روبي ڤيريدجو الجزء 12

- نسيم [برزانة وإبتسامة بشوشة طبطب ليه على كتفو ] :

داكشي نسيتو ، وعادي الغلط كيوقع .. مديرش فبالك .

- كريم : بارك الله فيك ..

- سارة : تصبحو على خير

- نسيم : تصبح على خير .. خرجو ساد كريم الباب وراهم ..

__________________________

- الايام دغية كتفوت والعمر كيزيد مكاينقصش فبلاما نضيعو عمرنا فشد ليا نقطع عليك .. بلاما نضيعو العمر ديالنا فالخصام والحقد والحسد والغيرة ، اليوم حنا هنا غدا علم الله فين انكونو ، واش الغد انكونو مزال فالحياة باش نصلحو من اغلاطنا .. داكشي باش الإنسان يبغي راسو يبغي الناس لي حداه يتمنى الخير للغير كيما كيتمناه لراسو ..

- لي عندو حلم يجري وراه ، يقد يطيح اليوم وغدا وبعدو ولكن ، ضروري مغادي يوصل قدما طول غايجي نهار وغايوصل ..

_____ فبوتيك كبيرة ، دازاين ديالها كان اقل مايقال عليه روعة ، لا من نحية ليڤيترين لا من نحية ديكو .. مجهز بانواع واشكال ديال شوكولاتة ، لي بالكراميل لي بالعنب ، لي بالبندق .. لي بشوكولا السوداء .. حتى من شوكولا المسوس كاين ..

- اي نوع من شوكولا كاين .. واقفة والإبتسامة على وجها ، كتستقبل الناس .. البوفي كان من ارقى مايكون .. سراج واقف بكامل أناقتو .. هو وهلال ، ليليا حتى هي .. هارون ويوسف .. الكل كان من غير جلال لي حظر فاخر لحظة ..

- جلال [سلم عليها بالوجه] :

كانت عندي شي خدمة عاد ساليت .. مجايينش؟

- أمينة [بملامح باين عليها معاجبهاش الحال ] :

لا سيفطوليا غير كادو ، ماما مقاداتش تخلي بابا حيت عيان ..

- جلال [قوس حواجبو ، بنبرة صوت باردة عاكسة القلق لي حس بيه الداخل ] :

مالو ؟

- أمينة [تنهدات تنهيدة طويلة] :

بين ليلة ونهار دارو خوات عليه ، ولادو بعدو عليه كاملين ، قاتلي ماما بلي كانو كيتغداو وداخ كونما شداتو كان غادي يطيح .. شافو الطبيب وقاليهم بلي عندو السكر ..

- جلال [ غوبش بإستفهام وبحة حرشة رجولية ] :

فين عمر الواليد كان فيه السكر ، من إيمتا ؟

- أمينة :

قاليهم الطبيب غير مأخرا ، وغالبا جاتو بالفقصة وكيرض لقلبو داكشي باش .. سكتات وشافت فيه بترجي :

دير شي وقت وشوفو أخويا ، عفاك .. واخا يدير لي دار راه كيبقى بابا .. وكيبقى باك ، لي غلب يعف .. حتى ليمتا اتبقاو بحال هكا .. خاصكم تݣلسو ودويو اخويا ضروري تصافا الخواطر ، راه مكاين لي مضرور بيناتكم قد ماما ..

- حتى ليمتا أخويا ، الموت والحياة هادي .. انت مول العقل والحمد لله واخا هاداكشي لي وقع بيناتكم ضرك ، ولكن راه نفعك حتى وصلتي لهادشي .. عفاك أخويا ، مجاوبهاش تنهد تنهيدة طويلة ، مطبطب على ظهرها عاطيها شبح إبتسامة ..

- دخل كريم ، باين بلي جاي زربان كيجري .. هز يديه الفوق بإستسلام :

غير سمحيليا ، كنت مع مسيرة .. راكي عارفة اليوم الكليب ديالها خرج داكشي باش تعطلت .. جلال حنحن بصوت رجولي :

انا جاي .. خلاهم ومشا بعد جار هلال لبعيد ..

- أمينة : طلبتها تجي واش مغاتجيش ؟

- كريم [هز هز راسو] :

لا ولكن سيفطات ليك معايا هادي ، عطاها واحد البواطة .. حلاتها كانت دائرة ديال الزاج مكتوبة بدهبي شوكولاتغي 5 إتوال .. بإبتسامة كتشوف فيها بإعجاب .. تحركات من حداه ومشات للجهة ديال البيرو ديالها وحطاتها ، حطات البواطة فواحد الجنب ورجعات عندو بتساؤل :

دفعات ولا مزال ؟

- كريم : لا دفعات الصباح ، قاديت معاها الوراق لي أتحتاج ودفعات القراية مابقى ليها والو نهار 15 فشهر 9 ..

- امينة : احسن ماغدير والله الله يوفقها ..

- كريم : امين .. غير يسالي هادشي خاصنا ندويو أحبيبي ضروري ..

- امينة [ بتساؤل] :

فاش ؟

- كريم : يدوز هاد النهار وتعرفي لا زربة على صلاح ..

- مجموعين على الطبلة .. سندس حاطة الحليب فوق البوطة .. والبنات مجموعين ..

- مسيرة : قهرتوني بالليمون مع المعدنوس ، واش انا بقرة كل صباح وبزاف .. وزدتوني بهاد العدس مطحون مع دانون .. الى بقيت هكا ايولي الباب مايخرجنيش ..

- صفاء : براكة من الفشوش الخاوي .. عندك الزهر لي مي ماقالتهاش لبابا وماما .. دوينا غير بينا وبينها .. بالكشايف باش سكتات ومقالتهاش ليهم ، وهي لي وصاتنا نجيبو ليك العدس بلدي نطحنوه ليك وينخلطوه ليك مع دانون ، شوي كيف بدا اللون كيرجع فوجهك ..

- سكينة [شادة تيليفونها ] :

وكونطك أنستغرام طلع أصاحبتي تبارك الله يلاه دازت 4 يام على الكليپ ديالكم ولا عندك 50 ألف .. ولكن الصراحة الاغنية واعرة بزااف ..

- مسيرة [كتلعب بسنسلة لي فعنقها ] :

انا مزال ماعندي مع هادشي وجاني فشكل والله العظيم .. لبارح كنا خارجين انا وصفاء نتسخرو لعند داك خونا لي فدورة لي كيبيع الإلكترونيات لقيناه مخدمها ..

- شافني بقا كيشوف فتلفازة لي قدامو وفيا ضحكني .. أجي اشنو درتي مع سراج ؟

- سكينة : نهار الإثنين غادي نبدا الخدمة .. انا لي انكون مكلفة بلي باغيين يتسجلو فالكلوب ، حتى صالير زوين الصراحة ..

- مسيرة [بصوت أنثوي باح ] :

وماعندك ماتساليه والله العظيم ، طلع ظريف ولد الناس .. قاطعهم صوت تيليفون ديال مسيرة ، هزاتو طلعات ليها نمرة نسيم ، فتحات الخط :

صباح الخير ، الحمد لله بيخير وانت ؟ .... دابا ومزال ݣاعما فطرت ، فين واش هادي لي فدورة ؟ واخا واخا صافي انا جايا .. قطعات معاه واقفة مكحزة الكرسي ..

- سندس : فين غادية مزال مافطرتيش ؟

- مسيرة : انا جايا نشوف نسيم شنو بغاني وغانرجع ، انلزح عليا غير القبية ديالي ونجي ، لبسات صابو ظيال الصالحة فالموڤ بارد فيه رسومات صغار ، مع سروال كيطمة لايحة عليها القبية ديالها ، هزات تيليفونها وخرجات .. خرجات من العمارة ضايرة لشارع لاخور .. قطعات الشانطي .. فتجاه القهوة كتبان ليها طوموبيلتو واقفة ..

دخلات للقهوة ، كان ݣالس كيشرب فالقهوة ديالو غير شافها جايا وقف ، خلطات عليه .. سلمات عليه بالوجه وݣلسات ..

- مسيرة ياكما تعطلت عليك ؟

- نسيم : صافي ولفت هاد تعطال ديالك ، أنت صاڤا صبحتي مزيانة ؟

- مسيرة :متزيدش فيه ، مع هضرتي معايا مع خرجت ههه باز ليك ، لالا الحمد لله بيخير .. أمضرا كاين شي جديد ؟ مجبتينيش لهنا على صباح غير هكاك ..

- نسيم [ضحك ، نزل عينيه لعنقها ، ورجع شافيها ] :.

مزال مابغيتيش تزماي ، هاديك سلسلة مناوياش تحيديها من عنقك تخبيها ..

- مسيرة [ببرودة] :

علاش غادي نحيدها ... الحمد لله كولشي داز على خير وبيخير ، بلاما تبقا مخلوع على والو وليتي بحال كريم ..

- نسيم : من نيتك ، على لي داز عليك قليل ، الخلعة لي ركباتنا داك نهار مانبغيها لحد ... رضي لبال لراسك الله يرضي عليك ، واخا تشدو خوتنا ولكن الانسان يرد البال .

- مسيرة : واش جبتيني لهنا على هادشي ، بغيت نفطر فيا جوع ، مصبحين عليا بعصير المعندنوس والليمون ، والعدس مطحون مع دانون ..

- نسيم [ضحك ضحكة رجولية ] :

لي بغا العسل يصبر لقريس النحل ، لا الالة ماجبناكش على هادشي ، وجدي ليا راسك ..

- مسيرة [بتساؤل، بنبرة صوت هادئة ] :

لاياش؟

- نسيم :

السيمانة الجاية غانمشيو فالإمارات ..

- مسيرة [بانو على وجها ملامح الصدمة ] :

شنو غادي نديرو فالإمارات ؟

- نسيم [بجدية ] :

كاينة عندنا حفلة تم ، فواحد لوطيل معروف .. وجايين ناس معروفة ، مالك ياك لاباس ؟ شفتك مافرحاناش .. ياكما ماعندكش الپاسپور ؟

- مسيرة [عقدات غوباشتها محركة راسها بنفي] :.

لالا عندي ، ولكن وقيلة مغاينفعني بوالو وموحال نقد نمشي معاك أنسيم ..

- نسيم [عݣد غوباشتو بإستفهام ] :

وعلاش بسلامة ؟

- مسيرة : أنت عارف البلان لي وقع راه عاودت ليك .. انا ديجا مشدودة ، وعلى ماسمعت لي كيكون مدوز الحبس كيكون صعيب ليه السفر ..

- نسيم : فأشمن دستور قريتيها واشمن قانون كينص على هادشي كدوي من نيتك شفتيها فشي فيلم ..

- مسيرة [عوجات فمها] :

وأنا سمعتها ولكن متأكدتش مزيان ..

- نسيم :

ياك صفاء قارية القانون ، سوليها باش نيت ضحك عليك ... شحال من واحد تشد هنا فالمغرب ، وخوا مشا الاوروپا عادي جدا ، حاجة وحدة لي ممنوعة على لي مدوزين الحبس ، هي الپاسپور الحمر .. غير هادشي الالة اتسافري فين ما بغيتي ، سيري حتى لماليزيا مكاينش لي غايدوي معاك ..

- وجدي ليا راسك ، وسكسفي ليا على الحالة حوايج جداد ، شي كساوي طوال يكون خاصين بالمناسبات ومستورين فنفس الوقت .. بغيتك تكوني أنيقة وكلاص يالالة ..

- مسيرة [رجعات بظهرها اللور بإبتسامة] :

جاتك أسيدي ، يلاه طلب ليا نفطر ..

- نسيم : هي لي ماتعاود ..

- مسيرة [بتساؤل] :

ديالاش بعدا هاد الحفلة بأشمن مناسبة ؟

- نسيم [أشر لسرباي] :

فطري بعدا ونݣوليك ..

_____________________

- فعين الذياب قدام مبنى كبير .. حطاتها الطاكسي ، جامعة شعرها على شكل ديل حصان .. لابسة سروال فالكحل مزير شوية من الفوق ومن رجلين واسع فيه جياب من الجنب .. مع تيشورت وقبية حازماها على الخصر ديالها .. وسكادو فظهرها ، هزات عينيها الفيروزية .. كتتفحص المبنى ، والإسم لي مكتوب بخط أحمر CLUB SIR ..

- تقدمات زوج خطوات ، قدام الباب الزجاجي لي غير وقفات قبالو وتحل .. دخلات ، كيبانو ليها بنات داخلات ورجال من مختلف الاعمار .. لي كانت لابسة غير بيل سماطي وكولون سبور ، ولا لي لابسة بيل سماطي وسيكليزم[شورط رياضي] من المظهر ديالهم باينين من اشمن طبقة ..

- وبحال هاد ليكلوپ ، كتكون عندهم طريفة محددة مكايقدو عليها ا ناس البورجوا .. مع زادت تقدامات دورات راسها ليمن ديالها كان طويل ، بان ليها واقف داير يديه على جنابو ، واقف مع واحد السيد هز راسو فيها اشر ليها براسو .. دغية سربا مع السيد وجا لعندها بالإبتسامة ديالو الجذابة ، مد ليها يدو مسلم عليها ..

- سراج [ بصوتو الغارق الرجولي ] :

ماعندي مانسالك ، جيتي نيشان ماتجليتيش ..

- سكينة [ بشبه إبتسامة] :

واش نسيتي بلي كنت ساكنة فكازا ، حاجة باينة مغاديش نتجلا وغانجي نيشان ..

- سراج [ صغر عينيه بنظرة غريبة ورجع مكمل كلامو] :

وي بصح ، هادي نسيتها .. أجي نوريك بلاصتك .. سبقها مخليها وراه .. تابعاه وعينيها على ليصال ، كل واحد ولاياش لايق..

- وصل قدام واحد الكونطوار ديال الخشب طويل ، عندو واحد الباب صغير ، حلو ودخل وقف وضار عندها حتى دخلات .. كان محطوط پيسي وكرسي ، مع كاميرا .. او وراها كان بحال ماريو ديال الزاج ..

- سراج [بجدية وبحة خاصة ] :

هاد لاڤيتغين فيها السوارت ، اي كليان كيدخل كتعطيه الساروت الخاصة بصال ديالو ، هادي لافيتغين ديال لي صال دالحديد ، وهادو ديال الزومبا وهادو ديال الايروبيك ، وهادو الصال الخاصة بالمحجبات داكوغ ..

- كدخل ولا كيدخل الكليان كتسوليه أشمن صال وكتعطيه ساروت ديال الباب الخاصة بساك ديال حوايجو .. كيخلي الساك ديالو تم ، حتى يسالي وكيرجع ليك الساروت وانت ترجعيه لاڤيتغين الخاصة بيه ..

- خاص غير تصغري دماغك كولشي اتعرفي ليه .. حاجة أخرى ممنوع نكشرو فوجه الكليان ، بحال هاد تغوبيشة لي دايرة دابا بحال الى باغة دابزي تحيد ..

- سكينة[دورات لسانها وسط فمها معوجاه بشبه إبتسامة ، ناطقة من تحت سنانها ] :

كون هاني دابا مكاينش الكليان باش نضحك فوجهو ، غير انا وأنت ..

- سراج [طلعها وهبطها بنظراتو لي ختارقوها ، وبنبرة صوتو المتميزة ] :

بحال الباطرون بحال الكليان ، واحد كيخلصك .. او واحد الى سهرتي على راحتو ايخلي الباطرون يزيدك فالخاصة ݣاع ..

- سكينة [ببرودة] :

انا براكة عليا اندير خدمتي كيما هي ، هذاك هو الفضل ..

- سراج [بجدية ] :

الپيسي ، كتقيدي فيه الخلاص ، هاد الخانة ديال العام وهادي ديال الشهر ..

- كانت متبعة مع كل كلمة كيقولها واي شرح كيشرحو ليها كدخلو لدماغها حتى سالة كلامو وختمها بجملة لي نرڤزاتها ..

- انت مانخافش عليه فهاد الحوايج .. لي تخلي لايف يخرج من 195 دولة هادشي اخضرة فوق طعام بين يديه .. ولالا الݣاورية ؟

- سكينة [ تبسمات إبتسامة واسعة وعينيها فعينيه] :

عندك الصح ، هادشي ساهل بنسبة ليا ... حتى كيفاش نخرج على الواحد ونعرف أش مخبي من وراه ساهل بحال شريب الما .. خاص غير الواحد مايجبدنيش ويتاقى شري ..

- سراج [هزهز براسو ، فاهم مغزى كلامها فين غادي ... ضارب بعرض الحائط تهديدها ] :

داكشي كان شحال هادي ، قبل مايكون الضوسي ديالك عند البوليس .. دابا الى وقعات شيحاجة بسيطة بحال هك يقرقبو عليك مانبغيهاش ليك الݣاورية ..

- سكينة [دورات لسانها وسط فمها ، مغمضة عينيها موركة عليهم ، ماسحة الابتسامة من شفايفها ] :

غادي تكمل ليا ولا انبقاو هنا ؟

- سراج [ بإبتسامة نصر] :

نكملو نكملو ..

________________________

- كدور فبلاصتها غادية جايا معصبة .. حاطة تيليفون على ودنها :

واش انت جهلتي ولا مالك ... سير خطب السيدة ودوز الخطوبة ديالك انا وياك انديرو أبيل كاميرا بحال الى انا معاك أسيدي ..

- كريم [بصرامة] :

راه دوينا واش انت مريضة .. بغيتيني ندير الخطوبة بلا بيك راه مايتقبلهاش العقل ..

- مسيرة [ ݣلسات بسخط ] :

كريم شوف متعصبنيش الله يرحم باك .. غدا عندي الطيارة خليني ماشية بݣانتي .. واش انت غادي دير العرس راه غير خطوبة هادي .. راه حشومة ، السيدة دويتي معاها ودويتي مع خوتها ومشات لدارهم تعلم والديها وتوجد .. وغاتجي تقولها لا حقا مسيرة مغاتحضرش مابقات خطوبة .. فكر شوية بعقلك ، ومتكونش برهوش ..

- كريم : دابا انا برهوش ؟

- مسيرة : ماتشدش ليا فهاد الكلمة تاني بحال غناية حشاك .. غادية مسافرة خليني غادة فرحانة وبخاطري ، دوز الخطوبة وفرح الله يكمل عليك بالخير ، تستاهل تفرح .. اجي بعدا العرس إيمتا ؟

- كريم [ زفر بقوة ] :

من هنا لعام إن شاء بغيت نشوف دار حسن من هادي لي انا فيها ، راكي شتيها على قدي ديال زوافرية ..

- مسيرة [ دارت رجل على رجل مرجعة راسها لور ] :

حتى لوانها خايبين ، مافيهمش الروح .. ديك الدار عندك كتجيب ليا الكأبة .. احسن قرار درتي ، وعام دغيا يدوز .. يلاه يلاه توجدو كولشي على دوقكم وغير بشوية ..

- كريم [ بتساؤل] :

إيمتا راجعة انت ؟

- مسيرة [ تنهدات ] :

واحد 10 يام إن شاء الله غادي نرجع ..

- كريم [ واخا معاجبوش الحال مورك على قلبو ] :

كنت باغيك تحضري ولكن نعوضوها فالعرس إن شاء الله ..

- مسيرة [ تنهدات تنهيدة طويلة] :

إن شاء الله .. يلاه انا مشيت خاصني نقضي شي شغال تيليفون بيناتنا أولد قلبي ..

- كريم [تبسم لا إراديا .. كانت قادة تعصبو وفلحظة تخليه يبرد ] :

تهلاي فراسك أبنت قلبي ..

- قطعات معاه حاطة التيليفون ، داخلة للصالة .. كانت سندس ݣالسة وحاطة قدامها باليزة ديال مسيرة كطوي ليها الحوايج وتستف ليها ..

- سندس : واش هو الخطبة عندو هاد السيمانة ؟

- مسيرة [ مدات يديها كتعاونها] :

واييه ، عرفتي صعر فاش ݣلتها ليه .. ماعجبوش الحال .. وزاد كمل فاش عرف بلي حتى انتوما مغاديينش ..

- سندس : وختي كون كان هنا اه .. ولكن باش نمشيو حتى لإفران عند ناس مكنعرفوهم مكايعرفونا ، جات بيزاغ مزال كون كان غايتعرس ممكن ولا الخطوبة لا ..

- مسيرة : المهم سلكناها وصافي ..

- سندس : الله يكمل عليهم بالخير ، زوينين الكسيوات لي خديتي واعرين حمقوني ..

- مسيرة [ شافت فيها بنص عين] :

أتهناي منين نرجع ايبقاو اليك ، عارفاني ماعنديش مع هادشي ..

- سندس[ بعتاب] :

مني نيتك ، ونساي ليا مسيرة ديال شحال هادي .. دابا راه خاص تبدلي كلك مابقيتيش مسيرة القديمة ..

- مسيرة [هزات حاجب منزلة الاخر ] :

الناس كيتبدلو هنا [أشرات لراسها] دماغهم لي كيتبدل ، اما شراوط عطاهم الله ..

- سندس [تنهدات بقلة حيلة] :

هاهي اتبدا تاني ، طوي اختي عفاك طوي .. كملو تستاف الحوايج حتى سمعو صوت الباب تحل وتسد وصوت صفاء وسكينة ..

- الطيارة كانت عندها مع 2 ديال النهار .. فاقت بكري لبسات سروال دجين مع شوميز نص كم فالموڤ .. ݣورميط فذهبي ، سبرديلة ديال دجين فالبيض مع نظاراتوشمسية ، شعرها كتفات جمعاتو وشداتو شدة عادية ..

- تجمعو على الطبلة ديال الفطور فطرو .. سكينة هزات سكادو ديالو تسيفطات مع مسيرة وخرجات للخدمتها .. بقات معاها غير صفاء وسندس ..

- صفاء [بترجي ] :.

ماتنساينيش من ديديكاس عفااك ..

- مسيرة [شدات على راسها ] :

سيمانة هادي وانت كتعاوديها ، وصافي وبراكة وناري ياربي الحبيب ..

- صفاء [شافت فيها بنص عين ] :

حيتاش عارفاك كتنساي ، داكشي باش كنأكد عليك .. تشوفي الاضواء ونجومية وتنساينيش ، أجي زعمة متقديش تجيبي ليا شي أيفون ابو 3 عيون ؟؟

- مسيرة [شافت فسندس بقلة حيلة ] :

دابا هادي شنو يديرو معاها الناس ؟ غير قولي ليا ... [رجعات شافت فصفاء] شوية دصبر اختي .. خليني احتى ندير لاباس ونولي بورجوازية وناخدو ليك تنهاي صافي ؟

- صفاء [وقفات عنقاتها من ورا ظهرها بجهد ] :

القلب الكبير ، عارفة لي كاين اختي انت راه الحب الله يخليك ليا ..

- سندس : نوضي دابا يجي نسيم ويلقاك مزال مواجداش ..

- مسيرة :

والحوايج راه لبسناهم ، غادي يسوني ليا فاش غايوصل أكوني هانية .. سونا عليا با الصباح مع 8 ..

- سندس [كضحك] :

منبر عليك على الصبيحي ، يحسابليه اتمشي بكري ..

- مسيرة :

أه انا قلت ليه راه 2 عندي الطيارة عند بالو قلت ليه 9 مسكين هههه .. يلاه انا غادي نوض نشوف واش نسيت شيحاجة ، ويلي بلات شارجوري .. دخلات للبيت هزات شارجور ديالها دارتو فساكها مع خرجات من البيت مع سونا ليها التيليفون وقطع .. جبداتو من جيبها طلعات ليها سمية نسيم ، عرفاتو وصل .. رجعات تيليفونها دغية وخرجات ..

- نسيم كاين التحت انا خاص نمشي [عنقات صفاء باستها ، وعنقات سندس] ..

- سندس : تهلاي فراسك وتيليفون بيناتنا توصلي علمينا صافي ..

- مسيرة [دارت سكادو على ظهرها وجرات الباليزة ديالها] :

تهناي صافي ، يلاه بسلامة .. فتحات الباب وخرجات ، خلات البنات مشاو للبالكو كيطلو عليها ، بان ليهم نسيم نزل خدا من عندها الباليزة ديالها فالكوفر .. فتحات هي طوموبيل طلعات , رجع للبلاصتو ساد الباب ديمارا وشدو الطريق ..

____________________

- فجهة أخرى ، وبضبط إفران .. الڤيلا كانت مقلوبة سفاها على علاها ..

- ماريا [هازة تيليفون وكدوي] :

ختي زهرة الله يرضي عليك ، بحال كيفما مالفة .. كولشي يكون على حقو وطريقو ومتنسايش ليا الكعبة والبهلة ، ضرورية الله يرضي عليك .. شوفي بلاطو ديال الكعبة وبلاطو ديال غريبة ، و3 لاخرين يكونو مشكلين ... ايااه الله يعطيك الستر ..

- وعاد المالح پيتزا بلاطو وبلاطو ديال البسيطلات .. ومتنسايش ليا البريوات ديالك ديال اللوز وديال الكروڤيت ..

- لالا عرفتيهم مع الحامض مكايبغيوش ، ديري لي زوج طارت ديال الشكلاط وديال الكراميل .. وحدة تكون فيها خطوبة مباركة وإسم أمينة وإسم كريم .. غادي نصيف لي يجيبهم غدا إن شاء الله مع الخمسة .. صافي اختي زهرة الله يكبر بيك .. خليت ليك الراحة ..

- أمينة [حاضياها حتى سالات ] :

ماما راه السيد جاي غير هو وباه ... لاش هادشي كامل مافهمتش انا ..

- ماريا [الإبتسامة مرسومة على وجها] :

ومالين دار مياكلوش ، خوتك جايين حشومة ..

- أمينة [كدور فراسها ] :

همممم قولي هادشي دايراه على خوتي ، وانا نعيق .. وهو هلال جاي ، ولكن جلال منظنش ..

- ماريا [حسات بالبرودة طلعات معاها ، قلبها كيضرب .. ملامح وجها تبدلو عينيها دغية عمرو بدموع] :

كيفاش ؟ واش خوك جلال مجايش ؟ ياك قلتي غايجي باش يتسامح مع باه وفرحتيني كنتي كتفلاي عليا ياك ؟؟ علاش مابغاش يجي ؟

- أمينة [بملامح جدية] :

جلال غايسافر أماما ، مامساليش الطيارة ديالو اليوم ..

- دموعها نزلو سخان ، كانت باغية تشوفو تعنقو توحشاتو كانت عوالة تمشي تشوفو كونماشي جواد لي مرض ، كانت فرحانة بزاف حيتاش اتشوفو ... وجدات ليه بيتو بيديها وعطراتو بيديها .. فرحتها مكان عالم بيها غير الله ..

- حتى من الحلوة لي كيموت عليها الكعبة دومونداتها على ودو هو .. حسات بالقهرة عݣدة فحلقها مالقات ليها دوا ، دموعها كانو كيسيلو بحال شي واد كان محبوس وتطلق صراحو .. يدين قاصحين حاوطو كتافها معنقينها بقوة وقبلة طويلة تطبعات على حنكها ..

- صوت رجولي عندو بحة مميزة نطق :

الدجاج مدغمر كاين ولا نرجع بحالي ؟ .. بكاها رجع إبتسامة وتزادو شهقاتها .. وركات على يديه بقوة ، ضار لعندها وݣلس قفازي .. طلع يديه ماسح ليها دموعها شاد ليها وجها بين يده الكبار المعرقين ، طابع قبلة طويلة على جبهتها .. بعد كيشوف ليها فعينيها ، وبنفس النبرة الرجولية نطق :

الناس يكبرو ويبان فيهم الشرف ، وانت كتصغاري وتزياني اش تم اماريا عطينا السر [غمزها]

- بكلامو خلاها الضحك ، جراتو معنقاه فالحضن ديالها ... مزيرة عليها مستنشقى ريحتو .. ريحتو لي توحشاتها ماشي ريحة پارفانو .. الريخة ديالو هو ريحة خاصة كتشمها غير هي ، حيت هي لي حملات بيه 9 شهور فكرشها تعدبات عليه ، ولداتو وسهرات حدا راسو ..

- نفس الريحة بقات فيه ، ولا ممكن غير هي بوحدها لي كتشمها .. جاهم صوت رجولي اخر من وراهم :

و الواليدة .. بان ليك اجلال زعمة حنا مابناش ليك ؟؟

- ماريا [بعدات عليه كضحك كتمسح فدموعها ، هزات راسها فهلال ، لي تقدم عندها بخطوات واسعة ، عنقها من اللور باس ليها راسها ويدها ] .. :

- توحشتكم بزوج ، ولكن خوك زايد عليك نغيزة [ضحكات ضحكة طفولية ، لي سرعان ماجمعاتها وضارت كتخنزر فأمينة ] :

والله كونما حشمت ، ودرت على وجه خطوبتك أبنتي حتى علامك نديرو فوق الجامع..

- أمينة [كدبل فعينيها ] :

والله ما انا ، راه هوما لي قالو ليا نكدب عليك ونديرها بيك ..

- ماريا [بعتاب] :

باز ليكم الوجه لي تحشمو عليه والله ماتكسابوه ..

- جلال [ݣلس ݣلسة رجولية مسرح رجليه ويديه على الفوتوي] :

دابا ش ݣلنا كاين شي دجاج ولا غير شفاوي الواليدة ؟

- ماريا [الفرحة أتنقز ليها من عينيها ] :

ݣاع لي كتشهاه خاطرك واجد .. خاصو غير أنت ..

- هلال [ݣلس مزول القبية ديالو ، كيدور فعينيه] :

فين هو الواليد ؟

- ماريا [عينيها على جلال مراقبة ردة فعلو] :

من نهار ولا شوية لاباس ، وهو كيخرج للجردة لورانية ... ربا 3 ديال القطيطات .. يخرجهم ويݣلس تم ..

- جلال [هز فيها عينيه ، مدور وجهو كيحك فللحيتو .. حنحن وتنهد جامع الوقفة ، بصوتو الحرش البارد ] :

خليك أنت .. حرك ليه راسو ، حركة خلات هلال يتراجع ويݣلس .. خلاهم جلال متبعينو بالعين ومشا للجهة الجردة ..

- ماريا [تنهدات تنهيدة طويلة] :

ياربي ياربي .. ياربي يتصالحو ياربي ونتهناو ياربي ، قلبي عالم بيه غير الله ..

- هلال [هزهز براسو ] :

يكون خير .. مديريش فبالك

- ماريا [حطات يدها على قلبها لي كان كيضرب بجهد بالخلعة] :

إن شاء الله أولدي ..

_____________________

- نسخة طبق الاصل .. من الوقفة من الهيبة من الحضور ، كون جاو قبل سينين ايقولو بلي الزمن تعاود .. من الشبه لي بينو وبين ولدو .. لابس سروال ديال الثوب فالݣري .. مع شوميز فالزرق مع تريكو كول ڤي فالݣري ، مع صباط فنفس اللون ديال الدار من النوع المريح ..

- كان محني وفيديه بواطة ديال الماكلة ديال القطوط ... كيحط فواحد 3 ديال الطباسل ديال الالومينيوم .. ضايرين بيه 3 ديال القطوط .. وحدة بيضة ، والثانية مزوقة بالصفر والكحل والبيض .. اما الثالثة كانت زهرة وعند عنقها بيض ، وكانت باينة بلي ماشي نتوة بلي ذكر لوخرين لي نتوات ..

- بقا واقف مراقبو من اللور كيفاش مهتم بهاد القطوط .. كيفاش حط ليهم الماكلة ، وكيفاش عمر ليهم لي طاس ديالهم بالما .. وكيفاش كيدوز على على ظهرهم بكل حب وحنان .. ضحك بإستهزاء حيت فاللحظة غار منهم غار حيتاش ، هو تحرم من داك الحنان لي باه كيعطيه ليهم .. تقدم زوج خطوات ، ومافكرش زوج مرات ناطق بداكشي لي كان كيدور فبالو ..

- سبحان الله ، لي شافك كيفاش كتعامل معاهم مايݣولش انت لي جريتي عليا هادي 18 عام من هاد الدار .. كيݣوليك المشاش كيمشيو عند داك الانسان لي كيحسو بݣلبو بيض ، وݣلبو حنين العجب ..

- هضرتو دخلات بحال السم لݣلبو ، خلات يديه يحبسو على المداعبة لظهر القطوط لي ستغلو الفرصة وتسلتو من من تحت يديه ، مخبين ورا الشجيرات الصغار ... مترقبين بعينيهم هاد الزائر الجديد ، لي قطع عليهم الخلوة ديالهم .. ومخلاهمش ياكلو فراحتهم ..

- ناض بشوية من بلاصتو وضار لعندو كيشوف فيه ، كيسكانيه بعينيه .. النظرات لي كانو غير النظرات لي كان كيشوف فاش كان كيجي ، بان المرض على وجهو .. بان العيا .. حتى من ملامحو تبدلو ، مابقاش كيبان عليه داك الغرور وداك الشموخ لي كان مالف كيشوف على باه ..

- حدر راسو بلع ريقو راجع بخطوات اللور ، شد فدراع الكرسي وݣلس متنهد تنهيدة طويلة .. حركة عطات الضو الاخضر لجلال باش يتحرك ويݣلس حتى هو .. بزوجهم كان خاص يدويو ، كل واحد كان خاص يفرغ ويخرج شنو عندو ويتصالح مع داتو باش يقد ينسى لي داز ..

- بلاما يشوف فيه .. كيشوف فنقطة فارغة كيسترجع الذكريات لي دازو ، بصوتو الرجولي لي ماتبدلش واخا كبر .. بالعكس تزادو وقار وهبة ، كتبين بلي هاد الانسان دوز شحال ديال الحوايج فهاد الأعوام كاملة لي دازت.. :

- نهار شديت الباك ، كنت باغي ندخل لكلية الطب ، امنية حياتي نكون طبيب .. كنت باغي نسافر ونزور الدول النائية ونعاون الناس ، كانت عندي واحد المذكرة كنكتب فيها ݣاع داكشي لي بغيت ولي ناوي ندير ، واحد القوة كانت لداخل ديالي .. كنݣول حتى واحد مايݣد يهرسها ، ولكن جا الحاج الله يرحمو وهرسها ..

- جواد انت الولد الكبير لعائلة الإبراهيمي ، خاصك دير مدرت ، خاصك تعاوني .. وتكون بجنبي وتبع طريݣي وطريݣ با .. ديما الولد الكبير فعائلة الإبراهيمي خاصو يتبع طريݣ باه ..

- ݣاع داكشي لي كنت كنخطط ليه تضرب فزيرو .. سكت ودرت ماݣال الحاج الله يرحمو ، وداكشي لي زرع فيا بغيت نزرعو فولادي . .. [شاف فجلال] حتى انا وليت بحال الحاج .. وبغيت ولادي يكونو بحالي ، ولكن ماضربتش حسبة بلي الواليد لي زرع فيا هادشي ، هو لي وݣف ضدي ومشا معاك وشجعك على داكشي لي ماشجعنيش عليه أنا ، انت لݣيتيه هو انا مالݣيت حد ..

- جلال [ببرود ق//ت/ل] :

زعمة هادشي يعطي ليك الحق دير فيا لي بغيتي ؟

- جواد [بنفس البرود] :

انا مكنعاودش ليك باش نعطي لراسي الحق ، انا كنعاود حيت خاصني نعاود .. حيت خاص نخرج هادشي ونرتاح ونريح مك ... هادشي كنديرو حتى على ودك انت .. سمعني مزيان وحل معايا ودنيك ..

- ياه منكرش بلي ندمت على لي درت ، ومنكرش بلي تغريت ومكانش خاصها توصل بيا لداكشي لي درت .. ولكن كون كونما تزيرتي مكنتيش غادي تخوي ، مكنتيش غادي اتخوي بلادك وتزير ، وتوصل لهادشي لي انت فيه دابا ..

- جلال [تقاد فالݣلسة حاط يديه بزوج على ركابيه ] :

دابا وليتي انت عندك الفضل على هادشي لي وصلت ليه ، وعلى هاد الحساب خاصنا نشكروك ..

- جواد :

كل حاجة وقعات فحياتنا بنسبة لينا خايبة ، راه فيها خير لينا ..

- جلال [بإنفعال] :

الله ينعل جد بو هاد الفلوس ، لي يحرمو واحد من مو وباه ، الله ينعل مت هاد الفلوس والجاه ، لي يخليو ام كتبكي بليل ونهار حيت ولدها بعيد .. ݣاليك خير ، اشمن خير علاياش كدوي ، اشمن خير ليالي كنت ندوزهم بوحدي .. الاعياد بوحدي بحال ليتيم ، نمرض ومنلݣا لي يعطيني كاس ديال الما .. كونما هارون لي كان معايا ، درت فيه با ودرت فيه مي وخويا ، لي انت حرمتيني منهم ..

- اش كان ݣاع غادي يوقع ، كون زطمتي على راسك او وݣفتي مع ولدك ، ودرتي داكشي لي مدارش جدي الله يرحمو معاك ، كان عليك انت تحس بيا ، بعدا جدي بزز عليك انت أما عمي امين خلاه على هواه ، وديك ساع بزز على ولدك الكبير وخليني على هوايا ، خليني نعوم بحري ... يديروها الكبار ويوحلو فيها الصغار ..

- برب مابغيتيش تفهم ليا ، كنݣلس مع راسي كنبقى نسول فراسي ، مكنلݣاش جواب ، بغيت تفهم ولكن ماݣدبتش الواليد والله ماݣديت .. شتي بسابك انت هاد الݣلب مو [ضرب على جهة قلبو] مابقاش كيحس ..

- خاصك تحمد الله وشكرو ألف مرة ، حيت بسباب البراني أنا هنا ..

- جواد [بإستفسار] :

علامن كدوي ؟

- جلال [تفكيرو مشا لعند معزوزة ، سها فتفكيرو ورجع شاف فيه] :

مكاين لاش تعرف ، حيت مكايهمش .. فخبارك عندك الصح ، حيت كونما قصحتيش معايا الطرح مكنتش غانخوي ، ومكانتش انجمع راسي ونجوع كرشي ونجمع ، مكنتش غانكون جلال الإبراهيمي الريفي ديال دابا .. وفبلاصة متكون عندي عائلة وحدة كتبغيني ، الحمد لله ولاو عندي عائلات ، شفتي ربي شحال كبير ..

- انت تحرمتي من اللمة دالعائلة لي كانت شحال هادي ، وانا عطاها ليا الله ، واخا تحرمت من حنان الوالدين .. دابا حنا متعادلين [كان كايدوي بواحد الحرقة وبواحد الإستفزاز وبرود كيق//تل] دابا عاد فهمت علاش ربيتي 3 ديال المشاش .. حيت تحرمتي من ولادك ب 3 بيهم ..

- هلال لي كنتي دايرو تحت جناحك ، وبززتي عليه حاجة ماباغيهاش حتى هو طار ماسماش .. جا الوقت لي يشوف راسو ويشوف هو شنو بغا .. شفتي العدالة الإلهية ، ربي كبييير ولي دعا بالقوة كيموت بضعف ..

- [نقص من نبرة صوتو وبإرتياح وصوتو الرجولي ] :

دابا مابقيتي كتسالني مابقيت كنتسالك ، حتى لي وقع هذا شحال منين دخلت لهاد الدار محيتو من حياتي ، عرفتي علاش .. مكنخليش شيحاجة تحكم فيا ، مغانخليش داكشي لي درتي زمان يتحكم ليا فحياتي ، ويبقى تابعني .. لي عندي ݣلتو وريحت ضميري من جيهتك .. جمع الوقفة باغي يتخطاه ، ولكن يدو ماخلاتوش يتحرك .. وقف كيشوف فيه ، كان باين من الداخل ديالو كيحارب ..

- كان فصراع مع المشاعر ديالو ، لاول مرة أيتحط فهاد الموقف ، لي عمرو تحط فيه حياتو كاملة .. ولكن كان خاصو ضروري مايرتاح ، الموت والحياة هادي .. وهو لي غلط ودار ديفو ، على وجه باش يرتاح ويعيش مزيان فلي بقا ليه فحياتو .. ولي صعيبة بزاف ، هو يخسر حب حياتو لي حارب على ودها ودار لي مايدار ، واخا حداه ولكن بعيدة عليه ، مكانش قاد مزال يكمل بحال هكا ..

- جواد [بصوت رجولي وقور ] :

سمحليا اولدي [زوج كلمات كانو كفيلين يخليو قلبو يضرب ، هاد الكلمة لي كان كيسمعها من البراني بزاف ، بدون معنى ولكن دابا عندها واحد الاثر كبيييير ، ايكون كذاب الى ݣال ماعندهاش اثر ، ايكون كذاب الى ݣال بلي هدمات ليه جميع القيود ، أيكون كذاب الى ݣال ماحس بوالو ، ايكون منافق الى ݣال بلي حس براسو يلاه تزاد من جديد ] كمل كلامو :

- انا عارف راسي مادرت فيها مايصلاح .. تعديت عليك وتعديت عليكم كاملين ، من غير ختك لي فلتات مني [ضحك بتأسف] راه واخا ماكنتش كنبين ليكم ، ولكن راه واقفة ليا هنا [فحلقو] ..

- واخا نݣول لي ݣلت مايشفعش ليا لي درت ... كنت باغي نمارس السلطوية ديالي لي كنت ندير مع الناس على ولادي ، ناسي بلي هادوك دراري من لحمي ودمي .. ماعرفتش اولدي شحال بقا ليا فدنيا ، واش مزال انعيش حتى نشوف ولادكم ولا يكتاب عليا نمشي ݣبل الوقت ..

- داكشي باش باغي تصفي ݣلبك من جيهتي ، الله يرضي عليك لي غلب يعف .. كنديروها حنا الكبار ولكن انتوما صغار كتوريونا الطريق ، [بلع ريقو ونزلات دمعة من عينيه ، كان باغي يعنقو وخايف ، صراع داخلي كان باين لجلال من عينين باه ، كان حاس بيه باغي يعنقو وخايف من ردة فعلو ، مكانش قاد يݣوليه المسامحة ولا يهضر ، مكانش عارف كيفاش يترجم باش حاس من غير يحضن باه ويطبطب ليه على ظهرو ] .. حركة لي فجرات الاحاسيس من اب كبر فسن ..

- اب تحرم من ولدو او بالأحرى حرم راسو من ولدو سينين طويلة هادي ، واخا كان كايتجمع معاه فالمناسبات ، ولكن القلوب مكانتش صافية .. خرجات تنهيدة إرتياح من قلبو ماحسش بيها هادي 18 عام ..

- لا هو لا ولدو ، لي حس براسو داك الولد الصغير لي كان كيركب مع باه فوق العود ، ويضور بيه فرحان بولدو وبشبه ديالو بيه ، لي كان كيفتاخر بلي عندو جوج ديال الولاد قدام الناس ، بهاد الحركة البسيطة ، قد يداوي الجرح لي جرحو بيديه هادي سينين ..

- بعد عليه بدون ماينطق بحرف واحد .. كيشوف فعينيه ، بكل إفتخار ناكق والإبتسامة على وجهو :

عمري ماݣلت ليك بلي كنفتاخر بلي عندي ولد بحالك ، رااجل كيدوي عليه الكبير والصغير ..

- جلال [هزهز براسو ، طابع قبلة على يدو ، ناطق برجولة ] :

السبع مكايولد غير السبع ..

- جواد [ضحك] :

كاينة غلبتيني فهادي ... عينيه مشاو لجهة الباب لي كيدي للكوزينة ، كتبان ليه واقفة معنقة يديها معنقاها امينة وكتنخصص بالبكا .. شاف فولدو :

ماشي غير أنت لي خاص نطلب منك السماحة .. تخطاه ومشا لجهة ماريا لي واقفة كتبكي وجها ولا حمر بدموع .. :

بالوما ديالي ، نهار تزوجنا ݣلت ليك عمري نخلي دمعة وحدة تنزل من عينيك .. وكنت انا السباب فالبكا لي بكيتيه سينين هادي ، سمحيليا واخا عارفك مابقيتيش كتبغيني بحال الاول ولكن [ قاطعاتو مرمية بين يديه معنقاه ، كانت ديما كتبان صغيرة قدامو بطولتو ورجولتو كتبان بحال بنتو ، تخشات فيه بحال شي بنت صغيرة عندها 10 سنين ] ..

- جلال :

أشرفة أشرفة نعلو شيطان ، اسي محمد دي أخويا مرتك لداخل ..

- هلال [كيطنز] :

مابقات عندنا ݣلسة هنا ، نسات دجاج نسات الغدا كيبان ليا نعديو بشي بيض بلدي فثلاجة ..

- جلال [دار يدو على كتف خوه وختو غادي بيهم ] :

ماطيبوش بزاف كيعجبني يبقى خضر ..

- ماريا بعدات على جلال متبعاهم بالعين كضحك ، رجعات شافت فجواد وفعينيه بكل حب ناكقة برفة وأنوثة :

أنا دايرة بحال ديك الحوتة لي وسط الما ، الى طلعات للبر ، غاتموت .. هكاك انا بلا بيك ، واخا دير لي درتي غادي نبقى كنبغيك ، عقلتي فاش قلت ليك الى بغيتي ترجع تكسب قلبي شنو خاص دير ، درتي لي خاص يدار .. ولقلبي راه كسبتيه من جديد ..

- بلاد جديدة عليها لاول مرة غادي تحط فيها رجليها ، كانت كتشوفها غير فتيليفون ... شكون لي مكرهش يزول الإمارات ويدور فيها .. ويتصور فيها ، بلاد زوينة بزاف ..

- مع خرجو من المكار كانت ليموزين كتسناهم ، خدا من عندهم الشيفور البالز ، حل ليهم الباب بالخف حتى طلعو .. عاد حط البالز فالكوفر وشد الطريق للوطيل ..

- عينيها كانو على الزاج ، منباهرة بالبنايات ، وتصميمات .. قلبها كان كيرفرف حاسة بلي هاد السفرية غادي تكون إنطلاقة زوينة بنسبة ليها ونقطة تحول فالمشوار ديالها ..

- نسيم [بإبتسامة ] :

كاينة شوية ديال الخلعة ولا ومتحمسة ؟

- مسيرة [كتحرك فصباعها بتوتر ، يديها كانو باردين وعرقانين بالخوف ] :

فمي نشف عليا ، قلبي كيضرب بجهد كنحس بيه غادي يطيح بين يديا ..

- نسيم [ضحك ضحكة رجولية ، هزهز براسو ] :

ضروري هادشي كيكون فالأول ... اول مرة عادي ، غير رتاحي ماتخافي من والو غادي تولفي .. انت غير الراحة الراحة الراحة .. واخر حاجة اتاخدي ليا واحد الكاس ديال الما دافي ديري ليا الالة معلقة العسل فيه ، واتكون طوب ..

- مسيرة [ زفرات ] :

إن شاء الله ، لهلا يحاشم وصافي ..

- نسيم : الأوطيل لي غادي نزلو فيه هو لي فيه الحفلة ، هاد الليلة بغيتك ترتاحي .. باش غدا إن شاء الله تكوني على سينݣيت عشرة خلاوها المصريين ..

- مسيرة [ حركات ليه راسها بالإيجاب] :

انت غير تهنى ونعس على جنب الراحة ..

- نسيم [ حك حاجبو وشاف ليها فعينيها ] :

الى داز كولشي على خير عندي ليك واحد المفاجأة ..

- مسيرة [ بان الحماس على ملامحها] :

اش تما قوليا ، متقوليش لا مفاجأة دابا راه دويتي ..

- نسيم [ كيضحك] :

غير بشوية عليك .. سارة عندها واحد الخدمة فمصر ، الى دازت الحفلة على خير ... انلحݣو عليها ونجيو مجموعين ..

- مسيرة [ترسمو قلوب بالفرحة فعينيها ] :

حلف بالله ، ناري عرفتي من إيمتا أمنيتي نزور مصر ، راه من زمان وحق الله العظيم ... على هاد الخبار الزينة ، انحمر ليك وجهك تهنى الحفلة ادوز من الطراز الرفيع وتقول مسيرة قالت ..

- نسيم [هزهز براسو ] :

إن شاء الله يالالة .. وصلات ليموزين للفندق جميرا ، من أفضل واشهر الفنادق .. نزلو من ليموزين ، هزات راسها منباهرة بتصميم المعماري ديالو ، كانت كتشوفو غير فبعض الأفلام الهندية لي تصورو بالإمارات .. جا المسؤول على البݣاج خدا من عندهم البالز عاد خرج عندهم المسؤول مستقبلهم بالحلويات .. من لهجة ديالو كان باين فيه لبناني :

اهلا وسهلا فيكن شرفتونا ..

- نسيم [ بالإنجليزية ] :

شكرا .. خدا هو حلوة وخدات هي وحدة ، غاديين معاه فنفس الطريق ، لوطيل من داخل كان حاجة اخرى .. شافت فنسيم وفلباسها لي كان غير مناسب للبحال هاد البلاصة نهائيا ..

- شافهم واحد السيد لي كان لابس لباس إمراتي ، ومن الهيئة ديالو كان باين عليه شخصية مهمة ، غير شافهم مشا بكل شموخ بعندهم .. مد يدو وحناكو للنسيم مسلم عليه سلام رجولي ..

- اهلا وسهلا بالفنان الحبيب .. الغالي الصوت الذهبي ، شرفت الإمارات بحظورك ..

- نسيم [بإبتسامة ] :

ربي يخليك حبيبي الغالي ، النور نورك يا غالي ..

- شاف لجهة مسيرة ، وبإبتسامة بشوشة مد ليها يدو :

النجمة الصاعدة ، الصوت الجوهري ... نورتي الأمارات بحظورك ..

- مسيرة [تحرجات ] :

ربي يخليك ، من دوقك ..

- غرفكم في الانتظار .. وعشاء من النوع الفاخر يستناكم ..

- نسيم : شكرا شيخ احمد ، تعبت نفسك ..

- احمد : بيتݣولون بالمغربي ، عذابكم راحة .. تفضلون .. تبعوه ومعاه الموظفين ، لي داوهم وراهم الغرف ديالهم ، لي مخاصش يتقال عليهم غرف ..

- مفرشين بفراش لي راقي ، وكل شومبر محطوط على الطبلة العشا ديالهم .. ستأدن منهم الشيخ أحمد ، داير معاهم غدا يتلاقى معاهم فصباح .. على ود يوريهم فين يتمرنو مع الفرقة ديالهم لي كانت مشات قبل منهم بنهار .. حلات السرجم ديال البالكو ، كان مقابل معاها منظر خطييير ، تنهدات تنهيدة طويلة ..

- الجو فلوطيل مكانش بحال برا ، كان مبرد بالكليمة .. عكس الحرارة لي كانت على برا .. اول حاجة دارتها سيفطات لبنات اوديو علماتهم بلس وصلات ، عاد ݣلسات تعشات فخاطرها عاد خدات الدوا ديالها ديال فقر الدم ..

- دخلات لدوش دوشات ، خرجات لبسات حوايج النعاس ، وتخشات فبلاصتها ، مدازش بزاف حتى كانت وانعسات ..

_____________________

‏ولا تحسبنَّ

حلو الگلام دومًا صادِقٌ..،

ولا تُصدِقنَّ إلَّا الذِي بـ الأفعالِ يتگلمُ..🍂

- فصالة كبيرة ، ديزاين ديالها رائع .. من طبالي فبالبلو غوا ، والڤوال نازل من السقف .. واقفة هي وياه كيديرو ريپيتسيو مع الفرقة ديال نسيم ، لابسة سروال توب بيض مع شوميز فنفس اللون .. وشعرها جامعاه بفولار .. شلاو ريبيتيسيو .. ومشاو للمطعم ديال لوطيل .. تغداو .

- نسيم: اطلعي ترتاحي ، نعسي واحد ساعتين ، باش تكوني واجدة صافي ؟

- مسيرة [ هزهزات ليه براسها بالإيجاب] .. داكشي لي دارت طلعات لشومبر ديالها .. دخلات وهي تلاح على النموسية ، عمرات الساعة ونعسات .. فاقت مع الوقت ، خدات دوش .. نشفات شعرها ، ونزلات لصالون ديال الفندق .. صايبو ليها شعرها مع مكياج لي ايناسب اللبسة ديالها ، شكراتهم وطلعات لبيتها ، لبسات كسوة طويلة بيضة بلا يدين مع كيمونو فالبيض مغطي يديها ، مزينة شعرها بواحد البونضو .. وقفات قدام المرايا ماسحة داك العكر لي دارو ليها ، ودارت العكر ديالها هي ، دارت قدام المرايا برضى على المنظهر ديالها ..

- تدق الباب ، ومشات حلات كان نسيم ، بانو علامات الرضى على وجهو .. :

لالا ماعرفتكش ، ههههه واجدة ؟

- مسيرة [تنهدات تنهيدة طويلة وعطاتو يدها ] :

واجدة .. سدات الباب ، ونزلات هي وياه ، الحضور كانو وصلو ، والقاعة عمرات .. غير دخلات هي وياه ݣاع العينين مشاو ليهم ، كانت بنسبة ليهم متمبزة بشعرها الناري ، شافهم الشيخ أحمد وتقدم عندهم مستقبلهم بحرارة ، وقبل مايطلعو يغنيو :

اعرفكم على أهم الضيوف عندي ، الغالي إبن الغالي ، ٱبن بلدكم .. [ كان واقف بكل اناقة ، رجولة واضحة حضور وهبة ونظرة حادة .. كتختارق الشعيرات لي تحت الجلد كيما ختارقوها او بالأحرى ختارقو شفايفها ] حاب أعرِفكم ، على عصام البشير ، هو إبن بلدكم وبضبط إبن مدينة فاس العريقة ..

- نسيم [سلم عليه سلام رجولي ] .. : مشرفين ..

- عصام [بصوت رجولي وعينيه على مسيرة ] :

الشرف ليا .. مد يدو لمسيرة ، نازل بشفايفو مقبل يديها وناطق بصوت رجولي عندو بحة خاصة بلاما يزيح عينيه عليها :

لاغوج أليڤغ لي دايرة أشمن غيفيغونص ؟

- صغرات عينيها بإستفسار ودهشة ، سحبات يدها بهدوء من يدو .. الشيخ احمد ضحك وتدارك الوضع ، حاط يدو على كتف عصام ناطق بمرح :

- لا تاخدين ببالك ، عصام بيملك ماركة للتجميل ، وماشاء الله عليه بيعتبر من أهم رجال الاعمال بالإمارات وإيطاليا ، وبيملك متاجر عدة وبراندات .. وبيمتلك عين تاقبة عين فنان ..

- عصام [ مزال مزحزحش عينيه من على شفايفها .. شوفاتو ليها وتروها ] :

مزال مجاوبتينيش ، اشمن غيفيغونص دايرة .. حيت هاد اللون مكاينش فسوق نهائيا ... يلاه ناوي ينزل ..

- مسيرة [ ببرود] :

وشكون لي غادي ينزلو انت ؟

- عصام [هزهز براسو وبإبتسامة غامضة نطق بصوتو الرجولي] :

مزال كنتسنى نسمع جوابك ..

- نسيم [قاطعهم] :

وصل الوقت ديالنا ، سمحولينا نخليوكم ... عطا يدو لمسيرة ، شدات فيه عاطيهم بظهر ، حتى طلقات من نسيم ورجعات وقفات قبالت عصام ، وبنظرة إنتصار وصوت انثوي رقيق :

هاد العكر ماعندوش غيفيغونص ، حيتاش انا لي مصاوباه بهاد ليدين [حركات صباعها قدام عينيه مكملة كلامها ] .. عمرك مغاتلقا بحالو فسوق ، او واخا تصايبو مغايكونش فنفس اللون ونفس الجمالية .. كل عكر كيختالف من شفايف لوخرا ... خليت ليك الراحة .. [لاحت شعرها على كتفها بحركة أنثوية ، وخلطات على نسيم للبلاصتهم تحت انظارو لي متزعزعوش عليها ] ..

_______________

- الصالة كانت عامرة بالناس المهمة ، منهم إمارتيين ولبنانيين ، حتى من المغاربة كانو حاضرين .. الكل كان جايب معاه الحرمة ديالو ، لي ختارت تلبس كسوة طويلة .. ولي ختارت تلبس عبايات دالحضور ، اما الزوجات المغربيات ، كانو متميزين بالقفطان المغربي .. وهادشي لي خلاهم محط انظار النساء الأخرى ..

- خدات بلاصتها حداه ، وبدات الموسيقى بالعزف على الاغنية ديو لي دارت هي وياه .. شاف فيها مزير على عينيه بنظرة إطمئنان .. باش ترتاح وتصرف على راحتها ، خدات نفس طويل وبادلاتو الإبتسامة لي عطاها ..

*** بصوت انثوي باح ***

- 4 ااااه الهوى يالهوى الهوى يالهوى لي يتبعك كيتكوى ..

- 2 فالاول يبدا زوين ودغية كيسالي ... ولي قلبو حنين راه مسكين كيعاني ..

- 2 ااااه الهوى يالهوى الهوى يالهوى لي يتبعك كيتكوى ..

- 2 وشحال صعيبة الكبدة والى غير ولفات ، والقضية حامضة والى العشرة مشات ..

- كملات على هاد المنوال ، هي كتغني ونسيم كيرد عليها ، كلما تزاد الريتم كان كيبان النشاط على الحضور ، وخصوصا لي فاهم الكلام ... ولي توحش المغرب وتوحش الأغاني الشعبية ، محاسش براسو نهائيا ... اما الباقي كان غير كيضرب الرش وعاجبو داك الجو ودوك الاغاني واخا كلمة فاهمها وكلمة لا ..

- أغنية من ورا أغنية ، مرة هي ومرة هو ... كانت كتغني بواحد الإحترافية عالية ، بحال الى سينين وهي فهاد المجال ... الفرحة كانت باينة فعينين نسيم ، حيت الحفلة من عينين الناس ، ومن الغرامة لي تعلقات ليهم كتبين بلي فرحانين ومستمتعين بزاف ..

- بدات كتحس بصهد وبالعطش والعيا ، أول نرة ليها عمرها وقفات قد هكا .. وحتى ظغط الناس زادها ، واخا الخوف والرهبة مشات وندمجات مع الموسيقى والفريق الموسيقي .. ولكن كانت كتحس بالعيا ..

- من بعد دقاىق أخرى حبسات الموسيقى ، وبهكا كانو سلات الفقرة الموسيقية فالحفلة ... تعالات التصفيقات ديال الناس عليهم ، لي عينيهم كانو كلهم إعجاب ... بالاغاني وحتى بمسيرة ، لي جمالها كان ملفت للأنظار .. نزلو بزوج غاديين جهة الشيخ لي تقدم عندهم ..

- تطلقات موسيقى هادئة مناسبة الحفلة ...

- الشيخ [ بإبتسامة واسعة ] :

والله ابدعتو ، مع انو فهمت بس شوي كلمات ... بس والله الاحساس وصل .. نسيم للغالي ، من وين حصلت على هاي الجوهرة ..

- نسيم [شاف فمسيرة لي راسمة ضحكة صفرة على شفايفها ... من داكشي لي وقع مع الضبع ودوك الخليجيين مابقاتش كتحملهم ولا كتقد عليهم ، واخا الناس ماشي بحال بحال ... ولكن لي عضو الحنش يخاف من الحبل] :

سر المهنة شيخ أحمد ، منݣدش نݣولو ليك ..

- مسيرة [قربات من ودن نسيم وشوشات ليه وبعدات ] ..

- نسيم [ هزهز براسو] :

نمشي معاك ؟

- مسيرة [ بنفي ] :

لا غير خليك ، يضربني اشوية البرد واخا كاين الصهد وغادي نرجع .. سمحوليا ، خلاتهم واقفين ومشات فتجاه باب كبير ، كانت شافتو فصباح وهو محلول ... حلاتو وسداتو من وراها ، ورا الباب كانو دروج كيديو لواحد طيراس كبير كيطل على واحد المنظر كيرض الروح ..

- وقفات مقابلة مع الأضواء ديال البنايات العالية ... عقلها رجع اللور بحال سينتة ديال شي كاسيطة ، تفكرات ايامها فسطات ... وداكشي لي عاشتو ، كيفاش فاش كانت فسن المراهقة كتقرا ، كان هذفها واحد هو تزوج بجمال .. وتعيش معاه فسعادة ..

- كانت باغية ترضيه بأي طريقة ... تسهر عليه تصبن ليه طيب ليه ، مكانتش كتفكر فراسها نهائيا وشنو باغية ، أقصى أحلامها هو جمال ..

- مادوزش دقيقة متجبدوش فيها ، كتسوني ليه 6 المرات حتى ل 7 فنهار ، كانت كتبغي تعرفو فين كاين وفين مشا .. مكتخليهش يتفنفن ... هادشي لي خلاه يطغا وخلاه يديرها فجيبو ويضمنها بلي عمرها مغادي تخليه واخا يدير لي دار ..

- ولكن الغلط ماشي منو هو منها هي لي كبرات ليه الشان ، هي لي دارتو فالقائمة الاولى وفأولوياتها ، نشات راسها ومستقبلها ، عمرها سولات راسها شنو بغات ... حتى لنهار لي حصلاتو ... هنا عاد فاقت وبدات كتعاود حساباتها ..

- شريط حياتها داز كلو قدام عينيها ، حتى حبس عند لقطة لي حسات بالبرودة نزلات عليها بحال الثلج ... تفكرات عينيه العنكبوتية لي كيخلعوك ، الحضور ديالو لي كيخلي الرجفة تركبك من صبعك الصغير ، صوتو لي عمرها لا ماشي عمرها من المستحيل يجي نهار وتنساه ..

- كنتي كدوي بصح ، ولا غير إستهزاء منك ؟ .. تنفضات من بلاصتها على صوتو ، خرجها من السهوة ديالها ... ضارت بزربة لعندو ..

- مسيرة [ كتحاول ما امكن تهضر عادي ، عكس الاعضاب لي عندها الداخل من هاد المتطفل لي هرس الخلوة ديالها ] :

الناس كيقولو السلام عليكم ، كيقولو سمحيليا واش ممكن نوقف معاك ولا ندوي معاك .. مكايجيوش على غفلة ويخلعو الناس ..

- تقدم عندها بخطوات واقف حداها .. ببرودة وصوت رجولي مهدن :

كون كنتي حاضرة بعقلك ، كون سمعتيني فاش ݣلت ليك سلام ... ولكن عقلك كان مسافر بعيد ، على العموم [ مد ليها يدو ] أنا عصام ..

- مسيرة [ نزلات عينيها من وجهو ليدو ، ثانية قليلة ومدات ليه يدها ] :

انا مسيرة .. السؤال لي سولتيني قبيلات مافهمتوش ؟

- عصام [ مد ليها كاس ديال العصير بارد ، النوع لي كيعجبها الحامض ] :

خودي هذا بعدا ، اتكوني محتاجاه .. خداتو من عندو جغمات منو وفعلا كانت محتاجاه .. [بإبتسامة] :

شكرا ..

- عصام [ ببرود] :

العكر لي دايراه ، واش بصح انت لي مصايباه ولا غير ݣلتي هكاك كإستفزاز ..

- مسيرة [ هزهزات بكتافها] :.

علاش غادي نستافزك وانا اصلا مكنعرفكش ..؟

- عصام [ حط يديه على الحاشية ديال الحيط ... طولو فكرها فواحد الشخص لي كانت كتفكر فيه قبل مايدخل ويهرس سهوتها ] :

حيت تعارف ديالنا مكانش هو هداك ، ولا حيت يمكن السؤال ديالي الاول جاك فشكل ... بزاف ديال الإحتمالات ، ولكن لي لاحظت بلي عندك خبرة تجاه العكورة ، وحتى على نوعية كل بشرة وكل شفاه وشنو كتجي معاها ..

- مسيرة [ تقادات فالوقفة بحالو كتشوف بعيد ] :

فاش جاوبتك ماكنتش كنكدب ، كنت كندوي بصح ... ݣاع العكورة ديالي أنا لي مصايباهم ، طبيعيين ... وكل مرة وباش كنصايبهم باش نصايب لون معين ... مكنبغيش ندير الألوان لي مطلية بيها السوق ... كنبغي نكون متميزة على الغير ..

- عصام [ هز فيها عينو ، بصوتوو الرجولي لي فيه بحة خاصة ] :

نسميو هذا غرور ؟

- مسيرة [ بنفي] :

لالا والله العظيم ماهكاك ، غير هو ماعرفتش هاد الحاجة فيا .. كيعجبني الحال نكون دايرة شيحاجة لي هي جديدة فهمتيني ... غير هو كيف قلت ليك طبيعي ، عكس انت لي كتزيد بزاف ديال الحوايج ، وكتبيع الماركة ديالك وكتصور منها بزاف ديال الفلوس ..

- عصام [ تقابل معاها ، داير يديه فجيابو كيشوف فيها بإهتمام ] :

علاش عمرك مافكرتيش ديري براند ديالك انت خاص بيك ، وطوري من راسك ... تستغلي هاد الموهبة ..

- مسيرة [ سكتات لعدة لحظات كتشوف فالفراغ ، هزات عينيها البندقية وشافت فيه] :

حيتاش مافكرتش فيها ..

- عصام : ودابا ؟

- مسيرة : دابا بديت ، ولكن خاص الوقت ..

- عصام [عوج فمو] :.

حجج فارغة ، ديك الجملة ديال خاص الوقت غير تخربيق ، حطي الطوبة اللولة بعدا ، غايجيو وراها باقي الطوبات ، واعرة البدية أما كولشي ساهل .. سكت كيسكانيها بعينيه ، بحال الى كيفكر فشيحاجة .. كان عند بالها بلي صافي ختم كلامو حتى فاجئها ..

- عصام : اش بان لك تخدمي معايا ؟

- مسيرة [وياعو عينيها على إثر الصدمة لي صدمها بكلامو ، السيد يلاه ساعتين باش تعرفات عليه ، وكيعرض عليها تخدم معاه ] :

واش كدوي بصح ولا كتريݣل عليا ؟!!

- عصام [بنفس الملامح والبرود ، مكانش كيبان عليه نهائيا بلي كيضحك ] :

شنو بان ليك انت ؟

- مسيرة [ضحكات ] :

هذا راه خرجان العقل ، حنا يلاه ساعتين باش تعرفنا ... انت غير ماتسرطاتش ليك حيت انا دايرة لون لي انت يلاه غاظي تنتجو ، داكشي باش بغيتيني نخدم معاك ..

- عصام [تبسم بنفس البرود ] :

وعلاش متݣوليش بغيت نمد ليك يدي ، وتݣولي بلي كنشوف موهبة ݣدامي خاص لي يدعمها ..

- مسيرة : مكاينش شي حاجة فهاد الدنيا لي فابور ، ومكاينش شي واحد كيعاون شي حد غير هكاك ..

- عصام :

هادشي هو لي كيخرج علينا ، كنبقاو نحللو وناقشو بزاف ... ودوك التحليلات هوما لي كيخليونا نضيعو بزاف ديال الفرص من بين يدينا .. عتابريها فرصة ، ولا عتابري الحياة مدات ليك يدها ، متخليش الوسواس لي كيدور فعقلك يخليك تعطي لديك ليد بالظهر ..

- مسيرة [ماجاوباتوش غير حاضياه ، مافهمات فهاد السيد والو ... ماعرفاتش الطينة ديالو مناش ، عمرها شافت شي حد بحالو .. هو فعلا هادي فرصة وقرصة مكتعوضش ، ولكن ماعرفاتش علاش مابغاتش دخل ليها لراسها ]

- عصام [كمل كلامو ] :

فكري مزيان على خاطرك .. وجاوبيني بلي كاين ..[جبد كارت من جيبو وعطاه ليها ] هاظي نمرة پيغسونيل .. انتسنا الإجابة ديالك ..

- عطاها بظهر ومشا .. مخليها شادة لاكارط وكتشوف فيها ..

_________________________

- فطيارة ... حاطة راسها على الزاج وكتفكر ساهية حتى حركاتها يدو :

فاش كتفكري ؟

- مسيرة [ ضارت عندو وتنهدات] :

قلتي ليا اندوزو 10 يام فالإمارات ... دوزنا يوماين بالحساب وجارني دابا للمصر ، صفاء عندها الزهر لي تفكرتها ودرت ليها ديديكاس ..

- نسيم [ بشك] :

ماعرفتش علاش جيتيني كنتي كتفكري فالعرض ديال عصام ..

- مسيرة [قلبات شفايفها ] :

وجاني فشكل ، واش السيد ساعتين باش تعرفنا عرض علي الخدمة معاه ... وانا راه منخليش المغرب ونمشي لبرا ، راه تابعني الباك واش نسيتي ..

- نسيم [بهدوء] :

وشكون ݣاليك مايكونش عندو فرع فالمغرب ، انت قبلي بعدا وݣلسي معاه سوليه ، عرفيه كثر وعاد حكمي .. ماشي الناس كاملين خايبين امسيرة ... عارف بلي الثقة بنسبة ليك ولات قليلة ولا شبه منعدمة ... ولكن ماشي اي واحد مد ليك يدو راه ناوي الخايب .. مكتشوفيش بلي جا الوقت لي تخدمي على الحاجة لي انت كتبغيها ؟

- مسيرة [ حكات راسها بتوتر] :

ماعرفتش والله ماعرفت .. المهم من بعد وندويو فهادشي .. بكلامها ختمات اي نقاش بينها وبينو ، وصلات بيهم الطيارة للمطار القاهرة ..

- نزلو بزوج الجو كان مشمش ولكن أقل سخونية من الإمارات .. دازو من جميع الإجراءات .. خرجو على برا كانت واقفة طوموبيل فالكحل كاتسناهم ، تقدم عندهم واحد السيد من الهيئة ديالو باين فيه شيفور .. بإبتسامة عريضة :

الأستاذ نسيم ؟

- نسيم [بإستغراب ، حيت عارف مراتو لي اتسناهم ماشي شيفور ] :

اه هو هذا ..

- مستر عصام بيبلغكم تحياتو وبيستناكم ..

- شافيها نسيم بإستفسار وهي بدورها شافت فيها وظاهر على وجها علامات التعجب ..

- طلعو لطوموبيل مفاهمين والو ..

- مسيرة [بإستغراب ] :

هذا باش عرفنا جايين لمصر ؟ واش انت قلتيها لداك الشيخ أحمد ؟

- نسيم [هزهز براسو ] :

أه ولكن غير هاد الصباح .. كيفاش غادي يوصلها ليه وبهاد الزربة يسيفط لينا الشيفور ؟ مسيرة سكتات حيت مكانت فاهمة والو ومعارفاش لاش باغي يوصل هاد السيد ، رجعات راسها لور مغمضة عينيها كتخمم .. مكانش عندها العقل ولا الݣانة لي طل بعينيها من زاج ، وتراقب المباني وشوارع ديال القاهرة ..

- عقلها عند شخص واحد عصام ، علاش وكيفاش وشنو باغي منها بضبط ..

_______________ فجهة أخرى وبضبط فالإمارات ، فشومبر ديالو .. قدامو لافاليز ديالو ، كيقاد فيها كل حاجة بوحدها بروية وهدوء ... ميك على الشخص لي كان واقف مقابل معاه داير رجل على رجل ويديه طاويهم كيشوف فيه بإستغراب .. :

ماشتيش راسك زدتي فيه شوية ؟

- عصام [ببرود] :

علاش غادي نزيد فيه ، بانت ليك شيحاجة ماشي نورمال ؟

- بصوت رجولي بارد وجدي ] :

وحدة عاد تعرفتي عليها مكاملة حتى 3 يام .. باغي تخدمها معاك فين هو اللوجيك فهادشي ، واش لاحظتي راسك كيفاش كدوي عليها ، عصام دير عقلك ..

- عصام [سد الباليزة ببرودة هزها من فوق النموسية وحطها على الأرض .. شاف فيه بجمود ونطق ] :

صاحبي مكايعنيش ادخل ليا بين اللحم والعظم .. ماتنساش راسك أسفيان ..

- سفيان [ بجدية ، مامديهاش فهضرتو] :

من الواجب ديالي نفكرك .. ماشي وقتو اعصام عندك حوايج اهم من هادشي ، على الاقل شوف غير الطبيب لي ݣلت ليك عليه ..

- عصام [بصوتو الرجولي وبصرامة ] :

دوينا فهادشي ، مغانبقاوش ندويو فيه بزاف .. مغانشوف حتى قمقوم مزال سالينا ..

- سفيان [بإنفعال] :

كيفاش سالينا ، واش ناوي تبقى حياتك كاملة بحال هك .. الوقت كتبدل كونماكانش علاج نتافق معاك ، ولكن راه كاين علاج اصاحبي .. راك غادوة .

- عصام [هز تيليفون ديالو دارو فجيب تجاكيط ، حط يدو على الباليزة جارها ، ناطق جملة لي حسمات كلامو مع سفيان ] :

منين تسالي راك عارف المطار فين جا .. ماتعطلش ، فتح الباب وخرج مخليه واقف متبعو بالعين والعصبية كتاكل فيه ..

_____________________

- وصلو الاوطيل Grand Nile Tower .. دخليهم الشيفور البالز ديالهم ، عينيه كانو كيقلبو على سارة حتى كتبان ليه جايا قبالتو بإبتسامة عنقاتو .. وعنقات مسيرة :

على سلامتكم ..

- نسيم [بإستفسار] :

علاش بدلتي لوطيل ؟؟

- سارة [بإستغراب] :

مابدلتوش ، راه انت لي دايخ هدا هو الاوطيل لي قلت ليك ... قالي عصام بلي تلاقى معاكم فالإمارات .. هو لي وصى الشيفور يجي يديكم ..

- نسيم [عقد غوباشتو مزال مافهم والو ] :

انت منين كتعرفي عصام ؟

- سارة [ بإستغراب] :

نسيم واش نسيتي ، راه دكرت ليك بلي عندي رونديڤو مع سي البشير على ود الماركة ديالو دخل للمغرب ..

- نسيم : البشير ماشي عصام !!

- سارة [ضحكات بأنوثة] :

وراه عصام كنيتو البشير .. ياك قلت ليك بلي خاص نطلع للمصر نتلاقى معاه على قبل الى قبل يبرم معانا عقد .. باش الماركة ديالو ندخلوها للمغرب ، واش نسيتي .. الصراخة مكانش فخباري بلي غايكون فالامارات كون مشيت معاكم ، ولكن فيها خير .. [شافت فمسيرة لي مراقباهم وساكتة ] مسيرة صافا كيبان عليك العيا ..

- مسيرة [هزهزات براسها ] :

اه مع الطريق راسي ضرني بغيت غير نعس ..

- سارة : الشومبر ديالك حدا ديالنا انا ونسيم ، خاص طلعي ترتاحي .. ها الكاغط ديالك .. العشية انخرجو نسهرو باش هكا تكوني رتاحيتي

- مسيرة [خداتها من عندها وحركات راسها ] :

داكشي لي غادي ندير ..

- ݣالسة على النموسية ديالها .. مشعلة كاميرا كتشوفيهم بفرحة وحب .. :

جيتو فنين ماشاء الله عليكم .. الزين ولمن عطاه الله ، الله يكمل عليكم بالخير ..

- كريم [ݣالس حدا أمينة ، لابس خاتم ديال النقرة ، وهي لابسة خاتم نقري فيه حجرة ] :

واخا درتي معانا الفالطة ابنت قلبي ، ولكن نعوضوها فالعرس ..

- مسيرة :

إن شاء الله ضروري ..

- أمينة : العقبة ليك إن شاء الله بلي يستاهلك ..

- مسيرة [ضحكات ] :

انا اختي مابيني وبين الحب الخير والإحسان ، هاد القلب سدينا عليه زمان صافي ..

- أمينة [بإستفسار ] :

والناس ماشي بحال بحال ، ماشي كولشي خايب ، الى لقيتي دابا شي واحد لي يبغيك ويصونك ويوقف معاك فاحلامك ويدعمك اتقولي لا ..

- مسيرة [ضحكات مرجعة راسها اللور ] :

هاد النوع مكاينش اتهناي ، قليل فين تلقايه ... نهار غادي نلقاه أنقول اه من دقة الاولى ..

- أمينة : ودابا نشوفو ..

- مسيرة : يلاه سيرو نشطو وكملو فرحتكم .. انا راه خاصني نعس عينيا كيتلاصقو بنعاس .. وعيانة خاصني نرتاح ..

- أمينة [بصوت أنثوي ] :

داكوغ ماشيغي ، سيري رتاحي ..

- كريم [بصوتو المميز ] :

تلاحي ابنت قلبي ، وتهلاي فراسك بلاما نوصيك وعنداك تنساي دواك ..

- مسيرة [ بتدمر] :

لا حول ولا قوة إلا بالله العلي العظيم .. انت سندس صفاء سكينة ، رحموني هالعار هاني مشيت [جا يجاوبها وقفاتو] بسلامة بسلامة انا مشيت انا نعست نعست صافي .. قطعات لاپيل ورجعات براسها اللور نازلة بكامل جسمها على النموسية ... جرات عليها الكوڤري ونعسات ، مأجلة الدورة فالبيت وطلان من البالكو على النيل حتى تفيق ..

______________________

- إفران

- ݣالس هو وخوه فجردة .. لابس كيطمة فالكحل مرجع راسو اللور مغمض عينيه ، قطوط ديال جواد كيدورو حداه .. حتى فيقو من السهوة ديالو هلال بكلامو :

باغيك تقضي معايا واحد الغراض ..

- جلال [هز براسو بشوية ، كيشوف فيه بإهتمام ، يد دايرها تحت راسو ويد فوق كرشو ، غمزو ناطق بحشرجة رجولية ] :

اش تم ؟

- هلال [ حاط قدامو فوق الطبلة الپيسي ديالو , هز عينو فيه راجع باللور ... دور لسانو وسط فمو بالع ريقو ] :

حتى تشوف بعينيك ..

- جلال [رجع مغمض عينيه مرجع راسو للوضعية لي كان عليها ] :

عاهدي بنسا لي فيهم هاد الخصايل ..

- هلال [ضحك ضحكة رجولية مرتافعة] :

مراضعش الحليب اخويا كيبان ليا راضع الݣطران ..

- جلال [تبسم بجنب فمو وهو مزال على نفس الوضعية] :

غدا خاصنا نرجعو ديرها فبالك ..

- هلال : وي عرفت .. بهاد الكلام ختم هضرتو مكمل على الخدمة لي كانت قدامو

- واقفة قدام المرايا .. طالقة شعرها كتقاد الحلقات ديالها ، لابسة لبسة عبارة على أونسومبل فذهبي .. مع صندالة عالية بنفس اللون واكسسوارات فنفس اللون .. هزات البارفان ديالها رشات منو .. شافت راسها فالمرايا قدات شعرها مشتتة الݣصة لي قطعات .. خدات ساك صغير مخصص لسهرات وتيليفونها .. طفات الضو فالبيت وخرجات لقاتهم حتى هوما يلاه خارجين من الشومبر ديالهم ..

- نسيم [بمرح ] :

دابا انا شكون بحالي ، لي معايا أجمل سيدات المغرب ..

- مسيرة [بإبتسامة مشرقة] :

هاي هاي هاي ، لا اخويا دوي على مراتك انا اعلى قدي ..

- سارة [شدات فيها ] :

أممم باغية تحيدي عليك العين زعمة ..

- مسيرة [لاحت شعرها على كتفها] :

دابا من الأخر ، شنو غادي ناكلو راه فيا الجوع .. فين عارضة علينا ..

- سارة [معنقاها من كتافها ] :

انت غير زيدي قدامي وغادي تعرفي .. نزلو لتحت كان شيفور كيتسناهم .. فتح ليهم الباب فنفس الطوموبيل لي جاو فيها .. طلو سد الباب وراهم وديمارا ... هاد المرة مسيرة كانت مراقبة السرجم .. كتحقق فكل بلاصة فالبنايات ديال القاهرة والأضواء لي مزينين الشوارع بواحد الجمالية خطيرة .. كانت أمنيتها تزور مصر وهاهو تحقق ليها الحلم ديالها ..

- وقفات الطوموبيل قدام واحد المبنى فخم ، مكتوب إسم فلور 10 فندق كمبنسكي النيل .. نزلو بثلاثة بيهم ، ستقبلهم الخدام فالاستقبال ... غادي بيهم لسانسور ، دخلو مورك على رقم 0 .. تحل الباب على مطعم كبير راقي .. كان عامر بالناس ، غادي بيهم حتى لقدام واحد الطبلة جات مقابلة مع واحد الساحة فيها فرقة موسيقية ، مسيرة مكانتش رادة البال المطعم ، ولا المشروبات الكحولية لي كانت محطوطة .. عينيها فقط على عصام لي كان ݣالس لابس كولشي بالكحل مع طربوش فنفس اللون ..

- غير وصلو للطبلة ناض واقف على وجهو إبتسامة رجولية ، سلم على نسيم سلام رجولي ... أما سارة ومسيرة باس ليهم اليد بكل إحترام وجنتلمانية ..

- عصام [بصوت رجولي] :.

مرحبا بيكم ..

- سارة [بنفس الإبتسامة ] :

شكرا بزاف موسيو عصام .. الصراحة عندك الدوق فإختيار الاماكن ..

- عصام [عينو على مسيرة ] :

كنتمنى يكون عجبكم كاملين .. مسيرة كيجاتك البلاصة ؟

- مسيرة [دورات راسها فالبلاصة ، وشافت فيه بتوتر] :

كون يقولي شي واحد شحال هدا غادي ندخل لبار ، مغانتيقوش ..

- عصام [ضحك] :

مسيرة ، هذا ماشي بار ، هذا اوطيل .. وفيه فمطعم كيقدم وصلات موسيقية ورقص شرقي .. واي بلاصة بحال هادي عادي يكونو فيها مشروبات كحولية .. هنا الناس كيجي يتعشاو ويستمتعو بالوقت ديالهم عادي ، فهمتي ؟

- مسيرة [هزهزات براسها ] :

هممم وي فهمت .. جا عندهم السرباي ، خدا الطلبات ديالهم .. لي كانو أكلات مصرية ، كانت كتمنى تاكل ودوق الأكل المصري ودابا جا الوقت ..

- سارة [بإبتسامة ] :

الصراحة فرحانة حيت قبلتي نتلاقاو وندويو على الفرع ديالك فالمغرب .. مكنتش متاكدة الصراحة واش غادي تقبل تفاجئت ..

- عصام [ كان كيبان بحال شخص أوروبي ماشي مغربي ، برجولة لي كتعطي منو والوشام لي كيبان جهة صدرو لي كان كيبان ... وجزء من الوشام لي كيبان من يدو ، كانت عندو واحد الضحكة جدابة .. مايمكنش ماتعجبش شي واحد ، بخلاصة كان ملفت للأنظار وعندو حضور طاغي ] :

الشركة ديالي تأسسات فإيطاليا ، خدمت عليها وكبرتها .. ودرت فروع فدول أخرى ، وأول بلاد عربية درت فيها فرع ديالي هي الإمارات .. دابا جا الوقت لي الماركة ديالي تدخل المغرب بلادي .. منكدبش بلي قلبت مزيان ، إنسانة مجتهدة بحالك .. لي الشرف نتاعمل معاها ..

- سارة [بفرحة ] :

أنا اسعد موسيو عصام ..

- عصام [موجه كلامو للنسيم ] :

سعداتك بيها اسي نسيم .. تبارك الله عليها إنسانة متابرة ..

- نسيم [بإبتسامة فخر ] :

هادشي علاش ختاريتها .. حيت كتعرف شنو باغية ..

- مسيرة [بدون سابق إنذار ] :

تخصصك فالعكورة بوحدهم ولا المكياج عامة ؟

- عصام [بإبتسامة وبحة رجولية ] :

فالأول كان الاختصاص ديالي هو العكورة ومن بعد زدت طورت من الماركة ... وضفت ليها عناصر أخرى ، المكياج ككل ..

- كان مراقبها بواحد التمعن كيشوف لمعة خاصة فعينيها ، بحال شي حد دكرتي ليه شي حاجة كيبغيها من كل قلبو .. بحال شي بنت صغيرة قلتي ليها غادي نديك لمدينة الالعاب ، هكاك ديك اللمعة كانت فعينين مسيرة منين دكر ليها العكورة ..

- دورات راسها مرجعاه اللور ، فاتحة المجال لسرباي يحط ليهم العشا ... العشا لي كان بنين بزااف ، وفعلا كان عند حسن حظها ، العشا داز مزيان فنقاشات بسيطة مرة مرة كدخل فيهم هي ، أما دماغها كان خدام ... قلبها كان كيضرب بجهد ، ولسانها باغي يقوليه أنا قابلة نخدم معاك ، خصوصا منين سمعات انو اتكون عندو شراكة مع سارة .. رتاحت ، حيت مستحيل سارة دخل مع شي واحد ماشي ثقة ... من غير الى كانت عارفة عليه الشادة والفادة ..

- توترها كان باين ، من الكاس ديال الما لي كل مرة كانت كتجغم منو .. قاطع حبل أفكارها نسيم وسارة لي ناضو يشطحو على أنغام موسيقى كلاسيكية ... هادشي خلاها تبقى بوحدها معاه ..

- راسها تبنج من الدورة لي كانت مدوراه لجهتهم .. مقاداش تشوف جيهتو نهائيا .. مكانتش باغياه يدوي ، تمنات يسكت ومايدويش ، ومايسمعش خفقان قلبها وتوتر لي متلبسها .. ولكن الامنية ديالها ماتحققاتش ، حيت بدورو كان كيتسنى غير الغفلة باش يسولها :

مسيرة فكرتي فداكشي لي ݣلت ليك ؟

- مسيرة [رسمات إبتسامة على وجها وشافت فيه ] :

علاياش كدوي ؟

- عصام [ضحك ] :

مسيرة ، جيني نيشان الله يرضي عليك ... كيعجبني الإنسان يكون معايا صريح .. بيدك تݣولي أه ولالا ، أنا مكنعضش انا باغي نعطيك غير فرصة ... حيت حرام موهبة بحال ديالك الضيع ..

- كيما أنا شحال هادي عطاني واحد الشخص يدو وعاوني ، حتى انا بغيت نعاونك ..

- مسيرة [بجدية ] :

جيني نيشان اعصام .. علاش انا ؟ إلى كنتي معايا صريح غادي تكون الإجابة ديالي هي أه ، والى كذبتي اتكون إجابتي لا ... بلاما تحاول تكذب عليا شنو لي خلاك تعرض عليا الخدمة ، ماشي غير خيت باغي تعاون ... عطى الله مواهب بحالي ، ولكن علاش انا ، فساعتين داك النهار قررتي ، جيني نيشان .. الصراحة كتساوي القبول ديالي ..

- عصام [زول الطربوش ديالو ، حطو على طبلة فجنب ... داير يديه على الطبلة كيشوف فيها بتمعن ، كيشوف ليها فعينيها ، ناطق بصوت رجولي وبحة خاصة ] :

عجبتيني أمسيرة ... الى كنتي كتسمعي بالحب من اول نظرة ، فا هو هذا [يلاه اتدوي وقفها بيدو] ماتدويش .. هادشي ايجيك فشكل .. ولكن من دخلة الاولى ديالك لوطيل شفتك ، فاش وصلتي ديك الليلة ، ولكن انت ماشفتينيش .. كنتي مميزة بزاف ، عرفتك انت لي اتغني فالحفلة الغد ، كنت فرحان حيتاش غادي نشوفك ..

- انا حياتي كلها وانا صريح .. الحاجة لي بغيتها كنجيها نيشان مكنبقاش ندور ، من اول نظرة بقيتي هنا [ أشر لراسو ] ... هادشي باش عرضت عليك الخدمة .. وهذا مغايكونش اخر عرض عندي ..

- مسيرة [بإستفهام ] :

بحالاش ؟

- عصام [رجع باللور ] :

غدا منين نتغداو بزوج انݣوليك ..

- مسيرة [بجدية ] :

عصام ، شوف انا بيني وبين الحب غير الخير والإحسان .. مابغيت لا نحب لا نعيش علاقة حب ، أصلا هادشي جاني فشكل وو [قطعها ] :

مسيرة ، انا دابا ماݣلت ليك والو ، بغيتي الصراخة صارحتك وجيتك نيشان .. ماعنديش مع الكذوب ونبقى ندور ، كاينة كاينة مكايناش مكايناش ... دابا خوي بالك من هادشي ، ستمتعي باللحظة .. انا جاوبتك بصراحة وانت دابة ملزومة تقبلي الخدمة .. أشنو بان ليك ..

- مسيرة [سهات فيه ، متنكرش عجباتها صراحتو .. كيعجبها الانسان يجيها نيشان ، لي يجيك فاص ماتخافيش منو ، خافي لي كيبقى يزوق ليك فالهضرة ويبغي يطيحك ، تنهدات تنهيدة طويلة ونطقات بصوتها الأنثوي الرقيق ] :

أنا قابلة ..

- دوزو باقي سهرتهم مزيان .. بنسبة للبعض ولكن بنسبة ليها هي كان عقلها محاضرش نهائيا معاها .. كيدي ويجيب فكلامو والعرض الثاني لي باغي يعرضو عليها ، ماكرهاتوش يقولو ليها دابا ويهنيها ولا يعيشها فهاد التوتر لي هي فيه ..

- بقية السهرة ماستمتعاتش بيها ، كانت باغية غير إيمتا تنوض بحالها ... وداكشي لي كان رتاحت وكانت فرحانة بزاف حيتاش وأخيرا غادي يمشيو بحالهم .. وصلهم الشيفور حتى لوطيل .. نزلو بثلاثة أما عصام فبقى داير مع مسيرة غدا مع 12:30 غادي يجي يديها يتغداو ..

___________ فالكولوار

- نسيم [بإستفسار] :

كيفاش بلان الغدا انت ؟

- مسيرة [تنهدات تنهيدة طويلة بعياء ] :

نسيم من بعد ونعاود ليك ، وحق الله العظيم الى راسي كيتبخ .. بغيت اناخود دوايا ونعس ، انعاود ليك صافي ..

- سارة [جرات نسيم ] :

صافي خليها ترتاح ... حتى تعاود ليك ، سيري اماشيغي رتاحي بون نوي ..

- مسيرة : تصبحو على خير ، فتحات باب الشومبر ديالها ودخلات سادة الباب وراها ، لايحة ساكها فوق النموسية ... بدلات حوايجها ، غسلات وجها وجمعات شعرها عقلها سارح .. ماكينش معاها نهاىيا ، تخشات تحت الغطا طافية الضو ، غمضات عينيها كترمش حتى داها النعاس ..

_____________________

‏‎قيلَ

لِـ أحدِهم:

گيف تعرفُ مَن يُحبُّگ..؟؟

قال:

مَن يُحبُّني

يشعُر بِـ النَّقصِ مِن دونِي ولو ٱمتَلگ كُلَّ شَيءٍ..،

ويشتاقُ إليَّ ولو گان حَولهُ ألف حيِّ..!!

هو الذي لن يختارَ غيري مهمَا إستَحالت الظُّروف..!!

هو الذي يُعامِلُني گأنَّه يَراني لِـ أوَّل مرّة..،

ويُحافظ عليَّ گأنَّني الوحِيد فى العَالم..!!

هو

الذي لا يَعترِف معي بِـ النِّهايات..،

ويُحِبُّني كُلَّ يَومٍ مثلَ البِدايات..

_____________________

- بكسوة بيضة صيفية ، كانت واقفة معاه قدام واحد الباطو طويل ، كان عبارة على باطو او مطعم فوسط النيل ، مد ليها يدو .. جارها حتى وقفات حداه ، خداو طريقهم لواحد الطبلة .. ݣلسو ، من ورا ماعمر خدا طريقو وسط النيل ..

- اول ما ݣلسو جا عندهم السرباي ، طلبو الحوت بحال ݣاع الناس لي جايين لهنا ، الحوت والنيل كان منظر خطير مكاينش بحالو ..

- من ديما كانت كتبغي تعرف الحاجة لي كتكون ضاراها فراسها .. مكتقدش تصبر وهادشي لي واقع ليها دابا وخلاها تهضر ، واعدات راسها ماتسولوش حتى يݣلسو ودابا جا الوقت ..

- مسيرة [بدون مقدمات ، كتشوف ليه فعينيه ] :

عصام ، خاصك تعرف واحد الحاجة مهمة ... عزيز عليا الواحد يكون صريح معايا .. وهادسي غادي يكون بان ليك لبارح ، مكنبغيش نطول بزاف فالهضرة ، لبارح قلتي بلي عندك عرض اخور من غير العرض ديال الخدمة .. قوليا شنو كاين عفاك مكايعجبنيش نتس[قبل متكمل قاطعها بسؤال لي زعزعها ، بحال الى كب عليها الما بارد ، لا الما جامد ماشي بارد ، قلبها كان كيضرب بجهد .. سؤالو خلاها تسول راسها واش هذا بعقلو ولا حماق ] ..

- عصام [كيشوف ليها فعينيها ، عينيها لي اتيراوه من أول نهار] :

مسيرة تزوجي بيا ؟

- مسيرة [بقات ساكتة حتى طلقاتها بضحكة جنونية ، خلات لي حداها يشوفو فيها بإستغراب ] :

والله مكايبان عليك كتنكت بالله [ كتنكت = كتقول النكت ] ولايني مساهلش مع راسك .. [كملات فضحكها .. حتى حسات براسها كتفات .. هزات راسها فيه كان كيشوف فيها بواحد البرود كيتسناها حتى تكمل الضحك ديالها على خاطرها .. :

مسيرة : كتفلا ، واش انت شوية لاباس ، عرفتيني ف 4 يام باغي تزوج بيا ... معارف لا دارنا ولا حتى معلومة عليا ، ماعرفتيني منين شكون قال نكون حباسة ، ولا مامزياناش يلاه ، ولا خارجة لطريق يلاه ..

- عصام [بهدوء مكتاسح وجهو وأعصابو ] :

لي خارجة الطريق مغاتختارش الغنا ، اتمشي فداك الطريق ، اما بنسبة معارف والو عليك .. هادشي مع الوقت ، انا ماقلتش ليك نتزوج اليوم ، انا غير قتارحت عليك .. قضية تعرفنا نهار ولا يوماين .. مكايحددش ، راه كاينين ناس معارفين سينين .. ومنجحوش .. وكاين لي كتعرفو فنهلر بحال الى عرفتيه هادي عام ، كتحس معاه بواحد الراحة غريبة ..

- بزاف ديال الحوايج اتعرفيهم عليا امسيرة ، نسبقو الخدمة هي الاولى ، هي لي غاتخليك قريبة مني وتعرفيني عن قرب .. وفداك الوقت غاتقرري واش تقبلي ولالا ، ديجا ݣلت ليك ماعنديش مع دوران وزواق فالهضرة ، وهادشي لي خلاني ناجح فخدمتي ..

- زواجك مني امسيرة ايكون بفائدة ، انا مطالبش منك تبغيني .. انا باغي غير نكون معاك هادشي لي بغيت ..

- مسيرة [هزهزات براسها ] :

سمحليا ولكن هادشي لي كطلب مني كيتسمى خرجان العقل ، انا مانقدش نتزوج بشي واحد مكنحس بجيهتو بحتى حاجة ، مكنبغيهش واخا يكون هو كيبغيني ، وديجا قلت ليك انا مابغاياش نتزوج .. عصام [بإنفعال] انا ديجا مزوجة ومطلقة .. وديجا كنت مشدودة فالحبس مدة 4 شهور ، واش بغيتي تزوج بوحدة حباسة .. شنو ايقولو عائلتك والناس لي كتعرف ..

- عصام [بإبتسامة ساحرة كتخليك ترتاح ، وبواحد الهدوء مغلف بحة صوتو ] :

والديا ميتين الله يرحمهم هادي 6 سنين .. ماعنديش خوت للأسف ، وحتى العائلة من موت والديا عمري تلاقيت بيهم ، الهبطة ديالي للمغرب غاتكون لأول مرة من نهار توفاو الوالدين ..

- شنو ايݣولو الناس مكايهمنيش نهائيا .. كيما بغيتي تكوني مكايهمش ، انا باغيك انت أمسيرة ، عاطيك يدي ، انوقف معاك حتى تحققي داتك وتكوني راسك انكون معاك فالحارة وفالحلوة .. حط يديه على الطبلة كيشوف فيها بتركيز وجدية ..

- بالعكس هاد زواج ايكون مزيان ليا وليك ، حيت انوقف معاك معنويا .. واي حاجة تقالت عليك اتخفاف عليا ..

- مسيرة [برفض] :

علاش انا ، راه مغادي نعطيك والو اعصام ، لا حب لا علاقة كاملة ... انا راه منقدش نوهب راسي لإنسان مكنبغيهمش ، فالاخير غادي تمشي وتخوني وهادشي لي منبغيش نعيشو ..

- عصام [بنفس الإبتسامة ] :

غير رتاحي من هاد النحية ، حيت حتى انا مغانقدش نعطيك علاقة كاملة [بلع ريقو مدوز يدو على شعرو ] هادشي لي غانݣول غايكون صعيب شوية ، صعيب على إنسان فالمكانة ديالي يݣولو .. حتى واحد مكامل امسيرة الكمال لله سبحانه ، واخا تشوفي الفلوس وشركات ولكن انا مكاملش ، انا منݣدش نعطي علاقة زوجية كاملة للشي وحدة ..

- مسيرة [كتشوف فيه ببلاهة ] :

كيفاش زعمة مافهمتش ، [خرجات عينيها بصدمة وبدون سابق إنذار وبلاما دير حساب لكلامها ] :.

واش ، واش بغيتي تقول بلي أنت ماشي راجل ؟

- عصام [أشر ليها باش تنقص صوتها ] :

شششش ، هضري بشوية .. لا الالة راجل .. ولكن راجل مكاملش ، ناقص .. كيفاش غنشرح ليك .. عندي مشكل فذكورتي .. يعني منقدش نوصل اي مرة كانت معايا للمتعة .. بزاف ديال الاطباء زرتهم ولكن بدون فائدة دوايات وبراوات ولكن والو .. كاينة عملية ولكن نسبة النجاح ديالها 20 فالمية ، ياتنجح .. يا تفشل والى فشلات ايكون عندي مشكل كبير ، نقد نتعالج منو ونقد لا ..

- داكشي باش حبست حتى دوايات لي كنت كنستعمل حبستهم ، صافي مرضت عانيت مدة كبيرة من الإكتئاب ، ولكن الحياة كتستمر مايمكنش ليا نبقى هامل خدمتي وصحتي ، الى الله ماباغيش ليا نتزوج ونولد ماعندي مندير .. بقات كتشوف فيه وساهية مصدومة [تبسم بتساؤل] :

مالك ؟

- مسيرة [تنهدات تنهيدة طويلة ] :

الحياة بعد المرات مكتكونش عادلة معانا والله العظيم ، ولكن راه تقد تزوج وتبنا شي دري ولا بنت ..

- عصام [بهدوء مغلف صوتو ، عكس إحساسو الداخل ، اي راجل كيبغي يعيش الحب .. كيبغي يكونو مع الانسانة لي كيبغي جسدا وروحا .. يبغي يولد يكونو عندو وليدات من دمو ولحمو ، المشكل لي بان عندو من البلوغ .. كان ميقول ممكن مع الايام هادشي يتصلح ولكن لا ، الحجم بقا عندو هو هو مستحيل ومن سابع المستحيلات تقبل شي وحدة تكون معاه ، اي مراة اتبغي تعيش مع راجلها علاقة زوجية كاملة .. مابغاش يتحط فالموقف ديال انو يجي نهار يلقا مراتو كتخونو .. ومكاينة حتى وحدة تقبل تزوج بواحد وتعيش معاه تحت سقف واحد بحال خوها ، واحد بحالو معروف ، باين بلي اضرب ليه الطر وتشوهو .. وهكا خبارو ايوليو عند الناس كاملين ، معارفو وشركاء ديالو ايلقاوها نقطة ضدو .. نفسو حارة ومايبغيش شي واحد ينعت فيه ..] :

مايمكنش امسيرة ، مكايناش شي مرأة غادي تقبل على راسها تعيش مع راجل مكاملش .. واش فخبارك بلي موضوع الزواج مجا لبالي حتى لبارح فاش كنا كنتعشاو .. حيت قلتي انت والحب مكتلاقاوش .. هكا اتعيشي معايا مزيان .. انا مغانطلب منك لا علاقة لا حب ، وكوني اكيدة وديري فبالك ، نهار غادي طلبي مني الطلاق غادي نعطيك الحرية ديالك ..

- مسيرة [ جمعات شعرها بالبانضة لي كانت فيديها ، وطلعاتو للفوق حاسة بصهد عتاراها ] :

هاد الزواج فاش غايفيدك فوالو ..

- عصام [ بإبتسامة بشوشة] :

الالة ستغليني وانا نستغلك .. انا نوقف معاك حتى توصلي ، وانت يلالة نسد بيك فام الناس لي كيتسناو هاد ليتيم يتزوج ، وفينما كانت شي وحدة كتجري ورايا ترجع بحالها ههههه ..

- مسيرة [ ضحكات ] :

باااز انت هو توم كروز ..

- عصام [ هز حاجب ونزل الثاني ] :

لالا هبطي نيفو اصاحبتي .. طلعيه شوية ، بلاما نوريك الرسائل لي كيجيوني كل نهار هوما يبينو ليك ..

- مسيرة [ بجدية ] :

الى فرضنا مثلا قبلت .. واش انعيشو انا وياك تحت سقف واحد ، انا راه منخليش المغرب .. منقدرش ، واش انكونو انا وياك فبيت واحد .. ولكن راه خواتاتي منخليهمش بوحدهم وحتى صاحبتي ..

- عصام [ زول نظاراتو الشمسية وحطهم على جنب ] :

اناخود دار فكازا .. انا كنسافر بزاف أغلبية الاوقات مغانكونش معاك ، ماعنديش إشكال الى بغيتي خواتاتك يسكنو معاك وصاحبتك .. ورتاحي امسيرة كل واحد غادي يكون فبيت ، انا مغاديش نقجر عليك ديجا قلت ليك عندك الوقت الكافي لي تفكري فيه .. ادوزو فالمصر سيمانة ، نهار تكونو نازلين المغرب جاوبيني ..

- فاش غانزل انا على ود الشراكة مع سارة ، انزور والديك وندوي معاهم نطلبك منهم ، اي حاجة اتكون بقوامها ومايكون غير خاطرك والحاجة لي انت باغياها هي بي غادي تكون .. انا اتكوني فحياتي هادي هي أحسن حاجة بنسبة ليا شي حاجة اخرى مكتهمنيش ..

- والى قبلتي فالعقد ايكونو الشروط ديالك ، اي شرط شرطيه انا موافق عليه تافقنا .. ناكلو دابا ؟

- مسيرة [تنهدات تنهيدة طويلة] :

واخا ناكلو ..

_________________________

- فالليل ، قدام البيسين فالكافي ديال لوطيل ݣالسين ب 3 بيهم .. هاد الزوج لي قدامها لي تضافو للقائمة الاصدقاء الموثوق بهم .. كيفما كانت كتعاود لكريم وللبنات عاودات ليهم كولشي ، خلاتهم كيخممو ومصدومين . ، من بعدات سكات لثواني وتحليلات ونقاشات ..

- نسيم [شافيها بجدية ] :

شوفي على ماسمعت من سارة ، عصام شخص لي مزيان .. إنسان ناجح فخدمتو وكيعرف مزيان شنو باغي ، إنسان لي تعولي عليه .. انت عندك هواية لي ممكن تخرجي منها الذهب ، ولكن خاص لي يوقف معاك لي يعرفك على الناس .. اه الهواية كاينة ولكن خاصك الدعم ..

- خاص لي يشد بيديك ويدخلك للمجال التجميل من اوسع أبوابو ، وعصام تبارك الله عندو خبرة كبيرة ، إلا ومكانتش سارة تقطع اميال باش تلاقى معاه .. فكرة الزواج واخا هي غريبة شوية ولكن راه فمصلاحتك عرفتي علاش ، الدنيا اخد ورد ..

- ضروري من بعض التنازلات الى بغيتي توصلي ، هو جاك لبصراحة وقاليك شنو كاين ، بالعكس هاد الزواج غادي تستافدي منو كثر ماغايستافد منو هو .. ونهار لي اتشوفي راسك مقاداش تكملي راه اتحبسي ، بالعكس اتعيشو بحال الأصدقاء هادي حاجة مزيانة .. انا كنقول متردديش وافقي..

- سارة [هزهزات براسها ] :

صراحة امسيرة ، مغاتلقايش بحالو .. إنسان غايدعمك ويكون معاك ماديا ومعنويا ، جا الوقت لي تكوني انانية واحك شةية وتشوفي مصلاحتك ، انا من راي نسيم .. وافقي ولي جاي اكيد ايكون مزيان ..

- مسيرة [تنهدات تنهيدة طويلة ] :

نفس الراي ديال البنات ، هادشي لي قالو لي قبيلات فاش دويت معاهم ، دخت والله ماعرفت مندير ... حاسة براسي فمتاهة والله العظيم ..

- سَلامٌ ، علىٰ الدُّنيا ، إن لم يَکُن فيها ،صَدِيقًا صَدوقًا صَادِقَ الوَعدِ مُنصِفًا .. أحيانًا ، يکونُ كلُّ مَا نحتاجُ إليه عابِرًا نُفضِي إليه بِـ أحادِيثٍ ضاقَت بها الصُّدور..؛

لِـ يحمِلَها عنَّا في رحلتِه نحوَ الغِيَّابِ دونَ گللٍ أو مَللٍ ..،

وبِلا خوفٍ يُروادُ الرُّوح ، من سُوءِ ظَنٍّ قد يُلاحِقُنا أو نَدم ..!! ليسَ بِـ گثرةِ مَن حولِگ ، حينَ تُشرِقُ شَمسُگ..، وإنَّما بِمَن يبقىٰ معگ ، عندمَا ينطفِيءُ بَريقُ نجمِگ..؛

فَـ يُضِيءُ بِـ صِدقِ مَحبَّته روحَگ ،قبلَ أن تغرقَ في غيَّاهبِ عتمَتِگ ..!! الصَّداقَة الحقِيقيَّة ، قد تَختبِرُها الشَّدائِد والمِحَن ..، لکنَّها تَقوىٰ وتَثبُت بِـ المَواقفِ ..

____________________

المـغرب

- دخلو لريسطو لي جا فعين الذياب .. خداو الطبلة لي على البحر ، بنسبة لواحد هادي أول مرة يدخل لهنا .. وبنسبة لشخص الثاني مرارا وتكرارا كيتردد على هاد المكان .. كانت الساعة جوايه 7:30 ..

- مع ݣلسو مع وقف هو بصوتو الرجولي التقيل الرزين مخاطب خوه :

شوية ونجي واخا ؟

- جلال [بإستفهام ] :

فين غادي أصاحبي ، جايبني لهنا وراجع دوميتور كيفاش بلانك أش تم ؟

- هلال [بنفس الهدوء] :

شوية ديال الصبر ، أنا شوية ونكون هنا .. اتهلاو فيك الدراري اتهنا .. خلاه مستغرب ومشا ، مافهم والو .. جا عندو السرباي ، حط ليه مشروب قدامو .. بإبتسامة ومشا .. دور عينيه على المطعم ، كانو الناس كاملين عينيهم على المنصة .. مرة مرة كل واحد فيهم كيشوف فساعتو .. بحال الى كيتسناو شيحاجة .. تكا بظهرو على الكرسي ، شاف فساعتو ورجع خدا الكاس بين يديه جاغم منو .. رجع حطو مصغر عينيه هاز معلقة صغيرة بين يديه ، دورها محقق فيها ، عوج فمو بعدم إهتمام لا شكلها عجبو ولا النحت لي فيها راقو ..

- الإضاءة نقصات .. ولات طاغية غير الإضاءة ديال الشموع .. طلعات الفرقة الموسيقية .. خدات بلاصتها ، دور عينيه العنكبوتية على الباب كيشوف واش جاي ولالا ، هز التيليفون ديالو دوز النمرة قبل مايحطها على ودنو يسوني كيسمع تصفيقات الناس ، هز عينيه جيهت المنصة .. هاز حواجبو وبوادر الصدمة معتارية محياه ، تبسم إبتسامة عريضة محرك راسو يمين وشمال بتمتم بصوت شبه مسموع مورك على الحروف :

بانضي .. بصوتو التقيل الرجولي الرنان .. بدا كيدندن الاغنية لي كان كيغنيها من شحال هادي ، الفرق لي كاين هو هذا شحال كان كيدندنها بحزن وظلام فعينيه ..

- ولكن هاد المرة كان كيغني وعينيه كيبريو ، كيغني بسعادة منساجم مع الموسيقيين ومع الناس ، الفرق لي كاين هو هذا شحال كان كيحس براسو بوحدو والحزن مغلف قلبو ، ولكن دابا لا دابا لقا نصو الثاني نصو الثاني لي كيتجسد فخوه .. خوه السند خوه لي خلاه يخرج من الدوامة والعتمة لي كان فيها ، خوه لي عطاه يدو واخا صغر منو عطاه الامان وتاق فيه ، وخلاه يلقى داتو لي كانت موضرة شحال هادي ..

- ختم الاغنية بقبلة سيفطها فالهوى لجهة خوه .. سلات الوصلة الغنائية ، وماشي بحال المرات لي فاتو كان كيبدل حوايجو .. دابا لقى بقا بنفس الحوايج نازل دوك دريجات فتجاه خوه ..

- جلال [قهقه بصوت رجولي ، واقف معنق خوه عناق رجولي ] :

النضا ابا هلال .. كيفاش بلانك من إيمتا ؟

- هلال [اشر لسرباي] :

نتعشاو ونعاود ليك لافير ..

_______________________

- دوزات هاد السيمانة زوينة ، ماخلاو بلاصة مامشاو ليها ، الغردقة /شرم الشيخ .. اي بلاصة كيمشي ليها كيكون معاهم عصام .. تصاور لي خدات اغلبهم هو لي مصورها ، متنكرش بلي هو إنسان ظريف بزاف بشوش .. وسخي ، كيحسسك براحة والامان .. واخا بقا فيها بزاف لي إنسان بحالو يعيش هاد الحالة ، كانت باغية تقوليه يغامر ويدير العملية ولكن منين تفكرات بلي العملية خطيرة وممكن تازم حالو سكتات وحتافضات برايها لراسها ..

- النهار الاخير ، ليها فهاد البلاد السعيدة .. وصلهم الشيفور حتى للمطار .. نزلو بثلاثة ، كدور فعينيها حيت قاليها ايسبقهم يتسناهم باش يتسيفط معاهم . .. ضارت بان ليها جاي بخطواتو الرجولية وحضورو الخطير ، سلم على نسيم وعلى سارة او وقف قبالتها :

تهلاي فراسك .. هاد السيمانة دازت طايرة وزوينة الصراحة ، المهم ماعرفت منݣول .. ولكن الى مكنتيش باغياني ندوي فالموضوع نخ ..[قاطعاتو بدون تردد] :

انا قابلة نتزوج بيك ..

يتبع...