روبي ڤيريدجو الجزء 11 (الفصل الثالث)

لا تكن حارساً على كل شيء ...!!!

هناك أشياء دعها تكون ... و أشياء دعها تذهب .......

و أخرى ... دعها تنتهي .........

قد يُفاجئنا القدر أحياناً بأحداثه ...!!!

لكنه ... يصنع فينا تغييراً كُنا بحاجة إليه ..

تستمر بالهروب لأنك مشمئز من هذا العالم ، تهرب في كتاب او فيلم او اغنية او في النوم ، ثم يصفعك الواقع أنك لازلت مكانك ، كان من الممكن لحياتِي أن تكون كافية وعلى مقاسي ، لولا أن خيالي كان يوسّعها دائمًا ..

الــفــصــل الـثــالــث : أسيــرتــه مــدى الـحـيــاة

- مجموعين فصالون الكبير ، معزوزة بقفطانها وشعرها المطلوق .. حداها الحاج وعباس وسعاد ..

- تسمع خطوات نازلين من دروج كانت سندس هي وصفاء نازلين وكيدويو .. خلطو عليهم وݣلسو معاهم ..

- سعاد [بتساؤل] :

ماسوناتش ليك ختك ؟

- سندس [هزهزات ليها براسها ] :

لا مزال ماسوناتش ، وتعطلات المغرب قربات تأذن ، عمي واش ماسونيتيش لإبتسام ؟

- محمد : سونيت أبنتي ولكن تيليفونها طافي واقيلة ديشارجا ليها ..

- تسمع صوت الساروت فالباب لي تحل .. وصوت خطوات مجرورين ، سابقة سكينة كتجر فرجليها .. رمات السلام وݣلسات مهلوكة ..

- سعاد [شافت فسكينة ] :

الله أبنتي الله تعطلتو من الصباح ، فين مسيرة ..

- سكينة [أشرات ليها لجهة الباب ] تمات داخلة مسيرة كتحر فرجليها هازة ملف او وراها إبتسام ..

- السلام عليكم .. رماو هاد زوج كلمات وݣلسو مغمضين عينيهم من العيا ..

- معزوزة [بصوتها الباح] :

واش اتبقاو مغمضين علينا عينيكم بحال هكا ، قولو لينا أش واقع من الصباح وحنا نتسناو فيكم بحال الهوبال ياك لاباس ؟

- إبتسام [بتعب] :

عيينا أخالتي ، من الصباح وحنا كنطوطحو من قنت القنت ، وعاد التحاليل ديال سكينة وديناهم لطبيبة تمارة وحق الله العظيم ..

- سعاد [بفضول وخوف ، بحال الى سكينة بنتها] :

أمضرا أبنتي شنو قالو ليك عندك ؟

- سكينة [تنهدات تنهيدة طويلة] :

عندي السكر أخالتي ..

- سعاد [غوبشات وتخلعات] :

اويلي على السكر ، ومنين ايجيك ابنتي وانت مكتاكلي حلاوة ما والو وباقي صغيرة ؟

- سكينة : سكر اخالتي مكايعرف لا كبير لا صغير ، راه عندهم 3 سنين وفيهم السكر ، ركبني اخالتي بالفقصة نهار تشديت من تم بداني ومكنتش عارفة .. الحمد لله على كل حال ..

- معزوزة : بصح ابنتي دابا السكر راه ولا عادي ، واش عطاك فانيد ولا الانسولين ؟

- سكينة : قاليا دابا انستعمل غير الفانيد ، وضروري مانتبع ريجيم الحلاوة ممنوعة والماكلة الصحية ضروري منها .. الى مدرت هاد الحوايج راه ايخرج ليا لانسولين وانا مابغيتهاش كنخاف من ليباري ..

- عباس [بصوت وقول تقيل] :

الله يشافيك ويعافيك ابنتي ، مديري والو فبالك الحمد لله .. مكتاب الله كيتصرف .

- سكينة : الحمد لله ، انا هانية والله بقات فيا امسيرة ، من الصباح وهي دور على الخدامي او والو .. عندها الباك بوحدو مكافيش خاصها ضروري ديبلوم ..

- مسيرة [تنهدات تنهيدة طويلة] :

والحبس لي دوزت خرج ليا فعودي ، زوج دناس طلبو ليا حسن السيرة والسلوك ودابا انا شنو ندير ، هاد الحبس ايبقى لاصق ليا فعودي حياتي كلها ..

- الحاج : قلت ليك ابنتي نخدمك مابغيتيشاي ..

- مسيرة [بإصرار] :

عمي ، انا عارفة هادشي .. انا راه مابغيتش نتكل على شي واحد هاهوما قدامك سولهم ، الحاجة الى درتها بين عينيا مانمشي حتى نديرها ..

- سندس : ودابا اختي اش غاديري ، راه عندهم الصح ، الباك بوحدو ماعندو باش يفيدك والو .. راه فهاد الوقت ديبلوماتك لي كيهدرو عليك ، وانت الله يسمح ليك تبعتي داك المعنطز ومكملتيش قرايتك ..

- سعاد [بصوت امر] :

بلاما نبقاو نجبدو العقود الراشية دابا صافي ، لي فات مات خاصنا نعرفو شنو ادير دابا ..

- مسيرة [تنهدات تنهيدة طويلة ونطقات بإصرار] :

أنزل لكازا عاوتاني ، ولكن هاد المرة انبقى تم ..

- عباس [عݣد غوباشتو ناطق بإستفسار بصوت تقيل ] :

كيفاش تنزلي لكازا بمرة ، واش انت ماعليك حكام ولا شناهو ، وديك الدار لي فجديدة نبيعوها ولا كيفاش ؟

- سعاد [شافت فيه مخنزرة ] :

هضر بشوية مع البنت ، خلينا نفهمو منها ، كتعرف اتعلي صوتك الله يستر ..

- مسيرة [بصوت هادئ على المعتاد] :

با سمعني مزيان عفاك وفتح معايا ودنيك ، حيت هادشي لي غادي نقوليك ضروري بنسبة ليا ، 3 شهور وحنا هنا دابا 3 شهور كاملة وانا كنفكر مزيان ، شهرين وانا كنقلب على خدمة ومالقيت والو ولي تقال اليوم يتقال غدا ، مشيت لجديدة قلبت وݣلست تم زوج سيمانات او والو ، وراك مشيتي معايا وشفتي كولشي بعينيك ..

- مغانبقاش أبا ݣالسة معاكم حياتي كاملة ، راه فعنري 28 عام ، العام جاي ندير 29 وهاني دخلت ف 30 ... مدرت لا مستقبل لا غيرو وماشي غير بوحدي لي بغيت نقلب على راسي راه حتى بناتك بزوجات باغيين يقلبو على خدمة ... كل وحدة واصلة لمستوى فقرايتها وݣالسة تيتي نيني ..

- درت كثر من الجهد 10 سنين وانا كنحرت بحال الحمارة ، ماخليت خدمت فخضرة ماخليت سݣت تريبورطور ، ماخليت سݣت الكاميو وديت الخضرة وجبتها ، دخلت لحبس بمسبة تبرݣيك الله يجعل البركة ، جا الوقت لي نشوف حتى انا حياتي ومستقبلي ..

- الحمد لله انت وماما راكم مع مي عايشين بيخير وعلى خير ، خالي أدريس راه خدام ... خواتاتي كبرو مابقاوش محتاجين ليا نخدم عليهم خاصهم هوما يشمرو على دراعهم دابا ، مابغيتش ابابا نوصل ل 35 عام ومنكون دايرة والو فحياتي ..

- كنشوف من هنا ل 5 سنين جايا انا شنو بغيت نكون وشنو بغيت ندير ، وانا مكنشوفش راسي ݣالسة بين 4 ديال الحيوط حاطة يدي على خدي ، بغيت نبدا من زيرو ونخدم على راسي ونزيد بيه القدام ..

- عباس سمع لكلامها كلو بتمعن كان عندها الصح فكل كلمة قالتها ماكدباتش فحتى حاجة ، من الاول مكانش خاصو يخليها تخلي قرايتها غير سلات الباك ديالها صافي ݣلسات .. تنهد تنهيدة طويلة :

هانتي نزلتي لكازا فين اتكوني عندمن أتمشي ، شنو غاتخدمي ؟

- مسيرة : الخدمة لي مغاتحتاجش حسن السيرة ، ومغايقولوش ليا عليها خاصك ديبلومات ..

- عباس سكت والكل بقاو ساكتين .. رجعات دوات موحهة نظراتها للباها :

ماسولتيتيش شنو هاد الخدمة أبا ؟

- عباس [بكل ثقة] :

مكاين لاش نسولك ، عارفك مكديريش شيحاجة لي خايبة ، والى درتي شيحاجة حتى كتكوني عارفاها منخافش عليك ..

- سندس [بتساؤل ] :

ومن بعد ؟

- مسيرة [بإصرار] :

غندفع ندير باك ليبر ، واخا عندي باك ولكن قديم بغيت نعاود نقرا وندير باك ليبر ، ومن بعد يحن الله ..

- صفاء : ونمشيو كاملين حنا ديما مجموعين عمرنا ماتفرقنا نهائيا [صوتها تأتر وبانو علامات الدموع فعينيها ] مجاتش تمشي وتخلينا ، حتى حنا بغينا نقلبو على خدمة ..

- مسيرة [طبطبات على يدها ] :

صبري غير هاد الشهر هذا .. نخدم انا نشوف لينا بلاصة فين نكونو ونجيبكم عندي واش انا حمقة نسمح فخواتاتي ، وخلي هادو يبقاو بوحدهم يلاه يساليو لبعضياتهم ..

- سعاد [واقفة ليها الدمعة فحلقها ] :

شفتكم كاملين باغيين تخويو ، حنا حد مافكر لينا ، وفين اتمشي دابا عندمن ؟

- مسيرة : انطلب كريم [ببرود] انطلبو يعاوني لاخر مرة ..

- سندس [بتساؤل] :

علاش اش وقع ، واش دابزتو قلتيلي اتشوفيه اليوم واش ماتلاقيتوش ؟

- مسيرة [بنفس الهدوء ] :

من بعد وندويو والله مافيا دابا ..

- الحاج [بوقار ] :

سمعي ابنتي ، مدام بغيتي تمشي وتقلبي على خدمة لراسك مرحبا ، ولكن الدار انا انتكفل بيها كاينة عندي بارطما فكازا اتسكني فيها يلالة ، وخلصي كراها حيت عارفك مغاتبغيش تسكني فيها فابور اتعطيني الثمن لي قديتي عليه أش بان ليك ..

- معزوزة [مقاطعة مسيرة لي جات تدوي] :

معلوم الحاج اتوافق ، قوليها تقول لا لا نحش ليها اركابي ..

- سعاد : لهلا يخطيك علينا الحاج ، خيرك مغرقنا والله العظيم ..

- إبتسام [بإبتسامة] :

البرطمة غزالة وغاتعجبك ، وجات فبلاصة زوينة ونقية ، مكاين لي يتبسل عليك ولا يقلل عليكم الحيا .. وكولشي قريب ليك شهوة منها تحلي السرجم تبان ليك المرصا وقريبة للمسجد الحسن الثاني ، غزالة كتحمق ..

- مسيرة :

والبارطمات لي فهاد الجوايه كيكونو غاليين ، وانا باغة نشوف أحاجة على قدي ..

- محمد [بنفس إبتسامة بنتو ] :

حتى حاجة ماتغلا على بنياتي ، انا عطيني اثمن رمزي ، وانا ماوقفشاي على خلاصك ابنتي ، امابغيتش نخصر ليك اما دار كتبقى امسدودة .. كون كان باك دابا مديريش معاه هاد الحسابات وخيت انا براني كتحاسبي معايا ..

- مسيرة [بإبتسامة رقيقة] :

حاشا أعمي ، والله العظيم الى عزيز عليا بزاف وربي شاهد [تنهدات] صافي اعمي مرحبا انا قابلة ..

- صفاء[ضحكات بنصر] :

دابا غانمشيو مجموعين ونسكنو مجموعين ..

- معزوزة [بصرامة] :

ولا تسمعو السكنة بوحدكم ديرو مابغيتو ، كل سيمانة نقول الحاج ينزلني نطل عليكم ..

- صفاء : ناري هامي بدات تاني ..

- معزوزة : اش كتݣولي ؟

- صفاء : والو متقلت والو أنا ..

- إبتسام [وقفات] :

ونوض نصايب العشا ..

- سعاد [حبساتها] :

غير سيري رتاحي ابنتي راك من صباح وانت خارجة ، انا نوض نصب ..

- إبتسام : واخا انا نبدل حوايجي ونجي نشوف فاش نعاونك ..

____________________

- فوق النموسية وفبيت مسيرة .. حاطة باليزة ديالها كطوي فحوايجها وترتب فالباليزة ..

- سندس [بتساؤل] :

مالك مع كريم ، ياك تصالحتو داك نهار ؟

- مسيرة [حبسات الطويان وشافت فيها بابتسامة مكسورة] :

واخا تصالحنا ، علاش مزال كيسوني ليا يوميا كيف كان لا ، ياك فهاد 3 شهور زوج مرات لي جا شافني هنا .. ولكن السيد معدور لقى البديل ..

- سندس [بإستغراب] :

كيفاش البديل علامن كدوي ؟

- مسيرة [ݣلسات فطرف النموسية وتنهدات تنهيدة طويلة] :

كنت اندوز عندو لكلينيك نسلم عليه ، مع وقفات إبتسام بطوموبيل كيبان ليا السيد نازل هو وأمينة أخت جلال من الباب ، ضحكتو واصلة لعند ودنيه ، فتح ليها الباب حتى طلعات وغادي كيجري طالع حداها ماخلصو خير ..

- سندس : وعادي أصاحبتي شنو فيها ؟

- مسيرة [هزهزات بكتافها] :

وراني عارفة بلي عادي ، وحتى انا ماقلت والو .. شغلو هداك علرفة بلي حتى هو ايجي الوقت ولي يبغي يدير فيه دارو ، مغايبقاش تابعني ، ولكن انا عشيرتو انا اولا ... عشرة ديال 10 سنين ولا منخلني وتابعها هي ..

- سندس :

وعادي امسيرة انت حاجة وهي حاجة ولالا اويلي من نيتك .. واش بغيتيه يبقى ليك بوحدك حياتو كاملة مايتعرف مايخطب مايتزوج ..

- مسيرة [نفاعلات] :

اه اختي انا كنغير على عشيري ، كريم عشيري انا وقتي كلو معاه 24/24 كانو يظل يدوي معايا بسوايع ... مامنعتوش يدير حياتو ولكن ماينخلنيش ، ولا يدوي معايا الوقت لي راشقة ليه وعندو الوقت ، وقتو ولا كولو ليها هي ..

- سندس [بتروي] :

نفكرو أبلعقل ، السيد راه طبيب يعني كيحاول يفرق وقتو ، هادي في حالة كان بينو وبين البنت شيحاجة ، والى كان فعلا بيناتهم راه هي اولا ، فعمرو 30 عام عمرو تعرف على شي بنت ... واش عقلتي شحال من وحدة كان معاها وبسبابك تفرق عليها ، 24 ساعة على 24 لاصقة فيه .. فينكا بغا يتلاقى بشي بنت كيديك ..

- ومنين كيطلع ليهم الدم وكيقولو ليه يا حنا يا هي كيختارك انت .. لا انت خاص نحسب ليك شحال من بنت كان معاها وفرتكتي ليهم الشمل ، فاطمة الزهراء عقلتي عليها ديك لي بحال شينوية ، كوثر لي باها استاذ نسيتيها ، وياسمين ، وسناء وزهرة واش نزيدك ولا براكة ... هادو كاملين ولائحة طويلة كان كيتفارق معاهم كريم على ودك انت .. كيختارك انت واخا كيكون عاجباه ديك البنت ، غير كيطيح فالمقارنة كيختارك انت بلاما يفكر ..

- عمرو فوت فالعلاقة كتر من زوج سيمانات علاش ، حيت مسيرة لاصقة فيه ، وفينما كان غادي يشوف شي وحدة تلصقي فيه ولاواه اختي ، السيد من حقو يشوف حياتو .. المهم راه مرة كيسول فيك ، اه مابقاش يسوني 24/24 ولكن كوميم ..

- سكينة [كانت دايرة ماسك هي وصفاء وساكتين ، سمعات هادشي وتقادات فالكلءة كتشوف فمسيرة بعدم تصديق ] :

واش بغيتي السيد يبقى باير بسبابك .. مايبغي ما يدير دار نعلي الشيطان شوية ..

- مسيرة [فالداخل ديالها كانت عارفاهم عندهم الصح ، ولكن مكانتش متقبلة هاد الحقيقة نهائيا ] :

ماشغليش ، يبقى كيف كان ماينقصش دقيقة وحدة وحتى انا قسما بالله لا واليتو ولا حديتو ولا حاشيتها ليه ونمرتي انبدلها وفيسبوكي وكولشي ، ويتقب الأرض .. وقسما بالله شي وحدة فيكم تعطيه خباري لا عمركم شفتو كمارتي ..

- أصلا حتى انتوما خاص تبدلو نوامركم ، ياك داخلين على حياة جديدة نبداو كولشي جديد ..

- سكينة [رجعات الخيارات على عينيها ورجعات تكات مغمغمة] :

الله يستر ..

- سندس [بهدوء] :

مزال ماقلتيش علاياش ناوية ، أشمن خدمة هادي لي مافيها لا قراية لا ديپلوم ..

- مسيرة [تنهدات بهدوء ، وهزات واحد الورقة وراتهم ليهم ] ..

- سندس [هزات حجبانها وعلامات الصدمة على وجها ، ضحكات ورجعات جمعات ضحكتها ] :

واش كتدوي من نيتك ولا كتفلاي ، شيخة امسيرة واش هبلتي ؟؟

- مسيرة [بإصرار وهدوء] :

نساي عليا شيخات لي كانو يهزو البوط ، انا انكون مغنية وكلاص ... نسيم حداد راه كلاص واش يحسابليك أنشطح مع ستاتي من نيتك .. انا كلاص داكشي الحفلات كلاص والاعراس كلاص .. كيخلصو مزيان هكا نجمع ونقرا فنفس الوقت انديرهم بزوج .. غادي نسوني ليه وندوي معاه ، ونشوف شنو غايقول ليا ..

- سندس [هزهزات براسها ] :

انا اختي شهمتيني شهمتيني ..

- مسيرة : عارفة شنو كندير انت غير تهناي ..

- الدار البيضاء العاصمة الإقتصادية ، المدينة لي كتلقى فيها أصناف وانواع ديال الناس ... جايين من مختلف المدن المغربية ، وهدفهم واحد هو الخدمة .. المدينة لي سكانها الأصليين ناس مضيافين ، يعاونو الكبير وصغير ، مدينة لي كتهز جميع الاصناف البشرية .. الزوين والخايب ..

- وقفات طوموبيل الحاج قدام الموبل ، ولكن لي كان سايݣة هي إبتسام .. نزلو البنات كل وحدة فيهم هازة باليزة ديالها .. هزو راسهم فالموبل ، مضورين عينيهم فداك الشارع الكبير .. بلاصة كانت النقية وقريبة لكازا پور .. حداها المرسا والهوا كيضرب فيك ديال البحر كتحس بيه قريب ليك ..

- دخلو من باب العمارة ، طلعو فلاسنسور لدوزيام إيطاج ، خرجو من لاينسور سابقاهم إبتسام .. وقفات قدام باب الشقة .. خرجات السوارت من ساكها وحلات الباب ، الشقة كانت نوعا ما مظلمة حيت السراجم مسدودين .. شعلات الضو ومسات نيشان لسراجم حلاتهم ..

- دخلو البنات وحدة تابعة لوخرا ، كدخل من الباب اول حاجة على يدك ليمن كاينة مرايا ، حداها بيت مفرش بسدادر فيهم البيج وتيركواز والغوز فيها تلفازة پلازما .. حداها بيت ديال النعاس بالغوز بيبي فيه كوافوزات وماريو بالبيض .. عاد الحمام مقابل مع باب الدار حداه طواليط ، وعاد الكوزينة قدها بداش ، مجهزة كلها .. فيها بالكو كلو زاج فيه ݣليسة ، كتوقف فيه كيبان ليك الجامع ..

- عاد الصالة الكبيرة مفرشة بالبيسطاج والبيج .. فيها پلازما حتى هي وسراجم كبار الريدو ديالهم بالبيض كيطلع وينزل اوتوماتيك ..

- صفاء [ والفرحة فعينيها ] :

الدار كتحمق ماشاء الله ..

- إبتسام : قليل فين كنجيو ليها ، خاصها غير شي تسييقة غدا نباليو بيها إن شاء الله ..

- مسيرة : ومالنا اختي دابا محنيين ، نباليو بيها نيت دابا يلاه العشرة ..

- سندس : وصاحبتي من نيتك حنا عيانين بطريق ..

- مسيرة [ميقات فيها ] :

مالنا جايين من الداخلة ، راه اساعة ديال المݣانة وجايا مفيكة مع راسك فطوموبيل وباز ياختي ..

- سكينة : انا مريضة اختي مخاصنيش تمارة ..

- مسيرة [طلعاتها ونزلاتها ] :

تبوحيط باز ، انا والبنات كافيين ..

- إبتسام [كضحك] :

انزل نجيب سانيكروا وجاڤيل وتيد ونجي ... دورو فدار بيما جيت وطلعو لسطح شوفوه .. فيه واحد الݣليسة كتحمق .. درتها فاش جينا لهنا فجهة ديالنا جليسة صغيرة وخلينا الباقي للنشير وجهة ديال جيران خليناها ليهم ..

- مسيرة : تهناي دروك نيت .. نزلات إبتسام للحانوت ، وخلات البنات تسراو فدار مزيان وطلعو للسطح ، فعلا كانت كليسة صغيرة ، فيها كرسي كبير متيسع ل3 الناس وزوج كراسة اخرين كلهم مبطنين والوسط طبيلة ..

- الجامع كيبان والعمارات كيبانو واحد المنظر زوين بزااف .. تسراو السطح وتمنظرو ، ونزلو لقاو إبتسام جابت ليهم مواد التنظيف ، بدلو حوايجهم وبداو فتخمال ..

__________________

- فجهة اخرى وبضبط مطار مراكش .. خارج شاب فثلاثينات ، شعرو ارونج كهرماني مع لحية فنفس اللون .. داير سكادو على ظهرو ..

- خرج ورقة من جيبو قراها وتبسم إبتسامة نصر ، رجعها للجيبو وبلغة إنجليزية هاز يدو ناطق :

طاكسي ..

- فالعشية ، حاطين قدامهم فوق الطبلة ، صينية ديال أتاي مع كرواصة والكومير زبدة الكوفيتير ، كل وحدة شادة سداري متكية والعيا باين عليها ..

- إبتسام هازة كاس ديال اتاي كتجغم منو ، حطاتو قدامها وشافت فمسيرة :

مسيرة اجي قولي ليا ، فلوس القناة فين مشاو ليك ؟

- سندس [ضحكات ] :.

راه صدقاتهم كاملين ، قاتليك ماعندها مدير بيهم وبغات تبدا من الزيرو ..

- إبتسام شدات حناكها :

اويلي امسيرة واش بصح ، العار وعلاش ؟

- مسيرة [هزهزات بكتافها ] :

ماعندي مانݣجدر بيهم ، ديك القناة مجا ليا منها المصايب ولكوارث ، فلوسها صدقتهم فسبيل الله على الناس لي مخصوصين نيت بصح ، الصدقة دفع علينا البلا والباس ، امنين خرجات طريفة .. [شافت فإبتسام ونطقات ] إبتسام عندك اختي شي نهار تزهق ليك من فمك ..

- إبتسام : من نيتك أمسيرة ، حنا الحمد لله شاركنا الطعام وحسبتكم خواتاتي كنعاود ليكم كولشي واخا يلاه هادي 3 شهور باش تجمعنا ، ولكن ربي لي عالم بمعزتكم عندي راه بوحدها وربي شاهد عليا ..

- مسيرة : راه داكشي باش حتى حنا عاودنا ليك ، حيتاش عزيزة وغالية ومخبينا عليك والو ..

- إبتسام [بإبتسامة] :

الله يجعها محبة دايمة ياربي .. هزات مسيرة التيليفون ديالها جبدات الورقة من جيب بيجامتها يلاه بدات كطاپي النمرة ..

- صفاء [بتساؤل] :

اتسوني لنسيم فهاد الوقت؟

- مسيرة : مكاين ماحسن من دابا .. باش غدا الى عندو وقت نشوفو ونطرقو هاد المسمار ..

- كملات الكتبة دنمرة ، حطات تيليفون على ودنها وبقات كتسنى .. مجاوبها حد ، رجعات سونات المرة الثانية والو ، الثالثة او والو ..

- سندس : والو مكايجاوبش ؟

- مسيرة [حركات راسها بنفي] :

لا والو ، تنهدات تنهيدة طويلة وحطات تيليفون على الطبلة ، حطات راسها على الحيط كتفرج فتلفازة ..

- سكينة : ايكون مشغول ، واحد بحالو راه مغايكونش مسالي ولا تكون عندو شي سهرة ولا حفلة ولا عرس الله أعلم ماتعرفي ..

- إبتسام : وي داكشي لي غايكون .. دازت 15 دقيقة بضبط بدا تيليفونها كيسوني ، هزات التيليفون بالخف طلعات ليها نمرتو ..

- البنات هو كيسوني ..

- إبتسام [باللهفة] :

جاوبي دغية اصاحبتي .. خدات نفس طويل وفتحات الخط ، بصوت انثوي تابت :

وي سلام عليكم .. [من جهة اخرى بصوت تقيل وغالبة عليه نبرة المرح ، وعليكم السلام شكون معايا ، هاد نمرة لقيتها سونات ليا trois fois ..

- مسيرة : وي سمحليا على تبرزيط انا مسيرة ، لي كنت غنيت معاك فالطهارة ديال الحاج محمد فولاد السعيد ..

- نسيم [بصوت غالبة عليه نبرة الفجاة] :

أياااه مرحبا لالة مسيرة ، صافا امورك هانية طولتي حتى سونيتي ..

- مسيرة : غير شي ظروف لي شداتني وصافي ... انا جيت لكازا وتفمرت النمرة لي عطيتي لختي تعطيها لي وسونيت ليك ..

- نسيم : داكوغ مرحبا ، الى كان مناسبك نتلاقاو غدا نتغداو اونسومبل شنو بان ليك ؟

- مسيرة : اهاه واخا مرحبا فين ؟

- نسيم : انا غدا إن شاء الله انسيفط ليك لوكاليزاسيو ، وديك الساع ندويو إن شاء الله ويكون خير ..

- مسيرة : واخا واخا مرحبا ، إن شاء الله شكرا بسلامة .. قطعات معاه شادة على قلبها ..

- البنات وحدة تابعة الثانية :

1 امضرا شنو قاليك ؟ 2 سربي دوي / 3 شوف كدير لينا التشويق .. 4 وشنو قاليك ؟

- من بعدما عاودات ليهم كولشي ، بقات متكية فبلاصتها حتى نعسات ، ماحسات على راسها حتى فاقت الصباح على التقرقيب فالكوزينة .. ناضت كتشبح لقات إبتسام وسكينة فالكوزينة ، ريحة اتاي بنعناع كتعطي ..

- خرجات كتجر رجليها ، دخلات عليهم للكوزينة مزال شاد فيها النعاس :

صباح الخير ، ناري نعست نعسة بحال الى كنت شادة العسة ..

- سكينة [كتحط فالفطور] :

وسيري بعدا اغسلي وجهك ودوزي تفطري .. داكشي لي دارت ناضت للحمام غسلات حالتها مسحات وجها وخرجات لعندهم ، لقات البنات فاقو .. تجمعو على الطبلة وفطرو مجموعين ..

- سندس [كتاكل فالخبز سخون داهناه بزبدة والكوفيتير ] :

معاش دايرة مع خونا ؟

- مسيرة : مع 12 ونص إن شاء الله ، ماعرفتش شنو نلبس ؟

- صفاء [هزات عينيها فيها ] :

اللباس خليه عليها حنا ، حنا لي انلبسوك .. الى جات عليك انت اتمشي عادي ، راه أهم حاجة هي الپغيزونطاسيو .. الشوفة الاولى هي لي عليها العمدة ..

- سندس : عندها الصح فهادي ..

- مسيرة : صافي واخا ، خاص انفطر نوض ندوش ..

- داكشي لي كان سلات فطورها البنات تكلفو بغسيل الماعن وهي دخلات دوشات ، خرجات نشفات شعرها .. وخلاتوالبنات هوما تكلفو ليها بحوايجها ، لبسات مسوة فالبيض .. مع جيلي ديال الجلد صندالة ديال الجلد فالقهوي بحال جيلي وصندالة ميني طالون بسيةر فنفس اللون ..

- هزات ساك الصغير ، مكياج خفيف مباينش ݣاع .. وبارفان ديالها ..

- ݣلسات كتسنى منو تيليفون والتوتر غالب عليها ، حتى وصلها ميساج فالواتساب من نمرتو فيه لوكاليزاسيو ..

- مسيرة [بخوف] :

سيفطليا ميساج ، انمشي دابا ناري دعيو معايا البنات ..

- إبتسام :

سيري ازين الله يسهل عليك ، رتاحي مايكون الخير ..

- سندس : ياربي تفرحنا بيك ..

- سكينة : وعنداك تنساي راسك ورضي البال ..

- صفاء : وديري فيها كلاص ، عندك تبقاي دوي بتجعويق ..

- مسيرة : لا تهناو .. انا مشيت ، خرجات من البارطما وهوما واقفين كيتسناوها حتى ركبات فلاسنسور ومشات ..

- وصلات للريسطو لي سيفط ليها ، كان ريسطو باينة فيه راقي من برا ، ومنين دخلات زادت تأكدات كثر ، دورات عينيها كتقلب .. هو غير شافها دفع الكرسي او وقف ، بإبتسامة تقدم عندها ، غير شافتو بادلاتو نفس الإبتسامة ..

- نسيم : نهار كبير هذا ، مرحبا بيك ..

- مسيرة [بإبتسامة وحرج ] :

الله يبارك فيك ، ياكما تعطلت عليك ؟

- نسيم [ بنفي ] :

پا ديتو ، تفضلي .. تبعاتو حتى لطبلة لي كان ݣالس فيها ، مكتاشفة بلي مكانش بوحدو ، كانت معاه بنت من لباسها كتبان من الطبقة الراقية ، شعرها كحل .. ملامحها زوينين ومرحين .. غير هزات فيها عينيها وقفات وسلمات عليها بالوجه ..

- نسيم [كيأشر للبنت لي معاه ] :

مسيرة ، كنقدم ليك سارة مراتي ، سارة هادي هي البنت لي عاودت ليك عليها ..

- مسيرة [حسات بقلبها زهق منها ، مكانتش متوقعة مراتو تكون معاه ، جاتها الخلعة ودهشة ] :

مشرفين ..

- سارة [بصوت انثوي رقيق ] :

مرحبا بيك مسيرة فكازا ، نسيم شحال عاودلي عليك .. تبارك الله عليك عندك إين بيل ڤوا ..

- مسيرة [من بعدما ݣلسات ] :

ربي يخليك ، غير شوية وصافي ماشي صوت ..

- سارة [هزهزات براسها ] :

نونونو ، نسيم الى قال صوتك زوين ، فراه فعلا صوتك زوين ..

- نسيم : نتغداو بعدا ونكملو هضرتنا .. جا السرباي ، عكاهم الموني ... ختارو لي بغاو ومسيرة معاهم ، بان ليه طبق باللحم طلباتو .. ماعندهاش مع هاد البلايص نهائيا ومكتقدش عليهم ..

- نسيم [وجه إنتباهو ليها ] :

ݣولي ليا امسيرة ، شنو كديري فحياتك مستواك الدراسي ؟

- مسيرة [بهدوء] :

انا قريت حتى لباك وخرجت الصراحة مكملتش ، ولكن ناوية إن شاء الله نعاود نقرا ندير باك ليبر ، ومن بعد يحن الله .. حاليا مكندير والو داكشي باش جيت لكازا ..

- نسيم [هزهز براسو ] :

داكوغ ، مزيان .. سبق ليك غنيتي فشي بلاصة ؟

- مسيرة [بنفي ] :

لا عمري ، من غير الطهارة ديال الحاج تما أول مرة ..

- نسيم [حك حاجبو ، عينيه مشات لمراتو ورجع شاف فمسيرة ] :

داكوغ ، شنو بان ليك تخدمي معايا .. مكندويش على السهرة .. نو كندوي على الاعراس لي كندير ، ولكن قبل شنو بان ليك فديو انا وانت ؟

- مسيرة [بصدمة ] :

ديو ديو ، يعني كليب ، واش ايشوفوه الناس ؟

- نسيم [ضحك] :

وي بيان سيغ ، هادي راه حاجة طبيعية غادي يشوفوه الناس ، لا فالمغرب لا خارج المغرب ..

- مسيرة [مزال الدهشة غالبة عليها ] :

الصراحة ، ماعرفتش وحق الله .. انا ماعنديش مشكيل ، غير هو مابغيتش ناخودها مهنة على المدى البعيد .. عنزي بزاف ديال الحوايج فبالي ، ولكن حاليا خاصني خدمة باش نقد ندير هاد الحوايج ..

- سارة :

إݣزاكتومو ، اديري حاجة لي تفتح ليك الباب لحاجة أخرى ..

- مسيرة [بإستفهام ] :

مافهمتش ؟

- سارة [تبسمات ليها ] :

منين كتشهري ، كيتفتحو ليك بزاف ديال البيبان ، باغ إيݣزومپل ، المؤثرين دابا حتاكرو حتى الشاشة ديال تلفاز .. ولاو كيمثلو علاش حيتاش تشهرو ، وهكاك الموسيقى ، غادي تفتح ليك اي باب بغيتيه ، ومغاتلقاي حتى صعوبة نهائيا .. فهمتيني ، بالعكس هي غاتسهليك داكشي لي كتخططي ليه ..

- واخا ماتبغيش تكملي فيه ، ماشي إشكال .. دو كليپ كافيين انهم يخليوك تنجحي وديري البوز ، بلاما ندويو على الحفلات والاعراس ...

- غتسهال الطريق عندك .. وحاجة اخرى لي كنحييك عليها ، هو قرايتك لي بغيتي تكملي ، متقوليش نو العمر لأنو العمر عمرو كان معيار .. ودليل هاهو نسيم قدامك ، عاد خدا الدكتورة ديالو .. لا الفن ولا خدمتو خلاوه مايكملش قرايتو وطموحو ..

- القراية مهمة كتخلي الانسان تكون عندو مكانة ، وكتخلي الكل يحتارمك ، ومكتخليكش نهاىيا تفكري فطريق ساهلة وخايبة بالعكس .. بغافو كنحيي فيك هاد الروح ..

- نسيم [بتساؤل] :

شنو ݣلتي الالة مسيرة ؟

- مسيرة [بإبتسامة هزهزات راسها ] :

انا موافقة ، كيف قلت مغانخدهاش مهنة دائمة ، حدي نوصل لي بغيت انحبس ..

- نسيم [بإبتسامة رضى ] :

إيوا يلالة مرحبا ، وإن شاء الله مايكون الخير .. جا السرباي جاب ليهم الغدا .. تغداو فجو زوين .. القلق وتوتر ديالها تحولو لراحة من بعد ، نسيم كان ظريف ولبق .. اما مراتو كانت قمة الانوثة والكياتة ورقي ..

- من ورا ماسلاو الغدا .. وصلو مسيرة حتى لموبل .. تسيفطو معاها ومشاو ..

- طلعات فلاسنسور ، كانو البنات كيتسناوها .. غير وصلات حلو الباب على غفلة كيتسناوها على احر من الجمر ..

- عاودات ليهم ݣاع لي طرا .. فرحتهم بيها كانت باينة بزاف .. وفرحتها هي كانت كثر لأنو هادي هي أول خطوة فمشوار حياتها الجديدة ..

____________________

- فجهة أخرى وبضبط بمدينة سطات ، واقف فواحد الساحة كيتسنى ويشوف بعينيه لي جاي ولي غادي .. حتى وقف عليه واحد الشخص ، بإنجليزية ركيكة نطق :

فلوسي بعدا ، سيفطي ليا غير النص دابا بغيت النص ..

- كان نفس الشخص لي خرج من المطار ، جبد جوا من جيبو واحد الجوا ومدو ليه ، رجع خطف يدو ونكق بتهديد :

واش فعلا عارفها فين كاينة ولا كتريݣل عليا ..

- جر ليه الجوا ونطق بصوت غالبة عليه نبرة الحقد :

راه ݣلنا ليك كنعرفوها وكنعرفو طاسيلتها كاملة ، هاديك بنت الهم كنعرفها كتر مكتصور ، حرقتها هنا [اشر لحلقو ] عندي رابور ديالها كامل ..

- ولكن أجي ماݣلتيش ليا شكون انت لي باغيها ، وعاطي عليها هاد الفلوس [طلعو ونزلوو] واخا انت باين عليك مكحط ماعندك ريال ، اشمن بلاد جاي بعدا ؟ وشكون عطاك لادريس ديالها وعطاك نمرتي ؟

- [جاوبو بإنفعال] :

ماتبقاش تسول بزاف ، شديتي فلوسك هنينا دابا ݣوليا فين مشات فين هي ݣلتي بلي دارهم القديمة تباعت فين مشاو ؟

- حتى تݣول شكون انت ؟

- [دوز يدو على شعرو بنرفزة ] :

انا ولد خالتها ، يلاه دوي فين مشات ؟

- بصوت مستفز جاوبو :

راه دويت معاك وݣلت ليك برب لا ݣلت ليك فين كاينة حتى تعطيني ديطاي ديال ديطاي ، ختار .. كيفاش ولد خالتها مسيرة مها ميتة سينين والمينين هادي ، شوف جيني نيشان ولا غانݣلب ساعة بختها ..

- [تعصب وتنيرڤا ولكن الى بغا يلقاها خاصو يعاود ليه ] :

سمعني ، مريسة [هي مسيرة ] عندها شيحاجة كتخص العائلة ، وخاصني نرجعها .. كيفاش عرفتها كاينة هنا ، عندي صديق فالشرطة الهولندية ، هو لي جابليا شي معلومات من عند ناس كيعرفهم هنا .. وناس لي كيعرفهم هنا هوما لي توسطو ليا معاك ، فهمتي دابا ولا نزيد نشرح .. اتݣوليا فين هي ولالا ؟

- [تبسم] مرحبا ، نݣوليك .. كاينة فواحد البلاصة سميتها ولاد السعيد .. ولكن غير لبارح جاتني واحد التنقنيقة بلي نزلات لكازا ، هي وخواتاتها كاينين تم ، وقيلة مشات تقلب على خدمة ..

- [تبسم ] هم مزيان ، ماعرفتيش لادريس ديالها فين ؟

- لي عارف هو سكنو قراب للمرسا .. ماعنديش لادريس بضبط هادشي لي كاين ، لي عندي انا ݣلتو ليك اجي ماݣلتيش ليا سميتك ؟

- [هبطو ونزلو ] سيمون وأنت ؟

- [بعد ثانية نطق] :

جمال ، ماݣلتيش ليا شنو هي هاد الحاجة لي عند مسيرة وكتخصك ؟

- سيمون [بصرامة] :

سلات ساعتك فاش نحتاجك نمرتك عندي بسلامة .. خلاه واقف وفيديه الجوا دالفلوس ، أشر لطاكسي وسكاكو على ظهرو ، وقف ليه ركب ساد الباب وراه ناطق بكلمة وحدة لي حفظها باش يبقى يݣولها :

لاݣار ..

________________________

- دوزات معاهم إبتسام داك النهار ، خرجو فيه وتساراو ماخلاو بلاصة مامشاو ليها ، كانو كيحسو براسكم مرتاحين حيت تهناو من ضغط منصور ، من نهار ساقو لخبار لباه لي تشد وليه هو لي خوا المغرب ..

- ماخلاو بلاصة مامشاو ليها ، سندباد المول .. اي بلاصة زوينة داروها حتى من المدينة القديمة مشاو ليها .. وفالأخير ختموها فسناك امين بپلا ديال الحوت ، ورحعو لدار عيانين .. كل وحدة خدات بلاصتها ونعسات وخصوصا مسيرة لي كانت الغدا ، عندها رونديڤو مع نسيم فالوستوديو على ود تقرا كلمات الأغنية ويبداو التسجيل ديالها ..

- كانت متحمسة ليها بزاف ومن كترت الحماس ماعقلاتش على راسها إيمتا نعسات ..

__________________

- ستقفين يوماً على بقايا كل كلمة كان هدفها تحطيمك وكل تصرف كان هدفه إلحاق الضرر بكِ ، ستقفين يوماً بكل صمود لتحتفلي بما وصلتِ له .. فقط عليكِ المثابرة و عدم الالتفات ..

-\-\- بعد مرور أسبوع -\-\-

••• مع 10 دصباح عند أمينة •••

- نزلات من الشقة ديالها ، الإبتسامة المشرقة لب على وجها كتبين قداش هي فراحة ومتحمسة ، لابسة .. صايا فالكحل مع فيست فنفس اللون مع سميطة رقيقة فالبيض ، ساك فالبيض كريستيان ديور مع سبيبيط فالكحل مه سميطة بيضة فنفس لامارط .. مكياج خفيف اما شعرها فخلاتو مطلوق على راحتو .. تاجهات نيشان لطوموبيل الجيپ لي كانت كتسناها ..

- حلات الباب وطلعات ، سادة الباب مزولة النظارات الشمسية لي كانت لابسة ، وبنفس الإبتسامة شافت فيه ونطقات بصوت أنثوي :

يكما تعطلت ؟

- بصوت رجولي غارف وقوي :

انتوما العيالات هذا حالكم ..

- أمينة [هزات حجبانها بإستفهام ] :

هههه كيفاش اخويا زعمة ، باش عرفتي انت هادشي ؟

- زول نظاراتو الشمسية مبين على عينيه العنكبوتية :

جاي من ورا شمس ، هادي حاحة باينة ..

- أمينة [مبدلة الهضرة ] :

والله اخويا الى فرحانة ومقاداني فرحة ، حيت انت معايا وانت لي وقفتي على المحال بيديك ..

- مجاوبهاش رجع لبس نظاراتو ، ديمارا وشد الطريق .. كسر الصمت بكلام ماكانتش متوقعاه غادي يݣولو نهائيا ، كلام لي خلا وجها يتزنݣ ..

- انت وكريم مطولين فهاد سابهلالة ديالكم ؟

- أمينة [ضورات راسها لعندو ] :

بحالاش اجلال مافهمتش ؟

- جلال [عينيه على الطريق ] :

مافهمتيش ... أمينة كيعجبني بنادم يجيني نيشان ، [شاف فيها ورجع عينيه على الطريق ] ديك تزنيݣة لي فوجهك كتبين بلي راك فهمتي ..

- أمينة : ولكن ..

- جلال [مقاطعها ] :

بلاما تݣولي مابيناتنا والو ، داك دخول والخروج انت وياه هادي 3 شهور ، راه كولشي كيدوز ݣدام عينيا وساكت ميك ، حتى نشوف اش غاتصنعو ..

- أمينة [حدرات راسها ، ورجعات علاتو فيه ] :

الصراحة ، كريم ولد الناس وظريف .. واي بنت تمناه .

- جلال [صوت متحجرش] :

ومن بعد ؟

- أمينة : هو راه باغي يتقدم ليا ، ولكن أجلال انا مزال معطلة شوية على قبل المحال ، خاص نعطي ليه وقتي كامل ..

- جلال [بصرامة وصوت رجولي ] :

اتصنعي ليا نواوي ولا أطلقي ليا صوارخ فسما .. الحاجة لي كتكون رسمية كتكون مزيانة ، داك دخول والخروج بلا موجب شرع ماعنديش معاه أ امينة من الأخر ..

- أمينة [بإحراج وتساؤل] :

أخويا غير نجيب السلعة ونديرو الإفتتاح ، وديك الساع إن شاء الله اندوي انا وياه ونݣولو يجي يدوي معاك ..

- جلال [بصوت قوي] :

يدوي مع باك ، لي ولدك وهو ولي امرك ، انا غي خوك .. باك مزال عايش ، انا من عندي الله يسخر ، كريم كنعرفو مزيان .. منحتاجش ندوي معاه ..

- أمينة [تنهدات] :

واخا هكاك كيبقى فيا ، كتحس بيه مافرحانش ..

- جلال [بتساؤل] :

علاش مالو ؟

- أمينة : سونا لمسيرة ولكن تيليفونها لقاه طافي .. مشا لعند دارهم منين سول قالو ليه بلي كاينة هنا فكازا هي وخواتاتها .. وبدلات نمرتها او وصاتهم مايعطيوهش النمرة ..

- جلال [بان شبح إبتسامة إستهزاء على جنب شفايفو ] :

وعلاش هاد الدراما كاملة ؟ ياك عشيرها يا حصرة !!

- أمينة [هزهزات راسها ] :

ماعرفتش وحق الله ، 10 سنين ديال العشرة ضرباتها فزيرو وبدلات عليه النمرة ..

- جلال [ورك بيديه على الڤولون ، حتى بياضو مفاصل يديه] :

عمر شيخة تنسى هزت الكتف .. هاديك هي قاعيدتها ، الانانية كتجري فدمها هي والكذوب .. وقف الطوموبيل قدام المول .. نزل هو وياها قاطع الهضرة لي كانت بيناتهم ..

_____________________

- فبارطما فالمعارف ، وبضبط فشقة لي كانت أستوديو .. ݣالسة جامعة شعرها على شكل سفنجة .. دايرة فولارا على عنقها .. كاسك على ودنيها وكتسمع والإبتسامة على وجها ..

- مستمتعة حتى سالات الموسيقى ، زولات الكاسك وشافت فيه :

وحق الله العظيم مكان يحسابلي أطلع بحال هكا ، زوينة بزااف ..

- نسيم [ضحك] :

زوينة حيت انت حليتيها .. دابا خاصنا ندوزو عندنا مدام بناني ليكيپ كيتسناونا تم ..

- مسيرة : فخبارك والله الى نسيتها ..

- نسيم : زݣي معايا هادشي مكايتنساش ، خاص تصاور يكونو موجودين للغد ، على ود الإشهارات .. وعلى ود الكليب ، لاسومين پغوشين إن شاء الله غاينزل ..

- مسيرة [بتوتر] :

والله العظيم الى فيا الخلعة .. تدق الباب ودخلات صفاء هازة جوج كيسان ديال القهوة .. :

هاقهوتك أختي ..

- نسيم : وانا ليا الله ، شي يشرب القهوة شي لا ؟

- صفاء [كضحك ] :

ويديا هزو ليا زوج كيسان اخويا ..

- نسيم [وقف] :

كملو قهوتكم فطوموبيل ، خاصنا نتحركو .. هزات مسيرة ساكها وقهوتها فيديها ، نسيم سبقهم وهوما وراه ..

- تحل باب الشقة ودخلو بزوج .. من عينيهم باين عليهم العيا ، حطات سكينة السوارت او واحد الملف على الطبلة لي حدا المرايا ، محيدة سبرديلتها ، تحطات على سداري مرجعة راسها اللور بعياء ..

- سندس [خرجات من كوزينة فيديها قرعة دالما وكاس ، كبات ليه الما ومداتو ليها ] :

خودي ..

- خداتو سكينة ونزلات عليه دقة وحدة ..

- سندس [من بعدما ݣلسات ، وبصوت غالبة عليه نبرة الاستسلام وضعف ] :

ݣاع هذا نحس اصاحبتي ، سيمانة على قدها او والو .. واخا يكون بايل علينا بلارج ..

- سكينة [حطات الكاس من يديها كتمسح جناب فمها] :

وراه كازا هادي ، عند بالك اتحديها فسيمانة .. مزال مامشيناش لوزينات ..

- سندس [شافت فيها بعدم تصديق] :

من نيتك اسكينة ، بديك الإجازة وبديبلوماتي نخدم فوزين ، وكون بقيت فجديدة حسن ليا ..

- سكينة : واش يحسابليك تخدمي فشركة .. هادوك الشركات كتخدمي فيهم بالواسطة ، وحنا هاد الساعة ماعندنا واسطة ..

- سندس : فخبارك والله مايحسابلي عندك الباك وعامين فلافاك واداب إنجليزي ، وزوج ديال ديپلومات هالفندقة هالانفورماتيك ..

- سكينة [تنهدات] :

اودي شفتيني دابا غير منفعة بيهم ، من صباح وحنا كنروليو او والو ..

- سندس : نرتاحو اليوم ياك وغدا تاني يحن الله ، ونعاودو نشوفو الإعلانات لي فلانترنت ماتعرفي ..

- سندس [بعياء] :

ناكلو اختي هو الاول ، ختك راكي عارفة الى ماكليت نسخف ..

- سندس : شربتي بعدا الفنيدة ديال الفطور ؟

- سكينة [هزهزات براسها ] :

لالا خديتها ، حتى لورا العشا وناخود الثانية ..

- سندس [بعدم إطمئنان ] :

حتى مسيرة بانت ليا ماشي هي هاديك ، ملاحظايش بلي ضعافت ولات صفرة ..

- سكينة [تنهدات تنهيدة طويلة] :

هاديك اخليها على الله ، راه قلتها ليها لبارح فاش كنا كنتعشاو ، نقبات زوج نقبات وناضت ، قلتها ليها وفاش طلعنا لسطح فين عمر دروج كانو كيسخفوها !!

- سندس [حكات تحت نيفها ] :

عندك غير يكون عندها فقر الدم ؟ راه الاعراض ديالو هادو السخفة وصفورية الوجه .. هاد 3 شهور كلها وهي راجعة لور وعدوها الطبيب ..

- سكينة : شوفي وجدي لينا مناكلو ، حتى تجي ونبززو عليها ..

- سندس : تهناي رجلي برجليها والله مانتفاك معاها ..

- خلات سكينة مشات تبدل حوايجها وناضت للكوزينة توجد الغدا ..

______________

- التصوير داز زوين ، فاجواء الضحك وتقشاب .. مدام ليلى بناني كانت من ارقى المصممات لي كيصممو البلدي ، عندها زوج بوتيكات كبار خاصين بالبلدي ، ختارت مسيرة قفطان فالموڤ .. وتكشيكة فالفوشيا ، بزوجهم جاوها واعرين .. مع مشطة لشعرها تاج والاكسسوارات ، والمكياج بانت بحال الأميرة ..

- خداو ليها بزاف ديال التصاور ، ليها بوحدها وعاد تصاور هي ونسيم على ود الكليپ ..

- ليلى [بإعجاب] :

ماشاء الله عليك .. تقول غير مفصلين ليلك ..

- مسيرة [ بإبتسامة إمتنان] :

ربي يخليك ، حتى انت تبارك الله عليك ..

- ليلى [ بتساؤل] :

مكتفكريش دخلي لعالم الموضة ؟

- مسيرة [ضحكات] :

لا الصراحة انا ماعنديش مع هادشي ، صفاء ختي لي عندها مع الموضة ، حلم حياتها تولي مودل ..

- ليلى [ضورات راسها طلعات صفاء من رجليها لراسها ] :

ختك غزالة ماشاء الله .. وشنو كتسنى علاش مابداتش ؟

- مسيرة : الصراحة حنا عاد ستقرينا فكازا .. متاحتش ليها الفرصة قبل ، المدينة لي كونا فيها قبل صغيرة ، مكانش عندها شي فرصة ..

- ليلى [هزهزات براسها ] :

وي فهمتك ، [سكتات ورجعات دوات] الى بغات تبدا معايا مرحبا ، أڤيك ݣغوند پليزيغ ..

- مسيرة [بإبتسامة وصوت أنثوي رقيق] :

سي ڤغي ربي يخليك ، [عيطات على صفاء حتى جات عندها ] .. صفاء مدام ليلى بغاتك تخدمي معاها ؟

- ليلى [بنفي الإبتسامة] :

ماشاء الله انت زوينة ، وحتى طول ديالك مناسب ، كانو عندي 5 دالبنات على ود جليلبات ، مي وحدة تزوجات ومشات لأوروبا ، الى بغيتي تبداي معايا مرحبا .. وحتى الپخي ايعجبك ..

- صفاء [توردو حناكها بالفرحة لي طغات عليها ، كتحس براسها بحال الى كتحلم ] ..

- ݣالسين مجموعين على الطبلة ، حاطين مقلة فيها البيض ومطيشة .. الخبز صينية ديال اتاي مع زيتون كحل والهريسة ..

- سندس [حطات الخبز من يديها ] :

ياربي العقبة لينا انا وهاد الميكروبة لي حدايا ..

- سكينة [ضحكات ] :

امين الحتالة .. أجي شحال دارت معاك فالثمن ؟

- صفاء [تبسمات بفرحة ] :

4000 درهم ، السيدة راه لاباس عليها ، غير البوتيك لي كنا فيه عرفتي قداش يجري فيه العود ، وكانت شاركات ف كافتان 2018 و كافتان 2014 ..

- قاتلي مع الوقت غاتزيدني فصالير .. وبلي هذا باب للحوايج اخرين إن شاء الله ..

- سندس : مبروك عليك ، والله الى فرحتيني وأخيرا ..

- سكينة [موجهة كلامها لمسيرة لي متكية ] :

إيمتا اينزل الكليپ ؟

- مسيرة [تنهدات] :

هاد سيمانة جايا إن شاء الله ..

- سكينة [بتساؤل] :

ومالك غير ساكتة ، خاصك تكوني فرحانة اصاحبتي ؟

- مسيرة : راني فرحانة غير العيا وصافي ، بغيت غير نعس .. كون اديري ليا مساج لراسي عايشك ..

- سكينة [وقفات] :

انا نغسل يديا وندير مساج لصحايبتي ..

- هزو البنات الطبلة ومسحوها .. اما سكينة غسلات يديها وجات لعند مسيرة ، خدات راسها حطاتو ليها غلى رجليها ، خدات واحد سيروم دهناتو ليديها وبدات كدير مساج بحركات دائرية لراس مسيرة ..

- ما هي إلا دقائق معدودة حتى كانت وا نعسات ..

- حسات بيها نعسات ودخلات فنعاس ، قدات ليها راسها غطاتها وطفات عليها الضو ..

- خرجات كاتسكل من الصالون ومشات للبيت عند البنات لقاتهم كيهضرو ..

- سندس : نعاس؟

- سكينة [تنهدات وݣلسات] :

اه نعسات ، شفتي شنو ݣلت ليك ؟

- صفاء [كتشوف فهادي وهادي] :

حتى قبيلات منين خرجات من البيت ديال القياس ، وجها صفر وباين عليها العيا ..

- سندس : هاد البنت راسها قاصح .. خاصها ضروري تشوف الطبيب أنا راه ولات خالعاني ..

- سكينة : حتى انا خاصنا نبززو عليها تشوف طبيب ، بغات ولا كرهت ..

- صفاء :

شوفو ، خليو تفوت هاد السيمانة ، اينزل الكليپ ديالها وديك ساعات نديوه بزز بغات ولا كرهت صافي ؟ هزهزو البنات راسهم موافقين على هضرة صفاء ..

- الترند لي دار بوم فوسط الشوارع .. فقناة نسيم وصفحة ديالو .. ، لي وقف فسطوب كيعلي راسو كاتبان ليه صورتها هي ونسيم وحداها قريبا ..

- تساؤلات كثيرة كانو كيدور فعقول الناس ، شكون هادي شكون هاد الوجه الجديد ؟ عمرها بانت ماعندهم عليها حتى شي معلومة ..

_____________________

- غادي جاي فالبيرو ديالو ، معصب وعصبيتو باينة من عينيه وشحال من ݣارو كماه ..

- أمينة [كتحاول تهدنو] :

كريم الله يهديك ، وراه زعمة الغنا راه فن ماشي حاجة خايبة ..

- كريم [بإنفعال] :

اتغني ليا تما الأطلال ، ولا اتغني ليا الأوپرا ، تاشياخت حتى هو فن ا أمينة يهديك الله متجعريش جدي فهاد الساعة ..

- أمينة [وقفات ، جراتو من يدو ضوراتو عندها ] :

كريم ، نسيم فنان ماشاء الله عليه معروف وخلوق ، وهوما دايرين دويتو ، ماشي اتمشي تشطح فالعراسات .. الله يهديك أكريم ، ومسيرة بعقلها على معاودتي ليا عليها كتعرف شنو كدير ..

- كريم :

لالا كتعرف نيت ، شفتها نيت كتعرف شنو كدير .. امينة راه عجينة يدي هاديك ، راه عشرت 10 سنين عمر كولو .. مغاتورينيش اش كيدور ليها فطانطو ديال راسها ، مالقات غير ديك الخدمة ..

- مجيتها لكازا ندوزها بجغمة ديال الما ، النمرة لي تبدلات عليا انا انا كريم ، [كيشدد على كل كلمة قالها] ندوزها ونصرطها ، ولكن تخدم ليا كتغني لا .. تجي عندي انا نشوف ليها خدمة مديرش شرع يديها ..

- امينة :

صافي أكريم تكالما ، كولشي بالعقل .. كتحاول ما امكن انها تبرد عليه وتهدنو ، حيت كان واصل بيه لدرجات الغليان ..

_______________________

••• عند سراج •••

بإبتسامة لي على وجهو ، كيشوف فتصويرة الكبيرة لي قبالتو .. بدون تفكير هز التيليفون ديالو مدوز النمرة ، بصوت رجولي غارف وقوي [هاز تيليفون عينيه مقابلين مع الصورة لي فالپلاكة لي قدامو ، غير سمع صوتو نطق] :

فين كاين السبع ؟ خليك تم انا جاي لعندك .. حرك راسو يمين وشمال ، ديمارا وشد الطريق لعندو ..

_____________________

- خارجة من الاستوديو هي ونسيم وسارة مراتو .. كيدويو الفرحة كانت باينة على وجها .. كانت كتسمع لشنو كيقول نسيم حتى حسات بيدها غاتحيد من بلاصتها ، هزات عينيها كيبان ليها وجهو حمر وعينيه ، وراه امينة ..

- نسيم [بإنفعال] :

إيه ياك لاباس ؟

- كريم : الله يرحم باك بلاما دخل ، بيني وبينها ..

- مسيرة [موجهة كلامها لنسيم ] :

سمحوليا ، انا جايا .. على إثر هاد الكلمة جرها لبعيد خابطها مع الحيط ..

- مسيرة [خبطة خلات دوخة تشدها ، شدات فالحيط مامبيناش ] :

واش انت مريض ولا مالك ، ياك لاباس ؟ اش كاين باش عرفتيني فين كاينة ؟

- كريم [كشاكشو خارجين] :

اتبارك الله على الشيخة ، تصاورك ولاو معرمرين القنات ، فينما ندور نلقاك .. انا امسيرة انا تبدلي عليا النمرة ، بغيتي تعرفي فين لقيتك ديك سمية الاستوديو لي ݣدها ݣداش فالبوستر ديالك انت وداك الشريف .. انا تبدلي عليا النمرة [كيشدد على كل كلمة ݣالها ، خابط يدو مع الحيط حتى غمضات عينيها ] ..

- مسيرة [بلعات ريقها وشافت ليه فعينيه ] :

علاش مال تاشياخت ماشي خدمة ، مالي غانمشي نزهى مع الرجال ولا ..

- كريم [ماحس على راسو حتى شدها من شعرها باغي يݣلعو ليها من بلاصتو ، شدات فيديه مزيرة علي عينيها بألم ] :

عاودي اش ݣلتي ؟ جات امينة حطات يدها عليه :

امينة : كريم حيد عليها يديك واش حماقيتي ؟

كريم [ضار عندها جاهل ] :

امينة دخلي سوق راسك ، بيني وبينها واياك واياك دخلي [رجع شاف فمسيرة ] كيفاش تزهاي مع رجال ، قسما برب الكعبة امسيرة ، العصب ديال رجليك نݣلعهم لملت مك فهمتي ..

- مسيرة [مزيرة على عينيها راسها حسات بيه كيحر/قها] :

حيد يديك ، واش انت نريض مالك والدني ، اش كتكون انت اصلا شكون انت .. دابا عاد بنت ليك بغيتي تعرف علاش بدلت نمرتي ، [دفعاتو مخرجة عينيها فيه ] كنتي ديما تسوني 24ساعة على 24 ، ديما انا وياك ابيل ، حتى دخلات هادي لحياتك [أشرات ليه جهة امينة ] ..

- من نهار عرفتيها وليتي عاطيها الوقت كثر مني انا ، وليتي تسوني ليا بالݣرام ومرة مرة [عينيها تغشاو بدموع ] انا انا لي كنتي كتفضلني على الناس كاملين ، انا عندك رقم واحد ..

- جات هي بين ليلة ونهار ولات عندك رقم واحد ، كنتي كتقولي مسيرة هادي لي انرتابط بيها خاص تبغيها انت الاولى عاد انا ، عقلتي ولا نفكرك هادشي فين مشا باح طار ، من نهار دخلات لحياتك مسيرة باح .. وحتى انا اندير نفس شي لا أصلا درت نفس الشي ، بدلت نمرتي للقديمة وحيدتها من حياتي كيما حيدتك حتى انت من حياتي ..

- سير تزوج وفرح ونشط مع راسك وعيش السعادة ، انا غير خيدني من حياتك بحال الى عمري كنت ..

- كريم [صدرو كيطلع وكينزل ] :

انت ݣد كلامك ياك ، ݣدو واخا ابنت ݣلبي ، واخا .. خبط فيها ومشا جيهة طوموبيلتو تابعاه امينة .. بقات متبعاهم بعيتيها حتى مشاو ، عينيها ساحو بدموع .. كتبكي وتشهق ، جا عندها نسيم هو وسارة كيجريو ..

- سارة [بخوف] مسيرة انت صافا ، اجي أجي .. جروها لطوموبيل .. فتح الباب ليها طلعات وسارة حداها ، طلع لطوموبيل ديمارا وزاد ..

- كان واقف شاهد على ݣاع لي وقع ، رما الݣارو لي فيديه زاطم عليه ، وقف وسط الشانطي ، مشير لواحد طاكسي وقف ليه طلع :

تبع ديك رونج الكحلة عفاك ..

- تحت من العمارة ، واقفة رونج فالكحل بشي 5 دقايق هكاك ..

- سارة [بإطمئنان] :

كيكتحسي براسك مزيانة ؟

- مسيرة [هزهزات براسها ] :

الحمد لله ، سمحوليا برزطكم معايا ..

- نسيم : مكاين حتى تبرزيط .. مابغيتش ندخل ونزيد نحكر ولكن الى بغيتي ديكلاري نمشيو ؟

- مسيرة [كتشوف فنقطة فارغة ، وبزربة حركات راسها بنفي] :

لا لا كريم كنعرفو ، كنعرفو كتر مكنعرف راسي هو عشرة عمري كلها وعشرة سينين .. [هزات راسها فيه] كنت كنقول كريم بلا مسيرة والو ومسيرة بلا كريم والو .. ولكن طراو شي حوايج لي خلاوني نضحك على هادشي لي كنت كنقول فيه ..

- سارة [طبطبات على ظهرها ] :

وقتما بغيتي تعاودي قوليها صافي ؟

- مسيرة [بإبتسامة] :

واخا ،[ضارت هزات ساكها] يلاه خليت ليكم الراحة .. نزلات من طوموبيل بشوية ، بقاو واقفين حتى شافوها طلعات عاد تحركو من تم ..

________________________

- فپتيت ڤيلا على البحر .. مقارنة مع الڤيلا ديالو لي فولاد السعيد كانت هاديك كبر من هادي ، هادي كان خداها على قدو فينما كان كيبغي يرتاح كينزل لكازا ويجي ليها ، الشمس كانت رخات خيوطها الذهبية .. الهوا ديال البحر كيلعب بالخوامي ديال الصالة ..

- ݣالس فصالون ، ساهي عاݣد غوباشتو قبالتو أمينة دايرة رجل على رجل وبدورها ساهية ... خرج سراج من الكوزينة .. هاز صينية فيها 3 الكيسان دالقهوة حطهم على الطبلة وݣلس .. هز راسو فأمينة ونكق بصوت رجولي غارق :

ياك لاباس انت ؟ من دابا بديتي تسهاي مزال مدرتي فطاجين مايتحرݣ ..

- أمينة [تنهدات تنهيدة طويلة ، هزات كاسها دالقهوة جغمات منو ] :

كنفكر غير فالمحال ، ماحيلتي ليه ماحيلتي لكريم ..

- هز راسو فيها وبعينيه لي بحال الغراب نطق :

وقعات شيحاجة ؟

- أمينة : أودي شلا حوايج وقعو ، كيبان ليا وقيلة طحت منحوسة على كريم .. اليوم راه شديتو غير بزز .. نوض الروينة هو ومسيرة ..

- سراج [هز حجبانو بإستغراب ] :

وايلي ؟ واش تلاݣاو ؟

- أمينة : اه خدا لادريس ديال لوستوديو .. ومشا تسناها حتى كانت هابطة هي وداك السيد لي تصاورها معاه ، تهازو فالهضرة شنق عليها من شعرها خابطها مع الحيط .. عمري شتو فديك الحالة خلعني ..

- بالكشايف باش حيد يدو عليها ..

- جلال [بصوت رجولي قاصح غالبة عليه نبرة البرود ] :

واشداه ؟ علاش هاد الروينة ؟

- أمينة : قاليها اش هاد الشوهة دايرة ، قاتلو علاش مالي شفتيني مع الرجال ، وهو يخبطها على ديك الكلمة ، بقاو مني منك .. منين سولها علاش دارت هادشي وحيدات نمرتها ، قاتلو بلي هو السبب .. وبلي انا نسيتو فيها ..

- وانا لي خليتو يتبدل عليها .. ماخلات مقالت ، انا مالقيت منقول بقيت اكنشوف .. قاتليه انا خرجتك من حياتي وعمري مزال بغيت نشوفك ..

- جلال [تبسم بإستهزاء] :

فيلم خاصو يدوز فسينما هذا ، كترت الدراما على الخوا ..

- سراج : جاتني زادت فيه شوية لا ؟ واش هاد ختنا أنورمال .. واش خاصو يتشاور معاها فشادة والفادة ولا كيفاش البلان .. !!

- قاطعاتو أمينة :

ماتبقاوش دويت على شيحاجة انتوما معارفين عليها والو ، حيتاش انتوما بزوج ماعشتوش شي علاقة ديال صداقة ... ݣلست مع كريم وعاود ليا من الاول ، فالوقت لي كانو عندو صراعات مع ختو دنيا ، ومشا لسطات سكن مع مو ... تعرف على مسيرة وهي عندها 18 عام ..

- مكانوش عندو صحاب من غيرها هي ، كانت معاه فالحلوة والمرة .. فينما يحتاجها كيلقاها ، وحتى هي فينما حتاجتو كتلقاه ، بنسبة ليها هو السند من بعد باها ..

- دخل لدارهم وشرك معاهم الطعام وأغلب وقولو كاع الوقات كيكون فدارهم ، معاها ومع خواتاتها .. وانا واخا معاشرتهمش بزاف راكم عارفين عائلة مسيرة كيف دايرين ..

- ناس شعبيين ودغية تنساجم معاهم ..

- جلال [بسهوة منو] :

خصوصا جداها ..

- أمينة : هانتا فهمتي ، قالي كريم بلي مسيرة مكانتش كدير شيحاجة الى متشاوراتش معاه ... وحتى هو هكاك وأي وحدة كان كيتعرف عليها كيعرفها عليها هي لولة ، والى ماعجباتش مسيرة مايكملش معاها ..

- كان كيعيط ليها ببنت قلبو ، وهي كتقولو لد قلبي ، او واعدها نهار يتعرف على شي بنت هي لولة تعرف ... وبلي عمرو يتبدل عليها .. ولكن هو شنو دار فاش بدينا كنهضرو بعد عليها كان كيسوني ليها يوميا فكل نهار شي 4 ولا 5 المرات ..

- ولكن هادشي مابقاش فاش ولا معايا ، تبدل كليا مقالش ليها بلي رتابطنا ولينا نبغيو بعضياتنا فظرفية قليلة .. وهي بقا فيها الحال بزاف يعني ردة الفعل ديالها عادية ..

- رجعات ليه اللومة وانا كرهاتني حيت بنسبة ليها انا لي خديت ليها خوها وصديقها وعشرة عمرها .. انا منلومهاش حيت قلتها لكريم ، لانو كون كنت فبلاصتها ندير ماكتر منها .. هي مزال خرجات وفرغات لي فالداخل ديالها .. هي ماشي حمقة ولا هبيلة ماعندهاش العقل ..

- ولكن هي من النوع المغيار ، ولي كيغير على حاجتو .. وبنسبة ليها انا ديتو ليها ..

- سراج [هز راسو فجلال ونطق ] :

هاد النقطة لي ݣلتي كاين فشي ناس كنعرفهم ... ضار جلال خنزر فيه ورجع شاف فأمينة .. :

كريم شنو ݣال لك ؟

- أمينة :

والو ، ݣال بلي كانت خاصها تدوي معاه راس فراس ، ومديرش هادشي ، وبلي مدامها مابغاتوش فحياتها حتى هو عمرو يبان ݣدامها ، الى بغات تمشي فطريقها تمشي ..

- سراج [بصوت تقيل ] :

على الهضرة لي ݣلتي ، كيبان ليا هو لي غالط فهادشي ، البنت من حقها نكونو واقعيين ..

- أمينة [هزهات براسها ] :

بصح ، وانا دابا كنحس براسي أنا السباب ، واخا انا قسما بالله عمري قلت ليه مدويش معاها ، ولا قلت ليه دوي معايا غير أنا .. وعمري اصلا نقولها حيت انا ماشي هكا .. ولكن على مبان ليا انتوما الرجا/ل فيكم خصلة ... كاين الراجل لي يسمح فصديقة عمرو ، وكاين لي يتقلب على ختو وهي غادة ..

- جلال [شاف فسراج بتساؤل] :

هادي مالها ؟

- سراج : مالك شاي اختي تݣلبتي ، دورو دورو رجال مات رجال امالنا اشريفة ..

- أمينة [حطات كاسها دالقهوة ] :

انمشي بحالي انا ، عيييت بغيت غير نعس .. انتوما بزوج عنداكم ديرو بحال كريم ، تلوا عليكم شي لفعة وتلوحوني انا علمتكم من دابا .. هزات ساكها وضربات فيهم ومشات ..

- سراج [بإستفهام ضار كيشوف فيها حتى سدات الباب ] :

واش الڤيس ديال مسيرة وصل ليها ولا كيفاش البلان ؟

- جلال [ضاغط على محاجر عينيه ] :

السوسة فاش كتبدا تحفر فسنان ، مكاتسالي حتى تريب الفم على ݣدو ..

- سراج :

مدويتيش مع هلال ؟

- جلال [رشف من قهوتو وحطها ] :

هاد سيمانة ، يݣاد أمورو تم ويرجع ..

- سراج : علم الله بحال عمي كيغاتكون ؟

- جلال [بغمزة ] :

فنظرك انت كيغاتكون ؟

- سراج : مدرتيهاش بلعاني ضد فيه ؟

- جلال [بصوت بارد بحال برودة الثلج ] :

الى فكرتي فيها هك ، هي مكتعرفنيش اولد العم .. ناض مربت على ظهرو هز تيليفون ديالو وخرج على برا مقابل مع مواج البحر لي كيبانو قل من بعاد ..

- مجموعين على الطبلة ..

- سكينة : مسيرة شوفي بالعقل ومتقلقيش مني ، هو فعلا داكشي لي دار كريم مخاصوش يدار .. ولكن متنسايش شنو دار على ودك .. هو لي عاونك فالقناة ، وهو لي حط فلوس صحيحة .. وهو لي سيفط لينا جلال وسراج كونما هوما لي دخلو قبل البوليس علم الله ..

- مسيرة [بصوت عيان ] :

انا عييت من هادشي وحق الله ، انا قلت لي عندي صافي سالينا ، الله يسهل عليه .. واش انا قلت ليه متبغيش ومتزوجش ومتخطبش ، واش انا غادي نشدو حدايا .. واش انا مريضة ماعنديش العقل نفكر بيه ..

- ولكن عدويا بنادم يتقلب عليا بحال الزمان ، الانسان يبقى فصباغتو واش انا كنت انقوليه تفرق عليها ، وغير يجي ويقولي فلانة هاليكاين وهاليكاين ، انا بالفرحات عليا يلقا لي بغاها ..

- ولكن باش تقلل الهضرة معايا غير حيت عرفتي وحدة أخرى لا .. انا عارفة مزيان بلي الصداقة راه اتقل فاش غايتزوج ... وبلي اي إنسانة مغاترضاش راجلها يولي كل نهار الهضرة مع صديقتو ... هادشي عارفاه راه عندي 28 عام ماشي كنرضع صبعي ..

- ولكن بنادم مايتبدلش ويقلب الفيستة ، صافي الله يسهل عليه ..

- سندس [جايا من كوزينة هازة طاجين ] :

ولكن مكانش عليه يهز عليك يديه ..

- مسيرة [تنهدات] :

اودي هانية ، شحال من مرة دارها فاش كنا كنقراو الى درت ليه شي زبلة قدها قد راسي .. حتى انت بقات فنتفة بقات فالجرح لي فالقلب ، كيقوليك الله ضربة بدمها ولا كلمة بسمها ..

- صفاء [كتحط فالخبز ] :

صافي براكة دوزو تعشاو .. ناضت مسيرة تقادات فالݣلسة ، بداو العشا ديالهم مبدلين موضوع كريم ... كل مرة وهضرتهم كتكون على حاجة شكل ..

- سلاو العشا ديالهم .. وݣلسو حاطين الزريعة كينقيو فيها ويتفرجو .. وصلا ديك 11:30 ديال الليل .. الضواو طافيين من غير الضو ديال التلفازة لي شاعل ..

- صفاء [بتساؤل] :

مغاديش تنوضو تنعسو ؟

- مسيرة [وقفات] :

انا انمشي لطواليط ونمشي نعس .. لبسات صندالتها غادية لطواليط حتى سونا الباب .. وقفات وضارت شافت فيهم بتساؤل :

شكون ايدق علينا فهاد الليل ؟؟

- سندس [بإبتسامة خجولة ] :

ايكون امول پيتزا ، عرفتوني مع طاجين دجاج ماعنديش معاه ، ودومونديت على پيتزا ..

- مسيرة : پيتزا فنصاصات الليل واش انت ڤيو .. دوموندي عليها بكري ماشي حتى لهاد الوقت ..

- سندس : راه قلت مغانتعشاش ، ومنين كلسنا جاني جوع وعرفت الى قلتها ليكم مغاتبغيوش تخليوني وصافي نخلي السيد يتسنى ولاواه ..

- ضربات فمسيرة لي عطاتها بظهر ، حطات يدها على الپوانيي ديال الطواليط ، مع اتحط يديها على النݣاصة ديال الضو تشعلو سمعات غوتت سندس لي هزات ليها الشعر ديال اللحمها .. ضارت بالخف ..

- مع الظلام فالمراح من غير ضو التلفازة لي كان شاعل ماقداتش تفرز شكون هاد زوج لي دخلو عليهم .. واحد جار سندس مدورها عندو حاط ليها موس على عنقها ..

- مع الضو لي تشعل على غلفة فصالون قدات تفرز ملامحو .. الصدمة خلاتها تشلل ماتقدش تحرك .. خرجات صفاء كتجري هي وسكينة شادين على فمهم ماعرفو باش تبلاو ..

- زوج صدمات دقة وحدة .. صدمة من هادو لي دخلو وصدمة الثانية ديال الشخص لي كان جار سندس وحاط ليها الموس على عنقها ..

- مسيرة [عينيها كيمشيو منو لشخص الثاني لي كان واقف وكيشوف فيها ، كون كانت فوقت حسن كانت أتفرز ملامحو لي كيشبهو ليها واحد الشوية ، ولكن لا الوقت ميسمح ولا الوضعية كتسمح ، بصوت تابت ] :

هذا هو جهدك .. باش منين نقوليك راك شماتة ماتجاحدش معايا ، هادي هي الرجلة دخل على بنات لقلب الدار هاز عليهم جن/وي ..

- جمال [بإستفزاز ] :

زيدي كحلي الضواسة الهولندية ، هكاك باش يلاه نصفيها لجد مكم جملة ، النفخة على الخوا .. مابغيتيش تهدي وزايداها بتاشياخت وصدقتي مساهلاش مع راسك ..

- مسيرة [كتنقل نظراتها منو للشخص لي معاه لختها لي تحت يدبه ، كانت اي حركة منها ولا من صفاء او سكينة يقد يدوز على عنق سندس بلاما يغمض عين ] :

انا بعدا شيخة ، كيت الرعواني لي مخبي ورا موس .. كنحمد الله ونشكرو لي ماخديتش شماتة بحالك .. اش بغيتي من الاخر وخلي عليك ختي فتيقار ، الى جاي على الفلوس ماعنديش ، مزال ماوليت بوكو فلوس .. يلاه انبدا اتقلب الدار سفاها على علاها مغاتلقى باش تنقي سنانك ..

- جمال [ضحك ، بصوت مدعدع ] :

الفلوس شديتهم على ظهرك .. اتهناي ازين الصافي ، انا غير عبد مامور جايب ليك ولد خالتك باغيك على غراضو ..

- مسيرة [مكانت فاهمة والو كاتحس براسها فدوامة .. ماحيلتها للعيا لي كتحس بيه ولا دوخة لي كتزورها مرة مرة ولا رجليها لي فاشلين عليها ولا لهادشي لي كيقول ] :

أش كتخربق ، اشمن ولد خالة انا ماعندي عائلة ، شكون هاد الكيدار لي جايبو معاك ، خرج اجمال قبل منديرصباعي فودنيا ونجمع عليك الجيران ..

- جمال [كيضحك ] :

غوتي يحسابليك راسك مزالك فضالاص ، تغوتي غوتة وحدة يتجمعو الجيران ، هنا راه واخا تغوتي حتى تبحي حد مايديها فيك اتهناي ، مك كانت عندها ختها الى فخبارك اشريفة ، وهدا ولد خالتك جاي باغي حقو فداكشي لي خلات ليك مك ، وانا عاونتو مسكين ، عرفتي شحال وهو كيقلب عليك ..

- وعطا فلوس نيت غي باش يلقاك .. واخا حتى هو مݣرد ولكن الحاجة لي عندك ساوية الملاين هانية كولشي يدوز فوجه الپينݣة ..

- سيمون [بإنجليزية ، كيدور عينيه عليها من راسها لرجليها ] :

بلا صداع بلا وبلا منديرو شيحاجة لي ندمو عليها كاملين ، الحجرة لي عندك لي عطاتك ماماك ادخلي اتجيبيها تعطيها ليا انمشي بحالي وصافي ..

- مسيرة [عرفاتو كيدوي على حجرة الروبي لي عطاتها مها ، غير صباح كانت دايراها فعنقها ، عقل قاليها تحيدها وديرها فكرطونتها ] :

ههههه ، وصدقو الناس لي قالو هاد الاوروبيين ، ماعندهمش مع العائلة ومع صلة الرحم .. كل كيضرب على عرامو .. [مكانش عندها مع الإنجليزية بزاف فهماتو ولكن باش ترض عليه ماعرفاتش ] صفاء قولي ليه ولا قوليه انت نيت الشماتة ، بلي الحجرة بااااح واا بعتها ..

- جمال [بقا كيدور فعينيه شاف فيه بنص عين ونفس الوقت مزال مزير على سندس ، لي عقلها غير مع الموس لا يشرݣ ليها عنقها ] :

ݣالت ليك الحجرة باعتها ..

- سيمون [تبسم ببرود وشاف فيها ] :

انا ماشي حم/ار ، الحجرة شفتها فعنقك فالڤيديو لي تلاح .. كنعرف نفرز بين الاصلي والمزور ..

- مسيرة [موجه هضرتها لجمال ] :

قوليه الحجرة بعتها ، وفلوسها فرقتهم وبفلوسها شريت هاد الدار .. والى ماتيقش يدخل يقلب الدار الى لقاها يديها ..

- جمال ترجم ليه هضرتها ، ملامحو تبدلو من برود للبركان ديال الأعصاب ، حنكو ولا كولو كيترعد .. بزوج خطوات كان عندها جارها من شعرها لوه حتى كان ايقلعو من بلاصتو ، لثاني مرة كتعرض لنتيف فهاد النهار ، غمضات عينيها بجهد حيت قصحها .. داها وجابها بجهد ناطق من تحت سنانو :

تجبدي الحجرة ، ماتجبديهاش ندفنكم هنا ونرجع بحال ماعندي مانخسر ، فيييين هي الحجرة ؟

- كانت حاسة برايها فأي دقيقة تقد تطيح .. ولكن كانت كتقاوم مابغاتش تبين ضعفها فين عمرها ضعفات ، ديما هي القوة لي سايݣة خواتاتها ..

- راه قلت ليك بعتها ، دخل قلب .. كلامها طرجمو ليه جمال وزاد نطق :

مكتكدبش كنعرف مسيرة فاش كتكدب وفاش كتدوي بصح ، خلينا نمشيو بحالنا ..

- سيمون [ضحك بخبث جبد موس من جيبو ] :

عندها جوج كلمات تݣول فين الحجرة ، ولا ندفنها حية وماعنديش مشكيل .. فاللحظة لي كانو ݣاع العينين عليها ، كولشي كان خايف .. سكينة كانت كتسلت شوية بشوية ، كان عينيها على شخص واحد .. بالخف يديها مشات للڤاز ديال الݣبص لي محطوط جهة يدها ليسرا هزاتو ..

- بنسبة ليها ياربحة يا دب/حة ، مخاصهاش تفكر بزاف خاصها تغفلو .. الى بقات دايرة مع البال ايعيق بيها .. بالخف نزلات عليه راسو .. خلاتو يطلق من سندس ويطلق الموس من يديه شاد على راسو .. هزات الڤاز وضرباتو للمرة الثانية والثالثة .. بدون وعي منها خلاتو يطيح على ركابيه ، حتى طاح كولو ناعس وراسو سايل بدماي/ات ..

- فرصة لي كانت عند مسيرة خلاتها تدفع سيمون ..كتغوت على حر جهدها باش الناس يعتقوها .. الدفعة لي دفعاتو خلات الموس يطير من يدو ..

- الرجعة لي جا يرجع ليها ، نزلات عليه سكينة بالڤاز لراسو .. الضربة اللولة والثانية خلاتو يطيح حدا جمال .. صفاء كانت فحالة تشفي العدو كتبكي وتغوت ..

- سندس حتى هي ، من غير مسيرة لي كانت كلها كترعد كانت واصاة بيها للحد كتحس براسها صافي هادي الأخرة ليها ، مكانتش قادة تصبر مشات وجات مغمضة عينيها طايحة على طولتها مخلية البنات كيغوتو حداها ..

______________________

- فالكولوار .. واقفين بپيجامات ديال النعاس ، حالتهم كانت كتفي العدو .. سكينة ݣالسة فوق الكرسي حادرة راسها .. أما سندس وصفاء غاديين جايين .. جا نسيم هو وسارة داخلين حتى وقف عليهم ..

- نسيم [بصوت رزين ] :

ماتخافوش ، ماشي شيحاجة لي خايبة ، راه دواوهم وخداهم البوليس ..

- سندس [بتأتر ] :

انا بغيتهم يدخلو للحبس مايخرجوش منو ياربي على مدارو فينا وفختي .. علاش تعطلو علينا خويا نسيم عفاك دوي مع الطبيب حتى واحد ماعطانا راس الخيط ، من قبيلات بغيت نعرف ختي اش وقع ليها اشنو عندها ..

- نسيم [بإطمئنان ] :

مايكون غير الخير ، غير شوية ديال الصبر .. نسيت ماݣلت ليكم بلي سونا .. [قاطعو صوت رجولي قاصح جاي من لور ] ..

- فين هي ، فين هي ودويو فين هي ، ݣلتها ليها مكاتسنطش ݣلتها ليها ، فين هي ؟

- سندس [شافتو بحال الى شافت باها ، تلاحت ليه بين يديه كتبكي بحال درية صغيرة ] :

كاينة لداخل اكريم ، مازال مقالو لينا والو ، كانو ايقتل/ونا أخويا ، ماعرفت ختي مالها ، انت كبيب ايقولو ليك مالها عفاك أخويا شوف ختي مالها [كتنخصص بين يديه ] ..

- كريم [بصرامة ] :

كدوي عليها بحال الى مدخلينها لبيت الخطار ، صافي تبتي شوية انا جاي صافي [كيشوف ليها فعينيها البؤبؤ ديالو مكايتحركش ، حيدها من قدامو ومشا كيقلب على الطبيب ] ..

- كان بحال شي هبيل فهاد اللحظة ، ݣرام ديال العقل ماعندوش نهائيا .. منين ݣالها نسيم ، كان ݣالس فدارو كيخمم فكلامها لي لقاه كلو بصح ، كيفاش ايخسر بنت قلبو الاخت لي عطاها ليه الله .. واخا مكانتش من دمو ولحمو ، داكشي لي كان خاصو يكون فختو لقاه فيها هي ، مرض يلقاها فرح تكون معاه فاي حاجة كتكون حاضرة معاه ، كدير معاه حوايج لي مو وكديرهمش معاه .. فاش كظلام فوجهو كيلقاها هي ..

- كدير المستحيل اباش تخليه يضحك ويكون فرحان .. يجي هو بين ليلة ونهار يتبدل عليها ، فعلا هو غالط مكانش خاصو يدير هكا .. ماعرفش اصلا علاش دار هكا وشنو خلاه يدير هكا .. واش خيت عمرو بغا فخياتو ولقا الحب فأمينة ..

- ولكن هذا مكانش سبب ، خدا نمرة الأستوديو من البوسطر ، سونا ليهم وطلب نمرة مسيرة ولكن مابغاوش يعطيوها ليه ، وطاب نمرة نسيم عي لي عطاوها ليه من بعد إصرار منو ، سونا ليه وشرح ليه الوضع كلو .. ولكن فديك اللحظة بضبط جاه إتصال من سندس ..

- خلاه يقطع مع كريم ويدوي مع سندس ، تم فاش ساق الأخبار ومشا طاير لعندهم .. حتى جاو البوليس وجوت لومبيلونص عاد تفكر كريم ورجع سونا ليه عالمو بلي وقع .. خبر لي نزل على كريم بحال سطل دالما بارد .. خلاه يخرج طاير من دارو بلا عقل والالاف الاسئلة كيدورو فراسو ..

- كون جا فاللحظة لي كانو فيهم جمال وسيمون .. كانو هاد الساعة كيحفرو ليهم القبر لي غايتدفنو فيه ..

- غادي بحال المسطي وسط الكولوارات .. دايخ تالف باغي يغوت باغي يجدب .. حتى كيبان ليه الطبيب مشا نيشان لعندو موقفو ..

- انا الدكتور كرين نجيب ، عفاك واحد البنات عاد جابوها يحفانة ، مزال مقالو لينا والو ، الله يخليك ادكتور شنو عندها ..

- الدكتور : اه وي الحال لي جابوها شوية هذا .. الصراحة ادكتور كريم حنا شاكين فشي حاجة وخاصنا نتأكدو .. درنا ليها ليزانالايز .. غدا ايخرجو ونعرفو واش الشك ديالنا فمحلو ولالا ..

- كريم [بتخوف ولا بحال شي واحد راكبينو بزوج ] :

فاش شاكين مافهمتش ؟

- الدكتور :

شاكين عندها فقر الدم .. وكنتمناو مايكونش فقر دم حاد ويكون عاد فالمرحلة الأولى .. من خلال الهضرة ديال خواتاتها بلي هاد الاعراض بداوها هادي 3 شهور ..

- كريم [عينيه كيترعدو ، صوتو لي باين عليه الخوف وتوتر] :

اشمن اعراض ؟

- الدكتور :

الماكلة القليلة ، السخفة الدوخة .. إصفرار الوجه ، فقدان الوزن .. دغية دغية الواحد كيعيا ومكايقدش يدير جهد كثير .. المهم اتبقى معانا هاد الليلة ، وغدا منين يخرجو التحاليل انعرفو لي كاين .. عطاه إبتسامة ومشا ..

- رجع زوج خطوات اللور .. نازل بالعرض البطيء على الكرسي وݣلس ، حلقو كان كيزدح والحاجة لي كانت محبوسة نزلات سخونة من عينيه .. حاجة لي بسيطة عند البعض ، ممكن فقر الدم يكون عادي عند البعض .. ولكن هو لا ..

- مع مسيرة لا ، مامالفش كيشوفها ضعيفة كيشوفها بحال السيف فينما مشات كتقطع .. عمرها ماتشكات من شيحاجة ولا قالت ضارني ومضارنيش .. بالعكس حرمية صعيب يشوفها ناعسة فوق النموسية فالكلينيك لي عمرها فحياتها دخلات ليه ..

- دموعو بداو يسيلو بحال شي دري صغير مو مريضة .. شهيقو كان كيتسمع ولي شافو يقول يا مو يا مرتو لي داخل ماشي رفيقة عمرو بنت قلبو ..

- تحطات عليه يد ململاه مسولاه بقلق :

أش قالو ليك ؟ قالو ليك شيحاجة خايبة ياك ؟

- مع 8 ديال الصباح كانو كلهم فلاكلينيك .. من غير سكينة بوحدها ، كان خاصها ضروري تمشي للكوميسارية على ود واحد الورقة تسنيها ..

- سندس [تحت عينيها كان باين عليها السهير ، لونها مخطوف ] :

واش غادي نبقاو نتسناو بزاف .. بغينا ندخلو نشوفوها خلاص او ..

- كريم [ باين عليه العيا بحالهم ] :

غير شوية ديال الصبر ... جات عندهم الفرملية بإبتسامة مشرقة ولبسة فالزريرق باردة ..

- صباح الخير ، تقدرو تدهلو تشوفوها يلاه فطرات ..

- كريم : شكرا .. طارت صفاء هي وسكينة من حداه سابقينو .. ماشيين نيشان للبيت لي كانت فيه .. حلو الباب عينيهم مشات نيشان ليها .. متكية فبلاصتها ، دايرين ليها واحد البرة فالعرق عليها واحد اللاصقة بيضة ..

- شعرها مطلوق على المخدة .. كتبان عيانة وضعيفة عينيها كانو على السرجم لي كان حداها .. كتشم الهوا والغربي لي داخل منو .. غير تحل الباب دورات راسها بشوية وترسمات إبتسامة على وجها ..

- سندس [مشات عندها بجرا .. شادة ليها فيدها ، باست ليها راسها ، وبصوت طاغية عليه نبرة اللهفة والحنان ] :

كيف بقيتي شوية ؟

- مسيرة [بصوت عيان ] :

الحمد لله شوية ؟ وانتوما كيف بقيتو .. ماخلاونيش لبارح نشوفكم فاش فقت قالو ليا مشيتو .. شنو دارو مع هادوك ؟

- صفاء [بخوف ] ؛

ختي واش حنا دابا غير فهادوك ، حنا فيك انت كيف بقيتي واش شوية لاباس كيف كتحسي ؟

- مسيرة [بنفس الإبتسامة ] :

الحمد لله ، ماعندكم مناش تخافو شوية ديال العيا وصافي .. عنداكم تقولوها لدار راكي عارفة مي فيها سكر يمشي يطلع ليها .. ماقلتوش ليا شنو درتو مع هادوك .. وشكون جابني لهنا ؟

- سندس : شدوهم اختي ، راهم مشدودين .. غير تجرحو فراسهم وصافي .. نسيم هو لي سونا لومبيلونص وهي لي جابتك لهنا ، وهو لي تكلف بالبوليس والباقي ..

- مسيرة [هزهزات براسها ] :

وسكينة فين هي ؟

- صفاء : مشات تسني اواحد الورقة فالكوميسارية وغادي تجي ..

- حطات يدها على الحديدة ، باغية تهز شوية باش تقاد فالݣلسة ، علات عينيها جات فعينيه واقف حدا الباب .. مشافتوش فالاول ، كانت شافت غير خواتاتها .. تفاحة أدم عندو كطلع وكتنزل .. دليل على التوتر ديالو ، عينيه مرة يشوفيها مرة يشوف فسقف .. معارف يدخل ولا يرجع ولا شنو يدير كان مخنوق فعلا واصلة بيه لعظم ..

- مسيرة [تنهدات تنهيدة طويلة] :

متخافش مافياش شيحاجة كتعدي ، غير دخل الى بغيتي دخل .. بلاما يزيد كلمة وحدة تقدم لعندها بخطوات بطيئة متاجه لجيهتها .. جارها من راسها لصدرو معنقها ، مزير عليها بحال شي بيبي متعلق بالام ديالو ، معنقها ودموعو نازلين ..

- كريم [من وسط دموعو وبصوت رجولي مكسور ] :

عمرك مزال ماتعاودي هاد الضحك الباسل .. معامن تشاورتي حتى مرضتي ؟ معامن تشاورتي حتى مكتاكليش ومكتهلايش فراسك .. بقاي تشاوري انت ماشي ديال راسك اشريفة ..

- مسيرة [ بضعف] :

كريم رجوع لله .. خنقتيني خليني انتنفس ، الى بقيتي على هاد الحال راه انت اتكون سبابي .. بعد عليها بشوية ، مبعدة ليها رجلها وݣالس حداها شاد يديها بزوج حاطهم فكفوف يديه ..

- كيكتحسي مزيان ، خاصك شيحاجة كضرك شيحاجة باش كتحسي ؟

- مسيرة [ بإستغراب] :

كريم راه غير سخفت ماشي ولدت ، رجوع لله هاد الحمق هدا ..

- كريم [ بنبرة لوم] :

انا السباب ياك ، انا لي وصلتك لهادشي انا مانسواش والله منسوى ، كيفاش ضربت عشرة ديال عمر فزيرو .. ونسيت لي بيناتنا وبعدت عليك متجاهلك ومخليك مامسول فيك لا كيف كيتحسي لاواش انت مزيانة ، سمحيليا امسيرة ضربيني ديري لي بغيتي غسر سمحيليا هالعار [ كيبوس ليها فيديها ]

- مسيرة : وصافي صافي اكريم المسامحة حتى انا غالطة وصافي اولد قلبي ، تشهيت الطيحان مشويين ..

- كريم [ هز راسو مخرج عينيه فيها ] :

أشناهو ؟

- مسيرة : تشهيت الطيحان .. تدق الباب وقاطعهم الطبيب لي كان هاز فيديه واحد الملف فيها وراق بإبتسامة :

صباح النور لاواه اليوم مزيان ..

- مسيرة : الحمد لله أدكتور ، أمضرا واش كولشي مزيان واش ممكن نخرج ؟

- الدكتور : لا مزال ..

- كريم [بقلق] :

علاش ادكتور ياك لاباس ؟

- سندس [بخوف] :

شنو فتحاليل واش شي حاجة خايبة ؟

- الدكتور [بإبتسامة مطمئنة ] :

غير بشوية عليكم ، خليوني نكمل غير كلامي ... مغاتخرجي من هنا حتى نسولك شي اسئلة وجاوبيني عليهم ، كيف كانت الماكلة ديالك هاد الشهور الأخيرة ؟

- مسيرة [بصوت طابع عليه نبرة الخجل ] :

وهو الصراحة مكناكلش مزيان ، الى فطرت مكنتغداش ومكنديرش كسكروط والعشا شيحاجة خفيفة .. الاكثرية فكسكروط كنشرب اقهوة كحلة .. علاش ؟

- الدكتور [هزهز براسو ] :

داكشي لي ݣلت حتى انا ، وشك ديالنا كان فمحلو عندك فقر الدم .. [شاف نظرات الخوف فعينيهم وكمل بزربة ] بلا خوف الحمد لله ماعندهاش فقر دم حاد ، عندها فقر دم ناتج عن نقص فالحديد وبعض الفيتامينات ..

- وهادشي نتيجة على عدم توازن الاكل وشرب القهوة بكثرة .. فقر الدم راه فيه انواع كثيرة كاينة لي وراثي وكاين لمكتسب ... وكاين لي كيبقى دائم ولي غير دايز ..

- صفاء : ومسيرة ادكتور عندها لي دايز ولا لي دائم ؟

- الدكتور [بنفي ] :

الحمد لله ماعندهاش لي دائم ، ولكن خاصها نظام غدائي اي حاجة فيها الحديد تاكلها .. وتاخود الدوا والڤيتامينات ..

- مسيرة [بتساؤل] :

وطيحان ادكتور ناكلو ياك .. ؟ شافيها كريم بمعنى هادشي لي هامك ..

- الدكتور [ضحك ] :

وي تاكليه .. أنا غانقيد ليك النظام الغدائي لي تاكليه ، وشنو الماكولات لي تبعدي عليهم حاليا ، ونكتب ليك الدوا والفيتامينات تاكليهم بنظام .. ممنوع تهاوني داكوغ ؟

- كريم [بصرامة ] :

كون هاني ، انا غاݣابلها ..

- مسيرة [تنهدات تنهيدة طويلة] :

إيمتا نخرج ادكتور ؟

- الدكتور [شاف فساعتو ورجع شاف لعندها ] :

واحد ساعتين هكاك وتقدي تمشي .. يلاه رتاحي ، خلاهم وخرج ..

- كريم [خنزر فيها ] :

سمعتيه ولالا ، وبقاي تسنطي شوية وتبتي .. قاطعهم الدقان فالباب ، دخلات امينة كطل براسها هازة مشموم ديال الورد ..

.. قربات لعندهم وعلى ملامحها إحراج وتوتر .. :

على سلامتك ، لبارح قالي كريم داكشي لي وقع الله يشافيك ويعافيك ..

- مسيرة [هزهزات براسها ] :

أمين ياربي ، ربي يخليك عدبتي راسك ..

- أمينة [حطات الورد حداها فوق الطبلة ونطقات بإبتسامة حنونة وصوت كلو رقة ] :

بالعكس ، مكاين حتى عذاب ، كنت انجي لبارح ولكن كريم قالي بلي راك ناعسة ومزال مدخل عندك حد ، غير فقت الصباح فطرت وجيت .. صاڤا كيف كتحسي مزيانة ؟..

- مسيرة : لالا الحمد لله ..

- أمينة [قوسات حواجبها ] :

غير سمحيلينا وصافي والله العظيم ، وقيلة حنا السباب فهادشي ..

- مسيرة : اويلي هادشي ديال الله ، انتوما مادرتو والو ..

- كريم [شاف فأمينة غمزها باش تسكت ] ..

- أمينة [بإنفعال ] :

علاش كتغمزني ، علاش ماشيش انت السباب .. ونكر قول ماشي انا ، صحبة ديال 10 سنين جيتي فشهورة تبدلتي عليها ، ونكر نكر .. انتوما اصلا الرجا/ل مافيكمش تقة نهائيا ..

- كريم [بإستغراب ] :

دابا انا شنو درت ، واش بايتة كتحلمي بيا ، جايا شاعلة على الصباح .. الناس كيخيطو بخيط بيض انت جاية تكحليها ..

- أمينة [خرجات فيه عينيها ] :

مالي كذبت ، اصلا بنتي على حقيقتك .. كيف درتي مع مسيرة ممكن دير معايا انا ، شكون قالي تشوف شي وحدة وتبدلني ، ولا تخوني مثلا راه كولشي ممكن .. راه قاليك لي كتأمن لراج/ل بحال الى امنات للما لي فالغربال ..

- مسيرة [كضحك ] :

كريم ، عقلتي فاش كنتي تقولي منرتابط بشي وحدة حتى تبغيها ، وانا والله حتى حبيت امينة [كضحك] لي فقلبها على لسانها بحالي عجباتني ..

- كريم : عاجبك الحال ..

- سندس : وصراحة تقال عطاتك علاش كتقلب ، عبرتي عليه .. ربطي من دابا باش تلقاي ماتسيبي ..

- أمينة : والله امسيرة معمري قلتليه مايعيطش ليك .. ولا عمري دخلت فعلاقتكم باش متديش عليا نظرة ماهياش .. انا فاش عاود لي عليكم ، بالعكس عجباتني صداقتكم .. بقيت كنقول ياريت كون كان عندي صديق حتى انا لي يوقف معايا فالاوقات لي كنت محتاجة علامن نحط الراس ..

- مسيرة [هزات راسها ] :

ماوقع والو ، نساي .. الله يفرحكم بزوج .. اصلا كريم عارضنا ايجيب لينا دوارة نديرو الشوا ..

- كريم [شاف فيها هاز حاجب ومنزل الثاني ] :

يلاه ݣلتي بغيتي طيحان ، دابا رضيتيها دوارة ؟

- مسيرة [رجعات راسها اللور متكية كتشوف فيه بعياء ] :

وبالي قبل لنغير رأيي ونصدق طالبة ليك حولي مشوي .. راه انا وݣانتي ..

- كريم [وقف ، باس ليها راسها ورجع اللور ] :

انا نكمل الإجراءات باش تخرجي ..

- مسيرة : شفتك بستيني غير أنا ، دابا راه كل حاجة درتيها معايا خاص ديرها مع أمينة ..

- أمينة [بإبتسامة حنونة] :

الله يجيب من يقول الحق ..

- كريم [هزهز براسو ، مقرب من امينة طابع قبلة على جبينها] :

بقاو ليا على خاطر خاطركم ، انا مشيت شوية ونرجع .. خرج كريم يكمل الإجراءات وخلا البنات مع مسيرة ..

______________________

- خرجات من الكوميسارية بعدما سنات الورقة لي كان خاصها تسنيها ، عطلوها كان عند بالها غير تسنيها وتمشي بحالها .. دوزات لسانها على شفايفها ، كان فيها العطش .. دقات قلبها كتحس بيهم مجهدين وسخفة شداها ، خرجات من الدار بلا فطور .. مامالفاش ليها ديما كتفطر فالوقت وتشرب دواها فالوقت ..

- هزات راسها فسما ورجعات شافت على يمينها وشمالها باش تقطع ، دازو زوج طوموبيلات رمات الخطوة الأولى والثانية قاطعة الشانطي ، كان خاصها تاخود واحد الطوالة .. باش دور لشارع لاخور الى بغات تاخود طاكسي لكلينيك ..

- كانت كتحس براسها ماشي نورمال ، غازية وكتقلب على حانوت بعينيها ، بغات تاخود قرعة ديال على الاقل غير تشرب ، وتشوف تاخود نص خبزة وفرماجة تاكلهم تلوحهم لكرشها ..

- ولكن لسوء حظها جات فشارع لي فيه غير ليبوتيك ولاجونص إينوي ولبنكة .. وصلات للقنت ديال الشارع وضارت وقفات شافت على يمينها وشمالها ، وغادي قاطعة .. فاللحظة حسات بدوخة وضبابة غشات عينيها ... خلاوها توقف فوسط الشانطي ، عينيها مفيكسيين فالارض ، دماغها مكانش خدام كانت كتشوف الضبابة ، ودقات قلبها لي تجهدو وسخفة ..

- حتى من الكلاكسون ماسمعاتوش وحتى من الطوموييل لي فرانات عند رجليها مداتهاش فيها ، بقات على داك الحال ، بغات غير شي حيط تشد فيها ولا شيحاجة تسند عليها .. مداتهاش فصوت الرجولي لي كان عند ودنيها كيسولها ، ولا اليد لي شدات ليها فدراعها .. يد لي كانت بحال طوق النجات بنسبة ليها ، شدات فاليد بلاما تشوف فمولاها كتردد بعياء :

بغيت نشرب ، غادي نطيح .. شدها من يدها ويدو لوخرا شد بيها ظهرها .. كتسمع فسميتها كتردد من فمو ولا جهد باش تهز راسها مكاينش ، كتبغي تهز عينيها كتجيها الدوخة .. بقا غادي بيها حتى ݣلسها فوق طروطوار ، راجل لطوموبيلتو .. واخد منها قرعة ديال الما ورجع عندها ..

- فتح القرعة وهز ليها راسها بشوية كيشربها .. شربات وحسات براسها روات العطش ديالها .. هزات فيه عينيها باش تشكرو ، عينيها اللوزيتين جاو فعينيه لي نفس لون عينيها .. عاقد غوباشتو وعلى ملامحو علامات الإستفسار والقلق ..

- سراج [بصوت رجولي غارق ] :

شوية مزيان دابا ؟ باش كتحسي ؟

- سكينة [لسانها تقال عليها] :

فيا الجوع ، فيا السخفة خاصني ناخود للدوا ..

- سراج : واخا [شد ليها فيديها موقفة ، غادي بيها لطوموبيلتو .. حل ليها الباب ودخلها بشوية داير ليها السمطة ، سد الباب عليها وضار للجهة لي حدها ركب وديمارا مكسيري ] ..

_______________________

- فالقهوة ، ݣالس مقابل معاها .. مناظرها بعينيه ، كيسكانيها حتى سلات ماكلتها ، خرجات تنهيدة طويلة منها ، ساست يديها ومسحاتهم ، خدات ساكها حلاتو وجبدات منو بكية ديال الدوا .. حلاتها وخدات منها حبة ، دارتها ففمها وشربات عليها الما ..

- سراج [بإطمئنان وبصوت رجولي باح ] :

شوية ؟ كيكتحسي دابا ؟

- سكينة [هزهزات براسها وبإبتسامة إمتنان ] :

الحمد لله ، دابا مزيان حسن من الاول ، مزال شوية ديال السخفة ولكن دابا تمشي ..

- سراج [هز براسو ] :

واش كيوقع ليك هكا ديما ولا غير مؤخرا ؟

- سكينة : من نهار دخلت الحبس ولا كيوقع ليا هكا ، داكشي باش وليت كناخود الدوا ، دوزت ولقيت عندي السكر ..

- سراج [بلع ريقو وتبسم ليها ] :

عادي ، السكر دابا ماخطا لا كبير لا صغير ، وليدات عندهم 3 سنين وفيهم السكر ، الحمد لله انت كتاخودي الفنيد اما كاين وليد صغير ، مزال معارف والو فدنيا وكيدݣ لانسولين ، ودايرين ليه والديه الريجيم ، ممنوع عليه الحلاوة ... وهو مسكين معارفش علاش مكايكلش الحلوة بحال ݣرانو وتݣادة ديالو ..

- اما لي جاه السكر وهو كبير ، راه بعدا دوز طفولتو ، كلا لي حبات خاطرو ولي تشهات خاطرو ..

- سكينة [هزهزات براسها وهي كتسمع لكل كلمة ݣالها وخرجات من فمو ] :

عندك الصح ، ماكدبتيش فهادشي ، انا مزال راه اليوم حرقت الضو الخضر وخديت عصير الليمون حلو ..

- سراج [برزانة وتقالة ناطق بحروشية وعينيه مزال عليها ] :

هاد المرة دازت ، ماتزيݣزاݣيش الݣاورية ، تبعي الريجيم ديالك كيما هو ، وشوية ديال الرياضة مرة مرة ..

- سكينة [هزات ليه براسها ] :

ضروري ، نمشيو ؟

- سراج : وي يلاه ..

- فطريق ..

- سراج [ عينيه على الطريق ] :

يحسبلي مسيرة بوحدها لي كاينة فكازا !!

- سكينة [ عينيها على الطريق] :

لا جينا كاملين ، البنات كيقلبو على خدمة .. صفاء لقاتها عند واحد السيدة ، مسيرة راه اتكون شفتي تصاورها ..

- سراج [ هزهز براسو] :

وي شفت .. وانت ؟

- سكينة [ شاف فيه ورجعات كتشوف جهة السرجم عينيها على الطريق] :

مزال هاد الساعة ، فهاد الارض السعيدة صعيب وحدة بحالي تلقى خدمة ، مزال سندس عندها إمكانية تلقى ، ولكن انا ديجا مشدودة فالحبس صعيب بزاف ..

- سراج [ بصوت حرش بارد ] :

ماشي بضرورة تݣولي راك ديجا مشدودة ، بنادم اش مشا ليه تشدي ولا متشديش ] :

مكنحملش نكذب ، كنبغي نجي لبنادم نيشان .. وانا ماعنديش إكسبيريونص ، عمري خدمت عند شي واحد .. فايت خدمت فبوتيك مرة وحدة وخرجت ماكملت معاهم حتى سيمانة .. اغير خالتي الله يرحمها لي كانت كتصرف عليا ... نهار توفات وراها تشديت ..

- سراج كان كيسمع ليها وساكت ، حتى قربو لكلينيك .. وقف طوموبيلتو ودار عندها كيشوفيها بإهتمام .. برزانة وملامح جدية :

تبغي تخدمي عندي ؟؟

- سكينة [هزات حجبانها بتساؤل] :

عندك ؟ فين ؟

- سراج : فالكلوب ، ومنها ضربي جوج ديال طيور بحجرة وحدة ، هانتي خدمة وكديري سبور فابور ..

- سكينة [بتساؤل] :

ولكن شنو غادي نخدم ؟

- سراج [هز تيليفون ديالو مدو ليها ] :

سجلي نمرتك ، نشوف البلان ونسوني ليك ، خاص غي نتي تكوني باغية تخدمي ..

- سكينة [شدات من عندو التيليفون بدون تردد] :

وانا علاش جيت لهنا غير باش نخدم ، وماعنديش إشكال فاشما كان ..[رجعات ليه التيليفون ]

- سراج : مزيان تفاهمنا ، رضي البال لتيليفون فأي وقت انسوني ليك ونعلمك بلي كاين سيري دابا ..

- سكينة [بابتسامة إمتنان] :

شكرا بزاف على كولشي ، بسلامة ..

- كتفى حرك ليها راسو واض ليها إبتسامتها بإبتسامة خفيفة مقوس حواجبو .. غير نزلات من طوموبيل سدات الباب ، ديمارا ومشا ..

__________________

بعد كل جملتين كان يتوقف ليقول لها :«أطمئني».

كأنه يعلم أن الخوف هو شعور دائم لديها، ليس مجرد حالة تتطلب وقتًا قصيرًا وتنتهي .. لذا كان يعلم أنه كي يكسب ثقتها .. عليه أن يطمئنها ويُشعرها بالحماية.

- البالكو ديال الكوزينة محلول ، خارج منو ريحة الدخان ديال القتبان .. ريحة الشوا خارجة لعند الجيران ، مجموعين كاملين فصالون ، سكينة سندس مسيرة صفاء ، معاهم أمينة ونسيم ومراتو لي جاو يطلو على مسيرة ..

- سارة [بإبتسامة ] :

وبراي خلاص الفنانة ديالنا ، خليتي حتى قرب يخرج الكليپ ديالكم ومرضتي حشومة ..

- سندس [عينيها على ختها ] :

مسيرة ݣاعما تخافي عليها ، مكتخليش المرض يأتر عليها مكتحملش تبقى ناعسة .. كانت الى مرضات بالحلاقم وكتكون فيها السخانة ، كدير ليها ماما البطاطا لنواضرها ، الغد ليه كتلقايها كدور فدار بعكافتها وبالبطاطا ديالها هههه ..

- ضحكاتهم كانت مسموعة ..

- مسيرة : بااز انت هي حماد الفرشة ، وراه نست مكنحملش نبقى اناعسة .. كيطيبو ليا جنابي ..

- كريم [راجع من الكوزينة هاز طرف دالخبز ديال الشعير داير فيه طرف ديال الطيحان مشوي مع البصلة خضرة ] :

هاكي كولي ..

- مسيرة [قوسات حواجبها ] :

الله أخويا مالي غادية لݣوانتنامو ، طروفة دالبصلة قداش وهاد الخبز كثير ..

- كريم [خنزر فيها تخنزيرة كون كانت قرطاس كون قت/لاتها] :

كولي ، البصلة مزيانة لفقر الدم .. براكة من تغبين .. سلمات امرها لله وخداتو من عندو ..

- نسيم [وقف] :

يلاه اسيادنا خليناكم على خير .. خاصنا نمشيو

- مسيرة [فمها عامر ] :

مزال الحال ، خليكم ..

- سارة [بإبتسامة ] :

منصيبوش ، غدا إن شاء الله خاص نوض بكري ، عندي واحد الغرض خاص نقديه فطنجة ، خاص نوض بكري على سلامتك أ ماشيغي .. تصبحو على خير ..

- تلقاو الخير ، كان هاد الجواب من عند البنات ..

- كريم : انمشي معاكم للباب ... وصلهم حتى لباب موقف نسيم :

بغيتك غير نعتاذر على لي وقع داك نهار .. كنت معصب شوية ..

يتبع...