روبي ڤيريدجو الجزء السابع (الفصل الثاني)

- معرفة اللغة تجعل كل شيء سهل ..

كذلك في الحب ، كلما أتقنت لغة نفسكِ و لغة شريكك كان التواصل بينكما أفضل ..

- في الغيرة ...

أنا لا أعرف أهلك ولا أصدقائك، كل ما أعرفه أنك ملكي وحدي .

الــفـصـل الثـاني : فـي قـبـضـــتـه

- ݣالسة على برا ، حاطة رجلها على واحد الكرسي وكتخمم ... مشا بالها لديك الليلة ، لي مابغاتش تنسى ليها نهائيا ..

فلاش باك ..

- بعد عليها عينيه لي كانو بحال الجمرة شاعلين ، صدرو كيطلع وكينزل ... عاد وعى على راسو شنو دار ، علاش وكيفاش ... هو لي عمرو مارغم على شي وحدة تكون معاه .. وعمرو ماحط يدو على شي وحدة بلاما تبغي هي ، التجارب لي دوز والعلاقات لي دوز ، سوى كانت عابرة ولا جدية ، كيكون الشعور متبادل بينهم بزوج .. عمرو رغم على شي وحدة تكون معاه بزز او تعاشرو جسديا بزز ، بالعكس عمرو طاح فهاد الموقف ..

- يكون حيت ستفزاتو ، ولا حيت تحداتو .. حيت بغا يعاقبها ، هادشي لي خلاه يتصرف بهاد التصرف .. من معرفتو لمسيرة ، كان متأكد بلي اتخلق مشكيل ... كان كيتسنى ردة فعل لي متوقعها ، هي ضربو .. ولكن هادشي لي كيشوف قدامو بين ليه العكس ..

- كانت كتبان مهدنة باردة ملامحها جامدين ، حتى تجاوب متجاوباتش معاه نهائيا ، بحال شي حجرة محطوطة مافيهاش الروح .. شوية بشوية بدات كترسم إبتسامة إستهزاء على وجها .. رجعات خصلة لورا ودنها ونطقات :

- هذا هو جهدك ... [هزهزات براسها] طيحتي نيڤو صراحة ، متوقعتهاش منك .. شافت فعينيه ] شنو مالك تصدمتي .. ياكما بغيتي تعاودها باش تأكد ، الصراحة بقيتي فيا ، حيت ضيعتي غير طاقتك ... شفتي هذا [ أشرات لقلبها ] لي غايحس بديك البوسة جامد ... بحال مولاتو [بقات كضحك]

- صدمتك حيتاش مدرت حتى شي ردة فعل ، أممم باينة فعينيك ، ندير ردة فعل الى كنت فعلا حسيت بشيحاجة ، ولكن انا ماحسيت بوالو غير رتاح ... [حطات يدها على صدرو مطبطبة عليه ] انا أصلا مكنتش غادي نقول والو ، حيت ماشي شغلي ومكايهمنيش ، هادشي لي درتي ضيعتيه غير فالخوا الخاوي ..

- جلال [ تبسم ، وعينيه مفارقوش عينيها ] :

غير كيبان ليك الواشمة غير كيبان ليك .. هز الصينية وحطها ليها بين يديها ، مأشر ليها بعينيه للباب ..

- مسيرة [بلعات ريقها ، حدرات راسها وخرجات ] ..

_____________________ الحـــاضـر

- سكينة [جرات الكرسي وݣلسات حداها ، مدواتهاش حاضياها بعينيها] :

مالك ياك لاباس ؟

- مسيرة [شافت فيها ، تنهدات وتقادات فݣلستها ] :

الأحد الجاي عندنا روبو ، غادي نزلو لكازا عند كريم ... على قبل الحلقة الجديدة ..

- سكينة [تبسمات] :

وأخيرا ، الضوسي واجد كيتسنى فيك غير انت ..

- مسيرة [تبسمات بخبث] :

وايلي واش ضوسي عامر ولا خاوي ، بعدي ليا غير على دوك ديال برا مكاينغمونيش اصاحبتي سبحان الله ...

- سكينة [ ربعات فوق الكرسي مقابلة مع مسيرة ] :

ودابا سمعيني وحلي معايا ودنيك ، هاد خونا يلالة كانو زمان كيقلبو عليه ، كيعيطو ليه الضبع ... حيت اكبر شلاهبي على وجه الارض .. المشكل خونا مكايعرفوهش بوجهو .. عارفينو غير بهاد السمية هادي ..

- مسيرة [ كتسمع ليها ] :

وشنو بلانو هدا حتى هو ؟

- هذا لافير ديالو بوحدها ... كيخدم غير تحت الدف ، كيدور بصحابات الصالونات ، حيت هوما لي كيجتمعو عندهم العيالات بزااف .. كيطلق الكل\\بات ديالو تم ، كيحط عينيه غير على البنات الصغار .. من 15 ل 18 عام .. اما صحابات 19 الفوق لا ..

- عندو واحد الڤيلا فالخرجة ديال بني ملال ، وااعرة .. هاديك راه ماشي فيلا راه قصر .. ايوا يلالة كيستهدف الخليجيين ، فالأنترنت ، كيتعرف عليهم ويستدرجهم للمغرب .. كيستاضفهم فالفيلا ديالو .. وكيجيب دوك البنات لي صغارات دايرهم بحال الجاريات ..

- مسيرة [مصدومة] :

بلاتي ، ولكن كيفاش واش كيخطفهم ولا كيفاش مافهمتش شوفي سيري معايا وحدة وحدة ، حيت راه عقلي حبس معاك ... كيفاش حتى كيدي هاد البنات ؟

- واش والديهم مكايسولوش عليهم ولا شنو ؟ مافهمتش ؟؟

- سكينة : سمعي مزيان ، دابا هو كيستهدف الصالونات كيف قلت ليك .. كيسيفط ليهم البرݣاݣات ديالو .. وعرفتي الصالون كيجيو ليه البنات ، البركاكة كتبقى تعاود على بنتها لي سيفطاتها للخارج ، وخدمات ودارت الدار وطوموبيل ...

- مسيرة : مابقاوش كيقولو الخليج ولا الخارج ؟

- سكينة [جمعات شعرها لي تحل ] :

لا مابقاوش ، حيت قضية الخليج ولاو الناس كيتخوفو منها ، عارفات بلي ولاو وسيطات ديال الفساد فهمتي ... دابا ولاو كيقولو الخارج ... وعرفتي البنات دابا خصوصا لي مامعمراش عقلها بالقراية ، كتسمع الدار طوموبيل الفلوس ... كتبغي حتى هي تكون بحال .. كيبقاو يسولو كيفاش وبشحال ..

- كتاخود لادريس ديالهم يالالة ، وكتمشي عندهم لدار ، وتهضر مع والدين البنت وتعمر ليهم راسهم ، وتجيب التقضية فيديها ، كتجي محملة ومجملة ، الناس كيشوفو داك الخير كيطمعو مساكن ، كيقولو الى سيفطنا بناتنا حتى حنا نديرو نفس الشي ..

- وفاش كتقوليهم بلي السيد كاين لي ايتكلف ليها بمصاريف الطيارة ، وكاين في تكون ... وراه هو لي ايقاد ليها الباسبور صاافي كيتحلو عينيهم على 10 ..

- الناس كيحطو تقتهم كاملة فسيدة ، وكون كانو كيفكرو اشوية ، ايعرفو بلي داكشي غير كذوب ... نقولو بنت مولات 18 ساهل تمشي ومولات 16 عام كيفاش دارو ليها ... فاش اتخدم أصلا مولات 16 الى ماخدمات فديور .. وهي ماعندهاش شي نيڤو فالقراية ..

- مسيرة : وراه هادشي فاش كنشوف انا ... شي والدين ياربي تسمح ليا منهم والله مكايخدمو عقلهم ..

- سكينة : ودوك لي مخصوصين مساكن فهمتيني ، ايوا صافي كدوز ديك الفترة ديال التمثيل ، زعمة راه كتجري ليها فالوراق ... وكيمشيو معاها حتى للمحطة .. وكتقوليهم بلي راه هي اتكلف بيها من المطار لهيه لا هي لا السيد ، وكيجي السيد راجل كبير فالعمر كيتيقو ، وهو راه كيديها من المحطة للبني ملال نيشان ، كيحيدو ليها التيليفون وكولشي ..

- مسيرة : ومن بعد فاش كتوصل لتم ، شنو كيوقع واش سادين عليهم ولا كيفاش ؟

- سكينة : اه سادين عليهم ، الدار كلها كاميرات .. البق مايزهق ، كل ليلة كتكون جلسات ، بحال جلسات وناسة تماما ... كيلبسو البنات كساوي طوال ، عريانين من جهة الصدر ... لي شعرها زعر كيردوه ليها كحل ، كلهم كيحلو ليهم شعوراتهم .. حيت الخليج كيميلو لهاد اللون ... ويزرزروهم جوالق مدهبين ... ومكاين اشيشة ، الشراب وشطيح ..

- ولي عجباتو شي وحدة لا كيهزها للبيت ، يدير معاها اللازم .. وضبع شاد فلوسو ..

- مسيرة : وفين يبان السعودي هدا .. عرفتي قسما بالله الى لحمي بورش عليا ..

- سكينة : فالأيام اللولة ... الوالدين كتوصلهم واحد البركة ، ولكن من بعد كيتقطع الاتصال .. وهي غادية ، ونزيدك ، فرضنا مثلا شي واحد عجباتو شي وحدة ... كيشريها يالالة من الضبع ويديها معاه للخليج ، حتى يشبع منها ويلوحها ..

- مسيرة [ شافت فسكينة] :

هادشي منين عرفتيه انت ، مايمكنش هادشي كامل تكوني جبدتيه من الپيسي غير ݣري ..

- سكينة [ هزهزات براسها ] :

لا ، ماشي غير من پيسي .. انا كنت كنسمع على هاد الضبع بلي مامزيانش ، وبلي عندو واحد الحفرة [ البار] وسمعة ديالو دايرة بوم ... ولكن لبارح بليل جاني واحد الميساج فالأنستغرام ..

- مسيرة : من عندمن ؟

- سكينة : واحد السيدة ، مابغاتش تقول لا سميتها لا حتى معلومة عليها ... قالت بلي هي كانت من البنات لي كان شادهم الضبع ، تخايلي معايا ... 8 سنين مشافتش عائلتها ..

- مشات من دارهم عندها 17 عام ، ومشافت دارهم حتى ولات عندها 25 عام ..

- الزهر لي عندها من دون البنات ، انو كانت عندها بكارة مطاطية ... وݣاع لي كان كيبغي يعاشرها مكايقدش ، يحسابليهم بلي هي ماشي بنت .. ولكن هي كان خاصها تدخل طبي ..

- وبقات على ديك الحالة وضبع مابغاش يطلقها خاص تبيع بيه ، وزهر الثاني لي عندها هو الضبع مكايبغيش يسيل الدم .. داكشي باش خلاها ... حتى دارت 23 عام ..

- جا واحد الخليجي ، شافها وبغاها ، قالت بلي كانت زوينة وعاطية العين ، كولشي فيها زوين ... شافها ولا كيموت عليها ... وشراها من عند الضبع ، لي كان حتى هو باغي غير يتهنى منها ..

- فاش داها الخليجي معاه ، وبغا يعاشرها لقا نفس المشكل ... وعاودات ليه بلي اي واحد كانو كيدخلو عليها الضبع مكايقدش يقرب ليها ... منين داها لطبيبة قاتليه بلي راها مزال بنت ، غير خاصها تدخل طبي .. ايوا السيد ناض وتزوج بيها ، حيت فعلا كان كيبغيها ..

- وصدق معاها ولد الناس ، عامين دازت عاد هبطات للمغرب ، مكانتش قادة توصل لدارهم حيت كانو تحولو من ديك الدار ونمرة تبدلات ، بقات كتسول فجيران حتى وصلوها لدارهم ..

- داكشي باش دارت كونط وسيفطات لينا مسياج ، وعاودات ليا كولشي لي كيوقع تم .. من الاول حتى للأخر ..

- مسيرة [بتساؤل] :

مقالتش ليك كيفاش داير هاد الضبع ؟

- سكينة [هزات براسها ] :

قالت بلي الى شفتيه متقوليش فيه هادوك الفعايل ، وبلي شي واحد كيكون فالپلايك ديال الإشهارات بزااف .. ولكن سميتو مكتعرفهاش حيت كانت كتشوفو غير فالپلايك شحال هادي ..

- مسيرة : مقالتش ليك ديالاش هاد الإشهارات ؟ كتبقاي تقطري عليا فالهضرة اسكينة دوي نيشان ، سرسبي ليا كولشي وانت كديري ليا بحال صحاب الواتساب ، كلمة تابعة ختها ، طلقي كولشي دقة وحدة ..

- سكينة : وراه انت لي كتقاطعيني ماشي انا لي مكنكملش ليك باااز .. المهم بلايك ديال طوموبيلات ، الإشهارات ديال طوموبيلات هادشي لي قالت ، يكون قاتليك فثلاثينات من عمرو ..

- متعطيهش بلي داير هادشي كامل ، وبلي هو لي كيقلبو عليه ، وهي اصلا مكانتش عارفاه مسمينو الضبع ، حتى سمعات الخليجي لي تزوج بيها عيط ليه بيها ..

- مسيرة [كتفكر ] :

وعلى هاد الحساب ، هذا راه خاصو تفكيير مزيان ... ماشي غير ضوسي بوحدو ، الى حطينا ضوسيه مغادي نستافدو والو ... خاصنا داكشي لي كيوقع فالڤيلا بصوت والصورة يتحط ..

- سكينة [نزلات رجليها ، حيت هاد القضية خرجات ليها من بالها ] :

كيفاش غادي نديرو ليها ..

- مسيرة [ هزات تيليفونها شعلاتو ] :

دابا يلاه 7:30 مزال الحال ، اجي عاونيني ..

- سكينة [بإستغراب ] :

فاش ؟

- مسيرة : وغير تبعيني وسكتي .. دخلات مسيرة لدار تابعاها سكينة ، معزوزة كانت كتفرج فواحد السكيتش فالمغرب ديال رمضان معاودينو ، وسعاد فالكوزينة ..

- ماما فين هو الفاخر والمجمر ؟

- سعاد [ كتنعت ليها ] :

راه تحت داك الكرسي لي حدا الثلاجة ... خدات المجمر والفاخر ، شعلات البوطة دارت عليها فاخرات ... غير شعلو دارتهم فالمجمر ، سعاد مقابلاها عرفاتها كتخطط فشيحاجة ، كولشي عارفها غير كتقلب على الفاخر والمجمر ، راه شيحاجة كدور ليها فراسها ..

- سعاد : والله يهديك ابنتي هادشي لي غانقوليك ..

- هزات المجمر خرجاتو على برا .. باش يشعل ، دخلات للبيت وسكينة بحال ظلها ... مدات ليها واحد الصينية بكيسانها صغار وبرادها مغلفين بواحد البلاستيكة ... خرجاتهم على برا ... هزات واحد اللحاف ، او واحد 3 ديال البواطات لي كانو وصلوها فاش كانت فجديدة ...

- خرجات تحت أنظار صفاء لي دايرة ماسك لوجها ومعزوزة ، لي متبعاها بلعين ..

- ختك عاوتاني علم الله اش كتبلاني ، هاد المرة جابتنا لولاد السعيد المرة جايا اتدينا لغينيا ..

- صفاء ماقداتش تجاوبها باش الماسك مايخسرش .. هزات ليها براسها ... كتخمم لأش كتفكر مسيرة دير ..

- على برا فرشات داك اللحاف ، سيفطات يكينة جابت ليها مخدة ، ݣلسات عليها مقربة منها المجمر لي بدا كيشعل .. غافلة على عينيه لي كانو مقابلين معاها ، كيرجع السينتة لور ..

انا مكنعمرش أتاي من غير الى كانت طقوس خاصة ، وعلى مبان ليه جا وقت الطقوس الخاصة ، مدامها من ݣبيل وهي داخلة خارجة ، كتحط وتوجد لݣلسة صحراوية وهادشي عارفو مزيان ، بحكم زيارتو للمناطق الصحراوية ، اذا راها كتخمم فشيحاجة ، علاش عندها طقس خاص ... مايمكنش تكون غير متعة ، ولا محبة لهاد الطقوس ...

- لأنو منطقة وحدة لي عندهم هاد الݣلسة عادية وهي أهل الصحراء ، راسو كان خدام وهو حاضيها من خلال التجارب ديالو لي دوز .. 18 سنة دوزها فسويسرا كلها ، درس الهندسة الزراعية ... وكان أستاذ كيدرس الكمياء ..

- هادشي كولشي لي دوز خلاها يوصل لهادشي لي فيه هو ، خلاتو يعرف ناس اشكال انواع .. ويعرف كل واحد طينتو كيدايرة وفاش كيفكر ، داكشي باش مسيرة عارفها ومتأكد 100/100 بلي مخبية شيحاجة ... وهاد الحاجة غادي يعرفها غادي يعرفها ..

*** بني ملال ***

- صوت السقيل ، من برا ... ضواو ديال فيلا كلهم شاعلين ، .. لي ݣارد ضايرين بيها عينيهم كانو كيدورو يمين وشمال .. أما الداخل كان غير على برا .. صوت الموسيقى كيتسمع ..

- طوموبيلات فخمة واقفين ، الجردة كبيرة كيتوسطها بيسين كبير ، صوت ضحكات جايا من الداخل .. الفيلا كانت ضايرة بسواري ، او واحد الخصة فالوسط .. بحال فيلات ألف ليلة وليلة ..

- اما الداخل كان غير ، صالون كبيير بطول وبالعرض ، مفرش فراش خليجي بالݣرونة ... الموسيقى خدامة خليجية ، رجال ݣالسين ، بفاقي بيضة .. حاطين حداهم الشيشة ومشروبات كحولية ... عينيهم خارجين فالبنات لي كانو كيشطحو قدامهم ..

- لباسهم كان بحال بحال ، ولكن الألوان مختلفة ، كساوي طوال مع فتاحي فجناب مبينين على رجلين بيضين ، درعان عريانين ، كساوي لاصقين معزولين ، كيبين مفاتن دوك البنات ، شعورات مطلوقين لي شعرها طويل ولي شعرها قصير ، ولكن لون واحد هو الاسود عندهم كاملات ..

- صباغة حمرة فظفران ديال ليدين وديال الرجلين ، جوج سلاسل فالعنق والخلخال ، مع خواتم وبراسليات ..

- أغنية راشد الماجد كانت كاصرة الدنيا ، وعلى انغام [ يودان داني لي داني داني وهاويلو ] كيتمايلو ... الى شفتيهم تقول خليجيات ، ولكن كلهم جامعهم عرق واحد مغربي ..

- الطبقة الفوقانية ، محطوط كرسي ، ݣالس فيه ... داير رجل على رجل ، هاز شيشتو وعينيه على الطبق التحتاني ... مقابلهم لا وحدة تغلط ومديرش داكشي لي مطلوب منها .. خدا نطرة طويلة من الشيشة ديالو ، دافع بدخان الفوق ..

- هز تيليفونو ، وبصوت رجولي جداب نطق :

خاصنا الجديد ، القديم مابقاش واكل ... [سكت من بعد مدة نطق] شوف كيفاش دير ليها ، الكرة عندك دابا .. [قطع الإتصال حاط التيليفون على الطبلة لي كانت حداه ] ورجع وجه عينيه للجلسة لي كانت التحت ..

_________________

- كتكب كاس ، وترجع تخويه فكاع الكيسان ... وتردو للبراد ، وترجع تكب فكاس وداك الكاس ترجع تكبو فكاع الكيسان وهي غادية ..

- سندس : اتبقتي مع ديك الصينية وداك البراد حتى لغدا بحال هاد الوقت ..

- مسيرة [هزات صينية صغيرة حطات فيها جوج كيسان ] :

- هاكي دي لعفاف ولخالتي نجية .. هزات سندس الصينية ، وداتها ليهم فطريقها كان نازل مع دروج ، قشعها غادية بصينية .. حطاتها لنجية وعفاف ..

- سندس : خالتي هاكي دوقي اتاي الصحراوي من يدين مسيرة ..

- نجية : الله يرضي عليك أبنيتي ... تبسمات لعفاف وخلاتهم وتمات راجعة ، يلاه اتحل الباب سمعات صوتو لي وقفها ..

- هلال [عينيه على ظهرها ] :

حنا ماعليناش الله نشربو أتاي ؟

- سندس [ضارت وتبسمات ليه ] :

مايحسابليش كيعجبك اتاي ، حيت لاحظت فالفطور كتشرب القهوة بزاف ، عمري شفتك كتشرب أتاي ..

- هلال [مصغر عينيه ، كيشوف فعينيها لي كانت فيهم نظرة خاصة ، الإبتسامة الصغيرة لي على شفايفها ] :

إلى مصاوب على حقو وطريقو ، ماعنديش مشكيل ندوق ..

- سندس : واخا انا نجيب ليك كاس .. حدرات راسها فتحات الباب وخرجات ، وجها مزنݣ وقلبها كيضرب 180 درجة ، ماعرفاتش علاش كيوترها وصوتو كيخلي البرودة الطلع معاها ، عمر شي واحد أثر فيها بحال هلال ... عينيه كيبان فيهم شيحاجة غريبة مقداتش تفسرها .. وصلات عند ختها ونطقات :

زيدي واحد الكاس أخر بغاه هلال ..

- مسيرة[طلعاتها ونزلاتها] :

هلال حرفية أممم ... واخا اهلال واخا .. هاكي دي ليه .. خدات سندس الكاس ورجعات للڤيلا ، لقاتو ݣالس وقفات حداه مادة ليه الكاس .

- هلال [هز عينو فيها ، خدا الكاس من يدها ، رشف منو رشفة وعينيه مامفارقينش وجها ، هزهز براسو ونطق ] :

بنين الله يعطيك الصحة ..

- بغات تقوليه بلي ماشي هي لي صايباتو ، ولكن شوفاتو كيوتروها ، فضلات تحدر راسها وتمشي ..

- على برا ، مدات لسكينة كاسها ، وصفاء كاسها ... حات سندس وعطاتها كاسها ..، كانت لحظة دصمت ... حيت فعلا هاد الكاس كان بنين وبرزتو ، كيخليك تمدقيه وتفضلي السكات ، باش تلددي باللحظة .. هازة كاسها كترشف منو وساهية ، مقابل معاها مراقب حراكتها ، حطات كاسها ونطقات :

- لقيت الحل ، لي يخلينا ندخلو للڤيلا دضبع ..

- سكينة [كتحك فراسها وكتفكر فكلام لي قالت مسيرة ] :

ماعرفتش واش هاد البلان يصدق ولالا ، خفت اصاحبتي غير مايصدقش لينا وحق الله ... ونصدقو واحلين ..

- سندس [ݣالسة على الكرسي بالمقلوب وكتفكر ] :

إلى بغينا نصورو الڤيديو فين غادي نصوروه ؟ هالولة بعدا ، الى خرجنا دقة وحدة أيعيقو بينا ولالا ؟

- صفاء : شوفي هو أصلا جلال غير حاضي مسيرة ، ومن الهضرة لي عاودات بحال الى حاس بشيحاجة ... يعني راه فيها ريسك وفيها خاص نحطو فلوس نيت ..

- مسيرة : من جهة الفلوس هانية ماشي مشكيل ، ولكن خاصنا شي بنات ثقة أصاحبتي فهمتيني ، منين غادي نشبرو عليهم .. وشكون لي غادي تيقي فيها وتيق فيك وتمشي للغار برجليها ..

- سكينة : راه هادشي فاش بقات ... شوفي هو قضية الفيديو ساهل حالو ، انݣعدو ليه مزيان ونمخمخو ليه .. ونصوروه بحال ديال التلفازة وغادي نلوحوه ، نݣلسو شوية وراها نلوحو واحد أخور ..

- مسيرة : وراه هادشي لي قلت ليكم أنا ، بحال نهار بانت مايا عقلتو ، اول فيديو خلق ضجة وكيفاش رقاصة فالأعراس المغربية ، حنا انلوحو فيديو بحال الى مصورنا شي حد فشي ݣليسة بنوتية .. ونبداو نلوحو فالإشعات ، جلسات خليجية بالمغرب لأفراحكم ومناسبتكم ..

- ونحطو النمرة ديال التيليفون ، وشي فوكونط .. فهمتو البلان دابا .. ولكن لي غانسيفطوهم خاصهم يكونو بخال الشكل لي غادي نطلعو فيه فالڤيديو ..

- صفاء [حطات الكاس من يديها او وقفات] :

والله اختي الى كضحكي على راسك ، عاد قلتي خاصنا شي وحدات يكونو عاطيين للعين ، وبلي داك الضبع ولا ديب ولا اشمن حيوان ، كيبغي الزين والمؤهلات ، وحنا تبارك الله لي هنا غير المضروبة بمقلة على ختها ...

- دابا ربي هادا منظر وحدة اتشطح فالجلسات الخليجية ، هادي شعرها زعر [سكينة] وانت شعرك ليموني ، انا شعري قصير واخا كحل وماشيش شي كحولية ، سندس شعرها مارو ، اما الفورما بلاما ندوي ... متعرفينا غاديين ولا راجعين ..

- سندس : دوي على راسك أختي ..

- صفاء [خرجات فيها عينيها ] :

ومالك تنكري ، زوينة هادي ، مالك عندك فورمت كيم كارديشيان ، والو السفود ني مؤهلات ني والو ، وحتى الانوثة مافيناش ... الخطة فاشلة من الأول بلاما تفكرو فيها ..

- مسيرة [ كتخنزر فيها ] :

انوض نريشك أعاشورا مافيهاش ، اطلعيهم فيا نوض نبرك على حسك حتى يخرجو فادك ..

- صفاء : نوضي مالك مارضيتيش ، أتكدبي .. راه غير حنا مسرارات اختي وفنكوشات ، شوفي حنا فنات اه منكدبش زين اختي زينات ، ولكن الفورمة والو ..

- سكينة : عطا الله الحلول ، البونج ماقال عيب ، الى مكاينينش نديروهم .. وحتى الشعر الپيروكة [الشعر المستعار] مقال عيب ، نركبوه يولي يبان بحال الى شعرنا ... اما الحوايج هادوك حالهم اسهل ..

- سندس : أممم بيناتنا البنات وحق الله حتى تحمست [ضحكات]

- مسيرة : وناخدو حتى طاطواج ، نلصقوه ... المهم خاصنا نضربو على الشعا .. داكشي باش هادشي خاصو تمخميخة ديال الصح ، غادي نأجلو اللايف حتى نشدو لي بغينا فيدينا ، وديك الساع ارا برع ..

- سندس : ياربي غير ينجح ونوصلو لي بغينا ..

- صفاء : الى داكشي لي دوات عليه سكينة ، راه ايقلب علينا غايقلب ، غايبغي يطيح على هاد الشطاحات جداد ، المهم يدير المستحيل باش يوصل لينا ، نكونو حنا فداك الوقت قلبنا على لي غايمشيو بلاصتنا ، ويوصلو لينا كولشي ..

- مسيرة : خاصنا نشوفو قضية الكاميرا اسكينة ..

- سكينة : متخمميش ، شحال هادي كنت كنعرف واحد الدري عندو مع هادشي ، عندو واحد المحال كيبيع التيليفونات فدرب عمر ، نديرو ونمشيو عندو ، غير الى كنا انزلو لكازا ، خاصنا شي عبايات وشي خمار باش مايعرفنا حد لا نصدقو ملاقيين مع داك منصور ، نصدقو واحلين ..

- مسيرة : لالا عرفت ، دايراها فبالي ... المهم حنا دابا تفاهمنا عنداكم تزلق ليكم شي كلمة قدام الدار .. يلاه نوضو تنعسو باش يلاه توجدو راسكم للطهارة ..

- عاونوها وجمعو ديك الجليسة ، دخلو كولشي لدار ... ݣلسو تعشاو بحال الى حتى حاجة ما وقعات ... أما ادريس لي غير تعشا ومشا ينعس هادي عادتو من نهار خدمو جلال ، مامالفش تمارة ... ولا كيطيح دودة بالعيا ، من ورا العشا تهزو الماعن غسلاتهم سكينة ، وخلطات على البنات للبيت سادين عليهم بابهم ... كايتسناو غدا يوصل بفارغ الصبر باش أخيرا يفوجو شوية ..

- فكازا .. فالبارطما ديال أمينة ، متكيين فصالون كيتفرجو ... بدا تيليفون وديان كيسوني ، هزاتو بانت ليها نمرتو .. رجعات حطات اليتيلفون بلاما تعيرو حتى شي إهتمام ..

- ليليا : مغاتجاوبيهش أصاحبتي ؟ يوماين هادي وهو كيسوني عليك وانت والو ..

- وديان [هزات راسها فختها ورجعات عينيها لتلفازة ] :

خلينا نتفرجو أختي الله يرضي عليك ، واش مشيت معاه للمحال واش وريتو شنو ياخود ، صافي مايبقاش مبرزط ليا مخي بتيليفونات ...

- ليليا : السيد عرضك للعشا وانت قمعتيه ، وهادشي ومزال كيسوني ليك مسكين ، وباغي يدوي معاك وانت دافعة كبير ، والله مافهمت فيك شيحاجة ..

- امينة وعينيها على التلفازة ] :

خليها على راحتها اليليا ، كيما انت أصاحبتي حتى واحد مكايبزز عليك تدوي مع شي حد ولا تعارفي ، وكيما حتى حد مابزز عليك تزوجي ، حتى هي حتارمي قراراتها ... هي باغية تكون طرونكيل أصاحبتي ..

- ليليا [شافت فيها بنص عين ] :

تحاميتو ، حيتاش باغية ليها مصلاحتها ، بغيتها تكون فرحانة ومرتاحة وراجل فجنبها ... انا حيتاش ماعنديش الولاد ، داكشي باش مرتاحة هكا ، ولكن هي عندها زوج بنيات .. خاصها لي يكون معاها ويوقف فجنبها ..

- وديان [تقادات فالݣلسة ] :

ليليا انا مرتاحة هكا مع بنياتي ، نهزهم بسناني .. وندير عليهم لي مايدارش ، مغاديش نتسنى انا راجل يوقف معايا ... الحمد لله بخدمتي بداري بطوموبيلتي ، بناتي كنقريهم وغادي نبقى هكا حتى نكبرهم ..

- بغيت مرة وحدة فحياتي ، الله يجعل شي براكة ... ياك انت كتقولي بلي المرأة ممكن تعيش بلا حب ، وبلي الحب كيجيب غير المشاكل وصداع الراس ... علاش دابا بدلتي كلامك ؟

- أنا عارفاك بغيتي ترتاحي من جيهتي ، وتشوفيني فرحانة .. ولكن انا مافياش غير خليني عفاك على خاطري .. [وقفات] أنا غادي نوض نعس باش غدا نشدو الطريق شوية بكري .. تصبحو على خير .

- مشات وديان وخلات أمينة وليليا بوحدهم ..

- ليليا [تنهدات تنهيدة طويلة ] :

حتى واحد مقاد يقول كلمة دالحق للاخر ، مافهمتش أنا والله العظيم ..

- أمينة : خليها على راحتها ، بلاما تقجري عليها .. المهم حتى أنا غادي نوض نرتاح عييت وفيا النعاس ..

- ليليا : مزال غاتمشي غدا لعند جلال ؟

- أمينة [حركات راسها بنفي] :

لا ماشي غدا ، كنحس براسي عيانة ، شتي هاد الأيام دوزناهم فشغال الدار ، نرتاح شوية وديك ساعات نشوف نحدد النهار لي نمشي فيه إن شاء الله ، يلاه تصبحي على خير ..

- ليليا [تبسمات ليها ] :

تصبحي على خير حبيبتي ..

- جلال [ بتساؤل ] :

تمشيو ولا تݣلسو لأرض ؟

- توفيق [ بإبتسامة ] :

أنا بعدا غادي منݣدش نفلت هاد المناسبة من إيديا .. حتى لهادي لا أصاحبي اتكون خايبة فحقي ..

- هلال [بإستغراب ] :

العجب مكانش عندك مع هاد الهيث ديال العرايض ..

- جلال [ هزهز براسو ] :

الحاج محمد معرفة قديمة ، منݣدش نرضها فوجهو ، عرض على كلشي ... حتى نجية وأحمد عرضهم ، وحيت أحمد مزال عيان مغايمشيش ، غاتمشي غير هي وتدي معاها الناس لي فدار لوخرا ..

- سراج [بإستغراب] :

شكون واش مسيرة وعائلتها ؟

- جلال [ ببرودة ] : علاش كاين شي حد من غيرهم ؟

- سراج [ ضرب على رجلو ] :

إيوا منين كولشي غادي نمشيو ، علاش لا ... شحال هادي مافوجنا محتاجينها انا وهلال ، ولالا ؟

- هلال [ بتباث ورزانة ] :

نمشيو علاش لا ..

- جلال [بصرامة موجه كلامو لتوفيق ] :

بلاما نوصيك ، بلاما ندوي ..

- توفيق : غير هنينا الله يرحم جدك .. بلاما تبدا .

- سراج : شفت هارون غابر ، واش مزال مسافر ؟

- جلال [هز براسو ] :

عندو شي خدمة ، هاد السيمانة غادي يدخل ... المهم انطلع نعس ، [وجه كلامو لهلال] خاص نتشاور معاك فواحد البلان على ود الوزين ، تمشي معايا غدا ..؟

- هلال [حرك ليه راسو بالإيجاب] :

إن شاء الله .. طلع جلال لبيتو ينعس ، وخلاهم هوما باقيين مجمعين ..

- هاد الصباح الجو كان زوين ، مكانش الجو بارد الشميسة سخونة ، الربيع الدخل والاجواء تبدلات ، الدنيا كلها خضرة ... قدام دار الحاج محمد تنصبو جوج ديال الخيام قدهم قداش ، سدادر بالخشب ديالهم ، ديال الموبرا فالݣرونة والبيج ... الزرابي فالݣرونة ، وطوابل .. ريحة العود كتعطي ... دارو كانت عامرة بناس بناتو ، لي داخل للكوزينة كيعاون ... ولي مقابل حالتو ، العيالات الكبار .. لي لابسة تكشيطة ولي لابسة قفطان ولا قميس ، جامعة ليه كمايمو ... مزرزرة دهوبات وكتعاون ، الݣراج الكبير ديال الدار كان محلول ، ومديورة ليه خامية فالبيض ..

- مدرقة على الطيابات ، لي بداو فتوجاد ، كل وحدة وشنو كدير ضايرين بيهم الݣوامل والفورنويات ..

- إبتسام [هازة ولد ختها ملبسينو فوقية فالبيض مطروزة ، وطريبيش فالحمر ..] :

حبيب خالتو زين ديالي .. والحنينة فليديات انبوسهم [هزات يدو باستها ، كيضحك ليها مغمض عينيه]

خاتو بيسام ، علاس دلتو ليا حانة ..

- إبتسام [ضحكات ليه ] :

حيت الحنة زوينة اولدي ، وكتحيد ديدي من اليدين ..

هاجر [كتماكي ] :

كون غير عفيتوني من هاد التجلاخ ... واش انا غير فيه ياختي ..

- إبتسام : سيري سيري ، ݣالاك لبسي وتقادي راه انت عروسة هاد الليلة انت وهاد الزين ..

- هاجر : ياختي فيا الخلعة وحق الله العظيم ، بقا فيا ولدي حبيبي ..

- إبتسام [غوبشات فيها ] :

ولاواه لاتزيدي فيه أصاحبتي ، متبينيش راه اتخلعيه .. شوف كيف فرحان وعاجبو الحال ..

- هاجر [تبسمات] :

جايا خالت حكيم ، شوية وتوصل .. مرة منخوية تبارك الله عليها ..

- إبتسام : غير خوي راسك باك ماباغيش يتزوج ... حالف بحلوفو لا تزوج .. من مي الله يرحمها ݣاليك مابقاش يطوف بشي مرا ..

- هاجر [ضارت عندها ] :

هاويلي ، ومالو ايبقى بوحدو ... انت طال زمان ولا قصار اتزوجي تمشي لدارك ، أيبقى بوحدو مجاتش ..

- إبتسام : شكيت عليك أختي ... قلت ليك باغية نتزوج ، ياك تزوجتي انت وأسماء ، وفوتوني اختي انا غانبقى مع با حتى يدفني ولا ندفنو .. الى غير على زواج الدل ، ونديه شي رعواني ماعندي مندير بشي زواج .. وعطي لباك بتيساع بلاما طوفي بيه ..

- هاجر : صافي اختي غير هنينا ماقلت والو ..

- دخلات عليهم أسماء ، كانت لابسة قفطان فتيركواز ، كريشتها باينة تكون عندها ديك 6 شهور ... دايرة شال ديال الحرير فالبيج ... لايحاه على النص فراسها ، شعرها الكحل باين .. دايرة فيدها ليسرية 3 البراصليات ... وخاتم ديال الذهب ... وليد لوخرا ، ساعة مدهبة وبراسلي ديالها مع خاتم زواج ..

- أسماء : أصاحبتي مزال ماوجدتي ݣاع اويلي ،.. وراه خاصك تكوني لتحت أصاحبتي ويلي ..

- هاجر [وقفات] :

صافي هاني ساليت .. هزات حزام التكشيطة ديالها لي لونها كان فالخضر ، دارتو .. من بعد خدات شالها قداتو ... مكانتش كتشبه لإبتسام لا هي لا اسماء كيشبهو لباهم ، عكس إبتسام كانت كتشبه للمرحومة مها ..

- خدات من عند إبتسام ولدها محمد أمين ، لي دار 4 سنوات ... عاد قررو يختنوه ..

- أسماء [جرات هاجر، كتشوف فإبتسام] :

متعطليش وݣلسي تاني عامين فوجهك عاد تنزلي ..

- إبتسام : سيري سيري ورضي الباب من وراك ..

- نزلات هاجر شادة لولدها فيدو هي وأسماء .. لي كانت كتقلب على راجلها بعينيها .. حتى شافتو ومشات عندو ..

- إبتسام ، لي اول حاجة دارتها لبسات قفطان فالحمر منبت ... يديه رقاق كيبينو ، عاد ݣلسات كتقاد فوجها .. منين سالات جمعات شعرها بمشيطة خفيفة أصلا شعرها قصير ، دارت إكسسوارات قلال ، رشات من ريحتها .. واخر حاجة لبسات صباط ميني طالون باش مايعكلهاش الى بغات تحرك ..

- هزات تيليفون وجمعات حوايجها لي حيدات وخرجات نازلة لعندهم لتحت ..

- فڤيلا جلال الإبراهيمي .. وبضبط عند دار مسيرة ، سعاد وجدات راسها ، لابسة واحد الفراشة فالپيستاج .. مع صندالة دهبية ميني طالو ، وشعرها لايحة عليه شال فدهبي ، مخرجة الݣصة ... مع نصاص ديال الدهب فودنيها ، وشرتلة لي شافها يقول ذهب ماشي پلاكيور ..

- أما معزوزة ، كانت ݣالسة هازة مرايا صغيرة فيديها ، كتكحل عينيها بالكحل البلدي ، لي خلا لون عينيها يبان مزيان ، يدها كتكحل ، ولسانها كيدور فسواك وسط فمها .. كحلات عينيها مزيان عمراتهم بالكحل ، دايرة خاتم ديال الذهب فواحد اليد حجرتو فالخضر ، أما ليد لوخرا دايرة دبالج وجوج خواتم ديال النقرة ..

- التكشيطة البيضة المخيطة بزرق توب الثليجة ، جاتها زوينة وعطاتها الضو على وجها ... اما زيف لي حتى هو كان لونو فالبيض ، زادها نخوة او وقار ..

- سعاد [بإبتسامة] :

هاي هاي هاي على خالتي ، خلاوها ماليها الى مشا الزين كيبقاو حروفو وانت تبارك الله مزال الزين ومزال حروفو .. وانا كنقول المرحوم علاش كان كيبغيك ، خدا زين عمي تبارك الله ..

- معزوزة [بصوتها الباح الوقور ، تبسمات حدرات راسها وتنهدات ] :

أحيانة أبنتي ، فين هو الزين ... الزين ابنتي كيدبال ، الزين لا زين الفعل وزين هذا [أشرات لقلبها] ولهذا [للسانها] ، أما زين الوجه كيمشي مع الليام .. الى مكان قلبك زين مكاين شاي ..

- دخل عباس ، لابس واحد الجلابة ..

- معزوزة [طلعاتو ونزلاتو ] :

هالعريس داحمان جا .. ديك الجلابة مزال مابغيتيش تحطها ، ولات تجيك مقزبة بحال الصايا ..

- عباس [بصوتو الغليض] :

هاد الجلابة عمري نحطها ، كنشم فيها ريحة الواليد ، بقات ليا منو غاهي ݣاع حوايجو صدقتيهم ..

- معزوزة : ومالي غادي نخليهم ، راه مزيان ياخود غير الرحمة مسكين الله يغطس عظامو فالجنة ..

- عباس [كيعيط ] :

- وادريس وفينك أصاحبي ، تݣول غايروحوك عريس هاد الليلة ... تم خارج دريس ، محسن وجهو ماشط راسو ، لابس سروال ديال الدجين فالكحل ، مع قميجة فالبيض ، داير عليها تجاكيط ديال الكوير فالكحل ، وسباط فنفس اللون كيبري ، ريحتو سابقاه ..

- معزوزة [طلعاتو ونزلاتو بعينيها ، بصوتها الباح لغالبة عليه نبرة الوقار ] :

هاي هاي هاي على وليدي دريس ، ومتݣول أعريس ... كضرب على الشعا ، اليوم نزوجوك ..

- دريس [كيفرنس] :

- وا كيجيتك أمي معزوزة ، ناضي ولا مناضيش ..

- معزوزة : لاواه لاواه ، زين زين منكدبوش ، أهو اوليدي الزين والقلدة بلا عقل بلا دراع راه مساويش ..

- ادريس [غوبش ] :

والخدمة خدمنا ، تمارة راه كنضربو فيها اش بغيتو مزال ..

- عباس [حط يدو على كتفو ] :

زيد زيد ، نتسناو على برا ..

- سعاد : معامن غاتمشيو انتوما ؟

- عباس : سي هلال الله يجازيه بالخير غايوصلنا .. انتوما اتجيو مع المرا وبنت ختها ..؟

- سعاد : وايه ، غايوصلنا لوسها بالپيكوپ ..

- عباس : وصافي نتلاقاو تم .. خرج هو وأدريس مخليين سعاد ومعزوزة كيتسناو فالبنات لي كانو كيوجدو راسهم فالبيت لداخل ..

- فالڤيلا الداخل ... الرجال كانو موجدين راسهم ، جلال بسروال ديال الثوب فالكحل مع سباط فنفس اللون ، وشوميز فالبيض ... كيبان انيق وكلاص ، أما توفيق كان لابس سروال والكوستيم ديالو فلون الغوز بارد مع شوميز فالبيض. أما هلال ختار يلبس سروال فالكحل مع شوميز كحلة مخطة خطوط رقاق فالبيض ... سراج حتى هو ختار يلبس سامبل سروال دجين مع ݣاط فالقهوي ، وشوميز فالموڤ داكن مخطة بالبيض ..

- هلال : انتوما غاتجيو مرافݣين .. انا غاندي معايا ادريس وسي عباس ..

- جلال [هزهز براسو كيقاد البراسلي ديالو فيدو ] :

صافي مزيان .. سبقونا انتوما ..

- هز هلال سوارت طوموبيلتو وتيليفونو وخرج ، لقا عباس وأدريس كيتسناوه ، طلعو لطوموبيل ، ديمارا هلال وشد الطريق لدار الحاج محمد ..

____________

- فالبيت .. واقفة صفاء كتكمل اخر اللمسات على وجها ، دارت الماسكارا لشفارها ، شعرها كانت مقاداه بتموجات خفيفة ، لابسة قميص فالحمر .. واخا كان واسع من الكمايم ولكن جاها فن مع البشرة ديالها ..

- أما سكينة ، ختارت تكشيطة من تكاشط لي وراتها نجية الموڤ داكنة ، تحتية ديالها من تحت فالبيض مع مضمة فالدهبي ..

- أما سندس لبسات تكشيطة فالكحل فيها وريدات بالخضر وليموني ، قميصها تحتاني فالليموني ، واخا تكاشط الدق القديم ولكن جاوهم فنين ..

- مسيرة ختارت تكشيطة فصفر ، منبتة بالحجر مع القفطان ديالها التحتاني فنفس اللون ومضمة فالصفر ... شعرها مطلوق متموج تموجات خفيفة ، مع طوانݣ طوال ... ومكياج خفيف ..

- وصلات اللپيكوب لي غايمشيو فيها ، نزلات عفاف لابسة قفطان فزرقة بلو مارين ، طالقة شعرها ولكن مجموع بزيف صغير ... أما نجية فكانت حتى هي مسوكة ومكحلة ، لابسة تكشيطة فالبيض ، مع زيف فالخضر ..

- دخلو لعندهم لدار بدات سعاد كتعيط ..

- والبنات وسربيو خلاص واش غانباتو هنا .. تحل الباب وخرجو البنات ، غير شافتهم نجية تبسمات ونطقات :

تبارك الله وصلاة على النبي ، بناتي زينات تبارك الله تبارك الله ... جاوكم تكاشط على مزيناتهم ..

- معزوزة [وقفات معكزة على عكازها ] :

دفلو فجنابكم ، [شافت فنجية ] ربي ياختي نجية واش جبتي معاك شي ساك ، بغيتك اتخبي ليا هاد الميكة نجيب معايا شي حليوات ..

- مسيرة [خرجات فيها عينيها ] :

اويلي امي ، راه فيك السكر اشمن حلوة ..

- معزوزة : ودخلي سوق راسك .. واش انت هي انا وبعدي مني لا نخبط بهاد العمود ، ݣاتليك فيك السكر ، انا انسبقكم نمشي نركب مع وليدي جلال ، مالني هبيلة نركب معاكم فديك الخرشاشة ..

- مسيرة [شدات فيها ] :

اويلي امي ، واش تسطيتي ، انمشيو كاملين مع خالتي نجية ، خلي عليك السيد ..

- معزوزة [طلقات منها ] :

وبعدي مني هاحجر العافية ، بغيتي تركبي فديك الپيكوب راه انت راه هي انا مانركبش ، انركب مع وليدي ... خلاتها كتخضر بوحدها وخرجات ، هي غادية ومسيرة تابعاها باغية توقفها .. وقفات كيبان ليا خارج من باب الڤيلا ، عينيه عليها ... مطلعها من رجليها حتى لراس ، صكاناها ..

- معزوزة [أشافتو تبسمات ليه ] :

تبارك الله تبارك الله أوليدي ، ݣلت ليهم كيشبه للمرحوم فياماتو ماتيقونيش ، لي شافك اوليدي يݣول غير رشدي أباظة فياماتو ..

- جلال [جابت ليه الضحكة ، وقف حداها وبصوت رجولي وقور نطق ] :

صحيحة شوية والفتي ؟

- معزوزة [تبسمات مبينة على سنانها البيضين المركبين ، وشفايفها المسوكين ] :

الحمد لله أوليدي الله يرضي عليك ، راه ݣلت ليهم نمشي مع وليدي جلال ماخلاتنيش ديك اللفعة الݣرطيطة دمسيرة ، ماحشوماش اوليدي ، انا لابسة ومݣادة وباغيين يركبوني فديك بيكوپ ..

- جلال [ دوز يدو فشعرو وتبسم ليها ، هز عينيه فمسيرة ورجع شاف فمعزوزة ] :

لا حشومة مجاتش ، أجي معايا ، خشات يدها فيديه شافت فمسيرة بنص عين كتقلي ليها السم ، وهي تركب معاه .. سد الباب باغي يدور حتى وقفات قدامو ..

- جلال [كيشوف فيها بإستغراب ، هاز حاجب ومنزل الثاني ] :

دوماج مكايناش بلاصة ليك ..

- مسيرة [تبسمات ليه ] :

وانا ماميتاش باش نركب معاك ، براكة غير كنشوفك 24 ساعة على 24 ، نزيد نكملها ونركب معاك فطوموبيل وحدة ، انا بغيت انتهنا ونتفك منك خلاص ..

- جلال [مدور لسانو وسط فمو ، ميدور عينيه عليها ] :

ماشي هادشي لي باين الواشمة ، عينيك كيݣولو لي مكايخرجوش فمك ..

- مسيرة : ماتبقاش ضسرها ، راه غادي توالف هاد الفشوش ، واتولي تزيد تزعم راه مي وانا عارفاها .. مكانش خاصك تخليها تركب معاك ..

- جلال [ببرودة] :

ومن بعد ، انت شنو دخلك نضسرها ولا منضسرهاش ، متبقايش دوي بلسان الناس .. [يلاه غادي يتخطاها ورجع لعندها] بقاي سݣمي هضرتك منين تكوني كدوي على جداك .. دفعها بكتفو وطلع لبلاصتو ...

- خرج سراج وتوفيق ، لي بانت ليهم معزوزة حدا جلال ، ستغربو ولكن مݣالو والو ... غير ركبو ديمارا طوموبيلتو وزاد مخلي ليها غير دخان فوجها ..

- خرجات سعاد هي والبقية ، طلعو فالپيكوپ .. أما هي كانت مزال واقفة فبلاصتها ساهية فالفراغ لي خلاه وفكلامو لي كيف الموس ..

- سعاد : ويلاه واش اتبقاي تم ..

- مسيرة ، تحركات عندهم ركبات اللور معاهم ... ونجية ركبات القدام مع لوسها ... دينارا الپيكوپ وشد الطريق لدار الحاج ..

__________________

- فدار الحاج .. وقفات طوموبيلت هلال معاه ادريس وعباس ... بلاصاو .. كان واقف الحاج محمد هو او ونسابو كايستقبلو الناس ، تقدم هلال هو الأول مسلم على الحاج محمد ..

- مرحبا مرحبا بسي هلال مرحبا ، زارتنا البركة ومدة هادي ..

- هلال [بإبتسامة] :

غير مع الوقت والخدمة مبارك ومسعود العزري ..

- محمد : الله يبارك فيك ، فين هو واحد جلال ؟

- هلال : هاهو غادي يتبعنا ، الحاج هادا سي عباس وسي أدريس ، من العائلة ..

- الحاج [سلم عليهم ] :

مرحبا مرحبا مشرفين ..

- عباس [بنخوة ] :

مبارك ومسعود الحاج ، وسمحلنا على هاد الدخلة ماشي ديالك ...

- الحاج : الله أودي ، مرحبا بعائلة سي جلال ... تفضلو تفضلو ..

- دخل معاهم وراهم فين غادي يݣلسو ... الخيمات كانو مفرقين ولكن مقابلين مع بعضياتهم ، خيمة الرجال بوحدها وخيمة العيالات بوحدها ، ولكن كل وحدة مفتوحة فوحه الثانية ، لي فخيمة الرجال اتكون عينيه نيشان فخيمة العيالات ..

- الحاج واخا ختار يكمل حياتو فولاد السعيد فالعروبية ، ولكن واخا هكاك إنسان عصري .. وهادشي لي باين عليه وباين على حالتو وعلى عائلتو ..

- بين الخيمات ، كانت ݣلسة كبيرة ... واقفين فيها شي رجال لابسين لبسة وحدة ، سروال فالكحل وقميجة فنفس اللون ، كيقادو فالمطريال ديالهم ..

- وصلات طوموبيلت جلال ، وقفات نزلو منها الدراري ... وهو اخر واحد نزل متاجه للباب يفتحو للمعزوزة ..

عليگ أن تتقبَّل فِکرةَ .. أنَّ بعضَ البَشرِ سَـ يَحتَلونَ

مَـگانًا في قلبِـگ إلىٰ اﻷبَـد..؛ دونَ أن يكونَ لهُم مَگانٌ في حيَاتگ ..!! الصَّداقَة گـ المَظلَّة کُلَّما ٱشتَدَّ المَطر، ٱزدَادت الحَاجَة إليها ..

- فإفران ... وصلو قدام باب الدار ، نزلات ليليا هي الاولى كتسنى فوديان تنزل .. هزات راسها للجهة اليمنية ديالها ، الصدمة نزلات عليها .. مشات جهة وديان كدق عليها فالباب ..

- وديان وديان .. حلي وديان ، هزات وديان راسها فيها ، حلات الباب بإستفهام :

- مالك شنو واقع ياك لاباس ؟

- ليليا [ أشرات ليها براسها ] :

شوفي شكون واقف تما ... طلات وديان براسها كيبان ليها منصور واقف بطوموبيلتو وكيشوف فيها .. تشوكات مافهمات والو ..

- حطات ساكها مرجعاه لبلاصتو ونزلات من الكوموبيل عينيها عليه مافهمات والو ، شافت فليليا بتساؤل :

واش هذا تبعنا ولا كيفاش واش هذا مسطي ... جاي لحدا الدار بلا حشمة بلا حيا ..

- ليليا [حطات يدها على كتف وديان ] :

شوفي غير بشوية سيري دوي معاه بشوية انا غادي نتسناك فطوموبيل .. باش مندخلش بوحدي ويسولو عليك ..

- وديان [حركات ليها راسها ومشات لعندو قاطعة الشانطي فتجاهو حتى وقفات مقابلة معاه ] ..

- منصور [ حيد نظاظرو وشاف فيها بإبتسامة] :

وديان صاڤا أمورك هانية ، على سلامتك ..

- وديان [ببرودة حركات ليه راسها ، وشبح إبتسامة على شفايفها ] :

الله يسلمك ... شنو جيتي كدير هنا ؟

- منصور [حدر عينيه حاك حاجبو ورجع هز فيها راسو ] :

بغيتي الصراحة ، تبعتكم ..

- وديان [ غوبشات] :

كيفاش تبعتينا مافهمتش ؟

- منصور كنت جاي باش نشوفك ، مكنتيش كتجاوبي على تيليفونك ... مع وصلت كتباني ليا زدتي بطوموبيلتك وامينة كانت واقفة سولتها ، ݣالت بلي مشيتو لإفران وتبعتك ..

- وديان : ولكن علاش تبعني أسي منصور ، مافهمتش انا علاش هاد التصرف ..

- منصور [ غوبش ] : وقيلة حيدنا هاد الرسميات ولالا ؟

- وديان : لا ماحيدناهمش ، أنت لي حيدتيهم ... واش ممكن نعرف علاش كدير هادشي ، علاش كتسوني عليا وعلاش تابعني حتى لهنا ..

- منصور [بجدية ] :

وديان ، مامالفاش ليا ، وهادي اول مرة ... ماعرفتش علاش ولكن شيحاجة كتشدني ليك باش نكون صريح معاك ..

- وديان : ك كيفاش مافهمتش ؟

- منصور [كيشوف ليها فعينيها] :

كلامي واضح وباين ، من نهار تلاݣيت بيك أول مرة ... وجهك مابغاش يمشي ليا من بالي ، فرحت بزااف فاش تلاݣينا ... وعجبني الحال كثر نهار تغدينا بزوج .. خسيت براحة معاك وهادشي جديد عليا ..

- لي مابغاش يتفهم ليا علاش كتهربي مني ، شنو واقع ؟ علاش مكتجاوبيش على ميساجاتي وليزاپيل ديالي ..

- وديان [قاطعاتو ] :

حيت مكاين لاش ندويو ... سمعني أسي منصور مزيان ، انا أرملة عندي زوج بنيات .. بغاية نربيهم ونكبرهم ونقريهم ، ودابا خاوية بالي من أي علاقة ، لا دابا لا غير دابا ... لاقاتنا الظروف أه .. ستاشرتيني اه وحتى انا عطيتك الإستشارة ديالي ، هادشي لي جمعنا ... ولكن باش تكون شيحاجة اخرى غير حيدها من بالك ..

- منصور [غوبش ، بصوت رجولي ] :

ولكن حتى ليمتا ، انت باقي صغيرة مزال المستقبل قدامك واش ناوية تسدي على راسك .. حتى انت من حقك تبغي من جديد ، وتلقاي لي يبغيك ..

- وديان : عندي لي يبغيني ، بناتي وعائلتي ... مامحتاجاش راجل فحياتي ، عشت الحب مرة وحدة .. مع المرحوم الله يرحمو ، عفاك مابغيتش ندخل معاك فهاد الحوايج ... كلمة وحدة راه ݣلتها ليك الله يخليك أخر مرة اخر مرة دور بساحتي ، وماتبقاش تسوني ليا خليك ليك الراحة .. عطاتو بظهر مامخلياش ليه الفرصة فين يهضر ... قطعات الشانطي قدام عينيه ، بقا واقف حتى دخلات هي وليليا لدار ، حدر راسو لبس نظاظرو طلع لطوموبيلتو وشد الطريق راجع بحالو ..

_____________________

- نزلو الدراري مسلمين على الحاج محمد ، داخلين للخيمة .. اما جلال تعطل شاد للمعزوزة فيديه ، حتى وقف قدام الحاج محمد ، لي عنقو بكل حب مطبطب على كتافو ..

- الحاج [بإبتسامة] : مرحبا بولدي جلال ، زارتنا البركة .. عينيه مشاو نيشان فتجاه معزوزة ... بقا مفيكسي عينيه عليها والإبتسامة على وجهو ..

- جلال [تبسم ] : الله يكبر بيك الحاج ، مبارك ومسعود ..

- الحاج [مزال عينيه على معزوزة] : الله يبارك فيك أولدي ، ماشي الواليدة هادي ، أول مرة نشوف هاد السيدة !!

- جلال [حدر راسو مبسم ، رجع شاف فيه بجدية ونطق ] :

الحاجة معزوزة من العائلة ... ولدها هو سي عباس راه دخل مع هلال ..

- محمد : اياااه أيااه ، وفين خليتو الحاج ؟

- جلال [بإستفهام ] :

إينا حاج ؟

- الحاج : راجل السيدة ؟

- معزوزة [غوبشات ] : الله يرحمو ويوسع عليه ، واش اتبقى تسول فينا خلينا ندخلو أنݣلسو بعدا راه رجلينا طابو من الوݣيف أويلي ..

- محمد [ضحك ] :

مديروهاش مني قلت الصواب مرحبا مرحبا [بدا كيعيط ] إبتسام أجي أبنتي الله يرضي عليك .. خرجات إبتسام هازة على قفطانها ...

- نعام أبا ..

- محمد : دي الحاجة معزوزة للخيمة دالعيالات الله يرضي على بنتي .. شدات إبتسام فمعزوزة ، غادية معاها حتى وصلات لخيمة وݣلساتها فبلاصتها ..

- معزوزة : هاد باك أبنيتي شحال فيه ديال التبرݣيݣ والهضرة وايه وايه مكايتقاداش ..

- إبتسام [كضحك] :

علاش أخالتي شنو دار ، انا بعدا أسمحيليا والله ماعرفتك ؟

- معزوزة : منين وقفنا وهو يسول شكون أنا ، عمرو شافني ... واش راجلي مجاش معايا ، أويلي بقا موقفنا فالباب بلا حشمة بلا حيا ... ويطلع فيا وينزل أويلي الله يستر الراجل هبل ..

- إبتسام [كضحك حتى شبعات ] :

ناري يا خالتي ، ضحكتيني متديش عليه ولكن راه با ضريف وقلبو كبير ... ماقلتيش ليا أخالتي معامن جيتي عمري شفتك ..

- معزوزة : حتى أنت بحالك بحال باك ، جيت مع ولدي جلال ..

- إبتسام [بإستفهام ] :

واش جلال الإبراهيمي ، لي خدامة عندو خالتي نجية ؟

- معزوزة [تبسمات ] :

واه هداك ، كاينين عندو انا وحفيداتي او ولدي ومرتو وخوها ، كيشتي ... طلب يد حفيدتي لزواج .. وجابنا لعندو لدار ..

- إبتسام [تبسمات ] :

إيوا مبروك أخالتي الله يكمل بالخير ..

- معزوزة [جراتها من يدها ] :

ݣولي ليا أنت مزوجة ولا مزال مادة يدك للحنة ؟

- إبتسام [حشمات ] :

لا أخالتي ، مزال هاد الساعة مجابش الله ... نخليك أخالتي نمشي نشوف الناس ..

- معزوزة : تي بلاتي ، أش سماك الله بعدا ؟

- إبتسام : إبتسام أخالتي ، مرحبا بيك أنا مشيت .. جمعات الوقفة خارجة من الخيمة ..

- وقفات الپيكوپ ديال لوس أحمد ، نزلو البنات وسعاد ... دخلو مستقبلاهم إبتسام لي كانت واقفة مع باها باش تستقبل العيالات ... سلمو عليها وسلمات عليهم وعلى نجية لي عرفاتهم على بعضياتهم ... باركو ليهم ودخلو للخيمة حدا جداهم ..

- مسيرة [كتحلف على معزوزة ] :

واخا عليك أمي ، انا لفعة ياك شفتي البراني ولحتيني وعقلي ..

- معزوزة : انت لاصقة فكمارتي نهار ومطال .. خليني انتنفس ونتبورض ليا شوية ..

- مسيرة : واخا هاهي سكتات ... سرحات عينيها ، كان ݣالس مقابل معاها كيدوي مع خوتو .. فيكسات عينيها فيه كتشوف فيه من ساسو لراسو ..

- سندس : كيبان كيحمق ياك ..؟

- مسيرة [ ساهية ] : هيبة وشخصية .. [ وعات على راسها وشافت فختها بزربة ] علامن كدوي ؟

- سندس [ أشرات بحجبانها جيهت هلال ] هلال ، جاه الكحل كيحمق ..

- مسيرة [ هزات حاجب ونزلات الثاني ] :

هاي هاي هاي على سبسبوية ، فين هي ديك الهضرة ديال لا للحب ولا لزواج ، والوحدة تقرا وتخدم ودير دارها وطوموبيلتها وتربي المشيشات مشات مع الواد ..تررر طحتي من عينيا الصراحة تقال ..

- سندس [شافت فيها ] :

لا شوفي الوحدة دير مستقبلها ، ولكن أختي راه زواج والحب مهمة فدنيا ، اختي الى مابغيتيش تحبي أنت خليني أنا نحب ..

- مسيرة : بلاما تعلقي فين تفلقي ، لا تجي على راسك ..

- سندس [رجعات شافت فيها ] :

وعلاش زعمة ؟

- مسيرة [قربات ليها ] :

قالت ليا خالتي نجية بلي هلال كان مزوج ، ومات ليه مراتو هادي 4 سنين ... وكانت حاملة مسكينة ، ومن داك العهد وهو ساد على راسو حيت كان كيبغيها بزاف ، وماقدش ينساها ويبدا مع شي وحدة ..

- سندس [هزات حجبانها بإستغراب ] :

ياختي كاين شي حب فهاد الوقت بحال هكا ، صدمتيني !! مسكين بقا فيا ..

- مسيرة : وجمعي راسك ، وجمعي داك القلب عندك ... واخا فات الفوت حيت الزعطة باينة خارجة من عينيك ... ولكن أختي راه السيد ساد على قلبو وعلى راسو ، اللهم ربطي من دابا قبل لا تولي تموتي عليه ، وأخيب حاجة هو الحب من طرف واحد ..

- سندس [تنهدات تنهيدة طويلة] :

أصلا واخا مايكونش هادشي ، راه انا وياه مستحيل تكون شيحاجة بيناتنا ، هو فين وانا فين ... واش عرفتي باه شكون ولالا ، وعائلتو شكون ... عرفتي بصراحة فيقتيني ، كنت غادية فواحد الطريق لي ماشي هي هاديك والله العظيم ..

- مسيرة [شدات ليها فيديها ] :

أنت فنة ويستاهلك سيد الرجال ، هذا المبارك والمسعود لي يديرك فدارو ..

- سكينة [كتشوفيهم ] :

من الصباح وانتوما لوك لوك ، أش كتقولو ؟

- مسيرة [شافت فيها ] :

كنسولها غير علم الله شحال من دجاجة غادي يحطو لينا فطبسيل ..

- سكينة : والله يمسخك ، كنتو كتشوفو لجهة الرجال وكتدويو ..

- مسيرة : ومنين اختي عارفانا فين كنشوفو وكنبرݣو فرجال علاش كتسولي غير قولي ليا ..

- بداو العيالات كيجيو والخيمة كتعمر ، اما صفاء مكانتش فهاد العالم ، هازة تيليفون وكتسيلفى وتلوح فالأنستغرام ديالها ، غافلة على عينيه لي غادي ياكلوها ... من كترت مامستفزاه ومانساش ليها الضربة ، ماينكرش بلي جات خطيرة .. جاتو غريبة بزاف ، حيت ماحرك فيها والو ... مامالفاش ليه ، فأي بلاصة كيكون فيها كيكون محط أنظار الكل ... البنات كيموتو عليه ، وهو لي كيخليهم ، ماشي غير على برا حتى فالمغرب ..

- علاش هي لا ، واخا من الطبقة المتوسطة ... لي هاد النوع الى شاف الفلوس كيدور راسو وعينيه وهي لا ، معارفش بلي لي مربية على القناعة فدار والديها ... كتشم يديها كتشبع ، كيفكر وغادي بواحد المنظور لي هو غالط ... منظور لي نهاوه عليه عائلتو مرارا وتكرارا ، ولكن لا من مجيب ..

- الخيمة درجال عمرات وديال العيالات حتى هي عمرات ... ݣاع لي معروض جا ، فالخيمة ديال الرجال كولشي كان باغي يݣلس حدا جلال ، لي كان مضور بيه خوه او ولاد عمامو ... كيدويو فبزاف ديال الحوايج ، جا رحال أو ولدو ݣلسو قراب ليه ، واحد الإحترام .. او واحد الحضور طاغي بزاف ..

- كولشي كان باغي يلفت النظر ديالو ، كولشي كان باغي يشرك الحديث معاه ... مكاين غير سي جلال سي جلال ، لا من الكبير لا من الصغير ، كتسمع غير هاد زوج كلمات كيتشايرو ...

- كلام كان كيدوز على ودنين مسيرة والبقية ..

- سندس : ياختي شوفي تبارك الله ، كولشي حامق عليه وكيحتارمو ..

- سكينة : حيت داير ليهم قيمة ، وكيوقف مع الكبير والصغير ، ولي دق بابو مكايرجعوش ..

- مسيرة [شافت فيها ] :

وباش عرفتي أنت هادشي المقدمة ديال الحومة ؟

- سكينة : وراه هادشي الى دخلتي لنيت وقلبتي عليه اتلقاي غير هادشي ، وقيلة نسيتي بلي أنا لي جبت ليك خبارو ولا نفكرك ؟

- مسيرة : يااه ياه نسييت .. واخا هكاك ماعرفتش علاش كيجيني تقيل على قلب ..

- سكينة : وبااز حيتاش ديما مناݣرة معاه بسيف مغايجيك تقيل على القلب ..

- مسيرة : هو لي هاز شوكتو .. بحال الى ماعرفتش شكون هو ..

- سكينة : صافي هنينا وقيلة غادي يبداو ..

- وقفات طوموبيل رونج فالكحل على برا .. نزل منها والإبتسامة على وجهو ... لابس سروال توب فالكحل مع شوميز فنفس اللون ، وكوستيم فالبلو غوا ... تلقى ليه الحاج معنقو :

- مرحبا مرحبا بسي نسيم عندنا زارتنا البركة ..

- نسيم : الله يبارك فيك الحاج ، مبارك ومسعود ..

- الحاج [مطبطب على كتفو داخل معاه لداخل ] :

الله يكبر بيك ، المجية ديالك بدنيا ومافيها ..

- نسيم : الله اودي هدا واجب ، الله يجعلو نهار مبارك ومسعود ونهار زين لي تجمعو فيه الحباب ..

- وصلو حتى لبلاصة فين كانو دراري ديالو ، كل واحد كان شاد بلاصتو ... جر الكرسي ݣلس كيهضر هو ومول الدربوكة ..

- مسيرة [وجها مزنݣ ، الضحكة واصلة ليها لعينيها ، شادة على قلبها ] :

الله البنات شدوني مشيت فيها ... ناري نسيم حدايا اعباد الله حدايا ..

- صفاء : الجحمومة جيتي حداه أجي خليني تم ..

- مسيرة : والله لا شميتها سيري لعبي بعيد ..

- اول صوت بدا هو صوت الكمنجة ... وقف نسيم مقابل مع الميكرو والإبتسامة على وجهو ..

- بدات الموسيقى ... وصوت البيفان مجهد ... شوية بدات الركزة .. صفاء بدات تمايل براسها وبيديها .. سعاد بغات غير تغمزها مالقات كيفاش ناسية بلي صفاء ، الى مشات حتى سمعات الجرة .. مكاتبقاش عاقلة على راسها ، كتنوض بلا هواها تحير ... مكتبرد حتى كطيح سخفانة ..

- نسيم :

واااااااااااااا وانا ، وااااا وانا وانا وعدي وبايتا نتسنى وݣاعما جيتي يالعدو .. وحبك كي توب الراشي كيف ندير ليه ميف ندير ليه ، انا نخيط من هنا وهو يتشرݣ من لهيه ..

- وحبك كيتوب الراشي كيف ندير ليه كيف ندير ليه ...وازينك كيلكنز والعزارة ضايرين بيه والبيضة تحيب الما وانا نعوم بيه أناري مݣواني ..

- تهز الريتم وناضت صفاء فبلاصتها كتحير براسها ... الخيمة درجال ، الكل كان ساقل ودنيه مع الموسيقى وكل واحد وعينيه فين مشاو من غير توفيق لي عينيه مشاو لصفاء نيشان مقابلها ، جاتو غريبة حيت لأول مرة فحياتو ايحضر لفرح شعبي وعروبي ... مالف كيشوف البنات غير بالعصري ، جاتو غريبة القفطان لي لابساه بسيط ... ونوضة لي ناضت ماتسوقاتش نهائيا لناس ..

- نسيم شاف فيها وتبسم .. كيشالي بيديه .. مكمل غناه ..

واوا واوا واو ، ويلي ويلي على ربطة خيي كولا فاش مربوط ، هي مربوطة فصدر وهو مربوط فشعر ، وانا مربوط ف رايضة والعود لدهم لي ساكن في وادزم ..

- هزات صفاء شال لي حداها ، حيدات من جهة الطبلة تحزمات .. وبدات تشطح ، تمات جايا إبتسام من الداخل ، تحزمات ، دخلو بزوج كيشطحو ... وحدة كتجاوب الثانية ، كتمشي صفاء حتى للقنت وتم جايا على صباع رجليها كتشطح وتلوي .. لي شافها يقول غير شيخة ... غافلة على العينين لي باغيين يخرجو من بلاصتهم ياكلوها ..

- ناضت سندس مشات عندهم ، كتشطح حتى هي نوبتها ، تشطح وضرب بشعرها ... سكينة ماحسات حتى كانت وسط منهم حتى هي ..

- لي فخيمة الرجال ، او بالأحرى ولاد الإبراهيمي ب 3 بيهم عينيهم غير على البنات ، جاهم داكشي فشكل ..

- وقفات مسيرة ، كضرب الرش بيديها ... ومتبعة مع نسيم ... قبل مايخرج الكلمة كتخرجها هي كانت حافظة كل كلمة كيݣولها ، كتبان ماشي هي خصوصا فعينين جلال ، كتبان غير الضحكة مافرقاتش وجها ..

- كتبان خارجة على شخصية لي كيشوفها بيها ديما ... شوية وقفات معزوزة ودخلات وسط البنات كتشطح .. نسيم خلا بلاصتو ودخل وسطهم شاد لمعزوزة فيديها كتشطح وهو كيغني كتهز فالبوط وتشطح بكتافها ...

- دخل الحاج محمد وسط منها ، كيلوح عليها الزرقات ، خدا جوج زرقات وعلقهم ليها ... وهي عاجبها الحال ..

- أدريس [همس لعباس] :

خالتي معزوزة كيبان ليا جاها ميمونها ..

- عباس [خنزر فيه ] :

أنضربك انجلي طواسلك أنا علمتك ..

- أدريس [كيضحك] :

أكنبسطو معاك ابا عباس ..

- عباس : ماتبسطش معايا فهادشي ..

- إبتسام لي كانت غير كضحك ، كتشوف فباها وكضحك مافهمات والو فتصرفات باها .. دخلو بنات محمد لا اسماء لا هاجر كيشطحو مع باهم .. الاجواء كانت زوينة ، من غير مسيرة لي واقفة فبلاصتها ومتبعة مع نسيم حافظة كل حاجة كيغنيها ..

- سلات الأغنية الأولى ، لي كانت كتشطح رجعات لبلاصتها .. لا معزوزة لا باقي البنات رجعو لبلايصهم .. مسيرة حتى هي ݣلسات ..

- شوية بدات الموسيقى من جديد ..

*** موسيقى ***

- موسيقى لي غير سمعاتها مسيرة بدات تشالي بيديها ... حيت كتحمقها ، وقف نسيم كيشوف لعندها ، تقدم بضع خطوات لعندها ماد ليها يدو ، شيحاجة لي بنسبة ليها بحال الحلم قلبها كيضرب بجهد ... واحد الفرحة عمرها حسات بيها فحياتها كلها ، بلا ماتحس مدات ليه يدها ... نوضها مخرجها من جهة الطبلة ، العينين كاملين عليهم ، الكاميرا مان كيصور ... عينين العيالات وتوشويش عليهم ... اما عينيه هو لي كانت مفيكسية عليها ، كيشوف فهاد المنظر .. مكتعرفو فاش كيفكر نهائيا ، واش فرحان ولالا ... مكايبانش عليه ..

- خدا نسيم ميكرو محطوط ومدو ليها ، مكانت فاهمة والو مخرجة عينيها بصدمة ، تبسم ليها وأشر ليها براسو بمعنى بداي .. بلعات ريقها وعينيه لي كانو كيطمنوها ، وسكينة وصفاء لي وقفو وجاو قبالتها مبسمين ، شادين تيليفوناتهم وكيصورو ويوتقو هاد اللحظة هادي ..

- مسيرة [بلعات ريقها والحمورية طاغية على وجها ، بصوت زوين نطقات ] :

ااااااا نبكي يا نا واش بيدي نصبر أنا على مكتوبي .. ياو طاحو دمعات الفراق على خدودي حاميين ، زادو بيا مع الطريق الطلبة والعوام غاديين ... وا خليت ميمتي تنوح وجيراني مهوليين .. [الموسيقى خلات إبتستم ترجع تنوض تنشطح مع خواتاتها .. وخلات القليل ينوض يشطح الاغلبية كانو حشمانين ومقادينش ..

- نسيم [شاف فمسيرة بإبتسامة ونطق] :

ااااا دݣيتيتي دݣت الحنة فالمهراز صرت غبرة ... وراسك مطلي بالحناني لى شمو المريض يبرا ... انتيا موشومة الصدر جيتك عطيني الفاتحة ... وا سولت على سميتاك ياو ݣالو ليا رابحة ..

- هنا الكل ناض كيشطح .. مابقا قاد حد يشد رجليه عندو الكل ناض كيشطح ..

- قرب نسيم من ودن مسيرة ونطق :

تبارك الله عليك صوتك غزاال .. خليك متمشيش ..

- بقا هو وياها مني منك مني منك ... حماو الطرح ، حتى من الرجال لي برات الخيمة كانو كيشطحو والخدامة ... كولشي كان فرحان وضاحك ..

- سلات الأغنية جر نسيم كرسي وأشر لمسيرة ، تݣلس لي بدورها مكانت مسوقة لحد ... علاش اتسوق وهي دارهم عاجباهم ، وباها مبسم يدور يدور ويݣول لي ݣالسين حداها هاديك راه بنتي السبيعة ديالي ..

- توفيق [همس لسراج] :

دخت أخويا والله العظيم حتى دخت ..

- سراج : لي داخ كيشد الأرض ، شفت تريكة الإبراهيمي كلها داخت ، شوف ولاد عمك .. عينيهم ماحركوهمش على الخيمة دالعيالات وعلى بنات عباس ..

- توفيق : وراه بزاف أصاحبي والله حتى بزااف ..

- قرب نسيم من مسيرة ، همس ليها فودنيها ... تحت انظارو لي مافهمش هاد السيدة هادي ، لبلاصة لي كدخل لسها ، كدير دغية بلاصتها ... ماعرف فين يشدها مزال لحد السبعة مشوكي من صوتها ... كيشوف نظرات نسيم ليها .. وكيفاش تصرف معاها واخا يلاه شافها ، مابقى فهم والو .. ومابغاتش تفهم ليه الطينة ديالها ..

- تبسمات ميسرة وقربات ليه هامسة فودنيه بشيحاجة ..

- معزوزة [نغزات إبتسام ] : بنيتي ربي شي طريف دالخبز راه جاني جوع ..

- إبتسام [لي كانت كتنش جاها الصهد مݣفضة على قفطانها ، ضحكات ليها او وقفات ] :

واخا اخالتي هاني دابا ، مشات دقايق ورجعات ... عطاتها خبز فيه الدجاج ..

- معزوزة : الله يرضي عليك ..

- بدات الموسيقى ، وهاد المرة موسيقى لي خلات سندس تشوف فصفاء واللون مخطوف من وجها ..

- صفاء : ناااري متقوليش ليا .. شافو فختهم لي كان الميكرو محطوط قبالتها ومقاد ملامحها كانو باردين وعاديين ... تنهدات تنهيدة طويلة ، وقربات شفايفها من الميكرو ..

- خليوني نبكي على الهالكني يالميمة ، خليوني نبكي على الهالكني يالميمة ، زين بلاني بلاني مشا وخلاني زين بلاني بلاني مشا وخلاني ..

- نسيم [كان بدورو كيرد عليها ] .. الكل ناض كيجدب على انغام الأغنية ..

- مسيرة : مابقاو صحابات غالغدارات الميمة ، مابقاو صحابات غالغدارات الميمة زين بلاني بلاني مشا وخلاني زين بلاني بلاني مشا وخلاني ..

- مسيرة كانت كتغني ، ومن صوتها كتحس بيها مجروحة ... كتحس بيها حابسة البكية غير بزز ، كتغني من قلبها ..

- مسيرة : كان حبيبي فدار وكيلكومندار الميمة ، وكان حبيبي فدار وكيلكومندار ألحبيبة ، زين بلاني بلاني مشا وخلاني زين بلاني بلاني مشا وخلاني ... نسيم كان كيرد عليها ، الغير كان غافل على الرنة المجروحة لي كانت فصوتها ..

- مسيرة : لالة الكبيرة انت الكبيدة يالميمة ، [هزات عينيها فسعاد عينين لي كانت باينة فيهم اللمعة ديال الدموع ، تبسمات ليها ] لالة سعاد انت الكبيدة ويالميمة ، زين بلاني بلاني مشا وخلاني زين بلاني بلاني مشا وخلاني ..

- تبدل الريتم ديال الموسيقى ، وكولشي ناض كيشطح ... مكمل نسيم الأغنية ، وقفات بدون سابق إنذار مبعدة الكرسي .. حدرات راسها متخطية العيالات وخرجات على برا ... منظر لي ماخفاش على جلال نهائيا ..

- خواتاتها بغاو يتبعوها ... ولكن يد سعاد حبساتها ، مأشرة ليهم بعينيها .. خرجات على برا مبعدة من الدار ، غير وقفات بعيد وعينيها بحال شي شلال كان محبوس وتسرح .. نزلو دموعها سخان .. بالخف هزات يديها ومسحات دموعها ..

- تسمع صوت وراها ، صوت لي جمد الدمع فعروقها لي خلا قلبها يضرب 180 درجة ... صوت لي خلاها تجمد فبلاصتها ، كتحاول تستوعب واش كتسمع مزيان ولا غير صوت الموسيقى أثر على ودنيها :

مسيرة واش هادي أنت ؟

و يَبقى شيء من عَبق الماضي عالقُ بنا رُغم الزَمن.. شيء تّعجز يّد النسيان أن تطاله. عش في حدود يومك وأنس الماضي والمستقبل. انسى الماضي بما فيه فالاهتمام بما مضى وأنتهى حمق وجنون.

____________

- كانت مترددة واش دور ولالا ... ولكن قبل لا تقرر كان هو دار وجا قدامها ... شاب فثلاثينات من عمرو ، طويل وزوين ، من النوع لي كيجدبك من أول نظرة ... طلعها ونزلها من شعرها وملامح وجها ، تبسم ونطق :

زيانيتي أمسيرة ، فالأول ماعرفتكش حتى حققت مزيان ..

- مسيرة [تبسمات وببرود نطقات] :

سمحليا ولكن ماعرفتكش شكون انت ؟ واش كتعرفني ؟

- كيفاش شكون أنا ، مسيرة براكة من ضحك ... مديريش فيها عزة نفسي حيت عارف مزيان بلي عرفتيني ... مايمكنش تكوني نسيتيني ..

- مسيرة [ضحكات] :

كيفاش منقدش نساك ، ياك توم كروز لي كاين حدايا حيت هو الصراحة لي منقدش نساه ...

- مسيرة براكة من لعب الدراري الصغار ، عارف مزيان بلي عرفتيني ومقديتيش تنسايني ، غير من الاغنية لي غنيتي لداخل ... مزال كتفكري فيا ..

- مسيرة [خرجات فيه عينيها ] :

لالا تايق فراسك ، ياكما انت لي كتصدر الأكسجين مثلا ، فيق أشريف ... شكون انت فملك الله باش منساكش .. بحالك بحال غيرك ، كدوز فحياة الانسان كتعلمو وتزيد بحال ... ماشي شيحاجة لي جديدة .. ݣاع الناس كيكونو كيعرفو بعضياتهم كيتفرقو الله يربح .. وصراحة عاد عقلت عليك .. تبدلتي مابقيتيش كيف كنتي الصراحة ضعافيتي وخيابيتي ..

- [ضحك بإستهزاء] :

انا وانت مكناش بحال الناس امسيرة ، انا وياك كنا مزوجين ولا نسيتي ..

- مسيرة [ضحكات ] :

هانتا قلتيها بفمك اجمال ، كنا مزوجين كنا وكنتو وصرنا وصرتو ، كنا مزوجين وخنتيني فداري ، لي كانت اتكون داري بغيت نقول ... وتفارقنا بااح مابقاتش شيحاجة اسمها كنا ..

- جمال : انت السباب نسيتي ولا نفكرك .. انت لي خليتيني نخونك كونما ..

- قاطعاتو :

شوف ديك المحاجية ديال كتاب حياتي ماعندي مندير بيها ، الخيانة كتعتابر خيانة كيفما بغات تكون نوعها ماعندهاش مبرر نهائيا ، كتسمى خنتيني وسالينا الهضرة ..

- جمال : مسيرة هادشي راه دازت عليه 9 سنين ... زعمة خاص تكون نسيتي ..

- مسيرة : وانا راه نسيت ، واش يحسابليك مزال كنتفكرك ، وراه هادشي ماات اشريف فيق من الݣلبة وشكون فايق ليك من النعاس ... ولا جايب ليك خبارك .. زوينة هادي ..

- جمال : وعلاش متزوجتيش حتى لدابا ، قنعيني بلي منسيتينيش ، اجي علاش انت هنا ياك كنتي فسطات ..

- مسيرة : ماشي شغلك دخل سوق راسك وسوق جواك ... وزيد عليها شكون قاليك انا متزوجتش .. الحمد لله جاب ليا الله سيد سيدك ، فين تبان انت .. نهار لي دخل حياتي تأكدت بلي كنت عورة فاش بغيتك ..

- الحمد لله ياربي كنحمدو وكنشكرو لي تفارقت معاك ، وربي جا من جيهتي ... نهار تعرفت على هاد السيد وبغينا بعضياتنا ، عرفت راسي يا كنت سكرانة ولا محشة ولا كانو ساحرين ليا بجرانة خانزة فاش كنت كنعرفك ..

- سير الله يرض بيك ابابا سير .. قاليك مانسيتينيش ومتزوجتي حتى لدابا .. جات تخطاه وهو يجرها من دراعها موعتها ..

- مسيرة [ مورك على سنانها ] :

حيد يديك الموسخة ماتحطهاش عليا ... حيد يديك من يدي ازبل ..

- جمال [مغوبش كيخرج الحروف بعصبية ] :

مزال مكملتش هضرتي ، كذوبك باين الهولاندية ... مغاديريهاش بيا ، شكون هاد الراجل لي يخلي مرتو كتغني ݣدام قومان ربي العالمين ..

- مسيرة : راجلي حبيبي وتاج راسي وانت مالك ، واش انت مريض ، حيد يدك حيد ازبل يدك ..[كتنطر منو كان كارز عليها بيدو ، ليد لي تنطرات منها بجهد خلاتو يرجع بخطوة اللور ، هاز راسو فشخص لي نطر ليه يدو]] ..

- بصوت رجولي قاصح :

تحط يدك عليها نݣرضها ليك من جدر ، ونلوحها لكلاب بحالك يهرمشوها ... [شاف فمسيرة ونطق] مالك معاه ؟

- مسيرة [بلعات ريقها] :

مكاين والو أحبيبي يلاه ندخلو ..

- جلال [صغر عينيه كيشوف فيها بشك ] رجع شاف فجمال .. بأشمن حق الشريف تحط عليها يدك ؟

- جمال [ بإبتسامة إستهزاء ] :

كانت مراتي ..

- جلال [ ببرود مميت ] :

كانت مراتك يعني فالماضي ، كنتوو .. وهادشي مكايخليكش تحط يدك على وحدة ݣالت ليك بلي راها مزوجة ، من غير الى كنتي كتقلب على لي يخلي دار عشتك .. [يدو لي كان شاد بيها كرة البيلياردو ، هزها وعطاه بيها للفك ديالو حتى خلاه يتراجع جوج خطوات طايح ] ..

- زعمة خاصك تكون راجل ، وتعرف بلي لي كيحط يدو على مرة مزوجة ، خاصها تݣلع ليه من جدر ، بحال هك [ نزل جارو من كول القميجة ، شاد ليه فاليد لي شد بيها مسيرة ، عوجها ليه حتى غوت جمال لربي لي خلقو ...

- مسيرة [تخلعات مافهمات والو عمرها شافت جلال فهاد الحالة ، جات وراها بغات تجرو ] :

جلال صافي هالعار ، راه اتقتلو واش هبلتي ..

- جلال [ضار لعندها عينيه بحال العافية ] :

نشركك معاه الواشمة ، خليني متاقي فيك وجه الله ..

- رجع شاف فجمال ، لي دم خارج ليه من فمو ... هز يدو لي فيها الكرة ونزل عليه لوجه الثاني .. :

هادي غير باش نݣادو ليك الفيݣورة ديالك ، حيت بانت ليا خاصها تݣاد .. مسيرة ماعرفات مدير مشات كتجري ، متخرج غير فوجه سراج ..

- سراج أجي معايا راه جلال كيدابز راه ايقت/لو ..

- سراج [أسمع كلمة ايقت/لو مشا كيجري ، عارف مزيان ولد عمو اش كيسو والى مشا حتى طاح شي حد فيديه غير يقرا على روحو الفاتحة ] ..

- جاه من اللور جارو ، كان جمال طايح مجبد ... شي رجال شافو لي وقع دخلو كيفكو ، وصلات الخبار للحاج محمد ... خرج وخرجو شي رجال معاه .. جلال كان واقف صدرو كيطلع وكينزل ، العصاب ديال دنيا كلو كان نازل عليه ..

- الحاج محمد [ماعجبوش الحال ] :

ولدي جلال اش هاد سكوندار ، حشومة مامعروفش عليك هادشي ، ومامنحقكش تضرب واحد من ضيوفي ..

- جلال [شاف فيه مورك على المرة لي فيدو كيحاول يضبط بيها أعصابو ] :

منين يولي هاد الضيف يقلل علينا للحيا الحاج ، مابقات هضرة ... شوف الضيف ديالك أش دار معاها [أشر لمسيرة] وديك الساع ندويو ..

- الحاج [شاف فمسيرة ] :

أش وقع أبنتي ياك لاباس ؟

- مسيرة [شافت فجمال محاملاه مقابلاه] :

تبسل عليا ، وهجم عليا موعتني فيدي .. بلا حشمة بلا حيا ... غير جلال لي دخل ..

- جلال متسناش محمد يدوي ، جر مسيرة من يدها غادي بيها ، مخلي سراج تابعو مداهاش فيه .. مداهاش فصوتها لي كانت كطلب منو يوقف والو ، فتح الطوموبيل ودخلها ساد عليها الباب بجهد ، طلع حداها وديمارا مخلي العجاجة وراه ..

- من الحالة لي كان فيها ختارت تسكت متدويش معاه ، كان سايݣ كيشوف قدامو ، عاݣد غوباشتو ... كيبان ليها فات الڤيلا ومزال غادي ما وقفش ، ماحبس حتى لعند واحد البلاصة خاوية ، غير الشجر ودنيا كلها ربيع ..

- حبس الطوموبيل ونزل منها ، واقف ومقابل مع الشمس لي بدات كتغرب .. مكايدويش كان كيحاول يكالمي راسو براسو ... من زمان ماوصلش لهاد الحالة ، وكان كيتفادى يوصل ليها ، مكانش باغي يفقد السيطرة على راسو ، هدا كان وعد من زمان ، وصديقة لي كانت معاه سينين هادي ، ولي كانت كتكالميه هي الكرة ديال البيلياردو رقم 8 ...

- سر هاد الرقم لي كان عارفو هو وجوج ديال الناس ، سراج وهارون هاد زوج فقط لي عارفين هادشي ..

- فتحات باب الطوموبيل ونزلات منها ، مشات لجهتو وقفات حداه .. من بعد مدة وهوما على داك الحال نطق ..

- هاد المرة منين تبغي تكدبي شي كدبة مدخليش حسي فيها .. ثاني مرة كدخليني فحياتك ..

- مسيرة [هزات راسها فيه ] :

شكون دخلك ، انا مدخلتكش ، واش انا قلت ليك ضربو ... انا كنت غادي نتكلف مكنتش غادي نخليه يوصلني ، ولكن انت دݣيتيه ..

- جلال [شاف فيها ، بعينين كون كانو كيتيريو كون وا قت//لوها ] :

داكشي باش ݣلتي ليه بلي مزوجة ، ومنين شفتي كتݣولي ليا حبيبي ، الى عندك شي تفسير خور المرضية ݣوليه ..

- مسيرة [حسات براسها تحبسات فقنت صعيب تخرج منو ] :

كنتي كتسنط علينا ياك ، سمعتي كولشي ..

- جلال : سولتك جاوبي ، ماتبقايش تخيطي عليا فطرݣان ..

- مسيرة : انت لي خرجتي فداك الوقت ، كون خرج شي حد خور كنت اندير نفس شي ..

- جلال [تبسم بإستهزاء] :

الله أودي أنت عندك الحل لكولشي .. علاش يݣد عليك شي حد ؟

- مسيرة [كانت على الاخر ديالها ] :

أنت مالك هكا ، مالك عاجبك راسك وحاس براسك ، كتشوف بنادم من الفوق ياك لاباس ، بحال أنت لي كاين ... ولا حيتاش زعمة انت عندك وناس ماعندهمش ؟ ولا حيتاش كتشوف راسك مزيود وفمك معيلقة ديال الدهب .. والناس لا ولاشنو ...

- من نهار عرفتك وانت ماعجبك الحال ، محاملناش اخويا مالنا أش درنا ليك .. ياك لاباس ؟

- جلال [تقابل معاها بملامح باردة ] :

اخر مرة دوي معايا بحال هك ، انا ماشي كريم .. ثاني حاجة مكنحملش لي يفرض عليا شيحاجة ، وانت فرضتي راسك وفرضتي عائلتك ودخلتي ليا بين جلدة والعظم ، وانا عدويا شي حد يمشي عليا كلامو ..

- مسيرة : ماشي حبا فيك دخلت للحياتك .. نزيدك ندمت على نهار لي جيت ودويت معاك فيه ، ولكن هذا [أشرات لقلبها ] مخلانيش ، حيت تربية با مخلاتنيش ... با لي كيقولينا الى شفتو المنكر دويو ... وانا شفت انسان مداير لي بيديه لا برجليه ، كان ايمشي فيها ... ولكن كون عرفت هادشي غادي يوقع والله مندخل بالله ..

- جلال [قرب منها ] :

ولكن كون مت ضميرك غادي يبقى يأنبك ، تولي تݣولي كون غير مشيت وعتقتو ولالا ؟

- مسيرة : هيا هو المشكل ... حيت كون وقعات ليك شيحاجة كنت غادي نبقى نلوم راسي ..

- جلال [كيشوف ليها فعينيها ، مترقبها بحال النسر ] :

المعلقة المذهبة لي دويتي عليها ، انا شديتها وهرستها ودرت منها خاتم ... ماتبقايش دوي على حوايج انت معارفاهمش الواشمة ..

- مسيرة : علاش كتݣول ليا الواشمة مافهمتش ؟

- جلال [على نفس النظرات ] :

سميتك مكتنغمنيش ، مكتجيش مع دماغي ..

- مسيرة [بإستفهام ] :

بغيت غير نفهم علاش مكتحملنيش ، مع أنو مدرت ليك حتى حاجة ، ضرني راسي وبغيت نعرف ..

- جلال [بان شبح إبتسامة على شفايفو ] :

علاش منين كتسمعي صوتي كتبدلي ؟

- مسيرة : دابا واش كتجاوبني بسؤال بحالو .. جاوبني بعدا باش نجاوبك حتى أنا ..

- جلال [ بصوت رجولي باح ] :

شكون ݣاليك مكنحملكش ، انا مكنحملش تصرفاتك .. مكنحملش وعدويا لي يكون كيستحمرني ويكدب فعينيا ، عدويا لي يحطني ݣدام الأمر الواقع .. هادشي لي مكنحملش ..

- مسيرة [فهماتو شنو كايقصد ] :

انا مكدبتش ، اه بصح كدبت فشي حوايج .. ولكن راه مايمكنش واحد الانسانة عاد عرفاتك تجي تݣوليك بلي كانت مشدودة ، راه مايمكنش ..

- جلال [ببرودة ] :

هذا ماشي دافع باش تكدب ، كنتي تݣدي متݣوليهاش ، ولكن متخيطيش وتشرݣي كيف بغيتي ... خاصك تعرفي واحد البلان ، حبل الكدوب قصير ، ومعايا انا قصر من القصورية الواشمة .. شادة والفادة كنعرفها المرة اللولة راه فاتت .. ومكاملاش 24 ساعة وعرفتك علاش مطوية .. المرة الثانية منضمنش ليك ..

- مسيرة : مكاينة لا مرة ثانية لا ثالثة ، نهار منصور يفوت ساحتي انمشي بحالي ... وحتى حياتك انخرج منها ... بحال الى عمرك عرفتيني .. غير رتاح ، نقدو نرجعو بحالنا .. عطاتو بظهر ..

- جلال [متحركش] :

مزال مجاوبتينيش ..

- وقفات من بعد ثانية ضارت عندو ... :

صوتك كيشبه لواحد المغني عزيز عليا ، وكيعجبني بزااف ... داكشي باش فاش سمعت صوتك تصدمت وتشوكيت .. هادشي لي كاين نقدو نمشيو دابا ..

- سبقاتو لطوموبيل .. طلعات كتسنى فيه حتى جا طلع حداها ... وقبل مايديماري شاف فيها ونطق :

على شحال تزوجتي ؟

- مسيرة [ بلاما تشوف فيه ] :

18 عام ..

- جلال [ديمارا ] :

ومالقيتي اداك الرعواني ، زعمة ماشي ديالك هادي الواشمة ..

- مسيرة [ شافت فيه ، وببرودة وهدوء نطقات ] :

القلب ، القلب هو لي كيطيح على الواحد الدل ، كنت كنبغيه وانا بنت 15 عام .. فهمتي دابا ، هادشي علاش الدقة كتجي قاصحة شوية .. اجي نسولك ، خوك هلال ، واش كان مزوج ؟

- جلال [شاف فيها هاز حاجب ومنزل الثاني ] :

علاش كتسولي ؟

- مسيرة : لا والو غير سولت وصافي .. واش ممنوع نسول ، عاد كنتي صحة سلام شفتك تقلبتي كيف زمان ..

- جلال : كان مزوج ، دابا لا .. تهنيتي .. نرضك عند داركم ولا تمشي لدار ، كيبان ليا مابقاش ليك جهد لي ترجعي للعراضة ، نص الجهد مشا فتاشياخت ، ونص لاخر مشا ليك مع طليقك ..

- مسيرة : ديني لدار حسن ، والله يرحم الوالدين مابقيتش بغيتك تجبد ليا طليقي وهاد الهضرة حيت ماتت بنسبة ليا .. صافي .

- مجاوبهاش ، ديمارا الطوموبيل وشد الطريق للڤيلا ، دخل وبلاصة طوموبيلتو ، حيد السمطة هز راسو فيها كتبان ليه مزال ݣالسة ومقلقة ..

- كون يحسابلي اتقلقي حيت خليت دار بوه ، كون خليتك منك ليه ...

- مسيرة : انا متقلقتش على ود داك راس التيمومة ، انا بقا فيا الحال لي مكليتش الدجاج بدغميرة واللحم بالبرقوق ... هالي بقا فيا الحال ..

- جلال [جاتو الضحكة ماقدش يحبسها ، كيضحك حتى دمعو عينيه ] :

لا حول ولا قوة إلا بالله العلي العظيم .. موصيبة كحلة والله القسم ..

- مسيرة [لأول مرة اتشوفو كيضحك بهاد الطريقة ، ضحكتو كانت كتسلب ، عمرها شافت شي واحد ضحكتو زوينة بحالو ] :

علاش كضحك واش قلت شيحاجة كضحك .. ، فيا جوع مشينا على الخاوي وجينا ، ماكلينا دجاجة ماكلينا لحم ماكلينا حلوة ..

- حبس من الضحك ، وضار بالعرض البطيء عندها ... كيسكاني ملامحها .. قرب لجهتها ، منزل راسو لعندها .. نطق وعينيه عليها .. بصوتو الرجولي المهيب نطق :

الدجاج واللحم ليهم الحل الواشمة ، الحلوة لي كيخصها بلاصتها وݣلستها ..

- مسيرة [بلعات ريقها ] :

كيفاش مافهمتش ؟ كيفاش الحلوة ليها بلاصتها وݣلستها ؟

- جلال [زد مقرب ليها ، حاط صبعو على العرق لي فعنقها ولي كان كينبض ] :

مالك ، مناش خايفة ؟ خايفة مني .. [طلع صبعو مع طول عنقها ، ورجع مهبطو حاطو فوق الشامة الكحلة لي فوق العظمة لي بين عنقها وصدرها ، هابط بشفايفو جهة ودنها ونطق بصوت برجولي باح بحال فحيح الافعى ، مبورش ليها عنقها بسخونية الهوى لي خارج من شفايفو ] ولا خايفة من راسك الواشمة ..

- مسيرة [ نزلات عينيها ليديه هازة ججبانها بإستغراب ، رحعات شافت فيه ] :

شفتك زعمتي ، شفتك وليتي فينما دور دور تحط يدك عليا بحال الى خويا ضارب بيا الكاغط ..

- جلال [ برنة إستهزاء فصوتو ] :

ومال الكاغط يخلعنا .. مزال مجاوبتيش على السؤال المرضية ..

- مسيرة [ غوبشات مكمشة فمها ] :

انا مخايفة لا منك لا من غيرك ، علاش غادي نخاف ... راه اي واحد يقرب مني راه انتصرف نفس التصرف ، حيت مكنحملش لي يقرب ليا ... وديجا قلت ليك بلي راه واخا دير لي درتي مغانحس بوالو ، حيت خص هذا يكون كيحس باش نحس أنا ..

- جلال [ دور صبعو على خصلة من شعرها ] :

ماشي بضرورة يكون الݣلب كيحس باش تحسي انت الواشمة ..

- مسيرة [ حطات يدها على يدو ونزلاتها ] :

جلال جيني ݣود ، أش كتحاول دير اش بغيتي مني ؟ مكنحملش لي يبقا يخيط عليا فطرقان .. كنبغي لي يجيني فاص ..

- جلال بقا ساكت مجاوبهاش ، عينيه مشاو ليدها لي فوق يدو ... تملص منها محيد سوارت فاتح الطوموبيل ونزل ، مخليها غير كتشوف ماقتلها ماحياها ... خلاها هكاك منك الموت لمولاك ... هاد السيد مكتفهم فيه والو كل مرة وهو ، كيدير شي تصرفات مامفهومينش ..

- حلات الطوموبيل ونزلات ، بقات واقفة كتشوف فيه حتى دخل للدار .. هزات يدها مراجعة الخصلة لي كان كيلعب بيها ورا ودنها ... حبسات نزلات يدها لجهة نيفها كتشم فريحتو لي لصقات فيها ..

- تنهدات تنهيدة طويلة ومشات لدار ، فتحات الباب ودخلات مشات للبيت نيشان ، حيدات دوك الحوايج ، لبسات بيجامة ديال الدار ... دارت عليها پينوارها ، غسلات وجها ... هزات تيليفونها ولكيت ديالها وخرجات على برا ، جرات الكرسي وݣلسات ... دارت الكيت ودارت رجل على رجل مرجعة راسها اللور ..

- دازت نص ساعة وهي على ديك الحالة ، حتى بانت ليها طوموبيلت هلال داخلة ، فيها هو وسراج توفيق ودريس وباها ، وطوموبيل أخرى كيبان ليها فيها الحاج ، ومعاه دارهم ..

- متحركاتش بقات ݣالسة ، حتى نزلو جا باها وخالها لعندها لي مكان فخبارهم مايتعاود مافهمو والو ، جر باها الكرسي وݣلس مقابل معاها ..

- هلال وسراج وتوفيق طلعو للڤيلا ..

- عباس [ بتساؤل] :

اش وقع ابنتي ياك لاباس ، كنتي صحة سلام حتى مشيتي ݣال لينا سراج بلي جلال داك لدار حيت ضرك راسك ..

- مسيرة [ تنهدات تنهيدة طويلة ، ماعمرها خبات شي حاجة على باها ومناوياش تخبي عليه ولا تكدب ] :

بابا جمال كان فالختانة ..

- عباس [بإستفهام ] :

شكون جمال [شوية خرج عينيه] واش جمال جمال ..

- مسيرة : اه جمال جمال ، خرجت على برا وشفتو ... وتشادينا ، وجا جلال عطاه قت/لة ديال العصا ..

- عباس [تعصب] :

عبر على الحمار تاع بوه ، واش جابو لهنا .. ؟ جا عندهم الحاج محمد ... وقف عليهم موجه كلامو لمسيرة ..

- سمحيليا ابنتي على ما وقع ، غير تهناي من جيهتو عمرو يعتب عندي باب الدار ، ولكن مابيدي حيلة ، حيت خو نسيبي ..

- مسيرة [تبسمات ليه] :

لالا مديرش فبالك ، انت لي سمح لينا ..

- عباس : مزال مافهمتش اش وقع ؟

- مسيرة [بإطمئنان ] : من بعد أبا من بعد ..

- كانو ݣالسين البنات بربعة بيهم على برا ..

- سندس : ناري فاش شفتو ... كون صبت نغززو وحق الله العظيم ، انا غير قاليا سراج على لي وقع عرفت هو السباب .. بغيت ليه ضربة ضربو فصحتو الكل/ب ..

- صفاء :

بغيت ليه الجهل إن شاء الله ، داير بحال بوبي غادي حادر راسو ... ومزال كيحنزز فينا بلا موجب شرع ، كون تشوفي مي ... على شوية كانت اتنوض ليه اماما لي شداتها ..

- سندس : كنا غادي نجيو حتى حنا ولكن جاتنا حشومة .. داكشي باش بقينا ..

- مسيرة [هزات راسها فسكينة لي كانت ساكتة مكدويش] :

مالك أسكينة ساكتة ، ياك لاباس ؟

- سكينة [ببرودة] :

لا ماماليش ، غير كنسمع ليكم وصافي ... مابغيتش ندخل بيناتكم ..

- مسيرة [غوبشات] :

كيفاش دخلي بيناتنا مافهمتش ، مالك شنو واقع ؟

- سكينة : وأنتوما عائلة بيناتكم كدويو ، مجاتش انا برانية ندخل ..

- مسيرة [ضحكات بإستهزاء] :

علاش انت مزال كتحسبي راسك برانية ، جديدة هادي تاني ... اش هاد الهضرة الخاوية ..

- سكينة :

كنقول لي كاين ، كون كنتي كتحسبيني وحدة منكم مغاتخبيش عليا هادشي ، كيفما أنا الشادة والفادة عاودتها ليك .. لي فمصارني عاودتو ليك ، عمري خبيت عليك شيحاجة ، حيت كنحسبك ختي .. ولكن انت شلا حوايج مامعاوداهمش ليا علاش مافهمتش ، منين انت مكتيقيش فيا علاش دخلتيني لداركم بغيت انفهم ..

- سندس [قاطعاتها ] :.

سكينة ، ماشي قضية متايقاش فيك ، ولكن مسيرة هاد الموضوع بداتو دفناتو ، ومابغاتش مزال تجبدو حيت نساتو .. أما هي راه مامخبية والو كون متاقتش فيك والله مدخلك لدارنا ..

- مسيرة [ببرودة] :

هداك الموضوع بحد داتو مكنحملش نجبدو ، حيت كيضر بزااف ... راه اصعب حاجة ممكن توقع للإنسان ، هو تكوني كتبغي شي واحد ، وتلقايه كيخونك فوق فراشك ... فوق بيت النعاس لي ختاريتيه انت ..

- فنظرك انت ساهل نعاود على هادشي ، إنسان حليتي عينيك فيه ، اول واحد تبغيه وانت عندك 15 عام ، كنتي كتشوفيه وانت صغيرة غادية جايا للقراية ، كتشوفيه فأي بلاصة مشيتي ليها ، وليتي كتفيقي بيه وكتنعسي بيه ... وليتي تموتي عليه ، ولا يتسناك حدا المدرسة .. يجي معاك يمشي معاك ، وكتسناي بفارغ الصبر ديري 18 عام باش تزوجي بيه ..

- ونهار الكبير هي فاش كتخطبو لبعضياتكم .. كتوليو تخرجو تأتتو داركم على دوقكم وانت صغيرة وكتبني الأحلام الوردية ... معلقة ديك الأخرة انا لي ختاريتها ، ديك الدار انا لي ختاريت ليها فراشها ... ونهار لي ديري العقد وأكبر حلم فحياتك يتحقق ، داك الانسان لي كتبغيه ولا حلالك ... وتلقايه فبيتك مع صاحبتو باش غاتحسي ، عند بالك هادشي ساهل ..

- سكينة [تنهدات تنهيدة طويلة] :

انا مكنتش عارفة هادشي ، انا بقا فيا الحال حيتاش مافخباري مايتعاود ، حتى كانو البنات كيتعاودو قبيلات مافهمت والو ... قلت علاش معاوداتش ليا ، واش مكتيقش فيا ... هادشي علاش اما كون فخباري هادشي منجبدش ݣاع هاد الموضوع ..

- صفاء : الله ياخود فيه الحق ، ربي نيت دار ليك تاويل ديال الخير ، حيت كون كملتي معاه والله العظيم حتى تندمي ، هداك راه كون كنتي نافسة ايخونك ..

- سكينة [بإستفهام] :

علاش ؟

- مسيرة : خاني حيتاش مارضاش ، كان باغي يبين ليا بلي راه راجل وباي المشكل مني أنا ماشي منو هو ..

- سكينة : مزال مافهمتش .. كيفاش شرحو ليا ؟

- مسيرة :

فاش تزوجنا انا وجمال ، مكانش ناويين نديرو العرس ... قلنا نديرو غير حفيلة بين العائلة صافي .. فاش درنا لاكط ، كنا مقررين نديرو حفلة ورا شهر ... ولكن هو مكانش قاد يصبر ، قاليك انت مراتي من حقي نعاشرك انت حلالي ، [ضحكات] وحيت أنا مكنتش بحال هكا شخصيتي مكانتش هكا نهائيا ..

- سندس [قاطعاتها] :

كنت مضبعة مخننة ، نية ولي جا يديرها بيك ... كنتي ميتة وتزوجي القرايا مكانت داخلة ليك لعقلك بالكشايف باش خديتي داك الباك ..

- سكينة [مكانت متيقة] :

حلفي بالله بلي مسيرة كانت مضبعة ، ناري مقاداش نتيق أصاحبتي مبايناش عليك نهائيا ..

- سندس [تقادات فالݣلسة] :

ورا كل شخصية جديدة ، شخصية قديمة مدفونة ، يكدب عليك الكادب منين تشوفي شي واحد قاصح ، عرفي بلي شحال هادي كان ساهل يتهرس ، بحال هاد خيتي لي قدامك .. فينما شافت شي هدية كتبعها ، عقلتي على العرس ديال المرزوݣي ..

- مسيرة [تكرشخات بضحك] :

ناري متفكرينيش ، سيفطاتني ماما سعاد نجيب الخبز من الفران ، كتبان ليا الهدية غاديين بدفوع ، وانا نتبعهم كنشطح مع الدقايقية ، ومع الزحام تقطعات ليا الصندالة ، والفردة لوخرا تحيدات من رجلي ، حيت كنت لابسة صندالة با ديال الميكة ... ويلي ويلي ... وݣاعما تسوقت ، بقيت تابعة الهدية حتى لدار العروسة ، ودخلت مع الناس وكليت ، وماخرجت من عندهم حتى للمغرب ... تخايلي معايا ..

- من الوحدة ديال النهار وانا خارجة حتى للمغرب ، وفاش تميت راجعة حفيانة ضرباتني زاجة لݣدمي ، جايا بدماياتي ... منين وصلت لقيتهم كيقلبو عليا ..

- سكينة [ميتة بضحك ] :

شحال كان فعمرك ؟

- مسيرة : كانت عندي 14 عام ديك ساعات ، وكنقوليهم فدار بغيت نتزوج راه انبور ... ناري داك نهار فاش جيت لقيت امي ، منين جا با وماما سعاد ، وقلت ليهم لي كاين ، عطاوني قت//لة ديال العصا عمرها تنسى ليا فحياتي ..

- سندس : عقلتي فاش قلت ليك مزال شي حوايج اتعرفيهم على مسيرة ، وهانتي عرفتيهم دابا ، راه مكانتش هكاك كانت اكبر باهلالة ، وغير حميقة ... عرفتي شحال من وحدة دارتها بيها .. شحال من وحدة خدات ليها حوايجها ، غير حيت مكانتش كتقد ترضها لبنادم فوجهو ..

- ومنهم هاد الكيدار ديال جمال ، فاش طلب منها حقو ماقداتش تقوليه لا ، ومشات معاه بالفرحات عليها ... ولكن ربي ونية بغيتها فيه انا عجبني الحال ..

- سكينة : علاش شنو وقع ؟

- مسيرة : مكانش قاد يقرب مني ، كان غير كيجي يبغي يعاشرني مكايقدش .. ورد ليا اللومة انا قاليك مي متقفاني ، وخاصني نجري على راسي ونفك هادشي ..

- صفاء : هو راه صاحبتو القديمة لي تقفاتو فاش عرفاتو تزوج ..

- مسيرة : إيوا سيد مارضاش منين قلت ليه حنا عائلتنا ماعندهمش مع هادشي ... وبلي المشكل منو هو ، وباش يتبت رجولتو مشا لعند صاحبتو القديمة ، وداها لدار لي كانت اتكون داري ..

- وانا فديك الوقيتة ، كنت جايبة واحد جوج كوڤرليات انا وماما سعاد ، فتحت دخلت ، كنسمع صوت جاي من بيت النعاس منعاودش ليك على الأصوات لي كنت كنسمع ، الدم جمد فعروقي ، ماما جراتني باش منمشيش نفتح ولكن فتح ... ولقيتو معاها ففراشي ، ههههه ولي كيضحك هو رجع ليا اللومة انا قاليك انا سباب حيت انا متقفة وبلي معاها هي ماوقع ليه والو ..

- سكينة [تعصبات] :

ناااري على الكيدار ، ولايني حيماري هذا مايسواش .. وشنو درتي ؟

- مسيرة : شنو غندير مثلا ... رفعت عليه دعوة ديال طلاق الشقاق قبل البناء ..

- سكينة [خرجات فيها عينيها ] :

كيفاش قبل البناء وهو راه وقع بيناتكم خلوة أصاحبتي ، خاصو يعطيك حقوقك ..

- سندس : ولكن راه مراحتش مدخلش بيها مزال بنت ..

- سكينة : ولو تكون بنت ، القاضي كيسولها واش وقع بيناتهم خلوة ... يعني خاصها حقوقها واخا ماوقعش بناء ، أش كتخربقو ..

- مسيرة : انا تضررت نفسيا ، واخا يعطيني لي يعطيني مغايداويش الجرح ديال الداخل ، المعاناة لي عانيتها ، ربي جا من جيهتي ، كونما عائلتي ... وكريم لي وقفو معايا وخرجوني من ديك الحالة ، كوراني مزال كنتداوا عند الطبة نفسيين ..

- صفاء : كنت كنطلع لسطح وكنلقاها كتدوي مع راسها ... كانت كتخلعني بزاف وكنزل نقولها لماما ، مرات كانت كتخرج وكنقلبو عليها مكنلقاوهاش ، كنقلبو كنلقاوها فواحد الجردة بوحدها مقابلة دراري الصغار كيلعبو ..

- سندس : داكشي لي داز عليها واخا يعطي فيها فلوس الدنيا كلهم ، مكانش ايخلص ليها الضرر لي تضررات منو الله ياخود فيه الحق ..

- مسيرة [تنهدات تنهيدة طويلة] :

داكشي باش فاش سولني القاضي واش وقعات بيناتكم خلوة قلت لا ، وتفارقنا حبيا ... هو سكت حيت خاف من تهمة الخيانة ، وانا كنت باغية غير نتهنى من كمارتو .. صافي وكان واجب عليا نرجع ليه النص فالحوايج ... انا سمحت ليه فالحوايج كاملين ، لا الخاتم لا دهاز لا الفراش لا كولشي ، ماعندي منݣجدر بيه ... كنت بغيت انتهنى منو صافي ..

- سكينة : الحمد لله على سلامتك ، ربي نجاك ومزال ربي ايعوضك خير ..

- مسيرة : لا صاف أبدا واش مزال نعاود نفتح قلبي ..

- سكينة [حطات يدها على يد مسيرة ] :

مسيرة سمعي ، الناس ماشي كامل بحال بحال ، وصباعك مكايتشابهوش ، انت طحتي فرعواني ... كانو هامو غير راسو وبين رجليه فقط ، كيرجع اللومة للمرا وبلي هي السبب ، ولاد الناس كاينين كيما العيالات فيهم الخايب وزوين ، وأبسط مثال سراج ، شفتي لي داز عليه .. وشفتي خيتي ليكان مزوج بيها ، كيف كيف ، كيف راحل كيف المرة ... ماتبقايش سادة على راسك ... انت مزال صغيرة ومزال المستقبل قدامك وتستاهلي أحسن حاجة .. فهمتيني ..

- مسيرة [تنهدات تنهيدة طويلة] :

يكون خير ، نهار يبان لي يستاهل ... راه القلب ايبغيه بلا هواه ..

- سندس [وقفات ] :

نوضو من البرد يلاه ندخلو ، هاد نهار داز طويل نيت ..

- صفاء : يلاه ... ناضو البنات ومسيرة تابعاهم شادة فيها يكينة ، دخلو للدار سادين عليهم بابهم مخليين هضرة الماضي وراهم ..

_______________

- سراج [ معصب ] :

واش انت مريض ، شوية وتقتل السيد ... واش نسيتي راسك ..

- جلال [ ببرودة ] :

يحمد الله لي ماسيفطوش للروضة .. عندو زهر لي مافصلتش ليه الجلدة على العظم ..

- سراج : عند بالي درتي عقلك أجلال ..

- جلال [هز فيه راسو ] :

كنحاول ، يدي سبقاتني نݣرضها اللهم نݣرضها ليه هو ..

- سراج [كيشوف فيه بعدم تصديق ] :

واش نسيتي راسك ، واش نسيتي اش وقع هادي شحال ولا نفكرك يلاه دوي ؟ هاديك لي فجيبك تفكرك الى انت نسيتي .. دير عقلك اجلال تبت شوية ، مابغيناش نحلو البيبان لي تسدات شحال هادي .. الله يهديك ..

يتبع...