روبي ڤيريدجو الجزء الخامس

دون التاريخ أحزاني، وحكم القدر أن أعيش وحيدة أنا الذي ماتت أغصاني وجف ينبوعي، أنا الذي تحولت جنات عشقي مقابرَ لدموعي، أبعد حبي وعطائي ومعاناتي أصبحتُ بلا ثمن ، هل كان قلبي قاسياً ليكون هذا الهجر قدري، أم أني مظلومة في بحر الحب وحدي .

***

- ݣالسة حادرة راسها ... كتلعب بصباع يديها ، حشمانة وكتحس براسها مامرتاحاش ، الغصة ديال البكية محبوسة فحلقها ... شي حاجة شادة على قلبها ، باغية تنهد بجهد وتخرج ݣاع داكشي لي كتحس بيه ، مكان عندها حتى حل من غير تجي لعند خالتها ..

- نجية [ جرات ليها كاس ديال اتاي قدامها ، ونطقات والإبتسامة على وجها ] :

كولي أبنتي ، ايكون فيك الجوع ..

- عفاف [ تنهدات تنهيدة طويلة ، تبسمات بزز منها ] :

والله أخالتي مافيا الجوع .. مسدودة ليا الشهية ..

- نجية [ بتعجب] :

كيفاش مسدودة ليا الشهية ، اويلي كولي كولي ݣالاك ميدودة ليا الشهية ، تي راه مجيتك بدنيا ومافيها عندي ، براكة عليا نشم فيك اريحة المرحومة الله يرحمها ..

- مع اخر جملة قالت نجية ، دموع عفاف هبطو دقة وحدة ، كان خاصها غير شيحاجة لي تفيض الكاس ..

- نجية [ حطات كاسها شافت فأحمد لي بدورو مافهم والو ] :

اويلي ، عفاف مالك ابنتي ياك لاباس ؟؟

- عفاف غير مزادت فالبكا كتنخصص ، شهقاتها كيجرحو القلب .. قربات منها نجية معنقاها كدوز ليها على كتافها ، وطبطب عليها ، كانت هادي هي النقطة لي غادي تفيض الكاس ، عفاف غير مزادت فدموعها ... نجية كتردد كلمة جملة وحدة ^ بسم الله عليك أبنتي ، انت فحمى الله والنبي رسول الله ^ هادي هي الجملة لي بقات كتردد ... حتى بدات عفاف كتهدن وترجع للوعي ديالها ..

- بعداتها نجية كتشوف فيها ، حالتها مكانتش كتعجب ، تحت عينيها زرق بسهير ، ضعافت ... حتى وجها لي كان صافي ولا مدبوغ ماشي كيف كانت ..

- لالا شي حاجة واقعة وانا مافخباريش ياك لاباس أبنتي ݣولي ليا الله يرضي عليك ... وقتاش جيتي بعدا من ديك الميريكان ؟؟

- عفاف [كتشوف قدامها ] :

سيمانة دابا أخالتي باش جيت ..

- نجية : وراجلك مجاش معاك ؟

- عفاف [بلعات ريقها مزيرة على جنب جلابتها بيديها ] :

انا وياه طلقنا أخالتي ..

- نجية [ شافت فأحمد ورجعات شافت فبنت ختها ] :

كيبان ليا ابنت خويتي شلا هضرة عدك متݣولي ليا ، تي ݣولي أش واقع ، انا راه مرتاحيتش لديك تزويجة لي زوجك باك ، لا عرس لا دهاز لا والو ، احتى معيط ليا راه عفاف تزوجت ..

- عفاف [ شافت فيها بتردد نطقات ] :

لاحني لوحة ديال الكلاب اخالتي [ غرغرو عينيها بدموع] كان باغي غير يخويني الدار ، باش يبقى هو ومرتو او ولادو ... مرتو لي جابت ليه العريس ، حيت لاباس عليه فبرا ..

- نجية [ مغزفة ] :

حيت حنا بعاد دارو فيك مابغاو ، مالݣاو عدك حمية ابنتي ، ريشوك وطيبوك كيبغاو هوما .. [ تنهدات] طلي أسعدية وشوفي عبد السلام ومدار فبنتك ..

- عفاف [ مسحات دموعها ] :

مكفاهومش اخالتي خرجوني من القراية ، بقا ليا 3 سنين على الباك وخرجوني ، عطاتني الحر ديال الشقا .. وهي ظل شادة الحتيت مع العيالات ، ماحيلتي لدار ماحيلتي للبهايم ، فاش سمعت برا وزواج قلت اللهم هوما ولا الذل لي عايشة فيه ، ولكن فاش جا راجل اخالتي ... تخايلي كبر من با ...وماقديت نقول والو ، با شد فلوس صحيحة فيا ، باعني برخيص ..

- نجية [كتحك على ركبتها ، بغات تاكول جنابها ، شافت فأحمد ] :

ݣولتها لك ، ݣتليك راه ݣلبي واكلني ومامهنينيش ، هااا شتي ..

- أحمد [بتأسف ] :

لا حول ولا قوة إلا بالله العلي العظيم ، اش غانݣول لك ابتي ، الله يهدي ماخلق وصافي ..

- نجية [ رجعات شافت فعفاف] :

أوا كملي ..

- عفاف [ شافت فخالتها ] :

فاش داني لتم ، ولا كل نهار يتكرفص عليا ، كيجي سكران ... كنبان ليه غير انا فالحساب ، الضرب لي على بالك أخالتي .. محيد ليا تيليفون وكيسد عليا ، كل نهار ضرب لحمي مات على الضرب .. كيبقا يعطيني حتى كنغيب .. حتى لواحد النهار ، خليتو دخل للبيت ، وهزيت ليه السوارت وانا نهرب ، وانا مامخالطاش غير كنجري وفينما داتني رجليا ، حتى دخلت لواحد سوپير مارشي ..

- مسيرة [كملات كلامها وختماتو] :

هادشي كامل راه با ماعندو يد فيه ، ماحرشنا ماقالينا ديرو ولا مديروش ، هو براسو كونما سمعناش هو وخالي ادريس ، راه مكانو غادي يعرفو والو ... ولكن حصلونا ولي عطا الله عطاه ، او واخا كونما خلانيش كنت اندير لي فراسي ، او واخا مايبغيوش البنات يعاونوني ، كنت اندير لي فراسي ... حيت ݣرحت با هنا [أشرات لحنجرتها ] ، [ غرغرو عينيها بدموع ] نهار لي مشات ليه الرجل ، مالقينا لا حنين لا رحيم ... كاين شي حد هز علينا القفة ، ياك ماخليت فاش خدمت ، خدمت كسالة فالحمام ، خدمت كنبيع الخضرة ، خدمت كنسوݣ الكاميو ، لي مايديروهش رجال بشلاغمهم درتو أنا ، ولا نسيتو ...

- عقلتو فاش با خمجات ليه الرجل ، كونماشي كريم مسكين لي دخلو لكلينيك ، وخلص عليه مليون ونص ... منين كنا انجيبوها ، وهادشي كامل بمسبة شكون ... ياك السعودي هو السباب فهادشي ... ياك كان باغي يصفيها ليه اربي جا من جيهتو ، وجاتو فرجلو اما كوراك فداك الوقت شادة حق الله ، وكتقولي ليا مديريش متفعليش .. واخا دݣدݣوني عصا ، والله منادمة على لي درت ..

- سرو ݣاع داكشي لي وقع ليه مزيان ، انا مكنتش باغية ليه الموت ... حيت الموت راه ساهلة راه رتاح ، انا كنت بغيتو يتعدب كيما تعدبنا حنا ... وباش ديرونا فبالكم ، هادشي راه مغاديش نحبسو ، راه واخا تربطوني بسلاسل ، مغاديش نحبسو ... حتى تريكتو كامل تمشي تربا ، ولي معاه يترباو ، حيت منا حنا عداد ... الطغات عطاهم الله ، وشحال من واحد حياتو مشات ، حنا جاتنا افرجل با ... أما الناس راه جاتهم فديورهم مشات ليهم وموسدين العتابي ..

- سعاد :

وانت بغيتي تكوني حسن من المخزن ؟ خليهم منهم للمخزن وربي لي خلقهم ..

- مسيرة [ بغل] :

انا كنعاون المخزن ، انا كنسهل عليهم غير المأمورية ، كيما المخزن في خدمة الشعب ، حتى الشعب في خدمة المخزن ... نديرو لي علينا ، ناخدو اجر ... نقيو الدنيا شوية من الأوباش ، اتقولي ليا نسيتي الشدة لي تشديتي ، والله اماما سعاد مكايهمني ... وشتي واخا نحصل ونتشد هانية مايبقاش فيا الحال الحمد لله ..

- معزوزة [ سدات على راسها ] :

انا كيبان ليا اكتحفي الحجرة معاها ، لي فراسها راه فراسها واخا تربطيها فقادوس تخرج منو ودير لي فراسها .. انا هدا جهدي .

- مسيرة [ كملات كلامها ] :

وغير وجدو راسكم ، حيت من هنا ليوماين انمشي لولاد السعيد ..

- سعاد [شافت فيها] :

اويلي حي ، تي أش انقورو فولاد السعيد ..

- مسيرة [عاودات ليهم كولشي] ..

- سعاد [كضرب ففخاضها ] :

هاليقلنا ، هالي دوينا عليه وقالت ليك لا متدويش ... اش بقا اخالتي أش بقا منين ولاو المافيا تابعانا ..

- مسيرة :

برامة اماما من تبوحيط أشمن مافيا ، مالنا كاينين فكولومبيا ولا الميكسيك ، راه نهار يتشد انرجعو بحالنا ..

- سعاد [شافت فيها ورجعات شافت فمعزوزة] :

شفتيها أخالتي شفتيها [شافت فبناتها] وانتوما كتشوفو وساكتات ... المش كلا ليكم لسانكم ..

- صفاء [بصوت شبه مسموع] :

حنا لي قالت لينا ختي مسيرة نديروه ، براكة الحبس لي تشداتو على مسبتنا ... ومشات فيه بوحدها ، بغيتينا نخليوها بوحديتها فهاد المعماعة ..

- سندس :

عندها الصح ، لي دارتها حنا معاها فيها براكة الي دوزاتو ، 4 شهور وهي مشدودة وحنا مرتاحين مخاصنا خير ، هادي راه أقل حاجة ، ولي نيتو زوينة عمر ربي يخيبو ، وان شاء الله بقدرة الله مغايوقع والو ..

- سعاد :

دابا انوليو نتلاوحو من دار لدار ، واش هادي حالة ؟

- مسيرة :

مغانطولوش ، غير بينما تقادات الامور إن شاء الله وغادي نرجعو بحالنا ..

- سعاد :

وهادشي فخبار بعدا ولا مزال ؟

- مسيرة : لا مزال ، يلاه غادي نقولها ليه نعلمو ..

- معزوزة [ببحة صوتها ] :

باها يعجبو الحال ، علاش يلقى الخضورية وتواسع مايعجبوش الحال ..

- مسيرة [كتحك فجنابها] :

حشومة عليك امي ، واش انا مزال ديال هاد الضرب؟

- معزوزة [خنزرات فيها ] :

وحتى مترجعي لسانك لدلقوشك ، ونوريك الضرب بشحال كيطلع ..

- أولاد السعيد -

- عفاف[مكملة كلامها] :

دخلت لواحد سوبيرمارشي ، كانت حالتي حالة وغير كنبكي ، وماعنديش اللغة ، حتى وقفات عليا واحد السيدة ، دوات معايا بالإنجليزية ، بصعوبة وصلت ليها بلي انا من المغرب ، ومن زهري لقيتها مغربية ... كانت كتبان ليا بحال الميمون ، عاودت ليها كولشي ، ديك ساع داتني للبوليس ، شافو حالتي ... ومشاو شدوه ، بقيت عند ديك المغربية ، حتى طلقني ..

- نجية [تعصبات] :

كيدار حتى طلقك الكيدار ؟

- عفاف [بصوت ضعيف] :

بزز منو ، طلقني ... وراه مشدود لحد الساعة ، وفاش رجعوني للمغرب .. وجيت لدارنا ، وتشوف با شنو دار ليا ... يحسابليك حن فيا ، رض ليا اللومة كاملة ليا أنا ... قاليك انا لي منسواش وانا لي فيا ديفو ، وزادت مرتو حرشاتو ... قاليك بلي ماعندوش بنات يطلقو ويݣلسو عندو فدار ، وخاصني ندير النفس ونهز راسي ونشوف فين نمشي ، وانا مالقيت فين من غيرك أخالتي أنت لي عندي ... مابغيتش نخرج لزنقة ماعندي ريال ، يتكرفصو عليا ولاد الحرام ، وليت كنحس براسي بوحدي ، مي لي كانت عندي مشات ، ولاو يلعبو بيا كيف بغاو[بدات كتبكي] ..

- جراتها نجية عنقاتها :

متݣوليش هوك ابنيتي ، حنا ربي ماعطانا وليدات ، وانا نهار ماتت العزيزة كنت بغيت نجيبك ، ولكن باك لا سماحة ليه ، هو لي مابغاش يعطيك ليا ، لي كليناها تاكليها ... ماعندنا حتى واحد حتى حنا لي يعمر علينا ، الحمد لله راك مزال صغيرة الحمد لله ، راك طرف من كبدتي ... الى ماهزك هاد الكتف يهز هاد الكتف الثاني ، ابنيتي نعطيك عويناتي ..

- عفاف [غير مزادت كتبني] ..

- أحمد :

شوفي ابتي ، مرحبا بك .. دار دارك ، وكي ݣالت خالتك راكي بتنا ، الحمد لله مايخصك معانا خير ، حتى لنهار لي ربي يدير ليك تاويل دالخير ، هانتي معانا واكلة شاربة[مع ترقيق الراء] حتى نهاريسهل عليك الله سبحانه ..

- عفاف [بلعات ريقها وتنهدات بإرتياح ] :

لهلا يخطيك أعمي أحمد ، الله يخلف عليكم ياربي ..

- نجية [بإبتسامة] :

يلاه زيدي تاكلي ، صبري نسخن ليك اتاي هدا راه برد ، نوضي بعدا بدلي عليك ..

- عفاف [بإبتسامة باهتة] :

واخا ..

_______________________

*** الجديدة - المحال ***

- سكينة [ كتشوف فمسيرة ] :

واش متأكدة ، انت اليوم عيانة مافيك مايتاشف ومزال باغية طلعي لايف ..

- مسيرة [ بجدية] :

السيدة سيفطات ليك ݣاع ليزانفوغماسيو ، ومن كلامها باينة فيها محروقة ... وحدة فمكانتها ممثلة معروفة ، منين تلتاجئ ليك ، عرفي بلي وصلات بيها للحد ... ومن داكشي لي عاودات ولي شفت وقريت ، هادوك الكلاب يستاهلو قت/لـة عاد يتشوهو ويمشيو يتݣلاصاو ..

- سكينة [بتساؤل] :

ختاريتي شنو اتلبسي هاد الليلة ؟

- مسيرة [ بإبتسامة شافت فسندس] :

سندس لي ختارت اللبسة هاد الليلة .. دخلات مسيرة لداخل ، من بعد دقائق خرجات ، كان شكلها بحال شكل رجل غليض ، شعرو بحال الى محروق لابس ماسك عينيه مكايبانوش ، وشخصية اللبسة ديال هاد المرة من فيلم [Halloween kills] ..

- صفاء [خسرات سيفتها ] ناري مكنحملش هاد الشخصية ... ياختي ماتشوف فيك لا موحمة لي شادة فحبل ..

- سكينة [موجهة كلامها لمسيرة ] :

الدخلة لي درتي المرة لولة ، اتبدليها عندك تنساي ، اتقولي [هيلو] وغادي طوليها ، باش تجي مع الصوت لي ايكون هاد المرة ، انخلي صوتك بحال صوت الشخصية نيشان ، كلامك انترجمو للتحت بالإنجليزية ، تافقنا واجدة ..؟

- مسيرة [واجدة ] .. خسبات ليها سمينة حتى ل 3 ونطقات :

هيلو هيلو ، ها حنا جينا لا تقولو ماجينا ، وتقولو نسينا وخرجتو من طوع يدينا [تنهدات بصوت تقيل ونطقات] هاد الليلة ، الضيف لي انجيبو ليكم ... بغيت نݣول ولدي او ولد ݣلبي ، بوصلعة لي مافراسو شعرة ، البورتكلي ديالي ... لي خرج من يدي ، مافخباورش بلي لي خرج من بين صباعي كيتقلا فالمقلة ... إييييه كنقدم ليكم ولدي [ هزات صورتو وحطاتها اونفاص مع الكاميرا ] ديـــيــغو ..

كملات كلامها :

اووه مديوش عليا اوليداتي الواحد منين كيكبر ، كيبقى غير يخرف ... نسيت ولدي تربيت يدي ، كان ف اللائحة السوداء ضمن المنظمة الاجرا*مية الخطيرة لي كان مشرف عليها العميد اريب العمراني ، الملقب بالنحرير ولكن لعدم توفر اذلة عليه بلي متورط معاهم تم اخلاء سبيلو ، وطبعا هادشي داز بسرية تامة ولكن مع قناة روبي ماكين لا سرية لا تامة [ضحكات بصوت عالي] ، قدرت من مصادري الخاصة بلي ديغو كان ضمن الاشخاص لي تم التحقيق معاهم فديك القضية ، طبعا كلشي سمع عليها حيت كانت قضية عامرة معلومات ، ولي كانت سبب بفضح العديد من المجرمين ، تحققات فيهم العدالة وخداو جزاءهم تالث ومثلت ... الحاجة لي دارت ايرور لدماغي وماقادرش نستوعبها ، هي واحد بحال ديغو سياسي كبير ومعروف كيمثل المثالية والشرف على الناس ومن وقاحتو ترشح باش ياخد منصب عضو ف مجلس الوزراء ..

- كيفاش واحد فاتح كازينو ، باش يدرݣ أعمالو المشبوهة ... كيف كنݣولو مخبي ورا حايكو ، وصراحة انا دخلني الشك فالاول من جيهتو ، دوك الفلوس كاملين بين ليلة ونهار ولا بوكو لعاقة ، ولكن انتوما ݣولو الله أعلم ، خدمت الجواسيس ديالي ، لي كيشموها من بعيد ..

- وسيد كيتاجر فالبنات ݣاع ، إيه ولدنا كيسمسر فالبنات ، ولكن بلات ضربو ليا على البنات لي كيبيع ويشري فيهم [حطات تصاور ديال بنات من 18 سنة ل 23 سنة ] ..

- لالا ماعليكش أ لقرع ، كتختار غير نݣعات .. لي ماشفتهم عينين ومشداتهم يدين ، واااعر أنت بجهد ... أما واحد غسيل الأموال مندويوش عليه هداك بوحدو قصة خرى ، أجيو نشوفو العضو ديالنا الشريف ، لي كيتصنع قناع البراءة ، رصداتو عينين الجواسيس ديالي ، وهو متواجد فمواقع مشبوهة ، بحال مثلا هاد الصورة [ حطات صورة فيها طوموبيلتو واقفة اونفاص مع طوموبيل أخرى ، وجوج ديال الناس كيتسلمو بالز متشابهة] هنا كنشوفو اليد اليمنى للدييغو وهو كيسلم باليزة مجهول شنو فيها ، لواحد من أكبر تجار المخدرات ... يعني باين الباليزة شنو فيها ، المتابعين ديالي دماغ تبارك الله عليهم ..

- بلاما ندويو على السوق السوداء ... وبلاما ندويو على هاد الڤيلات بغيت نݣول مستنقعات او وكور للدعارة الراقية [حطات ݣاع التصاور ] ..

- كيفاش واحد بحال هاد الإنسان يترشح ، المنصب حساس بحال هذا ، لي خاص يكون أساسو النزاهة .. وليتو كتحبسو ليا عقلي الصراحة ، ماعرفتش واش هو لي منو الخلل ولا منكم النتوما ..

سرسبات جميع المعلومات ، بدلائل والبراهين ... تسريبات صوتية ، وديڤيديو .. اي حاجة ممكن تشوهو وتشوه السمعة ديالو نزلاتها .. وختماتها بجملة اخيرة .

- عزيزي المشاهد ، ممكن يكون الدور عليك انت هاد المرة ، راجل حساباتك وخطاويك ... حيت المرة الجايا ممكن مطيحش فيا انا حنين ، ولكن ممكن طيح فقا||تل متسلسل ، عزيز عليه إراقة الأخبار الساخنة ..

- مع اخر جملة ݣالتها تقطع اللايف ..

________________

- سلات اللايف ، لي حقق مشاهدات عالية كثر من اللايف الأول .. ونفس المرة لي فاتت اللايف خرج من 300 بلاد ، باش توصل للمعلومات على تجار فاوروبا ... فراه عندك عكاز الصحيح ، وهادشي لي ستنتجوه البوليس ، لي حضرو لايف ..

- الضابط1 :

والو ، ماقديناش نوصلو ليه ، بحال المرة لي فاتت .. اي باب كنطرقو ليه مكايعطينا والو ..

- الضابط 2 [خبط يدو مع البيرو ] :

مايمكنش ، هادشي بزااف ... خاصنا نعرفو شكون هادو ..حيت كيبان ليا ماشي شخص واحد لي شاد القناة ، المرة لي فاتت كان واحد ودابا واحد ، والمرة جايا أيكون واحد ... كيبان ليا هادو عصابة..

- الضابط 3 :

حتى انا هادشي لي ݣلت ، مايمكنش شخص واحد داير هادشي كامل ، هادو عصابة على ݣدها .. جايبين أفكار من شخصيات تلفزية .. كل مرة پيغسوناج جديدة ..

- الضابط 1 :

سمعتيه شنو ݣال ، المرا جايا ايكون واحد خور ... يݣد يكون كتر منو هو ... راسي اينفاحر عليا ، سيفط ليا على قهوة كحلة ..

- [أشر ليه براسو ] واخا

_________________________

- راجعين لدار :

صفاء :

ناري الحلقة ديال هاد الليلة واعرة بزاف ، حبسات ليا راسي ... عرفتي كيكنتي كتهضري ياختي ، راه براڤو عليك وحق الله العظيم ..

- مسيرة [تبسمات] :

حتى العصا لي كليت من عندي مي زادت كملات عليا ، كنت كنحس بلحمي كيحرقني وكنبردو فالهضرة ..

- سندس [بتساؤل] :

مسيرة ، واش حنا انبقاو هكا حياتنا كلها ، واخا هكاك أختي خايفة عليك وحق الله العظيم ..

*** أولاد السعيد ***

مجموعين فصالة ، كانو كيتفرجو .. جات عندهم نجية موجهة كلامها لجلال :

- سي جلال ، وجدت الدار كيف ݣلتي ليا ... حتى التقدية راه ستفتها فثلاجة ..

- جلال [بإبتسامة إمتنان] :

سيري لدار ، وغدا فصباح بلاما تجي بكري ..

- نجية [بتساؤل] :

والفطور ؟

- جلال [شاف فسراج بنص عين ] :.

كاين لي أيتكلف ، أسيري أنت ... تمنات ليهم ليلة سعيدة ومشات ..

- هلال [بتساؤل ] :

واش هدا شي بلان جديد ولا شي منظمة جديدة ، من المغرب نقزو للأمريكا ..

- سراج [ تنهد ] :

لافير فيها شحال من واحد .. كل مرة كيطلع واحد شكل ..

- جلال [ دوز يدو على لحيتو او ورا عنقو كيتكسل ] :

علاش مايكونش واحد داير هاد البلبالة كاملة ، باش يبين لناس بلي هوما بزاف ..

- هلال [ بنفي] :

لالا منضنش ... حتى صوت ديال هاد خونا ، ماشي بحال لي طلع المرة لي فاتت .. حتى من جهة الطول والعرض ..

- جلال [ شاف فيه] :

تكنولوجيا وصلات لسما أصاحبي ، لي ݣاد يوصل لهاد الضواسة كاملين ، ݣاد يلعب على الصوت ... ويعطيك الف صوت الى بغيتي ، كل مرة شكل ..

- سراج :

واخا يݣلبو عليه الدنيا مغايلݣاوهش .. خاصهم سينين وشوف تشوف ..

- جلال [ ضرب على كتف سراج مبدل الموضوع ] :

الفطور عليك انت الصباح ..

- سراج [خنزر فيه ] :

بان ليك فيا البلان ولا شنو ؟

- جلال [غمز هلال] :

توحشنى ماكلتك أصاحبي .. ماخصاراش فينا ..

- سراج [بقا ساكت ونطق] :

واخا هكاك ، كيبان ليا كنتي غالط فمسيرة ..

- جلال [عݣدهم] :

اش جبد الواشمة لهضرة ؟

- سراج [ شاف فيه بجدية] :

كندوي معاك ، واخا هكاك كتبان ليا فشكل ديك البنت ، بعقلها .. غير مرات كدير فيها سباهلالة ..

- جلال [بصوتو رجولي الجدي] :

ديك سباهلالة وراها شيحاجة ، علاش بنادم يكون بعقلو ويدير فيها هبيل ..

- هلال [بجدية ] :

بيناتنا أجلال ، مكاينش شي واحد أيجي ويݣول على راسو كنت فالحبس ، أنا جاتني هضرتها منطقية ... غير انت لي كتحكر ، وحاجة بسيطة كتكبرها ..

- جلال [مرجع راسو لور كيلعب بصباعو ] :

واخ هاحنا انشوفو ..

- هلال :

نهار السبت مغاديش نكون هنا ..

- سراج [شاف فيه بإستفهام ] :

فين ناوي ؟

- هلال [كيلعب بتيليفونو ] :.

عندي مايدار فكازا ، نسالي لي عندي ونجي ... اهو مغاندخلش بكري ..

- سراج [ كيهزهز براسو ] :

اممم مغاتجيش بكري فهمت ..

- هلال [ شاف فيه ] :

داك العقل المسخ لي عندك ، خدمو فشيحاجة تنفعك ..

- جلال [ ببرودة وإستهزاء] :

واشفيها عادي ، خود راحتك [ غمزو]

- هلال [ وقف] :

موسخين بجوج .. تلاݣيتو ..

- سراج [ كيطنز عليه ] :

اتبارك الله على ولد العم ، وشوف تكون امليحة وهازة طريفة ..

- خنزر فيه هلال تخنزيرة ديال القتي**لة ، وطلع لبيتو ..

- جلال [من بعد مدة شاف فشراج بجدية ] :

شنو عاودات ليك ؟

- سراج [ بإستفهام ] :

شكون ؟

- جلال : الواشمة ..

- سراج : علاش كتعيط ليها بهاد السمية ؟

- جلال [ بصوت قاصح ] :

جني يجاوبني شي حد بسؤال ، سولتك جاوب ..

- سراج :

والو دوينا على كريم ، وعلى دنيا .. [ عاود ليه ݣاع داكشي لي عاودات ليه مسيرة ] ..

- داكشي باش ݣلت ليك البنت فشكل ..

- جلال [ وقف] :

نشوفو ..

- مسيرة :

متخافي والو ، ايمتا هادشي أيسالي الله بوحدو لي عالم ... نهار يكتاب راه غادي يسالي [خصرات سيفتها وقفات ] ناري ... شيحاجة هبطات ..

- صفاء : نااري جاتك اصاحبتي راه اليوم 12

- مسيرة [ ] :

راه من قبيلات وكنحس بشي نغزات فظهري ، ومرة مرة كيشدني الوجع ونسيت واش اليوم 12 ... ندوز نيت ناخود ليا ليكوش ..

- دازو للحانوت لي فالحومة ديالهم ، خدات ليكوش ... دازو من حدا واحد الدار دايرين جريدة ، قطعات ليهم شوية ديال السالمية ، وعاد دخلو لدار ... اول حاجة دارتها بدلات عليها ، لبسات حوايج سخان وتقاشر ، عاد عمران ليها براد ديال اتاي بسالمية ...

- عباس :

ماݣلتيش ليا ابنتي ، هاد جلال واش صغير ولا كبير ؟

- مسيرة [ دايرة قرعة ديال جاڤيل معمراها بالما السخون على كرشها ، وهاوة كاسها كتشرب فأتاي ] :

تكون عندو ديك 36 ولا ديك 34 ماعرفتش أبا ..

- معزوزة [ عاقدة غوباشتها] :

مزوج ؟

- مسيرة : لا امي مامزوجش ..

- سعاد :

أنا بعد جمعت حوايجي وحوايج خالتي ، ݣلتي لينا ناخدو احوايج لبوس ..

- عباس [ شافيها] :

وحوايجي انا ؟

- سعاد [ قلبات وجها] :

لي بغا شيحاجة يجمعها ..

- سندس [ جايا من البيت ] :

أنا انجمعهم ليك أبا كون هاني .. يلاه جمعت دياولي وديال صفاء ..

- عباس [ بإمتنان ] :

الله يرضي عليك أبنيتي ..

- مسيرة [ موجهة كلامها لمعزوزة ] :

ديوالك أمي راه جمعتهم ليك قبيلات ، واخا وكلتيها ليا ولكن هانية ... حسيت بدم جرا فعروقي ..

- معزوزة [ بعينيها المكحلين ] :

هي نولي نوكلها ليك كل سيمانة ، جمعتي ليا تيمونة ديالي وتشبيحي ؟ وداك الشربيل الصفر ؟

- مسيرة :

حتى هوما امي جمعتهم كوني هانية ..

- أدريس [ زعفان] :

أنا والله العظيم كون أخليتوني أهنا ، نبقاو نتلاوحو من دار لدار ، خليو ليا غير منجغدد وسيرو ..

- عباس [مخصر سيفتو كيخنزر فيه ] :

ماحمرك بوجه .. بغيتي تولف ليا تزنديق ولا ، اجمع راسك اشريف ، شتي انت مزيانة ليك هاد المشية ... نشوفو ليك نيت شي خدمة لي تحكك ، حيت كيبان ليا لحمك رطاب او كتافك ولفو البرودة .. خليني ساكت يالمسخوط ..

- سعاد [ كتخنزر فخوها] :

ياكما يحسابليك ناعسة على ودنيا ، ومافخباريش ديك المنطيحة معوݣدة الحجبان لي ظل داخل عندها خارج عندها ..

- معزوزة [شافت فسعاد وفيه ] :

أويليييي ، تي شكون هادي ؟

- سعاد [شافت فيها] :

الدار لي حدا مليكة ، فيها شي رواسيات تم يظلو يحلبو فرجالة ... والبارح فاش كنت غادية لحمام كيبان ليا داخل عندها ، وتلاقيت مع مليكة فالحمام ... واخا المدابزة لي دابزت مع مسيرة ، جات ودوات معايا ، السيد واكل شارب ناعس تم بلا حشمة بلا حيا ..

- معزوزة [شاف فيها ، وبصوتها الباح ] :

خاص بوك أرواصيات ... ماحشمتي ماتسحييتي ، الشيب نايض فنواضرك .. ݣدك عدهم الدراري حتارف ، الزغب لي فبيطانك نعݣدو بيه شجرة لاطيح ، وانت مابغيتي دير عقلك أݣوليا ، وجهك هداك ولا مسلفو ، إيوا اش غانݣوليك اولدي يادريس ، بغيت ليك العز اما الذل راك غايس فيه حتى لرجليك ..

- أدريس [هز الخبز غمسو فزيت ، كياكل مجاوبهمش ]

- مسيرة :

حنا نيت الى مشينا ، مغانبقاوش شادين يدينا ، انا والبنات نشوفو فاش نلاهيو ريوسنا ... وانتوما تبقاو فدار ..

- سعاد : هي أتخلي القناة ؟

- مسيرة [شافت فيها ] :

لا أماما مغاديش نخليها ، غير بيما شفت كيفاش ندير ، أنشوف داكشي لي فيه نديه لعند كريم ، المحال خاصني نطلقو مغانبقاش نخلص مراه اهكاك ، صعيب نبقى غادية جايا من ولاد السعيد للجديدة ... ندير وقت ونجي انا وكريم نخويه ..

- سعاد ماعجبهاش الحال ، حتى قالت غايتفكو من ديك القناة ورجع خاب أملها ..

- مسيرة :

القناة لوخرا انولي ندير فيها ميني ڤلوݣات ، باش مطيحش ليا ، الناس كيعجبهم هادشي ديال الطبيعة ، وديال الطياب ديال العروبية ... نولي نلوح كل مرة حاجة ، بحال هكا نسدو شوية علينا ..

- سعاد [بتساؤل] :

واش سكينة مزال ݣاعما سلات جميع ؟ تجي تاكل قبل مايبرد ..

- صفاء[وقفات] :

أنمشي نعيط ليها ونجي ..

- دخلات لبيتها باش تنعس ... بدا تيليفونها كيسوني ، هزاتو لقاتو كريم ، عرفات ايكونو وصلوها ليه ..

- مسيرة [ تخشات تحت المانطة ] :

شوف بلاما تبقى تغوت ، راه كنت انعاود ليك ولكن عرفتك اليوم مزير فالخدمة ..

- كريم [ معصب عليها ] :

واش باغية تخرجي لجدي لعقل ولا مال ملتك ... واش انت فيو ولا مال طواسلك الكلب ، كتݣولي لسيد نسكن معاك ..

- مسيرة [ وركات على عينيها كتحس بيهم كيحرقوها ] :

واشنو نسكن عندك انت ، لي ديجا أصلا منوضها مع رضوان بات منصور ، باش يلاه نجبد عليك النحل ديال بصح ... هو بعدا راه مايݣدش عليه منصور ، واخا دامشي كامل مايݣدش يدير شيحاجة كثر والى لاحظتي ، كيهاجمو وماشي فاص أفاص ، جلال كون عارفو ݣاد يصفيها ليه ، مغايخدش الأمر بتسلية ومايخافش منو فهمتي ، يعني انا ودارنا أنكونو محميين معاه .. غير بينما لقينا تصريفة وسيفطناه مع خوتو ..

- كريم :

وجهك قاصح ، انا مافهمتش منين جاتك هاد قصوحية الوجه ، وليتي كتخلعيني برب العالي ، نتفاهمو من بعد أمسيرة ، دابا حمدي ربي وشكريه ... حيتاش عندي مايدار مامساليش ..

- مسيرة : غدا انشدو الطريق لولاد السعيد اباش تكون فبالك ..

- ومتقولش ماقلتهاش ليك ، باش حتى لمن بعد نرجعو انا وياك للمحال نهزو لي فيه ، نحطوه عندك فدارك ، حتى نشوف شنو اندير من بعد ..

- كريم [كيحاول يضبط أعصابو ] :

سيري دابا ، من بعد .. قطع عليها ، حطات التيليفون حداها معنقة القرعة ديال الما لكرشها ، باش هكا ممكن تنعس ..

______________________

الفيلسوف سقراط صرخت عليه زوجته، ثم رشت عليه الماء الذي كان بيدها من شدة غضبها.

فقال لها: ما أجملك، ترعدين و تبرقين ثم تمطرين !

********

- الصباح جمعو الوقفة ، كل وحدة فيهم وشنو كدير ... مسيرة جمعات قشها وعكوراتها ، والمطريال باش كتخدم لعكورة ديالها ، اما سكينة كانت موجدة حوايجها وپيسي ديالها ، ݣاع لي عليها العمدة وجدوها ، خرجو بالزهم وشدو الطريق للݣار ديال التران ، قطعو للكازا ..

- شدو الطريق ، سعاد ݣالسة حدا معزوزة لابسة جلابة فورق مع شال لايحاه على النص فشعرها ، ساكها ديال اليد قدامها ، حاطة راسها على الجفاف ومقابلة الطبيعة ... اما سكينة دايرة الكيت مغمضة عينيها كتموسق ..

- بعد مدة وصلو لكازا ، من قدام لاݣار خداو طاكسي للمحطة ولاد زيان ، باش ياخدو الكار ..

- من بعدما وصلو للولاد زيان ، ݣلسات ليهم معزوزة مكورة ليهم ..

- فيا جوع ابنات الحرام ، ضاربين بيا الطريق خبيز حريفي مجايبينو لينا ..

- جا عندهم واحد :

أكادير مراكش تيزنيت ..

- عباس [كيخنزر فيه ] :

بولمهارز ، سير أولدي الى بغينا نركبو راه عارفين نمشيو ، حنا اسعاية كنسعاو ..

- حدر راسو السيد ومشا بحالو ..

- معزوزة [شافت واحد بدات تعيط ليه ] :

اوليدي ، أجي الله يرضي عليك [كان هاز بوكاديوسات ] ..

- هانا أميمتي اش حب الخاطر ؟

- معزوزة [كتشوف بعينيها ] :

بشحال هاد الخير ..

- مسيرة [بغات تدوي تقوليها متيقيش ولكن عارفاها اتمرمد بيها الأرض ] ..

- الدري : 8 دراهم أميمتي ، ونقاوة ونݣعة ... ديال الظار الواليدة لي مصايباهم ..

- جرات فولارتها لي خاشياها فكول الجلابة ، فتحات العݣدة وجبدات 8 دراهم مصرفة مداتهم ليه ، وعطاها سوندويتش ، فيه الخص ومطيشة وطون بصلة والفريت ... خداتو ودخلات فيه طول وعرض ..

- عباس :

ودابا اميمتي نوضو ولا مزال مشهية رفيسة والكرعين ..

- معزوزة [ خنزرات فيه] :

فراقشك انفورو عليهم ، زيد أنت نوضني [موجهة كلامها لأدريس] ..

- أدريس نوضها ودخلو للداخل للمحطة ، قطعو ... مشاو لجهة الكار كيتسناو ، حتى بدا الݣريسون كيعيط ، الناس طلعو كل واحد شد بلاصتو .. طلع الشيفور ، ديمارا وقبل لا يخرج من المحطة خدم الشعبي ، عاد تم خارج من المحطة شاد الطريق ..

- إفران

- ݣالسات مع بعضياتهم فالقهوة ، حاجة قدامها كرواصة كاس ديال العصير ، شوية دالخبز ديال الشعير والفرماج .. نفس الفطور لي واخدة واخداه حتى ليليا ..

- أمينة :

أش بان ليك فهادشي لي ݣلت ليك ؟

- ليليا :

وصراحة فكرة زوينة ، ديري شوكولاتغي [محال خاص بجميع انواع الشكلاط ] ولكن القضية ديال جلال يدهل معاك الشريك ماعرفتش ..

- أمينة :

عرفتي علاش فكرت فيه ، جلال كان عايش فسوسرا سينين هادي ، يعني عندو معارف ... وسويسرا معروفة بشوكولا ، يعني ايفيدني فهاد القضية ، انا راس المال لي عندي يلاه يقدني فنص ، وهو يدير النص ويدخل معايا شريك ..

- ليليا [هزات براسها ] :

نسيت انا القضية ديال جلال كان فسويسرا ، والله حتى فكرة زوينة الصراحة ، ولكن كيفاش اديري توافقي بين القهوة ، وانت المحال باغية تفتحيه فكازا ..؟

- أمينة [مسحات فمها] :

شوفي الصراحة تقال ، انا راه هنا شداني غير القهوة ، ودار راكي عارفة ، ماعندي هنا صحابات ما والو .. وكنحس بالقنط ، هضرت مع بابا ومع ماما ... غادي نمشي للقهوة لي فكازا نقابلها ، ومنها نكون واقفة على البروجي ديالي، القهوة هنا انخلي اسية هي تكلف ..

- ليليا [ كتفكر ] :

فعلا أختي بصح ، انا إفران كتعجبني فالبرد ، كونما انت كون وا مشيت للمراكش عند وديان ، هنا القنط وحتى الأفاق محدودة ، واش غادي تكري ؟ .

- أمينة :

اه غادي نشوف شي بارطما لي تكون قريبة ليا للخدمة ، نكريها ... واحد 10 يام هكاك ولا ديك السيمانة ، غادي نمشي للعند جلال نطل عليهم ونهضر معاه فهادشي ..

- ليليا [ تبسمات] :

لبارح كنا عند خالتي سومية ، توفيق ناوي سيمانة الماجية يخلط على سراج ..

- أمينة :

وغير خليه يمشي ، باش نيت يتوالاه جلال ، توفيق واخا قلبو بيض ، ومنين كتوقفي عليه كتلقايه ، ولكن ضاسر بزااف ... عرفتي راه الحماق ماخلا وحدة ماتصاحب معاها ، أي بلاد مشا ليها خاصو يعرف وحدة ، ويخليها وراه ... مصالح لا زواج لا علاقات جدية والو ..

- ليليا [ هزات براسها ] :

فعلا عندك الصح فهادشي لي ݣلتي ، توفيق ماشي بحال سراج خفيف بزااف ... الى ماجمع راسو ايبقى ينقز حتى يجيبها فجنابو ..

- أمينة [خدات رشفة من قهوتها ] :

غير خليه ، نهار الاخر أيطيح فشي وحدة لي تجمع ليه حب وتبن ..

- ليليا [غمزاتها] :

وانت زعمة ، كيفاش مكاين والو انت ... حبيب خطيب كيفاش بلانك ؟

- أمينة [ملامحها البريئة تحولات لملامح حزن ] :

انا صافي خويت راسي من هادشي أليليا ، بغيت نقابل غير خدمتي ..

- ليليا [شدات ليها فيديها ] :

واش انت حمقة ، باغية تدفني شبابك على واحد شماتة مايسواش أصاحبتي ..

- أمينة [تنهدات تنهيدة طويلة] :

ليليا ، راه كولشي داز على عينيك ، باش تأمني لشي واحد وتبغيه ، ويسمح فيك نهار خطوبتكم ، راه اربي دار تاويل دالخير وشديت فراسي ، أنا شي وحدة فبلاصتي راه مزال كتعالج عند طبيب نفساني ..

- ليليا : ولكن من الخير ، اتبقاي حابسة راسك ..

- أمينة [بجدية] :.

حاليا ، انشوف راسي وحياتي ، انخدم عقلي حيتاش نهار لي خدمت فيه عقلي شفتي شنو وقع ليا ، دابا أختي غير خليني بحال هكا ، دابا بغيت نركز على البروجي ديالي صافي أختي ..

- ليليا [بإبتسامة] :...

يكون خير حبيبتي ..

- أمينة : إن شاء الله ، نتمناو ..

*** ولاد السعيد ***

- خرج العود ديالو ، لابس شوميز فالبيج طاوي ليها يديها ، پوت طالع فالكحل مع سروال توب فالبيج ، ونظارات ديالو فنفس اللون .. شاد مشطة خاص فيديه ، وكيدوز على العود ديالو .. كيعاملو بحال الى ولدو ، وحاجة ثمينة فحياتو ... حس بشي حد وراه ، ضار كتبان ليه نجية ..

- جلال [بجدية ] :

وي نجية شيحاجة ؟

- نجية [بتردد] :

سي جلال ، نامس جات عدنا بنت ختي الله يرحمها ، غادي تݣلس عدنا عدها شي مشاكيل مسيكينة ، مكرهتش ليها اشي خديمة ... ولا تعاوني فدار الى جات على خاطرك أسي جلال ..

- جلال [شاف فساعتو ] :

الى بغيتي خليها معاك فدار تعاونك ، والى بغيتي تنزل تخدم مع البنات من غدا ، انت شوفي لي يناسبك ..

- نجية [فرحانة ] :

الله يخلف علك ، الله يحفظك لشبابك ويزيدك من فضلو ، انديها معايا تعاوني ، انا نتكلف بطياب وهي بجميع ..

- جلال [بصرامة] :

بيتي مايدخل ليه حد من غيرك انجية ..

- نجية [هزهزات براسها ] :

لا كون هاني اسي جلال ، كلامك هو الكبير ... حرك ليها راسو قبل لا تمشي سولاتو :

الضياف إيمتا ايجيو أسي جلال ، باش نوجد الغدا ..

- جلال [تفكرها وغوبش] :

معارفاش بضبط ، ولكن اوجديه ... دوك الناس مكايعلموش ..

- حركات راسها ومشات ، خلاها حتى مشات جبد تيليفونو ودوز واحد النمرة ..

__________________________

- حاطة راسها على الزاج ، مضورة كاشكول على نيفها ... عينيها تبوقلو عليها ..

- وحدة من العيالات لي راكبين [وقفات مغوبشة كتخاصم ] :

وا شيفور ، تا حل لينا الباب ، وراه بزاف هادشي الكوليرا ... تاخنقنا وعمينا اويلي وحدي ..

- وحدة أخرى كتشوف فجهة عائلة مسيرة ] :

الخنز جاي من هاد جيهة ، عيينا ساكتين وبزااف ، الحزاق لي مافيه صوت راه كيعمي ..

- سعاد [غوبشات ] :

الخنز وطوط مكايعرفو ليه غير ماليه ، بزاف عليك ولهلا يحيك ، والعطار كيشم من حانوتو ..

- معزوزة [عاقدة غوباشتها بصوتها الباح ] :

مايعرف لخنز الي مربي فيه ، انت لي باطك ݣدو ݣد الطبݣ ، تلݣاي عندك غابة ديال بوسكورة معشة تم ، ريحة الحزاق جاي من جيهتكم وريحة الصنان ..

- المرة 1 :

عندها الصح ، منين طلعتو وانتوما طالقينها ، ماحشمتو ماتسحييتو ، مادرتو بوجه الناس ، قوم هرݣوايين .. مايحشم مايرمش ، بنادم يهز معاه الرويحة ويحشم على عراضو ..

- ناضت صفاء ݣلسات على ركابيها مخرجة فيهم عينيها :

إيوا يوا ، بزاف عليك ولهلا يحييك ويطول زمان عليك ، الهرݣاويين ، انت هي كبيرتهم .. أطراكس ، دايرة راسك فراس مرا ݣد مك ... يالخانزة يالعقوبة ، نيفك كيرضاعة ماتشوفيك لا موحمة لا لي شادة فحبل ..

- من بعد كلام صفاء شبكات بين دوك جوج عيالات وبين معزوزة وسعاد وصفاء ، كولشي ناض يفك ... الݣريسون باغي يفك مالقى مايفك .. الى تلاقاو العيالات ماعند الرجال مايفكو ، شي كيݣوليهم ينعلو الشيطان وشي غير كيشوف وساكت مامسوق ، بخال عباس لي ماتململش ... عارف الى دخل بيناتهم مو اتخلطو معاهم ، أما أدريس كيجر فسعاد ، دفعاتو رضاتو لبلاصتو ݣالس ..

- سكينة وسندس دخلو ، مالقاو مايفكو .. معزوزة طلع ليها السكر ماعندهم مايشدو فيها ..

معزوزة [طلقات النفس ، ودخلات بين دوك الزوج ] :

ودابا شمي ريحة العنبر والقرنفل ، المعفونة رجليك مفلحين يدوز فيهم تران ويغرق .. شمي على ݣلبك ، مشكوضرة ماعرفين الناس ݣدامك من وراك ..

- تشبكات بينهم والشيفور ، معارف يرد البال لطريق ولا لمضاربة لي بين هادو ، شي يفك هادو وشي يفك هادو ، مسيرة وسط منهم ، ماحيلتها لتنفاس معزوزة ولا دوك زوجات ، لي كل وحدة فيهم قد الثورة ..

- بدا تيليفون كيسوني ، وبلاما ترد البال لنمرة ، حلات الخط وهي وسط المدابزة ..

- مسيرة [ بين جداها ودوك جوج عيالات ] :

ألو ، ألو شكون معايا مكنسمع والو ..

- جلال كيسمع الصداع ، الروينة نايضة ... خسر سيفتو بصوت قاصح باح :

حيدي من الصداع واش انت فسوق ؟

- معزوزة :

انا بنت لالاك وسيدك ، نضربك بطرش ونزيدك ، حزاقي حزاق الياقوت والعنبر ... بحالك انت تحت باطك بحال البركاسة ديال تهامي وكدوي ..

- جلال ماعرفش باش تبلا مصدوم .. مافهم والو ..

- مسيرة [ كتفك وكدوي ] :

انا فالكار ، شنو بغيتي لاش مسوني مالقيتي فين تسوني غير فهاد الوقت هدا ، ومي ومي راسي راسي .. وصافي أمي ..

- جلال [ كيحاول يستوعب] :

لا حول ولا قوة إلا بالله العلي العظيم ، فين وصلتو اشمن بلاصة ، واش هاد الصداع ؟

- مسيرة :

والݣيرة نايضة فالكار ، مي منوضاها سباط مع واحد زوج عيالات ..

- حبس الشيفور وبدا كيدفع فيهم منزلهم .. الغوت زاد على ودخل فيه حتى ادريس وعباس لي منوضينها مع الشيفور والݣريسون ..

- مسيرة [ كتخاصم ] :

تهنيتي امي ، هاحنا دابا انݣلسو فهاد الخلا ... عجبك الحال دابا ..

- معزوزة [ كتخنزر فيها ] :

والله يالحمار تاع بوك وماتسكتي ، حتى نكمل بيك لي خاص ..

- جلال [ على الخط ، كيدوز يديه فشعرو كيحاول يضبط أعصابو ] :

واش انت كدوي معايا ولا معاهم ، فين انتوما ؟

- مسيرة [نسات واش كدوي معاه] :

انت مزال هنا ، وراه ناضت المطايفة فالكار ... وشيفور نزلنا حالف مايوصلناش ، هبط لينا حوايجنا وحالف لا هزنا ..

- جلال [ضاغط على سنانو بزز مكالمي راسو ] :

شحال انتوما بضبط ؟

- مسيرة [ كتحسب بصباعها ] :

انا وخواتاتي بزوج هي 3 وسكينة ربعة وبا خمسة وماما ستة وجدة سبعة وخالي 8 ..

- جلال :

كون زدتو عليكم واحد 3 وشكلتو فرقة ديال الكرة ... فين كاينين بضبط ؟

- مسيرة [كتشوف بعينيها فجوايهم] :

حنا حدا الخرجة دسطات ، حدا المركب ديال الݣولف ..

- جلال [بأمر] :

خليكم تم .. مجات فين تجاوبو حتى قطع عليها ..

- أدريس [ مغزف ] :

ولد الكلب ، خلانا ومشا مارجع لينا حتى الربع فالفلوس ...

- سعاد [ݣالسة على واحد الساك كتقاد فشالها عكفات بيه ] :

داكشي باش شنقتي عليه تبارك الله ، بيمن محزمين مخليهم يديرو فينا مابغاو .. مهبطينا بحوايجنا ..

- سندس [تعصبات كتجمع فشعرها سفنجة من بعدما كان مطلوق ] :

هادوك خلاهم وحنا نزلنا ، الله يحفر ليه الجدر ..

- معزوزة :

نوريهم انا حلان الفم بشحال كيطلع ..

- عباس [موجه كلامو لمسيرة ] :

ودابا اش انديرو ؟ كون ادويتي مع كريم يجي يوصلنا ..

- مسيرة :

اويلي ابا كريم راه خدام .. مايقدش يجي ، السيد لي انكونو عندو راه ايتكلف ، يلاه دوا معايا ... نتسناو هنا حتى يجي ..

- سكينة [موجهة كلامها لصفاء ] :

أجي معايا نشوفو ديك القهوة ، بغيت نمشي لطواليط ..

- صفاء : واخا زيدي ..

- مشات صفاء وسكينة لطواليط ، أما مسيرة ݣلسات جنب لاصيرة حدا مها ومعزوزة ... ادريس وعباس بعدو عليهم شعل كل واحد فيهم ݣارو يكميه ..

- هلال [كيلبس فتجاكيط ديالو ] :

ݣولها لسراج ، بنت ليك غير أنا فالبلان ..

- جلال :

سراج وجد الفطور الصباح ، غير حطو وهو يتماوت بحال النافسة ، اصاحبي 8 ديال الناس ، نهز معايا 6 ايشيطو جوج كي اندير ليهم ..

- هلال [ بتدمر ] :

مشكيلة هاديك برب العالي ، المشاكل كيبانو ليا من بعيد ..

- جلال [ بصوتو الرجولي الباح ] :

هلال ، واصلة لهنا [ اشر لحلقو ] متزيدش فيه ..

- هلال [ هز يديه بإستسلام ] :

هاهو ساكت .. طلع لطوموبيلتو ، ديمارا ، خارج من الڤيلا من وراه جلال شادين الطريق ..

______________________

- معزوزة [بصوتها الباح مدرقة راسها بواحد الترازة على الشمس ] :

ونا انا انا يانا يانا يانا يانا يانا وعاد عادا

وبا يا با الوالي مولاي عبد الله ايا الوالي راحنا جينا نزوروك

ابتي ركبنا فرحانين الالة نضنا مجموعين

وهيا الوالي لحنين تعالى تشوف الزين

راه دكالة جايين زايرين

ونا انا انا يانا يانا يانا يانا يانا وعاد عادا

وبا يا با الوالي مولاي عبد الله ايا الوالي راحنا جينا نزوروك

آآآآ راه ركبنا فرحانين آ نضنا مجموعين

يا ةباغي نزورو مولاي عبد الله بن حسين

ونا انا انا يانا يانا يانا يانا يانا وعاد عادا

وبا يا با الوالي مولاي عبد الله ايا الوالي راحنا جينا نزوروك

آبتي ملي خلطنا الواد لالة ملي لحگنا للواد

وراه واد ام الربيع الطريق غادية وتعواج

الالة ممنوع الدوبلاج الراجل

ونا انا انا يانا يانا يانا يانا يانا وعاد عادا

وبا يا با الوالي مولاي عبد الله ايا الوالي راحنا جينا نزوروك

وااا واهيا مولاي عبد الله واهيا بني مغار

ويا لي زارك كانو زار الجنة بالنهار

وعندو تسع شراجم راه عندو تسع شراجم

ثلاتة صادين البحر ثلا للجرف الصفر

وثلاتة صادين القبلة،

ولي هو مولوع اسيادي راه الجامع تما

ونا انا انا يانا يانا يانا يانا يانا وعاد عادا

وبا يا با الوالي مولاي عبد الله ايا الوالي راحنا جينا نزوروك

ابتي جاو خيل العونات الالة

جاو خيل اولاد فرج

وجاو خيل جعيدان

جاونا لقواسم الالة تحكم فالطير الحر

ونا انا انا يانا يانا يانا يانا يانا وعاد عادا

وبا يا با الوالي مولاي عبد الله ايا الوالي راحنا جينا نزوروك ..

- عباس [بإفتخار] :

إيه اميمتي وانا نݣول ، السبيعة ديالي منين ورتت الصوت ݣول منك تي ، إيه حݣل با طاح فيك ..

- معزوزة [كذبل فعينيها ] :.

إيييه ، كنا نقصرو على بريريد ديال أتاي ، فالعشية ونݣلس نغني ليه ... كان يݣولي صوتك يرضلي المجاج ... مزينو براجل ، الله يرحمو ويوسع عليه ..[ شاف فحفيداتها ] ..

- انا حالفة وعليا بليمين ، لا تزوجتو ولا تخرجو من دار الى مكانو شي رجالة بحال المرحوم ... الى مكانو بحالهم مكاين زواج ، وحتى انت أعينين المشة [موجهة كلامها لسكينة] لا يحسبليك كندوي امع حفيداتي ، راه من نهار حطيتي رجلك فدار ، وليتي بحالك بحالهم ..

- صفاء [ ݣالسة حداها كتبرد فظفارها ] :

أتهناي أمي ، حنا ماباغيينش نتزوجو ، باغيين نبقى ليبر الراحة نديرو الدار وطو اااايييييييييييييي [ كتحك بلاصة القرصة ] ولا امي لا اويلي حرام عليك ..

- معزوزة [ مغزفة ] :

هاد المرة فجنابك المرة الثانية ، انحك ليك السودانية للفمك ... نوريك انا ، مالك اتݣلسو ليا بايرات ، يوليو يݣولو بنات عباس البايرات ، ابلات على طواسلكم الكلب ، انا خاصني نتوالاكم .. أحتى يسالي هادشي ديالكم ونتفاهمو [ شافت فمسيرة ] ..

- شفت هاد خونا تعطل ، واخا يكون جاي على كرويلة ايكون وصل ..

- مسيرة [ هزات راسها لسما ، غادي تجلطها ] :

أمي الله يهديك ، مالو جاي فطيارة راه ايكون مسيفط شي حد يجيبنا ، شوية ديال الصبر ..

- معزوزة [ كتخنزر فيها ] :

وبقاي تما تبغي عليا .. تبارك الله عليك وصلاة على نبي ، تشنعات عليا ماغطات ودنيا هي هادي ..

- وقفات طوموبيلت جلال جيپ الݣري ، وطوموبيلت هلال نوع جيب ولكن نوع wrangler willys 4×e ، نزل جلال هو الأول .. بكامل رجولتو واناقتو ، خلا لي قبالتو يحل فمو ... اولهم عباس وأدريس ، مامستوعبينش هاد الفخامة مصدومين ، اما سعاد بقات غير مترمش بعينيها .. قطعو الشانطي وجاو جيهتهم ..

- جلال [ بشموخ ونخوة وإحترام ] :

السلام ..

- الكل : وعليكم السلام

- معزوزة [ بإستغراب] :

شكون تا اوليدي ؟ ...

- ݣالس فجردة ، مرجعة راسو للور ... كيسمع للموسيقى لي جايا من الباف لي حداه .. ، سمع الروايض ديال الطوموبيل .. حل عينيه كتبان ليه طوموبيلت يوسف داخلة .. بلاصا ونزل منها ، لابس سبور .. جر الكرسي وݣلس حداه ..

- يوسف [مسرح رجليه ] :

شتك بوحدك أساط ، فين السبع ؟

- سراج [كيدوز يدو فشعرو ] :

مشا يجيب شي ناس كيعرفهم ، أيݣلسو شي يامات هنا .. العجب لي جيتي ..

- يوسف [شاف فساعتو ] :

توحشتكم اولاد العبد ، من السهرة لي فات مابان فيكم قمقوم ، حتى هارون ݣاطع الحس .. واش حتى هلال مشا معاه ولا كيفاش البلان شكون هاد خوتنا ؟

- سراج [بتدمر] :

فيك فريع الراس بزااف .. حتى يجي وسولو ، فاميلة كنعرفوهم ريحة الشحمة فشاقور ..

- تحل الباب ، ودخلات عفاف هازة صينية فيديها ، فيها كاس ديال العصير ، او واحد الأسبيرين .. حطاتهم فوق الطبلة ونطقات وعينيها فالأرض ..

- العصير والفنيدة لي طلبتيهم اسيدي ..

- سراج [هز فيها عينيه] :

شكون انت ؟

- عفاف :

انا عفاف ، بنت خت نجية .. هي لي ݣالت لي باش نجيب ليك العصير لي بغيتي ..

- سراج [هزهز براسو ] :

واخا عفاف ، تݣدي تمشي ..، حركات راسها بالايجاب مع إبتسامة خفيفة ، مع ضارت وقفها صوتو :

- يوسف :

معلموكش تسولي الضياف شنو يشربو .. ؟

- وقفات وضارت بشوية ، بلعات ريقها قلبها كيضرب بالخوف ... الخوف لي تربا عندها من جهة الأصوات العالية ، لي ولات غير كتسمعهم كتولي كلها ترعد ..

- عفاف [بصوت غالبة عليه الرجفة] :

سمحليا أسيدي ، شنو تشرب ؟

- يوسف [هاز حاجب ومنزل الثاني ، ناطق ومورك على كل حرف مخرجو من فمو ] :

قهوة كحلة ، بلا سكر ... وتكون قاصحة .

- عفاف [ حركات راسها] : واخا ..

- عطاتهم بظهر غادية بخطوات زربانين ..

- سراج [ كيشوف فيه بنص عين ، بصوت رجولي قاصح ] :

ياك لاباس ، ياكما يحسابليك خدامتك ... فراني شوية العود ، شفتك بغيتي تلصق فدرية ياك لاباس ؟

- يوسف [ بعدم إهتمام ] :

هاد بنات العروبية ، الى ماحديتيهاش ليهم فالأول ، راه كيبعرو ... كتولي تشوف بعيد منها ، اللهم من الاول تزير الحرام ..

- سراج [ تعصب ، هو دارو راسو وزاد كمل عليه ] :

مال بنات العروبية كيجاوك أساط ، تݣد عليهم على زينهم وحداݣتهم ، ولا تاويلهم ... غير انت ولفتي دوك الكروڤيتات اللوايين لي ضايرين بيك ، لي ينهشوك من الفوق والتحت [ غمزو] يحسابليك ݣاع البنات بحالهم ..

- وزايدون اسي شريف ، هاديك بنت خت نجية ، لي مݣابلة هاد الدار ... ولي كنعتابروها حنا وحدة من مالين دار ، هاد المرة الله يرضي على وادي فراني ..

- يوسف [ مغوبش ] :

واش دابا انشبكوها على ود وحدة مكتعرفها مكتعرفك ، صافي ميك أصاحبي ، انا هكا ... ماعنديش مع الضسارة ..

- سراج :

واش شتيها دابا ضسرات عليك ولا حداتك [ بصوت عالي] ولا انت مالف البلاصة لي دخلتي ليها فيها الدريات يضورو بيك وهيتهتو بيك ... لا البوݣوص ، ماشي هنا .. أخويا كون ابقيتي فدارك ضريتيني فطانطو ديال مخي ..

- رجعات عفاف فيديها كاس ديال القهوة ، حطاتو لي قدامو .. رجعات بخطوات اللور ونساحبات ..

- يوسف [ مداهاش فكلامو ، هز من قهوتو رشف منها ونطق ] :

ديك المريضة جات اليوم كتسول عليك ..

- سراج [ رجع شاف فيه محرك راسو بمعنى شكون ]

- يوسف : دنيا ..

- سراج [ نزل رجلو لي كان مطلعها ] :

واش جات لكلوپ ، اش بغات ؟

- يوسف :

باز ليك اصاحبي لي كنتي قابل عليها وصابر ، هاديك راه ندخل على مها لحبس ، دارت واحد سكونضار راه مايمكنش ..

- سراج [غوبش] :

أش دارت ؟

- يوسف :

سولات ياسمين عليك ، الدرية مدارت غير الواجب ݣالت ليها راه مكاينش ، السيدة تسيفات ... دفعات ودخلات للبيرو ديالك ، ݣلباتو ، بحال الى أنت مخبي وسط الوراق ... منين جات البنت تدوي ، ماخلاتش ليها ... دفعاتها جات على الكرسي ، مشات للصال ديال البنات ... جرات عليهم وحدة وحدة ..

- سراج [صعر ] :

واش مريضة هادي ولا مال جدها .. واش طلقنا أش بغات ..

- يوسف :

اخويا أش أنݣوليك حضي راسك ، أنا منك نديكلاري بيها ، عندك دليل الكاميرات سجلات كلشي ، رفع عليها دعوة بعدم التعرض ... شي نهار دير ليك شي موصيبة كحلة متݣعدش منها راسك أنك ݣلت ليك ..

- سراج :

غير يدوز اليوم ، يدوز اليوم غدا نشوف ليها بلانها ..

________________________

- معزوزة كطلع فيه وتهبط ، عطات يدها للعباس [ونطقات بصوت باح ] :

وقفني .. وقفها عباس وأدريس ، وهي بقات واقف كطلع فيهم بزوج هلال وجلال ، ولكن عينيها مشاو لجلال بالخصوص ..

- سكينة [كتنغز فمسيرة ] :

جداك مالك ، شفتها تكوانسات ؟

- مسيرة [حاسة بشي كارثة جاية فطريق ] :

انت غير سكتي وتفرجي ..

- معزوزة ، كتعكز على عكازها ومقربة من جلال ، تحت انظارو الإستفسارية ، حتى وقفات قدامو ... كيشوف فيها معلي حوايجبو مفاهم والو .. عݣد غوباشتو حيت عدوه شي حد يبقى يحقق فيه ..

- معزوزة [بإبتسامة ، بصوتها الباح ] :

سبحان الله العظيم ، غير المرحوم الله يرحمو ويوسع ليه ، نفس الطولة ونفس التغوبيشة ... ونفس الطول وسمورية تبارك الله ..

- هلال [غلباتو الضحكة لي شحال هدا ماشقات شفايفو ] ..

- جلال [لاول نرة كيتحط فبحال هاد الموقف ، محامل راسو ونفس الوقت غالباه الإبتسامة ، والأخيرة هي لي فازت فالأخير ، تبسم ليها فوجها ] :

على سلامتكم ..

- معزوزة [بإبتسامة] :

تبارك الله تبارك الله ، [شافت فعباس] شفتي صواب كيداير ، شتي ضحكة كيدايرة ، هدا بعدا حتى الى بقيت معاه فدار وحدة ، جمافو هانية نصبر ، الشوفة فيه نوض ندك وندردك .. [رجعات شافت فجلال ]

- ݣوليا اوليدي أش سماوك ، بغيت نݣول أش سماك الله ؟

- جلال [حك تحت نيفو] :

جلال الدين ..

- معزوزة [صغرات عينيها تبسمات ليه ] :

مزينك اوليدي ومزين سميتك تبارك الله ، تبارك الله [شافت فيهم] أنا غادي نݣلس حدا ولدي جلال ..

- رجعات شافت فيه ] شد فيا اوليدي ..

- جلال [ بلع ريقو ، وشد ليها فيدها غادي بيها لجهة طوموبيلتو ..

- عباس [شاف فسعاد لي مزال حالة عينيها فهلال وجلال ، بصوت عالي نطق ] :

واااا شريفة ، كوليهم بعينيك ... هدا لي حداك راجل ولا پوكيمون ، ياك لاباس ، [شاف فهلال] زيد اولدي نهزو هاد البݣاج ، راه هاد الشمس تقبات لبنادم راسو حتى ولا كيخترف ..

- البنات جرو بالزهم ، وادريس هز الباقي ، دخلوهم فطوموبيل ، معزوزة ركبات القدام حدا جلال ، ولور ركبات مسيرة وسندس وصفاء ، أما هلال ركب معاه القدام عباس ولور ركبات سكينة وأدريس ...

- فطريق .. ݣالسة جنبو عاجبها الحال كضحك ، حتى صدماتو :

- وليدي مزوج ؟

- جلال [ تزير ، كون شي واحد خور ايعطيه خو جوابو يندمو ، ولكن مرا كبيرة ماشي من طبعو ولا عوايدو ، تربيتو وزمان قراه يحتارم المرة لي تكون كبيرة فالعمر ، برد السوق ونطق] :

ألا مامزوجش ..

- معزوزة [ ضحكات] :

تهنا وليدي انا نزوجك على يدي ..

- سندس ومسيرة وصفاء دقة وحدة :

مـــــــــــي ...

- ضارت عندهم مخنزرة :

اللقوة العسرية ، ياك لاباس ياكما يحسابليكم طرشة مكنسمعش .. ياك لاباس مالني أش ݣلت ؟

- مسيرة : مي براكة ، السيد هرستي ليه راسو حشومة اويلي ..

- معزوزة [ خنزرات فيها ] :

ياكما دارك محامي عليه ، زوينة هادي الى برزطو راه أيݣولها هو .. [ شافت فيه] ، ياكما برزطك اوليدي ، والله العظيم دخلتي لقلبي وحبيتك ربي شاهد عليا ..

- جلال [ ببرودة وهدوء ] :

لا مرحبا .. ضارت عندها بإبتسامة مستفزة بمعنى هانتي سمعتي على ودنيك ..

- مسيرة [ رجعات راسها للور ، كدوي بشوية ] :

لا حول ولا قوة إلا بالله العلي العظيم ، شوية ديال العقل لي كان عندي غادي يمشي ليا وحق الله العظيم ..

- سندس [ مقربة لودنيها] :

شفتي كيف دارو فيهم ، لا مي لا ماما ، اويلي على شوهة بحال الى عمرهم شافو الرجال ، مدرنهاش حنى لي بنات ...

- صفاء :

وهو الصراحة تقال ، الزين راه زينين ماشاء الله ، مايمكنش شي وحدة متشوفهمش ومايعجبوهاش ، غير لي عمية ومكتفهمش فزين ، ولكن ماما ومي زادو فيه بزاف ... اما واحد با وخالي أدريس ، كملو على لي خاص ..

- مسيرة [ كتمسد جبهتها] :

انا راسي غادي ينفاجر وحق الله العظيم ، كولشي تجمع دقة وحدة عليا ، متعرفي دقة منين جاتك ... واش تهزي الهم لهادشي لي واقع ، ولا تهزي لهم لهادو لي أيديرو لينا الشوهة ..

- رجعات مسيرة راسها للور كتخمم ، هي أه بنت حي شعبي ... مالفة الضحك ونشاط مع عائلتها ، بيناتهم حد مشافهم ، ولكن قدام البراني مكتبغيش دارهم يديرو شيحاجة ماهياش ، نفسها عزيزة عليها ... كرامتها فوق كولشي ، وهادشي لي دارت معزوزة وسعاد ماعجبهاش ، ماعجبهاش الحال سعاد تحل فمها فهلال وجلال ... وماعجبهاش تصرف جداها ، وزاد كمل عليها باها وأدريس ، فاش حلو فمهم فطوموبيلات لي جاو راكبين ، صافي كملات لي خاص ... واخا هوما ماعندهمش ، ولكن مكتبغيش تبين للغير بلي مشوݣين ... بحال الى جايين من عالم ثاني ، حيت واخا يكونو فدار ماوكلينش ، ولكن منين كيخرجو كيبانو بحال الى بنات القايد ... بالحوايج لي كيلبسو ، كيمشيو للبال كيختارو غير البياسات الواعرين ، الى شافهم شي حد يقول بلي مشريين من أغلى البوتيكات ... وهوما راه الحاجة الغالية فيهم مشرية ب 50 درهم ..

- هز راسو فالمرايا ، بانت ليه مرجعة راسها ومغمضة عينيها .. عين على الطريق وعين عليها ... كتبان بحال شي ملاك بريء ، لي شافها مايݣولش بلي فيها هاد المشاكل وصداع الراس ..

- رجع إهتمامو على الطريق ، رجع الهدوء فطوموبيل معزوزة حطات راسها على الزاج وداتها عينيها .. أما البنات وحدة دايرة الكيت فودنيها ولوخرا حاطة راسها على زاج مستمتعة بالمناظر لي قبالتها ..

- ماشي بزاف باش وصلو ، دخلات الطوموبيل للطريق لي كتدي للڤيلا ، غير وصلات طوموبيل جلال هي الاولى تحل الباب .. فاقت معزوزة دايخة ، كتشوف فجنابها ... البنات الصدمة لي تصدمو والديهم تصدمو هوما من جمالية الدار ، اما لي كانو فطوموبيلت هلال ، مكانوش أقل منهم صدمة .. بلاصات طوموبيلت جلال هي الأولى ، نزلو البنات معاونين معزوزة باش تنزل ..

- معزوزة [ بإبتسامة كدور فعينيها] :

تبارك الله تبارك الله ، قصر هدا ماشي دار تبارك الله ..

- عباس [ واقف مسند على عكازو كيتبسم ] :

تبارك الله الناس لي عايشين ضبصح [ موجه كلامو لأدريس بالهمس ] .. شفتي يا دريس على دار تبارك الله وصلاة على النبي ..

- أدريس [ كيدور فعينيه] :

وكيݣولو ليك الفلوس وسخ الدنيا ، الى كانو وسخ الله يطليني بيهم ..

- عباس : تا هاديك أهضرة المزاليط ، لي مالقيين كيديرو الفلوس ، شو تبارك الله شو شو الخير ..

- خرجات لعندهم نجية كترحب بيهم ..

- جلال [ ببرود موجه كلامو للنجية ] :

نجية عيطي على عمر ، باش يهز البݣاج او وريهم الدار لي أيكونو فيها ..

- نجية [ حركات ليه راسها بالإيجاب] :

واخا أسي جلال ، راه سي سراج ومعاه سي يوسف الداخل ..

- جلال ، اشر ليها براسو ودخل ..

- معزوزة :

تي شت هدا دخل وخلانا أويلي ..

- مسيرة :

ياكما يحسابليك أمي أيݣلس معاك ، يقرقب الناب ... السيد راه أداير فينا خير .. [ قاطعاتهم نجية ] :

مرحبا بيكم ، أجيو معايا نوريكم الدار لي أتكونو فيها ... البالز اخليوهم ، عومار [ عمر] ايتكلف بيهم ..

- سعاد [ كتشوف فدنيا كي زينة ] :

واخا أختي لهلا يخطيك ، تبعوها للدار لي كانت فجهة ليسرية بضبط للڤيلا ... حلات نجية الباب سابقاهم ، وهوما وراها .. الدار فعلا كانت نقية وزوينة .. مفرشة على حقها وطريقها ..

- جوج ديال البيوت وصالون ، من دابا تافقو كل واحد فين ينعس ، أدريس وسعاد فبيت والبنات ب4 خداو البيت لاخر كان كبير شوية يلاه يقدهم ويقد قشهم ، أما الصالون اتنعس فيه معزوزة وأدريس فالمراح .. الصالون كانو فيه 4 ديال السدار والمراح فيه زوج سدادر طبلة وتلفازة ، بيت لاخور فيه بيت النعاس ، والبيت لاخور فيه جوج نوامس كبار ، كل جوج بنات ينعسو فنموسية ..

- نجية :

الثلاجة راها عامرة ، فيها كولشي ݣاع لي غادي تحتاجوه ، والى بغيتو أي حاجة ، ݣولوها ليا سميتي نجية ..

- سعاد [بإبتسامة إمتنان] :

لهلا يخطيك اختي نجية ، انا سعاد وهادي خالتي معزوزة ..

- نجية [بإبتسامة بشوشة] :

مرحبا بيكم ، المهم انا نخليكم ترتاحو شوية ونجيب ليكم تغداو ..

- سعاد: لهلا يخطيك .. خرجات نجية مخلياهم بوحدهم ..

- معزوزة [ معوجة سيفتها ] :

أويلي وحدي ، واش ايجيبو لينا الماكلة لهنا ؟ وعلاش مناكلوش الداخل معاهم ؟ مالنا فينا الجدام ..

- مسيرة [ بصرامة وهدوء] :

مي حنا هنا راه غير ضياف ، تقاد الأمور انرجعو بحالنا ... حنا ماشي فاميلتهم ولا من لحمهم ودمهم باش ناكلو معاهم فطبلة وحدة ، الناس هوما فين وحنا فين ... بلاما نظيرو راسنا عميين ، الله يرحم ليكم الوالدين ، مابغيتش نلقاكم كدورو وسط الڤيلا ، لي بغا يخرج يسرح رجليه هالخلاوات حداه وجنانات ارا مايسيح ... مقادة على مشاكل ونݣير براكة غير هادشي لي انا فيه [ شافت فباها وخالها]

- با الكلام ليك حتى انت وليك أخالي دريس ، منلقاكمش شاريين اللغا مع مالين الدار ، ولا كدورو ليهم فقلب دارهم ، السيد داير معانا غير جابنا لعندو ، كل واحد يلزم حدو ، لاهوما من توبنا لا هوما من توبهم ..

- مابغيتش شي حد يتشكا ليا منكم وانا اعصابي واصلين لعند نيفي .. انصدق منوضاها مع شيحد وانا مكنصبرش ، راعيو ليا وديرو بوجهي الله يرحم الوالدين ..

- سعاد [كطبطب على كتافها] :

عندك الصح أبنتي ، حتى حنا زدنا فيه شوية ، الناس مكايجيونا مكنجيوهم ، واخا راه حتى انت خاطرتي براسك وبسبابو حنا هنا ..

- مسيرة [ شاف فيها] :

ماما ندوي بلوجيك شوية، واش هو لي قالي عتقيني لا .. هو مكايعرفنيش أصلا واش انا كاينة ، راه انا لي قلبت عليه ومشيت عندو .. وانا لي حطيتو قدام الأمر الواقع ، وقلت ليه نجيو عندك ، أباش تكون فبالكم حيت خفت عليكم لا يلقانا داك صݣع ليام ..

- دابا فهمتو بلي كل واحد فينا يلجمو فمو ويشد رجليه عندو ، انا والبنات انشوفو شي خدمة هنا ... المهم نخدمو فالفيرما ولا نطيبو ولا شوف شنو كاين ... مغانبقاوش عايشين فابور على ظهر السيد ..

- عباس [ هزهز براسو ] :

عدك الصح ابنتي ، زدنا فيه نيت واحد الشوية ..

- سعاد :

هاباك نيت ، شوفيليه شي خدمة ، واخا يشد انشاشة وينش دبان ..

- صفاء [ غمزاتها حاط يدها على كتفها] :

صافي أماما ماتعيقيش حتى انت وتزيدي فيه ، وااه زعمة قلبك راه كبير وبيض ..

- سعاد [ دفعاتها] : بعدي مني ، بحالكم بحالو ..

- بدا تيليفون مسيرة كيسوني ، هزات تيليفون طلعات ليها نمرة كريم ..

- خرجات على برا ، فتحات الخط وجاوبات :

الحب ..

- كريم [مزال شاعل عليها ] :

أممم الحب ، صبغيني حيط أنا ، فينك ؟

- مسيرة [هزات راسها فالڤيلا ] :

أنا فدار جلال ..

- كريم : درتي لي فراسك ومشيتي مزال ، انا هضرتي مكايدارش بيها ياك ؟

- مسيرة : وصافي اكريم يهديك الله ، راه انت عارف علاش حنا هنا ، بلاما دير ليا العصا فرويضة ..

- كريم [ مبدل الهضرة] :

معاك الدار كلهم ؟

- مسيرة :

اه دار كلها معانا ، لقيناهم موجدين لينا الدار لي فالجردة .. شوية وغادي يجيبو لينا الغدا ، انت مزيان مال صوتك ياك لاباس ؟

- كريم [ كيحط فراسو] :

والو ، الواليد رجع لدار ... لقا دنيا فواحد الحالة مكتعجبش ، المشكل راسو قصح منها ... مرجع السبب للسراج ، واخا عارف بلي بنتو لي فيها الديفو ..ولكن معامن ، بعد المرات كيجيوني كيتشابهو فهاد الحوايج ..

- مسيرة [تنهدات تنهيدة طويلة ، كطرطق فصبعها ] :

ختك هكا دايرة الله يستر ، باغية تمرض كاع الناس لي ضايرين بيها ، مابغات تعالج مابغات تعتارف بلي هي مريضة ... عندك غير تمشي تأدي السيد ، راه واخا تفارقات معاه راه تخاف منها ..

- كريم :

وايلي حتى لديك الدرجة لا منظنش ..

- مسيرة : أنا غير كنقوليك ..

- كريم : المهم من بعد وندويو واخا ، كيعيطو ليا أنا مشيت ..

- مسيرة : سير الحب الله يعاونك ..

- قطع معاها خشات تيليفون فجيبها ، تنهدات تنهيدة طويلة ... حدرات راسها وضارت لقات راسها فاص أ فاص معاه .. ملامحو باردة ، كيشوف فيها بشوفات غراب ..

- جلال : تبعيني باغي ندوي معاك ..

- عطاها بظهر سابقها ، مامخليش ليها خيار اخر من غير أنها تبعو ..

_____________________

*** ڤيلا فؤاد نجيب***

- فجردة ݣالسة ، حاطة بكية ديال الݣارو قدامها .. تحت عينيها زرقين ، ساهية فبلاصة خاوية ، شعرها مامقادش .. لابسة كولون سپورتيف ، مع قبية ... من الطفاية لي قدامها والعدد لي فيها ، باين بلي دخلات فنص البكية .. خطوات كانو مسموعين ... ولكن هي مداتهاش فيه أخر همها ديها فيه ..

- حاجة لي كانت كتفكر فيها ، هي سراج لي كيفاش طلقها ... كيفاش خلاها هو مخاصوش يخليها ، خاصو يبقى معاها حتى هي لي تقرر تخليه ماشي هو ..

- واقف عند راسو كيشوف فالحالة لي وصلات ليها ، مابقاتش دايرة ليه إعتبار نهائيا ... حاطة البكية قدامها مامسوقاش ..

- بصوتو الوقور لي ممزوج بنبرات غضب :

نݣد نعرف اش هاد الروينة منوضة ، اش هاد التخربيق لي مغرقة راسك فيه ومغرقانا معاك ، واش باغية تشوهينا ولا اش كتحاولي تصنعي ..

- دنيا : [ الصمت]

- فؤاد وقف قدامها ، كيخنزر فيها ... ضرب الطبلة بيديه حتى نقزات ، معلية راسها ليه .. النظرات لي كانو على عينيها مامفهومينش ، بحال شي مختلة عقليا .. :

راني معاك داوي ، اش هاد الحالة وليتي تكمي ݣدامي ، مابقيتيش دايرة إعتبار لي كبر منك .. انا نيت ضسرتك بزاف ، مافهمتش علاش هاد الحالة على واحد ماحسش بيك واش كاينة ، صافي مشا الله يعاونو سالينا وفضينا ، انت بنت فؤاد نجيب .. ألف واحد يتمناك .. انا اصلا مكنتش راضي على هاد الزواج ..

- دنيا [ وقفات طفات لي بقا ليها من الݣارو كتورك عليه بجهد ، هزات راسها كتشوف فباها ببرود قربات ليه ناطقة بوجه خالي من التعابير ] :

- أنا مابغيتش دوك الألف [ كتنقل من عينو لعينو الثانية ، من كلامها كتبان بحال الى ماشي فهاد العالم ]

- أنا بغيت راجل واحد سراج الدين ، لا غير بغيتو يجي ويطلب ويرغب ... ويطيح على ركابيه قدامي ، ويبوس ليا يديا ورجليا ... ويقوليا سمحيليا ، ويطلب ويزاوݣ باش نرجع ليه ، وانا انرجع ليه ومن بعد انا لي نسوسو ... هو مخاصوش يكون فرحان فحياتو ... خاصني نغصها عليه ، فهمتيني أبابا ياك ؟

- انا مابغيت [كتورك على كل حرف] حتى واحد من غير سراج ، تلاح قدامي نشوفو دموعو ، حيت مكاينش شي واحد فهاد الدنيا [ مخرجة عينيها ، دموعها هابطين بحال قطرات ديال الما ] لي كيرفض دنيا .. ومكاينش شي واحد فهاد الدنيا حسن من دنيا ، فهمتيها أبابا ، إيوا حسن ليك تفهمها ومتنساهاش ، من مصلاحتك ماتنساهاش .. دفعاتو ومشات ..

- فؤاد بقا متبعها بعينيه ، جر الكرسي وݣلس شاد على راسو كيفكر فحالة بنتو لي خلعاتو ... جبد تيليفونو من جيب لاڤيست ، دوز نمرة كريم .. من يعد مدة عاد جاوبو :

- ألو ولدي ، لاباس الحمد لله بيخير ، الى عندك شي وقت دوز لدار بغيت ندوي معاك الله يرضي عليك ..

- كريم [ بتساؤل] :

علاش واش واقعة شيحاجة ياك لاباس ؟

- فؤاد [ تنهد] : بغيت ندوي معاك على ختك ..

- كريم [ ببرود] :

مالها انا سوقها خرجتو سينين هادي الواليد ، بلاما نجبدو السينتة القديمة حسن ، خليها تحمل مسؤوليتها ..

- فؤاد [ بإصرار] :

راه ختك أكريم ، واخا يوقع لي وقع .. ختك خاصها ضروري تشوف الطبيب ، راه ولات خلعاني .. خفتها تمشي دير شي فضيحة ..

- كريم [ سكت كيفكر عاد رجع نطق] :

الطبيب ݣلتها ليكم شحال هادي وحد مداها فيا ، الى هكا حسن جي انت عندي باش ماتسمعناش ، واحد نص ساعة صافي ..

- فؤاد [ هزهز براسو] : واخا أولدي .. [ قطع مع ولدو كيفكر فهادشي لي تلات بيه بنتو ..

_____________________

*** مراكش ***

- فوحدة من الشقق الراقية ، وبضبط فبيت النعاس ... ناعس نصو الفوقاني عريان ، بداو عينيه كيتحلو بشوية ، ضور راسو كيبان ليه غير شعرها الكحل .. وظهرها العريان حداه ، هز ساعتو لقاها 16:30 ..

- زول عليه الكوڤرلي ، لابس غير البكوسور ديالو ، دخل للحمام .. خدا دوش سخون ، خرج لاوي عليه الفوطة ... نشف راسو بدا كيلبس حوايجو ..

- بدات كتفيق شوية بشوية ، شافت فيه وتبسمات ناطقة بصوت أنثوي غالب عليه النعاس :

- علاش مافيقتينيش .. عارفني تابعاني الخدمة بليل ..

- توفيق [ بصوت رجولي ساخر ] :

غير بقاي ناعسة .. تمتعي ليا مع راسك الدار مكرية يوماين مكرية يوماين ... بلاما ضيع .

- [ غوبشات بإستغراب ] :

ياك درتي معايا اتݣلس يوماين ، كيفاش زعمة واش غادي لشي بلاصة ؟

- توفيق [ هزهز براسو كيلبس الݣاط ديالو ] :

فخبارك ، أعدى حاجة عندي ، وهي لي كتخليني نفرتك جد أم شي علاقة ، هي فين غادي فين جاي ، وكترت الشكاوي ... كيعجبني ندوز وقت زوين ، نضحك نلعب نشط ، ولكن باش مو بنادم يدخل ليا مع العظام ألا [ غمزها] ..

- [ قرب حداها لاعب ليها بشعرها] انا وياك عارفين البير وماحمل .. انت كنتي باغية كادويات ، خريجات زوينين ... لݣيتيهم ، انا كنت باغي ندوز وقت زوين ، نزهى مع قبي ، ماتجيش حتى لدابا وتخصري ليا المورال صافي الزوينة ..

- مجاوباتوش بقات غير كتشوف فيه ، هز بزطامو جبد منو 1500 حطها ليها فوق الكوافوز ..

- هادي حيت طلعتي ناضية [ غمزها] الدار غدا خاص تخرجي منها مع 2 تهلاي [ عطاها بوسة فالهوى ] .. هز شوارت طوموبيلتو وتيليفونو وخرج ، مخليها مفاهمة والو ..

- هاز جوج ديال الكيسان دالقهوة ، حط وحدة ليه او وحدة لباه ..

- كريم [ من بعدما ݣلس ] :

أنا لي عندي ݣلتو ليك ، وغادي نعاود نݣولو ليه ... مكاين لي خارج علينا ݣدها هي ، باش نكونو لوجيك ، حيد شوية ديال العاطفة الواليد الله يرضي عليك ، راه مكاين لي خرج على السيد ݣد بنتك ، اما هو ولد الناس كان كيبغيها وكيموت عليها ، واخا أنت هادشي ماباغيش تعتارف بيه .. بنتك مريضة ، والى مابغاتش داوا دير فبالك غادي دير شي موصيبة لي غادي تغرقنا معاها .. انا غير ݣلت ليك وأنت تعرف .. حيت كنظل ندوي كترضني أنا لي غالط ..

- فؤاد [ بعناد ] :

مكانش عليه يطلقها ، كون كان كيبغيها يصبر شوية عليها ، يداويها ماشي يهرب ..

- كريم [ متحكم فراسو بزز حط كاسو ديال القهوة وشاف فيه ] :

الواليد ، عندك الزهر لي هو صبر عليها 3 سنين ونص ، شتي انا بنتك منصبر عليها حتى سيمانة كاملة [ شاف فيه باه مغوبش] بلاما تشوف فيا نجيك نيشان بغيني ولا كرهني ، انا بنت سيمانة وحدة منصبرش عليها ، ومنفكرش نتزوج نهائيا ، حيت أتكرهني فزواج وفالعيالات كاملين ، واش انا صغير الواليد وكرهاتني فدار وجرات عليا منها ، خلي ولد الناس ... نجيك نيشان راه انت لي خارج عليها ، باش بلاما نكدبو ... حيت طغات ، كون كنتي كترض ليها عقلها لراسها مايوقعش هادشي ..

- فؤاد [ بقا ساكت مدة ورجع نطق ] :

شنو المعمول دابا ؟

- كريم [ كيحط طرف حاجبو كيفكر ] :

غادي ندوي مع واحد الطبيب صاحبي ، وديك الساع باشما كان غادي نجاوبك [ طبطب على فخض باه] ديها غير فصحتك انت ، يكون خير كاتخممش ..

- فؤاد [ تنهد تنهيدة طويلة ، هزهز راسو بالإيجاب وعقلو سارح بيه بعيد ]

- ربعات يديها كتشوف كتسناه شنو باغي يݣول ..

- جلال [بصوت رجولي قاصح] :

ماشي من عوايدي نخلي الناس لي عاونوني شي نهار فنص الطريق ونرجع ، الرجلة تعلمناها من الصغر .. ولكن الواشمة لي باغي يبقى فهاد الدار ، ويكون من ناسها ... خاصو يعرف حدو ، مايهز رجليه حتى يعرف مزيان فين يحطها ..

- عقلو يكون الصغير وكيخمم بيه ألف تخميمة ، قبل لا يضربها بالمقص .. كيمشي كيف كنتمشى أنا ، والحاجة لي لقاها مايزعزعهاش ، مكنبغيش الصداع والمشاكيل ، خاطيني من البلابلة وتطوال اللسان ، نبغي الحاجة فينما حطيتها نلݣاها ، باش نكونو مفاهمين الواشمة ..

- مسيرة [هزات عينيها فيه ببرود أقل من برودو ] :

سميتي مسيرة ، مسيرة فريدي بنت عباس فريدي ، ماسميتيش الواشمة ، واخا أخويا جلال .. مسيرة باش نكونو مزيانين عفاك حفظ هاد السمية مزيان ، وكون هاني حنا الحمد لله معروفة علينا ، مكنقربوش لشيحاجة ماشي ديالنا ، ومكنلبسوش شيحاجة ماشي قدنا ... وحتى لݣلسة ديالنا مغاديش تكون فابور غير تهنا ..

- جلال [طانز عليها ] :

ناوية تبيعي شي وحدة من كلاويك ، ولا غاتبرعي بقلبك باش تعيشي هنا ..

- مسيرة [ كتعوج فعينيها ] :

سي دوماج ماعنديش كون كانو عندي كون بعتهم ، انا عايشة غير بدوارة مسكينة ، وفاش كيوصل العيد الكبير كيحيدوها ليا كيشويوها وياكلوها ، ويعاودو يزرعو ليا وحدة أخرى ..

- جلال [ قرب منها كيطلعها وينزلها] :.

وأنا الحاجة لي كنموت عليها فالحوالي ، [ سكت ورجع نطق كيسكانيها بعينيه وخصوصا الشامة لي كانت باينة فعظمة عنقها ] اللسان ، ويتكال خضر ..

- مسيرة [ تبسمات ليه ] :

داكشي باش لسانك طويل سبحان الله ، الى زدتي لسونات ديال الأعياد الجاية ... ايولي عندك لسان اللبويا ، تبغي تحل غير فمك تسرط لي قدامك ..

- جلال [ ضاغط بيديه على الكرة لي فيديه ] :

مزيان منين عرفتيها الواشمة ..

- مسيرة :

بغيتك تشوف لينا غير شي خدمة انا وخواتاتي ، وحتى خالي ادريس الى لقيتي ليه شيحاجة ..

- جلال [ حك جنب لحيتو كيفكر ] :

بحال الى ݣلتي ، الݣلسة ديالكم هنا والماكلة لي انوكلكم اتخدمو عليها ، اممم مزيانة ... نفكر ونشوف فأشمن جيحة كحلة نحطكم فيها ..

- قربات ليه هي هاد المرة كتشوف فعينيه ، لي لونهم بحال حبة القهوة ، رموشهم الطوال ، لي مخبيين أسرار كثيرة .. عظمة فكو لي كتنبض .

- الجايحة الكحلة اتجمعنا بزوج الغراب ..

- لأول مرة يتبسم فوجها ، مستمتع بهاد النقاش لي ضاير بيناتهم .. وخصوصا أخر كلمة ݣالتها ليه ، ولي تݣالت ليه لتاني مرة ، المرة لولة تݣالت ليه من عند هارون فاش تعرف عليه لأول مرة ، وهادي ثاني مرة تݣاليه ومن عندها هي ..

- جلال [طلعها ونزلها ] :

الصراحة الݣلسة ديالكم فهاد الدار اترجع عليا بالفايدة ، كيبان ليها غادي نتمتع ويعجبني الحال ..

- مسيرة [دار يديها فجياب تجاكيط ديالها ، ضاحكة ] :

اوووف بزاااف ، غادي يعجبك الحال ، حتى حاجة مكتجي فابور ..

- جلال [غمزها] :

حتى انا هادشي لي ݣلت الواشمة ، [قرب حدا ودنيها حتى حسات بسخونية انفاسو على عنقها ، ريحتو الرجولية الممزوجة بريحة بارفانو ، السلسلة الفضية لي نزلات من عنقو ] :

حتى حاجة مكتجي فابور ..

- بعدات منو ، لايحة شعرها ورا ظهرها :

غير كون هاني ، حنى نيفنا فسما ، مكنرضاوش بطرف ديال الخبز فابور .. من غدا لقى لينا فين نتخشاو ، واخا يكون مع البݣر ..

- جلال [نطق بكلام لي جمد الدم فعروقها ] :

واخا كيبان لي متحتاجوش ..

- مسيرة [وقفات كتشوف فيه شنو باغي يقصد ] :

علاياش كدوي ؟ مافهمتش !!

- جلال [قرب منها ، لدرجة دقات قلبها كانو كيتصارعو فاش شافتو فين كيشوف ، يدو مشات نيشان لجهة عنقها ، مقاد ليها السلسلة لي كانت نازة وحجرها الحمر كيلمع فشمس ، قاد ليها السلسلة مقرب وجهو من وجها ، حتى تخلطات ريحتها مع ريحتو ، وبهمس نطق ] :

لي دايرة بحال هاد السلسلة فعنقها ماماحتاجاش تتخدم الواشمة ..

- مسيرة [متصنعة البرود ، بحال الى ماشي هي لي تشوكات من برودة صباعو لي لمسو جلدها ] :

مال السلسلة حتى هي ، أش جابها لهضرة ... أهي ياكما انت من دوك الناس لي كيكونو لاباس عليهم ، ولكن يديهم سابقينهم ، [ضحكات] غير رتاح حيتاش هادي ماشي ذهب ، وهذا ماشي حجر حقيقي ... هادي شريتها اعند السينيݣاليين ب 40 درهم ..

- ملامحو كانو باردين ، متقدش تعرف فاش كيفكر ... عينيه كانو بحال شي سكانير ، كتحس بنظراتو بحال الى كيعريوها ... عمرها ماتصدفات مع شي واحد بحالو .. قرب لعندها نازل براسو لمستوى راسها ، حركة كان ضروري يديرها باش يلاه ممكن انو يوصل ليها ، فرق الطول كان باين من بعيد بيناتهم ، علو طولو وكتافو العراض لي زادوه ضخامة ، وقصورية وصغر جسدها لي كانت واصلة ليه لجهة صدرو ..

- نزل براسو لعند ودنيها ، ونطق بصوت رجولي باح تقيل :

- عينين الغراب ،كيݣدو يفرقو بين الدوريجين و المدرح .. بعد راسو ورجع حط يدو على السلسلة مدورها ومرجعها مخبية كيف كانت .. تخطاها ورجع للفيلا مخليها متبعاه بالعين ..

- بلعات ريقها متوترة ، مافهمات والو ... زعمة يكون عرف بلي الحجرة لي فسلسلة دوريجين ، والى عرفها دوريجين ومن بعد هي مسارقاهاش ، حتى الى سولها غادي تقوليه كادو من عند ماماها عادي جدا ، ولكن علاش كدبات عليه كون غير قالت ليه الصراحة وتهنات ..

- مسيرة [تعصبات] :

تفو على بشار ، مكايفلت حتى حاجة خزيت .. وانا كيف الحمارة قلت ليه راه مشرية عند سينيݣاليين ، هاد المرة انقوليه راه اكنت كنضحك معاه صافي .. داكشي باش قاليا متحتاجيش تخدمي ، كيقصد زعمة راني دايرة الملاين فعنقي ..

- سندس [جاتها من اللور مقاطعاها ] :

مالك كدوي راسك ياك لاباس ، تعطلتي أصاحبتي ؟؟

- مسيرة [عاودات ليها البلان كولشي ] زعمة يكون عاق بشيحاجة ؟

- سندس : راه واخا مايعيقش أتخليه يعيق ، وأصلا باش ايعيق حجرة خلاتها ليك ماماك فاش توفات ، بابا دارها ليه فسلسلة وعطاها ليك ، واخا تكون ساوية الملاير راه مستحيل تبيعيها حيت كتبقى من ماماك ..

- عرفتي شنو دار ليك دابا ، انت مرات كتكلخي ولا هو لي كيأثر عليك ، هو دار هادشي غير باش يجس النبض ديالك ، ويحصلك راه دار ليك أخطة باش يعرف واش وراك شي إن ولالا ، وانت ݣلستي دخلي وتخرجي فالهضرة ..

- مامالفاش ليك أصاحبتي ماعرفتش انا مالك !! معانا حنا كتكوني شكل معاه هو كتولي غير جيبيها فم وݣول ..

- مسيرة [شافت فيها] :

اه على زينو وكحل عينو حيت تغرمت بيه ، واش من نيتك واش ماشتيهش كيداير وشخصيتو كيدايرة ، انت عارفة طبعي مزيان ... كنهضر ونقيس ، ومنطلق حتى نعرف الحاجة فين غادية ... ولكن جيت حتى لهاد جلال نوعو عمري ماشفت ، الحكة لي تحك مع الزمان .. وداكشي لي دوز وقريت عليه ولي وراتو ليا سكينة ، خلاه مطور أصاحبتي .. واخا تبغي تكذبي يقلعك يقلعك واخا تخبي حتى تعياي ، يعرفك كذابة .. واش انا فين عمري كنت كنظل نطرطر فالهضرة ، ولكن كنشوفها هي الحل الوحيد ، باش نغمق عليه ونهرب من عينيه ..

- خايفاه لا يعيق بلي أنا هي مولات القناة أصاحبتي ، راه ماشي قضية كيأثر عليا انت عارفاني مابقيتش كنتأتر بحتى واحد من زمان ، ولكن هدا فشكل أصاحبتي ، بلا داك الصوت المهيب لي عندو ، ولكن عينيه كتخافي تكذبي وهو راه قاري حقيقتك ..

- سندس [دار يديها فجيابها وكتفكر فكل كلمة قالتها ختها ] :

هو الى جينا لصراحة ، هادشي كامل لي قلتي بصح ، فخبارك نهار القهوة ، وفاش ركبنا معاه فطوموبيل ... قسما بالله العظيم الى قلبي كان أيخرج من بلاصتو بالخلعة ، علاش الله أعلم ، عندو واحد الهيبة واحد الحضور راه الخلعة كتحسب بقلبك ايخرج من بلاصتو ... راه انت مزال بقيتي كدخلي وتخرجي فالهضرة ، وتلبقي من هنا ومن لهيه باش سلكتي راسك ، اما كون انا انحط ليه المزيودة كاملة ..

- مسيرة :

هو من النوع لي مكايحملش الهضرة بزاف ، وأنا لاحظتها من اول نهار ، داكشي باش بديت كنبلبل بلعاني باش يتدعق ويفوتني عليه ، وراه شتي دغية عرفني كذابة ، بغيت انعرف شكون هاد الكمارة دالويل لي عطاه الراپور ديالي ؟

- سندس :

واحد بلاصتو راه عندو لي يجيب ليه الشادة والفادة ماشي غير راپور ديالك ..

- مسيرة : سبحان الله وباش يعلموه بلي كيتخيط وراه لا .. ندمت على نهار لي دخلت راسي فهادشي ..

- سندس : فات الفوت دابا ، ماعندك الميت مايدير قدام غسالو ، انت الوقت لي شفتيه باغي يجبد ليك لسانك ... ديري ديك سابهلالة ديالك ، خليه يكره البلاصة لي انت واقفة معاه فيها ..

- مسيرة [هزهزات براسها] :

داكشي لي غادي ندير نيت ..

- بمدينة مراكش الحمراء ، وقدام شقة راقية ... واقفة طوموبيل رونج فالݣرونة ، بابها اللوراني محلول ، محطوط كرسي خاص بالدراري الصغار ..

- خرجات من باب الشقة بنت لي شافها مايقولش بلي هي فأواخر الثلاثينات وأم لزوج بنات .. بنت عندها 4 سنين ، وبنت عندها 7 سنين ..

- وديان [ هازة بنتها الصغيرة بين يديها ، ولوخرا حداها ] :

شمسي طلعي اماما لطوموبيل يلاه .. بلاما تزيد كلمة وحدة حلات باب الطوموبيل وطلعات .. حطات حداها ختها فالكرسي لي حداها ، قداتو وسداتو السميطات ، البنت الصغيرة كانو ملامحها بحال ماماها عينيها قهويين ، وشعرها كورلي قهوي غامق ، والى ضربات فيه الشمس كيبان كيبري .. أما شمسي مكانتش كتشبه لماما ، شعرها حتى هي مبوكلي لونو كحل ، وبشرتها سمرة .. ملامحها كانو زوينين ..

- طلعات لطوموبيل من بعدما سدات الدار مزيان ، ديمارات وشدات الطريق ..

- شمسي [كطل على ماماها] :

ماما ، واش غانمشيو عند مامي ، أنبقاو تما ديما ؟

- وديان [ عينيها على طريق ، مرة مرة كتخطف شوفة لبناتها من المرايا ] :

لا مامي ، ندوزو العطلة ونرجعو أبنتي .. ملاك لا أبنتي مكنديروش ليبيتيز هداي ..

- ملاك [بإبتسامة بحال سميتها ] :

انا بيت حبيب بسوكولا[ بغيت حليب بشوكولا] ..

- وديان : واخا مامي أنا ناخدو لبنتي .. وصلو لواحد سطاسيون ، نزلات سادة عليهم ، دخلات لسوپير مارشي كاين تم .. كتقلب بعينيها على داكشي لي بغات ، مارضاتش لبال حتى دخلات فشي حد ..

- وديان [بإبتسامة تأسف ] :

- سمحليا ماشفتكش مارضيتش البال ..

- هو بنفس الإبتسامة ] لا هانية ماشي مشكيل كتوقع ..

- وديان [بنفس النبرة ] :

زربانة وخليت بناتي فطوموبيل ، داكشي باش سمحليا بزاف والله ..

- [بنفس نبرة صوتو الرجولية ] :

ماوقع والو ، مكاين لاش تضيعي الوقع وانت كتعتادري وبناتك كيتسناو ... هزهزات ليه براسها وكملات التقدية ، خدات لي بغات ، خلصات فلاكيس ، الخرجة لي اتخرج خرجات معاه دقة وحدة ... كان كيبان ليها شخص فأوائل الأربعينات ، من لباسو كيبان جينتيلمان ... ودواق .

- السفر مع الوليدات وبوحدك صعيبة شوية ..

- وديان [ بإبتسامة ومن خطواتها باينة زربانة ] :

هادي هي ضريبة ديال تكوني أم لجوج بنيات ومسؤولة عليهم بوحدك ، بسلامة وسمحليا مرة أخرى ..

- خلاتو واقف متبعها بنظراتو ، ختى طلعات لطوموبيلاتها ديمارات ومشات ، تنهد تنهيدة طويلة .. وهو بدورو طلع لطوموبيلتو ..

- عطات لكل وحدة فبناتها شنو خدات ليها ... بدا تيليفونها كيسوني ، دارت الكيت وجاوبات ... وعينيها على الطريق ..

- وديان : وي ليليا .. انا شادة الطريق أختي ، وبلاش بلاش واش انا أول مرة أنشد الطريق بوحدي من مراكش لإفران ..

- ليليا [فالجهة لوخرا] :

وصاحبتي راه بزاف عليك ، قلنا ليك نتلقاو ليك فكازا ونسوݣ انا نريحك ..

- وديان : راه عارفة ماما لي ݣالسة حداك دايرة ليك طورونونو فراسك ، راه انا مالفة بلاما تعدبي راسك أختي ..

- ليليا [شافت فمها لي سمعاتها ] :

سمعتيها شنو قالت ، رضيتيني انا لي مابغيتش نمشي نعاونها ..

- وردة [دايرة نظاظرها ديال الشوف] :

والله يعطي العقل لي يدير فيكم راسو ويخاف عليكم ، انا نحية علاش ، خفت عليها مع الطريق ، قلت تسارحيها زعمة ، هي بعدا راه جربات الكبدة وعارفاني علاياش كندوي ، انت نهار تجربيها وتفهميني ..

- ليليا [بإبتسامة] :

انا ولادي هوما هادوك لي كيلعبو فجردة شفتيهم [أشرات ليها ل 3 ديال المشاش ] هادوك هوما حفايدك أنا مامزوجاش أماما اتهناي ، براكة عليك أبنات وديان حفيداتك صافي ..

- وديان : واش أتبقاو كتناݣرو فتيليفون وانا سايݣة ، يلاه سيرو حتى نوصل إن شاء الله ..

- ليليا : بلات ماما قالت ليك واش البنات مزيانات ؟

- وديان [مشاو عينيها لبناتها لي كيتفرجو من الزاج فطريق ، تبسمات لا إراديا وتنهدات بإرتياح] :

الحمد لله راهم مزيانين ، يلاه انا مشيت .. قطعات مع ختها ، ورجعات إنتباها على الطريق ..

- وصل الليل ، سعاد ومعزوزة ݣالسين فالمراح مخدمين تلفازة كيتفرجو .. أما عباس هو وأدريس ، خرجو على برا ݣالسين ورا الدار حاطين جوج كراسة وشادين تقرقيب الناب ، الجهة لوخرا من جهة سرجم الكوزينة ، كانت طبلة بيضة فيها 4 ديال الكراسة ..

- كل كرسي شاداه وحدة فيهم ... كل وحدة فيهم لابسة لبسة فشكل ، ولكن كلهم نفس الستيل ... بيجامة سخونة مع بينوار فوق منها تجاكيط ، تقاشر طالعين مع بانطوفات ..

- سكينة : بغيت انعرف إيمتا تقديتي الزريعة ݣاعما شفتك ؟

- مسيرة : قبل منمشيو هاد الصباح ، قلت مغاديش نلقاوها فهاد القنت ، وجبتها معايا ، تقديتها خضرة باش متلواش لينا ، فينما نبغيوها نݣليوها مع الملح ونوضو نايضين ..

- صفاء (كتنقي فزريعة ) :

أجي زعمة ولد عمو يكون مزوج ؟ هداك لي عيط ليا بديك سمية الزينة النايحة ، مزال مانسيتهاش ليك غير بلات ..

- مسيرة (كتنقي فزريعة ودفل) :

لا مامزوجش ، ولكن يمكن دافعين فيه العربون .. واش انت هبيلة ولا دايرة راسك هبيلة واحد فزوج ، وحنا كنا جايين معاه فطريق ، وكتسمعي السيد يلاه طلق ... كتقوليك واش مزوج ، هاد البنت ماعرفت مالها ؟

- صفاء [ بزعاف] :

وصافي راه نسيت هاد القضية ، عارفاني مرة مرة كنسهى مكنبقاش نأضابطي ..

سكينة : انا حمقني صاحبو ، كيهبل ياختي على طولة وعلى تجريدة ، شفتوه قبيلات ، وداير واحد الوشام فيدو ، واخا خرج دافع كبير ملاح حتى سلام ، طلعنا ونزلنا وخرج ، ياربي غير مايكونش مزوج حتى هو ..

- مسيرة (دفلات قشور زريعة جابتها لسندس فوق عينها ) :

قالو راشماه شي درية ، شي سبسبوة من دوك لي فيهم 2 ميترو فطول ..

- سندس : وااا شريفة ، جمعي عليا دفالك أويلي ، راه جبتيها ليا فوجهي دابا ينوض فيا الݣوب ..

- سكينة : وأنت باش عرفتي بلي داوية فيه شي وحدة ، مالك أختي كنتي معاشرة معاه ، زوينة هادي تاني ..

- مسيرة : راه انت وهاد نص بلاصة لي حدايا لي خرج ليكم العقل ، وبقاو تحلمو تما ، مدو رجليكم على قد لحافكم أبنتي .. متعلقوش فين تفلقو وتنساو راسكم ..

- صفاء : خلينا أختي غير نحلمو .. حنا غير ضاحكين ، أنا بعدا داك ولد عمو ماعرفت كيف جاني ولكن داك خوه ، كيبان معقد الله يستر ..

سكينة [بحال الى تفكرات شيحاجة مشات ليها من بالها ] :

- مسيرة عمري سولتك شنو هو المستوى ديالك ؟

- مسيرة (علات فيها عينيها ) :

أنا اختي مستوايا هاااابط .. واصل حدا سروالي .. انا كنطلع فيه وهو كيهبط ، حدي وصلتو مسكين للباك وخديتو وهو يرجع يهبط ، وانا نݣلس فدار حيت خفت يطيح ليا شي نهار فشارع ونولي شفاية للعدو ..

- سندس (تقادات فالݣلسة) :

فخباركم البنات ، تعرفت على جوج دراري فالأنستغرام ، كيحمقو بزين ... واحد تركي وعايش فاليونان ، وثاني يلالياتي لبناني عايش فأمريكا ، كيحمقو بزين ..

- صفاء : ضربتيهم على الشعا بدوك التصاور لي كتلوحي فالأنستغرام ، عند بالهم غير بنت پوتين ، كون يعرفو دوك تصاور كاملين مصوراهم فسطح ، كون بلوكاوك ألف بلوك ومتبردش ليهم ..

- سندس : بزاف عليك ولهلا يحييك ..

- سكينة : انت دوي معاهم ، وشوفي شنو أيكون الى صدق واحد فيهم مزيانة ماصدقوش هانية ..

- سندس : الصراحة ماعرفتش شكون نختار بيناتهم ، حرت والله العظيم ماعرفت معامن ندوي فيهم ..

- مسيرة (دفلات قشرة زريعة جابتها فنيف سكينة ) :

نعطيك واحد الحل زوين والله العظيم غادي تشكريني عليه ...

- سكينة [بفضول] : شنو هو ؟

- مسيرة : هانتي انا بان ليا تزيدي تخدمي شوية على راسك هاد العام ، العام الجاي تقدر تبغيك البارصا ولا ريال اش بان ليك ؟؟ ..

- سندس [خنزرات فيها ] :

باز انا كنتسنى فيك تدوي بصح وانت ݣالسة كتريݣلي عليا ..

- مسيرة : وهي هادي مالي كدبت ، هاليونان ها أمريكا هالبنان ، خالوطة جالوطا ... تبتي شوية وانت فيك لادويد[دودة] ..

- سكينة [بزعاف] :

واش سلات نوبة سندس جات نوبتي أنا ، اويلي عمرتي لي وجهي بدفال أصاحبتي ..

- مسيرة [مكملة تنقية ] :

الما كايحيد الجدام ، الى ديتها فيكم غادي نمدغ ݣاع هاد الزريعة لي جمعت ففمي ..

- صفاء : القويعيدة هي القويعيدة ..

- سندس [نغزات مسيرة] : صاحب دعوتك مقابل معاك ، وقيلة راه بغاك ... هزات مسيرة راسها كيبان ليها واقف مقابل معاها ، لابس كيطمة كحلة ... أشر ليها براسو باش تبعو ..

- مسيرة [حطات الزريعة من يديها ، دايرة البركة لي جمعات تحت لسانها ] :

مسينة على جرانة حاملة مامسينا عليه ، ياربي سلامة تاني ..

- سندس [غمزاتها] :

متدهشيش وتبيني ليه بلي مخبية شي حاجة ، ديري لي قات ليك ..

- مسيرة [كتسوس حوايجها ] :

إلى مارجعتش بلغو ، قولو لصفاء بلي كاينة قضية إختفاء جديدة .. [دارت قبها وتحركات لعندو] ..

- كان واقف كيتسناها حدا واحد الشجرة ، حتى وقفات عليه ..

- مسيرة [ متصنعة البرود ، حاطة إبتسامة بريئة على وجها ] :

نعام أخويا جلال بغيتيني فشيحاجة ؟

- دور راسو عندها ، معوج عنقو مطلعها من رجليها لراسها ..

- جلال :

خالك يݣد يبدا من غدا الخدمة هنا فجردة هادشي لي ݣديت نشوف ليه هاد الساعة ..

- مسيرة [ غوبشات ] :

لا اويلي واش من نيتك ، هاديك راه خدمة ساهلة ماهلة ... ايولي عاطيها غير لتقرقيب الناب وبرارد أتاي .. خاصو شي خدمة لي تحكو مزيان ..

- جلال [ بإستغراب] :

عمري شفت شي وحدة باغية تمارة لخالها ..

- مسيرة : اه انا حيت خالي أدريس ، كتافو بردو من جهة الخدمة ، خاصو يتحك مزيان ... شوفليه شي خدمة نيت نيت ..

- جلال سكت ، واقف كيدوز يديه فلحيتو وكيخمم .. رجع شاف فيها ونطق :

نهبطو مع الخدامة ..

- مسيرة :

يݣلع الخضرة وداكشي زعمة ؟ [أشر ليها براسو بمعنى أه ] مزيانة هبطو خليه نيت يتحك الشوية مع الزمان ... أجي وانا وخواتاتي ، شنو غادي نديرو ..

- جلال [ مصغر عينيه كيفكر] :

شنو كتعرفي ديري بضبط ؟ من غير لسانك الطويل ..

- مسيرة [ بكل إفتخار] :

الصراحة كيقولو ليا أنا خطيرة فطياب ، وكنصرع شيحاجة سميتها اتاي ..

- جلال : بلدي ولا رومي ؟

- مسيرة :

البلدي القديم على حقو وطريق ، وكنصرع اتاي الصحراوي على حقو وطريقو ..

- جلال [هزهز براسو ] :

مزيان ، [بنبرة صوت رجولية امرة] من غدا ، انت لي اتولي طيبي ليا غدايا وعشايا ، الفطور عافيك منو .. مكناكلش شي حاجة خاوية ، ماعندها مداق ولا بنة .. أما خواتاتك ... يعاونو نجية فدار ، جايا العائلة وخاص لي يعاون ، بزاف عليها تكون بوحدها ..

- مسيرة [ متوقعاتش يطلب منها تولي لي تطيب ليه ، هو كيبان من النوع لي مكايتيقش فبنادم ، كيفاش تاق وعطاها مهمة انو طيب ليه ماكلتو ، صغرات عينيها كتفكر فهادشي ]

- جلال [ ملاحظ السرحان ديالها ، عارفها كتفكر وكدورها فدماغها ، هادشي مخافيش عليه من عينيها ، ولي هو عارف مزيان كيفاش يقراهم ] :

شتك سكتي الواشمة ، ياكما ماعجباتكش الخدمة نبدلوها ليك ..؟

- مسيرة [ داركات الموقف] :

لالا علاش متعجبنيش ، بالعكس مزيانة ليا ..

- جلال [ طلعها ونزلها ] :

ايوا على هاد الحساب حنا تفاهمنا ، تخطاها غادي شوية رجع لعندها ..

- من ورا العشا اتختميها ليا بشي كاس صحراوي من يديك ..

- مسيرة [ هزات فيه راسها وببرود ماسحة الضحكة من وجها ] :

غير سمحليا منقدش نعمر ليك اتاي صحراوي ..

- جلال [ عوج راسو لعندها ورجع تقابل معاها ] :

وعلاش؟ شنو السباب ؟

- مسيرة [الصمت ، كدور فعينيها كتحاول تقلب على مخرج لي يخرجها من هاد الحفرة لي كيحفر ليها ويلوحها فيها ] ..

- جلال [ بصوت رجولي باح ، مقرب منها حتى مابقاش بزاف بيناتهم ] :

عقلك خدام الواشمة فشي كذبة جديدة اممم ؟؟

- فجهة لوخرا ... دفعات الكرسي ، ومشات متجري للداخل بغات تدخل لطواليط .. حطات يدها على الپوانيي مابغاش يتحل ليها ، عرفاتو عامر فاش سمعات صوتها ..

- معزوزة : أويلي اشكون ، شكون لي كيدفع عليا الباب ؟

- سكينة [ حاصراها الى بقاات شوية اديرها فحوايجها ] :

مي معزوزة واش قربتي تسالي ؟

- معزوزة : وبلاتي نتفاهمو معاها نسولوها واش قربات تسالي ولا مزال ، واش انا لي محكمة فمصاريني ، مكاتبان ليكم الطواليط حتى كيكون فيها شي واحد ...

- سكينة [ مزيرة على رجليها ]

واش قربتي غير تخرجي ، اه ولالا عفاك امي معزوزة هالعار ، راه انديرهم فحوايجي الله يعطيك حاجة فمقام النبي ياربي ..

- معزوزة : امين وسيري أبنتي شوفي ليك شي نض بيدو ، ولا شي غراف انا راه يلاه دخلت .. مزال مغاديش نخرج ..

- سعاد [ نباتها ] :

خالتي الى دخلات ليك لطواليك ݣاعلا تعولي عليها تخرج تما تبقى ، اصبري أبنتي حتى تخرج ماعندك ماديري ..

- سكينة [ رجعات لعند البنات كتتلوى ] :

مي معزوزة فطواليط ، ناري يالبنات قسما بالله حتى انديرها فحوايجي راه مايمكنش أعباد الله ، راه مكنحصرش البول نهائيا ..

- سندس [ اشرات ليها براسها للڤيلا ] :

بحال والو خالتي نجية اتكون مزال فالڤيلا ، سيري لعندها تديك لطواليط ، الى بقيتي بحال هكا والله حتى اطلقيها فحوايجك ..

- مجات فين تكمل كلامها حتى كانت سكينة طارت لجهة الڤيلا ، كان الباب محلول ... أول ما حطات رجها فيها تبهضات ، ماقداتش تيق عينيها ..

- سكينة [ كتوبخ راسها ] :

ماشي وقت تمنضير دابا ، سيري قلبي على نجية [ بدات كتعيط] خالتي نجية ، خالتي نجية ... عندها الزهر لي نجية كانت فدار مزال مامشاتش لدارها ، خرجات من حهة الكوزينة كتمسح يديها فواحد المنديل ..

- نعام أبنتي بغيتي شيحاجة؟

- سكينة [ بترجي] :

خالتي الله يحفظك ، بغيت ندخل لطواليط ، طواليط دسال دار عامرة ، وانا مكنقدش نحصرها ..

- نجية [ بإبتسامة] :

واخا ابنتي أجي معايا .. تبعات سكينة نجية ، ماحيلتها للحصرة ولا لهاد الدارلي كان اقل مايقال عليها كتهبل .. وصلات لباب الطواليط :

- هاطواليط أبنتي ..

- سكينة : واخا أخالتي لهلا يخطيك .. مع عطاتها بظهر مع دخلات سادة عليها من الداخل ..

________________

- مسيرة [دبلات عينيها ببراءة ونطقات بصوت رقيق أنثوي ] :

- عندي طقوسي الخاصة ، وهاد الطقوس باش نعمر أتاي صحراوي كنديرهم نهار كتكون عندي انا الݣانة ، ماشي ديما [ مابغاتش تقوليه بلي الجلسة ديال أتاي صحراوي ، مكتݣلس وديرها حتى كتكون كتخطط لشيحاجة ، وباش تفكر لديك الحاجة مزيان ... كتݣلس ݣليسة بعقلها ، مجمر حداها مع صينية وكيسان الصغار ، وبرادها الصغير ...بأتايها شعرة والعلك .. أتاي برزتو على حقو وطريقو ، وتلبس ملحف وطلق البخور ... هادي هي النشوة ديالها ، وهكا كتفكر مزيان فداكشي لي باغية دير ، وهادشي مستحيل ديرو معاه .. ولا ديرو ليه ، الى هو باغي اتاي يزهى بيه تعمر ليه اتاي عادي ... أما صحراوي لا ..

- جلال [ كيختارق الجلد ديالها بنظراتو ] :

زيدي قنعيني كثر ، حيت مابغاتش دخل لراسي ..

- مسيرة :

شوف نعمر ليك اتاي عادي ، اما اتاي صحراوي راه صعيب ليك والله العظيم منكدب عليك ، دابا انا راه ماعرفتش كيفاش نوصلها ليك ، حيت انا واحد الإنسانة لي حشومية بزاااف ..

- زاد مقرب منها مختارق المسافة لي كانت بيناتهم ، حتى ظلو غطا عليها ..

- كنسمعك دوي ..

- مسيرة [مخرجة يديها من جياب التجاكيط ديالها ، كتشرح ليه بصباعها ]

دابا هانتا أتاي العادي حبوب ، راه خفيف على المعدة وعلى الدم وعلى الصحة ، داكشي باش كينصحو بيه الأطباء المختصين فصيف ، حيت كيبرد على الواحد .. اما اتاي الصحراوي ، [بلعات ريقها] حيت فيه اتاي شعرة ياك ، وفيه العلك ياك ، ووو ..

- جلال [زاد مقرب ليها ، ببحة صوتو ورنة صوتو نطق] :

دوي ..

- مسيرة :

الاطباء كيخرجوه لناس لي فيهم البرودة ، حيت هو كيحيد البرودة ، وكيخرجوه لناس لي فيهم مساكن العجز ، ومزوجين وباغيين يولدو الدراري والهراري ، وانت تبارك الله وصلاة على النبي ماحسدناك ، كتبان مافيكش البرودة ݣاع نخاف عليك ..

- جلال [عينيه فعينيها ] :

جيني نيشان وݣولي كيسخن ..

- مسيرة [كترمش بعينيها ، دقات قلبها كيتسارعو ، جات تنزل راسها ، ولكن صباعو ماخلاوهاش ، سرعان ما على ليها راسها حتى شافت فيه] ..

- جلال : وشكون ݣاليك انا ماباغيش نسخن الواشمة ؟

يتبع...