روبي ڤيريدجو الجزء 13

- قد يصنع الصمت مالا يصنعه الكلام ..

وقد يعالج البعد أموراً لم يستطع القرب علاجها...

اذا كانت الريح تتجه ... بعكس أشرعتك

فأخفض أشرعتك ... وإنتظر .. هدوء الريح .. ثم إرفع الأشرعة ... وابحر من جديد .

- فالحياة دروس وعبر ... وخير الناس من تعلم واعتبر .

________________________

- فولاد السعيد .. مجموعين كاملين فدار الحاج ، البنات ب 4 ، إبتسام والحاج ومعزوزة .. ادريس وعباس وسعاد .. ، شي كيشوف فشي .. كون كانو مكايعرفوش مسيرة مزيان ، وعارفين شنو كانت كتقول على الزواج كانو غادي يفرحو .. بحال اي عائلة كتفرح لبنتها ..

- عباس [ بصوتو الوقور ، داير نظاراتو ديال الشوف .. حاط ديه على عكازو وساهي هز عينيه فيها ونطق بكل هدوء ورزانة ] :

أبنتي اش غادي نݣوليك ، انت عارفة مصلاحتك فين كاينة .. انا عمري ݣلت ليك شنو ديري ولا مديريش ، حيت عارف مزيان شنو خارج من يديا .. عارف بناتي مايحطو رجليهم فشي عتبة حتى عارفين ديك العتبة اتكون قدام الربح ولا الخسارة عليهم ..

- إلى ابنتي كتشوفي هاد ولد الناس ايحافظ عليك ويبغيك ، ويصونك انا منزيدك غير الخير ..

- معزوزة [مدورة وجها لجهة الباب ، من تعابير وجها كان باين بلي ماعجبهاش الحال ، ضارت مع كلام ولدها كتخنزر فيه بعينيها المكحلين ، ناطقة ببحة صوت ووقار ] :

هادشي لي قدرك عليه الله تݣولو ، ماحشمتي ماتسحييتي .. انا اسيدي ماموافقاش على هاد الزواج هذا .. انا باغية لبنتي ولد البلاد مغربي قح ، عايش هنا وعارفينو وخابزينو ..

- مسيرة [هزات حجبانها فيها بإستغراب] :

ومالو عصام جاي من تانبوكتو .. راه مغربي من فاس ، غير هو عايش على برا .. ولد الناس ظريف ومخلق بخيرو ، وزايدون انعيش معاه هنا .. مغانمشيش نهاجر ، غير بغيتي ديري العصا فرويضة وصافي ..

- معزوزة [هزهزات براسها ] :

يكون كيما بغا يكون مدخلش ليا انا لخاطري ، خليتي لي حدا عينيك وغادة البراني .. هاهو تبارك الله وصلاة على النبي ولدي جلال على مزيناتو الطولة والقلدة ورجلة ، الى عولتي عليه عرفي راسك معكزة بعكاز صحيح .. كون كنتي لالة ومولاتي كوراك معاه فدار وحدة دابا ..

- مسيرة [بإنفعال] :

مي واش حماقيتي ولا شنو ، أش دخل جلال فالهضرة ، السيد ستاظفنا عندو الله يرحم ليه الوالدين الله يعمر الله يخلف ، وزايدون منصلاح ليه مايصلاح ليا انا وهداك السيد مكنتفاهموش وعمرنا مغانكونو بزوج أمي أحيديها من بالك ..

- معزوزة [خنزرات فيها ] :

لقيتيه ، على مزيناتو راجل ألف وحكة تمناك فين تباني انت كحل منك عين الزين والفورما وشعورات وكولة وتجريدة كي العودات بحالك انت امسمار جحا ..

- مسيرة [ببرود] :

مسمار وكنموت على راسي وكنبغي راسي كيف انا ، راه هو راه هوما الى الف وحدة تمناه الله يعاونو .. لا انا من توبو لا هو من توبي حرمان ربي فاش عدت ليه .. عمري نشوفو ولا يشوفني ولا نكون ليه .. ولا يكون ليا اديريها فبالك امي بلاما تبقاي تحلمي بشي حاجة عمرها مغادي تكون ، وانا عصام عاجبني وهو لي غادي نتزوج بيه ، ارتاحي ونعسي على جنب الراحة ..

- كلامها بنسبة ليهم كان خلاصة الكلام .. مدامها وافقات إلا وراها فعلا باغياه .. دازت ديك العشية هادئة ، وصل الليل من ورا العشا خرجو البنات كيتمشاو حدا الدار ..

- إبتسام [معنقة مسيرة من يدها وبإبتسامة بشوشة على وجها ] :

فرحت ليك أختي والله العظيم ، مبروك عليك والله يكمل عليك بالخير .. إيمتا غايجي يخطبك ؟

- مسيرة [ بإبتسامة هادئة ] :

أمين ياربي ، هاد السيمانة الجايا إن شاء الله ، العقبة ليك ، بشي راجل لي يستاهلك ويكون بيك إن شاء الله ..

- إبتسام [غمضات عينيها وحلاتهم مهزهزة براسها وتنهيدة خارجة ليها من القلب ] :

امييييييييييين اختي من فمك لسيدي ربي ..

- سندس [غمزات صفاء ] :

شفتك اختي طولتي ديك أمين ، وديك التنهيدة لي خارجة ليك من القلب .. هاي هاي هاي باينة كتحبي العفريتة ..

- إبتسام [ بتوتر] :

لالا والله ما هكاك ، غير .. غير قلت امين وصاف

- صفاء [كدور فراسها ] :

امممم غير قلت امين وصاف ، وانت بديتي دخلي وتخرجي فالهضرة .. علينا حنا ولا خرجي من رونضتك شكون هذا واش شيواحد كنعرفوه ..؟؟

- إبتسام [مدورة شعرها ورا ودنيها بتوتر ملحوظ بصوت منخفظ ] :

اويلي دغية دورتوني .. راه مكاين والو ، تسلتات منهم سابقاهم معارفاش بلي بنات عباس الى بغاو يعرفو الحاجة يعرفوها وربي كبير ..

- مسيرة جراتها واقفة قدامها ، بإبتسامة لاعوب ] :

شنو كاين شكون هذا غير دوي ، ياك حنا خواتاتة؟

- إبتسام [بتوتر] :

اصلا هادشي غير تخربيقو، حيت إعجاب من طرف واحد .. هو ݣاعما حاس بيا واش كاينة ولا مكايناش ..

- مسيرة [بإلحاح] :.

وغير دوي ، شكون هذا نلقاو ليه شي حل يدوخو ، يجي طايح على زنافرو ..

- إبتسام [حادرة راسها تنهدات تنهيدة طويلة ، وهزات فيها عينيها بدون مقدمات ] :

خالك ادريس ..

- دازت لحظة صمت بين البنات ، وحدة كتشوف فثانية ..

- سندس [ ملامح الصدمة مزال على وجها ] :.

واش خالي ادريس خالي ادريس واش متأكدة ؟

- إبتسام [ هزهزات براسها ] :

أه علاش مالو ؟

- مسيرة : مامالوش ، ولكن صدمتينا .. هو كبير عليك ، والصراحة زعمة وحدة بحالك متفكرش فيه جاتني عجب ..

- إبتسام [ بإنفعال] :

علاش اختي كيف جاك ، ماشي را/ جل ؟ الحمد لله بدراعو عمري شفت فيه حاجة خايبة واخا حنا تحت سقف واحد .. العين عمرو هزها فيا ، كون شي حد فبلاصتو كون ستغل الفرصة .. يقول هادي بخيرها وخميرها ارا ندور بيها ولكن هو لا ... هادشي لي عجبني فيه ، وهادشي لي مالقيتوش فدوك لي كانو يجيو عند با باغييني ..

- صفاء [ تبسمات ، مدورة راسها بطريقة درامية ] :

وكل عليا اخالي ادريس واجي تشوف شكون كيدافع عليك هاي هاي .. لالا ازغبية طحتي طيحة خايبة نيت .. وشوفي الصراحة خالي أدريس ضريف ودرويش .. حتى حاجة فيه مخايبة كانت فيها حاجة خايبة هي دراعو فنيان ، ولكن منين جينا لهنا تبدل ..

- ولا خدام ولا يصلي من دار الخدمة من الخدمة لدار ، دابا خصاه غير المرا .. وماكبيرش شي كبورية زعمة راه يلاه عندو 43 ..

- إبتسام [ بإبتسامة] :

وانا اختي عندي 36 عام جايين مع بعضياتنا .. [جمعات ضحكتها] ولكن اختي راه هو ݣاعما مسوق .. مكاينش كاع فهاد العالم يفطر يخرج لخدمتو .. يجي مع المغرب .. يدخل ياكول يݣلس معانا شوية يطلع لبيتو ..

- مسيرة [ شافت فخواتاتها كدور فلسانها ، رجعات بعينيها لعند إبتسام ] :

هاد لافير ضربيها على حسابي .. تهناي خرجك السوق انت ..

- سكينة [صغرات عينيها كتحقق فيها مهزهزة براسها ] :

علاش ناوية تاني اديك الهولندية ..

- مسيرة [كضحك بخبث] :

انت غير تفرجي .. الى ماخليتو يخطبها اجي وشمي ليا ليا ..

- ݣالس فبيتو .. عاد خارج من الحمام خدا دوش سخون من ورا نهار ديال العيا فالخدمة .. نشف راسو ولبس كيطمة ديال الدار .. فرش الصلاية وصلا العشا .. خدا القرآن ديالو .. قرا بضع سور .. ، رجع القرآن للبلاصتو بكل روية وهدوء .. هز كفوف يديه كيدعي ..

- يارب يارب تغفر ليا ذنوبي يارب .. يارب تقبل مني وتسمح ليا على أي ذرتو بقصد أو بدون قصد يا رحمان يارحيم .. يارب انا عارف راسي غلطت بزاف .. عارف راسي كنت بعيد على طريقك .. عارف راسي درت حوايج خايبة فحياتي .. يارب تغفرلي انا تايب وطالب السماحة منك يا رؤوف يا رحيم ..

- يارب تيسر أمري وتسهل عليا ، وتقبل مني دعائي .. ياربي تسهل عليا بزوجة صالحة يا رحمان ، ندير وليداتي حتى انا يارب .. [ تدق الباب .. ختم الدعاء ديالو وناض من فوق الصلاية طاويها ، مشا لجهة الباب فتحو ] :

مسيرة دخلي ..

- مسيرة [ كيحساب ليا نعستي .. حتى بان ليا الضو تحت الباب ..

- أدريس : يلاه صليت الله يقبل وبغيت نعس .. ياك لاباس ؟

- مسيرة [ݣلسات على الحاشية ديال النموسية .. اما هو ݣلس على الكرسي ، كيشوف فيها بإستغراب] :

بغيت ندوي معاك فواحد الحاجة اخالي .. وسمعني مزيان وحل معايا ودنيك ..

- ادريس[ غمض عينيه كإشارة على انو تهضر ، وبصوتو الغليض ] :

دوي كنسمعك أبنتي ..

- مسيرة [ بجدية] :

دابا اخالي انت تبارك الله خدام ، وراه غادي فالكبر .. مبانش ليك بلي جا الوقت تزوج ودير دارك او وليداتك ؟

- أدريس [ تنهد ] :

وا انا كرهت .. نهار يسهل الله غادي تيسر الامور من عندو .. الله يلاقينا مع شي بنت الناس لي تبغينا وتقبل علينا

- مسيرة : وخالي حل عينيك .. بنت الناس كاينة راه انت لي معمي وخاصك تحل عينيك ..

- أدريس [صغر عينيه بإستفهام ] :

علامن كدوي ؟

- مسيرة : على بنت خالي محمد .. ابتسام مالك تلقى بحالها ، الزين وتاويل وصواب والاداب ..

- أدريس [بانو ملامح الصدمة على وجهو] :

كتفلاي عليا أمسيرة ، إبتسام تبغيني أنا .. شوف هي فين وانت فين .. وكبر منها انت مسطية ..

- مسيرة [بخبث ] :.

والى قلت ليك بلي هي باغياك وموافقة عليك شنو دير ؟

- أدريس [سكت لثواني ] :

كيفاش ، باش عرفتيها .. كيفاش باغياني واش ݣالت لك شي حاجة ؟

- مسيرة [ بجدية] :

دوينا على زواج ، سولتها لوكان يجيك خالي تقبلي بيها ، قالت لي بالحرف وعلاش مانقبلش أدريس ولد الناس والله يعمرها دار وراجل بدراعو .. نقبل علاش منقبل ..

- أدريس [حدر عينيه ورجع هزهم كيفكر] :

ديك البنت الصراحة .. نقرة صافية سعدات هذا لي غادي يديها .. بنت الناس وديݣودية .. زعمة يبغي الحاج يعطيها لواحد بحالي ..

- مسيرة : مالك اش خاصك .. مايلقاش شي واحد حسن منك لبنتو ، انت ازعم أخالي ، ودوي معاه وبالي قبل لا يطيرو بيها ، وبقا تشوف حال عينيك .. ضرب الحديد ماحدو سخون ..

- أدريس [ بإبتسامة رجولية ] :

لهلا يحاشمنا ياربي ، تهناي اندوي معاه اتفوت الخوطبة ديالك وندوي معاه فهادشي ..

- مسيرة [وقفات وملامح الفرحة باينة على وجها ] :

وهكاك ، مبروك مسبقا .. انا مشيت تصبح على خير ..

- أدريس [عنقها بايس ليها جبهتها] :

تصبحي على خير أبنتي ، الله يكمل عليك ..

- مسيرة [خدات يدو باستها] :

أمين ياربي .. خرجات من عندو مخلية راحة كبيرة فقلبو .. حل السرجم ديال بيتو .. هاز عينيه للسما بإبتسمامة مغمغم :

الحمد لله ياربي ..

- الحيـاة غريبة بزاف .. دائما كتاخود منا بزاف ، ونهار لي كتعطينا كتعطينا بواحد الطريقة غريبة بزاف .. بيدينا نقبلو الهدية ديالها بغرابتها ، ولا نرفضو هاد الهدية ونتسناو واش الحياة تهدينا هدية بحالها فالقريب ولا غادي تعطل علينا ..

- الدار عند الحاج محمد ، الفياق فيها كان بكري ونعاس كان بكري .. جات واحد السيدة عاوناتهم فتخمال ، وفتصاييب ديال الحلوة .. البنات كانو فرحانين للختهم من غير معزوزة لي عاقدة غوباشتها وماعجبهاش الحال ..

- على برا كانو واقفين بزوج حدا طوموبيلتها ، هي مبردة اللعب ولكن هو طالع ليه الدم ..

- كريم [بإنفعال ] :

مسيرة ، انت عجينة يديا هاد ليدين بزوج عاجنينك وخابزينك وعارفينك مزيان علاش مطوية ، مغاتجيش بين ليلة ونهار عرفتي واحد فظرف 4 يام تقبلي تزوجي بيه واش انت لاباس ؟ وزواج ماشي عادي شنو ايخلي هاد خونا يتزوج بيك على الوراق .. هادشي كامل حبا فيك مافهمتش !!؟

- مسيرة [ببرودة] :

انا هاد الزواج مرتاحة فيه ، إنسان غادي يعاوني ويشد بيا .. يوقف معايا ولي خصاتني غادي يكون معايا فيها ، ايفتح ليا المجال لواحد ضومين لي كيعجبني .. يعني بسبابو هو انتبت داتي ونحط سميتي ، ونصايب لامارك ديالي .. عصام ظريف بزاف ولد الناس ، السباب علاش باغي زواج على الوراق .. حيتاش هو حاليا مامستاعدش يربط حياتو مع شي وحدة مدى الحياة ، ماتعرف من هنا للقدام زواجنا يرجع حقيقة كولشي ممكن ..

- كريم [ دوز يديه فشعرو هابط على وجهو جامع فمو بقبضة يديه ] :

لا حول ولا قوة إلا بالله العلي العظيم ، ياربي صبرك وعفوك كيفاش درتي ليها راه مايمكنش نتيق كنعرفك مزيان ... عاجنك واش باغة تجهليني ولا مال ملتك ، مسيرة مسيرة راه راه ، أستغفر الله العظيم ياربي .. انت مامحتاجة لحتى واحد ، وزايدون انا فين مشيت ؟

- مسيرة[ضحكات مقربة منو شادة يديه وسط من يديها ، بصوت هادئ أنثوي ] :

كريم انت دابا داخل على زواج .. خاص تشوف مستقبلك وانا طال زمان ولا قصار ايخصني نتزوج ... وداكشي لي كنتي قلتيلي لقيتو فعصام ، ايوقف معايا حتى نحقق داتي ، خاصك تلاقى معاه ظريف بزااف .. ياك كاتيق فيا وعارفني شنو كنسوى .. ماتخافش عليا اكريم رتاح من جيهتي ، وبلاما تقلق مني .. حيت انا موافقة على هاد الزواج ومغاديش نتراجع عليه ..

- كريم [بقا مدة وهو ساكت تنهد تنهيدة طويلة ، هزهز براسو ببرود ] :

ديري لي عجبك وانا نحفي الحجرة مغاتسنطيش ليا ، مامتأكدش واش غانحضر لهاد الخطبة ولالا غانحاول ..

- مسيرة [صغرات عينيها ] :.

غادي تجي مايمكنش تخلا عليا ، انت خويا لي عندي مغاتخليش ختك ، وعفاك قضية زواج على الوراق تبقى بيناتنا مابغيت حد يعرف ..

- كريم هزهز براسو تراجع خطوة للور راكب فطوموبيلتو .. ديمارا ومشا ، تنفسات بجهد مدوزة يدها على شعرها وعلى وجها بحال كانت فصراع وصراع كبير ...

_____________________

- على عكسهم هوما ، كانت لابسة عادي ... سروال ديال التوب فضفاض طويل واسع ، مع شوميز طويلة فنفس اللون .. أما شعرها جمعاتو على شكل سفنجة ، وجها خلاتو عادي بلا نقطة ديال المكياج .. مع حلقات صغار على شكل بولات مزينين ودنيها ..

- سعاد [بعدم رضى ] :

البنات نهار الخطبة ديالهم كيلبسو التقليدي باش يطيحو عليهم السر ، وأنت لابسة ليا هادشي ..

- صفاء : ماما هادشي كان شحال هذا خليها على راحتها ...

- سعاد [خنزرات فيها ] :

انت خليك مزيغاها .. وزيدي ليها فيهم فيخرات ..

- مسيرة [بهدوء] :

ماما هدا ماشي عرس عادي .. تعارف وصافي لا تركاب خواتم لا عقد ..

- دقات عليهم إبتسام حالة الباب :

العربس وصل ..

- مجموعين فالصالة .. كولشي كانو حتى كريم .. عصام كانو مݣلسينو الوسط .. كان بكامل أناقتو المعهودة ، ݣالس والإبتسامة على وجهو منزل راسو ..

- عباس [بصوت وقور وإبتسامة ] :

مرحبا بيك أولدي .. وعلى سلامتك كيداز السفر ؟

- عصام [بصوت رجولي] :

الحمد لله أعمي داز مزيان لهلا يخطيك ..

- الحاج : الدار دارك اولدي مرحبا بيك ..

- عصام [بإبتسامة] :

الله يكبر بيك ..[شاف فمسيرة لي كانت كتشوف فيه ، حركات ليه حجبانها بمعنى دوي ، حدر راسو وحنحن ] المهم كيف ݣالت ليكم مسيرة تلاݣيت بيها فالامارات .. داكشي باش بغيت نقصد الباب ، مابغيتش نطول فالهضرة .. انا يتيم ماعندي حد كيف شفتو جيت اليوم بوحدي ، والديا توفاو هادي 6 سنين فأكسيدو .. ومن نعار توفاو عمري دخلت المغرب ..

- مسيرة غادي نديرها فعينيا لي تقالت عليها خفافت عليا ، ناوي إن شاء الله ناخود دار فكازا وهكا تبقى فالمغرب وقريبة ليكم ... وماعنديش مشكي يسكنو معاها خواتاتها هكا اتكون الدار عامرة عليها ..

- انا كنسافر بزاف على ود الخدمة .. وهكا انرتاح من جيهتها ..

- كريم [ببرود] :

مابانش ليك زربتي شوية اسي عصام ، عرفتيها فظرف 4 يام وقررتي تزوج بيها .. ماسولتي عليها ماعرفتي كراطير ديالها كيف داير ؟

- عصام [بنفس الابتسامة الرجولية والبحة الهادئة لي فصوتو ] :

انا لي كيهمني راه عرفتو وعاوداتو ليا مسيرة .. مكايهمني حتى حاجة أخرى ، لي كيهم هو دابا الماضي كيبقى خاص بداك الانسان ، الوقت المهم هو فاش عرفتي داك الانسان .. ومسيرة ماشفت منها الخير ، والديا قبل لا يتفاو علموني حاجة وحدة عمري نتفلا على شي بنت الناس ، والى عجباتني شي بنت نقصد الباب نيشان ..

- عباس [هزهز براسو ] :

الله يرضي عليك أولدي ..

- مسيرة [تدخلات باش تلطف الجو] :

عصام ، كريم بحال خويا لا بغيت نقول كريم خويا عشرة ديال 10 سنين كان معايا فالفرح والقرح ..

- كريم [بتهديد وتشديد على كل كلمة ] :

ماشي غير كان ومزال انبقى حياتي كاملة [شاف فعصام] لي مسني فمسيرة بحال الى مسني فعينيا ولي أداها ولا فكر يأديها نحفر قبرو بيدي ونمشي عليه الحبس ، عندي هانية انشوفها فرحانة ..

- عصام [بكل هدوء] :

وحنى انا غادي نديرها فعينيا ، ومايخصها حنى خير وغانكون معاها فالحارة والحلوة .. ولي بغاتها تحضر واخا تكون فينما بغات تكون ..

- عباس : ايوا اسيادنا نسولو العروسة ، أش بان ليك ابنتي ؟

- معزوزة [عاقدة غوباشتها ، بصوتها الباح حاط يدها على خدها ] :

العروسة هي لي جايباه وكتسولها أش بان ليك .. خاصنا نسولوك تا .. اما هي راه عاجبها الحال ..

- سعاد [هزات حجبانها من تحت سنانها ناطقة] :

خالتــي ..

- معزوزة : بعدي مني خالتي ولا جدة ..

- سندس [وقفات] :

كيبان ليا كولشي موافق [رورورورورورورورورورورورويييييييييييييي] اللولة ليها وثانية لسعاد وثالثة لإبتسام ..

- فالفيلا ديال كازا .. واقف فالكوزينة ، داير الطباية .. يديه المعرقين كيبينو على قوتو .. مزينين زوج صباعو الأولين بزوج خواتم من صنع ديالو ، مع ݣورميط رجولي ثقيل .. لابس سروال منزلي بيض واسع مع تريكو مطلع ليه يديه مبين على الشعيرات الكتار الرطبين لي فيديه ، شاد الجن/وي بكل إحترافية كيقطع فالبصلة .. دارها فالمقلة كيشحرها ..

- من حركاتو كيبان إحترافي فطبخ بحال شي شاف كويزين عندو سنوات من الخبرة .. غمغم بصوت رجولي :

شفتك اليوم ماتعشيتيش مع حب قلبك ؟

- أمينة [كتلعب برجليها ساهية ] :

ماحضرش هنا كاين فولاد السعيد ، اليوم الخطبة ديال مسيرة ..

- جلال [بصوت مرتافع معبر على الغضب ديالو ] :

المرض .. هز كلينيكس حداه لاويه على صبعو لي تضرب بالموس ..

- أمينة [وقفات جات عندو مدوراه بإستفسار] :

مالك ؟ ضربتي صبعك انشوف ..

- جلال [ببرود وعدم إهتمام ] :

ماشي شيحاجة كتوقع .. هي صافي تخطبات شكون هدا لي داها ؟

- أمينة : شي واحد عندو شي ماركة ديال الميكاپ .. شافها فالامارات وتقدم ليها .. مغربي ولكن عايش فإيطاليا ..

- جلال [ببرود وملامح جامدة .. عقلو مشا نهار باسها ، تبسم نص تبسيمة مهزهز براسو مكمل على لي فيديه ] :

مزيان مبروك عليها ..

- أمينة : وانت أخويا إيمتا ناوي ؟

- جلال [ببحتو الرجولية غمغم هاز حاجبو بطريقة خطيرة ] :

نهار ينوي هارون غانوي انا ..

- أمينة [بإستسلام] :

مغانقول والو اخويا أنت تعرف .. واش هادشي غاتعطل فيه فيا الجوع ..

- جلال [شاف فيها شعيرات من شعرو نازلين على جبهتو مزينين وجهو لي كانت فيه وسامة خطيرة ] :

الطياب بحالو بحال زوج ديال الناس ، الى مكانش بيناتهم بضاض كبير صعيب ينجح ..

- أمينة : انمشي ناخود حلوة من الثلاجة بينما كملتي ..

- خلاتو يكمل شغالو هزات حلوة من الثلاجة ومشات خرجات لجردة تاكلها فراحتها مستمتعة بنسيم البحر القريب وريحتو ..

_________________________

- شادة الطريق لكازا ، وكتهضر فتيليفون :

شوف ليا على دوقك المهم يكون رقم 18 .. عصام والله حتى عندي الخدمة لراسي ، عندنا واحد العرس انا ونسيم فهاد السيمانة ، راه الوقت مزير عندي ، وعاد انت زربتي عليا بالعرس لي باغي دير انا بغيت احفلة صغيرة على قدي ، لاش ديك هايلالة كلها ..

- كانت كاسمع كلامو ولكن تصميمها كان هوهو :

لا مابغيت مابغيت لا قاعة لا قاعات الله يعطيك الستر .. نتكاتبو وغانلبس تكشيطة وحدة والله يجعل البركة عفاك ، انا راه ماعنديش مع داكشي ديال زطوطوطو .. خفيف الظريف ولا يعمر الله يخلف الى بغيتي دير ليا خاطري ..

- [غمضات عينيها مزيرة عليهم ] :

الحوايج غادي نخرج انا والبنات ، واخا واخا صافي كون هاني إن شاء الله .. لالا مغادة لا لشهر عسل لا غيرو ، من ورا الزواج نيشان عندي الباك راه قلتها ليك خاصني ندير جهدي باش نشدو ضروري ..

- صافي إن شاء الله حتى انت تهلا فراسك بزاف .. ، قطعات الاتصال تنهدات تنهيظة طويلة .. سكينة شافت فيها وفالبنات .. باغية تهضر وشيحاجة كتشدها ، قررات تسكت حتى يوصلو بدار ..

- فدار .. ݣالسين البنات كل وحدة فيهم كتخمم ..

- سندس : عندك الصح اسكينة ، فكرت فيها السيدة طافية ، مافرحاناش ، الى كانت مراضياش توقف هاد الزواج علاش تبزز على راسها ..

- سكينة : مسيرة عارفة راسها مزيان .. وانت عارفاها راسها قاصح .. مغاتراجعش ، ماعندك مديري ليها أختي بغاتو الله يسخر ليها معاه .. حنا فعلا بغيناها تزوج بيه ، حيت زواج مزيان فصالح ديالها ، ولكن خلينا ليها الاختيار ، وهي وافقات عليه ..

- صفاء : أنا كون كنت بلاصتها غادي نوافق الصراحة .. متنساوش لي داز عليها فزواجها الأول ، هذا هو السبب لي نخليها باردة فهاد الزواج .. خاص نكونو معاها ونوقفو معاها ..

- سندس [تنهدات تنهيدة طويلة] :

الله يدير لي فيها الخير ياربي ..

_______________________

- فولاد السعيد .. وقدام واحد الجنان واقف الحاج وأدريس ..

- الحاج : هانا أولدي ، شنو بغيتي تخبرني ݣوليا ..

- أدريس [حنحن ، مدوز يدو على راسو .. بتوتر ورزانة ] :

الحاج .. انا عاشرتيني فهاد المدة ، وعرفتيني مزيان .. من الخدمة لدار ومن الدار للخدمة .. ياه شحال هدا الصراحة مكانتش بحال هكا ، الدراع فاني وجهد الخدمة مكانش .. ولكن دابا تبدلات القضية .. الحمد لله وليت بخدمتي ومتبع طريق الله سبحانه ..

- الحاج [ هزهز براسو ] :

الحمد لله اولدي ، طريق الله مزيانة ومكاينش بحالها .. وسعدات لي قريب من الله ومتبع طريقو ..

- أدريس :

سي الحاج .. انا باغي نكمل ديني الى يسر الله وسهل ، داكشي باش جيتك طالب راغب فيد بنتك إبتسام الى قبلتو عليا ورضيتو ..

- الحاج [تفاجئ] :

الصراحة فاجئتيني .. والله ماعرفت منݣوليك أولدي ، انا مانلكاش ماحسن منك ، ولكن خليني نسول إبتسام ونرض عليك أولدي .. يكون خير .

- أدريس : ماقلتي عيب الحاج .. لهلا يحاشمنا ياربي .

- الحاج : أمين اولدي أمييين ..

____________________________

- دازو الأيام كتجري بشن توجاد وبين وقت مسيرة لي ولا ضيق مابقاش عندها الوقت نهائيا حتى باش تحك راسها .. حتى دوا خواتاتها لي ولاو كيفكروها فيه ... الأيام لي كتبغيها دوز دغية هي لي كطول ، والايام لي كتبغيها الطول هي لي كدوز بحال الصاروخ .. وصل النهار لي كان قبل العقد ..

- قرار قررراتو وكانت رافضة تراجع عليه .. مابغاتش تحني ..

- سعاد [بإنفعال] :

وراه الحماق هذا انا عمري شفت شي عروسة ، بحالك .. الحمام ومتبغيتيش تمشي ليه مدوشة فدار سكتنا ، ولكن الحنة غير صبع راه البهلان هدا وخرجان العقل ..

- مسيرة [بإصرار ] :

ماما راه قسما بالله مغانديرها ولا غادي نديرها ، راني دويت معاكم انا مابغيتش نحني اعباد الله ... نهار تزوجت بجلال راه شفتي شنو وقع ، وجدت وحنيت وغنيت فالاخير شنو كولشي تضرب فزيرو انا حالفة مغانحني مغاندني ..

- صفاء [بهدوء] :

بغيتي تقولي فاش تزوجتي بجمال !!

- مسيرة : علاش انا شنو قلت ؟

- سندس : قلتي نهار تزوجت بجلال ؟

- مسيرة [بعدم إهتمام] :

غاتكونو سمعتو غلط ، شتكم كلكم وليتو كتهترتو بهاد جلال واش كلا ليكم العقل ولا شنو .. [ شافت فسعاد ] ماما بغيتي تنفشي نقشي انت ونقشو كاملين وانا خليوني على خاطري .. راه خاص نرتاح غدا غادي نتزوج وقيلة .. خليت ليكم الراحة تصبحو على خير .. طلعات مخلياهم غير كيشوفو ..

- معزوزة [مغوبشة ] :

هادي بيها شيحاجة تݣولو ليا حتى تعياو ..

- سعاد [نزلات يديها بإستسلام ] :

انا مابقيت فاهمة والو هذا لله .. عمري شفت شي زواج بحال هذا هي مشات تنعس وحنا خلاتنا مشطونين ، الله يهديها الله يهديها ..

__________________

- فبيت إبتسام .. ݣالسة وحادرة راسها ، قلبها كيضرب بجهد ويديها كيترعدو عليها مقاداش طلع راسها وتشوف فباها لي كيسولها .. توترها عاكس الفرحة لي كتحس بيها الداخل ..

- الحاج [ بجدية] :

أش ݣلتي ابنتي ، شنو نݣول لسيد .. الله يرضي عليك .. من ݣبيل وانا كنتسنى جوابك ريحيني الله يرضي على بنتي ..

- إبتسام [علات فيه راسها وبإبتسامة حركات راسها بالإيجاب] :

انا قابلة أبا ..

- لا

تُوجَد

قوة في الأرضِ تجعلُنِي

أحِبُّ رغمًا عنِّي مَا لا أُحِبُّ..،

وأرضىٰ رغمًا عنِّي مَا لا أرضىٰ..،

وهذا هو المَخبأ الوحِيد الذي تبَقَّىٰ لي ..!!

أمَّابَعد

الحُريَّة

ليسَت أن تفعلَ مَا تُريد..،

وإنَّما الحُريَّة ألَّا تفعلُ مَا لا تُرِيد..،

ومَا بينهما الفرقُ گبير ..

___________________

- التحت كتسمع الموسيقى بحال الطرب الاندلسي ، ريحة البخور معطرة الدار او واصلة حتى للفوقي ، كانت ݣالية فالبيت لابسة پينوار ديال الستان .. فالبيض مكتوبة فيه عروس ، شعرها مطلوق ومصايب سامپل مع الݣصة وبونضو فالبيض فيه وريدات .. مكياج خفيف وفنفس الوقت راقي بين ملامح وعينيها البندقية ..

- فوق النموسية محطوطة تكشيطة فالبيض عصرية بحال شكل كسوة .. مع صباط عالي فالبيض .. ݣالسة مقابلة مع المرايا وساهية ، مخلية الميكاب أرتيست كتقاد ليها روتوشات لوجها ، سالات وشافت فيها بإبتسامة ناطقة برقة :

جيتي فنة ماشاء الله ، مبروك عليك ..

- مسيرة [تنهدات تنهيدة طويلة ، هزات فيها عينيها هزهزات براسها بتثاقل] :

ربي يخليك شكرا .. رجعات لنفس الجمود ، تدق الباب وتحل . دخلات سكينة كطل لابسة قفطان فتيركواز ، وشعرها جامعاه بمشطة بينات عنقها ، اما المكياج كتفات بتكخيلة مبينة عينيها الفيروزية ..

- ساليتو ؟

- مسيرة [شافت فيها وهزهزات براسها ] :

دخلي .. دخلات كتشوف فمسيرة بكل حب ، جاتها من اللور وعنقاتها ، طابع قبلة حارة على خدها ناطقة بكل حنان ودفىء :

مال الزين ديالي مقلق ، عاودي ليا شنو كاين ؟ شافت فيهم البنت تبسمات ليهم وخرجات مخلياهم بزوج ..

- مسيرة [تنهدات تنهيدة طويلة ، حاكة يدها على قلبها ] :

ماعرفتش اسكينة وحق الله القسم ، ماعرفتش مالي حاسة براسي ماشيش نورمال علاش الله أعلم ..

- حطات الكرسي قبالتها شادة ليها فيديها ..

سكينة : ياك انت متأكدة من هاد الزواج ، علاش كتحسي براسك مامرتاحاش ؟

- مسيرة : والله ماعرفت بالله ، هادشي لي كنحس بيه فشكل مافهمتوش ..

- سكينة [سكتات حدرات عينيها كتصارع الكلام لي بغات تقول زلكن كان خاصها تخرجو وترتاح ، هزات عينيها وبجدية وهدوء] :.

مسيرة ، انا عارفة غادي تقولي ليا حماقيت ومغاتبغيش تقبلي الكلام لي غانقوليك .. ولكن مرات كنقولو شي حوايج وكنطقو بيهم وكيكونو زلة لسان ، معارفينش بلي راه حنا نطقنا بحاجة كاينة فالعقل الباطني ديالنا ، ولي عقلنا الداخلي كيفكر فيها ورافض يخرجها لبرا .. وهادشي وقع ليك انت لبارح ..

- مسيرة [عقدات غوباشتها ] :.

علاياش كدوي ؟

- سكينة [بلعات ريقها وشافت فيها كترمش ، دورات البؤبؤ ديال عينيها يمين وشمال ناطقة ] :

الى مخفت نكذب ولي كنظن بلي انت ، [بلعات ريقها] بلي انت كتبغي جلال ..

- مسيرة [هزات حجبانها بصدمة عقلها ماستوعب لا بل عقلها ماتقبلش هادشي ] :

لالا انت صافي تسطيتي مافيهاش ، واش من نيتك أسكينة .. نبغي جلال ، اش وقع بيني وبينو باش نبغيه والو الى جينا نفكرو من نهار سكنا عندو وحنا فالمدابزة .. واش انا نبغي واحد حك ليا الفلفلة الحارة لفمي ، لا انت راه وقيلة هبلتي مافيهاش شك ..

- سكينة [بكل هدوء] :

يقدر دماغك رافض المشاعر لي فقلبك ، ويقدر دماغك رافض انو قلبك رجع بغا حيت عطيتي عهد لراسك عمرك تبغي شي واحد .. من لي وقع ليك مع جلال ، واش عقلتي نهار دافع عليك فالختانة ، او وصلك لدار .. عقلتي فاش عاودتي ليه علاش اتعاودي ليه وانت مكتعاوديش للبراني ، ياك بفمك قلتي ليا بلي انت تصرفاتك باردة من جهة اي واحد دار ليك شيحاجة ..

- مدام انت باردة من جيهتو علاش تعاودي ليه الدقة ، ودرتي ليه ديك الحالة لشفايفو .. علاش نهار باسك اول مرة ماعطيتيه علاش كيقلب وهزيتي حوايجك ومشيتي بحالك ، كان ممكن تمشي عند كريم وتکلسي عندو وعمرك ترجعي تشوفي كمارة جلال ..

- مسيرة [بإنفعال] :

انت .. [قاطعاتها سكينة ] خليني ندوي عفاك حتى نكمل ..

- [تنهدات وشافت فيها بجدية شادة على يديها لي كانو باردين ] :

شفتي انت بغيتي جلال من اول نهار شفتيه .. شفتي اول نهار وريتو ليك او حطيت ليك ݣاع المعلومات عليه بغيتيه ، حيت كنقسم بالله كونما بغيتيه ماكنتيش اتغامري وتلوحي راسك وسط طوموبيلتو فنصاصات الليل ، شادة الطريق من الجديدة لكازا ..

- متقوليش ليا لا تربيتي وبا قاليا الى شفتي شي حد محتاج عاونيه .. حيت مسيرة لي كنعرف وعرفتها فالحبس ، علماتو فتيليفون دورك فداك الوقت سالة ولي عليك راه درتيه ، انت فالداخل ديالك راه كنتي بغيتيه ، ولكن عقلك كان رافض وعقلك كان كيعطي إشارات دفاعية .. فينما تجمعتي معاه كنتي كتهاجميه كنتي كتحمني راسك باش متزيديش تبغيه ، كنتي باغة تبيني راسك بلي مكتحمليهش ..

- وحتى هاد الزواج ماشي غير على ود مستقبلك ، حيت باغية قلبك يموت .. وتبني صور عالي عليه باش تحمي راسك باش متأدايش ، حيت انت عارفة بلي هاد الحب من طرف واحد عارفة بلي جلال مكايحس من جيهتك بحتى حاجة .. خايفة تعلقي بحاجة ماشي ديالك ، ودليل لبارح لي نطقتي إسمو بلاما تحسي ، حيت كون كنتي مكتحسي بوالو من جيهتو مكنتيش اتغلطي وتنطقي بسميتو ..

- وحتى خالتي معزوزة فاش دكراتو ليك ، كنتي اتجاوبيها ببرودة وبضحك واللعب كيفما مالفة ، فين عمرك غوتي على خالتي ولا رفعتي صوتك عليها ، كتعايرك ومتخلي فيك غير لي نسات .. وكنتي تموتي بضحك ، كون شفتي راسك كيفاش نفاعلتي عليها البارح اتعرفي كلامي صحيح .. وهادشي ماشي عيب من حقك ، حيت مرات قلبنا كيطيح فالانسان الغلط .. واخا نكونو قويين ، مكايعنيش اننا كنغلطو ..

- [وقفات مطبطبة على كتاف مسيرة ] :

عصام راه وصل .. ومعاه واحد صاحبو ، والعدول راه التحت كيتسنى .. والناس كاينين وخالتي نجية وعفاف حتى هي ، امينة وكريم حتى هوما راه جاو بقيتي غير أنت ، ماتعطليش .. [باست ليها راسها وخرجات ] ..

- خلاتها غارقة فدوامة ماعندها ساس ولا راس .. عينيها ساهيين فنقطة وحدة .. ولي هي خيال وجهو ، عينيه العنكبوتية .. ملامحو الحادة هيبتو رجولتو ، صباعها مشات بلاما تحس مشاو لشفايفها .. تفكرات شفايفو ، بلعات ريقها كتحرك راسها بنفي رافضة رافضة تقبل هادشي لي قالت ليها سكينة .. وقفات محيدة داك الپينوار لبسات قفطانها والحزام ، خشات رجليها فصباط ورشات من ريحتها ..

- فراسها حاجة وحدة ، اتنزل واتوري لسكينة بلي راها غالكة وبلي مكتحس بوالو من جهة جلال ، وبلي هو براني بنسبة ليها مكايعني ليها والو ..

________________________

- فالتحت الإحتفالات بداو ، فصالون الكبير .. ݣالس بكل اناقة حداه الشخص الوحيد لي قريب ليه لي فيه خوه باه وكولشي ، دراعو الايمن سفيان .. لي من ملامح وجهو باين مراضيش على هاد الزواج .. حيت عندو فكرة وحدة مستحيل وحدة تقبل بواحد وهي عارفاه مغايحركش انوثتها ..

- الطبالي عامرين أشكال وانواع ديال الحلويات .. البنات غاديين جايين ، عباس لابس جلابة هو والحاج وݣالسين كيداكرو مع عصام .. حتى تسمعات الصلاة على النبي ، مشاو البنات كيجريو هابطين مع مسيرة .. سعاد كتصلي على النبي ، اما معزوزة شادة القنت وساكتة مكدويش ، كانت كاتبان بحال شي أميرة ..

- نزلوها بصلاة على النبي وزغاريت .. دور عينيه للباب ديال الصلاة مترقب الدخول ديالها .. شافها كريم جايا ناض وقف مشا لعندها ، خداها من يدها وهو لي دخل بيها لصالون ، ناضت سفيان مهزهز براسو ليها مع إبتسامة صفرة .. مبعد ݣالس بعيد مخلي ليها البلاصة حدا عصام ..

- خواتاتها لي كل وحدة فيهم كانت لابسة قفطان خفيف ، سندس فالحمر جاي مع بيوضيتها ، وصفاء فالكحل .. أمينة كانت بكامل أناقتها بقفطان عصلي فالموڤ ..

- العدول [فتح الكتاب] :

السيادنا نبداو على بركة الله .. اليوم تجمعنا فهاد المجمع الجميل ، باش نحمعو بين زوج ديال الناس اللهم بارك لهما وبارك عليهما بالخير .. سي عصام لاكارت ناسيونال ديالك، [مد ليه عصام لاكارت ديالو ] لاكارط ديال الاب وديال العروس .. مد ليه عباس لاكارط ديالو ولاكارط ديال مسيرة ..

- بدا العدول كيكتب وهو ينطق :

هل العروس توصلت بصداقها ..

- عصام [خدا واحد الجوا ومدو ليها ] :

هاهو ..

- العدول [بتساؤل] :

شخال نحطو فصداق اولدي ؟

- عصام : 10 ديال المليون ، واخا فلوس الدنيا كامل مايحيوش فحقها .. بانت للدهشة على وجوه المعروضين ، وعلى وجه مسيرة لي هزهزات ليه براسها بمعنى لا .. ولكن ماعطاش للرفض ديالها أهمية ، معارفاش بلي لي فراسو فراسو ..

- العدول [كمل الكتابة ديالو وجا وقت السؤال ] :

بنتي قابلة بعصام البشير يكون راجلك ، مامضغزطة مابزز عليك ، عندك شي شروط ] ..

- مسيرة [تنهدات تنهيدة طويلة بالعة ريقها ] :

أه قابلة ، الشروط ديالي هو نكمل قرايتي ..

- عصام [بلاما يتسناه يسول] :

وانا قابل هاد الشروط ..

- كمل العدول ، وجا وقت يسينيو ، سينا عباس وسينا عصام بكل فرح ، وجا وقتها لي غير شداتو الستيلو بردو عليها يديها وجاتها الرعدة ، بلعات ريقها وسنات مرجعة ليه الكتاب وستيلو ..

- العدول [بإبتسامة ] :

مبروك عليكم برفاه والبنين إن شاء الله ..

- فتح الباب ودخل ، دخلات تبعاتو .. دورات راسها فدار .. مكاننش كبيرة بزاف ، ولكن كانت زوينة راقية بديكورها الراقي والالوان لي كيعجبوها التيركواز لي كيحسسها بالراحة ..

- عصام [بإبتسامة ] :

كيجاتك ؟

- مسيرة [تنهدات تنهيدة طويلة ] :

زوينة الصراحة ..

- عصام : اجي معايا نوريك بيتك ، تبعاتو طالعين مع الدروج .. الفيلا كانت مصبوغة بالبيض ، كتخليك تحشي براحة ، فتح اول بيت ، كان الفراش فيه بالݣري والغوز ..

عصام : هذا بيت صفاء .. بخطوات قليلة حل البيت لاخور ، كانت فراشو فتيركواز ، شاف فيها بنفس الإبتسامة ] هذا البيت ديال سكينة .. زاد بخطوات قليلة وفتح باب واحد البيت لي فراشو كان فلونوج ] هذا بيت سندس ..

- اخر بيت فتح كان كبر منهم بشوي ، فراشو كان فالموف ، فيه بالكو ، وماريو وكوافوزات فالبيض .. شاف فيها وعلى وجهو نفس الابتسامة ] هذا بيتك أنت .. وبيتي انا فالكولوار لاخور .. الكوزينة كاينة التحت ، فيها ݣاع داكشي لي بغيتي ، من بعد وختاري شي وحدة لي تكون تقة لي تقوم بشغال الدار ، انا هادشي مكنعرفش ليه انت مولات الدار دابا ..

- رتاحي باينة فيك عيانة ، العشية غانتعشاو على برا .. باغي ندوي معاك فشي حوايج ..

- مسيرة [ وقفاتو] :

عصام ، الفلوس لي عطيتيني فالصداق راه بزاف ، كان خاص تحطها غير فالعقد وحتى دابا راه مغاديش نشدهم ...

- عصام [ بصوتو الرجولي ] :

الى ماشديتيه صدقيه ، باش يرجع لجيبي عمرها مغادي تكون غير ديريها فبالك .. انا غادي نخرج عندي شي شغل خاصني نطرقو رتاحي .. [ باس ليها راسها ومشا ] ..

- دورات راسها فالبيت ، خرجات منو كدور فكل بلاصة فدار ، مشات لبيتو لي كان عندو طابع رجولي ، مستف حوايجو وروايحو .. خرجات من بيتو .. نزلات لتحت ، خرجات لجردة لي كانت صغيرة .. كدور فيها ، رجعات للدار وبضبط للكوزينة ، ضارت فيها متنكرش كولشي كان زوين واي وحدة فبلاصتها كانت غادي تكون فرحانة وطايرة بالفرحة ..

- ولكن هي كتحس بهاد شي بارد ، ماعندو لا طعم لا لون لا والو ، كتحس بواحد البرود باغية تغوت بأعلى صوتها ، بدا تيليفونها كيسوني ، هزاتو كان نسيم .. فتحات الخط ودارت مكبر الصوت :

ألو ..

- نسيم [بتأسف] :

عارف راسي وبلتها معاك ، ولكن راكي عارفة الخدمة .. السفرة جاتني على غفلة ومكانش خاصني ناجلها ، مبروك عليك العزيزة ..

- مسيرة [تبسمات ] :

ترضها ليا فساعة الخير .. الله يبارك فيك ، سارة حداك ؟

- نسيم : لا فدوش .. كادوك عندي يالالة تهناي ، كنت باغي نكون ونغني ليك فعرس ولكن بتعويضة إن شاء الله ..

- مسيرة : إن شاء الله ، كاين شي جديد ولا والو ؟

- نسيم : فالقريب ، نجي وندويو ، يلاه سيري تهلاي فراسك ..

- مسيرة : حتى انت وسلم على سارة .. قطعات معاه الخط ، بان ليها واحد الكرسي مشات ݣلسات فيه ، بقات مدة وهي ݣالسة ، وبدون سابق إنذار وقفات ، غاديين بيها رجليها للجردة .. واقفة قدام لاپيسين وعقلها مرفوع .. زادت خطوة للقدام ، واقفة كتشوف فالما لي كيبري تحت الشمس ديال النهار لي بدات كترخي خيوطها ، غمضات عينيها وتلاحت وسط الما البارد لي حسات بيه برد عليها وعلى عقلها وقلبها لي كيخبطو ..

_________________________

- ݣالسين فمطعم راقي .. كيتعشاو ، كانت كتحاول تعامل عادي بحال الى معشية مع شي صديق كتهز يدها وخاتمها ديال الزواج لي ماختارتوش كيلمع ..

- عصام [جبد بواطة وحطها قدامها ، عينيها مشاو ليها ، ورجعو ليه هزهزات راسها بمعنى شنو ..] :

فتحيه .. حطات الفرشيط لي كتاكل بيه الݣرتان من يديها .. هزات البواطة وحلاتها شافت فيه وفالبواطة مخرجة منها سوارت بإستفسار :

ديالاش هادو ؟

- عصام [بإبتسامة وجدية ] :

هادو السوارت ديال المݣازاة ديالك ، فين غادي تبداي مشروعك والبراند ديالك إن شاء الله ..

- مسيرة [تصدمات مافهمات والو ] :

كدوي من نيتك ، كيفاش المݣازة ديالي .. ياك قلتي غادي نخدم معاك مافهمتش !!

- عصام : ماعندك فاش تخدمي معايا ، انا عندي بزاف ديال الناس خدامين عندي ، مانقبلش مرتي تخدم عندي .. مرتي خاصها تخدم عند راسها ..

- وديجا ݣلت ليك انوقف معاك حتى توصلي لداكشي لي بغيتي ، وهادي اول حاجة .. المݣازة زوينة غاتعجبك .. محهزة خاصها غير انت والبنات لي غادي يخدمو معاك ..

- مسيرة [ بإستغراب] :

من إيمتا هادشي ، كيفاش حتى وجدتيها وقاديتيها مافهمتش ؟

- عصام [رجع كياكول] :

الفلوس كتحل ليك الطريق فالبحر .. خاصك غير حرك جيبك كولشي كيسهال .. غدا نمشيو انا وياك نشوفوها والى بغيتي دابا نيت ماعنديش موشكيل ..

- مسيرة [عينيها كانو كيبريو البكية شداها غير بزز] :

شكرا بزاف أعصام ، والله العظيم ماعرفت منقول هادشي كثير لي درتي معايا ، عمر شي حد دار معايا بحال هك لا كاين كريم هههه وعاد انت ..

- عصام [بإبتسامة ] :

حنا قبل منكونو مزوجين حنا صحاب ، وغادي نبقاو صحاب .. وفينما حتاجيتيني غادي تلقايني ، حاجة وحدة لي مكنتعاتقش فيها ، هو الخدمة .. بغيتك تكوني حارة ، وتخلي بصمتك فسوق ، تكوني مراة حرة وقادة ويعول عليها الواحد .. بغيتك فظرف عام ، عام امسيرة عندك تحدي فعام .. تخلي ݣاع الناس يدويو عليك ..

- مسيرة [بإبتسامة ] :

كون هاني من هاد النحية ، خاف على راسك مني ، قريب سميتي غادي تزاحم سميتك ..

- عصام [ضحك ضحكة رجولية ] :

اهاه دابا نشوفو ا donna d'affari [سيدة اعمال بالإيطالية ] ..

- مسيرة [صغرات عينيها بإستفسار] :

شنو كتعني زعمة ؟

- عصام [كيضحك] :

هي سيدة اعمال بالطاليانية .. [سكت لبرهة .. خشا دغمة ففمو وشاف فيها ] شنو غادي تسمي البراند ديالك ؟

- مسيرة [ كتمدغ .. سرطات دغمتها ونطقات ولمعة غريبة فعينيها ] :

RUBY VIRIDJO ..

- عصام [ بإستغراب] :

اش هاد السمية الغريبة علاش زعمة ؟ شنو السر ديالها ؟

- مسيرة [ ضحكات ] :

انا غادي نعاود ليك ..

- عاودات ليه كولشي من الاول حتى للاخير بلاما تسكت .. كان غادي معاها فكل كلمة قالتها .. فلحظة حبس ، جمع يديه عندو كيسمع ليها بتمعن ، لمعان خطير كان فعينيه .. فكل مرة كدكر نفس الإسم ، صغر عينيه مراقبها مراقب ملامحها وكلامها ، كيفاش كانت كتدوي عليه بواحد الطريقة فشكل ، من كلامها كتبين قداش مكتحملوش ، ولكن ملامحها وعينيها كيقولو العكس ..

- مسيرة : ناري يا عصام عرفتي راه كان كيركب فيا السكر وحق الله العظيم .. شحال عاجبو راسو وناري ..

- وتقول واش هو لي مالك هاد الدنيا ، أحسن حاجة وقعات لينا هي مي معزوزة فاش تزوجات وخوينا ديك الفيلا ، ومابقيتش كنشوفو ، فينما كنت كنتلاقى معاه ضروري يحشي لي الهضرة ..

- ولكن بيناتنا أنا السبب ، عمري فحياتي ندمت على شيحاجة حتى لنهار لي ندمت فيه علاش عتقتو ومانو كيقولوها ليا خواتاتي ولكن انا ماكنتش كنسمع ليهم ..

- عصام [ببرود ] :

العجب لي انتوما تحت سقف واحد وعمرو حس بشيحاجة من جيهتك .. !!

- مسيرة [ ضحكات ] :

اويلي هذاك قلبو بارد مكايعرف يبغي حد .. وبيني وبينك حسن ، واخا يبقى غير هو راجل فهاد الدنيا منشوف فيه ولا نبغيه .. فاش كنشوفو الدم كيبربق ليا فعروقي كون نصيب نشدو ونحبسو فشي بيت ، ونبقى نعطيه فتصرفيق حتى يسخف .. يلاه نبرد فيه جنوني ..

- عصام : شوقتيني نعرف هاد جلال .. كانسمع بيه وبعائلتو ولكن عمرنا تلاقينا فاص ..

- مسيرة :

اويلي على تلاقى بيه ، الله ينجينا يا خويا حنا فحما الله .. يلاه رتاحيت منو ، عرفتي تشوقت نشوف المحال شنو بانليك نمشيو دابا نشوفوه ..

- عصام [سها بملامح باهتة وغريبة ، رجع رسم الابتسامة على وجهو ونطق ] :

واخا المغامرة ديالنا ، هادشي كامل فيك وانا معارفش .. [ اشر لسرباي لي جا لعندو طلب منو الحساب ، عطاه ليه خلص وخلى ليه التدويرة وخرج هو وياها فتجاه المحال ] ..

- فصالون الكبير ، واقف على الطبلة لابس شورط ديال التوب فالكحل .. صدرو عريان مزيانه كورميط رقيقة دهبية .. كان حفيان مسد على الطبلة ، قدامو ورقة كبيرة فيها واحد البلان ، شاد بيدو عود ديال الاراك وكيشرح .. هز عينيه العنكبوتية فخوها ناطق بصوتو الغارق لي فيه بحة رجولية مميزة :

- غادي يكونو جوج طبقات ، الطبقة التحتانية غاتبقى للموظفين ، هكا ايخدمو وهوما مرتاحين .. الى كانو البيروات ديال المدراء فنفس الطبقة الموظفين كيكون عليهم ضغط كبير .. مكايبݣدوش يخدمو براحتهم فهمتي ...

- هلال [ بنفس الملامح الرجولية وحروشية صوتو] :

هادشي لي كنت غندوي معاك فيه ، الى بغيتي تخلي الناس لي خدتمين معاك يبدعو فخدمتهم اتخلي ليهم واحد المتنفس فين يتحركو ويفج/رو الطاقات ديالهم ، منين كيكونو فنفس البلاصة كيحسو براسهم تحت الضغط ومتبوعين ..

- جلال [رجع عود الاراك لفمو مدوزو على سنانو كاملين ، بكل هدوء رجع زولو ومكمل كلامو ] :

لانونص اتنزل هاد السيمانة .. غايتكلف بيها هارون [فعز شرح سونا ليه التيليفون ، طل بانت ليه نمرة سراج :

أش تم أولد الذيب ؟

- سراج [سايݣ] :

وجدو راسكم ، شوية ونكون تم ..

- جلال [ببرود] :

الباب راك كتعرفو ، لاش فارع لينا [هلال سبقو ] ششش

- جلال [هزهز براسو ] :

واش؟

- هلال : مكنخصروش الهضرة قدام لي كبر منا ..

- جلال[بطنز] :

بغينا نݣولو ليه غي راسنا اصاحبي واش انا ديال هادشي ..

- هلال [كيضحك] :

لا انا لي ديالو .. قطع قطع اولد الذيب قبل لا تسمع خل ودنيك ..

- سراج : هاهو قاطع ..

- هلال [كيخنزر فجلال ] :

نكملو ؟

جلال [ بنفس البرود المعتمد عندو ] :

نكملو علاش لا أخويا الكبير ..

________________________

- شعل الضو فالمݣازة ، حلات فمها من الجمالية ديالها ، كيفما كانت كتخايل المݣازة ديالها تكون ، كبيرة ومصبوغة فالبيض ، الڤيترينات بشكل انيق .. البيرو ديالها كيفما كانت متوقعاه ، حمقها وطير ليها العقل .. كانت غير متبعاه وكدور فالبندقيتين ديالها على المحال ، نزلات من الدروج لي نزل ليهم ، شاعل الضو على بلاصة الخدمة فين ايخدمو فيها البنات لي اتخدمهم معاها ..

- الماكينات ديال صناعة احمر الشفاه كل وحدة كانت محطوطة فجهة .. وبزاف ديال المهارز لي كانو من الرخام محطوطين ، الجعابي ديال العكورة محطوطين فالكراطن ، خاصهم غير يتعمرو ويتستفو ، كان خاصها غير تبدا الخدمة .. كولشي كان كيفما كانت كتخايلو وكثر ، وقفات وشافت فيه بكل فرحة وبهجة وتأتر ..

- عصام [ حابسها بيدو ] :

بلاما دوي ، عارفك اشنو غادي تݣولي .. دابا كولشي فيديك ولي بغيتيه غايجي حتى لعندك ..

- مسيرة [ شدات فيديه مزيرة عليها ، بصوتها الانثوي الرقيق لي ظاهر عليه التأتر ] :...

والله معارفة شنو غادي نقوليك ، والله العظيم .. كلمة شكرا قليلة فحقك والله .. معرفتش شنو ممكن نقول فهاد اللحظة هادي ..

- عصام [ بجدية ] :

متݣولي والو ، خاصك ديري .. خاصك ديري بزاف باش توصلي دغية .. جا الوقت لي تخدمي وتبيني حنة يديك لݣاع الناس ، وتبصمي بصمة فعالم صناعة مواد التجميل ، وتخلي ماركة روبـي تباع فأي بلاصة ..

- قدامك جوج حوايج دابا ، الباك خاصك تاخديه ... والماركة ديالك خاص تخدمي عليها ، تافقنا ؟

- مسيرة [ هزهزات براسها وبكل ثقة فنفس ] :

كون هاني ، كانواعدك من هنا ، كيفما تقتي فيا وعاونتيني عمري مغادي نخيبك .. غاناخود الباك وغادي ندخل سيمتي لسوق .. وغادي نعاود نقولها ليك [ بشقاوة ] خاف على راسك مني ..

- دازو الأيام طايرين بين توجاد للمحل ديالها وبين الحفاظة للباك ، حطات انونص على قبل البنات لي خدمو عندها ، وهادشي كلفات بيه سندس باش هي تنضي معاه .. البنات تحولو من الشقة لي كانو فيها للڤيلا ..

- أما عصام ، كان سيمانة معاهم و 20 يوم على برا .. كيف قاليها مكانش كيعمر معاهم بزااف ..

- نهار على نهار كانت كتشوف مشروعها كيكمل .. خصوصا نهار لي تكتبات إسم الماركة ديالها فوق المحل بلون الأحمر كبيرة ، وحداها زوج عكورة مرسومين ..

- أما نهار الافتتاح كان بوحدو .. بالدقايقية حضرو ليه ݣاع الأحباب .. كان وقتها مقسم مابين المحال ومابين خدمتها مع نسيم لي قررات متخليها حتى تفوت معاه عام وداكشي لي كان ..

_________________________

*** بـــــعـد مـرور ســنـــة ***

- الخلعة كانت راكباها من ساسها لراسها ، غادية جايا كتورك على يديها العرقانين .. مرة مرة كدوز يدها على شعرها بتوتر .. مخلية البنات الداخل مع الكليان وهي على برا واقفة وكتسناه إيمتا يجي .. هزات راسها بانت ليها طوموبيلتو جايا ، قبل لا يوقف قدامها مشات لعندو بجرا ماخلاتوش ينزل فتحات عليه باب الطوموبيل .. وعينيها كلهم لهفة ونفس الوقت خوف ..

- مسيرة [بنبرة صوت طاغي عليها التوتر] :

أمضرا ، مانجحتش ياك عارفة راسي والله ..

- عصام [كيضحك] :

وخليني غير نزل ، وندويو الداخل واش انت ضروري تشوهينا ..

- مسيرة [بنفاد صبر] :

وعصام دوي خلاص ..

- عصام [نزل وإبتسامة بشوشة على وجهو ، قرص ليها نيفها ونطق برجولة ] :

حشومة الزين ديالي ماينجحش ، خايبة حتى المعاودة مبروك عليك ..

- مسيرة [بفرحة] :

حلف بالله ناري عصام ماتفلاش حلف بالله حتى نجحت ..

- عصام [على نيتو كيحلف] :

قسما بالله حتى نجحتي وبالحلوف ݣاع ..

- مسيرة [ماشعراتش حتى عنقاتو كتغوت بجهد ] :

ناااري الله يفرحك كيما فرحتيني ..

- عصام [بضحكة رجولية ] :

الباك وخديناه ، وفيتي دابا بقات سميتك تدخل فعالم الجمال ويكمل التحدي لي بيني وبينك ..

- مسيرة [بتحدي وبنبرة صوت أنثوي طاغية عليها القوة ] :

- كون هاني ، غادي نكون مرة وݣادة دابا تشوف ..

قدرتكِ على الوقوف مرة أخرى لا يملكها سواكِ، لا تبحثي عن قيمتك في أعين الناس ابحثي عنها في ضميركِ فإذا ارتاح الضمير ارتفع المقام وإذا عرفتي نفسكِ فلا يضركِ ماقيل فيكِ ..

"بإمكانك محو شخصٍ ما من عقلك ، لكن أن تقتلعه من قلبِك فهذه قصّة أخرى ." " التقينا في الوقت الخطأ وهذا ما كنت أقوله لنفسي باستمرار على أي حال ربما بعد مرور الوقت من الآن سنلتقي في مقهى في مدينة بعيدة في مكان ما ويمكن أن نعطي لأنفسنا فرصة أخرى ..."

- وقفات طوموبيل من نوع bm قدام الفيلا .. نزلات منها بكامل اناقتها ، لابسة سروال ديال الثوب فالبيض ، مع شوميز فالخضر فوق منها ڤيست فالبيض وسباط عالي ، سونات فالباب ، فتحات ليها سيدة فاواخر الثلاثينات .. ودخلات ..

- مسيرة [ بتساؤل] :

نجاة عصام جا ؟

- نجاة [ بنفي ] :

لا امدام مزال مجاش ، لالة صفاء لي قاتليك راه عندها شي تسافيرة لرباط اتݣلس تما سيمانة على قبل التصوير ، سونات ليك ولكن تيليفونك كان مسدود ..

- مسيرة [ ݣلسات شادة تيليفون فيديها ] :.

وي طفا ليا وماشفتوش .. سندس كاينة ؟

- جاوباتها من دروج :

هاني اختي فين غادي نمشي فنظرك حدي الدار ..

- مسيرة [مجاوباتهاش فتحات فوكال ] :

عصام فينك شوشتيني عليك ، اويلي سيمانة وانت غابر ياك لاباس ، واش مزال مراجعش .. هاد السيمانة غادي يخصني ندفع للافاك خاصك تكون هنا زعمة نسيتي بلي هاص تختار معايا .. [سيفطات الڤوكال وشافت فسندس لي ݣلسات حداها ] :

قلت ليك يلاه معايا ، مابغيتيش قلت ليك خدمي معايا مابغيتيش ، واش غادي تبقاي غير فدار .. الى مكانت الخدمة لي بغيتي انت ورتاحيتي فيها ماتخدميش كتفششي أصاحبتي ..

- سندس [دارت رجل على رجل] :

صافي عفاك براكة غير انت الحمد لله لي ولينا فينما ندوزو يبان لينا الاشهار ديال العكورة ديالك .. انا اختي مرتاحة هكا والى مالقيتش لي بغيت مغانخدمش .. فخبارك ماما وبابا فمراكش ، سيفطو ليا التصاور هههه شوفي [وراتها التصاور ديال عباس وسعاد فالكوتشي ] ..

- مسيرة [بإبتسامة ] :

هاي هاي هاي ، طار الزيف وجلابة ، ولاو بحال العرسان ... مشوشني عصام وحق الله العظيم خالعني ، هاد الغبرة ديالو جاتني فشكل ..

- سندس : اتلقايه ملهي غير مع الخدمة أصاحبتي مديريش فبالك .. رتاحي ..

- مسيرة [وقفات ] :

عرفتي كولشي تجمع عليا ، لافاك لي خاص ندفع ليه هاد السيمانة ، ومزال حايرة أشمن شعبة ندير ، العقد مع ݣوتشي ، وعاد العرس ديال الكريم لي بقات ليه شهر واحد .. قسما بالله حتى دخت ..

- سندس [كضحك ] :

غير بشوية عليك ماعندك مديري أصاحبتي .. تحل الباب ضارو بزوج .. تم داخل عصام ومعاه سفيان لي كانو ملامحو باردين ، اما عصام وجهو مكانش كيتفسر ، كان كيتمشى بشوية عليه .. وقفات مسيرة بزربة ومشات عندو وملامح الخوف وتوتر باينين عليها :

عصام فين غبرتي خلعتيني ،[طلعاتو ونزلاتو ] واش انت لاباس ؟

- سفيان [ببرودة ] :

خاصو يرتاح ..

- مسيرة [خنزرات فيه ] :

سولتو هو ماشي أنت ..

- سفيان [بإنفعال ] :

كون .. قاطعو عصام بيدو بصوت باين عليه التعب :

سفيان ، سير قضي الغرض لي وصيتك عليه .. شاف فيه سفيان وشاف فيها .. أفاف بغضب ومشا .. ضار غصام عند مسيرة وبإبتسامة :

ماتخافيش مكاين والو ، اجي ندويو شوية واخا .. اجي نخرجو للجردة .. شد ليها فيديها وجرها معاه للجردة تحت أنظار سندس ..

- خرجو على برا ملاحظة مشيتو .. والݣلسة ديالو لي كانت بشوية .. جرات الكرشي وݣلسات حداه وعينيها كلهم تساؤلات :

عصام مالك واش مريض ؟ سيفط ليك مامرة مازوج او والو ..

- عصام [بعد سكات طويل نطق بصوت كلو جدية] :

مسيرة خاصنا نطلقو ..

- مسيرة [بصدمة] :

كيفاش ؟؟ وعلاش ؟؟

- عصام [زير على عينيه منزل صباعو مع نيفو ماسح عليهم ] :

بزاف ديال الحوايج تبدلو .. خاصنا نطلقو ..

- مسيرة [عقدات غوباشتها ] :

وشنو هوما هاد الحوايج بسلامة ؟

- عصام [دوز لسانو على شفايفو ناظرها بعينيه البنية ] :

أنا درت العملية .. والعملية نجحات واخا تكرفصت ، يعمي انا مابقيتش كيف الاول ، والى بقينا تحت سقف واحد .. منقدش نضمن راسي ليك ، عصام لي كان شحال هادي مابقاش ، دابا وليت إنسان قاد نعيش حياتي بحالي بحال اي واحد .. منݣدش نقرب من إنسانة مكتحس والو من جبهتي ، داكشي باش جا الوقت باش نتفارقو ..

انا وياك صافي خاصنا نساليو هاد الزواج ..

_____________________

- فجهة أخرى ، واقف بكل أناقة .. كيقاد فالكول ديال القميجة ، هبة ورجولة كضخ منو .. تدق الباب وتحل داخل خوه لي كان فمثل اناقتو وبإبتسامة طبطب عاى كتافو ناطق ببحتو المميزة :

مبروك عليك ..

- جلال [بإبتسامة رجولية ، ونظرة مميزة .. وببحتو الحرشة بكل ثقالة وثقة فنفس ] :

الله يبارك فيك ، العݣوبة ليك ..

- كانت فحالة صدمة .. ماعرفات راسها تفرح ولا شنو تݣول هربو ليها الكلمات ، حاجة وحدة لي قدات ديرها انها تعنقو ..

- عصام [بإبتسامة مصغر عينيه] :

بشوية أصݣعا وزعمة يلاه نايض من العملية ..

- مسيرة [بفرحة] :

وراه فرحتيني وحق الله .. كيفاش وقع ݣاعما قلتيهالي ، إيمتا وكيفاش ياك قلتي العملية واعرة ؟

- عصام [شاد يديها بين يديه] :

وي ولكن سفيان لي حكر عليا ، قلب على واحد الطبيب مزيان .. مكايخرجش من شي عملية وكتفشل ليه .. هو الصراحة من شحال هدا وهو كيحكر عليا وانا مابغيتش .. ولكن فكرت مزيان ، ݣلت نزطم ونزعم ياربحة يا دبحة ..

- والحمد لله العملية نجحات بفضل الله وبالفضل ديالو ..

- مسيرة :

الحمد لله وحق الله العظيم الى فرحتيني ، حاجة دارها مزيانة سفيان بعدا ..

- عصام [بتساؤل] :

بغيت انعرف مالك معاه ؟

- مسيرة : مالو هو مكايحملنيش من نهار تزوجنا ، شفتي فاش كيجي لهنا على تخنزيرات كيدير فيا .. تقول واكلة ليه الورث ..

- عصام [سرح رجليه ] :

سفيان كنعرفو من زمان .. فيه صاحبي وخويا ولا هو عائلتي فاش توفاو والديا ، هو لي كان معايا وعمرو ماخلاني سامح فراسو على ودي وهامل حياتو غير باش مايتشغلش ، فاش كنحتاجو كنلقاه .. [تبسم] فخبارك حتى الوقت لي يخرج فيه مع شي بنت ماعندوش ، فعمرو 37 وعمرو تزوج .. واخا عييت معاه مكايسمعش داير فيها الأخ الكبير ..

- هو عند بالو بلي انت طماعة .. وبلي تزوجتي بيا على ود الفلوس واخا عارفة بحالتي ، داكشي باش كيتعامل معاك هكاك ..

- مسيرة [بلعات ريقها بالغصة لي حسات بيها فحلقها .. دغية تجمعو الدموع فعينيها ] :

عصام انا مانسواش ياك ، منسواش حيت عمري حسيت بشيحاجة من جيهتك كنحس براسي خايبة وحق الله العظيم ..

- عصام [بإبتسامة بشوشة ] :

بالعكس انت احسن إنسانة عرفت فحياتي كلها .. فنظرك انت كون كنت مزال كنبغيك وكنموت عليك غادي نݣوليك نطلقو .. مستحيل كنت غادي نحارب على ودك ... هاد العام و3 شهور لي جمعنا .. عرفتك فيها مزيان ، وقدرت نتحكم فقلبي ... باش مايزيدش يبغيك ويتعلق بيك ، وفعلا الحمد لله السفريات لي كنت كنسافر نفعوني .. ولكن عرفتي أمسيرة ..

- كسبت احسن من زوجة ولا احسن حبيبة ، كسبت صديقة .. عقلتي على الخرجات لي كنا كنخرجو .. والمضاربات ، عقلتي على الطيحة ديال لاپيسين ..

- مسيرة [كضحك نازلين دموعها ] :

اه عقلت ..

- عصام [قرب منها ماسح دموعها ] :

وعلاش دابا هادو نازلين ؟

- مسيرة [دموعها لي كانو بسكات ولاو نازلين على شكل شهقات ] :

حيت انت عزيز عليا بزاف .. وليتي بحال كريم ، وليت كنتشاور معاك كثر منو هو ، ودليل مزال معرفتش اشمن تخصص ندير فلافاك حتى تجي انت .. منقدش نتخايل انك ترجع لبرا وتخليني مستحيل اعصام وحق الله .. منقدش نخرجك من حياتي [حضنات وجها كتنخصص]

- عصام [زول ليها يديها ] :

وماخليتينيش نݣوليك بلي حولت الفرع الرئيسي ديال الشركة لهنا ، وبلي أي حاجة كتخص الخدمة لي على برا ايدير سفيان ، وبلي انا بت نبت هنا يحسابليك اتفكي مني ولا مالك مريضة ..

- مسيرة [عينيها بانت فيهم لمعة الفرحة ] :

هي مغاتخلينيش ياك ؟

- عصام : لا الالة ... مغاديش نخليك ، خديت دار حسن من هادي ، قريبة ليك فشارع الثالث .. وانا معاك صباحا ومساءا ..

- مسيرة [بإستفسار] :

وعلاش مال هادي ؟

- عصام : الالة هادي ديالك انت وخواتاتك ، وفكرت علاش لي مايجيوش والديك يعيشو معاكم فيها .. الفيلا واسعة وعريضة ، بلاما تبقاو غير انتوما بوحدكم ..

- مسيرة [بقات كتشوف فيه مدة ونطقات ] :

هاد القلب ماعرفتش مالو معاند ، ماعرفتش علاش كيطيح فحب الناس الغلط .. كون عمري بغيت جمال .. وبقا قلبي عدري حتى بغيتك ، حيت انت فعلا تستاهل تبغى والله ..

- عصام [قرصها من نيفها ] :

حيت ربي مابغاش ، خليها فبالك .. ربي كون بغاك تبغيني كون زرع فقلبك الحب جبهتي من اول نهار ، هذاك لي مكتاب انك تبغيه يقد مزال مبان ويقد يكون حداك وانت معارفاش .. كولشي بالمكاتيب ، ومككن انت مامكتاباش ليا وممكن هاديك لي مكتابة ليا ولي انعيش معاها الحب الحقيقي قريبة ليا ، فهمتيني ..

- مسيرة [هزهزات براسها ] :

أه فهم ..[قاطعاتهم نجاة] .. :

سمحوليا ولكن واحد المرة ومعاها واحد البنت كيسولو عليك امدام مسيرة ..

- مسيرة [بتساؤل] :

ماعرفتيش شكون ؟

- نجاة : قالت ليا نقوليك نجية وعفاف ..

- لابسة كيطمة مع سبرديلة كونڤيرصة .. جامعة شعرها سفنجة .. عينيها خاشياهم فالپيسي .. خدامة ، وقف عليها واحد الكليان هزات راسها عندو بإبتسامة عطاتو الساروت ديالو ومشا ..

- رجعات لخدمتها ، حتى وقف عليها سراج [بصوتو الرجولي العفوي ] :

سكينة ، توفيق خلصك ولالا ؟

- سكينة [هزهزات راسها بنفي ] :

لا ، ݣاليا بلي هو خو مول الشي مكايخلصش ..

- سراج [ورك على يديه بقوة ، تعصب ] :

بلات على الحمار .. حتى يرجع ..

- نباه صوت انثوي وراه .. :

سراج الدين غبرتي عليا i miss you [باستو من الوجه ] ..

- سراج [بصوتو المميز وغروقيتو الخاترة ] :

كنكون هنا الوقت ديال الخدمة .. انت صاڤا ، مبروك عليك مادرتي ..

- [ضحكات بميوعة] :

نوو داكشي مامنو والو ، انت عارف مزيان بلي منقدوش نكونو مع إنسان مكنحسو معاه بوالو .. وانت عارف كثر القلب شكون ساكنو ..[دوزات خط ظفرها على دراعو نزولا على يدو لي كان باين على مولاها كيتريني ديما ..

- فلتات ليها ضحكة خفيفة حتى ضارو بزوج شافو فيها :

سكينة : سمحوليا .. وصلني واحد الميساج ضحكني .. غير كملو ..

- سراج [ غوبش ، وضار عندو وعلامات الإستفهام على ملامح وجهو ، هزهز براسو ] :

كيفاش كملو ، مافهمتش ..

- سكينة : زعمة كملو هضرتكم .. هادشي لي قصدت ماقصدتش شيحاجة اخرى ..

- سراج : بحال الى كتريݣلي ولا جاب ليا عقلي ..

- [ بصوتها الأنثوي كسرات هاد النقاش] :

سراج ممكن تعطيني من وقتك ..

- ضار عندها بإنفعال ، وبصوت قاصح وبارد :

ماعنديش الوقت أسلوى .. وقيلة ساليتي الحصة ديالك ؟

- سلوى [ مارضاتش .. حدرات راسها وشافت فسكينة ، ورجعات شافت فيه ] :

وي ساليت بون سواغي .. خلاتهم ومشات ..

- سكينة [بقات متبعاها بالعين حتى مشات ، دورات راسها معلياه فيه لقاتو كيخنزر فيها ] :

بقات فيا الصراحة .. السيدة بقا ليها اشوية وتقوليك كنبغيك ، وانت لا هنا ..

- سراج [ببرود مميت] :

وأنت أش مشا ليك ؟

- سكينة [حسات بالقمعة ، دورات لسانها وسط فمها ] :

اه بصح ، نسيت سمحليا ..

- سراج [ طلعها ونزلها ، مقرب لمستوى راسها .. ناطق بصوت كفحيح الافعى حتى حسات بسخونيتو ] :

عام وانت هنا ، ومزال متعلمتيش تبدلي من راسك غير شوية الݣاورية ، بغيت نݣول الݣاوري .. [بعد عليها معلي يدو لشعرها ] نفسي هاد الشعر شوية ولبسي بحالك بحال الناس ..

- لي كيدخل مكايفرق بينك وبين عادل الكوتش .. [حيد ليها المقبط من شعرها خلاه يتطلق .. لايح المقبط قدامها ومشا خرج .. مخليها كتنغل بالأعصاب ، حدرات راسها كتشوف فحوايجها .. هزات داك المقبط بنطير ورجعات كتجمع فشعرها بكل قوتها باغية تحيدو من بلاصتو بالاعصاب ..

__________________________

- ݣالسين فصالون .. نجية ومسيرة ، معاهم عفاف .. قدامهم پلاطو فيه الحلوة وفيه العواصر ] :

نجية : توحشتك يابنيتي يا مسيرة ، غيبتي علينا [غيبتي = غبرتي] مابقينا نشوفوك ولا نراوك ..

- مسيرة [بإبتسامة عريضة ] :

راكي عارفة أخالتي ، الخدمة والقرايا والله مكنحك راسي ، راه حتى مي كنجي نخطف عندهم نهار زوج ونرجع بحالي .. كيداير عمي أحمد ، وانت اعفاف أش كتعاودي [شافت فيها] ..

- عفاف [بإبتسامة خجولة ] :

الحمد لله اختي مسيرة ربي خليك ..

- نجية : داكشي باش جيت عندك أبنتي ، بغيت انطلبك الله يرضي عليك ..

- قدام قصر المؤتمرات بسلا .. وقفات طوموبيل فالكحل ، نزل منها بكامل شياكتو واناقتو ورجولتو ، من الجهة الاخرى نزل خوه .. كانو بزاف ديال الطوموبيلات واقفين ، دليل على انو ݣاع الحضور ولي ايتكرمو هاد النهار حاضرين ، دخلو بزوج بيهم ، وداكشي لي كان الجردة الكبيييرة الواسعة كانت عامرة بناس ، الرجال وعيالاتهم .. جميع رجال الأعمال من مختلف مدن المملكة ..

- بصوت رجولي عنق جلال :

أهلا وسهلا بالخليفة ديال جواد الإبراهيمي .. ليك وحشة كبيرة ..

- جلال [بإبتسامة رجولية ] :

سعادة النائب .. الناس كيكبرو وانت غادي وكتصغار ..

- [ضحك ضحكة رجولية عاجبو الحال] :

ضروري ، باش نبقاو ديما شباب [شاف جهة هلال ] اهلا وسهلا بالإبن الأكبر ..

- هلال [بصوت رجولي وإحترام ] :

سي عزيز ، نهار كبير هذا ..

- عزيز [بإبتسامة عريضة ] :

وأنا اسعد لي غانقدم درع التكريم لأحسن رجل أعمال لهاد السنة ..

- جلال : من دواعي سروري سي عزيز ..

- تقدمو معاه لجهة الطبلة فين كان ݣالس ، سلمو على رجال الأعمال لي كانو واقفين مع النائب .. خداو كيسان ديال العصير كيرتاشفو منهم ..

- غابت الشمس وسدلات خيوطها ، دخلو للقاعة الكبيرة المخصصة .. كل واحد ݣلس فالكرسي المخصص ليه .. بدا الوزير بإلقاء الكلمة ..

- من ورا ما سالة جا الوقت ، باش كل واحد من رجال الاعمال ياخود تكريم فالمجال ديالو .. جات نوبتو ، عطا الوزير الكلمة فحقو كلمة حق وشهادة تقدير بالمجهودات ديال جلال الجبارة فالمجال ديال الزراعة ..

- تقدم النائب وهو فيدو درع التكريم ، نزل لمستوى الميكروفون ، وطلب من جلال الطلوع للمنصة .. وقف بكل هبة تحت التصفيقات الحضور .. طلع فدروج وراسو عالي ..

- ستالم الدرع مسلم على النائب وعلى الوزير .. خدا صور معاهم ونزل تحت عدسات تصوير الصحافة وتصفيقات الحضور ، يتقبلو خوه معنقو ..

- مد ليه الدرع بحال الى كيقوليه حتى انت كتستحقو حيت كنتي بجنبي ، سالى وقت توزيع الجوائز وتكريمات وجا وقت العشا ..

- تجمعو كل فئة فالطبلة ، محول كلامهم هو الهضرة على الخدمة .. حتا خاطبو صوت أنثوي راقي :

موسيو جلال مبروك عليك درع التكريم .. انا من المعجبات بالأعمال ديالك تبارك الله عليك ..

- جلال [ببرود مميت ] :

شكرا .. عند بالي les femmes مايستهويهمش الضومين ديال الزراعة العجب ..

- [ضحكات بميوعة ] :

نونو ، كاين لي كيميل لهاد المجال ، ماشي بضرورة ..

- هلال [قرب لودنو وهمس] :

الى جينا نسولوها واش المعزة كتولد ولا كتبيض ، أتݣوليك كتبيض ..

- جلال [جاتو الضحكة ، مجاوبوش ضور راسو لعند عزيز ودخل معاه فالكلام منخلها ] .. قمعة لي ماعجباتها وحسات بيها ، تداركات الموقف وضارت عند السيدة لي حداها كدوي معاها ..

- كمل العشا وجا الوقت لي يرجعو .. سلم على الناىيب والبقية سلام رجولي ، فهاد الاثناء مدات ليه يدها او وجها باش تسلم عليه ، سلم عليها بليد وسحب يدو بزربة مخلي وجها معلق فالهوى .. تخطاها وخرج لجهة طوموبيلتو ..

- خلط عليه هلال ، طلع لطوموبيل وتكرشخ بضحك :

ناري اصاحبي على قمعة عطيتيها ، تموت ومتنساهاش هاد الليلة خاصها تاخود دوليبران لراسها ..

- جلال [ديمارا الطوموبيل ] :

هاد النوع داز عليا بزاف ، حفيت ضراسي فهاد النوع .. خرجو من البوابة وشدو الطريق لكازا ..

____________________________

- مسيرة بقات ساكتة مدة ، هزات راسها فنجية ونطقات :

عرفتي شنو أخالتي نجية تهناي .. انا انشوف ليها خدمة فلاتوليي مع البنات .. تنهاي ..

- نجية : الله يخلف عليك ابنتي ، الله يزيدك من فضلو ياربي الحبيب .. لهلا يخطيك. ..

- مسيرة : هانية اخالتي ، هدا واجب الله اودي مادوزناش قليل ..

- عفاف : ربي يخليك اختي مسيرة شكرا بزاف الله يفرحك ..

- نجية [وقفات] :

خاصنا نوضو نمشيو ، كاينة واحد بنت عمي هنا ، أنمشيو نباتو عندها هاد الليلة .. وغدا نقلب ليها على الكرا مانمشي حتى نضي معاها الامور ..

- مسيرة [عقدات غوباشتها ] :

من نيتك اخالتي ، أتباتو هنا .. مغاتكري ليها مغاتكري ليك ، غادي تبقا هنا معانا ... حتى ماما والواليد راه ايسكنو معانا هنا ، الدار واسعة وعريضة .

- نجية : اويلي ابنتي وراجلك حشومة .

- مسيرة [ بإبتسامة ] :

غير رتاحي من ديك الجهة أخالتي ، انت غير نعسي على جنب الراحة .. هزات عينيها فيه خارج من الجردة ، شاف لجهتهم وحدة بوحدة .. عطاهم إبتسامة رامي ليهم السلام وطلع لبيتو ..

- مسيرة : انݣول لنجاة توجد لينا العشا .. خلاتهم ومشات للكوزينة عند نجاة علماتها توجد العشا .. تحل الباب ودخلات سكينة عاقد غوباشتها سلمات عليهم كاملين مرحبا بعفاف ونجية وطلعات لعند سندس للبيت ..

__________________

- ݣالسة معاهم فالبيت .. عاودات ليهم الحوار لي ضار بينها وبين عصام ..

- سندس [ ساهية ] :

هادشي كامل ومكان فخبارنا والو وماقلتي لينا والو ..

- مسيرة [ تنهدات تنهيدة طويلة] :

هادشي كيبقى سر ، السيد امني على سرو نوض انا نفضحو .. واخا لخواتاتي مايمكنش أصاحبتي ..

- سكينة :

بصح عندك الصح ، ناري عز عليا وحق الله العظيم الله يعمر ليه الدار عصام .. ودابا إيمتا ادفعو للطلاق ؟

- مسيرة [ ربعات رجليها] :

غدا .. غدا غادي ندفعو للمحكمة ، الصباح انمشي ندير شهادة عند الطبيبة بعدم الحمل ، وغاندفعو للمحكمة طلاق الشقاق قبل البناء ، هو راه غدا ايتحول لدارو الجديدة إن شاء الله .. [ شدات على راسها ] .. كتفكر ..

- سندس [ بتساؤل ] :

اجي مسيرة ، مزال كتفكري دخلي لي بغودوي كوسميتيك للماركة ديالك ..

- مسيرة [ نزلات يديها من راسها مرورا بوجها ] :

ماعرفتش والله كنفكر ولكن مامتأكداش ..

- سكينة : ديريها ، وديري حتى لي پارفان ..

- مسيرة [ شافت فيها بعياء] :

هادشي خاص نقرا عليه .. ماشي بحال العكورة هواية عندي من صغر وطورتها .. هادشي خاص ندخل نقرا عليه ..

- سندس : إيوا صافي ياك انت اصاحبتي كنتي دايخة اشمن شعبة ديري فلافاك .. دخلي ديري الكمياء والفيزيك ..

- حيت العطور ولي بغودوي كوسميتيك ، ضروري تقراي عليهم فهمتيني .. خاصك تعرفي كيفاش تمزجي العناصر فهمتيني ..

- مسيرة [مربعة دايرة يدها على خدها وكتشوف فيها ، ضارت جارة پينوارها لابساه ، حاسة بالبرد ديال أكتوبر لي تسلل لعظامها ] :

ندوي مع عصام غدا فهادشي ونشوف .. [نزلات من فوق النموسية خاشية رجليها فالبانطوفة ] :

تصبحو على خير .. انا خاصني نعس غادي نوض غدا بكري إن شاء الله ، غدا الإثنين غايكونو الادارات عامرين .. يلاه خليت ليكم الراحة ..

- سكينة [تبعاتها ] :

حتى انا غادي نعس تصبحو على خير .. خرجو من عند سندس خلاوها حتى هي تنعس ، كل وحدة فيهم دخلات لبيتها كتفكر فشنو جايب ليها غدا حتى نعسات ..

__________________________

أؤمن بأن جميع الأمور السيئة التي قد حدثت لي .. جائت لتحميني من أمور أشد سوءاً منهاً .. أؤمن بأن الله ما أخذ مني إلا ليعطيني الأفضل .. وما أخر علي أمراً تمنيته وحملته في كل أدعيتي إلا لأنه سيأتيني به في الوقت المناسب ..

- خرجو من عند الطوموبيل ، كان قدامها جميع الوثائق لي غادي يحتاجو .. ، كيدويو على موضوع لافاك لي أيدو عصام وعجبو .. :

شوفي انت خلي عليا هادشي ديها غير فخدمتك .. الوقت عندك ضيقة ، انا انسجلك كنعرف واحد السيد فالإدارة غادي نضي معاه الامور تهناي ..

- مسيرة [حطات راسها على الكوسان براحة ] :

ريحتيني وحق الله العظيم .. شوف فاش نخرجو من المحكمة .. دوزني عند كريم لكلينيك ..

- عصام [عينيه على الطريق ] :

واخا .. وصلو للمحكمة ، كان واقف سفيان ومعاه المحامي ، عطاه الملف وجميع الوثائق وخلاه هو لي يتكلف .. ماهضراتش مع سفيان نهائيا متفادية تشوف فيه .. رجعات ركبات فطوموبيل .. ديمارا وشد الطريق لكلينيك .. حطها ومشا .

_____________________

- كريم [ كان كيشوف فيها مافهم والو ] :

وعلاش ، شنو السبب .. بين ليلة ونهار باغيين طلقو .. ياك كنتي ميتة عليه نهار الاول ..

- مسيرة : انا وعصام كنا مزوجين على الوراق ، وهادشي كان بيناتنا حد مكان عارفو ، كان باغي يعاوني ويوقف معايا .. وداكشي لي دار ، ودابا جا الوقت لي نتفارقو هادشي لي كاين ..

- كريم : انا قسما برب مابقيت كنفهمك .. ماعرفتش شنو عندك فداك الدماغ ، كتبقاي طبخي راسك ..

- مسيرة [ دورات عينيها] :.

صافي اكريم ، دابا سمعني [ عاودات ليه على البلان ديال لافاك ]

- كريم : برافو .. احسن مادرتي ، لا احسن حاجة درتيها هي خليتي الغنا ..

- مسيرة : واخا خليتو مزال الاغاني ديالو كيتسمعو يوميا وكيطلقو فراديو .. ايبقاو معاك ديما فطوموبيلتك الحب ، اجي واش عرسك مزال اديرو فإفران ..

- كريم [ هزهز راسو ] :

وجدي راسك ليه ، شهر و15 يوم ازين ديالي .. علمي عمي عباس ودار .. مديروش ليا كيف درتو فالخطوبة ، نسيت دنيا هاد سيمانة اتخرج ..

- مسيرة [ وقفات ] :

والحمد لله على سلامتها ، يلاه انا خاص نمشي لمݣازة .. عندي واحد الطلبية خاص نوجدها ، وغايجي عندي ديريكتور ديال ݣوتشي ، [ شافت فساعتها ] ساعة وغايدخل لكازا .. انا مشيت ..

- كريم [ وقف] : صبري نوصلك ..

- مسيرة : لا لا انمشي فطاكسي .. طوموبيلتي خليتها فدار يلاه اولد قلبي هاني مشيت [ عنقاتو ومشات ] ..

_____________________

- هلال [موجه كلامو ليه ] :

إيمتا راجع ؟

- جلال [جار باليزة صغيرة ] :

نكمل الخدمة غادي نجي ، هارون كاين فوجدة .. خاصني ضروري نوݣف على السلعة بيديا ، [شاف فساعتو] يلاه انا مشيت خاص نكون فالمطار من هنا لنص ساعة ..

- هلال : كون خليتيني وصلتك ..

- جلال [بنفي] : لا خليك .. يلاه انا مشيت ، جر الباليزة ديالو خرجها .. دارها فالكوفر ، ركب فطوموبيلتو دمارا ومشا ..

- مشات للمحال .. سونا ليها التيليفون وكان الديريكتور ديال ݣوتشي .. الفرحة كانت باينة فعينيها ، شافت فالسماء كتحمد الله وتشكرو على هادشي لي وصلات ليه ... شعرها لي بدلات لونا للزعر كيتبري تحت اشعة الشمس الضبابية كيديه البرد ويجيبو ..

- وقف طاكسي قدام المحال ، ونزلات منو عفاف .. شعرها الكحل جامعاه على شكل سفنجة .. سلمات على مسيرة ودخلات هي وياها للمݣازة .. غادة فجنبها وكتشوف فالمحال ، والكليان لي داخلين خارجين ..

- الماركة ديالها كان مشية ومطلوبو فسوق ، فظرف عام دارت بلاصتها .. او ولات معروفة على جوج جوايه .. من خلال الماركة ديالها ومن خلال الاغاني لي غنات مع نسيم ..

- ورات لعفاف المحال وهبطاتها لاتوليي للتحت ... عرفاتها على البنات وخلاتها بين يديهم حيت كان عندها رونديفو مع دريكتور ..

_________________________

- دازو دوك الايام روتينيين .. عصام سجلها فلافاك ، ونهارها الاول فيه كان فسيمانة لي غادي دخل .. التوتر كان مغلفها والخوف .. سونات ليها صفاء وعلماتها بلي عندها سفرية من الرباط لمراكش فاوطيل المامونية ديال كوليكسيو جديدة ديال القفاطن النساىية والجبادور الرجالي ..

- سونات على والديها لي كانو مزال فمراكش .. مستمتعين بالاجواء تم ..

- بــعد أسبــوع

- كانت فبيتها ، واقفة ختارت اونسومبل فالفوشيا .. كان سرةال لاصق مع شوميز .. وساك فالكحل كيلصق على الخصر مع صبرديلة فنفس اللون الكحل ..

- يديها كانو كيترعدو عليها والخلعة شداها .. حطات روجيستر وستيلو معاه فوق الكوافوز .. دخلات تحت فراشها وطفات الضو ، كانت كتحاول تغمض عينيها وتنعس ..

- الغد ليه فاقت بكري ، غزلات وجها دارت ليكرو ديالها مع ايلاينر لعينيها وعكر خفيف غوز .. لبسات حوايجها وطلقات شعرها ماشطاه مخلياه على راحتو .. رشات من ريحتها ، لي شمها كيحس بلي دايز من حدة حديقة عامرة بالورود .. هزات تيليفون وروجيستر ديالها ونزلات ..

- لقات نجاة موجدة ليها الفطور ، فطرات واخا بززات على راسها .. الخلعة مكانش مخلي ليها الشهية للماكلة .. سونا تيليفونها ، هزات تيليفونها وخرجات لقاتو كيتسناها .. طلعات لطوموبيل وسلمات عليه بالوجه ..

- عصام : واجدة ؟

- مسيرة [حلات واحد المسكة خشاتها ففمها ] :

اه واجدة .. ديما الطوموبيل وشدو الطريق للافاك ، وصلها بلاصة .. سلم عليها بالوجه موصيها :

رضي لبال لراسك صافي ..

- مسيرة : كون هاني .. نزلات تحت أنظار الطلبة ، لي كانو عينيهم عليها .. كان مميزة بيناتهم بزاف ، خصوصا عرفوها شكون هي .. بطبيعة الحال تصاورها لي شحال وهوما معلقين فالبلايك ، وأغانيها لي كايتطلقو وسهرات لي تعرضات ليهم .. توشويش كان تابعها حتى دخلات للإدارة ، خرجات وتوشويش عليها ..

- بصوت بارد أنثوي : عرفتي شكون هادي [ضحكات] جايا مزاحمة معانا فلافاك ..

- السيدة بوكو فلوس ، شوفي اللبسة لي لابسة ، من عند الله مكنحملها مكنقد عليها ..

- زيديني عليك ، زيدي وكان ندخلو غادي تبدا الحصة .. جرات صاحبتها ودخلو سابقين مسيرة لي لسوء الحظ جات معاهم فنفس لونفي .. دخلات كتقلب بعينيها قلبها كيضرب .. بانت ليها بلاصة خاوية حدا واحد الدري ، مشات نيشان ݣلسات حداه رامية ليه إبتسامة ..

- كانت ݣالسة على اعصابها حاسة بنظرات الطلبة عليها ، بحال شي كائن فضائي نازل من الفضاء .. جبدات تيليفونها كتقلب فيه باش تكسر داك التوتر لي كتحس بيه بينما دخل الاستاذ ، كترعد فرجليها .. ساهية فتيليفونها ..

- كانت غافلة على الصمت لي ضاير بيها ، فمها بوحدها لي كان كيتحرك بالمديغ ديال المسكة .. تسللات ريحة رجولية لنيوفها وظل لي على راسها ..

- كتشوف فيدين رجوليين تحطو قدامها وجسم مال لمستواها .. هزات راسها بشوية قلبها كيخبط بالخوف ، عينيها البندقية لي تفيكساو فعينين سوداء عنكبوتية ، نفس الجمود لي كان على الملامح ديالها كانو على الملامح ديالو نفس الصدمة كانت طاغية عليهم بزوج .. نزل لحدى ودنيها وهسهس بصوتو الرجولي القوي المتميز بصوت سامعو غير هو وهي :

تحيديها انت ولا نحيدها انا الواشمة ..

- تبلوكات فبلاصتها .. عام .. عام و4 شهور مشافتوش .. كعينيها كيحققو فعينيه ، سكاناتو .. شفارفها بوحدهم لي كانو كيتحركو أما هي مكانتش فهاد العالم .. هبطات عينيها ليديه لي مدها قدام فمها ، خرجات المسكة بلسانها وحطاتها ليه فيدو .. هزهز ليها براسو بمعنى براڤو ..

- رجع بخطواتو للور ونزل ، طالع فدروج للبلاصتو ، خدا ورقة دار فيها ديك المسكة وحطها على جنب ..

- قرب ليها الدري لي حداها وهمس بصوت شبه مسموع :

هدا الأستاذ جلال ، هدا العام الثاني ديالو هنا .. الصراحة أستاذ واعر كيما كيعاودو عليه ، غير هو مكايرحمش .. اخر مرة تندغي المسكة ولا تجبدي التيليفون ..

- شافت فيها بدون ماتنطق حرف واحد ، ورجعات شافت قبالتو ودماغها غايب على الوعي ..

________________________

*** مـراكـــش ***

فاوطيل المامونية ، قدام واحد الخصة .. واقفين البنات ، الإضاءة كانت مسلطة عليهم .. ، جات عندهم واحد السيدة لابسة جبادور تكون فأواخر لأربعينات ، شعرها مزعراه .. على وجها علامات الفرحة والفخر ..

- البنات ، بغيتكم اليوم تنساور راسكم .. بغيت تصاور يكونو واعرين يكونو مبهرين نساو التصاور ديال الايام لي فاتو [شافت فجهة صفاء] خصوصا انت اصفاء ... أنت المودل الرئيسية .. بغيتك تبهريني ، بغيت يكون واحد التناغم بينك وبين المودل لي غايوصل دابا ..

- هاد النهار مهم وحتى المودل لي غايشرفنا وقبل التعامل معانا مهم بزاف بنسبة لينا وبنسبة لكوليكسيو واخا .. نعول عليك مابغيت حتى غلطة ..

- صفاء [ بإبتسامة ] :

كوني هانية مدام صوفيا .. رتاحي من هاد النحية ..

- جا واحد الشخص همس ليها فودنيها ، مشات تبعاتو كتجري .. كملو البنات البروڤا مع دراري لي معاهم من غير صفاء لي كانت كتسنى المودل لي اتكون معاه ..

- من بعد 3 دقايق .. تمات راجعة ومعاها شخص ، لي غير شافتو صفاء طلعات معاها الصهد واخا الجو بارد .. دقات قلبها كون قرب ليها شي حد كون وا سمعهم ..

- صوفيا :

البنات كنقدم ليكم توفيق الإبراهيمي ، بطل عالمي فتنس ، وهو لي ايكون الوجه الإعلامي للكوليكسيو ديال الرجال .. مرحبا بيك .

- توفيق [لي عينيه حبسو وتفيكساو على صفاء ، تبسم إبتسامة لعوبة ونطق بصوت رجولي لعوب ] :

الله اودي امدام صوفيا ، ليا الشرف نخدم معاكم ..

- صوفيا : الى ماكنتيش عيان نبداو ..

- توفيق [هزهز براسو ] :

نونو پا ديتو ... نبداو حنا شنو تابعنا ..

- صوفيا [كتعيط] :

رحمة ، لبسي صفاء او وجديها .. باش يكونو واجدين داكوغ ..

- رحمة : داكوغ مدام صوفيا .. مشات جهة صفاء باش توجدها ، طلعاتو وهبطاتو خنزرات فيه ومشات مع رحمة ، اما هو تكلف بيه .. الطاقم لي مخصص فاللباس الرجال ..

______________________________

- سالة الدرس الاول ، لي مافهمات فيه والو او بالاحرى عقلها كان غايب .. ماوعات حتى بانو ليها الطلبة خارجين ، جمعات شتات راسها هزات تيليفونها لايحة شعرها ورا ظهرها .. خدات نفس الطويل وتمات هابطة .. كانت هي اخر وحدة اتخرج ، درت راسها مكاينش ماعبراتوش ، حتى وقفها صوتو لي كيزعزع :

ماجاكش ..

- ضارت شاف فيه بإيتفسار ، عينيه كانو على الكتاب لي قدامو ، ملامحو جامدين وباردين ، هز راسو فيها بنظرة باردة وغامضة :

الصهوبية وتاتك كثر ..

- مسيرة [حبسات المشية وقفات كتشوفيه ، نطقات بصوت انثوي رقيق ] :

مزال مامستوعباش بلي انت لي غادي تقريني .. مكايحسابليش بلي انت استاذ ديال الكمياء من إيمتا ؟

- جلال [طلعها وهبطها ] :

من شحال هذا .. علاش فين عندك المشكل ؟

- مسيرة [حركات راسها بنفي] :

لا ماعندي المشكل فحتى حاجة ، غير جاتني عجب وصافي ..

- جلال [بصوتو الرجولي القوي] :

برافو عليك ، درتي شيحاجة لي تنفعك ..

- مسيرة : عندك يحسابليك بلي كلامك لي أتر عليا .. هادشي درتو من راسي ، والحمد لله وصلت حيت انا بغيت نوصل ..

- جلال [تبسم نصف إبتسامة ، هز واحد الساك صغير ديالو ، وقف قدامها عينيه فعينيها ] :

وشكون سولك .. هاد المرة دويت بيدي ، المرة الثانية .. بلاصتها فشعرك .. [جر ليها يدها وحط فيها الكاغط لي فيه المسكة ] .. ضرب فيها وخرج ..

- بقات واقفة فبلاصتها كتشوف فالفراغ صدرها كيطلع وكينزل .. تنفسات بهدوء وتبسمات إبتسامة عريضة ناطقة بكل برود :

واااخـــــا .. كيبان ليا جا الوقت لي تهبط فيه كواريك واحد الشوية ، قلنا الايام بدلاتك ساعة لي فيه شي لولة فيه .. غير صبر عليا . خشات داك الكاغط فسويك ديالها وخرجات ، كان واقف هو واحد الاستاذ أخر ، وصلات حتى لحداه وضربات بشعرها لي ضرب ليه فكتفو .. حركة لي نتابه ليها ، تبعها بالعين حتى مشات ..

- سلم على داك الاستاذ وخرج بكل هدوء تحت انظار الطالبات لي كانو باغيين ياكلوه بعينيهم ..

- خرجات على برا ، واقفة .. حتى بانت ليها طوموبيلت عصام وقفاتو، طلعات فيها تحت انظارو ، سلمات على عصام بالوجه .. ديمارا وزاد ، تبعهم بالعين حتى مشاو ، أنا هو بدورو ركب فطوموبيلتو .. مكسيري مخلي العجاجة وراه ..

_________________________

- ݣالسين فمطعم كيتغداو .. عقلها ساهي كتشوف فماج البحر .. حتى نباها عاد ردات البال :

عصام : مالك ؟ شنو وقع ؟

- مسيرة [غوبشات محركة راسها يمين وشمال ] :

لا مكاين والو .. كنفكر غير فالعرس ديال كريم ، أجي غادي تحضر ياك ؟

- عصام [هز حجبانو بإستغراب ] :

شكون انا لا ، مغانحضرش ..

- مسيرة : وعلاش ، راه عرض عليك زعمة حشومة ماتمشيش ..

- عصام [بصوتو الجوهري] :

لا مانݣدش .. ديجا عندي خدمة كثيرة ، راكي عارفة انسطاليت الخدمة هنا فالمغرب ... مخاصنيش نضيع الوقت .. غادي تمشي انت والبنات ؟

- مسيرة : انا ودار كاملين ، ملزوم علينا نمشيو كلنا ولا غادي يتقلق كريم ، واخا ايكونو والديه وختو ولكن راه حسب دوز معانا الوقت حنا كتر منهم هوما ..

- الى ماحضرناش كاملين ايخرجنا فجورنال ..

- عصام :

نسيت ماسولتكش على خالك ، أشنو دار مزال ؟

- مسيرة [كضحك] :

عرفتي اشمن شرط شرطات عليه إبتسام خرجاتها منو ، حيتاش هي ماقبلاتش تعيش هي وياه مع باها .. قالت ليه اتجمع وتبني الدار عاد نديرو العرس ، مع هي عندها واحد الارض بانية فيها غير واحد 4 ديال الحيوط .. مدوراهم ايوا مسكين راه كل شوية كيزيد عليهم دابا يلاه كمل الطاج الأول ..

- عصام [كيضحك] :

خرجاتها منو ..

- مسيرة : إيوا هو لي بغا .. خليه يتحك شوية ، مابقا ليه والو ، بحال والو يتبع كريم .. العرس لي بقا ليهم اما العقد راه داروه ..

- عصام : شكون ديك السيدة والبنت لي جاو داك النهار ؟

- خرجات لابسة قفطان فلون البلو غوا .. وحتى هو خرجوه لابس ݣندورة فنفس اللون .. الخلفية كانت عبارة على حائط ديال الزليج الفاسي ..

- صوفيا [بإبتسامة] :

صفاء غاتشوفي فتوفيق بكل حب .. بحال الى كتشوفي فشريك الحياة .. بغيت عينيك يكونو كيلمعو فتصاور داكوغ .. وحتى انت توفيق لاميم شوز داكوغ ..

- صفاء [داتها باردة عليها محاملاش فيه الشوفة كون صابت تشدو تلوحو فلاپيسين ] :

داكوغ .. خداو وضعيات التصوير هزات راسها فيه كتشوف فيه .. كانت كتحاول دير داكشي لي قالت ليها صوفيا ، واخا لداخل ديالها كانت باغية تنزل عليه تمسح ديك الضحكة من وجهو ، عارفاه بلي عاجبو الحال ومستمتع مزيان بهاد الموقف لي تحطات فيه معاه ..

- حطات يديها على درعانو كيف وراتها صوفيا .. كانت باغية تفادة الشوفة فيه ولكن مكاننش قادة ..

- نزل بشفايفو حدا ودنيها وهسهس بصوتو رجولي اللعوب :

طلقي رتاحي .. نساي نساي بلي ضرتي وجيتي بين يديا ..

- هزات عينيها فيه شرارة العصاب كتخرج ليها من عينيها .. كانت غاتجاوبو كونما قاطعاتهاش صوفيا ..

- يلاه بدينا .. بداو كيلتاقطو الصور بمختلف الوضعيات .. لنسبة لصفاء مكانتش حاملة هاد الحالة ، كان هاد التصوير هو اكفس تصوير اتعرض ليه من نهار بدات الخدمة ديالها ..

- خدمات مع بزاف ديال ليمودل بالفرحات عليها ، حتى لهاد النهار لي مكان لا على البال ولا الخاطر ..

- سالة التصوير وسالات المعاناة بالنسبة ليها .. حتى نطقات صوفيا :

هاد العشية غادي نتعشاو جميع ، بهاد المناسبة انا متفائلة بزاف بالكوليكسيو جديدة ، موسيو توفيق كنتمنى تقبل الدعوة ديالنا ..

- توفيق [ عينيه على صفاء ، وبنفس الابتسامة نطق] :

الله اودي مرحبا ، بكل سرور ..

- صفاء [ نساحبات من حداه لجهة صوفيا وقفات قبالتها ونطقات بكل هدوء بصوت شبه مسموع ] :

صوفيا ، اتعدريني مغانقدش نحضر معاك ، كنحس براسي عيانة والله وقيلة الجو تبدل عليا ..

- صوفيا [ شافت فيها مغوبشة ] :

نو صفاء مايمكنش .. حشومة المودل الرئيسية متحضر للعشا ... جات عيب وحشومة فحق الضيف ديالنا ..

- صفاء [ وركات على جناب عينيها ] :

راه راسي ضارني وعيانة .. خاصني نرتاح ولالا ، خدمتي درتها اقل حاجة خاص نرتاح ..

- صوفيا [ طبطبات على ظهرها] :

ماشيغي .. راه يلاه 2 هادي مزال الوقت فين طلعي وتاخدي اسبيرين وتنعسي ترتاحي وفالعشية تكوني واجدة داكوغ .. يلاه اكبيدة ديالي سيري رتاحي راه رحمة تعطيك اسبيرين ..

- خلاتها واقفة ومشات تكمل مع البقية .. يديها كانت كتشدهم وطلقهم بالأعصاب ، حسات بريحة رجالية فنيوفها عرفاتو كاين وراها .. قرب لودنيها ونطق :

العشا معايا ماشي خايب حتى لديك الدرجة ..

- صفاء [ضارت عندو بالعرض البطيء ، عينيها مكانوش كيتفسرو ، ببرودة نطقات ] :

حسن ليك ، حسن ليك تفوتني وتاقة شري .. حيت شفتي أنا قسما بالله منصلحش ليك .. [غمزاتو خابطة جوج خبطات على كتفو] حسن ليك تلعب بعيد ..

- لا انت اتقد عليا ، لا انا انضور بيك .. اكون هاني بسلامة ..

- مسيرة [ راجعة هي وعصام فطوموبيل ] :

هاديك السيدة نجية ، كانت خدامة عند جلال فدار ، الله يعمر ليها الدار مسكينة .. وعفاف بنت ختها ، كانت مزوجة بواحد الشارف الهارف بغيت ليه إن شاء الله الݣطع فليدين ، كون كنت كنعرفو نديرو ليه فسطل ولي جا يطل ..

- عصام [ ضار عندها بصدمة ]

- مسيرة [ شافت فيه ] :

مالك كتشوف فيا ، كندوي معاك يحساب ليك كنضحك .. انت مكتعرفنيش مزيان مكايعجبنيش الحݣرة .. تعرف اش دوز عليها الكلبوش ، باها زوجها حيت كان طامع .. الدرية مزالة صغيرة مزوجها بواحد كبة من الشيب ، قهرها عصاوات مسكينة ..

- عصام [ عينيه على الطريق] :

مزال بحال هاد النوع ؟

- مسيرة : كتر ماتخايل .. وفاش رجعات لدارهم باها ماقبلهاش لا هو لا مراتو .. وهي تجي لعند نجية ، خالتها ومع مشكينة ماعندهاش الولاد ، دارتها هي بنتها .. ودابا جات عندي نشوف ليها خدمة ، وراه هبطها مع البنات تخدم معاهم وغاتسكن معايا فدار ..

- عصام [ بإبتسامة ] :

القلب الحنين ..

- مسيرة [ كدور فخصلة ديال شعرها وهي تنطق ] :

عصام فنظرك انت شكون وتاني كثر ، اللون الاورونج الحقيقي دشعري ولا هذا ؟

- عصام [ عوج فمو ] :

اي حاجة كديريها كتجي معاك ، وخا هو الصراحة الاصل كيبقى أصل .. علاش باغية ترجعي اللون ديالك ..

- مسيرة [ سكتات ونطقات ] :

لا علاش غادي نبدلو مدام انا عاجبني مكايهمني حتى شي قندوح يعجبو ولا مايعجبوش ..

- عصام [ هز فيها حجبانو بإستغراب ] :

وانا مالي .. ههههه شكون ݣاليك شيحاجة ياك انت لي سولتي ، انا اصلا مارضيتش ليه البال بزاف يعني عادي بنسبة ليا ..

- مسيرة : وصلني للدار صافي بلاما تديني للمحال مافياش لي يمشي ..

- عصام [ بتساؤل] :

اشنو درتي مع فرانسيسكو ؟

- مسيرة [قلبات عينيها ] :

مافهمتش انا علاش مسيفطين واحد ماعندوش مع الفرنسية بزاف ومع الإنجليزية بزاف ، عرفتي راه بالكشايف باش تفاهمنا ..

- المهم تفاهمنا على العقد مدة ديال عامين إن شاء الله ، سنيت على الوراق ... يحال والو اتكون شي تسافيرة لإيطاليا فمارس ..

- عصام : ايوا مزيان الالة مبروك عليك ..

- مسيرة [ سكتات ورجعات شافت بيه بتردد ونطقات ] :

عصام ..

- عصام [ عينيه على الطريق] :

امممم ..

- مسيرة : عرفتي شكون الأستاذ ديال الكيمياء [شاف فيها بمعنى شكون ] جلال ..

- عصام [شاف فيها بصدمة ] :

واش جلال جلال ؟!!

- مسيرة : اه عرفتي فاش شفتو والله حتى تصدمت مافهمت والو .. العام الثاني ليه فلافاك ..

- عصام : ياك هو مهندس فلاحي ، اش جابو للكيمياء !؟

- مسيرة :

هادي هي خدمتو الأصلية ، كان أستاذ ديال الكيمياء فالجامعة ديال سويسرا .. واقيلة هاد العام لي ماتلاقيتوش فيها ولا كيقري فيها .. حيت واحد دري قالي عامو الثاني هذا هنا ..

- عصام : وانت اشنو ضرك فهادشي عادي ولالا ؟

يتبع...