محتوى القصة
طلعوا لسطح وقفات إسلام ماقبلا مع القمر بملامح ممحية ونسمات الهواء كتداعب خصلات شعرها الأسود طويل وأركان خاشي يديه في جيبوا واقف جنبها كيتأمل في شكلها ما مسدقش أنها هيا نفسها بقا تيرجع دكريات وتفكر نهار سمع لمختار فاش قال ل أمينة كلمي إسلام وملي دخل لحمام وسمع صوت غناها أو فاش شافها في العرس وقاليه لمختار بنت ختي لي نضماتوا،
"بقا صمت بينهم للحضات طويلا" هوا حاضيها وفرحان وهيا ما عاجبها حال واقفا بزز منها وقلبها تيضرب بجهد...
أركان حنحن بصوتوا الرجولي وكسر صمت لي بينهم بغاها باش ترتاح في الهضرة معاه و جبد ليها لحاجة لي كتعجها :
_إسلام سمعت بلي صوتك زوين ممكن تغني ليا ؟!
إسلام جمعات حجبانها بغضب ويالله غتفرق شفيفها وتخرج من فمها " غير كدبوا عليك صوتي خيب ما كيتسمعش" وهيا طيح في بالها فكرة رجعات سرطات ريقها وحركات راصها بإجاب...
دارت لعندوا وهما يتقابلوا نضراتهم للحضات تتحت ضوء القمر بقات كترمش بزربة و هربات عينيها منوا
وقفات كتغني بغات ترسل ليه ميساج من خلال كلمات الأغنية باش يفهم راصوا ويبعد منها غمضات عينيها وغنات بفرحة أغنية أسف حبيبي فرقات شفايفها وسارت على بركة الله
ميمتي باغا تزوجني
حسيت بيها بغا تصدرني
بُت نبت فقاع الدار
أو شي صعصع يخرجني
آسف حبيبي
أنتا ماشي نصيبي
أنا آسف حبيبي
انتا ماشي نصيبي
و لا لا لا لا||||
و أنا تابع قلبي
مسكين أو نية
أو بغى البنية
أو حالتي حالة
_إسلام كتغني من نيتها فرحانة بغا تهنى منوا كتعوج فمها وتحرك راصها والخوف متملكها.
الواليد شاف هاد الحالة
ما عجباتوش المسألة
قالي ولدي عيش حياتك
لا تدّي شي بدّالة
آسف حبيبي
انتا ماشي نصيبي
أنا آسف حبيبي
انتا ماشي نصيبي
و لا لا لا لا
كتضم يديها بزوج وتأسف ولات تمثل وتغني
و أنا تابع قلبي
مسكين أو نية
أو بغى البنية
/حركات راصها وشافت فيه ببرائة كتغني من نيتها عاجبها الحال ومرقب تصرفاتوا...
فاش كتوصل لهاد لمقطع لي لتحت كتزيد تعلي صوتها وكاتغنيه بتأكيد:
خليوني خليوني
خليوني في حالي
انا ما بغيت زواج
انا عاجبني حالي
تلف لي الآلي مع الروتور
جبتها قوقة بالموتور
ما تحترمش المرور
بغاتني نحسب سنية
آسف حبيبي
انتا ماشي نصيبي
ولا لا لا لا |||||
مشات ايام الحب مشات
_فتحات عينيها مراقبة ملامح وجهوا لي لاقتهم جامديين ما عرفاتوا واش مقلق ولا فرحان...
و أركان جامع يديه عندوا تيسمع ليها بإصغاء
هيا بدات تتدير حركات بيديها بحالي كتجري عليه ومكملا في الأغنية وهوا حابس ضحكة بين سناونوا جابت ليه تمام بحركاتها الطفولية ما كرهش ياكلها باش تبقا مخبيا في قلبوا لداخل ..
مشات ايام الحب مشات
مشات مع روميو أو جولييت
بقاو غير تويشيات
بلاك حيد عليا
اسف حبيبي
انتا مشي نصيبي
و لا لا لا لااااا
و أنا تابع قلبي
مسكين أو نية
أو بغي البنية
أو حالتي حالة
Are you the one ?
Are you the one for me ??
Are you the one
خلوني خليوني
خليوني في حالي
انا ما بغيت زواج
انا عاجبني
_حلات عينيها سخفانة حنت غنات الأغنية كلها بدون توقف...
أركان جرها من خصرها لعندوا مقربها طول شوفة في عينيها و سرط ريقوا حتى تفاحات أدم تحركات في حلقوا وبملامح جادة قال: كتعجبك هاد الأغنية ؟!
إسلام حركات راصها بإجاب ما فهما والوا
أركان حرك راصوا وقال بجدية :واحد الأغنية
ديما كنسمعها في راديوا فاش تنكون شاد طريق وما كنحملهاش ؛
والمشكلة الأكبر دغيا حفضتها واليوم بفضل هاد الأغنية لي غنيتي غيرت فكرتي على الأغنية الأخرى أو ولات كتعجبني شنوا رائيك تسمعيها...
إسلام تصدمات و بشفايف تيرجفوا نطقات :حتى نتا صوتك زوين اه تفضل
إركان حرك راصوا وبتاسم جنب وببحة في صوتوا قال:
_صوتي ما زوينش ولكن الأغنية متأكد غتعجبك ؛ نتييييي هتمي غير بالكلمات وما تديهاش في الصوت
إسلام سهاات في لون عينيه أوريحت عطروا الرجولية قدات عليها ولات مطيعةو لي قالها كديرها...
قرب فموا حدا ودنها وببتسامة مزينة ملامحوا غنا بصوت هادئ كيأكد فيه على كل كلمة تيقول
ديك طفلة ياناس عليها بايت عساس مجنون بدوك لعيون أو شوفا تبرد جماري منقطعشي لياس لو دربوني بلقراطس بايت هنا او منهنا حتى نديك لداري فعويناتي نديرك نهزليك أنا شانك راني حالف نخلي كاع لبنات اغيرو منك...
أركان ملي سمع أغنية إسلام لعامرة ميساجات خرجاتوا على طوعوا وهوا مالف بالعادة كلاموا قليل وملي شاف تصرفها الغبي حتى هوا هبط لمستوها وتبرهش معاها وجوبها بالأغنية لي غنا...
أما إسلام تزنكَات و حشمات وحسات بإحراج كبير من كلمات الأغنية ونضرات عينيه الجديين طيحوا منها نص وتعبها كلوا ضرب في زيرواا تربط ليها لسان ودقات قلبها تسرعات لدرجة ولات خيفاه لا يكون تيسمعهم...
أركان حط إيديوا تحت ودنها ومسح بإبهاموا الدمعة لي طاحت من جنب عينيها وقال بصوت غافت كتسمعوا غير هيا:
_دموعك غاليين عليا ما بغيتهمش ينزلوا مزال و أنا ونتي ما غتفرق بينا غير لموت وبيما أننا قرينا الفاتحة فا إبتدأ من ليوم نتي وليتي ديالي وملكي بوحدي
دور إيدوا تانية حتى هيا على خصرها وجرها لعندوا أكتر حتى تلاصقات مع سدروا لعريض إسلام تبنجات وسط يديه كتشوف في عينيه كتلف ما كتبقا عارفا ما دير...
أما هوا بقا تيشوف في عينيها ومرة مرة تيهبط نضروا لشفيفها لغوز عض فموا من جنب وبدا كيتقرب منها...
إسلام شافتوا كيتقرب منها وهيا تحس بقلبها طاح بين رجليها دورات عينيها وقالت بصوت رقيق غالب عليه الحرج"نعاام" باش تهرب من بين يديه و حركات شفيفها ونطقات :
_ختي كتعيط ليا خاصني نمشي عندها"بدات تتدفع ليه يديه وتقول" وطلاااق مني طلااااق
أركان خطف بوسة من حنكها وطلق منها وهيا تمشي قداموا تجري بحالا تابعينها وحاطا إيدها على خدها ما مسدقاش أما هوا بقا متبع ليها العين حتى ختافات من قداموا وبتاسم من نيتوا خشا يديه في جيبو و تقابل مع القمر سد عينيه وعود حلهم و بتنهيدة طويلة قال
_غاتسطيني أ بنت رحمة
دخلات لعندهم لصالون بوجه خجول تمشات بخطوات بطيئة متبتة وجلسات بين نجلاء ونرجس ...
نجلاء ملي دخلات إسلام وهيا طلع وتنزل فيها بعينين عامرين كره ما حملتهاش عكس نرجس لي فينما تشوف فيها إسلام كتبتاسم ليها..
نرجس مدات إيديها ل إسلام وبإبتسامة قالت:سلام أنا نرجس أخت أركان صغيرة
إسلام مدات إيدها صافحت نرجس:متشرفين أزوينة
نرجس حركات راصها كتضحك:لا نتي لي زوينة وبزااف ما شفتيش قبيلا مني دخلتي وخويا حاضيك ما حيدش عليك العين هبلتيه مسكين
إسلام وجها ولا حمر وبي إبتسامة خجولة ردات: عينيك لي زوينين
نرجس بتسمات جنب:نعرفكم هادي مرات خويا يوسف سميتها نجلاء
إسلام مدات إيدها لنجلاء وقالت:متشرفين أختي
نجلاء رجعات شعرها لور بطريقة كلاص وصافحت إسلام بجوج صبعان وقالت: شرف ليا أحبيبة
إسلام ببتسامة قالت:شكرا أختي
نجلاء رفعات حجبانها وقالت:العفوو زين ما بينتناش غير هوا متبقيش تقولي ليا ختي قولي لي غير نجلاء حسن
إسلام سرطات ريقها وحركات راصها ببرائة ما فاهما والوا قالت:
_وخا لي بغيتي
نجلاء قرات إسلام غير من ملامحها لي بان فيهم نوع من الإحراج حنت كلشي تيبان من وجها ما كتقدرش تخبي بتسمات ليها و
حطات إيديها على ركبة إسلام و قالت:
حنا غانعيشوا تحت سقف واحد وأي حاجة ضراتك قوليها ليا بإمكانك تعولي عليا ونكون صندوق أسرارك "وجهات كلامها لنرجس وقالت"ياك أنرجس !!
نرجس حركات راصها بخفة وقالت: أه ختي نجلاء يمكن ليك تعولي عليها في أي حاجة
إسلام منزل راصها الأرض قالت: ربي يخليك ميغسي
عمر راد لبال لنرجس و حاضيها مني دخلات وهوا يشوف فيها بإعجاب بانت دغيا نسجمات مع ختوا وبقات كتدحك وتعاود معاها وهوا عجبوا الحال ...
دخل لعندهم بهيبتوا وشخصيتوا الرائعة، عطروا رجولي سابقوا و ريحتوا كتفوح من بعيد ..
إسلام غير شمات ريحتوا هزات راصها بسرعة وهوما يتقابلوا نضراتهم مع بعض بلا ما تحس حطات إيدها على خدها وملي تفكرات لبوسة زادت غرقات في حويجها من كمية الإحراج ولي زاد على مابيها هيا إبتسامة أركان الجانبية والغمزة لي رسل ليها ملي شافها حطات إيدها على خدها...
الحاجة خديجة بتسأل نطقات :ولدي أركان هضرتوا مع بعضياتكم ؟!
أركان بتاسم جنب وحرك راصوا بإجاب
الحاج جمع الوقفا وقال:سيدنا الأسبوع الجاي الخطبة دابا جا لوقت باش نخليكم ترتاحوا خاصنا نمشيوا
لمختارجمع حجبانو وقال:مالك مزروب الحاج بقاوا معانا شويا مزال
الحاج بتاسم ورد عليه:ما منصيبش اسي لمختار خاصني نمشي باش نصلي لعشا في وقتها ونشرب دواء
رحمة بحسرة نطقات:الله يجيب شيفاء الحاج
الحاج حرك راصوا ورد عليها:أمين أبنتي أمين
و قفات العائلة كلها إستعداد باش يمشيوا من دار رحمة بداو كيتسالموا ويباركوا لبعضياتهم فرحانين ما ساخينش بي بعضياتهم ورحمة دخلات لخاطرهم وزادت كبرات في عينيهم مني عرفوا أنها بوحدها كبرات ولادها غير بسترة الله وبالحلال تقتلات وخدمات عليهم فرحوا حنت تربيت يديها غتكون معقولة بحالها نيت...
يالله غتخط الحاجة رجلها برات الصالون وهيا تسمع كلام إسلام لموجه ليها
إسلام هزات راصها بشوي و بتوتر قالت: الحاجة ممكن نهضر معاك؟
الحاجة ببتسامة رجعات عند إسلام وتكلمات بهدوء: مزال أبنتي غنتلاقوا ونهضروا خليها لمن بعد
إسلام سرطات ريقها وبتأكيد نطقات: لا الحاجة هاد الهضرة لي غنقول ليك مهمة وضرورية خاصك تعرفيها دابا نيت..
الحاجة تغيروا ملامحها وحركات راصها بإجاب..
إسلام قربات من الحاجة وقالت:ممكن تجي معايا لبيت
الحاجة تبعات إسلام و قالت :يسمعنا خير
توبة وسعاد بقاوو تيضروا في عينيهم مصدومين
أركان بقا غير تيشوف ما فاهم والوا هوا وباقي العائلة..
و توبة عضات شفايفها من جناب وبخفوت قالت في ودن سعاد:خالتي عنداك تمشي تهضر على علاقتها بي سفيان ودرب لينا كلشي في زيروا
سعاد بعصبية هضرات بشوي:ختك مسخوطة باغا تبقا بايرة طول عمرها ياودي كون كانت بنتي نقرصها من لفخاض ونعود ليها تربية من جديد و نزوجها الأول راجل يدق لباب أما هاد سيد ما كتستاهلوش الصراحة ،علم الله دابا أشنوا سيرا تخربق على السيدة
توبة سرطات ريقها وقالت:الله يحضر والله يكتب مكتاب الخير
أما رحمة بلا ما تحس جلسات فوق سداري شادا راصها بين يديها مبهوضة من فعلت بنتها وكتطلب الله يخرج هاد ليلة على خير
دازت ربوع ساعة وهوما كيتسناو على أحر من الجمر بعد لحضات قليلة خرجات لعندهم الحاجة خديجة بملامح متغيرة ما كتفسرش؛ قصحات شوفة فيهم و قالت قرارها بجدية :ما بقيناش غنديروا لخطبة الأسبوع الجاي
إسلام مني سمعات كلام الحاجة تنهدات براحة وفرحات حنت لحمل لي كانت هزاه خفاف
العائلة كلهم هزوا راصهم مصدومين من كلام الحاجة
ونجلاء فرحات من قلبها وببتسامة قالت : هيا لبنت ما عحباتكش الحاجة صافي نتاصل بي بابا نقول ليه ا يوجد راصوا حنت غتمشيوا تخطبوا ختي مروى ياك ...
فريدة من تحت سنانها نطقات:سدي فمك أنجلاء حنا ماشي في هاد شي دابا
رحمة وقفات برجلين كيترعدوا شويا ما كانت غطيح لولا عمر لي شد منها قربات بزز منها لعند لحاجة ونطقات بصوت باكي: علاش الحاجة؟!!
الحاجة حطات إيدها على كتف رحمة وهضرات بجدية أكبر:
_أه لخطبة ما بقاتش الأسبوع الماجي حنت
الأسبوع الجاي العرس وبعد غدا وجدوا راصكم غنديروا الخطبة وعقد زواج دقة وحدة
إسلام هزات راصها مبهوضة و عينيها وساعواا من صدمة ،جمدات في بلاصتها ما بقات فاهما والوا ،بلاناتها كلهم لي دارت باش تبعد من أركان غير ما زادوا قربوه منها كتر
رحمة بقات كتشوف مصدومة بتسمات من قلبها وقالت :
_كلامك هوا لكبير الحاجةولكن خاصنا وقت طويل باش نوجدوا
الحاجة شافت في إسلام وعود شافت في رحمةوعينيها عمروا بدموع لفرحة ونطقات: خفت لا بنتك يطيروا بيها لعرسان الى تعطلنا بنتي رحمة ربيتي وعرفتي أش تريي تبارك الله عليك صح وحدة من بناتك خطئات وليني لخرا بعقلها وصحات الغلاط ؛مابغاتش تبدا حياتها بالكدوب من لول فين باقي غنلقا بنت بحال إسلام...
توبة من هضرة لحاجة غرقات في حويجها من الإحراج وتمنات الأرض تشق وتبلعها أما سعاد تسلات من بينهم مبقاش عندها لوجه لي تشوف فيهم بيه حنت إسلام فضحاتها..
فريدة ببتسامة قالت:فهميني الحاجة شكون لي كدب وشكون لي قال الصراحة
الحاجة رجعات جلسات كتعود ليهم بالحرف لي وقع وأركان عاد ما زادت كبرات إسلام في عينيه كتر
"فلاش باك"
واقفا إسلام مقابلا مع الحاجة وكتلعب بيديها بتوتر ...
الحاجة بتسأل:بنتي قولي شنوا عندك واش غنبقاو واقفين؟!
إسلام بجدية قالت:خاصك تشوفي لحفيدك شي بنت تليق بمقامكم وتكون حادكة كيف بغيتيها نتي
الحاجة ضحكات بستهزاء وقالت:أش كتقولي أ إسلام أنا ختاريتك نتي باش تكوني مرت ولدي أش جابنا لشي مستويات دابا
إسلام حركات راصها ودموعها داروا خط على حناكهاوبصوت باكي نطقات:في صراحة الحاجة ختي توبة كدبات عليكم أنا ما كنعرف ندير والوا وحتى باب لكوزينة هوا لخر ما كنعرفوش فين جا"بتراجي قربات من لحاجة و قالت "عفاك ما تشديش في خاطرك من جهة ختي ومسحي فيا كلشي وحتى ماما كانت غتقول ليكم كلشي عليا غير هوا ملي شافت ختي هضرات ما بغاتش تصغرها قدامهم وسكتات بزز منها..
الحاجة راصها بدا يدور في ديك لحضة كانت فرحانة من قلبها حنت لقات ولقات لبنت لي بغات حتى تقلب كلشي و تصدمات ...
وقفات لتواني كتفكر والصمت بينهم طويل وبعد مدة تانية خرجات من لبيت بلا تنطق بكلمة قدام إسلام حتى دخلات لعندهم لصالون وصدماتهم جميع بقررها المفاجئ
"الحاضر"
رحمة حركات راصها وقالت بترجي:سمحوا ليا حنت سكت على الغلاط
توبة قاطعتها وبخجل قالت :لا أماما نتي ما درتي والوا الحق كلوا عليا و أنا لي كدبت "نطقات بصوت مخنوق غالب عليه لبكاء "بغيت نشوف ختي عروسة وتمنيتها تزوج بسي أركان وملي شفتكم مصريين على مرات ولدكم تكون حادكة كدبت عليكم سمحواا ليا بزاف
الحاجة وقفات:ما طرا باس أ بنتي وليني حبل لكدوب عمروا قصير حاولي تحيدي منك هاد العادة وخا تكوني غاتخسري حياتك أ توبة ،قولي الصراحة حنت الحقيقة هيا لي كتنفع طال زمان ولا قصار...
تمشات بخطوات تابتة لعند إسلام وشدات إيديها وقالت: عارفاك غتكوني تقولي مع نفسك ماشي أنا هيا لبنت لي كتحلم بيها لحاجة تكون مرت حفيدها"بتسمات وقالت "دخلتي لخاطري أبنتي وبهاد التصرف لي درتي ليوم زدتي كبرتي في عيني كتر وإنشاء الله إلى طول ليا ربي في لعمر أنا لي غنعلمك شغل لكوزينة كامل...
فريدة حركات راصها وخنزرات في توبة ما عجبهاش الحال :الحاجة يالله نمشيوا..
كأي عائلة مغربية بعدما تعشوا تجمعوا على كاس ديال أتاي في لمراح كيتعاودوا على أهل لعريس
جالسا إسلام وحطا قدامها سلة كبيرة مزينة بالورد الأحمر وخارج منها ضوء من جناب و فيها جميع أنواع الشكلاط الغالي؛كل شكلاطة حلاتها غتمدغها بالفقصة....
عمر حاضيها من قبيلا وهوا يطلب فيها بتراجي قال:أري شويا الخوادرية مالك على هاد جوع كامل
إسلام خرجات فيه عينيها: والله لا دقتيه ولا طاح في كرشك ،فاش حتاجيتك ما لقيتك !ما قلتيش زعما نوقف مع ختي مسكينة مبغاش راجل وغيلسقوه فيها بزز عاجبك لحال مني شفتي طموبيلات تلفتي
توبة جمعات حجبانها وقالت :بغينا ليك الخير ونتي شوهتينا مع ناس هاهيا خالتي سعاد حلفات لا رجعت عندنا لدار سيدا كتصوب ليك في بلاصتك مع ناس ونتي حطيتينا بوجهنا قدامهم
إسلام كتمدغ في شكلاطا غوز ردات عليها ب: شغلكم هاداك نتوما لي كدبتوا !أنا ما شكيتش عليكم وزيدن أش فيها كون قلتوا صراحة من لول غيجمعوا نوضا ويمشيوا يقلبوا في جهة خرا على بنت حادكة كيف بغاووا
رحمة شدا تسبيح بين يديها بخفوت قالت:هضروا بشويا خالكم ناعس نتوما عارفينوا تيفيق بكري قبل لفجر تيقرا الحزب عاد يصلي وتيخرج يشوف شغلوا ماشي بحالكم نتوما غير نعاس على خوه
عمر وقف غادي لبيتوا :الواليدة تصبحي على خير "وجه كلاموا ل إسلام"عقلي على هاد الشي الخوادرية نردها ليك في ساعة الخير
إسلام بتراجي قالت:ماما واش ما كينش شي حل ضروري خاصني نتزوج حشومة عليكم والله
رحمة خنزرات في إسلام وقالت بعصبية :أخر مرة نسمع من فمك هاد الهضرة مني جاو ناس وأنا حاضيا تصرفاتك وكنجمع ليك فيهم نهار غنوض ليك ما غيفكك مني حد"وقفات بتنهيدة طويلة نطقات" صبرت ليك حتى عييت ونتي شوهتينا قدام ناس دابا غديري لي نقول ليك عليه من فم ساكت غدا فيقي بكري خاصنا نخرجوا نشريوا دهاز لي غيخصك
طلعات رحمة لبيتها وخلات إسلام تخبط في بلاصتها من لفقصة هيا ما كتهزش راص في مها نزلات راصها وبقات تغوت على توبة
إسلام من تحت سنانها قالت:تفوو عليك نتي ختي ولا عدوتي ؟! واش بغيتيني نضحك على سيد أنا كنبغي سفيان وغنتزوج ب أركان هاكا غنضلموا بغيت غير نفهم علاش مني دخلتي لصالون ما دخل لسانك لحلقك كون ما قلتش ليهم لحقيقة كنت غنتشوه مني نمشي عندهم
توبة دورات ليها لقرصة وقالت:نتي لي كطيري كون سكتي كنت غنعلمك كلشي، وديك ساع غنتسمى ما كدبتش عليهم، أصلا أنا كنت غنصيفطك عندهم ناضيا ،شوفي غير شحال من كارطونة ديال سكار جابوا غنبقاو نعمروا بيه أتاي حتى لعام جاي وما غيتقداش، جاينين يتعرفوا عليك وما خلاوا ما جابوا أما ملي غتزوجوا غيغرقك كادوات
إسلام كمشات حجبانها من حر لقرصة دمعات:وعتيني هئ هئ حشومة عليك
توبة عينيها في سلة سرطات ريقهاوقالت :عطيني غير ديك شكلاطا لغوز لي في جنب غير وحيدة عفاك
إسلام قلبات عينيها وقالت: ألاأحححح جابها ليا راجلي أ ختي غانخلي منوا غير ل أمير بوحدوا ونتوما حلفت عليكم لا داقتوه
توبة جمعات لكيسان في سينية وهزاتها وضحكات على إسلام من قلبها وقالت:أحياني عليك العفريتة دابا ولا راجلك ههه
إسلام وجها ولا حمر تزنكَات دروات راصها مهرباه جيهت تيليفونها شافتوا شاعل وجاها أوديوا في لوتساب....
غسلات توبة لماعن بالخف وطلعات لعند ولدها دات ليه دانون ودواء...
حطات إيدها على راصوا لقاتوا سخون بلا قياس قلبها بدا يضرب بجهد والخوف تسلسل لقلبها نزلات بالخف لكوزينة هزات بانيوا صغير دارت فيه لماء وفوطة صغيرة..
ورجعات لعندوا بقات كتعصر لفوطة في لماء وتحطها على راصوا حتى برد وتخشات حداه كدوز بإيدها على راصوا حتى سمعات صوت تنخصيص وهضرة ولدها لي نزلات عليها بحال الصاعقة....فشلاتها...
أمير حال عينيه بزز منوا بصوت باكي قال: ماما علاش بابا ما كيجيش عندي ؟!!
توبة بحسرة نطقات:باباك عندوا لخدمة أولدي فاش غيسالي غيجي يشوفك
أمير زاد من وتيرة بكاء:نتي كتكدبي عليا هوا ما كيبيغينيش كَاعْ صحابي في لمدراسة كيجيوا بواتهم يوصلوهم إلى أنا "ببرائة قال" ماما وأش أنا خيب ؟!
توبة طاحت دمعة سخونة من جنب عينيها: لا أحبيبي نتا غزال وفن وبوكوص و حبيبي أمير مكينش بحالوا في دنيا
أمير :علاش بابا ما كيبغينيش؟!
توبة تنهدات من الأعماق مسحات دموعها و قالت: باباك تيحماق عليك غير عندوا لخدمة داك شي علاش ! سمعني أولدي شفتي نتا أكتر ولد ماحضوض في دنيا حنت عندك خالك عمر ديما تيوصلك لمدراسة وخالتك إسلام وأمينة ملي كانت هنا أي لعبة جديدة خرجات كانت كتشريها ليك نسيتي "طمناتوا بعينيها ومسحات ليه دموعوا"
أمير هز عويناتوا فيها ببرائةو قال ببتسامة: وعندي لميمة حتى هيا كتبغيني
توبة باست ولدها وعنقاتوا:أيه أحبيبي كلشي تيبغيك دابا خاصك تصح بزربة باش ترجع تلعب الكورة او السيمانة الجاية غيكون عندنا عرس خاصك تشطح فيه
أمير بتسأل:عرس بحال داك خالتي أمينة ؟
توبة:أييه أولدي بحالوا غير هوا لعروسة ماشي أمينة خالتك إسلام هيا لي غتزوج
أمير جمع حجبانوا مخنزر بنفي قال:لاااا خالتي غتسناني فاش غنكبر أنا لي غنتزوج بيها ماغنخليها تزوج بحتى واحد بغيتيها تبكي تاني بحال كيف دار ليها عمي سفيان
توبة حبسات الضحكة و غير سايسات معاه حنت مريض حركات راصها بإجاب:وخا اولدي ونعس صباح ويفتح
أمير غمض عينيه وبقا يقول: ما غنخليهاش تزوج لا هيا ما غتزوجش لا
******
إسلام طلعات لبيتها وفتحات الأوديوا لقاتوا جاها من عند أمينة فرحات من قلبها وفتحاتوا بزربة غير سمعات صوت صحباتها بداوو دموعها يطيحوا كيف شتاء
أمينة:سلام لخوادرية توحشت بزاااف نقول ليك هاد لكلمة في صراحة ما قدرتش نهضر معك أبيل حنت ما غنقدرش نصبر ،قالت ليا توبة بلي غتزوجي ،فرحت ليك من قلبي وأخيرا لقرصا لي عطيتك ولحليب لي شربتك في عرسي عطا مافعولوا هههههه غير كنضحك زواج مكتوب في سماء ما كين لا حليب ولا زعتر أصحيبتي؛ إسلام بغيت غير نفكرك مزال عاقلا على القصة لي قلتي ليا ديال خالك لمختار مني عائلتوا رفضوا يزوجوه بالبنت لي كايبغي وتزوج بنت خالتوا او ولا يبغيها لدرجة مني ماتت ما تزوجش من موراها ؛هاد القصة خاصك تاخدي منها عبرة و ربي ما كيبعد علينا شي حاجة إلا وغتكون ما فيهاش الخير لينا تنبغيك بزااف بسلامة سلمي على العائلة كاملا..
حطات إسلام تيليفون على قلبها وبقات كتبكي حتى كيتحبس ليها نفس حسات بالوحدة مني تفكرات صاحبتها..
وقفات من بلاصتها ومشات لبيت عند ختها دقات عليها ودخلات..
توبة بخفوت قالت:مالك أ إسلام؟!
إسلام قربات منها:بغيت نعس حداكم
توبة بتسمات جنب :أجي وغير بشويا لا تفيقي أمير
إسلام تخشات حداهم وقالت بشوي:كيف بقا شويا؟!
توبة بخفوت قالت:نزلات ليه سخانا ومن قبيلا وهوا يبكي تفكر باباه مسكين
إسلام هزات إيد أمير باستها وقالت بحسرة: صعيبة بزاف أنا لي حاسا بيه
توبة غمضات عينيها ما نعا دموعها باش ما ينزلوش بنتهدة طويلة قالت:نعسي قدمنا غدا نهار طويل شلا حوايج خاصنا نديروهم..
أشعة الشمس بخيوطها الدهبية تشع في أرجاء شوارع مدينة الجديدة و تسلات عبرة نافدة بيت توبة....
إسلام كمشات حجبانها بإزعاج وحلات عينيها درواتهم لبلاصة ختها لقاتها ما كيناش لا هيا لا أمير تشبرات مسرحة في بلاصتها وهيا تشوف أمينة واقفا قبالتها ...
حكات عينيها ما مسدقاش وجلسات في بلاصتها سدات عينيها وعود حلاتهم عند بالها غير كتحلم هزات إيديها بزوج بدات كتصرفق في راصها وكتقول
_حيدي من عقلي أ أمينة حيدي من عقلي اووف فينما دارت كنشوفك
أمينة تهزات من لداخل بضحك على صاحبتها وقربات منها شدات ليها إيديها و قالت ؟ والخاودرية غدا عندك العقد وسيرا دربي في راصك باغا تهربي لعريس هداي الزمرة
إسلام قلبها بدا يرفرف بالسعادة:واش هادي نتي أمينة نيت؟!
أمينة رفعات حاجبها ولاحت شعرها مورا ضهرها و قالت:أييييه هادي أمينة بنت لعربي "غمزتها "ومرات لكوميسركريم ومن لا يعرفها
إسلام تلاحت على أمينة عنقاتها وغوتات بفرحة:وااااااع لاااااااا مايمكنش هادي نتي ما تخيليش شحال توحشتك
أمينة مبادلاها العناق:وحتى أنا أختي توحشتك بزااف وتوحشت مدينتي ودرب ومي رحمة وعمر وأمير والوليدة وكلشي
إسلام بعدات منها ودرباتها لكتفها:عليها عايطتي لينا مني تزوجتي كريم تالفك علينا
أمينة رجعات ليها دربة:وعلاش ما تاصليش بيا نتي نيت شنوا لي حبسك ؟؟
إسلام دلات شفتها لتحتانية و بحزن قالت: نتي عارفاني الى عيطت ليك ما غنصبرش؛ خلينا من هاد شي دابا وعودي ليا كيفاش حتى جيتي لهنا ؟!!
أمينة بدات تضحك:لبارح فاش رسلت ليك الأوديوا كنا شادين طريق علاه بغيتيتي نفلت خطبة وعرس ختي الوحيدة ماشي معقول
إسلام عاد رجع نور وجها ولبسمة ما حيداتش من وجها مني شافت أمينة :نسيت ما سولتك كيف جاك زواج وكريم كيتعامل معاك مزيان؟
أمينة :زواج زين وخا مرة مرة تنوضها معاه علاه أنا قليلة في لبلاد ولا شنوا عند بالوا غينفارد بيا في كازا ويدير ما بغا سعا ختك أمينة مرا وقادة
إسلام دورات راصهاونطقات :ناري كاتحكْري عليه مسكين ههه ديما كيكون شي بوليسي قبيح مراتوا كتحدهم ليه ههه
أمينة ببتسامة قالت :إيوا نهار لول يموت لمش خلينا مني دابا وعودي ليا على سي أركان راضي
إسلام بخجل قالت:ما كين ما يتعاود ؟
أمينة هزات راصها لفوق ونطقات :عرفتي أصحبتي دعيت ربي أو ما خيبنيش عقلتي على داك تيتيز لي شفت في لفيرما عند خالك وهبلني ودعيت يكون من نصيبك
إسلام هزات كتفها بعدم إهتمام قالت:اه عرفتو مالوا
أمينة هضرات بالغوات:أويلي على مالوا راه هوا نيت سي أركان عرفتي دخلت لمواقع ديال اخبار رجال الأعمال وتشوفي تصاور لي حاطين وأشنوا كَيْلين عليه تسطاي لبنات تيموتوا غير باش يخدموا في شركات دياولوا ونتي متكبرة
إسلام تنهدات من الأعماق:غير بشويا صمكتيني بديتي عوتاني
أمينة وقفات :نوضي زربي خاصك تفطري بزربة باش نمشيوا نخرجوا نشريوا ليك دهازك ولي خاص
إسلام زفرات بجهد يالله غتنوض من بلاصتها وهيا تسمع تيلفونها كيصوني هزاتوا ولقات رقم غريب...
أمينة بتسأل قالت:شكون؟؟
إسلام هزات حجبانها:ما عرفتش؟
أمينة بتفكير قالت:مدخلا عندك نمرة أركان"إسلام جوبتها بلا" إدن هوا جوبي دغيا جوووبي
إسلام قبلات الإتصال وبتوتر حطات الهاتف على ودنها قالت بصوت رقيق :ألواا
أركان جوبها بصوتوا الرجولي:صباح النور عرفتيني شكون؟
إسلام قلبها بدا يضرب بجهد:جوباتوا ب اه
أركان ببتسامة جانبية قال:لباس عليك؟
إسلام :لباس الحمد لله
أركان ضحك من نيتوا وقال:ما غتسولينيش واش لاباس
إسلام بحرج قالت:اه سمح ليا كيف دير صفا؟
أركان حرك راصوا وقال:يسول فيك الخير الالة "بجدية قال" في لعشية وجدي راصك غنجي نديك معايا باش تاختاري لخاتم لي عجبك ومن موراها نتعشاو بجوج في شي ريسطوا
إسلام عضات فمها من جناب وسكتات
أركان بتسأل قال:أش قلتي؟؟
إسلام تزنكَات بلا قياس ردات عليه بالخف وقطعات خلاتوا يضحك عليها من نيتوا :أه وخا غنتسناك سلم على الحاجة و العائلة
أمينة غمزتها و قالت:ناري أصحبتي هادا غير هضر معاك في تيليفون او وليتي حمرة أما نهار غيدخل بيك علم الله أش غيوقع ليك غا تغيبي
إسلام شيرات عليها بمخدة:تفوو على زمرة نحمار ولا نزراق سوقك؟!
أمينة بتسأل نطقات:أش قال ليك؟
إسلام عوجات فمها وقالت:قال ليا غيجي في لعشية يديني معاه نختار لخاتم ونتعشاو بجوج
أمينة ببتسامة قالت: واااو ونوضي بزربة نقضيوا غراضنا وفاش نرجعوا غنلبسك واحد الكسوة معرية من لكتاف يالله شريتها غتجي فنا غيدوخ إلى شافك لبساها
إسلام بعصبية:لا ما بغيتش ما عنديش مع لحويج لمعريين لاااا...
أمينة خنزرات فيها: تفواا عليك عزيز عليك ديما تلبسي كيف لخنشة زرقاء ديال لقمح..
رجعوا لدار عيانين بدوران في القيساريات هازيين في يديهم بزااف ديال ساشيات جابوا فيهم كَاعْ داك شي لي تيخص لعروسة...
حيدات رحمة جلابتها و علقتها عند الباب وأمينة وتوبة حاطوا داك شي فوق طابلة و دخلوا نيشان للكوزينة يشربوا قاتلهم لعطش ...
وإسلام حيدات تجاكيطا وجلسات في كرسي وسط لمراح سخفانا وجها حمر بالصهد تنهدات من لداخل وقالت:
_أووف ليوم لحال سخون بزااف
رحمة جلسات فوق سداري وخدات إبرات الأنسولين دقتها في كرشها بعدما أمرت توبة جابتها ليها
حركات راصها وجوبات بنتها: فاش يكون لحال سخون أبنتي هزي راصك لسماء وقولي'ما أشد حر هاذا اليوم اللهم أجرنا من حر نار جهنم'هادشي راه والوا قدام عافية جهنم الله يجيرنا منها
إسلام :اللهم أمين
توبة وقفات عند راص إسلام وقالت:تكَاعدي خاصك توجدي راصك ما بقا والوا ويجي أركان
إسلام بتأفف جوباتها:وخليني غير نستراح بعدا مالنا على هاد الزربة كاملة
أمينة شدات إيد إسلام ونوضاتها بزز:نوضي خودي دوشي خفيف دغيا باش نصوبوا ليك شعرك والمكياج وغتلبسي ديك لكسوة لي قلت ليك عليها صباح غاتجيك فْنَا
إسلام عضات فمها من جناب وبعصبية قالت: لا أمينة ما غنلبسهاش هاديك حتى هيا كسوة يلبسوها ناس"جمعات حجبانها" كلها عريانة أختي و لبحر تحشمي تلبسيها فيه
أمينة بتأكيد نطقات:أش كتفهمي نتي في لبس وزيدن ناس لي لاباس عليهم هكاك كيلبسوا وبغيتي ولا كرهتي هيا لي غتلبسي
رحمة قاطعتهم بتسأل:فين هوا عمر؟
توبة جابت في يديها بانيوا في لماء ولملح خشات فيه رجلين مها وقالت: عمر راه لفوق خاليتوا مع أمير
رحمة حركات راصها وقالت:قولي ليه يلبس شي حاجة ويوجد راصوا
توبة جمعات حجبانها بتسأل:علاش واش غيمشي لشي بلاصة
رحمة تكات على الحيط: غيمشي مع إسلام ماشي معقول نصيفطوا لبنت بوحدها مع السيد
إسلام ما هتماتش أما توبة وأمينة شافوا في بعضياتهم بعدم بهم...
أمينة بتسمات بفقصة وقالت:أويلي أمي رحمة حشومة خليهم شويا بوحدهم"بغمزة" ما جاتش يمشي معاهم عمر
رحمة عقدات حجبانها:مزال ما تزوجوش باش يبقاوا بوحدهم وزيدن ادا اختلى رجل بامرأة كان ثالثهما الشيطان...
أمينة :العار امي رحمة قولي ليا فين سمعتي هاد شي
رحمة:سمعتوا في راديوا وزيدن حنا واليدينا ما كنوش تيخليونا بوحدنا ؛"حمرات فيهم بعينيها و قالت " و نوضو تهزوا من قدامي ولي عندها شي شغل تمشي تقديه مزيان تبارك الله...
خدات إسلام دوش خفيف و خرجات منوا كيف لبلارة مزينكة...
شداتها أمينة وتوبة وحدا تكلفات ليها بشعر ولخرا بالمكياج بعدما نتهات دارت ساعة في إيدها اليسرى وشعرها خلاوتوا مطلوق على راحتوا ولبسوها كسوة بيضاء فيها وريدات بالحكل معريا من جهة لكتاف ومفتوحا من جهة رجل حتى لفوق ركبة وسندالة طالون عالية في لبيض ...
تقابلات مع لمراية ما مسدقاش راصها
إسلام بدهشة نطقات:واش هادي أنا
أمينة باست يديها وبفتخار قالت: هادا كامل شغل يدي تبارك الله وليتي تباني بحال شي ممثلة في هوليوود
توبة حطات إيديها على فمها:وش هادي ختي نيت ولا محااال جيتي فنا كتحمقي بزين ماشاء الله
أمينة: هاي هاي فين يبانوا دابا ناس لي لباس عليهم قدامك
خداهم الحديث حتى سمعوا صوت سيارة دخلات لدرب
إسلام قلبها بدا يضرب بجهد ورجليها فشلوا عليها جلسات في طرف ديال نموسيتها كترجع نفس بينما أمينة طلات من شرجم وقالت بفرحة وهيا كترقص بعدما غمزلات إسلام :
_مولاي سلطان وصل مولاي سلطان وصل نا نا نا نا غيشوفك غيدوخ
توبة وقفات بزربة طلات حتى هيا ولبسات في رجليها :نمشي نشوف عمر واش وجد ...
قبل ما ينزل أركان من سيارتوا أمر ختوا نرجس باش تنزل معاه تسلم على العائلة خرج خاشي إيد في جيبوا والاخرى هاز بيها تيليفونوا لابس جاكيط كوير كحلا... وسروال جينز...وتيشرت أسود..فتح لكٌوْفر ديال طموبيل وجبد منوا ساشيات هازهم معاه ما بغاش يدخل بيديه خاوين عند نساوبوا
خرجات لعندوا نرجس لبسا سولوبيط جينز مع قميجة أونصومبل في الأبيض...
تمشا بكل تواضع هوا وختوا وأعين جيران كلها عليهم كيطالوا من شراجم باغيين يجيبوا لخبار ومنهم هناء لي حتى حاجة ما فلتاتها دارت ليهم سكانير بعينيها....
وصلوا قدام لباب هزات نرجس إيدها باش تدق وهوا يتفتح لباب بلخف سدقات داقا في راص عمر نيشان...
نرجس دورات عينيها وبصدمة قالت: أوبس سمح ليا ما شفتكش
عمر حط يدوا على جبهتوا يالله غيجوبها وهوا يشوف أركان واقف مد ليه يدوا وقال: مرحبا بيك اسي أركان
أركان حتى هوا مد إيدوا سلم عليه ببسامة مزينة ملامحوا رد عليه:قول غير أركان "مد ليه ساشيات ودخل "
عمر شد من عندوا وبعد ليهم باش يدخلوا ستقبلاتهم رحمة بفرحة على وجها
رحمة:مرحبا بيكم علاش معدب راصك اولدي
أركان بتاسم جنب وتحنى قبل إيديها: ماشي شي حاجة الالة رحمة
رحمة حركات راصها وقالت:الله يرضي عليك "دارت لعند نرجس سلمات عليها"كيف ديرا أبنتي لباس عليك؟ الحاجة والعائلة بيخير؟
نرجس ببتسامة ردات:كلشي لباس أخالتي
رحمة:دخلوا تشربوا كاس اتاي
أركان شاف في ساعتوا:لا الحاجة عندي لخدمة بزاف فاش غنساليوا ونتعشوا غنشد طريق لكازا نقاد شي امور في شريكة وغدا في صباح نكون هنا ..."دور راصوا في دار تيقلب عليها"
رحمة عرفاتوا علاش يبحت بتاسمت حنب وأمرت عمر لي كان ساهي حاضي نرجس يعيط لختوا
نزلات لعندهم هيا وأمينة وتوبة نرجس هزات عينيها مبهوضة قالت:
_واوا جيتي فنا بزااف مرات خويا كتحمق
إسلام هبطات لعندهم وقلبها تيضرب بجهد شافتوا وطاح ليها الماء في ركابي ...
على إتر كلام نرجس دور أركان راصوا عند إسلام مبتاسم طلعها من لتحت لفوق عينيه خرجوا من صدمة شاف لباسها لي كيكشف كلشي فيها باين بلا ما يهتم لا ب أمينة لي حلات فمها مني شافتوا ولا باقي العائلة زير على فكوا و جرها من دراعها مبعدها منهم
من تحت سنانوا قال :إسلام واش تسطيتي باغا تخرجي هاكا ما حشمتيش
إسلام هزات كتفها بلا مبالات:مالي كيف جيتك ؟!
أركان زير على فكوا كتر:طلعي بدلي هاد لفضيحة حسن ليك
إسلام شافت أركان بقا تيحكر على لبسها:إيوا أشنوا بغيتيني نلبس خنشا"دورات عينيها" ديك زرقاء ديال لقمح
أركان حتى هوا أعند منها قال بخفوت في ودنها :كتهضري على الخنشة زرقاء ديال 100 كيلوا "حك لحيتوا من لتحت وقال"أش بان ليك نمشيوا دابا لشي محل ديال زرع ونشري ليك شي وحدة على الأقل هيا غتكون حسن من هاد طرف ديال توب لي لابسا
إسلام عضات فمها من جناب وقالت:بعد مني ما بقيتش غاديا معاك
أركان زاد زير على درعها وعينيه حماروا: ماشي على كيفك ألالة غاطلعي تبدلي هاد لفضيحة دابا ولا غنقطعها فوق منك
إسلام شافت في عينيه بانوا ليها نضراوتوا ما كيبشروش بالخير بعدات منوا و قالت بخوف: ها هيا غادة اووف..
جالسا أمينة مفقوصة في لمراح وحداها توبة شادا ولدها قدامها ناعس ومي رحمة جنبهم كتنقي في جلجلان
أمينة حطا إيديها على خدها:وشوفي ليك سيدة قالت ليك أنا سبابها حتى بدا يحل عليها فموا
رحمة حركات راصها وقالت:واا كلمة لحق تقال نتي أبنتي ما درتي فيها ما يصلاح سيد متدين وكيصلي بغيتيه يقبل بالبنت لي غيتزوج تخرج معاه بداك الشكل عيب وحشومة أنا كون شفتها في لول ما نخليهاش تنزل عندوا بديك الحالة
أمينة :ياك أمي رحمة دابا أنا لي ولا وفيا لافوت أنا غير قلت مع راصي ناس لاباس عليهم تيلبسوا هكاك وزيدن هاداك شي نيت لي شفت في تلفازة
توبة :بقاي متبعا دوك المسلسلات التركية حتى يخرجوا عليك
أمينة كمشات حجبانها:ناري شوفي غير هيا وكيفاش جرها من بيناتنا تيبان فيه غا نيشان ما معاهش لعب تصوري كون قالت ليه راه انا لي بززت عليها تلبس لكسوة كون راه دعاني في المحكمة يقول ليا بغا تخرجي ليا مرتي لطريق
توبة تهزات بضحك: لا متزيديش فيه وليني فعلا ما درتي فيها مايصلاح وأنا كنت معوناك هههه"بتسأل قالت"إيوا ما كْلتيش لينا كيف درتي مع سكنة جديدة والمدينة لغريبة عليك
أمينةدورات راصها :اودي وقع ليا واحد لبلان ما تبغيهش لعدوك
رحمة هزات راصها بخوف :أش وقع أبنتي وعلاش ما عيطتيش علينا
توبة بإصرار:عودي لينا يرحم باك
أمينة تقدات في كلستها و قالت :إيوا ألالة مع ديك ستة ديال لعشية واحد نهار تاصلوا بكريم من لخدمة ناض هوا مشا وقاليا راه ما غديش يتعطل وجدي لعشا إيوا ياختي نضت للكوزينة غنصوب لعشاء جبدت لحم وكلشي او ملي بغيت نشعل لبوطا ما لقيتش لبريْكَة هزيت جوج دراهم وقلت مع راصي نهبط لحانوت نشري وحدة
صافي هبطت خرجت مع زنقة كنقلب على حانوت والوا ما لقيتش زدت شوية لزنقة للزنقة التانية كنقلب على حانوت حتى لقيتوا
شريت لبريكَة وبغيت نرجع لقيت راصي تلفت
ما عرفت نضحك ما عرفت نبكي لا أنا عافا سميت زنقة ولا أنا عارفا سميت الحي..
ما عقلتي حتى على دخلت زنقة منين ..
صافي وقافت مسمرا في بلاصتي ما قال ليا راصي غير سيري للجامع وقولي لفقيه يغوت في البوق أنا فلانة مرت فلان باش يجي يديني..
بقيت كندور ندور حتى حضر لعقل وبان ليا لباب وبقيت شاكا واش ندير ساروت ولا لا خفت لا يمشيوا يخرجوا ليا مالين دار يسحابوني شافارا تشجعت و قلت لي ليها ليها شعلت لبريكة بإيد وخشيت ساروت في لباب باش حتى لا خرج ليا شي حد نحرقوا بالبريكة ونهرب..سعا لقيتها دار نيت حسيت بواحد السعادة ما نقولش ليكم
مي رحمة وتوبة تهززا بضحك بقاوو تيضحكوا من نيتهم على كلام أمينة ..وحتى هيا معاهم ما سكتاتش من ضحك حتى سمعوا دقان في لباب بجهد ولغوات ناضت تجري أمينة غتحل وهيا توقفها رحمة
رحمة بتفكيرة :هداي أبنتي هاد صوت ما خافيش عليا
توبة حطات إيدها على فمها وشهقات بجهد : ماما هادا سفيان واقيلا سكران
أمينة طلعات تجري في دروج لدار لوسط حلات شرجم وطلات منوا وهيا تبان ليها لحومة عامرة بعباد الله خارجين يتفرجوا في سفيان لي هاز قرعة شراب في إيد والإيد الاخرا تيضرب بيها لباب ويغوووت
سفيان مشادش راصوا تيطيح ويعاود ينوض: مي رحمة حرااااام عليك علاااااش بغيتي تزوجيهااا علااااش واااااش أنااا ما كنستهلهاااش "غوت على جهدوا" سفيااان ل إسلااااام وإسلااااام لسفيااااان حراااام عليك أبااااا بعدتيييي منيييي لي تبغي حراااااام والله لا خلللليتها لغيري غنحرررق العااااالم كاااااامل على ودها بغيييييتهااا وهيااااااا كتبغيني والحسااااادة علااأااااش
طلات عليه مرا كبيرة في السن قالت ليه:سير دخل لداركم أولدي الله يعفوا عليك من البلية
سفيان دار لعندها وبداا يغني :راني سكران خلوني نهضاار راني سكران خلووني ندوي حتى حد فيكم ما يقمعني ويقول ليااا سكت خوكم مريض كيتألم جيبي خاووي ما فيه حتى درهم راها وصلات بيا لعضم ولعبات بيا لوقت لوقت
"طاح مسرح في الأرض تيغوت" كنبغييييييهااااا كنبغييييهااااا وتنموووووت عليهاااا وموتوااا في سمكم العديااان
أمينة حتى هيا ما شي من العاكزين ردات عليه: عو عو عو ساليتي من نباح و لا باقي سير عنق ديك لعضم ديال مراتك وتكمش أ سفيان
سفيان هز راصوا فيها وقاااال: كلشيييي منك هبطيي لعندي لكنتي مرااا
أمينة يالله غتنزل لعندوا وهيا تشوف الساعة وطاح عليها بلان في راصها نزلات بالخف هزات تيليفونها وهيا تلقا مي رحمة سيرا تلبس جابتها وتوبة معنقا أمير فاق تيبكي مخلوع
أمينة بتسأل:فين غادا امي رحمة؟!
رحمة معصبة:غنمشي نخرج لداك لكلب لي دير لينا شوهة في درب
أمينة وقفاتها:لا غير تسناي انا لي غنشوهوا دابا انعيط لكريم صيفط دراري من لكميسارية يجيوا يددوه شي شهر تما يربيوه بينما نيت داز لعرس وكلشي
توبة جمعات حجبانها:وخا يجيوا يدوه راه حتى بات هناء كوميسير غيخرج في ساع
أمينة:لا ما تخافيش راه سكران ما غيلقاش كيفاش يدير ليه وحتى كاع إلى خرجوه غنمشي ندير بيه شكاية نقول ليهم تعرض ليا في طريق وبغا يتعدى عليا...
شاديين طريق لقيسارية دهب وإسلام لبسا سروال جينز وقميجة في الأخضر غامق من بعد ما بدلات ديك لكسوة جلسا مورا أركان مخنزرا كتشوف في جنب طريق ما عاجبها حال
أركان سايق بإيد والأيد الأخرى مخرجها من شرجم جالس جنبوا عمر لي غير هوا ونرجس لي جابدين مواضيع كتخص الدراسة تيهضروا فيها بينما هوا و إسلام ساكتين
تيحك لحيتوا من لتحت و حاضيها ومرة مرة تيهز فيها عينوا كيشوف فيها من زاج ديال سيارة طول فيها شوفة مزيان و ساط من لدخل بعصبية مد إيدوا سحب مشوار من لكرطون ومدوا ل إسلام..
إسلام رفعات حجبانها وحركات راصها بمعنى أشنوا
أركان بجدية قال :خوديه
رهزات كتافها وقالت :ما بغيتوش غير شكرا
أركان قصح الشوفة فيها ونطق:شدي مسحي بيه داك لعجب لي ديرا في وجهك"من تحت سنانوا قال "ما تخلينيش نعود هضرتي أ إسلام..
نرجس خدات لمشوار من عند خوها مداتوا ل إسلام وقالت بخفوت في ودنها:مسحي وجهك خويا ما تيبغيش هاد شي
إسلام خداتوا من عندها بدات تمسح فيه بعصبية بحلا سيرا تجفف في الأرض
أركان بصوت هادئ نطق :غير بشويا عليك مالك على هاد الحالة كاملا
.
جمعات راصها وتركنات غير شوفات ديالوا تيجمدوا ليها لماء في ركابي بالخوف تيحدهم ليها
أما عمر تزير بضحك اول مرة يشوف ختوا في بحال هاد الموقف...
سطاسيونا أركان السيارة قدام القيسارية ونزلوا حل لباب ل إسلام غير نزلات خطف إيدها لعندوا و شابك أيدوا مع إيدها خلاها غير ترمش ما فاهما والوا تم توجهوا بي ربعة بيهم لمحلات دهيبية
.
دخلوا لعند سيد لي غير شاف أركان بتاسم من قلبوا ورحب بيهم..
مول المحال:سي أركان تفضل؛ مرحبا بيكم
أركان حرك راصوا وقال:ممكن تورينا اغلى خواتم عندك ديال زواج
مول لمحال جبد ليه بزااف ديال لخواتم ديال لعريسات أشكال وأنواع..
.
أركان جرهم قدام إسلام وقال ليها تختار
إسلام بحلا ضربتها لوقوا سكتت وجمدات في بلاصتها خلاتوا هوا جر إيدها وبدا يختار ويركب ليها لخاتم لي عجبوا بقا شحال حتى خدا الخاتم المناسب وخدا ليه هوا خاتم ديال نقرة دور راصوا في المحال بان ليه طقم ديال الألماس شراه حتى هوا وسرتلا ديال دهب وجوج براصليات خلاها هيا غير تشوف
دار عند ختوا وبتسأل قال:نرجس خودي لي خاصك؟!
نرجس ببتسامة قالت:لا أخويا عندي ما محتاجة والواا
شاروا داك شي كامل لي خاصهم وتوجهوا لمطعم راقي قدام لبحر...
جلسوا بربعة بيهم نرجس سرحات نضرها لبعيد بان ليها مول صَوفا طلبات من خوها باش يخليها تمشي تشريها
أركان عطاها الإدن بعدما طلب من عمر يرافقها ويرد ليها لبال...
بقا جالس هوا وإسلام بوحدهم هز الموني بين يديه تيشوف باش يتعشوا
دور راصوا عند إسلام ونطق:شنوا بغيتي تاكلي؟
إسلام نفخات بجهد ، طريق كلها وهيا كتجمع في الهضرة قالت :شتي على هاد الحالة لي درتي ليا ليوم غنولي نلبس بحال سبع بو لبطين نبان بحال شي بصلة مغلفدا باش ترتاح مع راصك
أركان هز راصول فيها مبهوض وقال: كرامة أحسن حاجة غديري باش نيت ما يديها فيك حد من غيري
إسلام بدات كتهضر تحت منها :مابقيتش بغا نتزوجك مالنا على هاد لقرع لي نمشطوا ليه راصوا حنا
أركان بتاسم جنب وقال:دخول لحمام ماشي بحال خروجوا
إسلام قفزات و دورات راصها يمين ويسار وبقات غير كتشوف مبهوضة مع نفسها عند بالها أركان ولا تيقرا أفكارها أما هوا بقا تيضحم عليها من نيتوا على تصرفاتها الغير معقولين ...
درب زاد عمر بناس بعدما جات سيارة الشرطة لي صيفطهم كريم خرجات أمينة وتوبة هزا ولدها بين يديها كيترعد بالخوف و مي رحمة مقفدا درعيها بزواج ولبسا جلابتها قربات من حدا سفيان لي جالس في الأرض كيغوت مرفوع مع شراب وحالتوا حالة تحنات حداه و قالت بحسرة :
_شوف حالتك كيف ولات مشوه راصك ومشوهنا قدام ناس علاش اولدي على والوا، حنا من لول كنا عاطينك لبنت، تسنيناك حتى خدمتي وجمعتي راصك باش تجي تخطب إسلام ونتا أشنوا درتي جيتي عند بنتي وقلتي ليها سمحي ليا عمتي ماتت وأنا خاصني نتزوج بنتها هناء "غوتات في وجهوا " نتا لي تخليتي على بنتي أسفيان حتى ركبها لعصاب بسبابك ولات إلا ما شرباتش دواء ما كتنعسش حياتها ولات جحيم ناس ناعسين وهيا سهرنا كتبكي "بصوت باكي قالت بترجي"
_هاحجر لعافية لما بعد من بنتي وتفرق علينا صافي نسانا دير غير على وجه داك طعام لي شركنا
هز راصوا فيها ديخ قال بصوت مبحوح: كنبغيها أمي رحمة قلبي كيتشوا من لداخل حسي بيا الله يخليك
رحمة وقفات بتنهيدة طويلة قالت: بنتي غتزوج أ سفيان خليها تعيش حياتها بركا ما ضلمها معاك "مسحات دموعها ورفعات صبعها في وجهوا بتهديد" إلى حاولتي تقرب من بنتي ولوا غير خطوا غتلقاني قدامك واقفا كنقسم بالله لي خاقني وخالقك إلى حطيتي إيدك على بنتي ولا قربتي جيهتها ولوا بالغلاط غنصيفطك فين تربا
أمينة تدخلات بينهم وقربات عند لبوليسي وقالت :
_هوا هادا أسيدي كل نهار تيجي سكران كيدير لينا لفوضا وسيمانة لي فاتت شير علينا بقرعة شراب هرس لينا زاج ديال شرجم لبيت"شارات بصبعها لعند أمير" شوف غير لولد كيف ولا بسبابوا كل نهار مخلوه ومريض بغيتكم ديوه يتربى الله يرحم ليكم الواليدين
المفتش قرب منها وبتسأل قال:شكون نتي؟
أمينة بعصبية ردات : كيفاش شكون أنا حنا كنهضروا على هاد شمكار ونتا سير تسول فيا شكون"رمات شعرها ورا ضهرها وقالت " أنا مرت سيدك الكومسير كريم سمعتي
المفتش:هضري بحترام حسن ليك
يالله غتجوبوا أمينة وهيا تدخل رحمة :
_هادي بنت جارتي وبحال بنتي أمينة مرت سي كريم
لمفتش حك لحيتوا من لتحت وقال للبوليس ليه معاه: هزوه عليا من هنا
قربوا جوج من لبوليس حطوا ليه لمينوط في يديه جروه غيدخلوه لطموبيل وهيا تهبط هناء تجري
هناء: هيااه وقف ما عندكمش الحق تاخدوه
المفتش:خلينا نديروا خدمتنا ما بانش ليك سكران
هناء بعصبية غواتات: إلى عرف بابا هاد شي لي درتوا لنسيبوا غيندمكم ..
البوليس ما تصوقوش ليها وهازوه في سيارة الشرطة
هناء بتراجي: غير سمعني أسيدي"تبعاتهم تجري وتبكي " سفيان لا ما تاخدوهش
المفتش:الى عندك شي حاجة جي قوليها في لكوميسريا..
هزوا سيفيان وركبوا في طموبيلات وشدوا طريق الكوميسارية...
رجعات هناء لعند رحمة تقبلات معاهم ؛ مسحات دموعها وبتهديد قالت :
_غتندموا على هاد شي غير صبروا الأيام بيناتنا
أمينة قفدات كميمها وقربات منها: مسيكينة خلعتينا شوفي كيفاش وليت كنترعد هههه
هناء خنزرات في أمينة وقالت: ما دوياش معاك نتي
توبة حطات ولدها في لعتبة ديال لباب أو وقفات قدام أمينة مقابلا معا هناء جمعات حجبانها وقالت :
_لمخير في عودك ركبيه حنا ما غنخافوش من دوك تهديدات ديولك لخاوية دازوا علينا شلا مصايب حتى حس لخوف مبقاش تيقرب جيهتنا
هناء قلبات عينيها وضحكات بمياعة وقالت:
_ههههه ق**** بحالك مطلقة ونهارها كدوزا في دار وليلها الله أعلم بلا ما تجي تهضر مع وحدة مزوجة وشريفة بحالي غير سكتي حسن لك "غمزتها"جديدة كلها عارفا خبارك واش كتسواي مزيان ابب لا نتي لديك ختك ديما كتلصقوا في رجال وتسحروا ليهم حتى كيوليوا تابعينكم
ديما توبة كتسمع ناس كيهضروا عليها بالخيب صبرات حتى عيات وقدام هضرت هناء لي منها عداد ما قدات تلاحت كمشات ليها على شعر وهيا كتغوت على جهدها ودموعها ديزين ما رداتش
توبة شادا شعر هناء وبفقصة نطقات :خانزة بحالك خاصها تشلل فمها بالعسل وسمن عاد تدوي مع لالياتها
مي رحمة دارت شافت في أمير كيبكي مشات لعندوا هزتوا بالخف دخلاتوا لدار بعدما أمرت أمينة تفكهم و جلسات تسكت فيه ...
وقلبها غيسكت بالخلعة على لمطايفة لي نيضا برا بين توبة وهناء ولات ما حيتها ل أمير ما حيتها لبنتها لي مداربا...
هناء دفعات توبة ودروات راصها بانت ليها حجرة هزاتها ودارت تجري غتضرب بيها توبة لراصها لور
شافتها أمينة وهيا تمشي تجري نصلات ليها سروال وحيدات ليها لحجرة من بين يدها
أمينة"خدات الحجرة وقالت : سمعيني مزيان اهاديك بنت لحرام يا دخلي دراع يا تصوخري لور
" قربات من هناء وشداتها من درعها لواتوا لور حتى كان غيطرطق وتوبة وقفات وهضرة هناء مرضاتها في عقلها ما برداتش تلاحت تاني لشعر هناء كتجروا ليها من جلدة حتى كيبقا في يديها وهناء ما حيتها لسرولها لي طايح ما حيتها الالم لي حاسا بيه ولا كتغوت ربي لي خلقها
_واععععع غتندمي هئ هئ واععععع اييييي دراعيييييي طلقوااا منييي المجريات تحاميتوا عليا غنصيفطكم لحبس ا بنات لحرااام
توبة عينيها خرجوا ما بقات تشوف حتى حاجة قدامها ترفعات :غنوري لجد طاسيلت مك السحارة شكون فينا الكلبة ل******
أمينة كتضرب في هناء بلا ما تخلي لاطراس :بنت لحرام هيا نتي العضم ديال جيفا لكلب يحشم يقرب منك...
طلقوها حتى ما خلاوا فيها لعضم صحيح
وقفات وهزات سروالها حتى تفرجوا فيها دراري كاملين بدات تبكي وتعرج بعدات منهم وقالت:
_كنحلف بالله حتى غنصيفطكم لحبس بجوجات هئ هئ هئ ها نتوما غتشوفوا أش غندير ليكم
أمينة تحنات وهزات حجرة كبيرة من الأرض خبطات بيها جنب راصها حتى داز دم وداخت شدات من راصها بزز وقالت:
_دابا غنشوفوا شكون فينا لي غتمشي لحبس إلى ما صيفطتكش حدا راجلك تونسيه نربيكم بجوج ما سميتيش أمينة بنت لعربي
توبة جات تجري حطا إيدها على فمها شهقات بجهد ونطقات:
_أويلي دم علاش دربتي راصك تسطيتي
أمينة عينيها كيتسدو وكتحلهم غير بزز بشفايف كيترعدوا قالت:
_ماشي أنا لي دربت راصي هناء لي درباتني
سيري دخلي لدار قولي لمي رحمة فاش تجي
إسلام ما تقول ليها والوا ولبسي عليك ويالله معايا لكوميسارية ندير شكاية....
هناء مشات تجري سبقاهم وقالت: كدابات أنا لي غنوريكم شكون غيمشي لحبس هئ هئ هئ البوحاطيات..
دخلات توبة وصات رحمة لي حتا هيا نيت داك شي لي قالت ومبغاتش بنتها إسلام تعرف
وخرجات توبة شدات طاكسي ركبات فيه هيا وأمينة مشاوو لكوميسارية يشكيوا بي هناء
أمينة عارفا ان هناء غتشكي بيهم وغتربهم حنت هيا وحدة وهما جوج لداك ما بانت ليا غير لحجرة ضربات راصها بيها باش يتيقوا بيها حنت لبوليس تيعرفوا غير دم الى كان راك رابحة
غير هما مشاو دخلات سيارة أركان لدرب وقفات حدا دار رحمة ..
نزل عمر وقال:شكر أخويا أركان على الخرجة
أركان حرك راصوا وقال: ماشي شي حاجة أ عمر مرحبا....مرة خرا ونعوضكم
عمر دار شاف في نرجس وقال: بسلامة تشرفت بمعرفتك
نرجس ببتسامة قالت:شرف ليا أخويا عمر
عمر عينيه خرجوا من ديك كلمة خويا بتاسم بزز منوا ومن تحت سنانوا قال:
_تصبحوا على خير
نزل أركان من سيارة وفتح ل إسلام باش تنزل
إسلام حركات راصها وقالت: غير عدبتي راصك ما كانش خاصك تنزل شكرا
أركان بتاسم جنب وقال: حاولي تعودي من دابا بيما أنك غتولي مراتي
رجع فتح لكوفر جبد داك شي لي شراوه مدوا لعمر لي بدوروا خدا من عندوا ساشيات دخلهم لدار معصب ما عاجبوا حال من كلام نرجس..
أو هوا وقف إسلام قبل ما تدخل شد من إيدها وقال بصوت هادئ: تهلاي في راصك
إسلام حسات بإحراج من نضراتوا سرطات ريقها وقالت:تصبح على خير
أركان حرك راصوا ورد عليها:ما غتقولي ليا والوا
إسلام قلبها ولا يضرب بجهد هربات نضراتها منوا وقالت:
_تهلى في راصك وسلم على الحاجة والحاج
أركان خشا إيدوا في جيبوا قال:مبلغ ألالة
إسلام تمات غاديا هوا متبعها من ضهرها وقفات ودارت عندوا وبتوتر قالت:
_ أجي دخل
أركان بتاسم جنب وقال: مرة أخرى تصبحي على خير وأحلام سعيدة
إسلام درات لوحات بإيدها لنرجس كتودعها وقالت ليها من بعيد:
_بسلامة أحبيبة
بعدما مشا أركان دخل عمر لدار زاعف حط ساشيات فوق طبلة وطلع نيشان لبيتو و إسلام غير دخلت لدار شافت في مي رحمة بان ليها وجها دم منوا مخطوف وصفرا ماشي حتى لهيه قربات منها وقالت
_ماما واقعا شي حاجة مالك
رحمة بتسمات بزز منها وردات: والوا أبنتي يمكن يكون سكار طالع ليا
إسلام بخوف قالت: اويلي أماما مريضا وصابرة نجيب ليك لبرا واش ما دكيتيهاش
رحمة طمناتها بعينيها :لا بنتي ما تخافيش شويا ونولي بيخير
إسلام شافت في أمير: ماما أمير مزال مريض مالوا كيبكي
رحمة:راه ولا شويا غير كيبكي على ماماه
إسلام درات راصها في دار:فين هيا توبة؟
اويلي تجي لعند ولدها لاش مخلياه كيبكي
رحمة تربط ليها لسان سكتات حتي هيا ومن أسئلة إسلام لكتيرة كدبات: مشات هيا وأمينة مسخرين
إسلام شافت في ساعة وكمشات حجبانها وقالت:هادا وقت سخراا !! فين مشاووو؟
رحمة بعصبية قالت:مشاو عند مول دجاج يجيبوا دجاج لي غنطيبوا غدا لناس وسيد تعطل عليهم أش بغيتهم يديروا يبقاو جالسين بحالك راهم من صباح وهوما يجريوا ما بقاش ليهم لوقت غدا غتكتبوا العقد
إسلام حطات سبعها على دقنها وبقات كتفكر تنهدات من الاعماق وقالت بخفوت:غير مصدعين راصكم
رحمة بتسأل قالت:شنوا قلتي
إسلام دورات راصها وقالت:والوا غير تنهضر مع راصي
رحمة : خديتوا لخواتم
إسلام بتنهيدة طويلة قالت: اه راهم فوق طبلة خدا لخواتم او طقم ديال الالماس وشي دهب اخر
رحمة شهقات بجهد:أويلي هاد شي كلوا وحطاه عند لباب تهزي جيبيهم لهناء نخبيهم في لبلاكار نسد عليهم مزيان.. او سيري تنعسي غدا خاصكم تفيقي بكري تمشي لحمام
إسلام مدات ليها ساشيات وهزات أمير بين يديها كتسكت فيه
رحمة حمرات فيها بعينيها: اري لولد لهنا وسيري تنعسي
إسلام حركات راصها وقالت: غنديه ينعس حدايا نتي مريضة مغتقدريش تبقاي هزاه
تمات غاديا طالعا لبيتها وكتسكت فيه
_صافي أحبيبي صافي هاهيا غتجي واش نتا مزال ولد صغير باش تبكي ياك نتا بطال والأبطال ما كيبكيوش
أمير هز راصوا فيها كيبكي وتنخصيصة كتحبس ليه لهضرة قال بحروف متقطعة:
ع ي ر ا ت عيرات ماما وضرباتها هئ هئ هئ هاديك لي ما كتحملكش ضربات ماما
وصلات لبيتها حطاتوا فوق ناموسية وقالت:
_شنوا قلتي أمير تهدن وعود ليا
أمير :ماما هئ هئ هئ ضربوها هئ هئ
جبدات بيجامة من لماريوا حطاتها جنبها وجلسات حداه شدات إيديه بزوج بين يديها وقالت :
_فهمني اولدي شكون لي تضرب واش حلمتي شي حلم غايب
أمير زاد في وتيرة لبكاء وتخشا في حضنها ساكت غير صوت شهقاتوا لي كيتسمعوا
إسلام زادت خشاتوا في حضنها وقالت: ها هيا توبة غتجي غير صبر أجي نعسوا ونعود ليك واحد القصة واعرااا
دخلوا لدرب في نص ليل وسقيل الهدوء مخيم على درب وتقول واحد يدور من غير لمشاش؛ غاديين كيتمشاوو وصمت بيناتهم طويل حتى نطقات توبة بتسأل:
_أمينة كيف بقيتي شويا؛ باش كتحس؟!
أمينة بتسمات جنب وقالت: متخافيش عليا ختك عندها سبع رواح
توبة بحسرة قالت :بقات فيا الصكعة ديال هناء ما كنتش علينا نضربوها لديك دراجا
و نحيدوا ليها سروال درب كامل شاف ليها مسعودتها
أمينة حطات إيديها على الضربا و نطقات بستهزاء: حتا تكون عندها بعدا شي طرمة علاش تجلس عاد غيشوفوا و هيا كارمة كيف لعود
"عوجات فمها وقالت" ما تبقيش تزيدي فيه حتى نتي الله على راحة بردت غدايدي
توبة بتسمات من قلبها وقالت : لمهم ما غتبقاش بعيدا وغتبات ليوم حدا حبيب لقلب
أمينة لاحت شعرها ورا ضهرها وردات: أختي حنا مزيانين تنجمعوا لقلوب البعيدة اوي هههه
توبة حطات إيدها على كرشها كتضحك من نيتها: ناريي بقات فيا مبقا عندها شعر شوفي زغبها باقي مشتت قدام لباب
أمينة رفعات حجبانها وقالت: باش تعلم تلعب مع لالياتها مزيان، عرفتي شحال وأنا كنجمع ليها فيهم من نهار دخلات لهاد درب ما حملتها صبرت عليها فوق لقياس
توبة حلات لباب بساروت وقالت :ناري ياصحبتي أش كتدري لتبوحيط على شويا وكنت غنتيقك عند لبوليس"تنهدات من الاعماق "جاب الله عمر وخالي لمختار ما كانوش اما كون قتلوا سفيان ليوم على ديك شوهة لي دار في درب
أمينة حركات راصها وقالت بحسرة: بقا فيا لحال وندمت حتى شاب شعر لي في راصي كون غير شديت داك سفيان قتلتوا عصا على داك شي كامل لي درا ل لخوادرية ؛ أو كان سكران دغيا نغلبوا وليني خسارة ضاعت مني لفرصة
توبة جمعات حجبانها وقالت بتهيدة طويلة: أودي راه مضروب من عند الله ما شفتيهش ولا مقابل غير شراب وحتى من خدمتوا خسرها"بتسمات وقالت" لي عجبني قبيلا هما جيران ودراري ديال درب وتقولي واحد يا ختي جا فك هناء من بين يدينا هههههه باغين فيها الخدمة
أمينة دورات راصها:حتى نتي راه كلهم باغينها فيها وتقولي واحد تيقولها فيها زينا، زيدي ندخلوا راصي عطاني لحريق الله يحرق لجد بوهم طواسل كْلتها في عضامي بسابهم
توبة بخوف قالت: كون غير قلتيها ل كريم يجي يديك عند طبيب
أمينة ساطت بجهد:اووف قلت ليك ما فيا والوا دابا لي عاطيني صداع هيا كرشي كتغوت بجوع كين ما يتكال ولا والوا
توبة دفعات لباب:زيدي دخلي نخربق شي حاجة بالخف نسكتوا بيها جوع حتى لصباح
دخلوا لدار كيلقاو مي رحمة وقفا كتمشي وتجي وسط لمراح وعقلها مرفوع تيخمم لدرجة انها مدتهاش فيهم مني دخلوا...
توبة قربات منها وبخفوت قالت: ماما علاش مزال ما نعستي ؟!
رحمة قفزت من سمعت صوت توبة وجوباتها بشوي :
_كنت كنتسنا فيكم شنوا وقع علاش تعطلتوا
خرجات عينيها بصدمة مني شافت جرحة لي في راص أمينة قربات منها وقالت:
_مالك في راصك أبنتي شنوا وقع ليك يكما تعرضوا ليكم شفارا في طريق الله يحفض
أمينة حيدات صنادلتها عند لباب وتكات في سداري لي في لمراح غمضات عينيها وجوبات مي رحمة:
_أنا لي دربت راصي أمي رحمة درت هكا باش نغبر شقف لديك لفراكة تاعت هناء في لحبس
رحمة جلسات حدا راص أمينة حطا إيديها على فمها وعينيها دموعوا هزات راصها وأمرت بنتها تجيب بيتادين او لقطن باش تداوي ليها لجرح بعدات شعر أمينة على جبهتها من جناب وقالت بحسرة:
_بسبابنا أبنتي درتي لراصك هاد لحالة، دابا الى عرف راجلك ما غيسمحش لينا لا هوا لا ختي سعاد
أمينة جمعات إيديها وكمشات حجبانها بغضب:
_حشومة عليك تقولي هكا أمي رحمة نتي
كتقولي ليا بنتي ودابا خرجتيني من وسط لعائلة وزيدن كريم ما غنقول ليه والوا وغدا ما غتصبح حتى حاجة والواليدة عرفاني ديما كنضارب مولفاني ديما كنرجع لدار مبرقعا من شي جيهة...
توبة قطعاتهم مدات لرحمة دواء ودخلات هيا لكوزينة عمرات أتاي وطيبات لبيض أومليط او حطات زيتون كحل وكاشير وزيت لعود و طون و لخبز....
رحمة حطات لقطن على جرح أمينة وقالت :الله يسر ليك أمورك أبنتي وفينما حطيتي رجلك تلقاي الخير "بتنهيدة طويلة قالت " غير هوا ما درتوا فيها ما يصلاح حطيتوا لباطل على لبنت غدا سيرا سحبوا شكاية حشومة
أمينة ناضت زاعفا قدات الجلسة : حشومة هيا مرت شيطان كَالاكْ ،والله ما نسمح ليها شوفي غير راصي لي تيضرني بسبابها يعطيها مصيبة تصيبها كتر من هادي
رحمة جمعات يديها عندها وردات:علاه هيا قالت ليك ضربي راصك أبنتي، اويلي ضربني وبكا وسبقني وشكا كنت ديما تنسمع هاد المثال وحياني الله حتى شفتوا قدامي مطبق
خرجات لعندهم توبة من لكوزينة نزلات باقي طباسل فوق طبلة وجلسات تكب في أتاي:
_ماما إسلام جات؟!
رحمة وقفات على طولتها ونطقات: راها نعسات لفوق هيا وأمير من قبيلا وهيا تسول عليكم قلت ليها مشيتوا تجيبوا دجاج
أمينة دارت دغمة في فمها وقالت:أحسن ما درتي ،كون عرفات غتمشي ديك ساع تخرج سفيان من لحبس هيا قلبها هشيش بلا قياس ودغيا كتيق..
رحمة حركات راصها وقالت :الله يدوز هاد العرس على خير ياربي كولوا أوسيروا تنعسوا غدا خاصكم تفيقوا بكري تمشيوا لحمام..
توبة شربات من كاس اتاي وقالت: وخا، أمير نعس كيف بقا
رحمة :نعساتوا ختك بزز يالله تصبحوا على خير
توبة:تباتي في راحة الله أماما
عمر متكي فوق ناموسية في بيتوا لابس غير سليب سمطة وجامع حجبانوا كيشوف في سقف زفر بجهد وهز تيليفونوا دخل لوتساب حتى كيكتب رسالة وكيرجع يمسحها لاح تليفونوا في جنب ..
و جلس في بلاصتوا معصب ،دوز بيديه على خصلات شعروا الأسود ناعم جا تيشوبه لخوتاتوا في رطوبة شعر وحروفوا كحلين جمع إيدوا على شكل قبضة حتى عضلات دراعوا تجمعوا وبرزوا أكتر زاد جمع حجبانوا كتر ورجع هز تيليفونوا دخل لوتساب لنمرة نرجس وكتب ليها :
_أنا عندي تلاتة لخوادريات توبة وإسلام وأمينة وما باغيش نزيد الرابعة
رسل لميساج وعض فموا من جنب وعود كتب ميساج أخر بغضب فيه :
_أنا ماشي خوك
ومن بعدوا طفا تيليفونوا ونعس ما عاجبوا حال
شرقات شميسة عليه وهوا شاد طريق راجع من كازا لجديدة ليل كلوا وهوا خدام ما شاف نعاس ما داقوا وليوم هوا نهار لكبير بالنسبة ليه غايتم فيه عقد القران مع بنت قلبوا لي عشقها مني سمع رنة صوتها بدون ما يشوف ملامحها فقط من خلال صوتها لحنين دخلات لقلبوا وسكنات فيه...
وقف سيارة قدام رياض ونزل منها بهدوء ضغط على زر لي في لكونطاك ديال طموبيل وشعلات بضواء بسرعة وطفات...
خلاها وتمشى خاشي إيدوا في جيبوا والأخرى تيمسد بيها عنقوا من التعب ديال لخدمة وطريق...
طلع لبيتوا لي كلوا مفرش بالأسود شكل غرفتوا مريح تيبان هادئ وغامض في نفس لوقت بحال شخصيتوا ؛شعل ضواء خفيف وحط لكونطاك ديال سيارتوا حدا طبلة لي قدام لفوطاي...
ودخل نيشان لدوش حيد لكوستيم لي لابس و حوايجوا كاملين ودخل تحت الرشاشة مخلي لماء نازل على داتوا كاملة كيروي عضلاتوا سدروا المطراسية خدا من جنبوا قرعة فاندوش رجالي بنكهة نعناع المنعش ودوز بيه على داتوا كاملة وحط شامبوا بنكهة نعناع على راصوا كيغسل عادي بملامحوا هادئة حتى جات في بالوا وبتاسم جنب بدون إحساس...
غير تفكرها بديك الكسوة المثيرة لي كتكشف على سدرها من لفوق وسيقانها وفخاضها لعرايانين ولون عينيها البنيتين الأخاد وملمس جسمها ناعم مني كانت بين يديه حس بنار شعلات فيه وشهوة تملكاتوا من لداخل كون كانت قداموا ما غتلفتش من بين يديه عض فموا من لداخل وزير على قبضة إيدوا بتاسم جنب ،و زفر من لداخل بصوت مبحوح نطق :
_كون تعرفي أبنت رحمة أشنوا كديري فيا
ختم كلاموا بتنهيدة طويلة وستغفر الله على هاد شي لي طاح في بالوا بسبابها ؛تشلل وتوضا بالخف باش يصلي لفجر
خرج من دوش لاوي فوطة على خصرو و فوطة صغيرة فعنقو و قطيرات د الما مهودين مع صدرو و شعرو فازگ ونازلين بعض الخصلات على عينيه...
لبس حويج لي مخصصهم لصلاة وفرش صلايا في الأرض نزل صلاة صلاتوا بتخشع ونضبابط فاش تيكون كيصلي وكيتقابل مع لي خلقوا تيخالي العالم والناس كاملين موراه
سلم أو وقف من بلاصتوا مشا نيشان لبلاكار خدا قميجة بيضاء وسروال جينز لبسهم و حط ساعتوا في يدوا تم رش من لبرفان ديالوا وتمشا بخطوات مسرعة لجهة ماكينة القهوة خدا منها كاس قهوة إسبريسوا باش يبقا فيق...
وجلس فتح تيليفونوا ودخل لمواقع ديال بيع أحدث فراش ديال بيت نعاس ختار جوج أنوع من أغلى الأفرشة من 'ناموسية وبلاكار زربية إلخ' ورسلهم بعدما رقمهم وصورهم الإسلام في لوتساب وكتب ليها تحت من صور
_ صباح النور ختاري لي عجبك
وخرج من بيتوا مشا لكوزينة نيشان لعند جداتوا عرفها غتكون فيقا حنت هيا مني كتصلي لفجر كتبقا فيقا دور في لمطبخ قرب منها وقال بصوت هادئ:
_صباح النور الحاجة
طفات لبوطة ودارت لعندوا بوجها لبشوش
ببتسامة ردات عليه:
_ صباح الخير والرباح اولدي لحبيب
أركان قرب منها وتحنى لعند قبل إيدها وقال:
_كيف صبحتي بيخير
الحاجة خديحة:لباس اولدي الحمد لله نعست مزيان
أركان حرك راصوا وقال:بغيت نستاشر معاك في واحد الموضوع
الحاجة درات عندوا مصدومة من كلاموا قالت:
_قول أولدي شنوا كين..
أركان هز كاس ديال لقهوة رتاشف منوا وتقابل معها بجدية قال:
_إسلام يالله باديا مشروعها ديال تنضيم الأعراس'زواج مبارك' وغتحتاج لفلوس "حرك راصوا وكمل كلاموا" ما غتبغيش تاخد من عندي لفلوس داك شي علاش بغيت نعطيها في صْدَاقها 70 مليون وخا هوا مبلغ قليل كون ما كنتش مستتمر باقي لفلوس في لمشروع جديد كنت نعطيها كتر"سرط ريقوا حتى تفاحة آدم تحركات في حلقوا ونطق بتسأل"
_ شنوا بان ليك؟
الحاجة بتسمات ليه من قلبها حتى عينيها دمعوا قربات منوا وقالت:
_هاديك غتولي مرتك أولدي عطيها لي بغيتي ما كينش لاش تشاور معايا
أركان ببتسامة مزينة ملامحوا قال:
_الله يخليك لينا...
الحاجة:فكرتيني غير في جدك حتى هوا كان عارفني نفسي عزيزة ما كتسمحش ليا ناخد من عندوا لفلوس وخا كان راجلي فاش تيبغي يعطيني لفلوس تيقول ليا هاكي هادوا من صداقك ديما تيقول ليا نفس لهضرة
أركان بتاسم جنب وقال:
_الله يخليكم لينا ،أنا غنمشي دابا لبنك نخرج لفلوس وإلى تعطلت عليكم سيروا نتوما حتى نلحق عليكم
الحاجة خديجة: وخا أولدي الله يعونك
فاقت من نعاسها بسباب لمسات أمير على جسمها لي صابح ناشط تيهرر فيها ...بتسمات ليه وجرتوا في حضنها عنقاتوا وباستوا وبدات تهرر فيه وضحك عاجبها الله
إسلام:غناكلك أنا ألحبيب ديالي
أمير تيضحك بجهد حتى كيتقطع ليه نفس:
_هههه خالتي بركااا بركااا ههههه
إسلام طلقاتوا وهزات راصها كتضحك عليه
_اودي على البطال ديالي أنا تيقتلوا غير لهران ونوض سير لحمام غسل سنيناتك وأجي نزلوا نفطروا
أمير سمع لكلامهاو ناض لبس في رجلوا وتوجه لحمام...
تشبرات إسلام وجبدات إيديها مزيان ما سخياش بنعسا هزات تيلفونها تحطوا في شارج وهيا تلمح لمساج لي جاها في لوتساب كمشات حجبانها ودخلات للوتساب..
حلاتوا وهوما يخرجوا عينيها بصدمة و تبهرات من شكل فراش لغرف لي رسل ليها أركان عضات فمها من جنب وما قدرتش تختار بينهم حنت بزوجهم حمقوها...شافت حتى هيا وحسبات حتى لعشرة ولي جا فيها رقم قالتها ليه بعدما كتبت ليه :
_صباح الخير،رقم واحد زوين بزاف
لبسات في رجلها وحطات تيلفونها في شارج ودخلات لحمام بعدما خرج عمر غسلات وجها وسنانها وطرفات حالتها ونزلات شادا من أمير
غير هبطات لدار لتحت حلات فمها بصدمة مني شافت دار عندهم عامرة بناس لحركة كتيرة وكل واحد وشنوا تيدير..
لمحها نور الدين وقرب منها مبتاسم قال:
_مبروك ما درتي الخوادرية
إسلام بتسمات ليه وقالت:
_لعوقبا ليك أخويا نورالدين شكرا بزاف !
نورالدين ما عجبوا حال وهوا عارف انه واحد بحالوا شكون غتقبل بيه وحتى إلى قبلات بيه ما غيوفرش ليها داك شي كامل لي غتحتاج ،حرك لحيتوا من لتحت وقال:
_الله يكمل بالخير
إسلام قربات منوا وقالت:
_شكراا بزاف اخويا عونتيني بزاف في عرس
أمينة ودابا سير كتعون في عرسي ما خديتي حتى ريال دابا راك كتسالني بزاف الله يخليك لينا اخويا كنعتابرك نتا هوا خويا لكبير وخا بينا غير عام في لعمر
نورالدين عينيه دمعوا قلبوا هشيش عكس هاد شكل لي كيبين لناس ،عض فموا من لداخل ورد عليها:
_ما كتساليني ما كنتسالك غير نساي نخليك الخاودرية نمشي نكمل شغلي
عطاها بضهروا وعينيه مدمعين متاثر من كلامها هرب منها بالخف باش متشوفش شكلوا لحزين..
مشات هيا دخلات لكوزينة لقاتها مقربلا عامرة بالعيالات سعاد ومليكة ولمختار لي غير يخرج يشري لي خاص وكتر ويدخل يحط قدامهم فرحان..
غير شافوها لعيلات واقفا حماوها لزغاريت والصلاة والسلام على رسول الله
رحمة بانت ليها إسلام واقفا تشوف هزات راصها فيها وقالت:
_جلسي تفطري أبنتي ومن بعد سيري لحمام نتي ولبنات عوموا بالخف ورجعوا راها نقاشة كتسنا فيكم في سطح
إسلام جلسات وحدها أمير كبات ليه كاس حليب وبتسأل قالت:
_فين هوما لبنات؟!
رحمة: أمينة مشات تشوف راجلها وختك واقفا على شغل في سطح بيديها...
يتبع...
التعليقات
لا توجد تعليقات بعد، كن أول من يعلق.