محتوى القصة
الزواج بالنية والحرث بالنية...ولي أسس زواجوا على النية عمروا يخسر...والنية وقلة النية عمرهم ما يتلقاوا...
🔅🔅🔅🔅🔅🔅🔅🔅🔅🔅🔅🔅
في أرجاء شوارع مدينة الجديدة تتهاطل أمطار الخير بغزارة...دخل واحد الدار كبيرة في أحد الأحياء الشعبية...تسري مناسبة خطوبة...وسط الصالون لي مفرش بطريقة بلدية مغربية....
المكان مكتض بناس وعامر.... وعلى إيقاع أغاني دكالة الشعبية...تيشطحوا فرحانين......إلى هيا.....
واقفا في قنت ديال البيت مقابلا مع العروسين...فتاة في عمر الزهور..شعرها أسود طويل مطلوق على راحتوا ... واصل عند حزام قفطانها..الأسود... لي بارز جميع معالمها الانثوية...زينها عاطي العين ولي شافها تيتبهر بجمالها العربي الأصيل....عينيها كبار مشفرين...سنانها مستفين بويض أو فمها حمر مرسوم كالعنقود من عند الخالق المعبود.....
تتطيح ليها دمعة من جنب عينها تتمسحها بزربة...ساهية تتلوم وتعاتب في نفسها بغباء داخليا...
بلسان البطلة:
ملي عقلت وحليت عيني على هاذ الدنيا وأنا عيشا في الضلم والحكرة حتى قلت كلشي تقاد أوا ولا مزيان وغنعيش مع شخص لي بغاه قلبي ورتاحيت معاه وها أنا ليوم حاضرا في الخطبة ديالوا لبنت عمتوا ولي باه واعد ختوا وهيا في فراش الموت باش يزوج ولدوا لبنتها ......اه قرر يزوج ولدوا وحبيبي لبنت ختوا لي ولات ليوم يتيمة الأم ....
تنوشف في عينيه نفس الألم لي أنا حاسا بيه دابا...
غنفاجر غير بي لي عالم بيا ....
تنشوف فيه محطم قدامي ...غير دير الخاطر لعائلتوا ......مقادرش لا يهضر ولا يقرر ويختار...
تمنيت نغوت باش كلشي يسمعني... بغيت نقول ليهم هاذ البنت راه انا لي خاصني نكون في بلاصتها ....
أنا حلمت و هيا حقات! ..... أنا تمنيت وهيا فازت! ....
في لحضة بغيت نوقف كلشي ونقول ليها راه مكيبغيكش نتي راه كيحماق عليا انا ....
أنا الوحدة لي كنفهموا من نضرة بلا مايتكلم ولا يقول شنوا ضاروا أنا لي باغي يكمل معها حياتوا أنا لي باغي يولد معها ....
ولادنا لي ختارينا ليهم أسمائهم قدام ديك الصخرة لي في البحر ولي شاهدا على جميع الوعود لي عطاني.... و على حبنا كذالك ...
مكرهتش نغوت والعالم كامل يسمعني ويعرفني أنني مخنوقة من لداخل وقلبي مجروح تينزف دم ولكن لا؛ دابا فات الوقت ...
خاصنا نضحيو بزوج بحبنا باش ...ميخليش باه يخلف بالوعد ليه عاطي لعمتوا الله يرحمها .....
شفتوا كيفاش شد ليها في إيدها ولبسها الخاتم وهيا في أبهى حلة فرحانة ....
عينيه كانت مباشرة تتشوف في عينيا انا ولكن الخاتم كانت كتلبسوا هيا...
تخيلت راصي في بلاصتها ....
شحال كنا غنكونوا فراحنين كون كنت في مكانها ....
كان حلامي غيتحقق وغنولي مع حبيبي ونكملوا بعضنا ...ونبنيوا بيتنا ....بكل حب وإحترام وفرحة كبيرة ...
ولكن خسارة......خسارة هاد الحلم ليوم ضاع أو ما بقاش من حقي أنا.....
توقفات من معاتبت نفسها...
مسحات دموعها بطرف كفها
وقربات لعندواا .... ركزت النضر في عينيه السوداويتين لي حمرين كيف جمر وكأنه في جنازة وليس فرح ...دققات الشوفة في تفاصيل وجهوا او ملامحواا لي مكتسخاش من النضر ليهم ...
بغات تحفض معالم وتقاسيم وجهوا...
بغات حبهم وحتى أحلامهم لي حلموها بزوج تبقى محفورة ومطبوعة في ذاكرتها.....
بتاسمات ليه إبتسامة رضا إبتسامة حاملة في طياتها كل الإحترام والحب والتقدير...
تحنات لعندوا تتبارك ليهم بزوج على الخطبة قربت الأذنو وحطات إيدها على كتفوا ونطقات أخر كلماتها باش تودعوا ....
بصوت حزين تيرجف وبحروف مبعثرة وبغصة في حلقها قالت ليه...
_كمل حياتك او متفكرش فيا أنا بيخير إلى كنتي نتا عايش مزيان الى كنتي كتبغيني بدا حياتك من لول ونساني
سرطات ريقها بعدما قالت بحزن...
تنتمنى ليك زواج مبارك........تنبغيك بزااف...
رمقها بعينين عامرين حب ليها.... وحزن على فراقها...
سرط ريقوا بصعوبة حتى تفاحة ادام تحركات في عنقوا ما قدرش لا يتكلم ولا يعبر ولا حتى يعتادر كانوا عينيه كفيلين أنهم يقولوا كلشي ...
حط يدوا لي تترجف فوق إيدها لي جرتها من فوق كتفوا فور ما حسات بلمسة إيدوا فوق إيدها... مبغاتش تزيد تضعف قدموا ولا تراجع...
هاذ الخطوة ديال لفراق خدوها بزوج او خاصهم يكملوا فيها ويكونوا قد قرارهم .... شافت الشفاه ديالوا غيتحركوا باش يمنعونها من انها تمشي وتخليه...
وهيا تدور بسرعة غاديا عطياه بضهرها .....
جمع إيدوا على شكل قبضة حتى عروق إيديه برزوا أكثر ....
بقا متبع ليها العين وهيا غاديا بحال شي شخص كيتفحص في جثة ميت عزيز غادي يشوفوا أخر مرة..
دخلات وسط ناس تيشطحوا بغا تهرب من هاد الأجواء ورجليها مبقاوش هازينها تتدفع فناس وتكابر بغا غير تخرج من تما .....
تتشوف فيهم بحال شي واحد واخد لادروك وتالف وهيا بنفسها مبقاتش فاهما راصها.....
ولا حتى كيفاش قدرات تتخلى اليوم على قلبها لوحدة أخرى قدماتوا ليها بالبارد المستريح...
جروها شي جرات من دربهم باش ترقص معاهم وهوما ما عرفينش راصهم راهم تيرقصوا على نغمات حزنها وآلمها هيا بتسمات بزز منها للمرأة لي تتجر فيها وقالت ....
_سمحي ليا دقيقة....ونجي نشطح معاك
بغات غير تفك منها وتخرج من هاذ المهزلة لي حطات فيها راصها .....
وهيا تتخطي أخرى خطوتها باش توصل للباب تتحس بجناوا تيتغرسوا في قلبها ...
فور ما حطات رجليها خارج باب دار دربها نسيم هواء بارد مخلط ببعض القطرات المطرية الخفيفة وكأن هاذ النسيم والقطرات ...كيحاولوا يفيقوها من سهوتها ويعريوا ليها على هاذ الواقع الأليم لي أصبح هوا عنوان حياتها ...حيدات سباط طالون من رجليها وغاديا مكاليا مع الحيط باليد اليسرى وشدا بيها صباط بجوج صبعن....
وإيدها اليمنى حطاها على قلبها وتتنفس بجهد ولقفطان لي لبساه غادي مجروج في الأرض ...
تتمشى ببطئ... رجليها مبقاوش هازينها تتحاول تحبس دموعها وتقوي نفسها باش متبكيش قدام الناس ولكن داك شي كان فوق طاقتها ....
دموعها داروا خط على وجنتيها الورديتين..
وشهقاتها ولاوا مسموعين مقدراتش باقي تكتمهم وصلات لدارها لي جات قدام داروا ...
بقات تتدق في باب شحال...لكن لا رد
تحنات بلي فيها هزات محبق ديال اليازير
جبدات الساروت من تحتوا بغا تحل الباب... ويديها تيرجفوا بسرعة ......
بقا تيطح ليها المفتاح و تعود تلتاقطوا من الارض....
بعد دقائق وحتى سردات مزيان .......
بمشقة الانفاس باش حلات الباب ......
دخلات وسداتوا مورها.... رمات صبطها في الأرض وطاحت على وقفتها مغمى عليها وسط لمراح.....
بدات تتحل عينيها العسليتين ولي حاملين من الحزن ما يكفي....
هزات يديها تتحسس في وجها لي سارد كلوا بالماء لقات راصها موسدا رجلين أمها نبع الحنان لي تتكون معها في جميع ضروفها ... بقات على نفس الوضعية متحركاتش كتافات أنها تهز عينيها لي جاو مباشرة في عينين أمها.....
شافت فيها بكل حب وحنان ونطقات باش تطمن عليها .......
بنتي واش نتي بيخير ...
فور ما سمعات كلام أمها عمروا عينيها بدموع دورات يديها على خصر أمها دافنا راصها فيه كتبكي بحرقة بحال شي بيبي صغير محتاج لي يهتم بيه ويقول ليه أنا معاك بقات تتبكي او مها تتدوز بيديها على راصها وتتبكي معها..
الام (رحمة) : بكي بكي أبنتي... (تنهدات من الأعماق مكملا كلامها بحزن )بكي وخوي قلبك خاصك ترتاحي..(سكتات لثواني مكملا كلامها ) من بعد اليوم .....دموعك مغنخليهمش ينزلوا مزال...نوضي من الأرض....
تمسكات بيد رحمة أو وقفات من الأرض تترجف مكابرا....
دورات يديها على خصر بنتها ومكليها عليها لاطيح من بين إديها وهيا مرخيةو ولات بحال شي لعبة تتحرك فينما حركتيها .....
تمات غاديا بيها لحمام أو قفطانها تيتجرجر في الأرض سارد ...
وجها ولا صفر نقطة دم مبقاتش فيه وعينيها صغاروا وتنفخوا بكثرة البكاء ....
دخلتها تتغسل ليها وجها لي ولا حالتوا بالبكا وعاد المكياج كلوا تجغلط ليها ......
رحمة بقات فيها بنتها عرفها ما عندها زهر ولي دارتها في يديها تتخسر ضرها قلبها من جهة إسلام و مبغاتش تعتبها ولا تلومها نطقات بقلة حيلة......
رحمة:شوفي حالتك كيف وليتي صفرة وجهك كحال واش بغيتي تمرضي (قلبها تزير عليها ونطقات) وديك الساع ما غينفعك لا طبيب ولا فقيه(خدات لفوطة تتمسح ليها وجها ) أبنتي ديري عقلك وديها في صحتك راه هيا لي غتدوم ليك ...وجهك ولا حالتوا وخا غسلتيه....كلك سردتي غير الله يحفض لا تمشي تمرضي..
تمشات غاديا بيها في لكولوار ديال دار باش توصلها لبيتها ومكملا حديتها....بغا تمرضيني بالفقصة عليك ابنتي (بغضب قالت ) ديك الساع نموت عاد ترتاحي...
فور ما سمعات كلام رحمة لي دخل بحال سم لقلبها وقفات.....
هزات إيدها بسرعة تترعد و حطتها على فم مها منعها من ذكر الموت مرة أخرى....
حركات الشفاه ديالها ونطقات بألم مخلط بغصة في حلقها...
_الله يحفضك ويطول في عمرك أ ماما متجبديش هاذ لكلمة...
دورات عينيها لي عمروا بدموع.... مبعداهم من نضرات أمها سرطات ريقها بصعوبة...
_هاذ الكلمة "الموت"بذات متنحملش نسمعها دورات وجها ناحية رحمة بتراجي....
_عفاك متبقيش تقولي هاكا...
غمضات عينيها ودموع نازلين بغصة خانقها... _هاديك الغدارة"قصدها الموت" خدات مني "با" وأنا مزال صغيرة لدابا معقلاش حتى على صورتوا او ملامحوا كيف ديرا ولا حتى كيفاش شخصيتوا كانت......
بكل بساطة معرفا عليه ولوا
(حطات يديها بزوج على كثاف مها )أو بغيتيها تاخدك مني حتى نتي(تتهضر كارزا على سننها) بأشمن حق أه(معليا صوتها ) بأشمن حق...
رحمة بألم: بركا مطيبي ليا قلبي ابنتي....كثر ما هوا طيب من جيتهك.....لموت علينا حق....
إسلام برجفة صابت كل جسدها: ولاكن أنا ما عمري ما شفتوا ! علاش؟ ...واش ما شي من حقي حتى نسمع صوتوا !
رحمة مبغاتش تبقا تعطا مع بنتها في الهضرة وهيا لي فيها كافيها..فقط كتفات أنها تجوبها بأية قرأنية...
_كل من عليها فان ويبقى وجه ربك دوا الجلال والإكرام ....
إسلام (نزلات راصها الأرض بخجل)ونعم بالله
رحمة:دخلي بدلي عليك هاذ الحالة ولا عرفتي شنوا... أنا غنسخن ليك الماء ودخلي دوشي حسن ....أو لبسي شي بيجامة سخونة
إسلام كتفات أنها تحرك ليها راصها بالإيجاب بعدما دخلات لبيتها.....
جالسين في وسط لمراح لي مفرش بطريقة بلدية مغربية ...وخا دراهم صغيرة وقديمة..ولكن مقادة ومجموعة نقية دليل على مولات الدار الحادكة...
كأي عائلة مغربية تيقرقبوا ناب على كاس ديال أتاي قدام التلفازا لي لاصقا في الحيط...
جالسا رحمة مربعة رجليها فوق السداري وموسدا تحت دراعها جوج مخدات...أو شبيكة صغيرة ديال دواء جنبها...وكاس ديال أتاي مسوس بين يديها.. في جنبها بنتها لكبيرة توبة كين شبه كبير بينها وبين إسلام.....
حتى هيا شعرها طويل كحل خارجين لمهم في زينها.....لبسا بيجامة في الغوز ديال الموبرة سخونة وقدمها طبلة محطوط فيها صينية ديال أتاي.......أو ولد صغير تيلعب بالكورة قدامهم..
توبة مخاطبا ولدها ...
_يهديك الله أولدي غتبقا تطير حتى تجيب الكورة في تلفازا ..دوز تبرك الارض..ولا نوض ليك.(مخرجا عينيها)..تسحاب راصك في ملعب....
رحمة :خلي عليك الولد يلعب...بغيتيه يخرج لزنقة في هاذ الشتاء...بقيتي مقبلاه وحبسا عليه حتى بقا قصير...دري عندوا سبع سنين ولي شافوا ما يعطيش حتى خمس سنين...
توبة رتشفات من كاس ديال اتاي ...ونطقات
_وهانا أمي ساكتة...بقاي تدصريه حتى يطلع ليك فوق الراص ...وزيدن عقلوا تبارك الله فيت عمروا بسنين.....وراصوا يابس متيسمعش الهضرة...
رحمة :بعدي ليا من ولدي حبيبي.... أمير أجي تشرب أتاي..
أمير(حرك راصوا بنفي) مافياش الجوع،باغي نلعب...
توبة :(مخنزرا فيه)شتي أش قلت ليك متيسمع لحد من غير إسلام...(بتفكيرة)أجي فين هيا إسلام ما شفتهاش من لبارح....
رحمة بتنهيدة طالعة من الأعماق حطات إيدها على خدها......
_أودي غير خليني ساكتة..لي وقع لختك ما تبغيهش لعدوك.... فاش جيت قبيلا مع ديك جوج من عند خديجة ديت ليها جوج كيلوا ديال صابلي لي وصاتني عليهم....
لقيت ختك طايحا في لرض سخفانة.....وفازكا بشتاء شحال وأنا نرش عليها فالماء سحاب ليا غير ماتت الله يحفض...دازت عليا قبيلا(صمتت للحضات مكملا كلامها)هاذ شي كلوا وقع حنت مشات حضرات لخطوبة ديال سفيان....
توبة بخوف وصدمة...حطات يديها على فمها
_أش داها تمشي عندوا؟
وقع هاد شي كلوا أمي او ما قلتي ليا والواا....(جمعات النوضة) نمشي نشوفها كيف بقات......
رحمة:لا غير بركي.. خليها راه دوشات وبزز باش نعسات .....خليها ترتاح شويا ....نتي ما عرفاش ختك حساسة وعلى سبة تتبدا تبكي..
ملي تتكون مقلقة تتجبد لقديم وجديد..وداك شي كامل لي ضرها في خاطرها تتجبدوا...
توبة( هضرات بعصبية )كون كان راجل كيف رجال..كون وقف في وجه باه وتزوج بيها....
ضحكات بسخرية...
_قالك حقا ما حقا نضحيوا أش تيسحاب ليهم راصهم في مسلسل تركي...
خبطات فخضها بعصبية موجها كلامها لمها....
_فين المنطق بهاد شي فين؟
رحمة مخرجا عينيها في بنتها بغضب....
_لواه الكذوب على الله حرام لولد ما دار فيها وفينا غير الخير...علاه نسيتي ملي مرض أمير في ليل شكون داه لسبيطار؟(تنهضدات مكملا كلامها)كون ما هوا كون الولد مات الله
يحفض...ونهار ختك كان عندها الباك شكون لي سمح في متحان خدمة الأساتدة وبقا مقابلها تيفهمها ويشرح ليها...وزيد وزيد...إلى بقيت تندكر ليك أفضالوا ما غنساليش...
توبة حطات الكاس ديال أتاي وكفضات يديها..
هاد الشي كلوا ما نكرتوش أمي..هوا عونا شحال من مرة الله يجازيه بالخير
ولكن طلع شماتا باينا كان تيتفلى على ختي..
لقاها حيط قصير....وفي الاخير يقول ليها با خطب ليا....
رحمة :(حطات الكاس من يديها)سفيان أبنتي مرضي ...موا وباه ...وهاد شي بشهادة الجميع...وختك إسلام ....تيبغيها شحال من حاجة دارها على قبلها ...او حتى لا ما كانش بينا دابا راه ملائكتوا حاضرة كتسمع...
توبة :(مقوصا حجبانها)هيا غير حنت دوزات معاه طفولتها ومرهقتها كاملااا تتسحاب راصها تتبغيه إسلام راه غير تتشوف في سفيان... بابا الله يرحموا (دربات الطبلة بيدها بتأكيد) نحلف ليك عليها ماكين لا حب لا زمر...(تتحرك في راصها )
حنت كيهتم بيها وتيعملها مزيان عند بالها تتبغيه وحتى دابا الى جا شي واحد اخرى هتم بيها غتعلق بيه كيفوا
رحمة:(بقلة حيلة )الله اعلم مبقيت فاهما ولوا...وزيدن هاذ الهضرة ما عندها فاش غتنفع دابا (هزات راصها لفوق) فات الفوت و زواج أبنتي قسمة ونصيب ..دابا يجي مكتوب ختك ونفرحوا بيها...
توبة:(بتنهيدة)الله يصوب ليها أمي ويجيب ليها شي ولد ناس لي يكون كامل مكمول (بغضب) ماشي بحال داك شماتة..ماعرفش حتى ولدوا فين حاط ....عام باش طلقنا وعمروا سول فيه...
رحمة: (طبطبات بيدها على كتف بنتها) أمير عايش بيخير بيه ولا بلا بيه ...ما حدي أنا عايشا ما غنخليه يحتاج لوالوا ..حمدي لله او شكري لمهم تفكيتي من ديك لعصا لي كان تيعطيك...الله ياخد فيه الحق.......
سمعوا الساروت تيدور في الباب داروا جيهتوا دقة وحدة ...حتى بان ليهم داخل لدار والمظل في يديه....حطوا عند الباب تما داخل عندهم.... .
والإبتسامة مرسومة على وجهوا كيف ديما...حتى سمع غوتها...وتقلبوا ملامحوا لغضب..
توبة:(تتهضر من تحت سنانها)هياه حط سباطك عند لباب ما تتشوف فيه كلوا عامر غيس..
عمر:(شاف فيها )بديتي تاني راه يالله جيت
توبة:(مدورا وجها عند مها)وماما هضري معاه ما شفتينيش يالله جففت
رحمة:حط اوليدي صباطك عند الباب الله يرضي عليك...وكون تسمع لكلام.... راها ختك لكبيرة
عمر:(تيعيب في توبة)وماما هضري معاه ماشفتينيش يالله جفتت
توبة:( معصبة)شوفيه أش تيدير ليا أماما
رحمة:راه مزال صغير
توبة:أويلي أمي على صغير ..عندوا عشرين عام قدواا راهم مزوجين
عمر:(تيستفزها)أو ولدين خمسة لولاد او بنت حفضت هاذ الكسيطة..بدلي بدلي شويا متبقيش قديمة حاولي تواكبي العصر.....
رحمة :(هزات يديها فوق راصها)نوضوا داربوا فوق راصي حسن...خاصني نعود ليكم تربية من جديد ....
قرب عندها يتضحك تحنى على إيد رحمة قبلها بحنان كيف ديما...
عمر: تنبغيك الوليدة متعصبيش علينا ...تبارك الله الخير ديال الشتاء كتطيح....
رحمة:ولله يجعها على قد النفع أولدي ..دير عقلك وبعد من ختك.....
عمر:(ناض على وقفتوا)هاهوا غادي مبعد منها.....راه لخوادرية لي ما تتقيلنيش (مخاطب ولد ختوا)..سي أمير هضر مع مك تبعد مني
أمير:(هز فيه عينوا وتكلم بعدما هز كتافوا بزوج) ماما قبيحة غير بعد منها راها ما تتفاهمش كون تشوف أنا لي ولدها وأشنوا تتدير ليا.....
بعد ما قال كلاموا خلا كل من رحمة وعمر تيموتوا بضحك عليها...
توبة حلامات عينيها فيه:شناهوااا
عمر :كلمت الحق تقالت حتى واحد متيقولها فيك زينة أبنت مي(غمزها)
دارت عند أمها معصبة :حتى نتي تتضحكي معاهم
رحمة:أيوا ولدك جاك نيشان راك بنتي وعجينة يدي.... مالقباحة راك قبيحة تتقولي الإبليس حيد من تما أنا غنجلس في بلاصتك الله يحضر السلامة....
دخل نيشان لكوزينة وخلاهم تيتناكروا تيدندن في فموا أغنية من أغاني راب لي تيعجبوه....
جا على مسامعهم أدان صلاة العصر....
رحمة:(هزات يديها لسما)اللهم رب هذه الدعوة التامة والصلاة القائمة وأتي سيدنا محمد الوسيلة والفضيلة وبعثه المقام المحمد الذي وعدته إنك لا تخلف الميعاد
توبة:اللهم أمين
رحمة:(مخاطبا أمير)سير فيق خالتك أولدي ....ما مزيانش تبقا نعاسا....ما تينعس بين العاصر والمغرب غير ضاسر
أمير رد بي إيجاب ومشا تينقز فرحان لبيت إسلام ...
رحمة:(علات صوتها)عمار فينك
عمر:(من الكوزينة)انا في الكوزينة الوليدة تنصوب سندويتش فيا جوع .....
توبة تتغدد في مكانها بخفوت قالت....
أويلي أمي الكوزينة غترون يالله جمعتها...
رحمة محمرا فيها بعينيها باش تسكت ..
_أنا غنجمعها غير زميه...موجها كلامها ل عمر رض ليا شوية ديال الماء يطيب لوضوا..وأرا ليا معاك لانسولين من تلاجة مزال ما دقيتها الله يرضي عليك
عمر:هيا لولة البوكوصة ديال الأمهات..مشا يجري طير مد ليها إبرة الأنسولين ورجع مكمل شغلوا في الكوزينة.....
حلات عينيها نص حلة وعودات سداتهم....
_خليني نعسا أ أمير مزال ما بغيت نفيق بعد مني...
أمير :خالتي قالت ليك لميمة نوضي لا يضربك جن...حنت هاذ الوقت ما زوينش لنعاس
إسلام ناضت قافزا من بلاصتها تتدفل في حويجها
_ بسم الله الرحمان الرحيم ما صبتي باش تفايل عليا..
أمير:ماشي أنا لي قلت راه لميمة لي قالت ليك
إسلام :ياك رحمة لي قالت وسير قول ليها أنا جايا دابا....ما تخليوا لي ينعس على خاطرواا
حط يديه الصغيرة على خدها:خالتي كنتي كتبكي..
إسلام:بلعما...(هزاتوا حطاتوا فوق رجليها تتلعب ليه في شعروا) وزيدن أنا علاش غنبكي .(بي شك)همم أجي شكون قالها ليك؟
أمير دلا شفتوا التحتانية بحزن:تا وحدا أنا شفتك ..او عارفك علاش تتبكي..
أمير مبغاش يصرحها ويقول ليها انه سمع عليها لكلام من عند رحمة وتوبة فاش كانوا تيهضروا عليها خافها تقلق منوا ..وهيا مصياه ..الى كانوا لكبار يتهضروا يبعد منهم حتى يسالوا حنت عيب يسمع لكلامهم...
إسلام :وعلاش غنبكي غاع أسي أمير هاه
أمير:تتبكي حنت باغا تزوجي وخافتي تبقاي بوحدك حنت عمي سفيان خلاك...
إسلام غير سمعت إسم سفيان حسات بجناوا تغرسوا في قلبها...
أمير:(هز عينيه فيها بجدية وقال)ما تخافيش مغنخليكش بوحدك أنا لي غنتزوج بيك..صبري غير شويا(بدا تيعبر بصبعانوا) نولي قدك بحال هكا في طول ونتزوج بيك
إسلام ما قداتش تشد راصها من ضحك او في لحضة نسات همومها مع أمير ديما تيفوج عليها ...بينما هوا بقا على نفس الجدية....
ضرباتوا لضهروا تتضحك معاه...
إسلام:يالله سبقني أنا جايا...
لبسا سروال بيجامة خفيف في الأزرق بارد...وتريكوا..ولبسات كلاكيطة صبع في رجليها...وجمعات شعرها كعكة مهملة ونزلات عندهم...
كان غادي هز سندويتش في يديه..وتيغني اغنية من أغاني راب لي تيعجبوه...
بانت ليه إسلام ديزا وهوا يشدها من حنكها تيضحك ....
عمر:مال زين مكشر(وغمزها)
إسلام:(بعدات ليه يدوا)ماشي وقتك أعمار بعد مني..ما مسلياش ليك
عمر:(بعد منها)هاهوا غادي ما بقا حد يهضر معاكم في هاذ الدار.....(بقلة حيلة)واش غير حنت أنا صغير خاص لي جا يسبني ماشي معقول
أمير مقاطعوا:راه أنا صغير ماشي نتا!
إسلام: (حطات صبعها على سدرها)شفتيني سبيتك ولا عيرتك علاش تتجيب الهضرة من راصك... (علات صوتها )ما عنديش الخاطر أخويا واش بزز نهضر معاك...
عمر:(عنقها بي إيد والإيد لأخرى هاز بيها بلاطوا..)راك عزيزة الخوادرية...(باسها في راصها)سمحي ليا...غير تنضحك معاك
إسلام:(مبادلاه العناق) لا نتا لي سمح ليا(طاحت دمعة من عينها مسحتها بزربة) أنا لي وليت معصبة ما بقيتش تنعرف أشنوا تنقول.....
عمر:(ببتسامة مسطنعة)هانيا أزين...واخليني نمشي ناكل قاتلني الجوع..وسندويتش غيبرد
إسلام:(مبعدا منوا)أجي فين وصلتوا في راب ديالكم
عمر:(هاز راصول لفوق )خوك غيولي سطار كبير..كون غير تغني معايا صوتك زوين...
أسلام:لا ذاك شي لي بقا نيت بغيتي مك تدفني حية....وتبدا عليا راه الأغاني حرام وداك شي...
عمر:(علا راصوا لفوق تيضحك )غير تنضحك...داك شي ديروا غير هواية تنحيدوا بيه الملل وندوزوا بيه الوقت مع الدراري في ستوديوا.....إنشاء الله فاش يقبلوني في البوليس خوك غيولي محقق كبير ويعيشك كيف المليكة...
إسلام:إنشاء الله أخويا...بغيت ربي يسهل علي
علاقة إسلام وعمر علاقة زوينة بزاف صح أنا إسلام كبر منوا بعامين ولاكن تيدللها بحال هيا صغيرة....
بدا تيليفونها تيصوني شافت في شاشة بحزن بعدما قرات الإسم صرطات ريقها بصعوبة وطفات بزربة على المتصل بتوتر.......
توبة بانت ليها إسلام جاية لعندهم وهيا تقول
_العاشقة الولهانة فقتي.....
(رحمة قرصتها في يدها ودرت ليها إشارة بعينيها باش تسكت)
_بنتي كيف بقيتي شويا.....
إسلام:(بغصة في حلقها) الحمد لله على كل حال...
رحمة:بنتي أش هاذ اللبس راه لحال بارد وشتاء تتطيح...سيري لبسي بانطوفتك وحيدي ديك الصندالة...
إسلام: (بحزن )ما فياش البرد....غير خليني نمشي...
رحمة:(بتسائل)فين غادا؟
إسلام:غاديا غير هنا وجايا متخافيش عليا...
هزات لمظل وخرجات تتجر في رجليها خلاتهم كاملين من موراها تيتسائلواا....
غريب هوا حال الذكريات...تتبكينا أجملها.... و
تتضحكنا أقصاها.....
بعدما حطات رجليها برات باب دارهم .....
كل خطوة تتخطيها...تتفتح ليها جرح من جروح الماضي القريب....
وفي كل قنت أو باب تتدوز من حداه تيفكرها في سفيان ولحضاتهم مع بعض....
أحيانا تبتسم من قلبها ضنآ منها أن هاذ اللحضة لي هيا مجرد ذكرى جميلة تتعيشها الآن قدام عينيها....وتارة أخرى تحزن عندما ترجع الى الحاضر.....
حاولت تنفض كل الأفكار والذكريات لي هجموا على عقلها....
بعدما شافتها مكمدا لبسا مونطوا كبير عليها وشال غليض على راصها وتترجف من البرد....
مشات تتجري عندها عنقتها بيديها بزوج....
إسلام:أمينة توحشتك بزاااف أصحبتي....
أمينة حتى هيا معنقها:توحشتيني سبحان الله ياك غير لبارح كنت عندكم في دار....
إسلام مبعدا منها:توحشتك ازمرة أش فيها
أمينة خشات يديها في جيب المونطوا مكمدا على البرد:زمرة هيا نتي لي مخرجاني في هاذ الجواا حشومة عليك وخا نكون عدوتك متديريش ليا هاكا....
إسلام بحزن:سمحي ليا مقصدتش نخرجك في هاذ الوقت...
أمينة ضربتها لكتفها :متقوليش هكاك الحب شتي نتي على قبلك نقطع سبع بحور وهانيا الساطة..(شافت فيها بعد تصديق)أويلي سم ديال البرد ونتي شوفي أش لابسة ناري باز ليك والله...واش ما تتحسيش؟
إسلام مدورا وجها لجيهة الأخرى: ملي تتفارقي مع لي تتبغي تيموتوا فيك جميع الأحاسيس ...
أمينة بحزن:ناري كنتوا تتجيوا مع بعضياتكم بزاف والله لي شافكم كيقول تخلقتوا لبعضياتكم...نتي زوينة أصحبتي على ديك الكراطة ديال بنت عمتوا لي خطب...كون غير رجعتوا لبعضياتكم...
إسلام بقلة حيلة:هاذا هوا حال الدنيا ...ماشي
غاع لي تنبغيوه تيتحقق..
_أجي أش درتي نتي مع ولد خالتك؟
أمينة بفرح:كريم قال ليا سيمانة الجاية غيجي يخطبني من دار...
إسلام جرات ليها يديها وعينيها تيبريوا بالفرح:قولي والله(دلات شفتها التحتانية بحزن) عنداك يكون تيتفلى كيف ديما...
أمينة بخجل:لا أزمرة راه قالها لخالتي مليكة قدامي..
إسلام بسعادة:هاي هاي على ناس ولوا تيحشمواا(تلاحت عليها معنقها)مبروك عليك إنشاء الله العقبة لعرس ولوليدات ياربي..
_ حولك دراتي شال العفريتة وسترتي راصك قول القاضية فيها كريم
أمينة مبدلها العناق: أشمن كريم مالوا صوقوا فيا راه غير لبرد لي سترني ...أمين الزين والعقبا ليك حتى نتي...
إسلام(طاحت دمعة جنب عينها مسحتها بزربة) لا رد
أمينة مبعدا منها:أجي دخلي لدار غنبقاو واقفين هنا...ماجاتش
إسلام:لا خليني غير هنا بغيت نهضر معاك ...
أمينة:يسمعنا خبار الخير...(غمزتها)أش تم؟
إسلام:سفيان ولا ديما مصدعني في تيليفون بل المكلمات والمساجات رغم أننا تفرقنا..ومع ذالك قالك نبقاو نهضروا بحال شحال هادي(نزلات راصها الأرض بحزن)وأنا إلى بقيت مزال تنهضر معاه هاكدا غنزيد نعاني كثر داك شي علاش بغيت نبعد شي يامات...وبغيتك تمشي معايا عند خالي المختار لمزراعة الخيول نجلسوا تما شي تلاتة أيام...بينما داز عرسوا ونرجعوا أش بان ليك؟
أمينة بتسائل:أو يمتا بغيتينا نمشيواا؟
إسلام بتراجي:بعد غدا... بينما نيت جمعنا لحويج وقلتيها لخالتي باش تخليك تمشي معايا...الفيرمة راها ما بعيداش بزاف غير نص ساعة ديال الطريق بينها وبين الجديدة أش قلتي؟
أمينة مقاطعها:حدك تما قالك ناخد الإدن من عند سعاد مي ..دابا أنا راه وليت مراة الراجل...الى بغيت ناخد الإدن غنخدوا من عندوا هوا(ببتسامة عريضة)أو كريم خليه على حسابي الحب (غمزتها) ميقولش لا...
إسلام:بغيت ليك العز ربي يخليك ليا ولهلا يحرمني منك
أمينة:عارفا الحب...أجي وعلاش ما قلتيهاش لتوبة ولا عمر يمشيوا معاك؟
إسلام:منيتك تتهضري ...راك عارفة توبة تتعون ماما في لحلوة وخاصها توصل أمير كل نهار لمدراسة أو عمر تيمشي لافاك ..بغيتني نبرزطهم في مشاكلي وهوما لي فيهم كافيهم...(سكتات للحضات وقالت )دابا غير قولي ليا ما بغيتيش تمشي معايا غنتفهمك هانيا
أمينة بغضب:أش تتخربقي أزمر ..غير سولت وزيدن أنا أصلا باغا نبدل الجوا..مالك على سبة؟
إسلام:غير قلت يالله خليني نمشي بعد غدا نتلقاو الزين الديالي
أمينة تمات غاديا:تصبحي على خير وسيري لبسي حويجك لا يضربك البرد(معليا صوتها) أو بيناتنا تيليفون...متنسايش تسلمي على خالتي رحمة...
إسلام:مبلغ..وسلمي ليا معاك على خالتي سعاد وكريم....
نهار جديد و مغاير على العادة صبحات الشميسة شارقة في جميع أرجاء مدينة الجديدة....
كانت ناعسا مخشيا في بلاصتها ودموعها مفزجين لمخدة كيف ديما...سمعات دقان في باب ....وهيا تخشي راصها تحت لمخدة تتغطي في ودنيها...بغا تهرب من هاذ الصوت لي خسر ليها نعاسها .....وخصوصا أنها مبقاتش تتدوقوا .... حتى كتشرب الكينة من نهار تفرقات مع سفيان....
كمشات حجبانها بغضب ملي سمعات صوت الدقان غادي وتيزيد من الحدة ديالواا...
وقفات مع تنهيدة طويلة...هبطات تتجري في الدروج حفيانة وعينيها تيتلصقوا بنعاس.....
تتحل في الباب مخسرا سيفتها:
حتي بان ليها واقف.....
ولد تكون عندوا ديك 14 عام طويل ورقيق...
إسلام:(بغضب مخرجا عينيها فيه)هرسوا هرسوا نتا حسن ...بغيت غير نعرف شكون حرشك عليا...
الولد:أنا غير...
إسلام قاطعاتوا بعصبية:غير أشنوا ما حشوماش(تتشير بيديها) ....متعرفوا لي مريض.... ما تعرفوا لي سير كيموت غير تتجيوا وتبداو تخبطوا في بيبان عباد الله ....
الولد هبط راصوا بخجل:سمحي ليا أختي أنا غير مسخريني ...لعند مي رحمة...
إسلام بقا فيها لولد ملي هضرات معاه بديك الطريقة وحسات براصها قصحات معاه لكلام.....
لينات هضرتها وقالت....
_سمح ليا...ولكن ماشي هكا تيذقوا الناس في الباب...
_حطات صبعها على ضقنها...بتسائل شكون سخرك؟
الولد:سخراتي ماما(هزات حجبانها فيه بمعنى شكون ) سميرة!
إسلام بتسائل: شكون سميرة؟
الولد:سميرة مرات مول الفاخر......
.
إسلام بتعب: أه عرفتها ...وعلاش سخراتك
الولد مصغر عينيه:قولي لمي رحمة قالت ليها سميرة تصيب ليها كيلوا غريبة وجوج كيلوا فقاص أو جوج كيلوا كعب غزال.. بغاتهم نهار سبت....
إسلام: وعلاش ما سيفطتوش ليها الكوموند في لوتساب ياك عندكم نمرة؟
الولد:سالات لينا الكونكسيوا!
إسلام تتدور في راصها :ماقدرينش تيديروا صولد(كمشات حجبانها) وعندكم باش تشريوا كعب غزال سبحان الله...وخا سير قوليها وخا..وأخر مرة تجي تصدعني.....
سدات لباب وهيا غاديا تتسب في خاطرها ولبسات صندالة ختها كانت وسط لمراح...
تمشات نيشان لحمام غسلات وجها ويديها...
وخرجات جلسات في طبلة لفطور ...كبات كاس ديال أتاي..وجرات طبسل ديال زيت لبلدية غطسات فيه فرماجة وقطعات طريف خبز ديال دار....وبدات تتغمس وتتاكل بشهية.....
رحمة جالسا تتصلي ودعي في صالون مقابل مع المراح....شافتها إسلام سالات وهيا تقول..
إسلام كتسرط دغمتها:ماما بما أنك جالسا في الصلاية دعي معايا براحة البال والهنا....
رحمة: أنا ديما تندعي معاكم كاملين ....السعادة غتجيك ملي يكون قلبك قابل ومطمائن أبنتي..
إسلام نزلات دغمة تانية من إيديها بحزن....
رحمة جمعات الصلاية وجات جلسات حداها وبدات تتدوز بيدها على راص إسلام بحنان..
_كولي أبنتي من شحال هادي ما شفتك جالسا براحة في بلاصتك...
إسلام ببتسامة مسطنعة تتخفي من مورها أحزانها: صبحان الله فاقت ليوم تنتشهى وتشهيت لخبز وزيت ولفرماج أماما... وجيت ناكلهم....
رحمة ضحكات من قلبها: بصحتك أبنتي.. الله يخليك ديما ضاحكة...(تقلبوا ملامحها)كون غير خليتي حتى لبعد غدا وسيري شوفي خويا لمختار ... زربتيني أبنتي ونتي عارفا ولابدا خاصني نصيفط ليه معاك شي سطل ديال حلوة ريشبوند لي تتعجبواا
إسلام:بلاش أماما أنا غدا غنمشي... مرة أخر وسيفطي لي بغيتي...
رحمة:لواه ما غنخليكش تمشي بيديك خاويين ولا بد ما تدي ليه معاك حلوة لكوك غنمشي دابا نشري المقادير ونصوبها ليه وخا نعرف نصهر فيها ليل كامل...
إسلام منزلا راصها بحزن:هاكذا غتعدبي بسبابي....وحتى سميرة مرت مول لفاخر سيفطات ولدها قالك بغات جوج كيلوا كعب غزال أو جوج كيلوا فقاص أو كيلوا غريبة لنهار السبت....
رحمة ببتسامة:وخا أبنتي دابا نصيب ليها لي بغات....وغتجي ختك توبة وتعوني...
إسلام: لهلا يخطيك علينا ألحبيبة ولهلا يحرمنا منك....
متكيا في نموسيتها تتشوف في السقف و
حطا السماعات في ودنيها على كلمات أغنية ماذا بيا الحزينة تتسنط ......
ماذا بيا نعطي عمري تكون حبيبي وتوقف جنبي. أنا نبغيك ملكي ليا وحدي ونموت عليك لكن عدياني وقفوا ضدي........
نتمنا نموت وتولي وتولي........ ..يا جامي ننساك نتا عمري نتا عمري.........
والمكتوب لي فارقنا......
.
تحل عليها لباب أو دخلات بعجاجتها...
أمينة: وتي فين أصحبتي...هبطي تغداي راه تتسنى فيك غير ليسرية
إسلام شيرات عليها بمخدة:يعطيك مصيبة خلعتيني أزمر (حطا يديها على قلبها) ما تتعرفيش دقي في الباب كيف ناس تفواا عليك...
أمينة تتضحك عليها: ونوضي تغداي دارت لينا مي رحمة واحد مولاتي قصرية تعت كسكسوا بتفاية جات بنينة...
إسلام قدات جلستها: ونتي باش عرفتي (بشك) أجي يمتا جيتي؟
أمينة جلسات حداها:جيت مع ديك لحداش كنت معا مي رحمة في لكوزينة تنتعلم ما يليق بيا بغيتيني نبقا بحالك خطية ....
إسلام عودات شيرات عليها بمخدة أخر:ياك ألالة إيوا تعلمي شكون حبسك...أنا غير خليني ما بقا عندي لاش تنعلم طياب....وأصلا ما عنديش مع ذاك شي ديال الكوزينة
أمينة مقاطعها: ملي فاقت صباح جمعت لحويج لي غيخصوني ودردبت عندكم نيشان لهنا لدار... باش نمشيوا لفيرمة عند خالي لمختار...
إسلام تتضحك عليها:هاي هاي على خالي لمختار من إيمتا ولا خالك ألالة...
أمينة طلعات حاحب ومنزلا لاخر:بما أن ماماك رحمة تنقول ليها مي رحمة ونتي ختي(صغرات عينيها)راك عارفة ما عندي أخت...إذن خالك المختار ولا خالي..إلا(كمشات حجبانها)إلى كان عندك شي مانع...
إسلام جرات أمينة من دراعها معنقها: راك عزيزة أصحبتي وغير تنضحك معاك...أي حاجة ديالي راها ديالك....إلى ريثيك روشان
متنازلش ليك عليه .....
أمينة حطات يدها على قلبها:الله فاش فكرتيني يختي نعطيك كريم وخلي ليا ريثيك (وسعات عينيها بفرح) أو تايغر أو سيدهارت...
إسلام مقاطعها:بسم الله عليك...مالك تحليتي قولي أعود بالله من شيطان الرجيم...متأكدة بالي عندك قلب أختي...
بقاوو تيضحكوا حتى سمعوا صوت عمر تيناديهم باش ينزلوا يتغداواا...
أمينة تتلبس في رجليها بزربة:بقيت مقبلاك حتى نستيني في كسكسوا دابا غيبرد بسبابك(نزلات تتجري)
إسلام ناضت حتى هيا تتلبس في رجليها وغاديا تابعاها:وتسناي راه حتى أنا تيعجبني كسكسوا بتفايا...
مجموعين في المراح على طبيلة ديال لخشب ديرا تتوسطها قسرية ديال كسكسوا بتفاية... مزينا بكيسان من جناب ديول اللبن
جالسا رحمة مربعة رجليها وعلى يمينها عمر وحداه ختوا توبةلي مجلسا ولدها جنبها تتبرد ليه...وعلى يسارها جالسا أمينة وجنبها إسلام...
إسلام تتبغي تجيب اللقمة لفمها تتشمها عاد تتاكلها وتتبنن في المذاق: شحال بنين أماما الله يعطيك الصحة .... وريحتوا تتحمق....
رحمة ببتسامة:بصحتك أبنتي
قاطعتها توبة:غير بشويا أ إسلام لي شافك يكون ما عمرك ما دقتي النعمة..
إسلام مسرحا رجليها وعينيها مفيكسين في القسرية تتاكل الدغمة وتتدوزها بجغمة اللبن
ما مصوقاش لكلام ختها...
رحمة:كسكسوا ما كيحلى غير مع الجماعة (موجها كلامها ل أمينة)مرحبا بيك أبنتي.. كولي متحشميش.. (تتقطع دجاج وتحط ليها) كولي أبنتي..
أمينة تتضحك حتى تتبان ليها ضرسة لعقل:ربي يخليك أمي رحمة هاذ شي بنين ومن ليوم غنتبع طريقة لي وريتيني ونصوب بيها كسكسوا بتفاية..ربي يخليك لينا...
إسلام عينيها خارجين في القصعة تتاكل وتلدد وفي كل دغمة تتخرج صوت باللبنا لي فيها:أممممم بنييييين
أمينة تتضحك عليها ضربتها لضهرها :ناري أصحبتي لي شافك يقول تتوحمي...
ملي سمعوا كلام أمينة كلشي هز راصوا بصدمة....
وإسلام ملي سمعات كلام صاحبتها عينيها خرجوا أو وحلات ليها الدغمة ولات كتكحب....وتنفسها كيتقطع..... كح كح كح
ناضت توبة كتجري جابت ليها الماء وعمر وأمير تيضربوها لكفاها بيديهم بجوج...
أما أمينة بقات غير تتدور في راصها بينهم..
..
رحمة جمعات النوضة: أش هاذ شي أبنتي غير
بشوياعليك هاهيا الماكلة حداك ما عندها فين غتهرب..كون وقعات ليك شي حاجة الله يحفض ...ردي البال...
إسلام ردات النفس وعينيها مزال مفيكسين مع القصعة تتهضر بزز:ماما إلى بقات شي حاجة خليها ليا نتعشا بيها...
عمر تيضحك:ناري يا الخوادرية وخا يقتلك هاد كسكسوا ما تتفاكيش معاه...
أما توبة جلسات وبقات تتشوف في ختها بشك...
واقفا في الكوزينة تتغسل في الماعن وعقلها غايب....تيحلل ويناقش غير بوحدوا.....
زينها طبيعي وعاطي لعين بحالها بحال ختها تيتشبهوا...الفرق الوحيد بينهم أن توبة عامرة شويا على إسلام... وخا الضروف قصات عليها وتزوجات صغيرة...
و هكاك وبقات زوينة مهليا في راصها وفي ولدها عندها غير 24عام و لي شافها ميعطيهاش هاذ السن وميقولش عليها والدا ولد عمروا سبع سنين....
عزيزة عليها ختها إسلام وتتبغي ليها الخير وتتفضلها على نفسها... ما بغتهاش توقع فشي مصيبة ماشي قدها.....
قبل ما تنزل أخر طبسيل من يديها دخلات لعندها تتسول....
أمينة تتدور راصها في الكوزينة:ختي توبا فين محطوط بزطام إسلام قلبت عليه حتى عييت أو ما لقيتوش...
توبة ساهيا:غتكون حطاه فوق طبلة ديال تلفازا الصغيرة لي في بيتها ولا في جيب لمونطوا لكحل لي معلق عند الباب...
أمينة تمات غاديا:العز أختي نمشي ليه دابا نيشان ناخدوا
توبة بتسائل ضارت عندها:أجي أش بغات لبزطام؟
أمينة: قالت ليا نجيب ليها منوا خمسة دراهم ديال الزريعة تشهاتها.....
توبة زادوا وساعوا عينيها حلاتهم كثر: أو فين هيا دابا؟
أمينة:راها جالسا قدام لباب رادا لبال ل أمير تيلعب الكورة في زنقة ....
توبة : أه صافي تفكرات عقلي مشوش بزاف ذاك شي علاش نسيت...
أمينة تمات غاديا:خليني نمشي نجيب ليها لي بغات دابا طليني حنت تعطلت.....
خرجات من الكوزينة وتوجهات نيشان للبيت لي في السطح لعند مها.... تما فين تتصوب الحلوة للناس....
طلعات وجلسات حدها ساهية ...
رحمة مشغولة مربعة رجليها تتعجن سخفانا ومعكفا راصها بجوج زيوف حنت تيضرها.... هزات راصها في توبة بانت ليها ماشي على برجها...
رحمة عاقدا حجبانها :توبة مالك أبنتي واقعا شي حاجة وأنا ما فراصيش؟
توبة بنفي تنهضدات: والوا أماما ما كين والوا...
رحمة هزات يديها من لعجينة وزادت عقدات حجبانها كثر: ما تتعرفيش تكذبي أتوبة..قولي ليا أش كين...راك بنتي وعجينة يدي
توبة حطات سبعها على ضقنها تتخمم:أنا خيفا أمي لي يكون لي في بالي صحيح..تنهدات مكملا كلامها... غتصدق خارجا على مستقبلها كامل...وهيا يالله قالت بسم الله...وتربية لولاد صعيبة...
رحمة بعدم فهم هزات فيها عينيها:تي على من سيرا تهضري وشكون لي غتخرج على مستقبلها ما فهمتش.. وضحي أبنتي...
توبة قربات منها وبخفوت قالت: متعصبيش مني على هاذ لكلام لي غنقول (بخوف وتوتر قالت ) تنهضر على إسلام عنداك غير تكون حاملة....
رحمة عقلها حبس عند كلمة"حاملة" بقات تتدور ديك الكلمة في راصها بخوف...حطات يدها على فمها ...ممصدقاش
_ لا هاديك بنتي وتربية يدي مستحيل دير شي حاجة بحال هادي...لا ما يمكنش...
توبة بتأكيد:يمكن أميمتي (تتدور في راصها) علاه ما شفتيهاش قبيلا.. أش دارت في كسكسوا عينيها بقا ليهم غير شوية ويطيحوا عند القسرية... وحتى من أمينة راك سمعتيها بودنيك قالت تتوحم وخا قالتها هيا بضحك وغدا ناس كلهم غيشكوا و يوليوا ينعتوا فيها....وزيد عليها شحال من مرة بقات هنا في دار هيا وسفيان بحدهم راص في راص...
رحمة شدات من راصها وتكونسات في بلاصتها وهضرت بنتها دخلات لراصها بحال سم لعقلها.... لدرجة خلاتها تشك في تربية يديها...
توبة ما سكتاتش وبقات مكملا كلامها......
_وا كنت ديما تنبهك باش ما تخليهمش بوحدهم
شحال من مرة قلت ليك الحضا تيغلب القضا أمي وربط تلقا ما تسيب... وهاهيا غتصدق فاضحانا في الحومة كلها وهوما خاصهم غير علاش يهضرواا.....
رحمة مسحات دمعة من عينها وناضت بزربة تتغسل يديها: نوضي عيطي ليا على لكلبة لصالون وصيفطي أمينة لشي بلاصة هيا وأمير ما بغيتهمش يسمعوني أش غنقول....
.
جالسا قدام باب دارهم وضحكة واصلا ليها لودنيها...معاه ديما تتنسى نفسها ومشاكلها
هوا ديما مفوج عليها....
تتشجعوا وهوا تيلعب في الكورة قدامها...
وهوا كذالك فرحان معاها...
أمير تيجري مورا الكورة وتيضحك:شوفيني خالتي إسلام هانا غنجيب بيت( غوت بي) كوووول
إسلام وقفات من بلاصتها تتصفق عليه وتشجعواا
وتتصفر ليه:تبارك الله على ميسي ديالي...تنبغيك بزاااف(صيفطات ليه بوسات في الهواء)
جا تيجري عندها عنقها بيديه بزوج هيا عزيزة عليه بزاف كتر من موا الأنها دائما تتدير ليه خاطروا ...
بدلاتوا العناق بفرحة كبيرة وباستوا في حنيكاتوا.....
أمير ببتسامة بريئة:أنا ملي غنكبر غنولي لاعب كورة كبير بحال ميسي
إسلام ببتسامة :نوو نتا غتكون أفضل لاعب وفين غيبان هاذ ميسي قدامك
لعبات ليه بشعروا ومشا تيجري قدامها فرحان...
حتى تقلبوا ملامحها ملي بانت ليها ديزا من حداهم لبسا جلابة جديدة بيضاء ديال لعريسات وغاديا لحمام هيا و جوج من بنات خالتها....
غير شافت إسلام وهيا تطلب من لبنات لي معها يبداو في الصلاة والسلام على رسول الله صلى الله عليه وسلم ...
خطيبة سفيان قربات عند إسلام:سلام لباس عليك
إسلام بغصة في حلقها :لباس الحمد لله أختي ونتي بيخير
خطيبة سفيان ضارت شافت في لبنات حداها
تتضحك:معلوم أنا بيخير وصلت لذاك شي لي بغيت وخديت الإنسان لي بغاه قلبي (طلقتها بضحكة إبستفزاز)شوفي غير نتي أحبيبة خاطرك كيف بقات.....
إسلام سرطات ريقها:كل واحد وأشنوا مقسم ليه الله في هاذ الدنيا... وكلشي بالمكتاب
بادوا لبنات تيضحكوا وتيتغامزوا على إسلام بينما هيا تربط ليها لسان وسط منهم...فاش كتطيح فشي موقف بحال هاكدا دئما ما تتعرف ما تقول حتى تيفوت الوقت عاد تتندم راصها.....
خطيبة سفيان:زين راك معروضة لعرس غدا (غمزتها)ولا بدا ما تجي...
إسلام بتسمات بزز منها:شكرا.. ومبروك مرة أخرى...
أمير ملي شافهم كيفاش تيضحكوا ويتغامزوا على خالتوا ما كانش من العاكزين وضرب ليها لكورة لي عامرة غيس في المنطقة المعلومة لور ...ولات جلبتها الجديدة فيها دائرة كحلة..
حسات بضربة يالله غتطلب من لبنات يشوفوا حويجها وهيا توقفهم جات في الوقت المناسب...
أمينة جايا تتجري وفي يديها بلاستيكة فيها زريعة وسط وراق:خليني أنا نشوف...
دارت تتشوف فيها وتتغمز في إسلام وحابسا ضحكة
أمينة :والوا ازين ما فيك والوا وحتى جلابة تبارك الله جاتك فنة تتحمقي...
خطيبة سفيان:ميغسي حبيبة.غير هوا بقاو ترضوا لبال لداك لبعلوك ...
أمينة بستفزاز:لبعالك هوما لي عندكم في داركم اما أمير تبارك الله ما شاء الله(خمسات ليها بيديها) تولدي بحالوا ما يعيش ليك...
خطيبة سفيان معصبة هزات صبعها تتشير بيه لنفسها:لبنات سمعتوها أش قالت ليا...أش تتسحابي راصك نتي باش تقولي ليا هاذ الهضرة...
أمينة من تحت سنانها: مزال ما تتعرفيني أزين سيري سولي على أمينة بنت لعربي غتشوفي أش غيقولوا ليك ....الجديدة كاملة تتعرفي ما تنخليش دقتي ولي جبدني تيلقاني (غمزتها) إلى ما خفتيش على وجهك تحضري بيه غدا مسيكاطريسي لعرس.... غاتجري هاذ جوج مونيكات وتزيدي فحالك من هنا....
خطيبة سفيان ولا وجها كيف المطيشة مرداتش يالله غتجوبها وهيا تجي إسلام
تتجري مقطعاهم.... جرات أمينة من دراعها...
موجها كلامها لخطيبة سفيان(هناء):صافي ما وقع باس سيري أ ختي دابا تعطلي...
خطيبة سفيان(هناء) قلبات عينيها موجها كلامها ل أمينة:مريضة خاصك داوي سيري جري على راصك أحبيبة.... ومشات تتعيوج
أمينة بعصبية:أجي لمك هنا ونوريك لمريضة فينا شكون أتريكة لكراطات.... ما عندكش حتى علاش تبركي وسيرا تعوجي..سيري غير بشويا عليك لا تفرتكي في طريق...
نترات دراعها من بين يدين إسلام...
أمينة بعصبية:لاش شديتيني على هاد الكراطة لحمارة تتسحاب راصها عارضة أزياء
إسلام مخرجا فيها عينيها:خفت عليك ا أمينة هادي راه باها كوميسير كبير ونتي السيمانة جايا عند الخطبة واش بغيتي تمشي لحبس...
أمينة:على قبل هاذ لماركة ما عنديش مشكل نمشي عليها حتى لجهنام...شفتي أش تتدير ليا كون غير خليتيني نتفها...
إسلام تتضحك:ما خليتي فيها غير لي نسيتي أختي وحتى أمير شفتيه أش دار غتبقا غاديا معلمة بديك الطبعة حتى لحمام.....
أمينة شدات من كرشها كتموت بضحك هيا وأمير...
إسلام نترات ليها لميكة من يديها: دابا هداك وجهك ولا مكتكسابيهش شهاد تعطال اصاحبتي...
أمينة مقوصا حجبانها:حادكا فيا غير أنا تعيريني وهيا سكتي ليها تفوو عليك ما كتسويش...
خرجات عندهم قالبا وجها....
توبة موجها كلامها ل أمينة:ختي أمينة واش ممكن تسخري ليا الى ما كنتش غنعدبك لقيتي أنا عرقانا كنت كنعجن والى خرجت غيضربني البرد...
أمينة:دنيا هانيا أختي الله ياودي أش بغيتي نجيبوا ليك دابا...
توبة مدات ليها لفلوس:خاصني جوج باكيات زبدة ديال لحلوة أو الكوك أو ثمنية الخمارات
أو عافاك متجبيهمش من الحانوت لي هنا عندوا سلعة مزويناش سيري عند سي موحا
لي في شاريع لكبير...
أمينة خرجات عينيها:حتى لتما...
توبة:اه ودي معك أمير يونسك في طريق
إسلام مقاطعها:حتى أنا نمشي معاكم نونسكم
توبة مخنزرا في إسلام:لا نتي غتدخلي تعونيني لداخل...
مشات أمينة تسخر هيا وأمير...
وهيا تبعات ختها لدار...شافتها غاديا داخلا لصالون وهيا تقول...
إسلام بتسائل:ياك قلتي ليا غنعونك يالله لسطح أش غاديا ديري في صالون...
توبة من تحت سنانها معصبة:عمرك عونتيني فشي حاجة بلاش ما ضحكي على راصك وأجي لهنا (شارت ليها لصالون )دخلي..
.
إسلام تبعتها بسكات..جاها داك شي فشكل ما عمر ختها هضرات معها بهاذ الشكل الغريب ....
دخلات لبيت لي مفرش بالأزرق زوين وكبير وتتوسطوا جوج طبيلات كبار...
هزات عينيها في صالون بانت ليها رحمة جالسا ووجها حمر ما كيتفسرش...
إسلام بخوف قربات من مها شدات يدها:ياك لباس واقعة شي حاجة أماما
رحمة بداو تينزلوا دموعها وتتمسحهم بشال لي فوق راصها... وقفات على طولتها وجرات يديها من بين يدين بنتها:هادي هيا تربيتي ياك أ إسلام ...هاذ شي باش كتجازيني.. (غوتات في وجه بنتها)عمرني خليتك محتاجة لشي حاجة دوي هضري ..
إسلام قفزات في بلاصتها ما فاهمة والوا: لا أماما الله يجازيك بالخير...
رحمة جلسات فوق سداري تتشير لنفسها وكتضرب في فخضها:ربيتكم بالحلال و عمر درهم ديال لحرام ما دخلتها لداري...
إسلام تتدور وجها لختها وتعود تضوروا عند مها عاقدا حجبانها و تالفا بينهم...
رحمة:باك فاش مات الله يرحموا خلا ليا خوك عمر لحيمة حمرة في القماط... ونتي بقا صغيرة ما عندكش حتي عامين سهرت عليك ليالي فاش كنتي كتمرضي ..ضحيت بشحال من حاجة على وديتكم... (سكتات تترجع نفس)
با الله يرحموا بغا يزوجني وأنا قلت ليه لا ما بغيتش راجل غريب يربي بناتي ويدخل وسط منكم.. وهوا أول واحد غيطمع فيكم...ضحيت بشبابي على قبلكم وهاذ شي هوا باش كتكافئيني أ إسلام ياك...هادي هيا تيقتي فيك...
(تتشير بيديها لخصر إسلام )جيبا ليا كرش ديال لحرام وسط داري...
إسلام عقلها حبس عند "جيبا ليا كرش ديال لحرام"
توبة جلسات حدا مها (موجها كلامها لختها)
تيعجبك تشوفي ماما في هاذ الحالة ياك على الأقل قبل لا ديري هاذ شي فكري في خوك لي يالله قال بسم الله واش بغيتيه ينتاحر فاش يولي يدوز في درب وينعت فيه لي يسوا ولي ميسواش وفكري في مك لي مريضة بسكار ولا نتي كيهمك غير راصك....
على إثر غواتهم دخل لدار شاف في إسلام لقاها كتبكي بصمت...بقا واقف قدام الباب تيسمع باغي يفهم علاش تيتناقشوا
رحمة (مسحات دموعها )سمعة لي بنيت طول هاذ السينين جيتي نتي هدمتيها في دقيقة... ما هامكتش أش غيقولوا ناس علينا
خسارا خسارة تربيتي فيك طلعت فالصواا...
طاحت في الأرض حدا رجلين رحمة ممسدقاش داك شي لي تتسمعواا...
حركات راصها ودموعها نازلين وتنخسيسة كتحبس ليها لهضرة...
_شكي في أي حاجة أماما حتى لتربيتك ليا ما نسمحش ليك تشكي فيها... ولا توجهي ليها اصابع الإتهام...أنا بنتك شوفي فيا واش تتسحابيني رخيسة لهاذ الدراجة باش نفرط في شرفي ..ونتي لي علمتيني شنوا معنيت شرف للبنت... وكيفاش خاصها دير المستحيل باش تحافض عليه...ما عمر شي واحد ما حط عليا يدوا ولا قلصني وحتى سفيان هوا لخر كان ديما محتارمني..
وقفات على طولها تتغوت..
.
اه بغيت سفيان ما غنكدبش ومزال تنبغيه و نقدر محالش واش ننساه ....
فاش بغيتو أماما اول مرة جيت لعندك نتي اول وحدة وقلتها ليك أنا ما كنخبي عليك لا صغير ة ولا كبيرة نتي وياها(شارات لختها) عرفيني ما تنخبي ولوا عليك ولي درتها تنقولها...
(موجها كلامها لختها)كون غير شفتي ليوم شحال كين في شهر قبل لا تحكمي عليا هاكا حرام عليك أختي...
توبة حطات يديها على فمها بصدمة ملي عرفات شحال كين في شهر ورحمة حطات يديها بجوج على راصها عرفات راصها ضلمات بنتها ...هيا اول وحدة عرفها ملي تتقرب تجيها العادة الشهرية تتولي تشهى اما ملي تتجيها تتدوز عليها سيمانة كحلة بالألام حتى تتصوب ليها لعشوب تشربوا ولا تتدق جوج بروات عاد تتولي مزيان...
مسحات دموعها بزربة وهزات فيهم عينيها لي ولا حمرين...
_أي حاجة كنت كنتوقعها من دنيا حتى لعائلتي تشك فيا ... ما خليتوا لبراني ما يقول...
خرجات ردخات الباب مورها تلقا ليها عمر عند الباب بغا يشدها وهيا تنتر يديها منوا معصبة طلعات كتجري لبيتها..ودموعها شلال بقا فيها الحال بزاف....
خبط يديوا بالعصاب مع الباب حتى تجرح
وغوت فيه وجهم صاعر...
عمر:أش هاد تخربيق الوليدة مضنيتهاش فيك هاديك بنتك زعما..ونتي ما حشمتيش تبغي لي يدير فيك هاذ شي لي درتي لختك.. الى كنتوا نتوما ما كتيقوش فيها ( هضر من تحت سنانو)ا انا كنتيق فيها وتيقة عميا..
..
ردخ عليهم الباب حتى قفزوا بجوج...( قال وهوا كارز على سنانوا) االحاصول ما درتوا فيها ما يصلاح ...
دقات في الباب فرحانة وتتضحك هيا وأمير
فتح عليها عمر الباب مخنزر ويدوا مجروحة
شافت فيه بان ليها ماشي على برجوا
شهقات على جهد ملي شافت يدوا مجروحة
أمينة بخوف:أش واقع أ عمار واش ضاربتي...
ديك ساع مشا بالها مع خطيبة سفيان ضنات أنها تكون صيفطات شي حد من مورها...
عمر متسوقش ليها خلاها تسول وخرج ساخط للزنقة...
دخلات تتجري لدار شافت توبة ورحمة عاطينها لبكاء صيفطات أمير لسطح يلعب وحطات تقضية لي وصاتها عليها توبة فوق طابلة و السرف جنبها...
ودخلات لعندهم لصالون وقلبها تيضرب خيفا لا تكون واقعا شي حاجة لصحبتها...
أمينة بتوتر:مي رحمة شنوا واقع...
رحمة هزات فيها راصها ودموعها شلال:سيري أبنيتي شوفي صحبتك غلطت في حقها بزاف طلبي منها تسمح ليا على هاذ شي لي درت غتكون محتاجة ليك...
طلعات أمينة تتجري عند إسلام لبيت وهيا ما فاهما والوا بينما رحمة بقات تتبكي...
توبة قربات من مها ودموعها داروا خط على وجنتيها:سمحي ليا أماما والله ما كنت عارفا مشا من بالي...
رحمة شافت فيها مخنزرا:بقيتي تتعمري ليا راصي على لبنت حتى دخلتي ليا الشك بحال السوسة لعقلي..(غوتات في وجه توبة)واش عرفتي راصك أش درتي خليتيني شكيت في كبدتي وضلمتها..ونسيت تربيتي ليها.... الله عمروا ما غيسمح ليا (ضربات فخاضها دربات متتالية) الله ما غيسمحش ليا عطاني بنت كيف الوردة وأديتها بهضرتي وهيا لي فيها كافيها ...
توبة تتبكي وتتشد يدين مها مانعها من ضرب نفسها:لا أمي لا مديريش هاكا أنا لي محال واش الله غيسمح ليا...شكيت في شرف ختي وضلمتها بزااف..ونسيت أنها ختي صغيرة لي فاش تتضرها أي حاجة تتجي تحط عليا راص وتعود ليا أنا لولة...
رحمة وقفات مسحات دموعها بغصة خانقها قالت:سيري طلبيها شوفيها على الله تسمح ليك وتسمح ليا أما أنا ما بقيتش قادرة نحط عيني في عينيها من مورا ذاك لكلام لي قلت ليها... نفس تقليقة ديال باها الله يرحموا فاش تتعصب تتردخ أي حاجة جات قدامها..
طلعات أمينة برجلين تيرجفوا في دروج لبيت إسلام وكلام رحمة وإيد عمر ما مشاوش من بالها خيفا لا تلقا صحبتها حتى هيا واقعا ليا شي حاجة...
دخلات لعندها لقاتها مبدلا حويجها وتتجمع لحوج من الماريوا تتدرهم في الباليزة...
أمينة بتسائل:إسلام علاش تتجمعي في حويجك
إسلام بتسمات فوق حزنها:ياك تافقنا باش نمشيوا لفيرمة عند خالي لمختار عرفتي شنوا هوا الوحيد لي تيفهمني وديرني بحال بنتوا وأعز.... عمروا شك فيا ولا في أخلاقي... (بتسمات بألم ) بختصار تترد بالك من لغريب والدقة تتجيكمن لقريب....
أمينة دورات إسلام لعندها وحيدات ليها تريكوا من بين يديها:شنوا واقع شرحي ليا أختي
إسلام شافت في أمينة:تتعرفي المعنى دايال الأخت ولا غير سيرا تتقولي فيه
أمينة شدات إسلام من كتافها تتحرك فيها: عافاك راه صدمتيني فهميني الله يرحم ليك باك لي عزيز عليك....
إسلام على إثر كلمة"أب" جلسات فوق ناموسية تتبكي:كون كان بابا عيش واش حتى هوا غيشك فيا بحالهم..ولا غيقول بنتي مديرهاش ويتيق في تربية يديه...
أمينة جلسات حداها:أشنوا واقع أ إسلام ماماك حتى هيا تتبكي وتوبة كذالك وخوك مجروح في يدوا..ونتي بهاذ الحالة أش كين فهميني...
إسلام عنقاتها بجهد ودموع داروا خط تتبكي وتنخصيصة تتحبس ليها لهضرة:شكوا فيا أختي قالوا عليا حاملة واش أنا نقدر ندير شي حاجة بحال هاكا..حرام عليهم ما خلاوا لبراني ما يقول عليا
أمينة مبدلها العناق وتتبكي معاها:سمعي ليهم يمكن يكون واقع شي سوء تفاهم..مديريش في بالك ا صحبتي...الغلط تيوقع
دخلات عليهم توبة جلسات في الأرض عند رجلين إسلام وحطات راصها على ركابي اسلام تترعدو تتبكي بحرقة:سمحي ليا أختي سمحي ليا حنت شكيت فيك ونتي راك بنتي قبل ما تكوني ختي... يمكن خوفي عليك هوا لي عما لي العينين حتى ما بقيتش تنشوف الحقيقة
إسلام دفعها وقفات جرات بليزتها خلات توبة مصدومة ...
مسحات دموعها وخاطبت أمينة: غتبقاي هنا هزي حويجك وتبعيني...
أمينة تتجر فيها:لا إسلام عافاك سمعي لختك غير مرة وحدة الغلط يتوقع ما ضلميهاش كيف ما هيا ضلماتك...عافاك غير على قبلي...
طلقات من لباليزة وربعات يديها عندها:اشنوا عندها ما تقول أنا كنسمع...
توبة وقفات من الأرض وقلبها تيخبط داخلها:
عافاك أختي سمحي ليا غير على قبل أمير ياك هوا عزيز عليك دوزيها ليا غير على وديتوا هوا...بقاي حتى لغدا وسيري عند خالي.. متنسيش ماما على قبلك حنت عرفاتك غاديا رها تتصيب في الحلوة باش تاخديها ليه معاك....مسكينة بقا فيها لحال بزاف لدرجة ما قدراتش تطلع عندك ...هبطي لعندها راها مريضة...
إسلام عاقدا حجبانها:ونتي قبل ما ديري هاذ شي ما فكرتيش في مك مريضة...
توبة نزلات راصها الأرض بخجل :غير سمحي ليا ديريني قليلة عقل ونتي مولات لعقل لكبير ...كون ما نتي في حياتي لي وقفتي في وجه داك شماتة وعونتيني حتى قويت راصي وطلقت كون أنا دابا مزال عايشا في جحيم وتناكل لعصا صباح وعشية ليومنا هاذا لحمي مزال مزوق بضرب...
إسلام قلبها بيض ما تيحقدش ودغيا تتسامح..في ساع رجعات حطات لبيزا لبلاصتها
توبة مسحات دموعها ببتسامة:صافي مغتمشيش ليوم ياك
إسلام هزات كتافها:بعدي مني متهضريش معايا
توبة قربات منها :وينوا زين مقلق مني و
باستها وعنقاتها بجهد
أمينة مسحات دموعها وقالت بفرحة :الحمد لله .....
جالسين وسط لمراح....تياكلوا في الزريعة...
وصوت ضحكاتهم مسموعين..لي شافهم ما يقولش هما لي كانوا تيبكيوا قبيلا...
توبة تتنقي في زريعة وديرا تتحت يديها جوج مخدات:إسلام تعطلات في دوش..
أمينة مربعة رجليها:تلقيها عجبها الماء وترخات نعسات واقيلا غتبات تم خليها حتى يسرفقها شي جن ويرجعها لعقلاها هههههه قبل ما تكمل هضرتها ما حسات غير بخبطة جاتها خربقات ليها كلامها....
رحمة مخرجا فيها عينيها:محشمتيش ما صبتي باش تفايلي على بنتي..
امينة تتضحك:وغير تتضحك أمي رحمة ناري زويتيني ضربتك شحا قاصحة...
توبة حطات سبعها على ضقنها وساطت بجهد:غدا عرسوا علم الله باش كتحس مسكينة..وحتى حنا زدنا عليها بديك الهضرة قبايلا...
أمينة من تحت سنانها معصبا:كون كانت غير تحمر لوجه ديك هناء تفوا ديرا كيف شي كراطة ما تصلح لا لزواج ولا تكراط.. بقا فيا غير سفيان مسكين ...
رجال داو لعيالات وهوا دا خطية لا زين لا فورة لا مجي بكري..الحاصول الفول تيتعطا غير لي ما عندوا دراس...
رحمة بقات مربعة يديها لسدرها وتتسمع لكلامهم ...تتحسر على بنتها من لداخل وشكون يفهم البنت من غير مها...
حتى دخلات عليهم بشعرها سارد مخلياه مطلوق على راحتوا وطاح عليها سر مع الماء سخون ولات مزينكة تقول هيا لعروسة لي تتسنا في عريسها يجي يديها...
غير شافوها ضربوا طم وسدوا على موضوع سفيان...
إسلام ببتسامة مزينة ملامحها:اش تم شفتكم شفتوني ونتوما تسقلوا...
أمينة:والوا أساطة بصحة بانت عليك تحمحيما...
إسلام جلسات بينهم:الله يعطيك الصحة...
رحمة تتشوف في بنتها:شعرك سارد غتمرضي سيري نشفيه بسيشوار...
إسلام بنفي:نوو تيعجبني هاكا سيشوار غير تينشف ليا شعري تنفضل نخليه هاكدا طبيعي
رحمة مخاطبا توبة:أري ليا ديك لفوطة نشف ليها شعرها إلى بقات هاكذا غتمرض....
إسلام عجبها لحال مامها تنشف ليها شعرهاا وهيا فرحانة تتحس براصها مزال صغيرة تيعجبها لي يهتم بيها ويدير ليها خاطرها.....
جرات الزريعة من جيهت أمينة:أري لهنا شفتك كملتيها...
أمينة قلبات عينيها: إيوا إلى كلتها حلال عليا..راه ضربت عليها طريق أحبيبتي..
إسلام تتضحك عليها:بصحتك ألالة غير بقاي على خاطرك
أمينة سيفطات ليها بوسات في الهوء:تشا بربي حتى ما كينش فحالك في الكون ...
رحمة موجها كلامها ل أمينة :ناري على هضور عندك أبنتي هاكدا غتهربي راجل
أمينة تتضحك:متخافيش عليا أمي رحمة ديراه تحت جناحي...وقابل على هبالي...
توبة تتضحك:والله يا أمينة شحال تتفوجي عليا بقاي تجي عندنا ديما ..كون ما نتي.. لي طلبتي إسلام تسمح ليا كون صحيبتك مزال مخاسما معايا..
أمينة تتضحك من قلبها:متقوليش هكاك نتوما خوتاتي ومي رحمة تنعتبرها في مقام مي سعاد..ما بينتناش ..
رحمة عنقات أمينة:عندها صح نتي راك وحدة من بناتي .. وأنا أول وحدة هزاتك ملي تزاديتي أبنتي..
توبة طلعات طلات على ولدها في بيتوا ناعس أو رجعات لعندهم هازا كتاب بين يديها.....
أمينة فاش شافت لكتاب بين يدين توبة "غمزتها"أش تم؟
توبة ساطت بجهد:هادوا أحلام صحبتك لي ما بغياش تنازل وتخدم عليهم في أرض الواقع
أمينة عقدات حجبانها مخنزرافي إسلام وخطبات بكلامها توبة:مكلخة هاذ ختك..والله العضيم
إسلام بتسمات بعينين تيبريوا وجرات لكتاب فتحاتوا
تنهدات بجهد:أيييه فاش فكرتيني...
فلاش_باك
جاسا في وسط السطح مسرحا رجليها وديرا قرينات في شعرها ولبسا ميني جيب والفوق لابسا تيشرت معري من جيهة لكتاف وبين يديها مقص ومجلات تتقطع منهم صور بعض الأعراس لي تاروا إهتمامها هيا...وتتلصق في كتابها
حتي بانت ليها ختها جايا وبين يديها ولدها صغير وسط القماط ناعس جلسات حدا ختها وبتسائل
قالت :إسلام أش تتديري هاكدا غتعمري كلشي بالوراق...
إسلام هزات عينيها صغار لي كلهم أمل وتفائل
وتيبريوا بالفرح:هادوا أحلامي ملي غنشد الباك غندير مشروع راصي ونخدم على شريكتي شركة تنضيم الأعراس لي سميتها زواج مبارك (تتكلم وعينيها فيهم بريق ديال الأمل والفرح) هادوا لي هنا خديت منهم أفكار غنضم أعراس بطريقة تخلي أي واحد مبهور بخدمتي...وحتى الممثلين لكبار وشخصيات المهمة غيجيوا لشركة زواج مبارك باش تنضم ليهم أعراسهم أنا يعطيوني غير لفلوس أو نتكلف بي كلشي...
توبة ضحكات عليها:فيقي أبنتي قالك شركة زواج مبارك لتنضيم الأعراس..من نيتك هههه
داك شي راه تيبغي لفلوس وشحال من حاجة ماشي غير جي وأسس شريكة تتضحكي على راصك...
إسلام ناضت وهزات كتابها:بعدي مني أنا كنتيق في راصي وفي أحلامي وغنحققهم كتسمعي ... وهانتي غتشوفي...
"نهاية لفلاش باك"
مسحات دمعة من عينيها وبتسمات بزز منها:كان عندك الحق أتوبة هاذ شي غيبقا مجرد حلم بنت مراهقة كانت عندها 16 عام..
أمينة بإصرار:لا الساطة متقوليش هكا..مزال عندك لوقت لي تحقي فيه هاذ الشي ما تستسلميش..
إسلام:لا رد
توبة زادت عقدات حجبانها:عتبريني وحدة حمقة لي هضرات معاك ونوضي على رجليك هانتي تبارك الله عندك الباك بداي بشوية بشوية حتى توصلي لذاك شي و زواج مبارك تولي في الواقع....
إسلام بقلة حيلة :غير نساو داك شي ما منوا والوا
أمينة بعصبية:أيوا اشنوا بغيتي ديري من هنا لقدام ولات في عمرك 22 عام بقاي جالسا حتى تشرفي بلا هداف بلا قرية...
إسلام قدات جلستها و بجدية قالت...
شتي أنا فاش تنجلس باش نخطط لمستقبلي ...تنحس بزهري وحضي جالسين مورايا تياكلوا في زريعة ويرميوا عليا قشورها وتيضحكوا ويقولوا (حركات يديها) غير كملي كملي عتابرينا ما كينينش....
توبة وأمينة بداوا تيضحكوا وقالوا دقة وحدة:يا ختي منين تا تجيبي هاد لكلام...
رحمة وقفات من بلاصتها مقطعاهم:من هاذ شي كامل نوضوا تنعسوا غدا خاصكم تخرجوا من دار بكري...
في مكان أخر وبضبط في مدينة الجديدة على إثر أذان صلاة الفجر...
واقفين ربعة رجال دخل رياض كبير وفخم باين من شكل الرياض أنهم عائلة غنية..... وسط بيت كبير ريحتوا معطرة بالمسك والعود .....
وفراشوا ما بين البلدي والعصري أنيق....
واقفين تيأديوا صلاة الفجر بكل تخشع....
تيصلي بيهم راجل كبير لحيتوا بيضاء باين عليه الوقار وتبات...عزيز عليه الإنضباط والوقت هوا الوقت...
أو من موراه واقف ولدوا أو حفيدوا بجوج...
تيصليوا بكل تخشع وإنضباط.....
ولدوا عدنان حتى هوا شعروا شيب بحال باه لكن هوا مزال شاد في راصوا وحج جوج مرات مع ولادوا بزوج وزوجتوا أو بنتوا .... حتى هوا ورث نفس الصيفات من باه..وعلمها لولادوا...
ولدوا لكبير يوسف راضي ..عمروا 36 سنة..تيبغي خدمتوا أو هوا لي واخد مجلس الإدارة في مجموعة شركات راضي لي عندها فروع في المغرب كامل..ولي تتصدر جميع أنواع السمك الطري....
من المرصا نيشان...لباقي مدن المغرب وخارج بقاع المملكة...
أو ولدوا صغير أركان عندوا30 سنة ما تايشبهش لخوه في حتى حاجة خدام تيبني في شريكتوا بوحدوا بجهدوا وعملوا بلا ما يعتامد على فلوس باه....خدام تيأسس في شركتوا لتصميم أحذث أنواع السيارات...
أركان شخص صارم وعندوا كلشي في حياتوا ديار ليه قواعد ماشي عليها....
نيتوا صافية وتيعطي بدون مقابل كبر وتربى وسط عائلة محافضة لي تتحتارم المرأة وديرها في مكانة عاليا....وعلاقتوا بي نساء محدودة فقط في إطار العمل أومع عائلتوا...
رجل شهم ومهتم غير بخدمتوا....
كتعجز الكلمات باش توصفوا....
أركان هوا ذاك الرجل الحنون الشجاع والمتواضع ما كتلهيهش مشاغل الدنيا عن تقديم الخير للقريب والغريب عزيز عليه الأ خلاص والتفاني في خدمتوا هوا نعم الإبن والصديق إمتزجت جميع هاذ الصفات في شخصيتوا وتيعلوها الطابع الديني...لي زاد من وسامتوا وأخلاقوا... بختصار هوا رجل كتحلم بيه جميع النساء....
بعدما سلاوا صلاتهم سلموا..أو وقفوا...كل واحد ناض غادي لخدمتوا..لكن قبل لا يخرجوا قبلوا إيد جدهم باش يرضا عليهم ويتوفقوا في حياتهم.....
يوسف أو عدنان رجعوا يكملوا نعاسهم أما جدهم جلس يقرا ما تيسر من القرأن الكريم..
وأركان خرج باش يشد طريق لكازا يشوف أمور شركة ديالوا فين وصلات....
تما غادي خارج بكل تواضع وإحترام حتى سمع الإسم ديالوا موراه أو وقف...
أركان دار عند جدوا أو حرك ليه راصوا بمعنى نعم؟
الجد نطق بصوت تقيل غالب عليه لعيا :ولدي يمكن ليك فاش تكون جاي في لعشية دوز تاخدني من عند سي المختار...
أركان معروف ما كيتكلمش بزاف كتفى أنه يحرك راصوا بإجاب وخرج من لباب عاطيه بضهروا لعريض...
حاطا راصها على زاج طاكسي بيض كبير... تتسقي عوينتها في الخضورة لي جنب طريق
وعقلها غايب...تيفكر فيه غير هوا .... نفضات الأفكار لي هجموا على عقلها...
تنهضدات بجهد وجبدات تيليفونها من وسط ساكها الصغير...
دخلات لوتساب تتسجل أوديوا...
إسلام:خويا لحبيب ما كتابش ليا لبارح نشوفك حنت نعست بكري...وحتى ليوم ما قدرتش نفيقك بغيتك تبقى مرتاح.. ما كانش خاصك ترفع صوتك على ماما.... صح هيا وتوبة أداوني بكلامهم..مي الإنسان تيغلط وخير الخطائين التوابين...سير طلب سماحة من ماما وبغيتها تكون أخرمرة ترفع عليها صوتك.....
أنا عرفتك أنك جيتي من جيهتي.. وهاذ شي فرحني حنت عرفت أنه كين شي واحد في هاذ الدنيا القاسية لي مهتم بيا..ولي هوا خويا صغير..كون كان شي ولد أخرمكانك كون راه دبحني ديك ساع فور ما سمع ذاك لكلام ...
ولكن نتا لا.... نتا تتيق في ختك وراجل ونعم الرجال ..والبنت لي غتزوجك غتكون محضوضة في هاذ الدنيا..بغيت ربي يسهل عليك ما صعاب ويحقق ليك جميع أمنياتك تنبغيك بزااف...
هزات راصها من على تيليفون شافت شيفور تيشوف فيها من زاج مبتاسم ونطق:الله يخليكم ديما فرحانين أبنتي ونهار الخيب عمركم تشوفوه..
قليل فاش تتلقا خوت متفاهمين الله يكملكم بعقلكم..
إسلام هزات راصها فيه بعيين تيبريوا :شكرا أعمي على هاذ الدعاء زوين على صباح الله يجازيك بالخير...
الشيفور:أمين أبنتي هاذ واجب..فيقي ختك راه وصلنا..
إسلام بدات تتململ في أمينة لي في عالم الأحلام ما هياش هنا..ولي شافهم ما يقولش صحابات يقول خوتات...
إسلام تتحرك امينة من على كتفها بغفوت قالت:أمينة فيقي راه وصلنا..
أمينة ناضت تالفا قفزات ... تتضور في راصها وعينيها عامرين عمش:اه جابوا النقشة ولا مزال؟...
إسلام تتضحك عليها:بسم الله عليك... (بخفوت)نوضي كلشي تيضحك عليك واش حنا في عرس...
حكات عينيها وخرجات من طاكسي...جروا لبنات بليزاتهم...ونمشاو وسط لخضورة....
يتبع...
اخيرا جديد هاكا كيعجبني
واخيراً قصص جداد حطو لينا قصة نسل قباءل
حبييت
حطو لينا قصة نسل القباءل
باقي مكملاش و الكاتبة حابساها حاليا
شكرا
حطو لينا قصص جداد بحال هاد قصة وشكرا
اه حطو لينا قصة شوك الورد
قصة قيد العراقي بليييز