روبي ڤيريدجو الجزء الثامن

- جلال [شاف فيه بنظرات لي فشكل ، صغر عينيه ورجع حلهم ] :

ماعنديش 12 عام تملي عليا شنو خاص يدار ولي لا .. ديك الكاسيطة حرقتها ورمادها حكيت بيه سناني ..

- سراج [دوز يدو فشعرو تنهد تنهيدة طويلة ، رجع حدر راسو وطلع لبيتو ] ..

- هلال : أخيب بلان يݣد يوقع ليك ، هو كاين شي حوايج ... عارفهم ولد عمك على خوك ، لي خاص أنت تعرفهم .. شتي على بلان كيداير .

- جلال [حادر راسو مشافش فيه ] :

هادشي ݣولو لباك ، متݣولوش ليا أنا ..

- هلال [ببرودة وصوت قاصح ] :

باك حتى أنت ، وكنيتو مكتوبة حدا سميتك ..

- جلال [تبسم مهزهز براسو ] :

با بسمية ، [هز راسو فيه غامزو] بلاما تعاود تحل داك الصندوق لي رشا وقفلو تصدا .. غير ايتفرتت بين يديك ومغاتسفال منو والو ..

- هلال : حتى ليمتا ايبقى مسدود ، باك هداك مغاتصفيش خاطرك من جيهتو ..

- جلال [بصوت رجولي باح وقاصح ] :

حتى يصفي خاطرو من جيهت راسو ، عاد ندويو على خاطر ولدو .. العݣدة تعݣدات بألف عݣدة ، الى بغا يحلها غير أيوحل معاها ، خليها كيما هي ..

- عارف خوه مغايبغيش يسد هاد الديسك ... وهو راسو ايترݣع عليه ، داكشي باش عطاه بظهر ومشا لجهة الكوزينة ، حال باب لاكاب ونزل ، بنسبة ليه الهضرة سالات ... جنو وجنونو يجبد باه ولي وقع ليه شحال هادي ..

- هبط لاتوليي ديالو ، شعل زوج ديال ضواو ، مشا لواحد الثلاجة صغيرة ، جبد منها قرعة دالما الخاسر [الشراب] ، هز كاس من الكيسان لي حاط تم ... كب ليه كاس وݣلس فوق واحد الكرسي كيشرب ، مقابل مع صورة جدو عبد الرحمان ، لي كان معلقها فلاتوليي ..

____________________

*** إفــران ***

- ݣالسين فجردة ، ماريا او وردة وسومية ... دايرة رجل على رجل ، وساهية .. ماسمعاتش سميتها منين عيطات عليها وردة ..

- ماريا [عاد ردات البال شافت لعندها ونطقات ] :

نعام قلتي شيحاجة ؟

- وردة : فين ساهية ياختي ، من صباح وانا وسومية ندويو وأنت مكايناش فهاد العالم ..

- ماريا [تنهدات تنهيدة طويلة ، صباعها كيلعبو بأطراف الكاپ لي لايحة عليها ] :

توحشت ولدي ياختي ، توحشتو بزااف ..

- سومية : مزال خاطرك ماصفاش من جهة جواد ؟

- ماريا [هزات عينيها فسومية ] :

لوكان أنت لي ذياب حرمك من سراج 18 عام ، كنتي غادي تسمحي ليه ؟

- سومية : أنت عارفة بلي جواد قاصح شوية ، ولكن الحمد لله جلال لقا عمي عبد الرحمان الله يرحمو فجنبو ..

- ماريا : اهاه ، وكونما لقاش عمي ، ولدي كان غادي يتشرد ليا فزناقي ياك أختي ..

- سومية : انا ماقلتش هكاك ، ومتفهميش كلامي بالغلط وتقولي كندافع على جواد ... انا متافقة معاك ، راه شفت لي داز عليك والبكا لي كنتي تبكي ليل ونهار ، ولكن واخا يوقع لي يوقع كيبقى راجلك ولالا ..

- ماريا [بعصبية] :

غير راجلي يحرمني من ولدي ، هاديك أختي كتسمى أنانية سمحيليا ، شنو فيها كون خلى ولدو يدير داكشي لي بغا ، غير حيتاش جلال مابغاش يتبع داكشي لي بغا جلال ، هو كان باغيه يدير إدارة الأعمال ... ويشد الشركة ديالو ... ولكن جلال مابغاش واش بزز ، هو من صغرو تربا فالفيرما ... عمي كان ديما كيديه معاه الله يرحمو ..

- رباه يبغي الأرض ويبغي الفلاحة .. شنو فيها كون خلاه يدير الهندسة الفلاحية ويكون حداه ، ويدعمو ويوقف معاه وبجنبو ، ويخليني حتى انا قريبة لولدي ..

- لا هو خسر عليه زوج كلمات ، يا دير داكشي لي بغيت انا وتبع لي بغيت أنا ، وتشد الشركة انت وخوك .. ولا هز حوايجك عليا وعطيني بتيساع متعرفني منعرفك ، الريال منخسروش عليك ..

- عمرها غادي تنسى ليا فحياتي ، نسى هو بلي ولدو نسخة طبق الأصل منو ، ونسفو فسما ... ونفسو حارة ، مارجعهاش ليه فوجهو .. هز حوايجو وضرب الباب [دموعها نزلو من عينيها سخان ، كان خاصهم غير السبة ] , ماخليت مادرت طلبت ورغبت ... شنو كان كيقولي ..

- دابا يرجع ، دابا يضربوه القنات ويرجع .. غير صبري ، حتى لنهار لي قالي عمي بلي راه و سيفطو لسويسرا ... شحال بكيت وجدبت ، ومرضت وطحت فيها فالفراش وراكم شاهدين ..

- وردة : بصح دازت عليك وعلينا ، وأمين دوا مع جواد ... ولكن راسو قاصح ..

- ماريا : كنشوف فهلال وأمينة كيكبرو قدامي .. او ولدي كنشوفو غير فتيليفون ، ساعة دالمݣانة فنهار ... ومرات كيغبر شحال عاد كندوي معاه ، وكتقولي ليا واش خاطرك مزال هاز من جهة جواد .. شفتي انا الى ماصفى الخواطر بينو وبين ولدو .. عمر خاطري مايصفى جيهتو ..

- سومية [بتساؤل] :

واش كيدوي معاه ولا مكايدويوش ݣاع ؟

- ماريا : غير فالمناسبات والأعياد .. غير هادشي مكايدويوش نهائيا ، وانت عارفة جواد النفاخة عندو فنيفو ... مكايرضاش ، [ ضحكات بإستهزاء] قاليك كونما الحكة لي حكو والخرجة لي خرجو ، مكانش غادي يوصل لهادشي لي هو فيه دابا ..

- وردة : الله يهديه حتى هو ، جواد خاصو يهبط كواريه شوية ، ويمشي يطلب السماحة من ولدو ..

- ماريا : مغادي يدير هادشي ، حتى توقف على الصح ... ونهز حواجي ونمشي عند ولدي ، والله العظيم كونما العهد لي عطيت لعمي الله يرحمو ، وبلي عمري فحياتي مانغضب ونخلي دار ونخرج ... كون وا تبعت ولدي زمان هذا ..

- سومية [ كطبطب ليها على يدها ] :

يكون خير أختي ، دابا تقاد الأمور ... حتى جواد شفتو هاد الأيام ماهواش غير كيفكر ... راه حتى هو غادي يكون معاجبوش الحال ، غير مكايبينش وصافي ..

- ماريا : باش غادي تفيد .. ولدو عندو 36 عام ، وحتى هو كبر حتى ليمتى أختي ... العمر كيجري والايام غادية ..

- وردة [ شافت عند سومية ] :

عندها الصح ، الايام دغية كتجري ، حتى ليمتا ايبقاو على هاد الحال حشومة ، هداك راه ولدو براكة عيق وزاد فيه ... ديك النفاخة تنفع مع البراني ماشي مع ولادو تخربيق ورݣيع الخاوي ..

- ماريا : انا أنا لي قلبي محروق ، الله يدير ليا شي تاويل ديال الخير ، الحاجة الوحيدة لي مفرحاني هي خوه معاه .. بعدا الحمد لله راهم بزوج ، يستغلو هاد الفرصة ويتقربو من بعضياتهم ..

- سومية : والله يحنن القلوب ..

- ماريا [تنهدات تنهيدة طويلة] :

أمــــيـــن ياربي ..

_____________________

- سالة القرعة كلها ، عينيها السود لي كانو خليط بين سواد الليل ، وبين لون القهوة ، واحد المزيج غريب .. رموشو لي كانو مغطيين عينيه لي تعسلو بتأثير المشروب ... خرج لسانو مدوز على شفايفو .. الداخل كان عبارة على بركان .. بركان ناعس ، هو لي خلاه ينعس ومابغاش يفيقو ..

- حيت الى فاق أيحرق الاخضر واليابس ، وهو هادشي لي مابغاش ، حياتو كلها وهو مقاد بروݣرام لحياتو ... عاش بوحدو وكمل حياتو بوحدو ... وكون راسو براسو ، وبنا إمبراطورية لراسو .. عندو أسلوب حياة عاجبو ، جوج ديال الصحاب .. واحد لي وقف معاه فالحارة والحلوة وكان بمتابة الأخ ليه ..

- كيتيق فيه وكيعاود ليه اي حاجة ، وثاني لي هو يوسف ، واخا تصرفاتو مكتعجبوش .. ولكن دار معاه شي حوايج لي مستحيل ينساهم .. وماشي من طبعو ينساهم ..

- اما بنسبة لعلاقتو مع العائلة ، فشخص واحد لي كاينة فالخانة ديال افضل الناس هو سراج ... لي وقف معاه وعول عليه فشلا حوايج ، هو لي مهد ليه الطريق فالمغرب ، وعاونو على عدة مشاريع دارهم قبل لا يدخل بصفة نهائية للمغرب ..

- أما خوتو ، فالعلاقة كانت بيناتهم حدودية ، وهادشي راجع لشخص واحد هو باه [تبسم مهزهز براسو على هاد الكلمة بااه ] .. باه بالفم اما الأفعال لا ، الشخص لوحيد لي كيستاهل يتݣال ليه با ، هو جدو .. حيت هو لي لقا وهو لي وقف معاه فالحارة والحلوة ..

- أما الناس لي تضررو من فعايل باه ، فهو ومو .. لي بنسبة ليه هي دنيا ومافيها ، يعطيها روحو ومايترددش لحظة وحدة ... عزيزة عندو وهي ضو عينيه ، وعلى وجها مزال كيسول فباه فالأعياد ..

- هادشي لي داز عليه ، وداز منو وهاد الجدار لي دار لراسو ، خلا قلبو جامد ... مكايعرفش شنو هو الحب ، ومعاشوش ، فسن 18 سنة هاجر لسويسرا ... وكمل قرايتو تما ، تخصص كيمياء .. ومن بعد تخرج ولا هو كيدرس ، الفلوس لي كان كيشد كانو فحدود المعقول ، ولا نݣولو كان كيتوشي مزيان ، ماوقفش هنا ودار الهندسة الفلاحية لي كان كيموت عليها ..

- قدر يجمع بزاف ديال الفلوس فسن صغيرة ، وهنا جات لبالو يستتمر هاد الفلوس ... فهاد الفترة لي كان تعرف فيها على هارون ولا ارون ، لي كان وقف معاه فسويسرا وكانو كاريين بزوج ، غير هارون دخل للمغرب بكري عليه هو ..، هارون لي عرفو على ناس ... وستتمر فلوسو .. وستغل الارض لي فولاد سعيد لي كتبها ليه جدو ، واول حاجة دارها هي كبر الدار لي خلا ليه جدو ، من دار صغيرة ردها فيلا قدها قداش ..

- وبدات الإستثمارات ديالو ، والمشارع ديالو ... حتى وصل لهادشي لي هو عليه دابا ، وهنا كان خاصو ضروري يدخل للمغرب ، باش هكا يوقف على المشاريع ديالو وخدمتو ..

- وقف ، حل الطارو لي كان حداه برجلو ، لاح فيه القرعة ... ، واخا كان كيحس براسو بلي فات لادوز ديال الشراب ... ولكن مكانش كيتمايل ، لي يشوفو يقول بلي مشاربش وبلي نورمال ..

- تم غادي حتى للجهة الضو طفاه ، فتح الباب وطلع مع الدروج راجع ساد الباب بساروت ، حطو فجيب السروال ، وطلع نيشان للبيتو ، بلاما يشعل الضو ، تلاح على النموسية ونعس ..

- من ورا العشا ، دخلو البنات ينعسو ... ݣلسات فبلاصتها ، حاطة حداها طبسيل فيه الحلوة لي جابت ليها معزوزة ، حداها نص غبزة فيها اللحم بالبرقوق ، وبين يديها هازة نص لاخر فيه دجاج محمر ..

- كلات النص اللول ، وتبعاتو النص الثاني ديال اللحم .. عاد تلاتها بالحلوة ، ناضت غسلات يديها ورجعات ..

- سندس [ضارت عندها بحال الى تفكرات شيحاجة ] :

حقا نسيت ماعطيتك واحد الحاجة ، ناضت من بلاصتها ومشات هزات الساك ديالها من الماريو ، فتحاتو وجبدات واحد الورقة ومداتها ليها ..

- مسيرة [بإستغراب] :

ديالمن هاد النمرة هادي ؟

- سندس: عطاها ليا نسيم يلالة ، عرفتي تصدمت .. مع بغاو يحطو الماكلة ... وجا لعندي ، سولني واش كنعرفك وفين مشيتي ، قلت ليه راه اعييتي ومشيتي لدار ، وقلت ليه بلي انت ختي ..

- قاليا بلي صوتك زوين بزاف ، وعطاني نمرتو الشخصية ، قاليا نعطيها ليك وقاليك ديري وسوني ليه إلى كنتي مهتمة طوري من راسك وصوتك يسمعوه الناس .. انا جاتني الضحكة حيت عارفة بلي مستحيل ديريها ، ولكن شديت من عندو النمرة ..

- مسيرة [والفرحة باينة على عينيها ] :.

ناري ياختي ياختي ، النمرة الشخصية ديال نسيم حداد ، وقيلة كنحلم ... أنسجلها عندي والورقة نخبيها ، ماتعرفي شنو تجيب الوقت ..

- سكينة [ حيدات واحد الكيت من ودن وخلاتو فالودن لوخرا ] :

أجي إيمتا غانزلو عند كريم لكازا ؟

- مسيرة : غدا إن شاء الله ونسوني ليه ، ونشوف واش غايكون مسالي هاد الأحد الجاي ولالا ..

- صفاء [دخلات عليهم ، كتنهض فيهم ] :

ونعسو وانتوما غير دودو دودو ، راه عندنا الصابون غدا ..

- مسيرة : طفي معاك داك الضو على وقفتك .. طفات صفاء الضو ، وكل وحدة فيهم نعسات فبلاصتها وراسها وتفكيرها فأشمن إتجاه مشا ..

__________________

- على الصباح .. حاطة جفنة ديال الحديد ، دايرة فيها العرارم ديال التيد ، لابسة بيجامة ديال الكاشمير كبيرة عليها .. خاشيها فجناب السليپ ، وعاكفة راسها بزيف حياتي فيه الموزون ..

- اما على الجنب لاخر كانت صفاء هازة غربال فيديها وكطبل ..

- وسالبة سالبة وسالباني يابنت مي خاطري هاني ولا حبيبي ولا من جاني ..

- مسيرة (كتشتف على المانط ودردك) :

وا مشيت البيتو وشت صدرو وحبيتو ، غمزني بعيونو وا وهبتو قلبي وبغيتو ..

- صفاء (وقفات) :

بلاتي بلاتي هادي ريتمها نازل صبري ، اه تفكرت ... تراح الليل عاد جيتيني يالعدو وليل الطويل ماقلتي حبيبي وحدو ..

- مسيرة (كتشتف وتلوز ) :

قولي فين تعطلتي جايني حتى لصباح الحال ، وانت تعالى فين كنتي ونزيد معاك انا محال ، راح راح الليل تراح الليل عاد جيتيني يالعدو وليل طويل وماقلتي حبيبي وحدو ..

- صفاء : رورورورووروروروروروري هاديك هاديك ، البوط البوط الهولاندية ..

- مسيرة (كتهز فالبوط ) :

يوايه ياوايه ، هدا شحال باش عرفتك تراتاتاتا ، ونحلف بي ربي ماخنتك تراتاتاتاتا ، هاديك فعايلك العيشورية ، هاديك فعايلك أشلاهبية .. هادا شحال باش عرفتك ..(بدات تجدب ) ..

- فجهة أخرى فالبالكو ، واقف مقابل معاهم ، أو بالأحرى عينيه على الرجال لي خلاو خدمتهم .. وحطو الكراسة وتقابلو مع هاد الضحك الباسل لي واقع ، حط كاسو ديال الحليب باللويزة على جنب ، دخل يديه اليمنية فجيبو ضاغط على الكرة لي هاز معاه ، رجع بخطوة اللور ، فتح باب البالكون لباب بيتو نازل مع دروج ، فتجاه واحد وهو المنظر لي شاف على الصباح ... ومن نظراتو باين بلي ناوي على خزيت .

- حط الطاس على الطبلة بجهد ... فتح الباب وخرج ، سكينة كانت الفوق فبيت سراج كتجمعو، وقفات فالبالكو حاضية جلال لي كانو خطواتو مكايبشروش بالخير ... كان غادي فجهة وحدة وهو عند الخدامة لي كان خاصهم يكونو عساسين ، ماشي مقابلين العيالات وحالين فمهم ..

- وقف عليهم ، غير شافوه جمعو الوقفة وبداو كيقفقفو .. وقف قبالت واحد ، بدا كيقرب منو والابتسامة على وجهو ... حط يدو على كتفو مطبطب عليه ، زول يدو وتنهد تنهيدة طويلة ، بالخف جرو من عنقو بجهد مقربو ليه ... هامس بصوت قاصح سخون :

جايب جدك لهنا باش تخدم ، مجايبكش تفرج بحال الى عندي موسم مولاي عبد الله .. [زاد زير عليه ] غادي تهز قشك وغاتخوي .. لا انت لي معاك ..

- [بترجي] عفاك اسي جلال ، والله عمرها مغاتعاود .. شحاا وحنا خدامين معاك ..

- جلال [بصرامة ] :

مغانعودهاش ، غتخوي لا انت لا لي معاك ، مكنخدمش رعاوين لي كيدوروهم العيالات .. دفعو ورجع باللور .. غادي لجهتهم ، عاݣد غوباشتو مكايشوفش ݣدامو ، نطر شيحاجة من واحد النبتة كانت طالعة ، غادي جيهتها .. صفاء غير شافتو وسكتات مابقاتش دوات .. مسيرة حتى هي لي غير شافتو حبسات الغنا ، ماوقفش عندها يدو جراتها من المعصم ديالها غادي بيها ..

- مسيرة [مافهمات والو ] :

بلاتي بلاتي نلبس صندالتي ، وهيا اويلي طلق مني واش حماقيتي ولا شنو ؟

- مجاوبهاش ، سكينة كانت مقابلاهم من الفوق ، هازة ماطلة فيديها كارزة عليها ومتبعاهم بالعين ، ماعرفات تنزل ولا تبقى ... صفاء حتى هي لي من عينيه ونظراتو خلاتها توقف ، ماعرفات تبعو ولا تحبس ... ماعرفات شنو دير ولكن فالأخير قررات تبعها ولي ليها ليها ..

- صفاء من اللور : وصبر صبر ، فين غادي بختي واش هبلتي .. حبس وضار عندها ، عينيه كيف جمر :

حسن ليك دخلي سوق راسك ، وخلي شبر ديال التيساع والإحترام بيناتنا ..

- صفاء : كيفاش ندخل سوق راسي ، راه ختي هاديك واش انت مسطي ولا مالك ، جارها بحال المعزة معاك ، واش غير حنا عندك فدارك دير مابغيتي ولا كيفاش ..

- مسيرة [شافت فختها ] :

صفاء صافي اختي غير سيري انا اندوي معاه ونجي ..[غمزاتها] ..

- صفاء [شافت فيه بتهديد] :

قسما بالله ودير ليها شيحاجة متلوم غير راسك ، لا يحسابليك هي حيط قصير ، الوقت لي بغيتي تغوت عليها ودير فيها مابغيتي ، عندها زوج خواتات أسي .. زوج خواتات ولي قلب علينا يلقانا ، أنا علمتك .. خنزرات فيه وعطاتو بظهر ..

- بقا متبعها بالعين حتى مشات ، رجع شاف فمسيرة ، وجرها من جديد غادي بيها حتى لجهة الأخرة للڤيلا ، مداهاش فكلامها ولا صوتها لي كتسولو مالو وشنو بغا منها .. بيدو جرها لقدامو خابطها مع الحيط .. كيشوف فعينيها ، عينيه لي مكانو كيبشرو بالخير نهائيا ..

- حط يديه بزوج على الحيط لي وراها ، مخليها محبوسة بين يديه .. :

أنا شنو ݣلت ليك [كيورك على كل كلمة كيخرجها من فمو ]

- مسيرة [مافهمات والو ] :

علاش شنو قلتي ، مالك تاني واش غير كتصبح مفقوص كتبغي تبرد حرك فيا ولا كيفاش ؟

- جلال [ضاغط على عينيه بجهد ، كيحاول يكالمي راسو بزز] :

نهار دخلتي لهاد الخربة ، ݣلت ليك اتبتي وترزني .. ݣلت ليك ماعنديش مع فريع الراس ، ݣلت ليك منسمعش حسك ، ديري علاش تودي الواشمة ݣلتها ولالا ..

- مسيرة [كتشوف فعينيه ، مزال مافهمات شنو دارت ] :

قلتيها ، ولكن شنو درت انا دابا مافهمتش ..؟

- جلال [بصوت رجولي صارم ] :

باش تنوضي فارعة بيا مخي على صباح ،، وراضة لي دار بحال سوق ... جامعة عليك الرعاوين كيتفرجو فيك كتشتفي طالقة داك درݣوم عندك لي عاجبك ، علاياش كتقلبي الواشمة .. ، دوزتها ليك شحال من مرة ، ݣلت ليك تعاوديها تودي .. ݣلتها ولالا ؟

- مسيرة [كتشوف فيه بعينيها لي لونها كينصاح فالنهار ، وكيبان لونهم البندقي الطبيعي ] :

انا غي[ شد ليها الفك ديالها ضاغط عليه مامخليهاش تكمل كلامها ] :

ݣلت ليك مكنحملش نعاود هضرتي ، ݣلت ليك ديريها تخلصي ݣلتها ولا ماݣلتهاش ، ولي مكايسمعش الهضرة شنو كيخصو .. أممم كيخصو هادي ..

- حطها ليها قدام عينيها ، هزات عينيها من وجهو للحاجة لي هاز فيديه ، خلاها تصدم وعينيها يخرجو مامستوعباش بلي ممكن يديرها بصح ، مايمكنش يكون كيدوي بصح ..

- رجعات شافت فيه كتحاول تهضر ، ماقداتش حيت كان ضاغط ليها بيدو على شفايفها .. بيد قسمها على زوج ، كانت فلفلة حمرة صغيرة بزااف .. بصباعو زوج حيد ليها الراس ديالها ..

- مسيرة [ مخرجة عينيها كتشوف فيه وفالفلفلة لي فيديه فنفس الوقت ، كتحرك راسها بمعنى لا .. ولكن معامن غادي تهضر وتقول لا ، مع واحد عينيه معميين ، واحد كيدير غير لي ݣالها ليه راسو ] :

امممم ، ج ... [كتحاول تدوي ولكن يدو كانت حاكماها .. قرب من شفايفها ديك الفلفلة ، وحكها ليها على شفايفها .. مدخل نصفها فوسط فمها ، حكها ليها على شواربها من الداخل ، ملامحو كانو جامدين .. مامسوقش لعينيها لي بداو كيحماىو وكيدمعو بفعل الحرورية ديال الفلفلة ..

- كان عزيز عليها الحرور وكتموت على الهريسة ، وماعندهاش مشكيل مع الحار نهائيا .. ولكن بحال الحرور ديال هاد الفلفلة عمرها مداقت ... نسات وغفلات بلي جلال مكايزرع الحاجة لي فريش ، لي منين كدوقها كدوق مداقها الأصلي ، الفلاحة لي كتمشى ليه فدم .. خلاتو يزرع البضع من الخضروات فجردة ديال الفيلا ديالو ، ومنها هاد الفلفلة الحارة ..

- ضغط بصباعو على شفايفها ... كيشوف فعينيها نازلين بدموع بفعل الحرورية لي كتحس بيها ففمها ... نيوفها بداو جايين بالما ، صدرها كيطلع وكينزل ... كتحس بسخفة وبلي مابقاتش قادة تصبر مزال ، عينيها كانو كيترعدو ... ونفس مابقاش منضابط عندها ..

- قرب من ودنيها ونطق :

فيما غاتبغي تحلي داك درݣوم ، تفكري هاد الفليفة الحارة ، هاد المرة حكيتها ليك فهاد الفم ، متخليش فيها مرة خرى ، حيت علم الله فين غاتجيك .. حيد يديه عليها ، وبعد منها عاطيها بظهر وناطق بصوتو الرجولي الباح :

متنسايش تشربي اللبن بردي حرها الواشمة ..

- ودنيها كانو مصمكين ، كتحاول تبرد الحر لي فمها ، عينيها جايين بدموع .. لسانها كيحرقها وشفايفها كتحس بيهم تنبلو ، كانت كتحاول تقلب على شيحاجة تبرد حرها ..

- صدرها كيطلع وكينزل وجها سخن ، عينيها حمارو وجايين بدموع نيوفها جايين بالما ، غادية كتجري كتحاول تقلب على شيحاجة تشربها ، مايبان ليها غير الپيسين ، مافكراتش جوج ديال المرات ، نقزات وتلاحت فيه ..

- شافتها سكينة ، تخلعات مافهمات والو ، فين كانت وفين كان جلال علاش رجع بلا بيها وعلاش تلاحت فالپيسين ، تمات راجعة بلور مشايفاش قدامها حتى خرجات فيه ..

- سراج [شد ليها فكتافها] :

شوفي ݣدامك ..

- سكينة [هزات راسها فيه ، نصو الفوقاني كان عريان ، عاد وعات على راسها بلي شادها ] :

لبس حوايجك وتستر راه كاينين البنات فهاد الدار ، ماتحشمو ماترمشو الله يستر ..

- سراج [هز حاجب ونزل الثاني] :

الشريفة الشريفة ، واش نسيتي راسك ... اتوريني شنو ندير وشنو مندير ولا كيفاش ؟

- سكينة [دفعاتو عليها] :

منوريك متوريني ، أنا غير قلت ليك حشومة هادشي ... عارفني كنجمع ليك بيتك تستر ..

- سراج [بلامبالاة] :

عادي ، ماشي شيحاجة ، من غير الى انت عندك مشكيل ، هاديك هضرة أخرى [غمزها]

- سكينة [ببرودة] :

غير كيبان ليك ، انا قلت غير إحتراما وصافي بلاما دير من الحبة قبة ، وعفاك حيد من قدامي عندي مايدار ..

- سراج [قرب منها ، قرب خوفها وخلاها تراجع جوج خطوات اللور .. هو كيزيد وهي كترجع ، حتى جات وسط النموسية .. مكالية بيديها كتشوف فيه بعينيها ، كترمش بلاما تحبس ، نزل بتقلو عليها .. حتى وصلاتها ريحة ديال عطر ما بعد الحلاقة لنغانغها ، نزل لمستوى راسها ونطق بصوت رجولي متحجر ] :

اخر مرة تݣولي ليا شنو ندير وشنو مخاصوش يدار ..

- سكينة : الصمت ..

- سراج [بتأكيد ] :

شنو ݣلت؟

- سكينة : اخر مرة نقوليك شنو خاصك دير وشنو لي لا ..

- سراج [غمزها] : الرضى .. خرجي .

ناضت بزربة ، مشافتش وراها وخرجات من بيتو ..

- سراج : عينين المشة ..

- المعاريف ، فواحد الريسطو .. لي كان الإسم ديالها مألوف ، اول حاجة حيت المالكة ديالها هي اول وحدة فتاتحات قهوة خاصة بنساء ، ولي هو إسم پالوما ، وتاني حاجة حيت هاد الريسطو معروفة بالماكلة ديال الزوينة وسيرڤيس ديالها الزوين ..

- بلاصات أمينة طوموبيلتها ، ودخلات لريسطو ، كانت مزال مافطرات ، أجلات فطورها حتى تفطر فالخدمة .. دخلات وختارت واحد الطبلة جات لي من نهار جات ، وهي كتاكل فيها مرة مرة ..

- جا عندها السرباي خدا شنو اتاكول للفطور ومشا .. خدات تيليفونها كتقلب فيه ، هزات عينيها جيهت الباب ، كتبان ايها طوموبيل رونج كحلة وقفات ، نزل منها شخص لابس شوميز فالزرق مع دجين ضاير نظارات شمسية فالكحل ، طلع دوك زوج درجات ودخل لريسطو .. زول نظاظرو كيدور عينيه فريسطو يشوف فين يݣلس ، عينيه جات فعينيها ..

- بزربة حدرات عينيها ورجعات كتشوف فتيليفونها .. حتى سمعات صوت رجولي نطق :

سلام .. هزات راسها لقاتو نفس الشخص لي دخل ، سكاناتو بعينيها بإستغراب ..

- أمينة : وعليكم السلام ..

- سمحيليا على ديرونجمو ، بغيت غير نسولك ، واش أنت أمينة ولا غلط ؟

- أمينة [ هزهزات براسها ] :

أه هي انا ، واش كتعرفني ؟

- [ مد ليها يدو بإبتسامة نطق] :

أنا كريم نجيب ، أنت امينة بنت عم سراح الدين ياك ؟؟

- أمينة [ وقفات بإبتسامة مدات ليه يدها ] :

أيااه هي انا ، انت كريم خو دنيا ياك ؟ سمحليا والله ماعقلت عليك فالاول مارضيتش البال ، ݣلس ..

- كريم [ جر الكرسي وݣلس] :

وي هو انا ، أنت صاڤا أمورك مزيانة ... جيتي غير زيارة ولا صافي أتشدي الريسطو لي هنا ؟

- أمينة : لا صافي ستاقريت هنا ..

- كريم : مزيان براڤو ، كازا ماشي بحال إفران ..

- أمينة : أه بصح ماشي بحال ، المدينة كبيرة كاين مايدار ومايتشاف .. والخدمة ماشي بحال إفران ..

- كريم : أحسن مادرتي ، دار لاباس عليهم أمورك انت مزيانة ، فالاول راه ماعرفتكش حتى حققت مزيان قلت نتأكد ..

- أمينة [ ضحكات ] : لالا أنا .. كتشوف سراج ؟

- كريم : وي شفتو غير مأخرا واحد جوج سيمانات هادي لي شفتو .. هو ودراري . ، انت مغاتنزليش لعندهم ؟

- أمينة : الصراحة فكرت فيها ، غير مزال الوقت معطلاني .. ولكن غادي نزل .

- كريم : مزيان ، يلاه نخليك خاص نفطر دغية ونمشي لكلينيك ..

- أمينة [ رضات عليه بإبتسامة ] :

واخا مرحبا ..

- كحز الكرسي ديالو وناض ، عطاها بظهر وخدا طبلة بعيدة عليها شوية وفنفس الوقت مقابلة معاها ..

- جابو ليها الفطور ، وحتى هو طلب لي بغا متعطلوش عليه وهادشي باش كيعجب الناس هاد الريسطو حيت مكيتعطلش فطلبيات ديالو ..

- فطرات وسالات فطورها ... حتى هو سالة الفطور ديالو ، خلص وناض هاز سوارت طوموبيلتو وتيليفونو ، شير ليها بيديه وخرج .. تبعاتو بعينيها حتى ركب فطوموبيلتو ومشا ..

- ݣالس فالكرسي المريح ديالو ، مقابل مع السرجم كيفكر وتفكيرو فشخص واحد فيها هي ، حاس براحو واحل وخاصو حل .. قاطع تفكيرو الباب لي تحل بجهالة ، ضور الكرسي بهدوء عكس داكشي لي كيحس بيه ..

- خاص تعاود ليك التربية من جديد ، توحشتي العصى اولدي ..

- مؤيد [عاقد غوباشتو ، وجهو عمر بالعصاب] :

واش غادي تخليه يدير مابغا ، واش كنبان ليكم انا برهوش تمشيوني على هواكم ولا كيفاش .. على اخر يامي ندي يه//ودية خانزة ..

- منصور [تبسم] :

علاش انت مامولفش بالخنز ، لا نسيت انت ملف بالعصا .. ملف يربطوك مع سدادر ومع نوامس ..

- مؤيد : منصور مابغيتش ندوي على هادشي ، داكشي مات وفات ..

- منصور [كيدوي ببرود] :

تزوج ستر راسك .. حتى الى ربطاتك مراتك ماتبقاش شفاية للعدو ..

- مؤيد [ضار ورا المكتب نازل برجليه على ركابي خوه ، بعينين كلهم ترجي ] :

خويا ندير لي بغيتي ، لي ݣلتي عليها نديرها انت غير دوي وݣول ، غير عفيني من هاد الزواج .. راه مايمكنش اخويا نتصور راسي مع ديك خيتي ..

- منصور [ببرودة متحركات فيه شعرة وحدة ] :

هاد المرة انت هو الطعمة لي ختارها باك باش يصيد الحوتة الكبيرة ، تزوج ودير لي بغيتي ... ماجديداش عليك ، بلاما تسنى مني ندير ليك شيحاجة ، لي ݣالها باك هي لي خاصك ديرها ..

- مؤيد [وقف كيشوف فيه بشوفة كلها إنكسار ، كان عند بالو خوه غادي يعاونو ، ويفكو من هاد التزويجة ، ساعة بحالو بحال باه ] :

ݣول لباك يديها ليه ، إلى لحݣتوني غير زوجوني .. [عطاه بظهر غادي خارج بحالو]

- منصور [ وقفو بهضرتو] :

منصحكش ديرها أولدي ، دير عقلك عارف باك الجايحة الكحلة تكون فيها يجبدك منها .. دير عقلك وتبت ..

- مؤيد [ضار كيشوف فيه] :

إلى لݣاني يدير فيا مابغا .. خرج سوقي اخويا ، فات الفوت منين جيتك ، اما الى خرجت من هاد الباب بلاما تحوم عليا .. حدر راسو وخرج من عندو خابط الباب وراه ..

___________________

ݣالس فالبيرو ديالو ، داير نظارات ديال البروتيج .. عينيه على الپيسي ، وصلو إيمايل من السيد لي كيتعامل معاه فهولندا ، تبسم إبتسامة فخر منين شاف الميساج لي جاه منو ، ورضى ديالو على السلعة ... هدا مسمار وطرقو ، دابا بقات ليه خدمة وحدة ويتهنى .. خاصو يدوي مع هلال فهاد القضية هو لي غايعاونو ..

- تدق الباب وتحل .. هز جلال راسو كيشوف فيه ..

- الترابي مزال متعلمتيهمش ، كون كنت منعس شي عودة هنا ؟

- هارون [ كيضحك] :

عارفك مديرهاش السبع ، وغير نوض عنقنا أصاحبي .. بين بلي توحشتينا ، عديم الضمير والمشاعر ..

- جلال [ تكا بظهرو على الكرسي ] :

كانو شادينك ، نصها ضربتيه خدمة ونصها ضربتيه زهو .. جابو ليا خبارك ابلعباس ..

- هارون [ ݣلس مفطح على الكرسي ] :

شكون ݣالها لك يوسف ..

- جلال [ غوبش] :

صاحبك هاز خنافرو لسما ، يحسابليه انا صاحبتو غانحزرو ..

- هارون : عاود ليا البلان .. كيبان ليا فاتني بزاف أرا ماعندك ..

- جلال : يوسف أيكون وصلها ليك سخونة ، خاصو غير نݣاب ويولي يدور فللحمامات بحال الدلالة ..

- هارون [كيضحك] :

مسخوط انت ، وهو عاود ليا البلان .. مكايبانش ليك ريسكيتي براسك ..

- جلال [تقاد فالݣلسة ] :

وانت عارف كنموت على ريسك .. كان ضارني راسي من جهة شيحاجة وتأكدت منها ..

- هارون [بإستفهام] :

أما هي ؟

- جلال : خلينا من هاد تخربيق دابا ، ونهضرو فالمفيد ..

- هارون : شي بلان كيدور ليك فراسك ، خرج لي عندك ..

- ناض من بلاصتو داير يديه فجيابو .. :

عيط على الديناصور ، نديرو شي ݣليسة هاد الليلة وندويو فهادشي ، هنا ماشي بلاصة الهضرة ..

- هارون [ضحك] :

هي لي متعاودش ..

- حاطة واحد الطاسة قدامها معمراها حمة بالعشوب ، وكطلي لشعرها حتى عمراتو .. هزات راسها فسعاد :

توما مال ديك صݣعة ليام عاوتاني ياك لاباس ، جايا حالتها فازݣة عينيها حمرين وفمها حمر تݣول كانت تكمي فالعفيون ..

- سعاد [ هزات البانيو خرجاتو حطاتو على الطبلة ، كتكمل الفول بتنقية ديالو وهي ݣالسة ] :

والله أخالتي ماعرفتش ، واش انا مزال بناتي كيعاودو ليا ... راه كيديرو غير لي ݣاليهم راسهم ، اما واحد باهم مابقاش مسوق ݣاع ، يظل نهار كلو حاتي على مقصو ويدور يقصقص ليا فالشجر ديال الجردة ..

- وفليل يجي ، يتعشا ويدخل ينعس صافي ، مايعرف لا شنو واقع لا والو .. مزال فاش كنا فدارنا كنت كنعرف شنو واقع .. راهم كلهم مجموعين عندها فالبيت وسادين عليهم ، منين جات وهوما حوت حوت ..

- معزوزة [ جمعات راسها بواحد الفيليل ديال پاتشا ، ولي شاط من الحنا دهنات بيه يديها ] :

إيمتا يسهل عليهم الله يتزوجو ويديرو دويرتهم ..

- سعاد [تنهدات] :

أحيانا أخالتي ، مزال سندس وصفاء ليهم دوا ... مسيرة اخالتي لي حلفات على الزواج وعلى الرجال ، دارت عليهم كروا ..

- معزوزة : هاديك انا لي كنعرف ليها ، انا لي غادي نتولاها غيرصبري عليا نسخن بلاصتي وأنا معاها ..

- سعاد [هزات عينيها فيها ] :

أش ناوية ديري أخالتي ؟

- معزوزة [ بصوتها الباح التقيل الوقور ] :

الديار ديال الله أبنتي ، أنا حنا غير سباب .. خليها على مولانا يصاوب الله .

_________________

- فبيت البنات ݣالسات ب 3 فوق نموسية مقابلينها شنو كدير .. كانت مبدلة حالتها ، جامعة شعرها .. فمها كايبان منفوق واحد الشوية وحمر ، كانت داهناه بزبدة باش يبرد عليها الحر .. قدامها حاطة طبلة ، فوق منها مهراز ديال الرخام او وريقات من الورد فلون بيض ..

- هزات دوك الورقات حطاتهم فداك المهراز ، وبدات دݣ فيهم حتى تعجنو وطلقو الما ، هزات قرعة صغيرة من روح القرفة ، وكباتها على داك الخليط .. بدات كتخلط بزربة حتى ندامجو العناصر مزيان ..

- خدات زيف رقيق ، دارت فيه داك الخليط وعصراتو مزيان ... دارتو فزلافة صغيرة وحطاتو فوق واحد الشمعة ، زادت عليه زوج قطرات من زيت الفلفل الحار ، ونقيطة من زيت الزنجبيل ، وحبات من الشمع .. خلاتو على ديك النار المهيلة ..

- من بعد 5 دقايق الخليط ولا واجد ، هزاتو وكباتو فبواطة ..

- دقايق قليلة غير برد وجمد ولا بحال ڤازلين .. ضحكات بشر ونطقات بصعوبة بحر شفايفها :

الى ماخليتك داير الكمامة 3 يام متابعة منتسماش الهولندية ، غير صبر عليا ..

__________________

- بليل مجموعين ورا الڤيلا ... هارون وجلال ، أما يوسف كان مع دراري لداخل .. كيوجدو فالعشا ، لي هاد المرة عفاو البنات ونجية من الكوزينة ، ليلة رجولية بيناتهم .. جلال لي من داكشي لي وقع مشافهاش نهائيا ..

- هارون : ماݣلتيش ليا أش كاين ؟

- جلال [دور لسانو وسط فمو ونطق بصوت رجولي غالبة عليه بحة رجولية قوية ] :

بغيتك تعرف ليا ، واش كاين شي حد فالمغرب كنيتو ڤيريدجو ؟

- هارون [هز جوج اكاجوات من الطبسيل لي قدامو ، ورجع شاف فجلال] :

علاياش كتقلب ؟ بغيت نعرف انت اش مشا ليك بغيت غير نفهم ؟

- جلال [حك لحيتو وحنحن ] :

بغيت نتأكد من شيحاجة ضراني فراسي ، خاصني نعرفها ..

- هارون : واخا غانقلب مزيان فهاد البلان ونعلمك .. [سكت كيفكر فالهضرة لي بغا يݣول ، مان غايتراجع ولكن نان ضروري يݣولها ] جلال ..

- جلال : اممم

- هارون : ماشتيش راسك عيقتي شوية على البنت ، هضرتي غاتجيك قاصحة ... عارفني ماعنديش مع الهضرة بالݣرام ..

- جلال [شاف فيه بطرف عينيه] :

دوي ..

- هارون : انت كبرتي بوحدك .. من بكري وانت بوحدك ، ماعندكش مع الصداع ... ولكن مكايعنيش تمشي الناس على هواك ، البنت مدارت والو ناشطة مع ختها ، مدارتش شيحاجة لي تستاهل الحالة لي درتي ليها ..

- جلال [ببرودة] :

ديرها فدارهم ، الدار ضايرين بيها الرجال أهارون ، العساسة لي فالباب ريوݣهم سايلين بحال الدياب ... لي دخل لداري غايمشي بداكشي لي باغيه أنا ، نهار ترجع لدارهم تخرج حتى عريانة .. مغانرضاش على راسي كلاب ديال الخلا يتفرجو بحال الذياب لي مشافو اللحم سينين هادي ..

- هارون : ولكن الفلفلة اصاحبي ..

- جلال : كانت خصاها نيت ، يلاه داك لسان الماضي عندها يحفا ..

- هارون : مابقيتش كنعرفك ، ماشي أنت هذا والله وليتي كتخلعني .. عمرك تعاملتي مع شي حد بحال هك ..

- جلال [بصرامة] :

الكذوب مكايدوز ليا ، جيني حتى لكذوب ... مغايرتاح هذا [أشر لراسو] حتى نعرفها علاش مطوية ..

- هارون [بإستفهام] :

فاش كيهمك ، وبغيت انفهم أنا فاش غايهمك واش غاضرب بيها الكاغط ..

- جلال [هز واحد اللوزة لاحها لفمو ، بعدم إهتمام هز كتافو ] :

متعرف ، والى ضربات ليا فمخي .. العرق ديال الحماق عندنا فالعائلة .. متعرف نديرها بصح .

- هارون [بقا ساكت كيشوف فيه ، صدمو ماعرفو كيدوي بصح ولا كيطنز ] :

كتريݣل عليا ، من نيتك كدوي ولا كطنز ..

- جلال [حك حاجبو ، هز راسو لسما رجل طاويها ورجل مسرحها ] :

علاش الزواج عيب ولا حرام ..

- هارون : لا ماشي عيب ، ولكن انت وياها مستحيل .. مايمكنش من داكشي لي عاودتي ليا عليها ، هي عاف/ية وانت ثور هايج [شاف فيه جلال] كندوي معاك كنݣوليك لي كاين ، وحاجة اخرى فين هو الحب فهادشي ..

- جلال [ضحك بصوت عالي] :

أشمن بضاض كتدوي عليه ، بضاض مات مع ماليه ، دابا عندك مصلحة معايا نموت معاك ، ماعنديش فيك غرض كنلوحك بحال شي صندوق قديم ماعندك مدير بيه ..

- هارون : وأشمن مصلحة عندك معاها ؟

- جلال [دور لسانو وسط فمو كيجرك الخاتم الكبير لي داير فأصبع الشهادة ] :

العائلة مثلا .. ممكن تكون المتعة ، كاين مايدار .

- هارون [عقلو غادي يحبس] :

جلال ماتبقاش تريݣل الله يرحم جدك ..

- جلال [ضحك بصوت عالي بحال شي حمق ، مستمتع بالعاصفة لي خلقها فدماغ هارون ] :

من إمتا كتدي عليا ، بحالي مكيديوش عليه الناس [غمزو] ..

- هارون [بجدية] :

المشكل كلام كيݣول حاجة ، وعينيك كيݣولو حوايج ..

- جلال : ماتيق حتى واحد فيهم ..

- هارون قالب الموضوع ، حيت الى بقا كيدوي معاه فهادشي غير عادي يحمقو ، معرفو كيدوي من نيتو ولا غير شاد فيه وكيستمتع بهادشي لي كيدير فيه ، كان كيعجبو الحال يخلي هارون كيفكر وفالخر كيضرب ليه كولشي فزيرو ، عارف مزيان بلي جلال من داك النوع لي ديما ، كيدير شي حوايج مايتقبلهمش العقل ..

- أي حاجة خارقة للعادة كتعجبو ، أي حاجة ممكن لإنسان مايتقبلهاش كيديرها ، واي حاجة يرفضها شي حد كيديرها .. نمط الحياة ديالو كيعيشو كيفما بغاه هو ماشي ميف بغاوه الناس ، واخا تكون ديك الحاجة ݣرام دالعقل مافيهاش يديرها ، تركيبتو مكاينش بحالها وعمرو شاف بحالها ..

- هارون : واحد منصور شفتو غابر ؟!

- جلال [ بإستخفاف] :

كيوجد شي دقة جديدة ..

- هارون : كتݣولها وفرحان مخاصك خير ..

- جلال : والحمد لله مخاصني خير .. ها الخيل جايا كتبورد ، قاطعهم توفيق والبقية لي دخلو ... حطو شلايض وطاجين ..

- هارون [غمز جلال] :

شفت توفيق داير عقلو ، سبحان مبدل الأحوال ..

- سراج [كيضحك] :

علاش هو لخاطرو ، راه ݣاطع فيه الزي ..

- توفيق [ ضحك] :

رتاحيت من فريع الراس ... نزل لمدينة ونخلص الضوبل ..

- جلال : أخرتك اتكون مزوهرة اولد الذيب .. بداو كيتعشاو وكيدويو فبزاف ديال الحوايج ، حاجة كتجبد حاجة ..

- جلال : هلال غانحتاجك فواحد الخديمة صغيرة ..

- هلال [ هز براسو ] :

وقتما بغيتي انا معاك .. كملو العشا ، وبقاو ݣالسين فجردة مجمعين .. الجو كان زوين والسما كانت صافية ونجومها واضحة ، حرك راسو بشوية هز يديه كيدلك بيها عنقو ..

- هارون [ كيتريݣل عليه ، غامز لوخرين ] :

خاصك شي مساج مزوهر اودي الغراب ..

- هلال [ بإبتسامة وصوت رجولي ] :

اش هاد السمية خرجات لينا من جنب ..

- هارون [ غمزو] : ميك ميك .. حتى لمن بعد [ رجع شاف فجلال] اش بان ليك ناخود ليك شي رونديڤو ، انت غير ختار هنا ، ولا دار دكازا ولا الكبانو ديالي .. هانتا النضا ، الحليب غير كيتكفح اود الغراب ..

- جلال [ بصوت رجولي قوي وغليض] :

الى كيتكفح شربو ، ينفعك كيرد العقل لناس لي فاتو ربعين ..

- يوسف [ ضحك بجهد ] :

رفد امعلم عطاك ، هاد الحليب منشربوش منو حنا زعمة ..

- جلال : مزال ݣاعما قنعتي وشبعتي ، اتبقى تسكح حتى يرشݣ ليك ..

- يوسف : مزال أخويا ، مازال ماشبعت وماقنعت كاين لي يقنع من الفرماج مريض هذا ..

- هارون : شنو ݣلتي ..؟ داوي معاك أصاحبي ، كنعرف واحد نݣيعة مفيكة ، اتجيك على المجاج داكشي لي كيعجبك .. اتخليك أليز بناليز .

- جلال [ أشر لسراج ] :

واحد ليتيم حداك شوف معاه ، مسكين يلاه خارج من قاع البير ، خاصو يتنفس ...

- سراج : تا ريح ، باغيين دوروني .. فوتو عليكم ساحتي ، واخا نعرف نݣرضو من جدر ولا نطوف بساحة شي مرا ..

- هلال : السيد تعقد مسكين ، خليوه عليكم .

- جلال [سكت مصغر عينيه ، بان طيف إبتسامة على شفايفو ، هز تيليفونو او وقف ] :

أنا جاي .. ، بعد عليهم ومشا لجهة لاپسين ، فتح تيليفونو ... كانت نمرتها هي الثالثة ، حط التيليفون على ودنو كيتسناها تجاوبو ..

__________________________

- ݣالسة سكينة فوق نموسية ، فاتحة رجليها ... هازة مشطة ديال البلاستيك سنانها غلاض خاصة بالمساج .. مݣلستها على الأرض ، شادة راسها دايراه بين رجليها وطالقة ليها شعرها ، كدوز بديك المشطة بحركات دائرية ..

- صفاء [بحتجاج] :

أنا الالولة لي ݣلت ليك ديري ليا مساج لشعري ، سبقتي مسيرة حيت صاحبتك ..

- مسيرة [عطاتها الصبع] :

هاكي عرفتي من إيمتا وأنا كنطلبها ، من نهار الخميس وانا كنطلب فيها ... بغيت غدا باش ندير الشݣوݣ ديال القطران ..

- سندس : أجي كي غاديري لداكشي لي خلطي حتى ديريه ليه ؟

- مسيرة [كضحك ، وعلى عينيها نظرات ماكرة ، بحال ديك اللبؤة لي كتربص بالفريسة ديالها ، كتقاد ليها المصيدة وكتسناها غير إيمتا دوز وطير عليها ، مدات يدها لفوق الكوافوز وهزات واحد الدوا محطوط ] :

بهذا ..

- سندس [ضربات فخاضها] :

اويلي الفنيد ديال مي دنعاس ..

- صفاء [ جرات تحت عينيها ] :

أويلي واش من نيتك ، بغيتي ديري ليه الفنيد ديال النعاس ... والى دار ليه شيحاجة ، والى سيد عندو حساسية من شي مادة فيه ماشتيهاش ..

- مسيرة : هذاك داير بحال الجن الكحل ، ماشتيش صحتو تبارك الله قداش ... يدير مني زوج ، غير يديه تبارك الله قدهم قداش كل وحدة تخبطني أخبطة تسيفطني ريفولي .. افاش كيوقف قدامي ، خاصني نبقى معلية راسي الى بغيت نشوف فيه ..

- كون بغا يدير شيحاجة كون دارها فمي نيت ، لي فيها السكر وطونسيو .. انت[قاطعها صوت تيليفونها لي ميسوني ، تماطات ليه هزاتو فوق الكوافوز .. غير شافت نمرتو وهي تعقدهم ] :

أش بغا فهاد الليل ، ياك ݣال بلي هوما لي ايتكلفو بالعشا هاد الليلة ..

- سندس : جاوبيه متعرفي محتاج شيحاجة .. ولا متعرفي باغي يطلب منك السماحة..

- مسيرة : انا بغيت جلبو عيشة مولات المرجة تعوجو من شي قنت ، تخلي غادي ويشالي ، رجل لقدام ورجل لور ..

- فتحات الخط ونطقات بصوت بارد :

نعام ..

- جلال [بصوت رجولي غالب عليه روح الإستهزاء] :

لالا كيبانو لي قنانفك تفشو .. وليتي تخرجي الكلام مسݣم الواشمة ..

- مسيرة : هادشي علاش مسوني ، يحسابليك ايبقاو منفوخين ... اليد لي تحطات علينا تݣرض الغراب ..

- جلال [ ضحك بإستمتاع] :

الشفايف المنفوخين ولاو موضة الواشمة ، شحال من وحدة كتمنى بلاصتك ومالݣاتش .. الشفايف الكبار دايرين بحال الحلوة ... ديك الحلوة الخاترة الغالية لي كتشوفيها فالڤيترينا ومكتقديش توصلي ليها ، ونهار كتوصلي ليها كتاكليها غير بالمهل كتخافي عليها تسالي ..

- مسيرة [ حناكها حمارو من كلامو تفكرات أول مرة باسها ، كيوترها بهاد المعاني وبهاد الجرأة وقلة الحيا لي فيه ] :

شتي انت والله العظيم الى باسل ، حشم شوية على عراضك زعمة راك كبير وبعقلك ..

- جلال [ ضحك بصوت عالي ، مستمتع بالحشمة ديالها وبتوتر لي زرع فيها ] :

تفكرتي لبوسة لولة معايا الواشمة اممم ..

- مسيرة [ خرجات عينيها، كتسول راسها هذا كيفاش عرفها تفكرات البوسة ، واش كيقرا افكارها .. بزاف ديال الأسئلة جاو لبالها ، علاش هو بضبط لي كيقدر يعريها ويقراها مقداش تفسر هادشي لي كتعيشو ولي كيوقع ليها لأول مرة معاه] :

الى كنتي معيط غير على هاد قلة العفة ، غير قطع حسن ..

- جلال [ بصوت بارد غالب عليه الهدوء] :

براد ديال اتاي ، وجيبيه ليا لبيتي ..

- مسيرة [ بإستغراب] :

شنو ؟

- جلال [ بنفس البرود] :

عندك نص ساعة متعطليش .. [ قطع عليها خلاها كتشوف فتيليفون وساهية .. ] .

- سندس : شنو بغاك ؟

- مسيرة [بدون وعي كتشوف فنقطة وحدة ] :

باغي براد ديال أتاي ..

- سكينة : أتاي مع ل 11 دليل غاما هف عليه ..

- مسيرة [هزات راسها فسندس] :

ونجيبو ليه لبيتو ..

- سندس : ماعندك مديري أخ[حبسات كلامها مخرجة عينيها هازة حجبانها بصدمة ] :

أش ناهو ؟

- صفاء : اويلي كيفاش بيتو دنعاس ، لالا أختي انا قلبي مامهنينيش .. هذا هذا شفتو رجليه بداو يخرجو الشواري ..

- مسيرة [شافت فالفنيد ] :

أنا غانرجعهم ليه الى خرجو شواري .. [هزات داك الفنيد ، خلات شعرها مطلوق شدات شوية منو بانضة فالكحل ، لابسة سروال كيطمة فلورونج ، مع تيشورت فالبيض وبانطوفة فرجليها ..

- سكينة [ بتساؤل] :

واش غادي ؟؟

- مسيرة : مكاين ماحسن من هاد الوقت ، مغنعس ونرتاح حتى نفدي دقتي ونرجعها ليه مضوبلة ، على لي دار فيا قبيلات .. أنا مشيت ، هزات تيليفونها والبكية ديال الفنيد دارتها فجيب الكيطمة وخرجات ..

- فدار الحاج محمد .. مجموعين كاملين على الطبلة كيشوفو فالحاج بصدمة ، بناتو ونسابو ..

- هاجر : اويلي الحاج ، واش وحدة شفتيها غير لبارح واليوم باغي تزوج بيها ..

- أسماء : بابا خليتي خالتي بديعة زعمة لا كلاص ، وتبارك عليها الاناقة ... ومزال كتبان صغيرة .. وبغيتي وحدة شفتيها كيف دايرة ..

- هاجر : وزايدون شفتي حفيدتها شنو دارت ..

- محمد [ خنزر فيها ] :

لوسك لي شماتة ، لوسك لي مايسواش بصلة خامجة ... لي هاجم على البنت ..

- فيصل [ راجل هاجر] :

كان راجلها الحاج .. والله اعلم شنو وقع بيناتهم هذا شحال ..

- محمد [ ضحك بإستهزاء ، وبصوت وقور نطق] :

ياكما يحسابليك ناعس على ودنيا ، ومافخباريش لي وقع ، راه قبل منعطيك بنتي حتى سولت على الطسيلة والفصيلة ديالكم ، فخباري بلي حصلاتو فبيت النعاس مع وحدة أخرى ... خليني ساكت اولدي وداير بوجه العشرة ودم لي مشاركين ..

- فيصل حدر راسو وسكت ، شافت فيه مراتو مصدومة من كلام باها .. :

انا هادشي ݣاعما فخباري ..

- فيصل [ شاف فيها محرك حجبانو بمعنى ماشي وقتو] ..

- اسماء : بلا حفيدتها ، بابا واش شفتيهم ... انت تبارك الله الحاج محمد الكريمي ، كولشي كيعرفك .. حنا ماقلناش متزوجش ابابا ، ولكن شي وحدة لي تليق بيك .. وتليق بينا حتى حنا ، شنو غادي تقول العائلة الى عرفوك تزوجتي بوحدة ماعرفناهم منين هوما ..

- محمد [هز راسو كيشوف فإبتسام لي ساكتة ، ونطق بهدوء] :

وانت أبنتي أبتسام ، شفتك ساكتة ... ماݣلتي والو ، حتى انت بحال خواتاتك ؟

- إبتسام [تنهدات تنهيدة طويلة] :

انا كنأمن بالحب من أول نظرة ، داكشي باش ابابا متفهماك ... ومنكذبش عليك أنا عجباتني خالتي معزوزة ، مرة حلوة وزينة تبارك الله ... مرة ديال الزمان داك الدق القديم ، لي بدا كينقارض ، ومابقاش بحالو مزال ..

- هاجر [بصدمة] :

اويلي ، واش فبلاصة مديري ليه العقل بغيتي تلوحيه فالزوبية ..

- إبتسام [خرجات فيها عينيها ] :

نلوحو فزوبية مالي غادي نعطيه هدية ليزانديان ، وها الهضرة الخاوية ... وزايدون شغلكم ودخلو سوق راسكم ، ياك كتجمعو معانا غير فالمناسبات ... انتوما كل ليلة كتخشو فرجالاتكم .. بداركم بوليداتكم ، انا يجي نهار نتزوج فيه اهاه ، وبا يلاه فكرتو ليه .. كون كنت نعرفكم بنات دقلبي ، اتفرحو ليه انتوما هامكم العائلة ... العائلة يعاودو لجهة ضاراهم ، ولي ماقدو فمو يتقب جنبو .. ولي ماعجبو حال يبقى فدارو ... لي مغايقول الله يكمل بالخير ايسد فمو ..

- أسماء [بصدمة ] : ياك أختي كتجري علينا ؟

- إبتسام : ماجريت على حد ، كل واحد يفهمها كي بغاها ... ولي جات قدو يلبسها ، أنا كنعرف با ولي بغاها با انا معاه فيها ، بغيتو تحضرو مع باكم وتفرحو ليه مرحبا وألف مرحبا ، مابغيتوش أنا قادة ببا وبشغالي ونخطب ليه وندير ليه أحسن عرس ..

- هاجر : نوضو وكان نعسو نبدلو ساعة بخرى حسن لينا ..

- ناضو كاملين مخليين محمد وابتسام ..

- محمد [شاف فابتسام] : ماقصحتيش عليهم شوية ؟

- إبتسام : خليهم أبا دابا يتفشو مزيان فيهم [تبسمات] مبارك ومسعود أبا زين ماختاريتي .. [وقفات وضرباتها ب3 تزغريتات كتسمع لخواتاتها] ..

- محمد [كيضحك] :

سكتي سكتي حشومة ..

- إبتسام : ويلي أبا بغيت نفرح بيك ، الى مافرحت بيك انا شكون يفرح بيك ..

- محمد : الله يرضي عليك أبنتي ، الله يرضي عليك ..

__________________

- عمرات أتاي ، براد صغير ، دارت فيه جوج حبات ديال الفنيد ديال النعاس ، مابغاتش دير ليه 3 لا تصدق عندو شي حساسية وتصدق خالياها عليه .. ولا تنعسو تما 2 يوماين متابعة .. هزات الصينية خرجات من الكوزينة وطلعات مع دروج ، بيتو كانت عارفاه حيت هو الوحيد لي كان ممنوع عليهم يدخلو ليه .. دقات جوج دقات ، حتى سمعات صوتو ودخلات .. مكانش عندها الوقت فين تحقق فالبيت وتشوفو كيف داير حيت اول حاجة طاحت عليها عينيها ، هي صدرو العاري .. كان واقف فاش دخلات ضار كيشوف فيها ، لابس سروال توب بيض واسع ... ومن الفوق كان عريان .. يديه وصدرو لي مطراسيين كيبينو بلي كيواضب على الرياضة والحديد ..

- جلال [ݣلس على واحد الكرسي طويل ، لي كون ركزات فالبيت اتشوف جماليتو وكون شافت الكرسي الطويل ، أتشوف قداش هو كلاسيكي بالموبرا ديالو الكحلة ، بصوتو الرجولي نطق وهو كيشوف ليها فعينيها بحال الى ميدير ليها التنويم المغناطيسي] :

حطي الصينية وأجي ..

- فالكازا وبضبط فدار منصور ..

- منصور [هاز بريكة بيد وسيݣار بيد أخرى] :

داك البرهوش الزناتي سيفطو لدارهم ، جربتو واحد سيمانة لقيتو عطاي لي حطو [ كينقل الهضرة] ..

- رضوان : وأنت شكون ݣالها ليك ؟

- منصور : نسيتي الكاميرات لي مزلعين تم .. خليتو الراس فراس هو وحميد .. السيد الباردة وسخونة لي سمعها كيوصلها لحميد ، شكيت فيه داكشي باش عطيتو السكاتة باش يتلاها ، ساعة ماعطلنيش دغية بين كمارتو ..

رضوان [بجدية] :

- القضية طلعات علينا بزبالة ديال الفلوس ، عولت عليك بكري ... عقلك مخدامش هاد ليام .. تݣلبتي مابقيتش كنعرفك ..

- منصور [بصرامة] :

دوينا على هاد البلان وطرقنا المسمار ، وݣلنا غانسلكوها هاد المرة بلي كان .. سلكات او وصلات وشديتي فلوسك وسخنتي بيهم جيابك فاش عينك ..

- رضوان [بجدية وصوت رجولي صارم ] :

واش غانبقاو فكل مشية نحطو عليها العرارم ، بحال الى كنربحو غير نص وصافي ، هادشي معاجبنيش ... كون صفيتيها ليه مانحطوش النص فهاد المشية ..

- رضوان [خنزر فيه] :

واحد باغي تلوحو لبنت ليهو//دي ... والثاني يركبو ليه نيميرو خمسة ويديوه لبوغمغم ، بو واعر أنت .. ضاحك عليك راسك يحسابك نموسة تزطم عليها برجليك .. نسيتي معامن كتعامل ، ولا مع الكبر ولي كتنسى بزاف ..

- رضوان : كتجاوب معايا ..

- منصور [بصوت بارد] :

كنعطيك خو كلامك ... سلعتك وصلات كيما هي ، شديتي فلوسك كيما هوما مناقصهم فرنك سالينا ، فك حريرت ولدك وخليني أنا ݣاد بشغلي .. انت متعرف غير فلوسك يوصلوك ، هاد السوق بعيد عليك ..

- رضوان [وقف] :

هاد سيمانة مغاديش نكون ..

- منصور : ماشي شيحاجة لي جديدة ، الشيخة عمرها ماتنسى هزة الكتف ..

- رضوان [بصرامة ] : منصوووور .. نسيتي راسك

- منصور [بإبتسامة إستهزاء] :

راه أنت لي نسيتي بلي بولادك ، الكبير فيهم عندو 40 عام .. بلاما نبقاو نجبدو فلاستيك ، إلى كنتي غاتمشي يلاه توصل ..

- طول فيه الشوفة ، هز سوارتو وتيليفونو وخرج .. مشافش جيهتو نهائيا حتى سمع الباب تسد ..

- هز تيليفونو ... دوز النمرة مدة وهو كيسوني ولكن والو حتى واحد مكايجاوب .. قطع ورجع سونا او والو كيسوني ونفس الحاجة حتى حد مكايجاوب .. حيد تيليفون على ودنو ، ودخلت لبلاصة الميساجات كاتب ميساج .. حط تيليفون بجهد ، او وقف كيدوز يدو فشعرو ، كيحس براسو مخنوق غادي ينفاجر .

- هز التيليفون ديالو وسوارت طوموبيلتو وخرج ..

__________________

- بقات واقفة كتشوف فيه ... هز عينيه فيها مطلعها من رجليها مراقب تضاريسها وملامح وجها ، ونظراتها ليه لي كانو كلهم تساؤلات وإستغراب :

صمكة ؟

- مسيرة [حطات الصينية وقربات ليه ] :

نعام ، هاني شنو ؟

- جلال [هز فيها راسو ، ناطق بصوت رجولي ] :

دوك ليدين عندك ، كيعرفو غير للكوزينة ، مكايعرفوش يديرو شيحاجة أخرى ؟

- مسيرة : شنو بغيتيهم يديرو مثلا ؟

- جلال : سؤال بسؤال ، متݣديش تجاوبي نيشان ..

- مسيرة [جمعات يديها عندها وحدرات راسها ] :

الله يبارك فعمر مولاي الغالي ، اش حب الخاطر امولاي عابد نديرو ليك بيدياتي البيضين ، انت امر وانا نفد امولاي ..

- جلال [غمزها] :

مساج ، كتعرفي ليه ولا كتعرفي غير طنزي ..

- مسيرة : هي لولة ، ولكن خاصك تشرب كاس ديال اتاي قبل مايبرد ... والى مشا اتاي حتى برد كيمشي ليه مداقو ، مكينغمكش الى رجع سخن ..

- جلال [غمض عينيه ] :

كبي كاس ..

- مسيرة : واخا .. رجعات لجهة الصينية كبات ليه كاس ورجعات لعندو مداتو ليه .. خدا من عندها الكاس ، وليد لوخرا جراتها من يدها ، مضورها ورا الكرسي لي ݣالس عليه ... حط يدها فوق كتفو بمعنى بداي ..

- بدات كتلعب بصباعها الرطبين الرقاق ... لي واخا كانت خدمتها الاولى الخضرة ، عمر يديها مافقدو النعومة ديالهم ولا البياض ديالهم ، الهواية ديال العكورة لي عندها وملامستها لشمع ، وملامستها بزبدة الكاكاو وزبدة الشيا ، خلاو يديها رطبين بحال القطن ..

- يكذب الى قال ماعجبوهش لمسات يديها ، كان فحالة سكر ... كيجغم من كاسو ويستمتع بصباعها لي كانو كيلعبو بإحترافية ، بحال الى كانت خبيرة فالمساج ... ولا عندها تجربة فشي سونطر ..

- سالة الكاس ديالو ... او وقف على غفلة ، بلاما يدويها مشا لجهة نموسيتو ، تصرفو خلاها دور لعندو لاحظات النموسية ديالو كانت بحال نموسية شي إمبراطور بلون الأسود والذهبي ، الكوڤرلي كان ديال الموبرا محفر وفيها خويطات خفاف فالذهبي ..

- قفزها صوتو ولي نسات بلي كاين معاها فالبيت .. :

أتبقاي واقفة تم بحال قباط الرواح .. تحركي كملي لي بديتيه ..

- مسيرة : منزيدش كاس ديال أتاي ؟

- جلال : [ كان مزال مغمض عينيه]

كملي لي بديتيهو ..

- قربات منو ، نزلات لمستوى ظهرو بدات كتماصي ليه ، وهنا أثار الإنتباه ديالها واحد الحاجة فظهرو ، حفرة غارقة ، بحال شي بلاصة حيديتي منها اللحم وبقات محفورة وغارقة ، ضرها راسها تعرف شنو سر هاد الحفرة ..

- جلال كان كيبان ليها من النوع المسالم ، لي ماعندوش مع الصداع ومع المضاربة .. منين اتكون جاتو هاد الحفرة ، زعمة من الصغر مايمكنش ، هادي بحال شي حد غرز فيها شي جنوي ، ودور داك الجنوي مزيان حتى خلاها ليه حفرة ضايرة وخاوية ..

- على غفلة منها وهي كتماصي ليها بيديها وعينيها على الحفرة ، سهات ومابقاتش غادية بنفس الريتم لي كانت غادية بيه ، كانت غادية فالاول مزيان ، ولكن دابا يديها ولاو بحال الى كيهروه ... بحال شي وحدة كان هدفها من المساج انها تشعل نارو وتهيجو ، ماشي دير ليه مساج باش يرتاح ..

- حركاتها خلاوه يعقد غوباشتو ... حيت لمساتها بداو كيحركو رجولتو وشهوتو .. ، إحساس لي ماحملوش .. بالخف تقلب على ظهرو .. ولا وجهو اونفاص مع وجها ، عاد فاقت من الݣلبة منين عينيها جاو فعينيه ، عينيها كانو كيمشيو من عينو ليمنة لليسرى ، يلاه نوات تجمع الوقفة .. ولكن كان سرع منها ، جرها من يديها حابسها بين يديه ، صدرو على صدرها ..

- بلعات ريقها بتوتر .. عينيه ونظراتو لي كانو بحال صقر لي كيتربص بالفريسة ديالو ... رمزشو الفوقانيين ولتحتانيين كانو دايرين تلاحم بحال خيوط العنكبوت ، انفاسو كانو كيضربو فوجها ..

- جلال :[ نطق بصوت رجولي غالبة عليه بحة مسكرة ]

اش كتصنعي ؟

- مسيرة : [ قلبها غادي يخرج من بلاصتو ، بحال شي وحدة فاول علاقة ليها بحال شي وحدة اول مرة يتقرب منها شي راجل ، واخا كانت مخطوبة لجمال ، وكانو كيخرجو ومتنكرش بلي كان بيناتهم لحظات حميمية خفيفة ، ولكن دابا كتحس بلي اول مرة قريبة من راجل راجل بالمعنى الحقيقي ] ..

كيفاش شنو كنصنع ، ياك قلتي ليا ندير ليك مساج ؟

- جلال : [ كيحس براسو بدا كيتقال عليه ، عينيه بداو كيتعسلو كيحس بواحد النعاس عمرو ماحس بيه واحد نعاس غير طبيعي جاه] :

نݣرض ليك صباعك الواشمة الى عاودتي [ مكملش كلامو حيت لسانو تقال عليه .. غمض عينيه وأنفاسو نتاضمات مبين بلي صافي نعس ..

- بقات فوق منو حاضياه ، حركات راسها كتشوف كيف دير تحرك من فوقو ، بشوية بشوية بدات كتسلت ، غير حيدات من فوقو يديه طاحو جنابو ..

- بقات واقفة كتشوف فيه ، الفضول ديالها خلاها دور عينيها على البيت ، عاد تعطاتها الفرصة تكتاشف بيتو ، لي كانت عندو لمسة خاصة .. رجليها مشاو بيها لدريسينݣ ديالو ، حوايجو لي معلقين ومقادين ، كل حاجة بوحدها .. التوب بوحدو ودجين بوحدو وݣاطيفة بوحدها ، حوايج المناسبات بوحدهم ، لي شوميز وكذلك .. حوايج سپور بوحدهم حتى هوما ..

- كل حاجة كانت شادة بلاصتها ، حلات واحد زوج بيبان ولي كانو عبارة على ڤيترينة ، فيها ساعاتو اشكال وأنواع .. مرايا طويلة بدهبي .. تلفازة بلازما معلقة فالحيط ، شوميني فالقنت حدا البالكو .. غير بيتو كان بحال شي شقة .. متشبعش منو ومتملش منو نهائيا ..

- رجعات عينيها ليه وتبسمات ، خشات يدها فجيب سروالها ، وخرجات منو البواطة لي صايبات ..

- مسيرة : [بإبتسامة شيطانية]

كتعرف تحݣر عليا غير الوقت لي بغيتي ، هادي غادي تكون فاصلة بيناتنا ، العين بالعين وسن بسن ولي بدا هو الظالم ..

- قربات منو بخطوات بطيئة حتى قربات ليه ، هزات عود دالودنين .. وهزات شوية من داك الخليط ، نزلات لمستواه وبدات كتعكر ليه على حدود شفايفو ... عاد بدات كتوزع الخليط فوسط شفايفو ..

- جمعات الوقفة وضحكات :

ودابا تعادلنا .. رجعات لور وݣلسات على الكرسي لي كان ݣالس عليه ، هزات راسها فساعة ليكانت معلقة فبيتو ، ولي كان ديزاين ديالها خطير على شكل عود .. رجعات براسها اللور ... ساهية كتخمم وتفكر فشنو غادي دير فالأيام الجايا ، أفكار يديوها وأفكار يجيبوها ..

- رجعات شافت فساعة لقات دازت 15 دقيقة وهذا وقت كافي وكتر من كافي باش تعطي الخلطة النتيجة ...

- قربات ليه بشوية وزادت إبتسامتها وساعت منين شافت النتيجة .. جرات طرف من تيشورت ديالها ومسحات ليه الكريم من فمو ..

- شفايفو كانو حمرييين ومنفوخين .. رجعات زوج خطوات مبعدة عليه ونطقات وهي طانزة :

ودابا نقد نقوليك تصبح على خير ..

- هزات الصينية طفات عليه الضو وخرجات ..

_______________

البيت مظلم وعينيها كيشوفو فشقف ومبسمة عاجبها الحال .. رجعات تفكرات الحفرة لي فظهرو ، ضرها راسها تعرف شنو سر ديك الحفرة لي فظهرو ...

- مدة وهي لي ديك الحال وكتفكر ، غمضات عينيها حتى داها النعاس ..

_______________

الرجولة الحقيقية يعني أن تسعى كل يوم لتكون أفضل ، في مكان أحسن مع وضع أفضل ..

أما الحصول على فتيات فهذه رجولة القطط في موسم التزاوج ..

- كان صباح غير الصباحات لي كيفيق فيهم ... راسو تقيل عليه ، حتى فاش كيكون شارب مكايصبحش بحال هكا ..

- بدا كيحل عينيه ، حس براسو شيحاجة فيه ماهياش وبضبط شفايفو كيحس بيهم فشكل ... كيحس بتوزويزة بحال شي نحلة قارصاك ، هكاك كان كيحس ، هز يديه لشفايفو يدو حبسات ، بزربة وقف عاقد 11 ... مشا نيشان لمرايا ، وقف كيشوف فمو ... مخو حبس ، صدرو كيطلع وكينزل بالعصاب ، دماغو مشا نيشان ليها ، عرفها هي مولات الفعلة .. مكاتخليش دقتها ضروري كترضها وتفديها تالية ومتلية ..

- دخل لدوش دزش بالما البارد ، كيحاول يكالمي راسو ماباغيش يدير شيحاجة لي يندم عليها ، مباغيش ينعسها فالفراش حتى تندم على النعار لي تزادت فيه ..

- بقا الما دايز على كتافو بارد .. حتى ولا كيحس بيه سخون ... تماطا للپينوار هزو ، لواه عليه وخرج نشف راسو ..

- لبس عليه حوايجو ، كيطمة فالݣري نظارات ديالو ... هز كمامة دارها على فمو هز سوارتو وتيليفونو وخرج ، كان ضروري خاصو يدوز لوزين هو وهلال ... ماعندوش لوقت ليها خاصو حتى يسالي شغالو عاد يشوف حسابو معاها ..

- كان هلال كيتسناه على برا ، هز راسو بان ليه جاي ... غوبش بإستغراب حيت شافو داير الكمامة ..

- ياك لاباس ؟

- جلال : والو غير ضرسة صابحة منبرة عليا .. سوݣ انت راسي ايتفرع ..[ لاح ليه السوارت ، طلع هو وهلال وشدو الطريق لوزين ..] .

____________________

- فجهة أخرى ، وعلى الطبلة ديال الفطور ... الهدوء والسكات كانو سيدى الموقف ... كولشي كيفكر فسكات ، وكل مرة كتسمع تنهيدة من واحد ... حتى كسرات هاد الصمت إبتسام لي وجهات لباها الهضرة :

با غادي نزلو لكازا على ود التقدية ..

- محمد [ حرك راسو بالإيجاب ] :

غير فطري أبنتي الله يرضي عليك ، وجدي راسك باش نمشيو ..

- هاجر [شافت فأسماء ورجعات شافت فباها ] :

بابا واش متأكد من هادشي لي بغيتي دير؟

- محمد [شافيها ببرودة] :

مكتعاود غير صلاة على النبي ... مغانبقاوش نعاودو الهضرة ، فين عمري ݣلت شيحاجة وماكنتش ناويها ، كلامي راه سمعتوه لبارح .. لي بغا يبقى ويجي معايا مرحبا وألف مرحبا ، ولي مابغاش ماعندي مندير بيه .. أنا قاد براسي الحمد لله ..

- [شاف فابتسام] :

إلى ساليتي أبنتي ، سيري وجدي راسك ..

- إبتسام : [بإبتسامة فرحة]

ساليت ابا ، نلبس عليا داغي ونجي ... مشافتش جهة خواتاتها ، ضربات فيهم وطلعات لبيتها ، لبسات عليها سروال دجين واسع ، مع قميجة وشال لاحتو على عنقها .. مع سبرديلة ، هزات ساكها ورشات من ريحتها ... هزات تيليفونها وسوارت ماريوها ونزلات ..

- يلاه أبا ..

- ناضو الحاج وخرج هو وإبتسام ، خلاهم شي كيشوف فشي ..

- عماد [راجل أسماء] :

الى جيتو تشوفو ، الحاج عندو الحق ... هو باغي السيدة انتوما أش بغيتوه ، بالعكس خاص توقفو مع باكم ..

- أسماء : ولكن شنو غادي تقول العائلة ؟

- عماد : العائلة العائلة ... هاد العائلة عمرهم وقفو معاكم ولا كانو معاكم ، ياك كولشي من الحاج ، الشادة والفادة كيوقف عليها ... نهار لي ماتت المرحومة ياك بفمك قلتي بلي عمرهم جاو ، من الجنازة عمركم شتو شي واحد فيهم .. بغيتو تخسرو باكم على ود العائلة .. الله يهديكم ...

- هاجر [ تنهدات ] :

عندو الصح ، الى ماوقفناش مع بابا غادي نخسروه هو لي بقا لينا ، وزيد عليها خاص نعرفو هاد الناس معامن غادي يتناسب ، خاصهم يعرفو بلي بابا ماشي بوحدو ... باش هكا مايغلبوش عليه ، خاص يشوفو بلي ضايرين بيه بناتو وحبابو وناسو ..

- أسماء [سلمات أمرها لله ونطقاتب بإستسلام] :

ايوا شنو غادي نقوليك ، لي درتوها أنا معاكم .. هادشي لي غانقول ..

- هاجر : يصاوب الله ، يدير الله خير .

__________________

- فالكوزينة دالڤيلا ، كتعاون فنجية .. صابحة ناشطة بحال الى ماشي هي لي دارت كارثة قد راسها لبارح ..

- مسيرة : [كتستف الفطور فالپلاطو حتى نطقات نجية ] ..

- بلاما تعدبي راسك أبنتي ، سي جلال خرج صباح بكري هو وسي هلال ..

- مسيرة [حبسات داكشي لي فيديها وضارت عند نجية ] :

وايلي ، مقالي والو ، كون ݣاعما نفيق بكري ..

- نجية [ضحكات] :

تلقاه غير نسى أبنتي .. دخلات عفاف ، من وجها كتبان ماعجبهاش الحال ..

- نجية : دي أبنتي داك الپلاطو ..

- عفاف [رخاف شفايفها وݣلسات] :

كون اعفيتيني اخالتي ، كون غير شي وحدة فالبنات تدي الفطور ... وخليوني أنا فالكوزينة وحق الله العظيم ..

- مسيرة [ضارت عندها موسدة البوطاجي] :

علاش اختي مالك ، كاين فالحبس ياك لاباس ؟ ياكما شي واحد قاليك شي كلمة ..

- عفاف [ماحسات حتى دموعها نزلو سخان على وجها ] :

صاحب سي جلال ، سمعتو بودني كيݣول لسي توفيق ، زينة ولكن عروبية ... هادي حتى شوفة خسارة فيها ، وقيلة سي توفيق ݣالو زوينة ... ݣاليه بحال هادي تصلح خدامة وجفاف ولي جاي يمسح ، أما حتى شوفة ماتشوفش فيها وضسرها ..

[ كتنخصص] انا ماعرت مالو معايا ، والله مدرت ليه حاجة ... من نهار حطيت رجلي فهاد الدار ،وفينما يدوز يلوح ليا الهضرة ويخنزر فيا تخنزيرات ماهوماش ، بحال الى ماعرفت اش شاف عليا ..

- نجية [ طبطبات على كتفها ] :

ماعندك ماديري أبنيتي ، صبري دابا يفوت هادشي ويمشي بحالو ، ماعندنا منديرو راه صاحب سي جلال ، منݣدوش ندويو ..

- مسيرة [ شافت فنجية] :

علاش اخالتي نجية ، مالو كيحط اللويز ... زوينة هادي مال البنت شايطة ، راه شتو كيكايدير مع البنات ، كيبقا يشوفيهم شوفت العما فظلمة .. هداك راه خاصو لي تأدبو ..

- نجية [بترجي] :

لا أبنيتي هالعار ، مافينا لي يجبد الصداع .. براكة علينا خلينا هانيين ..

- مسيرة : أنت أخالتي اسكتي ، نطرق واحد المسمار فراسي ، وغادي نتوالة هاد خينا ، الى ما ربيتوش مانتسماش مسيرة ، انا راه كيعجبوني هاد الانواع لي عاجبهم راسهم ، كنموت عليهم ..

- نجية : أودي غير خليه .. الله يهدي ماخلق ..

- مسيرة سكتات .. مزاداش طولات الهضرة مع نجية ، حيت لي فراسها كديرو وربي كبير ..

- تسمع صوت طوموبيل وقفات قدام الباب .. حاجة لي ماداتهاش فيها مسيرة ، عند بالها بلي غير هو لي رجع يمكن .. شوية وتسمع صوت سونيت فالباب ..

- مسيرة [حبسات نجية] :

أخليك أخالتي انا غانمشي نحل .. قدات رجلها فالبانطوفة ديالها ، وخرجات من الكوزينة فتجاه الباب .. دورات الپوانيي وفتحات ..

- مسيرة كتشوف فالسيدة لي واقفة قدامها ، كانت شادة فيديها شانطة صغيرة ، الإبتسامة لي كانت على وجها تحولات لإبتسامة تساؤل ، عينيها كيشوفو فمسيرة .. كطلعها وتنزلها .. [بصوت أنثوي ناعم ] ..

- كاين جلال ؟

- فالمكتب ديال لوزين ... ݣالس جلال وهلال ، حاطين كيسان ديال القهوة ، وخدامين على شي ضواسة ..

- هلال [ هز فيه راسو ] :

واش خدمة الضرسة هادي ، قنانفك منفوخين ..

- جلال [ماطلعش راسو على الضوسي لي قدامو ، تناسى الموضوع حتى رجع فكرو فيه ... عظمة الفك ديالو تحركات ، هز راسو فيه ونطق بصوت متحجر] :

اللهم أعلم ، تݣد تكون شي حساسية ..

- هلال [ رجع عينيه للوراق لي ݣدامو ] :

أش غادي معاه على ود السلعة لي شدها وماخلصكش فيها ..؟

- جلال [بلاما يشوف فيه ] :

غادي نمشي فهاد السيمانة ، خاص نوݣف عليه ..

- هلال : علاش ماتسيفطش هارون ؟

- جلال [هزهز براسو ] :

هداك مخاصوش هارون خاصو انا ، هارون يلاه جا من سفر ... انخليه ونمشي ..

- هلال : مدواتش معاك امينة على ود شوكولاتغي لي بغات دير فكازا ؟

- جلال [هز راسو فيه بإستفسار] :

مفاخباري مايتعاود ، شحال هادي مادوينا ..

- هلال : ݣالت باغة تجي ، وتدوي معاك فاص افاص فهادشي ..

- جلال : باش غانفعها انا ؟

- هلال : وانت 18 عام وانت فسويسرا ، غاتنفعها فهاد البلان ، اتكون عارف الناس وعارف شركات لي تݣد تعامل معاهم ..

- جلال [هك حاجبو ورجع شاف فالورقة لي بين يديه ] :

حتى ندويو فهادشي من بعد .. [سكت مدة ورجع ذاف فخوه ] الأرض لي فوجدة ..

- هلال [ بتساؤل] :

غاتبيعها ؟

- جلال : واخا نموت مانبيعهاش ، خاص نشوف ليها بلانها .. مخليها تم مامستغلهاش ، خاصني نلݣى ليها تصريفة ..

- هلال :

خليك حتى تجي من سفر ، وطلع شوف ليها بلانها ، متخليهاش هكاك ضايعة ... مكاتكساب منها الريال ، جايبة ليها اصداع الراس .. شفت داك الميكروب ساقر [ساكت] ، يكون دار عقلو زعمة ؟

- جلال [تبسم ] :

هداك عمرو مايدير عقلو .. منين تعرف الضبع داخل لغارو ، عرفو ناوي على خزيت ..

- هلال :

مغاديكلاريش بيه ؟

- جلال [بنبرة قاصحة رجولية ] :

انا مكانديكلاريش ، أنا كندير شرع يدي ..

- هلال [بصرامة] : جلال ..

- جلال [ بطنز] :

عمك دݣ فينا الشوكة ديال الحماق ، فات عليها الفوت ..

- بكلامو كان حبس النقاش لي بينو وبين خوه ، هلال عارف بلي جلال كيدير غير لي ݣاليه راسو .. واخا يعيا معاه مغاديش يديها فيه نهائيا ... اللهم يسكت ويبقى قريب منو وحاضيه ، وهادشي علاش قرر مايرجع للخدمتو ويسالي كونجيه ، مزال غادي يطول الݣلسة مع خوه ..

- هكا مايخليهش بوحدو ، حتى الى وقعات شيحاجة يكون معاه ..

_______________

- مسيرة : لا مكاينش ..

- [بنفس التساؤل] : وسراج الدين ؟

- مسيرة : اه كاين ، بلات نعيط عليه .. دخلات لداخل وقاطعاتهم ..

- سراج [ هز راسو فيها ] :

مسيرة بغيتي شيحاجة ؟

- مسيرة : واحد السيدة كاتسول على جلال ، وسولات عليك حتى انت ، اول مرة نشوفها ..

- سراج : ݣوليها تدخل .. رجعات مسيرة لعندها ، وخلات ليها المساحة باش تدخل .. مأشرة ليها باش تدخل ..

- دخلات ، جارة الباليزة ديالها ، حطاتها فالقنت ودخلات عليهم ... مسيرة كانت وراها مترقبة الأوضاع ..

- سراج [شافها ودفع الكرسي ] :

اوووه وانا كنݣول ريحة الورد داخلة ، ݣولي زينة العائلة جات [عنقها] ..

- أمينة [كضحك] : باااز ، صبغني من نهار ياخويا جيتي لعند ولد عمك مابقيتي سولتي ..

- سراج : بلاما ندويو الخبار فراسك .. وقف توفيق حتى هو عنقها ..

- لاش جايا غاݣولي ليا ، صداع راس عاوتاني ..

- أمينة [ضرباتو لكتفو ] شوفليك هاد الكل/ب .. جايا لظار خويا شغلك أنت [شافت فيوسف ، مدات ليه يدها ] سلام يوسف صاڤا ؟

- يوسف [بإبتسامة] :

صاڤا الحمد لله ، على سلامتك ..

- أمينة : الله يسلمك [شافت وراها مالقاتهاش كانت مشات] فين مشا جلال ، شكون ديك البنت ؟

- يوسف : خوك الالة .. [قاطعو سراج بصرامة] كنتي ناوي تنزل لكازا ياك ؟ ايكون مشا عليك الحال ..

- يوسف فهم مغزى كلام سراج .. وقف هز تجاكيط ديالو وسوارت طوموبيلتو ومشى ..

- أمينة [ جرات الكرسي وݣلسات ] :

كيبان ليا فاتني بزااف ... عطا الله ماتعاودو ليا ، خويو لي عندكم ..

___________________

- نجية : شكون جا ؟

- مسيرة : على مافهمت ، خت جلال لي جات ..

- نجية [ بفرحة] :

لالة أمينة .. مزيان منين جات ، شحال هادي ماجات لهنا ، شحال عزيزة عليا ديك البنت ، ضريفة و حنينة ..

- مسيرة : علاش اخالتي نجية كاين شي واحد حنين فهاد الوقت ؟ [دخلات صفاء وسندس من ورا ماسلاو شقاهم الفوق ، جرو الكرسي وݣلسو ] ..

- نجية[كملات كلامها] :

كاين ابنتي ، الكرش كتولد الصباغ ودباغ .. والدنيا هكا دايرة ، كتلاقيك مع الخايب ، حتى كايطلع ليك الدم ويبقى فيك الحال ، وتݣولي مالي ماعندي زهر أنا مزيانة وكنتلاݣى غير بالخايب ، ولكن دوك الناس الخايبين كيوعيوك ويعلموك ، وربي كايجازيك ويلاقيك مع الناس الجييدة أبنتي ... نطلبو من الله يلاݣينا مع ماحسن منا ، والله يجعل أخرنا حسن من أولنا ..

- مسيرة : اللهم أمين ..[شافت فالبنات ] فين سكينة ؟

- سندس : ماقداتش تنوض ، هالكها لوجع ..

- نجية : أنصايب ليها واحد البراد ديال السالمية ، ديه ليها تشربو راه اتسرحها ليها ويفوتها لوجع ..

- صفاء : شكون جا ؟

- مسيرة : خت جلال .. خاصنا بعد غدا نزلو للكازا ، راه درت مع كريم ..

- عفاف [بلمعة فعينيها] :

أمنيتي نزل لكازا ونشوفها ، ونشوف الجامع ..

- مسيرة : تهناي أختي عفاف .. إن شاء الله تفوت غير هاد السيمانة ونزلو ونديوك معانا وندوزو النهار تم ..

- سندس [شافت فصفاء وشافو فيها] :

ندوزو نهار تم ، واش نسيتي ؟

- مسيرة [أشرات ليهم بحجبانها باش يسكتو] :

غانلقاو ليها تصريفة ..

_________________________

- فالليل كانو كلهم مجموعين فصالون ، الخوت ب 3 او ولاد العم ... فوسط ضحكاتهم ، كان هو ساهي .. شحال هذا ماحس بهاد الدفىء العائلي .. شحال هذا ماتجمع مع خوتو بحال هكا ..

- سراج : واش قنانفك منفوخين ولا انا لي حول ؟

- جلال [ هاز حاجب ومنزل الثاني] :

هاد التبرݣيݣ لي فيك كون درتيه فشيحاجة لي تنفعك حسن ..

- أمينة : لا عندو الحق ، فمك منفوخ اخويا تقول داير الفيلر [ضحكات] ..

- جلال [بعدم إهتمام] :

خليت البالكو محلول ، أتكون اشيحاجة دازت على فمي ... ماتصدعيش راسك ..[مشا تفكيرو نيشان ليها ، وجها مشافوش ، الغدا تغداو على برا هو وهلال .. والعشا مزال ماتعشاوش .. تكون فالكوزينة ، أتخرج عندو ولا ادير شي حجة ، ولكن فيها فيها مغاتفلتش ومغايدوزهاش ليها بالساهل ] ..

- رجع شاف فختو ونطق بصوت متحجر غالبة عليه بحة رجولية :

ناوية تحلي شوكولاتغي؟

- امينة : صراحة أه .. داكشي باش جيت منها نشوفك ومنها ندوي معاك فهادشي ..

- توفيق : نشبعو أشكالط ... من نهار جينا لهاد البلاد السعيدة وهنا جبن لبن الحليب ..

- سراج : وجهك ديالو ، يلاه بان فيك الضو حمدك ربك وشكرو ..

- جلال [مكمل هضرتو مع ختو ] :

بغيتي نشوفليك مع الناس لي كنعرف ؟

- أمينة [بخجل] :

ماشي غير هادشي أخويا [كلمة لي خرجات عادية من شفايفها ولكن كان عندها وقع على المسامع ديالو ، إحساس زوين بزاف كيحس بيه لأول مرة ] انا ماكرهتش زعمة ، الى بغيتي دخل معايا شريك ..

- جلال [ عقد 11] :

شريك !! علاش زعمة .. الى مغاتݣديش على مشروعك من الاحسن تراجعي قبل متحطي فيه راس مالك ..

- امينة : لا ماشيش هكاك ، غير هو انا عندي النص ، وغايخصني النص ، مابغيتش نشد من عند بابا ، بغيت لي يدخل معايا شريك وفكرت فيك انت زعمة .. منها غاتنفعني بالخبرة ديالك ، وتشوف ليا مع الناس لي كتعرف .. هادشي فاش فكرت ..

- جلال : نݣد [ بدا تيليفونو كيسوني ، خدا تيليفون طلعات ليه نمرة هارون ، وقف وشاف فختو] انا راجع .. بعد عليهم عاد فتح الخط ..

- اش تما ؟

- هارون : البلان لي وصيتيني عليه ، قلبت مزيان[ مورك على حرف الألف] لقيت ليك بلي كاين المغرب كلو فيه 3 ديال العائلات عندهم هاد الكنية .. زوج كاينين فاس ، سولت عليهم ناس هاي كلاص ، يعني من سابع المستحيلات يكونو هوما ..

- جلال [بصوت بارد وهادى ] :

وثالثة ؟

- هارون : العائلة الثالثة باهم بدل الكنية ولكن الصراحة مالݣيت حتى شي معلومة عليه ، المعلومة الوحيدة لي لݣيت بلي بدل الكنية ومات شحال هادي ، شيحاجة أخرى مالݣيتهاش ..

- جلال [بصوت بارد] :

زيد قلب مزيان ، مايمكنش تكون حاجة وحدة لي لݣيتي ؟

- هارون : جلال لي كاين راه ݣلتو ليك ... قلبت ومزياان شيحاجة أخرى مكايناش ، نسى ..

- جلال [عݣد غوباشتو] :

نهضرو من بعد .. جملة لي بين بيها لهارون بلي هو لي كيقرر ينسى ولا لا ..

- رجع تيليفونو لجيبو ، دوز يدو فشعرو ورجع لعندهم ..

______________

- حطات ليهم نجية العشا .. وجات لعندهم لصالون تخبرهم بلي العشا تحط .. وقفو واحد تابع الثاني ، حتى ليه هو لي عينيه على الخرجة ديال الكوزينة. ، مراقب دخولها .. وقفات أمينة وضارت عندو كتشوف فيه بإستغراب ، شافت لفين كيشوف ورجعات شافت لعندو ..

- مغاديش تعشا ؟

- جلال [دور عينيه لجهتها ، وبشبه إبتسامة ] :

أنا جاي ..

- سبقاتو ݣالسة حدا هلال ، لباقي كانو بداة كياكلو ومجمعين ، وقف ومزال عينيه على الخرجة دالكوزينة ، تمشى بخطوات تقال ، جر الكرسي ديالو لي مالف يݣلس عليه .. ولي فدار والديه كان كيݣلس عليه باه ..

- جمع يديه على شكل مثلث ، كيحرك صباعو ضاربهم مع شفايفو .. جامع غوباشتو وعينيه على بلاصة وحدة .. ، حتى بانت ليه خارجة ، زاد غوبش من المنظر ديالها لي كيشكك .. وكيخليك تسول ألف سؤال ، هاد السيدة فاش كتفكر مناش مصنوعة .. واش عندها عقل ولا متكسابوش ، واش حمقة ولا كدير تابهلا وسريق العواد ..

- لاول مرة كيشوف شعرها مغطي بشال ... ملامحها كانو صفرين ، بحال شي وحدة تلقات شي خبر خايب ، ولا شي وحدة ناعسة فسبيطار ، ولا شي وحدة مريضة او واصلة ليها لعظم .. شفايفها كانو بحال شي وحدة عاد راجعة من الموت ... ناشفين وبيضين ، حنكها لي فجهة ليمنية كان عادي ، ولكن لي كان على الجهة ليسرية ، كان بحال الى خاشية فيها كرة صغيرة منفوخ ..

- هازة فيديها طاجين وجايا لجهتو حادرة راسها .. حطات ليه الطاجين قدامو ، وتراجعات خطوة اللور ساكتة ..

- ماشي غير هو بوحدو لي كانو تساؤلات باينين على ملامح وجهو ، وعلى عينيه لي كيتخللهم الشك وريبة ، ولكن حتى الباقي كانو كيشوفو فيها بحيرة وإستغراب .. ولكن الوحيد فيهم لي سولها هو سراج :

[بصوت رجولي غالب عليه الهدوء] :

مسيرة واش عيانة ؟

- مسيرة [هزات فيه عينيها البندقية ، لي كيشوفهم لأول مرة مغايقولش مولاتهم عندها من الدهاء اطنان ، ولا غيشك ولو غير شوية بفعايلها ، نطقات بصوت ضعيف غالبة عليه نبرة المرض ، مقاداش تخرج الحروف مقادين ] :

ماشكيت عليك ، ضرسة العقل قتلاتني .. خاصني نحيدها ..

- سراج : إلى بغيتي نعطيك واحد الفنيد راه يهمد عليك الحريق ..

- مسيرة : الله يرحم بيها الوالدين ، غير بينما صبح الصباح وغانزل لكازا نحيدها ..

- هز راسو فيها متفحصها بعينيه لي كانو بحال بيت العنكبوت ، وخيوطو هوما رموشو المتشابكة .. [بصوت باح غليض] :

كاين شي طبيب كيخدم الأحد ؟

- دورات راسها لعندو ، وعرق فعنقها كيضرب ، هاد العرق ديال الكذوب ، العرق لي كينبض بجهد فاش شي إنسان كيكون كيكذب ، وكتجي شيحاجة لي كتخليه غادي يحصل ، وخاصو يدير كيفاش يسل راسو ويفكها ..

- مسيرة : دويت مع كريم ، هو غايتكلف ..

- جلال [ببحة ممزوجة مع نبرة إستهزاء] :

كريم مابقاش طبيب ديال القلب ، ݣلبها ضراس ؟؟!

- مسيرة [تزيرات ، كان خاصها تخرج راسها بأي طريقة ] :

أنا معارفاش حدو قالي جي ، وبلي هو غايتكلف يمكن عندو شي صاحبو دونتيست الله أعلم ..

- رجع ركز نظراتو مع الطاجين .. مع حلو كضرب فيه ريحة متميزة ... ريحة ديال الطراوة ، ريحة طاجين ديال الدجاج البلدي ، غير بزيتون وزبيب والبصلة معسلين ، دجاج لي كيبري كيخليك تبغي تاكلو يلا خبز ... مريقة لي قليلة وخاترة .. بصلة لي كدوب فالفم .. طاجين لي كيعطيك واحد الفرحة وانت كتاكلو ..

- هز الخبز وبدا فعشاه ، مارجعش شاف فيها ... براكة عليه غير شوفة وحدة كفيلة توريه بلي كتكذب ، وهادشي لي مكايحملوش وكيخليه ينفر منها ، كلامها مصافيش ، كلو كذوب فكذوب .. عند بالها بلي كذوبها غايمشي عليه ، ولا هاد ضرورة ديال الضرسة اتخليها تفلت من لي دارت ..

- مافخبارهاش بلي هي الى كانت كتمثل الذكاء ، فراها مع غراب فذكاء ديالو ومع ثعلب أسود فالمكر ديالو ، كيتفنن فقلب الموازين لصالح ديالو ، واحد لي حياتو كاملة تحك وتحاك مع ناس أجناس متنوعة .. خلاتو يشم الحاجة وهي جاياه وقبل لا توصلو كيتحكم فيها ، مافخبارهاش بلي ݣاع لي كانت كديرو هادي 10 سنين .. تلاقات بشخص لي غايضرب ليها أفكارها وخططها وكذوبها كاملين فزيرو ..

- رجع سراج وفيديه واحد الكارطونة ديال الدوا مدها ليها ... :

هاهو خودي حبة وحدة ورا الماكلة ، عندك تكوني جيعانة ... حيت واعر على المعدة .

- مسيرة [ هزهزات ليه براسها] :

واخا .. عطاتهم بظهر ومشات ..

- أمينة [ بتساؤل] :

فين تعرفتي أخويا على هاد البنت وهاد الناس ؟

- جلال [ بلاما يشوف فختو ، حاني راسو على طاجين ] :

الهضرة وسط الماكلة كتخليها توحل ..

- شافت فسراج لي غمزها ، بمعنى باش تسكت ومتسولش ..

- توفيق [فوسط الماكلة ] :

خاصني هاد السيمانة نمشي لسويسرا .. عندي ماتش تم ..

- جلال [هز راسو كيشوف فيه بعينيه العنكبوتية] :

نمشيو مرافݣين ..

- توفيق [بتساؤل] : حتى انت مسافر ؟

- جلال [هزهز براسو]

- أمينة [بعتاب] :

حتى جيت انا أخويا عاد بغيتي تمشي انت ؟

- جلال [ببحة رجولية] :

الدار دارك .. هلال كاين هنا ، سيمانة وغادي نرجع إن شاء الله ..

- هلال [بصوت تقيل ] :

غادي يمشي معاك هارون ؟

- جلال [حرك راسو بنفي] :

لا هارون يلاه جا ، خاصو يبقى فلوزين ويݣابل الخدمة لي كاينة هنا ... صباح أيكون موجد ليك الضوسيات كاملين لي ݣلتي ..

- هلال : صافي مزيان ..

- سراج : حتى انا غانزل للكازا ، خاصني نطل على الخدمة ... خليت الدرك على يحيى ..

- أمينة [بصوت أنثوي غالبة عليه نبرة العتاب ] :

جلال وتوفيق مسافرين ، هلال غايولي يمشي لوزين ، سراج اينزل للكازا ، إيوا وأنا شنو اندير ..

- توفيق : ها يوسف يبقى معاك ، غدا تلقايه جاي ، نزل غير قبل شي بلان وغايرجع ..

- جلال [بنبرة تهديد قوية ] :

عطيه بتيساع حسن ..

- توفيق [هاز حاجب ومنزل الثاني] :

ياك صاحبك علاش زعمة ؟

- جلال [عاݣد غوباشتو ، دافع الطاجين لي قدامو ماسح يديه ] :

نأمن عليها مع هارون ومنأمنش ليها مع يوسف ... حيت صاحبي عارفو وحافظو .. [ بنبرة تهديدية] منشوفكش كدوري حداه .. [ وقف دافع كورسيه ، خلاهم وطلع لبيتو] ..

- سراج : عندو الصح ، يوسف باسل ... واخا رجولة ولكن باسل ، من الاحسن عطيه بتيساع ، انا انزل نهار وغادي نرجع .. مغانبقاش تم ، نشوف غير الخدمة ونخلص الما وضو وتيليفون وغادي نرجع ..

- أمينة [ تنهدات تنهيدة طويلة] :

واخا ..

___________________

- هزات الدوا دارتو فجيبها ، حيدات داكشي لي معمرة بيه فمها وخرجات من باب الكوزينة .. نازلة زربانة مع دروج دخلات لدار ..

- سعاد : جيتي بكري !!

- هزات مخدة ݣلسات وحطاتها على رجليها مسندة ظهرها للحيط مغمضة عينيها ، حلاتهم شايفة فسعاد :

ساليت وجيت .. فين با ؟

- سعاد : راهو فالبيت ... جا ضارو راسو قيل فالشمس وقيلة ضرباتو .. درت ليه شوية دالمخيزة لراسو تصم ليه ديك الشمس عطيتو كلا وراه نعس ..

- مسيرة : كنت بغيت نقوليه بلي انزلو غدا انا والبنات للكازا ..

- معزوزة [كتمشط فشعرها بمشطة العضم ، بصوت باح وقور ] :

اش غاتمشي تكوزي فيها تاني ، مكتعرفيش تبتي فبلاصة وحدة ..

- مسيرة [حيدات الشال حطاتو حداها متجنبة تشوف فجداها ] :

بغيت نشوف غير كريم ونرجع ، قنطنا فدار ..

- سعاد [خرجات من الكوزينة هازة طبسيل ديال الشعرية حطاتو ] :

ماݣالت ليك سندس والو ؟

- مسيرة [شاف فيها مهزهة راسها بنفي] :

لا علاياش ؟ ..

- سعاد [ رجعات من الكوزينة هازة فيديها طبسيل فيه السكر والمعالق] :

ماعرفتش واقيلة شي خدمة جاتها ، راه عيطي ليها هي راه تعاود ليك ..

- مسيرة [ بصوت شبه عالي] :

سندس ..

- جاوباتها من البيت : نعام بلات .. شوية خرجات من البيت ..

- نعام حطيتو العشا ..

- مسيرة : قالت ليا ماما بلي جاتك شي خدمة ؟ أشمن خدمة ؟

- سندس [ هزات المخدة وݣلسات حاطة يديها عليها ] :

ليلى صاحبتي ، ديك البنت لي كندوي معاها فالفيس ، دفعات ليا سيڤي ديالي لسونطر داپيل ، خاصني نمشي ندوز نشوف ..

- مسيرة : وفين اتسكني ، السونطر راه فكازا وحنا فولاد سعيك ، والى رجعنا بحالنا لجديدة كيفاش اديري ، مافكرتيش فهادشي ..

- سندس [ تنهدات] :

هادشي فكرت فيه ، الى تقبلت غادي نكري بيت مع البنات ، اختي مغانبقاش حياتي كاملة ݣالسة ، راه عندي 26 عام .. شادة الإجازة على الخوا الخاوي باش نبقى حاطاها مايمكنش ..

- مسيرة : حتى انا راه ماقلت ليك والو ، ومخاصك حتى حاجة لي بغيتيها كناخودها ليك ..

- سندس : هادشي انا راه عارفاه ولكن حتى ليمتا ، الى انعول عليك مكان لاش نقرا ، حتى انا اختي خاص نشوف راسي ومستقبلي ... مغانبقاش تابعة القناة ، وانت مغاتبقايش مقابلة ديك القناة حياتك كاملة ، وتبقاي مريسكية براسك وبينا كاملين ... وخير مثال هادشي لي واقع لينا دابا ..

- خرجات صفاء وسكينة من البيت ݣلسو ..

- سعاد : ختك عندها الصح ابنتي ، حتى ليمتا غادي تبقاو بحال هكا .. خواتاتك قاريات مخاصهمش يݣلسو بحال هكا ، خاص يقلبو على ريوسهم ..

- مسيرة [بإنفعال] :

واش انا شديتهم ولا ضربتهم على يديهم ، كل حر يدير لي بغا ... زعمة كتݣولي ليا هوما قاريات حيت انا زعمة حدي الباك صافي ياك ؟ زعمة هوما قاريات مخاصهمش يتبعوني انا لي ماعنديش شي نيڤو ..

- سعاد [خرجات عينيها مصدومة ] :

الله ابنتي أش وصلنا لهاد الهضرة ، حرام واش انا ݣلت هادشي ولا قصدتو ..

- صفاء : مسيرة نعلي شيطان ، الى كنتي طالع ليك الدم ومعصبة ماتبرديش فماما الحر ، هي مقالت ليك حتى كلمة ديال العيب ..

- مسيرة [تبسمات بإستهزاء] :

ماماك ، كتقولي ليا متبرديش الحر فماما ، زعمة راه ماماك انت ماشي ماما أنا .. ماقلتو عيب ، كل يعوم بحرو ويدير لي بغا [وقفات] تصبحو على خير .. خلاتهم ودخلات للبيت سادة عليها ..

- شافو فبعضياتهم ، صفاء [بإستفهام] :

هادي مالها ..؟

_____________________

ﺍﻧﺘﺒﻪ ﻟﻨﻔﺴﻚ ﺟﻴﺪﺍً ..

ڪﻦ ڪﺮﻳﻤﺎً ﻟڪﻦ .. ﻻ ﺗﺴﻤﺢ ﻷﺣﺪ ﺑـ اﺳﺘﻐﻼﻟڪ

ﺍﻣﻨﺢ ﺍﻟﺤﺐ ﺩﻭﻥ ﺃﻥ ﺗﺴﻤﺢ ﻷﺣﺪ ﺑﺎﻹﺳﺎﺀﺓ ﻟﻘﻠﺒڪ

ﺛﻖ ﻭﻟڪﻦ .. ﻻ ﺗڪﻦ ﺳﺎﺫﺟﺎً

ﺍﺳﺘﻤﻊ ﻟﻶﺧﺮﻳﻦ ﻭﻟڪﻦ .. ﻻ ﺗﻔﻘﺪ ﻫﻮﻳﺘڪ

و مهما بلغ حُبڪ لشخص لا تجعله مصدراً لسعادتڪ

أو تڪون تحت رحمة مزاجه المتقلب

بل اجعله إضافةً جميلةً لحياتڪ

إن بقى زادها جمالاً وإن رحل لم ينقصها سعادة

تعلم الاڪتفاء بذاتڪ فقط ..

- ݣالس فواحد القهوة ، حاط قدامو كاس ديال أتاي ، كيرعد فرجليه ... كيتسناه إيمتا يجي ، هز كاسو جغم منو ، حطو .. شاف فساعتو ورجع كيشوف فطريق .. حتى بانت ليه واحد الپيكوپ وقفات ..

- بلاصة فوحد القنت ، ونزل وقف تسنى طوموبيل دوز عاد قطع الشانطي عندو .. شافو تبسم ليه وقف سلم عليه وݣلس ..

- سليمان : وكيداير أبا جمال لاباس عليك هاني مهني ، تا فين غابر أصاحبي ؟

- جمال : أفدنيا وصاف ، وانت هاني مبروك العزري ، أسمحليا ماجيتش مدركاتنيش الوقت ..

- سليمان : هاني ماديرش فبالك حتى أنت ؟ أش داكشي ݣلتي ليا فتيليفون .. كدوي من نيتك ولا كتريݣل ..

- جمال : أش بان لك عمري تريݣلت عليك ، دابا أتيني بالمفيد ، داكشي لي سولتك عليه ؟

- سليمان [غمزو] :

ومناكلوش زعمة ؟

- جمال [أشر لسرباي] :

هي لي متعاود ..

- حاضيه ، كايتسناه إيمتا يسالي ، سالة وعرݣها وقف هاز يديه لي كانت عامرة بليدام ديال الطاجين داللحم لي ضرب ، مشا لجهة طواليط غسل يديه مسحهم بالدوك الوراق لي كاينين تم ورجع عندو ..

- سليمان [تݣرع] :

الله والله العظيم الى طاجين من داكشي رفيع ... خاصنا غير شي دكة داتاي ..

- جمال [هز البراد لي قدامو كب ليه كاس ، ومدو ليه وهو كلو كيغلي كيتسناه غير يمتى ينطق] :

هاك اسيدي هاهو كاس دتاي ، يلاه بالي وطلݣنا أصاحبي ..

- سليمان :

وسمعني وحل معايا ودنيك ... سي جلال راه مامزوج ماخاطب .. وعرفتي راه سينين وهو هنا ، عمرنا شفنا معاه شي وحدة .. عايش بوحدو معاه نجية مرات أحمد لي خدامين عندو ، وعلى ماݣالو جاب عندو شي ناس ، وقيلة واش من العائلة ديالو والله أعلم .. أما هو راه مامزوج ماخاطب ..

- جمال [ تبسم كيخمم مع راسو ، بلي غير كذبات عليه .. ولكن لي ضارو فراسو علاش ضربو شكون هو باش يضربو ، وعلاش كذبات عليه زعمة تكون مزال كتبغيه ، هادشي خلاه يتبسم عاجبو الحال ... حالف حتى يرضها ليه ويرجع يحيي الحب لي كان بيناتهم ] ..

- سليمان [ كيشير ليه قدام عينيه] :

أسبحان الله وا جمال ، اتا فين مشيتي .. ماݣلتيش ليا لاش كتسول عليه ، تا ݣالو ليا عصاك [ ضحك] ..

- جمال [ عݣد غوباشتو] :

يعصيني ، غير اجي وعصي جمال ... عندها الزهر كنت شارب شوية مكنتش فالوعي ديالي ، أما نخلي دار بوه ..

- سليمان :

وارود بالك ، راه مساهلش تا مكتعرفش شكون هو جلال .. السيد خانز فلوس بيني وبينك واقيلة كيبيع ويشري فالحشيس ، دوك الفلوس كامل لي عدو جاوني فشيشكل .. وتا كولشي كيحماق عليه ..

- جمال :

كولشي توقعو من بنادم .. انا بلاني فراسي ، مكايهمنيش هو ولا غيرو .. [تبسم] المهم الله يحفظ اسليمان .. أجي مكرهتش نلقى الكرا فهاد النواحي ..

- سليمان :

من نيتك تلقى الكرا هنا ، الى بغيتي الكرا شوف برشيد ولا سطات اما هنا راه متصيبش ..

- جمال : نشوف نشوف .. الله يحفظك ليا .

- سليمان [وقف]

يلاه الله يعاون مشا الحال خاص ندخل لدار ، والى بغيتي شيحاجة أنا موجود ..

- جمال : الله يحفظك كفيتي او وفيتي الله يعاونك ..

- سليمان [سلم عليه سلام رجولي ] :

التيليفون عندك فينما بغيتي شيحاجة دوي ..

- جمال : بوس ليا العزري بسلامة .. مشا سليمان ركب فطوموبيلتو وشد الطريق ..

- أما هو رجع ݣلس مبسم ، كيخطط ويفصل كيفاش يرجع ليه مسيرة ، ويرجع يرطب ليها قلبها ويرجعها كتبغيه وتموت عليه كيف قبل ... مافخباروش بلي الغزالة لي دفنها شحال هادي رجعات لفعة ، لي قرب ليها كضربو بسمها .

_____________________

- نتضت بشوية عليها باش ماتفيق حد ... هزات السطيلة ديالها طلقات الشوڤو ... هزات ميهة سخونة توضات ، حطات الصلاية وصلات الفجر ، ݣلسات كتسبح .. من وراها ناضت صلات الصبح ..

- سلات حلات باب دار وسداتو ، كتعكز بعكازها ، هزات راسها بان ليها كيتمشى لابس سورڤيت وسبرديلة ..

- تبسمات وشيرات ليه غير شافها او وقف ، بشوية بدات طالعة فدروج مادة ليه يدها ، شاف حتى هي وشدها مݣلسها ..

- معزوزة [بصوتها الباح الوقور] :

حتى انت أوليدي كتنوض تصلي الفجر ؟

يتبع...