :

وراه سمعتيها ، بحال الى انا ماعندي شوار فهاد الدار ... شفتي داك باك ، اخفت نخليكم يتامى أما ندخل عليه الحبس ، مكاين ݣدو لي مزعمكم فدوك المصايب لي كديرو ، هاد المرة حكمو على ختك ب 4 شهور ، المرة جايا واحد 10 سنين يلاه يبرد ..

- صفاء :

الله يستر أماما ماحنا على فالك ..

- سعاد :

دابا تشوفي ، ودابا تكولي مك ݣالتها ، هي حمقة وهو مزعمها ومزعمكم كاملين ، وانا مقاداش ندوي ..

- سندس (شافت فساعتها الإلكترونية لي فيديها ) :

مزال ساعتين ..

- سعاد (تنهدات تنهيدة طويلة) :

سيري شوفي جداك واجي عاونينا ، باش يلاه نساليو فالوقت ..

- سندس (باستها ) :

واخا ..

_____________________________

- من داخل غرف سجن عكاشة بمدينة الدار البيضاء ، ݣالسة على البياص لي 4 شهور وهي كتنعس فيه ... حاطة ساكها وساهية ، هزات عينيها فضو دالشمس لي داخل من السرجم الصغير ، خلا لون بشرتها الأبيض يبان ، ... لابسة سروال دجين سبرديلة ، مع تيشورت وتجاكيط ، شعرها لونو كان خليط بين أصفر وبرتقالي ، بحال الى كان مصبوغ وصباغة بدات طير منو .. تحل الباب ديال الشومبر ، ودخلات منو بنت على وجها إبتسامة عريضة ، شعرها طويل وزعر عينين كبار مشفرين لونهم بحال فصل الربيع فخضوريتو ، وضعيفة بحالها بحال صاحبتها ..

- أمضرا ساليتي ..

- (ݣلسات حداها ) :

ساليت ، بقا لينا ساعتين ونكرازيو من هاد القنت ..

- (ضحكات) وصراحة بقاو فيا صحاباتنا ، ولكن مرة مرة انرجع نطل عليهم ، ماينسى العشرة اولد الحرام ..

- سكتات ساهية وهزات فيها راسها ، لقاتها حاضياها كتشوفيها ..

- مانسيتش ، عارفاها واحلة ليك فقراجتك ... واعدتك يبقا لينا ساعتين نخرجو من الحبيبيس ، انعاود ليك شنو دخلني لهنا ، أصبري على خبزك اسكينة طيب ، لي كيزرب كيجيبها أفعضامو أحوباي (غمزاتها ) ..

- سكينة (ضحكات ) :

فضولية بلا قياس وعارفاني ، وداكشي لي خلاني ندوز 5 شهور دالحبس هنا ، دابا بلا كترت تجباد فلاستيك عاودي ليا ، نص ساعة دازت وبقات ساعة ونص ونخرجو أنا وياك من هنا ...

- واخا يلالة ، واخا قصتي طويلة ... ومزال غادي تزيد طوال حيت مزال مسالاتش ، ولكن نعاود ليك باش نرضي داك الدري الصغير لي عندك لي سميتو الفضول ، الالة ..

- سكينة (قاطعاتها) :

قبل متبداي ، عندي واحد سؤال ضارني فراسي ، وكنمشي حتى نبغي نسولك وكنسى ..

- سولي سربي راه دقايق معدودة ابيبي ، والوقت مكايتسناناش ..

- سكينة :

سيمانة لي فاتت فاش كنا فساحة ، وريتيني تصويرتك مع خواتاتك ومك وباك ولكن ..

- (ضحكات مقاطعاها ) :

علاش انا ليمونية بحال شي مندلينة ، وهوما لا ياك ؟ والله العظيم كون بقيتي ساكتة ، انعرفك مكايناش ..

- سكينة (بشك ) :

كيفاش بلان هاد اللعبة ؟

- (جمعات الضحكة كدور فعينيها ببرود) :

ساهلة ماهلة ، حيت ماما سعاد ماشي هي لي ولداتني ، فهمتي البلان بحالاش داير ، الواليد فاش كان مزال زاز لوز ، كان طيح واحد الݣاورية هولندية فالحب ديالو ، كيفاش طاحت فيه مسكينة الله أعلم هههه ، وتزوج بيها وحملات بيا ... ونهار ولداتني دا مول الأمانة أمانتو ، داكشي باش كيعيطو ليا الهولندية ..

المهم خلاتني تربية فيديه ، إيوا ناضت مو لي هي جدة معزوزة المعيزيزة ، زوجات ليه سعاد بنت جيرانهم كانت صغيرة عندها شي 18 عام الواليد كان فايتها ب 10 سنين ، وهي لي رباتني حطني فيديها وأنا عندي 10 شهور وهي صغيرة مسكينة مفايت عليها والو ، ومن ورا زواجها بعامين ولدات سندس ، وراها ب 3 سنين ولدات عاشورا لي هي صفاء فهمتي البلان دابا ؟

- سكينة (كتخمم) :

وانا كنݣول ، هوما الصراحة بيضات ازعورية لي مطلعوش لمهم ، دابا سعاد شحال فعمرها حيت كتبان ليا صغيرة ..

- وايييه ، ماما سعاد فعمرها 46 ولكن مكايبانش عليها داك العمر ، ومع قصيرة كاع هههه تكولي يلاه فتلاتينات ، با طيح مي زينة زاز لوز ، وطيح سعاد فنة شهوة منها ... كيضبر اعلى الفن (كضحك) حتى خالي دريس خو ماما سعاد زعر وعينيه خضرين ، اشمس لي شوطاتو ... ولكن راه واخا هكاك سندس كتدي ليا ملاحظتيهاش ؟؟

- سكينة :

واياااه كتدي ليك فالبيوضة ولكن المباقي لا ؟

- اه حيتاش فاش كانت كتوحم ماما سعاد كظل حاضياني ، اشعر لي مكنتشابهوش فيه اما البياض وحتى العينين شوية قراب ..

- اه سندس عويناتها ماعسليين ماخضرين ، ولكن أنت لا عينيك لونهم فشكل ، متعرفيهم واش خضرين ولا لوزيين عرفتي لون ديالهم شنو كيتسمى؟

- لا ؟

- سكينة : بندقي ، لونهم متميز وكيكون الأكثرية عند لي لون شعرهم بحالك .. المهم دابا عاوديلي ، شنو لي دخلك لهنا ؟

- أنا انݣوليك الالة ... زربانة أبشوية عليك راه بالمهل كيتكال بودنجال .. هزات راسها فسرجم ورجعات بيها داكرتها قبل ماتشد بشهر ..

___________________

- شارع محمد الخامس ، وقفات پيكوپ قدام واحد العمارة ، نزل منها شخص يكون فأواسط الأربعينات ، طويل وغليض ، لابس سروال توب فالقهوي مع شوميز غوز باردة ... جامع غوباشتو وكيلعب فموسطاجو ويدور فعينيه ، بحال الى خايف من شيحاجة ،. مبان ليه حتى واحد غافل على الظل لي مراقبو كيصور فيه ... حدر راسو ودخل للعمارة لي قبالتو ... بقا تما مدة ساعتين وخرج كيقاد فحوايجو ، الغوباشة لي على وجهو تمحات وفالبلاصة ترسمات إبتسامة عريضة كتبين فرحتوو، يلاه حل الباب باش يطلع لطوموبيلتو ... حبس فاش بانت ليه جايا كتعوج فالجلابة لي لاصقة عليها ، كتبين المفاتن ديالها ، بنت تكون فالعشرينات من عمرها ، شعرها كحل ورطب طويل ، حجبانها رقاق ... ظفار يديها طوال ، وقفات عليه خاشية راسها عند ودنيه ... مع بعدات وقف جابد بزطامو من الجيب ، مخرج منهم الفلوس مادهم ليها ، ضحكات ورجعات كتعوج حتى دخلات للعمارة ، هز راسو شاف فسراجم وركب فطوموبيلتو مديماري ... مخلي وراه عدسات الكاميرا لي صورات كولشي ... قطعات الشانطي هازة الكاميرا دايراها فعنقها ، لابسة جلابة قديمة مع شال ، حبسات عند البوطو كيبان ليها تريپورطور جاي ، وقف طلعات وراه ، لابس جلابة وداير الرزة ... غير هي ركبات ديمارا بزربة وزاد ..

- وقف التريپورطور قدام واحد الݣاراج ، نزل وفتح الباب ودخل تابعاه هي من اللور ... أول حاجة دارت جرات الكرسي ترتاح مخلياه كيسد باب الݣراج عليهم ..

- ناري سخسخنا ولد الهم ، ساعتين ديال المݣانة وانا كنتسنى فيه ينزل ... الليلة مغنعسش براس ، (الحس مقطوع) ... ضارت كيبان ليها علق الكاشكول ، جا حتى لقدامها وزول ديك الجلابة علقها ، مع زول الرزة تطلق شعر ماصفر ما أحمر ناري ، عينين بندقيتين عليهم نظرات رضا وراحة ، وإبتسامة ماكرة ..

- ماعليكش أصفصف هاد المرة خدمتك ناضية ..

- صفاء :

وعلاش انا فين عمر خدمتي مكانت ناضية ، حنا عسكر ولا زمر ..

- ( ضحكات) :

لا حنا بنات عباس هههه ، حطات رجليها على الطبلة مستمتعة ..

- كنشم ريحة الفلوس من هنا ، واحد الݣاط عيني عليه من شحال هادي ، غدا نشري بوه ..

- صفاء (غوبشات ) :

ماما مابقاش عاجبها الحال ، لبارح نوضاتها سباط هي وبا ..

- ( غوبشات) :

نفس البلان عاوتاني ، وناري واش هاد سعاد مكتقاداش ..

- صفاء :

ماشي بلان مكتقاداش ، الى جينا نفكرو مزيان راه من حقها ، راه كنريسكيو بريوسنا أصاحبتي ، راه بين ليلة ونهار يقرقبو علينا ..

- ( وقفات دايرة يديها فجياب سروال دالكيطمة لي كانت لابسة ) :

الى فرضنا قرقبو علينا ، انا لي انمشي فيها اتهناو ... مالي مريضة نخلي خواتاتي يضربو الحبس حتى منكونش انا هي الهولندية ...

- صفاء (وقفات وراها ) :

واش من نيتك ، حنا كلنا فهاد المعماعة ، الى انتشدو راه انتشدو كاملين .. مغنمسحوش فيك كولشي وتمشي فرجلين احيت زعمة ، انت هي ختنا الكبيرة ..

- (ضارت بشوية كطلعها وتنزلها ) :

تحل ليك الفم البزقولة وحتى انت وليتي دوي ، والله العظيم ويجي نهار ، ونتشد فيه وتبغي دوي ولا تنطقي بحرف واحد ، لي نديرو ليك اودي أعاشورا عمرك تنسايه أختي ..

- صفاء (غوبشات ) :

هاد السمية بلاش اعباد الله ، صافي غادي نسكت قسما بالله لا مزال نطقت .. ولكن حتى لإيمتا أصاحبتي ، راه منين كانت عندك 20 عام وانت كديري فهادشي ، وهانتي وصلتي ل 28 ومزال مكملة فيه ، واش باغية تبقاي حياتك كامل فيه ؟

- (نهضات فيها ) :

اه غادي نبقى فيه ، مدام الالة فيه الفلوس ، وكناكلو منو طرف دالخبز انبقا فيه ، تي مالنا بسلامة ياكما كنسرقو رزق عباد الله ، ازيري معايا ابنت سعاد ، مكنديرو والو حنا كنجيبو أخبيرات ديال الرجال لي كيخونو عيالاتهم ، وكنفيقوهم من الݣلبة باش تعرف راجلها شنو كيدير من ورا ظهرها ، كنجيبو ليها دليل وناخدو الپاي ديالنا وسالينا الهضرة ، ودابا خليني نمشي نشوف مرات سيهم رشيد ، نعطيها التصاور وناخود الباقي دالفلوس نتلاقاو فدار ، خلات صفاء واقفة متبعاها بالعين حتى مشات ..

- مرات رشيد (كتفرج فتصاور والڤيديو باغية تحماق ، كتحلف عليه وتقول متحلفات ) :

ناااااري على ولد الحرااام ، انا كنݣوليه بغيت نمشي غير الحمام ، كيݣوليا مدخلت اليوم والو ، بغيت ربي يدخل فعينو مسمار حامي ، وهاد الخانزة ݣالس يخسر عليها فالفلوس ، ومسكنها فپارطما كيدايرة ، وانا سقف دالكوزينة مابغاش يقادو ..

- الفيلم راهو عندك الى بغيتي تخرجي تصاور ، انا خدمتي راني درتها دابا عطيني أكمالة فلوسي نمشي بحالي اختي نعيمة ..

- نعيمة (الغصة واحلة ليها فحلقها ) :

واخا أختي ، لهلا يخطيك شكرا بزاااف (جبدات واحد جوا مداتو ليها ، دارتو فجيبها يلاه اتدور تمشي بحالها ورجعات شافت فيها ) :

ماشي من عادتي نصح كلياناتي ، حيت انا ماشي هي نسيمة الحر ... كندخل لخدمتي كنديرها ناخود الباي ديالي الله يعاون ، ولكن بغيت نكوليك واحد زوج كلمات ديري بيهم ، انت اختي نعيمة لي طيحتي الذل على راسك نجيك من الأخر ، شفتي لي كتدي الراجل بزز من دارهم وتحداهم ، وتعصا والديها لي بغاو ليها الخير ... هكا كيكون الأخر ديالها ، داخلت عليك أبوجه الله ، هداك فورمة السداري ، متعرفي حنوكو من حلحولو ... يبغيوه الناس ، فيك لادويد عرفتي شنو هي ، هي دودة القز لا دودة القز زوينة ، دودة لي عندها 44 رجل هي لي فيك ، خليتي داركم دار العز ... وسمحتي فقرايتك وتزوجتي بهاد فورمة اورونجينا ، ݣزار ومغدي بلفت ، كنتي على مزيناتك ..

- شوفي دابا كي وليتي ، وهاهو ولا كيعرف وحدة متوصلك حتى فزطمة درجليك ، سيري ديري حل لراسك قبل لا تولدي معاه الولاد ، بسلامة ..

- نعيمة (بإستغراب) :

اديك الهولندية بلاتي ، باش عرفتي انت هادشي ..

- (ضارت عندها كضحك) :

انا قبل مندخل فشي بريكول ، حتى كنعرف أصل بات مت الكليان ، باش نعرف راسي معامن ... وخليت ليك الراحة ، عطاتها بظهر ركبات فتريپورطور ديالها وشدات الطريق للدار ..

_______________________

- بلاصات التيرپورتور ديالها قدام باب الدار ، هزات المقدية لي تقدات وبدات كتعيط :

سندس وااا سندس .. تحل الباب وخرجات بكيطمة فالكحل فيها لوݣو ديال الرجاء ..

- أجي عاونيني هادشي راه تقيل ، هزات معاها المقدية ودخلوها لدار ..

- عباس ( مبسم ، رجل منزلها ورجل جامعها شاد تيليكوموند فيدو ) :

على سلامتك أسبع ديالي ، تعطلتي اليوم ..

- ( ݣلسات كترتاح وكتحيد فسبرديلة ديالها ) :

اليوم كانت الخدمة شوية قاصحة ، دزت ديت الكليانة داكشي ديالها ، إيوا دزت عند مول جملة خلصتو فسلعتو ، وتقديت وهاني جيت ... ( جبدات واحد البركة ومداتها ليه ) هاك أبا حبيبي ، اكون ليا فرحان وزاز لوز ..

- عباس (كيضحك ) :

كنݣوليهم أنت سبيعة ديالي مكيتيقوش بيا ..

- خرجات من الكوزينة هازة طاجين فيديها ، حطاتو على طبلة كتخنزر فيه ، مكدويش معاه صايمة ليه الهضرة ..

- سعاد :

الزين كيحشم على زينو والخايب غير الى هداه الله ..

- جاتها من اللور عنقاتها وجراتها للكوزينة :

مال الشكلاط مقلق ، مالك معاه تاني ؟

سعاد (شدات حنكها ) :

باااك كتافو بردو من جهة الخدمة ، فبلاصة مايعري على كتافو ويخدم على بناتو ، مسيفطهم للغراق بيديه وكيتفرج ..

- الواليدة سمعي .. (خنزرات فيها سعاد وهي ضحك) مااااماااا ، سمعي با راه ماشي هو لي مسيفطنا لهاد الخدمة ، راه حنا لي بغينا ، وداخلت عليك بوجه الله واش كاين غيرها ، نݣولو سندس قرات وعندها الماستر ... ونݣولو صفاء قرات وحتى هي إجازة فالقانون ، إيوا وهاد البنت لي قدامك لي شدات الباك وݣلسات تركنات ، مال هاد جوجات مالقاو خدمة واعرة ، بقا غير انا لي عندي الباك ، ها سندس كونما الحانوت دالحاج كوراه ݣالسة ، ومزال معاوناني فخدمتي ..

- سعاد (كتسمع ليها وساكتة حتى كملات ) :

وااا بنتي يهديك الله ، راني خايفة لا شي نهار شي واحد فدوك الرجال يسيفط ليك البوليس يقرقبو عليك ، راه تمشي فرجلين خدامة خدمة ماتصلاحش اعباد الله ، راه البوليس والقانون مامعاهش اللعب ، ونصدقو لا تيتي لا حب الملوك ..

- (باست ليها راسها ) :

متخافيش على بنتك ، فران وقاد بحومة ، (ضحكات بغنج) زعمة راني الهولاندية بنت سعاد ..

- سعاد (ضحكاتها ، جراتها وعنقاتها ) :

يااااربي يوقف معاك ، ويلقي ليك ولاد الحلال فطريقك ابنتي يا مسيرة ، الله يسهل عليك ياربي ..

- مسيرة (تبسمات ) :

أميييين ياربي ... جاتهم صفاء من اللور مقاطعاهم كتخنزر :

ياك بابا ݣاليكم ماتبقاوش تعيطو ليها بسميتها ، باش حتى واحد مايعرف عليها شيحاجة ..

- مسيرة (كتشوف فيها بإستهزاء) :

تبارك الله على لالة الفاهمة ، ݣالها فاش يكون البراني معانا ماشي غير بيناتنا ، عندك العرق ديال الفهامة مبوشي يمكن ..

- جداهم كتعيط من المراح :

واش حطيتو هاد الطاجين تاكلو الطبلة ، وراه هلكنا الجوع ..

- سعاد (شدات راسها ) :

هاهي بدات تاني ، زيدو ماقدة على نݣيرها ... خرجو من الكوزينة تجمعو كاملين على الطبلة كيتعشاو ..

- سندس :

ماما ، داك لونسومبل ديالي الكحل ، واش كاين فالمصبانة ؟

- سعاد (كتأشر لصفاء ) :

راها سوليها ، راه هي اخر وحدة كانت لابساه .. خنزرات فيها سندس ... هزات العين فباها وسكتات ..

- عباس (كيشوف فيهم مصغر عينيه ) ؛

شنو مالف كنݣوليكم ؟

- سندس (كتنزل فدغمة بزز ، بغات امنين دوز لصفاء) :

منين نكونو مجموعين على الطبلة وكناكلو ، نسكتو ومندويوش باش نعرفو الماكلة منين كدوز ..

- عباس :

حسن جدا ، هاد المرة دازت ... المرة جايا أبنتي اتلقاي راسك كدوزي النشرة الجوية وسط التلفازة ... وانت اعاشورا ابنتي ، ديك الخفة الزايدة لي فيك انقطع جد بوها من جدر ، إلى ماتفرقتيش على حوايج خواتاتك ..

- من بعد كلامو كولشي سقل من غير مو ..

- ديك البنت راه انا لي مقيداها فالحالة المدنية ماشيش أنت ، سميتها صفاء ماشي عاشورا ، ماشي أنت هبيل تعقد ليا البنت ، أوحدة سميتيها مسيرة حيت كنتي فالمسيرة الخضرة ، جيتيني براسك فيه كل ݣملة ݣدها ݣد ديناصور ، وحالف حتى نهار تزوج تولد تسمي بنتك مسيرة ...

- وهاد البنت مسكينة حݣرتي عليها ، حيت صغيرة أحيت تزادت نهار عاشورة ، جاب الله سندس سلكات منك ..

- عباس (مكيتفنفنش مع مو) :

والواليدة الله يهديك ، راه مزيان تسمي ولادك سميات مضايرنش ..

- معزوزة (قاطعاتو ) :

سميات مضايرينش مسمي ليا هنا نانسي وهيفا ، وحدة مسميها على المسيرة كون اتزادت فيها نكولو هانية بعدا ، او وحدة مسميها على نهار دعاشورة ، جاب الله سبقتك وقيدتها بصفاء ، واش انكوليك انت هبيل طالع لباك الله يرحمو ويسمح ليا منو ، تريكة الحمقين ..

- صفاء عجبها الحال ، أما هو مزادش كلمة وحدة مع مو ... حيت الى زاد حرف واحد اتخشي ليه راسو فوسط الطاجين .. سلاو العشا ..

- مسيرة : أنا عيييت هاد النهار ، أنمشي النعس تصبحو على خير ..

- الكل : تلقاي الخير أبنتي ، ناضت غسلات يديها وحكات سنانها ، مشااات نيشان لبيتها بدلات عليها وتلاحت على سداري ديالها ..

- قبل متنعس هزات تيليفونها دخلات لواتساب ، مشات نيشان لواحد النمرة خاصة ... لقاتو مداخلش من الصباح .. خلات ليه ميساج :

" كيفاش بلانك انت زعمة مامالفاش ليك لا ميساج ، لا والو ... مالف كتعيط ليا شنو واقع ، الى قريتي ميساجي بلاما تسوني تبرزط ليا راسي ... غادي نكون كناكل الشوا فمولاي بو سلهام فأحلامي ، تصبح على خير" ..

- سدات تيليفونها وحطاتو حداها ، جرات عليها الغطا ، دغية داها النعاس بكترة العيا ..

- (فبيت النعاس) ݣالسة فوق الكرسي .. كدهن يديها بواحد الكريم ، مكتشوفش جيهتو منخلاه ..

- عباس (حاضيها ) :

واش أتبقاي هازة عليا زنافرك لسما ..؟

- سعاد (ضارت خنزرات فيه) :

ياكما نوض نضرب ليك طارطاويت فالبيت ، ولا نلعب ليك مع حمادشة ..

- عباس :

وسييييري حمادشة اعرفي ليهم ، انت غير تسخرتي لسويقة وجيتي ، كتبداي تشكاي أميمتي رجلي اميمتي ظهري ..

- سعاد (مصغرة عينيها ، كطرطق ليه المرارة ) :

بغييييت وغزييييت ، هاااكا عاجبني راسي وعاجباني حالتي ، ݣاليك الشبكة كتعيب الغربال وكتݣوليها يا مو عيون كبار ، اشوف أراسك ودوي معايا أنايا .. بنادم دايرها يغرق فيها جمل ، ومزال كيدوي ..

- عباس :

دابا مابغيتيش تنعلي شيطان ، وديري الما منين يدوز عرفتي أشويطينة ، اندوز لقيسارية الشاوية ناخود ليك داك الثوب لي حامقة عليه .. ابقاي ليا على خاطرك..

- سعاد (وقفات مبسمة وجات حداه ، دخلات فالفراش وكتسبليه فعويناتها ، شوية جمعات الضحكة ) :

كون كانو من عرق كتافك اسبع ، كون قبلت بيه ... ولكن باش تسيفط ليا بناتي يردمو عليك ، هداك الثوب شريه وديرو حايك وخرج بيه ، تصبح على بوغطاط ..

- عطاتو بظهر وغمضات عينيها ، بقا شحال كيشوف فيها ، مد يدو طفا الضو وضار لجهة لوخرا نعس ..

_________________________

- فالببيت لاخور ، جمعات شعرها سفنجة فالمقدمة ديال راسها ، بحال عاتها فكل ليلة ... لابسة شورط وتيشورت ديالها ... مكتقدش تنعس ببزاف ديال الحوايج سوا كان برد او صيف ..

- تحل الباب ودخلات صفاء ... هازة فيديها اللبسة ديال سندس الكحلة ..

- صفاء (حادرة راسها حشمانة منها ) :

غير سمحيليا وصافي ، لبارح كان خاصني نمشي لعندك داك نوطير لي عاودت ليك عليه ، ومكانش عندي منلبس .. بان ليا فسطح وهزيتو ..

- سندس ( ݣلسات على نموسية ديالها كدير فواحد لكريم ليديها ) :

تشاوري اصفاء ، مكنحملش لي يهز ليا حوايجي بلاما يتشاور ، كنݣولها ليك 20 ألف مرة ، بغيتي شيحاجة مغاديش نݣلعها ليك ، ولكن تشاوري معايا .. خلينا من هادشي اشنو درتي معاه مزال ؟

- صفاء ( تكات فبلاصتها ) :

سطاجير واحد شهر ، وعاد ديك ساع نترسم معاه .. ناري ياختي كان عندو واحد خونا كيحمق بزين ، شفتو لطاسيلتك تلفني ، دومااااج ياختي كون اعرفت سميتو ولا كنيتو نقلب عليه فأنستغرام ولا الفيسبوك ..

- سندس ( كطلعها وتنزلها ) :

ديري حل ، سيري لكوميسارية وعطيهم الموصفات ديالو يرسموه ليك ، ومنين تعرفي عليه يجبدو ليك المعلومات ديالو ، نعسي نعسي خاصك ازعطة ..

- صفاء ( كتشوف فيها بنص عين ) :

كطنزي عليا اسندس ياك ؟

- سندس ( جرات عليها الغطا غطات بيه نصها ) :

كنفيقك من الݣلبة ، طفي داك الضو ودوزي تنعسي ، راه خاصني نكون فالمحال مع 9 ..

- صفاء (طفات الضو) :

تصبحي على خير ..

- سندس (غمضات عينيها ) :

وأنت من أهلو ..

- ‏وأكثر ما يعين المرء على تقبل مكان ما ، هي الرفقة الموجودة فيه ، لا أعرف مكانا اوحش من بقعة جغرافية خالية من الأحبة ، ولا أعرف مكانا أكثر ألفة من وجودهم معك .

- فاقت الصباح بكري بحال كل نهار ، هي اول وحدة كتفيق فيهم ... لبسات كيطمة فالݣري مع سبرديلة ، جمعات شعرها على شكل ديل حصان ... حطات سكادو ديالها موجداه ، ودخلات الكوزينة مجات فين تكمل الفطور حتى فاقت جداها ..

- دير ليا ابنتي الما يطيب لوضو الله يرضي عليك ..

- مسيرة ( كتحط الفطور فوق الطبلة) :

درتو امي اتهناي ، راه سطيلة عمرتها ليك راها فالطواليط .. توضاي واجي ندݣ ليك لانسولين ، باش تفطري نخرج لخدمتي ..

- معزوزة ( كتشوف فيها) :

اشمن خدمة فيهم ابنتي ؟

- مسيرة ( كضحك) :

لا امي ماشي لخدمة لي فراسك ، انخرج لخدمتي الثانية ، لبارح جبت السلعة جديدة ، واليوم الجمعة الناس دايرين كسكسو ، غادي تمشي كلها ..

- معزوزة ( كتلبس صندالتها دالميكة وكتهز كمايمها ) :

يودي كون ابقيتي افهاد البيع وشرا دالخضرة ، ولا ديك الخدمة زينة نايحة ..

- مسيرة ( مامسوقاش لديك الهضرة كتغمس فزيت العود وتاكل ) :

مي سيري توضاي خلاص راه خاصني نمشي ..

- معزوزة : بحالك بحال باك تريكة وحدة الله يستر .. هزات فيها راسها وكملات فطورها ... حتى قاطعها سونيت ديال التيليفون ، هزات تيليفون دخلات لقاتو جاوبها فأوديو :

- صباح النور الزين ديالي ، غير سمحيليا عارف راسي زبلتها معاك ، ولكن راه خرج ليا واحد البلان وكان ضروري خاصني نسافر ، والمشكل مغانرجعش دابا عندي واحد الشهر ..

- حيدات التيليفون على ودنيها وجاوباتو كتابي :

وعلاش ماعلمتينيش قبل ؟ شنو هو هاد البلان لب ايخليك تغبر شهر ياكما هارب من البوليس، ياكما أصݣع وليتي كتاجر فالممنوعات ، انا بعدا جات عليا الى وليت كندير هاد البلان اما انت مكاين لاش ..

- (جاها الرد منو ) :

حتى نكون انا هو انت ، عندي بلان برات المغرب ، حتى نرجع ازين ديالي ونهضرو ... يلاه خليني نعس راني يلاه واصل بغيت انرتاح ..

- مسيرة (جاوباتو بجوج كلمات ) :

إيوا تلاح .. لاحت تيليفونها فسكادو ... خلات ماعن الفطور ، هزات لانسولين عمراتها ، تسنات معزوزة حتى خرجات من الطواليط وكلسات ، عرات ليها كرشها ومسحاتها بپيطادين ، دݣات ليها البرة وحطات ليها تفطر .. هزات السكادو ديالها وسوارت الدار وتريپورتور ..

- مسيرة (تحنات باست راس جداها ) :

أنا مشيت أمي ، دعي معايا ..

- معزوزة (بصوتها الباح ) :

الله يسهل عليك ابنتي ، وينقي طريقك من الشوك ..

- مسيرة (قبل لا ترض الباب وراها ) :

أميييييين يااااربي ... (ركبات فتيربورتور ديالها ديمارات وقبل ماتشد الطريق ) :

ياااا بسم الله ، توكلنا على الله ..

- واقفة فالحومة لي مالفة ديما كتكون فيها ، كتعبر ماطيشة فالميزان ... هزاتها كباتها فالميكة ومداتها لسيدة لي كانت واقفة .. خلاصتها دارت الفلوس فالصكادو الصغير لي معلقاه قدامها ورضات ليها الصرف ..

- الله يعاونك ..

- مسيرة (بإبتسامة ) : أميييين .. دورات راسها كتبان ليها پاطنير ديال البوليس جايا ... متحركات فيها شعرة وحدة ، بقات واقفة عادي .. بلاصات ونزل منها شاب فتلاثينات من عمرو ، لابس سروال دجين قميجة وتجاكيط فالقهوي ، جاي نيشان قاصدها ..

- صباح الخير ..

- مسيرة (هزات فيه راسها ) :

صباح النور ..

- مسيرة ، لاباس عليك هانية ؟

- مسيرة (شافت فيه بعينيها لي ضاربة فيهم الشمس ) :

الحمد لله بيخير أخويا خالد .. ياك لاباس ؟

- خالد (مفيكسي عينيه مع عينيها ) :

مسيرة ، ريحتك عطات هاد الأيام ، داكشي لي كديري فيه راه مامزيانش ... انا كنصحك حيت بنت جيران وعزيزة ، مابغيتش ليك شيحاجة خايبة ..

- مسيرة (مامسوقاش) :

ريحتي عطات ، حوتة خانزة انا ... كيفاش مافهمتش جيني نيشان أخالد ..

- خالد (بحزم وجدية) :

مكنضحكش ، راه فخباري شنو كديري ... فخباري كتشدي الفلوس من العيالات وكتبعي ليهم رجالتهم ، وتصوريهم وهادشي راه كيعاقب عليه القانون ، كيتسمى كتجسسي على حياة الناس ... واش بغيتي دخلي تݣلاصاي فالحباسات ولا كيفاش بلانك ..

- مسيرة (كتشوف فيه ببرودة ) :

ونيت اخويا خالد الصهد فهاد سطات وشمس ، اللهم نمشيو نتبردو فعكاشة ، وانا نيت شحال هدا ماخديت كونجي ، سمعني اخويا خالد ... انا مكندي رزق بنادم ، مكندير يدي فجيوب الناس ، الحمد لله وشكر لله ... السمعة ديالي سابقاني ، انا كنعاون غير ديك المرة مسكينة ..

لي راميها راجلها فدار وݣالس على لالة ومالي وتقرقيب السطالي ، كنفيقها من الݣلبة باش تعرف باش هي محزمة ، شنو ندير الى ربي سبحانه عاطيني واحد الدكاء او واحد الهيبة من عندو ، خاص نعاون بيها الناس .. ولالا ؟

- خالد (مافهم فيها والو عصباتو ) :

يعني مكتنكريش ؟

- مسيرة (تبسمات هزات عينيها فشمس ورجعات شافت فيه ) :

مكنديرش حاجة خايبة باش نكر ، ولي عندو شيحاجة ضدي يبينها ويبين شطارتو ..

- خالد (تنهد مستسلم ) :

مابغيتش يجي نهار وندق بابكم وانا جاي باش نديك أمسيرة ..

- مسيرة (بدون مبالاة ) :

أتكون كدير غير خدمتك أخويا خالد (وركات على كلمة خويا لي كان فحل مرة قاصدة تكولها ليه ، باش تبين ليه بلي كاع لي كيفكر فيه من جهتها عمرو مغايكون ) ، غير هو نهار لي تجي تبغي تديني ، مابغيت حد يعرف شنو سميتي ، ولا كنيتي ، حيت مابغيت حد ينعت فدارنا ولا ينعت فخواتاتي ... وديك الساع انا غادي نتحمل المسؤولية انت غير تهنا ..

- إيوا شنو بان ليك نجمع ليك خضيرة ، من نوع الرفيع ... خالتي الحاجة اتكون كتسنى فيك تقدا ليه لكسكسو ، يلاه توصل ..

- خالد (حدر راسو ورجع شافيها ) :

الله يعاونك .. عطاها بظهر ورجع لطوموبيل ... ركب ديمارا وقبل مايدور شاف فيها وزاد ..

- شحال خيزو أختي ؟؟

- مسيرة (شافت فالكليانة وتبسمات ) :

هاكي عزلي اختي 3 دراهم مرحبا ..

________________________

- خرجات من دار زربانة ، شعرها مطلوق مبوكلي ، خاصها تكون فالمحال دابا ولكن تعطلات ، خدات طاكسي جاب الله مع شيرات ليه وقف ، ماشي بحال شحال من مرة ، كتشير ليه وكيخليها پلاكة .. وقفات قريبة للمحال نزلات وخلاصتو ، رجع ليها الصرف مع اتهز راسها تكمل طريقها كيبان ليها واقف ..

- سندس (بنفاد صبر ) :

تسليييم بدينا عاوتاني .. كملات طريقها دايرة راسها مشايفاهش حتى وقفها بيدو لي شدات فدراعها ..

- مكاينش صباح الخير ، غادية قالبة وجهك بحال الى انا مكاينش ..

- سندس (وقفات كتخنزر فيه ) :

صباح الخير اخويا زكرياء لاباس عليك هاني ، شنو حب الخاطر ، زربانة خاص نكون حالة قبل لا يجي الحاج ..

- زكرياء :

الواليد مغايجيش دابا غير رتاحي ، علاش لبارح كنسوني ليك مكتجاوبيش ، راه مافعايل ما والو أسندس ..

- سندس :

زكرياء راه دوينا الله يرحم بيها الوالدين خطي ساحتي ، شفتي أنا راه والله منصلاح ليك وقلب عليا الله يرحم جدك أو وبزااف ..

- جات غادية جا قدامها حابس عليها طريق مغوبش :

تي مالكي انت لي كتفرقي الأكسجين ، ياك لاباس كبرت ليك الشان بزااف يحسابليك راسك حاجة ولا ..

- سندس (ولاو فيها جوج ) :

همة وشان ، وتابعني وحامق دوي معايا ومابغيتش ، وخلي عندك شوية ديال النفس ، وعطيني بتيساع ... ولا قسما برب الجليل ، حتى نجمع عليك امة لا إله إلا الله ، ونفرج فيك الغادي وجاي ، وسييييير سول على بنات عباس وعلى عباس ، راه ماعندي منخسر ، وتوصل الحاج أش ݣلتي ؟ ...

- بقا واقف كيخنزر فيها بلاما يدوي خوا ليها الطريق ، ضربات فيه وكملات طريقها للمحال .. حلات ودخلات ، ضربات واحد تشطيبة ومسحة ، وݣلسات تشوف خدمتها ..

- فمكتب ديال نوطير ، واقفة حداه كتسناه يسالي الملفات لي فيدو ويعطيهم ليها .. هز عينو فيها كيطلع فيها ويهبط ..

- فاش ترسمي معانا ، من الأحسن تبدلي هاد الحوايج ... حيت بكل صراحة مايصلاحوش للمكتب ..

- صفاء (كتشوف فيه بإستغراب ، نزلات عينيها لشنو لابسة ، سبرديلة بيضة مع سروال كحل واسع ، وتريكو فالكحل والبيض بالحزام ، ومن للتحت بودي بيض ..

علاش شنو المشكل فحوايجي بضبط اموسيو العموري ..؟

- (بإبتسامة) :

خاصنا نخليو إنطباع زوين عند الكليان ديالنا ، داكشي باش خاص نبداو بلباسنا ولالا ؟

- صفاء (مكرهاتش تمسح ديك الضحكة على وجهو) :

وي بطبيعة الحال ، وشنو نوع الحوايج لي تبغيني نلبس ؟

- امممم (كيطلعها وينزلها) :

ميني جيب مثلا ، حوايج لي يبرزو الجمال ديالك مدموزيل صفاء ..

- صفاء (بإبتسامة ) :

بغيتي تݣول يبينو المفاتن ديالي ولالا ؟

- (غمزها) :

كيعجبوني الناس لي دغية كيفهمو ، الى بغيتي ممكن نسبق ليك شيحاجة باش تقدي تاخدي ليك شي حويجات ... شنو ݣلتي اصفاء ؟

- صفاء (ضحكات بنرڤزة ) :

لا دابا ماسميتيش صفاء ، سميتي عاشورة ... وغاتخرج ليك العيشورية جنية لي ساكناني ، سمع اسي بغيتي منيكة راه عطاهم الله فسوق ... زوقها ولبسها وجيبها خدمها ، وديك جيپة لبسها انت وشطح بيها ، حيت شوية ديال رجلة مافيكش ، نيفك داير بحال شارشابيل ، بغيت ليك دقة جدي لي مشا صغير ماشبعت فيه حتى تعناق ... بغيت ليك الحكة لي ماتبرا ماترصا ... كاليك الجيپة ، شفتي هاد الخدمة ديرها فپاپي جينيك ، وبلاما نݣوليك شنو تمسح بيها ..

- خرجات من عندو معصبة مخلياه مصدوم ماعرفت باش تبلا ، هزات ساكها وقبل لا تخرج شافت فناس لي كانو كيسمع فيها ..

- شفتو هدا اكبر ديوثي على وجه الكرة الارضية ، سيد مزوج وكيتحرش بيا الله ياخود فيه الحق (بدات تبكي وتبوحط بلعاني ، حلات الباب وخرجات ... وقفات فشارع بانو ليها النص من دوك الناس خرجو ... ضحكات بنصر شيرات لطاكسي ، وشدات الطريق لدار ..

- فدار بليل ، مجموعين كاملين كيتفرجو ... حاطين قدامهم الزريعة .. حلات الباب لابسة پانطوفة بلهفة :

طلو طلو ... بنت مي سعدية جاياها الهدية ..

- صفاء (نقزات من فوق السداري ، حلات السرجم كطل) :

فين هو العريس ݣاعما بان ليا ، شفت غير العيالات لي جايين ..

- مسيرة (مامسوقاش ݣاع ، كتفرج ) :

سبحان الله وحدة ، جراو عليها من الخدمة وحلات ليها الفراجة ...

- صفاء (ضارت عندها ) :

سمحيليا بزربة ، أنا لي خرجت منها وبكرامتي ، نوري لبوه تلاويط بشحال كيطلع ..

- معزوزة (مسرحة رجليها ) :

وكون اديتيني ليه أبنيتي ، نفرجك فيه ... نخلي العلماء يحيرو فيه ..

- مسيرة (ضارت عند جداها ) :

منين عرفتي العلماء أمي ؟

- معزوزة :

مالي شفتيني جايا من جبل ولا ، شفتك غالطة فيا لح//مار تاع بوك ..

- داخل عباس من برا .. :

أش دار بوها الواليدة ، ياك لاباس ؟

- معزوزة :

بحالك بحال تريكتك ياربي سلامة ، ماعرفت علاش مطلعوش لعيالاتك ، لا المرحومة لا سعاد زينة وماشرانيياش ..

- سعاد (حطات طبسيل ديال الشعرية ، وكتشوف فعدوزتها باستغراب ، قليل فين كتسمعها كتشكر فيها ) :

لهلا يخطيك عليا أخالتي ، الله يكبر بيك ..

- صفاء (سدات السرجم ) :

تبارك الله دهاز بنت السعدية على مزيناتو ، صبرات وربي كفا ليها .. ماعرفتش واش ايعرضونا ولالا

- معزوزة :

انا بعدا غادية ، واخا مايعرضونيش جداها راه صحيبتي ، مايبقاش فيكم الحال الى ماعرضاتكم ، نجيب لبنياتي نص خبزة فيها دجاج واللحم بالبرقوق .. مسيرة راه تبغي اللحم بالبرقوق .

- مسيرة (بدات الماكلة بلا بيهم) :

والحلوة ديال كاوكاو الى كانت أمي ، عمري نسا خيرك ..

- معزوزة (كتشوف فيها ) :

والله يقلل حياك أبنتي ، تبداي بلا بينا (هزات يديها عطاتها للعنق نيشان ) ..

- مسيرة (قصحاتها ) :

ولا امي لا وحلتيها ليا حرام عليك ..

- معزوزة :

باش تعلمي لحم//ار تاع بوك تاكلي قبل مايتجمعو الناس ..

- مسيرة (رجعات تكمل ماكلتها بدم بااارد ) :

فايقة بكري وخاص نعس بكري ، وشعرية كتقل على المعدة ، (هزات راسها ) سندس ديك القرعة دسنيدة عفاااك ..

- جابت ليها سنيدة دردراتها قدامها وكملات ماكلتها ... كتسمعهم مجمعين وهي ساكتة ، بعد المرات كتكون هضرتها كثيرة متسكتش ، ومرات كتبقى غير ساكتة ، والى كانت ساكتة يا واقعة شي حاجة ولا كتبلاني لشيحاجة ...

_______________________

- داز 15 يوم من اخر عملية دارت ... كان خاصها تبت شوية بينما هدات الأمور والمخزن حيد عينو عليها ، خصوصا الكلام لي ݣاليها خالد ... ماشي خوف منو أبدا ، هي مكتخافش غير من الله لي خلقها ، وباها وجداها الى طلع ليها السكر ، شي حد أخور أبدا ..

- مع 9 ديال الصباح مزال ناعسين حتى سمعو الدقان ... فاقت سعاد كتعكف فراسها :

شكوووون بلاتي أنا جايااااا ... حلات الباب ، كيبان ليها خالد لانسپيكتور لي فحومتهم واقف ، ومعاه جوج بوليس باللبسة ..

- خالد (بجدية) :

لالة سعاد ، كاينة مسيرة ؟

- سعاد (بحال الى خوا عليها سطل ديال الما بارد ) :

لاش بغيتيها ؟ تفتح الباب وخرجات لابسة بيجامة ديال الدار شعرها مشعكك ، حتى وقفات ورا سعاد :

ياك لاباس ؟ شنو كاين ؟ ... ضارت عندها سعاد كتخنزر فيها بعينيها ، بحال الى كتقول ليها علاش خرجتي ؟

- خالد ( بجدية ) :

مسيرة ، خاصك تجي معانا

- مسيرة (ببرودة ) :

وعلاش غادي نجي معاكم ؟ ناض عباس وصفاء وسندس ، كولشي فاق ..

- خالد :

3 ديال الرجال رفعو بيك شكاية ، بتهمة التجسس عليهم ، وتحريض عيالاتهم على الطلاق وتصويرهم بلا علم ديالهم وهادشي كيعاقب عليه القانون ، وانت ديجا منكرتيش بلاما نفكرك ..

- صفاء (يلاه اتدوي ) :

ولكن راه(خنزرات فيها مسيرة سكتاتها ) :

مرحبا ، وهاد الرجال عندهم شي دليل ، باش عرفوني أنا .. أنا من خدمتي لدار ، باطل كبير هدا ..

- خالد :

عيالاتهم لي عتارفو ليهم ، بلي انت لي حرشتيهم وانت لي جبتي ليهم كاع المعلومات على الأزواج ديالهم ، دابا ممكن تمشي معانا بلاما نستعملو القوة عفاك ..

- مسيرة (ضارت عند باها لي واقف مصدوم ، معارف شنو يدير ، قربات من ودنيه وهمسات) :

هاد المرة فكرني نخدم مع الرجال ، اما العيالات المدلولة على ختها .. (رجعات شافت فخالد ) نبدل ونجي ولا تديوني بالبيجامة حسن ؟

- خالد : ماتعطليش ..

- سعاد بدات كضرب ففخاضها وتولول .. :

عباس دير شيحاجة يا بارد الݣلب ، رتاحيتي تهنيتي غرقتيها صافي ، هاهي لبساتها وخرجتو منها انتوما سالمين ، عباس دير شيحاجة هالعار متخليهمش ياخدو ليا بنتي .. (كتبكي) ..

- فاقت معزوزة على غواتهم وكلامهم .. :

توما أش واقع ؟

- سندس (البكية حابساها بزز) :

البوليس امي جايين يديو مسيرة ..

- معزوزة (كتنوح ) :

أويلي ، صافي اعبيبيس رتاحيتي غرقتيها .. وسير الله يغرق ليك الشقف ، وندمت على نهار فاش ولدتك كون غير خرجت عاݣرة ، صافي تهنيتي يالمسخوط ..

- عباس : وا مي وامي ، صافي لا تزيديش على مابيا ..

- قاطعاتهم مسيرة ، لي خرجات من بيتها لابسة سروال دجين ، سبرديلة وقبية .. مع كاسكيطة :

مكاين لاش تنوحو ، سمعوني هالعار ماعنديش الوقت ... حتى واحد فيكم مايدوي ، سولوكم انتوما معارفين والو ... نكرو سندس صفاء ، بلاما تخليوني ندير فيكم شرع يدي ، انتوما مكتعرفو والو سالينا ، شحال كاع انتشد 3 شهور ولا 4 هانية دغية دوز ... (شافت فسعاد لي كتبكي) ماما صافي تهلاي فراسك وتهلاو فبعضياتكم ، راه واحد البركة فالماريو ديالي ..

- تحت التريكو الخضر ، قضيو بيهم صافي راه يقدوكم .. وبلاما تناݣري مع با هو راه مدار والو ... شفتي راه الى مابغيت انا الحاجة راه منديرهاش ، هو عمرو بزز عليا مكنݣولش ليك هكا زعمة كندافع عليه ، كنݣوليك غير لي كاين .. انا مشيت ..

- سعاد (تابعاها من اللور وتبكي ، بغات غير تعنقها ولكن مسيرة كانت خرجات ، مخاصهاش ضعف مابغاتش تشوف دموع فعينين عائلتها ، هادشي دايرة ليه حساب ، كانت عارفة ايجي نهار لي غادي تشد فيه ، طال الزمان ولا قصار ) ... ركبات فالفارݣو اللور ، تحركات الطوموبيل وهي عينيها على مها لي معنقينها بناتها كتبكي ، وجداها ونظرات الإنكسار والضعف لي فعينيه باها ..

_____________________________

#الـحـــاضـر

- سكينة (ساهية) :

بسباب هادشي دخلتي للحبس ، الصراحة قصة فشكل والله ... وهاد العيالات لي داروها بيك ، علاش من الاول كراوك تجسسي على رجالهم منين ايخويو ليهم المزيودة ..؟

- مسيرة (كضحك ) :

الذل ، شفتي لي كتكون شخصيتها ضعيفة وماعندها كرامة ... دغية كيضحك عليها بجوج كلمات وبشي براصلي ديال الذهب ، كتعاود ليه حتى على نهار تزادت ، واخا هي كانت تربية ، حيت ماعندها لين عليه ، وحيت دماغها باغي يتيق كدوبو فهمتي البلان ..

- سكينة (غوبشات ) :

عندك الصح ، هاد الݣنس مكايجيو منهم المشاكل ... الله ياخود فيهم الحق ..

- مسيرة (كتشوف ليها فعينيها) :

مزال كتبغيه ؟

- سكينة (ضارت عندها مصدومة) :

شكون انا لا من نيتك ، بسبابو دوزت 5 شهور فهاد الحبس ، وبغيتيني مزال نبقى نبغيه ، انا مكرهت نخرج ونلقاه ونفدي فيه دقتي ، ونرجع على طواسلو للحبس جمافو .. كنت غادة معاه بنيتي اصاحبتي .. ماخدام ماردام ..

- فلوس الݣارو انا نعطيهم ليه ، نبريكولي والفلوس لي شديت نقسمهم معاه ... فاللخر كنلقاه خاسرهم على وحدة أخرى ، وفاش قطعت معاه ونوضناها والباب لي يجي ليه منو الفلوس تسد ... مشا وبيع بيا ، هاد القلب قطعتو صااافي ، عمر داود مابقى يعاود مزال ..

- قاطعهم الباب لي تحل ، دخلات واحد السيدة رقيقة ، ملامحها مبشورين ، لابسة بدلة رسمية :

مسيرة سكينة الى كنتو واجدين باش تكملو الإجراءات لي باقيين ..

- مسيرة (وقفات هي وسكينة كل وحدة فيهم هزات الساك ديالها ) :

بسلامة ادريات تهلاو فراسكم ، مرة مرة انجي نزوركم إن شاء الله ...

- الله يعاونكم ، واياااكم ترجعو للهنا ..

- سكينة وعنداك تنساينا ... كل وحدة فسجينات كانت كتبارك وتوصي فسكينة ومسيرة ، خرجو من الباب ديال الحديد لي دخلو منو أول مرة ، دازو للإدارة كملو الإجراءات لي بقاو ، ستالمو شي حوايج كانو حيدوهم ليهم نهار دخلو ساعة وسلسلة وشي فلوس كانو ديال سكينة .. نزلو من دروج وحدة كتشوف فالأخرة ، قبل مايوصلو للباب الكبير مسيرة شافت فسكينة :

- ماݣلتيش ليا فين غاتمشي ؟

- سكينة (تبسمات وملامح الحزن باينة على وجها ) :

حتى انت أرض الله واسعة وعريضة ، غادي نقلب كيبان ليا انمشي نيشان للمحطة ، عندي هاد البركة ونركب ، فينما ايوقف نزل معاه ونشوف ..

- مسيرة (سكتات) :

مغاتمشي فين ، غادي تجي معايا ، لي كليناه تاكليه معانا ، الدار واسعة وعريضة ، كانت عندي سندس وصفاء ودابا كاينة حتى انت ، فينما تحطات يد يتحطو عشرة ..

- سكينة (بتردد) :

او والديك ؟

- مسيرة (كضحك) :

ويليييي ، عباس وسعاد والله متلقاي معاهم مشكيل ، بالعكش شفتي دارنا ، الناس داخلين خارجين ، شفتي ايكون القلب صافي حليب والهنا وراحة البال ، كولشي يفوت ، ومرحبا بيك فعائلة عباس وبناتو ..

- سكينة (كضحك رتاحت نسبيا ) ... تحل الباب ديال الحبس ، وخرجو وقفو كيشوفو فسما وكيشمو الهوا ، الحرية شيحاجة لي هي كبيرة بزاااف ، ومايعرف بحقها غير لي كان مسجون ..

- مسيرة (شافت قدامها كيبان ليها واقف ، كيشوف فيها مبسم ، تبسمات وغمزاتو ، حرك راسو يمين وشمال بإستسلام وجا لعندها ، وقف قدامها ونطق) :

على سلامتك ا لهولاندية (عنقها بجهد و هازها لعندو ) ..

- بعدات عليه شوية ، كطلعو وتنزلو ... غوبشات وتبسمات :

مزال مابغيتيش تحيد داك الݣارو ، شوف قنانفك كيف ولاو زرݣين ، ياودي يا ودي على الطبيب ديال القلب والشرايين ..

- واشتي مكتساليش ، نفس ديسك شتك ماعرفتيناش (كيأشر لسكينة) ..

- مسيرة (جرات سكينة من يدها ) :

سكينة هدا خويا وصاحبي وعشرة عمري كريم ، مسيرة ماتسوى والو بلا كريم وكريم مايسوا والو بلا مسيرة ولالا ؟(شافت فيه) ..

- كريم (كيضحك ماد يدو لسكينة) :

كاااينة ،(مد ليها يدو) مشرفين أختي ..

- سكينة (رضات ليه الإبتسامة ) :

الشرف ليا .. انا سكينة ..

- مسيرة : سكينة صاحبتي ، تعاشرنا فاش كنا كندوزو لاڤاكونص فإيطالي ، (تكرشخات بضحك) .. وغادي تبقى معايا ..

- كريم :

ناااري دخلتيها للعصابة ديالك ، دغية دغية العفوووو ..

- مسيرة (بتبات وهدوء) :

شنو بان ليك ؟

- كريم (عنقها من كتفها جارها لجهة الطوموبيل .. فتح الباب ركبات وسد وراها .. سكينة تبعاتهم حلات الباب اللوراني وركبات ..

- كريم (طلع دار السمطة وقبل مايديماري ) :

شاف فمسيرة بجدية ) شنو ناوية ديري من بعد هادشي لي وقع ؟

- مسيرة (ظهرو ملامح الجدية على وجها ، سكتات من بعد ثانية شافت فيه وتبسمات ) :

لي دارها ربي هي لي غاتكون ، نوصلو ويحن الله ..

- كريم (غوبش) :

علاش ناوية الهولندية ، كتخلعيني ؟

- مسيرة (ضحكات ، هزات رجليها وحطاتهم قدامها مامسوقاش ) :

نهضرو فهادشي من بعد ، حيت الى قلتو ليك دابا غير غادي نسد ليك الشهية على السوݣان ..

- كريم (بنظرات خبيثة) :

حتى حاجة مكاتسد ليا الشهية ، انا معاك عالقرص ..

- مسيرة (تبسمات) :

وديماري ديماري انباتو هنا ... مدات يديها وخدمات الموسيقى على جهدها كتشطح ، فرحانة بخروجها وبلي أخيرا أتكون مع عائلتها ..

____________________________

فالعشية ، فڤيلا الإبراهيمي ، واقفة قدام المرايا ... كتشوف فراسها وتجاعيد لي على وجها ، عينيها وشعرها لي كلو شيب من غير الصبايغ لي كدير ، هوما لي كيغطيوه ... كانت لابسة فراشة فالغوز منبتة بالحجر ، مع صندالة ميني طالون ، صباع يديها كيزينهم خاتم الزواج لي كانت لابسة هادي 35 عام ... حسات بلمسات يديه على كتافها ، تنهدات تنهيدة طويلة وعطاتو إبتسامة من المرايا .. :

اليوم عيد زواجنا 37 ... الأيام دغية كتجري ياك ؟

- جواد (تنهد تنهيدة طويلة ، حط الدقن ديالو على كتافها ، السينين بدلاتو واخا كبر مزال بنفس الوسامة ورجولة ، شعرو بيض ولحيتو بيضة والإبتسامة المعهودة الفتانة من غير البحة لي ضافة لصوتو زادتو رجولة على رجولتو) :

إلى أنا كبرت ، أنت كتبقاي ديما الوردة لي تحطات عليها عيني أول مرة ..

- ماريا (ضارت بين يديه والإبتسامة على وجها) :

كتعتارف بلي سرقت ليك قلبك اول مرة شفتيني ؟

- جواد (زاد زيرها بين يديه ونطق ، على جنب فمو إبتءامة صغيرة )) :

علاش فين عمري نكرت (كيدوز بعينيه على وجها ، عينيها وشفايفها ) ..

- نزلات عينيها وحناكها توردو بحال ديما ، مزال لحد الآن الى تغزل فيها كتحشم ..

- جواد (غمزها ) :

حاجة وحدة لي تبدلات ، ݣاع تشيطين لي كان فيك رجع حشمة ..

- ماريا (تملصات من يديه وهربات لجعة الباب ) :

الضيوف وصلو مكاين لاش نخليوهم كيتسناو .. حلات الباب وخرجات ... نازلة مع الدروج وهو تابعها ، الموسيقى بدات كتوصل لمسامع ديالهم وصوت الضحكات ديال الضيوف .. الكل كان مجموع ، الأصدقاء والأحباب والعائلة والمعارف لي من بعيد ...

خلقنا مخـتلفين لنتكـامل ، فيحـتوي الحنون الغاضـب ، ويساعد الهـادئ المـتسرع ، ويُطفئ المتفائل لهـيب اليائـس !

____________________

- الجردة كانت مزينة بزينة بسيطة على دوق ماريا ، مكانش عندها مع الزواق بزاااف ، المهم هو تحون العائلة مجموعة ... وهادذي لي كانت خدامة عليه من نهار تزوجات بجواد ، فاي مناسبة كتلقايهم مجموعين ... فالفرح والقرح ، واحد قلبو على الثاني لا الخوت لا الولاد ... الحب لي بيناتهم زرعوه فولادهم تجاه بعضياتهم ، وهادشي عطا نتيجة ..

- تلقات ليهم وردة هي وأمين ..

- أمين : خويا مبروك عليكم ، كل عيد الزواج وانتوما مجموعين إن شاء الله ..

- جواد (عنقو مطبطب على كتفو ) :

أمين أخويا الله يحفظك .. بعدو شوية مخليين ماريا هي او وردة كيدويو ..

- وردة :

والله اختي ماعرفت شنو غادي نݣول ، البنات ديما كيحضرو ولكن هاد المرة كل وحدة فيهم فاش تلهات ، يعوضوها ليك إن شاء الله ..

- ماريا (تبسمات ليها وعينيها فيهم نظرة إطمئنان ) :

مديريش فبالك ، البراكة فيكم أنتوما ، حتى دراري محاضرينش من غير أمينة الله يرضي عليها ، هي أصلا لي وجدات الحفلة ..

- وردة :

الله يرضي عليها تبارك الله ، كلشي غزال بحالها .. ݣاليا أمين بلي خالتي حورية هي وخالي مليكة مشاو للحج ، انا مع تشغلت فالجمعية والله مابقيت كندي خبار ولا نجيب خبار ..

- ماريا :

وايااااه ، مشاو السيمانة لي فاتت .. العقبة لينا للمرة الثانية إن شاء الله ..

- وردة :

إن شاء الله .. فجهة أخرى كان مجموع جواد وخوتو .. وشي معارف ، كيهضرو على الخدمة ... سكتات الموسيقى ، والانظار توجهات للبنت لي خرجات من ورا الاوركسترا ... شعرها العسلي الطويل الرطب ، ولونسوبل لي لابسة فالبيض ، الإبتسامة البريئة لي على وجها ... ونظراتها لي مانو على والديها ..

- أمينة (بالفرنسية):

حنا هنا اليوم كلنا مجموعين ، باش نشهدو على حب هاد الزوجين ، لي علمونا الوفاء والاحترام وتقدير ... لي الشرف يكونو والديني هاد الناس ، بغيت نݣوليكم (بصوت أنثوي رقيق ) هاپي بورد زداي تويو ، هاپي بورد زداي تويو ، هاپي بورد زداي هاپي بورد زداي هاپي بورد زداي تويو ... خرج واحد فدراري لي مسؤولين على الحفلة طبلة فيها لاطارط ... مزينة ومحطوط فوق منها 37 سنة ، جواد عنق بنتو وباسها فراسها ، همس ليها بشفايفو (شكرا) ... عنقات ماريا وباسها ... الكل تجمع على لاطارط ... الموسيقى خدامة الكل فرحان بأجواء إحتفلاية عائلية ، من بعد ساعتين ديال المݣانة ، الكل مشا بقات غير ماريا وجواد ..

- تنهدات تنهيدة طويلة :

كنت بغيت الدراري يكونو معانا ، ولكن مامكتابش ..

- امينة :

واخا اماما مكاينينش ولكن منساوكمش (جبدات واحد البواطة وعطاتها ليهم ... خداتها ماريا من عندها حلاتها ، كانت فيها سلسلة ديال الذهب طويلة ، الذهب ديالها من الدهب القديم الغالي ، فيها علاقة ضايرة ومنقوش عليها سميتها وسمية جواد او ولادها ... حاجة لي أثرات فيها حتى غرغرو عينيها بدموع .. اما من الجهة لوخرا ، كانت فيها ساعة ذهبية رجالية ..

- جواد (تبسم ) :

هلال هدا ، منساهاش ..

- أمينة : باش عرفتيه هو ؟

- جواد (شاف فيها ) :

حيت هو لي عارف نوع السوايع لي كيعجبني ..

- أمينة :

مزال ماساليتش ..

- هزات تيليفونها وخدمات واحد الأوديو مجهدة الصوت ... تسمع صوت لي خلى ماريا تبسم ويغرغرو عينيها بدموع .. صوت رجولي خااالص أصيل ونقي ، كيحرك بزااف ديال الأحاسيس فقلبك ، لدرجة خلى دموعها ينزلو سخان على وجها ..

- الواليدة ، مسحي دموعك عارفاني مكنحملش نشوفهم ..

- ماريا (ضحكات وبهمس) :

عارفني غادي نبكي ..

- (كمل كلامو) :

الواليد ، الكادو ديالك غدا اتلقاه فالفيرمة ، نوع عربي أصيل بحالك .. عارفيني مزيان ماعنديش مع تعبير بزااف ، لي غا نݣوليكم هو ، الله يخليكم لينا .. (تقطع الاوديو ) ..

- ماريا (تنهدات تنهيدة طويلة) :

حرقتك اولدي بوحدها فقلبي ... الله يرضي عليك ياربي ..

- جواد :

علاش مالو ؟ ماريا وعاي شوية ونعلي شيطان ..

- ماريا دورات راسها عندو مخنزرة ) :

الله ينعلو ويخزيه ، مالي شنو قلت ؟ علاش حرقتو ماشيش بوحدها ..

- جواد :

كتجيني بحال الى غير هو لي والداه ..

- ماريا (رفعات صوتها ) :

بلاما تخلينا نجبدو العقود الراشية أجواد ، ونفكرك فشنو داز خلي ليلة دوز ..

- أمينة (مافهمات والو ) :

علاياش كتهضري اماما ، علاش شنو وقع ؟

- جواد (بأمر ) :

امينة خلينا انا وماماك ابنتي ..

- امينة :

علاش ابابا ؟ مخبيين عليا شيحاجة ياك ؟؟ ولفتونا الصراحة من صغرنا ، عند بالي هاد العائلة مافيهاش اسرار ..

- جواد (بصرامة ) :

أمينة ، دويت يمكن ..

- حدرات أمينة راسها وطلعات لبيتها ..

- جواد (خلاها حتى طلعات وشاف فماريا عاقد غوباشتو ) :

عجبك الحال الالة ، رتاحيتي هانتي دخلتي لراسها الشك مزيان دابا ؟

- ماريا :

كونما هضرتيش ، مغاديش نهضر ... انت الحرقة مزال فقلبك شاعلة من جهة ولدك ، حيت دار لي فراسو ومتبعش داكشي لي بغيتي أنت ..

- جواد (هز حاجب ونزل الثاني بصوت طاغي عليه نبرة الغرور ) :

أنا كنت بغيت ولدي يكون بحالي ، يوصل لي وصلت ليه ... حتى واحد فهاد دنيا مكايبغي ولادو يشوفهم مكرفصين ..

- ماريا (كضحك) :

كيعجبو الحال غير يكرفصهم ، اما يشوف الناس مكرفصينهم لا ... خلي ليلة دوز اجواد خلي العافية لي فقلبي ناعسة ، متخليهاش تفيق عليك ..

- جواد (دوز يدو على وجهو ) :

انت هادشي مزال ݣاعما بغيتي تنسايه ؟

- ماريا ( وقفات ) :

وعمري مغادي نساه ، لي يحرم ام من ولدها 18 عام صعيب ، صعيييييب ترجع بلاصتو كيف كانت (دموعها لي كانت حابساهم نزلو ، هزات الكادو فيديها وتمات غادية حتى وقفها بصوتو ) :

هي الحب مات من جيهتي ، هي داكشي لي كانشوف فعينيك غير كدوب ݣدام لولاد ؟

- ماريا (بقات واقفة عاطياه بظهر ، عاد ضارت عندو بشوية ) :

عمري ماكرهتك ، واخا درتي لي درتي عمري كرهتك ، ماريا ديال شحال هادي هي ماريا ديال دابا ، مزال كنبغيك بحال اول نهار ، ولكن قلب الأم غضبان عليك اجواد ، نهار تكفر على لي درتي ، وتصلح لي وقع هادي 18 عام .. ديك الساع قلب الأم أيصفى من جيهتك ... تصبح على خير ..

- خلاتو واقف وطلعات لبيتها ، غمض عينيه بعصبية ... حل الݣرافاط لي كان لابس ... وصدفة الأولى ديال القميجة ، كيحاول يتنفس مزيان حاس براسو تقج .. ماباغيش يرجع يتفكر شنو دار شحال هادي ولا شنو سبب .. بسباب قصوحية الراس .. هاهو كيخلص دابا .

- فجهة أخرى -

- واقفين جوج طوموبيلات من نوع رونج فالكحل ، قدام واحد الديبو كبير ... الدنيا خاوية غير صوت نبيح الكلاب لي كيتسمع ، الباب محلول جاي منو الضو ، وريحة الݣارو عاطية .. تسمع صوت طوموبيل قريبة ، غير دقايق او وقفات حدا دوك طوموبيلات ، كانت من النوع ميرسيديس فالكحل ، نزل منها شخص ، طويل لابس سروال دجين كحل ، مع مونطو فنفس اللون وݣاط ، ملامح وجهو مكايبانوش بسباب الظلام لي كاين فديك البلاصة ، قبل مايدخل لديبو دور راسو جهة الطوموبيلات ، وجهة الديبو ودخل ..

- فالداخل ... كانو 3 ديال الرجال ، حاطين قدامهم رزامي ديال الفلوس ، بريكة تنطح بريكة ... غير زرقات ، كل واحد فيهم هاز رزمة ... كيبلل صباعو ويدوز على الوراق كيحسب فيهم ، غير دخل رمى السلام ، هزو فيه عينيهم وكملو خدمتهم .. الديبو كان كبير بزاااف ، عامر بصنادق وبالكراطن ، وريحة مألوفة عندهم بكترت ماشموها ، ولاو كيتنشواو عليها ، عاطية لداخل .. حيد المونطو ديالو وݣلس ، جبد بكية ديال الݣارو .. واخد منها واحد شعلو ، سف دخانو حتى شبع صدرو مزيان ... عاد طلق سراح الدخان لي خرج من نيفو او فمو ..

- سبع ولا ضبع (جاه صوت من الداخل .. ، هز فيه عينيه .. بان ليه خارج كيسد فصدايف ديال القميجة ، السمطة ديال سروالو كانت محلولة هي والعقدة .. مكايشوفش فيه ، مشغول بصدايفو كيسدهم ، عاقد غوباشتو مكتعرفو معصب ولا مبرد ) ..

-( رجع سف من الكارو لي فيديه ، علا راسو طالق الدخان من قنت فمو وبلكنة مراكشية نطق ) مبـاش يـسني ..

- مجاوبوش قاد سروالو وعلى كمايم القميجة ... تحل الباب وخرجات منو ريحة انثوية قاصحة بزااف .. كتخنق لي ماعندوش مع الروايح المجهدة ، سبقات رجلها ليمنية لي كانت لابسة سباط عالي فالحمر ، مع كسوة قصيرة فالكحل مبينة على الجسد ديالها المنحوت ، طالقة شعرها لي واصل عند خصرها كحوليتو كثر من كحولية الليل ، .. هز فيها عينيه ، أشر ليها بحاجبو ... حدرات راسها وخرجات راكبة فطوموبيلتو كتسناه ..

- تنهد تنهيدة طويلة ، وبخطوات بطيئة مشا لجيهتو ، ضار وراه حاط يديه على راسو كيدوز صباعو فشعرو ، بحال شي أب كيطبطب على ولدو ... نزل بشوية عند ودنيه ، وبصوت بحال فحيح الأفعى نطق :

- با الله يرحمو ، كان كيݣوليا اولدي ، قطع الضبرة تبرا .. واخا تكون خارجة ليك فداتك .. هز يدو ليمنية كيشوف فصبعو الصغير لي كان مقطوع ، تبسم ونطق :

وهادشي لي درت ..

- هز راسو فيه ، كيشوف الإستهزاء وشر لي فعينيه .. :

منصور ماشي من مصلحتنا .. (قاطعو) ..

- منصور (عاݣدهم ) :

فمصلحتنا فمصلحتنا ..(ضرب على كتفو) دير لي عليك .. هز لاڤيست ديالو من فوق واحد الطبلة ، خلاهم وزاد .. وصل عند الباب وضار :

- مؤيد طحن بدق وسكات وتقل (غمزو) .. حل الباب وسدو وراه بشوية ..

- دوز يديه على لحيتو وراسو متوتر ، خايف لا يمشيو فرجلين هاد المرة خصوصا ، النقطة لي حاطين عليها العين صعييب يوصلو ليها ..

____________________________

- ناعسة فوق الأرض .. وحدة حاطة راسها على كتفها والثانية على كرشها ... ساهية فسقف وكتحك ليهم بجوج شعرهم ... تبسمات منين تفكرات فاش وصلات التكبيرة لي دارو ليها ..

________ قبل 8ساعات_________

وصلات طوموبيلت كريم للحومة ، عباس كان ݣالس هو ودريس ، غير بانت ليهم طوموبيلت كريم مشا دريس كيجري علم الدار ، خرجات سعاد والبنات ومعزوزة ، نزلات مسيرة هي الأولى ، مشات كتجري عند باها عنقاتو ...

- عباس (بعدها عليه كيشوف فيها بحب ) :

على سلامتك أسبيعة ديالي ..

- مسيرة : الله يسلمك أبا ، وزيانيتي وصحاحيتي وصغاريتي ..

- سعاد (كتزغرت ) :

روروروروروروري ، روروروروروروري روروروروروروري ، صلاة والسلام على رسول الله ، إلى جاه إلى جاه سيدها محمد الله مع جاه العالي روروروروروروري (جراتها من يديه كتعنق وتبكي ) على سلامتك الحبيبة ديالي ..

- مسيرة (معنقاها بجهد ) :

الله يسلمك أزين الغالي والقد الوافي ... توحشتك ..

- سعاد (عينيها مدمعين ) :

حتى أنا توحشتك ابنتي ، على سلامتك والله يجعلها اخر الأحزان .. سلمات على خواتاتها لي مكانوش أقل فرحة من باها ومها ، سلمات على جداها عنقاتها لصدرها بجهد ... عنقها دريس حتى هو مطبطب على ظهرها .. الجيران كيطلو عليهم شي كيوشوش لشي ... هز عباس راسو فيهم لقاهم كيحنزو ..

- عباس (كيعرعر) :

وحضيونا وعاودوها لجهة ضراكم ، بنتي خرجات من الحبس سبيعة ديالي ، ولي ماقدو فمو راه عارف منين يدوي ..

- مسيرة (غمزاتو ) :

بااااا وهنينا ويلي ..

- سعاد : دخلو من زنقة دخلو .. كريم ولدي مرحبا بيك دخل ..

- مسيرة (شافت فسكينة لي غير ساكتة ) :

سكينة ، متحشميش أختي راه هادي هي عائلتي لي عاودت ليك عليهم ..

- سعاد : دخلي أبنتي مرحبا بيك ، متديش على هادو راه تريكة ناقصة ..

- سكينة (تبسمات ) :

لا هانية أخالتي ،... دخلو لدار وسدو عليهم مخليين الجيران كيتحتو وشادين التبرݣيك فمسيرة وعائلتها ..

فوق الطبلة محطوطة الصينية ديال أتاي ، طباسل ديال الحلوة وكيكة ومسمن ... أغلبية ديال الكيسان مشروب فيهم ، دليل أنهم كملو شريب أتاي ...

- مسيرة (موجهة كلامها لباها ) :

با سكينة صاحبتي ، ماعندها فين تمشي ... مها ماتت نهار ولداتها ، وباها سمح فيها لحمة صغيرة وخلاها عند جداها ، هي لي رباتها وكبراتها حتى ماتت مسكينة ، ماعندها لا حنين لا رحيم ..

- عباس (قاطعها ) :

أنا عارفك أش بغيتي تݣولي (شاف فسكينة) مرحبا بك دار داركم أبنتي وحنا عائلتك ، بحالك بحال هاد العويتقات الصغار ، راه واخا تشوفيهم عوراجات ، ولكن بنسبة ليا انا راهم بزوز ..

- سكينة (جاتها الضحكة) :

الله يخليهم ليك أعمي ، لهلا يخطيك ...

- عباس :

مكاين لا عمي لا عمتي ، ݣولي ليا باك عباس ، وهادي مك سعاد (شاف فمرتو ) ياك أسعاد ؟

- سعاد :

كاع لي تجي من ريحة بنتي ، مرحبا بيها دار دارهم ، فينما تحطات يد يتحطو عشرة ..

- مسيرة (عينيها على جدتها) :

ماشي من عوايدك تسكتي امعيزيزة ..

- معزوزة (مصغرة عينيها فولدها وفسعاد ) :

كنشوف افهاد جوج ضروس ديال الثومة ديال باك ومك ، قبل متجيو واحد مايدوي مع الثاني ، خاصهم المناتفة ... اجيتو وݣالسين يسبلو ليا بعينيهم بحال حليم وشادية فياماتهم ، إيوا اش غانݣوليكم .. الوجه لي يحشمو عليه الناس والله متكسابو بوه ، اغير حشمت من داك زين لي حداكم أما نخبط بوكم الراس ..

- كريم(جاتو الضحكة ) :

انت لي كاينة امي معزوزة ، فينما جيت تكبري بيا وترفعي ليا الݣراض ، بلا بيك هاد الدار خالية ..

- معزوزة (تنهدات ) :

عينيك أوليدي كيفكروني غير فالمرحوم (تنهدات ورخات عينيها ) ..

- عباس (هاز حجبانو متعجب منها) :

واااااا مي ونعلي الشيطان راه ولدك معاك زعمة .

- معزوزة :

وكون ابقيت عاݣرة ولا ولدت حتروف بحالك ، شوف الولاد زينين كيدايرين شوف ، وانت لا زين لا طولة لا تجريدة ، تا راه مافهمتش انا لمن طلعتي ، انا زينة باك زين ، انت لمن طلعتي مشكوضر بحال هوووك مافهمتش ..

سعاد (كضحك ) ..

- عباس (كيخنزر فيها ) :

عجباتك هادي ، جاتك على ݣانتك ياك ؟ بردات ليك الخاطر ..

- معزوزة :

ومالها ماضحك ، وتاها الضحك ، ضحكي ابنتي ونشطي ... راه متصوري منو اهاد الضحك ..

- كريم (وقف) :

انا خاصني نمشي عندي شي خدمة ، على سلامة مسيرة أعمي ..

- عباس (كيفرنس) :

الله يسلمك اولدي ، الله يرضي علك ، انا نوض نوصلك للباب ..

- مسيرة (قاطعاتو واقفة) :

أخليك ابا ، متعدبش راسك انا انوصلو ... خرجات مع كريم للباب ..

- كريم :

علاياش ناوية ، شفتك غير ساكتة وكتخمي ؟

- مسيرة (تنهدات تنهيدة طويلة) :

فبزاااف ديال الحوايج ، المهم ندوي مع دار ونشوفو الأمور كيدايرة ، وديك الساع نقوليك ..

- كريم (باس ليها راسها) :

يلاه انا مشيت تهلاي فراسك .. تيليفون بيناتنا ..

- مسيرة : وأنت بزااف ..

#الحاضر

- سندس :

خاصني غدا إن شاء الله نفيق بكري ، باش نعلم الحاج بلي انخلي الخدمة ..

- صفاء :

ناري شحال صعيبة ياختي ، والله انا الى بحال الحرقة فقلبي ، كبرنا هنا ودوزنا كاع صغر فهاد الحومة .. واخا مابقاو عندنا جيران ، كاع جيران ديال الݣلب رحلو .. ولكن صعيب الحال ..

- مسيرة ( كدوز يديها فشعر صفاء ) :

حتى أنت مدينة مدينة ، مزيان الواحد يبدل العتبة ، انا بغيت غير نفهم با منين لقا الشاري ؟

- سندس :

وراكي عارفة خالي دريس ، كيعرف كاع الناس ... مايكون اهو لي جاب ليه الشاري وغيز معاه هاد لافير ..

- مسيرة (هزات راسها جيهت سكينة كتبان ليها نعسات ) :

وبا لقا الدار بعدا فالجديدة لي غادي بينا ليها ؟ مݣاليا والو ؟

- تقادات صفاء فالݣلسة ، بحال الى تفكرات شيحاجة :

يلاه تفكرت ، سيمانة لي فاتت خالي دريس كان مشا لجديدة ، كنا تسنيناه للغدا عقلتي أسندس ، فاش كانت كتسوني عليه ماما ، وݣاليه با راه مغايجيش عندو غرض فجديدة ، وفاش سولاتو اشمن غرض ، كاليها كولي كولي وخلي عليك السيد ..

- سندس :

ناري ياختي با مطور ، وهو كيخطط من شحال هادي ، داكشي باش زرب علينا .. كان كايتسنى غير مسيرة تخرج ..

- مسيرة (تنهدات تنهيدة طويلة عينيها كيتلاصقو بنعاس ) :

بيني وبينكم ، مابقى لاش نݣلسو نيت هنا كتر ، اللهم نمشيو دغية حسن لينا ، يلاه نوضو لبيتكم انا راه فيا نعاس ..

- سندس (باستها وناضت تابعاها صفاء ) :

تصبحي على خير ..

- مسيرة : تلاقاو الخير ..

قلوبنــــا مدينةٌ ... نلتقي فيها أناساً ... نحتفظ بهم في أعماقنــا ... ولن يتمكن غبار الوقت من إغفال أعيننا عنهم ، غياب الشيء عن العين .. لا يعني عدم وجوده ... فَـ هناك مكان أرقى من العين ... وَهو الوجود في القلب ... أحيـــــاناً ... يمر بعض النّـــــــاس في حياتنا قدراً .. فَـيصبحون أغلى النَـــــــاس في قلوبنــا .. عندها نسأل أنفسنا ... هل نحن نعرفهم .. ؟ أم أنّنـــا ولدنا عندما عرفناهم ... ! حينها ندرك حقاً .. أن الأرواح حين تُحبّ ... لا تملك حق الاختيار ..

____________________

- شحال صعيب تبدل المدينة لي كبرتي فيها وتربيتي فيها ، تبدل داركم وجيرانكم ، واخا مكتكونش شي جورة لي مزيانة ، قليل الى خطاك واحد زوج ولا 3 أما الباقي ، غير البرݣاݣ يشد فيك النميمة ورا ظهر ... كتخلي كولشي وراك ، وترحل لمدينة ودار جديدة ، معارفش واش غادي تكون مزيانة عليك ، ولا يصدق المثل لي كيݣول ... متبدل صاحبك غير بماكرف منو ..

- فسيد الضاوي بالجديدة ، فواحد من الأحياء ... وقفات البيكوپ الثانية ديال الرحيل ، اللولة كانت جابتو هادي سيمانة ، وتكلف بيه دريس وهاد المرة ، جات وجاو معاها مالين الدار كاملين ، الجيران شي كيطل وشي غادي وكيدور ... باغيين يعرفو شكون هاد الجيران الجداد لي سكنو فالحومة ، وخداو دار سي حسن لي كيبيع الأثاث ... تكلفو الرجال ونزلو كاع الرحيل ، أما البنات تكلفو بالفراش ، الدار كانت نقية حيت دريس جاب المرة لي نضات معاهم الأمور ... النهار كامل داز غير فقاد هادي فرش هادي ..

- الدار زوينة ، مصبوغة بالبيج وسقف مديور ليه الݣبص الكوزينة كبيرة ومرحة ، الصالون كبير هو والبيوت .. مفروجة وجات فبلاصة لي هي مزيانة ..

- فالعشية ݣالسات البنات فوق السطح ... مفرشين واحد 3 ديال السدادر حسبيين ، ومقابلين مع النجوم ...

- تقادات سكينة فالݣلسة كدور راسها وتشمشم ..

- مسيرة ( هزات فيها عينيها ) :

من صباح وانت طالقة دوك المناخر بحال السلوݣي ؟

- سكينة ( غوبشات ) :

ريحة الݣارو ..

- مسيرة : ويلى كان ياك قطعتي داك الويل ؟

- سكينة :

قطعتو ، ولكن ريحتو (خسرات سيفتها) ..

- طلع عندهم دريس هاز ݣارو فيدو ..

- مسيرة (مشات عينيها نيشان للݣارو ليفيديه ) :

خالي طفي داك الويل الله يرحم بيها الوالدين ..

- دريس :

ومالف كنكمي حداكم وعادي ، أش تزاد ؟

- مسيرة :

سكينة عندها الحساسية ، الى شمات ريحتو كتقج ..

- دريس : دابا هي كتقج ، نقج أنا ݣارو شاريه بجوج دراهم ؟؟

- مسيرة :

ونعطيوك حتى 5 دراهم اقج والديه ..

- دريس (لاحو وعفط عليه وݣلس داير رجل على رجل) :

والحومة زوينة الصراحة ، واحد القهيوة هنا ناضية ... الى بغيتو تخرجو ولا شي لعبة راها فدورة ..

- سندس (ݣلسات) :

بحال والو نبدا بيها هي لولة ، نشوف الى بغاو شي وحدة تغسل الماعن ..

- صفاء :

حتى انا خاصني من غدا نبدا نقلب ، راه الى ماخدمناش ماعندنا منين نقفلو على الفلوس ..

- مسيرة :

مزال ماسخنا حتى بلاصتنا ، أبشوية وديك الساع نخممو فشنو غادي نديرو مزال عندنا واحد البركة ..

- دريس (بقا ساكت متردد شاف فالبنات ونطق) :

باكم مابغاتش تسرط ليه الفعلة ديال سعودي لي دار معاه ..

- سندس (غير سمعات سيرتو غوبشاتو) :

بغيت ليه دقة تجيه فرجلو كيما جات لبا وخلاتو ݣالس ، حنا وعمرها تنسى لينا ... هداك ولد الحرام يدو طويلة ماعندنا منصورو منو ... لا حنا لا با أقوليه يحيدو من بالو ..

- صفاء :

رزاه فرجلو هاد المرة والله حتى يرزيه فعمرو ، ولا فوحدة من بناتو ... راه خاصكم تشوفو اش كيقولو عليه ، أكبر مخلويض مايسواش ..

- سكينة (بإستفهام ) :

علامن كدويو ؟

- سندس :

هدا واحد خونا ، لاباس عليه عندو لوزينات ، وكيدير هادشي ديال العقار ، با كان خدام عندو فواحد الوزين ... ومنين عجباتو الخدمة ديالو حولوه ولا هو لي مسؤول على السلعة ديال البني لي كدخل ، منين با لقاه كيغش الناس ... وكيطلب أثمنة خيالية للناس ، والسلعة كيدخلها ابنص ثمن ... جا بغا يدوي ، وقاليه هادشي ماشي معقول وراه انفضحك وناس تعرفك شنو كدير ..

- مشا وحرش عليه شي واحد ، ماعرفناش كيفاش حتى طاحت عليه حديدة جاتو لرجل ... رجلو كاملها مشات ليه اربي لي لطف ... دابا راه داير غير رجل إصطناعية ، وزادو كملوها وجملوها ماعطاوه حتى تعويض ، ورضو الغلط منو ..

- سكينة :

شكون هاد خونا ؟

- مسيرة (تنهدات تنهيدة طويلة ) :

محمد السعودي ..

- سكينة (بصدمة قاطعاتها) :

واش محمد السعودي ، لي عندو الوزين ديال السبابط ، ويلاه مؤخرا ولا يدير هادشي دالعقار شي 5 سنين دابا ياك ؟؟

- دريس (معصب) :

هداك القو////**د ، اودي دوماج دوماج ماعنديش البينݣة ... كون عندي والله يابوه حتى نقبرو مايعرفوه فين غطس ..

- مسيرة ( بتساؤل ) :

واش كتعرفيه؟

- عقلتي على الشماتة لي عاودت ليك عليه ، لي سبابي حتى دخلت للحبس ، إيوا راه ولد خو هاد السعودي ... واحد خوهم كان ورث فاش مات باهم ، وطب فالفلوس فالقرعة والكاس وزهو ... وعندو ولد واحد ، هو داك لي كنت معاه الله ياخود فيه الحق ..

- دريس :

بحال هاد النوع ، راه خاص لي يندم جد مهم الكل**ب ... اما المخزن راه ماعندو مايصور معاه ، لي يديه واصلة كياكل الضعيف ومشات على عينيك أبن عدي ..

- صفاء :

والله مكدبتي أخالي غير المكاريب تفو ..

- مسيرة ( وقفات ) :

أنا عييت ، انمشي نعس تصبحو على خير ... خلاتهم ونزلات تنعس. وفراسها ألف مطرقة ، طريق تديها وطريق تجيبها ومزال مارصات على حاجة وحدة ..

_____________________

#إفران

دهنات يديها او وجها ، حطات الپينوار ديالها على الكرسي وجات حداه فوق النموسية ..

- جواد ( حط الكتاب لي كان كيقراه ونظاظرو وشاف فيها ) :

كتباني ليا عيانة ، كنݣوليك متبقايش تشقي راسك ..

- ماريا (تنهدات وببرود دوات ) :

لاواه ماشقيت راسي والو ، غير بالي مع دراري وصافي ..

- جواد (كيحاول مايجبدش معاها نفس الموضوع ويتصرف عادي) :

علاش مال دراري ، كل واحد فيهم عايش حياتو .. كل واحد بخدمتو بدارو مرتاح مع راسو ..

- ماريا ( شافت فيه ) :

عاجباك حالة هلال ... شوف ولدي كيف كان وكيف ولا ، كان شمعة مضوية ولا بحال شي ضرݣة ديال الشوك ..

- جواد ( جاتو الضحكة) :

ضرݣة ديال الشوك ݣاع ، كتدوي زعمة بحال الى مامجرباش ... وراه صعيب راه ديك لي ماتت مرتو وقيلة ... وداك لي مات راه ولدو نعلي الشيطان أماريا وحضري عقلك ..

- ماريا :

أنا ماقلت والو ، راني عارفة ... داكشي لي كان كيحس بيه وعايشو عشتو انا راه ولدي هداك كبدتي .. ولكن راه الحياة كتستمر أجواد ، راه كاين لي تزادو عندهم الوليدات وكبرو وداهم الله ، اما هو راه مع تزاد توفى تم تم ..أما إلهام (تنهدات تنهيدة طويلة) حنا ومنسيناهاش ..

- جواد (بجدية) :

هانتي دويتي ، حنا ومنسيناهاش خلي راجلها..

- ماريا (بإنفعال) :

وراه دازت 4 سنين وطالعين فخمسنين ، خاص يشوف حياتو ، يشوف شي بنت الناس يدير وليداتو ، واش حنا أندومو ليه ... واش حنا دامو لينا والدينا ، ها با أنا معمرها جات لبالي يخطيني ، وهاهو مسكين توفى الله يرحمو ، وعمي عبد الرحمان ... ومسكين جلال الله يرحمو .. حتى واحد مدايم لحد ، راه عندو 37 عام مابقا ليه والو ويدخل ف40 .. هدا هو الوقت .

- جواد (بصرامة وجدية) :

ماريا ، حنا عمرنا بززنا على ولادنا شيحاجة ، باش نجيو دابا نݣولو ليهم شنو ديرو وشنو مديروش .. كل واحد يتحمل مسؤولية قراراتو ... حنا أدينا الرسالة كبرنا قرينا ، وصلو لفين بغاو وسالينا ، دوزي تنعسي ترتاحي ..

- تبسمات تبسيمة طويلة ، وشافت فيه بإستهزاء :

اه بصح عمرني بززت انا شي حاجة على ولادي ، المهم تصبح على خير .. جرات الغطا وعطاتو بظهر ، حاسة بعينيه عليها .. زول النظارات ديالو ، طفا الضو .. حسات بيديه جروها خاشيينها فصدرو كيفما كان كيدير شحال هدا ، مامنعاتش ولا صدر منها حتى رد فعل ، غمضات عينيها وستسلمات لنعاس ..

** الدار البيضاء **

- فكافي فعين الدياب ، ݣالسة حاطة قدامها بكية ديال الݣارو .. هازة فيديها واحد ، مرة كتاخود منو نطرة ، وترجع تشرب من كاسها ديال العصير ، من شكلها باينة فيها هاي كلاص ، ملامح وجها كلها غرور تعطيها فسن 35 سنة هكاك ، رجعات شعرها لور وعلى وجها إبتسامة نصر ..

- من نيتك أريم (ضحكات) مايقدش يتفنفن قدامي ، غير كوني هانية من ديك النحية أماشيغي ..

- ريم (كتاكل من الكغيب لي قدامها ) :

ماشفتيش راسك ادنيا بلي زدتي فيه شوية ، أنا خايفة غير لا تخرجي على زواجك بيديك ..

- دنيا (خدات نطرة من الݣارو لي فيديها ، كان خاص بالعيالات .. شكلو ماشي بحال الݣارو العادي رقيق وطويل شوية ) :

سراج كيموت عليا ، ومايقدش يعيش بلا بيا ، واخا يوقع لي يوقع ... مايقدش يتفنفن ..

- ريم :

راجلك راه ضايرين بيه غير البنات بحكم خدمتو ، بتصرفاتك غادي تخليه يخونك انا غير قلت ليك ..

- دنيا (ضحكات حتى ضارو لي حداها شافو فيها ، جمعات ضحكتها بزربة ، طفات الݣارو لي فيديها وشافت فصاحبتها ببرودة ) :

مستحييييل ، مغايلقاش وحدة بحالي حيت أصلا مكاينش شي وحدة بحالي ، لا فزيني ولا فلوسي ، ولا المستوى ديالي ، دنيا وحدة لي كاينة هي أنا بوحدي ، دنيا نجيب ، حتى وحدة فوق وجه هاد الكرة الأرضية متوصلنيش داكوغ ..

- وقفات هزات ساكها وخرجات من الكافي تحت انظار الناس لي كانو ݣالسين ..

- ريم (بقات متبعاها حتى خرجات ، هزات تيليفونها ودوزات نمرة ، شوية وتحل الخط ) :

وي لمياء ، صاڤا ؟ الحمد لله صاڤا ، عاد كنت مع دنيا .. عرفتي أصاحبتي السيدة تسطات قسما بالله ... كتكون فحالة حتى كتولي حالة ، شوفي شوية ونجي عندك نعاود ليك بتفصيل الممل ، يلاه بسلامة ..

_____________

- من بعد نص ساعة ..

- فڤيلا فحي راقي .. وقفات طوموبيل داستر قدام الباب ، ماهي غير ثانية وتحل دخلات نظراتها المغرورة مزال مرسومين على وجها ، بلاصات الطوموبيل ديالها ونزلات كيتسمع صوت الطالون ديالها ، حلات الخدامة الباب ليها ودخلات ضاربة فيها ، ب 5 دقايق تبعاتها طوموبيل نوع رونج فالݣري ، بلاصات حدا طوموبيلتها .. نزل منها شخص فاوائل الثلاثين ، داير نظارات ديال الشمس فالكحل ، ملامحو حادة ، بعض الخصلات على جبهتو ... من المظهر ديالو كيبان رياضي ، حلات ليه الخدامة ودخل ..

- بصوت رجولي ) :

المدام هنا ؟

- اه أسيدي راها فجردة ..

- مشا نيشان لجردة ، ملامح وجهو الباردة مكتبشرش بالخير .. كانت ݣالسة دايرة رجل على رجل وكتقلب فتيليفونها ..

- [بزعاف] :

تبارك الله على لالة الشريفة .. مفيكة ليا مع راسك مخاصك خير ..

- دنيا (هزات فيه راسها بشوية ، كطلعو وتنزلو ) :

مالنا ياك لاباس ، شفتك داخل بعجاجتك ... شكون قلقك احبيبي ..

- (حيد نظاظرو وخبطهم مع الطبلة لي قدامو ، مقرب وجهو من وجها) :

المرض ديالك طلع ليا فطانطو ديال مخي ، عندي ليك جوج كلمات .. يا غاتݣادي وتشدي الطريق ..

- دنيا (هزات حاجب ونزلات الثاني ) :

يا شنو اسراج الدين ؟؟

- سراج (زاد قرب لوجها ، وبصوت بحال فحيح الأفعى ) :

يا لي جمعنا ايفاريها أبنت الحاج .. مكاين لاش نمشطو لقرع راسو ونجبدو فلاستيك ..

- دنيا [وقفات كترعد ، ماعمر جاها لبالها بلي ممكن يݣوليها هاد الهضرة ، بنسبة ليها ممنحقوش يݣولها ، خاصو يرضخ ليها ويدير ݣاع لي كتݣوليه ، واخا تمسح بيه الأرض خاصو يسكت ، بنسبة ليها هي مميزة ومكاينش منها زوج .. دنيا وحدة لي كاينة ، مكرهاتوش يبقا يطلب ويرغب وهي تزيد تدل فيه وتمسح بكرامتو .. هكا كتحس بالإنتصار وكتحس باللذة ] :

عاود شنو قلتي ؟؟!!!

أحبّ مساحتي الخاصة، أحبّ حدودي التي أصنعها، أحب الأشياء التي لا أحد يعرفها عني، أحبّ خصوصيتي مع نفسي وعدم وصول أي شخص لها مهما ظنّ أنه وصل ..

- فقهوة شعبية ... مخلطة بنات ودراري ، لي جاي يدوز غير الوقت ولي جاي يراجع ، ولي جاي يفكر فالمستقبل وكل واحد وهمو ... ݣالسة دايرة رجل على رجل ، نظارات شمسية مكيبينوش عينيها ، نايڤية عاقدة بيها المعصم ديالها .. قدامها براد ديال اتاي ، كتشرب بشوية ودماغها خدااام ... هادي 3 يام ، وهي غير كتفكر ... وإلى مشات حتى حطات شي حاجة فراسها ، متمشي حتى طبقها ..

- سكينة (مقابلة معاها حاضياها ، كتندغ فالمسكة باش تلاهي راسها على الريحة ديال الݣارو لي كتشم ) :

هادي نص ساعة وانت عاصرة على داك البراد ، ياااك لاباس ؟ مخرجاني مݣلساني فهاد القنت باش تبقاي ساكتة ولا كيفاش البلان ؟

- مسيرة (هزات كاسها جغمات منو بشوية ورجعات قابلاتو مع عينيها كتشوف فيه ، بحال الى كتشوف فشي تحفة فنية ) :

بنيييين ، معمرينو بنعناع ... مداقو واعر الله يعطي الصحة لي عمرو ، واخا ماشي برزتو ولكن بنين ..

- سكينة (كتشوف فيها ، مرات مكتفهم فيها والو) :

شفتك رجعتي تفهمي فأتاي !!

- مسيرة : بزاااف ديال الحوايج ، مزال معارفاهمش عليا .. مع الوقت اتعرفي كولشي ، العشرة كتبين كولشي ..

تجر الكرسي لي حداها وݣلسات بزعاف ... خابطة الملف لي كان فيديها مع الطبلة ..

- سندس :

يكما تعطلت عليكم (هزات كاس ديال الما نزلات عليه كامل وحطاتو )

- سكينة :

شوية وصافي ، أمضرا لقيتي شيحاجة ؟

- سندس :

الويل الكحل لي لقيت تفوو ... تعصبت قسما بالله العظيم ، واحد ختنا عندها مݣازة ديال ليموبيليي ، بقات عليا هو السيڤي ديالك زوين ، وحتى انت زوينة تبارك الله ، ولكن خاصك تبدلي حوايجك واحد الشوية ، الميكاپ يتبدل حيت الكليان عندنا أول حاجة كيشوفها هي واجهة المحل وانت هي الواجهة .. داخلت عليك بالله واش انا غادة نبيع ونشري ، ولا ديرني مونيكة فالڤيترينة وتعرضني .. هزيت سيڤي ديالي وضربت الباب ..

- سكينة :

حتى انت ݣاعما يبقى فيك الحال ، خيرها فغيرها .. سندس ضارت عند ختها لي كانت ساكتة مانطقاتش بحرف واحد ..

- سندس (بهمس) :

مال هادي ، شفتها مسهوتة مكدويش ، مقالتش ليك لاش بغاتنا ؟

- سكينة (تهندات ) :

وعلاش هي دوات ، منين جينا وهي عاصرة على داك البراد كل شوية تقطر منو باش مايساليش ، كنسولها كتقوليا حتى يجيو لوخرين ..

- سندس (شافت ورا سكينة ) :

هصفاء جايا .. باينة كاعية ، شفتي باين العربون قسما بالله ..

- صفاء (جرات الكرسي وݣلسات ) :

السلام عليكم ، كبي ليا اختي كاس دالما ريقي نشف ..

- سندس (كتكب ليها ) :

مالك جايا بعجاجتك ياك لاباس ؟

- صفاء ( حركات ليها صبعها باش تصبر بينما شربات ) :

الله ياربي عاد رجعات فيا الروح ... وراه مكاين غير لي جهلك ... مشيت نشوف داك الحمام الفردي لي قاليا عليه خالي ، لقيت مول شي تم الݣنس الحفيان كيوريني ، كيفاش نقطع الورقة وشنو ندير ... قاليك اجي نوريك فين كيحطو الناس حوايجهم ، انا سابقاه السيد حط يدو على ظهري ... ولكن منعاودش ليك اش درت ليه ، خليتو كيتزلق فداك الحمام بوحدو ، رجعت ليه ظهرو رطب من حناكو ... نيت عندو شي حناك اديال الغياط ..

- سندس (رجعات بظهرها اللور ) :

هالي قلنا شفتي ، انا على مبانلي موحال نلقاو شيحاجة ، من نهار جينا مخلينا فين دفعنا ، حتى من مسيرة شحال قلبات او والو ..

- سكينة (شدات راسها بين يديها ) :

أودي راه صعييب الحال ، أهو نزيدو نصبرو عاود متعرفي .. أجي (شافت فمسيرة) علاش متشوفي مع شي خضار كيمشي لسواق ، يكون عندو كاميو تولي انت تجيبي ليه الخضرة من الفارم ..

- سندس :

عندها الصح ياك عندك 3 ديال الپيرميات ، ديال الموطور وطوموبيل والكاميو .. وديجا كنتي كتسوݣي الكاميو ديال الراضي عقلتي ..

- مسيرة(مخلياهم كيخططو وهي ساكتة مجاوباتش)

صفاء (كتشوف فمسيرة بنص عين) :

مالها ثاني ؟

- سندس : بحالنا بحالك ... كندويو معاها بحال الى داويين مع الحيط ، الى شفتيها هكا عرفي داك العقل خدام عندها ..

- حيدات مسيرة نظاظرها ودارتهم على راسها ، و عينيها على البنات ب 3 ... وقفات رونج فالكحل ، تحل الباب ونزل كريم لابس ، تيشورت بيضة مع شوميز فالكحل وسروال فنفس اللون ونظارات فنفس اللون ، هاز فيدو بوشيط ... قطع الشانطي وجا عندهم ..

- كريم (رمى عليهم السلام ، جر الكرسي وݣلس حط الپيسي بزعاف ، جبد بكية ديال الݣارو خدا منها واحد شعلو ، خدا نطرة طويلة وساط الدخان ، باينة فيه معصب ) ..

- مسيرة (من بعد سكاتها الطويل) :

حيد داك الويل راه اتهلك صحتك شوف فمك كيف ولا ، وديك خيتي لي حداك يلاه قاطعاه ، اتشمو اتجيها الحالة تبغي ترجع ليه ..

- كريم (مجاوبهاش نطر مرة ثانية وثالثة وطفاه) :

هاهو طفيناه رتاحيتي ؟

- مسيرة( حركات حجبانها بتساؤل) :

أش واقع ؟

- كريم [تنهد تنهيدة طويلة ] :

ما طليتيش على تيليفونك اليوم ، ماشفتي والو ؟

- مسيرة :

اليوم مادخلتش ݣاع ، علاش كاينة شيحاجة ؟ شنو واقع خلعتيني ؟

يتبع...