روبي ڤيريدجو الجزء الثاني

*** فجهة أخرى ***

- سراج الدين [ببرود ] :

وقيلة راه سمعتيني شنو ݣلت .. هدا راجل لي قدامك ماشي دوك رعاوين لي خدامين عندك .. غادي تشدي معايا الطريق مرحبا ، مابغيتيش دار القاضي كتسنانا ، حسن ليا وليك باش بلاما دفعي شبابك غالي ..

- دنيا (كضحك ) :

شفتك كتهددني ، سيبة فالبلاد ولا شنو ، باغي ت**قتلني اسراج الدين ، ماتقدش احبيبي كتموت عليا وتحماق عليا ..

- سراج [بنفس البرود لي كان كيدوي بيه ] :

كولشي توقعيه من واحد باه كان فياماتو ڤيو ، داكشي عندنا وراثي .. بلاما تجربيني ، الى كنتي مريضة سيري داواي متمرضينيش معاك ..

- دنيا :

ياكما بنت ليك كنلوح حوايجي فزنقة ، أجي كتخوني عرفتي شي وحدة ياااك ، أصلا شنو غادي نتسنى منك .. ولكن دير فبالك مكايناش شي وحدة تجي فبلاصتي مستحيل متقدش (بدات كضحك بطريقة هيستيرية ) ..

- سراج (بملامح باردة ، كيطلعها وينزلها مصدوم .. عمرو كان كيتوقع الإنسانة لي بغا ، تكون بهاد الشكل ، ولا يمكن هي هكا والحب عما ليه عينيه ، مكانش محتاج يعطي ليها وقت ولا لراسو ، حيت الجواب باين من عنوانو بلاما بزيد يطول مزال ... عطاها بظهر وتم طالع لبيتو ) ..

- دخل حل الماريو ديالو ، خدا ساك صغير .. دار فيها جميع الوراق ديالو ، وراق الخدمة سوايع ديالو .. الباسبور ديالو واي حاجة مهمة سامح فݣاع الحوايح ديالو وسبابطو .. سد الساك هزو فيدو ونزل .. غير شافتو طات كتجري مخرجة عينيها فيه .. :

فين غادي ؟

__________________

كريم (حيد النظاظر حطهم قدامو ، عاقد غوباشتو ) :

الواليد كان كيعرف واحد السيد البشير ، حتى هو عندو كلينيك ، السيد معروف ... وكان باغي يدخل معاه شريك ، ولكن منين قلب مزيان وراه عرفو أكبر سالوپار وشلاهبي ، السيد عندو أعمال مشبوهة ، عمليات الإجهاض بلا قانون ولا رقابة ، وشحال من وحدة لاباس عليها كتحمل وتولد عندو فلكلينيك ، وكتخليه يتكفل بالبيبي ويبيعو الى هي مابغاتوش ، هادشي غير شوية من بزاااف ..

- صفاء (مخرجة عينيها فيه ) :

أوييييلي وحدي ، واش هادو وصلات بيهم حتى لهادشي ، راسي زند عليا أخويا ..

- كريم :

واش انت عايشة معانا ولا جاية من كوكب زمردة ، وتي راه كتر من هادشي ، الواليد منين كحز راسو للور وبعد ... بدا كيهددو ، بلي غادي يطيح بيه ، واليوم حط شي تصاور كان فيهم هو والواليد فالقهوة ، ومصور الواليد كيعطيه واحد الجوا .. ومكتوب بالخط العريض بلي فؤاد نجيب كيعطي رشوة ، للرضوان العسري ..

- سندس :

باينة خونا عاطي الفلوس ، باش ينتاقم من باك ..

- كريم :

هادي مندكروش عليها ، ديجا نهار خرجات مسيرة من الحبس ، سمعت غواتهم فالبيرو ، وهددو قدامي .. ولكن انا مديتهاش فيه ، ݣلت غير هضرة خاوية وصافي فهمتي ... كنت غادي نمشي ليه ولكن الواليد مخلانيش ، جيت لهنا نيشان ..

- مسيرة :

باك شنو قال ؟

- كريم :

الواليد فاش كتكون واصلة ليه العظم ، مكايدويش ... الشيفور داه نيشان للفيرما يرتاح ويبعد ..خاصني نفكر فشي تمخميخة مݣادة لهاد البلان ..

- المهم ماشي هادشي علاش جيت ، أش واقع انت أش تم ؟ فكرتي شنو غادي ديري ولا مزال ؟

- صفاء :

من صباح وحنا كنتسناوها تدوي مزال مهداها الله ..

- مسيرة (قربات بالكرسي حداهم حتى كانت أتدخل فطبلة ، حدرات راسها وكتشوف فكل واحد فيهم بجدية ) :

الخدمة ديال الكاميو لي دويتو عليها غير نساوها ، باش واحد يدير فيك الثقة ويعطيك السوارت راه صعيب ، هادشي كان ساهل فاش كنا فسطات ..

- سكينة :

إيوا وشنو غادي ديري ؟ كاين شي حل بلا هدا ؟

- مسيرة :

هادشي لي فكرت فيه ماعندو علاقة لا بخضرة لا خبز ، و ماعندها حتى علاقة بالخدمة لي كنا كنديرو ... راه شفتو الخدمة مع العيالات فين وصلاتنا ، فيهم اشفاوي ... حزرها راجلها بدبليج مشلل حطاتني بوجهي ، صدقت داخلة فيها لحبس ..

- كريم (كحز الكرسي للقدام ، حك حاجبو وشاف ليها فعينيها ) :

هادشي عرفناه ، عطينا المفيد ..

- مسيرة (دورات راسها على جانبها ورجعات شافت فيهم ) :

الخدمة لي جايبة ليكم ، مكايقد عليها غير جوج ديال الناس ، لي عندو هدا (أشرات لراسها ) ولي ماعندوش هدا (أشرات لقلبها) ..

صفاء (هازة حاجب ومنزلة الثاني) :

شوفي انا جيني لكولشي ، غير لسرقة هي لي عمرها تكون ..

- مسيرة (غوبشات ، كتغزز سنانها ) :

انا بغيتهم يسرقو ليك جنابك لي متكسابيهمش ݣولي أمين ..

- سندس :

عاشورا سكتي وهنينا ..

- صفاء (خنزرات فيها منين عيطات عليها بإسمها الثانوي ، وسكتات ) ..

- كريم (بنفاد صبر ) :

قصري ابنت عباس ..

- مسيرة (بحماس) :

قناة فيوتيوب ..

- سكينة (خرجات عينيها فيها مصدومة حيت عارفاها مزيان مايمكنش دير هادشي لي جا لبالها ) :

مافهمتش واش بغيتي تولي ديري روتيني اليومي ؟

- سندس (كضحك) :

كون اعندها متبين بعدا نقولو هانية ، هي الناس ماعرفوها خشبة ولا السبسي ديال با ..

- كريم (كيمسح على وجهو) :

مافهمتش علاش فيك كترت الدراما ، طلقينا ، ديالاش هاد القناة ؟

- مسيرة :

سمع القناة مغايكون فيها لا روتيني اليوم لا زعتر بلدي ، حنا نيڤو ديالنا ايكون هارب على هادشي ، البلان ومافيه هو انديرو قناة هدفها واحد وهو أي واحد دار شي منتيف كبير يتحط بوجهو ..

- كريم ( كيشوف فيها ) :

مزال لدابا مافهمتش نقصي من تجباد الله يرضي عليك ..

- مسيرة :

غير بشوية غادي تفهم ، دقة دقة متزربش عليا .. هانت سمعني ..

_________________________

- رجع بخطو للور وشاف فيها :

سراج ( كيبان عليه الكالم ، وهو شاد راسو غير بزز باش ميديرش شي حاجة لي ممكن يندم عليها من بعد ) :

كيهمك ؟ لاش كتسولي ؟؟

دنيا :

من حقي نعرف راجلي فين غادي ؟

- سراج ( طلق ضحكة لي خلعاتها ومتوقعاتهاش فهاد الموقف ) :

سبحان الله ، علاش انت مزوجة ، أه نسيت فعلا فعلا أنا راجلك .. متديش عليا حيت شحال هدا نسيت بلي بيناتنا عقد نكاح ..

- دنيا ( مصدومة من وجهو الثاني لي عمرها شافتو ... والفات يكبر بيها ويدير ليها خاطرها ، ويصبر ليها ويضبر لعصبيتها .. ولذل لي كانت كتمارسو عليه .. والفاتو يسكت ويدوزها ليها بجغمة ديال الما ، ومايتفنفنش حداها ، مافخبارهاش بلي داكشي كامل كان صابر ليه وكيديرو غير حيت كيبغيها ، ومباغيش يخسرها .. ولكن لصبر حدود طغات ودابا غادي تخلص على القديم وجديد) :

أنت أنت فيك غير الفم (ولات كدخل وتخرج فالهضرة ) نسيتي يامك ولا نفكرك ، كنتي باغي تحماق باش نتزوج بيك ، كنتي كتموت عليا ... ودرتي المستحيل على قبلي ، من سابع المستحيلات تبعد عليا ولا تشوف من غيري ، حيت مغادي تلقى أصلا ، ومايمكنش مايمكنش شي وحدة تقبل بواحد مطلق .. (كضحك) ..

- سراج الدين مدار حتى رد فعل ، كان واقف كيشوف فيها ، أو بالأحرى كيشوف فهاد الإنسانة لي كان غالط فيها ، حس بشمتة حيت قدات تمتل عليه باش تكسب حبو ليها ..

- حط الساك من يدو وقرب ليها ، كان واقف قدامها عينيه فعينيها ، نزل براسو لمستواها ... قرب من ودنيها وهمس من تحت سنانو :

الى كانو غير بحالك ، ندفنو تحت التراب وندير ليه ݣنازة وأنا فرحان .. الپروصي نعطي عليه فلوس ومايبقاش لاصق ليا فظهري بحال الحدبة .. بعد عليها بشوية وعلى وجهو إبتسامة إشمئزاز ، راجع للدروج هز ساكو وخرج .. بقات واقفة فبلاصتها ، كتحس بالخنقة داتها سخنات عليها ، كتحس بالحكة فشعرها ، وفيديها ..

- مع حل الباب حط فيه ساكو سمع غواتها ، ولكن هاد المرة مامشاش كيجيري لعندها ، إحساس الخوف جيهتها مات .. طلع لطوموبيلتو ، ديمارا وخرج من الڤيلا مكسيري ، هارب منها ومن العبدوية لي كانت معيشاه فيها ..

- حاضياهم بعينيها كتسناهم يݣولو شيحاجة ؟ حتى نطق كريم :

فاش كنتي فالحبس كانو كيطلقو ليكم الأفلام بزاااف ، يمكن طاحت عليك الفكرة من شي مسلسل كيبان ليا ..

- مسيرة ( ببرودة ) :

لا فيلم ، جاتني الفكرة منو وقلت علاش منطبقهاش !!

- كريم :

واش كتريݣلي عليا ولا مال ملتك ، واش كتحسي براسك مزيان حيت انا كيبان ليا جهلتي ، بلاتي نديوك حنا ݣاع على قد عقلك ، واخا من هادي عرفت جد بوك ماعندك عقل ، منين اتجيبي هاد الضواسة ها واحد ، باش اتفضحي هاد خونا هدا ولا ختنا ولا ماعرفت لملت مو ، ياكما اتبعيه بتريبورتور ... على مافراسي داك تريبورتور لي كان عندك راه بعتيه ، أيااه وهاد الناس زعمة مغايعرفوش لادريس ديالك ... راه من البلاصة فين حالة القناة غادي يجبدوك يجبدوك ، فهمتي ولالا ، ولا نزيد نشرح ، راه فحالة وحدة ممكن تسلكي بيها راسك وحدة ..

مسيرة (كدور عينيها على ناس لي شافو لجهتهم) :

- دوي بشوية أزمر ، ناس كيشوفو فينا باغي تشوهنا ..

كريم (جعر) :

واش انت خليتي لجد ملتي العقل (هز ݣارو من البكية لي كانت قدامو دارو ففمو وشعلو ، شاف فسكينة ) :

سدي مناخرك أنت ، [رجع شاف فمسيرة] برب ومكان معاك شي هاكر واااعر ، لا ݣديتي ديري شيحاجة من هاد تخربيق لي كدوي عليه ، باش يݣد ينضي ليك الأمور ، يأمن ليك على الحساب ديالك ، ومايخليش بنادم يعرف عليك راس الخيط ، مايعرفو ساسك من راسك ، غير جي وطبق هاد اللعب ديالك ..

- مسيرة (شافت فسكينة ) :

سكينة تكلف ..

- سندس (شافت فيها مصدومة ) :.

علاش واش سكينة كتعرف شي هاكر ؟

- مسيرة (عينيها على سكينة) :

هي براسها راه هاكر ، غير جات وتشدات ..

سكينة (بشبه إبتسامة ) :

وي وبسباب هادشي دوزت الحبس ، كنت كندخل ليكونط ديال الناس لي لاباس عليهم ، ونجبد معلومات ونعطيهم لداك الشما___/تة لي كنت معاه ، كان كيهدد بيهم دوك الناس ، وكيعطيوه الفلوس ، نهار طلع ليا داكشي فراسي ومابقيتش بغيت نعطيه معلومة وحدة ، بيع بيا للبوليس ، حيت كان تشد واحد من هادوك وديكلارا بيه ، هي فاش حكمو عليا ب 6 شهور دالحبس وغير الزهر وقف معايا ، أما راه كنت غادي ندوز كثر .. غير حيتاش داك السيد دكرو غير هو أما أنا قاليهم مكنعرفهاش ..

- كريم (طفا الكارو لي بقا فيه غير شوية وشاف فمسيرة كيسكانيها بعينيها ) :

داكشي باش كدوي وتايقة فراسك ... ولاو تكون سكينة طيارة ، هادشي راه ريسك أشريفة ، واخا تأمني على حسابك حتى تعياي يجيو نهار ويجبدوك فيه ..

- سندس :

وبلا هادشي ، متنسايش بلي اليوتيوب ايخصهم ضروري العنوان ديالك وحساب بنكي فين يتڤيرساو ليك الفلوس هادي في حالة الى نجحات ليك القناة ..

- مسيرة (بإصرار ) :

القناة غادي تنجح غير تهناي ، حيت مغانديرش غير وحدة اندير زوج ..

- صفاء (غير حالة فيها فمها ) :

أنا أختي مابقيت فاهمة فيك والو ، دماغي حبس ، كيفاش جوج قنوات شوفي ، المرة لولة تشديتي 4 شهور ... دابا راه كتلعبي مع الكبار الحاجة ، راه فيها واحد 15 عام بالقليلة ، ولا يغبروك واحد فزوج ..

- مسيرة :

القناة ديال الخدمة ، ايتلاح فيها الڤيديو غير نتأكدو بلي كولشي ناس شافوه وهزوه ... غادي نمسحو القناة كلها ، وهنا أيجي الدور ديال القناة الثانية ، لي أنبان فيها أنا بوجهي بحال شي وحدة كتستفسر على شكون هي مولات القناة الأولى منين جات ، وكيفاش عرفات هاد الناس ... وغنحط الڤيديو بحال أي وحدة هزاتو ، ويجيو يسدو ليا القناة بحالي بحال ألف صفحة أينشرو الڤيديو ، وحتى الى فرضنا كاع المخزن طالب يتمسح ، انكون ديجا ربحت وراه ديك الساعات الى تمسح هانية ..

- سندس (كتشوف فختها وفلوخرين ) :

كلت ليكم راه مسيرة كتفكر فشيحاجة ماهياش ..

- صفاء :

ياك الالة ، اهاه والى شدوك البوليس وانت ديجا عندك سوابق ، أش غادي تݣولي ليهم ؟

- مسيرة (رجعات بلور دايرة رجل على رجل ) :

ساهلة انا مادرت والو ، دايرة قناة وكيفما شحال من واحد هز الڤيديو هزيتو انا فيها شي عيب .. حتى انا باغية نترزق الله بحالي بحال العباد ، ومع ديجا سوابق حد مابغا يخدمني .. وختاريت هاد الضومين ..

- كريم :

سمعيني أشريفة ، عندك حل واحد الى بغيتي تكملي فهاد الهبال ، ومابغيتيش تحصلي وجن زرݣ مايعرف ليك طريق ، هو كل مرة الڤيديو يتلاح من بلاد .. بحال هكا حد مغايعرف شكون مولات هاد التنوعير .. وكل مرة من پيسي شكل فهمتي البلان ، وهادشي الى بغيتي ديريه خاصك الحبة أبنت عباس ..

- سكينة (كتشوف فيه بجدية ) :

هادشي حالو سااااهل ..

- شافت فيها مسيرة وتبسمات .. من غير لوخرين لي مزال مفاهمين والو خصوصا كريم غايحماق :

كيفاش حالو ساهل ، جاني بحال الى غادية مع هاد خيتي فحماقها ..!!!

سكينة :

فينما حطات مسيرة يديها أنا معاها ، طلب حياتي نعطيها ليها ... وقفات معايا فالحبس ، هاديك بوحدها قصة ... وعاد جابتني لدارهم بين عائلتها وحسباتني ختها ، أي حاجة بغاتها أنا معاها .. واخا يكون فيها الريسك نغامر على قبلها ..

- مسيرة كانت ساكتة وكتسمع مدواتش ..

- سكينة :

اما كيفاش غادي ندير ليها ، ساهل بحال الى كنشرب كاس دالما ، فكل مرة انبغيو نلوحو ڤيديو ، انختارق پيسي فشكل ، وعندي ليكم بلان واااعر ݣاع هههه ... شنو بان ليكم الى كل ڤيديو تلاح ايتلاح من اللپيسي ديال مول الفعلة ، تخايل معايا واحد لايح فيديو من پيسي ديالو كيفضح فيه راسو ولي معاه ..

- صفاء (كتشوف فسكينة بخوف) :

لالا أنا جاني راسي بحال الى غادي نمثل ، فشي فيلم ميريكاني ، كيبان ليا بغيتو تسيفطونا جملة نضربو العدس ..

- سكينة :

ونزيدكم حاجة أخرى ..

- سكينة :

نقدر نخلي الفيديو كل مرة يتلاح من بلاد ... هادشي ساهل بنسبة ليا ماعنديش فيه مشكيل .. والى فكرتو مزيان ، راه مغاديروش شيحاجة ليا هي خايبة ، ياك الخدمة وقلبتو ومالقيتوش ... بالعكس اتكونو كتعاونو المخزن وتسهلو عليهم الطريق ..

- كريم (كيضحك بإستهزاء) :

على أساس المخزن زعمة معارفش شنو واقع ؟ كون بغا كون وااا تشد شحال من واحد ، واش كطنزي على الوقت ..

- سكينة :

لا مكنطنزش (كتدوي بصح) سمع المخزن منين يشوف لي ڤيديو دارو حالة ، وشافهم المغرب كامل ، وماشي غير المغرب راه العالم كامل ، هنا ضروري ما المخزن يتحرك ، غير هكا مايمكنش يغامر بسمعة ديالو وبلي المخزن مدايرش خدمتو فهمتي البلان دابا وفتح معايا مخك شوية .. لا يمكن الواحد يغامر بالواجهة ديالو ..

- العينين تاجهو ليها ، كانت ساكتة ومبسمة ... كتلعب بسبابة ديالها تقادات فالݣلسة ورجعات لنفس الصبع وطرطقاتو ... عادة قديمة عندها الى مدارتهاش ، كتحس براسها ناقصاها شي حاجة ..

- عرفتو علاش ختاريت سكينة ، كتعرف تفكر مزيان وكتفهمني غير من عينيا لشنو بغيت نوصل واخا مدة قليلة باش عرفتها ، قدرات تفهمني (شافت فكريم ) عاجبك حالة باك ، وعاجبك هادشي لي واقع ، واش عاجبك السعودي ومدار فبا ودابا عايش ليا الحياة ، واش عاجبك شحال من بزناز طغا ، وݣالس يبيع لدراري صغار فالويل الكحل ، هادشي كامل وانا كنخمم ليه 4 شهووور هادي ... دورتها فراسي مزيان وحطيت إحتمالات وشنو ممكن يوقع ودابا جا الوقت لي نطبق فيه ، انا حتى واحد مغادي نضربو على يدو ..

- لي بغا يدير يدو فيديا ويكون معايا مرحبا وألف مرحبا ... ولي مابغاش ماعندي ݣرام ديال المشكيل ، الحمد لله قادة بخدمتي وعارفة شنو غادي ندير .. انا وسكينة قاضيين الغراض ..

- سندس (عينيها عليها ، بهدوء جاوبات ) :

حنا من صغرنا على الحارة والحلوة ، واخا كنختالفو بعد المرات ، او واخا كل وحدة فينا وكيفاش كتفكر ، ولكن أختي متنسايش بلي لي كيجمعنا قوي بزااف ، ماشي غير الدم لالا ، شيحاجة كثر وحدة فينا مدوز الثانية ، وحدة كتموت على لوخرا كثر من راسها ، والى وحدة طاحت فالعافية لوخرا كتبعها ، المرة لي فاتت ضرتي فينا وتݣدمتي فيها بوحدك .. هاد المرة حنا معاك وفينما بغات توصل توصل جمافو على مها (تبسمات) ..

- صفاء :

انا ديما كنت معاك ، وحتى دابا انا معاك لي بغيتينا نديروه نديره ، نتلاحو معاك فالعافية وهانية عندي انا بعدا فينما كانو خواتاتي انا معاهم ..

- مسيرة (دورات راسها كتشوف فكريم بدون متنطق ) ..

- كريم (ساهي ، دور عينيه عندها لقاها كتشوف فيه ... ساط معصب) :

عارف راسي واخا نطير ونزل معاك ، كديري غير لي ݣاليك راسك ... انا هادشي مداخلش ليا لراسي ، ومامتقبلوش اباش تكون فبالك .. ولكن منݣدش نخليك فهادشي بوحدك ..

- مسيرة (تبسمات بنصر ) :

ودابا منين تفاهمنا سمعوني وعطيوني ودنيكم ... بدات كتشرح ليهم وهوما معاها عالقرص ، أي حاجة كتݣولها مكتعاودهاش معاهم ، وديجا كتكون دخلات لبهم لدماغ وتحفرات ، الخواتات ب 3 واخا مختالفين فشحال من حاجة ، ولكن حاجة وحدة كيتشابهو فيها هي دكيااات ، ومطورات ومقرصات مايتخافش عليهم ..

- وحدة شافت فلوخرا مصدومة ... كل كلمة تݣالت من فم مسيرة شوكاتهم كتر وكتر ، حيت مظنوش انو طيح عليها فكرة بحال هادي ..

_____________________

*** ولاد السعيد ***

فوحدة من ديور دوار ولاد السعيد ... فراش بسيط بزااف .. ريحة الخبز كتعطي ، ݣالس فبيت الݣلاس حاط قدامو صينية ديال أتاي وكيتفرج فتلفازة .. لابس جلابة فالقهوي ، تحت منها قميجة فالبيض ، كان راجل ف 60 من عمرو .. دور راسو كيطل على المراح واش جايا ولالا .. بدا كيعيط :

- وا نجية ، وتي سربي راسك واش غانباتو هنا أو .. جاوباتو من البيت لاخور :

هانا جايا هاويلي ، بشوية عليا .. خرجات من البيت ، لابسة تكشيطة فالخضر والبيض ، توبها حريري ، فيها الفتاحي من الجناب ، لابسة تحتها سروال فالبيض مطروز بالخضر ، مع شال فدهبي ، مدوزة مرود ديال الكحل فعينيها وسواك فمها .. يد فيها دبالج 6 ديال الذهب .. والبد لوخرا فيها دبليج واحد غليض ، الدݣ القديم ..

- وتعطيلة هادي ، وتݣولي انت هي النفيسة .. وخاصني نكون واا سبقت ونكون مع الرجال ومع القايد ..

- نجية :

وبشوية عليا أخويي ، يلاه يلاه ، بلاتي نلوح عليا ليزار ديالي ونجي ..

- وسربي انا كنتسناك على برا .. متعطليش ..

- سبقها لپيكوپ .. خرجات مسورتة الباب ، ركبات حداه ديمارا وشدو الطريق ..

- نجية (عينيها على الطريق) :

زعمة يجي ؟ وهو ماعدوش مع العرايض وكترت الناس .. ݣوليا أحمد انت مݣاليك والو ؟

- أحمد (عينيه على الطريق) :

واش أنت مزاݣلة ولا هرب ليك الفرخ ، تي شكون انا باش يݣوليا واش انت تخوطرتي ..

- نجية (بزعاف) :

وأنا غير ݣلت ، مالك اخويي باغي اتشد فيا ياك لاباس ؟

- أحمد :

يامس سولتيني ، ودابا تتسولي ، راه دوينا معاك ... ݣلت ليك الله وعلم ، رحال راه عيط ليه وهو الله أعلم واش أيجي ولا ايرضها فوجهو ..

- نجية :

ناري ويجي ، عرفتي راه القايد متݣدو فرحة ، ايولي يتبورض على الشيخ ... السبوع اتولي فيه الروينة ، ومع ݣاع ايكونو بنات الدوار منعاودش لك ..

- أحمد :

ماشي شغلنا ، وسيري ودخلي سوق راسك ، وبقاي شادة ليا نميمة مع مرت جبارة ، ومرت الناجي انا علمتك من هن ، هاودني منك ..

- نجية خنزرات فيه ودورات وجها لجهة السرجم ..

_____________________

صوت الفرارج والبݣر كيعطيك واحد الإحساس براحة ، أما المنظر والخضورية هاديك قصة بوحدها ، لي عندو شي شغل ناض ليه متلقاش شي واحد ݣالس ..خصوصا فهاد النهار لي كان عند ناس الدوار كبير ، حيت ولد القايد رحال لي تزوج العام لي فات ، تزاد عندو دري ، جوج ديال الخزانات كبار بحال شي موسم .. كانو مفرشين بسدادر ديال الموبرا بالكحل وصفر والبيج ... طوابل كبار فالوسط مغطيين بلي ناب بالبيج مطروزين ، فوق كل طبلة محطوطين صواني كبار ديال أتاي ، مع برارد ديال النحاس كباااار ..

- فجهة لوخرا وبضبط فالبيت لي عطاو لطيارة طيب فيه ،مفرشين 3 ديال السدادر عاديين ، ݣالسين عليهم 2 ديال الطيابات .. قدامهم محطوطين 6 ديال الفورنويات ... كل فورنو فوقو ݣاميلة قدها قداش ... ريحة الطياب زينة كتعطي مخلية لي شمها ريوݣو يسيلو ..

- الخزانة ديال الرجال ، نصها عامر .. رحال هو او ولدو سليمان ، واقفين كل واحد فيهم بزيو التقليدي ، كيستقبلو الضيوف ، وهوما عينيهم ومترقبين بلهفة شخص واحد ينورهم .. أما الخزانة الثانية لي كانت مخصصة للعيالات .. كل وحدة فيهم مزرزرة ، ومقادة ومصايبة ، ولي عندها شي بنت لبساتها وجابتها معاها باش تبان ، فين وفين فاش كتكون شي مناسبة ، وهادا ماشي غير سبوع حفيد القايد رحال ... لا هاد المناسبة لي سمعو بلي غايحضر ليها ، وبلي القايد عرض عليه ... خلات اللغط يكثر ، وخلات البنات يحلمو بهاد النهار يجي باش يبانو وينشرو زينهم ، مرابانة قلبو يحن ، ويختار وحدة فبناتهم عروسة ليه ، واخا داكشي لي سمعو عليه كيبورش .. ولكن كيعاودو عليه زييين ، وحروشيتو كتخلي اي وحدة طاحت عينيها عليه تبغيه ..

- رحال (موجه كلامو لولدو) :

زعمة يجي ؟

- سليمان (طلع حجبانو معوج فمو ) :

وهدا عليا الله وعلم ، تا راه سامع عليه بلي ماعدوش مع هاد الوجيبات ... ولكن على ماسمعت مايرضهاش فوجه الواحد .. انا راه اسامع عليه عمري شتو ولا ريتو ..

- رحال (كيحرك راسو ) :

تا واش انا اجيت وعرضت عليه ، أحياني .. عرفتي ويجي الݣراد ايتزادو لينا لبوك .. لي كان يدير لينا حساب ايديرو لينا دابا بضوبل ..

- سليمان (دور راسو لعند باه ، وعلى وجهو علامات الإستغراب) :

وايلي واش تالهاد الدرجة ؟

- رحال (كيشوف فولدو بحال الى مامتيقش شنو ݣال ) :

تا كيبان ليا مݣلوبة عليك الݣفة ، ولا كتي مغيب ... تا واش عارف شكون ولا معارفش ، تا راه باه كان عضو فالمجلس عائلتو من الكوبارضيين .. باه راه كان شان وهمة او ولادو خرجو ليه ... شتي الوزين ديال الزبدة لي فطريق سطات ..

- سليمان : إيه عرفتو ..

- رحال : وراه ديالو .. وماشي هاهو ، عدك هو او الوزين دالفرماج لي فتح العام لي فات ، والأرض لي قبالت العموري ودوك زوج لي محلولين على بعضياتهم ديالو ، وهو لي كيدفع الخضرة للجمالة الكبار ، بلاما ندويو على البهايم ، هادوك بوحدهم وعاد علاما سمعت عدو شي أراضي خرين فوجدة ..

- سليمان (عقلو حبس ، عاد فهم باه علاش كيتسناه يجي وعارض عليه ) :

وكون انا بحالو وعندي لي يتحرݣ مايتم ، منݣلسش هنا ، كوراه عدي ڤيلا فشي مدينة ..

- رحال (خنزر فيه) :

هداك تا ، اما هو راه يموت على ارضو ، واش سهلتي الفيرما ديالو ولالا ، وكون تشوفها راه تلوح ليفيديك ... ويلي ويلي اشمنك يا ڤيلا ، كي لقصر ... كتعاود ليا موك ، كتعاود ليها نجية مرت أحمد ، حيت خدامة عندو هي وراجلها ، وعلى فراش ياولدي على فراش وعلى تواسع ، يسكنو فيها 3 دالعايلات .. خلي الخيل لي عندو وخلي طوموبيلات لي كيسوݣ ..

- سليمان (حس بالغيرة ) :

علاش شحال عدو بسلامة ؟

- رحال : شي جوج ولا 3 ... وحدة مخليها للعروبية ، وحدة ينزل بيها لمدينة ..

- سليمان :

وهادشي كامل دارو وهو عدو 36 ، تلقاه كيتاجر فداك الويل الخضر الحرامي ..

- رحال :

ونوووض نووض ، مكاين شي ويل ݣدك .. الي لاباس عليه راه عرݣ عليهم من صغور ، داكشي باش نيت مزدتيش للݣدام ابداك نص عقيل لي عدك .. سليمان مابقاش جاوب باه ، دور وجهو مغوبش عينيه على دخلة ديال باب دارهم ..

*** الجديدة ***

- فوق السطح ... فالݣليسة لي كانو مقادينها ب 3 ديال السدادر وطبلة الوسط ... ݣالسين حاطين الزريعة البيضة والكحلة ، مسيرة كتنقي ساهية وساكتة ..

- واش مزال متأكدة من كلامك نيت ، ولا اهضرة ودازت ؟ .. هزات راسها فيه واقف داير يديه فجيابو ومقابل معاها ..

- مسيرة (ببرود) :

دوز كول زريعة ماحدها سخونة ... تبسم وحدر راسو ݣلس حداها وبدا ينقب فزريعة ، واحد الحالة ديال الترقب كانت على البنات ، يديهم خدامة كتنقي فزريعة ، وعينيهم على مسيرة وألالاف التسائلات فبالهم ، ولكن بغاو الضو الخضر من ختهم باش كل وحدة تسول سؤال لي بغات ..

- كريم (أشر بحجبانو لخواتاتها ) :

سامرين عليك ، كيتسناو أفين يضورو بيك ..

- مسيرة (دارت رجل على رجل وتبسمات ) :

هادشي كيخصو الواحد يفكر فيه مزيان ، ماشي غير جي وطيح ... وماشي كولشي ايتحطو وراقيه من ديپار ، راه نهار على نهار كل واحد ايعرف لي عليه ..

- سكينة (بتساؤل)

بغيت غير نسولك عارفاني فضولية ..

- مسيرة :

سولي ..

سكينة :

كيفاش حتى طاح ليك هادشي فراسك ، راه حتى واحد عمرو طيح ليه فالبال هادشي لي ناوية ديري ، زعمة علاش مكملتي فداكشي لي كنتي كديري ، ولا تشوفي شي خضار تعاملي معاه ويتعامل معاك ، بلا صداع الراس وتريسكي بحياتك ..

- مسيرة ( طرطقات أصبع السباب بحال عادتها ، مدوزة لسانها على شفايفها لاحسة ملوحة الزريعة ) :

الخدمة مع العيالات فيها المشاكل وصداع الراس ، راه عاودت ليك .. خصوصا داك النوع لي كيكونو جناوحو قصار ، ماعندهاش لي يصرف عليها راجلها عارف نقطة ضعفها ، جاب ليها كادو ماعرفاتو ذهب ولا مشلل ، ناضت حطاتني بوجهي دوزناها حباسات .. مزال انا نتيق أبدا ..

- أما على ود الخضرة والخضارة ، ايبقى يحرت عليك يعطيك جوج دريال ، عاد يقد يتيق بيك ، واصلا مايخدمكش ݣاع هو ، يخدم الرجال العيالات لا .. راه فسطات السيد كان كيعرف با ... وعلى شحال ضربت عندو عاد درت كروستي ، فهمتيني ..

- أما علاش هاد القضية طاحت ليا فراسي ، قبل ݣاعما نعرف بلي با مزال مانسى فقصة السعودي وشنو دار ليه ، عقلتي على حفيظة لي كانت معانا فشومبر ؟

- سكينة (تفكراتها) :

ناري مسكينة ، عرفتي لي وقع ليها راه عمري نساه ..

- صفاء (كتبحت) :

شكون هادي مالها مسكينة ؟

- سكينة (شافت فصفاء ) :

واحد البنت ياختي شهوة منها ، فنة فنة والله ماتستاهل داك الحبس لي دخلات ليه ظلما وعدوانا ، الله ياخود الحق فلي كان حيلة وسباب وصافي .. (شافت فمسيرة ) عاودي ليهم ، انت راه عاودات ليك بتفصيل ... انا كنت مشيت لطواليط فداك الوقت انت لي عاودتي ليا ..

- مسيرة (كتنقي فزريعة وتلوح بفمها ، تقادات فالݣلسة وتقابلات معاهم كتعاود ) :

كانت لحسك طايحة مع شي محامي وااعر ومعروف ... كانت جايا اعلى قضية باها ، البنت شهوة منها شهبة كحمق تقولي غير ݣاورية ، سيد أشافها خرجو عينيه ... بقا عليها انعاونك انعاون باك تيقي فيا ، حتى لحس ليها مخها والبنت بغاتو ، مع الكل__ب عاطي للعين طيحها ، وهي غير نية وماشي بنت كازا ، بنت بني ملال ... راكوم عارفين زين الملالي ، إيوا صافي ولات معاه ... واعدها بزواج ، حتى نهار لي كلا ليها دماغها وداها لواحد الكبانو عندو حدا البحر ، قضا غراضو وصورها ..

- صفاء (تفكرات المحامي لي كانت كدوز عندو سطاج ) :

ناري ياختي لحمي بورش عليا ، تفكرت داك الحي__وان ديال داك المحامي لي كنت عندو ..

- مسيرة (رجعات بلور مسندة ظهرها على المخدة ) :

إيوا يلالة ، الصدمة هي نهار شافتو غير پارازار نازل من طوموبيلتو هو او مرتو او ولادو ، منين مشات تحيح عليه من بعد وراها الڤيديو لي صور ليها ، والك__لب لبق ليها مونتيف متحس بالبوليس موقفينها شدوها قلبوها لقاو عندها طريفة فساك ، هي فاش تشادت وهو مول الفعلة ، عرفتو بقات فيا قسما بالله العظيم قطعات ليا قلبي .. هي راه مزال ليها 4 شهور وتخرج ، وشوف كيفاش اتبدا حياتها ... وهو راه عايش ليا الحياة مفيك مع راسو ..

- كريم (ماحسش براسو شنو كيݣول دخان ايخرج ليه من نيوفو ) :

ولد ال**** مقطر هدا ..

- مسيرة : وهذا شنو خاصو دابا ؟

- كريم :

أحشمت قدام البنات ، اما نݣوليك شنو خاصو ، دابا هدا متقبرش مو ، تخشي لمو سفود حامي ، تݣلسو عليه باش عمرو يطوف ببنات الناس ..

- مسيرة :

هو فعلا حتى هي غلطات حيتاش ترخات ليه ، ولكن كتاب عليها والمشكيل منها عدد تلقاهم دار ليهم نفس الشي ، ولكن مقادينش يدويو ..

- سكينة :

واش فخبارك بلي السعودي حتى هو هكا ؟؟

- مسيرة (ربعات رجليها ودنيها وحواسها كلهم مع سكينة وكلامها ) :

حلفي ، قولي أقسم بالله ..

- سكينة :

أقسم لك بالله أختي ، الى سعودي بحال هكا ... عندو بتيت ڤيلا فدار بوعزة ، كيدي ليها غير البنات الصغارات ، ماليات 17 عام .. كيمشي يتكوانة حدا الليسي ، كيبانو ليه دوك البنات البطبوطات ، لي كيكونو بيوضات وفاخرات وعاطيات للعين ، وكيفرق عليهم باكي دشكلاط الغالي ، كيعمر الطوموبيل ، بشكلاط ها فيريرو ها ميلكا ، ويبدا يفرق عليهم ..

- منين كيطمع البنت ويلعب بدماغها ، راكي عارفة المراهقات ... صافي كتيق فيه وكيتحلو عينيها مسكينة ، كيولي يجيب ليها فالكادويات ... والمرحلة الثالثة يديهم للڤيلا وتما السيد مركب الكاميرات ، كيعريها كيف ولداتها مها ، ويصورها ومن بعد كيولي يهددها ، إوا هي مسكينة ماعندها مدير من غير داكشي لي طلب منها ..

- مسيرة [بغل] :

ولايني حيوان هدا ، وأنت باش عرفتي هادشي أطيطڤيط؟؟

- سكينة :

قبل مدخلي انت للحبس ، كانت معايا واحد البنت فشومبر ، ولكن حولوها لجناح أخر ... ختها دار ليها نفس البلان ، وهاد ختها لي كان محبوسة معايا ، مكتصبرش ، مشات ليه زعمة بغات تاخود حق ختها ... عند بالها بلي ساهل ليها ، وا ولد الحرام لبق ليها مونتيف ، سيفطها نيشان ... راه هداك واحد الجلاخة مايقد عليه غير الله .

- صفاء :

قوليها ليها ، لي ݣالت ليك بغات تبدا بيه هو الاول ..

- سكينة (كتشير بيديها ) :

بلات بلات ، السعودي راه مايقد عليه غير الله وشخص أخور .. مرتو ، كيموت منها كيترعد منها .. حيت باها نهار لي تزوج بيها السعودي راه كان اخدام عندو ..

- سندس : ياك قلتي كان ورث ..

- سكينة :

وماشي هو راه هداك لي كنت معاه لي كان ورت انت مالك غادية بريح مݣلوب .. السعودي راه كان اموظف صغير فشركة ديال العمران ديال بات مراتو ، طيحها وتزوج بيها وهي راه كبر منو ب 5 سنين ، وباها كاتب ليها كولشي بسميتها .. راه ديك الفيلا لي داير تسيف ليه الخبار ، ناااري قفرها ..

- مسيرة (كتنقي زريعة وكضحك) .. شافو فيها بإستغراب من غير كريم ..

- تبان ليكم كتفرنس ، عرفوها طاحت عليها شي فكرة بحال كمارتها ..

- مسيرة (تكرشخات بضحك حتى دمعو عينيها ) :

وكواك الحق ، ناري وسبحان الله وداكشي اتيسير الله وصافي ، انا كنقلب كيفاش نبالي بيه ، حتى جاني داكشي أبوحدو ..

- صفاء :

بغيتي تشريها ليه مع مرتو ؟

- مسيرة :

أنشريها ليه مع دنيا كاملة ماشي غير المغرب ، انخلي طواسلو على الضس ... مايقدش يهز الراس مايقدش يقلب من ورايا بريق الناشف ، مغاديش نخلي ليه الجهد غير بلاتي ، الى ماوريتو بنت عباس علاش قادة .. غير اجيو عند وجهي ودفلو ..

- صفاء (كتفرنس) :

نكدب عليك ، بغيتها فيه على الويل لي شفناه فاش با طاح مسكين ، وݣلس من الخدمة مالقينا لا حنين لا رحيم كونماشي كريم لي كان معانا ، كون خرانا مايجمعوه شرواط ..

- سندس (نفاعلات) :

بغيت ليه مصيبة تجيه فعضامو ، مايهز فيها الراس ..

- مسيرة :

أنا هي المصيبة الكحلة ، وسوسة لي ادخل فحياتو مانخرج منها حتى نريبها غير بلات ..

- فدار التحت ..

- معزوزة (مغوبشة ) :

تي فين هاد المسخوط ديال خوك ، سيفطناه يعيط ليهم يتغداو سكن ، واش هو ديما سخرتو لاروب يخخخ على ݣنس قصيف ..

- سعاد (تنهدات شادة فحنكها ) :

هدا هو حالو ، تسيفطيه لشي قنت يݣلس ليك عام عاد يجي ، (خنزرات فعباس كتشوف فيه) ..

- عباس (كيشوف فيها ) :

كوليني كوليني ، ياك لاباس عينيك دايرين بحال ديك المكحلة ديال الصيد يلاطيف اللوطف ..

- سعاد : متكون غير انت لي سخرتيه لشي قنت ، راه كنعرفك ..

- عباس (حاط يديه على عوكازو ) :

خوك ملاوط فسخرتو وانا مالي ، اش دخلني ... كتعرفو اتحطو على بنادم الباطل ، نوضي شوفيه فين مشا ..

- معزوزة (هزات بلغتها من الأرض شيرات عليه) :

ومالك متنوض انت ، محنيين ليك ولا مختنينك ، مابقاتش فيك لي من صباح واقفة فكوزينة توجد ليك متحنجر وانا بغيتو يوحل ليك فركابي ݣول امين ..

- عباس (مغوبش ) :

واااا الواليدة وا لواليدة ، واش انا باقي ديال الضرب فعمري 64 عام ولا ولا ..

- معزوزة (كتخنزر فيه بعيينيها لي مكحلين ، بينو حدة لونهم الحقيقي وسحرهم ، لي كان باين بلي فصغرها كانت زوينة ، عندها عينين كيأتيريو ، فاش كتشوفيها اول حاجة كيمشيو ليها عينيك هوما عينيها ) :

واتاااا نوووووض أساقيزو ، العصا لمن عصا أوليدي واخا تكون عندك حتى 70 عام ، الى ماربيتك فصغرك نربيك فكبرك أوليدي ماعندي مايدار انا ، ونووووض شوف داك العجل فين تعطل بغيتهم ينوضو فيك يريشوك ݣول أمين ...

- ناض عباس على سعدو او وعدو ، كولشي حتى لمو مزال لدابا كيخاف منها ومن دعاويها ، عزيزة عليه بزاااف مكايقدش يتفنفن قدامها ولا يهرس كلمتها ، مكايخلي حتى واحد يغلط معاه ولا يعايرو حتى ليها هي ، متخلي معيورة متعايروش بيها ، مكايهزش الراس .. طلع فدروج بشوية عليه بحكم رجليه ، حتى كيبان ليه دريس حاني راسو او واقف ورا الباب ديال السطح وكيتسنط ..

- وقف كيشوف فيه بإستغراب ، هز عكازو ونغزو بيه فظهرو ... أدريس قفز وظار ، غير شاف عباس ، وأشر ليه بيدو لجهة فمو بمعنى سكت ... عباس مافهم والو ، طلع دوك جوج درجات لي بقاو ، او وقف جنب أدريس كايحاول يفهم شنو واقع ..

صفاء :

بابا كان باغي يجبد على راسو النحل وعلينا ، راه ݣاعما ݣالها لينا مامشا غير لخالي دريس ..

- سندس :

حيتاش خالي ، كايخاف منو مايقدش يݣوليه لا ... بابا مطور مع راسو ... داكشي باش ماجبدش حس هادشي قدامنا .. عارفنا مغنبغيوش وجدة تسمعو تنݣدو ليه ..

- سكينة : هادوك راه سلعة وحدة ، بحالو بحال ولد خوه ..

- كريم (هز كمايم لا شوميز وشاف فمسيرة بجدية) :

دابا أنت أتبداي بسعودي ... واش ناوية طلعي بوجهك ولا غير بصوت ؟ وانا شنو باغة مني بضبط ؟

- مسيرة (تبسمات بحال الى حققات إنجاز واخا مزال مدارت والو ، مزال معارفاش واش هادشي ايصدق واش ايخرج على خير واش اتفلت منها ، المهم هو كتحس بواحد الحماس ، الفرشات كيلعبو فكرشها ... واخا يوقف لي يوقف فطريقها متحبسش على هادشي لي كتفكر فيه ومقرراه ..)

عومااااار ، الفلوس ... غادي نسيزيوك واحد الشوية ، ولكن مغايبانش عليك تبارك الله راك شابع مصاري ..

- كريم (كينݣر ) :

بسم الله الرحمن الرحيم ، بدينا يالاطيف هاتبيع بدا .. دابا هاد لافير كاملها شحال ايخصك فيها بدرهم ؟

- مسيرة :

ايخصنا پيسي بعدا ، وديكور لي انخدمو عليه ، والحوايج .. يعني واحد 10000 درهم هكاك ..

- كريم (رجع بظهرو لور وتبسم ، بحال الى ماشي هو لي كان كيتناݣر معاها دابا) :

الپيسي حسبيه عندك ، وحتى الفلوس حسبيهم فجيبك ... ولكن على اشمن حوايج كدوي أش بغيتي تصنعي بيهم ؟

- مسيرة (تبسمات بخبث ) :

ودابا واش من نيتك انا ، انبان فالقناة بوجهي ... مالك حماقيتي ولا حفا ليك القرشال

- كريم :

وهادشي علاش سولناك ؟؟

- مسيرة(جمعات شعرها بستيلو ورجعات بظهرها لور متكية) :

القناة ايخصها ماطرييل .. وهاد المطرييل هو حوايج جداد ومغير الصوت .. وهادشي أتكلف بيه سندس ..

- سندس (تبسمات وضو ديال الحماس شعل فعينيها ) :

تهناي ، قولي ليا غير البياسات لي بغيتي ، يسيفطهم ليا الحاج فالامانة ..

- مسيرة (هزات مخدة حطاتها على رجليها معنقاها ) :

بغيت شيحاجة تكون كتبدل الصوت ، وبغيت شي كسوة ديال عرس بيضة تكون قدييييمة ، وشي صباعيات ديال جلد ... بغيتهم بحال ديال يدين بنادم ولكن ديال شي حد كبييير فالعمر ، بيروكة والڤوال ديال العروسة ، وبنسبة للوجه ... شيحاجة تكون ديال شي وحدة شاااارفة ، واتصرعيه الى قديم ومافيه مايتشاف ..

- صفاء (كتحقق فيها ، سهات بحال الى كتحاول تفكر شيحاجة ) :

ماعرفتش علاش هاد اللبسة هادي ، فكراتني بشيحاجة ولكن ماعقلتش ياختي !!

- سكينة (عينيها على الطبلة ساهية ، او ودنيها معاهم هزات عينيها فمسيرة بحال الى مامتيقاهاش ) :

متݣوليش ليا هالعار ، بغيتي طلعي فالقناة بديك اللبسة ديال المرأة المجرمة ، ثمار الحب ..

- صفاء (تقادات فالكلسة ) :

أيااااه هدا هو المسلسل المكسيكي لي كنا عاودناه يااااك ؟؟؟

- سندس (حلات عينيها مزيان ، وضحكااات ) :

ناااااري ياختي انت خطيييييرة ، عندك شي أفكار كيخلعو ...

- مسيرة (دارت رجليها على طبلة لي قدامها حكات حاجبها ونطقات ) :

منين كتبغي ديري الحاجة ، خاصك تفكري وتخططي ليها شحال فهمتي البلان .. ولكن صبرو عليا شوية راه زربتو عليا الإخوان .. راه مخاصنيش اللبسة وحدة خاصني لبسات هوما ، الغرض لي عندي هو لي يتفرج فالڤيديو يحسابليه بلي راجل لي كيدوي ماشي بنت ، وفكل مرة انطل بلبسة شكل وصوت رجولي شكل ..

كريم :

باش يحسابليهم بلي القناة مشادهاش اواحد فيها بزاف ديال الناس ..

- مسيرة (غمزاتو) :

هانتا فهمتيني ، كل مرة طالع ليهم راجل شكل ، ايحسابليهم بلي شي عصابة لي شادة القناة مغايجيهمش لبالهم نهائيا ، بلي ݣاع دوك رجال هوما راه شخص واحد ، وفالحقيقة هي راها بنت ..

- سكينة (وقفات كتصفق) :

لالا الإخوان هنا سأصمت قليلا وارفع قبعتي إحتراما لهاته الفتاة الجميلة ...

- مسيرة (كدبل فعينيها ) :

احم احم شكرا شكرا ههههه .. ودابا هادشي كامل ومزال يحسابليكم ايقدو يشدونا ، واواخا يديرو لي داروه مايقدوش ..

- سندس : فكرتي فسمية للقناة ؟

وقفات طوموبيل نوع jeep grand cherokee قدام الباب الكبير لدار رحال .. من جهة الأخرى كانو واقفين شي رجال من بعيد هازين يدهم مدرقين عينيهم من الشمس ، حااضين الطريق ، غا لمح واحد فيهم الطموبيل وهو يهز جلابيتو مدردك وينوح بسمية رحال :

واااااا رحااااال وووو واااااااااا رحاااال

- (خرج رحال عندو عاقد غوباشتو ) :

وت مالك جاي وتلغط ؟ جارين عليك الكلاب ؟ امالك ساااير تنبح ياك شي باس ماكين ؟

- (كيهث) :

وااااا واااا (كيحاول يرجع النفس) وت وت واااااا راااااه جاااااااو وت راه جااااااا

- رحال ( بقلة صبر) :

وتجيك السخانة الباااردة ( بغوات) واات شكووون جااااا

- (شاد على صدرو حتى بدا كيرجع ليه النفس ونطق ) :

واا سي جلال سي جلال ..

- غا سمع السمية ماشعر براسو حتى دفعو و زاد كيجري مخليه يبرح و ينوح موصل الخباار للناس ... ما جا رحال يوصل حتى بدا كيتسمع صوت البارود في السمااء .. تمو خارجين شي رجال و عيالات من الخزانة فرحانين ويهللو بحال شي موسم ، كلشي فرحان و كلشي كيتسنى قدومه .. بالنسبة ليهم معجزة باش يلبي الدعوة ويجي ، هو لي مخدمهم و مهلي فيهم ماد يدو لجميع النااس ، وعمرو مابخل ولا رد شي حد دق بابو .. معروف عليه ولد الخير .. حقاني مايتعدا مايبغي لي يتعدا .. عمرهم شافو منو العيب ولا جا منه .. وحتى هما عارفين بقيمتو .. ودايرين ليه ألف حساب ..ولا كلمة كتجي ورا كلمتو و ما سماو عليهم سيدهم حتى سيدهم .. راجل يحنت الرجال ..

- وقف رحال مع الرجال .. مقابلين مع الطوموبيل ..مشا احمد كيجري جهة الطوموبيل مݣفض على جلابيتو ..فتح ليه الباب ووقف مخليه يترجل منها على خاطر خاطرو ...

بكل نخوة هز يدو رافع نظارتو الشمسية السوداء من على عينيه .. عيون واسعة حادة لونهم لون القهوة مايلين للأسود ، وبكثرة ما رموشهم كثار كيبانو ناعسين ... عاطيينو واحد النظرة خطيرة ، ماتعرف نظراتهم واش باردة ولا قاصحة ولا حنينة .. بكل بساطة نظراتو غامضة .. لحيته خفيفة عادية زايداه هبة ورجولة ، لون بشرتو قمحية .. لباسو عادي قميجة فلون الأصفر الكناري بارد مخططة ، مع دجين كحل و ݣاط أسود .. وهكاك مواتيه ومبين فصالتو وعرضو وطولتو، واخد حقو فالزين وكثر .. عاد الكاريزما وشخصيتو القوية كتخلي الواحد بدوون شعور يخاف و يعطيه قيمة .

- سد باب الطوموبيل .. ووقف مزين وجهو بابتسامة سااحرة .. مد يدو مسلم بيها على رحال ، ويدو الثانية حطها على كتفو مربت عليه ...

بصوت جوهري رخم :

- كيقولو السبع مااحدو يكبر وهو يخلع ( ربت على كتاافه ببشاشة ) أمبروك الزيادة أبا رحال ..

- رحاال كيحرك في راسه ويهضر ويبتاسم ما قاداه فرحة :

- ربي ينصرك اسي جلال ..

- ضار رحال جهة ولدو لي كان واقف جنبهم غامزو باش يزيد يسلم .. لي من بعد ما شاف فباه و تبسم وتقدم جهة جلال ..

- سليمان : امرحباوو بسي جلال ، مرحباااو ... واش هاد الغيباو (واخا عمرو شافو ولا تلاقى بيه ، ولكن على وجه باه باغي يبان ) ت مجيتك عدنا وا قداااش ..

- جلال( رد عليه السلام) :

ربي يخليك ابا سليمان ... مبروك عليك الراجل ..

سليمان (بفخر) :

واا الله يباارك فيك .. اسي جلال ، والرجال مايولدو غا الرجال .. (بتعالي) القايد والد غا الرجال .. وولدو مايجيب من صلبه غا راجل ولد راجل ولا لا اسيد رجال؟

- (تبسم جلال بهدوء وشاف فيه بعيون نايمين ) :

الرجلة ماشي باش ما جادو باك وجدودك الرجلة ... (حط يديه بزوج مربت على كتافو) باش ما جادو هادو (كيعني كتافو) (زاد ربت على كتافو بحال إلى نافض الغبرة منهم) يتربى في عزكم .. نتمناوه يطلع راجل بحال جدو ..

- قاطع حديثهم رحال بتهليلو و غواتو :

و غنبقاو واقفين هنا تحت الحرنة و النار تكدي .. زيد ندخلو الخيمة و نكملو الهضرة .. (تسوخر اللور مخلي جلال في المقدمة مخلينو ساابق ) أمرحبا بسي جلال ... امرحبااااا.. يااوزارتنا البركة .. امرحبااااو ..

- داروه هو الوسط ، وهوما دارو بيه ... لي دخل كيجي لعندو يسلم عليه ويرحب بيه ، بحال الى هو لي عندو السبوع ماشي سليمان ، وهادشي خلاه يتعصب غير مابغاش يبين لباه ... خايف من سخطو ، الخيمة لي كانت ملاصقة معاهم ، ولي كانت مخصصة للعيالات .. بنات الدوار مدورين شيلان على وجاهم وكيطلو عليه بنص عين ، وجهم مزنݣ وحشمانات وقلبهم كيضربهم ، بنسبة لكل وحدة فيهم كان جلال هو فارس أحلامها ، بحال رسوم ديال ساندريلا ..

- البنت 1 :

شفتوه يالبنات ، ناااري مزينو رااجل ... سعدات لي غاتديه ..

- البنت 2 :

انا بعدا يكون زماني نخدمو بعويناتي ، منݣولش أه مصاب أشوفة وحدة من عويناتو .. واش هدا هو لي كيسميوه البغو ؟

- البنت 3 :

واتوما نوضو من الݣلبة ، على ماسمعت بلي القايد رحال ، سامر عليه على ود بنتو لطيفة ..

- البنت 1 :

ياويلي ، من نيتك مالقى مايدي ، أديك الحولة كرضة الشعر ، لاواه موحال ..

- البنت 3 :

البنات البنات تغطاو تغطاو القايد رحال جاي .. كل وحدة فيهم رجعات لبلاصتها ، بحال الى ماشي هوما لي كانو مبحلقين عينيهم فجلال ..

_________________________

*** الدار البيضاء ***

قدام ريسطو راقية فعين الدياب ، وقفات طوموبيل رونج كحلة ... تحل الباب ، نزل من شخص لابس كحل فكحل .. سروال كيبري ، بدلة كلاسيكية مع ساعة فنفس اللون ، سد الباب عاقد غوباشتو ، عينيه كبار .. رموش طوال كحلين ، لحية سوداء زادتو جادبية رجولة ، بشرة بيضاء .. يكون شخص فأواخر الثلاثينات .. غير شافو الݣارد جا كيجري عندو ... حدر ليه راسو ونطق :

- مرحبا بيك أسي هلال ..

- عطاه السوارت ودخل الداخل ، الريسطو مزال ماعمرات ... حتى كتوصل العشية عاد كتبدا تعمر بناس ، مشا نيشان للشومبر ديالو ، دخل وسد عليه الباب ، زول لاڤيست ، رماها على النموسية ، حيد باقي حوايجو ودخل الدوش ، طلق عليه الرشاشة ... بقا مدة وهو حاط يديه على الحيط والما نازل عليه ، حتى حس براسو رجع هو هداك ... سد الما وخدا الفوطة لواها عليه وخرج ، نشف راسو لبس عليه كيطمة فالݣري .. خدا ݣيتار كان محطوط حداه ، ݣلس وبدا يلعب بأنامل صباعو ..

- بدا تيليفونو كيصوني ، حبس العزف ... خدا تيليفون طلعات ليه نمرة مو (بعد ثواني فتح الخط ) :

[بصوت رجولي تقيل ] :

عارف راسي تعطلت ... عطيني يوماين نكمل الخدمة لي عندي وغادي نجي ..

- ماريا (تنهدات تنهيدة طويلة ) :

والدة الولاد بحال الى ماولدهامش أولدي ، هاد الرباط مابقيتش كنحملها حيت كتخطفك مني ..

- هلال (بشبه إبتسامة) :

الخدمة الواليدة ، الخدمة لي شداني .. انت عارفة مزيان ماعنديش مع زحام ..

- ماريا :

عارفة اولدي ، يلاه سير تهلا فراسك ورد للبال لراسك ... الله يعاونك ويسهل عليك ..

- هلال : اللهم أمين ..

قطع معاها الخط ، حط التيليفون .. ورجع هز الݣيتار ديالو ، بعد مدة ، تدق الباب ... رجع حبس :

دخل ... تحل الباب ، وطلات مرأة تكون فالأربعينات ، أنيقة وعلى وجها إبتسامة :

ياكما صدعتك ، بغيت غير نطمن عليك ، ونفكرك بساعة لي خاص طلع فيها ..

- هلال (ببرودة ) :

عارف مزيان معاش كنطلع أمدام لبنى ، ماشي أول مرة هادي ... واخر مرة شي حد يدق عليا الباب حتى نخرج ..

- لبنى (بإعتذار ) :

واخا مايكون غير خاطرك موسيو هلال ، خليت ليك الراحة ... رجعات بلور وسدات الباب .

- رجع للعزف ديالو بحال الى ماشي هو دابا لي كان معصب ، وغوت على السيدة ... كيجس بالݣيتار بين يديه بحال شي قطعة زجاجية فخمة خايفة عليها لا تهرس .. حبس العزف وتنهد تنهيدة طويلة ، هاز راسو للسقف وملامح وجها كيتدكرهم ومزال محفورين بين عينيه ..

________________

ليسَ

الشِّتاءُ وحدُه مَوسِّم البَرد..؛

فَـ الجفَاءُ بَرد والخيبَةُ بَرد والخِذلان بَرد..،

والفِراق بَرد وگسرُ الخواطرِ بَرد..،

وبَردُ الرُّوحِ أبشَع من بَرد الجسَد..!!

الطِّمأنِينَة دِفء والأمَان دِفء وجبر الخواطرِ دِفء..؛

فَـ أمطِروا علىٰ مَن تُحِبُّون بِـ دِفءٍ دائِم..؛

فإنَّ القُلوبَ إذا جفَّت صَدأت ثُم إهتَرأت ثُم قسَت ..!!

___________________

- صفاء :

ماݣلتيش لينا شنو غادي تسمي القناة ؟؟

- مسيرة (تقادات فالݣلسة ، وبعد عدة ثواني ديال السكات نطقات ) :

انسميها RUBY VIRIDJO ..

- صفاء (كتشوف فمسيرة بإستفهام ) :

بلاتي بلاتي ماشي هادي هي كنيتنا القديمة ؟

- مسيرة :

أه كنيتنا القديمة ..

- سكينة (هزات حجبانها بصدمة كتشوفيهم ) :

بلاتي كيفاش هادشي ؟ واش كنيتكم ڤيريدجو ... هاد الكنية ماشي لاتينية لا ؟ مافهمتش !!

- سندس (ضرها ظهرها من كترت مكانت مقوسة ، رجعات بيه اللور وهزات واحد اللحاف لواتو على راسها ) :

كااااانت كنيتنا مابقاتش .. جدي الله يرحمو ويوسع عليه برتغالي .. جا المغرب وهو صغييير ، وخدم هنا وعاش هنا ، وتزوج بجدة حيت كانت بنت السيد لي كان خدام عندو ، ومع عندو بنت وحدة وجدي كان معقول زوجها ليه ، ولكن قبل لا يتزوجها شرط عليه يسلم ، وفعلا سلم وبدل سميتو وحتى كنيتو ... من ڤيريدجو رجعها فريدي ..

- سكينة (عوجات فمها بإستغراب ) :

انتوما عائلة فشكل والله هههه ، سبحان الله العظيم .. ولكن الصراحة عجبني عنوان القناة روبي ڤيريدجو ، واااعر بجهد ..

- كريم (كيشوف فيها ) :

علاش روبي بضبط ؟ نݣولو فيريدجو كنيتكم القديمة وروبي منين خرجات ليك هاد السمية ..

مسيرة (ساهية وحاطة يدها على عنقها وبضبط على السلسلة المدهبة السامبل لي مزيناه) :

حتى سمية مغاتجيش غير هكاك ، ضروري تكون وراها شي قصة ..

- صفاء (كضحك) :

شنو ايكون ورا سمية روبي ، كنعرف جوج ناس بهاد الإسم ، المغنية المصرية ، والمسلسل ديال روبي ..

- مسيرة (بلاما تحرك راسها ، حركات غير عينيها جيهتها ) :

ماما فاش عرفات راسها حاملة ببنت ، كانت ناوية تسميني روبي ، ماشي غير هكاك ..

- كريم يلاه باغي يدوي ، قاطعو حس العكاز ، صفاء شهقات او وقفات مخلوعة ... لا هي لا سندس ، على عكس مسيرة لي بقات ݣالسة وكتشوف فباها ، جاي قبالتهم مدواش نهائيا ، ݣلس بشوية عليه او وراه دريس كيشوف فيهم ... بقا مدة ساكت وشاد عكازو بيديه .. دور راسو كيستنشق الهوى ، مخلي لي معاه كيتسناو بفارغ الصبر شنو ممكن يݣول ، زعمة يكون سمع كولشي ... ماعرفوش بضبط فاش كيفكر ولا لاش كيبلاني وشنو سر الحركة لي دار ..

- سندس وصفاء كانو خايفين لا يكون باهم ودريس سمعو ݣاع لي ناويين عليه ، الخدمة الاولى كانو موافقين عليها ومشاركين فيها ، حيت جاتهم واخا هكاك مافيهاش خطر كبير ، أما هاد المرة راه يمشيو للحبس بعينيهم مغمضين .. ولدابا باهم مزال منطق بحرف واحد يرحم خوفهم منو ..

____________________

- تحطو صواني ديال اتاي ، والحلاوي شكال والانواع كولشي بلدي ديال الدار ، ريحة البخور معمرة الخيام ... رحال فرحتو مقاداهش .. يدور يدور ويرحب بجلال :

واااا سي جلال ، واتا راه هاد المجية ديالك لعدنا بدنيا ومافيها ..

- جلال (بإبتسامة جانبية) :

وعلاش منجيش أسي رحال ... الواجب حنا ماليه ولالا ؟

- رحال :

هذا هو المضمون فك .. الله يخليك لينا تاج فوق راسنا ..

- جلال :

تاجنا وتاجك هو المعقول أسي رحال ..

- رحال :

عندك الصح اسي جلال كاينة .. منتسالكشاي .. واا علال واتا كب أتاي لسي جلال هاويلي تا شفتك تصهطي ..

- علال حشم وحدر راسو ، كب اتاي ومدو لجلال ..

هاك أسي جلال ..

جلال :

شد عندو الكاس ، جغم منو وسكت ، هز عينو فرحال .. هز حاجب ونزل الثاني :

سي رحال .. مدح صاحبك مع الناس ، ولومو راس فراس ..

- رحال تحرج وحدر راسو مابقاش هزو ولا دوا ... عرف بلي مخاصوش يدوي مع علال بديك الطريقة وقدام جلال .. وقف خارج من الخيمة كيغوت على العيالات باش تحط الماكلة ..

- جلال حط كاسو وشاف جهة أحمد ، لي غير أشر ليه بعينيه جا كيجري ݣلس حداه ..

- جلال [عينيه على برا وفمو مع أحمد ] :

درتي لي ݣلت ليك ؟

- احمد :

كون هاني اسي جلال ، مع حطيت رجلي عد رحال عطيتو الأمانة ..

- تبسم وربت على كتافو على الخدمة لي عطاه ودارها تم تم

- إفران

- فقهوة پالوما الخاصة بنساء ، حبسات طوموبيل نوع ميرسيديس كحلة قدام باب القهوة ، نزلات بكامل أناقتها فطقم فالابيض ، مع شوميز مشبك ... شعرها جامعاه ديل حصان مع تموجات خفاف ، مع باقي الإكسيسوارات .. دخلات للقهوة لي كانت عامرة بحال ديما ، مشات نيشان للبيرو ديالها وݣلسات من بعد دقائق قليلة ، تدق الباب ودخلات بنت فالاواسط العشرينات ، لابسة يونوفورم ديال الخدمة فالغوز وعليه إسم القهوة ..

- القهوة بحال كيما كتبغيها ..

- أمينة (بإبتسامة ) :

شكرا أسية ، جبتيها فوقتها ..

- أسية (بإبتسامة ، بقات واقفة حادرة راسها كتلعب بقنت الطابلية .. باغية تݣول شي حاجة وحشمات ..

- أمينة (هزات فيها عينيها ) :

أسية واقعة شيحاجة ؟ بغيتي تقولي ليا شيحاجة ؟؟

- أسية (بإبتسامة خجل ) :

أه ، وكنتمنى مترضيهاش فوجهي إلى كان ممكن ..

- أمينة (حطات كاس القهوة من يديها وشافت فأسية بفضول ) :

وي ڤازي ، قولي ليا شنو كاين ..

- أسية ( حناكها تزنݣو ) :

عندي العرس السيمانة الجايا إن شاء الله ، والصراحة مكرهتش تجي ، والديا غادي يفرحو بزااف ..

- أمينة (ضحكات) :

أيااااه الالة ، إيوا مبروك ... أشمن نهار بضبط ؟

- أسية :

الجمعة إن شاء الله ، مع 6 ديال العشية ..

- أمينة :

غير هادشي ، كوني هانية أنجي ونجيب معايا الكادو ، اتبقاي فخدمتك ولا غتخرجي ؟

- أسية :

لا إن شاء الله غادي نكمل ، بغيت غير واحد السيمانة حيت درنا نسافرو الى ممكن ؟

- أمينة :

جاتك يالالة 15 يوم ماشي غير سيمانة ، الله يكمل عليك بالخير ..

- أسية (فرحانة ) :

لهلا يخطيك ختي أمينة شكرا بزااف ..

- أمينة : مكاين حتى مشكيل ، تقدري ترجعي لخدمتك ..

- اسية (بفرحة ) :

هي الاولى ، خليت ليك الراحة .. مشات أسية ، وأمينة يد شادة بيها قهوتها ويد كتشوف فيها ، الحسابات ديال القهاوي لوخرين ..

_________________________

- فألمانيا ، من ورا مكمل الماتش ديالو ... لي ربحو بحال كل مرة ، بسبب اللعب ديالو ... وتكتيكو والخفة لي فيديه ، ولا بطل فكرة التنس ، خارج من الملعب ، داير على راسو بانضا فالبيض جامع بيها شعرو ... إبتسامة ثقة ونصر على عينيه الحادين ...

- هاز فواحد اليد المضرب ديال التنس ... ويد الاخرى الكرة .. مشا نيشان للڤيستير ، بدل حوايجو .. هز السكادو ديالو وخرج مسلت باش مايشوفو حتى واحد ... وصل للأوطيل لي نازل فيه ، طلع لشومبر ديالو خدا دوش ، مع خرج ولبس جابو ليه الماكلة حتى لعندو ، وهو كياكل سونا ليه تيليفون ... هزو وشاف فالشاشة بإبتسامة لاعوب جاوب بالألمانية :

الحبيبة ديالي ، توحشتك بزاااف ... بطبيعة الحال غادي نشوفك (هز يدو وشاف فساعة ) ديك 7:30 هكاك ... لا ازين ديالي مايمكنش ليا نبات ، نخليوها لمرة أخرى ... امممم نتشاوفو اليوم ، وديك ساع نشوفو البلان ديال غدا كيفاش غايكون ، (سكت وتبسم) ضروري ابب واش انا ممكن نفلت عيد ميلادك ، يلاه حبيبي نتلاقاو فالعشية (سيفط ليها قبلة ) ... مع قطع التيليفون لاحو على نموسية ، كمل ماكلتو او وقف ... هز الباليزة ديالو ، حط فيها ݣاع حوايجو ... هز التيليفون ديال الشومبر وسونا للإستقبالات ..

- بغيت طاكسي يوصلني للمطار ، مع 10 ونص بضبط ، شكرا ..(قطع التيليفون ، هز تفاحة وتكى على نموسية ، عض عضة وتبسم بإستهزاء ..

- نزل راسو كيشوف فمسيرة ، رجع وقف ونطق :

هبطو تغداو ..

- كولشي ستغرب من ردة الفعل ديالو ، حيت كان باين بلي سمعهم ... زاد جوج خطوات القدام وقف وضار عندهم ، شاف فمسيرة :

- بليل من ورا صلاة العشا ، عمري لينا شي براد ديال اتاي ، عرفتيني ابنيتي مكنشربوش غير من يديك ، كيكون على حقو وطريقو وبنين ، كيݣولو اتاي العشية خير من بݣرة مشوية ، ومنها نيت ولدي كريم يكون حاضر حتى هو ونكونو مجموعين ، الݣلسة ديال السطح بليل ماشي هي ديال نهار .. عطاهم بظهر وتم هابط ..

- دريييس تبعني سربي .. ادريس جمعها بوقفة وتبعو كيجري ..

- سندس :

ايكون سمعنا ..

- مسيرة :

منين قاليا نعمر اتاي ، عرفيه سمع كولشي ... وجدو راسكم للمداولة ورا العشا ، غير مداولة كتبدا مع 9:30 فالاولى ، وحنا اتبدا عندنا فوق سطح إن شاء الله .. نزلو تغداو نزلو ..

- جمعو الوقفة ، وتبعوهم ... تجمعو على طبلة وحدة ، شي كيشوف فشي من غير عباس ، لي كياكول عادي بحال الى ماوقع والو ..

_________________________

- وقف جلال ، دليل على أنو صافي خاصو يمشي بحالو ... مطاولش بزاف دار الواجب وعطى لكل واحد حقو فالهضرة ، يد حطها على كتف رحال ويد سلم عليه بيها ..

- هو هذا أسي رحال ..

- رحال :

مزال ماسخيناش بيك اسي جلال ، ماݣلستي والو ..

- جلال (ربت على كتفو) :

تهلا اسي رحال ، زرع الرجلة فالخليفة .. رمى هاد جوج كلمات على مسامع سليمان لي واقف ... محاشاها ليه ماسلم عليه ، خلاهم ومشا لجهة طوموبيلتو ... جبد نظاظرو من جيبو دارهم ، تبعو احمد ورحال كيشير ليه بيديه ، طلع لطوموبيلتو ديمارا وكسيرا مخلي غيرالغبرة وراه ..

- سليمان (وقف حدا باه مغوبش) :

ام شحال عاجبو راسو يالاطيف ... تݣول مالك دنيا فيدو ..

- رحال (شاف فولدو وغوبش) :

سعدات باه بيه ، هو لي ولد وعرف اش ولد ، بحالي انا والد الخطية مݣابل اللغيط وسريط والمريط وشي مايشيط ، ومزال زايدها بنݣير بحال الوليات ، وكون تعرف شحال حط فزرورة ولدك متدويش ، حيد من ݣودامي تفو يخليها سلعة (دفعو ورجع لعند الناس) مخليه كيخنزر ماعجبو حال ..

___________________________

- فوق السطح .. مسيرة حاجة البوطة حداها وصينية ، مربعة رجليها وكتعمر فأتاي ، الكل مجموع من غير سعاد لي كانت فالحمام ، ومعزوزة لي ݣالسة على برة مجمعة مع جارات ..

-

- عباس شاد عكازو وساهي ، تنهد تنهيدة طويلة ونطق .. :

فين اللّي يْجْمًُْعُو عْلِيكْ اهَلْ النِيَّة

أدريس : آاااه يا الصينية

عباس : دُوكْ اللّي يَونْسُوكْ

فِينْ اهْلْ الجُودْ وَالرْضَى

فَِينْ حْيَاتِي، فِينْ حُومْتِي وُاللِّي لِيَّا

- أدريس : آْه يَا الصِّينِيَّة

عباس : وَاعْرْ بْلاَهْ، مَا سَاهْلْ حْبْ الكَاسْ

آهْ يَا غْيَّاتْ، مَا نْسَاكْ الخَاطْرْ

وَاعْرْ بْلاَهْم، مَا سَاهْلْ عَشْقْ النَّاسْ

آه يَا غْيَّاتْ، حْرَامْ يِنْسَاكْ الخَاطْرْ

وَاعْرْ بْلاَهْ، جَايْنِي بْغْرَامُه

وَالْعَنْبَر إِلَى يْجِي كُدَّامًُه

وُالنْعْنَاعْ وًُالشِّيبَة

- بنات عباس : آهْ يَا الصِّينِيَّة

- عباس : أَيَا نْدَامْتِي وَيَا نْدَامْتِي

وُمَالْ كَاسِي حْزِين مَا بِين الْكِيسَانْ ؟

أَيَا نْدَامْتِي وَيَا نْدَامْتَِي

وْمَالْ كَاسِي تَايْهْ تَايْنِينْ زَادْ قُوَّا عْلِيَّا ْلحْزَانْ ؟

مَالْ كَاسِي بَاكِي وَحْدُه

مَالْ كَاسِي نَادْبْ حَظـُّه

مَالْ كَاسِي يَا وَعْدُه هَذَا نَكْدُه، غَابْ سَعْدُه؟

- الكل :

آْااه يَا الصِّينِيَّة

عباس :

يَاللِّي مَا شْفْتُونِي رَحْمُوا عْلِيَّــــــــــا

يَاللِّي مَا شْفْتُونِي رَحْمُوا عْلِيَّــــــــــا

- الكل :

وَأَنَا رَانِي مْشِيتْ وُالْهُولْ دَّانِــــــي

وَاْلدِيَا وُاحْبَابِي مَا اسْخَاوْ

بِيَّـــــــــــا بَحْرْ اْلغِيوَانْ مَا دْخَلْتُه بَلْعَانِـــــــــي ..

بِـ

الأمسِ

قَد تَألَّمت ..، وفي مَعرگةِ الحيَاة هُزِمت..،

ولِـ أحزانِ الغُروبِ علي دَربِ الرَّحيلِ إستَسلمت..!!

واليَوم

قَـد عُــدت

ومعَ شُروقٍ بِـ الأمَلِ عادَ قد وُلِدت ..،

ومِن هَزائِم الأمسِ وعتمَـةِ إنکسَاراتِه قد تعلَّمت..؛

ولِهذا لن أتوَقفَ الآن..؛

فَـ اليَـوم هو بِدايةٌ جدِيدة..،

ولِـ الحيَاة هو فُرصَةٌ أکِيدة..!!

نُقطـة ومِن أوَّل السَّـطر ..

______________________

- ختم النغام بكاس من يدين بنتو ، كيفما كيبغيه وكيما هي كتصرعو ... أتاي على حقو وطريقو الى شربتيه عرفتي شنو شربتي ..

- عباس ( شاد كاسو كيدور فيه فيدو وتنهد تنهيدة طويلة ) :

إيييه ، كبرنا كبرنا او ولاو ولادنا يخططو ويفصلو ورا ظهرنا ... [شاف فكريم] إيه بغيت تجي تشوف كيف كنت فيامي أولدي يا كريم ، ترا كت كنتبورض على بنادم ... تا سبع يجي ݣدامي كان يخاف ويرجع لور ... باب باب باب باب ، مكاينش لي مايدير حساب لعباس ، كنعقل كنت خدام فمراكش ... وكت كنخدم مع الݣور ، ايوا تم شفت مت هاد الخليقة لي كتخطط ورا ظهري (كيأشر لمسيرة ، لي شادة كاسها وحاطة ظهرها على الحيط وكتسمع ليه ) ..

- كانت زينة (شافت فيه سندس وصفاء ، شاف فيهم بدورو وكمل ) مال بوكم ترا كنت طياح ... كنضرب على الشعا ، ومع كولشي كان يدير ليا حساب كات عدي الهيبة ... إيه كان سميتها يوانا ، إيوا نهار على نهار نهار على نهار ، لقينا راسنا كنبغيو بعضياتنا ، كانت هولاندية وباها كان عدو محال ديال هادشي ديال ذهب والحجر الغالي ، رجعات للهولندا وݣالتها لباها ، ومابغاش ... إيوا هزات قشها وجات لهنا ..

- وحتى أنا كنت معاها راجل ، تزوجت بيها وديتها لدار مع الواليدة ، واخا معزوزة كانت قويصحة شوية ، ولكن صبرات ، وناري ناري فاش سقنا لخبار بلي حاملة ... ماقداتنا فرحة ، واخا حمالتها كانت صعيبة شوية ، إيوا حتى قربات تولد .. كانت حامقة تسمي بنتها روبي ، واخا انا جاتني سمية فشكل وكنت بغيت نسميها مسيرة هي مابغاتش ليا ، كانت عينيها فروبي .. ولكن فاش تزادت مسيرة ، يوانا حسات بساعتها قربات .. تم تم ..

فلاش باك

- فبيتها ديال النعاس ، فوق النموسية ... طالقة شعرها لونو كان بحال شي كتلة ديال العافية ، عينيها البندقيين الشاحبين ، وإبتسامة باهتة على فمها ..

- أباس ، [بفرنسية معكلة ] قرب عندي وجيب داك الصندوق لي فالمجر ديال الماريو التحت .. ناض عباس للبلاصة فين قالت ليه ، خدا صندوق ديال الخشب لي ݣالت ليه ، جا قرب حداها وحطو عند راسها ... ݣلس عند رجليها كيتسناها شنو بغات تݣول ..

- يوانا (شافت جيهت الكونة لي محطوطة فيها بنتها ، وتبسمات ) :

كنت بغيت نسميها روبي ، ولكن كيبان ليا غادي تسمى بسمية لي بغيتي أنت ..

- عباس :

الالة اتنوضي على خير ، ونسميوها حتى القنب لهندي ... رتاحي شوفي وجهك كي صفر ..

- يوانا (ضحكات) :

غادي نرتاح ، غادي نرتاح غير خليني ندوي عفاك ... مابغيتكش تقاطعني ، كنحس بساعتي قربات ... المهم عنظي هو شفت عوينات بنتي هذا هو المهم .. عباس تهلا فبنتي ، والى تزوجتي عرف تختار ، بغيت شي وحدة لي تهلا فبنتي كثر من بناتها .. وديرها فعينيها ، ومتحرمهاش من حنان الأم ، تهلا فيكم بزوج ... و وعفاك ، هاد البرية بغيتك تسيفطها لادريس ديال بابا (مدات ليه واحد جوا ) ..

- ولكن ماشي دابا ، حتى لسبوع ديال مسيرة ، صورها ودير تصويرة مع البرا وسيفطها ليه ..

- عباس (بغا يسكتها) :

انا هادشي لي مكنحملش فيك ، مافيا لي يݣلس يسمع هاد الخراي ، نعسي رتاحي انوض نجيب ليك دوا ونرجع ..

- يوانا (شدات ليه فيدو ) :

أباس ، سمعني عفاك ... انا لي حاسة وعارفة شنو كنݣول .. راه مكنتفلاش أ أباس ، خليني نتكلم ونرتاح [ pleas ] ..

- هزات الصندوق بشوية وحطاتو قدامها ... حلاتو بشوية ودوراتو عند عباس ..

- شاف عباس جهة الصندوق لي كان كيشوفو ديما فالماريو ولكن عمرو حلو ، فيها حاجة زوينة بزاف كيحتارم خصوصية مرتو .. وهادشي لي كانت كتبغي فيه ، عمرو سولها ولا ݣاليها شنو فيه ..

- فوسط الصندوق كانت حجرة فالأحمر ... كتبري ، زوينة بزااف دايرة بحال حجر جليدي غير هدا لونو حمر ..

- عباس (هز راسو فيها ، كيسولها بعينيه قبل لا ينطق ) :

شنو هادشي ؟؟

- يوانا ( تبسمات ) :

روبـــي ( بالفرنسية) الياقوت الأحمر ..

- عباس (شافيها بإستغراب) :

الياقوت ، واش جاب الياقوت عندنا لدار ... بغيت نݣول منين جاك ؟

- يوانا :

كادو من عند بابا فعيد ميلادي ، هاد الحجرة راه ساوية زبابل دالفلوس ، ياقوتة حرة أصلية .. لي بغيت منك هو نهار دير مسيرة 18 عام تعطيها ليها ..

- عباس (تعصب ) :

انا مافهمتش علاش كدوي بحال هوك ... الالة منين تكبر بنتك انت عطيها ليها ..

- يوانا (تبسمات) :

أباس ، انت عارف شنو كاليك طبيب سمعت كولشي بودني ، انا راه مابقا ليا والو ، شد هاك ... أمانة توصل بنتي 18 عام عطيها ليها .. واعدني عفاااك .. [ شافيها بقلة حيلة ، كيحس بشي غصة فحلقو .. ] واعدني أباس ، پليييز ..

- عباس (تنهد تنهيدة طويلة ) :

كنواعدك ، واخا راه متأكد بلي انت لي اتعطيها لبنتك ..

- يوانا (رجعات راسها فوق المخدة براحة والإبتسامة على وجها ) ..

نهاية الفلاش باك

- عباس :

من وراها بنهار ماتت ..

- أدريس (مصدوم ) :

أواااه ، وهاد الحجرة عطيتيها لمسيرة ولا مزال عدك ، ناري يا عباس عداك تكون بعتيها ..

- عباس (خنزر فيه) :

مالي بنت ليك بهيمة ... هاديك أمانة ديال بنتي أتبقى أمانة ديال بنتي مالك مخوخش فمخك ..

- سندس :

عمرنا شفناها أبا ؟ واش عطاها ليك امسيرة (شافت فختها) ..

- مسيرة (جرات السلسلة ديال الذهب لي كانت فعنقها ، لي كيشوفها كتبان ليه قصيرة ، ولكن دابا تاضح العكس ، تاضح بلي السلسلة طويلة ، دوراتها بشوية ، حتى بانت العلاقة لي معلقة فيها من الفوق كانت بحال الوردة ، ولكن من تحت كانت بحال شي مرايا من العهد الڤيكتوري ، فيها حجرة كبيرة حمرة ) ..

- البنات مافهمو والو ، خيت كانو كيشوفو سلسلة فعنقها نهار عطاها ليها باها فعيد ميلادها ، كانت عند سندس 16 عام وعند صفاء 14 عام ... وكانت كتبان ليهم غير سلسلة عادية عمرهم شافو ديك العلاقة لي فيها ..

- عباس :

فاش ماتت يوانا ، وتزوجت بسعاد ... عاودت ليه لافير ، خدينا ديك الحجرة وديناها عند واحد السيد قديم فمراكش ، كيشتي كنا ساكنين فمراكش .. ايوا داتها ليه وصايب بيها هاد السلسلة ، ولكن ماݣلناش ليه بلي راه ياقوت اصلي ، ݣلنا ليه احجرة عادية ... دهايبية ديال هنا واخا هكاك مكايفهموش فهادشي ، وفاش دارت مسيرة 18 عام عطيتها غير سلسلة ، حتى لمؤخرا عاد عطيتها العلاقة ..

- مسيرة :

ݣاليا نردها اللور ، ومنبينها للحد ، حيتاش نقد نتصادف مع شي حد كيعرف فهادشي ويدي ليا سلسلة وعنقها معايا ..

- صفاء (كترمش فعينيها ) :

وصراحة أبا صدمتيني ، كان بين يديك كنز ومابعتيهش برافو ليك ..

- عباس :

تي مالكي غالطة ، يحسابليك حنا شمايت ... حنا راه نشمو اصباعنا نشبعو أبنتي ... كتبقى دكرى من مها خاصها تبقى ليها ، وممنوع عليها تبيعها ، حتى تزوج ودير ولادها ..

- سندس :

والبرية سيفطيها لجد مسيرة ؟

- عباس :

سيفطها ليه ، ولكن مجاوبنيش ... من بعد جاتنا واحد البرية بلي مات ، كانت مرتو لي سيفطاتها جدات مسيرة ، وكانت ناوية تجي فديك السيمانة نيت تشوفها ، ولكن مجاتش ..

- صفاء :

واش عندهم غير بنت وحدة ماعندهمش ولاد أخرين ؟

- عباس :

لواه كانت عندهم غير يوانا ، صافي واقيلة مها توفات حتى هي ..

- سكينة ( بقات غير ساهية ) :

وا قصة هادي والله حتى قصة ..

- عباس ( هز راسو فبنتو كيشوف فيها ) :

ايوا يلالة زينة ، شفتك وليتي تخططي وتقرري بلا موجب شرع ..

- مسيرة ( تبسمات) :

وااا عباس ، وعبيبيس ... زعمة زعمة ماعجبك الحال ومافرحتيش انفدي ضقتك مع السعودي .. زعمة زعمة ..

- عباس ( ضرب بعكازو مع الأرض ) :

بشوار بشوار ... مديريش لي ݣالها ليك راسك ، واش يحسابليك ابنيتي غير اجي ودير هاد تخربيق لي كدوي عليه ولا .. واش يحسابليك مليون قاداك لهادشي أبنتي ، وا والله ومكانو فلوس صحاح لا قفلتي عليه ..

- سكينة :

عندو الصح فهادشي ، راه كنت بغيت نݣولها ليك وݣلت حتى نݣلسو وندويو مزيان ، راه بلقليلة خاصك واحد 60000 الف درهم ..

- صفاء ( بصدمة) :.

اواه العار ، 6 ديال المليون واي واي ..

- سكينة :

واش غير اجي ودير هادشي ، راه بلاصة بيسي واحد خاص جوج هادي بالقليلة ، كل واحد ودور ديالو .. راه غير مغير الصوت راه حتى هو بشحال ايتقام .. المهم هادشي ندويو عليه من بعد ... انديرو ورقة وستيلو وندويو على هادشي ..

- كريم :

انا ماعنديش مشكيل ، بغيتو حتى 10 ديال المليون نحطها هانية ..

- ادريس ( كيشوف فعباس بعدم تصديق) :

واش تا غادي فهبال بنتك ، وربي وتسيق ليك الخبار سعاد ..

- عباس (قاطعو) :

وحموسك دوي ، سير دوي باش نحطك بوجهك ... لا يحسابليك مافراسيش دار نمرة 12 ... ندوي ولا نسكت ؟؟

- أدريس ( خرج عينيه تصدم ، حدر عينيه كيبلع فريقو) :

وتا باش عرفتيها ؟

- عباس :

عرفتها وسلام ، ماشي مهم كيفاش عرفت ..

- مسيرة :

با دابا شنو ؟

- عباس (تنهد تنهيدة طويلة ، ونطق بصوت مغزف ) :

العداب لي دوز عليا بغيتك تخرجيه منو بضوبل ... هاد رجل لي مشات ليا ، بغيتها تعطا ليه للݣفا ..

- مسيرة (تبسمات وقفات وقربات ليه معنقاه من لور ... بايت ليه راسو ونطقات وعينيها كلهم شر ) :

كون هاني أبا ، الى ماخليتوش يحبو على رجليه عريان مانتسماش الهولاندية ..

- قبل متنعس ، وفبيتها ... ݣلسات على الكرسي جارة الكوافوز لي حدا راسها ، كتشبع عينيها بالبلية ديالها ، دورات راسها ليمن ديالها هازة بين يديها عكر فلون الترابي ، وحطاتو مع خوتو فالكوافوز ... تنهدات تنهيدة طويلة ..

- مسيرة :

دابا كملنا 60 ، العقبة ل100 ..

- تحل الباب عليها ودخلات سعاد ، عينيها مشاو نيشان للكوافوز ..

- سعاد :

الله ابنتي ومالك على هاد العكورة كاملين ؟ وكون اكنتي بعدا كتبيعيهم نݣولو هانية ..

- مسيرة (سدات المجر ديال الكوافوز ورجعات براسها اللور ) :

كون بغيت نبيعهم كون وااا بعتهم ، ولكن انا كنتلدد فاش كنصايبهم ، ونحطهم مع خوتهم ونبقى نشوف فيهم ، وكل مرة كندير واحد .. وكيزيييييد يعجبني الحال وكنفرح ، فاش كنكون دايزة وكتسولني شي وحدة على سمية العكر لي دايرة ، ههههههه ..

- كنݣوليها سميتو مسيرة (ضحكات عاجبها الحال) ..

- سعاد :

كون خديتي هادشي لي كديري حرفة ، كون درتي لاباس ، أحسن شركة ديال العكورة تشدك تخدمك معاها .. وانت يا كتصايبي لراسك يالخواتاتك .. ومزال خواتاتك بطليب والرغيب والى رشقات ليك ..

- مسيرة (قربات وجها من وجه سعاد ) :

ماما ، اي حاجة كنديروها فحياتنا ، كنديروها بالݣانة والى مكانت الݣانة مكاين والو ، فاش كيكون المجاج اليز .. شونتيو هاهو باين 60 عكر ، اما فاش كتكون القردة طالعة ... نص عكر منحطش فيه يدي .. فكرتيني نيت خاص نزل لسوق نقلب على الخاوي ، ونمشي لجوطيا نقلب فهادشي ديال العكورة القديم .. باش نضيه ويكون عندي واجد خاصو غير يعمر ..

- سعاد ( حاولات تجبد ليها لسانها ) :

أجي نقوليك ، شفتك انت وباك اݣالسين وتغامزو على الطبلة ديال العشا ياك لاباس ، شيحاجة بيناتكم ومافخباريش ؟؟

- مسيرة ( هزات حجبانها للفوق دلالة إستغراب) :

شنو أيكون بيناتنا ، والو مكاين حتى حاجة كنا غير شادين فكريم وسكينة ، راه شفتي كلشي بعينيك ، علاش كاينة شيحاجة لي متخفاش عليك ؟

- سعاد ( بشك ) :

زعمة زعمة ، زعمة مكاين والو ݣاع ؟

- مسيرة :

وهي دابا مكتيقيش فيا ، كون كانت شيحاجة كون واقلتها ليك ، يهديك الله الالة سعاد ... نوضي خلينا نعسو عرفتي راه حالة عينيا غير بزز .. بقات سعاد كتشوفيها بشك ، شافت راسها مغادي تاخود منها لا حق لا باطل ... وهي تنوض مخلياها تنعس ..

- وصلات عند الباب ونطقات :

واخا كلامك مدخلش ليا لراسي ، ولكن اندوزها بجغيمة ديال الما ونخليك تنعسي ..

- مسيرة (جرات عليها الغطا ) :

تصبحي على خير .. طفات عليها سعاد الضو وسدات الباب وراها ..

_____________________

- فالبيت الاخر كانو مزال منعسوش البنات ، سندس متكية طالقة شعرها ، دايرة الكيت فودنيها وساهية ، صفاء لي كانت واقفة كتدهن لوجها واحد السيروم .. أما سكينة كانت مغطية وكتشوف فالحيط حتى نطقات ..

- بعد المرات مسيرة مكتفهمش ليا ، ماعندهاش الفرانات فأفكارها ... لي يشوف الهيئة ديالها او وجها الملائكي ، ميݣولش بلي عندها أفكار بحال هادو ..

- سندس (زولات الكيت وتكات على كرشها كتشوف فسكينة بإبتسامة ) :

مسيرة هكا دايرة ، مندافعة ... جبهة مكاتخافش نهائيا ، هي كتخاف من با ومن قريص جدة هههه ، ولكن شيحاجة أخرى لا ... من داك نوع لي جات فراسها ديرها ، صدقات داكشي لي بغات ماصدقاتش الله يربح ..

- صفاء :

ومحنتها مكاينش بحالها ، دايرة بحال ديك دجاجة لي كتقرق على بيضها وخايفة عليه ، هكاك معانا كتقدس العائلة بزاف ، انا راه هي لي كانت تعاوني فقرايتي ، وشتا كانت كتصب خيط من السما ، ودوز من الكوليج لعندي للمدرسة تجيبني ، وحق الله العظيم ..

- سندس :

ههههه أي حاجة كتحلها بالعقل ، وببرودة غادية بمبدأ بالمهل يتكال بودنجال ..

- سكينة (كضحك هزات راسها وݣلسات) :

كانت كتݣولها ليا فالحبس ، فاش كنتعصب ولا كنبغي شيحاجة دار ، كتݣوليا وغير بشوية عليك بالمهل يتكال بودنجال ... قبل منعرفها كنت كنقول مال هاد خيتي منونخة ومرخية هههه ، ولكن من بعد عرفت كتفكر مزيان وقبل مدير الحاجة ... حتى كتخطط ليها وتفكرليها وتقادها وتصايبها ، عااااد كديرها ..

- سندس (بتساؤل) :

واش ماعمرها عاودات ليك كيفاش وسبب حتى بدات بخدمتها اللولة ؟

سكينة :

لا الصراحة هي عاودات ليا على خدمتها ، ولكن شنو السبب لي خلاها ديرها معاوداتش ليا ..

- سندس (رجعات تكات على ظهرها ) :

خليها حتى تعاود ليك هي ، بزااف ديال الحوايج اتعرفيهم على مسيرة بزااف ، راه مجاتش او ولات بحال هكا ... مامنحقنا نقولو ليك والو ، حيت هي لي خاصها تعاود ليك عليهم ، الحاجة الوحيدة لي ممكن نقوليك هي انها مدمنة على شيحاجة سميتها العكر ... فأي زمان وأي مكان ، ولي مهم كثر عمرك تلقاي بحال دوك الألوان كيتباعو ، حيت بكل بساطة هي لي كتصايبهم ... يلاه تصبحي على خير ازين ..

- سكينة (مستغربة من كلام سندس ، واخا عاشرات مسيرة فهاد 4 شهور ونص ، او ولات عزيزة عليها بزااف ولكن مزال لحد الساعة كتجيها غامضة ) .. :

تلاقاي الخير .. طفات صفاء الضو وتوجهات للبلاصتها ، قبل لا تحط راسها على المخدة ، هزات شعرها هو الأول من على عنقها عاد تكات ، مسرحة شعرها فوق الخدية ..

________________________

فصباح ، ݣالسة كتنقي فالعدس ، بغات توجدو على تيساع باش الغد دير بيه الرفيسة ..

- معزوزة (مسرحة رجليها كتدلك فيهم وكتخمم ) :

نحلف بيماني ، وشبيك لي شبك فيه با ... حتى دوك 4 ديال الزلموميات مجموعين على خزيت ..

- سعاد (عينيها فطبسيل او ودنيها عند عدوزتها ) :

زيدي عليهم الحنش بوسكا ديال ولدك أخالتي ، بناتو مكايديروش شيحاجة بلا شوارو ... من نهار طلع عندهم لسطح وهو مفيك ليا ومرتاح ، ندور نلقاه يتحتت مع مسيرة ..

- معزوزة (غوبشات وشافت فيها ) :

وداك الݣرواز ديال خوك ، مايدي خبار مايجيب خبار بحال حليب الحمارة ماينفع مايضر ..

- سعاد (هزات فيها راسها ) :

لا البوس بيديك حليب الحمارة ولاو يصايبو منو الصابون للوجه ، اما خويا راه حاكم فيه عباس ... علاش هو يقد يتفنفن قدامو ، لي قالها ليه يديرها ... (تنهدات تنهيدة طويلة او وقفات هازة الطبسيل ) خليها على الله أخالتي ... هاد المرة ايسيفطونا جملة للفوريان ، ودابا تقولي سعاد قالت ... دخلات للكوزينة شلالات العدس ورقدتو ..

- تحل الباب وتسد ودخل عباس كيصفر ..

- معزوزة ( حاضياه حتى دخل كتشوفيه من راسو لرجليه ) :

وفرحان مع راسك أولد فريدي ، هاننك هاننك ... داخل وتصفر واتا بوك أتصفار ..

- عباس (هاز فيدو عود ديال السنان مبسم ) :

وااا عرفتي الواليدة ، فاش كتكون مرتاح وهاني ... ويلي ويلي با بشااااخ ، واحد الراحة سبحان الله كتجيك يا سلااااام ..

- معزوزة :

وايه وايه راني عارفاااك ، انت مكتكون اوليدي فرحان غير فاش كتكون كتوجد لشي مصيبة كحلة زحلة بحال كمارتك ، ولا شام الورقة غير هادو حتى حاجة متفرحك ، أخرج من رونضتك أولد معزوزة ... اش مخبي على ميمتك ؟

- عباس (بإنكار) :

وبرب العالي مامخبي شيحاجة الواليدة ، يهديك الله واش انا نقد نخبي عليك شي حاجة أميمتي وانت لي عندي ، عوينة وحدة لي كنشوف ..

- معزوزة (قاطعاتو) :

با مات وخلاك ليا امانة ، الصدر لحنين علامن كنحط الراس ، والله يمسخك ويمسخ بوك لي خلا ليا خطية ، وكون اولدت شي بنت كوراه خدامة عليا ومبرعاني ، ولا جايبة ليا نسيب زين كون سيفطني للحج ..

- عباس :

دابا اش دخل با فالهضرة ، با راه وا مات ورشاو عظامو ورتاااح ..

- معزوزة (حطات يدها على العكاز لي فجنبها ) :

مني يااااك ، رتاح مني كملها كملها يابلمسلݣم لاخر ... تقادو الكتاف ، أنت لي كدوي توصل لبوك فوقفتو وهيبتو وزينو ، كان غير الى حنحن الزنقة تخوا من الناس ..

- عباس (كيشوف فيها بنص عين ، وبعدم تصديق) :

نقسي فيخرات الواليدة ، كتخوا الزنقة مالو ولا ضوبيرمان ، ولا عفريت الليل ..

- معزوزة (شيرات عليه بالعكاز خوا ليها جاتو الدقة فكتفو ) :

وراه الوجه لي يحشمو عليه الناس أنت ماتكسابوش أوليدي ، رضيتيني كدابة وانت سنانك بحال أنزيض ، ولكن اش انݣوليك لي فيك اوليدي راه كافيك (بدات تعيط ) سعاااد وا سعااااد ..

- طلات عليها سعاد من الكوزينة :

نعام أخالتي .. بغيتي شيحاجة؟

- معزوزة :

دوايا ديال الطونسيو أبنيتي الله يرضي عليك ، وݣولي لهاد سنان أنزيض ينوض من حدايا يضرق عليا خنشوشو .. وقف عباس كيعکز على على عكازو ودخل لبيت النعاس يرتاح ..

____________________

- فشقة فحي راقي ... داير رجل على رجل كيقرا فواحد الكتاب بكل هدوء ، طلق شعرو ومتبع مع الكتاب ، سونا ليه التيليفون ... هزو شاف النمرة فتح الخط وبقا ساكت ثواني قليلة ، سد الكتاب ونطق :

ݣطعتي الصبع من جدر ؟

- (جاه صوتو من الجهة لوخرا) :

حسبو ميت وترحم عليه ..

- تبسم تبسيمة إرتياح وقطع عليه التيليفون ، هز الكتاب لي كان فيديه ورجع للصفحة لي كان كيقراها ..

_______________

- خرجات من الدار هي وسندس ... لابسة صايا فالݣري مع تيشورت فالبيض مكتوبة بالكحل ، مع تجاكيط فالقهوي ، طالقة شعرها هازة ساك دايراه فجنب .. دايرة فيه لاكارط ناسيونال وتيليفونها ..

- سندس :

علاياش دومونديتي ماقلتي ليا والو أصاحبتي ؟

- مسيرة :

داكشي لي سيفطنا عليه راه غادي تشوفيه ... أجي نقوليك الحاج الى وصيناه على داكشي لي بغينا معاش غادي يوصلنا ؟

- سندس :

غير يوماين راه يكونو هنا ، خاصني غير نسيفط ليه الفلوس فوافا كاش ... عرفتيه جلدة ، الى ماشد الفلوس والله لا سيفط شيحاجة ..

- مسيرة (عينيها على الطريق ، شافت يمين وشمال وقطعو شانطي للجهة لوخرا) :

لواليدة لبارح جات عندي للبيت ، سولاتني علاياش كنت كنتغامز انا وبا ... شكيت بلي عاقت بينا..

- سندس :

وصاحبتي انا وشفتكم لبارح ، اويلي تغامزو وانت عارفاها البق مايزهق ، شنو قلتي ليها ..

- مسيرة (وصلو قدام البريد بنك) :

ماقلت ليها والو ، انت عارفاها شوفي غير فالأول وشنو كانت دارت ليها خلي دابا ، والله حتى تهز لينا علامنا فوق الجامع ، وضرب لينا الطر هو ومي ... وانا مافياااش لي يسمع نݣير مي معزوزة ..

- سندس (حلات الباب ودخلو ، خداو الورقة ديال النوبة وݣلسو كيتسناو ) :

إيمتا اتخرجو تقداو داكشي لي خاص ؟

- مسيرة ( عينيها على شاشة لي كيدوزو فيها الأرقام ) :

لا مزال ، كريم خدام اليوم مغايساليش ... قاليا حتى يكونو عندو الوقت ونݣلسو وندويو على هادشي مزيان ..

- وصلات نوبتهم ... ناضت مسيرة عطاتو لاكارط ناسيونال ، وتيليفون لي فيه الكود ديال الأمانة ، شوية تم راجع السيد لي تم مد ليها كرطونة كبيرة شوية ... سنات فواحد الورقة ، هزات الكارطونة وخرجات هي وسندس من تم ..

________________________

- إفران

- فپتيت ڤيلا .. فصالة مونجي ݣالسة بجنبو ، جامعة شعرها بفيليل ... كانت دايرة ليه ليميش باش تغطي خصلات الشيب .. لابسة قفطان خفيف ، مع ساعة نقرية ، فراس الطبلة ݣالس شخص ف فستينات من عمرو ، شعرو رطب وطويل شوية ... مع لحية بيضة لون بشرتو سمرة ... شاد فيديه جورنال وكيقرا ..

- سومية (شافت فيه) :

ماسونيتيش لسراج ؟

- حط الجورنال من يدو ، شاف فتيليفون ديالو ورجع حطو :

سونيت ليه لبارح ومجاوبنيش ..

- سومية :

حتى مرتو سونات ليه ومجاوباتنيش ، ذياب خفت ايكون واقع ليهم شيحاجة ولا بيناتهم شي خصومة ؟

- ذياب (حط يدو على يدها ) :

متشغليش بالك ، ولدك راه بعقلو وعارف شنو كيدير ، بلاما دخلي خليك بعيدة ... هو لي ختارها نهار الاول يتحمل مسؤولية نفسو .. انا براكة عليا غير توفيق لي خارج ليا من جنب ..

- سومية (تبسمات) :

وراه طلع لباه لمن طالع ..

- ذياب (بإستنكار) :

انا لا سمحيليا ، فين عمر تحطات شي صورة ديالي ، فجورنال .. ضايرين بيا البنات ، نهار لي تعالجت وحدة لي عرفت وهي لي رتابطت بيها وهي لي بقيت معاها وهاهي حدايا ... ماشي بحالو هو ، من ورا كل ماتش هاهو فبلاصة فشمل مع وحدة فشكل ..

- ماخلا الشهبات ماخلا السمرات ، كيدوز فالخضر واليابس ..

- سومية (كضحك) :

مزال صغير ، خليه يعيش حياتو ... نهار يطلع ليه داكشي فراس ، راه دماغو لي غايقولها ليه ..

- ذياب (وقف) :

26 عام اشمن صغر كدوي عليه ، انا ݣدو فداك العمر راني خطبت ماماه ولا نفكرك .. المهم اندوز نشوف جواد ، ونرجع عندك باش نديك مخاصناش نتعطلو عليهم راك عارفة ختك ..

- سومية :

واخا سير .. هز التيليفون ديالو وسوارتو ، باس ليها راسها وخرج ..

"‏ثُم تكتشف أنك ركضت كثيرًا في المكان الذي كان من المُفترض أن ترتاح فيه.. وتكلمت كثيرًا مُبررًا نفسك وأفعالك في حين كان من المُفترض أن تكون مفهومًا دون الحاجة لذلك كُله وأنك تعبت، تعبت كثيرًا وعليك التوقُّف فحسب ."

** **

- فصالون فشقة راقية .. لابس سروال ديال الثوب فالبيض ، من الفوق عريان ... يد شاد بيها تيليكوموند ، ويد طالقها على المخدة لي جنبو ... شعرو مخربق جاي على عينيه بعشوائية ، عاقد غوباشتو ... رجليه حاطهم على الطبلة ، عينيه مع التلفازة لي كيقلب فالإداعات ، ولكن عقلو محاضرش مغيب ..

- سونا الباب ، لوهلة الاولى ماردش البال ودنيه مسدودين .. ، تخبط الباب بجهد ، عاد فاق من الݣلبة ... حط التيليكوند بجهل من يدو ، وغادي مغزف جيهة الباب عارف شكون مول هاد الخبطة هادي ..

- حل الباب ، كان واقف داير يدو على جنب الباب ، لابس سروال كحل ݣاطيفة مع صباط دان فنفس اللون ، تريكو بالكول طالع فالݣري وتجاكيط ديال الكوير فالكحل ، مع نظارات شمسية كحلين ..

- سراج (بصوت رجولي قاصح) :

فرعو حسن ..

- مداهاش فيه ، دفعو ودخل ... مشا ݣلس على الفوطوي مسرح يديه ورجليه .. ( كيشمشم)

فين اولد العم ، غرقتي حتى مابقيتيش كتشم ريحة الخنز لي ضاير بيك ..

- سراج ( بإستفهام ) :

على اشمن خنز كدوي ؟

- وقف غادي جهة الثلاجة ، حلها مع ضربات فيه الريحة رجع بللور مخسر سيفتو .. ضور راسو كيبان ليه الخيط ديال ثلاجة محيد .. هزو ودورو عندو ، كيحرك راسو يمين وشمال ..

- [دور راسو عندو كيطلعو وكيهبطو ] :

مافراسيش الطلاق كيدير هاد الحالة أولد الذيب ..

- سراج (خسرت سيفتو ) :

جلال ݣلب ..

- جلال (حيد تجاكيط لاحها ) :

غسل حالتك ريحتك عطات ..

- سراج [كيشوف فيه شنو باغي يصنع ] :

اش باغي دير ؟

- جلال [مشا الكوزينة ] :

الى انت مالف بالخنز اولد العم انا لا .. سير غسل حالتك وكون مرضي وخرج تقدا لينا منحنجرو ..

- سراج (رجع ݣلس هاز تيليفونو ) :

مافياش .. مع نطق بيها ، كيحس بشيحاجة تشيرات عليه تغرزات فالمخدة ... خطف راسو بالخف ، كيشوف شنو تلاح عليه كيلقاه موس صغير ..

- هز راسو فيه بإستغراب ، لقاه كيشوف فيه بإستفزاز ..

- جلال :

هاد المرة زݣلتك ، المرة الجايا مغنزݣلكش .. (بدا كيصفر ) .. ناض سراج مزادش معاه الهضرة ، عارفو مسطي ويتقب ليه عينو الى مناضش .. دخل لبيتو نيشان لدوش .. دوش عليه ، خرج لبس عليه كيطمة هز سوارت طوموبيل وتيليفونو ..

- دجاج ولا اللحم ..

- جلال (كينقي فالكوزينة ، مضارش عندو ) :

حوت ..

- خرج سراج يتقدا ... وخلا جلال فدار ، هو العكس ديالو ماعندوش سوق الى ماعندو ݣانة ، مايتسوق لا لماعن ولا لغيرهم ، عكس جلال كيبغي نقا وكيموت على النقا ... السينين لي دوزها بوحدو علماتو يعتامد على راسو ، راجل ولا كل رجال .. قليل تلقا شي حد بحالو ، مايمكنش يتخيل راسو يبقى ݣالس فهاد الدار وريحة النقاوة مكايناش ..

- نقا الكوزينة قادها ، وجا دور الثلاجة ، خرج منها كولشي لاحو ، نقاها ... غسل يديه ، نشفهم ... هز ساعتو لي كان حيدها رجعها ، رجع لصالون ݣلس مشات عينو للمعلقة لي كانت محطوطة على الطبلة .. هزها دورها بين صباعو وإبتسامة غامضة على فمو ، بدون تفكير خشاها فجيب سروالو ... راجع بظهرو وعلى عينيه نظارات غريبة ..

- سونا ليه التيليفون .. جبدو من جيب التجاكيط ، فتح الخط .. كيسمع صوت البكا فتيليفون ، ملامح وجهو تبدلو ..

- بصوت (بارد ) :

انا جاي ..

- ݣالسة فالبيت هي وسندس وسكينة ، كتحل فالكارطونة حتى وقفات عليهم صفاء :

صفاء كتغسل فالماعن وانتوما مجمعين هنا ..

- سندس :

نوبتي كانت لبارح ، هادي راه نوبتك أشريفة ..

- صفاء ( مسحات يديها فطابلية وݣلسات ) :

شنو داكشي ؟؟ .. جبدات مسيرة اول حاجة من الكارطونة وهوما باكي كبار ديال اتاي شعرة صحراوي ، حطاتهم حداها ... رجعات للكارطونة وجبدات منها براد صغير فزرق .. مع كيسان صغار ، وعاد جبدات صينية بالرجلين ديالها ، حطاتهم رجعات للكارطونة وهاد المرة جبدات بواطة كبيرة فيها العلك (الصمغ العربي) ... واخر حاجة جبدات هو جوج بواطات نقريين منقوشين وحدة ديال سكر وتانية ديال اتاي ..

- سكينة (بإستفهام ) :

لاش هادشي ، واش ناوية تحلي شي قهوة تولي تعمري لناس اتاي ؟

- سندس :

من بعد وغادي تعرفي علاش ، راسك لراسك غادي تفهمي ... راه قلتها ليك لبارح ..

- بدا تيليفون مسيرة كيسوني ... فتحات الخط :

ألو وي كريم ، لا انا فدار ماخرجت فين ... إيمتا ؟ واش من نيتك انخرج انا وسكينة راس فراس راه خاص حتى تكون أنت .. وأنا مزرباناش ياك واحد يوماين ، إوا صافي نصبروها المهم تكون أنت .. اجي باك رجع ولا مزال ؟ امممم وختك ؟

- فجهة لوخرا [كريم] :

هاديك مكايناش فهاد العالم ، راه واقفة هي وراجلها على الطلاق ..

- مسيرة :

العار ، وخويا راه عندو الصح ، كون انا فبلاصتو نطلقها الف مرة ومنبردش(هزات عينيها فصفاء لي كتغمزها) مالك كتغمزيني ، مالي كدبت ... ختو راه واحد بسيكوپاطة منخا مكاين .. احمقة وقالو ليها زغرتي .. أويلي بقات تحرر العيشة على داك راجل حتى طفشاتو وتبرد دابا ..

- كريم (تنهد) :

اودي طفشاتني انا لي خوها بقا أهو ، المهم نهضرو من بعد ..

- صفاء ( خلاتها حتى قطعات ) :

واش انت حمقة ، كتعايري ليه فختو قدامو ... راه ختو هاديك واخا يوقع لي يوقع ..

- مسيرة :

وانا مالي كدبت ، انا لي كاينة كنقولها ... ختو اكبر حمقة عرفاتها البشرية واحد المجينينة منها مكاين ، خرجات فراجل الشيب الخضر ، ودابا هاهوما كيطالقو ... هاديك مايصبر عليه غير شي پوكيمون ..

- تسمع الدقان فالباب ..

- معزوزة [ من المراح] :

اشوفو شكون كيدق .. أدوك العزبات البايرات لي ماعدكم شغل ولا مشغالة غير نميمة فعباد الله ..

- سندس ( دلات قنانفها) :

لا حولة ولا قوة إلا بالله العلي العظيم ، هاهي بدات تاني ..

- معزوزة ( بصوت مجهد ) :

أسمعتك أديك سنان قنية ، متحشمو مديرو بحساب الكبير ..

- حلات سندس الباب ، كانت واحد جارتهم .. دخلاتها ورجعات للبيت ..

- مسيرة :

شكون ؟

- سندس ( مخصرة سيفتها) :

تفو ، مت داك رجلين عويدات لابانضة ، داك المسلݣم لي اسمو سهيل ، لي كيظل واقف فالقنت ديال الزنقة .. مالقات إيمتا تجي غير دابا ..

- سكينة :

ونااري شحاال مكنقدش عليها ، وشحال فيها ديال تحنزيز كدخل لدارخل وترض السرجم ، وتبقى طل من الشقة .. يحسابليها بنادم معارفهاش ..

- مسيرة [ جمعات داكشي فكارطونة دخلاتو الماريو ، وشافت فالبنات ] :

واش نصايب ليكم معايا لبخة ديال شعر ولالا ، (شافت فسكينة) انت بعدا لا شعرك زعر أيخسر ديري ليه غير الشݣوݣ راه فالماريو ..

- سندس :

ديري بحسابي ، انمشي نجمع الماعن ديال الحمام ..

- مسيرة :

وسيري ونساي شيحاجة تاني ..المرة لي فاتت ناسية صابون البلدي اجاب الله المرا عطاتو لينا ..

- صفاء :

انمشي نجمع برودوياتي ، متعرفي نتلاقى بعݣوزتي فالحمام ، تعرفني نقية ومتولة ..

- مسيرة ( كطلعها وتنزلها) :

العمى والعميات وظفار الجنيات ، لولة تصوت ، وثانية تلوط والثالثة تضرب البوط ... داكشي لي خاصك نيت كولشي قامو خليفة بقاليه الخ...را فوق القطيفة ..

- واقف فواحد الخلا ، صدرو كيطلع وينزل ... باين عليه الخوف ، مامرتاحش .. عارف راسو صافي قفرها ، ݣاع علاش وصاه مدارش بيه .. فين كان عقلو الله وأعلم ، غادي جاي ماعرف في يصد ... مالف الى وقعات شيحاجة هو لي كيعتقو .. ولكن راه هاد المرة هو لي أيقبرو ، واخا عمرو حط عليه يدو ، مامرة مازوج دارها يغرق غيها جمل ، ولكن راه وصاه ݣاليه بالحرف ماتزربش .. ، جبد التيليفون دوز النمرة لي جات على بالو ... مدازش بزاف وتحل الخط على صوت أنثوي :

- بيبي [قاطعها صوتو]

- فينك ؟

- [مافهمات فيه والو] :

انا فدار علاش شنو كاين ؟ مؤيد حبيبي ياك لاباس؟

- مؤيد [طلع فطوموبيلتو] :

خليك تما أنا جاي ... قطع عليهت لايح تيليفون فالكرسي لاخور ، ديمارا الطونوبيل غادي مكسيري مكايشوفش قدامو ..

______________________

- معزوزة [هازة كاس دتاي فيديها] :

ايوا أش غادي ديري اختي مليكة ، هادو هوما ولاد اليوم ..

- مليكة [ مبسمة كدوي وتغمز ] :

وهادشي علاش جيت ندوي معاك انت ولالة سعاد ..

- سعاد [ماحملاها ماقبلاها] :

الله يسمعنا خبار الخير ..

- مليكة [كضحك وضور فعينيها] :

كيشتي عندي ولدي سهيل ، شهوة منو تمناه كل حبيبة ... وانا عجباتني ليه صفاء ، البنت الصغيرة لي عندكم .. بغيتها ليه .. كتبان لي مصوابة ومرزنة ومتبتة وعقلها صغير وكتسمع الكلام ..

- سعاد (شافت فمعزوزة ومعزوزة شافت فيها ) :

ولكن صفاء اختي مليكة مكتفكرش فزواج وحتى حنا مكنفكروش نعطيوها .. وعاد سكنا جداد مزال مكنعرفوش بعضياتنا مزيان ..

- معزوزة (جامعة غوباشتها ) :

وسمحيليا اختي مليكة ومديريهاش مني قلت الصواب ، من نهار حطينا رجلينا فهاد الزنقة كنسمعو بلي راجل عدك ، رجليه ملاوطين وغير سامر فزنقة الحناجرة لي فشارع الثالث ... والبنت كطلع لمها ودري راه كيطلع الباه ...

- مليكة (كدور فعينيها) :

لاواه انا راجلي سيدي حسن ماينبش مايخبش الله يعمر ليه الدار ، التيليفون الى دخل لدار مكايسوني ليه ..

- دخلات عليهم مسيرة ، دايرة الميكة لراسها سيلة ديال الحنة هابطة مع نواضرها :

ايوا الحمد لله وشكر لله منين عندك راجل ، داخل سوق راسو ... اهو راه يقد يكون عندو تيليفون اخور مامبينوش ليك ، ولكن انت مديريش فبالك وتفكري فهادشي وتبرزطي بيه راسك .. وكيف قالت ليك مي ماعندنا بنات لزواج ، انت راه جايا كطلبي خدامة ... شوفي ليك شي روبو يخدم عليك وعلى ولدك البيطالي لي حاضي الغادية وجايا ، هالي عندها لور قد البرمة وها لي عندها الصدر قد الحزمة ..

- مليكة [ بزعاف] :

وجينا ندويو مع الكبار ، حتى ولاو يتلاحو علينا الصغار لي قد نص فخضنا ..

- مسيرة [ وقفات] :

عاودي أش قلتي ؟ [شافت فسعاد وفجداها] :

اش قالت ؟

__________________________

- وقف طوموبيلتو قدام السبيطار .. نزل منها بخطوات السريعة ، كتبان ليه نجية واقفة وكتبكي غير شافتو جات عندو كتبكي وتزاوݣ :

سي جلال هالعار ، هالعار مابغاو يݣولو ليا والو .. خلاوني بحال الحنش لي مقطوع ليه راسو ..

- مادواش ، طبطب على كتفها ، يلاه ايتحرك يسول الطبيب حتى وقفو صوت رجولي .. دار كيبانو ليه زوج رجال ، دايرين بانضات فدراعهم مكتوب فيها الأمن الوطني ..

- [وقفو عليه حرك ليه واحد راسو ونطق ] :

سي جلال الإبراهيمي ، خاصك تفضل معانا ..

يتبع...