زواج مبارك الجزء التاسع

جالسا فوق لفوتاي لابسا بيجامة قصيرة في الأخضر ، مقابلا مع تلفازا مفقوصة وقدامها حطا عرام ديال لبكيات ديال لمسكة كتمضغ فيهم وطرطقهم بجهد ،هيا مجهدة لوحم زاد على ما بيها جاها واعر

تمشا ناحيتها لابس شورط أسود وتيشرت بيض ،جلس جنبها بهدوئ وكاس ديال لقهوة بين يديه شاف فيها وبقا ساكت نهار كلوا وهوما منوضينها مني جات وهيا تغوت عليه وتقول ليه زربتي عليا أكريم زربتي عليها بهاد لحبلى ما سكتاتش طول ليوم....

أمينة درات عندوا مخنزرا وبتسأل نطقات: لحمام يكون مزال محلول

كريم دار عندها مصدوم هز حاجبوا ومن تحت سنانوا نطق :يالله دوشتي أش غتمشي ديري في لحمام وزيدن راه 12 ديال ليل هادي

أمينة غوتات بجهد:ملي نكون نهضر معاك جوبني بلا كثرة الأسئلة ولفهامات لخاوية أنا بغا نمشي لحمام باش نضارب مشهية نتف شي وحدة حتى شعرها يبقا بين يدي ولا نخشي ليها راصها فشي سطل نْخُرْكُوا عليها عاد غنرتاح ونبرد

كريم دار عندها مصدوم زفر بجهد وقال بهدوئ: تسطيتي لا سيري تنعسي ليل هادا

أمينة مدات إيديها تيرجفوا قالت:كلي كنترعد أكريم إلى ما داربتش ليوم غنحماق دير ليا شي حل"دارت عندوا بوجه حمر بالعصاب" جهك ولا يبان ليا كي موكة "غوتات بحر جهدها"دور جهك لهيه ما بقيتش حاملة نشوف فيك

كريم جمع لوقفة وبتنهيدة طويلة قال:ها موكة غيمشي ينعس ويخليك أبنادمة

خلاها كتغلي بالعصاب ودخل لبيت نعاس لي مفرش بالأبيض وديكوراتوا بالحمر تخشا في بلاصتوا وهوا كيلعن حضوا معصب بقا هكاك حتى غفا من كترة تعب ديال لخدمة و داتوا عينيوا نعس بعض نصف ساعة ما حس غير بجوج يدين كيتحسسوا سدروا بحنية عض فموا من لداخل وما تسوقش ليها

أمينة دلات شفتها لتحتانية وقالت بصوت رقيق:حبيبي كريم سمح ليا عفاك"بداوو دموتها تيتزلوا شلال وتنخصيصة كتحبس ليها لهضرة"ما عرفتش أشنوا تيوقع ليا وكنتعامل معاك خيب الله يحفضك ما سمح ليا لزيزيلة ولميمة والله ما بقيت نعاود

كريم مالفا دائما يشوفها كضحك مني سمعها كتبكي بقا فيه لحال جمع نوضة وجلس مقابل معاها مطلع حاجبوا شافتوا مخنزر قربات منوا وجلسات فوق رجليه هزات إيدوا حطاتها فوق فخاضها لعريانين ودورات إيديها على عنقوا شعلاتوا وقالت بصوت أنثوي رقيق وهيا كتقرب منوا:

_ما بقيتيتش كتبغيني أكريم عليها ما بغيتيش تسمح ليا

كريم حاول يدور وجهوا لجهة الأخرى بعيد منها و قدرش زاد قرب منها حتى ما بقا كيفصلهم والوا ويديه بداو تيطلعوا ليها لبيجامة نطق بصوت مبحوح :

_المسامح كريم مزال كنبغيك غير ديري عقلك

أمينة خلاتوا حتى غمض عينيه غيبوسها وهيا تحط إيديها على فموا وعينيها على شعروا قالت وريوكها سيلين:

_عمري ماشي دابا "بترجي قالت"بليز عفاك خليني نتفك

كريم فتح عينيه بصدمة وبعد إيدها ونطق:

أش كتخربقي أمينة بنت ليك فروج باغا تريشيني

عوجات فمها وقالت بغضب:ما تبقاش تشوف فيا راه كتبان ليا غير موكة قدامي واااعععع وليتي خيب

و حطات إيديها على شعروا جراتوا منوا بجهد فرحانة خلاتوا يغلي بالعصاب

كريم حيد ليها إيديها و من تحت سنانوا نطق مكمش حجبانوا:الله ينعل نهار لي حملتك فيه أنا ماشي موكة أنا حمار اش داني نقول ليك قطعي شي كينة أش داني "ضرب راصوا بيديه وخرج عينيه ،بقا تيردد"أنا مسخوط" أنا مسخوط

حيدها من فوق رجليه ناض وساخط هاز صبعوا في وجها و بتحيدر نطق:

_غنمشي نسد عليا في لبيت لاخر نعس بربي وتبعيني حتى نخوي ليك داك لفردي في راصك أمينة

متشا وخلا أمينة مخسرا سيفتها ومن موراه بقات كتغوت:يهديك الله أكريم اجي غير نتفك وسير..

في هدوء الليل وسكناته كان غير صوت الرياح وضوء خفيف للقمر منبعث من شرفة الجناح،حالا عينيها لبنيتين لي كيبريوا بالدموع مكمشا حجبانها وكتشوف في سقف قابطا لحاف ديال سرير لي ناعسا فيه وكتنين بألم عضات شفتها لتحتانية بحر الألم ومصبرا راصها بزز

من شهقاتها المثثالية لي كتماهم فيقوه دور راصوا ناحيتها والخوف متملكوا نطق سميتها ووقف على سريع شعل ضوء

أركان بخوف قرب منها حط إيدوا مورا ودنها ودوز بإبهاموا مسح ليها دموعها وعلامات الإستفهام واضحة من تعابيروا

نطق بصوت مبحوح بنعاس:نديك عند طبيب شنوا دارك أحبيبة اش وقع ليك

بقا تيشوف فيها مصدوم كيتنفس بصعوبة و إسلام قدامو بديك الحالة ما عرف مايدير

حط جبهتوا على جبهتها و هوا كيتسنى منها رد حولات تبتاسم بزز منها قالت:

_أنا بيخير ما تخافش ديما تيوقع ليا هاد شي

أركان حرك راصوا بصدمة قال:كيفاش ديما تيوقع ليك هاد شي شنوا دارك بضبط واش فيك شي مرض هضري

إسلام الخجل كسا ملامحها أو وجها ولا حمر بلا قياس حشمات ومقدرات تقول ليه بلي وجع ليغيكل هوا لي دار ليها هاد لحالة،

حركات راصها وقالت بشفايف كيترعدوا وكيبريوا بدموع :

_غير نعس أنا شويا ونولي لابس

أركان بعصبية وخوف نطق من تحت سنانوا :

_ما تجهليش دين مي في هاد ليل قولي أش كيضرك

إسلام كمشات حجبانها كتر و دموعها ولا تينزلوا شلال شارت ليه الأسفل بطنها بخجل

أركان حيد ليها لغطاء على جسمها بسرعة وطلع ليها لبيجامة وهيا غتموت بالحشمة حط يدوا أسفل بطنها وهيا تبورش من لمستوا هزا عينوا فيها وقال بتسأل:

_تيضرك هنا ؟!!

إسلام حركات راصها بإجاب ما بقات قادرا تخبي بدات تبكي بجهد وتنخصيصية كتحبس ليها لهضرة قالت:

_فيا لوجع بزااف تما

فور ما سمع كلامها فهم بسرعة هز تليفونوا دخل تيبحث فيه على شي مهدئات يكونوا متوفرين في دار ،خدا معلومات من تيلي و وفتح لبلاكار ديالها جبد منوا جوارب" تقاشر" سخان لبسهم ليها ولبس تيشرت ديالوا حنت كان لابس غير سروال توب رمادي...

نزل بسرعة لمطبخ شعل ضوء وخدا زيت حطوا على نار هادئة يدفى فتح تيليفونوا دخل للوصفة متبع معاها خدا لقرفا وملعقة عسل وكوب ماء ضاف جميع المكونات إلى بعضها وضعها على النار حتى غلات وصبها في كأس كبير وهز معاه زيت وطفا ضوء وطلع نيشان للجناح ديالوا

حط كلشي فوق طابلة وهز مشروب لقرفة تمشا ناحيتها قاعدها بشوي و شربها بزز منها بقا معاها حتى شربات لكاس كلوا،مسح ليها فمها وزفر براحة

تم خدا زيت الزيتون لي دفاه حطوا فوق لكوافوز حداها وتخشا حدها كشف على أسفل بطنها وبقا تيدير ليها مساج بزيت حتى ترخات وبقات تطلق تنهيدات براحة جابت ليه تمام تبسم جنب وبقا متبع ليها لعين

إسلام عضات شفتها لتحتانية وقالت :اححح الله الله تما تما الله على راحة

أركان حرك راصوا ونطق بصوت رجولي خشن:

_ دابا باش كتحسي مزال الألم نديك عند طبيب

إسلام غمضات عينيها وبتنهيدة طويلة قالت:

_زوين بزاف بقا هكاك عفاك

بقا تيدير ليها لمساج وهيا كطلق تنهيدات براحة حتى ختفى صوتها ونعسات بين يديه ،طبع قبلة على جبينها وبقا تيدوز بإيدوا على بطنها خيف عليها حتى غفا....

بسبب أشعة شمس لي تسلات للجناح فتحات عينيها لي صبحوا منفوخين بالبكاء لقات راصها مخشية في سدروا لعريض وإيدوا محطوطة على بطنها تبسمات بدون شعور علات راصها وقربات منوا بقات كتأمل في ملامحوا الرجولية حطات إيديها بقات كتحسس في لحيتوا لمطراسية وكتلعب بشعروا بلا ما تحس حطات شفايفها على خدوا قبلاتوا بحب صدمها مني بقا ساد عينيه وهضر بصوت مبحوح و تتنفسوا حاد:

_كتقلبي عليها على صباح "عض شفايفوا من لداخل كاره "وديك مفرقة لحباب بيناتنا ما عندي كيف ندير

إسلام حركات راصها وقالت بصوت هادئ:

_واش كتحلم

فتح عينيه بسرعة وجا فوق منها بقا كيتأمل عينيها البنيتين وهوا هايم في حبها عض فموا من لداخل وقال:

_كنحلم بيك في صباح وليل شي نهار ناكلك

إسلام توردوا خدودها بقات كترمش بعويناتها بصوت رقيق نطقات:

_صباح الخير شكرا"صغرات عينيها"على لبارح

أركان بجدية قال:بغيتي تشكريني "غمزها" كينا طريقة أخرى

إسلام ببرائة جوبات :شنوا هيا واش بغيتي كادوا

أركان بدون سابق إندار طاح على شفايفها المثيرين كيلتاهم فيهم بحب وهيا مصدومة وقف على طولتوا دخل لدوش غادي وكيبتاسم خلاها غير كترمش حشمانة....

نزلوا لطبلة لفطور يفطروا حتى تفاجئوا بمروى لي لابسا قميجة بيضاء خرجات كتمايل من لمطبخ وزينها باهي عاطي لعين هازا بين يديها طباسل كتنزل فيهم فوق طبلة تبسمات ليهم وقالت:

_اليوم غتفطروا بفطور فرنسي من إعداد شيف ميروا كنتمنى يعجبكم

إسلام شافت في أركان وحشمات في بلاصتها عضات فمها من لداخل او ولات خيفة على راجلها لا يطير ليها من بين يدها بينما أركان ما دهاش في مروى بقا مركز مع تيليفونوا تيقرا لمساجات لي جاوه و مشابك إيدوا مع إيد حبيبتوا

نزلوا باقي العائلة داروا بطبلة لفطور تيفطروا بصمت هادي هيا عادتهم الى الحاجة خديحة لي جرات نجلاء من دراعها دخلتها لكوزينة معصبة ما عاجبها حال..

نجلاء بتسأل نطقات:اي قصحتيني حشومة عليك ،اش بغيتيتي

الحاجة خديجة زفرات بجهد ومن تحت سنانها نطقات:ما عرفانيش على جبتك لهنا

نجلاء بتأكيد جوبات:وباش غنعرف أنا

_الحاجة خديجة بتحدير نطقات:قولي لختك تمشي تبدل حويجها دار راها عامرة رجال مزوجين عيب تبقا دور بينهم بهاد لباس ولا غنجري عليها وراك عرفاني

نجلاء سرطات رقيها حولات تلطف الجوا:

_الحاجة أنا غنقول ليها تلبس حويجها مي هيا ضروري خاصها تبقا معايا بغيتها تقابلني حتى نولد

الحاجة خديحة طلقات منها و بعصبية نطقات: اش غتبقا دير هنا وزيدن الى بغيتي من يقابلك مجيب ليك فرملية تبقا معاك حتى تولدي

نجلاء صغرات عينيها وبتأكيد قالت :لا أنا بغيت ختي هيا لي كتفهمني ،صافي الحاجة غير تهاني اخر مرة تلبس داك شي

الحاجة خديجة ساطت بجهد دربت في نجلاء خلاتها كتفور وخرجات كتستغفر في الله بعدما قالت:

_عيطي ليها دابا تمشي تبدل ديك لحالة هادي راها عائلة محترمة ماشي بحال عائلتكم باك من نهار تزوجتي ما جا زارك ما سول فيك وختك طالق ليها لعب مخليها ديرا مت بغات

مر أسبوع بالمح البصر ...

وسط كلينك راقي بمدينة الدار البيضاء وقف في قسم لي كيخص المرأة قدام غرفة الفحص الطبي كيمشي ويجي متوتر وعلامات الخوف ورهبة كاسيا ملامحوا الرجولية حوالي عشرة دقائق وهوا كيتسنى وخوفوا على حبيبتوا وولدوا خلاواه يحس براصوا عام وهوا كيتسنى خرجات فرملية كتجري بملامح ما كتبشرش بالخير حاول يوقفها باش يسولها ويديه فاشلين عليه

كريم بصوت مبحوح نطق:شنوا واقع لداخل كيف بقات مرتي هضري

الفرملية لاحت ليه لهضرة ومشات كتجري :تهدن اسيدي حنا كنحاولوا نوقفوا النزيف بي أي طريقة

حط راصوا على زاج وتنفسوا حاد طاحت دمعة حارة من عينوا ومشا بالوا مع ليلة أمس

"فلاش باك"

في لمساء أمينة مربعة رجيلاتها فوق سداري لابسا بيجامة بسروال في الأبيض كيتوسطها دب مبيناها صغيرة وشعرها مطلوق موراها شادا تيليفونها كتفرج في فيديوهات ديال المصارعة وهوا واقف مورا ضهرها تيمشط ليها في شعرها داير ليها لخاطر فوق لقياس ..

أمينة بفرحة غوتات:واوو على بونية عطاه تشهيتها غير في ماريا جارتنا نهار كلوا وهيا تعيوج بداك طالون مصدعانا بيه

كريم ساط بجهد وقال بصوت رجولي خشن: تفرجي فشي حاجة إيجابية أمينة واش باغا تولدي ليا بريسلي

أمينة بعدم رضا نطقات:لا أنا بغيت بنت تكون مجهدة بحالي دارب في لحمامات ومتسكتش على حقها

قاطعها كريم بقوله: باركا عليا غير أمينة وحدة الله يجعل البراكة غير نتي مشيباني أنا باغي شي ولد باش يدافع عليا منك أما أنا ما بقيت قادر عليك أبنت خالتي

أمينة عوجات فمها وقالت:عرفا راصي فيا عشرة اممم كريم باقي كتبغيني

كريم بتنهيدة طويلة نطق وهوا كيجمع ليها في شعرها:اش بان ليك نتي.

أمينة تهزات بضحك:كتبغيني كلاك والى حسيت بيك ما بقيتش باغيني غنضرب وتبغيني بزز منك "تنهدات براحة وقالت بهدوء"مزال عاقل فاش كنتي كتمشط ليا شعري ملي كنت صغيرة كان كيعجبني لحال

كريم حط لمشط ودور إيدوا على ضهرها خشاها في سدروا وقال:

_عاقل مزيان كنتي كتهربي لخالتي حنت كنتفك وتجي عندي تبكي تقولي ليا كريم عفاك مشط ليا ونيوفك دايزين

أمينة درباتوا بمرفقها ما عاجبها حال نطقات :ما عمر نيوفي ما دازوا نتا لي كنتي مخانن

كريم بعد منها كيضحك بعدما سمع تيليفونوا كيصوني جاوب وعرف بلي طالبينوا في لخدمة الأمر مستعجل ودع أمينة وخرج

بينما هوا مشغول في خدمتوا شاف تيليفونوا كيصوني طلع ليه إسم المتصل أمينة جوبها بالخف حط تيلي على ودنوا وهاز ميلف تيقرا كيتفحص فيه:

_وي أمينة

أمينة بصوت باكي قالت:كريم

كريم كمش حجبانوا وبخوف نطق:شنوا واقع أمينة جوبي

أمينة بتراجي نطقات:عفاك ملي تكون جاي شري ليا شي جنوبة جديدة تكون كتبري تشهيتها نحطها في لفيترينا

كريم ساط بجهد وقال:اش هاد لبلان لعوج لي طاح عليك في هاد ليل انا ما مساليش عندي لخدمة بزاف سيري تنعسي وسدي عليك لباب مزيان أنا ما غنجي حتى لصباح

قطع معاها الإتصال وعودات صونات عليه كيجوبها وكلى مرة تخرج ليه بي بلان جديد لوحم لي جاها جاها على لمقاتلى وكريم بقات كتصعوا حتى عصباتوا

قطع عليها وخلاها كتصوني عليه دار تيلفوتوا صامت وجلس قابل خدمتوا بقا هكاك حتى لسبعة ديال صباح وهوا راجع لداروا في سيارتوا بشويا عليه رجع لتيلفونوا صوت فإدا بيه كيصدم من كمية لمساجات لي راسلاهم أمينة دخل تيقرا فيهم قلبوا تهز زاد في سرعة وعينيه ما بقاو تيشوفوا حتى واحد غير وصل طلع يجري لدار فتح لباب بساروت ودخل تيقلب عليها لقاها طيحة في الأرض وحويجها عامرين بدم جاها نزيف نزل لمستاوها كيضرب في وجها بشوي وبزز باش كينطق سميتها:

_أمينة حبيبتي حلي عينيك

أمينة حلات عينيها بشوي وكمشات حجبانها بألم صاحت بصوت حزين:

_بنتي كريم عتق ليا بنتي عفاك

ترخات بين يديه وغابت عن الوعي كريم ما بقاش قادر يستحمل بسرعة هزها بين يديه داها لكلينيك

سامحني يا الله إذا بكيتُ على قضائك رغم إني مؤمن به

ســــــامحني يـــــــــا الله إذا انفلتَ صبري و ضاقت نفسي من شي خير لي

"الحاضر"

بدا تيخبط في راصوا مع زاج وهوا كيردد بحرقة:

_أنا سباب أنا سباب كون جوبتك ما غيوقعش ليك هاد شي كامل"خبط يديه على الحيط بجهد حتى صباعوا تهردوا ودازوا بدم"وسط حزنوا وأهاتوا ما حس غير بإيد تحطات على كتفوا هوا يلتافت بفضول، لقاها دكتورة بوجها لبشوش لابسا وزرة في الأبيض وحاطا ناضارات طبية على عينيها ومن ملامحها كتبان في السن الأربعين هيا المشرفة على حالة أمينة...

بعينين تيلمعوا بدموع قال:كيف بقاو

دكتورة بصوت حزين نطقات:قدرنا نوقفوا النزيف الحمد لله ولكن كين واحد لمشكل أجي معايا لمكتب نشرح ليك

داخل مكتب الدكتورة جلس فوق لكرسي ورجليه ماهدوش من الإهتزاز والتوتر وعامل الخوف لاعب بيه...

الدكتورة تبسمات جنب وقالت:سيدي واش لمدام كتجيك من العائلة؟

كريم علامات تعجب ضهروا على ملامحوا حرك راصوا بإجاب:اه بنت خالتي علاش؟!!

دكتورة زيرات على فكها وقالت بملامح ممحية :يمكن يكون هادا هوا سبب "سكتت لثواني سرطات ريقها ونطقات "غنجيك من لاخر أسيدي مراتك خاصنا نزالوا ليها لجنين حنت إلى خليناه يقدر يتزاد مشوه ولا غيكون عندوا مشكل في النطق و هاد لحمل كيشكل خطر على حياة المدام نسبتوا 50 في 100 ولكن قبل هاد شي نديروا ليك تحليل فصيلة دم

هز راصوا بصدمةو قلبوا خفق بشكل مرعب لدرجة حس بيه غيخرج من بلاصتوا بلع ريقوا بزز منوا حتى تفاحة أدم مشات وجات في حلقوا

دكتورة حلات ملف حطاتوا قداموا وبدات تشرح ليه السبب رئيسي بصوت رقيق قالت:

_كتقول بعض الدراسات أن زواج الأقارب كينتج عليه شي82 مرض وراثي في بعض الحالات ، مثل الإجهاض المتكرر وهاد شي نيت لي وقع لمدام بداها بنزيف أو يمكن ولدك يكون عندوا إعاقات لمتعددة، أومرض الحويصلات المتعددة بالكلية ، وعدة أمرض من بينها[مرض زيادة الحديد بالدم أو مرض ضمور عضلات الوجه والكتفين "حركات راصها كتشرح بينما كريم في كلمة كيسمعها عينيه كيزيدوا يوساعوا" أو وزن المولود في هاد لحالة يقدر يكون صغر من الأطفال العاديين "سدات الملف وقالت بصوت هادئ:

_الى بغايتوا تحتافضوا بهاد لجنين وخرج للحياة ممكن يكون فيه أحد الأمراض لي دكرت ليك دابا ،ولكن هاد شي ما كيمنعش بلي ما تقدروش تولداو طفل طبيعي نهائيا لا كين إحتمال كبير أنه يتزاد سليم لا كانت ما عندكمش نفس فصيلة الدم

كريم زير على يديه ونطق بصوت مكسور: ما كين حتى حل ؟!

دكتورة شبكات إيديها مع بعض وقالت:

خاص لمدام تبع معانا الحمل ديالها من لول وتاخد دواء في وقتوا طول فترة الحمل حتى تولد إنشاء الله المشكلة أنكم تعطلتوا باش تجيوها لمستشفى

"جبدات وراق حطاتهم قداموا"خاصك تسني لينا هنا باش نباشروا بعملية الإجهاد لي كنتوا موافقين طابعا ولكن قبل هاد شي خاصك دير تحليل نعرفوا فصيلة دم ديالك باش نتأكدوا من لموضوع كثر كيف قلت ليك

طال صمتوا وقشعر بدنوا وفكرة أنه يقدر يخسر أول طفل ليه صدماتوا وأزماتوا عاد أمينة علم الله أش غيوقع ليها الى عرفات بتنهيدة طويلة وقف، مسد بإيدوا على عنقوا وقال:

_ما نقدرش نقرر بوحدي نقولها ل أمينة عاد نشوفوا

دكتورة لمحات إيدوا مجروحةوقالت:تسنا نعيط لشي ممرضة تضمد ليك الجرح

كريم فتح لباب وهوا عاطيها بضهروا لعريض نطق بصوت حزين:

_شكرا ما محتاجش

خرج من مكتب دكتورة مصدوم تمشى بضهر مكسور وكتاف طيحين ناحية غرفتها مسح دمعتوا وحاول يبتاسم بزز منوا زفر بجهد...

وفتح لباب دخل لعندها لقاها مسطحة فوق لفراش وعينيها مغمضين أو وجها شاحب

عض خدوا من لداخل وهوا تيقرب منها قلبوا غيسكت بالخوف قبط إيدها وسط يديه وتحنى قبل إيدها من لداخل ودموعوا حابسهم

حط جبهتوا على جبهتها مغمض عينيه وقلبوا كيغلي كيلوم راصوا حنت طفا عليها تيلفونوا وخلاه صامت مدهاش فيها طاحت دمعة حارة من عينيه على وجها وهيا تفيق حلات عينيها بشوي كتشوف في السقف فور ما تفكرات شنوا وقع حطات إيدها على بطنها وأجهشت بالبكاء وسط شهقاتها حل عينيه ...

أمينة بصوت باكي صاحت:بنتي أكريم بنتي واش ماتت

كريم قاطعها بصوت هادئ كيطمن فيها:

ما تخافيش بنتنا بيخير الحمد لله"شافها مسحات دموعها بزربة تبسمات ما قدرش يخبي عليهاو بسرعة قال" ولكن خاصك ضروري ديري إجهاض حنت حياتك في خطار ولا تزادت البنت ممكن تكون عندها شي إعاقة الله يحفض

أمينة جهلات بدات كتسرفق في راصها وكتعير في نفسها:أنا سباب أنا"بتنخصيصة قالت " دابا ربي كيعاقبني حنت ما بغيتوش ياك الله غيحرمني منوا حنت دعيت عليه قبل لا يتزاد أنا ما كنصلاحش نكون أم هئ هئ هئ سمح ليا أكريم سمح ليا هئ هئ هئ حرمتك من أحس حاجة كتحلم بيها

كريم خشاها في حضنوا حابسها باش ما ضربش راصها طاحوا دموعوا حتى هوا:شش نتي ما درتي والوا أحبيبتي ما درتي والوا تهدني

أمينة عينيها حماروا بلاقياس مسحات

دموعها و بشفايف كيترعدوا ردات:بنتي ولا ولدي غنحتافض بيه كيفما بغا يكون عطاه ليا الله ما غنفرطش فيه

كريم قاطعها مبعد منها ركز في عينيها وقال: لا حياتك في خطار ما غنسمحش ليك ضحي بحياتك على الأقل خلبني غير حتى نديروا تحاليل ونتأكدوا وإنشاء الله يكون كلشي مزيان

أمينة مسحات دموعها بطرف كفها وحطات إيدها على بطنها مزيرة عليها بحلا غيخونوا ليها ولدها بعدات نضرها منوا بقات كتشوف في لفراغ وبي برود نطقات :

_لي عندي قلتوا أكريم

كريم بتسأل نطق :كيفاش وقع ليك هاد شي

أمينة بدات كتعود ليه وتبكي:مشيت لتلاجة خديت لكلاس لي جبتي ليا كنت كناكل فيه عادي حتى حسيت بلوجع بقا غادي وكيزيد بقيت غاديا مكاليا مع الحيط حتى طحت وسط لبيت ودم بدا تينزل مني "هزات راصها بشوي "ديني لدار ما بقيتش بغيت نبقا هنا عفاك

كريم دور يديه عليها عنقها بحب خيف عليها بلا لقياس حنت وهاد لقرر لي خدات غيعرض حياتها لخطار وهوا عارفها راصها قاصح ولا قالت شي حاجة ما كتراجعش عليها

خرجات من دوش لاويا عليها فوطة تقدمات بخطوات بطيئة ناحية لبلاكار جبدات منوا دوبباس في الأسود مع بيجامة قصيرة فوق لفخاض لبساتها ونشفات شعرها بفوطة صغيرة و لبسات فوق منها عباية مخصصة للصلاة ودورات على راصها شال...

دخل للجناح حامل بين يديه ميلفات حطهم فوق طبلة ودار لعندها رمقها بعينين عامرين حب ومني شاف لباسها فرح من قلبوا واضح من تعابيروا أنه مفتون بيها بلا حد تقدم حدها بخطوات تابتة راسم على محياه إبتسامة مزيناه وعطياه جادبية كبيرة

أركان بعينين معسلين قال:واجدا

إسلام بخجل واضح من تعابيراها حركات راصها بإجاب

أركان ببتسامة مزينة ملامحوا قرب منها شد يديها بزوج قبلهم و تحنى لفوتاي لي حدها خدا منوا جوج زربيات ديال الصلاة فرشهم

وقف قدامها تيصلي وهيا موراه متبعا معاه سلاوا صلاتهم ودعاو باش ربي يوفقهم في حياتهم

إسلام قلبها غيسكت بالخوف بقات جالسا مزيرة على يديها وهوا يوقف وتمشا ناحيتها نوضها بشوي ودور يديه على خصرها جرها لعندوا كتر بعينين معسلين قال بصوت مبحوح:

_ ما بقيتش قادر نصبر ،امم حبيبة مستعدة؟

إسلام خشات راصها في سدروا وكمية كبيرة من الخجل كاسيا ملامحها طلع ليها وجها بشوي حيد ليها شال من فوق راصها وتبسم نصف إبتسامة وهبط لشفيفها كيلتاهم فيهم بحب مشتاق لملمسهم الناعم كيروي في عطشوا وهيا مرفوعة مستاجبة معاه حيد ليها لعباية ودور إيدوا على ضهرها والإيد الأخرى تحت رجليها هزها بشوي بين يديه وحطها فوق سرير وفموا مزال في فمها كيتدوق ريقها الحلوا باستمتاع وأحاسيسهم متحكمة فيهم

بعد منها وخيط ريقهم متاصل حط إيدوا على عنقها كيتملس في جلدها ناعم بتملك

رمقها بعينين معسلين وقرر يبوح ليها بكل ما في قلبوا نطق بصوت جوهري كعاشق ولهان :

_كنبغيك

حلات عينيها بصدمة فور في سمعت كلمتوا لي فاكراتها في سفيان دقات قلبها تسارعات لدرجة ولا كتسمعهم في ودنيها ، عقلها تخربق وبقا فيها لحال حنت ما صرحاتوش بعلاقتها لقديمة وماعوداتش ليه ماضيها بسرعة دفعاتوا من فوق منها خلاتوا مصدوم وجلسات مقابلا معاه وبيدين كيرجفوا قبطات إيدوا وسط يديها وعينيها تيبريوا بدموع بتوتر نطقات:

_أركان بغيت نعود ليك على الماضي ديالي

أركان تبسم جنب ودور إيدوا على وجها حط جبهتوا على جبهتها حتى تخلطات أنفاسهم مع بعض بصوت حنين نطق بتأكيد:

_ما كيهمنيش الماضي نسايه لمهم هوا لحاضر

إسلام وقفات على طولتها وقالت بصوت باكي:

_لا نتا ضروري خاصك تعرف كلشي، انا ما نقدرش نبدا حياتي جديدة معاك بلا ما تعرف والوا بغيت نكون صريحة في كلشي

أركان علامات الإستفهام ضهروا على ملامحوا جمع لوقفة وتقابل معاها بجدية قال :تفضلي

إسلام زيرات على يديها وقلبها ولا تيضرب بجهد ما قدراتش تشوف في وجهوا بعدات منوا أو وقفات حدا نافدة ونسمات الهواء كتداعب خصلات شعرها فتحات شفيفها وبدات كتحكي ليه على علاقتها بسفيان من طفولة حتى لوقت لي كانت كتسنى فيه يتزوجها وخلاها وهيا كتهضر ...

بينما هوا كيستامع لكلامها ملامحوا كيتغيروا ما

تقبلش ان حبيبتوا تكون عندها علاقة قديمة بغيروا

أركان كرز على إيدوا حتى عروقوا برزوا أكتر بصدمة وجهوا ولا حمر ودنيه تصمكوا

فتح شفايفوا وبزز باش وجه ليها سؤال كاره وهوا كيدعي مع نفسوا باش يكون ماشي داك شي لي في بالوا

_أركان من تحت سنانوا نطق :مزال كتبغيه

إسلام دموعها شلال بقات مقابلة القمر ما قدرتش تشوف فيه ولا تخيل نضراتوا سؤالوا صدمها حنت ولات كتبغيه بلا قياس جاها فشكل حنت باين من نضراتها كمية لحب لي كتكنوا ليه ،هوا ملي شافها ما هضراتش ستنتج أن سكوت علامة رضا بهدوء خرج من لجناح كيغلي مدمر بينما هيا تنهدات براحة وفتحات شفتيها باش تخبروا بكل ما في قلبها :

_لا أنا كنبغيك نتا سفيان غير مجرد صديق وقف معايا في وقت شدة نتا بوحدك لي علمتيني المعنى الحقيقي للحب "تبسمات جنب"مني كتكون واقفا قدامي غير ريحاك كدوخني ما كنقدرش حتى نشوف فيك وكنرتابك دغيا حنت كنبغيك وهادا هوا لحب لحقيقي لي كيعودوا عليه في رويات ياك أنا ما بغيتش نبدأ حياتي بكدبة بغيتك تعرف عليا كلشي أركان

كملات كلامها وتنهدات براحة بحالا كانت هازا جبل و تفكات منوا دورات راصها ناحية أركان لقات لفراغ تصدمات لبسلات عليها عباية ونزلات تجري تقلب عليه ولات كدور تائهة وسط رياض...

كيقوالوا حبل الكدب عمروا قصير وسوى طال زمان ولا قصار أركان كان غيعرف كلشي ملي خبراتوا على ماضيها وخرجات كل ما في قلبها كانت شجاعة منها حنت ماشي كلشي يقدر يقول الحقيقة في هاد الزمان..

الساعة تشير إلى سابعة صباحا واقف بملامح ممحية خاشي يديه في جيبوا ومقابل مع لبحر حجبانوا معقودين لوسط و عينيه حاملين نضرة مضلمة،

مني خرج من رياض وهوا قدام لبحر تائه كيفكر دازوا عليه ساعات طويلة ما حسش بيهم حتى طلعات شمس غارق وسط تفكير عميق ملي كان صغير وهوا كيشوف تعامل باه وموا معاه ما زوينش عكس خوه لي كانوا مفشينوا حنت هوا لكبير والأنه قرا تخصص لي ختار ليه باه وخدم معاه في شركة كيف بغا عكس أركان لي كان عنيد وختار يدرس تخصص لي بغا هوا وكافح بوحدوا فينما كان تيطيح كان اول ما كيتسهزاء بيه هوا باه ،حنت كان باغيه يخدم معاه و الوحيد لي شجعوا هيا جداتوا وجدوا لي كان قريب ليه وعلموا المعنى الحقيقي للإحترام و"الحب" لي للمرة تانية كيتخدل فيه بغا موا باه من كل قلبوا وما كانوش مهتمين فيه حتى وصل بوحدوا واليوم تكسر قلبوا حنت لبنت لوحيدة لي دق قلبوا ليها وبغاها وكان مستعد يدير أي حاجة على قبلها ليوم قسمات ليه قلبوا على جوج وجرحاتوا كان غيفرح لوا أنها قالت ليه الحقيقة قبل ولكنها جات معطلة بزاف...

لدرجة ربط تمنعها من علاقتهم وفي كل مرة تيقرب منها تيشوف الخوف في عينيها بعلاقتها بسفيان...

رسم إبتسامة إستهزاء ساخرة على محياه كيستهزء بيها من نفسوا ومن غبائوا حنت ما فهمش من لول بلي هيا مابغاهش رغم أنها شارت ليه بالموضوع من الأغنية لي غنات ليه نهار خطبتهم...

علا راصو كيشوف في لماج"لموج" لي كيتخبطوا مع بعض كيفما كيتخبطوا دكريات حياتوا الماضية والحاضرة وسط عقلوا وقلبوا شاعلة فيه نار الغيرة كتحرقوا من لداخل..

ساط بجهد و خشا إيدوا في جيبوا جبد مفتاح سيارتوا وتمشى بكتاف طيحين حتى وصل لوطوا ديالوا الحديثة لي من تصميموا الخاص ...

فتحات عينيها ودوراتهم في لجناح حطات إيدها على راصها لي صابح عاطيها لحريق كمشات حجبانها وناضت من فراشها قافزة مني تفكرات أحدات لبارح وكيفاش أنها خرجات حتى لشاريع و ملقاتش أركان هزات تيليفونها شافت ساعة لقاتها الثامنة والنصف تصدمات أن أركان ما نعسش حدها كيف موالفا تسلل الخوف لقلبها

وتمشات بخطوات بطيئة للحمام غسلات وجها وتوضات وخرجات لبسات لباس الصلاة وجلسات كتصلي بتخشع وكتدعي باش أركان يكون بيخير وما تكون واقعا ليه حتى حاجة سالات صلاتها وهزات زربية الصلاة كتطوي فيها من الأرض ...

دخل أركان بجسد صلب وخطوات تابتة بملامح صرمة شاف فيها ودور وجهوا لناحية الأخرى ، هيا غير لمحاتوا قربات منوا بالسرعة وبالفرحة نطقات:

_الحمد لله ما واقعا ليك حتى حاجة فين مشيتي؟!! ما خليت فين قلبت عليك

أركان قصح فيها شوفة ونطق بشكل جدي:

_غنمشي ندوش ملي نسالي نلقاك واجدة باش نوصلك لعندك لالة رحمة

إسلام حركات راصها وبصدمة نطقات:

_كيفاش ؟!!

أركان تخطاها وقال بصوت رجولي خشن:

_ ياك نتي لي لبارح قلتي ليا نديك عندك عائلتك دوزي معاهم ليوم ولا نسيتي

إسلام حركات راصها بإجاب وقالت بصوت هادئ:اه ولكن خاصنا نهضروا

أركان دخل لدوش سد عليه بلا ما يتكلم معاها خلاها غير كتشوف ما عرفات أش تحت راصوا جاها بحال شي شخص أخرى ما كتعرفوش و غريب عليها صدمها ....

وقفات سيارة كريم أمام منزل راقي بطابقين

نزل بسرعة فتح لباب ل أمينة وتحنى بغا يحملها بين يديه وهيا توقفوا

أمينة بوجه شاحب رسمات إبتسامة خفيفة على محياها وقالت بصوت تقيل:كريم أنا قادرا نتمشى على رجليا ما تزيدش فيه

كريم رمقها بعينين عامرين حب وبتنهيدة خفيفة قال:خليني نهزك بحال اول نهار جيتي فيه لهنا عروسة، بقا عاقلا ؟!!

أمينة دورات يديها على دراعوا وحطات راصها على جنب دراعو:اه اي حاجة عشتها معاك ما عمرني ما غنساها غير ديرها في بالك

كريم بتاسم بخفة ضغط على لمفتاح سد سيارتوا وتمشا هوا وياها غير بشوي مكايس عليها، ناحية لباب خشا يدوا في جيبوا جبد ساروات وفتح لباب جلسها في صالون ودخل هوا لبيت يمسح أثار دم ديالها لي بقا في الأرض...

أمينة تمدات فوق سداري حاطا إيديها على بطنها ،وشعلات تلفازا قدامها بقات ساهية متبعة مع برنامج كيخص الحيونات حتى رن تيليفونها هزاتوا بفضول قرات إسم المتصل وقبلات المكالمة فورآ

أمينة:ألوا

سعاد بقلق من بنرة صوتها:كيف بقيتي أبنتي

"أجهشت في لبكاء ما قدرت تصبر "قال ليا كريم شنوا وقع ليك والحالة لي لقاك فيها، الله يابنيتي الله وما كتستاهليش بغيتها لعدواتك لي ما يحملوك

أمينة تبسمات جنب وقالت :انا بيخير الواليدة ما تخافيش عليا بنتك عندها سبع رواح

سعاد بخوف:مدرا أمينة شنوا قالت ليكم طبيبة تحاليل خرجوا

أمينة بتنهيدة طويلة قالت :تحاليل طلعوا مزيانين الى فصيلة دم طلعات عندنا نفسها -O يعني هاد لولد ولا لبنت مني غيتزاد غتكون عندوا شي مشكلة ولكن طمناتني انه في لحبلى تانية نقدر ندق إبرة ونتبع معاها وغيتزاد سليم

سعاد ساطت بجهد ما عاجبها حال نطقات: إيوا نزليه أبنتي حسن ما تعدبي معاه طول حياتك وفي لحبلى تانية تبعي مع طبيبة كيف قالت ليك تولدي وليد صحة سلام

أمينة بعصبية نطقات: بنتي أماما ما غنتخلاش عليها ،لكلبة وكتهز ولادها بين سنانها وأنا لي إنسان نقتلوا باشمن حق ربي اه، لي قدم ليه هاد لحياة وأنا ما غنحرموش منها وزيدن ما تعرفي لخير فين كين، ولا انا مشيت أجهضتوا كيف قلتي او وقع ليا شي مشكل ما نبقاش نحمل مرة أخرى أش غندير

سعاد بصوت مكسور قالت:سمحي ليا أبنتي عندك لحق الله يرزقك لعوين كولي مزيان وما تحركيش بزاف ،كون غير جيتي لعندي نقابلك حتى تولدي

أمينة بصوت هادئ نطقات:ما كرهتش نجي تما وراك عرفاني شحال كنرتاح في جديدة غنشوف ولكن كريم عندوا لخدمة ما نقدرش نخليه ونجي، سلمي على الوليد توحشتوا بزااف

سعاد :مبلغ أبنتي وردي لبال لراصك و نقصي من نديك لخفة وطيران ديال والوا سلمي ليا على ولدي كريم

أمينة قطعات معاها بعدما قالت : وخا الواليدة غير تهناي يسلم عليك الخير

خرج كريم من لبيت توجه ناحيتها مستغرب بتسأل نطق:

_معا من كنتي كتهضري؟

أمينة: غير مع سعاد"خرجات عينيها "شتك ساير كتستنطق فيا مالي مجرمة، يكما تسحابني داويا مع صاحبي جمع راصك اولد الخالة

كريم تبسم جنب وقال:نتي هيا نتي امم زيانيتي وجا معاك سبيطار

أمينة عوجات فمها:باركا من حشيان لهضرة كلاك زيانيت سير جيب ليا معاك لمكياج ديالي نحط منوا وليت كنخلع "هزات تيليفونها بدات تشوف في راصها شقهات بجهد "ويليي وليت صفرة كيف لموتا زرب جيب ليا شغلي

كريم ضحك عليها من نيتوا حتى بان صف لفوقاني ديال سنانوا لبيضين مزينوا بسرعة مشا لبيت جاب ليها لي بغات حطوا قدامها هزاتوا بزربة وبدات تعكر

كريم جمع يديه عندوا قال:نتي زوينة بلا بيه "شافها خنزرات فيه جمع فموا وقال بتسأل" شنوا مشهية نخرج نجيب لك

أمينة قدات جلستها وقالت بفرحة:ناري وتعرفني اش مشهية اكريم تبغي تحماق

كريم تصدم و بتسأل قال:شنوا

أمينة سرطات ريقها بعينين تيبريوا جوباتوا: بغيت شي جليسة مع شماكريا ونسمع هضرتهم لخاسرة ديك لكلمة ديال ولعشير بروجولة احح كتحمقتي ونشم ريحة تبويقا عاد غنرتاح

قاطعها كريم مكمش حجبانوا:من نيتك كتهضري اش بان ليك نديك معايا لحبس كينين غير هوما

أمينة بفرحة تشع من عينيها نطقات: قول والله غتديني.. حلف....حلف

كريم قصح فيها شوفة وقال:تكمشي في قنتك مزيان تبارك الله"خنزر فيها وهيا تكمش" ما تخلينيش نخسر لهضرة معاك أمينة ونتي يالله خارجة من لكلينيك

أمينة بتراجي وريوقها سيلين قالت :غير خسر لهضرة هانيا.. ولكن أنا مشهيا

قاطعها كريم بقوله: ردي لبال لراصك وخلي تيلفون حداك انخرج نجيب ليك باش تفطري

جالس في سيارتوا ونسمات الهواء تداعب خصلات شعروا مخرج إيدوا من نافدة والإيد الأخرى تيحك بيها ضقنوا عاقد حجبانوا و غارق وسط تفكير عميق حتى فيقوا من سهوتوا خروج إسلام من رياض لابسا جلابة بيضاء جاتها فنا مع شربيل ديال صم غير لمحوا مشا بالوا مع نهار لول لي شافها فيه كانت فوق لحصان ديالها تبسم بدون شعور..

تمشات ناحيتوا فتحات لباب لي حداه وجلسات بهدوء كيف موالفا.....

دور ساروات وخدم لوطوا كسيرا في صمت ما وقف حتى لقدام مول كبير فيه جميع أنواع ملابس راقية للرجال والنساء والأطفال

أركان دور وجهوا عندها وقال:نزلي

إسلام شافت فيه بستغراب:ياك غتوصلني لدار أشنوا جينا نديروا هنا؟

أركان قصح فيها شوفة ونزل بلا ما يجوبها ساطت بجهد وزيرات على يديها و تبعاتوا بصمت ،دخلوا لمول غير شافوه الخدامين تما جاوو يجريوا لعندوا الأنه معروف وسمعتوا سابقاه...

الموضف حاني راص ببتسامة قال: سلام عليكم سي أركان مرحبا بيك عندنا أش حب لخاطر؟

أركان حرك راصوا كارد للتحية ودار لعند إسلام تبسم جنب وقال:

_ختاري أحسن حاجة لالة رحمة وباقي العائلة

إسلام دورات راصها في لمكان مصدومة ورجعت شافت فيه عقدت حجبانها وقالت برفض:

_ما كينش لاش غير خلينا نمشيوا

أركان عض فموا من لداخل وزفر بجهد ما بغهاش تمشي لدارهم في أول زيارة ليها دخل بيدين خاويين،

تجاهلها وتمشا كيشوف في لملابس رجالية والموضف تابعوا هوا كيختار ويسول وهوما كيجوبوه سالااا ودار عندها قرب منها ونطق بصوت رجولي خشن:

_ختاريت شي حاجة ل أمير وعمر ونتي ختاري لالة رحمة وختك"خنزر فيها " ما تخلينيش نعود هضرتي جوج مرات

إسلام حركات راصها بإجاب معصبة ما عاجبها حال نطقات بخفوت داخلها:

_تجاهلني ومن لفوق بدا تآمر فيا

أركان من تحت سنانوا نطق:قلتي شي حاجة

إسلام تبسمات من فوق خاطرها ونطقات:

_الوا

ختارت بزز منها كسوة طويلة لختها وفراشة راقية لمها و أركان تابعها بقا مورها حتى خدات بزاف ديال لحويج ليهم جبد لكرات خلص بيها وخرجوا من تما...

ركبوا في سيارة بصمت وصل حدا محل أخر للشكلاط نزل شرا منوا وخدا لفواكه من طريق تم كملوا طريقهم...

إسلام كسرات صمت لي بينهم و قالت:واش انا غلطت فاش عودت ليك على الماضي ديالي

أركان زير على فكوا ونطق من تحت سنانوا:

_ ما غلطتيش ولكن جيتي معطلة

إسلام شافت في طريق ورجعت دورات راصها لعندوا:

_ولكن أنا غير بغيت نقول ليك راه كن...

أركان قاطعها بقوله:سدي عليا لموضوع مزال ما ستوعبت داك شي لي قلتي ليا لدابا عقلي مشوش

إسلام جمعات يديها عندها زفرات بجهد ودورات عينيها بقات مقابلة طريق بصمت

أركان دور عينيه ليها تنفس من نيفوا مدور وجهوا وهوا يلمح مفتاح خداه وقال:خديت ليك قاعة الأعراس فيها مكتب صغير لفوق على قبل مشروع زواج مبارك "عض خدوا من لداخل مكمل كلاموا مفقوص" كنت ناوي نقدمها ليك كاهدية على ليلة لبارح "حط مفاتيح او ورقة بين يديها وقال"هادا لعنوان أو ساروت ديالها او وراق لملكية خليتيهم في لجناح فاش ترجعي خاصك تسني عليهم"حرك راصوا" مبروك عليك

إسلام عينيها لمعوا زيرات على لمفتاح بين يديها وقالت بفرحة :شكراا بزاف "سكتات لتواني وكملات كلامها بطرح تسأل " و علاقتنا أركان ما غنفكروش فيها ؟!

ضغط على لفرام برجليه وبغصة في حلقوا قال: وصلنا نزلي "شافها بقات كتسنا جوابوا سرط ريقوا حتى تفاحة أدم تحركات في حلقوا بجدية نطق "خليني حتى نتقبل لموضوع و ديك ساع غنخبرك بالمسار جديد ديال هاد لعلاقة

إسلام نزلات من لوطوا وسدات لباب ومني شافتوا بقا جالس دقات في زاج حتى فتح ليها ونطقات:

_نتا ما غنتزلش؟! على الأقل دخل سلم على ماما

أركان حط نضرات في الأسود على عينيه وقال:سلمي عليهم، وهزي داك شي لي في لكوفر دخلي لدار أنا ما مساليش خاصني نمشي

حطات الأغراض كلهم لي تقدوهم قدام لباب وسدات لكوفر ودعاتوا ودقات في باب دارهم فتح ليها خوها فور ما لمحاتوا قدمها عنقاتوا بجهد بينما أركان تما غادي بلوطوا غير بشويا بقا متبع ليها لعين من لمراية الأمامية للسيارة حتى دخلات لدار ...

عمر حرك راصوا وبفرحة نطق:الخوادرية توحشتك بزاف غبرتي حتى زيانيتي

إسلام بعينين تيبريوا بدموع نطقات : حتى أنا أخويا علاش ما جيتيش عندي لرياض

عمر مبعد منها بتاسم جنب وقال:ما كنتش مسالي فين هوا سي أركان

إسلام حسات بإحراج بلعات ريقها ونطقات: عندوا لخدمة "غيرات لموضوع"غنبقاو واقفين في لباب"شارت ليه لساشيات" هز هاد شي دخلوا لدار

عمر تحنى هز داك شي من الأرض بصدمة قال:اش هاد شي كلوا ؟!!

إسلام:هاد شي خداه ليكم أركان" غمضات عينيها ستنشقات ريحة الأكل لي حمقاتها"امم ريحة كسكسوا كتشهي

توجهات نيشان لمطبخ لقات مها واقفة عطياها بضهر لابسا بيجامة طويلة في لبيض جديدة وحازما راصها بزيف حياتي شادا لكَصعة وسيرا تعجن في لمسمن وردا حدها كسكسوا يطيب

إسلام عنقاتها من ضهرها فرحانة نطقات:

_توحشتك بزاف أماما

رحمة فور ما حسات بيدين بنتها خفق قلبها بسعادة وعينيها دمعوا درات عند إسلام بزربة عنقتها خشاتها في حضنها كارزة عليها و مبعدا يديها لا تعمر حويج بنتها بلعجينة

رحمة: لكبيدة ديالي حتى أنا توحشتك خليتي بلاصتك كبيرة

إسلام بعدات منها ونطقات: هاي هاي زيانيتي أماما و هاد لبيجامة جديدة صرعاتك

رحمة تبسمات جنب ونطقات :كيف ديرا وكيديرن عائلة راجلك؟ ولدي أركان جا معاك؟!!

إسلام دورات إيديها على كتف مها وقالت:كلهم لباس الحمد لله سلموا عليك كاملين وأركان وصلني ومشا عندوا لخدمة

رحمة حركات راصها وقالت بصوت هادئ:يسلم عليهم الخير كون غير بقا حتى يتغدا معانا

إسلام جمعات حجبانها ونطقات:علاش واقفا في لكوزينة بحدك مال توبة ما كيناش نتي عيانا وسيرا تعجني من لفوق

رحمة تبسمات بفرحة وقالت:أنا بغيت نصوب ليك كسكسوا بيديا عرافاه عزيز عليك

إسلام عينيها دمعوا:لهلا يخطيك علينا"بعصبية قالت" ولكن على الأقل خاصها تجي تعونك "دورات عينيها"فين هيا توبة ؟

رحمة رجعات لشغلها و قالت: ختك في سطح كتنشر في لحويج سيري ترتاحي بينما ساليت

إسلام حركات راصها ونطقات :نوو انا نمشي نطلع عند توبة

تمشات حتى وصلت لباب لكوزينة وبتسأل نطقات:فين هوا أمير؟

رحمة:أمير قاري ما غيخرج حتى 12

بعدما نشرات لحويج هزات تيلفونها تاصلات بي أمينة كتطمن عليها ...

توبة حطات إيديها على وجها مغطياه من شمس فور ما تقبل لخط قالت:كيف بقيتي يالله عيطات ليا خالتي سعاد عودات ليا لي وقع ليك

أمينة:وليت بيخير الحمد لله شفتي في لول ماكنتش بغاه ومني تقبلتوا طلع غيتزاد عندوا شي مشكل عرفتي شنوا، حسيت بلي هادوا دنوب ديال هناء لي دخلات للحبس بسبابي

توبة جمعات حجبانها وقالت:ما تقوليش هكاك بالعكس هيا كتستاهل اش داها تجي دافع على سفيان وهوا جا سكران

دار لينا شوهة قدام لباب عبرنا عليه ملي صيفطناه للحبس فين يتربا،

أمينة بتنهيدة طويلة قالت :عندك صح يستاهل

توبة بنبرة حزن قالت : لمهم نتي دابا ديها في صحتك وما تفكري في والوا خودي دوا في وقتوا وما تحركيش بزف

أمينة: وخا راه كنشربوا

توبة بتنهيدة قالت: ايوا الحمد لله على سلامتك كون ما كنتش مقابلا أمير وكنعون ماما والله حتى نجي نقابلك حتى تولدي

أمينة ببتسامة قالت:عارفا لي كين الحب سلمي على مي رحمة وعمر وبوسي ليا أمير

توبة :مبلغ تهلاي في راصك

توبة فور ما قطعات مع أمينة وهزات راصها ناحية لباب ديال دروج لي كيطلع لسطح تكونسات في بلاصتها مني شافت إسلام وجها حمر وداز كلشي على مسامعها،

سرطات ريقها و قربات منها راسمة إبتسامة على محياها

توبة: توحشتك بزاف اختي اش هاد لغبور

إسلام طاحت دمعة جنب عينيها ضغطات على سنانها و قالت بحرقة:ياك أختي وليتوا كتخبيوا عليا سفيان في لحبس وأنا اخر من يعلم وكون ما عرفت بالصدفة ما غتقولي ليا والوا

توبة حطات إيديها على فمها وقالت: ما شي هكاك أ إسلام كان عرسك ما بغيناكش تشوشي

إسلام بعصبية نطقات :شنوا دار عودي ليا كلشي ودابا

توبة فتحات شفايفها وبدات تحكي ليها شنوا وقع ديك ليلة كلها بينما هيا كتهضر إسلام زيرات على يديها و قالت:

_ولكن هوا كان سكران ما كانش عارف اشنوا كيدير حشومة ما كانش خاصكم تدخلوه لحبس

توبة حركات راصها وقالت بصوت هادئ: حنا ما كانش غرضنا ندخلوه للحبس بغيناه غير يغبر تما بينما داز عرسك على خير

إسلام ببرود نطقات:علاقتي بسفيان سلات شحال هادي وهوا خاصوا يفهم هاد شي "بتسأل قالت" أشمن حبس هوا فيه؟

توبة بستغراب قالت :كين غير حبس واحد على ما اضن هوا**** علاش كتسولي

إسلام بملامح جدية نطقات : غنمشي عندوا

خلات ختها كتنادي عليها و نزلات بسرعة خرجات من دارهم و شدات طاكسي قالت ليه يوصلها لسجن...

وصلت لتما دخلوها جلسات فوق طابلة وبينما هيا كتسنى فيه شافت بزاف ديول لحالات لي أزموها من بينهم أمهات عينيهم غارقين دموع وكبدتهم مشويا على ولادهم ما قادرينش يشوفهم وسط سجن مسجونين...

دراتها خاطرها وبقاو فيها بزاف...بقات ساهية كتشوف فيهم حتى فيقها من سهوتها جاية سفيان...

خرج لعندها شاحب الوجه ضعاف وفموا زراق بالكاروا لي كيكمي هز راصوا وفور ما شافها قاد حويجوا وتقدم بخطوات سريعة ناحيتها وعلى محياه راسم إبتسامة كبيرة

سفيان بشفايف كيترعدوا نطق: إسلام حياتي توحشتك بزاف

إسلام عينيها دمعواا مني شافت حالتوا قصحات قلبها وقالت:لباس عليك

سفيان: دابا عاد وليت لباس مني شفتك"جر يديها شدهم بين يديه وقال بصوت باكي" إسلام أنا غلطت ملي سمعت لكلام ديال لواليد كان خاصني نرفض طلبوا ونتزوج بيك أنا باقي كنبغيك وكتر من لول "مسح دمعة وقال بفرحة"انطلق هناء ونتزوجوا أش قلتي نتي موافقة ياك

إسلام جرات إيديها من وسط يديه وقصحات فيه شوفة عاد نطقات:مراتك هاديك أسفيان غير بقا معها واصلا وخا طلقها أنا ما عمري ما غنرجع ليك حنا ما مكتابينش لبعضياتنا وأنا دابا مرا مزوجة وكنبغي راجلي لدرجة كبيرة ما مستعداش نخسروا جيت باش نقول ليك جوج كلمات ونمشي نساني وبدا حياتك من لول مع مراتك وبعد من عائلتي أخر مرة تجي دير ليهم شوهة قدام دار

سفيان عينيه غرقوا بدموع اول مرة كيحس بيها مني سمع كلمة كنبغي راجلي قلبوا طاح لعند رجليه بصدمة نطق:تزوجتي ؟!!!

إسلام بعينين تيلمعوا قالت:اه تزوجت شنوا بغيتيني ندير نبقا بوحدي طول حياتي نتا شفتي حياتك وحتى أنا وزيدن شحال هادي كل واحد فينا شد طريق

سفيان دموعوا بداو تينزلوا شلال :علاش خنتيني إسلام علاش،"بتراجي نطق" طلقي وخلينا نرجعوا لبعضياتنا عفاك

إسلام بتنهيدة طويلة وقفات بعدما قالت:نتا واش حمق دير عقلك في راصك ماشي نهار لي بغا ليك راصك تزوج ونهار لي تمل تبغي طلق "بجدية نطقات "سفيان هناء كتبغيك بزاف بدا حياتك معها من لول ،شوف حالتك كيف ولات واش عاجبك دابا راصك في هاد لوضع حتى من خدمتك خسريتها

سفيان بصوت مكسور نطق :مبروك عليك سمحي انا كنبغيك ولكن خسرا كون بغيتي طلقي غي...

إسلام قطعاتوا :لي عندي قلتوا دابا الله يعونك أخر لقاء بيناتنا هوا هادا أخويا ولا كنتي كتبغيني كيف قلتي عيش حياتك ونسا هاد لفكرة ديال طلاق حيدها من بالك

سفيان مد إيدوا وقال:كنواعدك ما عمرني ما غنبقا نقرب جيهتك كنتمنى ليك سعادة في حياتك جديدة

إسلام بعينين تيبريوا بدلاتوا المصافحة وقالت:هادوا هوا سفيان ولد جيرنا لي تنعرف "طلقات منوا وقالت بصوت هادئ "بسلامة اناغنقول ل أمينة باش تنزل على دعوة باش تخرج نتا ومراتك

سفيان وبقا كيتأمل فيها وهيا غاديا بحلا كيودعها غضب ملي سمعها تزوجات وكان عايش في لحبس على أمل انه ملي يخرج يلقاها كتسنى فيه ولكن ليوم هضرتها حلات ليه لعينين على بزاف ديال لحويج كان هاملهم ومن بينهم مراتوا لي قرر انه مني يخرج يطلب منها سماحة هيا لولة...

إسلام فور ما خرجات تنهدات من الأعماق بحلا هازا جبل فوق كتافها رتاحت مني قالت ليه يبعد منها وهيا عارفة سفيان الى قال شي كلمة ما كيتراجعش عليها ، تمشات خارج سجن رفعات راصها لسماء وقالت بتحدي :

_غندير أي حاجة باش تبقا معايا"تنهدات براحة " أركان معاك عرفت لحب لحقيقي وما مستعداش نخسرك نهائيا غندير لمستحيل باش نحافض على هاد لعلاقة لي ما بغيتهاش في لول "ضحكات بستهزاء من نفسها و قالت " لعلاقة لي كنت بغاها من لول مع سفيان تخليت عليها والعلاقة لي ما بغيتهاش مع أركان دابا مستعدة ندير اي حاجة باش نحافض عليها غريبة هاد لحياة ولقدر لي كيلعب بيا كيف بغا...

شدات طاكسي فرحانة رجعها لدارهم نيشان وتصلات بأمينة طمنات عليها...

جالسين في وسط سطح تياكلوا كسكسوا في جوا عائلي سعيد تيضحكوا مع بعضياتهم وكيهضروا منها تيحيدوا الشوق لي بيناتهم....

إسلام حطات لقمة طعام في فمها وبتلدد قالت: الله هاد كسكسوا شحال بنين أماما الله يعطيك الصحة

رحمة ببتسامة ردات: بصحتك أبنيتي

أمير كمش حجبانوا بألم صاح بصوت طفولي باكي:أيي ماما جاني سخون

توبة خرجات فيه عينيها و نطقات :سرك نيت ياك قلت ليك خليني نبرد ليك ونتا راصك قاصح"وجهات كلامها لعمر "خويا هبط جيب ليه شي طبسيل الله يستر عليك

عمر هز راصوا من لقصرية غيهضر وهوا يقاطعوا أمير بتحدي قال بعدما ناض بالخف :

_ألااااا أنا لي غنجيبوا يالله ما تمشيش تا

عمر عوج فموا وقال:وشكون قال ليك كنت غنوض نجيبوا ليك غير سير اولد لعبد راك خارج لمك بحالك بحالها

توبة خنزرات فيه و نطقات بعصبية:مال موا كيف جاتك

رحمة هزات إيديها فوق راصها ورمقتهم بنضرات غاضبة قالت:بديتوا عوتاني بغيت غير نعرف إيمتا غتكبروا

إسلام حركات راصها ونطقات بعصبية:بغيتوا ضاربوا نزلوا لتحت خليوني أنا وماما تتغداو على خاطرنا ياااه ما كتسليوش

توبة خنزرات في عمر وبفقصة نطقات: هوا لي بدا مالي أنا أش درت ليه

عمر فتح شفايفوا غيجوبها حتى قاطعوا رنة تيلفونوا تيصوني بفضول شاف إسم لمتصل تبسم٨ جنب بعدما قال: هادي أمينة متاصلا أبيل فيديوا يمكن شمات ريحة كسكسوا

رحمة بقلة حيلة ردات:اولدي نوض غسل يديك وهضر معها ما توريهاش لماكلة ولبنت كتوحم حشومة

عمر قبل لخط بعدما بعد منهم تبسم جنب ونطق بصوت رجولي:

_لخوادرية صفا اش جرا حتى تفكرتيني ليوم

أمينة دورات عينيها وبتمسكن نطقات:والوا العشير غير توحشتك وصاف "سرطات ريقها وتبسمات "

عمر حرك راصوا وبغمرة نطق:باين ليا باغا تقولي شي حاجة غير طلبي اش بغيتي

أمينة بتراجي نطقات :عمر الله يحفضك شوف إلى بان ليك نورالدين ودراري ديول درب مجموعين خرج عندهم وجلس وسطهم و عيط ليا خليني نسمع هضرتهم

عمر بعدم فهم نطق :لخوادرية مالك هبليتي دراري كيقولوا لهضرة لخاسرة ما عندك لاش تسمعي ليهم

أمينة بعينين تيلمعوا نطقات:هاديك هيا لي بغيت غير نسمع ليهم تنحماق على ديك لهضرة عييت ما نقلب في ليوتيب مي ما قنعاتنيش لهضرة لي فيه ما حرشا ما معمقا

عمر بعدم رضا قال:وخا طيري وتنزالي والله لا سمعتي شي حاجة "بالفقصة ضحك"واش عرفاهم اش كيقولوا ولا كتهضري من فراغ

أمينة بعينين تيلمعوا : اه عرفاهم أش كيقولوا وانا ديك لهضرة بالضبط لي تشهيت نسمعها عفاك عفا خويي دير معايا مزيان الله يسهل عليك

عمر ساط بجهد و مد تيلي لتوبة بعدما قال:نخليك مع لخوادرية أنا ما مساليش دابا

توبة ببتسامة نطقات:أمينة لباس عليك ؟! توحشناك بزاف خليتي بلاصتك

أمينة مخسرا سيفتها بعصبية نطقات :داك خوك ما عرفت ربي في أشمن طبقة في جهنم غيحطوا ؟!!

توبة تهزات بضحك قائلة:باينة في سفلي ما يخص فيها خصاص خويا وتنعرفوا أنا ندوز ليك إسلام "دورات كاميرا انفاص مع إسلام "

أمينة :هاي زين صفا؟! اش كديري

إسلام هزات راصها من الأكل قالت:كناكل في كسكسو اختي و نتي تغديتي

"رحمة حمرات فيها مخنزرا حنت قالت ليهم ما يوروهاش كسكسوا"

أمينة خسرات سيفتها ونطقات : بصحتك أنا تغديت بطون ولحرور كنت مشهياه

إسلام بإحراج عضات فمها من لداخل وقالت: سمحي ليا نسيت دابا غتكوني تشهيتي كسكسوا

أمينة حركات راصها بنفي:لا ما بقيتش كنحملوا دابا لي مشهيا هيا تبويقا و شماكريا نجلس بينهم

إسلام بصدمة خرجات عينيها:اويلي مالكي تسطيتي

أمينة تنهدات من لداخل:محال واش تحسي بيا دار حتى تحملي وغتجربي عرفتي شنوا هيا تبويقا "بعينين تيبريوا "تبويقا عالم أخر

تهزوا كاملين كيضحكوا من نيتهم على أمينة حتى قفزوا من سماع رويض ديال طوموبيل تحكوا قدام دار ومن مورها بدا دقان في لباب مجهد

رحمة وجهات كلامها لتوبة مصدومة: نوضي شوفي شكون تيدق أبنتي

وقفات توبة على طولتها لبسات في رجليها وخرجات راصها من شرجم كطل حتى بان ليها واقف بي طولتوا وشخصيتوا الرجولية قدام لباب شهقات بجهد ورجعات لعند ختها بسرعة قالت:

_إسلام نوضي تشوفي راجلك جا راه هوا لي كيدق في لباب هبطي حلي ليه

إسلام هزات راصها بصدمة وحلات ليها لقمة حتى دموعها دازوا شربات لماء وخدات نفس طويل بعدما قالت :

_كح كح كح أش جا يدير ؟

رحمة دورات راصها لعند بنتها وقالت :أويلي على اش جا يدير راجلك هاداك أبنتي نزلي عندوا دخليه لصالون وحطي ليه داك طبسيل ديال طوس لي سْكِيت غتلقيه في لفران حطيتوا تما باش يبقا سخون

إسلام بنتهيدة طويلة وقفات غسلات يديها ونزلات غاديا وكتجر في شربيلها كتلبس فيه لابسا بيجامة خفيفة مبيناها صغر من سنها حلات لباب راسما إبتسامة على محياها هزات راصها جات عينيها في عينوا حسات بإحراج ونطقات:

_سلام عليكم دخل

أركان دور راصوا في دار لتحت ما بان ليه حد جرها من دراعها مورك عليها وبعصبية نطق:

_لبسي جلابتك وزيدي قدامي

إسلام كمشات حجبانها بألم وبتسأل نطقات :

_علاش غنمشي يالله جيت مزال ما شبعت من لكلسة مع ماما وخوتي

أركان طلق منها ومن تحت سنانوا نطق: مجعريش دين مي دابا طلعي لبسي عليك وزيدي قدامي بلا شوهة

إسلام قلبها خفق بشدة من نضراتوا لمضلمة طارت من قداموا طلعات لبيتها لبسات جلبتها وطلعات تجري لسطح تودعهم

توبة هزات راصها وبتسأل نطقات:ختي علاش لبستي واش غتمشي دابا مزال لحال

إسلام حركات راصها وبزز باش حبسات دموعها :

_غنمشي حنت أركان جا يديني

رحمة تنهدات من الأعماق وقفات على طولتها غسلات يديها وقربات من بنتها عنقاتها :

_الله يرضي عليك أبنتي ديما سمعي لراجلك وتهلاي فيه

إسلام طاحت دمعة جنب عينيها مسحتها بالخف ونطقات:ما سخيتش بيكم

توبة عنقاتها بجهد :غنتوحشك بزاف أختي رضي لبال لراصك نبقاو نهضروا في تليفون وانا مرة مرة نزورك

أمير بعينين تيدمعوا جر ليها من جلابتها وبصوت باكي نطق: خالتي بقاي معانا ما تمشيش عفاك

إسلام نزلات لمستواه عنقاتوا بجهد :ششش ما تبكيش الأبطال ما كيبكيوش أحبيبي شوف راه جبت ليك شكلاط او حويج جداد غنمشي باش مرة اخرى نجيب ليك شي هدية زوينة

أمير بعد منها ودميعاتوا هابطين على حنيكاتوا لمنفوخين ببرائة جوبها: اوك يالله سيري

إسلام على كلاموا ضحكات: صافي داغيا بغيتيني نمشي أطميميع

عمر دور دراعوا على ختوا وقال:الخوادرية شي نهار انجي عندك تهلاي في نسيبي

إسلام دلات شفتها لتحتانية و نطقات مكمشا حجبانها :كلكم وليتوا توصيوا على أركان وأنا مسكينة شكون أيتهلا فيا

توبة ببتسامة قالت:ايتهلا فيك نسيبي ما نخافش عليك فاش تكوني معاه

نزلوا كاملين لدار لتحت قربات رحمة من أركان لي خاشي يديوا في جيبوا وقاف بجسد متصلب ونطقات ببتسامة مزيانها:

_ولدي كون غير جلستي حتى تغديتي عاد سير

أركان تحنى قبل إيديها وقال وهوا كيشوف في إسلام وكارز على يديه :مرة اخرى لالة رحمة عندي لخدمة كتيرة

رحمة بوجه بشوش :وخا ولادي سيروا بلا ما نعطلكم الله يديكم على خير تهلا في إسلام وسلموا ليا على العائلة كاملا

أركان تبسم جنب وعينوا ما حيدهمش على إسلام:غنديرها في عينيا غير تهناي "حرك راصوا "مبلغ

بعدما توادعوا مع العائلة ركبات حدا أركان في لوطوا بقات كتشوف فيهم خلعها مرة مرة تيدير فيها شي تخنزيرا كطيح ليها الماء في ركابي بغات تهضر وخافت منوا

أركان عض على فموا من لداخل ونطق: ملي جيتي قبيلا لداركم ما خرجتيش؟

إسلام سؤالوا زعزعها بسرعة حسات بالعرق تينزل مع جبهتها فتحات شفايفها لملسقين بزز ونطقات بخوف:

_أه كنت غير في دار ما خرجتش

أركان ميل راصوا جنب بالعصاب حتى طرطق عنقوا زفر بجهد ودار لعندها بعينين حمرين:

_ما خرجتيش متأكدة

إسلام دقات قلبها تسرعات بشكل عجيب بلعات ريقها ونطقات :

_ما خرجتش علاش كتسول

أركان تبسم إبتسامة صفرة ونطق ببرود: وخا نوصلوا وغنشوفوا "كمل كلاموا مزير على الحروف "واش خرجتي ولا لا

ضغط على لفرام قدام رياض نزل بسرعة تيفور دار ناحيتها فتح ليها لباب وجرها من يدها بعصبية خبط باب لوطوا وتما غادي مدخلها لرياض داز على العائلة حرك راصوا كتحية وكمل طريقوا خلاهم مصدومين تيسولوا

فريدة بخوف نطقات:اويلي اشنوا واقع بينهم حتى جرها بديك طريقة ولبنت مخلوعة

نجلاء رتشفات من كاس ديال لعصير وقالت بفرحة :هيا لي كتطير علم الله أشنوا دارت ليه حتى ولا بديك لحالة مسكين

فريدة بخوف وقفات:غنمشي نشوف شنوا واقع و ندخل بخيط بيض

الحاجة خديجة حمرات فيها باش تجلس ونطقات : دوزي تبركي داك شي بين راجل ومرتوا خليهم يحلوا مشاكلهم بوحدهم هوما راهم كبار ماشي ولاد صغار بغا تنوضي تصالحيهم

لالة فريدة حطات إيديها تحت ضقنها وبتنهيدة طويلة جلسات

________

أركان بقا جارها بين يديه وهيا قلبها غيتوقف بالخلعة والبولة غطلقها في حويجها من لخوف ما بقات عارفا ما دير تلفت

دفعها داخل لجناح وسد لباب موراه دوز بإيدوا على شعروا رجعوا لور حتى بانت جبهتوا زفر بجهد ودار لعندها هيا غير شافتوا ولات كتفيبري غير بوحدها بالخلعة

أركان بصوت هادئ نطق:قولي لحقيقة مشيتي تشوفي داك ز***** في لحبس ياك

إسلام شافت فيه ببرائة وحركات راصها بنفي وتما فين جعراتوا بالمعقول....

أركان ما كيحملش لكدوب وهيا كون صرحاتوا كان غيتفهم وملي كدبات زادت غرقات راصها....

دار لعندها كيف ثور عينيه حمرين ما بقا يشوف حتى حاجة قداموا من غيرها طار عليها شدها من دراعها مورك عليها وتيحركها بين يديه كيف ريشة كيديها ويجيبها حتى غواتاات من الألم وهوا تيردد جملة وحدة في فمواا:

_علااااااش كتكدبي علااااااش هضريييي علااااش ؟؟

إسلام دموعها داروا خط على حناكها بصوت باكي نطقات :خفت خفت منك ما قدرت نقول ليك والوا سمح ليا عفاك

غير سمع كلامها وزاد تأكد تسمكوا ليه لودنين

و كأي راجل سمع مرتوا مشات لحبس تشوف حبيبها لقديم غيتعصب و هاد لفعلة لي دارت خلاتوا يحس بإهانة كبيرة مسات رجولتوا وخلاتوا بلا قيمة....

أركان عروق جبهتوا ويديه تنفخوا ونضراتوا مابقاوش كيبشروش بالخير دفعها بعصبية حتى تخبطات مع لحيط تقصحات ونزلات راصها الأرض ما قدرت تشوف فيه هو حط إيديه على الحيط وهيا وسط منوا غتموت واقفا بالخوف

أركان من تحت سنانوا نطق صاعر :في كل مرة كنتقرب منك تنشوف لخوف في عينيك وكتهربي من بين يدي فينما كتلقاي فرصة "سحق سنانوا بغيض" قلت مع راصي راك مزال ما ولفتيني وصبرت فوق لقياس"زاد ضغط على سنانوا ونطق كاره "ولكن نتي طلعتي كتبغي داك شماتة و في أول فرصة خرجتي فيها من رياض ما تعطلتيش دغيا مشيتي تشوفيه

"ساط بجهد وسدروا ولا يطلع وبنزل سد عينيه وعود حلهم بزربة قال"باش حسن مني داك ز****** حبيب لقلب لي تخلااااا عليك باااش "غوت على حر جهدواا وهوا كيخبط في لحيط حدا وجها شاد راصوا بزز ما بغاش يحط عليها يدوا"علااااش قبلتي تزوجي بيا ونتي باغا واحد اخر هضري علاااااااش ؟!!

إسلام دموعها ولاوا تينزلوا شلال شهقات بجهد وتنخصيصة كتحبس ليها لهضرة بشفايف كيترعدوا نطقات:ماشي كيف كيحساب ليك أنا فعلا مشيت عندوا غير باش نقول ليه...

قبل ما تكمل كلامها طلعات رعدة معها بالخوف ملي شافت أركان هز إيدوا حتى لفوق وخبطها مع لحيط بكل قوتوا حتى إيدوا تجرحات

رمقها بعينين حمرين مخنزر هضر بجهد :

ديك ساعة ابنت ناس صارحيني قولي ليا راه كتسناي فيه يخرج من لحبس ولا وقفت في طريقكم أنا ماشي راجل ولكن باش دربي كلشي في لحيط بحلا أنا ما كينش وديري لي قال ليك راصك أنا ما غتقلبهاش واش بنت ليك حماااار قدامك ؟

إسلام شدات إيدوا لمجروحة بين يديها لي كيترعدوا وهزات عينيها لي عامرين دموع شافت فيه وبشفايف كيرجفوا نطقات:

_يدك كدوز بدم أجي ندير ليك دواء

أركان جر إيدوا من وسط إيديها وقرب وجهوا من وجها حتى تخلطات أنفاسهم بصوت مجروح نطق:

_الغلاط ماشي ديالك إسلام حنت خدعتيتي ولكن الغلاط "وجه صبعوا لنفسو"ديالي أنا لي عطيتك فرصة باش ضحكي عليا كيف بغيتي

إسلام هزات إيديها بزواج حطاتهم على وجهوا ركزات بنضرها في عينيه ونطقات بتراجي :

_أنا ما عمري ما نويت نضحك عليك أركان كنحلف ليك عفاك غير سمعني

أركان وقف بجسد متصلب صبر راصوا باش ميضعافش قدام دموعها قاطعها بقوله بعدما بعد منها وخلاها مصدومة كترمش :

_على قبل سمعة ديالك لي ما فكراتيش فيها نتي، ملي غيكمل زوجنا عام "قلبوا خفق بشدة بزز منوا نطق لكلمة لي عمروا ما توقع غيخرجها من فموا زير على يديه وقال"غنطلقك نتي حرة أبنت ناس"بتحدير قال" ولكن ما حدك بقا تحت وصايتي و سميتي غديري داك شي لي كنقول ليك عليه وأخر مرة غتشوفي داك خونا "هز صبعوا في وجها "وإبتدأ من ليوم أي حاجة بغيتي ديرها حتى تشاوري معايا فيها ولا مشيتي حتى لا درتي شي حاجة من راصك غيكون ليا معاك تصرف أخر

إسلام تكونسات في بلاصتها ولات الأرض كدور بيها ما توقعاتش أنا مشيتها لعند سفيان غتكون غالطا لهد لحد وأركان ما غيبغيش يسمع ليها طاحت على ركابيها في الأرض مصدومة هزات راصها كتشوف فيه بتراجي وعينيها تيبريوا بدموع وديك كلمة طلاق فشلاتها...

أركان تجرح وقلبوا تقسم على زوج اول بنت بغاها من قلبوا وما خلا ما دار باش يرضيها دمراتوا وكرهاتوا في لحب وما يجي منوا طلعات كتبغي واحد اخر مشات تشوفوا بلا ما تهتم بيه ولا دير ليه حساب

أركان سرط ريقوا حتى تفاحة أدم تحركات في حلقوا؛ تما غادي ناحية لباب بكتاف طيحن وعروقوا بارزين دار لعندها قبل ما يخرج ونطق بهدوء عكس قبيلا :

_الألم هوا هديتك ليا إسلام وكنواعدك أنني غنحافض على أي هدية عطيتيها ليا مزيان

دخل لدار مع سبعة مساء عاد رجع من خدمتوا لقا ضوء طافي من غير تلفازة لي شاعلا تما دخل خلسة باغي يدير ليها مفاجئة أنه أول مرة يجي بكري من لخدمة حتى سدق هوا لي متفاجئ صدماتوا خرج عينيه حتى لبؤبئ لدخلاني وساع من تحت سنانوا نطق بغيض:

_أش كديري أمينة ؟!!

أمينة جالسا فوق زربية في الأحمر مقابلا مع لبلازما كتفرج في لمصارعة ومدورا بيها دوليوا "لي كيدار في لحنة"او ملمع الأحدية "سْيْراَجْ " و لقطران وطلاء الأضافر

سمعات هضرتوا وهيا تلفت جيهتوا ديخا وعينيها حمرين هازا بين يديها سباغا كتستنشق فيها ببرائة ردات:

_ما كندير والوا غير كنشم

كريم بعصبية نطق مزير على لحروف :تهزي حيدي عليا داك زبل من تم

أمينة خسرات سيفتها ونطقات:لاااا هيا لااااا وأصلا نتا علاش جيتي مزال لحال

كريم زير على يديه بتنهيدة طويلة قال:كنت جاي ندير ليك مفاجئة ونخرجك تعشاي برا ساعا صدقت أنا لي متفاجئ

قرب حدها تحنى لمستوها وبدا يجمع في داك شي من الأرض وهيا تمنعوا وبدات تضرب ليه في سدرواا بقوة وتردد:

_ولاااا خليني نتبواق لاااا سباغتي لاااا حرام عليك

كريم حمر فيها بعينيه وقال بصوت رجولي خشن :ولات عندي شمكارة في دار اش هاد لفعايل كديري باغا تولدي ليا شمكار "زاد قرب منها عاقد حجبانوا" أمينة ديري عقلك في راصك حسن ليك "بالفقصة ضحك " لعيالات كيتوحموا على لفواكه ولا كيتشهاو لماكلة ونتي بغا تبويقا

أمينة دلات شفتها لتحتانية ونطقات بتراجي: خليني نزيد غير شمة وحدة عفا خويييي الله يرضي عليك

كريم زير على فكوا وقال:انا ماشي خوك أبنت لعبد راجلك أنا ديري عقلك في راصك

أمينة خرجات تنهيدة من الأعماق ونطقات : وااااا عرفاااااك راجلي ما ديش عليا "هزات يديها بترجي "غير شمة وحدة عطيني اخر شمة عفاك

كريم ساط بجهد وقال:لا هاد شي ليا بقا نيت

جمع داك شي داه معاه لبيت وخلاها كتبكي وتحسر على حالها

أمينة بصوت باكي نطقات:حتى واحد ما كيحملني لا نتا ولا عمر ما فيكم فيدا أحياني عليكم الكفارة بالله "حركات راصها مكملا كلامها قالت"في صراحة ما كينش بحال خويا نورالدين كون كنت في جديدة وعرفني كنتوحم والله حتى يجيب ليا تبويقا لمخيرا ما يكبرها فيا

كريم خبا داك شي او وقف تيبدل في حويجوا من دخل غرفتوا جوبها:

_زمي عليا داك لفم حسن ليك باركا من دسارة ولا غنخوي ليك هاد لفردي في راصك

أمينة وقفات بلخف من الأرض ومشات لعندوا لبيت لاقاتوا بدل حويجوا لبس شورط أبيض مع تيشرت أسود قربات منوا وبدات ترمش ببرائة حلات شفايفها وبتراجي نطقات:

_نطلبك واحد طليبة وما تردهاش في وجهي الله يرحم ليك الواليدين

كريم بغمزة نطق معصب:اش بغيتي؟!!

أمينة جلسات حداه فوق سرير وقالت:حلف بالي ما غتردهاش ليا في وجهي عاد غنهضر

كريم كمش حجبانوا لوسط :عارف مزيان طلباتك كيف ديرين بغيتي تهضري مرحبا ما بغيتيش دبري لراصك نتي لخاسرة

أمينة بدات تدعي عليه داخلها بالعصاب بلعات ريقها و صغرات عينيها بتراجي نطقات:

عرفتي ديك لهضرة لي كتعير بيها لمجرمين في لحبس "حركات راصها "ملي ما كيبغيوش يعتارفوا ديك لهضرة لخيبة بزااف عيرني بيها الله يرحم لي قراك

كريم تهز كيضحك عليها من نيتوا حتى وجها حمار ما رداتش: ما نقدرش نعيرك مستحيل

جرها من يديها خشاها في حضنوا وقال:

كنبغيك بزااف أحياتي علاش غنعيرك

أمينة دموعها داروا خط على حناكها بصوت باكي قالت :

_هاد لوحم غيخرج ليا لعقل عفاك عيرني برجولة سبني وضربني شتف عليا كاع والله ما نهضر دير ليا بحال داك شي ديال المصارعة الله يسهل عليك الى ما ضربتينيش ما غنرتاحش

كريم :ما نقدرش نحط عليك يدي أبنت خالتي وزيدن نخاف نصفيها ليك دقة وحدة اتسيفطك الأخرة ديريكت

أمينة بعينين تيلمعوا نطقات:إيوااا خليني نضربك أنا"حركات راصها"هانيا ياك غير نتفك

كريم بقات فيه بقلة حيلة حرك راصوا بإجاب وهيا تلاح على شعروا جراتوا ليه من جدر حتى غوت وهيا بدات تضحك عاجبها لحال ببتسامة قالت:

_شكرااا

كريم رجع شعروا لور قادوا وقال:كاتفرنسي نتي لي جات معاك

خشا يديه تحت حويجها طلعهم حتى تبورشات وحط شفايفوا على شفايفها كيلتاهم فيهم بعنف وهيا مستاجبة معاه

أمينة بعدات منوا كتنهج ونطقات حدا فموا وعينيها في عينيه لمعسلين:

_ما غنخرجوش ؟!!

كريم بصوت مبحوح نطق بعدما دور إيدوا على خسرها جرها عندوا كتر :

_ما بقا فيا ما يخرج دابا

أمينة بعينين تيلمعوا قالت:فين خبيتي عليا صباغة ؟!

كريم خنزر فيها وقلبها تحتوا بالسرعة جا هوا فوق منها خشا راصوا في عنقها وقال:حنا ماشي في داك شي دابا

أمينة دفعاتوا وغوتات حدا ودنوا:و فيااا جووع بغيت ناكل يالله نخرجوا

كريم ساط بجهد وناض زاعف:تكَعدي لبسي حويجك وقسما بالله وديري ليا شوهة كيف لمرة لفايتا حتى نهارك ما غيطلع فيه شمس

أمينة ناضت كتنقز بالفرحة قالت:الله يرضي عليك أكريم كنبغيك بزاف

وقفا مقابلا مع ساعة كتحسب بتواني ودقيق فترة غيابوا من رياض...

مني خرج ما رجع بقات كمشي وتجي في لبيت ما جلساتش وكتعض في سبعانها من توتر بقا فيها لحال بزااف وندمات أشد ندم حنت مشات لعند سفيان...

جلسات في طرف سريرها تعبانة مربعة رجليها وبتوتر بدات تهضر مع نفسها ...

إسلام:أش هاد شي كوقع ليا علاش أنا ما عنديش زهر في لحب "بشفيف تيرجفوا نطقات" لا مستحيل نخليه يطلقني لااااا لااااا مستحيل ديري أي حاجة إسلام باش تنقدي زواجك ولا راجلك غيطير من بين يديك "طاحت دمعة سخونة جنب عينيها بحرقة قالت" حياتي كلها تقلبات ولي بغيتوا من كل قبلي فهمني غلاط علاش ديما كتسرع أ أركان وكتزرب ما كتسمعش ليا علااااش واش أنا درت شي غلطة في حياتي علاش ما نعيش مرتاحة كيف ناس أربي شوف من حالي راه عييت

بتنهيدة طويلة وقفات كتشوف في تليفونها راص كيقول ليها تاصلي بيه وراص اخر تيرفض بقات مداربا مع عقلها...

و بعد صراع طويل مع نفسها هزات تيلفونها صونات عليه وقلبها تيضرب بجهد بالخوف طفات عليه وكمشات حجبانها قالت:

_لا ما نعيطش ليه قبيلا دفعني على الحيط شويا ما يتهرس ليا سلسول ضهري وحتى دراعي زراقوا من جناب بسبابوا ما عرفت واش عندو يدين ولا حديدات اووووف اش غندير امم نعيط نسول ولي ليها ليها اش غنخسر أصلا عادي تشجعي إسلام تجشعي

رجعات تصلات بيه وحطات تيليفون على ودنيها كتسناه يجوب بعد لحضات قبل لخط بصوت رجولي خشن جوبها :

_ألوا

إسلام سرطات ريقها وبتسأل قالت:فينك واش ما غترجعش لدار

أركان بجدية نطق:عندي لخدمة أنا شاد طريق دابا قريب نوصل لكازا غنبقا هنا ختى نسالي ونجي

إسلام كمشات حجبانها بإزعاج :علاش ما ديتينيش معاك حرام عليك رجع عندي بغيت نمشي معاك

أركان زفر بجهد وقال:تصبحي على خير أحبيب"عض لسانوا ما بغاش يكمل لكلمة وطفا عليها خلاها مصدومة...

إسلام حطات إيدها تحت دقنها كتفكر ساطت بجهد ونطقات بحزن بعدما حطات تيلفون على سدرها فوق قلبها ...

_علاش كتهرب مني أركان واش أنا خيبا لهاد دراجة

قاطع تفكيرها صوت دقان في لباب مسحات دموعها بالخف و تقدمات بخطوات سريعة ناحيتوا فتحاتوا لقاتها نرجس هازا بين يديها تلاتة فساتين قصار تبسمات جنب وقالت:

_مرت خويا لعزيز صفا ؟

إسلام رسمات إبتسامة على محياها وقالت:

_لباس الحمد لله ونتي بيخير

نرجس كمشات حجبانها ونطقات بتسأل: مالكي واقعا شي حاجة كتباني ليا ماشي بيخير؟

إسلام حركات راصها بنفي وقالت:لا والوا ما كين حتى حاجة

نرجس بشك نطقات:كتبان فيك بحالا كنتي كتبكي !! إسلام واش تخاصمتي مع خويا ؟

إسلام بلعات ريقها بصعوبة و قالت:لا أنا وأركان علاقتنا مزيانة ما تخافيش"تبسمات جنب" إيوا دخلي غتبقاي واقفا عند لباب

نرجس صغرات عينيها وقالت بترجي: سمحي ليا حنت جيت لعندك في هاد لوقت مي أنا محتاجة مساعدتك ختاري ليا واحد من بين هادوا أنا بقيت حيرة ما عرفت إينا واحد نلبس بينهم وختي نجلاء ومروى مزال ما جاوو أما نقولها ليها هيا تعوني

إسلام حركات راصها وقالت:لا معليش هانيا أختي امم عطيني نشوف

شدات لفساتين بين يديها كتشوف فيهم عجبها واحد في الأسود مداتوا ليها

إسلام تبسمات بزز منها وردات :هادا غيجيك زوين بزاف

نرجس بفرحة عنقات إسلام و قالت:شكراا بزاف حنت عونتيني

إسلام بعدات منها وبتسأل نطقات:نرجس غاديا لشي حفلة ؟!!

نرجس دم تسحق من وجها تبسمات إبتسامة صفرة ونطقات بتردد: لا غير غنتعشى مع صحباتي عارضين عليا لواحد لمطعم

إسلام حطات إيديها على كتاف نرجس وقالت: بصحتكم، غير هوا رضي بالك منهم راه لوقت خيابت ما تشربيش اي حاجة عطوها ليك ،حضي راصك مزيان راه ما تعرفي ليام أش تجيب ليك

نرجس حركات راصها بإجاب وقالت :كوني هانيا انا حاضيا راصي تصبحي على خير اختي

إسلام ببتسامة نطقات :وأنتي من أهل لخير

يتبع...