روبي ڤيريدجو الجزء الثالث

- جلال ضار عندهم ، هز حواجبو بمعنى شنو كاين ؟

- [واحد فيهم نطق] :

إجراء روتيني اسي جلال ، على ود لاكسيدو لي وقعات ... إلى ممكن تجي معانا .. محتاجين بعض المعلومات منك ..

- جلال (بدون مايتحرك من بلاصتو) :

ماشي بلاصة الأسئلة هنا ، 10 دقايق وندوز عندكم ..

- هزهز واحد فيهم راسو بالإيجاب ، ضارو ومشاو ..

- جا الطبيب عند نجية ، غير شافتو وعيطات لجلال :

سي جلال هاهو طبيب ..

- بجوج خطوات كان حداهم .. كيسمع شنو أيݣول الطبيب ..

- دكتور :

الحمد لله ماعندوش نزيف داخلي ، عندو هرس على مستوى المرفق الأيمن ، وهرس فرجلو .. الحالة لي جا عندنا فيها مكانتش كتبشر بالخير ، الحمد لله لي خرجات بحال هكا ، شي معجزة وقفات معاه ..

- نجية (كبتكي) :

سي الطبيب واش فاق نݣد نشوفو ؟

- دابا لا واحد نص ساعة وتقدي دخلي تشوفيه ، على سلامتو ومايكون عندو باس ..

- نجية (رجعات بلور ݣلسات على الكرسي شادة حنكها وتخمم) ..

- هزات راسها جهة جلال لقاتو مكاينش غبر .. طلع لطوموبيلتو ، داير نظاراتو الكوحل لي مخبيين عقدة حجبانو ، ديما وعفط عفطة وحدة للكوميسارية ..

_____________________

- سعاد (وقفات حيت عارفاها غادي تنوض وعارفة مسيرة مزيان غادي تريشها ) :

سيري اختي مليكة عطينا بتيساع الله يرحم باك ،سيري اختي ماعندنا بنات لزواج ... هاحجر العافية ..

- مليكة :

وهي هادي ، كبر الشان لبوجعران ..

- مسيرة (كتقرب ليها ) :

بصح كبر شان لبوجعران ، راه كبرناها ليك نيت فاش حلينا ليك باب دارنا ... حݣل راجلك فيك ، ماعرفوك الناس غادية ولا جاية .. وداك الرعاوني ديال ولدك ، نحصلو حط عينيه على وحدة فخواتي انسيفطو لعوكاشة ، تولي تنݣلي ليه فالقفاف وأنا علمتك .. خرجات مليكة مسرسبة كيف الكلبة .. سدات الباب وراها ورجعات ݣلسات بحال الى ماوقع والو ..

- مسيرة :

مي تمشي لحمام ، نوض نجمع ليك حوايجك تسخني عظامك ... نحك ليك ونغسل ليك انت لولة تخرجي حيت كتسخفي اش قلتي ؟

- معزوزة :

والله ابنتي ماقادة ، عيانة عظامي باردين عليا ..

- مسيرة [وقفات] :

لالا غير نوضي ، انجمع ليك حوايجك ، تسخني عظامك .. نجيو نلقاو ماما دارت لينا شي طرح ديال المسمن معمر ..

- سعاد [بقات وسطهم كيف الحمقة ] :

والبهلان هدا وخرجان العقل ، ودغية بدلتو الهضرة بحال الى ماشي صفاء لي كانت كتخطب دابا ..

- مسيرة [كتشطح] :

والى جا دارو عالية حتى لشرع يديه والى جا ، صباطو مسيري حدو الݣدام والى جا .. دابا حنى نضيعو الوقت على داك شارشابيل ومو ... من نيتك اماما ، المهم انمشي نحمع ليك حوايجك امعزوزتي .. خلاتهم زمشات لبيت جداها تجمع ليها حوايجها ..

- سعاد :

هاد البنت مكنفهم فيها والو ، وحق الله العظيم..

- معزوزة :

كونما دارت هوكا ، كت انا لي انوض نخشي لديك ميليكة عكازي نعمي ليها العين ، عبرات عليها .. راجلك معاود ليك والو ؟

- سعاد (تنهدات) :

علاش هو اخالتي كيعاود ليا شيحاجة ، ولكن نحلف بيميني الى كيخططو لشي حاجة ، ودريس حلف واش يقول ليا شنو كاين كنجي نسولو كيدير العدر بالخدمة وهو راه ماخدم ماردم اكتر الكدوب وزفوط ..

- معزوزة :

غير خليهم حتى انت حتى نشوفو هاد القرع لي ايدينا ..

- فالكوميسارية .. ݣالس فالبيرو ديال الضابط .. داير رجل على رجل وقدامو طاس ديال القهوة ..

- [الضابط حكيم ] :

كنعتادرو منك على هاد المجية اسي جلال ،ولكن راك عارف ضروري من الإجراءات ..

- جلال (رشف من قهوتو حطها وشاف فيه ) :

شنو المشكل ؟

- حكيم :

سي جلال ، لقينا طوموبيل ديالك ملعوب فيها ، يعني لاكسيدو لي وقعات ، وقعات بفعل فاعل ... ماشي اكسيدو عادية ..من بعد تحقيقات في موقع الحادثة .. ( بعد صمت) التحقيقات الأولية فادت بلي الحادثة كانت مدبرة ... يعني محاولة قتل ...( بكل جدية ) عناصر الشرطة العلمية مزال كيستخلصو باقي المعلومات ..

- جلال[ كيدوز يدو على لحيتو ، ملامح وجهو مامفهومين ، مكتعرفو فاش كيفكر .. مجاوبش بقا ساكت ] ..

- حكيم :

انت تبارك الله إنسان ، لي عندك مكانة إجتماعية ، من عائلة معروفة ، وأي إنسان ناجح كيكونو عندو أعداء .. واش مشاكش فشي واحد ؟

- جلال [عوج فمو ، وهز بكتافو ] :

لا ، مجا فبالي حتى واحد ..

- حكيم [ كيحاول يركز ليه فعينيه ويأكد عليه] :

حاول تفكر أسي جلال ، اي حاجة راه تقد تنفعنا فهاد القضية ، راه حياتك هادي لي كانت فخطر ... وكون كنتي انت لي فطوموبيل انت لي كنتي اتكون فبلاصة سي أحمد ..

- جلال [عاقد غوباشتو] :

ولي عندي حتى أنا راه ݣلتو ..

- حكيم (تنهد تنهيدة طويلة ) :

واخا ، سمحلينا على الإزعاج .. بنسبة للطوموبيل ..

- جلال [ وقف] :

بصحة صحاب لافيراي بيها .. دار نظاظرو وخرج ، ركب فطوموبيلتو .. هز راسو كيفكر .. [ هز التيليفون ، دوز واحد النمرة ] فينك انت ؟ خليك تم أنا جاي ..

- قطع التيليفون ديمارا وزاد ..

- كان مزال واقع حتى دخل عندو ضابط اخور :

امضرا شنو ݣاليك ؟؟

- مݣال والو ، مكتعرف شنو تحت راسو ، هاد السيد فشكل داير غامض لأقصى درجة ..

- ومايمكنش ، ضروري تكون إن فهاد البلان ، غير اجي ولعب فالفرانات ديال واحد السيد لي معروف ، شي إن تما ..

- حكيم :

وتݣول واش بغا يدوي أصاحبي ، ݣاليك معارف حد ومجاه لبالو حد .. وحماق أنت ..

- شحال قدو حتى انت ، شفتي الى كان شي واحد حاجو فراسو ، البلان ايتعاود ايتعاود ..

- حكيم ( وقف) :

الى كنتي غادي لدار نوصلك ..

- لا غير سير انت انا مزال تابعني مايدار ..

- حكيم [ هز تيليفونو وسوارتو ] :

تهلا حتى لمن بعد ..

- نتقاشعو ..

______________________

- دخلو من الحمام سخفانين .. وميتين بجوع ، لقاو سعاد حاطة صينية ديال اتاي ، وطبسيل فيه مسمن بشحمة ، والبيض مسلوق وكيكة ..

- معزوزة ( ݣلسات) :

شريبة ديال الما ابنيتي اسعاد على وقتك ..

- سعاد ( جابت القرعة كبات ليها ) :

بصحتكم وراحتكم .. [ شافت فجهة مسيرة لي جرات الصينية خوات ليها اتاي وبدات بغات تاكول ..

- سعاد :

مكاين لا سلام لا كلام ، سلم عليه زرب عليه ، وخلي اتاترجع فيكم النفس ابنيتي ونتجمعو كاملين ..

- سندس [كتحيد فشال] :

اخليها ، راه نوضاتها فالحمام وجات لهنا ، دخلنا ماعلينا مابينا ، حتى تمات داخلة مليكة ... ولي بداوه هنا كملوه لهيه ..

- مسيرة ( دارت بيضة فالمسمنة ولواتها وكتاكول فمها عامر) :

انا ماجبدتهاش ، شفتي كولشي بعينيك .. بلعاني ݣلسات تحشي فالمعاني ، وبلعاني كنت حاجة سطولاتي جات كحزاتهم ودارت دياولها ، واخا نكون مافيا نفس مغانسكتش ليها ، شارفة الهارفة دايرة عقلها فبنات قد بناتها الله يمسخها ..

- سكينة (كتاكل كانت حاسة بسخفة ديال الجوع ) ..

- سعاد (كتشوف فيها ) :

مالك ابنتي ، وجهك صفر ، ناس يجيو من الحمام وجهو مزنݣ انت صفرة ..

- سعاد [بخوف] :

مالك قلبك كيضرب بغا يسكت .. ؟؟

- سكينة :

الى ضرني جوع وماكليتش فالوقت ، كتشدني سخفة وقلبي كيبقى يضرب ، كنحس بالفشلة ..

- سعاد :

عمرك مادوزتي ، تشوفي مناش هادشي ؟

- سكينة :

لا عمري مدوزت ، [ كملات ماكلتها] ..

- سندس :

خاصك ضروري تشوفي مناش هادشي ،، با مكاينش ؟

- سعاد :

صلى المغرب المغرب وخرج .. مازال ݣاعما جا لا هو لا دريس ..

- سعاد :

خالتي تاملي دابا ولا بلاتي شوية حتى ندݣ ليك لانسولين ..

- معزوزة (تكات فوق السداري مسرحة رجليها ) :

بلاتي واحد شوية نرتاح بعدا ، حتى يقرب العشا وعطيني ندݣ وناكل ..

- سعاد : واخا ..

________________

- ف le skybar فعين الذياب ، حدا البحر ، كاينين ݣليسات جماعية ، وكاين ݣليسات غير لجوج ديال الناس ، الضو كان قليل ، كاع الطبالي مضويين عليهم الشموع .. كاين لي جاي يتعشا وكاين لي جاي باش يسهر ، وكاين لي جاي يدوز وقت زوين ويمشي ..

- والأغلبية كانو جايين غير باش يسمعوه ، لحد الساعة معارفين شنو سميتو ، المهم عندهم هو صوتو زوين ... ولغة باش كيغني كطربهم .. كانو كايتسناو بفارغ الصبر توصل ال 10 ديال الليل باش يطلع ... كل شوية كيهزو راسهم للبلاصة لي كيغني فيها ..

- واخا سلاو العشا ، بقاو ݣالسين حالفين مايتحركوش حتى يطلع يغني عاد يمشيو ..

- فواحد الوقت ، طفا الضو الموڤي لي كان ، ورجع بلاصتو ضو فصفر خفيف بزااف .. تسلط ضو فالبيض على جوج ديال دراري واحد فيهم هاز الݣيتار ، وتاني حدا البيانو ، الكل ضار مترقبو يطلع ... وكاينة لي جاية ماشي غير باش تستمتع بصوتو ، لا جايا باش تستمتع بالكاريزما لي فيه ، رجولتو ونظراتو الغامضة ..

- خطوة الخطوة الاولى ، بطلة ديالو لي كانت مبدلة على باش دخل ، سروال كحل توب ، مع شوميز فالكحل نص كوم ... سلسلة طويلة فعنقو ، ساعة كحلة واليد لوخرا جوج ديال تويشيات فاليد لوخرا .. هاز الميكرو فيدو ، غير وقف وبدات الموسيقى .. كان ساكت وكيشوف بعيد ، حتى وصل الوقت لي خاص يبدا فيه .. بصوت حنين ..

- لا أستطيع أن أشرح كم إشتقت إليك ..

- وكم حسرتك عندي ..فإنني أحترق من الداخل ..

- اي نوع من الوداع لهذا الحب الأعمى ..

- قبل أن أقول لا تذهب إشتقت لك بعمق ..

- لا أستطيع أن أشرح كم إشتقت إليك ..

- وكم حسرتك عندي ..فإنني أحترق من الداخل ..

- اي نوع من الوداع لهذا الحب الأعمى ..

- قبل أن أقول لا تذهب إشتقت لك بعمق ..

- سالة حط الميكرو تحت تصفيقات الكل ، نزل وطلع نيشان لشومبر ديالو .. بدل حوايجو .. رجع لبس الكلاص ، هز سوارت طوموبيلتو وتيليفون ... نزل مع نفس الدروج لي جا منهم ، خرج من الباب اللوراني باش مايتلاقى مع حتى واحد .. حل طوموبيلتو ، ركب وديمارا شاد الطريق للإفران ..

________________

- فوق الصخر ، مقابل مع البحر .. واقف حاك حداه واحد الصندوق .. واخا كان البرد ، لابس غير پيل سماطي فالخزي، راسو رابطو بواحد النيڤية فالݣرونة ، جوج ديال سلاسل طوال مدهبين نازلين من عنقو ، الليل وداير نظارات شمسية ، كيبان من دوك الأشخاص الهيپيين .. يكون تقريبا فالأربعينات من عمرو .. الجسد ديالو باين خادم عليه مزيان ، شعرو رطب وقوي ، إبتسامة إستهزاء على وجهو لي مزين بلحية ..

- سمع الروايض ديال الطوموبيل حبسو .. ثواني قليلة ، حس بيه واقف وراه ..

- المارية هاد الليلة طالعة ، حوتة وحدة مزال ماقفلت عليها ..

- وقف بجنبو ، لابس كيطمة فالݣري .. كيشوف قدامو ..

- الضبابة والبرد وباغي تصيد ..

- [ تبسم وضار عندو ] :

أش تم ؟ الوحش ؟

- جلال (تبسم وشاف فيه) :

أش بان ليك ؟ تجرب ؟

- [بإستغراب] :

دابا ؟ والݣصبة ؟

- جلال [بصوت رجولي] :

قسم مها .. ضار وخلاه .. وصل عند طوموبيلتو ونطق :

1 ..

فلحظة ، لاح الݣصبة من يدو ، نقز من فوق ديك الصخرة ومشا كيجري لطوموبيلتو، ركب جلال فطوموبيلتو ولاخر بحالو ، قبل لا يديماري جلال شاف فيه وغمزو .. كسيرا وعفط عفطة وحدة ولاخر تابعو ، غاديين فخط واحد ، مسابقين .. كيسبقو جلال ، ويرجع لاخر يسبقو .. الزهر لي عندهم طريق لي كانو غاديين فيها كانت خاوية .. بقاو على داك الحال حتى كانو قدام واحد الكبانو ..

- سبق نزل جلال ، تبسم حتى بانو سنانو مستفين ، إبتسامة كتخليك تيه فملامح وجهو ..

- جلال (نزل من طوموبيل رامي ليه السوارت ) :

هادي عندك اهارون ..

- هارون (ماعجبوش الحال ) :

أرون اجلال أرون ..

- جلال مداهاش فيه ، دفع الباب برجلو ودخل ، وهارون من وراه ، ݣلس على واحد الفوتوي وجبد رجليه ..

- هارون (تقابل معاه ، ݣلس فوق كرسي مفرق رجليه ) :

أش تم ؟؟

- جلال :

وجد لينا منحنجرو بعدا ..

- هارون (دفع الكرسي) :

هي لي متعاود ..

______________________

- هارون ( مخصر سيفتو ) :

فيمن شاك أنت ؟

- جلال [مصغر عينيه ، كيضغط على كرة البيلياردو لي هاز فيدو ، كحلة وفيها رقم 8 فالبيض ] :

واحد مامنو جوج .. منصور .

- هارون :

شتك ميقن بلي هو ..

- جلال (كيلعب بواحد الموس بصباعو ) :

كنݣوليك هو [كيشدد على مخارج الحروف] ..

- هارون :

بحال الى زهقات ليا شيحاجة ، كيفاش البلان ؟ زعمة هادشي كامل على ود الشركة ؟

- جلال [ غمز بعينيه بمعنى لا ، وصباعو مزال كيلعبو بداك الموس ، ماعلى بالوش بلي حركة بسيطة ممكن يضرب يدو] :

الأرض دوجدة ..

- هارون :

لي خلى ليك جدك ، مالها ؟

- جلال [هز داك الموس ونيش بيه ، جابو نيشان فالباب] :

عينو فيها ، بالعربية بغا يشريها مني ..

- هارون (تبسم ) :

وانت مابغيتيش هادي باينة ، تفرط فطرف منك ومتفرطش فأرضك .. ولكن بلات أصاحبي ، أعلى ود مابغيتيش تبيع ليه يبقى حاط عليك مايمكن ، شي إن تم ..

- جلال [ هز فرشيطة كانت قدامو ، وبدا يلعب ليها كيما كان كيلعب بالموس] :

الأرض دايزة تحتها طريق كدي للحدود .. وهو عينو عليها ، يموت ويديها ..

- هارون [ بعصبية] :

ولد **** ، دابا فهمت البلان ، هي خونا من صحاب البيضة مونامور ..

- جلال (مزال كيلعب بالفرشيط بين يديه) :

لا ماشي ديالو ، الفرشاخة هي مولاتو [أسوء أنواع الحشيش] ..

- هارون [بصدمة] :

بابابابابا ، پشااخ .. بانت ليه فأرضك على قلة الطرقات ، ولا خاف يقطعو عليه المخزن الطريق ؟

- جلال (هز عينيه لجهة الموس لي مغروس فالباب ، بكل جهد تبع ليه الفرشيطة لي تغرزات حداه] :

الطريق لي كان كيدوز منها طرقوها ، سدو عليه العوينة منين كيجغم ..

- هارون [ناض للكوزينة ، حل الثلاجة جبد منها كازوزة [قرعة الشراب] ، خوا ليه كاس ، ولجلال كاس حطو ليه قدامو ..

- جلال [ بعدو من قدامو بجوج صباع ، على عينو فيه ورجعهم للهدف فين شير بالفرشيط ] :

الما الخاسر [الشراب] كيتشرب نهار السبت ، من غيرو كيولي باسل ..

- هارون :

خليه نشربو انا ، كاس واحد مع هادشي لي ݣولتي مغايكفيش ..

- جلال [ وقف ، بوقفتو كيبين بلي غايمشي ] :

عرݣها مع قبك ، وصبح ناعس ..

- هارون :

أجي ، بلات أصاحبي فين غادي تا ريح .. مزال مكملناش الهضرة ..

- جلال [جر داك الموس والفرشيط من الباب لاحهم فجيبو ] :

إلى عندك شي شغل قضيه ، لي كاين راه ݣلناه ..

- هارون (تبسم ) :

حط الموس والفورشيط أصاحبي ، واش أنا خاصني كل مرة نشري جديد ..

- جلال (ضغط على كتفو) :

ميك ..

- هارون :

وبلات ماݣلتيش ليا شنو غادير مع هاد خونا ..

- جلال [دوز لسانو وسط فمو] :

خلي ضبع يتبورض كيف بغا ويدردݣ برجليه ، نهار يطيح ايتݣطعو ليه ويتفركلو ݣدامو ..

- أشر ليه بيدو ، وخرج ..

مجموعات ب 4 فالبيت .. هازة فيديها مذكرة وستيلو وكتقيد ..

- مسيرة [دايرة لراسها پاطشة وعاكفاه] :

انا كان كيحسابلي المطريال ساهل ، وهو هادشي ايطلع علينا بغسيل الفندق .. المهم ماعليناش بداي ..

- سكينة [كتاكل فزريعة الݣرعة] :

هانتي قيدي تما جوج بيسيات ، ديجا قلبت فالفيسبوك ولقيت واحد حاط بيسي واعر ، digital storm ×17 .. هارد درايف 1 تيرا بايت ، المعالج cor i7 ..

- مسيرة [كتقيد فالمدكرة ، هزات راسها شافت فيها ] :

شحال كيدير ؟

- سكينة :

15000 درهم .. ولكن راه مخير ، عاد ايخصنا بيسي ثاني ، تكون الكاميرا ديالو مزيانة ..

- صفاء [كدير مساج لوجها بواحد السيروم ] :

علاش زعمة زوج ديال البيسيات ؟

- سكينة :

واش يحسابليك انت هادشي ساهل ، البيسي لي ايكون عندي انا بوحدو ولي عندها هي بوحدو ، ديالي انا انقد نتحكم بيه فالبيسي ديالها ، ونخلي لايف يتنشر ف 300 بلاد ، ..

- مسيرة [حطات يدها على حنكها] :

كيفاش مافهمتش ؟

- سكينة :

ديجا قتليك انخلي الفيديو ينزل من بزاف ديال البلدان ، وراه هدا هو البلان .. القالب هو اللايف ايبان جاي من 300 بلاد ، باش هكا البوليس مغايقدش يعرف اشمن بلاد كاينة انت .. الى درنا كل مرة تلاح من بلاد راه ساهل يلقاوك .. اما الى خلينا لايف يطلع من 300 بلاد ، مغايعرفوش فين كاينة ، واش طوكيو واش الهند واش واش فهمتي دابا ..

- سندس [ تبسمات] :

فخبارك تحمست وعجباتني الفكرة بزااف .. خطار انت ..

- مسيرة [ هزات كاس صغير فيه دكيكة ديال اتاي ، جغمات منو وحطاتو بلاصتو ] :

ماعندي مانسالك ، هاد الباب سديناه دابا ، كملي ليا باش نكمل التقياد ، غدا راه كريم ايصبح علينا على نبوري ..

- سكينة :

واخا كملي ، الكلي مكاين لاش حيت ديجا كاينة عندي ، مقاداها ..

- مسيرة [منزلة راسها على المدكرة كتقيد ، هزات راسها بتساؤل ] :

فين كنتي دايراه الجنية ، وهوما فاش كدخلي للحبس كيزولو ليك أي حاجة عندك ..

- سكينة [كضحك]

كنت غارساه فواحد المحبق فالبيت لي كنت كارية ، شديتو ودورت عليه السكوتش ، ولصقتو مع الجدورة وغرستو فتراب ، واخا كانو كاع يقلبو مايلقاوهش .. حتى داك سكوتش صبغتو بالقهوي مغايبانش مع التراب .. ولكن ماقلبوش ..

- صفاء :

وعرفوك هاكر وماقلبوش وراك العجب ..

- سكينة :

بنسبة ليهم انا ، اوحدة عندها مع لانفورماتيك ، يلاه كتعلم دوك القوالب ، كون عرفوني شي وحدة خطار راه كوراه مركبين ليا شي لعبة باش يتجسسو عليا ، ولا يخدموني نيت معاهم من نيتك ... واش انا اجيت وقببلت ندير هادشي مع مسيرة ..

- مسيرة :

دابا كملي ، بنسبة لصوت ..

- سكينة [هزات كتافها وحركات راسها ] :

لالا الصوت انخدم عليه غير ببرامج خاصة بتغيير الصوت ، داكشي خليه عليا انا متخميش فيه ..

- مسيرة :

بقا لينا الحوايح دابا ، والبلاصة لي انخدمو فيها ، عرفتو شنو .. واحد المحال نهار كنا راجعين من القهوة بان ليا حاطينو للكرا ، أش بان ليكم الى كريناه ..

- سندس [ حالة شعرها كتبوكليه ] :

ولاش غادي تكريه ، أش غادي تبيعي فيه ؟

- مسيرة :

قاليك ، نوصيك يا واكل لحم الراس ، فالبير رمي عظامو ضحك مع الناس وفمك دير ليه لجامو ..

- سندس [ طلقات لي فيديها وشافت فيها ] :

ماعنديش مع هاد حشيان المعاني ديالك ، دوي نيشان ..

- مسيرة :

المحال راه غير باب ، بنهار راه نحطو فيه لي كاين واخا نبيعو فيه بطاطا قصبية .. فليل راه انسدوه علينا ونخدمو فيه براحتنا ، حنا انقادو ليه بلانو ..

- صفاء :

ومناش انخلصوه يلاه ؟

- مسيرة :

الخلصة اللولة راه ايخلصها كريم ، هو قالي لي بغيتها راه ايعطيها ليا .. من بعد راه نوليو حنا نخلصو كراه ، وزايدون باينة فيه رخيص مغاليش ، غدا ندويو مع مولاه ..

- سكينة :

واشنو اتحطي فيه ..

- مسيرة :

انولي نبيع فيه السيديات القدام ، والكاسيط القديم ، كاين ناس كيبغيو هاد تويشيات ..

- صفاء : اي حاجة عندها ليها الحل ..

- مسيرة :

هاد المسمار خاصنا نطرقوه فهاد السيمانة باش نبداو الخدمة ، مانبقاش نضيعو فالوقت ..

- سكينة :

صافي دابا سندس اتكلف بالحوايج ، مابقاتش غادي تسيفط للحاج ، اتمشي مع كريم يجيبو داكشي نيشان ويرجعو ، غدا نحاولو ناخدو ݣاع لي غانحتاجو ، مسمار الحانوت انطرقوه ، والوقت لي اتمشي فيه سندس للسطات ، انكون انا وجدت ليك ضوسي متختخ ، وصايبت لي شين ديال روبي ، ولوخرا لي اتهزي بيها لايف وتحطيه فقناتك كيما ايديرو لوخرين ، باش غير ترجع سندس لونصيو اول لايف ..

- مسيرة : صافي مشات ..

____________________

الحبُّ طاقةٌ مِن نور ..؛ تبعثُ في قلب الوجُودِ نبضَ الحيَاة..، والكراهيَّةُ نَارٌ لا تَلتَهِمُ إلَّا ذاتها..؛ فَـ تغتالُ بِـ الرُّوحِ كلَّ مَعنىٰ لِـ الحيَاة..!! لِذلك مهمَا كانت أسبَابُك ..؛ ليسَ عليك أبدًا أن تَکره أحَدًا..، وإنَّما مَفروضٌ عليگ وبِکلِّ مَا أوتِيتَ مِن قُوةٍ ، أن تتَعلَّم گيف تُحِبّ نفسَّگ لِـ تتَصالحَ مَعها ..؟

ڤيلا الإبراهيمي

- مجموعين على طبلة الفطور ، ماريا الإبتسامة مزينة وجها ، ماخلات ما وجدات وحطات قدامو فرحانة برجوعو ، توحشاتو بزااف .. فاش شافتو حسات براحة والفرحة بروحها رجعات ليها ..

- ماريا [كتحط ليه قدامو] :

كول اولدي كول ، ضعافيتي شوف تحت عينيك ولا كحل بسهير وكترت الخدمة ، واش باغي تهلك راسك ..

- هلال [بشبه إبتسامة وبصوت رجولي ] :

ماعند البرد مايدي من الجبل الواليدة ، انت ارتاحي ليا ..

- ماريا [تنهدات تنهيدة طويلة وشافت لجواد بنص عين ] :

انا مغادي نرتاح حتى نشوف ولادي مجموعين معايا ، ونشوفهم فرحانين ومرتاحين ..

- هلال [سكت مدة حط كاسو ديال القهوة ، ساهي ورجع شاف فمو وباه ] :

غادي ناخود كونجي ..

- جواد [كان كيفطر هز عينو فيه مستغرب ] :

علاش ؟

- هلال [بنفس البرود ] :

كيفاش علاش ؟

- جواد :

لا غير حيت اول مرة ليك ، 4 سنين هادي ماخديتي كونجي ، جاتني عجب ..

- هلال [بجدية ] :

هانتا ݣلتيها ، 4 سنين .. خاصني نرتاح شوية ..

- أمينة [بصوت رقيق وهادئ] :

أحسن مغادير أخويا ، والله انت محتاج للراحة ..

- ماريا [فرحانة] :

على سلامة منين درتي بكلامي ، وفين اتمشي أولدي أتبقى هنا ولا غادي تسافر ؟

- هلال [هز كاسو ديال القهوة كمل لي بقا فيه ] :

غادي نهبط للفيرما عند جلال .. بغيت نرتاح شوية من صداع الراس ومشاكل ديال الخدمة طلعو ليا فراسي ..

- ماريا (طبطبات على يدو) :

أحسن مغادير اولدي ، إيمتا ناوي بعدا ؟

- هلال [بشبه إبتسامة عطاها لمو ] :

نݣاد شي بلانات عندي فالخدمة نساليهم ، عارف الى مدرتهم بيدي مغايديرهم حد ، باش منين نمشي ونسد تيليفون مايبرزطني حد بتعياط ..

- أمينة :

والله اخويا ماكرهت نمشي معاك ، ولكن عند الخدمة كثيرة فالقهوة مكاينش لي يقابلها ليا ..

- هلال [ وقف ] :

منين تنضي أمورك ، خلطي عليا ، ولا دوري ليا نجي نجيبك ..

- أمينة [ حركات راسها ليه بالإيجاب ] .. هز سوارت الطوموبيل ، خلاهم وخرج ..

- ماريا ( تنهدات بإرتياح ) :

مزيان منين غادي يمشي عند خوه ، شحال هادي ماتجمعو ، بحال الى برانيين على بعضياتهم ، شافت فجواد لي كان متبعها بالعين فاهم قصدها مزيان وهضرتها فين غادية ..

- أمينة :

متعرفي يجي معاه الهوى ديال الفيرما ، ودوك الأجواء ... يقدرو ينفعوه ويرجع المورال ديالو كيف كان شحال هادي ، والى لقا خوه معاه اتنفعو كثر ..

- جواد (كيحاول يتهرب من نظرات ماريا ) :

الى ساليتو ، نوضو وجدو راسكم ... مخاصناش نتعطلو .. وقف وطلع لبيتهم ، متبعاه ماريا بنظرات غامضة ..

____________________

فڤيلا ذياب ، واقفة فالكوزينة ، كتخلي كولشي للخدمات ولكن الطياب كطيب بيديها ، سينين وهي على هاد الحالة ..

- وقفات عليها الخدامة والإبتسامة مزينة وجها :

مدام سومية ، بيت سي توفيق واحد ، دامشي لي وصيتيني عليه درتو بالحرف ..

- سومية [كتقاد فبسيطلات صغار] :

الله يرضي عليك أنورة ... شوفيلي الطاوة لي الفران ، انخليك انت تكملي ، ونمشي نوجد راسي ، الله يرضي عليك رضي بالك ، مابغيتكش تغفلي على الفران ..

- نورة (حركات راسها بنفي ) :

لا أمدام كوني هانية .. خلاتها سومية تكمل على لي بداتو ، وطلعات لبيتها ، دخلات دوشات عليها ، خرجات نشفات شعرها وجمعاتو بمقبط ، لبسات عليها قفطان فالخضر مطروز ، مع ساعة ذهبية وصندالة ، رشات من ريحتها ونزلات ، مع ݣلسات ... سمعات الباب تحل وصوت ذياب ومعاه شي حد ، قلبها تهز توحشاتو بزااف ... جمعات الوقفة وقبل مايكون عندها كانت عندو ، شاف فيها الإبتسامة مزينة وجهو الرجولي ، الوشام لي فيدو زادو كاريزما غير لي عندو ، طانݣة صغيرة فودنو ، كتبين بلي نتمرد وعندو ستيل خاص بيه ، حال يديه ليها .. عنقاتو وتخشات فحظنو ..

- سومية :

الله أولدي وشحال توحشتك ..

- توفيق [حاظن عليها بجهد ] :

وانا بضوبل ..

_______________________

- مسيرة ، نظارات فوق راسها ، يديها شادة بيهم خاصها :

أشريف أشريف ، المحال راه واخا واسع وكبير ولكن راه كلو مقشر ، راه ماشي جايين من ايت بوجو .. راه بنت الحرفة انا وعارفة الاثمنة ديال الكرا ، الله يهديك 2500 درهم مالي انكري محال فدرب السلطان ، الكليان كينغل ..

- مول المحال (كيدور فمو ويفكر ، قال مع راسو يزيد يحكر عليها ) :

والمحال راه كبير ، والبلاصة النقية .. راه ماتلقايش بهاد الثمن ..

- مسيرة (كتحاول تنعل الشيطان ، حيت عصبها ، مجاوباتوش .. حلات جيب تجاكيط لي لابسة ، خرجات منها بكية ديال كلوريكس هزات وحدة لاحتها فمها ، ندغات جوج ندغات ، عاد هزات فيه عينيها بكل برودة وبإبتسامة ) :

أشريف ، راني غنكري غامحال ... مكارياش دار ، واش كن نيتك .. سمع أنعطيك 1500 درهم ، بغيتي مرحبا مابغيتيش الله يعاون ، راه مزال انخسر عليه دم جوفي باش يتصلح .. دابا بلاما نطولو الهضرة بغيتي مرحبا مابغيتيش الله يعاون .. جات ضايرة او وقفها :

صبري ، وخلينا اندويو ..

- ظارت عندو ، كتلوك المسكة فمها :

دوينا بزااف ، مغانبقاوش اندويو ، ياتغيز معايا ونطرقو هاد المسمار ، يانمشي نقلب على راسي فجهة اخرى عطا الله الحوانت ..

- وغير وسعي الخاطر يا هاد البنت ، سير عالله .. الالة مايكون غير خاطرك .. إيمتا نقادو الوريقات .. اليوم ولا حتى لغدا ؟

- مسيرة :

اليوم ..

نضاو الأمور مع الكراي ، خداو السوارت ديال المحال .. دازو للقهوة لي تجمعو فيها أخر مرة ، كيتسناو كريم حتى خلط عليهم ، كلاكسونا ناضت مسيرة خلصات ، ومشاو لعندو هي وسكينة ، ركبو ومن تم شدو الطريق باش يشريو لي خاصهم .. كريم كان جايب معاه العدد لي تفاهمات معاه عليه مسيرة ، بداو بالپيسيات ، أول واحد هو دري لي كان حاط لانونص فالفيسبوك ، قلبات سكينة البيسي وكان داكشي لي هي باغياه نيت ..

- من بعد دازو لمݣازة أخرى ، خداو منها پيسي ، وميكرو وݣاع لي أيخصهم فهاد لافير ، هوما كياخدو وكريم كيخلص .. نهارهم كان طويل ، مسالاو حتى لورا المغرب .. داهم كريم للمحال حطو فيه ݣاع داكشي لي خداو ، بقا ليهم اشي تخربيق على ود الديكور ديال الواجهة صافي .. سدات مسيرة وركبو موصلهم كريم لدار وهو مشا ..

_____________________

- سعاد (بشك ) :

ومنين جاك اختي انت الفلوس باش تكري هاد المحل ؟

- عباس :

ايكون اكريم الله يرضي عليه ، منين اتجيب الفلوس يادلي ..

- معزوزة [كتخنزر فيه] :

وا وليدي تا ياكما داروك محامي عليها ، حد سولك حد حشاها ليك ، تا مالك تدور وتنقز بحال حزيقة البولة أݣوليا ..

- عباس :

الواليدة ، الواليدة راه كتمرمديني ݣدام بناتي ..

- معزوزة (كتعوج فيه) :

وبراكة من تاشلهبانيت ، راك خبز يدي اوليدي ، اش طابخ انت وديك شعكاكة العافية دبنتك ..

- مسيرة (قوسات حجبانها ببراءة) :

والله امي مطابخين شيحاجة ، واش نبقى لا خدمة لا ردمة ، داكشي باش قلنا نبداو بمشيريع نترزقو فيه الله ، الفلوس لي عندنا قربو يساليو ، وكريم سلفني باش كريت نهار نتطلق نرجعهم ليهم شوية بشوية ..

- سعاد (كتشوف فبناتها لي مدواوش خاشيين وجاهم فتيليفوناتهم ، اما سكينة خاشية وجها وكتفرج ف م ب سي بوليود ..

- سعاد (رجعات بلور حاطة ظهرها على الحيط ) :

الله يجعلني نتيق .. سدو الموضوع على هادشي ..

- معزوزة [كتقلب بعينيها] :

خوك شتو غابر ، حالتو مابقاتش تعجب ..

- سعاد :

راه كبير خالتي ، اشنو اندير ليه ضبر راسو تلقاه فالقهوة ..

- معزوزة [كتعوح فمها] :

أمم القهوة ، أخليه ذي نهار يدخل عليك شي لفعة زلمومية ..

- سعاد :

الى جابها يمشي يعري على كتافو ويكري ليها ، ماعنديش هنا أوطيل الصفاء ..

- مسيرة :

نوضو وقيلة نعسو ، غدا خاصنا نهبطو للسوق نتقداو لي خاصنا المحال ..

- سكينة : نكمل الفيلم ..

- مسيرة [جراتها] :

هاد الفيلم تفرجتي فيه غير ولبارح ، مكتمليش .. نوضي تݣعدي .. ناضت سكينة تبعاتها ، او خواتاتها تسرسبو وراها وحدة تابعة الثانية ، تحت انظار سعاد لي كلها شك ..

- ݣالس فالمكتب ديالو بكل أريحية ، قدامو تصويرة فيها هو وخوه معانقين ، وراه بزاف ديال الجوائز معلقين ، حال الپيسي ديالو خدام فيه ، مبرد لابعد الحدود .. تدق الباب بصوت تقيل رجولي :

دخل ..

- تحل الباب ودخل رض الباب وراه .. وجا وقف قدامو ..

- منصور (سد الپيسي ديالو وهز عينيه فيه بملامح جامدة) :

لقيتيه ؟

- كاين فمراكش ، عند وحدة سميتها أمال ... خدامة فريسطو بار ..

- منصور [دور لسانو وسط فمو ] :

معاش معروضين ؟

- مع 8 خاصنا نكونو تما ... مخاصناش نتعطلو راك عارف هو عدوه شي واحد يتعطل عليه ، وحنا بغينا نشريو محبتو مانشريوش عداوتو ..

- منصور [وقف شاف فساعتو] :

مزيان ، عندنا 22 ساعة ..

- بغيتي تشد الطريق دابا فهاد الليل ؟

- منصور (هز حاجب ونزل الثاني ، نظرة من عينو كافية توقفو عند حدو ويجمع راسو معاه)

- سمحليا ، غير ݣلت الليل هدا ومشا الحال ..

- منصور : الصمت ..

- هز سوارت طوموبيلتو ، وخرج بلاما يدوي ولا يجاوبو والوجهة ديالو معروفة ..

- غير خرج وهو يطلق النفس :

أوووف ..

__________________________

- حيت نعسو بكري فاقو بكري ، صفاء بقات فدار حيت كانت فيها النوبة ديال الشقا ، أما سكينة ومسيرة وسندس ... غير فطرو مشاو للمحال .. دخلو وسدو عليهم ، بداو كيقادو لي خلصو يتقاد ومن حسن حظهم انو المحال كان عندو بحال بيت الفوق ، دروج ديال الخشب كيديو ليه ، منين كطلع كتلقا طبقة أخرى ، وهادا من زهرهم ... التحت ايديرو فيه السيديات والفوق هو المقر ديالهم ..

- مسيرة وسندس بداو يقادو الواجهة ... أما سكينة بدات خدمتها برونشات البيسيات ، جبدات الكلي ديالها وبرنشاتها مخداش معاها بزاف ديال الوقت حتى كانت متحكمة فالپيسيات بزوج بيهم ..

- عقلها غاب ونسات سندس ومسيرة لي ضايرين بيها وخدامين ، عينيها تحطو وسط البيسي ، يديها خدامين وعينيها كيدورو ، خدمتها وهاد الزربة مامشاتش غير هكاك ، بسرعة كانت دخلات لبيسي ديال السعودي وقدرات تختارقو ..

- مكانتش حاسة بالوقت نهائيا ، كانت بحال شي روبو خدام ، مسيرة وسكينة قادو داك الفوقي لي رجعوه بحال الوكر ديال العنكبوت ، مكاينش شي عش ديال العنكبوت مالصقوهش فالقنات ، أما الباپيي بان داروه فالحمر .. بقات ليهم غير الإضاءة يصايبها ليهم دريس .. ݣلسو يستارحو .. خدات مسيرة قرعة ديال الما شربات منها ورجعاتها للفوق الطبلة ..

- جاو مع 9 ديال الصباح ، ودابا الظهر .. نص نهار مشا للمسيرة وسندس فديكور ، ولسكينة فتقلاب .. مجهودها مامشاش غير هكاك .. تبسمات وضحكات بصوت عالي ..

- مسيرة [ وقفات بزربة جات حداها] :

أمضرا ؟

- سكينة [دورات ليها الپيسي ] :

شوفي شنو لقيت ؟

- مسيرة [كتحقق فشخص لي فليكرون ديال الپيسي] :

شكون هدا ؟؟ ....

_____________________

- فحي شعبي من أحياء مدينة الدار البيضاء ... دار سفلية ، مصبوغة بالبيج .. محلول بابها لي كان ديال الحديد مصبوغ بالقهوي ، سلات تجفاف ديال الدريجة الصغيرة ، كبات الما وضرباتو بشطابة ... مرا تكون ف الأربعينات من عمرها .. هزات الشطابة ساستها من الما هزات الجفاف دارتو فسطل ، ودخلات سادة الباب ..

- وقفات طوموبيل إيركات فالبيض .. قدام باب دارها ، نزل حل الكوفر وجبد منو 4 ديال الݣفات عامرين بسوميسترو[التقدية] ... سد الكوفر هز التقدية او وقف قدام الباب ... دق زوج دقات ، حتى تسمع صوتها :

- بلاتي ..

- تحل الباب كانت مغوبشة ، غيرشافتو وتبسمات :

دخل مرحبا بيك ...

- مسيرة [كتحقق فصورة ] :

شكون هذا ماعمري شفتو ... ماشيش السعودي حيت السعودي كبير فالعمر مايمكنش ..

- سكينة [ حركات راسها بنفي] :

واش عرفتي شنو ليقيت دابا ولالا ، السعودي غير مخلويض يلالة ، داخل حتى فالخضرة ..

- مسيرة [ عقدات غوباشتها ] :

كيفاش الخضرة ، شنو هاد الخضرة تاني ؟؟

- سكينة :

الحشيش ، الزطلة ازين ديالي ..

- مسيرة [ فتحات فمها بصدمة] :

حلفي بالله ، نااااري .. واش هدا شريكو ولا شنو ؟

- سكينة :

ماشي غير شريكو ، ولد خوه .. عقلتي فاش قلت ليك السعودي عند زوج خوتو .. واحد فيهم ولدو هو شماتة لي كنت معاه ، وثاني يلالة سميتو رضوان ، عرفتي شكون هو رضوان ... هو لي سرب التصاور ديال بات كريم وهددو ..

- مسيرة [ جاتها اللقوة ، كانت باغة ضرب ضربة وحدة حتى صدقات فزوج دابا ] :

مخي حبس ، راسي زند علي ..

- سندس [ بتوتر] :

هادشي خلعني أصاحبتي .. ناري 3 دقة وحدة ... والقضية فيها الحشيش ، واش عارفة انت البزنازة اش كيسواو ..

- مسيرة [ شافت فيها وجعات شافت فسكينة ] :

شوفي ، زيدي تعمقي .. مزيان بغيت اي حاجة على هاد خوتنا هادو ، وخصوصا هاد خونا شنو سميتو ؟

- سكينة :

منصور السعودي ..

__________________________

فشقة من الشقق الراقية .. فبيت النعاس بضبط ، كان مصبوغ بالموڤ سراجمو مسدودة ... داكشي باش كان مشعول فيه الضو بالحمر ، كيتسمع غير تأوهات وأصوات كذل على شنو واقع فهاد البيت ..

- ناعسة على ظهرها ، لابسة غير 2 بياس ، اما هو كان متجرد من حوايجو ، كالس على ركابيه ، خاشية ليه رجليها ففمو .. كل صبع من صباعها كيتمدق فيه ، بحال الى كيتمدق شي طبق شهي ..

- نزلات رجلها من فمو لجهة صدرو دفعاتو حتى طاح للأرض ، ناضت بشوية من فوق نموسية ... كتمشى بخطوات بطيئة ، حتى كانت حداه ، هزات رجلها وحطاتها ليه على فمو ونطقات بصوت سلطوي :

بوس رجلين لالاك ..

- خدا رجلها بحال شي مهوس ، كيبوس فيها ... عاجبو الحال بحال شي واحد مخدر غايب على الوعي ، رجعات لاحتو من جديد .. وتمشات جهة النموسية ، هزات صبعها وأشرات ليه باش يجي لعندها ..

- ناض عندها ميكر بسكرات شهوة ، مع وصليها دفعاتو على ، رابطة ليه يديه بمينوط مع جناب السرير .. نظقات بدلع :

أنت ديالمن ؟

- [مهزوز للعالم أخر] :

ديالك انت ..

- [ضحكات] :

انت ملك من ؟

- ملكك انت ، بوحدك ديالك انت بوحدك ..

- وشنو ندير فيك ؟

- [جاوبها] :

ديري فيا لي بغيتي .. ضحكات بإبتسامة لاعوب ، حطات رجل على طرف النموسية ، هابطة بداتها كلها عليه .. قبل مايدها توصل لعنقو ، تفرع باب الدار .. دورات راسها بزربة مخلوعة ، حيت هاد الضربة بحال ديال البوليس ، مجات فين ترمي عليها بينوارها .. حتى كان واقف فوسط اابيت كيشوف فيهم ..

- [ هي كتغوت] :

أش كاين اش واقع شكون انت أشريف ؟

- كان واقف مقابل مع وجها ، وجهو شراني مكايبشرش بالخير ..

- [بصوت بحال فحيح الأفعى ، ضاغط على مخارج الحروف ] :

انا لي انسيفط جد مك تݣلاصاي فروضة .. هز يدو حتى لسما عطاها بتصرفيقة لوجها ، كانت كفيلة طيحها وطوش ليها الدم من فمها ..

- هز عينيه لجهتو ، كيشوف فيه وفحالتو ، تبسم بإستهزاء :

تبارك الله على راجل ..

- [بلع ريقو] :

خويا منصور ، بلاتي غير نشرح ليك ..

- خلطات عليهم صفاء للمحال ، جابت ليهم الغدا والخبز خداو بوز من الخدمة حتى تغداو، ورجعات سكينة تكمل على خدمتها , اما مسيرة والبنات كملو داكشي لي ناقصهم , قادو المحال التحت وغطاو جهة الدروج بواحد لليزار داير بحال الخامية باش حتا الى جات مها لعندهم ولا شي كليان مايدي مايجيب ... تسمع صوت ديال سكينة كتعيط من الفوق .. مشات مسيرة والبنات كيجريو عندها ..

- مسيرة (عينيها عليها وعلى البيسي) :

ياك لاباس شنو لقيتي؟

- سكينة (فرحانة بحال الى حققات انجاز كبير)

طحت ليك شي ضواسة ايغرقو السعودي ماعمرو يهز فيها الراس ... وݣاع ليفيديو لي صور لبنات لي كيستغلهم جنسيا .. ولاو عندي , وشي وثائق مزور فيهم سينياتور ديال مراتو ايغبروه للعباق ... ولواعرة السيد داخل فتبزنيز ديال الحشيش , وهاد الليلة معروض هو ورضوان ومنصور وخوه الصغير , عند واحد خونا ، رجل أعمال معروف حتى هو سميتو مكسيم رؤؤول ..

- سندس (بتساؤل)

واش هذا يه**ودي ؟

- سكينة

ايه الالة .. هادشي مواقفش غير هنا ... هاد العشا دايرينو باش يلقاو حل للعملية ديال التهريب الجايا ... حيت خدمتهم واقفة هادي 4 شهور ..

- مسيرة ( كتلعب بالمسكة لي ففمها)

وعلاش ؟

- سكينة :

حيتاش يلالة .. الطريق لي كانو كيدوزو منها السلعة ، سدوها البوليس ... وخاصهم الشحنة الجديدة توصل لناس ديالهم فالجزائر ... ودوك الناس ايتكلفو يوصلوها .. النص ايمشي لافريقيا ونص لدول الخليج ..

- صفاء (غير ساهية وكتشوف):

انا مخي حبس قسما بالله العظيم ..

- مسيرة اهاه كملي ..

- سكينة [ بجدية] :

سمعي دابا هوما ، واخا عندهم بلايص أخرين منين ايدوزو السلعة ديالهم ، ولكن اطيح عليهم بالغلا .. هوما باغيين الساهلة ، والطريق الساهلة هي لي محبسة ليهم الخدمة دابا فهمتي ؟

- مسيرة :

وزعمة وحدين بحال هادو حتى حاجة متجيهم صعيبة .. العجب هذا

- سكينة :

كاين واحد كيدي للحدود ، جاي تحت واحد الارض فوجدة ، هداك النفق هو لي عينهم فيه ..

- مسيرة :

وعلاش مايدوزوهاش منو ، شنو كيتسناو زعمة ؟

- سكينة :

الارض ديال ماليها ، انا مزال غادي نزيد نقلب ، المهم بعدا دابا هو عندنا ضواسة لي غادي نحطوهم على السعودي ، وديك الساع عاد نشوفو بلان هاد منصور ..

- مسيرة :

دابا شوفي ليا بلان السعودي هو اللول ، نفتاتحو ليه الجلسة ، وعاد يكون عندنا الوقت نشوفو هاد منصور حتى هو ، حشومة السعودي بوحدو لي يدخل الحبيبيس ، ضروري نجمعو العائلة يتوانسو مع بعضياتهم ..

- سكينة :

دابا خاص سكينة هي وكريم ، غدا يشدو الطريق لسطات ، على وديت الحوايج .. أجي إيمتا نديرو لايف ؟

- مسيرة :

نهار السبت ، الاولى غادي دوز جماعتنا زينة مع نسيم ، وحنا غادي ندوزو نزاهتنا زينة مع مسيرة ..

- سكينة (غمزاتها) :

مشات ..

- فڤيلا من الڤيلات الفخمة ، واقفين 3 ديال طوموبيلات .. زوج من نوع رونج ، وحدة من نوع مرسيدس .. الصوت ديال الهضرة وضحك جاي من الداخل ، من برا كانت كتبان ڤيلا كلاسيكية ولكن من الداخل ديكورها كان عصري ، فصالون .. ݣالس شخص يكون فالخمسينات من عمرو ، شعرو كل شايب ولحيتو شايبة .. داير نظيظرات ديال الشوف .. كيبان عليه الهيبة والوقار .. لابس لباس رسمي داير رجل على رجل وكيهضر مع الشخص لي حداه ..

- أما فالفوتوي لاخر ، ݣالس عاقد غوباشتو هاز مشروب فيديه وعينيه على خوه ، لي كان واقف مع بنت فأوائل العشرينات من عمرها .. حداه باه ..

- مكسيم (بإبتسامة وصوت مغربي حر) :

منصور ، ياك لاباس منين جيتي ماݣلتي كلمة وحدة ..

- رضوان [شاف فولد خوه وتبسم] :

راك عارف منصور كيف داير ، كلامو قليل ..

- مكسيم [شاف فمؤيد والبنت لي معاه] :

سابينا شفتها تفاهمات هي ومؤيد ..

- رضوان [ضحك] :

كنتمناو هاد التفاهم يطور ، وكيما خدمتنا طورات ، حتى علاقتنا طور ، ولالا اسي مكسيم ..

- مكسيم [ضحك بعجرفة] :

علاش لا ، مغاديش نلقاو حسن من مؤيد ، وحنا مكرهناش نخطفو الولاد بزوج [كيضحك] ..

- قاطعو صوت أنثوي نزل من دروج ..

- شكون ناوي تخطف أبابا ؟ ، باغي تخوفني منك ..

- مكسيم [وقف وستقبلها بالحضن مقبل خدودها ] :

سي رضوان كنقدم ليك بنتي الكبيرة ، شارلوت ..

- رضوان [باس ليها يدها] :

شارلوت وكتدوي الدارجة مزيان ..

- شارلوت [تبسمات بغرور] :

وي ضروري ، تزاديت هنا وكبرت هنا ... ضروري نكون كندوي الدارجة ولالا ، بابا ماعرفتيناش !!

- مكسيم :

سي رضوان منتصر ، عندو كلينيك كبيرة هنا فكازا ، وأيكون الشريك ديالي .. وهدا سي عبد الرحيم السعودي ، ولدو منصور او ولدو مؤيد ..

- سلمات على الرجال الكبار بإبتسامة ، وصلات عند منصور مدات ليه يدها ، مد ليها يدو بلاما يعيرها أي إهتمام ، حاجة لي ماعجباتها دش ، وهي لي فأي بلاصة دخلات ليها كتخلي أثر عند جنس الرجال .. بلعاتها واخا غير بزز ، ومشات ݣلسات دايرة رجل على رجل .. مقابلة معاه ..

- مكسيم (موجه كلامو لمنصور) :

منصور ، فين وصلتي ؟

- منصور [بدون مايحرك راسو محرك غير عينيه جيهتو ] :

قريب قريب ..

- رضوان [بإبتسامة] :

نتمناو نحيدو هاد الحجرة من الطريق ، ونكملو الخدمة ديالنا ..

- مكسيم [بجدية] :

نحيدو هاد الحجرة بلاما يسيح الدم ارضوان ، حيت هاد الحجرة براسها تقيلة ، وماشي ساهلة ، وحنا مقادين على صداع الراس ..

- شارلوت [بتساؤل] :..

علامن كدويو ؟

___________________________

- سونا الباب .. كان ݣالس يلاه غادي يتعشا ، وقف ومشا يحل الباب .. لقاه واقف داير يديه على جناب الباب ..

- سراج :

تا فين مشيتي أصاحبي ، مشيت نتسخر غفلات عينيك طرتي .. نسوني مكتجاوبش ياك لاباس ..

- جلال (زول تجاكيط ديالو لاحها ، ومشا لبلاصة سراج .. جر الطبسيل لي كان فيه الݣراطان وبدا كياكل ) :

ماعندي منتسالك العود ، وليتي كتصرع الشهيوات خاصك المرا .. [ خنزر فيه سراج ] نسيت انت فالمحكمة وانا كنݣوليك المرا ..

- سراج :

مغاديش تسالي من طنز ديالك ، كيبقى أحمد ؟

- جلال [كياكل , محرك راسو] :

غادي يعيش ..

- سراج :

لا حول ولا قوة إلا بالله العلي العظيم ، مكتعرفش تهضر بحال الناس ؟ عاود ليا أش وقع ؟

- جلال (ببرودة) :

انبقاو غير نعاودو فنفس الديسك ، الخبار فراسك ..

- سراج [عقد غوباشتو] :

- متݣولهاش .. عاوتاني ؟

_____________________

- سكينة [خاشية وجها فالپيسي ، حكات حاجبها .. صغرات عينيها ] :

مسيرة ، أجي تشوفي أجي .. ناضت مسيرة من بلاصتها ݣلسات حداها ..

- مالك لقيتي شيحاجة ؟

- سكينة [شافت فيها] :

عرفتي شكون مول الأرض لي عينو فيها منصور ؟

- مسيرة :

اه علاش مافخباركش ، انا وياه كنا كنتنفحو طابة وكنكميو العفيون ، سكينة واش انت شوية لاباس لا ؟ باش انعرفو انا شكون هذا بعدا[ كتحقق فيه ] ..

- سكينة :

سيري تنعس ، هدا راه الحاج عبد الرحمان الإبراهيمي الريفي ، ناس لاباس عليهم أصلهم ريافة ، وساكنين فإفران ، ولدو معروف برلماني سميتو جواد .. تبارك الله عندهم بزاف ديال الأراضي ..

- مسيرة (مصغرة عين وحال عين كتفكر ) :

ديك الأرض لي فوجدة ديالو ؟

- سكينة :

دابا هو راه مات ، شي 10 سنين هادي .. ولكن ݣاع الأراضي ديالو كتبهم لحفيدو ..

- مسيرة :

شكون هو هاد حفيدو ؟

- سكينة [رجعات ضارت لپيسي] :

مزال كنقلب عليه ، نلقاه نوريه ليك ..

- مسيرة :

شوفي هانتي ، نوضو نعسو دابا ، رتاحي حتى انت أصاحبتي ماتبقايش فايقة ... غدا كريم ايدي سندس على قبل الحوايح ، باش نهار السبت إن شاء الله نكونو واجدؤن فهمتيني ..

- سكينة [طفات پيسي وحطاتو ، ناضت للبلاصتها] :

انا نيت كنحس براسي عييت وحق الله العظيم ..

- كل وحدة فيهم ناضت لبلاصتها تنعس ، من غير مسيرة لي كانت كتخمم وتفكر فهادشي ، السبت مابقا ليه والو يوماين بضبط ، غدا وبعدو .. تنهدات تنهيدة طويلة كتخمم ، واش هادشي لي كدير فيه أيعطي نتيجة ولالا ..؟؟

_____________________

- فجهة أخرى ، فبيت مظلم .. واقف عرقان صدرو كيطلع وكيهبط ، بعد خصلات من شعرو طايحين على جبهتو ، هاز واحد السمطة فيديو ، عينيهكون كانو قرطاس كون ختارقو الحيط لي قدامو ..

- انين وترجي ، كيطلبو يوقف هادشي لي كيدير :

عفااك أخويا ، عفااك صافي عييت صافي عييت سمحليا والله مابقيت نعاود ..

- منصور [بانت شبه إبتسامة على جنب فمو دغية جمعها ، ببرود قا**تل نطق ] :

ياك كتموت على الربيط ، وانا انبقى رابط حتى لصباح .. وياك كتموت على العصا ، ماطلبتي الموجود السبع ..

- مؤيد [ لي مربوطين يديه ورجليه ، عريان ، لحمو ولا حمر بضرب لي عطاه ، كان بحال شي ولية بدموع لي نازلين من عينيه] :

قسما برب لا بقيت عاودت أخويا ، والله حتى نتبع مع الطبيب ونتعالج ونعجبك ..

- منصور [كيغزز فسنانو] :

تعجبني صاحبتك أنا ، انت هو الضلعة العوجة فعائلة السعودي ، وديك الضلعة خاصها تݣاد وأنا لي غادي نݣادها .. هز يدو ونزل عليه بكل جهد كيعطيه لفخاض ..

- منصور [جاهل] :

انا هو الطبيب لي غادي نداوي شيطانك ..[كينزل عليه بݣاع الجهد لي فيه] ..

- مؤيد [كيغوت وكيتفركل ، الجهد لي يهز بيه راسو مابقاش عندو ] :

صافي صافي برامة ، جهدي تقادة .. راني راجل ماشي **** لي دير معايا هاد الفعايل ..

- منصور [ضحك مرجع راسو لور ] :

راجل ورابطاك مرة كي الكلب الكلب .. انا انعاود ليك ترابي ، حتى تولي نيت راجل ..

- متسوقش ليه ، كمل على الضرب ديالو ، حتى مؤيد ولا بحال الخنونة .. لاح ديك السمطة من يدو ، هز لافيست ديالو .. مخليه مزال مربوط ، طلع مع الدروج وقف وشاف فشخص لي كان معاه ..

- هزو وديه لوطيل ، وبقا معاه تم حتى يفيق ..

- [اشر براسو بالإيجاب ، بقا واقف حتى مشا منصور عاد نزل عند مؤيد ] ..

لم يـدرِ أي أحد كيف تغـيَّرت بـأكملها وجهة نظرها، وأفكارها، واعتقادها، وثـقتها بالآخـرين، وأصبحت تـضع حدوداً لـكل شيء!!! حتى في أبسط الأشيـاء، رُبـما هذه نـتيجة العـطاء المُفرط، والجميل بـها! أنّـها بقيت أصيلـة وقوّيـةٌ جـداً ..

_______________

دازت يوماين بضبط ، يوماين لي دازو على مسيرة تقال .. اتكون كذابة الى قالت مكتحسش بالخوف .. ومكتحسش بلي متوترة ، يديها كيرجفو عليها ... دقات قلبها كيتزادو كلما قربات الوقت ، واحد التبوريشة شداها عمرها حساتها .. حيت خدمتها الأول بنسبة ليها هي خدمة بيضة ، أما دابا راه داخلة على عالم كحل ... ياتخرج منو على خير ، ولا فالمحمل ولا مينوطية واحد فهادو ، هاد الطاقة السلبية لي كتحس بيها مابغاتش تنقلها لخواتاتها ... حيت عارفاهم منها كيستمدو قوتهم ، الى ترجعات حتى هوما ايتراجعو .. وبحال هكا اتكون اخوات الما فرملة ، ودابا فات الفوت باش ترجع خطوة اللور .. دابا جا وقت الخدمة ..

- وصلات 8:30 ديال الليل .. سكينة كانت سبقاتهم للمحال ، بقات غير سندس وصفاء ومسيرة كيتسناو فكريم ..

- معزوزة [هازة تسبيح ديالها ومقابلاهم ] :

مالكم متستفو السلعة فصباح ، مبان ليكم حتى ليل ..

- مسيرة :

و مي راه صباح كريم مكانش مسالي باش يعاونة ، ونص ديال السلعة هو لي جابها لينا من كازا ..

- سعاد :

وديو دريس معاكم ..

- عباس [حاط يديه على عكازو ] :

شفتي دابا دريس أكيضور حدانا ، وعلم الله فين هو ..

- تسمع صوت الكلاكصون ..

- مسيرة (شافت فخواتاتها) :

يلاه مشينا .. شافت فعباس ، لي تبسم ليها مغمض عينيه بحال الى كيݣوليها متخافيش انا معاك ، وكولشي ايكون بيخير ، نظرة منو خلاتها ترتاح .. حدرات راسها وخرجات هي وخواتاتها ، ركبات حدا كريم والبنات طلعو لور .. ديمارا وشدو الطريق للمحال ..

- سعاد (تنهدات تنهيدة طويلة) :

انا مامرتاحاش ، شيحاجة كيخططو ليها البنات ..

- معزوزة :

زيديني عليك ..

- عباس [ناض] :

نوض نتوضى نمشي نصلي العشا فجامع ، وقف عباس دخل لطواليط .. وسعاد مو متبعينو بالعين بشك ..

__________________

عند سراج .. خرج من شومبر ديالو ، لابس سروال دجين كحل مع تيشورت كحلة وكويرة فنفس اللون ، كورميط عريضة فعنقو مع نظاظر فالكحل ..

- هبطو جلال ونزلو وتبسم بإستهزاء :

شمس حارة اخويا ..

- سراج :

براكة من طنز .. مافيا لي يتلاقى بشي قمقوم ، نوض تݣعد غادي نلقاو دنيا عمرات تاني واليوم السبت ..

- جلال [وقف بزربة ، هز تجاكيط ديالو لاحها على كتفو عاطيه بظهر ] :

هارون سبقنا ..

- سراج : هو ومن تم ..

- جلال :

هو وديناصور .. فتح الباب وسبقو ، سد سراج الباب وتبعو .. كل واحد فيهم ركب فطوموبيلتو .. والوجهة ديالهم وحدة [الحفرة=البار] ..

______________________

- وصل كريم للمحال .. بلاصة طوموبيلتو ، سبقو البنات وتبعاتهم مسيرة هي وكريم ، سدو عليهم الباب .. وطلعو للفوق ..

- مسيرة [كتحيد فالقبية ديالها] :

أمضرا ؟

- سكينة : كلشي هو هداك خاص انت توجدي راسك ..

- مسيرة [كتحس بالبرودة طالعة ليها مع رجليها ] :

أنا غادي نوجد راسي ونجي .. يلاه غادي تمشي ورجعات عند كريم ..

- كريم واش كتعرف شي واحد أسميتو عبد الرحمان الإبراهيمي الريفي ، عندو ولدو فالبرلمان سميتو جواد ؟

- كريم [عقد غوباشتو مصغر عينيه] :

اه كنعرفو ، علاش فين كتعرفيه أنت ؟

- مسيرة : وفين كتعرفو أنت ؟

- كريم :

حفيدو هو راجل ختي ..

- مسيرة [حلات فمها بصدمة] :

العااار ، صدمتيني ..

- سكينة [ مقاطعاهم] :

هادشي هضرو فيه من بعد ، مسيرة سربي لبسي خلاص ..

- هزات مسيرة دوك الحوايح ، ومشات تبدل ... خواتاتها واقفات كيتسناو ، كريم حتى هو الكل كانو مترقبينها تسالي... حتى خرجات ليهم بشكل ، لي كان كيخلع ، بحال الى خارجة من شي فيلم ديال الرعب ..

- شعرها كان طويل كحل ، عبارة عن پيروك ، لبسة ديال عروسة قديمة فالبيض مرشوشة نقاطي حمرين بحال الدم .. صباعيات كانو على شكل جلد إنسان بحال شي وحدة لي شارفة ، الڤوال نازل على ظهرها .. وماسك كان كيخلع ، متقدش تكمل فيها الشوفة ..

- سندس[دفلات فعبونها[صدرها] :

ناري ياختي ماتشوف فيك لا موحمة ، لا لي شادة فحبل ..

- سكينة [أشرات ليها براسها] :

واجدة .؟؟

- مسيرة : أه واجدة .. وقفات قدام الكاميرا ، الإضاءة حمرة مسلطة عليها .. وراها كانو بزاف ديال المونيكات قدام ، كيخلو كلهم لابسين لباس عروسة .. الخلفية كانت حمرة ، وبزاف ديال الماس لاصقين فالحيط ..

- سكينة [برمجات اللايف ، قدات البروݣرام ديال الصوت ، ختارقات عدة حواسب فبزاف ديال الدول ، وهكا مسيرة كانت واجدة ] :

غادي نبداو ..

- مسيرة [ تنهدات تنهيدة طويلة، كانت واحد الصبورة قدامها فيها ݣاع المعلومات بترتيب ، بصوت رجولي تقيييل نطقات ] :

ciao ciao[شاو] [hello] [بالإيطالية]

لاباس عليكم كنتمنى لايف ديالي يلقاكم بيخير وعلى خير ، اوووه شحال كنت كنتسنى هاد نهار بفارغ الصبر ، ماعليناش .. بغيت نرحب بيكم فقناتي ، لي هي عبارة على محكمة ، محكمة لي أبطالها من العيار التقيل .. بمعنى لي دوا ياكل دوا ، وحنا تحمعنا هنا غير باش نظفو الخنز البشري من دنيا ، ولي دار الفالطة يخلص عليها ..

- فهاد الأثناء سكينة قدرات الطلع لي ڤي ديال القناة بزربة ، بداو كيطلعو المشاهدات شوية بشوية ، من 800/1000/3000/6000/10000 وهي طالعة ..

________________

- فحي شعبي ، قدام الباب مجموعين 6 دالبنات شادين الحتيت وحدة فيهم شادة التيليفون ،[غوبشات بخوف وصدمة على وجها] :

ناري يالبنات شوفو شوفو .. كلهم ضارو عندها وحدة فيهم شدات عندها التيليفون ..

- البنت2 :

أويلي شكون هادا ، ناري لحسك ... أش هادشي ؟

- البنت 1 :

ماعرفتش ، كنت كنظور فيوتيوب حتى طلع ليا لايف ، زيدي الصوت نسمعو زيدي ..

_________________

- فڤيلا السعودي .. ݣالسة مراتو كتفرج فواحد المجلة ، وهو حداها حاط پيسي خدام فيه ، تسمع صوت جرى فدروج ..

- ماما ماما ..

- نجاة [ بتساؤل ] :

ياك لاباس بشوية ، ياك كنقوليك ماتبقاش تغوت بشوية ..

- مد ليها ولدها طابليت .. :

هاكي شوفي ، سمعي أشنو كيݣولو على بابا .. باه اسمع إسمعو ، ضار عندهم كحز عند مرتو كيسمع ..

- مرتو عينيها كيترعدو ، كلها كترعد شاف فيه بشر ..

- عبد الرحيم ، شكون هدا ، وشنو هادشي كنسمع ؟ [كتغوت] اش هاد التخربيق .؟؟

_________________

- سلات مسيرة لايف ، حطات ݣاع الدلائل بالفيديوات والوثائق على عبد الرحيم السعودي ، ݣاع التخلويض لي دارو حطاتو ليهم تاني ومتني ..

- سكينة [ كتصفق] :

ناضي ناضي وااعر ، عرفتي شحال ديال ليڤيو مليون ، ومزال طالع ، الفيديو خرج من 300 دولة ، ودابا غادي نݣلسو ونتفرجو بعويناتنا شنو غادي يوقع ..

- مسيرة [تنهدات براحة بحال الى زولات عليها شي حاجة تقيلة فوق قلبها] :

نبدل ونجي ..

____________________

- فحفرة من حفاري عين دياب[البار] مجموعين على طبلة ، محطوط قدامهم قراعي ديال الشراب .. وطباسل فيهم مكسرات ، عينيه كيبانو معسلين ، هوما غامضين ومع المشروب زادو كملو ، ولاو كيبان فيهم. احد اللون غامض ..

- هارون [ عينيه على تيليفونو ، حبس كيشوف الڤيديو .. غوبش وتقاد فالݣلسة ، هز حجبانو من داكشي لي كيشوف ، هز راسو ونطق ] :

وبلان مق**د ..

- سراج [بتساؤل] : شنو كاين ..؟

- جلال ضار شاف فيه بتساؤل بلاما ينطق ..

- هارون [مد ليهم التيليفون ] :

شوفو ..

- وقف عليهم شخص لابس الكحل ، هاز فيدو تيليفون ديالو ... كان تقادة ديال جلال ، لابس كولشي كحل ، مغوبش .. لي شافو يݣول هدا عمرو تبسم ..

- شفتو شنو واقع ؟

- جلال (تقاد فالݣلسة ، خطف التيليفون من يد هارون ، كيحقق فالڤيديو ) :

شي بلان جديد هذا ..

- هارون :

السعودي ق**ها ، ماشي بعيد هاد الليلة يهزوه للقبر ..

- سراج [هز كاسو شحطو شحطة وحدة ] :

هاد خونا لي دار هاد البلان ، خطيير .. منين ايكون جاب هاد المعلومات كاملين ..

- هارون :

عطا الله منين ، المهم لي دار هادشي جبهة ، حس الخوف ماعدوش ، واش عرفتي شنو دار دابا ، البلبالة اتنوض أصاحبي ..

- [الشخص] :

لي ختار يدير هاد البلان ، وبدا بسعودي هو الأول قاريها فيه حسيفة .. ولكن منكدبش عليك عبرو على مو ..

- هارون :

وغير صبر أصاحبي ، المخزن ايتحرك .. عند بالك ادوز بسكات .. أصبرا اودي أديناصور ..

- ديناصور [بصوت رجولي قاصح] :

الديناصور هو لي غايقبرك الى معيطيش ليه بسميتو ..

- هارون :

اكنضحكو معاك أسي يوسف ..

- جلال [مامديهاش فيهم ، كيحقق فالڤيديو مركز معاه ، نطق بصوت رجولي باح] :

« 𝐑 𝐔 𝐁 𝐘 𝐕 𝐈 𝐑 𝐈 𝐃 𝐉 𝐎 »

____________________

- سكينة :

الڤيديو لونصيتو فالقناة العادية .. ولحتو فتيك توك ، حيت التيك توك كيطلع ليڤيديو ، نص ساعة واتشوفي التيك توك تبلبل ، القناة العادية وصلنا ليها ل 2000 أبوني ..

- سندس [بإستفهام] :

كيدرتي ليها ؟

- سكينة [كتضحك] :

هاديك خدمتي اصاحبتي ، واش انوريك خدمتي ولاواه ..

- مسيرة [كتفكر] :

علم الله شنو غادي يكون واقع دابا لسعودي .. بغيت غير نشوف وجهو ..

- قاطعهوم صوت تيليفون ديال كريم ..

- أشر ليهم باش يسكتو فتح الخط ، كيسمع .. جمع غوباشتو ونطق :

أنا جاي ..

- مسيرة[كتشوف فيه] :

شنو كاين ؟

- كريم [بجدية] :

صاحبت دعوتك داوه لكلينيك ، دبحة صدرية ..

- مسيرة [أتكون كذابة الى قالت بقا فيها ، على فعايلو ومدار فالبنات يستاهل ماكثر] :

وعلاش مداوهش لكلينيك خوه .. داوه غير لكلينيك ديالكم انتونا بضبط ، سبحان الله ..

- كريم :

الواجب ديالي خاصني نديرو انت عارفة هادشي ..

- مسيرة : وي عارفة ، سير دير خدمتك ..

- أشر ليها براسو وخرج ..

- ولادها ݣالسين ، وهي غادية جايا فالكولوار .. المجية ديالها غير على قبل ولادها اما هي تخليه تم مرمي ، ولكن على قبل ولادها ممكن دير اي حاجة ، كتفكر فالفضيحة لي وقعات .. لي فيديو لي شافت ديال راجلها فالفيلا ديالهم ، بنات قد بناتو ، مشهد ماعمر ولادو ولا هي ولا ناس اينساوه ، ايبقاو ديما ينعتو فيهم .. خلي الأعمال المشبوهة لي مدخل فيهم راسو ، والوثائق لي مزور الإمضاء ديالها ، كانت شادة راسها غير بزز .. ولا حتى هي غادي طيح ، سيرتهم اتولي على كل اللسان ، ماشي المغرب لي ايكون شاف لايف .. العالم كلو غادي يكون شافو مدام تلونصا بزرية ، فراه هاد الشخص يدو واصلة ، وغايوصلو للعالم كلو .. مكانتش عارفة مدير ولا فين تدي الراس ، ولكن حاجة وحدة لي متأكدة منها .. مخاصهاش تبقى على ذمة واحد بحال عبد الرحيم ..

- تحل الباب وتم داخل رضوان ومنصور .. غير شافتهم قلبات وجها ، حيت حتى هوما باينة عندهم يد فأي حاحة وقعات .. واخا سمياتهم متجبدوش ، ولكن باين العربون ..

- رضوان [بخوف] :

امضرا كي بقى ؟

- نجاة :

الله وأعلم ، مزال ماعرفناش ..

- رضوان :

كان عليك تجيبيه لكلينيك ديالي ، لاش جايباه هنا ؟

- نجاة [خنزرات فيه] :

ياكما كان خاصني نتشاور معاك ، راجل طايح كيموت نبقى نتشرط انا ..

- قاطعهوم كريم لي خرج من الغرفة ديالو .. ملامحو باردة ، مشات عينو نيشان لرضوان كيخنزر فيه .. عينيه سكناو منصور ، ولكن مداهاش فيه .. مشا نيشان جهة نجاة ..

- مدام واش راجلك عمرو مدوز على القلب عمرو دار شي تحاليل ؟

- نجاة :

لا ادكتور عمرو ، شنو واقع كيف بقا ..

- كريم [حرك راسو بتأسف] :

درنا لي علينا ولكن الحالة ديالو حرجة ، كان كيعاني من مضاعفات شحال هادي ، ولكن على مبان ليا مكانش مسوق .. مكانش محافض على الوزن الصحي ، حتى النظام الغدائي ديالو مكانش متوازن .. هادشي لي خلاه يتعرض لدبحة صدرية مامستقراش ، ويمكن كيبان ليا تعرض لصدمة ..

- رضوان [قاطعو] :

دابا شنو ، اش كتحاول تݣول زعمة .. بغيت نشوف خويا وغادي نطالب بنقل ديالو لكلينيك ديالي ، أصلا مايشرفنيش يكون فهاد الكلينيك المشبوه ..

- كريم [تبسم بإستهزاء ورجع شاف فنجاة] :

هاد 24 ساعة اتحدد ، واش ايتخطاها ولالا .. دور راسو لعند رضوان وقرب منو بشوية تحت أنظار منصور ، جا حتى لحدا ودنيه ونطق :

أنت اخر واحد تهضر على الشبوهات فهاد الوقت ، اه شنو كنتي ݣلتي ليا احسن حاجة درتي أدكتور كريم تخصص القلب وشرايين باش تنفع بيها باك .. [تبسم] دابا انت لي محتاج تخصص ديالي أسي رضوان[ورك على سمية] ضرب فيه وزاد .. دور منصور راسو متبعو .. ورجع شاف فباه بشك ..

______________________

- البنات نعسو ، وهي بقات حالة عينيها شادة تيليفون فيديها كتسناه يسوني ، يلاه غادي تنوض وهو يسوني ليها التيليفون ..

- مسيرة [بزربة جاوبات] :

ألو أمضرا ؟

- كريم :

موحال يݣعد الراس ، كيبان ليا مقدش على الفضيحة .. وديجا كان مريض بالقلب ، السيد صحتو مكان عندو فيها غراض ، متبع ازهو ونصب على الناس ..

- مسيرة [عينيها على نقطة فالحيط] :

القبر سترة اكريم .. وانا مابغيتوش يم**وت بغيتو يبقى ، باش يخلص ݣاع لي دار فناس ودار فبا .. يدوق من نفس الكاس ديال القطران لي شربو لينا ، اما الموت راه رحمة وسترة ..

- كريم :

هادشي كيبقى غير سبب ، الى كان مكتاب عليه ي*موت راه غ*يموت .. المهم غادي يتهناو الناس منو ودوك البنات مساكن لي مشاو ضحية ، ايتخاد حقهم .. وݣاع لي دكرتيهم معاه ضروري مالبوليس يديرو خدمتهم ، حيت العالم كامل شاف لايف ، مايمكنش مايديرو والو .. ولكن لي ضرتي فراسي ، علاش مدكرتيش رضوان او ولدو ، انت براسك ݣلتي مخلويضين وبزنانزة ..

- مسيرة [تنهدات تنهيدة طويلة] :

هادوك خاصني ليهم ضوسي بوحدهم ، غير بلاتي النوبة جاياهم أصبر عليا ..

- فشقة ديال سراج ، متكي على الفوتوي مغمض عينيه مرجع راسو اللور ..

- هارون [شاد تيليفون وكيعاود فالڤيديو ] :

شكون زعمة لي يكون داير هاد تنوعيرة [كيشوف جهة جلال] ..

- جلال [بلاما يشوف فيه] :

دور كمارتك ، انا كنجي لبنادم فاص .. مكنضربش فظهر بحال العيالات ..

- سراج [متكي على واحد الفوتوي ، كيلعب برجليه ، عينيه معسلين ، بصوت تقيل منغم بسكرة ] :

يكون شكون مابغا يكون ، براڤو عليه .. دار بلان مايقدو عليه الرجال ..

- جلال [هز راسو سارح .. عينيه حمرين ] :

الصوت صوت راجل ، وسمية سمية مرة [مورك على الكلمة]

- يوسف [هزهز براسو] :

وايلي أصاحبي ، مالك سكرتي .. مرة بغا يجي منها هادشي كامل ، واخا تكون مسكونة مدير هادشي ..

- جلال [ببرودة] :

كندوي معاك ..

- سراج [وقف جار رجليه ابزز] :

المهم منحتاجش نعرض عليكم ، انا انوض نتلاح .. [اشر ليهم بيدو ودخل ينعس ] ..

- يوسف :

انا غادي نمشي ..

- هارون : ياك كل سبت كنباتو مجموعين ؟

- جلال [كيشوف فيه بنص عين] :

وديك الحمامة لي حاطها فطوموبيل تحت ، ماشتيهاش .. السيد ليلة عندو زردة ..

- يوسف [تبسم ، طبطب على ظهرو ومشا] ..

- جلال [شاف فهارون بنص عين كيحرك فرجليه] :

دخل ليك البلان لراسك أنت ؟

- هارون [كيدلك راسو ] :.

نكدب عليك ، مقادش نفكر فحتى حاجة هاد الساعة ، دماغي مبلوكي .. انوض نعس تصبح على خير ..

- جلال بقا فبلاصتو نصغر عينيه، حالهم غير بزز .. كيحاول يستوعب بلي لي وقع هاد الليلة مولاها شي واحد شاري العداوة مع سعودي .. ولكن إحساس حاسو كيݣوليه ، بلي مول هاد البلان مرة ماشي راجل ..

_____________________

- الفَرح الوحشيِّ ، والمَرح العنِيف والضَّحِک المجَلجِل .. كلُّها حَالات لا تَدُل علىٰ السَّعادة ..؛ إنَّها تشنُّجات البُؤسَاء الذينَ يُريدونَ أن يُؤکدوا لِـ أنفسِّهم، ولِـ العَالم أنَّهُم يَفرحُونَ بِشدَّة ..!!

- ف ڤيلا السعودي .. الباب الكبير محلول ، صوت القرآن خدام وريحة العود .. واقف رضوان ، معاه منصور ومؤيد .. كيستقبلو العزاية .. الصالون الكبير كانو فيه الرجال ، لي لابس عادي ولي لابس جلابة بيضة .. الأغلبية مكانش جاي يعزي ، ولكن جايين يشمشمو ، ونص جاي غير يدي الخبار ، اما فصالة الثانية العيالات ݣالسين ، ضايرين بنجاة لي كانت لابسة البيض .. مكانتش كتبكي ملامحها جامدين .. غير ساهية وساكتة .

- المرأة 1[بهمس] :

حسن عوانها ياختي ، متبغيهاش لعدوك .. شوهتهم مايهزوش ليها الراس الله يستر ..

- المرأة2 :

المرحوم مدار فيها مايتصلح ، انا منها نهز ولادي ونزيد لشي بلاد .. على مقالي الحاج ، بلي ݣاع لي تحطو سمياتهم مع المرحوم قرقبو على نصهم هاد الصباح .. او واحد الزوج كيتسناوهم ايدخلو من برا ..

- المرأة 1 [كتشوف جهة نجاة] :

الحمد لله لي الحاج تاقي مدخلش معاه شريك ، كانت حريرتنا اتكون حريرة .. إيوا الله يرحمو الى دار علاش يترحم ، الڤيديو ديال البارح دار بوم .. عرفتي فين وصل ، دوا معايا وليد لبارح من موناكو ، باش يسولني .. الڤيديو دار بوم ..

- المرأة 2 :

البوليس ضروري نايقلبو على مول هاد الفضيحة ، واخا على مبان ليا موحال يلقاوه ، السيد خطيير .. إيوا الله يسترنا ياربي ..

- خرج منصور على برا .. جبد التيليفون ديالو ، كيشوف وراه .. لي كيدوز كيرمي ليه السلام غير بعينيه .. تحل الخط :

[ معصب واحلة ليه فحلقو ] :

غادي تعرف ليا شكون مول هادشي ، طرتي نزلتي بغيت سميتو عندي .. وشوف ليا السبع فين كان لبارح ..

- [فجهة لوخرا] :

بحال كل سبت ، كان فالحفرة مع صحابو او ولد عمو .. ماشي هو ماشي من عويدو ، الى كان قاصدك ايجيك انت نيشان .. الخبار فراسك راك عارف عمك كان مخلوضها بالمزيان .. ولي دار هكا ايكون شي حد عارفو وعارف عليه الشادة والفادة ، وماشي بعيد يكون كان شريكو ..

- منصور [مغزف] :

هضرة وحدة ݣلتها ليك .. عندك 12 ساعة [قطع عليه] ..

___________________

- فجهة اخرى .. فوق السطح ، ݣالس مقابل مع الشميسة .. مبسم وكيشوف فرجلو ، تنهد تنهيدة طويلة .. وهز راسو لسما ..

- طلعات مع دروج السطح ، وقفات كتشوف فيه ، مشات لجهتو نيشان .. تحنات على راسو وباستو وݣلسات ..

- مالك أبا ؟ ياكما تنادم معاك الحال ؟

- عباس [شاف فيها وتبسم] :

لاواه أبنتي ماتنادم معايا الحال والو ، هو لي بغاها هاهو لݣاها ..

- مسيرة :

وعلاش ݣالس هنا بوحدك وكتخمم ؟

- عباس :

كنشوف ، واخا ربي مارزقنيش بدراري ، رزقني غير بالبنات .. ولكن صدقو ليا حسن من 100 ولد [تحجرو الدموع فحلقو] كون كان عندي ولد مكانش غادي يدير عليا كيكايديرو بناتي .. وقفو معايا وخداو ليا حقي ، تظلمن ابنيتي تظلمت .. ولكن الحمد لله حسيت ربي خدا ليا حقي والله ..

- مسيرة [نزلو دموعها وحطات راسها على رجليه] :

علاش حنا شحال عندنا منك ، أواحد ابابا .. الله يحفظك لينا ياربي ، نديرو عليك لي مايدار براكة علينا اندخلو لدار ونلقاوك قبالتنا ، هاديك هي دنيا ومافيها ..واخا انا كنت بغيتو يتعدب فدنيا ، ولكن قلبو متحملش الصدمة والخسارة ، مع طيحتو مع موتو ..

- عباس [كيدوز على راسها] :

كيبقى السبب أبنتي ربي بغاه داه ، سيري ابنتي الله يرضي عليكم .. الله يكمل عليكم بالخير ، لا انت لا ديك بنت الناس لي معاكم ، الله يحفظكم ويستركم ويقيل عطراتكم ، ياربي الكريم ..

- مسيرة [تنهدات براحة] :

اللهم امــين يــارب ..

______________________

- ݣالسة فالقهوة ، كتراجع الحسابات ... ساهلة حتى سمعات صوت حنين نطق سميتها :

أمونتي ..

- أمينة [هزات فيها راسها ، غير شافتها تبسمات .. نايضة من بلاصتها معنقاها ] :

ليليا .. إيمتا جيتي ؟

- ليليا [بإبتسامة بشوشة] :

دابا شي ساعتين ، دزت لدار رتاحيت وݣلت نجي نشوفك توحشتك ياختي ..

- أمينة :

حتى أنا والله العظيم الى توحشتك ، غبرتي أصاحبتي ديك رباط داتك لينا ..

- ليليا : وراني عارفة مع الخدمة ، دابا شديت الكونجي وجيت .. كيدايرة خالتي ماريا وعمي جواد ..

- أمينة :

إلى بغيتي تعرفيهم كيدايرين هي دوزي تغداي معانا ..

- ليليا [رمات شعرها وراها ، وضحكات] :

صافي واخا ، شي خبار على جلال وهلال ، توحشتهم ..

- أمينة :

هلال كاين هنا ، أما جلال راكي عارفة ..

- ليليا [ضحكات] :

عارفة عارفة ، يلاه نوضي وقت الغدا هذا نيت ..

- أمينة [هزات ساكها] :

هههه واخا يلاه ..

- ݣالسين فبيرو كبير .. منصور ومؤيد مكسيم ورضوان ..

- مكسيم [بعصبية] :

دازت شهر على موت باك .. خدمتنا موقفينها شحال هادي ، لي دار البلان لعمك .. كان قاصدو عينو فيه هو ، كون بغاك ولا بغانا ، مغايبقاش كيتسنى شهر على قدو ..

- منصور [ببرود] :

مابغيناش نغامرو بريوسنا ..

- مكسيم [قاطعو] :

منصور ، غادي تشوف شي حل ، السلعة خاصها دوز بزز بالخاطر غادي دوز .. سالينا ، مابغيتش الدم .. مفهوم امنصور ، يادير شي حل ياعتابر الشركة لي بيناتنا سلات .. عطا الله لي باغي يخدم ..

- ناض من حداهم خرج ، مخليهم بزوج ..

- منصور [كيحاول يبرد راسو ما امكن ، ماحيلتو لمول الشوهة لي وقعات هادي الشهر ، ماحيلتو للسلعة لي خاصها دوز .. داخ ومعارف مايدير ] :

رضوان ، سمعتيه شنو ݣال ، شوف شي حل ..

- منصور [شاف فباه ، عاݣدهم ] :

أصلا بديت ، غير كون هاني ... هاد المرة غادي تجي فيه الدقة ..

- رضوان [وقف] :

دابا نشوفو ، هاد المرة متلوم غير راسك إلى غلطتي ..

___________________

- سكينة [ دايرة نظارات ديال البروطيج فعينيها ، وخاشية وجها فالبيسي ]

- حداها مسيرة ، هازة واحد المهراز ديال الرخام ، وكتورك بجهد على 5 الورݣات حمرين ديال الورد ..

- مسيرة عتقي .. حطات مسيرة لي فيديها ، وجات حداها ..

- سكينة :

مول الأرض لي دايزة تحتها الطريق ، هو الولد الوسطاني ديال جواد الإبراهيمي ، عندو بنت وزوج ولاد .. البنت هي الصغيرة ، وكاين هلال الولد الكبير ، ولي تابعو هو جلال .. السيد 18 عام وهو كاين فسويسرا ، ساكن فولاد السعيد كيعمر كازا بزاف .. ملعق ديال بصح .. منصور بغا يشري من عندو الارض ولكن مابغاش .. وغير الشهر لي فات طوموبيل ديال جلال دارت اكسيدو ، وعلى حساب هادشي لي عندي .. داكشي مضبر شي حد قاريها فيه حسيفة .. وباش زدت تأكدت هو هذا [ دورات ليها الپيسي ] ..

- السيمانة لي فاتت منصور ، خرج جوج بريكات من الكونط ديالو ، وعطاهم لهاد خونا ..[ وراتها تصويرة واحد الشخص فالأخمسينات من عمرو ، قصير وصلع] مسيفط ليه ميساج .. فيه بالحرف بلي " السبع كيكون فالحفرة مايسترو كلوپ اوغيونتال " حضي جنابك ، ماترجع عندي حتى تكون متأكد بلي مات " ..

- مسيرة [ شافت فيها مصدومة] :

ولد الكلبة .. باغي يقت**لو ... ناااري ..

- سكينة :

هذا فين يبان عمو ، فاتو باضعاف.. مزال عمو مكانش عندو مع القت**يلة .. أما هذا راه بحال شريب الما ..

- مسيرة[ساكتة وكتخمم]

- سكينة [كتشوف فيها ] :

فاش كتفكري .. واش تراجعتي على لايف ، تعطلنا على اللايف الثاني .. ولكن مزال خاصنا ضوسي كامل على هاد خونا ، حيت هدا شوية ميزانو تقيل ..

- مسيرة [ كتخمم] :

خاص لي يعلمو ..

- سكينة [بإستفهام ] :

علامن كدوي شكون يعلم شكون ..؟؟!!

- مسيرة [هزات فيها عينيها] :.

خاص لي يعلم هداك جلال ، بلي منصور باغي يق||تلو ..

- سكينة (بصدمة) :

واش من نيتك ، واش انت هبيلة ؟ كيفاش اتعلميه واش باغية تفضحي راسك ، مسيرة واش أنت ڤيو ديري عقلك واش هبلتي ..

- مسيرة [بحال الى مادواتش معاها] :

ضبري ليا فنمرتو ..

- سكينة : أش ناهو ؟

- مسيرة : بغيت نمرتو ..

*** ولاد السعيد***

بوابة كبيرة ديال الحديد ، الكميرات ضايرين بيها .. واقفين جوج ديال الرجال من الهيئة ديالهم باينة عليهم عساسة ، مخشيين فالبيوت ديالهم حاطين صينية ديال أتاي ، وكيهضرو بيناتهم .. وزوج عساسة أخرين كانو ورا الباب اللوراني .. واخا 4 ديال الرجال كانو غير كافيين ، باش يعسو على فيلا بحال هادي .. ولا إسم ڤيلا مجاتش معاها .. من برا كانت كتبان عادية ، مصبوغة بالبيج .. مع باب كبير دروج غاديين لجهة لابيسين .. من جهة لوخرا ، كاينة دار فيها 3 البيوت ومراح كوزينة وطواليط ، كانت مديورة على قبل أحمد ونجية قبل مايشريو دارهم .. اما من جهة ليسرية لدار ، واقفين زوج ديال طوموبيلات ، الجيپ الݣري لي كيمشي بيها للمدينة ، وجيب كحلة لي كيدور بيها تما ..

- الداخل ديال الڤيلا كان غير على برا ، منظر خرافي رقي مكاينش بحالو .. كيبين الدوق ديال مولاه .. الفراش كان خليط بين العصري والبلدي الراقي ، ألوان راقية مابين القهوي ، الاخضر ، الكحل وذهبي فكل فوتوي مطروز عود بدهبي ، فكل صالون كانت تلفازة مع ديكورات فدهبي ، كراسة رخامية .. وكراسة مبطنين بالكحل ضايرين بدهبي ، كلمة روعة قليلة فحقها .. وباين لي ختار هاد الديكورات خدم عليهم مزيان ودواق ..

- نزل مع دروج ، لابس سروال فالبيج مع قميجة فالبيج ، داير نظارات شمسية فالقهوي .. غير سمعاتو نجية وخرجات عندو :

صباح الخير أسي جلال ، كيصبحتي ..؟

- جلال [حرك راسو بالإيجاب مع شبه إبتسامة] :

كيبقى أحمد شوية دابا ؟

- نجية [بإبتسامة] :

لاواه اسي جلال كي كنا وكي ولينا ، الحمد لله لهلا يخطسك ، أسمح لينا عدبناك معانا ..

- جلال [حرك راسو بشوية] :

مكاين عذاب ، درتي لي ݣلت ليك ؟

- نجية :

اه اسي جلال كون هاني ، بيت سي هلال مقاد كولشي هو هداك ، لقيتيني نيت كنصايب شي شهيوات غادي يعجبوه ..

- جلال [عطاها إبتسامة وخرج ] .. خدا تيليفونو .. دوز نمرة سراج ، سونا المرة اللولة او والو مجاوبوش .. سونا المرة الثانية عاد فتح الخط ..

- سراج [بصوت تقيل] :

اممم اش كاين ؟

- جلال [بجدية] :

واش انت اول واحد غادي يطلق ، نوض شوف مدير لراسك ..

- سراج [تقاد فالݣلسة] :

مغاديش تحس بيا اجلال ، الله يرحم جدك دور 100 ..

- جلال [متسوقش ليه] :

هلال غدا غادي يكون هنا ..

- سراج [دخلو العجب] :

وايلي ، اش كتݣول .. كيطرا وجرا عمرها كانت ليه ..

- جلال [كحيرك عظمة الفك ديالو ضاغط بسنانو] :

هادشي كان خاصو يديرها شحال هادي ..

- سراج [بإبتسامة] :

هي نجمع باليزتي ونجي ؟

- جلال [بإستهزاء] :.

تجي أنت انخويها .. فوسط هضرتهم سمع صوت ميساج جاه ..

- جلال [ حيد تيليفون من ودنو كتبان ليه نمرة غريبة] :

سراج من بعد وندويو .. قطع عليه قبل مايجاوبو ، فتح الميساج .. عقد غوباشتو من محتوى الرسالة لي جاتو :

" سلام شوف ، انا مكنعرفك مكتعرفني ، بغيت نقوليك حضي راسك راه ناويين يق**تلوك "

- بلاما يفكر ، دوز أبيل لديك النمرة ، ولكن كانت طافية .. زيد على تيليفونو ، دوز نمرة هارون لي جاوبو تم تم ..

- جلال [بجدية ] :

غادي نسيفط ليك واحد نمرة دابا ، بغيتك تعرف ليا شكون مولاها ..

- هارون :

هي اللولة أسبع .. ديك ساع سيفط ليه النمرة ، كان على أعصابو ، ݣاع لي كان ناوي يديرو مابقاش عندو ݣانتو .. راسو كيدور فحاجة وحدة شكون هدا لي مسيفط ليه ميساج؟؟

- ݣالس على الكرسي ناشر رجليه وكيسمع لهارون ..

- هارون :

التيليفون مؤقت ، ومافيهش gps باينة من تيليفونات القدام ، غير سيفط ليك ميساج وزول النمرة ..

- جلال [شاد كرة البيلياردو رقم 8 فيدو كيورك عليها ، نازل بكاع قوتو عليها ] :

مايكون غير الق**د ..

- هارون [كيحرك راسو بنفي] :

لا موحال واش هو ، واش أيكون هو وكيعلم فيك ..

- جلال [تبسم] :

فعايل الذياب كنعرفهم ..

- هارون [بإستغراب] :

ماعرفتش .. فديك اللحظة بضبط سونا تيليفون جلال ، هز تيليفون بالخف ، طلع ليه ميساج ولكن من نمرة أخرى غير النمرة الأولى ..

- فڤيلا الإبراهيمي ، مجموعين كاملين على العشا .. ماريا وجواد وأمينة وهلال ، ذياب وسومية وتوفيق .. وليليا هي او او والديها وردة او أمين ..

- توفيق [بإبتسامة لعوب على شفايفو] :

شنو بان ليك نمشي معاك اهلال ، الصراحة طلع ليا فراسي الجو ديال المدينة ، مكرهتش نرتاح ..

- هلال [هز عينيه فيه ببرود] :

مايصلاحش ليك ..

- توفيق : شنو لي مايصلاحش ليا ؟

- هلال [ بشبح إبتسامة] :

الجو ديال العروبية [غمزو]

- توفيق [ حك على لحيتو ، عارف هلال فهم مغزى كلامو فين غادي ] :

بالعكس ، غايوالمني كثر ماتخايل أولد عمي ..

- هلال [رجع شاف فطبسيلو كلى دغمة ونطق] :

نسبق ونشوفو ، واش يصلاح ولالا ..

- توفيق :

حتى هذا نظر ..

- ليليا :

وصراحة مكرهناش كاملين نمشيو ، طلعات لينا المدينة فراسنا والخدمة وصداع ..

- أمينة [بضحكة بريئة ] :

انا بعدا غير نسالي الخدمة لي عندي ، وغادي نخلط على هلال ، توحشت نيت جلال وبغيتو فواحد الموضوع ..

- جواد [بتساؤل] :

شنو هو هاد الموضوع ؟

- أمينة [ بجدية ] :

شيحاجة بيناتنا ابابا ، من بعد ونقوليك ..

- ماريا [شافت فليليا] :

إيوا بنتي ، انت مزال مناوياش ؟

- ليليا [خسرات سيفتها] :

ماما ماريا هالعار ، موضوع ديال الزواج أحيديه من بالك نهائيا ، ها أمينة عطا الله العزاب فالعائلة ، انا بعدا غير نساوني ... واش انا راسي وكنتخاصم معاه ، بقا غير نتزوج فين تقشيرتي ، فين الورقة لي حطيت هنا فين هادي ، لالا براكة عليا راسي ومشاشي الحياة السعيدة ..

- وردة [تنهدات تنهيدة طويلة] :

كونماشي وديان تزوجات او ولدات ، كون راه حنا مشوݣين فالحفايد ، مافهمتش انا مالها مع زواج دكريه ليها بحال الى لحتي ليها البزار فعينيها ..

- أمين :

خليها عليك ، نهار غادي تبغي بلاما تݣولوها ليها ..

- وردة [شافت فيه] :

حتى ليمتا العمر كيفوت ، هلال لي صغر منها هاهو عندو 37 ..

- ليليا [بدلع ] :

ومالي ، كيجيتك أصلا المرأة فالاربعين كتعتبر قانون ، والقانون على الجميع [بإبتسامة ساحرة] ..

- توفيق [غمزها] :

دوماج عندي 25 عام والله وكون عندي 30 حتى ناخدك ، سعدات لي يديرك فدارو أبنت العم ..

- أمين [بجدية] :

دياب شد ولدك لا ندير فيه يدي ..

- ذياب [كيضحك] :

الحاجة لي متشبه مولاها حرام .. كملوها بضحك ، وختموها بكاس ديال القهوة ، من بعد تفرقو وكل واحد رجع بحالو لدار ، أما هلال لي كان فبيتو .. جوج بالز ديالو مقادين ومحطوطين ، تكا على نموسيتو ، جر المجر ديال الكوافوز .. خرج منو كادر فيه تصويرة ، فيها بنت لون بشرتها سمر مع شعر كحل ورطب ، وإبتسامة ساحرة على وجها ، تنهد تنهيدة طويلة .. قرب الصورة من شفايفو باسها ، ورجعها لبلاصتها ..

- " ماتمشيش نهار السبت للبار لي نالف كتمشي ليه ، راه ايكونو كيستناوك تما ، انا لي عليا راني درتو رض البال لراسك "

- هارون [ماعرف مايݣول بقا ساكت ] :

صاحبي ، هدا باين عارف البلان مزيان ، هدا ماشي منصور نبصم عليها ..

- جلال [كيحرك رجليه بزربة متوتر ، مكايحملش هاد الفعايل وهاد كترت الألغاز ] :

ماعنديش مع هاد البلانات ..

- هارون :

انت دير الاحتياطات ديالك ، هاد السبت بلاما تمشي ..

- جلال [ برودة] :

غادي نمشي ..

- هارون [خرج فيه عينيه] :

واش من نيتك ؟

- جلال [شاف فيه] :

دويت .. سالينا .

_____________________________

- ݣالسين كيشوفو فيها ..

- سكينة :

صافي تهنيتي دابا ، ياختي كتجبدي النبابر على راسك وحق الله العظيم..

- سندس :

وانا مافهمتش واش شغلك اختي ، ضبر راسو يق**لو ولا يعلقو فشجرة وحنا مالنا ، ناقصينا مشاكيل ..

- مسيرة [خنزرات فيها ] :

سوقنا ، لاش فتحنا ديك القناة اختي ، فلوسها اللولين عجبوك .. الى بغيت نغمض عينيا منفتحهاش ، ونخاطر براسي ونوض هاد هايلالة كاملة .. ياكما يحسابليك فتحتها اعلى سعودي ، سعودي مات ومنو عدد ، مغانخليش ح*يوان ديال الخلا ، يتعدا على شي واحد كيما بغا يكونو نوعو ، واخا تمشي فيها حياتي ، عباس هادشي لي علمنا .. الى كنتي انت مبردة وقلبك جامد اختي انا ماشي بحالك ، ومغاديش ندخل سوق راسي ..

- سكينة :

راه ماقلنا ليك والو ، ولكن اصاحبتي والله ماعرفت .. خايفة غير نمشيو فرجلين وصافي ..

- مسيرة :

مغادي نمشيو لا فرجلين لا يدين ، نهار الاول قلت ليكم لي مقادش على هادشي يبقى فتيساع ، مدام دخلتو لهاد المعماعة وصافي هنيونا وسدو دراݣمكم ..

- صفاء [كتبرد فظفارها] :

انا بعدا مع مسيرة ، أويلي اختي حرام داك الزين ي*موت ..

- سندس :

فين شفتيه انت ؟

- صفاء :

هاء راه دخلي غير الانترنت تقلبي على سميتو يطلع ليك ، كيحمق بزين ، على طولة وعلى كاريزما وعلى رجولة كيهبل ياختي .. وبغيتي مسيرة تخلي داك الزين يضيع ، انت ڤيو لا ؟

- مسيرة [متسوقاتش للوصف لي عطات ليهم صفاء همها غير يكون وصلو ميساجها ويدير بيه ] :

انا درت لي عليا ، على الله غير ياخد الأمور بجدية ، ويتيق بالميساج .. ومايمشيش لمصيدة برجليه هادشي لي كاين ..

- قدام ڤيلا جلال ، وصلات طوموبيل فالكحل ميرسيدس .. حل العساس الباب ودخلات ، وقفات ونزل منها جلال ، جا العربي ، الراجل لي بلاصى أحمد بينما برا ، خدا البالز ودخلهم للدار .. هز هلال عينيه كيدورهم جنابو ويستنشق الهوى النقي ، تنهد تنهيدة طويلة ، حدر عينيه لي جات نيشان فعينين خوه .. تبسم ليه فاتح ليه يديه ، مشا عندو معنقو ..

- جلال [مطبطب على ظهرو ] :

مرحبا بيك أخويا ، على سلامتك ..

- هلال [رض عليه بنفس الإبتسامة ] :

الله يسلمك أخويا ..

- سبحان الله ، جينا انا وياك دقة وحدة .. ضارو بزوج غلى إثر هاد الصوت ، جلال دور عينيه محرك راسو مامتيقش ..

- أخويا اش جابك ، أخويا واش عيط ليك شي حد .. غير مدخل حمارتك ..

- سراج [كيضحك] :

ولاد العم مجموعين ومنكونش ، خايبة فحقي أصاحبي .. خاصكم تفوجو عليا ، انا دابا وليت محسوب على المطلقين .. فبلاصة منمشي عند طبيب نفساني انتونا تعالجوني ..

- جلال [ميغزز فسنانو] :

القل ... [حبس كلامو ] متخلينيش نخسر الهضرة أصاحبي ..

- هلال [ببرودة] :

درتيها لراسك غرق فيها راسك ، ضار عاطيه بظهر ودخل ..

- سراج :

درتها راسي وفكيت راسي ، فرعتو ليا راسي بهاد ديسك ..

- دخلو ب3 بيهم للڤيلا لداخل ، نجية كانت موجدة ليهم الغدا على حقو وطريقو ، تجمعو ب 3 بيهم على للطبلة .. داويين فبزاف ديال الحوايج ، من غير جلال لي كان عقلو مع غدا ..

___________________

- كيسد فصدايف لا شوميز ديالو ، لون موحد كان لابسو هو الكحل ، ختمها بمونطو فالكحل .. رش من البارفان ديالو .. هز سوارتو وتيليفونو ، ونزل مع الدروج .. لقاهم مجموعين فجردة ..

- متأكدين مابغيتوش تسهرو على برا ؟

- سراج :

لا غير سير بصحة ، حنا انسهرو هاد الليلة غير هنا ..

- أسر ليهم بيدو وخرج ، طلع فطوموبيلو ، ديمارا ومشا ..

______________________

- مسيرة [حاضية سكينة] :

أمضرا شنو عطاك ؟

- سكينة :

الأشارة ديال طوموبيلتو عاطياني بلي شد الطريق ديال كازا ... كيبان ليا ميساجاتك ماخداهومش بجدية ..

- مسيرة [كتقز وضرب برجليها مع الأرض ، بصوت عالي غواتات ] :

اااااعععععع ، هاد الزبل هدا واش مامسوقش ولا مال طواسلو البعر تفو .. [كتحك فراسها غادية جايا تعصبات] .. هداك راس التيمومة شوفيه فين كاين؟

- سكينة [كطابي فالپيسي ديالها] :

سامر حدا الكلوپ ، كيبان ليا خونا مشا فيها ..

- مسيرة [كتجبد فشففايفها ، طرطقات صبعها وقربات من سكينة] :

وريني تصويرتو ݣاع .. سكينة ماعلقاتش على الأمر ، جبدات تصويرتو ، دورات الپيسي لمسيرة باش تشوفو ..

- مسيرة كتحقق فيه مدة ، فملامحو ونظرة ديال عينيه ، فأي حاجة فيه ، تقادات فالوقفة .. عطات لسكينة بظهر ، حالة الماريو ... جبدات قبية ديالها طويلة ، جبدات سبرديلة فالكحل من تحت الماريو لبساتها ، سكادو ديال الجنب فالكحل هزاتو ، دارت فيه سوارت الدار وتيليفون والفلوس ..

- سكينة [كتشوف فيها ] :

فين غادية ؟

-مسيرة : [مجاوبتهاش]

- سكينة :

مسيرة راه سولتك فين غادية أصاحبتي ؟؟

- مسيرة [فتحات الباب ديال البيت وشافت فيها] :

غادية لكازا ..

- فوق الطبلة .. محطوطين قراعي ديال الشراب ، بكية ديال الݣارو وطفاية ، وموسيقى هادئة .. داير رجل على رجل ، كيسف من الݣارو لي ففمو ... ويطلق الدخان من جنب فمو .. كان مقابل معاه حاضيه ..

- هلال :

راك واكلها اولد الذيب ..

- سراج [نزل راسو شاف فيه ، تنهد تنهيدة طويلة] :

ماشي ساهل ..

- هلال [حك حاجبو ، شاف فسما ورجع نطق] :

لي دزت منو أنا هو لي ماشي ساهل ..

- سراج [حرك راسو بنفي] :

تمنيت كون كنت بلاصتك ، شتي .. كون غير ماتت وخلاتها بلاصتها زوينة ، كنت بعدا غادي نبقى نتفكرها بزوين ..

- هلال [بجدية ] :

من نيتك كدوي ، واش عرفتي شنو تموت ليك مراتك او ولدك كنتي كتسناه يجي دقة وحدة ولا اكترون ..؟

- سراج [بهضرة قاصحة ] :

هلال ، انت بعدا مشات عند الله وخلات ليك باش تفكرها ، كانت مزيانة متقولبتيش ، ربي بغاها داها عندو .. انا راه درت على وديتها لي مايدارش ، وقفت فوجه باها .. رجعات ليا حياتي بحال الحبس ، كرهاتني فراسي .. الخدمة سمحت فيها مابقيتش كنمشي ليها ، دارنا مابقيتش كنوصلها .. راه أخيب بلان ممكن يوقع ليك ، هو تصدم فالبنت لي بغيتيها ، كون ابقيت ضرب طيح ومنطيحش .. ولكن هادي دير ليا العقل ..

- هلال [ خدا جغمة من كاسو ورجعو لبلاصتو] :

شحال من حاجة ندمنا عليها ، بلاما نجيو نشكيو بحال العيالات ، لي فات مات .. بنادم يصلح من راسو الى لقا مايصلح ..

- سراج [حط عينو فعينيه] :

وأنت اول واحد اولد عمي ، أحسن مدرتي فحياتك هو جيتي تݣلس مع خوك .. راه محسوب عليكم باطل ..

- هلال [كح] :

بلاما ندويو فهادشي ، ردمو ودير عليه الياجور ..

- سراج : هاهو رادمو .. [بدا تيليفونو كيصوني ] .. هزو صغر صغر عينيه فشاشة ، فتح الخط ونطق والإبتسامة على وجهو :

- كونما عيطي كنت غانعيط ليك .. انا عند ولد عمي فالفيرما ، تا ريح أشمن .. انسيفط ليك لوكاليزاسيو أجي تسركل شوية مع راسك حتى انت .. يلاه سير سير ..

_____ من بعد ساعة _____

- تحل الباب الكبير للڤيلا ، ودخلات رونج فالكحل .. بلاصات ونزل منها ، جاي قاصدهم .. غير شافو سراج وقف مبسم معنقو :

نسيبي العزيز ، بغيت نݣول كان نسيبي ..

- كريم [معنقو] :

حالتك صعيبة أصاحبي .. [مد يدو لهلال مسلم عليه جر كرسي وݣلس] ..

- سراج [مد ليه كاس] :

طنز طنز مع قبك ..

- كريم [خدا من عندو الكاس ، شرب منو وحطو] :

وحمد الله وشكرو تفكيتي .. خاصك تخرج شي صدقة .

- هلال[جاتو الضحكة] :

عمري شفت شي حد كيشهد فختو ..

- كريم [بجدية] :

عارف ختي اش كتسوى مزيان ، وبمسبتها خاوي الدار هادي 15 عام .. وكون لݣاني قبل مايكتب عليها ، كون ݣلتها ليه ، حيت كيبقى حتى هو ولد الناس .. ولكن مكنتش فداك الوقت ..

- هلال :

سي طروطار دابا ، طاح فالحفرة وفضا .. يهز راسو ويبدا من زيرو ..

- كريم [شرب كاسو دقة وحدة مرجع راسو اللور] :

هذا هو البلان ..

- سراج [بجدية] :

أش درتو مع داك المونتيف ديال رضوان ؟

- كريم [مزال مرجع راسو اللور] :

المونتيف راه حال راسو بيديه ، ايكذبو فؤاد [باه] ويتيقو بواحد يلاه خوه فضيحتو مابردات ..

- سراج [خوا لي بقا من القرعة فكاسو] :

هادي عندك ، لي دار هاد البلان برافو ليه ..

- كريم [مد ليه كاسو يكب ليه] :

هذا هو البلان ..

- ݣالسين فالبيت مع سكينة ، كانت أعصابهم على الجمر .. سعاد لي سولات عليها قالو ليها بلي جا كريم وداها تشوف شي سلعة ..

- صفاء [مغوبشة ] :

سيفطات ليه ميساجات لاش غادية لعندو انا بغيت انفهم ..

- سندس [كتخنزر فيها ] :

ياك انت لي ݣالسة عليها ، راجل شهوة منو ... حشومة يمشي فرجلين ، دابا وليتي تقولي لاش غادية عندو ، هاد البنت مافهمتش انا كيفاش كتفكر ، وحق الله العظيم .. كون اشديتيها اسكينة ..

- سكينة [شاف فيها ] :

واش كتفلاي عليا اسندس ، انت عارفاها كثر مني انا ... واش مسيرة الى دارت شيحاجة فراسها كيشدوها الناس ، ولا كتديها فشي واحد .. كدير لي قالها ليها راسها ، عيط حتى بحيت فالأخر جات خالتي سعاد ، كتسولني مالكم وفين مشات مسيرة ، قلت ليها راه اتلاقى مع كريم ايوريها شي سلعة ..

- سندس [بتساؤل] :

كيفاش ماما تيقاتك ، كاينة شي سلعة وهادي 8:30 ديال الليل ..

- سكينة :

وحيتاش مسيرة مشات مع 7:30 .. قلت ليها راه واحد السيد عندو واحد المحال وعاد جاب السلعة ، وخاصها تشوفها قبل مايطيرو بيها الناس ، قلت ليها راه بغات تزيد تبيع حتى هادشي ديال الإكسسوارات ديال التيليفونات ، انا راه بديت اكندخل ونخرج فالهضرة .. المهم قلت ليها وقتما سلاو ايرجعها كريم .. انت عارفاها منين كتكون معاه مسيرة مكتقول والو ..

- سندس [الخوف راكبها] :

انا خايفة على هاد صݣعة الأيام ، كدير غير لي قاليها راسها .. مكتفكرش نهائيا ، مغاتوعى على راسها حتى يكون فات الفوت ..

- صفاء [بجدية ] :

بلاما تبقاو ݣالسين وكتولولو ، مسيرة ديما كتزطط راسها ... مايتخافش عليها ، واخا كديرها يغرق فيها جمل ، ولكن راه مطورة .. كتبقاو تقولو بحال هكا كتجيبو ليا الضيقة ، بغيتو تخلعونا وصافي ..

- سكينة [حلات شعرها وجمعاتو] :

انا مابغيتش نفكر فالحوايج الخايبة ، ماعندنا منديرو دابا من غير نتسناو حتى ترجع ، مافيدينا حتى حاجة .. سونينا ليها مكتجاوب ، كريم طافي تيليفون ..

- صفاء [بحال الى تفكرات شيحاجة] :

أجي متقديش تبعي تيليفونها ؟ نقدو نعرفو فين هي ؟

- سكينة [بإبتسامة ، هزات تيليفونها وراتو ليها] :

هاهو خلاتو ، دات غير العادي ، والعادي منقدش نتبعو .. راه فكرت فيها قبل ولقيتها خلاتو .. وفرضنا مثلا ݣاع داتو معاها وعرفناها فين كاينة ، أنشدو الطريق لعندها انفضحو راسنا مع خالتي سعاد ومي معزوزة ، حتى عمي عباس مازال مدخلش من الزنقة ، نسونيو للبوليس اش انقولو ليهم ، راه ماعندنا حتى حل من غير نتسناو .. ونطلبو ربي يدير شي تاويل ديال الخير ..

- سندس [خدات زيف حياتي عكفات بيه راسها ] :

مش طبة كحلة هادي ، لي ماعندو هم تولدو ليه حمارتو .. ياربي تكتب علينا مكاتيب دالخير ..

- تحل الباب ، ودخل عليهم عباس ، كيدور فعينيه عليهم بشك ، شاف بنتو مكايناش ونطق :

فين هي سبيعة ديالي ؟

- سندس [كضحك فوق قلبها ] :

جا كريم داها ، بغات تجيب سلعة جديدة من كازا ..

- عباس [هز حاجبو بشك] :

وسلعة متسناش حتى لصباح ؟ كاينة شي سلعة فهاد الليل ؟

- صفاء :

وبابا راك انت عارف مسيرة ، كتبغي قبل متنعس تكون نضات أمورها ، والسيد عاد جاب السلعة ، فتح الكوليات قبل الأحد على ودها ، باش تعزل وتخير .. اتسالي وراه ايرجعها ..

- عباس [ سكت يلاه ايسد الباب ورجع] :

خرجو تعشاو ..

- سندس :

واخا ابابا حنا جايين .. خرج سد الباب وراه عاد طلقو النفس براحة ..

- واقفة قدام لاݣار ، كتسنى فطاكسي دوز .. كتفرك فيديها .. كان محرك البرد هاد الليلة ، كتحس بسم ديالو داخل ليك مع العظام .. شيرات لطاكسي بان ليها خاوي ، وقفاتو .. طلعات القدام شافت فمول طاكسي ونطقات :

عفاك كلوپ مايسترو اوغيونتال ..

- مول الطاكسي : واش لي فعين الذياب ؟

- مسيرة :

اه هو هداك .. ديمارا الطاكسي وشد الطريق للعين الذياب .. دقات قلبها كانو مجهدين ، كازا ماضربات فيها العطرة منين خرجات من الحبس ، ماعمرها جات ليها نهائيا غير إلى دازو منها فاش كانو جايين من سطات للجديدة ، كانت غير مݣدمة وجايا لمدينة مامخالطاهاش ، لي ݣاليها راسها دارتو بلاما تفكر ، المهم عندها هو دير لي عليها ... غير ايبان ليها اتمشي عندو تݣوليه شنو كاين وترجع بحالها ساهلة ماهلة ..

______________________

- ݣالس مكواني بوحدو ، فبلاصتو ديال ديما .. كيشرب راسو مامسوق لا لبنات لي كيتغمازو عليه ، ولا للإبتسامات لي كيتلاحو عليه ، ولا العروض المغرية لي حدا رجليه .. اخر همو هو هادشي ، مكايحملش الحاجة الرخيصة ... خاصو هو يبغي وهو يدير مجهود على ود ديك الحاجة ، أما السلعة الدليلة بنسبة ليه ، من سعد الصيادة الفنيانين .. أما هو مكتنغموش ، فاش بلاصة طوموبيلتو مبانتش ليه شيحاجة كتلفت الإنتباه .. دخل وخدا كيف مالف ، قاد مجاجو وكان هو هداك .. واخا كيعرݣها ولكن واخا هكاك كيعرف شنو كيدير ، وشنو كيوقع حداه من داك النوع لي واخا تحط ليه البار كلو كيبقا شاد فراسو ..

- خدا تيليفونو شاف شحال الساعة لقاها 9:30 ديال الليل ..

- رجع التيليفون للجيبو قرر يزيد 5 دقايق وغادي يمشي بحالو ..

___________________

- وصلها الطاكسي حتى لقدام البار ، خلصاتو ومشا .. وقفات كتشوف فجنابها .. الدنيا جاتها فشكل ، بنات مقزبات داخلات البار ، وبنات خارجات لي خارجة كتمايل ولي خارجة مع شي واحد ... كل وحدة وكيف دايرة ، من النوع الراقي .. غير الحوايح لي لابسين عاطيين العربون .. كترمي عينيها وتدوي مع راسها ، واش تدخل تقلب عليه فالباب ، ولا تسناه حسن .. هي عاقلة على الملامح ديالو مزيان ، تسناه حتى يخرج وتمشي عندو نيشان ، سلام خويا لاباس هاليكاين وترجع بحالها .. حيدات من بالها واش ترانات ايبقاو ولا ولا .. ونسات بلي طاكسي ايحسب عليها زبالو ديال الفلوس الى اترجع فالكار ويديها من عين الذياب حتى لمحطة ولاد زيان .. وشوف وشوف واش تلقى المركوب ديك الساع ولالا ... هادشي كلو حيداتو من بالها ، كتفكر غير كيفاش تعتق هاد السيد صافي ..

- تكوانات فواحد القنت ، وقررات تسناه حتى يخرج وغادي تمشي لعندو نيشان ..

- بقات مدة وهي واقفة كتسكاني ݣاع لي داخلين وخارجين ، فلحظة هزات راسها ومشاو عينيها لواحد القنت ، كتبان ليها طوموبيل فورد كحلة كبيرة ، زاجها فيمي .. مكوانية فداك القنت ، المنظر ديالها مكانش كيطمن كيجيب الخوف .. كان كيبان غير الخيال ديال الشخص لي كاين فيها ، ملامحو ماوضحاش ليها مزيان ..

يتبع...