روبي ڤيريدجو الجزء 20 والأخير

- اول ما خطوات داخل القاعة كانت الموسيقى خدامة وليكوپل كيشطحو ، عينيها مشاو ليه نيشان وهو حاضن هناء بين يديه ، مبسم فوجها كيشطحو وكيدويو ، بحال الى ماشي هو لي كان معنقها يلاه دابا ..

- هزات حجبانها بإستغراب وصدمة .. البرود طلع ليها مع رجليها حتى لراسها ... قلبها كيضرب غمضات عينيها كتحاول ما أمكن تكالمي راسها ، مابغاتش دير شي تصرف لي غادي تندم عليه .. وقف عليها أورانوس مقاطع نظراتها ..

- النجمة ديال الحفلة تبغي تشطح معانا ولالا ؟

- مسيرة [عينيها عليهم ، رسمات إبتسامة على شفايفها وشافت فيه ] :

الى ماشطحتش معاك انت معامن غادي نشطح ؟

- حطات ساكها على الطبلة لي كانت حداها سكينة وسراج بزعاف ، وشدات فيدين أورانوس .. توسطو القاعة شادها بين يديه ، بطولتو او وسامتو ..

- كان مراقبهم بنص عين ، متبت متصنع الهدوء .. عاطي ودنيه لهناء وعقلو مرفوع .. عدسات الصحفيين كانت دايرة خدمتها مع الحضور ..

- سكينة : غير الله يحفظ مع الله يستر ، شفتي على شوفات كيديرو فبعضياتهم ؟

- سراج : غير كايبان ليك ... صاحبتك كتبان ليا صافي ضبرات على راسها .. هاد المرة طيحاتو يوناني ..

- سكينة [خنزرات فيه ] :

مسيرة ماشي هكا ، ياكما يحسابليك هي من داك النوع لي ضرب طيح ، مسيرة الى بغات صعيب تنسى لي بغاتو ... شوف انت ولد عمك ، لي داك نهار مجرجرها ودابا ݣالس يشطح ليا مع ديك المتحول ديال هناء ..

- سراج : دابا مالك كتغوتي ياك لاباس ؟

- سكينة [خنزرات فيه ] :

شوف انت ، راه حالك مابقاش عاجبني ، هاد خيتي شفتها دات ليكم العقل كاملين ، شوف اسراج انا راه غير هبيلة والواحد يموت على بلادو او ولادو .. قسما بالله حتى نضرب ليها أكبر طر عرفاتو البشرية نبرد فيها جنوني .. وأنا علمتك ..

- سراج [مغوبش] :

واش الهرمونات عندك مخربقين ، واش قربات تجيك ولا كيفاش ..

- سكينة : تجيك فراس .. بنادم يصعرك ويقوليك واش قربات تجيك [هزات كاسها دالعصبر نزلات عليه كامل ، دايز سرباي ، خطفات ليه كاس من صينية ونزلات عليه ] بنادم تشحفوه وتخرجوه على طوعو ..

- ماجاوبهاش بقا مقابلها ومقابل فعايلها ..

- حبسات الموسيقى وبعدات مسيرة على أورانوس ملتاحقة هي وياه على عصام والبقية ، جا الوقت ديال العشا تجمعو كاملين على طبالي لي كانو نقادين على حقهم وطريقهم ..

- كل وحدة كانت مع راجلها من غير مسيرة لي كانت مابين أورانوس وعصام ، اونفاص معاها جلال حداه هناء .. بداو فالوليمة ديالهم كانت كتفادا ما أمكن تجي عينيها فعينيه ..

- أورانوس [مد ليها كاس دالعصير ] :

انت كيعجبك عصير الحامض ، راه خفيف ماتقيلش .. كيفما كاتبغيه ..

- هناء [بصوتها الأنثوي ] :

شوفتي يا مسيرة أورانوس واخد بالو بأدق تفاصيلك بتحبي إيه وبكرهي إيه ، سينين واحنا معاه عومرو مخاد بالو من حاݣة بتعتنا ..

- مسيرة [بإبتسامة صفرة ] :

براكة غير انت لي راضة البال للكبيرة والصغيرة ، مايحتاجش هو يرض ليك البال ..

- تبسمات ليها وبدلات الموضوع .. كانت فكل مرة كتهز راسها فيهم كتلقاها خاشية راسها فيه وكتوشوش وكضحك .. يدها ولات كترعد عليها ماكرهاتش تنوض تنتفها ..

- عصام [قرب ليها وبهمس نطق ] :

تكالماي ، كتباني ليا شوية وتنوضي تنتفيها ، منين فيك هاد النفس كلها لاش مشيتي وخليته ..

- مسيرة [هزات فيه راسها ونطقات من تحت سنانها ] :

داكشي لي غادي نديرو ليها ، إلى ماسكتيش اعصام غانوض ونزيدك عليها ونجمعكم بزوج .. حسن ليك سكت ودخل سوق راسك ..

- هناء : الأكل المغربي تحفة ، انا بنسبة لي هو نامبر وان بالعالم العربي .. لازم تدوق دي يا جلال حلوة جدا ..

- بلاما تحس قاطعتها :

جلال مكايكلش الحوت المخلل كايدير ليه الحموضة ديال المعدة .. غير كولي انت بصحتك وراحتك ..

- ݣاع لي كان فطبلة هزو فيها راسهم ، شي كيشوف شي .. هز عينيه العنكبوتية فيها ببطئ شديد .. واحد كيغمز لثاني ..

- هناء [تقرصات صرطاتها وتبسمات ] :

متهيئ لي إنك بتعرفي جلال جدا ، انت بتعرفي كل واحد هنا ولا إيه ؟

- سندس [قاطعاتها ] :

اه انت بوحدك لي برانية بيناتنا سبحان الله ، حنا كلنا هنا عائلة وصحاب وكنعرفو بعضياتنا وكنعرفو على كل واحد فينا اي حاجة ..

- هناء [كدور لسانها وسط فمها ، تبسمات إبتسامة مصطنعة] :

لا بعد كده مش حبقى غريبة ، انا ناوية إنو اعدي الأݣازة بتعتي هنا في المغرب .. وكمان جلال عايز يفرݣني على بيتو في البلد .. وقالي إنو في عرس مغربي متهيئ لي عرس هلال ، وانا من زمان نفسي أحضر لعرس مغربي ..

- سندس [خنزرات فهلال ، قربات لودنيه من تحت سنانها ] :

قسما بالله العظيم ، وتحضر هاد أم سيسي لعرسي ، حتى نلبس ليك خنشة كحلة بالله .. انا علمتك ..

- مسيرة [تبسمات ببرود ، عكس البركان لي نايض عندها الداخل ] :

اتعجب الفيرما ، انتوما كتقولو البلد ، اتعجبك بزاف .. حتى دارو كتحمق ، البيوت الواسعة .. والكوزينة ، والبݣر والخرفان .. والعودان .. حتى الپيسين لي عندو ورا الظار ايعجبك .. ݣوليه يوريك حتى لاتوليي لي عندو ..

- سراج [بإستفسار ] :

اشمن أتوليي ، علاش انت عندك شي أتوليي ؟؟

- جلال [عينيه عليها ، ببرود تبسم وشاف فولد عمو ] :

واحد لاتوليي كنجمع فيه الكيسان القديمة .. مديرش فبالك .. رجع شافيها وتبسم بنفس البرود ، بحال الى كيݣوليها باغية تستفزيني مغاتݣديش ، جلال لي كان يشععل على أي حاجة ولا كيتحكم فراسو ..

- هناء : انا متحمسة أوي ..

- سندس : انا بغيت سوسة دخل ليك بين جلدة والعظم تبقاي اتكري إن شاء الله ..

- هلال [بتساؤل] :

حبيبي شنو ݣلتي ؟

- سندس : نتݣل انا نتݣل ، ايمتا دوز هاد الليلة خلاص ..

- كتاسحها البرود ، كتحاول ما أمكن تشتت الإنتباه ديالها بين عصام وأورانوس ، سلاو العشا وجا الوقت لي المدعويين يمشيو .. خرجات قبل منو مخلياه وراها ، طلعات فطوموبيلتها لي جات فيها ، وشدات الطريق لدار .. تبعاتها سندس مع هلال ، أما هو غير شافها مشات .. خلا هناء وراه وطلع فطوموبيلتو ..

- دورات راسها تقلب عليه لقاتو طار .. ماعجبهاش الحال وماحملاتش راسها ، كان عند بالها بلي غادي يوصلها ولكن توقعاتها تضربو ليها فزيرو ..

______________

- كيفما جات معاه ، رجعات معاه .. الطريق كلها وهو ساكت على غير عوايدو .. مامالفاش ليه من خلال هاد الأيام لي كانت كتشوفو فيه الهضرة بزاف عكس دابا ، حبس الطوموبيل قريب من دارها ، مادهلش للداخل .. سكت الطوموبيل وشافيها وهو باين عليه الجدية :

صفاء ، بغيت ندوي معاك فواحد الموضوع ..

- صفاء [بإستفهام ] :

الله يسمعنا خبار الخير ، داكشي باش الطريق كلها وانت ساكت .. ياك لاباس ؟

- توفيق [بجدية على عكس عوايدو ، حك راسو بحال الى كان متردد ] :

انا عارف بلي مابديناش شي بدية مزيانة ، او وقعو بيناتنا بزاف ديال الحوايج لي خايبين ، يݣد تفكير ديالي كان فشكل ، حيت معاشرتش بزاف ديال الناس .. حتى ولا كيجيني مولشي بحال بحال ، ولكن الصراحة حسيت بلي تبدلو فيا بزاف دالحوايج ..

- من نهار دوينا أخر مرة ، شحال من حاجة زوينة كتاشفتها وانت السباب ، صفاء منكدبش عليك الى ݣلت ليك وليت كنحس بشيحاجة من جيهتك .. وماكرهتش تكون بيناتنا شيحاجة ، ماتفهمينيش غلط ماشي شيحاجة لي خايبة ..

- شيحاجة لي زوينة بحال لي بين هلال وسندس ، وبحال لي بين سراج وسكينة .. انا مغاديش نبزز عليك غير هو فكري مزيان فهادشي ..

- صفاء [كانت كتسمع ليه بأني وهدوء ، هزات فيه راسها وتبسمات ليه ] :

شوف توفيق سمعني ..

- صفاء [تنهدات وستأنفات كلامها ] :

مغاديش نكذب ونقوليك بلي مزال مكنحملكش هههه ، هاد الايام لي كنتلاقاو فيها كتاشفت فيك حوايج زوينة وعزيز عليا ، هادي مغاديش نكدب فيها ، ولكن باش تكون بيناتنا شيحاجة كثر لا ..

- توفيق [غوبش ] :

وعلاش ؟

- صفاء : توفيق ، مابغيتكش تقلق مني ، انت راه مكتبغينيش انت غير جيتك مختالفة على البنات لي عرفتي ، الى قبلت تكون بيناتنا شيحاجة غير غادي نظلم الصداقة لي تكونات بيناتنا ، حيت اترجع لعوايدك ولكترت البنات ونصدقهم منوصينها وشي مايبقى يحمل شي ، انا الانسان لي غادي نكون معاه ماشي انت .. ماشي كنهينك لا ..

- ولكن انا بغيت يكون معايا شي واحد لي كاپابل ، شي واحد لي نهار توقع شيحاجة ومايبقاش خدام يجيبها من فم السبع ، مايتكلش على دارهم .. يعرݣ عليها ويجيبها لدارو يكون حار وزمان محررو ..

- لي منكونش خايفة وانا معاه لا يمشي يخوني ، لا نكون مطمنة وناعسة على جنب الراحة .. مابغيتش شي واحد يكون متكل على إسم عائلتو ، كيما انا هادشي تعلمتو من با وخواتاتي .. بغيت حتى الانسان لي نكون معاه يكون هك .. والى مالقيتوش راه كنفضل نبقى بوحدي ..

- شفتي اتوفيق ، انا نفضل نتزوج بواحد بحال لي مخدمهم خوك فالفيرما وكيضربو تمارة ليلا نهارا ، وصداقي يجيبو ليا من عرق كتافو ويكون بسيط ، ونبنيها معاه طوبة طوبة ... ومنديش شي واحد لي من غدا الى ݣلس من الخدمة يخرجني انا نخدم عليه ولا يصرفو علينا والديه ... الحب أتوفيق أفعال أفعال ، ماشي غير هضرة ودايزة فهمتيني ..

- خاصني نمشي دابا ومتقلقش مني صافي [عطاتو إبتسامة دافية ، فتحات الطوموبيل ونزلات ، سدات الباب ، مع دارت ساكها على كتفها مع سمعات حس الروايض ، ضارت كيبان ليها مشا مكسيري .. تنهدات تنهيدة طويلة وكملات طريقها للدار ] ..

____________________

- من ورا ماسلمات على والديها وݣلسات معاهم ، 7 شهور وهي غايبة عليهم ... سلاو جماعتهم وطلعات لبيتها ، تجمعو الخواتات مع بعضياتهم ناقصاهم غير سكينة لي هلات بلاصتها ..

- سندس [ كتشوف فيها بشك ] :

انت دابا شنو ضارك ؟ مافهمتش ؟ قبل ماتجاوبهاش سونا ليهم تيليفون وكانت سكينة مسونية كاميرا فتيليفون سندس ..

- سكينة : بغيتو تجمعو بلا بيا الكلبات ، هاهايووو ..

- مسيرة [كتحقق فيها ] :

اشنو كتاكلي ؟

- سكينة : سيكوك ..

- مسيرة : سيكوك فنصاصات الليل فين هو سراج ؟

- سكينة : راهو فالبيت كيدوي مع واحد صاحبو داك يوسف ، المهم كنتو مجمعين بلا بيا اش كتݣولو ؟

- سندس : صاحبتك ، قاتليك علاش هناء لاصقة فجلال ، وهي مشات ورمات كولشي ورا ظهرها ، بغاتو يبقى يتسناها ..

- مسيرة : ماقلتش يتسناني ، متݣولينيش لي ماݣلتوش ..

- سكينة : وهو الصراحة من حقو ، السيد زوين بفلوسو خاصو ايهز صبعو على أي وحدة يلقاهم شادين الصف عليه ، صافي السيد خاصو يجمع راسو ويشوف حياتو .. راه السن ديالو خاصو يتزوج ..

- مسيرة [كتخنزر فيها ] :

اهاه ، شفتك اختي واقفة فصفو ، ايوا زوجيه أش كتسناي ..

- سكينة : وندويو بلوجيك أصاحبتي ، انت مشيتي بديتي حياتك على برا ، جايا راجعة فيدك واحد واشم مدخلاه علينا ، مالو ماعندوش نفس يبقى يتسناك ، جريتي عليه راه من حقو يبدا حياتو ..

- مسيرة : مع هناء ؟

- سكينة [بنفس البرود] :

وهناء الصراحة زوينة ، واخا مستفزة انا تبعد امن راجلي ، صافي وكايبان لي بلي عاجباه ومافيها مايتعاب الزين زينة وتبارك الله طايتها فنة ..

- مسيرة : بغيتي تقولي ليا بلي انا عود الند مافيا مايتشاف ياك ؟

- صفاء : سكينة ماقصداتش هادشي ، ولكن راه فعلا الغيرة ديالك ماعندها معنى ، ياك السيد بفمو عرض عليك الزواج قدامنا ، ولكن انت رفضتيه ..

- مشيتي بديتي حياتك من حقو يعاود يبني حياتو ويتعرف ويبغي ولالا أسندس ؟

- مسيرة [كتحاول تبرد على راسها ] :

أصلا شكون هادي لي غاتقبل عليه بديك العصبية لي فيه ، هادي لي اتكون معاه مغاتفوت معاه حتى نهار واحد غاتهرب كيما هربت أنا ..

- سكينة [ هزات معلقة من البلبولة دارتها فزلافة وزادت عليها اللبن ، كتصايب ليها سيكوك وكدوي ] :

وااا تعالج أحبيبتي ، مابقاش كيف كان .. علاش كون كان مزال عصبي اتشوفيه مبرد ديك تبريدة ..

- سندس : حلفي بالله ، شكون ݣالها ليك ؟

- سكينة : ݣالها ليا سراج ، أهو هضرتنا تبقى هنا ... فاش مشات مسيرة وبرا رجع كيتعالج على العصبية لي فيه ، انا كيبان ليا تعالج حتى من جهة هوسو لمسيرة ، منين ماعبرهاش فالحفلة وتصرف ببرود ايكون مابقاش كيبغيها ... شفتيه كيفاش عنقاتو هناء فاش يلاه دخل ..

- سندس : وياااه شفتها اختي ، بغيتك تشوفي فالايام ديال تصوير غير لاصقة فيه ، غدا تلقاي تصويرتهم بزوج فالمجلات وجورنال .. كيدوي عليهم الصغير والكبير ..

- حركت يدها الوحيدة لي كانت كتعبر على العصبية لي كتجس بيها الداخل .. كلامهم زاد جننها .. هزات تيليفون سندس ونطقات من تحت سنانها :

سيري عند راجلك ايكون كيتسناك تصبحي على خير .. قطعات عليها التيليفون ورماتو ، شافت فختها :

انت ايمتا عندك العرس ؟

- سندس [ببرود] :

تافقنا إن شاء الله سيمانة ورا العيد ..

- مسيرة : اممم مزيان ݣولي من هنا لزوج سيمانات ، هي هاديك باش غير نحضر ليك نضرݣ كمارتي من هنا حسن ليا ..

- صفاء : علاش مالكي ؟

- مسيرة : لا ماماليش ، غير منين خواتاتي زلاو واقفين فصف البراني ، فراه ماعندي ݣلاس هنا ، ندير الواجب ونحضر للعرس ختي ونمشي بحالي ..

- الله يرحم بيها الوالدين خليوني بغيت نعس عيانة ..

- سندس [ناضت بكل برود ] :

واخا تصبحي على خير ازين ديالي ومبروك عليك .. هزات تيليفون وعطاتها بظهر راسمة على وجها إبتسامة إنتصار ، ناضت صفاء بدورها باستها وخرجات تابعة ختها ، غير بعدو على بيتها وتكرشخو بضحك ..

- صفاء : ناري والله حتى بقات فيا ..

- سندس [بهمس] :

خليها مسيرة راه الى ماتحكات متعطيش ريحتها ، وبزاف عياتنا وناري الحجر كيتفرتت وهي راسها مابغا يرطاب ..

- صفاء : صافي ششش ، غادي تسمعنا ..

- توجهات كل وحدة فيهم للبيتها باش تنعس ، أما هي النعاس طار من عينيها ، كتقلب من بلاصة لبلاصة .. طار نعاسها وكانت معصبة لأقصى درجة ، الغيرة كتنهش ليها فقلبها .. زولات عليها الغطا وناضت غادي جايا .

- باغية دير شيحاجة ولكن ماعرفاتش شنو غادي دير .. هزات تيليفونها ، مشات لريپيرطوار كتبان ليها نمرتو .. :

مسيىة اش كتخربقي واش هبلتي ، بغيت ندوي مع شي حد اعباد الله معامن ، كريم اويلي حشومة ايكون ناعس .. لاحت تيليفونها وݣلسات شادة على راسها كتفكر ..

- خرجات للبالكو ، مقابلة مع النجوم .. تنهدات تنهيدة طويلة ، توجهات للكرسي جراتو ، ݣلسات مسرحة رجليها على الطبلة .. وجامعة يديها تفكيرها سارح غمضات عينيها ، وصوت البخوش كيتسمع مع هدوء الليل ، واهد الهدوء عكس مشاعرها المتضاربة .. عينيها غمضو وداتها عينيها غافلة على عيونو العنكبوتية لي كانو مراقبينها من الطوموبيل ..

- جوج ديال الطيارات هوائية متضاربين فبعضياهم شكون فيهم ايرضخ للثاني ؟ وشكون فيهم اينزل سلاحو وتكون المبادرة منو ؟ ..

- فالݣاراج ديال الڤيلا ، معلقين جوج صݣايط ديال الحوالة ، واحد ديال عباس والثاني ديال الحاج .. فالجردة ݣالسة سعاد مزندة المجمر كتشوي فالكبدة ، أما مسيرة كتغسل فالكرشة ، وسندس وصفاء كيسيقو الݣراج من الد/م ..

- مسيرة [لابسة ݣندورة فالموڤ وعاكفة راسها بزيف حياتي مع كلاكيطة ديال الميكة ] :

ديما كتلصقو فيا انا الدوارة نغسلها ، ماعرفتش شكون خاصو يغسلها انا ولا سندس ..

- سندس [ كتكرط ] :

انا اختي راني عروسة ، حشومة فحقي نغسل الكرشة ..

- معزوزة [ هازة واحد التسبيح ، لابسة قفطان جوهرة بالبيج مع شال وبلغة فرجليها ] :

عدها صح مالها كدبات عليك ، راه انت لي غاتزوجي انت لي خاص تعلمي لغسيل الدوارة فداركم قبل ماتمشي لدار راجلك .. البحوط المنقوب هو هذا ..

- صفاء [ بهمس ] :

واخا حجات لي فيها مايهنيها ..

- معزوزة [ خنزرات فيها ] :

وراني سمعتك ، كتقلبي عليا نجي نخشي ليك راسك فديك البطانة ديال الحولي ..

- مسيرة [ عينيها على داكشي لي فيديها ] :

عمي إبتسام مغاتجيش هي وعمي ؟

- الحاج : غدا إن شاء الله ، اليوم باغيين يعيدو اول عيد ليهم فدارهم ..

- عباس [ كيمسح على وجهو ، هاز فيديه فولات الحولي ، مدهم لسعاد ] :

الله يرضي عليك أسعاد شوي معاك هادو ، ديري ليهم العطرية ديالهم وشويهم معاك ..

- سعاد : حطهم تم حتى نسالي .. سلاو البنات التسياق ، ومسيرة سلات غسيل الدوارة .. مزيان دارتها فشبكة وخلاتها تسقطر ، هزات داك الما كباتو ودوزات على دوك الماعن التيد وجاڤيل ..

- قطعات سعاد الكبدة وزلݣاتها هي وشحمة فالقتبان ، كتشوي وتعطيهم .. قدامهم صينية ديال اتاي بالعلك لي وجداتو مسيرة ، مكاينش لي كيصرع أتاي قدها تحلف عليها صحراوية ..

- كياكلو ومجمعين على الحتيت والضحك حتى نطقات سعاد موجهة كلامها للسندس ..

- دويتي مع خطيبك على وديت غدا ؟

- سندس : اه قلتها ليه ..

- مسيرة [ بإستفسار ] :

علاش أشنو كاين غدا ؟

- سعاد : عارضين على دار هلال للغدا .. هادي قاعيدة فالعائلة عندنا ..

- مسيرة : أشمن عائلة اماما كدوي عليها ، انا بعدا عمري شفت عائلتك فين هوما عماتك وخلاتك حتى وحدة عمرها هزات تيليفون وسولات فيك ..

- سعاد : شفتيني أنا غير حايرة فيهم ، اسيمانة لي فاتت سونات ليا خدوج ، باغياني نطلبك على شي خدمة لولدها ، نهار باك خرجوه من الخدمة نبكي ونشكي ، سدات الباب فوجهي ݣاتليا ماعنديش ..

- رجعت بدموعي ، وصلات بيا كنت باغة نطلب الناس لي كنتلاقى معاهم فزنقة .. حتى انا قلت ليها مسيرة مكايناش وسديت عليها ..

- مسيرة : هي عائلة عريسك جاي .. أشنو غاديرو ليهم .. نجاة لي أطيب ولا أنت ؟

- سعاد : نطيبو بزوج .. الحلوة راه وصيت عليها غاتجيني غدا فصباح ، والماكلة انا ونجاة انتعاونو .. اللحم والبسطيلة ديال الدجاج ..

- مسيرة [هزهزات راسها ] :

مزيان ..

- معزوزة [بصوتها الباح] :

منها نيت تكون إبتسام هنا وادريس ، وتجي حتى سكينة مع راجلها ..

- مسيرة : نݣول للعصام يجي هو وعفاف ، أما كريم راه غايجي مع أمينة حيت ضروري غاتجي معاهم ..

- سندس : فخبارك بلي بنت عمها وديان طيحات العقد ؟؟

- مسيرة : وايلي مزيان شكون هذا لي داها ؟

- سندس : الى قلتها ليك غادي تصدمي ، تزوجات بمنصور ..

- مسيرة [بإستفهام نساتو] :

شكون منصور؟

- سندس [شافت فصفاء] :

قولي ليها شكون منصور ..

- صفاء : منصور ، لي كان باغي يق//تل جلال ، لي بمسبتو تخبينا عندو فالفيرما ..

- مسيرة [ظهرو ملامح الصدمة على وجها] :

اويلي ، واش كتفلاي كيفاش البلان ؟ ݣاعما عاودتو ليا ؟!!

- صفاء : نهار تشد باه مشا للبرا ، عو ديجا كان غرفها هنا ، وفاش تشد باه حيد من ديك الطريق ديال تبزنيز .. وݣاع منين زاد بغاها زاد جمع راسو كثر ، ايوا الروينة فاش ساق جلال الخبار ، نوضوها وهي قاتليهم منو نخلاق لدرجة فضلاتو على عائلتها ..

- ايوا السيد هز راسو وجا لعند جلال ، واقيلة هضرو ولا ماعرفت حيت من بعد جلال دوا معاها وݣاليها الله يعاونك ، هادشي لي كانت عاودات ليا أمينة فاش شفتها اخر مرة ..

- ايوا يلالة راهم طيحو العقد .. خدا الدار فطنجة ، وباع لي ريسطو لي هنا فكازا ، وغايحلهم تم فطنجة ... وهي لاتوليي لي كان عندها فمراكش وا باعتو .. لا هي لا الشقة لي كان خلا ليها راجلها ، ودابا راه يلاه ستقرو تم هادي شي يوماين .. مدارو لا عرس لا والو عقدو ومشات ..

- مسيرة [بقات مصدومة] :

وشوفي ليك ، والله حتى صدمتوني .. سبحان الله العظيم ، شكون ݣال ..

- فالعشية ݣالسين فجردة ، ب 3 بيهم ديرين لي ماسك لوجاهم ويديهم ..

- مسيرة [بتساؤل] :

واش هناء غادي تحضر لعرسك ؟

- سندس [ من تحت سنانها ] :

غير سكتي راني مفقوصة وحق الله العظيم ، أيااه يالالة غادي تحضر ، فخبارك دوزات معاهم العيد اليوم فدار عند جلال ؟

- مسيرة [تزاد معاها الزايد ] :

كتفلاي ؟

- سندس : قسما بالله العظيم أختي الى دوزات معاهم العيد ، انا راه تفقصت بلات نوريك صبري .. هزات تيليفونها بزوج صباع دخلات لݣالوري .. فتحات واحد الصورة او وراتها لمسيرة ..

- كان فيها جلال ݣالس فوق الطبلة كياكل ، وهي ݣالسة حداه لابسة كسوة صيفية بلا يديه .. طالقة شعرها وكضحك رامية عليه راسها ..

- صورة كانت كفيلة تخليها تشعل وتعصب .. عضات على شفايفها كارزة عليه ، جبدات جلدة من شفايفها حتى ساح دمها ..

- مسيرة [ببرود مصطنع ] :

ايوا مزيان ، الله يبارك ..

- صفاء : شفت حتى جورنال لبارح ... فيه تصاور ديال الحفلة ، مصورينها وهي معنقاه كاتبين عليه وعليها ، بلي كيشمو ريحة قصة حب جايا فطريق ..

- مسيرة [كانت كتحاول ما أمكن .. تضبط أعصابها ] :

خاصنا غدا نمشيو نشوفو ديك النݣافة لي قلت ليكم عليها ..

- صفاء [ شافت فسندس ورجعات شافت فختها ] :

نشوفو غير النݣافة لي شفنا فعرس أمينة مزيانة ..

- مسيرة : لا ، كاينة وحدة أخرى عندها تكاشط واعرين ، غادي نكري وحدة شفتها عندها فباج ديالها فالأزرق ملكي واعرة ، وغانلبس كسوة فالأحمر من بعد ..

- صفاء [بإستفهام ] :

كسوة ، عمري شت شي واحد ايلبس كسوة فالعرس اويلي ..

- مسيرة [ببرود ] :

رشقات ليا عليها وصافي ، بغيت نوع .. نوضو غسلو وجهكم باش ترتاحو ، انت خاصك تولي تنعسي بكري ..

- سندس : واييه راه عييت نيت وحق الله .. سبقاتهم مسيرة وهوما وراها ..

- صفاء : الله يستر مع الله يحفظ لا تنوض شي روينة فعرسك ، غير جلال نوضها فعرس ختو ، ومسيرة اتنوضها فعرسك ..

- سندس : ماهو فالي ياختي ، ياربي سلامة تفائلي بالخير ..

- صفاء : شفتي غير منين قالت ليك كسوة فالأحمر ، راه مكاين خير ، نقوليك الصراحة مسيرة هي وجلال كيتشابهو كيف كيف ، حتى هي خاصها تعالج الى جيتي لصراحة والله .. عمري كنت كنظن ختي تكون هكا ، بغات تلبس كسوة فالعرس ضد فجلال بلعاني ، حتى عرفات ديك هناء اتكون ..

- وباينة الكسوة مغاتكونش عادية ، مسيرة منين كتبغي كتحماق شوفي اجمال واش كانت كدير على ودو كانت اتخرج من القراية بمسبتو ، خلي جلال .. دابا تشوفي وتقولي صفاء قالت ..

_____________________

- الصباح غير فطرو مشاو عند النݣافة ، اما سعاد بقات مع نجاة على ود الغدا وتوجادو .. ختارت مسيرة التكشيطة لي غاتلبس فالأزرق ملكي هماوية .. أما صفاء ختارتها فاالأورونج ..

- سندس كانت دايرة مع نݣافة أخرى ختارتها ماريا .. رجعو لدار لقاو خالها هو وإبتسام كاينين ..

- بداو التوجاد ديال الغدا قادو الطبالي بلي ناپ ، وىيحة البخور كتعطي فدار .. هلال سونا لسندس علمها بلي راهم ايخرجو من دار ، كانت ديجا موجدة راسها .. جلابة فالموڤ بارد مع قفطانها صباط عالي فالموڤ ، مصايبة شعرها وطالقاه ..

- اما صفاء كتافات بجبادور .. سروال واسع فالفوشيا مع لاشوميز ديالو مطروزين .. أما مسيرة ختارت تلبس فراشة فتيركواز مع صندالة فذهبي ..

- وصلو حباب العريس ، سكينة لي كانت لابسة جلابة فلورونج .. أمينة لي حتى هي جلابة فالخزي ، والدين جلال او والدين سراج .. كريم حتى عصام وعفاف .. الدار عمرات بالحباب ، الصالة لولة ݣلسو فيها العيالات أما الصالة الثانية ݣلسو فيها الرجال ..

- حطات ماريا تفكيرة ديال العيد ، لي كانت عبارة على جلابة بقفطانها .. ساك وصباطو ، مع بيجامات وبواطة فيها سلسلة ديال الذهب ..

- نزلات من بيتها ، تجوهات نيشان للصالة ، كانت قبالتو فلمحة البصر طارت .. دور راسو وعطا الانتباه ديالو للعباس لي كان كيدوي ..

- دخلات رمات السلام وسلمات عليهم وحدة وحدة حتى وصلات لعند ماريا .. لي غير شافتها وقفات :

على سلامتك أبنتي ، شحال وانا كنتسنى فنهار لي نشوفك ، بقات ليا حرقة فقلبي لي ماشفتكش ومطلبتش منك السماحة على داكشي لي وقع ..

- مسيرة [شادة ليها فيديها ] :

مكاين لاش ، انا نسيت أشنو وقع .. الحمد لله حنا دابا نساب وغانشاركو الدم والطعام .. مديريش فبالك ..

- ماريا [عنقاتها وبإبتسامة لاقاتها ] :

الله يرضي عليك ، والحمد لله لي رجعتي لبلادك الغربة مافيها مايدار ..

- مسيرة [بنفس الابتسامة ] :

جيت ندوز غير العيد والمناسبة ديال ختي وغانرجع إن شاء الله ..

- ماريا : وعلاش أبنتي ، حبابك هنا وعائلتك ، ديك الغربة مافيها مايدار. .

- مسيرة : رتاحيت تم ، اليونان ولافة الصراحة وناسها حتى هوما ظريفيين .. وخدمتي دابا تم ..

- ماريا [تنهدات تنهيدة طويلة ، بحال الى ماعجبهاش الحال ] :

ايوا ماعليش أبنتي ، الله يسهل عليك ..

- مسيرة : آمين يارب .. كان خارج يدوي فتيليفون ، ولكن وقفو كلامها ، ݣاع داكشي لي قالت داز على ودنيه .. حدر راسو وكمل طريقو ، سالة المكالمة ديالو ورجع للصالون عند الرجال ..

- تحط الغدا .. العيالات بوحدهم ورجال حتى هوما بوحدهم ، كياكلو ومجمعين .. مرة يدويو على الحمالة ديال عفاف ومرة يشدو فأمينة ..

- سكينة [غمضات عينيها وخرجات نفس طويل ] :

الله اخالتي سعاد ، طيابك كيحمقني وبنين ..

- سعاد : وسبحان الله ابنتي ، كنتي مالفة غير تنقبي بحال دجاجة وترجعي لور ..

- مسيرة [ كتحقق فيها ] :

اجي انت ، ايمتا اخر مرة جاتك الدورة ؟

- سكينة [بعدم إهتمام ] :

والله ماعرفت ، مابقيتش عاقلة .. ودابا راه معطلة عليا بشي 15 يوم كنت نيت كنفكر ندير حب الرشاد والحليب ..

- معزوزة [كتشوفيها بنص عين ] :

هاد الصݣعة راه دايراها ݣد راسها ، عينيها ماشي خواتات ... سيري ديري تحليلة ماتشربي حتى عجب ..

- سكينة [حبسات الماكلة كتشوف فيهم بشك ] :

كيفاش زعمة ؟

- معزوزة : كيف المشماش ، باينة ابنيتي راكي حاملة .. نيفك نيت كيبان ليا تفݣع بحال الغريبة .. هادي شي قرعة جايا فطريق ..

- سومية [بفرحة ] :

غدا نمشيو لطبيبة إن شاء الله ، ياربي يكون بصح ..

- مسيرة [كتعيب فيها ] :

انا منديرش بحال عفاف حملات من شهرها لالا ، انا واحد عامين عاد نحمل ... بسسسس اودي ياودي دارها بيك سراج ..

- قلبوها ضحك شادين فسكينة لي كانت مزال فحالة صدمة .. جاتها فشكل تحمل من بعدما كانت دايرة حسابها ، ولكن الله كان ليه حكم ثاني وأي حاجة جات فوقتها مزيانة ..

- سلاو الغدا ومن وراها ݣلسو مجمعين .. جلال ستأذن منهم وخرج .. كانت متبعاه بالعين ، جاها فشكل كيفاش نخلها مدواهاش نهائيا مامالفاش ليها ، صدرها كيطلع وكينزل باغية تاكل ريتها ..

- بقات ݣالسة معاهم دايرة الصواب ، اما من الداخل ديالها كانت باغية تنوض لبيتها وتسد عليها .. أش كانت كتسنى منو .. كون غير عطاتو فرصة كون غير بقات وشدات بيدو ويتعالج وهو حداها وهي حداه ، ولكن راسها القاصح وكرامتها لي عندها هي أولى من كولشي ، هي سباب نفسها الحارة وعدم رضاها ..

- وحتى دابا مستحيل تنزل راسها مستحيل تبين ليه ولا تبادر ، واخا تعرف تخير حب حياتها وتخسر راسها متنزلش من كرامتها ونفسها العزيزة عندها .. اتخلي قدرها وحياتها بيدين المولى عز وجل هو لي عارف شنو مخبي ليها من هنا للقدام ..

- من بعد عام و 7 شهور ، هاهي اليوم حطات رجليها فالفيرما ديالو ... كيفما خرجات منها اخر مرة وهي لاشيء ، لا مستقبل لا خدمة لا والو .. هاهي اليوم حطات رجليها فيها وهي مسيرة فريدي سيدة الاعمال وصاحبة ماركة روبي ڤيريدجو .. تنهدات تنهيدة طويلة والإبتسامة على وجها ..

- الجردة كلها كانت مغطية بالرواقات فالبيض ، الطبالي ديال المعروضين حتى هوما كانو بنفس اللون البيض ، مع رباط فيه الغوز بارد ومنبت بالورد .. بلاصة الأوركسترا بوحديتها ..

- كانت هازة باليزة متوسطة فيديها ، فيها حوايجها لي غاتلبس فهاد النهار الكبير ، غير شافتها نجية جات لعندها عنقاتها ورحبات بيها .. ريحة الطياب كتعطي ، تبعات صفاء و سناء .. كانو هوما الوحيدين لي تعطلو ، العروسة كانت فالبيت ديال هلال الفوق معاها النݣافة ومعاها الكوافورة ..

- صفاء : انا هاد سندس مافهمت فيها والو ، واش عقلتي مكانتس كتبغي شي حد يفرض عليها شيحاجة .. ماخلاتناش نفرحو بنهار الحنة .. احيتاش سيهم هلال مكايحملش ريحتها .. لا حقا والواد هلال مكايبغيهاش منديرهاش اش هاد العبث أعباد الله ..

- مسيرة : ضبر لمخها ، حتى من العقد غايجي العدول ويتكاتبو فالعرس ، السيد زربان كولشي دايرو فنهار واحد ..

- صفاء [تنهدات بنفاد الصبر ] :

الله يستر بنادم كيكون فشان كيجي واحد يبدل ليها رأيها ..

- مسيرة [كتشوفيها بإستهزاء ] :

لا انا شفت الحال تقلب ، ولاو حتى العيالات كيأترو على رجال .. قالت ليا سكينة بلي توفيق لوسها ، طلب ولد عمو يخدمو عندو فالفيرما ، مبانش ليك فاش كنا جايين مع الخدامة فوسط الطريق ..

- صفاء [جمدات فبلاصتها كتشوفيها بإستغراب] :

كتفلاي ، حلفي بالله ، اويلي واش هادا حماق علاش دار هادشي ؟ حݣلو غبر غبرة وحدة ..

- مسيرة [طلعاتها ونزلاتها ] :

نسولك انت أختي ، ݣال لخوه بلي عرف شي بنت وبلي بغاها ، ولكن السيدة قاتليه سمحليا انت كيليميني ، وانا خاصني راجل معايا لي يجيبها من فم السبع ، ايوا سيد مشا لعند جلال طلبو ، وحتى لاخر ماشي من العاݣزين .. خدمو بحالو بحال أيها الناس ..

- انا يحسابلي شفتيه فاش كنا جايين ، بقا فيا ولا بحال المحروق بشموشات .. هادي لي شرطات عليه هاد الشروط باينة شي عيشورية هاربة من بويا عومار ... سعداتها بيه ، على ودها تنازل ومشا يخدم فالفلاحة .. الى ساقو ليها الصحافة الخبار ، يضربو ليه الطر بالبندير .. عنداك اتكون شي وحدة كتضحك عليه مسكين ، حيت على مبان ليا وهادشي لي دار عليها راه كيبغيها نيت .. عطاتها بظهر وخلاتها واقفة فبلاصتها مصدومة ..

- مسيرة [بضحكة شريرة ] :

عند بالها معايقاش بيها ، ماعرفن شكون لي ظل تخرج تفطر معاه عند بالها خبارها مكايوصلونيش مانيانا ..

- دخلات لدار الداخل ... دنيا عامرة بالعائلة ، ݣالسة سعاد بنخوة وتكشيطة فالموڤ داكن مع ساعة فذهبي ، وفولار فالبيج منقط بذهبي ، حداها معزوزة بتكشيطة هماوية بالبيض وذهبي ..

- ماريا واقفة بالمة وشان الضحكة منورة وجها ، علاش لا واليوم عرس ولدها .. الكل كان حاضر من غير منصور أما حتى وديان هي وليداتها كانو ..

- شافتها ليليا جات لعندها عنقاتها :

ياختي ياختي على صحايبتي وشريكتي ، حرام عليك لا برية لا تيليفون ... كنت كنتسناك غير انت باش نلبسو تاني بزوج ونزلو بزوج ..

- مسيرة [كضحك] :

اختي انا راه وليت نخاف من العراسات .. مبروك مدارت وديان ، كانت وراها نيشان وسمعاتها :

الله يبارك فيك ازين لهلا يخطيك .. [وقفات قدامها مكياج سامبل ، قفيطين خفيف فالأحمر ] مابغيتش تكون شي حساسية بيناتنا على ود ..

- مسيرة [ماخلاتهاش تكمل ] :

لالا اختي ، الله يكمل عليك بالخير ... انا نسيت لي وقع شحال هدا ، كنعيش كل نهار بنهارو ..

- وديان [شدات ليها فيديها ] :

فرحتيني وحق الله العظيم ، وحتى انت الله يفرحك ويحنن قلبك ، وترضي البال .. تغفل عينيك طرتي .. راه العديان كيدورو بجنابك .. [أشرات ليها بحجبانها جيهت الدروج .. هزات راسها كتبان ليها هناء نازلة بتكشيطة فالكحل كلها منبتة بالحجر مفصلة عليها مبينة مفاتنها ، شعرها هازاه للفوق مع مكياج صارخ شادة فدراع جلال ، لي كان فمنتهى الأناقة .. بكومبلي فالازرق وشوميز فالأزرق سموي ، نازلين وكيدويو .. دازو من حداهم بدون مايعيروهم أي إهتمام ..

- وديان [طبطبطات على يدها ] :

ديري عقلك .. الله يهديكم ..

- بخيط الروح منبت بالحجر زيرات جبهتها ، وبمكياج برز ملامحها وعينيها زينات وجها ... شعرها خلاتو مطلوق مع تموجات بسيطة ... أما التكشيطة لي فالأورق ملكي الهماوي جات بحال شي اميرة .. مغربية كلها نخوة وجمال ، لي واخا هناء تلبس التكشيطة حتى تعيى ماتبانش بنفس النخوة .. هزات ساكها لي ذهبي بحالو بحالو لون الصباط .. حلات الباب وخرجات عند صفاء لي كانت كتسناها بتكشيطة فالأورونج .. نزلو بزوج ، والأنغام الموسيقية الشعبية وصلات للمسامعهم .. دخلو تحت انظار الكل .. كانت كتبان بحال السلطانة ..

- دازت على الطبلة لي كان ݣالس فيها ومع هناء ، رضات شعرها ورا ظهرها بكل أنوثة .. غادية بمبدأ واخا تكون واصلة ليك العظم ، ماتبينش نقطة ضعفك للعدو ولي بنسبة ليها هناء عدوة ، كانت راضة ليها البال مزيان كيفاش غير لاصقة فيه وحتى هو مخليها على هواها .. ݣلسات فطبلة ديال العائلة ، رامية بوسة فالهوى للأمينة لي كانت ݣالسة هي وكريم .. حطاتها ساكها وناظت لعندهم بشوية كتنخوى ، كانت طبلتهم نفس الطبلة لي كان ݣالس فيها هو وهناء ، ضارت بشوية وراه ..

- نزلات على أمينة عنقاتها .. وضارت لعند كريم لي باس ليها يدها .. نزل شعرها وهزات ضارباه بيه .. ضارت لعندو لقاتو كيشوف فيها ببرود قا/تل .. بأنوثة وصوت مغري نطقات :

سمحليا ماشفتكش [ شافت فهناء ماعبراتهاش حتى دوات معاها ] ..

- هناء : مسيرة ، إنتي بتسلميش ولا إيه ؟

- مسيرة [بإبتسامة ] :

غير سمحيليا احبيبة ، والله مارضيت ليك البال ، مع كلك لابسة كحل فكحل بحال الغراب [وركات على الكلمة بتشديد ] داكشي باش ، جات معاك التكشيطة ... العقبة للتكشيطة لبيضة إن شاء الله ..

- هناء [ضحكات بميوعة ] :

والله العظيم انا مش فهمة كويس ، بس حقولك شكرا ياروح ألبي ..

- مكانتش عارفة بلي هو ، واخا يوصل فدرجة العشق ديالو ليها للحد ، ولكن هو وياها كيتشابهو فبزاق دالحوايج ومن بينهم الكبرياء ديالو ، رجولتو لي مساتو فيها وكرامتو لي قاستو فيها .. نفسو حارة ومكايرضاش ، يبغيها اه روحو يعطيها على ودها ، لي قاصها غايتحول لسيف ماضي لي داز من حداه يد//بحو ويطوش د//مو .. ولكن باش تهينو وتجرخو مايتقبلهاش ... الى ماشاف منها حاجة بسيطة .. ايخليها هكاك واخا يبقى فيه عرق واحد كينبض ..

مجاوباتهاش ، هزات على جلايلها ورجعات للطبلة ديالهم ... بدات الموسيقى والأجواء الأسطورية للعرس ديال هلال وسندس ... دخلات بأول تكشيطة فالبيض مرصعة بالحجر ، شعرها مجموع بمشيطة لي زادو فالڤوليم .. وقفو الناس كلهم كيصورو فيهم وهوما داخلين ..

- النݣافة معاها البنات ديالها بلباس فصفر كيصليو على النبي ، التبسيمة مزينة وجها .. كدير ليه باي باي بيديها وترمي قبلات لعائلتها .. الفرحة كانت باينة فعينيها ، أما هلال كان عبارة عن رجولة وكاريزما وتقزلية حداها ..

- الفرحة باينة من الشدة لي داير ليها شدة تملك .. عينيه كيشعو بالحب ليها ، خداو بلاصتهم ، فوق الكرسي المخصص ليهم ، تم داخل جواد هو وعباس ومعاهم العدول .. ݣلس فالكرسي المخصص ليه ، سكتات الموسيقى .. وتعطاه الميكرو ، هي اول وحدة سول ، واش قابلة بهلال زوج ليها بدون ضغوطات وبدون شروط .. عطاتو الموافقة ديالها ، وجات نوبتو حتى هو لي بدورو عطا الموافقة ديالو. .

- سنا عباس وسنا جواد .. جبد جوا هلال من جيبو فالبيض مكتوب بذهبي ومدو ليها ، كان عبارة عن صداقها لي مداتو لباها .. وهكا توجات علاقتهم او ولات مراتو بشرع والقانون .. مشا العدول من بعدما بارك ليهم ..

- ورجعات الاجواء الإحتفالية ..

- ݣالسة ومبسمة ، وهي عينيها كيدورو على الكراسة كاملين .. كتشوف فسكينة لي فرحانة من ورا ما عرفات راسها حاملة بشهرين .. حداها سراج الدين ، لي فرحتو كانت مضوبلة عليها هي .. يد شاد بيها يدها ويد معنقها بيها ... عينيها مشاو للكريم وأمينة لي كانو خير مثال للكوبل المرزن .. عينيها مشاو للعفاف وعصام .. لي كانو يستاهلو بعضياتهم. .

- لا العذاب لي داز على عفاف ولا العذاب لي داز على عصام والحرمان ديالو من عائلتو ، هاهو ربي جزاه بزوجة وبيبي جاي فطريق ...

- مشاو عينيها لجداها وضحكتها البشوشة حداها الحاج لي كان دايرها فعينيه ، سناء لي كانت ݣالسة معاهم فطبلة وعينيها مع سفيان لي كان مقابلها وتبسيمة على وجهو .. حتى هي ربي جزاها من بعد صبرها .. وقريب حتى هي تنضم للنادي المتزوجات .. مها وباها اغلى كنز عندها فحياتها ، شافت فصفاء لي عينيها كانو مع شخص واحد وهو توفيق لي ݣالس مع خوه او ولد عمو ، بتباتة ورزانة لي كانت جديدة عليه ، تبسمات وتنهدات تنهيدة طويلة ، حيت عارفة ومتأكدة بلي حتى صفاء جايا فطريق ..

- حدرات راسها ورجعات علاتو وهاد المرة مشاو لشخص واحد هو ، شافتو كيفاش ݣالس بهدوء وتبات وعاطي ودنيه لهناء ... حسات بقلبها نغزها ، وعرفات بلي صافي خسراتو وهاد المرة خسراتو وخسرات راسها معاه ..

- من بعد اللبسة الثالثة لي دارت سندس ... وقفات وخلات الطبلة ، خرجات من القاعة تحت انظارو .. هزات على تكشيطها وطلعات للبيت ، فتحات الباب ودخلات سادة الباب بجهد .. طلقات العنان للدموعها ، مستغلة المزسيقى المجهدة .. عارفة مغايسمعها حتى واحد ..

- غوتات على جهد غارزة ظفارها فلحمها حتى خلات اثار الدم فيديها ، كتبكي وكتشهق على حر جهدها بحال شي حمقة ... كون كان فيديها شي سلاح كون تيرات فراسها .. اكبر عدو هو الكبرياء يتلاقى مع الحب .. مكتكونش قاد دير شيحاجة ومرات كتبغي تنهي حياتك بيديك ولا ديك العيشة لي انت عايشها ..

- كانت بحال شي مهووسة فداك البيت كتقلب على شي حاجة ديرها .. الغيرة كتنهش فقلبها وفروحها .. مالقات من غير يديها تبرد فيهم العر بالعضان .. حتى خلاتهم زرقين ومطراسيين .. صدرها كيطلع وكينزل .. زولات داك خيط الريح ، حيدات ديك التكشيطة ومشات للحمام غسلات وجها .. خرجات ورجعات جددات المكياج من جديد ..

- شعرها جمعات بمقيبط .. غطات دوك ليطراس فكريم الأساس ، هزات ديك الكسوة ، ولبساتها كانت بلا يدين عريانة من صدر ... غيرتها الحارة ماخلاتهاش تشوف الكسوة لي لابسة بلي عريانة ، نسات باها ونسات العائلة ... نسات بلي هاد الحوايج مايليقوش لهاد المناسبة ويتلبسو قدام باها ..

- عينيها تغمضو ولات بحال شي مجنونة العقل غاب عن الوعي ، ولات كتصرف بهيسايرية ، حتافظات بصباك لي لابسة .. رشات من ريحتها وتبسمات للماريا وخرجات .. نزلات حتى وصلات للدرجة الاخيرة ، لقاتو قدامها .. مطلعها ومنزلها ..

- ببرودو القا///تل هزهز راسو :

باغة دخلي للعرس بهاد الحالة ؟

- مسيرة [ بلعات ريقها وبنفس البرود نطقات ] :

اه علاش كيف جاتك ؟

- جلال [كيحاول يتهدن ] :

فين عمرك كنتي كتلبسي هادشي ݣدام عائلتك ، تهزي طلعي حيدي عليا هاد الشوهة ، عاجبك لحمك .. ؟

- مسيرة [غمضات عينيها بتتاقل وحلاتهم ] :

مغانحيدهاش ، حرام عليا وحلال على غير ، انا ماشي هناء باش تحكم فيا وتقولي شنو ندير وشنو مندير ، بانت ليك اهاد الكسوة سبحان الله ..

- تبسم بعصبية :

غادي ، تهزي ، وطلعي ، وديري عقلك ، واتحيدي عليا هاد الشرويطة وتلبسي شيحاجة بحالك بحال عباد الله وتنزلي ..

- مسيرة : وانا عاجباني وغانزل بيها ونكمل العرس بيها [ العافية لي شاعلة فقلبها وقربات تحرقها ، خلاتها تمسى راسها ومبادئها وتغفل على الكسوة لي لابسة ، فاش كانت كتفكر حتى قررات تلبسها فيه هو ، كانت باغية تستفزو ماكرهاتش تغوت مكرهاتش تشدو تبرد فيه حر جهدها .. هزات يدها حتى لسما وماحساتش حتى طرشاتو .. عينيها مغرغرين كلها كترعد ، بقا للحظة وهو مكوامسي كيشوف فيها بنفس البرود مسكانيها ومسكاني عينيها والرعدة لي هزاها .. ] ..

- مدار حتى ردة فعل ، كان عكس توقعاتها ، كانت كتݣول ايرد عليها ويرض ليها الضربة ، ولكن وقع العكس تماما ..

- بصوتو الرجولي المميز لي عندو بحة وتقولية خاصة ، بعينيه لي كيف جغمة ديال الدم ، نار شاعلة فيهم مع كحوليتهم .. كانو مزيج خطير كيبعت الخوف والقشعريرة فدات ، من تحت سنانو وببرود قات/ل :

عزيز عليك نعاود الهضرة جوج ديال المرات ، توحشتي ايامك ..

- مسيرة [ ببرودة وبهدوء ، كل كلمة كتخرجها تقيلة من فمها بحال الى كتفيق فيه داك الوحش ، بحال الى كطيب الغضب ديالو على نار مهيلة ، ستفزها بردة فعلو وبرودو زادت تعصبات كثر وكثر ] :

إلى ماحيدتهاش شنو فجهدك مدير ؟ كتعرفني .. كنعرفك ... كنجيك .. خاطبني ولا مزوج بيا .. وريني كنتسنى ..

- دور عنقو على زوج جوايه .. مطرطقو ، ورك على محارج عينيه بصباعو .. دوز يدو على نيفو بحال شي مدمن .. ، شاف فيها بإبتسامة شر .. إبتسامة رجل مجنون رجل مهووس ، بنفس البرود :

- نوريوك علاش لا ... فاللحظة تهزات بين يديه بحال بنت 5 سنين الصدمة خلاتها تشوكة ، ماوعاتش على راسها حتى كان تجاوز دوك الدرجات ، خبط باب البيت برجلو ودخلها ليه ..

- دخلها للبيت ورماها على نموسية بجهد حتى تلاحت على ظهرها ... قرب منها بتهديد مغزف عليها كان كيحاول يأضابطي راسو لأبعد حد ولكن هي مصرة تفيق داك الوحش لي كيحاول يق//تل فالداخل ديالو ، دوز يدو على شعرو .. ونزل بتقلو على النموسية .. كتشوف فيه ساقلة عينيها كيترعدو شعرها تحل ..

- باغية تشوفي شنو غاندير انا غانوريك .. [شد الكسوة من التحت شرݣها تشريݣة وحدة ، شهقات من صدمتها .. شادة على فمها ] .. تبسم بإستفزاز :

دابا مزيان ، واش عند مك شي عقل ولا غير متقلة بيه ، فين عمرك لبستي هاد شوهة ݣدام داركم .. باغية تنزلي ݣدامهم هك ، غير شوهة لي درتي فعرس كريم بغيتي تعاوديه هنا ولا اش ݣاليك راسك ..

- كنݣول راه دارت عقلها ساعة انت مك ماعند جدك عقل ، طيحي براس والديك .. وبراس جداك وداك الحاج لي معاها وبراس عائلتك كلها ، واش عند بالك معايقش بقوالبك ..

- جكارة فيا لابسة ليا لاباس ديال الق/////// .. جيني نيشان فاش عينك ، فعايل البراهش مجايينش عليك .. خلي عينيك ودوي مݣاد ، مرة وحدة فحياتك ..

- البكا من ورا الميت خسارة ، مكاين لاش طلسي وجهك باش ضرݣي دموعك .. حتى منكونش كنشوف ولا معمي .. بكي عليا وانا حي اما الى مت مكاين لاش .. فات الفوت الواشمة وا فات الفوت ..

- خلاها وخرج ساد الباب وراها ، طلقات العنان لدموعها من أول وجديد ، بكات حتى بردات حر جهدها .. ناضت بتتاقل ، رجعات التكشيطة لي كانت لابسة ، قدات حالتها وجمعات شعرها ونزلات ..

- سولاتها مها فين تعطلات دارت حجة براسها لي ضرها وكانت كترتاح .. باقي العرس كان راسمة إبتسامة باهتة على وجها .. كتسنى غير ايمتا يسالي العرس وترجع لدار بحالها .. جات الكسوة البيضة ، قطعو طارط .. وجا الوقت لي يودعوهم العرسان ، كانو مخططين يمشيو للشهر العسل .. خرجو متاجهين للوجهة ديالهم .. وبضبط فالخرجة ديال مراكش بلاصة سياحية زوينة .. ختاروها بزوج بعيد على جميع الناس ..

_______________

- الطبالي خواو والناس لي معروضين مشاو ... كانت باغية ترجع بحالها فداك الليل مابغاتش تزيد دقيقة تم ، بغات تسد عليها وتبقى بوحدها ..

- رجعات حوايجها لي كانت لابساهم ، سروال ديال كيطمة وقبية ، جارة باليزتها .. أما دارهم كانو ايباتو فدار الحاج حتى للغد عاد يرجعو بحالهم ..

- واقفة قدام طوموبيلتها ، دخلات باليزتها للكوفر ، هزات راسها وملامحو تبدلو ... هاد الليلة مغاديش دوز على خير وبيخير ..

- هناء [ بصوتها الانثوي لي كلو غرور وثقة فنفس ] :

يا خبر ابيض ، هو انت هتمشي لالا ، جلال ملاوش حق إنو خلاكي تروحي .. إزاي كده ده أصر عليا ݣامد اني انام هنا وكمان خلالي بيتو انام فيه .. ملاوش حق انا لازم أوبخو على سوء المعاملة دي ..

- مسيرة [ كانت كتشوفيها ببرود , تبسمات وقربات ليها ] :

انجاوبك بالمصرية باش تفهميني ، من يوم ماتلاقينا وانا كان نفسي ومونى عيني فحاݣة ، بس كنت بأݣلها لي ظروف .. وبأول اللهم خزيك يا شطان ، بس متهيء لي كدة ، إينو الشطان هو الانسان .. بيعمل عمايل ، بيخليك تنسى نفسك ..

- ويخليك تعيد حسباتك ، ويخليك تأدبو ياااه انا مكنتش عارفة إنو أمنيتي حتحقق بسرعة دي .. هناء مافهماتهاش اش كتقصد ، حتى جراتها من شعرها نتفاتها ... نعساتها فالأرض ، كتنتفها وكتغوت فوق غوات هناء على زوج المرات ..

- كانت كتفركل تحت يديها ، خرجات سكينة وسراج لي غير شاف داك المنظر زرب على مسيرة كيحاول يحيدها من فوق منها ولكن كانت لاصقة عليها لصقة وحدة ... خرجو عائلة جلال ، وهو معاهم .. ماعرف باش تبلى بزربة زرب عليها وجرها كتركل بين يديه .. ݣاع داك الحر لي كانت كتحس بيه برداتو فيها ، ظفارها تصورو فوجها كلو ندباتو ليها .. شعرها بقا فيدها ، كتغوت وتبكي وتستنجد بيهم ..

- دفعاتو وشافت فيه بإنكسار ، كانت بحال شي طير جريح .. بإنفعال غواتات فوجهو :

بعد مني ، مابغيتش نشوف وجهك مزال ، عطيني بتيساع انت والله ماتستاهل والله مكتستاهل ، ومبروك عليك من دابا ، هدا اخر نهار غاتشوفيه وجهي .. ضربات فيه ، طلعات لطوموبيلتها ... ديمارات وشدات الطريق مخلية العجاجة وراها ..

يمكن تتفاجأ بكلامي رح قلك شو عم حس

آخر فتره علاقتنا ما عادت حب وبس يا نسخة مني حبك قاتلني بالدنيي مين بيحبك قدي أنا

أنا ما بتخيل حالي من دونك وبطفي عيوني

ليعيشو عيونک يا إنتَ إلي يا عمري ما كون

رح ضل بقلبك أنا الأولى نحنا روح بجسمين

قلب ومقسوم اتنين منشبه بعضنا لدرجة صرنا شخص بشخصين يا نسخة مني حبك قاتلني بالدنيي مين بيحبك قدي أنا أنا ما بتخيل حالي من دونك وبطفي عيوني تيعيشو عيونك يا إنتَ إلي

يا عمري ما كون

رح ضل بقلبك أنا الأولى

أصلا ما في حدا بالدني حبك متلي

صوتك معي حارسني ما بيفارقني

في شي غريب حبيبي فيك معلقني

شوف العمر ما أجملو ونحنا سوا

أنا ما بتخيل حالي من دونك وبطفي عيوني

تيعيشو عيونك

يا إنتَ إلي

يا عمري ما كون

رح ضل بقلبك أنا الأولى

_________________

- كانت هادي هي الموسيقى لي كتخدم وكتبرد عليها ... ولات دابلة جسد بلا روح بغات غير تسالي وترجع بحالها ... قطعات البيي ديال الطيارة ، بقات ليها 3 يام فالمغرب وترجع بحالها ..

- حالها مابقاش عاجب حتى واحد فدار ، ختارت تسكت ومتدويش على لي وقع .. كريم يظل يسوني كتهز التيليفون تشوف سكون وتحطو حتى يسكت بوحدو ..

- نهار قبل من السفر ديالها ، لبسات سروال عبارة على كولون فالكحل مع سبرديلة وقبية فنفس اللون ، ساكها على جنبها ونزلات باش تخرج ..

- سعاد [ كانت مقلقة من جيهتها ومن حالتها ، قلبها محر//وق وهي كتشوف فبنتها دابلة ، معارفة مالها حاسة بيها ولكن مخلياها على راحتها ] :

ياكما نجي معاك أبنتي ؟

- مسيرة [بهدوء ] :

لا اماما غير رتاحي ، انتمشى شوية جنب البحر وغادي نرجع .. خرجات وسدات الباب ، مداتش طوموبيلتها ، خدات طاكسي وقفها جنب البحر خلاصاتو وتوجات بخطوات بطيئة ، وقفات عند الصخر وݣلسات .. ساهية فالماج لي كانو بحال مشاعرها فهاد اللحظة ... هزات راسها لسما وتبسمات بإنكسار نطقات بهدوء :

بقيتي بوحدك ، أديتي الرسالة ... وكل واحد ضمنتي ليه مستقبالو ، داكشي لي ضربتي عليه تمارة حققتيه .. تهنيتي من جيهت عائلتك ، وحققتي لكل واحد وشنو بغا ، وبقيتي بوحدك .. سبحان الله الدنيا غدارة بزاف .. تعطيك شوية وتاخود منك بزاف ..

- تنهدات تنهيدة طويلة ، مدة وهي على نفس الحالة وفبلاصتها ، شافت فساعتها لقاتها 7 ديال العشية .. جمعات الوقفة وتحركات من تم .. وقفات فشارع محركة يديها لاول طاكسي .. وقف ليها طلعات عطاتو العنوان وتحرك فتجاه الدار ..

- حطها الطاكسي فشارع لي ساكنة فيه ... فتحات ساكها جبدات منو الفلوس ، خلصاتو ... رجع ليها الصرف ومشا .. عينيها كانو على ساكها لي كترجع ليه الصرف .. حسات باليد تحطات ليها على فمها ونيفها مجات فين تغوت حتى كتشم شيحاجة لي خنقاتها ، وخلاتها تغيب ..

- كان لابس الكحل ، وقبية بالقب فالكحل ... فتح طوموبيل رونج كحلة زاج فيمي ، حطها فالكرسي اللوراني ... طلع لبلاصتو ديمارا وزاد ..

__________________

- فدار بعيدة على المدينة ... كانت مأتتة بأحسن الأثاث ، فبيت النعاس ، كانت ناعسة ... شعرها الليموني مليوح على المخدة ... بدات كتحل فعينيها بشوية ، كتحس بيهم تقالين عليها ، حلاتهم مزيان كدورهم على البيت ، بزربة ستوعبات لي وقع ، بالخف جمعات الݣلسة مخلوعة كتشوف فين هي ..

- فنفس اللحظة تحل الباب ، ودخل ... هزات راسها فيه مصدومة ، كان هاز پلاطو فيه الفطور حطو على الطبلة ، ومشا لجهة السراجم حلهم .. متبعاه بالعين مكانت فاهمة والو ، كتحلل وتانقش لراسها اش جابها هنا وشنو كيدير هو هنا ، رجع لعندها وݣلس على طرف النموسية كيشوف فيها والإبتسامة على شفايفو ..

- شنو ݣلت ليك انا نهار لول ، امممم ... ݣلت ليك يا أنا يالمو/ت ، يا دوزي لي بقا ليك فحياتك معايا ، يادوزيهم فروضة ... طلقنا ليك الحبل وخليناك ترتاحي شوية براكة عليك ..

- مسيرة [غوبشات] :

واش أنت مريض ؟ لاش خاطفني واش من نيتك ، اليوم عندي الڤول ، انت راه خاصك تشوف طبيب يداويك ..

- بزربة كان حداها ، شاد وجها بين يديه ، كيشوف فوجها بتملك :

أنشوفوه بزوج ، بزوج الواشمة ..

- سكتات كتشوف فيه بهدوء ، دورات راسها فأرجاء البيت .. ورجعات كتشوفيه .. :

هادو فعايل البراهش ، لاش هاد دورة كاملة خاطفني بحال المسلسلات وجايبني لهنا ، جي لدار وندويو ، راه غايكونو منوضين القيامة عليا .. الصباح هذا من لبارح وانا غايبة .. جلال راه ماشي فعايل هادو أقسم لك بالله ..

- جلال [عينيه عليها ، بصوتو الحرش الرجولي ] :

متهزيش الهم من جهة ، عائلتك .. عارفينك فين كاينة غير تهناي ، الى مدرتش هكا عمرك مغادوي .. واش فخبارك كنت كنحتارمك ، عند بالي بلي قاصحة وكبابل وعلرفة شنو بغيتي ، ولكن صدقتي ضعيفة ، هشيشة من اول خطوة كتفشل وتبغي تهرب ..

- مسيرة [كانت كتسمع ليه بإمعان هزهزات كتافها ] :

لاش غادي نعرب ومن من ؟

- جلال [بنفس القرب الخطير ] :

من راسك ، من داكشي لي كتحسي بيه ، مراضياش تخرجيه على برا وتدوي .. وتݣولي ماعندك .. واش عاجبك هاد الحالة ، مزال ماعييتيش .. مزال راسك قاصح مابغيتيش ترتاحي .. واش انا خايب لهاد الدرجة لي هاربة مني مافهمتش ..

- مسيرة [بنفس الهدوء ] :

ماشي خايب ، ولكن خايفة منك ... واش كتشوف راسك كيف كتكون فاش كتعصب ، أش ضمني انا شي نهار تعاود ضربني .. أش ضمني يصدر مني شي تصرف بسيط وتفهمو انت غلط .. الغيرة ديالك خايبة تملك ديالك خايب .. انت الى فرضنا مثلا اشي واحد بغا يسولني فشارع تجي تهرسو احيت دوا معايا .. انا بعدت عليك ماشي حيت خايب حيت خايفة منك ..

- لحظة سكون دامت بيناتهم ، تبسم بإستهزاء .. ونطق ببرود قا//تل :

نأدي راسي ومنأديكش ، نأدي دنيا كاملة ومنأديكش انت ، مكاينش شي حد فهاد الدنيا كيأدي روحو .. هاد الݣلب عمرو بغا حتى شافك ، سكنتيه وملكتيه ولا ديالك بوحدك .. نݣطع لسان لي دوي عليك ، نهرس صباع لي تشير جيهتك ، هاد ليد تهزات عليك حرق//تها [ هز يدو لي كانت اثار حريق على صباعو هزات حجبانها بصدمة وخوف ، شافت فيه وفيدو ] ..

- واش انت هبلتي ، علاش حرقتي يدك ؟

- جلال [بنفس البرود ، عينيه كانو حمرة شاعلة كتحر//قو كتر من شعالة لي شاعلة فݣلبو ] :

حيت تهزات عليك ، واش كيبان ليك واحد حياتو وماهماتوش ... شخشخ طوموبيلتو وهو فيها ، ماهزش الهم لراسو يعيش ولا يموت ݣاع ، غادي ياديك .. واش واحد على ودك رجع كيتعالج .. غادي يأديك ..

- الى تزرع فهاد الݣلب الروح راه حيت انت لي سكنتيه ، والى رجع هدا لي ݣدامك للدنيا ، راه حيت انت لي رجعتيه .. بغيتك وربي عليا شاهد .. وعمري بغيت ولا غادي نبغي شي وحدة كيفما بغا يكون نوعها فهاد الدنيا غيرك .. سميتك توشمات على صدر وعشقك بحال شي بنج العروق بيه تخدر ..

- الى كان شي عشق من غير هذا ندوق مرارتو ، مكايهمش منين جاي ولا كيداير ، الى انت ماعييتيش ابنت الناس ، فانا هدا هو جهدي عليك ..

- الباب هاهو ݣدامك بلا ساروت ، طوموبيل فيها الساروت ، بغيتي تمشي سيري انت حرة .. بغيتي تهربي هربي ، زيدي فهروبك الى ماقداتك اليونان راه الصين ݣدامك ..

- جمع الوقفة ، عطاها بظهر وخرج من عندها ..

حبيبي يا عاشق

يا حر زي الطير

شاور هقول حاضر

للحب قلبي أسير

الحلم ده حلمنا

والحب من حقنا

مين اللي يمنع طير

إنه يطير في السماء

تعالى نحلم سوا

الله على الأحلام

ده الحب زي الهوا

اسكن عينيا ونام

اتحدي بيك الكون

قلبي في هواك مجنون

اعشق وحب وكون

روحي وقدري أنا

الحلم ده حلمنا

والحب من حقنا

مين اللي يمنع طير

إنه يطير في السماء

حبيبي يا عاشق

يا حر زي الطير

شاور هقول حاضر

للحب قلبي أسير

الحلم ده حلمنا

والحب من حقنا

مين اللي يمنع طير

إنه يطير في السماء

آآآآه

(والحب من حقنا)

آآآآه

مين اللي يمنع طير

إنه يطير في السماء

________________________

- دفعات داك البلاطو ، وناضت من بلاصتها ... توجهات للسرجم ، كيبان ليها غادي بشوية عليه حتى وقف عند زوج شجرات مقابل مع الطبيعة ، لوكان حققات غير شوية اتعرف راسها بلي كاينة فولاد السعيد على بعد كيلومترات قليلة من الفيرما ديالو ، وبضبط فواحد الدويرة ، الدويرة لي سكن فيها أول مرة جا للهنا .. دويرة لي خلا ليه جدو وبقات تدكار منو ..

- تنهدات تنهيدة طويلة ، كانت كتحس بواحد الراحة غريبة ... ماحساتهاش مدة ، هادي إحساس بلي شي حد كيبغيك وممكن يدير أي حاجة على ودك هكاك كان إحساسها ، واحد البركان ديال المشاعر كانو لداخل ديالها .. ، تنهدات تنهيدة طويلة وطلقات العنان لمشاعرها يتحكمو فيها ... رجعات بخطوات اللور ، فتحات الباب ونزلات مع الدروج لي بانو ليها ، دورات راسها كيبان ليها باب محلول ..

- ماداتهاش فديكور ديال الدار نهائيا ، عقلها كان فتجاه واحد عندو هو ، الى كان هو هيا هي راه عيات درجات .. صافي قدرة التحمل مابقاتش عندها نهائيا ... خرجات على برا وتوجهات للفين واقف .. وقفات وراه كتحقق فيه ، طولتو ظهرو ..

- مسيرة [ نطقات بكل هدوء وهاد المرة صوتها كانت غالبة عليه نبرة الحنان وتأثر ] :

أي حاجة توقع بيناتنا نحلوها بالعقل ، متغوتش عليا متنهرنيش .. واخا الحاجة تشوفها عينيك ، سول عليها حيت بعد المرات العين كتكون كذابة وخداعة ، وخاصنا نعرفو الحاجة من داك الطرف باش منفهموهش غلط .. الغيرة لي فايتة القياس نحاولو نعالجوها .. التفاهم هو أساس اي علاقة بين زوج ..

- ماتفرضش عليا رأيك ... الحاجة الى ماعجباتكش حاول توصلها ليا بالتي هي أحسن ونشوفو حل يرضينا حنا بزوج [ ضور راسو وضار عندها بملامح شك ، كيتسناها تكمل هضرتها ] ..

- الحاجة لي فيها المعقول انديرها ونسمع ليك من واجب ديالي جيهتك ، وحتى انت هكاك لي قلت ليك توافق عليه ، لي ماعجبنيش غادي نݣولها ليك .. متقولش ليا بعدي من كريم انت عارف مزيان علاقتي بيها كيف دايرة ..

- [صوتها تبدل لإنفعال ] :

ديك البوطو ديال الضو ديال هناء تعطيها بتيساع ، منشوفكش كدور جيهتها ... ممنوع تسلم على العيالات منحصلكش كتسلم عليهم ، ݣوليهم انت إخواني مكتسلمش .. حسن ليك وليا ولا غاتشوف شيحاجة مني مكتعجبش ..

- خدمتي انكمل فيها ، متقولش ليا ݣلسي ، حيت انا ماضربتش هاد تمارة ودرت بلاصتي باش نݣلس ..

- جلال [مزال على نفس الوضعية ] :

هادو هوما شروطك ؟

- مسيرة : اه هوما هادو ..

- جلال [هزهز راسو ونطق بصوتو الرجولي ] :

ستيل ديال حوايجك غايتبدل .. شعرك لي كيتيري أي واحد غايتغطى ، نشوفو انا ولي ومك باك خالك خواتاتك جداك ، شي حد خور لا .. مكاين لاش تبقاي تزوقي وجهك ... انت زوينة فكل حالاتك ، مانبغيش مرتي يشوف فيها شي قمقوم حيت مافيا لي يخلي دار عشت شي حد [ مع كل جملة كيخرجها من فمو كان كيخطوي خطوة جيهتها ] ..

- داك التنقاز وكل مرة جايبة ليا واحد ها عصام ، ها اورانوس ندكدك ملتك ، فهاد الحوايج منضمنش ليك راسي فيهم ، الحوايج لي دكرتي كلهم مرحبا على الراس والعين ، والعيب مني ابنت الناس الى شفتي شيحاجة مني خارجة القانون ..

- خدمتك ، حد مامنعك منها ، نشد بيديك ونوقف جنبك ... الصغيرة والكبيرة تشاوري معايا فيها ، الديانة متخبيهاش عليا .. أش ݣلتي قابلة تبدلي حوايجك قابلة تغطي راسك ، قابلة بشروطي ولالا ؟

- تنهدات تنهيدة طويلة ونزلات دمعة سخونة من عينيها ، هزهزات راسها بالقبول ونطقات :

اه قابلة .. يد جراتها ويد سدات عليها فحضنو أسيرة بين ضلوعو أسيرة لبقية حياتو ..

- حس بقميجتو فزݣات وفيديه كتنخصص .. بعدها عليه بشوية بدون مايزول يديه على وجها كيشوفها كيفاش كتبكي ، بصوتو لي تحول لنبرة حنونة ممزوجة بكتلة من المشاعر مع صوتو الحرش :

دابا لاش كتبكي ، واش لهاد الدرجة صعيب تݣوليها .. ؟

- مسيرة [شافت فيه بعينيها البندقية ] :

لا ماصعيباش ، كنبكي حيت كنبغيك بزاف ... كنبكي حيت هاد الحب حر/قني فقلبي وماخلاش ليا الجهد .. كنبكي حيتاش كنت كنقول صافي مامكتابش لينا نتجمعو بزوج ... كنت كنقول صافي ضيعتك. وعمري غادي نرجع نشوفك ..

- بغيتك بزاف ، بغيتك كتر من راسي إحساس اول مرة نحس بيه فحياتي كلها .. كنبغي أي حاجة فيك صوتك ريحتك عينيك رموشك ..

- جلال [تبسم وغمزها ] :

مكتبغيش شيحاجة أخرى ؟

- مسيرة [ضرباتو للكتفو ] :

باسل انت والله ..

- جلال : راه انت لي عقلك خامج .. كاين فمي كاين تعنيقتي ، ولكن حتى تفكيرك عاجبني الواشمة .. [جرها ورجعها للحضنو ] .. رجع بعدها مزول يديه عليها .. خشا يدو فجيبو وجبد منها واحد البواطة فاللون الفيروزي .. شافيها وبإبتسامة ساحرة خلابة فتحها ..

- كانت فيها خاتم ، خاتم عمر العين شافتو وعمر اليد لبساتو ... تصنع خصيصا ليها هي ، ومن يديه هو .. أسما حب واروع عشق ، هو الخاتم لي تلبسيه يكون من صنع الحبيب ..

- الخاتم كان عبارة على خاتم من الذهب القديم ، مرصعة بأحجار مابين حجر الروبي وحجر السافير الأزرق ..

- نطق بكل رجولة وهو شاد يدها بين يدو ، بصوتو الغارق وبحت صوتو المميزة :

مغاديش نسولك واش قابلة تزوجي بيا ، حيت من نهار تزاديتي من كرش مك .. المكتاب كاتبك ليا ، مكتابك توشمي ليا .. مكتابك تكوني ديالي سميتك حدا سميتي ، لي غادي يفرقنا هو الموت .. الدنيا لي فيها انت مابغيتهاش ومغاتحلاش ..

- خاتمي ايسكن صبعك .. ويترشم بيه ، بلاصتو هنا عمرو يتحيد .. طابع اطبعي بيه حياتك كاملة بلي انت ديال راجل واحد ، جلال الدين الإبراهيمي الريفي .. [مع أخر كلمة قال لبسها الخاتم ] ..

- مسيرة [كانت حاسة بدنيا هداتها من جديد وفرحاتها من جديد ، وضحكات ليها وربي جزاها على اي حاجة دارتها زوينة ... الخير لي كانت كدير كتير ، كانت كتصدق على الناس وكتݣولهاش ، كتشري الماكلة لمشاش والكلاب وأي زنقة دازت منها كانت تحط ليهم الماكلة والما .. فأي نهار كانت عندها عادة وهادي بحد داتها صدقة وخير كبير ربي جزاها عليه بدون ماحد يعرفها شنو كانت كدير ] ..

- ضحكات فوجهو وهي معنقاه وكتشوف فعينيه :

بغيت عرس كبير ، مابغيتوش عصري بغيتو بلدي ... بغيت ناس الدوار كولهم يحضرو بغيت الخزاين يتبناو ، والناس يفرحو ويشطحو .. مابغيتش عرسنا يكون فيه البروتوكول ... بغيتي يكون بحال ديال زمان ، مغالباش عليه المظاهر ..

- غالب عليه المحنة والحب بين الناس ، ولي جاي جاي حيت فرحان لينا ماشي باش يبان علينا ..

- جلال [عينيه كلهم حب وهيام ليها ] :

اكبر الخزاين غايتبناو ، وضروبات يتدبحو والكبير والصغير ياكل ويدي معاه ... الى دوات مرات الغراب ، الغراب ماعليه غير ينفد .

- راكبة هي وياه فطوموبيلتو ، سايݣ بيد ويدو لوخرا شاد بيها يدها بكل تملك ... فكل مرة كيدور راسو عندها ويشوف فيها .. بحال الى كيتأكد بلي هي فعلا كاينة معاه وحداه .. جميع احلامو تحققو ليه ، عمرو مكان حلمو مراة تكون فحياتي .. حتى لنهار لقاها وخطفت قلبو .. نسى اي حاجة كتعلق بخدمتو ، او ولا اقصى طموحاتو هي تكون ليه ..

- وهاهي دابا معاه ... فعلا الحب كيبدل فينا بزاف ديال الحوايج لي مكنكونوش ظانين ولا عالمين عليهم ، وكنديرو شي حوايج لي كنو كنقولو مستحيل نديروهم ، وكندير بطيب خاطر .. بدون أذنى إشكال ..

- وصلو للقدام باب الڤيلا .. تحل الباب ودخل بطوموبيلتو .. هزات حجبانها بإستغراب مافهمات والو ، كتشوف العائلة كلها بدون إسثناء مجموعين على برا .. شافت فيه مفاهمة والو .. :

ايمتا دويتي معاهم .. واش حتى عائلتك كان فخبارهم ولا كيفاش مابقيت فاهمة والو ..

- جلال [بإطمئنان ] :

من بعد ونعاود ليك ، منهليوهمش واݣفين بزاف .. من لبارح وهوما كيوجدو ..

- مسيرة [صغرات عينيها كتشوف فيه بشك ] :

كيفاش من البارح ، باش عرفوني غادي نوافق ؟

- جلال [حيد الحزام ] :

ݣلنا ليك من بعد ونعاود ليك يلاه نزلي .. فتح الباب ونزل هو الأول عاد تبعاتو هي ... مع تقدمو بزوج بداو يصليو على النبي .. مها ومو ، وحدة هازة بلاطو دالحليب وثانية هازة التمر ..

- اول وحدة تقدمات عندهم هي معزوزة ... جرات مسيىة وعنقاتها ودموعها نازلين ، بعداتها عليها بشوية وشافت فيها :

الله يكمل عليكم بالخير ابنتي ، يلاه غادي نرتاح من جيهتك ، ݣرحتك فقلبي كبيرة .. ودابا تداوات حتى الى دا مول الامانة أمانتو نمشي مرتاحة ..

- مسيرة [باست ليها يديها وراسها ] :

الله يطولينا فعمرك امي .. باس ليها جلال راسها ويديها .. واخد البركة ديالها ..

- معزوزة [بصوتها الباح الوقور] :

تعلا اوليدي تهلا فالكبيدة ..

- جلال : كانت كبيدتك دابا ولات كبيدتي ..

- معزوزة [ضحكات مطبطبة على دراعو ] ..

- تجمعو عليها خواتاتها ، كل وحدة كتعنق فيها من جهة ...

- مسيرة : اويلي ياك مشيتي لشهر العسل اش رجعك ... واش انتوما كنتو كتبلانيو ورايا ولا كيفاش ؟

- صفاء : حنا لي درنا هادشي كامل ، براكة اداكشي لي درتي انت على قبلنا جا الوقت لي حتى حنا نديرو شيحاجة على ودك ..

- مسيرة : دابا ديك الغيرة وحري/ق الراس انتوما لي تابخينها بيناتكم وانا نعيق ، ولايني لفعات ..

- سندس وصفاء دقة وحدة : لا حنى بنات عباس ..

- سكينة [خاشية مصاصة فمها ] :

متخليو حد يتوحم على خاطرو ضروري تعصبوني وتخليوني نخطط وانا كاعما فيا تحريميات ..

- مسيرة : امممم على ام تحريميات باااز .. تقدمات منها ماريا ، عطاتها تمرة كلاتها .. عطات الطبسيل للصفاء وشدات مسيرة عنقاتها :

متصوريش شحال فرحت .. كنت خايفة تمشي وتخلي ولدي ، انتوما تستاهلو بعضياتكم الله يفرحكم يارب ..

- مسيرة [عنقاتها ] :

اللهم أمين أخالتي ، وقفات قبالت جواد لي بدون مقدمات جرها وعنقها ..

- جواد : انا بلاما ندوي ، من نهار الاول كنت باغيك لجلال كنشوف فيك ماريا ... بحالك بحالها ، بحال الى قصتنا انا وياها كتعاود ..

- مسيرة : حتى انا عزيز عليا بزاف والله ..

- جلال [بصرامة ونوع من دعابة ] :

الواليد ، نعل شيطان الله يرضي عليك ..

- جواد : كتغير من باك .. باز لوجهك ..

- عباس : الله يكمل عليكم بالخير ، تهلا ليا فسبيعة ديالي ... راها روح والمومو باش كنشوف .. بلعات ريقها ودمعة سخونة نزلات من عينيها .. عنقاتو وتمخشات فيه ، هو الدرع الحامي هو احسن راجل بغاها بدون مقابل ، الأب لي كبرها وزرع فيها قيم وأخلاق ... هو لي علمها تجبدها من فم السبع ، وعلمها دافع على راسها وتكون حرة غرة ومتخاف من حتى حاجة ..

- مسيرة : الله يطوليا فعمرك ياربي ... لهلا يخطيكم عليا ، عنقات مها ، لي عمرها فرقات بيناتهم ولا كانت مرات الأب بنسبة ليها كانت الأم لي ربات كبرات سهرات وخرقات وبكات .. واخا توزنها بذهب عمرها متوفي ليها حقها وشنو دارت عليها ..

- مسيرة [ دموعها على خدها ] :

الله يخليك اماما ، كلمة شكرا قليلة فحقك ... عمرك حسستيني بلي انا ماشي من لحمك ودمك ، ديما كنتي كتفضليني على خواتاتي ، وديري ليا الخاطر ... واخا نتقل بذهب منوفيكش حقك ..

- سعاد [كتبكي جراتها وعنقاتها ] :

انت بنتي انا واخا ماشي من دمي ، ولكن بنتيييي وكبدتي نعطيك عينيا الله يرضي عليك ، انا مفرشاك برضى ومغطياك بيه .. الله يكمل عليك بالخير ..

- ݣاع لي كان تم بداو يبكيو إحساس زوين ومؤثر بزااف ... تشوف بنت عانات كافحات ضربات تمارة .. خواتاتها كانو اكبر شاهدات على لي دازت منو ... من الخدمة مع الخضارة ، للخدمتها الثانية تفكرو نهار قررات تخدم بركاكة دالعيالات ، تفكرو الكراج لي فسطات لي كانو كيتجمعو فيه ..

- تفكرو تريبورتور ، تفكرو كل حاجة شراتها ليهم .. وبلي مكانتس كتعز فيهم شيحاجة ، تفكرو نهار تشدات فالحبس وهزاتها بوحدها وضرقات عليهم .. تفكرو نهار قررات تفتح القناة .

- ونهار خدمات عليها والعجب لي دارو ، تفكرو نهار الضبع والفيديو لي صورو كيشطحو .. وحدة شافت فثانية عارفين بلي ب 4 فكرو فنفس الحاجة هوما الخواتات وسكينة ... تكرشخو بضحك وتعناقو .. واخا يوقع لي يوقع واخا يختالفو فأي حاجة الرابط بيناتهم قوي وقوي بزااف ..

- البراح برح ... وصوتو على وصاح فدوار ، الحاضر يعلم الغايب سي جلال الإبراهيمي عرسو غدا ، مرحبا بأي واحد كبير ولا صغير .. متجيبو حتى حاجة وجوهكم كافية او وافية ..

- تنصبو الخزاين فالفيرما الكبيرة ديالو .. كل خزانة كبر من الثانية لي شافهم يݣول هدا موسم وخاصو تبوريدة ، مافخبارهمش بلي فعلا غاتكون ... بلي الكبير وصغير معروض ..

- الفرحة ديال اهل دوار كانت باينة عليهم ، حيت عزيز عليهم بزااف ، كيوقف معاهم وكيكبر بيهم وعمرو بخل عليهم .. ولا سد بابو فوجهم ، كانت ݣالسة فالبيت ديالها لابسة قفيطين خفيف فالخضيضر ، شعرها دايرة ليه الظفاير .. هزات راسها فختها وسولاتها :

أجي ديك لفعة زلمومية فين مشات شفت حسها تقطع ؟

- سندس [ضحكات ] :

هناء ، وا رجعات هي وأورانوس اليونان ... هلال عاود ليا بلي جلال قمعها وضار فيها دورة شيطانية .. حيت نوضات ليه للصداع عرفتيه هو ماعندو فين يتݣيل ، عصام ݣاليها مابقا عندك مايدار هنا وصافي مشات هي وياه ..

- مسيرة : بغيت غير نعرف كيفاش جلال عرفني غادي نقبل .. سيمانة هادي من نهار رجعنا مساليتش نݣلس وندوي معاه ، زرب عليا زربة خايبة .. ماحيلتي لهادي ولا هادي نهار كلو وانا على برا مع خالتي ماريا على وديت دهاز ..

- الى ماخرجت معاها نخرج مع بابا على الوراق .. وشوفي اليوم حنتي ... وحتى الحمام مادرتوش ماعرفت مالو على هاد الزربة الحارة ..

- صفاء [تنهدات حداها وݣلسات ] :

اختي راه من حقو ، لاش الواحد كيبقى يضيع فالوقت ... صافي تفاهمتو الله يسخر مدام هو بخيرو وقاد يوجد كولشي فمدة قصيرة الله يسخر ..

- مسيرة [بتشكيك ] :

مالك انت ياك لاباس ؟ شفتك ماشي على برجك ؟

- صفاء [تنهدات تنهيدة طويلة ] :

توفيق ولا كينخلني فخبارك ، جيت نسلم عليه لبارح دار راسو مكايعرفنيش .. وقيلة قصحت معاه الهضرة ..

- سندس : واش غير جا بابا وسماك عاشورة ، كان خاصو يسميك العيشورية ... راه عاود ليا هلال اشنو قلتي ليه ، من نيتك راه بحال الى هنتيه فكرامتو وجرحتيه بمسبتك مشا عند ولد عمو ، داخلت عليك بالله عرفتي وتشوفو الصحافة الكاريير ديالو كامل تضرب فزيرو .. عندك شي أفكار ديال الحمقين وحق الله العظيم..

- صفاء : صافي اختي ديري ليا تأنيب الضمير ، وانا عند بابي فاش عرض عليا الزواج غير كان كيتفلا .. واصلا ماعرضش عليا زواج قال بلي باغي يحاجة تكون بيناتنا ..

- مسيرة : وراه هي هي ، باغي يهيأك لزواج ... دابا هو كون باغي يتفلا على أساس مكاينينش البنات فين تباني انت ، بلاما تبقاي تشوفي فيا كنكول الواقع ..

- سندس : دابا سي طرو طار طيراتو ولي كان كان .. يلاه اختي خاصك تنزلي النقاشة راها جات .. نزلات مسيرة معاها .. لقات مها وماريا جايين باش يدقو عليها .. بقات غير صفاء لي كتفمر فكلامهم وشادة حناكها .. تنهدات بقلة حيلة وناضت تبعاتهم ..

_____________________

- كانت كتموت على شيحاجة اسميتها الحنة ، من دون البنات لي كانو كيختارو يديرو صبع واحد ... قالت ليها تعمر ليها يديها ورجليها .. العائلة كلها ضايرة بيها ، ولي مادين يديهم للحنة حناو صبع صبع ، صفاء وسناء ..

- اللعابات كانو مسخنين الطرح .. ماريا وسعاد كيشطحو .. أما رجال كانو فالصالة لوخرا ، ومنهم منصور .. لي هاد المرة حضر بدعوة منو هو على وجه وديان .. العائلة كلها كانت حاضرة بدون إستثناء ..

- نشفات الحنة للمسيرة ، لي زولاتها ليها مها بدبليج ديال النقرة .. ومسحات ليها يديها ورجليها بزهر .. من عادات وتقاليد اهل العريس مايدخلش عند العروسة وهي كتحني ومايشوفهاش حتى لنهار العرس ... كان ݣالس مع رجال ضايرين بيه هارون خوه ولاد عمامو شادين فيه ..

- سراج : ونوبتك ابا هارون فرجنا باش تكمل الشلة اصاحبي ..

- هارون : كيضحك وحمستوني الصراحة .. كيبان ليا غير نزعم ..

- هلال : وغير زعم تاكل اللحم ، شي ناس راه عينيهم على الباب ماكرهوش ينوضو وسط العيالات ..

- جلال [خنزر فيه ] :

مغانديرش فيك راسي اولد ميمتي ، خلي ليلة دوز وسرطها ..

- هلال : هاهو سارطها .. تجمعو العيالات على الطبلة تعشاو وحتى الرجال ... سلاو وتجمعو طبالي وقبل مايدخلو الطلبة طلعوها لبيتها مغطيينها بيزار باش ماتبانش للعريسها ..

- ختموها الطلبة بقراءة القرآن ، باش يكون زواج مبارك فيك ومكاين ماحسن من إسم الله يتدكر باش هكا تكون حياتو زوينة ومبارك فيها ..

- اللهم صلي وسلم عليك سيدنا محمد عليه السلام ..

- أراو الحنة اراو الما ، أراو الحنة جيبوها نعجنها

- سيدنا محمد يشفع فالامة سيدنا محمد يشفع فالأمة

- أراو الحنة اراو الما ، أراو الحنة جيبوها نعجنها

- سيدنا محمد يشفع فالامة سيدنا محمد يشفع فالأمة

- اراو الحنة وشعلو الشمع أراو الحنة وشعلو الشمع .

- لالة العروسة نجمة كتلمع لالة العروسة نجمة كتلمع

- هزو الصينية ودورو العمارية .. الجيران والحباب ايما فرحانين بيا ..

- هزو الصينية ودورو العمارية .. الجيران والحباب ايما فرحانين بيا ..

- بتكشيطة هماوية فالخضر مخيطة بصقلي الحر ، الشعر مطلوق متموج .. المكياج خفيف ظريف .. سلسلة أمها فعنقها مضوية بحجرة الروبي .. التاج مرصع بحجيرات فالخضر ، مع طوانݣ طوال .. داخلة للخزانة تحت انغام أراو الحنة وزغاريت ديال الناس والنݣافات .. الخزاين عامرين ، مكاينش حس البروتوكول ... العيالات بسواك والكحلة الحرة مزينين ... بحال شي موسم ، كولشي فرحان وعينيه عليها هي وياه .. لي كان فكامل رجولتو منخوي بجلابة صفرة مغربية وبلغة فنفس اللون ، شاد ليها فيديها ..

- والديهم وحبابهم وراهم .. الكاميرا مستقبلاهم ، خوه ولاد عمامو عصام كريم .. العائلة والحباب ݣاع حاضرين ، العائلة المهمة بزاف فهاد النهار ، كتشاركك فرحتك ، بنسبة ليهم هدا ماشي عرس هادا موسم .. وهوما فرحانين لمولاي السلطان وعروستو ..

- وصلو لبلاصتهم وݣلسو .. كان كلو تقالة وكلو رزانة ... ماشي من نوع لي خفيف نوع لي يبقى حاضي عروستو ، إحتراما للناس لي كاينين ناس البلاد لي كلهم حشمة او وقار .. كان شاد يدها بين يديه والإبتسامة مزينة وجهو ..

- وقف القايد وبدا يهلل :

وهدا نهار زين وكبير ، لي فيه تزوج ولدنا وحبيبنا وتاع ݣلبنا سي جلال ، وهدا موسم عدنا .. مݣادانا فرحة ، لي شاركتا فرحتو وبغا يديرو وسط حبابو هلو وناسو .. واااااا سي جلال وهاد تبوريدة ليك ، وسييييير يالعلام سييييير ...

- بدات التبوريدة والخيل مراكبة ، لي جاي كيدخل مكاينش لبسي ولا تقادي ... كتحس بالناس طيبة جايين يفرحو ليك ويخلقو جاو معاك حيت كيبغيوك مجايينش على تبركيك والسم بالعكس .. القلب الصافي ونية الزوينة ..

- كولشي كان فرحان بدون إستثناء ... قرب منها وبهمس نطق :

ماعرفتش علاش ختاريتي يتحطو طباسل ديال الحلوة ، كنا ممكن نديرو بلاطويات ..

- مسيرة [قربات ليه وبهمس ] :

العراس لي كانو كيدارو فوق السطوحة ، وكانو يتحطو الطباسل ديال الحلوة فيهم البركة ، اما هادشي ديال التريتورات فيه المشاكل ... انا هكا بغيت عرسي ، واخا وليت فتم دافيغ ولكن هاد الناس فمدة قصيرة عاشرتهم .. ودوزت معاها أيام زوينة ، بغيتهم يحسو براسهم ماشي برانيين وياخدو راحتهم فهمتيني ..

- بعد كيشوفيها بكل فخر ، عينيه كيقولو ليها بلي أحسن حاجة وقعات ليه هي تكون فحياتو ..

- وبحال عرس سندس دارت ، وختارو العقد يكون بين حبابهم وناسهم باه عمامو واقفين .. مو معزوزة صحابو خوه ولاد عمو ، ليليا وديان كولشي كان كيتسنى هاد اللحظة لي دخل فيها العدول ..

- وافقات بكل سهولة بدون قيد او شرط .. وهو كذلك بدون قيد أو شرط .. وافق ، سناو بزوج وسناو والديهم .. او ولات مرتو على سنة الله ورسوله .. باس ليها راسها وهمس بصوت سامعاه غير هي وهو :

ݣلت ليك يا انا يالموت ... بقيت حتى ديك الواشمة

- مسيرة [ضحكات وحدرات راسها طاغية عليها الحشمة ..

- جلال : عندي ليك واحد الحاجة ..

- اول ماهزات عينيها باش تسولو كتبان ليها سارة مرات نسيم ، فرحات بزاف وقلبها ضرب دورات راسها لجهة الاوركسترا كيبان ليها نسيم واقف ... ماعرفاتش علاش غلبوها دموعها ، زاد كبر فعينيها منين جاب نسيم للعرسها الصديق الصدوق لي وقف معاها ، لي عيات تسوني ليه مجاوبهاش لا هو لا مراتو ..

- شافت فيه موركة على يديه كعربون إمتنان .. سلامات عليها سارة بحرارة :

مبروك عليك ازين ديالي ، تستاهلي كل خير الله يكمل عليك بالخير ..

- مسيرة : لهلا يخطيك ، وحق العظيم الى فرحت فاش جيتو ، ماقلتوهاش ليا ... عيييت نسوني او والو ..

- سارة [ غمزاتها ] :

بغينا نديروها ليك مفاجأة ، واش مسيرة غاتزوج ومنحضروش مايمكنش .. خلاتهم ومشات لعند خواتات العروسة ، لي ختارو لون واحد يلبسوه فهاد العرس ، وهو لون الموڤ .. لا سكينة لا صفاء لا سندس كلهم لبسو الموڤ ..

- بدات الموسيقى وقبل مايبدا يغني نطق :

اليوم ماجيتش على اساس فنان يغني ، اليوم جيت كأخ لهاد السيدة لالة العروسة ... ختنا وبنتنا ، بغيت نݣوليها الله يكمل عليك بالخير ... وبلي كنت فرحان حيت تعرفت على صديقة وأخت بحالك ، دياموندا ديالنا لالة العروسة ... بغيت كولشي ينوض كولشي كولشي ، لي ركابيه على قدو ايݣلس ..

- بغيتكم تبلبلوها ، كولشي ينوض .. بغيت العريس والعروسة ينوضو ويجيو لعندنا .. وقفات مسيرة ومعاها جلال ، نزلو درجات بمساعدة النݣافة .. داروهم الوسط ، والحباب تجمعو عليهم ..

- بدات الموسيقى وبدا صوت نسيم كيصدح ..

- وݣالت ليا سيدي كالت ليا نعطيه ، انا ݣلت ليها لاواه انا ݣلتيها لاواه ، وݣالت نعطيك الحليب باش داوي مرض القليب ݣلت ليها لاواه ... وانت موشومت الصدر كان هداك الله ، ولا إله الله فصبر كانا نتلاقاو برد وبرد برد يا عطشان ، برد و برد برد يا عطشان ..

- شد يديها كيطح هو وياها ، البنات كيشطحو ويغنيو مع نسيم ، حبابو بدورهم ناشطين وكيشطحو ... تخلطات الدعوة وكولشي ناض كيشطح الكبير وصغير ..

- الضحكة كانت هي عنوان العرس ، ضحكة من القلب نابعة الضحكة الصافية ..

- هزات على تكشيطها كتشطح وهو كيرد عليها ، كتاشفات فيه جانب اخر اولا خرجات منو جانب اخور ، جلال الإنسان جلال العاشق الولهان .. جلال الحنون ، كانت كتشوف فعينيها الحب .. والعشق ليها ، كانت متأكدة بلي غادي يحافظ عليها وعمرو فحياتو مغايأديها ..

- مكانش هامها الدفوع لي الناس حلات فيه فمها ، حتى من اللباس ماهمهاش لدرجة ختارت لبسة وحدة تكشيطها الخضرة لي خداتها لهاد النهار بضبط ..

- كان هامها هو هو وعائلتها وحبابها وهاد اللحظة لا أكثر ولا أقل ..

- فنفس الدار لي توجات حبهم ولي خطفها فيها ... كانت أول ليلة ليهم ، خرجات من الدوش محيدة عليها العيا ديال العرس ، ملامح وجها مبدلين .. كتحس بالبرودة راكباها والخلعة ..

- مع خرجات للبيت كتلقاه واقف قبالتها ، صدرو عريان ... لابس غير سروال ديال الكيطما فقط .. بلعات ريقها والخلعة ركباتها .. كانت كتحاول ما أمكن انها ماتبينش ليه ... تبسمات وتوجهات لعندو ، بسروال ديال التوب حريري فالأحمر مع دباردو ديالو مشبك .. غير وصلات لعندو جرها معنقها ، مدخل راسها بين ضلوعو ..

- جلال [بصوتو الرجولي لي ميز بنبرة حنونة ] :

مال حبيبي ؟

- مسيرة [تنهدات تنهيدة طويلة ] :

ماماليش ، غير مزال ضارني راسي كيفاش عرفتيني غادي نوافق ..

- جلال [بعدها عليه وتبسم ، جرها من يدها ݣلس على الكرسي وݣلسها على رجليها ، حس بيها موترة حاجة لي مافهمهاش ] :

قريتها فعينيك [شافليها فعينيها بكل حب ] نهار جيتي من اليونان فالحفلة فاش عنقتك حسيت بيها ، من التعنيقة لي درتي حسيت بيها ... من الشوفات ديالك حسيت بلي كتبغيني ..

- مسيرة : وبلا حشمة ݣلستي تفقص فيا انت وهناء ..

- جلال [ضحك ] :

كان خاصني نحركك شوية ، والباقي راه تكلفو بيه خواتاتك ... مانخافش عليهم ، كنت متأكد بلي خاصك غير شوية وتوافقي ، كريم هو لي قتارح عليا نخطفك حيت راسك قاصح ..

- مسيرة : شوفليك ولد الادينة ... بلعات ريقها وسكتات مالقات متݣول ... حسات بيدو على ظهرها كدغدغها ، صباعة كانو بحال شي كمان فظهرها طالع نازل ... حتى وصل للخيوط الديباردو نزل اول خيط .. بشوية نزل بشفايفو على كتفها ..

- ريحتها كانت كتسطي ، كتير وهي دايرة si passion ، نزل بشفايفو على طول كتفها حتى لصباع يديها .. شافيها بحال شي واحد سكران بنار الحب .. قبل خدودها وهي مغمضة عينيها قلبها كيضرب بجهد ..

- مكانش عندو ݣرام ديال الصبر ، بسرعة البرق كان ملاتهم شفايفها ... قبلة طويلة كلها شوق كلها عتاب .. كانت محملة بكتلة من المشاعر .. خلاها تحلق وتعلي وطير ، بالخف هزها بين يديها غادي بيها ومفاصلش شفايفو على شفايفها ..

- حطها على نموسية ، ناعس بنص جسدو عليها ، يد حاطها تحت راسها ويد كيتسارة بيها على كرشها .. كانت طايرة فالهوى بين يديه ، كتحس بيدو كتنزل ليها فسروالها ..

- زولو راميه حتى بقات غير بالسليپ .. فاللحظة كمشات رجليها وتكنزات ... حس بديك الشعلة لي كانت تحت منو بردات ، بعد منها وعينيه معسلين .. شافيها بشكل مطول ونطق :

شنو واقع ؟ واش عيانة مامرتاحاش ..؟

- مسيرة [حركات راسها بالنفي ] :

لا ولكن .. جلال خاصني نݣوليك واحد الحاجة وقيلة انت معارفهاش ..

- جلال [ بإستفسار] :

شنو واقع ؟ مالك دوي ..

- مسيرة [بلعات ريقها وتنهدات تنهيدة طويلة] :

انا ، [سكتات ] أنا راه مزالة بنت ..

- جلال [بإستفهام ] :

كيفاش بنت مافهمتش ، كيفاش بنت ياك مزوجة زوج ديال المرات قبل ؟

- مسيرة [تنهدات ] :

انا وجمال زواجنا ماكملش ، وطلقنا طلاق الشقاق قبل البناء ، وحتى عصام كنا مزوجين غير على الوراق .. كنا بحال الخوت وصحاب فدار ، عمرو ماقرب ليا ولا وصلني ، وحتى هو طلقنا طلاق الشقاق قبل البناء ..

- جلال [ بقا ساكت كيستوعب ] :

دابا بغيتي تݣولي ، أنا اول واحد غايقرب ليك ياك ؟

- مسيرة [جمعات حجبانها كتغبن ، خايفة ] :

اه وانا عندي فوبيا من الدم ، كنشوفو كنسخف ... خايفة بزاف ولحمي عزيز عليا بزااف ، مقا ... " ماخلاهاش تكمل كلامها كان ملتاهم شفايفها بين شفايفو ... مكمل على لي بداه .. هزها لسابع سما ، كانت متمرس فداكشي لي كيدير محترف .. كيطلع وينزلخا كيخليها تنفض .. وركات على حر جهدها على ظهرو العاري من حر الألم لي حسات بيه ، بالخف زول توب عذريتها لاحو لبعيد باش متشوفوش ..

- هزها بحال الاميرة بين يديه مدخلها للحمام ، طلق الما سخون ، وحطها فالبانيو مدوش ليها بكل حنان ومكايس عليها ... عيا العرس وعيا هاد الليلة سلاو معاها ، لواها فالپينوار وخرجها .. حطها فنموسية ورجع للحمام دوش ، نشف راسو ورجع لعندها لقاها مغمضة عينيها ..

- جرها لعندو محتاويها بين يديه غطاها وغطا راسو معاها وهو بالپينوار ديالو ، طفا الضو .. هز ليها راسها وقبلها قبلة طويلة فشفايفها .. حط راسو على راسها ومشاو فسبات عميق ..

- *** بعد مرور عام ***

سعاد شادة على راسها بالحامض .. كتميل راسها يمين وشمال ..

- صفاء : مالك اماما ، واش هكا درتي لخواتاتي فعرسهم ... جيتي حتى للخطوبة ديالي ودرتي هاد الحالة ياك لاباس ؟

- سعاد : واش انا هاد العائلة خارجين فعودي ، ولادهم داو ليا بناتي ، وحتى انت طيرك ولدهم الصغير ، انا هزيت الرايا صافي ..

- سندس : ماما يهديك الله حشومة ، الناس راه قراب يجيو وانت دايرة هاد الحالة نعلي الشيطان ..

- جايا من الفوق هازة بنتها .. حطاتها للسعاد بين يديها :

والو اخالتي عيييت مابغاتش تسكت ليا وحق الله العظيم ، اش داني لشي زواج ولشي ولاد انا ..

- سعاد : واش انا منرتاحش ، انهز جلابتي متعرفوني فين زدت [ هازة رؤية بنت سكينة كتسكت فيها ] :

فين مشات خالتي اويلي ؟ سونيو لختكم راه تعطلات ..

- سندس : قاتليا راها جايا فالطريق هي وراجلها .. ليكونو افطريق ، عرفتيها هي مكتقدش على الصهد ..

- صفاء [وقفات تيليفونها كيسوني ] :

توفيق كيسوني عليا انمشي نجاوبو ونوجد راسي ... خلاتهم وطلعات للفوق ..

- سعاد : سيري ابنتي شوفي نجية واش كملات ، وسوني لباك كولي ليه فين هو واش باغيين تحمقوني فهاد الدار ..

- سندس : واخا اماما اتكلاماي واخا ..

- سعاد : سوني لختك معاها .. صافي ابنيتي صافي الكبيدة هانا هانا ..

________________________

- دخل للسوبير ماشي ... يجيب ليها داكشي لي بغات ، عصير او واحد الكيك كيعجبها ديال الشكلاط ... من نهار حملات وهو لي كتاكلو حتى غلاضت ..

- خدا ݣاع داكشي لي بغات خلص وخرج غادي فتجاه الطوموبيل ، حتى كتبان ليه الروينة نايضة وسط الشانطي الناس مجموعين والغوات .. جا يركب فطوموبيلتو مالقاهاش مكايناش .. حط داكشي فطوموبيل .. وجرس الانذار كيضرب فىاسو حاس بلي داك الصداع غاتكون فيه ..

- زول نظاراتو الشمسية وتوجه لبلاصة الصداع .. كتبان ليه مرا كتبكي ، ورال مشبح فالارض راسو مدمغ بدمايات ، تشوكا وهو كيشوفها واقفة بقفطانها وفولارتها ، كرشها لفمها وفيدها حجرة ..

- مسيرة [بإنفعال ، كتغوت ] :

الشماتة تهز يديك على مرا وضريها ، لقيتيها ضعيفة مقاداش دافع على راسها لي بحالك موتهم حين من حياتهم .. يا عيفة الرجال ... داخ ماعرف باش تبلا .. بالخف زول ليها الحجرة ورضها وراه كيغوت عليها :

اش كتروني اش درتي ، واش انت مكتعلميش واش باغية تخرجي ليا العقل ، اش كتخوري اش درتي .. اش دخلك بين جوج .. واش امسيرة باغية تخرجي ليا العقل ..

- مسيرة : حݣار ضرب للمرا مسكينة مدارت ليه والو ، حتى واحد مدخل وبغيتيني نسكت والله لا كانت ليه ..

- جا يجاوبها ، ولكن قاطعو تدخل سطافيط لي وقفات عليهم ..

- ݣالسة على الكرسي قدام الضابط ، عينيها كتبيض فيهم ، مابغاتش تشوف فيه عارفاه مغزف عليها .. وخاصو غير منين يدوز ليها ..

- الضابط : سي جلال ، ماعندنا منديرو خاصها ضروري تهبط للتحت .. السيد كاين فسبيطار مزال ماعرفناش حالتو ..

- جلال [بصرامة وبصوتو الرجولي القوي ] :

سي رشيد ، المدام راها حاملة وفشهرها .. مايمكنش تهبط لتحت .. واش مكتشوفش حالتها ؟

- رشيد : شايف كولشي ، ولكن القانون فوق كولشي .. ضرةري متهبط ..

- مسيرة : نهبط مال البنيقة غادي تخلعني ، مالني شنو درت .. واحد كيسوط فمرتو رجال بشلاغمهم مدارو والو نبقى انا واقفة كنتفرج ..

- جلال [بصرامة ] :

غادي تسدي عليا فمك مانسمعش حسك .. غادي نهبط معاها مغاديش نخليها بوحدها التحت .. الى تهيك نهبط حتى انا ..

- رشيد : من نيتك اسي جلال ، راه كوميسارية هادي ..

- جلال : خير درتو معاك شحال هادي ، جا الوقت لي ترضو ليا ... الى اتهبطوها غانهبط معاها ..

- مسيرة : ديروه فسيلون بوحدو وسدو عليه ، هذا راه مصعور والله حتى يشنق عليا ..

- رشيد [حرك راسو بإستسلام وقف وتقدم قدامهم ] :

اجيو معايا .. وقفات ، سابقاهم خايفة منو عارفاه غادي يدݣها ... نزلهم بزوج لاكاب لتحت ، دخلوها هي سدو عليها ، وهو بقا واقف مقابل معاها .. مشا الضابط وبقاو بزوج ..

- جلال [بتهديد ] :

قسما برب الكعبة ، غير حتى تخرجي ونتفاهمو ..

- مسيرة [ببرودة كتهز فصمطة ديال القفطان ] :

حتى نخرجو وديك ساعات نتفاهمو ، هذا الى ماولدتش ليك هنا .. اجي نسميو ولدنا مسجون ..

- جلال [بصوت تهديدي ] :

مسيرة ، متخلينيش نرجع للكرة دالبيلياردو ..

- مسيرة : مالن ، اااااااااااااااه ... اااااااااااااااااااه [شدات على كرشها ] جلال جلال عتق عتق ااااااااااااه ..

- جلال [بخوف ] :

بشوية بشوية ، مالك مالك ... بلات ياك مزال ، مزال واش كتحسي بشيحاجة ..

- مسيرة [كتغوت ] :

وغانولد وغانولد ااااااااااااااااااه ، وعتقني دير شيحاجة وانت مخلوع مكتفافة ، اااااااااااااه .. طاخت على ركابيها ... طار كيغوت على البوليس ، جاو زوج كيجريو شافو حالتها طلعو كيجريو علمو الضابط ... لي بدورو علم لومبيلونص ... نزل بجرا فتح عليها ، دخل عندها جلال كيحاول يكالميها وهو براسو خاص لي يكالميه ..

- وصلو لومبيلونص .. دخلو بجرا ، هزوها مخرجينها من الكوميسارية ، طلعوها وطلع هو حداها ... الطريق كلها وهو شاد ليها فيديها .. كتغوت ربي لي خلقها وكتبكي كلها عرقانة ...

- وصلو لكلينيك لي كان فيه الطبيب لي متبع حالتها ... سدو عليها فبيت الولادة وهو علم العائلة .. كلهم تهز من الطبلة ، توفيق بالكوبلي ديالو وضفاء بقفطانها ... كولشي جا كيجري لتاحقو بيه ..

- كان واقف على ناس ، باها وجداها كيدعيو يدوز كولشي على خير ... خرج عندهم الطبيب والابتسامة على وجهو :

مبروك عليكم الله يكمل بالخير ، غير يديوها لبيتها وتشوفوها ..

- جلال [بخوف ] :

ياك هي مزيانة ؟

- مزيانة ، وحتى ولدك بيخير وعلى خير .. على سلامتها .. خلاهم ومشا ، الفرحة تعلات بيناتهم .. شي كيعنق شي ويبارك لشي ، بعد مدة حولوها لبيتها ... واول واحد دخلها عندها هو .. قرب ليها وقلبو كيضرب ، نزل بشفايفو على على جبهتها .. هز ولدو وأدن ليها فودنو ورجع حطو .. كانو العائلة مراقبينهم من السرجم وزاج ..

- مسيرة [بعياء ] :

شنو نسميوه ؟

- جلال : نسميوه لقمان ..

- مسيرة : لا نسميوه عطية الله ، ولا نسميوه ساجن حيت الوجع جاني فالحبس ..

- جلال [برزانة ] :

مسيرة نعلي شيطان ، كيفاش ساجن وكيفاش عطية الله ..

- مسيرة : ولدي وانا لي تعدبت عليه .. نسميه ساجن ولا عطية الله ..

- العائلة على برا مافهمو والو شي كيشوف فشي ..

- جلال : ولدي غانسميه لقمان الإبراهيمي ..

- مسيرة [بضد ] :

ولدي انسميه ساجن ولا عطية الله ، ولاغانهز جلابتي ونهز ولدي متعرفني فين زدت ...

- جلال : الواشمة مطلعيهمش فيا ..

- مسيرة : الغراب مطلعهمش فيا ..

- جلال : مســــــــــيــــــرة ....

- مسيرة : جـــــــــــــــلال ....

الــــنــهايـــة ...

تمت والحمد لله