روبي ڤيريدجو الجزء التاسع

- جلال [حنحن بصوتو الرجولي ] :

لا كنوض نتمشى ..

- معزوزة [ جراتو من يدو ݣلساتو ] :

هاويلي ياوليدي ، المشي فالح فيه ... وباش تنوض دير ميهة وتوضى وتصلي الصلاة لي تنفعك لا .. اويلي اوليدي تبارك الله راك كبير حشومة ..

- جلال [بلع ريقو ، حيت عمر شي حد متجرأ ودوا معاه هكا ولا أنبو من غير جدو الله يرحمو ] :

الله يهدينا ..

- معزوزة : الله أوليدي راه هاديك ، لاواه اوليدي الصلاة راها ركن من اركان الإسلام .. واول حاجة كتسال عليها وتحاسب عليها ، حشومة أوليدي ، وباش بغيتي ربي يسهل عليك ويكمل عليك ويحفظك ...

- ومن ݣال أوليدي لغد ليه ربي يقبط روحك ، باش غاتلقى مولاك ... اوليدي راه مكنديو معانا غير فعالنا وعمالنا ..

- جلال [بصوت رجولي هادئ] :

كنواعدك غادي نبداها إن شاء الله ..

- معزوزة [قربات ليه كتشوف فيه بعينيها الصغار ] :

ݣوليا اوليدي وسمحليا ، أنا راه فضولية .. والديك معايشينش معاك ؟

- جلال [حنحن ، مدوز يدو فراسو ] :

لا كاينين فإفران ..

- معزوزة : أممم تبارك الله ، وا وليدي مكتحسش براسك بوحدك فهاد الدار ݣدها ݣداش ، مكتخلع ما والو ... حنا اوليدي بلا عائلة راه منسواو والو ، مكاين ماحسن من اللمة وجماعة ..

- كيشتي دابا حنا ، راه ساكنين كاملين مع بعضياتنا إيه ، انا وسعاد وعباس والبنات ، وأدريس وتزادتنا حتى سكينة صحابت بنتي مسيرة ... والله يا وليدي ومتسالني حلوف ، واخا ناكلو الخبز وزيت وأتاي وبيخير ، كانكونو فرحانين والله العظيم ..

- ونهار ياوليدي يطيح شي حد فينا كتلقانا كاملين معاه ، منفوتوش بعضياتنا ، ومحانين مع بعضياتنا إيه اوليدي ، اش غادي نديو فهاد الدنيا غير فعالنا وعمالنا واللمة ديال العائلة ..

- كان الجوابو ديالو الصمت ، كيسمع ليها وساكت وكيفكر ... هادشي لي كتعاود ليه هو محاسوش نهائيا ، وعمرو ماحسو ... كيكون مريض مكايكون معاه حد ، فالأعياد قليل فاش كيدوز شي عيد مع مو وباه ، عايش بوحدو هو ومجية وأحمد ... من دار للخدمة للخدمة لدار ، ولا كيسهر مع هارون ويوسف ، ومرة مرة كان كيشوف سراج بحكم كان مزوج مكايتشاوفوش بزاف ..

- هاد الحوايج لي هي كتعاود عليهم ، ماعمرو حس بيهم ولا عاشهم نهائيا ، جاه هضرتها غريبة عليه .. واحد الإنسان لي 18 عام وهو فالغربة ... كان بوحدو ، عتامد على راسو ، كيكون مريض وخدام ... مكايعرفش نهائيا شنو هي الراحة ، وجا المغرب وبقا على نفس السيستيم ، حتى دخلات عائلة عباس وقلبات ليه حياتو سفاها على علاها ..

- معزوزة [نغزاتو حتى شاف فيها ] :

واش سمعتيني أش ݣلت ليك اوليدي ؟

- جلال [هزهز براسو ] :

سمعتك الحاجة سمعتك ..

- معزوزة [بعتاب] :

واش كدير اوليدي لي متزوج ، أويلي بخيرك وبخميرك الحمد لله ، وتبارك الله ماشي صغير اش كتسنى لي متشوف وليداتك كيجريو حداك ..

- جلال [حنحن] :

نهار غادي يكتاب الحاجة ..

- معزوزة : اويلي على نهار يكتاب ، واش بغيتيني نزوجك انا ..

- جلال [جاتو الضحكة] :

شكون هادي ؟

- معزوزة [بإبتسامة وصوت وقول] :

والله ماتلقى بحال بنت ولدي مسيرة ... الزين والحداݣة وصواب والاداب ..

- جلال [هزهز براسو وشاف فيها بسخرية ] :

متأكدة من الهضرة لي كتݣولي؟

- معزوزة [حنحنات كدور فعينيها ] :

شوف وهو منكدبوش عالله ، هي لسانها مبري منها واحد شوية ، وكدير شي فعايل دير الحمقين ... ولكن تبارك الله الحداݣة ومرا ونص ، تحطها على الجرح يبرا ... وعزيز عليها دير الخير ، وقلبها بيض مكاينش بحالو .. وصبيبيرة إيه انا نݣوليك .. والله ماتلقى بحالها ..

- جلال [حك حاجبو مدوز على لحيتو ] :

والى مابغاتش ؟ اش نديرو ؟

- معزوزة [خرجات فيه عينيها بصدمة ] :

هاةيلي على ماتبغيش ، تبغي بزز منها ݣلاك ، انت غير نوي وݣولها ليا انا نعطيها ليك .. كون هاني .

- جلال [تبسم] :

يصاوب الله الحاجة ، نوضي رتاحي ... راه مزال الحال ..

- معزوزة [مدات ليه يدها] :

نوضني عيش ولدي ، اي أي أي .. الله الله يرضي عليك ... بقا غادي معاها حتى قربها لدار ، خلاها ورجع للفيلا ، اما هي كيفما خرجات بلا حس دخلات بلا حس ، تجبدات فبلاصتها وكملات على نعاسها ..

- على الطبلة ديال الفطور ..

- سعاد [موجهة كلامها لصفاء ] :

مدويتيش مع ختك ، مشات بلا فطور ..

- صفاء [كتقاد فالكول ديال تجاكيط ديالها] :

انا مادرت ليها والو ، خليها حتى تفش وغادي دوي ... وهي لي غلطات ماشي أنا ..

- سعاد [بزعاف] :

اديك الكلبة شفتك وليتي كترادي معايا ، ختك كبر منك تغوت عليك ومتخلي لي يغوت عليك ، فين عمرها دارت بحال هك ... الله يحسن العوان حتى هي راه هازة المسؤولية ، وعيات مسكينة وزاد كمل عليها داك الحم/ار لي طلع ليها من جنب ، مفكرها فلي داز عليها ..

- صفاء [هزات نظارات ديالها ديال الشوف دارتهم ، هزات يديها كتقاد فخصلات من شعرها] :

ماقلنا عيب ، ولكن ماتغوتش عليك ... حشومة تغوت علينا حنا ومتغوتش عليك انت ..

- سعاد [عقدات غوباشتها ، بإنفعال] :

وانت اش دخل حمارك ، تغوت عليا ولا متغوت وانت مالك ... دخلي سوق راسك بيني وبين بنتي ، ليل تلقاينا مصالحين ، وبنتي كونما وصلات بيها العظم متدويش معايا هكاك ، حتى يكون داز عليك لا انت لا ختك لي داز عليها عاد دويو ... حمدو الله وشكروه ، مدازتش عليكم تمارة ، وماتحرمتوش من مكم وانتوما صغار ..

- نهار دوزات 4 شهور فالحبس ، انتوما ناعسين خامرات فبيوتكم ماخصكم خير ، الحاجة زينة تحلو عليها الفم تحضرها ليكم ، انتوما راه تخشي ليكم راسكم فبولخرارب ومتدويوش على لي دايرة معاكم ..

- كنقسم فمي بالله ، ومتدويو مع ختكم ، ما انا مكم ما نتوما بناتي ، وأجي انت بعدا فين غادية ؟

- صفاء : ماما يهديك الله ، راه قلنا ليك غادية أنا وسكينة مع سندس على وديت الخدمة ... مابغيناش نخليوها بوحدها ..

- سعاد [بصوت عالي كتسمع لسندس لي فالبيت ] :

وانا علمتكم ، والله القسام ومترجعو مصالحين لا دخلتو ليها انا ݣلت ليكم ..

- بقات صفاء غير كتشوف فيها ، خرجات سندس هي وسكينة ..

- سندس : يلاه مشينا راه تعطلنا ..

- سعاد [نباتها من الكوزينة ] :

أجيو انتوما ، شكون غادي يديكم بعدا للكازا ؟

- سندس [ضارت عندها] :

غادي يدينا لوس خالتي نجية ، وهو لي غايرجعنا ..

- سعاد : وأنا علمتكم ، الى مدخلتوش مصافيين مع ختكم بلاما تجيو اشوفو شي قنت تنعسو فيه ..

- هزهزات سندس براسها وخرجات هي والبنات ، شدو الطوالة لي كانت قدام الڤيلا ، دايرين مع حسن لوس نجية عند الشانطي تما يتسناهم ، فعلا وصلو كتبان ليهم الپيكوپ واقفة ..

- نزل حسن من الپيكوب ضار عندهم .. :

انا نجي هامن الحانوت نجيب شي سخرة ونرجع .. رجع ضار هز شيحاجة من الپيكوپ ، ومشا كيجري قاطع الشانطي ، ضارو لجهة لوراني الپيكوپ باغيين يركبو ..

- واش باغيين تركبو بحال هكا ، باش يلاه يحصلونا من دخلة ديال كازا [وقفات عاطياهم حايك حايك للوحدة ، اما هي كانت لابسة عباية كحلة وخمارها ] ..

- سندس [موجهة ليها الهضرة ، نبرة صوتها العتابية طاغية] :

علاش خرجتي بكري من دار وبلا فطور أصاحبتي ؟

- مسيرة : انا منين كنكون مقلقة مكنفطرش ، وإلى ݣلست نفطر اتقول ماما بلي مكاين والو ، وكان خاص ضروري نفيف انا الولة نخرج .. باش دزت عند خالتي نجية عطاتني هاد الحايكات لي لابسين ..

- من ورا مالبسو ركبو ݣالسين حداها ..

- سكينة : يا صݣعة خليتي خالتي سعاد عقلها باغي يخرج ... مسكينة كتغوت وتسمع لبنات ..

- مسيرة [ كضحك] :

العار شنو قالت ليكم ؟

- صفاء : أنا بعدا سرحاتهم ليا سمعاتني خل ودنيا .. قالت لينا الى ماتصالحتوش مع ختكم مترجعوش لدار ، شوفو فين تباتو ..

- مسيرة [ كضحك] :

ناري ماما مسكينة ، بقات فيا لبارح فاش ضرت فيها ، بقات مصدومة فيا مسكينة ... ولكن مكان عندنا حتى شي حل اخر ... حيت كون نزلنا كاملين دقة وحدة والله حتى تعيق بينا هي ومي ..

- سندس : مي مادواتش بعدا [ ضحكات] غير حدها كتشوف وساكتة ..

- مسيرة : شتي مي منين تشوفيها ساكتة ، عرفيها كتفكر فشيحاجة ..

- قطعهم حسن لي جا ، سد البيكوپ من اللور من ورا ما طمن عليهم ، عاد طلع للبلاصتو ... ديمارا وشد الطريق للكازا ..

- وصلو للكازا ، حطهم حسن حدا لاݣار ڤواياجور ... نزلو تما ، بعض الأعين كانو عليهم من المنظر ديالهم كانو كيبانو بلي جايين من العروبية ، وقفو كيتسناو حتى وقفات ليهم رونج ديال كريم ، حلات مسيرة الباب اللولاني وطلعات ، والبنات لوخرين طلعو اللور ..

- كريم [ شافيها ودور راسو شافيهم ] :

لي شافكم يݣول هاربين من بنات لالة منانة ..

- مسيرة [ حيدات نݣابها ] :

اول حاجة الله يرحم بيها الوالدين ، قبل السلام والكلام .. شوفليا شي محلبة ناكول راه فيا الموت ديال الجوع ومزال مفاكراش ݣاع ..

- كريم : علاش انت إيمتا مكانش فيك جوع ؟

- مسيرة [ بصرامة ] :

وصافي اكريم ، هنينا والله حتى فيا الجوع .. ديمارا الطوموبيل وشد الطريق ..

- كريم : علاش ناويين تاني اعصابة بنات عباس ..

- سندس : سول اخويا هاديك لي حداك ، حنا غير عبد مأمور ..

- كريم : هاديك راه كتقلب على خلا دار عشتها .. مغترتاح حتى يغبروها ..

- مسيرة [مامسوقاش ليه ، مضورة راسها لجهة الزاجة ] :

ارا ماتدويو وتهضرو حتى لغدا لي فراسي راه فراسي ، والمشكل انتوما كتعاودو نفس الهضرة واخا راكم عارفين بلي داكشي لي كنفكر فيه هو لي كندير ... يعني بلاما تعدبو راسكم على واحد الماتش لي اتخرجو منو خاسرين ..

- كريم : فين غادي تمشيو من ورا متاكلي ، فين بغيتوني نديكم ؟

- مسيرة : شوف لينا شي قيسارية ، تكون كتبيع الكساوي ديال الشطيح ..

- وقفات طوموبيلتو على غفلة ، حتى مشاو وجاو .. ضار كيشوف فيها عاݣد غوباشتو :

اش ناهو ، كيفاش كساوي ديال الشطيح ؟

_______________________

‏لا تبحثوا عن الحب

بل ابحثوا عن الصدق الذي يُغلّف الكلمات

ويلمع في العيون ...

عن الإخلاص الذي يستند خلف الأفعال

ابحثوا عن الثقة التي لا تهزها عواصف الدنيا وانشغالاتها

ابحثوا عن اللهفة الدائمة والشغف الذي لا ينقطع

والشوق الذي لا يهدأ ...

لا تبحثوا عن الحب

بل ابحثوا عن السند والثقة

عن من يحنو مودةً ،، ويدنو رحمةً ...

ابحثوا عن الأمان الذي لا يعقبه خوف من كذب أو خيانة ..

ابحثو عن الإهتمام

عن العفو الصادق الذي لا تغلفه رغبة أو مصلحة ...

*** هولندا[أمستردام] ***

- فوحدة من الشقق ، لي كان فراشها بسيط .. جوج فوتويات وصالة مونجي فالبيض ..

- ݣالسة مرا تكون ف 50 من عمرها ، شعرها فالقهوي فاتح ، كيتخللوه خصلات بيضاء ، هازة بين يديها ألبوم ديال التصاور كتشوف فيه .. تحل الباب ديال واحد البيت ، وخرج شاب يكون فتلاثينات من عمرو ، عاقد غوباشتو .. ݣلس مقابل معاها بسخط :

[بالهولندية] مابقا عندنا والو ، ݣاع الفلوس لي كنا مخبيين سلاو ، أيخصني ضروري منين نضبر .. لقيتي شي حاجة ولا والو ..

- بصوت تقيل جاوباتو :

لا مزال مالقيت والو ، واش عرفتي شحال من عام هذا داز ، لي عارفة بلي تزوجات بشي واحد مغربي ... وبدلات دينها هادشي لي عارفة .. هي مكانش فخبارها واش عندها ختها ، حيت بابا كان سامح فيا ..

- [ جاوبها بصوت قاصح عصبي] :

ماشغليش ومكايهمنيش ، لي كيهمني دابا خاص نلݣاوها ، ونلݣاو الحجرة لي عندها فهمتي ..

*** فلوزين ***

- السلعة تشارجات فالكاميوات .. تفتح الباب الكبير اللوراني وخرج اول كاميو تابعينو لوخرين ، هارون لي كان واقف عليهم .. هاز واحد الكتاب فيديه وكيقيد ، مع أخر كاميو خرج سد الكتاب ديالو .. ودخل .

- فالبيرو ، فبلاصة جلال كان ݣالس هلال قدامو الپيسي ، مراقب السلعة لي خرجات .. قاطعو الباب لي تحل وجلال لي دخل ..

- هلال [هز راسو فيه وبإبتسامة رجولية ] :

على السلامة ، مول شي جاي معطل ... وضيف جاي بكري ..

- جلال [ݣلس على الكرسي مقابل معاه ، داير رجل على رجل ] :

مكاينش فرق ..

- هلال : جيتي مع خروج السلعة نيشان ..

- جلال [بصوت رجولي هادئ] :

شفت ..

- هلال [عݣد11 وبإستفهام نطق] :

أش تما ؟ منعستيش مزيان ؟

- جلال [هزهز براسو ، خدا نفس طويل ، يدو على واحد المجسم مثلث فوق البيرو ديالو كيلعب بيه بصباعو ، فجأة زݣا .. هز فيه عينيه العنكبوتية ونطق من بعد صمت قصير ] :

تبغي دخل معايا شريك ؟

- هلال [صدمو السؤال متوقعوش منو ، ومافهمش علاش أصلا وجه ليه هاد السؤال] :

كدوي من نيتك ؟!

- جلال [غمزو ، وبنفس البرود والهدوء جاوبو ] :

واش بانلك ؟

- هلال : وخدمتي ؟

- جلال [بنفس الملامح الهادئة ، ونظرة التركيز على ملامح خوه] :

فرحان فيها مرتاح عاجبك الحال ؟

- هلال [ 3 ديال الأسئلة دقة وحدة خلاوه يتبلوكا ، معطاهش الجواب فديك اللحظة ، عطاه الصمت لدقائق عاد نطق بلامبالاة] :

الحاجة لي مكنرتاحوش فيها مكنكملوش فيها .

- جلال [رجع هز المجسم كيلعب بيه بجوج صباع كيشوف فيه ، شوية بانت شبه إبتسامة على طرف شفايفو .. فلحظة حط المجسم من يديه بحال شي شوكة دݣات يديك ، هز عينيه فخوه وهو مزال على نفس الإبتسامة ] :

كنتي تݣد تجاوب تم تم ، مكنتيش غاتدي وتجيب فالهضرة مع عقلك وتسول راسك عاد تجاوب .. هادشي الى كانت عاجباك خدمتك ..

- هلال [رجع بظهرو لور ، كيدوز يديه فلحيتو وعينيه السوداء على خوه] :

ماتبقاش تخدم معايا هاد الفعايل ..

- جلال [بنفس نبرة خوه] :

ماتبقاش تخيط معايا فدروبة ، كايعجبني بنادم يجبني نيشان ..

- هلال : شركة خدمت فيها سينين حتى دارت بلاصتها ، مجاتش نخليها ونبدا من زيرو ..

- جلال :

حتى حد مݣاليك خليها ، اتݣلب غير الميزان ..

- هلال [تݣاد فالݣلسة ، بإهتمام حط يديه بزوج على البيرو وعينيه مفيكسيين فعينيه خوه ، كيحاول يقرا نظراتو ..ويعرف فاش كيفكر ..] :

جبد لي عندك ..

- جلال [تبسم إبتسامة إنتصار ، عيبو الى ولي كيبان ليه هو عيب أما بنسبة للناس لي ضايرين بيه كتبانليهم ميزة عندو ، الحاجة لي كيخطط ليها مكايمشي حتى كيديرها ][ بصوت رجولي باح غليض غالبة عليه نبرة الامر]

- فالمغرب حنا مخصوصين من جهة الوكالات الإشهارية ، ماعندناش الجديد ، شي كيشبه لشي .. فنفس الإشهارات ، خاص الجديد خاص النضا ..

- هلال [هزهز براسو ، كيدوز بصباعو بزوج على موسطاجو منزل باقي يديه مع لحيتو ، بصوتو تقيل الرزين] :

عطيني المفيد ..

- ݣالسين فالمحلبة ... حاطة قدامها كاس ديال القهوة مع حرشة فيها الفرماج مقسومة على 4 .. أما البنات خداو مسمنا مسمنة للوحدة وبرارد ديال اتاي ، واخا فطرو فدار ولكن ماشي مزيان ..

- كريم [مسرح رجليه ، وحاضيها مقوس حواجبو كان كيحس براسو خاصو يكمي ، تعصب لدرجة كبيرة ... هاد الأيام لي فاتو كاملين كان مضغوط ، ومقسوم ماحيلتو للخدمتو ولا لختو لي كايمشي يزورها والحالة لي هي فيها ، كانت كتبان جسد بلا روح وغير ساهية ، واخا كيدوي معاها بحال الى كيدوي مع الحيط ... ودابا زادتو مسيرة بهضرتها ، عرق فراسو كانو غادي يطرطق إلى زاد غير شوية ..] :

- كدخلي راسك فشي حوايج انت ماشي ݣدهم ، خدمي عقلك شوية .. اللولة دازت ليك وثانية حتى هي ، ماشي غير دخلوك الفلوس تنساي راسك ..

- مسيرة [ساست يديها من السميدة دالحرشة لي لصقات ليها فيديها ، جغمات أخر جغمة بقات ليها فكاسها دالقهوة .. هزات عينيها البندقية فيه ، كتشوفيه بكل براءة .. وبتبات وتقالة جاوباتو ] :

نهار درت القناة ماشي غير وديت الفلوس ... درتها على بزاف ديال الحوايج ، باش لي دار العيب ياخود جزاتو .. وهادشي دوينا فيه اكريم ومغنبقاوش ندويو فيه يوميا ، اندير لي فجهدي ... خاص شي حد يتحرك ولا كيما دوك البنات مشاو فرجلين أيمشيو وحدين أخرين ..

- كريم [بصوت رجولي رزين ] :

واخا طيري وتنزلي ، التربية كتلعب دور ... شحال ݣدك ، نݣولو هادشي لي غاديري نجح وݣديتي تعتقي دوك البنات ، أيبانو بنات خرين .. عطا الله البنات لي باغيين يخويو البلاد ، بأي طريقة هي بغات غير تخوي ودير لعاقة ... مكايهمهاش بأشمن طريق ..

[ قرب كرسيه لعندها مربع يديه على طبلة مفيكسي عينيه الصغار الكحلين عليها ]

- خاص الوعي ، فهمتي ... شحال ݣدك ، اتحلي قناة تولي توعي الناس ، بنادم خاصو يوعى لا بنات لا دراري خاص يوعاو ، وتربية كتلعب دور .. الحوار خاص يكون من الصغر ، بنادم مايترباش فالقمع ..

- من صغر كيقمعو ولادهم ، سكت انت معارفش ... دخل سوق راسك حتى انت وليتي تعرف دوي ، من صغر كتكبر مقموع .. كتولي تخاف دوي ، وديك الدوامة لي عندك لداخل كتولي تمارسها فزنقة ، كتكون سبع على برا وفدار كانيش ..

- كتجيك الفرصة فين تزهق لبرا ، مكترددش باغي دير كيما دار صاحبك ، وتوري لداركم علاش ݣاد ... ولكن ناسي بلي أخرتك يا تنعس فزناقي ولا ياكل جدك البحر واحد فزوج ... هادشي بنسبة لدراري اما لبنات ، اخرتها فساد ولا تلاح بين يدين مكاريب بحال هاد خونا هذا ..

- دابا داخلت عليك بوجه الله ، الفرق بين وحدة غادة للخليج ولا لبرا بديپلوماتها وقرايتها واتخدم خدمة واعرة ، ولا بين وحدة عندها غير الكاطريام ولا ثامنة ، ولا تلݣاها ماوصلات حتى للكوليج ..

- غياب الوعي والحوار والعقل مكاينش كولشي من تربية .. فهمتي ، واخا طيري وتنزلي بنادم هو لي كيخلي الفرصة لواحد خور يستغلو ويلعب بيه كيف بغا ، كون كان كل واحد جامع راسو ... ويخرج عينيه ومايخلي خور يسيرو ولا يستغلو ، لا بحال الضبع ولا غير غيرو يكثرو ..

- هضرتو خلاها تشوف قدامها وتسكت ، هضرة إلى ضوراتها فراسها أتلقاها منطقية وعندو فيها الصح .. شحال ݣدها بنادم هو لي خاص يوعي راسو ويبدل من راسو ، شحال ݣدها ماتفضح وماتعتق ... الى فكرات فيها بعقلها ، هي راه ماشي سوپير وومن ، داكشي كاين غير فأفلام الخيال العلمي ، أما الواقع راه حاجة أخرى ...

- واخا دوك الناس لي فضحات قبل كل واحد فيهم خلص الحق ، ومزال مناوياش ترجع .. حتى تكون على الأقل دارت لي عليها مع بزاف دالوجوه .. ولكن واش هادشي لي غادية فيه ݣدو ولالا ..

- كريم [سكاتها كان علامة على تقبل كلامو ، وبلي هضرتو ضوراتها فدماغها ، كان خاصو مزال يحكر عليها ، ويوريها بلي هادشي لي كدير فيه راه يقدر يضرها من بعد ، خصوصا ماعندها شي ركيزة صحيحة .

- لا باها فالبرلمان ولا خالها منتامي لشي حزب ... ، لي ممكن نݣولو إلى حصلات تخرج منها ، بحالها وبحال غيرها فالمجتمع ، لي ناس على قد الحال ، نهار كيديرو شيحاجة خارج القانون وكيحصلو فيها ... كيخرجوها منهم تاني ومتني ، وهادشي لي هو خايف عليها منو حيت ماشي ديال وجهو ومتستاهلوش ] :

[بصوتو الرزين ، وتبات ملامحو وعينيه لي فعينيها نطق ] :

متنسايش بلي عندك عائلة ، خواتاتك راه مغايبقاوش معاك فهادشي على الدوام ديريها فبالك .. باك مافيه لي يتجرجر فالحباسات ... خواتاتك مزال باغيين يعيشو ويحققو داتكم ... صاحبتك من غدا ، يجبدو راپورات ديال لي هاكرز لي ديجا تشدو عندهم يقرقبو عليها ، هادشي مافكرتيش فيه انت ..

- يحسابلك أتݣولي ليهم راه انا مولات هاد المعماعة كاملة ايخليو داركم ، برب حتى تمشيو فيها كاملين جملة ... هادي في حالة ماوصلوش ليك دوك لي فضحتيهم قبل من المخزن ..

- ݣلسي مع راسك مزيااان ، وراجعي راسك بالمزيان وشوفي هضرتي فين غادية ، وفين جايا اتلݣاي راسك عندك بين يديك الذهب لي يغنيك ومعمية عليه .. ولي يسلكك ديريه ... إلى كملتي فطورك نوضي نوصلكم فين بغيتو ..

- دفع الكرسي ومشا خلص ، خرج كايتسناهم على برا .. البنات مدواوش ، حيت ماعندهم مايقولو ... هضرتو كانت صحيحة 100 فالمية ..

- صفاء عندها الإجازة فالقانون مدايرة بيها والو ، وݣالسة حيت كون تحكات كانت ادير المستحيل باش تلقى خدمة ، ولكن حيت لقات مسيرة كتهلا فيها ولي بغاتها تاخودها ليها ، كتافها بردو وعݣزات ، واخا مامرة مازوج قلبات ولكن ماشي بداك الجهد ، لانو لي بغا شيحاجة راه يجري وراها يجري وراها ..

- سندس لي عندها الماستر فإدارة الأعمال ، وبلاصتها فشي شركة بصالير مزيان ... اول خدمة جاتها عند الحاج فالمحال ديالو ، خدمات ب 1400 درهم ، كانت يلاه كتشري لي خاصها وتعاون بيها شوية ..

- الى جاو يفكرو أيلقاو بلي غير كيضيعو فالأيام ، وحياتهم غادية غير هكاك فالخوا الخاوي ... حيت هادشي مدايمش ليهم نهائيا ..

- فالطوموبيل ، كريم سايݣ بيهم والبنات اللور كيدويو ..

- صفاء [تنهدات تنهيدة طويلة، بصوت شبه مسموع] :

بغيتو الصراحة البنات ، كريم عندو الصح ... خاص كل وحدة تفكر فراسها شنو بغات من هنا للقدام ... شنو بغات تكون وكيفاش كتشوف راسها من هنا للخمسنين الماجية .

- سندس [بصوت غالب عليه التمني] :

أنا الصراحة مكرهتش نخدم فشي شركة ... وتكون شركة كبيرة ، وفيها الناس بزاف [تبسمات وعينيها ساهيين وسارحين فالمشهد لي قدام عينيها ، كانت كتخيل وتنطق بداكشي لي كتخايلو ، غافلة على أذان مسيرة لي كانو كيسمعو كلامها ]

- عرفتو بحال الفيلم ديال الطائر المبكر بحال هكاك [ضحكات بطفولية] ونكون انا الكل فالكل ويكونو معولين عليا فكولشي ، وناخود صالير يكون زوين ... ونكري شي دار زوينة ، وشوية بشوية تولي عندي طوموبيلتي .. ونبرع والديا ..

- صفاء [نزلات بظهرها على الكرسي ، دورات راسها للزاج وسهات ، بإبتسامة وبدون وعي نطقات ] :

أنا مكرهتش نخدم مودل ديال لاباس تقليدي ، والله العظيم مكنشوفش راسي خدامة عند شي نوطير ... الصراحة وتكون عندي صفحة فالأنستغرام ، ومن بعد نولي ندير إشهارات للشركات .. شوية بشوية يعيطو ليا فشي سلسلة ولا مسلسل نمثل فيه ..

- وحتى انا تكون عندي داري وطوموبيلتي ، ولي خصات دارنا نحضرها ليهم ... هادشي لي كنتخايل راسي من هنا لخمسنين ..

- سندس [ضورات راسها لجهة سكينة ، لي كانت ساكتة وكتسمع ليهم ] :

وانت أسكينة ، فين كتشوفي راسك من هنا ل 5 سنين ؟

- سكينة [جبدات يديها كتشبه وتنهدات تنهيدة طالعة من قلبها ، عمرها شي حد سولها هاد السؤال ولا عبرها ، ولا قاليها شنو بغيتي ديري ولا فين كتشوفي راسك من هنا للقدام .. ، أحلامها كلهم كانت كاتماهم للداخل كانت كتحلم غير بينها وبين راسها .. حسات بضغط فحلقها ، ودمعة غاتشق طريقها وتنزل من عينيها ، وفعلا غير طلات من قنت عينيها مهددة بالإنهمار ديالها بالخف مسحاتها ، بصوت غالبة عليه نبرة الضعف والتمني والحلم ] :

قريت وكبرت ، وكدوز الأيام وعالم العطارة كان كيجرني ، أتجيكم غريبة وفشكل ، ولكن مجال العطارة كيعجبني ، عزيز عليا نكتاشف ونعرف كل حاجة لاش كتصلح .. كتعجبني الحاجة تكون فريش ، وحرة ومطحونة على حقها وطريقها ..

- فاش كنت عايشة بوحدي ، وكنت كنتقدا وكنمشي عند العطار كنت كناخود الخرقوم عواد وكيطحنو قدام عينيا ، مكناخودش داك لي ديجا مطحون [هزهزات براسها وعينيها البلورية الفيروزية كيلمعو ] القرفة حتى هي كناخودها عواد ويطحنا قدامي ، وعزيز عليا نمشي عند دوك العطارة القدام ، ونݣلس ونتحتت معاهم ، ونعرف اسرار كل حاجة ... الفلفلة الحارة السودانية ، كنعرفها واش حارة من ريحتها ..

- كانت الأمنية ديالي ، نفتح محل ديال العطارة يكون صغير على قدي ، ونعمرو بالحوايج لي كنبغي .. نعمرو غير بالعطرية وبأي حاجة اتفيد فتجميل ، مندير لا شكلاط لا مواد غدائية لي بلاصتهم بوحدها ، حيت العطارة بوحدها والمواد الغذائية بوحدها ..

- [تبسمات إبتسامة إستهزاء وإنكسار] :

ولكن ماعندنا منديرو ، تجري الرياح بما لا تشتهي السفن [ضحكات] درنا حوايج لي غير حب الإستطلاع سبابنا فيهم ، وبسبابهم دوزنا 5 شهور ديال الحبس .. [درات عينيها لسندس وبنبرة هادئة عكس البكية لي شداها لداخل ] ..

- الدنيا ماشي ديما كتعطيك داكشي لي بغيتي ..

- كريم [لي كان سايݣ وعينيه على الطريق ، او ودنيه معاهم .. بنبرة صوت جدية حادة ، وقف طوموبيل وضار لعندهم ] :

الدنيا مكاتعطيش لواحد الإنسان لي عمرو حاول ، لي عمرو دار مجهود وتبع داكشي لي بغاه ، هاد الجملة كيݣولوها غير الناس لي عمرهم حاولو باش يغطيو بيها الفشل ديالهم فهاد الدنيا ..[رجع ضار وعينيه فنقطة محددة ، بصوتو القاصح البارد ] :

وصلنا ، الى بغيتو تنزلو ..

‏لا تبحثوا عن الحب

بل ابحثوا عن الصدق الذي يُغلّف الكلمات

ويلمع في العيون ...

عن الإخلاص الذي يستند خلف الأفعال

ابحثوا عن الثقة التي لا تهزها عواصف الدنيا وانشغالاتها

ابحثوا عن اللهفة الدائمة والشغف الذي لا ينقطع

والشوق الذي لا يهدأ ...

لا تبحثوا عن الحب

بل ابحثوا عن السند والثقة

عن من يحنو مودةً ،، ويدنو رحمةً ...

ابحثوا عن الأمان الذي لا يعقبه خوف من كذب أو خيانة ..

ابحثو عن الإهتمام

عن العفو الصادق الذي لا تغلفه رغبة أو مصلحة ...

*** فدار الحاج محمد ***

- إبتسام [هازة واحد الساشية فيديها ] :

ماعرفتش عقلي فين كان حتى ختاريت هادي ، أنت أبا لي عجباتك أويلي راه ديال البنات الصغار ..

- محمد [داير رجل على رجل كيدور فخاتمو دنقرة ، الرجل كبير فالعمر ، خطوط التجاعيد جهة عينيه وبجهتو ، بحل نهر طويل ، أما تجاعيد الصغيرة ... بحال شي كتاب قديم داو عليه أعوام وأعوام ، وهو من يد ليد .. كيعطيك تلخيص على هاد الشخص وشحال دوز فحياتو .. ومع ذلك عينيه مزال محتافظين بديك اللمعة والنظرة الطفولية ] ..

[بصوت مرح او وقور ] :

أنا عجباتني وبغيتها ، تشهيت داك اللون على لالة معزوزة ..

- هاجر شافت فخواتاتها وتبسمات حابسة الضحكة غير بزز ..

- إبتسام : والله يهديك ابا هادي راه غير خطوبة وتعارف ماشيش عرس ..

- محمد [ بصوت غالبة عليه نبرة الصرامة ] :

ياكما يحسابليك أبنيتي عندي 28 عام ، يلاه انخطب ونتعرف ... راه عندي 70 عام فعمري شحال انعيش فيها ، 10 سنين ولا 5 سنين ولا شهر ..

- بناتو : الله يطول فعمرك أبا ويخليك لينا ..

- محمد : التعارف أبنتي والخطبة خليه ليك انت ، لي مزال صغيرة أما انا ابنتي كبرت ... نديو ماقسم الله ، ونقراو الفاتحة ونطيحو العقد إن شاء الله الرحمن الرحيم ..

- هاجر : خديتو التمر بعدا ؟

- إبتسام : خديناه ، هو ولوز ... انتغداو إن شاء الله ونبداو فيه ..

- أسماء : معاش غنمشيو غدا ؟

- إبتسام [نازلة بركابيها على زربية صغيرة ، كتقاد فالحوايج لي خداو والكادويات لي جابو للعائلة معزوزة] :

ميقات ورا العصر إن شاء الله ، ياك ابا ؟

- محمد [وقف] :

إن شاء الله الى بغا الله وبقينا فالحياة ، أنا انطلع نرتاح شوية ..

- إبتسام : سير رتاح أبا ايوجد الغدا نفيقك ..

- محمد [هزهز براسو ] :

الله يرضي علك ... طلع للبيتو وخلا بناتو يكملو تستاف الحوايج فطيافر ..

___________________

*** لوزين ***

- السكوت والهدوء كان مخيم على البيرو ... من غير صوت السايلو لي فيد هلال هو لي كان كاسر هاد الهدوء .. يد كيخبط بيها على البيرو ، وعقلو سارح فالهضرة لي ݣاليه جلال ..

- كلامو خاصو يدير ليه ألف حساب وحساب ، صعيب نخدم فشيحاجة سينين وتوݣفها وبين ليلة ونهار تݣلبها وتحولها ، فيها ريسك كبير .. ومن جهة اخرى كان كيفكر فباه ، باه لي حياتو كاملة ... اي حاجة طلبها منو كيديرها ، عمرو رضها ليه فالوجه ولا ݣاليه لا ، حتى من البنت لي قتارحها عليه باه ، تعرف عليها وتزوج بيها ، اه هو فعلا بغاها ... بتصرفاتها خلاتو يبغيها ، ولكن باه لي عندو يد فزواجو منها ..

- كان غادي فطريق والمسار لي ختارو ليه باه ، ماشي ضعف شخصية منو ، ولكن كان كيشوف بلي واجب منو كولدو الكبير ، يكون يدو ليمنة ويسمع لكلامو ومايعصيهش ، بنسبة ليه العائلة مهمة والوالدين أهم .. وهادشي هو لي خلا واحد الجانب سري من حياتو عمرو شاركو مع شي حد ، ولي هو حبو للموسيقى والغنا .. كيحس براسو كيتمرد على قوانين باه ، وكيدير شيحاجة لي كيبغيها هو ..

- بنسبة ليه كان مسير وليس مخير ... واي حاجة ݣالها باه كتنفد بكل رحابة صدر ، حياتو كانت غادية عادية .. مافيهاش مشاكل ولا صداع الراس ، مرتاح فخدمتو وعمرو تشكا ..

- كلام خوه لي فهاد النهار ، خلاه يعاود حساباتو ، ويسول راسو واش هاد المدة كاملة كان فرحان فيها [الجواب لا] تفكر كلام باه ليه ، وبلي خاصو يشارك فالإنتخابات كيما كان باه ، واش هادشي هو باغيه [الجواب لا] ... فين عمرو كان كيخطط يكون مترأس شركة للإستراد والتصدير ، الحواب حتى هو لا ..

- فيقو من السرحان ديالو صوتو الخاتر القوي التقيل :

الدي مليح والسكات أحسن منو ، كتاف الرجال الحرين ، كتبقى سخونة ، واخا يبقى غير العرق واحد كيزدح .. أش ݣلتي ؟

- ختارت الكساوي ليها ولبنات ، كل وحدة فلون وفشكل ، حتى وحدة مكتشبه لوخرا ، لي جامع بيناتهم هوما الفاحي لي فجناب والموزون ... ونوعية ديال الثوب هادشي فاش كيتشابهو اما الشكل واللون كانو مبدلين ..

- خدات نݣابات فالكحل منبتين بالموزون ، عاد دازت وخدات البيروكات [شعر مستعار] لي كان لونهم واحد وهو الكحل ، وهاد اللون هو لي كان مطلوب ..

- خرجو من القيسارية وهوما محملين ، سونات على كريم لي جا داهم نيشان للبرطمة ديالو ..

- كريم [بجدية ] :

الباف راهو فوق الطبلة لي حدا التلفازة ... الثلاجة راها عامرة الى جاكم الجوع .. منين تساوليو سوني ليا .

- عطاهم بظهر وخرج مخليهم يبداو على شنو ناويين ..

___________________

*** إفران ***

- خرجات من بيتها ، لابسة سروال لاصق ديال الدجين ، مع شوميز بيضة دايراها وسط سروال مع فيست فالغوز فوشيا .. مع صنادلة دومي طالون فالبيض وساك فنفس اللون .. نزلات لتحت كتينى ، شافت فساعتها ، هزات راسها كتعيط .. :

ودياان ، وسربي خلاص أصاحبتي راه انتعشاو تم ماشي انتغداو ..

- نازلة بزربة مع دروج ، عينيها على ساكها كتحط فيه تيليفون ، لابسة سروال ثوب فالحمر ... مع تيشورت فالبيض ، وڤيست فنفس اللون حاطاها غير على كتافها ، مع صباط فالكحل وساك فنفس اللون ..

- ليليا : تعطيلة هادي خاصنا الى بغينا نخرجو توجدي مع صباح بكري يلاه يلاه ..

- وديان : وهداي عليا أصاحبتي يلاه يلاه ، 10 دقايق لي تعطلت عليك فيهم درتي هاد الحالة ..

- ليليا [عطاتها بظهر ، فتحات الباب وخرجات ] :

غير يلاه خلاص ..

- ضارت فتحات الباب وطلعات ، لحقات عليها وديان ركبات وسدات الباب وراها ... منزلة المرايا كتقاد فالعكر ديالها ، قدات شعرها ورجعات المرايا كيف كانت .. ديمارات ليليا الطوموبيل وشدات الطريق للفاس ..

- طالقة الموسيقى ، غاديين موسقين ... مرة يجبدو شي موضوع ومرة يتبعو كلمات الأغنية لي خدامة ..

- حتى وصلو للفاس ... بلاصات الطوموبيل ، واول بلاصة مشاو ليها هي المدينة القديمة ضارو فيها ، وخداو تصيورات بزوج .. من وراها رجليهم داتهم لطالعة بوجلود .. حتى هي خداو تصيورات وعطاوها حقها ومتعو عينيهم ، من وراها مشاو لدار الدباغ ... حتى هي تضورو وخداو ليه تصيورات وڤيديوات .. داتهم رجليهم لرصيف المريني ..

- دارو مزيان والإبتسامة مافرقاتش وجهم ، غافلين على العينين لي هاد المدة كلها وهي مراقباهم ... وعلى الرجلين ، لي فينما مشاو تابعاهم .. بكثرت مكانو مستمتعين بوقتهم مكانوش راضين البال نهائيا ..

- وديان [وقفات] :

أنا صافي عييت جاني الجوع ..

- ليليا [جراتها] :

زيدي نمشيو ناكلو ... أنديك لواحد البلاصة ترجعي لمراكش وماتنسايهاش وتاكلي فدجاج وبحال هاد الدجاج عمرك أدوقي ..

- وديان [حطات يدها على كرشها وبإبتسامة بريئة] :

عتقيني ..

- ركبو فطوموبيل ... وشدو الطريق لعاصمة الدجاج لي فسونطر ڤيل .. رحبو بيهم برحابة صدر وبالإبتسامة ، خداو بلاصة بعيدة شوية على الناس ، وطلبو دجاج مشوي مع شلاضة ..

- وديان [غمضات عينيها ] :

الله ريحة الدجاج كتشهي ، كنتسنى غير إيمتا يتحط خلاص ..

- قبل لا تجاوبها ليليا ، وقف عليهم السرباي ، هاز بلاطو فيه طبيسلات ديال زعلوك ، مع طبيسلات فيهم الزيتون وطبيسلات فيهم لاصوص ، مع شبكة فيها الخبز .. عطاهم إبتسانة ومع نبرة دافية :

بصحة وراحة ومرحبا بيكم ..

- وديان [ هزات الخبز وبدات كتاكل ] :

الله بحال الى حس بيا ، ناكل بعدا هادشي نسد بيه غير جوعي ..

- ليليا : مغايجي فين يوصل الدجاج حتى تكوني ساليتي هادشي وتݣهمي ..

- وديان [ فمها عامر ] :

لا أختي متخافيش ، هادشي غير غادي يهرني ويفتح ليا الشهية على لي جاي ..

- ليليا : كولي ياختي بصحتك ..

- الاجواء كانت عائلية ، واحد تناغم بين الخواتات غريب ، كلام وتجمعات فحوايج كثيرة ، كسرها بصوتو الرجولي التقيل القاصح ، لي من نبرتو كيبان ليك معاجبوش الحال ، ولا مضرور من شيحاجة ..

- بصحتكم ..

- صوتو خلاها تحبس الماكلة وطلع عينيها بالعرض البطيء ... عينيها لي ظاهر عليهم أثار الصدمة مقابلين مع عينيه الخضرين ، لي كانت فيهم شرارة غريبة ، شرارة عتاب .. وللوم ، شرارة كتعاود كولشي ، مكرهش كون يشدها يعصرها بين يديه ، علا وعسى تحس بنار لي كتح//رق فقلبو .. [جر الكرسي وݣلس] :

[قبل لا تدوي سبقها] مكاين لاش تعدبي راسك ، غير كولي على خاطر خاطرك ... مناويش نخرج من هنا حتى ندويو ، خودي وقتك مازربانش [غمزها] .. كلامو خلاها تحبس الماكلة ومتنزلش عينيها عليه ، مثدومة وقدمتها باينة من تصرفاتو والجرأة والثقة لي كيدوي بيها ..

- [رجع وقف] غير بشوية عليك ، شوية بشوية ادخل ليك لدماغك ، وباش متݣوليش مكنعرفش فصواب ومامزيانش ، نخليك تلكلي على خاطرك .. حشومة نحرم عليك اول ماكلة أتاكليها ففاس ..

- نزل بشوية مقرب من ودنيها ، وبصوت بحال الفحيح نطق ] :

متفرحيش بزاف مغانبعدش ، أنا غير حداك .. تبسم ليها عاطيها بظهر ، زاد 2 خطوات وݣلس فالطبلة لي وراهم بضبط ..

______________________

*** دبي ***

- وبضبط فمول الإمارات دبي ، أحد اكبر المولات بدبي .. معروف بمحالاتو الفخمة ، وانت كدور فيه كتستمتع ومكتسخاش تخرج منو نهائيا ... لي بغيتيه كتلقاه فيه محالات خاصة بالحوايج ومحلات خاصة بصبابط ، عاد محلات العطور العربية ومحالات التجميل ..

- من ضمن المحالات لي فيه كانو زوج محالات كبار عندهم نفس الإسم أو بالأحرى زوج حروف بذهبي متربعين على الپلاكة لي معلقة E.E .. محالات خاصين بمواد التجميل ، ݣاع لي كيخص عالم التجميل ... فيه وجميعهم عندهم نفس الإسم من بودرة وماسكارا من كولشي عندهم نفس الإسم ، كان عليهم إقبال كبير بزاف .. حتى من البنات لي خدامات تم عندهم نفس اللبسة ، مطروز عليها نفس الإسم ..

- دخل شاب فثلاثينات من عمرو ، ومن ملامح وجهو باين عليه الإرتباك ، وقف على دوك البنات ونطق بللغة الإنجليزية و بصوت غالب عليه التوتر ورهبة .. :

- Mr. Mr. Essam has come [سي عصام جا]

- هازة فخض فيديها كتاكول ماعلابالهاش نهائيا بشخص لي وراها ... ماهمهاش واخا تصدمات فالأول فاش شافتو ، ولكن مابغاتش تخليه يبرزطها ولا يضيع عليها الغدا ديالها ..

- ليليا [ كطل بنص عين عليها ، رجعات ركزات أنظارها على ختها] :

هذا زاد فيه بزاف ، اويلي واش حماق ..

- وديان [هزهزات كتافها بلامبالاة] :

مكايهمنيش ، يدير لي بغا مكايهمنيش ، كولي كولي ..

- ليليا [ستغربات من تصرفها وردة فعلها الباردة] :

ياختي باز محلولة ليك الشهية تاكلي ، وهو وراك وتابعك وحاضيك ..

- وديان [بصوت بارد ومهدن] :

وعلاش أختي لي مناكلش ، وعلاش لي تسد ليا الشهية ؟ كل واحد عندو رجليه ، كيما دخلت من هنا انخرج ... ويقوليه راسو يقيسني ولا يوقف ليا فطريقي ديك ساعات ايشوف وديان أخرى عمرو مشافها ... ديك الظرافة لي تعاملت بيها معاه قبل ، غادي نوريه القباحة ديالها دابا .

- ليليا : أنا هزيت يدي ، الى ساليتي يلاه ..

- وديان [كتلدد] :

بلات نكمل .. ، هزات الكانيطة ديالها ديال هاواي جغمات منها ورجعات حطاتها مكملة ماكلتها ..

- منين سالات الغدا ديالها وقفات مبعدة الكرسي برجليها ، مشات لجهة الحمام غسلات يديها ورجعات عند ليليا لقاتها خلاصات ، هزات ساكها وخرجات سابقة ختها ... ماتلفتاتش وراها ولا داتها فشخص لي غير شافها خرجات تبعها ، حتى كانت اتحل باب الطوموبيل ويدو حبساتها ..

- وديان [ضارت عندو مغوبشة ناطرة يديها منو ] :

ياك لاباس ، واش انت صاڤا پا .. بأشمن حق تشد فيا ولا تبعني ، الى كنتي مريض سير تعالج .. عطيني تيساع .

- ليليا [جات كتجري لعندهم على إثر صوت ختها لي كان واصل لعندها ] :

بشوية ششش وديان مالك كتغوتي ..

- وديان [فقدات السيطرة على راسها ] :

شوفي هذا ودوي معاه ، واش سونيتي ليا مجاوبتكش واش جيتي حتى لعندي ومابغيتش ندوي معاك ، أش بغيتي عندي ، شنو بغيتي ؟

- منصور [بصوت روجولي قاصح وبارد مقرب لوجها] :

باغيك أنت ، طيري تنزلي باغيك انت ... غوتي ديري صباعك فودنيك وجمعي الناس باغيك انت ..

- وديان [صدمها جوابو] :

وانا مابغياكش اسيدي تهنيتي ..

- منصور [ضحك ضحكة مستفزة ] :

هانية ، مع الوقت غاتولفي ..

- وديان : سير شوفيليك شي طبيب يداويك .. حيت خاصك تداوا ..

- منصور [عينيه مسكرين وهي لي مسكراه ] :

أنت دوايا انت لي بيديك حياتي ولا موتي ..

- وديان : عطيني بتيساع راه والله منصلح ليك ..

- منصور [قرب منها] :

أنا لي عارف شنو لي يصلاح ولي مايصلاح .. هاد قصوحية الراس عندك هي لي غاتخليني بحال ظلك ، ديريها فبالك ، واخا طيري وتنزلي واخا تمشي فينما بغيتي ، انكون وراك ..

- وديان [بصوت غالبة عليه نبرة التهديد ، مخالف لأحاسيسها الداخلية منو ، لي خلاها تخاف وتصدم فتصرفاتو وكلامو ] :

قسما بالله وتبعني حتى نديكلاري بيك ..

- منصور [هزهز بكتافو] :

أنا نمشي معاك إلى بغيتي ، ودابا نيت شنو بان لك [غمزها]

- وديان [كتحس بصبرها تقادة ومابقا عندها فين تزيد ]

ليليا ، يلاه بحالنا هذا راه عطيناه كتر من وقتو ..

- منصور [بنبرة تهديد ] :

كنقسم ليك برب الكعبة ، ماحدك مقصحة راسك انبقا بحال خيالك ... ورب الجليل ونلقى شي كيدار كيدور بجنابك ، غانخليك تحضري لݣنازتو وتبكي عليه ..

- وديان كلامو الأخير خلعها او وترها ، مجاوباتوش تراجعات خطوة للور وبالخف حلات باب الطوموبيل سادة عليها بجهد ... طلعات حداها ليليا ونظرات الإندهاش والإستغراب على وجها ... ديمارات الطوموبيل ، زادت وخلاتو مزال واقف متبعهم بعينيه .

- هلال من بعد داك السكوت ديالو والهدوء لي كان فيه ، حط الستيلو من يدو ، هز عينيه السود فعينيه خوه ونطق من بعد تفكير طويل :

غنزطم معاك فهاد لافير ..

- جلال [تبسم إبتسامة نصر بحال الى كان متوقع القبول ديالو ، بصوتو الرجولي التقيل المهدن ظاهريا عكس فرحة الإنتصار لي كيحس بيها لداخل] :

مرحبا ..

- تدق الباب وتحل داخل هارون .. :

ها أنتوما هنا ؟ [ شاف فجلال ، جر الكرسي وتقابل معاه داير رجل على رجل] :

واش انت خارج ليا فعودي ولا كيفاش بلانك ، أنت أدوݣ لسويسرا ، وانا باغي تزاوطني للوجدة ..

- هلال [ بإستفهام ] :

أش لاوحك لوجدة ؟

- هارون [ أشر ليه بحجبانو لجهة جلال ] :

سول خوك ، يلاه طاحت عليه المحنة على الارض لي تم ..

- جلال [ هز فيه عينيه العنكبوتية] :

كبرتي على على هاد الفشوش ورزاحة لي ولات فيك ..

- هارون : وصاحبي يلاه جينا ..

جلال [ بصرامة ] :

شهر 6 قرب يخرج .. مخاصش يجي شهر 7 ولݣانا مزال مازرعنا خيزو ، خيزو اليباني هادي هي وقتو ، حيت دغية كيبان باش ينزل لسوق ..

- منين يوصل شهر 9 وشهر 10 ديك ساع باش نزرعو البلدي ..

- هارون [ تنهد تنهيدة طويلة] :

واخا أسيدي ، غدا نمشي ولا ياكما بغيتيني نمشي دابا ؟

- جلال [ وقف] :

براكة من الطنز العكري ، غدا سير وبكري [ حط ليه سوارت فوق طبلة ] هادو سوارت الدار ، راه دويت مع رشيد غايتسناك ..

- هلال [بتساؤل] :

وانت فين غادي ؟

- جلال [ببرودة وصوت رجولي باح] :

حتى تكون سميتك نجاة ونجاوبك ... هز سوارتو وتيليفونو وخرج ..

- هارون [هز عينيه فهلال بان ليه حابس الضحكة غير بزز] :

لاش حابسها طلقها ..

- هلال[طلق ضحكة رجولية بجهد ، شحال ماضحك بحال هكا كانت ضحكة من القلب ] :

ناري عطاك أصاحبي ..

- هارون [غلباتو الضحكة] :

هنينا ، خوك جوابو على فمو ..

- هلال : نوووض نوض يلاه توجد راسك ..

- هارون : حياتنا بائسة لا زهو لا نشاط لا حب ، خدمة خدمة ، كيبان ليا نديميسيوني حسن ..

- هلال [مزال غالبة عليه الضحكة] :

وعلاش ؟

- هارون [بصوت رجولي غالبة عليه نبرة الإستهزاء] :

الى بقيت مع خوك اندخل فال50 بلا مرا بلا ولاد ..

- هلال : انت غير غيز هاد لافير دالأرض انا نزوجك ..

- هارون [هز حاجب ومنزل الثاني] :

اهاه بشكون ..

- هلال [غمزو] :

سير أصاحبي رجع ونطرق ليك هاد المسمار ..

- هارون [هزهز براسو ] :

صافي نزطم معاك ، نرجع نتفاهمو ..

- هلال [غمزو] :

سير عالله ..

- شعرها الناري مابقاش كيبان ... تفاصيل شعرها غابو مابقاوش حتى من عينيها البندقية وحجبانها غابو ليهم الاثر ورجعو كحلين ... بحال لي بدلات ليها اللوك فنانة محترفة ، تطبيقها للڤيديوات لي شافت ... خلاو الشعر المستعار لي ركباتو كيبان بحال الى شعرها الطبيعي ... ماشي غير هي حتى البنات ، كان شعرهم كيبان بحال الى أصلي .. عرفات كيفاش تركبو وتقناتو ، لي يشوف خدمتها يقول فايتليها كانت خدامة فصالون ...

- أما أجسامهم كانت مبدلة ، من عود السبسي لأجسام شبيهة بجسم هيفاء وهبي ... الخصر منحوت المؤخرة البارزة ، وصدر البارز .. أما بنسبة للوجه ، مكياج خيالي .. عينين كبار مجبدين بالكحل العربي الأسود ، رموش طويل واكيد رموش إصطناعية .. ملامح وجهم كانت مبدلة ، لون العينين تبدل بفعل العدسات اللاصقه الملونة .. سكينة لي ملامحها الزعرة تبدلات ورجعو عندها ملامح عربية سوداء من شعرها لعينيها لحجبانها ..

- لي حتافظات بملامحها الحقيقية صفاء بوحدها ، الإظافة لي كانت هي الرموش الطوال ، والخالة لي تحيدات الأثار ديالها من فوق حاجبها ..

- ولكن هاد الملامح مبانوش بنݣاب لي كان منبت بالموزون ... ومغطي ليهم النص فوجهم من غير عينيهم وحجبانهم ..

- الكساوي جاوهم لاصقين وكانو فعلا نسخة طبق الاصل ، للراقصات جلسات وناسة ..

- مسيرة [مفيكسية عينيها مع عينيهم ، كتشرح بشفايفها وبيديها باغة توصليهم الفكرة وتخليهم يطبقو شنو كتقول ] :

هانتوما جوج ديال الحوايج لي اتخدموهم ، الفوق والتحت ... الكتاف وصدر يتحركو يمين شمال ، ومرة مرة تهبطوهم وطلعوهم ... غادي تنساو الكراكطير ديال بوشعيب ، دابا بغيت فيفي عبدو لي فيكم تخرج .. التحت بغيتو يبقا بارز وتبازيو عليه .. تحركوه يمين وشمال بغيت الميوعة فهمتوني ... وهنا انجيو لشعر ، فاش تسمعو الموسيقى طلعات فريتم .. ضربو بشعر .

- صفاء : ويلى ضربنا بريوسنا وطارت لينا الپيروكة ؟

- مسيرة :

متخافيش مغاديش طير ، النوعية ديالها كتلصق مزيان ، الله يستر لا تبقى لاصقة ومتبغيش تحيد ..

- سندس [خرجات عينيها ] :

كيفاش لاصقة ؟ اويلي ياكما انبقاو شفاية وضحكة لناس ؟؟

- مسيرة : من نيتك الما السخون قاضي الغراض ... واش صافي واجدات فهمتو شنو قلت ليكم ..

- سكينة : صافي بالي ..

- مشات لجهة فين محطوط الباب ، خدات تيليفونات وفتحات البلوتوث ، مشات لليوتيوب وكتبات إسم الأغنية لي بغات ، [البرتقالة] كان هذا هو العنوان لي كتبات .. دارت للأغنية پوز ..

- شافت فسكينة كتسناها حتى قدات الكاميرا وريݣلاتها ، البيت لي كانو فيه مصبوغ بالغوز داكن ، وخاوي من الفراش كيفما طلبات منو مسيرة دار وخوا ليها البيت كلو من الفراش ، خلا غير واحد الزربية حمرة ... مع خوامي فنفس اللون ..

- مسيرة : صافي ساليتي ؟

- سكينة [ببحة رقيقة] :

أه ساليت بداي .. كانت كلمة من عند سكينة هي الضو الأخضر بنسبة ليها ... رجعات خدمات الموسيقى وتسمع صداها مجهد فالبيت والدار كلها ..

- كل وحدة فيهم بدات كتبان ، وحدة بوحدة كتمايل على انغام الموسيقى .. كتبعها لوخرا من وراها لوخرا من وراها لوخرا ..

- لي شاف الرقص ديالهم يقول بلي هادي هي حرفتهم الحقيقية ولا عندوهم ديجا تجربة فهاد المجال .. ولكن كلام مسيرة والاوامر ديالها هوما لي خدمو معاهم وخلاوهم يتقنو الشطيح بهاد الإتقان ..

- فاللحظة ولا شطيحهم غادي بريتم طبيعي ، بحال الى الجسم ديالهم تبرمج على ديك الموسيقى ، ماحبسوش نهائيا حتى حبسات الأغنية عاد الجسد ديالهم حبس وتسجيل حبس .. الفيديو دابا واجد خاصو غير المونتاج ويتقاد ويولي جاهز باش يتلونصا ويشوفوه الناس ..

- الحوايج لي كان لابس ماشي هوما لي كان لابسهم قبل ، سروال دجين كحل مع بروطكان وقميجة فلون السماوي بارد مخططة ..

- واقف هو وزوج ديال الرجال فالخمسينات من عمرهم .. قدام الكوري ، حاضي بعينيه العنكبوتية البݣر لي كان كياكل ... داير يديه ورا ظهرو كيراقب الخدامة بعينيه ، أي حاجة كدوز قدامو كيسجلها فدماغو ... عينيه مغافلينش ، هاد الشهر لي غايدخل السلعة كلها خاصها تخرج وتوصل لماليها طرية ، حتى حاجة مخاصهاش تزهق ... وعاد السفرية لي عندو لي بقات ليها يوماين خاص يوجد ليها ، ومايمشي حتى يكون كولشي ناضي ..

- الرجل 1 : العلف ديال هاد المرة زين تبارك الله ، وحتى الكسيبة زينة هاد العام ..

- جلال [بصوت رجولي تقيل] :

هاد العام صبات الشتا كثيرة داكشي باش ، رضو البال وياكم تعطيوهم العلف الاخضر ... براكة عليهم غير العلف الناشف .. مابغيناش كروشهم تنفخ ونصدقو طايحين فالمشكيل ..

- العلف المركز والعلف القاصح يتعطا للبݣر ، متخلوطوش ليا شي فشي ..

- الرجل 2 : وايلي أسي جلال واش هادي اول نيبة ، الحمد لله راه سينين وحنا معاك ..

- جلال [بنفس الحدة] :

الهضرة المعاودة كتنفع ... مابغيتش داكشي لي وقع العام لي فات يرجع يتعاود ، الى ماتو ليك غير 3 خاصك باش تعوضهم ... ونهار كتنزل لسوق كتولي تقرق فعينيك ، والبياعة لوخرين كيوليو فايتينك ..

- السمعة لي كتكسبها سينين هادي خاصها تبقى ماتزعزعش ، خاص تخلي ݣاع الناس تسنى الكسيبة ديالك كل عام ، ومنسن دخل لسوق تجيك نيشان ، حيت عارفة راسها غادي المليح ..

- مكايهمنيش شحال ديال الفلوس ربحت ، كيهمني الراس يبقى مرفوع ... والسمعة ديال الواحد هي راس مالو ..

- الرجل 2 : ماݣلتي عيب اسي جلال كلامك هو الكبير ..

جلال [بنفس الصرامة] :

- العلف يتنقى من زبل ، لي مكلفين بيه الى ماݣادينش عليه نجيبو لي يݣد بيه ، منبغيش ندور وراهم ونلݣا فرتيتة وحدة لي ضر بالبهايم ... الما يكون نقي بحال لي كتشربوه انتوما فديوركم ، كيما ترضى على راسك تاكل وتشرب النقاوة ترضاها على البهيمة ... صفي تلݣى ماتشرب ..

- مغانجيش من ورا هاد سينين كاملة ضربوها فزيرو غير هكاك .. ساهل عندي ومخاسر والو نعاود لي خدامين من اللول .. تمشي معايا مݣاد تلݣاني معاك راجل .. ، تبدا تزيݣزاݣي عليا ندير معاك فعايل الشمايت ..

- [ بنفس النبرة وعينيه على الخدامة كيسكانيهم بعينيه ، كيبان ليه كل واحد وكيفاش كيخدم ، كيعرف من عينين الواحد واش خدام من نيتو ، ولا غير كيطنز وداير خدمو فوق الشبعة ، لي ملحاݣ ومحتاج الخدمة ، كيدير فوق جهدو باش يجيب فلوسو حلال ، أما لي جاي ايدوز الوقت كيبان ليه من يديه ..] :

العربي غايدوز للوزين ديال العلف المركب .. هداك غاتعطيوه للبهايم زوج مرات فسيمانة متكتروش [ العلف اول الاعلاف المركبة كيتم تصنيعها فالمعامل ، كتحتوي على الكالسيوم الفسفور والنحاس الزنݣ وبعض الفيتامينات ، لي كتكون مهمة للماشية ] ..

- الرجل 1 : تهنا أسي جلال ..

- جلال [ دور راسو لجهتو ببحة رجولية ] :

الحال بدا كيسخن ، ماتنساش تزيد فالعبار ديال الما ..

- الرجل 1 : درتها ݣبل لا تݣولها اسي جلال ..

- جلال هزهز براسو خلاهم واقفين وتحرك من تم ، النفس لي كانو حابسينها والخلعة وتوتر لي كانو حاسين بين وهو حاضي الشادة والفادة ، عبرو عليها بتنهيدة طويلة منين مشا ...

- خدمتو قرا عليها مزيان سينين وسينين ، مجاش وعرف الكبيرة وصغيرة على العلف وعلى شنو خاص البهايم وشنو مخاصهمش ... العلف كيفليه وكيعرف اشمن نوع خاصو يتعطى فكل فصل ، وشنو العلف لي خاص يقللو منو والعلف لي خاص يكترو منو ..

- عارف شحال الكمية دالما خاص تشرب كل بݣرة ، والأملاح المعدنية لي اتحتاج الماشية ... أما بنسبة للخضرة ، عارف كل حاجة ونوعية التربة لي خاص تغرس فيها ، كيهز التراب بيديه ويشمو ... حاسة الشم القوية لي عندو ولي كيتميز بيها ، هي لي كتخليه يشم ريحة التربة ويعرفها واش صالحة ولالا ..

- متمكن من خدمتو مزيان وكيتقنها ، وهادشي هو لي خلاه كسب سمعة بين رجال الأعمال ، عاد الدكتورة لي خدا فالكيمياء ، ولي خلاها مهنة ومنها كسب فلوس صحيحها منها ، لي خلاتو يبني راسو طوبة طوبة ..

- دار اخر دورة على الخدامة وعلى العيالات ، داز لواحد الشاريج ، غسل يديه وساسهم ، عاد تاجه لطوموبيلتو ، حل الباب وخدا واحد الفوطة من الكرسي اللوراني ، نشف يديه عاد ركب شاد الطريق لدار ..

•• عند مسيرة ••

- الطريق كلها وكريم ساكت .. مدواش معاها نهائيا ، عينيه على الطريق ، ومن الشدة لي كان شاد فالڤولون كان باين بلي معصب وماعجبوش الحال ... فهاد الحالة لي كيكون فيها ، كيكون أحسن حل هو تخليه حتى يتفش عاد تدوي معاه .. وصلهم للڤيلا ، بلاصة الطوموبيل تسناهم حتى نزلو عاد نزل ..

- البنات دخلو للدار ، وهي بقات واقفة معاه .. ، بعينيها البندقية .. كطل عليه ، بصوتها الرقيق الغالبة عليه نبرة البراءة ، وهادي من ضمن الحوايج لي كتخلي الواحد مايتيقش بلي هي لي كانت كتبع الرجال وتجيب خبارتهم .. بالإضافة للملامح وجها الملائكية الجميلة .. مستحيل شي حد يتيق بلي ورا هاد الوجه او ورا هاد الصوت الرقيق لي عندو بحة ونغمة خاصة ، اتكون مخبية شخصية البركاكة او صانعة المحتوى لي كتفضح كل واحد دار علاش ..

- أتبقى مقلق بحال هكا وقالب عليا وجهك ؟

- كريم [دور عينيه رافض يشوف فيها ولا يشوف فعينيها ، عينيها ونظراتهم لي كديرها قدها قد راسها ، وبشوفة منها كتسكتو على اي عتاب ، كتكتم العصاب لي كيبغي يبردو فيها على قلة عقلها وتصرفاتها المتسرعة ] :

نهار ديري عقلك ندويو ..

- مسيرة : واش بنت ليك كنلوح فحوايجي ، ومتزيدش فيه اكريم ..

- كريم [ شاف فيها بعينيه السوداء ، لي مكانش الواحد كيقد يحقق فيهم من كترة كحوليتهم ، رغم صغر الحجم ديالهم كانت فيهم نظرة خاصة ..] :

دابا بنت ليك كنزيد فيه ياك الالة ، ايوا منين كنبان ليك كنزيد فيه ، جري طوالك وأرا ماعندك .. وصلات بيا لهنا [أشر لحلقو]

- من اليوم امسيرة مابقيتش انسايرك فهبالك .. الغلط لي درت طلقت ليك اللعب ، أما كون زيرتك نهار الأول مكناش انوصلو لهاد الماصل كاملين ..

- ماشي غير أنا ، لا انا لا باك لا خواتاتك ... كان خاص نحكموك ونزيروك من نهار الأول ، باش مديريش لي فراسك .. ماشي غير انت لي غالطة حنا كلنا غالطين ، حيت كنا كنشوفوك كتبورضي ومخليينك ديري لي بغيتي ..

- مسيرة [بصوت باح ] :

دابا ندمتي حيت كنتي كتوقف معايا ياك ؟

- كريم [مشدد على مخارج الحروف ، نبرة صوتو العصبية خلعاتها حيت اول مرة تبدر منو ويدوي معاها بحال هكا] :

ندمت ، نكدبو ندمت ، حيت الحبل مكانش خاصو يتطلق ليك ويتزير عليك بين وبين ، كيݣوليك شد تلݣى ماطلق .. وانت تطلق ليك بزاف ، زعمتي وطرتي على حوايج كبر منك ، منين وصلو بيك الماصل تصوري ڤيديو كتشطحي فيه ، باش تشدي ليا الضبع ، شكون انت أمم [كان كيدوي من حركات يديه ومن عينيه لي العصاب عامييهم من عروق عنقو لي برزو ، كيبان بلي وصل لواحد الحالة كبيرة من العصاب] ..

- وشكون انت أشريفة ، مخدمينك البوليس ، ولا عاطيينك الفلوس ، مخبرة انت ... ولا مربية الأجيال باغية تعتقي الناس ، خدمي هدا شوية [ضرب ليها لراسها بصبعو زوج ضربات خلاوها تغنض عينيها حيت ضرها ] ..

- شوفي افضولك فين وصلك ، لهنا [أشر ليها للڤيلا] كون كنتي كتعرفي دخلي سوق جواك وتديها فجهة الضراك ، مكنتيش اتوصلي لهنا ، السعودي كان يجي نهار ويخلص ، باك مزال بالحياة كاينة لي باها مات ومشات على عينها ضبابة ، وهي دابا اي وحدة مات باها بكسيدة ولا خوها ولا ولدها ، تمشي تنتاقم من هداك لي ضربو وتولي السيبة فالبلاد ..

- ݣراندايزر أنت ، وعاي وعاي شوية وراجعي راسك ..

- كلامو خلا شيحاجة متقلة ليها وسط حلقها ومهددة باش تنزل ، وهاد الحاجة هي الدموع عمرو دوا معاها هكا ، بنسبة ليه دوا على مصلاحتها ، ولكن بنسبة ليها هي قصح معاها ..

- العينين العنكبوتية لي كانت مقابلاهم منين نزلو من الطوموبيل ، عينيه عليهم ، كان حاس بشي حاجة واقعة ... أو بالأحرى عارف بلي كريم معصب من مسيرة غير من الطريقة لي كيدوي معاها بيها ، من نبراتو وحركات يديه عارفو كيغوت عليها ... شنو ايكون السبب ، كان حاس وعارف بالي المشية ديالها لعندو بحجة الطبيب غير كذبة من كذوبها لي مالفة كطلقهم ..

- حتى من المشية المفرقة ديال خواتاتها معاها ، عارف ومتأكد بلي غير خطة دايرينها ، ولكن علاش وشنو هو السبب ، هاد السبب لي باين هو لي مخلي كريم معصب لهاد الدرجة منها ..

- دموعها على شوية غاينزلو ، هزات راسها للفوق كتشوف فسما كتحاول ما أمكن باش تبلع ريقها ودموعها ماينزلوش .. حوارهم لي كان مزال مسالاش قاطعو سراج وأمينة لي كانت معاه ..

- كانت كتشوف فيهم بإستغراب .. حيت من الوقفة ديالهم باين بلي كيعرفو بعضياتهم مزيان ..

- سراج [موجه كلامو لكريم ] :

كريم إيمتا جيتي أصاحبي ؟

- كريم [رسم إبتسامة مزيفة على وجهو ، مدرق بيها أعصابو ] :

يلاه دهلنا ، وصلت مسيرة والبنات [شاف جهة أمينة هزهز ليها براسو ] أمينة صاڤا ، إيمتا جيتي ؟

- أمينة [بصوت أنثوي] :

غير لبارح ..

- مسيرة [حدرات راسها ] :

سمحوليا عندي مايدار ..

- كريم [وقفها] : مزال ماكملناش ؟

- مسيرة [بنفي] :.

لا صافي كملنا ، وشكرا على توصيلة ... عطاتهم بظهر ودخلات لدار ..

- قرب منو سراج جارو بعيد على مسامع أمينة [بصوت ثقيل] :

أش درتي ليها ؟

- كريم [دار يديه بزوج على الخص ديالو ، هز يديه دوزها فشعرو بعصبية وتوتر] :

ماشي شيحاجة ، تناقشنا وصافي ..

- سراج [بتأكيد] :

زعمة ؟

- كريم [هزهز ليه براسو ] :

خاصني نرجع .. نتشاوفو من بعد

- سراج : ݣلس أصاحبي تعشى معانا

- كريم : خدام هاد الليلة ، من بعد ونديرو بلان ، سلم عليهم .. خلاه واقف ومشا لطوموبيلتو ، ركب وديمارا من السرعة لي مشا بيها ، كان باين بلي العصاب مزال شاد فيه ..

••• إفران •••

- فڤيلا الإبراهيمي .. نزلات من بيتها كتقلب عليه ، نزلات لصالون لتحت مالقاتوش .. [ بصوت رزين ] :

حليمة حليمة .. [ خرجات واحد البنت فأواسط العشرينات من جهة الكوزينة ] :

نعام الالة ..

- ماريا [ غمضات عينيها ورجعات حلاتهم ] :

ديك لالة مغاتبدليهاش ، ماشتيش عزيزك ..

- حليمة :

جا قبيلات ، ودخل للبيرو الكبير .. شي ساعة ديال المݣانة هكاك ..

- ماريا [هزهزات ليها براسها ، عطاتها بظهر ومشات فتجاه البيرو ، كتمايل بفراشتها الفوشيا وبلغتها ، شعرها جامعاه على شكل سفنجة ..] ... اول حاجة دارت ولي دات عليها سينين هادي ، هي دقات فالباب عاد دخلات ..

- طاحو عينيها لي كان ضايرين بيهم خطوط رقيقة ، خطوط زمنية للسن ديالها عليه ، ݣالس فوق الكرسي ديال باه ، مدور بيه ألبومات ديال الصور ، وعينيه هازهم فالپلازما الكبيرة ..

- الشخص لي كان فشاشة ، هو نفسو غير هداك الشخص مزال شاد فراسو ، مزال التجاعيد ماعرفوش طريق لوجهو ، ولا الشيب عرف طريق لشعرو عكس الشخص لي ݣالس دابا ولي شيب غطا راسو ..

- راكب فوق العود ديالو ، قدامو كان ݣالس طفل نسخة عليه تكون عندو ديك 8 سنوات ، يديه الصغار كانو تحت يدين باه .. وفجهة لوخرا كان عود صغير راكب فوق منو طفل ، فسنوات التسع ... حروفو الكحلين لي خلاتو نسخة من الأم ديالو ..

- وعلى الجنب لاخر واقفة هي والإبتسامة على وجها مقابلة عائلتها الصغيرة ، ملامح الفخر لي كانت كتبان على وجه الأب ، وملامح السعادة كتبان على وجه ولادو ..

- عينيها نتاقلو من الشاشة لوجهو ، كتشوف شخص ضعيف ... لمحات دمعة صغيرة نازلة من جنب عينو شاقة طريقها من وجهو غابت فكول قميجتو ..

- هز التيليكوموند لي كان فيديه ، مزرب اللقطات ، حتى طاحت عينيه على اللقطة لي كانو مجموعين فيها ، باه ولادو ، وبضبط فسبوع بنتو أمينة .. هنا نزلات دمعة أخرى سخونة ، دموع النساء لي ولفنا نشوفوها بزاف ، ولكن دموع الرجال ، مكنتنزل إلا وداك الإنسان فعلا ضعف ، داك الجبل فعلا تهد ..

- واخا المشاكل لي وقعو ليها معاها ، غرورو وكبريائو لي حرموها من ولدو ، مكانتش باغية تشوفو ضعيف ، متقدش تحمل تشوف داك الإنسان ... لي كان سبب فنجاح سيناريو لمسلسل لي نتاجتو ختها هادي سينين ، ولي كان عنوانو [ سيــدها ] العنوان لي تختار للهاد المسلسل ، كان بضبط عليه هو .. حب الأسياد عشق الأسياد ، الإنسان لي كان الكل كيخاف منو ..

- الكل كيدير ليه ألف حساب ، المسلسل لي دار على ودو وتسنى عليه هو ، رفضات انها تشوفو ضعيف .. تحركات من بلاصتها لعندو وضارت ورا الكرسي لي كان ݣالس فيه ، بلاما دوي ... الحاجة الوحيدة لي كانت كديرها فهاد الأوثات ، هي كتكاصي ليه راسو ..

- صباعها الرطبين ، الغلاض شوية لي كانو مصبوغين بلون ترابي ، ماطوالش ... كيديرو حركات دائرية لراسو ، حركات كان محاتجهم ، خلاوه يطلقو العنان لدموعو ..

- دقائق طويلة وهي على داك الحال ، حتى حسات بيديه تحطو على يديها ، ودورها للجهة لي ݣالسة ولات قبالتو ، ݣلسها على جنب البيرو شادة ليها يديها بين يديه كيطبطب عليهم .. تنهد تنهيدة طويلة ونطق بصوت رجولي مطابق لصوت ولدو ، غير هو نبرة صوتو كان غالب عليها الوقار ورزانة :

ولدت بحال الى ما ولدت ، البرج لي بنيتو طوبة بطوبة وعليتو حتى وصل لسحاب ، تهد على راسي وطاح ، فقت ولݣيت راسي بوحدي وسط منو ..

- ماريا [بصوت انثوي رزين] :

انت لي بغيتي اجواد ، انت لي خليتي البرج يريب ، انت لي قصحتي راسك وقصحتي قلبك ..

- جواد [هز فيها عينيه ، كيراقب تعابير وجها وملامحها لي واخا تدوز سينين مكايشبعش من الشوفة فيهم ] :

هلال باغي يخدم مع خوه ، باغي يحول الشركة لي كان واݣف عليها سينين هادي ، ويخدم مع خوه [تبسم] جلال ݣد يلعب مزيان ..

- ماريا [بدهشة سحبات يديها من يديه] :

مافهمتش كيفاش زعمة ؟ شرح ليا !!

•• فولاد السعيد ••

الشمس غابت ، وفبلاصتها هلات الݣمرة بنورها ... وبحال هاد المنظر ، ماينفعش بنادم يبقى ݣالس فدار ، خصوصا البنات ..

- خرجو على برا سامحين فطبلة والكراسة ديالها ، مخرجين بونجات رقاق حسبينيين ، وزربية فالݣرونة والزرق .. مفرشينها هي اللولة ، عاد ستفو عليها دوك البونجات ، دايرين فوقهم اللحوفة ومستفين عليهم المخاد ..

- اخر حاجة دارتها سندس قبل لا تݣلس ، حطات صينية ديال أتاي فوق الطبيلة الصغيرة ، مع زوج طبيسلات واحد فيه التقاوت [ كاوكاو لوز ...] وطبسيل فيه كعيكعات حلوين ، وكاوكاو معسل مفند فزنجلان ..

- صفاء [ كتفتح واحد بيسطاجة باغة تاكلها ] :

بغيت انسولكم البنات ، واش الزواج عندو شي فوائد ولا كلو أضرار بحال كيف كيقولو ؟

- سكينة [جغمات من كاسها ديال اتاي ونطقات بصوت باح غالبة عليه نبرة المرح] :

عندو فوائد مضرة ..

- صفاء : وشكون حسن الزواج عن حب ولا الزواج التقليدي ؟

- سندس : الزواج بلا محاكم هو لي حسن ..

- صفاء [كتزول قشرة من بين سنانها ] :

فكرت مزيان البنات ، انا ماليقش ليا ناخود شي راجل حرش ، يبقى يتحكم فيا ويتأمر ..خاصني شي راجل لي مايهزش فيا العين ويخاف مني ، والاهم يكون كيعرف يطيب ، ويقبل يبقى فدار يقابلها ..

- مسيرة [من بعد سكوت طويل ، كانت كتسمع ليهم وكتنشوى على كاسها حتى كملاتو ، حطاتو قدام سكينة فوق الطبلة ، هزات عينيها فعينين ختها ، وبصوت طانز ] :

هاد النوع حتى هو كيقلب على راجل لي يسترو ، حيت تهدني اخيتي ..

- صفاء :

اجي مسيرة ، عمرك اصاحبتي ماتقفتينا ولا علمتينا كيفاش نتعاملو مع الراجل ، وفاش نكونو فديورنا كيفاش نتعاملو معاه ..

- مسيرة[تقادات فالݣلسة ] :

واش انت ملتك كترتي فالحلبة والݣوزة هاد النهار ولا مال حسك جهلتي ، واش کالو ليك انا هي دكتور عبيد وزوينة هادي البنت هترت ..

- صفاء : غادوينا مالك باغة تلبسيني ..

- مسيرة : كسوة انت نلبس ، استغفر الله العظيم .. كتكوني هانية حتى تيقوليها راسها اش نسات ..

- صفاء [ من بعد سكوت رجعات دوات وبنفس التساؤل] :

اجيو واش دابا زعمة ، ضروري نهار نتزوجو تكون ليلة الدخلة ، الصراحة كنخاف انا غير الى ضربني موس كنتلف ... لحمي عزيز عليا ..

- مسيرة [ شدات فراسها ] :

أخاااايت ، امالك روجوع لله احنينتي ، واش يحسابليك ݣالسة فعيادة دوك صمد .. واش انت لاباس لا ؟!!

- سندس [بنفس التساؤل ديال صفاء ] :

لبنات دابا بلاما ضحكو عليا [ضحكات ] ديوني اعلى قد عقلي راه حتى بعد المرات كيجيوني شي اسئلة مكانلقى ليهم جواب ، دابا غير فرضنا مثلا مشيت عند العدول واش زعمة ضرتري ندي معايا راجل ؟

- مسيرة [ربعات ، داك شوية ديال العقل لي كان عندها ، والمناقشة لي دازت بينها وبين كريم ، بغاو يطيروه ليها خواتاتها ] :

لا ازين ديالي ، دي غير فوطوكوبي ديالو ياك ، وشي صاحبتك تشهد معاك ، واش انتوما جهلتو هاد الليلة، منين كيطيحو عليكم هاد الاسئلة ديال الكلاخ ..

- سكينة [رجعات بظهرها اللور ، ضاربة بيدها على فخضها ميتة بضحك ] :

ناري ياربي ، داخلت عليكم بوجه الله اش هاد الأسئلة ..

- صفاء : عادي لاتزيدوش فيه ، كنقرقبو الناب من حقنا نعرفو وصافي .. وزايدون ماتغوتيش عليا راني مريضة ..

- مسيرة : مريضة فصحتك ولا ففعايلك ولا فعقلك شرحي لينا عفاك اختي باش ماتمرضيناش معاك .. جاتها حق الشهر بدات تبوحط علينا تاني ..

- صفاء : هاني سكت والله لا وليت دويت ..

- مسيرة [ رجعات تكات ] :

الى غير على هاد الحماق لي كتقولي فيه ، غير خليك اختي ساكتة حسن حيت بدا كيحفا ليك القرشال هاد الليلة ..

- رجعات سكينة راسها ورا سندس ، كتراقب بعينيها باب الڤيلا لي تحل ، وطوموبيل الصغيرة فورد لي وقفت ، مانطقاتش حتى شافت شكون نزل :

ماشيش بنت الحاج هاديك ؟

- فلاتوليي ديالو ، غارق فالمجموعة لي يلاه سالاها .. تبسم بإنتصار ، أصابع يديه كانو بحال شي كمان كيعزف انغام كلاسيكية ، ولكن انغامو كانت هي الخواتم لي عاد سلاهم من الپاك لي خداه ، پاك ديال الفراشط والمعالق من الذهب الخالص ..

- جمع يديه عندو مقابل المجموعة ديالو ، بحال شي أستاذ كيراقب فنجاح التلاميذ ديالو ..

- تسمع صوت نزل قطرة ديال الما ، قطرة مكانت غير موسيقى فتيليفونو كتعلن على وصول ميساج لتيليفونو .. جبد تيليفون ديالو من جيب السروال ، فتحو .. كان ميساج فابوات إمايل ديالو ، قراه ومن داكشي لي فيه باين بلي ماعجبوش الحال ..

- السفر لي كان مقرر يسافر من هنا ليوماين ، تقرر باش يسافر غدا .. أعدى حاجة عندو هو يكون ناوي على شيحاجة وتخرج ليه حاجة أخرى ..

- مكايبغيش شي حد يمشيه على قراراتو ، ولكن مكان عندو حتى شي حل اخر من غير يسافر غدا ..

- رجع التيليفون لجيبو ، تمشى بخطوات للقدام سد البواطة ديال الخواتم بكل تمهل .. هزها حطها فالڤيترينة ، ورجع بخطوات للور طافي الضو ساد الباب ، بخطوت بجولية وبتقالة ، خرج لجهة الصالون .. كيبان ليه هارون ويوسف والبقية ..

- جلال [بصوت رجولي ثقيل ] :

شفتك هنا ؟

- هارون [حاط يديه على الفوتوي ] :

دوينا على غدا ، ماشي اليوم مافيها باس نسهرو هاد الليلة ݣبل لا تسيفطنا للكحط ..

- توفيق [كيضحك] :

دار ليك التجنيد الإجباري ..

- جلال [ ݣلس داير رجل على رجل ، مدوز يديه على وجهو ] :

نسيتي راسك أشريف ، وديك الأنسة لي حداك ، مكاين سهير هاد الليلة ..

- أمينة [بإبتسامة وصوت أنثوي ] :

غير خودو راحتكم أخويا ، أصلا كنت انطلع نرتاح شوية ، عندي شي خدمة خاصني نساليها فالپيسي وغادي نعس ..

- جلال [بإستفسار عاݣد غوباشتو مصغر عينيه حتى بؤبؤ عينيه مابقاش بان بتخبيلة ديال شفارو ] :

أتنعسي بلا عشا ؟

- أمينة : كليت قبيلات حاجة خفيفة ، أنا قليل فين كنتعشى [وقفات] تصبحو على خير ..

- تصبحي على خير [إيجابة كانت من الكل ]

- هارون [ من ورا ماطلعات ] ودابا مابقا ماعندك ماتݣول ..

- جلال [هزهز براسو دماغو خدام فجهة أخرى ] ..

•• عند مسيرة ••

- إبتسام [ كضحك ] :

والله يالبنات الى الجماعة معاكم زينة ، حتى نسيتوني ݣاع علاياش جيت ..

- سندس : حتى انت دغية كدخلي الخاطر ، مرحبا طلقي ماعندك ..

- إبتسام [ بجدية ] :

المهم ، انا بغيت ندوي معاكم انتوما الأول بعدا ، ونخليكم تكلفو ، المهم باش منطولش عليكم ، انا جايا لهنا باش نقوليكم بلي غدا إن شاء الله ورا صلاة العصر انجي انا وبا وخواتاتي عندكم .

- مسيرة [ بتساؤل] :

مرحبا بيكم ، ولكن سمحيليا شنو سباب هاد المجية ، حيت زعمة اول مرة نعرفوكم هو نهار السبوع ..

- إبتسام [ ضحكات ] :

انا عارفة هادشي ، المهم سباب المجية ديالنا إن شاء الله هو جايين طالبين راغبين فخالتي معزوزة لبا ..

- سكينة شافت فالبنات ، وبدورهم شافو فيها ، من عينيهم وملامحم كتبان عليهم الصدمة ، الصدنة لي ترجموها للضحك ، مامتيقينش شنو كيسمعو ..

- صفاء : واش كدوي بصح ، اويلي مي معزوزة !!

- سندس : ختي إبتسام واش من نيتك كدوي ؟

- إبتسام : والله اختي حتى كندوي بصح ، ومن نيتي ، با نهار شافها فسبوع عجباتو وبغاها ... خواتاتي كلهم مزوجين ، وانا ايجي نهار يسهل عليا الله ، مابغيناش با يبقى بوحدو .. شحال وحنا بغيناه يتزوج ولكن مابغاش ، حتى نهار شاف خالتي معزوزة وبغاها .. واش جاتكم عجب ؟

- مسيرة [بجدية وصوت مهدن] :

لا ماشي هكاك ، الزواج ماعندوش سن ولكن راه مي مغاتبغيش انا نقوليك ..

- إبتسام : انتوما غير سولوها بعدا وتافهمو معاها ، الى بغات مرحبا مابغات هانية ... حنا الحمد لله انديروها معرفة دايمة بلا ݣاع الزواج ... من غير الى كان عندكم شي مشكيل على ود جمال ..

- مسيرة [قاطعتها] :

لالا ، هداك مكنعتابروهش ݣاع واش كاين .. حما الحمد لله امن داك نهار عرفناكم أش كتسواو .. المهم هانتي عطيني نمرتك ، نهضرو مع مي وهاد الليلة تلقاي الجواب ..

- إبتسام [جمعات الوقفة ] :

ماقلتي عيب ، انا مغانعس حتى نسمع جوابك ، يلاه انا مشيت البنات تصبحو على خير ..

- ناضت معاها مسيرة حتى لطوموبيلتها ، ركبات ومشات ... تمات مسيرة راجعة عندها ، يد حطاها على كرشها ، ملامح وجها خاسرة ..

- سندس : وشوفليك ياختي ، مي جاوها الخطاب ، كيتكم بالكواوي يلاه شدو هههه

- سكينة [ ميتة بضحك ] :

ناري ياختي راه مايمكنش وحق الله ، لا زعمة مي معزوزة جابت وعرفات اش جابت ..

- مسيرة [ ݣلسات فوق الكرسي ] :

الى اتبقاو ݣالسين هو هداك ، ادخلو متقولو ليها والو ..

- سندس : علاش أنت مداخلاش ..

- مسيرة : لا بلاتي شوية ، كنحس بمصارني منفوخين ..

- صفاء :

قلتها ليك ، قلت ليك كليتي الحرشة فصباح ، واكلة الحوت لغدا ، وخاتماها بسيكوك وانت عندك المصران ويلاه شدي ..

- مسيرة : الى مادازنيش الحال انتشمى شوية باش يتهضم ليا هادشي ..

- سندس :

والله مامتيقة بلي مي جاوها الخطاب .. وشوفليك ههه

- كملو جماعتهم والموضوع ديالهم هو خطوبة معزوزة ..

••• فالڤيلا لداخل •••

- حاطين طباسل فيهم كاوكاو لوز ݣرݣاع ، ݣاع القطعة حاطينها ...

- سراج [بصوت معسل رجولي باح ] :

اش هاد النوع جايب لينا هاد الليلة أصاحبي ، ناوي تسيفطنا ريفولي ..

- هارون [رجع راسو لور ضاحك ] :

النݣعة ، كادو على قبلي ... مجانيش نشربو بوحدي وانتوما لا ..

- كانت محطوطة قرعة طويلة فزرق ، حداها قرعة عريضة بالواطة ديالها فنقري ..

- جلال [عينيها بداو يتعسلو ] :

بلا عشا اولد الهم ، باغي تخرج سمك ..

- هارون [غمز يوسف ضاحك ] :

وخويا الشراب دبال هنا مكايدي منك لا حق لا باطل ، كلنا نشوفو القاصح ديال لهيه أش ايدير فيك ..

- جلال [هز كاسو شحطو ] :

يغلبنا ، شربنا قصح منو ..

- يوسف [كيضحك] :

هاحنا أنشوفو .. كل كاس كيشربوه كيضحكو عليه ، الموسيقى خدامة وهوما منغمين معاها .. هضرة كتجبد ختها وضحكات رجولية كتسمع ..

- لي كيشرب بالمهل ولي سكح النص ، ولي خدا كثر كثر من اللازم ..

- تيليفونو كان كيصوني ... وقف مال زوج ميلات وخرج على برا باش يدوي على خاطرو ..

- ضار ورا الڤيلا الضو خفيف ، زائد الضو ديال الݣمرة عاطي طابع وجو زوين شاعري ..

- سالة الإتصال ديالو ، هز راسو كايحس بصهدة ، الجسم ديالو كان محتاج شي تدويشة ، كتبان ليه كدور على لابيسين ، بحال شي وحدة عاطيها أستاذ الرياضة عقوبة 10 دورات على الملعب ... شعرها ضاربة فيه الݣمرة ..

- رجليه تحركو نيشان لجيهتها ، الويسكي لي جاب هارون كان مأثر عليه ، هو القرعة الوحيدة لي خدا منها 4 ديال الكيسان ، 4 كانو كافيين يدوخوه بالقصوحية ديالو ..

••• عند مسيرة •••

كدور على لابيسين ، علا وعسى يدوزها الحال وكرشها التفش ، من كثرت الدورة ليكدور حادرة راسها مشايفاش قدامها نهائيا خرجات فيه ضاربه ، حركة منها وبسكرة لي كانت شادة فيه ، ختل التوازن ديالو برجلو لي زلقات مخلية يدو تشد فيدها جارها معاه ، حتى تلاحو بزوج فالما ..

- طلعات براسها شاهقة على برودية الما .. شهقة اخرى خرجات منها على إثر الهزة لي هزها .. حركة خلاتها بين يديها صدرها على صدرو .. هزات عينيها فعينيه عينين معسلين ، رموش فازݣين لا هي لا هو كانو عسارة على لوحة فنية للفنان مشهور ..

- مسيرة [شفايفها كيترعدو] : واش مكتشوفش ؟

- جلال [بحال الى ماسمعهاش ، عينيه كانو على بلاصة وحدة هو شفايفها ، ولا السكرة هي لي خلاتو يشوف بلاصة وحدة فيها ، نطق بصوت رجولي باح غالبة عليه نبرة السكرة ] :

حاضي قطرة ديال الما طاحت من رموش عينيها شاقة طريقها فوق خدها قبل لا تغيب نزل ، بشفايفو على خدها صارط القطرة لي كانت غاتغيب فوق عنقها ، خاتمها بعضة خفيفة لخدها حتى تكمشات بين يديه ، بعد و عينيه العنكبوتية على عينيها البندقية ، نزل بنظراتو لشفايفها وتبسم بشر ناطق بصوتو الرجولي الباح :

- شفايفك كيعطيوني اللذة لي كنتنغم وكنتغدى بيها الواشمة ..

- حطات يديها على صدرو القاصح ... دافعاه مبعداه منها ، دفعة لي واخا كان شارب ماحركاتوش ، خلاها واقف قدامها بحال الجبل ..

- مسيرة [حيدات يديها من فوق صدرو ، مرجعة بيهم شعرها لور ] :

إلى كان كيسحابليك انا مونيكة عندك دير بيها مابغيتي ، غير راجع راسك ... ولا كان كيحسبليك انا بحال لعبة الشطرنج تحركها وقتما بغيتي راك غالط .. الى نسيتي نفكرك ، أنا حرة بنت مرة حرة ، ماتخلقتش باش راجل بحالك يحركني كيفما بغا ..

- غمض عينيه ورجع حلهم متفحصها إنش بإنش ، برزات إبتسامة على شفايفو ، إبتسامة مغلفة بالإستهزاء والسخرية .. [بصوتو الثقيل ] :

منين انت حرة ، دوي وانت كتشوفي فيا ، كتݣلبيش عينيك الواشمة .. متخليش هذا [حط صبعو على العرق لي فعنقها ] كيضرب بجهد ... كيشهيني كيجنني ، كيخليني نزيد ..

- مسيرة [صدرها كان كيطلع وينزل بإنفعال ] :

انت مريض وخاصك داوة ، خاصك تشوف شي طبيب نفساني لي يداويك ..

- جلال [ببرود رهيب ، برود كيخليك تحس بالخوف] :

بحال والو .. نݣد نشوف هادشي لي ݣلتي من بعد ، ويݣد تكوني انت هي دوايا الواشمة ..

- مسيرة [حاولات تبعد عليه ولكن يديه لي كان بيها ظهرها ] :

بعد مني الله يرحم باك عاد دوي ، واش انا فحبس واش انت هبيل ؟

- جلال [بنفس البرودة ونفس النبرة الهادئة ] :

الجهد كيضيع على الصح ، اما هادشي غير خوا لخاوي ..

- من خلال الهضرة معاها شحال من مرة ، عرفات بلي كلامو كيعني بيه شيحاجة ماسخة .. ، عقدات حوايجبها وغمضات عينيها ماعجبهاش الحال ، ومحاملاش هاد الموقف لي هي فيه ..

- ملامحها وتصرفاتها ، وتعابير عينيها وحجبانها كيفاش عقداتهم ، عرفت شنو كيظور فراسها وعقلها فين مشا ..

- كل واحد عندو تفكير محدود ، وكل واحد كيفهم على ݣد عقلو ..

- مسيرة : هضرتك باينة ..

- جلال [بصوت تقيل وبارد ] :

انت شوفي هاد نص عقل لي عندك شنو ݣاليك .. هاد الفرفارة لي ساكنة ليك فيه ، كون تخدميها فلي ينفعك حسن ..

- مسيرة [ جمعات يديها على شكل قبضة ، حاطاهم بزوج على درعانو كتحاول تملص منو ] :

دابا اش بغيتي مافهمتش انا ، طلق مني واش غالبة عليك السكرة ولا شنو واش انت مريض ..

- قرب منزل راسو لمستوى راسها ، هابط بشفايفو لعند عنقها ... قربو ليها وترها مابقاتش مركزة ... عينيها كيضورو مسنية منو حركة بسيطة يديرها .. عينيها كيترقبوه شنو غايدير بحال شي ضحية كتسنى فالمفترس ديالها إيمتا ينقض عليها ..

- جلال : ݣلتيها جوج ديال المرات ، واش واش بدلي ..

- مسيرة [بتهديد] :

أقسم لك يمينا ، حتى نغوت لربي لي خلقني ، ونجمع عليك امة لا إله إلا الله وغانوريك شوهة ، انا راه هانية عندي ماعندي سوق ..

- جلال [تبسم بشر ] :

ديريها ، غوتي ... نغوت بلاصتك الى بغيتي .. [كونماشي هارون لي خرج كيعيط بسميتو ، كان باغي يغوت ويديرها ليها على قد فمها ] عندك الزهر الواشمة .. زهرك كيهرس الحجر .. بعد عليها ، غادي لجهة الدروج ، طلع كلو فازݣ حوايجو كلهم لصقو عليه ..

- تلاقى مع هارون جاي لجهة الپيسين .. طلعو ونزلو جاتو الضحكة ، قبل ماينطق بكلمة وحدة ، جاتو ضربة لوجهو طيحاتو ..

- جلال [عينيه معسلين ، نزل بشوية لمستواه هاز صبعو بتحدير ] :

هادي باش عمر ماك الخاسر يوصل لعندي .. تݣاد فالوقفة ودخل للدار مخليه شاد حنكو مݣداش ينوض ..

‏- طافيين الضواو ديال البيوت ، من غير الضو ديال المراح لي شاعل ، كلهم ݣالسين مجموعين ... حتى من مسيرة لي دخلات بسلة وبدلات حوايجها كانت ݣالسة ، شي كيشوف فشي وسقيل ... غير العينين لي كيدورو على بعضياتهم ..

- أدريس [بإنفعال] :

تخربيق وخرجان العقل هذا ، وشوفليك الراجل شارف الهارف باغي يتزوج ... ماݣلتها حتى انا ..

- سعاد [دورات راسها لعندو ] :

كتقولها بوجهك حمر ، مزيان بعدا منين عرفتي راسك ... وعلاش مالو كيف جاك الراجل بفلوسو بدارو بكولشي ليه ، مافيها باس الى باغي يكمل دينو ..

- عباس [بصوت مبحوح ] :

يكمل دينو مابانت ليه غير مي أنا .. يمشي يشوف فين يلعب بعيد ، زوينة هادي راه غير مابغينش الصداع ، اما والله حتى نحرك ليه .. نوريه الزواج بشحال كيطلع ، بقات ليه امي فالحساب ..

- البنات كانو ساكتين عينيهم على معزوزة لي كتسمع وساكتة .. مترقبينها شنو غاتقول ، منين ݣالو ليهم البلان ديال الزواج وهي ساكتة .. تنهدات تنهيدة طويلة وهزات عينيها المكحلين ، تحت حواجبها المغوبشين ونطقات بصوتها الباح الوقور الثقييل :

واوليدي ياكما جا يخطب فيك اتا ، شتك اوليدي ساير دوي فبلاصتي ، ياكما كفنتيني ودرتيني فقبر .. ولا شتيني زيزونة مكندويش .. ولا بان ليك فمي محني ، اممم شتك اوليدي وليتي تهندز أبوحدك وتݣول شنو خاص يكون وشنو مخاص يكون .. [شافت فأدريس] وتا شكون بعدا تا لي تدوي ..

- شفتك أوليدي ساير تبورض علينا منين خدمتي وعريتي على كتافك ، ومنين فيك اوليدي هاد النفس كاملها سير تزوج ، دير بحالو وخطب وتزوج ... وتا الشيب طلا ليك نواضرك .. وتعلمو دخلو سوق راسكم شوية راني مزالة فالحياة ، نݣول شنو خاص يكون ولي مخاص يكون ..

- عباس [حاط يديه بزوج على عكازو] :

ومي ماسمعتيش اش ݣال ، باغيك لزواج امي راه شوهة هادي ..

- معزوزة :

وعلاش الشوهة ، الزواج عيب ولا حرام ... مالي كيجيتك اوليدي شرفت ولا هرفت ... مزال الحمد لله بصحيحتي وحسن منك ..

- عباس [الصدمة باينة على ملامح وجهو ] :

من نيتك امي ، ياك كتݣولي عمر شي حد يجي ورا با ولا نسيتي ؟

- معزوزة :

لا يا وليدي مانسيتش ، عمر شي حد يكون بحال باك ، وباك راه مات ، نبقى انا وحدانية ... انت دخل مع مرتك للبيت تݣلسو حوت حوت ، بناتك ايجي نهار يتزوجو .. نبقى انا وحدانية ، ربي جاب ليا ميموني وزهري .. حاج بݣدو وقامتو وبدارو وبطوموبيلتو ، يمشي ايدوز ليا على ركيباتي ويركب ليا الفم ، ونمشي نحج فبيت الله ..

- عباس [ مزال ملامح الصدمة باينة على وجهو ] :

دابا بغيتي تݣولي امي بلي باغة تزوجي بهاد الحاج ؟

- معزوزة : ايه باغية [ شافت فمسيرة ] سيفطي ابنتي للبنت ݣولي ليها مرحبا بيهم يجيو غدا ، انا موافقة ..

- مسيرة [ بإبتسامة] :

هي لي متعاودش أمي [ هزات تيليفونها وسيفطات ميساج لإبتسام علماتها بقرار جداها ] ..

- ناضت صفاء وسندس ، ضارو بمعزوزة كل وحدة عنقاتها من جهة [ بفرح ومحبة] :

مبروك عليك أمي ، الله يكمل عليك بالخير ..

- معزوزة : أمين ابنياتي ، العݣوبة ليكم إن شاء الله ..

- سكينة [ وقفات باست ليها راسها ويديها] :

مبروك عليك امي معزوزة ..

- سعاد : مبروك عليك أخالتي الله يكمل عليك بالخير ..

- عباس [ وقف ماعجبوش الحال ] :

انا خارج يضربني شوية البرد ..

- معزوزة [ بتهديد وصرامة ] :

سمع اداك سراقيزو ، ياوالله اوليدي وعليا بليمين ، وراك عارفني اش كنسوى ... ويجي راجل غدا وتغوبش فيه ، والله ياوليدي حتى ندفنك وندير عليك التردة وانا فين ݣلتها لك ..

- حدر راسو ومجاوبهاش .. خرج وتبعو أدريس حتى هو ..

- مسيرة [ وقفات وحلات فمها ضرباتها ب 3 ديال تزغريتات بردات حر حلقها فيهم ] :

الله يكمل عليك بالخير امي .. [ عنقاتها] ..

- معزوزة : امين ابنيتي الله يفرحكم كاملات .. إن شاء الله اتكمل هاد تزويجة نبرع بنياتي ..

- سندس : اويلي امي مالك داخلة على طمع ..

- معزوزة : وراني انكون مزوجة وبراجلي ونبرعكم معايا ، على انا شحال عندي منكم ..

- صفاء : وعلى هاد الكلام ها واحد التزغريتة فاعلة تاركة [ طلقاتها صفاء بتزغريتة عالية ، تسمعات فدار وبرات دار واصلة حتى للڤيلا ..] .

‏"قد يدفعك شخص واحد أن تُحبّ مدينة، ثم حيّ، ثم شارع، ثم أصحاب الدكاكين الموجودة فيه، ثم الجيران، ثم بيته، ثم والديه، ثم لونه، ثم قهوته، ثم المشي لمسافات طويلة، ثم التفاصيل الصغيرة، شخصٌ واحد فقط قادرٌ على جعلك حيّ بكل ما تملكه كلمة حيّ من حياةٍ مخزونة ."

- كانت فالكوزينة ، حاطة زوج كيكات ، فاقت الصباح بكري وجداتهم وحطاتهم على جنب ، دارت الدقيق الفورص والفينو فالقصرية ، وبدات كتعجن الملوي .. سمعات الحس ديال نجية .. كتدوي مع شي حد ، هزات عينيها للسرج المحلول لي كان قبالتها ، وكيطل نيشان على الجردة ..

- كيبان ليها جلال ، لابس تيشورت فالبيض ، مع سروال دجين وصباط .. جار الباليزة ديالو ونجية راحعة للڤيلا .. كانت قالت ليها بلي غايسافر ، ولكن مكانش كيحسابليها ايسافر اليوم ..

- بقات حاضياه حتى طلع فطوموبيلتو ومشا .. كملات على داكشي لي بداتو ، عجنات الملوي وخلاتو يرتاح ..

- البنات كانو فالمراح كيجمعوه ويقادوه ، كل وحدة وباش تكلفات ، اما سعاد كانت كتوجد فالغدا ..

- دقات عليهم عفاف فالباب ، حلات ليها مسيرة ودخلات فيديها طبسيل عامر برزيزة ..

- عفاف [ بصوت مهدن ورقيق] :

مبروك الله يكمل بالخير ، لبارح بليل كنت صايبت هاد الرزيزة ، وشوفي سبحان الله مكتابة ليكم .. فاش ݣالت ليا خالتي نجية على خالتي معزوزة ، ݣلت نجيبها ليكم ..

- سعاد : الله يعطيك الصحة ابنتي دخلي ݣلسي ..

- عفاف [بإبتسامة] :

لا أخالتي ، غير سمحيليا والله العظيم خاصني نعاون خالتي ، مع اليوم سافر سي جلال ... وخاص لي يعاونها ضروري ..

- سعاد : وعداكم متجيوش فالعشية ..

- عفاف : لا تهناي غانجيو .. عطاتها الطبسيل ورجعات للڤيلا ..

- داز نص نهار الاول غير فتوجاد واخا داكشي بسيط ولكن كولشي كان على حقو وطريقو ، كان قرب العصر يأدن .. خرجات معزوزة من بيتها لابسة قفطان لي كانت لبسات فالختانة ، مع شال فيه الهدوب ... كحلات عينيها ، كان السر نازل عليها ..

- مسيرة [ كضحك] :

هاي هاي على معيزيزتي ، جيتي فنة ياختي ..

- معزوزة [ توردو حناكها بحال شي مراهقة ] :

إيوا شنو ، جداك راه زينة واخا كبرنا مزال حروف الزين نابتين فينا .. [ هزات راسها كتقلب بعينيها] فين هو داك الملهوط ديال باك ..

- خرج كيعكز بعكازو من البيت ، لابس سروال ديال الثوب .. وتريكو كول ڤي مع قميجة من التحت ، ماشط شعرو ومحسن مخلي غير الموسطاج .. :

خاصك اتنݣري الواليدة الله يهديك ... هاهو الملهوط أش بغيتيه ؟

- معزوزة : وبلاما نوصيك ، دوي مزيان مع الناس وضحك ، وعداك تغوبش راه لي فراسك فراسي بلاما نݣلولك ..

- عباس [ تنهد ] :

اودي منين بغيتيه الله يكمل بالخير ، ماݣلنا والو اميمتي ..

- معزوزة : وهكاك .. حطو فوق الطبلة العصير والحلوة ، مسيرة لي لبسات كسوة بيضة وشعرها جمعاتو على شكل سفنجة ، مخلية خصلات من الݣصة مطلوقين ، اما صفاء لبسات اونصومبل سروال وقميجتو وطلقات شعرها ، على عكس سكينة لي لبسات كيطنة سروال وقبيتو ..

- جات نجية هي وعفاف ، ولثاني مرة مجاوش بيديهم خاويين جابو معاهم بوشيار مدهون بالعسل وزبدة .. سخوون كيحرق .. شداتو مسيرة وحطات طبسيل فالفران سدات عليه باش يبقا بسخونيتو ..

- أذن العصر ، وصلاوه جميع من غير صفاء لي كانت عليها حرمان الصلاة هي وسكينة ..

- من ورا أذان العصر بنص ساعة ، تسمع صوت طوموبيلات داخلين للڤيلا .. فهاد الوقت بضبط معزوزة تزاد معاها الزايد ، بحال الى اول مرة غاتزوج ، بحال شي بنت لأول مرة يجيو فيها الخطاب ..

- نزل الحاج بالكوستيم ديالو ، داير نظارات ديال الشوف وهاز مشموم ديال الورد ، اما رجال بنتو كانو هازين زوج طيافر ، وبناتو لارخين حتى هوما زوج طيافر .. اما إبتسام ، كانت هازة طارطة فيديها ..

- سبقاتهم إبتسام هي الاولى دقات ، فتحات ليها مسيرة رحبات بيها ... بداو واحد تابع الثاني كيدخلو ، وزوج كلمات لي طاغيين مرحبا بيكم مرحبا بيكم ..

- الحاج : سلام عليكم سمحو لينا على هاد الدخلة ..

- عباس [ سلم عليه سلام رجولي ] :

مرحبا بيك أسيد الحاج ، ماعرفنا دابا نݣولو ليك الحاج ولا نݣوليك با [ شافت فيه معزوزة بعينين كون كانو كيطلقو الرصاص كون وا قت//لوه .. ، تبسم وضحك ] اكنبسط معاك الحاج انا هوكا داير فروجي ..

- الحاج : الله ياودي مرحبا ، كولنا فروجيين اسي عباس .. حط مشموم الورد ومايمشي احدا معزوزة وݣلس ، الحشمة طارت مبانت ليه البلاصة لي ݣالسة فيها ݣلس فيها ..

- مسيرة [ واقفة وغالباها الضحكة حتى وقفات عليها إبتسام ] :

ربي اختي اجي معايا على برا ، وصيت واحد دري يجيب ليا السخرة ، ݣالت ليه ايلقاني حدا الباب ..

- مسيرة : اويلي انت غير خليك انا انتسناه حشومة أصاحبتي ..

- إبتسام : لهلا يخطيك أنعدبك معايا .. خلاتها مسيرة وخرجات برات الفيلا واقفة كدور راسها يمسن وشمال على مايبان ليها الدري .. [صوت رجولي ضعيف نطق من ليسر ديالها ] ..

- زيانيتي الهولندية ..

••• عند كريم •••

- فالبيرو ديالو ، ݣالس على الكرسي ديالو على ملامح وجهو نظرات الإهتمام ... عينيه الصغار الكحلين بحال ظلمة الليل مفيكسيهم على الشخص لي ݣالس قبالتو .. من خلال نظراتهم لبعضياتهم .. كيبان ليك بلي بيناتهم حديث شيق ، ومهم بزاف ..

- الستيلو لي كان يطقطق بين يدين كريم ، وشبح الإبتسامة الخبيثة لي كانت على جنب شفايفو ، كتعكس الشخصية ديالو لي كيعرف الغير .. شخصية أخرى لا علاقة ليها بشخصيتو الحقيقية ..

- الشخص [بصوت متردد ] :

ماعرفتش واش نزطم معاك فهادشي ونتيق فيك ، ولا غانجبد على راسي النحل ..

- كريم [رجع بظهرو لور ، حط عينيه على الستيلو بلامبالاة ورجع شاف فالشخص لي قدامو ] :

حتى حد ماحط ليك السيف على عنقك ، انت تعرف [سكت من بعد مدة ورجع دوى ] الى كنتي بغيتي داك الكلينيك يولي ديالك ، راك عارف اش خصك دير .. عارف بلي نݣد نديرها ..

- الشخص : كي غادير ليها .. ؟

- كريم [بصوت رجولي قوي ، بقدرة تأثيرية كبيرة ] :

بجوجنا عارفين بلي رضوان الى مشا حتى دخل لحبس ، اول واحد ايكون عندو الحق بداك الكلينيك هو أنت .. واخا انت شريكو غير بنسبة قليلة ولكن هادشي اضربو على حسابي ، البوليس راه خاصهم انقشة وحدة ويشدوه .. من نهار مات خوه وهوما حاطين العين عليه ..

- الشخص [دوز يديه على لحيتو وعلى شعرو ، تنهد تنهيدة طويلة ] :

ماعرفتش ، المهم خلي ليا شوية ديال الوقت واخا ؟

- كريم [برم شفايفو] :

أنت تعرف .. هاد زوج كلمات كانو كافيلين ينهيو المحادثة لي كانت بيناتهم ، ناض من الكرسي ديالو رجل كتديه ورجل كتجيبو .. خرج من البيرو ديالو .. ساد الباب وراه ، الباب لي رجع تدق وتحل وهاد المرة كان شاب ف أواخر العشرينات ..

- هز فيه راسو ، مصغر عينيه عافل عليه ومعاقلش عليه ، ملامحو مخافيينش عليه ولكن ماعقلش فين ..

- كريم [ بتساؤل] :

وي

- من ملامح وجهو كان كيبان بلي مناعسش ايام هادي ، بالارهاق لي باين على وجهو ، وتحت عينيه الزرݣين .. متسناهش يعطيه الإذن باش يݣلس ... جر الكرسي وݣلس عليه ، حاط واحد الضوسي فوق المكتب قدامو وݣلس ... من تصرفاتو كان باين بلي متوتر .. من رجليه ليكايترعدو ، والعضات الخفاف لي كيعضعض على شفايفو .. ويدو لي حاطها على خدو ..

- كريم [مصغر عينيه كيحاول يتفكر فين شافو ] :

انت مزيان ، حاس بشيحاجة ؟

- هز فيه عينيه ونطق بصوت طاغية عليه نبرة الإنكسار :

أنا مؤيد ولد رضوان ..

- الشك لي كان عند كريم تحول ليقين .. وهنا تأكد فين شافو ..

- مؤيد [مكمل كلامو ] :

ماعنديش الوقت بزاف ، طيارتي من هنا لساعة ونص ... بلاما نݣوليك بلي عارفك مصدوم حيت انا هنا وداك التخربيق الخاوي حيت ماعنديش معاه ، انا كنجي لبنادم نيشان ، وهادشي لي جايبني يݣد يصدمك .. ولكن مكايهمنيش حيت فهاد الساعة لي كايهمني هو راسي .

- كريم [بصوت رجولي ممزوج بالبرودة ] :

دوي ، خرج ماعندك ..

- كنتي كتقلب باش تبرأ باك من داكشي لي وقع ، اتلݣاه هنا [ضرب على داك الضوسي] هنا كاين كيفاش تبرأ باك ، وهما كاين ݣاع الݣيح لي كان كيخدم عليه رضوان لي هو با ، بهاد الضوسي تݣد تسيفطو ريفولي للعباق .. ونزيدك بلان خور ، فهاد السيمانة بضبط ونهار الاحد ، اتخرج السلعة من وجدة ، وحتى هنا اتلݣا كولشي على هاد البلان .. وحتى شكون مشارك فيه ، ضوسي متختخ تݣد تعطيه للبوليس ، ووجهك باك يبياض ويرجع كيف كان ..

- كريم [عݣد غوباشتو ، شابك يديه فوق البيرو ، بتساؤل ] :

وعلاش هادشي ؟ ديه نيت انت للبوليس شنو كدير ؟

- مؤيد [مدوز يدو فشعرو بتوتر ] :

علاش مكاين لاش تعرف ، شيحاجة خاصة بحياتي ، لي خاصك تعرف المينوط لي كان داير ليا على عنݣي ، حفر مزيان وضرني ، خاصني نتهنا منو ، أما على البوليس منݣدش نغامر براسي ونمشي عندهم برجلي ..[وقف] لي بغيت منك هو مدكرش لا سميتي ، لا سميت خويا منصور ..

- كريم : وعلاش ، حتى خوك راه مع باك فݣاع الويل لكحل لي كيدير .. بلاما نجبد الكسيدة لي ريݣلها للجلال الإبراهيمي ..

- مؤيد :

با هو داك الذيب لي كيݣود ولادو ، هو لي كيزرع فيهم السم .. وكيطلقهم فالغابة ، لي كايجي ݣدامهم كينهشوه .. فهمتي ، با لي خاصو يتحاسب على كل كبيرة وصغيرة وقعات .. با لي فرق زوج ديال الولاد على مهم ، ودݣ ليهم السم .. داكشي باش ݣلت ليك خلي خويا منصور بعيد ، ولا بناقص من هاد الويل كامل ..[هز الضوسي باغي يخرج حتى وقفو كريم ] ..

- كلمة الرجال ، لا انت لا خوك ماعندي سوق فيكم ، حسابي مع باك ... وݣلتها ليه نهار اللول ، كلت ليه يبعد من ساحت با وساحتي ، يݣد يشوف العذاب الكحل مني ..

- مؤيد [لاح ليه الضوسي ] :

بينك معاه خرجت هاد السوق .. رما ليه هاد الهضرة وخرج ..

- هز كريم الضوسي فتحو ، ورقة ورا ورقة صورة ورا صورة ، وإبتسامتو كتزيد توساع ، باش يغبر لرضوان الشقف ويندمو على النهار فاش تزاد هاهو بين يديه .. [هز التيليفون دوز النمرة من بعد دقائق ، جاه الصوت من الجهة لوخرا ] ..

- كريم : سي عمر ..

يتبع...