روبي ڤيريدجو الجزء 16

- سكينة : ولكن على الأقل كان غادي يجاوب ولالا ... غادي يقول شيحاجة ، ايقولي خليني نفكر ولا يكون خير .. هو غير قلت ليه هكاك ديمارا طوموبيل وجابني ، بحال شي جفاف بحال شي طارو ديال الزبل باغي يتهنا منو ..

- سراج النوع ديالو معروف مزيان ، مالف بالبنات ضايرين ليه بجنابو ... انا غير وحدة مغايرة على لي كان مالف بيهم ، حيت انا مابغيتوش من الاول وعمري بينت ليه ولا تلاحيت على رجليه .. داكشي باش جيتو متميزة .. قال شنو ندير ندير معاها علاقة ، ندوز الوقت والله يعاونها ويعاوني ..

- صدمتو منين خرجت ليه من الجنب .. [ضحكات] وانا كيف الحمارة كنت فرحانة عند بالي السيد راه كيبغيني ، وماشفتوش كيف ولا فاش قلت ليه انا ماشيش ديال التفليات. ، وسيد حطيتي واحد ونزلتي الثاني ، تعامل ببرود .. ضحكت على راسي وحق الله العظيم ..

- سندس [طبطبات على قلبها ] :

شوفي كولشي من الخير ، أي حاجة من الخير ... يمكن ماشي هو لي مكتاب ليك ويمكن يكون مكتاب ليك شي واحد أخور ماتعرفي لي كاين .. وأصلا فيها خير لي بين ليك من الاول ، ماشي مثل عليك وفالاخير يصدمك اتكون صدمة خايبة ..

- مسيرة : سندس عندها الصح .. وعرفتي أحسن حاجة ديريها هي تخرجي من ديك الخدمة وشوفي شي خدمة أخرى أحسن ، ولا اجي معايا انا نيت محتاجاك ..

- سكينة [تنهدات ] :

هادشي فاش فكرت ، فكرت نخرج من الخدمة مابقيتش غادي نكمل ، غادي نشوف شيحاجة أخرى .. مغانزيدش دقيقة وحدة تم .. مكرهتش غدا منمشيش ݣاع نشوف كمارتو .. ولكن ضروري ناخود حسابي ..

- صفاء : سيري تقادي وتريخي وسيري خودي الحساب ديالك وتعاملي ببرود بحال الى مامسوقاش نهائيا ..

- سكينة : إن شاء الله [وقفات] أنا غادي نطلع نبدل عليا ونزل واخا ..

- مسيرة : ماتعطليش باش نتعشاو ..

- سكينة : لا تهناي .. فطريقها للفوق سونا الباب ، وهاد المرة مسيرة لي فتحات .. وقفات جامدة بلاصتها كتشوف فيه بإستغراب ، ماتسناهاش تݣوليه دخل .. تخطاها ودخل ، وقفات صفاء وسندس وعفاف ، كيشوفو فيه بإستغراب ، نطق بصوتو الرجولي الغارق :

فين هي سكينة .. ؟ سمعات سميتها قبل ماتوصل لدرجة لاخرانية ... ضارت بالبطئء العريض ، نزلات 4 درجات .. زادت عليهم 3 لاخرين كيبان ليها واقف .. هاز بوكي ديال الورد فالأحمر .. وبواطة ديال شكلاط ، شعرو فازݣ .. وحوايجو النص منهم فازݣ بشتا لي كانت كتصب ..

- سراج [عينيه عليها ] :

زربتي عليا ، ولكن ماعليش ندوزوها .. يدوز عرس كريم ونديرو الخطبة وراها تكاتيب ..

- سكينة [بقات غير كتبحلق فيه ، ماتسناهاش تنزل طلع هو عندها تحت انظار البنات لي كانو واقفات بحال الى كيتفرجو فشي فيلم مافهمو والو ] ..

- سراج : ندوي مع الدار وانت ديجا ايكونو البنات فراسهم ، ولكن باش يكون زواج على حقو حسن ݣوليها لسي عباس .. باش نطلب يدك منو .. ماعنديش مع تخربيق ، المهم عندي تكوني فداري اليوم قبل من غدا وحدايا اليوم قبل من غدا وففراشي اليوم قبل من غدا ..

- سكينة [خرجات فيه عينيها ، الحمورية طلعات ليها مع حناكها ] :

و و واش انت لاباس ، واش مكتحشمش .. كيفاش زواج وباش اخويا عرفتيني انوافق ، يلاه رجعتيني لدار ومجاوبتيني بحتى كلمة ودابا جاي كتقول زواج ولا خطبة ..

- سراج [بصرامة وجدية ] :

كان عند بالي اتفهمي كلامي ، واش عند بالك شايط غليا راسي .. مكادش نفرق بين بنات الزنقة وبنت دارهم ، ولا معارفش ليهم طريق .. كون بغيت نتفلا ولا نجيب شي وحدة نفش نبولتي فيها كون درتها شحال هدا ... من نهار طلقت دنيا وانا عمري حطيت يدي على بنت المرا .. وكنت حالف ، نݣطعو من جدر ولا نتحط على مرا ..

- عفاف [غمضات عينيها هاربة للكوزينة بالحشمة .. أما مسيرة والبقية وحدة تشوف فوحدة ، مكانش مسوق لا ليهم لا حتى جنس بشري ، كيهضر بطلاقة ويخرج لي فݣلبو .. هو ماكانش من النوع الحشومي ، لي عندو كيݣولو ويطلقها وفينما بغات توصل توصل وهادشي لي كيدير دابا مهامو حد من غير ها هي لي قدامو ..

- سكينة [شداتها واحد المرݣة كتحس بوجها سخن غادي يطرطق بسخونية ] :.

وا واش انت شوية لاباس اويلي واش ماعندكش الوجه علاياش تحشم ..

سراج [ ببرود ] :

مناش غادي غاتحشم منك ، من مرتي ولا من هاد الفضوليات لي ورانا .. نوبتهم جايا على أساس مغايجربوش [ قاطعاتو حاطة يدها على فمو مسكتاه قبل لا يخسر الهضرة وتغرق كتر ماهي غارقة فحوايجها ]

- سراج [شد يدها باسها من وسط وسجنها وسط يدو ] :

نݣد نكون زربت ، بحال كيما زربت فزواجي الاول .. ولكن لي كنعرف هو بغيتك وباغيك ، باغيك تكوني حدايا باغي نوض على وجهك وعلى عينيك الݣاورية ، باغي مانشبعش من فمك .. مابغيتش نشبع منك .. باغيك فكل نهار وفكل ليلة وفكل صباح وفأي وقت ..

- سكينة : سراج صافي ..

- سراج : كيفاش صافي ، هوما باغيين يبقاو ورانا خليهم يتسنطو مالي كنخون .. حلالا طيبا ولي كيعرف جد با يمشي يدعيه .. دابا اش درنا الݣاورية [غمزها] ..

- سكينة [بلعات ريقها كتشوف فالبنات ، صفاء حركات ليها راسها بأه ] :

واخا يدوز عرس كريم ويكون خير .. [حط الورد فدرجة والشكلاط ووقف على وجهو علامات الإنتصار ] :

كنموت على طواسل مك .. [خدا وجها بين يديه وباسها على شفايفها بوسة قوية .. خلاها مخرجة عينيها ماعرفات فين دير وجها .. بعدها عليه كيشوفيها بتملك ] :

داك البيرو اندير لمو الݣرياج باش حتى شي كيداير مايوݣف عليك .. ولا غانحولك للصال ديال العيالات تم حسن ليك وليا .. نبقى نسوني على ملتك جاوبي ، برب العالي ومتجاوبيش تلݣايني عند راسك أنا علمتك .. وديك الريحة ماتبقايش ديريها حتى تكوني فدارك ومعايا .. داك لون لحمر والفجلي والخوخي ماتلبسيهمش حتى نكون معاك ولا برب العالي حتى نقسم مك على جوج ..

- خلاها واقفة مبلوكية ونزل من دروج ،رمى شوفاتو على البنات لي كانو بحال التماثيل ديال اليونان .. رما ليهم زوج كلمات :

نرضوها ليكم فساعة الخير [رما ليهم هاد الكلمات وخرج ..

- ماحسات براسها حتى ݣلسات فدروج نشرات رجليها ، وجها حمر حمر وسخون ... خرجات عفاف كتسلت كطل عليها ، اما مسيرة وسندس وصفاء كانو فحالة صدمة ..

- صفاء[ضارت شافت فيهم ] :

واش هذا زاير برشيد ، واش شفتوه شنو دار اويلي ..

- سندس : وحق الله الى ݣرام ديال العقل ماعندوش .. مابقيت فاهمة والو ..

- مسيرة [كضحك ] :

ولكن طلع رجولة .. [طلعات عندها كتجري عنقاتها ] :

مبروك عليك ، شفتي قلتها ليك ..

- تجمعو عليها البنات كيباركو ليها وهي عينيها كيبريو بالفرحة :

قسما بالله مزال مامتيقاش ..

- صفاء : الصراحة ظلمتو واخا نقزدر وماعندوش الفرانات ولكن والله حتى راجل صدق ..

- سكينة [ضحكتها وساعت عاجبها الحال ، هزات الورد كتشم فيه ، تنهدات تنهيدة طويلة .. ] :

مسيرة : نوضي اختي بدلي عليك واجي نتعشاو واخا راني شاكة يكون فيك الجوع من ورا البوسة لي عطاك ..

- سكينة [وقفات كضحك ، خلات ليهم الشكلاط وطلعات للفوق معنقة الورد والابتسامة مالية وجها ] ..

- وجدو البنات الطبلة ، حطو الحريرة الشباكية التمر البيض .. بريوات معمرين بالحوت ..

- مسيرة [كتعيط ] :

سكينة ويلاه .. نزلات سكينة ، تجمعو كاملين على الطبلة .. كبات سندس الحريرة .. يلاه ايبداو ياكلو ..

- مسيرة [شحفانة] :

ناري فيا الموت ديال الجوع وحق الله العظيم .. هاد الرواح ومع المناعة عندي قليلة ومع فقر الدم انموت بجوع ..

- بدا الباب كيسوني .. وقفات هي الاولى باش تفتح :

غير خليك انت يلاه ݣلستي ، مشات للباب فتحاتو .. كيبان ليها شخص واقف لابس كولشي كحل تجاكيط كوير وداير كاسك ديال سكوتر ، وسكوتر كحل كبير محطوط .. حيد الكاسك وبان شعرو وعينيه او وجهو .. حلات عينيها على تيساعهم نطقات بأول حاجة جات لبالها :

واش انتوما محرشينكم علينا .. مداهاش فيها ضرب فيها ودخل حتى وقف على البنات .. ببرودة وبلا ما يظير اعتبار لحد نطق بصوتو الحرش الغارق :

بصحة وراحة ، بلاما تسناو مسيرة .. عندي بيها غراض ، خلاهم مصدومين وحدة حابسة حريرة فمها ولوخرا حريرة تكبات ليها من المعلقة .. جرها من يديها تحت نظراتهم وسد الباب ..

- مسيرة [كتحاول تنطر ] :

اويلي فين غادي بيا ، جلال واش هبلتي واش انا ولبت مونيكة عندك وراه البرد اويلي فين غادي بيا ، هز جاكيط من فوق سوكتر دارو لبسو ليها ، من ريحتو كان باين ديالو .. سد ليها السلسلة حتى غرقات فيه ، لبسها الكاسك وركبها بحال البنت الصغيرة ، بحال الى ماعندها راس ولا شوار .. طلع مديماري قبل مايزيد نطق :

شدي مزيان .. عفط عفطة وحدة خارج من الڤيلا ..

- سندس [كتشوفيهم ] :

واش شفتوه دخل بلا موجب شرع ، داها من دار وهانية عندو واش هذا حماق واش هاد العائلة شوية لاباس ولا كلهم فيهم شركة ديال الحماق ..

- صفاء : قسما بالله الى هاد العائلة كلها مراض ... ماعندهمش الوجه علاش يحشمو أبدا ..

- عفاف [كضحك] :

بقات فيا كانت ميتة على الحريرة ، وصاوباتها بالعشق .. ساعة داها بلاما تعشا مسكينة ..

- سندس : وزعمة هي راه صعيب تݣودها بزز لشي قنت ومشات معاه ..

- صفاء : خلاها ليها هو الفرصة بعدا باش تقول ياه ولالا ، ماشفتيش كيفاش دار ليها ..

- عفاف : ماتخافو والو ، مدامها مشات معاه ومقالت والو .. راه تايقة فيه ..

- سندس : لا حول ولا قوة الا بالله العلي العظيم ..

__________________

- فجهة أخرى ، وبضبط قدام واحد المحال كبير ، حاط قدام الباب الطبالي ، ومنظر الدخاخن كتعطي وريحة الشوا كتخنق .. وقف السكوتر ديالو ، حيد الكاسك ، وهي بدورها نزلات كتعافر مع الكاسك ولكن كان السباق وحيدو ليها .. قدات شعرها كتشوف فجنابها ..

- كيبانو ليها الناس كالسين حاطين طباسل فيهم الشوا .. حسات بيدو جرات يدها وغادي بيها للطبلة لي كانت فالقنت محطوطة .. جر ليها الكرسي ݣلسها ، جر الكرسي ديالو وݣلس ..

- دور عينيه لجيهتها لقاها كتشوف فيه بإستغراب .. كانت حاضياه بشك مافهمات فيه والو ، نهار على نهار كيخلعها بتصرفاتو ..

- بصوتو القوي الغارق الحرش :

مبروك عليك الطلاق ..

- مسيرة [تعلاو حجبانها بإستفسار ] :

باش عرفتيني طلقت ، قالها ليك كريم ياك ؟

- جلال [ببرود ساحق] :

ماتلاݣيناش باش يݣولها ليا ، حسن ليك متجريش معايا .. كيبقيتي شوية ، تحت عينيك مزال زرݣ ، مناعتك قليلة .. قاطعهم السيد لي وقف عليهم فيديه زوج طباسل كبار ، واحد فيه الكبدة مشوية هي وطيحان .. او واحد فيه الكفتة والكوطليط ..

- مكانتش قادة تفهم كيفاش ، عرفها طلقات زعمة يكون كيتبعها ومراقبها .. ولكن علاش مايمكنش ، وهادشي دابا لي كيدير فيه والعشا لي جايبها تعشا ..

- جلال [ قاطع حبل أفكارها .. كيقطع الخبز وكيحط ليها ] :

كولي انت مريضة خاصك تقواي .. [ مجاوباتوش ، هز راسو فيها لقاها كتشوف فيه بشك ] كولي انعاودها جوج دالمرات ..

- مسيرة [ هزهزات راسها ] :

واخا .. هزات الخبز وبدات كتاكل ، فعلا كان فيها الموت دالجوع ومع البرد زادت كملت ، خلات الشك ديالها على جنب وقررات متسولو حتى تكمل ماكلتها .. ماهزاتش راسها حتى حسات براسها صافي شبعات ..

- جلال : نزيدك ؟

- مسيرة [ حركات راسها بنفي] :

لا الحمد لله شبعت ..

- جلال : بصحة ..

- مسيرة [ كانت مراقباه مراقبة حركاتو .. مراقبة ملامحو الرجولية لي كتخليك تسرحي فيه بلا هواك .. الكوير غادي ياكل منو النص .. اما ريحتو الرجولية لي شبعاتها كانت قصة أخرى ، هو فيها راسو محركو بتساؤل بمعنى مالك ]

مسيرة : جلال علاش كدير بحال هكا ؟

- جلال [هاز حجبانو كيشوف فيها بإستغراب ] :

مافهمتش وضحي !!

- مسيرة : هادشي لي كدير فيه ، جايبني من دار موكلني الشوا ، خايف على صحتي وراض ليا البال بغيت نفهم هاد التصرفات علاش ، علاش هاد القلبة لي تقلبتي دغية دغية ..

- جلال [مسح فمو ، هز كاسو دتاي شرب الجغمة لي بقا او وقف .. منزل عينيه كيشوفيها ، حط راسو على شعر حك ليها بصباعو بحال شي بنت صغيرة وناطق بحجرجة رجولية ] :

كولشي بوقتو زوين الواشمة ، انا جاي .. خلاها متبعاه بالعين ومشا خلص .. رجع لعندها مد ليها يدو ، مقاد ليها تجاكيط على البرد وجرها من يدها غادي بيها لجهة السكوتر .. للبس ليها الكاسك .. ركبات لبس الكاسك ديالو ، وديمارا شاد الطريق ..

- الى كان شي حد جابليها التمام فراه هاد السيد راه مابقات فهمات راسها من رجليها ، تصرفاتو جاوها فشكل .. كيخرج ليها من الجنب ولا عارفها كتر من راسها ، ولا كيجيب ليها الشك ..

- ضار بيها دورة شرفية ، دوزها من حدا البحر .. واحد الجو كان كيحمق كتحسي براسك حرة .. وطايرة فسما ، كسيرا كسيرية وحدة حتى زادت لصقات فيه حسات بيدو جرات يدها وحطها على كرشو باش تزيد تلصق معاه وتعنقو ..

- حطات راسها على ظهرو ماتنكرش بلي كان عاجبها الحال وفرحان وماسخاتش بيه نهائيا يديها لدار ماكرهاتش يبقى غير يدور بيها ..

- ولكن هاد المرة أمنيتها ماصدقاتش حيت كان وصلها لدار .. نزلات ونزل ، حيد الكاسك ليها و 6 ديال العينين كانو كيطلو من السرجم عليهم مراقبينهم بفضول ..

- جلال [بصوتو الروجولي التقيل ] :

تهلاي فراسك واخا [بصرامة ] ونعسي ماتبقايش سهرانة .. انسوني ليك نشوفك واش نعستي ولالا تفاهمنا ؟

- مسيرة [كانت بحال شي روبو ألي ، هزهزات ليه براسها ] :

واخا ..

- بقا واقف ، بحال الى كيتحارب مع راسو ، عينيه كانو على شفايفها ، ولكن فالاخر نتاصر التعقل .. خدا وجها بيدو وقبل الجبين ديالها .. خلاها واقفة وطلع فوق السكوتر ، مديماري شاد الطريق لدار .. بقات واقفة ومتبعاه بالعين بحال شي صنم ..

- غادي يجيب ليها التمام بغات تحماق ، فشلها ، تحل الباب وخرجو خواتاتها وعفاف ..

- سندس : فين مشيتو ؟ فين داك دوي وانت بحال الى نازلة عليك قضرة ؟

- صفاء : شفت السيد باسك فجبهتك شنو كاين ، واش واقعة شي حاجة حنا معارفينهاش ؟

- وصل للڤيلا ديالو ، بلاصة السكوتر .. كتبان ليه طوموبيلت سراج محطوطة .. عرفو كاين لداخل ديجا مخلي ليه السوارت .. صوت الموسيقى مجهد واصل على برا ، فتح الباب ودخل .. كيسمع فصوت demis rousso .. دخل لصالون كيبان ليه حاط قرعة ديال المشروب فوق الطبلة وكاس مشبح رجليه فوق الطبلة ... مغمض عينيه كيتنغم ..

- جلال [زول دجاكيط ديالو ، لاحو فوق الفوتوي ، هز كاس خاوي وكب ليه جغمة جغمة وتلاح حداه ] :

أش تم اولد العم ، شتك مريݣل ليا المجاج ..

- سراج [حل عينيه وإبتسامة إنتصار على وجهو ] :

ولد عمك ايكمل دينو ..

- جلال [جغم من كاسو ] :

على سلامة هي نويتي وطلبيتيها لزواج ؟

- سراج [هز عينيه فيه ، كيشوف فيه بشك ] :

نسيت بلي ݣالس مع الغراب ، البق مايزهق ..

- جلال : عينيك كيفضحوك اولد الذيب .. ايمتا ناوي ؟

- سراج : يفوت عرس ختك باش ندوي مع الدار ، بغيتها اليوم قبل غدا ..

- جلال : تقل كانو سادين عليك فبير ، نهار ديرها فدارك ارا ماتكركب انت وياها ..

- سراج : شهر فشي قنت بعيد على البشري .. لا طير يطير ولا وحش يسير ، غير انا وياها وسما والبحر ݣدامنا أصحايبي ..

- جلال [جغم من كاسو ] :

عيش باش تربي الريش ..

- سراج [كمل كاسو وزاد كاس خور ] :

وانت [غمزو ]. اش بلانك ؟ كاين شي ولا غير الفرشي .. شفتك هاد الأيام تفيق مع نبوري ، تݣول مخلصينك تبع شي حد ..

- جلال [دوز لسانو وسط فمو ونطق ] :

دخل سوق .......

- سراج [ضحك ] :

امنين ݣلتي هادشي البلان مزوهر باينة انفرحو بيك قريب العود ..

- جلال مجاوبوش مرجع راسو اللور .. كيلعب برجليه وإبتسامة كسولة على شفايفو ..

- قاطعهم صوت هلال من جهة الدروج :

شتكم ناشطين بجوج اش تم ؟

_____________________

- مݣلسينها وسطهم .. كيتسناوها تدوي ..

- مسيرة [وهي ساهية ] :

انا هاد السيد مافهمتوش وحق الله ، وساق ليا الخبار تطلقت .. تخايلي انا ماقلت والو ليه وكريم مقاليه والو ، وليت شاكة فيه كيتجسس عليا .. نهار لي مرضت ، الغد ليه دخل عليا لبيت النعاس بليل ، قاليك جاي يشوفني كيف بقيت .. منين دخل اللهم وأعلم ..

- سندس : اويلي على دخل عليك للبيت ، واش هذا حماق صافي .. قسما بالله العظيم مافهمت شي حاجة انا .. كيفاش دار ليها ..

- عفاف [بعفوية ] :

هاد الفعايل كيديرهم شي حد كيبغيك اختي مسيرة ، انا هادشي لي كنشوف فالأفلام ..

- مسيرة : دابا داني كليت الشوا .. قاليك بلي مناعتي قليلة وفيا فقر الدم خاصني نتقوت ، ولبسني تجيكيطو على البرد .. بلاما ندويو على لافيست ديالو لي فماريويا ،

- صفاء [بإستفسار ] :

ومنين جاتك انت تجاكيط ديالو ؟

- مسيرة [عاودات ليهم كولشي ] :

هادشي لي كاين راه عاودتو ليكم .. بقاو شي كيشوف فشي ..

- صفاء : لالا عقلي حبس ، وقيلة انوقفو على ملام عفاف .. قاطعهم صوت السونيط ديال الباب ..

- سندس[بشك ] :

بلاما تحلو الباب ، وليت خايفة تريكة الابراهيمي تشد النوبة وحق الله العظيم ..

- عفاف [وقفات ] :

انا غادي نشوف شكون .. مشات عفاف تحل الباب ، حطات يدها على البوانيي وحلات .. هزات عينيها وحجبانها بإستفهام :

انت !!

- تبسم فوجها وعينيه عليها ، إبتداءا من شعرها لي مجموع كحل .. وبيجامتها لي كان لونها فالݣري والغوز ، تقاشر لي فالݣري والپانطوفة لي فالغوز .. بصوتو الرجولي المميز :

عفاف صاڤا .. كاينة مسيرة ؟

- عفاف [تداركات الموقف واللون الأحمر طغا على وجها ، حشمات ومرݣات كيفاش حتى قالت ليه أنت ، واش نسات راسها .. تفافات ونطقات وراسها فالأرض ] :

سمحليا اسي عصام .. دخل انا انعيط ليها .. يلاه اتعطيه بظهر وهو يوقفها :

مكاين لاش ديك سي عصام ، غير عصام راه كافية ..

- بلعات ريقها وحشمات .. مجاوباتوش ولا كلفات راسها تدور عندو .. كملات على طريقها ودخلات عندهم كتعلمهم بشكون جا ..

- مسيرة [كتعيط ليه ] :

عصام دخل .. دخل عصام سلم عليهم وݣلس .. كيشمشم :

ريحة الحريرة لا ..

- مسيرة : كتشمشم بحال سلوݣي .. بلاتي نوض نسخنها ليك ..

- سندس [شافت فساعتها ] :

انا غادي نوض النعس ، فايقة بكري تصبحو على خير ..

- خلاتهم وطلعات ، اما صفاء بقات كالسة هازة تيليفونها .. من غير عفاف لي وقفات وهزات الزلايف لي خاويين داتهم للكوزينة ..

- رجعات طرفات الطبلة تحت أنظار عصام لي حاضيها بعينيه .. خرجات مسيرة هازة صينية صغيرة فيها الحريرة تمر شباكية البيض مسلوق .. والخبز ونص طرونشة ديال الحامض ..

- صفاء [وقفات ] :

انمشي نعس انا ، تصبحو على خير .. تصبح على خير عصام ..

- عصام : تصبحي على خير .. بقات غير مسيرة وعصام هو كيشرب فالحريرة وهي حاضياه ..

- عصام : الحريرة بنينة .. باينة عفاف لي مصايبها ..

- مسيرة [هزات حاجب ونزلات الثاني ] :

هاي هاي ، دقتي الرفيسة ديالها صافي وليتي حافظ طيابها ، وباز وجهك مصندل .. هاديك الحريرة انا لي مصايباها شرب شرب .. اجي اش جابك هاد الليلة كيفاش زعمة ..

- عصام [هز كتافو بلامبالاة ] :

كنت دايز ݣلت نشوفكم هادشي لي كاين ..

- مسيرة [كدور فراسها ، كانت عارفاه مزيان وحافظاه ما ] :

امممم تشوفنا ، بقيتي فيا .. حتى منكونش عارفاك وحافظاك .. عصام جيني نيشان الله يرضي عليك اش تم ؟..

- عصام [عوج فمو ] :

مافهمتكش ، شنو زعمة منوليش نجي ؟

- مسيرة : ماتبقاش تشد الهضرة ديالي من رجليها ، عارف قصدي مزيان .. الله يرضي عليك ..

- عصام : صونا لي كريم ، عرض عليا للعرس انا وسفيان .. ݣالها ليك ..؟

- مسيرة : ݣالها ليا ، انا لي سيفط ليه نمرتك ديال تيليفون ..

- عصام : الصراحة ماعرفتش واش نمشي ولالا ؟

- مسيرة : انا كنقول سير ، مدام عرض عليك مافيها والو .. مزيان نيت تفوج وتبدل الجو انت وداك المعقد ديال سفيان ..

- عصام [ضحك] :

لقاي ليه حتى هو شي عروسة دي فيه الأجر ..

- مسيرة [دارت رجل على رجل كضحك ] :

ايوا كولشي ممكن ، بحال والو نشوف ليه سناء ..

- عصام : البنت لي تلاقيتيها فالمحكمة ، لا كدوي زعمة من نيتك ؟ انا اضاحك ..

- مسيرة [حكات حاجبها كضحك] :.

راه قلت ليك انا اي حاجة توقعها مني ، .. قاطعاتهم عفاف لي وجهات كلامها للمسيرة :

مسيرة انا انمشي نعس تصبحي على خير ..

- مسيرة [ضارت عندها ] :

تلقاي الخير .. مشات عفاف ، ورجعات مسيرة شافت فيه لقاتو ساهي فعفاف متبعها بالعين ، تبسمات بخبث ونطقات بأنوثة :

غير منين دخلت ليك عفاف لراسك ، وليتي غير ساهي فيها ، فراه انا قادة وبقدودي .. والحاجة الى درتها فراسي كتصدق ..

- عصام [بإستفسار ونكران ] :

علاياش داوية ؟

- مسيرة [حركات راسها كضحك بإستهزاء] :

راك فاهم وانا فاهمة مكاين لاش تبقى درق الشمس بالغربال أعصام .. راه ديرها على الناس كامل حتى ليا أنا .. المهم شرب شرب الحريرة [كملات كلامها فخاطرها ] الى ماخليتك تشالي مانتسماش مسيرة غير بلات ..

- سالا العشا ديالو .. وناض هز سوارت طوموبيل وتيليفونو .. سلم عليها وخرج بقات متبعاه بالعين حتى خرج وهي كتحقق فيه ..

________________________

- خرجات لخدمتها بكري ، كانت عندها واحد لاكوموند خاصها تصيفطها .. فوسط خدمتها ملهية ، سونا ليها التيليفون .. كانت نمرة غريبة فتحات الخط ونطقات بألو .. جاها صوت انثوي :

مسيرة ؟؟

- مسيرة : وي شكون معايا ؟

- انا سناء ..

- مسيرة : اااه سناء صاڤا زين هانية فين كاينة ؟

- سناء : الحمد لله .. انا كاينة عند واحد صاحبتي فسباتة ..

- مسيرة : هكاك مزيان ، تبغي نتغداو اونصومبل ؟

- سناء : واخا مرحبا فين نجي ؟

- مسيرة : عطيني غير لادريس انا غادي نجي نديك صافي ؟؟ واخا صافي مزيان سيفطيها ليا فميساج انا غانجي نديك من تم .. اوك حبيبتي يلاه بسلامة ..

- قطعات مع سناء ورجعات تكمل خدمتها ..

*** فجهة أخرى ***

- مجموعين فقاعة الاجتماعات .. جميع الموظفين وهلال .. خدامين على لوحة إعلانية لواحد الشركة ديال التجميل .. المصممة كانت كتعرض اللوحة لي صممات والكل مركز معاها ..

- دابا البرد والالوان لي خاص نركزو عليهم هوما الالوان الباردة بحال الزرق .. البنفسجي ، والفوشيا .. هكا اتعطي لوحة فنية كتجلب عين الزبون ..

- الشاب الأول : ولكن اللون الفوشيا لون صيفي .. ماشي لون بارد ولالا ؟؟

- سندس [تدخلات ] :

لون صيفي الى تدمج مع الألوان الصيفية ، بحال الاورونج .. الپيستاج ، ولا الاصفر ، ولكن كيف قالت ليلى الى دمجناه مع الأزرق الملكي هنا كيولي لون بارد ..

- ليلى [تبسمات ليها ] :

بصح ، دابا لي خاصها هو الوجه الإعلاني ، لي ممكن نمزجو عليه هاد الألوان ، وجه مختلف ملائكي .. الصراحة انا عندي واحد الإقتراح اموسيو هلال ..

- هلال [حرك ليها راسو باش تكمل ، شاد ستيلو ديالو كيلعب بيه وداير رجل على رجل ] ..

- ليلى [وجهات انظارها للسندس وبإبتسامة مشرقة ] :

انا كنشوف بلي اللوحة الاعلانية ، الوجه لي يناسبها هو ديالك اسندس ..

- سندس [هزات حجبانها بصدمة ، ضارت كتشوفيهم كانو كلهم كيشوفو فيها ] :

لا واش كدوي بصح ، كيفاش انا لا ما يمكنش اويلي ..

- هلال [بصوتو الرجولي ] :

وعلاش ؟

- سندس [توترات والحمورية كتاسحات وجها ] :

انا ماشي وجه إعلاني ، وعمري فحياتي زعمة مجاتني لبالي .. منصلاحش ..

- ليلى : لا بالعكس ، عينيك زوينين بزاف ماشاء الله .. لون البشرة ديالك مناسب بزاف .. خصوصا بشرتك طبيعية وملامحك طبيعيين ، بالعكس انت أنسب وجه ..

- هلال [تقاد فالݣلسة وبكل جدية نطق] :

فكري مزيان .. الى نجحنا غادي نجحو كاملين وغادي تكون قفزة للوكالة ديالنا ..

- سندس [سكتات كتخمم ، شافت فيه وهزهزات راسها ] :

واخا لي درتوها انا معاكم فيها ..

- هلال : مزيان إذا تاقنا .. [شاف فليلى ] انت اتكلفي بسندس .. الكرة فيديك اليلى ، الى خسرنا بيدك والى ربحنا بيدك ..

- ليلى : كون هاني ، غادي نربحو إن شاء لله ، وحنا لمن غاتعطى ..

- هلال [هزهز براسو او وقف ] :

بون كوغاج .. خلاهم كيهضرو بيناتهم وخرج .. سندس كانت خايفة ومتوترة .. جات عندها ليلى عنقاتها :

غادي نديرو خدمة واعرة غير كوني هانية .. غادي نديوها ..

- سندس : إن شاء الله .. تنهدات تنهيدة طويلة ، هزات الوراق لي قدامها وخرجات .. دخلات للبيرو ديالها ، بقات مدة وهي واقفة ، هزات يدها كتمسد فعنقها وكتحاول دورو باش ترتاح حتى تحل الباب ، ضارت بزربة لقاتو واقف قدامها .. دخل وسد الباب وراه :

عيانة ؟

- سندس : لا غير خايفة الصراحة ومتوترة ، والله ماعرفت تخلطو عليا العرارم هههه ..

- هلال [وقف حدا البيرو مسند عليه داير رجل على رجل ، مراقبها بعينيه ، بصوتو التقيل الرزين ] :

كولشي غايدوز مزيان ، تيقي فراسك ..

- سندس [تنهدات تهنيدة طويلة ] :

إن شاء الله ، كنتمنى ..

- هلال [شاف فساعتو , ورجع شاف فيها ] :

كاينة واحد ريسكو هنا قريبة .. يلاه نتغداو ..

- سندس [تحرجات ، بلعات ريقها ] :

ولكن ..

- هلال [هز حاجب ونزل تاني بإستفسار ] :

ولكن شنو ؟

- سندس : جات ،، [سكتات ورجعات دوات ] جات فشكل نخرجو انا وياك .. والموظفين شنو غادي يقولو ؟؟

- هلال [عقد غوباشتو ، وهاد المرة لكنة صوتو تحولات لصرامة ] :.

سندس ، نرجع نلݣاك واجدة .. تخطاها فتح الباب وخرج ، خلاها متبعاه بالعين ومصدومة ..

- دخلات هي وياها لواحد الريسطو جا فعين الذياب .. ݣلسو الفوق فلاطيراس مقابلين مع البحر .. كانت لابسة سروال ديال الدجين واسع .. مع قميجة مخططة كارويات فالكحل والبيض سخونة دالبرد ، مع سبرديلة فالكحل .. أما لون الشال فكان أحمر باش تكسر بيه اللون لي كانت لابسة .. بشرتها بيضاء .. مدوزة فعينيها كحل غامق موضح خضورية عينيها .. ساعة دهبية فيديها مع براسلي وخاتم ..

- أما الريحة لي كانت دايرة جدابة لفتات إنتباه مسيرة لي سولاتها وجاوباتها ب إسم la nuit trésor ..

- دورات راسها لجهة البحر مغمضة عينيها كتستنشق الهوى ديالو ..

- مسيرة [بتساؤل] :

شحال ماجيتي البحر ؟

- سناء [شافت فيها ] :

مرة وحدة .. شحال هذا كان جابني هو .. عرفتي قبل منتزوج كنت كنحماق على كازا وكنت كنطلب الله نتزوج فيها ، كانت عزيزة عليا بزاف .. وكنت كنتمنى نزورها وندور فيها ، ولكن من بعد لي داز عليا مابقيتش حملتها هههه ..

- مسيرة : ولكن المدينة مدارت والو ..

- سناء : هادشي عارفاه ، وعارفة الناس حجر وطوب ، غير حيتاش ماعشتش فيها أيام زينة .. وليت كنخاف منها .. اليوم تحكم لينا بطلاق ، عرفتي فاش خرجنا من عند العدولة قالي رتاحيتي ، قلت ليه أه .. قالي متعرفي يكون امتحان دارو الله وغانرحعو لبعض من بعد ، قتليه انا عمري نرجع ليك .. عرفتي امسيرة ، كنشوفيه حابس البكية بسنانو ..

- مسيرة : حيتاش مظنش بلي اديريها بصح وانتي لي اطلبي الطلاق ، داكشي باش تصدم ..

- سناء [تبسمات ] :

ولكن انا فرحانة عرفتي علاش ، حيت ماماه دوات معايا ، عرفتي اشنو قاتلي .. قاتلي يلاه عرفنا بقيمتك وبلي مكنعرفو بقيمة الواحد حتى كنضيعوه ، واخا لي داز عليا قلت ليها انا مسامحاكم دنيا وأخرة ، ولكن باش نرجع للولدك راههي لي عمرها تكون .. دابا عاد رتاحيت وحق الله العظيم ..

- مسيرة : هنية عليك ، الحمد لله .. دابا ديها فصحتك وديها فراسك وشوفي مستقبل ، وراه هادشي علاش بغيت نتلاقى معاك ..

- سناء : اهاه مرحبا .. قاطعهم السرباي لي جاب ليهم الموني .. عطاهم ليهم ، فتحوه كيختارو شنو ياخدو من بعدما ختارو مدو لسرباي الموني ومشا ..

- مسيرة : المهم انا باغة نبدل اللوغو ديال لامارك ديالي بغيت شيحاجة تكون جديدة .. خصوصا غادي ندخل ليبروديو كوسميتيك ولي پارفا .. خاصني شيحلجة مكاين بحالها فسوق ..

- شيحاجة لي تلفت الأنظار ، وفنفس الوقت تجلب الكليان .. ومنين قلتيلي بلي كتخدمي لي لوݣو ولي كوڤر ، قلت علاش لا انت مديريش هاد الخدمة ..

- سناء [بصدمة ] :

أنا ولكن أنا يلاه خدمت لواحد البنت وشيحاجة خفيفة ، يعني انا ماشي شي وحدة لي معروفة ..

- مسيرة : مابقاتش فواش انت معروفة ولالا ، بقات فشنو كتخرجي من يديك فهمتيني .. انا تايقة فيك وعارفاك غادي ديري شيحاجة لي زوينة ..

- سناء [تبسمات حتى تحمعو خدودها على شكل جوج تفاحات ] :

كنتمنى منخيبكش ونكون عند حسن ظنك ..

- مسيرة : امين .. لالا إن شاء الله عارفاك قدها .. كلامهم كان من موضوع لموضوع .. مسيرة عزات عليها سناء بزاف ودخلات ليها قلبها بلا قياس ، كتخليك ترتاح ليها بلا هواك .. وتخليك تعاود ليها واخا يلاه عرفتيها ..

- حتى مسيرة عاودات ليها كولشي على حياتها من الأول حتى للأخير ماخبات عليها والو .. وحتى سناء هكاك عاودات ليها على خوتها .. وعلى دارهم وعلى كيفاش تربات وعلى عائلتها .. وعلى مدينتها ، ماخبات عليها حتى حاجة كولشي عاوداتو ليها ..

- قاطعهم السرباي لي جاب ليهم الغدا .. بداو كيتغداو وموضوع كيديهم لموضوع بحال الى كيعرفو بعضياتهم سينين هادي ..

- كانو فعز كلامهم حتى سمعو صوت رجولي نباهم من اللور ناطق بسميتها ..

- مسيرة [هزات راسها فيه ولي معاه ] :

وليت كنشوفك كتر من خيالي واش كتبعني ؟؟!

- عصام بإبتسامة ] :

وصدفة خير من الف ميعاد اطليقتي الفنة .. من نيتك مسالي انا نتبعك ، أضرنا جوع ݣلنا نجيو ناكلو حتى حنا ..

- مسيرة [هزهزات راسها وشافت فسناء ] :

سناء هدا عصام شريكي فالخدمة ، وطليقي وصديقي .. وهدا [شافت فسفيان هازة حاجب ومنزلة الثاني ] سفيان صاحبو وخدام معاه ..

- سفيان [كيشوف فيها بعجرفة ] :

مزال هازة فݣلبك من جيهتي كيبان ليا ..

- مسيرة : علاش غانهز من جيهتك .. انت لي محاملني ماقبلني من نهار عرفتك ، تقول واكلة ليك الورث ..

- عصام [جر كرسي وݣلس ] :

ݣلس وتفاهمو بيناتكم .. جر سفيان الكرسي مقابل مع مسيرة .. :

من حقي وقيلة نخاف على صاحبي وخويا ولالا ، هاديك ردة فعل طبيعية ..

- مسيرة : وي متافقة معاك ، ولكن ماشي بديك الجهالة .. فينما بنت ليك تخرج عينيك وتبين نيابك .. زدتي فيه ، وغير على وجه عصام كنت كنسكت ..

- سفيان [حك حاجبو وبرجولة وجدية ] :

الضومين ديالنا كيعرفنا على بزاف ديال الناس ... أشكال أنواع .. صعيب التيق وتفرز شكون العدو وشكون الصديق .. [قاطعهم السرباي لي عطاهم الموني ، ختارو شنو غاياكلو .. من ورا مامشا السرباي رجع مكمل كلامو ] ..

- عصام كنت انا صاحبو انا خوه انا كولشي ، من نهار ماتو والديه .. واخا كبير عليه بعامين كانحس براسي فايتو بسنوات .. ومسؤول عليه .. وحيت عارفو مزيان مكنبغيش شي حد يأديه .. [شدسكت ورجع دوا ] :

الى كنت سببت ليك شي إزعاج فأنا كنعتاذر ..

- مسيرة [تنهدات تهنيدة طويلة] :

وحتى انا الى عطيتك شي إنطباع ماهواش سمحليا ..

- عصام : ايوا على سلامتكم منين تصفاو الخواطر بيناتكم .. [شاف فسناء] سناء صاڤا ؟

- سناء [هزهزات راسها كتحس بإحراج ] :

الحمد لله شكرا ..

- مسيرة : انا وسناء غادي نخدمو بزوج ..

- عصام [بإستغراب] :

وايلي بصح فاش ؟

- مسيرة : هي لي غادي تقاد لينا اللوݣو الجديد ..

- عصام [بإبتسامة ] :

اهاه مزيان براڤو ، مرحبا بيك .. على هاد الحساب سفيان غادي يتكلف ..

- سناء [غوبشات وشافت فمسيرة ] :

علاش مغاديش نخدم معاك انت ؟

- مسيرة : وي معايا ، ولكن حيتاش انا وعصام شركاء ، اي حاجة كتخص الشركة سفيان هو المسؤول .. يعني ديزاين لي غاتصايبيه كيطالع عليه سفيان عاد كنطالعو عليه هنا المدراء فهمتيني ..

- سناء [هزهزات راسها ] :

وي فهمت ..

- سفيان [موجه كلامو ليها ] :

شفتك بحال الى ماعجبكش الحال أ أنسة .. كنظن لي كيكون تايق فخدمتو كيكون واتق من راسو ولالا ؟

- سناء [هزات فيه عينيها لي كان لونهم خليط فشمس وفظل مرة كيطغا عليهم اللون الزيتي ومرة كيطغا عليهم اللون اللوزي ، ومع الكحل كيبرز لونهم ] :

الحمد لله كنتيق فراسي ، وكنتيق فشنو كندير .. وعارفة خدمتي وتاقناها ، ماعنديش لاش نخاف ولا نتوتر .. مديرش فبالك اسي سفيان ..

- سفيان [بإبتسامة ] :

مزيان داكشي لي بغينا .. [جبد لاكارت فيزيت ديالو مدها ليها ] :

هذا رقم التيليفون .. منين تسالي الديزاين رسليه ليا نطالع عليه .. باش هكا نحولوه لشكل نمودجي الى عجبنا باش نشوفو التنسيقات والالوان .. وبدكاء الإصطناعي انشوفو كيف غايكون على أرض الواقع ..

- سناء [خدات ديك لاكارت ] :

شكرا .. [شافت فمسيرة ، ومن طبقة صوتها ليكانت كتميز ببحة صوتية دفاعية تحولات للبحة رقيقة أنثوية ] :

نمشيو ؟

- مسيرة : وي يلاه ..

- عصام : اجينا وانتوما اتمشيو ؟؟

- مسيرة : حنا تغدينا وسالينا بصحتكم .. هزات ساكها هي وسناء وخرجو تحت أنظارهم ..

- عصام [موجه كلامو للسفيان ] :

بدل لافاصو ديال هضرتك أصاحبي .. شتي انت برب اتهرب منك ݣاع البنات ..

- سفيان [تبسم مجاوبوش بدا الماكلة ديالو وعلى ملامحو نظرات برود وإستهزاء] ..

- فݣلستها كنتي كتحسها مامرتاحاش .. ݣالسة على أعصابها ، كتاكل بالمهل الدغمة كتبقى فمها شحال عاد كتبلعها ... حاسة بواحد التوتر رهيب وهي ݣالسة معاه .. ماواخداش راحتها نهائيا .. دقات قلبها متسارعين ويديها باردين كتر من بردية الجو ..

- قفزات من بلاصتها فاش حسات بيدو تحطات على يدها .. عينيها مشات من وجهو ليدو لي شدات فيدها ، مهتمش للقفزة ديالها .. كان مراقبها منين دخلو للمطعم ومنين كلسو كياكلو ، وهو مراقب ومسكاني حركاتها .. بصوتو الرزين بجدية نطق :

- رتاحي .. تطلقي شوية وانت بحال الى ݣالسة على الشوك ياك لاباس ..

- سندس [بلعات ريقها وحاولات تصنع الإبتسامة ] :

لا ماشي هكاك ، غير هو .. [كانت مترددة ] غير هو عمري ماݣلست مع شي راجل الراس فراس ولا تغديت مع شي حد راس فراس بحال هكا ..

- هلال [تبسم ، من دون ماينزل عينيه الحرشة عليها ] :

حاجة مزيانة ..

- سندس [هزات حجبانها ] :

ها كيفاش زعمة ؟!!

- هلال [تبسم مزول يدو على يدها ] :

مكتحسيش براسك غامضة واحد شوية .. عندي الفضول نعرفك عليك بزاف ديال الحوايج ، حنا خدامين بزوج .. وتقريبا مكنعرف عليك والو ..

- سندس [فاجأها بسؤال ديالو ، نطقات بدون ماتفكر] :

واش ݣاع الموظفين كتسولهم هاد السؤال ولا غير أنا ؟

- هلال [هز حاجب ونزل الثاني ] :

انا كنسولك انت ، مكنسولش غيرك .. مزال كنتسنى جوابك ..

- سندس : انا ماعنديش شيحاجة لي نعاود عليها ، السيڤي ديالي راه قريتيه ... عارف شكون والديا ، خدمتي الاولى كنت فبزار خاص بالازياء التنكرية فسطات .. وصافي هادشي لي كاين مكايناش شيحاجة لي مثيرة فحياتي ..

- هلال [بدون مايهز راسو على طبسيلو ] :

وبنسبة للحياتك الخاصة ..؟

- سندس [الحمورية طغات على وجها ، مكانتش متوقعة بحال هاد السؤال ] :

حياتي الخاصة بحالها بحال الناس ، الى كنتي كتقصد العلاقات لا ماعنديش معاهم ، وعمري مكان عندي معاهم ... واخا هاد السؤال كنشوفو ماعندوش علاقة بالخدمة ..

- هلال [مسح فمو وركز نظراتو السودوية عليها ] :

قلقك ؟

- سندس : لا ماقلقنيش .. غير هو كنشوف مكاين لاش تسول هاد السؤال ، حيت حتى لدابا انا ماسولتكش ، وعمري سولتك ..

- هلال [بنفس البرود ] :

وشكون منعك .. واها هو عارف ، ومتأكد اتكوني عارفة عليا بزاف ديال الحوايج ..

- سندس [دوزات يدها على عنقها من اللور ، من بعد ثواني عاد الصوت عرف طريق لفمها ] :

بحالاش هاد الحوايج وشكون غايقولي ..

- هلال [مركز مع حركاتها لي فاضحينها ] :

الخبار مكدرݣش ، تݣدي تعرفي من عند نجية ولا غيرها ، وماشي شيحاجة لي خاصها ضرݣ ، كولشي عارفني كنت مزوج ومرتي ماتت وهي حاملة ..

- سندس [بلعات ريقها ] :

ماعرفت منقول الصراحة .. الله يعوضك خير ..

- هلال [بنفس الهدوء ورزانة ] :

أمين .. كولي ..

- سندس [هزهزات راسها ] :

لا براكة شبعت الحمد لله ، وأصلا وصل الوقت باش نرجعو للخدمة ..

- هلال [إكتفى بإنحنائة من راسو ] .. أشر للسرباي جا عطاه الحساب ، خلصو وخرجو بزوج .. طلعات حداه دارت السمطة وهو بدورو دارها ديمارا وشدو الطريق للوكالة ..

- فجهة أخرى وبضبط مدينة إفران ... فالفيرما الڤيلا مقلوبة سفاها على علاها .. 3 ديال العيالات ليكانو مكلفين بيها .. كل وحدة وشنو كدير ، لي كتصبن ولي كتحك ولي منزلة الكوزينة .. ريحة جاڤيل وتيودات كتعطي .. 15 يوم مكانتش كافية بنسبة ليهم .. عائلة العروسة كلهم كانو مشطونين من جهة العرس .. كولشي تحول للڤيلا ديال جواد ..

- وردة [أم وديان او ليليا ] :

ماريا شحال قلتيلي غادي يجيو دناس مع العريس ؟

- ماريا [شادة تيليفونها كتقلب فتكاشط لي سيفطات ليها النݣافة ] :

13 واحد تقريبا .. فيهم باه ومو وختو .. وعائلة ديال شي بنت كان كيعرفها شحال هدا .

- وردة [ بشك ] :

كيفاش بنت كان كيعرفها ؟

- ماريا [ضحكات وشافت فيها ] :

واحد البنت كان قرا معاها ومربي معاها عشرة عمرو راه كتعرفها أمينة نيت .. فاش كان كيقرا فسطات قليل فين كيبات فدار مو الاغلبية عند هاد الناس ، قولي فمتابة عائلتو ، البنت راه تعرفيها .. راه هي لي كانت كتغني شي يمات سميتها مسيرة فريدي ..

- سومية [أخت ماريا ومامات توفيق وسراج ] :

واش لي عندها ديك الماركة ديال العكورة ؟

- ماريا : هاديك .. راه ضل تهترت بيها أمينة .. عاودات ليا عليها واحد شوية شي حوايج خفاف وصافي .. وهاديك هي وعائلتها او والدين كريم وختو .. وعاد دراري صحابو .. داكشي باش جمعنا الفيرمات بزوج ديال جواد وديال عمي الله يرحمو ..

- سومية : مزيان .. تبارك الله حنا كتار وهوما يلاه يلاه ، حتى وديان من هنا لسيمانة غاتكون هنا هي وليداتها .. ياك داكشي لي قاتيلي اوردة ..

- وردة [هزهزات براسها ] :

وداكشي لي قالت لختها قالتو ليا حتى انا .. انا خايفة امن ولدك لاما يجيش ..

- سومية : لالا توفيق يجي .. مايقدش يبطل عرس بنت عمو وخالتو ..

- وردة : والله يهديه حتى هو .. ويفرح سراج بشي بنت الناس يارب ..

- سومية [تنهدات تهنيدة طويلة] :

اللهم امين ، انا مكرهتوش يخليني نزوجو على يدي ، ولكن ولدي وانا عارفاه مكايساعفش وكيدير لي فراسو .. مكايخلي حد يدخل فيه ..

- ماريا [هزات راسها فيها ] :

انت نهار تزوجتي باه حد ماحط عليك السيف وزوجك ليه بزز .. انت لي ختاريتيه ، ولادك خرجي سوقهم راهم كبار وبعقلهم .. نهار يتزوج شي وحدة المهم تحون بنت الناس تبغيه وتصونو ..

- سومية [بطنز ] :

لالا تبارك الله .. شفتو نيت كيفاش ختار بنت الناس ، ياك هاديك خيتي خرجات فيه الشيب الأخضر .. اغير على وجه كريم اما منشوف وجها مانراها ..

- ماريا : البنت راه كانت مريضة الله يحسن العوان ، البيئة لي تربات فيها ماهياش .. ودابا راه دوات الحمد لله .. واياك تعامليها خايب أسومية ، انت ماشي هكا ماشي حتى كبرتي عاد بغيتي تخرجي من الجنب ..

- سومية [قلبات وجها ] :

ماقلت والو ، لي بغا شي حد الله يعاونو معاه ..

- ماريا : وهكاك .. كل وحدة فيهم كانت شادة تيليفون كتختار شنو غادي تلبس على عكس الرجال لي كانو مع جواد فالبيرو ..

- الاجواء بدات وضغط وستريس على العرسان بدا كيبان .. مامات كريم شدات الطريق لعند ولدها .. وحتى باه شد الطريق من فرنسا للمغرب ..

- مسيرة من داك نهار مابقاتش شافت جلال ، من غير فلافاك .. كانت كتخرج قبل من الطلاب وقبل منو كتركب طوموبيلتها وديريكت للمحال ، كان عليها ضغط كبير فالخدمة .. كيما كان عند سندس ..

‏أولئك الذين أحبّونا كما نحن .. ولم يتراجعوا

بأمزجتنا المتقلبه .. بضحكاتنا .. بفرحنا المبالغ.. وبالحزن الذي يخيّم على أفئدتنا للحظة .. الذين لم يتوقفوا وهلةً عن محبتنا .. ولم تقف رغباتهم أمام تقديرهم حيالنا ..

وحدهم من يستحقون أن نرغب في البقاء معهم ولو وهمًا للأبد ...

- فالمحال .. ݣالسة فالبيرو .. وحياة كتقاد لواحد الكليانة السلعة ديالها .. الكليانات داخلات خارجات .. والكل كيسولو على ايمتا غايكونو الروايح وليبرودوي كوسميتيك ..

- كان خاصها ضروري تنزل لانونص على وديت البنات لي ديجا قاريين الكيمياء وعندهم تربة فضومين .. هاد المدة كلها لي دخلات للافاك كتقرا ، اتكون كدابة الى قالت كانت كتفهم شيحاجة .. كتدوز الحصة تقيلة عندها واخا هو الأستاذ ديالها .. فبلاصة مكانت تشوف بنات فاهمين فضومين لي تخدمهم معاها .. قررات هي لي تقرا ، جات لطريق من اخرها .. وهادشي لي دارت ماشي لصالحها حيت غير غادي ضيع الوقت ..

- سلات حياة مع الكليان وجات ݣلسات فالكرسي لي مقابل معاها .. جات واحد الكليانة دائمة للمحال سلمات على مسيرة وݣلسات فالكرسي لاخر ..

- مسيرة [هزات فيها راسها ، لقاتها مغوبشة ، كانت فاواسط العشرينات من عمرها ] :

ملاك مالك ازين ياك لاباس ؟

- ملاك [تنهدات تنهيدة طويلة ] :

ماعرفتش اختي شنو ندير والله .. سمعي دابا انا كانت عندي غولاصيو مع واحد السيد .. ولكن ماخرا السيد ولا كيغبر بزااف .. نهار السبت لي فات كنت بغيت نشوفو .. قالي لا منين قتلو علاش قالي خارج سهران مع صاحبو .. واش أماشيغي كاين شي حد كيسهر مع صاحبو الراس فراس ؟؟

- مسيرة [حطات السايلو من يدها وهزهزات ليها راسها ] :

وهو الصراحة كاين لي كيسهر مع صاحبو ، ولكن الى كان هاد صاحبو جايب معاه جوج ديال البنات ..

- حياة [غمزاتها ] ..

- مسيرة : لاش كتغمزيني ، وانا كنقوليها الصراحة مالي كدبت عليها ..

- ملاك [بعدم إهتمام ] :

انا مابقاش كيهمني ، اصلا هاد عدم الاهتمام ديالو ، خلاني نشوف لجهة اخرى ، ولكن حيت انا ماعندي زهر حتى جهة لوخرا مالقيت معاها زهر .. واحد السيد معايا فالخدمة كيعجبني بزاف .. المشكل أي بنت معانا فالخدمة كيقمها ، وحتى انا وهادشي زاد مرضني ..

- مسيرة : تأكدي بعدا واش كيقمع حتى دراري ولا غير انتوما البنات ، حيت دراري ديال هاد الوقت راه ولاو كيخلعو ..

- حياة : ملاك كثر مني انا ..

- مسيرة [شافت فحياة ] :

ومالك انت اختي ، انا امفتحت شي كابيني ديال الإستشارة النفسية ..

- حياة [بإحراج ] :

عرفتي عماد السيد لي خاطبني لي كايجي يديني من هنا ..

- مسيرة [هزهزات براسها ] :

داك لحية العتروس ، مالو حتى هو ..

- حياة [كانت كتحس بالإحراج هزات فيها عينيها ] :

كنا انا وياه ناويين السبت الماجي نمشيو لسنيما ، لبارح قالي بلاش منمشيو البرد وشتا .. نجي لعندو لدار ونتفرجو فنيتفليكس ، انا مابغيتش نفهمو غلط .. حيت أصلا كون كان ناوي الغدر مايخطبنيش ..

- مسيرة : واختي منين مابغيتيش تفهميه غلط ومقتانعة ، غير بداي تفكري فسمية لولادكم .. ونوضي من الݣلبة .. راهم دارو معاهم العقد وتقلبو عليهم ، بقا غير الخطبة شحال من واحد ماقد يدي والو من البنت وكيدير الخطبة طريق .. انتوما غاتشهموني قسما بالله .. [وقفات ]

- جمعي راسك المحال فأمانتك .. كل نهار انتاصل بيك .. [شافت فملاك ] وانت تبتي شوية وعرفي شنو باغية .. العفو منكم .. هزات ساكها وسوارتها ، وخرجات ركبات فطوموبيلتها .. [شافت فساعتها كانت 2 .. سونات لسندس تأكدات بلي دارهم وصلو ] .. ديمارات لدار باش من تم يشدو الطريق لإفران ..

- وصلات لدار .. كانت طوموبيلة الحاج محمد واقفة هي وطوموبيلت إبتسام .. نزلات من كوموبيلتها طلعات مع دريجات كتجري ، سونات فالباب حلات ليها نجاة .. أصوات كتيرة جايا من الصالون .. مشات كتجري ترمات فأول حضن وهو حضن معزوزة كتعنق فيها وتبوس ..

- عباس [لابس سروال ديال دجين صباط كخل كيبري ، قميجة وساعدة نقرية فاليد ، محسن وجهو رجع ب 10 سنين اللور ] :

هزنا الما وضربنا الضو البنت بانت ليها مي هي لولة ..

- معزوزة [كانت لابسة جلابة مخدومة براندا .. ودايرة شال على عنقها شعرها عريان ] :

ومالك شتك بحال الى ماعجبك حال ، توحشتي يامك توحشتي نخلي دار عشك ..

- سلمات مسيرة على الحاج .. وعاد حات عند باها عنقاتو وعنقات سعاد ، لي حتى هي كانت لابسة جلابة اخر مكاين مع صباط عالي فالكحل ، ظفار مصبوغين .. الشعر مطلوق ، ساعة فذهبي مع الاكسسوارات .. تبدلات كليا على كيف كانت ..

- مسيرة : وبابا الله يهديك ، الناس الكبار هوما الاولين ومي هي لولة هي وعمي محمد ..

- محمد : الله يرضي عليك أبنتي ويكملك بعقلك .. دازت سلمات على خالها أدريس وعلى إبتسام ..

- كولهم كانو مجموعين .. وحاطين الشوانط ديالهم ..

- مسيرة : شكون غايمشي مع شكون ؟

- الحاج : انا ندي معايا سعاد وعباس وندي معايا سندس ..

- مسيرة : صافي مزيان ، عفاف تمشي مع إبتسام وخالي .. وانا اندي معايا صفاء وسكينة وبغيت نطرݣ واحد البنت حتى هي بغيت نديها معايا ..

- صفاء [بإستغراب ] :

شكون هادي ؟

- مسيرة : متعرفيهاش واحد البنت كنعرفها خدامة معايا .. عرضت عليها تمشي معانا ..

- سكينة : ايوا صافي هي نوضو ..

- مسيرة [وقفات ] :

بلات نجيب شي حاجة من بيت النعاس ، باليزتي فالطوموبيل .. طلعات للبيتها ، هزات شي فلوس ، او واحد الكارطونة .. ونزلات ، لقاتهم خرجو .. عطاتهم ديجا العنوان ، أما هي ركبات معاها صفاء وسكينة وشدو الطريق .. مشات نيشان لسباتة .. كانت واقفة لابسة مونكو فالقهوي ، سروال دجين وباليزة صغيرة موقفاها .. نزلات لعندها سلمات عليها .. دخلات لاڤاليز للكوفر ، فتحات ليها الباب القدامي طلعات ..

- سناء [ضارت تسلم على البنات ] :

سلام ..

- مسيرة : هادي سناء ، هادي صاحبتي سكينة وهادي اختي صفاء .. سلمات على سكينة هي الاولى .. دورات وحها تسلم على صفاء وهي تپلونطا ..

- صفاء [بدورها حطات يدها على فمها مصدومة ] :

واش سناء سناء ولا كدبت واش هادي انت ؟؟

- سناء [ضحكات مامتيقاش ] :

صفاء ناري ، والله حتى انت هادي .. صفاء مالت بنصها كتبوس فيها وتبوس ليها وجها وتعنق فيها ، واخا ماعنقاتهاش كيف بغات مع طوموبيل . .. ولكن عنقاتها بالقدر الكافي ..

- مسيرة [بإستفسار ] :

واش كتعرفيها ؟

- صفاء : أه .. كنعرفها ، واش عقلتي فاش أول مرة جينا .. وقتليكم تعرفت على واحد البنت فالفيسبوك ، وبلي تزوجات هنا لكازا ومشيت عندها .. وبلي من ديك المرة ماشفتها ، وراه هي سناء ..

- سناء [كانت فرحانة ، حيت صفاء كانت عزيزة عليها ] :

وحق الله الى فرحت بزاف فاش شفتك ، فخبارك راه مسيرة بزز عليا داتني ، فالاول مابغيتش والو .. قاتلي يلاه تفوجي وتبدلي الجو ، ومنها نيت مع طبيعة نخدم على خاطري .. ومع قلت ليها عمري زرت إفران حلفات تديني ..

- مسيرة [ديمارات وشدات الطريق ] :

وصاحبتي تبقاي غارقة فدار لا ، منها تفوجي وتخدمي ، باش تبدعي ..

- صفاء : أمضرا واش مزال مع خونا ؟

- سناء [تنهدات ] :

لا طلقت .. راكي شفتي داكشي لي كان واقع .. تفارقنا ..

- صفاء : حسن أختي ، العيشة ديال الذل ماعندك مديري بيها ، قلتها نهار جيت عندك والله قلتها امع راسي قلت حسن عوانها ، ربي دار ليك تاويل دالخير .. الحمد لله على سلامتك ، وأحسن حاجة رجعت شفتك [عنقاتها من اللور باستها ]

- سناء [كضحك معناقاها بيديها ] :

حتى انا فرحت فاش شفتك توحشتك ..

- مسيرة : ويلاه الالة شكون بحالكم ، هانتوما شبعو من بعضياتكم .. وعلى كيتها نضربو عليها شي دويسك ديال صديقي لي توحشتو وشحال ماشتو [خدمات الموسيقى وبضبط نسيم حداد .. وطلقاتها على الجهد ] ..

- سناء : ناري كيحمقني ..

- مسيرة [ضحكات ] :

هذا وكان ، وحق الله العظيم حتى نعرفك عليه وتصوري معاه ، ونهار يلالة يجيك ولد الناس هو يغني ليك فعرسك تهناي .. خرجو من كازا .. محهدين الموسيقى ناسيين الدنيا ومشاكلها وهمومها .. وخالقين السعادة لراسهم ..

- خرجو من كازا مع جوايه 2 ونص ديال النهار .. وصلو للإفران مع 5:37 دقيقة .. عاد شدو الطريق للفيرما لي عطاتهم أمينة وكريم العنوان ديالها .. 6:05 كانو قدام باب الفيرما الكبير .. الطريق كانت مزيانة واخا الشتا كانت صابة ، أما حس الثلج مكانش .. او بالأحرى مزال ماطاحش ..

- فتح ليهم العساس الباب ديال الڤيلا .. الحاج والبلقية كانو هوما السباقين ، عاد خلطات عليهم مسيرة .. الباب ديال الڤيلا كان مفتوح .. كانت واقفة ماريا هي وجواد ومعاهم وردة لي كانت هازة بلاطو فيه الحليب وطبسيل ديال التمر ..

- نزلو عباس وسعاد والحاج والحاجة هوما الأولين ..

- ماريا [سلمات عليهم ] :

مرحبا بيكم .. زارتنا البراكة ..

- جواد [بصوتو الرجولي] :

مرحبا بيكم ..

- معزوزة : ربي يخليك الالة .. خطات تميرة والحليب ، كيما البقية كملو سلامهم وخداو التمر والحليب ودخلو .. وقفات مسيرة بطوموبيلتها حدا طوموبيل ديال الحاج ، نزلات سكينة وصفاء وراهم سناء ..

- طلعو دريجات مسلمين على ماريا وعلى جواد او وردة .. كانت هي اخر وحدة اتنزل من طوموبيل هازة صاكها لي فيه الكريطينة لي خدات كادو لأمينة .. تيليفونها سدات الباب ، وشافت فيهم بإبتسامة بشوشة .. طلعات الدريجة وأول واحد سلمات عليه هو جواد .. لي باست ليه يدو بكل إحترام ..

- جواد : الله يرضي عليك ابنتي مرحبا بيك ..

- ماريا [سلمات عليها ] :

انت هي مسيرة ياك ؟

- مسيرة [سلمات عليها ] :

اه هي أنا ، مبروك مدرتو لأمينة الله يكمل عليها بالخير .. [سلمات على وردة خدات تمرة والحليب ] ..

- ماريا : دخلي ابنتي مرحبا بيك .. دخلات مسيرة .. الفيلا من الداخل كانت حكاية أخرى ، عاد عرفات جلال منين جاب الدوق ..

- لقات عائلتها ݣلسو كان كريم وفؤاد باه ومو نادية .. وختو دنيا .. سلمات عليهم وݣلسات ..

- كريم : على سلامة .. الناس علاش كيديرو تيليفونات اباش يجاوبو الناس ، وانت كنسوني ليك حرام واش تهزي داك التيليفون ..

- مسيرة : الناس مكايجاوبوش فتيليفون وهوما سايݣين .. الى كنتي انت كتجاوب اخويا انا لا ..

- عباس : عندك الصح ابنتي ، الهضرة فتيليفون راها خطار ..

- دخلو جواد وماريا ووردة نظمو ليهم ..

- جواد : كيدرتو مع الطريق ياكما تعدبتو ..

- الحاج : لا الصراحة الطريق مزيانة .. قاطعهم هلال وسراج الدين لي نزلو .. سراج اطاحت عينو على سكينة غمزها عاد سلم على الباقي ، خلاها غارقة فحوايجها .. هلال بدورو سلم عليهم وݣلس ..

- اول حاجة اتشمها هي ريحتو قبل ماينزل بخطوتو الاولى من دروج .. كان لابس سروال كحل دجين مع تريكو فالݣري داكن .. ماشط شعرو راضو اللور ..

- سلم على الحاج هو الأول عنقو .. :

الحاج زارتنا البركة مرحبا ..

- الحاج : ربي يخليك اولدي توحشناك ، غبتي علينا خاصك تخلص الفالطة ..

- جلال [بصوتو الرجولي المتميز ] :

باشما بغيتي الحاج .. سلم على عباس سلام رجولي وعلى البقية ، وقف عندها مد ليها يدو ونطق من بين سنانو :

مرحبا بيك الواشمة .. هزات حاجب ونزلات التاني كتخنزر فيه ، الشرارة لي كانت باينة للباه لي ماغفلش عليها .. تخطاها او وقف قدام معزوزة .. نزل قفازي شد ليها يديها باسهم ..

- معزوزة [بإبتسامة بشوشة ] :

خليتيني انا الاخرة علاش زعمة ؟

- جلال [فهاد اللحظة كان بحال شي انسان نصاب بإنفصام فشخصية .. الشخصية لي كان كيعامل بيها مع الغير ، لا مع خوتو او دارهم ماشي هي لي حضرات دابا .. باس ليها راسها وعنقها تحت نظرات الاستغراب ديال مو وباه وديال وردة ، لي كانو كيتساءلو منين كيعرف دار مسيرة صديقة كريم ، وشنو سر هاد المعاملة لي عمرهم شافوها ] .. :

كيݣوليك الاخر مبخر .. والعزيز خليه هو التالي ، باش تبع عينيك منو .. وحنا شحال هذا ماتشاوفنا اميمتي ..

- معزوزة [بإبتسامة شدات ليه وجهو بين يديها وباست ليه راسو ] :

داكشي باش كتجي تسول فميمتك .. نسيتيني ..

- جلال [جر ليها يدها باسها من الوسط ] :

كاين لي كينسى شي حد سكن قلبو ..؟

- معزوزة [كضحك، بصوت وقول وتقيل باح ] :

انت لي كتعرف ليا .. من غيرك مكاينش ، تا مالك ضعافيتي بحال هك .. واش مكتاكلش النعمة .. لالا خاصني نقرصك عاوتاني ..

- جلال [ضحك ضحكة رجولية ] :

انت هنا دابا ، بالي بيا ..

- معزوزة : كون هاني .. جمع الوقفة وݣلس حداها ، تحت أنظار الكل المدهولة ولي كانو علامات الاستفهام باينة على وجهم ..

- صفاء [قربات للمسيرة بهمس ] :

من ايمتا مي ولات الميمة .. ومنين جا هاد الحب هذا كاملو ؟

- مسيرة : علاش ماشتيش اش كانت كدير عليه ، تقول واش هو لي ولدها ماشي حنا ..

- جواد [بإستفسار ] :

واش كتعرفو بعضياتكم ؟

- نقز الحاج كيضحك :

داري حدا جلال ، داكشي باش شي كيعرف شي .. ولكن جلال هو ومرتي معزوزة قراب من بعضياتهم ..

- معزوزة [شافت فجواد ، وبصوتها الوقور الباح ، مطبطبة على يدو ] :

ولدي جلال بحال حفيدي وكثر ، عزيز عليا ومقطر ليا من عينيا .. محبتو فقلبي كبيرة دغية دار بلاصتو ..

- ماريا [بلعات ريقها ، وحدرات راسها .. ] ..

- قاطعهم دخول ذياب وسومية .. مع وديان او وليداتها وليليا .. سلمو عليهم وݣلسو حتى هوما بدورهم .. شي تعرف على شي وشي مجمع مع شي ..

- تسمع صوت طوموبيل وقفات ، ناض كريم .. فوت عدة ثواني ورجع معاه عصام وسفيان .. سلمو على البقية وݣلسو ..

- جات الخدامة علماتهم بلي الطبلة واجدة .. الكل كان مزال ماتغداش لا كانو شادين الطريق ولا مالين الدار لي كانو مشرفين على التحضيرات .. الطبلة لي فصالة كانت كبيرة وطويلة .. الدق ديالها دق قديم من أيام المرحوم .. تجمع كولشي على الطبلة .. ومن زهرها جات مقابلة معاه ..

- ليليا [بإبتسامة مشرقة ] :

عرفتي أمينة شحال كتعاود عليك .. عزيزة عليها بزاف ..

- مسيرة : حتى انا عزيزة عليا ..

- وردة : دابا عاد عقلت فين شفتك .. انت هي مسيرة لي عندها الماركة ديال العكورة ياك ؟

- مسيرة [ضحكات] :

اه هي أنا ..

- وردة : تبارك الله عليك ، داكشي عندك غزال ..

- ماريا : شفتك كتغني ياك ؟

- مسيرة [شافت فيها ] :

اه كنت ولكن دابا لا مابقيتش .. منين درت لامارك ديالي ، ودخلت شريكة مع عصام مابقيتش ..

- جواد : تبارك الله عليك .. واش قريتي على هاد الدومين ..

- مسيرة : لا ، كانت عندي هواية من الصغر ، ولكن الظروف ماسمحاتش ليا نقرا .. كنت خدامة خدمة أخرى ..

- كريم : مسيرة كانت عندها كروصة كتبيع فيها الخضرة .. هادشي لي ماخلاهاش تكمل قرايتها فداك الوقت حدها الباك وݣلسات ..

- جواد [بصوتو التقيل ] :

الخدمة ماشي عيب ، برافو .. وعلاش ماكملتيش قرايتك ..

- هنا عباس لي جاوبو :

حيت كانت وقعات ليا أكسيدو فالخدمة وقطعو ليا الرجل ديالي ، مكنتش ݣاد نخدم .. وخرجات هي تخدم باش خواتاتها يقراو .. الله يرضي عليها السبيعة ديالي [شافيها بفخر ] .. والحمد لله خواتاتها بزوج قراو ..

- كريم : هاد العام خدات الباك ديالها ، دارت باك ليبر واخا عندها الباك .. نجحات ودارت البراند ديالها ، ودابا راه كتقرا فلافاك .. عند جلال نيت ..

- هزات مسيرة راسها فيه بحال الى كتقوليه الله يعطيك اللقوة العسرية مالك اكتبرݣم مكتسكتش ..

- ذياب : تبارك الله عليك برافو .. قليل لي تلقى عندو الارادة ، كنحييك ..

- مسيرة : ربي يخليك ..

- جواد [شاف فولدو وفيها ] :

ياكما جلال مقصح معاك الطرح ..

- جلال [هز راسو فيها ، مسكانيها بنظراتو قاطع جوابها بصوتو الحرش ] :

خاصها غير تبعد على المشاكيل وتكون كتسنط ..

- مسيرة [هزات حاجب ونزلات الثاني ] :

علاش مالي كنتناتف ؟

- جلال [ببرود] :

شوفي انت ..

- مسيرة : كيفاش شوفي أنت ، واش كدوي على ديك خيتي لي دابزت انا وياها ، انت أصلا شاهد بلي هي جبداتني .. وحدة كتعاير فيا واش نسكت ليها ..

- ماريا [وجهات ليها الهضرة ] :

تاعنداك ابنتي ، لي عطاك كلمة عطيه 10 عمرك تسمحي فحقك ..

- مسيرة [بإنتصار ] :

سمعتيها ..

- جلال : ماشي بديك الطريقة ..

- مسيرة : وبأشمن طريقة بسلامة ، وحدة من نهار دخلت لافاك وهي تمعني ، وهي قاصداني .. وبمسبتها رضيتيني فلاخر ديال الطاولة ..

- جلال [ببرود وتحت سنانو ] :

رضيتك اللور على جماعتك مع لي حداك ..

- مسيرة : طالب كيقرا معايا ضروري يكون بيناتنا حوار ، وأصلا كنا كندويو عليها حيت قالي بعدي منها انت جيتي رضيتيني لور ، وبالأمارة قلتيلي هاد المرة اتهزني وتحطني فسرجم ..

- جلال [ببرود قا//تل ] :

وتعاوديها غانديرها ..

- عباس [قاطعهم ] :

وا شباب وا شباب ، بشوية ياك لاباس هههه ..

- ماريا [موجهة كلامها لجلال ] :

خلي عليك البنت من الطغيان ودكتاتورية ، بحالك بحال باك وانا كنقول لمن كتشبه .. خليها دافع على راسها ، مزيان ابنتي هكاك نبغيك ماتخلي حد يزطم ليك على طرف ..

- جواد : كتحرضيها حيت كتشبه ليك ..

- ماريا [شافت فيه ] :

ومالك كيف جيتك بسلامة والعافية .. ياك بعدا دوختك ، وتبعتيني حتى لكازا وتسحفيتي باش قبلت نتزوج بيك .. وهبط مناخرك الأرض ..

- سومية [شدات على راسها ] :

لا حول ولا قوة الا بالله العلي العظيم ، هاهوما غادي يبداو عاوتاني ..

- ماريا : ماشي انا لي جبدتو راه هو لي كيجبد ، بغانا نشوفو المنكر ونسكتو عليه ..

- عباس : الواحد فهاد الوقت ، مايخليش شي بنادم يزطم عليه ، ياخود حقو بيديه ..

- ماريا : هاه سمعتيه ..

- سعاد : انت اسباب لي خليتيها خارجة من الجنب ..

- صفاء : بالعكس اماما ، بابا مدارش شيحاجة لي هي غلط .. كون خلانا منونخين كون كلاونا الذياب ..

- ذياب [كيضحك] :

ماعندي مانسالك اسي عباس ، ونعمة التربية ..

- سراج [قرب من هلال بصوت شبه مسموع ] :

واش شتي خوك كيكايدير ولا غير انا لي كنتخايل .. ؟؟

- هلال [عينيه كانو فجهة أخرى ] :

ميك ..

- سراج [شافيه ، وفالبلاصة لي كيشوف فيها تبسم وضحك ] :

كيبان ليا ولاد الإبراهيمي كاملين كلاهم الحوت ..

- هلال [شافيها ] :

دويتي ؟

- سراج [هزهز براسو ] :

لا الله اودي ، مدويتش .. كملو ماكلتهم هضرة كتجبد هضرة فجو زوين .. غير سلاو ، تكلفات ماريا باش توري لكل واحد بيتو ، أما الرجال غايكونو فالڤيلا لي ملاصقة مع هادي .. باش هكا كل فئة تاخود راحتها ..

- بيتها كان زوين .. عجبها اما الإطلالة ديالو كانت حاجة أخرى ، مقابل مع الطبيعة ، وشجر لي كان خضر ناصع مغسول بالأمطار .. الألوان ديال البيت لون لي كيعجبها مزيج بين الابيض وتركواز .. كيخليك تحسي بواحد الراحة غريبة ..

- السرجم لاخر لي فبيتها كان اونفاص مع الڤيلا لي ايكونو فيها الرجال .. من ورا ما طلع ليها العساس الباليزة ديالها رتبات حوايجها فالماريو .. هزات لاتروس ديالها لي فيها شومبوان ولوازم الدوش .. ودخلات تغسل عظامها من العيا ديال الطريق ..

- خرجات لاوية على راسها فوطة ولابسة بينوار ، فتحات الماريو .. جبدات كيطما سخونة فالموڤ ، مع طاݣية .. وصابو ديال الدار ، دهنات لحمها بالمخمرية ديال الجسم ديالها ، أما شعرها نشفاتو بسيشوار وعطراتو .. رشات من الپارفان ديالها الجديد [ alien goddess intense ] نزلات التحت ، مكان حتى واحد فصالة .. حلات الباب وخرجات على برا .. الحال ظلام من غير الضواو ديال الفيرما لي كانو مضويين ..

- رجليها غاديين بيها كتمشى حتى خرج ليها من بين الشجر ..

- قفزات من بلاصتها بالخلعة .. جاها على غفلة ماعرفات باش تبلات .. :

واش مكديرش الحس بسم الله الرحمن الرحيم ..

- جلال [ببرودة وصرامة ] :

هادي لبسة يلبسوها الناس وهوما خارجين من الدوش ؟

- مسيرة [بقات كتشوفيه ] :

باش عرفتيني خارجة من دوش ، انت وليتي كتخلعني وحق الله العظيم .. مابقيتش كنفهمك .. مرات كتبان غامض مامفهومش ، كل مرة كتبان فشكل مافهمتش انا ..

- جلال [قرب منها حتى ولا واقف قبالتها نيشان ] :

خايفة ؟

- مسيرة [هزهزات كتافها ] :

مناش غادي نخاف واش انت حماقيتي ، غادي نخاف منك علاش .. جلال بعد المرات غير كتبقى تخربق وحق الله .. وانا خارحة نشم الهوى ونضرب دويرة .. مافيا منكمل داكشي لي بديناه على الطبلة ديال الغدا .. تخطاتو ولكن يدو كان ليها رأي اخور ..

- جرها من يدها غادي بيها مبعدها على الفيلا ، مدخلها بين الشجر ..

- مسيرة [ تنطرات منو عصبها ] :

طلق مني ، واش ملاحظتيش بلي وليتي خانقني ، وليت فينما ندور كنلقاك .. جلال الله يهديك خلينا ندوزو هاد الايامات على خير ..

- جلال [ مدواش ، حدو نزل براسو مقرب منها كيشمشم فيها .. بلعات ريقها من قربو ليها .. حبسات النفس فاش حسات بلمسة نيفو على الجلد ديالها .. حسات بالفشلة وقلبها كيضرب منين حسات بشفايفو على عنقها موزع قبلات خفيفة على عنقها ، كونما الشحرة لي كان مسندها عليها كانت غادي الطيح .. حسات برجليها فشلو عليها ، صدرها كيطلع وكينزل .. دقات قلبها كيضربو .. حطات يدها على صدرو لا شعوريا ، باش دفعو ولكن يدها ولات أسيرة ليدو ] ..

- نطق بصوت رجولي تقيل وغارق ، غالبة عليه بحة حرشة كتبورش :

ماتبقايش ديريها ..

- مسيرة [مغمضة عينيها ، حلاتهم بصعوبة باغية دفعو ] :

جلال ، بعد غادي يشوفنا شي واحد واش حماقيتي ..

- جلال [ببرود ساحق ] :

ومن بعد ، يشوف لي بغا يشوف .. ماتبقايش ديريها ..

- مسيرة [كتنفس بصعوبة ] :

شنو هي ؟

- جلال [شاف ليها فعينيها ، يديه مشاو نيشان للوجها .. شدو بين يديه الرجوليين ] :

هاد الريحة ماتبقايش ديريها ، ممنوع ديريها ݣدام شي حد ، [زاد لصقها مع الشجرة ] مابغيتش شي .... يشمها ويتشهاك ويتخايلك ݣدامو .. عنقك نحيدو من بلاصتو الواشمة ..

- بلعت ريقها لاول مرة تحس بالخوف من جيهتو ، مافهمات فيه والو .. مافهماتش تصرفاتو ، مرة كتكون فرحانة بكلامو ومرات كيخلعها .. جمعات شجاعتها ودفعاتو مخرجة فيه عينيها :

شكون انت ؟ شكون انت اخويا لي تحاسبني ولا تأمرني اشنو كتجيني يلاه ؟

- فجهة أخرى .. فبيت نعاسهم .. ݣالسة وساهية كتفكر .. قاطع حبل أفكارها يديه لي ضمو كتافها ..

- جواد [بصوتو التقيل الرزين القوي ] :

مالك ؟ شفتك ساكتة وساهية واقعة شيحاجة ؟

- ماريا [تنهدات تنهيدة طويلة ] :

شفتي العلاقة لي بين جلال وجدايت مسيرة ، مانكدبش عليك حسيت بالغيرة وحق الله العظيم ..

- جواد [ݣلس قدامها معنق يديها بين يديه ] :

فخبارك بلي ديك السيدة هي لي خلات جلال يتصالح معايا [شافت فيه بإستفهام ] اايااه الالة .. هي لي خلاتو يتصالح معايا ويرجع بحالو .. ويولي كيف كتشوفيه دابا .. هي لي رضات ليه عقلو ودارت لي مكناش كنديروه حنا ..

- فكراتني فالحاج الله يرحمو ، بكبرانيتو وكلمتو وديك النخوة والوقار ديالو ، داكشي باش كتشوفي جلال قريب ليها بداك الشمل ، كيشوفيها جدو وجداه .. الناس الكبار عندهم بلاصة كبيرة فالعائلة ..

- ماريا [تنهدات تهنيدة طويلة] :

بصح عندك الصح .. غير ماعرفتش والله ..

- جواد [كيطبطب على يدها ] :

هاد الحميقة ديالي ، نعلي شيطان .. ولكن أجي ماشفتيش تصرفات ولدك ..

- ماريا [ضحكات ] :

فكرني غير فيامي انا وياك ، كنا بحال هكا عقلتي ؟

- جواد [هزهز براسو ] :

وي عقلت .. هادوك الزوج هانتي وانا الى مكانت شيحاجة اتكون بيناتهم ..

- ماريا : انا عجباتني البنت ، وحتى عائلتها ظريفين ، هوما كلهم الصراحة ظريفين .. حتى صحاب كريم تبارك الله عليهم ..

- جواد : ايوا الحمد لله منين بنتنا ربي طيحها فراجل الله يعمر ليه الدار وناس ظريفين .. هذاك هو الربح ..

- ماريا : بصح هداك هو الرباح .. المهم نزل انا نشوف البنات واش وجدو العشا ومنها نݣلسو مع الناس حشومة يبقاو بوحدهم ..

- جواد : حتى انا غادي نشوف الرجال شنو كيديرو بيما وجدتو العشا .. [وقف باس ليها راسها وخرج ] ..

__________________________

- كانت فبيتها .. دوشات وسرحات شعرها منشفاه .. ݣلسات فوق النموسية كضفر شعرها ، طانت لابسة سروال سخون فالكحل .. مع تريكو طويل ديال الصوف فالأحمر ، جاي مع لون شعرها ومع لون عينيها ..

- وصلها ميساج .. هزات تيليفون فتحاتو ، خرجات عينيها من محتوى الميساج :

" نزلي ودور على يدك ليمن انا كنتسناك "

- سكينة [حطات المشطة وجاوباتو :

اويلي واش حماقيتي ، الى شافنا شي حد راه دار عامرة ..

- جاها الجواب ديك الساع : " قسما برب العالي ومتنزلي حتى نطلع عندك ونوريك الشوهة ديال بصح أش ݣلتي ؟ .. "

- سكينة : اوووف ، عارفاك مسطي وديرها .. جاوباتو بزوج كلمات " صافي واخا " ..

- دخلات رجليها فالبانطوفة ديالها ونزلات فدروج كتسلت بحال سحت الليل ، حلات الباب كتسمع فالهضرة جايا من الصالون .. خرجات على برا .. ضارت على يدها ليمن كيف قليها ، كتقلب بعينيها عليها ، حتى تجرات من يدها ودخلها بين الشجر .. صدرها كيطلع وكينزل بالخلعة ..

- سراج [كيشوف فيها بنظرات إشتياق ، بنظرات لعوب .. ] :

توحشتك الݣاورية ديالي .. ماخلاش ليها الفرصة فين دوي .. شفايفو نقضو على شفايفها فقبلة كلها شوق وحب .. قبلة متازجو فيها مشاعرهم بزوج .. مشاعر راقية من القلب ..

- بعد عليها ضام وجها بين يديه :

كيبان ليا ندخل دابا نݣوليهم نديرو عرس واحد اش بان ليك ؟

- ݣالسين مجمعين مع بعضياتهم فصالون .. هضرة كتجبد هضرة .. واخا هدا اول لقاء ديالهم ولكن كتحسهم كيعرفو بعضياتهم من شحال هذا ..

- بنياتها نعساتهم .. باش ماتخسرش ليهم السيستيم لي مولفاهم .. ساهية مع كلام معزوزة ومها .. حتى وصلها ميساج من عندو .. فتحاتو كان مكتوب فيه " خرجي عندي انا كنتسناك برات الڤيلا " ..

- هزات عينيها فيهم ، دورات عينيها تلاقاو مع عينين ليليا نيشان لي كانت كتشوف فيها .. أشرات ليها براسها بمعنى شنو .. خدات تيليفونها ودخلات للواتساب كتبات ليها ميساج " منصور كاين حدا الڤيلا باغي يشوفني ، غطي عليا الى سولاتك ماما قولي ليها غير صحاب الخدمة سوناو ليا وخرجت ندوي معاهم " ..

- هزات ليليا تيليفون .. قرات الميساج وجاوباتها بواخا .. ناضت من حداهم مستغلة الهضرة وجماعة ، هزات المونطو ديالها لبساتو وخرجات على برا .. غادية كتسلت شوية بشوية حتى خرجات على برا .. كتبان ليها طوموبيلتو واقفة بعيد ، مشات كتجري قاطعة الشانطي .. لعندو ، فتحات باب الطوموييل وطلعات ..

- منصور [غير دخلات جرها وعنقها كيستنشق ريحتها .. كيحس براسو توحشها كثر من القياس , بعدها عليه كيشوفليها فعينيها ، بحب وشوق عينيه فاضحينو ] :

توحشتك بزااف

- وديان [يديها فيديه قلبها كيضرب بجهد ، كتبغي هاد الشخص لي قدامها من كل قلبها كتموت عليه ] :

حتى انا توحشتك بزااف .. العائلة كلها مجموعة الداخل ..

- منصور : شكون كاين ؟

- وديان عائلة كريم ، واحد البنت كيعرفها وعائلتها ..

- منصور [بإستفسار ] :

مسيرة فريدي ؟

- وديان [بإستغراب] :

منين كتعرفها ؟

________________________

- سكينة [خرجات فيه عينيها ] :

اويلي اسراج واش حماقيتي ، ياط تافقنا حتى يسالي عرس كريم .. حشومة نخسرو ليهم الفرحة ديالهم ، هوما باغيين يفرحو براسهم ..

- سراج [دوز يدو فشعرو ورجع شد ليها وجها ] :

راه غانحماق برب .. بغيت نغوت مابقيتش ݣاد نصبر بغبتك معايا اليوم قبل غدا ..

- سكينة [كضحك] :

وغير شوية ديال الصبر يهديك الله احبيبي ..

- سراج [هز حاجب ومنزل الثاني ] :

عاوديها ..

- سكينة [ضحكات بأنوثة ] :

حبيبي ..

- سراج [هز راسو لسما مغمض عينيه ] :

مي مي على حبيبي ، أجي اسومية طلي على ولدك .. [شافيها ] كنموت على طواسل حسك .. كنعشقك الݣاورية ..

- سكينة [ضحكات ] :

حتى أنا ..

- سراج [غمزها ] :

حتى انت شنو ؟

- سكينة [ضحكات عاضة على شفايفها ] :

حتى انا كنموت عليك ..

- سراج [تنهد تنهيدة طويلة من أعماق قلبو ] :

غبري من ݣدامي الݣاورية ، على شوية غانسى راسي ونسا حنا فين ونسبق شي حوايج ماشي وقتهم ..

- سكينة شافت فيه بدلع .. تعلات على ريوس صباعها باستو فوجهو وهربات .. تبعها بالعين حتى غبرات ، مسند على الشحرة وإبتسامة عريضة مزينة وجهو ..

- منصور : عقلتي على البلان لي كنت عاودت ليك وقع مع جلال .. ديال الطوموبيل ..

- وديان [هزهزات براسها ] :

اه عقلت .. لا متقولش ليا هي البنت لي ركبات فطوموبيل وعتقاتو العار ..

- منصور : اه هي .. انا شاك بلي بيناتهم شيحاجة ، مايمكنش وحدة ماعندها معاه حتى علاقة وتجي تلوح راسها فطوموبيلتو ..

- وديان [بإستفسار] :

ولكن هي منين غادي تعرف بلي انتوما كنتو تابعينو .. كيفاش عرفات ؟

- منصور [حرك راسو بلا مبالاة ] :

يقدر يكون بيناتهم شيحاجة شحال هادي اللهم اعلم .. ماعنديش شي فكرة .. هدا شحال كان كيهمني [شافيها بكل حب ] ولكن دابا مابقاش كيهمني والو .. من غيرك انت ..

- وديان [تبسمات بأنوثة ] :

حتى انا مكاتهمني حتى حاجة من غيرك انت ..

- جرها لعندو عنقها بجهد خاشيها فوسط حضنوو، بعدها بشوية عليه ونطق بصوتو الرجولي :

ديري فبالك ، غير يسالي عرسك بنت عمك انهضر مع داركم ..

- وديان [حركات راسها بالإيجاب ] :

واخا إن شاء الله . .. خاصني نمشي دابا ، باش مانعيقش صافي ..

- منصور [باس ليها يديها ] :

ديري فبالك بلي كنبغيك وكنموت عليك .. تيليفون بيناتنا ..

- وديان : حتى انا [باستو فوجهو حلات الباب سداتو وراها ، غادة كتجري قاطعة الشانطي ، وصلات عند الباب شيرات ليه ودخلات ] ..

_________________________

- واقف كيشوف فيها بلاما ينطق بكلمة وحدة عرق واحد كينبض فيه فعنقو .. وفكو لي كيزدح وكيتحرك ..

- مسيرة : عارف عليا شي حوايج لي انا براسي معارفاهمش .. ولا مراداش ليهم البال .. جيتيني فنصاصات الليل .. للدار ودخلتي بلا حس حتى لقيتك فبيت نعاس ، جايني فليل غادي بيا ناكول .. ومابغيتيش تقولي شنو باغي مني وعلاش كتصرف معايا بحال هكا ..

- راه خرجان العقل هذا ، واش عاقل كيفاش كنتي كتصرف معايا .. شحال هادي ولانسيتي لا وقيلة نسيتي وخاصني انا نفكرك ..

- بجرة وحدة من يدو دخلها فصدرو ، ضام شفايفها لشفايفو .. كيقبل كل شفة بوحدها بكل تملك .. كيجر بكل إحترافية عبير شفايفها .. كيتمدق رحيقها لي كينتاعش بيه بحال شي مشروب غالي كيسكرو .. كيلعق شفتها التحتانية بشوية وبروية .. ويطلع لشفة الفوقانية يعطيها نصيبها من المتعة ..

- انفاسو حارة كتضرب فوجها .. صدرها كيطلع وكينزل ، يديها حطاتهم على صدرو القاصح .. حركة لي غير مزادت حيجاتو ، شدليها يديها بيدو وطلعهم فوق راسها ملصقهم مع الشجرة باش يكون هو المتحكم والمسيطر .. شفايفها حسات بيهم تزاد الحجم ديالهم بحال الى تعرضو للعملية الحقن بالبوطوكس ، بوطوكس طبيعي من شفايفو .. كانت عندو خبرة كبيرة ، كيتفنن فتعديبها ، بحال شي رسام كيتفنن فرسمة ديالو ..

- مكانش قاد يبعد عليها ، مابقاش كيفكر نهائيا ولا بحال شي حمق خارج ليه العقل من غير المشاعر ديالو لي محكمين فيه .. زاد لصقها كتر وكتر هزها من فخاضها ، مدور رجليها على الخصر ديالو .. أما ظهرها كان مكالي بشجرة ...

- فهاد اللحظة ماحبسش نهائيا .. اما هي كان عقلها مرفوع .. كانت كتحس براسها باغية ترتاح وتنفس ونفس الوقت مقاداش تبعد عليه نهائيا .. هزها من عالم لعالم أخور ، واخا كانت على علاقة بجمال .. وكانت بغاتو ، واخا حتى هو كان قرب منها واول قبلة ليها كانت معاه ، ولكن مع جلال كانت بحال اول مرة غادي يقرب منها شي واحد ..

- كان مختلف كليا على جمال ، كيعرف ليها عارف نقطة ضعفها فين كاينة .. عارف كيفاش يطلعها لسابع سما وينزلها لسابع ارض .. جبد المشاعر ديالها لمدفونة لي نساتها من شحال هادي ..

- كان هو المتحكم وهو المسيطر .. بعدها عليها بشوية حتى خدات انفاسها حتى قالت صافي راه ايحبس ، ورجع ضام شفايفها لشفايفو .. كان بصريح العبارة كلاها .. ندمها على الكلام لي خرجات ، نتاقم منها .. طبع طبعة على شفايفها حتى حس بدم ففمو .. بالعو بحال العسل الحر بنسبة ليه ..

- بعد عليها ولكن ماطلقش صراحها مزال هازها .. يديها لي كانو لاصقين فشجرة عياو وملقات حتى حل من غير تنزلهم وتحطهم على كتافو .. قلبها كيضرب وصدرها تيطلع وينزل ..

- جلال [هسهس بصوت قات//ل .. بحشرجة رجولية ، بحروشية خطيرة كتزعزع الاوصال ، بتهديد خطير .. لي كيخلي الطرف الثاني يراجع حساباتو ] :

- عمري نسمع من فمك كلمة شكون انت .. فالقاموس ديالي ملغية ..

- هاد الروايح عمري نشمهم فيك ، مرة خرا عنقك تلݣايه مفصل على ݣنازتك ..

- ماتبقايش تسولي بزاف ، الحوايج لي باينين راه باينين ..

- انا وانت شي حوايج فاتو القياس تولدو بيناتنا ومن شحال هادي ماشي حتى لدابا ..

- دخلتي للݣلب ، حسبي راسك محبوسة ومحكوم عليك بالمؤبد ، يا انا يا لموت الواشمة ..

- فعايل البراهش ماعندي مندير بيهم ، تحكم عليك بالحبس ، بالمؤبد .. هنا [ضرب جهة قلبو ] الهوى لي كيخرج من نيفك يخرج بشواري وتحت عيني .. نسكنك ونعشش فعقلك وفقلبك وضربي ليا ألف حساب ، ديري هاه ولا هاه .. نحفر ليك قبرك بيدي ، ونحفر قبري حداك ... فالقاموس ديالي مكاينش انت لغيري ، انت ديال واحد وداك الواحد هو انا .. طيري تنزلي الواشنة اتكوني ديالي ، يزنزن عليك الدماغ وتبغي تروري ، العصب ديال رجليك نحيدهم ليك ونݣلسك فكروصة ونݣودك ..

- عيني عليك الواشمة يا انا يالموت ..

- دفعاتو بكل قوتها .. منزلة رجليها للأرض .. خرجات من بين الشجر وشافت فيه .. عينيها كانو بحال شي لبؤة .. مافيهمش ݣرام ديال الخوف نهائيا .. بصوت أنثوي رقيق وقوي :

بصفتك شنو .. انت شكون انعاودها ونقولها انت شكون .. بين ليلة ونهار جاي تحكم بحال الى ضارب بيا الكاغط .. سكنت قلبك ، واش نسيتي لي وقع هدا عام بيناتنا ولا نفكرك ، انت وانت فين عمرنا كنا كنتفاهمو .. انت أصلا مامتأكدش من راسك شنو باغي ..

- انت مكتعتارفش بشنو كتحس أنت كتهدد .. انت كتخلي الطرف الثاني يخاف منك ماشي يقرب منك .. بعد المرات كنكون فرحانة فاش كنكون حداك وقريبة ليك ، وبعد المرات كتخليني نخاف على راسي منك .. وهادشي قلتو ليك داك نهار فاش اخر مرة دوينا .. قلت ليك انت فيك واحد الحاجة كتخوف وهاد الحاجة هي لي بينتيها دابا ..

- وشكون قاليك أصلا انا كنحس بشيحاجة من جيهتك أم [ضحكات بخبث ونطقات ] ماتنساش بلي انا مزال فالعدة .. يقدر بين ليلة ونهار يتنادم معايا الحال ونرجع للعصام .. [دوزات عينيها عليه ، من شدة ديال يدو كان باين بلي العصاب وصل فيه لأبعد الحدود .. كانت عارفة مزيان بلي جلال معارفهاش بلي مزال عذراء .. وبلي الوحدة الى تزوجات وبقات عذراء وطلقات طلاق الشقاق قبل البناء ، ماعندهاش العدة .. ولكن كانت باغية تستفزو باغية تمسح الطغيان ديالو من الوجود ] ..

- انا با لي ولدني وكبرني ومكانش كيتحكم فيا ، ومغاديش نخلي ولد المرا يتحكم فيا .. وأولهم أنت ، انا وانت مابيناتنا والو وعلى هاد الحماق لي فيه وهاد التملك لي فيك مغايكونش ، انا باغة نكون مع واحد نحس معاه بالامان ماشي بالخوف .. شي واحد بحال عصام مثلا ..

- جلال [نيفو كيترعد ، النفس كتخرج منو بصعوبة ، بهسهسة ومن تحت سنانو نطق ] :

كون بغيتيه كون بقيتي معاه .. مكنتيش غادوبي بين يدي ..

- مسيرة [بلامبالاة ] :

ممكن .. وممكن تكون انت لي بززتي عليا ، وممكن الصدمة خلاتني مندير حتى ردة فعل ، كاين بزاف ديال الاسباب ، ولكن كون متأكد ماشي الحب لي دارها .. ونزيدك اجلال ، واخا تجي لباب داري وتركع على رجليك وطلب مني الزواج غايكون جوابي هو لا .. حيت مستحيل نعيش مع واحد مريض متملك بحالك .. وهادي اخر مرة طوف بساحتي ..

- لاحت ليه هاد زوج كلمات ومشات كتجري هاربة منو .. خلاتو بركان شاعل .. صعيب يطفا ، كان مورك على يدو بقوة .. ويد لوخرا خاشيها فجيبو مورك على كرة البيلياردو مبرد فيها حرو ، ضار ضورة وحدة خابط يدو مع الشجرة حتى تسمع طرطيق صباعو .. صدرو كيطلع وكينزل بالعصاب ..

- حالف حلفة وحدة ، من غيرو والله لا كانت .. فقاموسو تخلقات ليه ، ماتخلقاتش لغيرو .. وحد مايحلم بيها ولي يطوف بساحتها ، يدفنو فصحرا ومايعرفوش ليه طريق ..

_______________________________

- دخلات للبيت لي عطاوها ، تبعوها خواتاتها وسكينة .. حالتها ماعجباتهم .. سدو الباب وراهم ، وعلامات الاستفهام على وجهم ..

- صفاء [بإستفسار ] :

مالك ياك لاباس ؟ شنو واقع ؟

- سندس : كنتي صحة سلام .. خرجتي رجعتي معصبة .. مال جهة فمك زرقة ..

- مسيرة [ݣلسات فوق نموسية محيدة الطݣية بعصبية .. حاطة يديها على فمها وساهية .. هزات عينيها فيهم ] :

مغاديش تيقو شنو وقع ..

- سكينة : راه هادشي لي مكنحملش فيك ، دوي خلاص واش انبقاو كنتسناو هنا ..

- مسيرة [عاودات ليهم كولشي ] ..

- سندس : اويلي وحدي ، واش هذا حماق واش هكا الناس كيعتارفو بداكشي لي كيحسو بيه هدا واش كيعتارف ولا كيهدد ..

- مسيرة : هانتي تشوفي ، انا راه هاد الراجل ايخرج ليا العقل .. كيفاش وايمتا بغاني بعدا .. وأصلا مقاليش كنبغيك ..

- صفتء : واشنو هي سكنتي القلب حتى انت ، راه باين .. يقدر يكون هادشي كان يحس بيه من نهار تلاقى بيك ، ولكن ماتأكد حتى بعدتو ورجعتو تلاقيتو من جديد .. بحالك .

- مسيرة [شافت فيها ] :

كيفاش بحالي ؟

- صفاء [بجدية كتشوف ليها فعينيها ] :

شوفي انا راه كنعرفك مزيان .. وݣاع لي فهاد البيت كيعرفوك مزيان أمسيرة ، انت صعيب شي حد يݣيدك انت راه تݣيدي قبيلة وتجيك قليلة .. قسما بالله ونبصم عليها بالعشرة ، كونما كنتي كتحسي بشيحاجة من جيهتو .. والله لا داك داك نهار من وسط الدار ، وسكتي مدويتيش عاجبك الحال ، هاديك الشعكاكة ديالك .. ياك كنتي كتقولي والله لا رجعت اللون الأصلي ..

- ولكن فاش قالها ليك هو وقاليك مجاش معاك نضتي وبدلتيه ، ونهار دخل عليك للبيت ، مدرتي حتى ردة فعل انت يا حسرة لي كتنوضي روينة على بحال هاد الحوايج ، وأصلا علاش تستافزيه بعصام كنعرفك مزيان ، الواحد لي ماعندك فيه سوق مكتخسريش عليه وقتك وكتقوليها ليه فاص ، وراه عندو الصح كون كنتي مكتحسي بوالو مغادوبيش بين يديه وترجعي فمك زرق ..

- مسيرة [سكتات دوزات يدها فشعرها او وقفات ] :

ومن بعد .. ماعرفتش انا معارفاش .. واش نسيتو بلي هاد السيد هو لي نعس صاحبو فالفراش ، راه هدا يتخاف منو ..

- سكينة : واش من نيتك .. عندو سبب ، صاحبو غدرو .. عشيرو لي كان صاحبو داخل ليه لدارو باغي يسرقو ، باغي يرزيع فوراقو وفخدمتو ديال سينين ، اش بغيتيه يدير يعنقو ويقوليه سير انا راضي عليك ، ونكونو لوجيك واحد الشوية أمسيرة .. عاوتاني متكوني أنانية وبرهوشة ..

- مسيرة [شافت فيها ] :

انا برهوشة دابا ؟

- سكينة : وهي هادي ، الحق حق .. السيد مدار حتى حاجة خايبة ، وكون كنت انا فبلاصتو ماشي انعسو فالفراش انصفيها ليه .. واحد بحال جلال مكايتسامحش فالخيانة والغدر والكذوب .. وكيف قالت صفاء ، ممكن يكون كان كيحس بشيحاجة من جيهتك شحال هادي ، وعاد عاق وفاق ، شحال من واحد وقعات ليه .. كيكون كيبغي شي حد ومكايبغيش يعتارف لراسو ، ولا كتكون عندو عقدة فحياتو كتخلي عينيه معميين ..

- نهار داك الانسان كيصلح من راسو ، وكيتصالح مع نفسو ومع الناس لي ضايرين بيه ، عاد كيعرف بلي داك الانسان ساكن قلبو ..

- سندس : ولكن هو واخا هكاك مقالش ليها كنبغيك ، خاصو يهيأها ، يبين اعجابو ليها .. بشوية بشوية عاد يعتارف ليها .. ماشي كيهدد ..

- صفاء [ضارت فسندس] :

داكشي كامل لي دار ومابينش اعجابو وخوفو .. جاي فنصاصات الليل يطل عليها ، هازها من دارهم وغادي بيها ضرب الشوا على قلبها وملبسها تجاكيطو ، ومخلي عندها لاڤيست ديالو ومابينش ليها ، ياكما بغيتيه يكتبها فسما زوينة هادي ، راه لي باين باين .. ونوع ديال جلال متشي كيليميني ، فيه كترت التبرويل حبيبة كبيدة زين .. عندو شان طان ..

- عندو مع الأفعال ماعندوش مع تبوزيق الخاوي ..

- سندس : جاني بحال الى كدافعي عليه ، ياك انت مكتحمليش ولاد الإبراهيمي اش جاك ؟

- صفاء : مكنحملش توفيق ، اما لوخرين ماشفت منهم عيب .. وكنقول الصح مكانافقش انا .. هو فعلا مخاصوش يهددها .. خاصو يكسبها ..

- سكينة [موجهة كلامها لمسيرة ] :

شوفي انت خليها تمشي بحال هك .. الحاجة الصعيبة كتكون زينة كتر من الساهلة ، ونوع ديال جلال كيموت على الحاجة الصعيبة .. خليه يطير وينزل على قبلك ، خليه يدير المستحيل .. وديما بيني بلي ساهل يخسرك .. جبدي منو ديك الشخصية لي مخبيها ..

- عمرك متكوني حاجة ساهلة ..

- مسيرة : كتقوليها ليا انا ، حافظة سوارية مزيان .. عند بالو ايغوت عليا غادي نخاف ، وغايهددني انقوليه واخا امولاي عابد .. بنت عباس هادي وأجرك على الله والله لا كانت ليه ..

- شتي واخا نكون كنموت عليه .. واخا يكون هو لي كايبان ليا وبين عينيا ، عمري منحني ليه الراس .. هو راسو قاصح وانت كتار منو .. وغانشوفو فين انوصلو وشكون ايتهرس ليه الراس انا ولا هو ..

- صفاء [بإبتسامة] :

دابا بيناتنا انت كتحسي بشيحاجة من جيهتو ولا والو ، حنا بوحدنا لي كاينين ..

- مسيرة [تنهدات تنهيدة طويلة ، بدون شعور هزات يدها كتشمشم ريحتو ] :

ماعرفتش وحق الله ، كنفرح فاش كنكون معاه .. فاش قرب ليا ترفعت عمري فحياتي حسيت بحال هكا .. واخا جمال كان كيقرب ليا فاش كنا مزوجين ولكن بحال لي حسيت مع جلال عمري حسيتو فحياتي كلها ، بحال الى اول مرة يقرب مني شي حد ..

- وريحتو كتبقى لاصقة فيا .. فاش كيكون كنتخربق وحق الله مافهمتش ..

- سندس : رفعت الجلسة .. مرحبا بيك مع ختك سكينة ...

- مسيرة [بصوت جدي ] :

ولكن قسما بالله العظيم لا كنت ليه ، نوريه انا كيفاش يهددني .. قاليك يا هو يا الموت ، انا انسيفطو لعند طبيب نفساني يعالجو المريض لاخور ..

‏أتظنني لا أتألم

حين أقابل الشمس في بدايات الصباح..،

والحزن يملأ ملامحي من فرط غيابك..،

وقضاء الليلة السابقة بلا معطفٍ دافيء..!!

‏‎"أنت الشخص الوحيد الذي لا أُمانع فُقدان النوم لأجله..،

والوحيد الذي لا يُمكنني التعب مِن الحديث معهُ..،

والوحيد الذي يَطوف في ذِهني بٱستمرار طوال اليوم..،

وكذلك الوحيد الذي يجعلني أبتسم دائمًا مهما كان مزاجي سيئًا..، أنت الذي صعبًا عليّ أن أخسرك لأنك ألطف جُزء في حياتي".

و‏أتمنى ألا ينعكف طريقي إلا إليك وألا ينطفئ الوهج الذي بيننا..،

ألا أشعر بالغربة معك مهما حدث ألا يخلو عمري منك..،

ألا تنجو مني يومًا أن أبقى مألوف لديك وتتعثرِ بي دائمًا..،

وأدعو الله دوممًا ألا يريني فيك بأسًا وألا أرى في وجهك شحوباً..، أتمنى أن أراك مشرقآ دائما كما أراك دومًا بداخلي .

‏أنتِ في دعائي وحديثي أنتِ الكلام المُردد في جوفي..،

أنتِ قلبي وقلبي أنتِ ..

__________________________

- العرس بقات ليها 6 يام بضبط .. العد التنازلي غادي وينقص .. العروسة لي كل نهار كيدوز كيزيدها توتر والخوف .. أما كريم كان مرتاح وفرحان حيت مابقا ليه والو ويتجمع هو وأمينة ..

- معلقين القفاطن ديال الحنة لي ايحضرو بيهم .. وعاد تكاشط ديال للعرس ، فجهة أخرى وبضبط فجردة اللورانية للڤيلا .. ݣااسة لابسة سروال ديال الكيطما مع تريكو ديال الصوف بالقب ديالها ، دايرة كاسك فودنيها كتموسق ..

- قدامها حاطة وراق بويض ، مع علبة فيها الألوان .. قلم الرصاص هزاه فيدها وكتخطط فالورقة لي بين يديها .. ساهية ومركزة مزيان مع الديزاين لي بين يديها ، غافلة على الشخص لي كان وراها وبضبط على بعد إنش من ظهرها مراقب داكشي لي كدير ..

- ضار من ورا ظهرها وݣلس ، هزات راسها على غفلة لقاتو ݣالس قبالتها .. زولات الكاسك بزربة ، كتشوف فيه ببرود .. بدون مبادرة نطقات :

بغيتي شيحاجة ؟

- سفيان [بإستفهام وبنبرة صوت رجولية ] :

ساليتي التصميم ولا مزال ؟

- سناء : أنا خدامة فيه .. داكشي باش جيت لهنا باش نخدم على خاطري ومرتاحة .. هكا كنركز كتر ..

- سفيان [هز حاجب منزل الثاني مهزهز براسو ] :

هممم باغية تصدريني زعمة ؟

- سناء[ببرود قا//تل ] :

لا بالعكس ، بغيتي تݣلس ݣلس ماعندي حتى مشكل .. والى كنتي جاي تݣلس غير باش تشوف واش غادي نترتر وانت كاين .. حيت زعمة مبتدأة ، غير كون هاني واخا تݣلس تما حتى لغدا مغاتحرك فيا شعرة ..

- سفيان [تبسم بإستهزاء ] :

وقويصحة مع راسك ..

- سناء [بلامبالاة ] :

لا ماشي قصوحية .. غير كيبان ليك ، غير انا كنجي لبنادم فاص .. مكايعجبنيش الزيݣ زاݣ .. مكنعرفش نكدب ولا نخبي هادشي لي كاين ..

- سفيان [كيسكانيها بعينيه ، حط يديه على الطبلة ونطق بصوتو الرجولي ] :

علاش كنحس بلي ورا هاد الماسك كاين وجه أخور ..

- سناء [ضحكات ] :

لي مالف بكترت الماسكات فحياتو ، كيوليو يبانو ليه كاع الناس لابسين ماسك .. [وقفات هازة وراقها ] سمحليا اسي سفيان .. خاصني نكمل خدمتي ، تخطاتو ومشات للطبلة لوخرا حاطة وراقها دارت الكاسك وكملات التصميم ديالها ..

___________________________

- غادية كتمشى .. كتكتاشف الفيرما ، وقفات عند الإسطبل ديال الخيل .. كيحمقها الخيل كتموت عليه ، كتشوفيه بكل حب .. جاها صوت رجولي وراها :

باين كيعجبك الخيل ..

- مسيرة [شافت فيه بإبتسامة] :

اه بزاف .. عزيز عليا واخا عمري ماجربت ركوب الخيل ...

- جواد : حتى انا مولوع بالخيل ، أول عود ليا كان سميتو nivan ربيتو على يدي لدرجة تصويرتو مزال مرسومة فالبيت ديالي وفالمكتب ، عمري مانسيتو .. توفى هادي 8 سنين .. وهادو لي كيبانو قدامك كلهم الخلف ديالو .. تبغي تجربي تركبي ؟

- مسيرة [بتردد ] :

الصراحة ماعرفتش هههه

- جواد : خايفة ؟

- مسيرة : لا مخايفاش ، غير مترددة وصافي ..

- جاها صوت رجولي أخور من جهتها ليمن :

شنو بان ليك فواحد التحدي صغيور ..

- جواد [شاف فولدو بصرامة ] :

جلال ..

- جلال [مامسوقش ] :

أش ݣلتي ؟

يتبع...