محتوى القصة
جالسين في صالون حتى دخلت لعندهم أمينة وتوجهات مباشرة لعند سي حمد(أب كريم)تحت نضراتهم...
أمينة بخجل:عمي سمح ليا قبيلا ما حسيتش براصي حتى بديت كنسب في ديك السيدة قدام ناس بلا ما ندير لوجودكم عتبار...
سي حمد ببتسامة حط يدوا على كتافها:بنتي أمينة نتي درتي غير لي شفتيه مناسب بالعكس حتى واحد ما تقلق منك لقيتينا نيت كنا تنهضروا عليها...
سي لعربي قاطعهم:إسلام أبنتي تربات بيناتنا وهيا بحالها بحالك كون ما كناش تنتيقوا فيها ما غنخليكش تمشي عندها باها الله يرحموا كان من خيرة البشر ..وهيا خرجات تتشبه ليه سبحان الله ...وصحبتكم تتفكرني غير في راصي أنا وسي محمد الله يرحمواا...
حتى حنا كنا كندافعوا على بعضياتنا بديك الطريقة نيت...
عائشة حطات لوزة في فمها وهضرات:يا بنتي أمينة عجبنتي فيها وبردتي ليا غدايدي راها جارتي بنت الهم وبزز مني كنت محتارماها...
كريم رجع شعروا لور :وخا سيدا كبر من مك وما كانتش خاصك تهضري معها بديك طريقة(حرك راصوا وهز يدوا كا تأكيد)واليني تستاهل .....كل نهار كيجيونا شكاوي ضد ولدها في الكوميسارية من بنات قاصر ومن بعد (زفر بجهد) تايسحبوا الشكوى ما عرفتش أشنوا تيدير ليهم حتى كيتراجعوا...
أمينة خنزرات فيه:ويالله سير تقول فيها كوميسير أخر زمان..
سعاد جلسات حطا يديها على ضقنها:ولد لحرام الله ياخد فيه الحق وهوا وياها
أمينة جلسات بينهم وخرجات من فمها كلام لي خلاهم غير جالسين يشوفوا في بعضياتهم:ديك نهار فاش تافقتوا على الخطبة قلتوا مورها بشهر ديروا العرس ياك
سي العربي حرك راصوا بإجاب: معلوم أبنتي بعد شهر إنشاء الله نفرحوا بيكم إلى كتاب
أمينة شكون لي غيحط فيكم لفلوس...
سعاد:أش هاد سؤال أبنتي حنا غنتعاونوا باك غيحط شي براكة وكريم حتى هوا ونديروا ليكم العرس الى نخليوا لكبير وصغير يهضر فيه ...
أمينة بتأكيد هزات حجبانها بزوج:عطيوني دوك لفلوس ديال العرس..بغيت شركة زواج مبارك هيا لي تنضم ليا العرس...
سعاد بصدمة وقفات:عودي أش قلتي؟! ما سمعتش ! أش تتخربقي نتي عارفا شركات تنضيم الأعراس شحال كيطلبوا ديال لفلوس
أمينة :هاذا الشركة غيكون ليها هاذا أول زواج غتنضم بختصار أنا بغيت صحبتي إسلام هيا لي تنضم ليا العرس...
عائشة جمعات حجبانها بزواج:أمينة يكما طلعات ليك السخانة ؟! هاذا راه عرس ما شي لعب ديال دراري صغار إسلام اش غتفهم بداك شي..
أمينة خرجات فيهم عينيها:تتفهم فيه مزيان شفت كتاب ديالها ديرا فيهم أفكار زوينة وحسابات ديال الأعراس وزيدن أنا بغيت نعطيها فرصة أو لا تقدروا تقولوا نفتح ليها باب باش تنطالق في مشروعها...
كريم مأيدها في فكرتها:أحسن حاجة غديري أكبيدة(نسا راصوا)قصدت أ حبيبة بغيت نقول أمينة قليل ناس لي تيفكروا بحالك وتيخاطروا باليلة العمر لي كيحلموا بيها على ود ناس لي كيبغيوا
عائشة بعصبية:شفتي لبنت ما تيقا حتى في راصها ! وغتنضم عرس على قدواا اش تتخربقوا !
أمينة تقبلات مع عائشة: إسلام في الخدمة ما ضيا ضربوها على حسابي...نتوما ما تفكروا في ولوا ! غتعطيوني غير لفلوس ونهار لعرس مرحبا بيكم...لي عندي قلتوا..تصبحوا على خير
خرجات وخلاتهم يشوفوا في بعضياتهم والأنهم ما عندهمش إختيار اخر وعارفين أمينة في لعناد ما كينش بحالها..سلموا أمرهم لله...أ وافقواا بزز منهم...
في كوزينة دار رحمة مجموعين تيصيبوا الفطور توبة واقفا كتعمر في أتاي أو أمينة كتحط في المسمن والحلوى وسط الطباسل وإسلام جالسا فوق سداري وحطا يديها على طبلة شادا بيهم تيليفونها تتخرق فيه و حداها متكي أمير موسد رجلين رحمة مزال شاد فيه نعاس...
أمينة تتوري في الخاتم لتوبة:كيف جاني؟
توبة ببتسامة:جاك زوين تيحمق !دابا نعيطوا عليك مرت الكوميسر كريم
أمينة قلبات عينيها:لواه مرتْ مول الهندية (هزات طباسل تتنزلهم فوق الطبلة) قولي
غير أمينة الساطة (خطبات أمير)فيق اوليدي تفطر مالك مقلوب دارب القرقوبي هههههه
إسلام صغرات عينيها في أمينة:من نيتك بغا تعلمي دري من صغروا
أمينة جلسات حدها:غير تنضحك الخوادرية مالك على سبة(خطبات توبة)ولدك ما قريش ليوم؟!
توبة حطات سينية ديال أتاي:ليوم الاحد ما كينا قراية تيبان ليا مزال شدا فيك فرحة الخطبة ههههه
إسلام قاطعتها:وتي راها داربا القرقوبي (شافت في أمينة)عليها صبحات واقفا فوق راصي بحال مالك الموت ! نوضتني بزز جابتني لهنا ! تقولي كانت كاريا ليا لبيت ههههه
أمينة جمعات حجبانها: حتى تعرفيني علاش جبتك عاد هضري ! (شارت لتوبة ورحمة ) وهادوا هما لي غيعونوني فيك حنت أنا ما نقدرش نقنعك بوحدي !
رحمة تتكب في أتاي:خودوا تفطروا..
إسلام خدات كاس ديال أتاي وغطسات دغمة في الزيت العود وتسائلات في راصها تيدوروا
أمينة بتسائل:توبة !!فين عمر؟
توبة يالله غتجوب وهوا يبان ليها نازل من الدروج وهاز معاه صكادوا ديال ضهر ولابس سروال جينز أزرق وتيشرت في الأبيض
وموقف شعرول بجل دخل لكوزينة صبح عليهم....
عمر جر كرسي جلس حداهم:صباح الخير(قرب من رحمة قبل إيدها)صباح النور العزيزة
رحمة بتسمات ورضات عليه من قلبها:صباح الخير أولدي الله يرضي عليك(بتسائل )فين غادي بصاك
عمر :ديار مع العشران غادين للبحر
رحمة شهقات بجهد:اولدي راه لحال بارد واش باغي تمرض
عمر شاف فيها:صبحات شمس اليوم وحنا ما غدينش نعوموا !غادين غير نحفضوا تما او نكتبوا شي لعيبات من الأغنية جديدة...
رحمة تنهدات براحة:هكاك أولدي أو رد بالك!
عمر وجه كلاموا ل أمينة :هاي هاي على الخوادرية ! درتي عقلك وغا ضربي الكحل في البيض..مبروك ! الى ولدتي شي ولد سميه عليا !
أمينة تتسرط في الدغمة قلبات عينيها وقالت :عقلي حاضر غير تانتكايس عليه ما تنبغيش نخدموا !العقوبا ليك حتى نتا ! وملي تولد ولادك سميهم كاملين على سميتك !
إسلام وتوبة شدوا من كرشهم تيضحكوا عليه...
توبة خرج ليها أتاي من نيفها مع ضحك وخا هكاك ردات نفس وهضرات:
خاصك ترقمهم باش ميتلفوش ليك ههههههه (هزات يديها تتحسب بصبعنها) عمر واحد وعمر جوج وعمر تلاتة !يكفيوك هادوا ؟! و لا نزيد كتر هههه
عمر ما عجبوش الحال: جمعي غير نيفك الطوبا عاد هضري...
أمينة وإسلام تفرشخوا بضحك....
أما توبة ما رداتش مسحات نيفها وجها ولا حمر خرجات عينيها وقالت:طَوْبَا بغيتها تاكل ليك الودنين إنشاء الله (هزات راصها لسماء)سميتي توبة وملي تبغي تدكرها شلل فمك بالسمن والعسل عاد جبدني....
رحمة محمر عينيها فيهم:كولوا أو هنيونا !ولا غنحيد سندالتي من رجلي ونعود ليكم تربية من جديد...
توبة تتدير حركات بوجها لعمر ديال دراري الصغار قلبات عينيها وهضرت مع أمينة:إيوا إمتا العرس؟
أمينة كالت زويتونة:بعد شهر لعرس وأنا تافقت مع العائلة بلي أسلام هيا لي غتنضموا ليا!؟
إسلام فور ما سمعات كلام أمينة كانت تتاكل في غريبة أو وحلات حتى خرجوا عينيها :
كح كح كح( قالت بحروف مقطعة)أش تا ت قو لي
أمينة بإصرار:كيفما سمعتي (دارت عندها) لي عليا ! غنجيب لفلوس !ونحطهم بين يديك ! أو نتي ريني حنة يدك وأش قدا ديري؟؟! (نزلات دغمة من إيدها وتحت نضرات إسلام لي حلات فمها ما ستوعباتش هضرتها،شابكت يديها فوق الطبلة وبجدية أكثر قالت) وفي حالة ما عارضتي ! ولا رفضتي ! أنا غنفسخ الخطبة ونجي نجلس حداك هنا نحطوا راص على بعضيتنا ونبقاوا نبكيوا حنت الحياة توقفات عند لالة إسلام...
إسلام بغضب وقفات:أش تتقولي أمينة ؟! أنا ما بقيتش كنتيق في راصي كيف لول !غير نساي !وداك شي لي شفتي في لكتاب مجرد أحلام بنت مراهقة كانت عندها16 عام !واش بغيتيني نخرب ليك عرسك ؟!
أمينة وقفات حتى هيا :أنا كنتيق فيك أصحبتي غير على قبلي بلييز !سمعيني عفاك
إسلام طوات يديها عندها او في نقطة وحدة بقات تتشوف وتترمش بزربة تالفا...
أمينة حلات عينيها حتى لموموا لدخلاني وساع وسرحات بخيالها بدات تتدور على إسلام وتفكر وتقول :دابا غير تخيلي بعد 14 عام من دابا فاش غتشهر شركة "زواج مبارك " وتولي تنضمي أعراس ناس مهمة بحال الممثلين والمغنين....الخ غنكون أنا أسعد وحدة حنت عرسي غيتربط مع إسم "زواج مبارك "وحتى ولادي غيكبروا فخورين بيك(عوجات فمها) البداية لي صعيبة أما لي باقي كلوا ساهل والله تيقي فيا...
توبة حتى هيا وقفات:اه أختي عفاك وافقي هادي هيا فرصتك باش تحقي أحلامك
عمر بتأكيد:توبة عندها الحق الخوادرية غير وافقي وحنا كاملين نعونوك
توبة عوجات فمها وتبسمات:أول مرة توافقني على شي حاجة سبحان الله
رحمة بدات تمتل على إسلام وطيحات جوج دمعات بإصرار أكبر قالت :ياك أبنتي هادي هيا تربيتي فيك؟! بغيتي تخرجي على ختك أمينة تبقا مركنا حداك او في لوقت لي الناس خدامين نتوما غتبقاواا جالسين حتى تشرفوا ما تخليوا حتى لي يرحم عليكم !
بقاوو عليها بالهضرة من هنا ومن لهيه وشي يبكي وشي يتبوحط حتى دوخوا ليها راص وستسلمات والجواب لي نطقاتوا بعد إصرار طويل منهم خلات قلوبهم يتراقصوا من الفرحة....بقلة حيلة قالت "وخا" على إثر هاذ الكلمة تلاحت عليها أمينة هيا وتوبة يعنقوا ويبوسواا
بعدات منهم بمشقة الأنفاس وجلسات في الكرسي مكمشا حجبانها نطقات:دابا المشكلة فين غيتقام العرس
عمر هز حاجبوا:كريوا شي قاعة صغيرة
إسلام حركات راصها بنفي : لفلوس ما غدينش يقدوا الان المبلغ أكيد غيكون صغير وعاد زيد عليها عائلة أمينة كبيرة تبارك الله
أمينة قاطعتهم:نديروه في الدرب؟!
إسلام بعصبية:بغيتي تشوهي بسمعة ديال "زواج مبارك " منضم في الزنقة أش بغيتي ناس يقولوا على شركتي من بعد تتنضم أعراسها في زنقة ياك بغيتي ضحكي عليا الشركات الكبرى...
في لوقت لي إسلام تتحلل وتناقش وتهضر بعصبية وتوقف وتجلس توتر والخوف مسيطرين عليها بغا تفكر بشي حاجة في المستوى هوما كلهم متبعن ليها العين و مبهوضين فيها فرحانين من قلبهم الأنهم قدروا يرجعوا ليها الحماس ديال الخدمة من جديد...
إسلام بعينين تيبريوا دربات الطبلة بجهد حتى فيقات أمير:جاتني فكرة واعراا !علاش ما نديروش العرس في الفيرما ديال خالي المختار كبيرة (حركات راصها تتفكر وتهضر) وقريبة نصف ساعة ديال طريق وهانتي في الجديدة عنونها باين وحتى لي ما عندوش طرونسبور كين الكاميوا نديوا فيه الناس لتما...
أمينة باست إسلام بجهد:وهانتي بديتي تخدمي عقلك أحسن فكرة هيا هادي تما ما كينش لي يبرزطنا! تنبغيك بزااف
جالسا قدام مرايا في أكبر صالون تجميل في مدينة الجديدة....وحاطا حداها بزاف ديال صاشيات فيهم لبيسات جداد....ولبسا وحدا منهم "عبارة عن فستان قصير أحمر معري من جهة لكتاف"
ضايرين بيها زوج بنات أو ولد تيقادوا ليها مكياج أو تيصيبوا ليها شعرها وهيا صابرة على سخونية ديال سيشوار وحابسا البكية بين سنانها أول مرة غتهتم بي نفسها بعدما كانت أخر أولويتها..... قلبها تيضرب بجهد وسط قفص سدرها الصغير من الخوف لي تملكها من داخل...
نضراتها مشتيين مرة تهزهم في نجلاء لي جالسا جنبها شادا مجلة الموضة بين يديها" لي بدورها تتطمنها بعينيها " وتارة أخرى تتشوف وجها في لمرايا......
تايها وسط تفكيرها عقلها تايقول ليها كلام وقلبها تيقول حاجة اخرى وهيا تالفة بينهم....
ما عرفات شكون تيق فيه....
غرقات في تفكيرها مدة طويلة ومشات لليلة أمس...
"فلاش باك"
وقفا قدام بيت خوها وشعرها مشعكك مغطي ليها عينيها نيفها حمر من لبكى ودموعها تينزلوا بغزارة مسحاتهم بطرف كم تريكوها لعريض ودقات في الباب...
خرج عندها لابس بيجامة ديال النعاس في الأسود رجالية وعينيه تيتلسقوا بنعاس "يوسف" حل عينيه وعود سدهم بصوت خشين فيه بحة نطق: نرجس !! أش تتديري مع عاد الوقت ؟! نص ليل هاذا؟
نرجس بصوت مخنوق: عفاك !! بغيت ختي نجلاء فيقها..
يوسف بتسائل:أش بغيتيها؟؟
نرجس بلعات ريقها وكدبات وكانت هادي أول مرة تكدب على خوها:بغيتها فشي حاجة تتخص لبنات ضروري "بتراجي" عفاك فيقها!
يوسف حرك راصوا بإجاب ودخل يفيق نجلاء
نجلاء مقلوبا بنعاس نطقات بدون ما تفتح عينيها: بعد مني خليني نعس
يوسف قرب من ودنها:حبيبة نوضي تكلمي؟
نجلاء كمشات حجبانها بنزعاج:شكون بغاني؟؟
يوسف وقف :نرجس محتاجاك ضروري ؟! "سكت للحضة وعود سولها" نقول ليها تمشي حتى لصباح ؟!
على دكر إسم " نرجس"حلات عينيها وبزربة ناضت تتلبس في بينورها وبنفي حركات راصها وخرجات بزربة جرات معها نرجس لبيتها ...بينما يوسف رجع يكمل نعاسواا
دفعاتها داخل للبيت وسداتوا من لداخل "هضرات بعصبية " بلا ما تنتابه لدموع نرجس
نجلاء بخفوت:قلت ليك ملي تبغيني رسلي ليا مساج !علاش جيتي لعندي في هاذ ليل قدام خوك؟!
نرجس حركات راصها بخوف ودموعها ديرين خط على حنكها جلسات في طرف ديال نموسيتها وفمها تيترعد كلماتها كيخرجوا مخربقين: كان عندك الحق أنا حتى واحد ما كيبغيني وكلهم تيضحكوا عليا هئ هئ في لقسم...
نجلاء قلبات عينيها وخنزرات بعصبية بلا ما تبين لنرجس وبتسمات جنب قربات منها بتعاطف:حبيبة علاش تتبكي (حطات يديها على شعرها )فهميني باش نعونك !
نرجس هزات راصها بوجه حزين "بتراجي قالت" كلهم كيضحكوا عليا حتى واحدا ما بغات تكون صحبتي تيستهزروا بلبسي وحويجي ...
نجلاء عاجبها لحال:وشتي أش قلت ليك أنا تنبغي ليك غير مصلاحتك ! كون سمعتي ليا في لول ما غديش طيحي في بحال هاذ الموقف...
نرجس مسحات دموعها:قالو ليا إلى بدلت راصي أو وليت زوينة فحالهم نمشي لعندهم غدا في لعشية لقهوة لي قدام لبحر...
نجلاء بتأكيد :وهاذ شي أحبيبة ضربيه على حسابي غدا نخرجوا مورا لفطور نشريوا شي حويجات ونديك لواحد الصالون تخرجي منوا ملكة جمال العالم
نرجس ببتسامة مترددة:بصح تتدوي؟!
نجلاء بتسمات بخفة أو وقفات:معلوم أنرجس سيري دابا تنعسي باش يصبح وجهك منور ! تصبحي على خير...
نرجس تنهدات براحة وتخشات في بلاصتها طفات الضوء حداها ونعسات...
"الحاضر"
فيقتها من سهوتها إيد نجلاء لي تحطات على كتفها...
نجلاء :حبيبة وقفي شوفي راصك جيتي غزالة تبارك الله
نرجس وقفات ببطئ ما مسدقاش نفسها شافت راصها تيبان في شكل أخر مغير عن المعتاد بغات الطير من الفرحة غرغروا عينيها بدموع الفرح وعنقات نجلاء تتشكر فيها "شكرا بزاف أختي أول مرة غيعجبني راصي لهلا يخطيك عليا"
بينما نجلاء ما دارت حتى رد فعل بقات مصدومة لدقائق أو من بعد بعدات نرجس عليها وقالت: خاصك تمشي أصدقائك غيكونوا كيتسناو فيك ما جاتش من نهار لول تعطلي عليهم...
نرجس هزات صاكها الصغير وباست نجلاء وخرجات فرحانة للشارع بحال شي واحد عاد تزاد وباغي يكتاشف دنيا...
واقف هوا وصحابوا في طروطوار ماقبلين مع البحر وعاطيين بضهرهم لقهوة راقية كيفصلها على فين واقفين هما غير شانطي...
أيمن حيد نضراتوا شمسية وستنشق ريحة لبحر من أعماقواا:كتبتوا شي حاجة ولا والوا؟
عمر حرك راصوا:داك شي في لبال العشير غير تتجبد ستيلوا باش تدون تيطير...
رضا قتلوا جوع:تاكلوا شي حاجة أدراري
عمر:جيب ليا قهوة كحلة
أيمن تنهد من الأعماق ساخط شار بصبعوا"للقهوة" هادوك هما لي طالعا ليهم عيشين بيخير لي بغاوها كتحضر...
عمر طبط بيدوا على كتف أيمن:مديرش في بالك أصاحبي فلوس ماشي هوما كلشي في دنيا...
رضا ساط بجهد وجه كلاموا ل أيمن :غنباتوا هنا قول أش باغي ؟!
أيمن :جيب معاك طاكوس أو موناضة ! لبحر دار ليا جوع
رضا زربان: يمشي معايا شي واحد فيكم ما عنديش عشرين يد !
أيمن خنزر فيه :زيد قدامي السمين ههههه
عمر ضحك عليهم أو وقف مقابل مع البحر....
داخل القهوة جالسا بينهم في كرسي وكتلعب بيديها بتوتر حاسا براصها غريبة عليهم ومع ذاك باغا تولي وحدة منهم...ديرينها وسط منهم ويسولوا فيها جبدوا منها كَاعْ داك شي لي بغاوو
ندى قدها قد نرجس غير هيا مع كترة المكياج لي تتدير تيخليها تبان كبيرة بتسمات جنب وقالت: إيوا دابا إلى بغيتي تولي من لكليكة ديالنا خاصنا نحكموا عليك بشي حاجة وديريها...
نرجس دورات راصها بهتمام باغا تحدى نفسها باش تبين ليهم العكس: شنوا ندير؟
أروى كبر منهم بعام دورات راصها مطولااا تتشوف لبعيد من بعد شارت لبرات لقهوة: أمم شوفي تما؟
نرجس شافت شنوا شارت ليها وبتسمات ببرائة: بغيتيني نمشي حتى لتما ونجي؟
أروى بتسمات جنب بستهزاء قالت:لا أحبيبة شتي داك الولد لي مقابل مع لبحر لهيه سيري بوسيه أو هاربي !
قاطعها أمين مبعد عينيه من تيليفونوا شاف فيهم:غير بدلي الحكمة البنت ماشي ديال داك شي ههههههه
نرجس دورات راصها مصدومة تتشوف في صحابها وتترجع تشوف في "عمر" الولد لي شاروا ليها تبوسوا...
ندى بتحدي:غنحسب حتى لتلاتة وإلى ما درتيش لي قلنا ليك غير نسينا أحبيبة...
أروى رتشفات من العصير "بتأكيد قالت": لبنت لي ما عندهاش حس الجرئة ما عندنا ما نديروا بيها في مجموعتنا.."صغرات عينيها " لبنات لي تيحشموا باليدات أو ما عندهمش شخصية...
ندى جمعات حجبانها وقصحات لهضرة: سيري بحالك ما بقاتش عندك بلاصة بينا
قبل لا تكمل كلامها لقات نرجس خرجات قطعات شانطي أو وقفات مورا عمر قلبها تيدرب بجهد ويديها تيترعدوا *شافت في أصدقائها بتراجي باش يمنعوها سعا هما العكس كلهم متحمسين وتيغمزوا فيها باش تبوسوا دغيا*
دارت لعندوا حطات يديها بزوج على عنقوا وقفات على صباع رجليها وغمضات عينيها
حطات شفايفها على حنكوا أو قبلاتوا بلطف وحنية ....
عمر كان واقف ما عليه ما بيه حتى حس بجوج يدين صغار رطبين تحطوا على كتفواا بحنية من بنت صغيرة عينيها صغيورين وزادت سداتهم ملي شافت في وجهوا بدون سابق إندار قبل لا يتكلم ويسولها قبلاتوا في حنكوا خلاتوا مصدوم
يالله غتهرب شد ليها من إيدها ما بغا يطلق
عمر حرك راصوا بتسائل:شكون نتي؟
نرجس قلبها تيدرب على جهد شافت حتى عيات وهيا دير لي غيسلكها دارت ببطئ بحالا غتجوبوا وتحنات عضاتوا في يدوا بجهد أو هربات...
غاديا تتجري في وسط شانطي غافلا على الطوبيس لي كيكلاصوني عليها بجهد فاش شافتوا قرب غمضات عينيها تتسنى الدربة...
يالله غا تغوت ما حسات غير بي إيد ساحبتها حتى جات طيحا على شخص لي جرها كاملا فوق تروتوار...هزات عينيها بشوي حلاتهم وهوما يتلقاوو عينيهم ببعض بقاو تيسمعوا غير صوت دقات قلوبهم .بحال شي مغنطيس جدبهم..بقاواا ساهيين في بعضياتهم لتاوني ما فيقهم من سهوتهم غير صوت الناس لي تجمعوا عليهم كيطمنوا على صحتهم....
راجل كبير في سن:كيف بقيتوا أو لدي نعيط ليكم على الإسعاف
عمر شد من درعواا بألم هضر من تحت سنانوا:لا ما عليش الشريف شكرا
نرجس وقفات تتسوس في راصها تسلات بين ناس وهربات وعمر لي كلاها في دراعوا كلوا تهرد ليه وتجرح حنت جا من لتحت هوا لي كلا الدقة....
رجعات لدار تترعد من الخوف ورجليها فاشلين عليها...
تقبلات مع المرايا حطا إيديها على قلبها لي تيدرب بجهد شعور جديد حسات بيه خالج كيانها....
جلسات فوق نموسيتها تترجع النفس وعينيها تيرمشوا بزربة حطات إيديها لي تترجف على فمها
وبتسمات جنب بلا ما تحس بقات ساهية تتضحك بوحدها وما ندماتش على فعلتها وخا كانت على شويا وتوقع ليها حادثة سير..
قفزت في بلاصتها بعد ما سمعات صوت مها"فريدة" تتنادي عليها جوبتها ب "نعم" وخرجات لعندها...
فريدة جالسا في الصالون لبسا كندورة في الأزرق وجامعة شعرها سفنجة ديرا مكياج خفيف ومهلايا في راصها رغم كبر سنها ...
حركات راصها بتأسل:فين كنتي أبنتي ما ماملفاش ليك تخرجي ؟! "هزات عينيها مبهوضة في حويج نرجس ما مسدقاش" تبارك الله جيتي زوينة أبنتي !أش هاذ لبس ومكياج شكون صوب ليك هاذ شي ؟
نرجس بعينين تيبريوا :بصح جيت زوينة؟!
فريضة بتسمات بخفة:جيتي فنة تتحمقي أنا لي ولدا زين صافي ههه
نرجس حركات راصها بقلق أو جلسات حدا مها:ماما أركان ما غيتلقلقش مني هوا وبابا على هاذ لحويج؟!
فريدة بجدية قالت:بنتي نتي عارفة خوك "أركان"باغيك تركزي على مستقبلك كثر من هاذ شي !ولكن ما فيها باس إلى تهليتي في راصك شويا !
نرجس بتسمات جنب وتخشات في حضن فريدة فرحانة حتى سمعات سميتها وتقلبوا ملامحها لخوف ...
دخل تايجري عينيه حمرين كيف جمر وعروق يدير مزيرين ضاهرين تيدور عينيه في رياض كامل تالف كيقلب عليها وكيغوت بسميتها بجهد من تحت سنانوا: ناااااااارجيييييس ناااارجيس
خرجات من الصالون و تمشات ناحيتوا ببطئ وخوف منزلا راصها الأرض سرطات ريقها بصعوبة وقالت : نعام أخويا؟
رتاح قلبوا مني سمع صوتها مشا لعندها بسرعة و بخوف تيتفحص فيها كاملااا
كمش حجبانوا: تتضرك شي حاجة؟!
نرجس حركات راصها ب لا
أركان قصح الشوفة :علاش تتكدبي ؟!
نرجس بصوت باكي:ما تنكدبش عليك
فريدة بتسائل قطعاتهم:أش واقع أولدي فهمني ؟!
أركان ما كين والوا الواليدة غير رتاحي "طمنها بعينيه ونطق"مسألة عادية بين لخوت ما ديريش في بالك !
كمش حجبانوا و دار عاطيهم بهضروا لعريض "
بعدما أمر نرجس تبعوا"تمات غاديا موراه برجلين تيرجفوا تتفرك في يديها بتوتر ومجموعة تساؤلات تيدوروا في راصها...
دخلها لبيت أو سد لباب برجليه من موراه بعصبية...
أركان مكمش حجبانوا :أش كنتي كديري في قهوة**** ليوم؟؟
هزات عينيها بصدمة وعامل لخوف لعب عليها قالت بتمتمة :مشيت نبدل الجوا؟
أركان صغر عينيه و سرط ريقوا حتى تفاحة أدم تحركات في حلقوا : ما مالفاش ليك تجلسي في لقهاوي؟
نرجس منزلا راصها الارض بصوت باكي قالت :خويا تنحلف ليك غير مشيت مع بنات تيقراو معايا نحفضوا؟!
أركان قرب منها طاوي يديه عندوا: وشنوا قضية طوبيس لي كان غيضربك ؟!
نرجس قلبها بدا يخبط خيفا لا يكون أركان عرف بداك شي لي وقع؟ غير كنت غنقطع شانطي و ما شفتواش والله
أركان نطق بصوت هادئ عكس قبيلا:نتي ختي صغيرة من حقي نخاف عليك"نرجس حركات راصها ب اه" كون وقعات ليك شي حاجة خيبة! ما فكرتيش شنوا غيوقع لحاجة وباقي العائلة ؟!
نرجس دلات شفتها التحتانية ببرائة:أخر مرة أخويا سمح ليا
أركان : سيري راجعي دروسك ! أخر مرة نسمع بحال هاذ شي؟
نرجس دارت لعندوا وبزز باش تجرأت أو سولاتوا: أركان باش عرفتي بلي وقع ليا؟
أركان رد ببرود: ما تشغليش راصك ! أي حاجة كتوقع كتوصلني ...
نرجس هبطات عينيها و تمشات غاديا ناحية للباب ...حطات إيدها على لبواني وهيا تسمع كلاموا أو وقفات جامدة في بلاصتها...
أركان حرك راصوا و جلس مفرق رجليه فوق الفوطاي لي في بيتوا ومشابك يديه مع بعض مطول الشوفة في نرجس حرك شفايفوا ونطق بصرامة: نرجس قرايتك هيا لولة..ملي تبغي ديري أي خطوة فكري في راصك أو مستقبلك "سكت لتواني مكمل كلاموا"كلشي نسمح فيه حتى لكرامة وإسم العائلة !
حركات راصها مكمشا حجبانها" راص كيقول ليها راه عرف بقضية لبوسة وعلى قبل الإحترام والحشمة لي بينهم ما بغاش يجبد ليها الموضوع وراص أخر تيقول ليها العكس"
أركان شافها جمدات في بلاصتها بتاسم جنب ونطق:جاتك زوينة هاذ الكسوة
وقف تمشا ناحيتها دورها عندوا ونطق: عارف لبنات لي قدك تيبغي يتهلاوا في راصهم ويلبسوا ولكن ماشي وقتوا ! و قريتك هيا الأهم دابا"شار لوجها وبي إبتسامة مزينة ملامحوا قال" نقصي شويا من ذاك زواق !
نرجس تنهدات براحة "وخا أخويا"وخرجات...
جالسين وسط لمراح والتلفازا شاعلا قدامهم تيتفرجوا في مسلسل هندي "حب خادع"
وإسلام شادا القنت ديال السداري جالسا حدا طبلة شادا ستيلوا وكتاب تاتخطط للعرس...
ورحمة ناعسة في بيتها حنت مولفا غير تغدا تضربها بنعسا باش ترتاح....
إسلام عين في الكتاب وعين في التلفازا نطقات بعصبية:وناري هاذ ديب شحال كداب وغدار ولد لحرام ! بقات فيا غير أروهي مسكينة وحتى تارا ! تيلعب بيهم بجوج ولد الهم !
أمينة معصبة كتر منها قالت :شتي أنا كون كنت في بلاصة تارا نصفيها ليه لمرة لولة ! قتالاا قتالا ا"هزات يديها" والله ما نقتلوا ونتهنا في مرة !
توبة دورات راصها وبحسرة قالت:أحياني شتي رجال ما فيهم تيقة ! سولوني أنا وهاذ لمسلسل تيهضر على هاذ الموضوع بدات حنت ديب كيفما لاحضتوا أناني تيقلب غير على مصلاحتوا والحاجة لي غتسلكواا تيديرها ولوا تكون على حسابهم هما...
أمينة بقلق وحيرة شدات من راصها :أيي فاش فكرتيني ؟!
إسلام بتسائل:مالكي؟!
أمينة بحيرة:دابا أنا قريب إنشاء الله نتزوج أو بنسبة لشهادة العذرية واش ضروري منها ولا بلاش حنت كنعرفوا؟!
توبة ضحكات بسخرية:أويلي على تنعرفوا من نيتك داويا"أمينة حركات راصها بسداجة"
عطيني ودنك ! شتي هاذ الشهادة ضروري منها الأي بنت ! هيا لي غتخليك دخلي لدار راجلك بفتخار وهازا راصك لسماء وفي حالة ما وقعات ليك شي مشكلة في ليلة الدخلة الله يحفض كتكون ديك الورقة هيا دليل برائتك
أمينة تتسمع بأهتمام أكبر لتوبة لي عندها خبرة وتتدور لهضرة في راصها نطقات بقلة حيلة:وشنوا ندير؟
توبة حركات راصها:هانتي غتمشي عند كريم وتقولي ليه يمشي معاك و خاليه هوا لي يختار شي طبيبة كيتيق فيها(بتحدير هزات صبعها) ويااك تختاري نتي طبيب ! باش غدا ولا بعدوا ما يقولش ليك كدبتي عليا ! و ديراها مع طبيبة ! زمان تيدور أختي أمينة والحب ما كيدومش...
إسلام هزات راصها في أمينة:توبة عندها الحق ديري لي قالت ليك عليه بالحرف ومتخافيش ختي نصائحها لا يستهان بيهم
أمينة حاطا صبعها على دقنها قالت بتنهيدة طويلة :عندكم الحق ! غدا إنشاء الله نمشي رجلي برجلوا والله ما نفلتواا (دورات راصها)نوقفوا على حدوا دابا باش يعرف أمينة بنت العربي أش كتسوا أهاه مزيان تبارك الله
بدوا تيضحكوا حتى قاطعهم صوت الباب كيتفتح بساروات داروا جيهتوا كاملين وهوا يدخل عمر شاد من دراعوا ومكمش حجبانوا بألم وقفات لعندوا توبة مصدومة : أش واقع مالك هاكا؟
عمر من تحت سنانوا:غير طحت ما وقع والوا
حيد تيشرت لي لابس وبقا غير بي سليب سمطة
غير شافت توبة لهردة لي في دراعوا ديزا بدم شهقات بجهد حطات إيديها على فمها وجرتوا من إيدوا ليمنى: أويلي هادي غير طيحة جلس هنا تسناني نجيب دواء نعقم ليك الجرح
جلس عمر وعلى يساروا جالسا أمينة وقداموا إسلام "هزات أمينة راصها من تيليفون بعدما كتبات مساج لكريم وقالت لعمر : ما يكون عندك باس "يالله غتنزل راصها وهيا تخرج عينيها حتى لبؤبؤ لدخلاني وساع فاش شافت طبعة بوسة مطراسية على خد عمر بالعكر...
أمينة تتعض في شفيفها من جناب وتشير ل إسلام باش تشوف في حنك عمر أو والوا إسلام ما فهماتش بقات ليها غير طريقة وحدة شارت ليها لتيلفون ورسلات ليها مساج
"شوفي خوك في حنكوا ليسرى فيها بوسة"
إسلام هزات راصها بصدمة ناضت دارت على يسار عمر وهيا تشهق بجهد وخرجات عينيها بجهد قالت :أويلي...
.
عمر هز حجبانوا بجوج كتسائل بمعنى مالكي
إسلام بقات تترمش بزربة و رجعات جلسات في بلاصتها تالفة بصدمة:والوا أخويا والوا
أمينة تتلعب بشفيفها:عمر !!عود لينا (غمزاتوا) كيفاش حتى طحتي؟؟
عمر هز عينوا فيها :ماشي شي حاجة فقدت توازن وطحت !
أمينة دورات راصها :وهاذي شي طيحة زوينة لي خلاتك مطبع ! أودي كون غير تكيستي شويا على صحيحتك !!حتى حاجة ما كتدار بجهالة "بتسمات بغمزة" ونتا باقي صغير مزال الوقت على هاذ شي مالك مزروب؟!
"إسلام من كلام أمينة خرجوا عينيها ولات تكحب بلعاني من الأحراج لي حسات بيه بغاتها غير تسكت"
عمر ما قشبل حتى حاجة في كلامها ...يالله غيسولها وهيا تقاطعوا توبة هازا دواء قربات تتعقم ليه الجرح وتحسر على حالوا
توبة بتسائل :عمر فين صحابك ياك خرجتي معاهم ! أحياني على الكفارة بالله ملي طحتي خلاوك بوحدك ومشاوا
عمر عاض شفتوا من لداخل بألم ملي كتحط عليه توبة لقطن فيه دواء: لا ما كانوش معايا ملي طحت"أمينة وإسلام وبداو يشوفوا في بعضياتهم ويغمزوا في توبة تشوف لحنك"كنت بوحدي مشاو يتسخروا ودابا ملي طحت جيت بلا ما نقولها ليهم فكرتيني نعيط عليهم غيكونوا كيقلبوا عليا دابا؟
توبة مبهوضة:عمر !! خدك حتى هوا طحتي عليه....
عمر حط يدوا على حنكوا بستفهام وهوا يلصق فيه أحمر شفاه في جنب صبعوا شافوا وهيا توحل ليه الهضرة ملي تفكر لبلان لي وقع بتاسم بزز منوا بملامح حرجا نطق:والوا غير شنيولة !! مع حال بدا يسخن كترات هاذ الأيام "بدا ينش على وجهوا أو قف" بنت لحرام
توبة حطات إيد على إيد :شي شنيولة زينة هادي
أمينة قلبات عينيها مقاطعها:لا تعيرهاش أخويا وشكون غيبردك والحال سخون؟!
إسلام تلاحت عليها بقرصة وهضرات
بعينيها:أويلي حي تي كوني تحشمي(خاطبت عمر)سير أخويا ترتاح في بيتك
هرب من وسطهم طالع في دروج وما سلمش من هضرة أمينة لي غوتات عليه من دار لتحت قالت:
_وعلى القليلة عرفنا بيها ! نشوفوها واش تليق ليك ولا لا ! أو واش تستاهل ديك الهردة كاملا على قبلها ولاولوا
إسلام حطات إيدها على خدها مبهوضة: شوفي ليك لولد حتى هوا ! شكون كان يضن عمر دير هكا ستغفر الله
توبة بتأكيد:شفتي أش قلت ليك رجال كلهم بحال بحال ! والعربون من خوك
أمينة ناضت تتلبس في رجليها:إيوا نخليكم تفكوا حريرتكم ونمشي لدار دابا سعاد تعرق ليا على التعطال...
لا يصل الناس إلى حديقة النجاح دون أن يمروا بمحطات التعب والفشل واليأس،و
صاحب الإرادة القوية لا يطيل الوقوف في هذه المحطات...
جالسين في الحمام بلدي وسط السخون توبة أو أمينة تيحكوا بالكيس أو إسلام تتغسل في شعرها....
توبة هزات راصها وتتحك في درعها:لعجب أ إسلام حتى ما طلقتيش داك الحلوق وسرتي تغني كيف موالفة؟!
إسلام تتكب لماء على راصها عوجات فمها :الصمت
أمينة دورات راصها تتضحك:لهلا يوريك أش وقع ليها مسكينة !
توبة بهتمام جمعات حجبانها:أش وقع وليتوا تاتخبيوا عليا ؟!
إسلام بخوف تتشوف في جنابها بخفوت قالت:خرجوا ليا لي ما كيدكروش ؟!
توبة بقات مبهوضة تتشوف فيها وتترمش بزربة ما مسدقاش..
أمينة : تي مال لكونكسيوا عندك تقيلة "هضرات بجهد خلات كَاعْ لعيالات يشوفوا فيها مخلوعين"خرجوا ليها جنون فاش كانت كتدوش في الفيرما !
إسلام قاطعتها بخوف وجرات اللحمة ديال عنقها ودفلات في الأرض:تف تف تف دكرنا السمن والعسل ،تنقول ليك ديما ما تبقايش دكريهم راصك أش فيه؟!
"أمينة وتوبة بقاوو تيشوفوا فيها بتعجب"
حركات راصها وهزات كتفها ونطقات :مالكم تتشوفوا فيا مالبساش تريكوا لي غندفل فيه قديت بعنقي هادوك ما معاهمش اللعب !
أمينة وتوبة قالوا دقة وحدة : الله يستر
توبة بهتمام أكبر حطات يدها على فمها وقالت: إيوا عودي ليا شفتيهم ؟! أش قالوا ليك؟!
إسلام جمعات شعرها ودلات شفتها التحتانية :هوما ما بانوش ليا ولكن خلاوا ليا رسالة
توبة بعد فهم:علاه هما كيكتبوا عندك يكون شي بنادم
أمينة بعينين تيبريوا:لهلا يوريك هاذ سيدي الجن ! كتبتوا كيف ديرا أنا حبيتوا من خط يدوا لقيناه كاتب ليها:
__متبقيش تغني في الحمام...وإلى غتشوفي شي حويج ما غادينش يعجبوك
توبة ضحكات من قلبها راضية عليه:شتي هاذا لي حيد منك هاذ العادة العوجة سوا كان من الإنس أو لا الجان الله يعطيه ستر ولي حط فيها يديه تقاد ليه ياربي
إسلام تنهدات من قلبها: بقا لدابا ديك الجملة لي كتب قتلاني بالخلعة فينما كنتفكرها ما كنعسش ليل كولوا ونتي سيرا كتدعي معاه...
أمينة بتسائل:إيوا فاش وصلتي في أمور العرس..
إسلام بتوتر:طارت 28 يوم بزربة ما حسيناش بيها (تقبلات معاهم) هانتوما أنا غنقول ليكم أشنوا درت باش منها نتفكر لا مشيت نسيت شي حاجة
أمينة وتوبة حركوا راصهم ب أه
إسلام : الحلوة وجدت على يد ماما ونتي ! وتقدات في البلاطوات" توبةحركات راصها بإجاب" أو بالنسبة لطياب سيفطت تقديا ولمناضا وكلشي مع سميرة لخالتي مليكة طيابها بنين غتيتعاونوا مع بعضياتهم أو طبالي ولكراسا وباقي لمعدات غيوصوا غدا في صباح لفيرما تقريبا كلشي وجد إلى (حطات إيدها على فمها مصدومة)ويلي نسيت سربايا ولجروب لي غيغنيوي في العرس أهم حاجة نسيتها تفواا أش غندير دابا
أمينة مخرجا عينيها:شناهوااا !وعلاش غنشطح أنا
إسلام بعينين عامرين أمل:متخافيش أنا غنشوف شنوا ندير !غنمشي ونخليكم تكملوا
عومتكم "وقفات تشلات ومشات لبسات حويجها وخرجات" خلات أمينة تتهضر معها مدتهاش فيها ...
أمينة تتطلع وتهبط في إسلام :فورمتك زيانت العفريتة سعدات هاذا لي غيديك(بتسمات جنب ) لي شافك يقولوا نتي العروسة ماشي أنا
توبة قاطعتها:أييه فاش فكرتيني
"دارت جبدات بواطة ديال البلاستيك غلاقتها صفراء ومداتها ل أمينة" شدي هادوا صوباتهم ليك ماما نتي غدا عرسك وهاذ لعشوب غيرجعوك بيضا كتشعلي وريحتك غتبقا غزالة فنا فيهم الحناء مخلطة مع لعكر الفاسي أو_بابونج او الخزامة وريحان ولقرنفل أو زعتر أو شيح أو لعرعار ....وهاكي تبرعي ليا مع راصك
أمينة ببتسامة:الله يعطيها الخير مي رحمة ديما مفكراني ! شكرا الحب الله يخليكم ليا
أو وقفات هازا سطل في يديها:أنا غنمشي نعمر هاذ سطل ضدد فديك فاطنة ديما تتجي تسابق معايا وأنا دابا نوريها شكون فينا الواعرة...
توبة كتضحك:اويلي يهديك الله غدا عرسك وغتسدقي مدربا ترجعي كلك مزوقة تخلي لعريس يهرب هههه
أمينة:غربيها ونجي متخافيش عليا
خرجات من الحمام وحنيكتها حمرين غيطرطقوا بسخونية غاديا تالفا وتتعض في صبعنها من التوتر
ما بان ليها غادي في الدرب غير "عْبَيْقَا" شمكار ! كولوا واشم وعينيه مقلوبين هاز ولد ختوا فوق عنقوا وغادي كيتخلوع في الطريق ترددات في لول ومن بعد دارتها في يد الله و مشات تتجري عندوا كتنهج وقفاتوا
إسلام تترد النفس:خويا نورالدين ممكن تعوني في واحد لبلان ؟!
نور الدين بصوت تقيل غالب عليه السكر رد عليها: نتي الوحيدة الخوادرية ديال الدرب لي تتعيطي ليا بسميتي يتووب عليك "ولد ختوا جروا من دوك جوج زغبات لي صابغ"
_ أتا هْذَا البرهوش ولا بربي حتى نردخ مك مع الحيط
إسلام سرطات ريقها بخوف:اويلي دري مزال صغير حشومة تقول ليه هاكا !عنداك !عنداك طيحوا حاول تشد في راصك الله يعفوا عليك
عبيقا بعينين مقلوبيش :وخا يبان ليك صغير راه تيطير مع الطيور (غمزها)إيوا أش بغيتيني يكما شي واحد بغيتي نعطيه شي قتلة ولا نخطف شي وحدة (حرك صبعوا تيهضر بيه وشويا ما كان غيطيح)عرفت لبلان نقتل ديك ختنا لي دات ليك سفيان؟!
إسلام حطات إيدها على فمها مصدومة: سلامة يا ربي ! راصك عامر غير الجرائم الله يستر ! "إسلام تتهضر وخيفا على راصها حنت عرفا عبيقا أش تيسوا يقدر يقتل على كلمة ما عجباتوش" أنا جيت عندك على وديت خدمة شريفة !
عبيقا تما غادي بحلاتوا:لا لا من غير هاذ شي لي قلت ليك ما تنعرف ندير والوا ؟!
إسلام بتراجي وقفاتوا:عفاك اخويا نورالدين الله يسهل عليك ما صعاب أنا محتجاك هانتا غنجيب دوك رباعة ديول صحابك ! وغتجيوا تسربيوا في واحد العرس !وملي تسالي غتديوا معاكم عشاكم وفلوس خدمتكم !
عبيقا تيدور في راصوا تقول هوا راجل أعمال
_وخا الخوادرية ما يكون غير خاطرك غير هوا مابغيت ماخزن يحضر
إسلام حركات راصهابتأكيد:كون هاني واصلا هاذي خدمة نقية ما غيتحاسب معك حد !وهنتا قاد الحالة نتا ودراري ولبسوا مزيان بغيتكم تحمروا ليا وجهي وغدا مع صباح ندق عليك غايجي واحد الكاميوا غنمشيوا فيه كاملين ...
نورالدين حرك راصوا يمين وشمال دايخ:كوني هانيا غدا تلقينا قدام الباب مستيكين على الحالة تنتسناواا فيك (تما غادي خاطب الولد)تا هدا البروهوش راني خاسر زبالة لفلوس تم
تنهدات براحة هزات راصها وهيا تلقا عمر واقف قدام لباب جا يجري عندها...
عمر بخوف:مالك معا داك خينا ؟! يكما تبسل عليك
إسلام حركات راصها ب لا
عمر بتسأل:وشنوا كنتي كديري معاه؟!
إسلام جراتوا أو دخلات لدار من لبرد و عودات ليه.....
عمر بصدمة بتاسم جنب:ويلييي الخوادرية دابا عرس كوميسير غيسربي فيه شمكار وجديدة هادي
إسلام هزات حجبانها بعدم الرضا:ما عندي حتى حل ! وبقا عندي مشكلة أخرى دابا
عمر عض شفتوا لداخلانية: أشنوا المشكل؟!
إسلام بصوت باكي:ناري نسيت لجروب وأول عرس غتنضموا شركة"زواج مبارك "غيفشل المشكلة الأكبرعرس صحبتي الوحيدة
عمر طبطب بيدوا على كتفها:لجروب ونشاط ضربيهم على حسابي الخوادرية ..
إسلام ضارت لعندوا:ياك باش تجيب ليا دوك صحابك مالين راب في عود ما تغنى هاهيا جات لعروسة زينة لبنات غتولي تقولوا
(بدات تتيدر حركات)ياوا ياواا هاهيا جات ياوو
عمر شد من كرشوا بضحك:ناري ياالخوادرية فين تباني قدام مسليم ! الى خدمتي على راصك غاتخرجي رابورة واعرة
إسلام ضرباتوا لكتفوا:تتضحك عاجبك الحال أنا في موصيبة ونتا سير تفرنس
عمر بتأكيد:ماشي داك شي لي في بالك غنجيب واحد لجروب تيغنيوا شرقي وشعبي كلشي كيبدعوا فيه غير نعسي على جنب راحة غدا يكونوا قدامك...
إسلام تنهدات براحة وجلسات فوق سداري :وخا ما عندي حتى حل أخر ! وسير عمر ليا أتاي عفا خويا
جالسين وسط الصالون في رياض عائلة راضي أو بي خبر "حمل" نجلاء مرت سي يوسف فرحانين الحاجة لالة خديجة ما قداها فرحة وفريدة دور وتزغرات ممسدقاش....
فريدة بعينين تيبريوا من الفرحة قالت:بنتي مشهيا شي حاجة نوجدها ليك؟!
نجلاء بتسمات جنب:لا أخالتي ميغسي ما بغيت
والوا دابا
سي عدنان فرحان من قلبوا: إلى ضراتك شي حاجة ولا حسيتي بدوخة نديوك عند الطبيب أبنتي؟!
الحاجة"خديجة"قاطعاتوا:عادي هاذ شي ! كيوقع في فترة الحمل أولدي !ما تشغلش بالك
"نجلاء ببتسامة يعلوها طابع تكبر تقول محقا إنجاز كبير:شكرا أعمي
فريدة بتسمات بخفة:بنتي قلتيها ليوسف كون راه غيطير من الفرحة حنت غيولي أب
نجلاء دورات عينيها:لا أخالتي نتوما أول وحدين تعرفوا"حركات راصها"حتى يجي من شاريكة ونقولها ليه
سي عدنان بفرحة كبيرة غامراه وقف أو طبطبئ على كتفها:غتقدمي لينا أول حفيد لعائلة راضي ! الله يرضي عليك أبنتي ما تخيليش شحال أنا فرحان دابا
الحاجة "خديجة" "وخا كتبان قبيحة وليني حنينة" نطقات:ردي لبال لصحتك أبنتي نجلاء هاذ الفترة مهمة خاصك تاكلي مزيان
نرجس تتلعب بشعرها بعينين تيبريوا قالت:يا ربي تكون بنية بغيت نلعب معها ونمشط ليها شعرها
نجلاء دارت مخنزرا ونطقات بتأكيد :لا بغيت ولد هوا لي غيحمل إسم العائلة ويكون الوريث الوحيد
فريدة قاطعتهم:ماكيهمش تكون بنت ولا ولد لمهم يكونوا فصحة مزيانة وبيخير
نرجس ببتسامة عريضة:ما كرهتش يمتا تزاد لبنيتة"شافت نجلاء خنزرات فيها"ولا لوليد ونهزوا بين يدي ونلعب معاه...
نجلاء رسمات إبتسامة خبث على محياها و حطات إيدها تتحسس بطنها وقالت مع نفسها:جيتي في وقتك أولدي ! غتكون نتا هوا الورقة رابحة ديال ماماك ! تنبغبك بزاف أ لحبيب ديالي...
فريدة فيقتها من سهوتها:طلعي لبيتك ترتاحي أبنتي...
جالس في المكتب ديالوا لي داخل رياض فوق كرسي في الأسود حاط رجل على رجل وطاوي يديه بزوج وعينيه مفيكسين في الحاج الراضي لي من الشوفة فيه تعرفوا عيان جالس يستنطقوا بحال شي محقق
أركان بصرامة نطق:ما تكدبش عليا الحاج ! بلا ما تخليني نمشي نشوف دكتور بنفسي !وطمني على نتائج تحاليل ؟!
الحاج راضي بصوت تقيل غالب عليه لمرض:ولدي أركان (تنهد من لداخل )طبيب لقا عندي ثقب في القلب ! وللأسف هاذ تقب كبير بزاف !إلى طولت عندي عام نعيشوا
أركان تهز قلبواا من لداخل وعلامات الحزن والقلق ضهروا على ملامحوا سرط ريقوا بصعوبة حتى تفاحة أدم تحركات في حلقوا أو وقف جر الكرسي لي مقابل مع جدوا جلس فيه مفرق رجليه وحاط مرافقوا على ركبتوا وجامع يديه بزوج على شكل قبضة حاطهم تحت ضقنوا
_متخافش الحاج كلشي غيكون مزيان..ولا بدا ما غيكون شي علاج
الحاج راضي بتاسم:أوديي اولدي أنا كبرت وعشت حياتي وليوووم أنا فرحان وما قداني فرحة خوك يوسف غيفرحني بحفيد وبغيت نطلب منك واحد الطلب ومتردوش في وجهي
أركان بهتمام شد يدين جدوا بين يديه :نتا أمر الحاج ولي بغيتيها تحدر دابا؟!
الحاج بجدية أكبر:بغيتك أولدي تزوج..أنا لحلم ديالي دابا نشد ولدك بين يديا ولا بغات تجي الموت مرحبا بيها
أركان زفر بجهد او وقف دار يديه في جيبوا عاطي لجدوا بضهروا بصوت رجولي خشن نطق :لحاج راك عارف مزال ما وسعتش المشاريع ديولي ويالله كيتأسوا بعض شركات في أوروبا خاصني نوقف على شغلي بيدي
الحاج راضي وقف بالعكاز ديالوا وقال:سيارات جَاعْ لي صممتي أويدي مشهورين تبارك الله أش بغيتي كتر ! "تقابل مع أركان وبجدية أكبر قال "كتعرف شي بنت أولدي ؟!
أركان حط يدوا على عنقوا جات في بالوا مولات صوت لكنه ما عارفش حتى شكلها أش غيدير "يشري الحوت في البحر" ما يمكنش حرك راصوا بنفي ونطق بلا مبالاة: لي بان ليكم الحاج ديروه لمهم هوا تعتاني بصحتك"وخرج مشا لبيتوا "
في باب الفيرما لكبير معلقة لافثة على شكل قلب مزينة بالورد لحمر والصفر ومكتوب وسطها
أمينة_كريم_زواج مبارك...
داخل لفيرما لحركة كتيرة كلشي كيجري وكل واحد وشنوا مهمتوا في العرس...
عمر هاز تيليفون تيهضر فيه مع لجروب ديال دراري لي غيغنيوا...عيا ما ينعت ليهم أو والوا تلفوا على طريق ...ما لقا ما يدير من غير يقولها لسي لعربي"أب أمينة" باش يديه في البيكوب ديالوا لي مالف تيجيب بيها لحم يجيبوا بيها لفرقة لي توضرات...
سعاد مقفطا كمايمها وجامعا جلايل تكشيطها
في الحزام أو واقفا على راص الطيابات في الكوزينة مقابلا الشغل بيديها...
ورحمة جالسا هيا و خوها لمختار في جليسة لي برا تيهضروا ويضحكوا ويحيدوا الشوق لي بينهم وأمير لابس كوستيم صغير على قدوا وتيلعب قدامهم...
وأمينة جلسا قدام لمراية في أبهى حلة فرحانة لبسا قفطان في الأبيض ومخيط بالأصفر ونكَافة ومساعدتها واقفين على راصها تيقادوا ليها في المكياج و شعر ...
وجنبها واقفا توبة لبسا قفطان في الأزرق توب ديال ساري وجامعا شعرها سفنجة على شكل شدات ديال لعريسات و حاطا مكياج خفيف مبين ملامحها...
أمينة تتشوف عينيها في المرايا خطبات النكَافة:ختي كتري ليا من المكياج هنا في جنب عيني باش تغطا هاذ الضربة الله يسهل عليك
توبة تتضحك من تحت سنانها بفقصة:بقيتي طيري في لحمام حتى سدقات فاطنة عاطياك بمرفقها لجنب عينك نيشان..
.
أمينة ببتسامة رضا:لمهم قتلت مها عصا وبردت هويشي الله عاد رتاحيت وشتي هاد الدقة غنرجعها ليها في ساعة الخير وغتقولي أمينة قالت غير بلاتي يدوز هاذ العرس
توبة بقات غير تتشوف وضحك هيا ولبنات على أمينة مابقات لقات ما تقول...
وسط الصالون لكبير محطوطين طبيلات والكراسا مقادين و زرابي في الأحمر مفرشين في الأرض وساريات لي في جناب ضاير بيهم لورد وشريط ديال لبولات صغار ملونين..
وبزاف ديال لي بوكي ديال لورد في الأبيض محطوطين في جناب حدا بلاصة لي غيجلسوا فيها العرسان مزينينها...وقدم صالون محطوطة العمالية لي غيهزوا فيها العروسة...
إلى شفتي صالون من بعيد تقول غير قاعة الأفرحان مزينا على إيدين ناس محترفين في المجال...
واقفا هيا وسط منهم لي تتعطي في الأوامر حاطا سماعة لبلوتوت في ودنيها ديال عمر و تيليفون ديراه في بوشيط لاصق في حزام قفطانها ودراري ديرين ليكيت باش كتواصل معهم لبسا قفطان في الأسود وفي رجليها لبسا بلغة وسيقانها كيبانوا من لتحث بيضين كيشعلوا وحاطا مكياج خفيف مركزا فيه غير على عينيها بالكحل وشعرها مطلوق مسرح من لفوق و ملوي من لتحت...
إسلام تالفا وسط منهم دور وتأكد من نفس الحاجة جوج مرات حتى لتلاتة وخاطرها ما مهنيها...
هزات تيليفون وعيطات على عمر و لقاتوا خارج تغطية حاولات مرة وجوج ونفس المشكل ...
هزات راصها ونفخات بجهد بان ليها "عْبَيْقاَ" ديز هاز كرسي قادوا وهيا تمشي لعندوا قصداه...
إسلام بتسائل:خويا نورالدين لعدول وصلوا ولا مزال ؟! عييت ما نعيط لعمر أو والوا..
نورالدين حرك راصوا بإجاب: شي ساعة باش جابهم عمر الخاودرية ! راهم تيشربوا في أتاي في داك الصالون صغير لي لهيه
إسلام بتسمات جنب ومشات دخلات لعندهم...
لعدول جالسين جوج أشخاص كبار في السن لابسين جلالب بيضين أو واحد حاط على راصوا طربوش حمر والأخر كحل... تيضحكوا فيما بينهم حتى دخلات لعندهم إسلام لقات عليهم السلام....
_السلام عليكم..مرحبا بيكم
مول طربوش لكحل ببتسامة رد عليها: وعليكم السلام ورحمة الله وبركاته ترحب بيك الجنة أبنتي
إسلام حركات راصها ونطقات:باقي غير نصف ساعة ويوصل لعريس و يكتبوا لكتاب إنشاء الله ؟ إلى ممكن تأكدوا من لوراق دابا نيت ما بغيناش نتحرجوا مع الناس !
مول طربوش حمر نطق:هانتي أبنتي أنا غنتأكد منهم قدامك
"جبد ملف فيه شي وراق حطهم قادموا تيقرا حتى خرجوا عينيه بصدمة سرط ريقوا بصعوبة مصدوم "خدا كاس ديال الماء شربوا دقة وحدة ودفع لملف لصاحبوا لي تصدم حتى هوا ملي قراهم...
إسلام بقات تتدور عينيها بينهم ما فاهما حتى حاجة بتسأل قالت:شنوا كين أعمي؟!
مول طربوش كحل حيد نضاضروا وقال:سمحي ليا أبنتي غلطنا بغينا نهزوا ملف لي فيه وراق عقد القران هزينا ملف كيخص قضية طلاق
إسلام خرجوا عينيها بصدمة:شناااهوااا؟! "حطات إيدها على فمها وجلسات فوق سداري فاشلا" وشنوا المعمول دابا؟!
مول طربوش حمر قال :كيفما كتعرفي أبنتي حنا ما عرفينش طريق لهنا !
صيفطي شي واحد للمكتب يمشي عند سي مصطفى يجيب الكاغيط ...أنا غنتاصل بيه نعلموا بالموضوع...
إسلام وقفات حطا إيدها على راصها والأرض كدور بيها بقلة حيلة مدات يديها:عطيني العنوان
خداتوا أو خرجات كتجري كتقلب لا كينا شي طوموبيل خرجا لمدينة تعطيهم لعنوان يدوزوا يجيبوا معاهم لوراق بقات تتدور تالفا حتى بان ليها معاد"الولد لي خدام عند المختار"مشات لعندوا وقفاتوا بتسأل؟!
_معاد فين هما طوموبيلات والكاميوا أو نورالدين في غبر حتى هوا؟!
معاد حرك راصوا:خويا عمر مشا يجيب لجروب أو نورالدين خرج يجيب الخبز وهوا ودراري حنت مزال ما وصل وباقين معرفتش فين مشاوو
إسلام حطات إيدها على فمها تتسوط بجهد: أووف وشنوا غندير دابا؟!" بقات ساهية تتدور في بلاصتها وهيا تجي في بالها فكرة" خويا عماد سير جيب ليا سيراج وقاد ليه لحزام وكلشي !
معاد حرك راصوا بإجاب ما فاهم والوا...
إسلام دخلات لبيت عند أمينة من تحت سنانها معصبة دخلات فيها طول و عرض
_شتي دابا بسباب راصك القاصح غتصدقي مزوجة غير بالفاتحة !قلت ليك ديري لعقد داك السبت ونتي مخك فيه حجرة يابس مصيبة كحلة هادي...
"ماخلاتش ل أمينة مجال باش تهضر وجرات شال أسود كبير دارتوا على راصها ودوراتوا على وجها بقاوو كيبانوا فيها غير العينين "
ومشات طلعات فوق سيراج"الحصان" ودخلات للغابة نيشان باش تخرج لطريق الرئيسية لي غتديها للمدينة....
دخلات لمدينة والخلعة ديال الطريق وهيا غاديا بوحدها قاتلاها أما المسؤولية ديال العرس زادت على ما بيها" ناس كلهم تيهزوا راصهم مبهوضين فيها كيفاش بنت لبسا قفطان فوق عود راكبا شي كيضحك وشي كيصور فيها والبعض الأخر ضنها خراجا من فيلم تاريخي ناقصها غير سيف وتجي هيا هاديك...
خدات لوراق وهاد المرة صحاح من العنوان لي عطوها العدول...ورجعات غاديا في طريق للفيرما...
كان غادي سايق بالمهل والقانون ما عندوش معها السوقان بجهالة... السرعة في طريق بالنسبة ليه هيا تعريض حياة ناس للخطر لداك كيتفادا يمشي بزربا...ساهي مخرج إيدوا من سرجم ديال سيارتوا حتى كيتفاجئ...
ببعض الأوراق لي حجبوا عليه الرئيا فوق زاج سيارتوا حبس لفران أو خرج من طموبيل تحنى تيجمع فيهم من الأرض...
إسلام كانت جالسا على ضهر الحصان وبين يديها وراق العقد حتى طيريهم ليها الريح على زاج سيارة أركان لي نزال يساعدها...
هز عينيه مبهوض فيها وحتى هوا كباقي ناس بزاف ديال الأسئلة هجمواا على عقلوا وخصوصا ملي شاف وراق عقد القران كانوا بين يديها...
بقا متبع ليها العين وهيا تتنزل من فوق سيراج يالله غتحط رجلها على الأرض... هربات ليها لفردة ديال شربيل وعفطات على زاجة صغيرة طلعات في كدمها كمشات حجبانها بألم وقربات كتعرج لعندوا
هوا ملي شاف أشنوا وقع ليها حس بجناوا تغرسوا في قلبوا وما فهمش علاش قلبوا حس هاكا من جيهة بنت غريبة تلاقها صدفة..بدون ما يحس قرب منها و تبع قلبواا
"أركان أسروا الكحل لي في عينيها البنيتين"
قرب منها وعينينه مفيكسين في عينيها حط يدوا على إيدها لي جراتها بالخف من وسط يدوا خيفا..هز يديه بزوج مبعدهم منها وقال بصوت حنين:ما تخافيش بغيت غير نعونك
إسلام بصوت باكي مدات يدها للوراق:بغيتهم عطيهم ليا
أركان جاه صوتها ماشي غريب وفيت داز على مسامعوا حط لوراق في سيارتوا و قرب منها وقال:شوفي رجلك تتدوز بدم خليني نعونك !
إسلام حركات راصها ب لا
أركان تحنى قاس راجلها ونطق بصوت خشن :الجرح ديالك غا يلتاهب الى ما تغطاش وهاذ زاجة خاصها تحيد من هنا !
إسلام خنقها شال حيداتواا من وجها وبدات تتنش بيه باش تبرد أو وجها ولا حمر بلا قياس ومن الألام لي حاسا بيه في راجلها دموعها داروا خط على حناكهاوغير سمعت قضية زاجة غيحيدها ليها بعدات وقالت بصوت غالبة عليه البكية تيرجف: أ لا هننننن هئ غير خليها بغيتها تبقا هئ هئ بعد مني هئ هئ
هز راصوا فيها وهوا يتعجب بجمالها وحنيكاها لحمرين تتبان بحال شي طفلة بريئة قال بينوا وبين نفسوا بنضرة طويلة وبإعجاب في وجها:
_سبحان من خلقك
أركان شاف تاعيا وعرف بلي لهضرة معها ما غتجيب حتى ناتيجة هزها بين يدوا وعينوا ما حيدهمش عليها..حطها فوق لكوسان مدور ليها رجليها لبرا يالله غتهضر وتغوت وهوا يحمر فيها بعينيه و قصح الشوفة فيها وهيا تخلع من نضراتوا جديين وستسلمات بالخوف...
حط يدوا على رجلها لي دغيا عمرات بدم ...
مزال ما قاص زاجة وهوا يسمع صوتها هز راصوا فيها مبهوض لقاها مغمضا عينيها تتعض في زيفها من جنب وكتنين بألم وشي تعابير ديال الخوف كدير بوجها جابت ليه الضحكة....
حط صباعوا بزوج على زاجة وجرها بزربة حتى غوتات ونطق باش يطمنها:
_هششش ما وقع والوا تهدني
نقا ليها الجرح ومسحوا بكلينيكس وحيد لقرافاطا حزمها ليها على رجلها بعدا دور عينيه في طموبيل وملقا حتى حاجة لي يغطي ليها بيه الجرح...وقف فتح لباب الأخر باش يجب ليها قرعة لماء...
هزات عينيها في تيليفونها شافت الساعة بان ليها الوقت داز تمدات وجرات لوراق من لوطوا ومشات تتجري رغم الآلام لي حاسا بيه وطلعات على ضهر سيراج قالت" شكر" من بعيد ومشات تتجري توغلات في الغابة لداخل ما بقاتش تتبان...
دخلات لعندهم كتلهت من جري ووجها صفر والعيا ضاهر على ملامحها ومكابرا...قفطانها مجرور في الأرض أو وراق العقد بين يديها....
أمينة بصدمة قالت:أويلي مالك على هاذ الحالة ؟! شوفي كيف وليتي حالتك ! ولكحل كامل داع في وجهك
إسلام تترد النفس حطات لوراق وهزات يديها بزوج لفوق ونطقات بتعب :هاذا هوا جهدي عليك أختي
توبة مدات ليها كاس ديال لماء وقالت:خودي شربي وجلسي ترتاحي
أمينة شهقات بجهد ملي شافت رجل إسلام مجروحة: مالك في رجلك ؟!
إسلام خشات رجلها تتخبيها تتحث القفطان وحركات راصها بنفي :ما فيا والوا غير نساي
توبة جرات ليها لقفطان:فين هيا فردة شربيل ؟ وعلاش رجلك مجروحة ؟! منين جبتي هاد لجرفاطا
إسلام شربات لكاس ديال الماء دقة وحدة: عفست على زاجة في طريق أو واحد الراجل هوا لي عوني "حطات يدها على راصها وتكات بضهارها على الحيط "وملي شفت الساعة جيت كنجري حفيانة ما رديتش البال للفردة "خرجات عينيها بتسائل "
_كريم وعائلتوا وصلوا؟!
أمينة وقفات ونكافة شادا ليها جناب قفطانها طويل حركات راصها بإجاب ومشات جيهت لحويج تتشوف بعينيها ختارات قفطان وأمرت البنت تمدوا ل إسلام حنت هيا إيديها عامرين بنقش "الحناء"مزال ما نشفوا ونطقات:نوضي لبسي هاذا وحيدي داك القفطان كلوا تغبر وسيري تنقشي راه نقاشة تتننقش لبنات برا..
إسلام وقفات بزربة وحطات الكاس من يديها:لا مزال تابعني شلا شغل ما عنديش كيف ندير؟!
أمينة خرجات عينيها و بعصبية نطقات موركا على كل حرف كتخرجوا:
عرس صحبتك الوحيييييدة ما بغيتييييييش تنقشيييييي فييييه أوبغاااااا تخرجييي هاكا ! عند الضيييييياف
توبة حطات سبعها تحت حنكها:أويلي أختي واش بغا ضحكي فينا الناس
إسلام بلا ما تحس بعصبية ضربات رجلها مع
الأرض وهيا تقصح كمشات حجبانها وقالت :
_وخااا وخاااا اوووف
قدات ليها نكَافة شعرها والمكياج بعدما لبسات قفطان في الأخضر..وجابت ليها توبة النقاشة حتى لعندها خافتها تسل تمشي تقابل شغلها وتخلي يديها بلا حناء..
بسرعة نقشات ليها داك شي خفيف وسامبل بعدما قادت سماعة لبلوتوت في ودنها باش تبقا على تواصل مع داراي...
يالله غتخرج مع أمينة باش تمشي معها تكتب العقد وهوا يجي لعندها عماد كيلهت من جري تيعيط عليها بجهد مخلوع
_ختي إسلام ختي إسلام !!
إسلام دارت لعندوا هازا يديها بزوج لفوق: عماد مالك أشنوا كين؟!
عماد شاد من جنبوا نطق بألم:ختي نوردين وصحابوا بغا يمشيوا بحالهم كان تيقول كدبتي عليه وملي بغيت نمنعوا ضربني؟!
إسلام خرجات عينيها ونطقات "شناهواا"..
خرجات تتعرج لعندهم باش توقفهم...
إسلام بان ليها غادي بعيد منها غوتات "خويا نورالدين "وزربات في مشيتها تتعرج لعندوا "خويا نورالدين وقف الله يستر عليك"عْبَيْقَا وقف مخنزر فيها وهيا دور أو وقفات قدماتوا بتسأل قالت ليه"
_شنوا كين علاش غتمشيوا
نورالدين حط إيدوا على وشم "الدئب" لي في عنقوا مخسر سيفتوا بصوت تيخلع قال:بنت ليك أنا بيدق قدامك ديرا ليا فخ بغيتي طيحيني في الشبكا !! مدخلاني وسط لحنوشا باغا تغرقي لجد بويا الشقف "بغمزة قال"الساطة جيتي حتى رحبة فليوا أو بغيتي تعطسي "زير على الفك السفلى ديالوا بغضب " راك مزال ما عارفا أبنت العبد شكون هوا عْبَيْقَا الذيب"من تحت سنانوا غوت في وجها ساعر"بغا ضحكي عليا؟!
إسلام تترعد من شكلوا خلعها يالله غتحط إيدها على كتفوا وهيا تشوف الحناء وجراتهم ساخطا "نطقات بترجي":والله ما ضحكت عليك أخويا أش جابنا لهاذ الهضرة..دوك البوليس غير معروضين وزيدن نتا خدام معايا بالحلال أ نورالدين ! أش غيقربهم ليك ؟!
نورالدين بتاسم بمكر أو وجر دراري:لهضرا ماشي هنا تجي لدرب ونتفاهموا الزين "دارمخنزر فيهاونطق:
_فعايل ديال لبراهش
إسلام بدموع تتطلبواا:عفااك أخويا محتاجاك والله العضيم بقاا غير على قبلي أنا غنضيع.....
نورالدين تما غادي ساخط وهوا يحس بإيد تحطات على كتفواا دار جامع حجبانوا بزوج مخنزر قال:
_مي رحمة حيدي من قدامي الله يحفضك
رحمة حطات إيدها على حنكوا المتصلب بحنان :ولدي نورالدين نتا عارف بنتي إسلام ما تأدي حد و نملة هيا لخْرا تتخاف تقتلها ! وغتنوض دير ليك نتا فخ "حركات راصها ببتسامة"مزال عاقل أولدي فاش كنتي صغير تتمشي تسخر ليا نتا وعمر كتديوا لاطات لحلوة لفران وتجي تجري لعندي وتغوت مي رحمة مي رحمة عطيني الحلوة ههههه
نورالدين زاد كمش حجبانوا كتر:وشنوا علاقة هاذ لهضرة بلي دارت بنتك؟!
رحمة بجدية أكبر قالت:عندها علااااقة أولدي وكيف ما فكرتك في هاذ شي خاصك تزيد تفكر في شكون لي كان تيخبيك في السطح من البوليس ملي كنتي صغيرة ولدابا الى درتي شي مصيبة تتخبا عندي "رحمة بتنهيدة طويلة نطقات"بنتي محتاجاك أ نورالدين تمارة لي داربت هاذ الشهر كامل وليالي لي سهرات كلشي غيضيع ليها أولدي إلى مشيتي بقا الله يرضي عليك
نورالدين حرك راصوا يمين وشمال تيشوف في دراري وبقا ساكت جامع يديه عندوا وعضلات كتافوا غيطرطقوا من القميجة...
رحمة بترجي :لعرس كلوا معتامد عليكم ! غير على قبل باك لي مريض وطيح في الفراش ! رجع تخدم و على حسابي أولدي حتى واحد ما غيقرب ليك
نورالدين دار كيشوف في دراري بانوا ليهم كاملين تيحركوا في راصهم موافقين...
طلق حجبانوا وتما راجع قدامهم بتهديد قال:
_تحركوا العشران إلى شي حد فيكم طيح شي حاجة من يديه نهاروا ما غيطلع فيه الشمس..
بعدما سناوو العرسان على عقد القران تعالات الزغاريت والصلاة والسلام على رسول الله...
لفيرما عمرات بناس أو لجروب بداووا يعزفوا ويغنيوا بنشاط دايرين خدمتهم وعباد الله ما كين غير شطيح وورديح
ونورالدين ودراراي لي معاه حاطين يد مورا ضهرهم بلابقة والإيد الأخرى هازين بيها بلاطوات لعاصير والحلوى وتيرحبوا بناس بإبتسامة لي شافهم ما يقولش عليهم شماكرية مدوزين الحبس وعبيقا بعضلاتوا ولقميجة لبيضاء لي مكروزا عليه لبنت لي شافتوا تتطيح فيه هوا دير خدمتوا ما مديهاش فيهم....
دخلات أمينة لبسا قفطان في الأزرق غامق وتاج محطوط فوق راصها وشعرها مطلوق بصلاة والسلام هيا وكريم لي لابس جلابة بيضا وفيها خطوطا بصفر وبلغة صفراء في رجلين جلسوا مشابكين يديهم مع بعض والإبتسامة ما فرقاتش وجوهم ...
إسلام هضرات مع داراري أو وصاتهم باش ضياف لي عاد دخلوا يستقبلوهم بالحليب والتمر كيف الباقين
كانت واقفا قدام باب الحمام تتسنى في أمير يخرج باش تديه عند موا وتشوف شغلها ويديها مزال هزاهم لفوق حنت الحناء مزال ما نشفات.....
حتى كيبان ليها داخل مع سي المختار كيهضروا بيناتهم "حاط إيد في جيبوا وإيد مخبيها مورا ضهروا وكتافوا مقادين "دورات وجها لجيها الأخرى تتخبا و حركات راصها يمين وشمال و هبطاتوا باش ينزل شعرها يغطي ليها وجها...
سي لمختار لابس جلابة بيضاء وحاط طربوش حمر فوق راصوا ويديه ديريهم مورا ضهورا ...حرك راصوا ببتسامة وقال:هيا الحاج الرضي غيتزاد عندوا حفيد أخر أو ولدي يوسف غيولي أب
أركان حاضيها من بعيد قشعها وعرفها هيا لي هربات قبيلا....
ببتسامة مزينة ملامحوا حرك راصوا لسي لمختار بإجاب...
سي لمختار تمشا هوا وياه :هاذ العرس كامل نضماتوا بنت ختي الصغيرة إسلام
أركان دور راصوا شاف في ديكورات لي قدام لباب ونطق بهدوء:تبارك الله
سي لمختار: الله يبارك فيك ....مرحبا بيك أولدي أركان جلس معنا بينما جا عماد راه مشا لمدينة يقضي شي غراض غير يجي و يحل ليك لكوري وسير ختار لعجل لي عجبك ديييه لحاج راه فرحان ملي سمع نجلاء حاملة عيط ليا أنا لول حلفني نختار ليه أحسن عجل على وديت لواليمة ديال الخبر
أركان حرك راصوا وقال : الحاج سيفطني عندك وهوا عارفك خير صديق وسلعتك مزيانة ما عندي ما نقول عليها أسي المختار
سي لمختار بتاسم جنب:أيييه انا و الحاج صحباا قديمااا راه عرض عليا مسكين باش نحضر غدا وليني كيفما كتشوف أولدي دنيا عندي عامر مع العرس غير عتادر ليه بنيابة عليا ونعودوا نتجمعوا إنشاء الله في ساعة الخير
يالله غيتكلم أركان وهوا يقاطعوا واحد السيد عيط على سي لمختار من بعيد..
سي لمختار نادى على دراري يجيبوا كرسي أركان باش يجلس وخا هوا عارض جابوا ليه كرسي
لمختار ستأدن منوا ومشا عند الراجل لي عيط ليه...
أركان دور راصوا بانت ليه إسلام غاديا مع جنب الحيط مخبيا منوا وهوا يتبعها....
إسلام ملي شافتوا تابعها تخبات و ما بقاتش كتبان ليه وهوا يفضحها أمير خرج كيجري وهيا تتعرج تتبعاتوا غاديا موراه خيفاه لا يطيح...
وقف أمير كيلعب بعيد عليها وهيا واقفا حضياه....وهوا يوقف عليها أركان ....
أركان قصح الشوفة فيها ونطق بعصبية:كْدامك مجروح ألالة وسير تجري يكما مشاركة فشي سيباق "مد ليها فردة شربيلها"هاكي لي شافني غادي موراك يسحابني غنخطفك ؟!
إسلام مدات يدها وهيا تشوف الحناء في يديها مزال ما نشفات "عوجات فمها ونطقات حطها لهييه" فقاصها شعرها وبقات مداربة معاه بمرفقها تتحاول تبعدوا
أركان قرب منها جامع حجبانوا قال بجدية:خليني نعونك؟!
إسلام شعرها ركب فيها العصاب لقاتها من الجنة والناس قربات ليه وجها كامل بحال شي طفلة ومخسرا سيفتها بسبب خصلات شعرها لي نازلين على عينيها.... أركان دور إيدوا على حزام قفطانها وجبدها لعندوا من خصرها كتر وهيا هازا يديها بزوج لفوق مفرق صبيعاتها لا تخسر ليها الرسمة حط إيدوا فوق وجها كيبعد بصبعانوا خصلات شعرها الناعم من على عينيها...... ونضراتوا مفيكسين في عينيها....بقا ساهي في ملامحها واللكحل لي مزين عينيها البنيتين من الجناب وزاد عاطيهم جمال و جادبية أكبر ...قربوا ليها والمسافة المنعادة لي بيناتهم خلا ت قلبوا يضرب بجهد باغي يخرج من وسط صدروا لعريض ...
أما هيا وجها تصبغ بالحمر مع ما ملفاش تشوف لشي واحد في عينيه مباشرة ويكون قريب ليها لديك الدراجة خصوصا وهوا شخص غريب بالنسبة ليها ....
بقات تتدور في عينيها يمين ويسار تشوف لفوق وتشوف لتحت غير باش تهرب من نضراتوا....
أركان جابت ليه الضحكة بتصرفاتها طفولية حبس راصوا تاعيا باش ميضحكش وليني من شكل تعابيرها ما قدرش وضحك عليها من نيتوا وقال بجدية:
_هْدَايْ بعينيك إلى بقيتي هاكا غتحوالي...
عضات فمها من جناب بلفقصة ودلات شفتها التحتانية ونطقات :بعد مني ...
أركان قرب فموا حدا ودنها وقال :وإلى ما بغايتش أش غديري
إسلام سلاحها هوا لبكاء غوتات بصوت باكي :بعددددد منييييي ماااااماااا
أركان جابت ليهم تمام بتصرفتها الغير معقولين وبلا ما يحس بدا كيطيح في حبها أكثر...
أمير شافها كتبكي جا تيجري باغي يدافع على خالتوا بعدها من أركان أو وقف قدامها مواجه معاه هز صبعوا بحال شي راجل كبير وجدية قال:
_أيها الوغد الحقير أبعد عن خالتي وإلى قتلتك وقف جامع يديه بحلا غيلعب الكراطي"غوت على جهدوا وقال"هيا يا دياجوو هجووووم
هضر معاه باللغة العربية حنت مبلي بالأفلام الكرطونية وأغلبية ديال لوليدات صغار لي تيتفرجوا بزااف كيوليوا يقلدووهم...
إسلام بقات كترمش بزربة ممسدقاش وأركان تحنى لعند أمير هضر معاه بهدوء حابس الضحكة
_شنوا سميتك أولدي
أمير بقا واقف حط يديه بزوج على خصروا مخنزر في أركان ما هضرتش حتى نطقات إسلام وقالت ليه "سميتوا أمير"
أركان ببتسامة مزينة ملامحوا مد يدوا ل أمير وقال
_متشرفين أ أمير
أمير جمع يديه بزوج عندوا و رض عليه:
أول حاجة أنا ماشي ولدك و وتانيا أنا ما صغيرش وقبل ما تنطق سميتي قول حدها سي أمير وتالت حاجة و والأهم أخر مرة تقرب من خالتي بقا بعيد عليها الله يرحم باك مزيان
أمير دار عاطي بضهروا ل أركان لي خلاه تيحك في لحيتوا من لتحت مصدوم وخاطب خالتوا
_تبعيني نتي !!
إسلام بي سمع وطاعة تبعات أمير دخلوا لعرس أو وقفها حدا خالوا عمر باش زعما يرض ليها لبال....
أو هوا مشا جلس في حضن توبة خايف كيترعد عنقها بيديه بزوج كارز عليها...
توبة كمشات حجبانها بخوف زادت خشاتوا في حضنها لحنين تتهدن فيه وتتسولوا وهوا ساكت حاضي إسلام...
أمير ملي شاف خالتوا غوتات بين يدين أركان بي ماما خاف بزااف ورجعوا ليه جميع ذكريات السيئة لي عاش مع باه وتفكر ماماه فاش كانت كتصرخ قداموا بألم وباه تيضرب فيها بدون إحساس وكيشتمها بكلمات نابية قداموا...
ما ديريش إعتبار لولدوا صغير لي مكمش تحت طبلة و لي حاط راصوا بين يديه كيبكي بحرقة...
كان كل نهار كيشوف ماماه كتعنف من طرف باباه بدون سبب وهوا ما قادرش لا يوقفوا ولا يدافع عليها من تما حقد على كَاعْ رجال لي قد باه وكرههم بزاف وداك شي أتر فيه ..
مابغاش يشوف خالتوا كتعيش داك شي نفسوا لي عاشت ماماه...
إسلام واقفا جنب عمر رادا لبال لكلشي في العرس وتتشوف في أمينة من بعيد بعنين تيبريوا من السعادة محضر ليها مفاجئة وكتسنى الوقت المناسب باش تقدمها...
خرجات غسلات يديها من الحناء ورجعات للعرس توجهات عند لجروب بتوتر...
أركان بعدما جا عماد وفتح ليه لكوري خدا لعجل لي عجبوا على قبل الوليمة لي محضر الحاج راضي...
يالله غيحط رجلوا داخل سيارتوا وهوا يحس بلاحموا بورش أو ذاتوا شعلات فيها نار هادئة ...
سرط ريقوا حتى تفاحة أدم تحركات في حلقوا ملي سمع صوت غنائها جاي من لعرس وقف مصدوم عاقد حجبانوا لوسط ما مصدقش...تبع صوتها حتى وصلوا لعندها تصاب بدهشة وعينيه وساعواا كتر ما توقعش أنها تكون نفس البنت لي تلاقا بيها الطريق بسباب وراق عقد الزواج لي جمعوهم صدفة وأنها هيا نفسها لي كانت بين يديه ...
وقف مقابل معاها كيستمتع بصوتها رنان ويديه طاويهم عند صدروا حاضيها غير هيا ما كيبان ليه حتى واحد من غيرها غافل على الكم الهائل من لبنات لي كيتغامزوا ويهضروا عليه حاضينوا تيشوفوا فيه بإعجبهم...
إسلام حناكها حمرين غيطرطقوا من السخونية والحشمة وعامل الخوف لاعب عليها بزز باش شادا الميكروا كتغني ويديها تيترعدوا نضراتها مفيكسين في أمينة لي بدورها وقفات حتى هيا مقابل مع صحبتها و كلامات الأغنية لامسوا قلبها خلاوها تبكي...
إسلام مفرقا شفايفا الغوز تتغني...
مرة تغمض عينيها ومرة تفتحهم وفي كل حرف أو كلمة من الأغنية كتنطقوا مخرجاه من قلبها....
"آااااهِ ياقلبي عَلْ الجمال قمر ماشاء الله 🎼
حُطَهَا فْي عِيْنَكْ دِيْ أغلى بنت في دنيا🎼 يعني تِدلَعْ ومالوا ما القمر عارف جمالوا 🎼
مِيْشْ حا تبعد عنها يوم ولا ساعة ولا تانية"🎼
تمشات بي بطئ وقفطانها طويل شداه من جنب وسيقانها تيبانوا من لتحت بيضين كيشعلوا وأعين الحاضريين كلهم عليها معجبين بيها و بصوتها لحنين لي دخل لمسامعهم بخفة...
قربات من أمينة شدات من إيدها أو وجهات كلماتها في الأغنية لكريم ...
"دي صَحْبِتِيْ وعشرة عمري اااا وبينا سنين ااا🎼
من صغري وأنا إيدي في إيدها تِعادي سنين🎼
الفرحة بَايْنَا من عِيْنِيهَا لايق الأبيض عليها🎼 والعريس إيدوا في إيديها الله على جمالهم"🎼
يتبع...
التعليقات
لا توجد تعليقات بعد، كن أول من يعلق.