روبي ڤيريدجو الجزء السادس

- مسيرة [ وجها تزنݣ ، من بيوضت وجها دغية بانت فيها الحمورية ] :

كيفاش تسخن ، لالا انت زعمتي بزاف ... شتك مابقيتيش كتفراني ..

- جلال [ ببرود] :

علاش أنا شنو ݣلت ، ياك اتاي كيسخن العظام ... وكيحيد البرودة كيف ݣلتي ، حتى انا بغيت نسخن عظامي .. انا هادشي لي قصدت ، من غير الى انت قصدتي شيحاجة أخرى ، حتى هي نلقاو ليها حل [ غمزها]

- مسيرة [ بقات ساكتة ، الى هضرات اتخرج كاع الزريعة لي فمها]

- جلال : سكتي ، دوي شنو ؟

- مسيرة [ مدات ليه لسانها] :

لساني عامر زريعة منقدش ندوي .. بعد عليها مطلعها ومنزلها ، عطاها بظهر ونطق :

- 10 تكوني فالكوزينة .. خلاها مسمرة حتى غبر ..

- مسيرة [ ندغات ديك زريعة كلها سرطات عاد تنهدات بإرتياح ..

- ناااري على ݣنس قصيف خارج ليا فعودي ، والله مني لا داقو واخا يعواج .. حدرات راسها ورجعات بحالها ..

_______________

- فطواليط دالڤيلا من بعدما سالات ، عاد رتاحت وتهنات ... هزات عينيها فالحمام ، لي بوحدو كان قصة بديكور ديالو ولونو لي كان بدهبي البيج والكحل ، تحشمي دخلي ليه ولا توسخيه ..

- هادو هوما الطواليطات ولا حيد بالاك ، علم الله الحمام كيف غادي يكون .. تنهدات تنهيدة طويلة ، حطات يدها على البوانيي بغات تحلو مابغاش يتحل .. عيات دور فيه او والو ... كتحاول مامرة ماجوج او والو ..

- سكينة : اويلي اش هاد زمر هذا مالو مابغاش يتحل ..

- حطات يدها على باب كدق ، ولا من مجيب ... حطات راسها كتحاول تسمع واش كاين شي حس ولالا ... سمعات خطوات نازلين ..

- سكينة [ كدق] :

عفااك ، واش كتسمعني .. [ كتخبط فالباب] عفاااك ..

- عاد مدوش ، لابس سروال كيطمة فالكحل مع تريكو فالبيض خفيف .. كيقاد فشعرو بيدو .. حتى وقفو الدقان فالباب والصوت النسائي لي كيعيط .. بدا كيقرب شوية بشوية ..

- سراج : شكون انت ؟

- سكينة : واش حنا دابا فشكون انت وشكون تكوني ، بقا اتقولي علاش متهضري وغير تسوني .. وحليا هالعار راه زمر معكس ماعرفتش علاش مابغاش يتحل ..

- سراج [ هزهز براسو ] :

شيري ليه ..

- سكينة [ تعصبات] :

كيفاش شيري ليه واش كتمرݣن عليا ، وحل عليا خلاص ..

- سراج : لا حول ولا قوة إلا بالله العلي العظيم ، راه ݣلنا ليك ابنادم شيري ليه ديري ليه باي باي فهمتيها دابا ، ولا نشرح ليك بالخشيبات ..

- سكينة : كيفاش واش انت مسطي ، كيفاش ندير باي باي ..

- سراج : الباب كايتحل اوتوماتيك الى شيرتي لجهة الپوانيي ، اتوقفي يدك مقابلة مع الپوانيي وغاديري باي باي ، بحال الى كتشيري لشي حد ايتحل ..

- سكينة سكتات ، حطات يدها كيف قال ليها وشيرات ، تصمع صوت طقطقة وهو يتحل الباب ، هزات راسها عينيها جاو فعينيه ، طلعها ونزلها ..

- بغيت نعرف أش جابك لهنا ..

- سكينة : راه القيت طواليطنا عامرة ومالقيت كيفاش ندير ..

- سراج [ هزهز براسو ] :

أمممم طواليطكم ... عطاها بظهر وتم غادي ، تبعاتو ..

- سكينة : بلاتي غير صبر ، بغينا أنقولو ليك شكرا ..

- سراج [ وقف وضار عندها ، بنظرات سخرية ] :

شكون انتونا ، حيت هاد الساعة كتباني ليا غير انت ؟ اه عندك الصح حيت انت فيك 10 فهمت ، الالة إعتذارك مقبول ..

- سكينة [ جمعات غوباشتها كتخنزر فيه] :

كيفاش فيا 10 ، ياكما يحسابليك غير طلبت منك السماحة .. صافي تبعر وتصحاب راسك تمة وانت غير نمة .. ايوا جمع راسك شوية ..

- سراج [ببرود] :

اللسان الطويل ، دار باش يتقطع ويتشرمل ويتكال الݣاورية ، [اشر ليها لجهة الباب خلاها ومشا ] ..

- انا إمرأة لست كنساء العالم .. أعيش في البحر ، لا رجل في البر يملأ عيني .. أريدك أنت يا رجل ، ولو لصدفة إذا مر بي بعض ظلك .. كنت عرفتك ، رائحة النرجس و الصمت في عمق قلبك .. كنت عرفتك ، طعم اللهيب على حافة الريح .. كنت عرفتك ، قطعان أيل و حصان و خيل و أطراف ليل على حد بابك .. كنت عرفتك ، لكنني منذ شِتائين .. أبحث عنك ، أبحث عن الهبوط سفحا بلا أي زرع ، أو مثل ليل بلا نهاية .. في آواخر كانون .. أو أزل يتحدى الأبد .

- على طبلة ديال الفطور مجموعين ..

- أدريس [ بزعاف] :

علاش انا زعمة نهبط مع الخدامة تا كيفاش دار ليها ، اش هاد البلان ، انا عنري خدمت فالفاس والبالة بقا انحيد البطاطا وخيزو ..

- مسيرة [ فتحات خبزها لي سخناتو حتى تݣرمل ، دايرة فيه الزبدة لي دابت وساحت ، سدات الخبز وكبات ليها كاس ديال أتاي ، عضات دغمة كتلدد ببنة الزبدة لي دايبة ومداق الخبز السخون ] :

ايوا غير سمحليا اخالي أدريس ، كان عليا نقوليك يرضك انت شاف ديال الخدامة ، ولا يشوفليك شي خدمة فالإدارة ... منك للمدير ، لا حول ولا قوة إلا بالله العلي العظيم ، خالي سمعني مزيان ... انا راه انخدم هنا اباش نخلص الݣلسة ديالنا هنا لا انا ، لا البنات ... راه خدمتك انت وبا لي اتخلصو عليها الفلوس ، ومنها مناش اتوليو تشريو لينا لي خاصنا .. اباش تكون فبالك ، وتشريو حتى داك الݣارو لي كتكميو ..

- يعني زمان مسيرة تخلص وتشري وتحط باااح ، دابا انتوما نوبتكم تخدمو شوية ..

- سعاد [ والفرحة طايرة من عينيها ] :

سيري يابنتي يامسيرة ، أنا مفرشاك برضى ومغطياك بيه .. بردتي ليا قلبي ، غلي بنادم يضرب الكرفي على قلبو .. الله يخلي ليا بنياتي ..

- معزوزة [ بصوت باح وتقيل] :

طليتو خضر ، ݣاليك بقا انحيد بطاطا وخيزو ... وبطاطا تعرف ليها أوليدي ، عندك يديها وانت يديك رطب من يدي انا لي بنت ، وكون اتزاديتي مرا بحالك بحال سعاد ... كون زوجناك بعدا ، اتجفف وطيب وتصبن وتسيق ..

- أدريس [ حط الخبز من يديه ] :

ومي معزوزة حشومة هادشي لي كتݣولي ، وااه وقدام البنات ..

- سعاد [بزعاف] :

مالها كدبات ، واش انت مزال ݣاعما بغيتي تفيق ، ولاواه اليوم غدا دابا يعيق ليوم غدا دابا يعيق ، وخويا راه فعمرك 44 عام لا دار لا مرا لا دراري ، معول على البنات اخويا يدورو معاك ولاواه حشومة ..

- تشهيت اشي نهار دير النفس بحال ݣرانك ، وتجي وتفرحني وتقوليا ختي راني لقيت خديمة كيفما كانت ، الراجل بحال الفاس فينما مشا يغرس ... وانت والو ، حتى ليمتا ... البنات راه مدايمين لا لينا حنا والديهم لا ليك ، ايجي نهار كل وحدة تزوج دير دارها ، ياكما ناوي تمشي معاهم ... ولا يصرفو عليك ، وݣول علينا وجي علينا ، حشومة ݣاع وعيب وعار ... راسك ولا كولو شيب ..

- وانا مغمضة عينيا وساكتة ، دروك يعيق دروك يعيق او والو .. راه حتى انا شهوتي نشوفك بدويرتك وبوليداتك ضايرين حداك العمر كيفوت اخويا ، تبع الراي لي يبكيك لا تبع لي يضحكك ..

- مجاوبهاش ادريس ، ناض حدر راسو وخرج ..

- معزوزة : ماحسيتيش براسك قصحتي معاها شوية ..

- سعاد :

لا أخالتي ، مزيان ليه ... اويلي بزاف على الترخوين ، راه الكلام ماشي اليه ، راه حتى لباهم ... عرفناه معدور ، ولكن راه كتلقايهم رجليهم بزوج ماعندهم ... ودايرين كروصة كيبيعو النعناع والشيبة ، والحمد لله بنادم عندو صحيحتو ، ماشي امشات ليه قنت فداتو يلصق فبناتو ، ويسيفطهم للتلت الخالي ، ويرتاح هو ... لاواه العوين زين أخالتي ، انا ومكرهت نخدم نيت ..

- مسيرة :

با ايشوف ليها اخديمة خفيفة على قد صحتو ، اهنا فالڤيلا ... يسقي الغرس صافي شي حاجة ماتكونش فيها تمارة ..

- عباس مدواش بقا غير ساكت ..

- مسيرة [وقفات] :

الى ساليتو يلاه ، باش منتعطلوش .. بقات ليها غير سبرديلتها لبساتها ، كانت من النوع لي مريح ، كتخشي فيها غير رجليها بزربة ، بلاما تسد سيورها ، لابسة سروال دجين واسع باش يسهل عليها الحركة ، مع قبية فصفر .. أما شعرها كانت جامعاه وظافراه ، دايرة حلاقات فودنيها وسلسلة على شكل ݣورميط .. أما سلسلتها ديال الذهب كانت محيداها ..

- خرجات على برا كتسنى فخواتاتها ، لحقات عليها سكينة ، لي كانت لابسة سروال فالخزي بجياب مع قبية فالݣري ، شعرها كانت دايرة جوج ݣرينات مضفورين ..

- مسيرة : البنات جايين ؟

- سكينة : سندس كتلبس غير سبرديلتها ، صفاء كتمشط شعرها .. هاهوما شوية ويجيو ..

- خرجات صفاء ، لابسة عليها كيطما فالݣري داكن ، مع بانضة شادة بيها مقدمة شعرها ...

- مسيرة :

واخا نكونو غاديين نحوصو ، راه غاديين انخدمو ..

- صفاء : سمحيليا أختي ، واخا نكون غادي ندير الميناج ، انا كنبغي نكون زاز لوز عارفاني ..

- خلطات عليهم سندس ، طالقة شعرها مبوكلياه .. لابسة سروال مع تريكو فالبيض وطربوش ضاير فالقهوي بارد وسباط فنفس اللون ..

- مسيرة : صافي ساليتو وزيدو قدامي .. سبقاتهم مسيرة ، والبنات تابعينها من اللور .. طلعو مع جوج دريجات لي كيديو للڤيلا ، وقفو قدام الباب ، مدات مسيرة يديها سونات .. شوية وتحل الباب على وجه نجية البشوش ..

- نجية : صباح الخير أبنتي ، كيصبحتو نعستو مزيان رتاحيتو ؟

- مسيرة : الحمد لله أخالتي ربي يخليك ..

- نجية [فتحات ليهم الطريق باش يدخلو] :

دخلو مرحبا ... أول ماحطو البنات رجليهم فالڤيلا ، وقفو مبلوكيين من غير سكينة ، لي ديجا دخلات وعاودات ليهم ، ولكن المعاودة ماشي بحال تشوفي بعينيك ..

- عمرهم فحياتهم شافو بحال هاد الدار ولا بحال هاد الفراش ولا بحال هاد الديكور ، حتى من المجلات لي كانو مبليين بيهم الناس هوما لا ، من غير المسلسلات التركية لي كيتبعو مرة مرة ... ولكن باش تشوفي داكشي على أرض الواقع صعيب شوية ..

- نجية : أجيو معايا للكوزينة ، نوريك كل حاجة ، والبنات حتى هوما نوريهم كيفاش يقادو ونوريهم كل حاجة فين كنديروها ..

- مسيرة ، حركات ليها راسها بالايجاب .. هوما تابعينها وكيشوفو فجنابهم حتى دخلو للكوزينة ... لي كانت شكل أخور ، جوج تلاجات ، كبار ، لونها كلو بيج ... مجهزة بݣاع الأجهزة لي ممكن يحتاجهم الواحد ... بلاصة الماعن العصرية وبلاصة الماعن البلدية ..

- كانت واقفة عفاف ، كتشوف فيهم وعلى ملامحها إبتسامة باهتة ..

- نجية : هادي بنت ختي عفاف ، كتعاوني فدار ... ولكن ايخصنا العوين حيت عائلة سي جلال غايجيو ، ضروري من العوين ... دابا ابنيتي يا مسيرة غاتهنيني من ماكلتو ، ربي جابك كي لميمون .. بنادم منين كيكبر فالعمر ، ضروري خاصو العوين ..

- مسيرة : داكشي لي كاين أخالتي .. المهم اباش تعرفي سمياتنا انا مسيرة ، وهادي ختي سندس ، وهادي ختي ع[يلاه اتقول عاشورا وهي تراجع فاش شافت شوفات صفاء ليها] وهادي خاي صفاء وصاحبتي سكينة ..

- نجية : مشرفين أبنيتي ، المهم هاد البلاكار راه غيه ݣاع داكشي لبلدي ، السمن وفيه العطرية وفيه البصلة يابسة مطحونة ، وتومة يابسة مطحونة ، وفيه السالمية وزعتر .. ݣاع لي تبغيه فيه ، هاد البلاكار فيه الطواجن ولي بغيتيها ديال الطين فيه [بقات كتوريها كل حاجة وبلاصتها حتى وراتها كولشي ] ..

- مسيرة : صافي أخالتي تهناي ، اليوم انوجد ليه طاجين ديال المعزي ، بالقوق وجلبانة ، وندير ليه معاها زعلوك مشوي ..

- نجية : صافي مزيان ، أنا انوجد الغدا لسي سراج ، أما سي هلال نزل للمدينة ݣبيل .. أنا نوري لبنات ، ونرجع عندك ... المهم نتعاونو انا بيت سي جلال عليا ، هو مكايخلي حد يدخل ليه لبيتو من غيري يانا ..

- سكينة [فخاطرها ] : بحال الى مشوݣين ندخلو ليه ، مرصع بذهب والجوهر ] صافي أخالتي انت اورينا او والا عاليك ..

- نجية مشات مع البنات توريهم ، ومسيرة بدات فطياب ، هزات الطابلية دارتها وبدات ... عفاف كانت واقفة وساهية فسرجم ... تنهدات تنهيدة طويلة ، تنهيدة لي خلات مسيرة تنتابه ليها ، ضارت عندها كتشوف فيها ، نطقا باشاشة :.

حتى حاجة ماتستاهل تهزي همها فهاد الدنيا ضحكي ولعبي ومولاها ربي ..

- عفاف [شافت فيها وتبسمات] :

داكشي لي كاين أختي .. تسمع صوت روايض تحكو مع الأرض ..

- مسيرة [خسرات سيفتها] :

ياربي سلامة ، هدا مالو جهل شكون جا ؟

- عفاف [رجعات شافت فسرجم ، ونطقات وهي كتهزهز بكتافها] :.

ماعرفتش ، واحد الطوموبيل فالحمر ، ماعرفتش شكون هذا ؟

- مسيرة [ جبدات تيليفونها ، تخدم الشعبي ... الى ماخدماتوش ماتغسل ماعن ماطيب ] :

بحال والو يكون شي صاحبهم جاي لعندهم ..

- عفاف [ بعد ثانية رجعات نطقات] :

معاه واحد البنت ، وقيلة نمشي نحل ليهم الباب ..

- مسيرة [ هزهزات بكتافها] :

سيري ..

- يلاه اتخرج عفاف من كوزينة ، تسمعو جوج دقات مجهدين فالباب ..

- مسيرة [ غوبشات] :

هادي مكتعرفش تسرسر ، بقا ليها غير تهرسو ... سيري اختي حلي ليها قبل لا طيح علينا الدار ..

- مشات عفاف بزربة ، حادرة راسها ، لابسة واحد البيجامة طويلة ، وشعرها عاكفاه بزيف حياتي .. مع صابو وتقاشر فرجليها ، حلات الباب .. يلاه اتبسم للسيدة ، كتحس براسها تدفعات حتى طاحت على طبلة كانت محطوطة فالقنت مطيحة الفاز لي فوقها حتى تهرس ..

- بدات كتغوت بصوت مجهد :

سرااااااااج ، سرااااااااج الدييييييييين ... سراااااااج ، غواتها وصل لعند البنات ..

- مسيرة [ماعرفات باش تبلات .. خرجات من الكوزينة بزربة ، كتلوح عينيها كتبان ليها عفاف طايحة مسكينة وزاج حداها ... مشات عندها كتجري هزاتها ] :

انت بيخير ؟ ياكما توعتي ..؟

- عفاف [دموعها نزلو متابعين ] :

شوية ..[بدات كتنخصص] ..

- هبطو البنات ومعاهم نجية ، لي غير شافت دنيا عرفاتها ..

- نجية : لالة دنيا .. [ماخلاتهاش تكمل ، دفعاتها وكتعيط ، مكتشوفش قدامها نهائيا ، حالتها كانت كتخلع ] ..

- صفاء [كتشوف فختها] :

اويلي هادي مالها ياك لاباس ؟

- سندس [مغوبشة] :

شكون عرف ، مالها جاهلة .. شو كي دارت للمرا كبر منها ..

- مسيرة [خلات عفاف ، وجات لجهتها ] :

ياك لاباس ، داخلة لرحبة ديال البݣر .. دافعة السيدة ، والبنت مطيحاها ..

- دنيا [خنزرات فيها ] :

أدخلي سوق جواك حسن ليك ، داكشي باش ݣالس هنا ... حيت عامر بنات .. جايبكم ليه ولد عمو ، تنسيوه فيا ، [بدات كضحك] العنبر مع الوسخ مكايتلقاوش .. [طلعاتها ونزلاتها] منين جابكم ، من البار لي مالفين كيتجمعو فيك ... تريكة الخانزات ..

- مسيرة [غمضات عينيها كتحاول تكالمي راسها] :

عاودي شنو قلتي ؟ تريكة شنو الخانزات .. وحشاك مايعرف للخنز غير لي كابر فيه أكبيرتهم ..

- نزل سراج ، كيجري فدروج .. غير شافها غوبش كحل بالعما ..

- سراج [جرها من يدها] :

اش هاد الروينة ، لاش تابعاني واش لي كان بيناتنا فاريناه .. واش باغياني نقبر جد ملتك الكلب ولا مال ملتك ..

- دنيا [دفعاتو] :

انت ديالي انا ، طير تنزل ديالي أنا ، لقيتي لي عجبك ... دورتي بيك الخنز والعفن ، نل وحدة كدوز معاها ليلة باش تنساني [كضحك]

- نجية [حدرات راسها كتستغفر الله ] ..

- مسيرة [ جراتو من يدو وجات قدامو ] :

سمعي المرشوݣة المهتوكة اخنزت البيطان ، يالي معارفين الناس فصالتك .. يالخويبة يالي لايحك اراجل وسامح فيك طلعتي ليه فطانطو ديال راسو ... داير عليك الصاحبة وكيموت عليها وحسن منك متوصليهاش حتى لزطمة ديال رجليها ..

- سراج [بغا يجرها دفعاتو] ..

- مسيرة : حيد انت ، هدا شغل العيالات .. البنت جات تحل الباب دفعاتها ، طيحاتها على الطبلة ربي قالها مدخلات فيديها زاج ... المرة قد مها دافعاها ، حنا كالسة علينا الخانزات ، الخانزة المهتوكة ... المنقوبة ، أمسوسة الفخاض ..

- دنيا [ كلها كترعد ] :

قسما برب الكعبة متحيدي من حدايا حتى ندير فيك شرع يدي الموسخة لي حطاتك ..

- مسيرة [ جابت النقطة لي فيضات الكاس ] ..

- صفاء [ كتولول] :

ناري الروح غادي الطيح ، ديرو شيحاجة فكوها اليوم يهزو وحدة للحبس او وحدة لسبيطار وهانتوما وهانا ..

- سكينة [بغات تدخل] .. جراتها سندس :

ناري بغيتيها تخلطك معاها ، الى كانت كدابز اتفرجي وسدي فمك ..

- مسيرة [ضارت عند سراج] :

وديني وما أعبد ، وتدخل أنسيفطك انت وهي لروضة ..[رجعات شافت فيها ، غمضات عينيها تنهدات تنهيدة طويلة ، حلات عينيها على غفلة جبداتها من شعرها ]

- أنا موسخة ، دوي أوجه الدكر يالمنفية ... حالتك ويامك ، باغية ديري فيها لاكلاص وانت ديݣولاس ، دوي يالمشوهة .. شتي أنا بزااااف عليك ، زطمة ديال رجليا متوصليهاش ..

- دنيا كتغوت ربي لي خلقها ، طاحت ليها كتفركل ، ماحبساتش تمات جراها من شعرها حالة الباب ومخرجاها ... البنات تابعينها ، غواتها خلا سعاد ومعزوزة يطالو كتبان ليهم مسيرة كدابز ، تمو طالعين ، عباس وأدريس خرجو ، العساسة لي على برا كيطلو ...

- مسيرة : انا بزااف عليك يالمدلولة يالمهتوكة يالمشروكة يا يالمفتوقة يالمحلولة .. انا حاشاك وماشاك والكلب مايتعاشاك ..

- سراج [باغي يجي وراها يجرها ، جراتو سكينة من يدو ..

- خليها ، ماتوصلهاش ، هي لي جبداتها خليها منها ليها ..

- سراج : راه اتقت\لها واش انت مريضة ..

- سندس : فاش كانت تعاير فينا كنتي الفوق ، والحالة لي دارت لخالتي نجية ولبنت مسكينة ، خلي طواسلها ، ماحشمات مارمشات ..

- مسيرة [ ݣلسات عليها ، هزات يديها حتى لسما طرشاتها ،نزلات عليها بليد لوخرا طرشاتها ]

- قبل لا تدوي عليا انا وخواتاتي غسلي عبونك ، يالحمارة يالخيبوعة ... يالمرجلة .. غسلي عبونك ونفضيه وسخنيه وحرمليه ونقيه .. نوري انا مك ياشمكارة يا شمامة .. كيفاش تحلي كابينتك على لالياتك ... بغيتي نوصلو للكوميسارية نوصلو ليها ، انا نيت ماعندي مايدار ، الى على الحبس دوزناه الحمد لله ... هانية نمشي ندوز على طواسلك واحد 4 شهور توحشت نيت صحاباتي والعدس البنين ديالهم نيت ..

- ريشاتها ماخلاتش ليها الجهد لي دافع على راسها ..

- مسيرة :

تقداو ليك ، اوجه الضفضعة ، ياوجه النموسة المهتوكة .. يا وجه سراق الزيت المنحور ياكمارة الفيل المتقوب ...

- تحل الباب الكبير ودخل جلال ، وجهو مكايبشرش بالخير .. من حوايجو باين يلاه داخل من سبور ... بزربة وصل عندها جرها من فوق منها ..

- جلال [بصوت رجولي قاصح] :

هداي هداااي .. مداتهاش فيه كتفركل فيديه ، هزها من كرشها مبعدها عليها ... حلفات لا تبعد ..

- مسيرة [صاعرة مكتشوفش بعينيها ] :

خليني نوري لفورمة الوصلة أش كنسوى ، انا موسخة يالمعفونة يالمهتوكة .. يالمتقوبة يالمحنكة ، ياحنوك كوجاك .. وطلق مني وطلق اوا طلق ، [نزلت بيديها تلاحت ليه على يدو عضاتها ، مع طلقها مع رجعات لدنيا ... لي بدورها ضرباتها ليديها ، خواتاتها غوتو فاش شافوها باش ضرباتها ..

- سراج خرج عينيها ... اما مسيرة مكانتش حاسة بضربة ، يالاه اتلاح عليها ، وهو يخطفها جلال هازها ، اشر للعساسة لي فالباب .. جاو شدو دنيا ، لي كتفركل وتغوت

- طلقوني طلقوني [ كتغوت بحال الحمقة .. تمات طوموبيلت كريم داخلة بلاصات وتم جاي كيجري ، كيشوف ديك الروينة لي نايضة ..

- سراج : دي ختك اكريم ، نتلاݣاو فالكوميسارية .. كريم ماعرف مايدير ماحيلتو لمسيرة لي يدها كلها دمايات ، ولا لختو لي كيشوفها صافي حماقت ... ولا جنوية لي طايحة ، داخ .. ركبها فطوموبيل .. وهي كتغوت لربي لي خلقها ، كان ضروري يمشي معاه واحد من العساسة وداكشي لي كان ، حيت حالتها خرجات على السيطرة ... ركب سراج فطوموبيل تابعهم ..

- مسيرة [ كتملص من جلال وتغوت حتى نزلها ] :

لاش تفكني لاش ، واش انا ݣلت ليك تفكني خليني نقت\ل جد مها الكلب ... تهجمات على عفاف لاحتها على طبلة شوية زاج يدخل معاها ، لاحت خالتي نجية مرا كبيرة ، عايراتنا بالموسخات ... واه بزااف ..

- جلال [ مجاوبهاش كيحاول يهدن راسو ، عينيه مشاو نيشان ليديها لي كانت غارقة بدم ، مع دمها سخون والاعصاب مكانتش حاسة ݣاع ... جاو خواتاتها كيجيريو عندها ... مها باها معزوزة دريس ..

- سندس [ عارفة حالة مسيرة داكشي باش دوات غير بشوية ] :

م مسيرة ، شوفي متخلعيش أختي .. ولكن ر راه يديك مضروبة ..

- فللحظة حبسات ، بقات واقفة فبلاصتها ... الكل كان كيشوف فيها ، مخلوع ومابغيينش يخلعوها ، ماباغيينش يغوتو ولا يوتروها حيت عارفينها مزيان .. بلي نقطة ضعفها هي تشوف الدم .. من صغرها الحولي الى كان كيتدبح متحضرش ليه متشوفوش ، هادي نقطة ضعفها متقدش تصبر عليها نهائيا ..

- جلال [ بهدوء] :

خاصنا نمشيو لسبيطار ..

- مسيرة [ مداتهاش فيه كتشوف فصفاء حيت هي الوحيدة لي مكتعرفش تكذب عليها ] :

واش كاين الدم ؟ ياك ؟

- صفاء [ حركات غير راسها بأه ] ..

- مسيرة : كثير ياك ؟

- صفاء [ حركات راسها بالإيجاب ] ... بدات كتنزل راسها شوية بشوية ليديها ، كتبان ليها كلها دم .. الضبابة جات ليها على عينيها ، خلاتها تفقد توازنها ، قبل لا طيح شدوها يديه ... هزها ، غادي بيها بجرا لجيهة طوموبيلتو ... باها تابعو ودريس والبقية ..

- عباس انا انمشي معاكم [ شاف فلوخرين ] بقاو هنا انتوما .. ركبها جلال اللور ... دخل لدار بزربة هز سوارتو وتيليفونو ورجع ، طلع بجرا لطوموبيلتو ديمارا وكسيرة عافط عفطة وحدة للسبيطار ..

______________________

*** من بعد ساعة ديال المݣانة ***

- ݣالسة فوق الكرسي ، ساهية ... كلها كترعد .. الريسيل نازل ليها على عينيها ، صدرها كيطلع وينزل كتشوف فنقطة فارغة ..

- على بعد ميتو منها ، واقفين بزوج بيهم كيتناقشو ..

- كريم : سراج راه مكاينة حتى فايدة باش تشد ، السيدة أنورمال أصاحبي ..

- سراج : انورمال ، تعالج اكريم ... جايا هاجمة علينا ، لايحة الدرية على الطبلة وضاربة المرا كبيرة ... وشتي أش درت لمسيرة ليدها ، مخليها كلها دمايات .. ختك خاصها داوا ، انا لي عليا انديكلاري بيها باش عمرها تيان ݣدامي ، والى مشات حتى وقعات ليا شيحاجة ولا لشي حد من لي كنعرف ، اتكون هي السباب ... خليهم هوما يتفاهمو معاها ، دوزنا بزااف وصلات للحد ..

- خلاه ودخل للعند الضابط .. كتب بيها شكاية وشما مخلي البوليس هوما يتكلفو بيها .. خرج تحت نظراتها ، كانت كتشوف فيه بواحد الشوفة غريبة مامفهوماش ..

- طلع فطوموبيلتو ، يلاه ايديماري بانت ليه طوموبيلت فؤاد باها وقفات .. ماتسوقش ليه نهائيا ديمارا وزاد ..

_______________

- حلات عينيها بشوية ، كيبان ليها بيت بيض ... واحد الطبلة حداها محطوط عليها كترت الدوايات ... هزات عينيها فباها لي كان ݣالس حداها ..

- عباس [ بإبتسامة بشوشة ] :

هاسبيعة ديالي فاقت .. على سلامتك أبنتي .. ، وهادو فعايل ديريهم فينا خالعانا ..

- مسيرة [ مشات عينيها ليديها ، كتبان ليها الفاصمة ] .. جاها صوتو من حهة ليسرية ديالها ، صوت الباح الرجولي القاصح ..

- خيطو ليك الجرح ، عندك الزهر مكانش غارق ومقاصش ليك العصب ..

- عباس [ شاف فيه] :

اه الحمد لله ، ربي جا من جيهتها .. ربي يخليك اسي جلال نرضوها ليك فساعة الخير ، جاب الله جيتي ..

- مسيرة [ قاطعاتهم] :

ديك خيتي شنو درتو معاها ، فين مشات ..

- عباس : ديها أفصحتك انت ، راه جا خوها داها ... سي سراج يدير معاها اللازم ..

- مسيرة : الى هكاك يلاه نمشيو بحالنا ، مكنحملش ريحة الدوايات وهاد الجو ديال السبيطارات .. جات نايضة ناسية يدها حتى تعݣرات منها ..

- جلال [ بأمر ] :

بشوية بشوية ، انت مالك كتنوضي كيرعدة بشوية ..

- مجاوباتوش ، حيت كتحس براسها فاشلة ... واش الدم لي شافت ولا من جرحها ، ولا من الدم لي ضيعات .. واخا الجرحة كانت غارقة ، غير متباغيينش يخلعوها ... عندها الصعر لي ماضرباتش ليها العصب .. ربي جا من جيهتها .. سبقهم جلال للطوموبيل ، مخلي ليها الباب محلول ، طلعات اللور .. باها طلع القدام ... ركب ساد باب الطوموبيل ، ديمارا وشد الطريق لدار ..

- حطات راسها على الزاجة .. ساهية وساكتة ومنظر ديال الدم قدام عينيها ، كانت حابسة راسها غير بزز ... ولكن مابقاتش قادة مزال تصبر ..

- مسيرة [ بصوت مخنوق] :

حبس حبس .. هز عينيه فيها من الزاجة بان ليه وجها لونو مخطوف .. دور طوموبيل للقنت ديال الطريق او وقف .. حلات الباب بيدها لوخرا ونزلات ...

- مع نزلات مع رضات ݣاع لي فكرشها ... كترض كترض حتى حست بصدرها ضرها .. حبسات هازة راسها لقاتو ثدامها هاز قرعة ديال الما ..

- جلال [ ببرودة] :

مدي يدك ، لي مصلوحة ماشي المعطوبة ..

- مدات ليه يده ، كب ليها الما .. غسلات وجها مزيان ..

- جلال [ بأمر وصوت قوي] :

شربي .. خدات من عندو القرعة شربات ... هزات راسها كتحاول تنفس ..

- جلال : مزيان دابا ؟

- ﻻ‌ﻓﺮﻕ ﺇﻥ ﻛﻨﺖ ﺟﻤﻴﻠﺔ ﺃﻭ ﻓﻴﻚ ﺑﻌﺾ ﺍﻟﺠﻤﺎﻝ ﺃﻭ ﺑﺪﻭﻥ ﺟﻤﺎﻝ ، ﻻ‌ﻳﻬﻢ ﻓﻜﻞ ﻣﻦ ﺣﻮﻟﻚ ﻣﺜﻠﻚ

ﺟﻤﺎﻝ ﺍﻷ‌ﻧﺜﻰ ﺃﻧﻬﺎ ﺃﻧﺜﻰ ، ﺟﻤﺎﻝ ﺍﻷ‌ﻧﺜﻰ ﻓﻲ ﺃﻧﻬﺎ ﺗﻌﻴﺶ ﻟﺘﺴﻌﺪ ﻧﻔﺴﻬﺎ، ﻭﺗﺴﺘﻤﺘﻊ ﺑﺎﻟﺤﻴﺎﺓ ... ﺟﻤﺎﻝ ﺍﻷ‌ﻧﺜﻰ ﻓﻲ ﺍﺑﺘﺴﺎﻣﺘﻬﺎ

ﻭﺭﻭﺣﻬﺎ ﺍﻟﻤﺮﺣﺔ ، ﻭﺭﺿﺎﻫﺎ ﻋﻦ ﻧﻔﺴﻬﺎ ﻭﺻﺪﺍﻗﺎﺗﻬﺎ ﺍﻟﺠﻤﻴﻠﺔ ،

ﺍﻛﻤﻠﺖ ﺗﻌﻠﻴﻤﻚ ﺃﻭ ﺗﻌﺜﺮﺕ ... ﻣﻮﻇﻔﺔ ﺃﻡ ﻻ‌ ، ﻟﺪﻳﻚ ﺯﻭﺝ ﺃﻡ ﻏﻴﺮ ﻣﺘﺰﻭﺟﺔ .. كل هذا ليس مهم فالمهم فقط هو أنت ..

- واقفات فالكوزينة .. بزوج بيهم عفاف ونجية ، دخلات عليهم صفاء لي كانت سالات شنو ݣالت ليها نجية دير ..

- صفاء : خالتي نجية كيف بقيتي شوية .. ياكما مزال موعتة فالمرود ..

- نجية : لا أبنيتي الله يرضي عليك ، دابا شوية ماشيش بحال ..

- صفاء : بنت الحرام من فعلها المريضة .. الله ياخود فيها الحق فهاد النهار .. الحمد لله لي ختي مسيرة مجاتهاش الدقة غارقة ... اما نتبع جد والديها فينما كانت ، النوبة لي فاتت مسيرة دخلات الحبس هاد النوبة نوبتي انا ..

- نجية [ شافت فيها مصدومة] :

هاويلي ، واش مسيرة خويتك كانت مشدودة فالحبس ؟

- صفاء [ بدات كتسرسب ليها ] :

لا يسحابليك اخالتي نجية تشدات حينتاش شماكرة ولا شيحاجة ، لا راه تشدات أعلى الخير ..

- ختي كانت كتخدم مع شي عيالات ، مكايتهلاوش فيهم رجالاتكم .. كانو مكرفصين عليهم ..

- نجية [ هزات خضراها حطاتها على الطبلة وݣلسات هي وعفاف كيسمعو ليها] ..

- ايوا أخالتي هي مايمكنش تشوف المنكر وتسكت ليه ... واحد المرة كانت خدمات فالحمام ، وجات واحد جارتنا كلها زرݣة بضرب مسكينة ... وناضت مسيرة كسلاتها ، وسولاتها شكون لي دار فيها ديك الحالة .. قالت ليها بلي راجلها ، كيصبحها بالعصا ويمشيها بالعصا علاش الله أعلم ..

- نجية : هاد ولاد الحرام مكايخافو لا من ربي لا من عبدو .. إيوا كملي ابنتي اش وقع من بعد ؟

- صفاء : واحد النهاريات كنا خارجين ، وهو يبان لينا بوبزة .. كرشو تقول حامل فسابع ، مع واحد خيتي تكون قدي فالعمر ، مدخلها لبوتيك الحوايج كاسيها ومسبطها ، او مرتو ... بالكشايف باش يعطيها 300 دالحمام ..

- ايوا نهار خرجات مسيرة من ديك الخدمة ، قالت اش دير تولي تبع رجال لي كيخونو عيالاتهم ، وتفيق دوك العيالات من الݣلبة ... وداكشي لي كان وكانو مساكنات كيدورو معاها ... ولكن شي عفاريت ، حصلوها وعرفوها وديكلاراو بيها ، هي فاش تشدات ..

- قاليك البوليس ، داكشي كيتعتابر تجسس وماشي من حقها دير هكاك ، وحكمو عليها ب 4 شهور ..

- نجية : والله ماتستاهل ، دوك لي خاصهم يتشدو على فعايلهم مطلوقين .. وهي لي مدارت غير الخير تشدات ، تي ابنيتي فهاد الزمان كولشي غادي عوج حتى حاجة مامسݣدة ، بحال بنت اختي نيت [ بدات تعاود ليها على عفاف وماوقع ليها ، جات سكينة وسندس من ورا مسلاو ݣلسو كيسمعو لنجية .. ] ..

- سندس : عبرتي على طاسيلتو الشارف الهارف ولد الحرام ، هداك باك اختي ماعرفت فين غادي يحط جنابو الله يستر ..

- عفاف [تنهدات تنهيدة طويلة] :

تبع المرا ، او ولادو لي دار معاها وانا لاحني ، كونماشي خالتي مسكينة لي لقيت ، الحمد لله على كل حال .. انا من طبعي سكوتية مكنعرفش ندوي وندافع على راسي ..

- سكينة : الوقت مابغاتش هادشي أصاحبتي ... الوقت بغاتك تكوني قاصحة .. دافعي على راسك وتخرجي عينيك ، راه الى بقيتي امخلوعة وخايفة ياكلوك ، انا نݣوليك ... خاصك تبدلي دابا ماتبقايش بحال هكا طوري شوية وتجبدي ، او ولي دافعي على راسك ..

- نجية : عندهم الصح ابنتي .. خاصك تبدلي ماتبقايش بحال هوكا ..

- بقاو على داك الحال ، هضرة كتجبد هضرة وجماعة .. حتى تسمع صوت ديال روايض طوموبيل قدام الباب .. بشوية تسمع الصونيت ..

- نجية : سيري ابنتي عفاف فتحي الباب راه وقيلة جاو ..

- صفاء [حبساتها] :

لا غير خليها انا انوض نفتح .. خشات رجليها فصباطها لي كانت محيدة .. ومشات تحل الباب .. مع حلات الباب ، جاو عينيها فعينين ساخرة .. طالعها ونزلها وطلق تصغيرة طويلة ..

- توفيق : ولد عمي ولا عندو دوق ..

- صفاء [خصرات سيفتها ] :

كيفاش ؟ أش كتقول ؟ وشكون انت ؟

- ‏"أنتَ محظوظٌ للغاية ..

إن لملمَ أحدهُم شتاتك في وقتِ ضياع، أو رماكَ بسهمِ جبرٍ في وقتِ انكسار، أو منحكَ يده يُطبطِب علي روحك في وقت احتياج، أو قبلِكَ كما أنتَ بماضيكَ وسيئاتكَ وندوبك، شخصٌ حينما كان الجميعُ يتخطاك كان هو يُقسم بيقين أنكَ شخصٌ عظيمٌ تستحِق..

‏" نحن لا نزهر إلّا من أولئك الذين يلقون أجمل مافي قلوبهم في قلوبنا "

/ / / / / / /

- دفع الباب ودخل كيشوف ليها وإبتسامة الاستهزاء على وجهو .. نطق وعينيه مفيكسيين فعينيها :

من إيمتا ولد العم كيجيب القاصرات للدار ، منين ضبر عليك ؟ [ غمزها] كتباني ليا جديدة فالحرفة ..

- صفاء [ فهمات قصدو ، الأعصاب ديال الدنيا كلها تجمعو فراسها ، ولات كتسمع غير التصفار فودنيها ... ماعندهاش مع المعيور هي ، هي عندها مع الأفعال ، ماتهز غير الڤاز لي كان فوق الطبلة لي حداها ، فغفلة عليه ... هزاتو وخبطاتو بيه ، حتى تسمعات صرخة ألم من فمو .. شد فراسو كيتألم ] .. قربات ليه نازلة براسها لعندو ..

- عندك الصح جديدة فضومين ، جديدة فالقت//ل مع سبق الإصرار والترصد .. ماعنديش مشكيل نسيفط بنادم كومة لسبيطار ، يغرزوه واحد 10 الغرزات باش تبقا ليه متورخة ... عمرو ينساها حياتو كاملة..

- جات سندس وراها نجية ، لي غير شافت المنظر بدات كتولول ..

- الله أبنتي اش درتي ، أويلي ... سي توفيق انت لاباس أولدي [تحدرات لعندو كتشوفو واش هو بيخير ، قطرات ديال الدم كانو نازلين من يدو ]

- سندس : اويلي يا صݣعة أشنو درتي واش باغية تمشي تݣلاصاي نوبتك هاد المرة ..

- نجية [موحهة كلامها لعفاف لي كانت كتشوف مخلوعة وساكتة] :

جيبي التلج وشي خرقة سربي ، أجي معايا اسي توفيق .. كتحاول توقفو ، مغمض عينيه من الحر لي كيعطيه راسو .. ݣلساتو على الكرسي ، جابت ليها عفاف خرقة والثلج .. من زهرو الجرحة كانت غير سطحية ..

- توفيق [كيشوف فيها عينيه كيف العافية ] :

غادي نربيك ، غير صبري .

- صفاء [تخطاتهم او تقابلات معاه ] :

ربي راسك انت الاول ، الحمار الكيدار اشماتة أعيفت الرجال ، عاد ربي الناس الحيماري لاخور تفو على قوم ..

- توفيق جا يوقف جاتو دوخة رجع ݣلس ..

- دخل جلال بحال شي عجاجة عاݣد غوباشتو .. كيبان ليه الڤاز مهرس وتوفيق راسو دمايات .. ݣاع السبان جاه فودنيه ..

- ابنادم أش هاد الصداع اش هاد الروينة .. مسيرة واقفة مصدومة كتشوف فداكشي لي قدامها ، صفاء ضارت لعندو كترعد ..

- هذا مامربيش .. دق الباب فاش حليت ليه ، ݣالس كيقول بلي ولد عمو ولا عندو الدوق ... وبلي ولا كيجيب القاصرات ، وبلي انا جديدة فالحرفة .. رضني انا مامزياناش ، كيدور عليا ويدير شوفات ديال ديال .. [ سكتات ] ..

- توفيق [ كيردد ] : غادي نربيك غير صبري غادي نربيك ..

- مسيرة [ غادية قبالتو] : عاود اش قلتي أتربيها ، ويلاه كون راجل وقف وحط عليها يديك ، الى فتحات ليك هي نص لاخور ، نفتح ليك انا نص الثاني وهانية. عندي ..

- جلال [ بصوت بحال الرعد ] :

براكة ، واش عندي عند رحبة ديال البهايم ، شتكم نسيتو راسكم وليتو ديرو مابغيتو بحال الى داركم هادي ، مل واحد يدخل جواه ، ماعنديش الكوري هنا ، وحدة منوضة ليا سكوندار هنا على صباح ، لي مالف بشي عيشة يبقى فيها ، مايجيش يفرع ليا قبي ..

- مسيرة [خنزرات فيه] :

وانت عاجبك مدار فالبنت ، عاجبك يقلل عليها العفة وحشاك ..

- جلال [بأمر] :

طلب السماحة من البنت ..

- توفيق [هز راسو فيه بمعنى اش كتݣول]

- جلال [من تحت سنانو] :

دويت ، طلب السماحة من البنت .. توفيق بلاما يشوف فيها :

سمحي ليا ..

- جلال [موجه كلامو لمسيرة] :

الى غاتبقاو فهاد الدار ، ادخلي سوق جواك انت ولي معاك ، هاد الدار عندها قانون مكاينين فسوق البهايم هنا ، لي مالف بشيحاجة يخليها فدارهم ، اخر مرة أخر مرة نشوف هادشي كيتعاود ولا ديني وما أعبد ، اتشوفي وجه قسما برب الكعبة عمرك شفتيه فحياتك انا علمتك .. خلاهم وطلع لبيتو ..

- مسيرة بقات واقفة ، كلها كترعد مابغاتوش يدوي معاها بداك الأسلوب ، ماحملاتش راسها .. عطاتهم بظهر وخرجات ، شافو البنات حتى عياو وتبعوها ..

- دخل لبيتو ، نيشان لدوش دوش عليه .. خرج لبس سروال كحل دجين مع ݣاط فنفس اللون قبية فنفس اللون طويلة ، وتيشورت فالكحل ... هز سوارتو وتيليفونو ونزل .. لقا توفيق ݣالس لاوي على راسو فاصمة ، هز راسو فيه مغوبش .. جا عندو ونطق بحدة :

جيتي مرحبا بيك ، دارك هادي مغانمنعكش ، ولكن أقسم لك يمينا ، دير هاه ولا هاه ، انت عارف وانا عارف بلاما ندويو بزاف ، برب العالي لا ضربتي فيها الضربة مزال ، ݣاع لي فهاد الدار عليك بتيقار والاحترام ، لا لي فهاد الدار ولا لي قراب لهاد الدار ، تجيني خبارك أتوفيق برب لا عقلت عليك انا علمتك ، عارفني مزيان بلاما نطولو فلوكو لوكو .. خلاه وخرج ..

- جات عندو نجية توريه بيتو ... طلعات معاه للبيت ، ستفات ليه حوايجو .. قبل لا تخرج سولها :

- شكون دوك البشار لي كانو لتحت ؟

- نجية : ضياف سي جلال .. انا مكنعرفهمش ولكن هو كيعرفهم ..

- توفيق : ومن إينا عام جلال كيعرف هاد النوع؟

- نجية : والله ماعرفت اسي توفيق ، سمحليا اوليدي خاصني نمشي نكمل شغالي .. خرجات وخلاتو باغي ياكل جنابو ..

- وديني وما أعبد لا خليتها فيك ..

_________________

- متكية فوق السداري ، دايرة مخدة تحت رجليها ومغمضة عينيها ، داكشي كامل لي وقع كيدوز من قدام عينيها ... ماحملاتش راسها علاش يدوي معاها بداك الأسلوب ... سكينة عاقت بيها حسات بشنو كتفكر ، ݣلسات حداها ونطقات :

الى جينا نشوفو راه عندو الصح ، جينا فنهار واحد قلبنا ليه الدنيا سفاها على علاها .. راه أي واحد مغاديش يتقبلها أصاحبتي ..

- مسيرة[شافت فيها ] :

واش أنا لي بديت ، راه شفتب ختنا تهجمات على البنت وعلى السيدة ، ونازلة معيور فينا ... انبقى ساكتة ليها ، حتى انا خرجتها من الدار وجففت بيها على برا ماشي الداخل ، وماشي انا لي هرست زاج راه ديك المعفونة المهتوكة خنزت الفم .. وداك متقوب الودنين راه هو لي جبد ، هو ݣلس يسمع الهضرة لصفاء ، صفاء راه نفسها حارة ... ماتخليش شي حد يغلط فيها يحسابليك بحالي أنا .. هي راه تنزل عليه وترجع اللور ..

- سكينة : متافقة معاك فهادشي ، ولكن واخا هكاك السيد راه مغاديش يعجبو الحال ، مزال ماسخناش بلاصتنا ، ادوك الڤيزان لي تهرسو علم الله بشحال دايرين .. كان هاني خرجنا ليه من الجنب ..

- مسيرة : يعاود لجهة الضراه ... بلاما تكملي عليا أسكينة وحق الله العظيم ، لي فيا كافيني .. شحال فيه تݣول عندو قصر باريس هيلتون ..

- سكينة [كتشوف فيها بعدم تصديق] :

ايوا اش غادي نقوليك بااز اختي والله حتى باز ، كون عندو اتلت من هاد الڤيلا لاباس علينا حد مايقولها الحد ، لعلا يزيد كثر ..

- مسيرة : صاف[قاطعها صوت التيليفون ، هزات لقاتو كريم ] .. ألو كريم ، الحمد لله شوية .. وانت كيبقيتي ، فينك دابا ؟

- كريم : انا مزال فالكوميسارية ، سراج ديكلارا بدنيا ... دابا جابو ليها طبيب باش يتحقق من قدراتها العقلية ، الى تأكدو بلي عندها خلل أتدخل تعالج ..

- مسيرة [تنهدات تنهيدة طويلة] :

انا مغاديش نديكلاري بيها على الضربة لي ضرباتني ، خليها منها لمولاها ، داكشي لي وقع أكريم راه هي لي جبدات ..

- كريم [ كيحك فراسو] :

عارف هادشي سراج عاود ليا كولشي ، دنيا خرجات على راسها بيديها ... كان عليها تعالج شحال هادي ، الموس لي كانت هازة فيديها كانت جايباه معاها قاصدة بيه سراج ، وجات فيك انت ... ݣلتها للواليد ، ولكن هو غفل عليها ، صراحة والله ماعرفت منݣول ..

- مسيرة [ كانت حاسة بيه ، عارفاه بلي كان محتاج ليها فهاد الوقت ] :

حاسة بيك ، ماعندك متقول ... انا ماشي برانية انا معاك وبجنبك ديرها فبالك ، منين تسالي دوز لعندي بليل ندويو صافي ..

- كريم [ تبسم ] :

- واخا غير نسالي ونشوف شنو كاين ، ندوز لكلينيك وليل نكون عندك .. يلاه انا خاصني نقطع دابا ..

- مسيرة : بسلامة .. قطعات معاه وشافت فسكينة :

بقا فيا ياختي ، باينة فيه واصلة ليه العظم مسكين ..

- سكينة : وصاحبتي راه بسيف هادشي لي داز عليه راه ربي لي عالم بيه ، ماحيلتو ليك انت لي تضربتي ولا لتختو ، ولا لراجل ختو وصاحبو .. الله يستر ياربي ودير تاويل دالخير ..

- مسيرة : اللهم أمين ياربي .. يالاه نوضي خليني نغمض واحد الغمضة ، دوا لي عطاوني ديال الحريق كيدير النعاس ، عينيا كيتلاصقو ..

- سكينة : نمشي نشوف خالتي سعاد ..

- مسيرة : واخا ..

- فوحدة من الديور ديال ولاد السعيد ، دار لي كبيرة ، مصبوغة ومفينية مزيان وباينة بلي مولاها ميسور الحال .. الدار لداخل حتى هي كانت زوينة ، بفراشها البلدي الزوين الطبالي منقوشين ، السقف فيه الݣبص منقوش ، ريحة البخور كتعطي فدار ... وقفات طوموبيل كاط كاط كحلة قدام الباب ، خرج منها راجل فأواخر السيتينات ، لابس سروال ديال الثوب فزرق مع قميجة بيضة وݣرافاط داير عليهم مونطو فالكحل وبيرية فنفس اللون ، مع نظارات ديال الشوف ..

- كيقلب فجيابو ، رجع لطوموبيل حلها وهز تيليفونو لي نساه سد الطوموبيل ، عاد دخل للدار .. وقف كيشم الريحة ديال النقا كتعطي فدار ، صفق وبدا كيعيط ..

- مالين الدار .. تسمعو خطوات جايين من الكوزينة .. خرجات بنت تكون فتلاثينات من عمرها ، شعرها عسلي ، بشرتها بيضة كانت قصيرة وعامرة وغزالة ... لابسة واحد الفراشة وشادة شعرها مطلعاه .. بإبتسامة جاوباتو :

با جيتي على سلامتك .. ايوا كيدازت العراضة ؟

- الحاج : داكشي زين ابنتي ، تبارك الله أمضرا الغدا واجد ولا مزال معطلة ؟

- لالا واجد ابا ، نتسناو غير هاجر وأسماء ، مابقاو ليهم والو ويجيو ..

- الحاج : توحشت نيت دوك الفراكس ، ألله يسهل عليك ابنتي أ إبتسام نشوفك بدويرتك حتى انت وبوليداتك ..

- إبتسام [ضحكات] :

امين أبا ، إن شاء الله انا مغانتزوج حتى نزوجك .. مالني هبلت نخليك بوحدك هاويلي ..

- الحاج : تي سيري كوني تحشمي سيري ، وسوني ليهم شوفيهم فين وصلو ، راه مع الطريق جاني الجوع .. أجي رجالهم جايين معاهم ولالا ؟

- إبتسام : اويلي أبا ومالهم ايجيو بلا بيهم ، نعل الشيطان شوية ..

- الحاج : الله يستر لاصقين فيهم كيلݣراد ، حرام واش يجيو بوحدهم بغيت انشد بناتي الراس فراس ، نشوفهم مهنيين واش بيخير وعلى خير ، وتݣول الله يستر ..

- إبتسام : وبا كون بغيتي بناتك يبقاو معاك كون خليتيهم حداك ، لاش مزوجهم اويلي على الهبال أبا ضحتيني ، هالعلاش انا مابغيتش نتزوج ..

- الحاج : لاواه أبنتي ، حتى حد مكره يشوف ولادو بدويرتهم ..

- إبتسام : شتي ابا الى كان اشي راجل مبطبط رعواني دراعو خاوي ماعدي مندير بيه ، أخليني فدار با موعززة مكرمة الحمد لله ياربي ، مالي على حالتي .. نولي انا نصرف عليه لا ..

- الحاج : وهادي غلبتيني فيها ، يلاه سيري شوفيهم فين وصلو خلاص ..

- إبتسام [عطاتو بظهر] : هي اللولة ..

_____________________

*** كازا ***

- واقفين قدام مصحة نفسية ، فؤاد كيبان عليه العيا من ملامح وجهو ..

- كريم [مطبطب على ظهر باه] :

انا هاد الايام انݣلس معاك فدار ، عارفك مغاتبغيش تبقى بوحدك .. كولشي ايتݣاد اشوية ديال الوقت ..

- فؤاد [تنهد تنهيدة طويلة] :

كنتمنى ، مابغيتش نوصلو لهاد الماصل ، حاس براسي انا هو السباب ..

- كريم : ماعندك مدير ، فات الفوت باش تلوم راسك ... مابغيتش نݣولها الواليدة حتى ترجع من سفر ، اتخلع ونصضقو واحلين ، وهي لاباس لي ولات بيخير وعلى خير ، انخليها حتى ترجع ونݣولها ليها ..

- فؤاد [هزهز براسو] :

انا غادي نمشي لدار ، بغيت نرتاح شوية ، ادوز لكلينيك أنت ؟

- كريم : اه غادي ندوز ، سير رتاح ومتفكرش بزااف ..

- فؤاد حرك راسو ، مشا لطوموبيلتو ركب مظيماري مخلي مريم متبعو بالعين ، حتى هو بدورو ركب فطوموبيلتو وشد الطريق للكلينيك ..

__________________

- فجهة الشعبية لمدينة كازا ، وبضبط فالحي الحسني ، فحي شعبي ، الناس غاديين جايين .. لي شادين قنات الدرب حاضيين الشادة والفادة ، لي غاديين بالخبز للفران ، العيالات قدام البيبان حاضيين تقرقيب الناب ..

- قدام واحد الدار سفلية ، دوزات تجفيفة ديالها ، دازت واحد السيدة وقفات تسلم عليها ..

- ختي حليمة كيدايرة لاباس عليك ؟ كيبقى سي عمر شوية ..

- حليمة : الحمد لله اختي شوية نݣولو الحمد لله على كل حال ، نتمناو من الله سبحانه يوقف على رجليه ..

- إيوا أختي حليمة الله يشافيه ويعافيه ياربي ، الله يزيد فراحتو ، الباب راه كتعرفيه لي خصك دقي ..

- حليمة [بإبتسامة بشوشة] :

ربي يخليك أختي نادية ، عارفة لي كاين ، كملات التجفاف ديالها ، كبات السطل ديال الما ، ضرباتو بشطابة .. دخلات السطل وحطات الجفاف ، يلاه بغات تدخل بانت ليها طوموبيل إيركات وقفات ... تبسمات فاش شافت لي نزل منها ، سد الباب حل الكوفر ونزل منو المقدية ، بحال كل مرة نزل محمل ومجمل بتقدية ، وقف حتى داز واحد الموطور عاد قطع لعندها ..

- حليمة [بإبتسامة ] :

مرحبا بيك اسي جلال دخل ..

- الشمس غربات ، والغروب فالعروبية ماشي بحال المدينة ... كيكون واحد الجو عمرك تشوف بحالو ، واحد الهدوء مايتباع مايتشرا ، أما ريحة الهوى النقي كيرض الروح ... صايبات سعاد المسمن وعمرات أتاي ، خرجوه على برا وݣلسو مجموعين معاهم حتى كريم ، لي غير سالة خدمتو شد الطريق لعندهم ... مايكدبش الى ݣال بلي كيرتاح معاهم .. كيحس براسو مع عائلتو .. يمكن حيت هاد الأجواء مفتاقدهم ومكابرش فيهم ..

- عباس كان شاد السبسي ديالو ، وكيكمي .. كان عاظي عندو بنسبة للكريم ، حيت ولد الدار مابيناتهومش حدود ..

- سكينة [من بعد تردد نطقات ] :

عمي ربي عطيني نجرب .. داك العجب نشوف كيداير ..

- مسيرة [خنزرات فيها ] :

اويلي وحدي ، السبسي لي بقا ليك ، واش انت هبلتي ولا مالك ..

- سكينة : وغير نطرة أصاحبتي غير نجرب كيف داير ..

- مسيرة : جربيه أختي من السبسي ، تولي تنفحي ، شوية تولي تكيلي وهي غادية .. زوينة هادي .

- عباس [ مد ليها السبسي ] :

هاكي هاكي ... ديها فهاديك الهبيلة ، والله منرضها فوجهك ابنيتي ، كيرض المجاج مع هادشي لي وقع هاد النهار ..

- شدات من عندو السبسي ، تحت انظار لوخرين لي مصدومين .. نطرات النطرة اللولة ، وبدات كتكح حيت شحال هادي مكمات شحال وهي قاطعاه ، والسبسي ماشي هو الݣارو .. تجيفات كتكح حتى كانو عينيها ايخرجو ودموعها نازلين ..

- مسيرة : هااا شفتي والله العظيم الى مزيان فيك ..

- كريم : عمي عباس ، عطيني واحد نطيرة ..

- معزوزة [بصوتها الباح] :

يلاه ها لاخر ، ݣاليك طبيب القلب .. شوية تݣوليك سعاد عطيني نطرة وصافي كملات ..

- سعاد [شافت فيها ] :

أويلي أخالتي ، داكشي لي بقا ليا فالحساب .. هادو راه مالاقيين جرة ..

- عباس مد لكريم السبسي ، نطر منو 3 النطرات ورجعو ليه ... بقاو مجمعين وقالبينها ضحك على هضرة ادريس الݣروزة ، ݣاع لي وقع مع الفطور والكلام لي قالت ليه سعاد ، ماهزش فقلبو .. الحاجة لي زوينة فيه قلبو بيض بحال الحليب ، والى عوللتي عليه فشي غرض يقضيه ليك ... يموت معاك ويوقف معاك ، من غير دراعو لي باردين من جهة الخدمة هدا هو الديفو ديالو ..

___________

- داخل الڤيلا ، ݣالسين مجموعين ب 3 بيهم ... توفيق داير الفاصمة لراسو ، حداه سراج وجلال .. لي كانو حاطين قدامهم قراعي ديال الشراب ، بلاطو فيه اللوز الݣرݣاع كاوكاو والأكاجو ..

- سراج [مغوبش] :

نقص من داك الطيران ديالك واحد الشوية ، هنا اشريف راه ماشي هو أوروبا ولا المدينة .. برب العالي يحصلك شي حد كدور ببنتو حتى يقبرك ..

- توفيق[بعصبية] :

الله يرحم جدك فوتني عليك ، أقسم لك يمينا لا بقات فيها ، رجال وعمر شي ولد المرة ݣد يحط يدو عليا ، تجي وحدة نص بلاصة ضربني برب حتى نقطعهم ليها ..

- جلال [بصوتو الرجولي القاصح] :

الى بغيتي دوز لي بقا ليك فالحياة بلا رجلين حط فيها يديك ، دوينا معاك جني وجنوني نبقا نعاود هضرتي جوج ديال المرات ، ديك الخفة لي فيك انا لي غانبردها ليك ..

- توفيق : وداكشي لي دارت عجبك ، جاك على هواك ..

- جلال [شرب من كاسو وحطو ] :

ونكدبو ، عبرات عليك .. عند بالك الرجلة هي لي بين رجليك ، الرجلة هي هنا [ خبط على كتافو ] وهنا [ أشر لراسو ] اما داك الزبل لي معشش ليك فالمخ ، بحالو بحال داكشي لي كتحط فطواليط .. مكاينش الفرق أولد العم .

- سراج :

عندو الصح ، داك الطيران ديالك جبتيها فعظامك ، عينا ندويو معاك باش دير عقلك ، ولكن معامن ... جبتيها فراسك لسانك دارها لك .. فوت عليك درية ، وفوت عليك الدريات ديال ولاد السعيد كلو ، وعوم بحرك ديك الساع تفاهمنا ، برب اخويا ونحصلك العصب ديال رجليك نحيدهم ليك انا علمك ..

- توفيق [بعصبية وقف] :

غير حيتاش باغي نرتاح ، اما بالله لا ضربت ضربة معاكم .. خلاهم وطلع لبيتو .

جلال [ موجه كلامو لسراج ] :

شنو درتي مع ديك المريضة ؟

- سراج [ نزل على كاسو دقة وحدة] :

ݣاليا كريم بلي دخلوها لشي مصحة باش تعالج ، واخا أنا هاديك مغاطولش ، تلقى ليها شي سلكة باش تخرج ..

- جلال [ هزهز براسو ] :

منظنش ، حالتها هاد المرة صعيبة بزاف .. مايݣدوش يخاطرو ، والقضية فيها إعتداء ..

- سراج : باها غيتصطى ، النفخة لي فيه مخلياه مراضيش ..

- جلال : هو لي خرج عليها شكون من غيرو ، مفششها ، مخليها لاعبة عليه 6 وضامة .. هاهو كيخلص ..

- سراج : بقا فيا أكريم ، بغيتك تشوفو أصاحبي ، عرفتي كيكان ..

- جلال [خدا من كاسو جغمة هز رجليه حطهم على الطبلة ونطق ] :

اممم داكشي باش صوت ضحك ديالو واصل حتى لهنا ..

- سراج :

عادي السيد جاي ينسي يفوج شوية ، مغايلݣاش بحال صحابو .. اجي واحد هارون شتو غابر ..

- جلال : مسافر ..

- سراج : شفت صاحب دعوتك ضارب الطم ، كيوجد ليك فضربة ..

- جلال [غمزو] :

الى لحݣني غير يضرب ، ݣالو ليا داخل فواحد لافير مع واحد اليهو//دي ، على جوج ديال البيبان ..

- سراج [ بإستغراب] :

بحالاش جوج ديال البيبان ؟

- جلال : باغيين يطورو الشركة ، باغيين يدخلو فيها حتى الولاد ... يزوجو شي بشي ، باش يربحو بمول شي فهمتي البلان ..

- سراج [ضحك] :

ولايني بانضي ، مطور مع قبو .. باغي يضرب على جوج جوايه .. باش يبقاو ضامنين اليهو/// دي حياتهم كاملة عمرو يݣد يخوي بيهم ..

- جلال : هادوك دايرين بحال دار ال***ب يدخل عليهم واحد جديد يلوحو الثاني ، نهار يتفضح واحد فيهم كيحط كل واحد بوجهو .. مايغركش يضمنو خونا فجيبهم ، [تبسم] أشوية دالوقت وغاتفرج أولد العم ..

- سراج :

مزال شاك فالبنت ؟

- جلال [كمل كاسو او وقف] :

من جهة منصور لا ، من جهة أخرى مزال ..

- سراج [بإستفهام ] : بحالاش ؟

- جلال [ غمزو] :

مديرش فبالك .. أنت اتفطح مع راسك ، رتاح أليز بناليز ... ومتبقاش تخمم بزاف .

__________________

- وصلاة 12 دليل .. جا الوقت لي يمشي فيه كريم .. كانت واقفة معاه عند طوموبيلتو ..

- مسيرة : كيكتحس دابا ؟

- كريم : لالا مزيان مديريش فبالك ، انت صاڤا ياكما يدك كتعطيك الحريق ؟

- مسيرة [ضحكات] :

متخافش مغاديش نموت ، مزال لاصقة فيك بحال الݣرادة ..

- كريم : بعدي مني هالعار ، اتبقاي أتبعاني ابنادمة ... بسبابك انا لدابا ليبر ، لي شافتك مكتݣدش تزعم عليا مسكينة ، ايحسبليهم امزوج بيك ..

- مسيرة [بتهديد] :

إلى سخنو عليك جنابك ، وسخن عليك راسك .. هاديك لي اتزوج بيها انا لي خاص نشوفها ليك ، ودوز من تحت يدي .. ودير فبالها بلي كيما دابا كيما فاش اتزوجو ، نشوفك وقتما بغيت ، وفينما بغيت .. بغات مرحبا مابغاتش الباب الحباب ..

- كريم [بعدم تصديق] :

واش انت مريضة ، شوية لاباس ؟

- مسيرة [بجدية] :

كيما كتسمع ، انا حاجتي كنبغيها ليا بوحدي ، عندك الزهر لي قبلت ليك باش تزوج .. طلعهم فيا راه والله لا خليتك ، تجي شي قزمة تزاحم معايا عليك ، نوليو انا وياها ندابزو مالنا عليها ..

- كريم [هاز حاجب ومنزل الثاني ] :

اهاه ، وإلى انت لي جا شي حد وداك مني يلاه ، ويݣوليك ممنوع تشوفيه ولا دوي معاه ؟ اشنو اتسمحي فيه ولا تسمحي فيا ؟

- مسيرة [ضحكات] :

اكون هاني من هاد النحية ، مكاين حتى شي واحد أيبعدني عليك ، ومغاديش نحتاج نختار ... حيت مناوياش نتزوج أنا ، الرجال فضيت معاهم زمان هذا ..

- كريم : زعمة مكتفك[قاطعاتو]

- مسيرة : بلاما تحاول تقولها أكريم ، هاد الموضوع بدات مكنبغيش ندوي فيه ، هاد القصة ساليت معاها انا من زمان ، مناوياش نعاودها ... انا براكة عليا انفرح بخواتاتي وبيك ... ولكن بديك لي نبغيها انا ، خاص انا نبغيها عاد تبغيها أنت ..

- كريم : الواليدة ومݣالتهاش ..

- مسيرة : الوقت لي كدوز معايا انا راه كتر من الوقت لي كدوز مع داركم ، داكشي باش انا خاص نكون راضية عليها ..

- كريم [جرها معنقها] :

لي ݣلتيها الالة نديروها ، غير هنينا .. مزال الحال على هاد الهضرة ، مزال مطوطحنا مروناها ... من دقة نجيو نتزوجو ، حتى نشبع ونشوفو هاد البلان ..

- مسيرة [ خنزرات فيه] :

ولايني حيماري انت ماتسواش ، الى مشيتي حتى تفليتي على شي بنت انا اش بغيت ليك ، بوتفتاف .. تجي تدوي مع شي وحدة تولي تدفل متحبسش ، انا بغيت ليك بوفالج ياربي ..

- كريم [كيضحك] :

ياك أ اورونجينا .. كتعايري وتدعي ..

- مسيرة : مكنحملش لي يتفلا على بنات الناس ، سير اخويا لداركم ݣاع ..

- كريم : يااك كتجري عليا ؟

- مسيرة [ببرودة] شريه ، يلاه يلاه بالي ..

- كريم [حرك راسو ] :

اهاه واخا ، هاهو غادي .. تبسم ليها ، طلع لطوموبيلتو ... بقات واقفة حتى ديمارا وتحرك ، شيرات ليه بيدها وتمات راجعة للداخل ..

- وصلات حدا لپيسين ، كيبان ليها واقف كيشوف فيها .. جات تخطاه تدوز وقف قدامها ..

- جلال [كيطلعها وينزلها ] :

صحاحيتي الواشمة ، وليتي تشيري بيدك ..

- مسيرة : باش بغيتيني نشير برجلي ، راه انشير بيدي .. وطلعتي بريݣيݣ مع راساتك ... عرفتي كون ادير واحد الخير ، ركب الكاميرات ... مغاتحتاجش تخرج تحضي بنادم ..

- جلال [بانت شبه إبتسامة على جنب فمو ] :

شكون ݣاليك مكاينينش ؟

- مسيرة [صغرات عينيها كتشوف فيه ] :

ناري ، شارب .. ݣاعما باينة عليك ݣاع تكون سكايري ، ياربي تعفو عليك .. راه مامزيانش ليك الشراب ، راه كيخرج على السنان وعلى اللثة ولسان ، والفم راه غادي يزراݣ ليك والله انا كنصحك فسبيل الله ..

- جلال [نزل براسو لمستوى راسها ] :

وانت فاش كيهمك فمي .. يزراݣ يخضار يكحال ، فاش كيهمك .. زاد قرب منها كيشمشم فيها .. كمل كلامو :

أممم ، العنبر ، زهرة الاوركيد ، خشب الصندل .. مزيج ليلي للمرأة المتمردة ..

- مسيرة [كان جوابها الصمت ، تكدب الى قالت بلي مكتفهموش ، معارفاش تركيبتو كيدايرة ... اي حاحة كيفهم فيها وأي حاجة كيعرفها وأي حاجة كيعيق بيها ] ، بعدات جوج خطوات اللور .. حتى كانت غادي طيح كونماشي إيدو لي جراتها ورجعاتها قريبة ليه ..

- علاش هاربة ، [غمزها] الهروب عندو سبب واحد ، الخوف ..

- مسيرة [كتشوف ليه فعينيه] :

علاش غادي نخاف ، واخا انت راه يتخاف منك ... اجي بغيت نسولك اخويا جلال فاش خدام ، حيت تبارك الله هاد العز والجاه لي انت فيه جاني فشكل ، واحد بحالك باقي الصغير وعندو هادشي ، أجي ياكما كتبيع وتشري فالممنوعات ، أجي يكما كتبيع وتشري فالحشيش ، داكشي باش تابعك منصور ياك ياك ..

- جلال : كيݣولو احسن وسيلة للهروب هي الهجوم .. وهادشي لي كديري فيه الواشمة ..

- مسيرة [بسخط] :

انا مافهمتش ربي منين سلطك عليا ، ديما كنت كنقرا القرآن عاد نخرج من الدار ، وقيلة هاد المرة ماقريتوش داكشي باش ربي دارك فطريقي ..

- جلال : هادشي خاصني نݣولو انا الواشمة ..

- مسيرة :

الحاجة لي زوينة ، هي دارك اخويا جلال والله العظيم ، اجي مكتفكرش تزوج اتبقى زوفري حياتك كاملة .. هادشي راه ماشي معقول ، تبقى فدار قدها قداش حياتك كاملة هكا بوحدك والله أخويا حتى غادي تسكن ، راه أصݣع شي نهار يلقاوك ميت كارم ، العمر كيفوت والله خاص ولادك يكبرو معاك ، انا با قدك راه مزوج وعندو انا والله العظيم ..

جرها بجهد حتى تزدحات مع صدرو .. ونطق بصوت بحال فحيح الأفعى ببحة رجولية خاصة :

علاش كتهربي ، شنو مخبية مناش خايفة ؟ شنو تحت راسك الواشمة ، علاش فينما كنكون معاك كتبداي دخلي وتخرجي فالهضرة ، علاش كتحاولي تهربي ، شنو تحت راسك ... علاش هاد الخوف ورهبة ، زعمة انا السباب ... ولا كاينة شيحاجة ما كثر مخبياها الواشمة وخايفة نشوفها فعينيك ..

- مسيرة [قلبها كيضرب ، كتحس براسها شفافة قدام عينيه ، بحال الى ايقرا شنو تحت راسها ويعرفها شنو دايرة ، حاولات تملص منو ولكن ماقداتش ، كان قوى منها بأضعاف ] :

مامخبية والو ، طلق مني واش انت مزنزن ..

- جلال [مزال على نفس الوضعية ، زاد زادحها معاه ، حتى نزلات السلسلة لي كانت مدرقة من عنقها ، حجرتها كتبان مع ضو الݣمرة حمرة ] :

- ݣولي شنو تحت راسك الواشمة ؟

[زاد قرب خاشي نيفو فعنقها ، مطلع نيفو على طول العرق لي كينبض عندها حتى وصل لودنها ، نطق بصوت خافت كيجيب التبوريشة ] :

نبداو ب روبـــــي ..

- قلبها كان كيضرب بجهد ، حسات بالبرودة طلعات ليها مع صبعها الصغير .. غوبشات ورجعات بخطوات اللور :

شفتك زعمتي ، ݣالس تشمشم فيا بحال سلوݣي ، واش انت شوية لاباس ؟ ياكما يحسابليك غير كاينين فدار دير مابغيتيو، أودني منك حسن ليك تخطي ساحتي .. بلات وكيفاش روبي مافهمتش ، اشمن روبي فروبيات ؟

- هز راسو فيها عينيها كيبانو معسلين ، رموشو لي مخبلة زادتهم جادبية وسحر ، نطق بصوت باح :

زعمة معارفاش روبي ؟

- مسيرة [هزات بكتافها] :

جوج روبيات لي كنعرف فحياتي ، المغنية المصرية ، ومسلسل روبي شيحاجة أخرى ماعرفتش ..

- جلال [باقي على نفس النظرات ] :

دايرة سلسلة فعنقك فيها حجرة الروبي ، ومعارفنيش علاش كندوي ، كتبوهلي ولا باغية تبوهلي ..

- مسيرة [لا إراديا مشات يدها لعنقها ، لقات السلسلة ضارت ونزلات دامشي باش بانت ليه لثاني مرة ] :

واش [ قاطعها ]

- بلاما تحاولي تكدبي ، كذوبك خليه لݣرانك .. ولي ضايرين بيك أما انا بلاما تحاولي ، ولا يسخن عليك راسك ، حيت متأكد بلي الحجرة لي فعنقك أصلية ..

- مسيرة [ ببرودة] :

ومن بعد ، والى كانت أصلية ... ياكما خاوناها ليك ... ولا يكما درت يدي فجيبك زوينة هادي ، وفاش كيهمك تعرف أصلا ..

- جلال [ نظراتو ليها كانو كيخلعو ] :

ناس على قد الحال ، ماعندهمش ، بنتهم لابسة حجرة كتساوي الملاين ، هادشي مكايخيليش عندك شوية ديال الفضول الواشمة .. وشوف سبحان الله ، غير مؤخرا كتخرج قناة سميتها روبي .. شوفي الصدف ومولاتها مرأة ، وصدقة خرى هي انت الواشمة عندك قناة ... وفينما نزل لايف جديد ، كتهزيه وتحطيه فقناتك ، وأي حاجة فيها اخر الأخبار كتنزليها مجاكش هادشي صدفة غريبة شوية ..

- مسيرة [ جمد الدم فعروقها ، ماشي حيت خايفة منو ، هي البوليس ومخافتش منو ومهمهاش ، ولكن تصدمات من كمية الدكاء لي عندو ، كيفاش كيحلل ويناقش ويدورها فدماغو ، بقات على نفس التبات والبرود ] :

أول حاجة ماشي بوحدي انا لي كنزل دوك لي لايف ، درت قناة قلت علاش منترزقش الله حتى انا ، خصوصا فهاد الوقت اي حاجة فيها فلان شوه فلان كطلع ، داكشي باش نزلت لايف عادي جدا ماشي شيحاجة ، وانت باش عرفتي مولات قناة مرة وهو جوج مرات بانو زوج رجال ...

- جلال [ دور لسانو وسط فمو ونطق ] :

من لايف الأول باين بلي مرا ، كاين شي حوايج خاص يكونو عندك عينين الصقر باش تشوفهم .. هادشي كبير عليك الواشمة ..

- مسيرة [كان خاصها ضروري تخرج راسها من هاد الوحلة ، وأخسن حل هو تقوليه منين جاتها السلسلة ] :

شوف واخا هادشي ماشي شغلك ، حيت مانت با مانت ضارب بيا الكاغط باش نقولو ليك ، ولكن باش مايبقاش ضارك راسك .. اه اسيدي هاد الحجرة أصلية وهاد السلسلة ديال الذهب تهنيتي ، انا أصلا مكنتش عارفة بلي سميتها روبي حتى قلتيها انت .. لي عارفة بلي ياقوت الأحمر لي سميتها .. ماما الله يرحمها كانت من هولاندا ، يعني هولاندية ... باها كان عندو بزار قديم ديال المجوهرات الأصلية الحرة ، وفاش تزوجات من بابا وسلمات ماعجبوش الحال ... وجرا عليها ، وفاش ولداتني كانو عندها مضاعفات ، وقبل لا توفى عطات لبابا هاد الحجرة .. وقالت ليه يعطيها ليا فاش ندير 18 عام .. وهو فسبوع ديالي ..

- خداها وداها لواحد الدهايبي ودارها ليه فسلسلة ديال الدهب ، وخبعها حتى درت 18 وعطاها ليا ... وانا كنغطيها حيتاش عارفاها حرة خايفة شي حد يطيرها ليا من عنقي ..

- دابا فهمتي علاش مخبياها وفهمتي علاش عمري فرط فيها ولا فكرت نبيعها ، حيت هي الحاجة الوحيدة لي بقات ليا من ريحة ماما ... مستحيل نبيعها واخا نخرج نطلب فزناقي ... دابا فهمتي ساليتي رضيتي فضولك ولا مزال عندك شيحاجة تسول عليها ؟

- دابا رضيتي فضولك وعرفتي قضية السلسلة وعرفتي قضية القناة ، كاينة شيحاجة أخرى ... اه نسيت اخر مرة اخر مرة تقرب ليا وتحط يدك عليا ..

- جلال [ قرب منها نازل بظلو عليها مغطي ضو القمرة بطولو ] :

ماشي انت لي غاتݣولي ليا شنو ندير وشنو مندير الواشمة .. خلاها واقفة ودخل للدار .. شدات على قلبها كتنفس بأريحية ..

- اوووف الحمد لله الحمد لله .. حدرات راسها ودخلات بدورها لدار ..

- بعد عدة أيام -

*** الدار البيضاء ***

- ليليا واقفة وعلى وجها إبتسامة بشوشة ] :

غزالة ياختي الدار فنة ، كيحمقوني الديور لي كيكونو متيولين ومايكونوش كبار ..

- وديان : حتى انا حمقاتني الصراحة .. أمينة عندك الدوق ، مبروك عليك الحب ... الله يدخلها عليك بصحة والهنا وراحة البال يارب ..

- أمينة [ عينيها كيبريو بالفرحة ] :

أمين يارب ... مزال خاصني بزااف ، دابا فرشت غير بيت النعاس ... العشية غادي يجيو الخدامة يجيبو ليا الفوتويات ، باش نخرج نتقدا الماعن ..

- ليليا : إيوا نمشيو نيت معاك ، حنا علاش جينا هنا اصلا غير باش نعاونوك ..

- امينة : وانتوما يلاه وصلتو أصاحبتي نعدب فيكم مجاتش ..

- ليليا : من نيتك ، مالنا انهزو الحجر ... حتى انا شحال هادي ماضرت وماجيت لكازا ، نخرجو ونتقداو نجيبو داكشي لي دار .. يكونو جابو الفراش ، وديك ساعات نخرجو نتعشاو على برا ..

- وديان : الله احسن قرار .. انا نيت عييت بغيت نرتاح ونخرج ونتسارى .. عرفتي شحال هادي ماخرجت ومتساريت وماعطيت الراحة لراسي ، ولا فرحت بوقتي راه من نهار مات المرحوم الله يرحمو ..

- ليليا [ تنهدات ] :.

- الله يرحمو ويوسع عليه ، ودابا ماحد البنات مع ماما رتاحي ليك شوية .. وفوجي .

- أمينة : عرفتي لي زوينة ، هو البنات كيموتو على خالتي وردة ، بعدا مغاتلقايش مشكيل يبكيو عليك ... وشمسي بعقلها ماشاء الله عليها ..

- وديان [ تنهدات تنهيدة طويلة] :

الحمد لله ، مكايعدبونيش لا هي لا ختها ، كتبغي تعاون الحبيبة ديالي فاش كتشوفني يدي بوحدي .. مكاتبغيش تخليني ، والى شافتني مقلقة كتبغي تصالحني واخا هي مدايرة والو .. الحمد لله لي لقيت بنياتي معايا ..

- أمينة : جدودهم كيشوفوهم ولالا ؟

- وديان : كيشوفوهم ، كيمشيو عندهم كل سيمانة ، عماماتهم لي قليل فين كيشوفوهم ، ملهيين مع مشارعهم حتى انت ݣاعما مسوقين لبنات خوهوم .. من غير والديهم فقط ، شي حد اخر ابدا تبدن ..

- ليليا [بلامبالاة] :

حتى انت ، عندهم ماماها وجدودهم وعندهم حنا ، أش بغاو مزال ماعندهم مايديرو بيهم ، خوهم لقا الخير فيهم وهو حي مسكين ، خلي دابا فاش مات ... الله يرحمو مسكين ، الحمد لله لي كتب ليك الدار فسميتك ، كان حاس بلي خواتاتو ايقلبو عليك الفيستة ..

- وديان [ دوزات يدها فشعرها ] :

حتى انت انا برامة عليا غير بنياتي معايا ، هداك هو الربح ... جدودهم مامخليينهم محتاجين لوالو ، كيبغيوهم وكيتهلاو فيهم حاطينهم فعينيهم .. أما عماماتهم حتى انت ݣاعما هامني ..

- ليليا : ويلاه نوضو نمشيو .. يلاه يلاه نجيبوها مع الوقت هي هاديك ..

- خرجو ب 3 بيهم ، ركبو فطوموبيل وديان ... شدو الطريق لإيكيا ،، ضارو مزيان .. خدات أمينة شي حوايج عجبوها خفاف ، من بعد شدو الطريق للمرجان .. تقدات الماعن الضروريات لي غادي تحتاج ، والباقي من بعد كل مرة تخطف حاجة ..

- دخلات داكشي كولشي للكوفر .. من بعد ديماراو وشدو الطريق لدار ، دارو دورة شرفية عاد وصلو لدار .. طلعو ݣاع داكشي لي خدات أمينة ... حطوه فالكوزينة ..

- جاو الخدامة جابو ليهم الفوتويات ، واحد الزربية ، أما الصالة الكبيرة ، بغات تفرشها بلدية ولكن من بعد حيت خاصها الوقت .. خلصاتهم ومشاو ..

- ليليا : غزالين الفوتويات .. انا ديجا كيحمقني الموڤ فنين ..

- امينة : حتى انا كيحمقني .. الصالون إن شاء الله غادي ندير ليه طلامط فالموڤ بارد والبيج .. غير خاص حتى نشوف شي حد يكون مزيان وكيقاد داكشي مزيان باش نفيكسي معاه .. نفرشو بعدا الصالون الصغير ويحن الله من بعد ..

- وديان : والثلاجة ؟

- امينة : هاديك حتى لغدا إن شاء الله حتى هي وناخودها ..

- ليليا : نستفو الماعن بعدا ونرتاحو وديك ساعات نخرجو ..

- دخلو لكوزينة ستفو كل حاجة فبلاصتها ، الدار كانت نقية حيت قبل لا تدخل ليها شافت واحد السيدة لي سيقاتها ومسحات الغبرة ، كولشي كان النقي .. بيت النعاس لي كان لونو فالبيض ، وعند راسها كان الپاپيي پان فالبيض وفيه خطوط فالݣري ..

- النموسية لونها فالبيض ، مع كوافوزات فنفس اللون ، مع زربية فالݣري والغوز بيبي ... كوڤرلي فنفس لون الزربية بمخيداتو ..

- من ورا مقادو كولشي ، دخلات وديان دوشات خرجات تبعاتها ليليا وعاد أمينة ، لبسو حوايجهم .. وخرجو .. مان الساعة قريبة 8 ..

- ليليا : دينا لشي ريسطو فعين الذياب ، بغيت ناكول ونتقابل مع البحر .. راه حنا مشوقين فيه ..

- أمينة : اه اختي والله العظيم الى محرومين منو ، عرفتي شحال ماشفت البحر ..

- وصلو لواحد الريسطو كانت جنب البحر .. بلاصاو الطوموبيل ودخلو ، خدا طبلة كانت على واجهة البحر ، الديكور ديال الريسطو زوين بزاف .. مزين بلامبات صغار فيهم الشمع ..

- جا السرباي ، خدا الطلبات ديالهم ..

- ليليا [غمزات وديان ] :

واحد خونا ياختي منين دخلنا وهو حاط عينو عليك ..

- وديان [ بإستفهام ] :

شكون انا ؟ فين هو ؟

- ليليا [ حبساتها بعينيها] :

هداي هاهو جاي جيهتنا ، متعيقيش .. تسمع صوت رجولي ببحة خاصة :

بونسواغ ..

*** ولاد السعيد ***

- فالكوزينة ، واقفة على الطاجين لي طيبات ، كانت ناضبة الحوت .. قداتو على حقو وطريقو ، سدات عليه ونقصات العافية ..

- نقات الفلفة ودنجال لي شوات ، خدات مقلة دارت فيها الزيت البلدية ، حكات فيها التومة ، قطعات جوج ماطيشات طريفات صغار ، محيدة ليها الزريعة .. دارت الملح والبزار والكامون ، مع سكينجبير الخرقوم وتحميرة ، داتهم وجابتهم حتى دبالت مطيشة ، وهي تزيد عليها ديك الفلفة مشوية مع دنجال مشوي مقطعين ، حركات مزيان حتى تجانسو العناصر ..

- زادت رشة ديال السودانية من الفوق ، وفاش قربات طفي عليه زادت شوية ديال المعدنوس مقطع وخيط من زيت البلدية ، عاد طفات عليه البوطة وغطاتو ..

- نجية : تبارك الله عليك أبنتي .. الريحة كتشهي تبارك الله .. شكون علمك الطياب ؟

- مسيرة [ تبسمات] :

علماتني مي معزوزة ، كانت هي اي كطيب مكانتش كتخلي ماما سعاد دخل الكوزينة ، كتعطيها غير تسياق وصابون ، وانا كنت كنغسل الماعن كنت كنجي من المدرسة ونغسل الماعن .. هي لي علماتني نعجن ونطيب ، وعلماتني الماكلة البلدية على حقها وطريقها ، أما داكشي ديال الحلاوي علماتني ماما سعاد .. فاش مي مابقاتش كتقد توقف فالكوزينة ، ماما سعاد هي لي ولات كطيب ..

- نجية : تبارك الله تبارك ، الله يرضي عليك ويعطيك شي نقرة فاش يغبر نحاسك ياربي ..

- مسيرة [ تبسمات ليها ] :

أمين ..

- دخلات عليهم سندس ، جامعة شعرها سفنجة .. لابسة تريكو كول مونطي فالكحل ، مع سروال كيطمة فالحمر ..

- خالتي نجية ، قاديت صالة مونجي .. منين تبغيني ندي الطباصل قوليها ليا ..

- نجية : الله يرضي عليك ابنتي ، جاب الله كاينة انت .. عفاف اليوم عيانة ، جاتها ديك الويلة قطعاتها ، درت ليها اواحد البراد ديال السالمية ..

- سندس : هانية اخالتي مكاين باس ..

- نجية [ موجهة كلامها لمسيرة ] :

السيمانة الجاية كاينة واحد العراضة فاااعلة تاركة تبارك الله ... انݣول لسي جلال يخليني نديكم معايا ، منها نيت تفوجو شوية ، وتشوفو الناس ويشوفوكم .. الناس هنا راه الله يعمر ليهم الدار ناس الجود والكرم ، نهار تعرفو عليكم كل نهار يعرض عليكم واحد إيه ..

- سندس : واش شي عرس ؟

- نجية [ هزات الطبسيل ديال الديسير حطاتو على الطبلة وݣلسات ] :

أيي ياي رجليا ، لا ماشي عرس ... يلالة هادي بنت الحاج محمد ، واحد السيد هنا تبارك الله وصلاة على نبي، عدو جوج مصبانات فدار البيضة [مع جر الياء] ، وعدو دروݣريات ، إيوا خلا المدينة وجا سكن هنا ، إيه .. راه العروبية مابحالها بلاصة ... عدو 3 البنات تبارك الله زوجات مزوجين او وحدة مزال معاه ..

- بنتو الكبيرة اتختن ولدها ، ودايرة الختانة عند باها ، تبارك الله عرايضو زينين ، كيدير الخزانات ݣدهم ݣداش ، والخير أمكفح ... النيبة لي فاتت فاش تزوجات بتو ، جاب داك اسميتو ، إيه ولد الحوات ..

- وهاد المرة على ما سمعت وݣالت ليا مرت المقدم رحال ، بلي جايب شي واحد من الدار البيضة ، غناه زين راه كايبان فتلفازة نهار السبت فالمغرب ..

- مسيرة [عينيها بداو كيطلعو فيهم القلوبة ] :

واش اخالتي داك لي كيكون نهار السبت ، راه كيعيط على الناس ..

- نجية [ضحكات] :

الله يرضي علك ، هداك راه يغني ديك مولاي عبد الله ، هداك هادشي لي سمعت ..

- مسيرة [مسيرة الفرحة باينة من عينيها ] :

ناري كنموت عليه ، [شافت فسندس] الكراش اصاحبتي الكراش ، خالتي خاصنا نلبسو ونتزيزو ياك ؟

- نجية : وضروري ، متعرفي يتݣعد ميمونكم فهاد الوجيبة ، الحاج محمد راه يعرف الناس ، ݣالو ليا أيعرض على سي جلال ، ولكن واش يمشي ولالا الله أعلم ، حيت هو ماعدوش مع هادشي ..

- مسيرة [مع راسها ] : ياربي مايمشيش ..

- بقاو على الجماعة ، حتى طاب الطجين ، أما العشا ديال البقية كان واجد .. هزات مسيرة الطاجين وخرجات للصالة مونجي ، حطاتو ليه فبلاصتو كيف مالفة .. مع طبسيل فيه زعلوك لي وجداك والخبز ديال الشعير ..

- تم نازل هلال ، هز فيها عينيه اشر ليها براسو وݣلس ..

- خرجات سندس ، هازة الطباسل ، حطات كل واحد فبلاصتو .. حطات ليه طبسيل قدامو ، مشافتش فيه نهائيا .. ورجعات للكوزينة ، جابت الخبز حتى هو حطاتو ليه قدامو ، الرجعة لي بغات ترجع ... تغشات ليها حديدة ديال شبكة الخبز فكم التريكو .. عينيه نيشان مشات ليها .. هز راسو فيها بملامح جامدة وباردة مكاتبينش فاش كيفكر ..

- سندس[غوبشات] :

داكشي لي بقا خاص غير انت تتقب ..

- هلال [ ببرود] :

لي كيبغي يحط شي حاجة ، ولا يݣاد شيحاجة ، كيعلي كمايمو هو الاول ، عاد يݣاد امورو ..

- سندس [ طلعاتو ونزلاتو] :

بصح عندك الصح ، هادي نسيتها مارضيتش ليها البال ..

- هز فيها راسو بإستغراب ، اخر مرة دوا معاها فالقهوة طلاتو ، ودابا كتأيدو .. مارضاتش عليه الهضرة ..

- خلاتو ورجعات للكوزينة ، خدات طبيصلات ديال لاصلاد ورجعات بيهم للطبلة ، كتحط كل واحد فبلاصتو ، بقا ليها طبسيلة .. يلاه حطاتو قدامو ، حسات بيديه على يديها هز ليها الكمايم قادهم ليها ، تبسم ليها شبه إبتسامة ونطق :

هكا مزيان ..

- سندس [ بلعات ريقها وتبسمات ليه إبتسامة صغيرة ] :

شكرا .. كملات الحطان ومشات .. نزل جلال ، مع سراج وتوفيق ..

- تجمعو على الطبلة ... حتى سونا الباب .. مشات مسيرة حلات ، كان يوسف ، طلعها ونزلها ودخل ..

- مسيرة [ تبعاتو بتخنزيرة كتغمغم ] :

حنزز مزيان ، بنادم تقول عمرو شاف الزين ، حيدات الݣصة على عينيها ومشات للكوزينة ..

- يوسف [ جر الطبلة بلا سلام بلا كلام ] :

شفت الجديد ، من إيمتا وليتي كتخدم الشباب ؟

- جلال [ هز صبعو بتهديد ] :

دخل سوق جواك تعيش مرتاح ، دير فيها عايق نخلي دور بين العيالات بالحايك ..

- يوسف : كالما اصاحبي أسولنا كالما ..

- سراج : هادوك المعرفة ديال جلال ، حسن ليك دير عين ميكة اديناصور ..

- يوسف : بديتي تاني خاص لي يجبدك ..

- جلال [بصوت أمر وجدية]

كول وسكت ، مكنحملش نكون كناكل والبلابلة حدايا ..

- يوسف حدر راسو ، كيهز من كل بلاصة حاجة ، مرة مرة كيهز راسو فسراج كيغمزو بعينيه ، وسراج ماباغي يعطيه لا حق لا باطل ..

*** الدار البيضاء ***

ليليا [ بإبتسامة ] :

وعليكم السلام ..

- ياكما كاين شي دورونجمو ، الى برزطكم نمشي ..

- ليليا [ كتشوف فختها لي ماداتهاش فيه ݣاع ] :

لا مكاين حتى ديرونجمو مرحبا بيك .. [ جر الكرسي وݣلس موجه كلامو لوديان ] :

صاڤا أمورك مزيانة الوليدات .. شافت فيه وديان كتحاول تدكر فين شافتو [ بان شبه إبتسامة على فمها ] :

الحمد لله ، بلات انت لي تلاقيت معاك فطريق ياك ..

- [ تبسم ] :

إݣزاكتومو ، صاڤا كيف وصلتي على خير ؟

- وديان :

الحمد لله ربي يخليك ، صدفة غريبة هادي ..

- [ ضحك ، ضحكة لي كانت عندها جادبية خاصة ] :

إيوا الدنيا صغيرة بزااف ..

- وديان :

وي بصح الدنيا صغيرة بزاف ، جيتي لكازا عطلة ولا خدمة ؟

- لا انا مستقر هنا .. غير المرة لي فاتت كانت عندي خدمة فمراكش داكشي باش .. وأنت ؟

- وديان :

لا انا ساكنة فمراكش ، وجيت عطلة لإفران ... دارنا كاينين فإفران ، ودابا جينا نبدلو الجو فكازا ، بنت عمي ستاقرات هنا وجينا عندها [ اشرات ليه لجهة أمينة ..

- [ هزهز براسو ] :

بغاڤو ، [ شاف فأمينة وتبسم] :

مرحبا بيك عندنا ، خدمتي هنا ولا عاد ناوية ..

- أمينة : لا عندنا ديجا كافي هنا ، كافي 100/100 نسائية ، وستاقريت هنا ..

- [ بمرح] : ياك الالة وحنا الرجال ماعليناش الله نتقهواو ، هي أنت إنحيازية للعنصر النسوي ..

- أمينة [ ضحكات ] :

لا پا ديتو ، غير جاتنا الفكرة هكاك وصافي ، ماما فتحات أول كافي نسائية فإفران ، ومع الوقت درنا الفرع ديالنا فكازا هذا مكان ..

- [ هزهز براسو ] : اه وي بغاڤو .. بحال الى ديجا سمعت بهاد الكافي ، مابقيتش عاقل على السمية مزيان ..

- أمينة : كافي پالوما ، كانت فتحاتها مدام ماريا ، مرات جواد الإبراهيمي ..

- [ بإبتسامة ] :

ويييي ، الله اودي شكون لي مسامعش بموسيو الإبراهيمي .. هي انتوما بنات العم ..

- وديان [ تبسمات ] :

أه انا وديان ، وهادي ختي ليليا ، وبنت عمي أمينة ..

- ليليا : وانت مزال لحد الساعة ماقلتي لينا والو ، شكون انت ... حيت من قبيلات كتسول ولحد الساعة ماعرفتيناش على راسك .. شنو كدير فحياتك سميتك ؟

- [ شاف فيها بعينيه لي عليهم نظرة خاصة ونطق ] :

سميتي منصور ، منصور بواب ..

- ليليا [ بإستغراب ] :

بلات واش هاد ريسطو ديالك ولا أنا غالطة ..

- منصور [ ضحك] :

وي يلالة ديالي ، ياكما ماعجباتكش شي حاجة فلاديكوغاسيو ، ولا شيحاجة غير دوي متحشميش ..

- ليليا : لالا [ضحكات] بالعكس كولشي زوين براڤو تبارك الله عليك ..

- منصور [شاف فوديان ] :

وانت أوديان ، شنو كديري فحياتك ؟

- وديان [ بإبتسامة عفوية ] :

أنا عندي محال ديال ليموبيليي فمراكش ..

- منصور : مزيان براڤو ، مشروع زوين وقليل لي كتلقى العيالات دايرين هاد الدومين .. هي تقدري تعاونيني ؟

- وديان : فاش ؟

- منصور : حاليا خدام على مشروع اخر ، ريسطو اتكون مختصة بالأكل الكوري والهندي .. مابغيتش ندير كراسة عاديين ، حيت اتكون عائلية ، بغيت ندير فوتويات .. باش تكون الأريحية ، ومكرهتش شي حد يكون فهاد الدومين .. وتكون خدمتو متقونة ..

- وديان : ولكن انا فمراكش ماشي فكازا ..

- منصور : عادي ، انا ناخود غير الرأي ديالك والمشورة ديالك ، ماحدك فكازا الى بغيتي طبعا تشوفي ريسطو وتعطيني الرأي ديالك ، شنو اللون لي يناسبو وديزاين .. وديك الساع انا انتكلف ، المهم ايخصني الدوق ديالك ... حيت انت عندك خبرة ماشي بحالي انا ..

- وديان : d'accord avec plaisir .. مرحبا ..

- منصور [جبد تيليفون ديالو ، مدو ليها ] :

ممكن تخلي ليا نمرة ديالك ؟

- وديان [خدات منو التيليفون ] :

واخا مرحبا ، سجلات ليه نمرتها ، رجعات ليه التيليفون .. سونا ليها تم تم ..

- منصور [مع إبتسامة] :

سجلي نمرتي أنا غدا إن شاء الله نسوني ليك ، ونشوف الى عندك وقت خاوي باش تشوفي ريسطو صافي ؟

- وديان [هزهزات براسها] :

- صافي واخا إن شاء الله ..

- منصور [وقف تبسم ليهم ، وبصوت رجولي غالب عليه نبرة الهدوء] :

تشرفت بمعرفتكم ، فرصة سعيدة وبون أپيتي ..

- البنات : ميغسي .. خلاهم ومشا راجع للعند الناس لي كان ݣالس معاهم ..

- ليليا [كتشوف فختها ] :

ناري السيد كلاص ، وغزال ياختي كايحمق ماشاء الله ، ععلى هيبة وعلى ختورية ..

- أمينة [كضحك] :

والمهم هو منزلش عينيه من على وديان ، السيد راه بقا غير حاضيها بعينيه ، ههههه وماعندك ماتساليه بقا عاقل عليك ..

- وديان [بعدم إهتمام] :

هاهوما بداو تاني ، اغير خويو راسكم مكاين والو من هادشي ، السيد جا دار الصواب ، وصافي نشوف معاه المحال والله يعاون الله يعاون ..

- ليليا : امممم المحال ، هاديك راه غير دارها باب باش تبقاي انت وياه على تواصل ... السيد عجبتيه وباينة من عينيه ، غير الى كنتي عورة وخاصك النظاظر هاديك حاجة أخرى ..

- وديان [بجدية] :

ليليا ، انت عارفاني أنا والحب فضينا ، من نهار مات المرحوم .. عشت الحب مرة فحياتي ، قلبي تدفن مع رشيد صافي .. انا دابا بغيت غير نقابل بنياتي ونكبرهم ونقريهم صافي الحب وداكشي كبرنا عليه ..

- ليليا : اويلي على كبرنا عليه ، مالك أختي فعمرك 70 عام ، وراه عندهم 70 عام وكيتزوجو ، بقا غير أنت لي عندك 38 عام واش من نيتك .. ماقلتها أنا لي عندي 41 زوينة هادي ..

- أمينة : ومابيناش عليكم نهائيا ، انا لي عندي 24 كنبان قدكم هههه

- ليليا : منين كتكوني فرحانة ، ومكتخليش المشاكل تأتر عليك ... واي حاجة قلقاتك ، مكتخليهاش منغصة عليك حياتك بشهور ... كتعطيها نهار واحد وتفوتيها ، قلبك كيكون نقي وبيض ، وكضحكي فوجه الناس ... كوني اكيدة راه عمرك مايبانش عليك ..

- الحياة فرص [ شاف فختها] 3 سنين باش مات المرحوم .. خلا ملاك عندها عام ، انت لي كبرتي وانت خرقتي وانت لي ضربتي تمارة ، من الخدمة لدار من دار الخدمة ، وقفتي وقفة صحيحة ، جا اختي الوقت لي تشوفي فيه حياتك شوية ، الحياة كتستمر ...

- خواتاتو شافو حياتهم ، فرحانين ناشطين .. العام لي فات تزوجات ختو دارت احسن عراسية ، ومالك اختي انت ... اتبقاي دافنة شبابك حياتك كاملة ، خاص شي واحد يكون فجنبك لي يهز عليك الحمل شوية ..

- وديان [ باغية تسد الموضوع ] :

السيد باغي غير ياخود الراي ديالي رضيتوه باغيني ، عفاك سدي هاد الموضوع هاد الساعة ، مابغيتش ندوي فيه ، واش حنا خارجين نتعشاو نفوجو ولا نبقاو نجبدو فهادشي ..

- ليليا : واخا هاهي ساكتة ، ماقلت والو دابا ..

- جا السرباي ، حط ليهم العشا ،، بداو كياكلو وديان كانت حاسة بعينيه مراقبينها ، مكانتش باغية دور لا تجي عينيها فعينيه ، كانت متحاشية النظر ليه ... كتاكل وساكتة كتشوف فبلاصة وحدة .. اما ليليا وأمينة كياكلو وكيدويو فترتيبات ديال غدا ..

- *** ولاد السعيد ***

- فالكوزينة ݣالسات مجمعات على براد ديال أتاي ..

- نجية : الله يعطيك الصحة يا بنتي يامسيرة ، كاس بعقلو تبارك الله عليك وخلاص ..

- مسيرة [ بإبتسامة ] :

بصحتك وبراحتك ، خالتي شنو غادي نلبسو للعراضة ، انا بعدا ماعنديش شيحاجة نلبسها ..

- نجية [ تبسمات بإفتخار ] :

خليها عليا ، عدي شي تكاشط ، لا يحسبليك تكاشط ديال هاد الوقت الزواق والخوا الخاوي والثوب الراشي ، كيضربوكم على شعا ، التكاشط لي عندي بصم الحر يالالة وبتليجة .. إيه لا تݣولي خالتك نجية متعرفش فزاز ..

- مسيرة [ ضحكات] :

خالتي حنا اتهناي من ديك نحية ، ماعندناش مع قوة التبوزيق وبخ وشويكيات ، مابقاتش فشنو لابسة بقات انت وشنو ساوية ، شحال من واحد لابس الجوهر وهو رخيص ، وشحال من واحد لابس النحاس ، وهو غالي ومقامو عالي ... حنا بغينا غير نفوجو ونشطو مع راسنا ..

- نجية [ عجباتها هضرت مسيرة ] :

الله يكملك بعقلك ابنتي تبارك الله عليك وخلاص الله يرضي عليك ..

- سندس : فخبارك أخالتي نجية مسيرة عندها واحد الصوت وااعر ، ديال العيطة ... مي عزوزة علماتها العيطة من الصغر ..

- نجية : هاي هاي ، وسمعينا ابنيتي شي مقيطع ..

- مسيرة : اويلي اخالتي ، بغيتي سي جلال يجي يلوحنا من السرجم .. لاواه العيطة عندها بلاصتها وعندها لمتها ..

- نجية : واخا يابنيتي دابا نفكرك ..

- سندس : يكونو سلاو العشا ولا مزال باش نهزو الطبلة ..

- مسيرة : صبري نمشي نشوف ... حطات كاسها ودخلات رجليها فالبانطوفة خرجات من الكوزينة بتجاه فين كانو ݣالسين ، وقفات كيبانو ليها سلاو العشا ... رجعات بخطوات اللور معيطة على سندس ، جات سندس ودخلو بزوج بيهم مقاطعين هضرتهم .. قربات للبلاصة فين ݣالس بغات تهز الطاجين حتى نطق بهمس ..

- بقاي تنقصي الثومة شوية ..

- مسيرة [ ماسمعاتوش ، تحدرات لعندو ، حتى خصلات من شعرها مسو حنكو ] :

شنو قلتي راه ماسمعتكش مزيان ..

- جلال [ هز حاجبو معلي عينو فيها ] :

نقصي من الثومة ، [ اشر ليها بحجبانو لشعرها] الناس فاش كيكونو فالكوزينة ، كيجمعو شعرهم ..

- مسيرة [ بإبتسامة ] :

الثومة راها انتيبيوتيك ، مزيانة ليك ومزيانة البرودة ..

- جلال [ دور لسانو فوسط فمو غامزها ] :

على اشمن برودة كتدوي فيهم ؟

- مسيرة [ بضحكة صفرة ] :

البرودة ديال العظام وديال الركابي ياك هي لي كدوي عليها انت ..

- جلال [ بإبتسامة إستهزاء ] :

ماعليكش تعلمتي .. وقفات هازة الطاجين ، داتو للكوزينة تحت انظار البقية .. لي كانو كيشوفو فجلال وفيها ..

- يوسف : كيفاش بلانك انت ؟

- جلال : مالي أنا ؟

- توفيق : مالك انت ، حلال عليك وحرام علينا ... حنا تقطع علينا الما وضو ..

- جلال [ ببرود] :

لي بغا يلعب ، الدواحات عطاهم الله ... غير مايلعبش فتيران ديالي وسلام ..

- يوسف :

كيفاش بلانك مع ختنا ، انا مابقيت فاهم والو ... زير صمطة شوية ، راه بحال هاد النوع يطلع يلعب ليك فوق راسك بحال القرودة ..

- مكايعرف للقرودة وكبيعتهم غير لي كابر فالغابة مع الحيوانات ..

- يوسف [ هز راسو فيها ، عاݣد غوباشتو ] :

أش ݣلتي ؟

- مسيرة : لي فاتو الكلام يقول سمعت ، ولي فاتو الماكلة يقول شبعت ، ولي فاتو المنظر يقول شفت ، والفاهم يفهم ومع مولاه يتنغم ..

- عطاتو بظهر ورجعات للكوزينة ..

- جلال [ بصرامة ] :

ماشي انت لي اتوريني كيفاش ندوي مع الناس ، لا انت لا غيرك ... ونقص من نفاخة شوية ، شي نهار تجيبها فعظامك الى ماجمعتهم ليك أنا نيت ..

- يوسف [ وقف ] :

اهاه كتجري عليا السبع ؟

جلال [كيخنزر فيه ] :

لي فهمها على هواه يتلݣاها ، مافيا لي يصحح لبنادم بحال الأستاذ ..

- يوسف ماعجبوش الحال ، هز تجاكيط ديالو وخرج ... جلال بدورو دفع الكرسي ، مشا جهة الكولوار لي كيدي للكوزينة ، حل واحد من البيبان وسدو عليه ..

- توفيق : مجاكمش زاد فيه شوية ، شكون هادو لي يخصر الصحبة ديالو على ودهم ..

- سراج [ بصرامة ] :

هاديك لي كتشوفيها ، راه عتقات روح ديالو من الموت فهمتيها ولا نزيد نشرح ليك ..

- توفيق [ بإستفهام] :

كيفاش .. قاطعاتهم سندس لي خدات اخر حاجة ومسحات الطبلة ، قبل لا تمشي وقفها بكلامو :

-هلال : الله يعطيكم الصحة العشا كان بنين ..

- سندس تشوكات ، ضارت عندو وتبسمات فوجهو :

بصحة وراحة .. حدرات راسها ومشات ..

- سراج [ خلاها حتى مشات وعاود لتوفيق ] :

وفهمتي دابا البلان ولا نزيد نشرح ليك كثر ..

- توفيق [ حك حاجبو ] :

بحال الى كنتفرج فشي فيلم ميريكاني اصاحبي ، بزااف عقلي غايحبس ..

- سراج : فهمتي علاش جلال ضار فيوسف .. وحتى هو زاد فيه ، المرة لي فاتت ضار فعفاف بنت خت نجية ، ودابا لسانو طويل ..

- هلال : هذاك مزال ايطيح على مناخرو ودابا تشوف ... هاد الطيران غايتحد ليه ..الصبر خاص اشوية ديال الوقت ..

- توفيق : ولكن لاش جايب تريكتها كاملة لدار ؟

- سراج :

حيت منصور كيقلب عليها ، والى مشا لقاها غايأديها عند بالو مصاحبة مع جلال ، وغايأدي عائلتها .. فهمتي البلان دابا الوحش ولا نزيد ندوي ونشرح ..

- توفيق : لا براكة شبعت ، ولكن بيناتنا اشباب ... البنات قرطاسات ... شفتو الشهبة لي عينيها خوضر وناااري واعرة ، حتى ديك نص ميترو لي ضرباتني لراس فرفوشة ..

- هلال [ بصرامة ] :

توفيييييييق ..

- توفيق : وغير دوينا أصاحبي او ، قطعو علينا الاكسجين حسن ، كندويوش منعبروش .. ومتزيدوش فيه ..

- سراج : جاي ترتاح تريح قبك ... خليك بحالك بحال الناس ، اتبقى طير اتجيبها فعظامك ... وأصلا مايحتاج يدخل ، البنات يقومو بالواجب معاك ..

- توفيق [ غمزو] :

ولد العم بعدا راه تقدم ملحوظ منو ، السيد ولا يݣوليها الله يعطيكم الصحة ، فين عمرك ݣلتيها لخالتي ماريا ..

- هلال [ مصغر عينيه ، لي كتاسحهم البرود ] :

كيبان لي انا لي غانݣادلك عظامك قبل جلال .. فوتني حسن ليك ..

- توفيق [ تبسم هاز يديه بإستسلام ] :

ماݣلت والو ..

____________________________

- حط يديه على النݣاصة ديال الضو وشعلو ، بلاصة كانت تحفة بحال شي أتوليي ... كبيييرة كلها ڤيترينات بحال شي متحف .. ڤيترينات كلهم خواتم وسلاسل وبراصليات .. فوق واحد الطبلة كبيرة وطويلة ، محطوطين بزاف ديال الماكن ..

- حداهم سلا كبيرة محطوطين فيه نصوصة ديال المعالق وديال الفراشط .. شعل واحد الفيوز ، حدر راسو على واحد الباليزة صغيرة فالكحل ... توب ديالها ديال الدان ، حلها من الداخل كانت هازة مجموعة من المعالق الصغار مذهبين ..

- هز معلقة ، حطها ولبس الليݣات ديالو ... خدا المعلقة وخدم المكينة اللولة ، قطعات ليه المعلقة على زوج ، خدا النص دارو فماكينة اخرى ، ضاغط عليها لي بدورها ضغطات على نص المعلقة ورجعاتها دائرية على شكل خاتم ... دوزو فواحد الما ومن بعد برضو مزيان ومسحو ، هزو بصبعو مقابلو مع الضو ، من وسط منو كيبان ليه وجها ..

أَتاني طَيفُ عَبلَةَ في المَنامِ فَقَبَّلَني ثَلاثًا في اللَثامِ وَوَدَّعَني فَأَودَعَني لَهيب أُسَتِّرُهُ وَيَشعُلُ في عِظامي وَلَولا أَنَّني أَخلو بِنَفسي وَأُطفِئُ بِالدُموعِ جَوى غَرامي لَمُتُ أَسىً وَكَم أَشكو لِأَنّي أَغارُ عَلَيكِ يا بَدرَ التَمامِ أَيا اِبنَةَ مالِكٍ كَيفَ التَسَلّي وَعَهدُ هَواكِ مِن عَهدِ الفِطامِ وَكَيفَ أَرومُ مِنكِ القُربَ يَوم وَحَولَ خِباكِ آسادُ الأَجامِ وَحَقِّ هَواكِ لا داوَيتُ قَلبي بِغَيرِ الصَبرِ يا بِنتَ الكِرامِ إِلى أَن أَرتَقي دَرَجَ المَعالي بِطَعنِ الرُمحِ أَو ضَربِ الحُسامِ أَنا العَبدُ الَّذي خُبِّرتِ عَنهُ رَعَيتُ جِمالَ قَومي مِن فِطامي .

_________________

بزربة ضور وجهو لعندها كتبان ليه واقفة هازة صينية فيها براد ديال أتاي وكاس ، او واقفة مصدومة من هادشي لي كتشوف عينيها ..

- عينيه ولاو حمرين بحال الجمر .. حط الخاتم من يدو ولاح دوك الصبعيات ، طفا الڤيوز ومشا لجهتها بحال شي وحش باغي يطير على الفريسة ديالو ..

- جرها من دراعها حتى البراد تبوقل ليها وسط الصينية ..

- مسيرة [ تقصحات وغوبشات ] :

أي بشوية راه قصحتيني ..

- جلال [ من تحت سنانو ] :

كنݣول لأصل مك ، بقاي تسنطي كنݣولها ولالا ... ݣلت ايك ودويت بلي اابلاصة لي نبغيك تكوني فيها انعطيك لورضر تكوني فيها ، اش نزلك لهنا ..

- مسيرة [ مافهماتش السبب ديال هاد التصرف ] :

قلتي ليا نعمر ليك اتاي ، ونجيبو ليك ... مشيت لصالون مالقيتش ، قاليا سراج راه شافك مشيتي لجهة الكولوار عند بالي .. بلي خرجتي لجردة ، بان ليا ضو من تحت هاد الباب فتحتو ونزلت ..

- جلال [ سخط ، ولاو فيه عشرة ، عمرها شافتو بحال هكا ... بنسبة ليه هو تعدات حدودها ، وشافت حاجة لي مخاصهاش تشوفها ، حاجة لي حتى ݣنس معارفهاش من غير هارون بوحدو .. حتى واحد معارف بلي هاد لاكاب في أتوايي ديالو بوحدو عالم خاص بيه ، كان ممنوع على اي واحد فهاد الدار يفتح باب لاكاب ، حتى جات هي فأيام قليلة وكسرات هاد الشرط ] :

ماعلموكش فداركم تسولي ، ممنوع هاد لاكاب يدخل ليه شي هد فهمتي ولالا ... واش خاص لجدك نبقى نعاود الهضرة 100 مرة باش تفهمي ولا مال ملتك بغيت نفهم .. واش مسلطك علي شي حد ولا شنو ..

- مسيرة [ دفعاتو بيدها ، حطات الصينية على واحد الطبلة ، وقفات نقابلة معاه مخرجة عينيها فيه ] :

- الى بغيتي حد مايدخل للمتلكاتك الخاصة ، علق بلاكة فالباب وكتب فيها ممنوع الدخول خطر الموت ، بحال دوك البيبان لي كانو شحال هادي فالمدرسة ، وكنا كنخافو نحطو يدينا عليهم لا نموتو ... دير هكاك وحد مغايدخل ..

- باش غانعرف أنا ، خالتي نجية مشات لدارها ، وانا خاص نعمر ليه هاد الكاس دتاي نمشي نرݣد ..

- جلال [ ضاغط على يدها بجهد ، كان معصب لواحد الدرجة كبيرة ، بنسبة ليه تعدات الحدود وشافت شيحاجة لي مخاصهاش تشوفها نهائيا ، مخاصهاش تكون هنا ماشي بلاصتها هادي ، عمر شي حد حط رجلو هنا ولا عرفو شنو كيدير ، هاد البلاصة ديالو ملكو بوحدو مملكتو ، البلاصة فين كيلقى فيها راحتو وكيكون على طبيعتو ، بنسبة ليه قتاحمات خصوصياتو ، وهادشي ممنوع بنسبة ليه ] :

حطي الزبل فوق الطبلة خليه مكتعرفيش ، كتعرفي اتخشي مناخرك فأي حاجة ..

- مسيرة [لتحدي ، عينيها مافيهمش درة خوف ] :

باش يبرد ، وتقولي سخنيه من جديد ، لا غير سمحليا حيت انا ماشي خدامة عندك ...

- وزايدون مالك مخبع اللويز هنا ، كترت المعالق والفراشط والخواتم ... بغيت انفهم شنو كتصنع ..

- جرها بجهد لاوي ليها يدها ورا ظهرها ، مرجعها اللور خابطها مع الحيط حتى حسات بظهرها تساس ليها ..

- مسيرة [قلبها نقز من وسط صدرها ] :

واش واش انت مسطي واش هبلتي شنو كدير ؟ راه قصحتيني ..

- جلال [عينيه كانو كيخلعو] :

مزال ماشفتي والو الواشمة ، عقلتي شنو ݣلت ليك .. لا انت مكتعقليش ، انت كديري غير لي ݣاليك راسك .. انݣولك جوج كلمات هادشي لي شفتيه غاتنسايه ولا قسما برب الكعبة ..

- مسيرة [مقربة راسها من راسو نيفها قريب من نيفو ] :

شنو فجهدك مدير ݣاع [كتورك على كل حرف] ، جري طوالك ولي فجهدك ديرو .. جات تملص منو رجع خابطها مع الحيط .. قرب وجهو من وجها ميشوف فعينيها لي كانو كيتحداوه .. عينيه كانو كينزلو من عينيها لشفايفها ... بلاما يفكر جوج مرات ، نزل بشفايفو ملتاهم شفايفها بوحشية وتملك ، مخليها مخرجة عينيها بصدمة لي مكانتش مخلياها لا تركز لا تبعدو عليها ..

نهاية الفصل الأول

يتبع...