محتوى القصة
- كريم [قرب منو ] :
شكون هي ؟
- جلال [بلع ريقو ] :
أمينة ، فين هي ؟ قربات منو أمينة لي كانت واقفة بعيد ... مشافهاش ، جات لحداه وݣلسات شادة فيدو .. شاف فيها كيخرج الاحرف بصعوبة :
سمحيليا ، خصرت ليك عرسك ... نعو ضو ليك إن شاء الله ..
- أمينة : متعوض ليا والو أخويا .. الحمد لله غير منين فقتي على خير وبيخير هذاك هو الربح عندي انا .. قاطعهم الطبيب لي طلب منهم يخرجو ويخليو المريض يرتاح .. حتى للغد ليه وينقلوه للغرفة ديالو ..
- فطريقهم لدار .. هو سايݣ وهي كتشوف فيه :
مالك ساكت شنو واقع ؟
- كريم [تنهد تنهيدة طويلة] :
دويت مع مسيرة ، علمتها بلي جلال فاق .. ولكن حسيتها فشكل بحال الى مخبية عليا شيحاجة شنو هي ماعرفتهاش ..
- أمينة : حتى هي قصحات معاها ماما بزاف ... ماعرفتهاش فاش ضارت فيها ، ماما عمرها كانت بحال هكاك مافهمت والو وحق الله العظيم ..
- كريم : ماماك مع الصدمة داكشي باش تعاملات مع مسيرة هكاك ، ولكن حاجة وحدة لي غلطات فيها جبدات ليها زواجها اللول والثاني ، اش دخل شي فشي هادي غلطات فيها بزاف ومكانش عليها دير هك ..
- أمينة : راه هادشي لي ضرني وعصبني هاد التصرفات لي دارت ماحملتهمش ..
- كريم : يصاوب الله ..
______________________
- صبح نهار جديد .. فاقت بكري جمعات الوراق ديالها ، ولاكارت ناسيونال وراق لي خاصين بدار .. نزلات التحت صبحات عليهم وݣلسات تفطر ، مكانتش كدوي ختارت السكات حسن ليها ، مافيها لي تبقى تدوي وشد ليا نقطع ليك .. حتى كسرات سعاد هاد السكات :
مغاتحضريش لعرس خالك أبنتي ؟
- مسيرة [بصوت باهت ] :
انا وليت كنتشائم من العراسات أماما .. نهار يدير العرس انسيفط ليه الكادو ديالي إن شاء الله ، اما باش نحضر بلاش شفتي اخر عرس حضرت ليه أش وقع اللهم بناقص ..
- شافت فباها ] ساليتي ابابا نمشيو ..
- عباس [وقف] : واخا أبنتي يلاه .. ناضت هي وباها خرجو وبقاو لوخرين شي كيشوف فشي ، ناضت سندس لخدمتها وصفاء وعفاف مشاو للمحال ..
- دازو عند العدول قامو بجميع الاجراءات كلها والڤيلا ولات فسمية عباس .. فطريقهم نطق عباس :
بنتي والله ماكرهت تديني نطل على البحر واحد شوية ندوي انا وياك ياك مزال عندك الوقت؟
- مسيرة : واخا ابابا .. ضربات الدورة ورجعات مع الطريق لي كانو جايين منها ... مسافة حتى كانت حدا البحر ، نزلات ونزل هو معاها .. كيتمشاو بشوية حتى وقفو عند البحر فوق زوج حجرات ݣلسو ، كانت محتاجة لهاد الݣلسة وتشم الهوى ..
- مغمضة عينيها كيضربها البرد ، كتستنشق عبير البحر لي كيرد الروح وكيخليك تخرج ݣاع لي كتحس بيه ..
- عباس [كيشوف فالماج ] :
شحال هذا فاش كنت مزوج بماماك ، وكنا كانسافرو لشي مدينة فيها البحر ، كنت كنستاغل الفرصة .. ونتݣابل مع البحر ، ونغوت على حر جهدي كنحس بالماج كايمصو ݣاع داكشي لي عندي لداخل خايب ..
- مسيرة [شافت فيه ] :
بغيتي تݣوليا نغوت باش نغوي داكشي لي عندي لداخل ؟
- عباس [تبسم ] :
كتنفع ابنيتي .. [رجع سكت هز عينيه وشاف فيها ، بصوت وقول وتقيل غالبة عليه قهرة الزمان ] :
نهار لي دخلنا للفيرما ديال جلال .. وݣلسنا معاه فدار وحدة ، كنت كنݣول كون غير هاد السيد يكون من نصيب بنتي ، منكدبش عليك .. كنشوف السيد بخيرو راجل بمعنى الكلمة تݣدي تعولي عليه .. كنت كنݣول ..
- كنت كنݣول تمارة لي دوزات بنتي ، واحد بحال جلال هو لي يجي معاها غادي يعوضها على لي فات .. ولكن من ورا داكشي لي وقع ابنتي تراجعت على هضرتي ، السيد كيبان كيبغيك ماݣلنا عيب .. وغايحطك فعينيه ، ولكن صعيب ابنتي شي حد بحالو تعيشي معاه وانا عارفك كيف دايرة .. مابغيتش ابنتي هاد المشية ديالك تكون على قبلو ..
- مسيرة [تهندات تنهيدة طويلة ] :
بابا المشية ديالي راه ماشي غير على ودو ، على ودي حتى انا .. باغية نبعد على كولشي باغية نفكر لراسي ، نقوليك الصراحة ابابا ، قسما بالله العظيم داكشي لي دار جلال فعلا ضرني منكدبوش .. ولكن لي دارت مي ضرني كثر ، تجيك من البراني ومتجيكش من القريب ..
- عباس : انت عارفة ابنتي جداك كيدايرة ، عارفاها عزيزة عليها انت كتر من حفايداتها لوخرين .. داكشي باش كتبغي ليك الخير ، الناس ديال بكري عقليتهم قديمة ابنتي ... هي كتشوف داكشي لي دار جلال رجولة منو ، حيت داكشي عاشتو مع باها ومع راجلها ..
- راه واخا داكشي كامل لي دارتو راكي عزيزة عندها مديش عليها وتحقدي عليها الله يرضي عليك ، عارف بلي حملناك كتر من طاقتك .. فينما طحنا انت لي كتهزينا ، عمرنا سولناك انت اش باغة ، عمرنا فكرنا نسولوك ابنتي ، داكشي باش لي بان ليك مخرجك ديريه ، انا راضي عليك ..
- مسيرة [شافت فيه وتبسمات ] :
مغانسمككش الى غوت ؟
- عباس [ضحك] : لا خودي راحتك .. عطاها الضو الاخضر توقف وتغوت على جهدها حتى حسات بحلقها تجرح ، ولكن حسات بقلبها رتاح ونفسيتها رتاحت ، هاد اللحظة ديال الوقفة مع الذات نفعاتها ، ختماتها بتعنيقة لباها ورجعو بزوج لدار ... طلعات لبيتها كتقلب ياكما نسات شيحاجة كون كولشي فبلاصتو .. مانسات والو ، خاصها تكون فالمطار مع 5 باش هكا تاخود وقتها الكافي ..
- وصل وقت الغدا جات عفاف وصفاء ، سندس حتى هي أما سكينة مامشات للخدمة نهائيا .. نفسيتها كانت فالحضيض وهي غاتفارق على صاحبتها .. من ورا الغدا طلعات لبيتها ، دخلات لدوش دوشات خرجات نشفات راسها وشعرها ، جمعاتو على شكل كعكة ، لبسات تريكو فالكحل مخطط بالبيض مع سروال دجين كحل وسبرديلة ، تجاكيط هزاتها فيدها .. نزلات التحت لقاتهم كلهم مجموعين .. سعاد غير شافت البالز وشافت ماقداتش تحمل ، عينيها ولاو بحال شي ينبوع ديال الما تطرطق ..
- مسيرة [عنقاتها ] :
ماما وحشومة عليك وحق الله .. الله يهديك ، إن شاء الله نقاد ليكم الفيزا ونجيو لعندي .. سكينة أشافت داك المنظر ماقدراتش تحمل تخشات فصفاء كتنحط ..
- مسيرة : اويلي نعلو شيطان واش انا مابقيتش انرجع ݣاع مرة نجي عندكم مرة تجيو عندي ، يهديكم الله ..
- عباس [بصرامة] :
وبراكة من البكا خليو البنت تمشي مرتاحة .. يلاه ابنتي باش منتعطلوش .. دازت للخواتاتها كتعنق كل وحدة ، كانت حابسة دموعها بزز منها .. كتوصي وتعاود :
صفاء كوني قادة ، المݣازة فرقبتك ، انت لي مسؤولة دابا على الماركة هنا فالمغرب ... راكي قدها الى وحلتي راه عصام ولا سفيان صافي ..
- صفاء [كتسمح دموعها ] :
تهناي بحال الى انت هنا ..
- مسيرة [شدات وجه سكينة بين يديها ] :
انت ماشي بوحدك ، انت فداركم مع والديك ، حتى لنهار تمشي عند راجلك ... هادو خواتاتك هادا باك وهادي مك وهاديك جداك .. فهمتي ماتبقايش تبكي انبقاو على تواصل ، نوصيك الى جا سراج وطلبك لزواج وافقي ، واخا مايجيبش ݣاع دارهم وافقي ، مديري لا عرس لا نبݣ كتبغيه كيبغيك ، ديري حفيلة فدار بلا صداع وسيري مع راجلك راه كيبغيك وتهلاي فيه .. وصوري ليا وسيفطيلي ههههه صافي .. [باستها وعنقاتها ] ..
- سكينة [كتنخصص ] :
كوني هانية ، وحتى أنت تهلاي فراسك بزاف .. عنقاتهم كاملين ، حتى من إبتسام بكات على مشيتها ، الحاج عنقها ورضى عليها ... وصلات عند جداها تحنات على ركابيها وشدات ليها يديها باستهم ليها :
تهلاي فراسك أمي .. تبقاي على خير ونشوفك على خير .. نزلو دموع معزوزة سخان شافت فيه دوزات يديها على شعرها ، بصوت وقور وباح :
تهلاي فراسك والله يعاونك ، ومتغيبيش ابنيتي الموت والحيا هادي ، مكرهت نشوف وليداتك قبل مايدي مول الامانة أمانتو .. الى دويت دويت على مصلاحتك وربي شاهد ..
- مسيرة [بإبتسامة ] :
إن شاء الله امي ، الاعمار بيد الله يكون خير اميمتي ، خليتك على خير .. ناضت جمعات الوقفة جرات الباليزة ديالها وخالها جر الثانية وخرجو من الڤيلا ، طلع البالز للطوموبيل ، مشا للبلاصة الشيفور ركب حداه عباس ومسيرة اللور ، ديمارا وشدو الطريق تحت أنظارهم لي كانو متبعينهم بالعين ..
- فبيتو ملبسينو تيشورت فالبيض ، حال عينيه ضايرين بيه والديه وختو .. ولد عمو وخوه هلال ، وكريم واقف عند السرجم مقابلين معاه ، وصلو ميساج فتيليفونو هز التيليفون وفتح ميساج ، كيحس بدمو برد عليه دقات قلبو مرتافعين .. رجليه فشلو عليه ، طاح على طولتو فوق الكرسي ، ضارت أمينة لعندو .. والبقية كيشوفو فيه ، وقفات أمينة ومشات لجهتو بإستفسار كتسولو :
مالك اش واقع ، واش جاك شي خبار ماهواش ؟
- مجاوبهاش ، هاز التيليفون ومصدوم .. مافهمات والو زولات ليه التيليفون كتقرا فالميساج لي كان كتالي :
" ولد قلبي خويا لي ماولداتوش ليا مي ، ولداتو ليا الدنيا واش عارف شحال كنبغيك وعزيز وغالي على قلبي ، هاد الوقت لي كتقرا فيه الميساج ديالي انا فالمطار محتاجة نرتاح ومحتاجة نبعد على كولشي ، ماتقلقش مني ، ولكن مابغيتش نقولها ليك حيت براكة عليك غير لي فات ، براكة لي تزوجتي ومافرحتيش مع مراتك ... جا الوقت لي تشوفيه راسك وراحتك وفرحتك ، ماقلتهاش ليك عارفاك مغاتخلينيش [ضحكات] كريم ماتحاولش تقلب عليا ولا تسول فين كاينة حيت راه حتى واحد معارفني فين غادة ، نقد نقوليك كدبت عليهم هههه الحمد لله جلال ولا بيخير وهادشي لي كنت كنتسناه ، تهلا فراسك وتهلا فأمينة وسلم عليها بزاف اولد قلبي "
- أمينة كانت إنسانة حساسة وقلبها هشيش أي حاجة كتأتر فيها ، نزلو دموعها سخان ... عارفة مسيرة اش كتسوى عند كريم ، عنقاتو كتصبر فيه ..
- هلال : أش تم ؟
- أمينة [شافت فيه ونطقات بتأسف ] :
مسيرة خوات المغرب ومشات بحالها .. حركة من يدو كانت كفيلة باش حس ، زير على الليزار لي مغطي بيه ، صدرو كيطلع وكينزل نطق من تحت سنانو :
فين مشات ؟
- ماريا : تمشي فينما مشات الله يعاونها أحسن مادارت هي بعدات .. [وقف كريم بدون سابق انذار كيخنزر فيها ] :
خالتي ماريا ، الله يرحم بيها الوالدين ماتخلينيش نسى النسوبية لي بيناتنا ونݣوليك شي هضرة لي غادي ضرك ، ديك البنت لي كدوي عليها ختي واش عارفة شنو هي ختي ، تربية ديالي ... ديك السيدة ، لي كانت تجي كل نهار طل على ولدك ومكتمشي من سبيطار حتى لنصاصات الليل ، وكانت تسمع حشيان الهضرة ديالك ومعيورك وكتسكت مكتجاوبكش ، ماي حيت مكتعرفش تجاوب ... راه تݣد تجاوبك وتسكتك ، ولكن تربيتها مكتخليهاش .. الى بغيتي تخلينا مزيانين ، منين دوي عليها دوي عليها مزيان .. خرج وخلاها متبعاه بالعين ..
- جلال [شاف فيها ببرود قا///تل ] :
كيفاش كنتي كتعايريها مافهمتش ؟
- ماريا : ولدي ، راه هي السباب حتى وصلتي لهنا .. ااسيدة كانت باغية غير طيحك وصافي ، مزوجة مرة اللولة وثانية هاديك خدمتها ..
- جلال [ضحك] :
شكون انت لي دوي فبلاصتي ؟ واش نسيتي بلي 18 عام عايش بلا بيك ، يلاه جايا تمارسي الامومة ديالك ..
- أمينة : خويا تكالما انت يلاه نضتي ..
- جواد : جلال ولدي ..
- جلال [غمض عينيه وحلهم كيحس براسو كيغلي ] :
وانا كنبغيها وانت مالك ، واش غير حيت والداني تحكمي فيا ، شكون انت لي تعايريها فين كنتي بعدا فين ، كنعرف الموات ديال الصح كيديرو على ولادهم لي مايدار ، انت الشوفة مكنتي تجي طلي عليا احيت كان راجلك مانعك .. ودابا جايا تعايري البنت ، وشكون انت بأشمن حق ..
- ماريا [نزلو دموعها ] :
حيت انا مك . مك لي تعدبات عليك وتوجعات عليك ، كنشوفك كتموت ݣدامي وكتݣوليا ماندويش وبأشمن حق حيت انا مك كنبغي ليك الخير ..
- جلال [بإنفعال جاي نوض حتى تقصح فصدرو ، سكت كياخود راحة باش يتنفس ] :
واخا واخا تكوني والداني ، قستيني فعينيا الواليدة ، قستيني فعينيا قستيني فكبدتي وفݣلبي ، هزي موس وغرزيه فݣلبي وماتلوميهاش ، هزي قطيب حامي .. ورشݣيه فعينيا وعميني ومتمسيهاش هي ، الى عميت هي لي اتݣودني وهي باش غانشوف .. الى ݣلعتي لي ݣلبي من بلاصتو هي ݣلبي بيها نعيش ..
- كون غير مت وماسمعتش هادشي لي درتيه الواليدة .. جيتيني مي جيتيني ولدتيني وݣلتي هزيتيني وتعبتي عليا ، قسما برب العزة كون كان شي بشري بلاصتك ، بربي لا حنيت فيه ..
- الله يرحم بيها الوالدين بغيت نبقى بوحدي ، راسي مايدور بيا حد .. جر جواد ماريا لي كانت كتبكي قصحها ولدها واداها بهضرتو ، حسات بقلبها كيتقطع على زوج .. خرج كولشي من عندو خلاوه بوحدو .. دور راسو للجهة لوخرا ، خرقة فقلبو حرقة ݣادية ومݣادش ينوض ماعندو حيلة ، سرحات دمعة باردة من جنب عينو .. ماقادش يسوتعب بلي مشات ..
- دموع النسا عادية بنسبة لينا ، ولكن دموع الرجال كتهد الجبال ، والى شفتي الراجل بكا عرفو هز كتر من طاقتو او وصلات بيه العظم وماقدش يتحمل ..
- واقفين على برا .. ماريا ساهية وعينيها باكيين هزات عينيها فراجلها ودوات بحزن :
شفتيه كيفاش دوا معايا ، على البراني شفتيه كيفاش تعامل معايا ؟
- جواد [بصرامة ] :
وكيفاش بغيتيه يدوي معاك ، على اساس درتي الزينة اماريا ، شوفي نݣوليك جوج كلمات ، انا ولدي تحرمت منو سينين هادي وشاري عداوتو ، ماشي انجي حتى لدابا لي تصالحت معاه وكنحاول نكسبو نخسرو ، وݣاع لي ݣالو عندو الصح فيه .. واش نسيتي راسك انت وشنو دوزنا انا وياك ، ولا مسحتي السما بليݣة ..
- ماريا [بإستغراب] :
دابا انا لي غالطة ؟
- أمينة [بإنفعال ] :
اه غالطة اماما من ساسك لراسك ، واش عمرك سولتي راسك كيفاش مسيرة تعرفات على جلال .. لا عمرك سولتي راسك ايوا انا انقوليك كيفاش ، واش فخبارك بلي خويا كونماشي مسيرة كوراه دابا ميت .. [شافيها باها ومها دقة وحدة بإستفسار ] ..
- جواد : كيفاش ؟
- امينة : جلال واحد خونا بزناز كان باغي الارض ديال وجدة لي كان خلاها جدي لجلال ، وجلال منين عرف بلي السيد بزنانز مابغاش يبيعها ليه ، فالاول قاليه ندخل معاك شريك ، ولكن من بعد مابغاش وأصلا انتوما عارفين جلال مع البيع ديال الارض ، كيحس براسو ايفرط فروحو ..
- ومسيرة باها كان دار كسيدة فالخدمة ، عند واحد خونا سميتو السعودي ، وفاش كانت كتقلب عرفتت بلي ولد خوه ناري يق//تل خويا جلال .. وعرفات اشمن بلاصة واشمن وقت ، وشدات الطريق من جديدة لكازا ... كيفاش عرفات انا معارفاش ، لي عارفة هو الوقت لي كان خويا ايتيريو فيه ، دفعاتو وركبات الطوموبيل ساݣت بيه ..
- عرضات حياتها للخطر ، حيت من بعد هداك خونا ولا كيقلب عليها حتى هي وعلى عائلتها داكشي باش خويا جابهم عندو لدار .. ضحات براسها وكونما هي كوراه كتبكيو على ولدكم ..
- واش الطلاق عيب ، الى هادشي غايبرد ليك العافية لي فقلبك اماما ، مسيرة حصلات راجلها الاول كيخونها ، هاباش طلقات منو ... وراجلها الثاني تفارقو حبيا حيت ماتفاهموش ، ومالقاوش راسهم مفاهمين .. الطلاق عمرو كان عيب ..
- والله القسام وليتو كتصدموني ، انا وليت كنشك واش انتوما فعلا عائلتي لي عشت معاهم هادي شحال ولالا ... سراج وقفات ليه خالتي سومية فطريقو ، احيتاش زعمة البنت دخلات الحبس ، وماغلطاتش ماسرقات مانصبات .. تاقت فواحد السيد ومشات فرجلين مدارت لا بيديها لا برجليها ... علاش مكتشوفوش ولادكم بلي ايرتاحو مع دوك بنات الناس ..
- علاش متقولوش براكة علينا اولدي ايرتاح ويعيش مزيان ويكون فرحان ... خالتي سومية نيت ، ياك عمي ذياب داتو بسيكو ، ياك كان خطفك وشوية مايمشي فيها بابا ، انت نيت اماما شحال دوزتي مع بابا ... علاش كتكبرو وكتمسحو السما وتنساو راسكم .. واش الطلاق عيب ، احيت ولدك عزري وهي مزوجة ومطلقة زوج مرات ..
- ها سراج داها بنت بنوت جامي تزوجات وخرجات فيه الشيب ، انا براسي تخطبت مرة الاولى وفسخت وتانية وفسخت ، وكون كملت وتزوجت كان يجي نهار ونطلق .. قسما بالله العظيم الى كضيعو ولادكم من بين يديكم ..
- وشتي اماما الى مسيرة خوات المغرب انت سباب ، وانت السباب باش ولدك ايرجع يبعد عليك ويرجع كيف كان .. بقيتي على خاطرك و رتاحي دابا ..
ويحملني الحنين إليك طفلاً وقد سلب الزمان الصبر مني وألقى فوق صدرك أمنياتي وقد شقي الفؤاد مع التمني غرست الدرب أزهاراً بعمري فخيبت السنون اليوم ظني وأسلمت الزمان زمام أمري وعشت العمر بالشكوى أغني وكان العمر في عينيك أمناً وضاع العمر يوم رحلت عني .
إذا اكتشفت أن كل الأبواب مغلقة وأن الرجاء لا أمل فيه وأن من أحببت يوماً أغلق مفاتيح قلبه وألقاها في سراديب النسيان.. هنا فقط أقول لك إن كرامتك أهم كثيراً من قلبك الجريح حتى وإن غطت دماؤه سماء هذا الكون الفسيح فلن يفيدك أن تنادي حبيباً لا يسمعك، وأن تسكن بيتاً لم يعد يعرفك أحد فيه، وأن تعيش على ذكرى إنسان فرط فيك بلا سبب، في الحب لا تفرط فيمن يشتريك.. ولا تشتري من باعك ولا تحزن عليه ..
- تدق الباب ودخل خوه طل عليه ، بصوت ىجولي تقيل وبنبرة هادئة :
واخا ندويو شوية ..
- جلال [بصوت بارد ] :
دخل .. دخل هلال سد الباب ، مشا لجهة الكرسي وݣلس قريب من خوه .. تنهد تنهيدة طويلة وبدا الحوار ، او بالأحرى الكلام لي كان مواعد راسو غير يفيق ويݣولها ليه ..
___________________________
- مع 10:30 وصلات للروما ... تلݣا ليه المدير التنفيدي للشركة ݣوتشي لي برمات معاهم العقد ، خرجات معاه من المطار فتح ليها باب الطوموبيل ، طلعات وركب حداها ... الطريق كلها وهوما كيدويو على الخدمة ، حتى وصلو للوطيل .. تمنى ليها ليلة سعيدة على موعد باش يتلقاو الغد ليه يكملو باقي الإجراءات .. خدات البطاقة ديال بيتها ودخلات لشومبر ، لاحت ساكها وفتحات البالكو .. مقابلة مع المنظر الزوين لي كان قبالتها ..
- هزات تيليفونها ، وسيفطات ميساجات لخواتاتها علماتهم بلي راه وصلات ... تم تم بدا تيليفونها كيسوني فالواتساب ، كان المتصل كريم ..
- مسيرة [تنهدات تنهيدة طويلة وفتحات الخط ] :
ألو ..
- كريم [بصرامة ] :
فين كاينة ؟ فين مشيتي وا باغية تصعري جدي ولا مال ملتك ..
- مسيرة : كريم
- كريم [بعصبية وإنفعال] :
الق..... ماشي كريم .. فين كاينة بلا متصعري ملتي ؟
- مسيرة : كريم اويلي نعل شيطان ، ومتخسرش الخضرة معايا ...
- كريم : علاش انت تخلي شي حد بعقلو ؟ دويت معاك فينك ؟
- مسيرة : انا فروما ولكن رتاح اندوز فيها غير يوماين ، باش تسناني نقوليك فين واخا طير مغانقوليكش ..
- كريم [كيتنفس بصعوبة بحال شي أنبوب هواىي قرب ينفاجر ] :
واش تهربي هو الحل ..
- مسيرة : انا مهارباش ، وابغيت نرتاح اعباد الله واش مامنحقيش نرتاح .. كريم ، ديها فراسك وديها فمراتك انا عارفة شنو كندير .. الله يخليك بلاما تصعبها عليا ، براكة اداكشي لي داز ..
- كريم : ݣولي ليا غير فين اتمشي ، نجي انا وامينة ندوزو عندك شهل العسل ..
- مسيرة [ضحكات ] :
انا باغية نرتاح منكم وانت باغير تبعني ، وبااز عارفة قوالبك مزيان ، كريم [سكتات ، ورجعات إستأنفات هضرتها ] انا والله حتى مزيانة ، ودابا عاد رتاحيت ... انا ماهربتش انا خويت حيت محتاجة اني نخوي ونبقى بوحدي ونكون بوحدي ، كل واحد كيدير لي يريحو .. ماتشوش من جيهتي راك عارفني ..
- كريم [بقا ساكت مدة تنهد تنهيدة طويلة] :
راسك قاصح ، واخا نݣول ليك ݣلت مغاتراجعيش ..
- مسيرة : لا والو ، سلم على أمينة بزاف صافي ؟
- كريم [بصرامة وجدية ] :
مطفيش التيليفون ، نسوني ليك فالواتساب تكوني حاضرة تجاوبيني ، تفاهمنا ؟
- مسيرة [ضحكات] :
واخا كون هاني ، يلاه تهلا فراسك أولد قلبي تصبح على خير .. قطعات معاه الاتصال ، حطات التيليفون فوق الكوافوز ، هزات الباليزة ديالها ، خرجات منها حوايجها ، بدلات عليها .. تدق الباب حلات لقاتهم جابو ليها العشا ، دخلو ليها للبيت وخرج ..
- تعشات فهدوء تام ، رجعاو داو الماعن .. دخلات للحمام غسلات وجها وحكات سنانها ، عمرات الساعة .. دخلات للفراشها ، طفات الضو وغمضات عينيها مستسلمة للنعاس ..
- إيطاليا ، مدينة العشاق ومدينة الرومانسية والحب ... جاتها فرصة انها تجي وتزورها ، واخا الجو كان بارد ولكن كانت الشميسة ، لبسات كسوة فالخضيضر بينات صهوبية شعرها وبشرتها ... من ورا مافطرات فالمطعم ديال لوطيل خرجات بتش دور وتمشي رجليها وتستمتع بالاجواء بينما وصل وقت الغدا لي كانت دايرة فيه مع المدير باش يكملو الاجراءات ...
- بلاصة كتديها لبلاصة ، مستمتعة بالمناظر .. هازة الكاميرا ديالها فعنقها ، مكانتش من النوع لي كيصور المنازر الطبيعية ولا البنايات الى سافرات بتيليفون ، كانت شارية كاميرا هي باش كتصور الى سافرات .. واحد الجو زوين كيخليك ترتاحي وكيخليك تنساي مبدئيا وتستمتعي بلي قدامك ..
- الطيارة كانت عندها فصباح ، داكشي باش قررات نعار كلو دوزو على برا ... وصل وقت الغدا ، خدات طاكسي ومشات للمطعم لي دارت مع السيد ، لقاتو كيتسناها .. تغداو مجموعين سنات على باقي الأوراق على ميعاد توصل ليهم السلعة فلافان ديال الشهر ..
- كملات الغدا وشكراتو على التعامل ديالو ، شدات طاكسي ومشات للبندقية ... ركبات فالفلوكة ، او وتقات جميع اللحظات .. دوزات العشية كلها فدوران ، مارجعات للوطيل حتى وصل الليل ، وصلات مهدودة وعيانة العظم الصحيح ماعندهاش ... حدها تعشات دوشات وطاحت نعسات باش تفيق الغد بكري ..
________________________
- فالمغرب ، فصباح .. خرجات بلا فطور دار معاها يفطرو بزوج ... لقاتو كيتسناها على برا ، ركبات فطوموبيل .. مع ركبات مع ديمارا ... عينيه على الطريق مادواش معاها نهائيا ، كتشوفيه بإستغراب ، ماعرفاتوش اشنو بيه ولا شنو واقع ..
- وصلو القهوة ، بلاصة طوموبيلتو ، نزل فتح ليها الباب شد من يدها ودخلو بزوج ... خداو الطبلة لي جات بعيدة على البشار .. جر ليها الكرسي ݣلسات عاد ݣلس هو ..
- سكينة [بإستفهام ] :
سراج مالك ؟ ياك لاباس واش واقعة شيحاجة ؟
- سراج [بدون مقدمات ، بجدية وبصوتو المميز لي غالبة عليه الحروشة وبحة غارقة ] :
سكينة كتبغيني ؟
- سكينة [هزات حجبانها مصدومة من سؤالو ] :
من نيتك اسراج ، واش كونما كنت كنبغيك انكون معاك هنا ..
- سراج [صغر عينيه وبنفس الجدية ] :
الى جيت بوحدي بلا والديا وطلبتك لزواج واش أتبغي ؟؟
____________________
- من مطار روما لمطار أثينا ، كتستغرق ساعتين ، رخلة بدون توقف ... وداكشي لي دارت مافيها لي تقطع فزوج طياير قطعات فوحدة نيشان .. خرجات من روما مع 9 ديال الصبح ... وصلات لمطار أثينا مع 12 ، اليونان كانت فايتة إيطاليا بساعة ديال المݣانة ..
- كانت لابسة كسوة فالبيض طويلة ، مع صندالة وطربوش ، بحكم عارفة الجو فاليونان مكايكونش بارد كيطون سخون ... دازت فجميع الاجراءات وخرجات كتسنى فالشخص لي قاليها عليه عصام وهي واقفة جاها صوت رجولي ..
- عندو لكنة رجولية لاتينية إغريقية بنكهة إنجليزية ... سمعات سميتها لي خرجات من فمو بطريقة غريبة ضارت عندو .. كيبان ليها شخص يكون فثلاثين من عمرو .. ملامح جميلة وحادة ، رشم باين من صدرو ويدو .. عينين خضرين ، كان عبارة عن قن//بلو موقوثة من الوسامة .. بإبتسامة مرحة مد ليها يدو ، مدات ليه يدها .. نزل بشفايفو وقبلها ، شاف ليها فعينيها وبنفس الملامح المرحة نطق معرف براسو :
أورانوس زيوس .. مرحبا بيك فأثينا .
خرجات من عندو الفرملية من ورا ماخدات البلاطو ديال الماكلة لي جابت ليه .. وجهو كان مضورو جهة السرجم .. ساهي كان واحد الهدوء ضاير بيه بحال شي إنسان غير الجسد لي كاين اما روح بردات وماتت .. تحل الباب بشوية ، وتسمعو خطوات شبه مترددة ، بحال الى مولاهم معارف راسو واش يدخل ولا يتراجع .. ضور راسو بشوية بانت ليه واقفة بتردد ، كتدعك فصباعها عينيها عليه ، من ملامح وجها كيبان بلي حابسة البكية بزز .. تنهد تنهيدة طويلة ونطق بصوتو لي كيميزو على غيرو :
اتبقاي واقفة تم بزاف ؟
- الجملة ديالو كانت بحال شي مفتاح لينبوع دموعها ، قربات ليه وعنقاتو كتبكي ، تألم من تعنيقتها حيت وعتاتو فيدو ولكن مابينش ليها .. عنقها بيدو لوخرا لي مزيانة .. كيدوز على ظهرها كيسكت فيها .. بعدات عليه بشوية ماسحة دموعها ، نطقات بصوتها الانثوي الرقيق ، لي واخا دازو أعوام بقا هو هو :
سمحليا أولدي ، والله ماقصدت ماعرفتش شنو وقع ليا حتى درت هكاك .. انا بالعكس نهار شفتها نهار الاول تمنيت كون كانت عروستك ، عجباتني وعجباتني عائلتها ... ولكن ماعرفتش شنو وقع ليا فاش شفتك بديك الحالة .. كلك دمايات ، خفتك ضيع مني كيما ضيعتك سينين هادي ..
- جلال [تنهد تنهيدة طويلة] :
حتى انا مكانش خاصني ندوي معاك هكاك ، ولكن راكي عارفاني ... انت مي لي ولداتني وكبراتني واخا تفارقت عليك واحد المدة كتبقاي مي ، على عيني وعلى راسي ولكن ، كاين شي حوايج الوالدة مخاصش الواليدين يفرضوها على ولادهم ولا يديروها ، وانت غلطتي معاها ..
- ماريا [تنهدات تنهيدة طويلة] :
عرفت اولدي ، وانا عمري كنت هكا فحياتي ، ولكن نهار غادي تولدهم اتعرف بحقهم مزيان ...
- بقا مدة كيشوف فيها وبدا كيكحاز شوية بشوية حتى خلى ليها بلاصة ، شاف ليها فعينيها ودوا :
أجي حدايا .. مشات تكات حداها فجهة لي ماموعتش فيها ، حطات راسها على دراعو ويدها على كرشو معنقاه .. تنهدات وبدات كدوي بدون مايطلب منها :
نهار تعرفت على باك انا وياه نوضنا الحرب ، هادشي لي غانعاود ليك عمري فحياتي عاودتو ليك .. كلامك لي قلتي ليا اوليدي عندك فيه الصح ، انا ام ماقريباش من ولادها ، ولادها عارفين عليها اشي حوايج وشي حوايج لا ... ماشي غير باك لي دار معاك الغلط ، حتى انا درتو لي ماتبعتش ولدي ، وماوقفتش لباك فوجهو واخا نعرف نضرب عليك الجفاف ، ومانخليكش ولكن فات الفوت ..
- جلال [حط راسو على راسو ونطق ] :
كملي ..
- ماريا : نهار درت 18 عام ، با الله يرحمو كان جاتو مشية لإسپانيا ، كان خدام فوزين الليمون ديال جدك الله يرحمو ، ايوا انا كانو عندي جوج دراري عشراني [شافيها وتبسم بتهكم] :
عشرانك ݣاع !!
- ماريا : ومالك انتوما لي كانو عندكم العشران ، المهم كنت كنقرا فلافاك ونفس الوقت كنخدم فواحد الپيتزارية ، سمعت دراري كيهضرو على المشية لاسبانيا يحرݣو ، ايول زعمة وحرݣت معاهم ، كنت بغيت نخلط على با حيت مي جداك حورية كانت سمحات فيا وانا عندي عامين ..
- جلال [تشوكا ملامح وجهو جمدو] :
عمرك ماݣلتيها ليا ..
- ماريا : حتى واحد معارفها ، مكنبغيش ندوي على لي داز ، المهم وصلت لاسبانيا ومشيت عند با واخا مابغانيش ندير داكشي ولكن قنعتو ، ايوا وقلبت على خدمة تم فين تعرفت على وردة مرات عمك ولينا صحابات من الروح روح ..
- ايوا كتاب المكتوب وحملات ببنت عمك ليليا ، وفاش رجعنا للمغرب باش نعلمو عمك وقعات ليها كسيدة ، ودخلات فغيبوبة وانا لي تكلفت بليليا انا لي ربيتها وقابلتها ، تما فين تعرفت على باك ، وناري جن لي فيا مكانش كيحملو .. خصوصا فاش بغا يدي ليا البنت ويلي ويلي ، ايوا بقينا انا وياه شد ليا نقطع ليك ، حتى نهار تزوجنا على الوراق بمسبة البنت ..
- جلال [كيزيد يتصدم ] :
وفيلم هندي هذا كملي ..
- ماريا [ضحكات] :
والله حتى فيلم ، ولكن وراها طلقنا منين وردة فاقت وقلبات على عمك أمين انت فخبارك هادي ، ديك ساعات فاش شدو بنتهم طلقت انا وباك ، وفاش رجعات مي بانت هربت ، مشيت لكازا حيت ماقديتش نسمح ليها ، ولكن باك تبعني .. فينما هربت تابعني ، بقينا على داك الحال حتى لقيت راسي كنبغيه ، كنعقل واحد المرة [بدات كضحك] ..
- شتي داكشي لي درتي مع مسيرة فالعرس درت ضوبل ديالو ..
- جلال [شافيها هاز حاجبو المضروب وناطق ] :
وراك بلان الواليدة كملي ..
- ماريا : كنا فكازا .. كنت انا وفرح أخت وسيم ، راك كاتعرفو ... وكانت معانا حتى صاحبتي دابا راه تزوجات .. ايوا كندورو حدا الجامع ، خسرت الفلوس لي عندي كاملين ، ومابقا عندنا باش نرجعو للدار فطاكسي
- مندخلو غير لواحد المطعم ، هو مطعم وبار وكباري ، كانو شي شيخات جايبينهم وشي وحدينات ماتفاهموش على الثمن ورجعو .. او واحد خيتي جيت عندها قلت ليها حنا نديرو راسنا شيخات وخلصينا ، ايوا لبسنا تكاشط ودرنا البونج ودخلنا نشطحو ..
- ايوا المصيبة الكحلة مايكون اباك فداك البار ، وقشعني واحد الخلعة شداتني وليت كنولول ، ههههه بديت نغني ليهم عتق عتق ماريا كتغرق شافني المخنزر محزمة كنشطح ..
- جلال : شكون المخنزر الواليد ؟
- ماريا : اه كنت مسمياه المخنزر ، حيت غير مغوبش الله يستر .. ايوا طاح البونج طاح كولشي ، شدني صرفقني ... وناضت المضاربة وجاو البوليس هزونا كاملين ..
- جلال [جاتو الضحكة] :
داكشي باش كتݣولي ليا ، انت وباك شجرة تقسمات على جوج ..
- ماريا : وايييه ، ولكن باك واخا هكاك كون رومانسي ، عرفتي كيفاش طلب مني الزواج ... فالبراشيد ، وصايب ليا خاتم على ودي هو هذا [وراتو الخاتم لي كان على شكل حبة القهوة ] وداني للبرازيل ماخلا بلاصة مداني ليها .. الصراحة انت قويسح عليه شوية ..
- جلال [بحشرجة رجولية ] :
ياك الواليدة ..
- ماريا [ناضت من حداه كتشوف فيه بجدية ] :
الى كنتي كتبغيها اولدي ، سير قلب عليها .. وجيبها لهنا ودير لازم ..
- جلال [ملامحو تبدلو للجدية ونطق بصوت هادي عكس إحساسو الداخيلي ] :
لا الواليدة ، مغادي فين ومغانمشي فين ، ومغانتبع حد ..
- ماريا : الله يهديك اولدي ، باك انا راه ماخلا مدار عليا ..
- جلال [ببرود] :
با هداك ، وأنا أنا ... مغانتبع حد خدمتي كتسناني خاصني نرجع ليها ونركز فيها ، مغانبقاش كندور بين البلدان ، كون بصح بغاتني كون بقات ..
- ماريا : راه كانت كتجي لهنا ديما ..
- جلال [بإستهزاء] :
كانت فين هي دابا ، لي كايبغي شي حد الواليدة على الاقل يجي يطل عليه ، واخا نكون ݣاع خايب مانسواش .. جوج ديال الحوايج بنادم مكايهز فݣلبو فيهم ، الموت وسبيطار ...
- ماريا : ونجيو لصراحة اولدي بغيني ولا كرهني ، انت نهار خويتي الدار حيت باك مابغاش داكشي لي بغيتي وانت مابغيتيش شي حد يبزز عليك ، وانت اولدي فرضتي راسك عليها ، وماشي هكا كيديرو الناس ، اتجرجيرة وشوهة لي درتي فالعرس حشومة ..
- جلال هزهز براسو وكمل فسكتاو ... تدق الباب وقاطعهم دخول سراج ، ملامحو كانت باردة على عكس شخصيتو .. :
كيصبحتي العود ؟
- جلال [هز براسو ] : الحمد لله ، مالك انت ؟
- سراج [بجدية ] :
غادي نخطب سكينة ..
رجعات لدار لقاتهم ݣالسين ، ݣلسات وستأنفات هضرتها :
فطرت انا وسراج ... باغي يجي يخطيني منكم ، ولكن مغايجيبش والديه ، بحال والو ايجي غير باه وخوه ، وغايشوف حتى عمو يجي معاه .. مو مغاتجيش ..
- معزوزة [ بصوتها الباح الوقور ] :
علاش مالها مراضياش بينا .. راه حنا لي خاصنا منرضاوش بيها زوينة هادي ، وبنادم مايطلعش لينا فوق الراس ..
- محمد : صافي ألالة معزوزة نعلي الشيطان خلي البنت تدوي ..
- سعاد : علاش مالها ياك لاباس ؟
- سكينة [ضحكات بحرقة ] :
حيت زعمة انا دايزة فالحبس ، داكشي باش ..
- سعاد [بإنفعال] :
ياكما مطيحة الرواح ، زوينة هادي تاني ، عندها الزهر لي ولدها طاح فبنت بحالك ، خاصها تبوس يديها وتحمد الله وتشكرو ..
- سكينة : انا اخالتي قلت ليه مرحبا ، انا مغانعيش مع مو انا بغيتو هو وانتوما عارفينو مزيان ، انا ماعندي حد داكشي باش غايجي لعندكم ..
- معزوزة [بوقارها ] :
مرحبا بيه ابنيتي ، انديرو لازم ولي كيدار ... بحالك بحال صفاء ومسيرة وسندس ، بحال بحال ... مݣاليكش ايمتا غايجيو ؟
- سكينة : واحد يوماين إن شاء الله ..
- سعاد : صافي مزيان ، باش يلاه نوجدو على خاطرنا ..
- سكينة : انا انبقى فدار هاد الايام ، مغانمشيش للخدمة ..
- معزوزة : اويلي على الخدمة ، ݣلسي وتبتي حتى يجي راجلك إن شاء الله ونديرو لازم وديري لي بغيتي ..
- سعاد : ايوا صافي مزيان نخرجو انا وياك ، راكي عارفاني مامخالطاش كازا بزاف .. نمشيو نشوفو ليك شيحاجة ، ونتقداو لي خلصنا .. سوارت ديال طوموبيلت دمسيرة راها فوق الطبلة حدا الڤاز ..
- معزوزة ': وعيطي على راجلك ݣوليها ليه ..
- سعاد [ بإستسلام] :
واخا اخالتي أنا أنقولها ليه ..
___________________
- سراج : لي بغا يمشي مرحبا لي مابغاش ماعندي مندير ليه ..
- ماريا : واتمشي بلا مك أولدي ؟
- سراج : هي لي مابغاتش اخالتي ، شغلها هذاك ... عمري فحياتي كنت كنعرف الواليدة هكا دايرة ، نهار لي دات الواليد مݣاليها حد شيحاجة ، ياك الواليد دوز عليكم الحر انت وعمي جواد ، ومالها داتو ..
- وبغيت اشي نهار تݣوليا الله يسخر ليك بلا هضرة بلا جوج ، ضروري خاصها دوي ضروري خاصها تكريتيكي ... توفيق لا ، لي دارها الله يهديه ماعندنا منديرو ليها ، سراج حيط قصير ..
- حتى انا اخالتي أندير لي ݣالو ليا راسي ، بغيتو تمشيو مرحبا مابغيتوش هانية ..
- ماريا : لا اولدي علاش ، مالك مݣطوع من شجرة ، نمشي معاك علاش شحال عندي منك غير واحد ... بحالك بحال جلال وهلال ، انت راه الحبيب الغالي ..
- سراج : لهلا يخطيك عليا أخالتي ..
- جلال : ومبروك عليك أولد العم ..
- سراج : الله يبارك فيك ، تحضر فالعقد إن شاء الله ..
- جلال [هزهز براسو ] :
إن شاء الله .. بغيتك فواحد البلان ..
- ماريا [وقفات ] :
انا نشوف باك ونرجع .. خرجات وخلاتهم بزوج ..
- سراج [قرب حداه ] :.
أش تم ؟
- جلال [بجدية وبرود ] :
شوفليا لادريس جديدة ديال الطبيب لي كنت متبع معاه ..
- سراج [هز حاجبو ] :
هي نويتي ؟
- جلال : الى بقينا فالحياة ، شوفليا البلان نعول عليك ..
- سراج : تهنا ..
- الطريق كلها وهي منبهرة بالمباني ديال أثينا ، أمنية حياتها كانت هي تجي لليونان وتزورها ودور فيها ، وهاهو كتاب المكتاب وغادي تستقر فيها .. رجعها صوتو للأرض للواقع .. :
أول مرة ليك هنا ؟
- مسيرة [هزهزات راسها ] :
أه اول مرة ..
- أورانوس : غادي تعجبك بزاف ... اليونان ولافة وغادي تلقاي فيها لي عجبك ، الى كان كيعجبك الهدوء والاجواء الشاعرية اتعجبك ..
- مسيرة [بإبتسامة ] :
إن شاء الله ، شكرا وسمحليا عذبتك ..
- أورانوس : لا مكاين لا عذاب لا والو بالعكس .. بليل غادي تكون واحد الحفلة صغيرة بالمناسبة ديال حضورك ..
- مسيرة [بتأسف] :
علاش عذبتو راسكم .. مكاين لاش ..
- أورانوس : لا مكاين حتى عذاب ، بالعكس .. ايكونو الموظفين الأساسيين حاضرين ، باش هكا تعرفي عليهم .. هادي هي العادات ديال هنا ، اي واحد جا جديد كنرحبو بيه بهاد الطريقة ، وخصوصا انت العضو المهم فشركة ..
- مسيرة [بإبتسامة ] :
واخا أسيدي ماعليش .. كمل السوݣان ديالو ، مسافة ديال شحال عاد وصلو لسانتوريني ، قلب الطريق وشد الطريق أخرى ... كيبانو ليها الديور بواحد الديكور زوين ، حتى حبس الطوموبيل قدام واحد الدار .. نزل ونزلات معاه ، خرج لي ڤاليز ديالها .. ونطق :
هادي هي الدار ، ديك 8 غادي نجي باش نديك ..
- مسيرة [ بإمتنان] :
صافي شكرا .. فتحات الباب ، بقا واقف حتى دخلات ، جات تجر البالز عاونهم حتى دخلهم ليها ومشا ..
- سدات الباب وضارت كتشوف فالأرجاء ، الدار كات اقل مايقال عليها روعة ... صالون كبير كلو بالبيض ، مزين بالمحابق .. دروج فنفس اللون كيديو للطابق الفوق ، سراجم كلهم زاج مقابلين مع البحر ..
- الكوزينة حتى هي كانت مصبوغة بالبيض ، اما البيت ديال الݣلاس لونو كان بالخضيضر بارد والبيض ، طلعات الفوق .. كان فيه 3 البيوت .. كلهم فيها لي بالكو .. واحد حتى هو بالبيض ، وتاني فتيركواز هو لي خدات ، اما الثالث لونو حتى هو نفس لون بيت الݣلاس ..
- الدار مريحة بزاف وكتخليك تحس بواحد الراحة مكاينش بحالها .. جرات الباليزة اللولة طلعاتها ، دخلاتها للبيتها ... رجعات للباليزة الثانية هزاتها تعنكشات معاها حتى للبيت ، دخلاتها .. ݣلسات رتاحت شوية ، وبدات فتستاف ديال الحوايج ..
- كملات التستاف ديالها ، حيدات ديك الكسوة بدلاتها بحوايج الدار ، هزات تيليفونها شعلاتو من ورا مكانت طافياه ، مع شعلاتو مع سونا ليها عصام :
وي وصلتي ؟
- مسيرة : اه انا فدار دابا ..
- عصام : وعلى سلامتك ، المهم فصالون التحت حدا التلفازة اتلقاي كارطة جديدة .. باش تبدلي هاديك لي عندك ..
- مسيرة : صافي لهلا يخطيك ، والله حتى وفرتي عليا الوقت ..
- عصام : المهم خاصني نمشي دابا ، التيليفون بيناتنا صافي ..
- مسيرة : صافي واخا ..
- قطعات معاه التيليفون ، ونزلات للبلاصة فين قاليها .. هزات الكارطة ركباتها .. مشات للكوزينة حلات الثلاجة لقاتها عامرة ، كان فيها الجوع .. كتشوف شنو ممكن الدير ..
- مكانتش عارفة شنو اطيب ، جبدات الدجاج حتى تسول عصام واش اللحم لي فثلاحة حلال ولالا .. قطعاتو طريفات صغار شحراتو .. حلات واحد الپلاكار لقات لي پاط صلقاتهم ..
- بقات فالكوزينة كتوجد ، دارت الݣراتان فالمول ، بقات مع الفران كتشوف كيفاش تشعلو حتى شعلاتو ، دخلات المول وخلاتها طيب .. غسلات الماعن وبدات كتوجد فطبلة ..
- حطات الغدا وسالات ، يلاه ݣلسات باش تغدا وهو يسوني الباب ، غمضات عينيها بنفاد صبر وناضت تحل .. فتحات الباب ، طاحت عينيها على رجلين طوال جسم منشوق ، شفايف منفوخين شعر رطب كحل ، كسوة ديال الجلد لاصقة عليها ، هزات حاجب ونزلات الثاني مطلعاها ومهبطاها .. [بلهجة مصرية وثقة فنفس وصوت أنثوي ] :
إِنتِ مسيرة ؟
- عوجات راسها بإستغراب ، شكون هادي وباش عرفات سميتها ، وهادي اول مرة تحط رجلها هنا .. بإستفسار :
اه انا هي مسيرة شكون انت ؟
- دخلات بلاما تسمح ليها دخل ، بإبتسامة وغرور :
انا المديرة التنفيذية للشركة .. [دورات راسها فدار وبخطوات أنثوية مشات نيشان لصالة وݣلسات ] شكلك كنتي لسة حتتغدي ..
- مسيرة [صغرات عينيها كتشوفيها ماحملاتش هاد الدخلة ديالها ومكتحملش لي يجيها فوقت الماكلة ] :
اه بحال الى علمك الله ..
- سوري نسيت معرفتكيش بنفسي ... انا هناء يوسف ... سمعت عنك شوية وعن البراند بتعاك .. بس إنت بتعرفي عصام منين ..
- مسيرة [ݣلسات مقربة ليها الطبلة كتاكل ، مامسوقاش ليها واش كاينة ولالا ] :
وعلاش كتسولي ؟
- هناء [دارت رجل على رجل ] :
سؤال بسيط جدا ... لأنو عصام مابيسيبش مفاتيح بيتو لأي كان ..
- مسيرة [ كتبرد فالفرشيط على الفرماج .. خشات الفرشيطة ففمها وهزات عينيها فيها بإبتسامة ] :
ساهلة ، مدامك خدامة عندو ... اتكوني عارفة بلي انا شريكتو ، وحاجة عادية يخلي ليا السوارت ديال دارو .. كيبان ليا بلي انت وعصام مابيناتكمش غير الخدمة بيناتكم شيحاجة كثر ..
- هناء [ضحكات بميوعة ] :
بحب جدا الناس الذكية ، وانت ذكية جدا ... انا وعصام بنحب بعض أوي ... بستنى بس رجعتو من المغرب ، وإن شاء الله نعلن خطوبتنا ..
- مسيرة [خرجات ليها الضحكة من فمها ، حتى رشݣات ليها وطار الما من نيوفها .. هزات كاس ديال الما شرباتو وشاف فيها بتأسف ] :
سمحيليا وحلات ليا .. واش متأكدة من هادشي لي كتقولي ؟
- هناء [بعدم رضى] :
شايفاني بضحك ولا بكذب ؟
- مسيرة : لا حاشا ، مكتكذبيش .. الله يكمل ليكم بالخير ..
- هناء : احسن حاݣة ... إنك تشوفي بيت غير البيت ده ، عشان تستقري فيه ، لانو بعد كده حيكون بيتي انا وعصام ..
- مسيرة [ كانت باغية تݣوليها لي كاين ولكن سكتات بغات تخليها حتى الوقت المناسب .. كانت عارفاه هاد الليلة غايكون فدار خالت عفاف ، باش يطلب يديها .. وكانت طالباه يسيفط ليها تصاور ، تبسمات بخبث .. التحريميات مكانوش من خصايلها ، ولكن هاد السيدة بذات طلعات ليها الدم وخاصها توقفها عند حدها ] :
إن شاء الله .. دابا الى سمحتي بغيت نرتاح ، أورانوس موجد حفلة على قبلي وخاص نكون واجدة ..
- هناء [وقفات وتبسمات ] :
أيوا ما انا عارفة .. بشوفك الليلة .. عطاتها بظهر غادية وكتمختر .. خرجات وسدات الباب وراها ..
- مسيرة : قالت ليك ايتزوجو الله يمسخها ، وشحال كيعجبوني لي بحالك .. [ كملات ماكلتها على خاطرها ، سالات جمعات الطبلة وغسلات الماعن .. تكات على الفوتوي مغمضة عينيها مستمتعة بالبرودة لي داخلة من السراجم ..
- ݣالسة والحشمة غالبة عليها .. بقفطان فالبيج من التراث القديم ديال نجية .. حاطين صينية ديال اتاي ، الحلوى المسمن الملوي البطبوط .. داكشي بسيط وعلى قدهم ... كان ݣالس أحمد بجلابتو مع نجية لي حتى هي لابسة واحد القفطان وشال .. أما عصام لي كان بلبسة بسيطة ، مابغاش يبان على منهم .. سروال دجين وتريكو فالݣرونة ..
- ماخلا مجاب ولا دخل فيديه ، شكلاط الورد خاتم الخطوبة لي ختارو على دوقها فاش خرج معاها .. نهار لي مشات فيه مسيرة ودوا معاها فتيليفون ، دارو يتلاقاو .. خرجو للقهوة وتكلمو .. كان معقول فهضرتو وجاها نيشان ، بلي عاجباه وباغي يكمل معاها حياتو .. مكانش من النوع لي عندو مع الخروج ودخول .. وكترت الهضرة ، كان باغي يسرع بالإجراءات ويجيبها لدارو ..
- من القهوة كانت طريقهم لذهيبية ، ختارو الخاتم على دوقها هي ، بسيط وراقي ..
- عصام [بادر بالهضرة ] :
سي أحمد لالة نجية ، بلا شك عفاف عاودات ليكم شنو كاين ... شفتوني اليوم جاي بوحدي ، والديا ميتين 7 سنين دابا ... الله يرحمهم ، ماعندي خوت وحتى العائلة من ورا الموت الوالدين كل واحد كيݣول راسي ياراسي ، قليل لي كتلقاه يتفكرك ..
- أحمد [هزهز براسو] :
عدك الصح اوليدي ، مرحبا بيك .. الى ماعدك عايلة حنا هوما عايلتك ، عفاف دوات لينا عليك ، وݣاع لي يجي من جهة مسيرة ودار عباس مرحبا بيهم ..
- عصام : لهلا يخطيك اسي احمد ... انا عفاف راه مايخصها معايا حتى خير ، لي تقالت عليها خفافت عليا .. ولي بغاتها تحضر ، الى بغات ترجع تقرا ماعندي مشكيل ... المهم عندي تكون فرحانة ومرتاحة .. هذا هو الأهم ..
- نجية [بإبتسامة بشوشة ] :
اوليدي كيݣولو سيادنا لوالة ، مول دار تعرفو من عتبة بابو .. وانت اوليدي باين ولد الناس .. انا غير تهلا فيها وديرها فعينيك راها دريويشة منحتاجش نشكرها ليك ..
- عصام [بصوتو الرجولي الرزين ] :
وانا داكشي باش قصدتكم ..
- أحمد : ايوا اوليدي منتسالكم غير الله يكمل بالخير ..
- عصام [بإبتسامة راحة ] :
هي نقراو الفاتحة .. رفعو يديهم وقراو الفاتحة .. من وراها ركبو الخواتم .. كانت الحشمة طاغية عليها بلا مكياج بلا والو ، خدودها موردين وعينيها كيبريو .. كتحس براسها بحال الى كتحلم ، تافقو على العقد يكون من هنا ل 15 يوم .. اما العرس كانت رافضة دير العرس غير حفلة بين العائلة صافي ..
- ختمو ديك الجلسة بتصاور صورهم هو .. فيهم هوما كاملين ، ولوخرين فيهم غير هو وياها .. وتصويرة يديهم فيها الخواتم ..
________________________
- لبسات كسوة فالبرو مارين تحت الركبة .. مع صندالة فنقري ، سلسلة فعنقها نقرية ... شعرها مشطاتو سامپل .. رشات من ريحتها ، هزات ساكها لي كان فنفس اللون ديال الصندالة ، نزلات مع دروج يلاه وصلات لنص سمعات السونيت ديال الباب ، كملات طريقها .. حتى وصلات الباب ، ضورات الپوانيي وفتحات لقات أورانوس واقف كيتساها ، كانت متأنق وريحتو سابقاه ..
- أورانوس [ طلعها ونزلها بإبتسامة ] :
فالوقت .. أول وحدة انلقاها سالات ولبسات ، مالف كنبقى نتسنى بزاف ..
- مسيرة : هههه كيما انا مكيعجبنيش نتسنى ، حتى انا منبغيش نخلي شي حد يتسنى .. مشينا ..
- أورانوس : يلاه ..
- سدات الباب وراها ، ماخلاتوش يحل ليها الباب ، سبقاتو وحلات الباب طلعات .. ركب حداها ديمارا وشدو الطريق ..
وصلو لواحد المطعم راقي كيطل على البحر ، كان عامر بالناس ... نزلو من الطوموبيل ، وقفات كدور فعينيها المنظر عجبها بزاف .. تقدم معاها داخلين للمطعم ، هزات عينيها كتبان ليها هناء هي اول وحدة جات عليها عينيها ... قربو من الطبلة ، كانو فيها 3 ديال البنات و4 ديال الدراري .. من الوهلة الاولى والبشاشة لي على ملامحهم كيبان بلي مغاتلقاش معاهم مشكيل ، عكس هناء لي عرفاتها الصباح وزادت تأكدات دابا من نظراتها لي كلها غرور ، حتى من مظهرها الخارجي كيبين هادشي ..
- على عكس البنات لي كانو بساط فحوايجهم ، هناء كانت مغرية فكسوتها الحمرة ومكياجها لي أوڤر ..
- قدها أورانوس لليكيپ لي غايخدم معاها ، الدراري كانو يونانيين ، أما البنات وحدة فرنسية وثانية برازيلية ، أما الثالثة كانت أردنية كبرات فلندن وستقرات فاليونان وكان سميتها خولة ..
- ݣلسات مسيرة وخدات بلاصتها ، حداها حدا اورانوس وخولة قبالتها هناء ..
- أورانوس : مكتشربيش ياك ؟
- مسيرة [بإبتسامة] :
لا .. طلب ليها عصير ، بينما يختارو شنو غاياكلو للعشا ..
- خولة [بإبتسامة مرح ] :
انا أسفي إذا عم إحكي إينݣليش ، بس عم تشوفي الظروف انا وإنت وهناء بس لي بنحكي عربي ..
- مسيرة [بنفي ] :
لالا ماشي موشكيل ، خودي راحتك ..
- زاريس : شفت الكتالوݣ ديال البرند ديالك ، واعر بزاف .. الصراحة احسن حاجة دارها عصام هو سيفطك لهنا ..
- اورانوس [ضحك] :
عصام الى بانت ليه شي همزة مكايفلتهاش ..
- مسيرة [ضحكات وهي حاسة بعينين هناء عليها ] :
توريني عصام ، عاشرتو عام وعارفاه مزيان كيداير فالخدمة ..
- هناء [بإستهزاء] :
كتعرفيه بحال الى كنتي قريبة ليه ، الخدمة ماشي هي الحياة الواقعية ..
- مسيرة [ضارت عندها بالعرض البطيء ] :
انا عاشرتو فالخدمة وفالواقع بزوج ..
- خولة : على هاد الحساب كانت بيناتكم كثر من الخدمة ..!!
- هناء [موجهة كلامها لخولة ] :
شنو غايكون مثلا ؟؟ عصام كنعرفوه مزيان مكيخلطش الخدمة مع الحياة الشخصية ..
- خولة [بجدية ] :
ولكن عصام عمرنا شفناه مع شي وحدة ... واصلا مكانش كيطول بزاف هنا ، هادشي باش شكيت انو يكون بيناتهم كثر من الخدمة ..
- مسيرة [قاطعات هاد الحوار بإبتسامة للخولة ] :
انا وعصام كنا مزوجين ..
- كولشي سكت ، من غير هناء لي كانت كتشوفيها بواحد النظرة غريبة ، نظرة لي تحولات لقهقهات متتالية .. قهقهات ديال إنسان لي تحط فموقف خايب ولي غالبة عليه الصدمة .. سكتات من الضحك وهي كتشوفيها مامتيقاهاش :
إنتو المغاربة دمكم خفيف أوي ..
- مسيرة [مبسمة وكتشوف فيها ببرود قــ / اتل ] :
ويلي مزال ماشفتي والو ، حنا الضحك غادي لينا مع الدم . .. واخا انا ماشفتش شيحاجة كضحك فكلامي ..
- هناء [ببرود] :
إنتي بتستعبطي ولا إيه ، أزاي انت وعصام كنتو متݣوزين ..
- مسيرة : والحماق هذا ، كنا مزوجين على سنة الله ورسوله ، فيها شيحاجة هادي بحالنا بحال الناس ، شافني فدبي حمقنو وخرجت ليه العقل ..
- قاليا بالحرف ، نهار شفتك خطفتي قلبي ، وعمري فحياتي ماشفت شي وحدة بحالك ... ساهلة ، وعرض عليا الزواج فنفس النهار وانا وافقت عادي جدا ..
- أورانوس : ولكن طلقتو هادشي لي فخباري ..
- هناء [شافت فيه بإستغراب] :
انت كنتي عارف ؟
- أورانوس [ببرود ] :
وي كنت عارف ، ياكما بغيتي نجي نݣولها ليك ونتشاور معاك ؟
- هناء : حنا خدامين مع بعضياتنا ، أي حاجة وقعات خاصنا نعرفوها ولالا ..
- أورانوس [ بصرامة] :
فالخدمة ماشي فالحياة ديال الناس ..
- هناء [ رجعات وجهات انظارها للمسيرة ] :
الصباح فاش تلاقينا كنتي كضحكي عليا ياك ؟؟
- مسيرة [ بنفس البرود ] :
علاش انضحك عليك ، غير هو ماتيقتكش وصافي .. بنادم كيحط راسو فمواقف خايبة بزاف .. ولكن شوفي رتاحي حيتاش انا وعصام طلقنا ... ولكن مابغيتش نصدمك ونقوليك بلي فهاد الوقيتة لي حنا ݣالسين هنا .. عصام فالمغرب كاين عند شي ناس كيخطب بنتهم ..
- فنفس الوقت سونا تيليفونها ، هزاتو فتحات الواتساب لقات تصاورهم دخلو عندها ... تبسمات ، وهزات راسها عندها ... قابلات التيليفون معاها :
هانتي شوفي ... جاو غزالين ، الصراحة انا لي عرفتو عليها ... ومامشيت حتى جمعتهم الحمد لله .. حيت مغايلقاش بحالها ، دوماج ماحضرتش .. وحتى العرس مغانحضرش ليه .. ولكن نحضرو جميع لسبوع [ غمزاتها] ..
- فديك اللحظة بضبط ، العاف/ية كانت شاعلة فيها ... صدرها كيطلع وكيهبط مكانتش قادة تصبر ، ولات كلها كترعد ... وقفات حتات على ساكها ، وتحركات من تم بزربة ضاربة فشرباي لي طاحت ليه الصينية من بين يديه ..
- اورانوس [ بإستفهام ] :
هادي مالها ؟ واش تلاقيتو الصباح ؟
- مسيرة [ كضحك] :
وايااه ، قصة طويلة ... المهم نتعشاو ونعاودها ليكم ، فيا الجوع ..
- أورانوس [ بإبتسامة البشوشة ] :.
هي الأولى ..
_______________________
- فالڤيلا ديال جلال .. ݣالسين الوالدين الراس فراس ، سومية لي حاكرة راسها وكتسمع لكلام ماريا ..
- شوفي انا ولدي شحال وهو غايب عليا ، واش باغية حتى ولدك يوقع ليك معاه نفس الشي ، البنت ظريفة وشفناها ... الحبس دخلات ليه ظلما وعدوانا ، مدارت لا بيديها لا برجليها .. ولدك راه كيبغيها ، ومنكدبش عليك ، انا وجواد غانمشيو معاه ..
- بغيتي اختي تمشي وتكبري بولدك مرحبا ، مابغيتيش انت تعرفي .. انا لي عندي راني ݣلتو ليك فكري مزيان فهضرتي ، حنا مكنبغيو فهاد الدنيا غير ولادنا يكونو على خير ، هذا هو المهم عندنا .. إيوا اختي هادشي لي كاين .. [ناضت تبعها راجلها طلعو الفوق ، وبقات غير سومية وذياب لي بدورو خلاها وخرج على برا ، مخليها تراجع نفسها وتفكر مزيان فهادشي ..
_________________
- فصباح ، وعلى غير عادتو .. كيصبح ناعس ، فاق دخل للحمام خدا دوش ... خرج نشف راسو ولبس حوايجو .. هز النظارات الشمسية ديالو ، نزل التحت ، لقا الفطور محطوط وجداتو الخدامة ... فطر قبل لا ينزلو هوما ، سالة ناض .. خشا التيليفون فجيبو ديال لاشوميز ، هز السوارت وخرج .. فالخرجة تلاقى مع هلال لي شافيه بإستغراب ، عمرو شافو فايق بكري كان هو اخر واحد كينوض ..
- هلال [غمزو] :
فين مبكر ؟
- توفيق [سكت مدة ، شافيه وتبسم ] :
المدينة القديمة ... دار نظاراتو ركب طوموبيلتو ، ديمارا ومشا تحت نظرات هلال لي كلها إستغراب ..
- فاقت الصباح بكري ، كان أول نهار ليها فالخدمة ... لبسات اونسومبل فالبيض ، شعرها خلاتو مطلوق بحرية ... فطرات بشوية ديال الجبن مع الخبز وكاس ديال العصير ، هزات تيليفونها ساكها وسوارت الطوموبيل لي خلا ليها عصام ... مع خرجتها من الدار مع لقات أورانوس كيتسناها ، كان خاصو ضروري يجي يسوݣ بيها باش هكا تعرف الطريق من الشركة لدار ..
- صبح عليها وطلع للطوموبيل وهي بدورها ركبات حداه ... الطريق كلها مكانش بيناتهم خضرة كثيرة ، كيسولها كتجاوبو وحتى هو هكاك .. داكشي لي وقع لبارح ماحكرش عليه بزاف ، حيت عارف هناء وشنو كتسوى ..
- وصلو للشركة ، لي كانت بيناية فالبيض ... عليها اللوݣو ديال البراند دعصام ، عطاهم السلام العساس ودخلو ، الانظار ديال الموظفين تاجهو ليهم ، كلهم عندهم خبار بلي الشريكة ديال عصام اتبدا الخدمة معاهم فشركة ..
- طلعو فلاسانسور للطاج الفوق .. مشاو نيشان لأول مكتب .. فتحو ودخل ، كان مكتب كبير كلو بيض ، فيها ڤيزان خضرين ... لي لاحظات بلي فهاد البلاد الاغلبية ديال البنايات كلهم فالبيض ، يا تلقاي فيهم التركواز ولا الخضيضر بارد ..
- أورانوس : هذا هو البيرو ديالك ، البيرو ديال عصام وصى باش انت تاخديه ..
- مسيرة [بإستغراب] :
علاش زعمة ماخديتيهش انت ؟
- اورانوس [ضحك] :
- انا عندي البيرو ديالي ، منݣدش نبدلو مرتاح فيه ... وبيني وبينك كيجيني حسن من ديال عصام ..
- مسيرة [هزهزات براسها ] :
الى كان بحال هكا ماعليش ..
- أورانوس : نخليك دابا ، انسيفط ليك خولة باش تعاونك ... وتوريك ݣاع داكشي لي خاصك تعرفيه ، واي حاجة تلفتي فيها البيرو ديالي لي اونفاص معاك ..
- مسيرة : صافي شكرا ... خرج ساد الباب وراه مخليها كدور فالمكتب ، فتحات السرجم وتقابلات مع المنظر لي قبالتها ..
______________________________
- بلاصة الطوموبيل فواحد الباركينݣ ، ونزل على رجليه كيدور ، قطع شانطي للجهة المدينة القديمة ، بلاصة تديه لبلاصة وزنقة تديه لزنقة ... كان بحال شي واحد معايش فالمغرب وأول مرة يحط رجليه فيه ، الناس مختالفين بزاف على الناس لي مالف كيشوف وكيتلاقى معاهم ..
- مالين السفنج .. ريحة أتاي بنعناع كتعطعط ، ريحة المسمن .. الناس ݣالسين وكياكلو ، لي مافطر بكري يلاه حاط كيفطر ، العيالات شادين الجماعة قدام الباب ..
- الدراري كيلعبو الكرة ، دراري اخرين شادين راس الدرب وحاضيين لي غادي ولي جاي .. أجواء لي جداد على توفيق عمرو شافهم ... دخل للبلاصة أخرى ، بلاصة البيع والشرا ... الأفارقة لي كيبيعو الپلاكيور وسوايع ، ولي كيديرو الراسطا للبنات ... عاد لي كيديرو لوجيل لظفار ، لي كيبيعو السوايع ولي كيبيعو سوندويتاش ... ها الكرشة هالومليط ، توفيق كان كايحس براسو بحال شي غريب فبلادو ..
- عمرو ماحس بهاد الإحساس ، كتحس بواحد المتعة غريبة مكاينش بحالها ... وقف شير لطاكسي وقف ليها طلع ساد الباب :
خويا الله يحفظك ديني لشي سوق يكون كيتباع فيه هادشي القديم الله يحفظك ..
- مول طاكسي [كيشوفيه فالمرايا ] :
الاخ ماشي من هنا ؟
- توفيق : لا ساكن هنا ... غير هو كنت على برا مشدود شحال هادي 10 سنين دابا ، وخوك مابقاش عاقل ..
- على سلامتك اخويا مرحبا .. ديمارا الطاكسي وشد بيه الطريق ... وصلو للحي الحسني ، ونزلو حدا سوق مينة .. خلصو ومشا ، شاف توفيق فصرف وتبسم بخبث ... كان عارف بلي الى قاليه اه انا براني غادي يحسب عليه شي ثمن مكاينش نهائيا ..
- رجع الصرف لجيبو ، ودخل للسوق ..
- فالفيلا دجلال .. فوق الطبلة الكبيرة محطوط 5 البواطات ... وحدة فيها الخواتم والثانية فيها كوليي ديال الذهب ، بواطة كبيرة ديال الشكلاط .. بواطة فيها ريحة وسبراي دالجسم .. وبواطو فيها ريحة أليين ݣولد .. والباقي جلابة بساكها وصباطها عالي .. اما البقية كانو عبارة على بيجامات وحوايج اخرين ..
- من هاد التقدية كتعرف داك الانسان شحال ساوية عندو ديك السيدة ... ماريا هي لي كانت قايمة بالواجب ... كتفلي فكل حاجة بوحدها باش تشوف واش شيحاجة ناقصة ..
- نزل سراج كاين باينة فيه عاد خارج من الدوش .. :
ياكما ناقصة شيحاجة ؟
- ماريا : اش درتي فالورد ؟
- سراج : اندوزو عليه فاش نكونو غاديين ، درت معاه ورا العصر نلݣاه واجد ..
- ماريا : صافي مزيان ، [سكتات ورجعات دوات ] مادويتيش أوليدي مع مك ؟؟
- سراج [ݣلس ببرود ، مفرق رجليه مرجع راسو اللور ، تنهد تنهيدة طويلة ، مورك على عينيه ، هز راسو وشاف فيها ، تبسم إبتسامة باردة ] :
مدويتش ومغاندويش ، ولفتها ... نهار مشيت نخطب دنيا ، خلات الخطبة بقات ليها سيمانة ، ومشات لعند توفيق للفرنسا ، دارت بيه العدر حݣا خوك مريض ، ودابا نفس البلان ، خالتي لي بغا يجي مرحبا الباب ݣدامو ... لي مابغاش شغلو هداك ..
- العار والعيب الى كنت مسخوط والى كنت كندير شيحاجة ديال الحرام ، والى عصيتها فشيحاجة ، انت شاهدة على كولشي ..
- ماريا [تنهدات بحصرة ] :
عارفة اوليدي الله يصاوب وصافي ، المهم حنا غانمشيو معاك ، باك معاك وخوك حتى هو ماترفد الهم ، واخا بلاصة الأم بوحدها .. هاد الصباح راه ماشتهاش ماعرفتها فين مشات ..
- سراج : ادير العدر بشيحاجة اخرى باش ماتحضرش ، مديريش فبالك اخالتي ..
- ماريا [دوزات يدها على شعرو ] :
يكون خير إن شاء الله .. هزهز ليها براسو وناض خارج على برا ..
________________________
- كيدور بين الݣياطن .. ماخلا صحاب الأثاث ماخلا حتى بلاصة ، داكشي لي كانت قالت ليه هو لي لقاه فعلا ، سبحان الله هاد البلايص كيخليوك تحس بواحد الاحساس فشكل ، كتكون على طبيعتك ، مكتحتاجش تصنع نهائيا ... ولا تبان كلاص ، وحتى الناس لي تم كيشوفو فيك إنسان عادي ..
- ماشي بحال البلايص الهاي كلاص ، لي مع دخلة كيميزوك بلباسك والحديدة لي راكب فيها ، وكيعاملوك على المظهر ديالك ... كنتي لابس مزيان راه كيكبرو بيك ، كنتي لابس عادي حد مايتسوق ليك ..
- عكس هنا كولشي بحال بحال لبستي زوين ولا لبسي خايب ... دخل للجهة ديال البال ، كيدور حدا الݣياطن ديال حوايج الرجال ، كيبانو ليه پياسات لي شاريهم هو بالغلا ... دخل عند واحد هز تجاكيط كيدورها فيدو ، سول داك لي تم :
بشحال هادي امعلم ؟
- 30 درهم اخويا قيس وشوف ... راه كاين پياسات اخرين النضا النضوضي ، عز وتخير .. [بدا كيغوت ] والهوتة الهوتة .. وكولشي 30 درهم ، ولبس وعاود الحبيب ، ومكاين اميريكان وطاليان زيد زيد هوتة ديال لاس ڤيكاس ..
- بقى مستغرب ، كيحس براسو فعالم ثاني ... حط ديك تجاكيط وكمل طريقو ، كتبان ليه جهة العيالات ... العيالات والبنات مجموعين ، كاينة لي جاية هي وراجلها هي تعزل وتعطي لراجلها يشد ليها ... قرب لجيهتم ..
- حبس المشية وهو مفيكسي عينيه فجهة وحدة وبضبط عند بنت وحدة ، كانت لابسة سروال ديال كيطمة فالغوز بارد مع سبرديلة دجين ، تيشورت بيضة نظاظر معلياهم على شعرها .. هازة سكادو فظهرها .. شعرها جامعاه وݣالسة كتعزل .. قرب لجهتها باش يتاكد وكلما قرب كيزيد يتأكد بلي هي حتى وقف وراها .. نطق بصوتو الرجولي :
هادي انت !
- فالدار عند عباس .. الركاني كلهم نقيين ، جابو مرا لي ضرباتها لدار بتخميلة تعاونات معاها سعاد ونجاة .. نقاو الدنيا وقادوها ، تقداو لي خاصهم ... من حلوة وليݣاطو لي غايحطو ... اما الطياب اتكلف بيه نجاة ، خرجات من الدوش .. وجها مزنݣ ، ولكن من ملامح وجها كتبان مقلقة وطايح عليها الضيم ، لبسات بيجامة سخونة وݣلسات قابلت المرايا كتنشف فشعرها ..
- تحل الباب ودخلات عندها سندس .. البسمة على وجها كتشوف فيها بكل حنان ، بحال الى وحدة فخواتاتها ... وراه فعلا كتحسبها ختها ، مدوزوش قليل نهائيا ، دوزات معاهم الحارة والحلوة وكانت معاهم فݣاع الاوقات .. واي زبلة دارت كديرها معاهم ..
- ݣلسات على طرف النموسية مقابلة معاها ، ملاحظة ملامح وجها لي كانت هادئة وغالب عليها تقليقة :
مال الزين مقلق ياك لاباس ؟
- سكينة [تنهدات تنهيدة طويلة , هزات راسها فالمرايا كتشوف فإنعكاس صورتها ] :
بحال هاد النهار لي بغيت مسيرة تكون معايا ، وجا هاد النهار وهاهي مكايناش ..
- سندس [هزهزات راسها] :
ماشي غير انت لي حاسة هكا ، اول مرة نبعدو على بعضياتنا .. اصعب حاجة تفرق صبع على خوه ، كتولي ديك اليد مكتخدمش مزيان .. صعيب الحال راه غير كنحاولو نتناساو وصافي .. واش مدواتش معاك اليوم ؟ ..
- سكينة : دوات معايا ، قبل لا تمشي للخدمتها ... بقات مجمعة معايا شحال ، حتى وصل الوقت لي خاصها تمشي للخدمة عاد قطعات ..
- سندس : مديريش فبالك ، المهم هو تكوني انت فرحانة ومرتاحة ، هذا هو الأهم ..
- سكينة [ضارت عندها ، بصوتها الهادئ الرقيق ] :
كيفاش انكون فرحانة وهاد الخطبة ادار بلا رضاة الوالدين أسندس ..
- سندس : ياك باه معاه اش بغيتي ؟
- سكينة : الأم أهم أصاحبتي ، مابغيتش حتى نتزوجو ويولي جايني الحر من عندها ، وانت عارفاني اختي ... هادشي شحال كنت لي جبدني نرضها ليه بالعشرة ، دابا اختي راه مخاصني مشاكل مخاصني صداع .. راكي عارفة صحاب السكر ، خاصهم راحة البال والهنا .. وحق الله العظيم الى اخليها على الله ..
- سندس [بإطمئنان ] :
مديري والو فبالك ، مايكون الخير ... متعرفي نيتك انت تغلب ، حيدي عليا هاد الأفكار ديال والو ، ديري ليا شي ماسك [شافت فساعتها ] بقات 4 ديال السوايع ونص .. رتاحي باش تكوني منورة ..
- سكينة [طلعات تنهيدة من قلبها ] :.
واخا .. خلاتها سندس ترتاح وخرجات سادة عليها باب بيتها ..
______________________
- هزات راسها فيه ... طلعاتو ونزلاتو ونطقات بصوت مرح :
هاي هاي على لاعب ديالنا ، اش جابك لبوتيك جوجو [جوطية] العجب العجب ياكما تلفات عليك الطريق .. ولا ياكما ݣريساوك [ضحكات ] ..
- توفيق [بجدية ] :
براكة من الطنز ، وانت لي شاف البخ الخاوي ونيف فسما يݣول كتقداي حوايجك من باريس .. هادي هي بلاصتك ..
- صفاء [ببرود ] :
وراني كنتقدا نيت حوايج باريس ، جوطية تݣد عليها ، خاصك تكون دكي باش تجي لهنا ..
- توفيق : وعلاش بسلامة ؟
- صفاء : الجوطية باش تجي وطيح على بياسات واعرين أول حاجة خاصك تعرف معاش كدخل السلعة ومعاش كتحط وأشمن نهار .. فهمتي باش هكا منين تجي تكون انت هو الاول ، ماشي تجي حتى لنهار ولا العشية ، كتلقى غير يدك وريح ..
- بالعربية كتلقى غير ديشي فهمتيني دابا ..
- توفيق [عوج فمو بإعجاب ] :
برافو عليك ماعندي مانسالك ..
- صفاء [ديريكت ] :
اش جابك لهنا ، مامالفاش ليك زعمة ؟
- توفيق [ضار من وراها داير يديه فجيابو نطق بصوت رجولي ميزو بوحدو ] :
تلاݣيت بواحد البنت ، وݣالت ليا جرب تنزل للبلايص الشعبية دور فيهم ، ودرت بكلامها وهاني كندور ..
- صفاء [بإستغراب ] :
سبحان مبدل الأحوال ، ايوا مزيان جابك الله نيت تشد ليا هاد الحوايج نعزل داكشي لي بقاليا ، ... كان مزال ماستوعبش هضرتها حتى شارجاتو بالحوايج لي عزلات .. عطاتو بظهر منخلاه وكملات العزيل ، حتى سللت على خاطرها اوهو واقف ... معارف يلوح ليها داكشي ويكمل طريقو ولا شنو يدير ..
- صفاء [بصوت عالي ] :
عفاك جمع ليا هادو ، ݣوليا بعدا بشحال ديك الجيهة .. [كتأشر ليه جيهة السوتيامات ] ..
- دوزي عزلي غير 5 دراهم ..
- صفاء : وجمع ليا بعدا هادو [هزات الحوايج من يدينا توفيق ومداتهم لسيد ... خلات توفيق واقف ومشات للجهة السوتيامات ، كلسات على ركابيها كتعزل ...
- كتهز وتجبدهم من السماطي تشوفهم واش صحاح ولالا ، خدات المشبكين وخدات ديال البونج ، وخدات وحدين مكتوبة فيهم سپور .. هزاتهم ومداتهم لسيد ، جمع ليها الحساب خلصاتو وخرجات كيبان ليها واقف كيتسناها ..
- صفاء [حيدات نظارظها ودارتهم ] :
انت مزال هنا ، خود ليك شيحاجة ..
- توفيق [برفض ] :
لا مكاين لاش .. نهار نحتاج غادي نجي ناخود .. كلامو داز ليها من ودن وخرج من ودن ، دورات عينيها حتى وقفاتهم عند واحد السيد كيبيع حوايج الرجال ..
- صفاء [بإبتسامة ] :
شوف على كويرة كيف دايرة ، تجيك واعرة اجي اجي تشوف براكة من البخ وشويكيات .. جراتو بلا هواه وبلعلا يطريه ليه ، ماوقفو غير عند السيد ... جرات تجاكيط حيداتها من العلاقة .. ضارت عندو كتقيسها عليه ، غافلة على نظراتو الغريبة ليها ..
- صفاء : والله حتى جاتك واعرة ، عرفتي هاد الماركة شحال كتباع جديدة ... الى ماحطيتي فيها 4000 درهم والله ماتديها .. ضارت عند مول الحوايج وسولاتو :
خويا شحال هادي ؟
- 100 درهم ..
- صفاء [هزات حاجب ونزلات الثاني ، بصوت مرتافع ] :
من نيتك ، اقبيلات سمعتك داير ليها 50 درهم دابا زدتي فيها النص ، ياكما يحسابليك لابسة الكيطة ونظاظر وضاربة الحطة وقلتي صافي هادي راه كيليميني نغمق عليها ، ولاواه راني كليانة هنا وعارفة الثمن ديال السوق ..
- توفيق [باغي يجرها ] :
صفاء براكة من الشوهة زيدي بحالك ..
- صفاء [نصلات يدها منو ] :
والله مغانحيد من هنا ، وغانديها وب 50 درهم ... نوريه انا يضحك عليا ..
- السيد [بتعناب ] :
وصافي امولات الخالة ، خودي لي بغيتي بغيتيني حتى انا ديني ..
- توفيق [ضار عندو ، ببرود هاز حاجبو ] :
أش ݣلتي اساط عاودها .. ماسمعتكش ..
- السيد [تقرص ] :
وغير كنبسطو اعشيري مالك ؟
- توفيق [بإنفعال] :
كيفاش كتبسط ، كتشوفني واݣف معاها كتݣوليا كنبسط ولا الق .....ي ، [تم غادي لجيهتو ] واش شفتيني معاها واݣف معاها ... بنت ليك بوكيمون ياكما بنت ليك ز.....
- صفاء [كتجر فيه ] :
توفيق صافي يلاه نمشيو ..
- توفيق [ضار خنزر فيها ، فللحظة ماعرفاتوش تسيف تسييفة ديال الغدايد ] :
مغانمشيو ما حتى ق .... ، [ضار عندو شنق عليه من ݣرفاتو ] دخلو الناس كيفكو ..
- توفيق : برب حتى نقلب على مك هاد السوق نوريك مولات الخالة ولا مولات الق ....... ، فرقوه الناس عليه بالكشايف ، لاخر سكت عرفها فراسو حق .. بعدوه على الكيطون ديال السيد وهي تبعاتو ..
- صفاء : وخليه يدوي فمو عندو مالنا على هادشي ..
- توفيق [ شاف فيها بشوفات ديال القت/يلة ] :
حتى يكون ز ..... لي واقف معاك ونخليه يدوي .. فين غادية دابا ؟
- صفاء : فيا الجوع ..
- حل الباب ودخل عليه ، لابس سروال دجين فالكحل ، مع صباك فنفس اللون ، شوميز فشيبي ، فيها سليسلات هابطين من الجيب ، شعرو راضو جنب .. كايبن كامل الرجولة والأناقة .. دخولو للكلينيك خلا الفرمليات ريوسهم يدور ... همسات بين البنات عليه ، وعلى وسامتو ورجولتو لي كتبان من بعيد ..
- جر الكرسي وݣلس ، هزو وطلعو وتبسم ، بصوتو الرجولي الحرش :
اتبارك الله على ولد العم .. هي نويتي ؟
- سراج : اليوم جيت انوتق معاك اللحظة هاد السويعة لي بقات باش نرجع نديهم ..
- جلال : ايوا مبروك عليك مسبقا ..
- سراج [جبد واحد لاكارت ڤيزيت من جيبو دالقميجة ومدو ليه ] :
هالادريس الجديدة ديال الطبيب ، راه شديت ليك عندو رونديڤو من هنا لجوج سيمانات ، بينما رتاحيتي نيت ... إيمتا بضبط اتخرج انت ؟
- جلال [حنحن] :
بعد غدا إن شاء لله ..
- سراج : ايوا مزيان ، مايجي فين يوصل نهار رونديڤو تكون رتاحيتي ..
- جلال : شكون غادي ؟
- سراج [ببرود ] :
راك عارف شكون غادي ، مكتعاود غير الصلاة على النبي .. [سكت ورجع دوا ] مابغيتيش نسول ليك سكينة على بلاصة مسيرة ..
- جلال [بنفس البرود ] :
مكاين لاش ... كون بغيت نعرف كون عرفت وانا فبلاصتي مابغيت ندوي فهادشي ..
- سراج [هزهز راسو ] :
اخويا من ظاكشي لي شفت السيدة باينة كتبغيك ، عرفتي كيدارت عليك فاش كنتي مجبد ... راه كتغوت ، حوايجها كلهم رجعو دمايات ... ولات بحال شي هبيلة ، صدماتني الصراحة واخا داكشي لي درتي معاها كانت كتفرتت على ودك ..
- جلال [بنفس البرود ونفس الملامح] :
ساليتي هضرتك ، ونوض يلاه توصل ..
- سراج [هز حاجب ومنزل الثاني ] :
جيتيني مريض الغراب ، اما نخبطك ... هاهو غادي وريح ودير عقلك ، لا يبان ليك شي موس ولا شي عاشق .. وديرو تحت باطك ..
- جلال [جاتو الضحكة ] :
دور 100 ..
- سراج [ وصل عند الباب ] :
مغانساكش اولد عمي حقك من اللحم ودجاج ، انديرو ليك فنص خبزة ونجيبو ليك ..
- جلال : الأيام بيناتنا .. هاد اليد المهرسة غاتجبر وتهرسك ..
- سراج : واخا دابا نشوفو ... لاح ليه السلام وخرج ساد الباب عليه .. تنهد تنهيدة طويلة ودور راسو كيشوف لجهة السرجم ساهي ودماغو خدامة ..
________________
فالڤيلا عند جلال ... واقفة ماريا لابسة جلابة هماوبة فالأحمر مع صباط عالي ، شعرها مغطية غير نصو بشال ... [شافت فساعتها ونطقات ] وتوفيق تعطل اويلي هادي هي انحضر فالوقت ..
- ذياب : مزال الحال مزال ساعة ديال المݣانة شوية وتلݣايه هنا .. فين هي أمينة والبنات ؟
- ماريا : شوية وتلقاهم جايين ، وديان جات لبارح دازت عندها باتت عندها .. خلات البنات مع جداهم لصقو فيها مابغاوش يجيو معاها .. مع كملات هضرتها دخلات أمينة وليليا ..
- ماريا : على سلامتكم ، فين هي وديان ؟
- ليليا : هاهيا جايا ... ݣالت تسخر وترجع .. شفتكم وجدتو كولشي فين هو العريس ؟
- جواد : مشا يشوف فجلال ويجي ، ايكون فطريق ..
- ليليا : ايوا صافي مزيان ..
- على برا كانت واقفة معاه بعيد على الدار بشوية ، واقفة كتدوي معاه .. :
منصور ، وغير شوية دصبر راه شفتي شنو وقع واش انا لخاطري ..
- منصور [بإنفعال] :
كل مرة شيحاجة خارجة من الجنب ، انبقاو هكا حنا ولا كيفاش البلان ، وديان هادشي راه طلع فراسي ، انا ماشي برهوش تشطحيني ..
- وديان [كتحاول تفسر ليه ] :
منصور ، كتدوي بحال الى انا ... [قاطعها صوت كان مألوف عندها ، صوت رجولي قاصح ] :
وديان ..
- ضارت رجليها تشللو عليها ... بلعات ريقها وشافت منصور بهمس :.
سير دابا حتى لمن بعد وندويو ... خلاتو وتوجهات لعند هلال ، كان واقف كايشوفيها بإستفهام وشك .. بصوتو الرجولي التقيل :
شكون هداك لي واݣفة معاه ؟
- وديان [بعدات خصلة من وجها ونطقات بتوتر ] :
من بعد وغانݣوليك ... انتعطلو على دار دابا [ واخا كانت وديان كبر من هلال بعام ولكن كانت كتحتاىمو إحترام كبير ] شداتو من يدو ومشاو لظار دخلو مجموعين ..
- كولهم كانو واجدين ، بقاو غير البقية توفيق يجي وسراج ..
___________________
- فجهة أخرى ، وبضبط فقهوة دايال الماكلة ، الطبسيل لي تحط عامر كفتة وكوطليط خواوه بزوج بيهم بجوع لي ان فيهم ..
- صفاء [شافت فساعتها ، نقزات من بلاصتها ] :
اويلي ، بقات ساعة وداركم يجبو عندنا ويلي على شوهة تعطلت ... انا خاص نمشي ..
- توفيق [وقف] :
بلات نخلص ونوصلك ..
- صفاء [مسحات يديها بالخف ] :
لالا متوصلني منوصلك ، الله يخلف على هاد الغدا انت يلاه توصل لداركم انا خاصني نمشي ... هزات الساشيات ديالها وخرجات من القهوة كتجري ماخلاتش ليه الفرصة فين يدوي ولا يتبعها ... خلص الغدا وخرج فتجاه طوموبيلتو ، طلع وشد الطريق لدار ..
___________________
- واقفين كولشي على اعصابهم كيتسناو فيه ، تعصبو ... حتى تم داخل ..
- سراج [بإنفعال ] :
واش انت مكتعلمش من هاد الفعايل ديال البراهش ، درنا معاك وقت جاينا معطل ..
- توفيق [بإستسلام ] :
سمحليا والله ماقصدت نتعطل دابا ندوش ونزل بزربة ..
- هلال [كيشمشم فيه ] :
أش هاد الريحة أصاحبي ، كنت فشي سوق ولا مالك ، فيك ريحة الشوا ..
- توفيق [غمزو باش يسكت ] :.
انا طالع ندوش ، تودسويت انا معاكم ..
- ݣلسو يتسناوه ، وفعلا بالخف دوش لبس عليه سروال بيج توب كريپ مع شوميز فنقس اللون ونفس التوب .. مع صندالة وساعة رياضية وريحتو الرجولية كتعطي ..
- ذياب : يلاه انتعطلو على الناس ..
- مع الخرجة مع نباهم صوتها من الدروج :
غاديين بلا بيا ... ضار ولدها وضارو كاملين ، لابسة جلابة بقفطانها فالبلو سييل ، وهازة فيدها واحد البوشيط وساك ونازلة .. ماريا تنهدات تنهيدة طويلة فرحانة حيت دارت عقلها ... وقفات قبالت ولدها ونطقات :
بغيتي تمشي تخطب بلا مك اولدي ؟
- سراج [ببرود ] :
درتها المرة اللولة ، شنو الفرق بين دابا وديك الساع ..
- سومية : ديك المرة فاتت ودابا حاجة أخرى .. اتبقى واقف معبس أولدي ، لي غلب يعف ..
- ذياب : نمشيو بعدا الناس كيتسناو حشومة ، من بعد وندويو إن شاء الله ..
- فدار العروسة الطبالي مزيينين بكل مالذ وطاب ، ريحة العود كتعطي فدار ... ݣالسة معزوزة بقفطان هماوي فالموطارد ... اما سعاد كانت لابسة فراشة فالغوز وفولار لايحاه على راسها مغطية بيه النص فشعرها ..
- سندس حتى هي كانت لابسة سروال دجين واسع من رجلين مع كيمونو مطروق فالفجلي وشعرها جامعاه بسفنجة مع اكسسوارات فالذهبي ، صفاء بدورها كانت لابسة بحال سندس من غير انو مبدلة السروال بسروال بيض ديال الثوب ..
- اخر حاجة تحطات هي طارت حطاتها عفاف ، لي حتى هي كانت لابسة جلابة وشعرها جامعاه .. من غير سكينة لي كانت مزال مانزلات ..
- دخل عباس من برا هو والحاج .. :
يلاه اسيادنا خفو يديكم شوية. .
- معزوزة [بصوتها الباح الوقور ] :
الى على جوج دليدين اولدي راه خدامين بيهم ، بغيتيهم يخدمو برجليهم راه كيتمشاو عليهم ، وانت اهاز عكازك وطوطح وتعطي فالأوامر ياك شي باس مكاين ..
- عباس : والواليدة انا ادويت ..
- معزوزة : شحال فيكم ديال النݣير الله يحضر السلامة ..
- كولشي وجد ، وتحط فصالة لوخرا ... ايستاقبلوهم فصالة لولة ، حتى يدويو عاد يمشيو للصالة الثانية .. مع يلاه ݣلسو البنات ، طلعات سندس لعند سكينة تشوفها واش وجدات تسمع صوت الكلاكصون حدا الباب ..
- جمعات الوقفة قلبها كيضرب بجهد ، لابسة قفطان خفيف فالبيض مطروز بذهبي ، معاه حزامو .. مع بلغة فذهبي ، شعرها مطلوق مبوكلي نصو .. كتفات بكحل خفيف برز ليها لون عينيها الفيروزية .. ظفارها مصبوغين بالبيج بارد ..
- سكينة [بخوف وتوتر قلبها كيضرب ويديها بردو عليها ] :
سندس ربي طلي وقيلة هوما ناري ..
- سندس [كتحاول تكالميها ] :
صافي اصاحبتي اويلي تهدني ، صبري نطل ... حلات البالكو بشوية كطل ، كيبانو ليها 3 طوموبيلات وقفو ، وحدة عرفاتها ديال هلال ، نزلات ماريا وجواد ... معاهم ليليا او وديان ، طوموبيل لوخرا كان فيها بات سراج او سراج .. شوية نزلات مو ، اما لوخرا كان فيها توفيق معاه أمينة ..
- بزربة هربات انظارها ورجعات عند سكينة ..
- سكينة : واش هوما ؟
- سندس : اه هوما ، فخبارك جات مو ؟
- سكينة : اويلي العار [بانو ملامح الدهشة على وجها ] :
حلفي بالله ، ياختي ماقالهاش ليا ..
سندس : يقد تكون بدلات رايها الله اعلم .. المهم رتاحي دابا ، باش شوية وديك الساعات تنزلي ..
- سكينة : ياكما اتخليني وتمشي ؟
- سندس : كضحك ] لا ماتخافيش مغانخليكش انا معاك هنا حتى يعيطو لينا بزوج ..
_____________________
- فالصالة التحت ، كانو ݣالسين كيدويو العيالات بيناتهم .. حتى نطقات ماريا ، كان ضروري خاصها تدزي وتعتادر على مدارت ، حشومة جات لعند الناس حتى لدارهم ومتݣول والو :
بعدا ربي لاما سمحوليا على ماوقع أخر مرة ، والله حتى حشمانو منكم بزااف ... راكم عارفين قلب الأم كيف داير ، فاش شفت ولدي فديك الحالة ماعقلتش على راسي اشنو كنت كنخرج من فمي ..
- معزوزة [بتقالة روزانة وصوتها المبحوح ] :
المسامح كريم ابنتي ، عارفين حر الكبدة كيدايرة .. كيبقا وليدي جلال ياك شوية ؟
- ماريا : لاواه الحمد لله ياربي ، فين كنا وفين ولينا ، بعد غدا إن شاء الله غادي يخرج من الكلينيك ..
- عباس : ايوا على سلامتو ..
- ماريا : كنت بغيت نشوف مسيرة ، ولحن ݣالو ليا بلي مسافرة .. واش غاتعطل ؟
- صفاء : لا مسيرة مابقاتش غادي ترجع للمغرب ، غادي تستاقر على برا .. من غير الى جات فشي عطلة وصافي .
- ماريا [تصدمات شافت فجواد ورجعات شافت فيهم ] :
وعلاش هنا كاين حبابها وكاينين ناسها ، ديك الغربة مافيها مايدار ..
- سعاد [تنهدات تنهيدة طويلة] :
الله يصاوب اختي ، نطلبو من الله يدير شي تاويل ديال الخير ...
- نظرات الكل الغريبة كانت هي سيدة الموقف فهاد اللحظة ..
- نقز ذياب باس يكسر هاد الصمت وهاد التوتر لي كيشوف على ملامح وجه ولدو .. بإبتسامة نطق وصوتو الرجولي كان كيتميز بيه بحال ولدو :
المهم اسيادنا ندخلو فالموضوع نيشان ، كنظن بلي عارفين السباب ديال المجية ديالنا لهنا ، جيت انا ومرتي سومية والعائلة مع ولدي سراج ... باش نطلبو يد بنتكم سكينة ليه .. على سنة الله ورسوله ، منحتاجش نعاود ليكم عليه كنظن راكم عارفينو مزيان ..
- معزوزة [بإبتسامة بشوشة ] :
الله اودي ، ولدي سراج بحالو بحال وليدي جلال ، واخا وليدي جلال زايد نغيزة فݣليبي هههه ..
- سراج : ياك امي معزوزة ؟
- معزوزة [كضحك ] :
غير كنضحك اوليدي ، كلكم بحال بحال ، تبارك الله ولاد الناس ومربيين الحمد لله ..
- ماريا : ايوا اش ݣلتو ؟
- عباس : اش غادي نݣوليك ، سكينة راه واخا ماشي بنتي من دمي ، ولكن راه بحالها بحال بناتي وربي شاهد عليا ، عمري فرقت بيناتهم .. بنت نقرة صافية ، والله يعمرليها دار .. ودرويشة ..
- جواد : عارفين لي كاين وداكشي باش جينا اليوم لهنا .. وحنا قصدناكم والمقصود الله ..
- عباس : ايوا الى العرسان موافقين الله يجعل كولشي مبارك ومسعود ..
- ماريا : هي نشوفو العروسة ..
- وقفات صفاء بالخف :
انا نعيط ليها ، مشات بزربة تحت انظار توفيق لي متبعها باللعين ، حتى حس برج شي حد نغزاتوو، ضار لقاه هلال كيسول فيه بعبنيه بمعنى فين مشيتي ..
- توفيق [بهمس] :
ميك عليا اصاحبي أو .. طلعات صفاء لعندهم علماتهم بلي كاين .. الخلعة غير مكتزيد تاكل فيها .. تمات خارجة ، وصفاء وسندس كبصليو على النبي وراها .. وصلات التحت الانظار كلها تاجهات ليها ..
- كولشي كان كيشوف فيها بإعجاب ... النور طايح عليها وشر مزين خدودها الحومر بالخجل ... داوها وݣلسوها حدا عباس وحدا سراج .. عينيها كانو فالأرض اما عينيه مفارقوهاش نهائيا ..
- عباس : بنتي سكينة ، هاد الناس راه جايين يطلبو يديك لزواج .. اشنو ݣلتي ؟
- سكينة [ومزال عينيها فالارض ] :
لي درتها اعمي انا موافقة عليها ..
- جواد : ايوا نقراو الفاتحة .. [هزو كفوفهم وقراو الفاتحة وزغاريت وسط الڤيلا تعلات ] .. ناضت ليليا هزات الخواتم .. عطاتو خاتمها لبسو ليها ، وهي بدورها لبساتو الخاتم ديالو ، جابت سعاد الحليب وتمر ..
- وكيف اي مخطوبين هي شرباتو او وكلاتو تمرة وهو كذلك .. وقفات سومية تحت انظار كولشي كان كيشوف فيها ، وقفات قبالتها وهزات بواطة من ديك الپوشيط .. حلاتها وجبدات منها سلسلة اقل مايقال عليها روعة .. ديال الذهب وفيها حجرة ديال الفيروز بحال عينيها .. خداتها ولبساتها ليها ..
- هزات براسي ديالها ولبساتو ليها ، نزلات بشفايفها باس ليها راسها وعنقاتها ونطقات بصوتها الرقيق وعينيها عامرين بدموع :
الله يكمل عليكم بالخير ابنتي ..
- سكينة : امين اخالتي لهلا يخطيك .. ضارت لعندها ولدها وعناقتو ، ساحو دموعها سخان على خدها .. هو بدورو عنقها ، تصرف منها بسيط قدات بيه تبرد قلبو وتفرحو ..
- تعلاو الزغاريت كثر وكثر ، نوضاتهم سعاد من ديك الصالة لصالة لوخرا ... تصور هو وياها كيقطعو لاطارط .. هي كتوكلو وهو كيوكلها ، خدمو الموسيقى وخداو تصاور مع بعضياتهم ، غافلين على زوج دناس لي كانو انظارهم متبتة على زوج دالبنات لي بقاو فالعائلة ..
_________________________
- كان عندهم إجتماع فالشركة خاصهم يتجمعو كاملين باش يناقشو الحيتيات ديالو .. جاية فالكولوار بكل اونوثة ، ملامحها باردين ضابطة اعصابها لي عاد كانو شاعلين فاش عرفاتها خدات البيرو ديال عصام .. دخلات للقاعة الاجتماعات .. كانت ݣالسة حدا اورانوس كيداكرو معاهم باقي الموظفين وخولة معاهم ..
- خدات بلاصتها وݣلسات ، بداو فالإجتماع ، وبضبط كان موضوع إجتماعهم البراند الجديدة ديال العطور لي اتدمج فيها إسم ڤيريدجو مع اسم عصام ..
- وقفات بكل ثقة فنفس كتدوي على العطور وعلى لي نوط لي غايكون فيها ، واول عطر ايبداو بيه هوما العطور الرجالية ..
- دواو على جميع التفاصيل ، وكانت ليها الكلمة الكبيرة هي لي غاتكلف بهاد البراند ، اما هوما كان عليهم غير يطبقو داكشي لي كتݣول ولي مطلوب منهم ، من غير الدعاية ، لي كانت من اختصاص المديرة التنفيدية ..
- هناء [بإبتسامة غرور ] :
انا عندي فكرة حلوة اوي فبالي .. الشغل ده حيكون من نصيب وكالة وحدة ، انا شوفت شغلها كويس .. ولو اتعاملنا معاها حنضرب في السما ، وأكيد أكيد العطر ده حيوصل للعالمية ، وكذة حايبئى إسمنا الفوق ..
- مسيرة [ هزهزات براسها ] :
مزيان ، إذا تفاهمنا .. الإشهار كيبقى عليك انت .. كولشي عندك بيني ماعندك .. وعلميني باي حاجة انا واورانوس ..
- هناء [رمات شعرها ورا ظهرها بغنج ] :
متخافيش ، مافيش شغل بخصر فيه ... اي حاݣة بكون مسؤولة عليها بتنݣح ودي مش اول مرة .. انتو كملو شغلكم عشان انا اسافر وأقوم بشغلي ..
- اورانس : ضروري تسافري علاش مال الوكالات ديال هنا ..
- هناء : لاء دي وكالة غير اوي ، وانا كمان كان نفسي اوي انزل على المغرب ، ودي فرصة ليا أضرب عصفورين بحجرة وحدة ..
- مسيرة [وقفات وضحكات] :
ايوا طريق السلامة ، غير تكون المعنى ... هزات الملف لي قدامها وخرجات من القاعة ..
- ݣالسة فبيتها فاتحة الكاميرا وكتدوي معاها وهي فرحانة ..
- عرفتي وحق الله العظيم الى تصدمت فاش جات ماماه ، مكنتش متوقعاها نهائيا ، شوفي سلسلة لي عطاتني والبراسلي ..
- مسيرة [ ݣالسة فالبالكو ، لابس سروال توب بيض قطني مع ضيباردو فنفس اللون ، حاطة قدامها بواطة ديال لاݣلاص كتاكل منها ] :
وهانتي ياختي ماعندك ماتساليها ، والحمد لله امنين رجع ليها عقلها .. شكون جا معاه والديه وشكون ؟
- سكينة : والديه او والدين جلال ، وهلال وخوه توفيق أمينة وبنات عمو .. عرفتي ماين جلال طلبات السماحة من كولشي ، وسولات عليك ..
- مسيرة [كتسمع بإهتمام ، هزات حجبانها بإستغراب] :
ولاش كتسول عليا ؟
- سكينة [كتحيد فسلسلة والبراسلي ترجعهم للبواطة ] :
باش زعمة طلب منها المسامحة ، نقزات صفاء قاتليها مسيرة مشات للبرا .. قاتليها واش اترجع وهي تجاوبها صفاء بلي عمرك مغاترجعي وغاتستقري تماك .. وعرفتي وجها تلون ، شي كيشوف فشي ..
- مسيرة [بنفس البرود كتمدق فلاݣلاص ] :
سبحان مبدل الاحوال ، مدواتش على ولدها ؟
- سكينة : سولات عليه خالتي معزوزة ، قاتلي بلي بعد غدا غايخرج من السبيطار ..
- مسيرة : إيوا على سلامتو .. عرفتي الدنيا هنا فشكل والله العظيم ، كتحسي بواحد الراحة فشكل .. الجو ولاف واخا يلاه يوماين ليا هنا ، ولكن زوين .. حتى إن شاء الله ونجيبك لهنا ..
- سكينة : وكيغانديرو مع سراج ؟
- مسيرة : من تما لتما يحن الله ، حتى حاجة مكتبقى مخبعة ، غير دابا مابغيت حد يعرف ... من بعد مايهمش ..
- سكينة : كيجاتك الخدمة ؟
- مسيرة : والصراحة زوينة ، ليكيپ زوينة ، من غير واحد المصرية طرطقت ليها المرارة السيدة داخلة عليا دخلة مجهدة .. ولكن ماتخافيش عليا [عاودات ليها كولشي ] ..
- سكينة [كضحك ] :
عبرتي عليها ..
- مسيرة : حددتو نهار العقد ؟
- سكينة : اه من هنا لشهر إن شاء الله ، مغاندير لا عرس لا عراسات .. اندير ليلة الحنة هنا فدار بين العائلة ، والعقد وطلبة سالينا ، واخا مو مابغاتش فالأول قاتليك حشومة والعائلة .. ولكن خالتو وافقاتنا الرأي ..
- مسيرة : إيوا مزيان الحب ، كادوك يوصلك ..
- سكينة [بعتاب] :
أنا بغيتك انت تكوني معايا ..
- مسيرة [. بإبتسامة بشوشة] :
انا وياك لي بيناتنا مغايبانش غير فداك النهار ، انا وانت بيناتنا الدوام والعشرة ولي جاي ، الى ماحضرت فهاد النهار نحضر فسبوع إن شاء الله ..
- سكينة : إن شاء الله ..
- مسيرة [تقادات فالݣلسة ] :
يلاه تلاحي ، خاصني نوض نعس غدا فايقة بكري تابعاني الخدمة ..
- سكينة : يلاه ازين ديالي تهلاي فراسك ، تصبحي على خير ..
- مسيرة : حتى انت .. قطعات معاها التيليفون .. هزات داك الݣلاص رجعاتو للثلاجة ، طفات الضو وطلعات لبيتها حكاتها سنانها ودخلات ففراشها تنعس ..
- الحيَاة
قد تتَعثَّر
لکنَّها لا تتَوقف..،
والأمَل قد يَختفِي حِينًا لکنَّه أبدًا لا يَموت..،
والفُرص قد تَضِيع ومع ذلگ فهي لا تنتَهي..،
وقد تضِيِّق بِنا الدُّنيَا سَاعة ولكن يبقىٰ دائمًا فرجُ اللّٰه قرِيب..؛
أمَّابعد
نحنُ لا نعلمُ ، ماذا تحملُ لنَا صُحفُ الغيبِ مِن أقدارٍ..؛
لکنَّنا نُحسِنُ الظَّنِّ بِـ عالمِ الغيبِ ، مَالِکُ المُلکِ سُبحانَه العزِيز الجبَّار ..
_______________________
- الفرحة مكانتش قداها ، وبحال أي ام منين كيدوز ولدها من شي محنة ، وكدوز عليه بيخير وعلى خير ، هكاك هي فهاد الوقت ... مكانتش من النوع لي كتعتامد على الخدامات الى كانت غاتستقبل ولادها ، كتوجد كولشي لراسها وبيديها .. قدات ليه بيتو وعطراتو ليه ..
- وجدات ليه ݣاع الشهيوات لي كايبغيهم ، عارفاه مل وعيا من الماكلة ديال السبيطارات ... كل شوية كانت كتشوف فساعة ديالها .. أعصابها على نا/ر ..
- سومية : ݣلسي اختي يهديك الله جبتيلي الدوخة ..
- ماريا : جابلي الله بحال الى تعطلو ، ياكما تزاد عليه الحال ومغايخرجوهش اليوم ..
- سومية : لا حول ولا قوة إلا بالله ، تفائلي خير أختي ..
- تسمع صوت الطوموبيلات على برا ، ماتسناتش حتى يدخلو حلات الباب وخرجات لقات راجلها حل الباب اللوراني مخرجو ... لابس كيطما فالبلو مارين مه سبرديلة ويدو هازها ..
- نزل ذياب وهارون .. مع سراج وهلال ، ستقبلاتو ماريا باست ليه راسو :
على سلامتك أولدي مرحبا فيك فدارك ..
- جلال [بإبتسامة ] :
الله يسلمك .. دخلو الداخل ، هلال قرب ليه مطبطب على ظهرو ، وناطق بصوتو الرجولي :
على سلامتك ، نتلاقاو فالعشية ..
- جلال هزهز ليه براسو .. خرج هلال للخدمتو ... أما سراج وهارون ݣلسو معاه ..
____________________
- حطاتها الطاكسي قدام الشركة ، خلصاتوو، دارت ساكها على كتفها وتم داخلة مع دخلة مع أطيح عينيها على صورتها مكبرينها ، لابسة كسوة بسميطات فالأبيض ... شعرها بوكلي طايح على الأرض .. الصورة كانت كبيرة بزاف .. وباقي الصور مصغرة معلقين فباقي الشركة ..
- جات عندها وحدة من الفريق بإبتسامة بشوشة :
سندس جيتي فنة ماشاء الله ..
- سندس [هزهزات راسها مزال مبهوضة ] :
شكرا ..
- جات لعندها ليلى عنقاتها :
فخبارك العميل مفرحان بزاف ، كولشي عجبو من هنا لنص ساعة غايجي ... باش نكملو باقي الإجراءات ... موسيو هلال شوية وغايكون هنا ، انا متحمسة بزاف والله العظيم ماتخايليش شحال أنا فرحانة ..
- سندس [تنهدات بتوتر ] :
انا مزال مامتيقاش هههه ..
- ليلى [كضحك] :
كتوقع .. من بعد ايجيك عادي رتاحي ..
- حركات ليها سندس راسها وطلعات للبيرو ديالها ، سدات عليها حاطة ساكها فوق البيرو ... دوزات يدها فشعرها شادة بيدها لوخرا على جنبها ، كتنش على وجها كتحس بسخونية ، حلات الباب ومشات نيشان للحمام ... دخلات كتشوف راسها فالمرايا ، طلقات الروبيني فزݣات وجها وعنقها ... كتحاول تهدن ، جاتها فشكل تشوف تصاورها بحال هاد الشكل ، كون كانت صفاء فبلاصتها كانت غادي تكون فرحانة ..
- ولكن هي ماشي من هاد النوع لي عزيزة عليه الشهرة ، ولا عزيز عليها تبان بالعكس ، رزينة ومتبتة ومعزيز عليها المظاهر ، كترتاح اكثر فالبساطة ..
- حسات براسها رتاحت ، فتحات البوانيي ديال الحمام وتمات راجعة للبيرو ديالها حتى خرجات فيه ..
يتبع...
التعليقات
لا توجد تعليقات بعد، كن أول من يعلق.