روبي ڤيريدجو الجزء الرابع

- قلبها تزير عليها ، حسات بإحساس خايب .. يدها مشات لا إراديا لسلسلة لي فعنقها زيرات عليها .. يديها كانو باردين ولكن دابا عرقانين ، أما نبضات قلبها الى قربتي منها تسمعهم .. كانت غافلة عليه فاش خرج من الباب ، ماوعات على راسها حتى تخطا جوج ديال الناس داخلين ، تخطات الناس لي حداها غادية فتجاهو ، كيبان ليها قطع الشانطي مشا لجهة طوموبيلتو ، حلها يلاه طلع دار السوارت باش يديماري ، بحال الى تفكر شي حاجة .. رجع نزل ومشا للباب لي حداه حلو طلع ... فلحظة هزات راسها كيبان ليها زاج الطوموبيل لي شافت تحل ، وضو حمر بحال الليزر منيش لجهتو ، مافكراتش مرة ولا زوج ... جرات بݣاع الجهد لي عطاها الله .. كانت كتصرف بلا عقل ، طلعات بجرا للبلاصتو .. خابطة الباب ، هز راسو مصدوم ماعرف باش تبلا .. مدواتوش دورات السوارات ديمارات وهي تكسيري .. الباب لي كان حداه كان محلول ، مافهم والو طاحت عليه بحال الرعدة ، بنت لابسة تجاكيط وهازة سكادو ، شعرها كيبان بحال شي كتلة ديال العافية .. مافهم والو ..

- خرجات راسها من السرجم كيبانو ليها تابعينهم .. دورات راسها عندو مغوبشة ومعصبة كتدوي بلا عقل ..

- ياك قلت ليك متجيش ؟ سيفط ليك ميساجات قلت ليك راه باغيين يقت**لوك ، رتاحيتي دابا هاهوما تابعينا ... قفرناها مشينا فيها ..

- مجاوبهاش ، كيحرك عظمة الفك ديالو ، دور راسو كتبان ليه فورد كحلة تابعاهم من اللور مكسيرية .. رجع شاف فطريق وشافيها وفسوݣانها .. كان كيبان فيها محتارفة وعارفة شنو كدير ..

- خرجات راسها من السرجم ، جات عينيها نيشان فعينين واحد الشخص مخرج نصو من السرجم ، من شوفاتو باين معصب ومغزف ... خرجات يديها وقلزات ليه [كتغوت بحر جهدها] :

وا والله لا شديتوني ، اتشدو البعابع اولاد الكلاب .. هاما تسواو هاما تسواو [عطاتهم الصبع الاول وزادتهم الثاني ] ، دخلات راسها وبدات كتغبن ، دورات راسها كتشوف فيه .. مكانوش ملامحو باينين ليها ماعرفاتو مصدوم ماعرفاتو مالو ، خسرات سيفتها وبدات ضرب فالڤولون وتولول :

أنا اش داني اخويا ، ياك سيفط ليك ميساجات وقلت ليك رد البال راسك ، ولكن انت زهواني جاي للموت بيديك ورجليك ... انا اش دخلني اعباد الله ، انا كنت هانية سخنزعليا راسي ، اخويا صدقنا فالقرطاس ، انا كنت كنتبع أرجال نجيب خباراتهم صافي ، انا اش لاحني للقرطاس أش لاحني ليه .. قالو ليا خواتاتي قالو ليا مسيرة كتقلبي على البلا [كتجر فحناكها وتندب ] ...

- تجرات من يدها بالخف ، كان هو بلاصتها وهي ݣالسة فوق من رجليه ... خرجات عينيها بصدمة ، وجها كان وسط عنقو ، من سوݣان لي دار حسات بروحها غادي تزهق وهادي هي الأخرة ديالها .. مانطقاتش بكلمة وحدة حدها مخشية فيه وساكتة ، حسات براسها مشات وجات وطوموبيل ضارت ، لا يمكن تقلبات ولا كرشها لي تقلبات ، طوموبيلتو وقفات .. بالخف بعدات عليه عينيها جاو فعينيه ..

- مسيرة : أ ... [ قاطعها بصوت رجولي زعزعها من الداخل ]

- ݣطعي الحس ..

سألوني من هي الأنثى فقلت هي من تقول أنا لا أبيع كرامتي حتى إن طوى التراب أنوثتي فأنوثتي ملك كرامتي وكرامتي تزيد بريق أنوثتي .

- قلبها تهز من بلاصتو ... دقاتو تسارعو على إثر صوتو ، مكانتش متيقة ودنيها وصوت لي كتسمع ، كان نسخة طبق الأصل ديالو ، نفس البحة نفس الخشونة نفس التقالة ..

- مسيرة [ بلاما تحس نطقات] :

Woorim ko ..

- جر ليها راسها ساد ليها فمها خاشيها تحت التحت ، نطق من تحت سنانو مخرج عينيه فيها :

- غادي تزمي درݣومك .. منسمعش حسك ..

- هز براسو كيطل بعينيه ، مبان ليه حتى واحد .. الزنقة لي دخلو ليها كانت مظلمة ، ماعرفوش جلال منين داز ... بقا ساد ليها على فمها حتى تأكد بلي مشاو ... زول يديه وشعل الضو فطوموبيل ، عاد وضاحت ملامحها .. كيشوف فيها بشك ... وهي كتبادلو نفس النظرات ..

- [ ببرود وصوت كيخلع] :

شكون أنت ؟

- مسيرة [ مامتيقاش ودنيها ، مزال ماستوعباتش .. صوتو بنسبة ليها تحفة ] :

عاود دوي ..

- جلال [ تقاد فالݣلسة مجاوبهاش محرك راسو يمين وشمال ، دور الساروت وديمارا عافط عفطة وحدة ]

- مسيرة [ بشك كتشوف فطريق] :

فين غادي بيا ؟

- جلال [ بلاما يشوف فيها ] :

لخلا دار عشتك ..

** فالفيرما **

- كانو ݣالسين قصارين مع بعضياتهم ..

- كريم [كيدوز يدو على جبهتو] :

شحال الساعة دابا ؟

- سراج :

مزال الحال أصاحبي ، مزال ماوصلاتش 12 ..

- كريم :

- واش انت مزال ماشبعتيش ، عينيك حوالو أصاحبي ..

- هلال [ كيدوز على لحيتو ] :

هدا بغانا نهزوه خنونة ... براكة عليك عيقتي لا ؟

- سراج [ أشر لقلبو ] :

العافية شاعلة هنا ... مابغاتش طفا ..

- كريم [ كيضحك] :

انا كيبان ليا نوض قبل مايبدا يتنخصص هنا .. فنفس الوقت تسمعو صوت روايض حبسو عندو عند الباب ..

- سراج [رجع راسو لور] :

ولد العم باين ليا جاي روايض مايضوروش ، روايض تلݣاهم شعلات فيهم العافية ..

- هلال [كيطنز] :

تريكة وحدة ..

*** على برا ***

- نزل من طوموبيلتو ، عاقد غوباشتو ... مجا فين يوصل عندها حتى كانت نزلات :

- أشريف بودربالة ، فين جاي بيا ... درنا خير صدق لينا بومزوي ..

- وقف قدامها كيسكانيها من ساسها لراسها ... كون كانت العافية كتخرج بلاصة النفس كون حرقاتها ، على غفلة منها شدها من عنقها خابطها مع طوموبيل [ من تحت سنانو ناطق بصوت رجولي باح قاصح ] :

دوي ، شكون أنت ؟

- مسيرة [كضربو ليدو وتغوت ] :

طلق مني اويلي على راجل ، وطلق اويلي واش هبلتي [كتغوت] وعتقو روووح باغي يقت**لني ... وعتقونيييي ، واكواك الحق ، وكواك امولاي جيلالي عتقوني ..

- الداخل كانو كيتسناوه يدخل حتى سمعو الغوت ، هلال غوبش كيحاول يسمع منين جاي الصوت ..

- كريم [بشك] : صوت شي وحدة كتغوت ..

- سراج : هاديك أسكرة ..

- هلال [غوبش] :

لا صوت الغوات .. وقف مرجع الكرسي للور ، بخطوات سريعة نزل مع دروج ... حل الباب تابعو كريم وسراج تابعهم بخطوات غير تابتة ..

- هلال [شاف خوه شانق على شي وحدة ، بزربة مشا عندو ] :

جلال اش واقع ، أش كدير طلق أصاحبي طلق [كيحاول يبعدو عليها .. مع طلقها شدات على عنقها كتكح ..

- هلال [كيشوف فيها وفخوه] :

أش كتخور اصاحبي ؟

- كريم [ مع شافها تشوكا ، مصدوم ماعرف باش تبلا .. وقف عليها جارها من دراعها ] :

أش كديري أنت هنا ؟

- ݣالسين مجموعين على براد ديال أتاي وكيتفرجو ..

- عباس [ كيشوف فبناتو لي وحدة كتشوف فالثانية ، عجينة يديه وتربيتو عارفهم أش كيسواو وعارفهم الى كانو مخبيين شيحاجة كتبان عليهم ] :

تيليفون ختكم طافي ، واش ناوية تبات فكازا ولا شنو ؟

- سندس [ شاف فيه متصنعة الإبتسامة] :

بابا من نيتك ، راه هادشي فيه تمارة .. يلاه يتقداو السلعة ويستفوها فالكراطن ، راه متكون هنا حتى تكون انت واا نعستي ..

- عباس [عينيه دخلو وسط عينيها قاريها] :

انوض نيت نرتاح ، اجي ابنتي مسدي ليا هاد رجل ضراتني ..

- سعاد :

نسخن ليك الما ونجي نمسدها ليك انا ..

- عباس [شاف فيها] :

لا انت غير ݣلسي كملي فيلمك .. بنتي لي غادي تمسدها ليا ، ناض كيعكز بعكازو دخل لبيتو ، سندس قربات من صفاء وسكينة :

- با عاق صافي قفرتها .. غير سمعاتو عيط وهي تجمعها بوقفة .. داخلة عندو كتسلت ..

- بلات أبابا نقاد ليك المخاد ورا ظهرك .. كتقاد ليه فالمخاد وهو مقابلها قاشعها ودابا زاد تأكد ، بلي مكاينة لا سلعة لا باكور هندي ، شيحاجة كبر من هادشي مخبيينها عليه ..

- عباس [بأمر] :

ݣلسي ..

- سندس [شداتها الرعدة] :

بلاتي نجيب بومادا باش ندلك ليك ..

- عباس [كيخنزر فيها ، نغزها بعكازو] :

ݣلت ليك ݣلسي .. بلعات ريقها وݣلسات بشوية مقابلة معاه ..

- عباس [كيسكاني تعابير وجها] :

فين مشات ختك [يلاه اتدوي وقاطعها] ديك القصة ديال مشات لكازا حتى تزوجي وتولدي ، وعاوديها لولادك قبل النعاس ، أنا ماشي مومو صغير كيرضع صبعو .. يا غادي تݣولي ليا فين مشات ختك ... ولا مغاديش يعجبك الحال أبنتي أسندس ، راه غادي نعرف غادي نعرف ، نعيط أعلى ختك عاشورا اتسرسب ليا كولشي ونعرف كيندير ليها ..

- سندس [عارفة باها وفعايلو ، يݣول لختها راه سندس عاودات ليا واخا معاودات ليه والو ، وتبدا تسرسب ليه وهي كتخاف منو] :

هانتا ابابا شوف ، انا نعاود ليك كولشي .. غير ماتخلع متدهش وقول الله أعلم ..

- عباس [كيحرك راسو مغمض عينيه] :

اااممممم الله أعلم زيدي ..

- سندس [كتلعب بصباعها] :

دابا مسيرة ..[ عاودات ليه كولشي من الأول للأخر ]

- عباس [تزاد معاه الزايد ، هو اه كيأيد بنتو فأي حاجة ولكن باش توصل للقت**يلة ، هنا وحبس مايقدش يتخايل بنتو تتحط فهاد الموقف هدا وتمس منها شعرة وحدة ، تعصب ] :

واش هادي ضاربها الخلا وجلا ولا مال طواسل ملتها الكلب .. وانتوما فين كتو فين ؟

- سندس :

انا وصفاء كنا فالمحال .. كنستفو شي سلعة كان خاصها تستف .. سكينة لي كانت معاها ، انت عارف مسيرة الى بغات دير الحاجة راه ماتشدهاش ..

- عباس [بأمر] :

رجعي سوني للكريم ..

- سندس [ وقفات] :

واخا بلات نجيب تيليفوني ..

- هزات راسها فيه ... تصدمات مكانتش متوقعة بلي غادي يكون هنا ..

- كريم [من تحت سنانو] :

راني دويت أش كديري لملتك هنا ؟ واش انا مخليك فجديدة فداركم ، تحت المانطة ودابا نلقاك هنا ؟؟

- مسيرة [ عقدات غوباشتها] :

مكنتش تحت المانطة ، وزايدون واش لي خلاه هو تكملو انت واش ماشتيهش خانقني ..

- جلال [كيخنزر فيها] :

واش كتعرفها ؟

- كريم [شاف فيها] :

أعز المعرفة ..

- هلال [ببرودة وهدوء] :

حيدو من هنا بعدا ، دخلو لداخل ..

- مسيرة [بنفي] :

لالا اخويا ، انا انرجع لدارنا جينا نديرو خير رجع لينا بومزوي ، جينا انقولو ليه يرد البال لراسو راه بغاو يق[خنزر فيها تخنزيرة الموت ، ولكن مكانتش قادة تحبس كلامها من غير الحروف لي تقالو ففمها] ي ق ت ل وه ..

- هلال [شاف فيها وفخوه ، عݣدهم] :

كيفاش ؟ اش كتخوري ؟

- جلال [شاف فخوه] :

من بعد ، [مشا نيشان لجهتها جرها بجهد من دراعها مدخلها لداخل ..

- مسيرة [ كتفركل فيديه] :

وا طلق اوا طلق ، واش هادو يدين ولا بالة ديال عمي تهامي أقوليا ...

- كريم تبعو جرها من يدها لوخرا مرجعها وراه ، ببرودة مخرج عينيه فجلال :

جلال ، خلي عليك البنت ..

- جلال [كيخنزر فيه ، كيحاول ما امكن يأضابطي راسو ، يدو مشات نيشان لجيبو ضاغط على كرة البلياردو بݣاع جهدو] كريم ، دخل سوق جواك .. مني ليها بلاما دخل ..

- كريم [متحركش] :

البنت مسؤولة عليا ، مغاديش نخليها تبرد فيها سمك ..

- هلال [فاصل بيناتهم] :

كريم ، خلينا ندويو بالعقل ، نعرفو بعدا شنو كاين .. جلال اجي معايا .. جر خوه داه لجهة الطبلة .. اما مسيرة لي كانت كتفرك فدراعها هزات راسها فكريم ، لقاتو كيخنزر فيها كثر من جلال ... حرك ليها حجبانو لجهة الكرسي ، بلاما تزيد معاه الهضرة مشات وݣلسات ... جر كريم الكرسي ݣلس ، كيلعب برجليه .. ماحيلتو لجلال ماحيلتو لهاد الخطية لي تبلا بيها ، كدير غير لي ݣاليها راسها ... ݣلس سراج حدا كريم كيطلعها وينزلها ، قرب من كريم ونطق بهمس :

شكون هادي ؟

- كريم [من تحت سنانو] :

من بعد .. قاطعهم جلال لي جر الكرسي ، وݣلس ... هز راسو فيها كيسكانيها مخنزر ..

- هلال [موجه كلامو لمسيرة] :

سمحيليا على لي وقع ، دابا بغيت نعرف شنو طاري بضبط ؟

- مسيرة : شوف اخويا انا والله العظيم جيت اباش نعاونو ..

- كريم [ضار خنر فيها] :

واش وليتي سوبروومن ولا شنو بضبط ، اش دخلك واش باغية تحمقيني ولا مال طواسل مك ..

- مسيرة [ شافت فيه ] :

ماتبقاش تغوت عليا ، السيد باغيين يقت**لوه نبقى انا واقفة كنتفرج ، واش انت هبيل؟

- جلال [ كيضغط على فكو بعصبية ] :

باش عرفتي انت هادشي ، جوج ديال المرات وانت كتسيفطي ميساجات ، باش عرفتيها ؟

- مسيرة شافت فكريم .. لي جاوبها بإبتسامة عصبية :

جاوبيه ، باش عرفتيها ؟

- جلال [موجه كلامو لكريم ] :

منين كتعرفها انت ؟

- كريم [ببرود وصوت قوي ] :

تقدر تݣول عشرة سينين ، شيحاجة كتر من صاحبي ..

- جلال [ حول عينيه من كريم ليها ] :

دوي ..

- مسيرة :

الى مدويتيش انت غادي نقد ندوي .. دابا شوف انا وأعود بالله من قولت انا ، كنقرا الصحافة [كريم دور عينيه لجهتها مصدوم ماعرف باش تبلا ] واحد المرة كنا مجموعين انا وزملاء ديالي ، واحد دري معانا جبد اسم هاد منصور ، وقالينا بلي بزناز خطير ، وبصدفة الشهر لي فات كان مات عمو ، ودارو ݣنازة ... لقيتها حجة وزيارة قلت والله حتى نمشي ، ودرت راسي جايا مع الطيابات ... صافي هي هاديك ، انا هادشي درتو ابلعانيات باش ندخل ونشوف هاداك العالم لي عايشين فيه كيف داير ، بصدفة هزيت طبيسيل فيه الكبدة وخرجت ناكلو ..

- جلال [صدرو كيطلع وكينزل تعصب كيحاول يكالمي راسو ابزز من تحت سنانو ..] :

استغفر الله العظيم ، لا حول ولا قوة إلا بالله ..

- مسيرة [سمعاتو] :

مالك شفتيني كندير النفحة ولا كنكيل ، راه هادشي لي كنعاود ليك هو لي كاين وربي شاهد عليا انتوما ماتبغيوش لي يدير الخير معاكم ..

- هلال [ ضاغط على سنانو] :

كملي .. [سراج شاد الضحكة غير بزز] كملي الاخت كنسمعوك ..

- مسيرة :

شي شريبة ديال الما عفاكم شحفت ..

- هلال [كب ليها كاس دالما مدو ليها ، نزلات عليه دقة وحدة ، ورجعات شافت فيهم ببراءة] :

خرج واحد عندو الشعر وعينيه خضرين ، زين الصراحة تقال متختار من الرجالة غير هو ..

- جلال [قرب من ودن خوه] :

انوض نقت**لها ..

- هلال [شد فيدو كيحاول يكالميه ] :

كملي ..

- مسيرة [ كاتحس براسها بحال الى كتعرض فالامتحانات ، كتلبق فالكذوب اباش هاد الليلة تسالي ، لأول مرة فحياتها كنتدم على شيحاجة دارتها ] :

سمعتو بالحرف كيقول لواحد فتيليفون ، راه سيفط ليك ليزانفوغماسيو كاملين ، جلال الدين الإبراهيمي ، تصويرتو راه وصلاتك ، ايكون فكلوپ مايسترو اوغيونتال ..

- ايوا بديت كنقلب عليك ، ومنين لقيت نمرتك سيفط ليك ميساجات ومديتيهاش فيا ، ومع حنا با مربينا احسن تربية ، الحمد لله وشكر لله ياربي ، راه با مربي أجيال ..

- سراج [بتساؤل] :

باك استاذ ؟

- جلال خنزر فيه وقلب وجهو ..

- مسيرة :

اه با تبارك الله راه أستاذ فالجامعة ... كان كيقري علم النفس ، غير انا خرجت ليه من الجنب .. بغيت نقول ختاريت الصحافة .. صافي شديت التران من جديدة لهنا ، وجيت باش نعلمك والباقي راه شفتيه ، وانت قاجني وانا مدرت ليك والو بالعكس عتقتك ..

- جلال [ طلعها ونزلها ، وقف ونطق بصوت رجولي قاصح ] :

شحال فعمرك ؟

- مسيرة [بدون تفكير] :

28 ..

- حرك راسو بالإيجاب ، خلاهم وطلع ..

- كريم [كيحس براسو الى زاد شوية غادي ينفاجر بكدوبها ، تصدم منين جابت هادشي كامل ، هي لي كانت كتدوي بالعقل ، ومتخرج الكلمة حتى توزنها ، مافيهاش كترت الهضرة ، حتى الى جاوباتك بخو كلامك مكتفوتش جوج كلمات ، ودابا ماسكتاتش ، وهادشي ناتج عن الضغط لي تعرضات ليه ، والحصلة لي حصلات خلاها تلبق كل كدبة من جهة ، حتى الخوف لي تعرضات ليه نتيجة القرطاس .. خلاها مامتازناش ..

- كريم [جرها وقفات] :

زيدي ݣدامي ، [شاف فلخرين ] نتلاقاو من بعد ..

- سراج من بعدما مشاو شاف فجلال :

فهمتي شيحاجة ؟

- هلال [حرك رايو او وقف] :

أنفهم دابا ..

____________________

- مخرج يدو من السرجم ديالو الطوموبيل ، كيدخلها غير الى بغا ينطر نطرة من الݣارو لي شاد ..

- مسيرة [عارفة راسها قفراتها معاه] :

انا مكانت فنيتي حتى حاجة خايبة ، داكشي لي قاليا ضميري ديريه درتو ..

- كريم [ضرب يدو مع الڤولون ] :

ماعندكش هذا [أشر لراسو] واش عارفة معامن كتعاملي ولالا ، منصور ... عندو يق** تلك بحال شريب الما ، بزناز واش عارفة شنو هي بزناز ، لا يحسابك دوك لي كيكونو فراس الدرب ... هو مهموش جلال ، لي معروف ولد من وهو شكون ... بقا غير أنت ، لا يحسبليك كدوبك لي كدبتيه لداخل ايتيقو جلال ، راه انا لي كنعرفو .. هدا عندو [ أشر لراسو] ديما خدام ... راه انت مزال مكتعرفيهش اش كيسوى ..

- مسيرة [كتخمم فكلامو ] :

انا لي قالو ليا راسي درتو ، يعيق بلي كنكدب عليه ولا مايعيقش مكايهمنيش ، مالي غانتزوج بيه ، عمرو مزال مغادي يشوف كمارتي ، درت لي عليا وسالينا ... نرجع لخدمتي ولي عليا ..

- كريم [ بلهجة امر] :

هاد الساعة خطي عليك المغاربة ، بينما تنسات القضية ديال هاد الليلة ، شوفي ليك شي واحد عايش على برا ... عمري بيه هاد السيمانة ، وديك الساع الى بغيتي تكملي على مابديتي بداي ، تكوني بعدا جمعتي شي بركة ... ويكون منصور نسى هاد الليلة وبلي ضربتي ليه لي كان باغيه فزيرو ..

- مسيرة [ قلبات وجها] :

واخا .. إن شاء الله [قالبة وجها]

- موسيقى الراي خدامة ، وبضبط اغنية الشاب خالد [aicha] ، كيدور فالكرسي ديالو ... واحد البرود على وجهو كيبان ليك مامسوقش ، واخا الخطة ديالو فشلات ل 3 مرة ... واحد فبلاصتو أيكون معصب ، ولكن هو لا كيلعب بجوج حجرات ديال الزاج ضايرين بين يديه ، وكيسمع لشنو كيݣول القرع ، كيف مسميه هو ..

- عينينا كانو على الباب ، كنا كنتسناوه أيحل بابا طوموبيلتو ويبعد على الناس ، ولكن ماعرفناهاش منين خرجات بحال زواق ..

- هز فيه عينيه ، بلاما ينطق سولو غير بحجبانو ..

- ماعرفناهاش شكون هي ، ولكن كانت حتى هي خارجة من جهة البار ، 100 فالمية اتكون صاحبتو .. ولا شي وحدة ضبر عليها ..

- وقف داير يديه فجيابو مصغر عينيه كيفكر :

جلال مكايصيدش فالحفاري ، إلى مكان مديها معاه من الأول ..

- ديك الركبة لي ركبات وساݣت بيه ، باينة مالفة على طوموبيلتو ... داك النوع ديال الطوموبيلات مكايسوݣو أشي واحد واعر فسوݣان ..

- منصور [حك حاجبو وشاف فيه] :

شافتكم ؟

- لا منظنش تكون شافتنا ، اهو من الكاركاس ديالها ... جاني فشكل كيفاش واحد بحالو يكون معاها ..

- منصور :

هذاك خارج لعائلة الإبراهيمي من جنب ، توقع منو أي حاجة .. [سكت] بغيتك تعرف ليا شكون هاد خيتي ..

- ولكن حنا شفنا غير وجها ، باش انعرفو شكون هي ؟

- منصور [شاف فيه بشوفات يتمنى ينعس وينساهم ] :

ݣلتي شيحاجة ؟

- لا كون هاني ، غادي ندير لي ݣلتي ليا عليه .. غير هو باش غادي ينفعك تعرف شكون هي ؟

- منصور [تبسم إبتسامة إستهزاء ] :

العين لي كتجيب الذهب تسدات ، نجربو العوينة لي كتخرج الجوهر ..

______________________

- هلال [ معصب] :

إيمتا كنتي ناوي تݣولها لينا ، حتى يسيفطوك لينا مكفن .. ولد عمك وصاحبك فخبارهم وخوك لي من لحمك ودمك اخر من يعلم ..

- جلال [ شاف فيه ببرود ، قرب حداه مقابل معاه عينيه فعينيه .. اصلا هو معصب الى زاد دقيقة غير ايسمعو شيحاجة متعجبوش ، من تحت سنانو ] :

يلاه بنت ليك ، فين كنتي هاديك 18 عام ، أممم فين كنتي ، لا أنت لا باك فين كنتو ؟ [ غمزو] نهار لي كنت نعرݣ من الفوق ومن تحت ، فين كنتو .. يلاه بان ليك خوك عاد طفات عليك الشمعة ... خليني نبدل ساعة بخرى ابا هلال ، بلاما نخرج شيحاجة لي ندمو عليها بجوج .. [ ضرب فيه وخرج ] ..

- هلال تبعو بالعين صدرو كيطلع وكيهبط ... عارف مزيان بلي ݣاع لي ݣالو خوه بصح ... مكانش معاه فأخيب أيام حياتو ، مايجيش دابا ويلومو حيت خبا عليه ، كل واحد فيهم عندو أسرار معالم بيها حتى واحد .. [دوز يدو فشعرو] تنهد تنهيدة طويلة ، ومشا بالو مع باه ... باه لي كان هو السبب حتى تفرقو هوما بزوج ، وها نتيجة الغلط ديالو ، خوه حياتو مهددة ... بلا علم حتى واحد ، ݣلس داير راسو بين يديه كيفكر شنو خاصو يدير ... وكيفاش يتصرف ، من الواجب ديالو كخوه الكبير يتصرف ، واخا فات الفوت ولكن ماشي عيب الواحد يحاول ..

*** على برا ***

- حل باب طموبيلتو فين نسا تيليفونو ، شعل الضو خدا تيليفون ، كتبان ليه كارطة طايحة ... هزها لقاها كارط ناسيونال فيها تصويرتها

- الإسم الشخصي : مسيرة

- الإسم العائلي فريدي

- سد الباب ، قرا جميع المعلومات لي على لاكارط ، خدا تيليفونو ودور لهارون ..[كيتسناه يجاوبو وكيدور لاكارط فيدو ] ..

- هارون : أش تما ؟

- جلال [عاݣد غوباشتو ، بصوت تقيل] :

هارون ، انسيفط واحد السمية ، بغيتك تعرف لي الشادة والفادة عليها ، غدا فصباح نلݣاهم عندي ..

- فوق سطح واقف معاها الراس فراس ، كيضرب بعكازو على الأرض معصب .. شاف فيها بنص عين :

كون وقعات ليك شيحاجة فين غادي نكونو ، يلاه مافكرتيش فيها هادي .. سمعي اشريفة راه ماشي غير طالق ليك الحبل ديري لي بغيتي ، فراني شوية ..

- مسيرة [ كطرطق فصباعها] :

بابا انت لي دقيتي فينا الشوكة ، متجيش دابا وتقكع علينا شيحاجة تزرعات فينا من الصغر ، انت من بكري علمتيني وقلتي لينا بالحرف الى شفتو المنكر متسكتوش عليه كيفما بغا يكون نوعو ..

- عباس :

إيه ݣلتها ، ولكن باش توصل للقرطاس لا ... حنا ناس ابنتي أعلى ݣد الحال ، مݣادين على صداع كبر منا ..

- مسيرة [شافت فيه بنص عين] :

أبا يهديك الله ، والقناة على ماشي ريسك .. نسيتيها ، راه حتى هي كنلعبو مع ما كبر منا ... غير هي مضرقين من ورا الشمس وصافي .. بحال بحال ، وزايدون انا مافكرتش لي شفتو صحيح درتو ، وعارفة ومتأكدة بلي ربي مغاديش يحاشمني ... حيت اي كيجري فالخير عمري ربي يخيبو ، كنشوف السيد حياتو كانت غادة لتهلكة عتقتو سالينا القصة ابا اخوي راسك ..

- عباس [ بقى ساكت من بعد مدة ] :

شكون هدا بعدا انا ماعرفتوش ؟

- مسيرة [ بدات كتعاود ليه عليه بتفصيل ] :

واحد الفيلا أبا ، يجري فيها الخيل ... يسكنو فيها 4 ديال العائلة ويشط الخير ..

- عباس [ بأمر] :

نقصي هاد الأيام من الخروج ودروج ، راه حتى كتݣولي تفكيتي وتلݣاي راسك طايحة فشي حفرة ، انا علمتك ... نزلو نعسو مك دابا تفيق ، وهي خاصها أسبة باش تشك ..

- مسيرة [باست ليه راسو ] :

واخا أبا تصبح على خير ..

- نزلات للدار لتحت بشوية ، جداها كانت ناعسة سعاد ... دخلات للبيت كتسلت ، مع سدات الباب شعل الضو ، ضارت مخلوعة لقاتهم كيتسناوها ب 3 ..

- سندس [كتخنزر فيها] :

وجهك هداك ولا مسلفاه ماحشمتي ماتسحييتي ..

- سكينة [بعصبية] :

واش باغية تجهلينا وضربي لينا ݣاع لي درناه فزيرو ، واش انت صاڤا پا ؟

- مسيرة [ حيدات تجاكيط ديالها وتلاحت عاى نموسيتها ] :

هالعار براكة عليا ، هاد الليلة اصلا مزفتة ، بلاما تكملو على لي بداه با وكريم ..

- سكينة :

شنو وقع عاودي لينا ؟

- مسيرة [تنهدات تنهيدة طويلة وعاودات ليهم كولشي ] :

فخباركم وبيني وبينكم ، أول مرة ندم على شيحاجة درتها فحياتي ، الرعب لي عشتو اليوم عمري عشتو ..

- صفاء [مامتيقاش ودنيها] :

ناري اختي باز ليك ، تخايلي كون تيراو فيك الله يحفظ [ عينيها دمعو وعنقاتها]

- مسيرة [خاشياها فحضنها] :

متخافيش الكبيدة ديالي ، مالك مسطية لي مكتابة هي لي اتكون ..

- سكينة [بعتاب] :

ريسكيتي أصاحبتي ، واش فخبارك ساهل يجبدوك ، راه شافو وجهك دابا ... ايبان ليهم ڤيديو من فيديوات القناة الثانية يجبدوك..

- مسيرة [شافت فيها ] :

انا القناة الثانية عمري بنت فيها ، هزيت الايف لي تحط حطيتو فيها ، ومرة مرة كنزل فيه دوك فضائح الفنانين ..

- سندس :

وراه كنتي ناوية تباني فيها ، قلتي بغيتي تعاودي فيه قصص ومشاكل الناس الواقعية ، بحال سمير الليل ..

- مسيرة :

دابا مابقيتش أنبان فيها ، غادي نأجل هادشي حتى لمن بعد ، ودابا عفاكم سدو هاد الموضوع خليونا نعسو ..

- سندس : اجي كيفاش تلاقيتي بكريم ؟

- مسيرة [جاتها الضحكة من الصدمة لي تصدم فاش بدات كتكدب] :.

ههههه ناوي ، المهم .. عاودات ليهم كولشي كيفاش تلاقاتو ، كانو مزال باغيين يسولو ولكن قررو يخليوها تنعس ترتاح ، حتى لغدا عاد يكملو معاها المداولة ..

- ݣالس مقابل مع الݣمرة ... كيخمم فهادشي لي وقع هاد الليلة ... هاز فيدو كرة البيلياردو ، كيضعط عليها وعقلو مشا للمدابزة لي دازت بينو وبين خوه .. عقلو رجع بيه اللور ، هز القرعة لي كانت قدامو نزل علي لي بقى فيها دقة وحدة ...

- حس بيه منين ݣلس حداه .. مادواهش ، ولكن كان خاصو ضروري يهضر معاه ويوضحو بزاف ديال الحوايج ..

- هلال [ ببرودة] :

مكان عندي مندير فداكشي لي وقع شحال هادي ، انت عارف الواليد كيف داير .. يگد كون جاني فهاد الوقت رأيي مغايكونش بحال قبل ... ولكن انت عارف مزيان كي كنت .. مكنبغيش الصداع وتبرزيط ، ولي بغاها كتكون ... لدرجة تبعت داكشي لي كان باغي هو ، غير باش ناخود رضاتو ... وشحال من مرة بغيت ندوي معاك ولكن انت كنتي شاد عليك الباب ..

- جلال [ظهر شبح إبتسامة على جنب شفايفو] :..

أنا هي ديك الضلعة العوجة لي خرجات من عائلة الإبراهيمي ، يحسبليك بقا فيا الحال ... كونما تمرمدت ديال بصح ، مانوصلش لهادشي لي انا فيه ..

- هلال [ تنهد تنهيدة طويلة] :

سعداتك ، نكدب عليك .. بعد المرات كنحسدك .. انت بعدا هزيتي الراس وبعدتي ، ودرتي لي ݣاليك راسك ديرو ... لقيتي بعدا جدي بجنبك ..

- جلال [كيشوف فنقطة وحدة قدامو ] :

جدي هو لي رباني ، هو لي كبرني وهو لي سيفطني لسويسرا قريت فيها ، وهو وصى عليا الناس تم ... دوزت 18 عام من حياتي فالغربة ، غير جيت او وصلت لهادشي ... ولكن لمخيرة هي هادشي كامل درتو بهدا [ضرب على كتفو] ، موس الأخر ماشي بفلوس الواليد .. داكشي باش انا مرتاح وكندير لي ݣالو ليا طانطو ديال راسي وماعند حتى واحد الحق يتدخل ..

- هلال [تنهد] :

مابغيتكش تحقد على الواليد ، واخا هكاك راه نادم على لي دار ..

- جلال [ضحك بإستهزاء] :

وراه خاصو يندم ، خاصو يندم حيت حرم ام من ولدها 18 عام ، كدوي معاه أفتيليفون ... تفكيرو الخاوي شتت شملنا كاملين ، نهار خرجت من دار امينة كانت عندها 5 سنين ... خليتها صغيرة ، أما انت كانو مسيفطينك للفرنسا تقرا تم ... باش تكون نسخة مصغرة من جواد الإبراهيمي ... شكون لي كان معايا جدي ، أما الواليدة مسكينة لي فيها كافيها ..

- هلال :

المهم ݣاع لي كان لين عينيك راه وصلتي ليه ..

- جلال [شاف فيه] :

وصلت ليه ، ولكن العائلة فين هيا من هادشي ، حتى من خويا ماحضرت لا لعرسو لا لقرحو ..

- هلال [ضرب على ظهرو] :

والى ݣلت ليك خوك محتاجك فهاد الوقت ..

- جلال [شاف فيه ، كيضغط على لحم حنكو بسنانو ، تنفس بهدوء ونطق بصوت رجولي باح ] :

دم جوفي نعطيه ليك ..

- هلال [تبسم وعنقو مطبطب على ظهرو ] :

ماعندك ماتسال هاد ختنا ، عمري شفت شي وحدة بحالها جبهة ..

- جلال [غوبش] :

حريرتها بوحدها هاديك ، من نيتك تقيتيها ..

- هلال :

واش أتݣولك ، داكشي لي ݣالت جاني فشكل ولكن ماعرفتش ..

- جلال :

عندها 28 عام ويلاه كتقرا على الصحافة ، من نيتك أصاحبي ..

- هلال [بجدية] :.

وشنو ناوي دير ، جلال هاد خونا راه ناوي على خزيت ... واش سهلتيها اصاحبي وانت مامسوقش ݣاع ، عرفتي شنو دير هاد البلان خليه عليا ..

- جلال [كيشوف فخوه ] :.

علاياش ناوي ؟

- هلال [هاز حاجب ومنزل الثاني ] :

انت اتفرج أمعلم غانعجبك ..

- جلال [كيشوف فيه مامتيقش بلي هدا خوه لي مهدأ ، وماعندو مع صداع مع مشاكل ] :

كدوي من نيتك ؟

- هلال [غمزو ] :

غاتفرج مزيان ..

أنا أستطيع فعل كل شيء طالما أنا أُريد ، عندما أُخبرك أنني لا أستطيع ، اعلم جيدًا أن لا رغبة لي تمامًا ..

- الصباح فالفيرما كيكون غير على المدينة ، اليوم الأحد الخدمة مكتكونش ، ولكن بنسبة للفيرما كتكون قليلة ... نحية وجدات للاحمد ماكلتو حطات ليه يفطر وعطاتو دواه ، عاد مشات للڤيلا ، وجدات الطبلة على حقها وطريقها كيفما كيبغيها ... متولة ومكالة بلدية ، عارفاه ماعندوش مع الماكلة العصرية وماكلة الزنقة ... حتى فاش كيكون بوحدو كيدخل للكوزينة يطيب راسو ، أهم حاجة عندو ياكل ماكلة صحية ديال الدار باش يحافظ على صحتو ..

- سراج [كيتبنن] :

وناري أصاحبي ، عرفتي شحال هادي ماكليت ماكلة الدار ، البنة أخويا الحياة السعيدة ..

- هلال [ هز راسو فيه ونطق وهو كياكل] :

فخبارك خوك ناوي يجي حتى هو ..

- سراج [حبس الماكلة] :

داوي من نيتك ، أش بغا يݣجدر هنا [اش بغا يدير هنا] ؟

- هلال [غمزو] :

فنظرك أنت ؟

- سراج [بصوت رجولي قاصح] :

هداك سخن عليه قبو ... باغيني نݣاد ليه عظامو ، ماخلا شكلاط ماخلا حليب ، باغي يجرب الرايب البلدي .. غادي نوحلها ليه ..

- جلال [ببرودة] :

خليه يجي مالو يخلعنا ، نݣادو ليه عظامو حتى هو [غمزو] ..

- جات نجية عندهم :

سي جلال سي هارون كايتسناك ...

- جلال : دخليه ..

- دخل هارون جر الكرسي وبدا كيفطر ..

- هلال [ كيطلعو وينزلو ] :

معشيين معاك انت ..

- هارون :

نعمر الكرش أخويا ، ونشوفو سلام ... خوك راه مخلاني نخمد ... مناعس حتى الفجر تݣول المرا عندي كانت كتولد ..

- جلال [ شاف فيه مطلع حاجب ومنزل الثاني ] :

ولاو فيك الشكاوي بحال العيالات الهداوي ..

- هارون [ كيفطر] :

خلينا نخشيو فكمارتنا الله يرحم جدك ، متوحلهاش لينا على صبيحي ..

- سراج :

وتيتيزة اساطة ديال البارح ، عرفتي دوك لي كايكون عندهم داك اللون ديال الشعر ، العافية الكحلة ..

- هلال :

الاغلبية دابا كيصبغوه ..

- جلال [ عينيه على طبسيلو ] :

دوريجين ... حالتها ماشي ديال الصباغة ..

- سراج [ شاف فهلال ] :

انت تعرف كثر من الخبرة ... السيد سكاناها عرفها دوريجين وبطامپو مزال ..

- جلال [ خنزر فيه وكمل ماكلتو ] :

كترت فيك الهضرة أولد الذيب .. الطلاق سرح ليك اللسان .. شاف فهارون ] طلقنا وخرج الحجرة لي واحلة ليك ..

- هارون [ خوا فمو وهز راسو فيه ] :

ݣاع داكشي لي ݣالت ليك مامنو زفتة ..

- جلال [ ملامحو كانت جامدة كيسمع ليه ] :

كمل ..

- هارون :

السيدة عاد خرجات من الحبس هادي شهرين ... كانو ساكنين فسطات ، وهادي شهرين باش تحولو لجديدة ..

- سراج [هاز حاجب ومنزل الثاني] :

العباق ݣاع[الحبس ݣاع] ..

- هارون [جغم من أتاي وكمل كلامو ] :

مها هولندية وماتت نهار ولداتها ، وباها تزوج مرة اخرى ، وعندها زوج خواتات ... وحدة سميتها سندس والثانية سميتها صفاء ، عايشة مع والديها وجداها او واحد خالها خو مرات باها ... خواتاتها كملو قرايتهم ولكن هي حدها الباك ، وقرات مع كريم نسيب سراج ... شي مدة كان يمكن كيقرا فسطات ، تما فين تعرفو وبقاو صحاب من داك الوقت ..

- هلال [بتساؤل] : علاش دخلات للحبس ؟

- هارون :

سمع على ودنيك ، كانت كتبع الرجال لي مزوجين وكيخونو عيالاتهم ، كتجيب راپور ديالهم كامل لعيالتهم وكتفضحهم ، فالاخر شي واحد رفع بيها شكاية وتشدات ودخلات فيها 4 شهور للحبس .. والبلان لي واعر فهادشي مغايجيكش للبالك ..

- جلال [حرك ليه براسو باش يكمل ] ..

- هارون[بجدية] :

باها ما أستاذ ماحتى لعبة ، باها كان خدام فواحد الوزين ، ومن بعد ولا خدام فالعمران هو لي كان مسؤول على الخدامة ، عرفتي عندمن [كايتسناوه يدوي] عند عبد الرحيم السعودي ..

- فصباح .. كانت صفاء ومشيرة مع سكينة فالمحال ... اما سندس كانت فيها النوبة ديال الشقا فدار ..

- سكينة :

عرفتي ولاد الحرام شحال من مرة الصفحة ديال الأنستغرام بغاو يطيروها لينا ؟

- مسيرة :

زعمة يكونو فعايل البوليس ؟

- سكينة [هزات خبزها كتكمل فيه ] :

وبحال إيكس ، أصلا هاد السكتة ديالهم جاتني فشكل ، زعمة ماقلبو ما والو ..

- مسيرة [كتمسح فزاج] :

غير خليهم يقلبو أيلقاو البرد ، اللايف تلاح من 300 بلاد دقة وحدة ، مغاديش يقدو يعرفو شكون ... ولكن الحاجة زوينة عرفتي شنو هي [شافت فيها] دوك لي كانو مع السعودي تشدو ..

- سكينة [كضحك] :

ههههه واييه ، حتى مرتو راه خوات المغرب هزات ولادها ومشاو للفرنسا ، مابقاش عندهم الوجه لي يبقى هنا ..

- مسيرة [ݣلسات كتمسد فعنقها] :

دابا بقا لينا غير منصور وباه ، ولكن بلاني ماشي دابا ... دقة دقة ، عرفتي غير الى درنا لايف مرة وحدة فشهر ولا شهرين راه مخيرة لينا ، دابا راه حنا محركين القضية فالقناة لوخرا ..

- سكينة :

فشهر طلعات ل 100k .. باش تعرفي بنادم كيموت على الشوهة ... والصفحة الثانية ديالك فالأنستغرام فيها 50k ، بنادم مابقاش باغي الإستفادة باغي غير الشوهة ..

- مسيرة :

وحتى أنا انحط ليهم الشوهة ، ولكن شوهة لي اتنفعهم مغاديش ضرهم ..

- صفاء :

اجي ݣاعما قلتي لينا ، كيداير داك جلال ؟

- مسيرة [تفكرات القجة لي دار ليها ورجعات تفكرات صوتو ] :.

عرفتي لحسك ، نااري على صوت راه تصدمت ... وصوتو نسخة طبق للأصل ل كو ووريم .. راه فاش دوا راه تصدمت مابقيت عارفة شنو نقول ..

- صفاء [خرجات عينيها] :

ناااري حلفي بالله ..

- مسيرة :

وحق الله العظيم ، صوتو راه كيبورش ... كيخليك تسكتي مدويش ، ولكن واخا هكاك عاجبو راسو راكي عارفة مالين الفلوس ، عكس واحد كان ݣالس شعرو كحل كان واخا هكاك ظريف ..

- سكينة :

مايكون اخوه هداك ، حيت عندو واحد خوه اسمو هلال ، بيض وشعرو كحل ..

- مسيرة :

هدا نيت بيض وشعرو كحل ، وكان حتى واحد اخر ݣالس ماعرفتوش شكون ، كانو مزهيينها حاطين قراعي دشراب ، تريكة ديال زهوانيين ..

- صفاء :

اش كتعرفي على صحاب الفلوس ، القصاير وشرابات والحالة ودنادن ..

- مسيرة [ وقفات] :

خاصني نعطي الفلوس ديال الكرا لسيد ، مشات لساكها هزات بزطامها حلاتو ، صغرات عينيها مغوبشة كتقلب .. البزطام فلاتو والو ، الفلوس كاينين ولكن فين هي هنا فين كدير ، وقفات ساهية وتفكرات بلي اخر مرة مدارتهاش فبزطامها ، لاحتها فسكادو .. حلات عينيها على تيساع فاش تفكرات بلي سكادو هو لي كانت هزاه لبارح ..

- مسيرة [ضارت عند البنات بصدمة ] :

لبنات لاكارط ناسيونال ديالي مكايناش ، وقيلة طاحت ..

- هلال [بشك] :

وايلي ، واش خونا لي عاد مات ؟

- هارون [هز بطبوطة دهنها بالعسل وجبن وكمل هضرتو ] :

إيه ، كان خدام عندو فالوزين ، ولكن رجعو للعمران ... حيت زعمة شافو كپابل ، ولكن واحد المدة صغيرة ، باها طاحت عليه حديدة لرجلو ، خلاتهم يقطعوها ليه ، وخرجوه من الخدمة بلا ريال بلا زوج ..

- سراج [بصوت رجولي قاصح] :

يديرها ويفوتها لهيه ماغريباش عليه ..

- جلال [كان كيسمع وساكت] :

من ورا ماݣلس تأزمات الحالة ديالهم ، هي فاش خرجات بنتو الكبيرة تخدم .. ݣالو ليا بلي كانت خدامة مع شي خضار من وراها هي فاش بدات فداك تنوعير ديالها ..

- جلال [بتساؤل] :

إيمتا قرات مع كريم ، حيت هو فايتها بعامين ؟

- هارون [كياكل] :

قرات معاه فسانكيام ، حيت الباك قراه فكازا ... الصراخة مارعفتش ، واش هي لي دخلات للقراية بكري ولا هو لي كان معطل ، المهم كانو كيقراو بزوج ، تفرقو فاش جا كريم لكازا ، ولكن بقاو على تواصل من ديك الوقت ، يعني عشران ديال بصح ..

- جلال [كيحرك ففمو ] :

مممم فهمت ..

- هارون :

الهضرة لي ݣالت ليك على الݣنازة أتكون بصح ، اهو دخلات ماشي بصفتها كتقرا الصحافة ، حيت هضرتها كدوب فكدوب ، هي دخلات للݣنازة غير على ود السعودي هو السباب حتى باها تقطعات رجلو ..

- سراج : باش تشمت ..

- هارون : هانتا فهمتي ..

- جلال [دوز يدو على فكو وناض] :

فريع الراس جاينا فطريق ..

- هلال [هز فيه راسو] :

علاش شنو كاين ؟

- جلال [دار يديه فجيابو ] :

الويل الكحل راه شافو كمارتها لبارح ، يحسابليك أدوز بساهل ، راكبة فطوموبيلتي ... وانت عارف داك نوع ماكيسوݣها الي معلم ، اش ايݣولو مع دماغهم .. صاحبتو ..

- سراج [هو فيه عينيه] :

مع السكرة ديال البارح خرج ليا من بالي هاد البلان ..

- هارون [مسح فمو وشاف فيه بجدية ] :

ايحطوها فدماغهم ، ايبغيو يشدوك من ليد لي كضرك ، بلعاني ... ماسلكاتش ليهم الطريق اللولة والثانية ايجيوك من هاد الطريق ..

- جلال [الاعصاب ديال دنيا تجمعو عليه ] :

أنا خارج ، الى كملتي فطورك تهز ، نسيتي راسك ... خاصنا ندوزو لوزين هو الاول ، وندوزو عند الحاج السلاوي على قبل البهايم ، ونشوفو معاه على قبل المازن الى كان مزال عينو فيهم ، ماغانبقاوش نلعبو معاه حابة هنا ... بغاهم يسيفط لي يديهم ، مابغاهمش راه عطا الله لي بغاهم ..

- هارون [وقف] :

دراري راه شارجاو السلعة لي غادي تمشي للفرنسا ..

- جلال [هز سوارت طوموبيلتو] :..

مزيان ، ولكن مافيها باس ضرب ضورة وتفيريفيي باش مانتحاشمو مع حتى واحد ، كيما خرجات من هنا فريش توصلهم فريش ، مابغيتش شي واحد يتشكا ..

- هارون :

ماعندهم مناش يتشكاو ، النوعية ديال التراب القديم راه حيدناه ، وهدا لي جبناه راك شتي الجودة ديالو بيديك ودقتيها ..

- جلال [دار نظاظرو وخرجو على برا ] :

مول الشي ماشي بحال الكليان ، ديرها فبالك هادي .. طلع لطوموبيلتو ، ركب حداه هارون مخلي طوموبيلتو حدا الفيلا حتى يرجع ليها من بعد ..

- السلعة كانت مستوكية مقادة خاصها غير تفرق ... پاپيي فدهبي مكتوب عليها بالأزرق ، goldrifi وحداها بقرة وأعشاب ، زبدة نباتية 100/100 حلال .. كان هاز واحد الكتاب فيدو كيقيد فيه ... دوز سكانير بعينيه على ݣاع السلعة وخرج من تم ... طلع للبيرو ديالو .. زول اللبسة لي كان لابسها فالبيض ، مع البوني ديالها وصباعيات ... زولهم ، غسل يديه فالحمام نشفهم ... تاجه للمكتب ديالو ، خدام ، سمع صوت التيليفون .. كان ميساج لي جاه .. صغر عينيه كيشوف فمحتوى الميساج :

" لاكارط ناسيونال ديالي واش بقات عندك ، الى بقات عندك جاوبني محتاجاها ضروري "

- صغر عينيه كيعاود فالميساج ، حط التيليفون وكمل خدمتو ..

_________________________

- سكينة [ عينيها على پيسي ] :

أمضرا جاوبك ؟

- مسيرة [ بعصبية ] :

تجاوبو عيشة مولات المرجة إن شاء الله .. راه باين بلي قرا الميساج ولكن حرام واش يجاوب ، الزبل صافي ... أجي نقوليك ، أش بان ليك نهبطو غدا لكازا ..

- سكينة :

اش انكزكزو فيها ، واش عجباتك ولا شنو واش انت هبيلة ..

- مسيرة :

كاين واحد البال مخير واااعر ، بال ضلاس .. فيه شي بياسات واعرين ، نمشيو نتكساو وندورو بالحالة شوية ..

- سكينة [ سمعات البياسات وحلات عينيها] :

عرفتو وااعر ... فيه شي پياسات خطيرين .. صافي نمشيو [ فوسط كلامهم وصل وصل ميساج فالكونط انستغرام ديال روبي ] ..

- دورات الكرسي لجهة الپيسي ، ودخلات كتقرا الميساجات لي قبل ، بقى ليها غير ميساج واحد لي وصلها فداك الوقت نيت ... فتحات الميساج [ مصغرة عينيها]

- مسيرة [ لاحظات وجها لي تبدل ] :

ياك لاباس مالك ؟ واش شي واحد عاير ، ياك ݣلتي ليا ݣاع الميساجات لي كيوصلو كيشجعو على هادشي لي كنديرو ، واش شي واحد سبنا ؟

- سكينة [ شافت فيها ] :

لا هاد الميساج ، جاي من أمريكا ، وعرفتي من عندمن ... من عند واحد الممثلة معروفة سميتها إشراق ..

- مسيرة [ قربات ليها مصدومة ] :

وايلي ، واش إشراق إشراق ، واش ديك لي عاد توفى ليها راجلها داك الخليجي ؟ كيفاش لاش مسيفطة ميساج قراي ليا العار ..

- سكينة [ كتقرا بصوت مرتف] :

سلام روبي ، اول حاجة بغيت نهنئك على الكونسيپت ديالك ، شفت لايف ديالك لي درتي ... داكشي باش كان خاصني ضروري نتواصل معاك ، عندي معلومات مهمة بغيت نوصلهم ليك ، هاد المعلومات مهمة بنسبة ليك ولبزاف ديال الناس ، واتكون حلقة من الحلقات ديالك لي انا متأكدة غادي ينجحو ، يمكن انت كتنزلي غير الناس لي كاينين فالمغرب ، ولكن انا متأكدة بلي هادشي لي انقوليك ونوصل ليك غادي ينفعك ، حيت هاد الناس خاص ضروري يترباو ، الى قريتي الميساج ديالي كنتمنى منك تجاوبيني ..

- شافت سكينة فمسيرة ، ولاخرى بادلاتها نفس النظرات ... والسكات كان سيد الموقف .

- الغد فاقو بكري ، جمعو الدار كل وحدة وباش تكلفات ... بغاو يساليو دغية باش يشدو الطريق لكازا ، يلاه يلاه يمشيو للبال ويخادو لي بغاو ، من تما يدوزو للجامع يدورو والى بقات ليهم الوقت يضربو دويرة فالمول وعاد يرجعو .. سبقاتهم لقدام الباب ، الساعة كانت 9 ديال الصباح فاش سلاو ، رجعات لدار حيت نسات تيليفونها ... وخرجات ، لابسة سروال ديال الدجين ، مع تيشورت فالبيض وتجاكيط ديال الدان بالهدوب مع ݣاط فالكحل ، خلطات عليها سندس وصفاء وسكينة ، خداو طاكسي للݣار قطعو الوريقات ديالهم ... 10 دقايق وهوما واقفين عاد جا التران ركبو فيه وشدو الطريق للكازا ..

******

- مع وصلو خداو جوج طاكسيات مفرقين ، نيشان للضلاس ، الدنيا مكانتش عامرة بزاف ومكانش الزحام ، كل وحدة فيهم تنشرات فقنت ... طاحو على پياسات واعرين ..

- سكينة :

ماجوبكش خونا على لاكارط ؟

- مسيرة [كتعزل وتقيس عليها ] :

لا والو ، بحال والو نساليو ونسيفط ليه ، ماحدي هنا ... كنت انسوني على كريم ولكن اليوم خدام ..

- سكينة :

لا بلاما تبرزطي ليه راسو ... كملو من الحوايج ومشاو لعند مالين السوتيامات ، خداو من عندهم حتى هوما ، بانو ليهم ليبوط وسبابط واعرين ، خدات مسيرة بوتيو وسبرديلة ، اما سكينة خدات جوج ديال لي ݣاط ، صفاء وسندس خداو ليبوت وصباط لوحدة .. جابوها مع 12 نيشان ..

- مسيرة [هازة ساشيات لي فيهم حوايجها] :

نمشيو نتغداو وعاد نمشيو للجامع ..

- سندس :

أنا نيت فيا الموت ديال الجوع ، شوفي كاين واحد المحال شفتو فتيك توك .. كاين قريب من المرسا اسمو يمكن بوكا مقيلة الى ماخفت نكدب ، عندو داكشي واعر نمشيو ليه ؟

- صفاء :

فينما ديتونا ، غير يلاه راه انسخف بجوع ..

- سكينة [كتمدغ فالخبز حرفي] :

جاب الله جايبة معايا ريزيرڤ ، أما كوراه وا سخفت بجوع ..

- خداو طاكسيات ، داوهم للبلاصة لي ݣالت ليهم عليها سندس ، فعلا المحال زوين ونقي .. ݣلسو على برا خداو شنو بغاو وݣلسو كيتسناو داكشي يوجد ..

- سكينة [كتندغ المسكة وساهية ] :

مسيرة شوفي بلاما تعيقي ياك ، غير بالفن .. واحد طوموبيل كحلة قبالتنا ، منين فاش خرجنا من سوق ضلاس شفتها ، وشوفي دابا فين واقفة ..

- مسيرة [مابغاتش تحقق فيها دارت راسها كتقرا فل menu ] :

دابا واش باغية دخلي ليا الشك ولا شنو ؟

- سكينة [كتلعب بالݣصة ديالها ] :

قلتها ليك ولالا ، قلت ليك راه شافوك وراه الى حطينا رجلنا فكازا يقدو يقرقبو علينا ... وتلقاي دابا ..

- مسيرة [تبسمات] :.

نعمرو الكرش بعدا ، ونقولو لرجلين غني ..

- داخلين لكازا ... سراج سايݣ ، وهلال حداه لابس سروال ديال الدجين بيض مع شوميز فشيپي محلولة شوية جهة الصدر ، معلي ليها الكمايم ، ساعة فالكحل مع تويشيات فليد لوخرا ..

- مافهمتش لاش جايبنا حتى لهنا ، داير بحال الموحمة أصاحبي ..

- سراج [عينيه على الطريق .. داير نظارات شمسية عاقد غوباشتو ] :

متفرعش ليا مخي ، كون بقيتي وهنيتينا داير فيك خير ، اش ندير لك تشهيت الحوت أو .. وانا مكناكلوش غير فسناك امين سالينا ..

- هلال مزادش معاه الهضرة ݣلب وجهو للجهة لوخرا ..

_______________________

- مسيرة سلات ماكلتها مسحات فمها [بهمس نطقات ] :

مزال ماوقفين مقابلين معانا ؟

- سكينة [كتشوف بنص عين ] :

مزال ... واقفين فنفس البلاصة ، وطوموبيل أخرى واقفة وراهم ..

- مسيرة [بإبتسامة ] :

غادي ديري راسك دخلتي لداخل تغسلي يديك ، وغادي تدوي مع مول القهوة اتسوليه واش كاين شي باب على برا ، أتقولي ليه بلي شي وحدين كيتبسلو علينا وكانو تابعينا ، وبلي مابغيناش نخرجو من هاد الباب ، سمعتيني يخلينا نخرجو من الباب ديال الكوزينة هادي الى عندها شي باب ..

- ياربي ايكون عندنا الزهر ويكون كاين ، اتعلمي صفاء وسندس ، راهم الداخل ݣاعما حاسين بلي واقع ، اتسبقو انتوما تخرجو الى عندهم باب كيف قلت ليك ، وانا انبقى .. انوض ندير راسي بغيت نخلص وغادي نتبعكم ، انتوما 3 بجرة أتشدو طاكسي ، ماتلفتوش وراكم .. فهمتيني ؟

- سكينة [مخرجة فيها عينيها ] :

أويلي واش من نيتك وانت شنو اديري ؟؟

- مسيرة [بأمر] :

ديري لي قلت ليك أصاحبتي ، اتشدو طاكسي نيشان للجامع ، نتلاقاو تماك ، هوما راه عينيهم فيا انا ، بغاوني أنا ... داكشي باش انتوما اتسبقو وانا انتبعكم ... فهمتي ، يلاه نوضي تهزي نوضي ..

- ناضت سكينة ، دارت داكشي لي قالت ليها مسيرة ، ولحسن الحظ انو سناك عندو باب لور ، تما فين كيخرجو طاروات دزبل واي حاجة شاطت ..

- سندس شافت فمسيرة لي غمزاتها ، باش طبق شنو قالت ليهم سكينة .. وداكشي لي كان ، خرجات وحدة تابعة الثانية .. هزات مسيرة راسها كيبان ليها باب الطوموبيل تحل ، جمعات الوقت ومشات لجهة لاكيص خلصات سامحة فالباقي ودخلات للكولوار لي كيدي لكوزينة ... عارفة ومتأكدة بلي هادوك لي على برا عاقو بيهم ..

- قرب يدخل للكازا ، سايݣ ببرودة ... جبد لاكارط ديالها من جيب لاشوميز ... شاف الصورة ديالها عاݣد غوباشتو ورجعها لجيبو ... دوز الخط لهلال خوه :

- وي فين أنتوما ؟

[ فالجهة لوخرا ] :

هاد ميخي ديال ولد عمك ، انخلي دار عشتو مافيهاش ، غادي بينا نتغداو مافهمتوش انا اش باغي يصنع ..

- جلال [تبسم ] :

جندخ ملتو أيغلبك .. المهم شوية ونكون عندكم .. قطع مع هلال وكمل طريقو ..

___________________________

- خرجات من المحال لور ، عاطية رجليها لريح كتجري ، كانت حاسة بالخطوات ديال الجرا تابعينها ، عاطية كل ما فجهدها كتجري ، داخلة بين الزناقي واخا معارفاش فين هي ولا فين غادية المهم عندها هو مايوصلوش عليها .. وقفات ورا واحد العمارة كتحاول ترجع الأنفاس ديالها ، كتبان ليها طوموبيل فالكحل لي كانت لاصقة على الطوموبيل لاخر دازت من شارع ... حيدات من ديك البلاصة وكملات الجري ديالها ، كيبان ليها غير الشانطي تقطع منو ... مشات كتجري قاطعاه ، دورات راسها كيبانو ليها شافوها وتابعينها ، الدورة لي ادور تخبطات مع شي حد ..

- مسيرة [هزات راسها فيه بغات تعتادر ، حسات بباب الفرج تحل عليها ، شدات فيه كتلهت ] :

جابك الله ..

- سراج [عقل عليها ، بشك ] :

مالك واش تابعك شي واحد ؟ هز عينيه لوراها كيبانو ليه 3 قاطعين الشانطي ... من الهيئة ديالهم باينين ناويين على خزيت ... غوبش [دورها فراسو حاس بلي هادو هوما لي كانو ناويين يصفيوها لجلال] ، جرها بجهد من دراعها غادي بيها فين بلاصة الطوموبيل ، وصل حل الباب اللورني دخلها .. يلاه ايغوت عليه هلال حتى كيبان ليه مطلع بنت اللور ، فاش حقق كتبان ليه نفس البنت لي كانت ولبارح فالفيرما ..

- طلع سيراج ديمارا وعفط عفطة وحدة مكسيري ، كيشوف فالمرايا كيبانو ليه ركبو فطوموبيل كحلة تابعينهم .. زاد مكسيري ، هلال طل براسو فالمرايا كتبان ليه طوموبيل كحلة تابعاهم ..

- مسيرة [تيليفونها كيسوني ، هزاتو كتبان ليها نمرة سكينة ] :

ألو وي ، لاباس لاباس ، انتوما مزيانين على خير ... صافي مزيان واخا خليكم تما انا جايا ..

- هلال [من ورا ماقطعات] :

ياك لاباس ، شكون تابعك ؟

- مسيرة [من بعدما قطعات ببرود ] :

شكون ايكون فنظرك غير قوليا ، كنت هانية نخرج كسف بغيت ندخل كيف بغيت ، فضولي دارها ليا ... بسباب خوك ولا ماعرفت اش كيجيك هادو تابعيني ..

- سراج [دخل من واحد الزنقة ضيقة هارب منهم ] :

ايكونو رجال منصور 100/100 ، واش انت عندك الدماغ ، لاش راجعة لكازا لاش ، معارفاش راسك راه ايكونو كيقلبو عليك .. باينة شافوك بصدفة وصلوها ليه ..

- مسيرة [معصبة] :

بغيت ليه موصيبة تصيبو فصحتو يولي فيه بوفالج ... خويا الله يرحم باك ، وصلني حدا الجامع ، راه كيتسناوني تم .. [ضارت كتقلب مالقاتهم ] ..

- هلال [فضل يسكت مايدويش ] ..

- سراج عين على الطريق وعين على جنابو لا يطلعو ليه ..

- خفف السرعة منين مبانوش ليه .. ومسيرة بدورها رتاحت نسبيا ..

- سراج [شاف فيها فالمرايا ، هز قرعة ديال الما مدها ليها ، خداتها من عندو شربات ورجعاتها ليه ] :

شكرا ..

- سراج [حرك راسو بالإيجاب] ، وقف بطوموبيلتو قدام الجامع ، نزلات مسيرة .. وتبعها سراج ..

- مسيرة [بإبتسامة] :

صافي شكرا ..

- سراج :

من الاحسن تمشيو معانا ، الى بقيتو هنا راه يݣدو يلقاوكم ..

- مسيرة [بتساؤل] :

فين أنمشيو ؟

- قبل ساعتين [من لي وقع] ... واقف هو او واحد السيد فسوق ضلاس ، كيتاواو على الثمن ديال واحد الپياسة ، دورة لي غادي يدور كتبان ليه ، وجها مايخفاش عليه ، وهي لي خسرات ليه داكشي لي كان ناوي يدير ... خدا التيليفون ودوز النمرة :

ألو سي منصور ، لا مابغيت لا فلوس لا والو ، بغيت غير نݣوليك ختنا ديال داك النهار ، هاهي ݣدامي ... داخلين للبال ديال ضلاس ، هي او 3 ديال البنات ... واخا اسيدي كون هاني ، نجيبها ليك نجيبها تهنا هادا مسمار وغادي نطرقوه ..

______________________

- صفاء غادية جايا ، بغات تندب جنابها ، كل شوية كطل واش تبان ليها ولالا ... ومزال مبانش حسها ..

- تعطلات البنات ، عندك يكونو لقاوها ولا شدوها .. اشدانا اختي ݣاع نجيو لهاد كازا ولا نحطو فيها رجلينا ، كنا هانيين وحق الله ..

- سكينة [حتى هي الوسواس بدا كيلعب ليها براسها ] :

ربوع ساعة هادي باش قالت ليا راه قربات .. راسي زند عليا البنات قسما بالله ..

- سندس [قلبها كيضرب يديها بردو عليها ] :

الله يستر ... اليوم انباتو فالكوميسارية مع عباس دابا تشوفو ، علم الله اش وقع ليها انا تلفت ..

- سلام .. ضارت سكينة وسندس دقة وحدة ، طلعوها ونزلوه ..

- سكينة [ببرودة] :

وعليكم السلام .. نعام اخويا كاين شيحاجة ؟

- [دور عينيه عليهم وحدة وحدة ] :

عاشورا ؟

- صفاء [تعصبات] :

لا حول ولا قوة إلا بالله العلي العظيم ، كتعرفني اخويا واش كتعرفني ، كيفاش عاشورا ..

- تبسم ونطق منين تاكد بلي هوما هادو :

مسيرة كتسناكم فالقهوة اجيو معايا ..

- سكينة [ مغوبشة جراتو من يدو ] :

بلاتي كيفاش مسيرة كتسناكم ، شكون انت اخويا بعدا ؟ اهي ياكما درتو شي حاجة للبنت ..

- [ عݣد غوباشتو ، نطر يدو منها كيخنزر فيها ] :

تعاوديها يديك نݣرضهم ليك ، بغيتي صاحبتك تابعيني ، يلاه ايتمشى ورجع خنزر فيها :

أنا سراج ولد عم جلال ، دابا اتكوني عرفتي صاحبتك ولا ختك فين هي .. عطاها بظهر ، شافت فالبنات لاخرين وتبعوه كيحاولو يسابقو خطواتو ، طلع لطوموبيلتو .. كيتسناهم ، حلات سندس الباب اللوراني ، طلعات صفاء حداها وسكينة طلعات حداه كتخنزر فيه ، دوزات عينيها على طوموبيل ، دوراتها فراسها بلي باينة هاد العائلة لاباس عليها ، من الراس حتى لراس .. ريحت پارفانو كانت عاكية فطوموبيل الداخل ... [دور راسو عندو ونطق بصوت رجولي ]

- السمطة ..

- جرات السمطة دارتها ودورات وجها ، ديمارا الطوموبيل وشد الطريق للقهوة ..

- ݣالسة على اعصابها ، كدوز يدها على راسها .. جا السرباي وقف عليهم ...

- هلال [موجه ليها الكلام ]

شنو تشربي ؟

- مسيرة [هزات فيه راسها ] :

براد ديال اتاي عفاك اخويا بنعناع .. ومتجيبوش ليا غير الما وزغاريت ، خليه يطيب على خاطرو ويكون برزتو ..

- علاش متنوضيش تصايبيه انت وتهناي ؟ ..

- هزات راسها فيه ، واقف عليها بحال قباط الرواح ... حر كرسي وݣلش فيه زول نظاظرو عاݣد غوباشتو ، شفارو مغطيين عينيه ، مكتعرفش لونهم الحقيقي كيداير .. مرات كيتخيل ليك بحال الى داير ليلونتي ، عينيه عندهم سحر خاص ..

- مسيرة [صوتو بورشها ، عندها قصة مع هاد الصوت او ممكن تقول انو نقطة ضعفها هاد الضوت بضبط ] :

علاش عيطي ليه [موجهة كلامها لهلال ] ..

- هلال [ببرود] :

انا معيط لحد [شاف فخوه] شكون عيط عليك انت ؟

- جلال [عينيه عليها] :

سراج .. [رجع وجه كلامو لمسيرة ] كتكون هاني حتى كطلع ليك الخطية من جنب..

- مسيرة [ببرود كثر منو ] :

ماعرفتش علاش ولات عندي قناعة ، بلي انت إبتلاء من عند الله بلاني بيه ، باش يختابر صبري فيك ..

- جلال [صوت قاصح مستفز] :

وطلعتي خطيرة فالكذوب الواشمة ..

- مسيرة [لا إراديا سكتات ، حدرات راسها ومشات عينيها للشامة لي عندها فوق العظمة لي فعنقها ... حرات التجاكيط وحاولات تدرقها ..

- مسيرة [ببرودة] :

فاش كذبت عليك ؟

- جلال [ غمض عينيه وظهرات شبح إبتسامة على طرف فمو دغية جمعها منين شاف الحركة لي دارت] :

الى ݣلسنا كنحسبو مانساليوش ، باش نسهل عليك الطريق ... نبداوها بالحبس ونكملوها بباك لي كان خدام عند السعودي ..

- مسيرة [تزاد معاها الزايد ، تأكدات بلي لاكارط ديالها معاه ، وبلي قلب عليها ... ولكن مابغاتش تبين ليه ، دبلات عينيها ونطقات بصوت منخافض ] :

واش كاينة شي وحدة أخويا جلال تقول على راسها كنت فالحبس ، راه مايمكن ... شوف انا راه نجيك الصراحة..

- قبل لا تكمل كلامها كيبانو ليها خواتاتها داخلات ، غير شافو وحدة ضارت من جهة وتانية من جهة ، وسكينة من اللور معنقينها ... بحال شي دجاجة حاضنة على ولادها ، منظر لي لاحظو جلال وهلال ..

- سندس [كتقلب فيها] :

انت مزيانة ما وقع ليك والو ، ياكما تبعوك ولا شدوك ..

- مسيرة [ غمضات عينيها وحلاتهم] :

سندس ، يهديك الله واش كون شدوني انكون هنا ؟ واش البيتزا لعبات ليك على راسك أقولي ليا ..

- سكينة :

راه من حقها راه تخلعنا عليك أصاحبتي ، وزدنا كملنا ݣاع فاش سيفطي لينا [ شافت فسراج مطلعاه ومهبطاه ] هاد السيد ..

- سراج [جر الكرسي ݣلس ، قرب من جلال ] :

تريكة مسݣية بمغرفة وحدة ..

- سكينة [شافت فيه هازة حاجب ومنزلة الثاني] :

سمعتك ، علاش أخويا كيجاتك هاد التريكة ... ياكما ناقصاها رجل ولا يد ..

- سراج [دور راسو شاف فيها ] :

لا ناقصها حاجة أخرى ..[ غمزها]

- سكينة [ خنزرات فيه ، ناطقة من بين سنانها ] :

حامض ..

- سندس :

يلاه نمشيو فحالنا أختي ، أصلا المجية ديالنا مكانش خاصها تكون ..

- صفاء [معنقة مسيرة بحال الى ماماها] :

عندها الصح ، يلاه نمشيو فحالنا حسن لينا .. كون غير ماجيناش أختي والله العظيم ..

- قاطعهم السرباي ، لي حط البراد ديال أتاي قدام مسيرة ومشا ..

جلال [تسناهم حتى سلاو ، دار رجل على رجل .. جر الصينية لي محطوطة قدام مسيرة ، جارها لعندو تحت نظراتها لي كانت باينة عليهم الصدمة من تصرفاتو ، كتسكانيه بعينيها كانت متأكدة ، بلي هاد السيد ماشي نورمال .. كب كاس ورجعو ، ورجع كب كاس ورجعو ، رجع كب كاس الأخير ، رشف منو ... مرجعو للصينية ، هز فيها راسو ونطق بصوت رجولي متحجر ] :

- ماعندكم مشي هاد الساعة ..

- ݣالسين فم الباب مجمعين على براد ديال اتاي ، كيقرقبو الناب ..

- عباس [بصوت جدي وقور ] :

راه عيقتي ، زدتي فيه ... براكة من ديك خيطي بيطي لدار الهوارية ..

- أدريس[بصوت منيرڤي كيݣروز] :

سكنتي شهرين عرفتيها هوارية وبااز ..

- عباس [ بجدية ] :

شوف ادريس انݣوليك جوج كلمات ، نوض عري على كتافك ، راه عيقتي الهضرة لي نݣوليك فظهر ... نݣولها ليك نيشان فالوجه ، ماعنديش مع حشيان المعاني ، راه شفتي الحالة البنات لي خدامات ويصرفو على دار ، انا عندي عدر رجلي محيدة مݣاد على خدمة ، ومزال كنفكر ندير شي كروصة خفيفة ، نبيع فيها ونشري ، واخا نهنيهم غير من دوا مي .. ايوا وانت لي واكل شارب ناعس فابور .. كيفاش قضيتك ؟

- أدريس [قلب وجهو ماعجبوش الحال ] :

وانا واش لݣيت وݣلت لا ؟

- عباس :

كتشرك ادريس ، كتشرط ياكما يحسابليك عندك الإجازة ، راه اشهادة ... كون بغيتي تخدم ودرتي راسك فيها كون واخدمتي ، انݣوليك جوج كلمات ، اتنوض تعري على كتافك .. وضبر على شي خدمة ، وتولي حتى انت دخل شوية فيديك ، البنات راه مدايمينش ودار البنات راها خالية ، مغاتسناهمش يصرفو عليك ويعطيوك ثمن ديال ݣارو .. دور هضرتي مزيان فدماغك ، تعجبك ماتعحبك سوقك هداك ، براكة أبناتي لي مريسكين بريوسهم ... مغايبقاوش طول حياتهم فهاد الهيث ..

- شوف غير ماوقع لمسيرة والبارح ، ربي قالها ..

- ادريس [شاف فيها] :

واا خويا ديك البنت عندك مافهمتهاش أنا ، دوزنا الفضيحة لي دارت لسعودي وشوهاتو حتى هزوه مرابعة للقبر ، وداك نهار غادية تعتق واحد مكتعرفو مايعرفها حتى صدقو تابعينهم بالقرطاس ، واش يحسبلها راسها فنيويورك .. واش هادي ڤيو ولا مالها ، تخربيق اصاحبي راه بنتك حمر فيها العين عارفها تخاف منك ..

- عباس : وراه المشك[قاطعهم صوت الخبيط والغوات وراهم ]

- سعاد [ كضرب ففخاضها] :

كيفاش القرطاس ؟ هادشي لي مخبيين علينا ... هادشي لي ظلو النهار ومطال وانتوما كتحتتو عليه ومخبيينو .. ياك أعباس ياك اعباس ، دخلات كتغوت وسط الدار ..

- معزوزة [ كانت متكية سمعات الغوات تݣعدات مخلوعة ، بصوت باح تقيل غالبة عليه الخلعة] :

ياك لاباس ، وا سعاد اش واقع توما مالكم ؟

- سعاد [ دخلات كتبكي ] :

شوفي اخالتي ولدك ، داكشي لي كنا خايفين منو طحنا فيه أخالتي ، شابكها مع بناتو وكادبين عليا أخالتي ، مسيفط بناتو للخطار وكادب عليا اخالتي ..

- عباس [ كيعكز على عكازو ݣلس وأدريس واقف] :

تي مالكي تنوحي عندنا الݣنازة هنا ، تي سكتي دابا يسمعوك اجيران ..

- سعاد [ خنزرات فيه] :

يسمع لي بغا يسمع ، عطيني براتي دار القاضي تفاريها عييت منك ومن فعايلك ، باغي اراسك ودوك البنات ماعندك فيهم سوق ..

- أدريس [ تدخل] :

ختي ، هاد المرة عباس راه مداير والو انا شاهد ، كولشي من بناتك ..

- سعاد [ كتخنزر فيه] :

حتى انت معاه ، دارك فصفو ماعرفتك خويا ولا عدويا ولا خارج ليا فعودي ..

- معزوزة [ بصوت تقيل أمر] :

سعاد سكتي خلينا نعرفو اش واقع [ شافت فأدريس لي غير بتخنزيرة منها كيحط ليها كولشي قدامها ] :

دوي أدريس خرج ماعندك ، اش واقع عاود ليا ..

- أدريس شاف فعباس ..

- معزوزة [ باللهجة أمرة] :

متبقاش تبقلل فعينيك اولدي ، دوي خرج شنو كاين ..

- ادريس [ رحع شافليها فعينيها لي كيخلوه ويجمدو الما فركابيه] :

شوفي امي معزوزة ، داك نهار ... [ حط ليهم كولشي من الاول حتى لداكشي لي وقع ولبارح لمسيرة ] ..

- فالقهوة ..

- البنات ب 3 شافو فبعضياتهم مصدومين ... شافو فمسيرة لي بدورها شافت فيهم ، بحال الى كتقوليهم سمعتوه سمعتو صوتو ، مكدبتش عليكم ..

- صفاء [ بلعات ريقها ودوات بهمس ] :

ناري والله حتى صوتو بحال كو ووريم فاش كيكون كيغني ..

- سندس [ حالة فمها بصدمة ] :

ااه والله العظيم ، هو محطوط منسوط ..

- مسيرة [ من تحت سنانها ] :

تجمعو ... هادشي مدازش مرور الكرام على جلال ، ولكن متسوقش ..

- اول بلاصة اتلݣايهم كيتسناوك فيها هي لاݣار ، والمحطة ديال الكيران ..

- مسيرة [ سكتات مجاوباتوش ، كتحاول تفكر فشيحاجة ديرها ] ..

- هلال [ خرج ليها من جنب بسؤال ديالو ] :

مزال ماكملتيش هضرتك ، علاش كدبتي ؟

- مسيرة [كتبغم مع راسها ] :

أنا اخويا والله العظيم ، كنت بغيت غير نعتقو مسكين ، مع منين قلبت عليه لقيتو ولد الناس ، وكيف قلت ليك أخويا بانا ربانا على المبادئ والأخلاق ، واخا هو راه ما استاذ ما والو ولكن بنسبة لينا حنا أستاذ ديالنا ... حيت علمنا بزاف ديال الحوايج فحياتنا ..[ كتدوي وعينيها فعينين هلال متفادية تشوف فجلال ] ..

- خواتاتها كانو كيسمعو ، وبحال الصدمة لي كانت على كريم المرة لي فاتت ، كانت باينة عليهم حتى هوما ، حيت عمرها دوات بهاد الطريقة ، ولا كانت فيها كترت الهضرة ... هي مكتدوي حتى كتوزن شنو اتقول ، وتقدر تخرج كلمة وحدة ترد بيها على هضرتك كلها ، ولكن دابا راه مافهمو فيها والو .. ناسيين بلي ختهم الى كانت حاصلة وكتكدب كتبقى اجيبها فم وݣول ..

- [كملات كلامها] :

انا ماخفتش على حياتي ، حيت ربي هو لي مقدر وحاكم ... انا خفت عليه اهو مسكين ، يحسابلي مزوج وبوليداتو .. وحشومة ولادو يبقاو يتامى [ شافت فسراج] واش درت شي حاجة غلط اخويا سراج .. ربي لما قول الحقيقة والطعام لي مزال متشاركناش ..

- سراج [عقلو حبس ، شوية ديال المخ لي خلات ليه دنيا غادي طيرو هاد الرباعة ] :

الله يكتر خيرك ، الله أودي .. فيك الخير .

- مسيرة [بهدوء عينيها غرغرو ] :

وكاين سبب أخور ، هو با فاش كانت مي حاملة بسندس ... داها لطبيب باش يشوف واش عندها دري ولا بنت ، ومع التيلاد كان عاطي بظهر ... قاليهم راه ولد وبا قال الى تزاد الدري نسميه جلال ، وأنا كنت فرحانة بزااف حيت أيكون عندي خويا اسمو جلال ..

- جلال [ كيحس ببرج من مخو غادي يطير ، قهراتو بالكذوب ، عند بالها بلي معايقش بيها ] :

فايتة ختك بعامين وكنتي فرحانة حيت أيتزاد عندك خوك ؟

- مسيرة [هزات كلينيكس من قدامها ] :

بلاتي عفاك ، حيت دموع منين كينزلو على وجهي مع عندي البشرة جافة ، والاملاح لي فدموع كيسببو لي تهيج فالبشرة ..

- تنهد تنهيدة طويلة مسيطر على اعصابو .. كيبان ليه ينوض يخبطها مع هاد الطبلة ويتهنا من فريع الراس ..

- مسيرة [مسحات دموع لي اصلا منزلوش ] :

دابا فهمتيني غلط ، راه داك الوقت كان عندي عامين ... وبا كان كيقولي بلي كنت كنعس على كرش ماما وكنبقى ندوي مع خويا على اساس راه خويا ، مكملتش ليك فاش سمعت إسم جلال ، تخايل ليا بحال خويا لي محطوط فداك الموقف ، وتحركو فيا المشاعر ... انا راه اخويا جلال والله حتى حنينة بزاف وقلبي بيض وصافي ، صفا من الما والله العظيم منكدب عليك ..

- جلال [هز براسو ] :

لا باين ، امن رجال لي كنتي تحرݣي ليهم النوادر مع عيالاتهم وتشدي الفلوس عليهم ݣلبك بيض ..

- مسيرة [تحولات نبرتها للبرود وهدوء ] :

كندير غير الخير .. ومكنحطش يدي فجيب شي واحد وناخود ليه رزقو ..

- هلال [بصوت رجولي قاصح] :

الخير هو تفرقي راجل على مرتو ..

- مسيرة [شافت فيه] :

وو ..[حسات بيدها زيرات عليها مقاطعاها] ..

- سندس [بنظرات شرانية ] :

وانت الخير فنظرك ، هو الراجل يخلي مرتو بجوع .. او وليداتو بجوع ملاقيين مياكلو ، ويخسر فلوسو فلالة ومالي وتقرقيب السطالي ..

- مسيرة [باغية تسكتها] :

سندس صافي ..

- سندس [شافت فيها مخنزرة] :

مصافيش ، باش يضوروك بحال الى هوما قضاة مصافيش ، بحال الى عوما كيصليو على هيضورة السبع مديرينش حتى ذنب فحياتهم [رجعات شافت فهلال بنفس تغوبيشة] مسيرة مكانت كضرب حد على يدو ، لي كتعاني من الظلم ديال راجلها وكيكون تبدل جيهتها ، كطلب منها تعاونها ... وݣاع العيالات لي تبعات رجلاتهم ... لقاتهم كيخونو عيالاتهم مع بنات مايوصلوش حتى لزطمة ديال عيالاتهم فهمتي ولالا ، منين مرتو كطلبو فلوس الحمام ... ولا كطلبو يشري ليها ابيجامة ديال 30 درهم مكايبغيش ، وصاحبة يخسر عليها فلوس صحيحة هدا راجل هذا ، لي يخلي ولدو بصندالة ديال الميكة فالبرد وشتا ، ويشري لصاحبتو الصبابط الغاليين هدا راجل ولا شماتة ، بلاما تجاوب حيت السؤال أصلا مجاوب على راسو ... مسيرة كدير خدمة كتخلص عليها ، تفييق ديك المرة من الݣلبة لي عايشة فيها ... حيت العيالات لي فدربنا ماشي هوما العيالات لي عندكم ..

- يخونها راجلها مع 20 وحدة متسوقش ، صاليرها دايز بدارها بطوموبيلتها ... حتى واحد فهمتي حتى واحد ماعندو الحق يحاسب ختي ، حيت مكدير حاجة خايبة ... الحاجة لخايبة لي دارت ، هي عاونات خوك لي بسبابو حنا هنا كنسمعو فهاد الهضرة الخاوية ..

- صفاء [وقفات موقفة سندس معاها ] :

اجي نخرجو على برا بدلي ساعة بأخرى ..

- سندس [كتخنزر فيه ماحملاتوش] :

بنادم مفاهم حتى وزة وكيصدر فالأحكام .. جرات يدها من صفاء وخرجات ..

- مسيرة بقات ساكتة ... عينيها فعينين جلال ، مدواتش من ورا الهضرة لي ݣالت ختها ..

- جلال [من بعد مدة نطق] :

كان فخبارك بلي السعودي عبد الرحيم ، عم منصور ؟

- مسيرة :

فالاول لا ، حيتاش عبد الرحيم كنيتو السعودي ماشي بحال رضوان تم عرفت بلي هوما خوت غير من الأم ..

- جلال [مفيكسي عينيه مع عينيها ، كيحاول يكتاشف ذي كذبة من كذوبها ، واش اطيح ولا تكمل ] :

هي المشية ديالك للݣنازة ، باش تشمتي ماشي على وديت منصور كيما ݣلتي قبل ؟

- مسيرة [بهدوء ، عارفاه عرف باها كان خدام عند السعودي ] :

بغيتي تعرف لي كاين ، أه مشيت باش نشمت باش نشوف مرتو او ولادو كيتشواو عليه ... عجبني الحال فاش ربي خدا حقنا ، وفاش تشوه ربي جاب لي فضحو وشوهو ... وكونت انا فبلاصة هداك لي فضحو كنت غادي نديرها ولكن دوماج ، حيت ماشي بالإستطاعة ديالي ، وماعنديش الإمكانيات باش نديرها ، ربي خدا حقي ... على مدار فبا ..

- هلال [بتساؤل] :

باك شنو بينو وبين السعودي وهو كان غير خدام عندو ؟

- مسيرة [جرات الصينية من قدام جلال كبات ليها كاس ، جغمات منو وحطاتو] :

با كان خدام عندو فلوزين ، منين شافو بلي إنسان مزيان داه للعمران ... ولا هو لي مسؤول تم على الخدامة ... ولكن با حصل عليه الكدوب ونصب ، كان كيطلع ليموبل بأقل ثمن لي شاد ، وداكشي مامبنيش على الصحيح ... فاش جا با يدوي ، حرش شي حد لي لاح عليه حديدة من الفوق كان ناوي يقت/لو ولكن با جاتو غير فرجلو ، وقطعو ليه الرجل ... وسيفطو لدار بلا ريال بلا زوج ..داير غير رجل ديال البلاستيك .. وعكاز .

- فهمتي دابا البلان كيداير ، من ديك الوقت وانا لي خدامة والحمد لله عارفة راسي أشنو كنسوى ، منحتاج حتى واحد يقولي شنو ندير ولا مندير ..[شافت فجلال]

- هلال :

وعلاش داك الكذوب كامل ، تݣدي تݣولي لي كاين نيشان ..

- مسيرة :

واش كاين شي واحد كيقول انا كنت فالحبس ، هادي راه مكايناش ... وانا مامطراش نعاود لشي حد قصة حياتي ، كونما شي خوك لي قلب ورايا ، حيت ستغل لاكارط ديالي لي عندي ، هادشي كامل منعاودوش ليكم .. حيت لي عليا درتو ، علمتكم على لي كاين وسالينا ..

- كتمشي وتجي بظهرها ، الخلعة قاتلاها ... كتحس بغصة فقلبها .. هزات راسها فعدوزتها :

شفتي اخالتي ، ياك قلتها ليك ... قلت ليك مجموعين على خزيت وكيخططو لشيحاجة ماهياش ..

- معزوزة [عاݣدة غوباشتها ، بصوت غاضب] :

واش هاد البنت مابغاتش تعلم ، واش خرج ليها العقل ولا تخوطرات فيه .. واش باغية نسيفطنا للعباق كاملين ، واش مابغاتش تعلم من داكشي لي وقع ليها ولا مال طواسلها ... [شافت فولدها] وانت يا شيب والعيب ، بلا حشمة بلا حية مخلي بناتك غاديين للعافية برجليهم ، مدويتيش مكتعرفش ولا محنيين ليك فمك ... ولا جاتك على الهيت ، خدات ليك حقك من السعودي .. ياك اولدي ، واش غانݣوليك معزوزة ماولادات فيك الخلا وجلا ..

- سعاد [وقفات] :

وانا اشنو انقوليك ، خليت ليك الله اعباس ، بغيتي ترضني عاݣرة ، عندي البنات ومكاينين فجنابي ، بغيت تسيفط ليا بناتي للحبس ..

- أدريس :

وراه بنتك هي لي منها كولشي ، هي لي ݣالسة تنوعر وتخطط مع خواتاتها ومع الطبيب ، راجلك راه مدار لا بيديه لا برجليه ..

- سعاد [خنزرات فيه ] :

انت أتسد درقوشك وتغبر عليا كمارتك ، بحالك بحالو ، مالو محني ولا ماعندوش الفم لي يدوي بيه ، مكايعرفش يݣوليهم لا ... ويݣوليهم هادشي لي كيديرو فيه ماهواش ، مكايعرفش يݣوليهم ها السخط ها الرضى ، لا السيد عاجبو الحال .. [شافت فعدوزتها ومشات ݣلسات حداها ] ..

- باغي يسيفط ليا بناتي للحبس أخالتي ، خالتي بناتي ضاعو صافي [بدات كتبكي] ..

- عباس [مدواش وقف كيعكز على عكازو وطلع لسطح ، مدواهمش] ..

- معزوزة [كطبطب على يد سعاد ] :

صافي أبنتي يكون خير ، مغايدخلو لحبس ، والو ... يرجعو ويكون خير ابنيتي ، مسحي دموعك [شافت فأدريس] غبر من ݣدامي انت منشوفكش كدور حدايا يلاه ..

- ادريس : وانا مالي امي معزوزة ..

- معزوزة [خنزرات فيه] :

يميلو ليك ، يميل حالك ݣول أمين ، متنفع مدور دور بجنابنا بحال جلايل القفطان البالي ، راه انوض لحمار تاع بوك ..

- خرج كيبغم .. مخلي معزوزة معنقة سعاد وكتصبر فيها ..

__________________________

*** فولاد السعيد ***

- حطات الصينية ديال اتاي ، ورجعات للكوزينة جابت طبسيل فيه المسمن مشلتت كيشهي سخون ، حطات السمن والعسل وزيت البلدية ... قربات الطبلة لجيهتو ، شاد سداري متكي فيه ، يد مهزوزة لجهة عنقو ويد شاد بيها تيليكوموند كيدوز فالإداعات ..

- نجية [بإبتسامة] :

مسيمنات لي كيعجبوك .. عارفاك تشهيتيهم ..

- أحمد [ بإبتسامة رضى وصوت وقور] :

الله يرضي عليك ابتي يانجية ، جاو فوقتهم تشهاتهم ليا خاطري ..

- نجية [ وقفات] :

بلات نقاد لك .. باش تاكول مزيان وتعرفو منين داز .. ، قدات ليه المخاد على جنابو .. تݣاد فالݣلسة ، دارت ليه الخدادي ورا ظهرو وفجنابو ، رجعات لبلاصتها كبات ليه كاس ديال اتاي ، حطات ليه فطبسيلو مسمنة سخونة ، قطعاتها ليه طريفات الصغار باش مايلقاش موشكيل مع يدو ... وسقاتها بالعسل والسمن ، وحطات ليه الطبسيل قدامو ..

- أحمد [ كياكل ويتبنن] :

يا مكاينش لي يصرع هاد المسمن ݣدك يالكوباردية ، ماعدي مايسلاك ... الله يحفظ ليك دوك ليدين وخلاص ..

- نجية [ عجبها الحال] :

بصحتك وراحتك ، الله يشافيك ويعافيك ... ويرجعك ليا شالم غانم ياربي حبيبي وشبيك فاش شبك بويا حنيني ..

- أحمد [ خوا فمو ] :

واش سي هلال ايطول هنا ولا ؟

- نجية [ جغمات من كاسها ديال اتاي] :

وعلى مبان ليا ايطول نيت ، شفتو جايب واحد الباليزة ݣد السخط ، لا هو لا ولد عمهم .. مزيان نيت ، ياخويي كيبقا فيا سي جلال ... بوحدو بحال الى مقطوع ، مزيان منين جاو يديرو فيه خير .. يعمرو عليه .

- أحمد :

بصح ، عدك الصح مسكين ، لي دار معايا منساهش الله يطول فعمرو ويخلي ليه ضو عويناتو ..

- تسمع صوت الدقان فالباب ..

- نجية [ بإستفهام] : شكون ايدق علينا ؟

- أحمد :

وتي نوضي شوفي شكون ، ايكون اشي واحد فجماعة جاي يطل عليا .. حطات نجية كاسها وناضت ..

- نجية : بلات [ حلات الباب ، بانت الدهشة على وجها]

عفاف ..

- جلال [تݣاد فݣلستو عينيه مفارقوهاش] :

الحفرة لي دخلتيها ، مابقيتيش ݣادة تخرجي راسك منها ، اباش تعرفي ، داكشي لي كنتي كدير ، راه انݣطة من بحر منصور اباش تكون فبالك ..

- دخلا صفاء وسندس، جرو الكراسة وݣلسو ..

- هلال[ بلاما يشوف جهتها عينيه على مسيرة ،بصوت جدي حاد ] :

عند بالك منصور عندو يد وحدة ، راه عندو يدين ... راه يجبدك يجبدك ، مايخرجش من شي بلان يديه خاويين ، الى مشا حتى دارك هنا [أشر لراسو] الى بغيتي تسلكي راسك منو ... هو يطيح كيما طاح عمو ، وماشي غير هو حتى باه ..

- سراج [ببرودة] :

وباه راه شتي علاش ݣاد ، العربون يبان ليك امن البلان لي دار مع بات كريم .. انت درتي بلان لي ماشي ݣدو ، لا انت لا خواتاتك ، ودابا ادخلي معاك حتى داركم ..

- مسيرة [تزاد معاها الزايد] :

بحالاش زعمة ، اش دخل دارنا ؟

- سراج :

منصور كون بغا يصفيها للجلال ، راه يصفيها ليه من شحال هذا ، ولكن مايݣدش عليه ... حيت حجرتو تقيلة ، ومع ذلك راه مقايلوش .. عندك بالك انت اتݣدي عليه ، وتݣدي تزهقي منو ، بنادم مكيدخل يدو للعافية ، حتى كيكون داير عليها ميات وميات شرويط .. باش متحرݣوش ، وانت بهادشي لي درتي ، راه لا انت لا عائلتك ايقيلكم ..

- دابا عند بالهم بلي انت ، صاحبت جلال ، داكشي باش كيقلبو عليك باش يشدوه من ليد لي كضرو فهمني البلان أبنت المختار ، دابا انت بحال ديك الصنارة لي باغيين يصيدوه بيها ، أيلقاوك ايلقاوك .. ونهار يحطو يدهم عليك ، لا انت لا عائلتك برب لا فلتو منها اديريها فبالك ..

- الخواتات شافو فبعضياتهم ، مسيرة ... عاد بدات كتحس بهادشي لي دارت ، كان هو ساكت مدواش ، يد دايرها على الطبلة كيلعب بالكاس ديالو لي بقا فيه غير شوية ، ويد حاطها على طرف الكرسي لي ݣالس عليه الكرسي ..

- مسيرة [ مدة وهي ساكتة حتى نطقات] :

وهي هاد الروينة لي حنا فيها بسباب ولد عمك ، وعلى هاد الحساب ولد عمك هو لي أيفكها ..

- ݣالسين فمطعم راقي كيتغداو بزوج الراس فراس ..

- منصور [ نظرة باردة على وجهو ] :

المحال أنا كنت متأكد ايبيعو ليا بثمن لي انا بغيت ، غير كنت كنطيب فيه بالمهل ..

- رضوان :

ماعندي منسالك ، شحفنا حتى فكيناه منو ... ولكن الصراحة يستاهل ، موقع من داكشي رفيع ، جا فبلاصة لي فيها الرواج ..

- منصور [ هز براسو] :

الخدامة غادي يبداو غدا ، مايجي فين يدوزو هاد الشهرين حتى يكون واجد ..

- رضوان [ هز عينيه فيه] :

هاد المسمار طرقناه ، والمسمار لاخور شنو درتي فيه ..

- قاطعهم صوت التيليفون ، حط الفرشيط من يدو ، فتح الخط ونطق ببرود :

أمممم .. [ بقا كيسمع ، يدو دوزها على لحيتو ، تنفس بهدوء كيفكر ] :

خليكم تم ... مترجعوش بلا بيها [قطع عليه وحط تيليفونو مكمل ماكلتو] :

السلعة غادي دوز ، نسلكو بطريق لي فيدينا هاد الساعة ، واخا غادي نخلصو عليها كثر ، خاص نغيزو هاد البلان ومنتحشاموش مع خونا ..

- رضوان [كيفكر] :

حتى انا رخيت الحبل مع بات الطبيب .. الراس عامر ، ولكن غير نسالي لي عندي ونسالي ليه ..

- منصور [بصوت رجولي قاصح] :

البير الخاوي ماعندنا منديرو بنݣطة لي واحلة فيه ..، خلينا فالعامر دابا ..

- رضوان [زݣا من الماكلة ونطق] :

مكسيم عينو فمؤيد للبنتو الصغيرة ، شوف كيدير مع خوك ... وهو دافع عليها كبير ، البنت صغيرة دغية يلحس ليها المخ ، كادو من هنا خريجة من هنا ، وهاهي طاحت فيه ، كلما زادت العلاقة بيناتنا كثر غادي نربحو كثر ... وحتى انت نيت ماكرهتش كون [ قاطعو بتخنزيرة لي دار فيه] ..

- منصور [ ببرود] :

ماشي حيت با ، اتخطط لحياتي .. حيدني من دماغك حسن ليا وليك ..

- من بعد الهضرة لي قاليه ولدو ، مابقاش زاد معاه الهضرة ..

__________________________

- جلال [ حنحن ] :

المعنى ؟

- مسيرة [كان بالها مع صوتو ] :

عرفتي أخويا جلال ، واخا هو هادشي لي انقوليك خارج الموضوع ، ولكن الى متقلتو ليك دابا ايبقى واحل ليا فقراجطي ، ومتعرف واش نبقى فالحياة ولالا .. صوتك كيفكرني أفواحد المطرب ماشاء الله عليه جبار والله العظيم ، مع انا تبارك الله عليا الله يحفظني من عينين بنادم ، عندي اذن موسيقية [شافت فيه عارفاه وصلات ليه العظم ، وهي هدا هو الغرض ديالها ] والله العظيم عرفتي انا راه با علمني العيطة وسر ديالها ، عطاني دروس فيها تبارك الله ..

- إيوا اش انقوليك اخويا جلال ، وهاد الساعة لي لقاتني بيك راه ماعرفت ربي مزال ايلاقينا ولالا ، ولكن انا متأكدة غادي نتلاقاو ، حيت كيف قلت ليك ، حاسة بلي انت بلية بلاني بيها ربي باش يختابر الصبر ديالي ، المهم ماعلينا با كان كيطلعني لسطح ... وكيقوليا غني ليا أبنتي ، وكنبقى نغني ليه ، كيقوليا كنشبه ليه لفاطنة بنت الحسين فياماتها إييه [شاف فسندس] عقلتي ..

- سندس [غادية معاها ] : اه عقلت عقلت ..

- جلال [كيحاول يأضابطي راسو ] :

دوي ، بلاما تكملي المحاجية ديالك فالقبر ..

- مسيرة [ ببرودة ، رجعات للوجه لي كانت عليه قبل ] :

من الاخر ، انت سباب فهاد الدعوة انت لي اتفكها .. كيما خاطرت براسي وعتقتك ، حتى انت أتأمن عليا وعلى خواتاتي وعلى دارنا ..

- جلال [ صغر عينيه ، بصوت متحجر من تحت سنانو] :

متبقايش تݣطري فالهضرة بحال المعصرة ، دوي نيشان الواشمة ..

- مسيرة [ماحكراتش على الكلمة لي قاليها لثاني مرة ، مابغاتش تبقى طول معاه ، لا هي عندها الجهد وحتى هو كيبان ليها ما عندو صبر ] :

انا ودارنا نبقاو معاك ، فحمايتك تحت جناحك ، قراب ليك وتحت عينيك ومعاك فدار وحدة ...

- جلال [تقاد فالݣلسة ، ملامح وجهو باردين مكتعرف شنو كيدور ليه فراسو ] :

دابا أنت ، ضايرة هاد الدورة كاملة ، باش دخلي ليا مع العظام ..

- مسيرة [ ببرودة كثر منو وبإبتسامة على وجها] :

علاش شكون انت أصلا ، باش ندخل ليك مع العظام ... وانا كونما سميتك لي سمعتها من عند داك بوسوالف ، ݣاعما نعرفك واش كاين على وجه الكرة الأرضية ..

- هادي اقل حاجة ديرها ، بيما انو خوك قال بلي منصور مقادش عليك ، على قبل مكانتك ... يعني حنى دابا فحماك وعارك شايلاه امولاي جلال ، فاش يتشد منصور ومايبقاش حتى خطر على حياتي وحياة عائلتي ديك ساع انمشيو بحالنا ..

- جلال [ هاز حاجب ومنزل الثاني] :

وإلى مابغيتش ؟

- مسيرة [ صغرات عينيها] :

ماشي ديالك هادي ، مامعرفش عليك تسمح فبنادم لي دار فيك الخير ، هادي خطية غادي نتحاسب عليها ، حيت درت لي مخاصوش يدار وحطيت راسي ، فعش ديال النحل .. واش فخبارك واحد الحاجة ، عمري فحياتي مندمت على شيحاجة درتها ... حتى لهادشي لي درت ، ندمت على نهار لي قاليا راسي سيري لديك الدار ، وسمعي لي مخاصوش يتسمع ، وندمت حيت هدا [ أشرات لقلبها] مطاوعنيش ، وجايا باش نعلمك حتى صدقت فمالونها هي ..

- جلال [ وقف] :

إلى ساليتي البرية ديالك ، تݣدي تنوضي نوصلكم ..

- سراج [ موجه كلامو ليه ] :

بلاما تعدب راسك ، أنا غادي نوصلهم ... هلال يمشي معاك ..

- جلال [ مجاوبوش هز نظاظرو وخرج] ..

- مسيرة [ موجهة كلامها لسراج ] :

شفتو مجاوبني لا بلا لا بيااه ؟؟!

- سراج [ وقف] :

علاش انت خليتي ليه فين يجاوبك .. قررتي وخططتي لراسك .. انا انتسناكم على برا .

- خرج هو وهلال دقة وحدة ، هلال مشا مع جلال ... اما سراج تسناهم حتى خرجو ، ركبات حداه مسيرة والبنات اللور ..

________________

- هلال [مغوبش] :

دخلات ليك لعقلك الهضرة لي ݣالت ..؟

- جلال [ مغوبش] :

دازو على يدي بزااف ، كنݣد نفرز بين لكداب ولي كيݣول الصح ، هي من نوع لي فاش كتحصل ، كتولي غيد دخل وتخرج فالهضرة ..

- هلال : باش عرفتيها ؟

- جلال [ عينيه على الطريق] :

فلحظة وحدة كتقلب ، فاش كتكون كتهضر بصح ... كدوي عادي ، وفاش كتكون كتكدب ، كتولي تلبقها من كل جيه ، كونما جاتش منها كانت اتجي مني ، وانا كنموت على الحاجة لي كتكون مغلفة وضاير بيها الشوك ... كنبغي نحلها على خاطري ، وديك خيتي مغانعرفها علاش مطوية الى ما كانتش تحت عيني ..

- هلال :

وفاش كيهمك تعرفها علاش مطوية ؟

- جلال [مخرج يدو من السرجم ] :

مزال عندي الشك بلي جايا من جهة منصور ، وهاد الحريرة كاملة دايراها هي وياها ، باش تكون معايا فنفس البلاصة .. داكشي باش خاص تكون تحت عيني ، الى تأكدت مزيان بلي مابينها وبينو والو ... أندير لازم ماشي جلال لي يخوي بشي حد دق باب دارو ..

- ختمها بهاد الجملة ، وكملو طريقهم للفيرما ..

- غاديين فطريق .. طالق الموسيقى بصوت ناقص ، حتى هرس هاد الهدوء كلامو ..

- شحال وانت كتعرفي كريم ؟

- مسيرة [شافت فيه] :

11 عام دابا .. أنت كنتي راجل ختو ياك ؟

- سراج [هز حاجب ومهبط الثاني شاف فيها ورجع ركز على الطريق] :

كيبان ليا عاود لي كولشي ؟

- مسيرة [رجعات شاف فطريق] :

مكاين مايتخبى ، أنا كريم كنعرفو سينين هادي ... وكنعرف مزيان بلي ختو أكبر سيكوپاطية على وجه الأرض ..

- سراج [شاف فيها ، هاز حجبانو بإستغراب من صراحتها] ..

- مسيرة [شافت فيه] :.

مالك كتشوف فيا ؟ مالي كذبت كنقوليك لي كاين ... راه واخا كون بقيتي مزوج بيها انقوليك لي كاين ، انا مكندخلش وماشغليش ، ولكن كنقول لي شافت عيني .. مكاين لي كره كريم فدار باه قدها هي ، هي لي خلاتو يهز حوايجو ويختار يعيش مع مو وهو عندو 15 عام قدها هي ، واخا كانت فايتاه ب 3 سنين ولكن كانت العافية الكحلة ..

- سراج [ببرود ] :

أنا مكانش فخباري هادشي ..

- مسيرة [ تقادات فالݣلسة ] :

انت عارف فؤاد مفارق مع مرتو شحال هادي ، ومرتو مشات تزوجات عاشت حياتها ، وهو بقا مع ولادو ... بنتو خرجات ليه من الجنب ، السيدة مفششة قارية فبرا ... كتموت على راسها ومايمكنش تشوف شي كد حسن منها ، وخاصها تنكدها على كولشي ، كانت ديما كتنوض الصداع غير باش باباها يضور فكريم ، وداكشي لي بغات كتوصل ليه ، داكشي باش كريم بينو وبين باه الاحترام وبس ... مكايخليهش يدخل فحياتو ..

- فاش دار 15 عام مشا عاش مع مو ، عاد حياتو رجعات مزيانة ... ماماه كانت ساكنة فسطات ، داكشي باش قرا تم وتعرفت عليه انا فاش كنت كنقرا فالباك ..

- سراج [بتعجب] :

وكيفاش هو فايتك ب عامين مافهمتش ؟

- مسيرة [خسرات سيفتها ] :

بسباب ختو ، لي كانت منغصة عليه حياتو ... ضوبل واحد العام فسابعة ، وعام فالكاطريام ... بمسبتها مسكين ، مارجع كيقرا مزيان حتى ولا عند مو .. شوف اش دارت فخوه خلي انت ، بيني وبينك دار ليك ربي تاويل ديال الخير ..

- سراج [دوز يدو على شعرو وخرجها من السرجم ] :

حتى فات الفوت ، منين كتهرس فيه شيحاجة صعيب ترجع ..

- لوخرينات اللور كيسمعو وساكتين ..

- مسيرة [بملامح جدية وصوت هادئ] :

لي متهرس فيه القليل ، تهرس فيه الكثير ... الدنيا هكا دايرة ، باش تعطيك خاصها تاخود منك ، وباش تفرحك خاصها تهزك حتى لسما وتخبطك ... حتى حاجة مكتجي بساهل ، هدا مجرد إختبار من عند الله ... واش انقدو عليه ونصبرو ، ولا انفشلو ونݣلسو للأرض ... شفتي كون كان مكتابليك تكمل معاها حياتك ، راه والله واخا طير وتنزل أتبقى معاها ..

- سراج بحال الى كان خاصو غير تقطة ويفيض ، بحال الى كان كيتسنى علامن يفرغ ، واخا يكون هاد الشخص يلاه يوماين باش عرفو ، واخا يكون ضايرين بيه الشبوهات كان باغي يفرغ ويرتاح .. خصوصا هاد الهضرة لي ايݣول الى عاودها لوالديه ، جملة وحدة ايݣولو ليه أنت لي بغيتيها نهار الأول ..

- سراج [ سايݣ وكيدوي ، بحال الى هاضر مع راسو ] :

أخيب بلان يݣد يوقع ليك ، هو تبغي شي واحد لي يكون كيبان ليك ملاك كيتمشى على الأرض ، تبغي اي حاجة فيه ماتشوف غير هو ... تبدا تحلم تبني معاه حياتك ، توݣف فوجه الناس على ودو ، أنت لي الزواج مكانش ضارب ليك فمخك ، تولي باغي غير إيمتا تجمع انت وهو ..

- ݣاع العوايد ديالك الخايبة ، حيدتيهم من لاليست ديالك ، على ود إنسان غير دارك فيدو ، تبدل 180 درجة ، كتولف تشمع بلي راجل منين كيتزوج كيتبدل على مرتو ، انا طرا ليا العكس ... الملاك لي كانت معايا ولات وحش ، كتاكل فيا نهار على نهار ... انا لي حاس بشمتة حتى واحد مغايحس بيها من غيري ..

- مسيرة [حسات بيه بزاف ، ويمكن هي أقرب شخص تحس بيه ، تنهدات تنهيدة طويلة ونطقات ] :

واش محاولتيش تديها عند شي طبيب تعالج ؟

- سراج [ ضحك بإستهزاء] :

وعلاش هي غير مرة ولا جوج ، وراه بزاف ديال المرات ... ولكن معامن غادي دوي ، وليت كنشوف راسي غادي فالخسران ، وليت كاره ندخل لدار تخايلي ... وليت كنفضل الخدمة ومنرجعش ، وحتى الخدمة مامرتاحش فيها ، كل شوية ليزاپيل عادية وليزابيل فيديو ، عرفتي شنو ... بعد المرات الشيطان كان كيلعب ليا براسي ، كنݣول نقت/ـلها وندوزها حبس ، ولا هادشي لي عايش ، ولكن كنرجع ونعل الشيطان ..

- الحل لي بقا ليا هو الطلاق ، وداكشي لي درت ... واخا رتاحيت شوية ، حيت واحد الحمل تحيد ، ولكن العافية مزال شاعلة هنا [ أشر لقلبو] حيت تشمت ..

- مسيرة [ بجدية] :

شوف سمعني مزيان وحل معايا ودنيك لهادشي لي غادي نقوليك ..

- الدنيا ولا الحياة بصفة عامة ، راه مجرد إختبارات اباش تكون فبالك هادي ، راه هاد العلاقة كيها كيبان ليا انت لي ديار مجهود فيها ماشيش هي ، انت لي ضاربتي وحاربتي باش تكون ليك ... وهادشي كانت هي باغياه ، مخاصكش تشوف النص الخاوي من الكاس ، خاص تشوف النص لي عامر ... انت عندك الزهر انك مزال حي ، اما شي واحد فبلاصتك ، راه كيقلبو على الكسدة ديالو ، بغيت نقول على عظامو فالخلاوات ..

- سراج [ شاف فيها بإستغراب] :

بحالاش زعمة دنيا ت [ قاطعاتو]

- مسيرة :

واش فخبارك بلي فاوروبا ، شحال من حالات ديال الإختفاء وقعات بحال حالتك .. ومنين كيقلبو مزيان ، كيلقاو بلي بحال مراتك هي السبب ، يا كتقت//لو بيديها ، ولا كتصفيها ليه تسيفط ليه شي حد يدير معاه الواجب ، أنت راه عندك الزهر حيتاش طلقتي وتهنيتي ، ومزال خاصك ترد بالك منها ..

- سراج [ تبسم بعدم تصديق ] :

لا ماشي حتى لديك الدرجة ..

- مسيرة [ رجعات تقادات فݣلستها ] :

انا غير قلت ليك وصافي ، المهم حاول تجاوز هادشي ... حيت الى جيتي تفكر فيه اتلقى راسك بلي هكا حسن ليك ..

- سراج [ هزهز براسو ] :

نتمناو ..

- بهكا كانو قطعو كلامهم ، حتى وصلو لجديدة ، عطاتو شريهان لادريس ... وصلهم حتى لباب الدار ، طوموبيل جديدة على الحومة ، من غير طوموبيلة كريم مكانتش طوموبيل أخرى واعرة كدخل للحومة ، البرݣاݣة غير هوما شي كيشوف فشي ويتغامزو غير بالعينين .. نزلو البنات ، اما مسيرة قبل متنزل شكرات سراج ، لي بقا كيشوف فيها بشك ومشا ..

- فتحات مسيرة الباب ، دخلو البنات ..

- مسيرة [كتعيط ] :

ماما فينك ..

- سعاد [نباتها من البيت لاخر] :

انا هنا ، رجعتو ... أجي نشوف شنو خديتو ... سبقات مسيرة هي لولة ، تابعينها البنات ، اول ما كانو وسط البيت تسد بابو ، ضارو كتبان ليهم سعاد لي سدات البيت ومعزوزة خارجة من ورا الخامية هازة واحد الݣصبة فيديها ..

- معزوزة [ببحة باين عليها كبورية عمرها] :

جيتو مرحبا مرحبا ، أتبارك الله على رباعة الشلاهبية ..

- مسيرة والبنات وحدة كتشوف فوحدة ..

- مسيرة [بإستفهام] :

أش واقع أمي [مع كملاتها نزلات عليها معزوزة بشحطة للفخاض خلاتها تنقز من بلاصتها ] :

هادي ابنيتي اول وحدة ، باش تعلمي تكدبي [نزلات عليها بثانية] وهادي ابنيتي باش تبقاي تݣدبي بوجهك حمر ..

- مسيرة [ هربات كتغوت تابعاها معزوزة ، اما لبنات صندالة سعاد كانت كافية وموفية معاهم ، ضربة فسكينة وضربة فضفاء وضربة فسندس ] ..

- صفاء [ كتغوت مكالية على وجها] :

الوجه لا اماما هالعار ، يلاه سلات ليا البومادا ديالي ، غير لمصاصط اماما المصاصط صافي هالعار ..

- سعاد [ كتهز يديها حتى للفوق وتنزل عليهم ، مكتشوفش قدامها ] :

انا ديروني ضحكة ابنات عباس ، دايرين ليا قناة ، وحاكسن الفلوس الصحيحة لي دير ليكم مشروع على قدو ، وتصورو منو طرف ديال الخبز مرتاحين ... كتقلبو على خليان دار عشتكم ...

- مسيرة [ معزوزة بردات فيها جنونها خلات غواتها ربي لي خلقها ، حتى نزلو دموعها ] :

صافي امي هالعار ... الله يعطيك حجة فمقام النبي راه جنابي طابو ، براكة [ يد كتبرد بيها ويد كتمسح فيها ]

- معزوزة سخفات ، رجعات بللور ݣلسات على الفوتوي لي فبيت سعاد ..

- بنات الحرام ، الشلاهبيات بحالهم بحال باهم تريكة وحدة ... باغيين تسيفطونا للحبس نضربو العدس ، كون عندنا امصارنو بعدا بلا حشمة بلا حيا ، يكدبو فعينينا ، انديرو محال نبيعو سيديات القدام ، الله يحفر لجدكم الجدر وطاطيرة والمعدن كاملين ، نوري انا لحمار تاع بوك الكذوب بشحال كيطلع ..

- مسيرة [ ݣالسة مقنتة كتحك فلحمهة ، كاع لحمها ضرها بضرب ، كتبقلل بعينيها ويد كتمسح بيها عينيها وخناينها ] :

فعمري 28 عام واش انا مزال ديال الضرب ..

- سعاد [ خنزرات فيها ] :

والله يابوك ، وتزيدي كلمة وحدة حتى نجي نكمل عليك بالله ، نبرد فيك هاد الغدايد لي فيا ... لا انت لا هاد خياتي ، كانو ب3 بيهم مربعين حدا القنت ديال الماريو دموعهم نازل من حر الصندالة لي عطاتهم سعاد ..

يتبع...