زواج مبارك الجزء 16

مسرحا فوق سريرها دائري مقابلا سقف وتفكر ما جا في بالها غير ليلة عيد ميلاد نرجس، ديك ليلة لي كتعتابرها مشؤومة بالنسبة ليها حنت هيا نفس ليلة لي تفضحات فيها وكلشي عرفها على حقيقتها، ذكراتها بتفاصيل المملة وخسرات ملامحها ما عاجبها حال ...

كرشها واصلا لفمها ولي فيها ما مهنيها فاش سد عليها يوسف في لبيت ديالها بدات كتردع...

وليني غير خرجات لحياتها طبيعية رجعات لمؤمرات والألعيب ديولها بختصار رجعات نجلاء لقديمة و لي ما في قلبها لا رحمة ولا شفقة ...

بالحق لي فيه شي، فيه وخا لحبس ما يكَر فيه ...

فور ما طاحت عليها فكرة جلسات بسرعة راسمة إبتسامة ماكرة على محياها حطات إيديها على بطنها وبجدية نطقات:

_ولدي لحبيب شنوا رائيك نلعبوا شويا في دواء ديال جداتك"حطات إيديها على خدها ونطقات بمكر" خاصني نربيها على ديك تسرفيقة لي عطاتها ليا قدام لي يسوا ولي ميسواش امم نوض نمشيوا دابا لبيتها ...

حطات رجليها في الأرض مع غتنوض حسات بألم طفيف أسفل بطنها،دورات راصها فوق طبلة على إبريق لماء، لقاتوا خاوي تمشات ناحيتوا بزز ،والألم غادي وكيتزاد هزاتوا بين يديها و قالت:

_نزلوا نشربوا لماء اولدي أو من بعد نرجعوا نفدوا خطتنا وخا ...

تمشات بخطوات بطيئة ناحية لباب مكمشا حجبانها وصابرة كتقول مع راصها راه شويا ويفوت ...

تمات غاديا نازلا في دروج شادا من جنب ومكاليا ولات غاديا غير بزز ما حسات غير بالماء نازل مع رجليها والألم أصبح مضاعف بشكل قوي لا يطاق، وحبات ديول لعرق تكونوا في جبهتها ، لاحت الأبريق في الأرض حتى تشتت كلوا او بدات كتغوت على جهدهااا...

نجلاء وجها ولا حمر عضات إبهامها وما قدراتش تصبر:امممم عتقوووووووونييييييي

كانت واقفا في لمطبخ كتقشر في لبطاطس حتى سمعات صوت زاج كيتهرس قفزات من بلاصتها او مورها سمعات صرخة نجلاء في كل أرجاء رياض، صمكات ليها لودنين ...

إسلام خلات كلشي من يديها او خرجات كتجري لقات نجلاء وقفات في درجة ما قبلا الأخيرة لنزول كتبكي ولماء نازل مع رجليها..

إسلام شهقات بجهد ومدات ليها يديها : عطيني يدك أنجلاء وعنداك تعفسي على زاج ...

نجلاء دموع من عينيها نازلين شلال على خدودها بحرقة ردات :بعدددي مننننني ما تقيصنيش كنكرررهك بعدددي مننننني هئ هئ هئ ...

إسلام بلعات ريقها بتوتر وبخووف نطقات: واااقيلاااا قربتتتي تولدددي خليييني غير نعونننننك عفااااك ...

نجلاء زيرات على سنانها ولات كطلع نفس وترجعها غير بزز:نتي ما كتحملينيش وحتى واحد ما كيبغينييي،بعددددددي منيييييييي...قلت ليك بعددددي منيييي هئ هئ هئ...

إسلام بعصبية نطقات:حنا مااااشي في هااااد شي اجي نزلييييي وعنداك زاج كوني تسمعي انجلاء واجيييي لهناااااا ...

نجلاء بدات تبكي وتشهق و الألم لي تحتها ما خلاها تحرك :علااااش حتى حددد ما كيبغيني علاااااش، انا ماشي وحدة خيبة وما عمرني كنت باغا نكون هااااكا، علاااش ماما ماتت وخلاتني بووحدي و علااااش بابا تزوج وما بقاش داها فياااا علااااااش هئ هئ هئ ...وحتى ولدي بغااااو يحرمونييي منوااا هئ هئ هئ ...

إسلام نزلوا دموعها بلا ما تحس بعينين تيلمعوا نطقات بتوسل:عطيني إيدك وكنواعدك كلشي غنحلوه أنجلاء او ولدك غيبقا معاك هادا وعدددد مني غير اجييي عطيني يديك ...

نجلاء يالله بغات تمد إيدها وهيا تهبط راصها لرجليها بانوا ليها نقيطات ديول دم نازلين غير شافتهم ما عرفات باش تبلات وغوتات بكل قوتها:عتقييينيييييي أ بنت لحرااااااااام راه كنمووووووت هئ هئ هئ عتقييييينيييييي هئ هئ عيطي ليووسف دغيااااا...

إسلام بعصبية غوتات:بينما يوصل يوسف غتكوني ولدتي دابا راه خاصنا نمشيوا لسبيطار بزربة عطيني يديك وما تقصحيش راصك انجلاء سررربي دغيااااااا...

إسلام كتشوف في نجلاء كتقطع قدامها باغا تعاونها ولكن هيا مامسعداش راصها، شافت حتى عيات او عفسات فوق زاج ومع لابسا بانطفوا خفيفة بدات كتحس بزاج كيطلع مع كدامها عضات شفاه سفلية ديالها بألم، ودورات دراع نجلاء على عنقها، وإيدها دوراتها على بطنها من جناب او ولات ما حيلتها لتقل ما حيلتها رجليها لي بداو كيتجرحوا...

إسلام سمعات نجلاء قطعات لحس ؛بتراجي نطقات:تنفسييي مزياااان أنجلاء تنفسييي "غوتااات على جهدها بصوت باكي"لااااا حليييييي عينيك ما تسديهمش هئ هئ هئ عفااااك غير على قبل ولدك زيدي تحملي و صبررري ....

الله يسمح لينا من أمهاتنا...

بقات شادها بزز وعضا فمها من لداخل بسباب الألم من لجرح لي في رجليها وزاج لي طلع ليها فيهم، بخطوات بطيئة كتمشى جوج خطوات بزز ناحية لباب وتوقف تسارح ونفس لوقت كتبكي على نجلاء لي سدات عينيها ما بقات حلاتهم ...

إسلام وجها ولا حمر وبتنفس كيتقطع نطقات بصوت باكي:نجلااااء عفااااااك هئ هئ هئ حلييي عينيك الله يخليك حلييييي عينيك تحملي غير على قبل ولدك هئ هئ هئ ياربي يجي شي واحد يعوني ياربي وقف معانا...

مع هزات عينيها لسماء كدعي تفتح لباب غير شافتوا فرحات من قلبها وبترجي نطقات:

_خالتي شعيبية(الخادمة) اجي عندي عفاك

شعيبية لابسا جلابة واسعا عليها في الأخضر بسيطة وحاطا شحال على راصها وهزا صاشية فيها حويج لخدمة ،مع شافتهم فديك لحالة تصدمات حلات فمها وبتسأل نطقات:

_بنتي إسلام اشنوا واقع هنا ؟!!

إسلام بعينين تيلمعوا نطقات بشفايف تيرجفوا:

_ عونيني عفاك أخالتي عونيني نديوها لطموبيل ...

شعبية لاحت كلشي من يديهاومشات تجري شدات نجلاء من جنب الأخر ونطقات بتسأل :لالة نجلاء علاش سدات عينيها؟ واش قريبة تولد ؟ولكن انا لي عارفا انه مزال باقي ليها شهر على لولادة ؟!!

إسلام قلبها كيتقطع ماكتبغي تشوف حتى واحد كيتألم قدامها بتوسل نطقات بعصبية:

_ماشي وقت هاد لهضرة دابا عيطي ليا لعمي (السائق )بزربة يشغل لوطوا ...

شعبية زفرات بجهد :عمك أبنتي ما كينش طلبت منوا يجيبني لرياض عندكم هنا حنت شتاء كتصب وما لقيتش لمركوب، قال ليا راه مع لالة فريدة داها عند لالة لباتول ...

إسلام علماتها مروى سياقة وليني مني خدات لبيرمي ما ساقت بوحدها مزال عندها تخوف زيرات على سنانها وبقلة حيلة نطقات:

_أوووف مصيبة هادي اجي نحطوها هنا انا غندخل نجيب شوية لما نكبوا عليها على الله تفيق ونتي طلعي لجناح ديالي جيبي ليا لكونطاك ديال طموبيلت أركان ودغيا عفاك وعنداك تعفسي على زاج ...

شعبية حركات راصها بإجاب:وخا ابنتي

حطوا نجلاء فوق لفوطاي لي قريب لباب، إسلام هزات تيلفونها ودخلات لكوزينة كتعرج دوزات راقم ديال أركان ومن بعدوا يوسف صونات عليهم حتى عيات ما جوبوهاش ...

خشات تيليفون في جيب لبيجامة لي لابسا وهزات كاس عمرتوا بالماء وخرجات كتجري كبات شوية منوا في يديها بدات كترش على وجه نجلاء ؛وبتوسل بدات تبكي وتقول:

_حلييي عينيك عفاك حليهم

نجلاء رمشات بشوي مع بدات كتحل عينيها بدات كتحس بالألم قوي تحتها زيرات على يديها وعلى جهدها غواتات:عتقووووني كنموووووت هئ هئ هئ عتقينييييي

إسلام تلاحت عليها عنقتها وقالت:الحمد لله الحمد لله ياربي مزيان ملي حليتي عينيك

نزلات شعبية كتجري، تعاونوا على نجلاء هزوها بزوجات للوطوا ديال أركان وهيا كتبكي وتغوت لي لربي لي خلقها ما صبراش

إسلام دورات ساروات في لوطوا شغلتها وبتوسل نطقات:ياربي تعوني ياربي تكون معانا ياربي ما تخلاش عليا ...

نجلاء موسدا رجلين شعبية ومزيرا على يديها ولات تخرج ودخل في لهضرة :هئ هئ هئ سيري دغيا ديني لشي لكلينك ابنت لحرااام باغا تخليني نموت هنا هئ هئ هئ ما بغيتش نموت لاااااا هئ هئ هئ لااااا ما بغيتش نموووووت لاااااااا ...

إسلام خدات نفس طويل حولات تغلب على مخوفها وحطات رجلها على لكسراتور حسات بضوء ضربها بسباب زاج لي عالق في رجليها صبرات راصها وساقت بزز تم خدامات سويكلاص حنت شتاء كتصب بعدات من رياض تمات غاديا بشويا وصرخات نجلاء لعالية خلوها تزيد في سرعة بلا ما تحس ،بترجي قالت :

_غير صبري نتي ما غتموتيش زيدي صبري انجلاء"خاطبت شعيبية"خالتي واش كتعرفي تخدمي تليفون نعطيك تشوفي ليا أقرب كلينيك حنت انا سيقا ما غنقدرش ...

شعيبية تنهدات بضيق :لا ابنتي ما كنعرفش ليه"بخوف"حاولي تزربي ابنتي راه غتبدا تولد "نزلات راصها لعند نجلاء"تنفسي مزيان لالة نجلاء تنفسي مزيان...

نجلاء بدات كتنتف في شعرها:هممممممم أ مممممم عتقووووووونيييي هئ هئ هئ بغيت غير نموت عيييت عيييت اووف اوووف اوووف اوووف ...

شعيبية بدات تمسح ليها في جبهتها:اه هكاك كملي هكاك تنفسي مزيان...

بقات كتسول في طريق حتى نعتوا ليها الأقرب كلينك وقفات قداموا،دخلات كتعرج...

فور ما طلبات لمساعدة خرجوا كيجريوا هزوا نجلاء دخلوها نيشان لغرفة توليد أما إسلام طاحت في الأرض بدات تبكي ودم عالق في يديها هزات يديها لسماء وبتوسل نطقات:

_ياربي تكون معاها ياربي تعونها وتفك وحيلها على خير ياربي ...

شعيبية بتفائل نطقات :ما تبكيش ابنتي ما غيوقع ليها ولوا كلنا ولدنا وها حنا بيخير عيطي لشي واحد من لعائلة أبنتي علميه...

إسلام هزات عينيها لي عامرين بدموع في شعيبية وقالت:عيطت ليهم حتى واحد ما جوبني يوسف في جتماع والحاجة ما بغيتش نخلعها "حركات راصها "سيري نتي لرياض جمعي ديك روينة لا يتجرح شي حد ولي جا علميه بلي وقع ليووم ...

الشعيبية حركات راصها:وخا ابنتي ولكن نتي رجليك كيدوزوا بدم قولي لشي طبيب يجي يدير ليك دواء ...

إسلام كمشات حجبانها بألم وبصوت مخنوق ردات :خليك مني انا أخالتي وسيري ديري لي قلت ليك عليه اه الى باغا يجي شي حد هنا رسلي معاه حويج نجلاء حنت غادي تحتاجهم ...

شعيبية حركات راصها بإجاب :صافي انا غادا ردي لبال لراصك ...

إسلام سمعات صوت تليفونها كيصوني قفزنها جبداتوا بزربة جوبات :

_ألوا

أركان بصوتوا رجولي المميز نطق:ألوا حبيبة توحشتيني دغيا همم ...

إسلام بصوت باكي نطقات:أركان هئ هئ أجي عندي عفاك أنا في لكلينيك ...

أركان قلبوا تهز زير على يديه وبخوف غوت: اشنوا واقع ؟واش واقعا ليك شي حاجة أحبيبة ؟عطيني اسم لكلينيك غنجي عندك دابا ...

إسلام بحزن:لا ما تخافش عليا انا بيخير نجلاء لي جاها لوجع مسكينة وجبتها لكلينيك سميتوا كلينيك المدينة راه خديت لوطوا ديالك ..

أركان تنهد براحة : وخا انا جاي دابا عندك ، غير تهدني ما غيوقع ليها والوا...

قطعات معاه الإتصال وشدات من رجليها بدات كتحيد في زاج قطعة بقطعة حتى وقفات عليها إحدى الممرضات:

_مدام ممكن تجي معايا نعقم ليك لجرح ؟

إسلام حركات راصها بنفي:لا اختي ما بغيتش

الممرضة:ما يمكنش هاكا غتبقاي تنزفي اجي معايا بغيت غير نعونك ،بزربة غنساليوا

إسلام شارت لغرفة لولادة: ايمتا غيساليوا لدخل ما غنقدرش نمشي معاك ونخليها..

الممرضة عينيها على لجرح:ما عرفتش امدام مزال عاد دخلوها بينما عقمت ليك لجرح غيكونوا مزال ما سالاوا ،أجي معايا الله يخليك ...

إسلام تنهدات بضيق:وخا

جالسا قدام غرفة لولادة ،حاطا راصها بين يديها وتخمم في داك شي لي وقع ليوم كلوا كان غريب عليها وصعيب في نفس لوقت ما عمرها ما توقعات انها غتحط في موقف بحال هاذا وتحاول تنقض حياة إنسانة لي كتكرها وما عمرها ما بغاتها ولا تعاملت معاها مزيان ...

جالسا ساهية ما حسات غير يدين عنقوها على غفلة من ريحتوا عرفاتوا، هزات راصها بشوي جاو عينيها في عينيه وهوما يرجعوا يعمروا عينيها بدموع وبغصة خانقاها نطقات:

_أركان

وتخشات في حضنوا كتبكي وتشهق ما مسدقاش شنوا وقع ...

أركان طبطب بيدوا على ضهرها وزفر بجهد وقال:ششش ما غيوقع والوا تهدني ...

إسلام بصوت باكي: بقات فيا بزاف قطعات لي قلبي كانت كتبكي وتألم بلا قياس ..

أركان حرك راصوا:ما تخافش غتولي بيخير هاد شي عادي "بتسأل"عيطتي لختها تجي..

إسلام مع هزات راصها غتجوبوا شافت مروى وعائلة راضي كاملين بملامح ممحية وقفوا عند راصهم...

مروى هازا صاك فيه حويج ختها، بفرحة نطقات:أمدرا نجلاء ولدات ولا باقا؟!

إسلام هزات راصها:مزال ما خرج دكتور

الحاجة خديجة:الله يفك وحيلها على خير وخا ولدات بكري ...

يوسف عوامل لحيرة وتوتر ولخوف كلهم ضهروا على ملامح وجهوا ،جمع يديه عندوا وبدون ما ينطق بكلمة وقف بعيد عليهم كيدعي دخلوا...

لالة فريدة كمشات حجبانها:إسلام شفتك جايا بيجامتك لكلينيك "شهقت بجهد"مالك في رجليك؟

إسلام بصوت مبحوح بالبكا :ما كانش عندي لوقت باش نبدل أخالتي كان خاصني نجيب نجلاء لكلينيك بزربة ...

أركان قشر فموا من لداخل بعصبية،نزل عينوا لرجلين إسلام لي كلهم فاصمات فتح فموا غيهضر ويسولها او هوا يقاطعوا لباب..

تحل لباب غرفة لعمليات خرج دكتور مبلامح أسى على وجهوا توجهات لعندوا إسلام هيا ومروى وقفوا قداموا هزوا فيه عويناتهم لي كلهم تفائل وأمل ...

مروى ببتسامة عريضة نطقات:شنوا ولدات ولاد ولا بنت ؟!!

دكتور بتنهيدة قال:نضرا الأنها ولادات مبكرا الطفلة غتبقا واحد لمدة في الحاضنة عندنا هنا حتى نطمنوا على صحتها بشكل كامل ...

إسلام بشفايف كيرجفوا نطقات:أوو نجلاء كيف بقات ؟!!

الدكتور بملامح ممحية:السيدة جاها نزيف حاد ودرنا لي في جهدنا و للأسف ما قدرناش نوقفوه حنت تعطلت باش تجي عندنا ، يمكن ليكم دخلوا توادعوا معاها..

مروى حسات بالأرض مشات وجات بيها، ما سدقاتش و بصدمة ضحكات :لا دكتور لا عفاك دير شي حاجة ختي أنا ما يمكنش تموت اكيد كضحك ...

خرجات لممرضة من غرفة نجلاء قاطعتهم:المدام بغات تشوف سي أركان وسي يوسف ومدام إسلام او مروى هادوا يدخلوا عندها دابا إلى ممكن ...

شافوا في بعضياتهم مبهوضين وبدون ما ينطقوا كلمة وحدة دخلوا كاملين عندها وسدوا لباب ...

نجلاء ممدودة فوق لبياص مغطية باليزار أبيض دموعها نازلين على خدودها ،وكتشوف في سقف ،فور ما تفتح لباب نزلات عينيها لعندهم شافت فيه مطولا ،هزات يديها بشوي مسحات دموعها وبنبرة صوت حزينة نطقات الأول مرة :

_يمكن هادي هيا نهاية ديالي اجيوا قربوا عندي "حركات راصها "خصوصا نتي إسلام أجي عندي ...

إسلام شافت في أركان وببتسامة مسطنعة قربات منها:نجلاء مبروك عليك تزادت عندك بنيتة..

نجلاء بوجه أصفر :اه عرفت راه شفتها "طلعات نفس غير بزز"الله يبارك فيك أختي ولكن خسارة ما غنربيهاش وما غنكونش معاها ملي تكبر "بغصة خانقاها"وما غنسمعش كلمة ماما من فمها حنت غنموت..

إسلام حبسات لبكية بزز وقالت:لا يصيبنا إلى ما كتبه الله لنا ما تبقيش تقولي هاد لهضرة عفاك ...

نجلاء بتوسل:إسلام سمحي ليا وخا انا عارفة ان كلمة سمحي ليا قليلة في حقك مقارنة بداك لعداب لي دزوت عليك انا ما عمري خليت لحضة و إلى وهنتك فيها ونقصت من قيمتك وضحكت عليك وسبيتك، وبالمقابل نتي أشنوا درتي!! عفستي على زاج باش تنقديني خاطرتي براصك باش تعتقي ليا بنتي، وخا أنا ما كنستاهلش "بحرقة نطقات" اه ما كنستاهل حتى حد يبغيني أنا ديرا بحال شي لعنة ولي قربات منوا كتضمروا"وجهات كلامها ل يوسف" سمح ليا نتا تزوجي بمرا ما كتستاهلكش ما عمرني ما بغيتك انا كنت طامعا غير في لفلوس وتروة والإسم والجاه لا غير هههه بغيت نولد ولد باش يولي كلشي ديالي ...

يوسف قرب منها ونطق بحزن:شش ما تقولي والوا دابا

نجلاء بدات كتبكي من قلبها وتنفسها كيتقطع:لا ما تقطعنيش خليني نهضر بغيت نقول كلشي، مروى ختي صغيرة لي كان خاصني نحميها ونكون في جنبها ،في لوقت لي غدرنا فيه بابا وتزوج وخلانا، أنا طعنتها ،اه طعنتها في ضهرها وخديت ليها راجل لي كتبغي أنا غير سراقة وخائنة أ يوسف انا خديتك من يديها هيا لي كتستاهلك ماشي انا ...

مروى ترمات في حضن ختها بدات تبكي وتشهق:لا نتي ما درتي والوا انا لي خنتك أختي هئ لي خاصها تعاقب هيا انا هئ هئ انا لي خاصني نكون في بلاصتك دابا ماشي نتي انا لي خاصني نموووت ...

نجلاء دوزت بيديها على شعر ختها بحنان: الله يطول في عمرك أحبيبتي، ملي نموت تزوجي بيوسف نتي خاصك تفرحي وتعيشي حياتك كيف بغيتي وانا هيا لعقبة لي في طريقك غير نحيد حقي أحلامك وخا ...

أركان و إسلام شافوا في بعضياتهم بعدم فهم مصدومين ...

نجلاء بعينين تيلمعوا:شكرااا بزاف إسلام حنت جبتيني لكلينيك وسمحي ليا على كلشي كنت ديما كنحاول ناديك بأي طريقة "تنهدات بضيق"للأسف فهمت هاد شي معطلة ...

إسلام قبطات في إيد نجلاء:هاد واجب أنا درت غير واجبي أنجلاء وما كينش لاش تشكريني ولا طلبي سماحة لي فات مات وحنا بنات ليوم خاصنا نفرحوا تزادت عندنا أميرة في عائلة راضي ...

نجلاء بتسمات إبتسامة بريئة زينات ملامحها والأول مرة تضهر على وجها بحال هاد الإبتسامة ؛بصوت هادئ نطقات :وليوم وأنا على فراش لموت بغيت نطلب منك اخر طلب ..

إسلام بصوت باكي:لا نتي ما غتموتيش لاااا

نجلاء بلعات ريقها بصعوبة:بنتي بغيتك تربيها نتي بغيتها تكون بحالك مربية ومخلقة، وقلبها كبير وكتساعد بدون مقابل ما بغيتهاش تخرج ليا نهائيا ما بغيتهاش تكون أنانية بحالي وتبغي غير نفسها وتفضل مصلحتها على لغير ما بغيتهاش تكون حقودة وقلبها كحل ..

واعديني باش تكون بنتي هيا بنتك ..

إسلام حركات راصها بنفي ودموع على خدودها نازلين شلال :لا نتي غاتصحي و غنربوها أنا وياك بزوج رتاحي باش تقدري توقفي على رجليك..

نجلاء مدات إيدها لي كترجف لعند إسلام بلعات ريقها وبصوت ضعيف نطقات بتوسل:لا إسلام انا لي حاسا براصي واعديني عفاك واعديني ...

إسلام حطات إيديها ليمنى فوق إيد نجلاء و بصوت باكي نطقات بحرقة:كنواعدك انني غنربي بنتك احسن تربية وغتكون هيا بنتي ..

نجلاء فمها بياض وعينيها تسدوا او وحلاتهم بزز تبسمات جنب وبترجي نطقات: خويا أركان سمح ليا ما خليت ما درت باش نزوجك مروى بزز وبالمقابل نتا كنتي كتسمح ليا وكتسكت على قبل يوسف ،بغيت نموت مرتاحة اي واحد غلطت في حقوا قولوا ليه يسمح ليا عفاكم...

أركان حرك راصوا وقال بصوت رجولي خشن : ما وقع والوا أنجلاء المسامح كريم حنا كلنا مجرد بشر وكنغلطوا ...

نجلاء بداو عينيها كيتسدوا وكتحلهم بزز وتنفسها ما بقاش مقاد ومروى كارزا عليها وتبكي في حضنها ،أركان بانت ليه حرارة لموت داخلاها قرب منها هز ليها سبابة وقال:ختي شاهدي!! شاهدي انجلاء..

فور ما شافتوا إسلام حطات إيديها فمها وبدات تبكي بجهد ومروى هزات راصها من حضن ختها مصدومة بدات تغوت: لا لا لا ختي ما غتموتش لا نجلاء غتبقا معايا ومع بنتها ختي غتبقا معانا كاملين ...

أركان بعصبية نطق:يوسف بعد مروى بزربة...

يوسف حرك راصوا بإجاب وشد مروى لي بقات كتفركل وتغوت ...

نجلاء سدرها ولا كيطلع وينزل ،حلات فمها بشوي وبتتاقل نطقات :أشهد ان لا إله إلا الله وأشهد أن محمد رسول الله " هبطات نفس ما عوداتش طلعاتوا"

أركان سد ليها عينيها وغطاها وبتنهيدة قال: لا إله إلى الله أنتم سابقون ونحن اللاحقون...

إسلام ما تحماتش داك لمنضر قدامها وطاحت في الأرض مغمى عليها أما مروى بدات كدرب في راصها وتقمش في وجها وتغوت لربي لي خلقها :

_خليتيني ومشيتي أختي وعلامن غنحط راصي مشيتي عند ماما هئ هئ هئ خليتي بنتك يتيمة كيفما انا دابا يتيمة لمن خليتينا لمن هئ هئ هئ حرام عليك ...

وقفات كتجري مسحات عينيها و عرات وجه ختها وبترجي قالت:

_ نجلاء ختي حلي عينيك وكنوعدك غنديك فرانسا تعالجي وتكبري بنتك على يديك غنوقف معاك حتى تبدلي غير حلي عينيك "بدات تبكي وضحك بهستيرية "عرفاك كتفلاي عليا همم باغا تلعبي معايا باش نتشطن عليك وحلي عينيك دغيا ما تعصبينيش نتي ما كيجيش معاك تكوني ناعسا فيقي وخودي يوسف أنا غنصالحكم وهادا وعد مني غير فيقي ..

على إتر صوتهم لعالي دخلات لالة فريدة والباقين لاقاو أركان هاز إسلام بين يدوا كيحاول يفيق فيها ومروى كتبكي وتغوت اما يوسف خرج يقلب على بنتوا يشوفها في الحاضنة و قلبوا مكسور...

فريدة عنقات مروى و بصوت حزين نطقات:ختك ماتت أبنتي نجلاء ماتت الله يرحمها دعي معاها ...

مروى بغات تسطى بجنون بدات تنتف في راصها :لااااااا ماااا ماتتش لااااااا ماااااتكدبيش عليييييااااا لااااااا "بدات كضرب في فخاضها"علااااااش خليتينيييييي علاااااااش أختييي علااااااش هئ هئ هئ نجلاااااااء لمن خلتينييييييي ...

_كل نفس دائقة الموت..

وسط لمراح مربعة رجليها قدام طابلا دائرية مصنوعة من لخشب محطوط فوقها لقمح "زرع" جالسا كتنقي فيه لابسا بيجامة مقطنة وطويلة كتناسب سنها وفوقها حاطا كاب سخون مع شال غليض فوق راصها ،أوفي فمها غير ذكر الله

رحمة تبسمت جنب :الله أكبر،أستغفر الله العلي العضيم واتوب إليه عدد خلقه ورضا نفسه وزينة عرشه ومداد كلماته ...

ساهية كذكر الله حتى قفزها صوت تيلفونها كيصوني من صالون دورات راصها في كل جويه وقالت:

_توبةااا بنتي آري ليا تيليفون من شارج وشوفي شكون كيصوني ؟

توبة من لمطبخ ردات معليا صوتها:كنغسل لماعن أماما راهوا أمير كيحفض حداك قولي ليه يمدوا ليك ...

رحمة هزات راصها:وليدي ارا ليا تيليفون الله يرضي عليك ...

أمير ناض بزربة وبصوت طفولي نطق:وخا الميمة ...

دخل لصالون حيد تيليفون من شارج ... وشارجور من ضوء وبعوينات كيلمعوا تهجئ الإسم لي كان مكتوب بالعربية وبالفرحة بدا ينقز ويقول بعدما مد تيلي لجداتوا:

_خالتي إسلام خالتي خالتي ههههه

لالةرحمة من دكر إسم بنتها ،ترسمات إبتسامة على محياها بسرعة خدات من عندوا تيليفون وبالخف قبلات لخط وقالت بفرحة:

_الوا بنتي

إسلام بصوت مخنوق بالبكاء :ألوا ماما

لالة رحمة تغيروا ملامحها ،بخوف نطقات: مالك أبنتي علاش كتبكي ؟

إسلام بشهقة : ماما هئ نجلاء هئ هئ هئ

لالة رحمة كمشات حجبانها وبتسأل نطقات: يكما درات ليك شي حاجة ؟

إسلام بصوت متألم ردات: لا أماما ما دارت ليا والوا مسكينة ..

رحمة رفعات حجبانها مخلوعة:ومالها ؟

إسلام نهارت بالبكاء:ماتت هئ هئ هئ

رحمة لحمها بورش، بصدمة وقفات حاطا يدها على قلبها، بعدما ساست لقمح من فوق رجليها ،قالت:لاإله إلى الله ،كيفاش حتى ماتت أبنتي ؟

إسلام بدموع :ولدات وماتت هئ هئ خلات بنتها يتيمة أماما بنتها صغيورة خلاتها ومشات عند الله ..

رحمة عينيها عمروا بدموع ،تنهدات بضيق وبقلة حيلة نطقات: الله يرحمها مزال صغيرة مسكينة ،هادا هوا حال دنيا أبنتي حتى واحد ما غيبقا فيها، كُلاَ واحد غيدوز ساعتوا ويدوز ،غير صبر انا غنلبس عليا ونجي عندكم انا وختك دابا ...

إسلام بصوت ضعيف:وخا الله يوصلكم على خير ...

رحمة بتنهيدة طويلة طفات تيلي وقالت لتوبة لي كانت واقفا قدامها كتسنط وما فهمات والوا ...

_ هاد دنيا غريبة

توبة كتمسح إيدها من لماء بفوطة بتسأل نطقات:ماما شكون مات ؟

رحمة مسحات عينيها بشالها وبصوت باكي ردات: مرت لوس ختك أبنتي ،نجلاء

توبة حطات إيديها على فمها ما مسدقاش:نجلاء !! اويلي واش نجلاء نجلاء مرت يوسف ..

رحمة بتنهيدة طويلة :اه ابنتي هيا الله يرحمها ولدات وماتت ،مدي ليا جلابتي ولبسي عليك نتي وأمير ويالله نمشيوا لرياض خاصنا نوقفوا معاهم في هاد لمحنة ..

توبة حركات راصها مصدومة ودموعها علين ينزلوا: وخا اماما صبري نعيط ل أمينة راه جات لبارح بالليل لدارهم لا بغات تمشي معانا تعزي هيا وخالتي سعاد ...

رحمة جلسات فوق سداري كترعد:وخا ابنتي غير سربي ومدي ليا شي كاس ديال لماء معاك، راه ما بقيت قادا نوقف على رجليا

توبة بصوت باكي: وخا وخا هيا لولة

مدات كاس ديال الماء لالة رحمة ودوزات الأبيل ل أمينة وفور ما تقبل لخط نطقات :

_ألوا أمينة

أمينة بصوت مبحوح بنعاس:لخوادرية صافا كنت ناعسا وفيقتيني اش بغيتي عندي

توبة ساطت بجهد وبشفايف تيرجفوا بنطقات :نجلاء ماتت ليوم

أمينة بصدمة جلسات :اويلي على نجلاء ماتت !! كضحكي معايا هههه لا ما كنضنش هاديك عندها سبع رواح ...

توبة بحزن:لا أختي راها ماتت الله يرحمها في لولادة

أمينة بدات تضحك :ويلي نجلاء ؟!! نجلاء ماتت !! خاصنا نديروا زردة ههههه

توبة كمشات حجبانها ما عاجبها حال:حشومة أمينة، دعي معاها برحمة لموت ما فيهاش ضحك ...

أمينة جمعات فمها وقالت بتنهيدة: غير سمحي ليا راه ما تقتش داك شي علاش ضحكت ...

توبة زفرات بجهد:اودي بقات فيا غير ديك سلخة لي عطيناها ليها محالش تسامح لينا غدا امام الله "تنهدات بضيق"بقا فيا لحال ما طلبتش منها سماحة قبل ما تموت ...

أمينة بعدم إهتمام ردات:و راه كانت كتستاهل تاكلها هيا لي دارت علاش ملي شوهات إسلام قدام لعائلة ...

توبة مسحات عينيها وبحزن نطقات :خلينا من هاد شي دابا وقولي ليا الى كنتي باغا تمشي تعزي نتي وخالتي سعاد وتوقفي مع صحيبتك لبسوا حويجكم بزربة ندوزوا عليكم أنا وماما ،راك عارفا إسلام ماكتصبرش في بحال هاد شي ديال موت ...

أمينة بتأيدد ردات: اه باغا نمشي انلبس دابا ونقولها لواليدة حتى هيا توجد راصها، انتلاقاو بسلامة "طفات تيلي وحركات راصها مبهوضة ما مسدقاش " إيوا تعيش نهار تسمع خبار...

متكيا في فرشها ورموشها وحنيكاتها فازكين بدموع كتشوف في سقف وعقلها كلوا مع لحضة موت نجلاء ،فور ما جات في بالها مروى جلسات بزربة ومع حاولت تنوض لقاتوا واقف عند راصها حبسها ورجع جلسها في مكانها...

إسلام بصوت مبحوح بالبكاء:ءء شنوا كدير خليني نمشي عند مروى غتكون محتاجاني مسكينة ماشي ساهل تخسر ختها لوحيدة

أركان حيد إيدوا من على كتافها وهز ليها رجليها فوق سرير: نبدل ليك لبنصمون ونحط ليك دواء وسيري ...

إسلام وجها حمر بالبكاء حركات راصها بشوي وبصوت حزين نطقات:لا بلاش غير خليني نمشي نشوفها أنا بيخير نقدر نتمشى ...

أركان مدهاش فيها ،فتح علبة الإسعافات الأولية خدا منها فاصمة وبيتادين ولقطن وجلس حدا رجليها بدا كيحيد ليها في لفاصما ؛و بصوت رجولي خشن نطق: صحتك هيا لولة هاد شي ما غياخدش وقت نسالي وسيري فين بغيتي وزيدن مروى ماشي بحدها معها الحاجة والوليدة غير تهناي ...

إسلام كمشات حجبانها بألم ملي حط لقطن فيه دواء فوق كدمها،بتسأل نطقات: دفنتوا نجلاء ولا باقين ...

أركان هز عينوا فيها وقال:مزال حتى يساليوا الإجرائات المستشفى ونبداو مراسم دفن ...

إسلام بلا ما تحس نزلوا دموعها :الله يرحمها خلات بنتها محتاجة ليها ومشات ...

أركان ما عجبوا حال حنت ما كيبغيش يشوف دموعها،بصوت رجولي مبحوح نطق: شش كنا ليها أحبيبة و بنت نجلاء غنربيوها كاملين "حط إيدوا على خدها"غتكوني أحسن أم ليها هيا ماشي يتيمة وعندها عائلة

إسلام بحرقة ردات: بقا صورتها بين عيني وهيا كتموت ما صبرتش ليها هئ هئ بقات فيا بزاف ...

أركان قاد ليها لفاصمة وجمع علبة الإسعافات، تم جا من وراها عنقها :دعي معها برحمة

إسلام دورات راصها لعندوا وبصوت باكي نطقات :انا خيفا بزاف لا ما نكونش قد لوعد لي عطيت لنجلاء ...

أركان مسح ليها دموعها وقال:لا ما تقوليش هكاك نتي غتربيها أحسن تربية "دور دراعوا على خصرها جرها لعندوا كتر "

إسلام حطات إيديها على يديه فوق بطنها وضهرها محطوط فوق سدروا لعريض، غمضات عينيها عاطيا لعنان لدموعها،بصوت مخنوق قالت:

_لموت خيبا بزاف خدات مني بابا ملي كانت عندي عامين حرماتني من حنانوا او وجودوا في حياتي "تبسمات فوق حزنها" كنت كنشوف لولاد كيمشيوا لمدرسة مع أبائهم وأنا كانت كتمشي معايا ماما الله يخليها ليا صعيبة تكون يتيم في هاد دنيا لقاصية ...

أركان ساط بجهد،خلاها تخرج ما في قلبها وبصوت هادئ نطق :ربما فيها خير أحبيبة وعسا أن تكرهوا شيء وهوا خير لكم وعسا أن تحبوا شيئا وهوا شرا لكم، الله ملي كياخد منا شي حاجة كيقدم لينا أشياء كتيرة مكانها داك شي علاش خاصنا نحمدوه ونشكروه على جميع نعم ...

إسلام تنهدات بضيق:الحمد لله على كل حال "مسحات دموعها بطرف كمها"نمشي نشوف مروى وعفاك ملي تبغي تمشي لسبيطار عند يوسف ديني معاك بغيت نشوف لبنيتة ...

أركان حرك راصوا بصوت رجولي خشن قال: سيري شوفي مروى وأنا غنبدل حويج رياضة ونمشيوا ومتبقايش تبكي ..

إسلام وقفات بشوي خشات رجليها في بانطفتوا واسعة وكبر منها، ما ضرهاش في رجليها،دارت لعندوا شافت فيه وقالت:وخا ولكن انحاول ...

أركان تبسم جنب: الله يرضي عليك لبكا ماعندوا فاش غينفع و ما غيرجعش لينا ناس لي خسرناهم إلى بقيتي كتبكي غير غتزيدي تعدبيهم كتر ،طلبي ليه رحمة حسن ...

إسلام حركات راصها بإجاب:الله يرحمهم

دارت عاطياه بضهر وهوا يوقفها بالكلمة لي نطق ولي نابعة من قلبوا "كنبغيك"

إسلام مسحات دموعها و دارت لعندوا،بعينين تيلمعوا ردات :حتى أنا كنبغيك ...

خرجات متوجهة نيشان لغرفة مروى لي مليانة ضجة وبكاء من لقلب ...

مروى واقفا وهازا بين يديها ساك فيه حويج ختها وفريدة شادا ليها من جهة الأخرى كتجر فيه ...

أما لحاجة بقات واقفا بعيدة في لقنت بقات كتبكي وتحسر على حالة مروى ...

مروى حالتها تشفي لعدا بدموع كتغوت: بعدوا مني خلوني نمشي عند ختي علاش حبستوني هنا هئ هئ هئ هيا ولدات وخاصها تلبس حويجها هئ حرام عليكم بعدوا مني ...

فريدة عينيها عامرين دموع بكاتها مروى، ساطت بجهد :ختك ماتت أبنتي حاولي تقبلي لموضوع وزيدن راه كلنا غنموتوا شي نهار

مروى حركات راصها بنفي:لا اخالتي لا هيا ما ماتتش علاش كتكدبوي عليا هئ هئ هئ نجلاء غير ناعسا ما يمكنش تمشي تخليني بحال ماما لاااااا ما يمكنش ...

إسلام قربات منهم قبطات في إيد مروى وهيا تخطف إيدها وعنقات ساك عندها وبترجي نطقات:ديول ختي هاد لحويج ما تاخديهمش ليا عفاك هئ هئ هئ

إسلام حركات شفارها بطمئنان وبهدوء نطقات: لا حويج نجلاء ما نقربش ليهم ولكن بغيتك تسمعي ليا، ياك انا بحال ختك ؟!!

مروى حركات راصها بإجاب بحال طفلة صغيرة ...

إسلام دكرت كلام أركان و بالحرف واحد قالتوا لمروى :لبكا ماعندوا فاش غينفع واش بغيتي تبقاي تعدبي في نجلاء وما ترتاحش في قبرها ...

مروى جلسات على ركابيها في الأرض نهارت بالبكاء بدات كضرب في فخاضها: لا ما بغيتش ما بغيتهاش تعدب يكفي لعداب ولحرمان لي عاشتوا مع بابا ...

إسلام نزلات لمستاوها:هكاك مزيان ودابا الله يرضي عليك مسحي دموعك ودعي معاها بالرحمة وصدقي على روحها راه هاد شي لي غينفها دابا ولي كطلبوا هيا منك "هزات يديها مسحات لمروى دموعها وقالت" وماتنسايش راه وخا مشات خلات لينا ملاك صغير نعتانيوا فيها وغيدكرنا بيها حتى نموتوا حنا ونلحقوا عليها ...

مروى عنقات إسلام وبصوت باكي نطقات: شكرا ما عرفتش بلا بيك شنوا كنت غندير ...

إسلام تبسمات فوق خاطرها أو وقفات:ما درت والوا اختي غير ما تبقايش تبكي وخا "شافت في لحاجة "غنمشي مع أركان لسبيطار ...

الحاجة خديجة حركات راصها وقالت :سيري أبنتي وحنا غنزلوا لدار لتحت باش نستقبلوا لعزاية لي غيجيوا ...

فور ما خرجات إسلام من لغرفة توجهات لجناحها لخاص لقات أركان بدل حويجوا وكيتسناها تبسمات ليه ودخلات للحمام غسلات وجها أو لبسات عباية الصلاة فوق بيجامتها وحطات شال فوق راصها وخرجوا ...

حاط جبهتوا على زاج ماقبل بنتوا من بعيد كيشوف فيها ويتحسر ،ندم أشد ندم على لعقاب لي عاقب بيه نجلاء وأكبر حاجة بقات كتألموا من لداخل هيا خيانتوا ليها مع ختها، رغم أنه كيبغيها من أعماق قلبوا، ماعرفش كيفاش حتى قدر يخونها وهوا تحت تأتير الشراب ...

حس بي إيد تحطات فوق كتفوا فيقاتوا من سهوتوا ، دور راصوا وهوما ينزلوا دموعوا بلا ما يحس زير على سنانوا ونطق بصوت مكسور:

_بنتي بقات يتيمة أخويا

أركان فتح يديه على طولتهم لخوه لي ترما في حضنوا عنقوا عناق رجولي وبقا كيبكي على كتفوا بحال شي ولد صغير ...

يوسف بحزن : بنتي بقات يتيمة نجلاء مشات وخلاتنا ...

أركان اول مرة يشوف خوه محطم بهاد شكل تنهد بضيق وقال:صبر أخويا صبر الله يرحمها والله يصبرك ويكون معاك ...

يوسف عينيه ولاوا حمرين :أنا غلطت غلطت في حقها بزاف ياربي تسمح ليا ...

أركان دور إيدوا على راص خوه جروا لسدروا كتر و بعصبية قال:نتا ما عندك ما درتي أيوسف ما تبقاش تلوم في راصك ...

يوسف هز راصوا شاف في خوه وبخجل نطق: لا نتا ما عارف والوا أخويا ...

أركان رفع حاجبوا :شنوا لي ما عارفش؟

يوسف بلع ريقوا حتى تفاحة أدم تحركات في حلقوا وجر خوه لقنت بعيد من إسلام لي بقات واقفا حاضيا طفلة من زاج ...

أركان طوا يديه عندوا وبتسأل نطق :مخبي عليا شي حاجة ؟!!

يوسف نزل راصوا الأرض :أنا غلطت في حق نجلاء وخنتها مع مروى ...

أركان فور ما سمع كلام يوسف حس بجنوون طلعوا فوق راصوا بلا ما يشعر هز يديه حتى لفوق ونزل عليه بالكمة قوية لوجه حتى تجرح جنب فموا وشدوا من كول قميجتوا مجنن ،بعصبية نطق:واش عارف راصك أشنوا درتي لمفروض مروى تكون بحال ختك ونتا لي تحميها ماشي تت "سحق سنانوا بغيض " ما خليتي لبراني ما يدير ...

يوسف مسح فموا من جنب وبصوت رجولي مبحوح نطق :عارف أخويا ولكن أنا ما كنتش في لوعي ديالي حاول تفهمني عفاك وتأنيب ضمير ما مخلينيش لا نعس ولا نرتاح بهاد دنب ...

أركان طلقوا و بالفقصة زير على سنانوا وقال :والوا تكون ماشي في لوعي ديالك نتا غلطتي وأجرمتي في حقهم بزوج ...

" حك لحيتوا من لتحت وهوا كيتفكر كلام نجلاء ملي قالت لمروى حقي أحلامك و تزوجي بيوسف ملي نموت "كمش حجبانوا وبتسأل نطق:

_شنوا كانت كتعني نجلاء بداك لكلام لي قالت لمروى قبل ما تموت ؟

يوسف جلس فوق كرسي وبتنهيدة نطق: قصة طويلة أخويا ...

أركان جلس حداه، مزير على قبضة إيدوا وبصوت رجولي خشن قال: هانا كنسمع ...

يوسف يالله فتح فموا غيهضر وهوا يقاطعهم سي عدنان ولحاج لي وقفوا فوق راصهم...

الحاج نحنح بشوي وبحزن قال:كيف بقيتي اولدي ؟!!

يوسف ساط بجهد :لباس الحمد الله الحاج...

سي عدنان رفع حاجبوا وبتسأل نطق مصدوم :شنوا واقع شكون ضربك في وجهك أيوسف ؟ !!

يوسف شاف في أركان مطول وبتنهيدة قال: لا والوا ما كين والوا

أركان ساط بجهد او وقف خاشي يديه في جيبوا شاف في باه وبصوت رجولي خشن نطق بتأكيد:أنا لي ضربتوا ما تخافوا من والوا ...

سي عدنان بصوت غليض كيهد جبل، نطق بعصبية: خوك كبر منك علاش هزيتي يديك عليه ...

أركان قشر فموا من لداخل وبعدم هتمام رد: كيستاهل ..

سي عدنان كمش حجبانوا ما عاجبوا حال : في لوقت لي خاصك توقف فيه مع خوك في هاد لمحنة ساير كتهز في يدك عليه أشمن نوع من لخوت نتا ؟

يوسف وجه كلاموا لباه مقاطعوا :أركان عندوا لحق أنا كنستاهل ضرب وهادي مسألة بين لخوت من الأحسن ما دخلش الواليد غنحلوها ببناتنا "وجه كلاموا لخوه" يالله نمشيوا عند إسلام اجي تشوف بنتي ...

أركان حرك راصوا بإجاب ومشا هوا وخوه ...

سي عدنان تصدم مسكين دور راصوا عند لحاج مبهوض ما فهم والوا،هز يديه وقال: ضربوا أو كيجي عليه من لفوق ؟

الحاج نحنح بشوي وببتسامة جانبية نطق : إيوا يضربوا وما يخالي من يضربوا اش فيها وزيدن قالوا ليك بيناتهم خليهم على رحتهم أولدي ...

•• إسلام بقات كتشوف في لبنيتة من زاج بعينين تيبروا تبسمات جنب وقالت:اش هاد لملاك لغزال امم مزال ما فكرنا ليك فشي إسم أحبيبة ...

إسلام بقات كتفكر وفور ما جا في بالها إسم، دارت لعند يوسف وبكل حماس نطقات:خويا واش ممكن تسميها "جنات" ...

يوسف مسح وجهوا وبتنهيدة قال: وخا، الإسم لي عجبك سميها بيه نتي عندك لحق فيها كتر مني حنت نجلاء الله يرحمها وصاتك عليها ...

أركان ببتسامة مزينة ملامحوا نطق : إسم زوين

إسلام فرحات و بتسأل قالت:واش سولتي دكتور إيمتا غتخرج "جنات" من هنا ؟

يوسف دور حنكوا لي تورم لجهة الأخرى كيحاول يخفيه على إسلام بصوت هادئ رد عليها :كَال ليا بعد 15 يوم تخرج "حرك راصوا" بغاو يخليوها تحت لمراقبة باش يتأكدوا بلي صحتها مزيانة ...

إسلام قادت شالها وببتسامة جانبية نطقات: ماشي مشكل نصبروا 15 يوم حتى تشرفنا الأميرة صغيرة "جنات الراضي" داخل رياض ...

رائحة العود والند كتفوح في كل ركن من أركان رياض عائلة راضي ،لي عمر بناس والشخصيات للمهمة كلهم جاو يعزيوا في موت نجلاء مرات ولدهم لكبير ...

عند لباب واقفة الحاجة خديجة كتستقبل ناس ،مرتدية جلابة في الأسود عريضة ومناسبة سنها وفوقها حاطا كاب وشال غليض على لبرد وتسبيح في يديها كيف ديما ما فارقهاش وعلامات الحزن مخيما على ملامح وجها ...

••دخلات مسبقة رجلها ليمنى بعدما سمات الله، غير سمعات صوت لقرأن الكريم وشافت الأجواء الحزينة المخيمة على رياض حسات بخنجر تغرس في قلبها و رجعوا ليها جميع ذكريات الكئيبة لي عاشتهم ،تفكرات نهار خسرات زوج ديالها وهيا مزال شابة في مقتبل العمر، خلا ليها تلاتة ليتامى ومشا عند لي خلقوا ...

تنهدات بضيق وتوجهات عند لحاجة،سلمات عليها بالوجه وقالت:البركا في راصك الحاجة ...

الحاجة خديجة حركات راصها بشوي وبصوت ضعيف ردات :ما مشا معاك باس أبنتي رحمة ...

لالة رحمة بحزن قالت :الله يصبركم ويكون معاكم والله يتبتها عند سؤال الملكيين ...

الحاجة خديجة شارت بإيدها: أمين أبنتي دخلي تفضلي ...

لالة رحمة دورات راصها في كل جويه و بتسأل نطقات :فين هوا لحاج وسي عدنان ويوسف حتى واحد ما بان ليا؟

الحاجة خديجة ساطت بجهد : مشاو لجامع يصليوا على المرحومة نجلاء ومن تما غيديوها لروضة يدفنوها ،شويا ويجبوا، دخلي عند فريدة راها لداخل هيا وإسلام ومروى ...

سي لعربي بعدم رضا نطق :جيت معطل وقيلة"وجه كلاموا لبنتوا أمينة" أنا غنمشي دابا نلحق عليهم بغيت ناخد الأجر "مد يدوا لحاجة وقال" البركا في راصكم الالة

الحاجة خديجة:ما مشا معاك باس أولدي

توبة قربات من لحاجة سلمات عليها بالوجه: الله يصبركم الحاجة والله يرحمها خلات بنتها يتيمة مسكينة ...

الحاجة خديجة :أمين أبنتي توبة ما مشا معاك باس " زفرات بجهد "هادا هوا حال دنيا

أمينة ولالة سعاد سلموا على لحاجة بالوجه وعزوها حتى هوما ودخلوا بعدما حطوا كارطونة سكار عند لباب ...

•• واقفا في لقنت لابسا نفس لعباية وشال فوق راصها وجها صفر وعينيها حمرين طاوية يديها عندها وحاطا راصها على سارية كتستامع لسورة ياسين لي مطلوقا على جهدهاا ...

توبة غير شافتها مشات بجري عندها عنقتها وبنبرة صوت حزينة نطقات : البركا في راصكم أختي ما ديريش في راصك هاد لحالة ...

إسلام ما بدلاها لعناق وبغصة خانقاها ردات : شفتها حتى خرجاتها روح قدامي حسيت بلحمي بورش عليا وعرفت بلي دنيا ما كتسوا والوا غير إلى درنا شي عمل زوين مع الله في دنيا غنلقوه في الأخيرة ...

توبة بعدات منها وقالت:داك شي لي كين أختي غير مولا نوبة وصافي "بتنهيدة كملات كلامها " ولي وصلات ساعتوا غيمشي ...

إسلام بصوت باكي نطقات بحرقة:الله يدينا في ضوء ويتجاوز عنا سيئتنا يارب العالمين "شافت في أمير نزلات لمستواه باستوا وقالت"لحبيب ديال خالتوا سير طلع لبيتي لفوق تلعب "مدات ليه تيلي "غتلقا هنا لعب زوينة بزاف ...

أمير رمش ببرائة وببتسامة نطق: وخا "دور راصوا وبتسأل قال" خالتي علاش هادوا كيبكيوا بزاف ؟!!

إسلام مسحات دموعها وقالت:ماتت خالتك نجلاء لله يرحمها وسير اودي تلعب ملي تكبر عاد غتفهم ...

توبة شافت ولدها غادي طالع لبيت :أمير ما ديرش لبسالة وخا ...

أمير حرك راصوا بإجاب وكمل طريقواا ...

توبة بتسأل:أمدرا كيف بقات مروى مسكينة ؟

إسلام ساطت بجهد:شويا الحمد لله "تمات غاديا" أجي شوفيها ...

توبة تبعتها وقالت:ما عوديش ليا كيفاش حتى ماتت نجلاء ؟

إسلام دارت لعندها :من بعد أختي ونعود ليك

إسلام بعدما سلمات على لالة رحمة وأمينة وسعاد لي تعرضوا ليها في طريق دخلوا كلهم لصالون فين جالسا مروى وفريدة ...

لالة رحمة بعدما سلمات على فريدة، تحنات لعند مروى وجلسات جنبها قبطات ليها في يديها وقالت: ما تهزيش في قبلك أبنتي بكي وخوي قلبك وملي تسالي نوضي صلي جوج ركعات ودعي مع ختك برحمة ...

مروى بصوت مخنوق :داك شي لي كين أخالتي "بحرقة " ولكن أنا بقيت بوحدي "نهارت بالبكاء" ختي مشات ما بقيتش غنشوفها ...

لالة رحمة جرات مروى لعندها ضمتها لسدرها وبدات تبكي معاها و قالت:ديريني أنا مك وإسلام وتوبة خوتاتك و ها هيا أمينة حتى هيا ختك كلنا معاك أبنتي نتي ماشي بوحدك قولي أعود بالله من الشيطان الرجيم ومسحي دموعك"رفعات حاجبها " شتي وهانتي بكيتيني معاك حتى انا ...

مروى هزات عينيها في رحمة :لهلا يخطيكم أخالتي...

أمينة شافت في مروى لي حالتها حالة تشفي لعدا وبصوت عالي نطقات بتنهيدة: بقات فينا كاملين وخا كانت شيطانة يالاطيف "شافتهم كيشوفوا فيها مصدومين وخصوصا أن صالون عامر بالعيالات ،برتباك بلعات ريقها" ءء الله يرحمها مسكينة غير أنا ما قصدش ولكن هيا كانت لفعى صراحة "هزات يديها" إيوا كلمة لحق تقال ...

توبة حبسات ضحكة ولالة فريدة من تحت سنانها نطقات بعصبية:أذكروا أموتكم بالخير ...

سعاد ندبات حنكها وبدات تحلف على أمينة، بالفقصة نطقات محرجة :ما تديش عليها أبنتي راها غير مع لحمل ولهرمونات عندها مخربقين شويا ...

مروى بغصة في حلقها نطقات ببرود :ختي مشات وما خلات حتى واحد يقولها فيها زوينة، بالحق هيا كتبقى ختي وكيفما كانت غنهز بيها، مصاب كون غير ترجع ...

سعاد جرات أمينة على جناب و بعصبية نطقات بخفوت: مالك مزبولة اويلي واش هادي هضرة يقولوها ناس "حطات إيدها فوق راصها" الله أربي أش هاد لبنت لي عطيتيني ؟ كاريثة !!

أمينة بعدم إهتمام:ما عند باليش راه هضرت بالجهد وزيدن مالي اشنوا قلت؟! هاديك غير صراحة !!

سعاد خبطات جنابها: وحتى نديك لدار وغتفرجي في صراحة كيف كتكون ...

أمينة نفخات شفيفها ما عاجبها حال:تكيسي عليا الواليدة أنا راه حاملا ...

سعاد بتأكيد قالت : يا وخا تكوني سيرا تولدي، ولاه لا رحمتك أبنت كرشي باش تعلمي تشوهي بيا الكلبة ...

أمينة طوات يديها عندها؛ياك فمي هادا نقول بيه ما بغيت ...

سعاد خنزرات فيها: اش غادا نكول ليك "هزات يديها لفوق" سيري الله يعطيك عقل..

أمينة تبسمات جنب :أمين وخا ما عندي ما ندير بيه ...

أمام المقبرة وقفات سيارة طويلة في الأسود نزل منها راجل كبير في سن لحيتوا بيضاء داخل فيها شوية رمادي، مرتدي طقم أسود فوقوا مونطوا طويل فتح ليه شيفور لباب وقبل ما ينزل فتح ليه لمضل فوق راصوا ...

تما غادي خاشي يديه في جيبوا وحاط نضارات شمسية على عينيه محاولة منه أنه يبين نفسوا حزين ،والشيفور غادي موراه...

وصل حدا فين مجموعين لقاهم سالاوا مراسم دفن وهزوا يديهم كيقروا على روح لميتة سورة الفاتحة باش يختموا بعدما قروا سورة ياسين ...

وقف حداهم هز يديه وبدا كيقرا معاهم:

《بسم الله الرحمان الرحيم :الحمد لله رب العالمين،الرحمان الرحيم،ملك يوم دين،إياك نعبد وإياك نستعين،إهدنا الصراط المستقيم، صراط الدين أنعمت عليهم غير لمغضوب عليهم ولا الضالين :صدق الله العضيم》

فور ما سالاوا سلم على بعض ناس لي كيعرف ومنهم سي عدنان لي قرب منوا وقال بصوتوا لغليض لمبحوح:بنتي كانت قطعة من روحي الله يرحمها مشات وخلاتني وحيد ..

سي عدنان تنهد بضيق: بغاها الله وداها عندوا أسي داوود ما تشدش في خاطرك وزيدن راه باقا عندك بنت أخرى خاصك تهلى فيها وتحميها ...

سي داوود رفع حاجبوا وبتسأل نطق: شكون ؟!!

الحاج راضي بالفقصة ضحك :ياكما وليتي كتنسى ؟!! نسيبان خليه ليا غير انا لي شرفت"حرك راصوا" عدنان كيهضر على بنتك صغيرة مروى ...

سي داوود خشا يدوا في جيبوا ما عاجبوا حال،بهدوء نطق :داك شي لي كين راك عارف مروى محالش دخل لبلاد دابا راها في فرانسا...

سي عدنان شاف في باه وببتسامة مسطنعة قال :الله يهديك اسي داوود مروى دخلات لبلاد سبع شهر دابا وكتر راها عندنا في رياض ...

سي داوود تحرج ،بلع ريقوا حتى تفاحة أدم تحركات في حلقوا:ايه الله يفكرنا في شهادة قالتها ليا ونسيت ..

الحاج راضي بصوت حاد نطق:كون كنتي كدوي مع بنتك اولدي ما غاديش تنسا نتا اصلا ما عارفش بلي بنتك في المغرب ...

سي داوود بغا غير يتسل من بينهم غير بان ليه أركان واقف مع يوسف بدون ما يستأدن منهم خلاهم واقفين ومشا قاصدوا مد ليه يدوا وقال :سلام عليكم كيف دير أولدي ؟

أركان ما كيحملوش حنت هوا من رجال الأعمال لفاسدين في لبلاد شاف فيه مطول،وخشا إيدوا في جيبوا بدون ما يبادلوا لمصافحة خلاه بلاكة كيدور في عينيه ونطق بصوت رجولي خشن وهوا ضاغط على مخارج لحروف:وعليكم السلام أسي داوووود ...

سي داودد ما رداش جر إيدوا عندوا وببتسامة مسطنعة قال: سمعت بلي أسستي مجموعة شريكات جديدة في أوروبا وكلهم ناجحين تبارك الله ...

أركان بدون ما ينطق بكلمة حرك راصوا بإجاب ...

سي داوود: مبروك عليك نجاح لي نتا فيه ءء ...

أركان عض فموا من لداخل و بعصبية نطق : الله يبارك فيك "زفر بجهد "إلى عندك شي حاجة قولها بزربة بلا ما تبقى تمهد في طريق وضيع ليا في لوقتي ...

سي داوود حك لحيتوا من لتحت وقال:هاكدا علاش كتعجبني "هز يدوا"بسباب سرعة لفهم ودكاء لي عندك ماشاء الله "نحنح بشوي "شنوا بان ليك نديروا شي صفقة بزوج ...

أركان ساط بجهد ومن تحت سنانوا نطق :صبر على بنتك غير ترتاح في قبرها هوا لول ومن بعد شوف لمشاريع "رفع حاجبوا" بالحق باش ما نخليكش تسنا، غنجيك من لخر أنا عندي شركات لصنع سيارات ونتا شركات لصنع شاي شنوا هيا، هاد صفقة لي غتجمعني بيك مثلااا ،لا علاقة خدمتي بخدمتك ،او والوا يكونوا من نفس دومين ما تحلمش أنني نخدم مع واحد بحالك ...

سي داوود نحنح بشوي وببتسامة ماكرة قال:احم احم الى ما كان حتى عقد يجمعني بيك نتا، أكيد كين عقد لي يقدر يجمعني بمراتك لالة إسلام ...

أركان جن جنونو و عينيه ولاوا حمرين زير على يديه ما عاجبوا حال ،تبسم جنب ونطق بهدوء عكس دخلوا:عقد مع مراتي ؟!!!

سي داوود بدا كيضحك:ما تفهمنيش غلاط اولدي على ما سمعت بلي مراتك عندها شركة صغيرة لتنضيم الأعراس سميتها "زواج مبارك "وهاد شريكة ،سُمعتها مزيانة في سوق وكلشي كيشكرها ،تبارك الله غاديا وكتشهر ،داك شي علاش قلت نجيبوا مراتك دير لينا إشهار المنتوجات شاي ديالنا وتقول أن جميع الأعراس لي نضمات كانوا ناجحين بفضل لمنتوج ديالي "هز يديه كيضحك "ساهلااا...

أركان تبسم جنب وبستهزاء قال :لا زوينة هادي والله حتى زوينة "رفع حاجبوا ونطق بحدة" حتى حاجة ما كتبغي تفلتها اسي داوود خاصاك غير لفرصة ...

سي داوود حرك راصوا : بالطبيعة لحال وهاد شي علاش انا ناجح وديما متقدم في مسيرتي لمهنية ...

أركان قرب حدا سي داوود حتى ما بقا كيفصلهم والوا وببرود نطق: سير تلعب قدام داركم اسي داوود حسن ليك ...

يوسف شاف لقاضية حماضت تبسم جنب وقال :عمي إلى بغيتي تجي تشوف حفيدتك جنات اجي معايا لسبيطار و مرحبا بيك عندنا في رياض ...

سي داوود ساط بجهد،خنزر في أركان وقال ليوسف :مرة أخرى إنشاء الله ونجي اولدي الله يعونكم ...

•• واقفات سيارة أجرة كبيرة في الأبيض نزل منها ودار لجهة الأخرى فتح لمراتوا لباب ونزل أغراضهم من لكوفر بعدما خلص سائق..

فور ما خرجات من سيارة واقفات بدون حراك ماقبلا رياض و قلبها كيضرب بجهد باغي يسكت تفكرات طفولتها ولوقت الثمين لي قضاتوا وسط عائلتها وحبابها...

عمر شاف فيها مطول وبصوت رجولي خشن قال: غنباتوا هنا زيدي دخلي لاباغا تشوفي عائلتك ...

نرجس زيرات على يديها وبتنهيدة ردات :تخيل أنا ما مسدقاش بلي نجلاء ماتت أو وخا شوهاتني وما خلات ما دارت ليا بقات فيا بزااف ...

عمر شاف فيها و ببرود نطق:نتي لي درتيها قد راصك كون ما تصورتيش ما غاديش تشوهي "حرك راصوا "دابا زيدي قدامي خليني باغي ندخل نعزي ونمشي نرتاح في دار ...

نرجس تصدمات وبتسأل نطقات :شنواا واش باغي تمشي ما غنباتوش هنا ؟ ...

عمر حك ضقنوا وبجدية نطق:ختاري نتي يا تباتي مع عائلتك ليوم تصبريهم غيكونوا محتاجين ليك ولا تمشي معايا لدار لواليدة ...

نرجس صغرات عينيها وقالت داخلها :بغيتي تمشي باش تبقا شاد لهضرة مع ديك سلمى بالليل ولاه لا كانت ليك أوليدي ...

عمر رفع حاجبوا وقال:شنيولة !!قلتي شي حاجة؟

نرجس بلعات ريقها: ءء لا والوا زيد يلاه ندخلوا من كترة الأسئلة لخاوية اووف ديما عزيز عليك دير ليا تحقيق ...

عمر شافها توترات ودغيا تزنكات بدا يضحك عليها: الله يصبرني معاك المغيارة هههه ...

جالسين بملامح ممحية فوق سرير في غرفة نجلاء كيشوفوا فيها بنضرت كلهم حزن، وهيا واقفا قدام بلاكار ختها كتجبد في لحويج وتحسر ...

مروى ببتسامة باردة مخلطة بحزن نطقات :هاد لكسوة عاد شراتها ختي مزال حتى ما لبستها ومشات الله يرحمها ...

إسلام بتنهيدة طويلة قالت :باركا ما تعدبي في راصك أمروى صافي بغاها الله وخداها ..

أمينة حطات إيديها على بطنها أو وقفات بشوي ،تقبلات مع مروى وبترجي نطقات: سمحي ليا بزاف على قبيلا وما تديش عليا راك عارفني خضرة ما كنعرفش نهضر لي جات في فمي كنقولها بلا ما ندير ليها حساب ..

مروى حطات لكسوة من إيدها وحركات راصها:ماشي مشكل هانيا أختي معايا أنا خودي راحتك في لهضرة اوك ...

أمينة تلاحت عليها عنقتها وبفرحة نطقات: شكرا الخوادرية عرفاك كينا "تنهدت براحة" الحمد لله ملي سمحتي ليا "هزات إيدها" كون ما سمحتيش ليا غيبقا يعدبني ضميري ليل كلوا ما غنعس ...

قاطعتهم توبة دخلات عليهم للغرفة كلها عرقانة لابسا بيجامة بسروال مستورة أو فوقها وزرة ملي جات دخلات لكوزينة عونات طيبات في لعشا ...

توبة دوزات بإيدها على جبهتها وبتنهيدة نطقات:لعزايا كلهم تعشوا البنات نزلوا تعشاو مع العائلة لي بقات ...

مروى بترجي قالت :سمحي لينا بزاف اختي توبة ملي جيتي ونتي في لكوزينة ...

توبة ببتسامة مزينة ملامحها ردات:لا متقوليش هكاك ،المرا فين ما مشات ما خصهاش تجلس ؛وفينما كانت دير يديها لعوين زين أختي وهبطوا باش نتعشاو ...

أمينة لبسات في رجليها وقالت :أنا بعدا فيا لموت ديال جوع ما بقيتش قادرا نصبر كتر ..

مروى : سيروا نتوما تاكلوا بصحتكم أنا ما فياش جوع ...

إسلام بعدم رضا ردات :ما يمكنش ليوم نهار كلوا ما نزلتي حتى حاجة في حلقك ،غتنزلي رجلي على رجلك خاصك تاكلي شي حاجة ولا بدا ...

مروى كمشات حجبانها :غير عضريني إسلام نفسيتوا مسدودة من جهة لماكلا ،من الأحسن نبقا بوحدي شويا عفاكم غير خلوني الى جاني جوع غنزل بنفسي"دارت شافت في لبلاكار ديال ختها وبتنهيدة قالت " امم لبنات لي عجبتها شي حاجة تاخدها هاد لي بغفان او سراول مزال جداد، كلشي تقريبا جديد "تنهدات بضيق" انا ما نقدرش ناخد منهم حنت غنبقا نتفكر نجلاء وانا ما بغيش نضعاف خاصني نكون قوية ...

إسلام شافت فيها مطولاا وقالت:فهماك أختي لمهم أنا خلي ليا أحسن كسوة كانت كتبغي نجلاء الله يرحمها بغيت نخزنها لبنتها جنات ملي تكبر تبقا تفكر بيها ماماها ...

مروى بصوت باكي ردات:وخا كوني هانيا "بعينين تيلمعوا"ختى كانت كتحماق على لكسوة الحمراء لي بلا كتاف كانت كتجيها زوينة بزاف ملي نجبدها غنديها ليك حتى لجناح"شابكت يديها مع بعض وشافت في توبة وأمينة " لبنات زيدوا ما تحشموش لي عجبتها شي حاجة تاخدها ولا عرفتوا شنوا جمعوا كلشي وحتى تكونوا مسالين وخودوا لي بغيتوا او ما دروهاش مني قلة صواب ...

توبة حطات إيديها على كتف مروى وقالت: لا أحبيبتي بالعكس عادي حنا كنا كنلبسوا مع بعضياتنا ولي عجبتها شي حاجة كتاخدها الاخرا هانيا ما عندناش مشكل ...

دخلات نرجس مقاطعاهم وبعصبية قالت: نزلوا تعشاو واش غنباتوا هنا من صباح وماما كتعيط ليكم ما كتسمعوش ...

أمينة عوجات فمها :هاحنا جيين الأخت زيدي قدامي تي كطيري بحال لكلية ...

فور ما خرجوا لبنات من لغرفة جلسات مروى في جنب سرير كتبكي وتشهق بحرقة على ختها ...

مروى: غير لبارح كنتي بيتا في بيتك وليوم غتباتي في لقبر، الله أربي ختي عندك رحمها برحمتك ياأرحم الراحمين "هزات مخدة ختها عنقتها وما حسات غير بدموعها نازلين شلال من عينيها" كون غي بقتي معايا الحبيبة علاش مشيتي وخليتيني بوحدي علاااش "هزات عينيها لسما" المجوهرات ديولك كاملين كنواعدك أنني غنخبيهم لبنتك حتى تكبر وتاخدهم هيا لوحيدة لي عندها لحق فيهم اه بوحدها لي عندها لحق ...

ديما كنتي كتحميني في لمدرسة ودافعي عليا وخا خديتي ليا اعز حاجة غاليا على قلبي ما عليش أختي هانيا أنا مسمحاك إلى يوم دين ...

توبة رسلات لبنات كلهم أو وقفات حدا لغرفة ديال نجلاء بقات كتستامع لكلام مروى ودموعها نازلين من عينيها شلال تفكرات باها لي مات وخلاها صغيرة ما فاهما في دنيا والوا، هيا وخا ما عمرها ما تكلمات ولا شكات ولكن هيا أكتر واحدة محروقة على موت باها وهازا دقة في قلبها وساكتة .. .

ملي تزوجات تمناتوا يكون معاها ويفرح في نهارها وملي بدا راجلها كيعنفها وكيتعامل معها خيب تمنات لو أن باها كان عيش وحماها من لوحش ديال راجلها لي كان كيغتاصبها كل نهار هاد شي ما عمرها ما تقصماتوا مع عائلتها ،كانت كتهز في قلبها وتسكت ...

صبرات لدل على قبل ولدها و في الأخير فاض لكاس وطلقات وصبر كيدير ضبر ..

طوات يديها عندها وبتوسل نطقات: ياربي تصبرها ياربي تكون معاها في هاد لمحنة ..

سمعات خطوات حذاء جاي جيهتها مسحات دموعها بالخف وحولات ما تبينش ..

يوسف وقف حدها وبصوت رجولي خشن نطق :شفت دموعك ما كينش لاش تخبيهم ...

توبة بلعات ريقها وبتوتر نطقات وهيا حانية راصها الأرض :اينا دموع أنا أصلا ما كنتش كنبكي ...

يوسف بصوت حاد نطق :هزي عينيك وشوفي فيا اتوبة من الأحسن ما تحاوليش تكدبي عليا ...

توبة هزات عينيها لي كيبريوا بدموع وبصوت مخنوق ردات:هانا شفت فيك "رفعات حاجبها "شتي ما كنبكيش بانت ليك شي دمعة مثلا همم ..

يوسف حرك راصوا وبصوت هادى نطق: خاصك تفرغي أ توبة من صغرك ما كنتيش كتبكي بزاف حاولي تخوي قلبك باش ترتاحي ما تبقيش تخبي دموعك على ناس ...

توبة حسات بدموعها علاين ينزلوا ،نزلات راصها الأرض وبتنهيدة ردات:انا بيخير وما عندي ما نخبي ..

يوسف هزا ليها راصها بشوي حتى لتقاو نضراتهم وبتأكيد قال:ما غنحولش نضغط عليك أ توبة نتي بوحدك ملي تكوني مستعدة تهضري وتبغي لي يسمع عليك غتلقيني كنتسناك ...

توبة شافت فيه مطولا وببتسامة مسطنعة نطقات :شكرا حنت كتفهمني او لبراكا في راصك من جهة نجلاء ما جاتنيش لفرصة باش نعزيك قبل ...

يوسف طلعها من لتحت لفوق ببتسامة جانبية نطق :كتباني ليا قيما بالواجب كتر من لازم أنا لي خاصني نشكرك امم "حرك راصوا "ما نشدكش كتر سيري تعشاي انا غير نبدل حويجي ونلحق عليك ...

•• دخل لغرفتوا بلا ما يدير لحس لقاها معنقة لوسادة وكتبكي من قلبها قرب منها وبتنهيدة نطق:

_واش انا غنبقا ندور نسكت فيكم وشكون لي غيصبرني أنا ديك سيدة لي كتبكي عليا راه مراتي وام بنتي وخا نتي ختك، أنا مضرور كتر منك امروى تهدني وبركا من لبكا ...

مروى بصوت مخنوق ردات:يوسف عفاك خليني بوحدي بغيت نعس في بلاصت ختي...

يوسف زفر بجهد وقرب منها:نوضي تعشاي وعاد رجعي تنعسي إلى بغيتي ...

مروى بصوت باكي :ما بغيتش غير خليني بوحدي عفاك ...

يوسف رفع حاجبوا:واش باغا تبقاي بجوع راه غتمرضي نوضي تاكلي ...

مروى وقفات عنقات مخدة ختها وقالت بعصبية : شتي هاد لبلاصة ،انا غنخليها ليك غير تهنا ،او وبيتك غانخويه اوك ...

يوسف ساط بجهد :مالك وليتي عصبية بلا قياس ؟!!

"قرب منها غيحط ايدوا على ايدها وهيا تخطف ايدها وعلاتها لفوق" وبتحدير نطقات:

_ما تقربش مني بسبابك أنا خنت ختي"شارت لنفسها " ختي لوحيدة أنا خنتها ربي ما عمروا غيسمح ليا ما تبقاش تقيسني وطريقي من ليوم ماشي هوا طريقك الله يهنيك...

خرجات وردخات لباب خلاتوا واقف مصدوم كيشوف فيها،هوا أصلا ندم اش ندم وهيا رجعات حطات ليه لملح على لجرح لي في قلبوا من جهتها ...

وقفات سيارة عائلة راضي قدام دار لالة رحمة،نزلات منها نرجس كتائب مورها نزلات توبة أو عمر هاز أمير ناعس بين يديه،عاد لالة رحمة هيا لاخراا ...

فور ما فتحات توبة لباب دخل عمر طلع أمير نيشان لبلاصتوا حيد ليه صباطوا وتجاكيد وغطاه ونزل يجيب لي فاليز ديولوا هوا ومرتوا ...

لالة رحمة دخلات مسبقا رجلها ليمنى بعدما سمات الله كيف ديما ...

حيدات جلابتها ومداتها لتوبة تعلقها عند لباب وقالت:اري ليا ابنتي لانسولين من تلاجة ما دقيتها قبل ما نخرج ...

توبة حيدات شالها حتى طلق شعرها طويل لي فايت خصرها وحيدات حتى هيا جلابتها وبقات منها لبيجامة، علقاتهم عند لباب وبتنهيدة نطقات:هيا لولة أميمتي ..

شافت في نرجس لي كدور عوينتها في دار واقفا مبهوضة من شكل حياتهم ومعاملتهم مع بعض، تبسمات ليها وقالت:

_نرجس بدلي حويجك ولبسي لي بغيتي ما كينش مشكل اصلا ما كين حتى راجل براني بيناتنا غير خودي راحتك في دار ...

رحمة حطات ايدها على سداري وقالت: مرحبا بيك أبنتي كون ما كانت مرت خوك ميتة حتى دخلي بطبالة ولغياطة لهاد دار، بالحق غير قبلي علينا، واجي ترتاحي جلسي حدا ميمتك رحمة ...

نرجس قربات منها ،جلسات حداها حشمانة مرتاحة معاهم وفي نفس لوقت مرتابكة معرفاش كيفاش تصرف،بعينين تيلمعوا ردات:ترحب بيك الجنة أمي رحمة ...

رحمة حركات راصها بشوي وبصوت هادئ نطقات: أمين ابنتي شكون كره جنة ترحب بيه من فمك لسيدي ربي ...

توبة جلسات جلسة القرفساء أمام رحمة لي عرات بطنها ،ودقات ليها إبرة الأنسولين وقالت :

_الله يجيب شيفاء أميمتي ...

نرجس كمشات حجبانها بخوف مني شافت لبرة وبتنهيدة نطقات:الله يشافيك ياربي

لالة رحمة برضا نطقات:أمين أبناتي شكون بحالي ولاوا عندي خمسة لبنات "هزات صباعها بدات تحسب بيهم" ها توبة وها نرجس وها إسلام وها أمينة وها مروى ، خمسة وخميس عليكم الله يحميكم من كل شر ...

نرجس رتاحت لكلام مي رحمة وعجبها لحال معاهم ...

رحمة بتسأل نطقات:بنتي تبغي تاكلي شي حاجة ؟!!

نرجس حركات راصها بنفي:لا شبعانة لحمد لله شكرا ...

لالة رحمة: كيبان ليا فيك نعاس"وجهات كلامها لتوبة "طلعي أبنتي لبيت خوك بدلي ليه ليزور وجبدلي لمانط جداد حطيهم ليهم تما باش يتغطوا راه كين لبرد ...

نرجس كمشات حجبانها : من صباح ونتي واقفا،عطيني غير ليزار اختي انا نقدوا ما كينش لاش تعدبي ...

توبة تبسمات:عدابك راحة أمرت خويا لعزيز غير خليني انا مولفا و أصلا غنمشي نقاد لماما فراشها ونخدم شوفوا يسخن ليا لحمام بينما قاديت ليكم لبيت وندخل ندوش ...

لالة رحمة ببتسامة مزينة ملامحها قالت:آييه على شوفوا فاش فكرتيني، هادك بنتي إسلام ملي خدات اول خلصة من اول عرس نضماتوا في قاعة" زواج مبارك "شراتوا لينا قالت ليا ماما ما تبقاوش تسخنوا لماء وتسناوه يطيب هادا زوين دغيا يسخن ليك لماء و دخلي دوشي، الله يرضي عليها مسيكينة ديما مفكراني ...

نرجس عينيها بقاو كيلمعوا وهيا كتسمع رحمة كيفاش كترضي على بنتها تمنات باها يرجع معاها كيف كان معاها قبل ...

دخل عمر هز في يدوا جوح باليزات حطهم عند لباب وسد لباب بزكروم ،عاد قرب منهم غمز موا وقال:لالة لعيالات ملكة قلبي اش خبارك توحشتك وتوحشت لجلسة معاك ...

لالة رحمة بصوت هادئ :لباس عليا اولدي هانا كيفما خليتيني بقيت وتوحشتك اكبيدتي بلا قياس كيف دير مع لخدمة ولعمَال؟!! جيتي منور أولدي بينا مرتك مهلية فيك ..

عمر قرب من موا طبع قبلة حنينة في راصها او فوق يديها بزوج، وبحزن مسطنع قال:ما مهلايا فيا كاع قتلاني غير بي سباكيتي بطون ولماطيشة ...

نرجس حلات عينيها حتى لبؤبئ لدخلاني وساع ...

لالة رحمة ببتسامة جانبية قالت:مالها حتى هيا ماكلة لمهم ما مخلياكش جيعان خاصك تبوس ليها يديها بزوج وحمد الله عليها نعمة ...

عمر بصوت رجولي خشن قال: في رياض ما لقيتش فرصة باش نهضر معاك دابا غنجلس حدا راصك ليل كلوا نباتوا نهضروا الوليدة...

لالة رحمة حركات راصها بلا: لواه اولدي سير تنعس حدا مرتك ،شوف مسكينة فيها نعاس وخليني عليك انا غنمشي نصلي ونشد لستغفار حتى تديني عيني ...

عمر تنهد بضيق وجمع لوقفة:دغيا سخيتي بيا الوليدة ...

لالة رحمة حركات راصها :ياك واخد كونجي فيه سيمانة ايوا مزال غدا انشاء الله وارا ما نبقاو نهضروا حتى نطلع ليك في راصك.. وا سير وري لمراتك لبيت فين ترتاح وتصبح على خير ...

عمر تحنى قبل راصها مرة أخرى وقال: تصبحي على الخير الوليدة "وجه كلاموا لنرجس "تبعيني نتي ....

لالة رحمة ما عجبها حال بعصبية نطقات: ينعل حسك كيفاش تبعيني نتي !! لقيتها طيحا في زنقة، بنتي راك مشيتي خطبتيها من دارهم معززة مكرمة من عند باها، حتارمها لا بغيتيني نرضي عليك ...

عمر كمش حجبانوا:غير كنضحك الوليدة واه "مد ايدوا وببتسامة مسطنعة نطق "نرجس حبيبة إلى سمحتي أجي معايا نوريك بلاصتك ...

نرجس مسكينة ما عرفات باش تبلات جميع الوان طيف ضهروا في وجها جمعات لوقفة وسبقاتوا لدروج بعدما قالت:تصبحي على خير أمي رحمة تباتي في رحة الله ...

فور ما دخلوا لغرفة لقاو توبة قادات أخر مخدة وقالت :

_الى حتاجيتي الأي حاجة انرجس عيطي ليا ما تحشميش "جبدات ليها خدها"شحال فنيونة ماشاء الله "وجهات كلامها لعمر"تهلاى في مراتك أخويا باش تجيبوا لينا شي عمر صغيور يلعب مع ولدي ...

عمر شاف في نرجس وقال:وياه الخوادرية عندك صح امير خاصوا شي أخ ...

نرجس بصدمة وحل ليها ريقها وبدات تكحب بصوت مسموح :كح كح كح

توبة مدات ليها كاس ديال لماء :استغفر الله العضيم شي عين درباتك هادي حلالي يالاه نخليكم ترتاحوا تصبحوا على خير ...

فور ما خرجات توبة نرجس حطات كاس الماء فوق طبلة، دورات عينيها لعندوا تقابلت معاه وقالت بفتخار :شفتي ختك قالت عليا زوينة وخا دور حتى تعيا ما تلقاش بحالي ...

عمر بستهزاء نطق :سمعتيها غير ملي قالت زوينة ونسيتي طلبها راها بغات اخ لولدها أمير ...

نرجس وجها ولا حمر هزات باليزتها حطاتها فوق سرير حلاتها جبدات منها بيجامة خفيفة ومني تفكرات هضرتوا بعصبية دارت لعندوا ونطقات: اش هاد نرجس حبيبة ما لقيتي ما تقول ليا ...

عمر تبسم جنب:قلتها غير قدام الوليدة أشنيولة ما تحلميش بلي غنقولها ليك ديما البواسة ...

نرجس ساطت بجهد دورات راصها في غرفتوا :بيتك صغير ولكن نعدي معاه ما شي مشكل "رفعات حاجبها "دور لجهة الاخرا بغيت نبدل حويجي ...

عمر ضحك عليها من نيتوا : ناري ساليتي معايا اش غتخبي وانا كلشي شفتوا "بدا كيقرب منها"نسيتي نهار طاحت ليك لفوطة قدامي هممم ...

نرجس دفعاتوا وخرجات تجري تقلب على لحمام غير لقاتوا دخلات ليه لبسات بيجامتها بسروال خفيفة في لغوز وشعرها خلاتوا مطلوق مورا ضهرها ...

رجعات دخلات لعندوا وسدات لباب مخسرا ملامحها تخشات حداه فوق سرير حنت أصلا ما كينش غيروا فين تنعس زفرات بجهد وبعصبية قالت:تصوخر لهيه عصبتيني ...

عمر بعدم هتمام:والله لا تزحزحت تي مخشية فيا هكا وسيرا كتهضري من لفوق زوينة هادي ...

نرجس زفرات بجهد وجرات ليه لغطا :شتي كون ما حشمت من مي رحمة او توبة او كون كانت شي بلاصة أخرى من غير هاد ناموسية ديالك لي هكا صغيرة قد ناموسة لا نعست حداك ...

عمر دفعها بجنبوا وشد لغطا من جنب :نتي ليا جايا لاصقا فيا كون بتي في ضاركم حسن ليك ...

نرجس صغرات عينيها :ياك باش تبقا نتا شاد ليا لحتيت مع لبنات بالليل ولاه لا كانت ليك يالاه ...

عمر بالفقصة ضحك :اه فكرتيني الله يفكرك في شهادة واحد أحلام من شحاال هادي ما هضرات معاها غتكون مشوشة عليا خاصني نعلمها بلي وصلت بيخير وعلى خير ...

نرجس عضات خدها من لداخل بجنون : شتي إلى بغيتي تشد بلاصة حدا نجلاء حاول تعيط وغتشوف شنوا غندير ليك

عمر رفع حاجبوا: تقتليني زعما ؟!!

نرجس خبطاتوا بدرعها ما راضياش:واشنوا نتا دابا باقي في ملكي وماشي معقول نحمل سميتك غير هكاك ...

عمر بصوت هادئ نطق :ايوا عطيني حقي ونبقا ليك بوحدك ...

نرجس قلبات عينيها :حقك خليتيه وسط لقصرية ديال طعام أسيدي،"عوجات فمها"أشنوا بغيتي نمشي نجيبوا ليك دابا ...

عمر شد ليها يديها بزوج :ماكنهضرش على دجاج انا باغي شي لاخر ...

نرجس نترات يديها من وسط يديه : الله يمسخك نعس يالله كنا في لعزاء ولموت تفكر الله شويا دابا تموت على هاد اخر كلمة قلتيها أستغفر الله ....

عمر تبسم جنب :يالاه صليت الحمد لله ناعس على وضوا ...

نرجس جرات ليه لغطا و قالت :تصبح على خير غدا انشاء الله غير نفطروا بغيت نشوف بابا نهضر معاه ليوم ما لقيتش كيفاش ندوي معاه بسباب ناس لي جاوو ...

عمر فقصاتوا نتر ليا لغطا وجمع ليها يديها بزوج لفوق وجا فوق منها:ما بغيتيش ترصاي أشنيولة شنوا بغيتيني ندير ليه هاه، لغطا ما خليتيه في حالوا دراعي كلوا قمشتيه اش خاصك ...

نرجس فور ما تقابل معها وفيكسا نضراتوا في عينيها بلعات ريقها بصعوبة وبتوتر نطقات: ءء صافي غنوض نفرش في الأرض ونخليك تنعس مرتاح ...

عمر تبنج وبصوت مبحوح نطق:كتقلبي عليها معايا ...

بدا تيقرب منها بشوي وهيا قلبها بدا يضرب بجهد حط شفايفوا على شفايفها بدا كيلتاهم فيهم بعطش عاطي لكل شفة حقها ...

نرجس ترفعات بدات كتحس بشي حاجة كتلعب في معدتها ترخات ليه وغمضات عينيها حتى حسات بيديها تحروا من قبضتوا او يديه نزلوا لذاتها كيتحسسوا فيها بشوي وهيا تحل عينيها وبشهقة دفعتوا ونطقات :بعد مني يالاه كنا في لعزا ديال مرت خويا حشومة ...

عمر نطق حابس ضحكة:كون ما كناش في عزا وكنا في فرح غتخليني ننن ...

نرجس درباتوا بشعرها ودرت لجهة الأخرا حشمانة هيا بنفسها ما بقاتش عارفا شنوا كيوقع ليها ملي تكون معاه: بعد مني خليني نعس ...

عمر بصوت رجولي خشن قال :جمعي عليا شعرك "دور يدوا على خصرها وعنقها من ضهرها " هاكا باش ما نبقاوش مضاربين على لبلاصة ...

نرجس تبسمات جنب وقالت:طفي ضوء من حداك فيا لموت ديال نعاس ...

غير طفا ضوء عمر وهيا تكمش حجبانها بإزعاج مني تفكرات كلاموا وبعدم رضا نطقات:دابا انا وليت قتلاك بسباكيتي ياك

عمر بصوت مبحوح بنعاس قال:خليها حتى لصباح ونهضروا ا دابا باغي نعس ...

يتبع...